\id TIT 2011-04-02 SIL-BFB Buamu Ouarkoye 
\h Tiite 
\toc1 Ho vũahṹ na ó o Poole túara nɔn o Tiite yi 
\toc2 Tiite 
\toc3 TIT 
\mt2 Ho vũahṹ na ó o Poole túara nɔn o 
\mt1 Tiite 
\mt2 yi 
\is1 Vũahṹ túaró ɲúhṹ 
\ip O Tiite hĩ́a lé o Poole nì-kenínii. O yínɔń zúifù (Kalasiisa 2.1-3). O hĩ́a wee bè là a Poole à ɓa sá le Dónbeenì bín-tente bueró tonló. 
\ip Pã̀ahṹ na ó o Poole wee túa ho vũahṹ na kà á à na a yi, ká a wi ho Kɛrɛɛte yi á wee loń ɓa kèrètĩ́ɛwa kuio na wi hã lórá na bĩ́n yi bìo, à hã wé va lè mí yahó (1.5). 
\ip Mu nín-yání ó o Poole zéenía bìo á ɓa kèrètĩ́ɛwa kuure ya-díwá ko ɓa ɓua lè míten (1.5-16). 
\ip Bṹn mɔ́n ó o Poole zéenía o Tiite làa bìo ó o ko ò o wé kàrán lè ɓa kèrètĩ́ɛwa kuio. Hɔ̃́n kuio so lé ɓa nì-kĩ́a kuure, lè ɓa hã́-kĩ́a kuure, lè ɓa yàrówá kuure, lè ɓa wobáaní kuure (2). 
\ip O mún zéenía bìo ɓa kèrètĩ́ɛwa ko ɓa ɓua lè míten à dàń kɛɛnínáa mín wán lè ho hɛ́ɛrà, ká hã zía lè hã bín-zàwa lè ho sankaró mía ɓa pã̀ahṹ. Bṹn mɔ́n ó o tɛ̀ɛnía ɓa yi (3). 
\c 1  
\s1 Le tɛ̀ɛníi 
\p  
\v 1 Mu lé ĩnɛ́n Poole á túara ho vũahṹ na kà. Ĩ lé le Dónbeenì ton-sá là a Yeesu *Krista tonkaro, bèra a na à bìa le hueekaa à ɓa sĩadéró wíoka fárá tĩn à ɓa zũń ho tũ̀iá poni na à wé á ɓa à ɓua míten á à héha làa bìo sĩ le Dónbeenì yi.  
\v 2 Lé bṹn ǹ na á ɓa dà à dé mí sĩa wé è lòoní le mukãnì binbirì na máa vé, dìo le Dónbeenì dó mí ɲii le mí ì na bìa bìo sã̀ le yi yi ká bìo ɓúi dĩǹ yí léra. Wa láa mu yi lé bìo wa zũ le le Dónbeenì máa wé fĩ̀ sabéré.  
\v 3 Ká bìo le le mí ì wé pã̀ahṹ dɔ̃n, á le zéenía bìo le dó mi ɲii le mí ì wé wéréwéré lè ɓa nùpua làa bìa le tonkaa le ɓa bue mí bín-tente ɲiní. Lé hón tonló so á wa kã̀nílo Dónbeenì kàràfáa miì. 
\p  
\v 4 Mu lé ĩnɛ́n Poole á túara ho vũahṹ mu nɔn ũnɛ́n Tiite yi. Fo lé ĩ za binbirì wa sĩadéró le Dónbeenì yi bìo yi. Le wàn Maá Dónbeenì lè wa kã̀nílo Yeesu *Krista à wé mí sãamu làa fo à na ho hɛ́ɛrà foǹ. 
\s1 Ho tonló na ó o Tiite ko ò o sá ho Kɛrɛɛte yi 
\p  
\v 5 Ĩ wà à ĩ día fo ho Kɛrɛɛte kɔ̃hṹ yi, à ũ wíoka bìo á ĩnɛ́n làa fo ɓúa ɲúhṹ à véení, à mún hueeka ɓa nùpua bàráka hã lórá lè mi dà-kéní kéní na ɓa kèrètĩ́ɛwa wi yi à ɓa dí ɓa yahó. Liiní ũ hácírí bìo á ĩ henía nɔn foǹ wán.  
\v 6 O ya-dí ko ò o wé nùpue na á bè-kohó yèni yí máa ve lɛɛ́ yi. O ya-dí ko ò o hã́a yà-kéní na ó o yan lé wón mí dòn ò o kã́ɲa yi à yí lé mɔ́n. O zàwa ko à ɓa dé mi sĩa o Yeesu *Krista yi, ɓa mún ko à ɓa zũń míten ɓuaró, bèra a na à bè-kohó bìo yí mì lɛɛ́ ɓa yi, à ɓa mún yí wé ɓa zà-kã́ania.  
\v 7 Lé bìo ɓa kèrètĩ́ɛwa kuure ya-dí lé le Dónbeenì ton-sá, lé bṹn bìo yi ó o yí ko à bè-kohó yèni ve lɛɛ́ wo yi. O yí ko ò o wé nùpue na yí máa tà ɲí bìa ká cɔ̃́n, á sĩi sùwa. O yí ko ò o wé o nùpue na wee ɲu ho *dìvɛ̃́n dàkhĩína, á wa hã bíoní. O yí ko ò o wé o nùpue na sòobáa dó mi sĩi le wárí yi, á wee cà le làa bìo yínɔń mu.  
\v 8 Ɛ̀ɛ ká a màhã́ ko ò o wé o nùpue na wee hɛ́n mí yahó sĩ́ ɓa nùpua. O ko ò o wań mu bè-tente wéró. O ko ò o wé o bè-zũńminì ɓànso, á térénna, á wee wé bìo sĩ le Dónbeenì yi, á dà wee ɓua míten sese.  
\v 9 Le Dónbeenì bín-tente, dìo lé ho tũ̀iá poni na kàránna làa wo ó o ko ò o wíoka ɓua sese. Ká a wee wé kà síi, o ò dàń wé è hení bìa ká sĩa á ɓa à bè ho kàránló na bìo bon yi, á mún ǹ dàń ǹ zéení wéréwéré làa bìa le ho kàránló mu bìo yí bon le ɓa wee vĩ́iní míten. 
\p  
\v 10 Mu bon, ɓa kèrètĩ́ɛwa cɛ̀rɛ̀ɛ, sɔ̃̀nkú bìa wee bè ho *kúiiró làndá yi tĩ́ahṹ, á yí máa ɲí dɛ̀ɛ, á wee bío hã bín-conconwà à khàráa ɓa nùpua vĩ́iní.  
\v 11 Yí día le bánsowa so wé kàrán ɓa nùpua lé bìo ɓa kàránló mu yí bon, ho wee yáa hã zĩ-ɲún-kùio. Mu yàá yínɔń bṹn mí dòn, ɓa wee wé mu à càráa le wárí.  
\v 12 Ho Kɛrɛɛte kɔ̃hṹsa nì-kéní ɓúi na ɓarɛ́n wee lá làa ɲi-cúa fɛɛro á bía bìo kà: «Ho Kɛrɛɛtesa lé ɓa sabín-fũ̀aalowa, ɓa sũnsũmána lòn zĩ́n-bùaa, ɓa lé ɓa paríwà, bìo ɓa wa lé ho dará ɓa dí.»  
\v 13 À mu ɓɛ̀n bon, o nìi mu tũ̀iá sĩ. Lé bṹn nɔn, á ũ zá làa ba à mì le sòobɛ́ɛ na ɓa yi à ɓa yèrèmá dé mí sĩa bìo bon yi  
\v 14 à yí tà ɓa *zúifùwa hácín-bíoní, làa bìa pã́ ho tũ̀iá poni làndáwá yi.  
\v 15 Yìa wee ce le Dónbeenì yahó, á làndá yí máa hè làa bìo ɓúi díró. Ká yìa yí máa ce le Dónbeenì yahó, á yí dó mí sĩi o Yeesu yi, wón wárá ɓúenɓúen yí máa ce. Hàrí o yilera yàá yí máa ce. O wó bìo yí se à mu nìyio máa dí o.  
\v 16 O wee bío wéréwéré le mí zũ le Dónbeenì ɛ̀ɛ ká a wárá hɔ̃́n wee zéení le mu yí bon. O bìo sũii ló, o yí máa bè le Dónbeenì bíonì yi, o yí dà bìo na se máa wé. 
\c 2  
\s1 Bìo ɓa kèrètĩ́ɛwa ko à ɓa ɓua lè míten 
\p  
\v 1 Ɛ̀ɛ ká ũnɛ́n wón wé kàrán ɓa nùpua lè ho kàránló na bìo bon.  
\v 2 Bío na ɓa nì-kĩ́a yi le ɓa wé ɓua míten yi mu bìo ɓúenɓúen yi. Le bìo ɓa à ɓua lè míten à wé à ɓa nùpua kɔ̃̀nbi ɓa. Ɓa ko à ɓa wé mu bè-zũńminì ɓànsowà, à wé ɓa nùpua na fárá tĩna mí sĩadéró le Dónbeenì yi, à wé wań ɓa nùpua làa sòobɛ́ɛ, à wé ɲì mí yiwa.  
\v 3 À ũ mún bío na ɓa hã́-kĩ́a yi le bìo ɓa wee ɓua lè míten à héha làa bìo le Dónbeenì sĩi vá yi. Ɓa yí ko ɓa wé yáa bìa ká yènnáa, à yí sòobá yí dé míten ho *dìvɛ̃́n ɲuló yi. Ɓa ko à ɓa wé zéení ɓa nùpua làa bìo se.  
\v 4 Ká ɓa wee wé kà síi á ɓa à dàń wé è kàrán ɓa hã́-fĩa làa bìo ɓa ko ɓa wańnáa mí bárání lè mí zàwa,  
\v 5 á à wé mu bè-zũńminì ɓànsowà, á wé è kã́ɲa mí bárání mí dòn yi, á wé è loń mí zĩní tonni yi sese, á à wé ɓa hã́-tentewà, á wé è liiní míten á à na mí bárání yi. Ká ɓa wee ɓua míten kà síi, á ɓa nùpua máa wé è bío hã bín-kora máa lɛɛ́ le Dónbeenì bíonì yi. 
\p  
\v 6 Mún hení na ɓa yàrówá yi le ɓa wé mu bè-zũńminì ɓànsowà  
\v 7 mu bìo ɓúenɓúen yi. Ũnɛ́n ũ bɛɛre ko à ũ wé wé hã wárá na se à bìa ká mi, à bè yi. Dé sòobɛ́ɛ ũ kàránló yi á wé wé ho lè le yi na púaara día.  
\v 8 Wé mì ho tũ̀iá poni, hìa á nùpue yí dà máa kán, bèra a na à hã nìyio dí bìa yí tà ũ bìo lé bìo ɓa máa dàń máa bío bín-kohó wa dã́ní yi. 
\p  
\v 9 Ɓa wobáaní bán á ũ bío na yi le ɓa wé liiní míten na mí ɲúnása yi mu bìo ɓúenɓúen yi, à wé wé bìo sĩ ɓa yi, à wé yí kán ɓa,  
\v 10 à wé yí kɔ̃̀nbũ̀ní ɓa níi bìo. Ɓa yàá ko à ɓa wé zéení le mí láayi wi binbirì mu bìo ɓúenɓúen yi. Ká ɓa wee wé kà síi, á ɓa wárá ɓúenɓúen á à wé á ɓa nùpua wé è kɔ̃̀nbi ho kàránló wa kã̀nílo Dónbeenì dã́ní yi. 
\p  
\v 11 Mu bon, le wó mí sãamu á hɛ́raráa ho kã̀níló wɔ̃hṹ nɔn ɓa nùpua ɓúenɓúen yi.  
\v 12 Mu sãamu mu bìo yi, á le Dónbeenì wee kàrán wɛn á wa pĩ́ bìo yí sĩ le yi lè ho dĩ́míɲá bìo na wa sĩa wee vá yi, bèra a na à wa wé mu bè-zũńminì ɓànsowà, lè ɓa nì-térénnia, lè ɓa nùpua na wee wé bìo sĩ le Dónbeenì yi hã laà na kà wán.  
\v 13 Bṹn lé bìo wa ko wa wé à déráa wa sĩa lòoní le wizon-tente na ó o Yeesu *Krista na lé wa Dónbe-beenì á lé wa kã̀nílo khíi ɓueé zéení míten mí cùkú yi.  
\v 14 O tà húrun wa bìo yi, bèra a na ò o kã̀ní wɛn ho pànká na wee ɲàa wɛn dé mu bè-kora lè mí sìíwà ɓúenɓúen níi yi, à wa wé ɓa nùpua na wee ce o yahó, à bìo sĩ̀ a yi, à hã wárá na se wéró bìo kɛń yi fɛ́ɛɛ. 
\p  
\v 15 Bìo á ĩ bía nɔn foǹ á ũ wé kàrán lè ɓa kèrètĩ́ɛwa lè ho pànká ɓúenɓúen na fo yú. Wé hení ɓa sĩa le ɓa bè mu yi. Ká bìa yí máa bè mu yi bán à ũ wé záráa. Yí tà le nùpue zùań foǹ. 
\c 3  
\p  
\v 1 Bĩní leéka ɓa kèrètĩ́ɛwa le ɓa ko à ɓa wé liiní míten ɓa bá-zàwa lè ho pànká ya-díwá yahó à wé bè ɓa bíoní yi, à hã wárá na se wéró bìo kɛń ɓa yi.  
\v 2 Bío na ɓa yi le ɓa wé yí bío yí khe na nùpue yi, à wé yí fi lè ɓa nùpua, à wé ɓa nùpua na wayika, à wé yí zùań ɓa nùpua yi.  
\v 3 Mu bon, warɛ́n mún lá yí máa ɲí dɛ̀ɛ, á lé ɓa nì-kã́ania, á dó wa sĩa mu bìo na yí bon yi. Bìo wa sĩa wee vá yi ɓúenɓúen lé bṹn á wa hĩ́a wee wé á yí dà máa día. Wa lá lé ɓa yi-kora ɓànsowà á wee dí le yandee. Wa lá wee wé à ɓa nùpua ɲin wɛn, à warɛ́n mún ɲin ɓa.  
\v 4 Ɛ̀ɛ ká wa kã̀nílo Dónbeenì á zéenía mí tentemu, làa bìo le wa lè ɓa nùpua.  
\v 5 Le kã̀nía wɛn lé bìo á le zũna wa màkárí, ká mu yínɔń wa wárá na térénna na wa dàńna wó bìo yi. Le kã̀nía wɛn á ceéra wɛn lè mí Hácírí pànká, á wa yú le mukɔ̃n-fĩnle.  
\v 6 Le Hácírí mu á le Dónbeenì nɔn wɛn á le wi wɛn wa kã̀nílo Yeesu *Krista pànká yi.  
\v 7 Lé bṹn bìo yi á wa dà à yí le mukãnì binbirì na máa ve, dìo wa dó wa sĩa wee lòoní. Mu ɓúenɓúen dà à wé lé bìo le Dónbeenì wó wɛn lè ɓa nì-térénnia le sãamu pànká yi.  
\v 8 Hã bíoní na á ĩ bía nɔn foǹ kà á láayi wi. 
\p Ĩ wi à ũ hení hã bìo làa sòobɛ́ɛ à na ɓa nùpua yi bèra a na à bìa dó mí sĩa le Dónbeenì yi wíoka ca mí kuio mu bìo na se wéró yi. Ho kàránló mu se á ɲúhṹ wi ɓa ɓúenɓúen cɔ̃́n.  
\v 9 Ká ɓa nùpua na wa le wã̀aníi na ɲúhṹ mía, làa bìa wa le nɔnkãni wã̀aníi, làa bìa wa hã zía, làa bìa wa a *Mɔyiize làndá bìo wã̀aníi, bán ɓúenɓúen à ũ khɛ̀nnáa. Bṹn ɓúenɓúen ɲúhṹ mía, mu yí máa séení nùpue.  
\v 10 Yìa wee khɛɛ́ ɓa kèrètĩ́ɛwa à ũ ve o bíoráa. Ká a yí tà à ũ wíoka ve o hã cúa-ɲun níi bíoráa. Ká a pá yí ɲá mu, à ũ wé ɲàa wo bã́ní.  
\v 11 Mún zũń mu kɛ̃́nkɛ̃́n le wón nùpue so síi á día ho wã-tente. Mu bè-kora na ó o wee wé wee zéení le o ɲúhṹ sú. 
\s1 Le mɔ́ndɛ́n tɛ̀ɛníi 
\p  
\v 12 Ĩ ì tonka a Aatemaasi tàá o Tisiiki mi cɔ̃́n. Ká ɓarɛ́n á yìa ɓueé dɔ̃n mia, á ũnɛ́n ɓɛ̀n bánbá à ũ ɓuee yí mi ho Nikopoliisi lóhó yi. Ĩ wi à ĩ ɓuee kɛɛní bĩ́n le tɛ̀ɛnì pã̀ahṹ.  
\v 13 O Zenaasi na lé ho *làndá zũńlo là a Apoloosi, à ũ bánbá à ũ séení mí vɛɛnì yi. Yí le dɛ̀ɛ ɓúi fòo ɓa yi.  
\v 14 Bìa dó mí sĩa le Dónbeenì yi lè wa bìo síi mún ko ɓa ca mí kuio mu bìo na se wéró yi, à wé séení ɓa nùpua làa bìo ɓa màkóo wi yi, bèra a na à ɓa bìo ɲúhṹ kɛń. 
\p  
\v 15 Bìa wi hen làa mi ɓúenɓúen wee tɛ̀ɛní foǹ. Bìa wa wɛn mí sĩadéró le Dónbeenì yi bìo yi á ũnɛ́n mún tɛ̀ɛní yi. Le le Dónbeenì wé mí sãamu lè mi ɓúenɓúen.