\id NEH Nehemiah in Boko, Ross Jones 2/08
\ide UTF-8
\h Nɛɛmii
\toc1 Nɛɛmii
\toc2 Nɛɛmii
\toc3 Nɛɛ
\mt1 NƐƐMII
\imt1 Yã́ pↄ́ kú láɛ bee guuↄ
\ip Nɛɛmii lá yã́ pↄ́ kɛ̀ Ɛzala lá guuↄ gbɛa yã́ dàu a sìuwɛ̃ɛ. Nɛɛmii láá yã́ pↄ́ a kɛ̃̀ azĩa yã́ musu láɛ. Nɛɛmii ku sa'ona Ɛzala gↄↄɛ, Pɛɛsiↄ kí Aatasasa ìwaↄ doɛ. Kípi aà gbà zɛ́ aà gɛ Yelusalɛũ kɛkɛ kálɛ. (1.1-2.10) Kɛ́ à kà we, baa kɛ́ gbɛ̃eↄ íbɛlɛsɛ̀aànↄ, aà bùsu gbɛ̃eↄ dↄ̀aàlɛ, ↄ̃ à Yelusalɛũ bĩ́i kɛ̀kɛ a bò. (2.11-7.72) À zɛ̀ ń Ɛzalao gↄↄ pↄ́ aa kãaaa zↄ̃ↄ kɛ, ↄ̃ Ɛzala Lua ikoyã kyokɛ̀. Levii buiↄ yã́pi bↄↄlɛkɛ̀ gbɛ̃́ↄnɛ, ↄ̃ baade kɛ̀kɛ zɛ̀ ń Diio. (8.1-10.40) Wà yãeↄ gↄ̃̀gↄ̃ Isaili pↄ́ sù Yelusalɛũↄnɛ, (11.1-12.26) ↄ̃ Nɛɛmii dↄ̀aa Yelusalɛũ bĩ́i sakɛ̃a guu. (12.27-43) Bee gbɛa à kɛ̀kɛ Lua ikoyãeↄ zɛ́ kàlɛnɛ́. (12.44-13.31)
\ip Láɛ bee guu wá è Nɛɛmiiá ãiadeɛ. A wↄ́ↄ vĩ mɛ́ gbɛ̃maaɛ. Yã́ pↄ́ à su lɛ́ kɛ píi guu ì wabikɛ Luawa a yã́ musuɛ.
\c 1
\s1 Nɛɛmii Yelusalɛũ kã̀akɛa
\p
\v 1 Akalia nɛ́ Nɛɛmii yã́n kɛ: Aatasasa kpalablea wɛ̃̀ baode mↄ pↄ́ wì mɛ Kisele guu má kú kibɛ Susa mɛɛwiau. 
\v 2 Ɔ̃ ma dãuna Anani bↄ̀ Yuda bùsuu à mↄ̀ ń gbɛ̃eↄ. Ma yãlàlamá Yuda gbɛ̃́ kↄ̃na pↄ́ bↄ̀ zĩ̀zↄkɛuↄ ń Yelusalɛũo musu. 
\v 3 Aa wèa aa mɛ̀, gbɛ̃́ pↄ́ bↄ̀ zĩ̀zↄkɛu aa tà Yuda bùsuuↄ lɛ́ taasikɛ maamaaɛ, wàlɛ ń láanikɛ, asa Yelusalɛũ bĩ́i gbooaɛ, mɛ́ a bↄlɛ gbaↄ tɛ́kũa. 
\v 4 Kɛ́ ma yã́pi mà, ma zↄ̃lɛ, ↄ̃ wɛ́'i bↄ̀a. Ma ↄ́ↄlↄ̀ gↄↄpla, málɛ lɛye, málɛ wabikɛ Lua Musudewa 
\v 5 ma mɛ̀: N yã́ na Dii Lua Musude. Lua zↄ̃ↄ pↄ́ ì tó ń mɛ séenatan n ũ. Gbɛ̃kɛ guu n bàa ìↄ kú ń gbɛ̃́ pↄ́ yenzi aaìↄ n yãdilɛaↄ kũaↄ. 
\v 6 Wɛ́tɛ mapi n zↄ̀blenai. Swã́kpa wabi pↄ́ málɛ kɛma fãanɛ ń gwãasĩnao n zↄ̀blena Isailiↄnɛzi. Málɛ duuna pↄ́ wá kɛ̀nɛ o. Baa mapi ń ma de bɛdeↄ wa duunakɛ̀ sↄ̃ɛ. 
\v 7 Wa yãvãikɛ̀nɛ maamaaɛ, wi n yãdilɛaↄ dao, wi n ↄtondↄkĩi gwao, wá n ikoyã pↄ́ ń dìlɛ n zↄ̀blena Mↄiziɛ kũao. 
\v 8 To yã́ pↄ́ ń dìlɛ n zↄ̀blena Mↄiziɛɛ bee dↄngu. N mɛ̀ tó wa bↄ n kpɛ, ńyↄ̃ wá fãaa buipãleↄ guuɛ. 
\v 9 N mɛ̀ lↄ, tó wa ɛa suma, mɛ́ wá n yãdilɛaↄ kũa wálɛ zĩkɛwà, baa kɛ́ n wá yá e dṹnia lɛ́wa, ńyↄ̃ wá kãaa, ńyↄ̃ suwanↄ gu pↄ́ ń sɛ̀ n tↄ́ kuwàu.\f + \fr 1.9 \fr*\ft Iko 28.64, 30.2-5\ft*\f* 
\v 10 Gbɛ̃́piↄá n zↄ̀blenaↄnɛ, n gbɛ̃́ pↄ́ n ń bó ń n iko zↄ̃ↄo ń n gã̀sa gbãaoↄnɛ. 
\v 11 N yã́ na Dii, swãdↄ mapi n zↄ̀blena wabikɛai ń n zↄ̀blena pↄ́ n yã́ ì kɛnɛ́ na aa n vĩa vĩↄ wabikɛao. Mapi n zↄ̀blena ma daɛ ń gòmio gbã, kí i ma wɛgwa.
\p Gↄↄ bee sↄ̃ kípi vɛ̃ɛbↄlɛnan ma ũ.
\c 2
\s1 Kí Aatasasa Nɛɛmii zĩa Yelusalɛũ
\p
\v 1 Aatasasa kpalablea wɛ̃̀ baode mↄ pↄ́ wì mɛ Nisã guu kí ye vɛ̃ɛmi, ↄ̃ má sɛ̀ má kpàwà. A ma dↄ̃ ń oosisio yãao, 
\v 2 ↄ̃ à ma la à mɛ̀: Bↄ́yãi n oosìsii? Ńlɛ gyãkɛo. N pↄ mɛ́ yàa? Vĩa ma kũ maamaa, 
\v 3 ↄ̃ má òɛ̀: Lua n dↄ̃ ń aafiao, Záai! Ma oosìsi, asa wɛ̃́lɛ pↄ́ ma deziↄ mia kuu gↄ̃̀ bɛzia ũɛ. A bĩ́ibↄlɛ gbaↄ tɛ́kũa.\f + \fr 2.3 \fr*\ft 2Kia 25.8-10\ft*\f* 
\v 4 Ɔ̃ a òmɛɛ: Ń ye mà kɛ kpelewa ni? Ma wabikɛ̀ Lua Musudewa gĩa, 
\v 5 ↄ̃ má wèwà ma mɛ̀: Kí, tó à kɛ̀nɛ maa, mɛ́ mapi n zↄ̀blena ma yã́ kànguɛ, ma zĩ Yuda bùsu wɛ̃́lɛ pↄ́ ma deziↄ mia kuupi, kɛ́ mà e kɛkɛ kálɛ. 
\v 6 Kípi na zↄ̃lɛa aà saɛ, ↄ̃ à ma la à mɛ̀: Ńyↄ̃ kɛ we gↄↄ ũma ni? Gↄↄ kpele ńyↄ̃ sui? Kɛ́ kí wè ma gɛai, ↄ̃ ma gↄↄdìlɛɛ̀. 
\v 7 Má òɛ̀: Tó à kànguɛ, lákɛ̃ Uflata baale dↄaanaↄnɛ ǹ kpaa. Onɛ́ aa to mà pã́ ń bùsua e mà gɛ kaò Yuda bùsuu. 
\v 8 Lákɛ̃ n líkpɛ dↄ̃̀ana Asafaɛ lↄ. Oɛ̀ aà ma gba lí mà zɛgikĩi pↄ́ kú Lua kpɛ́ saɛ gbaↄ kɛò ń bĩ́ibↄlɛ gbaↄ ń kpɛ́ pↄ́ máↄ kuu pↄ́o. Ɔ̃ kí lá pↄ́ má gbɛ̀awaↄ kpàa, asa ma Lua ↄ kuamalaɛ. 
\v 9 Kí sosa badeↄ ń sↄ̃deↄ dàmɛɛ aa gɛmanↄ. Ɔ̃ ma gɛ Uflata baale dↄaanaↄ lè, ma kí láↄ kpàmá. 
\v 10 Kɛ́ Oloni gbɛ̃́ Sambala ń a ìwa Tobia, Amↄni buio mà gbɛ̃e mↄ̀ Isailiↄ gwea kã́fĩi, à kɛ̀nɛ́ ĩ́i maamaaɛ.
\p
\v 11 Kɛ́ ma ka Yelusalɛũ, ma kã́mabò gĩa gↄↄ àaↄ̃. 
\v 12 Ɔ̃ ma fɛlɛ gwãasĩna ń gbɛ̃eↄ, mi yã́ pↄ́ ma Lua dà ma sↄ̃u mà kɛ Yelusalɛũ o gbɛ̃eɛo. Ma di zàa'ĩna kpɛ, gbɛ̃́ kĩniↄ bɛ kɛ̀sɛ. 
\v 13 Ma bↄ Guzulɛ Bↄlɛu gwã́, ma mipɛ̀ Gbɛ̃gbon lↄ̀ↄwa ń Tufua Bↄlɛo. Málɛ Yelusalɛũ bĩ́i pↄ́ daaĩa gwagwa ń a bↄlɛ gbà tɛ́kũaↄ. 
\v 14 Ɔ̃ ma gɛ aɛ e Nibↄna Bↄlɛ ń kí íkalɛkĩio. Gue ku we, ma zàa'ĩna i fↄ̃ gɛ̃̀uo, 
\v 15 ↄ̃ má bɛ swa'ɛu gwã́, málɛ bĩ́i gwagwa. Ɔ̃ ma ɛa su, ma gɛ̃ Guzulɛ Bↄlɛu. 
\v 16 Gbãadeↄ gu pↄ́ ma gɛu ge yã́ pↄ́ má kɛ̀ dↄ̃o, asa mi yãe o Yudaↄnɛ gĩao, baa sa'onaↄ ge kíabuiↄ ge gbãadeↄ ge gbɛ̃́ kĩni pↄ́ aa zĩpi kɛↄ. 
\v 17 Ɔ̃ má ònɛ́: A taasi pↄ́ wá lé èó? Yelusalɛũ gↄ̃̀ bɛzia ũ, a bĩ́ibↄlɛↄ tɛ́kũa. À to wà ɛa bĩ́iboi lↄ, kɛ́ wásu wàↄ dɛ láanipↄ ũ lↄo yã́i. 
\v 18 Má ònɛ́ lↄ lá ma Lua ↄkùmala ń yã́ pↄ́ kí òmɛɛo. Ɔ̃ aa mɛ̀: Wà fɛlɛ na a boawa. Ɔ̃ aa nà zĩ maapiwa ↄplapla.
\p
\v 19 Kɛ́ Oloni gbɛ̃́ Sambala ń a ìwa Tobia, Amↄni buio ń Laalubu bui Gɛsɛũo a baomà, aa wá àlafiikɛ̀, aa sakàwágu aa mɛ̀: Bↄ́ álɛ kɛ wei? Álɛ bↄ kí yã́ kpɛ yↄ̃oo? 
\v 20 Ɔ̃ ma a zãsìmá ma mɛ̀: Lua Musude a wá daɛ ń gòmio. Wápiↄ aà zↄ̀blenaↄ, Yelusalɛũ bĩ́iboa wálɛ nawà kɛ. Ápiↄ sↄ̃ á baa ku lao. Á yã́ kú la lↄo, á tↄ́ àↄ dↄ gbɛ̃egu wɛ̃́lɛpi guu la lↄo.
\c 3
\s1 Yelusalɛũ bĩ́ibonaↄ
\p
\v 1 Sa'ona Ɛliasibu ń a gbɛ̃ sa'onaↄ ɛ̀a Sã Bↄlɛ bò. Aa a sakɛ̃̀, ↄ̃ aa a gbaↄ pɛ̀lɛpɛlɛ. Aa bĩ́i sakɛ̃̀ e za Basↄo Kalanga ń Ananɛli Kalangao. 
\v 2 An saɛ Yelikodeↄ bĩ́ibò. An saɛ Imɛli nɛ́ Zakuu bĩ́ibò. 
\v 3 Asenaa bɛdeↄ ɛ̀a Kpↄ̀ Bↄlɛ bò, aa a zaↄ dàda, aa a gbaↄ pɛ̀lɛpɛlɛ, aa a mↄↄ ń a gbã́aↄ dàu. 
\v 4 An saɛ Ulia nɛ́ Mɛlemↄ, Akozi tↄũna bĩ́i kɛ̀kɛ bò. Aà saɛ Bɛlɛkia nɛ́ Mɛsulaũ, Mɛsezabɛli tↄũna kɛ̀kɛ bò. Aà saɛ Baana nɛ́ Zadoki kɛ̀kɛ bò. 
\v 5 Aà saɛ Tekoadeↄ bĩ́i kɛ̀kɛ bò, kási an gbɛ̃zↄ̃ↄↄ gì zĩ gbãa pↄ́ dↄaana dànɛ́ kɛiɛ.
\p
\v 6 An saɛ Pasea nɛ́ Yoiada ń Besodia nɛ́ Mɛsulaũo Bↄlɛ Zi bò. Aa a zaↄ dàda aa a gbaↄ pɛ̀lɛpɛlɛ, aa a mↄↄ ń a gbã́aↄ dàu. 
\v 7 An saɛ Gabaↄ̃ↄ gbɛ̃́ Mɛlatia ń Mɛlↄnↄ gbɛ̃́ Yadↄ̃o bĩ́i kɛ̀kɛ bò ń Gabaↄ̃ↄdeↄ ń Mizipadeↄ e za Uflata baala dↄaana bɛ. 
\v 8 An saɛ Alaia nɛ́ Uziɛli pↄ́ ì vua zĩ kɛ bĩ́i kɛ̀kɛ bò. Aà saɛ tulalekɛna Anania kɛ̀kɛ bò e za bĩ́i yàasa kĩ́i. 
\v 9 Aà saɛ Hulu nɛ́ Lefaia, Yelusalɛũ kpɛdo kía, bĩ́i kɛ̀kɛ bò. 
\v 10 Aà saɛ Alumafa nɛ́ Yedaia bĩ́i pↄ́ bↄaa ń a bɛo kɛ̀kɛ bò. Aà saɛ Asabana nɛ́ Atusu kɛ̀kɛ bò. 
\v 11 Aliũ nɛ́ Malakia ń Paata Mↄabu nɛ́ Asubuo gupãle kɛ̀kɛ bò ń Kĩna Kalangao. 
\v 12 An saɛ Aloese nɛ́ Saluũ, Yelusalɛũ kpɛdo kía, bĩ́i kɛ̀kɛ bò sãnu ń a nɛnↄɛↄ. 
\v 13 Anuni ń Zanↄadeↄ Guzulɛ Bↄlɛ kɛ̀kɛ. Aa ɛ̀a bò aa a gbaↄ pɛ̀lɛpɛlɛ, aa a mↄↄ ń a gbã́aↄ dàu. Aa bĩ́i kɛ̀kɛ bò lↄ gã̀sĩsuu ↄ̀aa sↄo e à gɛ̀ pɛ̀ Pↄtuogbↄ̃ Bↄlɛwa. 
\v 14 Lekabu nɛ́ Malakia, Bɛtakɛlɛũ fã́ani kí, Pↄtuogbↄ̃ Bↄlɛ kɛ̀kɛ. À ɛ̀a bò, à a gbaↄ pɛ̀lɛpɛlɛ, à a mↄↄ ń a gbã́aↄ dàu. 
\v 15 Kↄloze nɛ́ Saluũ, Mizipa fã́ani kí, Nibↄna Bↄlɛ kɛ̀kɛ. À ɛ̀a bò a dↄ̀, à a gbaↄ pɛ̀lɛpɛlɛ, à a mↄↄ ń a gbã́aↄ dàu. À bĩ́i pↄ́ kú Siloe Íkalɛkĩi saɛ kɛ̀kɛ bò lↄ za kibɛ kaa saɛ e à gɛ̀ pɛ̀ Davidi Wɛ̃́lɛ dɛdɛkĩiwa. 
\v 16 A gbɛa Azebu nɛ́ Nɛɛmii, Bɛzuu fã́ani kpɛdo kí, bĩ́i kɛ̀kɛ bò e Davidi bɛ gɛvĩkĩi saɛ ń íkalɛkĩi pↄ́ wa yↄ̃̀o ń Nɛgↄ̃naↄ Kpɛ́o.
\p
\v 17 A gbɛa Bani nɛ́ Leuũ ń Levii buiↄ bĩ́i kɛ̀kɛ bò. A gbɛa Asabia, Kɛila fã́ani kpɛdo kí, a fã́ani bĩ́i kɛ̀kɛ bò. 
\v 18 A gbɛa Enada nɛ́ Bavai, Kɛila fã́ani kpɛdo kí, a fã́ani bĩ́i kɛ̀kɛ bò. 
\v 19 Aà saɛ Yesua nɛ́ Ezɛɛ, Mizipa kí, bĩ́i pↄ́ bↄaa ń gↄ̃kɛbↄkpɛo kɛ̀kɛ bò e bĩ́i golawa. 
\v 20 A gbɛa Zabai nɛ́ Baluku kↄaikɛ̀ à bĩ́i kɛ̀kɛ bò za golawa e à gɛ̀ pɛ̀ sa'onkia Ɛliasibu bɛ kpɛɛlɛwa. 
\v 21 A gbɛa Ulia nɛ́ Mɛlemↄ, Akozi tↄũna gupãle kɛ̀kɛ bò za Ɛliasibu bɛ kpɛɛlɛ e aà ua lɛ́wa.
\p
\v 22 A gbɛa sa'ona pↄ́ kãi ń Yelusalɛũↄ bĩ́i kɛ̀kɛ bò. 
\v 23 A gbɛa Bɛ̃yãmɛɛ ń Asubuo bĩ́i pↄ́ bↄaa ń ń bɛo kɛ̀kɛ bò. A gbɛa Maasea nɛ́ Azalia, Anania tↄũna bĩ́i pↄ́ kú a bɛ saɛ kɛ̀kɛ bò. 
\v 24 A gbɛa Enada nɛ́ Binui gupãle kɛ̀kɛ bò za Azalia bɛ e à gɛ̀ pɛ̀ bĩ́i golawa. 
\v 25 Uzai nɛ́ Palala bĩ́i kɛ̀kɛ bò za golawa e kalanga pↄ́ bↄaa ń kibɛo dakpɛunaↄ ua saɛ. A gbɛa Palↄsi nɛ́ Pedaia 
\v 26 ń Lua ua zĩkɛna pↄ́ kú Ofɛli sĩ̀sĩ musuↄ bĩ́i kɛ̀kɛ bò Í Bↄlɛ kpɛɛlɛ gukpɛ oi e à gɛ̀ pɛ̀ kalangapiwa.
\p
\v 27 A gbɛa Tekoadeↄ bĩ́i kɛ̀kɛ bò za kalanga zↄ̃ↄpi saɛ e sĩ̀sĩpi bĩ́iwa. 
\v 28 Sa'onaↄ bĩ́i pↄ́ kú Sↄ̃́ Bↄlɛ saɛ kɛ̀kɛ bò, baade ń bĩ́i pↄ́ kú a bɛ saɛo. 
\v 29 A gbɛa Imɛɛ nɛ́ Zadoki bĩ́i pↄ́ kú a bɛ saɛ kɛ̀kɛ bò. A gbɛa Sekania nɛ́ Semaia pↄ́ dɛ Gukpɛ Bↄlɛ dↄ̃̀ana ũ bĩ́i kɛ̀kɛ bò. 
\v 30 A gbɛa Selemia nɛ́ Anania ń Zalafa nɛgↄ̃ɛ soolode Anunio gupãle kɛ̀kɛ bò. A gbɛa Bɛlɛkia nɛ́ Mɛsulaũ bĩ́i pↄ́ kú a kpɛ́ saɛ kɛ̀kɛ bò. 
\v 31 A gbɛa vuazĩkɛna Malakia bĩ́i kɛ̀kɛ bò e Lua ua zĩkɛnaↄ ń laatanaↄ bɛ Mifɛka Bↄlɛ saɛ e à gɛ̀ pɛ̀ kpɛ́ pↄ́ kú bĩ́i golawa. 
\v 32 Vuazĩkɛnaↄ ń laatanaↄ mɛ́ bĩ́i kɛ̀kɛ bò kpɛ́ pↄ́ kú bĩ́i golawa ń Sã Bↄlɛo zãnguo.
\c 4
\s1 Íbɛlɛsɛa ń Yelusalɛũ bĩ́ibonaↄ
\p
\v 1 Kɛ́ Sambala mà wá Yudaↄ wálɛ Yelusalɛũ bĩ́i bo, aà pↄ pà, aà za fɛ̃̀ maamaa, ↄ̃ àlɛ wá awiambↄ. 
\v 2 A ò a gbɛ̃́ↄ ń Samali zĩgↄ̃ↄ wáa à mɛ̀: Bↄ́ Yuda gianapiↄ lɛ́ kɛɛɛɛ? Aa fↄ̃ ɛa bĩ́ipi boe? Aa sa'o aai zĩpi nɛ gↄↄ do nia? Aa fↄ̃ wɛ̃́lɛpi vu ń gbɛ pↄ́ tɛkũ̀ à dàaĩpiↄe? 
\v 3 Amↄni bui Tobia ku aà saɛ, ↄ̃ à mɛ̀: Bĩ́i pↄ́ aalɛ bopi, tó gbɛ̃gbona dɛ̀dɛwà, a gbɛↄ gbooɛ fá!
\p
\v 4 Ɔ̃ ma mɛ̀: Wá Lua, wá yãma, asa aa nifɛ̃̀wáziɛ. Tó wá awiana pↄ́ aalɛ bↄ wi ń musu. To wà ń kṹkũ wà táńnↄ zĩ̀zↄↄ ũ. 
\v 5 Ńsu láka ń tàaeↄlao. Ńsu ǹ ń duuna bãdɛo, asa aa bĩ́ibonaↄ sↄ̃̀sↄ̃ɛ. 
\v 6 Màa wa bĩ́ipi bò e à pɛ̀kↄ̃wa mɛ́ a lɛsĩ kà guo, asa gbɛ̃́ↄ lɛ́ zĩpi kɛ ń nↄ̀sɛmɛndooɛ.
\p
\v 7 Kɛ́ Sambala ń Tobiao ń Laalubuↄ ń Amↄniↄ ń Asedodadeↄ mà Yelusalɛũ bĩ́ikɛkɛa lɛ́ gɛ́ aɛ mɛ́ gufooↄ lɛ́ tata, an pↄ pà maamaa. 
\v 8 Ɔ̃ aa lɛkpàaĩ ḿpii, aa mɛ̀ wa mↄ lɛ́lɛ Yelusalɛũwa, wi yãkele liańzi. 
\v 9 Ɔ̃ wa wabikɛ̀ wá Luawa, mɛ́ wa gudↄ̃anaↄ dìlɛdilɛ fãanɛ ń gwãasĩnao an yã́i. 
\v 10 Ɔ̃ wá Yudaeↄ mɛ̀: Asosɛnaↄ yɛ̃̀ɛɛ lɛ́ láa. Gbɛ pↄ́ wa gbòo wa dàaĩ zↄ̃ↄ, wá fↄ̃ bĩ́ipi bo wà a midɛo. 
\v 11 Wá ibɛɛↄ mɛ̀, e wàↄ gɛ́ ń yã́ dↄ̃i, wa siwágu, wi wá dɛdɛɛ, zĩpi i gↄ̃ kpaa zɛ́u. 
\v 12 Wá gbɛ̃́ pↄ́ kú ń saɛↄ mↄ òwɛ̃ɛ à kà gɛ̃n kwi aa mɛ̀: Aalɛ bↄ gupiiu, aa ye mↄ lɛ́lɛiwáɛ. 
\v 13 Ɔ̃ ma gbɛ̃́ↄ dìlɛdilɛ bĩ́ifooↄ guu ń a gu pↄ́ ɛɛũↄ. Ma ń dílɛdilɛ daɛdaɛ, baade ń a fɛ̃ndao ń a sↄ̃nao ń a sáo. 
\v 14 Kɛ́ ma wɛtɛ̀ guↄi, ma fɛlɛ ò kíabuiↄnɛ ń gbãadeↄ ń gbɛ̃́ kĩniↄ ma mɛ̀: Ásu vĩakɛnɛ́o. Àↄ dↄ̃ kɛ́ Dii zↄ̃ↄ, ì tó ń mɛ séenata. À zĩka á gbɛ̃́ↄnɛ ń á nɛgↄ̃ɛↄ ń á nɛnↄɛↄ ń á naↄ ń á bɛↄ. 
\v 15 Kɛ́ wá ibɛɛↄ mà Lua ń fú, a tò wa ń lɛkpaaĩ feena mà, ↄ̃ wápii wa ɛa na bĩ́iboawa, baade ń a zĩo.
\p
\v 16 Za gↄↄ bee ma gbɛ̃́ↄ kpaalɛ̀ lɛɛ pla. Gbɛ̃eↄ lɛ́ zĩkɛ mɛ́ gbɛ̃eↄ sↄ̃na kũa ń sɛ̀ngbaoo ń sáo ń mↄ̀ ulao daa. Kíaↄ sĩ gbɛ̃́ pↄ́ lɛ́ bĩ́iboↄ kpɛ. 
\v 17 Gbɛ̃́ pↄ́ aso sɛaↄ aso kũa ↄ do, gↄ̃kɛbↄ ↄ do. 
\v 18 Bĩ́ibonaↄ fɛ̃nda dↄa ń pi ḿpii. Kuupɛna ìↄ ku ma saɛ. 
\v 19 Ɔ̃ má ò kíabuiↄnɛ ń gbãadeↄ ń gbɛ̃́ kĩniↄ: Zĩ dasi mɛ́ bĩ́ipi gbã̀a, ↄ̃ wa kↄ̃kpaalɛ̀kpaalɛ a lɛ́u. 
\v 20 Gu pↄ́ á mà wàlɛ kuupɛu, à kãaawázi we, wá Lua i zĩkawɛ̃ɛ. 
\v 21 Ɔ̃ wa ɛa na zĩwa, gbɛ̃eↄ sↄ̃na kũa za guluuluui e saanaↄ gɛ̀ bìlɛò. 
\v 22 Zĩbeezĩ má ò gbɛ̃́ↄnɛ: Á baade lí i Yelusalɛũ la ń a ìwaↄ, kɛ́ aàli e gudↄ̃a gwã́, aàli zĩkɛ fãanɛ. 
\v 23 Mapi ń ma dãunaↄ ń ma ìwaↄ ń gudↄ̃ana pↄ́ kumanↄↄ, wili wá pↄkasa bↄo, baade ìↄ a gↄ̃kɛbↄ kũa a ↄplaauɛ.
\c 5
\s1 Nɛɛmii zɛa ń taasideↄ
\p
\v 1 Gↄↄ bee wá Yudaeↄ ń ń naↄ lɛ́ wiilɛ ń gbɛ̃́ↄwa maamaa. 
\v 2 An gbɛ̃eↄ mɛ̀: Wápiↄ ń wá nɛ́ↄ, wá dasi. Wá ye pↄ́wɛnai wà pↄble, wí e wàↄ aafia. 
\v 3 An gbɛ̃eↄ mɛ̀ lↄ: Nↄana ku, ↄ̃ wa wá buaↄ ń wá vɛ̃ɛbuↄ ń wá kpɛ́ↄ tↄ̀ↄma dìlɛ pↄ́wɛna yã́i. 
\v 4 An gbɛ̃eↄ mɛ̀: Wa ↄ̃a sɛ̃̀a, kɛ́ wà wá buaↄ ń wá vɛ̃ɛbuↄ falu kpa kíwa yã́i. 
\v 5 Baa tó wá bui doũɛ, mɛ́ wá nɛ́ↄ doũ ń ń nɛ́ↄ, wálɛ wá nɛ́ↄ yiamá zↄↄ ũ teasi. Wá nɛnↄɛeↄ lɛ́ zↄble kↄ̀, mɛ́ wá gbãa i ka wà pↄe kɛo, asa wá buaↄ ń wá vɛ̃ɛbuↄ gↄ̃̀ ń pↄ́ ũɛ.
\p
\v 6 Kɛ́ ma ń wiipi mà ń gbɛ̃́ↄ káala pↄ́ aa kɛ̀o, ma pↄ pà maamaa. 
\v 7 Ma yã́pi wàaipà ma sↄ̃ guu, ↄ̃ ma zↄadↄ̀ kíabuiↄ ń gbãadeↄwa má ònɛ́: Á baade lɛ́ ↄ'idia a gbɛ̃́deeɛ.\f + \fr 5.7 \fr*\ft Bↄa 22.24\ft*\f* Ɔ̃ ma mɛ̀ wà bíla kãaa an yã́pi yã́i. 
\v 8 Má ònɛ́: Wa wá gbɛ̃́ Yuda pↄ́ gↄ̃̀ buipãleↄ pↄ́ ũↄ bò wá gbãa lɛ́u, ↄ̃ á tò á gbɛ̃́ↄ lɛ́ ńzĩa yiawá lↄa? Ɔ̃ aa nílɛ kpɛ̃́, aai yãe e òo. 
\v 9 Ɔ̃ ma ɛa ma mɛ̀: Yã́ pↄ́ álɛ kɛpi maao. Àↄ wá Lua vĩa vĩ, kɛ́ wá ibɛɛ buipãleↄ su wá sↄ̃́sↄ̃o yã́i. 
\v 10 Mapi ń ma daɛↄ ń ma ìwaↄ, wa ↄ̃a ń pↄ́wɛnao sɛ̃̀anɛ́ sↄ̃. À ↄ'idianɛ́ tó sa, 
\v 11 í ń buaↄ ń ń vɛ̃ɛbuↄ ń ń kù kpɛ́ↄ ń ń kpɛ́ↄ sↄaanɛ́ ń pↄ́ basↄode pↄ́ álɛ símá ↄ'i ũo, ↄ̃a ń pↄ́wɛnao ń vɛ̃ɛo ń nísio píi. 
\v 12 Ɔ̃ aa mɛ̀: Wá sↄaanɛ́, wá pↄe wɛɛlɛmá lↄo. Wá kɛ lá ń òwa. Ɔ̃ ma sa'onaↄ sìsi, má tò gbɛ̃́piↄ lakpà ńzĩala lá aa a lɛgbɛ̃̀wa. 
\v 13 Ma a ulada kpòɛ ma mɛ̀: Lua gbɛ̃́ pↄ́ i zĩkɛ lɛ́ pↄ́ á gbɛ̃̀piwao kpoɛ màa, i aà bɛ ń aà àizɛɛↄ siwà. Lua aà kpoɛ aà gↄ̃ gii màa. Bíla mɛ̀: Ãmi! Ɔ̃ aa Dii sáaukpà. Ɔ̃ gbɛ̃́ↄ kɛ̀ lá aa a lɛgbɛ̃̀wa.
\p
\v 14 Bee gbɛa za gↄↄ pↄ́ Aatasasa ma dilɛ Yuda bùsu dↄaana ũ a kpalablea wɛ̃̀ baode zĩ́ e a wɛ̃̀ baakwi ń plaode guu, à kà wɛ̃̀ kuɛpla, mapi ń ma daɛↄ wi dↄaanakɛblɛ bleo. 
\v 15 Dↄaana káau pↄ́ dↄ̀aamɛɛↄ aso gbia tↄ̃̀ gbɛ̃́ↄwa, aa pↄblea ń vɛ̃ɛo sì baadewa ń ã́nusu ↄwatɛ̃ blablao. An ìwaↄ gbãablèmá lↄ. Mapi sↄ̃ mi kɛ màao, asa má Lua vĩa vĩ. 
\v 16 Ma mɛkpà bĩ́ipi boawa, mi tↄↄlɛ sɛ́ ma pↄ́ ũo. Ma ìwaↄ kãaaa we zĩpi yã́iɛ. 
\v 17 Yudaↄ ìↄ pↄble ma bɛ gbɛ̃ↄn basoplakwikwi, gbãadeↄ ń gbɛ̃́ pↄ́ bↄ̀ bui pↄ́ liaawáziↄ kĩ́iↄ. 
\v 18 Lá gu lɛ́ dↄ wìↄ zu kɛkɛmɛɛ mɛ̀ndodo ń sã mɛkpaaↄ mɛ̀n soolosoolo ń koↄ, mɛ́ wìↄ vɛ̃ɛ ba zↄ̃ↄzↄ̃ↄ gↄↄ kwi ń gↄↄ kwio. Gia ń beeo mi dↄaanakɛblɛ gbɛamáo, asa zĩ pↄ́ gbɛ̃́ beeↄ lɛ́ kɛ zↄ̃ↄ. 
\v 19 Ma Lua, yãmaa pↄ́ má kɛ̀ gbɛ̃́ beeↄnɛ píi àↄ dↄngu.
\c 6
\s1 Nɛɛmii ibɛɛↄ wɛɛlɛ ↄ̃nↄkɛaɛ̀
\p
\v 1 Ma bĩ́ibò má làa, a fòo ku guei lↄo, ãma mi a bↄlɛ gbaↄ pɛ́lɛpɛlɛ gĩao. Kɛ́ Sambala ń Tobiao ń Laalubu bui Gɛsɛũo ń ma ibɛɛ kĩniↄ a baomà, 
\v 2 Sambala ń Gɛsɛũpio lɛ́kpãsãkɛ̀mɛɛ aa mɛ̀ mà mↄ dańlɛ Onↄ guzulɛ wɛ̃́lɛe guu. Vãi ↄ̃ aalɛ wɛɛlɛmanↄ. 
\v 3 Ma gbɛ̃́ↄ zĩ̀má ma mɛ̀: Málɛ zĩ zↄ̃ↄ kɛɛ, má e mà mↄo. Má e mà zĩpi to we mà mↄ á kĩ́io. 
\v 4 Aa lɛ́kpãsãpi kɛ̀mɛɛ gɛ̃n síiↄ̃ɛ, mɛ́ ma yã́pi zãsìmá màa píi. 
\v 5 A gɛ̃n sↄode Sambala a ìwae zĩ̀a. A taala pↄ́ wi kã́n'ↄ nawào kũa. 
\v 6 Wa kɛ̃̀ lápi guu wà mɛ̀: Wà yãe feena mà buipãleↄ kĩ́i, ↄ̃ Gɛsɛũ mɛ̀ sĩanaɛ. À mɛ̀ mpi ń Yuda kĩniↄ a zɛò à bↄ kí yã́ kpɛɛ. A yã́i álɛ bĩ́ipi boi. Wà mɛ̀ lↄ ń ye ǹ gↄ̃ Yudaↄ kía ũɛ, 
\v 7 ↄ̃ n ãnabiↄ dìlɛ aa o Yelusalɛũ ḿmɛ ń dɛ ń kía ũ. Kí a yã́pi ma. Ayãmɛto mↄ wà lɛkpaaĩ. 
\v 8 Ɔ̃ ma lɛ́kpãsãkɛ̀ɛ̀ ma mɛ̀: Yã́ pↄ́ ńlɛ o kuo. Ḿmɛ n yã́pi ò nzĩawa. 
\v 9 Ampii aa ye vĩa ma kũ aa mɛ̀ wá ↄ a gↄ̃ dↄwáziɛ, wá e zĩpi midɛo. Ma Lua, ma ↄ gba gbãa.
\p
\v 10 Gↄↄewa ma gɛ Delaia nɛ́ Semaia, Mɛtabɛli tↄũna bɛ, asa à azĩa yè a kpɛ́u. À mɛ̀: Wà kpaaũ Lua kpɛ́u, wí a gbatawálɛ, asa gbɛ̃́ↄ lɛ́ mↄ́ n dɛiɛ. Aa mↄ n dɛi gwã́aɛ. 
\v 11 Ɔ̃ ma mɛ̀: Ma taa ì bàalɛa? Ma taa a fↄ̃ gɛ ulɛ Lua kpɛ́u mazĩa misia yã́ia? Má gɛo. 
\v 12 Má dↄ̃ mazĩawa aà yã́pi i bↄ Lua kĩ́io. À ãnabikɛpi kɛ̀ ma yã́ musu, kɛ́ Tobia ń Sambalao fĩabòɛ̀ yã́iɛ. 
\v 13 Màa à fĩabòɛ̀, kɛ́ vĩa e ma kũ mà duunakɛ mà gɛ́ we, aai gbasa ma tↄ́ ↄ̃̀ↄkpa aa ma sↄ̃́sↄ̃. 
\v 14 Ma Lua, to Tobia ń Sambalao yãkɛapi àↄ dↄngu. To nↄɛ ãnabi Nↄadia yã́ àↄ dↄngu lↄ ń ãnabi kĩni pↄ́ aa ye vĩa ma kũↄ.
\s1 Yelusalɛũ bĩ́i midɛa
\p
\v 15 Gↄↄ blakwi ń plao gbɛa wa bĩ́ipi mìdɛ mↄ pↄ́ wì mɛ Ɛlulu gↄↄ baasↄodezĩ. 
\v 16 Kɛ́ wá ibɛɛↄ a baomà, mɛ́ bui pↄ́ liaawáziↄ wɛsìɛ, an kã́ gà, aa dↄ̃̀ sa kɛ́ wa zĩpi kɛ̀ ń wá Lua gbãaoɛ. 
\v 17 Gↄↄbeezĩ Yuda kíabuiↄ lɛ́ lá kpã́sã Tobiaɛ mↄ̀ↄmↄↄ, mɛ́ Tobiapi lɛ́ kpã́sãnɛ́. 
\v 18 Yudaↄ yãyèaànↄ dasi, asa Ala nɛ́ Sekania mɛ́ aà ã̀nsue ũ, mɛ́ Bɛlɛkia nɛ́ Mɛsulaũ mɛ́ Tobiapi nɛ́ Yohanani ã̀nsue ũ. 
\v 19 Aaì aà sáaukpa ma wáa lↄ, ↄ̃ aaì ɛa ma yã́ dau siuɛ̀. Tobiapi láↄ kpã̀sãmɛɛ lↄ, kɛ́ vĩa e ma kṹ.
\c 7
\p
\v 1 Kɛ́ wà bĩ́ibò mɛ́ ma a bↄlɛ gbaↄ pɛ̀lɛpɛlɛ, wà bĩ́ibↄlɛdↄ̃anaↄ ń lɛ̀sinaↄ ń Levii buiↄ dìlɛ. 
\v 2 Ɔ̃ ma a dãuna Anani dìlɛ Yelusalɛũ gbɛ̃zↄ̃ↄ ũ ń kibɛ ziia Ananiao, asa gbɛ̃́ náaideɛ. A Lua vĩa vĩ dɛ gbɛ̃́ dasidela. 
\v 3 Má ònɛ́: Wasuli Yelusalɛũ bↄlɛ gbaↄ wɛ̃o e ĩatɛ̃ gɛ lí gbãakũ. Wàli zɛtata wà gbã́aↄ dau e bĩ́ibↄlɛdↄ̃anaↄ tá. Wà Yelusalɛũdeↄ dilɛdilɛ gudↄ̃anaↄ ũ lↄ, an gbɛ̃eↄ aaↄ ku gudↄ̃akĩi, an gbɛ̃eↄ ń bɛ saɛ. 
\v 4 Wɛ̃́lɛpi zↄ̃ↄ mɛ́ a bàlumaↄ vĩ, mɛ́ gbɛ̃́ pↄ́ kú weↄ bílao. Wi e ɛ̀a a kpɛ́ↄ dↄ̀dↄ yãao. 
\v 5 Ma Lua làasoo dàmɛɛ ma sↄ̃u, ↄ̃ ma kíabuiↄ kã̀aa ń gbãadeↄ ń gbɛ̃́ kĩniↄ píi, kɛ́ wà ń tↄ́ dalau ń buiwa yã́i.
\p
\v 6 Babɛli kí Nɛbukanɛza Isailiↄ kũ̀kũ zĩ̀zↄↄ ũ yãa, à tàńnↄ Babɛli. An gbɛ̃́ pↄ́ bↄ̀ zĩ̀zↄkɛpiu aa sù Yelusalɛũ ń Yuda bùsuo, baade ń a bɛoↄn kɛ: 
\v 7 Aa sù ń Zolobabɛlio ń Yesuao ń Nɛɛmiio ń Azaliao ń Laamiao ń Naamanio ń Maadoseo ń Bilisão ń Misipaao ń Bigivaio ń Leuũo ń Baanao sãnu.
\p Isaili gↄ̃ɛ pↄ́ sùpiↄ naoan kɛ: 
\v 8 Palↄsi buiↄ gbɛ̃ↄn ↄ̀aasↄsↄo lɛɛ pla ń baswaaↄ̃kwi ń plao (2.172). 
\v 9 Sefatia buiↄ gbɛ̃ↄn ↄ̀aa do ń baswaaↄ̃kwi ń plao (372). 
\v 10 Ala buiↄ gbɛ̃ↄn ↄ̀aa àaↄ̃o ń blakwi ń plao (652). 
\v 11 Paata Mↄabu bui pↄ́ dɛ Yesua ń Yoabuo buiↄ ũↄ gbɛ̃ↄn ↄ̀aasↄsↄo lɛɛ pla ń ↄ̀aa síiↄ̃ ń bao plasaio (2.818). 
\v 12 Elaũ buiↄ gbɛ̃ↄn ↄ̀aa soolo ń blakwi ń síiↄ̃o (1.254). 
\v 13 Zatu buiↄ gbɛ̃ↄn ↄ̀aa síiↄ̃ ń blasↄoo (845). 
\v 14 Zakai buiↄ gbɛ̃ↄn ↄ̀aa àaↄ̃ ń baswaaↄ̃o (760). 
\v 15 Binui buiↄ gbɛ̃ↄn ↄ̀aa àaↄ̃ ń blakwi plasaio (648). 
\v 16 Bebai buiↄ gbɛ̃ↄn ↄ̀aa àaↄ̃ ń baasↄo ń àaↄ̃o (628). 
\v 17 Azegada buiↄ gbɛ̃ↄn ↄ̀aasↄsↄo lɛɛ pla ń ↄ̀aa do ń basoolo ń plao (2.322). 
\v 18 Adonikaũ buiↄ gbɛ̃ↄn ↄ̀aa àaↄ̃ ń bàaↄ̃sↄo ń plao (667). 
\v 19 Bigivai buiↄ gbɛ̃ↄn ↄ̀aasↄsↄo lɛɛ pla ń bàaↄ̃sↄo ń plao (2.067). 
\v 20 Adini buiↄ gbɛ̃ↄn ↄ̀aa àaↄ̃ ń bàaↄ̃ sↄosaio (655). 
\v 21 Atee pↄ́ dɛ Ezekia bui ũ buiↄ gbɛ̃ↄn basↄo plasai (98). 
\v 22 Asuũ buiↄ gbɛ̃ↄn ↄ̀aa do ń basoolosↄo ń àaↄ̃o (328). 
\v 23 Bezai buiↄ gbɛ̃ↄn ↄ̀aa do ń basoolosↄo mɛ̀ndosaio (324). 
\v 24 Alifi buiↄ gbɛ̃ↄn basↄokwi ń plao (112). 
\v 25 Gabaↄ̃ↄ buiↄ gbɛ̃ↄn basↄo sↄosai (95). 
\v 26 Bɛtɛlɛũdeↄ ń Nɛtofadeↄ gbɛ̃ↄn ↄ̀aa do kuɛplasai (188). 
\v 27 Anatodeↄ gbɛ̃ↄn basoolosↄo ń àaↄ̃o (128). 
\v 28 Bɛtazamavɛdeↄ gbɛ̃ↄn bla ń plao (42). 
\v 29 Kiliayaaliũdeↄ ń Kefiladeↄ ń Beelodeↄ gbɛ̃ↄn ↄ̀aa àaↄ̃ ń basopla ń àaↄ̃o (743). 
\v 30 Lamadeↄ ń Gɛbadeↄ gbɛ̃ↄn ↄ̀aa àaↄ̃ ń bao ń mɛ̀ndoo (621). 
\v 31 Mimasadeↄ gbɛ̃ↄn basoolo ń plao (122). 
\v 32 Bɛtɛlideↄ ń Aideↄ gbɛ̃ↄn basoolo ń àaↄ̃o (123). 
\v 33 Nɛbo pãle buiↄ gbɛ̃ↄn blakwi ń plao (52). 
\v 34 Elaũ pãle buiↄ gbɛ̃ↄn ↄ̀aa soolo ń blakwi ń síiↄ̃o (1.254). 
\v 35 Aliũ buiↄ gbɛ̃ↄn ↄ̀aa do ń basooloo (320). 
\v 36 Yelikodeↄ gbɛ̃ↄn ↄ̀aa do ń basoplasↄoo (345). 
\v 37 Lodideↄ ń Adidadeↄ ń Onↄdeↄ gbɛ̃ↄn ↄ̀aa àaↄ̃ ń basoolo ń mɛ̀ndoo (721). 
\v 38 Senaadeↄ gbɛ̃ↄn ↄ̀aasↄsↄo lɛɛ àaↄ̃ ń ↄ̀aa síiↄ̃ ń basoolokwio (3.930).
\p
\v 39 Sa'ona bui pↄ́ sùↄn kɛ: Yesua bui Yedaia buiↄ gbɛ̃ↄn ↄ̀aa sↄo baasↄo ń plao sai (973). 
\v 40 Imɛɛ buiↄ gbɛ̃ↄn ↄ̀aa sↄo ń blakwi ń plao (1.052). 
\v 41 Pasuu buiↄ gbɛ̃ↄn ↄ̀aa soolo ń blasↄo ń plao (1.247). 
\v 42 Aliũ buiↄ gbɛ̃ↄn ↄ̀aa sↄo ń gɛ̃o ń plao (1.017).
\p
\v 43 Levii bui pↄ́ sùↄn kɛ: Odeva bui Yesua ń Kamiɛlio buiↄ gbɛ̃ↄn bàaↄ̃kwi ń síiↄ̃o (74). 
\v 44 Asafa bui lɛ̀sinaↄ gbɛ̃ↄn basoplasↄo ń àaↄ̃o (148). 
\v 45 Saluũ ń Ateeo ń Talemↄo ń Akubuo ń Atitao ń Sobaio bui bĩ́ibↄlɛdↄ̃anaↄ gbɛ̃ↄn basopla plasai (138).
\p
\v 46 Lua ua zĩkɛnaↄá gbɛ̃́ɛ beeↄ buiↄnɛ: Ziha, Asufa, Tabao, 
\v 47 Kelosi, Siaa, Padoni, 
\v 48 Lebana, Agaba, Salemai, 
\v 49 Anana, Gideli, Gaaa, 
\v 50 Leaia, Lezini, Nɛkoda, 
\v 51 Gazaũ, Uza, Pasea, 
\v 52 Besai, Mɛuniũ, Nɛfusiũ, 
\v 53 Babuku, Akufa, Aluu, 
\v 54 Bazelu, Mɛida, Aasa, 
\v 55 Baakosi, Sisela, Tɛma, 
\v 56 Nɛzia ń Atifao.
\p
\v 57 Salomↄↄ zↄ̀blena buiↄá gbɛ̃́ɛ beeↄ buiↄnɛ: Sotai, Sofɛlɛ, Peluda, 
\v 58 Yala, Daakↄ̃, Gideli, 
\v 59 Sefatia, Atili, Pokɛlɛ Azebaiũ ń Amↄo. 
\v 60 Lua ua zĩkɛnapiↄ ń Salomↄↄ zↄ̀blena buipiↄ gbɛ̃ↄn ↄ̀aa pla swaaↄ̃saiɛ (392).
\p
\v 61 Gbɛ̃eↄ bↄ̀ Tɛmɛla ń Tɛlaasao ń Kelubuo ń Adↄ̃o ń Imɛɛo, ↄ̃ aai e ń buibↄkĩi ↄ̀lↄnɛ́o, tó Isailiↄn ń ũ. 
\v 62 Delaia ń Tobiao ń Nɛkodao buiↄnɛ, aa gbɛ̃ↄn ↄ̀aa àaↄ̃ ń bla ń plaoɛ (642). 
\v 63 Sa'ona bui pↄ́ dɛ Ɔbaia ń Akozio ń Baazilaio buiↄ ũ sù lↄ. Baazilaipi Galada bui Baazilainɛ sɛ̀ yãa nↄ ũ, ↄ̃ à a ã̀nsue tↄ́pi sɛ̀. 
\v 64 Gbɛ̃́piↄ ń tↄ́ wɛ̀ɛlɛ buibↄkĩi taalau, aai bↄwào, ↄ̃ wà gìnɛ́ ń sa'ozĩo. 
\v 65 Bùsu dↄaana ònɛ́, mɛ́ i kɛ sa'ona ń yã́ gwà ń Uliũo ń Tumiũo\f + \fr 7.65 \fr*\ft Bↄa 28.30, Iko 33.8\ft*\f* bàasio, aasu Lua blɛ bleo.
\p
\v 66 Gbɛ̃́piↄ píi gbɛ̃ↄn ↄ̀aasↄsↄo lɛɛ bla ń plao ń ↄ̀aa do ń baswaaↄ̃o (42.360). 
\v 67 An zↄ̀blenaↄ gↄ̃ɛↄ ń nↄɛↄ ku lↄ gbɛ̃ↄn ↄ̀aasↄsↄo lɛɛ sopla ń ↄ̀aa do ń basopla àaↄ̃saio (7.337). Lɛ̀sinaↄ gↄ̃ɛↄ ń nↄɛↄ kúńnↄ lↄ gbɛ̃ↄn ↄ̀aa do ń blasↄoo (245). 
\v 69 Aa sↄ̃́ↄ vĩ ↄ̀aa àaↄ̃ ń basooloo ń gɛ̃o ń mɛ̀ndoo (736), sↄ̃baonaↄ ↄ̀aa do ń blasↄoo (245), yiongoↄ ↄ̀aa pla ń bla sↄosaio (435), zàa'ĩnaↄ ↄ̀aasↄsↄo lɛɛ soolo ń ↄ̀aa àaↄ̃ ń basooloo (6.720).
\p
\v 70 An uabeleeↄ gbadàda zĩ yã́ musu. Bùsu dↄaana gbadà Lua kpɛ́ zĩ kpagolo guu vua kiloo swaaↄ̃ ń kĩnio ń vua taↄ mɛ̀n blakwi ń sa'on ulataoↄ mɛ̀n ↄ̀aa pla ń basoolokwio (530). 
\v 71 Uabeleeↄ gbadàda Lua kpɛ́ zĩ kpagolo guu, vua kiloo baswaaↄ̃kwi (170) ń ã́nusuo tↄnu do ń kiloo ↄ̀aa doo. 
\v 72 Gbɛ̃́ kĩniↄ gbadàda lↄ, vua kiloo baswaaↄ̃kwi (170) ń ã́nusuo tↄnu do ń kiloo basↄoo ń sa'on ulataoↄ mɛ̀n bàaↄ̃sↄo ń plao (67). 
\v 73 Sa'onaↄ ń Levii buiↄ ń bĩ́ibↄlɛdↄ̃anaↄ ń lɛ̀sinaↄ ń gbɛ̃pãleeↄ ń Lua ua zĩkɛnaↄ ń Isaili kĩniↄ zↄ̃̀lɛzↄ̃lɛ ń wɛ̃́lɛↄ guu.\f + \fr 7.72 \fr*\ft 1Lad 9.2-3\ft*\f*
\c 8
\s1 Ɛzala Mↄizi ikoyã kyokɛa
\p
\v 1 Gbɛ̃́pii kã̀aa ń lɛdoũo gãaɛ pↄ́ kú Í Bↄlɛ saɛ, ↄ̃ wa ò yãdanɛde Ɛzalaɛ aà bↄ ń Mↄizi ikoyã pↄ́ Dii dìlɛ Isailiↄnɛ láo. 
\v 2 Mↄ sopla gↄↄ sɛ̃́ia zĩ́ sa'ona Ɛzala bↄ̀ ń Mↄizi ikoyão bíla aɛ. Gↄ̃ɛↄ ń nↄɛↄ ń gbɛ̃́ pↄ́ aa fↄ̃ yãmaↄ píi kú we. 
\v 3 À aɛdↄ̀ gãaɛ pↄ́ kú Í Bↄlɛpi saɛwa, ↄ̃ àlɛ lápi kyokɛ za kↄↄkↄↄ e ĩatɛ̃ minanguo gↄ̃ɛↄ ń nↄɛↄ ń gbɛ̃́ pↄ́ aa fↄ̃ maↄ wáa. Gbɛ̃́pii swãdↄ̀ Mↄizi ikoyã lápi kyokɛai. 
\v 4 Yãdanɛde Ɛzala zɛ gbà lɛsĩ pↄ́ wa dà ń lío lápi kyokɛa yã́i musu. Matitia ń Sɛmao ń Anaiao ń Uliao ń Ilikiao ń Maaseao ku aà ↄplaai. Pedaia ń Misaɛlio ń Malakiao ń Asuũo ń Asadanao ń Zakalio ń Mɛsulaũo ku aà ↄzɛɛi. 
\v 5 Kɛ́ Ɛzala lá wɛ̃̀, gbɛ̃́pii è, asa aà zɛkĩi lɛsĩ dɛńla. Kɛ́ a wɛ̃̀, gbɛ̃́pii fɛ̀lɛ zɛ̀. 
\v 6 Ɛzala Dii Lua zↄ̃ↄde sáaukpà, ↄ̃ gbɛ̃́pii ↄsɛ̀ musu aa mɛ̀: Ãmi! Ãmi! Ɔ̃ aa mipɛ̀lɛ tↄↄlɛ, aa kùlɛ Diiɛ. 
\v 7 Gↄↄ pↄ́ gbɛ̃́ↄ zɛa we, Levii buieↄ Mↄizi ikoyã dàdanɛ́. Levii buipiↄ tↄ́n kɛ: Yesua, Bani, Selebia, Yamini, Akubu, Sabetai, Odia, Maasea, Kelita, Azalia, Yozaba, Anana ń Pelaiao. 
\v 8 Aa Lua ikoyã lápi kyokɛ̀, ↄ̃ aa a bↄↄlɛkɛ̀, aa a wɛ́ wɛ̃̀nɛ́, kɛ́ aa e kyópi ma.
\p
\v 9 Ɔ̃ bùsu gbãade Nɛɛmii ń yãdanɛde sa'ona Ɛzalao ń Levii bui pↄ́ lɛ́ yãdada gbɛ̃́ↄnɛↄ ònɛ́: Gↄↄɛ beeá Dii á Lua pↄ́ɛ. Ásu wɛ̃nakɛo, ásu ↄ́ↄlↄo. Asa kɛ́ aalɛ Mↄizi ikoyã ma, aalɛ ↄ́ↄlↄ ḿpiiɛ. 
\v 10 Nɛɛmii mɛ̀: À gɛ pↄ́ níside ble, í í nana mi. À li gbɛ̃́ pↄ́ pↄe vĩoↄnɛ. Gↄↄɛ beeá wá Dii pↄ́ɛ. Ásu búbuapɛo, asa pↄna pↄ́ Dii ì kpámá dɛ á gbãa'ekĩi ũ. 
\v 11 Levii buiↄ gɛ̀ gbɛ̃́ↄ nↄ̀sɛ nìninɛ́ aa mɛ̀: À nílɛ! Gↄↄɛ beeá Lua pↄ́ɛ, ásu búbuapɛo. 
\v 12 Ɔ̃ aa fɛ̀lɛ gɛ̀ pↄblè aa imì, aa lìkↄ̃ɛ aa pↄnakɛ̀ maamaa, asa aa yã́ pↄ́ wa ònɛ́ mà sa.
\p
\v 13 Mↄpi gↄↄ plaade zĩ́ uabeleↄ ń sa'onaↄ ń Levii buiↄ kã̀aa yãdanɛde Ɛzalazi, kɛ́ aa e wɛ́tɛ Mↄizi ikoyãi. 
\v 14 Ɔ̃ aa yã́ pↄ́ Dii dìlɛ Mↄiziɛ è we à mɛ̀, Isailiↄ aaↄ ku lákpɛↄ guu mↄ soplade dikpɛgↄↄzĩ,\f + \fr 8.14 \fr*\ft Lev 23.33-43\ft*\f* 
\v 15 mɛ́ aa yã́ɛ bee kpàwakɛ ń zↄ̃ɛwiaↄ guu ń Yelusalɛũo aa mɛ: À bↄlɛ gɛ́ sɛ̃u, í kulaↄ kaso suò ń baalalaↄ ń gbɛ́laↄ ń daminalaↄ ń lí uede láↄ, kɛ́ à lákpɛↄ dↄò lá a ku taalauwa. 
\v 16 Ɔ̃ gbɛ̃́ↄ gɛ̀ kàsokaso aa sùò, baade lákpɛ dↄ̀ò a kpɛ́ musu ge ua ge Lua ua ge Í Bↄlɛ gãaɛ ge Ɛflaiũ Bↄlɛ gãaɛ. 
\v 17 Gbɛ̃́ pↄ́ bↄ̀ zĩ̀zↄkɛupiↄ lákpɛↄ dↄ̀dↄ ḿpii, ↄ̃ aa ku a guu. Za Nuni nɛ́ Yozuee gↄↄ e gↄↄ bee Isailiↄ i dikpɛpi kɛ màao. Ɔ̃ aa pↄnakɛ̀ maamaa. 
\v 18 Ɛzala ìↄ Lua ikoyã lá kyokɛ lá gu lɛ́ dↄ sɛa za dikpɛgↄↄ sɛ̃́ia zĩ́ e à gɛ midɛò. Aa dikpɛpi kɛ̀ gↄↄ soplaɛ. A gↄↄ swaaↄ̃de zĩ́ ↄ̃ aa kↄ̃kãaakɛ̀ lá wa dìlɛwa.
\c 9
\s1 Isailiↄ ń duunaↄ oa Luaɛ
\p
\v 1 Mↄ doũpi gↄↄ baasↄo mɛ̀ndosaide zĩ́ Isailiↄ kↄ̃ kã̀aa ń lɛyeo ń zwã̀nkasaↄ dadaa, mɛ́ bùsu kákaa ń miu. 
\v 2 Aa ńzĩa kɛ̃̀ buipãleↄwa ↄ̃ aa sĩa, aalɛ ń duunaↄ ń ń deziↄ yãvãikɛaↄ o. 
\v 3 Aa gↄ̃̀ sĩa gu pↄ́ aa kuu, ↄ̃ wà Dii ń Lua ikoyã lá kyokɛ̀nɛ́ e mↄ̀ àaↄ̃, ↄ̃ aa ń duunaↄ ò aa kùlɛ Dii ń Luaɛ e mↄ̀ àaↄ̃. 
\v 4 Levii buieↄ zɛ gba pↄ́ wa dànɛ́ musu, aa lɛzù Dii ń Luazi gbã́ugbãu. An tↄ́ↄn kɛ: Yesua, Bani, Kamiɛli, Sebania, Buni, Selebia, Bani ń Kenanio. 
\v 5 Levii buiↄ Yesua ń Kamiɛlio ń Banio ń Asaniao ń Selebiao ń Odiao ń Sebaniao ń Petaiao mɛ̀: À fɛlɛ Dii á Lua táasilɛ! A ku za asĩnizĩ e gↄↄpii. To wà n tↄbↄ, asa n gawi dɛ lɛ́maama ń táasiola píi. 
\v 6 Ḿmɛ ń Dii ũ ndo. N bàluma kɛ̀ ń n bɛ pↄ́ kú musuo ń pↄ́ pↄ́ kú weↄ píi. N dṹnia kɛ̀ ń pↄ́ pↄ́ kuwàↄ, n ísia kɛ̀ ń pↄ́ pↄ́ kú a guuↄ. Ni wɛ̃ni kpa ḿpiiwa, n bɛ malaika dasiↄ ì kúlɛnɛ.
\p
\v 7 Ḿmɛ ń Dii Lua pↄ́ Ablaũ sɛ̀ ũ, n bↄaànↄ Ulu, Babiloni bùsuu,\f + \fr 9.7 \fr*\ft Daa 11.31, 12.1\ft*\f* n aà tↄ́ lìlɛɛ̀ Ablahaũ.\f + \fr 9.7 \fr*\ft Daa 17.5\ft*\f* 
\v 8 Ń è a n náai vĩ a sↄ̃ guu, ↄ̃ n mɛ̀ n bàa aↄ kuaànↄ, ńyↄ̃ Kanaa bùsu kpawà ń aà buiↄ, bùsu pↄ́ Itiↄ ń Amↄleↄ kuu ń Pɛliziↄ ń Yebusiↄ ń Giigasiↄ.\f + \fr 9.8 \fr*\ft Daa 15.18-21\ft*\f* Ɔ̃ n lɛ́ pↄ́ ń gbɛ̃̀ɛ̀pi kɛ̀, kɛ́ ń maa yã́i.
\p
\v 9 N taasi pↄ́ wá deziↄ kɛ̀ Egipi è,\f + \fr 9.9 \fr*\ft Bↄa 3.7\ft*\f* n wii pↄ́ aa lɛ̀ Ísia Tɛ̃ai mà.\f + \fr 9.9 \fr*\ft Bↄa 14.10\ft*\f* 
\v 10 N seelaↄ ń dabudabuↄ kɛ̀ Falaↄ̃ↄɛ,\f + \fr 9.10 \fr*\ft Bↄa 7-12\ft*\f* ń kpàaàzi ń aà ìwaↄ ń aà bùsudeↄ píi, asa ń dↄ̃ lá aa ãiapãsĩkɛ̀ ń wá deziↄ. N tↄbↄ̀ lá a ku e ń a gbãowa. 
\v 11 N ísia zↄ̃̀ɛnɛ́, ↄ̃ aa táa'ò gugiiu aa bùa.\f + \fr 9.11 \fr*\ft Bↄa 14.21-29\ft*\f* N gbɛ̃́ pↄ́ pɛ̀lɛńziↄ zù ísiu, n ń zú lán gbɛwa í zↄ̃ↄpi guu.\f + \fr 9.11 \fr*\ft Bↄa 15.4-5\ft*\f* 
\v 12 N dↄaa n gbɛ̃́ↄnɛ tɛlu guu fãanɛ, gwãasĩna sↄ̃ tɛ́ guu.\f + \fr 9.12 \fr*\ft Bↄa 13.21-22\ft*\f* N zɛ́ pↄ́ dɛ aa sɛ pùnɛ́.
\p
\v 13 N pila Sinai gbɛ̀sĩsĩ musu, n yã'ònɛ́ za musu.\f + \fr 9.13 \fr*\ft Bↄa 19.18-20\ft*\f* N ikoyã zɛde sĩande kpàmá ń yãmaa pↄ́ ń dìlɛↄ. 
\v 14 Ń tò aa kã́mabogↄↄ dↄ̃̀ ń pↄ́ ũ.\f + \fr 9.14 \fr*\ft Bↄa 20.8-11\ft*\f* N n yãdilɛaↄ ń n ↄtondↄkĩio ń n ikoyão dà n zↄ̀blena Mↄiziɛ, ↄ̃ a kpàmá. 
\v 15 Kɛ́ nↄana ń dɛ́, n blɛ gbàɛnɛ́ za musu.\f + \fr 9.15 \fr*\ft Bↄa 16.14-15\ft*\f* Kɛ́ imi ń dɛ́, n ibↄ̀nɛ́ gbɛsiu.\f + \fr 9.15 \fr*\ft Bↄa 17.6-7\ft*\f* Bùsu pↄ́ n a lɛgbɛ̃̀nɛ́ n mɛ̀ ńyↄ̃ kpámá ↄ̃ ń ònɛ́ aa gɛ sí ń pↄ́ ũ.
\p
\v 16 Ń beeo wá dezipiↄ kàamai vĩ, an swã́ gbãakũ̀, aaliↄ n yãdilɛaↄ kũao. 
\v 17 Aa gì n yãmai, dabudabu pↄ́ ń kɛ̀nɛ́ↄ yã́ sã̀ńgu. An swã́ gbãakũ̀, aa bↄ̀ n yã́ kpɛ, aa dↄaana dìlɛ aà ɛa táńnↄ zↄbleu.\f + \fr 9.17 \fr*\ft Nao 14.4\ft*\f* Lua, ni gbɛ̃́ↄ duuna kɛ̃́má, ń sùuu vĩ ń sósobio, n pↄ lí pa kpaao, ń gbɛ̃kɛ vĩ zↄ̃ↄ, ↄ̃ ni pãkpańzio.\f + \fr 9.17 \fr*\ft Bↄa 34.6\ft*\f* 
\v 18 Baa kɛ́ aa mↄkàsa lán gáaenawa, aa mɛ̀ ń dii pↄ́ ń bↄ́lɛ Egipin we,\f + \fr 9.18 \fr*\ft Bↄa 32.1-4\ft*\f* mɛ́ aa dↄ̀ɛnnↄ maamaa, 
\v 19 ni pãkpańzi guwaiwaiuo n sósobi zↄ̃ↄ yã́i. Tɛlupi dↄ̀aa zɛ'ↄ̀lↄnɛ́ fãanɛ, tɛ́pi zɛ́ pↄ́ dɛ aa sɛ pùnɛ́ gwã́, i ń tó we ziio. 
\v 20 N n Nisĩna kpàmá à yãdànɛ́. Ni ń tɛ̃́ manao. Kɛ́ imi lɛ́ ń dɛ, n ń gbá í. 
\v 21 N ń gwá guwaiwaiu wɛ̃̀ bla, pↄe i kɛ̃́sãmáo. An pↄkasaↄ i yaao, an gbá i sɛ́sɛo.
\p
\v 22 N buiↄ kpàmá ń ń bùsuↄ, n ń bùsupiↄ kpaalɛ̀nɛ́ míↄ. Aa Ɛsɛbↄ̃ kí Siↄ̃ bùsu sì ń pↄ́ ũ ń Basana kí Ogu pↄ́o.\f + \fr 9.22 \fr*\ft Nao 21.21-35\ft*\f* 
\v 23 Ń tò an bui dasikũ̀ lán saanaↄwa,\f + \fr 9.23 \fr*\ft Daa 15.5\ft*\f* n gɛ̃ńnↄ bùsu pↄ́ ń ò ń maeↄnɛ aa gɛ sí ń pↄ́ ũ guu. 
\v 24 Kɛ́ an nɛ́ↄ gɛ̀ bùsupi sì ń pↄ́ ũ, ↄ̃ n Kanaa pↄ́ kú weↄ kãdɛ̀nɛ́, n ń nánɛ́ ń ↄzĩ ń ń kíaↄ píi, n bùsupi buiↄ kpàmá, aa ń pↄeã kɛ̀má.\f + \fr 9.24 \fr*\ft Yoz 11.23\ft*\f* 
\v 25 Aa wɛ̃́lɛ bĩ́ideↄ sì ń tↄↄlɛ maao, aa kpɛ́ↄ sì ń pↄmaa pↄ́ kúuↄ ń lↄ̀ↄ pↄ́ wa yↄ̃̀ↄ ń vɛ̃ɛbuↄ ń kù kpɛ́ↄ ń lí pↄ́ wì a bɛ bleↄ à kɛ̀ zài. Aa pↄblè aa kã̀ aa mɛ̀kpa, aa namablè n ɛ̀fãai zↄ̃ↄ yã́i.
\p
\v 26 Ń beeo an swã́ gbãakũ̀, ↄ̃ aa bↄ̀ n yã́ kpɛ, aa gì n ikoyãi. Aa ãnabi pↄ́ lɛdàmá aa sumaↄ dɛ̀dɛ, aa dↄ̀ɛnnↄ maamaa. 
\v 27 N ń ná ń ibɛɛↄnɛ ń ↄzĩ, aa gbãamↄ̀nɛ́, ↄ̃ aa wiilɛ̀nzi ń taasikɛa guu. Kua za musu ń sìńnↄ n sósobi zↄ̃ↄ yã́i, n suabanaↄ dìlɛnɛ́, ↄ̃ aa ń bↄ́ ń ibɛɛpiↄ ↄzĩ. 
\v 28 Tó aa niɛ è, aaì ɛa yã́ pↄ́ vãinɛ kɛɛ, ↄ̃ n ń kpá ń ibɛɛↄwa aa gbãablèmá. Aa ɛ̀a wiilɛ̀nzi, ↄ̃ kua za musu ń sìńnↄ, n ń bↄ́ gɛ̃n ũma'ũma n sósobi yã́i.\f + \fr 9.28 \fr*\ft Dↄa 2.11-16\ft*\f*
\p
\v 29 N lɛdàmá aa zɛ ń n ikoyão, kási aa zazakũ̀ma, aaliↄ n yãdilɛaↄ kũao, n yã́ pↄ́ tó gbɛ̃́ kũa, aↄ ku a sabaiɛ.\f + \fr 9.29 \fr*\ft Lev 18.5\ft*\f* Aa zã̀ n yã́piↄwa aa mikpɛlìnɛ, an swã́ gbãakũ̀ aa gì n yãmai. 
\v 30 N mɛnakɛ̀ńnↄ a wɛ̃ dasi, n Nisĩna yãdà ń ãnabiↄnɛ, ↄ̃ aa lɛdàomá, aai swãdↄio, ↄ̃ n ń ná buipãleↄnɛ ń ↄzĩ.\f + \fr 9.30 \fr*\ft 2Kia 17.13-18\ft*\f* 
\v 31 N sósobi zↄ̃ↄ guu ni ń midɛo, Lua sùuude sósobiden n ũ, ni pãkpańzio.
\p
\v 32 Ayãmɛto wá Lua, Lua zↄ̃ↄ gbãade pↄ́ ni tó ń mɛ séenata, lá n bàa ìↄ kúwanↄ gbɛ̃kɛ guu, taasi pↄ́ wá lé ń wá kíaↄ ń wá dↄaanaↄ ń wá sa'onaↄ ń wá ãnabiↄ ń wá deziↄ ń n gbɛ̃́ↄ píi za Asili kíaↄ gↄↄ e ń a gbão, ńsu to à kɛnɛ fɛ̃́nɛũo. 
\v 33 Yã́ pↄ́ wá léↄ píi musu ń maa, baa kɛ́ wa yãvãikɛ̀, ń náai vĩ. 
\v 34 Wá kíaↄ ń wá dↄaanaↄ ń wá sa'onaↄ ń wá deziↄ aai zĩkɛ ń ikoyãwao, aai laaidↄ ń yãdilɛaↄwao ge lɛ́ pↄ́ ń dàmáↄ. 
\v 35 Baa gↄↄ pↄ́ aa ńzĩa vĩ, mɛ́ aa pↄmaa dasi pↄ́ n ń gbáↄ vĩ ń bùsu yàasa táaede pↄ́ ń kpàmáo, aai zↄblenɛo, aai mikɛ̃ ń yãvãiↄwao.
\p
\v 36 Gwa! Zↄↄn wá ũ gbã. Bùsu pↄ́ ń kpà wá deziↄwa aa a libɛↄ ń a pↄmaaↄ ble, zↄↄn wá ũ a guu. 
\v 37 Wá bugbɛ yàasaↄ gↄ̃̀ kí pↄ́ ń tò aa gbãablèwáↄ pↄ́ ũ wá duuna yã́i. Aaì kiblewá ń wá pↄtuoↄ lá aa yeiwa. Wá kú wɛ́tɛ̃a zↄ̃ↄ guu.
\s1 Isailiↄ lɛdoũkɛa ń Luao
\p
\v 38 Yã́ beeↄ yã́i píi wálɛ lɛdoũkɛnnↄ ń sĩanao, wálɛ kɛ̃́ lá guu. Wá dↄaanaↄ ń Levii buiↄ ń wá sa'onaↄ lɛ́ ń seela kɛwà.
\c 10
\p  
\v 1 Gbɛ̃́ pↄ́ aa ń seela kɛ̀wàↄn kɛ: Bùsu gbãade Nɛɛmii Akalia nɛ́, Zedekia, 
\v 2 Selaia, Azalia, Zelemii, 
\v 3 Pasuu, Amalia, Malakia, 
\v 4 Atusu, Sebania, Maluku, 
\v 5 Aliũ, Mɛlemↄ, Obadia, 
\v 6 Daniɛli, Ginɛtↄ̃, Baluku, 
\v 7 Mɛsulaũ, Abia, Miamɛ, 
\v 8 Maazia, Bilegai ń Semaiao. Gbɛ̃́piↄá sa'onaↄnɛ.
\p
\v 9 Levii buiↄn kɛ: Azania nɛ́ Yesua, Enada nɛ́ Binui, Kamiɛli 
\v 10 ń ń gbɛ̃́ↄ: Sebania, Odia, Kelita, Pelaia, Anana, 
\v 11 Mise, Leobɛ, Asabia, 
\v 12 Zakuu, Selebia, Sebania, 
\v 13 Odia, Bani ń Beninuo.
\p
\v 14 Isaili dↄaanaↄn kɛ: Palↄsi, Paata Mↄabu, Elaũ, Zatu, Bani, 
\v 15 Buni, Azegada, Bebai, 
\v 16 Adonia, Bigivai, Adini, 
\v 17 Atee, Ezekia, Azuu, 
\v 18 Odia, Asuũ, Bezai, 
\v 19 Alifi, Anato, Nɛbai, 
\v 20 Mapiasi, Mɛsulaũ, Ezii, 
\v 21 Mɛsezabɛli, Zadoki, Yadua, 
\v 22 Pelatia, Anana, Anaia, 
\v 23 Ozee, Anania, Asubu, 
\v 24 Aloese, Pila, Sobɛki, 
\v 25 Leuũ, Asabana, Maasea, 
\v 26 Ahia, Anana, Ana, 
\v 27 Maluku, Aliũ ń Baanao.
\p
\v 28 Isaili kĩniↄ, sa'onaↄ ń Levii buiↄ ń bĩ́ibↄlɛdↄ̃anaↄ ń lɛ̀sinaↄ ń Lua ua zĩkɛnaↄ ń gbɛ̃́ pↄ́ aa kɛ̃̀ bui pↄ́ liaańziↄwa aa Lua ikoyã kũaↄ nàkↄ̃wa ń ń gbɛ̃́ pↄ́ dɛ gbãade ũↄ. An naↄ ń ń nɛgↄ̃ɛↄ ń ń nɛnↄɛↄ nàmá lↄ ń gbɛ̃́ pↄ́ yã́pi mà mɛ́ aa dↄ̃ↄ píi. 
\v 29 Aa lɛgbɛ̃̀ aa mɛ̀: Wá sì ń Luao, wáↄ tɛ Lua ikoyã pↄ́ a kpà a zↄ̀blena Mↄiziwai. Wáↄ Dii wá Lua yãdilɛaↄ kũa ń aà yãdanɛↄ, wíↄ aà ↄtondↄkĩi gwa. 
\v 30 Wá wá nɛnↄɛↄ kpã́sã bui pↄ́ liaawáziↄwa lↄo. Wá ń nɛnↄɛↄ sɛ́ wá nɛ́ↄnɛ sↄ̃o.\f + \fr 10.31 \fr*\ft Bↄa 34.16\ft*\f* 
\v 31 Aa mɛ̀ lↄ: Tó bui pↄ́ liaawáziↄ mↄ̀ ń laao ge pↄ́wɛnae aa yía kã́mabogↄↄ, wá lúmá kã́mabogↄↄzĩ ge lousisigↄↄzĩo. Wɛ̃̀ sopla ń wɛ̃̀ soplao wáli tó tↄↄlɛ ĩ́ampa,\f + \fr 10.32 \fr*\ft Bↄa 23.10-11\ft*\f* wíli gbɛ̃́ↄ kɛ̃́ ń ń fĩaↄ.\f + \fr 10.32 \fr*\ft Iko 15.1-2\ft*\f*
\p
\v 32 Wá dìlɛ wázĩa yã́ ũɛ, wá baade lí ã́nusu kpa wɛ̃ ń wɛ̃o galaũ síiↄ̃ wá Lua ua zĩ yã́ musu. 
\v 33 Iↄ dɛ pɛ̃ɛ pↄ́ wì kpa Luawa pↄ́ ũ ń pↄ́wɛnti pↄ́ wìↄ kpawà lá gu lɛ́ dↄo ń sa pↄ́ wìↄ a pↄ́ kátɛu à tɛ́kũ lá gu lɛ́ dↄo ń sa pↄ́ wìↄ o kã́mabogↄↄ ń mↄ dafu dikpɛgↄↄo ń dikpɛ pãle zĩ́o ń sa pↄ́ wì o sáaukpaa yã́io ń Isailiↄ duun awakpabↄↄ ń wá Lua ua yã́ kĩniↄ píi. 
\v 34 Wá sa'onaↄ ń Levii buiↄ ń gbɛ̃́ kĩniↄ píi, wa gbɛlà mↄa ń yàao wá Lua ua yã́ musu, wàli mↄò ualɛ ń ualɛo gↄↄ pↄ́ wa dìlɛwa wɛ̃ ń wɛ̃o. A dɛ Dii wá Lua gbagbakĩi pↄ́ ũɛ lá a ku Mↄizi ikoyã guuwa. 
\v 35 Wáliↄ mↄ Dii kpɛ́u wɛ̃ ń wɛ̃o ń wá buapↄ́ káauↄ ń libɛ sɛ̃́iaↄ píi.\f + \fr 10.36 \fr*\ft Bↄa 23.19\ft*\f* 
\v 36 Wáliↄ mↄ wá Lua ua ń wá nɛgↄ̃ɛ sɛ̃́iaↄ ń wá zunɛ sɛ̃́iaↄ ge sã ge ble, wíli kpá sa'ona pↄ́ lɛ́ zĩkɛ weↄwa, lá a ku Mↄizi ikoyã guuwa.\f + \fr 10.37 \fr*\ft Bↄa 13.2, Nao 18.15-16\ft*\f* 
\v 37 Wáli mↄ́ ń wá pↄ́wɛn sɛ̃́iao ń wá kàa sɛ̃́iaↄ ń wá libɛ sɛ̃́iaↄ ń wá vɛ̃ɛ sɛ̃́iaↄ ń wá nísi sɛ̃́iao, wí kálɛ làasiu wá Lua ua sa'onaↄnɛ. Wáli wá buapↄ́ↄ kwide bↄ Levii buiↄnɛ,\f + \fr 10.38 \fr*\ft Nao 18.21\ft*\f* asa Levii buiↄ mɛ́ ì a kwide si zↄ̃ɛwia ń zↄ̃ɛwiao. 
\v 38 Tó Levii buiↄ lɛ́ a kwide sí, Aalona bui sa'onaeↄ líↄ kúńnↄ. Levii buiↄ sↄ̃ aali pↄ́ kwide pↄ́ aa sìpi kwide sɛ gɛò wá Lua ua, aali kálɛ làasiu.\f + \fr 10.39 \fr*\ft Nao 18.26\ft*\f* 
\v 39 Levii buiↄ ń Isaili kĩniↄ píi lí pↄ́wɛna ń vɛ̃ɛo ń nísio labakɛ, aali kálɛ làasiu Lua ua, gu pↄ́ luakukĩi pↄ́ↄ kuu ń sa'ona pↄ́ lɛ́ zĩkɛ weↄ ń bĩ́ibↄlɛdↄ̃anaↄ ń lɛ̀sinaↄ. Màa wáli pãkpa wá Lua uaio.
\c 11
\s1 Isaili pↄ́ zↄ̃̀lɛ Yelusalɛũↄ
\p
\v 1 Isaili dↄaanaↄ zↄ̃̀lɛ Yelusalɛũ, ↄ̃ gbɛ̃́ kĩniↄ gbɛlà an gbɛ̃́ↄ kwide mↄ zↄ̃lɛa Lua wɛ̃́lɛpi guu yã́ musu, an gbɛ̃́ kĩniↄ i gↄ̃ zↄ̃ɛwiaↄ guu. 
\v 2 Wà uabele pↄ́ dↄ̀aa zɛ̀ ń kua Yelusalɛũoↄ sáaukpà.
\p
\v 3 Yuda bùsu dↄaana pↄ́ zↄ̃̀lɛ Yelusalɛũↄ tↄ́ↄn kɛ: Isaili kĩniↄ, sa'onaↄ ń Levii buiↄ ń Lua ua zĩkɛnaↄ ń Salomↄↄ zↄ̀blen buiↄ zↄ̃̀lɛ Yuda bùsu wɛ̃́lɛↄ guu, baade ń a tↄↄlɛo, 
\v 4 ↄ̃ Yudaeↄ ń Bɛ̃yãmɛɛ buieↄ zↄ̃̀lɛ Yelusalɛũ.
\p Yudaↄ dↄaanaↄ tↄ́n Ataia ń Maaseao. Pɛlɛzi Maalalee ì, Maalalee Sefatia ì, Sefatia Amalia ì, Amalia Zakali ì, Zakali Uzia ì, ↄ̃ Uzia Ataiapi ì. 
\v 5 Sela Zakali ì, Zakali Yoialibu ì, Yoialibu Adaia ì, Adaia Azaia ì, Azaia Kↄloze ì, Kↄloze Baluku ì, ↄ̃ Baluku Maaseapi ì. 
\v 6 Pɛlɛzi bui gↄ̃gbãa pↄ́ kú Yelusalɛũↄ gbɛ̃ↄn ↄ̀aa pla ń bàaↄ̃kwi plasaioɛ (468).
\p
\v 7 Bɛ̃yãmɛɛ buiↄ dↄaana Salu. Yesaia Itiɛli ì, Itiɛli Maasea ì, Maasea Kolaia ì, Kolaia Pedaia ì, Pedaia Yoedi ì, Yoedi Mɛsulaũ ì, ↄ̃ Mɛsulaũ Salupi ì. 
\v 8 Aàpi gbɛa Gabai ń Salaio. Ampii gbɛ̃ↄn ↄ̀aa síiↄ̃ ń basoolokwi plasaioɛ (928). 
\v 9 Zikeli nɛ́ Yoɛli mɛ́ ń gbɛ̃zↄ̃ↄ ũ, mɛ́ Asenua nɛ́ Yuda mɛ́ wɛ̃́lɛ gbɛ̃zↄ̃ↄ plaade ũ.
\p
\v 10 Sa'on dↄaanaↄ Yoialibu nɛ́ Yedaia ń Yakɛ̃o 
\v 11 ń Selaiao. Lua ua dↄaana Aitubu Mɛlaio ì, Mɛlaio Zadoki ì, Zadoki Mɛsulaũ ì, Mɛsulaũ Ilikia ì, ↄ̃ Ilikia Selaiapi ì. 
\v 12 An gbɛ̃́ pↄ́ aalɛ Lua kpɛ́ zĩ kɛↄ gbɛ̃ↄn ↄ̀aa síiↄ̃ ń bao ń plaoɛ (822).
\p Sa'on dↄaana Adaia. Malakia Pasuu ì, Pasuu Zakali ì, Zakali Amɛzi ì, Amɛzi Pelalia ì, Pelalia Yolaũ ì, ↄ̃ Yolaũ Adaiapi ì. 
\v 13 Aà gbɛ̃́ pↄ́ aa dɛ uabeleↄ ũↄ gbɛ̃ↄn ↄ̀aa do ń bla ń plaoɛ (242). Sa'on dↄaana Amasai. Imɛɛ Mɛsilemↄ ì, Mɛsilemↄ Azai ì, Azai Azalɛli ì, ↄ̃ Azalɛli Amasaipi ì. 
\v 14 Aà gbɛ̃́ↄá gↄ̃sa gbãaↄnɛ, aa gbɛ̃ↄn basoolokwi plasaiɛ (128). Agedoliũ nɛ́ Zadiɛli mɛ́ ń gbɛ̃zↄ̃ↄ ũ.
\p
\v 15 Levii buiↄ dↄaana Semaia. Buni Asabia ì, Asabia Azikaũ ì, Azikaũ Asubu ì, ↄ̃ Asubu Semaiapi ì. 
\v 16 Levii buiↄ dↄaanaↄ Sabetai ń Yozabao mɛ́ Lua ua gbɛ̃zↄ̃ↄↄ ũ. 
\v 17 Lɛ̀sin dↄaana Matania pↄ́ dɛ lousisin dↄaana ũ. Asafa Zabedi ì, Zabedi Mise ì, ↄ̃ Mise Mataniapi ì. Babukia mɛ́ aà plaade ũ. Bee gbɛa Samua nɛ́ Abeda, Galali tↄũna, Yedutu bui. 
\v 18 Levii bui pↄ́ kú Lua wɛ̃́lɛuↄ gbɛ̃ↄn ↄ̀aa do ń basiiↄ̃sↄo mɛ̀ndosaioɛ (284).
\p
\v 19 Bĩ́ibↄlɛdↄ̃anaↄ Akubu ń Talemↄo ń ń gbɛ̃́ↄ gbɛ̃ↄn baswaaↄ̃kwi ń plaoɛ. 
\v 20 Isaili kĩniↄ ń sa'onaↄ ń Levii buiↄ ku Yuda bùsu wɛ̃́lɛↄ guu, baade ń a tↄↄlɛo. 
\v 21 Lua ua zĩkɛnaↄ ku Ofɛli sĩ̀sĩ musu. Ziha ń Gisepao mɛ́ ń gbɛ̃zↄ̃ↄↄ ũ. 
\v 22 Levii bui pↄ́ kú Yelusalɛũↄ dↄaanan Uzi ũ. Mise Matania ì, Matania Asabia ì, Asabia Bani ì, ↄ̃ Bani Uzipi ì. Aàpi mɛ́ Asafa bui pↄ́ aaì dↄaa ń lɛsiyão Lua uaↄ gbɛ̃do ũ. 
\v 23 Pɛɛsiↄ kía mɛ́ yãdìlɛ lɛ̀sinaↄnɛ, à yã́ pↄ́ aa kɛ lá gu lɛ́ dↄ dànɛ́. 
\v 24 Mɛsezabɛli nɛ́ Petaia pↄ́ dɛ Yuda nɛ́ Zela bui ũ ku kíapi kĩ́i Isailiↄ yã́gↄ̃gↄ̃a yã́i.
\p
\v 25 Yudaeↄ zↄ̃̀lɛ zↄ̃ɛwiaɛ beeↄ guu ń ń fã́anio: Kiliataaba ń a bualoũↄ, Dibↄ̃ ń a bualoũↄ, Kabazee ń a bualoũↄ, 
\v 26 Yesua, Mↄlada, Bɛpele, 
\v 27 Azaasuali, Bɛɛsɛba ń a bualoũↄ, 
\v 28 Zikilaga, Mɛkona ń a bualoũↄ, 
\v 29 Ɛnilimↄ, Zↄla, Yaamu, 
\v 30 Zanↄa, Adulaũ ń a zↄ̃ɛwiaↄ, Lakisi ń a fã́anio ń Azekao ń a bualoũↄ. Aa bɛkpà za Bɛɛsɛba e Bɛninↄũ guzulɛu.
\p
\v 31 Bɛ̃yãmɛɛ buiↄ bɛkpà wɛ̃́lɛɛ beeↄ guu: Gɛba, Mimasa, Ai, Bɛtɛli ń a bualoũↄ, 
\v 32 Anato, Nↄbu, Anania, 
\v 33 Azoo, Lama, Gitaiũ, 
\v 34 Adida, Zeboiũ, Nɛbala, 
\v 35 Lodi, Onↄ ń Siaↄ guzulɛo. 
\v 36 Levii bui gãli pↄ́ kú Yuda bùsuu yãaeↄ bɛkpà Bɛ̃yãmɛɛ buiↄ bùsuu.
\c 12
\s1 Sa'onaↄ ń Levii buiↄ yã́
\p
\v 1 Sa'onaↄ ń Levii bui pↄ́ aa sù ń Salatiɛli nɛ́ Zolobabɛlio ń Yesuaoↄn kɛ: Selaia, Zelemii, Ɛzala, 
\v 2 Amalia, Maluku, Atusu, 
\v 3 Sekania, Leuũ, Mɛlemↄ, 
\v 4 Ido, Ginɛtↄ̃, Abia, 
\v 5 Miamɛ, Maadia, Bilega, 
\v 6 Semaia, Yoialibu, Yedaia, 
\v 7 Salu, Amↄku, Ilikia, Yedaia. Gbɛ̃́piↄ mɛ́ sa'ona ń ń gbɛ̃́ Levii buiↄ dↄaanaↄ ũ sa'onkia Yesua gↄↄ.
\p
\v 8 Levii buiↄ dↄaanaↄn kɛ: Yesua, Binui, Kamiɛli, Selebia, Yuda, Matania. Matania ń a gbɛ̃́ↄ mɛ́ aaì dↄaa ń táasilɛao, 
\v 9 mɛ́ Babukia ń Unio ń ń gbɛ̃́ↄ mɛ́ lɛ̀sinaↄ gãli plaade ũ. 
\v 10 Yesua Yoakiũ ì, Yoakiũ Ɛliasibu ì, Ɛliasibu Yoiada ì, 
\v 11 Yoiada Yonatãa ì, ↄ̃ Yonatãa Yadua ì.
\p
\v 12 Sa'ona pↄ́ aa dɛ uabeleↄ ũ Yoakiũ gↄↄↄn kɛ: Selaia bui Mɛlaia, Zelemii bui Anania, 
\v 13 Ɛzala bui Mɛsulaũ, Amalia bui Yohanani, 
\v 14 Maluku bui Yonatãa, Sebania bui Yosɛfu, 
\v 15 Aliũ bui Adena, Mɛlaio bui Ɛlekai, 
\v 16 Ido bui Zakali, Ginɛtↄ̃ bui Mɛsulaũ, 
\v 17 Abia bui Zikeli, Miyãmɛ bui, Maadia bui Piletai, 
\v 18 Bilega bui Samua, Semaia bui Yonatãa, 
\v 19 Yoialibu bui Matenai, Yedaia bui Uzi, 
\v 20 Salu bui Kalai, Amↄku bui Ɛbɛɛ, 
\v 21 Ilikia bui Asabia ń Yedaia bui Nɛtanɛlio.
\p
\v 22 Wà sa'ona uabeleↄ tↄ́ dàlau za gↄↄ pↄ́ Ɛliasibu ń Yoiadao ń Yohananio ń Yaduao dɛ sa'onkiaↄ ũ e Pɛɛsiↄ kí Daliusi kpalablegↄↄɛ. 
\v 23 Wà Levii bui uabeleↄ tↄ́ dà ladau e Ɛliasibu tↄũna Yohanani gↄↄ. 
\v 24 Levii bui dↄaanaↄ tↄ́n kɛ: Asabia, Selebia, Binui, Kamiɛli ń Yesuao. An gbɛ̃́ↄ ì yãwemá táasilɛa ń sáaukpaao guu gã ń gãoɛ, lá Lua gbɛ̃́ Davidi dìlɛwa. 
\v 25 Gbɛ̃́ɛ beeↄ mɛ́ bĩ́ibↄlɛdↄ̃ana pↄ́ aaì Lua ua làasiↄ ń a bↄlɛↄ dↄ̃́aↄ ũ: Matania, Babukia, Obadia, Mɛsulaũ, Talemↄ ń Akubuo. 
\v 26 Gbɛ̃́piↄ ku gↄↄ pↄ́ Yesua nɛ́ Yoakiũ, Yozada tↄũna dɛ sa'onkia ũɛ. Nɛɛmii mɛ́ bùsu dↄaana ũ, sa'ona Ɛzala mɛ́ yãdanɛde ũ.
\s1 Yelusalɛũ bĩ́i sakɛ̃a
\p
\v 27 Yelusalɛũ bĩ́i sakɛ̃gↄↄ wà Levii buiↄ wɛ̀ɛlɛwɛɛlɛ gu pↄ́ aa kuu, wà gɛ̀ńnↄ Yelusalɛũ aa bĩ́i sakɛ̃ ń pↄnao ń sáaukpaao ń lɛsiao ń sɛ̃́sɛ̃naↄ ń mↄↄnaↄ ń kúuↄ. 
\v 28 Lɛ̀sina pↄ́ kãi ń Yelusalɛũↄ kↄ̃ kã̀aa we, Nɛtofa bualoũdeↄ 
\v 29 ń Bɛgiligalideↄ ń gbɛ̃́ pↄ́ kú Gɛba ń Azemavɛo saɛↄ, asa lɛ̀sinaↄ ńzĩa bualoũↄ kpà Yelusalɛũ saɛ weɛ. 
\v 30 Sa'onaↄ ń Levii buiↄ gbãbↄ̀ ńzĩaɛ, ↄ̃ aa gbãbↄ̀ gbɛ̃́ kĩniↄnɛ, ↄ̃ aa gbãbↄ̀ bĩ́iɛ ń a bↄlɛↄ.
\p
\v 31 Má tò Yuda dↄaanaↄ dɛ̀dɛ bĩ́iwa, ↄ̃ ma lɛ̀sinaↄ kã̀aa gãli zↄ̃ↄ lɛɛ pla, aa dↄaanɛ́ bĩ́i musu. An gãli do bɛ ↄplaa oi, aa bɛ bĩ́i musu Tufua Bↄlɛ oi. 
\v 32 Osaia ń Yuda dↄaana lɛɛ doↄ tɛ́ ń kpɛ 
\v 33 ń Azaliao ń Ɛzalao ń Mɛsulaũo 
\v 34 ń Yudao ń Bɛ̃yãmɛɛo ń Semaiao ń Zelemiio. 
\v 35 Sa'onaeↄ kúńnↄ lↄ, aa kùuↄ kṹkũa. Bee gbɛa Yonatãa nɛ́ Zakali. Asafa mɛ́ Zakuu ì, Zakuu Mise ì, Mise Matania ì, Matania Semaia ì, Semaia Yonatãapi ì. 
\v 36 Aà gbɛ̃́ beeↄ kuaànↄ: Semaia, Azalɛli, Milalai, Gilalai, Maai, Nɛtanɛli, Yuda ń Ananio. Aa Lua gbɛ̃́ Davidi pↄ́'ↄbↄnaↄ kũa. Yãdanɛde Ɛzala mɛ́ dↄaaanɛ́. 
\v 37 Kɛ́ aa kà Nibↄna Bↄlɛ musu, aa dɛ̀dɛ Davidi wɛ̃́lɛ dɛdɛkĩi pↄ́ kú ń aɛↄwa, gu pↄ́ bĩ́i sĩ̀sĩ kũ̀u. Aa dↄ̀ Davidi bɛi, ↄ̃ aa kà Í Bↄlɛ musu gukpɛ oi.
\p
\v 38 Lɛ̀sinaↄ gãli plaadeↄ gɛ̀ ↄzɛɛ oi. Má tɛ́ńzi bĩ́i musu ń gbɛ̃́ kĩniↄ. Wa dↄ Kĩna kalangai, wa gɛ e bĩ́i yàasa kĩ́i. 
\v 39 Ɔ̃ wa gɛ̃ Ɛflaiũ Bↄlɛa ń Bↄlɛ Zio ń Kpↄ̀ Bↄlɛo. Wa dↄ Ananɛli kalangai ń Basↄo kalangao e Sã Bↄlɛ musu, ↄ̃ aa zɛ̀ Dakpɛunaↄ Bↄlɛ musu. 
\v 40 Ɔ̃ lɛ̀sinaↄ gãli plapiↄ kↄ̃ kã̀aa Lua ua. Má kú we lↄ ń gbãade lɛɛ doↄ 
\v 41 ń sa'onaɛ beeↄ: Ɛliakiũ, Maasea, Miyãmɛ, Mise, Ɛlioenai, Zakali ń Ananiao. Aa ń kùuↄ kṹkũa. 
\v 42 Maasea ku we lↄ ń Semaiao ń Ɛleazaao ń Uzio ń Yohananio ń Malakiao ń Elaũo ń Ezɛɛo. Lɛ̀sinaↄ lɛ́ lɛsi, Yezahia mɛ́ ń dↄaana ũ. 
\v 43 Gↄↄ bee aa sa'ò maamaa, ↄ̃ aa pↄnakɛ̀, asa Lua tò an pↄ kɛ̀na à kɛ̀ zàiɛ. Nↄɛↄ ń nɛ́ↄ lɛ́ pↄnakɛ lↄ. Wà Yelusalɛũdeↄ pↄnakɛapi súu mà zã̀.
\p
\v 44 Zĩbeezĩ aa gↄ̃ɛeↄ dìlɛ làasi gbɛ̃zↄ̃ↄↄ ũ, gu pↄ́ gbaↄ ń buapↄ káauↄ ń pↄ́ kwideↄ kálɛu. Gbɛ̃́piↄ lí buapↄ́ pↄ́ Mↄizi ikoyã dìlɛ a dɛ sa'onaↄ ń Levii buiↄ baa ũ sɛ́lɛ zↄ̃ɛwia ń zↄ̃ɛwiao aa kãaa we, asa sa'onaↄ ń Levii bui pↄ́ aaì zĩkɛ weↄ yã́ kà Yudaↄguɛ. 
\v 45 Lua ua zĩ ń gbãbↄanɛ́o dɛ ń yã́ ũɛ. Lɛ̀sinaↄ ń bĩ́ibↄlɛdↄ̃anaↄ líↄ ń zĩ kɛ lá Davidi ń a nɛ́ Salomↄↄo dìlɛwa. 
\v 46 Asa za Davidi ń Asafao gↄↄ lɛ̀sin dↄaanaↄ kuɛ, aaì dↄaa ń Lua táasilɛao ń aà sáaukpaao. 
\v 47 Zolobabɛli ń Nɛɛmiio gↄↄ Isailiↄ píi ìↄ lɛ̀sinaↄ ń bĩ́ibↄlɛdↄ̃anaↄ kámasa ká lá gu lɛ́ dↄɛ. Aaì Levii buiↄ asea kpámá, mɛ́ Levii buiↄ ì Aalona buiↄ asea kpámá sↄ̃.
\c 13
\s1 Nɛɛmii yã́gↄ̃gↄ̃a Isailiↄnɛ gbɛzã
\p
\v 1 Zĩbeezĩ wà Mↄizi lá kyokɛ̀ gbɛ̃́ↄnɛ, ↄ̃ wa è we kɛ́ Amↄni ge Mↄabu buie suli gɛ̃ Lua gbɛ̃́ↄ guuo, 
\v 2 asa aai da Isailiↄlɛ ń pↄbleao ń íoo. Aa fĩabò Balaaũɛ aà láaikɛmáɛ, ↄ̃ wá Lua aà yã́ lìlɛ samaa'oa ũ.\f + \fr 13.2 \fr*\ft Nao 22.1-6\ft*\f* 
\v 3 Kɛ́ aa ikoyãpi mà, aa buipãleↄ bↄ̀lɛ ń guu.
\p
\v 4 E yã́pi àↄ gɛ́ kɛi wà sa'ona Ɛliasibu dìlɛ wá Lua ua làasi gbɛ̃zↄ̃ↄ ũ. Amↄni bui Tobia daɛɛ, 
\v 5 à kpɛ́nɛ zↄ̃ↄ kpà Tobiapiwa. Wì pↄ́wɛnti kálɛu we yãa ń tulaletio ń Lua ua pↄ́ↄ ń pↄ́wɛna kwideo ń vɛ̃ɛo ń nísi pↄ́ dɛ Levii buiↄ ń lɛ̀sinaↄ ń bĩ́ibↄlɛdↄ̃anaↄ pↄ́ ũo ń laba pↄ́ wa kɛ̀ sa'onaↄnɛo. 
\v 6 Gↄↄ bee má kú Yelusalɛũo, asa Babɛli kí Aatasasa kpalablea wɛ̃̀ baakwi ń plaode guu ma ɛa gɛ aà kĩ́i. Gↄↄpla gbɛa ma wabikɛ̀wà, 
\v 7 ↄ̃ ma su Yelusalɛũ. Ma yãvãi pↄ́ Ɛliasibu kɛ̀ bao mà, lá à Lua ua kpɛ́nɛ kpà Tobiawa. 
\v 8 Yã́pi kɛ̀mɛɛ ĩ́i maamaaɛ, ↄ̃ ma aà pↄ́ↄ sɛ̀lɛ kↄ̀lɛɛ̀ bàasi. 
\v 9 Ma mɛ̀ wà gbãbↄ kpɛ́nɛpiɛ, ↄ̃ ma ɛa Lua ua pↄ́ↄ kàlɛ we ń pↄ́wɛntio ń tulaletio.
\p
\v 10 Má mà lↄ wìli Levii buiↄ ń lɛ̀sinaↄ asea kpámáo, ↄ̃ aa ↄbↄ̀lɛ Lua ua zĩu, an baade tà bua. 
\v 11 Ma zↄadↄ̀ gbãadeↄwa ma mɛ̀: Àkɛa a pãkpà Lua uaii? Ɔ̃ ma Levii buiↄ kã̀aa, ma ń baade dà a zĩu. 
\v 12 Ɔ̃ Yudaↄ mↄ̀ ń pↄ́wɛn kwide bↄ̀ ń vɛ̃ɛo ń nísio ḿpii, aa kàka làasiu.\f + \fr 13.12 \fr*\ft Mal 3.10\ft*\f* 
\v 13 Ma sa'ona Selemia ń lakɛ̃na Zadokio ń Levii bui Pedaiao dìlɛ làasipiↄ gbɛ̃zↄ̃ↄↄ ũ, ↄ̃ ma Zakuu nɛ́ Anana, Matania tↄũna dìlɛ ń dↄnlɛde ũ, asa wa ń dↄ̃ gbɛ̃́ náaideↄ ũɛ. Làasi pↄ́ↄ biilɛa ń gbɛ̃́ↄnɛ dɛ ń yã́ ũɛ. 
\v 14 Ma Lua, ma yã́pi àↄ dↄngu. Ńsu yãmaa pↄ́ má kɛ̀ n kpɛ́ zĩ yã́ musu suumpao.
\p
\v 15 Gↄↄbeezĩ ma Yudaeↄ è, aalɛ ↄ̃zↄ̃ vɛ̃ɛwa a ífɛ̃kĩi kã́mabogↄↄzĩ. Ma gbɛ̃eↄ è lↄ, aalɛ su Yelusalɛũ ń pↄ́wɛnao kã́mabogↄↄzĩ. Aa yè zàa'ĩnaↄnɛ ń vɛ̃ɛbɛ'io ń vɛ̃ɛbɛo ń kaadↄɛmbɛo ń aso pãleↄ, ↄ̃ ma ń gba laai blɛyiaa gↄↄpi zĩ́ yã́ musu.\f + \fr 13.15 \fr*\ft Bↄa 20.8-10\ft*\f* 
\v 16 Tiideↄ ku Yelusalɛũ, aaì su ń kpↄo ń laa bui píio, ↄ̃ aaì yía Yudaↄwa kã́mabogↄↄzĩ. 
\v 17 Ma zↄadↄ̀ Yuda gbãadeↄwa ma mɛ̀: Yãvãi pↄ́ álɛ kɛɛ bee sↄ̃ bɛ! Álɛ kã́mabogↄↄ gbãlɛɛ. 
\v 18 Màa á deziↄ lɛ́ kɛ, ↄ̃ wá Lua yãyìa wɛ̃́lɛɛ beewao lò? Ɔ̃ álɛ kã́mabogↄↄ gbãlɛ, álɛ aà pↄ fɛlɛ sↄ̃a? 
\v 19 Má dìlɛ tó gu sì ãsↄ̃adazĩ oosi, wàli Yelusalɛũ bↄlɛ gbaↄ tata, wasuli wɛ̃o e kã́mabogↄↄ gɛ̃. Ma azĩa gbɛ̃́ↄ kàlɛ bↄlɛpiↄu, kɛ́ gbɛ̃e su gɛ̃ ń asoo kã́mabogↄↄo yã́i. 
\v 20 Laatanaↄ ń gbɛ̃́ pↄ́ lɛ́ pↄ́ yiaↄ ì bĩ́i kpɛ gɛ̃n do ge gɛ̃n pla. 
\v 21 Ɔ̃ ma lɛzàmá ma mɛ̀: Tó a i we sa, má á kṹkũɛ. Za gↄↄ bee ↄ̃ aai mↄ kã́mabogↄↄzĩ lↄo. 
\v 22 Ɔ̃ má ò Levii buiↄnɛ aa gbãbↄ ńzĩaɛ, aai gɛ́ bↄlɛdↄ̃ai, kɛ́ wà kã́mabogↄↄ dↄ̃ Lua pↄ́ ũ yã́i. Ma Lua, to ma yã́pi àↄ dↄngu, ní ma wɛgwa n gbɛ̃kɛ zↄ̃ↄ lɛ́u.
\p
\v 23 Gↄↄbeezĩ lↄ ma Yudaeↄ è, aa nↄↄ sɛ̀ Asedodadeↄ ń Amↄniↄ ń Mↄabuↄ guu. 
\v 24 Ɔ̃ an nɛ́eↄ ì Asedoda yã́ ge buipãle yã́ ma, aali Ɛbɛlu yãmao. 
\v 25 Ɔ̃ ma zↄadↄ̀má ma ń ká, ma ń gↄ̃ɛeↄ gbɛ̃̀, ma ń gbɛ̃eↄ mikã gà má wò. Ɔ̃ má tò aa mɛ̀ wa sì ń Luao, wa ń nɛnↄɛↄ kpã́sã ń nɛgↄ̃ɛnaↄwao. Wa ń nɛnↄɛↄ sɛ́ ń nɛgↄ̃ɛↄnɛ ge ńzĩa pↄ́ ũo. 
\v 26 Màa Isailiↄ kí Salomↄↄ duunakɛ̀o lò? Buie kía i kaaàwao. Aà Lua yeaàzi,\f + \fr 13.26 \fr*\ft 2Sam 12.24-25\ft*\f* ↄ̃ à aà kpà Isailiↄ píi kía ũ, kási baa aàpi, buipãle nↄɛↄ mɛ́ aa aà dà duunau.\f + \fr 13.26 \fr*\ft 1Kia 11.1-8\ft*\f* 
\v 27 Ɔ̃ wá mà ápiↄ sↄ̃ a yãvãi zↄ̃ↄpi kɛ̀, a zĩbↄnkpɛkɛ̀ wá Luaɛ, a buipãleↄ sɛ̀ nↄ ũ. 
\v 28 Yoiada nɛ́ↄ do pↄ́ dɛ sa'onkia Ɛliasibu tↄũna ũ mɛ́ Oloni gbɛ̃́ Sambala nɛ́ sɛ̀ yãa, ↄ̃ ma aà yà. 
\v 29 Ma Lua, to an yã́ àↄ dↄngu, asa aa sa'onkɛ gbãlɛ̀ɛ, aa n bàa kua ń sa'onaↄ ń Levii buiↄ yãdilɛa gbòo. 
\v 30 Ma buipãleↄ yã́ↄ píi bↄ̀ sa'onaↄ ń Levii buiↄnɛ, ↄ̃ ma ń baade dàzĩu. 
\v 31 Ma ɛa yàa labakɛa gↄↄ dìlɛ gbɛ̃́ↄnɛ ń buapↄ́ káauↄ kpaao. Ma Lua, to ma yã́ àↄ dↄngu a maa ũ.