\id LEV – NTB 
\h ལེ་ཝིའི་ཚུལ་ཁྲིམས། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\mt1 ༄༅། །ལེ་ཝིའི་ཚུལ་ཁྲིམས་ཀྱི་མདོ།  
\imt1 ལེ་ཝིའི་ཚུལ་ཁྲིམས་ཀྱི་མདོ་ཞེས་བྱ་བའི་ངོ་སྤྲོད་མདོར་བསྡུས།  
\is1 ཁ་བྱང་དང་ལོ་རྒྱུས་རྒྱབ་ལྗོངས།  
\ipi ལེ་ཝིའི་ཚུལ་ཁྲིམས་ཀྱི་གཞུང་འདིའི་ཁ་བྱང་ནི་གྷི་རིག་གི་སྐད་དུ་བསྒྱུར་བའི་ཞལ་ཆད་རྙིང་པ་སྟེ་སིབ་ཐུ་ཨ་ཀྱན་ཏི་༼Septuagint༽ཞེས་པ་ལས་བྱུང་བ་ཡིན། དེ་ནི་ལེ་ཝི་པ་དང་འབྲེལ་བ་ཞེས་པའི་དོན་ལ་འཇུག ལེ་ཝིའི་ཚུལ་ཁྲིམས་ཀྱི་གཞུང་འདིར་ལེ་ཝི་པ་འབའ་ཞིག་གི་ལས་འགན་ཁོ་ན་བཀོད་ཡོད་པ་ཞིག་མིན་ཡང་། གུར་མཆོག་ལ་བསྙེན་བཀུར་ཞུ་བ་དང་ཞབས་ཕྱི་སྒྲུབ་པ་གཞིར་བཞག་ནས་མིང་དེ་ལྟར་བཏགས་པ་རེད། ཨེ་ཅིབ་ནས་ཐོན་པའི་མདོ་ལས་གུར་མཆོག་ཅི་ལྟར་བཞེངས་པའི་སྐོར་བསྟན་ཡོད་པ་དང་། ལེ་ཝིའི་ཚུལ་ཁྲིམས་ལས་གུར་མཆོག་ལ་བསྙེན་བཀུར་ཞུ་བའི་བཀའ་ཁྲིམས་དང་ལུགས་སྲོལ། ཡང་དག་པའི་མཛད་སྒོ་དང་ཀུན་སྤྱོད་ཕྱོགས་ཀྱི་བཀའ་ཁྲིམས། ཉིན་དམ་པ། ངལ་གསོ་ཡོངས་སུ་རྫོགས་པའི་ལོ་དང་དགའ་སྟོན་གྱི་ལོ་བཅས་ལ་ལམ་སྟོན་གནང་ཡོད་པ་རེད།  
\is1 ཡི་གེར་འགོད་མཁན་དང་འགོད་དུས།  
\ipi ལེ་ཝིའི་ཚུལ་ཁྲིམས་ཀྱི་ལེའུ་དང་པོའི་ཚིག་རྐང་དང་པོ་ནས་བཟུང་ལེ་ཝིའི་ཚུལ་ཁྲིམས་ཀྱི་གཞུང་འདི་ནི་དཀོན་མཆོག་གིས་མོ་ཤེ་ལ་ཐད་ཀར་གནང་བའི་བཀའ་ཡིན་ཞེས་གསུངས་ཡོད། གཞུང་འདི་ལས་དཀོན་མཆོག་ཡ་ཝཱེས་༼དཀོན་མཆོག་ཡ་ཝཱེ་ཞེས་པ་དཀོན་མཆོག་གི་མཚན་ཡིན།༽མོ་ཤེ་ལ་བཀའ་གནང་བའི་སྐོར་ཐེངས་ལྔ་བཅུ་ལྷག་ལ་བརྗོད་ཡོད། མོ་ཤེ་ཡིས་གཞུང་འདི་ཡི་གེར་བཀོད་པའི་ལོ་ཚིགས་ནི་སྤྱི་ལོ་སྔོན་གྱི་1446ནས་1406བར་ཡིན་པར་གསུངས།  
\is1 བརྗོད་སྙིང་དང་གསུང་འཕྲིན།  
\ipi ལེ་ཝིའི་ཚུལ་ཁྲིམས་ཀྱི་བརྗོད་བྱ་གཙོ་བོ་ནི་དམ་པ་ཡིན་ཏེ། དཀོན་མཆོག་གི་དམ་པ་དང་མིའི་རིགས་ཀྱི་དམ་པ་ཡིན། ལེའུ་བཅུ་གཅིག་པའི་ཚིག་རྐང་བཞི་བཅུ་ཞེ་ལྔ་ལས་དམ་པའི་སྐོར་གྱི་བཀའ་འདི་ལྟར་གསུངས་ཡོད་དེ། བདག་ནི་དམ་པ་ཡིན་པའི་ཕྱིར་ཁྱོད་ཀྱང་དམ་པ་ཡིན་དགོས་ཞེས་པའོ། །གཞུང་འདིའི་ནང་གི་བཀའ་དང་ཁྲིམས་རྣམས་ཡེས་ར་ཨེལ་པ་རྣམས་ཀྱིས་དཀོན་མཆོག་ལ་བསྙེན་བཀུར་ཞུ་བ་དང་དཀོན་མཆོག་གི་འབངས་མི་དམ་པ་བཞིན་འཚོ་བ་རོལ་བའི་ཆེད་དུ་གནང་བ་ཡིན། གཞུང་འདིའི་ནང་གི་བཀའ་ཁྲིམས་ལ་ལ་མཆོད་པ་འབུལ་བའི་སྐོར་དང་། ལ་ལ་ཉིན་རྒྱུན་གཙང་མ་བྱེད་པའི་ལས་དོན་གྱི་སྐོར། ཡང་ལ་ལ་ཁྱད་པར་ཅན་གྱི་ཉིན་མོ་བརྩི་སྲུང་བྱེད་དགོས་པ་སོགས་ཀྱི་སྐོར་ཡིན། དེ་ལས་གཞན་དཀོན་མཆོག་གིས་ལེ་ཝི་པའི་མཆོད་དཔོན་རྣམས་ལ་མཆོད་པ་འབུལ་ཚུལ་དང་ཁོང་གི་བཀའ་ཅི་ལྟར་ལག་བསྟར་བྱེད་སྟངས་སྐོར་དམིགས་བསལ་གྱིས་གསུངས་ཡོད།  
\is1 འཆར་ཟིན།  
\ipi 1. མཆོད་པ་འབུལ་བའི་བཀའ་དང་ཁྲིམས་ཀྱི་སྐོར། ༼ 1:1-7:38 ༽  
\ipi 2. ཨ་རོན་དང་ཁོང་གི་བུ་རྒྱུད་རྣམས་དཀོན་མཆོག་གི་མཆོད་དཔོན་ལ་བསྐོས་པའི་སྐོར། ༼ 8:1-10:20 ༽  
\ipi 3. ཅི་ལྟར་དམ་པར་སྤྱོད་པའི་སྒྲིག་ཁྲིམས་ཀྱི་སྐོར། ༼ 11:1-15:33 ༽  
\ipi 4. སྡིག་པ་བཤགས་པའི་ཉིན་མོ། ༼ 16:1-34 ༽  
\ipi 5. ཁ་ཡོད་ལག་ཡོད་ཀྱིས་དམ་པར་སྤྱོད་དགོས་པའི་སྐོར། ༼17:1-22:23 ༽  
\ipi 6. ངལ་གསོ་བའི་ཉིན་མོ་དང་གསོལ་སྟོན། དུས་ཚིགས་བཅས་དང་འབྲེལ་བའི་ཁྲིམས་ཁ་ཤས། ༼ 23:1-25:55 ༽  
\ipi 7. དཀོན་མཆོག་གི་བྱིན་རླབས་འཐོབ་པའི་ཆ་རྐྱེན་སྐོར། ༼ 26:1-27:34 ༽  
\c 1
\cl ལེའུ་དང་པོ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 སྦྱིན་སྲེག་གི་ཁྲིམས།  
\p
\v 1 དེ་ཡང་དཀོན་མཆོག་ཡ་ཝཱེས་མཇལ་འཕྲད་གུར་མཆོག་ནས་མོ་ཤེ་ཞལ་འབོད་གནང་སྟེ་འདི་སྐད་དུ།  
\v 2 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག ཁྱོད་རྣམས་ལས་མི་སུ་ཞིག་གིས་དཀོན་མཆོག་ཡ་ཝཱེ་ལ་སྒོ་ཕྱུགས་ཀྱི་མཆོད་པ་འབུལ་བའི་ཚེ། ཁྱོད་ཀྱི་མཆོད་པ་དེ་བ་ཁྱུ་དང་ར་ལུག་གི་ཁྱུ་ནས་འབུལ་དགོས།  
\v 3 གལ་སྲིད་ཁོས་སྦྱིན་སྲེག་ཏུ་འབུལ་བའི་མཆོད་པ་ནི་བ་གླང་ཡིན་ན། གླང་ཐུག་སྐྱོན་གྱིས་མ་གོས་པ་ཞིག་དཀོན་མཆོག་ཡ་ཝཱེའི་སྤྱན་སྔར་ཁོང་གི་ཐུགས་ལ་འབབ་ཕྱིར་མཇལ་འཕྲད་གུར་མཆོག་གི་སྒོ་ཁར་འཁྲིད་དགོས།  
\v 4 རང་གི་སྡིག་པ་བཤག་པའི་ཕྱིར། ཁོས་སྦྱིན་སྲེག་ཏུ་འབུལ་བའི་ཕྱུགས་ཟོག་གི་མགོ་ལ་ལག་པ་འཇོག་དགོས། དེ་ལྟར་བྱས་ན་དཀོན་མཆོག་ཡ་ཝཱེའི་ཐུགས་དང་ལྡན་པར་འགྱུར་རོ། །  
\v 5 དེ་ནས་ཁོས་དཀོན་མཆོག་ཡ་ཝཱེའི་དྲུང་དུ་གླང་ཁ་ཆུང་དེ་བཤའ་དགོས་ཤིང་། ཨ་རོན་གྱི་བུ་མཆོད་དཔོན་ཡིན་པ་རྣམས་ཀྱིས་ཁྲག་ཁྱེར་འོངས་ཏེ། མཇལ་འཕྲད་གུར་མཆོག་གི་སྒོ་ཁར་ཡོད་པའི་མཆོད་ཁྲིའི་ཕྱོགས་བཞི་རུ་གཏོར་བ་དང་།  
\v 6 ཁོས་སྦྱིན་སྲེག་ཏུ་འབུལ་བའི་ཕྱུགས་ཟོག་གི་པགས་པ་བཤུས་ནས་དེའི་ཤ་ལྷུ་ལྷུ་རུ་གཅོད་དགོས།  
\v 7 དེ་ནས་མཆོད་དཔོན་ཨ་རོན་གྱི་བུ་རྣམས་ཀྱིས་མཆོད་ཁྲིའི་སྟེང་མེ་སྦར་བ་དང་། མེའི་སྟེང་དུ་བུད་ཤིང་བསྒྲིག་དགོས་སོ། །  
\v 8 ཨ་རོན་གྱི་བུ་མཆོད་དཔོན་ཡིན་པ་རྣམས་ཀྱིས། ལྷུ་རྣམས་མགོ་དང་ཚིལ་བཅས་མཆོད་ཁྲིའི་སྟེང་མེ་འབར་བའི་བུད་ཤིང་གི་ཐོག་ཏུ་འཇོག་དགོས།  
\v 9 སྦྱིན་སྲེག་གི་ནང་ཁྲོལ་དང་རྐང་ལག་རྣམས་ཆུས་གཙང་མར་བཀྲུས་ནས། མཆོད་དཔོན་གྱིས་དེ་ཡོངས་སུ་མཆོད་ཁྲིའི་སྟེང་སྦྱིན་སྲེག་གཏོང་དགོས། དེ་ནི་སྦྱིན་སྲེག་དང་དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་མེ་མཆོད་ཡིན་ནོ། །  
\v 10 གལ་སྲིད་ཁོས་སྦྱིན་སྲེག་ཏུ་འབུལ་བའི་མཆོད་པ་ནི་ར་ལུག་གི་ཁྱུ་གང་ནས་ཡིན་ན། ཕོ་ཕྱུགས་སྐྱོན་གྱི་དྲི་མས་མ་གོས་པ་ཞིག་འབུལ་དགོས།  
\v 11 ཁོས་མཆོད་ཁྲིའི་བྱང་ཕྱོགས་སུ་དཀོན་མཆོག་ཡ་ཝཱེའི་དྲུང་དུ་ཕྱུགས་དེ་བཤས་ནས། ཨ་རོན་གྱི་བུ་མཆོད་དཔོན་ཡིན་པ་རྣམས་ཀྱིས་དེའི་ཁྲག་མཆོད་ཁྲིའི་ཕྱོགས་བཞི་རུ་གཏོར་དགོས།  
\v 12 ཁོས་སྦྱིན་སྲེག་དེའི་ཤ་ལྷུ་ལྷུ་རུ་བཅད་ནས། མཆོད་དཔོན་གྱིས་ལྷུ་རྣམས་མགོ་དང་ཚིལ་བཅས་མཆོད་ཁྲིའི་སྟེང་མེ་འབར་བའི་བུད་ཤིང་གི་ཐོག་ཏུ་འཇོག་དགོས།  
\v 13 ནང་ཁྲོལ་དང་རྐང་ལག་རྣམས་ཆུས་གཙང་མར་བཀྲུས་ནས། མཆོད་དཔོན་གྱིས་དེ་ཡོངས་སུ་ཕུལ་ཏེ་མཆོད་ཁྲིའི་སྟེང་སྦྱིན་སྲེག་གཏོང་དགོས། དེ་ནི་སྦྱིན་སྲེག་དང་དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་མེ་མཆོད་ཡིན་ནོ། །  
\v 14 གལ་སྲིད་ཁོས་དཀོན་མཆོག་ཡ་ཝཱེ་ལ་འབུལ་བའི་སྦྱིན་སྲེག་གི་མཆོད་པ་ནི་འདབ་ཆགས་ཡིན་ན། བྱ་ཐི་བའམ་ཕུག་རོན་ཆུང་ངུ་མཆོད་པར་འབུལ་དགོས་པ་དང་།  
\v 15 མཆོད་དཔོན་གྱིས་འདབ་ཆགས་མཆོད་ཁྲིའི་རྩར་ཁྱེར་འོངས་ནས་དེའི་སྐེ་གཅུ་བ་དང་མགོ་ཕྲལ་ཏེ་མཆོད་ཁྲིའི་སྟེང་སྦར་བ་དང་། ཁྲག་ནི་མཆོད་ཁྲིའི་ལོགས་སུ་བཞུར་དགོས།  
\v 16 ཡང་ཕོ་བ་དང་བྱ་སྒྲོ་རྣམས་བཏོན་ཏེ། མཆོད་ཁྲིའི་ཤར་ཕྱོགས་སུ་ཐལ་བ་འཕོ་སར་གཡུག་དགོས།  
\v 17 དེ་ནས་ཁོས་འདབ་ཆགས་ཀྱི་གཤོག་པ་གཉིས་ནས་བཟུང་སྟེ་རྒྱོང་བར་བྱེད་ཀྱང་དུམ་བུར་གཅོད་པར་མི་བྱ་སྟེ། མཆོད་དཔོན་གྱིས་མཆོད་ཁྲིའི་སྟེང་འབར་བའི་བུད་ཤིང་གི་ཐོག་ཏུ་སྦྱིན་སྲེག་གཏོང་དགོས་པ་དང་། དེ་ནི་སྦྱིན་སྲེག་དང་དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་མེ་མཆོད་ཡིན་ནོ། །   
\c 2
\cl ལེའུ་གཉིས་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 འབྲུ་རིགས་ཀྱི་མཆོད་པའི་ཁྲིམས།  
\p
\v 1 གལ་སྲིད་མི་ཞིག་གིས་འབྲུ་རིགས་ཀྱི་མཆོད་པ་དཀོན་མཆོག་ཡ་ཝཱེ་ལ་འབུལ་བ་ཡིན་ན། གྲོ་ཞིབ་མཆོད་པར་འབུལ་དགོས་ཤིང་། དེའི་སྟེང་དུ་སྣུམ་ལྡུག་པ་དང་། སྤོས་དཀར་ཡང་དེའི་སྟེང་དུ་བཞག་ནས།  
\v 2 ཨ་རོན་གྱི་བུ་མཆོད་དཔོན་ཡིན་པ་རྣམས་ཀྱི་མདུན་དུ་འཁྱེར་དགོས་ལ། མཆོད་དཔོན་གྱིས་གྲོ་ཞིབ་ཁྱོར་བ་གང་ལེན་པ་དང་། ཡང་སྣུམ་ཅུང་ཙམ་དང་སྤོས་དཀར་ཡོངས་རྫོགས་བླངས་ནས། དྲན་རྟེན་དུ་མཆོད་ཁྲིའི་སྟེང་སྦྱིན་སྲེག་གཏོང་དགོས། དེ་ནི་དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་མེ་མཆོད་ཡིན་ནོ། །  
\v 3 འབྲུ་རིགས་ཀྱི་ལྷག་མ་རྣམས་ཨ་རོན་དང་ཁོའི་བུ་རྣམས་ལ་དབང་ཞིང་། དེ་ནི་དཀོན་མཆོག་ཡ་ཝཱེ་ལ་ཕུལ་བའི་མེ་མཆོད་ཀུན་ལས་དམ་པའི་མཆོག་ཡིན་ནོ། །  
\v 4 གལ་སྲིད་ཐབ་ལ་བསྲེགས་པའི་འབྲུ་རིགས་མཆོད་པར་འབུལ་བ་ཡིན་ན། གྲོ་ཞིབ་ཀྱི་སྐྱུར་མེད་བག་ལེབ་སྣུམ་བསྲེས་མ་དང་། ཡང་ན་སྐྱུར་མེད་གོར་ལེབ་སྲབ་བུ་སྣུམ་བྱུགས་མ་ཡིན་དགོས།  
\v 5 གལ་སྲིད་ཁྱོད་ཀྱིས་ལྕགས་སླང་སྟེང་གི་འབྲུ་རིགས་མཆོད་པར་འབུལ་བ་ཡིན་ན། སྣུམ་བསྲེས་པའི་སྐྱུར་མེད་གྲོ་ཞིབ་ཡིན་དགོས་ལ།  
\v 6 དུམ་བུར་བགོས་ནས་དེ་ལ་སྣུམ་ལྡུག་དགོས། དེ་ནི་འབྲུ་རིགས་ཀྱི་མཆོད་པ་ཡིན་ནོ། །  
\v 7 གལ་སྲིད་སླ་ངའི་ནང་བསྲེགས་པའི་འབྲུ་རིགས་མཆོད་པར་འབུལ་བ་ཡིན་ན། དེ་ནི་སྣུམ་དང་གྲོ་ཞིབ་ཀྱིས་བཟོ་དགོས།  
\v 8 དེ་བཞིན་བཟོས་པའི་འབྲུ་རིགས་ཀྱི་མཆོད་པ་དཀོན་མཆོག་ཡ་ཝཱེའི་དྲུང་དུ་ཁྱེར་ནས་མཆོད་དཔོན་ལ་སྤྲོད་པ་དང་། མཆོད་དཔོན་གྱིས་མཆོད་ཁྲིའི་མདུན་དུ་འཁྱེར་དགོས་སོ། །  
\v 9 མཆོད་དཔོན་གྱིས་འབྲུ་རིགས་ཀྱི་མཆོད་པ་ལས་དྲན་རྟེན་གྱི་སྐལ་བླངས་ནས་མཆོད་ཁྲིའི་སྟེང་སྦྱིན་སྲེག་གཏོང་དགོས་ཤིང་། དེ་ནི་དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་མེ་མཆོད་ཡིན་ནོ། །  
\v 10 འབྲུ་རིགས་ཀྱི་ལྷག་མ་རྣམས་ཨ་རོན་དང་ཁོའི་བུ་རྣམས་ལ་དབང་ཞིང་། དེ་ནི་དཀོན་མཆོག་ཡ་ཝཱེ་ལ་ཕུལ་བའི་མེ་མཆོད་ཀུན་ལས་དམ་པའི་མཆོག་ཡིན་ནོ། །  
\v 11 དཀོན་མཆོག་ཡ་ཝཱེ་ལ་འབུལ་བའི་འབྲུ་རིགས་ཀྱི་མཆོད་པ་གང་ཡིན་ཡང་སྐྱུར་རྩི་འདྲེས་མི་རུང་སྟེ། ཁྱོད་རྣམས་ཀྱིས་སྐྱུར་རྩི་དང་སྦྲང་རྩི་གང་ཡིན་ཡང་དེ་བསྲེགས་ནས་དཀོན་མཆོག་ཡ་ཝཱེ་ལ་མེ་མཆོད་དུ་འབུལ་མི་རུང་ངོ་། །  
\v 12 དེ་དག་ཐོག་ཕུད་ཀྱི་མཆོད་པ་རུ་དཀོན་མཆོག་ཡ་ཝཱེ་ལ་ཕུལ་ཆོག་མོད། འོན་ཀྱང་མཆོད་ཁྲིའི་སྟེང་དྲི་ཞིམ་གྱི་མཆོད་པར་འབུལ་མི་རུང་།  
\v 13 འབུལ་བའི་འབྲུ་རིགས་ཀྱི་མཆོད་པ་གང་ཡིན་ཡང་དེ་ལ་ཚྭ་འདེབས་དགོས་ཏེ། འབྲུ་རིགས་ཀྱི་མཆོད་པའི་སྟེང་དུ་ཁྱོད་དང་དཀོན་མཆོག་བར་ཞལ་ཆད་བཞག་པའི་ཚྭ་ནི་མེད་མི་རུང་། མཆོད་པ་ཐམས་ཅད་ཀྱི་སྟེང་དུ་ཚྭ་བཏབ་ནས་འབུལ་དགོས་སོ། །  
\v 14 གལ་སྲིད་ལོ་ཏོག་གི་ཕུད་དཀོན་མཆོག་ཡ་ཝཱེ་ལ་འབྲུ་རིགས་ཀྱི་མཆོད་པར་འབུལ་བ་ཡིན་ན། མེ་ལ་བསྲེགས་པའི་སྙེ་མ་གསར་ཐོན་ཏེ། རགས་མོར་བཏགས་པའི་འབྲུ་རིགས་གསར་པ་དེ་ཐོག་ཕུད་ཀྱི་འབྲུ་མཆོད་དུ་འབུལ་དགོས།  
\v 15 སྣུམ་དང་སྤོས་དཀར་ཡང་དེའི་སྟེང་དུ་འཇོག་དགོས་ལ། དེ་ནི་འབྲུ་རིགས་ཀྱི་མཆོད་པ་ཡིན་ནོ། །  
\v 16 ཡང་མཆོད་དཔོན་གྱིས་མཆོད་པ་ལས་དྲན་རྟེན་གྱི་སྐལ་ཏེ། རགས་མོར་བཏགས་པའི་འབྲུ་རིགས་གསར་པ་དང་སྣུམ་ཉུང་ཙམ་རེ་དང་། སྤོས་དཀར་ཡོངས་རྫོགས་བཅས་སྦྱིན་སྲེག་གཏོང་བ་དང་། དེ་ནི་དཀོན་མཆོག་ཡ་ཝཱེ་ལ་ཕུལ་བའི་མེ་མཆོད་ཡིན་ནོ། །   
\c 3
\cl ལེའུ་གསུམ་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 ཞི་བདེའི་མཆོད་པའི་ཁྲིམས།  
\p
\v 1 གལ་སྲིད་མི་ཞིག་གིས་ཞི་བདེའི་མཆོད་པ་འབུལ་བ་དང་། བ་ཁྱུ་ལས་འབུལ་ན་ཕོ་ཕྱུགས་མོ་ཕྱུགས་གང་ཡིན་ཡང་སྐྱོན་གྱི་དྲི་མས་མ་གོས་པ་ཞིག་དཀོན་མཆོག་ཡ་ཝཱེའི་དྲུང་དུ་འབུལ་དགོས་པ་དང་།  
\v 2 ཁོས་མཆོད་པར་འབུལ་བྱའི་ཕྱུགས་ཟོག་དེའི་མགོ་ལ་ལག་པ་བཞག་ནས་མཇལ་འཕྲད་གུར་མཆོག་གི་སྒོ་ཁ་རུ་བཤའ་དགོས་ཤིང་། ཨ་རོན་གྱི་བུ་མཆོད་དཔོན་ཡིན་པ་རྣམས་ཀྱིས་དེའི་ཁྲག་མཆོད་ཁྲིའི་ཕྱོགས་བཞི་རུ་གཏོར་དགོས།  
\v 3 ཞི་བདེའི་མཆོད་པ་ལས་དཀོན་མཆོག་ཡ་ཝཱེ་ལ་མེ་མཆོད་དུ་འབུལ་དགོས་པ་འདི་ལྟ་སྟེ། ནང་ཁྲོལ་བཏུམས་པའི་ཚིལ་དང་ནང་ཁྲོལ་སྟེང་གི་ཚིལ་ཐམས་ཅད་དང་།  
\v 4 མཁལ་མ་གཉིས་དང་དེའི་སྟེང་གི་ཚིལ་ཏེ་མཁལ་མའི་ལོགས་གཉིས་སུ་ཡོད་པའི་ཚིལ་དང་། མཆིན་པའི་རྩ་རྒྱུས་ནི་མཁལ་མ་དང་བཅས་ལེན་པར་བྱའོ། །  
\v 5 དེ་ཡང་ཨ་རོན་གྱི་བུ་རྣམས་ཀྱིས་དེ་རྣམས་མཆོད་ཁྲིའི་སྟེང་གི་མེ་དང་བུད་ཤིང་དང་། སྦྱིན་སྲེག་བཅས་ཀྱི་སྟེང་ལ་བཞག་ནས་སྦར་དགོས་ལ། དེ་ནི་དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་མེ་མཆོད་ཡིན་ནོ། །  
\v 6 ཅི་སྟེ་མི་ཞིག་གིས་དཀོན་མཆོག་ཡ་ཝཱེ་ལ་མཆོད་པའི་ཕྱིར་ཞི་བདེའི་མཆོད་པ་འབུལ་བ་དང་། ར་ལུག་གི་ཁྱུ་ལས་འབུལ་བ་ཡིན་ན་ཕོ་ཕྱུགས་མོ་ཕྱུགས་གང་ཡིན་ཡང་། དེ་ནི་སྐྱོན་གྱི་དྲི་མས་མ་གོས་པ་ཞིག་ཡིན་དགོས།  
\v 7 གལ་སྲིད་ཁོས་ལུ་གུ་ཞིག་མཆོད་པར་འབུལ་ན་དེ་དཀོན་མཆོག་ཡ་ཝཱེའི་དྲུང་དུ་འབུལ་དགོས་པ་དང་།  
\v 8 མཆོད་པར་འབུལ་བྱའི་ཕྱུགས་ཟོག་གི་མགོ་ལ་ལག་པ་བཞག་ནས་མཇལ་འཕྲད་གུར་མཆོག་གི་མདུན་དུ་བཤའ་དགོས་ཤིང་། ཨ་རོན་གྱི་བུ་རྣམས་ཀྱིས་དེའི་ཁྲག་མཆོད་ཁྲིའི་ཕྱོགས་བཞི་རུ་གཏོར་དགོས་སོ། །  
\v 9 དེ་ནས་ཞི་བདེའི་མཆོད་པ་ལས། ཁོས་ཚིལ་བླངས་ནས་དཀོན་མཆོག་ཡ་ཝཱེ་ལ་མེ་མཆོད་དུ་འབུལ་དགོས་པ་འདི་ལྟ་སྟེ། སྒལ་ཚིགས་ནས་བླངས་པའི་རྔ་མ་ཚོན་པོ་ཧྲིལ་པོ་དང་། ནང་ཁྲོལ་བཏུམས་པའི་ཚིལ་དང་ནང་ཁྲོལ་སྟེང་གི་ཚིལ་ཐམས་ཅད་དང་།  
\v 10 མཁལ་མ་གཉིས་དང་དེའི་སྟེང་གི་ཚིལ་ཏེ་མཁལ་མའི་ལོགས་གཉིས་སུ་ཡོད་པའི་ཚིལ་དང་། མཆིན་པའི་རྩ་རྒྱུས་ནི་མཁལ་མ་དང་བཅས་ལེན་དགོས་སོ། །  
\v 11 ཡང་མཆོད་དཔོན་གྱིས་དེ་རྣམས་མཆོད་ཁྲིའི་སྟེང་སྦྱིན་སྲེག་གཏོང་དགོས་ལ། དེ་ནི་དཀོན་མཆོག་ཡ་ཝཱེ་ལ་ཞལ་ཟས་སུ་ཕུལ་བའི་མེ་མཆོད་ཡིན་ནོ། །  
\v 12 གལ་སྲིད་སུ་ཞིག་གི་མཆོད་པ་ནི་ར་ཞིག་ཡིན་ན། དེ་དཀོན་མཆོག་ཡ་ཝཱེའི་དྲུང་དུ་འབུལ་དགོས་པ་དང་།  
\v 13 དེའི་མགོ་ལ་ལག་པ་བཞག་ནས་མཇལ་འཕྲད་གུར་མཆོག་གི་མདུན་དུ་བཤའ་དགོས་པ་དང་། ཨ་རོན་གྱི་བུ་རྣམས་ཀྱིས་དེའི་ཁྲག་མཆོད་ཁྲིའི་ཕྱོགས་བཞི་རུ་གཏོར་དགོས་སོ། །  
\v 14 ཡང་མཆོད་པ་དེ་ལས་དཀོན་མཆོག་ཡ་ཝཱེ་ལ་མེ་མཆོད་འབུལ་དགོས་པ་འདི་ལྟ་སྟེ། ནང་ཁྲོལ་བཏུམས་པའི་ཚིལ་དང་ནང་ཁྲོལ་སྟེང་གི་ཚིལ་ཐམས་ཅད་དང་།  
\v 15 མཁལ་མ་གཉིས་དང་དེའི་སྟེང་གི་ཚིལ་ཏེ་མཁལ་མའི་ལོགས་གཉིས་སུ་ཡོད་པའི་ཚིལ་དང་། མཆིན་པའི་རྩ་རྒྱུས་དེ་མཁལ་མ་དང་བཅས་ལེན་དགོས་སོ། །  
\v 16 མཆོད་དཔོན་གྱིས་དེ་དག་དྲི་ཞིམ་མེ་མཆོད་ཀྱི་ཞལ་ཟས་སུ་མཆོད་ཁྲིའི་སྟེང་སྦྱིན་སྲེག་གཏོང་དགོས་ལ། ཚིལ་ཐམས་ཅད་དཀོན་མཆོག་ཡ་ཝཱེའི་ཡིན་ནོ། །  
\v 17 ཁྱོད་རྣམས་ཀྱི་སྡོད་གནས་ཐམས་ཅད་དུ་ཚིལ་དང་ཁྲག་གང་ཡིན་ཡང་བཟའ་མི་རུང་ལ། དེ་ནི་ཁྱོད་ཅག་མི་རབས་ནས་མི་རབས་བར་དུས་གཏན་གྱི་སྒྲིག་ཁྲིམས་ཡིན་དགོས་ཞེས་པའོ་གསུངས་སོ། །   
\c 4
\cl ལེའུ་བཞི་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 སྡིག་བཤགས་མཆོད་པའི་ཁྲིམས།  
\p
\v 1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 2 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག གལ་སྲིད་སུ་ཞིག་གིས་མ་ཤེས་པར་སྡིག་པ་སྤྱད་ཅིང་། བྱ་བ་གང་རུང་གི་སྟེང་དཀོན་མཆོག་ཡ་ཝཱེས་གསུངས་པའི་བཀའ་རྣམས་ལས་གཅིག་དང་འགལ་བའམ།  
\v 3 ཡང་ན་སྣུམ་གྱིས་བྱུགས་པའི་མཆོད་དཔོན་གྱིས་སྡིག་པ་བྱས་ནས། མི་རྣམས་ཉེས་པའི་ནང་ལྷུང་དུ་བཅུག་ན། རང་གིས་བྱས་པའི་སྡིག་པའི་དོན་དུ་སྒོ་ཕྱུགས་ལས་གླང་ཐུག་སྐྱོན་མེད་པ་ཞིག་དཀོན་མཆོག་ཡ་ཝཱེ་ལ་སྡིག་བཤགས་མཆོད་པར་འབུལ་དགོས།  
\v 4 ཁོས་གླང་ཐུག་དེ་མཇལ་འཕྲད་གུར་མཆོག་གི་སྒོ་ཁར་ཁྲིད་ནས། དཀོན་མཆོག་ཡ་ཝཱེའི་དྲུང་དུ་གླང་ཐུག་གི་མགོ་ལ་ལག་པ་བཞག་ནས་དེ་དཀོན་མཆོག་ཡ་ཝཱེའི་སྤྱན་སྔར་བཤའ་དགོས།  
\v 5 སྣུམ་གྱིས་བྱུགས་པའི་མཆོད་དཔོན་གྱིས་གླང་ཐུག་གི་ཁྲག་ཉུང་ཙམ་བླངས་ནས་མཇལ་འཕྲད་གུར་མཆོག་ཏུ་འཁྱེར་འོང་བ་དང་།  
\v 6 མཆོད་དཔོན་གྱིས་མཛུབ་མོ་ཁྲག་ནང་བསྒྲེས་ནས། དཀོན་མཆོག་ཡ་ཝཱེའི་སྤྱན་སྔར་དམ་པའི་གནས་ཀྱི་ཡོལ་བར་གཏད་ནས་ལན་བདུན་གཏོར་དགོས།  
\v 7 ཡང་ཁྲག་ཉུང་ཙམ་ཞིག་མཇལ་འཕྲད་གུར་མཆོག་གི་ནང་དུ་འབྱུག་དགོས་ཏེ། དཀོན་མཆོག་ཡ་ཝཱེའི་དྲུང་དུ་སྤོས་སྒྲོམ་གྱི་རུ་ཐུར་བཞི་པོར་འབྱུག་དགོས་པ་དང་། དེ་ནས་གླང་ཐུག་གི་ཁྲག་ལྷག་མ་ཡོངས་རྫོགས་མཇལ་འཕྲད་གུར་མཆོག་གི་སྒོ་ཁ་རུ་ཡོད་པའི་སྦྱིན་སྲེག་གི་མཆོད་ཁྲིའི་ཞབས་རའི་སྟེང་དུ་ལྡུག་དགོས་སོ། །  
\v 8 ཡང་སྡིག་བཤགས་མཆོད་པར་འབུལ་བའི་གླང་ཐུག་དེའི་ཚིལ་ཐམས་ཅད་དེ། ནང་ཁྲོལ་བཏུམས་པའི་ཚིལ་དང་ནང་ཁྲོལ་སྟེང་གི་ཚིལ་ཐམས་ཅད་དང་།  
\v 9 མཁལ་མ་གཉིས་དང་དེའི་ཚིལ་ཏེ་མཁལ་མའི་ལོགས་གཉིས་ཀྱི་ཚིལ་དང་། མཆིན་པའི་རྩ་རྒྱུས་དེ་མཁལ་མ་དང་བཅས་ལེན་དགོས།  
\v 10 དེ་ནི་ཞི་བདེའི་མཆོད་པར་ཕུལ་བའི་གླང་ཐུག་ནས་བླངས་པ་བཞིན་ཡིན་དགོས་ཤིང་། མཆོད་དཔོན་གྱིས་དེ་རྣམས་སྦྱིན་སྲེག་གི་མཆོད་ཁྲིའི་སྟེང་སྦར་དགོས་སོ། །  
\v 11 ཡིན་ནའང་གླང་ཐུག་གི་པགས་པ་དང་ཤ་ཐམས་ཅད་དང་། མགོ་དང་བརླ་རྐང་དང་ནང་ཁྲོལ་དང་ལྕི་བ་བཅས་ཏེ།  
\v 12 གླང་ཐུག་ཧྲིལ་པོ་སྒར་ཁའི་ཕྱི་རོལ་གྱི་གཙང་ས་སྟེ། ཐལ་བ་འཕོ་སའི་གནས་སུ་ཁྱེར་ནས་བུད་ཤིང་སྟེང་དུ་མེར་བསྲེག་དགོས།  
\v 13 གལ་སྲིད་ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་ཀྱིས་མ་ཤེས་པར་ཉེས་སྐྱོན་བཟོས་པ་དང་། བྱ་བ་གང་རུང་གི་སྟེང་དཀོན་མཆོག་ཡ་ཝཱེས་གསུངས་པའི་བཀའ་རྣམས་ལས་གཅིག་དང་འགལ་ནས་ཉེས་པ་བསགས་ཡོད་ཅིང་། མི་ཚོགས་ཀྱིས་སྦས་པའི་དོན་དེ་མ་རྟོགས་ན།  
\v 14 དེ་རྣམས་ཀྱིས་སྡིག་པ་བསགས་པ་ཤེས་མ་ཐག་སྒོ་ཕྱུགས་ལས་གླང་ཐུག་ཅིག་སྡིག་བཤགས་མཆོད་པར་འབུལ་དགོས་པ་དང་། དེ་མཇལ་འཕྲད་གུར་མཆོག་གི་མདུན་དུ་འཁྲིད་འོང་དགོས་སོ། །  
\v 15 མི་ཚོགས་ཀྱི་རྒན་པོ་རྣམས་ཀྱིས་དཀོན་མཆོག་ཡ་ཝཱེའི་སྤྱན་སྔར་གླང་ཐུག་གི་མགོ་ལ་ལག་པ་བཞག་ནས། དེ་དཀོན་མཆོག་ཡ་ཝཱེའི་དྲུང་དུ་བཤའ་དགོས།  
\v 16 སྣུམ་གྱིས་བྱུགས་པའི་མཆོད་དཔོན་གྱིས་གླང་ཐུག་གི་ཁྲག་ལས་ཉུང་ཙམ་བླངས་ཏེ་མཇལ་འཕྲད་གུར་མཆོག་ཏུ་འཁྱེར་འོང་དགོས།  
\v 17 མཆོད་དཔོན་གྱིས་མཛུབ་མོ་ཁྲག་ནང་བསྒྲེས་ནས་དཀོན་མཆོག་ཡ་ཝཱེའི་སྤྱན་སྔར་ཡོལ་བར་གཏད་དེ་ལན་བདུན་གཏོར་དགོས།  
\v 18 ཡང་ཁྲག་ཉུང་ཙམ་ཅིག་མཇལ་འཕྲད་གུར་མཆོག་གི་ནང་དུ་འབྱུག་དགོས་ཏེ། དཀོན་མཆོག་ཡ་ཝཱེའི་དྲུང་དུ་མཆོད་ཁྲིའི་རུ་ཐུར་བཞི་པོར་འབྱུག་དགོས་པ་དང་། དེ་ནས་ཁྲག་ལྷག་མ་ཡོངས་རྫོགས་མཇལ་འཕྲད་གུར་མཆོག་གི་སྒོ་ཁ་རུ་ཡོད་པའི་སྦྱིན་སྲེག་གི་མཆོད་ཁྲིའི་ཞབས་རའི་སྟེང་དུ་ལྡུག་དགོས་སོ། །  
\v 19 ཁོས་དེའི་ཚིལ་ཐམས་ཅད་བླངས་ནས་མཆོད་ཁྲིའི་སྟེང་སྦྱིན་སྲེག་གཏོང་དགོས།  
\v 20 ཁོས་སྡིག་བཤགས་མཆོད་པའི་གླང་ཐུག་དེ་ཇི་ལྟར་ཕུལ་བ་བཞིན་དུ་གླང་ཐུག་འདི་ཡང་དེ་ལྟར་འབུལ་དགོས་ལ། མཆོད་དཔོན་གྱིས་དེ་དག་གི་སྡིག་པ་བཤག་པར་བྱ་ཞིང་དེ་ཚོར་སྡིག་སེལ་འཐོབ་པར་འགྱུར་རོ། །  
\v 21 ཡང་ཁོས་གླང་ཐུག་སྒར་ཁའི་ཕྱི་རོལ་ཏུ་ཁྱེར་ནས། གླང་ཐུག་སྔོན་མ་དེ་བཞིན་མེར་བསྲེག་དགོས། དེ་ནི་མི་ཚོགས་ཀྱི་སྡིག་བཤགས་མཆོད་པ་ཡིན་ནོ། །  
\v 22 གལ་སྲིད་འགོ་དཔོན་ཞིག་གིས་སྡིག་པ་སྤྱད་ཅིང་། བྱ་བ་གང་རུང་གི་སྟེང་མ་ཤེས་པར་ཁོའི་དཀོན་མཆོག་ཡ་ཝཱེས་གསུངས་པའི་བཀའ་རྣམས་ལས་གཅིག་དང་འགལ་ཏེ་ཉེས་པ་བསགས་ན།  
\v 23 ཁོས་རང་གིས་སྡིག་པ་བྱས་པ་ཤེས་མ་ཐག ར་ཐུག་སྐྱོན་གྱི་དྲི་མས་མ་གོས་པ་ཞིག་ཁྲིད་འོངས་ནས་མཆོད་པར་འབུལ་དགོས་ཤིང་།  
\v 24 ར་ཐུག་གི་མགོར་ལག་པ་བཞག་ནས་དཀོན་མཆོག་ཡ་ཝཱེའི་དྲུང་དུ་སྦྱིན་སྲེག་གི་ཕྱུགས་ཟོག་བཤའ་སའི་གནས་དེར་བཤའ་དགོས་ལ། དེ་ནི་སྡིག་བཤགས་མཆོད་པ་ཡིན་ནོ། །  
\v 25 མཆོད་དཔོན་གྱིས་མཛུབ་མོ་སྡིག་བཤགས་མཆོད་པར་ཕུལ་བའི་ཕྱུགས་ཟོག་གི་ཁྲག་ནང་བསྒྲེས་ནས། སྦྱིན་སྲེག་གི་མཆོད་ཁྲིའི་རུ་ཐུར་བཞི་པོར་འབྱུག་དགོས་པ་དང་། དེ་ནས་ཁྲག་ལྷག་མ་སྦྱིན་སྲེག་གི་མཆོད་ཁྲིའི་ཞབས་རའི་སྟེང་དུ་ལྡུག་དགོས་སོ། །  
\v 26 དེ་ཡང་ཞི་བདེའི་མཆོད་པའི་ཚིལ་དང་འདྲ་བར་དེའི་ཚིལ་ཐམས་ཅད་མཆོད་ཁྲིའི་སྟེང་བསྲེག་དགོས་པ་དང་། མཆོད་དཔོན་གྱིས་ཁོའི་ཕྱིར་དུ་སྡིག་པ་བཤགས་ནས་ཁོ་ལ་སྡིག་སེལ་འཐོབ་པར་འགྱུར་རོ། །  
\v 27 གལ་སྲིད་མི་རྣམས་ལས་སུ་ཞིག་གིས་མ་ཤེས་པར་སྡིག་པ་བྱས་ཤིང་། བྱ་བ་གང་རུང་གི་སྟེང་དུ་དཀོན་མཆོག་ཡ་ཝཱེས་གསུངས་པའི་བཀའ་རྣམས་ལས་གཅིག་ལ་འགལ་ནས་ཉེས་པ་བསགས་ན།  
\v 28 ཁོས་རང་གིས་སྡིག་པ་བྱས་པ་ཤེས་མ་ཐག་རང་བྱས་ཀྱི་སྡིག་པའི་ཕྱིར་དུ་ར་མ་སྐྱོན་མེད་པ་ཞིག་ཁྲིད་ཡོང་སྟེ་མཆོད་པར་འབུལ་དགོས་པ་དང་།  
\v 29 སྡིག་བཤགས་མཆོད་པར་འབུལ་བའི་ཕྱུགས་ཟོག་གི་མགོ་ལ་ལག་པ་བཞག་ནས་སྦྱིན་སྲེག་གི་ཕྱུགས་ཟོག་འབུལ་བའི་གནས་སུ་དེ་བཤའ་དགོས།  
\v 30 མཆོད་དཔོན་གྱིས་མཛུབ་མོ་ཕྱུགས་ཟོག་གི་ཁྲག་ནང་བསྒྲེས་ཏེ། སྦྱིན་སྲེག་གི་མཆོད་ཁྲིའི་རུ་ཐུར་བཞི་པོར་འབྱུག་དགོས་པ་དང་། ཁྲག་ལྷག་མ་ཡོངས་རྫོགས་སྦྱིན་སྲེག་གི་མཆོད་ཁྲིའི་ཞབས་རའི་སྟེང་དུ་ལྡུག་དགོས་སོ། །  
\v 31 དེ་ཡང་ཞི་བདེའི་མཆོད་པར་ཕུལ་བའི་ཕྱུགས་ཟོག་གི་ཚིལ་དང་འདྲ་བར་དེའི་ཚིལ་ཐམས་ཅད་ལེན་པ་དང་། མཆོད་དཔོན་གྱིས་ཚིལ་རྣམས་མཆོད་ཁྲིའི་སྟེང་དུ་དཀོན་མཆོག་ཡ་ཝཱེ་ལ་དྲི་ཞིམ་མཆོད་པར་འབུལ་དགོས། མཆོད་དཔོན་གྱིས་ཁོའི་ཕྱིར་དུ་སྡིག་པ་བཤགས་ནས་ཁོ་ལ་སྡིག་སེལ་འཐོབ་པར་འགྱུར་རོ། །  
\v 32 གལ་སྲིད་མི་ཞིག་གིས་ལུག་ཅིག་ཁྲིད་འོངས་ཏེ་སྡིག་བཤགས་མཆོད་པར་འབུལ་ན། མོ་ལུག་སྐྱོན་མེད་པ་ཞིག་ཁྲིད་ཡོང་ནས་འབུལ་དགོས།  
\v 33 ཁོས་སྡིག་བཤགས་མཆོད་པར་འབུལ་བའི་ཕྱུགས་ཟོག་གི་མགོ་ལ་ལག་པ་བཞག་ནས། སྦྱིན་སྲེག་གི་ཕྱུགས་ཟོག་བཤའ་བའི་གནས་སུ་དེ་བཤས་ནས་སྡིག་བཤགས་མཆོད་པར་འབུལ་དགོས།  
\v 34 མཆོད་དཔོན་གྱིས་མཛུབ་མོ་སྡིག་བཤགས་མཆོད་པར་ཕུལ་བའི་ཕྱུགས་ཟོག་གི་ཁྲག་ནང་དུ་བསྒྲེས་ཏེ། སྦྱིན་སྲེག་གི་མཆོད་ཁྲིའི་རུ་ཐུར་བཞི་པོར་འབྱུག་དགོས་པ་དང་། དེ་ནས་ཁྲག་ལྷག་མ་ཡོངས་རྫོགས་མཆོད་ཁྲིའི་ཞབས་རའི་སྟེང་དུ་ལྡུག་དགོས་ལ།  
\v 35 ཡང་ཞི་བདེའི་མཆོད་པར་ཕུལ་བའི་ལུག་གི་ཚིལ་དང་འདྲ་བར་དེའི་ཚིལ་ཐམས་ཅད་ལེན་པ་དང་། མཆོད་དཔོན་གྱིས་ཚིལ་རྣམས་དཀོན་མཆོག་ཡ་ཝཱེ་ལ་མཆོད་ཁྲིའི་མེ་མཆོད་ཐོག་ཏུ་སྦྱིན་སྲེག་གཏོང་དགོས། མཆོད་དཔོན་གྱིས་ཁོས་བསགས་པའི་སྡིག་པ་བཤག་པར་བྱ་ཞིང་། ཁོ་ལ་སྡིག་སེལ་འཐོབ་པར་འགྱུར་རོ། །   
\c 5
\cl ལེའུ་ལྔ་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\p
\v 1 གལ་སྲིད་མི་ཞིག་གིས་སྡིག་པ་བྱས་པ་སྟེ། མནའ་བསྐྱལ་བའི་གཏམ་ཐོས་ཤིང་ཁོ་རང་དཔང་བོ་ཡིན་ནའང་། ཁོས་ཅི་མཐོང་བ་གང་ཤེས་པ་དེ་སྙན་སེང་མ་ཞུས་ན། ངེས་པར་རང་གི་ཆད་པ་འཁུར་དགོས།  
\v 2 ཡང་མི་ཞིག་གིས་མི་གཙང་བའི་རྫས་གང་རུང་སྟེ། གཅན་གཟན་མི་གཙང་བའི་རོའམ། སྒོ་ཕྱུགས་མི་གཙང་བའི་རོའམ། ལྟོ་འགྲོ་སེམས་ཅན་མི་གཙང་བའི་རོ་ལ་རེག་པ་གང་ཡིན་ཡང་། མི་དེས་མ་ཤེས་ནའང་མི་གཙང་བ་ཡིན་པས་ཉེས་པ་ཡོད་དོ། །  
\v 3 ཡང་ན་ཁོས་མི་ལས་བྱུང་བའི་མི་གཙང་བའི་རྫས་གང་རུང་སྟེ། མི་བཙོག་པར་བྱེད་པའི་མི་གཙང་བའི་རྫས་གང་རུང་ཞིག་ལ་རེག་ན། ཁོས་མ་ཤེས་ནའང་དེ་མི་གཙང་བ་ཡིན་པ་རྟོགས་ན་དེ་ནི་ཉེས་པ་ཡིན།  
\v 4 ད་དུང་མི་ཞིག་གིས་ཁ་ནས་ཅི་མི་སྙམ་པར་མནའ་བསྐྱལ་ན། ངན་སེམས་བཟང་སེམས་གང་ཞིག་བཅངས་ནས་བསྐྱལ་ནའང་། དེས་འཛེམ་དོགས་མེད་པར་དོན་གང་ཞིག་གི་སྟེང་ཅི་མི་སྙམ་པར་མནའ་བསྐྱལ་བ་ཡིན་ན། ནམ་ཞིག་ཁོས་ཤེས་མ་ཐག་ཏུ་དེའི་ནང་གི་དོན་ཞིག་གི་སྟེང་ཉེས་པ་ཡོད།  
\v 5 ཁོ་ལ་དེའི་ནང་གི་དོན་གང་རུང་ཞིག་གི་སྟེང་ཉེས་པ་ཡོད་ཚེ་སྡིག་པ་མཐོལ་བཤགས་བྱེད་དགོས་ལ།  
\v 6 རང་བྱས་ཀྱི་སྡིག་པའི་ཕྱིར་དུ། རང་གི་ཉེས་སེལ་མཆོད་པའི་ཕྱུགས་ཏེ། ལུག་ཁྱུ་ལས་མོ་ལུག་གཅིག་གམ་ཡང་ན་ར་མ་གཅིག་དཀོན་མཆོག་ཡ་ཝཱེ་ལ་སྡིག་བཤགས་མཆོད་པར་འབུལ་དགོས་ཤིང་། མཆོད་དཔོན་གྱིས་ཁོ་རང་གི་སྡིག་པ་བཤག་པར་བྱེད་དོ། །  
\v 7 གལ་སྲིད་མི་དེས་ལུ་གུ་གཅིག་འབུལ་མི་ནུས་ན། རང་བྱས་ཀྱི་སྡིག་པའི་ཕྱིར་དུ། བྱ་ཐི་བ་གཉིས་སམ་ཕུག་རོན་ཆུང་ངུ་གཉིས་དཀོན་མཆོག་ཡ་ཝཱེ་ལ་ཉེས་སེལ་མཆོད་པར་འབུལ་དགོས་ཏེ། གཅིག་ནི་སྡིག་བཤགས་མཆོད་པར་འབུལ་བ་དང་། ཅིག་ཤོས་ནི་སྦྱིན་སྲེག་ཏུ་འབུལ་བར་བྱའོ། །  
\v 8 ཁོས་དེ་རྣམས་མཆོད་དཔོན་གྱི་དྲུང་དུ་འཁྱེར་འོང་བ་དང་། མཆོད་དཔོན་གྱིས་ཐོག་མར་སྡིག་བཤགས་མཆོད་པ་འབུལ་བ་སྟེ། འདབ་ཆགས་ཀྱི་སྐེ་གཅུས་ནའང་དེ་གཅོད་པར་མི་བྱ།  
\v 9 མཆོད་དཔོན་གྱིས་སྡིག་བཤགས་མཆོད་པའི་འདབ་ཆགས་ཀྱི་ཁྲག་ཉུང་ཙམ་ཞིག་མཆོད་ཁྲིའི་ལོགས་སུ་གཏོར་བ་དང་། ཁྲག་ལྷག་མ་རྣམས་མཆོད་ཁྲིའི་ཞབས་རའི་སྟེང་ལྡུག་དགོས། དེ་ནི་སྡིག་བཤགས་མཆོད་པ་ཡིན་ནོ། །  
\v 10 ཡང་ཁོས་སྲོལ་ཡིག་བཞིན་དུ་འདབ་ཆགས་གཞན་པ་དེ་སྦྱིན་སྲེག་ཏུ་འབུལ་དགོས་ཤིང་། མཆོད་དཔོན་གྱིས་མི་དེའི་རང་བྱས་ཀྱི་སྡིག་པ་བཤག་དགོས་ལ། མི་དེར་སྡིག་སེལ་འཐོབ་པར་འགྱུར་རོ། །  
\v 11 གལ་སྲིད་ཁོས་བྱ་ཐི་བ་གཉིས་སམ་ཡང་ན་ཕུག་རོན་ཆུང་ངུ་གཉིས་འབུལ་མི་ནུས་ན། རང་བྱས་ཀྱི་སྡིག་པའི་ཕྱིར་དུ་གྲོ་ཞིབ་ཨེ་ཕཱ་གཅིག་གི་བཅུ་ཆ་གཅིག་སྡིག་བཤགས་མཆོད་པར་འབུལ་དགོས། དེའི་སྟེང་སྣུམ་དང་སྤོས་དཀར་གང་ཡང་འཇོག་མི་དགོས། ཅི་ལ་ཞེ་ན། དེ་ནི་སྡིག་བཤགས་མཆོད་པ་ཡིན་པའི་ཕྱིར་རོ། །  
\v 12 དེ་ཡང་ཁོས་གྲོ་ཞིབ་དེ་མཆོད་དཔོན་གྱི་དྲུང་དུ་འཁྱེར་འོང་བ་དང་། མཆོད་དཔོན་གྱིས་དེ་ལས་ཁྱོར་བ་གང་དྲན་རྟེན་དུ་བླངས་ནས། མཆོད་ཁྲིའི་སྟེང་དཀོན་མཆོག་ཡ་ཝཱེའི་མེ་མཆོད་ཀྱི་ཁར་སྦྱིན་སྲེག་གཏོང་དགོས་ལ། དེ་ནི་སྡིག་བཤགས་མཆོད་པ་ཡིན།  
\v 13 ཡང་ཁོས་དོན་དེ་རྣམས་ཀྱི་ཐད་བསགས་པའི་སྡིག་པ་གང་ཡིན་ནའང་། མཆོད་དཔོན་གྱིས་མི་དེའི་སྡིག་པ་དེ་བཤག་པར་བྱ་ཞིང་དེ་ལ་སྡིག་སེལ་འཐོབ་པར་འགྱུར། དེའི་ལྷག་མ་ནི་འབྲུ་རིགས་ཀྱི་མཆོད་པ་དང་འདྲ་བར་ཡོངས་རྫོགས་མཆོད་དཔོན་ལ་དབང་བར་འགྱུར་ཞེས་བཤད་དགོས་པར་བཀའ་བསྩལ་ཏོ། །   
\s1 ཉེས་སེལ་མཆོད་པའི་ཁྲིམས།  
\p
\v 14 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 15 གལ་སྲིད་མི་ཞིག་གིས་མ་ཤེས་པར་དཀོན་མཆོག་ཡ་ཝཱེའི་མཆོད་རྫས་དམ་པ་རྣམས་ཀྱི་སྟེང་དུ་སྡིག་པ་བྱས་ནས་ཉེས་པ་བསགས་ན། ལུག་ཁྱུ་ལས་སྐྱོན་མེད་པའི་ལུག་ཐུག་ཅིག་དཀོན་མཆོག་ཡ་ཝཱེ་ལ་ཉེས་སེལ་མཆོད་པ་རུ་འབུལ་བའམ། ཡང་ན་གནས་མཆོག་གི་སྲང་ལྟར་དངུལ་སྲང་གི་ཚོད་རྩིས་བྱས་པའི་རིན་འབབ་བཞིན་དུ་ཉེས་སེལ་མཆོད་པར་འབུལ་དགོས།  
\v 16 ཁོས་མཆོད་རྫས་དམ་པའི་ཐད་ནོར་འཛོལ་གང་ཞིག་བཟོས་པར་སྐྱིན་ཚབ་འཇལ་ཆེད་དང་། དེའི་ཁར་ལྔ་ཆ་གཅིག་བསྣན་ཏེ་མཆོད་དཔོན་ལ་སྤྲོད་པ་དང་། མཆོད་དཔོན་གྱིས་ཉེས་པ་སེལ་བྱེད་ལུག་ཐུག་གིས་ཁོའི་སྡིག་པ་བཤག་པར་བྱ་ཞིང་། ཁོ་ལ་སྡིག་སེལ་འཐོབ་པར་འགྱུར་རོ། །  
\v 17 གལ་སྲིད་མི་ཞིག་གིས་དོན་གང་རུང་གི་སྟེང་དུ་སྡིག་པ་བྱས་ཤིང་། དཀོན་མཆོག་ཡ་ཝཱེས་གསུངས་པའི་བཀའ་རྣམས་ལས་གཅིག་ལ་འགལ་ན། ཁོས་མ་ཤེས་ནའང་ཉེས་པ་རུ་བརྩི་ཞིང་རང་གི་ཆད་པ་འཁུར་དགོས་པ་ཡིན།  
\v 18 ཁོས་ལུག་ཁྱུ་ལས་ལུག་ཐུག་སྐྱོན་མེད་པ་ཞིག་འཁྲིད་ཡོང་བའམ། ཡང་ན་ཁྱོད་ཀྱིས་ཚོད་རྩིས་བྱས་པའི་རིན་འབབ་བཞིན། ཉེས་སེལ་མཆོད་པ་རུ་མཆོད་དཔོན་ལ་འབུལ་བ་དང་། མཆོད་དཔོན་གྱིས་ཁོའི་མ་ཤེས་མ་བསམ་ས་ནས་བྱས་པའི་སྡིག་པ་བཤག་པར་བྱ་ཞིང་། དེ་ལ་སྡིག་སེལ་འཐོབ་པར་འགྱུར་རོ། །  
\v 19 དེ་ནི་ཉེས་སེལ་མཆོད་པ་ཡིན་ཏེ། ཁོས་དཀོན་མཆོག་ཡ་ཝཱེའི་དྲུང་དུ་དངོས་སུ་ཉེས་པ་བཟོས་པའི་ཕྱིར་རོ་ཞེས་བཀའ་བསྩལ་ཏོ། །   
\c 6
\cl ལེའུ་དྲུག་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\p
\v 1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 2 གལ་སྲིད་མི་ཞིག་གིས་སྡིག་པ་བྱས་ནས་དཀོན་མཆོག་ཡ་ཝཱེ་ལ་འགལ་ཏེ། ཁྱིམ་མཚེས་ཀྱིས་ཁོ་ལ་བཅོལ་བའི་དངོས་པོའམ་གཏའ་མའི་སྟེང་གཡོ་སྒྱུའི་སྦྱོར་བ་སྤེལ་བའམ། འཕྲོག་པ། ཁྱིམ་མཚེས་ལ་བརྙས་བཅོས་བྱེད་པ།  
\v 3 བོར་དངོས་རྙེད་ཅིང་གཡོ་སྒྱུའི་སྦྱོར་བ་སྤེལ་ནས་མནའ་རྫུན་མ་སྐྱེལ་བ་དང་། མིས་བྱེད་སྲིད་པའི་ལས་གང་ཅིའི་ཐད་ནས་སྡིག་པ་བྱེད་པ་སྟེ།  
\v 4 ཁོས་སྡིག་པ་བྱས་ནས་ཉེས་པ་བསགས་ན། ཕྲོགས་ཏེ་ཁྱེར་བའམ་གཞན་ལ་བརྙས་བཅོས་བྱས་ནས་ཐོབ་པ། ཡང་ན་གཞན་གྱིས་ཁོ་ལ་བཅོལ་བ། ཡང་ན་ཁོས་རྙེད་པའི་བོར་དངོས།  
\v 5 ཡང་ན་མནའ་རྫུན་མ་བསྐྱལ་ནས་ཐོབ་པའི་དངོས་པོ་བཅས་གང་ཡིན་ཡང་ཕྱིར་སྤྲོད་དགོས་པ་སྟེ། ཁ་ཚང་ཕྱིར་སྤྲོད་དགོས་པར་མ་ཟད་དེའི་ཁར་ལྔ་ཆ་གཅིག་སྣོན་དགོས། ཁོ་ལ་ཉེས་པ་ཡོད་པ་རྩད་ཆོད་པའི་ཉིན་མོར་ལམ་སང་བདག་པོ་ལ་གུན་གསབ་སྤྲོད་དགོས་སོ། །  
\v 6 ཁོས་ལུག་ཁྱུ་ལས་སྐྱོན་མེད་པའི་ལུག་ཐུག་ཅིག་དཀོན་མཆོག་ཡ་ཝཱེ་ལ་ཉེས་སེལ་མཆོད་པ་རུ་འབུལ་དགོས་པའམ། ཡང་ན་ཁྱོད་ཀྱིས་ཚོད་རྩིས་བྱས་པའི་རིན་འབབ་བཞིན་དུ། ཉེས་སེལ་མཆོད་པའི་ཕྱིར་མཆོད་དཔོན་ལ་སྤྲོད་དགོས་ལ།  
\v 7 མཆོད་དཔོན་གྱིས་དཀོན་མཆོག་ཡ་ཝཱེའི་དྲུང་དུ་ཁོའི་སྡིག་པ་བཤག་པར་བྱ་ཞིང་། མི་དེས་དོན་གང་ཞིག་བྱས་ནས་ཉེས་པ་བསགས་ནའང་སྡིག་སེལ་འཐོབ་པར་འགྱུར་ཞེས་བཀའ་བསྩལ་ཏོ། །   
\s1 སྦྱིན་སྲེག་འབུལ་བའི་ཁྲིམས།  
\p
\v 8 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 9 ཁྱོད་ཀྱིས་ཨ་རོན་དང་ཁོའི་བུ་རྣམས་ལ་འདི་ལྟར་སྒོས་ཤིག སྦྱིན་སྲེག་གི་བཀའ་ཁྲིམས་ནི་འདི་ལྟ་སྟེ། སྦྱིན་སྲེག་ཏུ་འབུལ་བའི་མཆོད་པ་ནི་མཆོད་ཁྲིའི་སྟེང་ཞོགས་པའི་བར་དུ་མཚན་གང་པོར་འཇོག་དགོས་པ་དང་། མཆོད་ཁྲིའི་སྟེང་གི་མེ་ནི་ཆད་མེད་དུ་སྦར་དགོས།  
\v 10 མཆོད་དཔོན་གྱིས་སོ་རས་སྲབ་བུའི་སྟོད་གོས་དང་སྨད་གོས་ལུས་ལ་གྱོན་ནས། སྦྱིན་སྲེག་གི་མཆོད་ཁྲིའི་སྟེང་ལྷག་པའི་ཐལ་བ་བླངས་ནས་མཆོད་ཁྲིའི་ལོགས་སུ་འཇོག་དགོས་ལ།  
\v 11 དེ་ནས་གོས་དེ་རྣམས་ཕུད་ནས་གོས་གཞན་དག་གྱོན་པ་དང་། ཐལ་བ་སྒར་ཁའི་ཕྱི་རོལ་གྱི་གནས་གཙང་སར་འཁྱེར་དགོས།  
\v 12 ཡང་མཆོད་ཁྲི་སྟེང་གི་མེ་ནི་ཆད་མེད་དུ་འབར་དགོས་ཤིང་ཞི་མི་རུང་། ཉིན་རེའི་ཞོགས་པར་མཆོད་དཔོན་གྱིས་མཆོད་ཁྲིའི་སྟེང་དུ་བུད་ཤིང་སྦར་བ་དང་། དེའི་སྟེང་ཏུ་སྦྱིན་སྲེག་གི་མཆོད་པ་བཤམས་པར་མ་ཟད། ཞི་བདེའི་མཆོད་པའི་ཕྱུགས་ཟོག་གི་ཚིལ་རྣམས་སྦར་དགོས་སོ། །  
\v 13 མཆོད་ཁྲིའི་སྟེང་གི་མེ་ནི་རྒྱུན་ཆད་མེད་པར་འབར་དགོས་ཤིང་ནམ་ཡང་ཞི་མི་རུང་ངོ་། །   
\s1 འབྲུ་རིགས་ཀྱི་མཆོད་པ་འབུལ་བའི་ཁྲིམས།  
\p
\v 14 འབྲུ་རིགས་ཀྱི་མཆོད་པའི་བཀའ་ཁྲིམས་ནི་འདི་ལྟ་སྟེ། ཨ་རོན་གྱི་བུ་རྣམས་ཀྱིས་མཆོད་ཁྲིའི་མདུན་ནས་མཆོད་པ་འདི་དཀོན་མཆོག་ཡ་ཝཱེའི་དྲུང་དུ་འབུལ་དགོས།  
\v 15 མཆོད་དཔོན་གྱིས་འབྲུ་རིགས་ལས་གྲོ་ཞིབ་ཁྱོར་བ་གང་ཙམ་ལེན་པ་དང་། སྣུམ་ཉུང་ཙམ་དང་འབྲུ་རིགས་མཆོད་པའི་སྟེང་གི་སྤོས་དཀར་ཐམས་ཅད་བླངས་ནས། དེ་རྣམས་དྲན་རྟེན་གྱི་སྐལ་དུ་མཆོད་ཁྲིའི་སྟེང་སྦར་དགོས་ལ། དེ་ནི་དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་མཆོད་པ་ཡིན།  
\v 16 ཨ་རོན་དང་ཁོའི་བུ་རྣམས་ཀྱིས་འབྲུ་རིགས་ཀྱི་མཆོད་འཕྲོ་བཟའ་ཞིང་། གནས་དམ་པ་རུ་སྐྱུར་མེད་བག་ལེབ་འདི་བཟའ་དགོས་པ་སྟེ། མཇལ་འཕྲད་གུར་མཆོག་གི་ར་སྐོར་ནང་དུ་བཟའ་དགོས།  
\v 17 བསྲེག་གོར་ནང་དུ་སྐྱུར་རྩི་བསྲེ་མི་རུང་སྟེ། དེ་ནི་བདག་ལ་ཕུལ་བའི་མེ་མཆོད་རྣམས་ལས་བདག་གིས་དེ་དག་ལ་སྤྲད་པའི་སྐལ་ཡིན་པ་དང་། སྡིག་བཤགས་མཆོད་པ་དང་ཉེས་སེལ་མཆོད་པ་རྣམས་དང་འདྲ་བར་སྐལ་དེ་ནི་ཀུན་ལས་དམ་པ་ཡིན།  
\v 18 ཨ་རོན་གྱི་བུ་རྣམས་ལས་སྐྱེས་པ་ཀུན་གྱིས་དེ་བཟའ་བར་འགྱུར་ཞིང་། རྒྱུ་མཚན་དེ་ནི་མི་རབས་ནས་མི་རབས་བར་ཁྱོད་རྣམས་ཀྱིས་དཀོན་མཆོག་ཡ་ཝཱེ་ལ་ཕུལ་བའི་མེ་མཆོད་ལས། ཁོ་རྣམས་ལ་ནམ་ཡང་འཐོབ་འོས་པའི་སྐལ་ཡིན། མཆོད་པ་འདི་ལ་རེག་མཁན་ཐམས་ཅད་དམ་པར་འགྱུར་ཞེས་སྨྲ་དགོས་པར་བཀའ་བསྩལ་ཏོ། །   
\p
\v 19 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 20 འདི་ནི་ཨ་རོན་ལ་སྣུམ་གྱིས་བྱུག་པའི་ཉིན་མོ་ཡིན་ལ། ཁོ་དང་ཁོའི་བུ་རྣམས་ཀྱིས་དཀོན་མཆོག་ཡ་ཝཱེ་ལ་འབུལ་དགོས་པའི་མཆོད་པ་ནི་འདི་ལྟ་སྟེ། ཨེ་ཕཱ་ཡི་བཅུ་ཆ་གཅིག་གི་གྲོ་ཞིབ་ནི་དུས་རྒྱུན་འབུལ་བའི་འབྲུ་རིགས་ཀྱི་མཆོད་པ་བཞིན་འབུལ་བ་དང་། དེའི་ཕྱེད་ཀ་ཞོགས་པ་དང་ཕྱེད་ཀ་དགོང་མོ་འབུལ་དགོས་སོ། །  
\v 21 དེ་ནི་ལྕགས་སླང་ནང་སྣུམ་བསྲེ་དགོས་ལ། བསྲེ་སྦྱོར་ཡག་པོ་བྱས་རྗེས་བསྲེག་དགོས། འབྲུ་རིགས་ཀྱི་མཆོད་པ་བསྲེགས་ནས་ཚོས་པ་ན་དུམ་བུར་བགོས་ཏེ་དཀོན་མཆོག་ཡ་ཝཱེ་ལ་དྲི་ཞིམ་མཆོད་པར་འབུལ་དགོས་པ་དང་།  
\v 22 ཨ་རོན་གྱི་བུ་རྣམས་ལས་མཆོད་དཔོན་དུ་བྱུགས་པ་དེས་འབྲུ་རིགས་ཀྱི་མཆོད་པ་འདི་འབུལ་དགོས་པ་དང་། ཡོངས་རྫོགས་དཀོན་མཆོག་ཡ་ཝཱེ་ལ་སྦྱིན་སྲེག་གཏོང་དགོས་ལ། དེ་ནི་དུས་གཏན་གྱི་བཀའ་ཁྲིམས་ཡིན།  
\v 23 མཆོད་དཔོན་གྱིས་འབྲུ་རིགས་ཀྱི་མཆོད་པ་ཡོངས་རྫོགས་ལྷག་ལུས་མེད་པར་བསྲེག་དགོས་པ་ལས་བཟའ་མི་རུང་ཞེས་བཀའ་བསྩལ་ཏོ། །   
\s1 སྡིག་བཤགས་མཆོད་པ་འབུལ་བའི་ཁྲིམས།  
\p
\v 24 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 25 ཁྱོད་ཀྱིས་ཨ་རོན་དང་ཁོའི་བུ་རྣམས་ལ་འདི་ལྟར་སྒོས་ཤིག སྡིག་བཤགས་མཆོད་པའི་བཀའ་ཁྲིམས་ནི་འདི་ལྟ་སྟེ། དཀོན་མཆོག་ཡ་ཝཱེའི་སྤྱན་སྔར་སྦྱིན་སྲེག་གི་ཕྱུགས་ཟོག་བཤའ་སའི་གནས་དེར་སྡིག་བཤགས་མཆོད་པའི་ཕྱུགས་ཟོག་བཤའ་དགོས། དེ་ནི་ཀུན་ལས་དམ་པ་ཡིན་ནོ། །  
\v 26 སྡིག་བཤགས་མཆོད་པ་འབུལ་མཁན་མཆོད་དཔོན་གྱིས་འབུལ་བ་དེ་བཟའ་རུང་ལ། གནས་དམ་པ་སྟེ་མཇལ་འཕྲད་གུར་མཆོག་གི་ར་སྐོར་ནང་དུ་བཟའ་དགོས་སོ། །  
\v 27 མཆོད་པ་དེའི་ཤ་ལ་རེག་མཁན་ཐམས་ཅད་ནི་དམ་པ་ཡིན་དགོས་པ་དང་། དེའི་ཁྲག་སུའི་གོས་ལ་འགོས་པ་ཡིན་ན། ཁྱོད་ཀྱིས་གནས་དམ་པ་རུ་ཁྲག་འགོས་པའི་གོས་དེ་གཙང་མར་བཀྲུ་དགོས་སོ། །  
\v 28 མཆོད་རྫས་དེ་གདུ་བྱེད་ཀྱི་རྫ་སྣོད་གཅོག་དགོས། གལ་སྲིད་དེ་ནི་ལི་སྣོད་ལས་གདུས་པ་ཡིན་ན། དེ་གཙང་མར་དབྱི་དགོས་པ་དང་ཆུ་ཡིས་བཤལ་དགོས།  
\v 29 དེ་ནི་ཀུན་ལས་དམ་པ་ཡིན་ལ། མཆོད་དཔོན་རྣམས་ལས་སྐྱེས་པ་གང་ཡིན་གྱིས་བཟའ་རུང་ངོ་། །  
\v 30 གལ་སྲིད་སྡིག་བཤགས་མཆོད་པ་གང་རུང་གི་ཁྲག་མཇལ་འཕྲད་གུར་མཆོག་ཏུ་ཁྱེར་འོངས་པ་ཡིན་ན། གནས་དམ་པ་རུ་ཉེས་ཆད་བསལ་བའི་ཕྱིར་ཤ་དེ་བཟའ་མི་རུང་། དེ་ནི་མེ་ལ་བསྲེག་དགོས་སོ། །   
\c 7
\cl ལེའུ་བདུན་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 ཉེས་སེལ་མཆོད་པ་འབུལ་བའི་ཁྲིམས།  
\p
\v 1 ཉེས་སེལ་མཆོད་པའི་བཀའ་ཁྲིམས་ནི་འདི་ལྟ་སྟེ། མཆོད་པ་འདི་ནི་ཀུན་ལས་དམ་པ་ཡིན་ནོ། །  
\v 2 སྦྱིན་སྲེག་གི་ཕྱུགས་ཟོག་གནས་གང་དུ་བཤས་ན་སྡིག་བཤགས་མཆོད་བྱ་ཡང་གནས་དེ་རུ་བཤའ་དགོས་ལ། དེའི་ཁྲག་ནི་མཆོད་ཁྲིའི་ཕྱོགས་བཞི་རུ་གཏོར་དགོས།  
\v 3 མཆོད་དཔོན་གྱིས་དེའི་ཚིལ་ཐམས་ཅད་དེ། རྔ་མ་ཚོན་པོ་དང་། ནང་ཁྲོལ་བཏུམས་པའི་ཚིལ་དང་།  
\v 4 མཁལ་མ་གཉིས་དང་དེའི་སྟེང་གི་ཚིལ་ཏེ་མཁལ་མའི་ལོགས་གཉིས་སུ་ཡོད་པའི་ཚིལ་དང་། མཆིན་པའི་རྩ་རྒྱུས་ནི་མཁལ་མ་དང་བཅས་ལེན་དགོས་པ་དང་།  
\v 5 མཆོད་དཔོན་གྱིས་དེ་རྣམས་མཆོད་ཁྲིའི་སྟེང་བསྲེགས་ནས་དཀོན་མཆོག་ཡ་ཝཱེ་ལ་མེ་མཆོད་དུ་འབུལ་དགོས། དེ་ནི་ཉེས་སེལ་མཆོད་པ་ཡིན་ནོ། །  
\v 6 མཆོད་དཔོན་རྣམས་ལས་སྐྱེས་པ་གང་ཡིན་གྱིས་དེ་བཟའ་རུང་ཞིང་། དེ་གནས་དམ་པར་བཟའ་དགོས་ལ། ཀུན་ལས་དམ་པ་ཡིན་ནོ། །  
\v 7 སྡིག་བཤགས་མཆོད་པ་ཅི་ལྟར་ཡིན་ན་ཉེས་སེལ་མཆོད་པའང་དེ་བཞིན་ཡིན་ལ། དེ་གཉིས་ཀྱི་བཀའ་ཁྲིམས་གཅིག་ཡིན། སྡིག་པ་བཤགས་མཁན་མཆོད་དཔོན་ལ་མཆོད་རྫས་དེ་འཐོབ་པར་འགྱུར།  
\v 8 སྦྱིན་སྲེག་འབུལ་བའི་མཆོད་དཔོན་གྱིས་སུ་ཞིག་གི་དོན་དུ་སྦྱིན་སྲེག་བཏང་ནའང་། སྦྱིན་སྲེག་ཏུ་ཕུལ་བའི་ཕྱུགས་ཟོག་གི་པགས་པ་ནི་མཆོད་དཔོན་དེ་ལ་དབང་བ་ཡིན།  
\v 9 མེ་ཐབ་ནང་དུ་བསྲེགས་པའམ། སླ་ང་དང་ལྕགས་སླང་ནང་དུ་བཟོས་པའི་འབྲུ་རིགས་ཀྱི་མཆོད་པ་གང་ཡིན་རུང་། ཐམས་ཅད་མཆོད་པ་འབུལ་བའི་མཆོད་དཔོན་ལ་དབང་དགོས།  
\v 10 འབྲུ་རིགས་ཀྱི་མཆོད་པ་རྣམས་ལས་སྣུམ་གྱིས་བསྲེ་སྦྱོར་བྱས་པའམ། སྐམ་པོ་ཡིན་པ་གང་ཡིན་རུང་ཐམས་ཅད་ཨ་རོན་གྱི་བུ་རྣམས་ལ་ཁྱད་མེད་དུ་བགོ་དགོས་སོ། །   
\s1 ཞི་བདེའི་མཆོད་པ་འབུལ་བའི་ཁྲིམས།  
\p
\v 11 དེ་ཡང་དཀོན་མཆོག་ཡ་ཝཱེ་ལ་འབུལ་བའི་ཞི་བདེའི་མཆོད་པ་རྣམས་ཀྱི་བཀའ་ཁྲིམས་ནི་འདི་ལྟ་སྟེ།  
\v 12 གལ་སྲིད་གཏང་རག་གི་མཆོད་པ་འབུལ་ན། སྐྱུར་མེད་བག་ལེབ་སྣུམ་བསྲེས་མ་དང་། ཡང་ན་སྐྱུར་མེད་གོར་ལེབ་སྲབ་བུ་སྣུམ་བྱུགས་མ། གྲོ་ཞིབ་བག་ལེབ་སྣུམ་གྱིས་བསྲེ་སྦྱོར་ཡག་པོ་བྱས་པ་བཅས་གཏང་རག་གི་མཆོད་པ་དང་མཉམ་དུ་འབུལ་དགོས།  
\v 13 སྐྱུར་ལྡན་བག་ལེབ་དང་བཅས་གཏང་རག་ཏུ་འབུལ་བའི་ཞི་བདེའི་མཆོད་པ་ནི་མཆོད་པ་དང་མཉམ་དུ་འབུལ་དགོས།  
\v 14 ཕུལ་བའི་མཆོད་པ་རྣམས་ལས་བག་ལེབ་གཅིག་རེ་དཀོན་མཆོག་ཡ་ཝཱེ་ལ་འདེགས་མཆོད་དུ་འབུལ་བ་སྟེ། ཞི་བདེའི་མཆོད་པའི་ཕྱུགས་ཟོག་གི་ཁྲག་གཏོར་མཁན་མཆོད་དཔོན་ལ་དབང་དགོས་སོ། །  
\v 15 གཏང་རག་ཏུ་ཕུལ་བའི་ཞི་བདེའི་མཆོད་པའི་ཤ་ནི། མཆོད་པར་འབུལ་བའི་ཉིན་དེ་རང་དུ་བཟའ་དགོས་ཏེ། ཞོགས་པའི་བར་དུ་ཅི་ཡང་ལྷག་མི་རུང་།  
\v 16 གལ་སྲིད་ཁོའི་མཆོད་པ་ནི་དམ་བཅའ་སྒྲུབ་པའི་མཆོད་པའམ། ཡང་ན་ཡིད་མོས་མཆོད་པ་ཡིན་ན། མཆོད་པར་འབུལ་བའི་ཉིན་དེ་རང་དུ་བཟའ་དགོས་ཤིང་། དེའི་ལྷག་མ་ནི་ཕྱི་ཉིན་ཡང་བཟའ་རུང་བ་ཡིན།  
\v 17 མཆོད་ཤ་ལྷག་མ་ནི་ཉིན་གསུམ་པར་མེ་ལ་བསྲེག་དགོས།  
\v 18 གལ་སྲིད་ཞི་བདེའི་མཆོད་པར་ཕུལ་བའི་ཤ་རྣམས་ཉིན་གསུམ་པར་ཟོས་ན་དེ་ཐུགས་ལ་ལྡན་པར་མི་འགྱུར་ལ། གང་ཞིག་ཕུལ་བ་དེ་ཡང་མཆོད་པར་མི་བརྩི། མཆོད་པ་དེ་ནི་མི་གཙང་བ་ཡིན་པས་དེ་ཟ་མཁན་གྱིས་རང་གི་ཉེས་པ་འཁུར་དགོས་སོ། །  
\v 19 དེ་ཡང་མི་གཙང་བའི་རྫས་ལ་རེག་པའི་ཤ་ནི་བཟའ་མི་རུང་སྟེ་མེ་ལ་བསྲེག་དགོས། ཤ་གཞན་ལ་མཚོན་ན་གཙང་མ་ཡིན་པའི་མི་སུས་ཀྱང་ཤ་དེ་བཟའ་རུང་ངོ་། །  
\v 20 འོན་ཀྱང་མི་གཙང་བ་སུ་ཞིག་གིས་གལ་ཏེ་དཀོན་མཆོག་ཡ་ཝཱེ་ལ་ཕུལ་བའི་ཞི་བདེའི་མཆོད་པའི་ཤ་ཟོས་ན། མི་དེ་ནི་རང་གི་མི་མང་ལས་མེད་པར་གཏོང་དགོས།  
\v 21 གལ་ཏེ་མི་ཞིག་གིས་མི་ལུས་ཀྱི་མི་གཙང་བའམ་ཕྱུགས་ཟོག་མི་གཙང་བ། ཡང་ན་ཞེ་མེར་བའི་རྫས་མི་གཙང་བ་གང་རུང་ལ་རེག་ནས། ཡང་དཀོན་མཆོག་ཡ་ཝཱེ་ལ་ཕུལ་བའི་ཞི་བདེའི་མཆོད་པའི་ཤ་ཟོས་ན། མི་དེ་ནི་རང་གི་མི་མང་ལས་མེད་པར་གཏོང་བར་བྱ་ཞེས་བཤད་དགོས་པར་བཀའ་གནང་ངོ་། །   
\p
\v 22 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 23 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག གླང་དང་ལུག་དང་ར་བཅས་ཀྱི་ཚིལ་གང་ཡང་ཁྱོད་རྣམས་ཀྱིས་བཟའ་མི་རུང་།  
\v 24 རང་བཞིན་གྱིས་ཤི་བའམ་གཅན་གཟན་གྱིས་བསད་པའི་ཕྱུགས་ཟོག་གི་ཚིལ་ནི་གཞན་ཅི་རིགས་སུ་སྤྱད་ཆོག་མོད། འོན་ཀྱང་གཏན་ནས་བཟའ་མི་རུང་ངོ་། །  
\v 25 སུ་ཞིག་གིས་དཀོན་མཆོག་ཡ་ཝཱེ་ལ་མེ་མཆོད་དུ་ཕུལ་བའི་ཕྱུགས་ཟོག་གི་ཚིལ་ཟོས་པ་ཡིན་ན། མི་དེ་ནི་རང་གི་མི་མང་ལས་མེད་པར་གཏོང་བར་བྱའོ། །  
\v 26 ཁྱོད་རྣམས་ཀྱི་སྡོད་གནས་གང་དུའང་། འདབ་ཆགས་སམ་ཕྱུགས་ཟོག་གི་ཁྲག་གང་ཡིན་ཡང་བཟའ་མི་རུང་།  
\v 27 སུ་ཞིག་གིས་ཁྲག་ཟོས་ན། མི་དེ་ནི་རང་གི་མི་མང་ལས་མེད་པར་གཏོང་བར་བྱ་ཞེས་སྨྲ་དགོས་པར་བཀའ་གནང་ངོ་། །   
\p
\v 28 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 29 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག དཀོན་མཆོག་ཡ་ཝཱེ་ལ་ཞི་བདེའི་མཆོད་པ་འབུལ་མཁན་གྱིས་རང་གི་ཞི་བདེའི་མཆོད་པ་ལས་དཀོན་མཆོག་ཡ་ཝཱེ་ལ་མཆོད་པ་འབུལ་དགོས།  
\v 30 མི་དེས་དཀོན་མཆོག་ཡ་ཝཱེ་ལ་འབུལ་བའི་མེ་མཆོད་དངོས་སུ་འཁྱེར་འོང་དགོས་ཏེ། ཚིལ་དང་བྲང་ཁྱེར་འོངས་ནས་བྲང་ནི་དཀོན་མཆོག་ཡ་ཝཱེའི་དྲུང་དུ་ཕར་གཡོ་ཚུར་གཡོ་བྱས་ཏེ་གཡོབ་མཆོད་དུ་འབུལ་དགོས།  
\v 31 མཆོད་དཔོན་གྱིས་ཚིལ་རྣམས་མཆོད་ཁྲིའི་སྟེང་བསྲེག་དགོས་ཀྱང་། བྲང་ནི་ཨ་རོན་དང་ཁོའི་བུ་རྣམས་ལ་དབང་བ་ཡིན།  
\v 32 ཁྱོད་རྣམས་ཀྱིས་ཞི་བདེའི་མཆོད་པའི་ཕྱུགས་ཟོག་གི་བརླ་གཡས་པ་འདེགས་མཆོད་བྱས་ནས་མཆོད་དཔོན་ལ་འབུལ་དགོས་པ་དང་།  
\v 33 ཨ་རོན་གྱི་བུ་རྣམས་ལས་སུ་ཞིག་གིས་ཞི་བདེའི་མཆོད་པའི་ཕྱུགས་ཟོག་གི་ཁྲག་དང་ཚིལ་ཕུལ་ན། དེ་ལ་འཐོབ་འོས་པའི་སྐལ་དུ་བརླ་གཡས་པ་འཐོབ་དགོས།  
\v 34 གང་ལ་ཞེ་ན། བདག་གིས་ཡེས་ར་ཨེལ་པ་རྣམས་གྱི་ཞི་བདེའི་མཆོད་པ་ལས་གཡོབ་མཆོད་ཀྱི་བྲང་དང་འདེགས་མཆོད་ཀྱི་བརླ་བླངས་ཏེ། མཆོད་དཔོན་ཨ་རོན་དང་ཁོའི་བུ་རྣམས་ལ་སྤྲད་པ་ཡིན་ལ། དེ་ནི་ཁོ་རྣམས་ལ་ཡེས་ར་ཨེལ་པ་རྣམས་ལས་གཏན་དུ་འཐོབ་འོས་པའི་སྐལ་ཡིན་ཞེས་སྨྲ་དགོས་པར་བཀའ་གནང་ངོ་། །  
\v 35 འདི་ནི་དཀོན་མཆོག་ཡ་ཝཱེའི་མེ་མཆོད་ལས་བླངས་པ་དང་། ཨ་རོན་དང་ཁོའི་བུ་རྣམས་ཀྱི་སྐལ་ཡིན་ཏེ། མོ་ཤེ་ཡིས་ཁོ་རྣམས་ཚུར་བོས་ཡོང་ནས། དཀོན་མཆོག་ཡ་ཝཱེ་ལ་མཆོད་དཔོན་གྱི་ལས་འགན་བསྒྲུབས་པའི་ཉིན་དེ་ནས་བཟུང་འགོ་བརྩམས་པའོ། །  
\v 36 དེ་ནི་མོ་ཤེ་ཡིས་ཨ་རོན་དང་ཁོའི་བུ་རྣམས་ལ་སྣུམ་གྱིས་བྱུགས་པའི་ཉིན་མོར། དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ལ་གནང་དགོས་པའི་བཀའ་གནང་བ་སྟེ། ཁོ་རྣམས་ལ་ཡེས་ར་ཨེལ་པ་རྣམས་ལས་མི་རབས་ནས་མི་རབས་བར་གཏན་དུ་འཐོབ་འོས་པའི་སྐལ་ཡིན།  
\v 37 འདི་ནི་སྦྱིན་སྲེག་དང་འབྲུ་རིགས་ཀྱི་མཆོད་པ་དང་། སྡིག་བཤགས་མཆོད་པ། ཉེས་སེལ་མཆོད་པ། བསྐོ་བར་བྱེད་པའི་མཛད་སྒོ། ཞི་བདེའི་མཆོད་པ་བཅས་ཀྱི་བཀའ་ཁྲིམས་ཡིན།  
\v 38 དེ་ཐམས་ཅད་ནི་དཀོན་མཆོག་ཡ་ཝཱེས་རི་བོ་སི་ནཱ་རུ་མོ་ཤེ་ལ་བསྩལ་པའི་བཀའ་ཡིན་ལ། ཁོང་གིས་སི་ནཱ་དབེན་སྟོང་དུ་ཡེས་ར་ཨེལ་པ་རྣམས་ལ། དཀོན་མཆོག་ཡ་ཝཱེ་ལ་མཆོད་པ་འབུལ་དགོས་པའི་བཀའ་བསྩལ་པའི་ཉིན་མོར་གསུངས་པའི་བཀའ་ཡང་ཡིན་ནོ། །   
\c 8
\cl ལེའུ་བརྒྱད་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 མཆོད་དཔོན་རྣམས་བསྐོ་བའི་ཁྲིམས།  
\p
\v 1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 2 ཁྱོད་ཀྱིས་ཨ་རོན་དང་དེའི་བུ་རྣམས་ཁྲིད་ཤོག་དང་། ཡང་འཕགས་གོས་དང་འབྱུག་སྣུམ། སྡིག་བཤགས་མཆོད་པའི་གླང་ཐུག་གཅིག་དང་ལུག་ཐུག་གཉིས། སྐྱུར་མེད་བག་ལེབ་གཟེབ་གང་བཅས་འཁྱེར་འོང་དགོས།  
\v 3 ཡང་མི་ཚོགས་ཐམས་ཅད་མཇལ་འཕྲད་གུར་མཆོག་གི་སྒོ་ཁར་སྡུས་ཤིག་ཅེས་བཀའ་བསྩལ་ཏོ། །  
\v 4 དེ་ནས་མོ་ཤེ་ཡིས་དཀོན་མཆོག་ཡ་ཝཱེས་བསྩལ་པའི་བཀའ་བཞིན་དུ་བསྒྲུབས་ཏེ། མི་ཚོགས་རྣམས་མཇལ་འཕྲད་གུར་མཆོག་གི་སྒོ་ཁར་བསྡུས་པ་དང་།  
\v 5 མོ་ཤེ་ཡིས་མི་ཚོགས་ལ་འདི་ལྟར། འདི་ནི་དཀོན་མཆོག་ཡ་ཝཱེས་བསྒྲུབ་འོས་པར་གསུངས་པའི་དོན་རྣམས་ཡིན་ཞེས་གསུངས།  
\v 6 མོ་ཤེ་ཡིས་ཨ་རོན་དང་ཁོའི་བུ་རྣམས་ཁྲིད་འོངས་ཤིང་། དེ་དག་གི་ལུས་ཆུ་ཡིས་བཀྲུས་པ་དང་།  
\v 7 དེ་ནས་ཁོ་ལ་ནང་གོས་བསྐོན་ནས་སྐེད་ཆིངས་བཅིངས་པ་དང་གོས་རིང་བསྐོན་ཞིང་། བེར་ཐུལ་ཡང་བསྐོན་ཏེ། སྐ་རགས་སྤུས་དག་གིས་བེར་ཐུལ་དམ་པོར་བསྡམས།  
\v 8 ཡང་ཁོས་ཨ་རོན་ལ་བྲང་རྒྱན་ཡང་སྤྲས་པ་དང་། ཨུའུ་རིམ་དང་ཐུའུ་མིམ་ཞེས་པའི་རྟགས་རིལ་གཉིས་བྲང་རྒྱན་གྱི་ནང་དུ་བཅུག  
\v 9 དེ་ཡང་དཀོན་མཆོག་ཡ་ཝཱེས་མོ་ཤེ་ལ་བཀའ་བསྩལ་པ་བཞིན་དུ། ཁོས་ཨ་རོན་གྱི་མགོར་ལ་ཐོད་སྤྲས་ཤིང་། ལ་ཐོད་ཀྱི་མདུན་ངོས་སུ་དམ་པའི་ཅོད་པན་ཡིན་པའི་གསེར་གྱི་བྱང་བུ་བཏགས་སོ། །  
\v 10 དེ་ནས་མོ་ཤེ་ཡིས་འབྱུག་སྣུམ་གྱིས་གུར་མཆོག་དང་དེའི་ནང་གི་ཡོ་བྱད་ཐམས་ཅད་ལ་བྱུགས་ནས་དེ་རྣམས་དམ་པར་བྱས་པ་དང་།  
\v 11 ཡང་མཆོད་ཁྲིའི་སྟེང་འབྱུག་སྣུམ་ལན་བདུན་གཏོར་ནས། མཆོད་ཁྲི་དང་མཆོད་ཁྲིའི་ཡོ་བྱད་ཐམས་ཅད། ཁྲུས་གཞོང་དང་དེའི་སྟེགས་བུ་བཅས་སྣུམ་གྱིས་བྱུགས་ནས་དམ་པར་བྱས་སོ། །  
\v 12 ཨ་རོན་གྱི་མགོ་ལ་འབྱུག་སྣུམ་བླུགས་ནས་ཁོ་དམ་པར་བྱས་པ་དང་།  
\v 13 མོ་ཤེ་ཡིས་ཨ་རོན་གྱི་བུ་རྣམས་ཚུར་ཁྲིད་ཡོང་སྟེ། ཁོ་རྣམས་ལ་ནང་གོས་བསྐོན་ནས་སྐེད་ཆིངས་བཅིངས་པ་དང་པྲོག་ཞུ་དཀྲིས་ཤིང་། དེ་ཐམས་ཅད་དཀོན་མཆོག་ཡ་ཝཱེས་མོ་ཤེ་ལ་བསྩལ་པའི་བཀའ་བཞིན་དུ་ཡིན་ནོ། །  
\v 14 དེ་ནས་ཁོས་སྡིག་བཤགས་མཆོད་པའི་གླང་ཐུག་ཁྲིད་འོངས་པ་དང་། ཨ་རོན་དང་ཁོའི་བུ་རྣམས་ཀྱིས་གླང་ཐུག་དེའི་མགོ་ལ་ལག་པ་བཞག་ནས།  
\v 15 གླང་ཐུག་བཤས་ཤིང་། མཆོད་ཁྲིའི་སྟེང་སྡིག་པ་བཤག་ཕྱིར། མོ་ཤེ་ཡིས་དེའི་ཁྲག་བླངས་ནས་མཛུབ་མོས་མཆོད་ཁྲིའི་མཐའ་འཁོར་གྱི་རུ་ཐུར་རྣམས་ལ་བྱུགས་ཏེ་མཆོད་ཁྲི་འདག་པར་བྱས། དེ་ནས་ཁྲག་ལྷག་མ་རྣམས་མཆོད་ཁྲིའི་ཞབས་རའི་སྟེང་བླུགས་ནས་མཆོད་ཁྲི་དམ་པར་བྱས་སོ། །  
\v 16 ཡང་མོ་ཤེ་ཡིས་ནང་ཁྲོལ་གྱི་ཚིལ་ཐམས་ཅད་དང་མཆིན་པའི་རྩ་རྒྱུས་དང་། མཁལ་མ་གཉིས་ཀ་དང་དེའི་སྟེང་གི་ཚིལ་བཅས་བླངས་ནས་མཆོད་ཁྲིའི་ཁར་བསྲེགས།  
\v 17 གླང་ཐུག་གི་པགས་པ་དང་ཤ་དང་ལྕི་བ་བཅས་ནི་སྒར་ཁའི་ཕྱི་རོལ་ཏུ་མེ་ལ་བསྲེགས་པ་དང་། དེ་ཐམས་ཅད་དཀོན་མཆོག་ཡ་ཝཱེས་མོ་ཤེ་ལ་བསྩལ་པའི་བཀའ་བཞིན་དུ་ཡིན་ནོ། །  
\v 18 ཁོས་སྦྱིན་སྲེག་ཏུ་འབུལ་བའི་ལུག་ཐུག་ཁྲིད་འོངས་ཤིང་། ཨ་རོན་དང་ཁོའི་བུ་རྣམས་ཀྱིས་ལུག་ཐུག་གི་མགོར་ལག་པ་བཞག་ནས།  
\v 19 ལུག་ཐུག་བཤས་ཤིང་། མོ་ཤེ་ཡིས་དེའི་ཁྲག་མཆོད་ཁྲིའི་ཕྱོགས་བཞི་རུ་གཏོར་བ་དང་།  
\v 20 ལུག་ཐུག་གི་ཤ་ལྷུ་ལྷུ་རུ་བཅད་རྗེས་མགོ་དང་ཤ་དང་ཚིལ་ཐམས་ཅད་བསྲེགས།  
\v 21 ཁོས་ནང་ཁྲོལ་དང་རྐང་ལག་རྣམས་ཆུས་བཀྲུས་ཤིང་ལུག་ཐུག་ཧྲིལ་པོ་མཆོད་ཁྲིའི་སྟེང་སྦྱིན་སྲེག་བཏང་། དེ་ནི་དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་གྱི་མེ་མཆོད་ཡིན་ལ། དེ་ཐམས་ཅད་དཀོན་མཆོག་ཡ་ཝཱེས་མོ་ཤེ་ལ་བསྩལ་པའི་བཀའ་བཞིན་དུ་ཡིན་ནོ། །  
\v 22 ཡང་ཁོས་བསྐོ་བར་བྱེད་པའི་ལུག་ཐུག་གཉིས་པ་ཁྲིད་འོངས་ཏེ། ཨ་རོན་དང་དེའི་བུ་རྣམས་ཀྱིས་ལུག་ཐུག་གི་མགོ་ལ་ལག་པ་བཞག་ནས།  
\v 23 ལུག་ཐུག་བཤས་ཤིང་། མོ་ཤེ་ཡིས་དེའི་ཁྲག་ལས་ཉུང་ཙམ་ཞིག་ཨ་རོན་གྱི་རྣ་ཤལ་གཡས་པ་དང་། ལག་གཡས་པའི་མཐེ་བོང་དང་རྐང་པ་གཡས་པའི་མཐེབ་ཆེན་བཅས་ལ་བྱུགས་སོ། །  
\v 24 ཡང་ཨ་རོན་གྱི་བུ་རྣམས་ཚུར་ཁྲིད་འོངས་ནས། ཁྲག་ཉུང་ཙམ་ཞིག་དེ་དག་གི་རྣ་ཤལ་གཡས་པ་དང་ལག་གཡས་པའི་མཐེ་བོང་དང་རྐང་པ་གཡས་པའི་མཐེབ་ཆེན་བཅས་སུ་བྱུགས་རྗེས། ཁྲག་ལྷག་མ་རྣམས་མཆོད་ཁྲིའི་ཕྱོགས་བཞི་རུ་གཏོར་ཏོ། །  
\v 25 ཁོས་ཚིལ་དང་རྔ་མ་ཚོན་པོ་དང་ནང་ཁྲོལ་གྱི་ཚིལ་ཐམས་ཅད་དང་། མཆིན་པའི་རྩ་རྒྱུས་དང་མཁལ་མ་གཉིས་ཀ་དང་དེའི་སྟེང་གི་ཚིལ་དང་། བརླ་གཡས་པ་བཅས་བླངས་ཤིང་།  
\v 26 དཀོན་མཆོག་ཡ་ཝཱེའི་དྲུང་ནས་སྐྱུར་མེད་བག་ལེབ་འཇོག་བྱེད་ཀྱི་གཟེབ་ལས་སྐྱུར་མེད་བག་ལེབ་གཅིག་དང་། སྣུམ་གོར་གཅིག་དང་བག་ལེབ་སྲབ་བུ་གཅིག་བཅས་བླངས་ཏེ། དེ་ཐམས་ཅད་ཚིལ་དང་བརླ་གཡས་པའི་སྟེང་དུ་བསྒྲིགས།  
\v 27 ཁོས་དེ་ཐམས་ཅད་ཨ་རོན་དང་དེའི་བུ་རྣམས་ཀྱི་ལག་ཏུ་བཞག་སྟེ། དཀོན་མཆོག་ཡ་ཝཱེའི་དྲུང་དུ་གཡོས་ཤིང་གཡོབ་མཆོད་དུ་ཕུལ་ཏོ། །  
\v 28 དེ་ནས་མོ་ཤེ་ཡིས་མཆོད་རྫས་དེ་དག་ཁོ་ཚོའི་ལག་ནས་བླངས་ཤིང་། མཆོད་ཁྲི་སྟེང་གི་སྦྱིན་སྲེག་དང་ལྷན་དུ་བསྲེགས། དེ་ནི་བསྐོ་བར་བྱེད་པའི་མཛད་སྒོ་ལས་དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་མེ་མཆོད་ཡིན།  
\v 29 མོ་ཤེ་ཡིས་ལུག་ཐུག་གི་བྲང་ཁོག་དེ་བླངས་ནས་དཀོན་མཆོག་ཡ་ཝཱེའི་དྲུང་དུ་ཕར་གཡོ་ཚུར་གཡོ་བྱས་ནས་གཡོབ་མཆོད་དུ་ཕུལ། དེ་ནི་བསྐོ་བར་བྱེད་པའི་ལུག་ཐུག་ལས་མོ་ཤེ་ལ་ཐོབ་པའི་སྐལ་ཡིན་ལ། དེ་ཐམས་ཅད་དཀོན་མཆོག་ཡ་ཝཱེས་མོ་ཤེ་ལ་བསྩལ་པའི་བཀའ་བཞིན་དུ་ཡིན་ནོ། །  
\v 30 མོ་ཤེ་ཡིས་འབྱུག་སྣུམ་དང་མཆོད་ཁྲིའི་སྟེང་གི་ཁྲག་ཉུང་ཙམ་བླངས་ཏེ། ཨ་རོན་དང་ཁོའི་གོས་དང་ཁོའི་བུ་རྣམས་དང་། ཁོའི་བུ་རྣམས་ཀྱི་གོས་ཀྱི་སྟེང་དུ་གཏོར་ནས་ཨ་རོན་དང་ཁོའི་གོས་དང་། ཁོའི་བུ་རྣམས་དང་དེ་རྣམས་ཀྱི་གོས་བཅས་ཐམས་ཅད་དམ་པར་བྱས་སོ། །  
\v 31 མོ་ཤེ་ཡིས་ཨ་རོན་དང་དེའི་བུ་རྣམས་ལ་འདི་ལྟར། ཁྱོད་རྣམས་ཀྱིས་མཇལ་འཕྲད་གུར་མཆོག་གི་སྒོ་ཁ་རུ་ཤ་བཙོས་ཏེ། ཤ་དེ་དང་བསྐོ་བར་བྱེད་པའི་མཛད་སྒོའི་གཟེབ་ནང་གི་བག་ལེབ་བཟའ་དགོས་ཤིང་། ངས་ཁྱོད་རྣམས་ལ་བསྒོས་པ་བཞིན་དུ། འདི་ནི་ཨ་རོན་དང་ཁོའི་བུ་རྣམས་ཀྱིས་བཟའ་དགོས་པ་ཡིན་ཞེས་སྨྲ་བར་གྱིས།  
\v 32 ཤ་དང་བག་ལེབ་ལྷག་མ་རྣམས་ཁྱོད་ཚོས་མེ་ལ་བསྲེག་དགོས།  
\v 33 ཉིན་བདུན་པོ་དེ་མ་རྫོགས་བར་དུ། ཁྱོད་རྣམས་མཇལ་འཕྲད་གུར་མཆོག་གི་སྒོ་ཕྱི་རུ་འགྲོ་མི་རུང་། གང་ལ་ཞེ་ན། ཁྱོད་རྣམས་ཀྱི་བསྐོ་བར་བྱེད་པའི་མཛད་སྒོའི་ཉིན་མོ་ཚང་དགོས་ལ། ཁྱོད་རྣམས་བསྐོ་བར་ཉིན་བདུན་དགོས་པའི་ཕྱིར་རོ། །  
\v 34 དེ་རིང་བྱས་པ་ཐམས་ཅད་ནི་དཀོན་མཆོག་ཡ་ཝཱེས་ཁྱོད་ཅག་གི་སྡིག་པ་བཤག་པའི་ཕྱིར་བསྩལ་པའི་བཀའ་ཡིན་ནོ། །  
\v 35 ཉིན་བདུན་པོ་དེར་ཁྱོད་རྣམས་ཉིན་མཚན་ཀུན་ཏུ་མཇལ་འཕྲད་གུར་མཆོག་གི་སྒོ་འགྲམ་དུ་འདུག་དགོས་ལ། འཆི་བར་མི་འགྱུར་བའི་ཕྱིར་དཀོན་མཆོག་ཡ་ཝཱེས་བསྩལ་པའི་བཀའ་རྣམས་བསྲུང་དགོས། གང་ལ་ཞེ་ན། དེ་ནི་བདག་ལ་བསྩལ་པའི་བཀའ་ཡིན་པས་སོ་ཞེས་གསུངས།  
\v 36 དེ་བས་ཨ་རོན་དང་ཁོའི་བུ་རྣམས་ཀྱིས་དཀོན་མཆོག་ཡ་ཝཱེས་མོ་ཤེ་བརྒྱུད་ནས་བསྩལ་པའི་བཀའ་བཞིན་དུ་བྱས་སོ། །   
\c 9
\cl ལེའུ་དགུ་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 ཨ་རོན་གྱིས་དཀོན་མཆོག་ཡ་ཝཱེ་ལ་མཆོད་པ་འབུལ་བ།  
\p
\v 1 ཉིན་བརྒྱད་པ་ལ་མོ་ཤེ་ཡིས་ཨ་རོན་དང་ཁོའི་བུ་རྣམས་དང་། ཡེས་ར་ཨེལ་གྱི་རྒན་པོ་རྣམས་བོས་ཏེ།  
\v 2 ཨ་རོན་ལ་འདི་ལྟར། ཁྱོད་ཀྱིས་སྡིག་བཤགས་མཆོད་པར་སྒོ་ཕྱུགས་ལས་བ་ཕྲུག་ཅིག་དང་། སྦྱིན་སྲེག་གི་ཕྱིར་ལུག་ཐུག་ཅིག་ལེན་དགོས་ལ། དེ་གཉིས་ཀ་སྐྱོན་མེད་པ་ཞིག་ཡིན་དགོས་ཏེ། དཀོན་མཆོག་ཡ་ཝཱེའི་སྤྱན་སྔར་ཕུལ་ཞིག  
\v 3 དེ་ནས་ཡེས་ར་ཨེལ་པ་རྣམས་ལ་འདི་ལྟར། ཁྱོད་རྣམས་ཀྱིས་སྡིག་བཤགས་མཆོད་པ་ལ་ར་ཐུག་ཅིག་འཁྲིད་ཡོང་དགོས། སྐྱོན་གཏན་ནས་མེད་པའི་བ་ཕྲུག་དང་ལུ་གུ་ལོ་གཅིག་ཅན་གཉིས་ཀྱང་སྦྱིན་སྲེག་གི་མཆོད་པའི་ཕྱིར་དུ་འཁྲིད་ཡོང་དགོས།  
\v 4 ཡང་གླང་ཐུག་ཅིག་དང་ལུག་ཐུག་ཅིག་དམར་མཆོད་ཀྱི་ཆེད་དུ་ཁྲིད་འོངས་ནས་དཀོན་མཆོག་ཡ་ཝཱེའི་སྤྱན་སྔར་ཞི་བདེའི་མཆོད་པ་རུ་བཤམ་པ་དང་། འབྲུ་རིགས་ཀྱི་མཆོད་པ་ལ་སྣུམ་བསྲེས་ནས་འབུལ་དགོས་ཏེ། ཅིའི་ཕྱིར་ཞེ་ན། དེ་རིང་དཀོན་མཆོག་ཡ་ཝཱེ་ཁྱོད་རྣམས་ལ་མངོན་པར་འགྱུར་བའི་ཕྱིར་རོ་ཞེས་སྦྲོན་ཅིག་གསུངས་པས།  
\v 5 དེ་ཚོས་མོ་ཤེ་ཡིས་བསྒོས་པ་རྣམས་མཇལ་འཕྲད་གུར་མཆོག་གི་མདུན་དུ་ཁྱེར་འོངས་པ་དང་། མི་ཚོགས་ཐམས་ཅད་ཉེ་སར་བཅར་ནས་དཀོན་མཆོག་ཡ་ཝཱེའི་སྤྱན་སྔར་འགྲེང་ངོ་། །  
\v 6 དེར་མོ་ཤེ་ན་རེ། འདི་ནི་དཀོན་མཆོག་ཡ་ཝཱེས་ཁྱོད་རྣམས་ལ་བཀའ་བསྩལ་ཞིང་བསྒྲུབ་འོས་པ་རྣམས་ཡིན་ཏེ། དཀོན་མཆོག་ཡ་ཝཱེའི་གཟི་འོད་ཁྱོད་ཅག་ལ་མངོན་པར་འགྱུར་ཞེས་གསུངས།  
\v 7 མོ་ཤེ་ཡིས་ཨ་རོན་ལ། ཁྱོད་རང་མཆོད་ཁྲིའི་མདུན་དུ་བཅར་ནས་ཁྱོད་ཀྱི་སྡིག་བཤགས་མཆོད་པ་དང་སྦྱིན་སྲེག་ཕུལ་ཏེ། རང་ཉིད་དང་མི་རྣམས་ཀྱི་སྡིག་པ་ཤོགས་ཤིག ཡང་མི་རྣམས་ཀྱི་མཆོད་པ་ཕུལ་ཏེ་ཁོ་རྣམས་ཀྱི་སྡིག་པ་ཤོགས་ཤིག ཐམས་ཅད་དཀོན་མཆོག་ཡ་ཝཱེས་བསྩལ་པའི་བཀའ་བཞིན་དུ་ཡིན་ནོ་ཞེས་གསུངས་སོ། །  
\v 8 དེ་ནས་ཨ་རོན་མཆོད་ཁྲིའི་དྲུང་དུ་འོངས་ནས་རང་གི་སྡིག་བཤགས་མཆོད་པའི་བ་ཕྲུག་དེ་བཤས་པ་དང་།  
\v 9 ཨ་རོན་གྱི་བུ་རྣམས་ཀྱིས་ཁོ་ལ་ཁྲག་ཁྱེར་འོངས་པ་དང་། ཁོས་མཛུབ་མོ་ཁྲག་ནང་བསྒྲེས་ཤིང་མཆོད་ཁྲིའི་རུ་ཐུར་རྣམས་ལ་བསྐུས་པ་དང་། ཁྲག་ལྷག་མ་རྣམས་མཆོད་ཁྲིའི་ཞབས་རའི་སྟེང་དུ་བླུགས་སོ། །  
\v 10 ཁོས་སྡིག་བཤགས་མཆོད་པའི་ཚིལ་དང་མཁལ་མ་དང་། མཆིན་པའི་རྩ་རྒྱུས་བཅས་ནི་མཆོད་ཁྲིའི་སྟེང་དུ་བསྲེགས་པ་དང་། དེ་ཐམས་ཅད་དཀོན་མཆོག་ཡ་ཝཱེས་མོ་ཤེ་ལ་བསྩལ་པའི་བཀའ་བཞིན་དུ་ཡིན་ནོ། །  
\v 11 ཤ་དང་པགས་པ་རྣམས་སྒར་ཁའི་ཕྱི་རོལ་ཏུ་མེ་ལ་བསྲེགས་སོ། །  
\v 12 ཨ་རོན་གྱིས་སྦྱིན་སྲེག་ཏུ་འབུལ་བའི་ཕྱུགས་ཟོག་བཤས་རྗེས། ཁོའི་བུ་རྣམས་ཀྱིས་དེའི་ཁྲག་ཁྱེར་འོངས་པ་དང་། ཁོས་ཁྲག་དེ་མཆོད་ཁྲིའི་ཕྱོགས་བཞི་རུ་གཏོར།  
\v 13 ཡང་དེ་དག་གིས་སྦྱིན་སྲེག་ཧྲིལ་པོ་ལྷུ་ལྷུ་རུ་བཅད་པ་རྣམས་མགོ་དང་བཅས་ཁྱེར་འོངས་ནས་ཁོ་ལ་སྤྲད་ཅིང་། ཁོས་དེ་མཆོད་ཁྲིའི་སྟེང་བསྲེགས་པ་དང་།  
\v 14 ནང་ཁྲོལ་དང་རྐང་ལག་རྣམས་བཀྲུས་ཏེ་མཆོད་ཁྲིའི་སྟེང་གི་སྦྱིན་སྲེག་དང་ལྷན་དུ་བསྲེགས་སོ། །  
\v 15 དེ་ནས་མི་ཚོགས་ཀྱི་མཆོད་པ་ཕུལ་བ་སྟེ། ཁོས་མི་ཚོགས་ཀྱི་སྡིག་བཤགས་མཆོད་པར་ཁྲིད་འོངས་པའི་ར་ཐུག་བཤས་ཏེ་སྔར་བཞིན་སྡིག་བཤགས་མཆོད་པར་ཕུལ་ཏོ། །  
\v 16 ཡང་ཁྲིམས་སྲོལ་བཞིན་དུ་བསྒྲུབས་ནས་སྦྱིན་སྲེག་ཀྱང་ཕུལ་ཏོ། །  
\v 17 ཞོགས་པའི་སྦྱིན་སྲེག་ལས་གཞན་ཁོས་འབྲུ་རིགས་ཀྱི་མཆོད་པ་ཡང་ཕུལ་བ་སྟེ། ལག་པས་ཁྱོར་བ་གང་བླངས་ནས་མཆོད་ཁྲིའི་སྟེང་དུ་བསྲེགས།  
\v 18 དེ་ནས་ཨ་རོན་གྱིས་མི་ཚོགས་ཀྱི་ཞི་བདེའི་མཆོད་པ་ཡིན་པའི་གླང་ཐུག་དང་ལུག་ཐུག་བཤས་ཤིང་། ཁོའི་བུ་རྣམས་ཀྱིས་ཁོ་ལ་དེའི་ཁྲག་ཁྱེར་འོངས་པ་དང་། ཁོས་ཁྲག་ནི་མཆོད་ཁྲིའི་ཕྱོགས་བཞི་རུ་གཏོར་བའོ། །  
\v 19 དེ་དག་གིས་གླང་ཐུག་དང་ལུག་ཐུག་གི་ཚིལ་དང་། རྔ་མ་ཚོན་པོ་དང་། ནང་ཁྲོལ་བཏུམས་པའི་ཚིལ་དང་། མཁལ་མ་དང་། མཆིན་པའི་རྩ་རྒྱུས་བཅས་ཡོངས་སུ་རྫོགས་པ་དང་།  
\v 20 ཚིལ་ནི་དམར་མཆོད་དུ་བཤས་པའི་ཕྱུགས་ཟོག་གི་བྲང་རྣམས་ཀྱི་སྟེང་དུ་བཞག་པ་དང་། ཁོས་ཚིལ་རྣམས་མཆོད་ཁྲིའི་སྟེང་དུ་བསྲེགས།  
\v 21 ཨ་རོན་གྱིས་དམར་མཆོད་དུ་བཤས་པའི་ཕྱུགས་ཟོག་གི་བྲང་རྣམས་དང་བརླ་གཡས་པ་དཀོན་མཆོག་ཡ་ཝཱེའི་སྤྱན་སྔར་ཕར་གཡོ་ཚུར་གཡོ་བྱས་ནས་གཡོབ་མཆོད་དུ་ཕུལ་བ་དང་། དེ་ནི་མོ་ཤེ་ཡིས་བསྒོས་པ་བཞིན་དུ་ཡིན་ནོ། །  
\v 22 དེ་ནས་ཨ་རོན་གྱིས་ལག་པ་ཡར་བཏེགས་ནས་མི་རྣམས་ལ་བྱིན་གྱིས་བརླབས་པ་དང་། ཁོས་སྡིག་བཤགས་མཆོད་པ་དང་སྦྱིན་སྲེག ཞི་བདེའི་མཆོད་པ་བཅས་ཕུལ་རྗེས་མར་བབས།  
\v 23 མོ་ཤེ་དང་ཨ་རོན་གཉིས་མཇལ་འཕྲད་གུར་མཆོག་གི་ནང་དུ་སོང་ཞིང་། ཕྱི་རོལ་ཏུ་འོངས་ནས་མི་རྣམས་ལ་བྱིན་རླབས་མཛད་པ་ན། དཀོན་མཆོག་ཡ་ཝཱེའི་གཟི་འོད་མི་ཐམས་ཅད་ལ་མངོན་པར་གྱུར་པ་དང་ཆབས་ཅིག  
\v 24 དཀོན་མཆོག་ཡ་ཝཱེའི་དྲུང་ནས་མེ་ཞིག་བྱུང་སྟེ། མཆོད་ཁྲིའི་སྟེང་གི་སྦྱིན་སྲེག་དང་ཚིལ་རྣམས་ཡོངས་སུ་བསྲེགས་ཤིང་། མི་ཐམས་ཅད་ཀྱིས་དེ་མཐོང་བ་ན་སྐད་ཆེན་པོ་བརྒྱབ་ནས་ལུས་སར་བཏུད་དོ། །   
\c 10
\cl ལེའུ་བཅུ་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 ནཱ་དབ་དང་ཨ་བིད་ཧུ་གཉིས་ཀྱི་འཆི་བ།  
\p
\v 1 དེ་ཡང་ཨ་རོན་གྱི་བུ་ནཱ་དབ་དང་ཨ་བི་ཧུ་གཉིས་ཀྱིས་རང་གི་སྤོས་ཕོར་ཁྱེར་ནས། དེའི་ནང་དུ་མེ་བཞག་པ་དང་བདུག་སྤོས་ཀྱང་བཏབ་སྟེ། དཀོན་མཆོག་ཡ་ཝཱེས་ཁོ་ཚོར་བཀའ་འཁྲོལ་མེད་པའི་མེ་དཀོན་མཆོག་ཡ་ཝཱེའི་སྤྱན་སྔར་ཕུལ།  
\v 2 དེར་དཀོན་མཆོག་ཡ་ཝཱེའི་དྲུང་ནས་མེ་ཞིག་བྱུང་ཞིང་དེ་གཉིས་བསྲེགས་ནས་དཀོན་མཆོག་ཡ་ཝཱེའི་དྲུང་དུ་ཤིའོ། །  
\v 3 དེ་ནས་མོ་ཤེ་ཡིས་ཨ་རོན་ལ། དཀོན་མཆོག་ཡ་ཝཱེས་འདི་སྐད་དུ། ངའི་གམ་དུ་བཅར་བ་རྣམས་ཀྱི་ཁྲོད་དུ་ང་རང་དམ་པར་མངོན་པ་དང་། མི་ཐམས་ཅད་ཀྱི་མཐོང་ངོར་བདག་ལ་གཟི་བརྗིད་ལྡན་པར་འགྱུར་ཞེས་བཀའ་བསྩལ་པའོ་ཞེས་གསུངས་པར། ཨ་རོན་གྱིས་ངག་བཅད་དེ་བསྡད་དོ། །  
\v 4 མོ་ཤེ་ཡིས་ཨ་རོན་གྱི་ཞང་པོ་ཨུ་ཟི་ཨེལ་གྱི་བུ་མེ་ཤཱ་ཨེལ་དང་ཨེལ་ཙ་ཕཱན་གཉིས་བོས་ནས་ན་རེ། ཚུར་ཤོག་དང་། ཁྱོད་ཀྱི་སྤུན་མཆེད་རྣམས་ཀྱི་བེམ་པོ་གནས་མཆོག་གི་མདུན་ནས་སྒར་ཁའི་ཕྱི་རོལ་ཏུ་ཁྱེར་ཅིག་ཅེས་གསུངས་པ་ན།  
\v 5 དེ་གཉིས་ཚུར་འོངས་ནས། མོ་ཤེ་ཡིས་གསུངས་པ་བཞིན་དུ་བེམ་པོ་ནི་གོས་རིང་དང་བཅས་སྒར་ཁའི་ཕྱི་རོལ་ཏུ་ཁྱེར།  
\v 6 ཡང་མོ་ཤེ་ཡིས་ཨ་རོན་དང་དེའི་བུ་ཨེ་ལི་ཨ་ཟར་དང་ཨི་ཐ་མཱར་བཅས་ལ། ཁྱོད་ཀྱི་མགོ་ཟིང་ནས་སྐྲ་བཤིག་པར་མི་བྱེད་ལ་གོས་རྣམས་ཀྱང་དྲལ་བར་མ་གྱུར་ཅིག ཅི་ལ་ཞེ་ན། ཁྱོད་འཆི་བར་མི་འགྱུར་བ་དང་དཀོན་མཆོག་ཡ་ཝཱེ་ཁོང་ཉིད་མི་ཚོགས་ཐམས་ཅད་ལ་ཐུགས་ཁྲོ་བར་མི་འགྱུར་བའི་ཕྱིར་རོ། །འོན་ཀྱང་ཁྱོད་ཀྱི་སྤུན་ཟླ་སྟེ་ཡེས་ར་ཨེལ་གྱི་ཁྱིམ་རྒྱུད་ཀུན་གྱིས་དཀོན་མཆོག་ཡ་ཝཱེས་མཛད་པའི་མེ་འདི་ཡི་ཕྱིར་དུ་སྨྲེ་ངག་འདོན་ངེས།  
\v 7 ཁྱོད་ཅག་འཆི་བར་མི་འགྱུར་བའི་ཕྱིར་དུ། མཇལ་འཕྲད་གུར་མཆོག་གི་སྒོའི་ཕྱི་རོལ་ཏུ་མ་འགྲོ་ཞིག དཀོན་མཆོག་ཡ་ཝཱེས་བྱུགས་པའི་སྣུམ་ཁྱོད་ཅག་གི་ལུས་སྟེང་དུ་ཡོད་པའི་ཕྱིར་རོ་ཞེས་གསུངས་པས། དེ་དག་གིས་མོ་ཤེའི་བཀའ་བཞིན་དུ་བསྒྲུབས་སོ། །  
\v 8 དེ་ཡང་དཀོན་མཆོག་ཡ་ཝཱེས་ཨ་རོན་ལ་འདི་སྐད་དུ།  
\v 9 ཁྱོད་དང་ཁྱོད་ཀྱི་བུ་རྣམས་མཇལ་འཕྲད་གུར་མཆོག་གི་ནང་དུ་འོངས་པའི་ཚེ། འཆི་བར་མི་འགྱུར་བའི་ཕྱིར་དུ་རྒུན་ཆང་དང་ཨ་རག་གང་ཡང་བཏུང་བར་མ་བྱེད་ཅིག དེ་ནི་ཁྱོད་ཅག་གི་མི་རབས་ནས་མི་རབས་བར་དུས་གཏན་གྱི་སྒྲིག་ཁྲིམས་ཡིན།  
\v 10 ཁྱོད་རྣམས་ཀྱིས་དམ་པ་དང་ཐ་ཤལ་གཉིས་དང་། གཙང་དང་མི་གཙང་བའི་དབྱེ་བ་འབྱེད་དགོས་ལ།  
\v 11 དཀོན་མཆོག་ཡ་ཝཱེས་མོ་ཤེ་བརྒྱུད་ནས་ཡེས་ར་ཨེལ་པ་རྣམས་ལ་གསུངས་པའི་སྒྲིག་ཁྲིམས་ཐམས་ཅད་ཁོ་རྣམས་ལ་སློབ་དགོས་ཞེས་བཀའ་བསྩལ་ཏོ། །  
\v 12 ཡང་མོ་ཤེ་ཡིས་ཨ་རོན་དང་ཁོའི་གསོན་པོར་ལུས་པའི་བུ་ཨེ་ལི་ཨ་ཟར་དང་ཨི་ཐ་མཱར་གཉིས་ལ་འདི་ལྟར། དཀོན་མཆོག་ཡ་ཝཱེ་ལ་ཕུལ་བའི་མེ་མཆོད་ལས་འབྲུ་རིགས་ཀྱི་ལྷག་མ་རྣམས་བླངས་ཏེ། མཆོད་ཁྲིའི་ལོགས་སུ་སྐྱུར་མེད་བག་ལེབ་དེ་ཟོ་ཞིག དེ་ནི་ཀུན་ལས་དམ་པ་ཡིན་པའི་ཕྱིར་རོ། །  
\v 13 ཁྱོད་རྣམས་ཀྱིས་གནས་དམ་པ་རུ་དེ་བཟའ་དགོས། ཅིའི་ཕྱིར་ཞེ་ན། དེ་ནི་དཀོན་མཆོག་ཡ་ཝཱེ་ལ་ཕུལ་བའི་མེ་མཆོད་ལས་ཁྱོད་དང་ཁྱོད་ཀྱི་བུ་རྣམས་ལ་འཐོབ་འོས་པའི་སྐལ་ཡིན་ལ། ང་ལ་བསྩལ་པའི་བཀའ་ནི་དེ་བཞིན་ཡིན།  
\v 14 གཡོབ་མཆོད་ཀྱི་བྲང་དང་འདེགས་མཆོད་ཀྱི་བརླ་ནི། ཁྱོད་ཀྱིས་རང་གི་བུ་དང་བུ་མོ་རྣམས་དང་མཉམ་དུ་གནས་གཙང་ས་ཞིག་ཏུ་བཟའ་དགོས། དེ་ནི་ཡེས་ར་ཨེལ་པ་རྣམས་ཀྱི་ཞི་བདེའི་མཆོད་པ་ལས་ཁྱོད་ལ་དབང་ཞིང་། ཁྱོད་དང་ཁྱོད་ཀྱི་བུ་རྣམས་ལ་འཐོབ་འོས་པའི་སྐལ་ཡིན་པའི་ཕྱིར་རོ། །  
\v 15 ཁོ་རྣམས་ཀྱིས་འདེགས་མཆོད་ཀྱི་བརླ་དང་གཡོབ་མཆོད་ཀྱི་བྲང་། མེ་མཆོད་ཀྱི་ཚིལ་བཅས་ཁྱེར་འོངས་ཏེ། དཀོན་མཆོག་ཡ་ཝཱེའི་སྤྱན་སྔར་ཕར་གཡོ་ཚུར་གཡོ་བྱས་ནས་གཡོབ་མཆོད་དུ་འབུལ་བར་འགྱུར། འདི་ཐམས་ཅད་ཁྱོད་དང་ཁྱོད་ཀྱི་བུ་རྣམས་ལ་དབང་ཞིང་། དུས་གཏན་དུ་འཐོབ་འོས་པའི་སྐལ་ཡིན་ལ། ཐམས་ཅད་དཀོན་མཆོག་ཡ་ཝཱེས་བསྩལ་པའི་བཀའ་བཞིན་ཡིན་ཞེས་གསུངས་སོ། །  
\v 16 དེའི་སྐབས་སུ་མོ་ཤེ་ཡིས་གཟབ་ནན་གྱིས་སྡིག་བཤགས་མཆོད་པའི་ར་ཐུག་བཙལ་བ་ན། ལྟོས་དང་། དེ་ནི་བསྲེགས་ཟིན་པས་ཁོང་ཨ་རོན་གྱི་བུ་གསོན་པོར་ལུས་པ་ཨེ་ལི་ཨ་ཟར་དང་ཨི་ཐ་མཱར་གཉིས་ལ་ཁྲོས་ནས་འདི་ལྟར།  
\v 17 ཁྱོད་ཅག་གིས་སྡིག་བཤགས་མཆོད་པ་དེ་གནས་མཆོག་ཏུ་མ་ཟོས་པ་ཅི་ཡིན་ནམ། དེ་ནི་ཀུན་ལས་དམ་པ་ཡིན་ལ། མི་ཚོགས་ཀྱི་ནག་ཉེས་སེལ་ཞིང་། དཀོན་མཆོག་ཡ་ཝཱེའི་ཞབས་དྲུང་དུ་དེ་དག་གི་སྡིག་པ་བཤག་པའི་ཕྱིར་དུ་ཁྱོད་རྣམས་ལ་གནང་བ་ཡིན་ནོ། །  
\v 18 ལྟོས་དང་། དམར་མཆོད་དེའི་ཁྲག་ནི་གནས་མཆོག་ཏུ་ཁྱེར་མེད་པས། ཁྱོད་ཅག་གིས་ངའི་བསྒོ་བ་བཞིན་གནས་མཆོག་ཏུ་ཤ་དེ་བཟའ་དགོས་སོ་ཞེས་གསུངས་པ་ལ།  
\v 19 ཨ་རོན་གྱིས་མོ་ཤེ་ལ། ལྟོས་དང་། དེ་རིང་དེ་དག་གིས་དཀོན་མཆོག་ཡ་ཝཱེའི་དྲུང་དུ་སྡིག་བཤགས་མཆོད་པ་དང་སྦྱིན་སྲེག་ཕུལ་ནའང་། ང་རང་ཆག་སྒོ་འདི་ལྟ་བུར་ཕྲད་བྱུང་། གལ་སྲིད་དེ་རིང་ངས་སྡིག་བཤགས་མཆོད་པ་འདི་ཟོས་ན། དཀོན་མཆོག་ཡ་ཝཱེའི་སྤྱན་སྔར་འོས་སམ་ཞེས་སྨྲས་ཤིང་།  
\v 20 མོ་ཤེ་ཡིས་དེ་ཐོས་པ་དང་ལེགས་པར་དགོངས་སོ། །   
\c 11
\cl ལེའུ་བཅུ་གཅིག་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 ཁ་ཟས་གཙང་དང་མི་གཙང་བ།  
\p
\v 1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་འདི་སྐད་དུ།  
\v 2 ཁྱོད་ཅག་གིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག ས་སྟེང་དུ་ཡོད་པའི་དུད་འགྲོ་ཐམས་ཅད་ལས་བཟའ་རུང་བའི་སྲོག་ཆགས་ནི་འདི་དག་སྟེ།  
\v 3 དུད་འགྲོ་རྨིག་པ་གཉིས་སུ་ཁ་འཕྲལ་བའམ། ཡང་ན་རྨིག་སོར་ཁ་འཕྲལ་ཅན་དང་སྐྱུག་ལྡད་བྱེད་པ་རྣམས་བཟའ་རུང་བ་ཡིན།  
\v 4 འོན་ཀྱང་། སྐྱུག་ལྡད་བྱེད་པ་དང་ཡང་ན་རྨིག་པ་ཁ་འཕྲལ་ཅན་རྣམས་ལས་བཟའ་མི་རུང་བ་ནི། རྔ་མོང་གིས་སྐྱུག་ལྡད་བྱེད་ཀྱང་རྨིག་པ་ཁ་འཕྲལ་མེད་པས་ཁྱོད་རྣམས་ལ་མཚོན་ན་མི་གཙང་བ་ཡིན་པ་དང་།  
\v 5 འཕྱི་བས་སྐྱུག་ལྡད་བྱེད་ཀྱང་རྨིག་པ་ཁ་འཕྲལ་མེད་པས་དེ་ཡང་ཁྱོད་རྣམས་ལ་མཚོན་ན་མི་གཙང་བ་ཡིན།  
\v 6 རི་བོང་གིས་སྐྱུག་ལྡད་བྱེད་ནའང་རྨིག་པ་ཁ་འཕྲལ་མེད་པས་ཁྱོད་རྣམས་ལ་མཚོན་ན་མི་གཙང་བ་ཡིན།  
\v 7 ཕག་ནི་རྨིག་པ་གཉིས་སུ་ཁ་འཕྲལ་བ་དང་རྨིག་སོར་ཁ་འཕྲལ་ཅན་ཡིན་ནའང་། སྐྱུག་ལྡད་མི་བྱེད་པས་ཁྱོད་རྣམས་ལ་མཚོན་ན་མི་གཙང་བ་ཡིན།  
\v 8 དེ་དག་གི་ཤ་ནི་ཁྱོད་ཅག་གིས་མི་བཟའ་བར་གྱིས། དེ་དག་གི་རོ་རྣམས་ལ་ཡང་མི་རེག་པར་གྱིས། དེ་ཐམས་ཅད་ཁྱོད་རྣམས་ལ་མཚོན་ན་མི་གཙང་བ་ཡིན་ནོ། །  
\v 9 ཆུར་གནས་ཐམས་ཅད་ལས་བཟའ་རུང་བ་ནི་འདི་དག་སྟེ། རྒྱ་མཚོའམ་གཙང་པོ་གང་རུང་སྟེ་ཆུ་ནང་དུ་གནས་པའི་གཤོག་པ་དང་ཉ་སག་དང་ལྡན་པ་ཐམས་ཅད་བཟའ་རུང་བ་ཡིན།  
\v 10 རྒྱ་མཚོ་དང་གཙང་པོ་དང་། ཆུ་ནང་དུ་ནུར་འགྲོས་བྱེད་པའི་སྲོག་ཆགས་ཐམས་ཅད་དེ། ཆུ་ནང་དུ་གནས་པའི་སྲོག་ལྡན་ཐམས་ཅད་ལས་གཤོག་པ་དང་ཉ་སག་མེད་པ་རྣམས་ནི་ཁྱོད་ཅག་གིས་སྐྱུག་བྲོ་བར་བརྩི་དགོས།  
\v 11 དེ་དག་ནི་ཁྱོད་རྣམས་ལ་མཚོན་ན་སྐྱུག་བྲོ་བ་ཡིན་པས། དེ་དག་གི་ཤ་བཟའ་མི་རུང་ལ་རོ་ཡང་སྐྱུག་བྲོ་བར་བརྩི་དགོས།  
\v 12 གཤོག་པ་དང་ཉ་སག་དང་མི་ལྡན་པའི་ཆུ་གནས་ཐམས་ཅད་ནི་ཁྱོད་རྣམས་ལ་མཚོན་ན་སྐྱུག་བྲོ་བ་ཡིན་ནོ། །  
\v 13 ཡང་འདབ་ཆགས་ལས་ཁྱོད་ཅག་གིས་སྐྱུག་བྲོ་བར་བརྩི་རུང་བ་དང་། བཟའ་མི་རུང་བར་མ་ཟད་སྐྱུག་བྲོ་བ་རྣམས་ནི་འདི་དག་སྟེ། གླག་དང་བྱ་རྒོད་དང་གོ་བོ་དང་།  
\v 14 འོལ་པ་དང་བྱ་ཁྲའི་རིགས་དང་།  
\v 15 ཕོ་རོག་གི་རིགས་ཐམས་ཅད་དང་།  
\v 16 རྔ་བྱ་དང་སྲིན་བྱ་དང་ཆུ་སྐྱར་དང་ཁྲའི་རིགས་ཐམས་ཅད་དང་།  
\v 17 འུག་ཆུང་དང་སོ་བྱ་དང་འུག་རྒན་དང་།  
\v 18 འུག་དཀར་དང་འུག་སེར་དང་དུར་བྱ་དང་།  
\v 19 ཁྲུང་ཁྲུང་དང་སྐྱར་མོ་རྐང་རིང་གི་རིགས་དང་པུ་ཤུད་དང་ཕ་ཝང་བཅས་ཡིན་ནོ། །  
\v 20 རྐང་པ་བཞིས་འགྲུལ་བའི་འབུ་སྲིན་གཤོག་པ་ཅན་ཐམས་ཅད་ཁྱོད་རྣམས་ལ་མཚོན་ན་སྐྱུག་བྲོ་བ་ཡིན།  
\v 21 རྐང་པ་བཞིས་འགྲུལ་བའི་འབུ་སྲིན་གཤོག་པ་ཅན་ཐམས་ཅད་ལས། རྐང་པ་བརླ་ཐོག་ལ་འབྱར་ཡོད་པ་དང་ས་ནས་མཆོང་བ་རྣམས་ཁྱོད་ཅག་གིས་བཟའ་རུང་བ་སྟེ།  
\v 22 དེ་དག་ལས་ཁྱོད་རྣམས་ཀྱིས་བཟའ་རུང་བ་ནི་ཆ་ག་པའི་རིགས་དང་འབུ་ཀོ་ཀོའི་རིགས་དང་། འཐབ་འབུའི་རིགས་དང་ཅོག་ཅོག་པའི་རིགས་བཅས་སོ། །  
\v 23 འོན་ཀྱང་རྐང་པ་བཞི་ཡོད་པའི་འབུ་སྲིན་གཤོག་པ་ཅན་ཐམས་ཅད་ཁྱོད་རྣམས་ལ་མཚོན་ན་སྐྱུག་བྲོ་བ་ཡིན་ནོ། །  
\v 24 དེ་ཐམས་ཅད་ཀྱིས་ཁྱོད་རྣམས་མི་གཙང་བར་བྱེད་ཅིང་། སུ་ཞིག་གིས་དེ་དག་གི་རོ་ལ་རེག་ན། དགོང་མོའི་བར་དུ་མི་གཙང་བ་ཡིན།  
\v 25 ཡང་སུ་ཞིག་གིས་དེ་དག་གི་རོ་ཁྱེར་བ་ཡིན་ན། རང་གི་གོས་རྣམས་གཙང་མར་བཀྲུ་དགོས་ལ། དགོང་མོའི་བར་དུ་མི་གཙང་བ་ཡིན།  
\v 26 ཕྱུགས་ཟོག་རྨིག་པ་གཉིས་སུ་ཁ་འཕྲལ་ཡང་། རྨིག་སོར་འཕྲལ་མེད་པའམ་ཡང་ན་སྐྱུག་ལྡད་མི་བྱེད་པ་ཐམས་ཅད་ཁྱོད་ཅག་ལ་མཚོན་ན་མི་གཙང་བ་ཡིན། སུ་ཞིག་གིས་དེར་རེག་ན་དེ་ནི་མི་གཙང་བ་ཡིན།  
\v 27 རྐང་མཐིལ་གྱིས་འགྲུལ་བ་དང་རྐང་པ་བཞིས་འགྲུལ་བའི་སྲོག་ཆགས་ཐམས་ཅད་ཁྱོད་རྣམས་ལ་མཚོན་ན་མི་གཙང་བ་ཡིན་ལ། སུ་ཞིག་གིས་དེའི་རོ་ལ་རེག་ན་དེ་ནི་དགོང་མོའི་བར་དུ་མི་གཙང་བ་ཡིན་པ་དང་།  
\v 28 སུ་ཞིག་གིས་དེ་དག་གི་རོ་ཁྱེར་བ་ཡིན་ན། རང་གི་གོས་རྣམས་གཙང་མར་བཀྲུ་དགོས་ལ། དགོང་མོའི་བར་དུ་མི་གཙང་བ་ཡིན། དེ་དག་ཁྱོད་རྣམས་ལ་མཚོན་ན་མི་གཙང་བ་ཡིན་ནོ། །  
\v 29 ས་སྟེང་གི་ལྟོ་འགྲོ་སྲོག་ཆགས་ཁྱུ་དང་ཁྱུ་རྣམས་ལས། ཁྱོད་རྣམས་ལ་མཚོན་ན་མི་གཙང་བ་ནི་འདི་དག་སྟེ། སྲེ་མོང་དང་བྱི་བ་དང་རྩངས་པའི་རིགས་དང་།  
\v 30 གྱང་རྨིགས་དང་རྨིགས་པ་ཆེན་པོ། རྩངས་པ་ཁ་རལ་དང་རྩངས་པ་བྱེ་རལ་དང་བླ་མ་རྒལ་ཅིག་བཅས་སོ། །  
\v 31 ལྟོ་འགྲོ་སྲོག་ཆགས་དེ་ཐམས་ཅད་ནི་ཁྱོད་རྣམས་ལ་མཚོན་ན་མི་གཙང་བ་ཡིན་ལ། སུ་ཞིག་གིས་དེ་དག་ཤི་རྗེས་རོ་ལ་རེག་ན་དགོང་མོའི་བར་དུ་མི་གཙང་བ་ཡིན།  
\v 32 དེ་དག་ལས་ཤི་རོ་གཅིག་དངོས་པོ་གང་རུང་གི་སྟེང་དུ་ལྷུང་ན་དེ་ནི་མི་གཙང་བ་སྟེ། ཤིང་གི་སྣོད་དམ། གོས་སམ། ཀོ་བའམ། རྩྭ་ཕད་དམ། ཡང་ན་ལག་ཆ་གང་ཡིན་ཡང་ཆུ་རུ་སྦང་དགོས་ལ། དགོང་མོའི་བར་དུ་མི་གཙང་ཞིང་དེའི་རྗེས་སུ་ད་གཟོད་གཙང་བ་ཡིན།  
\v 33 དེ་དག་ལས་གཅིག་རྫ་སྣོད་དུ་ལྷུང་ན། དེའི་ནང་ཡོད་པ་ཐམས་ཅད་མི་གཙང་བར་གྱུར་ཅིང་། རྫ་སྣོད་དེ་གཅོག་དགོས་སོ། །  
\v 34 དེའི་ནང་གི་ཟས་རིགས་གང་ཡིན་ཡང་ཆུ་དེ་འདྲེས་ན་མི་གཙང་བ་ཡིན་ལ། སྣོད་ཆས་ནང་གི་བཏུང་བྱ་ཡང་མི་གཙང་བ་ཡིན།  
\v 35 དེ་དག་གི་རོ་ལས་ཆ་ཤས་ཙམ་དངོས་པོ་གང་རུང་གི་སྟེང་དུ་ལྷུང་ནའང་། དངོས་པོ་དེ་ནི་མི་གཙང་བར་གྱུར་པ་དང་། མེ་ཐབ་བམ་ཚ་ཐབ་གང་ཡིན་ཡང་རྡུལ་དུ་བརླག་དགོས། དེ་དག་མི་གཙང་བ་ཡིན་ལ། ཁྱོད་རྣམས་ལ་མཚོན་ནའང་མི་གཙང་བ་ཡིན།  
\v 36 འོན་ཀྱང་ཆུ་མིག་དང་རྫིང་བུ་སྟེ་ཆུ་འཁྱིལ་ས་རྣམས་ནི་སྔར་བཞིན་གཙང་མ་ཡིན་གྱི། དེ་དག་གི་རོ་ལ་རེག་པ་རྣམས་ནི་ད་གཟོད་མི་གཙང་བ་ཡིན།  
\v 37 གལ་སྲིད་དེ་དག་གི་རོ་ལས་ཆ་ཤས་ཙམ་རྨོ་འདེབས་ཀྱི་ས་བོན་སྟེང་དུ་ལྷུང་ན། ས་བོན་ནི་སྔར་བཞིན་གཙང་མ་ཡིན།  
\v 38 ཅི་སྟེ་ས་བོན་དེ་ལ་ཆུ་བརྒྱབ་པ་དང་། དེ་དག་གི་རོ་ལས་ཆ་ཤས་ཙམ་དེའི་སྟེང་དུ་ལྷུང་ན། ས་བོན་དེ་ཁྱོད་རྣམས་ལ་མི་གཙང་བ་ཡིན་ནོ། །  
\v 39 གལ་སྲིད་ཁྱོད་རྣམས་ཀྱི་ཁ་ཟས་སུ་རུང་བའི་ཕྱུགས་ཟོག་ལས་གཅིག་ཤི་བ་དང་། སུ་ཞིག་གིས་དེའི་རོ་ལ་རེག་ན་དེ་ནི་དགོང་མོའི་བར་དུ་མི་གཙང་བ་ཡིན།  
\v 40 སུ་ཞིག་གིས་སྲོག་ཆགས་ཀྱི་ཤི་རོ་དེ་ཟོས་ན། རང་གི་གོས་རྣམས་གཙང་མར་བཀྲུ་དགོས་ལ། དགོང་མོའི་བར་དུ་མི་གཙང་བ་ཡིན་པ་དང་། སུ་ཞིག་གིས་སྲོག་ཆགས་ཀྱི་ཤི་རོ་དེ་ཁྱེར་བ་ཡིན་ན། རང་གི་གོས་རྣམས་གཙང་མར་བཀྲུ་དགོས་ལ། དགོང་མོའི་བར་དུ་མི་གཙང་བ་ཡིན་ནོ། །  
\v 41 ས་སྟེང་གི་ལྟོ་འགྲོ་སྲོག་ཆགས་ཐམས་ཅད་ནི་སྐྱུག་བྲོ་བ་ཡིན་པས་བཟའ་མི་རུང་།  
\v 42 ལྟོ་བས་འགྲོ་བའམ་རྐང་ལག་བཞི་པོས་འགྲུལ་བ། ཡང་ན་སུག་མང་གིས་འགྲུལ་བ་བཅས་ས་སྟེང་གི་ལྟོ་འགྲོ་སྲོག་ཆགས་ཐམས་ཅད་ནི་སྐྱུག་བྲོ་བ་ཡིན་པས་བཟའ་མི་རུང་ངོ་། །  
\v 43 ཁྱོད་རྣམས་ཀྱིས་ལྟོ་འགྲོ་སྲོག་ཆགས་གང་རུང་གི་རྐྱེན་གྱིས་རང་ཉིད་སྐྱུག་བྲོ་བར་མ་བྱེད་ཅིག ཡང་དེ་དག་གི་རྐྱེན་གྱིས་མི་གཙང་བ་དང་བཙོག་པར་མ་བྱེད་ཅིག  
\v 44 བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་པས་ཁྱོད་རྣམས་ཀྱིས་རང་ཉིད་དམ་པར་བསྒྱུར་དགོས། བདག་ནི་དམ་པ་ཡིན་པའི༌ཕྱིར། ཁྱོད་ཀྱང་དམ་པ་ཡིན་དགོས་ཏེ། ཁྱོད་རྣམས་ཀྱིས་ས་ལ་ལྟོ་བས་འགྲུལ་བའི་ལྟོ་འགྲོ་སྲོག་ཆགས་གང་གི་རྐྱེན་གྱིས་ཀྱང་རང་ཉིད་མི་གཙང་བར་བྱེད་མི་རུང་ངོ་། །  
\v 45 བདག་ནི་ཁྱོད་ཅག་གི་དཀོན་མཆོག་བྱེད་པའི་ཆེད་དུ་ཁྱོད་ཅག་ཨེ་ཅིབ་ཡུལ་ནས་ཕྱི་རུ་ཁྲིད་ཡོང་མཁན་དཀོན་མཆོག་ཡ་ཝཱེ་ཡིན་ལ། བདག་ནི་དམ་པ་ཡིན་པའི་ཕྱིར། ཁྱོད་ཀྱང་དམ་པ་ཡིན་དགོས་སོ་ཞེས་བཀའ་བསྩལ་ཏོ། །  
\v 46 དེ་ནི་ཕྱུགས་ཟོག་སྟེ་འདབ་ཆགས་དང་ཆུ་ནང་རྒྱུ་བའི་སྲོག་ཆགས་དང་། ས་སྟེང་གི་ལྟོ་འགྲོ་སྲོག་ཆགས་ཐམས་ཅད་ཀྱི་བཀའ་ཁྲིམས་ཡིན་ཏེ།  
\v 47 ཁྱོད་རྣམས་ཀྱིས་གཙང་དང་མི་གཙང་བ་དང་། བཟའ་རུང་བ་དང་བཟའ་མི་རུང་བའི་སྲོག་ཆགས་ཀྱི་དབྱེ་བ་རྟོགས་པའི་ཕྱིར་ཡིན་ཞེས་པའོ་གསུངས་སོ། །   
\c 12
\cl ལེའུ་བཅུ་གཉིས་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 ཕྲུ་གུ་བཙས་རྗེས་ཀྱི་གཙང་སྦྲ།  
\p
\v 1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 2 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག བུད་མེད་ཅིག་མངལ་དང་ལྡན་པར་གྱུར་ནས་བུ་བཙས་ན། ཁོ་མོ་ཟླ་མཚན་འབབ་པའི་སྐབས་སུ་མི་གཙང་བ་བཞིན་དུ་ཉིན་བདུན་ལ་མི་གཙང་བ་ཡིན།  
\v 3 ཉིན་བརྒྱད་པ་ལ་བུའི་མཚན་སྐྱི་གཅོད་དགོས།  
\v 4 བུད་མེད་ལ་ཕྲུ་གུ་སྐྱེས་རྗེས་ཁྲག་ཤོར་བ་གཙང་མར་འགྱུར་བ་ལ་ཉིན་སུམ་ཅུ་སོ་གསུམ་དགོས་ཤིང་། ཁོ་མོ་གཙང་མར་བཟོ་བའི་ཉིན་མོ་རྣམས་མ་རྫོགས་གོང་རྫས་དམ་པར་རེག་པའམ་གནས་མཆོག་ལ་འགྲོ་མི་རུང་།  
\v 5 གལ་སྲིད་ཁོ་མོས་བུ་མོ་བཙས་ན། ཁོ་མོ་ཟླ་མཚན་འབབ་པའི་སྐབས་དང་འདྲ་བར་བདུན་ཕྲག་གཉིས་ལ་མི་གཙང་བ་དང་། ཁོ་མོར་ཕྲུ་གུ་སྐྱེས་རྗེས་ཁྲག་ཤོར་བ་གཙང་མར་འགྱུར་བ་ལ་ཉིན་དྲུག་ཅུ་རེ་དྲུག་དགོས་སོ། །  
\v 6 གཙང་མར་བཟོ་བའི་ཉིན་ལོངས་རྗེས། བུའམ་བུ་མོ་གང་ཞིག་སྐྱེས་ཀྱང་། ཁོ་མོས་སྦྱིན་སྲེག་གི་ཕྱིར་ལུ་གུ་ལོ་གཅིག་ཅན་ཞིག་དང་། སྡིག་བཤགས་མཆོད་པར་ཕུག་རོན་ཆུང་ངུ་གཅིག་གམ་བྱ་ཐི་བ་ཞིག་མཇལ་འཕྲད་གུར་མཆོག་གི་སྒོ་ཁར་ཁྱེར་འོངས་ཏེ་མཆོད་དཔོན་ལ་སྤྲོད་དགོས།  
\v 7 མཆོད་དཔོན་གྱིས་མཆོད་རྫས་དེ་རྣམས་དཀོན་མཆོག་ཡ་ཝཱེའི་དྲུང་དུ་ཕུལ་ནས། བུད་མེད་ཀྱི་སྡིག་པ་བཤག་དགོས། དེ་ལྟར་བྱས་ན་ཁོ་མོ་མངལ་ཁྲག་ལས་གཙང་བར་འགྱུར། དེ་ནི་བུ་དང་བུ་མོ་བཙའ་བའི་བུད་མེད་ཀྱི་བཀའ་ཁྲིམས་ཡིན་ནོ། །  
\v 8 གལ་སྲིད་བུད་མེད་ཀྱིས་ལུ་གུ་ཞིག་འབུལ་བར་མི་ནུས་ན། ཁོ་མོས་བྱ་ཐི་བ་གཉིས་སམ་ཕུག་རོན་ཆུང་ངུ་གཉིས་ཁྱེར་འོངས་ནས་གཅིག་ནི་སྦྱིན་སྲེག་དང་། ཅིག་ཤོས་ནི་སྡིག་བཤགས་མཆོད་པར་འབུལ་དགོས། མཆོད་དཔོན་གྱིས་ཁོ་མོའི་སྡིག་པ་བཤག་དགོས་ལ་ཁོ་མོ་གཙང་མར་འགྱུར་ཞེས་སྨྲ་དགོས་པར་བཀའ་བསྩལ་ཏོ། །   
\c 13
\cl ལེའུ་བཅུ་གསུམ་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 པགས་ནད་ཀྱི་ཁྲིམས།  
\p
\v 1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་འདི་སྐད་དུ།  
\v 2 གལ་སྲིད་སུ་ཞིག་གི་ལུས་ཀྱི་སྐྱི་མོ་ལ་སྐྲངས་འབུར་རམ་སིབ་རྒྱས་པ། ཡང་ན་ཁྲ་ཐིག་ལྷུང་བ་བཅས་མཛེ་ནད་དུ་འགྱུར་སྲིད་པའི་ནད་ཡམས་བྱུང་ཚེ། མི་དེ་མཆོད་དཔོན་ཨ་རོན་ནམ། ཡང་ན་དེའི་བུ་མཆོད་དཔོན་ཡིན་པ་རྣམས་ལས་གཅིག་གི་དྲུང་དུ་འཁྲིད་དགོས་པ་དང་།  
\v 3 མཆོད་དཔོན་གྱིས་དེའི་ལུས་ཀྱི་སྐྱི་མོའི་ནད་རྟགས་ལ་བརྟགས་ནས། ནད་ཡོད་སའི་བ་སྤུ་རྣམས་དཀར་པོར་གྱུར་ཅིང་། ནད་ཡམས་དེ་ལུས་ཀྱི་སྐྱི་མོའི་ནང་དུ་འཐིམ་ཡོད་པ་མཐོང་ན། དེ་ནི་མཛེ་ནད་ཀྱི་རྟགས་ཡིན་པས། མཆོད་དཔོན་གྱིས་བརྟག་དཔྱད་བྱས་རྗེས་མི་དེ་མི་གཙང་བ་ཡིན་པར་བསྒྲག་དགོས།  
\v 4 གལ་སྲིད་མི་དེའི་ལུས་ཀྱི་སྐྱི་མོ་ལ་ཁྲ་ཐིག་དཀར་པོ་ཡོད་ཀྱང་དེ་ནི་སྐྱི་མོའི་ནང་དུ་འཐིམ་མེད་པ་དང་། དེའི་སྟེང་གི་བ་སྤུ་རྣམས་ཀྱང་དཀར་པོར་གྱུར་མེད་ན། མཆོད་དཔོན་གྱིས་ནད་པ་དེ་ཉིན་བདུན་ལ་ལོགས་སུ་འགེར་དགོས།  
\v 5 ཉིན་བདུན་པར་མཆོད་དཔོན་གྱིས་དེར་བརྟག་དགོས་ཤིང་། ལྟོས་དང་། གལ་སྲིད་མཆོད་དཔོན་གྱིས་ནད་ཡམས་གཟུགས་མ་འགྱུར་བར་གནས་པ་དང་སྐྱི་མོའི་སྟེང་མ་ཁྱབ་པ་མཐོང་ན། མི་དེ་ཡང་ཉིན་བདུན་ལ་ལོགས་སུ་འགེར་དགོས།  
\v 6 དེ་ནས་ཉིན་བདུན་པར་མཆོད་དཔོན་གྱིས་དེ་ལ་སླར་ཡང་བརྟག་དགོས་ཤིང་། ལྟོས་དང་། གལ་ཏེ་ནད་ཡམས་ཇེ་ཡང་དུ་སོང་བ་དང་སྐྱི་མོའི་སྟེང་མ་ཁྱབ་པ་མཐོང་ན། མཆོད་དཔོན་གྱིས་མི་དེ་གཙང་མ་ཡིན་པར་བསྒྲག་དགོས། ཅི་ལ་ཟེར་ན། དེ་ནི་རྨ་སྐོགས་ཙམ་ཡིན་པའི་ཕྱིར་རོ། །མི་དེས་རང་གི་གོས་རྣམས་བཀྲུ་དགོས་ལ་དེ་ནས་གཙང་མར་འགྱུར་བ་ཡིན་ནོ། །  
\v 7 མི་དེར་མཆོད་དཔོན་གྱིས་བརྟག་དཔྱད་བྱས་ནས་གཙང་མ་ཡིན་པར་བསྒྲགས་རྗེས། གལ་ཏེ་རྔོ་ནི་སྐྱི་མོའི་སྟེང་རྒྱ་ཆེར་ཁྱབ་ན། ཁོས་ཡང་བསྐྱར་མཆོད་དཔོན་ལ་སྟོན་དགོས།  
\v 8 ཡང་མཆོད་དཔོན་གྱིས་དེ་ལ་བརྟག་ཅིང་། ལྟོས་དང་། རྔོ་ནི་སྐྱི་མོའི་སྟེང་ཁྱབ་ཡོད་པ་མཐོང་ན། དེ་ནི་མཛེ་ནད་ཡིན་པས་མཆོད་དཔོན་གྱིས་མི་དེ་མི་གཙང་བར་བསྒྲག་དགོས་སོ། །  
\v 9 གལ་སྲིད་མི་ཞིག་ལ་མཛེ་ནད་བྱུང་ན་ཁོ་རང་མཆོད་དཔོན་གྱི་དྲུང་དུ་འཁྲིད་དགོས་པ་དང་།  
\v 10 མཆོད་དཔོན་གྱིས་དེ་ལ་བརྟག་དགོས་ཤིང་། ལྟོས་དང་། སྐྱི་མོར་སྐྲངས་འབུར་དཀར་པོ་ཆགས་ནས་བ་སྤུ་དཀར་པོར་གྱུར་པ་དང་། སྐྲངས་འབུར་ནང་དུ་ཤ་གསར་སྐྱེས་པ་མཐོང་ན།  
\v 11 དེ་ནི་ཁོའི་ལུས་ཀྱི་སྐྱི་མོར་བྱུང་བའི་གཅོང་ནད་མཛེ་ནད་ཡིན་པས། མཆོད་དཔོན་གྱིས་དེ་ནི་མི་གཙང་བ་ཡིན་པར་ཁྱབ་བསྒྲག་བྱེད་དགོས་པ་དང་། མི་དེ་མི་གཙང་བ་ཡིན་པའི་ཕྱིར་ལོགས་སུ་འགེར་མི་དགོས་སོ། །  
\v 12 གལ་སྲིད་མཛེ་ནད་སྐྱི་མོའི་གང་ས་གང་ལ་ཁྱབ་ཅིང་། མཛེ་ནད་བྱུང་བའི་མི་དེའི་སྐྱི་མོ་ཡོངས་ལ་གང་བ་དང་། མཆོད་དཔོན་གྱིས་བལྟས་ནས་མགོ་ནས་རྐང་པའི་བར་དུ་ཁྱབ་པ་ཡིན་ན།  
\v 13 མཆོད་དཔོན་གྱིས་དེ་ལ་བརྟག་དགོས་ཤིང་། ལྟོས་དང་། གལ་སྲིད་ནད་པ་དེའི་ལུས་ཡོངས་ལ་མཛེ་ནད་ཀྱིས་ཁྱབ་ཡོད་ན། མི་དེ་གཙང་མ་ཡིན་པར་ཁྱབ་བསྒྲག་བྱེད་དགོས། ཁོའི་ལུས་ཡོངས་དཀར་པོ་ཆགས་པས་གཙང་མ་ཡིན་པའོ། །  
\v 14 འོན་ཀྱང་ཁོའི་ལུས་སྟེང་དུ་ཤ་གསར་པ་སྐྱེས་ན། མི་དེ་ནི་མི་གཙང་བ་ཡིན།  
\v 15 མཆོད་དཔོན་གྱིས་ཤ་གསར་པ་སྐྱེས་ཡོད་པ་མཐོང་ན། མི་དེ་ནི་མི་གཙང་བ་ཡིན་པར་ཁྱབ་བསྒྲག་བྱེད་དགོས། ཤ་གསར་པ་སྐྱེས་པ་ནི་མི་གཙང་ཞིང་དེ་ནི་མཛེ་ནད་ཡིན།  
\v 16 ཤ་གསར་པ་དེ་དཀར་པོར་གྱུར་ཡོད་ན། ཁོ་རང་མཆོད་དཔོན་གྱི་དྲུང་དུ་བཅར་དགོས་པ་དང་།  
\v 17 མཆོད་དཔོན་གྱིས་དེ་ལ་བརྟག་དཔྱད་བྱེད་དགོས། ལྟོས་དང་། ནད་རྟགས་དཀར་པོར་གྱུར་ཡོད་ན། མཆོད་དཔོན་གྱིས་ནད་ཡམས་བྱུང་བའི་མི་དེ་གཙང་མ་ཡིན་པར་བསྒྲག་དགོས་ལ། མི་དེ་གཙང་མར་གྱུར་པའོ། །  
\v 18 གལ་སྲིད་སུ་ཞིག་གི་ལུས་ཀྱི་སྐྱི་མོར་རྨ་བུད་ཀྱང་སོས་པ་དང་།  
\v 19 རྨ་འབུད་ས་སྐྲངས་ནས་དཀར་པོར་གྱུར་པའམ་ཁྲ་ཐིག་དམར་སྐྱ་ཞིག་བྱུང་ན་མཆོད་དཔོན་ལ་སྟོན་དགོས།  
\v 20 མཆོད་དཔོན་གྱིས་དེ་ལ་བརྟག་དགོས་ཤིང་། ལྟོས་དང་། ནད་རྟགས་སྐྱི་མོ་ནང་འཐིམ་པ་དང་། དེའི་སྟེང་གི་བ་སྤུ་དཀར་པོར་གྱུར་ཡོད་ན། དེ་ནི་མཛེ་ནད་ཀྱིས་རྨ་བརྟོལ་བ་ཡིན་པས། མཆོད་དཔོན་གྱིས་མི་དེ་མི་གཙང་བར་བསྒྲག་དགོས་སོ། །  
\v 21 མཆོད་དཔོན་གྱིས་དེ་ལ་བརྟག་དཔྱད་བྱས་ནས། ལྟོས་དང་། དེའི་སྟེང་དུ་བ་སྤུ་དཀར་པོ་མེད་ལ། སྐྱི་མོའི་ནང་དུའང་འཐིམ་མེད་པ་དང་། ནད་ཡམས་ཇེ་ཡང་དུ་སོང་ཡོད་ན། མཆོད་དཔོན་གྱིས་མི་དེ་ཉིན་བདུན་ལ་ལོགས་སུ་འགེར་དགོས།  
\v 22 གལ་སྲིད་ནད་དེ་སྐྱི་མོའི་སྟེང་རྒྱ་ཆེར་ཁྱབ་ན་དེ་ནི་ནད་ཡམས་ཡིན་པས། མཆོད་དཔོན་གྱིས་མི་དེ་མི་གཙང་བར་བསྒྲག་དགོས།  
\v 23 འོན་ཀྱང་ཁྲ་ཐིག་དེ་ཁ་མལ་དུ་ཡོད་ཅིང་ཁྱབ་མེད་ན། དེ་ནི་རྨ་ཤུལ་ཡིན་པས་མཆོད་དཔོན་གྱིས་མི་དེ་གཙང་མ་ཡིན་པར་བསྒྲག་དགོས་སོ། །  
\v 24 ཡང་ལུས་ཀྱི་སྐྱི་མོ་མེས་འཚིགས་ཤིང་རྨ་ཤུལ་དུ་ཤ་གསར་པ་སྐྱེས་པ་དང་ཁྲ་ཐིག་ལྷུང་བ་དམར་སྐྱའམ་དཀར་པོ་གང་ཡིན་ཡང་།  
\v 25 མཆོད་དཔོན་གྱིས་དེ་ལ་བརྟག་དགོས་ཤིང་། ལྟོས་དང་། ཁྲ་ཐིག་སྟེང་གི་བ་སྤུ་དཀར་པོར་གྱུར་པ་དང་ནད་རྟགས་ཀྱང་ཤ་ནང་དུ་འཐིམ་ཡོད་པ་མཐོང་ན་དེ་ནི་མཛེ་ནད་མེས་འཚིག་ཤུལ་དུ་བྱུང་བ་ཡིན་ལ། མཛེ་ནད་ཀྱི་རྟགས་ཡིན་པས་མཆོད་དཔོན་གྱིས་མི་དེ་མི་གཙང་བར་བསྒྲག་དགོས།  
\v 26 གལ་སྲིད་མཆོད་དཔོན་གྱིས་དེ་ལ་བརྟག་ཅིང་། ལྟོས་དང་། ཁྲ་ཐིག་སྟེང་བ་སྤུ་དཀར་པོ་མེད་པ་དང་ཤ་ནང་དུའང་འཐིམ་མེད་ལ། ནད་ཡམས་ཀྱང་ཇེ་ཡང་དུ་སོང་ཡོད་པ་མཐོང་ན། མཆོད་དཔོན་གྱིས་མི་དེ་ཉིན་བདུན་ལ་ལོགས་སུ་འགེར་དགོས།  
\v 27 ཉིན་བདུན་པར་མཆོད་དཔོན་གྱིས་དེ་ལ་བརྟག་དགོས། གལ་ཏེ་ཁྲ་ཐིག་སྐྱི་མོའི་སྟེང་རྒྱ་ཆེར་ཁྱབ་ཡོད་ན། མཛེ་ནད་ཀྱི་རྟགས་ཡིན་པས་མཆོད་དཔོན་གྱིས་མི་དེ་ནི་མི་གཙང་བར་བསྒྲག་དགོས།  
\v 28 ཡང་ཁྲ་ཐིག་ཁ་མལ་དུ་ཡོད་ཅིང་སྐྱི་མོའི་སྟེང་མ་ཁྱབ་པར་ཇེ་ཡང་དུ་སོང་ཡོད་ན། དེ་ནི་འཚིག་ཤུལ་གྱི་སྐྲངས་འབུར་ཡིན་པ་དང་། མེས་འཚིགས་པའི་རྨ་ཤུལ་ཙམ་ཡིན་པས་མཆོད་དཔོན་གྱིས་མི་དེ་གཙང་མ་ཡིན་པར་བསྒྲག་དགོས་སོ། །  
\v 29 གལ་སྲིད་སྐྱེས་པའམ་བུད་མེད་སུ་ཞིག་གི་མགོ་ལ་ནད་བྱུང་བའམ། ཡང་ན་སྐྱེས་པའི་ཁ་སྤུའི་ནང་ནད་ཡམས་བྱུང་ན།  
\v 30 མཆོད་དཔོན་གྱིས་ནད་ཡམས་ལ་བརྟག་དགོས་ཤིང་། ལྟོས་དང་། གལ་སྲིད་ནད་རྟགས་སྐྱི་མོའི་ནང་དུ་འཐིམ་ཡོད་པ་དང་དེའི་སྟེང་གི་བ་སྤུ་ཕྲ་མོ་མདོག་སེར་པོར་མཐོང་ན། དེ་ནི་གཡན་ནད་ཡིན་པ་དང་། མགོའམ་ཁ་སྤུའི་མཛེ་ནད་ཡིན་པས། མཆོད་དཔོན་གྱིས་མི་དེ་མི་གཙང་བར་བསྒྲག་དགོས།  
\v 31 མཆོད་དཔོན་གྱིས་གཡན་ནད་ལ་བརྟག་དགོས་ཤིང་། ནད་རྟགས་སྐྱི་མོའི་ནང་འཐིམ་མེད་པ་དང་དེའི་སྟེང་དུ་བ་སྤུ་ནག་པོའང་མེད་པ་མཐོང་ན། མཆོད་དཔོན་གྱིས་གཡན་ནད་ཕོག་པའི་མི་དེ་ཉིན་བདུན་ལ་ལོགས་སུ་འགེར་དགོས།  
\v 32 ཡང་ཉིན་བདུན་པར་མཆོད་དཔོན་གྱིས་ནད་ཡམས་དེ་ལ་བརྟག་དགོས་ཤིང་། གཡན་ནད་ཁྱབ་མེད་པ་དང་དེའི་སྟེང་དུ་བ་སྤུ་སེར་པོ་ཡང་མེད་ལ། གཡན་ནད་ཀྱི་ནད་རྟགས་ཀྱང་སྐྱི་མོའི་ནང་འཐིམ་མེད་པ་མཐོང་ན།  
\v 33 མི་དེས་སྐྲ་དང་ཁ་སྤུ་བཞར་དགོས་མོད། འོན་ཀྱང་གཡན་ནད་ཡོད་ས་བཞར་མི་རུང་ལ། མཆོད་དཔོན་གྱིས་གཡན་ནད་ཕོག་པའི་མི་དེ་སླར་ཡང་ཉིན་བདུན་ལ་ལོགས་སུ་འགེར་དགོས།  
\v 34 ཉིན་བདུན་པར་མཆོད་དཔོན་གྱིས་གཡན་ནད་ལ་བརྟག་དགོས་ཤིང་། ལྟོས་དང་། གཡན་ནི་སྐྱི་མོའི་སྟེང་ཁྱབ་མེད་པ་དང་ནད་རྟགས་ཀྱང་སྐྱི་མོའི་ནང་དུ་འཐིམ་མེད་པ་མཐོང་ན། མཆོད་དཔོན་གྱིས་མི་དེ་གཙང་མ་ཡིན་པར་བསྒྲག་དགོས་པ་དང་། མི་དེས་རང་གི་གོས་བཀྲུ་དགོས་ལ་དེ་ནས་གཙང་མར་འགྱུར་རོ། །  
\v 35 འོན་ཀྱང་ཁོ་རང་གཙང་མ་ཡིན་པར་བསྒྲགས་རྗེས། གཡན་ནད་སྐྱི་མོའི་སྟེང་རྒྱ་ཆེར་ཁྱབ་ན།  
\v 36 མཆོད་དཔོན་གྱིས་དེ་ལ་བརྟག་དགོས་ཤིང་། གཡན་ནད་སྐྱི་མོའི་སྟེང་ཁྱབ་ཡོད་པ་མཐོང་ན། མི་དེ་ནི་མི་གཙང་བ་ཡིན་པས་མཆོད་དཔོན་གྱིས་བ་སྤུ་སེར་པོ་བཙལ་དགོས་དོན་མེད།  
\v 37 གལ་སྲིད་གཡན་ནད་མཆོད་དཔོན་གྱི་མཐོང་ངོར་འཇགས་ནས་དེའི་སྟེང་དུ་བ་སྤུ་ནག་པོ་སྐྱེས་ཡོད་ན། གཡན་ནད་སོས་པ་དང་མི་དེ་ནི་གཙང་མ་ཡིན་པས། མཆོད་དཔོན་གྱིས་མི་དེ་གཙང་མ་ཡིན་པར་བསྒྲག་དགོས་སོ། །  
\v 38 སྐྱེས་པའམ་བུད་མེད་སུ་ཡིན་ཡང་། གལ་སྲིད་ལུས་སྟེང་གི་སྐྱི་མོར་ཁྲ་ཐིག་དཀར་པོ་བྱུང་ཡོད་ན།  
\v 39 མཆོད་དཔོན་གྱིས་དེ་ལ་བརྟག་དགོས་ཤིང་། ལྟོས་དང་། སྐྱི་མོའི་ཁྲ་ཐིག་དཀར་པོ་དེ་མོག་པོར་མཐོང་ན། དེ་ནི་རྔོ་ནད་ཀྱིས་སྐྱི་མོ་བརྟོལ་བ་ཡིན་པས་ཁོ་ནི་གཙང་མ་ཡིན་ནོ། །  
\v 40 གལ་སྲིད་སུ་ཞིག་གི་སྐྲ་ལྷུང་ནས་སྤྱི་ཐེར་དུ་གྱུར་ན། དེ་ནི་གཙང་མ་ཡིན།  
\v 41 གལ་སྲིད་མི་དེའི་སྐྲ་འདབས་ལྷུང་ཞིང་སྤྱི་ཐེར་དུ་གྱུར་པ་ཡིན་ན། དེ་ནི་གཙང་མ་ཡིན།  
\v 42 འོན་ཀྱང་སྤྱི་གཙུག་སྤྱི་ཐེར་ཡིན་སའམ་ཐོད་སྐྲ་སྤྱི་ཐེར་ཡིན་སར་ནད་རྟགས་དམར་སྐྱ་ཡིན་ན། དེ་ནི་མཛེ་ནད་ཁོའི་སྤྱི་གཙུག་དང་ཐོད་སྐྲ་ལྷུང་སར་ཁྱབ་པ་ཡིན།  
\v 43 ཡང་མཆོད་དཔོན་གྱིས་དེ་ལ་བརྟག་དགོས་ཤིང་། ལྟོས་དང་། གལ་སྲིད་སྤྱི་གཙུག་དང་ཐོད་སྐྲ་སྤྱི་ཐེར་ཡིན་སའི་ནད་ཡམས་ཀྱི་སྐྲངས་འབུར་དེ་དམར་སྐྱ་ཡིན་ཞིང་། ལུས་སྟེང་གི་སྐྱི་མོའི་མཛེ་ནད་ལྟར་མཐོང་ན།  
\v 44 མི་དེར་མཛེ་ནད་བྱུང་བ་ཡིན་པས་མི་གཙང་བ་ཡིན། དེའི་མགོ་ལ་ནད་ཡམས་བྱུང་བ་ཡིན་པས། མཆོད་དཔོན་གྱིས་མི་དེ་མི་གཙང་བར་བསྒྲག་དགོས་སོ། །  
\v 45 མཛེ་ནད་བྱུང་བའི་མི་ཡི་གོས་རྣམས་དབྲལ་དགོས་པ་དང་། མགོ་ཟིང་ནས་སྐྲ་བཤིག་ཅིང་། ཡ་ཁ་བཀབ་ནས་མི་གཙང་མི་གཙང་ཞེས་སྐད་ཆེན་པོས་བསྒྲག་དགོས།  
\v 46 ནད་ཡམས་ད་དུང་ཁོའི་སྟེང་དུ་ཡོད་པའི་ཚེ། ཁོ་ནི་མི་གཙང་བ་ཡིན་ལ། མི་གཙང་བ་ཡིན་པའི་རྐྱེན་གྱིས་ཁོ་གཅིག་པུར་བསྡད་ནས་སྒར་གྱི་ཕྱི་རོལ་ཏུ་གནས་དགོས་པའོ། །  
\v 47 ཡང་གོས་ཤིག་ལ་མཛེ་ནད་འགོས་ཡོད་ན། བལ་ལྭའམ་སོ་རས་ཀྱི་གོས་སམ།  
\v 48 སོ་རས་སམ་བལ་གྱི་གཞུང་ངམ་འཕྲེད་ཐིག་གམ། ཀོ་བའམ་ཀོ་བཟོས་དངོས་པོ་གང་དང་གང་ཡང་རུང་།  
\v 49 གལ་སྲིད་གོས་སམ་ཀོ་བའམ། གཞུང་ངམ། འཕྲེད་དམ། ཡང་ན་ཀོ་བཟོས་དངོས་པོ་གང་དང་གང་ལ་མདོག་ལྗང་གུའམ་དམར་པོ་ཆགས་ཡོད་ན། དེ་ནི་མཛེ་ནད་བྱུང་བ་ཡིན་པས་མཆོད་དཔོན་ལ་སྟོན་དགོས།  
\v 50 ཡང་མཆོད་དཔོན་གྱིས་གཡན་སྤུ་དེ་ལ་བརྟག་ཅིང་། གཡན་སྤུ་སྐྱེས་པའི་དངོས་པོ་ཉིན་བདུན་ལ་ལོགས་སུ་འགེར་དགོས།  
\v 51 ཉིན་བདུན་པར་གཡན་སྤུ་ལ་བརྟག་དགོས་ཤིང་། གལ་སྲིད་གཡན་སྤུ་ནི་གོས་ཀྱི་སྟེང་དུ་ཡོད་ན། དེ་གཞུང་ངམ་འཕྲེད་ཐིག་གང་རུང་ངམ། ཡང་ན་བཀོལ་སྤྱོད་བྱེད་པའི་ཀོ་བཟོས་དངོས་པོ་གང་རུང་གི་སྟེང་ཁྱབ་པ་ཡིན་ན། དེ་ནི་མཛེ་ནད་ཁྱབ་པའི་རྟགས་ཡིན་པས་མི་གཙང་བ་ཡིན།  
\v 52 གཡན་སྤུ་སྐྱེས་པའི་གོས་ནི་གཞུང་ངམ་འཕྲེད་ཐིག་གམ། བལ་ལམ་སོ་རས་གང་ནས་ཡིན་པ་དང་། ཡང་ན་ཀོ་བཟོས་དངོས་པོ་གང་ཡིན་རུང་ཐམས་ཅད་མེ་ལ་བསྲེག་དགོས་ཏེ། དེ་ནི་མཛེ་ནད་ཁྱབ་པའི་རྟགས་ཅན་ཡིན་པས་མེ་ལ་བསྲེག་དགོས་སོ། །  
\v 53 འོན་ཀྱང་མཆོད་དཔོན་གྱིས་དེ་ལ་བརྟག་ཅིང་། ལྟོས་དང་། གཡན་སྤུ་དེ་གོས་ཀྱི་སྟེང་དུ་ཡོད་ཀྱང་། གཞུང་ངམ་འཕྲེད་གང་རུང་ངམ། ཡང་ན་ཀོ་བཟོས་དངོས་པོའི་སྟེང་དུ་ཁྱབ་མེད་ན།  
\v 54 མཆོད་དཔོན་གྱིས་གཡན་སྤུ་སྐྱེས་པའི་དངོས་པོ་རྣམས་མི་ལ་བཀྲུ་བར་བཅུག་ནས། སླར་ཡང་ཉིན་བདུན་ལ་ལོགས་སུ་འགེར་དགོས།  
\v 55 བཀྲུས་པའི་རྗེས་སུ་མཆོད་དཔོན་གྱིས་བརྟག་དགོས་ཤིང་། ལྟོས་དང་། གཡན་སྤུ་དེ་ཁོའི་མཐོང་ངོར་མདོག་འགྱུར་མེད་ན། གཡན་སྤུ་ཁྱབ་མེད་ནའང་དེ་ནི་མི་གཙང་བ་ཡིན། དེ་ནི་ནད་ཡམས་རུལ་རྟགས་ཅན་ཡིན་པས་མདུན་རྒྱབ་གང་དུ་ཡོད་ནའང་དངོས་པོ་དེ་མེས་བསྲེག་དགོས།  
\v 56 ཅི་སྟེ་མཆོད་དཔོན་གྱིས་དེ་ལ་བརྟག་ཅིང་། ལྟོས་དང་། བཀྲུས་པའི་རྗེས་སུ་གཡན་སྤུ་མདོག་ཡལ་བ་མཐོང་ན། ཁོས་གོས་དང་ཀོ་བ་ནས་གཞུང་ངམ་འཕྲེད་དུ་གཡན་སྤུ་སྐྱེས་པའི་རིམ་པ་དབྲལ་དགོས།  
\v 57 གལ་སྲིད་གཡན་སྤུ་ཡང་བསྐྱར་གོས་ཀྱི་སྟེང་གཞུང་ངམ་འཕྲེད་ཐིག་གང་རུང་ནས་མངོན་པའམ། ཡང་ན་ཀོ་བཟོས་དངོས་པོ་གང་རུང་གི་སྟེང་ཐོན་ན། དེ་ནི་གཡན་སྤུ་རྙིང་བ་དེ་ཡང་བསྐྱར་སྐྱེས་པ་ཡིན་པས། གཡན་སྤུ་སྐྱེས་པའི་དངོས་པོ་དེ་མེས་བསྲེག་དགོས།  
\v 58 འོན་ཀྱང་བཀྲུས་ཟིན་པའི་གོས་ནི་གཞུང་ངམ་འཕྲེད་ཐིག་གམ། ཡང་ན་ཀོ་བཟོས་དངོས་པོ་གང་རུང་གི་གཡན་སྤུ་ཡལ་བ་ཡིན་ན། ད་དུང་ཡང་བསྐྱར་བཀྲུ་དགོས་ལ། དེ་ནས་གོས་དེ་གཙང་མར་གྱུར་པའོ་ཞེས་བཀའ་བསྩལ་ཏོ། །  
\v 59 དེ་ནི་གོས་ལ་གཡན་སྤུ་སྐྱེས་པའི་བཀའ་ཁྲིམས་ཡིན་ལ། བལ་ལྭའམ་སོ་རས་གྱི་གོས་སམ། གཞུང་ངམ་འཕྲེད་ཐིག་གང་རུང་ངམ། ཡང་ན་ཀོ་བཟོས་དངོས་པོ་གང་ཡིན་རུང་། ཐམས་ཅད་ཁྲིམས་སྲོལ་འདི་བཞིན་གཙང་མི་གཙང་བསྒྲག་པའོ། །   
\c 14
\cl ལེའུ་བཅུ་བཞི་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 པགས་ནད་སོས་རྗེས་གཙང་མར་བཟོ་བའི་ཁྲིམས།  
\p
\v 1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 2 མཛེ་ནད་ཕོག་པའི་མི་ཞིག་གཙང་མར་གྱུར་སྐབས་ཀྱི་བཀའ་ཁྲིམས་ནི་འདི་ལྟ་སྟེ། མི་དེ་མཆོད་དཔོན་གྱི་མདུན་དུ་འཁྲིད་དགོས་པ་དང་།  
\v 3 མཆོད་དཔོན་སྒར་ཁའི་ཕྱི་རོལ་ཏུ་སོང་ནས་མཛེ་ནད་ཅན་དེ་ལ་བརྟག་དགོས་ཤིང་། ལྟོས་དང་། གལ་སྲིད་དེའི་མཛེ་ནད་དྲག་པ་ཡིན་ན།  
\v 4 མཆོད་དཔོན་གྱིས་གཙང་མར་བཟོ་དགོས་པའི་མི་དེའི་ཕྱིར་དུ། བྱ་གསོན་པོ་གཙང་མ་གཉིས་དང་ཐང་ཤིང་དང་། སེང་སྐུད་མཚལ་དམར་དང་། ཨི་སོབ་རྩྭ་ཤིང་བཅས་འཁྱེར་འོང་དུ་འཇུག་དགོས།  
\v 5 དེ་ནས་མཆོད་དཔོན་གྱིས་རྫ་སྣོད་ནང་གི་ཆུ་དྭངས་མོའི་ཐོག་ཏུ་བྱ་གཅིག་གསོད་དུ་འཇུག་དགོས།  
\v 6 བྱ་གསོན་པོ་དེ་ནི་མཆོད་དཔོན་གྱིས་ཐང་ཤིང་དང་། སེང་སྐུད་མཚལ་དམར་དང་། ཨི་སོབ་རྩྭ་ཤིང་བཅས་དང་མཉམ་དུ་ཆུ་གཙང་མའི་སྟེང་དུ་བསད་པའི་བྱ་དེའི་ཁྲག་ནང་དུ་བསྒྲེས་ནས།  
\v 7 ཁོས་མཛེ་ནད་གཙང་མར་བཟོ་དགོས་པའི་མི་དེའི་ལུས་སྟེང་དུ་ལན་བདུན་ལ་གཏོར་རྗེས་མི་དེ་གཙང་མ་ཡིན་པར་བསྒྲག་དགོས། དེ་ནས་བྱ་གསོན་པོ་དེ་ཡང་ཐང་ཆེན་དུ་གཏོང་དགོས་སོ། །  
\v 8 གཙང་མར་བཟོ་དགོས་པའི་མི་དེས་རང་གི་གོས་རྣམས་བཀྲུ་བ་དང་། སྐྲ་སྤུ་ཐམས་ཅད་བཞར་ནས་ལུས་པོ་ཆུས་བཀྲུས་རྗེས་ཁོ་རང་གཙང་མར་གྱུར་པ་ཡིན་ལ། དེ་ནས་ཁོ་སྒར་ཁའི་ནང་དུ་འོང་ཆོག་ཀྱང་། ཉིན་བདུན་ལ་རང་གི་གུར་གྱི་ཕྱི་རུ་འདུག་དགོས།  
\v 9 ཉིན་བདུན་པ་ལ། མི་དེས་རང་གི་སྐྲ་སྤུ་ཐམས་ཅད་དེ། སྐྲ་དང་ཨག་ཚོམ་དང་སྨིན་མ་བཅས་ལུས་ཡོངས་ཀྱི་སྐྲ་སྤུ་ཐམས་ཅད་གཞར་དགོས། དེ་ནས་གོས་རྣམས་བཀྲུ་བ་དང་ལུས་པོ་ཆུའི་ནང་དུ་བཀྲུས་རྗེས་གཙང་མར་གྱུར་པའོ། །  
\v 10 ཡང་ཉིན་བརྒྱད་པ་ལ། མི་དེས་སྐྱོན་མེད་པའི་ལུ་གུ་ཕོ་ཅན་གཉིས་དང་མོ་ལུག་ལོ་གཅིག་ཅན་གཅིག འབྲུ་རིགས་ཀྱི་མཆོད་པའི་གྲོ་ཞིབ་སྣུམ་བསྲེས་མ་ཨེ་ཕཱ་བཅུ་ཆ་གསུམ་དང་སྣུམ་ལོ་རྒི་ \f + \ft ལོ་རྒི་གཅིག་ནི་སྤྱི་བྲེ་གཅིག་གི་བཅུ་ཆའི་གསུམ་ཙམ་ཡིན།\f*གཅིག་བཅས་འཁྱེར་འོང་དགོས་ལ།  
\v 11 གཙང་མར་བཟོ་མཁན་མཆོད་དཔོན་གྱིས། གཙང་མར་བཟོ་དགོས་པའི་མི་དེ་རྫས་དེ་དག་དང་མཉམ་དུ་མཇལ་འཕྲད་གུར་མཆོག་གི་སྒོ་ཁར་དཀོན་མཆོག་ཡ་ཝཱེའི་སྤྱན་སྔར་འཇོག་དགོས།  
\v 12 མཆོད་དཔོན་གྱིས་ལུ་གུ་ཕོ་ཞིག་ཉེས་སེལ་མཆོད་པར་འབུལ་དགོས་ཞིང་། ཡང་སྣུམ་ལོ་རྒི་གཅིག་བླངས་ནས་དེ་དག་དཀོན་མཆོག་ཡ་ཝཱེའི་དྲུང་དུ་ཕར་གཡོ་ཚུར་གཡོ་བྱས་ཏེ་གཡོབ་མཆོད་དུ་འབུལ་དགོས།  
\v 13 དེ་ནས་ཉེས་སེལ་མཆོད་པ་ནི་སྡིག་བཤགས་མཆོད་པ་ལྟར་མཆོད་དཔོན་ལ་དབང་བ་ཡིན་པས། ལུ་གུ་ཕོ་དེ་སྡིག་བཤགས་མཆོད་པའི་ཕྱུགས་ཟོག་དང་། སྦྱིན་སྲེག་གི་ཕྱུགས་ཟོག་བཤའ་སའི་གནས་ཏེ་གནས་མཆོག་ཏུ་གསོད་དགོས་ལ། དེ་ནི་ཀུན་ལས་དམ་པ་ཡིན་ནོ། །  
\v 14 མཆོད་དཔོན་གྱིས་ཉེས་སེལ་མཆོད་པའི་ཁྲག་ཅུང་ཙམ་བླངས་ནས། གཙང་མར་བཟོ་དགོས་པའི་མི་དེའི་རྣ་ཤལ་གཡས་པ་དང་། ལག་གཡས་པའི་མཐེ་བོང་དང་རྐང་པ་གཡས་པའི་མཐེབ་ཆེན་བཅས་སུ་འབྱུག་པར་བྱ་བའོ། །  
\v 15 མཆོད་དཔོན་གྱིས་ལོ་རྒི་གཅིག་གི་སྣུམ་དེ་ལས་ཅུང་ཙམ་བླངས་ནས་རང་གི་ལག་གཡོན་པའི་ལག་མཐིལ་དུ་ལྡུག་དགོས་པ་དང་།  
\v 16 ལག་གཡས་པའི་མཛུབ་མོ་རང་གི་ལག་གཡོན་པའི་ལག་མཐིལ་དུ་ཡོད་པའི་སྣུམ་གྱི་ནང་དུ་བསྒྲེས་ནས། མཛུབ་མོས་སྣུམ་དེ་དཀོན་མཆོག་ཡ་ཝཱེའི་སྤྱན་སྔར་ལན་བདུན་གཏོར་དགོས་སོ། །  
\v 17 དེ་ནས་མཆོད་དཔོན་གྱིས་ལག་མཐིལ་གྱི་སྣུམ་ལྷག་མ་ཅུང་ཙམ་བླངས་ནས་གཙང་མར་བཟོ་དགོས་པའི་མི་དེའི་རྣ་ཤལ་གཡས་པ་དང་ལག་གཡས་པའི་མཐེ་བོང་དང་། རྐང་པ་གཡས་པའི་མཐེབ་ཆེན་བཅས་སུ་ཉེས་སེལ་མཆོད་པའི་ཁྲག་བྱུགས་སར་འབྱུག་དགོས།  
\v 18 མཆོད་དཔོན་གྱིས་ལག་མཐིལ་གྱི་སྣུམ་ལྷག་མ་རྣམས་གཙང་མར་བཟོ་དགོས་པའི་མི་དེའི་མགོར་འབྱུག་པ་དང་། དཀོན་མཆོག་ཡ་ཝཱེའི་སྤྱན་སྔར་མི་དེའི་སྡིག་པ་བཤག་དགོས།  
\v 19 ཁོས་སྡིག་བཤགས་མཆོད་པ་ཕུལ་ནས་མི་གཙང་བ་ལས་གཙང་མར་བཟོ་དགོས་པའི་མི་དེའི་སྡིག་པ་བཤགས་རྗེས། སྦྱིན་སྲེག་གི་ཕྱུགས་ཟོག་བཤའ་དགོས།  
\v 20 དེ་ནས་མཆོད་དཔོན་གྱིས་སྦྱིན་སྲེག་དང་འབྲུ་མཆོད་རྣམས་མཆོད་ཁྲིའི་སྟེང་འབུལ་བ་དང་། ཁོས་མི་དེའི་སྡིག་པ་བཤག་པར་བྱ་ཞིང་། དེ་ནས་མི་དེ་གཙང་མར་གྱུར་ཏོ། །  
\v 21 གལ་སྲིད་མི་དེ་དབུལ་ཞིང་རྒྱུ་ནོར་དེ་ཙམ་མེད་ན། ལུ་གུ་ཕོ་ཞིག་ཉེས་སེལ་མཆོད་པའི་ཕྱིར་འཁྱེར་འོང་བ་དང་། གཡོབ་མཆོད་དུ་ཕུལ་ནས་ཁོའི་སྡིག་པ་བཤག་དགོས། ཡང་འབྲུ་མཆོད་དུ་འབུལ་བའི་གྲོ་ཞིབ་སྣུམ་བསྲེས་མ་བྲེ་ཡི་བཅུ་ཆ་གཅིག་དང་། སྣུམ་ལོ་རྒི་གཅིག་དེ་དང་མཉམ་དུ་འཁྱེར་འོང་དགོས།  
\v 22 ཡང་ཁོས་རང་གི་རྒྱུ་ནོར་འཛོམ་ཚོད་ལྟར་བྱ་ཐི་བ་གཉིས་སམ་ཕུག་རོན་ཆུང་ངུ་གཉིས་ཁྱེར་འོངས་ཏེ། གཅིག་ནི་སྡིག་བཤགས་མཆོད་པ་དང་། ཅིག་ཤོས་ནི་སྦྱིན་སྲེག་ཏུ་འབུལ་དགོས་སོ། །  
\v 23 ཉིན་བརྒྱད་པར། རང་ཉིད་གཙང་མར་འགྱུར་བའི་ཕྱིར་དུ་ཁོས་དེ་དག་དཀོན་མཆོག་ཡ་ཝཱེའི་སྤྱན་སྔར་མཇལ་འཕྲད་གུར་མཆོག་གི་སྒོ་ཁ་རུ་ཁྱེར་ནས་མཆོད་དཔོན་ལ་སྤྲོད་དགོས།  
\v 24 མཆོད་དཔོན་གྱིས་ཉེས་སེལ་མཆོད་པའི་ལུ་གུ་དང་། སྣུམ་ལོ་རྒི་གཅིག་པོ་དེ་མཉམ་དུ་དཀོན་མཆོག་ཡ་ཝཱེའི་དྲུང་དུ་ཕར་གཡོ་ཚུར་གཡོ་བྱས་ནས་གཡོབ་མཆོད་དུ་འབུལ་དགོས།  
\v 25 དེ་ནས་ཡང་ཁོས་ཉེས་སེལ་མཆོད་པའི་ལུ་གུ་བཤས་ནས། ཉེས་སེལ་མཆོད་པ་དེའི་ཁྲག་ལས་ཅུང་ཙམ་བླངས་ཏེ། གཙང་མར་བཟོ་དགོས་པའི་མི་དེའི་རྣ་ཤལ་གཡས་པ་དང་ལག་གཡས་པའི་མཐེ་བོང་། རྐང་པ་གཡས་པའི་མཐེབ་ཆེན་བཅས་ལ་འབྱུག་པར་བྱའོ། །  
\v 26 མཆོད་དཔོན་གྱིས་སྣུམ་ཅུང་ཙམ་ཞིག་རང་གི་ལག་གཡོན་པའི་ལག་མཐིལ་དུ་བླུགས་ནས།  
\v 27 ལག་གཡས་པའི་མཛུབ་མོས་ལག་གཡོན་པའི་ལག་མཐིལ་དུ་ཡོད་པའི་སྣུམ་དེ་དཀོན་མཆོག་ཡ་ཝཱེའི་སྤྱན་སྔར་ལན་བདུན་གཏོར་དགོས།  
\v 28 དེ་ནས་མཆོད་དཔོན་གྱིས་རང་གི་ལག་མཐིལ་གྱི་སྣུམ་ལས་ཅུང་ཙམ་ཞིག་གཙང་མར་བཟོ་དགོས་པའི་མི་དེའི་རྣ་ཤལ་གཡས་པ་དང་། ལག་གཡས་པའི་མཐེ་བོང་དང་རྐང་པ་གཡས་པའི་མཐེབ་ཆེན་བཅས་སུ། ཉེས་སེལ་མཆོད་པའི་ཁྲག་བྱུགས་སར་འབྱུག་དགོས།  
\v 29 དཀོན་མཆོག་ཡ་ཝཱེའི་སྤྱན་སྔ་ནས་མི་དེའི་སྡིག་པ་བཤག་ཕྱིར། མཆོད་དཔོན་གྱིས་རང་གི་ལག་མཐིལ་གྱི་སྣུམ་ལྷག་མ་རྣམས་གཙང་མར་བཟོ་དགོས་པའི་མི་དེའི་མགོ་ལ་འབྱུག་དགོས་སོ། །  
\v 30 ཡང་མི་དེས་རང་གི་རྒྱུ་ནོར་འཛོམ་ཚོད་ལྟར་བྱ་ཐི་བ་གཉིས་ལས་གཅིག་གམ་ཕུག་རོན་ཆུང་ངུ་གཉིས་ལས་གཅིག་མཆོད་པར་འབུལ་བ་འདི་ལྟ་སྟེ།  
\v 31 ཁོས་རང་གི་འཛོམ་ཚོད་ལྟར། བྱ་གཅིག་ནི་སྡིག་བཤགས་མཆོད་པ་དང་། ཅིག་ཤོས་ནི་སྦྱིན་སྲེག་ཏུ་འབྲུ་མཆོད་དང་ལྷན་ཅིག་འབུལ་དགོས་ལ། དེ་ནས་མཆོད་དཔོན་གྱིས་དཀོན་མཆོག་ཡ་ཝཱེའི་སྤྱན་སྔར་གཙང་མར་བཟོ་དགོས་པའི་མི་དེའི་སྡིག་པ་བཤག་དགོས།  
\v 32 དེ་ནི་མཛེ་ནད་བྱུང་ཞིང་རྒྱུ་ནོར་མེད་པ་དག་གཙང་མར་བཟོ་དགོས་པའི་བཀའ་ཁྲིམས་ཡིན་ནོ་ཞེས་བཀའ་བསྩལ་ཏོ། །   
\s1 ཁང་པ་གཡན་སྤུ་ཅན་གཙང་མར་བཟོ་བའི་ཁྲིམས།  
\p
\v 33 དེ་ཡང་དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་འདི་སྐད་དུ།  
\v 34 ཁྱོད་ཅག་བདག་གིས་ཁྱོད་རྣམས་ལ་ས་སྐལ་དུ་སྤྲད་པའི་ཀ་ན་ཨན་ཡུལ་དུ་སླེབས་དུས་སུ། བདག་གིས་ཁྱོད་རྣམས་ལ་ས་སྐལ་དུ་སྤྲད་པའི་ཡུལ་དེའི་ཁང་པར་མཛེ་ནད་བྱུང་དུ་བཅུག་ཡོད་ན།  
\v 35 ཁང་བདག་སོང་ནས་མཆོད་དཔོན་ལ། ངས་བལྟས་ན་ཁང་པར་གཡན་སྤུ་སྐྱེས་འདུག་ཅེས་སྨྲ་དགོས།  
\v 36 མཆོད་དཔོན་ཁང་པའི་ནང་བརྟག་དཔྱད་བྱེད་དུ་མ་ཕྱིན་པའི་སྔོན་ལ། ཁང་པའི་ནང་གི་དངོས་པོ་ཡོད་ཚད་བཙོག་པར་མི་འགྱུར་བའི་ཕྱིར། དེ་དག་ལ་ཁང་པའི་ནང་གི་དངོས་པོ་ཆ་ཚང་སྤོ་རུ་འཇུག་དགོས་ལ། དེའི་རྗེས་སུ་མཆོད་དཔོན་ནང་དུ་སོང་ནས་ཁང་པར་བརྟག་དགོས།  
\v 37 ཁོས་གཡན་སྤུ་དེ་ལ་བརྟག་དགོས་ཤིང་། ལྟོས་དང་། ཁང་པའི་རྩིག་ངོས་ཀྱི་གཡན་སྤུ་དེར་མདོག་ལྗང་གུའམ་དམར་པོའི་ཐིག་རིས་ཀོང་ཀོང་ཡོད་ཅིང་། རྟགས་དེ་རྩིག་པའི་ནང་འཐིམ་པ་མཐོང་ན།  
\v 38 མཆོད་དཔོན་ཁང་པའི་སྒོ་ཕྱི་རུ་ཐོན་ཏེ། ཁང་པའི་སྒོ་ཉིན་བདུན་ལ་རྒྱག་དགོས།  
\v 39 ཉིན་བདུན་པར། མཆོད་དཔོན་ཡང་བསྐྱར་སོང་ནས་བརྟག་དགོས་ཤིང་། ལྟོས་དང་། གལ་སྲིད་གཡན་སྤུ་ཁང་པའི་རྩིག་ངོས་སུ་ཁྱབ་པ་མཐོང་ན།  
\v 40 མཆོད་དཔོན་གྱིས་གཡན་སྤུ་སྐྱེས་པའི་རྡོ་རྣམས་ཕྱིར་འདོན་པ་དང་། མཁར་ཕྱིའི་གནས་མི་གཙང་བ་ཞིག་ཏུ་གཡུག་པའི་བཀའ་གནང་དགོས།  
\v 41 ཡང་ཁོས་ཁང་པའི་རྩིག་ངོས་བཞི་པོ་འབྲད་དུ་འཇུག་པ་དང་། བྲད་པའི་འཇིམ་པ་རྣམས་མཁར་ཕྱིའི་གནས་མི་གཙང་བ་ཞིག་ལ་ལྡུག་ཏུ་འཇུག་དགོས།  
\v 42 དེ་ནས་ཁོ་རྣམས་ཀྱིས་རྡོ་གཞན་དག་རྡོ་ཕྱིར་བཏོན་པ་རྣམས་ཀྱི་ཚབ་ཏུ་འཇོག་པ་དང་། འཇིམ་པ་གཞན་གྱིས་ཁང་པའི་ནང་འབྱུག་དགོས་སོ། །  
\v 43 ཁོས་རྡོ་རྣམས་བཏོན་ནས་རྩིག་ངོས་བྲད་པ་དང་། བྱུགས་པའི་རྗེས་སུ་གཡན་སྤུ་ཡང་བསྐྱར་སྐྱེས་ན།  
\v 44 མཆོད་དཔོན་ནང་དུ་སོང་ནས་བརྟག་དགོས་པ་དང་། ལྟོས་དང་། གལ་སྲིད་གཡན་སྤུ་ཁང་པའི་ནང་དུ་ཁྱབ་ཡོད་ན། དེ་ནི་ཁང་པ་རུ་གཡན་སྤུ་བསྟུད་མར་སྐྱེས་པ་ཡིན་པས་མི་གཙང་བ་ཡིན་ནོ། །  
\v 45 ཁོས་ཁང་པ་བཤིགས་ནས་དེའི་རྡོ་དང་ཤིང་ཆ་དང་། འཇིམ་པ་བཅས་ཐམས་ཅད་མཁར་ཕྱིའི་གནས་མི་གཙང་བ་ཞིག་ཏུ་འཁྱེར་དགོས་པ་དང་།  
\v 46 ཁང་པའི་སྒོ་གཏན་པའི་དུས་ཡུན་གང་དང་གང་ལ་དེའི་ནང་དུ་འགྲོ་བའི་མི་ནི་དགོང་མོའི་བར་དུ་མི་གཙང་བ་ཡིན།  
\v 47 ཁང་པའི་ནང་དུ་ཉལ་བའི་མི་དེས་གོས་རྣམས་གཙང་མར་བཀྲུ་དགོས་པ་དང་། ཁང་པའི་ནང་དུ་ཁ་ཟས་ཟ་བའི་མི་དེས་ཀྱང་གོས་རྣམས་གཙང་མར་བཀྲུ་དགོས།  
\v 48 ཁང་པར་འཇིམ་པ་བྱུགས་རྗེས་སུ། མཆོད་དཔོན་ནང་དུ་སོང་ནས་བརྟག་ཅིང་། ལྟོས་དང་། གཡན་སྤུ་ཁང་པའི་ནང་དུ་ཁྱབ་མེད་ན། གཡན་སྤུ་ཚར་བཅད་པས་ཁང་པ་དེ་གཙང་མ་ཡིན་པར་བསྒྲག་དགོས།  
\v 49 ཁོས་ཁང་པར་གཙང་སྦྲ་བྱེད་ཆེད། བྱ་གཉིས་དང་ཐང་ཤིང་དང་སེང་སྐུད་མཚལ་དམར་དང་ཨི་སོབ་རྩྭ་ཤིང་བཅས་ཁྱེར་འོངས་ནས།  
\v 50 བྱ་གཅིག་རྫ་སྣོད་ནང་གི་ཆུ་དྭངས་མོའི་ཐོག་ཏུ་གསོད་དགོས་པ་དང་།  
\v 51 ཐང་ཤིང་དང་ཨི་སོབ་རྩྭ་ཤིང་དང་། སེང་སྐུད་མཚལ་དམར་དང་། བྱ་གསོན་པོ་བཅས་ཐམས་ཅད་བསད་པའི་བྱ་དེའི་ཁྲག་དང་ཆུ་དྭངས་མོའི་ནང་བསྒྲེས་ནས། ཁང་པ་དེ་ལ་ལན་བདུན་གཏོར་དགོས།  
\v 52 དེ་ལྟར་བྱ་ཡི་ཁྲག་དང་ཆུ་དྭངས་མོ་དང་། བྱ་གསོན་པོ་དང་། ཐང་ཤིང་དང་། ཨི་སོབ་རྩྭ་ཤིང་དང་། སེང་སྐུད་མཚལ་དམར་བཅས་ཀྱིས་ཁང་པ་དེར་གཙང་སྦྲ་བྱེད་དགོས།  
\v 53 ཁོས་བྱ་གསོན་པོ་དེ་མཁར་ཕྱིའི་ཐང་ཆེན་དུ་གཏོང་བ་དང་། ཁོས་ཁང་པའི་སྡིག་པ་བཤག་དགོས་ཤིང་དེ་ནས་ཁང་པ་གཙང་མར་གྱུར་པའོ་ཞེས་བཀའ་བསྩལ་ཏོ། །  
\v 54 དེ་ནི་མཛེ་ནད་དང་གཡན་དང་།  
\v 55 གོས་དང་ཁང་པ་རྣམས་ལ་གཡན་སྤུ་སྐྱེས་པ་དང་།  
\v 56 སྐྱི་མོར་སྐྲངས་འབུར་དང་སིབ་རྒྱས་པ་དང་། ཁྲ་ཐིག་ལྷུང་བ་བཅས་ཀྱི་ཕྱིར་ཡིན་ལ།  
\v 57 དུས་ནམ་ཞིག་ལ་གཙང་བ་དང་དུས་ནམ་ཞིག་ལ་མི་གཙང་བའི་དབྱེ་བ་འབྱེད་བྱེད་ཡིན་ཞིང་། དེ་ནི་མཛེ་ནད་ཀྱི་བཀའ་ཁྲིམས་ཡིན་ནོ། །   
\c 15
\cl ལེའུ་བཅོ་ལྔ་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 མིའི་ལུས་ནས་གཤེར་ཁུ་འཛིར་བའི་ཁྲིམས།  
\p
\v 1 དེ་ཡང་དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་འདི་སྐད་དུ།  
\v 2 ཁྱོད་གཉིས་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག གལ་ཏེ་སྐྱེས་པ་ཞིག་གི་ལུས་སུ་རྣག་ནད་བྱུང་ན། ཁོའི་རྣག་ནད་དེ་ནི་མི་གཙང་བ་ཡིན།  
\v 3 ཁོ་རང་འཛིར་ནད་ཀྱི་རྐྱེན་གྱིས་མི་གཙང་བར་གྱུར་པ་ནི་འདི་ལྟ་སྟེ། ལུས་ནས་རྣག་བཞུར་བའམ། ཡང་ན་ལུས་ནས་གཤེར་ཁུ་འཛིར་མཚམས་བཞག་པ་གང་ཡིན་ཡང་། ཁོ་རང་མི་གཙང་བ་ཡིན་ནོ། །  
\v 4 རྣག་ནད་བྱུང་བའི་མི་དེ་ཉལ་བའི་མལ་ཁྲི་ཐམས་ཅད་མི་གཙང་བ་དང་། མི་དེ་སྡོད་པའི་དངོས་པོ་གང་ཡིན་ཡང་མི་གཙང་བ་ཡིན།  
\v 5 ཡང་མི་དེའི་མལ་ས་ལ་རེག་མཁན་གྱིས་རང་གི་གོས་རྣམས་བཀྲུ་བ་དང་། ལུས་པོ་ཆུའི་ནང་དུ་བཀྲུ་དགོས་ཤིང་དགོང་མོའི་བར་དུ་མི་གཙང་བ་ཡིན།  
\v 6 སུ་ཞིག་རྣག་ནད་ཅན་དེ་བསྡད་མྱོང་བའི་དངོས་པོའི་སྟེང་དུ་བསྡད་ན། དེས་རང་གི་གོས་རྣམས་བཀྲུ་བ་དང་ལུས་པོ་ཆུའི་ནང་དུ་བཀྲུ་དགོས་ཤིང་། དགོང་མོའི་བར་དུ་མི་གཙང་བ་ཡིན།  
\v 7 སུ་ཞིག་གིས་མི་རྣག་ནད་ཅན་གྱི་ལུས་ལ་རེག་ན། དེས་རང་གི་གོས་རྣམས་བཀྲུ་བ་དང་། ལུས་པོ་ཆུའི་ནང་དུ་བཀྲུ་དགོས་ཤིང་། དགོང་མོའི་བར་དུ་མི་གཙང་བ་ཡིན།  
\v 8 ཡང་རྣག་ནད་ཅན་གྱིས་སུ་ཞིག་ལ་མཆིལ་མ་འཕངས་ན། དེས་རང་གི་གོས་རྣམས་བཀྲུ་བ་དང་ལུས་པོ་ཆུའི་ནང་དུ་བཀྲུ་དགོས་ཤིང་། དེ་ནི་དགོང་མོའི་བར་དུ་མི་གཙང་བ་ཡིན།  
\v 9 རྣག་ནད་ཅན་དེ་ཞོན་པའི་སྒ་གང་དང་གང་ཡིན་རུང་དེ་ནི་མི་གཙང་བ་ཡིན།  
\v 10 མི་དེ་བསྡད་མྱོང་བའི་དངོས་པོ་གང་རུང་ལ་རེག་ན། དེ་ནི་དགོང་མོའི་བར་དུ་མི་གཙང་བ་དང་། དངོས་པོ་དེ་དག་ཁྱེར་བ་ཡིན་ན། མི་དེས་རང་གི་གོས་རྣམས་བཀྲུ་བ་དང་། ལུས་པོ་ཆུའི་ནང་དུ་བཀྲུ་དགོས་ཤིང་དགོང་མོའི་བར་དུ་མི་གཙང་བ་ཡིན།  
\v 11 ཡང་རྣག་ནད་ཅན་དེས་རང་གི་ལག་པ་ཆུས་མ་བཀྲུས་པར་མི་སུ་ཞིག་ལ་རེག་ན། མི་དེས་རང་གི་གོས་རྣམས་བཀྲུ་བ་དང་ལུས་པོ་ཆུའི་ནང་དུ་བཀྲུ་དགོས་ཤིང་། དགོང་མོའི་བར་དུ་མི་གཙང་བ་ཡིན།  
\v 12 རྣག་ནད་ཅན་དེས་རེག་པའི་རྫ་སྣོད་གཅོག་དགོས་པ་དང་། དེས་རེག་པའི་ཤིང་གི་སྣོད་ཐམས་ཅད་ཆུ་ཡིས་བཤལ་དགོས།  
\v 13 རྣག་ནད་བྱུང་བའི་མི་དེའི་རྣག་ནད་སོས་པ་ཡིན་ན། དེས་རང་ཉིད་གཙང་མར་བཟོ་བར་ཉིན་བདུན་བརྩིས་ཏེ། རང་གི་གོས་རྣམས་བཀྲུ་བ་དང་། ཆུ་གཙང་མས་ལུས་པོ་བཀྲུས་ན་གཙང་མར་གྱུར་པའོ། །  
\v 14 ཡང་ཉིན་བརྒྱད་པ་ལ་ཁོས་བྱ་ཐི་བ་གཉིས་སམ་ཕུག་རོན་ཆུང་ངུ་གཉིས་ཁྱེར་ནས་དཀོན་མཆོག་ཡ་ཝཱེའི་དྲུང་དུ་འོངས་ཏེ། མཇལ་འཕྲད་གུར་མཆོག་གི་སྒོ་ཁ་རུ་བྱ་རྣམས་མཆོད་དཔོན་ལ་སྤྲོད་དགོས་པ་དང་།  
\v 15 མཆོད་དཔོན་གྱིས་དེ་དག་ལས་བྱ་གཅིག་ནི་སྡིག་བཤགས་མཆོད་པ་དང་ཅིག་ཤོས་ནི་སྦྱིན་སྲེག་ཏུ་འབུལ་དགོས་ཤིང་། ཡང་མི་དེའི་རྣག་ནད་ཀྱི་རྐྱེན་གྱིས་དཀོན་མཆོག་ཡ་ཝཱེའི་སྤྱན་སྔར་དེའི་སྡིག་པ་བཤག་དགོས་སོ། །  
\v 16 གལ་སྲིད་སྐྱེས་པ་ཞིག་ནས་ཁུ་བ་ཟགས་ན། དེས་རང་གི་ལུས་ཧྲིལ་པོ་ཆུས་བཀྲུ་དགོས་ལ། དགོང་མོའི་བར་དུ་མི་གཙང་བ་ཡིན།  
\v 17 གོས་དང་ཀོ་བ་གང་ཡིན་ཡང་ཁུ་བ་འགོས་ན་དེ་ཆུ་ཡིས་བཀྲུ་དགོས་པ་དང་། དགོང་མོའི་བར་དུ་མི་གཙང་བ་ཡིན།  
\v 18 བུད་མེད་ནི་གལ་སྲིད་སྐྱེས་པ་ཞིག་ལ་ལུས་འབྲེལ་བྱས་ནས་ཁུ་བ་འགོས་ན། དེ་གཉིས་ཀྱིས་རང་གི་ལུས་ཆུ་ཡིས་བཀྲུ་དགོས་ཤིང་། དགོང་མོའི་བར་དུ་མི་གཙང་བ་ཡིན་ནོ། །   
\s1 ཟླ་མཚན་གྱི་ཁྲིམས།  
\p
\v 19 བུད་མེད་ལ་ཟླ་མཚན་འབབ་པའི་སྐབས་སུ་ལུས་ནས་ཁྲག་འཛིར་ན། ཉིན་བདུན་གྱི་བར་དུ་མི་གཙང་བ་ཡིན། མི་སུ་ཞིག་གིས་ཁོ་མོར་རེག་ཚེ་དེ་ནི་དགོང་མོའི་བར་དུ་མི་གཙང་བ་ཡིན།  
\v 20 ཡང་མི་གཙང་བའི་སྐབས་སུ། བུད་མེད་དེ་ཉལ་བའི་དངོས་པོ་ཐམས་ཅད་མི་གཙང་བ་དང་། གང་གི་སྟེང་དུ་བསྡད་ན་དེ་ཡང་མི་གཙང་བ་ཡིན།  
\v 21 སུ་ཞིག་གིས་དེའི་མལ་སར་རེག་ན། དེས་རང་གི་གོས་རྣམས་བཀྲུ་བ་དང་ལུས་པོ་ཆུ་ནང་བཀྲུ་དགོས་ལ། དགོང་མོའི་བར་དུ་མི་གཙང་བ་ཡིན།  
\v 22 ཡང་སུ་ཞིག་གིས་ཁོ་མོ་བསྡད་པའི་དངོས་པོ་ལ་རེག་ན། རང་གི་གོས་རྣམས་བཀྲུ་བ་དང་ལུས་པོ་ཆུ་ནང་བཀྲུ་དགོས་ལ། དགོང་མོའི་བར་དུ་མི་གཙང་བ་ཡིན།  
\v 23 མལ་སའམ་མོ་བསྡད་པའི་དངོས་པོ་གང་རུང་ལ་སུ་ཞིག་གིས་རེག་ཚེ། དེ་ནི་དགོང་མོའི་བར་དུ་མི་གཙང་བ་ཡིན།  
\v 24 གལ་སྲིད་སྐྱེས་པ་ཞིག་ཁོ་མོར་ལུས་འབྲེལ་བྱས་ནས་ཁོ་མོའི་མི་གཙང་བ་དེ་ཁོ་ལ་འགོས་ན། དེ་ཡང་ཉིན་བདུན་ལ་མི་གཙང་བ་ཡིན་ཏེ། ཁོ་ཉལ་བའི་མལ་ས་ཡང་མི་གཙང་བ་ཡིན་ནོ། །  
\v 25 དེ་ཡང་བུད་མེད་ལ་ཟླ་མཚན་འབབ་དུས་བརྒལ་ནས་ཉིན་མང་པོར་ཁྲག་བཞུར་བའམ། ཡང་ན་ཟླ་མཚན་འབབ་དུས་རིང་དྲགས་ན། ཁྲག་འཛིར་བའི་ཉིན་མོ་ཡོངས་ལ་ཁོ་མོ་མི་གཙང་བ་སྟེ། ཟླ་མཚན་འབབ་དུས་ཀྱི་ཉིན་རྣམས་ལ་ཁོ་མོ་མི་གཙང་བ་དང་གཅིག་ཡིན།  
\v 26 ཁྲག་འཛིར་བའི་ཉིན་མོ་རྣམས་ལ། ཁོ་མོ་ཉལ་བའི་མལ་ས་དང་། སྡོད་སའི་དངོས་པོ་གང་ཡིན་རུང་ཐམས་ཅད་མི་གཙང་བ་ཡིན་ཏེ། ཟླ་མཚན་འབབ་དུས་མི་གཙང་བ་དང་གཅིག་ཡིན།  
\v 27 ཡང་དངོས་པོ་དེ་རྣམས་ལ་རེག་མཁན་ནི་མི་གཙང་བ་ཡིན་པས། དེས་རང་གི་གོས་རྣམས་བཀྲུ་བ་དང་། ལུས་པོ་ཆུས་བཀྲུ་དགོས་ལ་དགོང་མོའི་བར་དུ་མི་གཙང་བ་ཡིན།  
\v 28 གལ་སྲིད་ཁོ་མོའི་ཁྲག་འཛིར་བ་ཆད་པ་ཡིན་ན། ཉིན་བདུན་བརྩིས་པའི་རྗེས་སུ་ད་གཟོད་གཙང་མར་གྱུར་པའོ། །  
\v 29 ཉིན་བརྒྱད་པ་ལ་ཁོ་མོས་བྱ་ཐི་བ་གཉིས་སམ་ཕུག་རོན་ཆུང་ངུ་གཉིས་ཁྱེར་འོངས་ནས། མཇལ་འཕྲད་གུར་མཆོག་གི་སྒོ་ཁ་རུ་མཆོད་དཔོན་ལ་སྤྲོད་དགོས།  
\v 30 མཆོད་དཔོན་གྱིས་བྱ་དེ་གཉིས་ལས་གཅིག་ནི་སྡིག་བཤགས་མཆོད་པ་དང་། ཅིག་ཤོས་ནི་སྦྱིན་སྲེག་ཏུ་འབུལ་དགོས་པ་དང་། བུད་མེད་དེའི་ཁྲག་འཛིར་བའི་མི་གཙང་བ་དེའི་རྐྱེན་གྱིས། དཀོན་མཆོག་ཡ་ཝཱེའི་སྤྱན་སྔར་ཁོ་མོའི་སྡིག་པ་བཤག་དགོས་སོ། །  
\v 31 དེ་བས་ཁྱོད་ཅག་གིས་ཡེས་ར་ཨེལ་པ་རྣམས་ཁོ་ཚོའི་མི་གཙང་བ་རྣམས་ལས་ལོགས་སུ་འགེར་དགོས། དེ་ལྟར་མ་བྱས་ཚེ་དེ་དག་གིས་བདག་གི་གུར་མཆོག་ཁོ་ཚོའི་ཁྲོད་དུ་ཡོད་པ་དེ་བཙོག་པར་བྱ་ཞིང་། ཁོ་རང་ཚོའི་མི་གཙང་བ་དེའི་རྐྱེན་གྱིས་འཆི་ཉེན་ཡོད་ཅེས་པའོ་ཞེས་བཀའ་བསྩལ་ཏོ། །  
\v 32 དེ་ནི་འཛིར་ནད་ཕོག་པའི་མིའམ་ཁུ་བ་ཟགས་ནས་མི་གཙང་བར་གྱུར་པ་དང་།  
\v 33 བུད་མེད་ལ་ཟླ་མཚན་འབབ་པའི་དུས་དང་། སྐྱེས་ཕོ་མོར་རྣག་ནད་བྱུང་བ། བུད་མེད་མི་གཙང་བ་དང་ལུས་འབྲེལ་བྱེད་པའི་སྐྱེས་པ་བཅས་ཀྱི་ཕྱིར་དུ་བཙུགས་པའི་བཀའ་ཁྲིམས་ཡིན་ནོ། །   
\c 16
\cl ལེའུ་བཅུ་དྲུག་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 སྡིག་པ་བཤགས་པའི་ཉིན་མོ།  
\p
\v 1 ཨ་རོན་གྱི་བུ་གཉིས་དཀོན་མཆོག་ཡ་ཝཱེའི་ཉེ་དྲུང་དུ་བཅར་ཏེ་ཤི་བའི་རྗེས་སུ། དཀོན་མཆོག་ཡ་ཝཱེས་མོ་ཤེ་ལ་གསུང་གླེང་མཛད་ཅིང་།  
\v 2 འདི་སྐད་དུ། ཁྱོད་ཀྱིས་རང་གི་ཕུ་བོ་ཨ་རོན་ལ། ཁོ་རང་མི་འཆི་བའི་ཕྱིར་དུ། དུས་གང་རུང་དུ་གནས་དམ་པའི་ཡོལ་བ་ནང་གི་ཤུར་སྒམ་གྱི་སྟེང་ལ་ཡོད་པའི་ཐུགས་རྗེའི་བཞུགས་ཁྲི་མདུན་དུ་མི་འགྲོ་བར་སྒོས་ཤིག ཅིའི་ཕྱིར་ཞེ་ན། བདག་ནི་ཐུགས་རྗེའི་བཞུགས་ཁྲི་སྟེང་གི་སྤྲིན་གསེབ་ནས་སྣང་བར་འགྱུར་རོ། །  
\v 3 ཨ་རོན་གནས་དམ་པ་རུ་འདི་ལྟར་འཛུལ་དགོས་ཏེ། སྡིག་བཤགས་མཆོད་པར་སྒོ་ཕྱུགས་ལས་གླང་ཐུག་ཅིག་དང་། སྦྱིན་སྲེག་ཏུ་ལུག་ཐུག་ཅིག་བཅས་མཉམ་དུ་འཛུལ་དགོས།  
\v 4 ཁོས་སོ་རས་སྲབ་བུའི་ཕྱི་གོས་དམ་པ་དང་ནང་གོས་ལུས་ལ་གྱོན་ཏེ། སོ་རས་སྲབ་བུའི་སྐེད་ཆིངས་བཅིང་དགོས་ལ། སོ་རས་སྲབ་བུའི་ལ་ཐོད་ཀྱང་དཀྲི་བར་བྱའོ། །དེ་དག་ནི་ན་བཟའ་དམ་པ་ཡིན་པས། ཁོས་རང་གི་ལུས་ཆུ་ཡིས་བཀྲུས་ནས་དེ་དག་གྱོན་དགོས།  
\v 5 ཁོས་ཡེས་ར་ཨེལ་པ་རྣམས་ཀྱི་མི་ཚོགས་ལས་ར་ཕོ་གཉིས་སྡིག་བཤགས་མཆོད་པར་འབུལ་བ་དང་། ལུག་ཐུག་གཅིག་སྦྱིན་སྲེག་ཏུ་འབུལ་བའི་ཕྱིར་ལེན་དགོས་སོ། །  
\v 6 ཨ་རོན་གྱིས་ཁོ་རང་གི་སྡིག་བཤགས་མཆོད་པའི་གླང་ཐུག་ཕུལ་ནས། ཁོ་རང་ཉིད་དང་ཁྱིམ་མི་རྣམས་ཀྱི་སྡིག་པ་བཤག་དགོས་ལ།  
\v 7 ཡང་ར་ཕོ་གཉིས་པོ་དཀོན་མཆོག་ཡ་ཝཱེའི་དྲུང་དུ་ཁྲིད་འོངས་ཏེ་མཇལ་འཕྲད་གུར་མཆོག་གི་སྒོ་ཁར་འཇོག་དགོས།  
\v 8 ཨ་རོན་གྱིས་ར་ཐུག་དེ་གཉིས་ལ་རྒྱན་འཕངས་ནས། གཅིག་ནི་དཀོན་མཆོག་ཡ་ཝཱེ་ལ་དབང་བ་དང་། ཅིག་ཤོས་ནི་ཨ་ཟཱ་ཟེལ་ལ་དབང་བར་བྱེད་དགོས།  
\v 9 ཨ་རོན་གྱིས་རྒྱན་བླངས་ནས་དཀོན་མཆོག་ཡ་ཝཱེ་ལ་བབས་པའི་ར་ཐུག་དེ་ཁྲིད་འོངས་ཏེ་སྡིག་བཤགས་མཆོད་པར་འབུལ་བ་དང་།  
\v 10 རྒྱན་བླངས་ནས་ཨ་ཟཱ་ཟེལ་ལ་བབས་པའི་ར་ཐུག་དེ་ནི། སྡིག་པ་བཤག་བྱེད་དུ་གསོན་པོར་དཀོན་མཆོག་ཡ་ཝཱེའི་དྲུང་དུ་འཇོག་དགོས་ལ། དེ་ནས་ཨ་ཟཱ་ཟེལ་གྱི་ཕྱོགས་སུ་ཐང་སྟོང་དུ་གཏོང་དགོས་སོ། །  
\v 11 ཡང་ཨ་རོན་གྱིས་རང་གི་སྡིག་བཤགས་མཆོད་པའི་གླང་ཐུག་ཕུལ་ནས། ཁོ་རང་ཉིད་དང་ཁྱིམ་མི་རྣམས་ཀྱི་སྡིག་པ་བཤག་དགོས་པ་དང་། ཁོས་རང་གི་སྡིག་བཤགས་མཆོད་པའི་གླང་ཐུག་བཤའ་དགོས།  
\v 12 ཁོས་དཀོན་མཆོག་ཡ་ཝཱེའི་མདུན་དྲུང་གི་མཆོད་ཁྲི་ལས་སོལ་མེས་གང་བའི་སྤོས་ཕོར་དང་། བདུག་སྤོས་ཞིབ་བཏགས་ཁྱོར་བ་དོ་བླངས་ནས་ཡོལ་བའི་རྒྱབ་ཏུ་འཁྱེར་འོང་དགོས།  
\v 13 མི་དེ་འཆི་བར་མི་འགྱུར་བའི་ཕྱིར་བདུག་སྤོས་དཀོན་མཆོག་ཡ་ཝཱེའི་དྲུང་དུ་མེ་ལ་སྒྲོན་ནས། བདུག་སྤོས་ཀྱི་དུ་སྤྲིན་གྱིས་དཔང་མཛད་ཤུར་སྒམ་གྱི་སྟེང་དུ་ཡོད་པའི་ཐུགས་རྗེའི་བཞུགས་ཁྲི་གཡོག་པར་བྱའོ། །  
\v 14 ཁོས་གླང་ཐུག་གི་ཁྲག་ཉུང་ཙམ་བླངས་ནས། མཛུབ་མོས་ཐུགས་རྗེའི་བཞུགས་ཁྲིའི་མདུན་དང་ཤར་ཕྱོགས་སུ་གཏོར་བ་དང་། ཡང་ཐུགས་རྗེའི་བཞུགས་ཁྲིའི་མདུན་དུ་ཁྲག་དེ་མཛུབ་མོས་ལན་བདུན་གཏོར་དགོས།  
\v 15 ཁོས་མི་རྣམས་ཀྱི་སྡིག་བཤགས་མཆོད་པར་འབུལ་བའི་ར་ཐུག་བཤས་ནས། དེའི་ཁྲག་ཡོལ་བའི་རྒྱབ་ཏུ་འཁྱེར་འོང་ཞིང་། གླང་ཐུག་གི་ཁྲག་གཏོར་བ་བཞིན་དུ་ཁྲག་འདི་ཡང་ཐུགས་རྗེའི་བཞུགས་ཁྲིའི་སྟེང་དང་དེའི་མདུན་དུ་གཏོར་དགོས།  
\v 16 ཡང་ཡེས་ར་ཨེལ་པ་རྣམས་ཀྱི་མི་གཙང་བ་དང་ཉེས་སྐྱོན་ཏེ། ཁོ་རྣམས་ཀྱི་སྡིག་པ་མཐའ་དག་གི་ཕྱིར་དུ། ཁོས་གནས་དམ་པའི་སྡིག་པ་བཤག་དགོས་ལ། ཁོས་དེ་རྣམས་ཀྱི་མི་གཙང་བའི་དབུས་སུ་གནས་པའི་མཇལ་འཕྲད་གུར་མཆོག་གི་ཕྱིར་དུའང་དེ་བཞིན་བྱེད་དགོས།  
\v 17 ཁོ་གནས་དམ་པ་རུ་འཛུལ་ནས་སྡིག་པ་བཤགས་པའི་དུས་སུ། ཁོས་རང་ཉིད་དང་ཁྱིམ་མི་རྣམས་དང་། ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་ཀྱི་སྡིག་པ་བཤགས་ནས་ཕྱི་རོལ་ཏུ་ཐོན་པའི་བར་དུ་མཇལ་འཕྲད་གུར་མཆོག་ཏུ་མི་སུ་ཡང་ཡོད་མི་རུང་།  
\v 18 ཁོ་ཕྱི་རོལ་ཏུ་ཐོན་རྗེས་དཀོན་མཆོག་ཡ་ཝཱེའི་མདུན་དྲུང་གི་མཆོད་ཁྲིའི་རྩར་སོང་སྟེ་དེའི་སྡིག་པ་བཤག་དགོས། ཁོས་གླང་ཐུག་གི་ཁྲག་དང་ར་ཐུག་གི་ཁྲག་ལས་ཉུང་ཙམ་བླངས་ནས་མཆོད་ཁྲིའི་ཕྱོགས་བཞི་རུ་ཡོད་པའི་རུ་ཐུར་བཞི་པོར་འབྱུག་དགོས།  
\v 19 ཡང་མཛུབ་མོས་དེའི་ཁྲག་མཆོད་ཁྲིའི་སྟེང་ལན་བདུན་ལ་གཏོར་བ་དང་། ཡེས་ར་ཨེལ་པ་རྣམས་མི་གཙང་བ་ལས་གཙང་མ་དང་དམ་པར་བཟོ་དགོས་སོ། །  
\v 20 ཡང་ཨ་རོན་གྱིས་གནས་དམ་པ་དང་མཇལ་འཕྲད་གུར་མཆོག མཆོད་ཁྲི་བཅས་ཀྱི་སྡིག་པ་བཤགས་ཚར་རྗེས། ར་ཐུག་གསོན་པོ་དེ་འཁྲིས་སུ་འཁྲིད་འོང་དགོས།  
\v 21 ཁོའི་ལག་པ་གཉིས་ཀ་ར་ཐུག་གསོན་པོའི་མགོ་ལ་བཞག་ནས། ཡེས་ར་ཨེལ་པ་རྣམས་ཀྱི་ནག་ཉེས་དང་སྐྱོན་ཐམས་ཅད་དེ། ཁོ་རྣམས་ཀྱི་སྡིག་པ་ཐམས་ཅད་མཐོལ་བཤགས་བྱས་ཏེ། སྡིག་པ་ཐམས་ཅད་ར་ཐུག་གི་མགོ་ལ་བཀལ་ནས། ཆེད་བསྐོས་ཀྱི་མི་ཞིག་གིས་དེ་ཐང་སྟོང་དུ་གཏོང་དགོས།  
\v 22 ར་ཐུག་གིས་དེ་ཚོའི་ནག་ཉེས་ཐམས་ཅད་འཁུར་ཞིང་གནས་དབེན་པ་ཞིག་ཏུ་འཁྱེར་དགོས་པས། མི་དེས་ར་ཐུག་ནི་ཐང་སྟོང་དུ་གཏོང་དགོས་སོ། །  
\v 23 དེ་ནས་ཨ་རོན་མཇལ་འཕྲད་གུར་མཆོག་གི་ནང་དུ་འཛུལ་ཞིང་། སྔར་གནས་དམ་པ་རུ་འགྲོ་དུས་གྱོན་པའི་སོ་རས་སྲབ་བུའི་གོས་རྣམས་ཕུད་ནས་དེར་འཇོག་པ་དང་།  
\v 24 ཡང་གནས་དམ་པ་རུ་ལུས་པོ་ཆུ་ཡིས་བཀྲུས་རྗེས་རང་གི་གོས་རྣམས་གྱོན་ནས་ཕྱི་རུ་འོངས་ཏེ། རང་གི་སྦྱིན་སྲེག་དང་མི་རྣམས་ཀྱི་སྦྱིན་སྲེག་ཕུལ་ནས་རང་ཉིད་དང་མི་རྣམས་ཀྱི་སྡིག་པ་བཤག་དགོས་ལ།  
\v 25 སྡིག་བཤགས་མཆོད་པར་ཕུལ་བའི་ཕྱུགས་ཟོག་གི་ཚིལ་རྣམས་མཆོད་ཁྲིའི་སྟེང་བསྲེག་དགོས།  
\v 26 ར་ཐུག་ཨ་ཟཱ་ཟེལ་གྱི་ཕྱོགས་སུ་གཏོང་མཁན་གྱི་མི་དེས། རང་གི་གོས་རྣམས་བཀྲུ་བ་དང་ལུས་པོ་ཆུ་ཡིས་བཀྲུས་རྗེས་ད་གཟོད་སྒར་ནང་དུ་འགྲོ་རུང་བ་ཡིན།  
\v 27 སྡིག་བཤགས་མཆོད་པའི་གླང་ཐུག་དང་། སྡིག་བཤགས་མཆོད་པའི་ར་ཐུག་གཉིས་ཀྱི་ཁྲག་གནས་དམ་པ་རུ་ཁྱེར་ཏེ་སྡིག་པ་བཤགས་པའི་རྗེས་སུ། གླང་ཐུག་དང་ར་ཐུག་དེ་གཉིས་སྒར་ཁའི་ཕྱི་རོལ་ཏུ་ཁྱེར་ནས། པགས་པ་དང་ཤ་དང་ལྕི་བ་བཅས་ཐམས་ཅད་མེ་ལ་བསྲེག་དགོས།  
\v 28 དེ་དག་སྲེག་མཁན་གྱིས་རང་གི་གོས་རྣམས་བཀྲུ་བ་དང་། ལུས་པོ་ཆུ་ཡིས་བཀྲུས་རྗེས་ད་གཟོད་སྒར་ནང་དུ་འགྲོ་རུང་བ་ཡིན་ནོ། །  
\v 29 དེ་དག་ཁྱོད་ཅག་གི་དུས་གཏན་གྱི་སྒྲིག་ཁྲིམས་ཡིན་ཏེ། ལོ་རེའི་ཟླ་བ་བདུན་པའི་ཚེས་བཅུ་པར་རང་ཉིད་ཁྱད་གསོད་བྱེད་དགོས་པ་དང་། གཞིས་སུ་སྐྱེས་པའམ་ཁྱོད་ཚོའི་དབུས་སུ་སྡོད་པའི་བྱེས་པ་གང་གིས་ཀྱང་ལས་ཀ་ཅི་ཡང་བྱེད་མི་རུང་།  
\v 30 ཅིའི་ཕྱིར་ཞེ་ན། ཉིན་དེ་ཉིད་དུ་ཁོས་ཁྱོད་ཅག་གཙང་མར་བཟོ་ཆེད་སྡིག་པ་བཤགས་པ་ཡིན་པས། དཀོན་མཆོག་ཡ་ཝཱེའི་མདུན་དྲུང་དུ་ཁྱོད་རྣམས་ཀྱི་སྡིག་པ་ཐམས་ཅད་དག་ཅིང་།  
\v 31 ཉིན་དེ་ནི་ཁྱོད་རྣམས་ཀྱིས་ངལ་གསོ་ཡོངས་སུ་རྫོགས་པའི་ཉིན་མོ་རུ་བསྲུངས་ནས། རང་ཉིད་ཁྱད་གསོད་བྱེད་དགོས་ལ། དེ་ནི་དུས་གཏན་གྱི་སྒྲིག་ཁྲིམས་ཡིན།  
\v 32 སྣུམ་གྱིས་བྱུགས་ཤིང་ཕ་ཡི་ཚབ་ཏུ་ལས་འགན་དམ་པ་འཁུར་མཁན་མཆོད་དཔོན་གྱིས་སོ་རས་ཀྱི་གོས་དམ་པ་རྣམས་གྱོན་ཞིང་སྡིག་པ་བཤགས་པ་སྟེ།  
\v 33 གནས་དམ་མཆོག་དང་མཇལ་འཕྲད་གུར་མཆོག མཆོད་ཁྲི་བཅས་ཀྱི་ཕྱིར་སྡིག་པ་བཤགས་པར་མ་ཟད། མཆོད་དཔོན་རྣམས་དང་མི་ཚོགས་ཐམས་ཅད་ཀྱི་ཕྱིར་དུ་ཡང་སྡིག་པ་བཤག་དགོས།  
\v 34 ཡེས་ར་ཨེལ་པ་རྣམས་ཀྱི་སྡིག་པ་ཐམས་ཅད་ཀྱི་རྐྱེན་གྱིས། ལོ་རེར་ཐེངས་གཅིག་ལ་དེ་དག་གི་སྡིག་པ་བཤག་དགོས་པས། འདི་ནི་ཁྱོད་རྣམས་ཀྱི་དུས་གཏན་གྱི་སྒྲིག་ཁྲིམས་ཡིན་ནོ་ཞེས་བཀའ་བསྩལ་ཏོ། །དེ་ནས་ཨ་རོན་གྱིས་དཀོན་མཆོག་ཡ་ཝཱེས་མོ་ཤེ་ལ་ཅི་ལྟར་བཀའ་བསྩལ་པ་བཞིན་དུ་བསྒྲུབས་སོ། །   
\c 17
\cl ལེའུ་བཅུ་བདུན་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 དམར་མཆོད་བཤའ་བའི་ཁྲིམས།  
\p
\v 1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 2 ཁྱོད་ཀྱིས་ཨ་རོན་དང་ཁོའི་བུ་རྣམས་དང་། ཡེས་ར་ཨེལ་པ་ཐམས་ཅད་ལ་འདི་ལྟར་སྒོས་ཤིག དཀོན་མཆོག་ཡ་ཝཱེས་བཀའ་གནང་བ་ནི་འདི་ལྟ་སྟེ།  
\v 3 ཡེས་ར་ཨེལ་གྱི་ཁྱིམ་རྒྱུད་ལས་སུ་ཞིག་གིས་བ་གླང་ངམ། ལུག་ཐུག་གམ་ར་ཐུག་བཅས་གང་རུང་བཤའ་བ་ཡིན་ན། སྒར་ནང་ངམ་སྒར་ཕྱི་གང་དུ་བཤས་ཀྱང་།  
\v 4 གལ་སྲིད་ཕྱུགས་ཟོག་དེ་མཇལ་འཕྲད་གུར་མཆོག་གི་སྒོ་ཁ་རུ། དཀོན་མཆོག་ཡ་ཝཱེའི་གུར་མཆོག་གི་མདུན་དུ་ཁྲིད་འོངས་ཏེ་དཀོན་མཆོག་ཡ་ཝཱེ་ལ་མཆོད་པར་འབུལ་བ་མིན་ན། ཁྲག་བཞུར་བ་དེ་ནི་མི་དེའི་ཉེས་པར་བགྲང་དགོས་ཤིང་། ཁོས་ཁྲག་བཞུར་དུ་བཅུག་པས་མི་དེ་ནི་རང་གི་མི་མང་ལས་མེད་པར་གཏོང་དགོས་ལ།  
\v 5 དེ་ནི་ཡེས་ར་ཨེལ་པ་རྣམས་ཀྱིས་ཐང་རྒོད་དུ་བཤའ་བའི་དམར་མཆོད་རྣམས་དཀོན་མཆོག་ཡ་ཝཱེའི་མདུན་དྲུང་སྟེ། མཇལ་འཕྲད་གུར་མཆོག་གི་སྒོ་ཁ་རུ། མཆོད་དཔོན་གྱི་མདུན་དུ་ཁྱེར་འོངས་ནས་དམར་མཆོད་དེ་རྣམས་བཤའ་བ་དང་། དེ་རྣམས་དཀོན་མཆོག་ཡ་ཝཱེར་ཞི་བདེའི་མཆོད་པ་རུ་འབུལ་དགོས་པའི་ཕྱིར་རོ། །  
\v 6 མཆོད་དཔོན་གྱིས་མཇལ་འཕྲད་གུར་མཆོག་གི་སྒོ་ཁ་རུ། ཁྲག་ནི་དཀོན་མཆོག་ཡ་ཝཱེའི་མཆོད་ཁྲི་སྟེང་གཏོར་བ་དང་། ཚིལ་ནི་བསྲེགས་ཏེ་དཀོན་མཆོག་ཡ་ཝཱེ་ལ་དྲི་ཞིམ་མཆོད་པ་རུ་འབུལ་དགོས།  
\v 7 ཁོ་ཚོས་ད་ནི་རྗེས་སུ་འབྲངས་ཏེ་ལོག་གཡེམ་བྱེད་པའི་ར་ཐུག་གི་རྟེན་རྣམས་ལ་དམར་མཆོད་འབུལ་བར་མི་བྱ་ཞིང་། དེ་ནི་ཁོ་རྣམས་ཀྱི་མི་རབས་ནས་མི་རབས་བར་དུས་གཏན་གྱི་སྒྲིག་ཁྲིམས་ཡིན་ནོ་ཞེས་པའོ། །  
\v 8 ཁྱོད་ཀྱིས་དེ་དག་ལ་འདི་ལྟར་སྨྲོས་ཤིག ཡེས་ར་ཨེལ་ཁྱིམ་རྒྱུད་ཀྱི་མི་དང་དེ་དག་ཁྲོད་དུ་གནས་པའི་བྱེས་པ་སུ་དང་གང་ཞིག་གིས་སྦྱིན་སྲེག་དང་མཆོད་རྫས་འབུལ་བ་ཡིན་ཚེ།  
\v 9 གལ་སྲིད་མཇལ་འཕྲད་གུར་མཆོག་གི་སྒོ་ཁར་ཁྱེར་འོངས་ཏེ་དཀོན་མཆོག་ཡ་ཝཱེ་ལ་འབུལ་བ་མིན་ན། མི་དེ་ནི་མི་མང་ལས་མེད་པར་གཏོང་དགོས་སོ། །   
\s1 ཁྲག་བཟའ་མི་རུང་བའི་ཁྲིམས།  
\p
\v 10 ཡེས་ར་ཨེལ་གྱི་ཁྱིམ་རྒྱུད་དང་དེ་དག་གི་ཁྲོད་དུ་གནས་པའི་བྱེས་པ་སུ་དང་སུ་ཞིག་གིས་ཁྲག་གང་རུང་ཟོས་ན། ཁྲག་ཟ་བའི་མི་དེ་ལ་བདག་གི་གདོང་མདོག་ལོག་ཅིང་རང་གི་མི་མང་ལས་མེད་པར་གཏོང་བར་བྱའོ། །  
\v 11 གང་ལ་ཞེ་ན། སྲོག་ཆགས་ཀྱི་ཚེ་སྲོག་ནི་ཁྲག་གི་ནང་དུ་ཡོད་ཅིང་། ཁྲག་ནི་ཚེ་སྲོག་ཡིན་ལ་སྡིག་པ་བཤག་ནུས་པས། མཆོད་ཁྲིའི་སྟེང་ཁྱོད་རྣམས་ཀྱི་ཚེ་སྲོག་གི་ཕྱིར་སྡིག་པ་བཤག་པའི་ཆེད་དུ། བདག་གིས་ཁྲག་ནི་ཁྱོད་རྣམས་ལ་སྤྲད་པ་ཡིན་ནོ། །  
\v 12 དེ་བས་ན། བདག་གིས་ཡེས་ར་ཨེལ་པ་རྣམས་ལ་འདི་སྐད་དུ། ཁྱོད་རྣམས་སུ་ཡིན་ཡང་ཁྲག་བཟའ་མི་རུང་ལ། ཁྱོད་ཅག་གི་ཁྲོད་དུ་གནས་པའི་བྱེས་པ་རྣམས་ཀྱིས་ཀྱང་ཁྲག་བཟའ་མི་རུང་ཞེས་སྨྲས་པའོ། །  
\v 13 ཡེས་ར་ཨེལ་པ་ཐམས་ཅད་དང་དེ་དག་གི་ཁྲོད་དུ་གནས་པའི་བྱེས་པ་སུ་དང་སུ་ཡིན་ཡང་། བཟའ་རུང་བའི་འདབ་ཆགས་སམ་རི་དྭགས་བརྔོན་པ་ཡིན་ན། དེའི་ཁྲག་བཞུར་དུ་བཅུག་ནས་ས་ཡིས་འགེབ་དགོས་སོ། །  
\v 14 གང་ལ་ཞེ་ན། སྲོག་ཆགས་ཐམས་ཅད་ཀྱི་ཚེ་སྲོག་སྟེ། ཁྲག་ནི་དེའི་ཚེ་སྲོག་ཡིན་པས་སོ། །དེའི་ཕྱིར་བདག་གིས་ཡེས་ར་ཨེལ་པ་རྣམས་ལ་འདི་སྐད་དུ། ཁྱོད་ཅག་གིས་སྲོག་ཆགས་གང་ཡིན་ཡང་དེའི་ཁྲག་བཟའ་མི་རུང་སྟེ། སྲོག་ཆགས་ཐམས་ཅད་ཀྱི་ཚེ་སྲོག་ནི་དེའི་ཁྲག་ཡིན་པས་སོ། །ཁྲག་བཟའ་བའི་མི་ཐམས་ཅད་ནི་མེད་པར་གཏོང་ངེས་ཡིན་ཞེས་སྨྲས་པའོ། །  
\v 15 དེ་ཡང་གཞིས་སྐྱེས་སམ་བྱེས་པ་སུ་ཡིན་ཡང་། རང་བཞིན་གྱིས་ཤི་བའམ་གཅན་གཟན་གྱིས་བསད་པའི་སྲོག་ཆགས་ཟོས་པ་ཡིན་ན། མི་དེས་རང་གི་གོས་རྣམས་བཀྲུ་བ་དང་། ལུས་པོ་ཆུ་ཡིས་བཀྲུ་དགོས་ཤིང་། དགོང་མོའི་བར་དུ་མི་གཙང་བ་དང་། དེའི་རྗེས་སུ་གཙང་བའོ། །  
\v 16 འོན་ཀྱང་ཁོས་གོས་དང་ལུས་པོ་མ་བཀྲུས་ན། རང་གི་ནག་ཉེས་འཁུར་དགོས་ཞེས་བཀའ་བསྩལ་ཏོ། །   
\c 18
\cl ལེའུ་བཅོ་བརྒྱད་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 ལོག་གཡེམ་འགོག་པའི་ཁྲིམས།  
\p
\v 1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 2 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན།  
\v 3 ཁྱོད་རྣམས་སྔར་འདུག་སའི་ཨེ་ཅིབ་ཡུལ་གྱི་མི་རྣམས་ཀྱི་སྤྱོད་པ་བཞིན་དུ་བྱེད་མི་རུང་བ་དང་། བདག་གིས་ཁྱོད་ཅག་ཁྲིད་ནས་འགྲོ་ས་ཀ་ན་ཨན་ཡུལ་གྱི་མི་རྣམས་ཀྱི་སྤྱོད་པ་བཞིན་དུ་ཡང་བྱེད་མི་རུང་ལ། དེ་དག་གི་སྒྲིག་ཁྲིམས་བཞིན་དུ་ཡང་སྤྱོད་མི་རུང་ངོ་། །  
\v 4 ཁྱོད་རྣམས་ཀྱིས་བདག་གི་སྲོལ་ཡིག་ལྟར་བྱེད་པ་དང་། བདག་གི་སྒྲིག་ཁྲིམས་རྣམས་བརྩི་སྲུང་བྱེད་དགོས་ཤིང་། བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན།  
\v 5 བདག་གི་སྒྲིག་ཁྲིམས་དང་སྲོལ་ཡིག་རྣམས་ནན་བསྲུང་བྱས་ན། མི་དེའང་དེ་ལ་བརྟེན་ནས་སྲོག་འཚོ་བར་འགྱུར། བདག་ནི་ཡ་ཝཱེ་ཡིན་ནོ། །  
\v 6 སུ་ཡིན་ཡང་རང་གི་གཉེན་ཉེའི་གམ་དུ་བཅར་ནས་དེའི་ཁོག་སྨད་གཅེར་བུར་འཕུད་མི་རུང་། བདག་ནི་ཡ་ཝཱེ་ཡིན་ནོ། །  
\v 7 ཁྱོད་ཀྱིས་རང་གི་ཕ་ལ་གཏོགས་པའི་ལུས་པོ་སྟེ་ཁྱོད་ཀྱི་མ་ཡི་ཁོག་སྨད་གཅེར་བུར་འཕུད་མི་རུང་སྟེ། ཁོ་མོ་ནི་ཁྱོད་ཀྱི་མ་ཡིན་པའི་ཕྱིར་དེའི་ཁོག་སྨད་གཅེར་བུར་འཕུད་མི་རུང་ངོ་། །  
\v 8 ཁྱོད་ཀྱིས་ཕ་ཡི་ཆུང་མ་གཅེར་བུར་འཕུད་མི་རུང་། མོའི་ལུས་གཅེར་བུ་དེ་ཁྱོད་ཀྱི་ཕ་ལ་གཏོགས་པ་ཡིན་ནོ། །  
\v 9 ཁྱོད་ཀྱི་ལྕམ་སྲིང་སྟེ། ཁྱོད་ཀྱི་ཕ་ཡི་བུ་མོ་དང་མ་ཡི་བུ་མོ་ཁྱིམ་ནས་སྐྱེས་པའམ་ཕྱི་ནས་སྐྱེས་པ་གང་ཡིན་ཡང་། དེ་དག་གི་ཁོག་སྨད་གཅེར་བུར་འཕུད་མི་རུང་ངོ་། །  
\v 10 ཁྱོད་ཀྱི་བུ་ཡི་བུ་མོའམ་བུ་མོའི་བུ་མོ་ཡི་ཁོག་སྨད་གཅེར་བུར་འཕུད་མི་རུང་སྟེ། ཅི་ལ་ཞེ་ན། དེ་དག་གི་ཁོག་སྨད་གཅེར་བུར་ཕུད་པ་ནི་ཁྱོད་ཀྱི་ངོ་ཚ་ཡིན་ནོ། །  
\v 11 ཕ་ཡི་ཆུང་མས་བཙས་པའི་བུ་མོ་ནི་ཁྱོད་ཀྱི་ལྕམ་སྲིང་ཡིན་པས། ཁྱོད་ཀྱིས་ཁོ་མོའི་ཁོག་སྨད་གཅེར་བུར་མ་ཕུད་ཅིག  
\v 12 ཁྱོད་ཀྱི་ཕ་ཡི་སྲིང་མོའི་ཁོག་སྨད་གཅེར་བུར་འཕུད་མི་རུང་སྟེ། དེ་ནི་ཁྱོད་ཀྱི་ཕ་ཡི་ཤ་ཁྲག་ཡིན་པའོ། །  
\v 13 ཁྱོད་ཀྱི་མ་ཡི་ལྕམ་སྲིང་གི་ཁོག་སྨད་གཅེར་བུར་འཕུད་མི་རུང་སྟེ། དེ་ནི་ཁྱོད་ཀྱི་མ་ཡི་ཤ་ཁྲག་ཡིན་པའོ། །  
\v 14 ཁྱོད་ཀྱི་ཁུ་བོར་དབང་བའི་ཁོག་སྨད་གཅེར་བུར་འཕུད་པའམ་དེའི་ཆུང་མའི་ཉེ་སར་བཅར་མི་རུང་སྟེ། ཁོ་མོ་ནི་ཁྱོད་ཀྱི་ཨ་ནེ་ཡིན་པའོ། །  
\v 15 ཁྱོད་ཀྱི་མནའ་མའི་ཁོག་སྨད་གཅེར་བུར་འཕུད་མི་རུང་སྟེ། དེ་ནི་ཁྱོད་ཀྱི་བུ་ཡི་ཆུང་མ་ཡིན་པས་དེའི་ཁོག་སྨད་གཅེར་བུར་འཕུད་མི་རུང་།  
\v 16 ཁྱོད་ཀྱི་སྤུན་གྱི་ཆུང་མའི་ཁོག་སྨད་གཅེར་བུར་འཕུད་མི་རུང་སྟེ། དེ་ནི་ཁྱོད་ཀྱི་སྤུན་ལ་དབང་བའི་ཁོག་སྨད་ཡིན་ནོ། །  
\v 17 བུད་མེད་ཅིག་དང་དེའི་བུ་མོ་གཉིས་ཀྱི་ཁོག་སྨད་གཅེར་བུར་འཕུད་མི་རུང་ལ། ཡང་དེའི་བུ་ཡི་བུ་མོའམ་བུ་མོའི་བུ་མོ་གཉིས་ཀྱི་ཁོག་སྨད་གཅེར་བུར་འཕུད་མི་རུང་སྟེ། དེ་དག་ནི་ཉེ་འབྲེལ་ཡིན་པ་དང་། དེ་ནི་དོན་ངན་པ་ཡིན་ནོ། །  
\v 18 ཁྱོད་ཀྱི་ཆུང་མ་ད་དུང་གསོན་པའི་དུས་སུ། ཁྱོད་ཀྱིས་ཁོ་མོའི་འགྲན་ཟླ་རུ་དེའི་ལྕམ་སྲིང་གཞན་ཞིག་ཆུང་མར་བླངས་ནས། ཁོ་མོའི་ལྕམ་སྲིང་གི་ཁོག་སྨད་གཅེར་བུར་འཕུད་མི་རུང་ངོ་། །  
\v 19 ཟླ་མཚན་འབབ་དུས་ཀྱི་བུད་མེད་མི་གཙང་བའི་ཉེ་སར་བཅར་ནས་ཁོ་མོའི་ཁོག་སྨད་གཅེར་བུར་འཕུད་མི་རུང་།  
\v 20 ཁྱིམ་མཚེས་ཀྱི་ཆུང་མ་དང་འགྲོགས་ནས་རང་ཉིད་བཙོག་པར་བྱེད་མི་རུང་།  
\v 21 ཁྱོད་ཀྱིས་རང་གི་བུ་དང་བུ་མོ་རྣམས་མོ་ལེག་ལ་མེ་མཆོད་དུ་འབུལ་མི་རུང་ལ། ཁྱོད་ཀྱི་དཀོན་མཆོག་གི་མཚན་ཡང་ཁྱད་དུ་གསོད་མི་རུང་སྟེ། བདག་ནི་ཡ་ཝཱེ་ཡིན་ནོ། །  
\v 22 བུད་མེད་དང་ལུས་འབྲེལ་བྱེད་པའི་ཚུལ་བཞིན་དུ་སྐྱེས་པ་དང་ལུས་འབྲེལ་བྱེད་མི་རུང་སྟེ། དེ་ནི་སྐྱུག་བྲོ་བའི་བྱ་སྤྱོད་ཡིན།  
\v 23 སེམས་ཅན་དུད་འགྲོ་དང་འཁྲིག་པ་སྤྱད་དེ་རང་ཉིད་བཙོག་པར་བྱེད་མི་རུང་ལ། བུད་མེད་ཀྱང་སེམས་ཅན་དུད་འགྲོའི་མདུན་དུ་ལངས་ནས་དེ་དང་འཁྲིག་པ་སྤྱོད་མི་རུང་། དེ་ནི་ཕྱིན་ཅི་ལོག་པ་ཡིན་ནོ། །  
\v 24 དོན་འདི་ཐམས་ཅད་ཀྱི་ཐད་ནས་ཁྱོད་རྣམས་ཀྱིས་རང་ཉིད་བཙོག་པར་བྱེད་མི་རུང་སྟེ། ཅི་ལ་ཞེ་ན། བདག་གིས་ཁྱོད་ཅག་གི་མདུན་ནས་ཕར་བསྐྲད་པའི་མི་རྣམས་ཀྱིས་དོན་འདི་མཐའ་དག་གི་ཐད་རང་ཉིད་བཙོག་པར་བཟོས་པའོ། །  
\v 25 ཐ་ན་ཡུལ་དེའང་སྦགས་པ་ཡིན་པས་བདག་གིས་ཡུལ་དེའི་ནག་ཉེས་ལ་ཆད་པ་བཅད་ཅིང་། ཡུལ་དེས་རང་གི་ཡུལ་མི་རྣམས་སྐྱུག་པའོ། །  
\v 26 འོན་ཀྱང་ཁྱོད་ཅག་གིས་བདག་གི་སྒྲིག་ཁྲིམས་དང་སྲོལ་ཡིག་རྣམས་བསྲུང་དགོས་ཤིང་། གཞིས་སྐྱེས་སམ་ཁྱོད་ཅག་ཁྲོད་དུ་གནས་པའི་བྱེས་པ་རྣམས་སུ་ཡིན་ཡང་། སྐྱུག་བྲོ་བའི་དོན་དེ་ལྟ་བུ་ཅི་ཡང་བྱེད་མི་རུང་།  
\v 27 ཁྱོད་ཅག་གི་སྔོན་དུ་ཡུལ་དེར་གནས་པའི་ཡུལ་མི་རྣམས་ཀྱིས་སྐྱུག་བྲོ་བའི་དོན་དེ་ཐམས་ཅད་བྱས་པས་ཡུལ་དེ་སྦགས་པའོ། །  
\v 28 ཁྱོད་ཀྱིས་དེ་ལྟར་གནས་དེ་མི་གཙང་བར་བཟོས་ན། ཁྱོད་ཀྱི་སྔོན་དུ་ཡོད་པའི་མི་རྣམས་ཡུལ་གྱིས་སྐྱུག་བྲོ་བར་བཟོས་པ་ལྟར། ཁྱོད་རང་སྐྱུག་བྲོ་བར་མི་འགྱུར་བའི་ཕྱིར་དུའོ། །  
\v 29 སུ་ཡིན་ཡང་སྐྱུག་བྲོ་བའི་དོན་དེ་རྣམས་ལས་གཅིག་བྱས་ན། དེ་ནི་མི་མང་ལས་མེད་པར་གཏོང་དགོས།  
\v 30 ཁྱོད་རྣམས་ཀྱིས་སྐྱུག་བྲོ་བའི་གོམས་སྲོལ་དེ་དག་ལ་བསྟུན་ནས། ཁྱོད་ཅག་སྔོན་གྱི་མི་རྣམས་ཀྱིས་ཅི་ཞིག་བྱས་པ་བཞིན་སྤྱད་དེ་རང་ཉིད་བཙོག་པར་མི་བྱ་བའི་ཆེད་དུ། བདག་གི་བསྒོ་བ་རྣམས་བསྲུང་དགོས་ཏེ། བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་ཞེས་སྨྲ་དགོས་པར་བཀའ་བསྩལ་ཏོ། །   
\c 19
\cl ལེའུ་བཅུ་དགུ་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 དམ་པ་དང་དྲང་གཞག་གི་ཁྲིམས།  
\p
\v 1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 2 ཁྱོད་ཀྱིས་ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་ལ་འདི་ལྟར་ཤོད་དང་། ཁྱོད་ཅག་གི་དཀོན་མཆོག་ཡ་ཝཱེ་བདག་ནི་དམ་པ་ཡིན་པའི་ཕྱིར། ཁྱོད་རྣམས་ཀྱང་དམ་པ་ཡིན་དགོས་སོ། །  
\v 3 ཁྱོད་ཅག་མི་རེ་རེས་རང་རང་གི་ཕ་མ་ལ་བསྙེན་བཀུར་བྱེད་དགོས་པ་དང་། བདག་གི་ངལ་གསོ་བའི་ཉིན་མོའང་བསྲུང་དགོས་ལ། བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་ནོ། །  
\v 4 ལྷ་སྐུ་རྣམས་ཀྱི་ཕྱོགས་སུ་འཁོར་མི་རུང་ལ། རང་ཉིད་ཀྱི་ཕྱིར་དུ་ལྷ་སྐུ་རྣམས་ལྡུག་ཀྱང་མི་རུང་སྟེ། བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་ནོ། །  
\v 5 དེ་ཡང་ཁྱོད་རྣམས་ཀྱིས་དམར་མཆོད་བཤས་ནས་དཀོན་མཆོག་ཡ་ཝཱེ་ལ་ཞི་བདེའི་མཆོད་པ་འབུལ་བའི་ཚེ། ཁྱོད་རྣམས་ཁོང་གི་ཐུགས་ལ་ལྡན་པ་ཞིག་ཡིན་པའི་ཕྱིར་འབུལ་དགོས་པ་དང་།  
\v 6 མཆོད་རྫས་དེ་ནི་མཆོད་པར་ཕུལ་བའི་ཉིན་དེ་རང་དང་དེའི་ཕྱི་ཉིན་བཟའ་དགོས་ལ། ཉིན་གསུམ་པའི་བར་དུ་ལུས་པ་རྣམས་མེ་ཡིས་བསྲེག་དགོས་སོ། །  
\v 7 གལ་སྲིད་ཉིན་གསུམ་པར་ཟོས་ན་དེ་ནི་མི་གཙང་དྲི་མས་གོས་པ་ཡིན་པས་ཁོང་གི་ཐུགས་ལ་མི་ལྡན་ཞིང་།  
\v 8 སུ་ཞིག་གིས་དེ་ཟོས་ན་དེས་རང་གི་ནག་ཉེས་འཁུར་དགོས་ཏེ། ཁོས་དཀོན་མཆོག་ཡ་ཝཱེའི་རྫས་དམ་པ་བསླད་པའི་རྐྱེན་གྱིས་ཁོ་ནི་མི་མང་ལས་མེད་པར་གཏོང་ངེས་སོ། །  
\v 9 ཁྱོད་རྣམས་ཀྱིས་རང་གི་ས་ཞིང་ནས་སྟོན་ཐོག་བསྡུ་བའི་ཚེ། ས་ཞིང་གྲུ་ཟུར་གྱི་ལོ་ཏོག་བསྡུ་མི་འོས་ལ། སར་ལྷུང་བའི་སྙེ་མ་རྣམས་ཀྱང་བཏུ་མི་རུང་།  
\v 10 རྒུན་འབྲུམ་ར་བ་ལས་རྒུན་འབྲུམ་ཡོད་ཚད་བཏོག་མི་རུང་ལ། རྒུན་འབྲུམ་ར་བར་ས་ལ་ལྷུང་བའི་རྒུན་འབྲུམ་རྣམས་ཀྱང་བཏུ་མི་འོས་ཏེ། དེ་ནི་དབུལ་པོ་དང་བྱེས་པ་རྣམས་ཀྱི་ཕྱིར་དུ་བསྐྱུར་དགོས། བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་ནོ། །  
\v 11 ཁྱོད་རྣམས་ཀྱིས་རྐུ་བྱེད་མི་རུང་བ་དང་། མགོ་སྐོར་གཏོང་མི་རུང་ལ། ཕན་ཚུན་ལ་རྫུན་ཡང་སྨྲ་མི་རུང་།  
\v 12 བདག་གི་མཚན་དཔང་དུ་བཙུགས་ནས་མནའ་རྫུན་མ་བསྐྱལ་ཏེ་ཁྱོད་ཀྱི་དཀོན་མཆོག་གི་མཚན་ཁྱད་དུ་གསོད་མི་རུང་། བདག་ནི་ཡ་ཝཱེ་ཡིན་ནོ། །  
\v 13 ཁྱོད་ཀྱི་ཁྱིམ་མཚེས་ལ་བཙན་གནོན་བྱེད་མི་རུང་ལ། འཕྲོག་བཅོམ་ཡང་བྱེད་མི་རུང་། གླ་པའི་གླ་ཆ་ནི་ཞོགས་པའི་བར་དུ་ཁྱོད་ཀྱི་ལག་ནས་ལུས་མི་རུང་།  
\v 14 འོན་པ་ལ་དམོད་མོ་འདེབས་མི་རུང་ལ། ལོང་བའི་མདུན་དུ་བཀག་རྡོ་འཇོག་མི་འོས། ཁྱོད་ནི་རང་གི་དཀོན་མཆོག་ལ་གུས་ཤིང་འཇིགས་དགོས་ཏེ། བདག་ནི་ཡ་ཝཱེ་ཡིན་ནོ། །  
\v 15 ཁྲིམས་ལ་གཏུག་སྐབས་དྲང་གཞག་ཡིན་དགོས་ཤིང་། དབུལ་པོར་ཕྱོགས་ལྷུང་བྱེད་མི་རུང་ལ། དབང་ཤུགས་ཅན་གྱི་ཁ་ངོར་ཡང་བལྟ་མི་རུང་སྟེ། ཅི་ནས་ཀྱང་འདྲ་མཉམ་གྱིས་ཁྱོད་ཀྱི་ཁྱིམ་མཚེས་ལ་དྲང་བདེན་བསྐྱང་དགོས།  
\v 16 མི་མང་གི་ཁྲོད་དུ་གང་སར་དབྱེན་སྦྱོར་རྩོད་སློང་བྱེད་མི་རུང་ལ། ཁྱིམ་མཚེས་ཀྱི་ཚེ་སྲོག་ལ་གནོད་འཚེ་གཏོང་མི་རུང་སྟེ། བདག་ནི་ཡ་ཝཱེ་ཡིན་ནོ། །  
\v 17 ཁྱོད་ཀྱི་སེམས་སུ་རང་གི་སྤུན་ཟླར་སྡང་མི་རུང་། ཁྱོད་ཀྱིས་རང་གི་ཁྱིམ་མཚེས་ཀྱི་རྐྱེན་གྱིས་སྡིག་པ་མི་འབྱུང་བའི་ཕྱིར་དེའི་སྐྱོན་སྟོན་དགོས།  
\v 18 འཁོན་ལན་སློག་མི་རུང་ལ། ཁྱོད་རང་གི་མི་རྣམས་ལ་འཁང་ར་ཡང་བྱེད་མི་རུང་ཞིང་། ཁྱོད་ཀྱིས་ཁྱིམ་མཚེས་ལའང་རང་དང་འདྲ་བར་གཅེས་ཤིག བདག་ནི་ཡ་ཝཱེ་ཡིན་ནོ། །  
\v 19 ཁྱོད་ཅག་གིས་བདག་གི་སྒྲིག་ཁྲིམས་བརྩི་སྲུང་བྱེད་དགོས་ཏེ། ཁྱོད་ཀྱི་ཕྱུགས་ཟོག་རྣམས་རིགས་མི་གཅིག་པ་དང་འཁྲིག་ཏུ་འཇུག་མི་རུང་བ་དང་། ཞིང་ལ་རིགས་མི་མཚུངས་པའི་ས་བོན་གཉིས་འདེབས་མི་རུང་ལ། རྒྱུ་གཉིས་ལས་གྲུབ་པའི་གྱོན་པ་ཡང་གོན་མི་རུང་ངོ་། །  
\v 20 གལ་སྲིད་སྐྱེས་པ་ཞིག་བུད་མེད་ཅིག་ལ་འགྲོགས་ནས་འཁྲིག་པ་སྤྱད་ཅིང་། ཁོ་མོ་ནི་བྲན་མོ་ཡིན་ཞིང་སྐྱེས་པ་གཞན་ལ་གཉེན་རྟགས་བརྒྱབ་ཡོད་པ་དང་། ད་དུང་བླུས་མེད་པའམ་རང་དབང་ཐོབ་མེད་པ་ཡིན་ན། ཉེས་ཆད་གཅོད་འོས་པ་ལས་དེ་གཉིས་གསོད་པར་མི་རིགས། ཅི་ལ་ཞེ་ན། བྲན་མོར་ད་དུང་རང་དབང་ཐོབ་མེད་པའོ། །  
\v 21 སྐྱེས་པ་དེས་ཉེས་སེལ་མཆོད་པ་སྟེ་ལུག་ཐུག་ཅིག་དཀོན་མཆོག་ཡ་ཝཱེའི་མདུན་དྲུང་དུ་མཇལ་འཕྲད་གུར་མཆོག་གི་སྒོ་ཁར་འཁྲིད་འོང་དགོས།  
\v 22 དེ་ནས་མཆོད་དཔོན་གྱིས་ཉེས་སེལ་མཆོད་པར་ཕུལ་བའི་ལུག་ཐུག་དེས། མི་དེས་བྱས་པའི་སྡིག་པའི་ཆེད་དུ་དཀོན་མཆོག་ཡ་ཝཱེའི་སྤྱན་སྔར་སྡིག་པ་བཤག་དགོས་པ་དང་། དེས་བྱས་པའི་སྡིག་པ་སེལ་བར་ངེས་སོ། །  
\v 23 ཁྱོད་རྣམས་ཀཱ་ན་ཨན་ཡུལ་དུ་སླེབས་ཚེ། སིལ་སྡོང་སྣ་ཚོགས་བཙུགས་ནས་དེ་དག་གི་ཤིང་ཏོག་རྣམས་ཟས་སུ་སྤྱོད་མི་རུང་། ལོ་གསུམ་གྱི་ནང་དུ་ཁྱོད་ཅག་གིས་དེ་བཀོལ་མི་རུང་ལ་བཟའ་ཡང་མི་རུང་ངོ་། །  
\v 24 འོན་ཀྱང་ལོ་བཞི་པར་ཐོགས་པའི་ཤིང་ཏོག་ནི་ཐམས་ཅད་དམ་པ་ཡིན་ལ། དཀོན་མཆོག་ཡ་ཝཱེ་ལ་བསྟོད་པ་འབུལ་བའི་མཆོད་པ་ཡིན།  
\v 25 ལོ་ལྔ་པར་ཁྱོད་ཅག་གི་ཆེད་དུ་སིལ་སྡོང་ལ་ཤིང་ཏོག་མང་པོ་ཐོགས་སུ་བཅུག་ནས། ཁྱོད་རྣམས་ཀྱིས་སྡོང་མགོའི་སིལ་ཏོག་རྣམས་བཟའ་དགོས། བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་ནོ། །  
\v 26 ཁྱོད་ཚོས་ཁྲག་ཡོད་པའི་ཁ་ཟས་ཅི་ཡང་བཟའ་མི་རུང་ཞིང་། ཁྱོད་ཚོས་མོ་འདེབས་མི་རུང་ལ། སྐར་ལྟས་ལའང་བལྟ་མི་རུང་།  
\v 27 ཁྱོད་ཀྱི་སྐྲ་འདབས་བཞར་མི་རུང་བ་དང་། ཨག་ཚོམ་གྱི་མཐའ་ནས་ཀྱང་གཅོད་མི་རུང་།  
\v 28 གཤིན་པོའི་ཕྱིར་དུ་རང་གི་ཤ་གཅོད་མི་རུང་ལ། ལུས་སྟེང་དུ་རི་མོ་གཙགས་མི་རུང་། བདག་ནི་ཡ་ཝཱེ་ཡིན་ནོ། །  
\v 29 ཁྱོད་ཀྱི་བུ་མོ་སྨད་འཚོང་མ་རུ་བྱས་ནས་སྐྱོན་གྱིས་གོས་པར་བྱེད་མི་རུང་། དེ་ལྟར་བྱས་ན་ཡུལ་འདིས་གཡེམ་སྦྱོར་སྤེལ་ནས་གནས་འདིར་ངན་པས་འགེང་བར་འགྱུར་རོ། །  
\v 30 ཁྱོད་རྣམས་ཀྱིས་བདག་གི་ངལ་གསོ་བའི་ཉིན་མོ་རྣམས་བསྲུང་བ་དང་། བདག་གི་གནས་མཆོག་ལ་གུས་ཤིང་འཇིགས་དགོས། བདག་ནི་ཡ་ཝཱེ་ཡིན་ནོ། །  
\v 31 ལྷ་པ་རྣམས་ཀྱི་ཕྱོགས་སུ་འཁོར་མི་རུང་ལ། མོ་པ་རྣམས་ལ་ཞུ་ཡང་མི་རུང་སྟེ། ཁྱོད་རང་དེ་དག་གིས་བཙོག་པར་མི་བྱེད་པའི་ཕྱིར་ཡིན། བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་ནོ། །  
\v 32 མགོ་སྐྲ་དཀར་པོར་གྱུར་པའི་མདུན་ནས་ཡར་ལངས་པ་དང་། བགྲེས་པོ་ཚོར་གུས་བཀུར་བྱེད་དགོས། ཁྱོད་ཀྱི་དཀོན་མཆོག་ལ་གུས་ཤིང་འཇིགས་པར་གྱིས། བདག་ནི་ཡ་ཝཱེ་ཡིན་ནོ། །  
\v 33 གལ་སྲིད་ཕྱི་རོལ་གྱི་མི་ཞིག་ཁྱོད་ཅག་གི་ཡུལ་ནས་ཁྱོད་དང་མཉམ་དུ་གནས་བཅས་ན་དེ་ལ་ཐུབ་ཚོད་བྱེད་མི་རུང་།  
\v 34 ཁྱོད་ཅག་གི་ཡུལ་ནས་བྱེས་སུ་སྡོད་པའི་ཕྱི་མི་ལ། ཁྱོད་རྣམས་ཀྱིས་གཞིས་སྐྱེས་པའི་ལྟ་སྟངས་འཛིན་པར་མ་ཟད། རང་ཉིད་ལ་གཅེས་པ་བཞིན་དེ་ཡང་གཅེས་སུ་འཛིན་དགོས། ཅི་ལ་ཞེ་ན། ཁྱོད་རྣམས་ཀྱང་ཨེ་ཅིབ་ཡུལ་དུ་བྱེས་སུ་བསྡད་མྱོང་བས་སོ། །བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་ནོ། །  
\v 35 ཁྱོད་རྣམས་ཀྱིས་ཁྲིམས་ཐག་གཅོད་པའི་སྐབས་སུ། རིང་ཐུང་ཚད་པ་དང་ལྕི་ཡང་འཇལ་བ། ཤོང་ཚད་འཇལ་བ་བཅས་ལ་གཡོ་སྒྱུ་བྱེད་མི་རུང་།  
\v 36 ཁྱོད་རྣམས་ཀྱིས་དྲང་གཞག་གི་རྒྱ་སྲང་དང་དྲང་གཞག་གི་རྒྱ་རྡོ་དང་། དྲང་གཞག་གི་ཨེ་ཕཱ་དང་། དྲང་གཞག་གི་རྫ་བུམ་བཅས་བཀོལ་དགོས། བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན་ལ། སྔར་ཁྱོད་ཅག་ཨེ་ཅིབ་ཡུལ་ནས་ཕྱི་རུ་ཁྲིད་འོངས་པ་ཡིན།  
\v 37 ཁྱོད་རྣམས་ཀྱིས་བདག་གི་སྒྲིག་ཁྲིམས་དང་སྲོལ་ཡིག་ཐམས་ཅད་བརྩི་སྲུང་བྱས་ནས་དེ་བཞིན་དུ་སྒྲུབས་ཤིག བདག་ནི་ཡ་ཝཱེ་ཡིན་ནོ་ཞེས་སྨྲ་དགོས་པར་བཀའ་བསྩལ་ཏོ། །   
\c 20
\cl ལེའུ་ཉི་ཤུ་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 ཉེས་ཆད་གཅོད་པའི་ཁྲིམས།  
\p
\v 1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 2 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར། ཡེས་ར་ཨེལ་པ་དང་ཡེས་ར་ཨེལ་གྱི་ཁྲོད་དུ་བྱེས་སུ་སྡོད་པའི་ཕྱི་མི་སུ་ཡིན་ཡང་། རང་གི་བུ་རྒྱུད་མོ་ལེག་ལ་མཆོད་པར་བྱེད་ན་དེ་ནི་གསོད་དགོས། ཡུལ་མི་རྣམས་ཀྱིས་རྡོ་རུབ་བཏང་ནས་གསོད་དགོས་པ་དང་།  
\v 3 མི་དེ་ལ་བདག་གི་གདོང་མདོག་ཀྱང་ལོག་སྟེ་ཁོ་རང་མི་མང་ཁྲོད་ནས་མེད་པར་གཏོང་བར་བྱ། གང་ལ་ཞེ་ན། ཁོས་རང་གི་བུ་རྒྱུད་མོ་ལེག་ལ་ཕུལ་ནས། བདག་གི་གནས་མཆོག་སྦགས་པ་དང་བདག་གི་མཚན་དམ་པ་ཁྱད་དུ་བསད་པའི་ཕྱིར་རོ། །  
\v 4 གལ་སྲིད་མི་དེས་བུ་བུ་མོ་རྣམས་མོ་ལེག་ལ་ཕུལ་བ་དང་། ཡུལ་མི་རྣམས་ཀྱིས་དེ་མ་མཐོང་ཁུལ་བྱས་ཏེ་མི་དེ་མི་གསོད་ན།  
\v 5 མི་དེ་དང་དེའི་ཁྱིམ་མི་ལ་བདག་གི་གདོང་མདོག་ལོག་ཅིང་། མི་དེ་དང་དེའི་རྗེས་སུ་འབྲངས་ནས་མོ་ལེག་དང་ལོག་གཡེམ་བྱེད་པ་ཐམས་ཅད་མི་མང་ལས་མེད་པར་གཏོང་བར་བྱའོ། །  
\v 6 མི་སུ་ཞིག་མོ་པ་དང་ལྷ་པ་རྣམས་ཀྱི་ཕྱོགས་སུ་འཁོར་བ་དང་། དེ་དག་གི་རྗེས་སུ་འབྲངས་ནས་ལོག་གཡེམ་བྱེད་པ་ཡིན་ན། མི་དེ་ལ་བདག་གི་གདོང་མདོག་ལོག་ཅིང་ཁོ་རང་མི་མང་ལས་མེད་པར་གཏོང་བར་བྱའོ། །  
\v 7 ཁྱོད་ཅག་གིས་རང་ཉིད་དམ་པར་བྱོས་ལ་དམ་པར་སྒྱུར་ཅིག ཅི་ལ་ཞེ་ན། བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་པའི་ཕྱིར་རོ། །  
\v 8 ཁྱོད་ཅག་གིས་བདག་གི་སྒྲིག་ཁྲིམས་བརྩི་སྲུང་བྱས་ནས་དེ་བཞིན་དུ་བྱོས་ཤིག བདག་ནི་ཁྱོད་ཅག་དམ་པར་བཟོ་བའི་དཀོན་མཆོག་ཡ་ཝཱེ་ཡིན།  
\v 9 གལ་ཏེ་རང་གི་ཕ་མ་ལ་དམོད་མོ་འདེབས་མཁན་ཡོད་ན་དེ་གསོད་དགོས། སུས་ཕ་མ་ལ་དམོད་མོ་གཏོང་ན། དེའི་སྟེང་ནས་ཁྲག་ལན་འཇལ་དགོས་སོ། །  
\v 10 གཞན་གྱི་ཆུང་མ་སྟེ་རང་གི་ཁྱིམ་མཚེས་གྱི་ཆུང་མ་དང་ལོག་གཡེམ་བྱེད་མཁན་སུ་ཡིན་ཡང་། འཆལ་པོ་འཆལ་མོ་གཉིས་ཀ་གསོད་དགོས།  
\v 11 སུ་ཞིག་རང་གི་ཕ་ཡི་ཆུང་མ་དང་ལུས་འབྲེལ་བྱེད་པ་སྟེ། རང་གི་ཕ་ཡི་ཁོག་སྨད་གཅེར་བུར་འཕུད་པ་ཡིན་ན། དེ་གཉིས་ཀ་གསོད་དགོས་ལ། དེ་གཉིས་ཀའི་སྟེང་ནས་ཁྲག་ལན་འཇལ་དགོས་པ་ཡིན།  
\v 12 སུ་ཞིག་རང་གི་མནའ་མ་དང་ལུས་འབྲེལ་བྱེད་ན་དེ་གཉིས་ཀ་གསོད་དགོས། དེ་དག་གིས་གཉེན་ཚན་བར་འཁྲིག་པ་སྤྱད་པ་ཡིན་པས། ཁོ་ཚོའི་སྟེང་ནས་ཁྲག་ལན་འཇལ་དགོས།  
\v 13 སྐྱེས་པ་ཞིག་བུད་མེད་ལ་ལུས་འབྲེལ་བྱེད་པའི་ཚུལ་བཞིན་དུ་ཕོ་དང་ལུས་འབྲེལ་བྱས་ན། དེ་གཉིས་ཀྱིས་སྐྱུག་བྲོ་བའི་ལས་བྱས་པ་ཡིན་པས་གསོད་དགོས། དེ་དག་གི་སྟེང་ནས་ཁྲག་ལན་འཇལ་དགོས།  
\v 14 སྐྱེས་པ་ཞིག་གིས་ཆུང་མ་བླངས་པ་དང་། ཆུང་མའི་མ་ཡང་བླངས་ན་དེ་ནི་ལོག་སྤྱོད་ཡིན་པས། མི་དེ་གསུམ་པོ་མེ་ཡིས་བསྲེགས་ནས། ཁྱོད་ཚོའི་ཁྲོད་ནས་ལོག་སྤྱོད་མེད་པར་བཟོ་དགོས།  
\v 15 སུ་ཞིག་གིས་ཕྱུགས་ཟོག་རིགས་དང་འཁྲིག་པ་སྤྱད་ན་མི་དེ་གསོད་དགོས་ལ། ཕྱུགས་ཟོག་དེ་ཡང་གསོད་དགོས།  
\v 16 བུད་མེད་ཅིག་ཕྱུགས་ཟོག་རིགས་ཀྱི་ཉེ་སར་བཅར་ནས་དེ་དང་འཁྲིག་པ་སྤྱད་ན། ཁྱོད་ཀྱིས་བུད་མེད་དང་ཕྱུགས་ཟོག་གཉིས་ཀ་གསོད་དགོས། དེ་དག་ངེས་པར་གསོད་དགོས་ལ། དེ་དག་གི་སྟེང་ནས་ཁྲག་ལན་འཇལ་དགོས་པའོ། །  
\v 17 སུ་ཞིག་གིས་རང་གི་ལྕམ་སྲིང་སྟེ། ཕ་ཡི་བུ་མོའམ་ཡང་ན་མ་ཡི་བུ་མོ་ཆུང་མར་བླངས་ཏེ། ཕན་ཚུན་གྱི་ཁོག་སྨད་མཐོང་བ་ཡིན་ན་དེ་ནི་ངོ་ཚ་དགོས་པའི་དོན་ཡིན་པས། དེ་གཉིས་ཀ་རང་གི་མི་རྣམས་ཀྱི་མཐོང་ངོར་རྩ་མེད་དུ་གཏོང་དགོས། དེས་རང་གི་ལྕམ་སྲིང་གི་ཁོག་སྨད་གཅེར་བུར་འཕུད་པ་ཡིན་པས་ཉེས་པ་འཁུར་དགོས་པའོ། །  
\v 18 གལ་ཏེ་སུ་ཞིག་ཟླ་མཚན་འབབ་དུས་ཀྱི་བུད་མེད་དང་ལུས་འབྲེལ་བྱས་ནས། ཁོ་མོའི་ཁོག་སྨད་གཅེར་བུར་འཕུད་པ་དང་། ཁོ་མོའི་ཁྲག་ཁུངས་དམར་རྗེན་དུ་བཏོན་ཏེ། ཁོ་མོས་ཀྱང་རང་གི་ཁྲག་ཁུངས་མངོན་པ་ཡིན་ན། དེ་གཉིས་ཀ་རང་གི་མི་མང་ལས་མེད་པར་གཏོང་དགོས།  
\v 19 མ་ཡི་ལྕམ་སྲིང་དང་ཕ་ཡི་ལྕམ་སྲིང་གི་ཁོག་སྨད་གཅེར་བུར་འཕུད་མི་རུང་། དེ་ནི་རང་གི་གཉེན་ཉེ་གཅེར་བུར་འཕུད་པ་ཡིན་པས། ཁོ་ཚོས་རང་གི་ནག་ཉེས་འཁུར་དགོས་སོ། །  
\v 20 གལ་ཏེ་སུ་ཞིག་ཁུ་བོའི་ཆུང་མ་དང་ལུས་འབྲེལ་བྱས་ན། དེ་ནི་རང་གི་ཁུ་བོའི་ཁོག་སྨད་གཅེར་བུར་འཕུད་པ་ཡིན་པས། དེ་ཚོས་རང་གི་སྡིག་པ་འཁུར་དགོས་ལ་བུ་ཕྲུག་མེད་པར་འཆི་ངེས་ཡིན།  
\v 21 ཡང་སུ་ཞིག་གིས་རང་གི་སྤུན་གྱི་ཆུང་མ་བླངས་ན་དེ་ནི་སྤུན་གྱི་ཁོག་སྨད་གཅེར་བུར་འཕུད་པ་ཡིན་ལ། དེ་ནི་འཆལ་སྤྱོད་ཡིན་པས་ཁོ་ཚོར་བུ་ཕྲུག་མེད་པར་འགྱུར་རོ། །  
\v 22 ཁྱོད་ཚོས་བདག་གི་སྒྲིག་ཁྲིམས་དང་སྲོལ་ཡིག་ཐམས་ཅད་སྲུང་བརྩི་བྱས་ནས་དེ་བཞིན་བྱོས་ཤིག དེ་ནས་བདག་གིས་ཁྱོད་རྣམས་ཁྲིད་དེ་གནས་པར་འགྱུར་བའི་ཡུལ་དེས་ཁྱོད་ཅག་སྐྱུག་པར་མི་བྱའོ། །  
\v 23 ཁྱོད་རྣམས་ནི་བདག་གིས་ཁྱོད་ཅག་གི་མདུན་ནས་བསྐྲད་པའི་མི་རྣམས་ཀྱི་ལུགས་སྲོལ་གྱི་རྗེས་སུ་འབྲང་མི་རུང་སྟེ། ཅི་ལ་ཞེ་ན། དེ་དག་གིས་དོན་མི་ལེགས་པ་དེ་ཐམས་ཅད་བྱས་པས་བདག་ནི་དེ་དག་ལ་ཞེན་པ་གཏིང་ནས་ལོག་ཡོད།  
\v 24 འོན་ཀྱང་བདག་གིས་ཁྱོད་ཚོ་ལ། དེ་དག་གི་ཡུལ་ནི་ཁྱོད་རྣམས་ཀྱིས་རྒྱུན་འཛིན་བྱེད་པ་དང་། བདག་གིས་འོ་མ་དང་སྦྲང་རྩི་བཞུར་བའི་ཡུལ་དེ་ཁྱོད་ཅག་ལ་བགོ་སྐལ་དུ་སྟེར་བར་བྱ་ཞེས་སྨྲས་ཡོད། བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་སྟེ། ཁྱོད་རྣམས་མི་ཐམས་ཅད་ལས་སོ་སོར་འགེར་མཁན་དེ་ཡིན་ནོ། །  
\v 25 ཁྱོད་རྣམས་ཀྱིས་འདབ་ཆགས་དང་སེམས་ཅན་དུད་འགྲོ་གཙང་མི་གཙང་གི་དབྱེ་བ་འབྱེད་དགོས་པ་དང་། བདག་གིས་མི་གཙང་བར་སོ་སོར་ཕྱེས་པའི་འདབ་ཆགས་དང་སེམས་ཅན་དུད་འགྲོའམ། ཡང་ན་ས་སྟེང་གི་ལྟོ་འགྲོ་སྲོག་ཆགས་གང་དང་གང་གི་རྐྱེན་གྱིས་རང་ཉིད་སྐྱུག་བྲོ་བར་བཟོ་མི་རུང་།  
\v 26 ཡ་ཝཱེ་ང་རང་ནི་དམ་པ་ཡིན་པའི་ཕྱིར། ཁྱོད་ཀྱང་བདག་གི་ཆེད་དུ་དམ་པ་ཡིན་དགོས། བདག་གིས་ཁྱོད་ཅག་བདག་གི་ཡིན་པའི་རྐྱེན་གྱིས་མི་ཐམས་ཅད་ལས་སོ་སོར་བཀར་བ་ཡིན་ནོ། །  
\v 27 ཡང་མོ་པ་དང་ལྷ་པ་ནི་སྐྱེས་ཕོ་མོ་སུ་ཡིན་ཡང་གསོད་དགོས་ལ། མི་ཡིས་རྡོ་རུབ་བཏང་སྟེ་གསོད་དགོས་པ་དང་། དེ་དག་གི་སྟེང་ནས་ཁྲག་ལན་འཇལ་དགོས་ཞེས་སྨྲོས་ཤིག་ཅེས་བཀའ་བསྩལ་ཏོ། །   
\c 21
\cl ལེའུ་ཉེར་གཅིག་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 མཆོད་དཔོན་དམ་པར་འགྱུར་བའི་ཁྲིམས།  
\p
\v 1 དེ་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ཨ་རོན་གྱི་བུ་རྒྱུད་ལས་མཆོད་དཔོན་ཡིན་པ་རྣམས་ལ་འདི་ལྟར་སྨྲོས་ཤིག མཆོད་དཔོན་གྱིས་རང་གི་མི་མང་ཁྲོད་ཀྱི་འདས་པོའི་ཕྱིར་དུ་རང་ཉིད་སྦག་མི་རུང་།  
\v 2 དེ་ཡང་རང་གི་རྩ་བའི་གཉེན་ཉེ་སྟེ། ཁོའི་ཕ་མ་དང་། བུ་བུ་མོ་དང་། སྤུན་མཆེད་དང་།  
\v 3 ཡང་ན་ད་དུང་གནས་ལ་མ་སོང་བའི་ན་ཆུང་བུ་མོ་སྟེ་ལྕམ་སྲིང་ཡིན་པ་བཅས་ནི་འཕུད་དགོས། དེ་ནི་ཁོའི་ལྕམ་སྲིང་ཡིན་པའི་རྐྱེན་གྱིས་རང་ཉིད་མི་གཙང་བར་བྱས་ཆོག  
\v 4 མཆོད་དཔོན་ནི་རང་གི་མི་མང་ཁྲོད་ཀྱི་འགོ་དཔོན་ཡིན་པས། རང་ཉིད་སྦགས་ནས་མི་གཙང་བར་བྱེད་མི་རུང་ངོ་། །  
\v 5 མགོ་སྤྱི་ཐེར་དུ་གཏོང་བ་དང་ཨག་ཚོམ་གྱི་སྣེ་མོ་གཅོད་མི་རུང་ལ། རང་ལུས་ཀྱི་ཤ་སྐྱི་གང་ཡང་གཅོད་མི་རུང་།  
\v 6 ཁོ་རྣམས་ནི་དཀོན་མཆོག་གི་ཆེད་དུ་དམ་པ་ཡིན་དགོས་ལ། རང་གི་དཀོན་མཆོག་གི་མཚན་ཁྱད་དུ་གསོད་མི་རུང་། དཀོན་མཆོག་ཡ་ཝཱེའི་མེ་མཆོད་དེ་དཀོན་མཆོག་གི་ཞལ་ཟས་ནི་ཁོ་རྣམས་ཀྱིས་འདྲེན་པ་ཡིན་པས། ཁོ་ཚོ་ནི་དམ་པ་ཡིན་དགོས་སོ། །  
\v 7 མཆོད་དཔོན་གྱིས་སྨད་འཚོང་མ་དང་ཡང་ན་གཞན་གྱིས་སྦགས་པའི་བུད་མེད་ནི་ཆུང་མར་ལེན་མི་རུང་ལ། ཁྱོ་གས་ཕྱི་ལ་སྤྱུགས་པའི་བུད་མེད་ཀྱང་ཆུང་མར་ལེན་མི་རུང་། ཅི་ལ་ཞེ་ན། ཁོ་ནི་རང་གི་དཀོན་མཆོག་གི་ཆེད་དུ་དམ་པ་ཡིན་པས་སོ། །  
\v 8 མཆོད་དཔོན་གྱིས་ཁྱོད་ཀྱི་དཀོན་མཆོག་ལ་ཞལ་ཟས་འདྲེན་པས་ཁྱོད་ཀྱིས་ཁོ་ནི་དམ་པར་བཟོ་དགོས། ཁྱོད་ཀྱིས་མཆོད་དཔོན་དམ་པར་བརྩི་དགོས་ཏེ། ཅིའི་ཕྱིར་ཞེ་ན། བདག་ནི་ཁྱོད་རྣམས་དམ་པར་བཟོ་བའི་དཀོན་མཆོག་ཡ་ཝཱེ་དང་དམ་པ་ཡིན་པའི་ཕྱིར་རོ། །  
\v 9 མཆོད་དཔོན་གྱི་བུ་མོ་སྨད་འཚོང་མ་བྱས་ནས་རང་ཉིད་སྦགས་ན། རང་གི་ཕ་བཙོག་པར་བཟོས་པ་ཡིན་པས་ཁོ་མོ་མེས་བསྲེག་དགོས་སོ། །  
\v 10 སྤུན་ཟླ་ཚོའི་ཁྲོད་ནས་མཆོད་དཔོན་ཆེན་པོ་བྱེད་པ་སྟེ། མགོ་ལ་འབྱུག་སྣུམ་བླུགས་པ་དང་། ལས་འགན་དམ་པ་རྒྱུན་འཛིན་བྱས་ཤིང་འཕགས་གོས་མནབས་པ་དེས། མགོ་ཟིང་ནས་སྐྲ་བཤིག་པར་མི་བྱེད་པ་དང་གོས་ཀྱང་གཤག་མི་རུང་།  
\v 11 བེམ་པོ་གང་ཡིན་ཡང་དེའི་ཉེ་སར་བཅར་མི་རུང་སྟེ། རང་གི་ཕ་མའི་ཆེད་དུ་ཡང་རང་ཉིད་སྦག་མི་རུང་ངོ་། །  
\v 12 དཀོན་མཆོག་གི་གནས་མཆོག་འབག་པར་མི་བྱེད་པའི་ཕྱིར་དུ། མཆོད་དཔོན་ཆེན་པོ་གནས་མཆོག་གི་ཕྱི་རུ་འགྲོ་མི་རུང་སྟེ། ཁོའི་ལུས་སྟེང་དུ་དཀོན་མཆོག་གི་འབྱུག་སྣུམ་དམ་པ་ཡོད་པའི་རྐྱེན་གྱིས། དཀོན་མཆོག་གི་གནས་མཆོག་འབག་པར་མི་བྱེད་དེ། གནས་མཆོག་གི་ཕྱི་རུ་འགྲོ་མི་རུང་། བདག་ནི་ཡ་ཝཱེ་ཡིན་ནོ། །  
\v 13 ཁོས་ན་ཆུང་བུ་མོ་ཆུང་མར་ལེན་དགོས་ཏེ།  
\v 14 མཆོད་དཔོན་ཆེན་པོས་ཡུགས་མོ་དང་ཁྱོ་གས་ཕྱི་ལ་སྤྱུགས་པའི་བུད་མེད་དང་། ཡང་ན་གཞན་གྱིས་སྦགས་པའི་སྨད་འཚོང་མ་བཅས་ནི་ཆུང་མར་ལེན་མི་རུང་། ཁོས་རང་གི་མི་མང་ཁྲོད་ཀྱི་ན་ཆུང་བུ་མོ་འབའ་ཞིག་ཆུང་མར་ལེན་དགོས།  
\v 15 ཁོས་རང་གི་མི་རིགས་ཀྱི་ཁྲོད་དུ་རང་གི་བུ་རྒྱུད་བཙོག་པར་བཟོ་མི་རུང་། ཅི་ལ་ཞེ་ན། བདག་ནི་ཁོ་རང་དམ་པར་བཟོ་མཁན་དཀོན་མཆོག་ཡ་ཝཱེ་ཡིན་ཞེས་པའོ་གསུངས་སོ།།   
\p
\v 16 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 17 ཁྱོད་ཀྱིས་ཨ་རོན་ལ་འདི་ལྟར་སྒོས་ཤིག ཁྱོད་ཀྱི་རིགས་རྒྱུད་ལས་མི་རབས་ནས་མི་རབས་བར། དབང་བོ་སྐྱོན་ཅན་སུ་ཡིན་ཡང་ཚུར་འོངས་ནས་སོ་སོའི་དཀོན་མཆོག་ལ་ཞལ་ཟས་འདྲེན་མི་རུང་།  
\v 18 ཅི་ལ་ཞེ་ན། དབང་བོ་སྐྱོན་དང་ལྡན་པ་ནི། ལོང་བའམ། ཞ་བོའམ། ཁ་ངོ་སྐྱོན་ཅན་ནམ། ཡན་ལག་གཅིག་རིང་དྲགས་པའམ།  
\v 19 རྐང་པའམ་ལག་པར་ཆག་གྲུམ་ཤོར་བའམ།  
\v 20 སྒུར་པོ་དང་། མིའུ་ཐུང་དང་། མིག་མཛེར་ཅན་དང་། རྔོའམ་རྨ་སྐོགས་ཅན་དང་། རླིག་འབྲས་བསྣད་པ་བཅས་ནི་ཚུར་འོང་མི་རུང་ངོ་། །  
\v 21 མཆོད་དཔོན་ཨ་རོན་གྱི་རིགས་རྒྱུད་ལས་དབང་བོ་སྐྱོན་ཅན་སུ་ཡིན་ཡང་། ཚུར་འོངས་ནས་དཀོན་མཆོག་ཡ་ཝཱེའི་མེ་མཆོད་འབུལ་མི་རུང་། དེའི་དབང་བོར་སྐྱོན་ཡོད་པས་ཚུར་འོངས་ནས་དཀོན་མཆོག་ལ་ཞལ་ཟས་འདྲེན་མི་རུང་ངོ་། །  
\v 22 རང་གི་དཀོན་མཆོག་གི་ཞལ་ཟས་ནི་ཀུན་ལས་དམ་པའམ་དམ་པ་གང་ཡིན་ཡང་ཁོས་དེ་ཟོས་ཆོག་མོད།  
\v 23 འོན་ཀྱང་། ཁོ་རང་ཡོལ་བའི་མདུན་དུ་འོང་མི་རུང་ལ། མཆོད་ཁྲིའི་ཉེ་སར་ཡང་བཅར་མི་རུང་སྟེ། ཁོའི་དབང་བོར་སྐྱོན་ཡོད་པ་དང་བདག་གི་གནས་མཆོག་མི་སྦག་པའི་ཕྱིར་རོ། །བདག་ནི་དེ་རྣམས་དམ་པར་བཟོ་བའི་དཀོན་མཆོག་ཡ་ཝཱེ་ཡིན་ནོ་ཞེས་པའོ་གསུངས།  
\v 24 དེ་བས་མོ་ཤེ་ཡིས་ཨ་རོན་དང་ཁོའི་བུ་རྣམས་དང་། ཡེས་ར་ཨེལ་པ་ཐམས་ཅད་ལ་བཀའ་བསྒོས་སོ། །   
\c 22
\cl ལེའུ་ཉེར་གཉིས་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 མཆོད་རྫས་བཟའ་བའི་ཁྲིམས།  
\p
\v 1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 2 ཁྱོད་ཀྱིས་ཨ་རོན་དང་དེའི་བུ་རྣམས་ལ་འདི་ལྟར་བསྒོ་བར་གྱིས། ཁྱོད་ཅག་གིས་བདག་གི་མཚན་དམ་པ་ཁྱད་དུ་མི་གསོད་པའི་ཕྱིར། ཡེས་ར་ཨེལ་པ་རྣམས་ཀྱིས་བདག་གི་ཆེད་དུ་དམ་པར་བསྔོས་པའི་རྫས་རྣམས་གཟབ་གཟབ་བྱས་ནས་བསྲུང་དགོས་ལ། བདག་ནི་ཡ་ཝཱེ་ཡིན་ནོ་ཞེས་དང་།  
\v 3 ཡང་དེ་དག་ལ་འདི་ལྟར་སྨྲོས་ཤིག ཁྱོད་ཀྱི་རིགས་རྒྱུད་ཀྱི་མི་རབས་ཀུན་ལས་སུ་ཡིན་ཡང་། ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེའི་ཆེད་དུ་དམ་པར་བསྔོས་པའི་རྫས་དང་ཉེ་བར་གཅར་མཁན་དེ་མི་གཙང་བ་ཡིན་ན། མི་དེ་ནི་ངའི་སྤྱན་སྔ་ནས་མེད་པར་གཏོང་ངེས་ཡིན། བདག་ནི་ཡ་ཝཱེ་ཡིན་ནོ། །  
\v 4 ཨ་རོན་གྱི་བུ་རྒྱུད་ལས་མཛེ་ནད་ཅན་དང་། ཡང་ན་འཛིར་ནད་ཡོད་པ་སུ་ཡིན་ཡང་གཙང་མར་མ་གྱུར་བར་དུ། རྫས་དམ་པ་དག་ལས་བཟའ་མི་རུང་། སུ་ཞིག་གིས་བེམ་པོའི་རྐྱེན་གྱིས་མི་གཙང་བར་གྱུར་པའི་རྫས་དང་ཁུ་བ་ཟགས་པའི་མི་ལ་རེག་པའམ།  
\v 5 ཡང་ན་ཁོ་རང་མི་གཙང་བར་བཟོ་བའི་ལྟོ་འགྲོ་སྲོག་ཆགས་སམ་མི་གང་དང་གང་ལ་རེག་པ་ཡིན་ན། མི་དེར་མི་གཙང་བའི་ཆ་གང་ཞིག་ཡོད་ནའང་།  
\v 6 དེ་རྣམས་ལ་རེག་པའི་མི་ནི་དགོང་མོའི་བར་དུ་མི་གཙང་བ་ཡིན་ཏེ། ལུས་པོ་ཆུས་མ་བཀྲུས་ན་རྫས་དམ་པ་ལས་བཟའ་མི་རུང་།  
\v 7 ཉི་མ་ནུབ་པའི་དུས་སུ་ཁོ་རང་གཙང་མར་འགྱུར་ཞིང་། དེའི་རྗེས་སུ་རྫས་དམ་པ་ལས་བཟའ་རུང་བ་ཡིན། ཅིའི་ཕྱིར་ཞེ་ན། དེ་ནི་ཁོའི་ཁ་ཟས་ཡིན་པའི་ཕྱིར་རོ། །  
\v 8 ཡང་རང་ཉིད་མི་སྦག་པའི་ཕྱིར་ཁོས་རང་བཞིན་གྱིས་ཤི་བའམ་གཅན་གཟན་གྱིས་བསད་པའི་ཤ་ནི་བཟའ་མི་རུང་། བདག་ནི་ཡ་ཝཱེ་ཡིན།  
\v 9 བདག་གི་བཀའ་རྣམས་ཁྱད་དུ་བསད་པའི་རྐྱེན་གྱིས་རང་གི་སྡིག་པ་ཁུར་ནས་འཆི་བར་མི་འགྱུར་བའི་ཆེད་དུ་བསྲུང་དགོས། བདག་ནི་དེ་དག་དམ་པར་བྱེད་པའི་དཀོན་མཆོག་ཡ་ཝཱེ་ཡིན་པའོ། །  
\v 10 དེ་ཡང་ཕྱི་མི་སུ་ཡིན་ཡང་རྫས་དམ་པ་རྣམས་བཟའ་མི་རུང་སྟེ། མཆོད་དཔོན་ཚང་གི་མགྲོན་པོའམ་གླ་པ་སུ་ཡིན་ཡང་རྫས་དམ་པ་ལས་བཟའ་མི་རུང་།  
\v 11 གལ་སྲིད་མཆོད་དཔོན་གྱིས་རང་གི་དངུལ་སྤྲད་ནས་ཉོས་པའི་མི་ཡིན་ན་དེས་རྫས་དམ་པ་བཟའ་རུང་བ་དང་། རང་ཁྱིམ་ནས་སྐྱེས་པ་དག་གིས་ཀྱང་དེའི་ཁ་ཟས་ལས་བཟའ་རུང་བ་ཡིན་ནོ། །  
\v 12 གལ་སྲིད་མཆོད་དཔོན་གྱི་བུ་མོ་ཕྱི་མི་ཞིག་ལ་གཉེན་བསྒྲིགས་ན། དེས་འདེགས་མཆོད་ཀྱི་རྫས་དམ་པ་བཟའ་མི་རུང་བ་ཡིན།  
\v 13 ཅི་སྟེ་མཆོད་དཔོན་གྱི་བུ་མོ་ཡུགས་མོ་རུ་ལུས་པའམ་ཁྱོ་གས་བཟའ་འཐོར་བྱས་ནས། ཕྲུ་གུ་མེད་པར་གཞོན་དུས་དང་འདྲ་བར་ཕ་གཞིས་སུ་ཕྱིར་ལོག་ན། རང་གི་ཕ་ཡི་ཁ་ཟས་ལས་བཟའ་རུང་མོད། འོན་ཀྱང་ཕྱི་མི་སུ་ཡིན་ཡང་དེ་ལས་བཟའ་མི་རུང་ངོ་། །  
\v 14 གལ་སྲིད་མི་ཞིག་གིས་མ་ཤེས་པར་རྫས་དམ་པ་ལས་ཟོས་ན། དེས་རྫས་དམ་པའི་ཁར་ལྔ་ཆ་གཅིག་བསྣན་ཏེ་མཆོད་དཔོན་ལ་སྤྲོད་དགོས།  
\v 15 ཡང་ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་ཕུལ་བའི་རྫས་དམ་པ་ནི་མཆོད་དཔོན་གྱིས་སྦག་མི་རུང་སྟེ།  
\v 16 དེ་བཞིན་བྱས་ན་ཁོ་རྣམས་ཀྱིས་རྫས་དམ་པ་ཟོས་ནས་རང་གིས་རང་ལ་ནག་ཉེས་འགེལ་བར་འགྱུར། ཅི་ལ་ཞེ་ན། བདག་ནི་དེ་རྣམས་དམ་པར་བྱེད་པའི་དཀོན་མཆོག་ཡ་ཝཱེ་ཡིན་ཞེས་པའོ་གསུངས་སོ། །   
\s1 ཐུགས་སུ་ལྡན་པའི་མཆོད་པ།  
\p
\v 17 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 18 ཁྱོད་ཀྱིས་ཨ་རོན་དང་ཁོའི་བུ་རྣམས་དང་། ཡེས་ར་ཨེལ་པ་ཐམས་ཅད་ལ་འདི་ལྟར་སྒོས་ཤིག ཡེས་ར་ཨེལ་གྱི་ཁྱིམ་རྒྱུད་དང་ཡེས་ར་ཨེལ་གྱི་ཁྲོད་དུ་གནས་པའི་བྱེས་པ་རྣམས་ལས་སུ་ཞིག་གིས་དཀོན་མཆོག་ཡ་ཝཱེ་ལ་སྦྱིན་སྲེག་གི་མཆོད་པ་འབུལ་ན། དམ་བཅས་པ་བཞིན་དུ་སྒྲུབ་པའམ་ཡིད་མོས་མཆོད་པ་གང་ཡིན་ཡང་།  
\v 19 སྐྱོན་གང་ཡང་མེད་པའི་བ་གླང་ཞིག་གམ། ཡང་ན་ཕོ་ལུག་དང་། ཡང་ན་ར་ཕོ་ཞིག་འབུལ་དགོས་ཤིང་། དེ་ལྟར་བྱས་ན་ཁྱོད་རྣམས་ད་གཟོད་ཁོང་གི་ཐུགས་སུ་ལྡན་པ་ཡིན།  
\v 20 སྐྱོན་དང་ལྡན་པ་གང་ཡིན་ཡང་འབུལ་མི་རུང་སྟེ། དེ་ལྟར་བྱས་ན་ཁོང་གི་ཐུགས་སུ་མི་ལྡན་པའི་ཕྱིར་རོ། །  
\v 21 གལ་སྲིད་སུ་ཞིག་གིས་དམ་བཅས་པ་བཞིན་དུ་བསྒྲུབ་པའི་ཆེད་དུའམ། ཡིད་མོས་མཆོད་པ་རུ་བ་ཁྱུ་དང་ར་ལུག་གི་ཁྱུ་ནས་དཀོན་མཆོག་ཡ་ཝཱེ་ལ་ཞི་བདེའི་མཆོད་པ་འབུལ་ན། ཁོང་གི་ཐུགས་སུ་ལྡན་པའི་ཕྱིར་མཆོད་པ་དེ་ནི་ནད་མེད་པ་དང་སྐྱོན་གང་ཡང་མེད་པ་ཞིག་ཡིན་དགོས།  
\v 22 ལོང་བའམ། ཞ་བོའམ། སུག་རྡུམ་མམ། ཤ་མཛེར་ཅན་དང་རྔོ་ཅན་ནམ། རྨ་ཅན་བཅས་གང་ཡིན་ཡང་དཀོན་མཆོག་ཡ་ཝཱེ་ལ་འབུལ་མི་རུང་སྟེ། མཆོད་ཁྲིའི་སྟེང་དུ་དཀོན་མཆོག་ཡ་ཝཱེ་ལ་མེ་མཆོད་དུ་འབུལ་བར་མི་རིགས་སོ། །  
\v 23 བ་གླང་ངམ་ལུ་གུ་གང་ཡིན་ཡང་། སུག་པ་གཅིག་རིང་དྲགས་པའམ་ཐུང་དྲགས་ན། དེ་ནི་ཡིད་མོས་མཆོད་པ་འབའ་ཞིག་ཏུ་འབུལ་རུང་བ་ཡིན་ལ། དམ་བཅས་པ་བཞིན་དུ་བསྒྲུབ་པའི་ཆེད་དུ་ཡིན་ན་དེ་ནི་ཐུགས་ལ་མི་ལྡན་ནོ། །  
\v 24 ཡང་རླིག་འབྲས་བསྣད་པའམ། བརྫིས་པའམ། གཤགས་པའམ། བཅད་པ་སོགས་གང་ཡིན་ཡང་དཀོན་མཆོག་ཡ་ཝཱེ་ལ་འབུལ་མི་རུང་ཞིང་། ཁྱོད་ཅག་གི་ཡུལ་དུ་དེ་ལྟ་བུ་བྱེད་མི་རུང་ངོ་། །  
\v 25 ཕྱི་མིའི་ལག་ནས་ཐོབ་པའི་སྲོག་ཆགས་དེའི་རིགས་གང་དང་གང་ཡིན་ཡང་། ཁྱོད་རྣམས་ཀྱི་དཀོན་མཆོག་གི་ཞལ་ཟས་སུ་འབུལ་མི་རུང་། ཅི་ལ་ཞེ་ན། དེ་དག་ལ་ཡན་ལག་མི་ཚང་བ་དང་སྐྱོན་ཡོད་པས། ཁྱོད་རྣམས་ཀྱི་ཕྱིར་དེ་དག་ཐུགས་སུ་ལྡན་པར་མི་འགྱུར་བས་སོ་ཞེས་པའོ་གསུངས་སོ།།   
\p
\v 26 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 27 བཙས་མ་ཐག་གི་བ་ཕྲུག་དང་། ལུ་གུའམ། རེའུ་བཅས་ནི་ཉིན་བདུན་ལ་མ་དང་མཉམ་དུ་འདུག་དགོས་ལ། ཉིན་བརྒྱད་པ་ནས་བཟུང་སྟེ་མེ་མཆོད་ཀྱི་མཆོད་པ་བྱས་ནས་དཀོན་མཆོག་ཡ་ཝཱེ་ལ་འབུལ་རུང་བ་དང་། དེ་ནི་ཁོང་གི་ཐུགས་སུ་ལྡན་པ་ཡིན།  
\v 28 བ་གླང་དང་ར་ལུག་གང་ཡིན་ཡང་། དེ་དང་དེའི་ཕྲུ་གུ་གཉིས་ཉིན་གཅིག་ལ་བཤའ་མི་རུང་བ་དང་།  
\v 29 ཁྱོད་རྣམས་ཀྱིས་དམར་མཆོད་བཤས་ནས་དཀོན་མཆོག་ཡ་ཝཱེ་ལ་གཏང་རག་གི་མཆོད་པ་འབུལ་བའི་ཚེ། ཁྱོད་ཅག་གིས་ཁོང་གི་ཐུགས་སུ་ལྡན་པ་ཞིག་འབུལ་དགོས་སོ། །  
\v 30 དེ་ནི་ཉིན་དེ་རང་དུ་བཟའ་དགོས་པ་དང་། ཞོགས་པའི་བར་དུ་ཅི་ཡང་ལུས་སུ་འཇུག་མི་རུང་། བདག་ནི་ཡ་ཝཱེ་ཡིན་ནོ། །  
\v 31 ཁྱོད་རྣམས་ཀྱིས་བདག་གི་བཀའ་རྣམས་བསྲུངས་ནས་དེ་བཞིན་དུ་བསྒྲུབ་དགོས། བདག་ནི་ཡ་ཝཱེ་ཡིན་ནོ། །  
\v 32 བདག་གི་མཚན་དམ་པ་ཁྱད་དུ་མ་གསོད་ཅིག བདག་ནི་ཡེས་ར་ཨེལ་པ་རྣམས་ཀྱི་ཁྲོད་དུ་དམ་པར་བཀུར་ཞིང་། བདག་ནི་ཁྱོད་ཅག་དམ་པར་བཟོ་མཁན་དཀོན་མཆོག་ཡ་ཝཱེ་ཡིན་ལ།  
\v 33 ཁྱོད་ཅག་གི་དཀོན་མཆོག་ཡིན་པའི་ཆེད་དུ། ཁྱོད་རྣམས་ཨེ་ཅིབ་ཡུལ་ནས་ཕྱི་རོལ་ཏུ་ཁྲིད་འོངས་པ་དང་། བདག་ནི་ཡ་ཝཱེ་ཡིན་ནོ་ཞེས་གསུངས་སོ། །   
\c 23
\cl ལེའུ་ཉེར་གསུམ་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 དཀོན་མཆོག་ཡ་ཝཱེའི་དུས་ཆེན།  
\p
\v 1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 2 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག གཤམ་དུ་བཀོད་པ་ནི་བདག་གི་དུས་ཆེན་རྣམས་ཏེ། ཁྱོད་རྣམས་ཀྱིས་དམ་པའི་འདུ་འཛོམས་སུ་ཁྱབ་བསྒྲགས་བྱེད་དགོས་པའི་བདག་གི་དུས་ཆེན་རྣམས་ཡིན་ནོ། །   
\s1 ངལ་གསོ་བའི་ཉིན་མོ།  
\p
\v 3 ཉིན་དྲུག་གི་རིང་ལ་ལས་ཀ་བྱེད་ཅིང་ཉིན་བདུན་པ་ནི་ངལ་གསོ་ཡོངས་སུ་རྫོགས་པའི་ཉིན་མོ་ཡིན་ལ། འདུ་འཛོམས་དམ་པ་ཡོད་དགོས་ཏེ་ལས་ཀ་གང་ཡང་བྱེད་མི་རུང་། དེ་ནི་ཁྱོད་རྣམས་ཀྱི་སྡོད་གནས་ཐམས་ཅད་དུ་དཀོན་མཆོག་ཡ་ཝཱེའི་ཕྱིར་བསྲུང་དགོས་པའི་ངལ་གསོ་བའི་ཉིན་མོ་ཡིན་ནོ། །   
\s1 པེ་སག་གི་དུས་ཆེན་དང་སྐྱུར་མེད་བག་ལེབ་ཀྱི་དུས་ཆེན།  
\p
\v 4 གཤམ་དུ་བཀོད་པ་ནི་ཁྱོད་ཅག་གིས་དུས་ལྟར་འདུ་འཛོམས་དམ་པ་རུ་བསྒྲག་དགོས་པའི་དཀོན་མཆོག་ཡ་ཝཱེའི་དུས་ཆེན་རྣམས་ཡིན་ནོ། །  
\v 5 ཟླ་བ་དང་པོའི་ཚེས་བཅུ་བཞི་\f + \ft འདི་ནི་སྤྱི་ཟླ་གསུམ་པ་ཡིན་མོད། འོན་ཀྱང་ཡ་ཧུ་དཱ་མི་རིགས་ཀྱི་སྐད་དུ་ལོ་གསར་པའི་ཟླ་དང་པོ་ལ་ངོས་འཛིན་དགོས། \f*ཡི་ས་སྲོས་ཀྱི་དུས་ནི་དཀོན་མཆོག་ཡ་ཝཱེའི་པེ་སག་གི་དུས་ཆེན་ཡིན།  
\v 6 ཟླ་བ་དེའི་ཚེས་བཅོ་ལྔ་ནི་དཀོན་མཆོག་ཡ་ཝཱེའི་ཕྱིར་སྲུང་བའི་སྐྱུར་མེད་བག་ལེབ་ཀྱི་དུས་ཆེན་ཡིན་ཏེ། ཁྱོད་ཅག་གིས་ཉིན་བདུན་གྱི་རིང་ལ་སྐྱུར་མེད་བག་ལེབ་བཟའ་དགོས།  
\v 7 ཉིན་དང་པོར་འདུ་འཛོམས་དམ་པ་ཡོད་དགོས་ཤིང་རྒྱུན་ལྡན་གྱི་ལས་ཀ་གང་ཡང་བྱེད་མི་རུང་།  
\v 8 འོན་ཀྱང་དཀོན་མཆོག་ཡ་ཝཱེ་ལ་ཉིན་བདུན་གྱི་རིང་མེ་མཆོད་འབུལ་དགོས། ཉིན་བདུན་པར་འདུ་འཛོམས་དམ་པ་ཡོད་དགོས་ལ། རྒྱུན་ལྡན་གྱི་ལས་ཀ་གང་ཡང་བྱེད་མི་རུང་ཞེས་པའོ་གསུངས་སོ། །   
\s1 ཐོག་ཕུད་དུས་ཆེན།  
\p
\v 9 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 10 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག ཁྱོད་རྣམས་བདག་གིས་ཁྱོད་ཅག་ལ་གནང་བའི་ཡུལ་དུ་སླེབས་ནས་ལོ་ཏོག་བསྡུ་བའི་ཚེ། ཐོག་ཕུད་ལོ་ཏོག་གི་ཚར་ཕོན་གཅིག་ཁྱེར་འོངས་ཏེ་མཆོད་དཔོན་ལ་སྤྲོད་དགོས།  
\v 11 ཁྱོད་རྣམས་ཁོང་གི་ཐུགས་སུ་ལྡན་པའི་ཕྱིར་དུ། མཆོད་དཔོན་གྱིས་ཚར་ཕོན་དེ་དཀོན་མཆོག་ཡ་ཝཱེའི་དྲུང་དུ་ཕར་གཡོ་ཚུར་གཡོ་བྱེད་ཅིང་། ངལ་གསོ་ཉིན་མོའི་ཕྱི་ཉིན་མཆོད་དཔོན་གྱིས་དེ་གཡོ་བར་བྱེད་དགོས།  
\v 12 ཚར་ཕོན་གཡོ་བའི་ཉིན་མོར་ཁྱོད་རྣམས་ཀྱིས་ལོ་གཅིག་ཅན་གྱི་ལུ་གུ་ཕོ་སྐྱོན་མེད་པ་ཞིག་དཀོན་མཆོག་ཡ་ཝཱེ་ལ་སྦྱིན་སྲེག་ཏུ་འབུལ་དགོས།  
\v 13 དེ་དང་མཉམ་དུ་འབུལ་བའི་འབྲུ་མཆོད་ནི་སྣུམ་བསྲེས་གྲོ་ཞིབ་ཨེ་ཕཱ་ཡི་བཅུ་ཆ་གཉིས་ཡིན་ཏེ། དཀོན་མཆོག་ཡ་ཝཱེ་ལ་འབུལ་བའི་དྲི་ཞིམ་མེ་མཆོད་ཡིན་པ་དང་། དེ་དང་མཉམ་དུ་འབུལ་བའི་སྐྱེམས་མཆོད་ནི་རྒུན་ཆང་རྫ་བུམ་གྱི་བཞི་ཆ་གཅིག་ཡིན་ནོ། །  
\v 14 བག་ལེབ་དང་འབྲུ་རྔོས་མའམ། སྙེ་མ་གསར་པ་བཅས་གང་ཡིན་ཡང་། ཁྱོད་རྣམས་ཀྱིས་མཆོད་པ་འདི་རྣམས་ཁྱེར་འོངས་ནས་ཁྱོད་ཅག་གི་དཀོན་མཆོག་ལ་འབུལ་བའི་ཉིན་མོའི་བར་དུ་བཟའ་མི་རུང་སྟེ། ཁྱོད་རྣམས་ཀྱི་སྡོད་གནས་ཐམས་ཅད་དུ། འདི་ནི་ཁྱོད་ཅག་གི་མི་རབས་ནས་མི་རབས་བར་དུས་གཏན་གྱི་སྒྲིག་ཁྲིམས་ཡིན་དགོས་སོ། །   
\s1 བདུན་ཕྲག་རྣམས་ཀྱི་དུས་ཆེན།  
\p
\v 15 དེ་ཡང་ཁྱོད་རྣམས་ཀྱིས་རང་ཉིད་ཀྱི་ཕྱིར་ངལ་གསོ་ཉིན་མོའི་ཕྱི་ཉིན་ཏེ། འབྲུ་རིགས་ཀྱི་ཚར་ཕོན་དེ་གཡོབ་མཆོད་དུ་ཕུལ་བའི་ཉིན་མོ་དེ་ནས་བཟུང་། ངལ་གསོ་བའི་ཉིན་མོ་བདུན་ཏག་ཏག་བགྲང་དགོས་ལ།  
\v 16 ངལ་གསོ་བའི་ཉིན་མོ་ཨང་བདུན་པའི་ཕྱི་ཉིན་ཏེ་བསྡོམས་པས་ཉིན་ལྔ་བཅུ་ཡིན་ལ། ཁྱོད་རྣམས་ཀྱིས་འབྲུ་མཆོད་གསར་པ་ཞིག་དཀོན་མཆོག་ཡ་ཝཱེ་ལ་ཕུལ་ཞིག  
\v 17 ཁྱོད་ཅག་གི་སྡོད་གནས་དག་ལས་གྲོ་ཞིབ་བྲེའི་བཅུ་ཆ་གཉིས་བླངས་ཏེ། གཡོབ་མཆོད་ཀྱི་བག་ལེབ་སྐྱུར་མ་གཉིས་བསྲེགས་ནས། དཀོན་མཆོག་ཡ་ཝཱེ་ལ་ཐོག་ཕུད་ཀྱི་ལོ་ཏོག་འབུལ་དགོས།  
\v 18 ཡང་ལོ་གཅིག་ཅན་གྱི་ལུ་གུ་ཕོ་སྐྱོན་མེད་པ་བདུན་དང་། སྒོ་ཕྱུགས་ལས་གླང་ཐུག་གཅིག་དང་ལུག་ཐུག་གཉིས་བཅས་བག་ལེབ་དང་མཉམ་དུ་འབུལ་དགོས། དེ་དག་ནི་འབྲུ་མཆོད་དང་སྐྱེམས་མཆོད་མཉམ་དུ་དཀོན་མཆོག་ཡ་ཝཱེ་ལ་སྦྱིན་སྲེག་ཏུ་འབུལ་བ་དང་། དཀོན་མཆོག་ཡ་ཝཱེ་ལ་དྲི་ཞིམ་མེ་མཆོད་དུ་འབུལ་དགོས།  
\v 19 ཡང་ཁྱོད་རྣམས་ཀྱིས་ར་ཕོ་ཞིག་སྡིག་བཤགས་མཆོད་པ་དང་ལོ་གཅིག་ཅན་གྱི་ལུ་གུ་ཕོ་གཉིས་ཞི་བདེའི་མཆོད་པ་རུ་འབུལ་དགོས་པ་དང་།  
\v 20 མཆོད་དཔོན་གྱིས་དེ་རྣམས་དང་ལོ་ཏོག་གི་ཕུད་ཀྱིས་བཟོས་པའི་བག་ལེབ། ལུ་གུ་གཉིས་བཅས་མཉམ་དུ་དཀོན་མཆོག་ཡ་ཝཱེའི་དྲུང་དུ་ཕར་གཡོ་ཚུར་གཡོ་བྱས་ནས་གཡོབ་མཆོད་དུ་འབུལ་དགོས། འདི་རྣམས་ནི་དཀོན་མཆོག་ཡ་ཝཱེའི་རྫས་དམ་པ་ཡིན་པས་མཆོད་དཔོན་ལ་དབང་བ་ཡིན་ནོ། །  
\v 21 ཉིན་མོ་དེར་ཁྱོད་ཅག་གིས་འདུ་འཛོམས་དམ་པ་ཡིན་པ་བསྒྲག་དགོས་ལ། རྒྱུན་ལྡན་གྱི་ལས་ཀ་གང་ཡང་བྱེད་མི་རུང་། ཁྱོད་ཅག་གི་སྡོད་གནས་ཐམས་ཅད་དུ། དེ་ནི་ཁྱོད་རྣམས་ཀྱི་མི་རབས་ནས་མི་རབས་བར་དུས་གཏན་གྱི་སྒྲིག་ཁྲིམས་ཡིན་དགོས་སོ། །  
\v 22 ཁྱོད་རྣམས་ཀྱིས་རང་རང་གི་ས་ཞིང་ལས་ལོ་ཏོག་བསྡུ་བའི་ཚེ། ས་ཞིང་གི་གྲུ་ཟུར་བར་དུ་ཡོངས་སུ་བསྡུ་མི་རུང་། ལོ་ཏོག་སར་ལྷུང་བ་རྣམས་ཀྱང་བཏུ་མི་རུང་། དེ་ནི་དབུལ་པོ་དང་བྱེས་པ་དག་གི་ཕྱིར་དུ་འཇོག་དགོས། བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན་ཞེས་པའོ་གསུངས་སོ། །   
\s1 དུང་འབུད་དུས་ཆེན།  
\p
\v 23 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 24 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག ཟླ་བ་བདུན་པའི་ཚེས་དང་པོ་ནི་ཁྱོད་རྣམས་ཀྱིས་ངལ་གསོ་ཡོངས་སུ་རྫོགས་པའི་ཉིན་མོ་རུ་བསྲུང་བ་དང་། རྗེས་དྲན་གྱི་དུང་བུས་ནས་འདུ་འཛོམས་དམ་པ་ཡོད་དགོས།  
\v 25 རྒྱུན་ལྡན་གྱི་ལས་ཀ་གང་ཡང་བྱེད་མི་རུང་བར་དཀོན་མཆོག་ཡ་ཝཱེ་ལ་མེ་མཆོད་འབུལ་དགོས་ཞེས་པའོ་གསུངས་སོ། །   
\s1 སྡིག་པ་བཤགས་པའི་ཉིན་མོ།  
\p
\v 26 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 27 ཟླ་བ་བདུན་པའི་ཚེས་བཅུ་ནི་སྡིག་པ་བཤགས་པའི་ཉིན་མོ་ཡིན་པས། ཁྱོད་རྣམས་ཀྱིས་འདུ་འཛོམས་དམ་པ་རོལ་ནས་རང་ཉིད་ཁྱད་དུ་གསོད་པ་དང་། དཀོན་མཆོག་ཡ་ཝཱེ་ལ་མེ་མཆོད་འབུལ་དགོས།  
\v 28 ཉིན་དེ་ལ་ལས་ཀ་གང་ཡང་བྱེད་མི་རུང་། ཅི་ལ་ཞེ་ན། ཉིན་དེ་ནི་སྡིག་བཤགས་ཉིན་མོ་ཡིན་པས་ཁྱོད་རྣམས་ཀྱིས་དཀོན་མཆོག་ཡ་ཝཱེའི་དྲུང་དུ་སྡིག་པ་བཤག་དགོས་པའི་ཕྱིར་རོ། །  
\v 29 ཉིན་དེ་ལ་རང་ཉིད་ཁྱད་དུ་མི་གསོད་པ་ཐམས་ཅད་མི་མང་ཁྲོད་ནས་རྩ་མེད་དུ་གཏོང་ངེས་ཡིན།  
\v 30 ཉིན་དེ་ལ་ལས་ཀ་གང་རུང་བྱེད་མཁན་ཐམས་ཅད་ནི་བདག་གིས་རང་གི་མི་མང་ཁྲོད་ནས་འཇོམས་པར་བྱའོ། །  
\v 31 ཁྱོད་རྣམས་ཀྱིས་ལས་ཀ་གང་ཡང་བྱེད་མི་རུང་། དེ་ནི་ཁྱོད་ཅག་སྡོད་སའི་ཡུལ་ཐམས་ཅད་དུ། ཁྱོད་རྣམས་ལ་མི་རབས་ནས་མི་རབས་བར་དུས་གཏན་གྱི་སྒྲིག་ཁྲིམས་ཡིན་དགོས།  
\v 32 ཉིན་དེ་ནི་ཁྱོད་རྣམས་ཀྱིས་ངལ་གསོ་ཡོངས་སུ་རྫོགས་པའི་ཉིན་མོ་རུ་བསྲུང་བ་དང་། རང་ཉིད་ཁྱད་དུ་གསོད་དགོས། ཟླ་བ་དེའི་ཚེས་དགུ་ཡི་དགོང་མོ་ནས་ཕྱི་ཉིན་དགོང་མོའི་བར་དུ་ངལ་གསོ་བའི་ཉིན་མོ་རུ་བསྲུང་དགོས་ཞེས་གསུངས་སོ། །   
\s1 སྤྱིལ་བུའི་དུས་ཆེན།  
\p
\v 33 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 34 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག ཟླ་བ་བདུན་པའི་ཚེས་བཅོ་ལྔ་ནི་སྤྱིལ་བུའི་དུས་ཆེན་ཡིན་པ་དང་། དཀོན་མཆོག་ཡ་ཝཱེའི་ཕྱིར་དུ་ཉིན་བདུན་གྱི་རིང་ལ་དུས་ཆེན་འདིར་རོལ་དགོས།  
\v 35 ཉིན་དང་པོར་འདུ་འཛོམས་དམ་པ་ཡོད་དགོས་ལ། རྒྱུན་ལྡན་གྱི་ལས་ཀ་གང་ཡང་བྱེད་མི་རུང་།  
\v 36 ཉིན་བདུན་གྱི་རིང་དཀོན་མཆོག་ཡ་ཝཱེ་ལ་མེ་མཆོད་འབུལ་དགོས། ཉིན་བརྒྱད་པར་འདུ་འཛོམས་དམ་པ་བསྲུང་བ་དང་། དཀོན་མཆོག་ཡ་ཝཱེ་ལ་མེ་མཆོད་འབུལ་དགོས། དེ་ནི་འདུ་འཛོམས་དམ་ནན་ཡིན་པས་རྒྱུན་ལྡན་གྱི་ལས་ཀ་གང་ཡང་བྱེད་མི་རུང་ངོ་། །  
\v 37 དེ་ནི་དཀོན་མཆོག་ཡ་ཝཱེའི་དུས་ཆེན་རྣམས་ཡིན་ཏེ། ཁྱོད་རྣམས་ཀྱིས་འདུ་འཛོམས་དམ་པར་བསྒྲག་དགོས་པའི་དུས་ཆེན་ཡིན་ཞིང་། མེ་མཆོད་དེ་སྦྱིན་སྲེག་གི་མཆོད་པ་དང་འབྲུ་མཆོད། དམར་མཆོད། སྐྱེམས་མཆོད་རྣམས་ཉིན་རེའི་གཏན་འཁེལ་བཞིན་དཀོན་མཆོག་ཡ་ཝཱེ་ལ་འབུལ་དགོས་པ་ཡིན་ནོ། །  
\v 38 གཞན་ཡང་དཀོན་མཆོག་ཡ་ཝཱེ་ལ་ངལ་གསོ་བའི་ཉིན་མོ་དང་། ཁྱོད་ཚོས་དཀོན་མཆོག་ཡ་ཝཱེ་ལ་འབུལ་བའི་མཆོད་རྫས་རྣམས་དང་། དམ་བཅའི་མཆོད་པ་ཐམས་ཅད་དང་། ཡིད་མོས་པའི་མཆོད་པ་ཐམས་ཅད་བཅས་ཡོད་པའོ། །  
\v 39 དེ་ལས་གཞན་ཟླ་བ་བདུན་པའི་ཚེས་བཅོ་ལྔ་ཏག་ཏག་སྟེ། ཁྱོད་རྣམས་ཀྱིས་ས་ཞིང་ནས་ལོ་ཏོག་བསྡུས་པའི་རྗེས་སུ། ཉིན་བདུན་རིང་དཀོན་མཆོག་ཡ་ཝཱེའི་དུས་ཆེན་རོལ་དགོས། ཉིན་དང་པོ་དེ་ངལ་གསོ་ཡོངས་སུ་རྫོགས་པའི་ཉིན་མོ་ཡིན་པ་དང་། ཉིན་བརྒྱད་པ་དེ་ཡང་ངལ་གསོ་ཡོངས་སུ་རྫོགས་པའི་ཉིན་མོ་ཡིན་ནོ། །  
\v 40 ཉིན་དང་པོ་ལ། ཁྱོད་རྣམས་ཀྱིས་ཕུལ་དུ་བྱུང་བའི་ལྗོན་ཤིང་གི་འབྲས་བུ་དང་། ཏ་ལའི་ཤིང་གི་ཡལ་ག་དང་། ལྗོན་ཤིང་ལོ་མ་སྟུག་པོ་ཅན་གྱི་ཡལ་ག་དང་། ཆུ་བོ་འགྲམ་གྱི་ལྕང་མའི་ཡལ་ག་བཅས་ཁྱེར་ནས། ཁྱོད་རྣམས་ཀྱིས་རང་གི་དཀོན་མཆོག་ཡ་ཝཱེའི་སྤྱན་སྔར་ཉིན་བདུན་གྱི་རིང་ལ་དགའ་མགུ་ཡི་རང་བྱེད་དགོས།  
\v 41 ལོ་རེ་བཞིན་དུ་ཉིན་བདུན་གྱི་རིང་ལ་ཁྱོད་རྣམས་ཀྱིས་དཀོན་མཆོག་ཡ་ཝཱེའི་དུས་ཆེན་རོལ་ཞིག ཁྱོད་ཅག་གིས་ཟླ་བ་བདུན་པར་རོལ་བའི་དུས་ཆེན་དེ་ནི་མི་རབས་ནས་མི་རབས་བར་དུས་གཏན་གྱི་སྒྲིག་ཁྲིམས་ཡིན་དགོས།  
\v 42 ཁྱོད་རྣམས་སྤྱིལ་བུའི་ནང་དུ་ཉིན་བདུན་ལ་འདུག་དགོས་ཤིང་། ཡེས་ར་ཨེལ་གྱི་གཞིས་སྐྱེས་ཐམས་ཅད་ཀྱང་སྤྱིལ་བུའི་ནང་དུ་འདུག་དགོས་སོ། །  
\v 43 གང་ལ་ཞེ་ན། བདག་གིས་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཕྱི་རོལ་ཏུ་ཁྲིད་པའི་དུས་སུ། དེ་དག་སྤྱིལ་བུའི་ནང་འདུག་ཏུ་བཅུག་པ་དེ་ཁྱོད་རྣམས་ཀྱི་མི་རབས་ནས་མི་རབས་བར་ཤེས་སུ་འཇུག་པའི་ཕྱིར་རོ། །བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན་ཞེས་པའོ་གསུངས་སོ། །  
\v 44 དེ་ནས་མོ་ཤེ་ཡིས་དཀོན་མཆོག་ཡ་ཝཱེའི་དུས་ཆེན་དག་ཡེས་ར་ཨེལ་པ་རྣམས་ལ་གསལ་བསྒྲགས་བྱས་སོ། །   
\c 24
\cl ལེའུ་ཉེར་བཞི་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 སྒྲོན་མེ་རྣམས།  
\p
\v 1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 2 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག འོད་ཀྱི་ཆེད་དུ་སྐྱུ་རུ་ཤིང་ལས་བརྡུངས་པའི་སྣུམ་དྭངས་མ་དེ་འཁྱེར་ཡོང་དགོས། དེ་ནི་སྒྲོན་མེ་རྟག་ཏུ་འབར་བའི་ཕྱིར་ཡིན།  
\v 3 མཇལ་འཕྲད་གུར་མཆོག་ནང་གི་དཔང་མཛད་ཤུར་སྒམ་གྱི་ཡོལ་བའི་ཕྱི་ལོགས་སུ། ཨ་རོན་གྱིས་མཚན་མོ་ནས་ཞོགས་པའི་བར་དུ། དཀོན་མཆོག་ཡ་ཝཱེའི་སྤྱན་སྔར་སྒྲོན་མེ་དེར་རྒྱུན་དུ་བདག་བྱེད་དགོས། དེ་ནི་ཁྱོད་རྣམས་ཀྱི་མི་རབས་ནས་མི་རབས་བར་དུས་གཏན་གྱི་སྒྲིག་ཁྲིམས་སུ་ཆགས་དགོས།  
\v 4 ཁོས་དཀོན་མཆོག་ཡ་ཝཱེའི་སྤྱན་སྔར་རྟག་ཏུ་གསེར་བཙོ་མའི་སྒྲོན་སྟེགས་སྟེང་གི་སྒྲོན་མེ་ལ་བདག་བྱེད་དགོས་སོ། །   
\s1 གུར་མཆོག་ནང་གི་བག་ལེབ།  
\p
\v 5 དེ་ནས་ཁྱོད་ཀྱིས་གྲོ་ཞིབ་བླངས་ནས་བག་ལེབ་བཅུ་གཉིས་བསྲེག་དགོས་པ་དང་། བག་ལེབ་རེ་རེ་ཨེ་ཕཱ་ཡི་བཅུ་ཆ་གཉིས་རེས་བསྲེག་དགོས།  
\v 6 དེ་ནས་བག་ལེབ་དྲུག་རེ་བྱས་ནས་གྲལ་གཉིས་སུ་བསྒྲིགས་ཏེ། དཀོན་མཆོག་ཡ་ཝཱེའི་སྤྱན་སྔར་གསེར་བཙོ་མའི་སྒྲོག་ཙེ་སྟེང་དུ་བཤམ་དགོས་ལ།  
\v 7 གྲལ་རེའི་བག་ལེབ་སྟེང་དུ་སྤོས་དཀར་སླད་མེད་གཏོར་བ་དང་། དྲན་རྟེན་བྱས་ནས་དཀོན་མཆོག་ཡ་ཝཱེ་ལ་ཞལ་ཟས་ཀྱི་མེ་མཆོད་དུ་འབུལ་དགོས།  
\v 8 ངལ་གསོ་བའི་ཉིན་མོ་རེ་རེ་ལ་ཨ་རོན་གྱིས་དཀོན་མཆོག་ཡ་ཝཱེའི་སྤྱན་སྔར་བག་ལེབ་ཆད་མེད་དུ་བཤམ་དགོས། དེ་ནི་ཡེས་ར་ཨེལ་པ་རྣམས་ཀྱི་དུས་གཏན་གྱི་ཁ་ཆད་ཅིག་ཡིན།  
\v 9 བག་ལེབ་དེ་ནི་ཨ་རོན་དང་ཁོའི་བུ་རྣམས་ལ་དབང་བ་དང་། ཁོ་ཚོས་དེ་དག་གནས་དམ་པ་རུ་བཟའ་དགོས། ཅིའི་ཕྱིར་ཞེ་ན། དེ་ནི་དཀོན་མཆོག་ཡ་ཝཱེ་ལ་ཕུལ་བའི་མེ་མཆོད་ལས་ཀུན་ལས་དམ་པ་ཡིན་པ་དང་། དུས་གཏན་དུ་ཁོང་ལ་དབང་བའི་སྐལ་ཡིན་ཞེས་གསུངས་སོ། །   
\s1 སྐུར་བ་འདེབས་མཁན་ལ་ཉེས་ཆད་གཅོད་པ།  
\p
\v 10 དེ་ཡང་ཡེས་ར་ཨེལ་གྱི་བུད་མེད་ཅིག་ལ་བུ་ཞིག་ཡོད་པ་དེའི་ཕ་ནི་ཨེ་ཅིབ་པ་ཡིན་ལ། ཁོ་རང་ཡེས་ར་ཨེལ་པ་རྣམས་ཀྱི་ཁྲོད་དུ་སོང་ནས། ཡེས་ར་ཨེལ་གྱི་བུད་མེད་ཀྱི་བུ་དེ་དང་ཡེས་ར་ཨེལ་པ་ཞིག་སྒར་ནང་དུ་རྩོད་པ་བྱས་པ་དང་།  
\v 11 ཡེས་ར་ཨེལ་གྱི་བུད་མེད་ཀྱི་བུ་ཡིས་མཚན་\f + \ft མཚན་ཞེས་པ་འདི་དཀོན་མཆོག་ཡ་ཝཱེའི་མཚན་ལ་གོ་དགོས།\f*དམ་པར་དམོད་མོ་དང་བཅས་སྐུར་བ་བཏབ་པས། དེ་དག་གིས་མི་དེ་མོ་ཤེའི་དྲུང་དུ་ཁྲིད། ཁོའི་མ་ཡི་མིང་ལ་ཤེ་ལོ་མིད་ཅེས་བྱ་ཞིང་། དཱན་ཚོ་པའི་དི་པཱ་རེ་བྱ་བའི་བུ་མོ་ཡིན་ནོ། །  
\v 12 དཀོན་མཆོག་ཡ་ཝཱེའི་བཀའ་གསལ་པོར་རྟོགས་ཕྱིར་ཁོ་ཚོས་མི་དེ་བཙོན་དུ་བཀག་པའོ། །   
\p
\v 13 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 14 དམོད་མོ་འདེབས་མཁན་དེ་སྒར་གྱི་ཕྱི་རོལ་ཏུ་ཁྲིད་ཅིག དེ་ཐོས་པའི་མི་ཐམས་ཅད་ཀྱིས་ལག་པ་ཁོའི་མགོ་ལ་བཞག་ནས་མི་ཚོགས་ཧྲིལ་པོས་ཁོ་རང་རྡོ་རུབ་བཏང་ནས་གསོད་དགོས།  
\v 15 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག སུ་ཞིག་གིས་རང་གི་དཀོན་མཆོག་ལ་དམོད་པར་བྱས་ན། དེས་རང་གི་སྡིག་པ་འཁུར་དགོས།  
\v 16 སུ་ཞིག་གིས་དཀོན་མཆོག་ཡ་ཝཱེའི་མཚན་ལ་སྐུར་བ་བཏབ་ན། དེ་ནི་ཅིས་ཀྱང་སྲོག་དང་འཕྲལ་དགོས་པ་དང་། མི་ཚོགས་ཧྲིལ་པོས་ཁོ་རང་རྡོ་རུབ་བཏང་ནས་གསོད་དགོས། བྱེས་པའམ་གཞིས་སྐྱེས་གང་ཡིན་ཡང་། ཁོས་དམ་པའི་མཚན་ལ་སྐུར་བ་འདེབས་དུས་སྲོག་དང་འཕྲལ་དགོས་སོ། །  
\v 17 མི་གསོད་མཁན་ནི་ངེས་པར་སྲོག་དང་འཕྲལ་དགོས།  
\v 18 ཕྱུགས་ཟོག་གསོད་མཁན་གྱིས་དེའི་སྐྱིན་ཚབ་ལ་ཕྱུགས་ཟོག་སྤྲད་ནས། སྲོག་ཚབ་སྲོག་གིས་འཇལ་དགོས།  
\v 19 སུ་ཞིག་གིས་ཁྱིམ་མཚེས་ལ་གནོད་བསྐྱལ་ན། མི་དེས་བྱས་པ་བཞིན་དུ་ཁོ་ལའང་དེ་ལྟར་བྱེད་དགོས་པ་འདི་ལྟ་སྟེ།  
\v 20 བཅགས་པའི་ལན་དུ་བཅགས་པ་དང་། མིག་ལ་མིག་ལན་དང་སོ་ལ་སོ་ལན་འཇལ་དགོས། མི་དེས་ཇི་ལྟར་མི་གཞན་ཞིག་དབང་བོ་སྐྱོན་ཅན་དུ་བཟོས་ན། ཁོ་ལའང་དེ་བཞིན་བྱེད་དགོས།  
\v 21 ཕྱུགས་ཟོག་གསོད་མཁན་གྱིས་དེའི་སྐྱིན་ཚབ་ལ་ཕྱུགས་ཟོག་འཇལ་དགོས་པ་དང་། མི་གསོད་མཁན་ལ་སྲོག་ཆད་གཅོད་དགོས།  
\v 22 བྱེས་པའམ་གཞིས་སྐྱེས་གང་ཡིན་ཡང་ཁྲིམས་སྲོལ་གཅིག་ཡིན་དགོས། ཅི་ལ་ཞེ་ན། བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན་ཞེས་པའོ་གསུངས་སོ།།  
\v 23 དེ་ནས་མོ་ཤེ་ཡིས་ཡེས་ར་ཨེལ་པ་རྣམས་ལ་བཀའ་བསྒོས་ཤིང་། ཁོ་རྣམས་ཀྱིས་དམོད་མོ་འདེབས་མཁན་དེ་སྒར་གྱི་ཕྱི་རོལ་ཏུ་ཁྲིད་དེ་རྡོ་རུབ་བཏང་ནས་བསད་དོ། །ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེས་མོ་ཤེ་ལ་བསྩལ་པའི་བཀའ་བཞིན་དུ་བསྒྲུབས་པའོ། །   
\c 25
\cl ལེའུ་ཉེར་ལྔ་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 ངལ་གསོ་བའི་ལོ།  
\p
\v 1 དེ་ཡང་དཀོན་མཆོག་ཡ་ཝཱེས་རི་བོ་སི་ནཱའི་སྟེང་དུ་མོ་ཤེ་ལ་འདི་སྐད་དུ།  
\v 2 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག ཁྱོད་རྣམས་བདག་གིས་ཁྱོད་ཅག་ལ་སྦྱིན་པའི་ཡུལ་དུ་སླེབས་པའི་ཚེ། དཀོན་མཆོག་ཡ་ཝཱེའི་ཕྱིར་དུ་ས་གཞིས་ངལ་གསོ་བྱེད་དགོས།  
\v 3 ཁྱོད་རྣམས་ཀྱིས་ལོ་དྲུག་གི་རིང་ཞིང་ལ་ས་བོན་འདེབས་པ་དང་། ལོ་དྲུག་གི་རིང་རྒུན་འབྲུམ་ར་བར་འབྲེག་བཅོས་བྱས་ནས་ས་ཞིང་གི་ལོ་ཏོག་བསྡུ་དགོས།  
\v 4 ལོ་བདུན་པར་ས་གཞིས་ངལ་གསོ་ཡོངས་སུ་རྫོགས་པ་བྱས་ཏེ། དཀོན་མཆོག་ཡ་ཝཱེའི་ཕྱིར་ངལ་གསོ་བྱེད་དགོས། ཁྱོད་རྣམས་ཀྱིས་ས་ཞིང་འདེབས་མི་རུང་ལ། རྒུན་འབྲུམ་ར་བར་འབྲེག་བཅོས་ཀྱང་བྱེད་མི་རུང་ངོ་། །  
\v 5 རང་བཞིན་དུ་སྐྱེས་པའི་ལོ་ཏོག་བསྡུ་མི་རུང་ལ། འབྲེག་བཅོས་མ་བྱས་པའི་རྒུན་འབྲུམ་ཤིང་གི་རྒུན་འབྲུམ་ཡང་བསྡུ་མི་འོས། ལོ་དེར་ས་གཞིས་ངལ་གསོ་ཡོངས་སུ་རྫོགས་པ་བྱེད་དགོས་སོ། །  
\v 6 ངལ་གསོའི་ལོར་ས་ཞིང་ལས་སྐྱེས་པ་དེ་ནི་ཁྱོད་དང་ཁྱོད་ཀྱི་གཡོག་པོ་གཡོག་མོ་དང་། གླ་པ་དང་ཁྱོད་དང་མཉམ་དུ་སྡོད་པའི་བྱེས་པ་བཅས་ཀྱི་ཁ་ཟས་ཡིན།  
\v 7 ལོ་ཏོག་ཐམས་ཅད་ནི་ཁྱོད་ཀྱི་ཕྱུགས་ཟོག་དང་ཡུལ་དེར་ཡོད་པའི་རི་དྭགས་ཀྱི་ཁ་ཟས་ཀྱང་ཡིན་ནོ། །   
\s1 དགའ་སྟོན་གྱི་ལོ།  
\p
\v 8 ཁྱོད་ཀྱིས་ངལ་གསོའི་ལོ་བདུན་བརྩི་དགོས་པ་སྟེ། ལོ་བདུན་ནི་ཐེངས་བདུན་ཡིན་པས། ཁྱོན་བསྡོམས་ལོ་བཞི་བཅུ་ཞེ་དགུ་ཡིན།  
\v 9 ཟླ་བ་བདུན་པའི་ཚེས་བཅུ་པར་ཁྱོད་ཀྱིས་རྭ་དུང་སྐད་ཆེན་པོ་འབུད་དགོས། དེ་ནི་སྡིག་བཤགས་ཉིན་མོ་ཡིན་ལ་ཁྱོད་ཀྱིས་ཡུལ་ཐམས་ཅད་ནས་རྭ་དུང་འབུད་དགོས།  
\v 10 ཁྱོད་ཅག་གིས་ལོ་ལྔ་བཅུ་པ་ནི་ལོ་དམ་པ་རུ་བརྩི་བ་དང་། ཡུལ་ཐམས་ཅད་དུ་མི་ཀུན་ལ་རང་དབང་ཡིན་པར་སྒྲོགས་ཤིག དེ་ནི་ཁྱོད་ཅག་གི་དོན་དུ་དགའ་སྟོན་གྱི་ལོ་ཡིན་པས། མི་རེ་རེ་ཕྱིར་ཕ་གཞིས་སུ་ལོག་པ་དང་། མི་རེ་རེ་རང་རང་གི་ཁྱིམ་རྒྱུད་དུ་ལོག་པར་རིགས་སོ། །  
\v 11 ལོ་ལྔ་བཅུ་པ་ནི་ཁྱོད་རྣམས་ཀྱི་དགའ་སྟོན་གྱི་ལོ་རུ་བརྩི་དགོས་ལ། ས་ཞིང་འདེབས་མི་རུང་བ་དང་རང་བཞིན་གྱིས་སྐྱེས་པའི་ལོ་ཏོག་བསྡུ་མི་འོས་ལ། འབྲེག་བཅོས་མ་བྱས་པའི་རྒུན་འབྲུམ་ཤིང་གི་རྒུན་འབྲུམ་ཡང་བསྡུ་མི་རུང་།  
\v 12 ཅིའི་ཕྱིར་ཞེ་ན། དེ་ནི་དགའ་སྟོན་གྱི་ལོ་སྟེ་ཁྱོད་རྣམས་ཀྱི་ལོ་དམ་པ་ཡིན་ཞིང་། ས་ཞིང་དུ་སྐྱེས་པའི་ལོ་ཏོག་རྣམས་བཟའ་དགོས་པའོ། །  
\v 13 དགའ་སྟོན་གྱི་ལོ་འདིར་ཁྱོད་ཚོ་མི་རེ་རེ་ཕ་གཞིས་སུ་ཕྱིར་ལོག་དགོས་པ་དང་།  
\v 14 ཁྱོད་ཀྱིས་ཁྱིམ་མཚེས་ལ་གང་ཞིག་བཙོང་བའམ། ཡང་ན་ཁྱིམ་མཚེས་ཀྱི་ལག་ནས་ཅི་ཞིག་ཉོས་ན་ཕན་ཚུན་ལ་མགོ་སྐོར་གཏོང་མི་རུང་།  
\v 15 ཁྱོད་ཀྱིས་དགའ་སྟོན་གྱི་ལོ་ནས་བཟུང་སྟེ། ལོ་དེ་དག་གི་གྲངས་བཞིན་དུ་ཁྱིམ་མཚེས་ནས་ཉོ་བ་དང་། ཁོས་ནི་ཐོན་འབབ་ཡོད་པའི་ལོ་གྲངས་བཞིན་དུ་ཁྱོད་ལ་བཙོང་དགོས།  
\v 16 ཁོས་ཐོན་འབབ་ཀྱི་གྲངས་ཀ་བཞིན་དུ་ཁྱོད་ལ་བཙོང་བའི་ཕྱིར། ལོ་གྲངས་ཅི་ལྟར་མང་ན་རིན་གོང་དེ་བཞིན་མཐོ་བ་དང་། ལོ་གྲངས་ཅི་ལྟར་ཉུང་ན་རིན་གོང་དེ་བཞིན་དམའ་བ་ཡིན་ནོ། །  
\v 17 ཁྱོད་ཚོས་ཕན་ཚུན་ལ་གྱོང་གུད་བཟོ་མི་རུང་། ཁྱོད་ཀྱི་དཀོན་མཆོག་ལ་གུས་ཤིང་འཇིགས་དགོས། ཅི་ལ་ཞེ་ན། བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན་པའོ། །  
\v 18 ཁྱོད་རྣམས་ཀྱིས་བདག་གི་སྒྲིག་ཁྲིམས་བཞིན་དུ་བྱེད་པ་དང་། བདག་གི་སྲོལ་ཡིག་རྣམས་བསྲུངས་ནས་དེ་བཞིན་དུ་བྱེད་དགོས་ལ། དེ་བཞིན་བྱས་ན་ཡུལ་དེ་རུ་བདེ་བར་གནས་ཐུབ་པ་ཡིན།  
\v 19 ས་ཞིང་གིས་འབྲས་བུ་བསྐྱེད་ཅིང་ཁྱོད་རྣམས་ཀྱིས་དེ་ཟོས་ནས་འགྲང་བ་དང་། ཡུལ་དེ་རུ་བདེ་བར་གནས་པར་འགྱུར་རོ། །  
\v 20 གལ་སྲིད་ཁྱོད་རྣམས་ཀྱིས། གཟིགས་དང་། ལོ་བདུན་པར་ས་ཞིང་མི་རྨོ་ལ་ལོ་ཏོག་ཀྱང་མི་བསྡུ་བས་ང་ཚོས་ཅི་ཞིག་བཟའ་དགོས་སམ་ཞེས་བརྗོད་ན།  
\v 21 ལོ་དྲུག་པར་བདག་གིས་བཀའ་བབས་ཏེ་ཁྱོད་ལ་བྱིན་རླབས་གནང་ནས། ས་ཞིང་གིས་ལོ་གསུམ་གྱི་ལོ་ཏོག་བསྐྱེད་པར་འགྱུར་རོ། །  
\v 22 ལོ་བརྒྱད་པར་ཁྱོད་རྣམས་ཀྱིས་ས་ཞིང་རྨོ་དགོས་ལ། འབྲུ་རྙིང་ཡང་བཟའ་དགོས། ལོ་དགུ་པར་ལོ་ཏོག་བསྡུ་བའི་བར་དུ་ཁྱོད་རྣམས་ལ་ད་དུང་འབྲུ་རྙིང་བཟའ་རྒྱུ་ཡོད་པའོ། །   
\s1 ས་བླུ་བའི་ཁྲིམས།  
\p
\v 23 ས་ནི་མཐའ་གཅིག་ཏུ་བཙོང་མི་རུང་། ཅི་ལ་ཞེ་ན། ས་ཞིང་ནི་བདག་གི་ཡིན་པའི་ཕྱིར་རོ། །ཁྱོད་ཅག་ནི་ངའི་མདུན་དུ་མགྲོན་པོ་དང་བྱེས་པ་ཡིན་ནོ། །  
\v 24 ཁྱོད་ལ་ས་སྐལ་དུ་ཐོབ་པའི་ཡུལ་ཀུན་ཏུ་མི་ལ་ས་བླུ་བའི་དབང་ཡོད་པར་བྱེད་དགོས།  
\v 25 ཁྱོད་ཀྱི་སྤུན་ཟླ་དབུལ་པོར་གྱུར་ནས་རང་གི་ནོར་སྐལ་ལས་ཆ་ཤས་བཙོངས་ན། ཁོ་བླུ་མཁན་གྱི་གཉེན་ཉེ་ཡོང་ནས་གང་ཞིག་བཙོངས་པ་དེ་ཕྱིར་བླུ་དགོས།  
\v 26 གལ་སྲིད་ཁོ་ལ་བླུ་མཁན་མེད་ན། ཁོ་རང་ལ་རིམ་བཞིན་རྒྱུ་སྟོབས་འཛོམས་ནས་ཕྱིར་བླུ་ཐུབ་པའི་དུས་སུ།  
\v 27 ཕར་བཙོངས་པའི་ལོ་ནས་བཟུང་བརྩིས་ཏེ། དེའི་འཕྲོ་ཡི་ལོ་གྲངས་ཀྱི་རིན་གོང་རྣམས་ཉོ་མཁན་ལ་ཕྱིར་སློག་དགོས་ཤིང་། དེ་ནས་རང་གི་ཕ་གཞིས་ལ་ཕྱིར་ལོག་དགོས།  
\v 28 གལ་སྲིད་མི་དེའི་ལག་ཏུ་ཕྱིར་བླུ་བའི་རྒྱུ་སྟོབས་མེད་ན། ཕར་བཙོངས་པའི་ས་དེ་ནི་ཉོ་མཁན་གྱི་ལག་ནས་དགའ་སྟོན་གྱི་ལོ་ཡི་བར་དུ་ལུས་ཤིང་། དགའ་སྟོན་གྱི་ལོ་དེར་ས་འཚོང་མཁན་ནི་ཕ་གཞིས་སུ་ཕྱིར་ལོག་དགོས།  
\v 29 གལ་སྲིད་མི་ཞིག་གིས་ལྕགས་རིས་བསྐོར་བའི་གྲོང་ཁྱེར་ནང་གི་སྡོད་ཁང་བཙོངས་ན། བཙོངས་པའི་རྗེས་སུ་ལོ་གཅིག་གི་ནང་དུ་ཕྱིར་བླུ་བའི་དབང་ཡོད་ལ། དེ་ནི་ཁོས་ཕྱིར་བླུས་ཆོག་པའི་ལོ་གཅིག་གི་ཚད་ཡིན།  
\v 30 གལ་སྲིད་ཁོས་ལོ་ཧྲིལ་པོའི་ནང་ཕྱིར་མ་བླུས་ན། ལྕགས་རིས་བསྐོར་བའི་གྲོང་ཁྱེར་ནང་གི་ཁང་པ་དེ་ནི་མི་རབས་ནས་མི་རབས་བར་དུ་ཉོ་མཁན་ལ་དབང་བ་ཡིན། དགའ་སྟོན་གྱི་ལོ་ལའང་ཕྱིར་སྤྲོད་མི་དགོས།  
\v 31 འོན་ཀྱང་ལྕགས་རིས་བསྐོར་མེད་པའི་གྲོང་ཚོའི་ཁང་པ་རྣམས་ནི་གྲོང་གསེབ་ཀྱི་ཞིང་ས་རུ་བརྩིས་ཏེ་ཕྱིར་བླུ་སྲིད་པ་ཡིན་ལ། དགའ་སྟོན་གྱི་ལོ་ལ་ཕྱིར་སྤྲོད་དགོས།  
\v 32 ལེ་ཝི་པ་རྣམས་ལ་ས་སྐལ་དུ་ཐོབ་པའི་གྲོང་ཁྱེར་ལ་མཚོན་ན། ལེ་ཝི་པ་ཚོས་ཁོ་རྣམས་ཀྱི་གྲོང་ཁྱེར་དུ་ཡོད་པའི་ཁང་པ་ནི་དུས་ནམ་ཡིན་ཡང་བླུས་ཆོག་པ་ཡིན།  
\v 33 གལ་སྲིད་ལེ་ཝི་པ་རྣམས་ཀྱིས་རང་ལ་ས་སྐལ་དུ་ཐོབ་པའི་གྲོང་ཁྱེར་ནས་ཁང་པ་བཙོངས་པ་དང་། ཕྱིར་མ་བླུས་པ་ཡིན་ན། དགའ་སྟོན་གྱི་ལོ་དེར་ཕྱིར་བདག་པོར་སྤྲོད་དགོས། ཅི་ལ་ཞེ་ན། ལེ་ཝི་པ་རྣམས་ཀྱི་གྲོང་ཁྱེར་གྱི་ཁང་པ་རྣམས་ནི། ཡེས་ར་ཨེལ་པ་རྣམས་ཀྱི་ཁྲོད་དུ་ཁོ་ཚོའི་ནོར་སྐལ་ཡིན་པའི་ཕྱིར་རོ། །  
\v 34 ཡིན་ནའང་། དེ་དག་གི་གྲོང་ཁྱེར་སོ་སོའི་ཉེ་འཁོར་གྱི་རྩྭ་ས་ནི་ཁོ་ཚོའི་དུས་གཏན་གྱི་ས་སྐལ་ཡིན་པས་བཙོང་མི་རུང་ངོ་། །   
\s1 སྤུན་ཟླ་དབུལ་པོ་རྣམས་ལ་བུ་ལོན་གཏོང་བའི་ཁྲིམས།  
\p
\v 35 གལ་སྲིད་ཁྱོད་ཀྱི་སྤུན་ཟླ་རིམ་བཞིན་དབུལ་པོར་གྱུར་ཏེ་ལག་ནས་ཅི་ཡང་མེད་ན། ཁྱོད་ཀྱིས་ཁོ་ལ་རོགས་སྐྱོར་བྱས་ཏེ་ཕྱི་མི་དང་བྱེས་པ་རྣམས་དང་མཚུངས་པར་ཁོ་རང་ཁྱོད་དང་མཉམ་དུ་འཚོ་བར་གྱིས་ཤིག  
\v 36 མི་དེ་ལས་སྐྱེད་ཀ་ལེན་མི་རུང་ལ། ཁེ་བཟང་ཡང་ལེན་མི་རུང་། ཁྱོད་ཀྱི་དཀོན་མཆོག་ལ་གུས་ཤིང་འཇིགས་པའི་སྒོ་ནས། ཁྱོད་ཀྱི་སྤུན་ཟླ་ཁྱོད་དང་མཉམ་དུ་འཚོ་བར་བྱེད་དགོས།  
\v 37 ཁྱོད་ཀྱིས་སྐྱེད་ཀའི་དོན་དུ་ཁོ་ལ་དངུལ་བསྐྱི་མི་རུང་ལ། ཁེ་བཟང་གི་དོན་དུ་ཟས་རིགས་ཀྱང་བསྐྱི་མི་རུང་།  
\v 38 བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན་ལ། ཀ་ན་ཨན་གྱི་ཡུལ་ཁྱོད་ཅག་ལ་སྦྱིན་པ་དང་ཁྱོད་རྣམས་ཀྱི་དཀོན་མཆོག་ཡིན་པའི་ཕྱིར་དུ། ཁྱོད་ཅག་ཨེ་ཅིབ་ཡུལ་ནས་ཕྱི་རོལ་ཏུ་ཁྲིད་ཡོང་བའོ། །  
\v 39 གལ་སྲིད། ཁྱོད་ཀྱི་སྤུན་ཟླ་རིམ་བཞིན་དབུལ་པོར་གྱུར་ནས་རང་ཉིད་ཁྱོད་ལ་བཙོངས་ན། ཁྱོད་ཀྱིས་ཁོ་བྲན་གཡོག་ལྟར་བཀོལ་ནས་ཞབས་ཕྱི་སྒྲུབ་ཏུ་འཇུག་མི་རུང་།  
\v 40 ཁོ་རང་ཁྱོད་ཀྱི་རྩར་གླ་པ་དང་མགྲོན་པོ་ལྟར་ཡིན་ཞིང་། དགའ་སྟོན་གྱི་ལོའི་བར་དུ་ཁྱོད་ལ་ཞབས་ཕྱི་བསྒྲུབ་དགོས།  
\v 41 དེ་ནས་ཁོ་དང་ཁོའི་བུ་ཕྲུག་རྣམས་ཁྱོད་དང་བྲལ་ནས་མཉམ་དུ་རང་གི་ཁྱིམ་རྒྱུད་དུ་ཕྱིར་ལོག་ཅིང་། རང་གི་ཕ་མེས་ཀྱི་བདག་དབང་ཡུལ་དུ་ཕྱིར་འགྲོའོ། །  
\v 42 ཅིའི་ཕྱིར་ཞེ་ན། ཁོ་རྣམས་ནི་བདག་གི་ཞབས་ཕྱི་ཡིན་ལ། བདག་གིས་ཨེ་ཅིབ་ཡུལ་ནས་ཕྱི་རོལ་ཏུ་ཁྲིད་འོངས་པ་ཡིན་པས། དེ་དག་བྲན་གཡོག་ཏུ་བཙོང་མི་རུང་།  
\v 43 དེ་དག་ལ་གདུག་རྩུབ་བཀོལ་ནས་དབང་སྒྱུར་མི་རུང་ལ། ཁྱོད་ཀྱི་དཀོན་མཆོག་ལ་གུས་ཤིང་འཇིགས་དགོས་སོ། །  
\v 44 དེར་བརྟེན། ཁྱོད་ལ་མཁོ་བའི་གཡོག་པོ་གཡོག་མོ་རྣམས་ནི། ཁྱོད་ཀྱི་མཐའ་འཁོར་དུ་ཡོད་པའི་མི་རྣམས་ལས་ཡོང་བར་རིགས། ཁྱོད་ཅག་གིས་ཁོ་རྣམས་ལས་གཡོག་པོ་གཡོག་མོ་ཉོས་ཆོག་པ་ཡིན།  
\v 45 ཁྱོད་ཅག་ཁྲོད་དུ་གནས་པའི་ཕྱི་མི་དང་དེ་དག་གི་ཁྱིམ་མི་སྟེ། ཁྱོད་ཅག་གི་ཡུལ་ནས་སྐྱེས་པ་རྣམས་ཀྱི་ཁྲོད་ནས་མི་ཉོས་ཆོག་པ་ཡིན། དེ་དག་ཁྱོད་རྣམས་ཀྱི་ནོར་སྐལ་ཡིན།  
\v 46 ཁྱོད་ཅག་གིས་དེ་དག་ནི་མི་རབས་རྗེས་མའི་བུ་རྒྱུད་རྣམས་ལ་ཤུལ་བཞག་ཏུ་སྤྲད་ནས། དུས་གཏན་དུ་རྒྱུན་འཛིན་བྱས་པའི་ནོར་སྐལ་དུ་བྱས་ཏེ། དེ་དག་བྲན་གཡོག་ཏུ་བཀོལ་བར་རིགས། འོན་ཀྱང་ཁྱོད་ཀྱི་སྤུན་ཟླ་ཡེས་ར་ཨེལ་པ་རྣམས་ལ་མཚོན་ན། ཕན་ཚུན་ལ་གདུག་རྩུབ་བཀོལ་ནས་དབང་སྒྱུར་མི་རུང་ངོ་། །   
\s1 དབུལ་པོ་བླུ་བ།  
\p
\v 47 གལ་སྲིད་ཁྱོད་དང་མཉམ་དུ་གནས་པའི་ཕྱི་མིའམ་བྱེས་པ་ཞིག་རིམ་བཞིན་ཕྱུག་པོར་གྱུར་པ་དང་། ཁྱོད་ཀྱི་སྤུན་ཟླ་ཞིག་རིམ་བཞིན་དབུལ་པོར་གྱུར་ཏེ། རང་ཉིད་ཕྱི་མིའམ་བྱེས་པ་དང་། ཡང་ན་ཕྱི་མིའི་ཁྱིམ་རྒྱུད་ལས་ཆད་པའི་བུ་ཞིག་ལ་བཙོངས་པ་ཡིན་ན།  
\v 48 བཙོངས་པའི་རྗེས་སུ་རང་ཉིད་ཕྱིར་བླུ་བའི་དབང་ཡོད་དེ། ཁོའི་སྤུན་རྣམས་ལས་གཅིག་གིས་ཁོ་རང་ཕྱིར་བླུ་རུང་བ་ཡིན།  
\v 49 ཁོའི་ཁུ་བོ་དང་ཁུ་བོའི་བུ་ཡིས་ཁོ་རང་བླུ་རུང་བ་དང་། ཁོའི་ཁྱིམ་རྒྱུད་ཀྱི་ཉེ་འབྲེལ་གྱིས་ཀྱང་ཁོ་རང་བླུ་རུང་བ་ཡིན། གལ་སྲིད་ཁོ་རང་ཉིད་རིམ་བཞིན་ཕྱུག་པོར་གྱུར་ན་རང་གིས་རང་ཉིད་བླུ་ཡང་རུང་བ་ཡིན།  
\v 50 མི་དེས་རང་ཉིད་བཙོངས་པའི་ལོ་ནས་བཟུང་སྟེ། དགའ་སྟོན་གྱི་ལོའི་བར་དུ་ཁོ་རང་ཉོ་མཁན་དང་རྩིས་རྒྱག་དགོས། བཙོངས་པའི་རིན་པ་ནི་ལོ་ཡི་གྲངས་ཀ་སྟེ། གླ་པ་དང་ཉོ་བདག་མཉམ་དུ་ཡོད་པའི་ཉི་མ་ལྟར་བརྩི་དགོས་སོ། །  
\v 51 གལ་སྲིད་ལོ་མང་པོ་ལྷག་ཡོད་ན། ལོ་ཡི་གྲངས་ཀ་བཞིན་དུ་ཉོས་པའི་རིན་ལས་ཁོའི་བླུ་རིན་ཕྱིར་སློག་དགོས།  
\v 52 དགའ་སྟོན་གྱི་ལོ་བར་དུ་ལོ་འགའ་ཤས་ལས་ལྷག་མེད་ན། ལོའི་གྲངས་ཀ་བཞིན་དུ་ཉོ་བདག་ལ་རྩིས་རྒྱག་པ་དང་། ཁོའི་བླུ་རིན་ཕྱིར་སློག་དགོས་སོ། །  
\v 53 ཁོ་རང་ཉོ་བདག་དང་མཉམ་དུ་ལོ་རེ་བཞིན་གླ་བའི་གླ་པ་ལྟར་འདུག་དགོས་ལ། ཉོ་བདག་གིས་ཁྱོད་ཀྱི་མིག་ལམ་ནས་མི་དེར་གདུག་རྩུབ་བཀོལ་ནས་དབང་སྒྱུར་མི་རུང་།  
\v 54 གལ་སྲིད་ཁོ་རང་དེ་བཞིན་དུ་བླུ་བར་མ་འོངས་ན། དགའ་སྟོན་གྱི་ལོ་ལ་སླེབས་ཚེ་ཁོའི་བུ་ཕྲུག་རྣམས་དང་མཉམ་དུ་ཕྱིར་འགྲོ་དགོས་སོ། །  
\v 55 ཅི་ལ་ཞེ་ན། ཡེས་ར་ཨེལ་པ་རྣམས་ནི་བདག་གི་ཞབས་ཕྱི་ཡིན་ལ། དེ་རྣམས་ནི་བདག་གིས་ཨེ་ཅིབ་ཡུལ་ནས་ཕྱི་རོལ་ཏུ་ཁྲིད་པའི་ཞབས་ཕྱི་ཡིན། བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན་ནོ། །   
\c 26
\cl ལེའུ་ཉེར་དྲུག་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 བཀའ་བརྩི་མཁན་ལ་བྱིན་རླབས་འཐོབ་པ།  
\p
\v 1 ཁྱོད་རྣམས་ཀྱིས་སྙིང་པོ་མེད་པའི་སྐུ་བརྙན་བཟོ་མི་རུང་ཞིང་། བརྐོས་པའི་སྐུ་འདྲ་དང་ལྷ་རྟེན་བསྒྲེང་མི་རུང་ལ། ཁྱོད་རྣམས་ཀྱི་ཡུལ་དུ་རྡོ་སྐུ་བསྒྲེངས་ནས་དེ་ལ་ཕྱག་ཀྱང་མ་འཚལ། ཅི་ལ་ཞེ་ན། བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན་པའོ། །  
\v 2 བདག་གི་ངལ་གསོ་བའི་ཉིན་མོ་རྣམས་བསྲུངས་ནས་བདག་གི་གནས་མཆོག་ལ་གུས་ཤིང་འཇིགས་པར་གྱིས་ཤིག བདག་ནི་ཡ་ཝཱེ་ཡིན་ནོ། །  
\v 3 གལ་སྲིད་ཁྱོད་རྣམས་ཀྱིས་བདག་གི་སྒྲིག་ཁྲིམས་བཞིན་བསྒྲུབས་པ་དང་། བདག་གི་བཀའ་རྣམས་བསྲུངས་ནས་དེ་བཞིན་དུ་བྱས་ན།  
\v 4 བདག་གིས་ཁྱོད་རྣམས་ལ་དུས་ལྟར་ཆར་པ་གནང་སྟེ་ས་གཞི་ནས་ལོ་ཏོག་སྐྱེ་བ་དང་། ཞིང་ཁའི་སྡོང་པོར་ཤིང་ཏོག་འཐོག་པར་བྱའོ། །  
\v 5 ཁྱོད་ཚོས་རྒུན་འབྲུམ་བསྡུ་བའི་བར་དུ་གཡུལ་ཁ་གཅོག་པར་འགྱུར་བ་དང་། ས་བོན་འདེབས་པའི་བར་དུ་རྒུན་འབྲུམ་བསྡུ་བར་འགྱུར་ལ། ཟ་མ་ཟོས་ནས་ལྟོ་བ་འགྲང་ཞིང་། ཁྱོད་ཅག་རང་གི་ཡུལ་དུ་བདེ་བར་གནས་པའོ། །  
\v 6 བདག་གིས་ཁྱོད་ཚོའི་ཡུལ་དུ་ཞི་བདེ་གནང་ནས་མལ་དུ་ཉལ་བའི་དུས་སུ་ཁྱོད་ལ་འཇིགས་སྐུལ་མཁན་མེད་པར་བྱ། བདག་གིས་ཁྱོད་ཚོའི་ཡུལ་ནས་གཅན་གཟན་གཏུམ་པོ་རྣམས་མེད་པར་བྱེད་ཅིང་། རལ་གྲི་ཅན་རྣམས་ཡུལ་འདི་བརྒྱུད་ནས་འགྲོ་བར་མི་བྱའོ། །  
\v 7 ཁྱོད་ཚོས་དགྲ་རྣམས་འདེད་པར་བྱེད་ཅིང་། དེ་དག་ཁྱོད་རྣམས་ཀྱི་རལ་གྲིའི་ཁ་ནས་འགྱེལ་བར་འགྱུར།  
\v 8 ཁྱོད་ཚོ་མི་ལྔ་ཡིས་མི་བརྒྱ་འདེད་པ་དང་། ཁྱོད་ཚོ་མི་བརྒྱ་ཡིས་མི་ཆིག་ཁྲི་འདེད་ཅིང་། དགྲ་རྣམས་ཁྱོད་ཀྱི་མདུན་དུ་རལ་གྲིའི་ཁ་ནས་འགྱེལ་བར་འགྱུར་རོ། །  
\v 9 བདག་གིས་ཁྱོད་རྣམས་ལ་བདག་སྐྱོང་བྱས་ཏེ་འབྲས་ལྡན་གྱི་རྒྱུད་མང་པོ་འཕེལ་བར་བྱེད་ཅིང་། བདག་གི་ཁ་ཆད་ཀྱང་ཁྱོད་རྣམས་བར་དུ་བརྟན་པར་བྱའོ། །  
\v 10 ཁྱོད་ཚོས་གསོག་ཉར་བྱས་པའི་འབྲུ་རྙིང་བཟའ་ཞིང་། ཡང་འབྲུ་གསར་བྱུང་བའི་རྐྱེན་གྱིས་འབྲུ་རྙིང་གཙང་བཤེར་བྱེད་པར་འགྱུར།  
\v 11 བདག་གིས་རང་གི་གུར་མཆོག་ཁྱོད་ཚོའི་དཀྱིལ་དུ་འཛུགས་པ་དང་། བདག་གི་སེམས་ནས་ཁྱོད་ཚོར་སྡང་བར་ཡང་མི་བྱའོ། །  
\v 12 བདག་ནི་ཁྱོད་ཅག་གི་ཁྲོད་ནས་འགྲོ་འོང་བྱེད་ཅིང་ཁྱོད་ཚོའི་དཀོན་མཆོག་བྱེད་པ་དང་། ཁྱོད་ཅག་ནི་བདག་གི་འབངས་མི་ཡིན་པར་འགྱུར་རོ། །  
\v 13 བདག་ནི་ཁྱོད་རྣམས་ཀྱི་དཀོན་མཆོག་ཡ་ཝཱེ་ཡིན་པ་དང་། ཁྱོད་རྣམས་ཨེ་ཅིབ་པ་རྣམས་ཀྱི་བྲན་གཡོག་མི་བྱེད་པའི་ཆེད་དུ། བདག་གིས་ཁྱོད་ཚོ་ཨེ་ཅིབ་ཡུལ་ནས་ཕྱི་རོལ་ཏུ་ཁྲིད་པ་ཡིན། བདག་གིས་ཁྱོད་རྣམས་ཀྱིས་འཁུར་བའི་གཉའ་ཤིང་བཅགས་ཏེ་ཁྱོད་ཚོ་མགོ་ཡར་དགྱེ་ནས་མདུན་དུ་སྐྱོད་ཐུབ་པར་བྱས་སོ། །   
\s1 བཀའ་མི་བརྩི་མཁན་ལ་ཉེས་ཆད་གཅོད་པ།  
\p
\v 14 འོན་ཀྱང་། ཁྱོད་ཀྱིས་བདག་གི་ངག་ལ་མི་ཉན་ཞིང་། བདག་གི་བཀའ་རྣམས་བརྩི་བར་མི་བྱེད་པ་དང་།  
\v 15 བདག་གི་སྒྲིག་ཁྲིམས་རྣམས་དོར་ནས་སེམས་སུ་བདག་གི་སྲོལ་ཡིག་རྣམས་ལ་སུན་སྣང་སྐྱེས་ཤིང་། བཀའ་རྣམས་མི་བརྩི་བར་བདག་གི་ཁ་ཆད་རྒྱབ་ཏུ་བསྐྱུར་ན།  
\v 16 བདག་གིས་ཁྱོད་ཅག་ལ་འདི་བཞིན་བྱ་སྟེ། ཁྱོད་ལ་འཇིགས་སྣང་དང་གློ་ནད་དང་ཚ་ནད་བཅས་ཕོག་པར་བྱས་ནས། མིག་ཞར་བ་དང་ལུས་ཟུངས་ཟད་པར་འགྱུར། ཁྱོད་རྣམས་ཀྱིས་དོན་མེད་དུ་ས་བོན་འདེབས་པར་འགྱུར་ཏེ། ཅི་ལ་ཞེ་ན། ཁྱོད་ཚོས་བཏབ་པ་རྣམས་དགྲ་ཡིས་ཡོངས་སུ་བཟའ་བར་འགྱུར་རོ། །  
\v 17 ཁྱོད་རྣམས་ལ་བདག་གི་གདོང་མདོག་ལོག་སྟེ། ཁྱོད་རྣམས་དགྲ་བོའི་མདུན་དུ་ཕམ་པར་བྱའོ། །ཁྱོད་ཚོར་སྡང་བའི་མི་རྣམས་ཀྱིས་ཁྱོད་ཅག་དབང་དུ་བསྡུ་བ་དང་། ར་མདར་རྒྱུག་མཁན་མེད་ཀྱང་ཁྱོད་རྣམས་འབྲོ་བར་འགྱུར་རོ། །  
\v 18 དེ་ལྟར་བྱུང་རྗེས་ཁྱོད་ཅག་གིས་ད་དུང་བདག་གི་ངག་ལ་མི་ཉན་ན། བདག་གིས་ཁྱོད་རྣམས་ཀྱི་སྡིག་པའི་ཕྱིར་ཁྱོད་ཚོར་ཉེས་ཆད་ལྡབ་བདུན་གཅོད་པར་འགྱུར།  
\v 19 བདག་གིས་ཁྱོད་རྣམས་ཀྱི་སྟོབས་ཤུགས་ལས་བྱུང་བའི་ང་རྒྱལ་རྡུལ་དུ་བརླག་པར་བྱེད་པ་དང་། ཁྱོད་རྣམས་ཀྱི་ནམ་མཁའ་ལྕགས་ལྟར་མཁྲེགས་ཤིང་། ཁྱོད་ཚོའི་ས་གཞི་ལི་ལྟར་སྲ་བར་བྱའོ། །  
\v 20 ཁྱོད་རྣམས་ཀྱི་རྩོལ་ཤུགས་ངལ་བ་དོན་མེད་དུ་འགྲོ་བ་སྟེ། ཁྱོད་ཅག་གི་ས་ཞིང་གིས་ལོ་ཏོག་མི་བསྐྱེད་ལ། ས་སྟེང་གི་སྡོང་པོས་ཀྱང་ཤིང་ཏོག་མི་བསྐྱེད་པ་ཡིན་ནོ། །  
\v 21 གལ་སྲིད། ཁྱོད་ཅག་གི་སྤྱོད་པ་སྤྱོད་སྟངས་བདག་དང་རྒྱབ་འགལ་དུ་སོང་ནས་བདག་གི་ངག་ལ་མཉན་མི་འདོད་ན། བདག་གིས་ཁྱོད་རྣམས་ཀྱི་སྡིག་པ་བཞིན་དུ། ལྡབ་བདུན་གྱིས་ཁྱོད་རྣམས་ལ་ཆད་མེད་དུ་བརྡུང་བ་དང་།  
\v 22 བདག་གིས་ས་སྟེང་གི་གཅན་གཟན་རྣམས་ཁྱོད་ཅག་གི་ཁྲོད་དུ་གཏོང་ཞིང་། ཁྱོད་ཅག་གི་བུ་ཕྲུག་རྣམས་འཕྲོག་པ་དང་། ཁྱོད་ཅག་གི་ཕྱུགས་ཟོག་རྣམས་བསད་ནས། ཁྱོད་ཅག་གི་མི་གྲངས་ཇེ་ཉུང་དུ་འགྲོ་ཞིང་སྲང་ལམ་རྣམས་སྟོང་བར་བྱའོ། །  
\v 23 དེ་ལྟར་བྱུང་རྗེས་ཁྱོད་རྣམས་ཀྱིས་ད་དུང་ངའི་བསླབ་ཁྲིམས་དང་དུ་བླངས་ནས་བདག་གི་ཕྱོགས་སུ་མི་འཁོར་བར། བདག་དང་རྒྱབ་འགལ་དུ་སོང་ན།  
\v 24 བདག་ཀྱང་ཁྱོད་དང་རྒྱབ་འགལ་དུ་འགྲོ་ཞིང་། ཁྱོད་རྣམས་ཀྱི་སྡིག་པའི་ཕྱིར་དུ་ལྡབ་བདུན་གྱིས་ཁྱོད་ཅག་ལ་བརྡུང་བར་བྱའོ། །  
\v 25 བདག་གིས་རལ་གྲི་ཁྱོད་རྣམས་ལ་ཕོག་པར་བྱས་ནས་ཁྱོད་ཚོ་ཁ་ཆད་དང་འགལ་བར་ལན་འཇལ་རྒྱུ་ཡིན། ཁྱོད་ཚོ་རང་གི་གྲོང་ཁྱེར་རྣམས་སུ་འདུས་པ་ཡིན་ན། བདག་གིས་ཁྱོད་རྣམས་ཀྱི་དཀྱིལ་དུ་ནད་ཡམས་གཏོང་ཞིང་། ཁྱོད་རྣམས་དགྲ་བོའི་ལག་ཏུ་གཏོད་པར་བྱ།  
\v 26 བདག་གིས་ཁྱོད་ཅག་ལ་འབྲུ་རིགས་འཐོབ་མཚམས་ཆད་པར་བྱ་ཞིང་། བུད་མེད་བཅུ་ཡིས་ཐབ་ཀ་གཅིག་ཏུ་ཁྱོད་རྣམས་ལ་བག་ལེབ་བསྲེག་ཅིང་། ལྗིད་ཚད་འཇལ་ནས་ཁྱོད་རྣམས་ལ་སྦྱིན་པ་དང་། ཁྱོད་ཚོས་དེ་ཟོས་ཀྱང་འགྲང་བར་མི་འགྱུར་རོ། །  
\v 27 དེ་ལྟར་བྱུང་རྗེས་ཁྱོད་ཚོས་ད་དུང་བདག་གི་ངག་ལ་མི་ཉན་པར་བདག་དང་རྒྱབ་འགལ་དུ་སོང་ན།  
\v 28 བདག་ཀྱང་ཁྱོད་ལ་ཁྲོ་ཞིང་རྒྱབ་འགལ་དུ་འགྲོ་བར་བྱ་སྟེ། ཁྱོད་རྣམས་ཀྱི་སྡིག་པའི་ཕྱིར་དུ་ལྡབ་བདུན་གྱིས་ཁྱོད་ཅག་ལ་ཆད་པ་གཅོད་པར་བྱའོ། །  
\v 29 ཁྱོད་རྣམས་ཀྱིས་རང་གི་བུ་རྣམས་ཀྱི་ཤ་བཟའ་བ་དང་། རང་གི་བུ་མོ་རྣམས་ཀྱི་ཤ་ཡང་བཟའ་བར་འགྱུར།  
\v 30 བདག་གིས་ཁྱོད་རྣམས་ཀྱི་མཐོ་གླིང་རྣམས་བརླག་པ་དང་། སྤོས་ཀྱི་མཆོད་ཁྲི་རྣམས་བཤིགས་ནས། ཁྱོད་ཀྱི་ལྷ་རྟེན་རྣམས་ཀྱི་ཞིག་རོའི་སྟེང་དུ་ཁྱོད་རང་གི་བེམ་པོ་རྣམས་གཡུག་པར་བྱེད་ཅིང་། ངའི་སེམས་སུའང་ཁྱོད་རྣམས་ལ་སྡང་བར་གྱུར་ནས།  
\v 31 ཁྱོད་ཅག་གི་གྲོང་ཁྱེར་རྣམས་ཞིག་རལ་དུ་འགྱུར་བ་དང་། ཁྱོད་ཚོའི་གནས་མཆོག་རྣམས་སྟོང་པར་བྱེད་ཅིང་། ཁྱོད་ཚོའི་དྲི་བསུང་ཞིམ་པོ་ལའང་བདག་གིས་སྣོམ་པར་མི་བྱ།  
\v 32 བདག་གིས་ཡུལ་འདི་སྟོང་པར་བྱེད་ཅིང་། ཐ་ན་ཡུལ་འདི་བཙན་འཛིན་བྱེད་མཁན་དགྲ་བོ་རྣམས་ཀྱང་ཧ་ལས་པར་འགྱུར་རོ། །  
\v 33 བདག་གིས་ཁྱོད་ཅག་ནི་མི་རིགས་སོ་སོའི་ཁྲོད་དུ་གཏོར་བ་དང་། རལ་གྲི་བཏོན་ནས་ཁྱོད་རྣམས་འདེད་པར་འགྱུར་ལ། ཁྱོད་ཅག་གི་ཡུལ་ནི་སྟོང་པར་འགྱུར་བ་དང་། ཁྱོད་ཅག་གི་གྲོང་ཁྱེར་རྣམས་ཞིག་རལ་དུ་འགྱུར་རོ། །  
\v 34 ཁྱོད་རྣམས་དགྲ་བོའི་ཡུལ་དུ་གནས་པའི་དུས་སུ། ཁྱོད་ཅག་གི་ཡུལ་ནི་སྟོང་པར་ལུས་པའི་ཉིན་མོ་ནས་ཡང་བསྐྱར་ངལ་གསོ་འཐོབ་པར་འགྱུར་ཞིང་། དེ་ནས་ཡུལ་དེར་ངལ་གསོ་འཐོབ་ཅིང་ཡང་བསྐྱར་ངལ་གསོ་བའི་ཉིན་མོ་རོལ་བར་འགྱུར།  
\v 35 སྟོང་པར་ལུས་པའི་ཉིན་མོ་ཀུན་ལ་ཡུལ་དེས་ངལ་གསོ་བར་འགྱུར་ཞིང་། དེ་ནི་ཁྱོད་རྣམས་དེར་སྡོད་པའི་དུས་སུ་ཁྱོད་ཀྱིས་ངལ་གསོ་བའི་ཉིན་མོར་ངལ་མ་གསོས་པས་ཡིན་ནོ། །  
\v 36 ཁྱོད་རྣམས་ལས་ཤུལ་དུ་ལུས་པ་རྣམས་ལ་མཚོན་ན། བདག་གིས་དགྲ་བོ་རྣམས་ཀྱི་ཡུལ་དུ་དེ་དག་གི་སེམས་སུ་འཇིགས་སྣང་བསྐྱེད་ཅིང་། ཐ་ན་རླུང་གིས་དེད་པའི་ལོ་མའི་ཤག་སྒྲ་ཡིས་ཀྱང་དེ་རྣམས་འབྲོ་བར་བྱེད། ཁོ་ཚོ་རལ་གྲིའི་ཁ་ནས་འབྲོ་བ་ལྟར་འབྲོ་ཞིང་། ར་མདར་རྒྱུག་མཁན་མེད་ནའང་འགྱེལ་བར་འགྱུར།  
\v 37 ར་མདར་རྒྱུག་མཁན་མེད་ནའང་དེ་དག་གིས་ཕན་ཚུན་བསྒྱེལ་ཞིང་། རལ་གྲིའི་ཁ་ནས་འབྲོ་བ་དང་མཚུངས། ཁྱོད་རྣམས་ནི་དགྲ་བོའི་མདུན་དུ་ཚུགས་མི་ཐུབ་བོ། །  
\v 38 ཁྱོད་ཅག་མི་རྣམས་ལས་རྩ་མེད་དུ་འགྲོ་ཞིང་། དགྲ་བོའི་ཡུལ་དེས་ཁྱོད་རྣམས་ཁྱུར་མིད་གཏོང་ངོ་། །  
\v 39 ཁྱོད་ཅག་ལས་ཤུལ་དུ་ལུས་པ་རྣམས་ནི་རང་གི་ནག་ཉེས་ཀྱི་རྐྱེན་གྱིས་དགྲ་བོ་རྣམས་ཀྱི་ཡུལ་དུ་འཕུང་བར་འགྱུར་བ་དང་། མེས་པོ་རྣམས་ཀྱི་ནག་ཉེས་ཀྱི་རྐྱེན་གྱིས་ཀྱང་འཕུང་བར་འགྱུར་རོ། །  
\v 40-41 དེ་དག་གིས་བདག་ལ་ཡིད་ཆེས་མི་བྱེད་པར་བདག་དང་རྒྱབ་འགལ་བྱས་པས། བདག་ཀྱང་ཁོ་ཚོ་དང་རྒྱབ་འགལ་དུ་འགྲོ་ཞིང་། ཁོ་ཚོ་དགྲ་བོའི་ཡུལ་དུ་འཁྲིད་པ་ཡིན། དེའི་དུས་སུ་ཁོ་རྣམས་ཀྱི་མཚན་སྐྱི་བཅད་མེད་པ་ལྟ་བུའི་སེམས་ཁེངས་སྐྱུང་བྱས་ནས། ཁོ་ཚོས་རང་གི་ནག་ཉེས་ཀྱི་ཆད་པ་ཁུར་ཏེ། རང་རང་གི་ནག་ཉེས་དང་མེས་པོ་རྣམས་ཀྱི་ནག་ཉེས་ཁས་བླངས་ན།  
\v 42 བདག་གིས་ང་དང་ཡ་ཀོབ་བར་གྱི་ཁ་ཆད་དང་། ང་དང་ཨི་སཱག་བར་གྱི་ཁ་ཆད་དང་། ང་དང་ཨབ་ར་ཧམ་བར་གྱི་ཁ་ཆད་བཅས་དྲན་པར་བྱེད་ཅིང་། ཡུལ་འདི་ཡང་དྲན་པར་བྱའོ། །  
\v 43 དེ་དག་གིས་ཡུལ་ཁམས་ཡོངས་སུ་དོར་བ་དང་། ཁོ་རྣམས་མེད་པས་སྟོང་པར་ལུས་པའི་དུས་སུ། ཡུལ་དེར་ཡང་བསྐྱར་ངལ་གསོ་འཐོབ་དགོས། ཁོ་ཚོས་ནག་ཉེས་ཀྱི་ཆད་པ་དང་དུ་བླངས་པ་སྟེ། དེ་དག་གིས་བདག་གི་སྲོལ་ཡིག་སྤངས་ཤིང་། སེམས་སུ་བདག་གི་སྒྲིག་ཁྲིམས་རྣམས་ལ་སུན་སྣང་སྐྱེས་པའི་ཕྱིར་རོ། །  
\v 44 འོན་ཀྱང་དེ་ལྟར་ཡིན་ནའང་། དེ་དག་དགྲ་བོ་རྣམས་ཀྱི་ཡུལ་དུ་ཡོད་པའི་སྐབས་སུ། བདག་གིས་ཁོ་ཚོ་མ་དོར་ཞིང་། ཁོ་རྣམས་ལ་སྡང་ནས་རྩ་མེད་དུའང་མ་བཏང་ལ། བདག་དང་ཁོ་རྣམས་བར་གྱི་ཁ་ཆད་ཀྱང་འདོར་བར་མ་བྱས། ཅི་ལ་ཞེ་ན། བདག་ནི་དེ་རྣམས་ཀྱི་དཀོན་མཆོག་ཡ་ཝཱེ་ཡིན་པའོ། །  
\v 45 བདག་ནི་དེ་དག་གི་དཀོན་མཆོག་ཡིན་པའི་ཆེད་དུ་བདག་གིས་མི་རིགས་རྣམས་ཀྱི་མཐོང་ལམ་དུ། དེ་དག་གི་མེས་པོ་རྣམས་ཨེ་ཅིབ་ཡུལ་ནས་ཕྱི་རོལ་ཏུ་ཁྲིད་འོངས་ནས། ངས་དེ་དག་གི་མེས་པོ་རྣམས་ཀྱི་ཁ་ཆད་དྲན་པར་བྱའོ། །བདག་ནི་ཡ་ཝཱེ་ཡིན་ཞེས་པའོ་གསུངས་སོ།།  
\v 46 དེ་དག་ནི་དཀོན་མཆོག་ཡ་ཝཱེས་རི་བོ་སི་ནཱ་རུ་མོ་ཤེ་བརྒྱུད་དེ་ཡེས་ར་ཨེལ་པ་རྣམས་ལ་བཙུགས་པའི་སྒྲིག་ཁྲིམས་དང་། སྲོལ་ཡིག བཀའ་ཁྲིམས་བཅས་ཡིན་ནོ། །   
\c 27
\cl ལེའུ་ཉེར་བདུན་པ། 
\toc1 ༄༅། །ལེ་ཝིའི་ཚུལ་ཁྲིམས་ཀྱི་མདོ། 
\toc2 ལེ་ཝིའི་ཚུལ་ཁྲིམས། 
\s1 དམ་བཅའི་ཁྲིམས།  
\p
\v 1 དེ་ནས་ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 2 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་སྐད་སྒོས་ཤིག སུ་ཞིག་གིས་མི་ཞིག་གི་རིན་ཐང་ལྟར་དཀོན་མཆོག་ཡ་ཝཱེ་ལ་དམ་བཅའ་ཁྱད་པར་བ་ཞིག་འབུལ་ན།  
\v 3 ཁྱོད་ཀྱི་ཚོད་རྩིས་ནི། སྐྱེས་པ་ལོ་ཉི་ཤུ་ནས་དྲུག་ཅུའི་བར་དུ་གནས་མཆོག་གི་སྲང་བཞིན་དུ་དངུལ་སྲང་ལྔ་བཅུ་རུ་བརྩི་བར་བྱའོ། །  
\v 4 གལ་སྲིད་བུད་མེད་ཡིན་ན། དངུལ་སྲང་སུམ་ཅུ་རུ་རྩིས་ཤིག  
\v 5 ལོ་ལྔ་ནས་ཉི་ཤུའི་བར་གྱི་ཕོ་ནི་དངུལ་སྲང་ཉི་ཤུ་དང་། མོ་ནི་དངུལ་སྲང་བཅུ་རུ་བརྩི་དགོས་སོ། །  
\v 6 ཟླ་བ་གཅིག་ནས་ལོ་ལྔ་བར་གྱི་བུ་ནི་དངུལ་སྲང་ལྔ་དང་བུ་མོ་ནི་དངུལ་སྲང་གསུམ་དུ་བརྩི་དགོས།  
\v 7 ལོ་དྲུག་ཅུའི་ཡན་གྱི་སྐྱེས་པ་ཡིན་ན་དངུལ་སྲང་བཅོ་ལྔ་དང་། བུད་མེད་ཡིན་ན་དངུལ་སྲང་བཅུ་རུ་བརྩི་དགོས།  
\v 8 གལ་སྲིད་ཁོ་རང་དབུལ་དྲགས་ཏེ་ཁྱོད་ཀྱི་ཚོད་རྩིས་བཞིན་དུ་བསྒྲུབ་མི་ནུས་ན། མཆོད་དཔོན་གྱི་མདུན་དུ་ཁྲིད་དེ། མཆོད་དཔོན་གྱིས་ཁོ་ལ་ཚོད་རྩིས་བྱེད་ཅིང་། དམ་བཅའ་འཇོག་མཁན་ལག་གི་རྒྱུ་སྟོབས་བཞིན་དུ་མཆོད་དཔོན་གྱིས་ཚོད་རྩིས་བྱེད་དགོས་སོ། །  
\v 9 དཀོན་མཆོག་ཡ་ཝཱེ་ལ་འབུལ་བར་དམ་བཅས་པའི་མཆོད་པ་ནི་ཕྱུགས་ཟོག་ཡིན་ན། དཀོན་མཆོག་ཡ་ཝཱེ་ལ་གང་ཞིག་ཕུལ་བ་ཐམས་ཅད་དམ་པ་ཡིན་དགོས།  
\v 10 དེ་ནི་བརྗེ་མི་རུང་ལ། གཞན་ཞིག་གིས་ཚབ་ཀྱང་བྱེད་མི་རུང་ཞིང་། བཟང་པོའི་ཚབ་ཏུ་ངན་པའམ། ངན་པའི་ཚབ་ཏུ་བཟང་པོ་གང་ཡང་བརྗེ་མི་རུང་། གལ་སྲིད་ཅིས་ཀྱང་ཕྱུགས་ཟོག་གིས་ཕྱུགས་ཟོག་གཞན་པའི་ཚབ་བྱེད་དགོས་ན། སྔར་དམ་བཅས་པ་དང་ཚབ་ཏུ་ཕུལ་བ་གཉིས་ཀ་དམ་པ་ཡིན་དགོས་སོ། །  
\v 11 གལ་སྲིད་ཕྱུགས་ཟོག་དེ་ནི་མི་གཙང་བ་དང་། དཀོན་མཆོག་ཡ་ཝཱེ་ལ་མཆོད་པར་འབུལ་མི་རུང་བ་ཞིག་ཡིན་ན། ཕྱུགས་ཟོག་དེ་མཆོད་དཔོན་གྱི་མདུན་དུ་འཁྲིད་དགོས།  
\v 12 མཆོད་དཔོན་གྱིས་ཕྱུགས་ཟོག་གི་བཟང་ངན་ལ་བལྟས་ནས་རིན་གོང་ཚོད་རྩིས་བྱེད་དགོས་ཤིང་། མཆོད་དཔོན་གྱིས་ཚོད་རྩིས་བྱས་པ་དེ་ཁྱོད་ཀྱི་ཚོད་རྩིས་རིན་གོང་ཡིན་ནོ། །  
\v 13 གལ་སྲིད་དམ་བཅའ་འཇོག་མཁན་གྱིས་ཅིས་ཀྱང་དེ་བླུ་བར་འདོད་ན། ཁྱོད་ཀྱིས་ཚོད་རྩིས་བྱས་པའི་རིན་གོང་སྟེང་ལྔ་ཆ་གཅིག་སྣོན་དགོས་སོ། །  
\v 14 གལ་སྲིད་སུ་ཞིག་གིས་རང་གི་ཁང་པ་དམ་པར་བརྩིས་ཏེ། དཀོན་མཆོག་ཡ་ཝཱེ་ལ་དམ་པར་འབུལ་ན། མཆོད་དཔོན་གྱིས་རིན་གོང་ཚོད་རྩིས་བྱེད་དགོས་ཤིང་། ཁང་པ་བཟང་ངན་གང་ཡིན་ཡང་མཆོད་དཔོན་གྱིས་ཚོད་རྩིས་བྱས་པ་བཞིན་དུ་རིན་གོང་དེ་ཚད་གཞི་རུ་འཛིན་དགོས་སོ། །  
\v 15 ཁང་པ་དམ་པར་རྩི་མཁན་གྱིས་རང་གི་ཁང་པ་བླུ་ན། ཁྱོད་ཀྱིས་རིན་རྩིས་པའི་སྟེང་ལ་ལྔ་ཆ་གཅིག་བསྣན་ནས་སྤྲད་ན་ཁང་པ་ད་གཟོད་མི་དེ་ལ་དབང་བར་འགྱུར་རོ། །  
\v 16 གལ་སྲིད་མི་ཞིག་གིས་རང་གིས་རྒྱུན་འཛིན་བྱས་པའི་ས་ཞིང་ལས་ཁག་ཅིག་དམ་པར་བརྩིས་ཏེ་དཀོན་མཆོག་ཡ་ཝཱེ་ལ་དམ་པར་ཕུལ་ན། ས་ཞིང་དེའི་ས་བོན་འདེབས་ཚད་བཞིན་དུ་ཚོད་རྩིས་བྱེད་དགོས་པ་འདི་ལྟ་སྟེ། ནས་ཁལ་ \f + \ft འདིར་ཁལ་ཞེས་པར་གནའ་བོའི་ཡ་ཧུ་དཱ་མི་རིགས་ཀྱི་སྐད་དུ་ཧོ་མིར་ཟེར། ཧོ་མིར་ནི་དངོས་པོའི་ཤོང་ཚད་འཇལ་བྱའི་རྩི་གཞི་ཞིག་ཡིན་ལ། ཧོ་མིར་གཅིག་ནི་སྤྱི་རྒྱ་བརྒྱ་དང་སོ་ལྔ་ཙམ་ཡིན། \f*གཅིག་གི་ས་བོན་འདེབས་ཐུབ་པའི་ས་ཞིང་ནི་དངུལ་སྲང་ལྔ་བཅུ་ཡིན།  
\v 17 ཁོས་དགའ་སྟོན་གྱི་ལོ་ནས་བཟུང་སྟེ། རང་གི་ས་ཞིང་ཞིག་དམ་པར་བརྩིས་ན་ཁྱོད་ཀྱིས་ཚོད་རྩིས་བྱས་པའི་རིན་གོང་ཚད་གཞིར་འཛིན་དགོས།  
\v 18 ཅི་སྟེ། ཁོས་དགའ་སྟོན་གྱི་ལོ་ཡི་རྗེས་ནས་ས་ཞིང་དམ་པར་བརྩིས་ན། མཆོད་དཔོན་གྱིས་དུས་དེ་ནས་བཟུང་དགའ་སྟོན་གྱི་ལོ་རྗེས་མའི་བར་གྱི་ལོ་ལྷག་མའི་ལོ་གྲངས་བཞིན་དུ་འདེད་རྩིས་བྱས་ཏེ། ཁྱོད་ཀྱིས་ཚོད་རྩིས་བྱས་པའི་རིན་གོང་ལས་འཐེན་དགོས་སོ། །  
\v 19 ས་ཞིང་དམ་པར་རྩི་མཁན་གྱིས་དེ་བླུ་བར་འདོད་ན། ཁྱོད་ཀྱིས་རིན་རྩིས་པའི་སྟེང་ལ་ལྔ་ཆ་གཅིག་བསྣན་ཏེ་སྤྲད་ན་ས་ཞིང་ད་གཟོད་ཁོ་ལ་དབང་བར་བྱས་ཆོག  
\v 20 འོན་ཀྱང་མི་དེས་ས་ཞིང་རང་གིས་མ་བླུས་པའམ་མི་གཞན་ཞིག་ལ་བཙོངས་ན། རྗེས་སུ་དེ་བླུ་བར་མི་ནུས་སོ། །  
\v 21 དགའ་སྟོན་གྱི་ལོར་ས་ཞིང་དེ་ཉོ་བདག་གི་ལག་ནས་ཕྱིར་ལེན་དུས། དཀོན་མཆོག་ཡ་ཝཱེ་ལ་དམ་པ་ཡིན་པས། ཡོངས་སུ་རྫོགས་པར་ཕུལ་བའི་ས་ཞིང་དང་འདྲ་བར་མཆོད་དཔོན་ལ་དབང་བར་འགྱུར་རོ། །  
\v 22 དཀོན་མཆོག་ཡ་ཝཱེ་ལ་དམ་པར་ཕུལ་བའི་ས་ཞིང་ནི་རང་ས་མ་ཡིན་པར་གཞན་ནས་ཉོས་པ་ཡིན་ན།  
\v 23 མཆོད་དཔོན་གྱིས་ཁྱོད་ཀྱི་ཚོད་རྩིས་རིན་གོང་བཞིན་དུ། དགའ་སྟོན་གྱི་ལོ་ཡི་བར་དུ་འདེད་རྩིས་བྱེད་པ་དང་། ཉིན་མོ་དེ་ལ་མི་དེས་ཁྱོད་ཀྱིས་ཚོད་རྩིས་བྱས་པའི་རིན་འབབ་དཀོན་མཆོག་ཡ་ཝཱེ་ལ་དམ་པར་འབུལ་དགོས།  
\v 24 དགའ་སྟོན་གྱི་ལོར་ས་ཞིང་དེ་འཚོང་བདག་སྟེ་ས་ཞིང་དེ་རྒྱུན་འཛིན་བྱེད་མཁན་ལ་ཕྱིར་སློག་དགོས།  
\v 25 ཁྱོད་ཀྱིས་ཚོད་རྩིས་བྱས་པའི་རིན་གོང་ཐམས་ཅད་ནི་གནས་མཆོག་གི་སྲང་བཞིན་དུ་ཡིན་དགོས་ཏེ། དངུལ་སྲང་གཅིག་ལ་གཱེ་ར་ཉི་ཤུ་ཡིན་དགོས།  
\v 26 སྐྱེས་འགོ་སྟེ་ཕྱུགས་ཟོག་ཁྲོད་ཀྱི་སྐྱེས་འགོ་རྣམས་ནི་དཀོན་མཆོག་ཡ་ཝཱེའི་ཡིན་པས། མི་སུས་ཀྱང་དེ་ཡང་བསྐྱར་དམ་པར་རྩི་མི་རུང་ལ། བ་གླང་ངམ་ལུག་གང་ཡིན་ཡང་། དེ་ནི་དཀོན་མཆོག་ཡ་ཝཱེའི་ཡིན་ནོ། །  
\v 27 ཅི་སྟེ། ཕྱུགས་ཟོག་སྐྱེས་འགོ་ནི་མི་གཙང་བ་ཡིན་ན། ཚོད་རྩིས་བྱས་པའི་རིན་གོང་དང་དེའི་ཁར་ལྔ་ཆ་གཅིག་བསྣན་ནས་དེ་བླུ་དགོས། བླུ་བ་མིན་ན་ཁྱོད་ཀྱི་ཚོད་རྩིས་ཀྱི་རིན་བཞིན་དུ་དེ་བཙོང་དགོས་སོ། །  
\v 28 འོན་ཀྱང་། ཡོངས་སུ་རྫོགས་པར་ཕུལ་བ་རྣམས་ཏེ། མི་ཡིས་རང་ལ་གང་ཡོད་པ་ལས་དཀོན་མཆོག་ཡ་ཝཱེ་ལ་གཏན་དུ་འབུལ་འོས་པ་ནི། མིའམ་ཕྱུགས་ཟོག་གམ། ཁོ་ལ་དབང་བའི་ས་ཞིང་བཅས་གང་ཡིན་ཡང་བཙོང་བའམ་ཉོ་བར་མི་རུང་སྟེ། གཏན་དུ་འབུལ་འོས་པ་ཐམས་ཅད་དཀོན་མཆོག་ཡ་ཝཱེ་ལ་ཀུན་ལས་དམ་པ་ཡིན་པའི་ཕྱིར་རོ། །  
\v 29 མི་རྣམས་ལས་གཏན་དུ་འབུལ་འོས་པ་ཐམས་ཅད་ནི་བླུ་མི་རུང་བར་སྲོག་གཅོད་དགོས་སོ། །  
\v 30 ས་གཞིའི་སྟེང་གི་ཡོད་ཚད་དེ་ས་བོན་དང་སྡོང་མགོའི་ཤིང་ཏོག་གང་ཡིན་ཡང་། དེའི་བཅུ་ཆ་གཅིག་ནི་དཀོན་མཆོག་ཡ་ཝཱེའི་ཡིན་ལ། དཀོན་མཆོག་ཡ་ཝཱེ་ལ་དམ་པ་ཡིན་ནོ། །  
\v 31 སུ་ཞིག་གིས་བཅུ་ཆ་གཅིག་དེ་བླུ་བར་འདོད་ན། གཞན་པའི་ལྔ་ཆ་གཅིག་སྣོན་དགོས།  
\v 32 བ་གླང་གི་ཁྱུ་དང་ར་ལུག་གི་ཁྱུ་ཐམས་ཅད་ཀྱི་བཅུ་ཆ་གཅིག་སྟེ། ཕྱུགས་རྫིའི་དབྱུག་པའི་འོག་ནས་འགྲོ་བ་ཐམས་ཅད་ལས་ཕྱུགས་བཅུ་པ་ནི་དཀོན་མཆོག་ཡ་ཝཱེ་ལ་དབང་ཞིང་དམ་པ་ཡིན་ནོ། །  
\v 33 དེའི་བཟང་ངན་གྱི་དབྱེ་བ་འགེར་མི་རུང་ལ། བརྗེ་ཡང་མི་རུང་སྟེ། གལ་སྲིད་ཅིས་ཀྱང་བརྗེ་དགོས་ན། དེའི་ཚབ་བྱེད་དང་འབུལ་འོས་པའི་ཕྱུགས་ཟོག་གཉིས་ཀ་དམ་པ་ཡིན་པས་བླུ་མི་རུང་ཞེས་པའོ་གསུངས་སོ། །  
\v 34 དེ་དག་ནི་དཀོན་མཆོག་ཡ་ཝཱེས་རི་བོ་སི་ནཱ་རུ་ཡེས་ར་ཨེལ་པ་རྣམས་ཀྱི་ཆེད་དུ་མོ་ཤེ་ལ་བསྩལ་པའི་བཀའ་རྣམས་ཡིན་ནོ།། །།