\id PHP - NTB བོད་འགྱུར་གསར་མ། 
\h ཕི་ལིབ་པི་པ། 
\toc1 ༄༅། །ཕི་ལིབ་པི་པ་རྣམས་ལ་སྤྲིངས་པའི་འཕྲིན་ཡིག 
\toc2 ཕི་ལིབ་པི་པ། 
\mt1 ༄༅། །ཕི་ལིབ་པི་པ་རྣམས་ལ་སྤྲིངས་པའི་འཕྲིན་ཡིག  
\imt1 ཕི་ལིབ་པི་པ་རྣམས་ལ་སྤྲིངས་པའི་འཕྲིན་ཡིག་གི་ངོ་སྤྲོད་མདོར་བསྡུས།  
\is1 ཁ་བྱང་དང་ལོ་རྒྱུས་རྒྱབ་ལྗོངས།  
\ipi ཕི་ལིབ་པི་པ་རྣམས་ལ་སྤྲིངས་པའི་འཕྲིན་ཡིག་འདི་ནི་ཕོལ་ལོལ་ཐེངས་དང་པོར་རོ་མཱ་གྲོང་ཁྱེར་ནས་བཙོན་དུ་སྦྱར་ཡོད་པའི་སྐབས་སུ་ཡི་གེར་བཀོད་པ་ཡིན་ལ། འཕྲིན་ཡིག་འདི་དང་ཨེ་ཕེ་སི་པ། ཀོ་ལོ་སཱ་པ། ཕི་ལེ་མོན་བཅས་ལ་བཙོན་ནས་བྲིས་པའི་འཕྲིན་ཡིག་ཅེས་ཀྱང་ཟེར། སྔར་ཕི་ལིབ་པི་གྲོང་ཁྱེར་གྱི་ཆོས་ཚོགས་ཀྱིས་སྤུན་ཟླ་ཨེ་པབ་རོ་དི་བྱ་བ་བརྒྱུད་ནས་ཕོལ་ལོལ་ལ་ཞལ་འདེབས་ཀྱི་དངུལ་ཞིག་བསྐུར་བ་ལ། ཨེ་པབ་རོ་དི་ལ་རོ་མཱ་གྲོང་ཁྱེར་ནས་ན་ཚ་བྱུང་ཞིང་། ཕི་ལིབ་པི་གྲོང་ཁྱེར་གྱི་ཡེ་ཤུའི་ཆོས་ལུགས་པ་རྣམས་ཀྱིས་གནས་ཚུལ་དེ་ཐོས་ནས་ཁོ་ལ་སེམས་ཁུར་བྱས་པ་དང་། སྐབས་དེར་ཨེ་པབ་རོ་དི་ཕྱིར་ཕ་ཡུལ་ལ་ལོག་འདོད་ཀྱི་འདུན་པ་དྲག་པོ་སྐྱེས་པས། ཕོལ་ལོལ་གྱིས་ཕི་ལིབ་པི་གྲོང་ཁྱེར་དུ་ཡོད་པའི་དད་ལྡན་རྣམས་ལ་འཕྲིན་ཡིག་འདི་བྲིས་ཤིང་། དེ་རྣམས་ཀྱི་བྱམས་པ་དང་རོགས་སྐྱོར་ལ་ཆེད་དུ་བཀའ་དྲིན་ཞུས་པ་ཡིན།  
\is1 ཡི་གེར་འགོད་མཁན་དང་འགོད་དུས།  
\ipi གཞུང་འདིའི་ལེའུ་དང་པོའི་ཚིག་རྐང་དང་པོ་ལས་འཕྲིན་ཡིག་འདི་ཡི་གེར་འགོད་མཁན་ཕོལ་ལོལ་ཡིན་པ་ཁ་གསལ་ཡོད་ལ། ཡི་གེའི་འབྲི་སྟངས་ལས་ཀྱང་འཕྲིན་ཡིག་འདི་ཕོལ་ལོལ་གྱིས་བྲིས་པ་གསལ་པོ་ཡིན་པ་རེད། ཡི་གེར་འགོད་མཁན་གྱིས་རང་གི་དོན་དག་མང་པོ་ཞིག་བྲིས་ཡོད་པ་དེ་དང་། ང་ཚོས་ཞལ་ཆད་གསར་པའི་གཞུང་རྣམས་ལས་རྟོགས་པའི་ཕོལ་ལོལ་གྱི་སྐོར་དེ་གཉིས་ཧ་ཅང་མཐུན་པ་ཡིན། དམ་པའི་གསུང་རབ་ཀྱི་མཁས་པ་རྣམས་ཀྱི་བཞེད་ཚུལ་ལྟར་ན། འཕྲིན་ཡིག་འདི་ཡི་གེར་འགོད་པའི་ལོ་ཚིགས་ནི་སྤྱི་ལོ་61ལོའི་ཡས་མས་ཡིན་པར་འདོད།  
\is1 བརྗོད་སྙིང་དང་གསུང་འཕྲིན།  
\ipi འཕྲིན་ཡིག་འདིའི་བརྗོད་བྱའི་སྙིང་པོ་ནི་སྤྲོ་སྣང་ངམ་ཡང་ན་གཙོ་བོ་ཡེ་ཤུ་ལ་བརྟེན་ནས་དགའ་ཞིང་སྤྲོ་བར་གྱིས་ཞེས་པ་དེ་ཡིན། སྤྲོ་སྣང་ཞེས་པའི་ཚིག་འདི་རྣམ་པ་འདྲ་མིན་གྱི་སྒོ་ནས་ཐེངས་16ལ་བྱུང་ཡོད་ལ། དེ་དང་མཉམ་དུ་ཉེན་ཁ་ལའང་འཛེམ་དགོས་པ་སྟེ། ཆོས་ཚོགས་ཀྱི་ཕྱི་ནང་གཉིས་ཀར་དགྲ་ཟླ་ཡོད་པ་གསལ་པོར་བསྟན་ཡོད། ཕོལ་ལོལ་གྱིས་ཕི་ལིབ་པི་པ་རྣམས་ཀྱི་སོ་སོའི་སྒེར་སེམས་དང་ཁེངས་དྲེགས་ཀྱི་རྣམ་འགྱུར་ལ་ཉེན་བརྡ་བཏང་བ་དང་། དེ་གཉིས་ཀྱིས་ཆོས་ཚོགས་ཀྱི་ནང་དུ་འགལ་ཟླ་སློང་བར་འགྱུར་ཞེས་ཐ་ཚིག་བསྒྲགས་ཡོད། ཕི་ལིབ་པི་པའི་འཕྲིན་ཡིག་ལས་སྐྱབས་མགོན་ཡེ་ཤུ་མི་ཡི་གཟུགས་པོར་གྱུར་པའི་སྐོར་གྱི་གསུང་འཕྲིན་ཟབ་ཅིང་རྒྱས་པར་གསུངས་ཡོད། ༼ལེའུ་གཉིས་པའི་ཚིག་རྐང་ལྔ་པ་ནས་བཅུ་གཅིག་གི་བར་དུ་གཟིགས་རོགས།༽  
\is1 འཆར་ཟིན།  
\ipi 1. ཁམས་འདྲི་གནང་བ་དང་བཀའ་དྲིན་ཞུ་བ། གསོལ་བ་འདེབས་པ་བཅས་ཀྱི་སྐོར། ༼1:1-11༽  
\ipi 2. ཕོལ་ལོལ་རང་ཉིད་ཀྱི་གནས་ཚུལ་སྐོར། ༼1:12-26༽  
\ipi 3. སྐུལ་མ་གཏོང་བ། ༼1:27-2:18༽  
\ipi ཀ འཕྲིན་བཟང་དང་མཐུན་པར་སྤྱོད་དགོས་པའི་སྐོར། ༼1:27-30༽  
\ipi ཁ། སྐྱབས་མགོན་ཡེ་ཤུ་མིག་དཔེར་འཛིན་དགོས་པ། ༼2:1-18༽  
\ipi 4. ཕོལ་ལོལ་གྱི་ཆོས་གྲོགས་གཉིས། ༼2:19-30༽  
\ipi 5. དམིགས་ཡུལ་འགྲུབ་པར་བརྩོན་པ། ༼3:1-4:1༽  
\ipi 6. མཇུག་མཐའི་སྐུལ་སློང་དང་བཀའ་དྲིན་ཞུ་བ། མཇུག་སྡོམ་བཅས་ཀྱི་སྐོར། ༼4:2-23༽  
\c 1
\cl ལེའུ་དང༌པོ། 
\toc1 ༄༅། །ཕི་ལིབ་པི་པ་རྣམས་ལ་སྤྲིངས་པའི་འཕྲིན་ཡིག 
\toc2 ཕི་ལིབ་པི་པ། 
\s1 འཕྲིན་ཡིག་བསྐུར༌ཡུལ།  
\p
\v 1 དེ་ཡང་མཱ་ཤི་ཀ་ཡེ་ཤུའི་ཞབས་ཕྱི་པ་ཕོལ་ལོལ་ང་རང་དང་ཐི་མོ་ཐེ་གཉིས་ཀྱིས། ཕི་ལིབ་པི་རུ་ཡོད་པ་དང་མཱ་ཤི་ཀ་ཡེ་ཤུའི་ནང་གི་དད་ལྡན་དམ་པ་རྣམས༌དང༌། ཆོས་ཚོགས་ཀྱི་དོ་དམ་པ་རྣམས། ལས་འཛིན་པ་རྣམས་བཅས་ལ་འཕྲིན་ཡིག་འདི་སྤྲིངས༌པ་ཡིན།  
\v 2 བདག་ཅག་གི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཁྱོད་རྣམས་ལ་ཐུགས་རྗེ་དང་ཞི་བདེ་འཐོབ་པར༌སྨོན།   
\s1 ཐུགས་རྗེ་དང་གསོལ༌འདེབས།  
\p
\v 3 བདག་གིས་ཁྱོད་རྣམས་དྲན་ཐེངས་རེ་རེར་ང་ཡི་དཀོན་མཆོག་ལ་བཀའ་དྲིན་ཞུས་ཤིང་།  
\v 4 ཁྱོད་ཅག་ཐམས་ཅད་ཀྱི་དོན་དུ་གསོལ་བ་འདེབས་ཐེངས་རེ་རེར། རྒྱུན་དུ་དགའ་སྤྲོའི་ངང་ནས་གསོལ་བ་བཏབ་པའོ།།  
\v 5 རྒྱུ་མཚན་ནི་ཉིན་དང་པོ་ནས་ད་ལྟའི་བར༌དུ། ཁྱོད་རྣམས་ཀྱིས་བློ་སེམས་གཅིག་མཐུན་གྱིས་འཕྲིན་བཟང་བདག་དང་མཉམ་འབྲེལ་སྤེལ་བའི་ཕྱིར༌རོ།།  
\v 6 ཁྱོད་རྣམས་ཀྱི་སེམས་སུ་ལས་བཟང་པོ་སྒྲུབ་འགོ་རྩོམ་མཁན་དེ་ཉིད་ཀྱིས། མཱ་ཤི་ཀ་ཡེ་ཤུའི་ཉིན་མོ་སླེབས་པའི་བར༌དུ། ལས་དེ་འགྲུབ་པར་མཛད་ངེས་པར་བདག་ལ་ཡིད་ཆེས་བརྟན་པོ་ཡོད་དོ།།  
\v 7 ངས་ཁྱོད་རྣམས་ལ་འདི་ལྟ་བུའི་བསམ་པ་བཅང་འོས་པ་ཡིན༌ཏེ། ཁྱོད་རྣམས་རྟག་ཏུ་ངའི་སེམས་སུ་གནས༌ཤིང༌། ང་རང་བཙོན་དུ་ཡོད་པའམ་འཕྲིན་བཟང་ལ་ཁུངས་བཅོལ༌ཞིང༌བདེན་དཔང་བྱེད་པའི་དུས་ནམ་ཞིག་ལའང་ཁྱོད་རྣམས་ཐམས་ཅད་ནི་བདག་དང་མཉམ་དུ་ཐུགས་རྗེ་ཐོབ་མཁན་ཡིན།  
\v 8 ངས་མཱ་ཤི་ཀ་ཡེ་ཤུའི་བྱམས་བརྩེ་བཞིན་དུ་སེམས་གཏིང་ནས་ཁྱོད་རྣམས་ཤིན་ཏུ་དྲན་པ༌དང༌། དོན་འདིར་དཀོན་མཆོག་གིས་ཀྱང་བདག་ལ་བདེན་དཔང་མཛད་པ་ལགས་སོ།།  
\v 9 ངས་གསོལ་བ་འདེབས་དོན་ནི་ཁྱོད་ཅག་གི་བྱམས་པ་དེ་ཤེས་ཡོན་དང་མཐོང་རྒྱ་སྣ་ཚོགས་ཀྱི་ཆ་ནས་སྔར་ལས་ལྷག་ཏུ་འཕེལ༌ཏེ།  
\v 10 ཁྱོད་རྣམས་ཀྱིས་བདེན་རྫུན་གྱི་དབྱེ་བ་འབྱེད་ཐུབ་པ༌དང༌། སྐྱབས་མགོན་མཱ་ཤི་ཀའི་ཉིན་མོ་སླེབས་པའི་བར༌དུ། གཞུང་དྲང་སྐྱོན་མེད་ཀྱི་མི་ཞིག་ཏུ་འགྱུར་བ༌དང༌།  
\v 11 ཡེ་ཤུ་མཱ་ཤི་ཀར་བརྟེན་ནས་དྲང་བདེན་གྱི་འབྲས་བུ་མང་དུ་བསྐྱེད༌དེ། དཀོན་མཆོག་ལ་གཟི་བརྗིད་དང་བསྟོད་བསྔགས་འབུལ་བའི་ཕྱིར༌རོ།།   
\s1 འཕྲིན་བཟང་སྔར་ལས་འཕེལ་བ།  
\p
\v 12 སྤུན་ཟླ༌རྣམས། ངས་ཁྱོད་རྣམས་ལ་ཤེས་སུ་འཇུག་འདོད་པ་ནི། བདག་ལ་བྱུང་བའི་དོན་དེས་འཕྲིན་བཟང་སྔར་ལས་འཕེལ་བར་བྱས༌ཤིང༌།  
\v 13 ཐ་ན་ང་རང་བཙོན་དུ་འཇུག་དོན་ཡང་ཕོ་བྲང་ནང་གི་དམག་མི་དང་མི་གཞན་ཐམས་ཅད་ཀྱི་ཁྲོད༌དུ། སྐྱབས་མགོན་མཱ་ཤི་ཀའི་ཆེད་དུ་ཡིན་པ་གསལ་པོར་མངོན་ནོ།།  
\v 14 གཞན༌ཡང༌། གཙོ་བོ་ནང་གི་སྤུན་ཟླ་མང་ཤོས་ཀྱང་ང་རང་བཙོན་དུ་སྦྱར་བའི་རྐྱེན་གྱིས་དད་མོས་ཆེ་ཞིང་ཐེ་ཚོམ་མེད་པ༌དང༌། སྔར་ལས་ཀྱང་སྙིང་སྟོབས་བསྐྱེད་ནས་དཀོན་མཆོག་གི་བཀའ་སྒྲོག་པ་ལ་འཇིགས་པ་ཅི་ཡང་མེད༌དོ།།   
\p
\v 15 མི་ལ་ལས་སྐྱབས་མགོན་མཱ་ཤི་ཀའི་ཆོས་སྒྲོག་པ་ནི་ཕྲག་དོག་དང་འགྲན་སེམས་ཀྱི་རྐྱེན་ཡིན་པ༌དང༌། ལ་ལ་ནི་ཕན་འདོགས་པའི་སེམས་ཡིན༌ཏེ།  
\v 16-17 སྔ་མ་རྣམས་ཀྱིས་སེམས་དྲང་པོ་མ་བཅངས༌པར་སྒེར་སེམས་ངང་ནས་ཆོས་སྒྲོག༌ཅིང༌། བཙོན་དུ་བཅུག་པ་ང་རང་ལ་སྡུག་བསྔལ་ཇེ་ཆེར་གཏོང་འདོད༌པ་ཡིན། ཕྱི་མ་རྣམས་ཀྱིས་བྱམས་པའི་ངང་ནས་ཆོས་སྒྲོག་ཅིང་ང་རང་ནི་འཕྲིན་བཟང་ལ་བདེན་དཔང་བྱེད་པའི་ཆེད་དུ་བསྐོས་པ་ཤེས་སོ།།  
\v 18 དེར་སྐྱོན་ཅི་ཡོད་དམ། སྔ་ཕྱིའི་བདེན་རྫུན་གང་ཡིན་ཡང་མཐར་ཐུག་སྐྱབས་མགོན་མཱ་ཤི་ཀའི་ཆོས་བསྒྲགས་པ་ཡིན༌པས། ང་རང་ད་ལྟ་དགའ་ཞིང་ཕྱིས་སུའང་དགའ་བར་འགྱུར།  
\v 19 ཅིའི་ཕྱིར་ཞེ་ན། དོན་འདི་ནི་ཁྱོད་ཅག་གི་གསོལ་འདེབས་དང་ཡེ་ཤུ་མཱ་ཤི་ཀའི་ཐུགས་ཉིད་ཀྱིས་རོགས་རམ་མཛད་པ་བརྒྱུད༌ནས། མཇུག་མཐར་ང་རང་ཐར་བར་འགྱུར་བ་བདག་གིས་ཤེས་པས༌སོ།།  
\v 20 བདག་གིས་ཡིད་སྨོན་དང་རེ་འདུན་ཆེན་པོ་བཅངས་པ༌ལྟར། བདག་ལ་ངོ་གནོང་དགོས་པའི་དོན་གཅིག་ཀྱང་མེད༌དེ། བདག་ལ་ཤི་གསོན་གང་འདྲ་བྱུང་ནའང་སྤོབས་པ་ཆེན་པོ་བཅངས༌ཏེ། སྔར་བཞིན་ད་ལྟ་ཡང་ངའི་ལུས་སྟེང་ནས་སྐྱབས་མགོན་མཱ་ཤི་ཀའི་གཟི་བརྗིད་མངོན་པར༌འགྱུར་རོ།།  
\v 21 ཅིའི་ཕྱིར་ཞེ་ན། ང་རང་གསོན་པོར་འཚོ་བ་ནི་སྐྱབས་མགོན་མཱ་ཤི་ཀའི་ཆེད་དུ་ཡིན༌ལ། ང་རང་འཆི་བར་གྱུར་ནའང་བདག་ལ་ཕན་ཐོགས་ཡོད་པའི་ཕྱིར༌ཡིན།  
\v 22 འོན༌ཀྱང༌། ངའི་ལུས་པོ་གསོན་པོར་འཚོ༌ཞིང༌། བདག་གིས་འབད་པའི་ལས་ལ་འབྲས་བུ་བྱུང༌ནའང༌། ངས་གང་ཞིག་གདམ་རྒྱུ་མི་ཤེས།  
\v 23 ད་ནི་ང་རང་ཅི་བྱེད་འདི་བྱེད་མེད་པར་གྱུར༌ཅིང༌། འཇིག་རྟེན་དང་ཁ་བྲལ་ནས་སྐྱབས་མགོན་མཱ་ཤི་ཀ་དང་མཉམ་དུ་གནས་པ་ནི་དོན་ཀུན་གྱི་མཆོག་ཡིན་པས། ངས་དེ་ལྟར་བྱ་འདོད༌ནའང༌།  
\v 24 ཁྱོད་རྣམས་ཀྱི་ཆེད་དུ་བདག་གི་ལུས་པོ་གསོན་པོར་འཚོ་བ་ནི་དེ་བས་ཀྱང་གལ༌ཆེའོ།།  
\v 25 བདག་ལ་འདི་ལྟ་བུའི་ཡིད་ཆེས་ཟབ་མོ་ཡོད༌པས། ཁྱོད་ཅག་གི་དད་པ་ཇེ་བརྟན་དང་དགའ་སྤྲོའང་ཇེ་ཆེར་འགྱུར་བའི༌ཕྱིར། བདག་ནི་སྔར་བཞིན་འཇིག་རྟེན་དུ་གསོན་པོར་འཚོ་ཞིང་ཁྱོད་ཅག་དང་མཉམ་དུ་སྡོད་པར་འགྱུར་བའང་ཤེས།  
\v 26 ང་རང་སླར་ཡང་ཁྱོད་ཅག་གི་གམ་དུ་སླེབ་པར་འགྱུར་བའི་རྐྱེན༌གྱིས། ཁྱོད་ཅག་གིས་མཱ་ཤི་ཀ་ཡེ་ཤུའི་ནང་དུ་བསྔགས་པའི་དགའ་སྤྲོ་ནི་སྔར་ལས་ཀྱང་ཇེ་ཆེར་འགྱུར༌རོ།།   
\p
\v 27 ཁྱོད་ཅག་གི་སྤྱོད་ལམ་ནི་སྐྱབས་མགོན་མཱ་ཤི་ཀའི་འཕྲིན་བཟང་དང་མཐུན་པར༌གྱིས། དེ་ནི་ང་རང་ཁྱོད་ཅག་གི་གམ་དུ་ཡོང༌བའམ། ཡང་ན་ཁྱོད་ཅག་གི་གམ་དུ་མེད་པ་གང་ཡིན་ཡང་ཁྱོད་ཅག་གི་གནས་ཚུལ་ཐོས༌ཤིང༌། ཁྱོད་ཅག་ལ་དམིགས་ཡུལ་གཅིག་མཚུངས་ཡོད་པ་དང་བརྟན་པོར་གནས་པར་བྱས༌ཏེ། བདག་ཅག་གིས་འཕྲིན་བཟང་གི་དད་པའི་ཆེད༌དུ། བློ་སེམས་རྩེ་གཅིག་གིས་ཧུར་བརྩོན་བྱེད་བཞིན་པའང་བདག་གིས་ཤེས་པར་འགྱུར་བའི་ཕྱིར༌ཡིན།  
\v 28 དོན་གང་ལ་ཕྲད་ནའང་དགྲ་བོའི་འཇིགས་སྐུལ་ལ་མི་སྐྲག་པར༌གྱིས། དེ་ནི་དགྲ་བོ་རྣམས་འཇིག་ཅིང་ཁྱོད་རྣམས་ལ་ཐར་པ་ཐོབ་པའི་རྟགས་ཡིན༌ལ། དེ་ནི་དཀོན་མཆོག་ནས་བྱུང་བ་ལགས་སོ།།  
\v 29 ཅིའི་ཕྱིར་ཞེ་ན། ཁྱོད་རྣམས་ཀྱིས་སྐྱབས་མགོན་མཱ་ཤི་ཀར་དད་པ་བྱེད་པ་ལས༌གཞན། ཁོང་གི་ཆེད་དུ་ཁྱོད་རྣམས་ལ་སྡུག་བསྔལ་མྱོང་བའི་ཐུགས་རྗེ་ཡང་གནང་བ༌དང༌།  
\v 30 ཁྱོད་ཅག་ལ་འབྱུང་བའི་འཁྲུག་རྩོད་ནི་ཁྱོད་ཅག་གིས་བདག་ལ་བྱུང་བའི་དོན་རྣམས་སྔོན་ཆད་མཐོང་ཞིང་ད་ལྟ་ཐོས་པ་དང་གཅིག་མཚུངས་ཡིན༌ནོ།།   
\c 2
\cl ལེའུ་གཉིས༌པ། 
\toc1 ༄༅། །ཕི་ལིབ་པི་པ་རྣམས་ལ་སྤྲིངས་པའི་འཕྲིན་ཡིག 
\toc2 ཕི་ལིབ་པི་པ། 
\s1 སྐྱབས་མགོན་མཱ་ཤི་ཀ་མིག་དཔེར་འཛིན༌པ།  
\p
\v 1 དེའི་ཕྱིར། སྐྱབས་མགོན་མཱ་ཤི་ཀའི་ནང་དུ་སྐུལ་མ་གང་ཞིག༌དང༌། བྱམས་པའི་སེམས་གསོ་གང༌ཞིག དམ་པའི་ཐུགས་ཉིད་ཀྱི་འབྲེལ་འདྲིས་གང༌ཞིག བྱམས་དང་སྙིང་རྗེ་གང་ཞིག་ཡོད་པ་ཡིན་ན།  
\v 2 ཁྱོད་རྣམས་ཀྱིས་བསམ་པ་གཅིག༌དང༌། བརྩེ་སེམས༌གཅིག དྲན་ཚུལ༌གཅིག བསམ་འདུན་གཅིག་ཡོད་པ་བཅས་བྱས་ནས་ངའི་དགའ་སྤྲོ་རྫོགས་པར་བྱ་འོས་སོ།།  
\v 3 སྒེར་སེམས་དང་སྙིང་པོ་མེད་པའི་གཟི་བརྗིད་ལ་འདོད་རྔམ་མི་བཅང་བར། ཁེངས་སྐྱུང་གི་བསམ་པ་བཅངས་ནས་རང་ལས་མི་གཞན་མཆོག་ཏུ་འཛིན་པར༌གྱིས།  
\v 4 མི་སུ་ཞིག་ཡིན་ཡང་རང་དོན་ཁོ་ན་མི་སེམས་པར་གཞན་དོན་ཡང་བསམ་དགོས་པ་ཡིན།  
\v 5 ཁྱོད་ཅག་གི་བསམ་པ་ནི་མཱ་ཤི་ཀ་ཡེ་ཤུའི་ཐུགས་དགོངས་བཞིན་ཡིན་དགོས་པ་འདི༌ལྟ་སྟེ།   
\q1
\v 6 དེ་ཡང་ཁོང་ཉིད་དཀོན་མཆོག་ཇི་བཞིན༌དུ།།  
\q1 ཐོག་མ་ཉིད་ནས་རང་བཞིན་མཚུངས་ན༌ཡང༌།།  
\q1 དཀོན་མཆོག་ཉིད་དང་མཉམ་པའི་གོ་འཕང༌དེར།།  
\q1 འཕྲོག་ཅིང་རྩོད་པའི་འགྲན་སེམས་ཡེ་ནས༌མེད།།   
\q1
\v 7 རང་གི་གཟི་བརྗིད་དོར་ནས་ཁེངས་སྐྱུང༌གིས།།  
\q1 རང་ཉིད་ཞབས་ཕྱི་པ་ཡི་རྣམ་པ༌བཞིན།།  
\q1 འཇིག་རྟེན་ཕལ་བའི་མི་ཡི་གཟུགས་པོར༌གྱུར།།   
\q1
\v 8 ཕལ་བའི་རྣམ་འགྱུར་བཟུང་ཞིང་དམན་ཚུལ༌གྱིས།།  
\q1 དཀོན་མཆོག་ཉིད་ཀྱི་བཀའ་ལུང་ཇི་བཞིན༌དུ།།  
\q1 རྒྱ་གྲམ་ཤིང་གི་རྩེ་ནས་གྲོངས་པར༌མཛད།།   
\q1
\v 9 དེའི་ཕྱིར་དཀོན་མཆོག་ཉིད་ཀྱིས་ཁོང་ཉིད༌ནི།།  
\q1 ཀུན་ལས་མཐོ་བའི་གནས་སུ་དྲངས་པ༌དང༌།།  
\q1 ཀུན་ལས་འཕགས་པའི་མཚན་ཡང་གནང་བར༌གྱུར།།   
\q1
\v 10 དེ་ནི་ས་སྟེང་ས་འོག་ས་བླ་ཀུན༎  
\q1 སྐྱབས་མགོན་ཡེ་ཤུའི་མཚན་ལ་བཀུར་བའི༌ཕྱིར།།  
\q1 པུས་མོ་ས་ལ་བཙུགས་ནས་ཕྱག་འཚལ༌ཞིང་།།   
\q1
\v 11 ཡབ་ཆེན་དཀོན་མཆོག་ཉིད་ལ་བསྟོད་པའི༌ཕྱིར།།  
\q1 ཀུན་གྱི་ངག་ལས་ཡེ་ཤུ་མཱ་ཤི༌ཀར།།  
\q1 གཙོ་བོ་ལགས་ཞེས་སྨྲ་ཞིང་ཁས་ལེན༌བརྗོད།།  
\m ཅེས་པ་བཞིན༌ནོ།།   
\s1 སྤྱོད་ལམ་དྲང་པོར་གདམས༌པ།  
\p
\v 12 དེ་བས་ན། བདག་གི་སྙིང་ཉེ་བའི་སྤུན་ཟླ༌རྣམས། ཁྱོད་ཅག་གིས་རྒྱུན་དུ་བདག་གི་གཏམ་ལ་མཉན་པ་ཡིན༌ན། ང་རང་ཁྱོད་ཅག་གི་གམ་དུ་ཡོད༌པའམ། ཡང་ན་ད་ལྟ་ཁྱོད་ཅག་གི་གམ་དུ་མེད་པའི་དུས་སུའང་ལྷག་ཏུ་བདག་གི་གཏམ་ལ་ཉན་པ༌བཞིན། ཁྱོད་ཅག་གིས་སྐྲག་སྐྲག་འདར་འདར་ངང་ནས་རང་ལ་ཐར་པ་ཐོབ་ཟིན་པའི་དོན་དེ་དང་མཐུན་པར་བསྒྲུབ་དགོས་སོ།།  
\v 13 རྒྱུ་མཚན་ནི་ཁྱོད་ཅག་གིས་ལས་གང་ཞིག་དྲན་ཞིང་སྒྲུབ་པར་བྱེད་པ་ནི་དཀོན་མཆོག་གི་ཐུགས་དགོངས་བཞིན་དུ་ཡིན་པའི་ཕྱིར། དཀོན་མཆོག་གིས་ཁྱོད་རྣམས་ཀྱི་སེམས་ནང་དུ་འཕྲིན་ལས་མཛད༌པས་སོ༎  
\v 14 ཁྱོད་ཅག་གིས་འཁང་རའི་གཏམ་དང་རྩོད་གླེང་ཅི་ཡང་མེད་པར་ལས་ཐམས་ཅད་བསྒྲུབ་པར༌གྱིས།  
\v 15 ཅིའི་ཕྱིར་ཞེ་ན། ཁྱོད་རྣམས་ལ་སྐྱོན་བརྗོད་རྒྱུ་ཅི་ཡང་མེད་པ་དང་གཞུང་དྲང་ཟོལ་མེད་ཡིན༌པ། དཀར་ནག་གོ་ལྡོག་གི་དུས་རབས༌འདི་ལ། ཁྱོད་ཅག་ནི་སྐྱོན་གྱི་དྲི་མས་མ་གོས་པའི་དཀོན་མཆོག་གི་བུ་ཕྲུག་ཡིན་པའི་ཕྱིར༌རོ།། ཁྱོད་རྣམས་དུས་འདིར་མངོན་པ་ནི་འཇིག་རྟེན་ཀུན་ལ་འོད་ཟེར་འཕྲོས་པ་དང་མཚུངས་ཏེ།  
\v 16 ཁྱོད་ཅག་གིས་ཚེ་སྲོག་གི་བཀའ་དམ་པོར་ཟུངས་ཤིག་དང་། དེ་ནི་སྐྱབས་མགོན་མཱ་ཤི་ཀའི་ཉིན༌ལ། བདག་གི་ངལ་བ་འབྲས་མེད་དུ་མ་གྱུར་བར་བསྔགས་བརྗོད་བྱེད་པའི་ཕྱིར་ཡིན།  
\v 17 ང་རང་ནི་ཁྱོད་ཅག་གི་དད་པའི་བསྙེན་བཀུར་དང་མཆོད་རྫས་སྟེང་དུ་སྐྱེམས་མཆོད་གཏོར་བ་བཞིན་དུ་གྱུར༌ནའང༌། བདག་ནི་དགའ་ཞིང་ཁྱོད་རྣམས་དང་མཉམ་དུ༌སྤྲོ་བ་ཡིན་ནོ།།  
\v 18 ཁྱོད་རྣམས་ཀྱང་དེ་བཞིན་དུ་དགའ་ཞིང་བདག་དང་མཉམ་དུ་སྤྲོ་བར་གྱུར༌ཅིག།   
\s1 ཆོས་གྲོགས་ཐི་མོ་ཐེ་དང་ཨེ་པབ་རོ་དི༌གཉིས།  
\p
\v 19 དེ་ཡང་བདག་གིས་ཁྱོད་རྣམས་ཀྱི་གནས་ཚུལ་ཤེས་ནས་རང་ལ་སེམས་གསོ་འཐོབ་ཐུབ་པའི་ཕྱིར། བདག་གིས་གཙོ་བོ་ཡེ་ཤུར་བརྟེན་ནས་ཐི་མོ་ཐེ་མྱུར་བ་མྱུར་བར་ཁྱོད་རྣམས་ཀྱི་གམ་དུ་མངག་པའི་རེ་བ་བཅངས༌སོ།།  
\v 20 རྒྱུ་མཚན་ནི་ཁྱོད་རྣམས་ཀྱི་དོན་དུ་དངོས་གནས་སེམས་ཁྲལ་བྱེད་མཁན་ནི་བདག་དང་བློ་སེམས་མཐུན་པ་གཞན་མེད་པས༌སོ།།  
\v 21 མི་གཞན་རྣམས་ཀྱིས་རང་དོན་ཁོ་ན་ལས་མཱ་ཤི་ཀ་ཡེ་ཤུའི་དོན་དེ་མི་བསམས་མོད།  
\v 22 འོན༌ཀྱང༌། ཐི་མོ་ཐེ་ནི་བུས་ཕ་ལ་བསྙེན་བཀུར་བྱེད་པ༌བཞིན། ཁོས་ཀྱང་བདག་དང་མཉམ་དུ་འཕྲིན་བཟང་དར་སྤེལ་བྱས་མྱོང༌བས། ཁོས་ཚོད་བགམ་ཐེག་ཐུབ་པ་ཁྱོད་རྣམས་ཀྱིས་ཀྱང་ཤེས་པ་ཡིན།  
\v 23 དེའི༌ཕྱིར། བདག་གིས་རང་ལ་བྱུང་བའི་དོན་དེ་ཅི་ལྟ་བུ་ཞིག་ཏུ་འགྱུར་ངེས་པ་ཤེས་མ་ཐག ཁོ་རང་མྱུར་དུ་མངག་པར་རེ་བ་བྱེད༌ཅིང༌།  
\v 24 ང་རང་ཡང་གཙོ་བོ་ལ་བརྟེན་ནས་མྱུར་བ་མྱུར་བར་ཡོང་ཐུབ་པར་ཡིད་ཆེས་སོ།།  
\v 25 འོན༌ཀྱང༌། ད་ལྟ་བདག་གིས་ངེས་པར་ཁྱོད་རྣམས་ཀྱི་གམ་དུ་ཨེ་པབ་རོ་དི་མངག་དགོས་པར་འདོད༌དེ། ཁོ་ནི་བདག་གི་སྤུན་ཟླ་དང་ཆོས༌གྲོགས། དཔུང་གྲོགས་བཅས་ཡིན༌ལ། ཁྱོད་རྣམས་ཀྱིས་བདག་ལ་མངགས་པའི་མི༌དང༌། བདག་གི་དགོས་མཁོ་སྐོང་མཁན་ཡང་ཡིན།  
\v 26 ཁོས་ཁྱོད་རྣམས་ཤིན་ཏུ་དྲན་ཞིང་ཁྱོད་རྣམས་ཀྱིས་ཁོ་རང་ལ་ན་ཚ་བྱུང་བའི་གནས་ཚུལ་ཐོས་པས་ཁོའི་སེམས་ཤིན་ཏུ༌སྐྱོ་བ་རེད།  
\v 27 ཁོ་རང་ལ་དངོས་གནས་ན་ཚ་བྱུང་སྟེ་འཆི་ལ་ཉེ་བ་ཙམ་བྱུང་ནའང་དཀོན་མཆོག་གིས་ཁོ་རང་ལ་ཐུགས་རྗེ་གནང༌ཞིང༌། བདག་ལ་སྡུག་བསྔལ་གྱི་སྟེང་དུ་སྡུག་བསྔལ་མི་འབྱུང་བའི་ཕྱིར་ང་ལའང་ཐུགས་རྗེ་གནང༌ངོ་།།  
\v 28 དེའི༌ཕྱིར། བདག་གིས་དེ་ལས་མགྱོགས་མྱུར་ངང་ཁོ་རང་ཁྱོད་རྣམས་ཀྱི་གམ་དུ་མངགས་པ་སྟེ། ཁྱོད་རྣམས་ཀྱིས་ཁོ་རང་སླར་ཡང་མཐོང་ན་དགའ་ཞིང་སྤྲོ་བ་དང༌། བདག་གི་སེམས་ཁུར་ཡང་ཇེ་ཆུང་དུ་འགྲོ་ངེས་པའི་ཕྱིར༌ཡིན།  
\v 29 ཡང་ཁྱོད་རྣམས་ཀྱིས་གཙོ་བོའི་ནང་དུ་དགའ་དགའ་སྤྲོ་སྤྲོའི་ངང་ནས་ཁོ་རང་ལ་སྣེ་ལེན་བྱེད་དགོས༌ཤིང༌། མི་འདི་ལྟ་བུ་ལ་བརྩི་བཀུར་ཡང་བྱ་འོས་སོ།།  
\v 30 ཅིའི་ཕྱིར་ཞེ་ན། ཁོས་སྐྱབས་མགོན་མཱ་ཤི་ཀའི་ཆོས་དོན་སྒྲུབ་པའི་ཆེད་དུ་འཆི་ལ་ཉེ་བ་ཙམ་བྱུང༌ནའང༌། ཁྱོད་རྣམས་ཀྱིས་བདག་ལ་རོགས་རམ་བྱེད་མ་ནུས་པ་ཐམས་ཅད་ཁོས་རང་སྲོག་ལ་མ་འཛེམས་པར་བདག་ལ་རོགས་རམ་བྱས༌སོ།།   
\c 3
\cl ལེའུ་གསུམ༌པ། 
\toc1 ༄༅། །ཕི་ལིབ་པི་པ་རྣམས་ལ་སྤྲིངས་པའི་འཕྲིན་ཡིག 
\toc2 ཕི་ལིབ་པི་པ། 
\s1 ཤ་གཟུགས་ཀྱི་ཕུང་བོར་བརྟེན་མི་འོས༌པ།  
\p
\v 1 བདག་གི་སྤུན་ཟླ༌རྣམས། མཐར་ཁྱོད་ཅག་གཙོ་བོ་ལ་བརྟེན་ནས་དགའ་ཞིང་སྤྲོ་བར༌གྱིས། བདག་གིས་ཡང་བསྐྱར་གཏམ་འདི་རྣམས་ཁྱོད་ཅག་ལ་འབྲི་བར་དཀའ་ངལ་མེད༌ལ། ཁྱོད་ཅག་ལ་མཚོན་ན་འོས་ཤིང་འཚམ་པ་ཡིན་ནོ།།   
\p
\v 2 ཁྱོད་རྣམས་ཀྱིས་ཁྱི་སྤྱང་ངན་པ་ལྟ་བུ་དང་ལས་ངན་པ་བྱེད་མཁན། རང་སྣང་ཆེན་པོས་མཚན་སྐྱི་གཅོད་མཁན་དག་ལ་དོགས་ཟོན་བྱོས༌ཤིག  
\v 3 ཅིའི་ཕྱིར་ཞེ་ན། བདག་ཅག་ནི་དངོས་གནས་མཚན་སྐྱི་གཅོད་པ་དག་ཡིན༌ལ། དཀོན་མཆོག་གི་ཐུགས་ཉིད་ལ་བརྟེན་ནས་བསྙེན་བཀུར་བྱེད༌ཅིང༌། མཱ་ཤི་ཀ་ཡེ་ཤུར་བསྔགས་མཁན་ཡང་ཡིན་པ༌ལས། ཤ་ཁྲག་གི་ཕུང་བོར་བརྟེན་མཁན་མ་ཡིན་པའི་ཕྱིར༌རོ།།  
\v 4 དོན་དམ་དུ། ངས་ཀྱང་ཤ་ཁྲག་གི་ཕུང་བོར་བརྟེན་རུང་སྟེ། མི་གཞན་ཞིག་གིས་ཤ་ཁྲག་གི་ཕུང་བོར་བརྟེན་རུང་བར་འདོད༌ན། བདག་ནི་ལྷག་ཏུ་བརྟེན་རུང་ངོ་།།  
\v 5 སྐྱེས་ནས་ཉིན་བརྒྱད་པ་ལ་ངའི་མཚན་སྐྱི་བཅད་ཅིང་། ང་ནི་ཡེས་ར་ཨེལ་གྱི་མི་རིགས་དང༌པེན་ཡཱ་མེན་གྱི་ཚོ་པ་ལའང་གཏོགས༌པ་དང་། ཨིབ་རིའི་མི་རིགས་ནས་མཆེད་པའི་རིགས་རྒྱུད་དངོས་མ་ཡང་ཡིན། བཀའ་ཁྲིམས་ཀྱི་ཕྱོགས་ནས་བཤད༌ན། ང་ནི་ཕ་རུ་ཤི་པའི་གྲུབ་མཐའ་ལ་གཏོགས་པ་ཡིན།  
\v 6 རང་གི་སྤྲོ་སེམས་ཐད་ནས་བཤད༌ན། ང་རང་ནི་ཆོས་ཚོགས་ལ་གནོད་འཚེ་ཆེན་པོ་བྱེད་མཁན་ཡིན་ལ། བཀའ་ཁྲིམས་ཀྱི་བདེན་ལུགས་ལྟར་བཤད༌ན། བདག་ནི་སྐྱོན་གྱི་དྲི་མས་མ་གོས་པ་ཡིན་ནོ།།  
\v 7 འོན༌ཀྱང༌། སྔོན་ཆད་བདག་གིས་ཁེ་ཕན་དུ་བསམས་པ་ཐམས་ཅད་ད་ལྟ་སྐྱབས་མགོན་མཱ་ཤི་ཀའི་རྐྱེན་གྱིས་གྱོང་གུད་དུ་མཐོང༌ངོ་།།  
\v 8 དེར་མ་ཟད་ངས་རང་གི་གཙོ་བོ་མཱ་ཤི་ཀ་ཡེ་ཤུ་ཁོང་ཉིད་ངོ་ཤེས༌པ་ནི་མཆོག་ཏུ་གྱུར་བར་བསམས་པས་དོན་གཞན་ཐམས་ཅད་གྱོང་གུད་དུ་བརྩིས་པ་ཡིན་ལ། བདག་ལ་སྐྱབས་མགོན་མཱ་ཤི་ཀ་འཐོབ་པའི་ཕྱིར། ངས་ཁོང་གི་ཆེད་དུ་དོན་གཞན་ཐམས་ཅད་སྤངས་ཤིང་སྙིགས་མར་བརྩིས་པ་དང་།  
\v 9 ང་རང་ཁོང་གི་ནང་དུ་གནས་པ་དང་། རང་ཉིད་ལའང་སྐྱབས་མགོན་མཱ་ཤི་ཀར་དད་པ་ནས་ཡོང་བའི་དྲང་བདེན་དེ་འཐོབ་པར་འགྱུར་ཞིང་། དྲང་བདེན་དེ་ནི་བཀའ་ཁྲིམས་ནས་བྱུང་བ་མ་ཡིན༌པར། དཀོན་མཆོག་ལས་བྱུང་ཞིང་དད་པའི་སྒོ་ནས་འཐོབ་པ་ཡིན་ལ།  
\v 10 དེ་ནི་ངས་སྐྱབས་མགོན་མཱ་ཤི་ཀ་ཁོང་ཉིད་ངོ་ཤེས་པ་དང་། ཁོང་ཉིད་སླར་གསོན་པའི་ནུས་མཐུ་ཆེན་པོའང་རྟོགས་ཤིང༌། ཁོང་གི་སྡུག་བསྔལ་ཡང་མཉམ་དུ་འཁུར་ཐུབ་པ་དང༌། ཁོང་ཉིད་སྐུ་གྲོངས་པ་མིག་དཔེར་བཟུང༌སྟེ།  
\v 11 ང་རང་ཡང་འཆི་བ་ལས་སླར་གསོན་པར་འགྱུར་བའི་ཕྱིར་རོ།།   
\s1 དམིགས་ཡུལ་འགྲུབ་པར་བརྩོན༌པ།  
\p
\v 12 བདག་ལ་དོན་དེ་དག་ཐོབ་ཟིན་པ་དང་ཕུལ་ཏུ་བྱུང་བ་ཡིན་ཞེས་པ་མིན༌ཏེ། མཱ་ཤི་ཀ་ཡེ་ཤུས་བདག་ལ་བསྩལ་པའི་དགོངས་དོན་དེར་སྙེག༌ཅིང༌། དོན་དེ་བསྒྲུབ་པའི་ཕྱིར་ངས་ཀྱང་བརྩོན་པ་བྱེད་དོ།།  
\v 13 སྤུན་ཟླ༌རྣམས། ངས་རང་ལ་དོན་དེ་ཐོབ་ཟིན་ཞེས་པ་མིན༌ཏེ། བདག་གིས་དོན་གཅིག་ཁོ་ན་སྒྲུབ་པ་ནི་འདས་པ་བསྐྱུར་ཞིང་མདུན་ལ་བརྩོན༌པ་ཡིན།  
\v 14 དེ་ནི་དཀོན་མཆོག་གིས་མཱ་ཤི་ཀ་ཡེ་ཤུའི་ནང༌ནས། ཁོང་གིས་ང་རང་ནམ་མཁའི་བྱ་དགའ་ལེན་པར་ཞལ་སྐུལ་གནང་བ་བཞིན་བདག་ཀྱང་དམིགས་འབེན་དེའི་ཕྱོགས་སུ་རྒྱུག་པ་ཡིན་ནོ།།  
\v 15 དེའི༌ཕྱིར། བདག་ཅག་གི་ཁྲོད་ནས་བསམ་ཤེས་རྣམས་ཀྱིས་དེ་ལྟ་བུའི་བསམ་པ་རྟག་ཏུ་བཅང་དགོས༌ཤིང༌། དོན་འདི་དང་བསམ་ཚུལ་མི་མཚུངས་པ་ཡོད༌ནའང༌། དཀོན་མཆོག་གིས་ཁྱོད་རྣམས་ལ་གསལ་པོར་སྟོན་པར་འགྱུར།  
\v 16 འོན༌ཀྱང༌། བདག་ཅག་ཚད་ག་འདྲ་ཞིག་ལ་སླེབས་ན་ཚད་དེ་བཞིན་དུ་བསྒྲུབ་དགོས༌སོ།།   
\p
\v 17 སྤུན་ཟླ༌རྣམས། ཁྱོད་རྣམས་ཀྱིས་མཉམ་དུ་ང་རང་མིག་དཔེར་བཟུང༌ཞིང༌། ངེད་རྣམས་མིག་དཔེར་འཛིན་མཁན་དེ་རྣམས་ལའང་མཉམ་འཇོག་བྱ་འོས།  
\v 18 ཅིའི་ཕྱིར་ཞེ་ན། མི་མང་པོའི་སྤྱོད་སྟངས་ནི་སྐྱབས་མགོན་མཱ་ཤི་ཀའི་ཤིང་རྒྱ་གྲམ་གྱི་དགྲ་བོ་ཡིན་པའི་ཕྱིར༌རོ།། བདག་གིས་དོན་འདི་ཁྱོད་རྣམས་ལ་ཐེངས་མང་པོར་སྨྲས་མྱོང༌ལ། ད་ལྟ་ཡང་མིག་ལས་མཆི་མ་དང་བཅས་ཏེ་སྨྲས༌པ་ཡིན།  
\v 19 མི་དེ་རྣམས་ཀྱི་མཇུག་འབྲས་ནི་རང་ཉིད་འཇིག་པར་འགྱུར་བ༌དང༌། དེ་རྣམས་ཀྱི་དཀོན་མཆོག་ནི་རང་གི་ལྟོ་བ་ཁོ་ན་ཡིན། དེ་རྣམས་ཀྱིས་རང་གི་ངོ་ཚ་ནི་གཟི་བརྗིད་དུ་བརྩི་ཞིང་འཇིག་རྟེན་གྱི་ལས་ཁོ་ན་བསམས་མོད།  
\v 20 འོན༌ཀྱང༌། བདག་ཅག་ནི་ནམ་མཁའི་ཞིང་ཁམས་ཀྱི་འབངས་མི་ཡིན༌ལ། ཡང་སྐྱབས་མགོན་ཏེ་གཙོ་བོ་ཡེ་ཤུ་མཱ་ཤི་ཀ་ཕེབས་ཡོང་བར་རེ་བ་ཆེན་པོས་སྒུག༌པ་ཡིན།  
\v 21 ཁོང་གིས་འཇིག་རྟེན་གྱི་དངོས་པོ་ཐམས་ཅད་རང་ཉིད་ཀྱི་དབང་འོག་ཏུ་བསྡུ་ནུས་པའི་མཐུ་རྩལ་ཆེན་པོར་བརྟེན༌ནས། བདག་ཅག་གི་ལུས་པོ་ཐ་མལ་བ་འདིའི་རྣམ་པ་བསྒྱུར༌ཏེ། ཁོང་རང་ཉིད་ཀྱི་གཟི་བརྗིད་ལྡན་པའི་སྐུ་ལུས་དང་མཚུངས་པར་མཛད་ངེས༌སོ།།   
\c 4
\cl ལེའུ་བཞི༌པ། 
\toc1 ༄༅། །ཕི་ལིབ་པི་པ་རྣམས་ལ་སྤྲིངས་པའི་འཕྲིན་ཡིག 
\toc2 ཕི་ལིབ་པི་པ། 
\s1 སྐུལ་མ་གནང༌བ།  
\p
\v 1 དེ་ལྟར་ཡིན་པས། བདག་གི་སྙིང་ནས་བརྩེ་ཞིང་རྟག་ཏུ་དྲན་པའི་སྤུན་ཟླ༌རྣམས། ཁྱོད་ཅག་ནི་བདག་གི་དགའ་སྤྲོ་དང་གཙུག་རྒྱན་ཡིན། བདག་གི་སྙིང་ནས་བརྩེ་བ༌ལགས། ཁྱོད་རྣམས་ནི་གཙོ་བོ་ལ་བརྟེན་ནས་བརྟན་པོར་གནས་འོས་སོ།།  
\v 2 བདག་གིས་ཨོ་དི་ཡཱ་དང་སིན་ཏི་ཀེ་གཉིས༌ལ། གཙོ་བོའི་ནང་དུ་བློ་སེམས་མཐུན་དགོས་པར་སྐུལ་མ་གནང༌བ་ཡིན།  
\v 3 ངས་བློ་སེམས་དཀར་བའི་ཆོས་གྲོགས་ཁྱོད་ཀྱིས་ཀྱང་སྐྱེས་མ་འདི་གཉིས་ལ་རོགས་རམ་བྱེད་པར་བསྐུལ། རྒྱུ་མཚན་ནི་བདག་གིས་འཕྲིན་བཟང་སྤེལ་བའི་དུས༌སུ། དེ་གཉིས་ཀྱིས་བདག་དང་མཉམ་དུ་དཀའ་སྡུག་མྱངས་པ་དང་། ཡང་ཀཱ་ལེ་མེན་དང་ཆོས་གྲོགས་གཞན་རྣམས་མཉམ་དུའང་དཀའ་སྡུག་མྱངས་པས། ཚེ་སྲོག་གི་གླེགས་བམ་ནང་དུ་མི་དེ་རྣམས་ཀྱི་མིང་ཡང་བཀོད་ཡོད༌དོ།།   
\p
\v 4 ཁྱོད་རྣམས་གཙོ་བོ་ལ་བརྟེན་ནས་རྟག་ཏུ་དགའ་ཞིང་སྤྲོ་བར༌གྱིས། ངས་ཡང་བསྐྱར་ཁྱོད་རྣམས་ལ་དགའ་ཞིང་སྤྲོ་བར་གྱིས་ཞེས་སྨྲས༌པའོ།།  
\v 5 ཁྱོད་རྣམས་ཀྱི་ཁེངས་སྐྱུང་གི་སེམས་དེ་མི་ཀུན་ལ་ཤེས་སུ་འཇུག་དགོས། གཙོ་བོ༌ཉེ་བར་བཞུགས་སོ།།  
\v 6 དོན་གང་ལའང་སེམས་ཁྲལ་མི་བྱ༌བར། དོན་ཐམས་ཅད་ཀྱི་ཆེད་དུ་གསོལ་བ་འདེབས་པ༌དང༌། སྨོན་ལམ་ཞུ༌བ། དྲིན་ལན་བརྗོད་པ་བརྒྱུད་ནས་ཁྱོད་ཅག་གི་དགོས་མཁོ་གང་ཞིག་དཀོན་མཆོག་ལ་ཞུས་དང༌།  
\v 7 མི་ཡི་བློ་ཡུལ་དུ་མི་ཤོང་བའི་དཀོན་མཆོག་གི་ཞི་བདེ་དེས། མཱ་ཤི་ཀ་ཡེ་ཤུའི་ནང་དུ་ཁྱོད་རྣམས་ཀྱི་སེམས་དང་བསམ་པ་བསྲུང་ངེས༌སོ།།   
\p
\v 8 སྤུན་ཟླ༌རྣམས། མཐར་ཁྱོད་རྣམས་ཀྱིས་བདེན་པ༌དང༌། གུས་པར་འོས༌པ། དྲང༌བདེན། གཙང་མར་གྱུར༌པ། གཅེས་པར་འོས༌པ། སྙན་གྲགས་རྒྱས༌པ། གཤིས་སྤྱོད་ཕུལ་དུ་བྱུང༌བ། བསྟོད་པར་འོས་པ་བཅས་པའི་དོན་གང་ཡིན་ཡང་བསམ་བློ་གཏོང་དགོས་སོ།།  
\v 9 ཁྱོད་རྣམས་ཀྱིས་བདག་ལས་གང་ཞིག་བསླབས་པ་དང་ཐོབ༌པ། གང་ཞིག་མཐོང་བ་དང་ཐོས་པ་ཐམས་ཅད་ལག་ལེན་དུ་འདེབས་པར༌གྱིས་དང་། ཞི་བདེ་གནང་མཁན་དཀོན་མཆོག་ནི་ཁྱོད་རྣམས་དང་མཉམ་དུ་བཞུགས་ངེས༌སོ།།   
\s1 དྲིན་ལན་བརྗོད༌པ།  
\p
\v 10 ཁྱོད་རྣམས་ཀྱིས་ད་ལྟའང་བདག་གི་དོན་དུ་སེམས་ཁྲལ་བྱེད་བཞིན༌པས། ང་རང་གཙོ་བོ་ལ་བརྟེན་ནས་སེམས་སུ་དགའ་སྤྲོ་ཚད་མེད་སྐྱེས་སོ།། ཁྱོད་རྣམས་ཀྱིས་སྔར་ནས་བདག་ལ་སེམས་ཁྲལ་བྱས་ཀྱང་གོ་སྐབས་མ་བྱུང༌།  
\v 11 བདག་ལ་དགོས་མཁོ་གང་ཞིག་ཡོད་པའི་རྐྱེན་གྱིས་གཏམ་འདི་སྨྲས་པ་མིན༌ཏེ། བདག་ནི་གནས་ཚུལ་ཅི་འདྲའི་འོག་ཏུའང་རང་བློ་ཚིམ་པར་གོམས་ཡོད་ལ།  
\v 12 བདག་གིས་འབྱོར་བ་མེད་པའི་འཚོ་བ་དང་ལོངས་སྤྱོད་ཕུན་སུམ་ཚོགས་པའི་འཚོ་བ་ཅི་ལྟར་རོལ་དགོས་པ་ཤེས་ཏེ། རང་གི་ལྟོ་བ་འགྲངས་པའམ་ལྟོགས༌པ། རྒྱུ་ནོར་འཛོམས་པའམ་ཕོངས་པ་བཅས་དོན་གང་ཞིག་བྱུང༌ཡང༌། བདག་ནི་གོམས་པར་གྱུར་ཡོད།  
\v 13 ཅིའི་ཕྱིར་ཞེ་ན། བདག་གིས་རང་ལ་ནུས་མཐུ་གནང་མཁན་སྐྱབས་མགོན་ཡེ་ཤུར་བརྟེན་ནས་དོན་ཐམས་ཅད་བསྒྲུབ་ནུས་པའི་ཕྱིར༌རོ།།  
\v 14 འོན༌ཀྱང༌། ཁྱོད་རྣམས་ཀྱིས་བདག་དང་ལྷན་དུ་དཀའ་སྡུག་མྱོང་ཐུབ་པ་ནི་དོན་ལེགས་པོ་ཞིག་ཡིན་ནོ།།   
\p
\v 15 ཕི་ལིབ་པི་པ༌རྣམས། བདག་གིས་ཐོག་མར་འཕྲིན་བཟང་བསྒྲགས་པའི་དུས༌དེར། མ་ཀེ་དོན་ཡཱ་ཡུལ་དང་ཁ་བྲལ་བའི་དུས་སུ། ཁྱོད་ཅག་གི་ཆོས་ཚོགས་ལས༌གཞན། ཆོས་ཚོགས་གང་གིས་ཀྱང་བདག་ལ་འབུལ་བ་མ་གནང་བ་ནི་ཁྱོད་རྣམས་ཀྱིས་ཤེས་སོ།།  
\v 16 ང་རང་ཐེ་སཱ་ལོ་ནེ་ཀེར་ཡོད་པའི་དུས༌སུའང༌། ཁྱོད་རྣམས་ཀྱིས་ཐེངས་འགར་མི་མངགས་ཏེ་ངའི་དགོས་མཁོ་བཞིན་དུ་འབུལ་བ་གནང་མྱོང༌།  
\v 17 ད༌ལྟ་བདག་གིས་འབུལ་བར་དམིགས་པ་མ་ཡིན་པར། ཁྱོད་རྣམས་ཀྱི་ལས་བཟང་པོའི་འབྲས་བུ་རིམ་བཞིན་ཇེ་མང་དུ་འགྱུར༌ཞིང༌། ཁྱོད་ཅག་གི་རྩིས་ཐོའི་སྟེང་དུ་འགོད་རྒྱུ་ཡོད་པར་དམིགས་པའི་ཕྱིར༌རོ།།  
\v 18 འོན༌ཀྱང༌། བདག་ལ་ཐམས་ཅད་འཛོམས་ཤིང་ལྷག་མའང་ཡོད་དེ་རང་བློའང་ཚིམས༌པ་ཡིན། བདག་གིས་ཨེ་པབ་རོ་དི་ཡིས་བསྐྱལ་ཡོང་བའི་ཁྱོད་ཅག་གི་འབུལ་བ་བླངས༌ཤིང༌། དེ་ནི་དཀོན་མཆོག་ལ་དྲི་ཞིམ་གྱི་འབུལ་བ་དང་ཐུགས་དགྱེས་པའི་མཆོད་པ་ཕུལ་བ་དང་མཚུངས་སོ།།  
\v 19 བདག་གི་དཀོན་མཆོག་གིས་ཁོང་ཉིད་ཀྱི་ཕུན་སུམ་ཚོགས་པའི་གཟི་བརྗིད་ཇི་བཞིན༌དུ། མཱ་ཤི་ཀ་ཡེ་ཤུའི་ནང་དུ་ཁྱོད་ཅག་གི་དགོས་མཁོ་ཐམས་ཅད་བསྐང་ངེས༌ཡིན།  
\v 20 བདག་ཅག་གི་ཡབ་དཀོན་མཆོག་ལ་ཇི་སྲིད་བར་དུ་བསྟོད་བསྔགས་བརྗོད་པར༌ཤོག ཨ༌མེན།   
\s1 མཇུག་མཐའི་འཚམས༌ཞུ།  
\p
\v 21 ཁྱོད་རྣམས་ཀྱིས་མཱ་ཤི་ཀ་ཡེ་ཤུའི་ནང་གི་དད་ལྡན་དམ་པ་ཐམས་ཅད་ལའང་འཚམས་འདྲི་ཞུ་བར་བྱའོ།། བདག་གི་གམ་དུ་ཡོད་པའི་སྤུན་ཟླ་རྣམས་ཀྱིས་ཀྱང་ཁྱོད་རྣམས་ལ་འཚམས་འདྲི༌ཞུའོ།།  
\v 22 འདིར་ཡོད་པའི་དད་ལྡན་དམ་པ་ཐམས་ཅད་ཀྱིས་ཀྱང་ཁྱོད་རྣམས་ལ་འཚམས་འདྲི༌ཞུའོ།། ལྷག་པར་སེ་བཟིར་གྱི་ཕོ་བྲང་ནང་དུ་ཡོད་པ་རྣམས་ཀྱིས་ཀྱང་ཆེད་དུ་ཁྱོད་ཅག་ལ་འཚམས་འདྲི༌ཞུའོ།།   
\p
\v 23 གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་ནམ་ཡང་ཁྱོད་ཅག་གི་སེམས་སུ་གནས་པར༌སྨོན།། །།