\id TIT - NTB བོད་འགྱུར་གསར་མ། 
\h ཐེ་ཏུ། 
\toc1 ༄༅། །ཐེ་ཏུ་ལ་སྤྲིངས་པའི་འཕྲིན་ཡིག 
\toc2 ཐེ་ཏུ། 
\mt1 ༄༅། །ཐེ་ཏུ་ལ་སྤྲིངས་པའི་འཕྲིན་ཡིག  
\imt1 ཐེ་ཏུ་ལ་སྤྲིངས་པའི་འཕྲིན་ཡིག་གི་ངོ་སྤྲོད་མདོར་བསྡུས།  
\is1 ཁ་བྱང་དང་ལོ་རྒྱུས་རྒྱབ་ལྗོངས།  
\ipi ཕོལ་ལོལ་ཁོང་ཉིད་ཨན་ཏི་ཡོག་ཡཱ་གྲོང་ཁྱེར་དང་ཁ་གྱེས་ཏེ་ཡེ་རུ་སཱ་ལེམ་གྱི་ཆོས་དཔོན་རྣམས་དང་ལྷན་དུ་འཕྲིན་བཟང་གི་སྐོར་ལ་གྲོས་མོལ་བྱེད་པར་འགྲོ་དུས་ཐེ་ཏུ་ཁྲིད་ནས་སོང་། གཅིག་བྱས་ན་ཐེངས་གསུམ་པར་ཆོས་སྤེལ་དུ་འགྲོ་སྐབས། མཛད་འཕྲིན་གྱི་གཞུང་གི་ནང་དུ་གནས་ཚུལ་བཀོད་མེད་ཀྱང་ཐེ་ཏུ་ཡིས་ཨེ་ཕེ་སི་གྲོང་ཁྱེར་ནས་ཕོལ་ལོལ་དང་མཉམ་དུ་ལས་དོན་བསྒྲུབས་པ་དང་། གྲོང་ཁྱེར་དེ་ནས་ཕོལ་ལོལ་གྱིས་ཐེ་ཏུ་ཞེས་བྱ་བ་ཀོ་རིན་ཐུ་ལ་མངགས་ནས་ཆོས་ཚོགས་དེའི་ལས་དོན་བསྒྲུབ་པར་རོགས་རམ་བྱེད་དུ་བཅུག དེ་ནས་ཕོལ་ལོལ་ནི་རོ་མཱ་གྲོང་ཁྱེར་ནས་ཐེངས་དང་པོར་བཙོན་ནས་གློད་གྲོལ་བཏང་བ་དང་། ཁོང་གཉིས་ཀྱིས་ཀཱ་རེ་ཏ་གླིང་ཕྲན་ནས་དུས་ཡུན་ཅུང་རིང་པོར་ལས་དོན་བསྒྲུབས་རྗེས་ཡུལ་དེར་ཁོང་གིས་ཐེ་ཏུ་འཐུས་ཚབ་ཏུ་བསྐོས་ནས་འགྲུབ་དགོས་པའི་བྱ་བ་རྣམས་བསྒྲུབ་ཏུ་བཅུག  
\is1 ཡི་གེར་འགོད་མཁན་དང་འགོད་དུས།  
\ipi འཕྲིན་ཡིག་འདི་ཕོལ་ལོལ་གྱིས་སྤྱི་ལོ་64ལོའི་ཡས་མས་སུ་ཀོ་རིན་ཐུ་གྲོང་ཁྱེར་ནས་ཐེ་ཏུ་ལ་བྲིས་པ་ཡིན།  
\is1 བརྗོད་སྙིང་དང་གསུང་འཕྲིན།  
\ipi ཕོལ་ལོལ་གྱིས་རང་ཉིད་ཀྱི་དབང་ཆ་ཐེ་ཏུ་ལ་སྤྲད་ཅིང་། ཐེ་ཏུ་ལ་ལམ་སྟོན་བྱས་པ་བརྒྱུད་ནས་ངོ་རྒོལ་བྱེད་མཁན་རྣམས་ལ་གདོང་ལེན་ཇི་ལྟར་བྱེད་དགོས་པ་དང་། དད་པའི་སེམས་དང་སྤྱོད་ལམ་སྐོར་ནས་སློབ་སྟོན་གནང་ཞིང་། ཡང་དགེ་རྒན་རྫུས་མ་རྣམས་ལ་ཉེན་བརྡ་ཇི་ལྟར་གཏོང་དགོས་པ་བཅས་ཀྱི་ཕྱོགས་ནས་འཕྲིན་ཡིག་འདི་བྲིས་པ་ཡིན། ཕོལ་ལོལ་གྱིས་ཐེ་ཏུ་ལ་བཅངས་པའི་འབྱུང་འགྱུར་གྱི་འཆར་གཞི་རྣམས་ཀྱི་གནས་ཚུལ་ཡང་བཀོད་ཡོད།  
\is1 འཆར་ཟིན།  
\ipi 1. རྒན་པོ་རྣམས་ཀྱི་སྐོར། ༼1:1-9༽  
\ipi 2. དགེ་རྒན་རྫུས་མའི་རིགས། ༼1:10-16༽  
\ipi 3. ཆོས་ཚོགས་སོ་སོར་སློབ་སྟོན་གནང་བའི་སྐོར། ༼2:1-15༽  
\ipi 4. དད་ལྡན་རྣམས་ཀྱི་སྐོར། ༼3:1-8༽  
\ipi 5. སེམས་ཀྱི་ནོར་འཁྲུལ་སྣ་ཚོགས་ཀྱི་སྐོར། ༼3:9-15༽  
\c 1
\cl ལེའུ་དང༌པོ། 
\toc1 ༄༅། །ཐེ་ཏུ་ལ་སྤྲིངས་པའི་འཕྲིན་ཡིག 
\toc2 ཐེ་ཏུ། 
\s1 འཕྲིན་ཡིག་བསྐུར༌ཡུལ།  
\p
\v 1 དེ་ཡང་ཕོལ་ལོལ་བདག་ནི་དཀོན་མཆོག་གི་ཞབས་ཕྱི་པ་དང་ཡེ་ཤུ་མཱ་ཤི་ཀའི་སྐུ་ཚབ་པ་ཞིག་ཡིན༌ལ། དེ་ནི་དཀོན་མཆོག་གི་བདམས་པའི་མི་རྣམས་ཀྱི་དད་པ་དང༌། དད་གུས་བྱས་པ་བཞིན་དུ་བདེན་པ་ཉིད་རྟོགས་པ་ལ་བརྟེན༌ནས།  
\v 2 ཞལ་རྫུན་མི་གསུང་བའི་དཀོན་མཆོག་གིས་དུས་ཀྱི་སྔ་རོལ་ནས་ཞལ་བཞེས་གནང་བའི་མཐའ་མེད་པའི་ཚེ་སྲོག་དེ་ཉིད་འཐོབ་པར་རེ་བ་བཅངས་པ༌དང༌།  
\v 3 དུས་ལ་བབས་པ་ན། ཆོས་སྒྲོག་པ་བརྒྱུད་ནས་དཀོན་མཆོག་གི་བཀའ་དེ་མངོན་པར་མཛད༌ཅིང༌། ཆོས་བསྒྲག་པའི་ལས་འགན་ནི་བདག་ཅག་གི་སྐྱབས་མགོན་ཏེ་དཀོན་མཆོག་གི་བཀའ་བཞིན་དུ་བདག་ལ་བཅོལ་བ་ཡིན༌ནོ།།   
\p
\v 4 ད་ལྟ་འཕྲིན་ཡིག་འདི་ནི་བདག་ཅག་ཐུན་མོང་གི་དད་པ་བཞིན། བདག་གི་བུ་དངོས་སུ་གྱུར་པ་ཐེ་ཏུ་ལ་སྤྲིངས༌ཤིང༌། ཡབ་དཀོན་མཆོག་དང་བདག་ཅག་གི་སྐྱབས་མགོན་མཱ་ཤི་ཀ་ཡེ་ཤུ་ནས་ཁྱོད་ལ་ཐུགས་རྗེ་དང་ཞི་བདེ་འཐོབ་པར༌སྨོན།   
\s1 ཐེ་ཏུའི་ལས་འགན༌སྐོར།  
\p
\v 5 བདག་གིས་སྔོན་ཆད་ཁྱོད་རང་ཀཱ་རེ་ཏ་རུ་བསྐྱུར་དོན༌ནི། བསྒྲུབས་མ་ཚར་བའི་བྱ་བ་རྣམས་ལེགས་པར་བསྒྲུབ་པ༌དང༌། བདག་གིས་ཁྱོད་ལ་ཁ་བསྒོ་བཏང་བ་བཞིན་གྲོང་བརྡལ་རེ་རེ་ནས་ཆོས་ཚོགས་ཀྱི་རྒན་པོ་རྣམས་བསྐོ་བར་བྱེད་པའི་ཕྱིར༌ཡིན་ནོ།།  
\v 6 རྒན་པོ་ནི་སྐྱོན་བརྗོད་རྒྱུ་ཅི་ཡང་མེད་ལ་ཆུང་མ་གཅིག་ཁོ་ནའི་ཁྱོ་ག་ཡིན་པ༌དང༌། ཁོའི་བུ་ཕྲུག་རྣམས་ལ་དད་པ་ཡོད་པ༌ལས། བག་མེད་རྣམ་གཡེང་དང་ངག་ལ་མི་ཉན་མཁན་ཞིག་རེད་ཅེས་གཏུག་མཁན་མེད་པ་ཞིག་ཡིན་དགོས་སོ།།  
\v 7 ཅིའི་ཕྱིར་ཞེ་ན། དོ་དམ་པ་ནི་དཀོན་མཆོག་གི་གཉེར་པ་ཡིན་ལ། ངེས་པར་སྐྱོན་བརྗོད་རྒྱུ་ཅི་ཡང་མེད་པ༌དང༌། ཨུ་ཚུགས་མེད༌པ། ཁྲོ་སླ་བོ་མེད༌པ། ཆང་རག་འཐུང་བར་མི་རྔམ༌པ། མི་ལ་གཅར་རྡུང་མི་བྱེད༌པ། རྒྱུ་ནོར་མི་གཙང་བ་ལ་མི་རྔམ༌པ།  
\v 8 མགྲོན་པོ་བསུ་བར་དགའ༌བ། ལས་བཟང་པོར་དགའ༌བ། བག་ཡོད༌པ། གཞུང་དྲང༌བ། དམ་པ་ཡིན༌པ། རང་ཚོད་ཟིན༌པ།  
\v 9 ཡང་དག་པའི་བསྟན་པ་ལ་བརྟེན་ནས་མི་རྣམས་ལ་སྐུལ་སློང་བྱེད་པ༌དང༌། རྒོལ་ལན་སློག་མཁན་གྱི་སྨྲ་སྒོ་གཅོད་ཐུབ་པའི་ཕྱིར། ཆོས་གསུངས་པ་བཞིན་ཡིད་རྟོན་རུང་བའི་བཀའ་བརྟན་པོར་སྲུང་བ་བཅས་ཡིན་དགོས༌སོ།།  
\v 10 རྒྱུ་མཚན་ནི་ངོ་རྒོལ་བྱེད་ཅིང་འཆལ་གཏམ་སྨྲ་བ་དང་མི་ལ་མགོ་སྐོར་གཏོང་མཁན་ཡང་མང་དུ་ཡོད༌ལ། མཚན་སྐྱི་བཅད་པ་རྣམས་ནི་ལྷག་ཏུ་དེ་འདྲ་ཡིན་པའི་ཕྱིར༌རོ།།  
\v 11 དེ་རྣམས་ཀྱིས་ལྐོག་རྔན་གྱི་རྒྱུ་ནོར་འཐོབ་པའི་ཆེད༌དུ། སློབ་སྟོན་བྱེད་མི་རུང་བ་དེའང་མི་གཞན་ལ་སྨྲ་ཞིང༌། ཁྱིམ་ཚང་གང་བོར་གནོད་བསྐྱལ་བས་དེ་རྣམས་ཀྱི་སྨྲ་སྒོ་གཅོད་དགོས།  
\v 12 དེ་དག་གི་ཁྲོད་ནས་ལུང་སྟོན་པ་ཞིག་ན༌རེ། ཀཱ་རེ་ཏ་པ་རྣམས་ནི་རྟག་ཏུ་རྫུན་སྨྲ་མཁན་དང་གཅན་གཟན་གཏུམ་དྲག་ཅན་ལྟ་བུ་ཡིན༌ལ། ཟས་ལ་རྔམ་ཞིང་ལེ་ལོ་ཅན་ཡིན་ཞེས༌སྨྲས་སོ།།  
\v 13 བདེན་དཔང་དེ་ནི་དོན་དངོས་ཡིན་པས་ཁྱོད་ཀྱིས་དེ་རྣམས་ལ་གཤེ་གཤེ་དྲག་པོ་གཏོང་དགོས་སོ།། དེ་ནི་དེ་དག་ལ་དད་པའི་ཆ་ནས་སྐྱོན་གྱི་དྲི་མས་མ་གོས་པ༌དང༌།  
\v 14 ཡ་ཧུ་དཱ་པའི་ཁུངས་ལུང་མེད་པའི་གཏམ་རྒྱུད་དང་བདེན་པ་ཉིད་དང་ཁ་བྲལ་བ་རྣམས་ཀྱི་ངག་ལ་མི་མཉན་པའི་ཕྱིར༌རོ།།  
\v 15 སྤྱིར་གཙང་མ་ཅན་ལ་དངོས་པོ་ཐམས་ཅད་གཙང་མ་ཡིན༌མོད། འོན་ཀྱང་མི་གཙང་བ་དང་དད་པ་མེད་པའི་མི་ལ་གཙང་བ་གཅིག་ཀྱང་མེད། ཐ་ན་དེ་དག་གི་སེམས་དང་བསམ་པ་ཡང་མི་གཙང༌ངོ་།།  
\v 16 དེ་དག་གིས་དཀོན་མཆོག་ངོ་ཤེས་པ་ཡིན་ཞེས་སྨྲ་ཡང་སྤྱོད་ལམ་གྱི་ཆ་ནས་དཀོན་མཆོག་རིང་དུ་སྤངས་ཤིང་། དེ་དག་ནི་སྐྱུག་བྲོ་བ༌དང༌། བཀའ་ལ་མི་ཉན༌པ། ལས་བཟང་པོ་ཐམས་ཅད་ཀྱི་ཆ་ནས་འདོར་འོས་པ་ཡིན༌ནོ།།   
\c 2
\cl ལེའུ་གཉིས༌པ། 
\toc1 ༄༅། །ཐེ་ཏུ་ལ་སྤྲིངས་པའི་འཕྲིན་ཡིག 
\toc2 ཐེ་ཏུ། 
\s1 ཆོས་ཚོགས་སོ་སོར་སློབ་སྟོན་གནང་བའི༌སྐོར།  
\p
\v 1 དེ་ཡང་ཁྱོད་ཀྱིས་ཡང་དག་པའི་བསྟན་པ་དང་མཐུན་པའི་སྒོ་ནས་སློབ་སྟོན་བྱ་འོས༌ཏེ།  
\v 2 རྒན་པོ་རྣམས་ལ་རང་ཚོད་ཟིན་པ༌དང༌། བཀུར་འོས༌པ། བག་ཡོད་པར་མ༌ཟད། དད་པ༌དང༌། བྱམས༌སེམས། བཟོད་བསྲན་བཅས་ཀྱི་ཆ་ནས་སྐྱོན་ཅི་ཡང་མེད་པར་བསྐུལ་འོས༌སོ།།   
\p
\v 3 ཡང་དེ་བཞིན་དུ་རྒན་མོ་རྣམས་ལའང་སྤྱོད་ལམ་ཚུལ་ལྡན་ཡིན་པ༌དང༌། ཕྲ་མའི་གཏམ་མི་སྨྲ༌བ། ཆང་རག་གི་དབང་དུ་མི་འགྲོ་བ། བསླབ་བྱ་བཟང་པོ་སྟོན་པར་བསྐུལ་འོས་སོ།།  
\v 4 དེ་ནས་ཁོ་མོ་རྣམས་ཀྱིས་ད་གཟོད་བུད་མེད་ན་གཞོན་དག་ལའང་རང་གི་ཁྱོ་ག་དང་བུ་ཕྲུག་ལ་གཅེས་པ༌དང༌།  
\v 5 བག་ཡོད་པ༌དང༌། སྤྱོད་ལམ་གཙང༌བ། ཁྱིམ་ལས་བྱེད༌པ། དྲིན་སྐྱོང་བ། རང་རང་གི་ཁྱོ་ག་དང་བསྟུན་པར་བསྐུལ་ནུས་པ་ཡིན། དེ་ལྟར་བྱས་ན་མི་གཞན་རྣམས་ཀྱིས་དཀོན་མཆོག་གི་བཀའ་ལ་དམའ་འབེབས་བྱེད་པར་མི་འགྱུར༌རོ།།   
\p
\v 6 ཡང་དེ་བཞིན༌དུ་ན་གཞོན་རྣམས་ལ་བག་ཡོད་པར་བསྐུལ་བར༌གྱིས།  
\v 7 ཁྱོད་ཀྱིས་བྱ་བ་ཀུན་ལ་ལས་བཟང་པོའི་མིག་དཔེ་སྟོན་དགོས༌ཏེ། སློབ་སྟོན་གནང་སྐབས་གཞུང་དྲང་བ་དང་བཀུར་འོས༌པ།  
\v 8 གཏམ་བདེན་པར་སྨྲ་ཞིང་སྐྱོན་བརྗོད་རྒྱུ་མེད་པར་གྱིས། དེ་ནས་ངོ་རྒོལ་བྱེད་མཁན་རྣམས་ཀྱིས་བདག་ཅག་ལ་སྐྱོན་བརྗོད་རྒྱུ་མེད་པས་ཁོ་རྣམས་ངོ་གནོང་བར་འགྱུར༌རོ།།   
\p
\v 9 གཡོག་པོ་རྣམས་ལ་རྣམ་པ་ཐམས་ཅད་ནས་རང་རང་གི་བདག་པོའི་བཀའ་བརྩི་བ༌དང༌། བདག་པོ་དགའ་བར་བྱེད༌པ། ཚིག་སློག་མི་རྒྱག་པ།  
\v 10 མ་བྱིན་པར་མི་ལེན་པ། དོན་ཐམས་ཅད་ལ་བློ་སེམས་དཀར་བ་བཅས་ཡིན་པར་བསྐུལ་ཏེ། ཕྱོགས་ཀུན་ནས་བདག་ཅག་གི་སྐྱབས་མགོན་དཀོན་མཆོག་གི་བསྟན་པ་ལ་གཟི་དཔལ་གྱིས་བརྒྱན་པའི་ཕྱིར་རོ།།   
\p
\v 11 ཅིའི་ཕྱིར་ཞེ་ན། མི་ཐམས་ཅད་སྐྱོབ་པར་མཛད་པའི་དཀོན་མཆོག་གི་ཐུགས་རྗེ་ནི་མངོན་སུམ་དུ་བྱུང༌སྟེ།  
\v 12 བདག་ཅག་གིས་དཀོན་མཆོག་ལ་དད་གུས་མི་བྱེད་པའི་སེམས་དང་འཇིག་རྟེན་གྱི་འདོད་ཆགས་སྤོང་བར་བྱེད་པ༌དང༌། བསྐལ་པ་འདིར་བག་ཡོད་པ་དང་གཞུང་དྲང༌བ། དད་གུས་ངང་འཚོ་བ་རོལ་བ་དང་།  
\v 13 བླ་ན་མེད་པའི་དཀོན་མཆོག་སྟེ་བདག་ཅག་གི་སྐྱབས་མགོན་ཡེ་ཤུ་མཱ་ཤི་ཀ་གཟི་བརྗིད་ངང་ནས་མངོན་སུམ་དུ་ཕེབས་ཡོང་བའི་བདེ་སྐྱིད་ལྡན་པའི་རེ་བར་སྒུག༌པའི་ཕྱིར་ཡིན།  
\v 14 བདག་ཅག་ཉེས་པ་ཐམས་ཅད་ནས་བླུ་བ༌དང༌། ཁོང་ཉིད་ལ་དབང་བའི་མི་སྡེ་ལས་བཟང་པོར་བརྩོན་པ་ཞིག་གཙང་མར་མཛད་པའི་ཆེད་དུ། ཁོང་གིས་རང་ཉིད་ཀྱི་ཚེ་སྲོག་ཀྱང་བློས་བཏང་བའོ།།  
\v 15 ཁྱོད་ཀྱིས་རང་གི་དབང་ཐམས་ཅད་ལ་བརྟེན་ནས་དོན་འདི་རྣམས་ཀྱི་སྐོར་མི་རྣམས་ལ་གསལ་པོར་སྟོན་ཞིང་སྐུལ་སློང་བྱེད་པ་དང་ཚིག་ནན་མོ་བརྗོད་དེ། མི་སུ་ལའང་ཁྱོད་ལ་མཐོང་ཆུང་བྱེད་དུ་མི་འཇུག་པར་གྱིས།   
\c 3
\cl ལེའུ་གསུམ༌པ། 
\toc1 ༄༅། །ཐེ་ཏུ་ལ་སྤྲིངས་པའི་འཕྲིན་ཡིག 
\toc2 ཐེ་ཏུ། 
\s1 ལས་བཟང་པོ་བསྒྲུབ་པར་གདམས་པའི༌སྐོར།  
\p
\v 1 དེ་ཡང་ཁྱོད་ཀྱིས་མི་དེ་རྣམས་ལ་དཔོན་པོ་དང་དབང་འཛིན་པ་རྣམས་ཀྱི་བཀའ་བརྩི་ཞིང་ཅི་གསུང་བཞིན་དུ་བསྒྲུབ་པ། ལས་བཟང་པོའི་རིགས་ཐམས་ཅད་བསྒྲུབ་པར་སྟ་གོན་བྱེད༌དགོས་པ་དང༌།  
\v 2 མི་སུ་ལའང་ཚིག་ངན་མི་སྨྲ༌བ་དང༌། འཁྲུག་རྩོད་མི་བྱེད༌པ། ཞི་ཞིང་དུལ་བ། མི་ཀུན་ལ་ཁེངས་སྐྱུང་ཡོད་པ་བཅས་བྱེད་པར་དྲན་སྐུལ་བྱའོ།།  
\v 3 ཅིའི་ཕྱིར་ཞེ་ན། དེ་སྔར་བདག་ཅག་ཀྱང་ཡིད་རྨོངས་ཤིང་བཀའ་ལ་མི་ཉན་པ་དང་བསླུ་བྲིད་ཐེབས༌པ། མ་རབས་ཐ་ཤལ་གྱི་ལས་དང་འདོད་ཡོན་སྣ་ཚོགས་ཀྱི་དབང་དུ་སོང༌སྟེ། རྟག་ཏུ་གདུག་རྩུབ་དང་ཕྲག་དོག་གིས་འཚོ༌ཞིང༌། གཞན་རྣམས་བདག་ཅག་ལ་སྡང་བ༌དང༌། ཕན་ཚུན་ལའང་སྡང་བའི་ཕྱིར་རོ།།  
\v 4 འོན༌ཀྱང༌། བདག་ཅག་གི་སྐྱབས་མགོན་དཀོན་མཆོག་གི་ཐུགས་རྗེ་དང་ཁོང་གིས་མི་རྣམས་ལ་བཅངས་པའི་བྱམས་པ་དེ་ཉིད་མངོན་སུམ་དུ་བྱུང༌ཚེ།  
\v 5 ཁོང་གིས་བདག་ཅག་བསྐྱབས་ཤིང་། དེ་ནི་བདག་ཅག་གིས་དྲང་བདེན་གྱི་ལས་བྱས་པའི་རྐྱེན་གྱིས་མ་ཡིན༌པར། ཁོང་གི་ཐུགས་རྗེའི་དབང་གིས་ཡིན༌པ་དང༌། ཡང་བསྐྱར་སྐྱེས་པའི་ཁྲུས་དང་དམ་པའི་ཐུགས་ཉིད་ཀྱིས་གསར་དུ་མཛད་པ་བརྒྱུད་ནས་བདག་ཅག་བསྐྱབས༌པའོ།།  
\v 6 དམ་པའི་ཐུགས་ཉིད་ནི་དཀོན་མཆོག་གིས་བདག་ཅག་གི་སྐྱབས་མགོན་ཡེ་ཤུ་མཱ་ཤི་ཀ་བརྒྱུད་ནས་བདག་ཅག་ལ་ཕངས་མེད་དུ་གནང་བ༌སྟེ།  
\v 7 ཁོང་གི་ཐུགས་རྗེ་ལ་བརྟེན་ནས་བདག་ཅག་མི་རྣམ་དག་ཏུ་མཛད༌ཅིང༌། མཐའ་མེད་པའི་ཚེ་སྲོག་གི་རེ་སྨོན་བཞིན་རྒྱུད་འཛིན་མཁན་དུ་འགྱུར་བའི་ཕྱིར༌ཡིན་ལ།  
\v 8 གཏམ་འདི་ནི་ཡིད་རྟོན་རུང་བ་ཡིན་ནོ།།  
\p ཡང་དཀོན་མཆོག་ལ་དད་པ་བྱེད་མཁན་རྣམས་ཀྱིས་ལས་བཟང་པོར་བརྩོན་པའི༌ཕྱིར། ཁྱོད་ཀྱིས་དོན་འདི་དག་ནན་ཏན་གྱིས་གསལ་པོར་སྟོན་རྒྱུ་ནི་བདག་གི་རེ་བ་ཡིན༌ལ། དོན་འདི་དག་ནི་ལེགས་ཤིང་མི་ཐམས་ཅད་ལ་ཕན་ཐོགས༌མཆིས་སོ༎  
\v 9 འོན༌ཀྱང༌། བླུན་ཞིང་རྨོངས་པའི་རྩོད་གླེང༌དང༌། ཁྱིམ༌རྒྱུད་ཀྱི་སྟོང་བཤད། འཁྲུག༌རྩོད། བཀའ་ཁྲིམས་སྐོར་གྱི་རྩོད་པ་བཅས་ལ་སྙིང་པོ་མེད་ཅིང་ཕན་ཐོགས་ཅི་ཡང་མེད་པས་དེ་དག་ལས་གཡོལ་བར༌གྱིས།  
\v 10 ཕྱོགས་ཁག་སྒྲིག་མཁན་ལ་ཉེན་བརྡ་རྒྱོབས་དང་། དེ་ནས་ཐེངས་གཉིས་ལ་ཉེན་བརྡ་བརྒྱབ་རྗེས་རིང་དུ་དོར༌ཅིག  
\v 11 རྒྱུ་མཚན་ནི་མི་དེ་ལྟ་བུ་ཕྱིན་ཅི་ལོག་ཅིང་སྡིག་པ་བྱེད་མཁན་ཡིན༌ལ། རང་གིས་རང་ལ་ཁྲིམས་ཐག་བཅད་པ་ཡིན་པ་ཁྱོད་ཀྱིས་ཤེས་པའི་ཕྱིར༌རོ།།   
\s1 མཇུག་མཐའི་གདམས༌པ།  
\p
\v 12 ད་ལོ་དགུན་དུས་བདག་ནི་ནུ་ཀོ་པོ་ལི་རུ་སྡོད་རྒྱུ་ཐག་གིས་བཅད༌པས། བདག་གིས་ཨར་ཏེ་མཱའམ་ཐི་ཀེ་ཀུ་གཉིས་ལས་མི་གཅིག་ཁྱོད་ཀྱི་གམ་དུ་མངག་པར་འགྱུར་བའི་དུས༌སུ། ཁྱོད་ནི་མྱུར་བ་མྱུར་དུ་གནས་དེར་ཡོང་བར་གྱིས།  
\v 13 ཁྱོད་ཀྱིས་ཁྲིམས་རྩོད་པ་ཟི་ནཱ་དང་ཨ་པོལ་ལོ་གཉིས་ལ་ཇི་དགོས་པ་སྦྱར་ཏེ་མྱུར་དུ་བསྐྱལ་བར༌གྱིས།  
\v 14 སྤྱིར་གང་ལ་གང་མཁོ་སྟ་གོན་བྱས་ཏེ་འབྲས་བུ་དང་ལྡན་པའི༌ཕྱིར། བདག་ཅག་གི་མི་རྣམས་ཀྱིས་ངེས་པར་ལས་བཟང་པོ་སྒྲུབ་ཚུལ་བསླབ་དགོས་སོ།།  
\v 15 བདག་དང་མཉམ་དུ་ཡོད་པ་ཀུན་གྱིས་ཁྱོད་ལ་འཚམས་འདྲི་ཞུ༌ཞིང༌། ཁྱོད་ཀྱིས་བདག་གི་འཐུས་ཚབ་ཏུ་ངེད་ཅག་ལ་བྱམས་ཤིང་གཅེས་པའི་དད་ལྡན་གཞན་རྣམས་ལའང་འཚམས་འདྲི་ཞུ་བར༌གྱིས། ཐུགས་རྗེ་ནི་ནམ་ཡང་ཁྱོད་རྣམས་ཐམས་ཅད་དང་མཉམ་དུ་གནས་པར༌སྨོན།། །།