\id 1TH 1 Thessalonians in Busa, Ross Jones 3/02
\ide UTF-8
\h 1 TƐSALONIKADENƆ
\toc1 TƐSALONIKADENƆ TAKADA KAAKU
\toc2 1 TƐSALONIKADENƆ
\mt1 TƐSALONIKADENƆ TAKADA KAAKU
\c 1
\s1 Tɛsalonikadenↄ zɛ́mↄnnɛnaa
\p
\v 1 Makũ Pↄlu kũ Silasio kũ Timↄtio, ókↄ̃nↄ mɛ́ o takada díkĩna kɛ̃̀ Tɛsalonika sↄsi gbɛ̃ kũ ò kú De Luda kũ Dikiri Yesu Kirisio gũnnↄnɛ. Luda gbɛ̃kɛ kɛárɛ, à á gba aafiaa. 
\v 2 Ó aduakɛnaa gũn á yã dìgↄ̃ dↄógu gↄrↄ sĩnda pínki, odìgↄ̃ Luda sáabu kpá á pínki yã musu. 
\v 3 Lákũ átɛn zĩ kɛ á ludanaanikɛnaaa nà, átɛn kokari kɛ yenyĩ gũn, akũsↄ̃ átɛn mɛna kɛ wɛ́dↄna ó Dikiri Yesu Kirisii yãi, yã pìnↄ dìgↄ̃ dↄógu Luda ó De arɛ. 
\v 4 Ó gbɛ̃ Luda yenyĩdenↄ, ó dↄ̃ kũ Luda á sɛ́, 
\v 5 zaakũ kũ o baaru nna kpàárɛ, ódi su kũ yã'onaao adoro, o su kũ Luda Nini gbãnaomɛ, yã pì ó kũna gbãna manamana. Á dↄ̃ lákũ ó kú á tɛ́ nà á aafia yãi, 
\v 6 akũ a gↄ̃ ókↄ̃nↄ kũ Dikirio dàdarinↄ ũ. Wari zↄ̃kↄ̃ↄ gũn a yã pìi sì kũ pↄnna kũ Luda Nini dàáguo, 
\v 7 akũ a zɛ́ mↄ̀ Yesude kũ ò kú Masedonia bùsu gũnnↄnɛ kũ Girisi bùsuuo pínki. 
\v 8 Dikiri yã bò á kĩnaa, adi zɛ Masedonia kũ Girisio adoro, á Yesu náanikɛna yã dàgula pínki, à baarukpana vĩ doro. 
\v 9 Òtɛn o lákũ o zɛ́ lè á kĩnaa nà, lákũ a kpɛ lì tãnanↄnɛ, a arɛ dↄ̀ Ludaa nà, akũ átɛn do Luda Wɛ̃̀ndide Yãpuradei, 
\v 10 átɛni a Nɛ́ Yesu kũ à a fùtɛ bona gan dã ari à bo ludambɛ, à su ó sí pↄfɛ̃ kũ Luda ni kipaḿmaa.
\c 2
\s1 Pↄlu zĩkɛna Tɛsalonika
\p
\v 1 Ma gbɛ̃nↄ, á dↄ̃ kũ á zĩdao, kũ ó zɛ́ lena á kĩnaa dí kɛ pãro. 
\v 2 Á dↄ̃ lákũ ò wɛ́ tã̀wá nà, o wari kɛ̀ káaku zaa Filipi, akũ Luda ó gbá swɛ̃̀ɛ, o a baaru nna kpàárɛ kokari kũ kokario. 
\v 3 Ó nakaranaáwa de ɛ́kɛ zɛ́ yã ũro. Ódi kɛ laasun vãni ke á takikɛna yãinlo. 
\v 4 Lákũ Luda ó ká a baaru nna kpanaaa nà, lɛn odì kpáńnɛ lɛ, adi kɛ bisãsiri pↄyeinan ótɛn wɛtɛro, sé Luda ó laasun tàasikɛri pↄ́. 
\v 5 Á dↄ̃ kũ ódi yã nnanna o gbɛ̃kenɛro, akũsↄ̃ ódi yãke kɛ kũ manafikio wãkũ yãiro. Ludan ó sèedade ũ. 
\v 6 Ódi sáabu wɛtɛ bisãsiri kĩnaaro, ákↄ̃nↄ ke gbɛ̃ pãndenↄ. 
\v 7 Bee kũ ó a zɛ́ vĩ ò gↄ̃árɛ aso ũ ó Kirisi zĩ̀rikɛna yãi, o kɛ̀ kãáo busɛbusɛ, lákũ nↄgbɛ̃ nɛ́rande dì laakari dↄ a nɛ́a nà. 
\v 8 Kũ ó yeái manamana yãi, ódi zɛo ò baaru nna kũ à bò Luda kĩnaa kpáárɛ adoro, kũ ó zĩda kpááwanaaomɛ dↄ, zaakũ a gↄ̃ ó gbɛ̃ yenyĩdenↄ ũ. 
\v 9 Ma gbɛ̃nↄ, à tó ó zĩkɛna kũ wario yã dↄágu. Gↄrↄ kũ ótɛn baaru nna kũ à bò Luda kĩnaa pì kpáárɛ, odìgↄ̃ zĩ kɛ fãnantɛ̃ kũ gwãanio, de òsun gↄ̃ á gbɛ̃kenɛ aso ũro yãi. 
\v 10 Ákↄ̃nↄmɛ ó sèedadenↄ ũ, kũ Ludao dↄ, kũ ó kú ákↄ̃nↄ kũ a Yesu náani kɛ̀nↄ tɛ́ a zɛ́a nɛ̀sɛpuradenↄ ũ taari sari. 
\v 11 Á dↄ̃ kũ o yã kɛ̀ á baadinɛ lákũ de dì kɛ a nɛ́nↄnɛ nà. 
\v 12 O lɛ́ dàáwa, o á nɛ̀sɛɛ kpàtɛárɛ, o nakaraáwa, de á kunna kɛ lɛɛlɛ kũ gbɛ̃ kũ Luda ń ká kpata gakuride kũ à bò a kĩnaannↄo.
\p
\v 13 Kũ a Luda yã kũ o òárɛ pìi mà, ádi ditɛ bisãsiri pↄ́ ũro, a sì lákũ à de nà, Luda yã yãpura ũ. Àkũ mɛ́ àtɛn zĩ kɛ ákↄ̃nↄ kũ átɛni a náani kɛnↄ gũn. Abire yãi dↄ odìgↄ̃ Luda sáabu kpá lakanaa sari. 
\v 14 Ó gbɛ̃nↄ, á yã kɛ̀ lɛɛlɛ kũ Luda gbɛ̃ kũ ò kú Kirisi Yesu gũn zaa Yudeanↄo, zaakũ á bùsudenↄ wɛ́ tã̀áwa se lákũ Yudanↄ tã̀ḿma nà. 
\v 15 Yudanↄ Dikiri Yesu dɛ̀ kũ annabinↄ dↄ, akũsↄ̃ ò pɛ̀wá. Ń yã dì ká Luda guro, ò ibɛrɛɛ sɛ̀ kũ gbɛ̃ sĩnda pínkio. 
\v 16 Òdi kpáwɛrɛ ò yã kũ Luda dì gbɛ̃ sura bao o buri pãndenↄnɛ. Lɛn durunna kũ òdigↄ̃ kɛ gↄrↄ sĩnda pínki dìgↄ̃ didikↄ̃a lɛ. Luda pↄfɛ̃ kìpa ń musu sà.
\s1 Timↄti zĩna Tɛsalonika
\p
\v 17 Ó gbɛ̃nↄ, kũ o kɛ̃kↄ̃a gↄrↄ pla, wɛ́ mɛ́ adi kↄ̃ ero, ama ó laasun kúáwa. O á bɛgɛ kɛ̀ manamana, o mɛ̀ɛ wã̀ kũ ò wɛ́ sikↄ̃lɛ. 
\v 18 Ó ye ò su á gwa dↄ. Makũ Pↄlu ma suna zɛ́ wɛ̀tɛ à de gɛ̃̀n do ke gɛ̃̀n plala, akũ Setan kpàwɛrɛ. 
\v 19 Tó ó Dikiri Yesu sù, dí mɛ́ anigↄ̃ de ó tãmaa kũ ó pↄnnao kũ ó gã̀zubↄↄo ũ a arɛ á baasii? 
\v 20 Zaakũ ákↄ̃nↄmɛ ó gakuri kũ ó pↄnnao ũ.
\c 3
\p
\v 1 Kũ ódi fↄ̃ ò mɛna doro, o zɛo ò gↄ̃ Atɛni ó tɛ̃nɛ, 
\v 2 o ó gbɛ̃ndo Timↄti, Luda zĩkɛri dake Kirisi baarunnakpanaa gũn zĩ̀áwa, de à á gba gbãna à á nɛ̀sɛ kpátɛárɛ á ludanaanikɛnaa gũn, 
\v 3 de á gbɛ̃ke laakari sún futɛ wɛ́tãmmanaa pì yãiro. Á dↄ̃ kũ á zĩdao kũ Luda abire taka dìtɛwɛrɛ. 
\v 4 Gↄrↄ kũ ó kú á kĩnaa, o gĩnakɛ o òárɛ kũ oni wɛ́ tãwá, akũ à kɛ̀ lɛ lákũ á dↄ̃ nà. 
\v 5 Abire yãi kũ mani fↄ̃ mà mɛna doro, ma a zĩ̀ à á ludanaanikɛna gwa. Ke Ibilisi á yↄ̃ à á gwá, ó zĩ kɛ̀ pãn yá, ó dↄ̃ro.
\p
\v 6 Kũ Timↄti sù sà, à á ludanaanikɛna kũ á yenyĩo baaruu kpàwɛrɛ. À pì ó yã dìgↄ̃ dↄágu kũ laasun manao, akũsↄ̃ átɛni ó bɛgɛ kɛ lákũ ótɛni á bɛgɛ kɛ nà. 
\v 7 Ma gbɛ̃nↄ, á ludanaanikɛna yã mɛ́ à tò ó laakari kpatɛna á yã musu ó wɛ́tãmmana kũ ó wario gũn pínki. 
\v 8 Zaakũ á zɛna gíngin Dikiri gũn, tera o ĩam pà sà. 
\v 9 Óni fↄ̃ ò Luda sáabu kpá á yã musu. O ó Luda sáabu kpà manamana kũ pↄnna zↄ̃kↄ̃ kũ odì kɛ a arɛ á yãiio. 
\v 10 Gwãani kũ fãnantɛ̃o odìgↄ̃ wɛ́ kɛ manamana, de ò le ò wɛ́ sikↄ̃lɛ, ò pↄ́ kũ à kĩ̀a á ludanaanikɛnaa gũn papaárɛ.
\p
\v 11 Luda ó De kũ ó Dikiri Yesuo zɛ́ porowɛrɛ ò su ò á gwa. 
\v 12 Dikiri yenyĩ kũ á vĩ kũ kↄ̃o kũ gbɛ̃ sĩnda pínkio karaárɛ, à dadaála lán yenyĩ kũ ó vĩ kãáo bà, 
\v 13 à á swɛ̃̀ gba gbãna de àgↄ̃ kun gbãsĩ sari taarisaridenↄ ũ Luda ó De arɛ ó Dikiri Yesu kũ a gbɛ̃nↄ pínki sugↄrↄa.
\c 4
\s1 Kunna lákũ Luda yei nà
\p
\v 1 Yã kũ à gↄ̃̀n dí, ma gbɛ̃nↄ, a mà ó kĩnaa lákũ à mana á kunna ká Ludagu nà. Á kunna de lɛ kↄ̀, ama ótɛn wɛ́ kɛáwa, ótɛn kútɛ kɛárɛ ó Dikiri Yesu gũn, àgↄ̃ kun lɛ àgↄ̃ gɛ́o. 
\v 2 Á yã kũ o dàárɛ kũ Dikiri Yesu tↄ́o dↄ̃. 
\v 3 Luda ye á kunna gↄ̃ adona, à mì kɛ̃ pãpãkɛnaaa. 
\v 4 Á baadi gↄ̃ a zĩda kũna dↄ̃ kũ bɛ̀ɛrɛɛo gbãsĩ sari, 
\v 5 adi kɛ kũ dà vãni nidɛnaao lán kifiri kũ ò Luda dↄ̃ronↄ bànlo. 
\v 6 Yã pìi musu gbɛ̃ke sún a gbɛ̃dake taki kɛ ke à taari kɛnɛro, zaakũ Dikiri ni wɛ́ tã yã bire taka kɛ̀rinↄ a lákũ o gĩnakɛ o òárɛ nà, o á sã gào. 
\v 7 Luda dí ó sísi ògↄ̃ kú kũ gbãsĩoro, séde ó kunna gↄ̃ adona. 
\v 8 Abire yãi gbɛ̃ kũ à gì yãdannɛna díi, adi kɛ bisãsirin à gìiro, Luda kũ àdi a Nini kũ à kú adona daógun à gìi.
\p
\v 9 Óni le ò yekↄ̃ina yã oárɛro, zaakũ kũ á zĩdao Luda yekↄ̃inaa dàárɛ. 
\v 10 Á kunna de lɛ kↄ̀, á ye ó gbɛ̃ kũ ò kú Masedonia bùsu gũnnↄi ń pínki. Ma gbɛ̃nↄ, o lɛ́ dàáwa, àgↄ̃ kɛ lɛ àgↄ̃ gɛ́o, 
\v 11 à zɛ́ wɛtɛ àgↄ̃ kun yãkete sari, á baadi á zĩda yã kɛ à á zĩda zĩ kɛ, lákũ o dìtɛárɛ nà, 
\v 12 de á kunna le à ká bàaidenↄgu, de àsun fu á zĩdaa à da gbɛ̃keiro.
\s1 Dikiri sunaa
\p
\v 13 Ma gbɛ̃nↄ, o ye àgↄ̃ yãpura dↄ̃ gbɛ̃ kũ ò andunia tònↄ yã musu, de á pↄ súngↄ̃ sira lán gbɛ̃ kũ ò tãmaa vĩronↄ bàro yãi. 
\v 14 Zaakũ o sì kũ Yesu gà à fùtɛ, lɛn dↄ Luda ni tó gbɛ̃ kũ ò andunia tò Yesu gũnnↄ ɛra ò su kãao lɛɛlɛ.
\p
\v 15 Yã kũ ótɛn oárɛ díkĩna bi Dikiri yãdannɛnaamɛ. Ókↄ̃nↄ gbɛ̃ kpara kũ ónigↄ̃ kun ari Dikiri sugↄrↄ zĩnↄ, óni do gbɛ̃ kũ ò andunia tòo pìnↄnɛ arɛro. 
\v 16 Dikiri mɛ́ ani bo ludambɛ, à kipa kũ yãditɛnnɛnaao kũ malaika gbɛ̃ zↄ̃kↄ̃ↄ kòtooo kũ Luda kãkãki ↄ́o, gbɛ̃ kũ ò gà Kirisi gũnnↄ ni vu bona gan káaku, 
\v 17 abire gbɛra ókↄ̃nↄ gbɛ̃ kpara kũ ó kunnↄ, oni ó sɛ́tɛ kũńwo lɛɛlɛ ari ludambɛ lukun ò da Dikirilɛ ĩa gũn, gbasa ògↄ̃ kú kãao ari gↄrↄ sĩnda pínki. 
\v 18 Abire yãi à kↄ̃ laakari kpátɛ kũ yã pìio.
\c 5
\p
\v 1 Ma gbɛ̃nↄ, yã pì kɛna ke a kɛgↄrↄ oárɛna zɛ́ vĩro, 
\v 2 zaakũ á dↄ̃ sãnsãn lákũ kpãni dì su gwãani nà. Lɛn anigↄ̃ de Dikiri sugↄrↄ zĩ lɛ. 
\v 3 Tó gbɛ̃nↄ tɛn pi, ó aafia, ó kun ó laakariia, kakatɛna ni suḿma kãnto lákũ nɛ́'iwãwã dì su nↄ̀sindarea nà, oni boro. 
\v 4 Ákↄ̃nↄ sↄ̃ ó gbɛ̃nↄ, á kú gusiranlo, gↄrↄ pì ni suáwa lán kpãni bàro, 
\v 5 zaakũ gupura gbɛ̃nↄn á ũ, fãnantɛ̃ gbɛ̃nↄn á ũ á pínki. Gwãani ke gusira gbɛ̃nↄn ó ũro. 
\v 6 Abire yãi òsun i o lán dakenↄ bàro. Ò itɛ̃ kɛ ògↄ̃ kú ó laakariia. 
\v 7 I'orinↄ dì i o gwãani, wɛ̃dɛrinↄ sↄ̃ òdi wɛ̃dɛ kɛ gwãani. 
\v 8 Ókↄ̃nↄ sↄ̃, zaakũ fãnantɛ̃ gbɛ̃nↄn ó ũ, ògↄ̃ kú kũ laakariio, ò ludanaanikɛna kũ yenyĩo da mↄ̀ uta ũ, ò surabana tãmaa kú mↄ̀ fùra ũ. 
\v 9 Zaakũ Luda dí ó ditɛ à pↄfɛ̃ kipawáro. À ó dítɛ à ó sura ba ó Dikiri Yesu Kirisi gãimɛ. 
\v 10 Àkũ mɛ́ à gà ó yãi de ògↄ̃ kú kãao, tó ó bɛ̃nɛ ke o andunia tòn yá. 
\v 11 Abire yãi à lɛ́ dakↄ̃a, à kↄ̃ gba gbãna, lákũ átɛn kɛ nà.
\s1 Pↄlu yãditɛna Tɛsalonikadenↄnɛ
\p
\v 12 Ma gbɛ̃nↄ, o wɛ́ kɛ̀áwa, à bɛ̀ɛrɛ lí gbɛ̃ kũ òdi zĩ kɛ á tɛ́nↄnɛ, kũ ò iko vĩáwa Dikiri gũn, òtɛni á da zɛ́anↄ. 
\v 13 À ń gakuri dↄ̃ńnɛ manamana yenyĩ gũn zĩ kũ òtɛn kɛ yãi. Àgↄ̃ nna kũ kↄ̃o. 
\v 14 Ma gbɛ̃nↄ, o lɛ́ dàáwa, à fayasaridenↄ da zɛ́n, à gbɛ̃ yĩdanↄ gba swɛ̃̀ɛ, à laakari dↄ gbãnasaridenↄa, à mɛna kũ gbɛ̃ sĩnda pínkio. 
\v 15 À laakari kɛ, á gbɛ̃ke sún a vãni fĩna bo kũ a vãnioro. À zɛ́ wɛtɛ àgↄ̃ a mana kɛkↄ̃nɛ kũ gbɛ̃ sĩnda pínkio gↄrↄ sĩnda pínki.
\p
\v 16 Àgↄ̃ kú kũ pↄnnao gↄrↄ sĩnda pínki. 
\v 17 Àgↄ̃ adua kɛ lakanaa sari. 
\v 18 Àgↄ̃ Luda sáabu kpá yã sĩnda pínki musu. Abire mɛ́ à deárɛ a pↄyenyĩna ũ Kirisi Yesu gũn. 
\v 19 Àsun Luda Nini tɛ́ kũ àdi káńgu dɛdɛro, 
\v 20 àsun annabikɛyã gya boro. 
\v 21 À yã sĩnda pínki tàasi ká, àgↄ̃ a mana kũna, 
\v 22 à mì kɛ̃ vãnikɛna buri sĩnda pínkia.
\p
\v 23 Luda Aafiade tó á kunna gↄ̃ kú adona yã sĩnda pínki gũn, à á nini kũ á wɛ̃̀ndiio kũ á mɛ̀ɛo dãkpãárɛ aafia taari sari ari ó Dikiri Yesu Kirisi sugↄrↄ. 
\v 24 Luda kũ à á sísi à á sɛ́ náani vĩ, ani yã pì kɛárɛ.
\p
\v 25 Ma gbɛ̃nↄ, à adua kɛwɛrɛ. 
\v 26 À fↄ kpá ó gbɛ̃nↄa ń pínki kũ Luda gbɛ̃nↄ lɛ́pɛmmanaao. 
\v 27 Ma naárɛ Dikirii, à takada dí kyó kɛ ó gbɛ̃nↄnɛ ń pínki. 
\v 28 Ó Dikiri Yesu Kirisi gbɛ̃kɛ kɛárɛ.