\id 2TH 2 Thessalonians in Boko, Ross Jones 2/08
\ide UTF-8
\h 2 Tɛsalonideↄ
\toc1 Tɛsalonideↄ lá plaade
\toc2 2 Tɛsalonideↄ
\toc3 2Tɛs
\mt1 TƐSALONIDEƆ LÁ PLAADE
\imt1 Yã́ pↄ́ kú láɛ bee guuↄ
\ip Pↄlu yã́ pↄ́ á ò Tɛsalonideↄ lá sɛ̃́ia guu ò la lↄ, à Kilisi mↄa ń gawi zↄ̃ↄo ònɛ́. Yã́pi lɛ́ ĩada Tɛsalonideↄwa. An gbɛ̃eↄ lɛ́ e gↄↄpi kà kↄ̀ɛ (2.2), ↄ̃ an gbɛ̃eↄ lɛ́ gí zĩkɛi, ↄ̃ aa gↄ̃̀ ń gbɛ̃́ↄnɛ aso ũ, asa aalɛ e gↄↄ gbɛzãpi kà kãikãi (3.6-12). Láɛ bee lɛ́ ń da zɛ́wa an làasoo kpaanla kɛapi yã́ musu.
\ip Pↄlu nà Lua sáaukpaawa Tɛsaloni Yesudeↄ yeakↄ̃i yã́ musu, ↄ̃ à wabikɛ̀ Diiwa aà ń gba gbãa zĩ pↄ́ a nànɛ́ ń ↄzĩ yã́ musu (1.1-12). Ɔ̃ à Kilisi mↄa yã'ònɛ́. Bee a kɛo e gbɛ̃́ pↄ́ wì mɛɛ̀ luayãdansai à gɛ mↄò. Tó aà gbãa dɛ̀dɛ, a to dṹnia gbɛ̃́pii bↄ Lua yã́ kpɛ, aai íbɛlɛsɛ ń Yesudeↄ (2.1-12). Vãi ↄdaa zãa yã́ musu, sema Yesudeↄ zɛ gbãa luanaaikɛa guu (2.13-3.5). A gbɛa Pↄlu lɛkã̀ gbɛ̃pãↄ yã́wa, kɛ́ aasu wàↄ dɛ gbɛ̃eɛ aso ũo (3.6-15). Lápi midɛkĩi à báaadàńgu, à fↄkpàmá (3.16-18).
\ip Yãdilɛaɛ bee lɛ́ wá gba laai: Gbɛ̃́ pↄ́ ye pↄe woaio a pↄbleo (3.10). Wá Yesudekɛ guu wásuli pãkpa yã́ pↄ́ kũ̀ wà kɛzio.
\c 1
\s1 Yã́kpalɛkɛa Kilisi mↄgↄↄzĩ
\p
\v 1 Ma Pↄlu ń Silivɛ̃ɛo ń Timↄteeo, wámɛ wa láɛ bee kɛ̃̀ Tɛsaloni\f + \fr 1.1 \fr*\ft Zĩn 17.1\ft*\f* Yesude pↄ́ aa ku Lua wá Mae ń Dii Yesu Kilisio guuↄnɛ. 
\v 2 Mae Lua ń Dii Yesu Kilisio gbɛ̃kɛkɛɛ́, aai á gba aafia.
\p
\v 3 Wá gbɛ̃́ↄ, a maa wàↄ Lua sáaukpa á yã́ musu gↄↄpiiɛ, lá a maawa, asa á luanaaikɛa lɛ́ zↄ̃ↄkũ maamaa, mɛ́ á yeakↄ̃i lɛ́ kã́fĩ. 
\v 4 A yã́i tò wi ĩ́anadã á yã́ musu Lua gbɛ̃́ↄ kↄ̃kãaaↄ guu, lá i ĩadama ń taasi píio fↄ̃ ń mɛnao ń luanaaikɛao. 
\v 5 Lua ì yã́gↄ̃gↄ̃ ń gbɛ̃́ↄ a zɛ́waɛ. Taasi pↄ́ álɛ kɛ kpala pↄ́ bↄ̀ Lua kĩ́i yã́i lɛ́ ↄlↄnɛ́ kɛ́ a ka à gɛ̃u. 
\v 6 Lua ì yãkɛ a zɛ́waɛ. A gbɛ̃́ pↄ́ aalɛ á wɛtãↄ wɛtã, 
\v 7 i á gbɛ̃́ pↄ́ wàlɛ á wɛtãↄ gba ĩ́ampakĩi ń wápiↄ. Tó Dii Yesu bↄ̀ luabɛ, a mↄ́ ń a malaika gbãaↄ 
\v 8 ń tɛ́vuao, a mↄakaò luadↄ̃nsai pↄ́ aai wá Dii Yesupi bao sioↄwa.\f + \fr 1.8 \fr*\ft Isa 66.15-16\ft*\f* 
\v 9 Kaalɛ láasai ↄ̃ Lua a fĩaboonɛ́. Aaↄ ku zã̀ ń Diio ń aà gbãa gawideo. 
\v 10 Tó à mↄ̀ gↄↄpi zĩ́, a tↄbↄ a gbɛ̃́ↄ yã́ musu, aà náaikɛnapiↄ i aà maabo ḿpii. Áↄ kú ń guu, asa a yã́ pↄ́ wá òɛ́ sìɛ.
\p
\v 11 Ayãmɛto wiↄ wabikɛɛ́ wá Luawa gↄↄpii, aà tó á kua ka gbɛ̃́ pↄ́ à ń sisi à ń sɛ́ↄ kuawa, i yãmaa pↄ́ a zɛ ń a kɛaↄ ń zĩ pↄ́ álɛ kɛ aà náaikɛa guuↄ píi papaɛ́ ń a gbãao, 
\v 12 Dii Yesu tↄ́ i bↄ á musu, á tↄ́ i bↄ aà musu wá Lua ń Dii Yesu Kilisipio gbɛ̃kɛkɛaɛ́ yã́i.
\c 2
\s1 Luayãdansai
\p
\v 1 Wá gbɛ̃́ↄ, Yesu Kilisi mↄa ń wá kãaaaaàzio yã́ musu,\f + \fr 2.1 \fr*\ft 1Tɛs 4.15-17\ft*\f* wa wabikɛ̀wá, 
\v 2 ásu tó á pↄ ya àannↄo. Tó ãnabi yãe ge waasoe ge taalae pↄ́ wà mɛ̀ à bↄ̀ wá kĩ́i mɛ̀ Dii mↄgↄↄ kà kↄ̀, ásu bílikɛo. 
\v 3 Ásu to gbɛ̃e á sã́sã ń bee taaoo, asa gↄↄ bee a mↄo, sema bↄa Lua kpɛ ka gĩa, luayãdansai pↄ́ mipɛ̀ kaalɛwa bↄ̀ gupuau bàasio. 
\v 4 A íbɛlɛsɛ ń pↄ́ pↄ́ wì ń dilɛ dii ũↄ ń pↄ́ pↄ́ wì kúlɛnɛ́ↄ píi, i azĩa sɛ lɛsĩ dɛńla, i gɛ zↄ̃lɛ Lua kpɛ́u à azĩa dilɛ Lua ũ se.\f + \fr 2.4 \fr*\ft Dan 11.36\ft*\f* 
\v 5 Gↄↄ pↄ́ má kúánↄ ma yã́pi òɛ́. A dↄáguo lé? 
\v 6 Á dↄ̃ pↄ́ pↄ́ lɛ́ kpaɛ̀ tia, kɛ́ asu bↄ kpóoo, 
\v 7 asa luayãdasai lɛ́ ↄta asii guu kↄ̀. A bↄo, sema gbɛ̃́ pↄ́ lɛ́ kpaɛ̀ tia gɛ̃zɛa bàasio, 
\v 8 luayãdansaipi i bↄ sa. Dii Yesu a aà dɛ ń a lɛ́'ĩanao,\f + \fr 2.8 \fr*\ft Isa 11.4\ft*\f* a aà míↄnzↄ̃ ń a mↄa gawio. 
\v 9 Luayãdansaipi a mↄ́ ń Setãu gbãaoɛ, i dabudabuↄ ń yãbↄnsaɛↄ ń seela ɛgɛnaↄ kɛ píi.\f + \fr 2.9 \fr*\ft Mat 24.24\ft*\f* 
\v 10 A kↄ̃ni bui píi kɛ gbɛ̃́ pↄ́ aa mipɛ̀ kaalɛwaↄnɛ, kɛ́ aa gì sĩana pↄ́ a ń suabai yã́i. 
\v 11 Bee yã́i Lua lɛ́ sã́sãyã zĩmá à ↄta ń guu, aai ɛɛ náaikɛ. 
\v 12 Beewa yã́ a zↄ̃lɛ gbɛ̃́ pↄ́ aai sĩana sio aaì pↄnakɛ ń vãioↄwa ḿpii.
\p
\v 13 Wá gbɛ̃́ Dii yenzideↄ, a maa wàↄ Lua sáaukpa gↄↄpii á yã́ musuɛ, asa Lua á sɛ́ za káau à bↄ ń a Nisĩna pↄ́ tò wa gↄ̃ a pↄ́ ũ gbãao á sĩanasia yã́iɛ. 
\v 14 Lua á sisi à á sɛ́ màa baona pↄ́ wá kpàɛ́ guu, kɛ́ à á baa e wá Dii Yesu Kilisi gawi guuɛ. 
\v 15 Ayãmɛto wá gbɛ̃́ↄ, à zɛ gíũgiũ, íↄ yã́ pↄ́ wá dàɛ́ ń lɛ́o ge lá guu kũa. 
\v 16 Lua wá Mae yewázi, aà gbɛ̃kɛ guu a tò wá nↄ̀sɛ àↄ daa doũ e gↄↄpii, à wá ká zia maawa. Aàpi ń wá Dii Yesu Kilisio 
\v 17 á nↄ̀sɛ níniɛ́, aai á zɛdↄ maakɛa ń yãmaa oao guu píi.
\c 3
\s1 Wásu wàↄ màa vĩo
\p
\v 1 Yã́ pↄ́ gↄ̃̀ wá gbɛ̃́ↄ, à wabikɛwɛ̃ɛ Luawa kɛ́ Dii yã́ e ligua kpakpa, iↄ gawi vĩnɛ́ lá a vĩ á kĩ́iwa. 
\v 2 À wabikɛwɛ̃ɛ aà wá bↄ gbɛ̃vãi mìsaiↄ ↄzĩ, asa i kɛ gbɛ̃́pii mɛ́ Lua náai vĩo. 
\v 3 Dii náai vĩ, a á gba gbãa, i á sí Setãuwa. 
\v 4 Wá naa Diiwa guu wá a náai vĩ kɛ́ álɛ yã́ pↄ́ wá òɛ́ↄ kɛ, mɛ́ áↄ kɛɛ. 
\v 5 Dii tó á laai àↄ ku Lua yeaáziwa ń mɛna pↄ́ Kilisi ì inɛ́o.
\p
\v 6 Gbɛ̃́ↄ, wa naɛ́ Dii Yesu Kilisizi, à kɛ̃́ wá gbɛ̃́ pↄ́ màa vĩ aali zĩkɛ yã́ pↄ́ wá dànɛ́waoↄwa. 
\v 7 Á dↄ̃ ázĩawa, a maa à wá kɛa kɛɛ, asa màadeↄn wá ũ á guuo. 
\v 8 Wi gbɛ̃e blɛ si wá blè pão, wa zĩkɛ̀ gwãasĩna ń fãanɛo, wa taasikɛ̀ e wa kpasa, kɛ́ wásu gↄ̃ á gbɛ̃eɛ aso ũo yã́i.\f + \fr 3.8 \fr*\ft 1Tɛs 2.9\ft*\f* 
\v 9 Wá a zɛ́ vĩ à dↄwálɛ, ãma wa a taa kɛ̀ɛ́, kɛ́ à wá ↄlɛsɛɛ. 
\v 10 Gↄↄ pↄ́ wá kúánↄ, wá dìlɛ gbɛ̃́ pↄ́ ye zĩkɛaio a pↄbleo. 
\v 11 Wá mà á gbɛ̃eↄ màa vĩ, aali pↄe woo, sema gudɛ. 
\v 12 Wá dìlɛ gbɛ̃́ bee taaↄnɛ, wa nanɛ́ Dii Yesu Kilisizi, aali zĩkɛ kílikili aa ńzĩa gwa.
\p
\v 13 Ápiↄ sↄ̃ wá gbɛ̃́ↄ, ásu kpasa ń maakɛaoo. 
\v 14 Tó gbɛ̃e i yã́ pↄ́ wá òɛ́ lápi guu dao, à aà yã́ bↄ dilɛ. Ásu gbɛ̃́ kpaaànↄo, kɛ́ wí e aà kṹ. 
\v 15 Ãma ásu íbɛlɛsɛaànↄo, à lɛdawà á gbɛ̃do ũ.
\p
\v 16 Dii Aafiade á gba aafia gↄↄpii yã́pii guu. Dii àↄ kúánↄ ápii. 
\v 17 Ma Pↄlu mámɛ ma fↄɛ bee kɛ̃̀ ń mazĩa ↄo. Bee mɛ́ ma lá píi seela ũ, màa mi kɛ̃́. 
\v 18 Wá Dii Yesu Kilisi gbɛ̃kɛkɛɛ́ ápii.