\id 1PE 1 Peter in Busa, Ross Jones
\ide UTF-8
\h 1 PITA
\toc1 PITA TAKADA KAAKU
\toc2 1 PITA
\mt1 PITA TAKADA KAAKU
\c 1
\s1 Tãmaa kũ àdi ń nɛro
\p
\v 1 Makũ Pita, Yesu Kirisi zĩ̀ri mɛ́ à takada dí kɛ̃̀ Luda gbɛ̃ kũ ò de nibↄnↄ ũ andunia dí gũn, kũ ò fãkↄ̃ana bùsu díkĩnanↄ gũnnↄnɛ: Pↄntu, Galatia, Kapadosia, Asia kũ Bitiniao. 
\v 2 De Luda gĩnakɛ à á dↄ̃, akũ à á sɛ́, a gↄ̃ a pↄ́ ũ kũ a Nini gbãnao, de à mì natɛ Yesu Kirisinɛ, a aru gbã̀ boárɛ. Luda gbɛ̃kɛ kũ aafiaao karaárɛ.
\p
\v 3 Ò Luda ó Dikiri Yesu Kirisi De sáabu kpá! A sùru zↄ̃kↄ̃ↄ gũn à ó í dufu kũ Yesu Kirisi vuna gan gbãnao, akũ ó tãmaa kũ àdi ń nɛro vĩ, 
\v 4 zaakũ túbi kũ à ditɛnaárɛ ludambɛ pìi dì lákaro, àdi gbãsĩ kpáro, a mana dì lákaro. 
\v 5 Luda soru kɛ̀ à làka de à á sura ba a náani kũ átɛn kɛ yãi, akũ àtɛni á dãkpã kũ a gbãnao ari à gɛ́ bo kũ surabanaa pìio gupuraa gↄrↄ kpɛde zĩ. 
\v 6 Átɛn pↄnna kɛ kũ yã pìio, bee kũ áni wari kɛ gĩa fíti yↄ̃ogwana buri sĩnda pínki yãi. 
\v 7 Lákũ òdi wura mana dↄ̃ tɛ́ gũn nà, lɛn òtɛni á ludanaanikɛna yↄ̃ à gwa lɛ, zaakũ á ludanaanikɛnaa pìi bɛ̀ɛrɛ vĩ de wura kũ a gakuri dì lákala manamana. Tó a bo mana, Luda ni á sáabu kpá Yesu Kirisi sugↄrↄ zĩ, ani á kpe ta kũ gakurio. 
\v 8 Bee kũ ádi a ero, á yei. Bee kũ ádi wɛ́ kɛ pla kãao zikiro, átɛni a náani kɛ, akũ átɛn pↄnna zↄ̃kↄ̃ kũ à gɛ̃̀ onala kɛ, 
\v 9 kũ átɛni á ludanaanikɛna gbɛ̀ le á surabana ũ yãi.
\p
\v 10 Annabinↄ gĩnakɛ ò gbɛ̃kɛ kũ Luda ni kɛ kãáo yã ò, ò surabanaa pì yã gwà, ò a tàasii kà. 
\v 11 Kirisi Nini kũ à kú ń gũn gĩnakɛ à wari kũ Kirisi pì ni kɛ òńnɛ kũ gakuri kũ ani le a gbɛrao, akũ ò wɛ̀tɛ ò yã pì zɛ́ dↄ̃ kũ a gↄrↄo. 
\v 12 Akũ Luda tò ò dↄ̃̀ kũ yã kũ òtɛn o pì de ń gↄrↄ pↄ́ ũro, á pↄ́mɛ. Tera sà baarunnakparinↄ yã pìi òárɛ kũ Luda Nini kũ Luda pìi zĩ̀ bona ludambɛ gbãnao. Bee malaikanↄ se òtɛn ↄsi ká yã pì dↄ̃naai.
\s1 Kunna adona
\p
\v 13 Abire yãi àgↄ̃ kú á laakariia, àgↄ̃ á zĩda kũna dↄ̃, á wɛ́ gↄ̃ dↄ gbɛ̃kɛ kũ Luda ni kɛárɛ Yesu Kirisi sugↄrↄ zĩi sikaa sari. 
\v 14 Lákũ á de Luda nɛ́ kũ òtɛni a yã manↄ ũ nà, àsun tó dà vãni kũ á vĩ yã á wɛ́siragↄrↄ doárɛ arɛro. 
\v 15 Luda kú adonamɛ. Lákũ à á sisi à á sɛ́ nà, àgↄ̃ kú adona á yãkɛna sĩnda pínki gũn lɛ se. 
\v 16 Zaakũ ò kɛ̃̀ Luda yãn ò pì:
\q1 Àgↄ̃ kú adona,
\q1 zaakũ má kú adonamɛ.
\p
\v 17 Zaakũ Luda dì yãkpatɛ kɛ kũ baadio a yãkɛnaaa ń wɛ́ gwanaa sari, tó átɛni a sísi De, à vĩna kɛnɛ á nibↄkɛnaa gũn la. 
\v 18 Á dↄ̃ lákũ Luda á bó kunna kori kũ à de á futɛokarayã ũ gũn nà. Luda dí á bo kũ pↄ́ kũ a gakuri dì lákaoro, lán wura ke andurufu bà, 
\v 19 à á bó kũ Kirisi aru gakurideomɛ, kũ à de lán sãnɛ bↄ̀rↄ kũ à mamberu vĩro à gbãsĩ vĩro bà. 
\v 20 Luda gĩnakɛ à a dìtɛ zaade adi andunia kátɛro, akũ à bòárɛ kãao gupuraa gↄrↄ kpɛde díkĩnanↄ zĩ. 
\v 21 A yã musun átɛn Luda náani kɛ. Luda a bò gan à gakuri kpàa, de à le à a náani kɛ, á wɛ́ gↄ̃ dↄi.
\p
\v 22 Lákũ mìnatɛna yãpuranɛɛ gbã̀ bòárɛ nà, akũ a gↄ̃ kↄ̃ gbɛ̃nↄ ũ manafiki sari, àgↄ̃ yekↄ̃i kũ nɛ̀sɛ mɛ̀n doo. 
\v 23 Luda á í dufu kũ a yã wɛ̃̀ndide kũ àdigↄ̃ kun gbãnao. Yã pì de pↄ́buri kũ àdi ga ũro, pↄ́buri kũ àdi garomɛ.
\q1
\v 24 Gbɛ̃ sĩnda pínki de lán sɛ̃̀ɛ bàmɛ,
\q1 ń gakuri de lán sɛ̃̀vu bàmɛ pínki.
\q1 Sɛ̃̀ɛ dì kori kɛ, a vú dì kↄ́tɛ,
\q1
\v 25 ama Dikiri yã dìgↄ̃ kun gↄrↄ sĩnda pínki.
\m Yã pì mɛ́ à de baaru nna kũ ò kpàárɛ ũ.
\c 2
\s1 Gbɛ̀ wɛ̃̀ndide
\p
\v 1 Abire yãi à yã vãni sĩnda pínki tó kũ ɛ́kɛtona sĩnda pínkio kũ manafikio kũ nɛ̀sɛgↄ̃bao kũ kↄ̃yakanaao. 
\v 2 Lákũ nɛ́kpãntɛ̃nↄ dìgↄ̃ yↄ̃'i ni dɛ nà, àgↄ̃ Luda yã kũ à de lán vĩ'ipu swáswa bà ni dɛ lɛ se, de à le à gbã á surabana zɛ́ gũn, 
\v 3 tera sà kũ a dↄ̃̀ kũ Dikiri mana. 
\v 4 À nai, àkũmɛ gbɛ̀ wɛ̃̀ndide kũ ò gìi ũ, ama Luda a sɛ̀ bɛ̀ɛrɛde ũ. 
\v 5 Ákↄ̃nↄ sↄ̃ á gbɛ̀ wɛ̃̀ndide kũ Luda tɛni a kpɛ́ ɛ̃ boonↄ ũ. Ákↄ̃nↄmɛ a gbàgbarinↄ ũ, adì sa kũ àdi káagu o kũ a Nini gbãnao Yesu Kirisi gãi. 
\v 6 Zaakũ ò kɛ̃̀ Luda yãn ò pì:
\q1 Ǹ gwa, matɛn gbɛ̀ ditɛ Zaiↄ̃,
\q1 ɛ̃pɛtɛna gbɛ̀ bɛ̀ɛrɛde kũ ma sɛ̀ ũ.
\q1 Wé'i ni gbɛ̃ kũ àtɛni a náani kɛ kũro.
\m
\v 7 À de gbɛ̀ bɛ̀ɛrɛde ũ ákↄ̃nↄ kũ átɛni a náani kɛnↄnɛ, ama à de lɛ gbɛ̃ kũ òtɛni a náani kɛronↄnɛro.
\q1 Gbɛ̀ kũ kpɛ́borinↄ pã kpài
\q1 mɛ́ à gↄ̃̀ kpɛ́ kusuru gbɛ̀ mìde ũ.
\m
\v 8 Lɛn dↄ à de:
\q1 Gbɛ̀ kũ òdi gɛ̃̀ sía ũ,
\q1 gbɛ̀si kũ òdi kpáala ò lɛ́tɛ ũ.
\m Ò gɛ̃̀ɛ sìa, kũ odi Luda yã daro yãi. Lɛn Luda dìtɛńnɛ lɛ.
\p
\v 9 Ákↄ̃nↄmɛ buri kũ Luda ń sɛ́nↄ ũ, kínanↄ kũ sa'orinↄ ũ, a gbɛ̃ kũ ò kú adonanↄ ũ, de à Luda kũ à á sisi a bo gusiran, à gɛ̃̀ kãáo a gupura bonsarɛde gũn sáabu kpá.
\q1
\v 10 Á de Luda gbɛ̃nↄ ũ yãro,
\q1 ama tera sà a gↄ̃ ń ũ.
\q1 Luda dí sùru kɛ kãáo yãro,
\q1 ama tera à kɛ̀ kãáo.
\s1 Kunna ludanaanikɛrisarinↄ tɛ́
\p
\v 11 Ma gbɛ̃ yenyĩdenↄ, lákũ á de nibↄ kũ bòasunↄ ũ nà andunia dí gũn, matɛn lɛ́ daáwa, à mì kɛ̃ á dà vãni kũ òdi zĩ̀ ká kãáonↄa. 
\v 12 Àgↄ̃ kun gbɛ̃ bɛ̀ɛrɛdenↄ ũ kifirinↄ tɛ́. Lɛmɛ dↄ bee tó ò á dítɛ yãvãnikɛrinↄ ũ, tó ò yã mana kũ átɛn kɛnↄ è, oni Luda sáabu kpá gↄrↄ kũ ani suńyĩ.
\p
\v 13 À mì natɛ ikode kũ bisãsiri dìtɛnↄnɛ ń pínki Dikiri yãi, kína kũ à gbãna vĩ deńlan yá, 
\v 14 ke gbãnade kũ à dìtɛ à wɛ́ tã yãvãnikɛrinↄa à yãmanakɛrinↄ sáabu kpá. 
\v 15 Luda pↄyenyĩnaan dí: Á yãmanakɛnaa gũn, áni yↄ̃nkↄ wɛ́siradenↄ lɛ́ yĩtɛńnɛ. 
\v 16 Àgↄ̃ zĩdadenↄ ũ, ama àsun tó á gↄ̃na zĩdadenↄ ũ gↄ̃árɛ vãnikɛna zɛ́ ũro. Àgↄ̃ kun Luda zↄ̀blerinↄ ũ. 
\v 17 À bɛ̀ɛrɛ li gbɛ̃ sĩnda pínkinɛ. Àgↄ̃ ye á Yesude dakenↄi. À vĩna kɛ Ludanɛ. À bɛ̀ɛrɛ lí kínanɛ.
\p
\v 18 Zĩkɛrinↄ, à mì natɛ á dikirinↄnɛ, à zↄ̃kↄ̃kɛ dↄ̃ńnɛ yã sĩnda pínki gũn. Adi kɛ dikiri mana nɛ̀sɛdodenↄnɛ ńtɛ̃nɛnlo, ama kũ ń gbɛ̃ pãsĩnↄomɛ se. 
\v 19 Tó ò wɛ́ tã̀áwa pã, tó a mɛna fↄ̃̀o Luda yãi, abirekũ sáabu vĩárɛ. 
\v 20 Tó ò á gbɛ̃ á taari yãi, tó a mɛna fↄ̃̀o, abirekũ tↄ́ nna vĩ máa? Ama tó a wari kɛ̀ yã mana kũ a kɛ̀ yãi, tó a mɛna fↄ̃̀o, Luda ni á sáabu kpá. 
\v 21 Abire yãin Luda á sisi à á sɛ́. Kirisi wari kɛ̀árɛ, à zɛ́ mↄ̀árɛ de àgↄ̃ tɛ́ a gɛ̀sɛgbɛɛi yãi.
\q1
\v 22 Adi durunna kɛro,
\q1 odi ma à ɛ́kɛ tòro.
\m
\v 23 Kũ ò a sↄ̃̀sↄ̃, adi yã síńlaro. Kũ à wari kɛ̀, adi yã pãsĩ ke ońnɛro, à zɛ̀ kũ Luda yãkpatɛkɛri manaomɛ. 
\v 24 Àkũ mɛ́ à ó durunnanↄ dì a mìia, à gào lía, de ó bàka súngↄ̃ kú kũ durunnanↄ doro, ògↄ̃ kú yãmanakɛnaa gũn. A flã̀gbɛnↄ mɛ́ ò ó gbá aafia. 
\v 25 Zaakũ a sãtɛ lán sãnↄ bà yã, akũ a arɛ dↄ̀ á Dã̀ri kũ á Dãkpãriiooa tera sà.
\c 3
\s1 Kunna kↄ̃o
\p
\v 1 Nↄgbɛ̃nↄ sↄ̃, à á zĩda kpá á zãnↄa. Tó ń gbɛ̃kenↄ tɛn Luda yã daro, á kunna ni ń litɛ. Bee tó ádi yãke ońnɛro, 
\v 2 oni e kũ á kun gbãsĩ sari, akũsↄ̃ a á zĩda kpàḿma. 
\v 3 Àsun tó á nↄmanakɛ gↄ̃ mɛ̀ yã ũro, mìtãna ke nↄmanablebↄnↄ ke pↄ́kasadanaan yá. 
\v 4 Ama àgↄ̃ de á nɛ̀sɛgũnyã kũ àdi lákaro ũ, nɛ̀sɛyĩda kũ zĩdabusanaao. Abirekũ mɛ́ à bɛ̀ɛrɛ vĩ Ludanɛ. 
\v 5 Zaakũ lɛn nↄgbɛ̃ donyĩri kũ ń wɛ́ dↄ Ludai yãnↄ ń zĩda kɛ̀kɛ lɛ, ò ń zĩda kpà ń zãnↄa. 
\v 6 Lɛn Sara de lɛ, àdi Ibrahĩ yã ma, àdi a sísi Baa. Tó átɛn yã mana kɛ, tó átɛn pↄ́ kũ òdi vĩna kɛnɛ yã daro, a Sara dàa sɛ̀n gwe. 
\v 7 Gↄ̃gbɛ̃nↄ sↄ̃, àgↄ̃ kú kũńwo nↄgbɛ̃kɛ dↄ̃nnɛnaa gũn, àgↄ̃ yã maḿma, de pↄ́ke sún kpáárɛ á aduakɛnaa gũnlo, zaakũ á de wɛ̃̀ndi gbablerinↄ ũ lɛɛlɛmɛ.
\p
\v 8 Abire gbɛra àgↄ̃ lɛ́dokↄ̃nↄ vĩ kↄ̃o á pínki. Àgↄ̃ kↄ̃ wɛ̃nda dↄ̃, àgↄ̃ yekↄ̃i, àgↄ̃ gbɛ̃kɛ vĩ kↄ̃o, à busakↄ̃nɛ. 
\v 9 Àsungↄ̃ a vãni fĩna bo kũ a vãnioro. Àsungↄ̃ gbɛ̃ kũ à á sↄ̃sↄ̃ sↄ̃sↄ̃ro. À sa mana onɛ, zaakũ Luda á sisi de à arubarika daágu yãimɛ.
\q1
\v 10 Gbɛ̃ kũ à ye àgↄ̃ kú nnamanan,
\q1 akũsↄ̃ à ye a kunna gↄ̃ mana,
\q1 à a lɛ́ kũ kũ yãvãni'onaao,
\q1 àsun tó ɛ́kɛ bo a lɛ́nlo.
\q1
\v 11 Ade kpɛ li a vãninɛ, à a mana kɛ,
\q1 à aafia zɛ́ wɛtɛ àgↄ̃ tɛ́i.
\q1
\v 12 Zaakũ Dikiri dìgↄ̃ gbɛ̃ mananↄ tàasi ká,
\q1 a sã kpá ń aduakɛnaai,
\q1 ama àdi mìkpɛrɛ zu yãvãnikɛrinↄnɛ.
\s1 Wɛ́tãmmana yãmanakɛna yãi
\p
\v 13 Tó á kokari vĩ kũ yãmanakɛnaao, dí mɛ́ ani wɛ́ tãáwaa? 
\v 14 Bee tó a wari kɛ̀ yãmanakɛna yãi, á arubarika vĩ. Àsungↄ̃ vĩna kɛ ń wɛ́tãmmanaanɛro, àsun tó á swɛ̃̀ kɛ̃águro. 
\v 15 À Kirisi dↄ̃ Dikiri ũ á swɛ̃̀ɛ gũn. Àgↄ̃ kú soru gũn gↄrↄ sĩnda pínki, de à le à yã we gbɛ̃ kũ àtɛni á la yã kũ á wɛ́ dↄii mìiia. 
\v 16 Àgↄ̃ ońnɛ busɛbusɛ kũ bɛ̀ɛrɛlinnɛnaao. À ońnɛ kũ nɛ̀sɛpurao dↄ, de wé'i gbɛ̃ kũ òtɛni á sↄ̃sↄ̃ á yãmanakɛna Kirisi gũnnↄ kũ. 
\v 17 Warikɛna Luda pↄyenyĩnaa gũn yãmanakɛna yãi mana de warikɛna yãvãnikɛna yãila.
\p
\v 18 Kirisi gà gɛ̃̀n do durunnakɛ̃mmana yãi. Taarisaride gà ókↄ̃nↄ taaridenↄ yãi, de à le à gɛ́ kũoo Luda kĩnaa. Ò a dɛ̀ mɛ̀ɛ gũn, akũ Luda a vù ninikɛ gũn. 
\v 19 A ninikɛ pìi gũn à gɛ̀ɛ à waazi kɛ̀ gyãwãnde kũ ò ń ká kpɛ́sirannↄnɛ. 
\v 20 Ò bò Luda yã kpɛmɛ yã, gↄrↄ kũ à mɛna ari Nuhu gɛ̀ɛ à gó'itɛ kɛ̀ à làkao. Gbɛ̃ kũ ò bò ín aafia gó pì gãinↄn dasiro, gbɛ̃nↄn sↄraakↄ̃. 
\v 21 Í pì mɛ́ à de á da'itɛkɛna kũ àdi á sura ba tera taka ũ. Da'itɛkɛnaa pì bi mɛ̀ gbãsĩworona yãnlo, lɛ́sɛna Ludanɛ kũ nɛ̀sɛpuraomɛ. Àdi ń sura ba, kũ Yesu Kirisi bò gan yãi. 
\v 22 À gbãna blè malaikanↄa kũ tãnanↄ kũ ń gbãnadenↄ kũ ń ikodenↄ, akũ à tà ludambɛ, à kú Luda ↄplai.
\c 4
\s1 Bona kunna zĩn
\p
\v 1 Lákũ Kirisi wari kɛ̀ a mɛ̀n nà, ákↄ̃nↄ se à nɛ̀sɛ bire buri sɛ́, zaakũ gbɛ̃ kũ à wari kɛ̀ a mɛ̀n, ade mìi kɛ̃̀ durunnaamɛ. 
\v 2 Gↄrↄ kũ à gↄ̃̀árɛ á kunnaa gũn, á dà vãni súngↄ̃ doárɛ arɛ doro, séde Luda pↄyenyĩnaa. 
\v 3 Á kunna kifirinↄ yãkɛnaa gũn yã mↄ̀ lɛ. Yã á kú wé'isariyãkɛnaa gũn kũ dàvãninidɛnaao kũ wɛ̃dɛkɛnaao kũ pãpã kↄ̃kↄ̃o kũ wɛ̃mikↄ̃kↄ̃ bɛ̃̀nɛɛo kũ tãnagbagbana kũ Luda zã̀aguo. 
\v 4 Kũ adì kakara kũńwo ń pãpã zↄ̃kↄ̃ↄ pì kɛnaa gũn doro, àdi kɛńnɛ yãbonsarɛ ũ, akũ òdi á tↄ́ vãni sí. 
\v 5 Oni ń yãkɛnanↄ baba Ludanɛ, kũ à yãkpatɛkɛna kũ gbɛ̃ bɛ̃nɛnↄ kũ gyãwãndenↄ soru kɛ̀. 
\v 6 Ò baaru nna kpà bee gyãwãnde pìnↄnɛ se, de ò le ògↄ̃ kú ninikɛ gũn lán Luda bà, bee kũ yã vùtɛḿma mɛ̀ɛ gũn lán gbɛ̃ sĩnda pínki bà.
\s1 Ludayãmarinↄ
\p
\v 7 Pↄ́ sĩnda pínki lakanaa kà kãni. Abire yãi àgↄ̃ de laakaridenↄ ũ, àgↄ̃ á zĩda kũna dↄ̃ de àgↄ̃ adua kɛ yãi. 
\v 8 Yã kũ à de a pínkilan dí: Àgↄ̃ yekↄ̃i kũ nɛ̀sɛ mɛ̀n doo, zaakũ yenyĩ dì pↄ́ kútɛ durunnanↄa dasi. 
\v 9 À yàri kɛkↄ̃nɛ yãketekanaa sari. 
\v 10 Lákũ Luda gba dà á baadinɛ nà, à kpákↄ̃i kũ gba pìnↄ Luda gba buri donadona zĩkɛri mananↄ ũ. 
\v 11 Gbɛ̃ kũ à de waazikɛri ũ, à Luda yã ońnɛ. Gbɛ̃ kũ à de kpanyĩri ũ, à kpáńyĩ kũ gbãna kũ Luda a gbào, de à Luda tↄ́ kpá yã sĩnda pínki gũn Yesu Kirisi gãi. Àkũ mɛ́ à gakuri vĩ kũ gbãnao gↄrↄ sĩnda pínki! Aami.
\s1 Warikɛna Yesudekɛ yãi
\p
\v 12 Ma gbɛ̃ yenyĩdenↄ, àsun tó yↄ̃ogwana pãsĩ kũ àtɛni á le bo á sarɛ lákũ yã dufu mɛ́ à á lé bàro. 
\v 13 Lákũ á bàka kú Kirisi warikɛnaa gũn nà, à pↄnna kɛo de à le àgↄ̃ pↄnna zↄ̃kↄ̃ vĩ gↄrↄ kũ Kirisi pì ni bo gupuraa kũ gakurio. 
\v 14 Tó ò á sↄ̃sↄ̃ Kirisi tↄ́ kũ à kúáwa yãi, á arubarika vĩ, zaakũ Luda Nini gakuride kúáwa. 
\v 15 Á gbɛ̃ke sún wari kɛ gbɛ̃dɛna ke kpãni'ona ke yãbɛ̃nɛkɛna ke gudɛ yãiro. 
\v 16 Tó a wari kɛ̀ á Yesudekɛ yãi, àsun kɛárɛ wé'iyã ũro. À Luda sáabu kpá kũ Yesu tↄ́ kúáwa yãi. 
\v 17 Zaakũ wɛ́tãmmagↄrↄ kà, Luda gbɛ̃nↄn à nàa kũńwo. Lákũ ókↄ̃nↄmɛ à nàa kũoo káaku nà, ani láka kũ gbɛ̃ kũ ò gì Luda baaru nna mainↄo deramɛɛ?
\q1
\v 18 Zaakũ gbɛ̃ mananↄ surabana zĩ'ũ,
\q1 yã ni bo kũ ludayãdarisarinↄ kũ durunnakɛrinↄo deramɛɛ?
\m
\v 19 Abire yãi gbɛ̃ kũ òtɛn wari kɛ Luda pↄyenyĩnaa gũnnↄ ń zĩda na ń Kɛ̀ri náanidenɛ a ↄĩ, ò kpɛ́ ògↄ̃ yã mana kɛ.
\c 5
\s1 Luda sã kpàsa gwanaa
\p
\v 1 Matɛn lɛ́ da ákↄ̃nↄ gbɛ̃ zↄ̃kↄ̃nↄa sà. Gbɛ̃ zↄ̃kↄ̃ↄn ma ũ se. Má de wari kũ Kirisi kɛ̀ɛ sèedade ũ, akũsↄ̃ ma bàka nigↄ̃ kú kũ gakuri kũ ani bo gupuraaao se. 
\v 2 Àgↄ̃ de kpàsa kũ Luda kàtɛárɛ dã̀rinↄ ũ. À ↄ likai kũ pↄyeinaao, adi kɛ tilasinlo, lákũ Luda yei nàmɛ. Adi kɛ ↄgↄwɛtɛna yãinlo. À kɛ kũ nɛ̀sɛ mɛ̀n doo dé. 
\v 3 Àsungↄ̃ gbãna mↄ gbɛ̃ kũ ò ń náárɛ á ↄĩ pìnↄaro. À tó á kunna gↄ̃ á sã pìnↄ da a zɛ́a, 
\v 4 áni kífura kũ a gakuri dì lákaro le gↄrↄ kũ Sãdãriki ni su.
\p
\v 5 Ákↄ̃nↄ kɛfɛnnanↄ sↄ̃, à á zĩda kpá gbɛ̃ zↄ̃kↄ̃nↄa. Á pínki à á zĩda busakↄ̃nɛ à kpákↄ̃i, zaakũ
\q1 Luda dì ibɛrɛ sɛ́ kũ zĩdabirinↄ,
\q1 ama à gbɛ̃kɛ vĩ kũ zĩdabusarinↄ.
\m
\v 6 Abire yãi à á zĩda busa Luda gbãnadenɛ, ani á kara gↄrↄ kũ à dìtɛa. 
\v 7 À á yã'ũmmananↄ tónɛ pínki, zaakũ àdi laakari dↄáwa.
\p
\v 8 Á wɛ́ gↄ̃ dↄ, àgↄ̃ kú á laakariia. Á ibɛrɛ Ibilisi de lán músu ↄ́ↄdↄrii bàmɛ. Àtɛn kpátɛ kɛái, àtɛn gbɛ̃ wɛtɛ à kũ. 
\v 9 À gínɛ, à zɛ gbãna ludanaanikɛnaa gũn, zaakũ á dↄ̃ kũ á Yesude dake kũ ò kú andunia gũnnↄ ń pínki tɛn wari dokↄ̃nↄ pì kɛmɛ se. 
\v 10 Luda Arubarikasĩndapinkide á sisi a gakuri kũ àdi lákaroa Kirisi gũn. Tó a wari kɛ̀ fíti, ani á bo mana, ani á zɛ gíngin, ani á gba gbãna, ani á zĩni pɛ́tɛ. 
\v 11 Àkũ mɛ́ à gbãna vĩ ari gↄrↄ sĩnda pínki! Aami.
\s1 Lɛ́zammanaa
\p
\v 12 Ma takada fíti dí kɛ̃̀árɛ kũ ó gbɛ̃ndo Silasi ↄomɛ. À demɛnɛ gbɛ̃ náanide ũ. Ma lɛ́ dàáwa, má de a sèedade ũ kũ yã kũ ma ò de Luda gbɛ̃kɛ yãpura ũ. À zɛo gíngin. 
\v 13 Babilↄnu gbɛ̃ kũ Luda ń sɛ́ lán á bànↄ fↄ kpàáwa. Ma nɛ́ Maaku fↄ kpàáwa dↄ. 
\v 14 À fↄ kpákↄ̃a kũ lɛ́pɛmmanaao yenyĩ gũn. Luda ákↄ̃nↄ kũ á kú Kirisi gũnnↄ gba aafia á pínki.