\id ZEP – NTB 
\h ཟེ་ཕན་ཡཱ། 
\toc1 ༄༅། །ལུང་སྟོན་པ་ཟེ་ཕན་ཡཱའི་མདོ། 
\toc2 ཟེ་ཕན་ཡཱ། 
\mt1 ༄༅། །ལུང་སྟོན་པ་ཟེ་ཕན་ཡཱའི་མདོ།  
\imt1 ལུང་སྟོན་པ་ཟེ་ཕན་ཡཱའི་མདོ་ཞེས་བྱ་བའི་ངོ་སྤྲོད་མདོར་བསྡུས།  
\is1 ཁ་བྱང་དང་ལོ་རྒྱུས་རྒྱབ་ལྗོངས།  
\ipi ཟེ་ཕན་ཡཱ་ཞེས་པ་ནི་དཀོན་མཆོག་ཡ་ཝཱེས་སྦས་པར་མཛད་པའམ་ཡང་ན་སྲུང་བར་མཛད་པ་ཞེས་པའི་དོན་ཡིན། ཧི་ཟི་ཀི་ཡཱ་སྐུ་གྲོངས་པའི་རྗེས་སུ་ཡ་ཧུ་དཱའི་ཆོས་ལུགས་ཀྱི་གནས་ཚུལ་ཇེ་སྡུག་ཏུ་ཕྱིན། ཡོ་ཤི་ཡཱས་གནད་དོན་དེ་གཙང་མར་བཟོས་ནས་བསྐྱར་དར་མཛད་པའི་འགོ་བརྩམས་ནའང་ལེགས་འགྲུབ་མ་བྱུང་། སྐབས་དེར་ཡེ་རམ་ཡཱ་དང་ནཱ་ཧུམ་གཉིས་ཀྱིས་ཟེ་ཕན་ཡཱ་ལ་རྒྱབ་སྐྱོར་མཛད་ནས། ཡ་ཧུ་དཱ་པ་རྣམས་ལ་འགྱོད་བཤགས་བྱེད་དགོས་པར་གདམས་ན་ཡང་། དེ་དག་གིས་འོན་པ་ལྟར་བྱས་ནས་མ་མཉན་པས་ན། ཡ་ཧུ་དཱ་པ་རྣམས་ཉེས་ཆད་གཅོད་རུང་བའི་ཚད་དུ་སླེབས་པ་རེད།  
\is1 ཡི་གེར་འགོད་མཁན་དང་འགོད་དུས།  
\ipi ལུང་སྟོན་པ་ཟེ་ཕན་ཡཱ་ནི་ཡ་ཧུ་དཱ་པའི་སྤྱི་ཚོགས་ཁྲོད་དུ་སྐད་གྲགས་ཅན་ཞིག་ཡིན་པར་གསལ། ཁོང་ནི་རྒྱལ་པོ་ཧི་ཟི་ཀི་ཡཱའི་རིགས་རྒྱུད་ཀྱི་མི་རབས་བཞི་པ་ཡིན། ཟེ་ཕན་ཡཱ་ཞེས་པའི་གཞུང་དུ་ཁྲིམས་ཀྱི་དོན་དག་དང་སྐབས་དེའི་ཆབ་སྲིད་སྐོར་ལ་རྒྱུས་མངའ་ཆེན་པོ་ཡོད་པར་བཀོད་ཡོད། ལེའུ་དང་པོའི་ཚིག་རྐང་དང་པོའི་ནང་དུ། ཡོ་ཤི་ཡཱས་རྒྱལ་སྲིད་བསྐྱངས་པའི་སྐབས་སུ་༼སྤྱི་ལོ་སྔོན་གྱི་640ལོ་ནས་609ལོའི་བར།༽ཟེ་ཕན་ཡཱས་ལུང་བསྟན་པ་རེད་ཅེས་གསུངས་ཡོད། རྒྱུ་མཚན་དེའི་དབང་གིས། ལུང་བསྟན་གྱི་མདོ་འདི་ནི་ཧ་ལམ་སྤྱི་ལོ་སྔོན་གྱི་630ལོའི་ཡས་མས་སུ་ཡི་གེར་བཀོད་པ་ཡིན།  
\is1 བརྗོད་སྙིང་དང་གསུང་འཕྲིན།  
\ipi ཡི་གེར་འགོད་མཁན་གྱི་དམིགས་ཡུལ་ནི་དཀོན་མཆོག་གི་ཉེས་ཆད་ཡ་ཧུ་དཱ་པའི་སྟེང་དུ་འབབ་པར་ཉེ་བའི་སྐོར་ཁྱབ་བསྒྲགས་བྱེད་རྒྱུ་དེ་རེད། ཁོང་གི་བརྗོད་བྱ་གཙོ་བོ་ནི་དཀོན་མཆོག་ཡ་ཝཱེའི་ཉིན་མོ་ཕེབས་པར་འགྱུར་བ་དང་། སྐབས་དེར་དཀོན་མཆོག་གིས་མི་རིགས་དེ་ལ་ཉེས་ཆད་དྲག་པོ་གཅོད་པར་འགྱུར། ཟེ་ཕན་ཡཱས་དངངས་སྐྲག་ལྡན་པའི་ཉེས་ཆད་འབབ་པ་བརྗོད་པའི་ཆབས་ཅིག དཀོན་མཆོག་གིས་རང་གི་མི་རྣམས་ལ་སྔར་ལས་ཀྱང་སྙིང་རྗེ་ཆེན་པོ་དགོངས་པར་མཛད་པ་ཡང་གསལ་པོར་སྨྲས།  
\is1 འཆར་ཟིན།  
\ipi 1. ངོ་སྤྲོད། ༼1:1-3༽  
\ipi 2. ཡ་ཧུ་དཱ་པ་དང་མི་རིགས་ཀུན་གྱི་སྟེང་ལ་དཀོན་མཆོག་ཡ་ཝཱེའི་ཉིན་མོ་སླེབ་པར་འགྱུར་བ། ༼1:4-18༽  
\ipi 3. མི་རིགས་ཀུན་ལ་དཀོན་མཆོག་གི་ཉེས་ཆད་འབབ་པར་འགྱུར་བའི་སྐོར། ༼2:1-3:8༽  
\ipi 4. ཡེས་ར་ཨེལ་གྱི་ལྷག་ལུས་རྣམས་སྐྱོབ་པའི་སྐོར། ༼3:9-20༽  
\c 1
\cl ལེའུ་དང་པོ། 
\toc1 ༄༅། །ལུང་སྟོན་པ་ཟེ་ཕན་ཡཱའི་མདོ། 
\toc2 ཟེ་ཕན་ཡཱ། 
\s1 དཀོན་མཆོག་ཡ་ཝཱེས་ཉེས་ཆད་གཅོད་པར་བསྒྲགས་པ།  
\p
\v 1 དེ་ཡང་ཡ་ཧུ་དཱའི་རྒྱལ་པོ་ཨ་མོན་གྱི་བུ་ཡོ་ཤི་ཡཱ་རྒྱལ་པོར་སྡོད་པའི་དུས་སུ། དཀོན་མཆོག་ཡ་ཝཱེའི་བཀའ་ནི་ཧི་ཟི་ཀི་ཡཱའི་གསུམ་ཚ་དང་། ཨ་མར་ཡཱའི་ཡང་ཚ་དང་། གེ་དལ་ཡཱའི་ཚ་བོ་སྟེ། ཀུ་ཤིའི་བུ་ཟེ་ཕན་ཡཱ་ལ་བྱུང་ཞིང་།  
\v 2 དཀོན་མཆོག་ཡ་ཝཱེས་འདི་སྐད་དུ། བདག་གིས་ས་གཞིའི་སྟེང་གི་བྱ་དངོས་ཡོད་ཚད་མེད་པར་བྱེད་ངེས་ཡིན་ཞེས་གསུངས་སོ། །  
\v 3 ཡང་དཀོན་མཆོག་ཡ་ཝཱེས་འདི་སྐད་དུ། བདག་གིས་མིའི་རིགས་དང་། དུད་འགྲོ་རྣམས་དང་། ནམ་མཁའི་བྱ་དང་། རྒྱ་མཚོའི་ཉ་ཐམས་ཅད་མེད་པར་བྱེད་དགོས་པ་དང་། བདག་གིས་མི་ངན་འགྱེལ་བར་བྱ་ཞིང་། མིའི་རིགས་ནི་ས་གཞི་ལས་མེད་པར་བྱའོ་ཞེས་གསུངས་སོ། །  
\v 4 བདག་གིས་རང་གི་ལག་པ་བརྐྱངས་ཏེ་ཡ་ཧུ་དཱའི་ཡུལ་དང་ཡེ་རུ་སཱ་ལེམ་གྱི་མི་ཀུན་ལ་རྒོལ་བར་འགྱུར་ཏེ། བདག་གིས་ཡུལ་འདི་ནས་པཱ་ཨལ་གྱི་ཤུལ་ལུས་རྣམས་མེད་པར་བྱ་ཞིང་། སྐུ་འདྲར་དད་པའི་མཆོད་དཔོན་དག་གི་མིང་དང་། བསམ་པ་རྣམ་དག་མ་ཡིན་པའི་དཀོན་མཆོག་ཡ་ཝཱེའི་མཆོད་དཔོན་རྣམས་མེད་པར་བྱའོ། །  
\v 5 ཁང་ཀླད་ནས་ནམ་མཁའི་སྐར་ཚོགས་ལ་བསྙེན་བཀུར་བྱེད་ཅིང་། དཀོན་མཆོག་ཡ་ཝཱེར་བསྙེན་བཀུར་ཞུས་ནས་ཁོང་ཉིད་དཔང་དུ་བཙུགས་ཏེ་མནའ་སྐྱེལ་བ་དང་། ཡང་ལྷ་མིལ་ཀོམ་དཔང་དུ་བཙུགས་ཏེ་མནའ་སྐྱེལ་མཁན་རྣམས་དང་།  
\v 6 ཕར་འཁོར་ནས་དཀོན་མཆོག་ཡ་ཝཱེའི་རྗེས་སུ་མི་འབྲང་བ་རྣམས་དང་། དཀོན་མཆོག་ཡ་ཝཱེ་མི་བཙལ་ཞིང་ཁོང་གི་དྲུང་དུ་བཀའ་འདྲི་ཞུ་བར་ཡང་མི་འགྲོ་བ་རྣམས་ཀྱང་མེད་པར་བྱའོ། །   
\s1 དཀོན་མཆོག་ཡ་ཝཱེའི་དུས་རྣམས།  
\p
\v 7 ཁྱོད་ནི་གཙོ་བོ་ཡ་ཝཱེའི་དྲུང་དུ་ཁུ་སིམ་མེར་སྡོད་ཅིག ཅིའི་ཕྱིར་ཞེ་ན། དཀོན་མཆོག་ཡ་ཝཱེའི་ཉིན་མོ་སླེབས་ལ་ཉེ་ཞིང་། དཀོན་མཆོག་ཡ་ཝཱེས་མཆོད་རྫས་རྣམས་གྲ་སྒྲིག་བྱས་ཟིན་ལ། ཁོང་གིས་གདན་དྲངས་པའི་མགྲོན་པོ་རྣམས་དམ་པར་མཛད་དོ། །  
\v 8 དཀོན་མཆོག་ཡ་ཝཱེའི་མཆོད་པ་འབུལ་བའི་ཉིན་མོར་ངས་འགོ་དཔོན་དང་རྒྱལ་སྲས་རྣམས་ལ་ཆད་པ་གཅོད་པ་དང་། ཕྱི་ཕྱོགས་པའི་གོས་གྱོན་པ་ཐམས་ཅད་ལ་ཉེས་ཆད་གཅོད་ངེས་ཡིན།  
\v 9 ཉིན་དེ་སླེབས་ཚེ། ངས་སྒོ་ཐེམ་ལ་བགོམས་ནས་འགྲོ་བ་ཐམས་ཅད་དང་། བཙན་ཤུགས་དང་གཡོ་འཕྲུལ་གྱིས་བླངས་པའི་རྒྱུ་ནོར་གྱིས་རང་གི་ལྷ་ཁང་བཀང་དུ་འཇུག་པ་ཐམས་ཅད་ལ་ཉེས་ཆད་གཅོད་པར་འགྱུར་ཞེས་གསུངས་སོ། །  
\v 10 དཀོན་མཆོག་ཡ་ཝཱེས་འདི་སྐད་དུ། ཉིན་དེ་སླེབས་ཚེ། ཉ་སྒོ་ལས་ངུ་འབོད་བསྒྲག་འོང་ཞིང་། གནས་གསར་པ་ནས་སྨྲེ་སྔགས་འདོན་པའི་སྒྲ་ཐོས་འོང་བ་དང་། རི་རྣམས་ལས་གས་པའི་སྒྲ་ཆེན་པོ་གྲགས་འོང་ངོ་། །  
\v 11 ཀྱེ་མག་ཏེ་སིའི་\f + \ft འདིར་མག་ཏེ་སི་ཞེས་པ་ནི་གཏུན་ཁུང་གི་དོན་ཡིན་ལ། ཡེ་རུ་སཱ་ལེམ་གྱི་ཡུལ་ཁ་ཤས་ལ་དེ་ལྟར་འབོད་པ་ཡིན། \f*མི་སྡེ་རྣམས། ཁྱོད་རྣམས་ཀྱིས་སྨྲེ་སྔགས་ཐོན་ཞིག ཅིའི་ཕྱིར་ཞེ་ན། ཚོང་པ་ཐམས་ཅད་མེད་པར་བཟོས་ཤིང་། དངུལ་ཁྱེར་ནས་ཚོང་རྒྱག་མཁན་ཐམས་ཅད་ཚར་དུ་བཅད་དོ། །  
\v 12 དེའི་དུས་སུ་ངས་སྒྲོན་མེ་ཡར་བཏེགས་ནས་ཡེ་རུ་སཱ་ལེམ་བསྔོགས་ཏེ། སྙིགས་རོ་མ་དཀྲུག་པའི་རྒུན་ཆང་དྭངས་མོ་དང་འདྲ་བའི་མི་ \f + \ft འདིར་སྙིགས་རོ་མ་དཀྲུག་པའི་རྒུན་ཆང་དྭངས་མོ་དང་འདྲ་བའི་མི་ཞེས་པ་ནི་རང་བློ་ཚིམས་པའི་མི་རྣམས་ལ་གོ་བ་དང་། དེ་རྣམས་ཀྱིས་ཐ་ན་རྒུན་ཆང་གི་སྙིགས་རོ་ཡང་མི་བཙག་སྟེ། བཟང་ངན་གང་ཡིན་བསྲེས་ནས་འཇོག་པའི་དོན་ཡིན། \f*རྣམས་ལ་ཉེས་ཆད་གཅོད་པ་དང་། མི་དེ་དག་གིས་སེམས་སུ་དཀོན་མཆོག་ཡ་ཝཱེས་བྱིན་རླབས་མི་གནང་ལ། གནོད་འཚེ་ཡང་མི་མཛད་སྙམ་པ་ཡིན།  
\v 13 དེ་དག་གི་རྒྱུ་ནོར་ནི་བཅོམ་ནོར་དུ་འགྱུར་ཞིང་། དེ་དག་གི་ཁང་པ་རྣམས་ཞིག་རོར་ལུས་པ་དང་། དེ་དག་གིས་ཁང་པ་བརྩིགས་ཀྱང་དེའི་ནང་དུ་སྡོད་མི་ཐུབ་ལ། རྒུན་འབྲུམ་ར་བ་བཙུགས་ཀྱང་དེས་བསྙལ་བའི་རྒུན་ཆང་འཐུང་མི་ཐུབ་བོ། །   
\p
\v 14 དཀོན་མཆོག་ཡ་ཝཱེའི་ཉིན་ཆེན་པོ་དེ་སླེབས་ལ་ཉེ་ཞིང་མྱུར་དུ་སླེབ་ངེས་ཡིན། དཀོན་མཆོག་ཡ་ཝཱེའི་དུས་ལ་སྡུག་བསྔལ་ཆེ་ཞིང་། ཉིན་དེར་དཔའ་བོ་རྣམས་ཀྱིས་ཀྱང་ངུ་འབོད་བྱེད་པར་འགྱུར།  
\v 15 ཉིན་མོ་དེ་ནི་ཐུགས་ཁྲོ་བའི་ཉིན་མོ་དང་། སྡུག་བསྔལ་དང་དཀའ་ཚེགས་ཀྱི་ཉིན་མོ། ཉམས་རྒུད་དང་སྐྱོ་སྣང་གི་ཉིན་མོ། མུན་ནག་དང་སྨག་རུམ་གྱི་ཉིན་མོ། སྤྲིན་ནག་དང་མུན་པའི་ཉིན་མོ།  
\v 16 དམག་དུང་འབུད་ཅིང་ངར་སྐད་སྒྲོག་པའི་ཉིན་མོ་བཅས་ཡིན་པ་དང་། མཁར་བརྟན་པོ་དང་ལྕོག་མཁར་མཐོན་པོ་རྣམས་ལ་རྒོལ་བར་འགྱུར་རོ། །  
\v 17 ངས་མི་ཐམས་ཅད་ལ་སྡུག་བསྔལ་མྱང་དུ་འཇུག་ཅིང་། ཁོ་རྣམས་ལོང་པ་བཞིན་དུ་སྐྱོད་པར་བྱ་སྟེ། ཅིའི་ཕྱིར་ཞེ་ན། ཁོ་ཚོས་བདག་ལ་འགལ་བའི་སྡིག་པ་བྱས་པས་སོ། །ཁོ་ཚོའི་ཁྲག་ནི་ས་རྡུལ་བཞིན་ཕྱིར་ལྡུག་ཅིང་། ཁོ་ཚོའི་ལུས་པོ་ནི་བཙོག་པ་བཞིན་འདོར་བར་འགྱུར།  
\v 18 དཀོན་མཆོག་ཡ་ཝཱེ་ཐུགས་ཁྲོ་བའི་ཉིན་མོ་ལ། ཁོ་ཚོའི་གསེར་དངུལ་གྱིས་ཁོ་ཚོ་སྐྱོབ་མི་ནུས། ས་གཞི་ཐམས་ཅད་ཁོང་གི་ཕྲག་དོག་གི་མེ་ལྕེ་ཡིས་ཁྱུར་མིད་གཏོང་ངེས་ཏེ། ཅིའི་ཕྱིར་ཞེ་ན། ཁོང་གིས་ས་གཞིའི་སྟེང་གི་མི་སྡེ་ཐམས་ཅད་རྩ་བ་ནས་མེད་པར་མཛད་ཅིང་། དེ་ནི་ཤིན་ཏུ་འཇིགས་ཆེ་བའི་ཚར་གཅོད་ཡིན་ནོ་ཞེས་གསུངས་སོ། །   
\c 2
\cl ལེའུ་གཉིས་པ། 
\toc1 ༄༅། །ལུང་སྟོན་པ་ཟེ་ཕན་ཡཱའི་མདོ། 
\toc2 ཟེ་ཕན་ཡཱ། 
\s1 དུས་ཐོག་ཏུ་འགྱོད་བཤགས་བྱེད་པར་བསྐུལ་བ།  
\p
\v 1 ཀྱེ་ངོ་ཚ་མེད་པའི་མི་སྡེ། ཁྱོད་རྣམས་མཉམ་དུ་འདུས་ཤིག མཉམ་དུ་འདུས་ཤིག  
\v 2 བཀའ་མ་བབས་པའི་སྔོན་དང་། ཉིན་མོ་ནི་རླུང་གིས་འཁྱེར་བའི་ཕུབ་མ་བཞིན་དུ་མ་འདས་སྔོན། དཀོན་མཆོག་ཡ་ཝཱེའི་ཁྲོ་གཏུམ་ཁྱོད་ཅག་གི་སྟེང་དུ་མ་བབས་པའི་སྔོན། དཀོན་མཆོག་ཡ་ཝཱེའི་ཐུགས་ཁྲོ་བའི་ཉིན་མོ་ཁྱོད་ཅག་གི་ཐོག་ཏུ་མ་སླེབས་པའི་སྔོན་དུ་ཁྱོད་རྣམས་འདུས་ཤིག  
\v 3 ཀྱེ་དཀོན་མཆོག་ཡ་ཝཱེའི་སྒྲིག་སྲོལ་རྣམས་སྲུང་བའི་ས་སྟེང་གི་མི་ཁེངས་སྐྱུང་ཅན་རྣམས། ཁྱོད་རྣམས་ཀྱིས་དཀོན་མཆོག་ཡ་ཝཱེ་ཚོལ་ཞིག ཁྱོད་རྣམས་ཀྱིས་དྲང་བདེན་དང་གུས་ཞབས་ཚོལ་ཞིག དེ་ནས་དཀོན་མཆོག་ཡ་ཝཱེ་ཐུགས་ཁྲོ་བའི་ཉིན་མོར་ཁྱོད་རྣམས་གཡོལ་ཐུབ་ཀྱང་སྲིད།  
\v 4 གཱ་ཟཱ་འདོར་ཞིང་ཨ་ཤཱ་ཀེ་ལོན་སྟོང་བར་འགྱུར། ཨ་སི་དོད་ཀྱི་མི་སྡེ་ནི་ཉིན་གུང་གི་དུས་སུ་ཕྱིར་སྐྲོད་པ་དང་། ཨེག་རོན་ནི་རྩ་བ་ནས་འདོན་པར་འགྱུར་རོ། །  
\v 5 མཚོ་རྒྱུད་ས་ཁུལ་དུ་སྡོད་པའི་མི་སྟེ་ཀེ་རེད་པའི་མི་རྣམས། ཁྱོད་རྣམས་ལ་ཆག་སྒོ་འབྱུང་། ཀྱེ་ཕེ་ལེ་ཤེད་ཀྱི་ཡུལ་ཀ་ན་ཨན། དཀོན་མཆོག་ཡ་ཝཱེས་འདི་སྐད་གསུངས་ཏེ། ངས་ཁྱོད་མེད་པར་བྱེད་ཅིང་ཁྱོད་ཀྱི་གནས་སུ་འདུག་མཁན་མེད་ཅེས་པའོ། །  
\v 6 མཚོ་རྒྱུད་ས་ཁུལ་ནི་རྩྭ་ཐང་དུ་འགྱུར་ཞིང་། དེར་ལུག་རྫིའི་འདུག་ས་དང་ལུག་ཁྱུའི་ལྷས་ར་ཡོད་པ་ཡིན།  
\v 7 ཡུལ་དེ་ནི་ཡ་ཧུ་དཱ་ཁྱིམ་རྒྱུད་ཀྱི་ལྷག་ལུས་རྣམས་ལ་དབང་ཞིང་། དེ་དག་གིས་ཡུལ་དེ་རུ་ར་ལུག་འཚོ་བ་དང་། མཚན་མོར་དེ་དག་ཨ་ཤཱ་ཀེ་ལོན་གྱི་ཁང་པ་ནང་དུ་ཉལ་བར་འགྱུར། ཅིའི་ཕྱིར་ཞེ་ན། ཁོ་ཚོའི་དཀོན་མཆོག་ཡ་ཝཱེས་ཁོ་ཚོར་གཟིགས་སྐྱོང་མཛད་དེ། ཁོ་རྣམས་བཙོན་དུ་ཁྲིད་པའི་གནས་ལས་ཕྱིར་ལོག་པར་མཛད་དོ། །   
\s1 མོ་ཨབ་དང་ཨམ་མོན་གཉིས་ལ་ཉེས་ཆད་གཅོད་པ།  
\p
\v 8 ངས་མོ་ཨབ་པའི་འཕྱ་སྨོད་བྱེད་པའི་སྐད་དང་། ཨམ་མོན་པའི་དམའ་འབེབས་བྱེད་པའི་སྒྲ་ཐོས་ཏེ། ཁོ་ཚོས་ངའི་འབངས་མི་ལ་སྨད་ནས་དེའི་མངའ་ཁོངས་སུ་བཙན་འཛུལ་བྱེད་པའི་འཇིགས་སྐུལ་བས་ན།  
\v 9 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། བདག་གིས་རང་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བ་སྟེ། མོ་ཨབ་ནི་སཱ་དོམ་ལྟ་བུ་དང་། ཨམ་མོན་པ་ནི་གཱ་མོ་ར་ལྟར་ཐམས་ཅད་ལྗང་ཚེར་དང་ཚྭ་དོང་། གཏན་དུ་སྟོངས་པའི་གནས་སུ་འགྱུར་ཞིང་། ངའི་འབངས་མི་ལྷག་ལུས་རྣམས་ཀྱིས་དེ་དག་བཅོམ་ནས། ངའི་རྒྱལ་ཁམས་ནང་གི་ལྷག་ལུས་རྣམས་ལ་དེ་དག་གི་ཡུལ་ནོར་སྐལ་དུ་འཐོབ་པར་འགྱུར།  
\v 10 དེ་དག་ང་རྒྱལ་ཆེ་ཞིང་རང་རློམ་ཆེན་པོས་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་འབངས་མི་ལ་འཕྱ་སྨོད་བྱས་པས་དོན་དེ་ཁོ་ཚོའི་སྟེང་དུ་འབྱུང་ངེས་ཡིན།  
\v 11 ཁོ་ཚོར་མཚོན་ན་དཀོན་མཆོག་ཡ་ཝཱེ་ནི་འཇིགས་སུ་རུང་བ་ཡིན་ཏེ། ཅིའི་ཕྱིར་ཞེ་ན། ཁོང་གིས་ས་སྟེང་གི་ལྷ་རྣམས་རིད་པར་མཛད་ཅིང་། དེའི་དུས་སུ་ཡུལ་ཁམས་ཀུན་གྱི་གླིང་ཕྲན་སྟེང་གི་མི་རིགས་རྣམས་ཀྱིས་རང་རང་གི་ཡུལ་ནས་ཁོང་ལ་ཕྱག་འཚལ་བར་འགྱུར་རོ། །   
\p
\v 12 ཀྱེ་གུ་ཤ་པ་རྣམས། ཁྱོད་རྣམས་ཀྱང་ངའི་རལ་གྲིས་འགུམ་པར་འགྱུར་ཏེ།  
\v 13 ཡ་ཝཱེས་ཕྱག་བརྐྱངས་ཏེ་བྱང་ཕྱོགས་ལ་རྒོལ་ནས་ཨ་སུར་མེད་པར་མཛད་ཅིང་། ནིན་ཝེ་སྟོངས་པར་གྱུར་ནས་སྐམ་ཞིང་དབེན་སྟོང་དུ་ལུས་ཡོང་།  
\v 14 ཕྱུགས་ཁྱུ་དང་རི་དྭགས་སྣ་ཚོགས་ནི་དེའི་ནང་དུ་ཉལ་བར་འགྱུར་ཞིང་། འུག་པ་དང་རྒང་ནི་ཀ་བའི་རྩེ་མོར་གནས་ལ། སྒེའུ་ཁུང་ནང་དུ་བྱིའུས་སྐད་སྒྲ་སྒྲོག་པ་དང་། སྒོ་ཐེམ་རྣམས་ཆག་ནས་ཤུག་ཤིང་རྩ་ནས་འགོག་པར་འགྱུར་རོ། །  
\v 15 འདི་ནི་དགའ་སྤྲོ་དང་བཅས་བདེ་བར་གནས་པའི་གྲོང་ཁྱེར་ཡིན་ཏེ། སྔར་དེའི་སེམས་སུ་ང་རང་ཁོ་ན་སྟེ། ང་མ་གཏོགས་གཞན་གང་ཡང་མེད་སྙམ་པ་ཡིན། ཡིན་ན་ཡང་ད་ལྟ་དེ་ནི་དབེན་སྟོང་དང་རི་དྭགས་ཉལ་སའི་གནས་སུ་གྱུར་པ་ཅི་ཡིན་ནམ། གནས་དེ་བརྒྱུད་ནས་འགྲོ་མཁན་ཐམས་ཅད་ཀྱིས་ལག་པ་གཡུགས་ནས་འཕྱ་བར་འགྱུར།   
\c 3
\cl ལེའུ་གསུམ་པ། 
\toc1 ༄༅། །ལུང་སྟོན་པ་ཟེ་ཕན་ཡཱའི་མདོ། 
\toc2 ཟེ་ཕན་ཡཱ། 
\s1 ཡེ་རུ་སཱ་ལེམ་གྱི་སྡིག་པ།  
\p
\v 1 གྱེན་ལོག་དང་མི་གཙང་བ། མི་ལ་གཉའ་གནོན་བྱེད་པ་བཅས་ཀྱི་གྲོང་ཁྱེར་འདི་ལ་ཆག་སྒོ་འབྱུང་།  
\v 2 དེས་བཀའ་ལ་མི་མཉན་ལ། བསླབ་བྱ་དང་དུ་མི་ལེན་ཞིང་། དཀོན་མཆོག་ཡ་ཝཱེར་མི་བརྟེན་ལ། རང་གི་དཀོན་མཆོག་དང་ཉེ་བར་ཡང་མི་བྱའོ། །  
\v 3 གྲོང་ཁྱེར་ནང་གི་འགོ་དཔོན་རྣམས་ནི་ངར་སྐད་སྒྲོག་པའི་སེང་གེ་དང་། གྲོང་ཁྱེར་ནང་གི་ཁྲིམས་དཔོན་རྣམས་ནི་མཚན་མོའི་འཕར་སྤྱང་ཡིན་ཏེ། ཞོགས་པའི་བར་དུ་ཅི་ཡང་ལུས་པར་མི་བྱ།  
\v 4 གྲོང་ཁྱེར་ནང་གི་ལུང་སྟོན་པ་རྣམས་ནི་བླང་དོར་མི་ཤེས་པ་དང་གཡོ་སྒྱུ་ཅན་ཡིན་ལ། གྲོང་ཁྱེར་ནང་གི་མཆོད་དཔོན་རྣམས་ཀྱིས་དམ་པའི་གནས་མི་གཙང་བར་བྱས་ནས་བཀའ་ཁྲིམས་དང་འགལ་བའོ། །  
\v 5 དཀོན་མཆོག་ཡ་ཝཱེ་ནི་གྲོང་ཁྱེར་ནང་དུ་དྲང་བདེན་ཡིན་པས། དྲང་བདེན་མིན་པའི་དོན་ནི་གཏན་ནས་མི་མཛད། ཁོང་གིས་ཞོགས་པ་རེ་རེར་དྲང་བདེན་མངོན་ཞིང་ནམ་ཡང་མཚམས་མ་ཆད། ཡིན་ཡང་དྲང་བདེན་མིན་པའི་མི་ལ་ངོ་ཚ་མེད་དོ། །  
\v 6 ང་ཡ་ཝཱེས་མི་རིགས་ཐམས་ཅད་ཚར་དུ་བཅད་པ་དང་། དེ་དག་གི་ལྕོག་མཁར་རྣམས་གཏོར་བར་གྱུར། ངས་དེ་དག་གི་སྲང་ལམ་རྣམས་སྟོངས་སུ་བཅུག་ཅིང་དེ་བརྒྱུད་ནས་འགྲོ་མཁན་མེད་ལ། དེ་དག་གི་གྲོང་ཁྱེར་སྟོང་བར་བསྐྱུར་ནས་མི་གཅིག་ཀྱང་མེད། དེར་འདུག་མཁན་ཡང་མེད་དོ། །  
\v 7 དེ་ནས་ངས་འདི་སྐད་དུ། ཁྱོད་རང་བདག་ལ་གུས་ཤིང་འཇིགས་པ་དང་བསླབ་བྱ་དང་དུ་བླངས་ན། ཁྱོད་ཀྱི་སྡོད་གནས་ནི་ངས་སྔར་ཐག་གིས་བཅད་པ་བཞིན་ཚར་དུ་མི་གཅོད་ཅེས་སྨྲས་པ་ཡིན། ཡིན་ནའང་ཁྱོད་ཅག་གིས་ཞོགས་པ་སྔ་མོ་ནས་བཟུང་སྒོ་ཀུན་ནས་རང་ཉིད་རང་གིས་བརླག་པ་ཡིན་ནོ། །  
\v 8 ཡང་དཀོན་མཆོག་ཡ་ཝཱེས་འདི་སྐད་དུ། དེ་བས་ཁྱོད་རྣམས་ཀྱིས་ང་ལ་སྒུགས་དང་། ང་ཡར་ལངས་ནས་འཕྲོག་བཅོམ་བྱེད་པའི་ཉིན་དེ་ལ་སྒུགས་དང་། ངས་མི་རིགས་ཐམས་ཅད་དང་ཡུལ་ཁམས་ཀུན་བསྡུ་བར་ཐག་བཅད་དེ། ངའི་ཁོང་ཁྲོ་སྟེ་ཁོང་ཁྲོ་ཆེན་པོ་ནི་ཡོངས་སུ་དེ་དག་གི་སྟེང་དུ་ལྡུག་པར་བྱའོ། །ཅིའི་ཕྱིར་ཞེ་ན། ས་གཞི་ཡོངས་ནི་ངའི་ཞེ་སྡང་གི་མེ་ཡིས་ཁྱུར་མིད་གཏོང་བར་འགྱུར་བས་སོ། །  
\v 9 དེའི་དུས་སུ་མི་སྡེ་ཀུན་ལ་དཀོན་མཆོག་ཡ་ཝཱེའི་མིང་ལ་ཞུ་བ་བྱེད་པ་དང་། བློ་གཅིག་སེམས་གཅིག་གིས་ང་ལ་ཞབས་ཕྱི་བྱེད་དུ་འཇུག་པའི་ཕྱིར། བདག་གིས་མི་སྡེ་ཀུན་ལ་ངག་གཙང་མ་ཞིག་ཡོད་པར་བྱའོ། །  
\v 10 དེ་ནས་བདག་གིས་ཁ་ཐོར་དུ་འགྲོ་རུ་བཅུག་པའི་མི་སྟེ། ང་ལ་གསོལ་བ་འདེབས་པའི་མི་རྣམས་ནི་གུ་ཤ་གཙང་པོའི་ཕ་རོལ་ནས་འོངས་ཏེ། ང་ལ་ཞུ་རྟེན་འབུལ་བར་འགྱུར།  
\v 11 ཉིན་མོ་དེ་སླེབས་ཚེ། ཁྱོད་ནི་བདག་དང་འགལ་བའི་སྡིག་པ་ཀུན་གྱི་ཕྱིར་ངོ་ཚ་མི་དགོས་ཏེ། ཅིའི་ཕྱིར་ཞེ་ན། དུས་དེར་བདག་གིས་ཁྱོད་ཀྱི་ནང་གི་མི་རང་རློམ་ཅན་དང་ང་རྒྱལ་ཆེ་བ་རྣམས་ཚར་དུ་གཅོད་ཅིང་། བདག་གི་རི་བོ་དམ་པའི་སྟེང་དུ་ཁྱོད་ཡང་བསྐྱར་ང་རྒྱལ་སྐྱེ་བར་མི་འགྱུར་རོ། །  
\v 12 ཡིན་ནའང་བདག་གིས་ཁྱོད་ནང་གི་མི་ཁེངས་སྐྱུང་ཅན་དང་སྙེམས་ཆུང་རྣམས་ལུས་པར་བྱ་སྟེ། དེ་དག་ནི་དཀོན་མཆོག་ཡ་ཝཱེའི་མིང་ལ་བརྟེན་པར་འགྱུར།  
\v 13 དེ་ནས་ཡེས་ར་ཨེལ་གྱི་ལྷག་ལུས་རྣམས་ཀྱིས་སྡིག་ཉེས་མི་སྤྱོད་ལ། རྫུན་ཡང་མི་སྨྲ་ཞིང་། ཁོ་ཚོའི་སྨྲ་སྒོར་གཡོ་སྒྱུའི་ལྕེ་ཡང་མེད་པ་དང་། ཁོ་རྣམས་ཀྱིས་བཟའ་བཏུང་སྤྱད་ནས་བདེ་བར་གནས་ཤིང་འཇིགས་སྐུལ་མཁན་མེད་དོ། །   
\s1 དགའ་སྤྲོའི་མགུར་གླུ།  
\p
\v 14 ཀྱེ་ཛ་ཡན་གྱི་བུ་མོ། ཁྱོད་རྣམས་ཀྱིས་སྐད་གསང་མཐོན་པོས་མགུར་གླུ་ལོངས་ཤིག ཀྱེ་ཡེས་ར་ཨེལ། ཁྱོད་ཀྱིས་དགའ་འབོད་གྱིས་ཤིག ཀྱེ་ཡེ་རུ་སཱ་ལེམ་གྱི་མི་སྡེ་རྣམས། ཁྱོད་རྣམས་ཀྱི་སེམས་སུ་དགའ་སྤྲོས་ཁེངས་པར་གྱིས་ཤིག  
\v 15 དཀོན་མཆོག་ཡ་ཝཱེས་ཁྱོད་རྣམས་ཀྱི་ཉེས་ཆད་མེད་པར་མཛད་དེ། ཁྱོད་ཅག་གི་དགྲ་རྣམས་ཕྱི་རུ་བསྐྲད་པ་ཡིན། ཀྱེ་ཡེས་ར་ཨེལ་གྱི་རྒྱལ་པོ་ཡ་ཝཱེ་ཁྱོད་ཀྱི་ནང་དུ་བཞུགས་པས། ད་ནི་ཁྱོད་རྣམས་གནོད་འཚེ་ལ་འཇིགས་པར་མི་འགྱུར།  
\v 16 ཉིན་མོ་དེ་སླེབས་ཚེ། མི་ཡིས་ཡེ་རུ་སཱ་ལེམ་ལ་འདི་ལྟར། ཀྱེ་ཛ་ཡན་ལགས། མ་འཇིགས་ཤིག ཁྱོད་ཀྱི་ལག་ཤེད་ཉམས་པར་མ་བྱེད་ཅིག  
\v 17 ཁྱོད་དང་མཉམ་དུ་བཞུགས་པའི་དཀོན་མཆོག་ཡ་ཝཱེ་ནི་ནུས་མཐུ་ཆེན་པོ་ལྡན་པའི་སྐྱབས་མགོན་ལགས་ཏེ། ཁོང་ནི་ཁྱོད་ཀྱི་དབང་གིས་ཐུགས་དགྱེས་པར་འགྱུར་ཞིང་། ཁྱོད་ལ་ཤིན་ཏུ་བྱམས་ཏེ། ཁྱོད་ཀྱི་ཕྱིར་དུ་དགྱེས་ཤིང་མགུར་གསུངས་པ་ཡིན།  
\v 18 ཁྱོད་ལ་གཏོགས་ཤིང་འདུ་ཚོགས་ལ་ཡིད་སྨོན་ཤོར་ནས་ཡིད་སྐྱོ་བ་དང་། ཁྱོད་ཀྱི་ངོ་ཚ་ཁུར་བ་རྣམས་ནི་ངས་བསྡུ་བར་བྱའོ། །  
\v 19 ལྟོས་ཤིག དེའི་དུས་སུ་ངས་ཁྱོད་སྡུག་ལ་གཏད་པའི་མི་རྣམས་ལ་ལན་འཇལ་ཞིང་། རྐང་པ་ཞ་བོ་ཡིན་པའི་མི་རྣམས་བསྐྱབས་ནས་ཕྱིར་བསྐྲད་པའི་མི་རྣམས་བསྡུས་ཏེ། ངས་ས་གཞི་ཡོངས་ནས་ངོ་ཚ་ཐེབས་པའི་མི་རྣམས་ལ་བསྟོད་པ་འཐོབ་པ་དང་མཚན་སྙན་ལྡན་པར་བྱའོ། །  
\v 20 དེའི་དུས་སུ་ངས་ཁྱོད་རྣམས་ཕྱིར་འཁྲིད་འོང་ཞིང་ཁྱོད་རྣམས་མཉམ་དུ་བསྡུས་ནས། ངས་བཙོན་དུ་ཁྲིད་པ་ཁྱོད་རྣམས་ཕྱིར་ལོག་ཏུ་འཇུག་པའི་ཚེ། ས་སྟེང་གི་མི་སྡེ་ཀུན་གྱི་ཁྲོད་དུ་ཁྱོད་རྣམས་ལ་མཚན་སྙན་ལྡན་ཞིང་བསྟོད་པ་འཐོབ་པར་བྱའོ་ཞེས་དཀོན་མཆོག་ཡ་ཝཱེས་གསུངས་སོ།། །།