\id 2TI 2011-04-02 SIL-BFB Buamu-Ouarkoye 
\h Timɔtee ɲun níi 
\toc1 Ho ɲun níi vũahṹ na ó o Poole túara nɔn o Timɔtee yi 
\toc2 Timɔtee ɲun níi 
\toc3 2TI 
\mt2 Ho ɲun níi vũahṹ na ó o Poole túara nɔn o 
\mt1 Timɔtee 
\mt2 yi 
\is1 Vũahṹ túaró ɲúhṹ 
\ip Pã̀ahṹ na ó o Poole wee túa ho vũahṹ na kà yi ká a wi ho kàsó yi ho Oroomu yi. O lò hĩ́a wee be (2.9) à nùpue na à séení a mún mía (4.16). 
\ip Bìo ó o Poole mu wee leéka le mí húmú wà ɓueé sùará, ó o bánbáa ò o kenía o Timɔtee na ó o wa làa sòobɛ́ɛ. O Poole wee dé le Dónbeenì bárákà o Timɔtee mu bìo yi. O wee hení na a yi le o fárá dĩ̀n mí sĩidéró o *Krista yi wán, à bánbá wé sá le Dónbeenì bín-tente bueró tonló, hàrí ká ɓa nùpua wee beé o lò ho tonló mu sáró bìo yi (1.1–2.13). 
\ip O Poole pá bĩnía bía nɔn wo yi le o hè ɓa nùpua na wa hã bín-conconwà bíoró. Lé bìo á mu yí máa na à le Dónbeenì tonló va làa yahó, ò o bía nɔn o Timɔtee yi le o wé làa bìo mínɛ́n wee wéráa, à lá ho tũ̀iá poni, lè le waminì, lè ho ten liiníló dã́ní. O mún bía nɔn wo yi le o yí nɔnsã ho kàránló tente na ó o yú bìo yi (2.14–4.5). 
\ip Ho vũahṹ véeníi ó o zéenía bìo ó orɛ́n mí bɛɛre lò bonnáa, làa bìo le Dónbeenì séeníanáa wo o lònbee yi (4.6-18). 
\c 1  
\s1 Le tɛ̀ɛníi 
\p  
\v 1 Mu lé ĩnɛ́n Poole, yìa le Dónbeenì lè mí sĩi bìo á wó á ĩ lé o Yeesu *Krista tonkaro lé mi wee túa ho vũahṹ na kà. Le tonkaa mi le ĩ bue le mukãnì binbirì na máa vé bìo, dìo le Dónbeenì dó mí ɲii le mí ì na wɛn wa páaníló là a Yeesu Krista bìo yi.  
\v 2 Ĩ wee túa ho á à na ũnɛ́n Timɔtee na lé ĩ za na ĩ wa làa sòobɛ́ɛ yi. Le o Maá Dónbeenì lè wa Ɲúhṹso Yeesu Krista wé mu sãamu làa fo, à zũń ũ màkárí, à na ho hɛ́ɛrà foǹ. 
\s1 O Poole wee hení a Timɔtee sĩi 
\p  
\v 3 Ĩ wee dé le Dónbeenì bárákà, dén na á ĩ wee sá na yi lè le yi na wee ce làa bìo á wàn maáwà fù wee sá nanáa le yi bìo síi. Le wisoni lè ho tĩ́nàahṹ ká ĩ wee fìo, à ĩ mún wé fìo na foǹ.  
\v 4 Hen ká ĩ wee leéka le wɛ́ɛ na fo wá bìo pã̀ahṹ na á ĩ wà día fo yi, à ĩ sĩi vá làa sòobɛ́ɛ à ĩ bĩní mi ũ wán à zã̀maka mu bìo yi.  
\v 5 Ĩ mún wee leéka bìo á fo dóráa ũ sĩi lè ũ sòobɛ́ɛ o Yeesu *Krista yi bìo. Dén sĩidéró so na kɛra mìn ɓùaa Loyiisi lè mìn nu Eniisi yi, á ĩ láa le lé dén ɓàn síi mún wi ũnɛ́n yi.  
\v 6 Lé bṹn nɔn á mu bìo wéró pànká na le Dónbeenì nɔn foǹ pã̀ahṹ na á ĩ bò ĩ níní ũ wán yi, á ũ wíoka dé sòobɛ́ɛ yi.  
\v 7 Mu bon, le Dónbeenì Hácírí na le nɔn wɛn yínɔń zã́níi Hácírí, ká le màhã́ wee na ho pànká wɛn, á wee wé à wa wań ɓa nùpua, à mún dàń waten ɓua yi. 
\p  
\v 8 Àwa, á ũ yí nìyi o Ɲúhṹso bìo bíoró yi, à ũ mún yí nìyi bìo á ĩnɛ́n wi ho kàsó yi bìo yi. Ká ũ tà à wa páaní le lònbee yi le Dónbeenì bín-tente bìo yi, à wé mu lè ho pànká na le Dónbeenì nɔn foǹ.  
\v 9 Le Dónbeenì mu lé dìo kã̀nía wɛn á hueekaa wɛn à wa bìo sĩ̀ le yi. Mu yínɔń wa wén-tentewà bìo yi á le wóráa mu. Mu lé lerɛ́n lè mí sãamu kã̀nía wɛn làa bìo le lon le mí ì wéráa mu. Bṹn le fèra wíokaa wa bìo yi o Yeesu Krista pànká yi ká ho dĩ́míɲá dĩǹ yí léra.  
\v 10 Bìo kà wán á mu sãamu mu bìo wã́a wee mi wéréwéré, lé bìo á wa kã̀nílo Yeesu Krista ɓuara ɓueé fá mu húmú fũuhṹ. O zéenía le ká wa tà le Dónbeenì bín-tente bìo, á wa à yí le mukãnì binbirì na máa vé. 
\p  
\v 11 Ĩnɛ́n le Dónbeenì léra á wó lè mí tonkaro, á le ĩ bue mí bín-tente na ɓa nùpua yi à mún kàrán ɓa làa de.  
\v 12 Lé bṹn bìo yi á ĩ wiráa le lònbee na kà yi, á mu nìyio mún yí dú mi, lé bìo á ĩ zũ yìa á ĩ dó ĩ sĩi yi, á ĩ láa mu yi le le dà à pa le bín-tente na le kàràfáa miì bìo. Mu bon, le è pa le bìo fúaa le wizonle na ó o khíi bĩní ì ɓuen yi. 
\p  
\v 13 Ho tũ̀iá poni bíonì na á fo ɲá ĩ cɔ̃́n á ũ ɓua, à bè le yi. Wé mu lè le sĩidéró o Yeesu Krista yi à wań ɓa nùpua ũ páaníló làa wo bìo yi.  
\v 14 Mu bè-tentewà na le Dónbeenì kàràfáa foǹ mí Hácírí na wi làa wɛn pànká yi, á ũ pa bìo. 
\p  
\v 15 Fo zũ le ho Azii kɔ̃hṹ nùpua na dó mí sĩa le Dónbeenì yi cɛ̀rɛ̀ɛ pã́ mi día. O Fizɛɛle là a Hɛɛmɔzɛɛnɛ mún wi ɓa tĩ́ahṹ.  
\v 16 Le o Ɲúhṹso wé mí sãamu là a Onɛzifoore zĩ-ɲúhṹ nùpua, lé bìo ó o wee hĩ̀í ĩ sĩi túntún. Bìo á ĩ wi ho kàsó yi ó o yí máa nìyi bìo yi ɓa nùpua yahó.  
\v 17 Pã̀ahṹ na ó o ɓuara ho Oroomu yi hen ó o bánbáa ò o cànkaa mi fúaa bìo ó o yú mi.  
\v 18 Le o Ɲúhṹso zũń o màkárí nɔ̀nzoǹ na ó o khíi ɓueé cítí ɓa nùpua yi. Fo zũ le pã̀ahṹ na á ĩ hĩ́a wi ho Efɛɛze lóhó yi ó o séenía mi làa sòobɛ́ɛ. 
\c 2  
\s1 O ton-sá ko lè mí sàáníi 
\p  
\v 1 Ká ũnɛ́n na lé ĩ za, wé yí ũ pànká mu sãamu na ó o Yeesu *Krista wó làa fo yi.  
\v 2 Bìo á ĩ kàránna lè ɓa nùpua ɓa sɛɛ́ràsa cɛ̀rɛ̀ɛ yahó na fo ɲá ĩ cɔ̃́n, ũ bĩní kàrán lè ɓa nùpua na láayi wi, bìa dà à bĩní ì kàrán mu lè ɓa ɓúi.  
\v 3 Le lònbee na wee yí o Yeesu Krista ton-sáwá á ũ tà yi làa bìo ó o dásí tente wee tàráa le lònbee yi bìo síi.  
\v 4 O dásí na wi ò o bìo wé sĩ mí ɲúhṹso yi wón yí máa wé día míten à bè-vio ɓúi bũmaka.  
\v 5 O nùpue na wi hã penkaa lùwíi yi á mún yí dà máa yí bìo ko làa wo ká a yí bò ɓa lùwílowà làndá yi.  
\v 6 O vàro na wee tà beé mí lò ho vàró yi lé yìa ko ò o wé o yahón nùpue na á à yí mí lònbee cũ̀nú.  
\v 7 Wé và ũ yi bìo á ĩ wee bío na foǹ wán, ó o Ɲúhṹso ò wé á fo ò zũń mu ɓúenɓúen kúará.  
\v 8 Bĩní leéka a Yeesu Krista na vèera bìo, wón na lé o *Daviide mɔ̀nmàníi. Bṹn lé le bín-tente na á ĩ wee bue.  
\v 9 Lé lerɛ́n bín-tente mu bìo yi á ɓa cannáa mi dó ho kàsó yi á wee beé lò lòn nùpue na wó khon. Ɛ̀ɛ ká le Dónbeenì bíonì dén á nùpue yí can.  
\v 10 Lé bṹn nɔn á ĩ wee tà le lònbee lè mí sìíwà yi bìa le Dónbeenì hueekaa bìo yi, bèra a na à bán mún kã̀ní ɓa páaníló là a Yeesu Krista bìo yi à ɓa dàń zo a cùkú na máa vé yi.  
\v 11 Le bíonì na kà láayi wi: 
\q1 Ká wa ká lòn nùpua na páanía húrun làa wo, 
\q2 á wa mún ǹ yí le mukãnì làa wo. 
\q1  
\v 12 Ká wa wee dàń hĩ̀ wa sĩa, 
\q2 á wa à dí le bɛ́ɛnì làa wo. 
\q1 Ká wa pã́ a, 
\q2 ó orɛ́n mún ǹ pĩ́ wɛn. 
\q1  
\v 13 Ká wa yí máa wé bìo ó o le wa wé, 
\q2 ó orɛ́n yí máa yèrèmá mí ɲii. 
\q2 Mu bon, bìo ó o karáa ó o yí dà máa lé wán. 
\s1 Le Dónbeenì bíonì bueró na ɲii tun 
\p  
\v 14 Bío na ɓa kèrètĩ́ɛwa yi le ɓa bĩní leéka mu bìowa na kà bìo, à hení mu na ɓa yi le Dónbeenì yahó le ɓa wé yí dé míten le wã̀aníi na ɲúhṹ mía yi. Le yí máa séení bìa wee ɲí le ká mu yínɔń ɓa yáaró.  
\v 15 Sòobá ũten à wé o nùpue na láayi wi le Dónbeenì yahó. Ɓua ũten là a ton-sá na yí máa nìyi mí ton-sánii bìo yi bìo síi, à wé bue ho tũ̀iá poni bíonì.  
\v 16 Hã bín-conconwà làa hĩ̀a bìo ɓúi yí cɛɛ́ra le Dónbeenì yi à ũ yí dé ũten yi, lé bìo á bìa wee dé míten hɔ̃́n bíoní so síi yi á wee wíoka khɛ̀n lè le Dónbeenì ká ɓa wà.  
\v 17 Bán nùpua so bíoní ka lòn càká na wee bɛɛni. O Himɛnɛɛ là a Filɛɛte wi ɓa nùpua mu tĩ́ahṹ.  
\v 18 Ɓa khɛ̀ra lè ho tũ̀iá poni lé bìo ɓa wee bío le ɓa nì-hía vèera khĩína, à vĩ́inínáa ɓa nùpua à ɓa bĩnía a Yeesu mɔ́n.  
\v 19 Ɛ̀ɛ ká le Dónbeenì nìpomu bán yí máa dèké yi lòn zĩi na ɲúhṹ fárá tĩna bìo síi. Mu túara le zĩi mu ɲúhṹ na fárá tĩna wán kà síi: «O Ɲúhṹso zũ bìa bìo sã̀ a yi». Mu mún túara le: «Bìa le mí bìo sã̀ a Ɲúhṹso yi lè mí nì-kéní kéní wã́a wé yí wé bè-kohó». 
\p  
\v 20 O nàfòró ɓànso zĩi yi á ho dĩ́nló sĩ̀a lè mí sìíwà wi yi. Hã ɓúi wó lè ho sã́nú, hã ɓúi wó lè ho tɔ̃̀ɲɔ̀n, hã ɓúi má lè ho córó, hã ɓúi lé hã ɓùɛɛní á ɓa tan. Hã ɓúi ɓa wee sáráa hã wizon-beera yi, ká hã ɓúi ɓa wee sáráa hã wizon-kã́amáawa yi.  
\v 21 Hen ká yìa wee ceé míten ho kàránló mu dã́ní yi, wón á à kɛń lòn dĩ́nló dɛ̀ɛ na ɓa wee sáráa le wizon-beenì yi bìo síi. O bìo á à sĩ̀ mí Ɲúhṹso yi, á bìo ɲúhṹ ù kɛń o cɔ̃́n. O wíokaa hã wén-tentewà wéró bìo yi. 
\p  
\v 22 Àwa, á mu bìo na yí se na wee vá ɓa yàrówá dé mu bè-kohó yi á ũ khɛ̀nnáa. Bánbá á ũ wé o nùpue na térénna, à sĩidéró le Dónbeenì yi fárá tĩn, à wań ɓa nùpua, à wé à ho hɛ́ɛrà kɛń ũnɛ́n làa ba pã̀ahṹ. À bìa sĩa wee ce á wee fìo wa Ɲúhṹso yi à mún wé làa bṹn bìo síi.  
\v 23 Hã bín-conconwà bíoró á ũ yí dé ũten yi, fo zũ le mu wee ɓuen lè hã warà.  
\v 24 Ò o Ɲúhṹso ton-sá ɲɔǹ yí ko ò o wé tá warà. O ko ò o wé wé mu tentemu lè ɓa nùpua ɓúenɓúen, à wé dàń kàrán ɓa nùpua. O ko ò o wé o nùpue na mu bìo ɓúenɓúen wee kúu yi.  
\v 25 Hàrí bìa yí tà a bìo ó o pá ko ò o wé wayiráa à kàrán ɓa, ɲún-sĩ á le Dónbeenì ì wé á ɓa sĩa á à yèrèmá á à tà ho tũ̀iá poni bìo.  
\v 26 Le è wé á ɓa à zũń bìo se, á à fee míten o *Satãni níi yi, wón na ka lòn dádá na lá vũn ɓa á ɓa wee wé o sĩi bìo. 
\c 3  
\s1 Mu bìowa na khíi wé á ho dĩ́míɲá à véráa 
\p  
\v 1 Zũń mu, le ká mu bìo ɓúenɓúen véró khíi wà ɓueé dã, á le lònbee á à kɛń làa sòobɛ́ɛ.  
\v 2 Lé bìo mu pã̀ahṹ ká ɓa nùpua wé è cà mí kùrú bìo mí dòn. Ɓa à wań le wárí á à poń mu bìo ɓúenɓúen. Ɓa wé è khòoní míten, á à yòoní míten. Ɓa wé è bío hã bín-kora á à lɛɛ́ le Dónbeenì yi. Ɓa zàwa máa wé è ɲí mín nùwã bíoní. Ɓa nùpua á à wé ɓa bè-yízũńlowà. Bìo lé le Dónbeenì bìo á ɓa máa wé è dé kɔ̃̀nbii yi.  
\v 3 Ɓa máa wań mín nùpua. Ɓa máa wé è zũń nùpue màkárí. Ɓa wé è yáa ɓa nùpua yènnáa. Ɓa máa wé è dàń míten máa ɓua yi, ɓa à wé ɓa nì-sũmáa, bìo se á ɓa máa wań.  
\v 4 Bìa làa ba lé le ɲii á ɓa wé è lé mɔ́n. Ɓa máa wé è le mí yiwa máa wéráa mu bìo. Ɓa à wé ɓa khònlowà, ɓa à wań mí sĩa bìo á à poń le Dónbeenì.  
\v 5 Ɓa wé è ɓua míten lè ɓa wee wé bìo sĩ le Dónbeenì yi, à le pànká ɓa ɲɔǹ yí tà bìo. Bán nùpua so á ũ khɛ̀nnáa.  
\v 6 Ɓa nùpua mu tĩ́ahṹ ɓa ɓúi wé è lé yi á à zo hã zĩní, á zoó khà ɓa hã́awa ɓúi na sĩadéró yí fárá yí tĩna, á sú lè mu bè-kora, à ɓa yèrèmá bè ɓa bíoní yi. Ɓa hã́awa mu sĩa wee vá mu bìo na yí se lè mí sìíwà wéró yi.  
\v 7 Ɓa wee kení míten fɛ́ɛɛ ká ɓa màhã́ yí dàńna yí zũna ho tũ̀iá poni.  
\v 8 Bán nùpua so yí tà ho tũ̀iá poni bìo làa bìo ó o Zanɛɛsi là a Zãnbɛrɛɛsi\f + \fr 3:8 \ft Mi loń Léró vũahṹ (Exode) 7.11-12\f* hĩ́a yí tàráa o *Mɔyiize bìo bìo síi. Ɓa yilera yí se, ɓa yí dó mí sĩa sese le Dónbeenì yi.  
\v 9 Ɛ̀ɛ ká ɓa bìo màhã́ máa va làa yahó lé bìo ɓa nùpua ɓúenɓúen zũ le ɓa vṹnun làa bìo ó o Zanɛɛsi là a Zãnbɛrɛɛsi vĩ́ló bìo hĩ́a zũnanáa bìo síi. 
\s1 Bìo ɓa kenía làa fo, á ũ ɓua sese 
\p  
\v 10 Ɛ̀ɛ ká ũnɛ́n wón zũ bìo á ĩ wee kàrán lè ɓa nùpua, á zũ bìo á ĩ wee ɓua lè ĩten. Fo zũ ĩ tonló ɲúhṹ, á zũ bìo á ĩ dóráa ĩ sĩi le Dónbeenì yi. Fo mún zũ bìo á ĩ wee hĩ̀náa ĩ sĩi làa bìo á ĩ waráa ɓa nùpua. Fo zũ bìo á ĩ wee ɲìnáa ĩ yi.  
\v 11 Bìo ɓa nùpua ɲíiníanáa ĩ sãnía, á beéra ĩ lò ho Ãntiosi lè ho Ikoniyuumu, lè ho Lisitere lórá yi, á fo zũ. Mu bon, ɓa ɓɛ̀ntĩ́n beéra ĩ lò làa sòobɛ́ɛ. Ɛ̀ɛ ká wa Ɲúhṹso màhã́ kã̀nía mi mu ɓúenɓúen yi.  
\v 12 Bìa ɓúenɓúen na wi ɓa ɓua míten à héha làa bìo le Dónbeenì sĩi vá yi wa páaníló là a Yeesu *Krista bìo yi, bán ɓa à beé lò.  
\v 13 Ká ɓa nì-sũmáa lè ɓa sabín-fũ̀aalowa, bán sũnsũmámu lè ɓa sabíoní wé è dé wán ká mu wà. Ɓa à vĩ́iní ɓa nùpua, á ɓa nùpua mún ǹ vĩ́iní ɓarɛ́n.  
\v 14 Ká ũnɛ́n, bánbá à ũ wé bè bìo á fo kenía yi, à tà mu yi lè ũ sĩi ɓúenɓúen. Ũnɛ́n ũ bɛɛre zũ bìa kenía mu làa fo.  
\v 15 Le Dónbeenì bíonì vũahṹ á fo zũ bìo hàrí ũ háyónmu yi. Lé lerɛ́n dà à na mu bè-zũńminì binbirì foǹ, bìo á fo dà à bè yi á à déráa ũ sĩi o Yeesu Krista yi á à kã̀nínáa.  
\v 16 Le Dónbeenì bíonì vũahṹ á túara lè lerɛ́n mí bɛɛre Hácírí pànká. Le bíonì mu bìo ɲúhṹ wi làa sòobɛ́ɛ. Lé lerɛ́n wee kàrán o nùpue, á wee wé ò o pĩ́ bìo yí bon, lé lerɛ́n wee bé o nùpue, le mún wee wé ò o wé wé bìo térénna.  
\v 17 Lé bṹn ǹ na ká le Dónbeenì nùpue á à dàń wé è wé hã wárá na se. 
\c 4  
\s1 O Poole mɔ́ndɛ́n bìo na ó o henía 
\p  
\v 1 Bìo kà lé bìo á ĩ wee hení ì na foǹ lè le sòobɛ́ɛ le Dónbeenì yahó, là a Yeesu *Krista yahó, wón na khíi ɓuen ɓueé cítí ɓa yèn-vèeniasa lè ɓa nì-hía á mún ɓueé dí mí bɛ́ɛnì.  
\v 2 Hàrí ho pã̀ahṹ wé se loo, à ho yí wé se loo, à ũ wé bue le Dónbeenì bíonì. Bìa wé wó khon à ũ zéení ɓa wékheró bìo na ɓa yi, à hení mu na ɓa yi le ɓa día mu bè-kora wéró. Wé hení ɓa sĩa. Bṹn ɓúenɓúen á ũ wé ɲì ũ yi à wé kàrán ɓa.  
\v 3 Lé bìo á pã̀ahṹ ɓúi khíi dã ká ɓa nùpua máa wé è ɲí bìa wee kàrán ɓa lè ho tũ̀iá poni cɔ̃́n, ká ɓa wé è wé bìo sĩ ɓa yi, á wé è ɲí ɓa nì-kàránlowà cɛ̀rɛ̀ɛ na bìo yí bon cɔ̃́n.  
\v 4 Ɓa à pĩ́ ho tũ̀iá poni bìo ká ɓa à bè hã sabíoní mɔ́n.  
\v 5 Ɛ̀ɛ ká ũnɛ́n wón zũń ũten ɓuaró mu bìo ɓúenɓúen yi, tà le lònbee yi. Wé bue le Dónbeenì bín-tente na ɓa nùpua yi. Sá ho tonló mu sese làa bìo mu koráa. 
\p  
\v 6 Ká ĩnɛ́n wón húmú sùaráa, ĩ ka lòn yìa na ɓa yan lè le muinì vó.  
\v 7 Ĩ sá a Yeesu Krista tonló lè ĩ sĩi ɓúenɓúen lòn nùpue na san ho saró lè mí sòobɛ́ɛ. Bìo le Dónbeenì le ĩ wé á ĩ wó á mu ɲii sú lòn nùpue na lùwa vaá dɔ̃n hen na ó o ko ó o vaa dã yi. Ĩ sĩidéró o Yeesu Krista yi á ĩ yí día.  
\v 8 Bìo kà wán á ho cũ̀nú na ko làa mi bìo á ĩ wó bìo térénna bìo yi, á bàrá pan mi ho wáayi. O Ɲúhṹso na lé o cítí fĩ̀ na térénna á à na ho cũ̀nú mu miì pã̀ahṹ na ó o khíi cítí ɓa nùpua yi. Mu máa wé ĩnɛ́n ĩ dòn ó ò na ho cũ̀nú yi, ká bìa ɓúenɓúen na wee lòoní a bĩní ɓuenló ó o mún ǹ na ho yi. 
\s1 O Poole wi ò o Timɔtee ɓuen o cɔ̃́n 
\p  
\v 9 Bánbá à ũ ɓuen ĩ cɔ̃́n fùafùa.  
\v 10 Lé bìo ó o Demaasi wà ò o día mi á van ho Tesaloniiki lóhó ho dĩ́míɲá bìowa na ó o wa bìo yi. O Keresãn wón wà van ho Kalasii kɔ̃hṹ, ò o Tiite ɓɛ̀n van ho Dalamatii kɔ̃hṹ.  
\v 11 O Luki mí dòn lé yìa wi hen làa mi. Hen ká fo bò o ɓuen à ũ fé o Maaki ɓuennáa, lé bìo ó o dà wee séení mi ho tonló yi.  
\v 12 O Tisiiki wón á ĩ tonkaa ó o van ho Efɛɛze.  
\v 13 Fo bò o ɓuen à ũ ɓuee lé ho Torowaasi yi à ũ lá ĩ báká beenì na á ĩ día o Kaapuusi cɔ̃́n ɓua ɓuennáa. Fo bò o ɓuen à ũ mún khuii ĩ vɔ̃nna, sɔ̃̀nkú ĩ sɔ̃nna na ho túaró wi wán.\fig Sɔ̃nna na ɓa wee túa wán|src="hk00153b.tif" size="col" copy="Horace Knowles" ref="Timɔtee ɲun níi 4:13" \fig* 
\v 14 O Alɛkisãndere na lé o kháa-liki ɓɛ̀ntĩ́n wó khon làa mi dàkhĩína. Le Dónbeenì á à sàání a yi á à héha làa bìo ó o wó.  
\v 15 Ũnɛ́n mún pa ũten bìo lé bìo á bìo wa wee kàrán lè ɓa nùpua ó o yí tà bìo hùúu.  
\v 16 Bìo ɓa nín-yání ɓuan mi vannáa le cítíi fĩ̀iníi, á hàrí nùpue yí ɓueé tà ĩ ɲii, ɓa ɓúenɓúen pã́ mi día. Le le Dónbeenì sɛ́n mu día na ɓa yi.  
\v 17 Ɛ̀ɛ ká a Ɲúhṹso wón pan ĩ bìo á nɔn ho pànká miì á ĩ bueraráa o bíonì á bìa yí zũ le Dónbeenì cɛ̀rɛ̀ɛ ɲá le. Lé orɛ́n kã̀nía mi ɓa kúdenwà yi.  
\v 18 O Ɲúhṹso á à kã̀ní mi mu bè-sũmáa ɓúenɓúen yi. O ò kã̀ní mi á ĩ kɛń ho wáayi o bá-zàmu yi. Le ho cùkú à bìo sĩ̀ a yi fɛ́ɛɛ hã lúlúio na ɲii mía yi. *Amiina! 
\s1 Le mɔ́ndɛ́n tɛ̀ɛníi 
\p  
\v 19 Ĩ wee tɛ̀ɛní a Pirisiiye là a Akilaasi yi. Ĩ mún wee tɛ̀ɛní a Onɛzifoore zĩ-ɲúhṹ nùpua yi.  
\v 20 O Erasiite wón kará ho Korɛnte yi, ká a Torofiimu wón á ĩ día ho Milee yi lé bìo ó o lò yí here.  
\v 21 Bánbá à ũ ɓuen ká le tɛ̀ɛnì dĩǹ yí hĩ́nɔn. 
\p O Ebuluusi, là a Pudɛ̃nsi là a Linuusi là a Kolodia lè wàn zàwa lè wàn hĩ́nni kèrètĩ́ɛwa na wi hen ɓúenɓúen wee tɛ̀ɛní foǹ. 
\p  
\v 22 Le wa Ɲúhṹso kɛń làa fo, le o wé mí sãamu làa mia.