\id MRK Mark BSMK01.SC Sarangani Blaan Mark 16-Julù86 
\h Mark 
\toc1 Mark I Fye Tulen gablà ku Dyisas Krayst i Sulat Mark 
\toc2 Mark 
\toc3 Mark 
\mt1 Mark 
\mt2 I Fye Tulen gablà ku Dyisas Krayst i Sulat Mark 
\is1 Kafaglabat i sulat Mark 
\ip Mark smulat libru ani, na ditù di Roma i gusmulatan, na sulatan i dad to di banwe Roma. Kenen i tnanin smulat gablà di dad mgimò Dyisas Krayst klon dini di tah tanà. Tingà fa i nawa Mark di kdini Dyisas. Dyérusalém i syudad gumdaan na gulamnokan. Na slaan makuf Mark di gal gustifun i dad gal mlalò ku Dyisas di bangla gal dmasal di Dwata, na déén gumdà Mark dmilè ku Fiter na i dademe gal mlalò ku Dyisas. Na man i dademe, faglut Mark di ku Dyisas mdà di ku Fiter. 
\ip Kafnge i dee fali, mbaling too bong i ksalig Mark di ku Dyisas. Na di slà ditù Fiter di banwe Roma, Mark i satu dmeme kenen. Na too matnù i gnadean mdà di ku Fiter. Magin kenen ku Fol na Barnabas tmulen i Fye Tulen gablà ku Dyisas. 
\ip Sulat Mark ani du fye gadè i dad to faglut ku tan i duen Dyisas fafati. Landè alì gmanan gablà di dad tdò Dyisas, bay tulenan i dad tnikeng mgimoan, du fye gadèla kenen too mtulus. Na faglabat Mark nun glal Dyisas mlifet dad salà i dad to. 
\c 1  
\s1 Gablà ku Dyan Gal Munyag 
\r (Matyu 3:1-12; Luk 3:1-18; Dyan 1:19-28) 
\p  
\v 1 Ani kagatbù i Fye Tulen gablà ku Dyisas Krayst Tingà Dwata. 
\p  
\v 2 Nun man Dwata di Tingaan fsulatan tugadan Isaya i gman, 
\q1 “Dekgu saliggu muna di ge, 
\q2 du fatlagad i dalanam. 
\q1  
\v 3 Tamlo kenen mdà di banwe landè to mnè déén, 
\q2 manan, ‘Fatlagadyu i dalan i Amu, 
\q2 na tanluyu i gumagun.’ ”\f + \fr 1:3 \ft Isaya 40:3. I fléd ani gablà di kafatlagad dad to i ktola du fan kel i Amu, dunan Dyisas Krayst.\f* 
\p  
\v 4 Taman dek Dwata Dyan, i to gal munyag. Na mnè kenen di banwe landè to mnè déén. Na tdoan dad to stifun déén, fye msal ale na tmagak dad sasè nimòla na fbunyag, du fye nlifet Dwata dad salàla. 
\p  
\v 5 Na too dee dad to gal salu déén di kenen, mdà di klamang banwe Dyudiya, na mdà di syudad Dyérusalém. Na tulenla kenen i dad salàla, na bnunyag ale Dyan di bong yéél Dyordan. 
\p  
\v 6 Na i klaweh lsak Dyan dunan i bul kamél nanem, na i galingan kindal lmanaf. Tlangas na tnab i knaanan. 
\p  
\v 7 Na ani galan santulen di dad to, manan, “Nun fan kel satu to tmadol deg. Too kenen mdatah fa di deg, taman là agu gablà balù lkuad na mbel ikat talumfaan.\f + \fr 1:7 \ft Di bang Dyan mnè di tah tanà satu nimò fimò dad to i dad mdanà lifan dunan malob blì i dad to kel di gumnè. Bay di fandam Dyan too mdatah fa Dyisas di kenen, taman là kenen gablà balù mgimò lifan mbel i talumfaan.\f* 
\v 8 I kbunyaggu gamu ani fagu alò di yéél, bay i kbunyag i to tmadol deg fagu di Mtiu Tulus blén gamu.” 
\s1 I kbunyag ku Dyisas, na ktilew kenen 
\r (Matyu 3:13–4:11; Luk 3:21-22; 4:1-13) 
\p  
\v 9 Là mlo ani, salu Dyisas di ku Dyan fdu di Nasarét déén di banwe Galili. Na fbunyag kenen ku Dyan di yéél Dyordan.  
\v 10 Na di kalwaan di lam yéél, teenan nun gumgukà i langit, na fdanà Tulus Dwata mdaf di kenen gambet abun.  
\v 11 Na nun talù mdà di langit, manan, “Ge tingàgu toogu kando, na too fye nawagu ge.” 
\p  
\v 12 Kafnge én, gasil fsalu Tulus Dwata Dyisas di banwe landè to mnè déén.  
\v 13 Fat falò butangan mnè ditù, na di klon déén tnilew kenen Satanas. Na nun fa déén dad labè lmanaf di bnas, bay dad kasaligan Dwata mifat kenen. 
\s1 I kalék Dyisas fat dad to mlalò kenen 
\r (Matyu 4:12-22; Luk 4:14-15; 5:1-11) 
\p  
\v 14 Kafnge én, di kaglam Dyan di bilanggù samfulê Dyisas di banwe Galili du samtulen i Fye Tulen mdà di Dwata.  
\v 15 Na manan, “Ani bang kagdohò i gman di Tnalù Dwata, du tamdadong nan kagot Dwata. Taman msal gamu na tnagakyu dad sasè nimòyu, na faglut gamu di Fye Tulen mdà di Dwata.” 
\p  
\v 16 Na di kagun ani, magu Dyisas di kilil i bong lanaw Galili, na teenan lwe lagi saflanek, Simon na Andru. Mukut ale di lanaw du ale dad to gal mwè nalaf.  
\v 17 Na man Dyisas di dale, “Magin gamu deg, du balù ani galyu nimò meye nalaf, tdòta gamu meye dad to du fye mlalò ale deg.”  
\v 18 Na di kmanan ani, tagakla fukutla, na magin ale kenen. 
\p  
\v 19 Di kagula là mlo teen Dyisas lwe saflanek, Dyém na Dyan, dad ngà Sébidi, di lam awengla. Tambél ale dad fukutla.  
\v 20 Na di kite Dyisas dale tlon ale du faginan, na tnagakla màla Sébidi na dad to tnadenla di lam awengla, du magin ale ku Dyisas. 
\s1 I kafalwà Dyisas dad busaw 
\r (Luk 4:31-37) 
\p  
\v 21 Na di kagula, salu ale di tukay banwe Kafernaum. Na kakel i Duh Kaftud dad Dyu, fusuk Dyisas di gal gusatdò dad Dyu, na tamdò.  
\v 22 Di kaklinge dad to i tdò Dyisas too ale tikeng, du too nun glal i katdoan, là salngad di dad to gal tamdò flalò blé Dwata fagu di ku Mosis. 
\p  
\v 23 Di là fa fnge i katdò Dyisas nun satu lagi déén nun busaw. Na mkit kenen,  
\v 24 manan, “E Dyisas mdà di Nasarét, tan labetam gami? Fanam gami kè falmo? Gadègu ku simto ge! Ge sa To Landè Salà dek Dwata.” 
\p  
\v 25 Kabay nngak Dyisas i busaw, manan, “Fanak ge! Lamwà ge di to én.”  
\v 26 Na too fakakal i busaw lagi ani na mkit na lamwà. 
\p  
\v 27 Too tikeng i kdee dad to déén, taman sasalek ale, manla, “Tan kè ani? Satu falami tdò ani dé? Hae, du nun glalan mdek dad busaw lamwà, na mimen ale!”  
\v 28 Na too mlal mbel santulen gablà ku Dyisas di klamang banwe Galili. 
\s1 I kafgulê Dyisas tewe Fiter na dademe to 
\r (Matyu 8:14-17; Luk 4:38-41) 
\p  
\v 29 Na di kdà Dyisas di gusatdò dad Dyu, salu kenen di gumnè Simon na Andru. Na magin Dyém na Dyan.  
\v 30 Kakella déén tatì milè tewe Simon libun, du too minit lawehan. Na gasilla santulen ku Dyisas kagkahan.  
\v 31 Di kaklinge Dyisas dun, fdadong kenen, na nagotan sigalan du ntékan. Di kték Dyisas kenen, magwè initan, na fles kenen mlé dale knaan. 
\p  
\v 32 Na mdà di kasdaf i duh di flabi én, nebe dad to di ku Dyisas kdee dademela nun tduk na dad to nun busaw,  
\v 33 na dee dad to mdà di lunsud stifun mdadong di gufusuk i gumnean.  
\v 34 Na dee dad to fanguléan mdà di dee bung tduk na falwaan dee busaw di dad to salu déén. Kabay là faloh Dyisas i dad busaw ku talù, du dilèla ku simto kenen. 
\s1 I katdò Dyisas di Galili 
\r (Luk 4:42-44) 
\p  
\v 35 Na di too flafus di tmadol duh kifu fa, mték Dyisas na mdà salu di satu banwe gulandè to aloan satu du dmasal.  
\v 36 Kabay lê mdà ale Simon du mngabal kenen.  
\v 37 Na di kitela kenen, manla, “Too dee dad to mngabal ge.” 
\p  
\v 38 Kabay man Dyisas, “Fles ito di dademe banwe mdadong dini du fye lêgu tdò i Fye Tulen di dad to ditù, du én sa duengu salu dini di tah tanà.”  
\v 39 Taman lamngab ale Dyisas di dee banwe di klamang Galili, du tamdò di dad gal gusatdò dad Dyu, na falwaan dad busaw mdà di dad to. 
\s1 I kafgulê Dyisas i to tanfig 
\r (Matyu 8:1-4; Luk 5:12-16) 
\p  
\v 40 Na satu duh nun to tanfig salu di ku Dyisas. Lkuad kenen di munan, na fakdo manan, “Ku beg ge mayè, gaganam fgulê deg di tduk fagsik deg ani.” 
\p  
\v 41 Too bong kakdo Dyisas kenen, taman nagotan, na manan, “Mayè agu sa. Mgulê ge nan.”  
\v 42 Na too glut, tamgulê sa to tanfig, talandè tfigan. 
\p  
\v 43 Na gasil fdà Dyisas na toon dek, manan,  
\v 44 “Nangam tulen ani di balù simto to, bay én nimoam, mdà ge na fitem laweham di bà di Dwata, na nebem di kenen dsuam di Dwata i fgadè ku Mosis, du én gugmadè dad to too glut tamgulê ge.” 
\p  
\v 45 Kabay di kdà i to tafangulê Dyisas, balingan tulen di kdee dad to i mgimò Dyisas di kenen, na nbelan santulen ani di klamang banwe. Taman talà gfite Dyisas di dademe dad banwe di lam Galili du alì dee dad to gal stifun di safédan. Baling kenen lamngab di dad banwe gulandè dee to. Kabay knean salu déén di kenen dad to mdà di kdee banwe déén. 
\c 2  
\s1 I kafgulê Dyisas i to là galyak lawehan 
\r (Matyu 9:1-8; Luk 5:17-26) 
\p  
\v 1 Di kafnge file duh, samfulê Dyisas di banwe Kafernaum, na linge i dad to tamulê kenen.  
\v 2 Na du dee dad to stifun, fnò i gumnean kel di naselan, taman landè kibò dademe to fdadong di kenen. Na én nimò Dyisas tamdò i dad to Tnalù Dwata.  
\v 3 Klon tamdò, nun fat lagi kel samtiang i to là galyak lawehan.  
\v 4 Na landè dalanla fles salu di ku Dyisas du too dee dad to, taman nebela to là galyak lawehan di tah ataf na lanketla dademe ataf \f + \fr 2:4 \ft I ataf di dad gumnè di banwe dad Dyu gal datal, landè bulélla, na nun yaut gumyak dad to salu ditù.\f* gsen di tah i gutamdò Dyisas, du fayolla kenen di muna Dyisas gagin gumilean.  
\v 5 Di kite Dyisas i bong kafaglutla di kenen, manan di to là galyak, “E Tò, tamaglifet dad salaam.” 
\p  
\v 6 Na nun dad to gal tamdò i flalò Dwata sudeng déén. Na di kaklingela i man Dyisas snalekla di ktola,  
\v 7 “Kan ku manan nlifetan salà i to gine? Falmon dengeg Dwata du manan én, du Dwata alò gmagan mlifet dad salà.” 
\p  
\v 8 Kabay gadè Dyisas i kdee mnè di nawala, na manan di dale, “Kan ku én fandamyu làgu gagan mimò dun?  
\v 9 Nè too malima man di to là galyak ani, ‘Maglifet salaam,’ ku demen, ‘Tadag ge, nweam i gumileam, na magu ge?’ Salngad sa, du slame alò Dwata gmagan mimò dun.  
\v 10 Taman fangulêgu kenen, du fye gadèyu agu, i to dnagit Tingà To, nun glal di tah tanà ani mlifet dad salà i dad to.” Na manan di to là galyak lawehan,  
\v 11 “Mangu di ge, tadag ge, nweam gumileam, na mulê ge.”  
\v 12 Na glut, gtadag i to là galyak gine. Na gasilan nwè gumilean, na mdà kenen. Mite kdee dad to déén, na too ale tikeng na dnayenla Dwata, manla, “Landè lmenito teen gambet ani.” 
\s1 I klak Dyisas ku Libay 
\r (Matyu 9:9-13; Luk 5:27-32) 
\p  
\v 13 Na lêman mdà Dyisas salu di kilil i bong lanaw Galili. Na too dee dad to stifun déén di safédan, na tdoan ale.  
\v 14 Na di slengan magu, teenan satu to dnagit ku Libay, tingà Alfyus, sudeng di lam gumimò dad to gal mwè bayad buhis. Na man Dyisas di kenen, “Mlalò ge deg.” Na tadag Libay na fles mlalò kenen. 
\p  
\v 15 Na kmaan ale Dyisas di gumnè Libay. Di slengla kmaan nun dee dad to mwè bayad buhis na dademela gal mlafà dad flalò fnaglut dad Dyu sudeng di saféd Dyisas na dad mlalò kenen du dee ale gal samlalò kenen.  
\v 16 Na di klo Dyisas kmaan di saféd i dad to di gumnè Libay, nun dad tamdò dad flalò Dwata mdà di dad Farisi mite kenen. Na snalekla dad gal mlalò ku Dyisas, manla, “Kan ku kmaan Dyisas di saféd i dad to gal mwè bayad buhis na dademe to gamsalà.” 
\p  
\v 17 Na di kaklinge Dyisas manla di dad gal mlalò kenen, tnimelan ale fagu di fléd, manan, “I dad to nun tduk, nun gukmamula to mulung, bay i dad to landè tduk, landè gukmamula i to mulung. Taman ise ku én duengu salu dini du fanngabalgu dad to tlu du fsalgu di dad salàla, bay dad to gamsalà fanngabalgu.” 
\s1 I kaflingen Dyisas i kton di lagi sandeme 
\r (Matyu 9:14-15; Luk 5:33-35) 
\p  
\v 18 Di satu duh, fwasa i dad to gal mlalò ku Dyan Gal Munyag na dad Farisi. Na nun dad to salu di ku Dyisas, na smalek ale, manla, “I dad to gal mlalò ku Dyan na dad mlalò dad Farisi gal fwasa. Kan ku là fwasa dad mlalò ge?” 
\p  
\v 19 Na tmimel Dyisas dale fagu di fléd, manan, “Ku fkahta di kasdeme, fwasa kè dad malò i kasdeme ku déén fa i lagi sandeme di safédla? Ku déén kenen fa, là ale fwasa!  
\v 20 Kabay nun duh kadang, nwè di dale i lagi sandeme, na én bangla fwasa.” 
\s1 I kaflingen Dyisas i tdoan di falami safut na falami binu 
\r (Matyu 9:16-17; Luk 5:36-39) 
\p  
\v 21 Na man Dyisas, “Tagadeito sasè ku klafang i falami safut di labi klaweh tabaltok, du falami klafang kamsang na magwè i falami mdà di labi na matnù baling kbong kasê i klaweh.  
\v 22 Na salngad én, là fakay sanbool i labi na falami ku fkahta di binu, du ku fkahito falami binu kmadok fa di lam i labi gufkah kindal, btù sa, na mkok i binu na malmo i gufkah kindal. Én fye gufkah falami binu di falami kindal.” 
\s1 I fye nimò di Duh Kaftud 
\r (Matyu 12:1-8; Luk 6:1-5) 
\p  
\v 23 Na di satu Duh Kaftud dad Dyu, magu ale Dyisas di dalan di satu nligo. Na di slengla magu kambang dad mlalò ku Dyisas là dee kigan trigu fule déén, du knilewla.  
\v 24 Na di kite i dad Farisi dun, manla di ku Dyisas, “Neyem dad gal mlalò ge. Kan ku kamtu ale di Duh Kaftud? Là fakay sa, du fnang Dwata di flalò blén fagu di ku Mosis.” 
\p  
\v 25 Kabay tmimel Dyisas dale, manan, “Kan kè. Làyu lmen masa gablà di nimò Harì Dabid du mdà di kliduan na kbitilan na kbitil i dademen?  
\v 26 Là kenen fansalà Dwata balù fusuk kenen di lam Gumnè Dwata na nwean i fan blé di Dwata, na blén di dad ton, na kdeela kmaan. Na blaam én alò fakay kmaan dun dad baito di Dwata. Mgimò ani di bang Abiatar gumdatah dad bà di Dwata.” 
\p  
\v 27 Na man Dyisas, “Én duen Dwata mimò i Duh Kaftud du tnabengan i dad to, du én funan nimò i dad to, na kafnge én, blén flalò gablà di Duh Kaftud.  
\v 28 Na agu, i dnagit Tingà To, i nun glal mangman fakay nimò di Duh Kaftud.” 
\c 3  
\s1 I kafgulê Dyisas i to kengkeng kmalan di Duh Kaftud 
\r (Matyu 12:9-14; Luk 6:6-11) 
\p  
\v 1 Na di satu duh lêman fusuk Dyisas di gal gusatdò dad Dyu. Na nun lagi déén kengkeng bali kmalan.  
\v 2 Na nun dad to déén dmuen ku Dyisas, na toola neye ku fanguléan i to kengkeng di Duh Kaftud, du fye nun gutadagla dmalam kenen di salà ditù di dad ganlal.  
\v 3 Na man Dyisas di to kengkeng kmalan, “Tadag ge dini di muna.” 
\p  
\v 4 Kafnge én snalekan dad to dmuen kenen, “Tan man dad flalò Dwata i fakay nimò di Duh Kaftud, mimò fye di demeyu to, ku mlayam? Tan fye, tmabeng demeyu to ku mati to?” Kabay landè timella. 
\p  
\v 5 Na keye Dyisas di dale too kenen flabè na mlidù fa du too mgal ulula. 
\p Na kafnge én, man Dyisas di to kengkeng kmalan, “Bankem kmalam.” Na banken sa, na di kabken dun, tamgulê.  
\v 6 Na gasil lamwà dad Farisi du stifun magin dad to gsen di ku Harì Hérod, du fye stulen ku tan kfagula mati ku Dyisas. 
\s1 I kafgulê Dyisas dad to di kilil lanaw Galili 
\p  
\v 7 Kafnge én tnagak Dyisas na dad gal mlalò kenen i banwe én, na salu ditù di kilil i bong lanaw. Na too dee dad to mlalò kenen stifun déén mdà di klamang dad banwe Galili na Dyudiya,  
\v 8 kel di syudad Dyérusalém, na mdà di klamang banwe Idumya. Na nun dee dademe mdà di dad banwe di faltù i bong yéél Dyordan, na mdà di banwe mdadong di dad syudad Tiro na Sidon. Salu ale di ku Dyisas du talingela gablà di kdee nimoan.  
\v 9 Na too dee dad to samlibut ku Dyisas, taman dekan dad gal mlalò kenen fatlagad i aweng gumyakan du fye là kenen msikut i dad to. 
\p  
\v 10 Tadee dad to fanguléan mdà di tdukla, taman saglad dademe nun tduk fdadong, fye begla gagot kenen du fye mgulê ale.  
\v 11 Na di kite dad busaw ku Dyisas, lkuad ale lamfan di munan, na mkit, manla, “Ge sa Tingà Dwata.” 
\p  
\v 12 Kabay too ale fnang Dyisas tmulen ku simto kenen. 
\s1 I kalék Dyisas dad sfalò lwe fatdoan 
\r (Matyu 10:1-4; Luk 6:12-16) 
\p  
\v 13 Kafnge én, salu Dyisas ditù di satu bulul, na fatlon déén dad to kayean fasnagin kenen. Na salu ale di kenen.  
\v 14 Na nalékan sfalò lwe dad to fye samnagin kenen na dekan ale tamdò di dad to i Fye Tulen mdà di Dwata,  
\v 15 na banlén ale glal falwà dad busaw mnè di dad to. 
\p  
\v 16 Na ani dad dagit i sfalò lwe lagi nalék Dyisas, Simon i dnagitan ku Fiter,  
\v 17 Dyém na flanekan Dyan, dad ngà Sébidi. Na lwe ani dnagit Dyisas Boanigis, na i gumtatekan dunan labè gambet kilet,\f + \fr 3:17 \ft Satu kubad i talù Boanigis dunan dad ngà kilet.\f* 
\v 18 na Andru, Filif, Bartolomyu, Matyu, Tomas, Dyém tingà Alfyus, Tadyus, Simon msen di banwen,  
\v 19 na Dyudas Iskariyot to mangkal kenen. 
\s1 I gumdà tulus Dyisas 
\r (Matyu 12:22-32; Luk 11:14-23; 12:10) 
\p  
\v 20 Kafnge én, mulê Dyisas, na lêman too dee dad to stifun déén di kenen, taman talà gasleng Dyisas na i dad gal mlalò kenen kmaan.  
\v 21 Di kaklinge i gaked Dyisas ani, salu ale ditù du nngéla kenen du man dademe to tabook. 
\p  
\v 22 Na nun dad tamdò flalò blé Dwata fagu di ku Mosis mdà di syudad Dyérusalém mite kafalwà Dyisas dad busaw. Na manla, “Bélsébul\f + \fr 3:22 \ft Bélsébul dunan satu dagit Satanas, én gumdatah i dad busaw.\f*, gumdatah dad busaw mnè di kenen, na én sa mlé kenen tulus falwà dad busaw di dad to.” 
\p  
\v 23 Na taman tlo ale Dyisas di kenen du talù di dale fagu di fléd, manan, “Tan kibò Satanas falwà i kton? Landè sa,  
\v 24 du ku fkahta di kagot satu harì ku sunay ale dad ton, malmo baling kagotan dale.  
\v 25 Na salngad ku fkahta di satu malay ku sfati slame ale, malmo baling i ksasatula.  
\v 26 Na ku glut i manyu sanfati Satanas dad busaw samnagin kenen, na snang ale nawa, na là mlo, malmo baling kagotan dale. 
\p  
\v 27 “Én kaglutan tafnisangu Satanas, na én duengu gmagan falwà dad busaw galan dek, du landè to fakay fusuk di gumnè i mgal to du mwè knunan ku laan funa kenen bnakus, bay ku tabnakus fakayan nwè balù tan kayean di gumnè i mgal to. 
\p  
\v 28 “Tulengu gamu kaglutan, nlifet Dwata i kdee dad salà i dad to balù dad sasè manla gablà di kenen.  
\v 29 Kabay i to falmo dengeg Mtiu Tulus di ktaluan là nlifet Dwata, na là maglifet salaan kel di landè sen.” 
\p  
\v 30 Man Dyisas ani, du dad to gine falmola dengeg Tulus Dwata, du manla kun, “Nun sasè tulus mnè di ku Dyisas.” 
\s1 I yê Dyisas na dad flanekan 
\r (Matyu 12:46-50; Luk 8:19-21) 
\p  
\v 31 Na takel yê Dyisas na dad flanekan lagi di gutamdoan. Tadag ale di lwà, na fafngéla kenen.  
\v 32 Na dee dad to sudeng di glibutan na nun tmulen kenen, manla, “Taditù yéam na dad flanekam di lwà, na snalekla ge.” 
\p  
\v 33 Na tnimelan ale, manan, “Hae, bay simto kè yêgu na dad flanekgu?” 
\p  
\v 34 Na meye Dyisas di dad to di glibutan, na manan, “Ani sa yêgu na dad flanekgu,  
\v 35 du ku simto mimò knayè Dwata, kenen mgimò flanekgu lagi, flanekgu libun, na yêgu.” 
\c 4  
\s1 I fléd gablà di to smabul bnê 
\r (Matyu 13:1-9; Luk 8:4-8) 
\p  
\v 1 Satu duh lêman tamdò Dyisas ditù di kilil bong lanaw. Na too dee dad to stifun déén di safédan, taman myak kenen di tah satu aweng faltew di kilil lanaw na sudeng kenen déén du tamdò. Na tadag dad to flinge déén di kilil lanaw.  
\v 2 Na too dee tdoan dale fagu di fléd, na manan di dale, 
\p  
\v 3 “Too gamu flinge. Nun to salu di nligon du smabul bnê.  
\v 4 Na di ksabulan dun nun dademe gsabul di bà dalan, na fti tnukè dad anuk di bnas.  
\v 5 Na nun dademe gsabul di gumngifi tanà di tah batu. Na too mlal ktabòla du babu i tanà.  
\v 6 Kabay di ksut i duh, sakuf tabòla na du là alì dmalil mlanas ale.  
\v 7 Na nun dademe bnê gsabul di gutmabò walad nun sual. Na tmabò, bay mlal kalnok dad walad, na mlimas dad tabò i bnê, taman là ale munge.  
\v 8 Kabay dademe bnê sabul di gufye tanà, na midul ktaboan na midul kafye lnokan, taman too munge. Nun dademe tlu falò uléan, dademe nam falò, na dademe mlatu.” 
\p  
\v 9 “Taman flinge gamu, ku nun klingeyu!” 
\s1 Gablà di katdò Dyisas fagu di fléd 
\r (Matyu 13:10-17; Luk 8:9-10) 
\p  
\v 10 Na di kdà i dee dad to gine fdadong di ku Dyisas dad sfalò lwe gal mlalò kenen na dademen déén, na snalekla kenen gablà di dad fléd.  
\v 11 Na tnimelan ale, manan, “Faglabatgu gamu dad mlalò deg dad gbuni gablà di kagot Dwata. Kabay di dademe dad to fléd alò kibògu tamdò dale.  
\v 12 Du fye, 
\q1 ‘balù meye ale là ale mite, 
\q2 na balù flinge ale knean là ale gamlabat, 
\q1 du ku glabatla ken tagakla dad sasè nimòla, 
\q2 na nlifet Dwata dad salàla.’ ” 
\p  
\v 13 Na man Dyisas di dale, “Ku làyu glabat gumtatek i fléd gine, tan kibòyu gamlabat i dademe dad fléd.” 
\s1 I gumtatek i fléd gablà di bnê gsabul 
\r (Matyu 13:18-23; Luk 8:11-15) 
\p  
\v 14 Na nubadan di dale i fléd snalekla, manan, “Én to smabul bnê, dunan i to fbel Tnalù Dwata.  
\v 15 Na i dalan gugsabul i dad bnê, dunan i dad to tamlinge Tnalù Dwata, bay gasil Satanas salu di dale du nwean di nawala i talingela. 
\p  
\v 16 “Na salngad i bnê gsabul di mngifi tanà di tah batu i gugsabul i dademe bnê, dunan dad to too lehew dmawat Tnalù Dwata di kaklingela dun,  
\v 17 bay landè gudmalilan di nawala, taman là mlo ktayudla, du di kakel i kalima na kaflayam mdà di kdawatla Tnalù Dwata, mlal ale tmagak kafaglutla. 
\p  
\v 18 “Na i tanà gugsabul bnê i gutmabò walad nun sual, dunan dad to mlinge Tnalù Dwata,  
\v 19 bay dee gusbalét i nawala gablà di knèla di tah tanà, na kiballa knun, na dademe knayè ktola. Taman landè ulê Tnaluan di dale. 
\p  
\v 20 “Kabay i fye tanà gusmabul i dademe bnê, dunan dad to mlinge Tnalù Dwata na dmawat dun, na too nun kbungen di nawala. Nun tlu falò uléan, dademe nam falò, na dademe mlatu.” 
\s1 I fléd gablà di salò gbuni 
\r (Luk 8:16-18) 
\p  
\v 21 Na manan di dale, “Ku nun to fusuk mebe salò, laan snukub been ku demen buni di dungan katri. Én gufkahan dun di gumefen.  
\v 22 Salngad én, i kdee gbuni di mduh ani, teen sa kadang, na i là gadè ani, gadè sa kadang.  
\v 23 Taman flinge gamu, ku nun klingeyu!” 
\p  
\v 24 Na man fa Dyisas, “Hae, tooyu fanse flinge i tdògu du salngad kdawatyu dun én kalbong kaglabat blé Dwata gamu. Ku fkahta di kasad, i kibòyu masad, salngad én kasad Dwata di kablén gamu, bay tananuan fa.  
\v 25 Na dad to nun kaglabat i tdògu, tananù Dwata. Na dad to là fkah dun di nawala, nawì Dwata balù tukay man nawala glabatla.” 
\s1 I fléd gablà di bnê tmabò 
\p  
\v 26 Na tulen Dyisas satu fléd, manan, “I kalnok kagot Dwata salngad satu to smabul bnê di nligon.  
\v 27 Laan gadè ku tan kibò bnê én tmabò, du kafngen smabul dun di nligon, tatian tagak. Na di laman fadlug mimò i nimoan klit duh na kudang klit butang tmabò i bnê na lamnok.  
\v 28 Du i tanà gumdàla tmabò na munge. I muna tmabò muhad foonan, na tmadol dad malnak fusuan, na kafnge én, dad bungen.  
\v 29 Na di ktagan, kamtu kenen, du tabang sa nan.” 
\s1 I fléd gablà i satu too tukay bnê 
\r (Matyu 13:31-32, 34; Luk 13:18-19) 
\p  
\v 30 Na lêman tamdò Dyisas satu fléd, manan, “I tan gufasngadgu i kagot Dwata? Tan fye guflingengu dun?  
\v 31 Flingengu di satu too tukay bnê fule satu to di tanaan.  
\v 32 Na i bnê én tukay fa di kdee dademe bnê di tah tanà, bay ku fulem, tmabò na baling too bong di kdee dademe fule, na i malbang fangan gusmalal dad anuk di bnas fsilung déén.” 
\p  
\v 33 Na fagu di dee dad fléd faglabat Dyisas di dad to Tnalù Dwata, ku tan gaganla glabat, én tdoan dale.  
\v 34 Kdee fgadè Dyisas di dad to slame fagu di fléd, bay ku alò ale déén nubadan kdee di dad gal mlalò kenen. 
\s1 I kngak Dyisas i nus na lwek 
\r (Matyu 8:23-27; Luk 8:22-25) 
\p  
\v 35 Na di duh én di kakimalan tanlak Dyisas dad gal mlalò kenen, manan, “Mdà ito mifal lanaw.”  
\v 36 Taman tnagakla kdee dad to déén, na faginla Dyisas smakay di aweng tagnè gusudengan tamdò. Na nun fa dademe aweng salngan dale.  
\v 37 Klola déén di talà nkel ale bong mgal nus. Mgal lwek samfaw di awengla, na maglam yéél.  
\v 38 Kabay Dyisas déén kenen di ulin tamdanan du kudang. Na nukatla kenen, na manla, “E To Tamdò, tafan ito galnab! Mayè ge kè ku mlimas ito?” 
\p  
\v 39 Na mukat kenen na nngakan i nus na lwek, manan, “Fanak nan.” Na di kmanan én, manak i nus na too lanél i lanaw. 
\p  
\v 40 Na man Dyisas di dademen, “Tan duenyu likò? Landè fa kè ksaligyu di deg?” 
\p  
\v 41 Na too bong ktikengla, na stulen ale, manla, “Simto to ani? Balù nus na lwek mimen ale kenen.” 
\c 5  
\s1 I kafalwà Dyisas dad busaw 
\r (Matyu 8:28-34; Luk 8:26-39) 
\p  
\v 1 Na fles ale mifal lanaw kel di kagduungla di banwe dad to Gérasin.  
\v 2 Na di ktufala mdà di aweng, nun satu lagi bnusaw lamwà mdà di dad ilib gal gulambang dad to na smitong ku Dyisas.  
\v 3 I gumnè to ani di dad ilib galla gulambang dad to. Na to ani too nun galan, landè to gmagan makus kenen, balù ku sangkalì bakusla kenen.  
\v 4 Too dee dulê bnakusla blian na sigalan, bay gaganan bangang dad tek afas i blian na smafto dad sangkalì. Na landè to gmagan mafas kenen du mdà di galan.  
\v 5 Mduh na butang tatian lamngab di dad gulambang na di dad bulul na mkit na sneey batu lawehan. 
\p  
\v 6 Na di kiten ku Dyisas mdà di gumawagan tatian mila smitong kenen na lkuad di munan,  
\v 7 na mkit, manan, “E Dyisas, Tingà i Too Mdatah Dwata, tan kiboam deg? Fnigu ku makang ge di Dwata, laam agu fanlayam.”  
\v 8 Manan ani, du tagman Dyisas di kenen, “E ge busaw, lamwà ge di to ani!”  
\v 9 Na snalek Dyisas kenen, manan, “Simto dagitam?” 
\p Tmimel busaw, manan, “Dee Libu dagitgu, du too gami dee.”  
\v 10 Na too fakdo dad busaw fye laan ale dek di dademe dad banwe. 
\p  
\v 11 Na nun dee dad sdè nifat mdadong déén samwel di bilil.  
\v 12 Na fakdo dad busaw di ku Dyisas, manla, “Dekam gami di dad sdè ditù na faloham gami fusuk di dale.”  
\v 13 Na falohan ale. Taman lamwà dad busaw di to én, na fles fusuk di dad sdè. Na kdee dad sdè mdadong lwe libu. Na kdeela mila masol di bilil na gtufa di lanaw, na sdulê mlimas. 
\p  
\v 14 Di kite dad to mifat dad sdè i mkel ani, mila ale na tnulenla dad to di lunsud na di klamang banwe. Na i dad to mlinge, salu ale ditù du neyela i tamkel.  
\v 15 Kakella di ku Dyisas teenla i to gulamwà dee libu dad busaw sudeng di saféd Dyisas. Takamlaweh kenen, na tafye fandaman. Na too ale likò.  
\v 16 Na dad to mite nimò Dyisas, tulenla i mkel di to nun dee busaw gine na di dad sdè.  
\v 17 Taman toola man di ku Dyisas fye ku tnagakan banwela. 
\p  
\v 18 Na di kyak Dyisas lêman di aweng, too fakdo di kenen i to nun busaw tafanguléan, du kayean magin,  
\v 19 bay fnang Dyisas, na manan, “Mulê ge, na tnulenam dademem ku tan kalbong mgimò Dwata di ge na bong kakdon ge.”  
\v 20 Na too glut, mdà to én mulê na tambù tmulen di dad to déén di dad banwe Dikafolis i kalbong nimò Dyisas di kenen. Na too tikeng dad to di kaklingela i manan. 
\s1 I kafgulê Dyisas libun maloh tienan na kton i tingà mati 
\r (Matyu 9:18-26; Luk 8:40-56) 
\p  
\v 21 Na lêman mifal ale Dyisas smakay di aweng. Na kagduungla di faltù, too dee to stifun glibut di kenen di kilil lanaw.  
\v 22 Na salu déén Dyairus, satu ganlal di gal gusatdò dad Dyu. Di kiten ku Dyisas lkuad kenen di saféd blian,  
\v 23 du fakdo kenen, manan, “Tafan mati tukay tingàgu libun, bay beg ge magin deg ditù, na nagotam kenen du fye mgulê na mto fa.”  
\v 24 Taman magin Dyisas kenen. 
\p Na too dee dad to magin ku Dyisas, tatì sgat dad to magu.  
\v 25 Na di kagula nun satu libun déén too maflayam mdà di tdukan, tatì maloh tienan. Tasfalò lwe fali klon lamyalo dun.  
\v 26 Na bong kaflayaman mdà di dee to gufbulungan. Tamti dad kandeenan di kafbulungan, bay landè gumguléan, na baling matnù i tdukan.  
\v 27 Talingen gablà di kafgulê Dyisas dad to nun tduk, taman tamguna kenen kdee dad to di kagol Dyisas, na nagotan klawehan,  
\v 28 du manan di kton, “Ku gagotgu alò i klaweh Dyisas mgulê agu.” 
\p  
\v 29 Na di kagotan dun, tlag kaloh tienan, na lyalon tamgulê i tdukan.  
\v 30 Na lyalo Dyisas nun eneg gafgulê lamwà di kenen, taman falê kenen di kdee dad to di glibutan, na manan, “Simto magot deg?” 
\p  
\v 31 Na man dad gal mlalò kenen, “Teenam dee dad to gihok di ge, na kan ku snalekam ku simto magot ge?” 
\p  
\v 32 Kabay lêmanan meye di glibutan du neyen ku simto magot kenen.  
\v 33 Kabay i libun, gadean ku tan mgimò di kenen di kagotan klaweh Dyisas, taman fdadong di ku Dyisas na lkuad di saféd blian. Kankal kenen di klikoan na tulenan kdee mgimò di kenen.  
\v 34 Na man Dyisas di kenen, “Tingàgu, mdà di kafaglutam tamgulê ge. Mulê ge na i ktanak nawa mnè di ge, du talandè nan tdukam.” 
\p  
\v 35 Na sleng Dyisas talù fa, nun to kel fdu di gumnè Dyairus, dunan ganlal i gusatdò dad Dyu. Na manla di kenen, “Nangam nan fafles To Tamdò ani di gumneam du talaam gnumah tingaam. Tamati nan.” 
\p  
\v 36 Kabay fbayà Dyisas i manla, na manan di ganlal di gusatdò dad Dyu, manan, “Nang ge likò. Alò ge fadlug faglut.” 
\p  
\v 37 Na landè to falohan magin dale, senan alò Fiter, Dyém, na Dyan flanek Dyém. 
\p  
\v 38 Na kakella di gumnè i ganlal, linge Dyisas ugak dee dad to déén na teenan dad to mlanu na kamwak.  
\v 39 Na di kfusuk Dyisas di gumnè, manan di dad to, “Kan ku mugak gamu na kamwak? Là mati tingà, bay alò kudang.” 
\p  
\v 40 Kaklingela i man Dyisas, toola kenen nulé, taman falwaan kdee dad to déén. Na faginan alò dad tua i tingà na tlu dademen fusuk di lam sibay gumilè i tingà,  
\v 41 na nagotan kmalan, manan, “Talita kumi,” i gumtatekan dunan, “Tuy, mangu di ge, mték ge.” 
\p  
\v 42 Na di kmanan én, mték i tingà na fles magu. Sfalò lwe falin. Na kitela én tatìla là gadè nawala mdà di ktikengla.  
\v 43 Na fnang ale Dyisas fgadè di dad to, na dekan dad tuan mlé knaan di tingà. 
\c 6  
\s1 Knangla Dyisas di banwe Nasarét 
\r (Matyu 13:53-58; Luk 4:16-30) 
\p  
\v 1 Na kafnge én, tnagak Dyisas banwe én, du mulê di kenen banwe, na magin dad gal mlalò kenen.  
\v 2 Na di kakel Duh Kaftud tamdò Dyisas di gal gusatdò dad Dyu. Na dee di dad to déén tikeng flinge katdoan, na snilola kenen, manla, “Nè gugamwean i gnadean ani? Na nè gumdà kfulungan? Tan kiboan mimò dad tnikeng?  
\v 3 Ise ani i karfintiro tingà Méri? I twege Dyém, Dyosis, Dyudas na Simon? Na i dad flanekan libun mnè dini kè di banweito.” Na én knangla kenen déén. 
\p  
\v 4 Na man Dyisas di dale, “I tugad Dwata too mgafè balù tanè gugsalun, bay alò là nafè kenen di kenen too banwe, na di gutngà i dad flanekan na di kenen too gumnè.” 
\p  
\v 5 Taman du landè kafaglutla di kenen landè alì tnikeng gimò Dyisas di banwe én, aloan nagot là file dad to nun tduk du fanguléan ale.  
\v 6 Na tikeng Dyisas du dad to déén di kenen banwe là faglut di kenen. Taman mdà Dyisas magu di dademe dad malnak banwe di glibutla du tamdò. 
\s1 I kafngewe Dyisas dad sfalò lwe dekan tamdò 
\r (Matyu 10:5-15; Luk 9:1-6) 
\p  
\v 7 Na santifun Dyisas i dad sfalò lwe to gal mlalò kenen du dekan ale lamngab tamdò man lwe to dale. Na banlén ale glal falwà dad busaw.  
\v 8 Na én flaun dale, “Nebeyu alò tugad di kaguyu, na nang mebe bnatu, kuyut, na balù filak.  
\v 9 Nlafinyu blìyu, bay nang mebe i dademe klaweh galwà di tagnè lsakyu.”  
\v 10 Na manan fa di dale, “Na ku takel gamu di banwe gutamdòyu, nè gumnè gufyakla gamu, déén gumnèyu kel di kdàyu di banwela.  
\v 11 Na ku nun banwe gutamdòyu na dad to déén là dmawat gamu na là flinge i tdòyu, mdà gamu di banwela, na kakesyu kfung di blìyu, du én ilè ale tmimel di Dwata i nimòla.” 
\p  
\v 12 Taman kafnge én, mdà ale, na én tdòla, dunan fye msal i dad to na tmagak dad sasè nimòla.  
\v 13 Na falwàla dee busaw di dad to, na nihokla fngalo i dad to nun tduk du fangulêla ale. 
\s1 I kfati Dyan Gal Munyag 
\r (Matyu 14:1-12; Luk 9:7-9) 
\p  
\v 14 Na linge Harì Hérod gablà di kdee nimò Dyisas, du tatoo mdengeg i dagit Dyisas. Man i dademe to kun, “Dyisas, dunan Dyan Gal Munyag tamték mdà di fati, na én duen too kenen mtulus.” 
\p  
\v 15 Kabay man dademe gablà ku Dyisas, “Kenen Ilaydya, tugad Dwata tasamfulê.” 
\p Na man dademe, “Dyisas ani, satu tugad Dwata salngad tugad Dwata di muna fa.” 
\p  
\v 16 Na di kaklinge Harì Hérod i man dad to, man nawan mték Dyan, na manan, “Dunan Dyan Gal Munyag. Tafaklanggu ulun, bay tamték mdà di fati.” 
\p  
\v 17 Ani manan, du tafakfean Dyan, na fbakusan, na fbilangguan, du mdà di ku Hérodiyas, yaan flanekan Filif, du balù yaan flanekan nwean.  
\v 18 Na tagal man Dyan di kenen, “Là fakay nlad yaan flanekam.”  
\v 19 I manan ani duen Hérodiyas too mnang nawa kenen, na mayè mati kenen, bay landè fa dalanan,  
\v 20 du too nun klikò Harì Hérod ku Dyan, du toon dilè i katlu Dyan, na gadean landè sasè mgimoan. Taman là faloh Hérod ku fnati kenen. Na too mayè Hérod flinge i tdò Dyan, bay msamuk nawan di gal kaklingen dun. 
\p  
\v 21 Kabay teen Hérodiyas i kiboan fafati ku Dyan di duh kafaldam i ksut Harì Hérod, du mimò harì i bong fista. Na nlakan dademen dad ganlal di gubirnu, na dad ulu i dad sundalu na dademe mdatah dad to di banwe Galili.  
\v 22 Na nun tingà Hérodiyas libun fsayew Hérod di fistan. Na di kite kdee dad nlak di fista i tingà sayew, too ale mayè, na labi nan Hérod. 
\p Taman man Harì Hérod di tingà sayew, “Balù tan fnim di deg blégu ge.”  
\v 23 Na makang Hérod di kenen, manan, “Balù tan fnim kel di kagatngà i nagotgu, blégu ge.” 
\p  
\v 24 Na lamwà i tingà libun, na snalekan yéan ku tan fye fnin di ku Hérod. 
\p Na man yéan, “Fnim ulu Dyan Gal Munyag.” 
\p  
\v 25 Na gasil samfulê tingà libun di ku Hérod, na manan, “Én kayègu ku kaham ulu Dyan Gal Munyag di fligo na blém di deg.” 
\p  
\v 26 Too mlidù nawa Harì Hérod di fni tingà én, bay landè kibò du makang kenen di muna kdee dad to nlak di fista na myà kenen ku laan dnohò dun.  
\v 27 Taman dek Hérod satu sundalun mwè ulu Dyan. Na salu sundalu di bilanggù na kanlangan ulu Dyan,  
\v 28 na fkahan ulun di satu fligo, na neben di libun, na flesan nebe di yéan. 
\p  
\v 29 Na kaklinge dad to gal mlalò ku Dyan ani kibòla kenen, beg ale salu di bilanggù, na nwèla lawehan du lbangla di ilib galla gulambang dad to mati. 
\s1 I kasfulê dad sfalò lwe gal mlalò ku Dyisas mdà di kdekan dale 
\r (Matyu 14:13-14; Luk 9:10-11) 
\p  
\v 30 Na samfulê di ku Dyisas dad sfalò lwe dekan tamdò, na santulenla di kenen kdee nimòla di kagula na kdee tdòla.  
\v 31 Kafnge én, man Dyisas di dale, “Salu ito di gulandè to du fye beg gamu gaftud.” Ani manan, du too dee dad to gal salu di dale balù kmaan talà ale gasleng. 
\p  
\v 32 Na mdà ale maweng du salu di satu banwe gulandè to du ftud.  
\v 33 Kabay dee dad to mite kdàla, na dilèla ale. Taman gasil ale tmanà mdà di kdee dad lunsud, na dad to én guna kel di gusalu ale Dyisas.  
\v 34 Na di ktufa Dyisas mdà di aweng, teenan dee dad to déén. Na toon ale kando du salngad ale i bilibili landè to mifat dun. Taman dee tdoan dale. 
\s1 I kafkaan Dyisas mlukas lime libu dad to 
\r (Matyu 14:15-31; Luk 9:12-17; Dyan 6:5-14) 
\p  
\v 35 Na di kaflabin salu dad gal mlalò ku Dyisas di safédan, na manla, “Taflabi nan, na landè gumnè mdadong dini.  
\v 36 Fye ku fdaam dad to du fye mngabal ale gumayadla knaan di dad gumnè na dad malnak banwe mdadong dini.” 
\p  
\v 37 Kabay tnimelan ale, manan, “Gamu sa mlé dale knaan.” 
\p Na manla di kenen, “Kayeam ku gami mayad knaan kdee dad to ani? Mti taden di walu bulen\f + \fr 6:37 \ft Satu kubad ani dunan: \fq Lwe latu denari i bayad knaan i kdee dad to ani.\ft I denari ani dunan i filak di banwe én. Na man dademe, i satu denari dunan i taden di sduh di bangla mangman ani. Manla lwe latu denari gablà taden satu to di walu bulen kel di sfali.\f* i bayad dun.” 
\p  
\v 38 Na man Dyisas, “File batù i fan nebeyu? Neyeyu sa kun.” 
\p Na di keyela dun manla, “Alò lime batù fan na lwe nalaf.” 
\p  
\v 39 Na dek Dyisas i dad to sudeng di bnas di dad sahal lumbuk.  
\v 40 Na slumbuk ale sudeng, nun mlatu to na nun lime falò dad to di kat lumbuk.  
\v 41 Na nwè Dyisas i lime batù fan na lwe nalaf, na lngalà kenen di langit du dmasal mlé fye di Dwata, na snatngaan i fan, na blén di dad gal mlalò kenen du nalella di dad to. Na nalelan lwe nalaf di kdeela.  
\v 42 Na gamkaan i kdeela, na bsol ale.  
\v 43 Na santifun dad gal mlalò kenen i lukasan, na fnò sfalò lwe been i gdèla fan na nalaf.  
\v 44 Na kdee dad lagi kmaan lime libu. 
\s1 I kagu Dyisas di tah lanaw 
\r (Matyu 14:22-23; Dyan 6:15-21) 
\p  
\v 45 Kafngela kmaan dek Dyisas muna dad gal mlalò kenen maweng di banwe Bétsayda di faltù bong lanaw. Na kafnge én, fdaan dad to.  
\v 46 Kafngen fdà dad to, mnagad kenen di satu bulul du dmasal di Dwata. 
\p  
\v 47 Di kbutangan, ditù fa i aweng dad gal mlalò kenen di talà lanaw, na Dyisas aloan satu gtagak di kilil.  
\v 48 Na teen Dyisas too maflayam dad gal mlalò kenen kamwa awengla du gsitongla i too mgal nus. Taman tamayè mwal salu Dyisas di dale tatì magu di tah lanaw, na tafanan ale nlius.  
\v 49 Kabay di kitela kenen tatì magu di tah lanaw, làla dilè, na man nawala lmagol kenen. Na mkit ale,  
\v 50 du kdeela mite kenen na too ale likò. 
\p Kabay gasil talù Dyisas di dale, manan, “Fangalyu nawayu du agu sa ani. Nang gamu likò.”  
\v 51 Na di kyak Dyisas di awengla, manak i nus. Na too tikeng dad gal mlalò kenen, na too msamuk fandamla tan duen tatì manak i nus.  
\v 52 Hae, du balù tateenla tnikeng nimò Dyisas di fan, knean là ale gamlabat du mgal ulula. 
\s1 I kafgulê Dyisas i dad to di Génésarét 
\r (Matyu 14:34-36) 
\p  
\v 53 Na fles ale mifal di lanaw na ditù gudmuungla di banwe Génésarét, na ikatla awengla.  
\v 54 Na di ktufa ale Dyisas di aweng, dad to mnè déén dmilè kenen.  
\v 55 Na taman faflal ale fgadè kdee dad to nun tduk di klamang banwela, na balù nè lingela gusalun déén, nebela dad to nun tduk gagin gumilèla salu di kenen.  
\v 56 Na di kdee gusalu Dyisas, balù tukay banwe ku bong, galla sansebe dad nun tduk di kenen. Nebela di fadyanla na fakdo ale ku Dyisas ku beg alò magot di kilil klawehan i dad to nun tduk, na mgulê sa kdee gamgagot dun. 
\c 7  
\s1 I kalob i dad to Dyu 
\r (Matyu 15:1-9) 
\p  
\v 1 Na nun dad Farisi na dademe tamdò dad flalò blé Dwata fagu di ku Mosis mdà di Dyérusalém stifun di saféd Dyisas.  
\v 2 Na teenla dademe dad gal mlalò ku Dyisas mlafà i tdò flalò dad Dyu, du là ale funa malob kagula kmaan. Na di fnaglutla magagsik i to là malob.  
\v 3 Hae, du dad Farisi na kdee dademe dad Dyu, silang ale kmaan ku funala nalob i kmalla, du én tdò lalò dad gutambulla.  
\v 4 Na ku kel ale fdu di fadyan silang ale kmaan ku funala snabul yéél lawehla. Na nun fa dademe tdò toola nimen mdà di gutambulla gablà di kalob, salngad i kalobla dad tabù, dad kulang na dad fligo tabaga. 
\p  
\v 5 Na taman smalek dad Farisi na dad tamdò i flalò Dwata di ku Dyisas, manla, “Kan kè duen dad gal mlalò ge mlafà i tdò flalò dad gutambulito? Hae, du là ale funa malob di fan ale kmaan.” 
\p  
\v 6 Na tnimel ale Dyisas, manan, “Tay gamu dad to flingu mimen Dwata! Too glut man Dwata gablà di gamu fagu di tugadan Isaya, manan, 
\q1 ‘I dad to ani mafè deg alò di bàla, 
\q2 bay too mawag nawala di deg. 
\q1  
\v 7 Taman landè gukmamu i kfangamfùla di deg, 
\q2 du i tdò manla mdà di Dwata, mdà alò di to.’ 
\p  
\v 8 “Hae, knagolyu dad flalò Dwata na balingyu too nimen dad flalò i dad to.” 
\p  
\v 9 Na lêman man Dyisas, “Tay, kfulungyu kmagol i flalò blé Dwata du fye gimenyu gamu flalò.  
\v 10 Du man Dwata fagu di ku Mosis, ‘Nafèyu màyu na yêyu,’ na manan, ‘Ku simto to talù sasè gablà di maan ku demen yéan fnatiyu.’  
\v 11 Hae, knagolyu du én balingyu tdò, ku nun tabeng fan blé satu to di dad tuan, na fakay kun, ku manan, ‘Korban,’ (Na i gumtatek ani dunan, i fangu tabeng gamu tagablégu di Dwata.)  
\v 12 Na mdà di manan én, làyu faloh kenen mafè dad tuan fagu di ktabengan dale.  
\v 13 I katdòyu i kimen dad flalò dad gutambulyu kfaguyu kmagol i Tnalù Dwata. Na ise alò ani nimòyu, bay dee dademe nimòyu salngad ani.” 
\s1 I gumdà salà i dad to 
\r (Matyu 15:10-20) 
\p  
\v 14 Kafnge én, tlo Dyisas dad to di safédan lêman, na manan di dale, “Kdeeyu too flinge na fnaglabatyu i mangu.  
\v 15 Landè di dad fkah i to di lam baan i gafagsik kenen, bay i sasè lamwà di bà i to i gafagsik kenen.  
\v 16 Taman flinge gamu, ku nun klingeyu!” 
\p  
\v 17 Na tnagak ale Dyisas i dad to déén na fusuk di lam i gumnè, na smalek dad gal mlalò kenen gablà di fléd gine.  
\v 18 Na man Dyisas di dale, “Balù gamu là gamu fa gamlabat? Làyu kè glabat, i fusuk di bà i to là gafsalà kenen,  
\v 19 du là sa fusuk di lam nawan bay di tienan na fles lamwà di lawehan.” (Di kman Dyisas ani, falohan balù tan bung knaan, talandè fnang du gafagsik.) 
\p  
\v 20 Na manan fa, “Kabay i kdee sasè lamwà di bà i to én gafsalà kenen,  
\v 21 du i lamwà di baan mdà sa di nawan. Na én gumdà i kdee bung salà gambet i sasè fandam, ksaféd i to ise yaanan, ktaku, kbanò, klafà yaan,  
\v 22 klom nawa di knun, ayè mimò sasè di dademe to, kafgaw, klandè kyà, kingà nawa, ktalù sasè gablà di dademe to, kafdatah kto, na klandè ldam.  
\v 23 I kdee sasè ani slame lamwà mdà di nawa i to, na ani sa gafsalà kenen.” 
\s1 I kafaglut i libun ise Dyu 
\r (Matyu 15:21-28) 
\p  
\v 24 Kafnge én, tnagak Dyisas i banwe én, na fles kenen di banwe mdadong di lwe syudad Tiro na Sidon. Na fusuk kenen di satu gumnè, na kayean ku landè to gmadè déén kenen di lam, bay laan gagan muni i kton,  
\v 25 du di là mlo nun satu libun mlinge tadéén kenen. Na di kgadean dun gasil kenen salu di ku Dyisas na began lkuad di munan du nun tingaan libun nun busawan.  
\v 26 Na libun ani ise Dyu, bay satu to mdà di banwe Fonisya glam di Sirya. Na toon fakdo ku Dyisas, fye falwaan i busaw mnè di tingaan.  
\v 27 Na tmimel Dyisas fagu di fléd, manan, “Funagu fankaan dad ngà, du là fakay nwè knaan i dad ngà na blé di dad ayem.” 
\p  
\v 28 Na glabat i libun, ayem i guflingen Dyisas dad to ise Dyu, taman manan, “Hae Amu, gadègu én, bay balù dad ayem gamkaan samel mtatek di dungan i gukmaan dad ngà.” 
\p  
\v 29 Na man Dyisas di kenen, “Too fye timelam, taman fakay ge mulê du talamwà i busaw di tingaam.” 
\p  
\v 30 Na mdà mulê i libun. Na di kakelan di gumnean teenan tingaan milè di gumilean, du talamwà i busaw. 
\s1 I kafgulê i to bakong na umu 
\p  
\v 31 Na tnagak Dyisas i banwe Tiro. Na én dalanan di syudad Sidon na di banwe dnagit Dikafolis na fles kenen salu di bong lanaw Galili. 
\p  
\v 32 Na i dad to déén nebela satu to bakong na malima ktaluan di ku Dyisas. Na fnila ku nagot Dyisas kenen fye mgulê.  
\v 33 Na fagin Dyisas i to bakong mawag di dademe dad to. Na kafnge én, dogan tnaloan di sbalà klingen, na naféan ibal i tnaloan na ihokan di dilaan.  
\v 34 Na meye Dyisas di langit, na falbongan kalnawan. Kafnge én, manan, “Ifata.” I gumtatekan, “Mgukà nan.”  
\v 35 Di kmanan én, mgukà i klinge i to én, na salngad ku tamagteh dilaan du mbangal i ktaluan. 
\p  
\v 36 Na fnang Dyisas i dad to mite, tmulen i mgimoan, bay balù lêan fnang, baling midul fa i ktulenla dun.  
\v 37 Na kdee dad to gmadè dun too ale tikeng, na manla, “Tay, kafye nimò to ani, du balù dad bakong faflingen, na to umu ftaluan.” 
\c 8  
\s1 I kafkaan Dyisas i fat libu dad to 
\r (Matyu 15:32-39) 
\p  
\v 1 Di satu duh tastifun lêman dee dad to di ku Dyisas. Na di klandè knaanla, tlo Dyisas dad gal mlalò kenen di safédan, na manan di dale,  
\v 2 “Toogu kando dad to stifun dini. Tatlu duhla fanak dini di safédgu, na talandè knaanla.  
\v 3 Na ku fdàgu ale landè knaan, baling ale kadang mtafì di dalan, du mawag gumulê dademe.” 
\p  
\v 4 Na smalek dad gal mlalò kenen, “Nè gumwèmi knaan di banwe ani gablà fkaan kdee dad to ani? Fye ku nun dad to mnè dini!” 
\p  
\v 5 Na snalek Dyisas ale, manan, “File batù fanyu?” 
\p Na manla, “Alò fitu.” 
\p  
\v 6 Na dekan i dad to sudeng di tanà. Na nwean fitu batù fan na funa kenen dmasal mlé fye di Dwata. Kafnge én, snatngaan, na blén di dad gal mlalò kenen, du falelan dale di dad to. Na nalella di kdee dad to.  
\v 7 Na nun tukay nalafla bay là dee, na lêman dmasal Dyisas di Dwata, na lêmanan dek dad gal mlalò kenen malel dun di dad to.  
\v 8 Na kmaan dad to, na bsol ale. Na i gdè knaan santifunla fitu been fnò.  
\v 9 Na kdee dad to kmaan mdadong di fat libu. Kafngela kmaan fdà Dyisas dad to,  
\v 10 na gasil myak di aweng magin dad gal mlalò kenen na salu ale di banwe Dalmanuta. 
\s1 I kafni dad Farisi tnikeng 
\r (Matyu 16:1-4) 
\p  
\v 11 Na nun dad Farisi salu di ku Dyisas du samdal ale kenen. Fnila di kenen i tnikeng mdà di langit, du kfagula tmilew kenen ku glut kenen i dek Dwata.  
\v 12 Na falbongan i nawa, na manan, “Kan ku mni dad to di duh ani tnikeng? Tulengu gamu kaglutan, landè tnikeng fitegu di gamu.” 
\s1 I kafngewe Dyisas gablà di tdò dad Farisi na tdò Harì Hérod 
\r (Matyu 16:5-12) 
\p  
\v 13 Kafnge én, tnagak Dyisas dad to déén, na lêman myak ale Dyisas di aweng, na mdà mifal di bong lanaw. 
\p  
\v 14 Na di kifalla taglifetla mebe fan bnatula di aweng, alò salbatù gebela.  
\v 15 Na fanngewen ale fagu di fléd, manan, “Tooyu fangeye én gambet bulung falnok fan dad Farisi na Harì Hérod.” 
\p  
\v 16 Na là ale gamlabat, taman stulen ale, manla, “Én kè manan, du landè fan nebeito.”  
\v 17 Kabay gadè Dyisas gsalà kaglabatla, taman manan di dale, “Kan ku stulen gamu gablà di làyu kgebe fan? Là gamu fa gamlabat kel ani? Mgal kè uluyu?  
\v 18 Nun matayu, bay là gamu mite? Nun klingeyu, bay là gamu kè mlinge? Làyu kè gafaldam i nimògu?  
\v 19 Taglifetyu kè kasatngàgu i lime batù fan fkaangu lime libu dad to. File been gukuyu gdèla?” 
\p Na manla, “Sfalò lwe.” 
\p  
\v 20 Na man Dyisas, “Na i fitu batù fan fkaan fat libu dad to. File been gukuyu gdèla?” 
\p Na manla di kenen, “Fitu.” 
\p  
\v 21 Na manan, “Kan kè duenyu là gamlabat na ise ku btal fan i mangu?” 
\s1 I kafgulê Dyisas i lagi butè di Bétsayda 
\p  
\v 22 Na di kakella di tukay banwe Bétsayda nun satu lagi butè nebe dad to di ku Dyisas. Na fakdo ale fye nagotan du fye mgulê.  
\v 23 Na nagot Dyisas sigal i to butè na nalakan kenen lamwà di tukay banwe én, na dnulaan dad matan. Na di kafkahan kmalan di to én, snalekan, manan, “Nun teenam?” 
\p  
\v 24 Na tukeng to én, na manan, “Hae, teengu dad to, bay gambet dad kayu magu kitegu dale.” 
\p  
\v 25 Na lêman nagot Dyisas i matan. Na kafnge én, too meye to én, na too fye kiten du tamgulê.  
\v 26 Na dek Dyisas kenen mulê, na manan di kenen nang samfulê di tukay banwe én. 
\s1 I gman Fiter gablà ku Dyisas 
\r (Matyu 16:13-20; Luk 9:18-21) 
\p  
\v 27 Na salu Dyisas na dad gal mlalò kenen di dad malnak banwe glam di banwe Sisariya Filifos. Na di lamla magu nun snalekan dale, manan, “Tan gal man dad to gablà di deg? Simto agu kun?” 
\p  
\v 28 Na tulenla kenen, “Man i dademe, ge kun Dyan Gal Munyag. Man dademe, Ilaydya, ku demen satu di dademe tugad Dwata.” 
\p  
\v 29 Na smalek Dyisas, manan, “Kabay gamu, tan manyu? Simto agu kè?” 
\p Na tmimel Fiter, manan, “Ge sa Krayst.” 
\p  
\v 30 Na too ale nfang Dyisas nang tmulen di balù simto to gablà di kenen. 
\s1 I kafgadè Dyisas i kfatin 
\r (Matyu 16:21-28; Luk 9:22-27) 
\p  
\v 31 Mdà di bang ani tambù Dyisas fgadè di dad gal mlalò kenen i fan kel di Tingà To. Na manan là fakay ku là kenen magu di dee bung kaflayam. Na dad tua gal mebe dad Dyu na dad ulu dad bà di Dwata na dad tamdò i flalò blé Dwata fagu di ku Mosis, knagolla kenen kadang na fnatila, bay nték kenen mdà di fati di gatlun duh.  
\v 32 Na too mbangal i man Dyisas di dale ani, taman nebe kenen Fiter di kilil, na nngakan du tagmanan, “Fnatila agu.” 
\p  
\v 33 Kabay falê Dyisas meye di dademe gal mlalò kenen, na nngakan Fiter, manan, “Fawag ge di deg Satanas! Ise di Dwata gumdà i fandamam bay di to!” 
\p  
\v 34 Na lêman tlo Dyisas di safédan dad gal mlalò kenen na i dee dad to déén, na manan di dale, “Ku nun to mayè too mlalò deg, là fakay ku laan knagol knayè i kton, na mebe krusan, na too mlalò deg.  
\v 35 Du ku simto kmabas i nawan, knean mati. Kabay ku simto mati du mdà di klaloan deg ku demen mdà di kbelan i Fye Tulen gablà di deg, nun nawan landè sen.  
\v 36 Balù gfun satu to i kdee fye dini tah tanà, tan gufyen ku lana di kenen nawa landè sen. Landè.  
\v 37 Du landè fakayan blé du fye gbawian nawan landè sen.  
\v 38 Na sadni too dee dad to too gamsalà na knangla Dwata. Na i to gbol di dale i myà mfun deg ku demen tdògu, kyàgu kenen kadang, agu dnagit Tingà To, di kasfulêgu magin bong kdatah Màgu na magin dad kasaligan too mtiu.” 
\c 9  
\p  
\v 1 Na manan di dale, “Tulengu gamu i kaglutan, nun tadag dini là mati kel di kiteyu kdatah i kagot Dwata.” 
\s1 I kgili baweh Dyisas 
\r (Matyu 17:1-13; Luk 9:28-36) 
\p  
\v 2 Kafnge i nam butang, fagin Dyisas Fiter, Dyém, na Dyan di satu mdatah bulul, na landè to ditù alò ale. Na di klola meye di kenen mgili bawehan.  
\v 3 I klawehan too mneng bukay landè to di klamang banwe gmagan fbukay salngad kbukayan.  
\v 4 Na msut déén Ilaydya na Mosis stulen di ku Dyisas. 
\p  
\v 5 Na man Fiter di ku Dyisas, “Amu, too fye du dini gami. Fye ku fdak gami tlu slung, satu i ge, satu ku Mosis, na satu ku Ilaydya.”  
\v 6 Ani gman Fiter du laan gadè i fye man du too ale likò. 
\p  
\v 7 Na di slengan talù maglimun ale labun, na nun talù mdà di bong labun, manan, “Ani tingàgu toogu kanbong nawa. Flinge gamu kenen!” 
\p  
\v 8 Na gasil ale meye di glibutla, bay landè dademe to teenla di safédla, alò Dyisas. 
\p  
\v 9 Na di kasolla mdà di bulul too ale nfang Dyisas, manan, “Nangyu tulen di balù simto to i teenyu ditù gine. Silangyu tulen ku mték agu, i dnagit Tingà To, mdà di fati.” 
\p  
\v 10 Na nimenla man Dyisas di dale, bay santulenla ku alò ale, i gumtatek i manan mték mdà di fati.  
\v 11 Na nun fa làla glabat, taman snalekla, manla, “Kan ku gal man i dad to tamdò flalò Dwata, na silang kel i To Mgalék Dwata ku takel lêman Ilaydya?” 
\p  
\v 12 Na man Dyisas, “Too glut, i muna kel i to gambet ku Ilaydya du fatlagadan kdee, bay nun fa gman di Tnalù Dwata gablà deg, i dnagit Tingà To. I gman déén dee kaflayam nagugu na knangla agu nawa.”\f + \fr 9:12 \ft Faglabat Dyisas dad mlalò kenen gablà di kaflayam nagu i Tingà To du i man nawala ku glut Dyisas i To Mgalék Dwata mebe i banwe là fakay ku maflayam.\f* 
\v 13 Na man Dyisas fa, “Na gablà ku Ilaydya, tulengu gamu, takel sa Ilaydya, na balingla kenen fanlayam gusen i knayèla gambet i fsulat Dwata di Tnaluan gablà di kenen.” 
\s1 I kafgulê Dyisas i tingà nun busaw 
\r (Matyu 17:14-21; Luk 9:37-43) 
\p  
\v 14 Na di kasfulê ale Dyisas di dademe dad gal mlalò kenen, teenla dee dad to stifun ditù. Na nun dad tamdò i flalò blé Dwata fagu di ku Mosis samdal dale.  
\v 15 Na kite dad to ku Dyisas too ale tikeng, na gasilla snitong kenen, na dnawatla kenen.  
\v 16 Na snalekan ale, manan, “Tan sandalyu?” 
\p  
\v 17 Na nun to mdà di dad to stifun déén tmimel, manan, “To Tamdò, tanebegu di ge i tingàgu lagi du nun busaw fumu kenen.  
\v 18 Na ku gal fusuk i busaw, galan sek di tanà tingàgu. Na gal mulak i baan, na kminggat kifanan, na mbaling kmeseg lawehan. Tabeg agu fakdo di dad gal mlalò ge du fye falwàla, bay làla gagan falwà dun.” 
\p  
\v 19 Na man Dyisas, “E tay, gamu dad to di bang ani, too landè kafaglutyu. Bong klogu mnè di safédyu! Tan fa dé kaftahàgu nawagu di gamu du fye faglut gamu? Nebeyu dini i tingà.” 
\p  
\v 20 Taman nebela tingà di ku Dyisas. Na di kite busaw ku Dyisas toon fakakal i tingà na fafugenan di tanà. Na tatì glulid i tingà, na mulak baan.  
\v 21 Na snalek Dyisas mà i tingà, manan, “Tamlo kè tdukan?” 
\p Na man i maan, “Tagnè mdà di ktukayan.  
\v 22 Too dee dulê batan di lam lifoh na yéél du kayean mati kenen, bay ku gaganam, toom gami kando, na tnabengam gami.” 
\p  
\v 23 Na man Dyisas, “Kan ku manam, ‘Ku gaganam?’ Gagan Dwata mimò balù tan di to faglut di kenen.” 
\p  
\v 24 Na falbong mà i tingà taluan, manan, “Faglut agu sa, bay begam snikof i kafaglutgu.” 
\p  
\v 25 Na teen Dyisas tadee dad to gasil salu di dale, taman nngakan i busaw, manan, “Ge busaw gal fbakong na fumu, mangu ge, lamwà di kenen, na nang ge lêman fusuk kel di landè sen.” 
\p  
\v 26 Na mkit i busaw na salngan én toon kfakakal i tingà, kafnge én, lamwà. Na i baweh tingà salngad i tidol, taman man dee dad to, “Tamati kenen.”  
\v 27 Kabay nagot Dyisas kmal i tingà na ntékan, na fles kenen tadag. 
\p  
\v 28 Di kfusuk Dyisas na dad gal mlalò kenen di gumnè, nun snalekla kenen di alò ale déén, manla, “Tan duenmi là gmagan falwà i busaw gine?” 
\p  
\v 29 Na man Dyisas di dale, “Alò fagu di dasal gaganyu falwà i busaw salngad ani.” 
\s1 I kafgadè Dyisas lêman gablà di kfatin 
\r (Matyu 17:22-23; Luk 9:43-45) 
\p  
\v 30 Tnagakla banwe én, na déén dalanla di Galili. Na là mayè Dyisas ku nun gmadè ku nè gumagula,  
\v 31 du én tdoan i dad gal mlalò kenen gablà di fan kel, manan, “Tamdadong kablé deg, i dnagit Tingà To, di agot i dad to, na fnatila agu, bay balù fnatila agu, lêman agu sa mték di gatlun duh.”  
\v 32 Kabay làla glabat gumtatek i manan, na likò ale smalek dun. 
\s1 I too mdatah to di kagot Dwata 
\r (Matyu 18:1-5; Luk 9:46-48) 
\p  
\v 33 Na di kakella di tukay banwe Kafernaum fusuk ale di gumnè na snalek Dyisas dad gal mlalò kenen, manan, “Tan santulenyu gine di dalan?” 
\p  
\v 34 Kabay là ale gamtimel, du i santulenla ku simto too mdatah di dale. 
\p  
\v 35 Taman sudeng Dyisas, na tlon di kenen dad sfalò lwe, na manan, “Ku nun to mayè too mdatah di kdee, fye ku fdanaan i kton, na tnabengan i kdee.” 
\p  
\v 36 Na nwè Dyisas satu tingà du ftadagan di blengla na began lkaf, na manan di dale,  
\v 37 “Ku simto dmawat satu tingà gambet ani du mdà di ksasatun di deg, dnawatan agu, na i dmawat deg, dnawatan Màgu Dwata, i mdek deg.” 
\s1 I to là mnang nawa ku Dyisas, msen kenen 
\r (Luk 9:49-50) 
\p  
\v 38 Na man Dyan di ku Dyisas, “To Tamdò, nun teenmi satu lagi gal falwà dad busaw fagu di dagitam. Na fnangmi, du ise kenen satu dadememi gal mlalò ge.” 
\p  
\v 39 Kabay man Dyisas, “Nangyu kenen fnang du landè to mlal gamtalù sasè gablà di deg ku galan nimò tnikeng fagu di dagitgu,  
\v 40 du i to là mnang nawa gito msen gito.  
\v 41 Na tulengu gamu i kaglutan, nun untung sa di fulé duh én to mlé balù alò tukay yéél ninum di gamu du mdà di ksasatuyu di deg, dunan Krayst, i Mgalék Dwata.” 
\s1 I kgebe di salà 
\r (Matyu 18:6-9; Luk 17:1-2) 
\p  
\v 42 Na man Dyisas fa, “Na ku simto gumdà i satu to gamsalà, too kenen fanlayam. Fye fa ku mgikat di lialan bong giling batu, na bat kenen di gumngalam mahin, di laan fa gebe di salà satu di dad to faglut di deg gambet tingà ani.  
\v 43 Kaflingenta dun, ku bali kmalam mebe ge di kimò sasè, fye fa baling ku kanlangam du fye là ge fles mimò sasè, du fye fa ku fatok ge na nun nawam landè sen di sikof kmalam bay baling ge bat di lanaw lifoh landè gusenan,  
\v 44 du ditù landè gumati dad safat, na landè gumati i lifoh.  
\v 45 Na ku bali bliam i mebe ge di kimò sasè, fye fa baling ku kanlangam, du fye là ge fles mimò sasè, du fye fa ku kimay ge na nun nawam landè sen di sikof bliam, bay baling ge bat di lanaw lifoh,  
\v 46 du ditù landè gumati dad safat, na landè gumati i lifoh.  
\v 47 Na ku bali matam mebe ge di kimò sasè fye fa ku balingam tanwil du fye là ge fles mimò sasè, du fye fa ku alò satu matam, na fakay ge gakuf di kagot Dwata, di sikof matam, bay baling ge bat di lanaw lifoh,  
\v 48 du ditù landè gumati dad safat, na landè gumati i lifoh.  
\v 49 Na kdee dad to tnilew fagu di lifoh dunan i kaflayam. 
\p  
\v 50 “I dad to mlalò deg gambet kahì mlé nem di knaan du ale gumdà i kafye di demela to, bay ku magwè i nem i kahì, talandè kibò fye lêman mahì. Taman fye ku gambet kahì mangnem i nimòyu, taman sansatuyu nawayu di dademeyu.” 
\c 10  
\s1 I tdò Dyisas gablà di kaskah i kasatlamin 
\r (Matyu 19:1-12; Luk 16:18) 
\p  
\v 1 Na tnagak Dyisas Kafernaum na salu di banwe Dyudiya. Kakelan ditù fles kenen di faltù i yéél Dyordan. Na lêman dee dad to stifun di kenen, na lêman kenen tamdò dale du én tagnè galan nimò. 
\p  
\v 2 Na nun dad Farisi salu di kenen du neyela dalan dmalam kenen, taman smalek ale, manla, “Fakay dé di flalò blé Dwata ku kahito yaanito?” 
\p  
\v 3 Na smalek Dyisas, manan, “Tan i flalò Mosis?” 
\p  
\v 4 Manla, “Falohan ku kah i dad lagi yaanla ku tafunala sulat i fafil gufgadè i kaskah.” 
\p  
\v 5 Man Dyisas, “Hae, du too mgal i uluyu. Ani sa duen Mosis smulat i flalò én.  
\v 6 Kabay ise gambet ani di katbuan di kimò Dwata i banwe, du man i Tnaluan, ‘Nimò Dwata satu lagi na satu libun.’  
\v 7 ‘Ani duen i lagi lamwà di ifat i maan na yéan na mnè di saféd i yaanan,  
\v 8 du lwe to ani mgimò satu.’ Taman taise ku lwe to i satlamin bay mbaling satu.  
\v 9 Taman là fakay sankah dad to tasansatu Dwata.” 
\p  
\v 10 Na di kfusukla di lam gumnè, lêman smalek dad gal mlalò kenen gablà di kaskah yaan.  
\v 11 Na man Dyisas di dale, “Balù simto to mkah yaanan, na lêman mwè satu libun, tagamsalà du nlafaan i muna yaanan.  
\v 12 Salngad i libun mkah yaanan, na mwè satu lagi, tagamsalà du nlafaan i muna yaanan.” 
\s1 I kdawat Dyisas i malnak dad ngà 
\r (Matyu 19:13-15; Luk 18:15-17) 
\p  
\v 13 Na nun dad to mebe i dad ngà di ku Dyisas du fye nagotan ale na dnasalan. Kabay dad gal mlalò ku Dyisas balingla nngak dad to én.  
\v 14 Kabay di kite Dyisas nimòla, kalbutan dad gal mlalò kenen, na manan di dale, “Falohyu dad ngà salu di deg na nangyu ale fnang, du ku simto nun ksalig salngad dad ngà ani, gakuf ale di kagot Dwata.  
\v 15 Tulengu gamu kaglutan, ku i ksalig satu to là salngad di dad ngà ani, là kenen gakuf di kagot Dwata.”  
\v 16 Na lkaf Dyisas i dad ngà, na fkahan kmalan di ulula du banlén ale kafye. 
\s1 I lagi nun bong knun 
\r (Matyu 19:16-30; Luk 18:18-30) 
\p  
\v 17 Na di kdà Dyisas magu nun to gasil salu di kenen na lkuad di munan, manan, “E To Tamdò, too ge tlu to, taman ani snalekgu di ge, tan nimògu fye gfungu nawa landè sen?” 
\p  
\v 18 Na man Dyisas di kenen, “Kan ku manam agu tlu to? Alò satu to tlu, dunan Dwata.  
\v 19 Tagadeam dad flalò blé Dwata fagu di ku Mosis i gman, ‘Nang ge manò, nang ge mlafà yaanam, nang ge tmaku, nang tmulen kéng di gususay, nang ge mlangong i demem to, na mafè ge maam na yéam.’ ” 
\p  
\v 20 Na man i to, “Hae To Tamdò, tanimengu i kdee flalò Dwata mdà fa di gutukaygu.” 
\p  
\v 21 Na meye Dyisas di to én na too bong kakdon kenen. Na manan di kenen, “Kabay nun fa satu gukulangam. Mdà ge, na fablim kdee dad knunam, na blém bayadan di dad to landè. Na fagu déén nun bong knun gfunam di langit. Kafnge én, samfulê ge, na mlalò ge deg.” 
\p  
\v 22 Kabay di kaklinge i lagi i man Dyisas, mbaling too blat bawehan, na mdà kenen na too mlidù nawan du too bong knunan. 
\p  
\v 23 Na falê Dyisas meye di dad gal mlalò kenen, na manan, “Too malima kagfusuk i to nun bong knun di kagot Dwata.” 
\p  
\v 24 Na tikeng i dad gal mlalò kenen di kaklingela i manan. Kabay lêman man Dyisas di dale, “Mangu di gamu dad gal mlalò deg, too malima di balù simto to fusuk di kagot Dwata.  
\v 25 E dad ngà, malima fusuk i bong lmanaf kamél di sol i dalum, bay malima fa i satu to nun bong knun fusuk di kagot Dwata.” 
\p  
\v 26 Kaklingela én, matnù ktikengla, na manla, “Ku glut én, simto kè galwà?” 
\p  
\v 27 Na meye Dyisas di dale, na manan, “Landè to gmagan mimò ani, bay Dwata gmagan sa, du gagan Dwata kdee.” 
\p  
\v 28 Na man Fiter di kenen, “Neyem gami, tatnagakmi kdee du mlalò gami ge.” 
\p  
\v 29 Na man Dyisas, “Tulengu gamu kaglutan, ku nun to tmagak i gumnean, ku demen dad flanekan, ku demen dad tuan, ku demen dad ngaan, ku demen tanaan du mdà di ksasatun di deg na mdà di kdawatan i Fye Tulen,  
\v 30 too bong gdawatan mdà di Dwata di klon mnè di tah tanà, dunan dad gumnè, dad flanek lagi na libun, dad yê, dad ngà, na dad tanà, kel di mlatu dulê kbongan di gtagakan, na gagin dee dad kaflayam, na di fulé duh gamdawat kenen nawa landè sen.  
\v 31 Nun dee dad to mdatah di duh ani baling mdanà kadang di fulé duh. Na dee dad to mdanà di bang ani mdatah kadang di fulé duh.” 
\s1 I gatlu dulê Dyisas fgadè gablà di kfatin 
\r (Matyu 20:17-19; Luk 18:31-34) 
\p  
\v 32 Di dalan ale Dyisas mnagad salu di syudad Dyérusalém, magu Dyisas muna di dademe to magin kenen. Na tikeng i dad gal mlalò kenen du salu ale di syudad gumnè dad to dmuen kenen. Na likò dad to tmadol déén. Na lêman fafdadong Dyisas dad sfalò lwe galan dek, du fgadè dale gablà di fan kel di kenen.  
\v 33 Na man Dyisas di dale, “Flinge gamu, du salu ito nan di Dyérusalém, na ditù bléla agu, i dnagit Tingà To, di agot dad ulu dad bà di Dwata na dad tamdò dad flalò blé Dwata fagu di ku Mosis na nukumla agu di fati. Na kafnge én, bléla agu di agot dad to ise Dyu du fafatila,  
\v 34 na dad to én, toola agu kadang snilo, na dnulàla, na bnadasla, na flesla agu fnati, bay di gatlun duh mték agu mdà di fati.” 
\s1 I fni ale Dyém na Dyan 
\r (Matyu 20:20-28) 
\p  
\v 35 Na fdadong Dyém na Dyan, i lwe dad ngà Sébidi, na manla di ku Dyisas, “To Tamdò, nun kayèmi fni di ge.” 
\p  
\v 36 Na smalek Dyisas, manan, “Tan kayèyu mdà di deg?” 
\p  
\v 37 Na tmimel i lwe, “Ku tagdawatam kdataham kadang, kayèmi ku fsudengam gami di safédam satu gsen di kwananam na satu gsen di ibengam.” 
\p  
\v 38 Kabay man Dyisas, “Làyu gadè i fniyu. Gaganyu kè mebe i kaflayam salngad bong kaflayam gnagugu kadang? Gamtayud gamu i bong kalima salngad deg kalima?”\f + \fr 10:38 \ft Satu kubad ani dunan: Gaganyu kè tmufì minum di basu guminumgu, ku demen gmagu i kafbunyag gnagugu kadang?\f* 
\p  
\v 39 Manla, “Hae, gaganmi.” 
\p Na man Dyisas di dale, “Too glut, i kaflayam gnaguyu, salngad di kaflayam gnagugu.  
\v 40 Kabay landè kaglutgu malék ku simto fsudeng gsen di kwanangu na di ibenggu, du én alò gsudeng déén i dad to tagutmagà i Màgu dun.” 
\p  
\v 41 Na di kaklinge i dademe sfalò gal mlalò ku Dyisas i fni dademela ani, flabè ale ku Dyém na Dyan.  
\v 42 Kabay tlo Dyisas kdeela di safédan, na manan di dale, “Tagadèyu i gal nimò i dad ganlal dad to di tah tanà ani. Toola bankut dad to gdanà di dale. I dad to nun glal, toola gal dek i dad to.  
\v 43 Kabay gamu, ise én kfaguyu, du ku nun di gamu mayè mbaling mdatah là fakay ku laan gal tnabeng i dademen.  
\v 44 Na ku nun di gamu mayè mdatah di kdee, là fakay ku laan flifan i kton di kdee dademen,  
\v 45 du balù agu, i dnagit Tingà To, làgu salu di tanà ani du én kayègu ku tnabeng agu i dad to, bay i duengu salu dini du tnabenggu dad to na blé ktogu di fati, du bnayadgu i dad salàla du fye dee dad to galwà.” 
\s1 I kafgulê Dyisas i to butè dnagit Bartimyus 
\r (Matyu 20:29-34; Luk 18:35-43) 
\p  
\v 46 Na takel Dyisas na dad gal mlalò kenen di banwe Dyériko, na di kdàla lêman, nun dee dad to magin dale. Na nun to butè dnagit ku Bartimyus, tingà Timyus lagi, sudeng di kilil dalan du mni.  
\v 47 Di kaklingen i to mlius di kenen dunan Dyisas mdà di Nasarét, tambù kenen tamlo, manan, “E Dyisas, Bel Harì Dabid, begam agu kando!” 
\p  
\v 48 Na dee to mngak na manla kenen fanak. Bay baling matnù kakitan, manan, “Bel Harì Dabid, begam agu kando!” 
\p  
\v 49 Na tlag Dyisas magu, manan, “Tloyu kenen dini.” 
\p Na katlola i to butè, manla, “Fangalam nawam, na tadag ge du tatlon ge.” 
\p  
\v 50 Na batan lafin klaweh began kalomboy, na gasil kenen tadag, na salu di ku Dyisas. 
\p  
\v 51 Na snalek Dyisas kenen, “Tan kayeam nimògu di ge?” 
\p Na tmimel i to butè, manan, “Amu, kayègu ku beg agu mite.” 
\p  
\v 52 Na man Dyisas di kenen, “Fakay ge mulê du mdà di kafaglutam tamgulê ge.” Na mite sa kenen, na fles magin ku Dyisas di kagun. 
\c 11  
\s1 I sangal kagu Dyisas di bong syudad Dyérusalém 
\r (Matyu 21:1-11; Luk 19:28-40; Dyan 12:12-19) 
\p  
\v 1 Na mdadong ale Dyisas di Dyérusalém du tafan ale kel di dad tukay banwe dnagit Bétfagi na Bétani déén di dungan bulul Olib. Na nun lwe gal mlalò kenen dekan muna.  
\v 2 Na manan di dale, “Fles gamu di banwe sen munaito. Kfusukyu ditù, nun teenyu satu nati dongki ikat landè to lmen smakay dun. Nbelyu ikatan na nebeyu dini.  
\v 3 Na ku nun to man di gamu, ‘Kan ku nimòyu én?’ manyu di kenen, ‘Nun gukmamu i Amu dun, na lêmanan gasil fulê di gamu.’ ” 
\p  
\v 4 Na tamdà ale, na kakella ditù nun teenla nati ikat déén di dalan di saféd takab gumnè. Na klola mbel ikat i nati,  
\v 5 nun dad to tadag déén smalek, manla, “Kan ku nbelyu ikat nati én?” 
\p  
\v 6 Na tmimel ale salngad i man Dyisas di dale, na falohla ale mwè dun.  
\v 7 Na nebela nati di ku Dyisas, na nafidla i dademe klawehla, na smakay Dyisas.  
\v 8 Na dee dad to mbel dademe klawehla di dalan gumagun, na kamlang dademe dad fanga nun doon mdà di dad kayu di kilil dalan du filèla di gumagu Dyisas, du fitela afèla kenen.  
\v 9 Na tamlo dad to di muna na tmimel dad to di fulé, manla, 
\q1 “Dnayenito Dwata! 
\q2 Too nun kafye i to salu dini mebe i glal Amuito Dwata! 
\q1  
\v 10 Banlé Dwata kafye i kagot fan kel tafakang di tbulito Harì Dabid! 
\q2 Dnayenyu Dwata kdeeyu mnè di tah langit!” 
\p  
\v 11 Na di kakel Dyisas di Dyérusalém, fusuk kenen di Bong Gumnè Dwata. Na teenan kdee nimòla di lam, na du taflabi nan, samfulê kenen na i dad sfalò lwe gal mlalò kenen di banwe Bétani. 
\s1 I talù Dyisas di kayu fig 
\r (Matyu 21:18-19) 
\p  
\v 12 Na di tmadol duh, mdà ale di Bétani, na di lamla magu tabitil Dyisas.  
\v 13 Na mdà di gumawagan nun teenan satu kayu fig mlumbù doonan, taman salu kenen ditù du neyen ku nun bungen, bay kakelan déén alò doon teenan, du ise bangan munge.  
\v 14 Na talù Dyisas di kayu, manan, “Fandà ani landè nan gamkaan i bungem.” Na mlinge dad gal mlalò kenen. 
\s1 I nimò Dyisas di Bong Gumnè Dwata 
\r (Matyu 21:12-17; Luk 19:45-48; Dyan 2:13-22) 
\p  
\v 15 Na di kakel ale Dyisas di syudad Dyérusalém fusuk kenen di Bong Gumnè Dwata, gal gumangamfù dad Dyu, na ndalan dad to sbayad déén. Fnugenan dad lamisa dad to samfalit filak, na dad gusudeng dad to fabli salafati galla dsù.  
\v 16 Na laan faloh dad to mebe dad kalyak balù alò magu di lam i Bong Gumnè Dwata. 
\p  
\v 17 Na tdò ale Dyisas, manan, “Tagsulat di Tnalù Dwata, manan, ‘Én gukmamu gumnègu gal gudmasal di deg i dad to mdà di kdee dad banwe.’ Én man Dwata, bay tabalingyu nimò gumnè dad to tmaku.” 
\p  
\v 18 Na linge dad ulu dad bà di Dwata na dad tamdò i flalò blé Dwata fagu di ku Mosis, taman mngabal ale kfagu mati ku Dyisas, du likò ale kenen, du too tikeng i dad to di katdoan. 
\p  
\v 19 Na di kasdaf i duh, lamwà ale Dyisas di syudad. 
\s1 I tdò gwè mdà di kayu fig 
\r (Matyu 21:20-22) 
\p  
\v 20 Na di flafus i tmadol duh, di kagula lêman, teenla i kayu fig tamlanas na mati kel di dalilan.  
\v 21 Na gafaldam Fiter i gman Dyisas di kayu, na manan, “Amu, neyem kayu tanngakam, tamlanas.”  
\v 22 Na tmimel Dyisas, “Hae, faglut gamu di Dwata,  
\v 23 du tulengu gamu kaglutan, balù simto to ku too kenen faglut na là lwe nawan di kdohò Dwata i fnin, toon dnohò di kenen. Na fakayan man di bulul ani, ‘Magket ge na gbat di lam mahin,’ na gdohò sa i manan.  
\v 24 Taman tulengu gamu, balù tan fniyu di dasal, ku faglut gamu blé di gamu i fniyu, gdawatyu sa.  
\v 25 Kabay di kdasalyu ku nun ksasè nawayu di balù simto to, funayu nlifet salàla kloyu dmasal di Dwata du fye i Màyu di langit lê mlifet i salàyu, ( 
\v 26 du ku làyu nlifet salà demeyu to, na là nlifet Màyu di langit gamu salà.)” 
\s1 I gumdà glal Dyisas 
\r (Matyu 21:23-27; Luk 20:1-8) 
\p  
\v 27 Na di kakella di Dyérusalém lêman salu Dyisas di Bong Gumnè Dwata. Na di laman magu di lam, fdadong di kenen dad ulu dad bà di Dwata na dad tamdò i flalò blé Dwata fagu di ku Mosis, na dad tua gal mebe i dad Dyu.  
\v 28 Na smalek ale, manla, “Tan kè kaglutam mimò i kdee nimoam? Na simto kè mlé ge glal mimò dun?” 
\p  
\v 29 Na man Dyisas di dale, “Nun snalekgu gamu funa, na ku gtimelyu tulengu gamu gumdà glalgu mimò ani.  
\v 30 Tulenyu deg sa kun, nè gumdà glal Dyan munyag? Mdà di Dwata, ku demen mdà di to?” 
\p  
\v 31 Na stulen ale ku tan timella, manla, “I tan timelito? Ku manito, ‘I glalan mdà di Dwata,’ snalekan ito, ‘Kan ku làyu fnaglut i manan?’  
\v 32 Kabay là fakay ku manito, ‘Mdà di dad to.’ ” (Hae, du likò ale i dad to du kdeela too faglut Dyan satu too glut tugad Dwata.) 
\p  
\v 33 Taman tmimel ale ku Dyisas, manla, “Làmi gadè.” 
\p Taman man Dyisas di dale, “Na, làgu tulen gamu ku nè gumdà glalgu mimò i nimògu.” 
\c 12  
\s1 I guflingen Dyisas i dad ganlal di kafaglut di dad to magot i fule 
\r (Matyu 21:33-46; Luk 20:9-19) 
\p  
\v 1 Na tambù Dyisas tamdò dad to lêman fagu di fléd, manan, “Nun satu to mule dad walad dnagit grép di tanaan, na nlabatan. Na makol kenen sol di bong batu du gumisà bunge grép. Na fdakan satu too mdatah gumnè du gumunung dad fulen. Na kafnge én, fagotan dad fulen di dademe to, du salu kenen di satu banwe.  
\v 2 Na di bang ktaga dad bungen, nun dekan satu saligan salu di dad to magot dun, du fwean kenen alel.  
\v 3 Kabay i dad to fagotan dun, balingla kanfè saligan na bnunalla, na dekla kenen mulê, bay landè febela kenen. 
\p  
\v 4 “Na lêmanan dek satu saligan salu ditù, na sneeyla i ulun na toola fa fyà.  
\v 5 Na lêmanan dek satu, bay fnatila sa. Na dee fa dad to dek i mfun tanà, bay bnunalla dademe na fnatila dademe. 
\p  
\v 6 “Én alò i laan fa fsalu ditù i tingaan lagi toon kando, bay di sangalan, dekan di dale i tingaan, du manan, ‘Là fakay ku làla nafè tingàgu.’ 
\p  
\v 7 “Kabay kitela kenen, baling ale stulen, manla, ‘Ani sa tingà i mfun i fule. Kenen i mfun kadang, taman snitongito kenen na fnatiito, du fye di kfati maan gito gamfun i fule.’  
\v 8 Na taman kanfèla, na fnatila, na batla di lwà gumule i maan.” 
\p  
\v 9 Na smalek Dyisas manan, “Tan dé kibò i mfun fule i dad to gufagotan dun? Én nimoan, salu ditù na fnatin kdeela, na fagotan di dademe dad to.  
\v 10 Làyu kè gbasa i gman Dwata di Tnaluan? Manan, 
\q1 ‘I batu knang i dad to fdak i gumnè batu, 
\q2 du di dale fandam landè kamu dun, 
\q2 én baling i batu too mabtas di kdee. 
\q1  
\v 11 Hae, ani mgimò Amuito Dwata, 
\q2 na di kitemi, too gamtikeng i nimoan.’ ” 
\p  
\v 12 Di kaklinge i dad gal mebe dad Dyu i fléd Dyisas, glabatla ale gugtadè i manan, taman mngabal ale kfagu kamfè kenen, bay làla mgimò dun du likò ale i dad to. Taman tnagakla Dyisas déén, na mdà. 
\s1 I salek gablà di bayad buhis 
\r (Matyu 22:15-22; Luk 20:20-26) 
\p  
\v 13 Na dekla dademe dad Farisi na dademe dad Dyu msen di ku Harì Hérod di ku Dyisas, du kayèla mawel kenen fagu di dad ksalek.  
\v 14 Na salu ale di ku Dyisas, na manla di kenen, “To Tamdò, gadèmi ge satu to là tmulen kéng. Tamdò ge i kaglut gablà di knayè Dwata, du laam fkah di nawam i man dad to gablà di ge, na là mabtas di ge ku tan glalla. Taman nun snalekmi ge. Fakay dé di flalò blé Dwata fagu di ku Mosis ku mlé gami bayad buhis di ku Sisar, gumdatah di banwe Roma?  
\v 15 Nun kaglutmi mayad dun ku demen landè?” 
\p Kabay gadè Dyisas alò flingu mimò fye i dad to ani, na kayèla kamfè kenen, taman snalekan ale, “Kan ku tilewyu agu fnawel? Nebeyu deg satu filak galyu bayad buhis du neyegu.” 
\p  
\v 16 Na nebela di kenen satu filak. Na snalekan ale, manan, “Simto kè baweh na dagit i gkah di filak ani?” 
\p Na manla, “Ku Sisar.” 
\p  
\v 17 Na man Dyisas di dale, “Na ku tan nfun Sisar bléyu ku Sisar, na ku tan nfun Dwata bléyu di Dwata.” 
\p Na too ale tikeng di timelan. 
\s1 I salek gablà di kték mdà di fati 
\r (Matyu 22:23-33; Luk 20:27-40) 
\p  
\v 18 Na nun dad Sadusi salu di ku Dyisas, dunan dad Dyu i gal mangman kun, là mték dad to mdà di fati. Na ani snalekla di kenen,  
\v 19 manla, “To Tamdò, nun sulat Mosis di gito di muna gman, ku mati satu lagi, bay landè tingàla yaanan, là fakay ku là nwè i flanekan lagi i libun balu én, du fye nun bel i tamati fagu di kenen.  
\v 20 Na di muna kun, nun fitu lagi saflanek. Na mwè yaan i twege, bay mati na landè tingàla.  
\v 21 Di kfatin, nwè i twalin tmadol kenen i yaanan, bay lêman mati flanekan, na landè tingàla. Na salngad kagkah di gatlun,  
\v 22 kel di sangal twali, i fitu saflanek, kdeela mati landè tingàla di libun ani. Na i sangalan mati libun.  
\v 23 Na ani snalekmi, kadang di kték i dad mati, simto di fitu saflanek i yaanan du kdeela mwè kenen.” 
\p  
\v 24 Na tmimel Dyisas, manan, “Gsalà fandamyu, na i duenan du làyu gadè i Tnalù Dwata, na làyu gadè kgal tulus Dwata.  
\v 25 Du di kték i dad to mati, talandè swè yaan lagi ku demen libun, du én kagkahla salngad dad kasaligan Dwata di langit.  
\v 26 Na gablà di fnaglutyu i là mték dad to mati, làyu kè lmen masa i gsulat Mosis gablà di kayu dminè du ditù gugsulat i gman Dwata di ku Mosis, manan, ‘Agu i Dwata fnangamfù Abraham, Isaak, na Dyékob.’  
\v 27 I gman Dwata ani satu gugmadeito balù tamati ale Abraham mto ale lêman, du Dwata i Dwata fnangamfù i dad to mto, ise dad to mati. Taman too bong kagsalàyu ku man nawayu landè dad to mték mdà di fati.” 
\s1 I too mdatah flalò Dwata 
\r (Matyu 22:34-40; Luk 10:25-28) 
\p  
\v 28 Na nun satu to tamdò flalò blé Dwata fagu di ku Mosis salu déén na lingen i kastulenla, na gadean too fye timel Dyisas dale, taman snalekan kenen, manan, “Tan too mdatah flalò di kdee flalò Dwata?” 
\p  
\v 29 Na tmimel Dyisas, manan, “I too mdatah flalò Dwata, dunan ani, ‘Flinge gamu kdeeyu dad bel Israél. I Amuito Dwata alò, i too glut Dwata, landè dademe.  
\v 30 Taman tooyu kando Amuyu Dwata mdà di nawayu, na di kdee knayèyu, na di kdee fandamyu, na di kdee galyu.’  
\v 31 Na i gamtadol too mdatah flalò dunan ani, ‘Tooyu kando i demeyu to salngad kakdoyu i ktoyu.’ Na landè dademe flalò mdatah fa di lwe ani.” 
\p  
\v 32 Kaklinge i to tamdò flalò Dwata i man Dyisas ani, manan, “Too glut manam, To Tamdò, én Dwataito alò i too glut Dwata na landè dademe Dwata galwà di kenen.  
\v 33 Na ku tooito kando kenen mdà di nawaito, na mdà di kdee kaglabatito, na mdà di gusen galito, na ku kandoito demeito to salngad kalbong kakdoito ktoito, mdatah kimenito lwe flalò ani, di kdee dad lmanaf snakufito du dsù di Dwata na kdee dademe gabléito di kenen.” 
\p  
\v 34 Di kaklinge Dyisas timelan, gadean too nun kaglabatan, taman manan di kenen, “Là ge mawag di kagot Dwata.” 
\p Na mdà di timelan, landè to gamlas smalek kenen du gadèla landè kibòla matu. 
\s1 I salek gablà di To Mgalék Dwata 
\r (Matyu 22:41-46; Luk 20:41-44) 
\p  
\v 35 Na kafnge én, di sleng Dyisas tamdò di Bong Gumnè Dwata smalek kenen, manan, “I dad tamdò flalò blé Dwata, tan duenla man Krayst, i Mgalék Dwata, dunan alò bel Harì Dabid?  
\v 36 Balù Harì Dabid fagu di kalak Mtiu Tulus, tlon i To Mgalék Dwata, Amu, manan, 
\q1 ‘Man i Amuito Dwata di Amugu, 
\q2 fagotgu ge i kdee, 
\q2 taman sudeng ge dini gsen di kwanangu, 
\q1 kel di kagfisangu dad mnang nawa ge, 
\q2 na kafkahgu dale di dungan falel bliam.’ 
\m  
\v 37 Ku i katlo Dabid ku Krayst, ‘Amu’, kan ku én katloyu kenen bel Dabid?” 
\p Na too lehew i dee dad to stifun di kenen flinge tdoan. 
\s1 I kafngewe gablà di nimò dad to gal tamdò i flalò blé Dwata 
\r (Matyu 23:1-36; Luk 20:45-47) 
\p  
\v 38 Na di katdò Dyisas, manan, “Tooyu fgeye fye làyu lalò i nimò dad to gal tamdò flalò blé Dwata fagu di ku Mosis. Lamsak ale i too fye tahà klaweh ku magu ale, du kayèla ku too ale nafè dad to di fadyan.  
\v 39 Na kayèla too fye gusudeng di dad gal gusatdoito, na dad gusudeng dad mdatah to di fista.  
\v 40 Blaam, ale dad to mlangong i dad to balu du fye gwèla dad knunla, na fantahàla dasalla du fye là dilè dad to i ksasèla. Taman falbong Dwata i flayamla di fulé duh.” 
\s1 I kablé gafye nawa Dwata 
\r (Luk 21:1-4) 
\p  
\v 41 Na satu duh sudeng Dyisas déén di Bong Gumnè Dwata mdadong di gumkah i filak blé di Dwata, du neyen dee dad to ftatek bléla di Dwata di lam gumkah én. Nun dee dad to nun bong knun ftatek bong filak.  
\v 42 Kabay nun kel satu libun balu landè knun ftatek alò lwe malnak filak. 
\p  
\v 43 Na tlo Dyisas dad gal mlalò kenen di safédan, na manan, “Tulengu gamu kaglutan, landè gumwè balu ani, bay kenen kablé bong fa di kablé i kdee dad to gine mlé bong filak,  
\v 44 du di kablé i dademe gine, alòla blé lukas i bong knunla, bay libun balu ani, balù landè gumwean kliduan, knean blén i kdee knunan.” 
\c 13  
\s1 I kalmo Bong Gumnè Dwata 
\r (Matyu 24:1-2; Luk 21:5-6) 
\p  
\v 1 Di kalwà Dyisas mdà di Bong Gumnè Dwata nun satu gal mlalò kenen talù, manan, “To Tamdò, neyem Bong Gumnè Dwata. Tay, kalbong dad batu didingan! Too fye kdee gumnean!” 
\p  
\v 2 Na tmimel Dyisas, manan, “Hae, neyem kalbong dad gumnean, bay nun duh kadang malbà, na landè batu gtagak di tagnè gugkahan du sdulê malbà kdeela.” 
\s1 I dad samuk na dad kaflayam 
\r (Matyu 24:3-14; Luk 21:7-19) 
\p  
\v 3 Na fles Dyisas di bulul dnagit Olib, na sudeng kenen di sdifal Bong Gumnè Dwata. Na fdadong Fiter, Dyém, Dyan, na Andru di alò ale déén, na smalek,  
\v 4 manla, “Tulenam gami ku kilen kagdohò i manam gine, na tan ilè gugmadèmi i bang kakel ani.” 
\p  
\v 5 Mdà ani tambù Dyisas tamdò dale gablà di fan kel, manan, “Too gamu fgeye du fye là gamu mgebe dad to tamdò kakakéng,  
\v 6 du dee dad to kel kadang mebe dagitgu, na manla, ‘Agu sa Krayst, i Mgalék Dwata.’ Na too dee dad to kadang mafgaw mdà di manla. 
\p  
\v 7 “Na lingeyu kadang nun dad kasfati mdadong di gamu na dad santulen gablà di dad kasfati di dademe dad banwe, bay nang gamu likò, du glut muna kel kdee ani, bay ise ku én gusen i banwe.  
\v 8 Hae, du sfati kadang dad sahal to na dad sahal banwe. Na mkel dad malbang linol di dademe dad banwe na kbitil. Kabay kdee ani alò katbù dad kaflayam, salngad di kagkah libun maltien ku lyon lbanad tienan, bay là fa kel i too katdukan. 
\p  
\v 9 “Kabay too gamu fafye, du kanfè gamu dad to, du nebela gamu di muna dad ganlal gal mukum, na bnunalla gamu di lam galla gusatdò. Na ftadagla gamu di muna dad harìla na dademe dad ganlal du mdà di klalòyu deg. Kabay én dalanyu samtulen di dale kdee gadèyu gablà di deg,  
\v 10 du silang kel i gusen i banwe ku tagatdò i Fye Tulen di kdee bung to di tah tanà.  
\v 11 Na di kakfèla na kebela gamu di usay du nukumla gamu, nangyu fsamuk nawayu ku tan fye timelyu dale, bay manyu i fgadè Dwata di gamu di ktadagyu déén, du ise ku mdà di gamu fandam i dad manyu, bay mdà di Mtiu Tulus. 
\p  
\v 12 “Na di bang én kadang, én nimò i dademe to bléla di fati balù dad flanekla, na dad mà bléla i dad ngàla. Na dademe dad ngà dnuenla dad tuala na fafatila.  
\v 13 Na knang gamu nawa kdee dad to du gamu dad togu. Kabay ku simto gamtayud kel di gusenan, galwà kenen.” 
\s1 I too gamlikò di Bong Gumnè Dwata 
\r (Matyu 24:15-28; Luk 21:20-24) 
\p  
\v 14 “Na teenyu kadang i too gamlikò gal falmo tadag déén di Gumnè Dwata, i là fakay gumnean. (Gamu masa ani tooyu fandam du fye glabatyu.) Na ku teenyu i too gamlikò én, ku déén gamu di Dyudiya mila gamu di dad bulul.  
\v 15 Na ku nun to déén di lwà nang kenen fusuk di gumnean du mwè balù tan.  
\v 16 Na salngad i to mimò di nligon, nang nan mulê funa du mwè klawehan.  
\v 17 Di bang én kadang too magakdo dad libun maltien na dad to nun malnak ngà tmutù.  
\v 18 Taman too gamu dmasal du fye là kel ani di bang ksasè tanà.  
\v 19 Hae, du balù tan ksasè i dad kaflayam mkel mdà di kimò Dwata i banwe kel di duh ani, na balù kel di landè gusenan, landè gasngad i ksasè ani. 
\p  
\v 20 “Kabay fanfukal Dwata klo i bong kaflayam ani, du ku là, landè to gtagak mto. I duenan fanfukal i bang ani du too bong nawan dad to tamgalékan.” 
\p  
\v 21 “Di bang én ku nun to mangman di gamu, ‘Neyem, dini Krayst, i Mgalék Dwata!’ ku demen manan, ‘Neyeyu ditù kenen!’ nang gamu faglut,  
\v 22 du di bang én, dee to msut flingu na ale kun, Krayst, i Mgalék Dwata. Na man dademe, ale kun, tugad Dwata, bay ise. Na mimò ale dad bong tnikeng na dad ilè ktulusla, du ku nun kibòla kayèla ku mafgaw kdee to, balù dad to mgalék Dwata.  
\v 23 Taman too gamu fafye, du tafalagu nan tulen di gamu kdee ani di lamla là fa kel.” 
\s1 I kagkah i langit di kasfulê Dyisas 
\r (Matyu 24:29-31; Luk 21:25-28) 
\p  
\v 24 Na man fa Dyisas, “Na di dad duh kafnge i dad kaflayam atù, 
\q1 ‘mbaling kifu i duh, 
\q2 na là nan mneng i bulen. 
\q1  
\v 25 Na tatek dad blatik mdà di langit, 
\q2 na gasyat kdee mnè di langit di tagnè dalanla.’ 
\p  
\v 26 “Kafnge én, teenla agu, i dnagit Tingà To, di lam labun di ksalugu dini magin i bong eneg na kneng mdà di kdatahgu.  
\v 27 Kafnge én, dekgu dad kasaligan Dwata di kdee suluk i banwe du santifunla kdee dad to mgalék Dwata mdà di kdee banwe dini di tah tanà.” 
\s1 I fléd gablà di dad ilè kasfulê Dyisas 
\r (Matyu 24:32-44; Luk 21:29-33) 
\p  
\v 28 Na nun fléd Dyisas, manan, “Satu gugmadèyu kagkah i tanà di kayu fig. Ku tmubad na tambù dmoon gadèyu too mdadong nan bang kafye tanà.  
\v 29 Na salngad én, ku tateenyu takel dad ilè mangu gamu gine, gadèyu tamdadong nan kasfulêgu, salngad ku tatadag agu di bà takab.  
\v 30 Tulengu gamu kaglutan, kel kadang kdee ani di là fa mati kdee dad to di bang ani.  
\v 31 Matlas i langit na tanà, bay là matlas i tnalùgu kel di landè sen. 
\p  
\v 32 “Kabay landè to gmadè i duh ku demen i too bang kasfulêgu, balù dad kasaligan Dwata di langit ku demen deg, i Tingà Dwata, du alò Mà gmadè dun.  
\v 33 Taman too gamu fgeye, na fatlagadyu ktoyu, du làyu gadè ku kilen kakel i duh ani.  
\v 34 I guflingengu dun di satu to magu di mawag banwe. Di laan fa mdà funan fagot dad saligan i gumnean, na nun fimoan kat to. Na manan di to gal munung di bà takab, ‘Too ge fgeye.’  
\v 35 Taman too gamu fgeye salngad dad salig gine, du làyu gadè ku kilen kasfulêgu, i mfun i gumnè, ku flabi, demen tngà butang, demen takamleet i anuk, ku demen di ksut i duh. Taman too gamu fgeye,  
\v 36 ken kantogu kel là gamu tamwan, na baling gamu gkudang na là gatlagad.  
\v 37 I mangu gamu ani, mangu di kdee dad to, ‘Too gamu fgeye.’ ” 
\c 14  
\s1 I fan nimò dad ulu i dad Dyu di ku Dyisas 
\r (Matyu 26:1-5; Luk 22:1-2; Dyan 11:45-53) 
\p  
\v 1 Na taalò lwe butang i gdè klo Duh Kaglius na Fista Kakaan i Fan Landè Falnok Dun. Na dad ulu dad bà di Dwata na dad tamdò i flalò blé Dwata fagu di ku Mosis, mngabal ale kfagu kamfè ku Dyisas di landè to gmadè dun, du fye fnatila,  
\v 2 du manla, “Nangito nimò ani di bang i fista du ken flabè i dee dad to na too ale smamuk.” 
\s1 I kakok satu libun i fangbun di ulu Dyisas 
\r (Matyu 26:6-13; Dyan 12:1-8) 
\p  
\v 3 Na déén Dyisas di banwe Bétani di gumnè Simon, i to tanfig di munan. Na di slengla kmaan nun satu libun kel déén mebe sabuy batu fnò fangbun. Na too mabtas i laman, du mdà di nardo alò, landè bolan. Na tningkuan lial i sabuy du kokan fangbun di ulu Dyisas. 
\p  
\v 4 Na kite dademe to i nimoan, flabè ale na stulen, manla, “Kan ku falmon i fangbun?  
\v 5 Fye fa ku fablin, du bong gwean, mlukas tlu latu denari,\f + \fr 14:5 \ft I denari, dunan satu bung filak di banwe Israél di bang i santulen ani. I taden di sduh dunan satu denari, taman i fangbun kok libun ani too mabtas du i btasan mdadong di taden satu to di sfali.\f* na fakay blé di dad to landè.” 
\p  
\v 6 Kabay man Dyisas di dale, “Bayàyu kenen. Fye ku gnamitan di duh kalbang deg.  
\v 7 Gal nun dad to landè di safédyu fakayyu tnabeng balù tan bang kayèyu, bay deg, là agu mlo mnè di safédyu.  
\v 8 I nimò libun ani, i sen gaganan nimò. Di kakokan i fangbun gine di deg, falan fatlagad lawehgu du lbang.  
\v 9 Tulengu gamu i kaglutan, balù nè gutamdò i Fye Tulen gablà di deg di tah tanà, lê tulen nimò libun ani du fye gafaldam kenen.” 
\s1 I kafakfè Dyudas ku Dyisas 
\r (Matyu 26:14-16; Luk 22:3-6) 
\p  
\v 10 Kafnge én, Dyudas Iskariyot, satu di sfalò lwe gal mlalò ku Dyisas, salu di dad ulu dad bà di Dwata, du stulen ku tan kiboan mangkal ku Dyisas fye kanfèla kenen.  
\v 11 Di kaklingela dun, too ale lehew, na makang ale mlé filak di ku Dyudas. Taman mngabal kenen kfagu mlé ku Dyisas di agotla. 
\s1 I sangal kakaan Dyisas deme i dad gal mlalò kenen 
\r (Matyu 26:17-25; Luk 22:7-14, 21-23; Dyan 13:21-30) 
\p  
\v 12 Na di tnanin duh Fista Kakaan i Fan Landè Falnok Dun, i duh ktatêla i tingà bilibili galla uten kifu di Duh Kaglius, smalek dad gal mlalò ku Dyisas di kenen, manla, “Nè kayeam gusalumi gufatlagad knaan i Duh Kaglius?” 
\p  
\v 13 Taman dek Dyisas lwe di dad to gal mlalò kenen, manan, “Salu gamu di syudad, na nun lagi gsitongyu déén mebe namu yéél. Lalòyu kenen.  
\v 14 Na di gumnè gumyakan, manyu di mfun i gumnè, ‘Nun snalek i To Tamdò ku tanè sibay fakay gukmaanan di flabi Duh Kaglius deme dad gal mlalò kenen?’  
\v 15 Na tdoan gamu kadang satu bong sibay di tah, na kdee klidù slame déén. Na déén gufatlagadyu kakaanito.” 
\p  
\v 16 Na mdà lwe dekan salu di syudad, na kdee manan gdohò. Na fnatlagadla knaan i Duh Kaglius. 
\p  
\v 17 Na di butang én, takel Dyisas na dad sfalò lwe gal mlalò kenen.  
\v 18 Na di slengla kmaan, man Dyisas, “Tulengu gamu i kaglut, nun kadang satu di gamu, demeito kmaan ani, mangkal deg di fati.” 
\p  
\v 19 Di kaklingela dun, too ale mlidù, na kat satu dale smalek kenen, manla, “Agu kè i manam?” 
\p  
\v 20 Na man Dyisas, “I to mimò dun kadang satu di gamu dad sfalò lwe gal mlalò deg. I demegu lamnab fan di tukung ani, én mangkal deg.  
\v 21 Too glut, agu i dnagit Tingà To, gsalu di fati salngad tagsulat gablà di deg. Kabay too magakdo kadang i to mangkal deg. Fye fa baling di to én ku laan sut.” 
\s1 I kfafaldam Dyisas kfatin fagu di fan na ninum 
\r (Matyu 26:26-30; Luk 22:15-20; 1 Korintu 11:23-25) 
\p  
\v 22 Di slengla kmaan, nwè Dyisas fan na funa dmasal mlé fye di Dwata, na snatngaan, na blén di dad gal mlalò kenen, manan, “Nwèyu ani, du ani lawehgu.” 
\p  
\v 23 Kafnge én, nwean i ninum, na mlé fye di Dwata, na blén di dale. Na kdeela minum. 
\p  
\v 24 Na man Dyisas di dale, “Ani litègu falohgu du fye galwà dee dad to di salàla, du litègu i kaglut di falami dalan\f + \fr 14:24 \ft Satu kubad i talù ani dunan: i falami kasfakang\f* fakang Dwata.  
\v 25 Na tulengu gamu i kaglutan, là agu lêman minum i ninum\f + \fr 14:25 \ft I ninum ani satu binu nimò mdà di yéél i bunge grép. \f* ani kel di duh kinumgu i falami binu di kagot Dwata.” 
\p  
\v 26 Kafnge én, mlingag ale dmayen Dwata, na kafngela mlingag mdà ale salu di bulul Olib. 
\s1 I kafgadè Dyisas gablà di ktagak dad gal mlalò kenen 
\r (Matyu 26:31-35; Luk 22:31-34; Dyan 13:36-38) 
\p  
\v 27 Na talù Dyisas di dad gal mlalò kenen, manan, “Kadang ani, kdeeyu baling tmagak deg, du man Dwata di Tnaluan, manan, 
\q1 ‘Fnatigu i to mifat dad bilibili, 
\q2 na sbalét dad bilibilin.’ 
\m  
\v 28 Kabay ku tamték agu mdà di fati, muna agu di gamu salu di Galili.” 
\p  
\v 29 Na man Fiter di ku Dyisas, “Balù i kdee dademe tmagak ge, bay làta ge tagak.” 
\p  
\v 30 Na man Dyisas di kenen, “Tulengu ge i kaglutan, kadang butang ani, di là fa kamleet i anuk lwe dulê, tmulen ge tlu dulê i laam agu dilè.” 
\p  
\v 31 Kabay too makto talù Fiter, manan, “Balù mati agu magin ge, làgu tmulen kéng i là agu dmilè ge.” Na salngad man kdee dad gal mlalò ku Dyisas. 
\s1 I kdasal Dyisas déén di Gétsémani 
\r (Matyu 26:36-46; Luk 22:39-46) 
\p  
\v 32 Na fadlug ale Dyisas salu di satu tanà dnagit Gétsémani. Na manan di dad gal mlalò kenen, “Sudeng gamu dini di lamgu dmasal.” 
\p  
\v 33 Na faginan Fiter, Dyém, na Dyan. Na tambù én, too mlidù na too msamuk nawan.  
\v 34 Na manan di tlu magin kenen, “I klidù nawagu ani too blat gambet tafan agu mati. Mnè gamu dini, na too gamu fgeye dmeme deg.” 
\p  
\v 35 Na salu kenen di là too mawag, na tatì kenen lamfan di tanà du dmasal, du fnin ku fakay galwà kenen di kaflayam fan kel.  
\v 36 Na manan, “E Mà, gadègu landè laam gagan nimò. Taman begam nwè i kaflayam fangu gnagu ani. Kabay balù én deg knayè, toom dnohò i ge knayè.” 
\p  
\v 37 Kafngen dmasal, samfulê kenen di tlu gal mlalò kenen faginan gine, na teenan ale kudang. Na snalekan Fiter, manan, “Simon, takudang ge kadì? Là ge kè gamtayud fgeye balù là mlo alò?  
\v 38 Too gamu fgeye na dmasal fye là gamu fisan di tilew, du balù mayè i nawayu mimò fye, bay nun klungay i lawehyu mimò dun.” 
\p  
\v 39 Na lêman samfulê Dyisas di gudmasalan, na salngad i dasalan gine.  
\v 40 Na lêman kenen samfulê na lêmanan ale teen gkudang du too ale malkudang, na làla gadè ku tan i fye timella kenen. 
\p  
\v 41 Na samfulê Dyisas di safédla di gatlun dulê, na manan di dale, “Tan, kudang gamu fa na ftud? Tongyu nan. Takel i bang kablé deg, i dnagit Tingà To, di agot dad to gamsalà.  
\v 42 Mték gamu nan du mdà ito. Neyeyu, dini nan i to mangkal deg.” 
\s1 I kakfè ku Dyisas 
\r (Matyu 26:47-56; Luk 22:47-53; Dyan 18:3-12) 
\p  
\v 43 Di laman fa talù takel Dyudas, satu di sfalò lwe gal mlalò kenen. Na too dee dad to magin kenen mebe dad sundang na dad bunal. Dek ale i dad ulu dad bà di Dwata na dad tamdò i flalò blé Dwata fagu di ku Mosis, na dad tua gal mebe dad Dyu. 
\p  
\v 44 Na nun ilè tatulen i to mangkal di dad to faginan kamfè ku Dyisas, manan, “I to nalakgu kadang, én to fanngabalyu. Kanfèyu kenen, bay tooyu fangeye kebeyu kenen ditù.”  
\v 45 Taman kakel ale Dyudas déén, gasil kenen fdadong di ku Dyisas, na manan, “E Amu!” Na nalakan Dyisas.  
\v 46 Na kafnge én, gasilla kanfè Dyisas, na toola nafas.  
\v 47 Kabay satu to tadag mdadong déén nsoan i sundangan, na tniben lifan i gumdatah dad bà di Dwata, na masfek i bali klingen. 
\p  
\v 48 Na man Dyisas di dad to kamfè kenen, “Kan, to tmaku agu kè du mebe gamu sundang na bunal di kakfèyu deg?  
\v 49 Klit duh déén agu di safédyu di Bong Gumnè Dwata du tamdò, na làyu agu kanfè. Kabay là fakay ku là gdohò i gman di Tnalù Dwata.” 
\p  
\v 50 Na di kman Dyisas ani, kdee dad gal mlalò kenen, tnagakla kenen na mila. 
\p  
\v 51 Kabay nun satu lamnok lagi mlalò ku Dyisas, én alò lsakan i safut kalomboyan. Na fanla kenen kanfè,  
\v 52 bay gagotla i safut kalomboyan, taman tagakan na mila flaweh. 
\s1 I kebela ku Dyisas di muna i mdatah mukum dad Dyu 
\r (Matyu 26:57-68; Luk 22:54-55, 63-67; Dyan 18:13-14, 19-24) 
\p  
\v 53 Na nebela Dyisas salu di gumnè i gumdatah di dad bà di Dwata. Na stifun déén dad to mukum dad Dyu, dunan dad bà di Dwata na dad tua gal mebe i dad Dyu na dad tamdò i flalò blé Dwata fagu di ku Mosis. 
\p  
\v 54 Na mlalò Fiter kel di nasel i bong gumnè gumdatah i dad bà di Dwata, bay fawag di fulé. Kakelan déén fasbool kenen sudeng di saféd dad to munung du mnalang di lifoh. 
\p  
\v 55 Na dad ulu di dad bà di Dwata na i dademe ganlal gal mukum tastifun déén, mngabal ale kfagu fsalà ku Dyisas, balù là glut, gumdàla mati kenen. Kabay landè teenla salà di kenen.  
\v 56 Na too dee dad to tmulen kakakéng gablà kenen, bay là maslalò i manla. 
\p  
\v 57 Na nun dademe tadag déén na mlé kenen salà bay kakakéng,  
\v 58 du manla, “Ani lingemi, manan, ‘Lanbàgu i Bong Gumnè Dwata nimò i dad to, bay di tlu duh lêmangu ftadag satu ise to mimò dun.’ ”  
\v 59 Kabay balù dad to ani, là maslalò dad manla. 
\p  
\v 60 Kafnge én, tadag i gumdatah i dad bà di Dwata di muna i dad to, na snalekan Dyisas, manan, “Landè kè timelam di kdee tulenla salaam ani?”  
\v 61 Kabay là tmimel Dyisas, tatì fanak. 
\p Taman lêman smalek i gumdatah dad bà di Dwata di kenen, manan, “Ge kè Mgalék Dwata, i Tingà Too Magdayen?” 
\p  
\v 62 Na man Dyisas, “Agu sa dunan. Na teenyu agu kadang, i dnagit Tingà To, sudeng di kwanan i mdatah ganlal, dunan Dwata Too Mtulus, di ksalugu dini di lam labun mdà di langit.” 
\p  
\v 63 Na di kaklinge i gumdatah dad bà di Dwata i gman Dyisas ani, knaséan i klawehan du ilè knangan i man Dyisas, na manan, “Landè kamuito dademe to mlé kenen salà,  
\v 64 du talingeyu i kafalmon Dwata. I tan sa kukumyu kenen?” 
\p Na man i kdeela, gablà kenen fnati.  
\v 65 Na tambù dademe déén dmulà kenen. Na snafangla bawehan klola smamfak kenen, na manla, “Manam sa kun ku simto smamfak ge?” Na tmufì dad munung smamfak kenen. 
\s1 I kbalew Fiter 
\r (Matyu 26:69-75; Luk 22:56-62; Dyan 18:15-18, 25-27) 
\p  
\v 66 Na Fiter ditù fa di dungan di nasel i gumnè, na mlius satu libun gal dek i gumdatah i dad bà di Dwata.  
\v 67 Na di kiten ku Fiter mnalang di lifoh toon kenen fanunu, na manan, “Ge lê satu gal magin ku Dyisas mdà di Nasarét.” 
\p  
\v 68 Kabay baling malew Fiter, manan, “Làgu gadè i manam. Làgu glabat dun.” Mdà én mili Fiter di bà gufusuk i nasel. Na nun anuk kamleet. 
\p  
\v 69 Na lêman teen i libun Fiter. Na lêmanan man di dad to tadag déén, “To ani satu gal magin ku Dyisas.”  
\v 70 Kabay lêman malew Fiter. 
\p Na là mlo nun dademe dad to tadag déén mangman, “Too glut sa, ge satu di dale du dilèmi mdà ge sa di Galili.” 
\p  
\v 71 Kabay tambù kenen baling smafà, manan, “Fanlayam agu Dwata ku tmulen agu kéng. Làgu dilè i to manyu én.” 
\p  
\v 72 Na di kmanan én, lêman kamleet i anuk, na gafaldam Fiter i gman Dyisas di kenen, “Di là fa kamleet i anuk lwe dulê tatmulen ge tlu dulê na laam agu dilè.” Na malbà i nawan na too kenen mngel. 
\c 15  
\s1 I kebela ku Dyisas di muna Filat 
\r (Matyu 27:1-2, 11-14; Luk 23:1-5; Dyan 18:28-38) 
\p  
\v 1 Na di kakwalan nan, lêman stifun na stulen kdee dad ganlal dad Dyu, dunan dad ulu dad bà di Dwata, na dad tamdò flalò blé Dwata fagu di ku Mosis, na dad tua gal mebe i dad Dyu. Na én nimòla, fbakusla Dyisas, na nebela di ku Filat, i gubirnador, du fukumla kenen. 
\p  
\v 2 Na snalek Filat kenen manan, “Ge kè Harì i dad Dyu?” 
\p Na tmimel Dyisas, manan, “Tagmanam sa.” 
\p  
\v 3 Na dad ulu dad bà di Dwata tatoo dee salà dalamla kenen.  
\v 4 Taman lêman snalek Filat kenen, “Landè kè timelam dale? Tay, neyem dee salà i dalamla ge.” 
\p  
\v 5 Kabay talà tmimel Dyisas, taman too tikeng Filat. 
\s1 I kafalwà ku Barabas na kfati ku Dyisas 
\r (Matyu 27:15-26; Luk 23:13-25; Dyan 18:39–19:16) 
\p  
\v 6 Na klit fali di bang fista Duh Kaglius, i tagnè nimò Filat falwaan satu to bnilanggù, ku simto fni dad Dyu, én falwaan.  
\v 7 Na di bang én, nun satu to dnagit Barabas gakuf di dad to bnilanggù du sanfatila dad to magot i banwela. Na di kasfatila, nun to bnanòla. 
\p  
\v 8 Na di duh fista ani, dee dad Dyu salu di ku Filat na tambù mni ku falwaan satu to di bilanggù gambet i tagnean nimò.  
\v 9 Taman snalek ale Filat, manan, “Mayè gamu kè ku falwàgu di gamu i Harì dad Dyu?”  
\v 10 Én duenan smalek, du gadè Filat i duen dad ulu dad bà di Dwata mebe ku Dyisas di kenen du mingà nawala ku Dyisas. 
\p  
\v 11 Kabay én nimò dad ulu dad bà di Dwata, banlétla dad to stifun déén fafalwà baling Barabas.  
\v 12 Taman lêman ale snalek Filat, manan, “Na tan kibògu i to dnagityu Harì dad Dyu?” 
\p  
\v 13 Na mkit ale, manla, “Flansangam di krus!” 
\p  
\v 14 Kabay man Filat, “Kan? Tan salaan?” 
\p Kabay baling matnù kakitla, manla, “Flansangam kenen di krus!” 
\p  
\v 15 Taman nagin Filat knayè i dad to, na falwaan Barabas. Kabay Dyisas, funan too faskél, na kafnge én, blén di dad sundalun du flansang di krus. 
\s1 I kadoy dad sundalu ku Dyisas 
\r (Matyu 27:27-31; Dyan 19:2-3) 
\p  
\v 16 Na dad sundalu, nebela Dyisas di lam nasel i bong gumnè Gubirnador Filat, na santifunla dademela dad sundalu.  
\v 17 Na falsakla kenen klaweh fulè du fagbetla kenen i harì. Na nlikinla dad walad nun sual, na sukubla di ulun du nimòla kyangenan.  
\v 18 Na kafnge én, flingu ale mafè kenen, manla, “Too ge mlawil Harì i dad Dyu!”  
\v 19 Na bnunalla ulun i tugad, na sandulàla, na lkuad ale du flingu mangamfù di kenen.  
\v 20 Di kafngela smilo kenen, lêmanla nlus i klaweh fulè, na falsakla lêman i tagnè klawehan. Na kafnge én, nebela kenen di lwà di gumlansangla kenen di krus. 
\s1 I klansang ku Dyisas di krus 
\r (Matyu 27:32-44; Luk 23:26-43; Dyan 19:17-27) 
\p  
\v 21 Na di kebela ku Dyisas ditù, gsitongla satu lagi mdà di banwe Sirini dnagit ku Simon mà Alihandro na Rufus. Fdu kenen di lagad. Na nlegesla kenen mebe i krus Dyisas. 
\p  
\v 22 Na nebela kenen di tukay bulul dnagit Golgota. Na gumtatek Golgota, dunan banwe tulan ulu.  
\v 23 Kakella ditù banléla kenen binu sanbool bulung dnagit mira, bay laan fles ninum.  
\v 24 Na nlansangla kenen di krus, na sansalella i klawehan fagu di kasbunut du neyela ku tan gwè kat satu dale. 
\p  
\v 25 Na tatngà mnagad i duh klansangla ku Dyisas di krus.  
\v 26 Na nun gsulatla tmulen i salà dalamla kenen fkahla di krusan, manan, “I Harì dad Dyu.” 
\p  
\v 27 Na nun lwe to tmaku nlansangla di saféd Dyisas, satu gsen di kwananan na satu gsen di ibengan.  
\v 28 Na i kibòla kenen ani, tagdohò i gman di Tnalù Dwata, manan, “Fakufla kenen di dad to gamsalà.” 
\p  
\v 29 Na i dad to magu mlius déén toola snilo Dyisas na kmiling ale du fanngulêla kenen. Na manla, “Ge kun, i to gmagan lambà Bong Gumnè Dwata, na lêman ftadag dun di tlu duh,  
\v 30 taman falwaam i ktom ku gaganam, na tufa ge mdà di krus.” 
\p  
\v 31 Na salngad nimò dad ulu di dad bà di Dwata na dad tamdò flalò blé Dwata fagu di ku Mosis, snilola kenen, manla, “Gaganan falwà dademe dad to, bay i kton laan gagan falwà.  
\v 32 Kenen kun, i Harì di Israél! Ku gtufa kenen di krus, faglut ito di kenen.” Na balù dad nlansang di safédan smilo kenen. 
\s1 I kfati ku Dyisas 
\r (Matyu 27:45-56; Luk 23:44-49; Dyan 19:28-30) 
\p  
\v 33 Na mdà di ltu i duh mbaling kifu di klamang banwe kel di tngà masol i duh.  
\v 34 Na di tngà masol i duh falbong Dyisas taluan, manan, “Iloy, Iloy, lama sabaktani?” I gumtatek ani, “E Dwatagu, Dwatagu, tan duenam tmagak deg?” 
\p  
\v 35 Na nun dad to tadag déén mlinge i talù Dyisas, na balingla man, “E tatlon Ilaydya.” 
\p  
\v 36 Na nun satu to déén faflal lamnab i galla fsaf yéél di masam binu, na fkahan di tukè i kayu, na ulukan di ku Dyisas fye ninuman, na manan, “Tayò fa, neyeito funa ku salu dini Ilaydya du mwè kenen mdà di krus.” 
\p  
\v 37 Na falbong Dyisas i taluan na fles mati. 
\p  
\v 38 Na salngan én, i bong kurtina déén di lam Bong Gumnè Dwata matngà kasê mdà di tah kel di dungan.  
\v 39 Na i kafitan i dad sundalu tadag di muna Dyisas mite kiboan mkit na mati, na manan, “Too glut, to ani Tingà Dwata.” 
\p  
\v 40 Na nun fa dad libun mnè di gumawagan, du beg ale meye ku Dyisas. Na gakuf di dad libun ani, Méri Magdalin, na Méri i yê Dyosis na Dyém i dnagitla Twali, na Salomi.  
\v 41 Ani dad libun gal mlalò ku Dyisas di katdoan di Galili na gal tmabeng kenen. Na nun dee dademela libun déén magin kenen di ksalun di Dyérusalém. 
\s1 I kalbang ku Dyisas 
\r (Matyu 27:57-61; Luk 23:50-56; Dyan 19:38-42) 
\p  
\v 42-43 Na i duh kfati Dyisas, én duh kafatlagad dad Dyu i Duh Kaftud. Na di kasdaf i duh én, nun satu to dnagit ku Dyosif mdà di banwe Arimatiya kayean ku gasilan nwè laweh Dyisas du lbang di là fa Duh Kaftud. Na to ani satu di dad ganlal gal mukum dad Dyu, na too kenen mgafè. Na kenen satu Dyu too fatan i kagot Dwata. Na di flabi én, fangalan nawan salu di ku Gubirnador Filat du fni laweh Dyisas.  
\v 44 Na tikeng Filat kaklingen tamati Dyisas, taman fatlon i kafitan i dad sundalu du snalekan ku glut tamati.  
\v 45 Kgadean tamati, na falohan Dyosif mwè i lawehan. 
\p  
\v 46 Taman bnayad Dyosif i safut bukay du nwean laweh Dyisas mdà di krus, na labédan kenen falami safut én, na fkahan di satu gulambang tansol di lfidas di gugdak i bulul. Kafnge én, flulidan déén satu bong batu du nsangan bà gufusuk i lbang.  
\v 47 Na Méri Magdalin na satu Méri, i yê Dyosis, teenla gulambangla ku Dyisas. 
\c 16  
\s1 I kték Dyisas 
\r (Matyu 28:1-8; Luk 24:1-12; Dyan 20:1-10) 
\p  
\v 1 Na di kasdaf i duh di Duh Kaftud, mayad Méri Magdalin na Salomi, na Méri i yê Dyém i fangbun, du fye salu ale ditù du ihokla di laweh Dyisas.  
\v 2 Na di too flafus Linggu di ksut i duh, salu ale di gulambang kenen.  
\v 3 Na slengla magu stulen ale, manla, “Simto kè tmabeng gito flulid i batu sang di bà i lbang.”  
\v 4 Manla ani du too bong i batu. Kabay kagdadongla ditù teenla tamlulid nan i batu. 
\p  
\v 5 Na kagfusukla di lbang teenla satu lagi lamnok sudeng di lam gsen di kwananla. Na i klawehan too bukay. Kitela kenen too ale tikeng,  
\v 6 bay manan di dale, “Nang gamu tikeng. Én fanngabalyu Dyisas mdà di Nasarét, i tanlansangla di krus. Talaan dini du tamték mdà di fati. Neyeyu i gufilèla kenen, talaan déén. 
\p  
\v 7 “Na salu gamu di dad gal mlalò ku Dyisas na Fiter, na tnulenyu ale tamuna kenen di gamu salu di Galili. Ditù gusmiteyu kenen, salngad i tagmanan di gamu di laan fa mati.” 
\p  
\v 8 Na gasil lamwà i dad libun. Na mila ale mdà di lbang. Kankal ale di klikòla na ktikengla. Na landè manla di balù simto, du mdà di klikòla. 
\s1 I kfite Dyisas i kton di ku Méri Magdalin 
\r (Matyu 28:9-10; Dyan 20:11-18) 
\p  
\v 9 Na kafnge Dyisas mték di too flafus Linggu, i tnanin gufiten i kton di ku Méri Magdalin, i libun gufalwaan fitu busaw.  
\v 10 Na Méri, mdà kenen du fye tnulenan i dad gal mlalò ku Dyisas tamték kenen. Di kakelan di dale too ale mlidù fa na mngel.  
\v 11 Kabay kaklingela na tamto sa kenen làla fnaglut dun. 
\s1 I kfite Dyisas i kton di lwe gal mlalò kenen 
\r (Luk 24:13-35) 
\p  
\v 12 Kafnge én, fiten i kton lêman di lwe to gal mlalò kenen di klola magu di dalan mdà di syudad Dyérusalém. Kabay tamgili bawehan.  
\v 13 Na di kgadèla dunan Dyisas, samfulê ale di dademela mlalò ku Dyisas, na tulenla tateenla kenen, bay làla ale fnaglut. 
\s1 I kfite Dyisas i kton di sfalò satu gal mlalò kenen 
\r (Matyu 28:16-20; Luk 24:36-49; Dyan 20:19-23; Dad Nimò 1:6-8) 
\p  
\v 14 Kafnge én, fite Dyisas i kton di dad sfalò satu gal mlalò kenen slengla kmaan. Na tnaluan ale du kulang i kafaglutla na mgal i ulula, du talà ale faglut i man dad mite kenen kafngen mték.  
\v 15 Na manan di dale, “Salu gamu di klamang banwe, na tdòyu i Fye Tulen di kdee dad to.  
\v 16 Na kdee dad to faglut di deg, na fbunyag, galwà ale di dad salàla. Kabay dad to là faglut, fanlayam ale Dwata di fulé duh.  
\v 17 Na nun dad ilè di dad to faglut, du falwàla dad busaw di dad to fagu di dagitgu, na gamtalù ale dademe talù làla gadè.  
\v 18 Na ku gagotla ulad ku demen ginumla makakilu, là ale mati. Na magot ale i dad to nun tduk, na mgulê ale.” 
\s1 I kagket Dyisas di langit 
\r (Luk 24:50-53; Dad Nimò 1:9-11) 
\p  
\v 19 Na i Amuito Dyisas, kafnge i manan dale ani, magket kenen di langit, na sudeng kenen gsen di kwanan Dwata. 
\p  
\v 20 Na dad mlalò kenen, mdà ale tamdò i Fye Tulen gablà di ku Dyisas di kdee dad to di klamang banwe. Na Amuito Dyisas tmabeng na mlé dale tulus mimò i dad tnikeng, du én ilè glut i Tnaluan.