\id 1JN 1 John in Busa, Ross Jones
\ide UTF-8
\h 1 YUHANA
\toc1 YUHANA TAKADA KAAKU
\toc2 1 YUHANA
\mt1 YUHANA TAKADA KAAKU
\c 1
\s1 Yã wɛ̃̀ndide
\p
\v 1 Yã kũ à kun zaa káaku kũ o a yã mà, akũ o a è kũ wɛ́o, o a gwà, o ↄ nàa, yã wɛ̃̀ndide pì baaruun ótɛn kpáárɛ. 
\v 2 Wɛ̃̀ndide pìi bò gupuraa, o a è, ókↄ̃nↄmɛ a sèedadenↄ ũ. Wɛ̃̀ndide pì kú De Luda kĩnaamɛ yã, akũ à bò à sùwá. A baaruun ótɛn kpáárɛ. 
\v 3 Yã kũ o mà, akũ o èen ótɛn oárɛ, de ákↄ̃nↄ se à le àgↄ̃ kú kũoo kↄ̃ gbɛ̃nↄ ũ, zaakũ ó kun kↄ̃ gbɛ̃nↄ ũ kũ De Ludaomɛ kũ a Nɛ́ Yesu Kirisi pìio. 
\v 4 Ótɛn yã dínↄ oárɛ de ó pↄnna le àgↄ̃ papana.
\s1 Luda bi gupuramɛ
\p
\v 5 Baaru kũ o mà a kĩnaa, ótɛn kpáárɛn dí: Luda bi gupuramɛ, gusira kú a kĩnaaro, bee fíti. 
\v 6 Tó o pì ó kú kãao kↄ̃ gbɛ̃nↄ ũ, akũ ó kú gusiran, ɛ́kɛn ótɛn to, ótɛn zĩ kɛ yãpuraaro. 
\v 7 Tó ó kú gupuran, lákũ Luda kú gupuran nà, gbasa ó kun kↄ̃ gbɛ̃nↄ ũ, a Nɛ́ Yesu aru dì ó durunna sĩnda pínki kɛ̃wá.
\p
\v 8 Tó o pì ó durunna vĩro, ótɛni ó zĩda kɛkɛmɛ, yãpura kúwáro. 
\v 9 Tó o ó durunnanↄ ò Ludanɛ, à náani vĩ, àdi yã kɛ a zɛ́a, ani ó durunna pìnↄ kɛ̃wá, ani yã bɛ̃̀nɛ pínki gowá. 
\v 10 Tó o pì ódi durunna kɛro, o Luda dìtɛ ɛ́kɛde ũmɛ, a yã kú ó swɛ̃̀ɛ gũnlo.
\c 2
\p
\v 1 Ma nɛ́ yenyĩdenↄ, matɛn yã bire oárɛ de àsun durunna kɛro yãimɛ. Ama tó á gbɛ̃ke durunna kɛ̀, ó Zɛkũnwode vĩ De Luda kĩnaa, àkũmɛ taarisaride Yesu Kirisi ũ. 
\v 2 Àkũmɛ ó durunnanↄ kútɛkɛbↄ ũ. Adi kɛ ó durunnanↄn adoro, kũ andunia pínki gbɛ̃nↄ pↄ́oomɛ.
\p
\v 3 Tó ó yã kũ à dìtɛnↄ kũna, abirekũ mↄ̀wɛrɛ yãpura kũ ó a dↄ̃. 
\v 4 Tó gbɛ̃ pì á a dↄ̃, akũ à a yã kũ à dìtɛnↄ kũnaro, ɛ́kɛdemɛ, yãpura kú a swɛ̃̀ɛ gũnlo. 
\v 5 Gbɛ̃ kũ à a yã kũna sↄ̃, Luda yenyĩ papana a gũn yãpura. Pↄ́ kũ ani tó ò dↄ̃ kũ ó kú a gũnn dí: 
\v 6 Gbɛ̃ kũ à pì á kú a gũn, séde àgↄ̃ kun lákũ Kirisi kun nà yã.
\s1 Yã dufu ditɛnaa
\p
\v 7 Ma gbɛ̃ yenyĩdenↄ, adi kɛ yã dufun matɛn oárɛro, yã zĩ kũ ò dìtɛárɛ zaa káakumɛ. Yã zĩ pìimɛ yã kũ a mà ũ. 
\v 8 Bee kũ abireo yã kũ matɛn oárɛ dufumɛ dↄ, òdi a yãpura e a kĩnaa kũ á kĩnaao, zaakũ gusira tɛn gɛ̃tɛ, akũ gupura yãpura tɛn pu sà.
\p
\v 9 Gbɛ̃ kũ à pì a kú gupuran, akũ à zã a gbɛ̃dakegu, ade kú gusira gũmmɛ ari tera. 
\v 10 Gbɛ̃ kũ à ye a gbɛ̃dakei kú gupuran, a yãke dì tó gbɛ̃ke furo. 
\v 11 Gbɛ̃ kũ à zã a gbɛ̃dakegu kú gusiran, à tɛ́ gusiran, à dↄ̃ gu kũ àtɛn gɛ́nlo, kũ gusira a vĩ̀na kũ̀ yãi.
\q1
\v 12 Ma nɛ́ yenyĩdenↄ, matɛni abirekũ oárɛ
\q1 kũ á durunnanↄ kɛ̃̀áwa a tↄ́ gãi yãimɛ.
\q1
\v 13 Marenↄ, matɛni abirekũ oárɛ
\q1 kũ á gbɛ̃ kũ à kun zaa káaku dↄ̃ yãimɛ.
\q1 Kɛfɛnnanↄ, matɛni abirekũ oárɛ
\q1 kũ a zĩ̀i blè Setanwa yãimɛ.
\q1 Ma nɛ́ yenyĩdenↄ, ma òárɛ
\q1 kũ á De Luda dↄ̃ yãimɛ.
\q1
\v 14 Marenↄ, ma òárɛ
\q1 kũ á gbɛ̃ kũ à kun zaa káaku dↄ̃ yãimɛ.
\q1 Kɛfɛnnanↄ, ma òárɛ
\q1 kũ á gbãna vĩ, Luda yã kú á swɛ̃̀ɛ gũn dↄ,
\q1 akũsↄ̃ a zĩ̀i blè Setanwa yãimɛ.
\b
\p
\v 15 Àsungↄ̃ ye anduniairo, kesↄ̃ pↄ́ kũ ò kú a gũnnↄ. Tó gbɛ̃ ye anduniai, à ye De Ludairo. 
\v 16 Zaakũ yã kũ à kú andunia gũn pínki, mɛ̀ pↄ́nidɛna kũ wɛ́pio kũ aruzɛkɛ ĩadãnaao, adi bo De Luda kĩnaaro, à bò andunia kĩnaamɛ. 
\v 17 Andunia tɛn gɛ̃tɛ kũ a pↄ́nidɛnaao, ama ludapↄyenyĩnakɛri nigↄ̃ kun gↄrↄ sĩnda pínkimɛ.
\s1 Kirisi ibɛrɛɛ
\p
\v 18 Ma nɛ́ yenyĩdenↄ, gↄrↄ kpɛden ó kun dí. Lákũ a mà kũ Kirisi ibɛrɛ tɛn su nà, a ibɛrɛnↄ gĩnakɛ ò kɛ̀ dasi. Abirekũ mↄ̀wɛrɛ kũ ó kú gↄrↄ kpɛde gũn. 
\v 19 Gbɛ̃ pìnↄ bò ó kĩnaamɛ, ama ó gbɛ̃nↄnlo. Tó ó gbɛ̃nↄmɛ yã de ò kú kũoo. Ò bò de ò dↄ̃ kũ ń gbɛ̃ke de ó gbɛ̃ ũro yãimɛ.
\p
\v 20 Ákↄ̃nↄ sↄ̃, Luda a Nini dìárɛ, akũ á yãpura dↄ̃ á pínki. 
\v 21 Ma abire òárɛ, kũ á yãpura dↄ̃ yãimɛ, adi kɛ kũ á dↄ̃ro yãinlo. Á dↄ̃ kũ ɛ́kɛ ke dì bo yãpura gũnlo. 
\v 22 Dín ɛ́kɛde ũu? Gbɛ̃ kũ à gì Yesu Arumasihukɛnaaimɛ. Gbɛ̃ bire takan Kirisi ibɛrɛ ũ, à gì De Ludai kũ a Nɛ́omɛ. 
\v 23 Gbɛ̃ kũ à gì Luda Nɛ́i De Luda vĩro. Gbɛ̃ kũ à zɛ̀ kũ Luda Nɛ́o mɛ́ à De Luda vĩ dↄ.
\p
\v 24 À tó yã kũ a mà zaa káaku gↄ̃ kú á swɛ̃̀ɛ gũn. Tó yã kũ a mà zaa káaku pì kú á swɛ̃̀ɛ gũn, ákↄ̃nↄ sↄ̃, anigↄ̃ kú Luda Nɛ́ gũn kũ a Deo. 
\v 25 Pↄ́ kũ Kirisi a lɛ́ sɛ̀wɛrɛn wɛ̃̀ndi kũ àdi lákaro ũ.
\p
\v 26 Ma yã bire òárɛ gbɛ̃ kũ òtɛni á sãtɛnↄ yã musu. 
\v 27 Ákↄ̃nↄ sↄ̃, Nini kũ a lè Kirisia kú á gũn. Á bàka kú kũ gbɛ̃ke yã dadanaárɛoro, zaakũ a Nini tɛn yã sĩnda pínki dadaárɛ, à yãpura vĩ, ɛ́kɛ kú a gũnlo. Lákũ àtɛn dadaárɛ nà, àgↄ̃ kú Kirisi gũn lɛ.
\p
\v 28 Tera sà ma nɛ́ yenyĩdenↄ, àgↄ̃ kú a gũn, de gↄrↄ kũ à bò gupuraa, ó swɛ̃̀ gↄ̃ ditɛna, wé'i sún ó kũ a sugↄrↄ zĩro.
\p
\v 29 Zaakũ á dↄ̃ kũ Luda mana, àgↄ̃ dↄ̃ kũ yãmanakɛri sĩnda pínki bi a nɛ́mɛ.
\c 3
\s1 Luda nɛ́nↄ
\p
\v 1 À gwa lákũ De Luda yewái à kɛ̀ zↄ̃kↄ̃ nà ari àdi ó sísi a nɛ́nↄ. Ó a ũ sↄ̃! Andunia ó dↄ̃ro, kũ adi a dↄ̃ro yãi. 
\v 2 Ma gbɛ̃ yenyĩdenↄ, Luda nɛ́nↄn ó ũ tera, lákũ ónigↄ̃ de nà dí bo gupuraa kↄ̀ro. Ó dↄ̃ kũ gↄrↄ kũ ani bo gupuraa, ónigↄ̃ de lán a bà, zaakũ óni a e lákũ à de nà. 
\v 3 Gbɛ̃ kũ à wɛ́ dↄi lɛ dì a swɛ̃̀ pu, lákũ Kirisi swɛ̃̀ punaa nà.
\p
\v 4 Gbɛ̃ kũ à durunna kɛ̀ɛ bò doka kpɛmɛ, zaakũ durunnakɛna bi bona doka kpɛmɛ. 
\v 5 Á dↄ̃ kũ Kirisi sù durunnakɛ̃mmana yãimɛ, durunna sↄ̃ à kú a swɛ̃̀ɛ gũnlo. 
\v 6 Gbɛ̃ kũ à kú a gũn dìgↄ̃ kpɛ́ àgↄ̃ durunna kɛro. Durunnakɛri ke dí a ero, adi a dↄ̃ro.
\p
\v 7 Ma nɛ́nↄ, àsun tó gbɛ̃ke á sãtɛro, yãmanakɛri mɛ́ à mana, lákũ Kirisi mana nà. 
\v 8 Gbɛ̃ kũ àdi durunna kɛ bi Ibilisi pↄ́mɛ, zaakũ Ibilisi durunna kɛ̀ zaa káakumɛ. Ibilisi yãnↄ kakatɛna yãimɛ Luda Nɛ́ sù. 
\v 9 Gbɛ̃ kũ Luda a ì dìgↄ̃ kpɛ́ àgↄ̃ durunna kɛro, zaakũ Luda buri mɛ́ à kú a gũn. Ani fↄ̃ àgↄ̃ kpɛ́ gↄ̃ durunna kɛro, kũ Luda a ì yãi. 
\v 10 Lákũ ó Luda nɛ́nↄ dↄ̃kↄ̃nɛ kũ Ibilisi nɛ́nↄon dí: Gbɛ̃ kũ àdi yã mana kɛro kesↄ̃ gbɛ̃ kũ à ye a gbɛ̃dakeiro bi Luda nɛ́nlo.
\s1 Yekↄ̃inaa
\p
\v 11 Yã kũ a mà zaa káakun dí: Ògↄ̃ yekↄ̃i. 
\v 12 Àsungↄ̃ de lán Kainu bàro. À de Setan pↄ́ ũmɛ, akũ à a dakũna dɛ̀. Bↄ́ yã mɛ́ à tò à a dɛ̀ɛ? Kũ a yãkɛna bɛ̃̀nɛ, akũsↄ̃ a dakũna pↄ́ mana yãimɛ. 
\v 13 Ma gbɛ̃nↄ, tó andunia zã̀águ, àsun tó à bo á sarɛro. 
\v 14 Ó dↄ̃ kũ o bo gan o gɛ̃ wɛ̃̀ndii gũn, kũ ó ye ó Yesude dakenↄi yãi. Gbɛ̃ kũ à ye gbɛ̃iro bi gɛ̀ɛmɛ ari tera. 
\v 15 Gbɛ̃ kũ à zã̀ a gbɛ̃dakegu bi gbɛ̃dɛriimɛ. Á dↄ̃ kũ gbɛ̃dɛri ke dìgↄ̃ wɛ̃̀ndi kũ àdi lákaro vĩ a gũnlo.
\p
\v 16 Yã kũ ó yenyĩ pì dↄ̃̀aan dí: Kirisi a zĩda kpà ó yãi. Ókↄ̃nↄ sↄ̃, séde ò ó zĩda kpá ó Yesude dakenↄa. 
\v 17 Tó gbɛ̃ andunia pↄ́ vĩ, akũ à è a Yesude dake kú pↄ́nidɛnaa gũn, tó adi a wɛ̃nda gwaro, Luda yenyĩ kú a swɛ̃̀ɛ gũn yá? 
\v 18 Ma nɛ́ yenyĩdenↄ, òsungↄ̃ yekↄ̃i kũ lɛ́oro. Ògↄ̃ yekↄ̃i yãpura gũn kũ ó yãkɛnaao. 
\v 19 Abire mↄ̀wɛrɛ kũ yãpura gbɛ̃nↄn ó ũ, gbasa ó swɛ̃̀ le àgↄ̃ ditɛna Luda arɛ. 
\v 20 Tó ó laasun tɛni ó kù vĩ sↄ̃, ó dↄ̃ kũ Luda zↄ̃kↄ̃ de ó laasunla, à yã sĩnda pínki dↄ̃.
\p
\v 21 Ma gbɛ̃ yenyĩdenↄ, tó ó laasun tɛni ó kù vĩro, ó swɛ̃̀ nigↄ̃ ditɛna Luda arɛ, 
\v 22 kũ ó yã kũ à dìtɛnↄ kũna, akũ ótɛn yã kũ àdi kɛnɛ nna kɛ yãi, óni pↄ́ kũ o gbɛ̀kaa e. 
\v 23 Yã kũ à dìtɛwɛrɛn dí: Ò a Nɛ́ Yesu Kirisi náani kɛ, ógↄ̃ yekↄ̃i lákũ à dìtɛwɛrɛ nà. 
\v 24 Gbɛ̃ kũ à yã kũ à dìtɛnↄ kũna kú a gũn, Luda pì kú ade gũn se. Ó dↄ̃ kũ à kú ó gũn a Nini kũ à kpàwá yãi.
\c 4
\s1 Nininↄ dↄ̃kↄ̃nɛnaa
\p
\v 1 Ma gbɛ̃ yenyĩdenↄ, àsun nini sĩnda pínki náani kɛro. À nininↄ tàasi ká à gwa, tó ò bò Luda kĩnaamɛ, zaakũ annabi ɛ́kɛnↄ dasi kũ̀ andunia gũn. 
\v 2 Yã kũ ani tó à Luda Nini dↄ̃n dí: Nini kũ à pì Yesu Kirisi sù bisãsiri ũ bò Luda kĩnaamɛ. 
\v 3 Nini kũ àdi zɛ kũ Yesuo lɛro dí bo Luda kĩnaaro. Kirisi ibɛrɛ kũ a mà àtɛn sun gwe. À kú andunia gũn kↄ̀.
\p
\v 4 Ma nɛ́ yenyĩdenↄ, Luda gbɛ̃nↄn á ũ, a zĩ̀i blè annabi ɛ́kɛ pìnↄa, zaakũ gbɛ̃ kũ à kú á gũn zↄ̃kↄ̃ de gbɛ̃ kũ à kú andunia gũnla. 
\v 5 Andunia gbɛ̃nↄmɛ ń ũ. Abire yãin òdi yã o andunia ágban, akũ andunia gbɛ̃nↄ dì ń yã ma. 
\v 6 Luda gbɛ̃nↄn ó ũ. Gbɛ̃ kũ à Luda dↄ̃ dì ó yã ma, gbɛ̃ kũ à de Luda pↄ́ ũro dì ó yã maro. Àkũ mɛ́ à tò ó Nini yãpurade dↄ̃kↄ̃nɛ kũ nini ɛ́kɛo.
\s1 Ludamɛ yenyĩde ũ
\p
\v 7 Ma gbɛ̃ yenyĩdenↄ, ògↄ̃ yekↄ̃i, zaakũ yenyĩ dì bo Luda kĩnaamɛ. Gbɛ̃ kũ à yenyĩ pì vĩ bi Luda nɛ́mɛ, à Luda dↄ̃. 
\v 8 Gbɛ̃ kũ à yenyĩ vĩro Luda dↄ̃ro, zaakũ Ludamɛ yenyĩde ũ. 
\v 9 Lákũ Luda a yenyĩ mↄ̀wɛrɛ gupuraa nàn dí: À a Nɛ́ mɛ̀n do légelege zĩ̀ andunia gũn, de ò wɛ̃̀ndi le kũ a gbãnao. 
\v 10 Yenyĩ pìin dí: Adi kɛ ókↄ̃nↄ mɛ́ ó ye Ludairo, Luda mɛ́ à yewái, akũ à a Nɛ́ zĩ̀ ó durunnanↄ kútɛkɛbↄ ũ. 
\v 11 Ma gbɛ̃ yenyĩdenↄ, lákũ Luda yewái lɛ nà, séde ògↄ̃ yekↄ̃i. 
\v 12 Gbɛ̃ke dí wɛ́ kɛ pla kũ Ludao zikiro, ama tó ó yekↄ̃i, Luda kú ó gũn, akũ a yenyĩ pì papana ó gũn.
\p
\v 13 Ó dↄ̃ kũ ó kú a gũn akũsↄ̃ à kú ó gũn, kũ à a Nini kpàwá yãi. 
\v 14 O è, a sèedadenↄn ó ũ, kũ De Luda a Nɛ́ zĩ̀ andunia Surabari ũ. 
\v 15 Gbɛ̃ kũ à ò gupuran kũ Yesu bi Luda Nɛ́mɛ, Luda kú a gũn, akũsↄ̃ à kú Luda gũn. 
\v 16 Ó Luda yenawái dↄ̃, akũ ó a náani vĩ.
\p Ludamɛ yenyĩde ũ. Gbɛ̃ kũ àdigↄ̃ yenyĩ vĩ kú Luda gũn, akũ Luda kú a gũn. 
\v 17 Pↄ́ kũ à tò yenyĩ pì papana ó gũnn dí: Ó swɛ̃̀ nigↄ̃ ditɛna yãkpatɛkɛgↄrↄ zĩmɛ. Zaakũ lákũ Kirisi de nà, ókↄ̃nↄ se, lɛn ó de lɛ andunia dí gũn. 
\v 18 Yenyĩ pìi dìgↄ̃ vĩna vĩro. Yenyĩ swáswa dì pɛ́ vĩnaa, zaakũ vĩna bi wɛ́tãmma yãmɛ. Vĩnade yenyĩ dìgↄ̃ swáswaro.
\p
\v 19 Ókↄ̃nↄ, ó yenyĩ vĩ, kũ Luda gĩnakɛ à yewái yãimɛ. 
\v 20 Tó gbɛ̃ pì á ye Ludai, akũ à zã̀ a Yesude dakei, ɛ́kɛdemɛ. Zaakũ gbɛ̃ kũ à ye a Yesude dake kũ à a èeiro, ani fↄ̃ àgↄ̃ ye Luda kũ adi a eroi yá? 
\v 21 Yã kũ à dìtɛwɛrɛn dí: Gbɛ̃ kũ à ye Ludai, séde àgↄ̃ ye a Yesude dakei.
\c 5
\s1 Luda Nɛ́ náanikɛnaa
\p
\v 1 Gbɛ̃ kũ àdi Yesu náani kɛ Arumasihu ũ, Luda mɛ́ à ade ì. Gbɛ̃ kũ à ye dei ye a nɛ́imɛ se. 
\v 2 Tó ó ye Ludai, akũ ó yã kũ à dìtɛnↄ kũna, abire mɛ́ à mↄ̀wɛrɛ kũ ó ye Luda nɛ́nↄi. 
\v 3 Zaakũ yena Ludai mɛ́ à de yã kũ à dìtɛnↄ kũna ũ. Yã kũ à dìtɛ pìnↄ de aso ũ sↄ̃ro. 
\v 4 Zaakũ gbɛ̃ kũ Luda a ì dì zĩ̀ ble anduniaamɛ. Ó ludanaanikɛna mɛ́ àdi tó ò zĩ̀ ble anduniaa. 
\v 5 Dí mɛ́ àdi zĩ̀ ble anduniaaa? Séde gbɛ̃ kũ à sì kũ Yesu bi Luda Nɛ́mɛ.
\s1 Yesu Kirisi sèedadenↄ
\p
\v 6 Yesu Kirisi pìin gbɛ̃ kũ à sù à da'itɛ kɛ̀ à a aru kↄ̀tɛ ũ. Adi kɛ da'itɛmɛ adoro, à da'itɛ kɛ̀ à a aru kↄ̀tɛ se. Luda Ninin a sèedade ũ, zaakũ àkũmɛ yãpurade ũ. 
\v 7 Sèedadenↄ kun mɛ̀n aakↄ̃mɛ. 
\v 8 Luda Nini kũ í pìio kũ aru pìio. Pↄ́ mɛ̀n aakↄ̃ pìnↄ pínki dokↄ̃nↄmɛ. 
\v 9 Lákũ odì bisãsiri sèedakɛna sí nà, Luda sèedakɛna de abirekũla, zaakũ Luda yã pìi ò a Nɛ́ yã musumɛ. 
\v 10 Gbɛ̃ kũ àdi Luda Nɛ́ náani kɛ sèedaa pì vĩ a swɛ̃̀ɛ gũn. Gbɛ̃ kũ adi Luda yã síro Luda pìi dìtɛ ɛ́kɛde ũmɛ, zaakũ adi yã kũ Luda ò a Nɛ́ musu síro. 
\v 11 Yã kũ à òon dí: Luda ó gba wɛ̃̀ndi kũ àdi lákaro, wɛ̃̀ndii pì sↄ̃ à kú a Nɛ́ kĩnaamɛ. 
\v 12 Gbɛ̃ kũ à Luda Nɛ́ vĩ wɛ̃̀ndi kũ àdi lákaro vĩ. Gbɛ̃ kũ à Nɛ́ pì vĩro wɛ̃̀ndii pì vĩro.
\s1 Wɛ̃̀ndi kũ àdi lákaro
\p
\v 13 Matɛn yã birenↄ oárɛ, ákↄ̃nↄ kũ átɛn Luda Nɛ́ náani kɛnↄ, de àgↄ̃ dↄ̃ kũ á wɛ̃̀ndi kũ àdi lákaro vĩ. 
\v 14 Pↄ́ kũ à tò ó swɛ̃̀ɛ dìgↄ̃ ditɛna Luda arɛn dí: Tó o pↄ́ wɛ́ kɛ̀a lákũ à pↄ yei nà, àdi sí kũoo. 
\v 15 Lákũ ó dↄ̃ kũ àdi ó wɛ́kɛ ma nà, ó dↄ̃ kũ pↄ́ kũ o wɛ́ kɛ̀aa pì o gĩnakɛ o lè kↄ̀.
\p
\v 16 Tó gbɛ̃ a Yesude dake è, àtɛn durunna kũ àdi ń kakatɛro kɛ, à wɛ́ kɛ de Luda a gba wɛ̃̀ndii. Durunna kũ àdi ń kakatɛron má tɛ́a. Durunna kũ àdi ń kakatɛ kun, adi kɛ abirekũn ma pì à wɛ́ kɛ a musuro. 
\v 17 Yãvãnikɛna sĩnda pínki bi durunnamɛ, ama durunna kũ àdi ń kakatɛro kun.
\p
\v 18 Ó dↄ̃ kũ gbɛ̃ kũ Luda a ì dìgↄ̃ kpɛ́ àgↄ̃ durunna kɛro, zaakũ Luda Nɛ́ dì a dãkpã, Setan dì fↄ̃ à ↄ naaro. 
\v 19 Ó dↄ̃ kũ Luda gbɛ̃nↄn ó ũ, bee kũ andunia pínki kú Setan ↄĩmɛ. 
\v 20 Ó dↄ̃ kũ Luda Nɛ́ sù, akũ à ó wɛ́ kɛ̃̀, de ò le ò Yãpurade dↄ̃. Ó kú Yãpurade pìi gũn kũ a Nɛ́ Yesu Kirisio. Àkũmɛ Luda yãpurade pì ũ. Àkũmɛ wɛ̃̀ndi kũ àdi lákaro ũ.
\p
\v 21 Ma nɛ́ yenyĩdenↄ, à laakari kɛ tãnanↄi.