\id EPH Ephesians in Boko, Ross Jones, 2/08
\ide UTF-8
\h Ɛfɛsɛdeↄ
\toc1 Ɛfɛsɛdeↄ
\toc2 Ɛfɛsɛdeↄ
\toc3 Ɛfɛ
\mt1 ƐFƐSƐDEƆ
\imt1 Yã́ pↄ́ kú láɛ bee guuↄ
\ip Lua zĩna Pↄlu wɛ̃́lɛgɛa gɛ̃̀n àaↄ̃de guu à kɛ̀ Ɛfɛsɛ wɛ̃̀ àaↄ̃ɛ (Zĩn 19.1-20.1). Pↄlu dɛa dakpɛuna ũ guu ↄ̃ à láɛ bee kɛ̃̀u Ɛfɛsɛdeↄnɛ (3.1, 4.1) Yã́ pↄ́ àlɛ danɛ́ dɛ yã́ pↄ́ Lua a zɛkàlɛnɛ́ kɛ́ aaↄ tɛi gↄↄpii ũɛ, kɛ́ a pↄ́pii kãaa an mide Kilisiɛ, pↄ́ pↄ́ kú musu ń tↄↄlɛo píi (1.10).
\ip Láɛ bee daalɛkĩi (1.3-3.21) yã́ pↄ́ Lua kɛ̀wɛ̃ɛ Yesu Kilisi sabai bↄↄlɛkɛ̀, ↄ̃ à lɛdoũ pↄ́ wá vĩ naa Kilisiwa yã́ bↄↄlɛkɛ̀, à mɛ̀ Lua Yuda Yesudeↄ ń buipãle Yesudeↄ kɛ̀ a gbɛ̃́ↄ ũ mɛdoũdeↄ ũ. Bee gbɛa (4.1-6.20) Pↄlu ònɛ́ aa ãiakɛ wàↄ ku mɛ̀ndoũdeↄ ũ naa Yesu Kilisiwa Yesu gãli guu, uaↄ guu, zĩkɛkĩiↄ ń Yesusaideↄ guuo.
\ip Pↄlu Yesudeↄ gↄ̃a mɛdoũ lɛ̀ɛũ ń yã́ mɛ̀n àaↄ̃o: Yesudeↄ dɛ lán mɛwa mɛ́ Kilisi dɛ mɛpi mi ũ, Yesudeↄ dɛ lán Lua kpɛ́wa mɛ́ Kilisi dɛ a ɛ̃daalɛgbɛ ũ. Yesudeↄ dɛ nↄ pↄ́ Yesu sɛ̀ ũ. Beewa wá è Yesudeↄ lɛdoũkɛa bↄ̀ Dii kĩ́iɛ, tó wá aà náai vĩ mɛ́ wá naawà.
\c 1
\s1 Gbɛ̃kɛ pↄ́ Lua kɛ̀wɛ̃ɛ naa Kilisiwa guu
\p
\v 1 Mámɛmaa Pↄlu, Kilisi Yesu zĩna lá Lua yeiwa, ma láɛ bee kɛ̃̀ Lua gbɛ̃́ pↄ́ aalɛ Kilisi Yesu náaikɛ Ɛfɛsɛↄnɛ.\f + \fr 1.1 \fr*\ft Zĩn 18.19-21, 19.1\ft*\f* 
\v 2 Lua wá Mae ń Dii Yesu Kilisio gbɛ̃kɛkɛɛ́, aai á gba aafia. 
\v 3 Wà Lua wá Dii Yesu Kilisi Mae sáaukpa! Wá naa Kilisiwa musu Lua báaa píi dàwágu wá nisĩnau. 
\v 4 Wá naawà guu à wá sɛ́ dṹniakalɛa ãa, kɛ́ wá kua àↄ adoaɛ̀ sãasai. Aà yeawázi guu 
\v 5 à dↄ̀aa wá dílɛ a nɛ́ↄ ũ ń Yesu Kilisi gbãao, lá àlɛ yá a pↄeã guuwa, 
\v 6 kɛ́ à tↄbↄ a gbɛ̃kɛ gawide pↄ́ a kɛ̀wɛ̃ɛ a Yenzidepi guu yã́i. 
\v 7 Wá naawà guu wa bↄ aà au sabai. À wá tàaeↄ kɛ̃̀wá\f + \fr 1.7 \fr*\ft Kls 1.14\ft*\f* a gbɛ̃kɛ zↄ̃ↄ 
\v 8 pↄ́ a kɛ̀wɛ̃ɛ à kɛ̀ zài guu. Ɔ̃nↄ píi ń wɛzɛ̃ píio guu 
\v 9 a tò wà a pↄeã asii dↄ̃̀, lá à zɛ̀ò à kɛ Kilisi sabaiwa. 
\v 10 Tó aà pↄeãpi kɛgↄↄ kà, a pↄ́pii kãaa an mide Kilisiɛ, pↄ́ pↄ́ kú musu ń tↄↄlɛo píi.
\p
\v 11 Lua pↄ́ ì yã́pii kɛ lá à zɛ̀ò a pↄeã guuwa dↄ̀aa wá dílɛ lá álɛ yáwa, à wá sɛ́ a pↄ́ ũ wá naa Kilisiwa guu, 
\v 12 kɛ́ wá gbɛ̃́ pↄ́ wá wɛ́ dↄ Kilisizi káauↄ, wàↄ dɛ aà tↄbↄnaↄ ũ. 
\v 13 Ápiↄ sↄ̃ a sĩana yãmà, a bao pↄ́ a á suabapi sì. Á naawà guu Lua a seela kɛ̀wá a Nisĩna pↄ́ à a lɛgbɛ̃̀ ũ. 
\v 14 A dɛ gba pↄ́ Lua dↄ̀aa dàwɛ̃ɛ e àↄ gɛ́ a gbɛ̃́ↄ boi ũ, kɛ́ aa aà tↄbↄ yã́i.
\s1 Pↄlu wabikɛa Ɛfɛsɛdeↄnɛ
\p
\v 15 Ayãmɛto za gↄↄ pↄ́ ma á Dii Yesu náaikɛa mà ń á yea Lua gbɛ̃́ↄ píizio, 
\v 16 mili kã́mabo ń Lua sáaukpaa á yã́ musuoo. Á yã́ ìↄ dↄmagu wabi pↄ́ mi kɛ Luawa guu. 
\v 17 Mi wabikɛ Mae Gawide, wá Dii Yesu Kilisi Luawa, aà á gba ↄ̃nↄ, i á wɛ́ kɛ̃́ɛ́ ń a Nisĩna gbãao, kɛ́ à e à a dↄ̃ wásawasa. 
\v 18 Mi wabikɛwà aà á nↄ̀sɛ wɛ̃ɛ́, kɛ́ à e zia'ea yã́ pↄ́ à á káwà dↄ̃. À gba zↄ̃ↄ gawidepi dìlɛ a gbɛ̃́ↄnɛ 
\v 19 ń a gbãa zↄ̃ↄ bↄnsaɛ pↄ́ lɛ́ zĩkɛ wá gbɛ̃́ pↄ́ wálɛ a náaikɛↄ guuo. Iko gbãapi zĩkɛ̀ Kilisi guu 
\v 20 gↄↄ pↄ́ Lua aà bↄ̀ gau à aà zↄ̃̀lɛ musu a ↄplaai.\f + \fr 1.20 \fr*\ft Soũ 110.1\ft*\f* 
\v 21 We Kilisi dɛu kpalablenaↄ ń ikodeↄ ń gbãadeↄ ń diiↄla píi ń tↄ́ pↄ́ wì misiilɛnɛ́ↄ píi.\f + \fr 1.21 \fr*\ft Kls 1.16\ft*\f* I kɛ dṹnia tiaɛ bee ado no, ń a pↄ́ pↄ́ a mↄòɛ lↄ. 
\v 22 Lua tò pↄ́pii mikpàwà,\f + \fr 1.22 \fr*\ft Soũ 8.7\ft*\f* ↄ̃ à aà dìlɛ yã́pii mide ũ Yesudeↄnɛ.\f + \fr 1.22 \fr*\ft Kls 1.18\ft*\f* 
\v 23 Aamɛ Kilisi mɛ ũ, aa dɛ Kilisi pↄ́ ì gupii pa pɛɛa ũ.
\c 2
\s1 Bↄa gau gɛ̃a wɛ̃niu
\p
\v 1 Á dɛ yãa gɛↄ ũ Luaɛ á tàaeↄ ń á duunao yã́i. 
\v 2 Á tɛ́ dṹniaɛ bee tufai, a misìilɛ ĩ́an gbãadeↄ kíaɛ, nisĩna pↄ́ dↄaaa luayãmansaiↄnɛ ń a tiaopi. 
\v 3 Wápii wá dɛńwa yãaɛ sↄ̃. Wi pↄ́ pↄ́ wá mɛ yei ń yã́ pↄ́ wá pↄ gbào kɛ. Wá ia guu wá dɛ gbɛ̃́ pↄ́ Lua a pↄkũmabↄbↄmáↄ ũ lán dãↄwa, 
\v 4 ãma Lua sùuu zↄ̃ↄ, a yewázi maamaa. 
\v 5 Gↄↄ pↄ́ wá dɛɛ̀ gɛↄ ũ wá tàaeↄ yã́i, à wá vú ń Kilisio sãnu. À á suabà a gbɛ̃kɛ guuɛ.\f + \fr 2.5 \fr*\ft Kls 2.13\ft*\f* 
\v 6 Wá naa Kilisi Yesuwa guu à wá sɛ́ à wá zↄ̃lɛaànↄ musu, 
\v 7 kɛ́ à e a gbɛ̃kɛ zↄ̃ↄ bↄnsaɛ ↄlↄnɛ́ dṹnia pↄ́ a mↄ guu yãmaa pↄ́ a kɛ̀wɛ̃ɛ naa Kilisi Yesu guuwa. 
\v 8 Lua á suabà a gbɛ̃kɛ guu Yesu náai pↄ́ á kɛ̀ yã́iɛ. Bee i bↄ á kĩ́i no, Lua mɛ́ á gbá. 
\v 9 I bↄ á yãkɛa kĩ́i no, kɛ́ gbɛ̃e su ĩ́anadãòo yã́i. 
\v 10 Lua ↄgbɛn wá ũ. Wá naa Kilisi Yesuwa guu à wá kɛ́, kɛ́ wàↄ kú ń yãmaa pↄ́ à dↄ̀aa dìlɛwɛ̃ɛ kɛao.
\s1 Gↄ̃a mɛdoũ naa Kilisiwa guu
\p
\v 11 Á gbɛ̃́ pↄ́ á dɛ buipãle ũ ia guuↄ, tↄ̃̀zↄ̃naↄ ì mɛɛ́ gyafↄↄdeↄ, ãma an tↄ̃zↄ̃a dɛ gbɛ̃nazĩna ↄgbɛ ũɛ, à làasookɛ á kua ziwa. 
\v 12 Gↄↄ bee á kú Kilisi kpɛo, á dɛ zĩ̀loↄ ũ Isailiↄnɛ. Á baa ku Luabaakuańnↄ ń aà lɛgbɛ̃anɛ́o guuo. Á kú dṹnia guu wɛdↄa zia'eai sai luadↄ̃sai. 
\v 13 Á naa Kilisi Yesuwa guu tia, á gbɛ̃́ pↄ́ á zã̀ ń Luao yãaↄ a sↄ̃aàzi kãi ń Kilisipi au gbãao. 
\v 14 Aàpi mɛ́ wá kua ń kↄ̃o na ũ, a tò Yudaↄ ń buipãleↄ gↄ̃̀ mɛdoũ. Aà mɛ guu à íbɛlɛ pↄ́ da ń zãnguo bĩ́i ũ gbòo, 
\v 15 à Mↄizi ikoyã kpàgui ń a yãdilɛaↄ, kɛ́ à to an pla ḿpii gↄ̃anↄ mɛdoũ gbɛ̃́ dafuↄ ũ. Màa à ń kɛ́ ń kↄ̃o na. 
\v 16 À íbɛlɛ mìdɛ, à ḿpla ḿpii kɛ̀na ń Luao mɛdoũpi guu a gaa líwa musu. 
\v 17 À mↄ̀ kɛa na ń Luao baokpà á gbɛ̃́ pↄ́ á zã̀ ń Luaoↄnɛ ń gbɛ̃́ pↄ́ kãiaànↄↄ lↄ.\f + \fr 2.17 \fr*\ft Isa 57.19\ft*\f* 
\v 18 Aà yã́i wápii wá sↄ̃a Mae Luazi zɛ́ vĩ ń aà Nisĩna doũ gbãao. 
\v 19 Ayãmɛto á dɛ nibↄↄ ge bↄ̀mↄↄ ũ lↄo, a gↄ̃ beleↄ ũ ń Lua gbɛ̃́ↄ, aà uadeↄ ũ. 
\v 20 A gↄ̃ kpɛ́ pↄ́ Lua lɛ́ bo ũ. Zĩnaↄ ń ãnabiↄ mɛ́ a ɛ̃daalɛa ũ, mɛ́ Kilisi Yesu mɛ́ ɛ̃pi daalɛgbɛ ũ. 
\v 21 Naawà guu kpɛ́ pↄ́pii ì kↄ̃'eu, ìↄ gbã Lua kpɛ́ ũ naa Diiwa guu. 
\v 22 Ápiↄ sↄ̃ á naawà guu á dɛ kpɛ́pi dↄbↄↄ ũ, kɛ́ àↄ dɛ Lua Nisĩna kúkĩi ũ.
\c 3
\s1 Pↄlu baonakpan ziia
\p
\v 1 Bee yã́ mɛ́ tò ma Pↄlu, má dɛ dakpɛuna ũ Kilisi Yesu yã́ musu á buipãleↄ yã́i. 
\v 2 I ma lá Lua a gbɛ̃kɛkɛanɛ́ zĩ dàmɛɛ má kɛ̀ á guuo lé? 
\v 3 Lua a asiiyã ↄ̀lↄmɛɛ, má kɛ̃̀ɛ́ yↄↄ kↄ̀. 
\v 4 Tó a a kyokɛ̀, á fↄ̃ dↄ̃ lá ma wɛ́ kɛ̃̀ Kilisi asiiyã musu. 
\v 5 Lua i yã́pi o gbɛ̃eɛ yãao, ↄ̃ tiasa a ↄ̀lↄ a zĩnaↄ ń a ãnabiↄnɛ ń a Nisĩna gbãao. 
\v 6 Yã́ pↄ́ ulɛa yãapin kɛ: Naa Kilisi Yesuwa guu baona maa yã́i buipãleↄ gↄ̃̀ Lua àizɛɛblenaↄ ũ ń Yudaↄ, aa gↄ̃̀ńnↄ mɛdoũdeↄ ũ. An baa ku lɛ́ pↄ́ Lua gbɛ̃̀ guu.\f + \fr 3.6 \fr*\ft Kls 1.26-27\ft*\f* 
\v 7 Ma gↄ̃ baonapi kpana ũ gba pↄ́ Lua dàmɛɛ aà gbãa lɛ́ zĩkɛ ma guu yã́i. 
\v 8 Ma gbɛ̃́ pↄ́ má kpɛɛ Lua gbɛ̃́ↄ guu, Lua gbapi dàmɛɛ, ↄ̃ málɛ Kilisi ɛ̀fãai pↄ́ lɛ́ vĩo baonakpa buipãleↄnɛ, 
\v 9 málɛ asiiyã pↄ́ Lua lɛ́ yá ń gbɛ̃́piio bↄnɛ́ gupuau. Asiiyãpi ulɛa Lua pↄ́ pↄ́pii kɛ̀ kĩ́i za asĩnizĩ, 
\v 10 kɛ́ tiasa a to kpalablenaↄ ń ikode pↄ́ kú musuↄ a ↄ̃nↄ bui dasiↄ e a gãlideↄwa. 
\v 11 Kilisi Yesu wá Dii sabai ↄ̃ Lua pↄeã pↄ́ kú gↄↄpiipi bↄ̀lɛi. 
\v 12 Wá naawà guu wá sↄ̃a Luazi zɛ́ vĩ ń sↄ̃o dilɛa aà náaikɛa yã́i. 
\v 13 Ayãmɛto ma wabikɛ̀wá, ásu tó á pↄ ya taasi pↄ́ málɛ kɛ á yã́ musu yã́io. Á kpɛlaa yã́ɛ.
\s1 Kilisi yeawázi
\p
\v 14 Ayãmɛto mi kúlɛ Mae Luaɛ. 
\v 15 Maepi ↄ̃ maekɛ pↄ́ kú musu ń zĩ́lɛↄ píi ì a ↄlɛsɛ. 
\v 16 Mi wabikɛwà aà á gba gbãa á nↄ̀sɛ guu ń a Nisĩna gbãao a gawi zↄ̃ↄ lɛ́u, 
\v 17 Kilisi e sadaáguu a náai pↄ́ álɛ kɛ yã́i, á zĩ́napɛlɛa ìↄ zɛdↄa aà yeawázi guu, 
\v 18 kɛ́ à e Kilisi yeawázi yàasa ń a gbã̀ao ń a lɛsĩo ń a zã̀o wàaipa ń Lua gbɛ̃́ↄ píi, 
\v 19 í aà yeawázi pↄ́ wa fↄ̃ wà a lɛ́ dↄ̃ píio dↄ̃, Lua kɛkɛá píi i pɛɛwá.
\p
\v 20 Lua gbãa lɛ́ vĩo, a fↄ̃ kɛwɛ̃ɛ dɛ lá wi a wabikɛ ge wi a làasookɛla maamaa ń gbãa pↄ́ lɛ́ zĩkɛ wá guuo. 
\v 21 Aà tↄbↄ Yesudeↄ ń Kilisi Yesupio musu wɛ̃ ń wɛ̃o e gↄↄpii! Ãmi.
\c 4
\s1 Mɛdoũkɛa
\p
\v 1 Ma gbɛ̃́ pↄ́ má dɛ dakpɛuna ũ Dii yã́i, ma wabikɛ̀wá, á kua ká lá Lua á sisi àↄ dɛwa. 
\v 2 À kↄ̃ fↄ̃ àↄ yekↄ̃i zĩabusaa ń nↄ̀sɛniɛo guu ń mɛnao.\f + \fr 4.2 \fr*\ft Kls 3.12-13\ft*\f* 
\v 3 À wɛtã àↄ lɛdoũ pↄ́ bↄ̀ Lua Nisĩna kĩ́i vĩ ba pↄ́ wá dↄkↄ̃wa ũ. 
\v 4 Mɛ mɛ̀ndoɛ, mɛ́ Nisĩnapi mɛ̀ndoɛ. Màa zia'ea yã́ pↄ́ Lua á káwà mɛ̀ndo lↄ. 
\v 5 Dii mɛ̀ndoɛ, mɛ́ Lua zɛ́ mɛ̀ndoɛ ń da'ilɛ mɛ̀ndoo. 
\v 6 Lua mɛ̀ndoɛ wápii Mae ũ, ↄ̃mɛ iko vĩ wá baadewa, ìↄ zĩkɛ wá baade píi guu, a kú ń wá baade píio.
\p
\v 7 Kilisi gbɛ̃kɛkɛ̀ wá baadeɛ lá à gbadàwɛ̃ɛ lɛ́u. 
\v 8 A yã́i a kɛ̃a láu wà mɛ̀:
\q1 Kɛ́ à dɛ̀dɛ musu ń a zĩ̀zↄↄ,
\q1 à gbadà gbɛ̃́ↄnɛ.\f + \fr 4.8 \fr*\ft Soũ 68.18\ft*\f*
\m
\v 9 Aà dɛdɛa bee mɛ̀ kpelewa ni? Bee mɛ̀ à pìla e tↄↄlɛ nↄnau gĩaɛ. 
\v 10 Gbɛ̃́ pↄ́ pìlapi mɛ́ gbɛ̃́ pↄ fɛ̀lɛ mà luabɛa ũ, kɛ́ aà gupii pa. 
\v 11 Aàpi mɛ́ gbɛ̃eↄ gbà zɛ́ aàↄ dɛ zĩnaↄ ũ, gbɛ̃eↄ ãnabiↄ, gbɛ̃eↄ baonakpanaↄ, gbɛ̃eↄ pàsitɛɛↄ ge yãdanɛdeↄ,\f + \fr 4.11 \fr*\ft 1Kln 12.28\ft*\f* 
\v 12 kɛ́ Lua gbɛ̃́ↄ e wàↄ ku a zĩ sↄu guu, Kilisi mɛ i zɛdↄ, 
\v 13 e wápii wàↄ ka Lua Nɛ́ náai doũ kɛawa aà dↄ̃a doũ guu, wí gↄ̃ gbɛ̃́ kàsaaↄ ũ Kilisi pↄ́ pↄ́ pɛ̀ɛwà zↄ̃ↄ lɛ́u. 
\v 14 Màa wáↄ dɛ nɛ́fɛ̃nɛna pↄ́ wì ↄ̃nↄ ń kↄ̃nio kɛnɛ́ wà ń sã́sãↄ ũ lↄo. Yã́ dafu daanɛ́ ì ń sɛ́ lán ĩ́ana ge ísↄ̃wa. 
\v 15 Wá sĩana'onɛ́ ń yeańzio, wí gbã́ yã́pii musu naa Kilisi pↄ́ dɛ mi ũwa. 
\v 16 Naawà guu mɛgu píi ì kↄ̃'eu aa nakↄ̃wa kĩↄ zĩ sabai, ↄ̃ mɛguↄ ì zĩkɛ a zɛ́wa, mɛ iↄ gbã́, iↄ zɛdↄ ń yeakↄ̃io.\f + \fr 4.16 \fr*\ft Kls 2.19\ft*\f*
\s1 Kua zi ń kua dafuo
\p
\v 17 Ayãmɛto málɛ yã'oɛ́ ń Dii tↄ́o, málɛ á gbaò laai. Ásu àↄ ku lán luadↄ̃nsai pↄ́ an nↄ̀sɛ yãfũna dↄaaanɛ́ↄwao. 
\v 18 An làasoo sↄũkũ̀, aa kɛ̃a wɛ̃ni pↄ́ Lua ì kpámáwa, kɛ́ an wɛ́ sia mɛ́ an swã́ gbãa yã́i. 
\v 19 Aa nↄ̀sɛ vĩo, aa ńzĩa kpà wisaiyãwa, aa dↄ́ɛ'ĩi bui píi kɛa bĩi vĩ. 
\v 20 Ápiↄ sↄ̃ i Kilisi yãdada màao. 
\v 21 A aà yã́ mà, a sĩana pↄ́ a vĩ dàda á Yesudekɛ guu. 
\v 22 Wa òɛ́ à ↄkpa á dàa zi\f + \fr 4.22 \fr*\ft Kls 3.9-10\ft*\f* pↄ́ dↄaaaɛ́i, asa a ↄ̃̀ↄkpà á pↄnidɛa vãiↄ yã́i. 
\v 23 À tó á nↄ̀sɛlilɛ, á làasoo i gↄ̃ dafu, 
\v 24 í dàa dafu pↄ́ Lua kɛ̀wɛ̃ɛ kɛ́ wà e wàↄ dɛ láawa\f + \fr 4.24 \fr*\ft Daa 1.26\ft*\f* sɛ́, á kua iↄ adoa kua sĩande ũ yã́zɛdekɛa guu.
\p
\v 25 Bee yã́i à ↄkpa mↄafiliyãi, á baade lí sĩana'o a gbɛ̃́deeɛ,\f + \fr 4.25 \fr*\ft Zkl 8.16\ft*\f* asa mɛ̀ doũ guↄn wá ũ. 
\v 26 Tó á pↄ pà, ásu duunakɛo. Ásu to ĩatɛ̃ gɛ̃ kpɛ́u à á pↄpaa leo, 
\v 27 kɛ́ ásu Ibiisi gba gɛ̃kĩio yã́i. 
\v 28 Gbɛ̃́ pↄ́ ì kpã́i'o yãa kpã́i tó. Aà wɛtã zĩ maa kɛ ń a ↄo, i pↄ́ e à dↄò taasidelɛ. 
\v 29 Ásu to yãvãie bↄ á lɛ́uo, sema a zɛde pↄ́ a gbɛ̃́ kã́fĩ à àikɛ gbɛ̃́ pↄ́ lɛ́ maↄnɛ. 
\v 30 Ásu Lua Nisĩna pↄ yao, asa aà kua adoaɛ. A dɛ seela pↄ́ Lua kɛ̀wá e wá bogↄↄzĩ ũ. 
\v 31 Ásuli ĩ́isɛ ń gbɛ̃eoo. À pↄkũma ń pↄkpɛ̃nɛo ń palaa gbãao ń gbɛ̃́sↄ̃sↄ̃ao ń pãsĩ bui píio tó. 
\v 32 Àↄ gbɛ̃kɛ vĩ ń kↄ̃o. Àↄ kↄ̃ wɛ̃na vĩ. À sùuukɛ ń kↄ̃o lá Lua sùuukɛ̀ánↄwa naa Kilisiwa guu.\f + \fr 4.32 \fr*\ft Kls 3.13\ft*\f*
\c 5
\s1 Kua gupuau
\p
\v 1 Lá á dɛ Lua nɛ́ yenzideↄ ũ, à aà ↄlɛsɛ́. 
\v 2 Lá Kilisi yewázi à gì a wɛ̃nii wá yã́i sa'obↄ pↄ́ a gĩ ì kɛ Luaɛ na ũ, à to yeakↄ̃i dↄaaɛ́ màa sↄ̃.\f + \fr 5.2 \fr*\ft Bↄa 29.18\ft*\f* 
\v 3 Lá á dɛ Lua gbɛ̃́ↄ ũ, i kũ wà káaluakaa ń dↄ́ɛ'ĩi bui píio ń bĩikɛao ma dↄ á lɛ́u bauo. 
\v 4 Wisaiyã'oa ń yãdↄↄsai oao ń faai bɛ̃̀ɛ boao maaánↄo lↄ, sema sáau yã́. 
\v 5 Àↄ dↄ̃ sã́asã kɛ́ káaluae ge dↄ́ɛ'ĩidee ge bĩidee a kpala pↄ́ bↄ̀ Lua kĩ́i ble ń Kilisioo. Pↄ́ pↄ́ gbɛ̃́ lɛ́ a bĩikɛ gↄ̃̀ aà dii ũ.
\p
\v 6 Ásu to gbɛ̃e á sã́sã ń yãpã giioo. Yã́ bee taaↄ mɛ́ a to Lua pↄkũmabↄbↄ a yãdansaiↄwa. 
\v 7 Á bàa su àↄ kúńnↄo. 
\v 8 Á kú yãa gusiau, tiasa naa Diiwa guu á kú gupuau. Àↄ ku gupua gbɛ̃́ↄ ũ, 
\v 9 asa gupua ì maa bui píi inɛ́ ń yã́zɛdeo ń sĩanao. 
\v 10 À yã́ pↄ́ ì ka Diigu dada. 
\v 11 Á baa su àↄ kú ń gusia yãkɛa pↄ́ lí kã́fĩakɛnɛ́oo. À bↄ yã́ beeↄ kpɛ wɛliwɛ. 
\v 12 Baa yã́ pↄ́ gbɛ̃́piↄ ì kɛ asii guu oaá wíyãɛ. 
\v 13 Tó wà bↄ̀ yã́ kpɛ gupuau, wì a sã́asã dↄ̃, 
\v 14 asa pↄ́ pↄ́ bↄ̀ gupuau gↄ̃̀ gupua pↄ́ ũɛ. A yã́i tò wì mɛ:
\q1 I'ona vu fɛlɛ bↄ gɛↄ guu,
\q1 Kilisi i gupunɛ.
\p
\v 15 Àↄ á táa'ozɛ dↄ̃ maamaa. Ásu àↄ dɛ sↄũↄ ũo, sema ↄ̃nↄnaↄ. 
\v 16 Àli yã́ pↄ́ Lua a zɛbↄ̀ɛ́ kɛ,\f + \fr 5.16 \fr*\ft Kls 4.5\ft*\f* asa gↄↄɛ beeↄ maao. 
\v 17 Ayãmɛto ásu àↄ sↄũo, àↄ dↄ̃ lá Dii pↄeã dɛ. 
\v 18 Ásu àↄ kú ń wɛ̃dɛkɛaoo, ì lalasizĩmáɛ. À to Lua Nisĩna paɛwá, 
\v 19 í faaibo ń kↄ̃o ń soũo ń Lua táasilɛao ń lɛ pↄ́ Lua Nisĩnapi ì daɛ́o. À lɛsi, í Dii táasilɛ á sↄ̃ guu, 
\v 20 íↄ Mae Lua sáaukpa gↄↄpii yã́pii guu ń wá Dii Yesu Kilisi tↄ́o.\f + \fr 5.20 \fr*\ft Kls 3.16-17\ft*\f* 
\v 21 À misiilɛkↄ̃ɛ Kilisi vĩa pↄ́ á vĩ yã́i.
\s1 Gↄ̃ɛ kua ń a nao
\p
\v 22 Nↄɛↄ, á baade lí misiilɛ a zã́ɛ lá i kɛ Diiɛwa.\f + \fr 5.22 \fr*\ft Kls 3.18, 1Piɛ 3.1\ft*\f* 
\v 23 Asa gↄ̃ɛ mɛ́ nↄɛ mi ũ, lá Kilisi dɛ a gãlide pↄ́ dɛ a mɛ ũↄ mi ũ an Suabana ũwa. 
\v 24 Lá gãlidepiↄ ì misiilɛ Kilisiɛ, màa sↄ̃ nↄɛↄ baade lí misiilɛ a zã́ɛ yã́pii guu.
\p
\v 25 Gↄ̃ɛↄ sↄ̃, á baade líↄ ye a nazi, lá Kilisi ye a gãlideↄzi à gì a wɛ̃nii ń yã́iwa.\f + \fr 5.25 \fr*\ft Kls 3.19, 1Piɛ 3.7\ft*\f* 
\v 26 À ń gbãsĩ wòlo da'ilɛkɛa guu ń yã́ pↄ́ aa òo, ↄ̃ aa gↄ̃̀ aà pↄ́ ũ, 
\v 27 kɛ́ à ń kpán'aɛkɛ ń gawio tèbatebasai, yuunkasai, sãasai, gbãsĩsai, tàaesai. 
\v 28 Màa à kũ̀ gↄ̃ɛↄ baade àↄ ye a nazi lá azĩa mɛwa. Gbɛ̃́ pↄ́ ye a nazi ye azĩai. 
\v 29 Gbɛ̃e líↄ za azĩa mɛuo. Ì blɛ kpawà, ì laaidↄwà, lá Kilisi ì kɛ a gãlideↄnɛwa, 
\v 30 kɛ́ wá dɛ aà mɛguↄ ũ yã́i. 
\v 31 Ayãmɛto gↄ̃ɛ ì go a de ń a daowa, ì na a nawa, aaì gↄ̃ lán sàwakula ń gbalaowa.\f + \fr 5.31 \fr*\ft Daa 2.24\ft*\f* 
\v 32 Yã́ gbia ulɛa yã́pi guu, mɛ́ má è a dɛ Kilisi ń a gãlideↄ yã́ ũ. 
\v 33 Ń beeo a dɛ á yã́ ũ sↄ̃. Á baade líↄ ye a nazi lá azĩawa. Nↄɛ sↄ̃ aàli a zã́ yãda.
\c 6
\s1 Nɛ́ↄ ń zↄↄ
\p
\v 1 Nɛ́ↄ, naa Diiwa guu àli á de ń á dao yãma, asa bee mɛ́ maa.\f + \fr 6.1 \fr*\ft Kls 3.20\ft*\f* 
\v 2-3 Àli á de ń á dao kpɛla, kɛ́ àↄ aafia, í gɛ̃gɛ̃ dṹniau. Yã́ pↄ́ Lua dìlɛ ń lɛgbɛ̃ao sɛ̃́ian we.\f + \fr 6.2-3 \fr*\ft Bↄa 20.12\ft*\f*
\p
\v 4 Maeↄ sↄ̃ ásuli á nɛ́ↄ pↄ fɛ̃o.\f + \fr 6.4 \fr*\ft Kls 3.21\ft*\f* Àli ń toto, íli lɛdamá Dii gbɛ̃́ↄ nɛgwaa ũ.
\p
\v 5 Zↄↄ, àli á dṹnia la diiↄ yãma ń nↄ̀sɛmɛndoo ń vĩao ń lualuao, lá Kilisi álɛ kɛɛ̀wa. 
\v 6 Ásuli zĩ ↄkunwɛiana kɛnɛ́o. Àli Lua pↄeã kɛ ń nↄ̀sɛpuao Kilisi zↄↄ ũ. 
\v 7 Àli zĩkɛ ń ãiao, lá Dii álɛ kɛɛ̀wa, i kɛ gbɛ̃nazĩna no. 
\v 8 Àↄ dↄ̃ kɛ́ Dii a baade maakɛa fĩaboɛ̀, zↄ ge wɛ̃́ɛ.\f + \fr 6.8 \fr*\ft Kls 3.22-25\ft*\f*
\p
\v 9 Diiↄ sↄ̃ àli kɛnɛ́ màa lↄ.\f + \fr 6.9 \fr*\ft Kls 4.1\ft*\f* À yãpãsĩ'oanɛ́ tó. Àↄ dↄ̃ kɛ́ ampiↄ ń ápiↄ píi, á Dii ku musu, ìli gbɛ̃e zãboo.
\s1 Gↄ̃kɛbↄ pↄ́ Lua kpàwáↄ
\p
\v 10 Yã́ pↄ́ gↄ̃̀n kɛ: Àↄ gbãa naa Diiwa guu ń aà iko gbãa zↄ̃ↄo. 
\v 11 À gↄ̃kɛbↄ pↄ́ Lua kpàwáↄ da píi, kɛ́ à e zɛ gíũgiũ, í Ibiisi dↄfↄ̃. 
\v 12 Asa i kɛ gbɛ̃nazĩnaↄ wálɛ dɛ̃ɛkańnↄo, sema nisĩn vãi pↄ́ kú musuↄ. Aa dɛ dṹniaɛ bee gusia kiblenaↄ ũ ń ń mideↄ ń ń ikodeↄ. 
\v 13 Ayãmɛto àↄ gↄ̃kɛbↄpiↄ kũa píi, kɛ́ à fↄ̃ zɛ gi gↄↄ vãi zĩ́, í gↄ̃ zɛa gíũgiũ apii kɛ láaa gbɛa. 
\v 14 Àↄ zɛa gbãa, í sĩana dↄ ápi asana ũ, í yã́zɛde da mↄ̀ ula ũ.\f + \fr 6.14 \fr*\ft Isa 11.5, 59.17\ft*\f* 
\v 15 À kɛa na ń Luao baokpaa ãia kpa kyale ũ,\f + \fr 6.15 \fr*\ft Isa 52.7\ft*\f* 
\v 16 íↄ luanaaikɛa kũa sɛ̀ngbao ũ gↄↄpii, kɛ́ à fↄ̃ zɛzↄ̃ Setãu kagbaↄnɛ píi. 
\v 17 À suabaa si kpa mↄ̀ fùa ũ,\f + \fr 6.17 \fr*\ft Isa 59.17\ft*\f* íↄ Lua yã́ pↄ́ dɛ aà Nisĩna fɛ̃nda ũ kũa. 
\v 18 Àliↄ wabikɛ gↄↄpii, íↄ Lua dↄnlɛ gbɛa yã́pii guu ń aà Nisĩna dↄaaaɛ́o. Àli a itɛ̃kɛ ń mɛna zↄ̃ↄo, íↄ wabikɛ Lua gbɛ̃́ↄnɛ píi. 
\v 19 À wabikɛmɛɛ sↄ̃, kɛ́ tó málɛ yã'o, Lua ma gba lɛ́ mà a bao asii onɛ́ sↄ̃̀deedeesai. 
\v 20 Baonapi yã́i má dɛ kↄ́ↄ pↄ́ wa dàkpɛu ũ. Àↄ wabikɛmɛɛ mà kpa sↄ̃̀deedeesai, lá à kũ̀ mà owa.
\s1 Lɛzaamá
\p
\v 21 Wá gbɛ̃do yenzide Tisiki, Dii zĩkɛnnáaide, a ma yã́ↄ píi baokpaɛ́, kɛ́ à e àↄ ma kua dↄ̃. 
\v 22 Ma aà zĩ̀wá, kɛ́ aà wá kua oɛ́ɛ, á nↄ̀sɛ i níni.\f + \fr 6.22 \fr*\ft Kls 4.7-8\ft*\f*
\p
\v 23 Mae Lua ń Dii Yesu Kilisio wá gbɛ̃́ↄ gba aafia, aa ń yeakↄ̃i kã́fĩnɛ́ ń ń Lua náai pↄ́ aalɛ kɛo. 
\v 24 Lua gbɛ̃kɛkɛ gbɛ̃́ pↄ́ ye wá Dii Yesu Kilisizi láasaiↄnɛ ḿpii.