\id 1TI 1 Timothy in Busa, Ross Jones 3/02
\ide UTF-8
\h 1 TIMƆTI
\toc1 TIMƆTI TAKADA KAAKU
\toc2 1 TIMƆTI
\mt1 TIMƆTI TAKADA KAAKU
\c 1
\s1 Yãdannɛrinↄ gbana laakarii
\p
\v 1 Makũ Pↄlu, Kirisi Yesu zĩ̀rii lákũ Luda ó Surabari kũ Kirisi Yesu kũ ó wɛ́ dↄiio dìtɛmɛnɛ nà, 
\v 2 ma takada dí kɛ̃̀nnɛ Timↄti, ma nɛ́'ina Yesu zɛ́ gũn. De Luda kũ ó Dikiri Kirisi Yesuo gbɛ̃kɛ kɛnnɛ kũ sùruuo à n gba aafiaa.
\p
\v 3 Lákũ ma nakaramma nà gↄrↄ kũ matɛn gɛ́ Masedonia bùsun, ǹ gↄ̃ Ɛfesu ǹ o gbɛ̃kenↄnɛ òsun yã kũ àdi kↄ̃ sɛ́ kũ Luda yãoro dańnɛ doro. 
\v 4 Òsun laakari dↄ gara kũ dizinↄ tↄ́ kↄ̃nↄwɛna kũ à lɛ́ vĩrooa doro. Abire dì su kũ lɛ́kpakↄ̃anaaoomɛ. Àdi tó Luda zĩ kũ àdi bo a náanikɛnaa gũn gɛ́ arɛro. 
\v 5 Ma yã pìi dìtɛ de ògↄ̃ yenyĩ vĩ yãimɛ, yenyĩ kũ àdi bo nɛ̀sɛpura kũ laasunlɛna dokↄ̃nↄo kũ ludanaanikɛna manafikisarioo gũn. 
\v 6 Gbɛ̃kenↄ pã̀ yã pìnↄnɛ ò gɛ̃̀ yã pãpã onan. 
\v 7 Ò ye ògↄ̃ de Musa doka yãdannɛrinↄ ũ, ama ò yã kũ òtɛn o gbázɛ dↄ̃ro ke yã kũ ò zɛ̀anↄ.
\p
\v 8 Ó dↄ̃ kũ doka pì mana, tó gbɛ̃ tɛn zĩ kɛa a zɛ́a. 
\v 9 Ó dↄ̃ dↄ kũ Luda dí doka ditɛ gbɛ̃ mananↄ yãiro, séde dokadarisarinↄnɛ kũ sãgbãnadenↄ kũ ludawɛkɛrisarinↄ kũ durunnakɛrinↄ kũ ludadↄ̃risarinↄ kũ donyĩrisarinↄ kũ de kũ dao dɛ̀rinↄ kũ gbɛ̃dɛrinↄ 
\v 10 kũ zinakɛrinↄ kũ pãpãbɛ̃nɛkɛrinↄ kũ lágilaginↄ kũ ɛ́kɛdenↄ kũ yãdimmarinↄ kũ gbɛ̃ kũ òdi bo yãdannɛna zɛ́de kpɛnↄo ń pínki. 
\v 11 Yãzɛde pì kↄ̃ sì kũ baaru nna gakuride kũ Luda arubarikade a kpanaa nàmɛnɛ ma ↄĩo.
\s1 Lákũ Luda gbɛ̃kɛ kɛ̀ Pↄlunɛ nà
\p
\v 12 Ma Kirisi Yesu ó Dikiri kũ à ma gba gbãna sáabu kɛ̀, zaakũ à ma náani kɛ̀ à ma sɛ mà zĩ kɛarɛ. 
\v 13 Ma a tↄ́ bɛ̃̀nɛɛ sì yã, ma wɛ́ tã̀ a gbɛ̃nↄa, ma gbãna mↄ̀ńnɛ. Bee kũ abireo à sùruu kɛ̀ kũmao, zaakũ ma kɛ̀ wɛ́sirakɛnaa gũmmɛ kũ a náanikɛnasario. 
\v 14 Akũ ó Dikiri gbɛ̃kɛ zↄ̃kↄ̃ↄ kɛ̀mɛnɛ, à tò ma a náani kɛ̀, akũ má yenyĩ kũ à de ó pↄ́ ũ kunna Kirisi Yesu gũn vĩ. 
\v 15 Yã díkĩna bi yãpuramɛ, à kũ̀ ò sí ↄplapla. Kirisi Yesu sù andunia gũn durunnakɛrinↄ surabana yãi. Makũ, ma durunna mɛ́ à de dakenↄ pↄ́la, 
\v 16 akũ Luda ma wɛ̃nda gwà, de mɛna zↄ̃kↄ̃ kũ Kirisi Yesu kɛ̀ kũ makũ durunnakɛri kàsaraao bo gupuraa, de àgↄ̃ de sèeda ũ gbɛ̃ kũ oni a náani kɛ ò wɛ̃̀ndi kũ àdi lákaro lenↄnɛ. 
\v 17 Luda mɛ̀n do légelege, gↄrↄ sĩnda pínki Kína kũ àdi garo akũsↄ̃ òdi a e kũ wɛ́oro gↄ̃ bɛ̀ɛrɛ vĩ kũ gakurio gↄrↄ sĩnda pínki, aami.
\p
\v 18 Ma nɛ́ Timↄti, lákũ ò gĩnakɛ ò annabikɛyã ò n yã musu nà, matɛn yã pì dannɛ, de ǹgↄ̃ kũna ǹ zĩ̀ mana káo 
\v 19 ludanaanikɛnaa gũn kũ laakariio kpátɛna. Gbɛ̃kenↄ yã pìnↄ kpà sãkoto, akũ ń ludanaanikɛnaa dì lɛ́ kútɛ. 
\v 20 Imɛnɛu kũ Alɛsandao kú ń tɛ́. Ma ń kpá Setanwa, de ògↄ̃ dↄ̃ kũ òdi dↄkɛ kũ Ludaoro.
\c 2
\s1 Donyĩkɛnaa
\p
\v 1 Káaku gĩa ma lɛ́ dàmma, à adua kɛ gbɛ̃ sĩnda pínkinɛ à zɛ́ gbɛkańnɛ, à kútɛ kɛ Ludanɛ ń yãi kũ sáabukpanaao. 
\v 2 À adua kɛ kínanↄnɛ kũ gbãnadenↄ ń pínki, de ò le ògↄ̃ kun aafia yãkete sari ludayãmarinↄ ũ, ó kunna gↄ̃ bɛ̀ɛrɛ vĩ. 
\v 3 Abirekũ mɛ́ à mana, àdi ká Luda ó Surabarin. 
\v 4 À ye gbɛ̃ sĩnda pínki surabana le ògↄ̃ yãpura dↄ̃.
\q1
\v 5 Zaakũ Luda mɛ̀n domɛ,
\q1 akũsↄ̃ yãkɛkɛri kun mɛ̀n do
\q1 Luda kũ bisãsirinↄ dagura,
\q1 àkũmɛ bisãsiri Kirisi Yesu ũ.
\q1
\v 6 À a zĩda kpà à gbɛ̃ sĩnda pínki bò,
\q1 akũ ò a sèedaa kɛ̀ a gↄrↄa.
\m
\v 7 Abire yãi Luda ma ditɛ a kpàkpakɛri kũ a zĩ̀riio ũ, de mà a donyĩ zɛ́ yãpurade da buri pãndenↄnɛ. Yãpuran matɛn o, adi kɛ ɛ́kɛnlo.
\p
\v 8 Má ye gↄ̃gbɛ̃nↄ adua kɛ gu sĩnda pínkia, ò ↄ sɛ́ musu gbãsĩ sari, pↄfɛ̃ kũ lɛ́kpakↄ̃anaao sari. 
\v 9 Má ye dↄ nↄgbɛ̃nↄ ń zĩda kɛkɛ a zɛ́a yↄ̃̀gↄ̃kɛnaa sari, zĩdamↄnnɛnaa baasi. Adi kɛ kũ mì yↄ̃̀gↄ̃de tãnaao ke wura kũ òso nↄmanablebↄnↄ ke biza ↄgↄdenↄonlo. 
\v 10 Ò ń zĩda kɛkɛ kũ yãmanakɛnaao lákũ à kũ̀ nↄgbɛ̃ donyĩrinↄ kɛ nà. 
\v 11 Nↄgbɛ̃nↄ yã dada yĩtɛna, ò mì natɛ yã sĩnda pínki gũn. 
\v 12 Madì we nↄgbɛ̃nↄ yã dada gↄ̃gbɛ̃nↄnɛ ke ògↄ̃ iko vĩḿmaro, séde ògↄ̃ yĩtɛna kítikiti. 
\v 13 Zaakũ Adamun Luda kɛ̀ káaku, a gbɛra Awau. 
\v 14 Adi kɛ Adamun ò sã̀tɛro, nↄgbɛ̃n ò sã̀tɛ à gↄ̃̀ taaride ũ. 
\v 15 Ama tó nↄgbɛ̃nↄ mɛna fↄ̃̀ kũ ludanaanikɛnaao kũ yenyĩo kũ kúadonaao zĩdamↄnnɛnaa baasi, oni nɛ́ i aafia.
\c 3
\s1 Sↄsi gbɛ̃ zↄ̃kↄ̃nↄ
\p
\v 1 Yã díkĩna bi yãpuramɛ: Tó gbɛ̃ ye à kɛ gbɛ̃ zↄ̃kↄ̃ ũ, àtɛn zĩ mana ni dɛ. 
\v 2 Gbɛ̃ zↄ̃kↄ̃ gↄ̃ kun taari sari, nↄmɛndode ũ, laakaride ũ. Àgↄ̃ a zĩda kũna dↄ̃ gbɛ̃ fayade ũ, nibↄkũri ũ, gbɛ̃ kũ ani fↄ̃ à yã dańnɛ ũ. 
\v 3 Àsungↄ̃ de wɛ̃dɛri ke gbɛ̃ pãsĩ ũro. Àgↄ̃ de nɛ̀sɛdode yãketesaride ũ. Ɔgↄ sún donɛ arɛro. 
\v 4 Àgↄ̃ a ↄn kũna dↄ̃, a nɛ́nↄ gↄ̃ mì natɛnɛ ògↄ̃ a ↄdↄki gwa. 
\v 5 Zaakũ tó gbɛ̃ a ↄn kũna dↄ̃ro, ani kɛ dera à fↄ̃ à Luda sↄsi gbɛ̃nↄ gwaa? 
\v 6 Àsungↄ̃ de Yesude dufu ũro, de àsun ĩa dã à a zĩda da yãn lán Ibilisi bàro yãi. 
\v 7 Àgↄ̃ tↄ́ nna vĩ Yesusaridenↄ kĩnaa dↄ, de òsun a tↄ́ ĩni sí, à zu Ibilisi tankutɛnlo yãi.
\s1 Sↄsi kpanyĩrinↄ
\p
\v 8 Lɛmɛ dↄ kpanyĩrinↄ gↄ̃ de gbɛ̃ bɛ̀ɛrɛdenↄ ũ. Òsungↄ̃ de lɛ́pladenↄ ũro. Wɛ̃ yã sún dońnɛ arɛro. Òsungↄ̃ de ↄgↄ vãni wɛtɛrinↄ ũro. 
\v 9 Ògↄ̃ Yesu yã asirinↄ kũna kũ nɛ̀sɛpurao. 
\v 10 Ò ń yã gwa gĩa, tó ódi yãke leḿmaro, gbasa ò ń ditɛ kpanyĩrinↄ ũ. 
\v 11 Lɛmɛ dↄ ń nↄnↄ gↄ̃ de nↄgbɛ̃ bɛ̀ɛrɛdenↄ ũ, laakaridenↄ ũ, ògↄ̃ náani vĩ yã sĩnda pínki gũn. Òsungↄ̃ de kↄrↄmↄtↄdenↄ ũro. 
\v 12 Kpanyĩri gↄ̃ de nↄmɛndode ũ, àgↄ̃ a ↄn kũ a nɛ́nↄ kũna dↄ̃. 
\v 13 Gbɛ̃ kũ ò ń zĩ kɛ̀ a zɛ́anↄ gwena nigↄ̃ mana, ń laakari nigↄ̃ kpatɛna ń Kirisi Yesu náanikɛnaa gũn manamana.
\s1 Ó donyĩzɛ asiri zↄ̃kↄ̃
\p
\v 14 Bee kũ matɛn yã dínↄ onnɛ, ma dìtɛ mani su n gwa saa. 
\v 15 Tó ma suna sù à gìi kɛ̀, má ye ǹgↄ̃ dↄ̃ lákũ à kũ̀ ògↄ̃ kun Luda ↄndenↄ ũ nà. Ɔnde pìnↄmɛ Luda Wɛ̃̀ndide sↄsi ũ, yãpura pɛ́tɛki ũ kũ a gbãnalekio. 
\v 16 Ó donyĩzɛ asiri kũ à bò gupuraa zↄ̃kↄ̃ yãpuramɛ:
\q1 À bò à sù bisãsiri ũ,
\q1 Luda Nini yãpura kpàa,
\q1 malaikanↄ a è.
\q1 Ò a yã waazi kɛ̀ burinↄ tɛ́,
\q1 ò a náani kɛ̀ andunia gũn,
\q1 Luda a sɛ̀ à tà kãao gakuri gũn.
\c 4
\s1 Tɛ̃̀ yãnↄ
\p
\v 1 Luda Nini ò swáswa kũ gↄrↄ kpɛde gbɛ̃kenↄ ni pã kpá Yesu zɛ́i, ò tɛ́ yã kũ tãnanↄ dì ɛ́kɛdenↄ da a onanyĩ ò ń sãtɛ. 
\v 2 Manafikide pìnↄ a mana dↄ̃kↄ̃nɛ kũ a vãnioro, ń nɛ̀sɛ gana lákũ ò pi gɛ̃ wãnan ò kɛ̃̀o bà. 
\v 3 Òdi gbɛ̃nↄ dãdã nↄsɛnaai kũ zãkɛnaao, akũsↄ̃ òdi pↄ́ble tɛ̃̀bona ditɛ gbɛ̃nↄnɛ, pↄ́ble kũ Luda kɛ̀ a náanikɛri kũ ò yãpura dↄ̃nↄ yãi, kũ à de ò ble kũ sáabukpanaao. 
\v 4 Pↄ́ kũ Luda kɛ̀ sĩnda pínki manamɛ. Òsun a ke tɛ̃̀ boro, ò ble kũ sáabukpanaao, 
\v 5 zaakũ Luda yã kũ ó aduakɛnaao gbãsĩ bòn.
\s1 Kirisi Yesu zĩkɛri mana
\p
\v 6 Tó n yã pìnↄ dà n gbɛ̃nↄnɛ, ĩnigↄ̃ de Kirisi Yesu zĩkɛri mana ũ kũ ò gwà kũ ó donyĩzɛ yãnↄ kũ yãdannɛ mana kũ ń tɛ́iio. 
\v 7 Ǹ mì kɛ̃ futɛokaragara kũ àdi kↄ̃ sí kũ Luda yãoroa. Ǹ n zĩda tùtu kɛ de ǹgↄ̃ de ludayãmari ũ. 
\v 8 Mɛ̀tutukɛnaa àre vĩ fíti, ama dena ludayãmari ũ àre vĩ yã sĩnda pínki gũn, zaakũ abire dì su kũ wɛ̃̀ndiio gbãra kũ ziao. 
\v 9 Yã díkĩna bi yãpuramɛ, à kà ò sí ↄplapla. 
\v 10 Òdi zĩ kɛ òdi ↄsi ká a musu, zaakũ ó wɛ́ dↄ Luda Wɛ̃̀ndidei. Àkũmɛ gbɛ̃ sĩnda pínki Surabari ũ, atɛ̃nsa a náanikɛrinↄ.
\p
\v 11 Ǹ yã pìnↄ ditɛńnɛ ǹ dadańnɛ. 
\v 12 Ǹsun tó ò n kɛfɛnnakɛna gya boro. Ǹ tó n kunna zɛ́ mↄ Yesu náanikɛrinↄnɛ yã'onaa gũn kũ yãkɛnaao kũ yenyĩo kũ ludanaanikɛnaao kũ kunna gbãsĩ sario. 
\v 13 Ari màgↄ̃ su ǹ wɛ́ tã ǹ Luda yã kyó kɛ gbɛ̃nↄnɛ, ǹ dańnɛ ǹ lɛ́ daoḿma. 
\v 14 Gba kũ Luda dànnɛ gↄrↄ kũ ò annabikɛyã ò n yã musu, akũsↄ̃ gbɛ̃ zↄ̃kↄ̃nↄ ↄ nànamma, ǹsun pã kpáiro. 
\v 15 Ǹ laakari dↄ yã pìnↄa ǹ mɛ̀ kpáa, de gbɛ̃ sĩnda pínki n gɛna arɛ e. 
\v 16 Ǹ n zĩda yã kũ n yãdannɛnaaoo tàasi ká. Ǹgↄ̃ gɛ́ arɛ kũ yã pìnↄ. Tó n kɛ̀ lɛ, ĩni n zĩda sura ba kũ gbɛ̃ kũ òtɛn sã kpá n yãinↄomɛ.
\c 5
\s1 Gyaanↄnↄ kũ don'arɛdenↄ yã
\p
\v 1 Ǹsun kpãkɛ̃ mare zↄ̃kↄ̃ↄiro. Ǹ lɛ́ daa lán n de bà. Ǹ lɛ́ da kɛfɛnnanↄa lán n vĩ̀ni kũ n dakũnanↄ bà. 
\v 2 Ǹ lɛ́ da nↄgbɛ̃ zↄ̃kↄ̃ↄa lán n da bà, ǹ lɛ́ da nↄ gbãnaa lán n dãre bà kũ nɛ̀sɛpurao.
\p
\v 3 Ǹ kpá gyaanↄ kũ ò gbɛ̃ke vĩronↄi. 
\v 4 Tó gyaanↄ nɛ́nↄ vĩ ke daikorenↄ, ò ń danɛnↄ gwanaa dada gĩa ń donyĩkɛnaa gũn, ò fĩna bo ń denↄnɛ kũ ń danↄ, zaakũ abirekũ dì ká Ludagu. 
\v 5 Gyaanↄ kũ à gbɛ̃ke vĩro wɛ́ dↄ Ludai, àgↄ̃ adua kɛ àgↄ̃ kpányĩ gbɛkaa gwãani kũ fãnantɛ̃o. 
\v 6 Gyaanↄ kũ a zĩda pↄyeinaa dì donɛ arɛ bi gɛ̀ɛmɛ, bee tó à bɛ̃nɛ. 
\v 7 Ǹ yã pìnↄ dańnɛ de gbɛ̃ke sún ń taari ero. 
\v 8 Tó gbɛ̃ tɛni a danɛnↄ gwaro, atɛ̃nsa a ↄndenↄ, à bò Luda yã kpɛmɛ, Yesusaride deala. 
\v 9 Nↄgbɛ̃ kũ à de ò da gyaanↄnↄ tɛ́n di: Nↄgbɛ̃ kũ à kà wɛ̃̀ baaakↄ̃, akũsↄ̃ à zã kɛ̀ gɛ̃̀n do, 
\v 10 ò a dↄ̃ yãmanakɛri ũ, nɛ́gwari mana ũ, nibↄkũri Luda gbɛ̃nↄ gbá pìpiri ũ, takaside kpanyĩri ũ, nↄgbɛ̃ kũ à mɛ̀ɛ kpà yãmanakɛna pínkia ũ. 
\v 11 Ǹsun gyaanↄ nↄ gbãnanↄ danlo, zaakũ tó ń gↄ̃ nidɛnaa fùtɛ, ń nana Kirisia ni busamɛ, onigↄ̃ ye ò zã kɛ, 
\v 12 ò ń zĩda da yãn, kũ ò lɛ́ kũ ò sɛ̀nɛ yã gbòro yãi. 
\v 13 Abire gbɛra òdi ma'ã dada, òdigↄ̃ gɛ̃gɛ̃ ↄn kũ ↄnnwo. Adi kɛ ma'ãdenↄmɛ ń ũ adoro, òdi gↄ̃ gbɛ̃piri gudɛrinↄ ũmɛ dↄ, òdi yã kũ à de ò oro o. 
\v 14 Abire yãi má ye gyaanↄ nↄ gbãnanↄ zã kɛ, ò nɛ́ i ò laakari dↄ bɛa, de òsun ó ibɛrɛnↄ gba zɛ́ ò ó tↄ́ vãni síro yãi. 
\v 15 Ń gbɛ̃kenↄ bò ò tɛ̀ Setanyĩ kↄ̀. 
\v 16 Tó Yesude nↄgbɛ̃ ke gyaanↄnↄ vĩ a bɛa, àgↄ̃ kpáńyĩ. Àsun tó ò gↄ̃ sↄsinɛ aso ũro, de ò le ò kpá gyaanↄ kũ ò gbɛ̃ke vĩronↄi yãi.
\p
\v 17 Gbɛ̃ zↄ̃kↄ̃ kũ àdi dońnɛ arɛ a zɛ́aa kà ò fĩna bonɛ lɛu pla, atɛ̃nsa gbɛ̃ kũ à waazikɛna kũ yãdannɛnaao kokari vĩ. 
\v 18 Luda yã pì: Àsun lɛ́sↄ da zù kũ àtɛn pↄ́ gbɛ̃nɛro. À pì dↄ: Zĩkɛrii kà à a làada le. 
\v 19 Ǹsun gbɛ̃ kũ à sù kũ gbɛ̃ zↄ̃kↄ̃ káarao yã síro, séto sèedadenↄ kà gbɛ̃nↄn pla ke aakↄ̃ baasiro. 
\v 20 Ǹ kpãkɛ̃ gbɛ̃ kũ ò durunna kɛ̀nↄi gbɛ̃ sĩnda pínki wára, de vĩna le à gbɛ̃ kparanↄ kũ. 
\v 21 Ma nannɛ Luda kũ Kirisi Yesuooi kũ malaika kũ à ń sɛ́nↄ, ǹgↄ̃ yã pìnↄ kũna, ǹsun gbɛ̃ke tɛ̃̀ boro. Ǹsun yãke kɛ gbɛ̃kenɛ úblembɛ yãiro. 
\v 22 Ǹsun wã ǹ ↄ na gbɛ̃a ǹ a da Luda zĩnlo. Ǹsun tó n ↄ gↄ̃ kú gbɛ̃ke durunna gũnlo. Ǹgↄ̃ n zĩda kũna gbãsĩ sari. 
\v 23 Ǹsun í pã mi atɛ̃nɛro. Ǹgↄ̃ sèwɛ̃ gá fíti n nɛ̀sɛ yãi kũ n gyãkɛna gɛ̃̀n baaakↄ̃o.
\p
\v 24 Gbɛ̃kenↄ durunna dì bo gupuraa ari ògↄ̃ gɛ́ a yã gↄ̃gↄ̃ kũńwo, gbɛ̃kenↄ sↄ̃ ń pↄ́ dì bo likalikaro. 
\v 25 Lɛmɛ dↄ yãmanakɛnaa dì bo gupuraa, bee a kũ odi ero ni le à gↄ̃ utɛnaro.
\c 6
\p
\v 1 Gbɛ̃ kũ ò de zↄ̀ ũnↄ ń dikirinↄ ditɛ gbɛ̃ bɛ̀ɛrɛdenↄ ũ ò mì natɛńnɛ a sĩnda pínki gũn, de òsun Luda tↄ́ kũ yã kũ odì dańnɛo vãni boro yãi. 
\v 2 Gbɛ̃ kũ ń dikirinↄ de Yesu náanikɛri ũnↄ sún dↄkɛ kũńwo kũ ò de kↄ̃ gbɛ̃nↄ ũ yãiro. Ò zↄ̀ bleńnɛ manamana, zaakũ gbɛ̃ kũ òtɛni ń zĩ àre blenↄ bi Yesu náanikɛrinↄmɛ, ń gbɛ̃ yenyĩdenↄmɛ. Ǹ yã pìnↄ dańnɛ, ǹ lɛ́ daoḿma.
\s1 Yena ↄgↄi
\p
\v 3 Tó gbɛ̃ke tɛn yã pãnde dańnɛ, akũsↄ̃ adi zɛ kũ ó Dikiri Yesu Kirisi yãzɛdeo kũ ó zɛ́ yãdannɛnaaoro, 
\v 4 ĩadãriimɛ, à yãke dↄ̃ro, lɛ́kpakↄ̃ana kori kũ yãgwana lakanasario a kũ̀ gyã ũ. Yã birenↄ dì tó gbɛ̃nↄ nɛ̀sɛgↄ̃ba kpá, ò fìti kɛ, ò kↄ̃ sↄ̃sↄ̃, ò laasun vãni lɛ́ kũ kↄ̃o, 
\v 5 ògↄ̃ ĩni kũ kↄ̃o. Gbɛ̃ pìnↄ laasun kotina, yãpura ń kɛ̃, òdigↄ̃ da donyĩkɛna bi ↄgↄwɛtɛzɛmɛ. 
\v 6 Donyĩkɛnaa àre zↄ̃kↄ̃ yãpura, tó gbɛ̃ zɛ̀ kũ pↄ́ kũ à vĩo. 
\v 7 Zaakũ ódi su kũ pↄ́keo andunia gũn laro, óni tá kũ pↄ́keo sↄ̃ro. 
\v 8 Tó ó pↄ́ble kũ pↄ́kasanↄo vĩ, abirekũ mↄ̀ lɛ. 
\v 9 Gbɛ̃ kũ ò ye ò gↄ̃ aruzɛkɛde ũnↄ dì ń zĩda da yↄ̃ogwana tankutɛn. Pↄ́nidɛna mìsari karii dì gɛ̃ńgu à ń kpá kisira kũ kakatɛnaaooi. 
\v 10 Yena ↄgↄi mɛ́ à de yã vãni sĩnda pínki zĩni ũ. Gbɛ̃kenↄ a kↄ̃dɛ kɛ̀ ari ò kɛ̃̀ ó donyĩzɛa ò wãwã zↄ̃kↄ̃ↄ kpà ń zĩdai.
\s1 Ǹ ↄsi mana ká
\p
\v 11 Zaakũ Luda gbɛ̃mɛ n ũ, ǹ bàa sí yã pìnↄnɛ, ǹ tó yã mana gↄ̃ donnɛ arɛ kũ yãkɛna a zɛ́aao kũ ludanaanikɛnaao kũ yenyĩo kũ mɛnao kũ busɛkɛnaao. 
\v 12 Ǹ ó donyĩzɛ ↄsi mana ká, ǹ wɛ̃̀ndi kũ àdi lákaro sí, zaakũ abirekũn Luda n sisia gↄrↄ kũ n lɛ́ mana sɛ̀nɛ pari wára. 
\v 13 Ma nannɛ Luda kũ àdi wɛ̃̀ndi kpá pↄ́ sĩnda pínkiaai kũ Kirisi Yesu kũ à yã mana ò Pↄntiu Pilatinɛɛo, 
\v 14 ǹgↄ̃ yã kũ ò dìtɛnnɛ kũna gbãsĩ sari taari sari ari ó Dikiri Yesu Kirisi sugↄrↄ zĩ. 
\v 15 Gbãnade mɛ̀n do Arubarikade, kínanↄ Kína, dikirinↄ Dikiri mɛ́ ani Kirisi pì bo gupuraa a gↄrↄa. 
\v 16 Àkũ mɛ́ àdi garo ado, àdigↄ̃ kú gupura kũ òdi fↄ̃ ò nairo gũn. Gbɛ̃ke dí wɛ́ sialɛro, oni fↄ̃ sero. Àkũ mɛ́ à gakuri kũ gbãnao vĩ gↄrↄ sĩnda pínki, aami.
\p
\v 17 Ǹ o andunia tera díkĩna aruzɛkɛdenↄnɛ, òsun ĩa dãro. Òsun gbãna le ↄgↄda náanisariaro, ò gbãna le Luda kũ àdi pↄ́ sĩnda pínki kpáwá zↄ̃kↄ̃ ò pↄnna kɛooa. 
\v 18 Ǹ ońnɛ ò a mana kɛ, ò nna kɛńnɛ, ò ↄ porońnɛ, ògↄ̃ gbɛ̃kɛ vĩ. 
\v 19 Lán abirekũ bà oni zàna mana di ń zĩdanɛ aruzenna pↄ́ ũ, oni wɛ̃̀ndi kũ à de wɛ̃̀ndi ũ yãpura le.
\p
\v 20 Timↄti, ǹ yã kũ Luda nànnɛ n ↄĩ kũ gbãna. Ǹ mì kɛ̃ ludayãdanasari yã pãpã onaaa kũ yãlɛkpɛrɛ'ona kũ òdi pi dↄ̃naao. 
\v 21 Gbɛ̃kenↄ zɛ̀o, akũ ò pã̀ ó donyĩzɛnɛ.
\p Luda gbɛ̃kɛ kɛárɛ.