\id 1TH 1 Thessalonians in Boko, Ross Jones 2/08
\ide UTF-8
\h 1 Tɛsalonideↄ
\toc1 Tɛsalonideↄ lá sɛ̃́ia
\toc2 1 Tɛsalonideↄ
\toc3 1Tɛs
\mt1 TƐSALONIDEƆ LÁ SƐ̃IA
\imt1 Yã́ pↄ́ kú láɛ bee guuↄ
\ip Tɛsaloniá Masedoni bùsu wɛ̃́lɛdaɛ. A ku Gɛlɛsi bùsu saɛ, Lomadeↄ mɛ́ iko vĩwà. Pↄlu wɛ̃́lɛgɛa plaade guu à gɛ̀ Filipi gĩaɛ, a gbɛ̀a Tɛsaloni. We à gãli dàalɛu, ãma i gↄↄplakɛ weo, asa Yudaↄ bↄ̀ aà kpɛ. Wà nàɛwà aà bↄ Tɛsaloni. Kɛ́ à bↄ̀ we à tà Belee (Zĩn 17.1-10). Gbɛzã gↄↄ pↄ́ a ku Kↄlɛni, ↄ̃ aà ìwa Timↄtee mↄ̀ aà lè we, à Tɛsalonideↄ yã́ sɛ̀lɛ sìuɛ̀. Ɔ̃ Pↄlu a lá sɛ̃́iaɛ bee kɛ̃̀ Tɛsalonideↄnɛ.
\ip Bao pↄ́ Pↄlu mà Tɛsaloni Yesudeↄ yã́ musu aà pↄ kɛ̀ na. À Lua sáaukpà Tɛsaloni Yesudeↄ yãkɛa pↄ́ lɛ́ gbɛ̃́ↄ da zɛ́wa yã́ musu. Aà zĩkɛa we yã'oanɛ́ gbɛa à mɛ̀ á ɛa mↄ wɛ́kpalɛńzi (1.1-3.13). À lɛdàmá aa zɛ gbãa Dii guu, aa wɛtã wàↄ gɛ́ aɛ ń Yesu yã́o (4.13-5.11). A midɛkĩi à lɛdàumá à fↄkpàmá lↄ. (5.12-28).
\ip Pↄlu gↄↄgbɛzãzĩ yã́ↄ bↄↄlɛkɛ̀ lↄ. A òwɛ̃ɛ wà gupu gbɛ̃́ↄnɛ, wàↄ dↄ̃ kɛ́ zĩewa wáↄ kú ń Diio gↄↄpii (4.17).
\c 1
\s1 Tɛsalonideↄ zɛ'ↄlↄanɛ́
\p
\v 1 Má Pↄlu ń Silivɛ̃ɛo ń Timↄteeo wámɛ wa láɛ bee kɛ̃̀ Tɛsaloni\f + \fr 1.1 \fr*\ft Zĩn 17.1\ft*\f* Yesude pↄ́ aa na Mae Lua ń Dii Yesu Kilisiowaↄnɛ. Lua gbɛ̃kɛkɛɛ́, i á gba aafia.
\p
\v 2 Wá wabikɛa guu á yã́ ìↄ dↄwágu gↄↄpii, wíↄ Lua sáaukpa á baade píi yã́ musu. 
\v 3 Kɛ́ i zĩkɛ á luanaaikɛawa, mɛ́ á yea gbɛ̃́iá yã'oa ń lɛ́o yã́ no, mɛ́ á wɛdↄ wá Dii Yesu Kilisizi seasai yã́i, a yã́ ìↄ dↄwágu Lua wá Mae kùɛ. 
\v 4 Wá gbɛ̃́ Lua yenzideↄ, wá dↄ̃ kɛ́ Lua á sɛ́, 
\v 5 asa kɛ́ wa baonakpàɛ́, wi mↄ́ ń yã'oao adoo, wa mↄ ń Lua Nisĩna gbãaoɛ, yã́pi wá kũa gbãa maamaaɛ. Á dↄ̃ lá wá kuò á guu á aafia yã́i, 
\v 6 ↄ̃ a gↄ̃ wápiↄ ń Diio dàdanaↄ ũ. Taasi zↄ̃ↄ guu a yã́pi sì ń pↄna pↄ́ Lua Nisĩna dàáguo,\f + \fr 1.6 \fr*\ft Zĩn 17.5-9\ft*\f* 
\v 7 ↄ̃ a zɛ'ↄ̀lↄ Yesude pↄ́ kú Masedoni bùsuuↄnɛ ń Gɛlɛsi bùsuo píi. 
\v 8 Dii yã́ bↄ̀ á kĩ́i, i zɛ Masedoni ń Gɛlɛsio adoo, á Yesu náaikɛa yã́ lìgua píi, a baokpaa vĩ lↄo. 
\v 9 Wàlɛ o lá wa zɛ'è á kĩ́i, lá a bↄ dii ɛgɛnaↄ yã́u a zɛ̀ ń Luao, ↄ̃ álɛ zↄble Lua bɛ̃́ɛ sĩandepiɛ, 
\v 10 álɛ aà Nɛ́ Yesu pↄ́ à aà bↄ̀ gau dã e aà bↄ luabɛ, i mↄ wá sí pↄkũma pↄ́ Lua a bↄbↄmáwa.
\c 2
\s1 Pↄlu zĩkɛa Tɛsaloni
\p
\v 1 Ma gbɛ̃́ↄ, á dↄ̃ ázĩawa kɛ́ wá zɛ'ea á kĩ́i i kɛ pão. 
\v 2 Á dↄ̃ lá wà ĩadàwá, wa taasikɛ̀ Filipi káau,\f + \fr 2.2 \fr*\ft Zĩn 16.19-24\ft*\f* ↄ̃ wá Lua tò wa sↄ̃dìlɛ, wa baona pↄ́ bↄ̀ aà kĩ́i kpáɛ́ dɛ̃ɛ ń dɛ̃ɛo.\f + \fr 2.2 \fr*\ft Zĩn 17.1-9\ft*\f* 
\v 3 Wá naɛawá dɛ ɛɛ zɛ́ yã́ ũo. Wi kɛ làasoo vãi ge á blea yã́i no. 
\v 4 Lá Lua wá ká a baokpaawa, màa wi kpánɛ́, i kɛ gbɛ̃nazĩna pↄeã wálɛ wɛɛlɛo, sé Lua wá làasoo tàasikana pↄ́. 
\v 5 Á dↄ̃ kɛ́ wi yã́ nana o gbɛ̃eɛo, mɛ́ wi yãe kɛ ń mↄafilio bĩikɛa yã́io. Lua mɛ́ wá seelade ũ. 
\v 6 Wi sáau wɛɛlɛ gbɛ̃nazĩna kĩ́io, ápiↄ ge gbɛ̃pãleↄ. 
\v 7 Baa kɛ́ wá a zɛ́ vĩ wà to à wá iko dↄ̃ wá Kilisi zĩnakɛ yã́i, wá kɛ̀ánↄ busɛbusɛ, lá nↄɛ nɛade ì laaidↄ a nɛ́wawaɛ. 
\v 8 Kɛ́ wá yeázi maamaa yã́i, wi zɛò wà baona pↄ́ bↄ̀ Lua kĩ́i kpáɛ́ adoo, ń wázĩa kpaawáoɛ lↄ, asa a gↄ̃ wá gbɛ̃́ yenzideↄ ũɛ. 
\v 9 Ma gbɛ̃́ↄ, à tó wá zĩkɛa ń taasio yã́ dↄágu. Gↄↄ pↄ́ wálɛ bao pↄ́ bↄ̀ Lua kĩ́ipi kpáɛ́, wiↄ zĩkɛ fãanɛ ń gwãasĩnao, kɛ́ wásu gↄ̃ á gbɛ̃eɛ aso ũo yã́i.\f + \fr 2.9 \fr*\ft 2Tɛs 3.8\ft*\f* 
\v 10 Wá seeladeↄn á ũ, ń Luao lↄ, kɛ́ wá kú á Yesudeↄ guu a zɛ́wa luayãmanaↄ ũ tàaesai. 
\v 11 Á dↄ̃ wa yãkɛ̀ á baadeɛ lá mae ì kɛ a nɛ́ↄnɛwa. 
\v 12 Wa lɛdàwá, wa á nↄ̀sɛ nìniɛ́, wa naɛwá á kua ka gbɛ̃́ pↄ́ Lua ń kpá kpala gawide pↄ́ bↄ̀ a kĩ́iuↄ kuawa.
\p
\v 13 Kɛ́ a Lua yã́ pↄ́ wá òɛ́pi mà, i dilɛ gbɛ̃nazĩna pↄ́ ũo, á sì lá a dɛwa Lua yã́ sĩande ũ. Ɔ̃mɛ lɛ́ zĩkɛ á gbɛ̃́ pↄ́ álɛ aà náaikɛↄ guu. Bee yã́ mɛ́ tò lↄ wiↄ Lua sáaukpa láasai. 
\v 14 Ma gbɛ̃́ↄ, á yã́ kɛ̀ doũ ń Lua gbɛ̃́ pↄ́ naa Kilisi Yesuwa Yudeↄ, asa ĩa doũ pↄ́ Yudaↄ dàmá ↄ̃ á bùsudeↄ dàwá sↄ̃.\f + \fr 2.14 \fr*\ft Zĩn 17.5-9\ft*\f* 
\v 15 Yudaↄ Dii Yesu dɛ̀ ń ãnabiↄ lↄ, mɛ́ aa wá yá.\f + \fr 2.15 \fr*\ft Zĩn 13.50, 14.19\ft*\f* An yã́ lí ká Luaguo, aa íbɛlɛsɛ̀ ń gbɛ̃́piio. 
\v 16 Aaì kpáwɛ̃ɛ wà yã́ pↄ́ Lua ì gbɛ̃́ suabao o buipãleↄnɛ. Màa duuna pↄ́ aaìↄ kɛ gↄↄpii ìↄ diadi. Lua pↄkũma wì ń musu sa.
\s1 Pↄlu Timↄtee zĩa Tɛsaloni
\p
\v 17 Wápiↄ sↄ̃ ma gbɛ̃́ↄ, kɛ́ wa kɛ̃kↄ̃wa gↄↄpla, wɛ́ mɛ́ gɛ̃̀gɛ̃ ń kↄ̃o, i kɛ sↄ̃ no. Wa á nidɛ̀ maamaa, wa wã wà wɛsikↄ̃lɛ. 
\v 18 Wá ye mↄ́ á gwai lↄ. Mapi ma Pↄlu, ma mↄa zɛwɛ̀ɛlɛ dɛ gɛ̃n do ge gɛ̃n plaa, ↄ̃ Setãu zɛzↄ̃̀wɛ̃ɛ. 
\v 19 Tó wá Dii Yesu mↄ̀, démɛ àↄ dɛ gbɛ̃́ pↄ́ wá wɛ́ dↄiↄ ũ ń wá pↄnakɛbↄo ń wá ĩ́andãbↄo aà aɛi? Ápiↄ bàasio, 
\v 20 asa ámɛ á wá ĩ́andãbↄ ń wá pↄnakɛbↄo ũ.
\c 3
\p
\v 1 Kɛ́ wá fↄ̃ mɛnakɛ lↄo, wa zɛò wà gↄ̃ Atɛni wátɛ̃ɛ,\f + \fr 3.1 \fr*\ft Zĩn 17.16\ft*\f* 
\v 2 wa wá gbɛ̃́ Timↄtee, wá Lua zĩkɛndee Kilisi baokpaa guu zĩ̀wá, kɛ́ aà á gba gbãa, i á nↄ̀sɛ níniɛ́ á luanaaikɛa guu, 
\v 3 kɛ́ gili su gɛ̃ á gbɛ̃egu ĩadamaɛ bee musuo. Á dↄ̃ ázĩawa, kɛ́ Lua bee taa dìlɛwɛ̃ɛ. 
\v 4 Gↄↄ pↄ́ wá kú á kĩ́i, wa dↄaa wá òɛ́ wa mɛ̀ wa gi ĩadaiwáo, ↄ̃ à kɛ̀ lá á dↄ̃wa màa. 
\v 5 Ayãmɛto lá má fↄ̃ mɛnakɛ lↄo, ma aà zĩ̀ á luanaaikɛa gwai. Gbɛ̃yↄ̃na á yↄ̃́, wá zĩkɛ̀ pã yã̀, wá dↄ̃o.
\p
\v 6 Ɔ̃ Timↄtee sùwá sa,\f + \fr 3.6 \fr*\ft Zĩn 18.5\ft*\f* à á luanaaikɛa ń á yeawázio baokpàwɛ̃ɛ. À mɛ̀ wá yã́ ìↄ dↄágu ń làasoo maao, mɛ́ álɛ wá bɛɛkɛ lá wálɛ á bɛɛkɛwa. 
\v 7 Ma gbɛ̃́ↄ, á luanaaikɛ Ayãmɛto wá nↄ̀sɛ nìni á yã́ musu wá ĩadama ń wá taasio píi guu. 
\v 8 Asa lá á zɛa gíũgiũ naa Diiwa guu, wá mɛ sù sa. 
\v 9 Wá fↄ̃ Lua sáaukpa á yã́ musu. Wa wá Lua sáaukpà maamaa ń pↄna zↄ̃ↄ pↄ́ wi kɛ aà aɛ á yã́io. 
\v 10 Gwãasĩna ń fãanɛo wiↄ wabikɛ Luawa maamaa, kɛ́ wà e wɛsikↄ̃lɛ, wí pↄ́ pↄ́ kɛ̃̀sã á luanaaikɛawa bↄↄlɛkɛɛ́.
\p
\v 11 Lua wá Mae ń wá Dii Yesuo zɛpoowɛ̃ɛ wà e mↄ́ á gwai. 
\v 12 Dii á yeakↄ̃i ń á yea gbɛ̃́piizio kã́fĩɛ́, i liála lá wá yeáziwa, 
\v 13 á sↄ̃ iↄ daa doũ gbãsĩsai, íↄ ku tàaesaideↄ ũ Lua wá Mae aɛ wá Dii Yesu mↄa ń a gbɛ̃́ↄ píi gↄↄzĩ.
\c 4
\s1 Kua lá Lua yeiwa
\p
\v 1 Yã́ pↄ́ gↄ̃̀ ma gbɛ̃́ↄ, á mà wá lɛ́u lá a maa á kua ka Luagu. Á kú màa, ãma wálɛ wabikɛwá, wálɛ awakpaɛ́ wá Dii Yesu guu, àↄ ku màa àↄ gɛ́. 
\v 2 Á yã́ pↄ́ wá dìlɛɛ́ ń Dii Yesu tↄ́o dↄ̃. 
\v 3 À tó á kua àↄ adoa, í mikɛ̃ gbãsĩkɛawa, asa bee mɛ́ Lua pↄeã ũ. 
\v 4 Á baade azĩa mɛ kpɛla, àↄ azĩa kũa dↄ̃ gbãsĩsai, 
\v 5 i kɛ ń dↄ́ɛ'ĩi nidɛao lán luayãdↄ̃nsai pↄ́ aa aà dↄ̃oↄwa no. 
\v 6 Yã́pi guu gbɛ̃e su a gbɛ̃́ taiinkɛ ge à tàaekɛɛ̀o, asa Dii mɛ́ a mↄaka gbɛ̃́ bee taaↄwa, lá wa dↄaa wá òɛ́ wa a lɛzàwáwa. 
\v 7 Lua i wá sísi wàↄ ku gbãsĩ guuo, sema wá kua àↄ adoa. 
\v 8 Ayãmɛto gbɛ̃́ pↄ́ gì yã́ beei i kɛ gbɛ̃nazĩna à gìio, Lua pↄ́ ì a Nisĩna pↄ́ a kua adoa dawágu ↄ̃ à gìi.
\p
\v 9 Wá e yeakↄ̃i yã'oɛ́o, asa ázĩawa Lua yeakↄ̃i dàɛ́. 
\v 10 Á kú màa kↄ̀ ń wá gbɛ̃́ pↄ́ kú Masedoni bùsuuↄ píi. Gbɛ̃́ↄ, wa lɛdàwá àↄ ku màa àↄ gɛ́, 
\v 11 í zɛwɛɛlɛ àↄ ku yãkelesai, í ma ázĩawa, í ázĩa zĩ kɛ lá wá dìlɛɛ́wa, 
\v 12 kɛ́ á yãkɛa e ka Yesusaideↄgu, mɛ́ ásu àↄ sↄ̃kpalɛa gbɛ̃ezio.
\s1 Dii mↄa
\p
\v 13 Gbɛ̃́ↄ, wá ye àↄ sĩana dↄ̃ gbɛ̃́ pↄ́ i'òↄ yã́ musu, kɛ́ á pↄ su àↄ sia lán gbɛ̃́ kĩni pↄ́ aa zia'eoↄwao yã́i. 
\v 14 Lá wá sì Yesu gà à vù, màa lↄ Lua a tó gbɛ̃́ pↄ́ i'ò Yesu guuↄ ɛa mↄaànↄ sãnu.
\p
\v 15 Yã́ pↄ́ wálɛ oɛ́ɛ beeá Dii yãdanɛɛ. Wá gbɛ̃́ kↄ̃na pↄ́ wáↄ ku e Dii mↄ́zĩↄ, wá dↄaa i'onapiↄnɛo. 
\v 16 Dii mɛ́ a bↄ luabɛ, i pila ń yãdilɛnɛo ń malaika gbɛ̃zↄ̃ↄ lↄↄo ń Lua kã̀ae ↄ́o, gbɛ̃́ pↄ́ gà naa Kilisiwaↄ i vu sɛ̃́ia, 
\v 17 a gbɛa wá gbɛ̃́ kↄ̃na pↄ́ wá kúↄ, wa wá sɛ́lɛńnↄ sãnu e luabɛpuanau dai Diilɛ ĩ́ana guu, wíↄ kuaànↄ gↄↄpii.\f + \fr 4.17 \fr*\ft 1Kln 15.51-52\ft*\f* 
\v 18 Ayãmɛto à kↄ̃ nↄ̀sɛ níni ń yã́pio.
\c 5
\p
\v 1 Gbɛ̃́ↄ, a gↄↄ ge a zaa oaɛ́ zɛvĩo, 
\v 2 asa á dↄ̃ sã́asã lá kpã́i ì mↄ gwã́, màa aↄ dɛ Dii mↄgↄↄ.\f + \fr 5.2 \fr*\ft Mat 24.43-44, 2Piɛ 3.10\ft*\f* 
\v 3 Tó gbɛ̃́ↄ lɛ́ o wa aafia, wa ku dↄdↄa, kaalɛ a mↄ́má kã́ndo lá nɛ'iwãwã ì mↄ nↄsindeewawaɛ, aa bↄo. 
\v 4 Ápiↄ sↄ̃ gbɛ̃́ↄ, á kú gusiau kɛ́ gↄↄpi á le lán kpã́iwao, 
\v 5 asa gupua gbɛ̃́ↄn á ũ, fãanɛ gbɛ̃́ↄn á ũ ápii. Gwãasĩna ge gusia gbɛ̃́ↄn wá ũo. 
\v 6 Ayãmɛto wásuli i'o lán dãↄwao. Wà itɛ̃kɛ, wíↄ kú ń laaio. 
\v 7 I'onaↄ ì i'o gwã́, mɛ́ wɛ̃dɛnaↄ ì wɛ̃dɛ kɛ gwã́, 
\v 8 wápiↄ sↄ̃, lá fãanɛ gbɛ̃́ↄn wá ũ, wàↄ kú ń laaio, wí luanaaikɛa ń yeakↄ̃io da mↄ̀ ula ũ, wí wɛdↄa zia'ea yã́i kpá mↄ̀ fùa ũ.\f + \fr 5.8 \fr*\ft Isa 59.17, Ɛfɛ 6.14-17\ft*\f* 
\v 9 Asa Lua i wá dilɛ à pↄkũmabↄbↄwáo. À wá dílɛ à wá suaba ń wá Dii Yesu Kilisi gbãaoɛ. 
\v 10 Ɔ̃mɛ gà wá yã́i kɛ́ wàↄ kuanↄ, wá bɛ̃́ɛ ge wa i'òn nò. 
\v 11 Ayãmɛto à lɛdakↄ̃wa, í kↄ̃ gba gbãa, lá álɛ kɛwa.
\s1 Pↄlu yãdilɛa Tɛsalonideↄnɛ
\p
\v 12 Gbɛ̃́ↄ, wa wabikɛ̀wá, à bɛɛɛ dↄ̃ gbɛ̃́ pↄ́ aaì zĩkɛ á guu, aa iko vĩwá an zĩkɛa Diiɛ guu, aalɛ á dazɛwaↄnɛ. 
\v 13 À ń kpɛla maamaa, íↄ yeńzi zĩ pↄ́ aalɛ kɛ yã́i. Àↄ na ń kↄ̃o. 
\v 14 Gbɛ̃́ↄ, wa lɛdàwá à faasaideↄ dazɛwa, à gbɛ̃́ pↄ́ an kúsu kwɛ́ↄ gba sↄ̃, à laaidↄ gbãasaideↄwa, í mɛnakɛ ń gbɛ̃́piio. 
\v 15 À laaika á gbɛ̃e suli vãi fĩabo ń vãioo. À zɛwɛɛlɛ àↄ maakɛkↄ̃ɛ ń gbɛ̃́piio gↄↄpii.
\p
\v 16 Àↄ ku pↄna guu gↄↄpii. 
\v 17 Àↄ wabikɛ Luawa láasai. 
\v 18 Àↄ Lua sáaukpa yã́ píi musu. Bee mɛ́ dɛɛ́ aà pↄeã ũ naa Kilisi Yesuwa. 
\v 19 Ásuli kpá Lua Nisĩnaɛo, 
\v 20 ásuli saka ãnabikɛguo. 
\v 21 À yã́pii tàasika, íↄ a maa kũa, 
\v 22 í mikɛ̃ vãi bui píiwa.
\p
\v 23 Lua aafiade to à ázĩa kpawa míↄmiↄ, i á nisĩna ń á wɛ̃nio ń á mɛo dↄ̃́aɛ́ aafia tàaesai e wá Dii Yesu Kilisi mↄ́zĩ. 
\v 24 Lua pↄ́ á sisi à á sɛ́ náai vĩ, a yã́pi kɛɛ́.
\p
\v 25 Gbɛ̃́ↄ, à wabikɛwɛ̃ɛ. 
\v 26 À fↄkpa wá gbɛ̃́ↄwa píi ń Lua gbɛ̃́ↄ lɛ́pɛakↄ̃wao. 
\v 27 Ma naɛ́ Diizi à láɛ bee kyokɛnɛ́ ḿpii.
\p
\v 28 Wá Dii Yesu Kilisi gbɛ̃kɛkɛɛ́.