\id JER - NTB 
\h ཡེ་རེམ་ཡཱ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\mt1 ༄༅། །ལུང་སྟོན་པ་ཡེ་རེམ་ཡཱའི་མདོ།  
\imt1 ལུང་སྟོན་པ་ཡེ་རེམ་ཡཱའི་མདོ་ཞེས་བྱ་བའི་ངོ་སྤྲོད་མདོར་བསྡུས།  
\is1 ཁ་བྱང་དང་ལོ་རྒྱུས་རྒྱབ་ལྗོངས།  
\ipi གཞུང་འདིའི་ཁ་བྱང་ནི་ལུང་སྟོན་པ་ཡེ་རེམ་ཡཱའི་མིང་ནས་ཐོགས་པ་དང་། གཞུང་འདིའི་ནང་དུ་ཡེ་རེམ་ཡཱས་ཆོས་ཀྱི་ཕྱག་ལས་གནང་བ་རྣམས་ཡི་གེར་བཀོད་ཡོད། འདི་ནི་ཡེས་ར་ཨེལ་པ་རྣམས་པཱ་པེལ་ལོན་ཡུལ་ལ་བཙན་ཁྲིད་མ་བྱས་ཡར་སྔོན་དུ་རྒྱལ་པོ་ཡོ་ཤི་ཡཱ་དང་རྒྱལ་པོ་གཞན་རྣམས་ཀྱིས་སྲིད་བསྐྱངས་པའི་སྐབས་སུ་ཡེ་རེམ་ཡཱས་ཡ་ཧུ་དཱ་ཡུལ་ནས་ལུང་དུ་བསྟན་པ་ཡིན། སྐབས་དེར་ཡ་ཧུ་དཱ་ཚུད་པའི་རྒྱལ་ཁམས་ཡོངས་ལ་འཕྲོག་བཅོམ་ཐེབས་པ་གཏན་ཁེལ་ཡིན་པར་བརྟེན། མི་རྣམས་ལ་མཚོན་ན་དེ་ནི་གནོན་ཤུགས་ཀྱི་ཆར་རླུང་དྲག་ཏུ་འཚུབ་པའི་དུས་སྐབས་ཤིག་ཡིན། ཡོ་ཤི་ཡཱ་ཡིས་སྲིད་དབང་བཟུང་བའི་རྗེས་སུ་ཆོས་སྲིད་གཉིས་ཀྱི་དབུ་འཛིན་པ་རྣམས་ཡེ་རེམ་ཡཱའི་གསུང་བཤད་ལ་མ་དགའ་བས་ཁོང་ནམ་རྒྱུན་ཉེན་ཁར་ཐུག་ཡོད། དོན་དེ་ཐམས་ཅད་ཀྱི་ཁྲོད་དུ་དཀོན་མཆོག་གིས་ཡེ་རེམ་ཡཱ་ལ་སྲུང་སྐྱོབ་མཛད་པ་དང་། ཡེ་རེམ་ཡཱས་ཀྱང་མི་གདུག་པ་ཅན་རྣམས་ལ་དུས་ནས་དུས་སུ་ཉེན་བརྡ་བཏང་བ་དང་དཀོན་མཆོག་ལ་ཡིད་ཆེས་ཡོད་པའི་མི་རྣམས་ལ་སེམས་གསོ་གནང་བ་རེད།  
\is1 ཡི་གེར་འགོད་མཁན་དང་འགོད་དུས།  
\ipi གཞུང་གི་ནང་དུ་ལུང་སྟོན་པ་ཡེ་རེམ་ཡཱའི་ལུང་བསྟན་གྱི་ཕྱག་ལས་རྣམས་བཀོད་ཡོད། ཁོང་གི་མི་སྒེར་གྱི་འཚོ་བ་དང་དཀའ་ངལ་རྣམས་ནི་ཞལ་ཆད་རྙིང་པའི་ནང་གི་ལུང་སྟོན་པ་གཞན་དག་ལས་ཀྱང་ང་ཚོར་རྒྱུས་མངའ་གསལ་པོར་ཡོད། ཡེ་རེམ་ཡཱའི་ལུང་བསྟན་གྱི་ཕྱག་ལས་རྣམས་སྤྱི་ལོ་སྔོན་གྱི་626ལོར་འགོ་བརྩམས་པ་དང་སྤྱི་ལོ་སྔོན་གྱི་586ལོའི་ཡས་མས་སུ་མཚམས་བཞག་པ་རེད།  
\is1 བརྗོད་སྙིང་དང་གསུང་འཕྲིན།  
\ipi ཡེ་རེམ་ཡཱས་ནམ་ཡིན་ཡང་དཀོན་མཆོག་གིས་ཁོང་ལ་ལུང་སྟོན་པར་ཞལ་འབོད་གནང་བའི་དོན་དེ་རྟོགས་པ་དང་། ཁོང་གིས་གསུང་བཤད་གནང་བ་དག་ཀྱང་ཐོག་མར་དཀོན་མཆོག་གིས་གསུངས་པ་ཡིན་པས་གསུང་དེ་རྣམས་ཇི་བཞིན་འགྲུབ་པར་ཐེ་ཚོམ་མེད། ཉེས་ཆད་གཅོད་པའི་སྐོར་ནི་ཡེ་རེམ་ཡཱས་ཡི་གེར་བཀོད་པའི་གཞུང་རྣམས་ལས་ཧ་ཅང་ཁྱབ་ཆེ་བའི་བརྗོད་གཞི་ཞིག་ཡིན། ཡེ་རེམ་ཡཱས་ལུང་བསྟན་གནང་བ་ལྟར། གལ་སྲིད་ལྷག་བསམ་ཟོལ་མེད་ཀྱིས་འགྱོད་བཤགས་བྱས་པ་ཡིན་ན་འབྱུང་ངེས་པའི་དཀོན་མཆོག་གི་ཉེས་ཆད་དེ་ཁོང་གིས་ནར་འགྱངས་གཏོང་བར་འགྱུར། ཡེ་རེམ་ཡཱ་ལ་མཚོན་ན་དཀོན་མཆོན་ནི་ཡོད་ཚད་ཡིན། ཡེ་རེམ་ཡཱའི་ཆོས་ཀྱི་ལྟ་གྲུབ་ཀྱི་ནང་དུ་དཀོན་མཆོག་ནི་ཡོད་ཚད་ཀྱི་བྱེད་པོ་དང་ཐམས་ཅད་ཀྱི་སྟོབས་ཤུགས། དུས་གཅིག་ལ་ཕྱོགས་ཀུན་ཏུ་ཁྱབ་ཡོད་པ་དེ་ཉིད་ལགས། མཚུངས་སུ་དཀོན་མཆོག་གིས་མི་བུ་སྒེར་རེ་རེ་དང་དེ་དག་གིས་ཁོང་གི་དྲུང་དུ་ལས་ཅི་ཞིག་བགྱི་བར་འགྱུར་བ་ལ་ཐུགས་ཁུར་རྒྱ་ཆེན་པོ་གནང་ཡོད།  
\is1 འཆར་ཟིན།  
\ipi 1. ཡེ་རེམ་ཡཱ་ལ་ཞལ་འབོད་གནང་བ། ༼1:1-19༽  
\ipi 2. ཡ་ཧུ་དཱའི་མི་རྣམས་ལ་ཉེན་བརྡ་བཏང་ནས་སྐུལ་མ་མཛད་པ། ༼2:1-29:32༽  
\ipi 3. བསྐྱར་དར་མཛད་པར་དམ་བཅས་པ། ༼30:1-33:26༽  
\ipi 4. ལོ་རྒྱུས་ནང་གི་གནས་ཚུལ་ཁག་བརྗོད་པ། ༼34:1-35:19༽  
\ipi 5. ཡེ་རེམ་ཡཱའི་དཀའ་སྡུག་གི་སྐོར། ༼36:1-38:28༽  
\ipi 6. ཡེ་རུ་སཱ་ལེམ་གྱི་གྲོང་ཁྱེར་བརླགས་པ་དང་དེའི་མཇུག་འབྲས། ༼39:1-45:5༽  
\ipi 7. རྒྱལ་ཕྲན་རྣམས་ལ་ཉེས་ཆད་བཅད་པ། ༼46:1-51:64༽  
\ipi 8. ལོ་རྒྱུས་ཀྱི་མཇུག་གི་གཏམ། ༼52:1-34༽  
\c 1
\cl ལེའུ་དང་པོ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\p
\v 1 འདི་དག་ནི་པེན་ཡཱ་མེན་ཡུལ་གྱི་ཨ་ན་ཐོད་གྲོང་ཁྱེར་གྱི་མཆོད་དཔོན་ཏེ། ཧིལ་གི་ཡཱའི་བུ་ཡེ་རེམ་ཡཱའི་གསུང་ཡིན་ནོ། །  
\v 2 ཡ་ཧུ་དཱའི་རྒྱལ་པོ་ཨ་མོན་གྱི་བུ་ཡོ་ཤི་ཡཱས་རྒྱལ་སྲིད་སྐྱོང་བའི་ལོ་བཅུ་གསུམ་པར། དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་སྟེ།  
\v 3 ཡ་ཧུ་དཱའི་རྒྱལ་པོ་ཡོ་ཤི་ཡཱའི་བུ་ཡེ་ཧོ་ཡཱ་ཀིམ་གྱིས་རྒྱལ་སྲིད་བསྐྱངས་པ་ནས། ཡ་ཧུ་དཱའི་རྒྱལ་པོ་ཡོ་ཤི་ཡཱའི་བུ་ཚིད་ཀི་ཡཱ་ཡིས་རྒྱལ་སྲིད་སྐྱོང་བའི་དུས་མཇུག་སྟེ། ལོ་བཅུ་གཅིག་པའི་ཟླ་ལྔ་པའི་ནང་ཡེ་རུ་སཱ་ལེམ་གྱི་མི་རྣམས་བཙན་བཟུང་བྱས་པའི་སྐབས་སུ། དཀོན་མཆོག་ཡ་ཝཱེའི་བཀའ་ནི་རྒྱུན་དུ་ཡེ་རེམ་ཡཱ་ལ་བྱུང་ངོ་། །   
\s1 ཡེ་རེམ་ཡཱ་ལགས་བདམས་པ།  
\p
\v 4 ཡེ་རེམ་ཡཱ་ན་རེ། དཀོན་མཆོག་ཡ་ཝཱེའི་བཀའ་ནི་བདག་ལ་བྱུང་བ་འདི་ལྟ་སྟེ།  
\v 5 བདག་གིས་ཁྱོད་མ་ཡི་མངལ་ནང་མ་བཀོད་སྔོན་དུ་ཁྱོད་རང་ངོ་ཤེས་པ་དང་། ཁྱོད་རང་མ་ཡི་མངལ་ལས་མ་ཐོན་སྔོན་དུ་བདག་གིས་ཁྱོད་དམ་པར་མཛད་ཅིང་། ཁྱོད་རང་མི་རིགས་རྣམས་ཀྱི་ལུང་སྟོན་པར་བསྐོས་པ་ཡིན་ཞེས་གསུངས།  
\v 6 དེ་ནས་ངས་འདི་ལྟར། ཀྱེ་གཙོ་བོ་ཡ་ཝཱེ་ལགས། གཟིགས་དང་། ང་ནི་ལོ་ན་ཕྲ་བས་གཏམ་ཅི་ལྟར་སྨྲ་བའང་མི་ཤེས་སོ་ཞེས་ཞུས་པ་ན།  
\v 7 དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་ཀྱིས་ང་རང་ལོ་ན་ཕྲའོ་ཞེས་མ་བཤད་ཅིག ཅི་ལ་ཞེ་ན། བདག་གིས་ཁྱོད་སུ་དང་སུ་ཞིག་གི་གམ་དུ་མངགས་ཀྱང་ཁྱོད་དེར་འགྲོ་དགོས་ལ། བདག་གིས་ཁྱོད་ལ་བཀའ་བབས་ནས་ཅི་སྨྲ་བར་བཅུག་ན་ཁྱོད་ཀྱིས་དེ་བཞིན་སྨྲ་དགོས།  
\v 8 ཁྱོད་དེ་རྣམས་ལ་མ་འཇིགས་ཤིག ཅི་ལ་ཞེ་ན། བདག་ཁྱོད་དང་མཉམ་དུ་ཡོད་པ་དང་ཁྱོད་སྐྱོབ་པར་འགྱུར་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །  
\v 9 དེ་ནས་དཀོན་མཆོག་ཡ་ཝཱེས་ཕྱག་བརྐྱངས་ནས་ངའི་ཁ་ལ་རེག་སྟེ་ང་ལ་འདི་སྐད་དུ། ལྟོས་ཤིག བདག་གིས་རང་གི་གཏམ་ཁྱོད་ཀྱི་སྨྲ་སྒོར་བཞག་པ་ཡིན།  
\v 10 དེ་རིང་བདག་གིས་ཁྱོད་ནི་མི་རིགས་དང་རྒྱལ་ཕྲན་ཐམས་ཅད་ཀྱི་མཐོ་སར་འགོད་པ་སྟེ། ཅི་ལ་ཞེ་ན། རྩ་ནས་འབལ་བ་དང་བཤིག་པ། རྩ་མེད་གཏོང་བ། ཕམ་པར་རྒྱག་པ་བཅས་དང་། ཡང་བསྐྱར་འཛུགས་པ་དང་འདེབས་པའི་ཕྱིར་ཡིན་ཞེས་གསུངས།   
\s1 ཞལ་གཟིགས་གཉིས།  
\p
\v 11 ཡང་དཀོན་མཆོག་ཡ་ཝཱེའི་བཀའ་ནི་བདག་ལ་བྱུང་བ་འདི་ལྟ་སྟེ། ཡེ་རེམ་ཡཱ་ཁྱོད་ཀྱིས་ཅི་ཞིག་མཐོང་ངམ་ཞེས་གསུངས་པར། ངས་འདི་ལྟར། ངས་སྟར་སྡོང་གི་ཡལ་ག་ཞིག་མཐོང་བྱུང་ཞེས་ཞུས་པ་ལ།  
\v 12 དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་ཀྱིས་མཐོང་པ་ལེགས་ཏེ། བདག་གིས་རང་གི་གཏམ་གཟབ་གཟབ་ངང་བསྲུངས་ནས་དེ་འགྲུབ་པར་བྱེད་ངེས་ཡིན་ཞེས་གསུངས།  
\v 13 ཡང་དཀོན་མཆོག་ཡ་ཝཱེའི་བཀའ་ཐེངས་གཉིས་པ་བདག་ལ་བྱུང་བ་འདི་ལྟ་སྟེ། ཡེ་རེམ་ཡཱ་ཁྱོད་ཀྱིས་ཅི་ཞིག་མཐོང་ངམ་ཞེས་གསུངས་པར། ངས་བྱང་ནས་ལྷོ་རུ་བསེགས་པའི་སྣོད་ལས་ཆུ་ཁོལ་བ་མཐོང་བྱུང་ཞེས་ཞུས་པ་ལ།  
\v 14 དཀོན་མཆོག་ཡ་ཝཱེས་ང་ལ་འདི་སྐད་དུ། བྱང་ཕྱོགས་ནས་ཆག་སྒོ་འབྱུང་ཞིང་ཡུལ་འདིའི་མི་ཐམས་ཅད་ཀྱི་སྟེང་ལ་འབབ་པར་འགྱུར།  
\v 15 ལྟོས་ཤིག བདག་གིས་བྱང་ཕྱོགས་རྒྱལ་ཕྲན་རྣམས་ཀྱི་མི་ཐམས་ཅད་བསྡུ་བར་བྱེད་ཅིང་། དེ་རྣམས་འོངས་ནས་རེ་རེས་ཡེ་རུ་སཱ་ལེམ་གྱི་མཁར་སྒོ་རུ་རང་རང་གི་བཞུགས་ཁྲི་འགོད་པ་དང་། ཉེ་འཁོར་གྱི་མཁར་རྣམས་ལ་རྒོལ་ཞིང་། ཡང་ཡ་ཧུ་དཱའི་གྲོང་ཁྱེར་ཐམས་ཅད་ལ་རྒོལ་བར་འགྱུར་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །  
\v 16 མི་འདི་རྣམས་ཀྱིས་བདག་དོར་ནས་ལྷ་གཞན་རྣམས་ལ་སྤོས་བདུགས་ཏེ། རང་གི་ལག་པས་བཟོས་པ་ལ་ཕྱག་བཙལ་ཏོ། །བདག་གིས་སྤྱོད་ངན་འདི་ཐམས་ཅད་ཀྱི་ཕྱིར་དུ་དེ་རྣམས་ལ་ངའི་ཉེས་ཆད་བསྒྲག་པར་འགྱུར་རོ། །  
\v 17 དེ་བས། ཁྱོད་རྣམས་ཀྱིས་སྐ་རགས་ཆོངས་ལ་ཡར་ལོངས་དང་། བདག་གིས་ཁྱོད་ལ་བསྒོས་པའི་བཀའ་ཐམས་ཅད་དེ་དག་ལ་ཤོད་ཅིག བདག་གིས་ཁྱོད་ནི་དེ་དག་གི་མདུན་དུ་འཇིགས་པར་མི་བྱ་བའི་ཆེད་དུ། དེ་རྣམས་ཀྱི་དབང་གིས་ཁྱོད་མ་འཇིགས་ཤིག  
\v 18 ལྟོས་དང་། བདག་གིས་དེ་རིང་ཁྱོད་ནི་མཁར་བརྟན་པོ་དང་ལྕགས་ཀྱི་ཀ་བ། ལི་ཡི་གྱང་བཅས་སུ་བྱས་ནས་ས་གཞི་ཡོངས་ཏེ་ཡ་ཧུ་དཱའི་རྒྱལ་པོ་དང་འགོ་དཔོན། མཆོད་དཔོན། ཡུལ་འདིའི་མི་ཐམས་ཅད་བཅས་ལ་འགོག་རྒོལ་བྱེད་དུ་འཇུག་གོ །  
\v 19 དེ་དག་གིས་ཁྱོད་ལ་རྒོལ་ན་ཡང་ཁྱོད་ལས་རྒྱལ་མི་ཐུབ། ཅི་ལ་ཞེ་ན། བདག་ཁྱོད་དང་མཉམ་དུ་ཡོད་པ་དང་ཁྱོད་སྐྱོབ་པར་འགྱུར་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །   
\c 2
\cl ལེའུ་གཉིས་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེས་ར་ཨེལ་གྱིས་དཀོན་མཆོག་དོར་བ།  
\p
\v 1 དཀོན་མཆོག་ཡ་ཝཱེའི་བཀའ་བདག་ལ་བྱུང་བ་འདི་ལྟ་སྟེ།  
\v 2 ཁྱོད་སོང་ལ་ཡེ་རུ་སཱ་ལེམ་གྱི་མི་རྣམས་ཀྱི་རྣ་ལམ་དུ་འདི་ལྟར་ཤོད་ཅིག དཀོན་མཆོག་ཡ་ཝཱེས་འདི་སྐད་གསུངས་ཏེ། ཁྱོད་ལོ་ན་གཞོན་པའི་བྱམས་བརྩེ་དང་། གཉེན་སྒྲིག་བྱས་མ་ཐག་གི་མཛའ་སེམས། དབེན་སྟོང་དང་ས་བོན་མ་གཏོར་བའི་ཡུལ་དུ་ཁྱོད་བདག་གི་རྗེས་སུ་ཇི་ལྟར་འབྲངས་པ་བཅས་ཐམས་ཅད་བདག་གིས་ཡིད་ལ་བཟུང་ཡོད་དེ།  
\v 3 དུས་དེར་ཡེས་ར་ཨེལ་ནི་ཡ་ཝཱེའི་དྲུང་དུ་དམ་པ་དང་ཁོང་གི་འབྲས་བུ་ཐོག་མ་ཡིན་ཏེ། སུ་ཞིག་གིས་དེ་ཁྱུར་མིད་བཏང་ན་ཐམས་ཅད་སྡིག་ཅན་དུ་བརྩིས་ནས། དེ་དག་གི་སྟེང་དུ་ཆག་སྒོ་འབྱུང་བར་འགྱུར་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །   
\p
\v 4 ཀྱེ་ཡ་ཀོབ་ཀྱི་ཁྱིམ་རྒྱུད་དང་ཡེས་ར་ཨེལ་ཁྱིམ་རྒྱུད་ཀྱི་རིགས་རྒྱུད་སོ་སོས་དཀོན་མཆོག་ཡ་ཝཱེའི་བཀའ་ལ་ཉོན་ཅིག  
\v 5 དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་གི་ཕ་མེས་རྣམས་ཀྱིས་བདག་ལས་ཉེས་སྐྱོན་གང་ཞིག་མཐོང་ནས། བདག་དང་རིང་དུ་གྱེས་ཏེ་རིན་ཐང་མེད་པའི་ལྷ་རྣམས་ཀྱི་རྗེས་སུ་འབྲངས་པ་དང་། རང་ཉིད་ཀྱང་རིན་ཐང་མེད་པར་གྱུར་པ་ཡིན་ནམ།  
\v 6 ཡང་དེ་དག་གིས། ངེད་ཅག་ཨེ་ཅིབ་ཡུལ་ནས་ཡར་བཏོན་ཏེ། སུ་ཡང་འགྲོ་འདུག་མི་བྱེད་པའི་དབེན་སྟོང་དང་། བྱེ་ཐང་ས་དོང་ཅན་དང་སྐམ་སའི་སྨག་རུམ་ལས་ལམ་སྟོན་མཛད་པའི་དཀོན་མཆོག་ཡ་ཝཱེ་གང་དུ་བཞུགས་སམ་ཞེས་མ་དྲིས་སོ། །  
\v 7 བདག་གིས་ཁྱོད་རྣམས་ས་བཅུད་འཛོམས་པའི་གནས་སུ་ཁྲིད་དེ། ཁྱོད་ཚོས་དེའི་ནང་གི་ཤིང་ཏོག་དང་ཟས་མཆོག་སྤྱོད་པར་བྱས་ནའང་། ཁྱོད་ཚོ་གནས་དེ་རུ་སླེབས་པ་ཙམ་གྱིས་བདག་གི་ཡུལ་ནི་མི་གཙང་བར་བཟོས་པ་དང་། བདག་གི་ནོར་སྐལ་ནི་ཞེན་ཁ་ལོག་པ་ཞིག་ཏུ་བཅོས་པ་ཡིན་ནོ། །  
\v 8 མཆོད་དཔོན་རྣམས་ཀྱིས་ཀྱང་དཀོན་མཆོག་ཡ་ཝཱེ་གང་དུ་བཞུགས་སམ་ཞེས་མ་དྲིས་ལ། བཀའ་ཁྲིམས་ཀྱི་མཁན་པོ་རྣམས་ཀྱིས་བདག་ནི་ངོ་མི་ཤེས། འགོ་དཔོན་རྣམས་ཀྱིས་ཀྱང་བདག་ལ་ངོ་ལོག་བྱས་ཏེ། ལུང་སྟོན་པ་རྣམས་ཀྱིས་པཱ་ཨལ་ལ་བརྟེན་ནས་ལུང་བསྟན་ཞིང་སྙིང་པོ་མེད་པའི་འདྲ་སྐུ་དག་གི་རྗེས་སུ་འབྲངས་སོ་ཞེས་གསུངས་པའོ། །  
\v 9 དེ་བས་བདག་གིས་ཁྱོད་རྣམས་དང་ཡང་བསྐྱར་རྩོད་དགོས་ཏེ། ཁྱོད་རྣམས་ཀྱི་བུ་རྒྱུད་རྣམས་ལའང་རྩོད་པར་བྱ་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །  
\v 10 ཁྱོད་རྣམས་ཕར་ཀི་ཐིམ་མཚོ་ཡི་གླིང་ཕྲན་དུ་སོང་ལ་ལྟོས་ཤིག ཡང་ཀེ་དཱར་དུ་མི་མངགས་ནས་གཟབ་གཟབ་ངང་ཞིབ་དཔྱོད་གྱིས་དང་། དོན་འདི་འདྲ་སྔར་བྱུང་ཡོད་མེད་ལ་ལྟོས་ཤིག  
\v 11 མི་རིགས་གང་ཞིག་གིས་རང་གི་ལྷ་རྣམས་བརྗེས་པ་ཡིན་ནམ། དོན་དམ་དུ་དེ་དག་ནི་ལྷ་མ་ཡིན་ནོ། །ཡིན་ཡང་བདག་གི་མི་རྣམས་ཀྱིས་རང་གི་གཟི་བརྗིད་དེ་ཕན་ཐོགས་མེད་པའི་འདྲ་སྐུ་དང་བརྗེས་པའོ། །  
\v 12 ཀྱེ་ནམ་མཁའི་དབྱིངས་རྣམས། འདིའི་ཕྱིར་ཧ་ལས་ཤིང་བླ་འདར་ནས་རབ་ཏུ་སྐྱོ་བར་གྱིས་ཤིག་ཅེས་དཀོན་མཆོག་ཡ་ཝཱེས་གསུངས་པའོ། །  
\v 13 ཅི་ལ་ཞེ་ན། བདག་གི་མི་རྣམས་ཀྱིས་སྤྱོད་ངན་གཉིས་སྤྱད་དེ། ཚེ་སྲོག་དང་ལྡན་པའི་ཆུ་མིག་ \f + \ft འདིར་ཚེ་སྲོག་དང་ལྡན་པའི་ཆུ་མིག་ཅེས་པ་ནི་ཆུ་མིག་ལས་བཞུར་བའི་ཆུ་ནི་དྭངས་གཙང་ཡིན་ཞིང་མི་གསོ་བར་བྱེད་པ་ལ་འཇུག\f*ཡིན་པ་ང་རང་བསྐྱུར་ནས་རང་གི་དོན་དུ་ཆུ་དོང་བརྐོས་པ་དང་། ཆུ་དོང་དེ་ནི་ཞིག་རལ་དུ་སོང་ནས་ཆུ་མི་འཚོག་པའི་ཆུ་དོང་ཞིག་ཡིན་ནོ། །   
\p
\v 14 ཡེས་ར་ཨེལ་ནི་གཡོག་པོའམ་ཁྱིམ་ལས་སྐྱེས་པའི་བྲན་པོ་ཡིན་ནམ། ཁོ་བཅོམ་ནོར་དུ་གྱུར་པ་ཅི་ཡིན་ནམ།  
\v 15 སེང་གེ་དར་མ་དག་གིས་དེ་ལ་ངར་སྐད་དང་ང་རོ་བསྒྲགས་ནས་དེའི་ཡུལ་འགུལ་དུ་བཅུག་པ་དང་། གྲོང་ཁྱེར་རྣམས་བཅོམ་སྟེ་མི་མེད་ལུང་སྟོང་དུ་ལུས་སོ། །  
\v 16 ནོབ་པ་དང་ཐ་ཕན་ཧེ་སི་པ་རྣམས་ཀྱིས་ཁྱོད་ཀྱི་མགོ་བོ་གཅོག་པར་བྱེད་དེ།  
\v 17 འདི་ནི་ཁྱོད་ཀྱིས་རང་སྡུག་རང་གིས་ཉོས་པ་མ་ཡིན་ནམ། ཁྱོད་ཀྱི་དཀོན་མཆོག་ཡ་ཝཱེས་ཁྱོད་ལ་ལམ་སྟོན་གནང་དུས་སུ་ཁྱོད་ཀྱིས་ཁོང་ཉིད་བསྐྱུར་བ་ཡིན།  
\v 18 ད་ལྟ་ཁྱོད་ཀྱིས་ཅིའི་ཕྱིར་ཨེ་ཅིབ་ལ་སོང་ནས་སི་ཧོར་གྱི་ཆུ་འཐུང་བ་དང་། ཨ་སུར་ལ་ཕྱིན་ཏེ་ཕི་རཱད་གཙང་པོའི་ཆུ་འཐུང་བ་ཡིན་ནམ།  
\v 19 ཁྱོད་ཀྱི་སྤྱོད་ངན་གྱི་ཕྱིར་ཁྱོད་ལ་ཉེས་ཆད་ཕོག་ཅིང་། ཁྱོད་ལོག་ལམ་དུ་ཞུགས་པས་ཁྱོད་ལ་བཀའ་བཀྱོན་ཐེབས་ངེས་ཡིན། ཁྱོད་ཀྱིས་རང་གི་དཀོན་མཆོག་ཡ་ཝཱེ་ང་རང་དོར་ཏེ། བདག་ལ་གུས་ཤིང་འཇིགས་པའི་སེམས་མེད་པ་ནི་དངོས་གནས་ངན་པ་དང་སྡུག་བསྔལ་ཡིན་པར་མནོ་བསམ་ཐོངས་ལ་ཤེས་པར་གྱིས་ཞེས་དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་གསུངས་སོ། །   
\s1 ཡེས་ར་ཨེལ་གྱིས་ཡ་ཝཱེར་བསྙེན་བཀུར་མི་བྱེད་པ།  
\p
\v 20 ཁྱོད་ཀྱིས་གནའ་བོའི་དུས་ནས་རང་གི་གཉའ་ཤིང་བཅག་སྟེ་རང་གི་འཆིང་ཐག་བཅད་ནས་ན་རེ། ངས་ཁྱེད་ལ་ཞབས་ཏོག་མི་བསྒྲུབ་ཅེས་སྨྲས་པ་ལྟར། ཁྱོད་ཀྱིས་རི་མཐོན་པོ་རེ་རེའི་སྟེང་དང་སྔོ་ལྗང་གི་ལྗོན་ཤིང་རེ་རེའི་འོག་ཏུ་སྨད་འཚོང་མ་བཞིན་དུ་ལོག་གཡེམ་སྤྱད་པའོ། །  
\v 21 བདག་གིས་ཁྱོད་འཛུགས་དུས་སུ་རྒུན་ཤིང་མཆོག་ཏུ་གྱུར་པ་དང་ས་བོན་ཆེས་དག་མ་ཡིན་ནའང་། ཁྱོད་ནི་ང་ཡི་མདུན་དུ་རི་སྐྱེས་རྒུན་ཤིང་གི་ཡལ་ག་རུལ་བ་ལྟར་གྱུར་པ་ཅི་ཡིན་ནམ།  
\v 22 ཁྱོད་ཀྱིས་བ་ཚྭ་དང་འདག་རྫས་ཀྱིས་གཙང་འཁྲུད་བྱས་ཀྱང་། ཁྱོད་ཀྱི་སྡིག་པའི་ཤུལ་ནི་ང་ཡི་མདུན་དུ་མངོན་པར་གྱུར་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །  
\v 23 ཁྱོད་ཀྱིས་ང་ལ་སྐྱོན་ཅི་ཡང་མེད་དེ། པཱ་ཨལ་གྱི་རྗེས་སུ་ཡང་མ་འབྲངས་ཞེས་ཅི་ལྟར་སྨྲ་ནུས་སམ། ཁྱོད་ཀྱིས་ལུང་པའི་ནང་དུ་སྤྱད་པའི་སྤྱོད་པར་ལྟོས་ཤིག རང་ཉིད་ཀྱིས་གང་ཞིག་སྤྱད་པར་བསམ་བློ་ཐོངས་དང་། ཁྱོད་ནི་མྱུར་དུ་སྐྱོད་པའི་རྔ་མོང་དང་འདྲ་ཞིང་གང་སར་ཧར་རྒྱུག་བྱེད་དེ།  
\v 24 ཁྱོད་ནི་རྐྱང་དང་འདྲ་སྟེ་དབེན་སྟོང་ལ་གོམས་པ་དང་། འདོད་ཆགས་ལང་དུས་རླུང་གི་དྲི་སྣོམ་ཞིང་། འཁྲིག་སྲེད་ལང་དུས་སུ་ཞིག་གིས་འགོག་ནུས་སམ། དེ་འཚོལ་མཁན་རྣམས་ཀྱིས་ཤུགས་རྒྱག་མི་དགོས་ཏེ། དུས་སུ་སླེབས་ན་དེ་རྙེད་པར་འགྱུར།  
\v 25 ཁྱོད་རང་རྐང་རྗེན་དུ་ལུས་པ་དང་མིད་པ་སྐམ་པའི་བར་དུ་མ་འདུག་ཅིག ཡིན་ཡང་ཁྱོད་ན་རེ། ད་ནི་རེ་ཐག་ཆད་སོང་། ང་ནི་ལྷ་རྒྱུས་མེད་རྣམས་ལ་ཆགས་ནས་དེ་དག་གི་རྗེས་སུ་འགྲོ་དགོས་ཞེས་སྨྲས་སོ། །   
\p
\v 26 རྐུན་མ་བཟུང་དུས་ངོ་ཚ་བ་བཞིན་དུ། ཡེས་ར་ཨེལ་གྱི་ཁྱིམ་རྒྱུད་དང་དེ་དག་གི་རྒྱལ་པོ། འགོ་དཔོན། མཆོད་དཔོན། ལུང་སྟོན་པ་རྣམས་ཀྱང་དེ་བཞིན་ངོ་ཚ་བར་འགྱུར།  
\v 27 དེ་དག་གིས་ཤིང་སྡོང་ལ་ཁྱོད་ནི་ངའི་ཕ་ཡིན་ཞེས་དང་། རྡོ་ལ་ཁྱོད་ཀྱིས་ང་བཙས་པ་ཡིན་ཞེས་སྨྲ་ཞིང་། དེ་དག་གིས་བདག་ལ་རྒྱབ་གཏད་ནས་ངའི་ཕྱོགས་སུ་མ་འཁོར། ཡིན་ནའང་དཀའ་སྡུག་ལ་འཕྲད་དུས་ཡར་བཞེངས་ནས་ངེད་རྣམས་སྐྱོབ་རོགས་ཞེས་ཞུ་བ་ཡིན།  
\v 28 ཁྱོད་ཀྱིས་རང་གི་དོན་དུ་བཟོས་པའི་ལྷ་རྣམས་གང་དུ་ཡོད་དམ། ཁྱོད་རང་དཀའ་སྡུག་ལ་འཕྲད་དུས་དེ་དག་ལ་ཁྱོད་སྐྱོབ་ཏུ་ཆུག་དང་། ཅི་ལ་ཞེ་ན། ཀྱེ་ཧོ་ཡ་ཧུ་དཱ། ཁྱོད་ལ་གྲོང་ཁྱེར་ག་ཚད་ཡོད་ན་ཁྱོད་ཀྱི་ལྷ་རྣམས་ཀྱང་དེ་བཞིན་མང་བའོ། །  
\v 29 ཁྱོད་རྣམས་ཀྱིས་ཅིའི་ཕྱིར་བདག་དང་རྩོད་དམ། ཁྱོད་རྣམས་ཐམས་ཅད་བདག་དང་འགལ་བའོ་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །  
\v 30 བདག་གིས་ཁྱོད་ཀྱི་བུ་རྣམས་ལ་བརྡུངས་ནའང་དོན་མེད་ཡིན་ཏེ། དེ་དག་གིས་བསླབ་བྱ་དང་དུ་མ་བླངས། ཁྱོད་ཅག་གི་རལ་གྲིས་ལུང་སྟོན་པ་རྣམས་བསད་པ་ནི་མི་སྲོག་ལེན་པའི་སེང་གེ་བཞིན་ཡིན་ནོ། །  
\v 31 ཀྱེ་དུས་རབས་འདི་ཡི་མི་རྣམས། ཁྱོད་ཚོས་དཀོན་མཆོག་ཡ་ཝཱེའི་གསུང་ལ་གཟབ་གཟབ་བྱས་ནས་ཉོན་དང་། ཡེས་ར་ཨེལ་ལ་མཚོན་ན་བདག་ནི་དབེན་སྟོང་དང་མུན་ནག་གི་ཁམས་སུ་གྱུར་པ་ཡིན་ནམ། ངའི་མི་རྣམས་ཀྱིས་ངེད་རྣམས་ལ་རང་དབང་ཐོབ་པས་ད་ནི་ཁྱེད་ཀྱི་དྲུང་དུ་མི་འོང་ཞེས་སྨྲ་བ་ཅི་ཡིན་ནམ།  
\v 32 ན་ཆུང་མས་རང་གི་རྒྱན་ཆ་བརྗེད་ནུས་སམ། བག་མས་རང་གི་བག་གོས་བརྗེད་ནུས་སམ། ཡིན་ནའང་ངའི་མི་རྣམས་ཀྱིས་ཉིན་ཞག་གྲངས་མེད་དུ་ང་རང་བརྗེད་དོ། །  
\v 33 ཁྱོད་ནི་དགའ་གྲོགས་འཚོལ་བའི་ཐབས་ལམ་ལ་འདི་ལྟར་མཁས་ཏེ། ཐ་ན་བུད་མེད་ངན་པ་ལའང་ཁྱོད་ཀྱིས་རང་གི་ཐབས་ལམ་བསླབས་སོ། །  
\v 34 ཁྱོད་ཀྱི་གྱོན་པའི་ཐུ་བའི་སྟེང་དུ་དབུལ་པོ་ཉེས་མེད་ཀྱི་ཁྲག་ཡོད་ལ། དེ་དག་གིས་ས་ཁུང་བརྐོས་ནས་ནང་ལ་འཛུལ་ཏེ་རྐུ་བྱེད་པ་ཁྱོད་ཀྱིས་མ་མཐོང་། དེ་ལྟར་ཡིན་ནའང་།  
\v 35 ཁྱོད་ཀྱིས་ད་དུང་ན་རེ། ང་ལ་ཉེས་པ་མེད་དེ། དཀོན་མཆོག་ཡ་ཝཱེ་ང་ལ་ཐུགས་ཁྲོས་མེད་ཅེས་ཟེར། ལྟོས་ཤིག བདག་གིས་ཁྱོད་ལ་ཉེས་ཆད་གཅོད་པར་བྱ་སྟེ། ཅི་ལ་ཞེ་ན། ཁྱོད་ཀྱིས་ངས་སྡིག་པ་མ་བྱས་ཟེར་བའི་རྐྱེན་གྱིས་སོ། །  
\v 36 ཁྱོད་ཅིའི་ཕྱིར་ཡར་རྒྱུག་མར་རྒྱུག་བྱས་ཏེ་རང་གི་བགྲོད་ལམ་བསྒྱུར་བ་ཡིན་ནམ། སྔར་ཨ་སུར་ནས་ཁྱོད་སྐྱེངས་པར་གྱུར་པ་ལྟར། ཁྱོད་ཨེ་ཅིབ་ནས་ཀྱང་སྐྱེང་བར་འགྱུར།  
\v 37 ཡང་ཁྱོད་ཀྱིས་ལག་པ་གཉིས་ཀས་མགོ་བསྐྱོར་\f + \ft འདིར་ལག་པ་གཉིས་ཀས་མགོ་བསྐྱོར་ཞེས་པ་ནི་ངོ་གནོངས་པའི་རྟགས་ཤིག་ཡིན།\f*ནས་ཨེ་ཅིབ་ཡུལ་དང་འབྲལ་བར་འགྱུར། ཅི་ལ་ཞེ་ན། དཀོན་མཆོག་ཡ་ཝཱེས་ཁྱོད་ཀྱི་བརྟེན་ས་དེ་དོར་བས། དེ་དག་ལ་བརྟེན་ནས་ཁྱོད་ཀྱི་དོན་མི་འགྲུབ།   
\c 3
\cl ལེའུ་གསུམ་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 བློ་མི་དཀར་བའི་ཡེས་ར་ཨེལ།  
\p
\v 1 གལ་ཏེ་མི་ཞིག་གིས་ཆུང་མ་དོར་ནས་ཆུང་མ་དེ་ཁོ་དང་བྲལ་ཏེ་མི་གཞན་པའི་ཆུང་མ་བྱས་པ་ཡིན་ན། སྐྱེས་པ་དེ་སླར་ཡང་མོའི་གམ་དུ་འགྲོ་ནུས་སམ། གནས་དེ་རྩ་བ་ནས་བཙོག་པར་གྱུར་པ་མ་ཡིན་ནམ། ཁྱོད་ནི་དགའ་རོགས་མང་པོ་དང་ལོག་གཡེམ་སྤྱད་ཅིང་ད་ནི་བདག་གི་གམ་དུ་ལོག་འདོད་དམ་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །  
\v 2 དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་མགོ་ཡར་བཀྱགས་ནས་སྐྱ་ཐེར་ཐེར་གྱི་མཐོ་སྒང་རྣམས་ལ་ལྟོས་ཤིག གནས་གང་དུ་ཁྱོད་ཀྱི་གཡེམ་སྦྱོར་མེད་དམ། ཁྱོད་ལམ་ཁར་བསྡད་དེ་དགའ་རོགས་ལ་སྒུག་པའི་ཚུལ་ནི། ཨ་རབ་པ་ཞིག་དབེན་སྟོང་དུ་འཇབ་པ་དང་འདྲ་སྟེ། ཁྱོད་ཀྱི་གཡེམ་སྦྱོར་དང་མ་རུངས་པས་ས་གཞི་ཐམས་ཅད་བཙོག་པར་བཟོས།  
\v 3 དེ་བས་དཔྱིད་ཆར་འབབ་མཚམས་བཞག་ཅིང་སྟོན་ཁའི་ཆར་བའང་མི་འབབ་པར་གྱུར་ཡང་། ཁྱོད་ཀྱི་གདོང་ནི་ད་དུང་སྨད་འཚོང་མའི་གདོང་བཞིན་ངོ་ཚ་དང་བྲལ་ཏོ། །  
\v 4 ཁྱོད་ཀྱིས་ད་ལྟ་བདག་ལ་ཞུས་ནས་ན་རེ། ཀྱེ་ང་ཡི་ཡབ་ལགས། ཁྱེད་ནི་ངའི་ལོ་ན་གཞོན་དུས་ཀྱི་མཛའ་གྲོགས་ཡིན།  
\v 5 དཀོན་མཆོག་ཡ་ཝཱེ་ཇི་སྲིད་བར་དུ་ཐུགས་ཁྲོས་ནས་ཡུན་རིང་པོར་ཁྲོ་གཏུམ་འབར་ག་ལ་སྲིད་ཅེས་པའོ། །ལྟོས་ཤིག ཁྱོད་ཀྱིས་འདི་ལྟར་སྨྲས་ཀྱང་ད་དུང་ནུས་ཤུགས་ཅི་ཡོད་བཏོན་ནས་སྤྱོད་ངན་སྤྱད་པ་ཡིན་ཞེས་གསུངས་སོ། །   
\s1 ཡེས་ར་ཨེལ་དང་ཡ་ཧུ་དཱ་གཉིས་ཀྱིས་འགྱོད་བཤགས་བྱེད་འོས་པ།  
\p
\v 6 ཡོ་ཤི་ཡཱས་རྒྱལ་སྲིད་སྐྱོང་དུས་སུ་དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་ཀྱིས་ལོག་ལམ་དུ་ཞུགས་པའི་ཡེས་ར་ཨེལ་གྱི་སྤྱོད་པ་མཐོང་ངམ། དེ་ནི་རི་མཐོན་པོ་རེ་རེར་སོང་སྟེ། སྔོ་ལྗང་གི་ལྗོན་ཤིང་རེ་རེའི་འོག་ཏུ་ལོག་གཡེམ་སྤྱད་པའོ། །  
\v 7 ངས་དེ་ཡིས་སྤྱོད་པ་འདི་ཐམས་ཅད་སྤྱད་རྗེས་སླར་ཡང་བདག་གི་ཕྱོགས་སུ་འཁོར་ཡོང་སྙམ་ནའང་དེ་ཕྱིར་མ་འོང་སྟེ། དེའི་སྲིང་མོ་གཡོ་སྒྱུ་ཅན་ཡ་ཧུ་དཱས་ཀྱང་མཐོང་བ་ཡིན།  
\v 8 ལོག་ལམ་དུ་ཞུགས་པའི་ཡེས་ར་ཨེལ་གྱིས་ལོག་གཡེམ་སྣ་ཚོགས་སྤྱད་པས་བདག་གིས་དེར་བཟའ་འཐོར་ཡི་གེ་སྤྲད་ནས་དོར་བ་ཡིན་མོད། འོན་ཀྱང་དེའི་སྲིང་མོ་གཡོ་སྒྱུ་ཅན་ཡ་ཧུ་དཱ་ནི་ད་དུང་མི་སྐྲག་པར་དེས་ཀྱང་ལོག་གཡེམ་སྤྱད།  
\v 9 ཡེས་ར་ཨེལ་གྱིས་ལོག་གཡེམ་སྤྱོད་པ་སྣང་མེད་དུ་བཏང་ཞིང་རྡོ་དང་ཤིང་ལ་ལོག་གཡེམ་སྤྱད་ནས་ས་འདི་ཡོངས་སུ་བཙོག་པར་བྱས།  
\v 10 དོན་འདི་ཐམས་ཅད་ཡོད་ཀྱང་། དེའི་སྲིང་མོ་གཡོ་སྒྱུ་ཅན་ཡ་ཧུ་དཱ་ནི་ང་ཡི་ཕྱོགས་སུ་ལོག་ཁུལ་བྱས་པ་ལས་སེམས་གཅིག་ལུས་གཅིག་མ་ཡིན་ནོ་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །  
\v 11 དཀོན་མཆོག་ཡ་ཝཱེས་ང་ལ་འདི་སྐད་དུ། གཡོ་སྒྱུ་ཅན་གྱི་ཡ་ཧུ་དཱ་ལས་ལོག་ལམ་དུ་ཞུགས་པའི་ཡེས་ར་ཨེལ་ནི་དྲང་པོར་མངོན་ཞིང་།  
\v 12 ཁྱོད་ནི་བྱང་ཕྱོགས་སུ་སོང་ནས་འདི་ལྟར། ཀྱེ་ལོག་ལམ་དུ་ཞུགས་པའི་ཡེས་ར་ཨེལ་ལགས། ཕྱིར་ལོག་དང་ཞེས་སྨྲོས་ཤིག་ཅེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །བདག་ནི་བྱམས་སྙིང་རྗེ་ཅན་ཡིན་པས་ངས་ཁྱོད་ཚོར་སྡང་མིག་གིས་མི་བལྟ་ཞེས་དཀོན་མཆོག་ཡ་ཝཱེས་གསུངས་པའོ། །བདག་ནི་ཇི་སྲིད་བར་དུ་ཁྲོ་བར་མི་བྱ་སྟེ།  
\v 13 ཁྱོད་ཀྱིས་རང་གི་དཀོན་མཆོག་ཡ་ཝཱེ་དང་འགལ་ཏེ། སྔོ་ལྗང་གི་ལྗོན་ཤིང་རེ་རེའི་འོག་ཏུ་ཕྱི་ཕྱོགས་པའི་ལྷ་རྣམས་ཀྱི་རྗེས་སུ་འབྲངས་ནས་བདག་གི་བཀའ་ལ་མ་མཉན་པའི་སྡིག་པ་ཁས་ལོངས་ཤིག་ཅེས་དཀོན་མཆོག་ཡ་ཝཱེས་གསུངས་པའོ། །  
\v 14 ལོག་ལམ་དུ་ཞུགས་པའི་བུ་རྣམས་ཕྱིར་ལོག་ཅིག་ཅེས་དཀོན་མཆོག་ཡ་ཝཱེས་གསུངས། ཅི་ལ་ཞེ་ན། བདག་ནི་ཁྱོད་རྣམས་ཀྱི་ཁྱོ་ག་ཡིན་ལ། ངས་ཁྱོད་རྣམས་གྲོང་ཁྱེར་གཅིག་ནས་མི་གཅིག་རེ་དང་། རིགས་རྒྱུད་གཅིག་ནས་མི་གཉིས་རེ་བླངས་ཏེ་ཛ་ཡན་དུ་འཁྲིད་རྒྱུ་ཡིན།  
\v 15 ངས་རང་གི་བློར་འབབ་པའི་རྫི་བོ་ཁྱོད་རྣམས་ལ་གནང་སྟེ། དེ་དག་གིས་ཤེས་བྱ་དང་ཤེས་རབ་ཀྱིས་ཁྱོད་རྣམས་སྐྱོང་བར་འགྱུར།  
\v 16 ཁྱོད་རྣམས་ནི་ཡུལ་དེ་རུ་དར་ཞིང་རྒྱས་པའི་ཉིན་དེ་དག་ལ། མི་ཡིས་སླར་ཡང་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ཞེས་གླེང་བར་མི་འགྱུར་ལ། དེར་དོ་སྣང་མི་བྱེད། དེ་ཡིད་ལ་མི་དྲན། དེ་དགོས་འདོད་ཀྱང་མི་སྐྱེ། དེ་སླར་བཟོ་བར་ཡང་མི་བྱ་ཞེས་དཀོན་མཆོག་ཡ་ཝཱེས་གསུངས་པའོ། །  
\v 17 དུས་དེར། མི་ཡིས་ཡེ་རུ་སཱ་ལེམ་ལ་དཀོན་མཆོག་ཡ་ཝཱེའི་བཞུགས་ཁྲི་ཞེས་འབོད་ཅིང་། མི་རིགས་ཐམས་ཅད་དེ་རུ་འདུ་བ་དང་། དཀོན་མཆོག་ཡ་ཝཱེའི་མཚན་གྱི་ཕྱིར་ཡེ་རུ་སཱ་ལེམ་དུ་འོང་ཞིང་། ཁོ་རྣམས་ཡང་བསྐྱར་རང་གི་སེམས་ངན་གཤིས་གྱོང་གི་རྗེས་སུ་མི་འབྲང་ངོ་། །  
\v 18 དུས་དེར། ཡ་ཧུ་དཱའི་ཁྱིམ་རྒྱུད་དང་ཡེས་ར་ཨེལ་གྱི་ཁྱིམ་རྒྱུད་གཉིས་ལྷན་ཅིག་ཏུ་འགྲུལ་ཞིང་། བྱང་ཕྱོགས་ནས་མཉམ་དུ་བདག་གིས་ཁྱོད་ཚོའི་མེས་པོ་རྣམས་ལ་ནོར་སྐལ་དུ་གནང་བའི་ཡུལ་དུ་འོང་བར་འགྱུར།   
\s1 དཀོན་མཆོག་གི་མི་རྣམས་ཀྱིས་སྐུ་འདྲར་ཕྱག་བཙལ་བ།  
\p
\v 19 བདག་གིས་ཁྱོད་ནི་རང་གི་བུ་དང་བུ་མོར་བརྩིས་ཤིང་ཁྱོད་ལ་ཡིད་དུ་འོང་བའི་ཡུལ་ཞིག་གནང་བ་སྟེ། ཡུལ་དེ་ནི་མི་རིགས་རྣམས་ལས་ཆེས་ལེགས་པའི་ནོར་སྐལ་ཡིན་ལ། ཁྱོད་ཀྱིས་བདག་ལ་ངའི་ཡབ་ཅེས་བོས་ནས་སླར་ཡང་བདག་དང་མི་འབྲལ་བར་ང་ཡི་རྗེས་སུ་འབྲང་ངེས་ཡིན་སྙམ་ནའང་།  
\v 20 ཀྱེ་ཡེས་ར་ཨེལ་གྱི་ཁྱིམ་རྒྱུད་རྣམས། ཁྱོད་ཚོས་བདག་གི་ཕྱོགས་སུ་གཡོ་སྒྱུ་ཚད་པ་དེ་ནི། ཆུང་མ་ཞིག་གིས་གཡོ་སྒྱུ་ཚད་ནས་རང་གི་ཁྱོ་གར་བྲལ་བ་དང་མཚུངས་ཞེས་དཀོན་མཆོན་ཡ་ཝཱེས་གསུངས་པའོ། །  
\v 21 སྐྱ་ཐེར་ཐེར་གྱི་མཐོ་སྒང་ནས་སྐད་སྒྲ་ཞིག་བྱུང་བ་སྟེ། དེ་ནི་ཡེས་ར་ཨེལ་པ་རྣམས་ངུས་ནས་ནན་ཞུ་བྱེད་པའི་སྐད་སྒྲ་ཡིན་ལ། ཅི་ལ་ཞེ་ན། དེ་རྣམས་ལོག་ལམ་དུ་རྒྱུ་བ་སྟེ་རང་གི་དཀོན་མཆོག་ཡ་ཝཱེ་བརྗེད་པས་ཡིན་ནོ། །  
\v 22 ལོག་ལམ་དུ་ཞུགས་པའི་བུ་རྣམས་ཕྱིར་ཤོག་དང་། བདག་གིས་ཁྱོད་ཚོ་ལོག་ལམ་དུ་ཞུགས་པའི་ནད་གསོ་བར་བྱ། གཟིགས་དང་ངེད་རྣམས་ཁྱེད་ཀྱི་དྲུང་དུ་འོང་བར་བྱ་སྟེ། ཅི་ལ་ཞེ་ན། ཁྱེད་ནི་ངེད་རྣམས་ཀྱི་དཀོན་མཆོག་ཡ་ཝཱེ་ཡིན་པས་སོ། །  
\v 23 རི་སྒང་དང་རི་བོ་རྣམས་ཀྱི་འུར་སྒྲ་ལས་སྐྱབས་འཚོལ་བ་ནི་དོན་མེད་ཡིན་ལ། ཡེས་ར་ཨེལ་གྱི་ཐར་པ་ནི་དངོས་གནས་ང་ཚོའི་དཀོན་མཆོག་ཡ་ཝཱེ་ལ་ཐུག་ཡོད་དོ། །  
\v 24 ངེད་རྣམས་ལོ་ན་གཞོན་པའི་དུས་ནས་ད་ལྟའི་བར་དུ། རང་ཅག་གི་མེས་པོས་ངལ་རྩོལ་བྱས་ནས་ཐོབ་པ་དང་། ཁོང་རྣམས་ཀྱི་ར་ལུག་དང་བ་གླང་གི་ཁྱུ། བུ་དང་བུ་མོ་བཅས་ཐམས་ཅད་ལྷ་ཁྲེལ་མེད་དག་གིས་མེད་པར་བཟོས།  
\v 25 རང་ཅག་དང་རང་ཅག་གི་མེས་པོ་རྣམས་ཀྱིས་ང་ཚོའི་དཀོན་མཆོག་ཡ་ཝཱེ་ལ་འགལ་བའི་སྡིག་པ་བྱས་ཤིང་། རང་ཅག་གིས་ལོ་ན་གཞོན་པའི་དུས་ནས་ད་ལྟའི་བར་དུ་ང་ཚོའི་དཀོན་མཆོག་ཡ་ཝཱེའི་གསུང་ལ་མ་མཉན་པས་ན། རང་ཅག་ངོ་ཚའི་ནང་དུ་ཉལ་ནས་ཡོངས་སུ་ངོ་གནོང་བར་གྱུར་ཅིག   
\c 4
\cl ལེའུ་བཞི་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེས་ར་ཨེལ་ལ་འགྱོད་བཤགས་བྱེད་པར་བསྐུལ་བ།  
\p
\v 1 དཀོན་མཆོག་ཡ་ཝཱེས་འདི་སྐད་དུ། ཀྱེ་ཡེས་ར་ཨེལ། གལ་ཏེ་ཁྱོད་ཕྱིར་ལོག་ན་བདག་གི་ཕྱོགས་སུ་ལོག་དགོས་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །བདག་གི་མིག་མདུན་ནས་ཁྱོད་ཀྱི་ཞེན་ཁ་ལོག་པའི་སྐུ་འདྲ་མེད་པར་བཟོས་ཏེ་ལོག་ལམ་དུ་མི་འགྲོ་ཞིང་།  
\v 2 བདེན་པ་དང་དྲང་གཞག དྲང་བདེན་བཅས་ལ་བརྟེན་ནས། གཏན་དུ་གསོན་པོར་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་བསྐྱལ་ན། མི་རིགས་ཐམས་ཅད་ལ་ཁོང་ནས་བྱིན་རླབས་འཐོབ་ཅིང་། ཁོང་གི་རྐྱེན་གྱིས་གཟི་བརྗིད་འཐོབ་པར་འགྱུར་ཞེས་གསུངས་སོ། །  
\v 3 དཀོན་མཆོག་ཡ་ཝཱེས་ཡ་ཧུ་དཱ་པ་དང་ཡེ་རུ་སཱ་ལེམ་གྱི་མི་རྣམས་ལ་འདི་སྐད་དུ། ཁྱོད་ཚོས་རང་ཉིད་ཀྱི་ཆེད་དུ་ས་རྒོད་བཏོད་དགོས་ཤིང་། ས་བོན་ཚེར་མའི་གསེང་དུ་མ་འདེབས་ཤིག  
\v 4 ཡ་ཧུ་དཱ་དང་ཡེ་རུ་སཱ་ལེམ་གྱི་མི་རྣམས། ཁྱོད་ཚོས་དཀོན་མཆོག་ཡ་ཝཱེའི་ཕྱིར་རང་གི་མཚན་སྐྱི་གཅོད་དགོས་ཏེ། སེམས་ནང་གི་མི་གཙང་བ་རྣམས་མེད་པར་བཟོས་ཤིག དེ་ལྟར་མིན་ཚེ། ཁྱོད་ཚོའི་ངན་སྤྱོད་ཀྱི་རྐྱེན་གྱིས་བདག་གི་ཁོང་ཁྲོ་མེ་ལྟར་འབར་ཞིང་། མི་སུས་ཀྱང་དེ་ཞི་བར་བྱེད་མི་ནུས་ཞེས་གསུངས་སོ། །   
\p
\v 5 ཁྱོད་རྣམས་ཀྱིས་ཡ་ཧུ་དཱ་རུ་སྒྲོགས་ལ་ཡེ་རུ་སཱ་ལེམ་དུ་ཁྱབ་བསྒྲགས་བྱས་ཏེ་ན་རེ། ཡུལ་ཁམས་ཀྱི་ནང་དུ་རྭ་དུང་བུས་ཤིག སྐད་ཆེན་པོས་འདི་ལྟར། རང་ཅག་མཁར་བརྟན་པོ་རྣམས་སུ་འགྲོ་བའི་ཆེད་དུ་ཕྱོགས་གཅིག་ཏུ་འདུས་ཤིག་ཅེས་སྨྲ་བར་གྱིས།  
\v 6 ཡང་ཛ་ཡན་གྱི་ཕྱོགས་སུ་དར་ཆེན་བསྒྲེངས་ནས་ཕྲོས་ཤིག བདག་གིས་ཆག་སྒོ་དང་འཇིགས་པ་ཆེན་པོ་བྱང་ཕྱོགས་ནས་སླེབ་ཏུ་འཇུག་རྒྱུ་ཡིན་པས་དུས་འགྱངས་མ་བྱེད་ཅིག  
\v 7 སེང་གེ་ནི་ནགས་ཚལ་སྟུག་པོ་ནས་ཡར་ཐོན་ཞིང་དེ་ནི་ཡུལ་ཁམས་རྣམས་མེད་པར་བཟོ་མཁན་ཡིན་ལ། དེ་རང་གནས་དང་བྲལ་ནས་ཡོང་བཞིན་པ་དང་ཁྱོད་ཀྱི་ཡུལ་སྟོངས་སུ་འཇུག་ལ། ཁྱོད་ཀྱི་གྲོང་ཁྱེར་དག་རྡུལ་དུ་བརླགས་ནས་མི་གཅིག་ཀྱང་ལུས་པར་མི་བྱའོ། །  
\v 8 དེ་བས་ཁྱོད་རྣམས་ཀྱིས་རྐེད་པར་རྩིད་རས་གཡོགས་ལ་ངུ་འབོད་བྱོས་དང་། ཅི་ལ་ཞེ་ན། དཀོན་མཆོག་ཡ་ཝཱེའི་ཐུགས་ཁྲོ་ནི་རང་ཅག་དང་མ་བྲལ་བའི་ཕྱིར་རོ། །  
\v 9 དཀོན་མཆོག་ཡ་ཝཱེས་འདི་སྐད་དུ། དུས་དེར། རྒྱལ་པོ་དང་འགོ་དཔོན་དག་གི་སེམས་དཔའ་ཞུམ་པར་འགྱུར་ལ། མཆོད་དཔོན་དག་ཧ་ལས་ཤིང་ལུང་སྟོན་པ་རྣམས་ཀྱང་ངོ་མཚར་བར་འགྱུར་ཞེས་གསུངས།  
\v 10 དེ་ནས་ངས་འདི་ལྟར། ཅི་འདྲའི་སྐྱོ་བ་ལ། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་མི་འདི་རྣམས་དང་ཡེ་རུ་སཱ་ལེམ་ལ་མགོ་སྐོར་ཆེན་པོ་བཏང་སྟེ་འདི་སྐད་དུ། ཁྱོད་རྣམས་བདེ་བར་འགྱུར་ཞེས་གསུངས་མོད། དོན་དམ་དུ་སྲོག་གི་སྟེང་ལ་རལ་གྲི་བབས་ཡོད་ཅེས་ཞུས་པ་ཡིན།  
\v 11 དེའི་ཚེ་མི་འདི་རྣམས་དང་ཡེ་རུ་སཱ་ལེམ་ལ་འདི་སྐད་གསུང་བར་འགྱུར། དབེན་སྟོང་གི་སྐྱ་ཐེར་ཐེར་གྱི་མཐོ་སྒང་ལས་ཚ་རླུང་བདག་གི་མི་རྣམས་ཀྱི་བུ་མོའི་ཕྱོགས་སུ་གཡུགས་འོང་སྟེ། སྙིགས་མ་ཡར་ཕྱར་བའི་དོན་དུ་མ་ཡིན་ལ་གཙང་མར་བཟོ་བའི་དོན་དུའང་མ་ཡིན་ནོ། །  
\v 12 ཡང་དེ་ལས་ཆེ་བའི་རླུང་ནི་བདག་གི་ཕྱོགས་སུ་གཡུགས་འོང་སྟེ། ད་ལྟ་བདག་གིས་ཁྲིམས་གཅོད་བསྒྲགས་ནས་དེ་དག་ལ་རྒོལ་བར་བྱའོ་ཟེར།  
\v 13 ལྟོས་ཤིག དེ་ནི་སྤྲིན་བཞིན་དུ་ཡར་རྒྱས་ཤིང་། དེའི་ཤིང་རྟ་ནི་རླུང་འཚུབ་དང་འདྲ། དེའི་རྟ་རྣམས་ནི་གླག་ལས་ཀྱང་མགྱོགས་པས། ངེད་ཅག་ལ་ཆག་སྒོ་འབྱུང་ཞིང་ངེད་རྣམས་ཉམས་པར་གྱུར།  
\v 14 ཀྱེ་ཡེ་རུ་སཱ་ལེམ་ལགས། ཁྱོད་ལ་ཐར་པ་འཐོབ་ཕྱིར་ཁྱོད་ཀྱིས་རང་སེམས་ཀྱི་ངན་པ་དེ་ཁྲུས་ཤིག ངན་སེམས་ཁྱོད་ཀྱི་ནང་དུ་དུས་ག་ཚོད་ལ་འདུག་གམ།  
\v 15 སྒྲ་ཞིག་དཱན་ལས་གྲགས་འོང་ཞིང་། ཆག་སྒོ་ཨེ་ཕཱར་ཡིམ་གྱི་རི་ནས་ཀུན་ལ་བསྒྲག་འོང་།  
\v 16 ཁྱོད་རྣམས་ཀྱིས་མི་རིགས་ཐམས་ཅད་ལ་བསྒྲགས་ནས་ཡེ་རུ་སཱ་ལེམ་ལ་འདི་ལྟར། འགོག་རྒོལ་བྱེད་པའི་མི་ནི་རྒྱང་རིང་ནས་ཡོང་སྟེ་ཡ་ཧུ་དཱའི་གྲོང་ཁྱེར་ལ་ངར་སྐད་སྒྲོག་པ་དང་།  
\v 17 དེ་དག་གིས་ས་ཞིང་སྲུང་མཁན་དང་འདྲ་བར་ཡེ་རུ་སཱ་ལེམ་ཕྱོགས་བཞི་ནས་བསྐོར་བ་ཡིན། ཅི་ལ་ཞེ་ན། དེས་བདག་ལ་རྒྱབ་འགལ་བྱས་པ་ཡིན་ཞེས་ཤོད་ཅིག་ཅེས་དཀོན་མཆོག་ཡ་ཝཱེས་གསུངས་སོ། །  
\v 18 ཁྱོད་ཀྱི་ཅི་བྱས་དང་སྤྱོད་ཚུལ་གྱིས་དོན་འདི་དག་བྱུང་དུ་བཅུག་ལ། འདི་ནི་ཁྱོད་ཀྱི་སྡིག་པའི་མཇུག་འབྲས་ཡིན་ཏེ། དངོས་གནས་སྡུག་བསྔལ་ཆེ་ཞིང་ཁྱོད་ཀྱི་སེམས་ལ་ཕོག་གོ །   
\s1 ཡེ་རེམ་ཡཱ་ཡིས་སྤུན་ཟླ་རྣམས་ལ་སེམས་ཁུར་བྱས་པ།  
\p
\v 19 ཀྱེ་ང་ཡི་སེམས། ང་ཡི་སེམས་ལགས། ངའི་སེམས་ཤིན་ཏུ་སྐྱོ་སྟེ། ངའི་སེམས་ངའི་ནང་དུ་འཚབ་ནས་མི་བདེ་ཞིང་། ང་ཁ་རོག་སྡོད་མི་ནུས་ཏེ། ཅི་ལ་ཞེ་ན། ངས་རྭ་དུང་གི་སྐད་དང་དམག་འཐབ་པའི་སྒྲ་ཐོས་པ་ཡིན།  
\v 20 ས་གཞི་ཡོངས་སུ་གཏོར་བརླག་ཐེབས་པས་མེད་པར་བཟོ་བའི་བརྡ་ནི་བསྟུད་མར་ཐོས་ཡོང་ཞིང་། བདག་གི་གུར་ཡང་གློ་བུར་རྩ་མེད་བཏང་བ་དང་། བདག་གི་ཡོལ་བ་གཤགས་པར་གྱུར།  
\v 21 བདག་གིས་དར་ཆེན་མཐོང་ནས་རྭ་དུང་གི་སྐད་ཐོས་ཏེ་ནམ་ཞིག་གི་བར་དུ་སླེབ་བམ།  
\v 22 དཀོན་མཆོག་ཡ་ཝཱེས་འདི་སྐད་དུ། བདག་གི་མི་རྣམས་ནི་གླེན་ཞིང་ཨུ་ཚུགས་ཆེ་ལ་ང་རང་ངོ་མི་ཤེས་ཏེ། དེ་དག་ནི་བླུན་རྨོངས་གོ་མེད་ཅན་གྱི་བུ་ཡིན་ཞིང་། ངན་པ་སྤྱོད་པར་ཤེས་རབ་ལྡན་ཞིང་། བཟང་པོ་སྤྱོད་པར་ཤེས་བྱ་མེད་དོ་ཞེས་གསུངས་སོ། །  
\v 23 ངས་ས་གཞིར་བལྟས་པ་དང་། ཀྱེ་ཧོ། ས་གཞི་ནི་སྟོངས་ཤིང་གོ་རིམ་མེད་པ་དང་། ངས་ནམ་མཁར་བལྟས་པ་ལ། ནམ་མཁའ་ཡང་འོད་དང་བྲལ།  
\v 24 ངས་རི་བོ་རྣམས་ལ་བལྟས་པ་དང་། ཀྱེ་ཧོ། དེ་དག་འདར་ཞིང་རི་སྒང་ཐམས་ཅད་ཀྱང་རབ་ཏུ་གཡོ་བཞིན་འདུག  
\v 25 ངས་བལྟས་པ་ན། ཀྱེ་ཧོ། མི་གཅིག་ཀྱང་མི་འདུག ནམ་མཁའི་བྱ་ཐམས་ཅད་ཀྱང་ཡིབ་ནས་འདུག  
\v 26 ངས་བལྟས་པ་ན། ཀྱེ་ཧོ། ས་ཞིང་གཤིན་པོ་དེ་དབེན་སྟོང་དུ་གྱུར་ཅིང་། གྲོང་ཁྱེར་ཐམས་ཅད་ནི་དཀོན་མཆོག་ཡ་ཝཱེ་ཐུགས་ཁྲོས་པས་ན་ཁོང་གི་དྲུང་དུ་མེད་པར་བཟོས་པའོ། །  
\v 27 དཀོན་མཆོག་ཡ་ཝཱེས་འདི་སྐད་དུ། ཡུལ་ཁམས་ཐམས་ཅད་སྟོངས་པར་འགྱུར་ངེས། ཡིན་ཡང་བདག་གིས་ཐམས་ཅད་རྩ་མེད་དུ་མི་གཏོང་།  
\v 28 དེ་བས། ས་གཞིས་མྱ་ངན་བྱེད་པ་དང་། ནམ་མཁའ་ལ་ཡང་མུན་ནག་འཐིབ་པར་འགྱུར། ཅི་ལ་ཞེ་ན། བདག་ནི་ཅི་ཞིག་སྨྲས་པར་འགྱོད་པ་མེད་ལ། སེམས་ཐག་བཅད་པས་ནམ་ཡང་འགྱུར་བ་མེད་ཅེས་གསུངས་པས་སོ། །  
\v 29 གྲོང་ཁྱེར་སོ་སོའི་མི་རྣམས་ནི་རྟ་དམག་དང་མདའ་པ་རྣམས་ཀྱི་ཀི་སྒྲའི་རྐྱེན་གྱིས་གང་སར་འབྲོ་བ་སྟེ། ནགས་ཚལ་སྟུག་པོའི་ནང་དུ་འཛུལ་ནས་བྲག་ལ་འཛེགས་པ་དང་། གྲོང་ཁྱེར་རྣམས་ཀྱང་སྤངས་ནས་དེ་རུ་སྡོད་མཁན་གཅིག་ཀྱང་མེད།  
\v 30 ཀྱེ་རྡུལ་དུ་བརླག་པར་འགྱུར་བ་ཁྱོད་ཀྱིས་ཅི་བྱེད་དམ། ཁྱོད་ཀྱིས་གོས་རྒྱ་ཚོས་ཅན་གྱོན་ཞིང་གསེར་གྱི་རྒྱན་ཆ་བཏགས་ནས། མིག་རྩི་བསྐུས་ཏེ་མིག་མཛེས་པར་བྱེད་པ་དང་། རང་ཉིད་ཡག་པར་རློམ་ནའང་ངལ་བ་དོན་མེད་ཡིན་ཏེ། ཁྱོད་ལ་ཡིད་སྨོན་བྱེད་མཁན་གྱིས་ཁྱོད་ལ་མཐོང་ཆུང་བྱས་ནས་ཁྱོད་ཀྱི་སྲོག་འཚོལ་བའོ། །  
\v 31 བདག་གིས་བུད་མེད་ཅིག་ལ་གཟེར་རྒྱག་པའི་སྐད་ལྟ་བུ་དང་། ཕྲུ་གུ་སྐྱེས་འགོ་བཙའ་བའི་འཁུན་སྒྲ་ལྟ་བུ་ཞིག་ཐོས་བྱུང་། དེ་ནི་ཛ་ཡན་གྱི་བུ་མོའི་སྐད་ཡིན་ལ། མོས་དབུགས་རིང་འཐེན་ཏེ་ལག་པ་བརྐྱངས་ནས། ང་ལ་ཆག་སྒོ་འབྱུང་། མི་གསོད་རྣམས་ཀྱི་མདུན་དུ་ངའི་སེམས་ཀྱི་དྲན་པ་ཉམས་སོང་ཞེས་ཟེར་གྱིན་འདུག   
\c 5
\cl ལེའུ་ལྔ་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེ་རུ་སཱ་ལེམ་གྱི་སྡིག་པ།  
\p
\v 1 ཁྱོད་རྣམས་ཡེ་རུ་སཱ་ལེམ་གྱི་སྲང་ལམ་རེ་རེར་སོང་ནས། གྲོང་ཁྱེར་དེའི་ཐང་ཆེན་དུ་མི་སུ་ཞིག་གིས་དྲང་པོར་སྤྱོད་པ་དང་། སུ་ཞིག་གིས་དྲང་བདེན་བསྙེག་པ་འཚོལ་ཞིག གལ་ཏེ་ཡོད་ན། བདག་གིས་གྲོང་ཁྱེར་དེ་གུ་ཡངས་སུ་གཏོང་བར་བྱ།  
\v 2 དེ་དག་གིས་གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་བསྐྱལ་ན་ཡང་མནའ་དེ་ནི་དངོས་གནས་རྫུན་ཡིན།  
\v 3 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱི་སྤྱན་གྱིས་དྲང་བདེན་འཚོལ་བ་མ་ཡིན་ནམ། ཁྱེད་ཀྱིས་དེ་རྣམས་ལ་བརྡུངས་ནའང་དེ་དག་སེམས་མ་སྡུག་ལ། ཁྱེད་ཀྱིས་དེ་དག་རྩ་མེད་དུ་བཏང་ནའང་དེ་དག་གིས་ད་དུང་ཁྱེད་ཀྱི་བསླབ་བྱ་དང་དུ་མ་བླངས། དེ་དག་གིས་རང་གི་ངོ་གདོང་ཕ་བོང་ལས་ཀྱང་མཁྲེགས་པར་བྱས་ནས་ཕྱིར་མི་འཁོར་བ་ཡིན་ནོ། །  
\v 4 བདག་གིས་མི་འདི་དག་ནི་དངོས་གནས་དབུལ་ཞིང་བླུན་རྨོངས་ཡིན་པ་སྟེ། ཅི་ལ་ཞེ་ན། དེ་དག་གིས་དཀོན་མཆོག་ཡ་ཝཱེའི་ཕེབས་ལམ་མི་རྟོགས་པ་དང་། ཁོ་ཚོའི་དཀོན་མཆོག་གི་ཁྲིམས་སྲོལ་ཡང་མི་ཤེས་སོ། །  
\v 5 ང་རང་མི་ཆེན་རྣམས་དང་འཕྲད་དུ་སོང་ནས་ཁོ་རྣམས་ལ་གཏམ་བཤད་དགོས་ཏེ། ཁོ་རྣམས་ཀྱིས་དཀོན་མཆོག་ཡ་ཝཱེའི་ཕེབས་ལམ་དང་ཁོ་ཚོའི་དཀོན་མཆོག་གི་ཁྲིམས་སྲོལ་ཤེས་པ་ཡིན་ཞེས་སྨྲས་ནའང་། མི་འདི་རྣམས་ཀྱིས་མཉམ་དུ་གཉའ་ཤིང་བཅག་སྟེ་འཆིང་ཐག་བཅད་པ་ཡིན།  
\v 6 དེ་བས་ནགས་ཚལ་གྱི་སེང་གེས་ཁོ་རྣམས་གསོད་པར་འགྱུར་ལ། ཐང་རྒོད་ཀྱི་འཕར་སྤྱང་གིས་ཁོ་རྣམས་མེད་པར་བཟོ་ངེས། གཟིག་གིས་མཁར་སྒོ་རུ་དེ་རྣམས་ལ་འཇབ་སྒུག་བྱེད་པ་དང་། མཁར་སྒོ་ནས་ཕྱིར་འབུད་པ་ཐམས་ཅད་གཤགས་པར་འགྱུར། ཅི་ལ་ཞེ་ན། དེ་ཚོའི་ཉེས་སྐྱོན་ཧ་ཅང་མང་ཞིང་ལོག་ལམ་དུ་ཞུགས་པའི་དོན་ཡང་བགྲང་ལས་འདས་པས་སོ། །  
\v 7 བདག་གིས་ཁྱོད་ལ་གུ་ཡངས་ཅི་ལྟར་གཏོང་ངམ། ཁྱོད་ཀྱི་བུ་རྣམས་ཀྱིས་ང་རང་བསྐྱུར་ནས། དཀོན་མཆོག་མིན་པ་དེ་དཔང་དུ་བཙུགས་ནས་མནའ་བསྐྱལ་བ་དང་། བདག་གིས་ཁོ་རྣམས་འགྲང་བར་བྱས་ནའང་དེ་དག་གིས་ལོག་གཡེམ་སྤྱད་ནས་སྨད་འཚོང་མའི་ཁྱིམ་དུ་འཚང་པའོ། །  
\v 8 དེ་དག་ནི་ལེགས་པར་གསོས་པའི་རྟ་དང་འདྲ་སྟེ། འདོད་ཆགས་རྒྱས་ཏེ་ཁྱིམ་མཚེས་ཀྱི་ཆུང་མའི་ཕྱོགས་སུ་འཚེར་བའོ། །  
\v 9 བདག་གིས་དོན་འདི་རྣམས་ཀྱི་ཕྱིར་ཉེས་ཆད་མི་གཅོད་དམ། མི་རིགས་འདི་ལྟ་བུ་ལ་བདག་གིས་ལན་མི་བསློག་གམ་ཞེས་དཀོན་མཆོག་ཡ་ཝཱེས་འདི་སྐད་གསུངས།  
\v 10 ཁྱོད་རྣམས་ཡར་སོང་ནས་དེའི་རྒུན་ཚལ་རྣམས་གཏོར་བར་གྱིས་ཤིག ཡིན་ཡང་རྩ་བ་ནས་མེད་པར་མི་བཟོ་བར་དེའི་ཡལ་ག་ཆོད་ཅིག ཅི་ལ་ཞེ་ན། དེ་ནི་དཀོན་མཆོག་ཡ་ཝཱེ་ལ་མི་གཏོགས་པས་སོ། །  
\v 11 ཡེས་ར་ཨེལ་གྱི་ཁྱིམ་རྒྱུད་དང་ཡ་ཧུ་དཱའི་ཁྱིམ་རྒྱུད་གཉིས་ཀྱིས་བདག་ལ་གཡོ་སྒྱུ་ཚད་པ་ཡིན་ཞེས་དཀོན་མཆོག་ཡ་ཝཱེས་གསུངས་སོ། །   
\p
\v 12 དེ་དག་གིས་དཀོན་མཆོག་ཡ་ཝཱེ་ཁས་མི་ལེན་པར་ན་རེ། ཁོང་གིས་ཅི་ཡང་མཛད་པར་མི་འགྱུར་ཏེ། ཆག་སྒོ་ང་ཚོའི་སྟེང་ལ་ལྷུང་མི་སྲིད། ང་ཚོས་རལ་གྲི་དང་མུ་གེ་ཡང་མཐོང་བར་མི་འགྱུར།  
\v 13 ལུང་སྟོན་པ་རྣམས་ནི་རླུང་ཙམ་ཡིན་པ་དང་དེ་དག་གི་ནང་དུ་བཀའ་ཡང་མེད་ལ། ཁོ་ཚོས་ཅི་སྨྲས་པ་དེ་རང་གི་སྟེང་དུ་འབབ་ངེས་ཡིན་ཞེས་སྨྲས།  
\v 14 དེ་བས་དཔུང་ཚོགས་ཀྱི་དཀོན་མཆོག་ཡ་ཝཱེས་འདི་སྐད་དུ། དེ་དག་གིས་ཚིག་འདི་སྨྲས་པའི་རྐྱེན་གྱིས། ལྟོས་ཤིག བདག་གིས་རང་གི་བཀའ་ནི་ཁྱོད་ཀྱི་ངག་ཏུ་མེ་ལྟར་བྱེད་ཅིང་། འབངས་མི་ནི་ཤིང་ལྟར་བྱས་ནས་མེ་དེས་ཁོ་རྣམས་ཁྱུར་མིད་གཏོང་བར་འགྱུར་རོ། །  
\v 15 ཀྱེ་ཡེས་ར་ཨེལ་གྱི་ཁྱིམ་རྒྱུད་རྣམས། བདག་གིས་མི་སྡེ་གཞན་ཞིག་རྒྱང་རིང་ནས་ཡོང་སྟེ་ཁྱོད་ལ་རྒོལ་བར་བྱེད་ངེས་ཡིན་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །མི་སྡེ་དེ་ནི་གནའ་ནས་གནས་པ་དང་། གནའ་བོའི་མི་སྡེ་ཞིག་ཡིན་ལ། ཁོ་ཚོའི་སྐད་རིགས་ཁྱོད་ཚོས་མི་ཤེས་ལ། སྨྲ་བའི་སྐད་ཆ་ཡང་ཁྱོད་ཚོས་རྟོགས་པར་མི་འགྱུར།  
\v 16 དེ་དག་གི་མདའ་དོང་ནི་ཁ་ཕྱེས་པའི་དུར་ཁུང་དང་འདྲ་ཞིང་། དེ་རྣམས་ཐམས་ཅད་དཔའ་བོ་ཡིན།  
\v 17 དེ་དག་གིས་ཁྱོད་ཚོའི་ལོ་ཏོག་དང་འབྲུ་རིགས་རྣམས་ཁྱུར་མིད་གཏོང་ཞིང་། ཁྱོད་ཀྱི་བུ་དང་བུ་མོ་རྣམས་དང་། ཁྱོད་ཚོའི་ར་ལུག་དང་བ་གླང་གི་ཁྱུ། ཁྱོད་ཚོའི་རྒུན་འབྲུམ་དང་སེ་ཡབ་ཀྱི་ཤིང་རྣམས་ཀྱང་ཁྱུར་མིད་གཏོང་བ་ཡིན། ཁྱོད་ཅག་བརྟེན་སའི་མཁར་བརྟན་པོ་རྣམས་ཀྱང་རལ་གྲིས་འཇོམས་པར་འགྱུར།  
\v 18 ཐ་ན་དུས་དེ་ལ་ཡང་། བདག་གིས་ཁྱོད་རྣམས་རྩ་མེད་དུ་མི་གཏོང་ཞེས་དཀོན་མཆོག་ཡ་ཝཱེས་གསུངས།  
\v 19 གལ་ཏེ་མ་འོངས་པ་ན་འདི་ལྟར། བདག་ཅག་གི་དཀོན་མཆོག་ཡ་ཝཱེས་ཅིའི་ཕྱིར་རང་ཅག་ལ་དོན་འདི་རྣམས་མཛད་པ་ཡིན་ནམ་ཞེས་ཟེར་མཁན་བྱུང་ན། ཁྱོད་ཀྱིས་ཁོ་ཚོར་འདི་ལྟར། ཁྱོད་ཚོས་ཇི་ལྟར་ང་རང་དོར་ནས་རང་གི་ཡུལ་འདིར་ཕྱི་རོལ་པའི་ལྷ་རྣམས་ལ་ཞབས་ཕྱི་བསྒྲུབས་པ་ཡིན་ན། ཁྱོད་ཅག་གིས་དེ་ལྟར་རང་ལ་མི་དབང་བའི་གནས་སུ་ཕྱི་རོལ་པ་རྣམས་ལ་གཡོག་བྱེད་པར་འགྱུར་ཞེས་ཤོད་ཅིག་ཅེས་གསུངས་སོ། །   
\s1 དཀོན་མཆོག་གིས་ཉིད་ཀྱི་འབངས་མི་ལ་ཐ་ཚིག་སྒྲོག་པ།  
\p
\v 20 ཁྱོད་རྣམས་ཀྱིས་ཡ་ཀོབ་ཀྱི་ཁྱིམ་རྒྱུད་ལ་དོན་འདི་བསྒྲགས་ནས་ཡ་ཧུ་དཱ་རུ་འདི་ལྟར་སྒྲོགས་ཤིག  
\v 21 ཀྱེ་གླེན་ཞིང་གོ་བ་མེད་པའི་མི་རྣམས། ཁྱོད་ཚོར་མིག་ཡོད་ཀྱང་མི་མཐོང་ལ། རྣ་བ་ཡོད་ཀྱང་མི་ཐོས། ཡིན་ཡང་ད་ལྟ་གཏམ་འདི་ལ་ཉོན་ཅིག  
\v 22 ཁྱོད་ཚོ་བདག་ལའང་མི་འཇིགས་སམ། ཁྱོད་རྣམས་བདག་གི་མདུན་དུ་མི་འདར་རམ་ཞེས་དཀོན་མཆོག་ཡ་ཝཱེས་གསུངས། བདག་གིས་དུས་གཏན་གྱི་ཁྲིམས་སྲོལ་དུ་རྒྱ་མཚོའི་ས་མཚམས་སུ་བྱེ་མ་བཞག་སྟེ། ནམ་ཡང་དེ་ལས་བརྒལ་མི་རུང་བ་དང་། རྦ་རླབས་འཕྱུར་ཡང་དེ་ལས་རྒྱལ་མི་ནུས་ལ། མཚོ་རླབས་ལང་ལོང་དུ་འཕྱུར་ཡང་དེ་ལས་བརྒལ་ཐབས་མེད་དོ། །  
\v 23 ཡིན་ནའང་མི་འདི་དག་ནི་གཤིས་གྱོང་ངོ་ལོག་གི་སེམས་དང་བཅས་བདག་དང་བྲལ་ནས་སོང་།  
\v 24 དེ་དག་གི་སེམས་སུ་བདག་ཅག་གིས་རང་རེའི་དཀོན་མཆོག་ཡ་ཝཱེ་ལ་གུས་ཤིང་འཇིགས་པར་བྱེད་འོས་ཏེ། ཁོང་གིས་དུས་བཞིན་ཆར་བ་གནང་སྟེ། དེ་ནི་སྟོན་དཔྱིད་གཉིས་ཀྱི་ཆར་བ་ཡིན། ཡང་རང་ཅག་གི་དོན་དུ་སྟོན་ཐོག་བསྡུ་བའི་དུས་ཚིགས་གཏན་ལ་ཕབ་པ་ཡིན་ཞེས་མི་དྲན་ནོ། །  
\v 25 ཁྱོད་ཚོའི་ཉེས་སྐྱོན་གྱིས་འདི་རྣམས་ཁྱོད་ཚོ་དང་འབྲལ་བར་བྱས་ཤིང་། ཁྱོད་ཚོའི་སྡིག་པ་ཡིས་ཁྱོད་ཚོའི་བདེ་སྐྱིད་ཕྲོགས་པ་ཡིན།  
\v 26 བདག་གི་འབངས་མིའི་ཁྲོད་དུ་ངན་པ་ཡོད་ལ། དེ་དག་བྱ་འཛིན་མཁན་ལྟར་ལྐོག་ཏུ་འཇབ་ནས་ལྟ་ཞིབ་བྱེད་པ་དང་། དྲ་རྒྱ་བཙུགས་ནས་མི་རྣམས་འཛིན་པ་ཡིན།  
\v 27 བྱ་གཟེབ་ནང་དུ་བྱ་བྱེའུ་ཡིས་བཀང་པ་ལྟར། དེ་དག་གི་ཁང་པར་ཡང་གཡོ་སྒྱུས་བཀང་པས་ཁོ་རྣམས་འབྱོར་བ་རྒྱས་ཤིང་སྟོབས་ཅན་དུ་གྱུར།  
\v 28 དེ་རྣམས་ལུས་སྟོབས་རྒྱས་ཤིང་ངན་སྤྱོད་ཚད་མེད་སྤྱད་པ་དང་། མི་ཡི་ཆེད་དུ་དཀར་མི་འདོན་ལ། དྭ་ཕྲུག་གི་ཆེད་དུ་དཀར་བཏོན་ནས་དེ་དག་གྱོད་ལས་རྒྱལ་བར་མ་བཅུག་ཅིང་། དབུལ་པོའི་ཆེད་དུ་དག་འབུད་ཀྱང་མ་བྱས་སོ། །  
\v 29 བདག་གིས་དོན་འདི་རྣམས་ཀྱི་ཕྱིར་ཉེས་ཆད་མི་གཅོད་དམ། མི་རིགས་འདི་ལྟ་བུ་ལ་བདག་གིས་ལན་མི་བསློག་གམ་ཞེས་དཀོན་མཆོག་ཡ་ཝཱེས་གསུངས།  
\v 30 རྒྱལ་ཁམས་ནང་དུ་འཇིགས་སུ་རུང་ཞིང་སྐྲག་སྣང་ཅན་གྱི་དོན་བྱུང་སྟེ།  
\v 31 ལུང་སྟོན་པ་རྣམས་ཀྱིས་ལུང་བསྟན་རྫུན་མ་སྨྲ་ཞིང་། མཆོད་དཔོན་རྣམས་ཀྱིས་དབང་ཆ་རང་གི་ལག་ཏུ་འཛིན་པ་ཡིན། བདག་གི་མི་རྣམས་ཀྱང་འདི་ལ་དགའ་སྟེ། མཐའ་མའི་དུས་སུ་སླེབས་དུས་ཁྱོད་ཚོས་ཅི་ཞིག་བྱེད་དམ།   
\c 6
\cl ལེའུ་དྲུག་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེ་རུ་སཱ་ལེམ་གྱི་མཐའ་ནས་བསྐོར་ཞིང་རྒོལ་བ།  
\p
\v 1 ཀྱེ་པེན་ཡཱ་མེན་པ་རྣམས། སྲོག་ཐར་བར་ཡེ་རུ་སཱ་ལེམ་ནས་བྲོས་ཏེ། ཐེ་ཀོ་ཨ་རུ་རྭ་དུང་བུས་ཤིག པེད་ཧག་ཀེ་རེམ་དུ་བརྡ་མཚོན་རྒྱལ་མཚན་སྒྲེངས་ཤིག ཅི་ལ་ཞེ་ན། ཆག་སྒོ་དང་གཏོར་བརླག་ཆེན་པོ་ནི་བྱང་ཕྱོགས་ནས་སླེབས་ལ་ཉེ།  
\v 2 ཡིད་དབང་འཕྲོག་པའི་ཛ་ཡན་\f + \ft འདིར་ཛ་ཡན་ཞེས་པ་ཡེ་རུ་སཱ་ལེམ་ལ་གོ་དགོས།\f*གྱི་བུ་མོ་ནི་བདག་གིས་མེད་པར་བྱེད་ངེས་ཡིན།  
\v 3 རྫི་བོས་ལུག་ཁྱུ་དེད་ནས་དེར་སླེབ་པ་དང་། དེའི་ཕྱོགས་བཞི་ནས་གུར་ཕུབ་སྟེ་རེ་རེས་རང་རང་གི་གནས་སུ་ལུག་ཁྱུ་འཚོ་བར་འགྱུར།  
\v 4 ཁྱོད་རྣམས་ཀྱིས་དེ་ལ་རྒོལ་བར་གྲ་སྒྲིག་བྱོས་ཤིག ཡར་ལོངས་དང་། རང་ཅག་ཉིན་གུང་ལ་ཡར་འགྲོ་བར་བྱ། ཀྱེ་ཧོ། ཉི་མ་ནུབ་ལ་ཉེ་ཞིང་ས་སྲོས་གྲིབ་མ་ཇེ་རིང་དུ་སོང་།  
\v 5 དེ་བས་ལོངས་དང་རང་ཅག་མཚན་མོའི་དུས་སུ་ཡར་སོང་ནས་དེའི་བཙན་རྫོང་རྣམས་གཏོར་དགོས།  
\v 6 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་རྣམས་ཀྱིས་ཤིང་སྡོང་ཆོད་ཅིག ས་རགས་བརྩིགས་ནས་ཉེས་ཆད་གཅོད་འོས་པའི་གྲོང་ཁྱེར་ཏེ་ཡེ་རུ་སཱ་ལེམ་ལ་རྒོལ་བར་གྱིས་ཤིག ཅི་ལ་ཞེ་ན། གྲོང་ཁྱེར་དེ་རུ་གཉའ་གནོན་གྱིས་བཀང་བས་སོ། །  
\v 7 ཁྲོན་པ་ནས་ཇི་ལྟར་ཆུ་འཕྱུར་བ་བཞིན་གྲོང་ཁྱེར་འདི་ལས་དེ་ལྟར་སྡིག་པ་ཐོན་ཡོང་། དེའི་ནང་དུ་གདུག་རྩུབ་དང་གཏོར་བརླག་བྱེད་པའི་དོན་རྣམས་སྦས་ཡོད་པ་དང་། ན་ཚ་དང་རྨས་སྐྱོན་ཡང་རྒྱུན་དུ་ང་ཡི་མདུན་དུ་ཡོད།  
\v 8 ཀྱེ་ཡེ་རུ་སཱ་ལེམ། བདག་གི་སེམས་ཁྱོད་དང་རིང་དུ་མི་གྱེས་པ་དང་། ངས་ཁྱོད་དབེན་སྟོང་དུ་བསྒྱུར་ནས་མི་མེད་ལུང་སྟོང་ལ་འགྱུར་དུ་མི་འཇུག་པའི་ཆེད་དུ་ཁྱོད་ཀྱིས་བསླབ་བྱ་ལོངས་ཤིག་ཅེས་གསུངས་སོ། །   
\s1 ངོ་ལོག་བྱས་པའི་ཡེས་ར་ཨེལ།  
\p
\v 9 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། དགྲ་བོ་རྣམས་ཀྱིས་རྒུན་འབྲུམ་གཙང་མར་བཏོགས་པ་བཞིན་ཡེས་ར་ཨེལ་གྱི་མི་ལྷག་ལུས་རྣམས་ཀྱང་འཇོམས་པར་བྱེད། ཁྱོད་ནི་རྒུན་འབྲུམ་འཐོག་མཁན་དང་འདྲ་བར་ལག་པ་ཡལ་གའི་སྟེང་དུ་བསྲིངས་ནས་ཡང་ཡང་བཏོག་དགོས་ཞེས་གསུངས་སོ། །  
\v 10 ད་ལྟ་བདག་གིས་སུ་ཞིག་ལ་གཏམ་སྨྲའམ། སུ་ཞིག་ལ་ཐ་ཚིག་བསྒྲགས་ནས་མཉན་པར་བྱའམ། ལྟོས་ཤིག དེ་དག་གི་རྣ་བ་གཙང་མར་མ་མཛད་པས་ཐོས་མི་ནུས་ལ། ལྟོས་ཤིག དེ་རྣམས་ཀྱིས་དཀོན་མཆོག་ཡ་ཝཱེའི་བཀའ་ནི་ངོ་ཚ་རུ་བརྩི་བ་ལས་དགའ་སྤྲོ་རུ་མི་བརྩི།  
\v 11 དེ་བས། བདག་ནི་དཀོན་མཆོག་ཡ་ཝཱེའི་ཐུགས་ཁྲོ་ཡིས་བཀང་སྟེ་བཟོད་མི་ནུས་ཤིང་། ཁྱོད་ཀྱིས་ཐུགས་ཁྲོ་དེ་ནི་སྲང་གི་བྱིས་པ་དང་མཉམ་དུ་འཛོམས་པའི་ན་གཞོན་རྣམས་ཀྱི་སྟེང་ལ་འཕོ་བར་གྱིས་ཤིག ཁྱོ་ཤུག་གཉིས་ཀ་དང་བགྲེས་པོ། ཚེ་ལོ་མཐར་ཕྱིན་པ་བཅས་ཐམས་ཅད་ལྷན་ཅིག་ཏུ་འཛིན་པར་འགྱུར་རོ། །  
\v 12 ཡང་དེ་དག་གི་ཁང་པ་དང་ཞིང་ས། ཆུང་མ་བཅས་ནི་གཞན་ལ་དབང་བར་འགྱུར། བདག་གིས་ལག་པ་བརྐྱངས་ནས་ས་འདིའི་ཡུལ་མི་རྣམས་ལ་རྒོལ་བར་འགྱུར་ཞེས་དཀོན་མཆོག་ཡ་ཝཱེས་གསུངས།  
\v 13 ཅི་ལ་ཞེ་ན། དེ་དག་མཆོག་དམན་སུ་ཡིན་ཡང་ཐམས་ཅད་འདོད་རྔམ་ཅན་ཡིན་ཞིང་། ལུང་སྟོན་པ་ནས་མཆོད་དཔོན་རྣམས་ཀྱི་བར་དུ་ཐམས་ཅད་ཀྱིས་གཡོ་སྒྱུའི་སྦྱོར་བ་སྤེལ་ཏོ། །  
\v 14 དེ་རྣམས་ཀྱིས་ཧོལ་རྒྱུག་གིས་ངའི་མི་རྣམས་ཀྱི་རྨས་སྐྱོན་གསོས་ནས་ན་རེ། ད་ནི་བདེའོ་ད་ནི་བདེའོ་ཟེར་ཡང་། དོན་དམ་དུ་བདེ་བ་མེད་དོ། །  
\v 15 དེ་རྣམས་ཀྱིས་ཞེན་ཁ་ལོག་པའི་དོན་བྱས་ཏེ་ངོ་ཚ་བར་འོས་ན་ཡང་། དེ་རྣམས་ལ་ངོ་ཚ་བའི་ཚོར་སྣང་ཙམ་ཡང་མེད་དེ་ངོ་ཚ་ཁྲེལ་མེད་རང་ཡིན་ནོ། །དེ་བས། དེ་རྣམས་ནི་སར་འགྱེལ་བའི་མི་རྣམས་དང་མཉམ་དུ་འགྱེལ་ངེས་ལ། ངས་དེ་རྣམས་ལ་ཉེས་ཆད་གཅོད་སྐབས་དེ་རྣམས་འགྱེལ་བར་འགྱུར་ཞེས་དཀོན་མཆོག་ཡ་ཝཱེས་གསུངས་སོ། །  
\v 16 ཡང་དཀོན་མཆོག་ཡ་ཝཱེས་འདི་སྐད་དུ། ཁྱོད་རྣམས་ལམ་ཁར་འགྲེང་ནས་ལྟོས་ཤིག གནའ་བོའི་བཞུད་ལམ་རྣམས་ལ་རྩད་ཆོད་ཅིག ལམ་བཟང་པོ་དེ་གང་དུ་ཡོད་ན་དེའི་ནང་དུ་འགྲུལ་བར་གྱིས། འདི་ལྟར་སྤྱད་ན་ཁྱོད་རྣམས་ཀྱི་སེམས་སུ་ངལ་གསོ་རྙེད་པར་འགྱུར། འོན་ཀྱང་དེ་དག་གིས་ངེད་རྣམས་དེའི་ནང་དུ་འགྲུལ་བར་མི་བྱ་ཞེས་སྨྲས་སོ། །  
\v 17 བདག་གིས་ཁྱོད་རྣམས་ཀྱི་དོན་དུ་སོ་པ་བསྐོས་ཏེ། གཟབ་གཟབ་ངང་རྭ་དུང་གི་སྐད་ལ་ཉོན་ཅིག་ཅེས་སྨྲས་ནའང་། ཁོ་རྣམས་ཀྱིས་ངེད་ཅག་གིས་མི་མཉན་ཞེས་སྨྲས།  
\v 18 དེ་བས། ཀྱེ་མི་རིགས་རྣམས་ཀྱིས་ཉོན་ཅིག ཀྱེ་ཡེས་ར་ཨེལ་གྱི་མི་ཚོགས་རྣམས། ཁོ་རྣམས་ལ་ཅི་ཞིག་འབྱུང་བ་རྟོགས་པར་གྱིས།  
\v 19 ཀྱེ་ས་གཞི་ལགས་ཉོན་དང་། ལྟོས་ཤིག ཁོ་རྣམས་ཀྱིས་ངའི་བཀའ་ལ་རྣ་བ་བླགས་ནས་མ་མཉན་པ་དང་ངའི་བཀའ་ཁྲིམས་ཀྱང་དོར་བ་ཡིན་པས། བདག་གིས་མི་འདི་རྣམས་ཀྱི་སྟེང་ལ་ཆག་སྒོ་འབྱུང་བར་བྱ་སྟེ། དེ་ནི་ཁོ་རྣམས་ཀྱི་ཇུས་ངན་ལས་ཐོགས་པའི་འབྲས་བུ་ཡིན་ནོ། །  
\v 20 ཤེ་བཱ་ནས་ཡོང་བའི་སྤོས་དཀར་དང་རྒྱང་རིང་ནས་ཐོན་པའི་དྲི་ཞིམ་ཤུ་དག་བདག་ལ་ཕུལ་བས་ཅི་ལ་ཕན། ཁྱོད་རྣམས་ཀྱི་སྦྱིན་སྲེག་གི་མཆོད་པ་ལ་བདག་མི་དགའ། ཁྱོད་ཚོའི་མཆོད་རྫས་རྣམས་ལ་ཡང་བདག་མི་མགུ་ཞེས་གསུངས་སོ། །  
\v 21 དེ་བས་དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག བདག་གིས་བཀག་རྡོ་མི་སྡེ་འདིའི་མདུན་དུ་འཇོག་པར་བྱ་སྟེ། ཕ་དང་བུ་གཉིས་ཀ་དེའི་སྟེང་དུ་འགྱེལ་བ་དང་། ཁྱིམ་མཚེས་དང་གྲོགས་པོ་ལྷན་ཅིག་ཏུ་མེད་པར་འགྱུར་ཞེས་གསུངས་སོ། །   
\s1 བྱང་ཕྱོགས་ནས་འོངས་པའི་བཙན་འཛུལ་པ།  
\p
\v 22 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག དམག་དཔུང་ཞིག་བྱང་ཕྱོགས་ནས་འོང་གིན་འདུག ས་གཞིའི་མཐའ་མཚམས་ནས་མི་རིགས་ཆེན་པོ་ཞིག་བསྐུལ་ནས་སླེབས་ཤིང་།  
\v 23 དེ་དག་གི་ལག་ཏུ་གཞུ་དང་མདུང་བཟུང་སྟེ་གདུག་རྩུབ་ཆེ་ལ་སྙིང་རྗེ་མེད་པ་དང་། རྒྱ་མཚོའི་རྦ་རླབས་འཕྱུར་བ་ནང་བཞིན་དེ་དག་གིས་ང་རོ་འདོན། ཀྱེ་ཛ་ཡན་གྱི་བུ་མོ་ལགས། དེ་རྣམས་རྟ་ལ་ཞོན་ནས་བསླེབ་ཅིང་གཡུལ་ངོར་ཞུགས་པའི་དམག་མི་ནང་བཞིན་གྲལ་བསྒྲིགས་ཏེ་ཁྱོད་ལ་རྒོལ་བར་འགྱུར་ཞེས་གསུངས།  
\v 24 རང་ཅག་གིས་དེ་ཚོའི་སྐོར་གྱི་གཏམ་ཐོས་ནས་ལག་རྩ་ལྷོད་དེ། རང་ཅག་ཟུག་རྔུ་དྲག་པོས་གདུངས་ནས་སྐྱེ་གཟེར་རྒྱག་པའི་བུད་མེད་ལྟར་ན་ཟུག་ལང་ངོ་། །  
\v 25 ཕྱོགས་བཞིར་དགྲ་བོའི་རལ་གྲི་དང་འཇིགས་སྣང་ཡོད་པས་ཁྱོད་རྣམས་རི་ཐང་ལ་མ་འགྲོ། ལམ་བར་དུ་ཡང་མ་འགྲུལ་ཞིག  
\v 26 བདག་གི་མི་རྣམས་ལགས། རྐེད་པར་རྩིད་རས་གཡོགས་ཏེ་ཐལ་བའི་ནང་དུ་འགྲེ་ལྡོག་རྒྱོབ་ཅིག བུ་གཅིག་པུ་ཤོར་བ་བཞིན་དུ་མྱ་ངན་བྱོས་དང་། ཅི་ལ་ཞེ་ན། རྩ་མེད་དུ་གཏོང་མཁན་ནི་གློ་བུར་རང་ཅག་གི་སྟེང་དུ་སླེབ་པར་འགྱུར།  
\v 27 བདག་གིས་ཁྱོད་ནི་ངའི་འབངས་མིའི་ཞིབ་དཔྱོད་པ་དང་ཚོད་བརྟག་མཁན་དུ་བསྐོས་ཏེ། ཁྱོད་ཀྱིས་དེ་དག་གི་སྤྱོད་པ་ལ་ལྟ་ཞིབ་བྱས་ནས་ལེགས་ཉེས་འབྱེད་དགོས་པའོ། །  
\v 28 དེ་དག་གིས་རབ་ཏུ་ངོ་ལོག་བྱེད་ཅིང་གང་སར་མི་ལ་དཀྲུག་ཤིང་འཕེན་པ་ཡིན། དེ་དག་ནི་ལི་དང་ལྕགས་ཡིན་ \f + \ft འདིར་ལི་དང་ལྕགས་ཡིན་ཞེས་པ་ནི་ཁོ་ཚོའི་སེམས་གྱོང་པོ་ཡིན་པར་གོ་དགོས།\f*ཏེ་ཐམས་ཅད་ངན་པར་གྱུར།  
\v 29 མེ་ལ་ཁོལ་མོ་ཤུགས་ཀྱིས་བརྒྱབ་ནས་ཞ་ཉེ་མེ་རུ་ཡང་ཡང་བཞུས་ནའང་མཐའ་མཇུག་སྟོང་བ་ཡིན། ཅི་ལ་ཞེ་ན། ངན་པ་ད་དུང་ཚར་གཅོད་མ་བྱས་པའོ། །  
\v 30 དཀོན་མཆོག་ཡ་ཝཱེས་ཁོ་རྣམས་དོར་བ་ཡིན་པས་མི་ཡིས་དེ་དག་ལ་དོར་བའི་དངུལ་ཞེས་འབོད་པར་འགྱུར་རོ། །   
\c 7
\cl ལེའུ་བདུན་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེ་རེམ་ཡཱ་ཡིས་མཆོད་ཁང་དུ་བཀའ་བསྒྲགས་པ།  
\p
\v 1 དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།  
\v 2 ཁྱོད་རང་དཀོན་མཆོག་ཡ་ཝཱེའི་མཆོད་ཁང་གི་སྒོ་ཁར་འགྲེང་ནས་དེ་རུ་གཏམ་འདི་སྒྲོགས་ཤིག ཀྱེ་སྒོ་འདི་རྣམས་བརྒྱུད་ནས་དཀོན་མཆོག་ཡ་ཝཱེ་ལ་བསྙེན་བཀུར་བྱེད་དུ་འོངས་པའི་ཡ་ཧུ་དཱ་པ་ཐམས་ཅད་ལགས། དཀོན་མཆོག་ཡ་ཝཱེའི་བཀའ་ལ་ཉོན་ཅིག་ཅེས་པའོ་ཞེས་གསུངས།  
\v 3 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཁྱོད་རྣམས་ཀྱིས་རང་གི་བྱ་བ་སྤྱོད་པ་བསྒྱུར་ན། བདག་གིས་ཁྱོད་རྣམས་ཡུལ་འདིར་སྡོད་དུ་འཇུག  
\v 4 ཁྱོད་རྣམས་རྫུན་གཏམ་ལ་བརྟེན་ནས། འདི་ནི་དཀོན་མཆོག་ཡ་ཝཱེའི་མཆོད་ཁང་ཡིན། དཀོན་མཆོག་ཡ་ཝཱེའི་མཆོད་ཁང་ཡིན། དཀོན་མཆོག་ཡ་ཝཱེའི་མཆོད་ཁང་ཡིན་ཞེས་མ་བརྗོད་ཅིག  
\v 5 ཁྱོད་ཚོས་དངོས་གནས་རང་གི་བྱ་བ་སྤྱོད་པ་བསྒྱུར་ཏེ། ཕན་ཚུན་བར་གཟབ་ནན་སྒོས་དྲང་གཞག་སྤྱོད་པ་དང་།  
\v 6 བྱེས་སུ་སྡོད་པའི་མི་དང་དྭ་ཕྲུག ཡུགས་མོ་བཅས་ལ་བརྙས་བཅོས་མི་བྱེད་ཅིང་། ཡུལ་འདིར་མི་ཉེས་མེད་ཀྱི་ཁྲག་བཞུར་དུ་མི་འཇུག་པ་དང་། ལྷ་གཞན་རྣམས་ཀྱི་རྗེས་སུ་འབྲངས་ནས་རང་ལ་གནོད་བསྐྱལ་བ་མིན་ན།  
\v 7 བདག་གིས་ཁྱོད་རྣམས་ད་དུང་ངས་གནའ་ནས་ཁྱོད་ཅག་གི་མེས་པོ་རྣམས་ལ་ཇི་སྲིད་བར་དུ་གནང་བའི་ཡུལ་འདིར་གནས་པར་བྱའོ། །  
\v 8 འོན་ཀྱང་ལྟོས་ཤིག ཁྱོད་རྣམས་རྫུན་དང་ཕན་ཐོགས་མེད་པའི་སྨྲ་བརྗོད་ལ་བརྟེན་པ་ཡིན།  
\v 9 ཁྱོད་རྣམས་ཀྱིས་རྐུ་བྱས་ནས་སྲོག་གཅོད་ཅིང་། ལོག་གཡེམ་བྱེད་པ་དང་། མནའ་རྫུན་མ་བསྐྱལ་བ། པཱ་ཨལ་ལ་སྤོས་བདུག་པ་བཅས་བྱེད་པར་མ་ཟད། རྒྱུས་མི་མངའ་བའི་ལྷ་རྣམས་ཀྱི་རྗེས་སུ་འབྲངས་རྗེས།  
\v 10 ཡང་ངའི་མིང་གིས་འབོད་པའི་མཆོད་ཁང་འདིར་འོངས་ནས་བདག་གི་མདུན་དུ་ལངས་བསྡད་དེ་ན་རེ། ངེད་རྣམས་བདེའོ་ཞེས་སྨྲ་ག་ལ་རུང་། ཁྱོད་ཅག་གི་བྱ་སྤྱོད་འདི་ལྟ་བུ་ནི་ཞེན་ཁ་ལོག་པའི་དོན་འདི་རྣམས་སྤྱོད་པའི་ཕྱིར་ཡིན་ནམ།  
\v 11 བདག་གི་མིང་གིས་འབོད་པའི་མཆོད་ཁང་འདི་ཁྱོད་ཚོའི་མིག་ནང་དུ་ཇག་ཚང་དུ་བརྩིས་པ་ཡིན་ནམ། ལྟོས་ཤིག བདག་གིས་ཐམས་ཅད་མཐོང་ངོ་ཞེས་དཀོན་མཆོག་ཡ་ཝཱེས་གསུངས།  
\v 12 ཁྱོད་རྣམས་བདག་གིས་དེ་སྔར་རང་གི་མིང་གནས་ས་རུ་བྱས་པའི་ཞི་ལོ་\f + \ft འདིར་ཞི་ལོ་ཞེས་པ་ནི་ཡེ་རུ་སཱ་ལེམ་བྱང་ཕྱོགས་ཀྱི་གྲོང་ཁྱེར་ཆུང་ངུ་ཞིག་ཡིན་ལ། སྤྱི་ལོ་སྔོན་གྱི་1050ལོར་ཕེ་ལེ་ཤེད་པ་རྣམས་ཀྱིས་དེ་གཏོར་བཤིག་བཏང་བ་དང་། ལུང་སྟོན་པ་ཡེ་རེམ་ཡཱ་ཡིས་ལུང་བསྟན་གནང་བར་བརྩམས་པའི་ལོ་སྟེ་སྤྱི་ལོ་སྔོན་གྱི་626ལོར་གྲོང་ཁྱེར་དེ་ད་དུང་ཞིག་རོར་ལུས་ཡོད་པས། ཞི་ལོ་ལྟ་བུ་ཡིན་ཞེས་སྨྲ་འོང་དུས་ཞིག་རོར་ལུས་པའི་གྲོང་ཁྱེར་ལ་གོ་བ་ཡིན། \f*ཡུལ་དུ་སོང་ལ། ངས་རང་གི་འབངས་མི་ཡེས་ར་ཨེལ་གྱི་སྡིག་ཉེས་ཀྱི་ཕྱིར་གནས་དེར་ཅི་བྱས་པར་ལྟོས་ཤིག  
\v 13 ད་ལྟ་ཁྱོད་རྣམས་ཀྱིས་ཀྱང་དོན་འདི་ཐམས་ཅད་བྱས་པའི་ཕྱིར། བདག་གིས་ཁྱོད་རྣམས་ལ་ཉེན་བརྡ་ཡང་ཡང་བཏང་ནའང་ཁྱོད་རྣམས་ཀྱིས་མ་མཉན། བདག་གིས་ཁྱོད་རྣམས་བོས་ཀྱང་ཁྱོད་རྣམས་ཀྱིས་ཨ་ལན་མ་བྱིན་ཞེས་དཀོན་མཆོག་ཡ་ཝཱེས་འདི་སྐད་གསུངས།  
\v 14 དེ་བས་བདག་གིས་ངའི་མིང་གིས་འབོད་པ་དང་ཁྱོད་རྣམས་བརྟེན་སའི་མཆོད་ཁང་འདི་དང་། བདག་གིས་ཁྱོད་ཅག་དང་ཁྱོད་ཅག་གི་མེས་པོ་རྣམས་ལ་གནང་བའི་ཡུལ་ལ་འདི་ལྟར་སྤྱོད་ངེས་ཏེ། སྔར་བདག་གིས་ཞི་ལོ་ལ་ཇི་ལྟར་སྤྱད་པ་བཞིན་དུ་སྤྱོད་པར་འགྱུར།  
\v 15 ངས་ཇི་ལྟར་ཁྱོད་ཅག་གི་སྤུན་ཟླ་རྣམས་ཏེ་ཨེ་ཕཱར་ཡིམ་གྱི་བུ་རྒྱུད་ཐམས་ཅད་ཕྱི་རོལ་ཏུ་བསྐྲད་པ་བཞིན། བདག་གིས་ཁྱོད་རྣམས་ཀྱང་དེ་ལྟར་ངའི་མདུན་ནས་ཕྱི་རུ་སྐྲོད་པར་འགྱུར།   
\s1 མི་རྣམས་བཀའ་དང་འགལ་བ།  
\p
\v 16 དེ་བས། ཁྱོད་ཀྱིས་མི་འདི་རྣམས་ཀྱི་དོན་དུ་སྨོན་ལམ་མ་འདེབས། དེ་དག་གི་ཆེད་དུ་ཞུ་འབོད་མ་བྱེད། བདག་གིས་ཁྱོད་ལ་མི་མཉན་པས་ན་དེ་དག་གི་ཕྱིར་དུ་བདག་ལ་ཞུ་བའང་མ་བྱེད་ཅིག  
\v 17 དེ་རྣམས་ཀྱིས་ཡ་ཧུ་དཱའི་གྲོང་ཁྱེར་དང་ཡེ་རུ་སཱ་ལེམ་གྱི་སྲང་ལམ་དུ་བྱས་པའི་དོན་རྣམས་ཁྱོད་ཀྱིས་མ་མཐོང་ངམ།  
\v 18 བྱིས་པས་བུད་ཤིང་བཏུས་ནས་ཕ་ཡིས་མེ་སྦར་བ་དང་། བུད་མེད་ཀྱིས་ཕྱེ་བརྫིས་ནས་བག་ལེབ་བཅོས་ཏེ་ནམ་མཁའི་རྒྱལ་མོར་ཕུལ་ཞིང་། ཡང་ལྷ་གཞན་རྣམས་ལ་སྐྱེམས་མཆོད་ཕུལ་ནས་ང་ཁྲོ་རུ་བཅུག  
\v 19 དེ་དག་གིས་ང་ཁྲོ་རུ་བཅུག་པ་ག་ལ་ཡིན། རང་གིས་རང་ལ་ཆག་སྒོ་བསླངས་ཏེ་རང་ཉིད་ངོ་ཚར་སྦྱར་བ་མ་ཡིན་ནམ་ཞེས་དཀོན་མཆོག་ཡ་ཝཱེས་གསུངས།  
\v 20 དེ་བས་གཙོ་བོ་ཡ་ཝཱེས་འདི་སྐད་དུ། ལྟོས་ཤིག བདག་གིས་རང་གི་ཁོང་ཁྲོ་དང་ཞེ་སྡང་ནི་ཡུལ་འདིའི་མི་ཕྱུགས་གཉིས་ཀ་དང་། རི་ཐང་གི་ཤིང་སྡོང་དང་ས་ལས་སྐྱེས་པའི་འབྲས་བུ་ཐམས་ཅད་ཀྱི་སྟེང་དུ་བླུག་པར་བྱ་སྟེ། མེ་ལྟར་འབར་ཞིང་སུས་ཀྱང་གསོད་མི་ནུས་ཞེས་གསུངས།  
\v 21 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཁྱོད་རྣམས་ཀྱིས་སྦྱིན་སྲེག་གི་མཆོད་པའི་སྟེང་དུ་ཞི་བདེའི་མཆོད་པའང་སྣོན་ལ་ཤ་ཟོ་ཞིག  
\v 22 ཅི་ལ་ཞེ་ན། བདག་གིས་ཁྱོད་ཅག་གི་མེས་པོ་རྣམས་ཨེ་ཅིབ་ཡུལ་ནས་ཁྲིད་འོངས་པའི་ཉིན་མོར། སྦྱིན་སྲེག་གི་མཆོད་པ་དང་ཞི་བདེའི་མཆོད་པ་གཉིས་ཀྱི་དོན་ནི་བདག་གིས་མ་གླེང་ལ། དེ་རྣམས་ལ་བཀའ་ཡང་མ་བསྒོས།  
\v 23 བདག་གིས་དེ་རྣམས་ལ་དོན་འདི་གཅིག་པུ་བསྒོས་ནས་འདི་ལྟར། ཁྱོད་རྣམས་ཀྱིས་ངའི་བཀའ་ལ་མཉན་ན། བདག་ནི་ཁྱོད་རྣམས་ཀྱི་དཀོན་མཆོག་ཏུ་འགྱུར་གྱིས། ཁྱོད་རྣམས་ཀྱང་ངའི་མི་རུ་འགྱུར་ངེས་ཡིན། ཁྱོད་རྣམས་བདག་གིས་བསྒོས་པའི་བཀའ་ཐམས་ཅད་ཀྱི་ནང་དུ་འགྲུལ་ན་བྱིན་རླབས་འཐོབ་པར་འགྱུར་ཞེས་སྨྲས་སོ། །  
\v 24 ཡིན་ནའང་དེ་རྣམས་ཀྱིས་མ་མཉན་ཏེ་རྣ་བ་གཏད་ནས་མི་མཉན་པར། རང་གི་ཐབས་ཇུས་དང་སེམས་ངན་གཤིས་གྱོང་གི་རྗེས་སུ་འབྲངས་ནས་ཕྱི་བསྣུར་བྱས་པ་ལས་མདུན་དུ་མ་བསྐྱོད་དོ། །  
\v 25 ཁྱོད་ཅག་གི་མེས་པོ་རྣམས་ཨེ་ཅིབ་ཡུལ་ནས་ཕྱི་རུ་ཐོན་པའི་ཉིན་ནས་དེ་རིང་བར་དུ། བདག་གིས་རང་གི་ཞབས་ཕྱི་སྟེ་ལུང་སྟོན་པ་ཐམས་ཅད་ཡང་ནས་ཡང་དུ་ཁོ་ཚོའི་མདུན་དུ་མངགས་ཀྱང་།  
\v 26 ཁོ་ཚོས་བདག་ལ་མ་མཉན་ཏེ་རྣ་བ་གཏད་ནས་མི་མཉན་པར་སེམས་རྒྱུད་རེངས་པོ་བྱས་ནས་ལས་ངན་པ་སྤྱད་པ་ནི་ཁོ་ཚོའི་མེས་པོ་རྣམས་ལས་ཀྱང་ཐུའོ། །  
\v 27 ཁྱོད་ཀྱིས་གཏམ་འདི་ཐམས་ཅད་ཁོ་ཚོར་སྨྲས་ཀྱང་དེ་རྣམས་ཀྱིས་ཁྱོད་ལ་མི་མཉན་ཏེ། ཁོ་ཚོ་བོས་ཀྱང་དེ་དག་གིས་ཨ་ལན་མི་སྤྲོད།  
\v 28 དེའི་ཕྱིར་ཁྱོད་ཀྱིས་ཁོ་རྣམས་ལ་འདི་ལྟར་སྨྲ་དགོས་ཏེ། འདི་ནི་ཁོ་ཚོའི་དཀོན་མཆོག་ཡ་ཝཱེའི་བཀའ་ལ་མི་མཉན་པ་དང་བཀའ་སློབ་དང་ལེན་མི་བྱེད་པའི་མི་རིགས་ཡིན་ལ། དེ་ཚོའི་སྨྲ་སྒོར་དྲང་བདེན་མེད་པར་གྱུར་ཏོ་ཞེས་པའོ། །  
\v 29 ཀྱེ་ཡེ་རུ་སཱ་ལེམ། རང་གི་སྐྲ་བཞར་ནས་ཕོངས་ཤིག སྐྱ་ཐེར་ཐེར་གྱི་མཐོ་སྒང་དུ་མྱ་ངན་བྱོས་ཤིག ཅི་ལ་ཞེ་ན། དཀོན་མཆོག་ཡ་ཝཱེས་ཁོང་ཉིད་ཐུགས་ཁྲོ་རུ་འཇུག་པའི་མི་རབས་དེ་སྤངས་ནས་བསྐྱུར་བས་སོ། །   
\p
\v 30 ཡ་ཧུ་དཱ་པ་རྣམས་ཀྱིས་བདག་གི་མིག་ལམ་དུ་ངན་པ་གང་ཡིན་དེ་སྤྱད་ནས། བདག་གི་མིང་གིས་འབོད་པའི་མཆོད་ཁང་ནང་དུ་ཞེན་ཁ་ལོག་པའི་རྫས་རྣམས་བསླངས་ཏེ་མཆོད་ཁང་འདི་མི་གཙང་བར་བཟོས་ཞེས་དཀོན་མཆོག་ཡ་ཝཱེས་འདི་སྐད་གསུངས།  
\v 31 དེ་རྣམས་ཀྱིས་རང་གི་བུ་བུ་མོ་རྣམས་མེའི་ནང་དུ་བསྲེག་ཕྱིར་པེན་ཧིན་ནོམ་ལུང་པའི་ཐོ་ཕེད་དུ་མཐོ་གླིང་བརྩིགས་པ་དང་། འདི་ནི་བདག་གིས་བསྒོས་པའི་བཀའ་མིན་ལ། ངའི་ཡིད་ལའང་ཤར་མ་མྱོང་ངོ་། །  
\v 32 དེ་བས། ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། གནས་འདི་ལ་ཐོ་ཕེད་དང་པེན་ཧིན་ནོམ་ལུང་པ་ཞེས་མི་འབོད་པར་གསོད་གཅོད་ཀྱི་ལུང་པ་ཞེས་འབོད་པར་འགྱུར། དེ་རྣམས་ཀྱིས་ཐོ་ཕེད་དུ་བམ་རོ་སྦས་པ་དང་། ཐ་ན་སྦས་ས་ཡང་མེད།  
\v 33 མི་འདི་དག་གི་བེམ་པོ་རྣམས་ནི་ནམ་མཁའི་བྱ་དང་ས་གཞིའི་གཅན་གཟན་རྣམས་ཀྱི་ཁ་ཟས་སུ་འགྱུར་ཏེ། སུས་ཀྱང་དེ་དག་དཀྲོག་པར་མི་འགྱུར།  
\v 34 དུས་དེར་བདག་གིས་ཡ་ཧུ་དཱ་གྲོང་ཁྱེར་དང་ཡེ་རུ་སཱ་ལེམ་གྱི་སྲང་ལམ་དུ་དགའ་སྤྲོ་དང་སྐྱིད་པོའི་སྐད་སྒྲ་དང་། བག་མ་དང་མག་པའི་སྐད་སྒྲ་མཚམས་ཆད་པར་བྱའོ། །ཅི་ལ་ཞེ་ན། ཡུལ་འདི་མི་མེད་ལུང་སྟོང་དུ་འགྱུར་བས་སོ། །   
\c 8
\cl ལེའུ་བརྒྱད་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\p
\v 1 དཀོན་མཆོག་ཡ་ཝཱེས་འདི་སྐད་དུ། དུས་དེར། མི་ཡིས་ཡ་ཧུ་དཱའི་རྒྱལ་པོ་དང་འགོ་དཔོན། མཆོད་དཔོན། ལུང་སྟོན་པ་བཅས་དང་། ཡེ་རུ་སཱ་ལེམ་གྱི་ཡུལ་མི་རྣམས་ཀྱི་ཀེང་རུས་ཐམས་ཅད་དུར་ལས་བསློགས་ཏེ།  
\v 2 སྔར་དེ་རྣམས་ཀྱིས་ཡིད་སྨོན་བྱས་པ་དང་། ཞབས་ཏོག་བསྒྲུབས་པ། རྗེས་སུ་འབྲངས་པ། སློབ་སྟོན་ཞུས་པ། ཕྱག་མཆོད་བྱས་པ་བཅས་ཀྱི་ཉི་མ་དང་ཟླ་བ། ནམ་མཁའི་སྐར་ཚོགས་བཅས་ཀྱི་འོག་ཏུ་གཡུག་པར་འགྱུར་ལ། དེ་ནས་ཀེང་རུས་འདི་དག་བསྡུ་བར་མི་འགྱུར་ལ་སྦ་བར་ཡང་མི་བྱ་སྟེ། ས་ཁར་ལུད་དུ་འགྱུར་བའོ། །  
\v 3 ཁྱིམ་རྒྱུད་ངན་པ་འདི་ལས་ལུས་པའི་མི་རྣམས་ཀྱིས་སྔར་བདག་གིས་མཐར་སྐྲོད་བཏང་བའི་ཡུལ་སོ་སོར། འཚོ་བ་ལས་འཆི་བ་བདམས་པ་ཡིན་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་གསུངས་སོ། །   
\s1 སྡིག་པ་དང་ཉེས་ཆད།  
\p
\v 4 ཁྱོད་ཀྱིས་དེ་རྣམས་ལ་ཤོད་དང་། དཀོན་མཆོག་ཡ་ཝཱེས་འདི་སྐད་དུ། མི་སར་འགྱེལ་ན་ཡང་བསྐྱར་མི་ལང་ངམ། མི་ལམ་ཁ་ནོར་ན་ཡང་བསྐྱར་ཕྱིར་མི་ལོག་གམ།  
\v 5 མི་འདི་རྣམས་ཅིའི་ཕྱིར་ལོག་ལམ་དུ་ཞུགས་པ་ཡིན་ནམ། ཅིའི་ཕྱིར་ཡེ་རུ་སཱ་ལེམ་ནམ་ཡང་ལམ་ཁ་ནོར་བ་ཡིན་ནམ། ཁོ་ཚོས་གཡོ་སྒྱུ་སྤེལ་བར་སེམས་ཐག་བཅད་དེ་ཁ་ཕྱིར་འཁོར་བར་མ་འདོད་དོ། །  
\v 6 བདག་གིས་གཟབ་གཟབ་བྱས་ནས་མཉན་པ་ཡིན་ཏེ། ཁོ་ཚོས་དྲང་བདེན་མ་ཡིན་པའི་གཏམ་སྨྲ་བ་ཐོས་ཤིང་། སུས་ཀྱང་ངས་ཅི་ཞིག་བྱས་པ་ཡིན་ནམ་ཞེས་རང་གི་སྤྱོད་ངན་ལ་འགྱོད་བཤགས་མི་བྱེད་པར། ཁོ་ཚོ་རྟ་གཡུལ་ངོར་རྒྱུག་པ་བཞིན་ཐམས་ཅད་རང་རང་གི་ལམ་དུ་ཞུགས་པའོ། །  
\v 7 མཚོ་བྱ་དཀར་མོས་རང་གི་དུས་ཚིགས་ཤེས་པ་དང་། ཐི་བ་དང་ཁུག་རྟ། ཁྲུང་ཁྲུང་བཅས་ཀྱིས་ཀྱང་རང་གི་གནས་སྤོར་བའི་ནམ་ཟླ་ལ་སྒུག་པའོ། །ཡིན་ཡང་ངའི་མི་རྣམས་ཀྱིས་དཀོན་མཆོག་ཡ་ཝཱེའི་སྒྲིག་ཁྲིམས་དེ་མི་ཤེས་སོ། །  
\v 8 ཁྱོད་རྣམས་ཀྱིས་ངེད་རྣམས་ལ་ཤེས་རབ་ལྡན་ཏེ། དཀོན་མཆོག་ཡ་ཝཱེའི་བཀའ་ཁྲིམས་ངེད་ཅག་ལ་ཡོད་ཅེས་བརྗོད་པ་ཅི་ཡིན་ནམ། ལྟོས་ཤིག དྲུང་ཡིག་རྣམས་ཀྱི་སྨྱུ་གུ་རྫུས་མས་བཀའ་ཁྲིམས་རྫུན་དུ་བསྒྱུར་བ་ཡིན།  
\v 9 མཁས་པ་རྣམས་སྐྱེངས་ནས་འཇིགས་སྐྲག་སྐྱེ་ཞིང་འཛིན་པར་འགྱུར། ལྟོས་ཤིག དེ་དག་གིས་དཀོན་མཆོག་ཡ་ཝཱེའི་བཀའ་དོར་བས་ད་དུང་ཤེས་རབ་ཅི་ཞིག་ཡོད་དམ།  
\v 10 དེ་བས་ཁོ་རྣམས་ཀྱི་ཆུང་མ་ནི་མི་གཞན་ལ་སྦྱིན་པ་དང་། དེ་དག་གི་ཞིང་ས་ཡང་གཞན་ལ་དབང་བར་བྱ། ཅི་ལ་ཞེ་ན། དེ་དག་མཆོག་དམན་སུ་ཡིན་ཡང་ཐམས་ཅད་འདོད་རྔམ་ཅན་ཡིན་ཞིང་། ལུང་སྟོན་པ་ནས་མཆོད་དཔོན་རྣམས་ཀྱི་བར་དུ་ཐམས་ཅད་ཀྱིས་གཡོ་སྒྱུའི་སྦྱོར་བ་སྤེལ་ཏོ། །  
\v 11 དེ་རྣམས་ཀྱིས་ཧོལ་རྒྱུག་གིས་ངའི་མི་རྣམས་ཀྱི་རྨས་སྐྱོན་གསོས་ནས་ན་རེ། ད་ནི་བདེའོ་ད་ནི་བདེའོ་ཟེར་ཡང་། དོན་དམ་དུ་བདེ་བ་མེད་དོ། །  
\v 12 དེ་རྣམས་ཀྱིས་ཞེན་ཁ་ལོག་པའི་དོན་བྱས་ཏེ་ངོ་ཚ་བར་འོས་ན་ཡང་། དེ་རྣམས་ལ་ངོ་ཚ་བའི་ཚོར་སྣང་ཙམ་ཡང་མེད་དེ་ངོ་ཚ་ཁྲེལ་མེད་རང་ཡིན་ནོ། །དེ་བས། དེ་རྣམས་ནི་སར་འགྱེལ་བའི་མི་རྣམས་དང་མཉམ་དུ་འགྱེལ་ངེས་ལ། ངས་དེ་རྣམས་ལ་ཉེས་ཆད་གཅོད་སྐབས་དེ་རྣམས་འགྱེལ་བར་འགྱུར་ཞེས་དཀོན་མཆོག་ཡ་ཝཱེས་གསུངས།  
\v 13 བདག་གིས་ཁོ་རྣམས་རྩ་བ་ནས་མེད་པར་བྱའོ། །རྒུན་ཤིང་སྟེང་དུ་རྒུན་འབྲུམ་མེད་པ་དང་། སེ་ཡབ་ཤིང་གི་སྟེང་དུ་འབྲས་བུ་མི་ཐོགས་པར་ལོ་མ་ཡང་སྐམ་ཞིང་། བདག་གིས་དེ་ཚོར་གནང་བ་རྣམས་ཁོ་ཚོར་འབྲལ་བར་འགྱུར་ཞེས་དཀོན་མཆོག་ཡ་ཝཱེས་གསུངས།  
\v 14 རང་ཅག་གྲགས་འགུལ་ཅི་ཡང་མེད་པར་སྡོད་པ་ཅི་ཡིན་ནམ། རང་ཅག་མཉམ་དུ་འདུས་ཏེ་མཁར་བརྟན་པོའི་ནང་དུ་འཛུལ་ནས་དེ་རུ་མེད་པར་འགྲོའོ། །ཅི་ལ་ཞེ་ན། བདག་ཅག་གིས་དཀོན་མཆོག་ཡ་ཝཱེ་ལ་འགལ་བའི་སྡིག་པ་བྱས་པས་ན། རང་རེའི་དཀོན་མཆོག་ཡ་ཝཱེས་རང་ཅག་གྲགས་འགུལ་ཅི་ཡང་མེད་པར་མཛད་ཅིང་། ཡང་ང་ཚོར་དུག་ཆུ་འཐུང་དུ་བཅུག་གོ །  
\v 15 རང་ཅག་གིས་ཞི་བདེ་ལ་རེ་སྨོན་བྱས་ཀྱང་ཕན་པ་ཅི་ཡང་མ་ཐོབ་སྟེ། དྲག་གསོ་གནང་བའི་དུས་ལ་རེ་སྨོན་བྱས་ཀྱང་། ལྟོས་ཤིག འཇིགས་སྐྲག་འབའ་ཞིག་ལུས་སོ། །  
\v 16 དཱན་གྱི་ཡུལ་ནས་དགྲ་བོའི་རྟ་རྣམས་ཀྱིས་སྣ་ཤུ་རྒྱག་པའི་སྒྲ་ཐོས་ཏེ། རྟ་གསེབ་ཀྱི་ངར་སྐད་ཀྱིས་ས་གཞི་ཡོངས་སུ་འདར་བའོ། །ཅི་ལ་ཞེ་ན། དེ་དག་ནི་ཡུལ་ཁམས་དང་དེའི་ནང་དུ་ཡོད་པ་ཐམས་ཅད་དང་། གྲོང་ཁྱེར་དང་དེའི་ནང་དུ་གནས་མཁན་བཅས་མེད་པར་བཟོ་ཆེད་འོངས་པ་ཡིན།  
\v 17 ལྟོས་ཤིག བདག་གིས་རྫུ་འཕྲུལ་གྱིས་ཀྱང་འདུལ་མི་ཐུབ་པའི་དུག་སྦྲུལ་ཁྱོད་ཅག་གི་ཁྲོད་དུ་གཏོང་བར་བྱ་སྟེ། དེ་དག་གིས་ཁྱོད་ཅག་ལ་རྨུག་པར་འགྱུར་ཞེས་དཀོན་མཆོག་ཡ་ཝཱེས་གསུངས་སོ། །   
\s1 ཡེ་རེམ་ཡཱ་སྤུན་ཟླའི་ཕྱིར་དུ་སེམས་སྐྱོ་བ།  
\p
\v 18 བདག་གི་དགའ་སྤྲོ་ནི་སྡུག་བསྔལ་དུ་གྱུར་ཅིང་། བདག་གི་སེམས་ནི་ངའི་ནང་དུ་སྐྱོ་སྣང་ཚད་མེད་སྐྱེས་སོ། །  
\v 19 ཉོན་དང་། བདག་གི་མི་རྣམས་ཀྱིས་ཞུ་འབོད་བྱེད་པའི་སྒྲ་ནི་རྒྱང་རིང་ནས་རྒྱུ་འོང་སྟེ། དཀོན་མཆོག་ཡ་ཝཱེ་ཛ་ཡན་དུ་བཞུགས་པ་མ་ཡིན་ནམ། ཛ་ཡན་གྱི་རྒྱལ་པོ་དེའི་ནང་དུ་བཞུགས་པ་མ་ཡིན་ནམ་ཞེས་པའོ། །དེ་རྣམས་ཀྱིས་རང་གིས་བརྐོས་པའི་སྐུ་འདྲ་དང་། ཕྱི་རོལ་པའི་སྙིང་པོ་མེད་པའི་ལྷ་རྣམས་ཀྱིས་བདག་ཁྲོ་རུ་འཇུག་པ་ཅི་ཡིན་ནམ།  
\v 20 སྟོན་ཐོག་བསྡུས་ཚར་ལ་དབྱར་ཡང་རྫོགས་ཀྱང་། བདག་ཅག་ལ་ད་དུང་ཐར་པ་མ་ཐོབ།  
\v 21 ངའི་མི་རྣམས་རྨས་པས་བདག་ཀྱང་རྨས་པ་ཡིན་ལ། བདག་གིས་སྨྲེ་སྔགས་བཏོན་ཞིང་དངངས་སྐྲག་གིས་ང་རང་ཟིན།  
\v 22 གིལ་ཨད་དུ་སྤོས་དཀར་མེད་དམ། དེ་རུ་སྨན་པ་མེད་དམ། བདག་གི་སྤུན་ཟླར་སྨན་བཅོས་མ་ཐོབ་པ་ཅི་ཡིན་ནམ།   
\c 9
\cl ལེའུ་དགུ་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\p
\v 1 བདག་ནི་རང་གི་མི་རྣམས་ཀྱི་ནང་དུ་གསོད་གཅོད་ཐེབས་པའི་མི་ཡི་ཆེད་དུ་ཉིན་མཚན་མེད་པར་ངུ་བའི་ཕྱིར། བདག་གི་མགོ་ནི་ཁྲོན་པ་དང་བདག་གི་མིག་ནི་མཆི་མའི་ཆུ་མིག་ཡིན་པར་སྨོན།  
\v 2 ཡང་བདག་ནི་ང་ཡི་མི་རྣམས་དང་གྱེས་ནས་འགྲོ་ཐུབ་པའི་ཆེད་དུ་དབེན་སྟོང་དུ་ལམ་པའི་གནས་ཚང་ཞིག་ཡོད་པར་སྨོན། ཅི་ལ་ཞེ་ན། དེ་དག་ཐམས་ཅད་ལོག་གཡེམ་བྱེད་མཁན་དང་གཡོ་སྒྱུའི་སྦྱོར་བ་སྤེལ་མཁན་ཡིན་ནོ། །  
\v 3 རྫུན་སྨྲ་བའི་ཆེད་དུ་དེ་རྣམས་ཀྱིས་ལྕེ་བཀུག་ནས་གཞུ་དང་འདྲ། དེ་རྣམས་ལ་ཡུལ་ཁམས་སུ་སྟོབས་ཤུགས་རྒྱས་པ་ནི་དྲང་བདེན་གྱི་དབང་གིས་མ་ཡིན་ལ། དེ་དག་གིས་ངན་པའི་སྟེང་དུ་ངན་བསགས་ནས་བདག་ཀྱང་ངོ་མི་ཤེས་ཞེས་དཀོན་མཆོག་ཡ་ཝཱེས་གསུངས།  
\v 4 སྤུན་ཟླ་ཀུན་གྱིས་མི་ལ་མགོ་སྐོར་གཏོང་ཞིང་ཁྱིམ་མཚེས་ཐམས་ཅད་ཀྱིས་ཀྱང་དཀྲུག་ཤིང་འཕེན་པས་ན། ཁྱོད་ཚོས་རང་གི་ཁྱིམ་མཚེས་ལ་དོགས་ཟོན་གྱིས་ཤིག སྤུན་ཟླ་ལའང་བློ་མ་གཏོད་ཅིག  
\v 5 དེ་དག་གིས་ཁྱིམ་མཚེས་ལ་མགོ་སྐོར་གཏོང་ཞིང་དྲང་གཏམ་མི་སྨྲ་བར། རང་གི་ལྕེ་ཡིས་རྫུན་ཚིག་སྨྲ་བར་སྦྱང་སྟེ། ནུས་ཤུགས་གང་ཡོད་བཏོན་ནས་སྤྱོད་ངན་སྤྱོད་པའོ། །  
\v 6 ཁྱོད་ནི་གཡོ་སྒྱུ་ཅན་རྣམས་ཀྱི་དབུས་སུ་སྡོད་པ་དང་། དེ་དག་གིས་གཡོ་སྒྱུ་སྤྱད་པས་ང་རང་ངོ་ཤེས་པར་མ་འདོད་ཅེས་དཀོན་མཆོག་ཡ་ཝཱེས་གསུངས།  
\v 7 དེ་བས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག བདག་གིས་དེ་རྣམས་གཙང་མར་བཟོ་བ་དང་ཚོད་བགམ་བྱེད་པར་འགྱུར། བདག་གི་འབངས་མིའི་ཆེད་དུ་ངས་དེ་ལས་གཞན་ཅི་ཞིག་སྤྱོད་འོས་སམ།  
\v 8 དེ་དག་གི་ལྕེ་ནི་དུག་མདའ་ཡིན་ལ་ཁ་ནས་གཡོ་སྒྱུ་སྨྲ་ཞིང་། ཁྱིམ་མཚེས་ལ་ཁ་ཡག་ཚིག་འཇམ་སྨྲ་ནའང་སེམས་སུ་ཇུས་ངན་བཀོད་ནས་དེ་རྣམས་ལ་གནོད་བསྐྱལ་བ་ཡིན།  
\v 9 བདག་གིས་དོན་འདི་ཐམས་ཅད་ཀྱི་ཕྱིར་དུ་དེ་དག་ལ་ཉེས་ཆད་མི་གཅོད་ག་ལ་རུང་། ཡུལ་ཁམས་འདི་ལྟ་བུ་ལ་བདག་གིས་ལན་མི་བསློག་གམ་ཞེས་དཀོན་མཆོག་ཡ་ཝཱེས་གསུངས།  
\v 10 བདག་ནི་རི་རྒྱུད་རྣམས་ཀྱི་ཕྱིར་ངུ་ཞིང་སྡུག་པར་འགྱུར་ལ། དབེན་སྟོང་གི་རྩྭ་སའི་ཆེད་དུ་ངུ་འབོད་བྱེད་དོ། །ཅི་ལ་ཞེ་ན། དེ་རྣམས་སྐམ་ཞིང་དེར་བརྒྱུད་ནས་འགྲོ་མཁན་གཅིག་ཀྱང་མེད་ལ། ཕྱུགས་ཟོག་གི་སྐད་ཀྱང་མི་ཐོས་ཏེ། ནམ་མཁའི་འདབ་ཆགས་དང་ས་ཡི་གཅན་གཟན་ཡང་བྲོས་སོང་ངོ་། །  
\v 11 བདག་གིས་ཡེ་རུ་སཱ་ལེམ་ནི་ཞིག་རོ་དང་ཁྱི་སྤྱང་གི་གནས་སུ་བསྒྱུར་དགོས་ལ། ཡ་ཧུ་དཱའི་གྲོང་ཁྱེར་རྣམས་ཀྱང་ཤུལ་མེད་དུ་བསྐྱུར་ནས་མི་སུ་ཡང་སྡོད་པར་མི་འགྱུར་རོ། །  
\v 12 སུ་ཞིག་ལ་ཤེས་རབ་ལྡན་ཞིང་དོན་འདི་རྣམས་རྟོགས་ནུས་སམ། དཀོན་མཆོག་ཡ་ཝཱེའི་ཞལ་གྱིས་སུ་ཞིག་ལ་གསུངས་ཏེ་དོན་འདི་བསྒྲག་ནུས་པར་མཛད་དམ། གནས་འདི་ནི་མེད་པར་བཏང་ནས་དབེན་སྟོང་དུ་ལུས་པ་དང་། དེར་བརྒྱུད་ནས་འགྲོ་མཁན་གཅིག་ཀྱང་མེད་པ་ཅི་ཡིན་ནམ།  
\v 13 དཀོན་མཆོག་ཡ་ཝཱེས་འདི་སྐད་དུ། མི་འདི་རྣམས་ཀྱིས་བདག་གིས་ཁོ་རྣམས་ཀྱི་མདུན་དུ་བཤམས་པའི་བཀའ་ཁྲིམས་དོར་ཞིང་བདག་གི་བཀའ་ལ་ཡང་མི་མཉན་པ་དང་། བདག་གི་བཀའ་ཁྲིམས་བཞིན་དུ་མ་སྤྱད་པར།  
\v 14 གཤིས་རྒྱུད་གྱོང་པོའི་རྗེས་སུ་འབྲངས་ཏེ་སྤྱོད་པ་སྤྱད་ཅིང་། དེ་དག་གི་ཕ་མེས་རྣམས་ཀྱིས་བསླབ་པ་བཞིན་དུ་པཱ་ཨལ་རྣམས་ཀྱི་རྗེས་སུ་འབྲངས་པ་ཡིན་ཞེས་པའོ། །  
\v 15 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ལྟོས་ཤིག བདག་གིས་མི་འདི་རྣམས་ལ་ཟས་སུ་མཁན་པ་དང་བཏུང་བར་དུག་ཆུ་སྦྱིན་པར་བྱའོ། །  
\v 16 བདག་གིས་ཁོ་ཚོ་ནི་ཁོ་རྣམས་དང་ཁོ་ཚོའི་མེས་པོ་རྣམས་ལ་རྒྱུས་མེད་པའི་ཡུལ་ཁམས་སུ་གཏོར་བར་བྱ་ཞིང་། དེ་དག་ཚར་མ་བཅད་བར་དུ་རལ་གྲིས་དེ་དག་འདེད་བཅོམ་བྱེད་པར་འགྱུར་ཞེས་གསུངས།   
\s1 ཡེ་རུ་སཱ་ལེམ་གྱིས་རོགས་སྐྱོར་བྱེད་རེ་ཞུ་བ།  
\p
\v 17 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། དོགས་ཟོན་གྱིས། སྐྱོ་གླུ་ལེན་པའི་བུད་མེད་རྣམས་བསྡུས་ཤིག མི་མངགས་ནས་ངུ་བར་བྱང་བའི་བུད་མེད་རྣམས་བོས་ཤིག  
\v 18 དེ་དག་མྱུར་དུ་ཡོང་ནས་བདག་ཅག་གི་ཕྱིར་མྱ་ངན་ཞུ་བར་བྱས་ནས། རང་ཅག་གི་མིག་ལས་མཆི་མ་བཞུར་བ་དང་རང་ཅག་གི་མིག་ལྕིབས་ལས་མིག་ཆུ་ཡོང་བར་བྱེད་དགོས།  
\v 19 ཅི་ལ་ཞེ་ན། ཛ་ཡན་ལས་སྨྲེ་སྔགས་འདོན་པའི་སྒྲ་གྲགས་འོངས་ཏེ་ན་རེ། བདག་ཅག་ཕམ་པར་གྱུར་ཅིང་ཇི་འདྲའི་ངོ་ཚ་བ་ལ། བདག་ཅག་གིས་ཡུལ་ཁམས་དོར་ནས་མི་ཡིས་རང་རེའི་ཁྱིམ་གཞིས་མེད་པར་བཟོས་སོང་ཞེས་སྨྲའོ་ཞེས་གསུངས།  
\v 20 ཀྱེ་བུད་མེད་རྣམས། དཀོན་མཆོག་ཡ་ཝཱེའི་གསུང་ལ་ཉོན་ཅིག ཁྱོད་ཚོའི་བུ་མོ་རྣམས་ལ་མྱ་ངན་ཞུ་ལུགས་སློབས་དང་། མི་རེ་རེས་རང་གི་ཁྱིམ་མཚེས་ལ་སྐྱོ་གླུ་བསླབ་དགོས།  
\v 21 ཅི་ལ་ཞེ་ན། འཆི་བ་དཀར་ཁུང་ནས་ཡར་འོངས་ཏེ་རང་ཅག་གི་བཙན་རྫོང་དུ་འཛུལ་བྱུང་། དེས་ཕྱི་རོལ་ཏུ་བྱིས་པ་རྣམས་ཚར་གཅོད་པ་དང་། ཐང་ཆེན་དུ་ན་གཞོན་དག་ཚར་གཅོད་པར་བྱེད་དོ། །  
\v 22 ཁྱོད་ཀྱིས་འདི་ལྟར་སྨྲ་འོས་ཏེ། དཀོན་མཆོག་ཡ་ཝཱེས་འདི་སྐད་དུ། མི་ཡི་བེམ་པོ་ནི་ཞིང་ཁའི་ལུད་བཞིན་འཕྲེད་དུ་ཉལ་བ་དང་། ཡང་ལོ་ཏོག་རྔ་མཁན་རྣམས་ཀྱི་རྗེས་སུ་ལུས་པའི་སྙེ་མ་བཞིན་དུ་སྡུད་མཁན་མེད་ཅེས་གསུངས།  
\v 23 དཀོན་མཆོག་ཡ་ཝཱེས་འདི་སྐད་དུ། ཤེས་རབ་ཅན་གྱིས་རང་གི་ཤེས་རབ་ཀྱི་ཕྱིར་ཁ་ཕོ་མ་གཏོང་ཞིག སྟོབས་ཤུགས་ཅན་གྱིས་རང་གི་སྟོབས་ཤུགས་ཀྱི་ཕྱིར་ཁ་ཕོ་མ་གཏོང་ཞིག ཕྱུག་པོས་ཀྱང་རང་གི་རྒྱུ་ནོར་གྱི་ཕྱིར་ཁ་ཕོ་མ་གཏོང་ཞིག  
\v 24 བསྔགས་བརྗོད་བྱེད་མཁན་གྱིས་རང་ལ་བློ་གྲོས་ལྡན་ཞིང་བདག་ནི་ཡ་ཝཱེ་ཡིན་པ་ཤེས་པ་དང་། ཡང་བདག་ནི་ས་གཞིའི་སྟེང་དུ་བྱམས་བརྩེ་དང་དྲང་གཞག དྲང་བདེན་བཅས་སྤྱོད་པར་དགའ་བ་རྟོགས་པའི་རྐྱེན་གྱིས་བསྔགས་འོས་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །  
\v 25 ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། བདག་གིས་ལུས་ཕུང་འབའ་ཞིག་ཏུ་མཚན་སྐྱི་བཅད་པ་རྣམས་ལ་ཉེས་ཆད་གཅོད་པར་འགྱུར་ཏེ།  
\v 26 དེ་ནི་ཨེ་ཅིབ་དང་ཡ་ཧུ་དཱ། ཨེ་དོམ། ཨམ་མོན། མོ་ཨབ་བཅས་དང་དབེན་སྟོང་དུ་གནས་ཤིང་ཡ་ཐོད་ཀྱི་སྐྲ་གཞར་མཁན་ཐམས་ཅད་དོ། །ཅི་ལ་ཞེ་ན། མི་རིགས་འདི་ཐམས་ཅད་གཙང་མར་མ་མཛད་དེ། ཡེས་ར་ཨེལ་གྱི་ཁྱིམ་རྒྱུད་ཀུན་གྱི་སེམས་ཀྱང་གཙང་མར་མ་མཛད་པའི་ཕྱིར་རོ། །   
\c 10
\cl ལེའུ་བཅུ་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 སྐུ་འདྲར་དད་པ་དང་དད་པ་ངོ་མ།  
\p
\v 1 ཀྱེ་ཡེས་ར་ཨེལ་གྱི་ཁྱིམ་རྒྱུད་ལགས། དཀོན་མཆོག་ཡ་ཝཱེས་ཁྱོད་ཅག་ལ་གསུང་བའི་བཀའ་ལ་ཉོན་ཅིག  
\v 2 དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་གིས་ཕྱི་རོལ་པའི་ཚུལ་བཞིན་མ་བྱེད་ཅིག ནམ་མཁའི་རྟགས་རྣམས་ཀྱིས་ཕྱི་རོལ་པའི་སེམས་དཀྲུགས་ཀྱང་། ཁྱོད་རྣམས་དེ་ལ་མི་འཇིགས་པར་གྱིས།  
\v 3 མི་རྣམས་ཀྱི་ལུགས་སྲོལ་ལ་སྙིང་པོ་མེད་དེ། དེ་རྣམས་ཀྱིས་ནགས་ལས་ཤིང་ཞིག་སྟ་རེས་བཅད་འོངས་ནས་ལག་ཤེས་པས་ལག་རྩལ་ལ་བརྟེན་ནས་སྐུ་འདྲ་བཟོས་པ་ཡིན།  
\v 4 མི་ཡིས་གསེར་དངུལ་གྱིས་དེ་བརྒྱན་པ་དང་། མི་འགུལ་བའི་ཕྱིར་འཛེར་མ་དང་ཐོ་བས་བརྟན་པོར་བཟོས།  
\v 5 སྐུ་འདྲ་ནི་ཁི་རའི་ཞིང་ནང་གི་ཐོ་དང་འདྲ་ཞིང་། སྨྲ་མི་ནུས་ལ་འགྲོ་ཡང་མི་ནུས་པས་ངེས་པར་དུ་མི་ཡིས་ཡར་འགྱོག་དགོས་པ་ཡིན། དེ་རྣམས་ལ་མ་སྐྲག་ཅིག ཅི་ལ་ཞེ་ན། དེ་ཡིས་གནོད་བསྐྱལ་མི་ཐུབ་ལ། བྱིན་རླབས་གནང་བའི་ནུས་པ་ཡང་མེད་དོ་ཞེས་གསུངས།  
\v 6 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱི་མཚུངས་ཟླ་སུ་ཡང་མེད། ཁྱེད་ནི་མཆོག་ཏུ་གྱུར་པ་དེ་ཡིན་ལ། ཁྱེད་ཀྱི་མཚན་སྙན་ལ་མཐུ་སྟོབས་ཆེའོ། །  
\v 7 ཀྱེ་མི་རིགས་ཀུན་གྱི་རྒྱལ་པོ་ལགས། ཁྱེད་ལ་གུས་ཤིང་མི་འཇིགས་པ་སུ་ཡོད་དམ། ཁྱེད་ལ་གུས་ཤིང་འཇིགས་པར་འོས་ཏེ། མི་རིགས་ཀུན་གྱི་ཤེས་ལྡན་ཁྲོད་དང་དེ་རྣམས་ཀུན་གྱི་རྒྱལ་ཕྲན་ལའང་ཁྱེད་ཀྱི་དོ་ཟླ་སུ་ཡང་མེད་དོ། །  
\v 8 དེ་རྣམས་ནི་དུད་འགྲོ་དང་འདྲ་ཞིང་ཐམས་ཅད་བླུན་རྨོངས་ཡིན་ཏེ། སྐུ་འདྲ་ནི་ཤིང་སྡོང་འབའ་ཞིག་ཡིན་ལ་དེའི་བཀའ་སློབ་ལ་ཕན་ཐོགས་ཅི་ཡང་མེད་དོ། །  
\v 9 ཐཱར་ཞིས་ནས་ཁྱེར་འོངས་པའི་དངུལ་ལེབ་མོ་དང་། ཨུ་ཕཱ་ཟི་ནས་ཁྱེར་འོངས་པའི་གསེར་ཡོད་དེ། ཐམས་ཅད་ལག་ཤེས་པ་དང་དངུལ་མགར་གྱི་ལག་རྩལ་ཡིན། ཡང་མདོག་སྔོན་པོ་དང་རྒྱ་སྨུག་གི་གོས་ཡོད་དེ། དེ་ཚང་མ་ལག་རྩལ་ཅན་གྱི་ལས་ཀ་ཡིན་ནོ། །  
\v 10 དཀོན་མཆོག་ཡ་ཝཱེ་གཅིག་པུ་ནི་དཀོན་མཆོག་བདེན་པ་ཡིན་ལ། ཁོང་ནི་རྟག་ཏུ་གསོན་པོར་བཞུགས་པའི་དཀོན་མཆོག་དང་དུས་གཏན་གྱི་རྒྱལ་པོ་ཡིན་ཏེ། ཁོང་ཐུགས་ཁྲོས་པ་ཙམ་གྱིས་ས་གཞི་འདར་ཞིང་། ཁོང་གི་ཁྲོ་གཏུམ་ནི་མི་རིགས་ཀུན་གྱིས་མི་ཐེག་གོ །  
\v 11 ཁྱོད་ཚོས་དེ་དག་ལ་འདི་ལྟར། གནམ་ས་མཛད་མཁན་མིན་པའི་ལྷ་དེ་རྣམས་ནི། ས་སྟེང་དང་གནམ་འོག་ནས་མེད་པར་བཟོ་ངེས་ཞེས་ཤོད་དང་།  
\v 12 དཀོན་མཆོག་ཡ་ཝཱེས་ཉིད་ཀྱི་ནུས་མཐུ་ལ་བརྟེན་ནས་ས་གཞི་བཀོད་ཅིང་། ཉིད་ཀྱི་ཤེས་རབ་ཀྱིས་འཇིག་རྟེན་མཛད་པ་དང་། ཡང་ཁོང་གི་མཁྱེན་རབ་ཀྱིས་ཨ་སྔོན་དབྱིངས་རྣམས་བཏིངས།  
\v 13 ཁོང་གིས་གསུང་སྐད་འདོན་དུས་ནམ་མཁའ་ནས་ཆུ་རྣམས་འཕྱུར་ཞིང་། ཁོང་གིས་ས་མཐའ་ནས་སྤྲིན་དང་སྨུག་པ་ལང་བར་མཛད་པ་དང་། ཆར་བ་དང་ཆབས་ཅིག་གློག་དམར་འཁྱུག་པར་མཛད། ཉིད་ཀྱི་གཏེར་མཛོད་རྣམས་ལས་རླུང་ཡང་འདོན་ནོ། །  
\v 14 མི་རེ་རེ་དུད་འགྲོ་དང་འདྲ་སྟེ་ཤེས་བྱ་མེད་ལ། དངུལ་མགར་རྣམས་ནི་རང་རང་གི་སྐུ་འདྲའི་རྐྱེན་གྱིས་ངོ་ཚ་བ་དང་། དེས་བླུགས་པའི་སྐུ་འདྲ་རྣམས་ནི་རྫུས་མ་ཡིན་ལ་དེ་དག་གི་ནང་དུ་དབུགས་ཀྱང་མེད་དོ། །  
\v 15 སྐུ་འདྲ་ཐམས་ཅད་སྙིང་པོ་མེད་པ་དང་། དེ་ནི་མི་ལ་མགོ་སྐོར་གཏོང་བྱེད་ཙམ་ཡིན་ཏེ། ཉེས་ཆད་གཅོད་པའི་དུས་ལ་སླེབས་ཚེ་དེ་དག་མེད་པར་བཟོ་ངེས་ཡིན།  
\v 16 ཡང་ཡ་ཀོབ་ཀྱི་ཐོབ་སྐལ་ནི་དེ་འདྲ་མིན་ཏེ། ཅི་ལ་ཞེ་ན། ཁོང་ནི་ཐམས་ཅད་འགོད་མཁན་གཙོ་བོ་ཡིན་པས་སོ། །ཡེས་ར་ཨེལ་ཡང་ཁོང་གི་ནོར་སྐལ་གྱི་ཚོ་ཁག་ཡིན་པ་དང་། ཁོང་གི་མཚན་ནི་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལགས་སོ། །   
\s1 འབྱུང་འགྱུར་གྱི་ཆག་སྒོ།  
\p
\v 17 ཀྱེ་མཐའ་ནས་བསྐོར་བའི་མི་རྣམས། ཁྱོད་རྣམས་ཀྱིས་ཅ་ལག་བསྡུས་ནས་ཡུལ་འདི་དང་འབྲལ་བར་གྱིས།  
\v 18 ཅི་ལ་ཞེ་ན། དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ད་རེས་བདག་གིས་ཡུལ་འདིའི་མི་རྣམས་རྒྱང་དུ་གཡུག་པ་དང་། ཡང་དེ་རྣམས་ལ་གནོད་བསྐྱལ་ནས་ཁོ་ཚོའི་གོ་རྟོགས་སད་པར་བྱའོ་ཞེས་གསུངས།  
\v 19 ང་རང་རྨས་ཤིང་བདག་གི་རྨ་ཁ་ཤིན་ཏུ་ཆེ་བས་སྐྱོ་བ་ལ། ཡིན་ཡང་ངས་འདི་ནི་བདག་གིས་ངེས་པར་བཟོད་དགོས་པའི་སྡུག་བསྔལ་ཡིན་ཞེས་སྨྲས་སོ། །  
\v 20 ངའི་གུར་བཤིག་ཅིང་ངའི་ཐག་པ་ཐམས་ཅད་བཅད། ངའི་བུ་ཕྲུག་རྣམས་ཀྱང་ང་དང་བྲལ་ནས་མེད་པར་གྱུར་ཏེ། ད་ནི་ངའི་གུར་ཕུབ་མཁན་དང་ངའི་ཡོལ་བ་འགེལ་མཁན་སུ་ཡང་མེད།  
\v 21 ཅི་ལ་ཞེ་ན། རྫི་བོ་རྣམས་དུད་འགྲོ་ལྟ་བུར་གྱུར་ཅིང་དཀོན་མཆོག་ཡ་ཝཱེ་མ་བཙལ་བས་དོན་མ་འགྲུབ་ལ། དེ་དག་གི་ལུག་ཁྱུ་ཡང་ཐམས་ཅད་ཁ་ཐོར་དུ་སོང་།  
\v 22 སྐད་ཅིག་ཐོས་ཡོང་སྟེ། ལྟོས་དང་དགྲ་བོ་སླེབས་བྱུང་། ཟིང་སློང་ཆེན་པོ་ཞིག་བྱང་ཕྱོགས་ནས་འོང་ཞིང་། ཡ་ཧུ་དཱའི་གྲོང་ཁྱེར་རྣམས་ཞིག་རོ་དང་ཁྱི་སྤྱང་གི་ཚང་དུ་བསྒྱུར་བའོ། །  
\v 23 ཀྱེ་དཀོན་མཆོག་ཡ་ཝཱེ་ལགས། མི་ཡི་འགྲོ་ལམ་རང་ལ་མི་དབང་བ་བདག་གིས་རྟོགས་ཏེ། ལམ་འགྲོ་བས་ཀྱང་རང་གི་གོམ་སྟབས་ལ་ཁ་ལོ་བསྒྱུར་མི་ནུས།  
\v 24 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་དྲང་གཞག་ངང་བདག་གི་སྐྱོན་སེལ་བ་ལས། ཉིད་ཀྱི་ཐུགས་ཁྲོའི་ནང་དུ་བདག་ལ་ཉེས་ཆད་མི་གཅོད་རོགས། ཅི་ལ་ཞེ་ན། ཁྱེད་ཀྱིས་ང་རང་མེད་པར་མི་མཛད་པའི་ཕྱིར་དུའོ། །  
\v 25 ཁྱེད་ཀྱིས་ཉིད་ཀྱི་ཐུགས་ཁྲོ་ནི་ཁྱེད་མི་ཤེས་པའི་རྒྱལ་ཁམས་དང་ཁྱེད་ཀྱི་མཚན་ནས་མི་འབོད་པའི་མི་རིགས་རྣམས་ཀྱི་སྟེང་དུ་ལྡུག་པར་མཛོད་ཅིག ཅི་ལ་ཞེ་ན། དེ་རྣམས་ཀྱིས་ཡ་ཀོབ་ཁྱུར་མིད་བཏང་བར་མ་ཟད་རྩ་བ་ནས་མེད་པར་བཟོས་ཤིང་། དེ་དག་གི་ཡུལ་ནི་མི་མེད་ས་སྟོང་དུ་བསྒྱུར་བའོ། །   
\c 11
\cl ལེའུ་བཅུ་གཅིག་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེ་རེམ་ཡཱ་ཡིས་དཀོན་མཆོག་གི་ཞལ་ཆད་སྒྲོག་པ།  
\p
\v 1 དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།  
\v 2 ཁྱོད་ཀྱིས་ཞལ་ཆད་འདིའི་བཀའ་ལ་མཉན་ནས་ཡ་ཧུ་དཱ་པ་དང་ཡེ་རུ་སཱ་ལེམ་པ་རྣམས་ལ་འདི་ལྟར་ཤོད་ཅིག  
\v 3 དེ་རྣམས་ལ། ཡེས་ར་ཨེལ་གྱི་དཀོན་མཆོག་ཡ་ཝཱེས་ཞལ་ཆད་འདིའི་བཀའ་ལ་མི་མཉན་པའི་མི་ལ་དམོད་པར་འགྱུར་ངེས།  
\v 4 ཞལ་ཆད་འདི་ནི་བདག་གིས་ཁྱོད་ཚོའི་ཕ་མེས་རྣམས་ཨེ་ཅིབ་ཡུལ་ནས་ཕྱིར་ཁྲིད་འོངས་པ་དང་། ལྕགས་འཇུ་བྱེད་ཀྱི་མེ་ཐབ་ནས་བྲལ་བའི་ཉིན་མོ་དེར་ཁོ་རྣམས་ལ་བསྒོས་པའི་བཀའ་ཡིན། ཁྱོད་ཚོས་བདག་གི་བཀའ་ལ་ཉོན་ཅིག བདག་གིས་གང་ཞིག་བསྒོས་པ་ཐམས་ཅད་ལྟར་སྤྱད་པ་སྤྱོད་དང་། དེ་ནས་ཁྱོད་རྣམས་བདག་གི་འབངས་མི་དང་། ང་རང་ཁྱོད་ཅག་གི་དཀོན་མཆོག་ཏུ་འགྱུར་ངེས།  
\v 5 བདག་གིས་ཁྱོད་རྣམས་ཀྱི་ཕ་མེས་རྣམས་ལ་བསྐྱལ་བའི་མནའ་དེ་འགྲུབ་པར་བྱས་ནས། དེ་རྣམས་ལ་དེ་རིང་དང་འདྲ་བར་འོ་མ་དང་སྦྲང་རྩི་བཞུར་བའི་ཡུལ་ཞིག་གནང་བར་བྱའོ་ཞེས་གསུངས་པ་ན། བདག་གིས་ཞུ་ལན་དུ། ཀྱེ་དཀོན་མཆོག་ཡ་ཝཱེ་ལགས། ཨ་མེན་ཞུས་པ་ཡིན།  
\v 6 དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་ཀྱིས་ཡ་ཧུ་དཱའི་གྲོང་ཁྱེར་དང་ཡེ་རུ་སཱ་ལེམ་གྱི་སྲང་ལམ་དག་ཏུ་བཀའ་འདི་ཐམས་ཅད་བསྒྲག་དགོས་ཏེ། ཁྱོད་རྣམས་ཀྱིས་ཞལ་ཆད་འདིའི་བཀའ་རྣམས་ལ་མཉན་ནས་དེ་བཞིན་དུ་སྤྱོད་ཅིག  
\v 7 ཅི་ལ་ཞེ་ན། བདག་གིས་ཁྱོད་ཅག་གི་ཕ་མེས་རྣམས་ཨེ་ཅིབ་ཡུལ་ནས་ཕྱིར་ཁྲིད་འོངས་པ་ནས་དེ་རིང་གི་བར་དུ། དེ་དག་ལ་ཡང་ཡང་བསླབ་བྱ་གནང་སྟེ་བདག་གི་བཀའ་ལ་ཉོན་ཅིག་ཅེས་སྨྲས་ཀྱང་།  
\v 8 དེ་དག་གིས་མ་མཉན་ཞིང་རྣ་བ་གཏད་ནས་མ་མཉན་པར། རང་གི་སེམས་ངན་གཤིས་གྱོང་གི་རྗེས་སུ་འབྲངས་ཏེ་སྤྱོད་ངན་སྤྱད་པས། བདག་གིས་ཞལ་ཆད་འདིའི་ནང་གི་དམོད་ཚིག་ཐམས་ཅད་དེ་དག་གི་སྟེང་དུ་འབབ་པར་བྱས། བདག་གིས་དེ་སྔ་ཁོ་རྣམས་ལ་ཞལ་ཆད་འདི་བསྲུང་དགོས་པར་བསྒོས་ན་ཡང་དེ་རྣམས་ཀྱིས་མ་བསྲུངས་ཞེས་པའོ་ཞེས་གསུངས་སོ། །  
\v 9 དཀོན་མཆོག་ཡ་ཝཱེས་ང་ལ་འདི་སྐད་དུ། ཡ་ཧུ་དཱ་པ་དང་ཡེ་རུ་སཱ་ལེམ་གྱི་ཡུལ་མིའི་ནང་དུ་མཉམ་དུ་ལྐོག་ཇུས་འཐེན་ནས་རྒྱབ་འགལ་བྱེད་པའི་དོན་ཡོད་དེ།  
\v 10 དེ་རྣམས་ཁ་ཕྱིར་འཁོར་ནས་ཁོ་ཚོའི་ཕ་མེས་རྣམས་ཀྱི་སྤྱོད་ངན་ལྟར་བྱེད་ཅིང་བདག་གི་བཀའ་ལ་མཉན་མི་འདོད་པར། ལྷ་གཞན་དག་གི་རྗེས་སུ་འབྲངས་ནས་ཞབས་ཏོག་བསྒྲུབས་པའོ། །ཡང་ཡེས་ར་ཨེལ་གྱི་ཁྱིམ་རྒྱུད་དང་ཡ་ཧུ་དཱའི་ཁྱིམ་རྒྱུད་རྣམས་བདག་གིས་དེ་དག་གི་ཕ་མེས་རྣམས་ཀྱི་བར་དུ་བཞག་པའི་ཞལ་ཆད་དང་འགལ་བས།  
\v 11 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག བདག་གིས་ཁོ་རྣམས་ལ་ཆག་སྒོ་འབྱུང་བར་བྱེད་ཅིང་དེ་རྣམས་ཐར་བར་མི་འགྱུར་ལ། དེ་རྣམས་ཀྱིས་བདག་ལ་ནན་གྱིས་ཞུས་ཀྱང་བདག་གིས་མི་མཉན་ཞེས་གསུངས།  
\v 12 དུས་དེར་ཡ་ཧུ་དཱའི་གྲོང་ཁྱེར་གྱི་མི་རྣམས་དང་ཡེ་རུ་སཱ་ལེམ་གྱི་ཡུལ་མི་དག་གིས་ཁོ་ཚོས་སྤོས་བདུགས་ནས་ཞབས་ཏོག་སྒྲུབ་པའི་ལྷ་རྣམས་ལ་ནན་གྱིས་ཞུས་ཀྱང་། སྡུག་གིས་མནར་བའི་དུས་སུ་ལྷ་དེ་དག་གིས་ཁོ་རྣམས་སྐྱོབ་པར་མི་འགྱུར་རོ། །  
\v 13 ཀྱེ་ཡ་ཧུ་དཱ། ཁྱོད་ཀྱི་ལྷ་ཡི་གྲངས་ནི་ཁྱོད་ཀྱི་གྲོང་ཁྱེར་གྱི་གྲངས་དང་མཉམ་ཞིང་། ཁྱོད་ཀྱིས་ངོ་ཚའི་གཞི་ཡིན་པའི་པཱ་ཨལ་རྣམས་ལ་སྤོས་བདུག་ཕྱིར་བརྩིགས་པའི་མཆོད་ཁྲི་ཡང་ཡེ་རུ་སཱ་ལེམ་གྱི་ལམ་སྲང་གི་གྲངས་བཞིན་དུ་མང་བས།  
\v 14 ཁྱོད་ཀྱིས་མི་འདི་རྣམས་ཀྱི་ཆེད་དུ་གསོལ་བ་མ་འདེབས་ཤིག དེ་རྣམས་ཀྱི་ཕྱིར་ཞུ་འབོད་དང་ཞུ་བའང་མ་བྱེད་ཅིག ཅི་ལ་ཞེ་ན། དེ་རྣམས་སྡུག་བསྔལ་གྱིས་མནར་བའི་དུས་སུ་བདག་ལ་ཞུས་ཀྱང་བདག་གིས་ལན་མི་སྦྱིན་ནོ། །  
\v 15 བདག་གིས་གཅེས་སུ་འཛིན་པ་ཡིས་ནག་ཉེས་ཚབས་ཆེན་བྱས་པས་བདག་གི་མཆོད་ཁང་ནང་དུ་ཅི་ཞིག་བྱེད་དམ། མཆོད་པར་ཕུལ་བའི་ཤ་ཡིས་ཁྱོད་ཀྱི་ཆག་སྒོ་བཟློགས་ནས་ཁྱོད་དགའ་བར་བྱེད་ནུས་སམ།  
\v 16 སྔར་དཀོན་མཆོག་ཡ་ཝཱེས་ཁྱོད་ཀྱི་མིང་ལ་ཡིད་དུ་འོང་བ་དང་འབྲས་བུ་ལེགས་པོ་བསྐྱེད་པའི་སྐྱུ་རུ་ཤིང་སྔོན་པོ་ཞེས་བཏགས་མོད། འོན་ཀྱང་ད་ལྟ་ཁོང་གིས་རླུང་དམར་གྱི་སྒྲ་ཆེན་པོས་དེ་ལ་མེ་སྦར་ནས་ཡལ་ག་རྣམས་གཅོག་པར་འགྱུར།  
\v 17 མ་གཞི་ཁྱོད་འཛུགས་མཁན་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ཆག་སྒོ་བཏང་ནས་ཁྱོད་ལ་རྒོལ་བར་གསུངས། ཅི་ལ་ཞེ་ན། ཡེས་ར་ཨེལ་གྱི་ཁྱིམ་རྒྱུད་དང་ཡ་ཧུ་དཱའི་ཁྱིམ་རྒྱུད་གཉིས་ཀྱིས་སྤྱོད་ངན་སྤྱད་པ་དང་། དེ་དག་གིས་པཱ་ཨལ་ལ་སྤོས་བདུགས་ནས་ང་རང་ཁྲོ་བར་བྱས་པས་སོ། །   
\s1 ཡེ་རེམ་ཡཱ་གསོད་པའི་ཇུས་ངན།  
\p
\v 18 དཀོན་མཆོག་ཡ་ཝཱེས་ང་ལ་མཛུབ་སྟོན་གནང་བས་ངས་རྟོགས་པ་དང་། ཁྱེད་ཀྱིས་དེ་དག་གི་སྤྱོད་ལུགས་ང་ལ་བསྟན་པ་ཡིན།  
\v 19 ང་ནི་ཞི་ཞིང་དུལ་བའི་ལུ་གུ་ཞིག་དང་འདྲ་བར་བཤའ་རུ་ཁྲིད་པ་དང་། དེ་ཚོས་རང་ཅག་གིས་ལྗོན་ཤིང་དེ་ཤིང་ཏོག་དང་བཅས་མེད་པར་བྱས་ནས། ཁོ་གསོན་ཡུལ་ནས་ཚར་གཅོད་བྱེད་པར་བྱ། ཕྱིན་ཆད་ཁོའི་མིང་ཙམ་ཡང་དྲན་པར་མི་འགྱུར་ཞེས་གྲོས་ངན་བཏབ་ནས་ང་རང་ལྐོག་གསོད་བྱེད་པར་རྩོམ་པ་ངས་མ་ཤེས།  
\v 20 འོན་ཀྱང་དྲང་བདེན་ཀྱི་ཁྲིམས་ཐག་གཅོད་པ་དང་། མིའི་སེམས་དང་བསམ་པར་ཞིབ་དཔྱོད་མཛད་པའི་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལགས། ངས་རང་གི་ཁ་མཆུ་ཁྱེད་ལ་བཅོལ་བས་ན། ཁྱེད་ཀྱིས་དེ་ཚོར་ལན་གནང་བ་ང་ལ་མཐོང་བར་མཛོད་ཅིག  
\v 21 དེ་བས་ཁྱོད་ཀྱི་སྲོག་འཚོལ་བའི་ཨ་ན་ཐོད་པ་རྣམས་ལ་དཀོན་མཆོག་ཡ་ཝཱེས་བཀའ་བཀྱོན་གནང་ངོ་། །ཁོ་རྣམས་ན་རེ། ཁྱོད་ནི་ང་ཚོའི་ལག་ཏུ་མི་འཆི་བའི་ཕྱིར་དུ་ཁྱོད་ཀྱིས་དཀོན་མཆོག་ཡ་ཝཱེའི་མཚན་གྱི་སྒོ་ནས་ལུང་མ་སྟོན་ཞེས་སྨྲས།  
\v 22 དེའི་ཕྱིར་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག བདག་གིས་དེ་རྣམས་ལ་ཉེས་ཆད་གཅོད་ངེས་ལ། དེ་དག་གི་ན་གཞོན་རྣམས་ནི་རལ་གྲིའི་འོག་ནས་འཆི་བ་དང་། དེ་དག་གི་བུ་དང་བུ་མོ་རྣམས་ནི་མུ་གེ་ལས་འཆི་བར་འགྱུར།  
\v 23 ཉེས་ཆད་གཅོད་པའི་དུས་དེར་བདག་གིས་ཨ་ན་ཐོད་པ་རྣམས་ལ་ཆག་སྒོ་འབྱུང་བར་བྱེད་པས། དེ་རྣམས་ལས་སུ་ཡང་ལུས་པར་མི་འགྱུར་ཞེས་གསུངས་སོ། །   
\c 12
\cl ལེའུ་བཅུ་གཉིས་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེ་རེམ་ཡཱ་ཡིས་དཀོན་མཆོག་ཡ་ཝཱེ་ལ་ཞུ་བ་བྱས་པ།  
\p
\v 1 ཀྱེ་དཀོན་མཆོག་ཡ་ཝཱེ་ལགས། བདག་གིས་ཁྱེད་དང་རྩོད་པའི་དུས་སུ་ཁྱེད་ཉིད་ནམ་ཡང་དྲང་བདེན་ཡིན། ཡིན་ཡང་དྲང་གཞག་གི་ཐད་ངས་ད་དུང་ཁྱེད་ལ་རྩོད་དགོས་ཏེ། ངན་པའི་ལམ་ནི་ཅིའི་ཕྱིར་བདེ་བླག་ཡིན་ནམ། གཡོ་སྒྱུ་ཆེས་ཆེར་སྤེལ་མཁན་ཐམས་ཅད་ཅིའི་ཕྱིར་བདེ་བར་གནས་སམ།  
\v 2 ཁྱེད་ཀྱིས་ཁོ་རྣམས་བཙུགས་ནས་དེ་རྣམས་རྩ་བ་རྒྱས་ཤིང་ཡར་སྐྱེས་ཏེ་འབྲས་བུའང་ཐོགས་པ་ཡིན། དེ་རྣམས་ཁ་ནས་ཁྱེད་དང་ཉེ་ཡང་སེམས་ནི་ཁྱེད་དང་རིང་དུ་གྱེས་སོ། །  
\v 3 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་ང་རང་མཁྱེན་ཞིང་གཟིགས་པ་དང་། ངའི་སེམས་ནི་ཁྱེད་ཀྱི་ཕྱོགས་སུ་གང་འདྲ་ཡིན་པར་ཞིབ་དཔྱོད་མཛད་པ་ཡིན། ཁྱེད་ཀྱིས་དེ་རྣམས་ཕྱི་རུ་དྲུད་ནས་བཤས་ལུག་བཞིན་དུ་གསོད་པའི་ཉིན་མོའི་བར་དུ་ལོགས་སུ་བཀར་བར་མཛོད།  
\v 4 ཡུལ་འདིས་མྱ་ངན་བྱེད་ཅིང་རི་ཐང་གི་རྩྭ་སྔོན་ཡོད་ཚད་སྐམ་ནས་ནམ་དུས་བར་དུ་ལུས་སམ། ཅི་ལ་ཞེ་ན། དེ་རུ་སྡོད་པའི་མི་རྣམས་ཀྱི་སྤྱོད་ངན་གྱི་རྐྱེན་གྱིས། ཕྱུགས་ཟོག་དང་འདབ་ཆགས་ཐམས་ཅད་རྩ་བ་ནས་མེད་པར་གྱུར་ཏེ། སྔར་དེ་དག་གིས་ཁོང་གིས་ངེད་ཅག་གི་མཇུག་འབྲས་མི་མཐོང་ཞེས་སྨྲས་སོ། །  
\v 5 ཡང་ཁྱོད་ནི་རྐང་ཐང་དང་མཉམ་དུ་རྒྱུག་དུས་ཐང་ཆད་པ་ཡིན་ན། རྟ་མཆོག་དང་ཅི་ལྟར་འགྲན་ནམ། ཁྱོད་ནི་བདེ་ཞིང་འཇགས་པའི་ཡུལ་དུའང་འགྱེལ་བ་ཡིན་ན། ཡོར་དན་གཙང་པོའི་ནགས་ཚལ་དུ་ཅི་ཞིག་བྱའམ།  
\v 6 ཁྱོད་རང་གི་སྤུན་མཆེད་རྣམས་དང་ཁྱོད་ཀྱི་ཕ་རྒྱུད་ཀྱིས་ཀྱང་ཁྱོད་ལ་གཡོ་སྒྱུ་སྤྱད་དེ། ཁྱོད་ཀྱི་རྒྱབ་ནས་སྐད་ཆེན་པོས་འུར་རྒྱག་པ་དང་། དེ་ཚོས་ཁྱོད་ལ་གཏམ་སྙན་མོ་བཤད་ནའང་ཁྱོད་ཀྱིས་དེ་དག་ལ་ཡིད་ཆེས་བྱེད་མི་རུང་།   
\p
\v 7 ངས་རང་གི་ཕོ་བྲང་སྤངས་ཏེ་རང་གི་ནོར་སྐལ་ཡང་དོར་ནས། བདག་གི་སྙིང་ཉེ་བ་དེ་མོའི་དགྲ་ཡི་ལག་ཏུ་གཏད་པ་ཡིན།  
\v 8 ངའི་ནོར་སྐལ་ནི་ང་ལ་མཚོན་ན་ནགས་ཚལ་གྱི་སེང་གེ་དང་འདྲ་བར་གྱུར་ཏེ། དེས་ང་རོ་དང་བཅས་ང་ལ་རྒོལ་བས་ང་དེ་ལ་སྡང་བ་ཡིན།  
\v 9 ངའི་ནོར་སྐལ་ནི་ང་ལ་མཚོན་ན་བྱ་རྒོད་ཁྲ་བོ་དང་འདྲ་ཞིང་། བྱ་རྒོད་གཞན་རྣམས་ཀྱིས་ཕྱོགས་བཞི་ནས་མོ་ལ་རྒོལ་བ་མ་ཡིན་ནམ། ཁྱོད་རྣམས་སོང་ནས་རི་ཐང་གི་གཅན་གཟན་སྣ་ཚོགས་བསྡུས་ནས་དེ་རྣམས་ལ་ཧབ་ཟ་བྱེད་དུ་ཆུག་ཅིག  
\v 10 ལུག་རྫི་མང་པོས་ངའི་རྒུན་འབྲུམ་ར་བ་བརླགས་ནས། ངའི་ས་ཆ་རྣམས་བརྫིས་ཤིང་ངའི་ཡིད་དུ་འོང་བའི་ས་ཆ་རྣམས་མི་མེད་ལུང་སྟོང་དུ་བསྒྱུར་ཏོ། །  
\v 11 ཁོ་རྣམས་ཀྱིས་ཡུལ་དེ་ཐང་རྒོད་དུ་བསྒྱུར་ཅིང་། ཡུལ་དེ་ཐང་རྒོད་དུ་གྱུར་པས་བདག་གི་ཕྱོགས་སུ་ངུ་འབོད་བྱེད། ཡུལ་ཐམས་ཅད་ཐང་རྒོད་དུ་གྱུར་ནའང་དེར་དོ་ཁུར་བྱེད་མཁན་སུ་ཡང་མེད།  
\v 12 སྲོག་ལེན་མཁན་ནི་དབེན་སྟོང་གི་སྐྱ་ཐེར་ཐེར་གྱི་མཐོ་སྒང་རྣམས་སུ་འོངས་ནས། དཀོན་མཆོག་ཡ་ཝཱེའི་རལ་གྲི་ཡིས་ཡུལ་གྱི་འདི་ཕྱོགས་ནས་ཕ་གའི་བར་དུ་ཐམས་ཅད་མེད་པར་མཛད་ཅིང་། ཤ་ཁྲག་ལས་གྲུབ་པ་གང་ལའང་བདེ་བ་མེད་དོ། །  
\v 13 དེ་རྣམས་ཀྱིས་གྲོ་བཏབ་ཀྱང་ཚེར་མ་བསྡུས། དཀའ་ལས་ཆེན་པོ་མྱངས་ནའང་འབྲས་བུ་ཅི་ཡང་མ་ཐོབ། ཅི་ལ་ཞེ་ན། དཀོན་མཆོག་ཡ་ཝཱེའི་ཁྲོ་གཏུམ་གྱི་རྐྱེན་གྱིས་ཁྱོད་རྣམས་རང་གི་སྟོན་ཐོག་གི་ཕྱིར་ངོ་ཚ་བར་འགྱུར།   
\s1 ཡ་ཝཱེས་ཡེས་ར་ཨེལ་ལ་ཞལ་བཞེས་གནང་བ།  
\p
\v 14 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག བདག་གིས་ཁྱིམ་མཚེས་ངན་པ་སྟེ་ངས་ཡེས་ར་ཨེལ་གྱི་མི་རྣམས་ལ་གནང་བའི་ནོར་སྐལ་བཙན་བཟུང་བྱེད་མཁན་ཐམས་ཅད་ཡུལ་ཁམས་འདི་ནས་འདོན་པར་བྱ་ཞིང་། ངས་ཡ་ཧུ་དཱའི་ཁྱིམ་རྒྱུད་ཀྱང་དེ་དག་གི་ཁྲོད་ནས་འདོན་པར་འགྱུར།  
\v 15 ངས་ཁོ་རྣམས་བཏོན་པའི་རྗེས་སུ་ཁ་ཕྱིར་འཁོར་ནས་དེ་རྣམས་སྙིང་རྗེས་བསྐྱང་བ་དང་། དེ་རྣམས་ཕྱིར་ཁྲིད་འོངས་ནས་རང་རང་གི་ནོར་སྐལ་ཏེ་རང་རང་གི་ཡུལ་དུ་ལོག་པར་བྱའོ། །  
\v 16 གལ་སྲིད་དེ་དག་གིས་ལྷག་བསམ་རྣམ་དག་གིས་ངའི་འབངས་མིའི་ཚུལ་བསླབ་ཏེ། ངའི་མིང་གི་སྒོ་ནས་མནའ་བསྐྱལ་ནས་འདི་ལྟར། ངས་གཏན་དུ་བཞུགས་པའི་དཀོན་མཆོག་ཡ་ཝཱེའི་མཚན་གྱི་སྒོ་ནས་མནའ་སྐྱེལ་ལོ་ཞེས་སྨྲ་ཞིང་། སྔར་དེ་དག་གིས་ངའི་འབངས་མི་ལ་པཱ་ཨལ་གྱི་མིང་གི་སྒོ་ནས་མནའ་སྐྱེལ་ལུགས་བསླབས་པ་བཞིན་བྱས་ན། དེ་དག་ངའི་འབངས་མིའི་ནང་དུ་གཞི་ཚུགས་པར་འགྱུར།  
\v 17 འོན་ཀྱང་དེ་རྣམས་ཀྱིས་མ་མཉན་ན། ངས་མི་རིགས་དེ་ནི་འདོན་པར་འགྱུར་བར་མ་ཟད་རྩ་བ་ནས་མེད་པར་གཏོང་ངེས་ཡིན་ཞེས་དཀོན་མཆོག་ཡ་ཝཱེས་གསུངས་པའོ། །   
\c 13
\cl ལེའུ་བཅུ་གསུམ་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 སྐ་རགས་ཀྱི་དཔེ།  
\p
\v 1 དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་སོང་ལ་སོ་རས་ཀྱི་སྐ་རགས་ཤིག་ཉོས་ཏེ་རྐེད་པར་དཀྲིས་ཤིག ཡང་དེ་ཆུའི་ནང་དུ་མ་སྦང་ཞིག་ཅེས་གསུངས་པས།  
\v 2 ངས་ཀྱང་དཀོན་མཆོག་ཡ་ཝཱེའི་བཀའ་བཞིན་དུ་སྐ་རགས་ཤིག་ཉོས་ནས་རང་གི་རྐེད་པར་དཀྲིས་སོ། །  
\v 3 ཡང་དཀོན་མཆོག་ཡ་ཝཱེའི་བཀའ་ཐེངས་གཉིས་པ་ང་ལ་བྱུང་སྟེ་འདི་སྐད་དུ།  
\v 4 ཁྱོད་ཀྱིས་རང་གིས་ཉོས་ཡོང་ནས་རྐེད་པར་དཀྲིས་ཡོད་པའི་སྐ་རགས་ཁྱེར་ནས། ཡར་ལོངས་ལ་ཕི་རཱད་གཙང་པོའི་འགྲམ་དུ་སོང་ལ། སྐ་རགས་དེའི་བྲག་ཕུག་ནང་དུ་སྦ་བར་གྱིས་ཞེས་གསུངས་པ་ལ།  
\v 5 དཀོན་མཆོག་ཡ་ཝཱེས་ང་ལ་བཀའ་བབས་པ་བཞིན་དུ། བདག་སོང་ནས་སྐ་རགས་དེ་ཕི་རཱད་གཙང་པོའི་འགྲམ་དུ་སྦས་སོ། །  
\v 6 ཡང་ཉིན་མང་པོ་འགོར་རྗེས་དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་ལོངས་ལ་ཕི་རཱད་གཙང་པོར་སོང་ནས། བདག་གིས་ཁྱོད་ལ་བཀའ་བབས་ཏེ་སྦས་པའི་སྐ་རགས་དེ་ལོངས་ཤོག་ཅེས་གསུངས།  
\v 7 དེ་ནས་ང་ཕི་རཱད་གཙང་པོར་སོང་ནས་སྐ་རགས་དེ་ངས་སྦས་ས་ནས་བསློགས་ཏེ་བླངས་པ་ན། ལྟོས་ཤིག སྐ་རགས་ཧྲུལ་ནས་བེད་མེད་དུ་གྱུར་ཏོ། །  
\v 8 ཡང་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་བ་འདི་ལྟ་སྟེ།  
\v 9 དཀོན་མཆོག་ཡ་ཝཱེས་འདི་སྐད་དུ། ངས་ཡ་ཧུ་དཱའི་ང་རྒྱལ་དང་ཡེ་རུ་སཱ་ལེམ་གྱི་རང་སྣང་ཆེན་པོ་ཡང་དེ་དང་དེ་བཞིན་དུ་ཉམས་པར་བྱའོ། །  
\v 10 མི་ངན་པ་འདི་དག་གིས་ངའི་བཀའ་ལ་མི་མཉན་པར། རང་གི་གཤིས་རྒྱུད་གྱོང་པོ་བཞིན་དུ་སྤྱོད་པ་སྤྱད་དེ། ལྷ་གཞན་རྣམས་ཀྱི་རྗེས་སུ་འབྲངས་པ་དང་དེ་དག་ལ་ཞབས་ཏོག་བསྒྲུབས་ནས་ཕྱག་བཙལ་བས། ཁོ་རྣམས་ཀྱང་སྐ་རགས་འདི་བཞིན་དུ་སྤྱོད་ཡུལ་གང་ཡང་མེད་པར་འགྱུར།  
\v 11 སྐ་རགས་ཅི་ལྟར་མི་ཡི་རྐེད་པར་འབྱར་བ་བཞིན། ངས་ཀྱང་ཡེས་ར་ཨེལ་ཁྱིམ་རྒྱུད་ཐམས་ཅད་དང་ཡ་ཧུ་དཱའི་ཁྱིམ་རྒྱུད་ཐམས་ཅད་ནི། ང་ལ་གཏོགས་པའི་མི་ལ་གྱུར་ནས་ང་ལ་མཚན་སྙན་གྲགས་དང་། བསྟོད་པ། གཟི་བརྗིད་བཅས་འབྱུང་བར་ངས་རང་ལ་སྦྱར་བ་ཡིན་མོད། འོན་ཀྱང་དེ་དག་གིས་མཉན་པར་མ་འདོད་དོ་ཞེས་དཀོན་མཆོག་ཡ་ཝཱེས་གསུངས་པའོ། །   
\s1 རྒུན་ཆང་གི་རྫ་མའི་དཔེ།  
\p
\v 12 དེའི་ཕྱིར། ཁྱོད་ཀྱིས་དེ་དག་ལ་འདི་ལྟར། ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་གསུངས་ཏེ། རྒུན་ཆང་གི་རྫ་མ་རེ་རེ་རྒུན་ཆང་གིས་བཀང་བར་བྱོས་ཤིག་ཅེས་པའོ་ཞེས་སྨྲོས་དང་། དེ་དག་གིས་ཁྱོད་ལ་ལན་དུ། ངེད་ཅག་གིས་རྒུན་ཆང་གི་རྫ་མ་རེ་རེ་རྒུན་ཆང་གིས་བཀང་བར་བྱེད་མི་ཤེས་སམ་ཞེས་སྨྲ་བར་འགྱུར་ལ།  
\v 13 ཡང་ཁྱོད་ཀྱིས་དེ་དག་ལ་འདི་ལྟར། དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག བདག་གིས་གནས་འདིའི་ཡུལ་མི་ཐམས་ཅད་དེ། དཱ་བིད་ཀྱི་ཁྲི་ལ་བཞུགས་པའི་རྒྱལ་པོ་དང་མཆོད་དཔོན། ལུང་སྟོན་པ། ཡེ་རུ་སཱ་ལེམ་གྱི་ཡུལ་མི་ཐམས་ཅད་རྒུན་ཆང་གིས་རབ་ཏུ་བཟི་བར་བྱེད་ཅིང་།  
\v 14 བདག་གིས་དེ་རྣམས་ཕན་ཚུན་འགལ་བར་བྱེད་དེ་ཕ་དང་བུ་ཡང་ཕན་ཚུན་འགལ་བར་འགྱུར། བདག་གིས་གཅེས་སུ་མི་འཛིན་ཞིང་། ཤ་ཚ་བར་མི་བྱེད་ལ། སྙིང་རྗེ་ཡང་མི་བྱེད་པར་དེ་དག་ཚར་དུ་གཅོད་པར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །  
\v 15 འདི་ནི་དཀོན་མཆོག་ཡ་ཝཱེས་གསུངས་པ་ཡིན་པས་ཁྱོད་ཚོས་ཉོན་ཅིག རྣ་བ་གཏད་ནས་ཉོན་ཅིག ང་རྒྱལ་མ་སྐྱེས་ཤིག  
\v 16 ཁྱོད་རྣམས་ཀྱི་དཀོན་མཆོག་ཡ་ཝཱེས་ད་དུང་མུན་ནག་མ་གནང་གོང་དང་། ཁྱོད་རྣམས་ཀྱི་རྐང་པ་མུན་པ་འཐིབས་པའི་རི་བོར་མ་འགྱེལ་སྔོན་དུ། གཟི་བརྗིད་ཐམས་ཅད་ཁོང་ལ་ཕུལ་དང་། དེ་མིན་ཚེ་ཁྱོད་རྣམས་ཀྱིས་འོད་ལ་སྒུག་ཀྱང་ཁོང་གིས་འོད་ནི་སྨག་རུམ་དང་མུན་ནག་ཏུ་མཛད་དོ། །  
\v 17 ཁྱོད་རྣམས་ཀྱིས་གཏམ་འདིར་མི་མཉན་ན། ཁྱོད་ཚོའི་ང་རྒྱལ་གྱི་ཕྱིར་ང་རང་ཕག་ནས་ངུས་ཏེ་ངའི་མིག་ལས་སྡུག་གི་མཆི་མ་བཞུར་ངེས་ཡིན། ཅི་ལ་ཞེ་ན། དཀོན་མཆོག་ཡ་ཝཱེའི་ལུག་ཁྱུ་བཙོན་དུ་ཁྱེར་བའི་ཕྱིར་རོ། །  
\v 18 ཁྱོད་ཀྱིས་རྒྱལ་པོ་དང་རྒྱལ་ཡུམ་གཉིས་ལ་འདི་ལྟར། ཁྱོད་ཅག་གི་དཔལ་དང་ལྡན་པའི་ཅོད་པན་དེ་ཁྱོད་ཚོའི་མགོ་ནས་མར་ལྷུང་བས་ན་ཁྱོད་རྣམས་ནི་ཁེངས་སྐྱུང་ངང་སྡོད་ཅིག་ཅེས་སྨྲོས་ཤིག  
\v 19 ནེ་གུབ་ཡུལ་གྱི་གྲོང་ཁྱེར་རྣམས་ཀྱི་སྒོ་བརྒྱབ་ནས་དེ་འབྱེད་མཁན་སུ་ཡང་མེད་ལ། ཡ་ཧུ་དཱ་ཡོངས་རྫོགས་བཙོན་དུ་ཁྱེར་ནས་ཚང་མ་བཙོན་དུ་ཁྲིད་དོ། །  
\v 20 ཁྱོད་རྣམས་ཀྱིས་མགོ་བོ་ཡར་བཀྱགས་ཏེ་བྱང་ཕྱོགས་ནས་འོངས་པའི་མི་རྣམས་ལ་ལྟོས་ཤིག ཁྱོད་ཀྱིས་གཟི་བརྗིད་དུ་བརྩིས་པའི་ལུག་ཁྱུ་སྟེ་སྔར་ཁྱོད་ལ་གནང་བའི་ལུག་ཁྱུ་ད་ལྟ་གང་དུ་ཡོད་དམ།  
\v 21 དཀོན་མཆོག་ཡ་ཝཱེས་ཁྱོད་ཀྱིས་བསླབས་པའི་མནའ་གྲོགས་རྣམས་འགོ་དཔོན་དུ་བསྐོས་ནས་ཁྱོད་ལ་དབང་བསྒྱུར་བར་མཛད་པས་ཁྱོད་ལ་སྨྲ་བ་ཅི་ཞིག་ཡོད་དམ། ཁྱོད་སྡུག་བསྔལ་གྱིས་བཟུང་ནས་གཟེར་རྒྱག་པའི་བུད་མེད་ལྟར་འགྱུར་བ་མ་ཡིན་ནམ།  
\v 22 ཇི་སྟེ་ཁྱོད་ཀྱིས་སེམས་སུ་དོན་འདི་ཐམས་ཅད་བདག་གི་སྟེང་དུ་བྱུང་བ་ཅི་ཡིན་ནམ་སྙམ་ན། ཁྱོད་ཀྱི་ཐུ་བ་རྣམས་ཡར་བཀྱགས་ནས་ཁྱོད་ཀྱི་ཕྱི་རྟིང་རྨས་པ་ \f + \ft འདིར་ཕྱི་རྟིང་རྨས་པ་ཞེས་པ་ནི་བཙན་གཡེམ་བྱས་པར་གོ་བ་ཡིན།\f*ནི་ཁྱོད་སྡིག་པ་ཆེ་བའི་རྐྱེན་གྱིས་ཡིན།  
\v 23 གུ་ཤ་པས་སྐྱི་མོ་ག་ལ་བསྒྱུར་ཐུབ་བམ། གཟིག་གིས་རང་གི་ཁྲ་ཐིག་བརྗེ་ནུས་སམ། ཇི་སྟེ་ནུས་ན། སྤྱོད་ངན་ལ་གོམས་པ་ཁྱོད་ཚོས་ཀྱང་བཟང་པོ་སྤྱོད་ནུས་པ་ཡིན།  
\v 24 དེ་བས་ངས་དེ་དག་ནི་དབེན་སྟོང་གི་རླུང་གིས་འཁྱེར་བའི་སྦུར་མ་ལྟར་འཁུར་བར་བྱའོ། །  
\v 25 དཀོན་མཆོག་ཡ་ཝཱེས་འདི་སྐད་དུ། འདི་ནི་ཁྱོད་ལ་འཐོབ་འོས་པ་སྟེ་བདག་གིས་ཁྱོད་ལ་ཚད་པའི་ཟ་སྐལ་ཡིན། ཅི་ལ་ཞེ་ན། ཁྱོད་ཀྱིས་ང་བརྗེད་པར་གྱུར་ནས་རྫུས་མ་ལ་བརྟེན་པའི་ཕྱིར་རོ། །  
\v 26 དེའི་ཕྱིར་ངས་ཁྱོད་ཀྱི་ཐུ་བ་ཡར་བརྫེས་ནས་ཁྱོད་ཀྱི་གདོང་ལ་བཀབ་སྟེ་ཁྱོད་ཀྱི་ངོ་ཚ་རྣམས་མངོན་པར་བྱ།  
\v 27 ཁྱོད་ཀྱིས་ས་སྟོང་གི་རི་ཀླུང་རྣམས་སུ་ལོག་གཡེམ་སྤྱད་ནས་སྐད་ཅོར་རྒྱག་པ་དང་། གཡེམ་སྦྱོར་ལ་བརྩོན་པའི་ཞེན་ལོག་གི་ལས་འདི་རྣམས་ངས་མཐོང་བ་ཡིན། ཀྱེ་ཡེ་རུ་སཱ་ལེམ་ཁྱོད་ལ་ཆག་སྒོ་འབྱུང་། ཁྱོད་གཙང་མར་བཟོ་མི་འདོད་པར་ག་དུས་བར་དུ་བསྒུག་དགོས་སམ་ཞེས་གསུངས་སོ། །   
\c 14
\cl ལེའུ་བཅུ་བཞི་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 འཇིགས་སུ་རུང་བའི་ཐན་པ།  
\p
\v 1 དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་ནས་ཐན་པའི་སྐོར་གླེང་བ་སྟེ།  
\v 2 ཡ་ཧུ་དཱ་ཡིས་མྱ་ངན་བྱེད། དེའི་མཁར་སྒོ་རྣམས་ཉམས་པར་གྱུར་ནས་མི་ཐམས་ཅད་སར་བསྡད་དེ་མྱ་ངན་ཞུ་ཞིང་། ཡེ་རུ་སཱ་ལེམ་གྱི་ངུ་སྐད་ཡར་ཁྱབ་པ་ཡིན།  
\v 3 དེ་དག་གི་སྐུ་དྲག་རྣམས་ཀྱིས་ཞབས་ཕྱི་རྣམས་ཆུ་ལེན་དུ་མངགས་ནས། དེ་རྣམས་རྫིང་བུའི་འགྲམ་དུ་ཕྱིན་ཡང་ཆུ་མ་རྙེད་པས་སྣོད་སྟོང་བ་ཁུར་ནས་ངོ་ཚ་ཞིང་མགོ་བསྒུར་ཏེ་ཕྱིར་ལོག་འོང་།  
\v 4 ས་ལ་ཆར་མ་བབས་པར་ས་གཞི་སྐམ་ནས་གས་པར་གྱུར་པས། ཞིང་བ་རྣམས་ཀྱང་ངོ་ཚ་ནས་མགོ་བསྒུར་ཏོ། །  
\v 5 དེ་ཡང་རྩྭ་མེད་པས་ན་ཐང་རྒོད་ཀྱི་ཤ་མོ་ལ་ཤ་ཕྲུག་སྐྱེས་ཀྱང་དེ་སྤང་བར་བྱེད།  
\v 6 རྐྱང་རྣམས་སྐྱ་ཐེར་ཐེར་གྱི་རི་སྒང་དུ་འགྲེང་ཞིང་ཁྱི་སྤྱང་ལྟར་དབུགས་རྔུབ་པ་དང་། རྩྭ་མེད་པས་དེ་དག་གི་མིག་ལ་མདངས་མེད་པར་འགྱུར་ཞེས་གསུངས།   
\p
\v 7 ཀྱེ་དཀོན་མཆོག་ཡ་ཝཱེ་ལགས། ངེད་རྣམས་ཀྱིས་ཐེངས་མང་པོར་ངོ་ལོག་བྱས་ཏེ་ཁྱེད་དང་འགལ་བའི་སྡིག་པ་བསགས་པས། ངེད་ཅག་གི་སྡིག་པས་ངེད་རྣམས་ལ་ར་སྤྲོད་བྱེད་ནའང་། ཁྱེད་ཀྱིས་ཉིད་ཀྱི་མཚན་གྱི་དོན་དུ་ད་དུང་འཕྲིན་ལས་མཛོད་ཅིག  
\v 8 ཀྱེ་ཡེས་ར་ཨེལ་གྱི་རེ་བ་བཅོལ་ས་དང་དཀའ་སྡུག་ལ་འཕྲད་དུས་སྐྱབས་སུ་འགྲོ་ས་ལགས། ཁྱེད་ནི་ཡུལ་ཁམས་འདིར་བྱེས་སུ་སྡོད་པའི་མི་དང་མཚུངས་ཤིང་། ཡང་ན་ཞག་གཅིག་ལ་མ་གཏོགས་མི་འདུག་པའི་མགྲོན་པོ་ཞིག་དང་འདྲ་བ་ཅི་ཡིན་ནམ།  
\v 9 ཁྱེད་ནི་ཧོན་འཐོར་བའི་མི་ཞིག་གམ། ཡང་ན་མི་སྐྱོབ་པར་མི་ནུས་པའི་དཔའ་བོ་ཞིག་དང་འདྲ་བ་ཅི་ཡིན་ནམ། ཀྱེ་དཀོན་མཆོག་ཡ་ཝཱེ་ལགས། ཁྱེད་ནི་སྔར་བཞིན་ངེད་ཅག་གི་དཀྱིལ་དུ་བཞུགས་ཤིང་། ངེད་རྣམས་ནི་ཁྱེད་ཀྱི་མཚན་ལ་གཏོགས་པའི་མི་ཡིན་པས། ཁྱེད་ཀྱིས་ངེད་རྣམས་འདོར་བར་མི་མཛད་རོགས།  
\v 10 དཀོན་མཆོག་ཡ་ཝཱེས་མི་འདི་རྣམས་ལ་འདི་སྐད་དུ། མི་འདི་དག་ནི་གང་སར་འཁྱམ་པ་ལ་དགའ་ཞིང་རང་གི་གོམ་སྟབས་ལ་ཚོད་མ་བཟུང་བའི་རྐྱེན་གྱིས། དཀོན་མཆོག་ཡ་ཝཱེས་དེ་རྣམས་དང་ལེན་མི་བྱེད་པར། ད་ལྟ་ཁོང་གིས་དེ་ཚོའི་སྡིག་ཉེས་རྣམས་དྲན་ཞིང་། དེ་དག་གི་སྡིག་པའི་ཕྱིར་དུ་ཉེས་ཆད་གཅོད་དོ་ཞེས་གསུངས་སོ། །  
\v 11 ཡང་དཀོན་མཆོག་ཡ་ཝཱེས་ང་ལ་འདི་སྐད་དུ། མི་འདི་དག་ལ་བྱིན་རླབས་འཐོབ་པའི་ཕྱིར་ཞུ་བ་མ་བྱེད་ཅིག  
\v 12 དེ་དག་གིས་སྨྱུང་གནས་སྲུང་དུས་ངས་ཁོ་ཚོའི་ཞུ་བར་མི་མཉན་ལ། སྦྱིན་སྲེག་གི་མཆོད་པ་དང་འབྲུ་རིགས་ཀྱི་མཆོད་པ་འབུལ་དུས་ངས་དང་ལེན་མི་བྱེད་པར། ངས་དེ་དག་རལ་གྲི་དང་མུ་གེ རིམས་ནད་བཅས་ཀྱིས་མེད་པར་བྱའོ་ཞེས་གསུངས་སོ། །  
\v 13 དེ་ནས་ངས་འདི་ལྟར། ཀྱེ་གཙོ་བོ་ཡ་ཝཱེ་ལགས། གཟིགས་དང་། ལུང་སྟོན་པ་རྣམས་ཀྱིས་ནམ་རྒྱུན་དེ་རྣམས་ལ། ཁྱོད་ཅག་གིས་རལ་གྲི་མཐོང་བར་མི་འགྱུར། མུ་གེའང་འབྱུང་བར་མི་འགྱུར། དཀོན་མཆོག་ཡ་ཝཱེས་ཡུལ་ཁམས་འདི་ནས་ཁྱོད་རྣམས་ལ་དུས་གཏན་གྱི་ཞི་བདེ་གནང་བར་འགྱུར་ཞེས་སྨྲས་སོ་ཞུས་པ་ལ།  
\v 14 དཀོན་མཆོག་ཡ་ཝཱེས་ང་ལ་འདི་སྐད་དུ། ལུང་སྟོན་པ་དེ་རྣམས་ཀྱིས་ངའི་མིང་གཡར་ནས་རྫུན་གྱི་ལུང་སྟོན་པ་དང་། ངས་དེ་དག་མ་མངགས་ལ་ཁོ་ཚོར་བཀའ་ཡང་མ་བསྒོས། གསུང་ཡང་མ་གནང་ངོ་། །དེ་དག་གིས་ཁྱོད་རྣམས་ལ་ལུང་བསྟན་པ་ནི་ཞལ་གཟིགས་རྫུས་མ་དང་མོ་དང་། སྙིང་པོ་མེད་པའི་དོན། རང་སེམས་ཀྱི་གཡོ་སྒྱུ་བཅས་ཡིན་པས།  
\v 15 དཀོན་མཆོག་ཡ་ཝཱེས་འདི་སྐད་དུ། ངའི་མིང་གཡར་ནས་ལུང་སྟོན་མཁན་གྱི་ལུང་སྟོན་པ་དེ་རྣམས་གླེང་ན་ངས་དེ་རྣམས་མངགས་མེད། དེ་དག་གིས་ཡུལ་འདི་ལ་རལ་གྲི་དང་མུ་གེ་མི་འབྱུང་ཟེར་ཡང། དོན་དམ་དུ་ལུང་སྟོན་པ་དེ་དག་ནི་རལ་གྲི་དང་མུ་གེས་མེད་པར་བཟོ་ངེས་ཡིན།  
\v 16 དེ་དག་གི་ལུང་བསྟན་ལ་ཉན་པའི་མི་རྣམས་ཀྱང་མུ་གེ་དང་རལ་གྲིའི་རྐྱེན་གྱིས། ཡེ་རུ་སཱ་ལེམ་གྱི་སྲང་ལམ་དུ་གཡུགས་ནས་དུར་ལ་འཇུག་མཁན་ཡང་མེད་དེ། ཁོ་རྣམས་ཀྱི་ཆུང་མ་དང་བུ་བུ་མོ་རྣམས་ཀྱང་དེ་བཞིན་ཡིན། ངས་དེ་དག་གི་ངན་པ་ནི་དེ་ཚོའི་སྟེང་དུ་བླུག་པར་འགྱུར།  
\v 17 ཁྱོད་ཀྱིས་དེ་རྣམས་ལ་འདི་ལྟར། ངའི་མི་རྣམས་ལ་གནོད་པ་ཚབས་ཆེན་ཐེབས་ཏེ་རྨ་ཁ་རབ་ཏུ་ཆེ་བས། ངའི་མིག་ནས་ཉིན་མཚན་མེད་པར་མཆི་མ་བཞུར་བར་གྱུར་ཅིག  
\v 18 གལ་ཏེ་ང་རང་ཞིང་ཁར་ཕྱིན་ན། ལྟོས་དང་། དེ་རུ་རལ་གྲིས་བསད་པ་རྣམས་མཐོང་ཞིང་། གལ་ཏེ་ང་རང་གྲོང་ཁྱེར་དུ་ཕྱིན་ན། ལྟོས་དང་། དེར་མུ་གེ་ལས་བྱུང་བའི་ནད་པ་རྣམས་འདུག ལུང་སྟོན་པ་དང་མཆོད་དཔོན་རྣམས་ཀྱང་ཡུལ་རྒྱུས་མེད་ཅིག་ལ་འགྲིམས་པ་ལས། ཅི་བྱེད་དགོས་མི་ཤེས་ཞེས་སྨྲོས་ཤིག་གསུངས་སོ། །   
\s1 མི་རྣམས་ཀྱིས་ཡ་ཝཱེའི་སྙིང་རྗེ་ཞུ་བ།  
\p
\v 19 ཁྱེད་ཀྱིས་ཡ་ཧུ་དཱ་ཡོངས་སུ་སྤངས་པ་ཡིན་ནམ། ཁྱེད་ཉིད་ཛ་ཡན་ལ་ཞེ་ལོག་པ་ཡིན་ནམ། ཁྱེད་ཀྱིས་ངེད་རྣམས་ལ་བརྡུངས་ནས་གསོ་ཐབས་མེད་པར་མཛད་པ་ཅི་ཡིན་ནམ། ངེད་ཅག་གིས་ཞི་བདེ་ལ་རེ་ཡང་ཕན་གང་ཡང་མ་ཐོགས། ནད་སངས་པར་རེ་ཡང་འཇིགས་སྐྲག་ཐེབས་བྱུང་།  
\v 20 ཀྱེ་དཀོན་མཆོག་ཡ་ཝཱེ་ལགས། ངེད་རྣམས་ཀྱིས་ཁྱེད་ལ་འགལ་བའི་སྡིག་པ་བྱས་པས། ངེད་ཅག་གིས་རང་གི་སྡིག་ཉེས་དང་ཕ་མེས་རྣམས་ཀྱི་སྡིག་པ་རྣམས་ཁས་ལེན་པར་བྱའོ། །  
\v 21 ཁྱེད་ཀྱིས་ཉིད་ཀྱི་མཚན་གྱི་ཕྱིར་ངེད་རྣམས་མི་འདོར་ཞིང་། རང་གི་གཟི་བརྗིད་ཀྱི་བཞུགས་ཁྲི་ལ་དམའ་འབེབ་མི་མཛད་རོགས། ཁྱེད་ཀྱིས་ངེད་རྣམས་ལ་བཞག་པའི་ཞལ་ཆད་ཐུགས་སུ་དྲན་ནས་དེ་དང་འགལ་བར་མི་མཛད་རོགས།  
\v 22 ཕྱི་རོལ་པའི་སྙིང་པོ་མེད་པའི་ལྷ་རྣམས་ཀྱི་ནང་དུ་ཆར་བ་འབེབ་ནུས་པ་ཡོད་དམ། ནམ་མཁའ་རང་གིས་སྦྲང་ཆར་འབེབ་ནུས་སམ། ཀྱེ་ངེད་རྣམས་ཀྱི་དཀོན་མཆོག་ཡ་ཝཱེ་ལགས། དེ་བཞིན་མཛད་ནུས་པ་ནི་ཁྱེད་རང་མ་ཡིན་ནམ། དེའི་ཕྱིར་འདི་དག་ཐམས་ཅད་ཁྱེད་ཀྱིས་བཀོད་པས་ན། ངེད་ཅག་གིས་ཁྱེད་ལ་རེ་བར་བྱའོ། །   
\c 15
\cl ལེའུ་བཅོ་ལྔ་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡ་ཧུ་དཱའི་མི་རྣམས་ཀྱི་རྐྱེན་ངན།  
\p
\v 1 དེ་ནས་དཀོན་མཆོག་ཡ་ཝཱེས་ང་ལ་འདི་སྐད་དུ། མོ་ཤེ་དང་སཱ་མུ༌ཨེལ་གཉིས་ངའི་དྲུང་དུ་ལངས་བསྡད་ནའང་། ངའི་སེམས་མི་འདི་རྣམས་ཀྱི་ཕྱོགས་སུ་བསྒྱུར་བར་མི་བྱ་སྟེ། ཁྱོད་ཀྱིས་དེ་དག་ངའི་མིག་མདུན་ནས་ཕྱིར་སྐྲོད་ཅིག དེ་དག་འགྲོ་རུ་ཆུག་ཅིག  
\v 2 ཡང་དེ་དག་གིས་ཁྱོད་ལ་ངེད་རྣམས་གང་དུ་འགྲོའམ་ཞེས་དྲིས་ན། ཁྱོད་ཀྱིས་དེ་རྣམས་ལ། དཀོན་མཆོག་ཡ་ཝཱེས་འདི་སྐད་དུ། འཆི་དགོས་པ་རྣམས་འཆི་བར་ངེས་ལ། རལ་གྲིས་གསོད་དགོས་པ་རྣམས་གསོད་པར་འགྱུར། མུ་གེ་འབྱུང་དགོས་པ་རྣམས་ལ་མུ་གེ་འབྱུང་། བཙོན་དུ་འཁྲིད་དགོས་པ་རྣམས་བཙོན་ལ་འཁྲིད་ངེས་ཡིན་ཞེས་གསུངས་སྨྲོས་ཤིག  
\v 3 ངས་དེ་རྣམས་ཀྱི་སྟེང་དུ་གནོད་འཚེ་རིགས་བཞི་ཐེབས་པར་བྱ་སྟེ། གསོད་དུ་རལ་གྲི་དང་འདྲུད་དུ་ཁྱི། བཟའ་བ་དང་མེད་པར་བྱེད་དུ་ནམ་མཁའི་བྱ་དང་ཐང་གི་གཅན་གཟན་བཅས་སོ་ཞེས་དཀོན་མཆོག་ཡ་ཝཱེས་གསུངས།  
\v 4 ཧི་ཟི་ཀི་ཡཱའི་བུ་སྟེ་ཡ་ཧུ་དཱའི་རྒྱལ་པོ་མཱ་ན་ཤེ་ཡིས་ཡེ་རུ་སཱ་ལེམ་དུ་སྤྱད་པའི་ལས་ཀྱི་རྐྱེན་གྱིས། ངས་གནམ་འོག་གི་རྒྱལ་ཕྲན་ཀུན་ཏུ་དེ་རྣམས་སྐྱུག་བྲོ་བར་བྱའོ། །  
\v 5 ཀྱེ་ཡེ་རུ་སཱ་ལེམ། སུས་ཁྱོད་ལ་སྙིང་རྗེ་བར་འགྱུར་རམ། སུས་ཁྱོད་ཀྱི་དོན་དུ་མྱ་ངན་བྱེད་དམ། སུས་ཁ་ཕྱིར་འཁོར་ནས་ཁྱོད་ལ་ཁམས་འདྲི་ཞུའམ།  
\v 6 ཁྱོད་ཀྱིས་ང་རང་དོར་ཏེ་ཁ་ཕྱིར་འཁོར་ནས་སོང་བས། ངས་ལག་པ་བརྐྱངས་ནས་ཁྱོད་ལ་རྒོལ་ཞིང་ཁྱོད་མེད་པར་བཟོ་དགོས་ལ། བདག་བློ་ཁ་ཚུར་འཁོར་བའི་དཔེ་མེད་ཅེས་དཀོན་མཆོག་ཡ་ཝཱེས་གསུངས།  
\v 7 ངས་ཡུལ་ཁམས་ཀྱི་མཁར་སྒོ་རྣམས་སུ་ཚེབ་ཀྱིས་ངའི་མི་རྣམས་ཕྱར་ཞིང་དེ་དག་ལ་ཕྲུ་གུ་ཤོར་དུ་བཅུག ཡང་དེ་རྣམས་མེད་པར་བཟོས་ཀྱང་དེ་དག་རང་གི་ལམ་དང་མ་བྲལ་ཏོ། །  
\v 8 དེ་དག་གི་ཡུགས་མོ་རྣམས་ནི་ངའི་མདུན་དུ་རྒྱ་མཚོའི་བྱེ་མ་ལས་ཀྱང་མང་སྟེ། ངས་ཉིན་གུང་ལ་སྲོག་ལེན་མཁན་འོང་དུ་བཅུག་ནས། གཞོན་ནུ་རྣམས་ཀྱི་མ་རྣམས་འཇོམས་པར་བྱེད་ཅིང་། སྡུག་བསྔལ་དང་འཇིགས་སྣང་གཉིས་ཀ་གློ་བུར་མོའི་སྟེང་ལ་སླེབ་པར་བྱ།  
\v 9 ཕྲུ་གུ་བདུན་བཙས་པའི་བུད་མེད་ནི་ཉམ་ཐག་པར་གྱུར་ཏེ། ཉིན་དཀར་ཡིན་ཡང་ཉི་མ་གློ་བུར་ནུབ་ཅིང་། མོ་སྐྱེངས་ཤིང་ངོ་ཚ་བར་འགྱུར། དེ་དག་གི་ལྷག་ལུས་རྣམས་ནི་ཁོ་ཚོའི་དགྲ་བོའི་མདུན་དུ་གྲིར་གཏོད་པར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །   
\s1 ཡེ་རེམ་ཡཱ་ཡིས་ཡ་ཝཱེ་ལ་སྡུག་བགྲང་བ།  
\p
\v 10 ཀྱེ་ཧུད་བདག་གི་མ་ཡུམ་ལགས། ང་ལ་ཆག་སྒོ་འབྱུང་ངོ་། །ཅི་ལ་ཞེ་ན། ས་གཞི་ཐམས་ཅད་དུ་ཀུན་དང་མི་མཐུན་པའི་མི་རུ་འགྱུར་བར་ཁྱེད་ཀྱིས་ང་བཙས་པ་ཡིན། ངས་སྔར་ནས་མི་ལ་དངུལ་མ་གཡར་ཞིང་། མི་ཡིས་ང་ལ་བུ་ལོན་ཡང་མ་བཏང་མོད། འོན་ཀྱང་མི་རེ་རེས་ང་ལ་དམོད་པ་ཡིན་ནོ། །  
\v 11 དཀོན་མཆོག་ཡ་ཝཱེས་འདི་སྐད་དུ། ཁྱོད་ལ་ཕན་ཐོགས་པའི་ཕྱིར་ངས་ཁྱོད་སྒྲོལ་བར་འགྱུར། ཡང་བར་ཆད་དང་སྡུག་བསྔལ་འབྱུང་དུས། བདག་གིས་ཁྱོད་ཀྱི་དགྲ་བོ་རྣམས་ལ་ཁྱོད་ལ་ཞུ་བ་བྱེད་དུ་འཇུག་གོ །  
\v 12 སུ་ཞིག་གིས་བྱང་ཕྱོགས་ཀྱི་ལྕགས་ཏེ་ལི་དང་ལྕགས་གཉིས་གཅོད་ནུས་སམ།  
\v 13 ཁྱོད་ཀྱིས་མངའ་འོག་གི་ཡུལ་གྲུ་ཀུན་ཏུ་བྱས་པའི་སྡིག་པ་ཐམས་ཅད་ཀྱི་རྐྱེན་གྱིས། བདག་གིས་ཁྱོད་ཀྱི་རྒྱུ་ནོར་དང་རིན་པོ་ཆེ་རྣམས་བཅོམ་ནོར་ལྟར་རིན་མེད་དུ་དགྲ་བོ་རྣམས་ལ་སྤྲོད་པར་བྱ།  
\v 14 བདག་གི་ཁོང་ཁྲོ་མེ་ལྟར་འབར་ནས་ཁྱོད་རྣམས་བསྲེག་རྒྱུ་ཡིན་པས། བདག་གིས་ཁྱོད་ཀྱི་དགྲ་རྣམས་ཁྱོད་ལ་རྒྱུས་མི་མངའ་བའི་གནས་སུ་འགྲོ་རུ་འཇུག་དགོས་ཞེས་གསུངས་སོ། །  
\v 15 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་མཁྱེན་ཏེ། ཁྱེད་ཀྱིས་ང་ཐུགས་སུ་དྲན་ནས་གཟིགས་སྐྱོང་གནང་བར་མཛོད། བདག་ལ་གནོད་སྐྱེལ་བའི་མི་ལ་འཁོན་ལན་སློགས་ཤིག ཁྱེད་ཉིད་རང་དགར་ཐུགས་མི་ཁྲོ་བས་ང་ཡི་ཚེ་སྲོག་མི་ལེན་པར་མཛོད། ཅི་ལ་ཞེ་ན། ཁྱེད་ཀྱི་ཕྱིར་དུ་བདག་ལ་བརྙས་བཅོས་ཐེབས་པས་སོ། །  
\v 16 དཔུང་ཚོགས་ཀྱི་དཀོན་མཆོག་ཡ་ཝཱེ་ལགས། ཁྱེད་ཀྱི་བཀའ་གསུང་བདག་ལ་ཐོབ་པས་ངས་དེ་ཟོས་པ་དང་། ང་ནི་ཁྱེད་ཀྱི་མཚན་ཐོགས་པའི་མི་ཡིན་པས་ཁྱེད་ཀྱི་བཀའ་ནི་ངའི་སེམས་ཀྱི་དགའ་སྤྲོ་ཆེན་པོ་ཡིན་ནོ། །  
\v 17 བདག་ནི་འདོད་ཡོན་ཅན་གྱི་ཚོགས་ནང་བསྡད་ནས་དགའ་མགུ་མ་བྱས། ཁྱེད་ཀྱི་ཕྱག་གི་རྐྱེན་གྱིས་ང་རང་གཅིག་པུར་བསྡད་དེ། ཁྱེད་ཀྱིས་ངའི་སེམས་སུ་ཁོང་ཁྲོས་བཀང་བར་མཛད།  
\v 18 ངའི་སྡུག་བསྔལ་གཏན་དུ་ལུས་པ་ཅི་ཡིན་ནམ། ངའི་རྨ་ཁ་གསོ་ཐབས་མེད་པ་དང་མི་དྲག་པ་དེ་ཅི་ཡིན་ནམ། ཁྱེད་ནི་བདག་ལ་མི་སེམས་སླུ་བའི་ཆུ་ཕྲན་ལྟ་བུ་ཡིན་ནམ།  
\v 19 དེ་བས་དཀོན་མཆོག་ཡ་ཝཱེས་འདི་སྐད་དུ། ཇི་སྟེ་ཁྱོད་ཀྱིས་འགྱོད་བཤགས་བྱས་ན་ངས་ཀྱང་ཁྱོད་ཡང་བསྐྱར་ངའི་མདུན་དུ་འགྲེང་བར་བྱའོ། །ཡང་གལ་ཏེ་ཁྱོད་ཀྱིས་སྐད་ཆ་རྩ་ཆེན་སྨྲ་བ་ལས་རིན་ཐང་མེད་པ་དོར་ན་ཁྱོད་ངའི་སྨྲ་སྒོ་རུ་འགྱུར། དེ་དག་ཁྱོད་ཀྱི་ཕྱོགས་སུ་ལོག་འོང་ངེས་ལ། ཁྱོད་ནི་དེ་དག་གི་ཕྱོགས་སུ་མི་འགྲོའོ། །  
\v 20 ཡང་ངས་མི་འདི་རྣམས་ཀྱི་ཕྱོགས་སུ་ཁྱོད་རང་ལི་ཡི་ལྕགས་རི་བརྟན་པོར་བྱེད་ཅིང་། དེ་ཚོས་ཁྱོད་ལ་རྒོལ་ཡང་ཁྱོད་ལས་རྒྱལ་བར་མི་འགྱུར། ཅི་ལ་ཞེ་ན། ཁྱོད་སྐྱོབ་ཅིང་སྒྲོལ་བའི་ཕྱིར་ང་རང་ཁྱོད་དང་འགྲོགས་ཡོད་ཅེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །  
\v 21 ཡང་ངས་ཁྱོད་ནི་སྡིག་སྤྱོད་ཀྱི་ལག་ནས་སྒྲོལ་ཞིང་། གདུག་རྩུབ་ཅན་རྣམས་ཀྱི་ལག་ནས་ཐར་བར་བྱའོ། །   
\c 16
\cl ལེའུ་བཅུ་དྲུག་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡ་ཝཱེས་ཡེ་རེམ་ཡཱ་ནི་ཁེར་རྐྱང་དུ་སྡོད་པར་བསྐུལ་བ།  
\p
\v 1 ཡང་དཀོན་མཆོག་ཡ་ཝཱེའི་བཀའ་ནི་བདག་ལ་བྱུང་ནས་འདི་སྐད་དུ།  
\v 2 ཁྱོད་ཀྱིས་གནས་འདི་རུ་ཆུང་མ་བླངས་ཏེ་བུ་དང་བུ་མོ་སྐྱེས་མི་རུང་ཞེས་གསུངས།  
\v 3 ཅི་ལ་ཞེ་ན། གནས་འདིར་བཙས་པའི་བུ་དང་བུ་མོ་རྣམས་དང་། དེ་དག་སྐྱེས་པའི་ཕ་དང་མ་རྣམས་ཀྱི་སྐོར་ལ་དཀོན་མཆོག་ཡ་ཝཱེས་འདི་སྐད་དུ།  
\v 4 དེ་དག་སྲོག་ལ་ཐུག་པའི་ན་ཟུག་གིས་འཆི་བར་འགྱུར་ཞིང་མྱ་ངན་བྱེད་མཁན་སུ་ཡང་མེད་ལ་བསྐུང་བར་ཡང་མི་བྱ་སྟེ། དེ་རྣམས་ལུད་ལྟར་ས་རུ་ལུས་པར་འགྱུར། རལ་གྲི་དང་མུ་གེས་དེ་དག་མེད་པར་བྱེད་ཅིང་། དེ་དག་གི་བམ་རོ་ནི་ནམ་མཁའི་བྱ་དང་ས་སྟེང་གི་གཅན་གཟན་རྣམས་ཀྱི་ཁ་ཟས་སུ་འགྱུར་རོ་ཞེས་པའོ། །  
\v 5 ཡང་དཀོན་མཆོག་ཡ་ཝཱེས་འདི་སྐད་དུ། མི་ཤི་བའི་ཁྱིམ་དུ་མ་འགྲོ། མྱ་ངན་མ་ཞུ། དེ་དག་གི་ཕྱིར་དུ་སེམས་སྡུག་ཀྱང་མ་བྱེད་ཅིག ཅི་ལ་ཞེ་ན། ངས་རང་གི་ཞི་བདེ་དང་བྱམས་བརྩེ། སྙིང་རྗེ་བཅས་ནི་མི་འདི་རྣམས་ལས་ཕྱིར་བླངས་པ་ཡིན་ཞེས་གསུངས་སོ། །  
\v 6 དེ་དག་མཆོག་དམན་སུ་ཡིན་ཡང་ཐམས་ཅད་ས་འདི་ནས་འཆི་བར་འགྱུར་ཏེ་དུར་ལ་འཇུག་མཁན་ཡང་མེད། མི་ཡིས་དེ་དག་གི་ཕྱིར་དུ་མྱ་ངན་མི་བྱེད། དེ་དག་གི་ཕྱིར་དུ་རང་གི་ཤ་གཅོད་པར་མི་བྱེད། དེ་དག་གི་ཕྱིར་སྐྲ་བཞར་ནས་སྤྱི་ཐེར་དུ་ཡང་མི་གཏོང་།  
\v 7 འདས་མཆོད་ཡོད་ཀྱང་མི་ཡིས་དེ་དག་གི་ཕྱིར་དུ་བག་ལེབ་མི་གཅོག་ལ། གཤིན་པོའི་ཕྱིར་དུ་དེ་དག་ལ་སེམས་གསོ་མི་བྱེད། དེ་དག་གི་ཕའམ་མ་ཚེ་ལས་འདས་ནའང་མི་ཡིས་དེ་དག་གི་ཕྱིར་དུ་ཆང་སྤྲད་ནས་སེམས་གསོ་མི་བྱེད་དོ། །  
\v 8 ཁྱོད་ནི་མི་དང་མཉམ་དུ་བཟའ་བཏུང་ལ་རོལ་བར་སྟོན་མོའི་ཁྱིམ་དུ་ཞུགས་མི་རུང་།  
\v 9 ཅི་ལ་ཞེ་ན། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ལྟོས་ཤིག ཁྱོད་རྣམས་གསོན་པའི་དུས་སུ། ངས་ཁྱོད་ཚོའི་མདུན་དུ་ཡུལ་འདིའི་དགའ་སྤྲོ་དང་དགའ་མགུ་བྱེད་པའི་སྐད། བག་གསར་དང་མག་གསར་གྱི་སྐད་ནི་མེད་པར་བྱའོ་ཞེས་གསུངས་པས་སོ། །  
\v 10 ཁྱོད་ཀྱིས་མི་འདི་དག་ལ་གཏམ་འདི་ཡོངས་སུ་སྨྲས་ནས་དེ་དག་གིས་ཁྱོད་ལ། དཀོན་མཆོག་ཡ་ཝཱེས་བར་ཆད་ཆེན་པོས་ངེད་རྣམས་ལ་རྒོལ་བར་འགྱུར་ཞེས་གསུངས་པ་ཅི་ཡིན་ནམ། ངེད་རྣམས་ལ་ཉེས་སྐྱོན་ཅི་ཞིག་ཡོད་དམ། ངེད་ཅག་གིས་རང་གི་དཀོན་མཆོག་ཡ་ཝཱེ་ལ་སྡིག་ཉེས་ཅི་ཞིག་བསགས་པ་ཡིན་ནམ་ཞེས་འདྲི་བའི་ཚེ།  
\v 11 ཁྱོད་ཀྱིས་དེ་དག་ལ་འདི་ལྟར་སྨྲོས་ཤིག དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་གི་མེས་པོ་རྣམས་ཀྱིས་བདག་དོར་ཏེ་ལྷ་གཞན་རྣམས་ཀྱི་རྗེས་སུ་འབྲངས་ནས། དེ་རྣམས་ལ་ཞབས་ཏོག་བསྒྲུབས་ནས་ཕྱག་བཙལ་ཞིང་། ངའི་བཀའ་ཁྲིམས་ཀྱང་མ་བསྲུངས་པ་དང་།  
\v 12 ཡང་ཁྱོད་ཚོའི་སྤྱོད་ངན་ནི་ཁྱོད་ཚོའི་མེས་པོ་ལས་ཀྱང་ལྷག་པའི་རྐྱེན་དང་། མི་རེ་རེ་རང་རང་གི་སེམས་ངན་གཤིས་གྱོང་གི་རྗེས་སུ་འབྲངས་ནས་ཐ་ན་བདག་གི་བཀའ་ལའང་མི་མཉན་པས་ན།  
\v 13 བདག་གིས་ཁྱོད་རྣམས་ཡུལ་འདི་ནས་ཕྱི་རུ་སྐྲོད་པར་འགྱུར་ལ། ཁྱོད་ཚོ་དང་ཁྱོད་ཚོའི་མེས་པོ་དག་ལ་རྒྱུས་མི་མངའ་བའི་གནས་སུ་སྐྲོད་པར་འགྱུར། ཁྱོད་རྣམས་ཀྱིས་གནས་དེར་ཉིན་མཚན་མེད་པར་ལྷ་གཞན་རྣམས་ལ་ཞབས་ཏོག་བསྒྲུབ་ངེས་ཡིན། ཅི་ལ་ཞེ་ན། བདག་གིས་ཁྱོད་རྣམས་དྲིན་གྱིས་མི་སྐྱོང་ཞེས་པའོ་ཞེས་གསུངས།   
\s1 བཙོན་དུ་ཁྲིད་པ་རྣམས་ཕྱིར་ལོག་པར་སྔོན་བརྡ་གཏོང་བ།  
\p
\v 14 ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། མི་རྣམས་ཀྱིས་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཡར་འདྲེན་མཁན་གཏན་དུ་གསོན་པོར་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་མི་བསྐྱལ་ལོ། །  
\v 15 ཡིན་ཡང་མི་རྣམས་ཀྱིས་ཡེས་ར་ཨེལ་པ་རྣམས་བྱང་ཕྱོགས་ཀྱི་ཡུལ་དང་། ཁོ་རྣམས་སྐྲོད་སའི་རྒྱལ་ཁམས་སོ་སོ་ནས་ཡར་འདྲེན་མཁན་གཏན་དུ་གསོན་པོར་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་བསྐྱལ་བར་འགྱུར་ཏེ། ཅི་ལ་ཞེ་ན། བདག་གིས་དེ་དག་ཁྲིད་ནས་ངས་སྔར་དེ་རྣམས་ཀྱི་མེས་པོ་ལ་གནང་བའི་ཡུལ་དུ་ཕྱིར་ལོག་པར་བྱེད་དོ། །  
\v 16 ལྟོས་ཤིག བདག་གིས་ཉ་པ་མང་པོ་མངགས་ནས་དེ་རྣམས་འཛིན་པར་བྱེད་ཅིང་། དེའི་རྗེས་སུ་བདག་གིས་རྔོན་པ་མང་པོ་མངགས་ནས་རི་བོ་རེ་རེ་དང་སྒང་རེ་རེ། བྲག་ཕུག་རེ་རེ་བཅས་ནས་དེ་རྣམས་བརྔོན་པར་བྱེད།  
\v 17 ཅི་ལ་ཞེ་ན། བདག་གི་མིག་གིས་དེ་དག་གི་སྤྱོད་པ་ཀུན་ལ་ལྟ་ཞིབ་བྱེད་ཅིང་། དེ་དག་གིས་ངའི་མདུན་ནས་འགེབ་མི་ནུས་ལ། དེ་དག་གི་སྡིག་པའང་ངའི་མདུན་དུ་སྦ་མི་ནུས་སོ། །  
\v 18 བདག་གིས་སྔོན་ལ་དེ་དག་གི་སྡིག་པ་དང་ཉེས་པ་རྣམས་ལ་ལྡབ་འགྱུར་གྱིས་ལན་འཇལ་བར་བྱ་སྟེ། ཅི་ལ་ཞེ་ན། དེ་རྣམས་ཀྱིས་ཞེན་ཁ་ལོག་པའི་སྐུ་འདྲའི་བམ་རོ་ཡིས་བདག་གི་ཡུལ་ཁམས་བཙོག་པར་བཟོས་པ་དང་། རྫས་མི་གཙང་བ་རྣམས་ཀྱིས་ངའི་ནོར་སྐལ་ཡིན་པའི་ཡུལ་བཀང་བར་བྱས་ཞེས་དཀོན་མཆོག་ཡ་ཝཱེས་གསུངས་སོ། །   
\p
\v 19 ཀྱེ་དཀོན་མཆོག་ཡ་ཝཱེ་ལགས། ཁྱེད་ནི་ང་ཡི་སྟོབས་ཤུགས་དང་ང་ཡི་བཙན་རྫོང་། དཀའ་སྡུག་གི་དུས་སུ་ང་ཡི་སྐྱབས་བཅོལ་ས་བཅས་ཡིན་པས། མི་རིགས་ཐམས་ཅད་ས་མཐའ་ནས་ཁྱེད་ཀྱི་དྲུང་དུ་འོངས་ཏེ། ངེད་ཅག་གི་ཕ་མེས་རྣམས་ཀྱིས་རྒྱུན་འཛིན་བྱས་པ་ནི་རྫུན་དང་སྙིང་པོ་མེད་པ། ཕན་ཐོགས་ཅི་ཡང་མེད་པ་བཅས་སོ། །  
\v 20 མི་ཡིས་རང་གི་ཕྱིར་དུ་དཀོན་མཆོག་བཟོ་ནུས་སམ། དོན་དམ་དུ་དེ་དག་ནི་དཀོན་མཆོག་མིན་ཞེས་ཞུ་བར་འགྱུར།  
\v 21 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ད་རེས་བདག་གིས་དེ་རྣམས་ལ་སྟོན་པར་བྱ་སྟེ། ཐེངས་འདིར་ངའི་ཕྱག་དང་མཐུ་སྟོབས་སྟོན་པར་བྱ། དེ་ནས་ཁོ་ཚོས་ངའི་མིང་ནི་ཡ་ཝཱེ་ཡིན་པ་རྟོགས་པར་འགྱུར་རོ། །   
\c 17
\cl ལེའུ་བཅུ་བདུན་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡ་ཧུ་དཱའི་སྡིག་པ་དང་ཉེས་ཆད།  
\p
\v 1 ཡ་ཧུ་དཱའི་སྡིག་ཉེས་ནི་ལྕགས་སྨྱུག་དང་རྡོ་རྗེའི་རྩེ་མོས་བཀོད་པ་སྟེ། ཁོ་ཚོའི་སེམས་ནང་དང་མཆོད་ཁྲིའི་ཟུར་དུ་བརྐོས་ཡོད།  
\v 2 དེ་དག་གི་བུ་ཕྲུག་རྣམས་ཀྱིས་ཀྱང་རི་མཐོན་པོ་རྣམས་ཀྱི་སྟེང་དང་སྔོ་ལྗང་གི་ལྗོན་ཤིང་འགྲམ་གྱི་མཆོད་ཁྲི་དང་ལྷ་མོ་ཨ་ཤེ་རཱའི་སྐུ་བརྙན་རྣམས་ཡིད་ལ་བཟུང་ཡོད།  
\v 3 ཀྱེ་ངའི་ཐང་ལ་ཡོད་པའི་རི་བོ། ཁྱོད་ཀྱིས་མངའ་འོག་གི་ཡུལ་གྲུ་ཀུན་ཏུ་བྱས་པའི་སྡིག་པ་ཡི་རྐྱེན་གྱིས། བདག་གིས་ཁྱོད་ཀྱི་རྒྱུ་ནོར་དང་རིན་པོ་ཆེ་ཐམས་ཅད་དང་། ཁྱོད་ཀྱི་མཐོ་གླིང་བཅས་པ་བཅོམ་ནོར་ལྟར་དགྲ་བོ་རྣམས་ལ་སྤྲོད་པར་བྱའོ། །  
\v 4 ཁྱོད་རང་གི་སྤྱོད་པའི་རྐྱེན་གྱིས་ངས་ཁྱོད་ལ་གནང་བའི་ནོར་སྐལ་ནི་འཆོར་བར་འགྱུར་ལ། ཡང་བདག་གིས་ཁྱོད་ལ་རྒྱུས་མི་མངའ་བའི་ཡུལ་དུ་རང་གི་དགྲ་བོར་གཡོག་བྱེད་དུ་འཇུག་གོ །ཅི་ལ་ཞེ་ན། ཁྱོད་རྣམས་ཀྱིས་ངའི་ཁོང་ཁྲོ་མེ་ལྟར་འབར་དུ་བཅུག་ཅིང་དེ་ནི་ཇི་སྲིད་བར་དུ་འབར་ངེས་ཡིན་ཞེས་གསུངས་སོ། །  
\v 5 ཡང་དཀོན་མཆོག་ཡ་ཝཱེས་འདི་སྐད་དུ། མི་ཡི་སྟོབས་ཤུགས་ལ་བརྟེན་པ་དང་སེམས་ནས་དཀོན་མཆོག་ཡ་ཝཱེ་དང་འབྲལ་བའི་མི་ལ་དམོད་མོ་ཐེབས་འོས་སོ། །  
\v 6 དེ་ནི་བྱེ་ཐང་གི་སྡོང་ཕྲན་དང་འདྲ་ཞིང་། བྱིན་རླབས་དང་དགའ་སྤྲོ་མི་མཐོང་བར་དབེན་སྟོང་གི་སྐམ་ས་དང་མི་མེད་པའི་ཡུལ་བ་ཚྭ་ཅན་དུ་གནས་པར་འགྱུར་མོད།  
\v 7 འོན་ཀྱང་དཀོན་མཆོག་ཡ་ཝཱེ་ལ་བློ་གཏོད་པ་དང་། ཁོང་ཉིད་རང་གི་བརྟེན་ས་བྱེད་པའི་མི་དེ་ནི་བདེའོ། །  
\v 8 དེ་ནི་ཆུ་འགྲམ་དུ་བཙུགས་པའི་ལྗོན་ཤིང་ཞིག་དང་འདྲ་བར་ཆུ་ནང་དུ་རྩ་བ་རྒྱས་པ་དང་། ཚ་བ་སླེབས་ཀྱང་འཇིགས་སྣང་མེད་ལ་ལོ་འདབ་རྒྱས་ཤིང་། ཐན་པ་འབྱུང་བའི་ལོ་ལའང་སེམས་ཁྲལ་མེད་པར་སྔར་བཞིན་འབྲས་བུ་བསྐྱེད་དོ། །  
\v 9 མི་སེམས་ནི་ཐམས་ཅད་ལས་གཡོ་སྒྱུ་ཆེ་ཞིང་བཅོས་ཐབས་མེད་ལ། སུ་ཞིག་གིས་དེ་རྟོགས་ནུས་སམ།  
\v 10 ཡ་ཝཱེ་བདག་ནི་མིའི་སེམས་ལ་ལྟ་ཞིབ་དང་ཚོད་བརྟག་བྱེད་མཁན་ཡིན་ཏེ། མི་ཀུན་ལ་རང་རང་གི་བྱ་སྤྱོད་དང་ཅི་བྱས་ལ་འོས་པའི་འབྲས་བུ་བཞིན་དུ་ལན་འཇལ་བར་བྱ།  
\v 11 འཁྱོག་པོའི་ལམ་ནས་རྒྱུ་ནོར་ཐོབ་པ་དེ་ནི། སྲེག་པས་རང་གིས་བཏང་བ་མ་ཡིན་པའི་སྒོ་ང་རུམ་པ་བཞིན་ཡིན་ལ། དར་མའི་དུས་སུ་རྒྱུ་ནོར་ཁོ་དང་བྲལ་ནས་མཐར་ཁོ་རང་བླུན་པོ་རུ་འགྱུར་རོ། །  
\v 12 རང་ཅག་གི་གནས་དམ་པ་ནི་གཟི་བརྗིད་ལྡན་པའི་བཞུགས་ཁྲི་ཡིན་ལ་གནའ་སྔ་མོ་ནས་མཐོ་སར་བཞག་ཡོད།  
\v 13 ཀྱེ་ཡེས་ར་ཨེལ་གྱི་རེ་བ་ཡ་ཝཱེ་ལགས། ཁྱེད་འདོར་བ་ཐམས་ཅད་ངོ་ཚ་བར་འགྱུར། ཁྱེད་དང་འབྲལ་བ་ཐམས་ཅད་ཀྱི་མིང་ནི་ས་སྟེང་ཏུ་འགོད་པར་འགྱུར། ཅི་ལ་ཞེ་ན། དེ་དག་གིས་ཚེ་སྲོག་དང་ལྡན་པའི་ཆུ་མིག་སྟེ་དཀོན་མཆོག་ཡ་ཝཱེ་སྤངས་པའི་ཕྱིར་རོ། །  
\v 14 ཀྱེ་དཀོན་མཆོག་ཡ་ཝཱེ་ལགས། ཁྱེད་ནི་ངས་བསྟོད་བསྔགས་བརྗོད་ས་དེ་ཉིད་ཡིན་པས། ཁྱེད་ཀྱིས་ངའི་ནད་གསོ་བར་མཛོད་དང་ང་རང་སོས་པར་འགྱུར། ང་རང་སྐྱོབ་དང་ཐར་བར་འགྱུར།  
\v 15 གཟིགས་དང་། དེ་དག་གིས་ང་ལ་དཀོན་མཆོག་ཡ་ཝཱེའི་བཀའ་ནི་གང་དུ་བཞུགས་སམ། བཀའ་དེ་ད་ལྟ་འགྲུབ་པར་མཛོད་ཅིག་ཅེས་སྨྲས་ཀྱང་།  
\v 16 ང་རང་ཁྱེད་ཀྱི་རྗེས་སུ་འབྲངས་ནས་རྫི་བོ་བྱེད་པ་ལ་མ་བྱོལ་ཏེ། ཆག་སྒོ་འབྱུང་བའི་དུས་དེར་རེ་སྨོན་མ་བྱས་པ་ཁྱེད་ཀྱིས་མཁྱེན་ནོ། །ཡང་ངའི་སྨྲ་སྒོ་ལས་གང་ཞིག་ཐོན་པ་དེ་ཁྱེད་ཀྱི་ཞལ་ངོར་གསལ་པོ་ཡིན།  
\v 17 ཁྱེད་ཀྱི་དབང་གིས་ང་རང་འཇིགས་པར་མ་མཛད་ཅིག བར་ཆད་འབྱུང་དུས་ཁྱེད་ནི་ང་ཡི་སྐྱབས་བཅོལ་ས་ཡིན།  
\v 18 ང་ལ་གནོད་སྐྱེལ་མཁན་དེ་དག་ངོ་ཚར་སྦྱོར་བ་ལས་ང་རང་ངོ་ཚ་བར་མི་མཛད་རོགས། དེ་རྣམས་འཇིགས་པར་མཛད་པ་ལས་ང་རང་འཇིགས་པར་མ་མཛོད་ཅིག ཆག་སྒོའི་ཉིན་མོ་དེ་དག་གི་སྟེང་དུ་བབས་ནས། ལྡབ་འགྱུར་གྱིས་དེ་རྣམས་མེད་པར་བཟོས་ཤིག   
\s1 ངལ་གསོ་བའི་ཉིན་སྲུང་བ།  
\p
\v 19 དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་སོང་ལ་ཡ་ཧུ་དཱའི་རྒྱལ་པོ་རྣམས་འགྲོ་འོང་བྱེད་ས་སྟེ་ངའི་མི་རྣམས་ཀྱི་རྒྱ་སྒོ་དང་། ཡེ་རུ་སཱ་ལེམ་གྱི་མཁར་སྒོ་རེ་རེར་ལངས་བསྡད་ནས་ཁོ་རྣམས་ལ།  
\v 20 མཁར་སྒོ་འདི་རུ་འཛུལ་བའི་ཡ་ཧུ་དཱའི་རྒྱལ་པོ་རྣམས་དང་ཡ་ཧུ་དཱའི་མི་རྣམས་དང་། ཡེ་རུ་སཱ་ལེམ་གྱི་ཡུལ་མི་ཐམས་ཅད་ཀྱིས་དཀོན་མཆོག་ཡ་ཝཱེའི་བཀའ་ལ་ཉོན་ཅིག  
\v 21 དཀོན་མཆོག་ཡ་ཝཱེས་འདི་སྐད་དུ། ཁྱོད་ཚོས་སྲོག་འཚོ་བའི་ཕྱིར་གཟབ་གཟབ་གྱིས་ཤིག ངལ་གསོ་བའི་ཉིན་མོར་ཁུར་པོ་ཁུར་ནས་ཡེ་རུ་སཱ་ལེམ་གྱི་མཁར་སྒོ་ནང་དུ་མ་འཛུལ་ཞིག  
\v 22 ངལ་གསོ་བའི་ཉིན་མོར་རང་གི་ཁྱིམ་ནས་ཁུར་པོ་ཁུར་ནས་མ་འགྲོ་ཞིག ལས་ཀ་ཅི་ཡང་མི་བྱེད་པར་ངས་ཁྱོད་ཚོའི་མེས་པོ་རྣམས་ལ་བསྒོས་པའི་བཀའ་བཞིན་དུ་ངལ་གསོ་བའི་ཉིན་མོ་ནི་དམ་པར་སྲུངས་ཤིག་ཅེས་སྨྲ་བར་གྱིས་ཞེས་གསུངས་ནའང་།  
\v 23 དེ་དག་གིས་མ་མཉན་ལ་རྣ་བའང་མ་གཏད་དེ། སེམས་རྒྱུད་གྱོང་པོ་བྱས་ནས་མ་མཉན་ལ་བཀའ་སློབ་དང་ལེན་མི་བྱེད་དོ། །  
\v 24 དཀོན་མཆོག་ཡ་ཝཱེས་འདི་སྐད་དུ། ཁྱོད་རྣམས་ཀྱིས་སེམས་བསམ་པས་ང་ལ་ཉན་ཞིང་། ངལ་གསོ་བའི་ཉིན་མོར་ཁུར་པོ་ཁུར་ནས་མཁར་སྒོ་ནང་དུ་མི་འཛུལ་བར་ངལ་གསོ་བའི་ཉིན་མོ་དམ་པར་བསྲུངས་ཏེ། ཉིན་མོ་དེར་ལས་ཀ་ཅི་ཡང་མ་བྱས་ན།  
\v 25 དེ་ནས་དཱ་བིད་ཀྱི་རྒྱལ་ཁྲིར་བཞུགས་པའི་རྒྱལ་པོ་རྣམས་དང་འགོ་དཔོན་རྣམས་ནི་ཡ་ཧུ་དཱ་པ་དང་ཡེ་རུ་སཱ་ལེམ་གྱི་ཡུལ་མི་རྣམས་དང་མཉམ་དུ། ཤིང་རྟ་དང་ཆིབས་པར་བཅིབས་ནས་མཁར་སྒོ་རུ་འཛུལ་འོང་ཞིང་། གྲོང་ཁྱེར་འདི་ནི་གཏན་དུ་ལུས་པར་འགྱུར་རོ། །  
\v 26 ཡང་ཡ་ཧུ་དཱའི་གྲོང་ཁྱེར་རྣམས་དང་ཡེ་རུ་སཱ་ལེམ་གྱི་ཉེ་འཁོར་དང་། པེན་ཡཱ་མེན་གྱི་ཡུལ། རི་ཀླུང་། རི་ཁུལ། ནེ་གུབ་ཡུལ་བཅས་ནས་མི་རྣམས་ཀྱིས་སྦྱིན་སྲེག་གི་མཆོད་པ་དང་། དམར་མཆོད། འབྲུ་རིགས་ཀྱི་མཆོད་པ། སྤོས་དཀར། གཏང་རག་གི་མཆོད་པ་བཅས་ཁྱེར་ནས་དཀོན་མཆོག་ཡ་ཝཱེའི་མཆོད་ཁང་དུ་འགྲོ་བར་འགྱུར།  
\v 27 ཇི་སྟེ་ཁྱོད་ཚོས་ང་ལ་མི་མཉན་ཞིང་ངལ་གསོ་བའི་ཉིན་མོ་དམ་པར་མི་བསྲུང་བར། ད་དུང་ངལ་གསོ་བའི་ཉིན་ལ་ཁུར་པོ་ཁུར་ནས་ཡེ་རུ་སཱ་ལེམ་གྱི་མཁར་སྒོར་ཞུགས་ན། དེ་ནས་བདག་གིས་མཁར་སྒོ་སོ་སོར་མེ་སྦར་ཞིང་། མེ་དེས་ཡེ་རུ་སཱ་ལེམ་གྱི་ཕོ་བྲང་རྣམས་ཁྱུར་མིད་གཏོང་ཞིང་གསོད་མི་ཐུབ་བོ་ཞེས་གསུངས་སོ། །   
\c 18
\cl ལེའུ་བཅོ་བརྒྱད་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེ་རེམ་ཡཱ་རྫ་བཟོ་ཞིག་གི་ཁྱིམ་དུ་ཕྱིན་པ།  
\p
\v 1 དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།  
\v 2 ཁྱོད་ལོངས་ལ་རྫ་བཟོའི་ཁྱིམ་དུ་མར་སོང་ཞིག དེ་རུ་ངས་ཁྱོད་ལ་བདག་གི་བཀའ་གནང་བར་བྱའོ་ཞེས་གསུངས་པས།  
\v 3 ང་རང་མར་རྫ་བཟོའི་ཁྱིམ་དུ་སོང་བ་ན། ལྟོས་ཤིག དེས་རང་གི་འཁོར་ལོའི་སྟེང་དུ་སྣོད་བཟོ་བཞིན་འདུག  
\v 4 འཇིམ་པས་བཟོས་པའི་སྣོད་དེར་རྫ་བཟོའི་ལག་ནས་ཆག་སྐྱོན་བྱུང་བ་ཙམ་གྱིས། ཁོས་འཇིམ་པ་དེས་སྣོད་གཞན་ཞིག་བཟོས་སོ། །  
\v 5 དེ་ནས་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་བ་འདི་ལྟ་སྟེ།  
\v 6 ཀྱེ་ཡེས་ར་ཨེལ་གྱི་ཁྱིམ་རྒྱུད་ལགས། ངས་ཁྱོད་རྣམས་ལ་རྫ་བཟོས་འདམ་བཟོ་བ་ལྟར་བྱེད་མི་ནུས་སམ་ཞེས་དཀོན་མཆོག་ཡ་ཝཱེས་གསུངས། ཀྱེ་ཡེས་ར་ཨེལ་གྱི་ཁྱིམ་རྒྱུད་ལགས། ལྟོས་ཤིག འཇིམ་པ་རྫ་བཟོའི་ལག་ནང་དུ་ཇི་ལྟར་ཡིན་པ་བཞིན། ཁྱོད་ཀྱང་ངའི་ལག་ནང་དེ་ལྟར་ཡིན་ནོ། །  
\v 7 ངས་མི་རིགས་དང་ཡང་ན་རྒྱལ་ཕྲན་གང་ཞིག་གི་སྐོར་ལ། དེ་རྩ་བ་ནས་བཏོན་ཏེ་བཤིག་ནས་མེད་པར་བཟོ་དགོས་ཞེས་དུས་ནམ་ཞིག་ལ་སྨྲས་པ་ཡིན་ནམ།  
\v 8 ཇི་སྟེ་ངས་གླེང་པའི་མི་རིགས་དེས་འགྱོད་བཤགས་བྱས་ནས་རང་གི་ངན་སྤྱོད་ལས་བྲལ་ན། ངས་ཀྱང་བློ་ཁ་བསྒྱུར་ནས་ལག་བསྟར་བྱེད་འདོད་པའི་ཆག་སྒོ་ནི་དེ་རྣམས་ཀྱི་སྟེང་དུ་འབྱུང་བར་མི་བྱའོ། །  
\v 9 ཡང་ངས་མི་རིགས་དང་ཡང་ན་རྒྱལ་ཕྲན་གང་ཞིག་གི་སྐོར་ལ། དེ་ཡར་བཙུགས་ནས་གསོ་སྐྱོང་བྱེད་དགོས་ཞེས་དུས་ནམ་ཞིག་ལ་སྨྲས་པ་ཡིན་ནམ།  
\v 10 གལ་སྲིད་ཁོ་རྣམས་ཀྱིས་ངའི་མིག་ལམ་དུ་ངན་པ་གང་ཡིན་དེ་སྤྱད་ནས་ངའི་བཀའ་ལ་མི་མཉན་ན། ངས་ཀྱང་བློ་ཁ་བསྒྱུར་ནས་ངས་སྨྲས་པའི་བྱིན་རླབས་ནི་དེ་དག་ལ་གནང་བར་མི་བྱའོ། །  
\v 11 ད་ལྟ། ཁྱོད་ཀྱིས་ཡ་ཧུ་དཱ་པ་དང་ཡེ་རུ་སཱ་ལེམ་གྱི་ཡུལ་མི་རྣམས་ལ། དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ཁྱོད་རྣམས་ལ་ཆག་སྒོ་ཐེབས་པར་རྩོམ་ཞིང་། ཁྱོད་རྣམས་ལ་ཉེས་ཆད་གཅོད་པར་སེམས་ཐག་བཅད་པ་ཡིན། ཁྱོད་རྣམས་ཁ་ཕྱིར་འཁོར་ཏེ་རང་གི་སྤྱོད་ངན་དང་འབྲལ་དགོས་ལ། རང་གི་བྱ་བ་སྤྱོད་པ་སྒྱུར་ཅིག་ཅེས་སྨྲོས་དང་།  
\v 12 དེ་དག་གིས་དེར་ཕན་ཐོགས་ཅི་ཡང་མེད་པས། ངེད་རྣམས་ཀྱིས་རང་གི་བསམ་པ་བཞིན་དུ་སོ་སོའི་སེམས་ངན་གཤིས་གྱོང་གི་རྗེས་སུ་འབྲངས་ནས་སྤྱད་པ་སྤྱོད་དགོས་ཞེས་སྨྲ་བར་འགྱུར་ཞེས་གསུངས་སོ། །   
\p
\v 13 དེའི་ཕྱིར་ན་ཡང་དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་སོང་ནས་ཡུལ་ཁམས་ཀུན་ལ་དྲིས་ཤིག འདི་འདྲའི་དོན་རྣམས་ཐོས་མྱོང་ངམ། ན་ཆུང་བུ་མོ་ཡེས་ར་ཨེལ་གྱིས་དོན་ཤིན་ཏུ་མི་རུང་བ་ཞིག་བྱས་སོ། །  
\v 14 ལེ་པཱ་ནོན་གྱི་བྲག་རི་སྟེང་གི་གངས་ནི་ཞི་བར་འགྱུར་རམ། རྒྱང་རིང་ནས་བཞུར་འོང་བའི་དྭངས་ཤིང་བསིལ་བའི་ཆུ་དེ་སྐམ་པར་འགྱུར་རམ།  
\v 15 ཡིན་ཡང་ངའི་འབངས་རྣམས་ཀྱིས་ང་རང་བརྗེད་ནས་རིན་ཐང་མེད་པའི་སྐུ་འདྲ་རྣམས་ལ་སྤོས་བདུགས་ཤིང་། ཁོ་རྣམས་འགྲུལ་བའི་ལམ་ནང་དང་གནའ་བོའི་ལམ་བུར་འགྱེལ་ཞིང་། ལམ་ཆེན་ནང་དུ་མི་འགྲུལ་བར་ལམ་ཕྲན་ནང་དུ་བསྐྱོད་དོ། །  
\v 16 དེ་དག་གི་ཡུལ་ཁམས་ནི་མི་མེད་ལུང་སྟོང་དང་ནམ་རྒྱུན་མི་ཡིས་འཕྱ་སྨོད་བྱེད་ཡུལ་དུ་འགྱུར་བ་དང་། ཡུལ་དེ་བརྒྱུད་ནས་འགྲོ་མཁན་ཐམས་ཅད་དངངས་ནས་མགོ་གཡུག་པར་འགྱུར་རོ། །  
\v 17 ཤར་རླུང་གིས་བསྐྱོད་པ་བཞིན་ངས་དེ་དག་དགྲ་བོའི་མདུན་དུ་གཏོར་ཞིང་། ཆག་སྒོ་འབྱུང་དུས་ངས་དེ་དག་ལ་རྒྱབ་གཏོད་པ་ལས་གདོང་སྟོན་པར་མི་བྱའོ་ཞེས་གསུངས་སོ། །   
\s1 ཡེ་རེམ་ཡཱ་ལ་གནོད་བསྐྱལ་བ།  
\p
\v 18 དེར་ཁོ་རྣམས་ན་རེ། མཆོད་དཔོན་ལས་བཀའ་ཁྲིམས་དང་། མཁས་པ་ལས་བློ་གྲོས། ལུང་སྟོན་པ་ལས་ལུང་བསྟན་བཅས་རྒྱུན་མི་ཆད་པས། ཤོག་དང་། ཡེ་རེམ་ཡཱ་ལ་གནོད་བསྐྱལ་བར་གྲོས་བྱེད་དོ། །ཤོག་དང་། རང་ཅག་གི་ལྕེ་ཡིས་ཁོ་ལ་རྒོལ་ཞིང་ཁོའི་ཚིག་གང་ལའང་མ་མཉན་ཞིག་ཅེས་སྨྲས།  
\v 19 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་ང་ལ་གསན་ཞིང་ང་ལ་སྐྱོན་བརྗོད་པའི་མི་དེ་དག་གི་གཏམ་ལའང་གསན་པར་མཛོད།  
\v 20 མི་ཡིས་བཟང་ལན་ངན་འཇལ་བྱེད་འོས་སམ། དེ་དག་གིས་དོང་ཞིག་བརྐོས་ནས་ངའི་སྲོག་ལ་གནོད་བསྐྱལ་འདོད་དེ། ཁྱེད་ཀྱི་ཐུགས་ཁྲོ་དེ་དག་དང་འབྲལ་བའི་ཕྱིར་ང་ཁྱེད་ཀྱི་དྲུང་དུ་ལངས་ནས་དེ་དག་གི་ཆེད་དུ་ཞུ་བ་ཞུས་པ་ཁྱེད་ཀྱི་ཐུགས་སུ་དྲན་པར་མཛོད།  
\v 21 དེའི་ཕྱིར་དེ་དག་གི་བུ་ཕྲུག་རྣམས་ལ་མུ་གེ་འབྱུང་ཞིང་རལ་གྲིའི་དབང་ལ་གཏོད་པར་མཛོད་ཅིག དེ་དག་གི་ཆུང་མ་རྣམས་ལ་ཕྲུ་གུ་མི་སྐྱེས་པར་ཡུགས་མོ་རུ་འགྱུར་བར་མཛོད་ཅིག དེ་དག་གི་ཁྱོ་ག་རྣམས་ནི་འཆི་བས་གསོད་ཅིང་། དེ་དག་གི་གཞོན་ནུ་རྣམས་གཡུལ་ངོར་རལ་གྲིས་འགུམ་པར་མཛོད་ཅིག  
\v 22 ཁྱེད་ཀྱིས་དེ་དག་གི་སྟེང་དུ་གློ་བུར་ཉིད་ལ་ཆོམ་རྐུན་འདྲེན་པའི་དུས་སུ། དེ་དག་གི་ཁྱིམ་ནས་སྐྱབས་ཞུ་བའི་སྐད་ཐོས་འོང་བར་གྱུར་ཅིག ཅི་ལ་ཞེ་ན། དེ་དག་གིས་དོང་བརྐོས་ནས་ང་རང་འཛིན་འདོད་པ་དང་། ང་རྐང་འདྲེད་འཆོར་བའི་ཕྱིར་ལྐོག་ནས་རྙི་བཙུགས་སོ། །  
\v 23 ཀྱེ་དཀོན་མཆོག་ཡ་ཝཱེ་ལགས། དེ་ཚོས་ང་གསོད་པར་འདོད་པའི་གྲོས་ངན་དེ་ཐམས་ཅད་ཁྱེད་ཀྱིས་མཁྱེན་པས། ཁྱེད་ཀྱིས་དེ་དག་གི་སྡིག་པ་བསལ་བར་མ་མཛད་ཅིག ཁྱེད་ཀྱི་གཟིགས་ངོར་དེ་དག་གི་སྡིག་ཉེས་མེད་པར་ཡང་མི་མཛད་རོགས། ཁྱེད་ཀྱི་དྲུང་དུ་དེ་དག་འགྱེལ་ཞིང་། ཁྱེད་ཐུགས་ཁྲོ་བའི་ཚེ་ན་དེ་དག་ལ་འདི་ལྟར་མཛད་དུ་གསོལ་ལོ། །   
\c 19
\cl ལེའུ་བཅུ་དགུ་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཆག་གྲུམ་བྱུང་བའི་རྫ་བུམ།  
\p
\v 1 དཀོན་མཆོག་ཡ་ཝཱེས་འདི་སྐད་དུ། ཁྱོད་སོང་ལ་རྫ་བཟོའི་བུམ་པ་ཞིག་ཉོས་ཏེ། མི་རྣམས་ཁྲོད་ཀྱི་རྒན་པོ་རྣམས་དང་གུས་པར་འོས་པའི་མཆོད་དཔོན་རྣམས་ལས་ཁ་ཅིག་ཁྲིད་ནས།  
\v 2 པེན་ཧིན་ནོམ་ལུང་པ་ནང་དང་རྫ་ལེབ་ཀྱི་སྒོ་ཁར་སོང་ནས། དེ་རུ་ངས་ཁྱོད་ལ་བབས་པའི་བཀའ་རྣམས་སྒྲོགས་ལ་འདི་ལྟར།  
\v 3 ཀྱེ་ཡ་ཧུ་དཱའི་རྒྱལ་པོ་དང་ཡེ་རུ་སཱ་ལེམ་གྱི་ཡུལ་མི་ཀུན། དཀོན་མཆོག་ཡ་ཝཱེའི་བཀའ་ལ་ཉོན་ཅིག དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ལྟོས་ཤིག ངས་གནས་འདིར་ཆག་སྒོ་འབྱུང་བར་བྱེད་ཅིང་། དེ་ཐོས་མཁན་ཐམས་ཅད་ནི་རྣ་འུར་བར་འགྱུར།  
\v 4 ཅི་ལ་ཞེ་ན། དེ་དག་དང་དེ་དག་གི་མེས་པོ་རྣམས་དང་། ཡ་ཧུ་དཱའི་རྒྱལ་པོ་བཅས་ཀྱིས་བདག་དོར་ནས། གནས་འདི་བཙོག་པར་བྱས་ཏེ་རྒྱུས་མི་མངའ་བའི་ལྷ་གཞན་རྣམས་ལ་སྤོས་བདུགས་པ་དང་། ཡུལ་འདི་རུ་ཉེས་མེད་ཁྲག་གིས་བཀང་བར་བྱས།  
\v 5 རང་གི་བུ་མེ་རུ་བསྲེགས་ནས་པཱ་ཨལ་ལ་སྦྱིན་སྲེག་གི་མཆོད་པ་འབུལ་བའི་ཆེད་དུ། དེ་དག་གིས་པཱ་ཨལ་གྱི་མཐོ་གླིང་རྣམས་བརྩིགས། དེ་ནི་ངས་བསྒོས་པ་མ་ཡིན་ལ། ངས་གླེང་པ་ཡང་མིན་ཏེ། ངའི་ཡིད་ལའང་ཤར་མ་མྱོང་ངོ་། །  
\v 6 དེ་བས་ལྟོས་ཤིག དུས་དེ་སླེབས་ལ་ཉེ། གནས་འདི་ལ་ཐོ་ཕེད་མི་ཟེར་ལ། པེན་ཧིན་ནོམ་ལུང་པ་ཡང་མི་ཟེར་བར། གསོད་གཅོད་ཀྱི་ལུང་པ་ཞེས་འབོད་པར་འགྱུར་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །  
\v 7 ངས་ཡུལ་འདི་རུ་ཡ་ཧུ་དཱ་དང་ཡེ་རུ་སཱ་ལེམ་གྱི་ཇུས་ངན་ནི་མེད་པར་བྱེད་ཅིང་། དེ་དག་རང་གི་དགྲ་བོའི་མདུན་དུ་རལ་གྲིའི་ཁ་དང་། དེ་དག་གི་སྲོག་ལ་སྙེག་པའི་ལག་འོག་ཏུ་འགྱེལ་བར་བྱེད། ངས་དེ་དག་གི་བམ་རོ་ནི་ནམ་མཁའི་བྱ་དང་ཐང་གི་གཅན་གཟན་རྣམས་ཀྱི་ཟས་སུ་སྦྱིན་པར་བྱའོ། །  
\v 8 ཡང་ངས་གྲོང་ཁྱེར་འདི་ནི་མི་མེད་ལུང་སྟོང་དང་མི་ཡིས་འཕྱ་སྨོད་བྱེད་ཡུལ་དུ་འགྱུར་བར་བྱེད་ཅིང་། ཡུལ་དེ་བརྒྱུད་ནས་འགྲོ་མཁན་ཐམས་ཅད་དེའི་རྐྱེན་ངན་གྱི་ཕྱིར་དངངས་ནས་འཕྱ་བར་འགྱུར།  
\v 9 དགྲ་དང་དེ་དག་གི་སྲོག་ལ་སྙེག་མཁན་གྱིས་ཁོ་རྣམས་ཀྱི་རྗེས་དེད་ནས། དེ་དག་སྡུག་བསྔལ་བའི་དུས་སུ། ངས་དེ་རྣམས་ལ་རང་རང་གི་བུ་བུ་མོ་རྣམས་ཀྱི་ཤ་དང་གྲོགས་པོའི་ཤ་བཟའ་བར་བྱེད་དོ། །   
\p
\v 10 ཡང་ཁྱོད་ཀྱིས་རང་དང་མཉམ་དུ་འགྲོ་མཁན་རྣམས་ཀྱི་མདུན་དུ་བུམ་པ་དེ་ཆོགས་ལ།  
\v 11 དེ་དག་ལ་འདི་ལྟར། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། མི་ཡིས་རྫ་བཟོའི་སྣོད་བཅག་ནས་སྔར་བཞིན་སླར་གསོ་བྱེད་མི་ཐུབ་པ་ལྟར། ངས་མི་འདི་དག་དང་གྲོང་ཁྱེར་འདི་ཡང་གཅོག་པར་བྱ་སྟེ། སྦས་ས་མེད་པའི་བར་དུ་དེ་རྣམས་ཐོ་ཕེད་དུ་བསྐུང་བར་འགྱུར་རོ། །  
\v 12 ངས་གནས་འདི་དང་འདིའི་ཡུལ་མི་རྣམས་ལའང་དེ་བཞིན་བྱས་ཏེ། གྲོང་ཁྱེར་འདི་ཐོ་ཕེད་ལྟ་བུར་བྱའོ་ཞེས་གསུངས་ཞེས་སྨྲོས་ཤིག  
\v 13 ཡེ་རུ་སཱ་ལེམ་གྱི་ཁང་པ་དང་ཡ་ཧུ་དཱའི་རྒྱལ་པོ་དག་གི་ཕོ་བྲང་རྣམས་ནི་ཐོ་ཕེད་ལྟར་བཙོག་པར་འགྱུར་ཏེ། སྔར་ཁོ་ཚོས་ཁང་པ་ཐམས་ཅད་ཀྱི་སྟེང་ནས་ནམ་མཁའི་ཚོགས་ལ་སྤོས་བདུགས་པ་དང་། ལྷ་གཞན་རྣམས་ལ་སྐྱེམས་མཆོད་ཕུལ་བ་ཡིན་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །  
\v 14 དེ་ནས་ཡེ་རེམ་ཡཱ་ནི་དཀོན་མཆོག་ཡ་ཝཱེས་ལུང་སྟོན་པར་མངགས་པའི་ཐོ་ཕེད་ཡུལ་ནས་ཕྱིར་ལོག་སྟེ། དཀོན་མཆོག་ཡ་ཝཱེའི་མཆོད་ཁང་གི་ཁྱམས་རར་ལངས་བསྡད་ནས་མི་ཀུན་ལ་ན་རེ།  
\v 15 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ལྟོས་ཤིག བདག་གིས་གྲོང་ཁྱེར་འདི་དང་འདིའི་ཉེ་འཁོར་ཐམས་ཅད་ལ་རྒོལ་བར་བསྒྲགས་པའི་ཆག་སྒོ་དེ་ཐམས་ཅད་འབབ་པར་བྱའོ། །ཅི་ལ་ཞེ་ན། དེ་དག་གིས་སེམས་རྒྱུད་གྱོང་པོ་བྱས་ནས་བདག་གི་བཀའ་ལ་མི་མཉན་ནོ་ཞེས་གསུངས་ཞེས་སྨྲས་པའོ། །   
\c 20
\cl ལེའུ་ཉི་ཤུ་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེ་རེམ་ཡཱ་དང་ཕཱ་ཤུར་བར་གྱི་འགལ་བ།  
\p
\v 1 དེ་ཡང་དཀོན་མཆོག་ཡ་ཝཱེའི་མཆོད་ཁང་གི་འགོ་དཔོན་ཏེ། ཨིམ་མེར་གྱི་བུ་མཆོད་དཔོན་ཕཱ་ཤུར་གྱིས། ཡེ་རེམ་ཡཱས་དོན་འདི་དག་ལུང་སྟོན་པ་ཐོས་ནས།  
\v 2 ལུང་སྟོན་པ་ཡེ་རེམ་ཡཱ་ལ་བརྡུངས་ཏེ། དཀོན་མཆོག་ཡ་ཝཱེའི་མཆོད་ཁང་གི་པེན་ཡཱ་མེན་གྱི་རྒྱ་སྒོ་གོང་མར་ལྕགས་སྒྲོག་བརྒྱབ་ནས་བཞག  
\v 3 དེའི་ཕྱི་ཉིན་ཕཱ་ཤུར་གྱིས་ལྕགས་སྒྲོག་བཀྲོལ་ནས་ཡེ་རེམ་ཡཱ་བཏང་བས། ཡེ་རེམ་ཡཱ་ཡིས་དེ་ལ་འདི་ལྟར། དཀོན་མཆོག་ཡ་ཝཱེས་ཁྱོད་ཀྱི་མིང་ལ་ཕཱ་ཤུར་ཞེས་མི་འབོད་པར། མཱ་ཁེར་མཱེ་སཱ་ \f + \ft མཱ་ཁེར་མཱེ་སཱ་ཞེས་པ་ནི་ཕྱོགས་བཞིར་དགྲ་བོའི་རལ་གྲི་དང་འཇིགས་སྣང་ཡོད་པའི་དོན་ལ་འཇུག\f*ཞེས་འབོད་པ་ཡིན།  
\v 4 ཅི་ལ་ཞེ་ན། དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ཁྱོད་དང་ཁྱོད་ཀྱི་གྲོགས་པོ་ཐམས་ཅད་དངངས་ནས་འཚབ་པར་བྱེད་དེ། ཁྱོད་ཀྱིས་དེ་དག་དགྲ་ཡི་རལ་གྲི་འོག་ཏུ་འཆི་བ་དངོས་སུ་མཐོང་བར་འགྱུར། ཡང་ངས་ཡ་ཧུ་དཱ་པ་ཐམས་ཅད་པཱ་པེལ་ལོན་གྱི་རྒྱལ་པོའི་ལག་ཏུ་གཏོད་དགོས་ཤིང་། ཁོས་དེ་དག་བཙན་གྱིས་པཱ་པེལ་ལོན་དུ་འཁྲིད་པའམ་ཡང་ན་རལ་གྲིས་གསོད་པར་འགྱུར།  
\v 5 ངས་གྲོང་ཁྱེར་འདིའི་ནོར་རྫས་ཐམས་ཅད་དང་། ངལ་རྩོལ་ལས་ཐོབ་པ་ཐམས་ཅད། རིན་པོ་ཆེ་ཐམས་ཅད། ད་དུང་ཡ་ཧུ་དཱའི་རྒྱལ་པོ་རྣམས་ཀྱི་གཏེར་མཛོད་ཐམས་ཅད་དགྲ་ཡི་ལག་ཏུ་གཏོད་པར་བྱེད་ཅིང་། དགྲ་ཡིས་དེ་དག་ཕྲོགས་ནས་བཅོམས་ཏེ་པཱ་པེལ་ལོན་དུ་འཁྱེར་བར་འགྱུར།  
\v 6 ཀྱེ་ཕཱ་ཤུར་ཁྱོད་རང་དང་ཁྱོད་ཀྱི་ཁྱིམ་དུ་ཡོད་པ་ཐམས་ཅད་བཙོན་དུ་འཁྲིད་པར་འགྱུར་ལ། ཁྱོད་དང་ཁྱོད་ཀྱི་གྲོགས་པོ་རྣམས་ཏེ། ཁྱོད་ཀྱིས་ལུང་བསྟན་རྫུན་མ་སྨྲས་པ་དེ་ཐམས་ཅད་ནི་པཱ་པེལ་ལོན་དུ་ཁྲིད་ནས། དེ་རུ་འཆི་བ་དང་དེ་རུ་བསྐུང་བར་འགྱུར་ཞེས་པའོ་ཞེས་གསུངས་སོ། །   
\s1 ཡེ་རེམ་ཡཱ་ཡིས་དཀོན་མཆོག་ཡ་ཝཱེ་ལ་སྡུག་ཡུས་བཏོན་པ།  
\p
\v 7 ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་ང་བསླུས་ཤིང་ང་ལ་བསླུ་བྲིད་ཐེབས་པ་ཡིན། ཁྱེད་ནི་ང་ལས་སྟོབས་ཆེ་བས་ཁྱེད་རྒྱལ་བར་གྱུར་པ་དང་། ང་རང་ཉིན་གང་པོར་གཞན་རྣམས་ཀྱི་འཕྱ་སྨོད་བྱེད་ཡུལ་དུ་གྱུར་ཅིང་མི་ཀུན་གྱིས་ང་ལ་འཕྱའོ། །  
\v 8 ངས་ནམ་རྒྱུན་གཏམ་སྨྲ་དུས་སྐད་ཆེན་པོ་བརྒྱབ་པ་དང་། སྐད་ཆེན་པོས་གདུག་རྩུབ་དང་འཕྲོག་བཅོམ་འབྱུང་ངོ་ཞེས་སྒྲོག་སྟེ། ཅི་ལ་ཞེ་ན། དཀོན་མཆོག་ཡ་ཝཱེའི་བཀའ་ཡིས་ང་རང་ཉིན་རེ་བཞིན་ངོ་ཚ་དང་འཕྱ་སྨོད་ལ་གཏད།  
\v 9 གལ་ཏེ་ངས་ད་ནས་བཟུང་ཁོང་ཉིད་མི་གླེང་ལ། ཕྱིན་ཆད་ཁོང་གི་མཚན་གྱི་སྒོ་ནས་གཏམ་སྨྲ་བར་ཡང་མི་བྱ་ཞེས་སྨྲས་ན། ཁོང་གི་བཀའ་ནི་ངའི་སེམས་སུ་མེ་ལྟར་འབར་ཞིང་ངའི་རུས་པའི་ནང་དུ་སྦས་ཡོད་པར་འདྲ་སྟེ། ངས་དེ་བཟོད་མི་ཐུབ་ལ་དངོས་གནས་བཟོད་ཐབས་བྲལ་བ་ཡིན།  
\v 10 ངས་མི་མང་པོས་འདི་ལྟར། ཕྱོགས་བཞིར་འཇིགས་སྣང་གིས་བཀང་ཡོད། ཁོ་གཏུག་དང་། རང་ཅག་གིས་ཁོ་གཏུག་པར་བྱ་ཞེས་ཤབ་ཤུབ་སྨྲ་བ་ཐོས་ཏེ། ངའི་ཡིད་གྲོགས་རྣམས་ཀྱིས་ཀྱང་ང་འགྱེལ་བ་མཐོང་བར་བསྒུགས་ནས་ན་རེ། ཁོ་གཡོ་འོག་ཏུ་ཚུད་ན་ངེད་རྣམས་ཁོ་ལས་རྒྱལ་བར་འགྱུར་ལ། ཁོའི་སྟེང་དུ་དགྲ་ཤ་ལེན་ཡང་སྲིད་ཅེས་སྨྲས་སོ། །  
\v 11 ཡིན་ཡང་། དཀོན་མཆོག་ཡ་ཝཱེ་ནི་ང་དང་མཉམ་དུ་བཞུགས་ཏེ་འཇིགས་སུ་རུང་བའི་དཔའ་བོ་བརྗིད་ཉམས་ཅན་ཞིག་དང་མཚུངས་པས་ན། ང་ལ་གནོད་སྐྱེལ་མཁན་ཐམས་ཅད་འགྱེལ་ཞིང་རྒྱལ་བར་མི་འགྱུར་ལ། དེ་རྣམས་ཕམ་པས་ཤིན་ཏུ་ངོ་ཚ་བར་འགྱུར་ཏེ། ཡང་དེ་རྣམས་ཀྱིས་ཤེས་རབ་བཞིན་སྤྱོད་པ་མ་སྤྱད་པས་ན་ཇི་སྲིད་བར་དུ་བརྗེད་མི་ཐུབ་པའི་ངོ་ཚ་དེ་འབྱུང་བར་འགྱུར།  
\v 12 དྲང་བདེན་མི་ལ་ཞིབ་དཔྱོད་མཛད་མཁན་དང་། མིའི་སེམས་དང་བསམ་པར་གཟིགས་པའི་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལགས། ཁྱེད་ཀྱིས་དེ་དག་ལས་དགྲ་ཤ་ལེན་པ་ང་ལ་མཐོང་བར་མཛོད་དང་། ཅི་ལ་ཞེ་ན། ངས་རང་གི་དོན་ནི་ཁྱེད་ལ་བཅོལ་བའི་ཕྱིར་རོ། །  
\v 13 ཁྱོད་རྣམས་ཀྱིས་དཀོན་མཆོག་ཡ་ཝཱེར་བསྟོད་དབྱངས་ཕུལ་ཞིག དཀོན་མཆོག་ཡ་ཝཱེར་བསྟོད་པ་ཕུལ་ཞིག ཅི་ལ་ཞེ་ན། ཁོང་གིས་དབུལ་པོའི་སྲོག་བསྐྱབས་ཏེ་ངན་པའི་ལག་ནས་ཐར་བར་མཛད་དོ། །  
\v 14 ང་སྐྱེས་པའི་ཉིན་དེ་ལ་དམོད་མོ་ཐེབས་གྱུར་ཅིག ངའི་མ་ཡིས་ང་བཙས་པའི་ཉིན་དེ་ལ་བྱིན་རླབས་མི་ཐོབ་པར་ཤོག  
\v 15 ངའི་ཕ་ལ་ཁྱོད་ལ་བུ་ཞིག་སྐྱེས་བྱུང་ཞེས་འཕྲིན་བསྐྱལ་ནས་ངའི་ཕ་རབ་ཏུ་དགའ་བར་བྱེད་མཁན་དེ་ལ་དམོད་མོ་ཐེབས་གྱུར་ཅིག  
\v 16 ཡང་མི་དེ་ནི་དཀོན་མཆོག་ཡ་ཝཱེས་སྙིང་རྗེ་མ་གནང་བར་ཕམ་པར་བཟོས་པའི་གྲོང་ཁྱེར་དང་འདྲ་བར་གྱུར་ཅིག དེ་ཡིས་ཞོགས་པར་སྨྲེ་སྔགས་དང་ཉིན་གུང་འཐབ་མོའི་ཀི་སྒྲ་ཐོས་གྱུར་ཅིག  
\v 17 ཅི་ལ་ཞེ་ན། དེས་ངའི་མ་ནི་ངའི་དུར་ཁུང་དུ་གྱུར་ནས་ང་མ་ཡི་མངལ་ནང་དུས་གཏན་དུ་ལུས་པའི་ཆེད་དུ། ང་མངལ་ལས་མ་སྐྱེས་སྔོན་དུ་མ་བསད་པས་སོ། །  
\v 18 ང་མ་ཡི་མངལ་ལས་ཐོན་ནས་དཀའ་ངལ་དང་སྡུག་བསྔལ་ལ་ཕྲད་དེ། ངའི་མི་ཚེ་འདི་ངོ་ཚའི་ནང་དུ་རོལ་དགོས་པ་ཅི་ཡིན་ནམ།   
\c 21
\cl ལེའུ་ཉེར་གཅིག་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེ་རུ་སཱ་ལེམ་ནུབ་པར་ལུང་བསྟན་པ།  
\p
\v 1 དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་ཞིང་། དུས་དེར་རྒྱལ་པོ་ཚིད་ཀི་ཡཱ་ཡིས་མལ་ཀི་ཡཱ་ཞེས་བྱ་བའི་བུ་ཕཱ་ཤུར་དང་། མ་ཨ་སེ་ཡཱའི་བུ་སྟེ་མཆོད་དཔོན་ཟེ་ཕན་ཡཱ་གཉིས་ཀ་ཁོང་གི་རྩར་མངགས་ནས་ན་རེ།  
\v 2 ཁྱེད་ཀྱིས་ངེད་རྣམས་ཀྱི་ཆེད་དུ་དཀོན་མཆོག་ཡ་ཝཱེ་ལ་ཞུ་བར་མཛོད། ཅི་ལ་ཞེ་ན། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་ངེད་རྣམས་ལ་རྒོལ་དུ་འོངས་པའོ། །དཀོན་མཆོག་ཡ་ཝཱེས་མཛད་པ་ངོ་མཚར་ཅན་གྱིས་ངེད་རྣམས་ལ་རོགས་རམ་གནང་ནས། པཱ་པེལ་ལོན་གྱི་རྒྱལ་པོ་ནི་ངེད་དང་འབྲལ་བར་མཛད་ཀྱང་སྲིད་ཅེས་ཞུས་པ་ན།  
\v 3 ཡེ་རེམ་ཡཱ་ཡིས་དེ་དག་ལ་འདི་ལྟར། ཁྱོད་རྣམས་ཀྱིས་ཚིད་ཀི་ཡཱ་ལ་འདི་སྐད་ཤོད་ཅིག  
\v 4 ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ཁྱོད་རྣམས་ཀྱི་ལག་གི་མཚོན་ཆ་སྟེ། ཁྱོད་ཚོས་ལྕགས་རིའི་ཕྱི་རོལ་ནས་ཁྱོད་རྣམས་བསྐོར་བའི་པཱ་པེལ་ལོན་གྱི་རྒྱལ་པོ་དང་ཀལ་དི་པ་རྣམས་དང་འཐབ་བྱེད་མཚོན་ཆ་རྣམས་ཕྱིར་བསྐོར་ནས་གྲོང་ཁྱེར་འདིའི་དཀྱིལ་དུ་བསྡུ་བར་བྱའོ། །  
\v 5 ངས་ཁོང་ཁྲོ་དང་ཁྲོ་གཏུམ་ཆེན་པོ། ཞེ་སྡང་བཅས་ཀྱི་ནང་དུ་ཕྱི་རུ་བརྐྱངས་པའི་ལག་པ་དང་ནུས་མཐུ་ལྡན་པའི་དཔུང་ངར་གྱིས་ཁྱོད་རྣམས་ལ་རྒོལ་ངེས་ཡིན།  
\v 6 ཡང་ངས་གྲོང་ཁྱེར་འདི་རུ་གནས་པའི་མི་ཕྱུགས་གཉིས་ལ་བརྡུངས་ནས་དེ་ཐམས་ཅད་ལ་རིམས་ནད་དྲག་པོ་བྱུང་ནས་འཆི་བར་འགྱུར་རོ། །  
\v 7 དེའི་རྗེས་སུ། ངས་ཡ་ཧུ་དཱའི་རྒྱལ་པོ་ཚིད་ཀི་ཡཱ་དང་དེའི་འཁོར་གཡོག་དང་མི་རྣམས་ཏེ། གྲོང་ཁྱེར་འདིའི་ནང་དུ་རིམས་ནད་དང་རལ་གྲིའི་ཆག་སྒོ་དང་། མུ་གེ་བཅས་ལས་ལུས་པའི་མི་རྣམས་ནི་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་དང་ཁོ་ཚོའི་དགྲ་རྣམས་དང་། ཁོ་ཚོའི་སྲོག་ལ་སྙེག་མཁན་བཅས་ཀྱི་ལག་ཏུ་གཏད་དེ། པཱ་པེལ་ལོན་གྱི་རྒྱལ་པོས་དེ་རྣམས་གཅེས་སུ་མི་འཛིན་ཞིང་། ཤ་ཚ་བར་མི་བྱེད་ལ། སྙིང་རྗེ་ཡང་མི་བྱེད་པར་རལ་གྲིས་དེ་རྣམས་གསོད་པར་འགྱུར་ཞེས་དཀོན་མཆོག་ཡ་ཝཱེས་གསུངས་པའོ། །  
\v 8 ཡང་དཀོན་མཆོག་ཡ་ཝཱེས་ཡེ་རེམ་ཡཱ་ལ་འདི་སྐད་དུ། ཁྱོད་ཀྱིས་མི་འདི་རྣམས་ལ་འདི་ལྟར། དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ཤི་གསོན་གཉིས་ཀྱི་ལམ་ནི་ཁྱོད་ཅག་གི་མདུན་དུ་བཤམ་པར་བྱ་སྟེ།  
\v 9 གྲོང་ཁྱེར་འདི་རུ་སྡོད་པ་རྣམས་རལ་གྲི་དང་མུ་གེ རིམས་ནད་བཅས་ཀྱི་རྐྱེན་གྱིས་འཆི་བར་འགྱུར་མོད། འོན་ཀྱང་ཕྱི་རོལ་ཏུ་སོང་ནས་ཁྱོད་ཅག་བསྐོར་བའི་ཀལ་དི་པ་ལ་མགོ་སྒུར་མཁན་ནི་གསོན་པོར་ལུས་ཤིང་སྲོག་ཐར་བར་འགྱུར་རོ། །  
\v 10 ངས་གྲོང་ཁྱེར་འདི་ལ་ཆག་སྒོ་འབྱུང་བར་མཛད་པ་ལས་བྱིན་རླབས་མི་གནང་བའི་སེམས་ཐག་བཅད་པ་དང་། གྲོང་ཁྱེར་འདི་ནི་པཱ་པེལ་ལོན་གྱི་རྒྱལ་པོའི་ལག་ཏུ་གཏོད་ཅིང་། དེས་མེ་ཡིས་བསྲེག་པར་འགྱུར་གསུངས་ཞེས་ཤོད་ཅིག་ཅེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །   
\s1 ཡ་ཧུ་དཱའི་རྒྱལ་རྒྱུད་དག་ལ་ཉེས་ཆད་གཅོད་པ།  
\p
\v 11 ཁྱོད་ཀྱིས་ཡ་ཧུ་དཱའི་རྒྱལ་རྒྱུད་ལ་འདི་ལྟར་ཤོད་ཅིག ཁྱོད་རྣམས་ཀྱིས་དཀོན་མཆོག་ཡ་ཝཱེའི་བཀའ་ལ་ཉོན་ཅིག  
\v 12 དཱ་བིད་ཀྱི་ཁྱིམ་རྒྱུད་ལགས། དཀོན་མཆོག་ཡ་ཝཱེས་འདི་སྐད་དུ། ང་རང་ཁྱོད་ཅག་གི་སྤྱོད་པ་ངན་པའི་རྐྱེན་གྱིས་ཁོང་ཁྲོ་ཆེན་པོ་ལངས་ཏེ། མེ་བཞིན་འབར་ནས་སུས་ཀྱང་གསོད་མི་ནུས་པ་ཞིག་མི་འབྱུང་བའི་ཆེད་དུ། ཁྱོད་རྣམས་ཀྱིས་ཞོགས་པ་རེ་རེར་དྲང་བདེན་སྤྱོད་ཅིག ཕྲོགས་ནས་ཁྱེར་བ་དག་བརྙས་བཅོས་བྱེད་མཁན་གྱི་ལག་ནས་སྒྲོལ་ཞིག  
\v 13 སུས་རང་ཅག་ལ་རྒོལ་ཡོང་། སུ་རང་ཅག་གི་གནས་ཚང་དུ་འཇུག་པར་འགྱུར་ཞེས་སྨྲ་བའི་རི་ཁུག་དང་ཐང་གི་བྲག་ལ་གནས་པའི་ཡུལ་མི་རྣམས། ལྟོས་ཤིག ང་ནི་ཁྱོད་རྣམས་ཀྱི་དགྲ་རུ་ལང་ངོ་ཞེས་དཀོན་མཆོག་ཡ་ཝཱེས་གསུངས།  
\v 14 ཡང་ཁྱོད་ཅག་གིས་སྤྱད་པའི་ལས་འབྲས་བཞིན་དུ་ངས་ཆད་པ་གཅོད་དེ། ངས་ཡེ་རུ་སཱ་ལེམ་གྱི་ནགས་ཚལ་ལ་མེ་སྦར་ནས་ཁྱོད་ཀྱི་མཐའ་འཁོར་གྱི་ཡོད་ཚད་ཁྱུར་མིད་གཏོང་ངོ་ཞེས་དཀོན་མཆོག་ཡ་ཝཱེས་གསུངས་སོ། །   
\c 22
\cl ལེའུ་ཉེར་གཉིས་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེ་རེམ་ཡཱ་ཡིས་ཡ་ཧུ་དཱའི་རྒྱལ་པོ་ལ་ཐ་ཚིག་སྒྲོག་པ།  
\p
\v 1 དཀོན་མཆོག་ཡ་ཝཱེས་འདི་སྐད་དུ། ཁྱོད་ཡ་ཧུ་དཱའི་རྒྱལ་པོའི་ཕོ་བྲང་དུ་མར་སོང་ནས་འདི་སྐད་ཤོད་ཅིག  
\v 2 ཀྱེ་དཱ་བིད་ཀྱི་ཁྲི་ལ་བཞུགས་པའི་ཡ་ཧུ་དཱའི་རྒྱལ་པོ་ལགས། ཁྱེད་དང་ཁྱེད་ཀྱི་འཁོར་གཡོག་རྣམས་དང་མཁར་སྒོ་འདིའི་ནང་དུ་ཞུགས་པའི་མི་ཐམས་ཅད་ཀྱིས་དཀོན་མཆོག་ཡ་ཝཱེའི་བཀའ་ལ་ཉོན་ཅིག  
\v 3 དཀོན་མཆོག་ཡ་ཝཱེས་འདི་སྐད་དུ། ཁྱོད་རྣམས་ཀྱིས་དྲང་གཞག་དང་དྲང་བདེན་སྤྱོད་ཅིག ཕྲོགས་ནས་ཁྱེར་བ་དག་གཉའ་གནོན་གཏོང་མཁན་གྱི་ལག་ནས་སྒྲོལ་ཞིག བྱེས་སུ་སྡོད་པའི་མི་དང་དྭ་ཕྲུག་དང་ཡུགས་མོ་བཅས་ལ་མནར་གཅོད་གཏོང་བའམ་ཡང་ན་གདུག་རྩུབ་མ་སྤྱོད་ཅིག ཡང་གནས་འདི་རུ་ཉེས་མེད་ཀྱི་ཁྲག་བཞུར་མི་རུང་།  
\v 4 ཇི་སྟེ་ཁྱོད་རྣམས་ཀྱིས་དངོས་གནས་འདི་བཞིན་སྤྱད་ན། དེ་ནས་དཱ་བིད་ཀྱི་རྒྱལ་ཁྲིར་བཞུགས་པའི་རྒྱལ་པོ་ནི་ཤིང་རྟ་དང་ཆིབས་པར་བཅིབས་ནས། རང་གི་འཁོར་གཡོག་དང་མི་རྣམས་མཉམ་དུ་ཕོ་བྲང་འདིའི་སྒོ་རྣམས་ལས་ནང་དུ་འཇུག་པར་འགྱུར།  
\v 5 འོན་ཀྱང་ཇི་སྟེ་ཁྱོད་རྣམས་ཀྱིས་ཚིག་འདི་ལ་མ་མཉན་ན། ཕོ་བྲང་འདི་ཁང་སྟོང་དུ་འགྱུར་བར་ངས་རང་ཉིད་དཔང་དུ་བཙུགས་ནས་མནའ་སྐྱེལ་ལོ་ཞེས་པའོ་ཞེས་སྨྲོས་ཤིག་ཅེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །  
\v 6 ཡ་ཧུ་དཱའི་རྒྱལ་པོའི་ཕོ་བྲང་གི་སྐོར་ལ་དཀོན་མཆོག་ཡ་ཝཱེས་འདི་སྐད་དུ། ང་ལ་མཚོན་ན་ཁྱོད་ནི་གིལ་ཨད་དང་ལེ་པཱ་ནོན་གྱི་རི་རྩེ་ལྟ་བུ་ཡིན་ནའང་། ངས་ཁྱོད་ནི་དབེན་སྟོང་དང་སྡོད་མཁན་མེད་པའི་གྲོང་ཁྱེར་དང་འདྲ་བར་བྱའོ། །  
\v 7 ངས་བཤིག་མཁན་མངགས་པར་བྱེད་དེ། རེ་རེས་མཚོན་ཆ་ཐོགས་ནས་ཁྱོད་ལ་རྒོལ་ཞིང་། དེ་ཚོས་ཁྱོད་ཀྱི་ཐང་ཤིང་ཡག་ཤོས་རྣམས་བཅད་དེ་མེ་རུ་གཡུག་པར་འགྱུར།  
\v 8 རྒྱལ་ཁམས་མང་པོའི་མི་རྣམས་གྲོང་ཁྱེར་འདི་བརྒྱུད་ནས་འགྲོ་ཞིང་ཕན་ཚུན་ལ། དཀོན་མཆོག་ཡ་ཝཱེས་ཅིའི་ཕྱིར་གྲོང་ཁྱེར་ཆེན་པོ་འདི་ལ་འདི་ལྟར་མཛད་པ་ཡིན་ནམ་ཞེས་འདྲི་བ་དང་།  
\v 9 ཡང་དེ་རྣམས་ཀྱིས་འདི་ལྟར། དེ་དག་གིས་རང་གི་དཀོན་མཆོག་ཡ་ཝཱེའི་ཞལ་ཆད་དོར་ནས། ལྷ་གཞན་རྣམས་ལ་ཕྱག་བཙལ་ནས་ཞབས་ཏོག་བསྒྲུབས་པས་ཡིན་ཞེས་ལན་འདེབས་པར་འགྱུར་ཞེས་གསུངས་སོ། །   
\p
\v 10 གཤིན་པོའི་དོན་དུ་མ་ངུ་ཞིག དེའི་དོན་དུ་སེམས་མ་སྐྱོ་ཞིག འོན་ཀྱང་རང་ཡུལ་དང་བྲལ་བའི་མི་རྣམས་ཀྱི་ཕྱིར་དྲག་ཏུ་ངུས་ཤིག ཅི་ལ་ཞེ་ན། དེ་ཕྱིར་མི་ལོག་ལ་རང་གི་ཕ་ཡུལ་མཐོང་ཡང་མི་ནུས་སོ། །  
\v 11 ཡ་ཧུ་དཱའི་རྒྱལ་པོ་ཡོ་ཤི་ཡཱ་ཡི་བུ་སྟེ། རང་གི་ཕ་ཡོ་ཤི་ཡཱ་ཡི་རྒྱུན་མཐུད་ནས་རྒྱལ་སྲིད་བསྐྱངས་པའི་རྒྱལ་པོ་ཤལ་ལུམ་གྱི་སྐོར་ལ། དཀོན་མཆོག་ཡ་ཝཱེས་འདི་སྐད་དུ། ཁོ་ནི་ཡུལ་འདི་དང་བྲལ་ནས་ཕྱིར་འདི་རུ་མི་འོང་སྟེ།  
\v 12 བཙོན་དུ་བཟུང་ནས་ཁྱེར་བའི་གནས་སུ་འཆི་དགོས་ལ། ཡུལ་འདི་སླར་མཐོང་བར་མི་འགྱུར་རོ་ཞེས་གསུངས་སོ། །   
\s1 ཡེ་ཧོ་ཡཱ་ཀིམ་གྱི་སྐོར་གླེང་བ།  
\p
\v 13 དྲང་བདེན་མིན་པའི་སྒོ་ནས་རང་གི་ཁང་པ་བཟོས་ཤིང་། མི་དྲང་པོའི་ཚུལ་གྱིས་རང་གི་ཐོག་ཁང་རྣམས་རྩིག་མཁན་ལ་ཆག་སྒོ་འབྱུང་། དེས་རང་གི་ཁྱིམ་མཚེས་ལ་དོན་མེད་དུ་ངལ་རྩོལ་བྱེད་དུ་འཇུག་ཅིང་དེ་རྣམས་ལ་གླ་མི་སྦྱིན་ནོ། །  
\v 14 ཁོ་ན་རེ། ངས་རང་ལ་ཁང་ཆེན་ཞིག་དང་ཐོག་ཁང་མཐོན་པོ་ཞིག་བརྩིག་པར་བྱའོ་ཟེར་ཞིང་། དེར་དཀར་ཁུང་ཡངས་ཤིང་རྒྱ་ཆེ་བ་རྣམས་ཕྱེས་ཏེ། རྩིག་ངོས་ཐང་ཤིང་གིས་བཏུམས་ནས་མཚལ་མདོག་གི་ཚོན་བྱུགས།  
\v 15 ཁྱོད་ཀྱིས་ཐང་ཤིང་གིས་ཐོག་ཁང་བརྩིགས་ནས་རྒྱལ་ཁ་ལོན་ཐབས་བྱས་ཏེ་རང་ཉིད་རྒྱལ་པོ་ཡིན་པ་ངོམ་མམ། ཁྱོད་ཀྱི་ཕ་ཡིས་ཀྱང་བཟའ་བཏུང་སྤྱད་ནས་དྲང་གཞག་དང་དྲང་བདེན་སྤྱད་པ་མ་ཡིན་ནམ། དུས་དེར་ཁོ་ལ་བདེ་སྐྱིད་ཐོབ་པར་གྱུར།  
\v 16 དེས་དཀའ་ངལ་ཅན་དང་དབུལ་པོ་རྣམས་ལ་དཀར་འདོན་བྱས་པས། ཁོ་ལ་བདེ་སྐྱིད་ཐོབ་པར་གྱུར་ཏེ། འདི་ནི་བདག་ངོ་ཤེས་པའི་དོན་སྙིང་མ་ཡིན་ནམ་ཞེས་དཀོན་མཆོག་ཡ་ཝཱེས་གསུངས་སོ། །  
\v 17 ཁྱོད་ཀྱི་མིག་དང་སེམས་ནི་མི་འོས་པའི་ཐོབ་ནོར་འབའ་ཞིག་ལ་ཆགས་ཤིང་། མི་ཉེས་མེད་ཀྱི་ཁྲག་བཞུར་དུ་བཅུག་སྟེ། བརྙས་བཅོས་དང་གདུག་རྩུབ་སྤྱད་པས།  
\v 18 དཀོན་མཆོག་ཡ་ཝཱེས་ཡོ་ཤི་ཡཱའི་བུ་སྟེ་ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིམ་གྱི་སྐོར་ལ་འདི་སྐད་དུ། མི་ཡིས་དེའི་དོན་དུ་ཀྱི་ཧུད་ངའི་གཅེན་པོ། ཀྱི་ཧུད་ངའི་གཅེན་མོ་ཟེར་བཞིན་མྱ་ངན་མི་བྱེད་ལ། ཀྱི་ཧུད་ངའི་ཇོ་བོ། ཀྱི་ཧུད་ངའི་རྒྱལ་པོ་བརྗིད་ཉམས་ཅན་ཟེར་བཞིན་མྱ་ངན་མི་བྱེད་དོ། །  
\v 19 བོང་བུ་ཞིག་སྐུང་བ་བཞིན་དུ་དེ་བསྐུང་བར་འགྱུར་ལ། ཡེ་རུ་སཱ་ལེམ་གྱི་མཁར་སྒོའི་ཕྱི་རོལ་ཏུ་དྲུད་ནས་གཡུག་པར་འགྱུར་ཞེས་གསུངས་སོ། །  
\v 20 ཀྱེ་ཡེ་རུ་སཱ་ལེམ། ཁྱོད་ཀྱི་མནའ་བཅད་ཐམས་ཅད་མེད་པར་བཟོས་པས། ཁྱོད་རང་ཡར་ལེ་པཱ་ནོན་དུ་སོང་ལ་འོ་དོད་བོས་ཤིག པཱ་ཤན་དུ་སྒྲ་སྒྲོགས་ཤིག ཨ་བཱ་རིམ་ནས་འོ་དོད་བོས་ཤིག  
\v 21 ཁྱོད་རང་དར་བའི་དུས་སུ་བདག་གིས་ཁྱོད་ལ་སྨྲས་ཀྱང་ཁྱོད་ཀྱིས་ངས་མི་མཉན་ཞེས་སྨྲས། ཁྱོད་ནི་གཞོན་པའི་དུས་ནས་འདི་བཞིན་ཡིན་ཏེ་ངའི་བཀའ་ལ་མ་མཉན་ཏོ། །  
\v 22 ཁྱོད་ཀྱི་རྫི་བོ་ཐམས་ཅད་དྲག་རླུང་གིས་འཁུར་ཞིང་ཁྱོད་ཀྱི་མནའ་བཅད་རྣམས་བཙོན་དུ་འཁྲིད་པར་འགྱུར་བས། དུས་དེར་ཁྱོད་ནི་རང་གི་སྤྱོད་ངན་གྱི་དབང་གིས་ནོངས་ཤིང་ངོ་ཚ་བར་འགྱུར།  
\v 23 ལེ་པཱ་ནོན་དུ་སྡོད་པ་དང་ཐང་ཤིང་གི་དཀྱིལ་དུ་ཚང་བཅའ་མཁན་ཁྱོད་ལ། སྡུག་བསྔལ་བྱུང་ནས་ཕྲུ་གུ་བཙའ་བའི་བུད་མེད་ལ་ཟུག་གཟེར་རྒྱག་པ་ལྟ་བུའི་དུས་དེར་ཁྱོད་ཀྱིས་ཅི་འདྲའི་འཁུན་སྒྲ་འབྱིན་ནམ།   
\p
\v 24 དཀོན་མཆོག་ཡ་ཝཱེས་འདི་སྐད་དུ། བདག་གིས་རང་གི་ཚེ་སྲོག་དཔང་དུ་བཙུགས་ནས་མནའ་བསྐྱལ་བ་སྟེ། ཡེ་ཧོ་ཡཱ་ཀིམ་གྱི་བུ་སྟེ་ཡ་ཧུ་དཱའི་རྒྱལ་པོ་ཀོན་ཡཱ་ནི་ངའི་གཡས་ལག་གི་མཛུབ་དཀྲིས་དམ་ཕྲུག་ཅན་ \f + \ft འདིར་མཛུབ་དཀྲིས་དམ་ཕྲུག་ཅན་ཞེས་པ་ནི་མི་སྒེར་གྱི་རྟགས་ཁྱད་པར་ཅན་བརྐོས་ཡོད་པའི་མཛུབ་དཀྲིས་ཡིན་ལ། མཛུབ་དཀྲིས་འདི་རིགས་ཀྱིས་འཇིམ་པ་དང་ཡང་ན་སྤྲ་ཚིལ་སྟེང་དམ་ཕྲུག་ཕབ་ནས་ཕྱག་རྒྱ་འདེབས་མཁན་གྱི་ཐོབ་ཐང་མཚོན་པ་ཡིན། \f*ཡིན་ནའང་། ངས་ཁྱོད་ངའི་མཛུབ་མོ་ནས་མར་བླངས་ཏེ།  
\v 25 ཁྱོད་ཀྱི་སྲོག་སྙེག་མཁན་དང་ཁྱོད་རང་འཇིགས་པའི་མི་སྟེ། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་དང་ཀལ་དི་པའི་ལག་ཏུ་གཏོད་པར་བྱའོ། །  
\v 26 ཡང་ངས་ཁྱོད་རང་ཁྱོད་སྐྱེས་པའི་མ་དང་བཅས་ཁྱོད་ཅག་གི་སྐྱེ་ཡུལ་མིན་པའི་ཡུལ་དུ་སྐྲོད་པར་བྱ་ཞིང་། ཁྱོད་རྣམས་དེ་རུ་མ་སྐྱེས་ཀྱང་དེ་རུ་འཆི་བར་འགྱུར་ལ།  
\v 27 ཁྱོད་རྣམས་སེམས་ནས་ཕྱིར་རང་ཡུལ་དུ་ལོག་འདོད་ཀྱང་ནམ་ཡང་ཕྱིར་ལོག་པར་མི་འགྱུར་ཞེས་གསུངས་སོ། །  
\v 28 ཀོན་ཡཱ་བྱ་བའི་མི་འདི་ནི་མི་ཡིས་མཐོང་ཆུང་བྱེད་པ་དང་དུམ་བུར་བཅག་པའི་རྫ་སྣོད་དམ། སུས་ཀྱང་མི་འདོད་པའི་སྣོད་ཡིན་ནམ། དེ་དང་དེའི་བུ་རྒྱུད་དག་ནི་ཅིའི་ཕྱིར་ཆ་རྒྱུས་མེད་པའི་ཡུལ་དུ་བསྐྲད་པ་ཡིན་ནམ།  
\v 29 ཀྱེ་ས་གཞི། ཀྱེ་ས་གཞི། ཀྱེ་ས་གཞི། དཀོན་མཆོག་ཡ་ཝཱེའི་བཀའ་ལ་ཉོན་ཅིག  
\v 30 དཀོན་མཆོག་ཡ་ཝཱེས་འདི་སྐད་དུ། དེང་ཕྱིན་དཱ་བིད་ཀྱི་རྒྱལ་ཁྲིར་བཞུགས་ཏེ་ཡ་ཧུ་དཱ་ལ་སྲིད་བྱེད་དུ་མི་དེའི་བུ་རྒྱུད་ལས་གཅིག་ཀྱང་མི་འབྱུང་བས་ན། འདི་ལ་བུ་མེད་པའི་མི་དང་མི་ཚེ་གང་པོར་དོན་གང་ཡང་མི་འགྲུབ་པའི་མི་ཞེས་ཡི་གེར་ཁོད་ཅིག་ཅེས་གསུངས་སོ། །   
\c 23
\cl ལེའུ་ཉེར་གསུམ་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 མ་འོངས་པའི་རེ་བ།  
\p
\v 1 དཀོན་མཆོག་ཡ་ཝཱེས་འདི་སྐད་དུ། ངའི་རྩྭ་སའི་ལུག་རྣམས་བསད་ནས་ཁ་འཐོར་དུ་གཏོང་བའི་རྫི་བོ་རྣམས་ལ་ཆག་སྒོ་འབྱུང་ཞེས་གསུངས།  
\v 2 དེ་བས་ཡེས་ར་ཨེལ་གྱི་དཀོན་མཆོག་ཡ་ཝཱེས་ཁོང་གི་འབངས་མི་འཚོ་སྐྱོང་བྱེད་པའི་རྫི་བོ་རྣམས་ཀྱི་སྐོར་ལ་འདི་སྐད་དུ། ཁྱོད་ཚོས་ངའི་ལུག་ཁྱུ་ཁ་འཐོར་དུ་བཏང་ནས་ཕར་བསྐྲད་ཅིང་དེ་དག་ལ་ལྟ་སྐྱོང་མ་བྱས་པས། ལྟོས་ཤིག བདག་གིས་ཁྱོད་རྣམས་ཀྱི་སྤྱོད་ངན་ལ་ཉེས་ཆད་གཅོད་པར་འགྱུར་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །  
\v 3 བདག་གིས་དངོས་སུ་རང་གི་ལུག་ཁྱུ་ནས་ལུས་པ་རྣམས་དེད་པའི་ཡུལ་ཀུན་ནས་ཚུར་བསྡུས་ཏེ། དེ་དག་སླར་ཡང་རང་གི་ལུག་རར་ཁྲིད་ནས་རྒྱུད་འཕེལ་བར་བྱེད་དོ། །  
\v 4 ཡང་ངས་རྫི་བོ་རྣམས་བསྐོས་ནས་དེ་དག་འཚོ་སྐྱོང་བྱེད་དུ་འཇུག་པ་དང་། དེ་རྣམས་ལ་འཇིགས་སྣང་དང་དངངས་སྐྲག་ཅི་ཡང་མེད་ལ། གཅིག་ཀྱང་བོར་མི་འགྱུར་ཞེས་དཀོན་མཆོག་ཡ་ཝཱེས་གསུངས་པའོ། །  
\v 5 ལྟོས་ཤིག ངས་དཱ་བིད་ཀྱི་ཆེད་དུ་དྲང་བདེན་གྱི་མྱུ་གུ་བསྐྱེད་པའི་དུས་དེ་སླེབས་ལ་ཉེ། དེས་རྒྱལ་སྲིད་ཀྱི་དབང་འཛིན་ཞིང་མཁས་པར་སྤྱོད་དེ། ས་གཞིའི་སྟེང་དུ་དྲང་གཞག་དང་དྲང་བདེན་སྤྱོད་པར་འགྱུར།  
\v 6 ཁོང་གི་སྐུ་རིང་དུ་ཡ་ཧུ་དཱ་ལ་ཐར་པ་འཐོབ་པར་འགྱུར་ཞིང་། ཡེས་ར་ཨེལ་ཡང་བདེ་བར་གནས་པར་འགྱུར་བས། ཁོང་གི་མཚན་ལ་ཡ་ཝཱེ་ངེད་ཅག་གི་དྲང་བདེན་ཞེས་འབོད་པར་འགྱུར་རོ་ཞེས་དཀོན་མཆོག་ཡ་ཝཱེས་གསུངས་སོ། །  
\v 7 ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། མི་རྣམས་ཀྱིས་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཡར་འདྲེན་མཁན་གཏན་དུ་གསོན་པོར་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་མི་བསྐྱལ་མོད།  
\v 8 འོན་ཀྱང་མི་རྣམས་ཀྱིས་ཡེས་ར་ཨེལ་པ་རྣམས་བྱང་ཕྱོགས་ཀྱི་ཡུལ་དང་། ཁོ་རྣམས་སྐྲོད་སའི་རྒྱལ་ཁམས་སོ་སོ་ནས་ཡར་འདྲེན་མཁན་གཏན་དུ་གསོན་པོར་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་གནའ་བསྐྱལ་བར་འགྱུར་རོ། །   
\s1 ལུང་སྟོན་པ་རྣམས་ལ་ཐ་ཚིག་སྒྲོག་པ།  
\p
\v 9 ལུང་སྟོན་པ་རྣམས་གླེང་ན། ངའི་སེམས་རང་གི་ནང་དུ་སྐྱོ་ཞིང་ངའི་རུས་པ་ཐམས་ཅད་འདར་བ་ཡིན། ཅི་ལ་ཞེ་ན། དཀོན་མཆོག་ཡ་ཝཱེ་དང་ཁོང་གི་བཀའ་དམ་པའི་དབང་གིས། ང་ནི་ར་བཟི་བའི་མི་དང་རྒུན་ཆང་བླུད་ནས་བཟི་བར་གྱུར་པའི་མི་དང་འདྲའོ། །  
\v 10 ཡུལ་ཁམས་ཡོངས་སུ་ལོག་གཡེམ་པས་ཁེངས་ཤིང་། དམོད་མོ་ཐེབས་པའི་རྐྱེན་གྱིས་ས་གཞི་ཡང་སྐྱོ་བར་གྱུར་ཏེ། དབེན་སྟོང་གི་རྩྭ་ཡང་སྐམ་མོ། །ཅི་ལ་ཞེ་ན། དེ་དག་གི་སྤྱོད་ལམ་ནི་ངན་པ་ཡིན་ལ། དེ་དག་གི་དབང་ནི་འགྲིག་སར་མ་སྤྱད་དོ། །  
\v 11 ཐ་ན་ལུང་སྟོན་པ་དང་མཆོད་དཔོན་གཉིས་ཀ་ཡང་དད་པ་མེད་དེ། ཐ་ན་ངའི་མཆོད་ཁང་ནང་དུའང་དེ་དག་གི་སྤྱོད་ངན་མཐོང་བྱུང་ཞེས་དཀོན་མཆོག་ཡ་ཝཱེས་གསུངས་པའོ། །  
\v 12 དེ་བས་ཁོ་རྣམས་ཀྱི་འགྲོ་ལམ་ནི་མུན་ནག་ཁྲོད་ཀྱི་འདྲེད་ས་དང་འདྲ་ཞིང་། དེ་དག་དེད་ནས་ལམ་དེར་འགྱེལ་བར་འགྱུར། ཅི་ལ་ཞེ་ན། དེ་དག་ལ་ཉེས་ཆད་གཅོད་པའི་ལོ་ཟླའི་ནང་དུ། ངས་དེ་དག་གི་སྟེང་དུ་ཆག་སྒོ་འབྱུང་བར་བྱེད་དོ་ཞེས་དཀོན་མཆོག་ཡ་ཝཱེས་གསུངས་པའོ། །  
\v 13 ངས་སཱ་མར་ཡ་ཡི་ལུང་སྟོན་པའི་ནང་དུ་ཞེན་པ་ལོག་པའི་དོན་མཐོང་པ་སྟེ། དེ་དག་གིས་པཱ་ཨལ་ལ་བརྟེན་ནས་ལུང་བསྟན་པ་དང་། ངའི་འབངས་མི་ཡེས་ར་ཨེལ་ནི་ལོག་ལམ་དུ་བཅུག་གོ །  
\v 14 ངས་ཡེ་རུ་སཱ་ལེམ་གྱི་ལུང་སྟོན་པའི་ནང་དུ་འཇིགས་སུ་རུང་བའི་དོན་མཐོང་སྟེ། དེ་དག་གིས་ལོག་གཡེམ་བྱེད་ཅིང་རྫུན་གྱི་ནང་དུ་སྤྱད་པ་སྤྱོད་པ་དང་། ཡང་ངན་པའི་ལག་པ་བརྟན་པོར་བྱས་ནས་དེ་དག་ལས་སུ་ཞིག་གིས་ཀྱང་རང་གི་སྤྱོད་ངན་མ་དོར་ལ། དེ་ཐམས་ཅད་ངའི་མདུན་དུ་སཱ་དོམ་བཞིན་དང་། ཡེ་རུ་སཱ་ལེམ་གྱི་ཡུལ་མི་རྣམས་ནི་གཱ་མོ་ར་དང་འདྲ་བས།  
\v 15 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ལུང་སྟོན་པ་འདི་རྣམས་ཀྱི་སྐོར་ལ་འདི་སྐད་དུ། ཡེ་རུ་སཱ་ལེམ་གྱི་ལུང་སྟོན་པ་རྣམས་ལས་ཆོས་མིན་གྱི་དོན་བྱུང་ནས་ཡུལ་ཁམས་ཡོངས་སུ་ཁྱབ་པས། ལྟོས་ཤིག ངས་དེ་དག་ལ་ཟས་སུ་མཁན་པ་དང་བཏུང་བར་དུག་ཆུ་སྦྱིན་པར་བྱའོ་ཞེས་གསུངས།  
\v 16 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་ཚོར་ལུང་བསྟན་སྨྲ་བའི་ལུང་སྟོན་པ་འདི་དག་གི་གཏམ་ལ་མ་མཉན་ཞིག དེ་དག་གིས་ཁྱོད་རྣམས་ལ་རེ་བ་སྟོང་བ་ཡོད་པར་བྱེད་ཅིང་། དེ་དག་གིས་སྨྲས་པའི་ཞལ་གཟིགས་ནི་རང་སེམས་ནས་བྱུང་བ་ལས་དཀོན་མཆོག་ཡ་ཝཱེའི་ཞལ་ནས་བྱུང་བ་མ་ཡིན་ནོ། །  
\v 17 དེ་དག་གིས་བདག་ལ་མཐོང་ཆུང་བྱེད་པའི་མི་ལ་རྒྱུན་ཆད་མེད་པར་འདི་ལྟར། དཀོན་མཆོག་ཡ་ཝཱེས་འདི་སྐད་དུ། ཁྱོད་རྣམས་ཞི་ཞིང་བདེ་བར་གནས་པ་ཡིན་གསུངས་ཞེས་སྨྲ་ཞིང་། ཡང་རང་གི་སེམས་རྒྱུད་གྱོང་པོ་ལྟར་སྤྱད་པ་སྤྱོད་པ་ཐམས་ཅད་ལ་འདི་ལྟར། ཁྱོད་ལ་ཆག་སྒོ་འབྱུང་མི་སྲིད་ཅེས་སྨྲ་བ་ཡིན་ཞེས་གསུངས་སོ། །  
\v 18 འོན་ཀྱང་ཁོ་རྣམས་ལས་སུ་ཞིག་དཀོན་མཆོག་ཡ་ཝཱེའི་ཚོགས་ལ་ཞུགས་ནས་ཁོང་གི་བཀའ་ལ་མཉན་ཞིང་དེ་རྟོགས་པ་ཡིན་ནམ། སུ་ཞིག་གིས་རྣ་བ་བླགས་ནས་ཁོང་གི་བཀའ་ལ་མཉན་ཞིང་དེ་ཐོས་པ་ཡིན་ནམ།  
\v 19 ལྟོས་ཤིག དཀོན་མཆོག་ཡ་ཝཱེའི་ཐུགས་ཁྲོ་ནི་རླུང་དམར་དང་འདྲ་ཞིང་། རླུང་འཚུབ་དྲག་པོ་ཡིན་ཏེ་ངན་པའི་མགོ་ལ་འཁོར་བར་འགྱུར།  
\v 20 དཀོན་མཆོག་ཡ་ཝཱེའི་ཐུགས་དགོངས་རྣམས་དངོས་སུ་འགྲུབ་པའི་བར་དུ། ཁོང་གི་ཐུགས་ཁྲོ་ལ་ཞི་བ་མེད་ཅིང་། མཐའ་མའི་ཉིན་མོ་དག་ལ་ཁྱོད་ཅག་གིས་དོན་འདི་ཐམས་ཅད་རྟོགས་པར་འགྱུར་རོ། །  
\v 21 ངས་ལུང་སྟོན་པ་དེ་དག་མ་མངགས་ཀྱང་དེ་རྣམས་རང་རང་གང་སར་བརྒྱུགས་ཤིང་། ངས་དེ་དག་ལ་བཀའ་མ་བསྒོས་ཀྱང་དེ་རྣམས་རང་གིས་ལུང་བསྟན་ནོ། །  
\v 22 ཇི་སྟེ་དེ་རྣམས་ངའི་ཚོགས་ལ་ཞུགས་པ་ཡིན་ན། བདག་གི་བཀའ་རྣམས་ངའི་འབངས་མི་ལ་བསྒྲག་པར་འགྱུར་ཞིང་། དེ་རྣམས་ངན་པའི་ལམ་ནས་བཟློགས་ཏེ་རང་གི་སྤྱོད་ངན་རྣམས་དང་འབྲལ་བར་བྱེད་དོ། །  
\v 23 ང་ནི་ཁྱོད་རྣམས་དང་ཉེ་བའི་དཀོན་མཆོག་ཁོ་ན་ཡིན་ནམ། ཁྱོད་རྣམས་དང་རྒྱང་ཐག་རིང་བའི་དཀོན་མཆོག་ཀྱང་མ་ཡིན་ནམ་ཞེས་དཀོན་མཆོག་ཡ་ཝཱེས་གསུངས་སོ། །  
\v 24 ངས་མི་མཐོང་བའི་ཆེད་དུ་མི་ནི་གསང་བའི་གནས་སུ་སྦ་ནུས་སམ། ང་ནི་གནམ་ས་གཉིས་ལ་ཁྱབ་ཡོད་པ་མ་ཡིན་ནམ་ཞེས་དཀོན་མཆོག་ཡ་ཝཱེས་གསུངས།  
\v 25 ལུང་སྟོན་པ་ཚོས་ངའི་མིང་གཡར་ཏེ་རྫུན་གྱི་ལུང་སྟོན་ཞིང་། དེ་དག་གིས་ངས་རྨི་ལམ་རྨིས་སོང་། ངས་རྨི་ལམ་རྨིས་སོང་ཞེས་སྨྲ་བ་ངས་ཐོས་བྱུང་།  
\v 26 ལུང་སྟོན་པ་དེ་དག་གིས་འདི་ལྟར་བསམ་བཞིན་ནམ་དུས་བར་དུ་ལུས་སམ། ཁོ་ཚོས་རྫུན་སྨྲ་ཞིང་སེམས་ལ་གཡོ་སྒྱུས་བཀང་ཡོད་དོ། །  
\v 27 དེ་དག་གིས་ཕན་ཚུན་ལ་རང་གི་རྨི་ལམ་བཤད་ན། ངའི་འབངས་མིའི་མེས་པོ་རྣམས་ཀྱིས་པཱ་ཨལ་གྱི་དབང་གིས་ངའི་མིང་བརྗེད་པ་ནང་བཞིན་དེ་དག་ལའང་ང་རང་བརྗེད་དུ་འཇུག་ནུས་པར་འདོད་པ་རེད།  
\v 28 རྨི་ལམ་ཐོབ་པའི་ལུང་སྟོན་པ་ལ་རྨི་ལམ་བཤད་དུ་ཆུག ཡིན་ནའང་ངའི་བཀའ་དང་ལེན་བྱས་ཡོད་པ་དེས་གཞུང་དྲང་སྒོས་ངའི་བཀའ་ཤོད་ཅིག སོག་མ་ནི་གྲོ་དང་བསྡུར་ནུས་སམ་ཞེས་དཀོན་མཆོག་ཡ་ཝཱེས་གསུངས་པའོ། །  
\v 29 ངའི་བཀའ་ནི་མེ་ལྟར་མ་ཡིན་ནམ། དེ་ནི་ཕ་བོང་སིལ་བུར་གཏོར་བའི་ཐོ་བ་དང་མི་འདྲའམ་ཞེས་དཀོན་མཆོག་ཡ་ཝཱེས་གསུངས་སོ། །  
\v 30 དེ་བས་ལྟོས་ཤིག ལུང་སྟོན་པ་དེ་དག་གིས་ཕན་ཚུན་ནས་ཚིག་བརྐུས་ཏེ་ངའི་བཀའ་རུ་བྱས་པས། ང་ནི་དེ་དག་གི་དགྲ་རུ་འགྱུར་ཞེས་དཀོན་མཆོག་ཡ་ཝཱེས་གསུངས།  
\v 31 ལུང་སྟོན་པ་དེ་དག་གིས་རང་གི་ལྕེ་ཡིས་འདི་ནི་དཀོན་མཆོག་ཡ་ཝཱེས་གསུངས་པ་ཡིན་ཞེས་ཟེར་ཞིང་། ལྟོས་ཤིག ང་ནི་དེ་དག་གི་དགྲ་རུ་འགྱུར་ཞེས་དཀོན་མཆོག་ཡ་ཝཱེས་གསུངས།  
\v 32 ལྟོས་ཤིག ང་ནི་རྨི་ལམ་རྫུན་མར་བརྟེན་ནས་ལུང་སྟོན་ཁུལ་བྱེད་པ་དེ་དག་གི་དགྲ་རུ་འགྱུར། ཁོ་ཚོས་རྨི་ལམ་དེ་དག་སྨྲས་ནས་རྫུན་དང་འུར་ཤོབ་ཀྱིས་ངའི་འབངས་མི་ལོག་ལམ་དུ་དྲངས་པ་ཡིན། ངས་ཁོ་རྣམས་མ་མངགས་ལ་དེ་དག་ལ་བཀའ་ཡང་མ་བསྒོས། དེ་དག་ནི་མི་འདི་རྣམས་ལ་ཕན་ཐོགས་ཅི་ཡང་མེད་ཅེས་དཀོན་མཆོག་ཡ་ཝཱེས་གསུངས་པའོ། །   
\p
\v 33 མི་འདི་རྣམས་དང་ཡང་ན་ལུང་སྟོན་པའམ། མཆོད་དཔོན་བཅས་ལས་སུ་ཞིག་གིས་ཁྱོད་ལ། དཀོན་མཆོག་ཡ་ཝཱེ་ནས་བཀའ་ལུང་ཅི་ཞིག་ཡོད་དམ་ཞེས་དྲིས་ན། ཁྱོད་ཀྱིས་དེ་དག་ལ་ལན་དུ། བཀའ་ལུང་ཅི་ཡོད། ངས་ཁྱོད་བསྐྱུར་བར་བྱའོ་ཞེས་ཤོད་ཅིག་ཅེས་དཀོན་མཆོག་ཡ་ཝཱེས་གསུངས་སོ། །  
\v 34 ཡང་ལུང་སྟོན་པ་དང་ཡང་ན་མཆོད་དཔོན་ནམ། མི་རྣམས་ལས་སུ་ཞིག་གིས་འདི་ནི་དཀོན་མཆོག་ཡ་ཝཱེའི་བཀའ་ལུང་ཡིན་ཞེས་སྨྲ་བ་ཡོད་ན། ངས་མི་དེ་དང་དེའི་ཁྱིམ་ལ་ཉེས་ཆད་གཅོད་དགོས།  
\v 35 ཁྱོད་རྣམས་ཀྱིས་རང་རང་གི་ཁྱིམ་མཚེས་དང་སྤུན་ཟླ་རྣམས་ལ་འདི་ལྟར། དཀོན་མཆོག་ཡ་ཝཱེས་བཀའ་ལན་ཅི་གནང་བྱུང་ངམ། དཀོན་མཆོག་ཡ་ཝཱེས་ཅི་གསུང་ངམ་ཞེས་དྲིས་ཤིག  
\v 36 ཁྱོད་རྣམས་ཀྱིས་ད་ནས་བཟུང་དཀོན་མཆོག་ཡ་ཝཱེའི་བཀའ་ལུང་ཞེས་མ་གླེང་ཞིག ཅི་ལ་ཞེ་ན། མི་རེ་རེས་སྨྲས་པའི་གཏམ་ནི་རང་རང་གི་བཀའ་ལུང་དུ་འགྱུར་ཏེ། ཁྱོད་རྣམས་ཀྱིས་གཏན་དུ་གསོན་པོར་བཞུགས་པའི་དཀོན་མཆོག་དང་། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ང་ཚོའི་དཀོན་མཆོག་གི་བཀའ་ལོག་བཤད་བྱས་པས་སོ། །  
\v 37 ཁྱོད་རྣམས་ཀྱིས་དཀོན་མཆོག་གི་ལུང་སྟོན་པ་ལ་འདི་ལྟར། དཀོན་མཆོག་ཡ་ཝཱེས་ཁྱོད་ལ་བཀའ་ལན་ཅི་གནང་བྱུང་ངམ། དཀོན་མཆོག་ཡ་ཝཱེས་ཅི་གསུང་ངམ་ཞེས་དྲིས་ཤིག  
\v 38 ཇི་སྟེ་ཁྱོད་ཅག་གིས་འདི་ནི་དཀོན་མཆོག་ཡ་ཝཱེའི་བཀའ་ལུང་ཡིན་ཞེས་སྨྲས་ན། དཀོན་མཆོག་ཡ་ཝཱེས་ངེས་པར་འདི་སྐད་དུ། ངས་སྔོན་ཆད་མི་མངགས་ནས་ཁྱོད་རྣམས་ལ་ད་ནས་བཟུང་འདི་ནི་དཀོན་མཆོག་ཡ་ཝཱེའི་བཀའ་ལུང་ཡིན་ཞེས་མ་ཟེར་ཞིག་ཅེས་འཕྲིན་བཏང་ཡང་། ཁྱོད་རྣམས་ཀྱིས་འདི་ནི་དཀོན་མཆོག་ཡ་ཝཱེའི་བཀའ་ལུང་ཡིན་ཞེས་སྨྲས་པས་ན།  
\v 39 ལྟོས་ཤིག ངས་ཁྱོད་རྣམས་བརྗེད་པར་འགྱུར་ཏེ། ཁྱོད་རྣམས་ནི་ངས་ཁྱོད་ཅག་དང་ཁྱོད་ཅག་གི་མེས་པོ་རྣམས་ལ་གནང་བའི་གྲོང་ཁྱེར་དང་བཅས་ངའི་མདུན་ནས་འདོར་བར་འགྱུར།  
\v 40 ཡང་ངས་ཁྱོད་ཅག་ལ་དུས་གཏན་གྱི་བརྙས་བཅོས་དང་། དུས་ནམ་ཡང་བརྗེད་པར་མི་འགྱུར་བའི་ངོ་ཚ་འབབ་པར་བྱའོ་ཞེས་གསུང་ངེས་ཡིན།   
\c 24
\cl ལེའུ་ཉེར་བཞི་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 སེ་ཡབ་ཀྱི་ཤིང་ཏོག་སླེ་པོ་གཉིས་ཀྱི་དཔེ།  
\p
\v 1 པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིམ་གྱི་བུ་ཡེ་ཀོན་ཡཱ་དང་། ཡ་ཧུ་དཱའི་འགོ་དཔོན་རྣམས་དང་། ཤིང་བཟོ་དང་། མགར་པ་རྣམས་བཙོན་དུ་བཟུང་སྟེ་ཡེ་རུ་སཱ་ལེམ་ནས་པཱ་པེལ་ལོན་དུ་ཁྲིད་པ་དང་། དོན་འདིའི་རྗེས་སུ་དཀོན་མཆོག་ཡ་ཝཱེས་བདག་ལ་སྟོན་པར་མཛད་པ་ནི། ལྟོས་ཤིག དཀོན་མཆོག་ཡ་ཝཱེའི་མཆོད་ཁང་གི་མདུན་དུ་སེ་ཡབ་ཀྱི་ཤིང་ཏོག་སླེ་པོ་གཉིས་བཞག་ཡོད་དེ།  
\v 2 སླེ་པོ་གཅིག་གི་ནང་དུ་སེ་ཡབ་ཀྱི་ཤིང་ཏོག་ཤིན་ཏུ་ཡག་པོ་ཐོག་ཕུད་རྣམས་ཡོད་པ་དང་། སླེ་པོ་ཅིག་ཤོས་དེའི་ནང་དུ་རུལ་ནས་བཟའ་ཡང་མི་རུང་བའི་སེ་ཡབ་ཀྱི་ཤིང་ཏོག་རྣམས་ཡོད་པ་ལ།  
\v 3 དཀོན་མཆོག་ཡ་ཝཱེས་ང་ལ་འདི་སྐད་དུ། ཡེ་རེམ་ཡཱ། ཁྱོད་ཀྱིས་ཅི་ཞིག་མཐོང་ངམ་ཞེས་བཀའ་འདྲི་གནང་བ་དང་། ངས་ལན་དུ། ངས་སེ་ཡབ་ཀྱི་ཤིང་ཏོག་རྣམས་མཐོང་སྟེ། སེ་ཡབ་ཀྱི་ཤིང་ཏོག་ཡག་པོ་ནི་ཤིན་ཏུ་ཡག་ལ། རུལ་བར་གྱུར་པ་ནི་རུལ་ནས་བཟའ་ཡང་མི་རུང་ངོ་ཞེས་ཞུས་པ་ཡིན།  
\v 4 དེ་ནས་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་བ་འདི་ལྟ་སྟེ།  
\v 5 ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། བཙོན་དུ་བཟུང་བའི་ཡ་ཧུ་དཱ་པ་སྟེ། ངས་གནས་འདི་ནས་ཀལ་དི་པའི་ཡུལ་དུ་བསྐྲད་པ་དེ་དག་ལ་ངས་སེ་ཡབ་ཀྱི་ཤིང་ཏོག་ཡག་པོ་འདི་དག་ནང་བཞིན་བདག་སྐྱོང་བྱས་ནས་བྱིན་རླབས་འཐོབ་པར་འགྱུར།  
\v 6 ངས་དེ་དག་ལ་བདག་སྐྱོང་བྱས་ནས་བྱིན་རླབས་འཐོབ་པར་བྱེད་པ་དང་། དེ་དག་ཁྲིད་ནས་ཡུལ་འདིར་ཕྱིར་ལོག་པར་འགྱུར། ཡང་ངས་དེ་དག་འཛུགས་པར་བྱ་སྟེ་བཤིག་པར་མི་འགྱུར་ལ། ངས་དེ་དག་བཙུགས་ནས་འབྱིན་པར་མི་བྱའོ། །  
\v 7 ཡང་བདག་ནི་ཡ་ཝཱེ་ཡིན་པ་རྟོགས་ནུས་པའི་སེམས་ཤིག་ངས་དེ་དག་ལ་གནང་ཞིང་། དེ་རྣམས་ངའི་འབངས་མི་དང་ང་དངོས་སུ་དེ་དག་གི་དཀོན་མཆོག་ཏུ་གྱུར་ནས། དེ་དག་སེམས་གཅིག་གིས་ངའི་ཕྱོགས་སུ་ལོག་པར་འགྱུར་ཞེས་གསུངས་སོ། །  
\v 8 དཀོན་མཆོག་ཡ་ཝཱེས་འདི་སྐད་དུ། དེ་ཡང་སེ་ཡབ་ཀྱི་ཤིང་ཏོག་རུལ་ནས་བཟའ་བར་ཡང་མི་རུང་བ་དེ་བཞིན་དུ། ངས་ཡ་ཧུ་དཱའི་རྒྱལ་པོ་ཚིད་ཀི་ཡཱ་དང་དེའི་འགོ་དཔོན་རྣམས་དང་། ཡེ་རུ་སཱ་ལེམ་དུ་ལུས་པའི་ཡུལ་མི་རྣམས་ཏེ་གནས་འདིར་ལུས་པ་རྣམས་དང་། ཡང་ཨེ་ཅིབ་ཡུལ་དུ་གཞིས་ཆགས་པའི་ཡ་ཧུ་དཱ་པ་རྣམས་སྤྲོད་པར་བྱའོ། །  
\v 9 ངས་དེ་དག་ནི་ས་སྟེང་གི་རྒྱལ་ཕྲན་ཡོངས་སུ་འཇིགས་སྣང་ཅན་དང་སྐྱུག་བྲོ་བར་བྱ་སྟེ། ངས་དེ་དག་བསྐྲད་སའི་ཡུལ་སོ་སོར་དེ་དག་ནི་མི་ཡིས་ངོ་ཚ་གཏོད་ས་དང་། གཏམ་དཔེ། ཟུར་ཟ་བྱེད་ཡུལ། དམོད་མོ་འདེབས་ཡུལ་བཅས་སུ་འགྱུར་བར་བྱ།  
\v 10 དེ་དག་དང་དེའི་ཕ་མེས་ལ་གནང་བའི་ཡུལ་ཁམས་ནས་ཚར་གཅོད་པའི་བར་དུ། ངས་དེ་དག་གི་སྟེང་ལ་རལ་གྲི་དང་མུ་གེ རིམས་ནད་བཅས་གཏོང་བར་བྱའོ་ཞེས་གསུངས་སོ། །   
\c 25
\cl ལེའུ་ཉེར་ལྔ་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 བྱང་ཕྱོགས་ནས་འོང་བའི་དགྲ་བོ།  
\p
\v 1 པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱི་སྲིད་ལོ་དང་པོའམ། ཡ་ཧུ་དཱའི་རྒྱལ་པོ་ཡོ་ཤི་ཡཱའི་བུ་ཡེ་ཧོ་ཡཱ་ཀིམ་བྱ་བའི་སྲིད་ལོ་བཞི་པར། ཡ་ཧུ་དཱའི་མི་ཐམས་ཅད་ཀྱི་སྐོར་དུ་དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་སྟེ།  
\v 2 ལུང་སྟོན་པ་ཡེ་རེམ་ཡཱ་ཡིས་བཀའ་འདི་རྣམས་ཡ་ཧུ་དཱའི་མི་ཐམས་ཅད་དང་ཡེ་རུ་སཱ་ལེམ་གྱི་ཡུལ་མི་ཀུན་ལ་སྦྲན་ནས་འདི་སྐད་དུ།  
\v 3 དེ་ཡང་ཡ་ཧུ་དཱའི་རྒྱལ་པོ་ཨ་མོན་གྱི་བུ་ཡོ་ཤི་ཡཱ་བྱ་བའི་སྲིད་ལོ་བཅུ་གསུམ་པ་ནས་དེ་རིང་གི་བར་དུ་མི་ལོ་ཉེར་གསུམ་གྱི་རིང་ལ། དཀོན་མཆོག་ཡ་ཝཱེའི་བཀའ་ནི་རྒྱུན་དུ་ང་ལ་བྱུང་ཞིང་། ངས་ཀྱང་ཡང་ནས་ཡང་དུ་ཁྱོད་ཅག་ལ་སྨྲས་ཀྱང་ཁྱོད་ཅག་གིས་མ་མཉན་ཏོ། །  
\v 4 དཀོན་མཆོག་ཡ་ཝཱེས་ཡང་ནས་ཡང་དུ་ཁོང་གི་ཞབས་ཕྱི་ལུང་སྟོན་པ་རྣམས་ཁྱོད་ཚོའི་མདུན་དུ་མངགས་ནའང་། ཁྱོད་ཚོས་མ་མཉན་ལ་རྣ་བ་གཏད་ནས་མ་མཉན་ཏོ། །  
\v 5 ཁོང་རྣམས་ཀྱིས་ཁྱོད་ཅག་ལ་འདི་ལྟར་གསུངས་ཏེ། ཁྱོད་རྣམས་མི་རེ་རེས་འགྱོད་བཤགས་དང་བཅས་རང་རང་གི་ལོག་ལམ་དང་སྤྱོད་ངན་རྣམས་སྤངས་ན། དཀོན་མཆོག་ཡ་ཝཱེས་ཁྱོད་དང་ཁྱོད་ཀྱི་ཕ་མེས་རྣམས་ལ་གནང་བའི་ཡུལ་ཁམས་སུ་དུས་གཏན་དུ་གནས་པར་འགྱུར་ཞེས་པའོ་ཞེས་གསུངས།  
\v 6 ལྷ་གཞན་རྣམས་ཀྱི་རྗེས་སུ་མ་འབྲང་ཞིག དེ་དག་ལ་ཞབས་ཏོག་མ་བསྒྲུབ་ཕྱག་ཀྱང་མ་བཙལ་ཞིག རང་གི་ལག་པའི་བཟོས་པ་ཡིས་བདག་ལ་ཁོང་ཁྲོ་ཡང་མ་སློང་ཞིག དེ་ནས་བདག་གིས་ཁྱོད་ཅག་ལ་གནོད་པ་འབྱུང་བར་མི་བྱའོ་ཞེས་སྨྲས་ཀྱང་།  
\v 7 ཁྱོད་ཅག་གིས་ང་ལ་མ་མཉན་པར། རང་གི་ལག་པས་བཟོས་པ་ཡིས་ང་ལ་ཁོང་ཁྲོ་བསླངས་ནས་རང་གིས་རང་ལ་གནོད་བསྐྱལ་ཏོ་ཞེས་དཀོན་མཆོག་ཡ་ཝཱེས་གསུངས་པའོ། །  
\v 8 དེ་བས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་གིས་ངའི་བཀའ་ལ་མ་མཉན་པའི་རྐྱེན་གྱིས།  
\v 9 ལྟོས་ཤིག ངས་བྱང་ཕྱོགས་ཀྱི་མི་ཀུན་དང་རང་གི་བྲན་པོ་སྟེ་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་ཁྲིད་འོངས་ནས། ཡུལ་འདི་དང་འདིའི་འབངས་རྣམས་དང་མཐའ་འཁོར་དུ་སྡོད་པའི་མི་ཡོངས་ལ་རྒོལ་བར་བྱེད་དོ། །ངས་དེ་དག་རྩ་བ་ནས་མེད་པར་བཏང་སྟེ། དེ་དག་ནི་མི་ལ་འཇིགས་སྣང་བསྐྱེད་པ་དང་མི་རྣམས་འཕྱ་དགོད་བྱེད་ཡུལ་དང་། དུས་གཏན་དུ་ཞིག་རོར་ལུས་པའི་གནས་བཅས་སུ་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །  
\v 10 ཡང་ངས་དེ་དག་གི་ནང་ནས་དགའ་སྤྲོ་དང་དགོད་སྒྲ། མག་གསར་དང་བག་མའི་སྐད། རང་འཐག་གི་སྐད། མར་མེའི་འོད་བཅས་མེད་པར་བྱའོ། །  
\v 11 ཡུལ་ཁམས་འདི་ཐམས་ཅད་ཞིག་རོར་གྱུར་ནས་མི་རྣམས་འཇིགས་སྣང་སྐྱེ་བའི་གནས་སུ་འགྱུར་ཞིང་། མི་རིགས་འདི་དག་གིས་ལོ་བདུན་ཅུའི་རིང་དུ་པཱ་པེལ་ལོན་གྱི་རྒྱལ་པོར་གཡོག་བྱེད་པར་འགྱུར་རོ། ། \f + \ft ཡ་ཧུ་དཱའི་མི་རྣམས་ནི་སྤྱི་ལོ་སྔོན་གྱི་607ལོ་ནས་537ལོའི་བར་ཏེ་མི་ལོ་བདུན་ཅུའི་རིང་ལ་པཱ་པེལ་ལོན་དུ་བཙན་ཁྲིད་བྱས་ཤིང་། སྤྱི་ལོ་སྔོན་གྱི་539ལོར་པཱ་པེལ་ལོན་དབང་དུ་བསྒྱུར་བ་དང་དེ་ནས་ལོ་གཉིས་ཀྱི་རྗེས་སུ་སྟེ་537ལོར་ཡ་ཧུ་དཱའི་མི་སྡེ་ཕྱིར་རང་ཡུལ་དུ་ལོག་པའི་སྐལ་བ་ལྡན་པ་རེད།\f*  
\v 12 ལོ་བདུན་ཅུ་རྫོགས་པའི་རྗེས་སུ་ངས་པཱ་པེལ་ལོན་གྱི་རྒྱལ་པོ་དང་དེའི་མི་རིགས་ཏེ། ཀལ་དི་པའི་ཡུལ་ཁམས་ལ་ཁོ་ཚོའི་སྡིག་ཉེས་ལྟར་ཆད་པ་བཅད་ནས། ཡུལ་ཁམས་དེ་དུས་གཏན་དུ་ཞིག་རོར་ལུས་པར་བྱའོ་ཞེས་དཀོན་མཆོག་ཡ་ཝཱེས་གསུངས།  
\v 13 མདོ་འདིའི་ནང་དུ་བཀོད་པ་ཐམས་ཅད་དང་། ངས་ཡུལ་ཁམས་དེའི་སྐོར་ལ་སྨྲས་པའི་བཀའ་སྟེ། ཡེ་རེམ་ཡཱ་ཡིས་རྒྱལ་ཁམས་འདི་དག་གི་སྐོར་ལ་ལུང་བསྟན་པ་ཐམས་ཅད་དེ་དག་གི་སྟེང་དུ་འབྱུང་བར་འགྱུར་རོ། །  
\v 14 རྒྱལ་ཁམས་མང་པོ་དང་རྒྱལ་པོ་ཆེན་པོ་རྣམས་ཀྱིས་ཀལ་དི་པ་རྣམས་བྲན་དུ་འཁོལ་ཞིང་། ངས་ཀྱང་དེ་དག་གི་སྤྱོད་པ་དང་ལག་པས་བཟོས་པ་བཞིན་ལན་འཇལ་བར་བྱའོ་ཞེས་གསུངས་སོ། །   
\s1 དཀོན་མཆོག་གིས་ཡུལ་ཁམས་རྣམས་ལ་ཉེས་ཆད་གཅོད་པ།  
\p
\v 15 ཡེས་ར་ཨེལ་གྱི་དཀོན་མཆོག་ཡ་ཝཱེས་ང་ལ་འདི་སྐད་དུ། ངའི་ལག་ནས་ཁྲོ་གཏུམ་གྱི་ཕོར་བ་འདི་བླངས་ཏེ། ངས་ཁྱོད་མངགས་པའི་ཡུལ་ཁམས་སོ་སོའི་མི་རིགས་ཐམས་ཅད་ལ་འཐུང་དུ་ཆུག་དང་།  
\v 16 ངས་དེ་དག་གི་ནང་དུ་རལ་གྲི་བཏང་བས། དེ་དག་གིས་འཐུང་རྗེས་ཕར་ཡོར་ཚུར་ཡོར་བྱེད་ཅིང་སྨྱོ་བར་འགྱུར་རོ་ཞེས་གསུངས་པས།  
\v 17 ངས་ཡ་ཝཱེའི་ཕྱག་ལས་ཕོར་བ་དེ་བླངས་ནས། དཀོན་མཆོག་ཡ་ཝཱེས་བདག་མངགས་པའི་ཡུལ་ཁམས་སོ་སོའི་མི་རིགས་ཐམས་ཅད་ལ་འཐུང་དུ་བཅུག་པ་སྟེ།  
\v 18 དེའི་ནང་དུ་ཡེ་རུ་སཱ་ལེམ་དང་ཡ་ཧུ་དཱའི་གྲོང་ཁྱེར་རྣམས་དང་། ཡེ་རུ་སཱ་ལེམ་གྱི་རྒྱལ་པོ་རྣམས་དང་། དེའི་འགོ་དཔོན་རྣམས་ཡོད་ལ། དེ་དག་གིས་གྲོང་ཁྱེར་དེ་ནི་ཞིག་རོར་ལུས་པ་དང་། འཇིགས་སུ་རུང་བ་དང་འཕྱ་དགོད་དང་དམོད་མོ་བྱེད་ཡུལ་དུ་གྱུར་ནས་དེ་རིང་གི་ཉིན་མོ་དང་འདྲ་བར་བྱས།  
\v 19 ཡང་དེའི་ནང་དུ་ཨེ་ཅིབ་ཀྱི་རྒྱལ་པོ་ཕཱར་ཨོལ་དང་དེའི་འཁོར་གཡོག་རྣམས་དང་། རྒྱལ་བློན། དེའི་མི་ཐམས་ཅད་བཅས་དང་།  
\v 20 མི་རིགས་གཞན་མཐའ་དག་ཡོད་པ་དང་། ཡང་ཨུ་ཟཱ་ཡུལ་གྱི་རྒྱལ་པོ་ཐམས་ཅད་དང་། ཕེ་ལེ་ཤེད་པའི་ཡུལ་གྱི་རྒྱལ་པོ་ཐམས་ཅད་དང་། ཨ་ཤཱ་ཀེ་ལོན་དང་གཱ་ཟཱ། ཨེག་རོན། ཨ་སི་དོད་བཅས་ཀྱི་ལྷག་ལུས་རྣམས་ཀྱི་རྒྱལ་པོ་དང་།  
\v 21 ཨེ་དོམ་དང་མོ་ཨབ། ཨམ་མོན།  
\v 22 ཐཱར་བཅས་ཀྱི་རྒྱལ་པོ་ཐམས་ཅད་དང་། ཚི་ཏུན་གྱི་རྒྱལ་པོ་ཐམས་ཅད་དང་། རྒྱ་མཚོའི་ཕ་རོལ་གྱི་གླིང་ཕྲན་རྣམས་ཀྱི་རྒྱལ་པོ་ཐམས་ཅད་དང་།  
\v 23 དི་དན་དང་། ཐེ་མཱ་དང་། པུ་ཟཱ་དང་། ཡ་ཐོད་ཀྱི་སྐྲ་གཞར་བའི་ཚོ་པ་ཁག་དང་།  
\v 24 ཨ་རབ་ཡུལ་གྱི་རྒྱལ་པོ་ཐམས་ཅད་དང་། དབེན་སྟོང་དུ་གནས་པའི་མི་རིགས་གཞན་རྣམས་ཀྱི་རྒྱལ་པོ་ཐམས་ཅད་དང་།  
\v 25 ཟིམ་རེའི་རྒྱལ་པོ་ཐམས་ཅད་དང་། ཨེ་ལཱམ་གྱི་རྒྱལ་པོ་ཐམས་ཅད་དང་། མཱ་ཏི་ཡུལ་གྱི་རྒྱལ་པོ་ཐམས་ཅད་དང་།  
\v 26 བྱང་ཕྱོགས་ཉེ་རིང་གི་རྒྱལ་པོ་ཐམས་ཅད་དང་། གནམ་འོག་དང་ས་ངོས་ལ་ཡོད་པའི་རྒྱལ་ཕྲན་ཐམས་ཅད་ཀྱི་མི་རེ་རེས་འཐུང་བ་དང་། རྗེས་སུ་ཤེ་ཤག་ \f + \ft ཤེ་ཤག་ཅེས་པ་ནི་པཱ་པེལ་ལོན་གྱི་མིང་གི་རྣམ་གྲངས་ཡིན།\f*གི་རྒྱལ་པོས་ཀྱང་དེ་བཏུང་དགོས་སོ། །  
\v 27 དེའི་ཕྱིར་ཁྱོད་ཀྱིས་དེ་དག་ལ་འདི་ལྟར། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ངས་ཁྱོད་ཀྱི་སྟེང་དུ་རལ་གྲི་ལྷུང་བར་བྱ་བས། ཁྱོད་རྣམས་ཀྱིས་འཐུང་ནས་ར་བཟི་བ་དང་། སྐྱུག་ནས་འགྱེལ་ཞིང་ཡར་ལང་མི་ཐུབ་ཅེས་སྨྲོས་ཤིག  
\v 28 གལ་སྲིད་དེ་དག་གིས་ཁྱོད་ཀྱི་ལག་ནས་ཕོར་བ་བླངས་ཏེ་འཐུང་བར་མི་བྱེད་ན། ཁྱོད་ཀྱིས་དེ་དག་ལ་འདི་ལྟར། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་གིས་དེ་ཅི་ནས་ཀྱང་འཐུང་དགོས།  
\v 29 ཅི་ལ་ཞེ་ན། ལྟོས་ཤིག ངས་རང་གི་མིང་གིས་འབོད་པའི་གྲོང་ཁྱེར་ནས་མགོ་བཙུགས་ཏེ་ཆག་སྒོ་འབྱུང་བར་བྱས་ན། ཁྱོད་ཅག་དེ་ལས་ཐར་བར་འགྱུར་རམ་ཞེ་ན་ཁྱོད་ཅག་ཐར་བར་མི་འགྱུར་ཏེ། ངས་ཡུལ་འདིའི་ཡུལ་མི་ཀུན་གྱི་སྟེང་ལ་རལ་གྲི་འབབ་པར་བྱ་ཞེས་པའོ་ཞེས་སྨྲོས་ཤིག་ཅེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་གསུངས།  
\v 30 དེ་བས་ཁྱོད་ཀྱིས་དེ་དག་ལ་གཏམ་འདི་ཐམས་ཅད་ལུང་བསྟན་ནས་འདི་ལྟར། དཀོན་མཆོག་ཡ་ཝཱེས་མཐོ་ས་ནས་ང་རོ་འདོན་ཞིང་། ཁོང་གི་བཞུགས་གནས་དམ་པ་ནས་གསུང་སྐད་བཏོན་ནས་རང་གི་ལུག་ཁྱུའི་སྟེང་དུ་ངར་སྐད་བསྒྲགས་ཏེ། རྒུན་འབྲུམ་བརྫི་མཁན་དག་དང་འདྲ་བར་ས་ལ་གནས་པ་ཐམས་ཅད་ཀྱི་སྟེང་དུ་ང་རོ་འདོན་པར་འགྱུར།  
\v 31 ཡང་དཀོན་མཆོག་ཡ་ཝཱེས་མི་རིགས་ཐམས་ཅད་ལ་སྐྱོན་འཛུགས་ཤིང་མི་ཐམས་ཅད་ལ་འདྲི་གཅོད་བྱེད་པས་ན། ངར་སྐད་དེ་ནི་ས་མཐའི་བར་དུ་སླེབས་པ་ཡིན། ངན་པ་རྣམས་ནི་ཁོང་གིས་རལ་གྲིར་གཏོད་ངེས་ཡིན་ཞེས་སྨྲོས་ཤིག་ཅེས་དཀོན་མཆོག་ཡ་ཝཱེས་གསུངས་པའོ། །  
\v 32 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ཆག་སྒོ་ནི་ཡུལ་ཁམས་འདི་ནས་ཡུལ་ཁམས་གཞན་པའི་བར་དུ་འབྱུང་བར་འགྱུར་ཏེ། ས་མཐའ་ནས་རླུང་ནག་འཚུབ་མ་ཞིག་གཡུག་པར་འགྱུར་ཞེས་གསུངས།  
\v 33 ཉིན་མོ་དེར་དཀོན་མཆོག་ཡ་ཝཱེས་བསྣུན་ནས་བསད་པ་ནི་ས་གཞིའི་མཐའ་གཅིག་ནས་མཐའ་གཞན་པའི་བར་དུ་ཡོད་པར་འགྱུར་གྱི། དེ་དག་གི་ཕྱིར་མྱ་ངན་བྱེད་མཁན་སུ་ཡང་མེད་ལ། བསྡུ་མཁན་དང་དུར་ལ་སྐུང་མཁན་ཡང་མེད་པར་ལུད་ལྟར་ས་ངོས་སུ་ལུས་པར་འགྱུར་རོ། །  
\v 34 ཀྱེ་ཁྱོད་རྫི་བོ་རྣམས་ཀྱིས་ངུ་འབོད་བྱོས་ལ་འོ་དོད་བོས་ཤིག ཁྱོད་ལུག་ཁྱུའི་འགོ་ཁྲིད་རྣམས་ཐལ་བའི་ནང་དུ་འགྲེ་ལྡོག་རྒྱོབ་ཅིག ཅི་ལ་ཞེ་ན། ཁྱོད་གསོད་པའི་ཉིན་མོ་དང་ཁྱོད་གཏོར་བའི་དུས་ལ་སླེབས་ཤིང་། ངས་ཁྱོད་རྣམས་དུམ་བུར་གཅོག་པར་བྱ་སྟེ། ཁྱོད་རྣམས་ནི་སྣོད་སྤྱད་རྩ་ཆེན་དག་སར་ལྷུང་ནས་ཆག་པ་བཞིན་དུ་འགྱེལ་བར་འགྱུར།  
\v 35 རྫི་བོ་རྣམས་འབྲོ་ས་མེད་དེ། ལུག་ཁྱུའི་འགོ་ཁྲིད་དག་ཀྱང་ཐར་བར་མི་འགྱུར།  
\v 36 ཉོན་ཅིག དཀོན་མཆོག་ཡ་ཝཱེས་དེ་དག་གི་རྩྭ་ས་གཏོར་བས་ན། རྫི་བོས་སྐད་རྒྱག་ཅིང་ལུག་ཁྱུའི་འགོ་ཁྲིད་དག་གིས་ངུ་འབོད་བྱེད་པའོ། །  
\v 37 དཀོན་མཆོག་ཡ་ཝཱེའི་ཐུགས་ཁྲོ་དྲག་པོའི་རྐྱེན་གྱིས། ལྷིང་འཇགས་སུ་གནས་པའི་ལུག་ར་རྣམས་ཀྱང་རྩ་ནས་བཤིག་གོ །  
\v 38 དེ་ནི་སེང་གེ་དར་མ་རང་གི་བྲག་ཕུག་དང་བྲལ་བར་འདྲ་ཞིང་། མི་ལ་གཉའ་གནོན་བྱེད་པའི་རལ་གྲི་དང་ཁོང་གི་ཁྲོ་གཏུམ་གྱི་དབང་གིས་དེ་དག་གི་ཡུལ་ནི་མི་མེད་ལུང་སྟོང་དུ་གྱུར་ཏོ། །   
\c 26
\cl ལེའུ་ཉེར་དྲུག་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེ་རེམ་ཡཱ་ལ་ཉེས་ཆད་བཅད་པ།  
\p
\v 1 ཡ་ཧུ་དཱའི་རྒྱལ་པོ་ཡོ་ཤི་ཡཱའི་བུ་ཡེ་ཧོ་ཡཱ་ཀིམ་རྒྱལ་པོའི་ཁྲི་ལ་བཀོད་དུས། དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།  
\v 2 དཀོན་མཆོག་ཡ་ཝཱེས་འདི་སྐད་དུ། ཁྱོད་ནི་ཡ་ཝཱེའི་མཆོད་ཁང་གི་ཁྱམས་རར་ལངས་ནས། ཡ་ཧུ་དཱའི་གྲོང་ཁྱེར་སོ་སོ་ནས་ཡ་ཝཱེའི་མཆོད་ཁང་དུ་བསྙེན་བཀུར་བྱེད་པར་འོང་བའི་མི་ཐམས་ཅད་ལ། ངས་ཁྱོད་ལ་ཅི་དང་ཅི་བསྒོས་པ་བཞིན་ཚིག་གཅིག་ཀྱང་མ་ལུས་པར་ཤོད་ཅིག  
\v 3 གཅིག་བྱས་ན་དེ་དག་གིས་ངའི་ཁ་ལ་མཉན་ནས་རང་རང་གི་ལོག་ལམ་དང་བྲལ་ཏེ་ཕྱིར་ལོག་ཀྱང་སྲིད་དེ། ངས་ཀྱང་རང་གི་བློ་ཁ་བསྒྱུར་ནས་དེ་དག་གིས་སྤྱོད་ངན་སྤྱད་པའི་ཕྱིར་ངས་གཏོང་འདོད་པའི་ཆག་སྒོ་ནི་དེ་དག་གི་སྟེང་ལ་འབྱུང་བར་མི་བྱའོ། །  
\v 4 ཁྱོད་ཀྱིས་ཁོ་རྣམས་ལ་འདི་ལྟར། དཀོན་མཆོག་ཡ་ཝཱེས་འདི་སྐད་གསུངས་ཏེ། ཁྱོད་ཅག་གིས་ང་ལ་མི་མཉན་པ་དང་ངས་ཁྱོད་ཅག་གི་མདུན་དུ་བཀོད་པའི་བཀའ་ཁྲིམས་མི་བརྩི་ཞིང་།  
\v 5 ངས་སྔར་ནས་ཡང་ཡང་ཁྱོད་ཅག་གི་རྩར་མངགས་པའི་ཞབས་ཕྱི་ལུང་སྟོན་པ་རྣམས་ཀྱི་གསུངས་པའི་བཀའ་ལ་མ་མཉན་ན། ༼ཁྱོད་ཚོས་དངོས་གནས་མ་མཉན་ཏོ། །༽  
\v 6 ངས་མཆོད་ཁང་འདི་ཞི་ལོ་དང་འདྲ་བར་བྱ་ཞིང་། གྲོང་ཁྱེར་འདི་ནི་རྒྱལ་ཁམས་ཡོངས་ཀྱིས་དམོད་མོ་བྱེད་ས་རུ་འགྱུར་བར་བྱའོ་ཞེས་གསུངས་པ་སྨྲོས་ཤིག་ཅེས་གསུངས་སོ། །  
\v 7 ཡེ་རེམ་ཡཱས་དཀོན་མཆོག་ཡ་ཝཱེའི་མཆོད་ཁང་དུ་གསུངས་པའི་བཀའ་འདི་དག་མཆོད་དཔོན་དང་ལུང་སྟོན་པ་རྣམས་དང་མི་ཐམས་ཅད་ཀྱིས་ཐོས་སོ། །  
\v 8 ཡང་ཡེ་རེམ་ཡཱ་ཡིས་དཀོན་མཆོག་ཡ་ཝཱེས་མི་ཀུན་ལ་གསུང་བར་བསྒོས་པའི་བཀའ་ཐམས་ཅད་གསུངས་ཚར་བ་དང་། མཆོད་དཔོན་དང་ལུང་སྟོན་པ་རྣམས་དང་མི་ཡོངས་ཀྱིས་ཁོང་བཟུང་སྟེ་ན་རེ། ཁྱོད་འཆི་ངེས་ཡིན་ཏེ།  
\v 9 ཁྱོད་ཀྱིས་ཅིའི་ཕྱིར་དཀོན་མཆོག་ཡ་ཝཱེའི་མཚན་ལ་བརྟེན་ནས་ལུང་བསྟན་ཏེ་ན་རེ། མཆོད་ཁང་འདི་ནི་ཞི་ལོ་ལྟར་འགྱུར་ཞིང་། གྲོང་ཁྱེར་འདི་ནི་མི་མེད་ལུང་སྟོང་དུ་འགྱུར་རོ་ཞེས་སྨྲ་བ་ཡིན་ནམ་ཞེས་སྨྲས་ཤིང་། མི་ཚང་མ་དཀོན་མཆོག་ཡ་ཝཱེའི་མཆོད་ཁང་དུ་འདུས་ཏེ་ཡེ་རེམ་ཡཱ་བསྐོར་ཏོ། །  
\v 10 དེ་ནས་ཡ་ཧུ་དཱའི་འགོ་དཔོན་རྣམས་ཀྱིས་དོན་དེ་ཐོས་པ་དང་རྒྱལ་པོའི་ཕོ་བྲང་ནས་ཡར་དཀོན་མཆོག་ཡ་ཝཱེའི་མཆོད་ཁང་དུ་ཕྱིན་ཏེ། དཀོན་མཆོག་ཡ་ཝཱེའི་མཆོད་ཁང་གི་སྒོ་གསར་པའི་འཇུག་སྒོར་བསྡད་ནས།  
\v 11 མཆོད་དཔོན་དང་ལུང་སྟོན་པ་རྣམས་ཀྱིས་འགོ་དཔོན་རྣམས་དང་མི་དེ་ཐམས་ཅད་ལ་འདི་ལྟར། ཁྱེད་ཅག་གི་རྣ་བས་ཐོས་པ་བཞིན་མི་འདིས་ལུང་བསྟན་ནས་གྲོང་ཁྱེར་འདི་ལ་རྒོལ་བས་ན་ཁོར་སྲོག་ཆད་གཅོད་འོས་པ་ཡིན་ཞེས་སྨྲས་པ་དང་།  
\v 12 ཡེ་རེམ་ཡཱ་ཡིས་འགོ་དཔོན་དང་མི་རྣམས་ལ་ན་རེ། མཆོད་ཁང་འདི་དང་གྲོང་ཁྱེར་འདི་ལ་རྒོལ་བའི་གཏམ་ཁྱོད་ཅག་གི་ཐོས་པ་དེ་ཐམས་ཅད་ལུང་སྟོན་ཕྱིར་དཀོན་མཆོག་ཡ་ཝཱེས་ང་མངགས་སོ། །  
\v 13 ད་ལྟ། ཁྱོད་ཅག་གིས་རང་གི་བྱ་བ་སྤྱོད་པ་རྣམས་ཇེ་ལེགས་སུ་བཏང་ནས་ཁྱོད་ཅག་གི་དཀོན་མཆོག་ཡ་ཝཱེའི་བཀའ་ལ་མཉན་ན། ཁོང་གིས་ཉིད་ཀྱི་ཐུགས་ཞི་ནས་གསུངས་ཟིན་པའི་ཆག་སྒོ་དེ་ཁྱོད་ཅག་གི་སྟེང་ལ་འབེབ་པར་མི་མཛད།  
\v 14 ཡང་བདག་ལ་མཚོན་ན། ལྟོས་ཤིག བདག་ནི་ཁྱོད་ཅག་གི་ལག་ཏུ་ཡོད་པས། ཁྱོད་ཚོས་ཅི་བྱས་ན་ལེགས་ཤིང་འགྲིག་པར་འདོད་ན་དེ་བཞིན་བྱོས་ཤིག  
\v 15 ཡིན་ཡང་ཁྱོད་ཅག་གིས་རྟོགས་དགོས་པ་ཞིག་ནི། གལ་ཏེ་ཁྱོད་ཅག་གིས་ངའི་སྲོག་བླངས་ན། ཉེས་མེད་ལ་ཁྲག་བཞུར་དུ་བཅུག་པའི་སྡིག་པ་དེ་ཁྱོད་རྣམས་དང་གྲོང་ཁྱེར་འདི་དང་། ད་དུང་གྲོང་ཁྱེར་ནང་གི་མི་རྣམས་ཀྱི་སྟེང་དུ་དྲངས་པ་ཡིན་ཏེ། ཅི་ལ་ཞེ་ན། དཀོན་མཆོག་ཡ་ཝཱེས་དངོས་གནས་ང་རང་ཁྱོད་ཚོའི་མདུན་དུ་མངགས་ཤིང་བཀའ་འདི་ཐམས་ཅད་ཁྱོད་ཚོའི་རྣ་ལམ་དུ་བསྒྲག་པར་མཛད་པ་ཡིན་ཞེས་གསུངས།  
\v 16 དེ་ནས་འགོ་དཔོན་དང་མི་རྣམས་ཀྱིས་མཆོད་དཔོན་དང་ལུང་སྟོན་པ་དག་ལ་འདི་ལྟར། སྐྱེ་བོ་འདིས་བདག་ཅག་ལ་རང་ཅག་གི་དཀོན་མཆོག་ཡ་ཝཱེའི་མཚན་ལ་བརྟེན་ནས་ལུང་སྟོན་པ་ཡིན་པས། ཁོང་གསོད་མི་འོས་ཞེས་སྨྲས་པ་ན།  
\v 17 ཡུལ་དེའི་རྒན་པོ་འགའ་ལངས་ནས་མི་ཚོགས་ཀུན་ལ་གཏམ་བྱས་ཏེ་ན་རེ།  
\v 18 དེ་ཡང་ཡ་ཧུ་དཱའི་རྒྱལ་པོ་ཧི་ཟི་ཀི་ཡཱའི་དུས་སུ། མོ་རེ་ཤེད་པ་མི་ཀཱས་ཡ་ཧུ་དཱའི་མི་རྣམས་ལ་འདི་ལྟར། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཛ་ཡན་ནི་ཞིང་ལྟར་རྨོ་ཞིང་། ཡེ་རུ་སཱ་ལེམ་ནི་ཞིག་རོར་འགྱུར་བ་དང་། མཆོད་ཁང་འདིའི་རི་བོ་ནི་ནགས་ཚལ་གྱི་མཐོ་ས་དང་འདྲ་བར་འགྱུར་ཞེས་ལུང་བསྟན་ན་ཡང་།  
\v 19 ཡ་ཧུ་དཱའི་རྒྱལ་པོ་ཧི་ཟི་ཀི་ཡཱ་དང་ཡ་ཧུ་དཱ་པ་རྣམས་ཀྱིས་ཁོང་བསད་པ་ཡིན་ནམ། ཧི་ཟི་ཀི་ཡཱ་ནི་དཀོན་མཆོག་ལ་གུས་ཤིང་འཇིགས་པ་སྟེ། དཀོན་མཆོག་ཡ་ཝཱེ་ལ་སྙིང་རྗེ་གནང་བར་ཞུས་པ་དང་། དེ་ནས་དཀོན་མཆོག་ཡ་ཝཱེས་ཉིད་ཀྱི་ཐུགས་ཞི་བར་མཛད་དེ་གསུངས་ཟིན་པའི་ཆག་སྒོ་ནི་དེ་དག་གི་སྟེང་ལ་འབེབ་པར་མ་མཛད་དོ། །ཡིན་ནའང་རང་ཅག་གིས་རང་ལ་ཆག་སྒོ་སློང་ངོ་ཞེས་སྨྲས།  
\v 20 ཡང་མི་ཞིག་ཡོད་པ་སྟེ་ཤེ་མ་ཡཱའི་བུ་ཀིར་ཡཱད་ཡེ་ཨ་རིམ་པ་ཨུ་རི་ཡཱ་ཞེས་པས་ཀྱང་། དཀོན་མཆོག་ཡ་ཝཱེའི་མཚན་ལ་བརྟེན་ནས་ལུང་བསྟན་ཅིང་། དེས་གྲོང་ཁྱེར་འདི་དང་ཡུལ་ཁམས་འདི་ལ་རྒོལ་བར་ལུང་བསྟན་པ་ནི་ཡེ་རེམ་ཡཱའི་གསུང་ཐམས་ཅད་དང་མཐུན་ནོ། །  
\v 21 རྒྱལ་པོ་ཡེ་ཧོ་ཡཱ་ཀིམ་དང་དེའི་དཔའ་བོ་རྣམས་དང་། འགོ་དཔོན་རྣམས་ཀྱིས་ཨུ་རི་ཡཱའི་གསུང་ཐོས་ནས་རྒྱལ་པོས་དེ་གསོད་འདོད་པ་ལ། ཨུ་རི་ཡཱས་གཏམ་དེ་ཐོས་ནས་འཇིགས་ཏེ་ཨེ་ཅིབ་ཡུལ་དུ་བྲོས་སོ། །  
\v 22 རྒྱལ་པོ་ཡེ་ཧོ་ཡཱ་ཀིམ་གྱིས་ཨག་པོར་གྱི་བུ་ཨེལ་ན་ཐན་དང་བཅས་མི་འགའ་ཨེ་ཅིབ་ཡུལ་དུ་མངགས་ཏེ།  
\v 23 དེ་དག་གིས་ཨུ་རི་ཡཱ་ནི་ཨེ་ཅིབ་ཡུལ་ནས་བཟུང་སྟེ་རྒྱལ་པོ་ཡེ་ཧོ་ཡཱ་ཀིམ་གྱི་དྲུང་དུ་ཁྲིད་ཅིང་། རྒྱལ་པོས་དེ་རལ་གྲིས་བསད་ནས། དེའི་བམ་པོ་ནི་མི་སེར་དཀྱུས་མའི་དུར་ས་རུ་གཡུགས་པ་ཡིན།  
\v 24 འོན་ཀྱང་ཤཱ་ཕན་གྱི་བུ་ཨ་ཧི་ཀམ་གྱིས་ཡེ་རེམ་ཡཱ་བསྲུངས་ཏེ། མི་རྣམས་ཀྱི་ལག་ཏུ་གཏད་ནས་ཁོང་གསོད་དུ་མ་བཅུག་གོ །   
\c 27
\cl ལེའུ་ཉེར་བདུན་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེ་རེམ་ཡཱ་འཆིང་རྒྱར་ཚུད་པ།  
\p
\v 1 ཡ་ཧུ་དཱའི་རྒྱལ་པོ་ཡོ་ཤི་ཡཱའི་བུ་ཡེ་ཧོ་ཡཱ་ཀིམ་རྒྱལ་ཁྲིར་འཁོད་དུས། དཀོན་མཆོག་ཡ་ཝཱེའི་བཀའ་ཡེ་རེམ་ཡཱ་ལ་བྱུང་བ་འདི་ལྟ་སྟེ།  
\v 2 དཀོན་མཆོག་ཡ་ཝཱེས་ང་ལ་འདི་སྐད་དུ། ཁྱོད་ཀྱིས་རང་ཉིད་ལ་ཀོ་བའི་ཐག་པ་དང་གཉའ་ཤིང་བཟོས་ཏེ་རང་གི་སྐེ་ལ་སྐོན་ཅིག  
\v 3 དེ་ནས་ཡེ་རུ་སཱ་ལེམ་དུ་ཡ་ཧུ་དཱའི་རྒྱལ་པོ་ཚིད་ཀི་ཡཱའི་དྲུང་དུ་འོངས་པའི་བང་ཆེན་དག་གི་ལག་ཏུ་ཀོ་བའི་ཐག་པ་དང་གཉའ་ཤིང་ནི། ཨེ་དོམ་གྱི་རྒྱལ་པོ་དང་། མོ་ཨབ་ཀྱི་རྒྱལ་པོ། ཨམ་མོན་གྱི་རྒྱལ་པོ། ཐཱར་གྱི་རྒྱལ་པོ། ཚི་ཏུན་གྱི་རྒྱལ་པོ་བཅས་ལྔ་པོར་རྫོངས་ཤིག  
\v 4 ཡང་དེ་དག་གི་ཇོ་བོ་རྣམས་ལ་བརྡ་སྤྲོད་པར་འདི་ལྟར་བཅོལ་གདམས་བྱོས་ཤིག དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཁྱོད་ཅག་གིས་རང་གི་ཇོ་བོ་རྣམས་ལ་འདི་ལྟར་སྨྲོས་ཤིག  
\v 5 ངས་ནུས་མཐུ་ཆེན་པོ་དང་ཕྱི་རུ་བརྐྱངས་པའི་དཔུང་ངར་གྱིས་ས་གཞི་དང་ས་ལ་ཡོད་པའི་མི་དང་གཅན་གཟན་རྣམས་བཀོད་པ་དང་། ངས་སུ་ལ་སྦྱིན་འོས་འདོད་ན་ས་གཞི་དེ་ལ་སྦྱིན་ནོ། །  
\v 6 ད་ལྟ་ངས་ཡུལ་ཁམས་མཐའ་དག་ངའི་འཁོར་གཡོག་སྟེ་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱི་ལག་ཏུ་གཏད་ཅིང་། ཐང་རྒོད་ཀྱི་རི་དྭགས་རྣམས་ཀྱང་དེ་ལ་སྤྱད་དུ་གནང་ངོ་། །  
\v 7 དེའི་ཡུལ་ཁམས་ལ་འཁོན་ལན་ཕོག་པའི་དུས་མ་སླེབས་བར་དུ། མི་རིགས་ཀུན་གྱིས་དེ་དང་དེའི་བུ་རབས་ཚ་རྒྱུད་རྣམས་ལ་གཡོག་བྱེད་དགོས་པ་དང་། དུས་དེར། རྒྱལ་ཁམས་མང་པོ་དང་རྒྱལ་པོ་ཆེན་པོ་རྣམས་ཀྱིས་དེ་བྲན་གཡོག་ཏུ་བྱེད་པར་འགྱུར།  
\v 8 དེ་ནས་མི་རིགས་དང་རྒྱལ་ཕྲན་གང་ཡིན་ཡང་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་འདི་ལ་གཡོག་མི་བྱེད་ཅིང་། རང་གི་མཇིང་པ་དེའི་གཉའ་ཤིང་འོག་ཏུ་མི་འཇོག་ན། ངས་པཱ་པེལ་ལོན་གྱི་རྒྱལ་པོའི་ལག་པ་བརྒྱུད་ནས་དེ་དག་རྩ་མེད་གཏོང་བའི་བར་དུ། རལ་གྲི་དང་མུ་གེ རིམས་ནད་བཅས་ཀྱིས་ངས་མི་རིགས་དེ་ལ་ཉེས་ཆད་གཅོད་ངེས་ཡིན་ཞེས་དཀོན་མཆོག་ཡ་ཝཱེས་གསུངས།  
\v 9 ཡང་ཁྱོད་རྣམས་ཀྱིས་རང་གི་ལུང་སྟོན་པ་དང་མོ་པ། རྨི་ལམ་ལ་བརྟག་མཁན། ལྷ་པ། སྒྱུ་མ་མཁན་བཅས་ལ་མ་མཉན་ཅིག དེ་དག་གིས་ཁྱོད་རྣམས་ལ། ཁྱོད་ཅག་གིས་པཱ་པེལ་ལོན་གྱི་རྒྱལ་པོར་གཡོག་བྱེད་པར་མི་འགྱུར་ཞེས་སྨྲའོ། །  
\v 10 དེ་ཚོས་ཁྱོད་ཅག་ལ་རྫུན་གྱི་ལུང་བསྟན་ཏེ། ཁྱོད་ཅག་རང་ཡུལ་དང་བྲལ་ནས་རྒྱང་ཐག་རིང་པོར་འགྲོ་ཞིང་། ངས་ཁྱོད་ཅག་ཕྱིར་བསྐྲད་ནས་ཁྱོད་རྣམས་འཆི་བར་འགྱུར།  
\v 11 འོན་ཀྱང་མི་རིགས་གང་ཞིག་གིས་པཱ་པེལ་ལོན་གྱི་རྒྱལ་པོའི་གཉའ་ཤིང་འོག་ཏུ་རང་གི་མཇིང་པ་བཞག་ནས་དེ་ལ་གཡོག་བྱས་ན། ངས་མི་རིགས་དེ་ནི་རང་ཡུལ་དུ་ལུས་པར་བྱེད་ཅིང་། དེར་ཞིང་རྨོས་ཏེ་གནས་པར་འགྱུར་ཞེས་དཀོན་མཆོག་ཡ་ཝཱེས་གསུངས་སོ། །  
\v 12 ངས་བཀའ་འདི་རྣམས་བཞིན་དུ་ཡ་ཧུ་དཱའི་རྒྱལ་པོ་ཚིད་ཀི་ཡཱ་ལ་བསྐུལ་ནས་འདི་ལྟར། ཁྱེད་ཚོས་པཱ་པེལ་ལོན་གྱི་རྒྱལ་པོའི་གཉའ་ཤིང་འོག་ཏུ་མཇིང་པ་བཞག་ནས། དེ་དང་དེའི་འབངས་མི་ལ་གཡོག་བྱས་ན་གསོན་པོར་ལུས་པ་ཡིན།  
\v 13 པཱ་པེལ་ལོན་གྱི་རྒྱལ་པོའི་གཡོག་མི་བྱེད་པའི་མི་རིགས་ཀྱི་སྐོར་ལ་དཀོན་མཆོག་ཡ་ཝཱེས་ཇི་སྐད་གསུངས་པ་བཞིན། ཁྱེད་དང་ཁྱེད་ཀྱི་མི་རིགས་རལ་གྲི་དང་མུ་གེ རིམས་ནད་བཅས་ཀྱིས་འཆི་བར་བྱེད་དོན་ཅི་ཡོད་དམ།  
\v 14 ཁྱེད་རྣམས་ཀྱིས་པཱ་པེལ་ལོན་གྱི་རྒྱལ་པོར་གཡོག་བྱེད་པར་མི་འགྱུར་ཞེས་སྨྲ་མཁན་ལུང་སྟོན་པ་དག་གིས་ཁྱོད་ཅག་ལ་སྨྲས་པའི་གཏམ་ལ་མ་མཉན་ཅིག དེ་དག་གིས་ཁྱེད་ལ་ལུང་རྫུན་མ་བསྟན་ཏོ། །  
\v 15 དཀོན་མཆོག་ཡ་ཝཱེས་འདི་སྐད་དུ། ངས་དེ་རྣམས་མངགས་པ་མིན་ཡང་། དེ་དག་གིས་ངའི་མིང་གཡར་ནས་ལུང་རྫུན་མ་བསྟན་ཏེ། ངས་ཁྱོད་རྣམས་དང་ཁྱོད་ཅག་ལ་ལུང་བསྟན་སྨྲ་བའི་ལུང་སྟོན་པ་དེ་དག་ཕྱིར་བསྐྲད་དེ། མཉམ་དུ་རྩ་མེད་གཏོང་ངོ་ཞེས་གསུངས་ཞེས་སྨྲས་སོ། །  
\v 16 ངས་ཡང་མཆོད་དཔོན་རྣམས་དང་མི་འདི་དག་ཐམས་ཅད་ལ་འདི་ལྟར། དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་གི་ལུང་སྟོན་པས་ཁྱོད་རྣམས་ལ་ལུང་བསྟན་ཏེ་ན་རེ། ལྟོས་ཤིག དཀོན་མཆོག་ཡ་ཝཱེའི་མཆོད་ཁང་གི་ཡོ་བྱད་རྣམས་པཱ་པེལ་ལོན་ནས་འདིར་འདྲེན་ལ་ཉེ་ཞེས་ཟེར་ཞིང་། དེ་དག་གིས་ཁྱོད་ལ་སྨྲས་པ་ནི་ལུང་བསྟན་རྫུན་མ་ཡིན་པས་དེར་མ་མཉན་ཅིག  
\v 17 དེ་དག་ལ་མི་མཉན་པར་པཱ་པེལ་ལོན་རྒྱལ་པོའི་གཡོག་བྱས་ན་གསོན་པོར་ལུས་ཏེ། གྲོང་ཁྱེར་འདི་ཞིག་རོར་འགྱུར་དུ་འཇུག་དོན་ཅི་ཡོད་དམ།  
\v 18 གལ་ཏེ་ཁོ་རྣམས་ལུང་སྟོན་པ་ངོ་མ་ཡིན་ཞིང་། དཀོན་མཆོག་ཡ་ཝཱེའི་བཀའ་ཁོ་རྣམས་ལ་བྱུང་བ་ཡིན་ན། དཀོན་མཆོག་ཡ་ཝཱེའི་མཆོད་ཁང་དང་ཡ་ཧུ་དཱའི་རྒྱལ་པོའི་ཕོ་བྲང་། ཡེ་རུ་སཱ་ལེམ་བཅས་སུ་ལུས་པའི་ཡོ་བྱད་རྣམས་པཱ་པེལ་ལོན་དུ་མི་འཁྱེར་བའི་དོན་དུ། དེ་དག་ལ་དཔུང་ཚོགས་ཀུན་གྱི་དཀོན་མཆོག་ཡ་ཝཱེར་ཞུས་སུ་ཆུག་ཅེས་པའོ། །  
\v 19 ཀ་བ་དང་། ལི་ཡི་རྒྱ་མཚོ། སྟེགས་བུ། གྲོང་ཁྱེར་འདིའི་ནང་དུ་ལུས་པའི་ཡོ་བྱད་བཅས་པ་སྟེ།  
\v 20 པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིམ་གྱི་བུ་ཡེ་ཀོན་ཡཱ་དང་། ཡ་ཧུ་དཱ་དང་ཡེ་རུ་སཱ་ལེམ་གྱི་སྐུ་དྲག་ཐམས་ཅད་བཟུང་སྟེ་ཡེ་རུ་སཱ་ལེམ་ནས་པཱ་པེལ་ལོན་དུ་ཁྲིད་དུས་བཙན་འཕྲོག་མ་བྱས་པའི་ཡོ་བྱད་དག་གི་སྐོར་དང་།  
\v 21 དཀོན་མཆོག་ཡ་ཝཱེའི་མཆོད་ཁང་དང་ཡ་ཧུ་དཱའི་རྒྱལ་པོའི་ཕོ་བྲང་། ཡེ་རུ་སཱ་ལེམ་བཅས་སུ་ལུས་པའི་ཡོ་བྱད་རྣམས་ཀྱི་སྐོར་ལ་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ།  
\v 22 ཡོ་བྱད་དེ་རྣམས་པཱ་པེལ་ལོན་དུ་འཁྱེར་བར་འགྱུར་ཞིང་། ངས་ཡོ་བྱད་རྣམས་ལ་ལྟ་སྐྱོང་བྱས་ཏེ་འདི་དག་ཕྱིར་གནས་འདིར་སྤྲོད་པའི་བར་དུ་དེར་ལུས་པར་འགྱུར་ཞེས་གསུངས་སོ། །   
\c 28
\cl ལེའུ་ཉེར་བརྒྱད་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེ་རེམ་ཡཱ་དང་ཧ་ནན་ཡཱ།  
\p
\v 1 དེ་ཡང་ཡ་ཧུ་དཱའི་རྒྱལ་པོ་ཚིད་ཀི་ཡཱ་ཡི་སྲིད་ལོ་བཞི་པའི་ལོ་དེའི་ཟླ་ལྔ་པར། གིབ་ཡོན་པ་ཨ་ཟུར་གྱི་བུ་ཧ་ནན་ཡཱ་ཞེས་པའི་ལུང་སྟོན་པ་ཡིས་དཀོན་མཆོག་ཡ་ཝཱེའི་མཆོད་ཁང་ནང་དུ་མཆོད་དཔོན་རྣམས་དང་མི་ཀུན་གྱི་མདུན་དུ་བདག་ལ་ན་རེ།  
\v 2 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ངས་པཱ་པེལ་ལོན་གྱི་རྒྱལ་པོའི་གཉའ་ཤིང་བཅག་པ་སྟེ།  
\v 3 ལོ་གཉིས་ཀྱི་ནང་དུ། ངས་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་གནས་འདི་ནས་བཙན་འཕྲོག་བྱས་ཏེ་པཱ་པེལ་ལོན་དུ་ཁྱེར་བའི་ཡོ་བྱད་རྣམས་ཏེ། དཀོན་མཆོག་ཡ་ཝཱེའི་མཆོད་ཁང་ནང་གི་ཡོ་བྱད་མཐའ་དག་གནས་འདིར་ཕྱིར་འདྲེན་དགོས་ལ།  
\v 4 ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིམ་གྱི་བུ་ཡེ་ཀོན་ཡཱ་དང་བཅས་པཱ་པེལ་ལོན་དུ་བཙོན་ལ་ཁྲིད་པའི་ཡ་ཧུ་དཱ་པ་ཐམས་ཅད་ཕྱིར་འཁྲིད་འོང་བར་བྱའོ། །ཅི་ལ་ཞེ་ན། ངས་པཱ་པེལ་ལོན་གྱི་རྒྱལ་པོའི་གཉའ་ཤིང་གཅོག་པར་འགྱུར་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ་ཞེས་སྨྲས་པ་ལ།  
\v 5 ལུང་སྟོན་པ་ཡེ་རེམ་ཡཱས་མཆོད་དཔོན་རྣམས་དང་དཀོན་མཆོག་ཡ་ཝཱེའི་མཆོད་ཁང་ནང་དུ་ལངས་བསྡད་ཡོད་པའི་མི་ཐམས་ཅད་ཀྱི་མདུན་དུ་ལུང་སྟོན་པ་ཧ་ནན་ཡཱ་ལ་འདི་ལྟར།  
\v 6 ཨ་མེན། དཀོན་མཆོག་ཡ་ཝཱེས་དེ་ལྟར་མཛོད་ཅིག དཀོན་མཆོག་ཡ་ཝཱེས་ཁྱོད་ཀྱི་ལུང་བསྟན་རྣམས་འགྲུབ་པར་མཛད་ནས། དཀོན་མཆོག་ཡ་ཝཱེའི་མཆོད་ཁང་གི་ཡོ་བྱད་དང་བཙོན་དུ་ཁྲིད་ཕྱིན་པ་ཐམས་ཅད་པཱ་པེལ་ལོན་ནས་གནས་འདིར་ཕྱིར་འདྲེན་པར་ཤོག  
\v 7 ཡིན་ནའང་ངས་ཁྱོད་དང་མི་ཀུན་གྱི་རྣ་བར་གང་ཞིག་སྨྲས་པར་ཁྱོད་ཀྱིས་ཉན་པར་མཛོད་ཅིག  
\v 8 གནའ་ནས་ད་བར་དུ། ང་དང་ཁྱོད་གཉིས་ཡར་སྔོན་གྱི་ལུང་སྟོན་པ་རྣམས་ཀྱིས་ཀྱང་ཡུལ་དུ་མ་དང་རྒྱལ་ཕྲན་སྟོབས་ཅན་དག་ལ་དམག་འཁྲུག་དང་ཆག་སྒོ། རིམས་ནད་བཅས་འབྱུང་བར་ལུང་བསྟན་པ་ཡིན།  
\v 9 དེ་ཡང་ཞི་བདེ་ལུང་སྟོན་མཁན་གྱི་ལུང་སྟོན་པ་ཡིན་ན་དེའི་ཚིག་ནང་བཞིན་འགྲུབ་པའི་དུས་སུ། མི་ཡིས་ད་གཟོད་དེ་ནི་དཀོན་མཆོག་ཡ་ཝཱེས་མངགས་པའི་ལུང་སྟོན་པ་ཡིན་པར་ཁས་ལེན་ནོ་ཞེས་སྨྲས།  
\v 10 དེ་ནས་ལུང་སྟོན་པ་ཧ་ནན་ཡཱས་ལུང་སྟོན་པ་ཡེ་རེམ་ཡཱའི་མཇིང་པ་ལས་གཉའ་ཤིང་བླངས་ནས་བཅག་པ་དང་།  
\v 11 ཡང་མི་ཐམས་ཅད་ཀྱི་མདུན་དུ་ན་རེ། དཀོན་མཆོག་ཡ་ཝཱེས་འདི་སྐད་དུ། ལོ་གཉིས་ཀྱི་ནང་དུ་ངས་དེ་དང་དེ་བཞིན་དུ་མི་རིགས་ཐམས་ཅད་ཀྱི་མཇིང་པ་ལས་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱི་གཉའ་ཤིང་གཅོག་པར་བྱའོ་ཞེས་གསུངས་ཞེས་སྨྲས་པ་དང་། ལུང་སྟོན་པ་ཡེ་རེམ་ཡཱ་ཕྱིན་ཏོ། །  
\v 12 ལུང་སྟོན་པ་ཧ་ནན་ཡཱས་ལུང་སྟོན་པ་ཡེ་རེམ་ཡཱའི་མཇིང་པ་ལས་གཉའ་ཤིང་དེ་བཅག་པའི་རྗེས་སུ། དཀོན་མཆོག་ཡ་ཝཱེའི་བཀའ་ནི་ཡེ་རམ་ཡཱ་ལ་བྱུང་བ་འདི་ལྟ་སྟེ།  
\v 13 ཁྱོད་སོང་ནས་ཧ་ནན་ཡཱ་ལ་འདི་སྐད་སྦྲོན་ཅིག དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་ཤིང་གི་གཉའ་ཤིང་བཅག་ནའང་དེའི་ཚབ་ཏུ་ལྕགས་ཀྱི་གཉའ་ཤིང་བཟོ་བར་འགྱུར་རོ་ཞེས་གསུངས།  
\v 14 ཅི་ལ་ཞེ་ན། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱི་གཡོག་བྱེད་དུ། ངས་མི་རིགས་ཐམས་ཅད་ཀྱི་མཇིང་པར་ལྕགས་ཀྱི་གཉའ་ཤིང་འགེལ་ཞིང་། དེ་དག་གིས་ནམ་ཡིན་ཡང་དེ་ལ་གཡོག་བྱེད་པར་འགྱུར་ཏེ། ངས་ཐང་རྒོད་ཀྱི་རི་དྭགས་རྣམས་ཀྱང་དེ་ལ་སྤྲད་དོ་ཞེས་གསུངས་པས་སོ་ཞེས་པའོ། །  
\v 15 དེ་ནས་ལུང་སྟོན་པ་ཡེ་རེམ་ཡཱས་ལུང་སྟོན་པ་ཧ་ནན་ཡཱ་ལ་འདི་ལྟར། ཀྱེ་ཧ་ནན་ཡཱ་ཁྱོད་ཀྱིས་ཉོན་ཅིག དཀོན་མཆོག་ཡ་ཝཱེས་ཁྱོད་མངགས་པ་མིན་ཡང་། ཁྱོད་ཀྱིས་མི་འདི་རྣམས་རྫུན་ལ་བརྟེན་པར་བྱས་པས།  
\v 16 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ཁྱོད་ནི་ས་གཞི་ལས་འདོར་བར་བྱ་ཞིང་། ཁྱོད་ནི་ལོ་འདི་རང་ལ་འཆི་བར་འགྱུར་རོ། །ཅི་ལ་ཞེ་ན། ཁྱོད་ཀྱིས་དཀོན་མཆོག་ཡ་ཝཱེ་ལ་ངོ་ལོག་གི་གཏམ་བརྗོད་པའི་ཕྱིར་རོ་ཞེས་གསུངས།  
\v 17 དེ་ནས་ལུང་སྟོན་པ་ཧ་ནན་ཡཱ་ལོ་དེའི་ཟླ་བདུན་པའི་ནང་ཚེ་ལས་འདས་སོ། །   
\c 29
\cl ལེའུ་ཉེར་དགུ་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེ་རེམ་ཡཱ་ཡིས་པཱ་པེལ་ལོན་དུ་ཡོད་པའི་ཡ་ཧུ་དཱ་པ་རྣམས་ལ་འཕྲིན་བསྐུར་བ།  
\p
\v 1 དེ་ཡང་བཙོན་དུ་ཁྲིད་པའི་མཆོད་དཔོན་དང་ལུང་སྟོན་པ། མི་ཐམས་ཅད་དང་། ད་དུང་ཤུལ་དུ་ལུས་པའི་རྒན་པོ་རྣམས་ཏེ། ནེ་བོ་ཀད་ནེ་ཙར་གྱིས་ཡེ་རུ་སཱ་ལེམ་ནས་པཱ་པེལ་ལོན་དུ་བཙོན་ལ་ཁྲིད་པའི་མི་ཡོངས་ལ། ལུང་སྟོན་པ་ཡེ་རེམ་ཡཱས་ཡེ་རུ་སཱ་ལེམ་ནས་འཕྲིན་ཞིག་སྤྲིངས་པ་འདི་ལྟ་སྟེ།  
\v 2 འདི་ནི་རྒྱལ་པོ་ཡེ་ཀོན་ཡཱ་དང་རྒྱལ་ཡུམ། ཕོ་བྲང་གི་རྒྱལ་བློན། ཡ་ཧུ་དཱ་དང་ཡེ་རུ་སཱ་ལེམ་གྱི་འགོ་དཔོན། དེ་མིན་ཤིང་བཟོ་དང་མགར་པ་དང་བཅས་པ་ཡེ་རུ་སཱ་ལེམ་དང་བྲལ་བའི་རྗེས་སུ་ཡིན་ནོ། །  
\v 3 འཕྲིན་ཡིག་འདི་ནི་ཤཱ་ཕན་གྱི་བུ་ཨེ་ལ་ཟཱ་དང་ཧིལ་ཀི་ཡཱའི་བུ་གེ་མར་ཡཱ་གཉིས་ཀ་བརྒྱུད་ནས་སྤྲིངས་པ་དང་། དེ་གཉིས་ནི་ཡ་ཧུ་དཱའི་རྒྱལ་པོ་ཚིད་ཀི་ཡཱས་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་ལ་འཕྲད་དུ་མངགས་པ་ཡིན་ནོ། །  
\v 4 འཕྲིན་ཡིག་གི་ནང་དུ་འདི་ལྟར། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་བཙོན་དུ་ཁྲིད་པའི་མི་ཐམས་ཅད་དེ། ངས་ཡེ་རུ་སཱ་ལེམ་ནས་པཱ་པེལ་ལོན་དུ་བཙོན་ལ་ཁྲིད་དུ་བཅུག་པའི་མི་ཐམས་ཅད་ལ་འདི་སྐད་དུ།  
\v 5 ཁྱོད་རྣམས་ཀྱིས་ཁང་པ་བརྩིགས་ནས་དེའི་ནང་དུ་འདུག་དགོས་ལ། སྐྱེད་ཚལ་བཙུགས་ནས་དེའི་ནང་གི་ཤིང་ཏོག་སྤྱོད་དགོས།  
\v 6 ཆུང་མ་བླངས་ནས་བུ་རྒྱུད་སྤེལ་བ་དང་། བུ་རྒྱུད་སྤེལ་བའི་ཕྱིར་ཁྱོད་རྣམས་ཀྱི་བུ་ལ་ཆུང་མ་ལོངས་ལ་ཁྱོད་རྣམས་ཀྱི་བུ་མོ་རྣམས་མནའ་མར་སྟེར་དགོས། ཁྱོད་རྣམས་གནས་དེར་མང་དུ་འཕེལ་བ་ལས་ཉུང་དུ་བྲི་མི་རུང་།  
\v 7 ཡང་ངས་ཁྱོད་ཅག་བཙོན་དུ་ཁྲིད་པའི་གྲོང་ཁྱེར་དེའི་ཆེད་དུ་ཁྱོད་རྣམས་ཀྱིས་ཞི་བདེ་ཚོལ་ཞིག གྲོང་ཁྱེར་དེའི་ཕྱིར་དུ་དཀོན་མཆོག་ཡ་ཝཱེར་གསོལ་བ་ཐོབས་ཤིག ཅི་ལ་ཞེ་ན། གྲོང་ཁྱེར་དེ་ལ་ཞི་བདེ་ཐོབ་ན་ཁྱོད་རྣམས་ཀྱང་བདེ་བ་ཡིན་ནོ་ཞེས་གསུངས་སོ། །  
\v 8 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཁྱོད་རྣམས་ཁྱོད་ཅག་ཁྲོད་ཀྱི་ལུང་སྟོན་པ་དང་མོ་པ་རྣམས་ཀྱི་མགོ་སྐོར་འོག་ཏུ་མི་ཚུད་པར་གྱིས། ཡང་ཁྱོད་ཅག་གིས་རྨིས་པའི་རྨི་ལམ་ལ་བློ་མ་གཏོད་ཅིག  
\v 9 ཅི་ལ་ཞེ་ན། དེ་དག་གིས་ངའི་མིང་ལ་བརྟེན་ནས་ཁྱོད་ཅག་ལ་ལུང་བསྟན་རྫུན་མ་སྨྲས་པ་ཡིན་ལ། ངས་དེ་དག་མངགས་མེད་ཅེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །  
\v 10 དཀོན་མཆོག་ཡ་ཝཱེས་འདི་སྐད་དུ། པཱ་པེལ་ལོན་གྱི་ཕྱིར་དུ་གཏན་ལ་ཕབ་བའི་བགྲང་བྱ་བདུན་ཅུ་རྫོགས་དུས་སུ། ངས་ཁྱོད་རྣམས་ལ་ལྟ་སྐྱོང་བྱས་ཏེ་ངའི་ཁས་ལེན་བཟང་པོ་ཁྱོད་ཅག་ལ་བསྒྲུབས་ནས། ཁྱོད་རྣམས་ཕྱིར་གནས་འདིར་འཁྲིད་འོང་དགོས།  
\v 11 ངས་ཁྱོད་རྣམས་ལ་བཅངས་པའི་བསམ་པ་ནི་ཁྱོད་ཚོར་ཞི་བདེ་འཐོབ་པ་ལས་ཆག་སྒོ་འབྱུང་བ་མིན་པ་ངས་རྟོགས་ཡོད། མ་འོངས་པ་ན་ཁྱོད་རྣམས་ལ་འོད་སྟོང་འབར་བའི་མདུན་ལམ་དང་རེ་བ་ཡོད་པར་བྱའོ་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །  
\v 12 ཁྱོད་ཅག་གིས་ང་ལ་འོ་དོད་བོས་ནས་ངའི་ཕྱོགས་སུ་གསོལ་བ་བཏབ་ན་ངས་དེར་མཉན་པར་བྱའོ། །  
\v 13 ཡང་ཁྱོད་ཚོས་ང་ཚོལ་ཞིག སེམས་པ་རྩེ་གཅིག་གིས་ང་རང་བཙལ་ན་རྙེད་པར་འགྱུར་ཏེ།  
\v 14 ཁྱོད་ཅག་གིས་ང་རང་རྙེད་པར་འགྱུར་ལ། ཡང་ངས་ཁྱོད་ཅག་བཙོན་དུ་ཁྲིད་པ་རྣམས་ཕྱིར་ལོག་པར་བྱ་སྟེ། ངས་ཁྱོད་རྣམས་སྐྲོད་སའི་རྒྱལ་ཁམས་དང་ཡུལ་ཕྱོགས་སོ་སོ་ནས་བསྡུས་ཏེ། ངས་ཁྱོད་རྣམས་བཙོན་དུ་ཁྲིད་ནས་ཁ་བྲལ་བའི་གནས་སུ་ཁྱོད་རྣམས་ཕྱིར་འཁྲིད་འོང་ངོ་ཞེས་དཀོན་མཆོག་ཡ་ཝཱེས་འདི་སྐད་གསུངས།  
\v 15 ཁྱོད་རྣམས་ན་རེ། དཀོན་མཆོག་ཡ་ཝཱེས་པཱ་པེལ་ལོན་ནས་རང་ཅག་གི་ཕྱིར་དུ་ལུང་སྟོན་པ་རྣམས་བསྐོས་སོ་ཞེས་སྨྲ་བས་ན།  
\v 16 དཀོན་མཆོག་ཡ་ཝཱེས་དཱ་བིད་ཀྱི་རྒྱལ་ཁྲིར་བཞུགས་པའི་རྒྱལ་པོ་དང་གྲོང་ཁྱེར་འདིར་གནས་པའི་མི་ཀུན་ཏེ། ཁྱོད་དང་ལྷན་ཅིག་པཱ་པེལ་ལོན་དུ་བཙོན་ལ་མ་ཁྲིད་པའི་སྤུན་ཟླ་རྣམས་ཀྱི་སྐོར་ལ་འདི་སྐད་གསུངས་ཏེ།  
\v 17 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ལྟོས་ཤིག ངས་རལ་གྲི་དང་མུ་གེ རིམས་ནད་བཅས་དེ་དག་གི་སྟེང་དུ་འབེབ་ཅིང་། དེ་དག་ནི་སེ་ཡབ་ཤིང་འབྲས་རུལ་བ་དང་མཚུངས་པར་བཟའ་ཐབས་མེད་པར་བྱའོ། །  
\v 18 ངས་རལ་གྲི་དང་མུ་གེ རིམས་ནད་བཅས་ཀྱིས་དེ་དག་འདེད་ཅིང་། ས་སྟེང་གི་རྒྱལ་ཕྲན་ཐམས་ཅད་དེའི་ཕྱིར་འཇིགས་པར་འགྱུར་བ་དང་། ངས་དེ་དག་སྐྲོད་སའི་ཡུལ་ཁམས་རྣམས་སུ་མི་རྣམས་འཇིགས་པ་དང་། དམོད་མོ་དང་འཕྱ་དགོད་བྱེད་ས་དང་། ངོ་ཚ་གཏོད་ཡུལ་དུ་འགྱུར་རོ། །  
\v 19 དེ་ནི་ངས་སྔོན་ཆད་རང་གི་ཞབས་ཕྱི་ལུང་སྟོན་པ་རྣམས་ཡང་ཡང་མངགས་ནས་སྨྲས་པའི་གཏམ་ལ་དེ་དག་གིས་མ་མཉན་པས་སོ། །ཁྱོད་རྣམས་ཀྱིས་ཀྱང་དེ་དང་དེ་བཞིན་དུ་མ་མཉན་ཏོ་ཞེས་དཀོན་མཆོག་ཡ་ཝཱེས་འདི་སྐད་དུ།  
\v 20 དེ་བས་ཁྱོད་ཅག་ངས་ཡེ་རུ་སཱ་ལེམ་ནས་པཱ་པེལ་ལོན་དུ་བཏང་བའི་བཙོན་པ་ཐམས་ཅད་ཀྱིས་དཀོན་མཆོག་ཡ་ཝཱེའི་བཀའ་ལ་ཉོན་ཅིག  
\v 21 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ངའི་མིང་གཡར་ནས་ཁྱོད་རྣམས་ལ་རྫུན་གྱི་ལུང་བསྟན་སྨྲ་བའི་ཀོ་ལ་ཡཱའི་བུ་ཨ་ཧབ་དང་མ་ཨ་སེ་ཡཱའི་བུ་ཚིད་ཀི་ཡཱ་གཉིས་ལ་མཚོན་ན། ལྟོས་ཤིག ངས་དེ་གཉིས་པོ་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱི་ལག་ཏུ་གཏད་ནས། དེས་ཁྱོད་ཚོའི་མིག་མདུན་དུ་དེ་གཉིས་གསོད་པར་འགྱུར་ཞིང་།  
\v 22 པཱ་པེལ་ལོན་དུ་བཙོན་ལ་ཁྲིད་པའི་ཡ་ཧུ་དཱ་པ་ཐམས་ཅད་ཀྱིས་དེ་གཉིས་པོ་བསྟན་ནས། དཀོན་མཆོག་ཡ་ཝཱེས་ཁྱོད་ནི་པཱ་པེལ་ལོན་གྱི་རྒྱལ་པོས་མེའི་ནང་དུ་བསྲེགས་པའི་ཚིད་ཀི་ཡཱ་དང་ཨ་ཧབ་ལྟར་མཛོད་ཅིག་ཅེས་དམོད་པར་འགྱུར་རོ། །  
\v 23 མི་འདི་གཉིས་ཀྱིས་ཡེས་ར་ཨེལ་གྱི་ནང་དུ་ངོ་ཚ་མེད་པའི་ལས་སྤྱད་དེ། རང་གི་ཁྱིམ་མཚེས་ཀྱི་ཆུང་མ་དང་ལོག་གཡེམ་སྤྱད་ཅིང་། ཡང་ངའི་མིང་གཡར་ནས་ངས་དེ་དག་ལ་མ་བསྒོས་པའི་རྫུན་སྨྲས་སོ། །ངས་དེ་ཐམས་ཅད་རྟོགས་ཤིང་བདེན་དཔང་ཡོད་དོ་ཞེས་དཀོན་མཆོག་ཡ་ཝཱེས་གསུངས་སོ། །   
\s1 ཤེ་མ་ཡཱའི་འཕྲིན་ཡིག  
\p
\v 24 དཀོན་མཆོག་ཡ་ཝཱེས་ཡེ་རེམ་ཡཱ་ལ་འདི་ལྟར་བསྒོས་ཏེ། ཁྱོད་ཀྱིས་ནེ་ཧེ་ལམ་པ་ཤེ་མ་ཡཱ་ལ་འདི་ལྟར་སྨྲོས་ཤིག  
\v 25 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། དེ་ཡང་ཁྱོད་ཀྱིས་ཡེ་རུ་སཱ་ལེམ་དུ་ཡོད་པའི་མི་ཐམས་ཅད་དང་། མཆོད་དཔོན་མ་ཨ་སེ་ཡཱའི་བུ་ཟེ་ཕན་ཡཱ་ཞེས་པ་དང་། མཆོད་དཔོན་གཞན་རྣམས་ལ་རང་གི་མིང་བཀོད་ནས་འཕྲིན་བསྐུར་ཏེ་འདི་ལྟར།  
\v 26 དཀོན་མཆོག་ཡ་ཝཱེས་མཆོད་དཔོན་ཆེན་པོ་ཡེ་ཧོ་ཡ་དཱའི་ཚབ་ཏུ་ཁོང་གི་མཆོད་ཁང་དུ་སྤྱི་དཔོན་བྱེད་པར་ཟེ་ཕན་ཡཱ་ཁྱེད་ཉིད་མཆོད་དཔོན་དུ་བསྐོས་པ་ཡིན་པས། རང་ཉིད་ལུང་སྟོན་པ་ཡིན་ཞེས་སྨྱོ་ལབ་རྒྱག་མཁན་ཐམས་ཅད་ལ་རྐང་སྒྲོག་དང་སྐེ་སྒྲོག་རྒྱག་འོས།  
\v 27 ད་ལྟ་ཨ་ན་ཐོད་པ་ཡེ་རེམ་ཡཱ་ཡིས་ཁྱོད་རྣམས་ལ་ལུང་བསྟན་སྨྲས་པར་ཁྱོད་ཀྱིས་ཅིའི་ཕྱིར་བཀའ་བཀྱོན་མི་གནང་ངམ།  
\v 28 དེས་བདག་ཅག་པཱ་པེལ་ལོན་དུ་གནས་པ་རྣམས་ལ་འཕྲིན་བསྐུར་ཏེ་འདི་ལྟར། བཙོན་ལ་གནས་པའི་དུས་ཡུན་རིང་སྟེ། ཁྱོད་ཅག་གིས་ཁང་པ་བརྩིགས་ནས་དེའི་ནང་དུ་འདུག་དགོས་ལ། སྐྱེད་ཚལ་བཙུགས་ནས་དེའི་ནང་གི་ཤིང་ཏོག་སྤྱོད་དགོས་ཞེས་སྨྲས་སོ་ཞེས་པའོ། །  
\v 29 ཡང་མཆོད་དཔོན་ཟེ་ཕན་ཡཱས་འཕྲིན་ཡིག་འདི་ལུང་སྟོན་པ་ཡེ་རེམ་ཡཱའི་རྣ་བར་བཀླགས་སོ། །  
\v 30 དེ་ནས་ཡང་དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།  
\v 31 ཁྱོད་ཀྱིས་བཙོན་དུ་ཁྲིད་པ་ཀུན་ལ་འཕྲིན་བསྐུར་ཏེ་འདི་ལྟར། དཀོན་མཆོག་ཡ་ཝཱེས་ནེ་ཧེ་ལམ་པ་ཤེ་མ་ཡཱའི་སྐོར་ལ་འདི་སྐད་དུ། ངས་ཤེ་མ་ཡཱ་མ་མངགས་ཀྱང་དེས་ཁྱོད་ཅག་ལ་ལུང་བསྟན་ཏེ་ཁྱོད་རྣམས་རྫུན་ལ་ཡིད་ཆེས་སུ་བཅུག་པས།  
\v 32 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ནེ་ཧེ་ལམ་པ་ཤེ་མ་ཡཱ་དང་དེའི་བུ་རྒྱུད་ལ་ཉེས་ཆད་གཅོད་པར་བྱའོ། །ཁོའི་བུ་རབས་ཚ་རྒྱུད་ལས་གཅིག་ཀྱང་མི་འདི་རྣམས་ཀྱི་ནང་དུ་མི་ལུས་ཤིང་། ངས་རང་གི་འབངས་མི་ལ་གནང་བར་འགྱུར་བའི་བྱིན་རླབས་དེ་ཡང་མཐོང་བར་མི་འགྱུར། ཅི་ལ་ཞེ་ན། དེས་ཡ་ཝཱེ་ལ་ངོ་ལོག་གི་གཏམ་སྨྲས་པས་ཡིན་ཞེས་གསུངས་པ་སྨྲོས་ཤིག་ཅེས་དཀོན་མཆོག་ཡ་ཝཱེས་འདི་སྐད་གསུངས་སོ། །   
\c 30
\cl ལེའུ་སུམ་ཅུ་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡ་ཝཱེས་ཉིད་ཀྱི་མི་རྣམས་ལ་ཞལ་བཞེས་གནང་བ།  
\p
\v 1 དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།  
\v 2 ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་གསུངས་ཏེ། ཁྱོད་ཀྱིས་ངས་ཁྱོད་ལ་སྨྲས་པའི་བཀའ་ཐམས་ཅད་གཞུང་ལ་ཡི་གེར་ཁོད་ཅིག  
\v 3 ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། ངས་རང་གི་འབངས་མི་ཡེས་ར་ཨེལ་དང་ཡ་ཧུ་དཱ་ནས་བཙོན་དུ་ཁྲིད་པའི་མི་རྣམས་ཕྱིར་ལོག་པར་བྱའོ། །དཀོན་མཆོག་ཡ་ཝཱེས་ཡང་འདི་སྐད་དུ། ངས་དེ་དག་གི་ཕ་མེས་རྣམས་ལ་གནང་བའི་ཡུལ་ཁམས་སུ་དེ་དག་ཕྱིར་ལོག་ཏུ་འཇུག་ཅིང་། ཡུལ་དེ་ཡང་བསྐྱར་ཁོ་རྣམས་ལ་ས་སྐལ་དུ་འཐོབ་པར་འགྱུར་ཞེས་པའོ་ཞེས་གསུངས་སོ། །  
\v 4 ཡང་དཀོན་མཆོག་ཡ་ཝཱེས་ཡེས་ར་ཨེལ་དང་ཡ་ཧུ་དཱའི་སྐོར་ལ་གསུངས་པའི་བཀའ་ནི་འདི་ལྟ་སྟེ།  
\v 5 དཀོན་མཆོག་ཡ་ཝཱེས་འདི་སྐད་དུ། འཇིགས་ནས་སྐད་ངན་འདོན་པའི་སྒྲ་ངས་ཐོས་བྱུང་། དེ་ནི་དངངས་སྐྲག་ལས་ཞི་བདེ་མིན།  
\v 6 ཁྱོད་རྣམས་སོང་ནས་འདྲི་རྟོག་གྱིས་ལ་ལྟོས་ཤིག སྐྱེས་པས་ཕྲུ་གུ་བཙའ་ནུས་སམ། དར་མ་རྣམས་ཀྱིས་སྐྱེ་གཟེར་རྒྱག་པའི་བུད་མེད་དང་འདྲ་བར་ལག་པས་གྲོད་པ་བསྐྱོར་ནས་རེ་རེའི་ངོ་མདོག་སྐྱ་བོར་འགྱུར་བ་ངས་མཐོང་བ་འདི་ཅི་ཡིན་ནམ།  
\v 7 ཀྱི་ཧུད། ཉིན་མོ་དེ་ནི་འཇིགས་སུ་རུང་བའི་རྐྱེན་གྱིས་དེ་ལ་འགྲན་ཟླ་མེད། འདི་ནི་ཡ་ཀོབ་ལ་སྡུག་བསྔལ་འབྱུང་བའི་དུས་ཡིན་ཡང་ཁོ་རང་སྡུག་བསྔལ་དེ་ལས་ཐར་བར་འགྱུར་ཞེས་པའོ་ཞེས་གསུངས།  
\v 8 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཉིན་དེར་སླེབས་ཚེ། ངས་དེ་རྣམས་ཀྱི་མཇིང་པ་ལས་དགྲ་བོའི་གཉའ་ཤིང་བཅག་ནས་ཁོ་ཚོའི་ཀོ་བའི་ཐག་པ་དེ་གཅོད་ཅིང་། མི་ཡན་རྣམས་ཀྱིས་དེ་དག་སླར་གཡོག་ཏུ་བཀོལ་བར་མི་འགྱུར་རོ། །  
\v 9 དེ་རྣམས་ཀྱིས་རང་གི་དཀོན་མཆོག་ཡ་ཝཱེ་དང་ངས་དེ་དག་གི་དོན་དུ་བསྐོས་པའི་རྒྱལ་པོ་དཱ་བིད་ལ་གཡོག་བྱེད་པར་འགྱུར།  
\v 10 ཀྱེ་ངའི་ཞབས་ཕྱི་ཡ་ཀོབ་ཁྱོད་རང་མ་འཇིགས་ཤིག ཀྱེ་ཡེས་ར་ཨེལ་ཁྱོད་མ་དངངས་ཤིག ཅི་ལ་ཞེ་ན། ངས་རྒྱང་རིང་ཡུལ་ནས་ཁྱོད་སྐྱོབ་ཅིང་། བཙོན་དུ་ཁྲིད་པའི་ཡུལ་ནས་ཁྱོད་ཀྱི་བུ་རྒྱུད་རྣམས་སྒྲོལ་བར་བྱའོ། །དེ་ནས་ཡ་ཀོབ་ཕྱིར་ལོག་ངེས་ཤིང་། སེམས་བདེ་ལ་བབས་ནས་བག་ཕབ་ངང་འདུག་པར་འགྱུར་ལ། སུས་ཀྱང་དེ་སྐྲག་པར་མི་བྱའོ། །  
\v 11 ང་རང་ཁྱོད་དང་མཉམ་དུ་གནས་ཤིང་ཁྱོད་སྐྱོབ་པར་འགྱུར་ལ། ངས་ཁྱོད་ཅག་སྐྲོད་སའི་ཡུལ་གྱི་མི་རིགས་ཀུན་ཚར་བཅད་ནའང་ཁྱོད་རང་ཚར་གཅོད་པར་མི་བྱ། ངས་དྲང་གཞག་སྒོས་ཁྱོད་ལ་ཉེས་ཆད་གཅོད་པ་ལས། ཁྱོད་རྩ་བ་ནས་ཉེས་མེད་དུ་བརྩིས་པ་མིན་ཞེས་དཀོན་མཆོག་ཡ་ཝཱེས་གསུངས།  
\v 12 དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱི་རྨ་ཁ་གསོ་མི་ནུས་ལ་ཁྱོད་ཀྱི་རྨས་སྐྱོན་ཤིན་ཏུ་ཆེ།  
\v 13 ཁྱོད་ཀྱི་རྩོད་པའི་ཕྱིར་ཞུ་མཁན་དང་རྨ་ཁའི་ཕྱིར་ཁྱོད་ལ་སྨན་གང་ཡང་མེད།  
\v 14 ཁྱོད་ཀྱི་མཛའ་བོ་ཀུན་གྱིས་ཁྱོད་རང་བརྗེད་ནས་ཁྱོད་འཚོལ་ཞིབ་མི་བྱེད་དེ། ཅི་ལ་ཞེ་ན། ཁྱོད་ཀྱི་ཉེས་སྐྱོན་མང་དྲགས་པ་དང་སྡིག་པ་ཚབས་ཆེ་བས་ན། ངས་དགྲ་བོས་ཁྱོད་ལ་རྡུང་བ་ལྟར་ཁྱོད་ལ་བརྡུངས་ཤིང་། སྙིང་རྗེ་མེད་པའི་ཚུལ་དུ་ཁྱོད་ལ་ཉེས་ཆད་བཅད་པ་ཡིན།  
\v 15 ཁྱོད་ཀྱིས་རྨ་ཁའི་ཕྱིར་འོ་དོད་ཅི་ལ་འདོན། ཁྱོད་ཀྱི་ཟུག་གཟེར་ནི་གསོ་ཐབས་མེད་དེ། ཁྱོད་ཀྱི་ཉེས་སྐྱོན་མང་དྲགས་པ་དང་སྡིག་པ་ཚབས་ཆེ་བས་ངས་ཁྱོད་ལ་འདི་ལྟར་བྱས་སོ། །  
\v 16 ཡིན་ནའང་ཁྱོད་ཟ་མཁན་ཐམས་ཅད་ཀྱང་བཟའ་བར་འགྱུར་ལ། ཁྱོད་ཀྱི་དགྲ་གཅིག་ཀྱང་མ་ལུས་པར་བཙོན་དུ་འགྲོ་བར་འགྱུར། ཁྱོད་འཇོམས་མཁན་རྣམས་ཀྱང་འཇོམས་པ་དང་། ངས་ཁྱོད་ལས་འཕྲོག་མཁན་ཐམས་ཅད་ལས་ཀྱང་འཕྲོག་པར་བྱའོ། །  
\v 17 མི་ཡིས་ཁྱོད་ནི་ཕྱི་རུ་སྤྱུགས་པའི་མི་དང་སུས་ཀྱང་འཚོལ་ཞིབ་མི་བྱེད་པའི་ཛ་ཡན་ཡིན་ནོ་ཞེས་ཟེར་མོད། འོན་ཀྱང་ངས་ཁྱོད་ཀྱི་ནད་སངས་པ་དང་རྨ་རྣམས་གསོ་བར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །  
\v 18 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ཡ་ཀོབ་ཀྱི་གུར་རྣམས་སླར་ཡང་དར་བར་བྱས་ནས་དེའི་གནས་ཚང་ལ་སྙིང་རྗེ་བསྐྱེད་ཅིང་། སྔ་མའི་ཞིག་རོའི་སྟེང་དུ་གྲོང་ཁྱེར་བརྩིག་པ་དང་ཕོ་བྲང་ནང་དུ་སྔར་བཞིན་མི་རྣམས་འདུག་པར་འགྱུར།  
\v 19 ཡང་གཏང་རག་འབུལ་བའི་མགུར་དང་དགའ་མགུ་བྱེད་པའི་སྐད་སྒྲ་དེ་ལས་ཐོན་པར་འགྱུར་ཏེ། ངས་དེ་དག་འཕེལ་བར་བྱེད་པ་ལས་རྒུད་དུ་མི་འཇུག་ལ། ཁོ་ཚོར་དཔལ་སྦྱིན་པ་ལས་སྐྱེངས་པར་མི་བྱའོ། །  
\v 20 དེ་དག་གི་བུ་རྒྱུད་རྣམས་ལ་སྔར་བཞིན་ཐུགས་རྗེ་འཐོབ་པ་དང་། དེ་དག་གི་མི་ཚོགས་ངའི་མདུན་དུ་བརྟན་པོར་ཚུགས་པར་འགྱུར། ཡང་ཁོ་རྣམས་ལ་གཉའ་གནོན་བྱེད་མཁན་ཐམས་ཅད་ལ་ངས་ཉེས་ཆད་གཅོད་ངེས་ཡིན།  
\v 21 དེ་དག་གི་འགོ་དཔོན་ནི་དེ་དག་རང་གི་མི་ཡིན་ཞིང་། དབང་འཛིན་མཁན་ཡང་དེ་དག་གི་ནང་ནས་ཐོན་ནོ། །ངས་དེ་དག་ང་དང་ཉེ་བར་འདྲེན་ཞིང་དེ་ཡང་ང་དང་ཉེ་བར་བཅར་ངེས་ཡིན། དེ་མིན་ངའི་མདུན་དུ་འོང་བའི་སྙིང་སྟོབས་སུ་ལ་ཡོད་ཅེས་གསུངས་པ་དང་།  
\v 22 ཁྱོད་ཅག་ངའི་འབངས་མི་དང་། ང་ཁྱོད་ཀྱི་དཀོན་མཆོག་ཏུ་འགྱུར་རོ་ཞེས་དཀོན་མཆོག་ཡ་ཝཱེས་གསུངས།  
\v 23 ལྟོས་ཤིག དཀོན་མཆོག་ཡ་ཝཱེའི་ཐུགས་ཁྲོ་ནི་རླུང་དམར་དང་འདྲ་ཞིང་། རླུང་འཚུབ་དྲག་པོ་ཡིན་ཏེ་ངན་པའི་མགོ་ལ་འཁོར་བར་འགྱུར།  
\v 24 དཀོན་མཆོག་ཡ་ཝཱེའི་ཐུགས་དགོངས་རྣམས་དངོས་སུ་འགྲུབ་པའི་བར་དུ། ཁོང་གི་ཐུགས་ཁྲོ་ལ་ཞི་བ་མེད་ཅིང་། མཐའ་མའི་ཉིན་མོ་དག་ལ་ཁྱོད་ཅག་གིས་དོན་འདི་རྟོགས་པར་འགྱུར་རོ། །   
\c 31
\cl ལེའུ་སོ་གཅིག་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེས་ར་ཨེལ་པ་རྣམས་ཕྱིར་རང་ཡུལ་དུ་ལོག་པ།  
\p
\v 1 དེའི་ཚེ་ང་ནི་ཡེས་ར་ཨེལ་གྱི་ཁྱིམ་རྒྱུད་སོ་སོའི་དཀོན་མཆོག་དང་དེ་དག་ངའི་འབངས་མི་རུ་འགྱུར་རོ་ཞེས་དཀོན་མཆོག་ཡ་ཝཱེས་གསུངས།  
\v 2 དཀོན་མཆོག་ཡ་ཝཱེས་འདི་སྐད་དུ། རལ་གྲི་ལས་ཐར་བའི་མི་རྣམས་ལ་དབེན་སྟོང་ནས་གཟིགས་སྐྱོང་འཐོབ་པ་དང་། ངས་ཡེས་ར་ཨེལ་ལ་ངལ་གསོ་གནང་བར་བྱའོ་ཞེས་གསུངས།  
\v 3 དཀོན་མཆོག་ཡ་ཝཱེ་ནི་རྒྱང་རིང་ནས་ང་ལ་མངོན་པར་གྱུར་ཏེ་འདི་སྐད་དུ། ངས་མཐའ་མེད་པའི་བྱམས་བརྩེས་ཁྱོད་ལ་བྱམས་པས། ངས་བྱམས་བརྩེ་ཡིས་ཁྱོད་རང་འགུག་པ་ཡིན།  
\v 4 ཀྱེ་ན་ཆུང་ཡེས་ར་ཨེལ་ལགས། ངས་ཡང་བསྐྱར་ཁྱོད་བརྩིགས་ན་ཁྱོད་རང་ཚུགས་པར་འགྱུར་ལ། ཁྱོད་ཀྱིས་ཡང་བསྐྱར་སིལ་རྔ་བཟུང་ནས་དགའ་མགུའི་ངང་གར་རྩེད་ཀྱི་ཁྲོད་དུ་ཞུགས་པར་འགྱུར།  
\v 5 ཁྱོད་ཀྱིས་སཱ་མར་ཡའི་རི་རྣམས་ལ་རྒུན་ཚལ་རྣམས་འཛུགས་ཤིང་། འཛུགས་མཁན་གྱིས་བཙུགས་ནས་དེའི་ཤིང་ཏོག་ལོངས་སུ་སྤྱོད་པར་འགྱུར་རོ། །  
\v 6 ཉིན་ཞིག་ལ་ཨེ་ཕཱར་ཡིམ་གྱི་རི་ལས་སོ་ལྟ་པས་འདི་ལྟར། ལོངས་ཤིག་དང་། རང་ཅག་ཛ་ཡན་དུ་རང་གི་དཀོན་མཆོག་ཡ་ཝཱེའི་དྲུང་དུ་འགྲོའོ་ཞེས་འབོད་པར་འགྱུར་ཞེས་གསུངས་སོ། །  
\v 7 ཡང་དཀོན་མཆོག་ཡ་ཝཱེས་འདི་སྐད་དུ། ཡ་ཀོབ་ཀྱི་ཕྱིར་དུ་དགའ་སྤྲོའི་སྐད་སྒྲོགས་ཤིག མི་རིགས་ཀུན་ལས་གཙོ་བོ་ཡིན་པ་དེའི་ཕྱིར་དགའ་འབོད་གྱིས་ཤིག ཁྱོད་ཚོས་ཀྱེ་དཀོན་མཆོག་ཡ་ཝཱེ་ལགས། ཉིད་ཀྱི་མི་རྣམས་སྐྱོབ་པར་མཛོད་ཅིག ཡེས་ར་ཨེལ་གྱི་ལྷག་ལུས་རྣམས་སྐྱོབ་པར་མཛོད་ཅིག་ཅེས་ཁྱབ་བསྒྲག་བྱོས་ལ་བསྟོད་ཅིག  
\v 8 ལྟོས་ཤིག ངས་དེ་དག་བྱང་ཕྱོགས་ཀྱི་ཡུལ་ནས་ཕྱིར་འཁྲིད་འོང་བ་དང་ས་མཐའ་ནས་བསྡུ་བར་བྱ་སྟེ། དེ་དག་གི་ནང་དུ་ལོང་པ་དང་ཞ་བོ། མངལ་དང་ལྡན་པ། སྦྲུམ་མ་བཅས་ཡོད་ཅིང་མི་ཚོགས་ཆེན་པོ་ཞིག་ཚུར་ལོག་འོང་།  
\v 9 དེ་དག་ངུ་བཞིན་འོངས་ནས་བདག་ལ་ཞུ་བ་བྱེད་པ་དང་། ངས་ཁོ་རྣམས་ཁྲིད་ནས་གཙང་པོའི་འགྲམ་དང་དྲང་པོའི་ལམ་དུ་བསྐྱོད་པར་བྱེད་ཅིང་དེ་རྣམས་འགྱེལ་བར་མི་འགྱུར་རོ། །ཅི་ལ་ཞེ་ན། ང་ནི་ཡེས་ར་ཨེལ་གྱི་ཕ་དང་། ཨེ་ཕཱར་ཡིམ་ནི་ངའི་སྐྱེས་འགོ་ཡིན་ནོ། །  
\v 10 ཀྱེ་མི་རིགས་རྣམས། དཀོན་མཆོག་ཡ་ཝཱེའི་བཀའ་ལ་ཉོན་ཅིག རྒྱང་རིང་གི་གླིང་ཕྲན་དུ་འདི་བཞིན་སྒྲོགས་ཤིག ཡེས་ར་ཨེལ་སིལ་བུར་གཏོར་མཁན་གྱིས་དེ་སླར་ཡང་བསྡུ་ཞིང་། རྫི་བོས་རང་གི་ལུག་ཁྱུ་སྲུང་བ་ལྟར་དེ་དག་བསྲུང་བར་འགྱུར་ཞེས་པའོ། །  
\v 11 ཅི་ལ་ཞེ་ན། དཀོན་མཆོག་ཡ་ཝཱེས་ཡ་ཀོབ་བླུས་པ་དང་། དེ་ནི་རང་ལས་སྟོབས་ཆེ་བའི་ལག་ནས་ཐར་བར་མཛད།  
\v 12 དེ་རྣམས་ཛ་ཡན་གྱི་མཐོ་སར་འོངས་ཏེ་གླུ་ལེན་ཞིང་། དཀོན་མཆོག་ཡ་ཝཱེས་གནང་སྦྱིན་བཟང་པོ་རྣམས་ཏེ། འབྲུ་རིགས་དང་རྒུན་ཆང་། སྣུམ། ལུ་གུ། བ་ཕྲུག་བཅས་གནང་བས་དགའ་སྤྲོས་དགང་ཞིང་། དེ་དག་གི་མི་ཚེ་ནི་ཆུ་མོད་པའི་སྐྱེད་ཚལ་ལྟར་གྱུར་ནས་ནམ་ཡང་སྐམ་པར་མི་འགྱུར།  
\v 13 དེའི་དུས་སུ་ན་ཆུང་མ་རྣམས་དགའ་ནས་བྲོ་འཁྲབ་ཅིང་། ཁ་རྒན་གཞོན་ཐམས་ཅད་མཉམ་དུ་དགའོ། །ཅི་ལ་ཞེ་ན། ངས་དེ་དག་གི་སྡུག་བསྔལ་ནི་དགའ་སྤྲོ་རུ་བསྒྱུར་ནས་ཁོ་རྣམས་ལ་སེམས་གསོ་བྱེད་པ་དང་། དེ་དག་ལ་སེམས་སྡུག་ཁྲོད་དགའ་སྤྲོ་འཐོབ་པར་བྱའོ། །  
\v 14 ཡང་མཆོད་དཔོན་རྣམས་ཀྱི་སེམས་ནི་སྣུམ་གྱིས་ཚིམ་པར་བྱ་ཞིང་། མི་རྣམས་ངའི་གནང་སྦྱིན་གྱིས་ཚིམ་པར་འགྱུར་ཞེས་དཀོན་མཆོག་ཡ་ཝཱེས་གསུངས་སོ། །   
\s1 ཡ་ཝཱེས་ཡེས་ར་ཨེལ་ལ་སྙིང་རྗེས་གཟིགས་པ།  
\p
\v 15 དཀོན་མཆོག་ཡ་ཝཱེས་འདི་སྐད་དུ། རཱ་མ་རུ་ཆོ་ངེ་འདོན་པ་དང་ངུ་འབོད་ཆེན་པོའི་སྒྲ་ཞིག་ཐོས་འོང་སྟེ། དེ་ནི་རཱ་ཧེལ་རང་གི་བུ་ཕྲུག་རྣམས་ཀྱི་ཕྱིར་ངུ་བ་ཡིན་ལ། དེ་རྣམས་མེད་པས་མོས་སེམས་གསོ་མི་འདོད་དོ་ཞེས་གསུངས།  
\v 16 དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱི་ཅི་བྱས་ལ་ལས་འབྲས་འཐོབ་ཅིང་དེ་རྣམས་དགྲ་བོའི་ཡུལ་ནས་ཕྱིར་ལོག་འོང་བས་སྐད་བརྒྱབ་ནས་མ་ངུ་ཞིག ཁྱོད་ཀྱི་མིག་ལས་མཆི་མ་མ་བཞུར་ཅིག་ཅེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །  
\v 17 ཁྱོད་ཀྱི་བུ་ཕྲུག་རྣམས་སླར་རང་གི་ཡུལ་དུ་འོང་བར་འགྱུར་བས་ན། ཁྱོད་ཀྱི་མ་འོངས་པར་རེ་བ་ཡོད་ཅེས་དཀོན་མཆོག་ཡ་ཝཱེས་གསུངས།  
\v 18 ཨེ་ཕཱར་ཡིམ་གྱིས་རང་གི་ཆེད་དུ་འདི་ལྟར་སྨྲེ་སྔགས་འདོན་པ་ངས་ཐོས་ཏེ། ཁྱེད་ཀྱིས་བདག་བཅུན་ཞིང་ང་ནི་ཁ་ལོ་མ་བཏུལ་བའི་བ་ཕྲུག་ཅིག་དང་འདྲ། ཁྱེད་ནི་ངའི་དཀོན་མཆོག་ཡ་ཝཱེ་ལགས་པས། ང་གསོ་བར་མཛོད་དང་ང་ཕྱིར་འཁོར་འོང་།  
\v 19 ང་ཕྱིར་འཁོར་རྗེས་སེམས་གཏིང་ནས་འགྱོད་པ་སྐྱེས་ཤིང་། གོ་རྟོགས་སད་རྗེས་རང་གི་བྲང་ཁར་བརྡུངས་ \f + \ft འདིར་བྲང་ཁར་བརྡུངས་ཞེས་པར་མ་ཕྱི་ལས་བརླ་ལ་ཐལ་ལྕག་གཞུས་ཞེས་མཐོང་སྟེ། ངོ་གནོང་བ་མཚོན་པ་ཡིན། \f*ཤིང་། ངས་ན་གཞོན་དུས་ཀྱི་བརྙས་བཅོས་ཁུར་བས་འགྱོད་པ་སྐྱེས་ནས་ངོ་ཚ་བར་གྱུར་ཏོ་ཞེས་པའོ། །  
\v 20 ཨེ་ཕཱར་ཡིམ་ནི་ངའི་གཅེས་པའི་བུ་ཡིན་ནམ། ང་དགའ་བའི་བུ་དེ་ཡིན་ནམ། ངས་དེ་ལ་བཀའ་བཀྱོན་གནང་དུས་སུ་སེམས་ལ་ཡང་བསྐྱར་དེ་དྲན་ངེས་ཡིན། དེའི་ཕྱིར་ངའི་སེམས་ནས་དེ་ལ་སེམས་ཁྲལ་བྱེད་ཅིང་། ངས་དེ་ལ་སྙིང་རྗེ་བསྐྱེད་པར་འགྱུར་ཞེས་དཀོན་མཆོག་ཡ་ཝཱེས་གསུངས།  
\v 21 ཀྱེ་ན་ཆུང་བུ་མོ་ཡེས་ར་ཨེལ་ལགས། རང་གི་དོན་དུ་ལམ་ཐོ་ཚུགས་ཤིག རང་ལ་ཐོ་སློངས་ཤིག ཁྱོད་རང་འགྲིམས་མྱོང་བའི་ལམ་ཆེན་ལ་ཡིད་འཇོག་ཡོད་པར་གྱིས། ཁྱོད་ཕྱིར་འཁོར་ལ་རང་གི་གྲོང་ཁྱེར་གྱི་ནང་དུ་ལོག་ཤོག  
\v 22 དཀོན་མཆོག་ཡ་ཝཱེས་ས་གཞིའི་སྟེང་དུ་བུད་མེད་ཀྱིས་སྐྱེས་པ་བསྲུང་བའི་དོན་གསར་པ་ཞིག་མཛད་པར་འགྱུར་བས། དད་པ་མི་བརྟན་པའི་བུད་མེད་ཁྱོད་གང་སར་འཁྱམས་ནས་དུས་ག་ཙམ་ལ་འདུག་གམ།   
\s1 དཀོན་མཆོག་གི་འབངས་མིའི་འོད་སྟོང་འབར་བའི་མ་འོངས་པ།  
\p
\v 23 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ངས་བཙོན་དུ་ཁྲིད་པའི་མི་རྣམས་ཕྱིར་ལོག་ཏུ་འཇུག་པའི་དུས་སུ། དེ་རྣམས་ཀྱིས་ཡ་ཧུ་དཱའི་ཡུལ་ཁམས་དང་དེའི་གྲོང་ཁྱེར་དུ། ཀ་ཡེ་དྲང་བདེན་གྱི་གནས་ཚང་། རི་བོ་དམ་པ་ལགས། དཀོན་མཆོག་ཡ་ཝཱེས་ཁྱོད་ལ་བྱིན་རླབས་གནང་བར་གྱུར་ཅིག་ཅེས་བརྗོད་པར་འགྱུར།  
\v 24 དེ་ནས་ཡ་ཧུ་དཱའི་གྲོང་ཁྱེར་སོ་སོའི་མི་དང་ཞིང་པ། ཕྱུགས་འཚོ་བའི་མི་ཐམས་ཅད་ལྷན་ཅིག་ཏུ་ཡ་ཧུ་དཱ་རུ་གནས་པར་འགྱུར་རོ། །  
\v 25 ཉམ་ཐག་པའི་མི་ཀུན་ལ་ངས་སེམས་ཤུགས་བསྐྱེད་ཅིང་། སེམས་སྡུག་པའི་མི་ནི་ངས་ཡིད་ཚིམ་པར་འཇུག་གོ་ཞེས་གསུངས།  
\v 26 དེ་ནས་ང་གཉིད་ལས་སད་ཅིང་ཕྱོགས་བཞིར་བལྟས་པ་དང་། ངས་རང་ཉིད་གཉིད་སྐྱིད་པོ་ཞིག་ལོག་པ་ཚོར་བྱུང་།  
\v 27 ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། ངས་ཡེས་ར་ཨེལ་གྱི་ཁྱིམ་རྒྱུད་དང་ཡ་ཧུ་དཱའི་ཁྱིམ་རྒྱུད་གཉིས་ཀྱི་མི་ཕྱུགས་གཉིས་ཀ་འཕེལ་བར་བྱའོ། །  
\v 28 ངས་སྔོན་ཆད་དེ་རྣམས་རྩ་བ་ནས་འདོན་པ་དང་བཤིག་པ། བརླག་པ། ཕམ་པར་བཟོ་བ། ཆག་སྒོ་འབེབ་པ་བཅས་ལ་ཇི་ལྟར་ཡིད་འཇོག་བྱས་ན། མ་འོངས་པ་ན་ངས་དེ་རྣམས་ཡར་བརྩིག་པ་དང་འཛུགས་པའི་དོན་ལའང་དེ་ལྟར་ཡིད་འཇོག་བྱེད་ངེས་ཡིན་ཞེས་དཀོན་མཆོག་ཡ་ཝཱེས་གསུངས།  
\v 29 དེའི་དུས་སུ་མི་རྣམས་ཀྱིས་ཕ་ཡིས་རྒུན་འབྲུམ་སྐྱུར་མོ་ཟོས་པས་བུ་ཡི་སོ་བརྩེ་ཞེས་མི་ཟེར་རོ། །  
\v 30 ཡིན་ནའང་སོ་སོ་རང་རང་གི་སྡིག་པའི་ལས་འབྲས་ཀྱིས་འཆི་ཞིང་། རྒུན་འབྲུམ་སྐྱུར་མོ་ཟ་མཁན་རང་རང་གི་སོ་བརྩེ་བར་འགྱུར་རོ། །  
\v 31 ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། བདག་གིས་ཡེས་ར་ཨེལ་གྱི་ཁྱིམ་རྒྱུད་དང་ཡ་ཧུ་དཱའི་ཁྱིམ་རྒྱུད་གཉིས་ལ་ཞལ་ཆད་གསར་པ་ཞིག་འཇོག་པར་བྱ་སྟེ།  
\v 32 ཞལ་ཆད་འདི་ནི་བདག་གིས་དེ་དག་གི་ཕ་མེས་རྣམས་ཀྱི་ལག་པར་འཇུས་ཏེ་ཨེ་ཅིབ་ཡུལ་ནས་ཁྲིད་ཡོང་དུས་བཞག་པའི་ཞལ་ཆད་ལྟ་བུ་མ་ཡིན་ཏེ། བདག་ནི་དེ་དག་གི་ཁྱོ་བོ་ཡིན་ནའང་དེ་རྣམས་ངའི་ཞལ་ཆད་དང་འགལ་བ་ཡིན་ཞེས་དཀོན་མཆོག་ཡ་ཝཱེས་གསུངས།  
\v 33 དུས་དེའི་རྗེས་སུ་བདག་གིས་ཡེས་ར་ཨེལ་གྱི་ཁྱིམ་རྒྱུད་རྣམས་ལ་ཞལ་ཆད་གསར་པ་ཞིག་གནང་བར་བྱ་ཞེས་དཀོན་མཆོག་ཡ་ཝཱེས་གསུངས་ཏེ། དེ་ནི་ངས་རང་གི་བཀའ་ཁྲིམས་དེ་དག་གི་ཡིད་ལ་འཇོག་ཅིང་དེ་དག་གི་སེམས་ནང་དུ་བརྐོ་བར་བྱ། བདག་ནི་དེ་དག་གི་དཀོན་མཆོག་དང་དེ་དག་བདག་གི་འབངས་མི་རུ་འགྱུར་བ་དང་།  
\v 34 ཡང་མི་མཆོག་དམན་ཀུན་གྱིས་བདག་ངོ་ཤེས་པར་འགྱུར་ལ། ངས་དེ་དག་གི་སྡིག་པ་སེལ་ཞིང་ཕྱིན་ཆད་དེ་དག་གི་སྡིག་ཉེས་མི་དྲན་པའི་རྐྱེན་གྱིས། སུས་ཀྱང་རང་གི་ཁྱིམ་མཚེས་དང་སྤུན་ལ་དཀོན་མཆོག་ཡ་ཝཱེ་ངོ་ཤེས་པར་འོས་ཞེས་སྨྲ་ཞིང་བསླབ་པར་མི་འགྱུར་རོ་ཞེས་དཀོན་མཆོག་ཡ་ཝཱེས་གསུངས་སོ། །  
\v 35 ཉིན་མོའི་འོད་དུ་ཉི་མ་གནང་ཞིང་། མཚན་མོའི་འོད་དུ་ཟླ་བ་དང་སྐར་མ་རྣམས་ཀྱི་སྲོལ་མཛད་དེ། རྒྱ་མཚོའི་རྦ་རླབས་དཀྲུགས་ནས་མཚོ་རུ་རྦ་རླབས་ཆིལ་ཆིལ་གཡོ་བར་མཛད། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ནི་ཁོང་གི་མཚན་ལགས་པ་ཉིད་ཀྱིས་འདི་སྐད་དུ།  
\v 36 ཇི་སྟེ་ཆོས་ཉིད་འདི་དག་ངའི་མདུན་ནས་འདོར་ནུས་པ་ཡིན་ན། ཡེས་ར་ཨེལ་གྱི་བུ་རྒྱུད་ཀྱང་ངའི་མདུན་ནས་རྒྱུད་ཆད་པར་གྱུར་ཏེ་རྒྱལ་ཁམས་ཤིག་ཏུ་གཏན་ནས་མི་གྲུབ་བོ་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །  
\v 37 དཀོན་མཆོག་ཡ་ཝཱེས་འདི་སྐད་དུ། གལ་ཏེ་མི་ཡིས་སྟེང་གི་ནམ་མཁའ་གཞལ་ནུས་པ་དང་འོག་གི་རྩིག་རྨང་འཚོལ་ཞིབ་བྱེད་ཐུབ་ན། བདག་གིས་ཀྱང་ཡེས་ར་ཨེལ་གྱི་བུ་རྒྱུད་ཐམས་ཅད་ཀྱིས་བྱས་པའི་ལས་ཀུན་གྱི་ཕྱིར་ཁོ་རྣམས་འདོར་བར་བྱའོ་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །  
\v 38 ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། ཧ་ནན་ཨེལ་ལྕོག་མཁར་ནས་གྲུ་ག་ཡི་རྒྱ་སྒོའི་བར་དུ་གྲོང་ཁྱེར་འདི་དཀོན་མཆོག་ཡ་ཝཱེའི་དོན་དུ་བཞེང་བའི་དུས་དེ་སླེབས་ལ་ཉེ།  
\v 39 ཡང་ཐིག་སྐུད་ཕྱི་རུ་འཐེན་ཏེ་ག་རེབ་རི་བོ་ནས་གོ་ཨཱའི་བར་དུ་སླེབ་པར་འགྱུར།  
\v 40 རོ་གཡུག་ས་དང་ཐལ་བ་གཏོར་སའི་ལུང་པ་ཧྲིལ་པོ་དང་བཅས་ཞིང་ས་ཐམས་ཅད་ཀིད་རོན་གྲོག་མོའི་བར་དང་། ཤར་ཕྱོགས་རྟའི་རྒྱ་སྒོ་ཡི་གྲུ་གའི་བར་དུ་དཀོན་མཆོག་ཡ་ཝཱེའི་ཕྱིར་དམ་པར་འགྱུར་ཞིང་། ཕྱིན་ཆད་ནམ་ཡང་དེ་རྩ་བ་ནས་འདོན་པ་དང་ཕམ་པར་བཟོ་བར་མི་འགྱུར་རོ། །   
\c 32
\cl ལེའུ་སོ་གཉིས་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེ་རེམ་ཡཱས་ཞིང་ས་ཉོས་པ།  
\p
\v 1 ཡ་ཧུ་དཱའི་རྒྱལ་པོ་ཚིད་ཀི་ཡཱའི་སྲིད་ལོ་བཅུ་པ་སྟེ་ནེ་བོ་ཀད་ནེ་ཙར་གྱི་སྲིད་སྐྱོང་བའི་ལོ་བཅོ་བརྒྱད་པ་ལ། དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།  
\v 2 དུས་དེར་པཱ་པེལ་ལོན་གྱི་རྒྱལ་པོའི་དམག་དཔུང་གིས་ཡེ་རུ་སཱ་ལེམ་བསྐོར་ཅིང་། ལུང་སྟོན་པ་ཡེ་རེམ་ཡཱ་ནི་ཡ་ཧུ་དཱའི་རྒྱལ་པོའི་ཕོ་བྲང་དུ་ཡོད་པའི་སྐུ་སྲུང་གི་ཁྱམས་རར་བཟུང་ཡོད་པ་ཡིན།  
\v 3 ཅི་ལ་ཞེ་ན། ཡ་ཧུ་དཱའི་རྒྱལ་པོ་ཚིད་ཀི་ཡཱས་ཁོང་ཉིད་བཟུང་སྟེ་འདི་ལྟར། ཁྱོད་ཀྱིས་དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་གྲོང་ཁྱེར་འདི་པཱ་པེལ་ལོན་གྱི་རྒྱལ་པོའི་ལག་ཏུ་གཏོད་ཅིང་དེས་གྲོང་ཁྱེར་འདི་འཛིན་པར་འགྱུར།  
\v 4 ཡ་ཧུ་དཱའི་རྒྱལ་པོ་ཚིད་ཀི་ཡཱ་ནི་ཀལ་དི་པའི་ལག་ནས་ཐར་བར་མི་འགྱུར་ལ། པཱ་པེལ་ལོན་གྱི་རྒྱལ་པོའི་ལག་ཏུ་གཏོད་ངེས་ཏེ། པཱ་པེལ་ལོན་གྱི་རྒྱལ་པོ་དང་ཁ་རི་ཁ་ཐུག་གིས་གཏམ་སྨྲ་ཞིང་། ཕན་ཚུན་དངོས་སུ་མཐོང་བར་འགྱུར།  
\v 5 པཱ་པེལ་ལོན་གྱི་རྒྱལ་པོས་ཚིད་ཀི་ཡཱ་ནི་པཱ་པེལ་ལོན་དུ་ཁྲིད་དེ། ངས་ཁོ་ལ་ལྟ་སྐྱོང་བྱེད་པའི་བར་དུ་ཚིད་ཀི་ཡཱ་ནི་དེ་རུ་འདུག་པར་འགྱུར། ཁྱོད་རྣམས་ཀལ་དི་པ་དང་འཐབ་ནའང་རྒྱལ་ཁ་མི་ལོན་ཞེས་པའོ་ཞེས་ལུང་སྟོན་པ་ཅི་ཡིན་ནམ་ཞེས་སྨྲས་སོ། །  
\v 6 དེ་ནས་ཡེ་རེམ་ཡཱ་ན་རེ། དཀོན་མཆོག་ཡ་ཝཱེའི་བཀའ་ནི་ང་ལ་བྱུང་བ་འདི་ལྟ་སྟེ།  
\v 7 ལྟོས་ཤིག ཁྱོད་ཀྱི་ཁུ་བོ་ཤལ་ལུམ་གྱི་བུ་ཧ་ནམ་ཨེལ་ཁྱོད་ཀྱི་གམ་དུ་འོངས་ནས་ཁྱོད་ལ་འདི་ལྟར། ཨ་ན་ཐོད་དུ་ཡོད་པའི་ངའི་ཞིང་ས་དེ་ཁྱེད་ཀྱིས་ཉོས་ཤིག ཅི་ལ་ཞེ་ན། ཁྱེད་ལ་དེ་བླུ་བའི་དབང་དང་འགན་ཡོད་ཅེས་ཟེར་བར་འགྱུར་གསུངས་པ་ན།  
\v 8 ངའི་ཁུ་བོའི་བུ་ཧ་ནམ་ཨེལ་ནི་ཏག་ཏག་དཀོན་མཆོག་ཡ་ཝཱེའི་བཀའ་བཞིན་དུ་སྐུ་སྲུང་གི་ཁྱམས་རར་ངའི་གམ་དུ་འོངས་ནས་ང་ལ་ན་རེ། པེན་ཡཱ་མེན་མངའ་ཁོངས་ཀྱི་ཨ་ན་ཐོད་དུ་ཡོད་པའི་ངའི་ཞིང་ས་དེ་ཁྱེད་ཀྱིས་ཉོ་བར་མཛོད། ཅི་ལ་ཞེ་ན། དེ་ནི་ཁྱེད་ཀྱིས་ཁུར་དུ་ལེན་འོས་པར་མ་ཟད་ཁྱེད་ལ་དེ་བླུ་བའི་དབང་དང་འགན་ཡོད་པ་ཡིན། ཁྱེད་ཀྱིས་དེ་ཉོ་བར་མཛོད་ཅེས་སྨྲས་པ་དང་། འདི་ནི་དཀོན་མཆོག་ཡ་ཝཱེའི་བཀའ་ལགས་པ་ངས་རྟོགས་སོ། །  
\v 9 དེ་ནས་ངས་ཨ་ན་ཐོད་དུ་ཡོད་པའི་ཞིང་ས་དེ་རང་གི་ཁུ་བོའི་བུ་ཧ་ནམ་ཨེལ་ལས་ཉོས་ཏེ། དངུལ་སྲང་བརྒྱ་དང་དགུ་བཅུ་གོ་གསུམ་དེ་ལ་སྤྲད།  
\v 10 ངས་ཆད་ཡིག་སྟེང་དུ་མིང་བཀོད་དེ་ཐེའུ་བརྒྱབས་ནས་ཁ་སྦྱར་བ་དང་། དཔང་མི་རྣམས་བོས་ནས་དངུལ་སྲང་ལ་ཚད་དེ་ཁོ་ལ་སྤྲད།  
\v 11 ཡང་ངས་ཁྲིམས་དང་སྒྲིག་སྲོལ་ལྟར་བཞག་པའི་ཆད་ཡིག་སྟེ་ཐེའུ་བརྒྱབས་ཡོད་པ་དང་ཁ་སྦྱར་མེད་པ་གཉིས་ཀ་བླངས་ཏེ།  
\v 12 ངའི་ཁུ་བོའི་བུ་ཧ་ནམ་ཨེལ་དང་མིང་བཀོད་དེ་དཔང་པོ་བྱེད་མཁན་རྣམས་དང་། སྐུ་སྲུང་གི་ཁྱམས་རར་བསྡད་ཡོད་པའི་ཡ་ཧུ་དཱ་པ་ཀུན་གྱི་མདུན་དུ། ཆད་ཡིག་ནི་མ་སེ་ཡཱའི་ཚ་བོ་སྟེ་ནེར་ཡཱའི་བུ་པཱ་རུག་ལ་སྤྲད་ཅིང་།  
\v 13 ངས་མི་ཚོགས་ཀྱི་མདུན་དུ་པཱ་རུག་ལ་བཅོལ་གདམ་བྱས་ཏེ་འདི་ལྟར།  
\v 14 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཁྱོད་ཀྱིས་ཐེའུ་བརྒྱབས་ཡོད་པ་དང་ཁ་སྦྱར་མེད་པའི་ཆད་ཡིག་འདི་གཉིས་ཁྱེར་ནས། ཡུན་རིང་པོར་ཉར་བའི་ཕྱིར་རྫ་བུམ་ནང་དུ་ཞོག་ཅིག་ཅེས་གསུངས་སོ། །  
\v 15 ཅི་ལ་ཞེ་ན། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། མ་འོངས་པ་ན་ས་འདི་རུ་མི་ཡིས་ཡང་བསྐྱར་ཁང་པ་དང་ཞིང་ས། རྒུན་ཚལ་བཅས་ཉོ་བར་འགྱུར་ཞེས་གསུངས་པའོ། །   
\s1 ཡེ་རེམ་ཡཱས་སྨོན་ལམ་བཏབ་པ།  
\p
\v 16 དེ་ཡང་ངས་ནེར་ཡཱའི་བུ་པཱ་རུག་ལ་ཆད་ཡིག་དེ་སྤྲད་རྗེས། དཀོན་མཆོག་ཡ་ཝཱེ་ལ་སྨོན་ལམ་བཏབ་ནས་འདི་ལྟར།  
\v 17 ཀྱི་ཧུད། གཙོ་བོ་ཡ་ཝཱེ་ལགས། གཟིགས་དང་། ཁྱེད་ཀྱིས་སྔར་ཉིད་ཀྱི་མཐུ་སྟོབས་ཆེན་པོ་དང་ཕྱི་རུ་བརྐྱངས་པའི་དཔུང་ངར་གྱིས་གནམ་ས་གཉིས་ཀ་བཀོད་པ་སྟེ། ཁྱེད་ལ་མི་འགྲུབ་བྱ་བ་གང་ཡང་མེད།  
\v 18 ཁྱེད་ཀྱིས་མི་ཁྲི་མ་འབུམ་ལ་ཐུགས་བརྩེ་བས་གཟིགས་ཤིང་། ཕ་མེས་ཀྱི་སྡིག་པའི་ལས་འབྲས་ནི་དེའི་བུ་རྒྱུད་རྣམས་ཀྱི་སྟེང་ལ་འབབ་པར་མཛད་པ་དང་། ཁྱེད་ནི་མཐུ་སྟོབས་ཆེ་བའི་ཀུན་དབང་གི་དཀོན་མཆོག་ཡིན་ལ། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ནི་ཁྱེད་ཀྱི་མཚན་ལགས་སོ། །  
\v 19 ཁྱེད་ཀྱི་ཐུགས་བཀོད་རླབས་ཆེ་བ་དང་མཛད་པ་ནུས་མཐུ་དང་ལྡན་ཞིང་། མི་རེ་རེའི་སྤྱོད་པ་དང་དེས་སྤྱད་པའི་ལས་འབྲས་བཞིན་ལན་འཇལ་ཕྱིར། ཁྱེད་ཀྱི་སྤྱན་ཟུང་གིས་མི་བུ་ཀུན་གྱི་སྤྱོད་པ་ཐམས་ཅད་ལ་ཞིབ་ཅིང་ཕྲ་བར་གཟིགས་སོ། །  
\v 20 ཁྱེད་ཀྱིས་ཨེ་ཅིབ་ཡུལ་དུ་གྲུབ་རྟགས་དང་དོན་ངོ་མཚར་ཅན་རྣམས་མངོན་པར་མཛད་ཅིང་། དེ་རིང་གི་བར་དུ་ཡེས་ར་ཨེལ་དང་ས་སྟེང་གི་མི་རྣམས་ཀྱི་ནང་དུའང་དེ་ལྟར་མཛད་ནས། དེ་རིང་གི་ཉིན་མོ་བཞིན་ཉིད་ཀྱི་མཚན་སྙན་གྲགས་རྒྱས་པར་མཛད་དོ། །  
\v 21 ཁྱེད་ཀྱིས་གྲུབ་རྟགས་དང་དོན་ངོ་མཚར་ཅན་རྣམས་དང་ནུས་མཐུ་ལྡན་པའི་ཕྱག ཕྱི་རུ་བརྐྱངས་པའི་དཔུང་ངར་བཅས་དང་། རབ་ཏུ་ཆེ་ཞིང་འཇིགས་སུ་རུང་བའི་སྒོ་ནས་ཉིད་ཀྱི་མི་སྡེ་ཡེས་ར་ཨེལ་ནི་ཨེ་ཅིབ་ཡུལ་ནས་ཁྲིད་འོངས་པ་དང་།  
\v 22 ཁྱེད་ཀྱིས་དེ་དག་གི་ཕ་མེས་རྣམས་ལ་གནང་བར་དབུ་མནའ་བཞེས་པའི་ཡུལ་ཏེ་འོ་མ་དང་སྦྲང་རྩི་བཞུར་བའི་ཡུལ་འདི་དེ་དག་ལ་གནང་བ་དང་།  
\v 23 དེ་རྣམས་འོངས་ནས་ཡུལ་འདི་ས་སྐལ་དུ་ཐོབ་ཀྱང་། ཁྱེད་ཀྱི་གསུང་ལ་མ་མཉན་པ་དང་ཁྱེད་ཀྱི་བཀའ་ཁྲིམས་ཀྱང་མ་བསྲུངས་ལ། དེ་དག་གིས་ཁྱེད་ཀྱིས་བསྒོས་པའི་བཀའ་བཞིན་དུ་མ་སྤྱད་པའི་རྐྱེན་གྱིས། ཁྱེད་ཀྱིས་དེ་དག་གི་སྟེང་ལ་ཆག་སྒོ་འདི་ཐམས་ཅད་བྱུང་བར་མཛད།  
\v 24 གཟིགས་དང་། དགྲ་རྣམས་འོངས་ཏེ་ས་རགས་བརྩིགས་ནས་གྲོང་ཁྱེར་འདི་ལེན་པར་རྩོམ་ཞིང་། གྲོང་ཁྱེར་འདི་ནི་རལ་གྲི་དང་མུ་གེ རིམས་ནད་བཅས་ཀྱི་དབང་གིས་འདི་ལེན་མཁན་ཀལ་དི་པ་རྣམས་ཀྱི་ལག་ཏུ་སྤྲད་པ་དང་། ཁྱེད་ཀྱིས་གསུངས་པ་ལྟར་འགྲུབ་ཅིང་ཁྱེད་ཀྱིས་དེ་གཟིགས་སོ། །  
\v 25 ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་ང་ལ་འདི་སྐད་དུ། དངུལ་གྱིས་རང་གི་དོན་དུ་ས་དེ་ཉོས་ལ། དཔང་པོ་བོས་ནས་བདེན་དཔང་བྱོས་ཤིག་ཅེས་གསུངས་ན་ཡང་། དོན་དངོས་སུ་གྲོང་ཁྱེར་འདི་ནི་ཀལ་དི་པའི་ལག་ཏུ་གཏད་ཟིན་ཏོ་ཞེས་ཞུས་སོ། །  
\v 26 དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།  
\v 27 ལྟོས་ཤིག བདག་ནི་ཡ་ཝཱེ་ཡིན་ཏེ། ཤ་ཁྲག་ཡོད་པ་ཐམས་ཅད་ཀྱི་དཀོན་མཆོག་ཡིན་པས། བདག་ལ་མི་འགྲུབ་བྱ་བ་ཡོད་སྲིད་དམ།  
\v 28 དཀོན་མཆོག་ཡ་ཝཱེས་འདི་སྐད་དུ། ངས་གྲོང་ཁྱེར་འདི་ནི་ཀལ་དི་པ་དང་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱི་ལག་ཏུ་གཏོད་པར་བྱ་སྟེ། ཁོས་དེ་ལེན་པར་འགྱུར།  
\v 29 གྲོང་ཁྱེར་འདིའི་ཡུལ་མི་རྣམས་ཀྱིས་སྔར་ཁང་ཐོག་ཏུ་པཱ་ཨལ་ལ་སྤོས་བདུགས་པ་དང་། ལྷ་གཞན་རྣམས་ལ་སྐྱེམས་མཆོད་ཕུལ་ནས་ཁོ་བོར་ཁོང་ཁྲོ་བསླངས་པས། གྲོང་ཁྱེར་འདི་བཙན་འཛིན་བྱེད་པའི་ཀལ་དི་པ་རྣམས་འོངས་ཏེ། མེ་སྦར་ནས་གྲོང་ཁྱེར་འདི་དང་འདིའི་ཁང་པ་རྣམས་བསྲེག་པར་འགྱུར་རོ། །  
\v 30 ཡེས་ར་ཨེལ་པ་དང་ཡ་ཧུ་དཱ་པ་རྣམས་ཀྱིས་གཞོན་དུས་ནས་བདག་གི་མིག་ལམ་དུ་ངན་པ་གང་ཡིན་དེ་ཁོ་ན་སྤྱད་ནས། ཡེས་ར་ཨེལ་པ་རྣམས་ཀྱིས་ལག་པས་གང་ཞིག་བཟོས་པ་ཡིས་ང་ལ་ཁོང་ཁྲོ་བསླངས་ཞེས་དཀོན་མཆོག་ཡ་ཝཱེས་འདི་སྐད་གསུངས།  
\v 31 གྲོང་ཁྱེར་འདི་བཞེངས་པ་ནས་དེ་རིང་གི་ཉིན་མོའི་བར་དུ། དེ་དག་གིས་བདག་ལ་ཁོང་ཁྲོ་དང་ཞེ་སྡང་བསླངས་ཏེ། ངས་དེ་རང་གི་མཐོང་ལམ་ནས་མེད་པར་བཟོ་དགོས་པ་བྱུང་།  
\v 32 དེ་ནི་དེ་དག་དང་དེ་དག་གི་རྒྱལ་པོ་དང་འགོ་དཔོན། མཆོད་དཔོན། ལུང་སྟོན་པ། དེ་མིན་ཡ་ཧུ་དཱ་པ་རྣམས་དང་ཡེ་རུ་སཱ་ལེམ་གྱི་ཡུལ་མི་བཅས་ཀྱིས་གང་ཞིག་སྤྱད་པ་དང་། ཡེས་ར་ཨེལ་པ་དང་ཡ་ཧུ་དཱ་པ་རྣམས་ཀྱི་སྡིག་སྤྱོད་ཐམས་ཅད་ཀྱིས་བདག་ལ་ཁོང་ཁྲོ་བསླངས་པའི་ཕྱིར་ཡིན་ནོ། །  
\v 33 དེ་དག་གིས་ང་ལ་རྒྱབ་གཏད་ནས་ངའི་ཕྱོགས་སུ་མ་འཁོར། ངས་དེ་དག་ལ་བསླབ་བྱ་ཡང་ཡང་བཏང་ནའང་དེ་དག་གིས་གདམས་ངག་ཁུར་དུ་ལེན་པར་རྣ་བ་མ་གཏད་པའི་ཁར།  
\v 34 ཞེན་ཁ་ལོག་པའི་སྐུ་འདྲ་རྣམས་ངའི་མིང་གིས་འབོད་པའི་མཆོད་ཁང་དུ་བཞག་སྟེ་མཆོད་ཁང་འདི་བཙོག་པར་བཟོས་སོ། །  
\v 35 རང་གི་བུ་དང་བུ་མོ་རྣམས་མོ་ལེག་ལ་མེ་མཆོད་གཏོང་བའི་ཕྱིར་དུ། དེ་དག་གིས་པེན་ཧིན་ནོམ་ལུང་པ་རུ་པཱ་ཨལ་གྱི་མཐོ་གླིང་རྣམས་བརྩིགས་པ་དང་། ངན་པ་འདི་རྣམས་སྤྱད་དེ་ཡ་ཧུ་དཱ་ཡང་ཉེས་སྡིག་གི་ནང་དུ་ལྷུང་བར་བྱས། འདི་ནི་ངས་བསྒོས་པ་མ་ཡིན་ལ། ངའི་ཡིད་ལའང་གཏན་ནས་ཤར་མ་མྱོང་ངོ་། །  
\v 36 ཁྱོད་ཅག་གིས་གླེང་བའི་རལ་གྲི་དང་མུ་གེ རིམས་ནད་བཅས་ཀྱི་དབང་གིས་པཱ་པེལ་ལོན་གྱི་རྒྱལ་པོའི་ལག་ཏུ་གཏད་པའི་གྲོང་ཁྱེར་འདིའི་སྐོར་ལ། ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ།  
\v 37 ལྟོས་ཤིག དེ་སྔ་ངས་ཁོང་ཁྲོ་དང་ཁྲོ་གཏུམ། ཞེ་སྡང་ཚ་པོ་བཅས་ཀྱི་ནང་དུ་ཡེས་ར་ཨེལ་པ་རྣམས་ཡུལ་ཕྱོགས་སོ་སོར་བསྐྲད་པ་དང་། མ་འོངས་པ་ན་ངས་ཡུལ་དེ་དག་ནས་དེ་རྣམས་བསྡུས་ཏེ་སླར་ཡང་གནས་འདིར་དྲངས་ནས་བདེ་བར་གནས་སུ་འཇུག་གོ །  
\v 38 དེ་དག་ངའི་འབངས་མི་དང་ང་དེ་རྣམས་ཀྱི་དཀོན་མཆོག་ཏུ་གྱུར་ནས།  
\v 39 དེ་དག་མི་ཚེ་གང་པོར་ང་ལ་གུས་ཤིང་འཇིགས་པ་དང་། ཁོ་རྣམས་དང་ཁོ་ཚོའི་བུ་རབས་ཚ་རྒྱུད་རྣམས་ལ་བདེ་སྐྱིད་འཐོབ་པའི་ཕྱིར་དུ། ངས་དེ་དག་ལ་སེམས་པ་གཅིག་མཐུན་དང་སྤྱོད་ལམ་གཅིག་མཚུངས་ཡོད་པར་བྱེད་དོ། །  
\v 40 ངས་དེ་དག་ལ་དུས་གཏན་གྱི་ཞལ་ཆད་བཞག་ནས་ཁོ་རྣམས་དང་མི་འབྲལ་ཞིང་ཁོ་ཚོར་བྱིན་རླབས་གནང་བ་དང་། ཡང་ང་ལ་གུས་ཤིང་འཇིགས་པའི་སེམས་ནི་དེ་དག་གི་ནང་དུ་བཞག་སྟེ། དེ་དག་ང་དང་འབྲལ་བར་མི་བྱའོ། །  
\v 41 ངས་ནི་དེ་དག་ལ་དགའ་བཞིན་དུ་བྱིན་རླབས་གནང་ཞིང་། བློ་གཅིག་སེམས་གཅིག་གིས་དངོས་གནས་དེ་རྣམས་གནས་འདི་རུ་འཛུགས་པར་འགྱུར།  
\v 42 ཅི་ལ་ཞེ་ན། དཀོན་མཆོག་ཡ་ཝཱེས་འདི་སྐད་དུ། ངས་ཇི་ལྟར་མི་འདི་རྣམས་ཀྱི་སྟེང་དུ་ཆག་སྒོ་འདི་ཐམས་ཅད་དྲངས་པ་ཡིན་ན། ངས་དེ་དག་ལ་ཁས་བླངས་པའི་བདེ་སྐྱིད་ཐམས་ཅད་ཀྱང་དེ་ལྟར་འདྲེན་པར་བྱ་སྟེ།  
\v 43 ཁྱོད་ཅག་གིས་འདི་ནི་ཀལ་དི་པ་རྣམས་ཀྱི་ལག་པར་གཏད་ཅིང་། མི་ཕྱུགས་གང་ཡང་མེད་པའི་ས་སྟོང་ཡིན་ཞེས་ཟེར་མོད། འོན་ཀྱང་མ་འོངས་པ་ན་ཡུལ་འདིའི་ཞིང་ས་རྣམས་ཉོ་ཚོང་བྱེད་པར་འགྱུར་ཏེ།  
\v 44 པེན་ཡཱ་མེན་གྱི་ཡུལ་དང་། ཡེ་རུ་སཱ་ལེམ་མཐའ་འཁོར་གྱི་ཡུལ་རྣམས། ཡ་ཧུ་དཱའི་གྲོང་ཁྱེར་རྣམས། རི་ཁུལ་གྱི་གྲོང་ཁྱེར་རྣམས། རི་ཀླུང་གི་གྲོང་ཁྱེར་རྣམས། ནེ་གུབ་ཡུལ་གྱི་གྲོང་ཁྱེར་རྣམས་སུ་མི་ཡིས་དངུལ་སྤྲད་ནས་ཞིང་ས་ཉོ་བར་འགྱུར་ལ། ཆད་ཡིག་བྲིས་ནས་ཐེའུ་བརྒྱབས་ཏེ་ཁ་སྦྱོར་བ་དང་། དཔང་པོ་བཙལ་ནས་བདེན་དཔང་བྱེད་པར་འགྱུར་རོ། །ཅི་ལ་ཞེ་ན། ངས་བཙོན་དུ་ཁྲིད་པའི་མི་རྣམས་ཕྱིར་ལོག་པར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །   
\c 33
\cl ལེའུ་སོ་གསུམ་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡང་བསྐྱར་རྒྱལ་ཁབ་ཕྱིར་འཛུགས་པར་ཁས་ལེན་པ།  
\p
\v 1 ཡེ་རེམ་ཡཱ་ད་དུང་སྐུ་སྲུང་གི་ཁྱམས་རའི་ནང་བཙོན་དུ་ཡོད་པའི་ཚེ། དཀོན་མཆོག་ཡ་ཝཱེའི་བཀའ་ནི་ཐེངས་གཉིས་པར་ཁོང་ལ་བྱུང་བ་འདི་ལྟ་སྟེ།  
\v 2 ས་གཞི་བཀོད་ནས་དབྱིབས་བཏོད་ཅིང་དེ་བརྟན་པོར་འཛུགས་མཁན་ནི་དཀོན་མཆོག་ཡ་ཝཱེ་ཡིན་ལ། མཚན་ལ་དཀོན་མཆོག་ཡ་ཝཱེ་ཞེས་བྱ་བ་ཁོང་གིས་འདི་སྐད་དུ།  
\v 3 ཁྱོད་ཀྱིས་ང་ལ་ཞུས་ན། ངས་ཁྱོད་ལ་བཀའ་ལན་གནང་ཞིང་། ཁྱོད་ཀྱིས་མི་རྟོགས་པའི་གསང་བ་ཆེན་པོ་རྣམས་ཁྱོད་ལ་སྟོན་པར་བྱའོ་ཞེས་གསུངས་སོ། །  
\v 4 ཡང་གྲོང་ཁྱེར་འདིའི་ནང་གི་ཁང་པ་དང་ཡ་ཧུ་དཱ་རྒྱལ་པོའི་ཕོ་བྲང་སྟེ། གྲོང་ཁྱེར་བསྐོར་བའི་ས་རགས་དང་རལ་གྲི་འགོག་པའི་ཆེད་དུ་བཤིག་པ་དེའི་སྐོར་ལ། ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ།  
\v 5 གྲོང་ཁྱེར་འདིའི་ཡུལ་མི་རྣམས་ཕྱི་རོལ་ཏུ་སོང་ནས་ཀལ་དི་པ་དང་འཐབ་པའི་དུས་སུ། ངས་ཁོང་ཁྲོ་དང་ཞེ་སྡང་གིས་བཀུམ་པའི་བེམ་པོ་ཡིས་ཁང་པའི་ནང་བཀང་ངེས་ཡིན་ཏེ། དེ་དག་གི་སྡིག་སྤྱོད་ཀུན་གྱི་ཕྱིར་ང་ཕར་འཁོར་ནས་གྲོང་ཁྱེར་འདི་ལ་མི་བལྟའོ། །  
\v 6 ལྟོས་ཤིག ངས་གྲོང་ཁྱེར་འདིའི་རྨ་ཁ་གསོས་ནས་ཡུལ་མི་རྣམས་དྲག་པར་བྱེད་ཅིང་། ཞི་བདེ་དང་ལྷོད་འཇགས་བསམ་གྱིས་མི་ཁྱབ་པ་དེ་རྣམས་ལ་མངོན་པར་བྱེད་དོ། །  
\v 7 ངས་ཡ་ཧུ་དཱའི་བཙོན་པ་དང་ཡེས་ར་ཨེལ་གྱི་བཙོན་པ་རྣམས་ཕྱིར་ལོག་ཏུ་བཅུག་ནས། ཐོག་མའི་དུས་ལྟར་དེ་རྣམས་འཛུགས་པར་བྱའོ། །  
\v 8 དེ་དག་གིས་ང་ལ་བྱས་པའི་སྡིག་པ་ཐམས་ཅད་འདག་པར་བྱས་ནས། དེ་དག་གིས་ང་ལ་བྱས་པའི་ཉེས་པ་དང་། ང་དང་རྒྱབ་འགལ་དུ་སོང་བའི་སྡིག་པ་རྣམས་སེལ་བར་བྱའོ། །  
\v 9 གྲོང་ཁྱེར་འདི་ཡིས་ས་སྟེང་གི་མི་རིགས་ཀུན་གྱི་མདུན་དུ་ང་ལ་དགའ་སྤྲོའི་མཚན་སྙན་དང་བསྟོད་པ། གཟི་བརྗིད་བཅས་འཐོབ་པར་བྱའོ། །ཅི་ལ་ཞེ་ན། མི་རིགས་ཐམས་ཅད་ཀྱིས་ངས་གྲོང་ཁྱེར་འདིའི་ཡུལ་མི་རྣམས་ལ་གནང་བའི་བདེ་སྐྱིད་ཐོས་པར་འགྱུར། ཡང་དེ་དག་ནི་ངས་གྲོང་ཁྱེར་འདི་ལ་གནང་བའི་བདེ་སྐྱིད་དང་ཞི་བདེ་ཀུན་གྱི་རྐྱེན་གྱིས་འཇིགས་ཤིང་འདར་བར་འགྱུར་རོ་ཞེས་གསུངས།  
\v 10 དཀོན་མཆོག་ཡ་ཝཱེས་འདི་སྐད་དུ། ཁྱོད་ཚོས་ཡུལ་འདི་ལ་མི་ཕྱུགས་གང་ཡང་མེད་པའི་ས་སྟོང་ཞེས་ཟེར་ཡང་། དབེན་སྟོང་དུ་ལུས་ཤིང་མི་མེད་པ་དང་། ཐ་ན་དུད་འགྲོའང་མེད་པའི་ཡ་ཧུ་དཱའི་གྲོང་ཁྱེར་དང་ཡེ་རུ་སཱ་ལེམ་གྱི་སྲང་ལམ་རྣམས་སུ།  
\v 11 ཡང་བསྐྱར་དགའ་ཞིང་སྤྲོ་བའི་སྐད་སྒྲ་དང་། མག་གསར་དང་བག་མའི་སྐད། ད་དུང་གཏང་རག་གི་མཆོད་པ་ཁྱེར་ནས་དཀོན་མཆོག་ཡ་ཝཱེའི་མཆོད་ཁང་དུ་སླེབས་པ་རྣམས་ཀྱི་སྐད་དེ། ཁྱོད་རྣམས་ཀྱིས་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལ་བཀའ་དྲིན་ཞུས་ཤིག ཅི་ལ་ཞེ་ན། ཁོང་ནི་གཞི་ནས་ལེགས་ཤིང་ཁོང་གི་བྱམས་བརྩེ་རྒྱུན་ནས་རྒྱུན་དུ་གནས་ཞེས་ཟེར་བ་ཐོས་ཡོང་སྟེ། ངས་ཡུལ་འདི་ལས་བཙོན་དུ་ཁྲིད་པ་རྣམས་སྔར་བཞིན་ཕྱིར་ལོག་པར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །  
\v 12 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། མི་ཕྱུགས་གང་ཡང་མེད་པའི་ས་སྟོང་འདི་དང་། ཡུལ་འདིའི་གྲོང་ཁྱེར་ཀུན་ཏུ་རྫི་བོ་རྣམས་ཀྱིས་ཡང་བསྐྱར་རང་གི་ལུག་ཁྱུ་འཚོ་བར་འགྱུར་ཞིང་།  
\v 13 རི་ཁུལ་དང་རི་ཀླུང་། ནེ་གུབ་ཡུལ་བཅས་ཀྱི་གྲོང་ཁྱེར་དང་། པེན་ཡཱ་མེན་གྱི་ཡུལ་ཁམས། ཡེ་རུ་སཱ་ལེམ་མཐའ་འཁོར་གྱི་ཡུལ་རྣམས། ཡ་ཧུ་དཱའི་གྲོང་ཁྱེར་རྣམས་སུ་ལུག་ཁྱུ་རྣམས་ཁ་གྲངས་རྩི་མཁན་གྱི་ལག་འོག་ནས་རྒྱུ་བར་འགྱུར་རོ་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །  
\v 14 ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། ངས་ཡེས་ར་ཨེལ་གྱི་ཁྱིམ་རྒྱུད་དང་ཡ་ཧུ་དཱའི་ཁྱིམ་རྒྱུད་རྣམས་ལ་བྱིན་རླབས་གནང་བའི་ཁས་ལེན་བཟང་པོ་དག་བསྒྲུབ་པར་བྱའོ། །  
\v 15 ཉིན་དེ་དག་དང་དུས་དེ་ལ་དཱ་བིད་ཀྱི་རྒྱུད་ནས་མྱུ་གུ་དྲང་བདེན་བསྐྱེད་པར་བྱ་སྟེ། དེས་ས་སྟེང་དུ་དྲང་གཞག་དང་དྲང་བདེན་སྤྱོད་པར་འགྱུར།  
\v 16 དེའི་དུས་སུ་ཡ་ཧུ་དཱ་ནི་ཐར་བར་འགྱུར་ཞིང་ཡེ་རུ་སཱ་ལེམ་བདེ་བར་གནས་པ་དང་། གྲོང་ཁྱེར་འདིའི་མིང་ལ་དཀོན་མཆོག་ཡ་ཝཱེ་ངེད་ཀྱི་དྲང་བདེན་ལགས་ཞེས་འབོད་དོ། །  
\v 17 ཅི་ལ་ཞེ་ན། དཀོན་མཆོག་ཡ་ཝཱེས་འདི་སྐད་དུ། དཱ་བིད་ཀྱི་ཁྱིམ་རྒྱུད་ལས་ནམ་ཡིན་ཡང་ཡེས་ར་ཨེལ་ཁྱིམ་རྒྱུད་ཀྱི་རྒྱལ་ཁྲིར་བཞུགས་མཁན་རྒྱུན་མི་ཆད་ལ།  
\v 18 མཆོད་དཔོན་ལེ་ཝི་པ་རྣམས་ལས་ཀྱང་ངའི་མདུན་དུ་སྦྱིན་སྲེག་དང་འབྲུ་རིགས་ཀྱི་མཆོད་པ། དུས་རྒྱུན་གྱི་མཆོད་པ་རྣམས་འབུལ་མཁན་རྒྱུན་མི་ཆད་ཅེས་གསུངས་སོ། །  
\v 19 དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།  
\v 20 དཀོན་མཆོག་ཡ་ཝཱེས་འདི་སྐད་དུ། གལ་ཏེ་ཁྱོད་ཅག་གིས་ཉིན་མཚན་དུས་ལྟར་མི་འཁོར་བར། ངས་ཉིན་མཚན་གཉིས་ཀྱི་བར་དུ་བཞག་པའི་ཞལ་ཆད་དེ་འདོར་ནུས་པ་ཡིན་ན།  
\v 21 དེ་ནས་ངས་རང་གི་ཞབས་ཕྱི་དཱ་བིད་ལ་བཞག་པའི་ཞལ་ཆད་ཀྱང་འདོར་ནུས་ལ། དེའི་བུ་རྒྱུད་ལས་རྒྱལ་པོའི་སྲིད་ཁྲི་ལ་བཞུགས་མཁན་མེད་པ་དང་། ཡང་ངས་བདག་ལ་ཞབས་ཏོག་སྒྲུབ་པའི་ལེ་ཝི་ཚོ་པའི་མཆོད་དཔོན་རྣམས་ལ་བཞག་པའི་ཞལ་ཆད་ཀྱང་འདོར་ནུས་པ་ཡིན།  
\v 22 ནམ་མཁའི་ཚོགས་རྣམས་བགྲང་གིས་མི་ལང་བ་དང་རྒྱ་མཚོའི་འགྲམ་གྱི་བྱེ་མ་འཇལ་མི་ནུས་པ་ལྟར། ངས་རང་གི་ཞབས་ཕྱི་དཱ་བིད་ཀྱི་བུ་རྒྱུད་དང་ང་ལ་ཞབས་ཏོག་སྒྲུབ་པའི་ལེ་ཝི་པ་རྣམས་འཕེལ་བར་བྱའོ་ཞེས་གསུངས།  
\v 23 ཡང་དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།  
\v 24 མི་འདི་དག་གིས་ཅི་ཟེར་བ་ཁྱོད་ཀྱིས་མི་ཐོས་སམ། དེ་དག་གིས་དཀོན་མཆོག་ཡ་ཝཱེས་བདམས་པའི་ཁྱིམ་རྒྱུད་གཉིས་པོ་ནི་ཁོང་གིས་སྤངས་སོ་ཞེས་ཟེར་ཞིང་། དེ་དག་གིས་དེ་ལྟར་ངའི་མི་སྡེ་ལ་མཐོང་ཆུང་བྱས་ནས། དེ་གཉིས་ཀ་རྒྱལ་ཕྲན་ཞིག་ཏུ་མི་བརྩིའོ་ཞེས་གསུངས།  
\v 25 དཀོན་མཆོག་ཡ་ཝཱེས་འདི་སྐད་དུ། ངས་ཉིན་དཀར་དང་མཚན་མོའི་ཞལ་ཆད་མ་བཞག་པ་དང་། གནམ་སའི་སྲོལ་མ་བཀོད་པ་ཡིན་ན།  
\v 26 དེ་ནས་ངས་ཡ་ཀོབ་ཀྱི་བུ་རྒྱུད་དང་བདག་གི་ཞབས་ཕྱི་དཱ་བིད་ཀྱི་བུ་རྒྱུད་རྣམས་དོར་ནས། དཱ་བིད་ཀྱི་བུ་རྒྱུད་ལས་མི་བདམས་ཏེ་ཨབ་ར་ཧམ་དང་ཨི་སཱག ཡ་ཀོབ་བཅས་ཀྱི་བུ་རྒྱུད་ལ་དབང་སྒྱུར་བར་མི་བྱའོ། །ངས་དེ་དག་ལས་བཙོན་དུ་ཁྲིད་པ་རྣམས་ཕྱིར་ལོག་ཏུ་བཅུག་ནས། དེ་དག་ལ་སྙིང་རྗེ་བསྐྱེད་པར་བྱའོ་ཞེས་གསུངས་སོ། །   
\c 34
\cl ལེའུ་སོ་བཞི་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཚིད་ཀི་ཡཱ་ལ་བསྐུར་བའི་འཕྲིན།  
\p
\v 1 དེ་ཡང་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་ཁོའི་དམག་དཔུང་ཐམས་ཅད་དང་། མངའ་འོག་ཏུ་ཡོད་པའི་ས་སྟེང་གི་རྒྱལ་ཕྲན་དང་མི་རིགས་ཐམས་ཅད་ཁྲིད་དེ། ཡེ་རུ་སཱ་ལེམ་དང་དེའི་མཐའ་འཁོར་གྱི་གྲོང་ཁྱེར་ཡོངས་རྫོགས་ལ་རྒོལ་བའི་ཚེ། དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།  
\v 2 ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་སོང་ནས་ཡ་ཧུ་དཱའི་རྒྱལ་པོ་ཚིད་ཀི་ཡཱ་ལ་ཤོད་ཅིག དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་གྲོང་ཁྱེར་འདི་པཱ་པེལ་ལོན་གྱི་རྒྱལ་པོའི་ལག་ཏུ་གཏོད་དེ། དེས་གྲོང་ཁྱེར་འདི་མེ་ཡིས་བསྲེག་པར་འགྱུར་ཞིང་།  
\v 3 ཁྱོད་ཀྱང་དེའི་ལག་ནས་ཐར་མི་ཐུབ་ལ་བཟུང་ནས་དེའི་ལག་ཏུ་གཏོད་ངེས་ཡིན། ཁྱོད་ཀྱིས་དངོས་སུ་པཱ་པེལ་ལོན་གྱི་རྒྱལ་པོ་མཐོང་ཞིང་། དེས་དངོས་སུ་ཁྱོད་ལ་གཏམ་སྨྲ་བར་འགྱུར་ལ། ཁྱོད་ཀྱང་པཱ་པེལ་ལོན་དུ་འགྲོ་ངེས་ཡིན་ཞེས་གསུངས་ཞེས་པའོ། །  
\v 4 ཀྱེ་ཡ་ཧུ་དཱའི་རྒྱལ་པོ་ཚིད་ཀི་ཡཱ་ཁྱོད་ཀྱིས་དཀོན་མཆོག་ཡ་ཝཱེའི་བཀའ་ལ་ཉོན་ཅིག དཀོན་མཆོག་ཡ་ཝཱེས་ཁྱོད་ཀྱི་སྐོར་ལ་འདི་སྐད་དུ། ཁྱོད་ནི་རལ་གྲིའི་འོག་ཏུ་མི་འཆི་བར།  
\v 5 བདེ་བར་ཚེ་ལས་འདས་ཏེ། མི་རྣམས་ཀྱིས་ཇི་ལྟར་ཁྱོད་ཀྱི་མེས་པོ་སྟེ་རྒྱལ་པོ་སྔ་རབས་རྣམས་ལ་སྤོས་བདུགས་པ་བཞིན་ཁྱོད་ལའང་དེ་ལྟར་སྤོས་བདུག་ཅིང་། ཀྱི་ཧུད་ཇོ་བོ་ལགས་ཞེས་ཟེར་ཞིང་ཁྱོད་ཀྱི་དོན་དུ་མྱ་ངན་ཞུ་བར་འགྱུར་ཞེས་བདག་གིས་སྨྲའོ་ཞེས་གསུངས་སོ། །  
\v 6 དེ་ནས་ལུང་སྟོན་པ་ཡེ་རེམ་ཡཱ་ཡིས་ཡེ་རུ་སཱ་ལེམ་དུ་གཏམ་འདི་རྣམས་ཡ་ཧུ་དཱའི་རྒྱལ་པོ་ཚིད་ཀི་ཡཱ་ལ་སྨྲས་པའོ། །  
\v 7 དུས་དེར་པཱ་པེལ་ལོན་རྒྱལ་པོའི་དམག་དཔུང་གིས་ཡེ་རུ་སཱ་ལེམ་དང་ཡ་ཧུ་དཱ་ནས་ལུས་པའི་གྲོང་ཁྱེར་ཏེ་ལཱ་ཀི་སི་དང་ཨ་ཟེ་ཀཱ་གཉིས་ཀར་དམག་བརྒྱབ་བོ། །ཅི་ལ་ཞེ་ན། ཡ་ཧུ་དཱའི་གྲོང་ཁྱེར་རྣམས་ལས་མཁར་བརྟན་པོ་ལུས་པ་འདི་གཉིས་སོ། །   
\p
\v 8 དེ་ཡང་རྒྱལ་པོ་ཚིད་ཀི་ཡཱ་ཡིས་ཡེ་རུ་སཱ་ལེམ་གྱི་མི་རྣམས་དང་ཁ་ཆད་བཞག་ནས་བྲན་པོ་རྣམས་ལ་རང་དབང་སྟེར་དགོས་པར་བསྒྲགས་ཤིང་། དེ་ནས་དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བའོ། །  
\v 9 མི་རེ་རེས་རང་རང་གི་ཨིབ་རི་པའི་གཡོག་པོ་དང་གཡོག་མོ་རྣམས་གཏོང་དགོས་པ་དང་། སུས་ཀྱང་རང་གི་ཡ་ཧུ་དཱའི་སྤུན་མཆེད་གཡོག་པོར་བྱེད་མི་རུང་བར་བྱས།  
\v 10 ཁ་ཆད་བཞག་པའི་འགོ་དཔོན་དང་མི་ཐམས་ཅད་རང་གི་གཡོག་པོ་དང་གཡོག་མོ་རྣམས་གཏོང་བར་ཡིད་འཐད་པ་དང་། དེ་རྣམས་ཡང་བསྐྱར་བྲན་གཡོག་བྱེད་དུ་མ་བཅུག་གོ །ཁོ་ཚོ་ཚང་མ་དེར་ཡིད་འཐད་པར་མ་ཟད་གཡོག་པོ་གཡོག་མོ་རྣམས་ལ་རང་དབང་སྤྲད་པ་རེད།  
\v 11 ཡིན་ནའང་རྗེས་སུ་དེ་རྣམས་བློ་འགྱོད་སྐྱེས་ནས། རང་དབང་སྤྲད་ནས་བཏང་བའི་གཡོག་པོ་གཡོག་མོ་རྣམས་ཕྱིར་བོས་ནས་དེ་དག་བྲན་གཡོག་བྱེད་དུ་བཙན་བཙུགས་སོ། །   
\s1 བྲན་གཡོག་དགྲོལ་བའི་ཞལ་ཆད་དང་འགལ་བ།  
\p
\v 12 དེ་ནས་དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།  
\v 13 ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། དེ་ཡང་ངས་ཁྱོད་ཅག་གི་ཕ་མེས་རྣམས་བྲན་དུ་བཀོལ་བའི་ཨེ་ཅིབ་ཡུལ་ནས་ཕྱི་རུ་ཁྲིད་འོང་དུས། དེ་དག་དང་ཞལ་ཆད་བཞག་ནས་འདི་ལྟར།  
\v 14 གལ་ཏེ་ཨིབ་རི་པའི་སྤུན་ཞིག་ཁྱོད་ལ་བཙོངས་ནས་ལོ་དྲུག་གི་རིང་དུ་ཁྱོད་ལ་ཞབས་ཕྱི་བསྒྲུབས་པ་ཡིན་ན། ལོ་བདུན་པར་ཁྱོད་རྣམས་མི་རེ་རེས་དེར་རང་དབང་སྤྲད་ནས་ཕྱིར་གཏོང་དགོས་ཞེས་བསྒོས་ཀྱང་། ཁྱོད་ཅག་གི་མེས་པོ་རྣམས་ཀྱིས་བདག་ལ་མ་མཉན་པ་དང་དོ་སྣང་ཙམ་ཡང་མེད་དོ། །  
\v 15 ད་ལྟ་ཁྱོད་རྣམས་ཀྱིས་འགྱོད་བཤགས་བྱས་ཏེ་ངའི་མིག་ལམ་དུ་ལེགས་པོ་གང་ཡིན་དེ་སྤྱད་ནས། མི་རེ་རེས་རང་གི་སྤུན་ཟླར་རང་དབང་བསྒྲགས་པ་དང་། ངའི་མིང་གིས་འབོད་པའི་མཆོད་ཁང་ནང་དུ་ངའི་མདུན་ནས་ཁ་ཆད་བཞག་མོད་ཀྱང་།  
\v 16 ཁྱོད་རྣམས་བློ་འགྱོད་དེ་ངའི་མིང་ཁྱད་དུ་བསད་ནས། མི་རེ་རེས་རང་རང་གི་རང་དབང་སྤྲད་ནས་འགྲོ་རུ་བཅུག་པའི་གཡོག་པོ་གཡོག་མོ་རྣམས་ཕྱིར་ལོག་ཏུ་བཅུག་ནས་དེ་དག་བྲན་གཡོག་བྱེད་དུ་བཙན་བཙུགས་སོ། །  
\v 17 དེ་བས་དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་གིས་ང་ལ་མཉན་ནས་རེ་རེས་རང་གི་སྤུན་ཟླ་དང་ཁྱིམ་མཚེས་ལ་རང་དབང་མི་བསྒྲག་པས། ལྟོས་ཤིག ངས་ད་ལྟ་ཁྱོད་ཅག་ལ་རང་དབང་སྒྲོག་ཅིང་། ཁྱོད་རྣམས་ནི་རལ་གྲི་དང་མུ་གེ རིམས་ནད་བཅས་ལ་གཏད་དེ། ས་སྟེང་གི་རྒྱལ་ཕྲན་ཐམས་ཅད་ཁྱོད་ཅག་ལ་འཇིགས་པར་འགྱུར་རོ་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །  
\v 18 ངའི་ཞལ་ཆད་དང་འགལ་བའི་མི་རྣམས་ངས་སྤྲོད་པར་བྱ་སྟེ། དེ་དག་གིས་ངའི་མདུན་དུ་བ་ཕྲུག་དུམ་བུ་གཉིས་སུ་གཤགས་ \f + \ft འདིར་བ་ཕྲུག་དུམ་བུ་གཉིས་སུ་གཤགས་ཞེས་པ་ནི་སྐབས་དེའི་མི་རྣམས་ཀྱིས་ཕན་ཚུན་བར་དམ་བཅའ་འཇོག་དུས་སུ་ཕྱུགས་གང་རུང་དུམ་བུ་གཉིས་སུ་གཤགས་ནས་དམ་བཅའ་འཇོག་མཁན་ཕྱོགས་གཉིས་ཀ་དུམ་བུ་གཉིས་ཀྱི་བར་ནས་རྒྱུ་ཞིང་། སུ་ཞིག་དམ་བཅའ་དང་འགལ་བ་ཡིན་ན་ཕྱུགས་དེའི་རང་བཞིན་ཡིན་པ་མཚོན། \f*ཤིང་དུམ་བུ་དེ་གཉིས་ཀྱི་བར་ནས་རྒྱུ་དུས་སུ་ཞལ་ཆད་བཞག་ནས་བསྐྱལ་བའི་མནའ་ཚིག་མ་བསྲུངས་སོ། །  
\v 19 ཁོ་རྣམས་ནི་བ་ཕྲུག་དུམ་བུ་གཉིས་སུ་གཤགས་པའི་བར་ནས་རྒྱུ་མཁན་ཡ་ཧུ་དཱའི་འགོ་དཔོན་དང་ཡེ་རུ་སཱ་ལེམ་གྱི་འགོ་དཔོན། ཕོ་བྲང་ནང་གི་འཁོར་གཡོག མཆོད་དཔོན། དེ་མིན་ཡུལ་དེའི་མི་སྡེ་ཐམས་ཅད་དོ། །  
\v 20 ངས་དེ་དག་ནི་ཕ་རོལ་དགྲ་བོའི་ལག་དང་ཁོ་ཚོའི་སྲོག་སྙེག་མཁན་རྣམས་ཀྱི་ལག་པར་གཏད་ནས། དེ་དག་གི་བམ་རོ་ནི་ནམ་མཁའི་བྱ་དང་ས་སྟེང་གི་གཅན་གཟན་གྱི་ཟས་སུ་འགྱུར་རོ། །  
\v 21 ཡང་ངས་ཡ་ཧུ་དཱའི་རྒྱལ་པོ་ཚིད་ཀི་ཡཱ་དང་དེའི་འགོ་དཔོན་རྣམས་ཀྱང་དགྲ་བོའི་ལག་དང་ཁོ་ཚོའི་སྲོག་སྙེག་མཁན་གྱི་ལག་དང་། རེ་ཞིག་ཁྱོད་རྣམས་དང་བྲལ་བའི་པཱ་པེལ་ལོན་རྒྱལ་པོའི་དམག་དཔུང་གི་ལག་ཏུ་གཏོད་པར་བྱའོ། །  
\v 22 ལྟོས་ཤིག ངས་དེ་དག་ལ་བཀའ་བཀོད་ནས་སླར་ཡང་གྲོང་ཁྱེར་འདིར་དྲངས་ཏེ། གྲོང་ཁྱེར་འདི་ལ་འཐབ་ནས་བླངས་ཏེ་མེས་བསྲེག་པར་འགྱུར་ལ། ཡང་ངས་ཡ་ཧུ་དཱའི་གྲོང་ཁྱེར་རྣམས་ནི་ས་སྟོང་ལུང་སྟོང་དུ་འགྱུར་བར་བྱས་ནས། སྡོད་མཁན་མི་གཅིག་ཀྱང་མེད་པར་བྱའོ་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །   
\c 35
\cl ལེའུ་སོ་ལྔ་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེ་རེམ་ཡཱ་དང་རེ་ཁབ་པ།  
\p
\v 1 ཡ་ཧུ་དཱའི་རྒྱལ་པོ་ཡོ་ཤི་ཡཱའི་བུ་ཡེ་ཧོ་ཡཱ་ཀིམ་བྱ་བ་ཡ་ཧུ་དཱའི་རྒྱལ་པོ་བྱེད་པའི་དུས་སུ་དཀོན་མཆོག་ཡ་ཝཱེའི་བཀའ་ཡེ་རེམ་ཡཱ་ལ་བྱུང་བ་འདི་ལྟ་སྟེ།  
\v 2 ཁྱོད་རེ་ཁབ་པའི་ཁྱིམ་རྒྱུད་ཀྱི་གམ་དུ་སོང་ནས་དེ་རྣམས་ལ་གླེང་མོལ་བྱས་ཏེ། དཀོན་མཆོག་ཡ་ཝཱེའི་མཆོད་ཁང་གི་ནང་མིག་རྣམས་ལས་གཅིག་གི་ནང་དུ་ཁྲིད་ནས། དེ་དག་ལ་རྒུན་ཆང་འདྲེན་པར་གྱིས་ཞེས་གསུངས་པ་ལ།  
\v 3 ངས་ཧ་བ་ཟིན་ཡཱའི་ཚ་བོ་སྟེ་ཡེ་རེམ་ཡཱའི་བུ་ཡ་ཨ་ཟན་ཡཱ་དང་དེའི་སྤུན་མཆེད་རྣམས། དེའི་བུ་ཐམས་ཅད། རེ་ཁབ་པའི་ཁྱིམ་རྒྱུད་ཐམས་ཅད་ཁྲིད་ནས།  
\v 4 དཀོན་མཆོག་ཡ་ཝཱེའི་མཆོད་ཁང་དུ་ཨིག་དལ་ཡཱའི་བུ་སྟེ་དཀོན་མཆོག་གི་སྐྱེས་བུ་ཧ་ནན་གྱི་བུ་རྣམས་ཀྱི་ཁང་པར་དྲངས་ཏེ། ཁང་པ་དེ་ནི་འགོ་དཔོན་རྣམས་ཀྱི་ཁང་པ་དང་ཉེ་ཞིང་། ཤལ་ལུམ་གྱི་བུ་སྟེ་མཆོད་ཁང་གི་སྒོ་སྲུང་མཁན་མ་ཨ་སེ་ཡཱ་བྱ་བའི་ཁང་པའི་སྟེང་དུ་ཡོད།  
\v 5 དེ་ནས་ངས་རྒུན་ཆང་གིས་བཀང་བའི་བུམ་པ་དང་ཕོར་པ་རྣམས་རེ་ཁབ་པ་རྣམས་ཀྱི་མདུན་དུ་བཤམས་ནས་དེ་དག་ལ། རྒུན་ཆང་བཞེས་རོགས་ཞེས་སྨྲས་ན་ཡང་།  
\v 6 དེ་རྣམས་ཀྱིས་ངེད་ཅག་གི་མེས་པོ་རེ་ཁབ་ཀྱི་བུ་ཡོ་ན་དབ་ཀྱིས་ངེད་རྣམས་ལ་བཀའ་བཀོད་ཅིང་། ཁྱོད་ཅག་དང་ཁྱོད་ཅག་གི་བུ་རབས་ཚ་རྒྱུད་རྣམས་ཀྱིས་དུས་ནམ་ཡིན་ཡང་རྒུན་ཆང་མི་འཐུང་བ་དང་།  
\v 7 ཁང་པ་མ་བརྩིག ས་བོན་ཡང་མ་འདེབས། རྒུན་འབྲུམ་ར་བ་ཡང་མ་འཛུགས་ལ་དེ་རང་ལ་ཡོད་ཀྱང་མི་རུང་བར། ཚེ་གང་པོར་གུར་དུ་བསྡད་ནས་ཁྱོད་ཅག་བྱེས་སུ་སྡོད་པའི་ས་སྟེང་དུ་ཚེ་ཐག་རིང་བར་གྱིས་ཤིག་ཅེས་གསུངས་ལ།  
\v 8 ངེད་ཅག་གི་མེས་པོ་རེ་ཁབ་ཀྱི་བུ་ཡོ་ན་དབ་ཀྱིས་བསྒོས་པའི་བཀའ་རྣམས་ང་ཚོས་ཐམས་ཅད་བསྲུངས་ཏེ། ངེད་ཅག་དང་ངེད་ཅག་གི་ཆུང་མ་དང་བུ་དང་བུ་མོ་རྣམས་ཀྱིས་མི་ཚེ་གང་པོར་རྒུན་ཆང་མི་འཐུང་བ་དང་།  
\v 9 འདུག་སའི་ཁྱིམ་གཞིས་ཀྱང་མི་འཛུགས་ལ། ངེད་ཅག་ལ་རྒུན་འབྲུམ་ར་བ་དང་ཞིང་ས། ས་བོན་བཅས་ཀྱང་མེད་དོ། །  
\v 10 ངེད་རྣམས་གུར་དུ་སྡོད་ཅིང་། ངེད་ཅག་གི་མེས་པོ་ཡོ་ན་དབ་ཀྱིས་བཀའ་བཀོད་ཀུན་དང་བསྟུན་ནས་དེ་བཞིན་སྤྱད་པ་ཡིན།  
\v 11 པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་ཡར་འོངས་ཏེ་ཡུལ་འདིར་དམག་དྲངས་པའི་དུས་སུ། ངེད་རྣམས་ཀྱིས་འདི་ལྟར། ཤོག་དང་། ཀལ་དི་པ་རྣམས་དང་ཨ་རམ་པའི་དམག་ཚོགས་གཉིས་ལས་ཐར་བའི་ཕྱིར་ཡེ་རུ་སཱ་ལེམ་དུ་འགྲོའོ་ཞེས་སྨྲས་པ་དང་། དེ་ལྟར་ངེད་རྣམས་ཡེ་རུ་སཱ་ལེམ་དུ་བསྡད་པ་ཡིན་ཞེས་ཞུས་སོ། །  
\v 12 དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།  
\v 13 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཁྱོད་སོང་ནས་ཡ་ཧུ་དཱ་པ་དང་ཡེ་རུ་སཱ་ལེམ་གྱི་ཡུལ་མི་རྣམས་ལ་འདི་ལྟར། ངའི་བཀའ་ལ་མི་མཉན་ཞིང་བཀའ་སློབ་དང་ལེན་མི་བྱེད་དམ་ཞེས་དྲིས་ཤིག  
\v 14 རེ་ཁབ་ཀྱི་བུ་ཡོ་ན་དབ་ཀྱིས་ཁོའི་བུ་རྒྱུད་རྣམས་ལ་རྒུན་ཆང་འཐུང་མི་རུང་བའི་བཀའ་བསྒོས་པ་དེ་རྣམས་ཀྱིས་བསྲུངས་ཤིང་། དེ་རིང་གི་བར་དུ་རྒུན་ཆང་མ་འཐུང་བར་མེས་པོའི་བཀའ་ལ་མཉན་ཏོ། །འོན་ཀྱང་ངས་ཁྱོད་ཅག་ལ་བཀའ་སློབ་ཡང་ཡང་གནང་ནའང་ཁྱོད་རྣམས་ཀྱིས་ང་ལ་མ་མཉན།  
\v 15 ངས་ཡང་ཡང་རང་གི་ཞབས་ཕྱི་ལུང་སྟོན་པ་རྣམས་ཁྱོད་ཅག་གི་གམ་དུ་མངགས་ཏེ། ཁྱོད་རྣམས་རེ་རེས་འགྱོད་བཤགས་དང་བཅས་རང་གི་ལོག་ལམ་སྤངས་ནས་བྱ་བ་སྤྱོད་པ་རྣམས་བཅོས་ཤིག ལྷ་གཞན་རྣམས་ལ་བསྙེན་བཀུར་བྱས་ནས་དེའི་རྗེས་སུ་མ་འབྲང་ཞིག དེ་ནས་ངས་ཁྱོད་ཅག་དང་ཁྱོད་ཅག་གི་མེས་པོར་གནང་བའི་ཡུལ་དུ་གནས་པར་འགྱུར་ཞེས་བསྒོས་ཀྱང་། ཁྱོད་ཅག་གིས་ང་ལ་རྣ་བ་གཏད་ནས་མ་མཉན་ཏོ། །  
\v 16 རེ་ཁབ་ཀྱི་བུ་ཡོ་ན་དབ་ཀྱི་བུ་རྒྱུད་རྣམས་ཀྱིས་མེས་པོས་ཁོ་རྣམས་ལ་བསྒོས་པའི་བཀའ་རྣམས་བསྲུངས་ནའང་། མི་འདི་རྣམས་ཀྱིས་ང་ལ་མ་མཉན་ཏོ་ཞེས་སྨྲོས་ཤིག་ཅེས་གསུངས།  
\v 17 དེ་བས་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ངས་དེ་དག་ལ་བཀའ་གནང་ཡང་དེ་དག་གིས་མ་མཉན་ལ། ངས་དེ་དག་བོས་ཀྱང་ཁོ་ཚོས་ཨ་ལན་མ་བྱིན་པས། ལྟོས་ཤིག ཡ་ཧུ་དཱ་པ་དང་ཡེ་རུ་སཱ་ལེམ་གྱི་ཡུལ་མི་ཐམས་ཅད་ཀྱི་སྟེང་དུ་ངས་དེ་དག་ལ་སྔོན་ཚུད་ནས་སྨྲས་པའི་ཆག་སྒོ་ཐམས་ཅད་འབེབ་པར་བྱའོ་ཞེས་གསུངས་སོ། །  
\v 18 ཡེ་རེམ་ཡཱ་ཡིས་རེ་ཁབ་པ་རྣམས་ལ་འདི་ལྟར། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཁྱོད་ཅག་གིས་རང་གི་མེས་པོ་ཡོ་ན་དབ་ཀྱི་བསྒོ་བ་ལ་མཉན་ཏེ། དེའི་བཀའ་ཐམས་ཅད་བསྲུངས་ནས། དེས་ཅི་བསྒོས་པ་བཞིན་བྱས་པས་ན།  
\v 19 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། རེ་ཁབ་ཀྱི་བུ་ཡོ་ན་དབ་ལ་ངའི་མདུན་དུ་འགྲེང་བའི་མི་ནི་དུས་ནམ་ཡིན་ཡང་རྒྱུན་མི་ཆད་ཅེས་གསུངས་ཞེས་གསུངས་སོ། །   
\c 36
\cl ལེའུ་སོ་དྲུག་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 པཱ་རུག་གིས་ཕོ་བྲང་ནང་དུ་གླེགས་བམ་ཀློག་པ།  
\p
\v 1 ཡ་ཧུ་དཱའི་རྒྱལ་པོ་ཡོ་ཤི་ཡཱའི་བུ་ཡེ་ཧོ་ཡཱ་ཀིམ་གྱི་སྲིད་ལོ་བཞི་པར། དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།  
\v 2 ཁྱོད་ཀྱིས་ཤོག་སྒྲིལ་ཞིག་བླངས་ནས། ཡེས་ར་ཨེལ་དང་ཡ་ཧུ་དཱ། དེ་མིན་མི་རིགས་ཐམས་ཅད་ཀྱི་སྐོར་ལ་སྨྲས་པའི་གཏམ་ཡོད་ཚད་དེ། ཡོ་ཤི་ཡཱས་སྲིད་བསྐྱངས་པའི་དུས་ནས་དེ་རིང་གི་བར་དུ་ངས་ཁྱོད་ལ་བསྒོས་པའི་བཀའ་ཐམས་ཅད་ཕྲིས་ཤིག  
\v 3 གཅིག་བྱས་ན་ཡ་ཧུ་དཱ་ཁྱིམ་རྒྱུད་ཀྱིས་ངས་དེ་དག་ལ་འབྱུང་དུ་འཇུག་འདོད་པའི་ཆག་སྒོ་རྣམས་ཐོས་ནས། མི་རེ་རེ་རང་གི་ལོག་ལམ་དང་འབྲལ་བར་འགྱུར་ཡང་སྲིད་དེ། ངས་ཀྱང་དེ་དག་གི་ཉེས་སྐྱོན་དང་སྡིག་པ་སེལ་བར་བྱའོ་ཞེས་གསུངས།  
\v 4 དེ་ནས་ཡེ་རེམ་ཡཱ་ཡིས་ནེར་ཡཱའི་བུ་པཱ་རུག་བོས་འོངས་པ་དང་། པཱ་རུག་གིས་ཡེ་རེམ་ཡཱའི་ཞལ་ནས་དཀོན་མཆོག་ཡ་ཝཱེས་གསུངས་པའི་བཀའ་མཆིད་ཐམས་ཅད་ཤོག་སྒྲིལ་སྟེང་དུ་བཀོད།  
\v 5 ཡེ་རེམ་ཡཱ་ཡིས་པཱ་རུག་ལ་བཀའ་བསྒོས་ཏེ་ན་རེ། ང་རང་དཀོན་མཆོག་ཡ་ཝཱེའི་མཆོད་ཁང་དུ་འགྲོ་བར་བཀག་པས།  
\v 6 ཁྱོད་ནི་སྨྱུང་གནས་ཀྱི་དུས་སུ་དཀོན་མཆོག་ཡ་ཝཱེའི་མཆོད་ཁང་དུ་སོང་ནས་དཀོན་མཆོག་ཡ་ཝཱེའི་བཀའ་སྟེ། ཁྱོད་ཀྱིས་ངའི་ངག་ནས་ཤོག་སྒྲིལ་སྟེང་ཡི་གེར་བཀོད་པ་དེ་མི་རྣམས་དང་ཡ་ཧུ་དཱའི་གྲོང་ཁྱེར་རེ་རེ་ནས་འོངས་པའི་མི་ཐམས་ཅད་ཀྱི་རྣ་བར་སྒྲོགས་ཤིག་དང་།  
\v 7 ཡང་ན་དེ་དག་གིས་དཀོན་མཆོག་ཡ་ཝཱེའི་དྲུང་དུ་ཞུ་བ་ཕུལ་ཏེ་མི་རེ་རེ་ཕྱིར་འཁོར་ནས་རང་གི་ལོག་ལམ་དང་འབྲལ་ཡང་སྲིད། ཅི་ལ་ཞེ་ན། དཀོན་མཆོག་ཡ་ཝཱེས་མི་འདི་རྣམས་ལ་གསུངས་པའི་ཐུགས་ཁྲོ་དང་ཁྲོ་གཏུམ་ནི་ཤིན་ཏུ་ཆེ་བའི་ཕྱིར་རོ་ཞེས་བསྒོས་སོ། །  
\v 8 དེ་ནས་ནེར་ཡཱའི་བུ་པཱ་རུག་གིས་ལུང་སྟོན་པ་ཡེ་རེམ་ཡཱས་གང་དང་གང་གསུངས་པ་བཞིན་སྤྱད་དེ། དཀོན་མཆོག་ཡ་ཝཱེའི་མཆོད་ཁང་དུ་གླེགས་བམ་སྟེང་གི་དཀོན་མཆོག་ཡ་ཝཱེའི་བཀའ་རྣམས་བསྒྲགས་སོ། །  
\v 9 ཡ་ཧུ་དཱའི་རྒྱལ་པོ་ཡོ་ཤི་ཡཱའི་བུ་ཡེ་ཧོ་ཡཱ་ཀིམ་གྱི་སྲིད་ལོ་ལྔ་བའི་ཟླ་དགུ་པར། ཡེ་རུ་སཱ་ལེམ་གྱི་མི་རྣམས་དང་ཡ་ཧུ་དཱའི་གྲོང་ཁྱེར་ནས་ཡེ་རུ་སཱ་ལེམ་དུ་འོངས་པའི་མི་ཡོངས་ཀྱིས། དཀོན་མཆོག་ཡ་ཝཱེའི་དྲུང་དུ་སྨྱུང་གནས་བསྲུང་བར་བསྒྲགས་པ་དང་།  
\v 10 པཱ་རུག་གིས་དཀོན་མཆོག་ཡ་ཝཱེའི་མཆོད་ཁང་གི་ཁྱམས་ར་གོང་མ་སྟེ། དཀོན་མཆོག་ཡ་ཝཱེའི་མཆོད་ཁང་དང་ཉེ་བའི་སྒོ་གསར་པ་རུ། ཤཱ་ཕན་གྱི་བུ་གེ་མར་ཡཱ་དྲུང་ཡིག་གི་ཁང་པའི་ནང་དུ་གླེགས་བམ་ལས་ཡེ་རེམ་ཡཱའི་བཀའ་རྣམས་མི་ཐམས་ཅད་ལ་བསྒྲགས་སོ། །  
\v 11 ཡང་ཤཱ་ཕན་གྱི་ཚ་བོ་སྟེ་གེ་མར་ཡཱའི་བུ་མི་ཀ་ཡཱས་གླེགས་བམ་སྟེང་གི་དཀོན་མཆོག་ཡ་ཝཱེའི་བཀའ་མཆིད་རྣམས་ཐོས་པ་དང་།  
\v 12 མར་རྒྱལ་པོའི་ཕོ་བྲང་དུ་སོང་ནས་དྲུང་ཡིག་གི་ཁང་པར་སླེབས་པ་ན། ལྟོས་ཤིག འགོ་དཔོན་ཐམས་ཅད་དེ་རུ་བསྡད་ཡོད་པ་མཐོང་བ་སྟེ། དྲུང་ཡིག་ཨེ་ལི་ཤཱ་མ་དང་། ཤེ་མ་ཡཱའི་བུ་དི་ལཱ་ཡ། ཨག་པོར་གྱི་བུ་ཨེལ་ན་ཐན། ཤཱ་ཕན་གྱི་བུ་གེ་མར་ཡཱ། ཧ་ནན་ཡཱའི་བུ་ཚིད་ཀི་ཡཱ། དེ་མིན་འགོ་དཔོན་གཞན་རྣམས་ཀྱང་ཡོད་པ་ཡིན།  
\v 13 དེ་ནས་མི་ཀ་ཡཱ་ཡིས་ཁོ་རྣམས་ལ་རང་གིས་ཐོས་པའི་བཀའ་ཐམས་ཅད་དེ་པཱ་རུག་གིས་མི་རྣམས་ལ་གླེགས་བམ་དེ་བསྒྲགས་དུས་སུ་ཐོས་པ་རྣམས་སྨྲས་པ་ན།  
\v 14 འགོ་དཔོན་རྣམས་ཀྱིས་ཀུ་ཤིའི་ཡང་ཚ་དང་ཤེ་ལེམ་ཡཱའི་ཚ་བོ་སྟེ་ནེ་ཐན་ཡཱའི་བུ་ཡེ་ཧུ་དི་ནི་པཱ་རུག་གི་གམ་དུ་མངགས་ནས་དེ་ལ། ཁྱོད་ཀྱིས་མི་རྣམས་ཀྱི་རྣ་བར་བསྒྲགས་པའི་གླེགས་བམ་དེ་ལག་ཏུ་ཐོགས་ནས་འདིར་ཤོག་ཅེས་སྨྲས་པས། ནེར་ཡཱའི་བུ་པཱ་རུག་གིས་གླེགས་བམ་ཁྱེར་ནས་དེ་རྣམས་ཀྱི་གམ་དུ་འོངས་པ་དང་།  
\v 15 དེ་རྣམས་ཀྱིས་ཁོང་ལ་ན་རེ། བཞུགས་དང་། ངེད་ཅག་གི་རྣ་བར་དེ་ཀློགས་ཤིག་ཅེས་སྨྲས་པ་ལ། པཱ་རུག་གིས་དེ་དག་གི་ཆེད་དུ་བཀླགས་སོ། །  
\v 16 དེ་དག་གིས་བཀའ་མཆིད་རྣམས་ཐོས་པ་ཙམ་གྱིས་འཇིགས་ཏེ། གཅིག་གིས་གཅིག་ལ་བལྟས་ནས་པཱ་རུག་ལ་འདི་ལྟར། རང་ཅག་གིས་འདི་ཐམས་ཅད་རྒྱལ་པོར་ཞུ་དགོས་ཞེས་སྨྲས་ཤིང་།  
\v 17 པཱ་རུག་ལ་འདི་ལྟར། ཁྱོད་ཀྱིས་བཀའ་མཆིད་འདི་ཐམས་ཅད་ཁོང་གི་ཞལ་ནས་ཇི་ལྟར་ཡི་གེར་བཀོད་པ་དེ་ངེད་རྣམས་ལ་ཤོད་ཅིག་ཅེས་དྲིས་པ་ལ།  
\v 18 པཱ་རུག་གིས་ལན་དུ། ཁོང་གིས་ཞལ་ནས་འདི་ཐམས་ཅད་ང་ལ་གསུངས་པ་དང་། ངས་སྣག་ཚས་གླེགས་བམ་ནང་བྲིས་པ་ཡིན་ཞེས་སྨྲས་པ་ལ།  
\v 19 འགོ་དཔོན་རྣམས་ཀྱིས་པཱ་རུག་ལ་འདི་ལྟར། ཁྱོད་དང་ཡེ་རེམ་ཡཱ་གཉིས་སྦོས་ཤིག ཁྱོད་གཉིས་གང་དུ་སྦས་པ་མི་ལ་ཤེས་སུ་འཇུག་མི་རུང་ཞེས་བསྐུལ་ཏོ། །   
\s1 ཡེ་ཧོ་ཡཱ་ཀིམ་གྱིས་གླེགས་བམ་མེ་རུ་བསྲེགས་པ།  
\p
\v 20 འགོ་དཔོན་རྣམས་ཀྱིས་གླེགས་བམ་དེ་དྲུང་ཡིག་ཨེ་ལི་ཤཱ་མའི་ཁང་པར་བཞག་རྗེས། ཁྱམས་རའི་ནང་དུ་རྒྱལ་པོའི་དྲུང་ལ་ཕྱིན་ཏེ་བཀའ་མཆིད་ཐམས་ཅད་རྒྱལ་པོར་ཞུས་པ་ཙམ་གྱིས།  
\v 21 རྒྱལ་པོས་ཡེ་ཧུ་དི་ཞེས་བྱ་བ་གླེགས་བམ་ལེན་དུ་མངགས་ནས། དེས་དྲུང་ཡིག་ཨེ་ལི་ཤཱ་མའི་ཁང་པ་ནས་དེ་བླངས་ཏེ། རྒྱལ་པོ་དང་རྒྱལ་པོའི་གཡས་གཡོན་དུ་ལངས་བསྡད་ཡོད་པའི་འགོ་དཔོན་ཀུན་གྱི་རྣ་བར་བཀླགས་སོ། །  
\v 22 དུས་དེར་ཟླ་དགུ་པ་ཡིན་པས། རྒྱལ་པོ་དགུན་སར་བཞུགས་ནས་དེའི་དྲུང་དུ་མེ་ཕོར་ནང་མེ་འབར་བཞིན་ཡོད་དེ།  
\v 23 ཡེ་ཧུ་དིས་ཚན་པ་གསུམ་བཞི་ཙམ་བསྒྲགས་པ་དང་། རྒྱལ་པོས་དྲུང་ཡིག་གི་སྤུ་གྲིས་གླེགས་བམ་གཤགས་ཏེ་མེ་ཕོར་ནང་ལ་གཡུགས་ནས་གླེགས་བམ་ཡོངས་སུ་མེའི་ནང་དུ་འཚིག་པའི་བར་དུ་བསྲེགས་སོ། །  
\v 24 བཀའ་འདི་ཐམས་ཅད་ཐོས་མཁན་རྒྱལ་པོ་འཁོར་དང་བཅས་པ་སུ་ཡང་འཇིགས་པར་མ་གྱུར་ལ། རང་གི་གོས་ཀྱང་མ་གཤག་ \f + \ft གོས་གཤག་པ་ནི་ཡིད་སྐྱོ་བའི་མཚོན་རྟགས་ཤིག་ཡིན།\f*གོ །  
\v 25 ཡང་ཨེལ་ན་ཐན་དང་དི་ལཱ་ཡ། གེ་མར་ཡཱ་བཅས་གསུམ་པོས་རྒྱལ་པོར་གླེགས་བམ་དེ་མི་བསྲེག་པའི་ཆེད་དུ་ཞུ་བ་ཞུས་ཀྱང་རྒྱལ་པོས་མ་མཉན་ཏོ། །  
\v 26 རྒྱལ་པོས་རྒྱལ་སྲས་ཡེ་རཱ་མེ་ཨེལ་དང་ཨས་རི་ཨེལ་གྱི་བུ་སེ་ར་ཡཱ། ཨབ་དེ་ཨེལ་གྱི་བུ་ཤེ་ལེམ་ཡཱ་བཅས་གསུམ་ཀ་དྲུང་ཡིག་པཱ་རུག་དང་ལུང་སྟོན་པ་ཡེ་རེམ་ཡཱ་གཉིས་འཛིན་དུ་མངགས་ན་ཡང་། དཀོན་མཆོག་ཡ་ཝཱེས་དེ་གཉིས་སྦས་པར་མཛད་དོ། །   
\s1 ཡེ་རེམ་ཡཱ་ཡིས་གླེགས་བམ་གཞན་ཞིག་བྲིས་པ།  
\p
\v 27 ཡེ་རེམ་ཡཱའི་ཞལ་ལས་གསུངས་པ་ལྟར་པཱ་རུག་གིས་ཡི་གེར་བཀོད་པའི་བཀའ་མཆིད་ཀྱི་གླེགས་བམ་དེ་རྒྱལ་པོས་མེ་རུ་བསྲེགས་པའི་རྗེས་སུ། ཡེ་རེམ་ཡཱ་ལ་ཡང་དཀོན་མཆོག་ཡ་ཝཱེའི་བཀའ་བྱུང་བ་འདི་ལྟ་སྟེ།  
\v 28 ཁྱོད་ཀྱིས་སླར་ཡང་ཤོག་སྒྲིལ་ཞིག་བླངས་ཏེ། ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིམ་གྱིས་བསྲེགས་པའི་གླེགས་བམ་སྔ་མའི་ནང་དུ་ཡོད་པའི་བཀའ་ཐམས་ཅད་དེའི་སྟེང་དུ་ཕྲིས་ཤིག  
\v 29 ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིམ་ལ་འདི་ལྟར། དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་གླེགས་བམ་དེ་བསྲེགས་ནས་ན་རེ། པཱ་པེལ་ལོན་གྱི་རྒྱལ་པོ་འོངས་ཏེ་ཡུལ་འདི་བཤིག་ནས། མི་ཕྱུགས་གཉིས་ཀ་གང་ཡང་ལུས་སུ་མི་འཇུག་ཅེས་ཁྱོད་ཀྱིས་དེའི་ནང་དུ་འབྲི་དོན་ཅི་ཡིན་ཟེར་བས།  
\v 30 ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིམ་གྱི་སྐོར་ལ་དཀོན་མཆོག་ཡ་ཝཱེས་འདི་སྐད་དུ། དེའི་བུ་རྒྱུད་རྣམས་ལས་དཱ་བིད་ཀྱི་རྒྱལ་ཁྲིར་འདུག་མཁན་སུ་ཡང་མ་ལུས་པར། དེའི་བེམ་པོ་ཕྱི་རུ་དོར་ནས་ཉིན་མོར་ཚ་བ་དང་མཚན་མོར་བད་ནག་གིས་མནར་བར་འགྱུར།  
\v 31 ཡང་ངས་དེ་དང་དེའི་བུ་རྒྱུད་དང་། དེའི་འཁོར་གཡོག་བཅས་ཀྱི་སྡིག་པར་ཉེས་ཆད་གཅོད་ཅིང་། ངས་དེ་ཚོར་སྨྲས་ཀྱང་དེ་དག་གིས་མ་མཉན་པས། ད་ནི་ཆག་སྒོ་ཐམས་ཅད་དེ་དག་དང་ཡེ་རུ་སཱ་ལེམ་གྱི་ཡུལ་མི་རྣམས་དང་ཡ་ཧུ་དཱའི་མི་རྣམས་ཀྱི་སྟེང་དུ་འབབ་པར་བྱའོ་ཞེས་པའོ་ཞེས་སྨྲོས་ཤིག་ཅེས་གསུངས།  
\v 32 དེ་ནས་ཡེ་རེམ་ཡཱས་ཤོག་སྒྲིལ་གཞན་ཞིག་བླངས་ནས། ནེར་ཡཱའི་བུ་དྲུང་ཡིག་པཱ་རུག་ལ་སྤྲད་དེ། ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིམ་གྱིས་མེ་རུ་བསྲེགས་པའི་བཀའ་ཐམས་ཅད་ཁོས་ཡེ་རེམ་ཡཱའི་ཞལ་ནས་དེའི་ནང་དུ་བཀོད་དོ། །དེར་མ་ཟད་དེ་དང་མཚུངས་པའི་བཀའ་མང་པོ་ཡང་བསྣན་པ་ཡིན་ནོ། །   
\c 37
\cl ལེའུ་སོ་བདུན་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཚིད་ཀི་ཡཱ་ཡིས་རང་གི་ཚབ་ཏུ་སྨོན་ལམ་འདེབས་པར་ཡེ་རེམ་ཡཱ་ལ་ཞུས་པ།  
\p
\v 1 ཡོ་ཤི་ཡཱའི་བུ་ཚིད་ཀི་ཡཱ་བྱ་བ་ཡེ་ཧོ་ཡཱ་ཀིམ་གྱི་བུ་ཀོན་ཡཱའི་ཚབ་ཏུ་ཡ་ཧུ་དཱའི་རྒྱལ་པོར་བསྡད་ནས་སྲིད་བསྐྱངས་པ་སྟེ། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་དེ་ཡ་ཧུ་དཱ་རུ་རྒྱལ་པོ་བྱེད་དུ་བཅུག  
\v 2 ཡིན་ནའང་ཚིད་ཀི་ཡཱ་དང་དེའི་འཁོར་གཡོག་རྣམས་དང་། ཡུལ་མི་དག་གིས་དཀོན་མཆོག་ཡ་ཝཱེས་ལུང་སྟོན་པ་ཡེ་རེམ་ཡཱ་བརྒྱུད་ནས་གསུངས་པའི་བཀའ་ལ་མ་མཉན་ཏོ། །  
\v 3 དེ་ཡང་རྒྱལ་པོ་ཚིད་ཀི་ཡཱ་ཡིས་ཤེ་ལེམ་ཡཱའི་བུ་ཡེ་ཧུ་ཀལ་དང་། མཆོད་དཔོན་མ་ཨ་སེ་ཡཱའི་བུ་ཟེ་ཕན་ཡཱ་གཉིས་པོ་ལུང་སྟོན་པ་ཡེ་རེམ་ཡཱའི་དྲུང་དུ་མངགས་ནས་འདི་ལྟར། ཁྱེད་ཀྱིས་ངེད་ཅག་གི་དོན་དུ་རང་རེའི་དཀོན་མཆོག་ཡ་ཝཱེ་ལ་གསོལ་བ་འདེབས་རོགས་ཞེས་ཞུས།  
\v 4 དུས་དེར་ཁོ་རྣམས་ཀྱིས་ཡེ་རེམ་ཡཱ་ད་དུང་བཙོན་དུ་བཅུག་མེད་པས་ན་ཁོང་མི་རྣམས་ཀྱི་ནང་དུ་འགྲོ་འོང་བྱེད་བཞིན་ཡོད།  
\v 5 ཡང་ཕཱར་ཨོལ་གྱི་དམག་དཔུང་ཨེ་ཅིབ་ཡུལ་ནས་ཚུར་ཐོན་ཅིང་། ཡེ་རུ་སཱ་ལེམ་མཐའ་ནས་བསྐོར་བའི་ཀལ་དི་པ་རྣམས་ཀྱིས་དེ་དག་འོང་བ་ཐོས་པ་ཙམ་གྱིས། དམག་སྒར་སྤོས་ནས་ཡེ་རུ་སཱ་ལེམ་དང་བྲལ་ཏོ། །  
\v 6 དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།  
\v 7 ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་ཅག་ངའི་མདུན་དུ་ཐུགས་བརྟག་ཞུ་བར་གཏོང་མཁན་ཡ་ཧུ་དཱའི་རྒྱལ་པོ་ལ་ཁྱོད་ཅག་གིས་འདི་སྐད་སྦྲོན་ཅིག ལྟོས་ཤིག ཁྱོད་ཚོར་རོགས་བྱེད་དུ་འོངས་པའི་ཕཱར་ཨོལ་གྱི་དམག་དཔུང་ནི་ཨེ་ཅིབ་རང་ཡུལ་དུ་ཕྱིར་འགྲོ་བར་འགྱུར་ཏེ།  
\v 8 ཀལ་དི་པ་རྣམས་ཡང་བསྐྱར་འོངས་ནས་གྲོང་ཁྱེར་འདི་ལ་དམག་བརྒྱབ་སྟེ་ལེན་པ་དང་མེས་བསྲེག་པར་འགྱུར།  
\v 9 དཀོན་མཆོག་ཡ་ཝཱེས་འདི་སྐད་དུ། ཀལ་དི་པ་རྣམས་ཅི་ནས་ཀྱང་ངེད་རྣམས་དང་འབྲལ་བར་འགྱུར་ཞེས་ཁྱོད་རྣམས་ཀྱིས་རང་མགོ་རང་གིས་མ་གཡོག་ཅིག ཅི་ལ་ཞེ་ན། དེ་རྣམས་འབྲལ་བར་མི་འགྱུར་རོ། །  
\v 10 ཁྱོད་རྣམས་དང་འཐབ་པའི་ཀལ་དི་པའི་དམག་དཔུང་ཐམས་ཅད་ཁྱོད་ཅག་གིས་ཕམ་པར་བརྒྱབ་ཀྱང་། དེ་རྣམས་ལས་རྨས་པར་གྱུར་པའི་ལྷག་ལུས་རྣམས་རང་གི་གུར་ནས་ཡར་ལངས་ཏེ་གྲོང་ཁྱེར་འདི་མེས་བསྲེག་པར་འགྱུར་རོ་ཞེས་སྨྲོས་ཤིག་ཅེས་གསུངས་སོ། །   
\s1 ཡེ་རེམ་ཡཱ་བཙོན་དུ་བཟུང་བ།  
\p
\v 11 ཀལ་དི་པའི་དམག་དཔུང་ནི་ཕཱར་ཨོལ་གྱི་དམག་དཔུང་ལ་འཇིགས་ནས། དམག་སྒར་སྤོས་ཏེ་ཡེ་རུ་སཱ་ལེམ་དང་འབྲལ་དུས།  
\v 12 ཡེ་རེམ་ཡཱ་ཡིས་ཡུལ་མི་རྣམས་ལས་རང་གི་ས་སྐལ་ལེན་པའི་ཆེད་དུ་ཡེ་རུ་སཱ་ལེམ་དང་བྲལ་ནས་པེན་ཡཱ་མེན་ཡུལ་དུ་ཕྱིན་ཏེ།  
\v 13 ཁོང་པེན་ཡཱ་མེན་རྒྱ་སྒོ་ཡོད་སར་སླེབས་པ་ལ། དེའི་སྐུ་སྲུང་དམག་དཔོན་མིང་ལ་ཡི་རི་ཡཱ་ཟེར་བ་སྟེ། ཧ་ནན་ཡཱའི་ཚ་བོ་དང་ཤེ་ལེམ་ཡཱའི་བུ་ཡིན་པ་དེས་ཡེ་རེམ་ཡཱ་བཟུང་སྟེ་ན་རེ། ཁྱོད་ནི་ཀལ་དི་པ་ལ་མགོ་བསྒུར་དུ་འགྲོ་བ་ཡིན་ཟེར་ཞིང་།  
\v 14 ཡེ་རེམ་ཡཱ་ཡིས་ལན་དུ། ཁྱོད་ཀྱིས་རྫུན་སྨྲ་བ་ཡིན་ཏེ་ང་ནི་ཀལ་དི་པ་ལ་མགོ་བསྒུར་དུ་འགྲོ་བ་མིན་ཞེས་སྨྲས་ཀྱང་། ཡི་རི་ཡཱ་ཡིས་ཡེ་རེམ་ཡཱ་ལ་མ་མཉན་པར་ཁོང་བཟུང་ནས་འགོ་དཔོན་རྣམས་ཀྱི་རྩར་ཁྲིད་དོ། །  
\v 15 དེ་ནས་འགོ་དཔོན་རྣམས་ཡེ་རེམ་ཡཱ་ལ་ཁྲོས་ནས་ཁོང་ལ་བརྡུངས་ཏེ། དྲུང་ཡིག་ཡོ་ནཱ་ཐན་གྱི་ཁང་པར་བཙོན་དུ་བཅུག་གོ །ཅི་ལ་ཞེ་ན། དེ་དག་གིས་ཁང་པ་དེ་བཙོན་ར་བྱས་ཡོད་པ་ཡིན།  
\v 16 ཡེ་རེམ་ཡཱ་ས་འོག་གི་བཙོན་ཁང་དུ་བཅུག་སྟེ་ཉིན་ཞག་མང་པོར་དེར་ལུས་སོ། །  
\v 17 ཡང་རྒྱལ་པོ་ཚིད་ཀི་ཡཱས་མི་མངགས་ནས་ཁོང་ཕྱི་རུ་ཡོང་བར་བཅུག་ཅིང་། རང་གི་ཕོ་བྲང་ནང་དུ་ལྐོག་ནས་ཁོང་ལ་ན་རེ། དཀོན་མཆོག་ཡ་ཝཱེའི་ཞལ་ནས་བཀའ་བྱུང་ངམ་ཞེས་དྲིས་པ་ལ། ཡེ་རེམ་ཡཱས་ལན་དུ་ཡོད་དོ་ཞེས་དང་། ཡང་ཁྱོད་ནི་པཱ་པེལ་ལོན་གྱི་རྒྱལ་པོའི་ལག་ཏུ་གཏོད་པར་འགྱུར་ཞེས་སྨྲས་པ་དང་།  
\v 18 ཡེ་རེམ་ཡཱས་ཡང་རྒྱལ་པོ་ཚིད་ཀི་ཡཱ་ལ་འདི་ལྟར། ངས་དོན་གང་གི་ཕྱོགས་ནས་ཁྱེད་རང་ངམ་ཡང་ན་ཁྱེད་ཀྱི་འཁོར་གཡོག་དང་། མི་འདི་རྣམས་ལ་འགལ་བའི་སྡིག་པ་གང་ཞིག་བྱས་ནས། ཁྱེད་ཀྱིས་ང་རང་བཙོན་དུ་བཅུག་པ་ཡིན་ནམ།  
\v 19 པཱ་པེལ་ལོན་གྱི་རྒྱལ་པོ་ཁྱོད་རྣམས་དང་ཡུལ་ཁམས་འདིར་རྒོལ་དུ་མི་འོང་ཞེས་ཁྱེད་ཅག་ལ་ལུང་བསྟན་པའི་ལུང་སྟོན་པ་དེ་དག་ད་ལྟ་གང་དུ་ཡོད་དམ།  
\v 20 ཀྱེ་ཇོ་བོ་ངའི་རྒྱལ་པོ་ལགས། ད་ལྟ་ཁྱེད་ཀྱིས་གསན་རོགས་གནང་། ང་ལ་ཁྱེད་ཀྱི་དྲུང་དུ་ཞུ་བར་མཛོད་དང་། ང་རང་དྲུང་ཡིག་ཡོ་ནཱ་ཐན་གྱི་ཁང་པར་མ་བསྐྱལ་ཞིག དེ་མིན་བདག་དེར་འཆི་བར་འགྱུར་ཞེས་སྨྲས་སོ། །  
\v 21 དེ་ནས་རྒྱལ་པོ་ཚིད་ཀི་ཡཱས་བཀའ་བབས་ནས། དེ་དག་གིས་ཡེ་རེམ་ཡཱ་ནི་སྐུ་སྲུང་དམག་གི་ཁྱམས་རར་བཅུག་པ་དང་། གྲོང་ཁྱེར་གྱི་ཁ་ཟས་ཐམས་ཅད་ཚར་བའི་བར་དུ་བག་ལེབ་ཚོང་པའི་སྲང་ལམ་ནས་ཉིན་རེ་བཞིན་བག་ལེབ་ཁོང་ལ་སྤྲད་ཅིང་། དེ་ལྟར་ཡེ་རེམ་ཡཱ་སྐུ་སྲུང་གི་ཁྱམས་རར་ལུས་སོ། །   
\c 38
\cl ལེའུ་སོ་བརྒྱད་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེ་རེམ་ཡཱ་དོང་ནང་དུ་བསྡད་པ།  
\p
\v 1 མད་ཐན་གྱི་བུ་ཤེ་ཕད་ཡཱ་དང་། ཕཱ་ཤུར་གྱི་བུ་གེ་དལ་ཡཱ། ཤེ་ལེམ་ཡཱའི་བུ་ཡུ་ཀལ། མལ་ཀི་ཡཱའི་བུ་ཕ་ཤུར་བཅས་ཀྱིས་ཡེ་རེམ་ཡཱས་མི་སྡེ་ཀུན་ལ་གཏམ་འདི་ལྟར་སྨྲས་པ་ཐོས་ཏེ།  
\v 2 དཀོན་མཆོག་ཡ་ཝཱེས་འདི་སྐད་དུ། གྲོང་ཁྱེར་འདི་རུ་ལུས་པ་ཀུན་རལ་གྲི་དང་མུ་གེ རིམས་ནད་བཅས་ཀྱིས་སྲོག་དང་འབྲལ་བར་འགྱུར། ཡིན་ནའང་ཀལ་དི་པའི་ཕྱོགས་སུ་འཁོར་བ་རྣམས་གསོན་པོར་ལུས་ཏེ། དེ་རྣམས་སྲོག་ཐར་ནས་འཚོ་བར་འགྱུར་རོ་ཞེས་གསུངས།  
\v 3 ཡང་དཀོན་མཆོག་ཡ་ཝཱེས་འདི་སྐད་དུ། གྲོང་ཁྱེར་འདི་ནི་པཱ་པེལ་ལོན་གྱི་རྒྱལ་པོའི་དམག་ཚོགས་ཀྱི་ལག་ཏུ་གཏོད་ངེས་ལ། དེས་གྲོང་ཁྱེར་འདི་ལེན་པར་འགྱུར་ཞེས་གསུངས་སོ་ཞེས་པའོ། །  
\v 4 དེ་ནས་འགོ་དཔོན་རྣམས་ཀྱིས་རྒྱལ་པོ་ལ་འདི་ལྟར། ཁྱེད་ཀྱིས་མི་འདི་གསོད་རོགས་གནང་། ཅི་ལ་ཞེ་ན། ཁོས་གྲོང་ཁྱེར་འདི་རུ་ལུས་པའི་དམག་དང་མི་ཚོགས་ལ་གཏམ་འདི་ལབ་ཅིང་། དེ་རྣམས་ཀྱི་སེམས་ཤུགས་ཉམས་སུ་བཅུག་པ་སྟེ། ཁོས་མི་འདི་རྣམས་ཀྱི་དོན་དུ་ཞི་བདེ་མི་འཚོལ་བར། དེ་རྣམས་ལ་ཆག་སྒོ་བསླངས་པ་ཡིན་ཞེས་སྨྲས་པ་ན།  
\v 5 རྒྱལ་པོ་ཚིད་ཀི་ཡཱ་ན་རེ། ལྟོས་ཤིག ཁོ་ནི་ཁྱོད་ཚོའི་ལག་ཏུ་ཡོད་དེ། ངས་ཁྱོད་ཚོས་ཁོ་ལ་ཅི་བྱེད་པར་རྒོལ་མི་ནུས་སོ་ཞེས་སྨྲས་ཤིང་།  
\v 6 དེ་དག་གིས་ཡེ་རེམ་ཡཱ་བཟུང་སྟེ་སྐུ་སྲུང་པའི་ཁྱམས་རར་ཡོད་པའི་རྒྱལ་སྲས་མལ་ཀི་ཡཱའི་ཆུ་དོང་ནང་དུ་གཡུགས་པ་སྟེ། ཁོ་ཚོས་ཡེ་རེམ་ཡཱ་ནི་དཔྱང་ཐག་ལས་མར་ཕབ་བོ། །ཆུ་དོང་དེའི་ནང་དུ་ཆུ་མེད་པར་འདམ་རྫབ་འབའ་ཞིག་ཡོད་པས་ཡེ་རེམ་ཡཱ་འདམ་ནང་དུ་ཟུག་པ་རེད།  
\v 7 ཡང་རྒྱལ་པོའི་ཕོ་བྲང་དུ་ཡོད་པའི་ཉུག་རུམ་པ་གུ་ཤ་པ་ཨེ་བེད་མེ་ལེག་གིས་དེ་ཚོས་ཡེ་རེམ་ཡཱ་ཆུ་དོང་གི་ནང་དུ་བཅུག་པ་ཐོས་ཤིང་། སྐབས་དེར་རྒྱལ་པོ་ནི་པེན་ཡཱ་མེན་གྱི་རྒྱ་སྒོར་བཞུགས་ཡོད་པ་དང་།  
\v 8 ཨེ་བེད་མེ་ལེག་རྒྱལ་པོའི་ཕོ་བྲང་ནས་ཕྱི་རུ་འོངས་ཏེ་རྒྱལ་པོ་ལ་ན་རེ།  
\v 9 ཀྱེ་ཇོ་བོ་ངའི་རྒྱལ་པོ་ལགས། མི་འདི་དག་གིས་ལུང་སྟོན་པ་ཡེ་རེམ་ཡཱ་ལ་སྤྱོད་ངན་ཚ་པོ་རྐྱང་རྐྱང་སྤྱད་དེ་ཁོང་ཆུ་དོང་ནང་དུ་གཡུགས་པ་རེད། གྲོང་ཁྱེར་ནང་དུ་ཁ་ཟས་མེད་པས་ཁོང་གིས་དེ་རུ་ལྟོགས་སྐོམ་མྱངས་ནས་འཆི་བར་ངེས་ཞེས་ཞུས་པ་དང་།  
\v 10 རྒྱལ་པོས་གུ་ཤ་པ་ཨེ་བེད་མེ་ལེག་ལ་འདི་ལྟར། ཁྱོད་ཀྱིས་འདི་ནས་མི་སུམ་ཅུ་ཁྲིད་ནས་ལུང་སྟོན་པ་ཡེ་རེམ་ཡཱ་མ་ཤི་བའི་སྔོན་དུ་ཆུ་དོང་ལས་ཡར་འཐེན་པར་གྱིས་ཤིག་ཅེས་བཀའ་བསྩལ་པ་ན།  
\v 11 ཨེ་བེད་མེ་ལེག་གིས་མི་དེ་རྣམས་ཁྲིད་ནས་རྒྱལ་པོའི་ཕོ་བྲང་དུ་མཛོད་ཁང་གི་འོག་ཁང་ལ་སོང་ནས། གོས་ཧྲུལ་དང་རས་ཧྲུལ་རྣམས་དེ་ནས་བླངས་ཏེ། ཆུ་དོང་གི་ནང་དུ་ཡེ་རེམ་ཡཱའི་རྩར་ཐག་པས་མར་བཏང་ནས།  
\v 12 གུ་ཤ་པ་ཨེ་བེད་མེ་ལེག་གིས་ཡེ་རེམ་ཡཱ་ལ་འདི་ལྟར། ཁྱེད་ཀྱིས་རས་ཧྲུལ་དང་གོས་ཧྲུལ་འདི་དག་ཐག་པའི་འོག་ལ་མཆན་ཁུང་དུ་ཆུག་དང་ཞེས་ཞུས་པ་ལ་ཡེ་རེམ་ཡཱས་དེ་ལྟར་བྱས་པ་དང་།  
\v 13 དེ་དག་གིས་ཐག་པས་ཡེ་རེམ་ཡཱ་ཆུ་དོང་ལས་ཡར་འཐེན་ནས་ཡེ་རེམ་ཡཱ་སྐུ་སྲུང་པའི་ཁྱམས་རར་བཞུགས་སོ། །   
\s1 ཚིད་ཀི་ཡཱ་ཡིས་ཡེ་རེམ་ཡཱ་ལ་བློ་དྲིས་པ།  
\p
\v 14 ཕྱིས་སུ་རྒྱལ་པོ་ཚིད་ཀི་ཡཱས་མི་མངགས་ཏེ་ལུང་སྟོན་པ་ཡེ་རེམ་ཡཱ་ནི་དཀོན་མཆོག་ཡ་ཝཱེའི་མཆོད་ཁང་གི་སྒོ་གསུམ་པའི་ཁར་རྒྱལ་པོ་རང་གི་དྲུང་དུ་བོས་ནས། རྒྱལ་པོས་ཡེ་རེམ་ཡཱ་ལ་འདི་ལྟར། ངས་ཁྱེད་ལ་དོན་ཞིག་འདྲི་བར་བྱ་སྟེ། ཁྱེད་ཀྱིས་ང་ལ་སྦ་གསང་མེད་པར་གྱིས་ཞེས་སྨྲས་པ་དང་།  
\v 15 ཡེ་རེམ་ཡཱ་ཡིས་ཚིད་ཀི་ཡཱ་ལ་འདི་ལྟར། ཇི་སྟེ་ངས་ཁྱེད་ལ་སྨྲས་པ་ཡིན་ན་ཁྱེད་ཀྱིས་ང་གསོད་པར་འགྱུར་བ་མ་ཡིན་ནམ། ཇི་སྟེ་ངས་ཁྱེད་ལ་ཁ་ཏ་བསླབ་བྱ་བཏང་ན། ཁྱེད་ཀྱིས་ང་ལ་མི་མཉན་ནོ་ཞེས་སྨྲས་པས།  
\v 16 རྒྱལ་པོ་ཚིད་ཀི་ཡཱ་ཡིས་ལྐོག་ཏུ་ཡེ་རེམ་ཡཱ་ལ་མནའ་བོར་ནས་འདི་ལྟར། ངས་རང་ཅག་གི་ཚེ་སྲོག་འགོད་མཁན་གྱི་གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་བསྐྱལ་བ་ཡིན་ཏེ། ངས་གཏན་ནས་ཁྱེད་རང་གསོད་པར་མི་འགྱུར་ལ། ཁྱེད་ཀྱི་སྲོག་སྙེག་མཁན་གྱི་ལག་ཏུ་ཁྱེད་རང་གཏོད་པར་ཡང་མི་བྱའོ་ཞེས་སྨྲས།  
\v 17 དེ་ནས་ཡེ་རེམ་ཡཱ་ཡིས་ཚིད་ཀི་ཡཱ་ལ་འདི་ལྟར། དཔུང་ཚོགས་ཀྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཇི་སྟེ་ཁྱེད་རང་སོང་ནས་པཱ་པེལ་ལོན་གྱི་རྒྱལ་པོའི་དམག་དཔོན་རྣམས་ལ་མགོ་བསྒུར་ན། ཁྱེད་ཀྱི་སྲོག་ནི་ཐར་ཞིང་། གྲོང་ཁྱེར་འདི་ཡང་མེས་བསྲེག་པར་མི་འགྱུར་ལ། ཁྱེད་དང་ཁྱེད་ཀྱི་ཁྱིམ་རྒྱུད་ཡོངས་གསོན་པོར་ལུས་ཡོང་།  
\v 18 གལ་ཏེ་ཁྱེད་རང་ཕྱི་རོལ་ཏུ་སོང་ནས་པཱ་པེལ་ལོན་གྱི་རྒྱལ་པོའི་དམག་དཔོན་རྣམས་ལ་མགོ་མི་བསྒུར་ན། གྲོང་ཁྱེར་འདི་ཀལ་དི་པ་རྣམས་ཀྱི་ལག་ཏུ་གཏོད་ཅིང་། ཁོ་རྣམས་ཀྱིས་གྲོང་ཁྱེར་འདི་མེས་བསྲེག་པར་འགྱུར་ཏེ། ཁྱེད་རང་ཉིད་ཀྱང་དེ་དག་གི་ལག་ནས་ཐར་བར་མི་འགྱུར་ཞེས་གསུངས་ཞེས་སྨྲས་པ་ལ།  
\v 19 ཚིད་ཀི་ཡཱ་ཡིས་ཡེ་རེམ་ཡཱ་ལ་འདི་ལྟར། ང་ནི་ཀལ་དི་པའི་ཕྱོགས་སུ་མགོ་བསྒུར་བའི་ཡ་ཧུ་དཱ་པ་རྣམས་ལ་འཇིགས་ཏེ། ཀལ་དི་པ་རྣམས་ཀྱིས་ང་རང་དེ་དག་གི་ལག་ཏུ་གཏད་ན། དེ་དག་གིས་ང་ལ་བརྙས་པར་འགྱུར་རོ་ཞེས་སྨྲས་ཤིང་།  
\v 20 ཡེ་རེམ་ཡཱ་ན་རེ། ཀལ་དི་པས་ཁྱེད་ནི་དེ་རྣམས་ལ་མི་གཏོད་དོ། །ངས་ཁྱེད་ལ་བསྐུལ་བའི་དཀོན་མཆོག་ཡ་ཝཱེའི་བཀའ་ལ་གསན་རོགས་མཛོད། དེ་ནས་ཁྱེད་བདེ་ཞིང་ཁྱེད་ཀྱི་སྲོག་ཀྱང་གསོན་པོར་ལུས་ཡོང་།  
\v 21 ཇི་སྟེ་ཁྱེད་རང་ཕྱི་རུ་སོང་ནས་མགོ་མ་བསྒུར་ན། དཀོན་མཆོག་ཡ་ཝཱེས་ང་ལ་མངོན་པར་མཛད་པའི་བཀའ་ནི་འདི་ལྟ་སྟེ།  
\v 22 ལྟོས་ཤིག ཡ་ཧུ་དཱའི་རྒྱལ་པོའི་ཕོ་བྲང་ནང་དུ་ལུས་པའི་སྐྱེས་མ་ཐམས་ཅད་ནི་པཱ་པེལ་ལོན་གྱི་རྒྱལ་པོའི་དམག་དཔོན་ཚོའི་མདུན་དུ་བསྐྱལ་བར་འགྱུར་ལ། དེ་ནས་སྐྱེས་མ་དེ་དག་ན་རེ། ཁྱེད་ཀྱི་མནའ་བཅད་རྣམས་ཀྱིས་ཁྱེད་བསླུས་ཤིང་དེ་དག་ཁྱེད་ལས་རྒྱལ་བ་དང་། ད་ལྟ་ཁྱེད་ཀྱི་རྐང་པ་འདམ་རྫབ་ནང་དུ་ལྷུང་ཞིང་དེ་དག་གིས་ཁྱེད་དོར་བ་ཡིན་ཞེས་སྨྲ་བར་འགྱུར།  
\v 23 མི་ཡིས་ཁྱེད་ཀྱི་བཙུན་མོ་ཐམས་ཅད་དང་ཁྱེད་ཀྱི་བུ་ཕྲུག་དག་ནི་ཀལ་དི་པའི་རྩར་འཁྲིད་ཅིང་། ཁྱེད་ཀྱང་དེ་དག་གི་ལག་ནས་ཐར་བར་མི་འགྱུར་ལ། པཱ་པེལ་ལོན་གྱི་རྒྱལ་པོའི་ལག་པས་འཛིན་པར་མ་ཟད་གྲོང་ཁྱེར་འདི་ཡང་མེས་བསྲེག་པར་འགྱུར་ཞེས་སྨྲས་སོ། །  
\v 24 དེ་ནས་ཚིད་ཀི་ཡཱ་ཡིས་ཡེ་རེམ་ཡཱ་ལ་འདི་ལྟར། གཏམ་འདི་རྣམས་སུ་ལའང་ཤེས་སུ་མ་འཇུག་དང་དེ་ནས་ཁྱེད་མི་འཆིའོ། །  
\v 25 འགོ་དཔོན་རྣམས་ཀྱིས་ངས་ཁྱེད་ལ་གཏམ་སྨྲས་པ་ཐོས་ན་ཁྱེད་ཀྱི་རྩར་ཡོང་ནས་ཁྱེད་ལ་ན་རེ། ངེད་རྣམས་ལ་ཤོད་ཅིག ཁྱེད་ཀྱིས་རྒྱལ་པོར་ཅི་གསུངས་པ་ཡིན་ནམ། ཡང་རྒྱལ་པོས་ཁྱེད་ལ་ཅི་གསུངས་བྱུང་ངམ། ངེད་རྣམས་ལ་མ་སྦས་མ་གསང་ཞིག དེ་མིན་ངེད་ཅག་གིས་ཁྱེད་གསོད་པར་འགྱུར་ཞེས་ཟེར་བར་འགྱུར་ཞིང་།  
\v 26 ཁྱེད་ཀྱིས་དེ་དག་ལ་འདི་ལྟར། ང་རང་ཡོ་ནཱ་ཐན་གྱི་ཁང་པར་མི་འཆི་བའི་ཕྱིར་དུ། ངས་རྒྱལ་པོའི་དྲུང་དུ་ང་རང་ཕྱིར་དེ་རུ་མི་བསྐྱལ་བའི་རེ་བ་ཞུས་པ་ཙམ་ཡིན་ཞེས་ལན་ཐོབས་ཤིག་ཅེས་བསྐུལ་ཏོ། །  
\v 27 ཕྱིས་སུ་འགོ་དཔོན་རྣམས་ཡེ་རེམ་ཡཱའི་གམ་དུ་འོངས་ནས་ཁོང་ལ་དྲིས་པ་ན། ཁོང་གིས་རྒྱལ་པོས་རང་ཉིད་ལ་བསྒོས་པ་ཇི་བཞིན་ལན་བཏབ་པས། དེ་དག་གིས་ཁོ་ལ་ཡང་བསྐྱར་མ་དྲིས་སོ། །ཅི་ལ་ཞེ་ན། རྒྱལ་པོ་དང་ཁོང་གཉིས་བར་གྱི་གསང་བ་ཕྱི་ལ་མ་ཤོར་བའོ། །  
\v 28 དེ་ནས་ཡེ་རུ་སཱ་ལེམ་བཙན་གྱིས་བླངས་པའི་ཉིན་མོའི་བར་དུ། ཡེ་རེམ་ཡཱ་ནི་སྔར་བཞིན་སྐུ་སྲུང་པའི་ཁྱམས་རར་བསྡད་པའོ། །ཡང་ཡེ་རུ་སཱ་ལེམ་ནི་འདི་ལྟར་བླངས་པ་སྟེ།   
\c 39
\cl ལེའུ་སོ་དགུ་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེ་རུ་སཱ་ལེམ་དགྲ་ལག་ཏུ་ཤོར་བ།  
\p
\v 1 ཡ་ཧུ་དཱའི་རྒྱལ་པོ་ཚིད་ཀི་ཡཱའི་སྲིད་ལོ་དགུ་པའི་ཟླ་བཅུ་པར། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་དཔུང་ཚོགས་ཁྲིད་དེ་ཡེ་རུ་སཱ་ལེམ་ལ་རྒོལ་བར་འོངས་ནས་གྲོང་ཁྱེར་བསྐོར་བ་རེད།  
\v 2 ཚིད་ཀི་ཡཱའི་སྲིད་ལོ་བཅུ་གཅིག་པའི་ཟླ་བཞི་པའི་ཚེས་དགུ་ཉིན་ལྕགས་རི་གཏོར་བའོ། །  
\v 3 ཡེ་རུ་སཱ་ལེམ་ལེན་པའི་དུས་སུ། པཱ་པེལ་ལོན་གྱི་རྒྱལ་པོའི་འགོ་དཔོན་རྣམས་ཏེ་ནེར་གལ་ཤར་ཨེ་ཟེར་དང་། སམ་གར་ནེ་བོ། བློན་ཆེན་སར་སེ་ཀེམ། དམག་དཔོན་ནེར་གལ་ཤར་ཨེ་ཟེར། དེ་མིན་པཱ་པེལ་ལོན་གྱི་རྒྱལ་པོའི་འགོ་དཔོན་གཞན་ཐམས་ཅད་རྒྱ་སྒོ་བར་མ་རུ་བསྡད་དོ། །  
\v 4 ཡ་ཧུ་དཱའི་རྒྱལ་པོ་ཚིད་ཀི་ཡཱ་དང་དམག་མི་ཐམས་ཅད་ཀྱིས་དེ་རྣམས་མཐོང་ནས། མཚན་མོའི་དུས་སུ་རྒྱལ་པོའི་སྐྱེད་ཚལ་དང་ཉེ་བའི་མཁར་གཉིས་ཀྱི་བར་སྒོ་ནས་ཕྱི་རུ་བྲོས་ཏེ་ཨ་ར་པཱ་རུ་སོང་ངོ་། །  
\v 5 ཡིན་ནའང་ཀལ་དི་པའི་དམག་དཔུང་གིས་དེ་རྣམས་ཀྱི་རྗེས་དེད་ནས། ཡེ་རུ་ཀོའི་ཐང་དུ་ཚིད་ཀི་ཡཱའི་རྗེས་ཆོད་པ་དང་དེ་བཟུང་ནས་ཧ་མཱད་ཀྱི་གནས་རིབ་ལཱ་ཞེས་པར་པཱ་པེལ་ལོན་རྒྱལ་པོ་ནེ་བོ་ཀད་ནེ་ཙར་གྱི་མདུན་དུ་ཁྲིད་པ་དང་། ནེ་བོ་ཀད་ནེ་ཙར་གྱིས་དེ་ལ་ཁྲིམས་ཐག་བཅད་དོ། །  
\v 6 པཱ་པེལ་ལོན་གྱི་རྒྱལ་པོས་རིབ་ལཱ་ཡུལ་དུ་ཚིད་ཀི་ཡཱའི་མདུན་ནས་ཁོའི་བུ་རྣམས་བསད་པ་དང་། ཡང་ཡ་ཧུ་དཱའི་སྐུ་དྲག་ཐམས་ཅད་ཀྱང་བསད་པར་མ་ཟད།  
\v 7 ཚིད་ཀི་ཡཱའི་མིག་ཟུང་བཏོན་ནས་ཁོ་པཱ་པེལ་ལོན་དུ་འཁྲིད་ཕྱིར་ལི་ཡི་སྒྲོག་རྣམས་བརྒྱབ་པ་རེད།  
\v 8 ཡང་ཀལ་དི་པ་རྣམས་ཀྱིས་རྒྱལ་པོའི་ཕོ་བྲང་དང་མི་རྣམས་ཀྱི་ཁང་པ་རྣམས་མེ་ཡིས་བསྲེགས་ཏེ། ཡེ་རུ་སཱ་ལེམ་གྱི་མཁར་རྣམས་ཀྱང་བཤིགས་པའོ། །  
\v 9 དུས་དེར། སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་གྲོང་ཁྱེར་ནང་གི་ཤུལ་ལུས་རྣམས་དང་། པཱ་པེལ་ལོན་གྱི་ཕྱོགས་སུ་མགོ་བསྒུར་བ་རྣམས། དེ་འཕྲོའི་མི་རྣམས་པཱ་པེལ་ལོན་དུ་བཙོན་ལ་ཁྲིད་དོ། །  
\v 10 ཡིན་ནའང་སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་མི་སྡེ་ལས་ཅི་ཡང་མེད་པའི་དབུལ་པོ་དག་ནི་ཡ་ཧུ་དཱའི་ཡུལ་དུ་བསྐྱུར་ནས། མཚུངས་སུ་ཁོ་རྣམས་ལ་རྒུན་འབྲུམ་ར་བ་དང་ཞིང་ས་རྣམས་གནང་བ་རེད།   
\s1 ཡེ་རེམ་ཡཱ་བཙོན་གྲོལ་བཏང་བ།  
\p
\v 11 པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་ཡེ་རེམ་ཡཱའི་དོན་དུ་སྐུ་སྲུང་དམག་དཔོན་ནེ་བོ་ཟར་ཨ་དན་ལ་འདི་ལྟར་བཀའ་གནང་བ་སྟེ།  
\v 12 ཁྱོད་ཀྱིས་ཁོ་ཁྲིད་ནས་སོང་དང་། དེ་དྲིན་གྱིས་བསྐྱངས་ནས་གནོད་བསྐྱལ་མི་རུང་། ཁོས་ཁྱོད་ལ་ཇི་ལྟར་ཞུས་ན་དེ་ལྟར་བྱོས་ཤིག་ཅེས་བསྒོས་པ་ན།  
\v 13 སྐུ་སྲུང་དམག་དཔོན་ནེ་བོ་ཟར་ཨ་དན་དང་བློན་ཆེན་ནེ་བུ་ཤཱ་སི་བན། དམག་དཔོན་ནེར་གལ་ཤར་ཨེ་ཟེར། དེ་མིན་པཱ་པེལ་ལོན་གྱི་རྒྱལ་པོའི་འགོ་དཔོན་ཀུན་གྱིས།  
\v 14 མི་མངགས་ཏེ་སྐུ་སྲུང་གི་ཁྱམས་ར་ནས་ཡེ་རེམ་ཡཱ་ཁྲིད་འོངས་པ་དང་། ཤཱ་ཕན་གྱི་ཚ་བོ་སྟེ་ཨ་ཧི་ཀམ་གྱི་བུ་གེ་དལ་ཡཱ་ལ་གཏད་ནས་དེའི་ཁྱིམ་ལ་འཁྲིད་དུ་བཅུག་པ་དང་། ཡེ་རེམ་ཡཱ་ཡང་མི་རྣམས་ཀྱི་ཁྲོད་དུ་བཞུགས་སོ། །  
\v 15 ཡེ་རེམ་ཡཱ་ད་དུང་སྐུ་སྲུང་གི་ཁྱམས་རར་བཙན་བཟུང་བྱས་ཡོད་པའི་དུས་སུ། དཀོན་མཆོག་ཡ་ཝཱེའི་བཀའ་ནི་ཁོང་ལ་བྱུང་བ་འདི་ལྟ་སྟེ།  
\v 16 ཁྱོད་སོང་ནས་གུ་ཤ་པ་ཨེ་བེད་མེ་ལེག་ལ་འདི་ལྟར་སྨྲོས་ཤིག དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ལྟོས་ཤིག ངས་ཆག་སྒོ་འབྱུང་དུ་འཇུག་པ་ལས་བྱིན་རླབས་མི་གནང་ཞེས་སྨྲས་པའི་གཏམ་ནི་གྲོང་ཁྱེར་འདི་ལ་འབྱུང་བར་འགྱུར་ཏེ། དུས་དེར་འདི་ཐམས་ཅད་ཁྱོད་ཀྱི་མདུན་དུ་དངོས་སུ་འབྱུང་བར་འགྱུར།  
\v 17 ཡིན་ནའང་ཉིན་དེར་སླེབ་དུས་ངས་ཁྱོད་རང་སྐྱོབ་པར་འགྱུར་ལ། ཁྱོད་ནི་རང་ཉིད་འཇིགས་པའི་ལག་ཏུ་མི་གཏོད་ཅེས་དཀོན་མཆོག་ཡ་ཝཱེས་གསུངས།  
\v 18 ངས་ཁྱོད་རང་སྐྱོབ་པར་འགྱུར་བས། ཁྱོད་ནི་རལ་གྲིའི་འོག་ཏུ་མི་འགྱེལ་བར་དམག་འཁྲུག་ལས་རང་སྲོག་ཐར་བར་འགྱུར་རོ། །ཅི་ལ་ཞེ་ན། ཁྱོད་རང་ང་ལ་བརྟེན་པས་ཡིན་ཞེས་པའོ་ཞེས་དཀོན་མཆོག་ཡ་ཝཱེས་གསུངས་སོ། །   
\c 40
\cl ལེའུ་བཞི་བཅུ་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེ་རེམ་ཡཱ་ཁོང་ཉིད་གེ་དལ་ཡཱ་དང་མཉམ་དུ་བཞུགས་པ།  
\p
\v 1 ཡེ་རེམ་ཡཱ་ཁོང་ཉིད་ཡེ་རུ་སཱ་ལེམ་དང་ཡ་ཧུ་དཱ་ཡི་པཱ་པེལ་ལོན་དུ་བཙོན་ལ་ཁྲིད་པ་ཐམས་ཅད་ཀྱི་ཁྲོད་དུ་ལྕགས་སྒྲོག་བརྒྱབ་ཡོད་པ་ལ། སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་ཁོང་ཉིད་རཱ་མ་ནས་བཙོན་གྲོལ་བཏང་བ་དང་། དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་ངོ་། །  
\v 2 དེར་སྐུ་སྲུང་དམག་དཔོན་གྱིས་ཡེ་རེམ་ཡཱ་གདན་དྲངས་ནས་ཁོང་ལ་འདི་ལྟར། ཁྱེད་ཀྱི་དཀོན་མཆོག་ཡ་ཝཱེས་གནས་འདི་ལ་ཆག་སྒོ་འདི་འབྱུང་བར་མཛད་པ་བསྒྲགས་ཤིང་།  
\v 3 ད་ནི་དཀོན་མཆོག་ཡ་ཝཱེས་ཉིད་ཀྱི་བཀའ་གསུང་བཞིན་དུ་ཆག་སྒོ་འདི་འབྱུང་བར་མཛད་པ་སྟེ། ཅི་ལ་ཞེ་ན། ཁྱོད་ཚོས་དཀོན་མཆོག་ཡ་ཝཱེ་དང་འགལ་བའི་སྡིག་པ་བྱས་ཏེ། ཁོང་གི་བཀའ་ལ་མ་མཉན་པས་དོན་འདི་ཁྱོད་ཅག་གི་སྟེང་དུ་བབས་པ་ཡིན།  
\v 4 ལྟོས་དང་། ད་ལྟ་ངས་ཁྱེད་ཀྱི་ལག་སྒྲོག་བསྒྲལ་ཟིན་པས། ཇི་སྟེ་ཁྱེད་རང་ང་དང་མཉམ་དུ་པཱ་པེལ་ལོན་དུ་ཕེབས་འདོད་ན་ཕེབས་ཤོག་དང་ངས་ཁྱེད་རང་དྲིན་གྱིས་སྐྱོང་ངོ་། །ཡང་ཇི་སྟེ་ང་དང་མཉམ་དུ་པཱ་པེལ་ལོན་དུ་ཕེབས་མི་འདོད་ན་བཞུགས་པར་མཛོད་ཅིག ལྟོས་དང་། ཡུལ་ཁམས་ཐམས་ཅད་ཁྱེད་ཀྱི་མདུན་དུ་ཡོད་པས། ཁྱེད་གང་ལ་མཉེས་ཤིང་གང་ཞིག་ཐུགས་ལ་འབབ་ན་དེ་རུ་ཕེབས་ཤིག་ཅེས་སྨྲས་པ་དང་།  
\v 5 ཡེ་རེམ་ཡཱ་ད་དུང་མ་སོང་བའི་སྔོན་དུ་དེས་ཁོང་ལ་འདི་ལྟར། ཡང་ན་ཁྱེད་ནི་པཱ་པེལ་ལོན་རྒྱལ་པོས་ཡ་ཧུ་དཱའི་གྲོང་ཁྱེར་རྣམས་ཀྱི་འགོ་དཔོན་དུ་བསྐོས་པའི་ཤཱ་ཕན་གྱི་ཚ་བོ་སྟེ་ཨ་ཧི་ཀམ་གྱི་བུ་གེ་དལ་ཡཱའི་རྩར་ཕེབས་ཤིག དེའི་རྩར་མི་རྣམས་ཀྱི་ཁྲོད་དུ་བཞུགས་དང་། དེ་མིན་གཞན་ཁྱེད་གང་ལ་མཉེས་ཤིང་གང་ཞིག་ཐུགས་ལ་འབབ་ན་དེ་རུ་ཕེབས་ཤིག་ཅེས་ཞུས་ཏེ། སྐུ་སྲུང་དམག་དཔོན་གྱིས་ཁོང་ལ་ཁ་ཟས་དང་གསོལ་རས་ཕུལ་ནས་བཞུད་དུ་བཅུག་པ་དང་།  
\v 6 ཡེ་རེམ་ཡཱ་ནི་མཱས་ཟི་ཕཱ་རུ་སླེབས་ཏེ་ཨ་ཧི་ཀམ་གྱི་བུ་གེ་དལ་ཡཱ་ཡོད་སར་ཕྱིན་ནས། དེ་དང་མཉམ་དུ་ཡུལ་ནང་ལུས་ཡོད་པའི་མི་རྣམས་ཀྱི་ཁྲོད་དུ་བཞུགས་སོ། །   
\s1 གེ་དལ་ཡཱ་སྤྱི་དཔོན་དུ་བསྐོས་པ།  
\p
\v 7 དེ་ཡང་ཐང་དུ་ཡོད་པའི་དམག་དཔོན་རྣམས་དང་དེ་དག་གི་འཁོར་གཡོག་རྣམས་ཀྱིས། པཱ་པེལ་ལོན་གྱི་རྒྱལ་པོས་ཨ་ཧི་ཀམ་གྱི་བུ་གེ་དལ་ཡཱ་ཡུལ་དེའི་སྤྱི་དཔོན་དུ་བསྐོས་པ་དང་། པཱ་པེལ་ལོན་དུ་བཙོན་ལ་མ་ཁྲིད་པའི་སྐྱེས་པ་དང་བུད་མེད། བྱིས་པ་རྣམས། ཡུལ་དེའི་དབུལ་པོ་རྣམས་དེའི་ལག་ཏུ་གཏད་པ་ཐོས་ནས།  
\v 8 ནེ་ཐན་ཡཱའི་བུ་ཡེས་མ་ཨེལ་དང་ཀཱ་རེ་ཨའི་བུ་ཡོ་ཧ་ནན་དང་ཡོ་ནཱ་ཐན་གཉིས་ཀ ཐན་ཧུ་མེད་ཀྱི་བུ་སེ་ར་ཡཱ། ནེ་ཏོ་ཕཱ་པའི་ཨེ་ཕཱ་ཡིའི་བུ་རྣམས། མ་ཨ་ཀཱ་པའི་བུ་ཡེ་ཟན་ཡཱ་དང་དེ་དག་གི་འཁོར་དང་བཅས་པ་མཱས་ཟི་ཕཱ་རུ་གེ་དལ་ཡཱའི་དྲུང་དུ་འོངས་པ་ལ།  
\v 9 ཤཱ་ཕན་གྱི་ཚ་བོ་སྟེ་ཨ་ཧི་ཀམ་གྱི་བུ་གེ་དལ་ཡཱས་དེ་དག་དང་དེ་དག་གི་འཁོར་རྣམས་ལ་མནའ་བསྐྱལ་ནས་འདི་ལྟར། ཁྱེད་ཅག་ཀལ་དི་པ་རྣམས་ལ་འཇིགས་ནས་དེ་དག་ལ་གཡོག་མ་བྱེད་ཅིག ཡུལ་འདིར་སྡོད་ལ་པཱ་པེལ་ལོན་གྱི་རྒྱལ་པོར་ཞབས་ཕྱི་སྒྲུབས་ཤིག་དང་། དེ་ནས་ཁྱེད་ཅག་བདེ་བར་གནས་ཐུབ་པ་ཡིན།  
\v 10 ཡང་ང་རང་ནི་མཱས་ཟི་ཕཱ་རུ་བསྡད་དེ། ངེད་ཅག་གི་རྩར་འོང་བའི་ཀལ་དི་པ་རྣམས་ལ་བར་དཔང་བྱེད་དགོས། ཁྱེད་ཅག་གིས་རྒུན་ཆང་དང་དབྱར་ཀའི་ཤིང་ཏོག སྣུམ་བཅས་སྡུས་ལ་རང་གི་སྣོད་ཀྱི་ནང་གསོགས་ཤིག ད་དུང་རང་གིས་བཟུང་བའི་གྲོང་ཁྱེར་དུ་སྡོད་ཅིག་ཅེས་བསྒོས་སོ། །  
\v 11 དེ་ནས་མོ་ཨབ་དང་ཨམ་མོན་པའི་ཁྲོད་དང་། ཨེ་དོམ། ཡུལ་ཕྱོགས་སོ་སོ་བཅས་སུ་ཡོད་པའི་ཡ་ཧུ་དཱ་པ་ཐམས་ཅད་ཀྱིས་པཱ་པེལ་ལོན་གྱི་རྒྱལ་པོས་ཡ་ཧུ་དཱ་པའི་ལྷག་ལུས་རྣམས་བསྐྱུར་བར་མ་ཟད། ད་དུང་ཤཱ་ཕན་གྱི་ཚ་བོ་སྟེ་ཨ་ཧི་ཀམ་གྱི་བུ་གེ་དལ་ཡཱ་སྤྱི་དཔོན་དུ་བསྐོས་པའི་གཏམ་ཐོས་པ་ན།  
\v 12 ཡ་ཧུ་དཱ་པ་ཐམས་ཅད་གང་སར་བསྐྲད་པའི་ཡུལ་ཕྱོགས་སོ་སོ་ནས་ཕྱིར་ལོག་སྟེ། ཡ་ཧུ་དཱའི་ཡུལ་གྱི་མཱས་ཟི་ཕཱ་རུ་གེ་དལ་ཡཱའི་རྩར་འོངས་ནས་རྒུན་ཆང་དང་དབྱར་ཀའི་ཤིང་ཏོག་མང་པོ་བསགས་སོ། །  
\v 13 ཀཱ་རེ་ཨའི་བུ་ཡོ་ཧ་ནན་དང་ཐང་དུ་ཡོད་པའི་དམག་དཔོན་རྣམས་མཱས་ཟི་ཕཱ་རུ་གེ་དལ་ཡཱའི་རྩར་འོངས་ནས་དེ་ལ་ན་རེ།  
\v 14 ཨམ་མོན་པའི་རྒྱལ་པོ་པ་ཨ་ལིས་ཀྱིས་ཁྱེད་གསོད་དུ་ནེ་ཐན་ཡཱའི་བུ་ཡེས་མ་ཨེལ་མངགས་པ་ཁྱེད་ཀྱིས་ཤེས་སམ་ཞེས་ཞུས་ཀྱང་། ཨ་ཧི་ཀམ་གྱི་བུ་གེ་དལ་ཡཱ་དེ་དག་ལ་ཡིད་མ་ཆེས་སོ། །  
\v 15 དེ་ནས་ཀཱ་རེ་ཨའི་བུ་ཡོ་ཧ་ནན་གྱིས་མཱས་ཟི་ཕཱ་རུ་གེ་དལ་ཡཱ་ལ་ལྐོག་ཏུ་ན་རེ། ང་རང་ནེ་ཐན་ཡཱའི་བུ་ཡེས་མ་ཨེལ་གསོད་དུ་འགྲོ་བར་གནོངས་ཤིག་དང་སུས་ཀྱང་ཤེས་པར་མི་འགྱུར་རོ། །ཅི་ཞིག་ལ་དེར་ཁྱེད་གསོད་དུ་བཅུག་ནས། ཁྱེད་ཀྱི་དྲུང་དུ་འདུས་པའི་ཡ་ཧུ་དཱ་པ་ཐམས་ཅད་ཁ་འཐོར་དུ་འགྲོ་བ་དང་། ཡ་ཧུ་དཱའི་ནང་ལུས་པའི་མི་ཐམས་ཅད་འཆི་བར་བྱའམ་ཞེས་ཞུས་མོད་ཀྱང་།  
\v 16 ཨ་ཧི་ཀམ་གྱི་བུ་གེ་དལ་ཡཱ་ཡིས་ཀཱ་རེ་ཨའི་བུ་ཡོ་ཧ་ནན་ལ་འདི་ལྟར། ཁྱོད་ཀྱིས་དེ་ལྟར་མ་བྱེད་ཅིག ཅི་ལ་ཞེ་ན། ཁྱོད་ཀྱིས་ཡེས་མ་ཨེལ་གྱི་སྐོར་དུ་སྨྲས་པ་ཐམས་ཅད་རྫུན་ཡིན་ནོ་ཞེས་སྨྲས་སོ། །   
\c 41
\cl ལེའུ་ཞེ་གཅིག་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\p
\v 1 དེ་ཡང་ཟླ་བ་བདུན་པར་རྒྱལ་པོའི་བློན་ཆེན་ཏེ། རྒྱལ་རྒྱུད་ཨེ་ལི་ཤཱ་མའི་ཚ་བོའམ། ནེ་ཐན་ཡཱའི་བུ་ཡེས་མ་ཨེལ་བྱ་བས་མི་བཅུ་ཁྲིད་དེ་མཱས་ཟི་ཕཱ་རུ་ཨ་ཧི་ཀམ་གྱི་བུ་གེ་དལ་ཡཱའི་རྩར་འོངས་ནས། དེ་དག་གིས་མཱས་ཟི་ཕཱ་རུ་མཉམ་དུ་ཁ་ཟས་རོལ་བ་དང་།  
\v 2 དེ་ནས་ནེ་ཐན་ཡཱའི་བུ་ཡེས་མ་ཨེལ་དང་། ཁོ་དང་མཉམ་དུ་ཡོང་བའི་མི་བཅུ་པོ་དེ་ལངས་ནས། པཱ་པེལ་ལོན་གྱི་རྒྱལ་པོས་ཡུལ་ཁམས་ཀྱི་སྤྱི་དཔོན་དུ་བཞག་པའི་ཤཱ་ཕན་གྱི་ཚ་བོའམ། ཨ་ཧི་ཀམ་གྱི་བུ་གེ་དལ་ཡཱ་རལ་གྲིས་བཀུམ་མོ། །  
\v 3 ཡང་ཡེས་མ་ཨེལ་གྱིས་གེ་དལ་ཡཱ་དང་མཉམ་དུ་མཱས་ཟི་ཕཱ་རུ་ཡོད་པའི་ཡ་ཧུ་དཱ་པ་ཐམས་ཅད་དང་། དེར་ཡོད་པའི་ཀལ་དི་པ་དག་དང་དམག་རྣམས་ཀྱང་བསད་དོ། །  
\v 4 ཁོས་གེ་དལ་ཡཱ་བསད་པའི་ཉིན་གསུམ་པ་སྟེ། མི་སུས་ཀྱང་མི་ཤེས་པའི་དུས་སུ།  
\v 5 མི་བརྒྱད་ཅུ་ནི་སི་ཀེམ་དང་། ཞི་ལོ་དང་། སཱ་མར་ཡ་བཅས་ནས་འོངས་པ་དང་། སྨ་ར་བཞར་ཏེ་གོས་བཤགས་ནས། རང་ལ་རྨ་ཕྱུང་ \f + \ft འདིར་སྨ་ར་བཞར་ཏེ་གོས་བཤགས་ནས། རང་ལ་རྨ་ཕྱུང་ཞེས་པ་ནི་མྱ་ངན་ཆེན་པོ་བྱེད་པའི་རྟགས་ཡིན། \f*སྟེ་འབྲུ་མཆོད་དང་སྤོས་དཀར་ལག་ཏུ་བཟུང་ནས། དཀོན་མཆོག་ཡ་ཝཱེའི་མཆོད་ཁང་ལ་འབུལ་དུ་འོང་བ་སྟེ།  
\v 6 ནེ་ཐན་ཡཱའི་བུ་ཡེས་མ་ཨེལ་ནི་དེ་དག་ལ་བསུ་རུ་མཱས་ཟི་ཕཱ་ནས་ཐོན་ཏེ། ངུ་ཞོར་འགྲོ་ཞོར་དེ་དག་དང་ཕྲད་ནས་ན་རེ། ཁྱོད་རྣམས་ནི་ཨ་ཧི་ཀམ་གྱི་བུ་གེ་དལ་ཡཱའི་དྲུང་དུ་ཤོག་དང་ཞེས་པ་དང་།  
\v 7 དེ་རྣམས་གྲོང་ཁྱེར་གྱི་དབུས་སུ་ཕྱིན་པའི་ཚེ། ནེ་ཐན་ཡཱའི་བུ་ཡེས་མ་ཨེལ་དང་དེ་དང་མཉམ་དུ་ཡོད་པའི་མི་རྣམས་ཀྱིས་དེ་ཚོ་བསད་ནས་དོང་ནང་དུ་གཡུགས་སོ། །  
\v 8 ཡིན་ཡང་དེ་རྣམས་ལས་མི་བཅུ་ཡིས་ཡེས་མ་ཨེལ་ལ་འདི་ལྟར། ངེད་ཅག་གིས་ཞིང་ཁར་སོ་བ་དང་གྲོ་དང་། སྣུམ་དང་། སྦྲང་རྩི་སོགས་སྦས་ཡོད་པས་ངེད་ཅག་མ་གསོད་ཅིག་ཞུས་པ་ན། ཡེས་མ་ཨེལ་གྱིས་དེ་དག་སྤུན་ཟླ་རྣམས་དང་མཉམ་དུ་མ་བསད་པར་བསྐྱུར་བ་རེད།  
\v 9 ཡེས་མ་ཨེལ་གྱིས་བསད་པའི་མི་རྣམས་ཀྱི་བེམ་པོ་གེ་དལ་ཡཱའི་རྩར་གཡུགས་པ་དང་། དོང་འདི་ནི་སྔར་རྒྱལ་པོ་ཨ་སཱ་བྱ་བ་དེ་ཡེས་ར་ཨེལ་གྱི་རྒྱལ་པོ་པཱ་ཤ་ལ་སྐྲག་ནས་བརྐོས་པ་ཡིན་ལ། ནེ་ཐན་ཡཱའི་བུ་ཡེས་མ་ཨེལ་གྱིས་བེམ་པོ་ཡིས་དོང་དེ་བཀང་བར་བྱས།  
\v 10 དེ་ནས་ཡེས་མ་ཨེལ་གྱིས་མཱས་ཟི་ཕཱ་རུ་ལུས་པའི་མི་རྣམས་ཏེ། རྒྱལ་པོའི་སྲས་མོ་རྣམས་དང་མཱས་ཟི་ཕཱ་རུ་གནས་པའི་མི་སྡེ་ཐམས་ཅད་བཙོན་དུ་ཁྲིད་དོ། །དེ་དག་ནི་སྔར་སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་ཨ་ཧི་ཀམ་གྱི་བུ་གེ་དལ་ཡཱ་ལ་བཅོལ་བ་ཡིན་ཏེ། ནེ་ཐན་ཡཱའི་བུ་ཡེས་མ་ཨེལ་གྱིས་དེ་རྣམས་བཙོན་དུ་ཁྲིད་ནས། ཨམ་མོན་པའི་རྩར་འགྲོ་བར་བརྩམས།  
\v 11 ཀཱ་རེ་ཨའི་བུ་ཡོ་ཧ་ནན་དང་། དེ་དང་མཉམ་དུ་ཡོད་པའི་དམག་དཔོན་རྣམས་ཀྱིས་ནེ་ཐན་ཡཱའི་བུ་ཡེས་མ་ཨེལ་གྱིས་སྤྱད་པའི་ངན་སྤྱོད་ཐམས་ཅད་ཐོས་པ་དང་།  
\v 12 མི་རྣམས་ཁྲིད་ནས་ནེ་ཐན་ཡཱའི་བུ་ཡེས་མ་ཨེལ་དང་འཐབ་ཏུ་སོང་བ་ལ། གིབ་ཡོན་གྱི་ཆུ་ཆེན་འགྲམ་དུ་དེ་དང་ཕྲད།  
\v 13 ཡང་ཡེས་མ་ཨེལ་དང་མཉམ་དུ་ཡོད་པའི་མི་རྣམས་ཀྱིས་ཀཱ་རེ་ཨའི་བུ་ཡོ་ཧ་ནན་དང་། དེ་དང་ལྷན་ཅིག་ཏུ་ཡོད་པའི་དམག་དཔོན་རྣམས་མཐོང་ནས་སེམས་དགའ་བར་གྱུར་ཏོ། །  
\v 14 དེ་ལྟར་ཡེས་མ་ཨེལ་གྱིས་མཱས་ཟི་ཕཱ་ནས་བཙོན་དུ་ཁྲིད་པའི་མི་ཐམས་ཅད་ཁ་ཕྱིར་འཁོར་ནས་ཀཱ་རེ་ཨའི་བུ་ཡོ་ཧ་ནན་གྱི་དྲུང་དུ་ཕྱིན་ཏོ། །  
\v 15 ཡང་ནེ་ཐན་ཡཱའི་བུ་ཡེས་མ་ཨེལ་ནི་མི་བརྒྱད་དང་བཅས་ཡོ་ཧ་ནན་གྱི་ལག་ནས་ཐར་ཏེ་ཨམ་མོན་པའི་རྩར་བྲོས་སོ། །  
\v 16 ནེ་ཐན་ཡཱའི་བུ་ཡེས་མ་ཨེལ་གྱིས་ཨ་ཧི་ཀམ་གྱི་བུ་གེ་དལ་ཡཱ་བསད་དེ། མཱས་ཟི་ཕཱ་རུ་ལུས་པའི་མི་རྣམས་དང་། དམག་མི་དང་། བུད་མེད་དང་། བྱིས་པ་དང་། ཉུག་རུམ་པ་དང་བཅས་གིབ་ཡོན་དུ་བཙོན་ལ་ཁྲིད་པའི་རྗེས་སུ། ཀཱ་རེ་ཨའི་བུ་ཡོ་ཧ་ནན་དང་དེ་དང་མཉམ་དུ་ཡོད་པའི་དམག་དཔོན་དག་གིས་དེ་རྣམས་ཕྱིར་ཕྲོགས་ཏེ།  
\v 17 ཨེ་ཅིབ་ཡུལ་དུ་འགྲོ་བར་པེད་ལེ་ཧེམ་གྱི་གེ་ལོ་ཐུ་ཀིམ་ཧམ་དུ་བསྡད་དོ། །  
\v 18 ཅི་ལ་ཞེ་ན། ནེ་ཐན་ཡཱའི་བུ་ཡེས་མ་ཨེལ་གྱིས་པཱ་པེལ་ལོན་རྒྱལ་པོས་ཡུལ་ཁམས་ཀྱི་སྤྱི་དཔོན་དུ་བསྐོས་པའི་ཨ་ཧི་ཀམ་གྱི་བུ་གེ་དལ་ཡཱ་བསད་པའི་རྐྱེན་གྱིས་དེ་དག་ཀལ་དི་པ་ལ་འཇིགས་པས་སོ། །   
\c 42
\cl ལེའུ་ཞེ་གཉིས་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 མི་རྣམས་ཀྱིས་ཡེ་རེམ་ཡཱ་ལ་གསོལ་བ་འདེབས་པར་ཞུ་བ།  
\p
\v 1 དེ་ནས་དམག་དཔོན་རྣམས་དང་། ཀཱ་རེ་ཨའི་བུ་ཡོ་ཧ་ནན་དང་། ཧོ་ཤ་ཡཱའི་བུ་ཡེ་ཟན་ཡཱ་དང་མི་ཐམས་ཅད་ཀྱི་མཆོག་དམན་སུ་ཡིན་ཡང་ཚང་མ་མདུན་དུ་འོངས་ནས།  
\v 2 ལུང་སྟོན་པ་ཡེ་རེམ་ཡཱ་ལ་ན་རེ། ངེད་ཅག་ལ་ཁྱེད་ཀྱི་དྲུང་དུ་ཞུ་བར་མཛོད་ཅིག ངེད་ཅག་ཤུལ་ལུས་རྣམས་ཀྱི་ཆེད་དུ་ཁྱེད་ཀྱི་དཀོན་མཆོག་ཡ་ཝཱེ་ལ་སྨོན་ལམ་འདེབས་རོགས་ཞུ། ཅི་ལ་ཞེ་ན། ཁྱེད་ཀྱིས་དངོས་སུ་གཟིགས་པ་ལྟར་ངེད་ཅག་ནི་མང་པོའི་ནང་ནས་ཤིན་ཏུ་ཉུང་ངུ་ལས་ལུས་མེད་པས་སོ། །  
\v 3 ཁྱེད་ཀྱི་དཀོན་མཆོག་ཡ་ཝཱེས་ངེད་ཅག་ལ་འགྲུལ་དགོས་པའི་ལམ་དང་། སྤྱོད་དགོས་པའི་དོན་རྣམས་སྟོན་པར་ཤོག་ཅེས་ཞུས་པ་དང་།  
\v 4 ལུང་སྟོན་པ་ཡེ་རེམ་ཡཱས་འདི་ལྟར། ངས་ཁྱོད་ཅག་གི་གཏམ་ཐོས་པས། ལྟོས་ཤིག ངས་ཁྱོད་ཀྱིས་སྨྲས་པ་བཞིན་དུ་ཁྱོད་ཅག་གི་དཀོན་མཆོག་ཡ་ཝཱེ་ལ་གསོལ་བ་འདེབས་པར་བྱ་སྟེ། དཀོན་མཆོག་ཡ་ཝཱེས་ཁྱོད་ཅག་ལ་བཀའ་ལན་ཅི་ཞིག་གནང་བ་དེ་ངས་ཁྱོད་ཅག་ལ་འཆད་པར་བྱ་ཞིང་། གསང་བར་མི་འགྱུར་རོ་ཞེས་སྨྲས་སོ། །  
\v 5 དེ་ནས་ཁོ་ཚོས་ཡེ་རེམ་ཡཱ་ལ་ན་རེ། གལ་ཏེ་ངེད་རྣམས་ཀྱིས་ཁྱེད་ཀྱི་དཀོན་མཆོག་ཡ་ཝཱེས་ཁྱེད་མངགས་ནས་གསུངས་པའི་བཀའ་ཐམས་ཅད་བཞིན་དུ་མ་སྤྱད་ན། དཀོན་མཆོག་ཡ་ཝཱེ་ཁོང་ཉིད་ངེད་ཅག་གི་ཁྲོད་དུ་ཡིད་རྟོན་རུང་བ་དང་བདེན་པའི་དཔང་པོ་རུ་འགྱུར་བར་ཤོག  
\v 6 ད་ལྟ་ངེད་ཅག་གིས་ཁྱེད་ནི་ངེད་ཀྱི་དཀོན་མཆོག་ཡ་ཝཱེའི་དྲུང་དུ་འགྲོ་བར་ཞུ་བ་དང་། ཁོང་གིས་བཀའ་བཟང་ངན་གང་ཞིག་གསུངས་ནའང་ངེད་ཅག་གིས་མཉན་པར་བྱའོ། །ཅི་ལ་ཞེ་ན། ངེད་རྣམས་ཀྱིས་རང་ཅག་གི་དཀོན་མཆོག་ཡ་ཝཱེའི་གསུང་ལ་མཉན་ན་བྱིན་རླབས་འཐོབ་བར་འགྱུར་རོ་ཞེས་སྨྲས་སོ། །   
\s1 ཡ་ཝཱེས་ཡེ་རེམ་ཡཱ་ལ་བཀའ་ལན་གནང་བ།  
\p
\v 7 དེ་ནས་ཉིན་བཅུ་འགོར་རྗེས་དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་དང་།  
\v 8 ཁོང་གིས་ཀཱ་རེ་ཨའི་བུ་ཡོ་ཧ་ནན་དང་། དེ་དང་མཉམ་དུ་ཡོད་པའི་དམག་དཔོན་ཀུན་དང་། མཆོག་དམན་སུ་ཡིན་ཐམས་ཅད་བོས་ནས།  
\v 9 དེ་དག་ལ་འདི་ལྟར། ཡེས་ར་ཨེལ་གྱི་དཀོན་མཆོག་ཡ་ཝཱེ་སྟེ། ཁྱོད་ཅག་གིས་ང་རང་ཁོང་གི་དྲུང་དུ་སོང་ནས་གསོལ་བ་འདེབས་དགོས་པར་ཞུས་པ་ཉིད་ཀྱིས་འདི་སྐད་དུ།  
\v 10 ཇི་སྟེ་ཁྱོད་ཅག་ད་དུང་ཡུལ་འདིར་གནས་ན། ངས་ཁྱོད་ཡར་བཞེང་ཞིང་བཤིག་པར་མི་བྱ། ངས་ཁྱོད་འཛུགས་ཤིང་བསློག་པར་མི་བྱའོ། །ཅི་ལ་ཞེ་ན། ངས་ཁྱོད་ཅག་ལ་ཕབ་པའི་ཆག་སྒོའི་ཕྱིར་ང་འགྱོད་དོ། །  
\v 11 ཁྱོད་ཅག་སྐྲག་པའི་པཱ་པེལ་ལོན་གྱི་རྒྱལ་པོར་མ་འཇིགས་ཤིག དེ་ལ་མ་སྐྲག་ཅིག ཅི་ལ་ཞེ་ན། ང་ནི་ཁྱོད་དང་མཉམ་དུ་གནས་ཤིང་། ཁྱོད་རྣམས་བསྐྱབས་ཏེ་ཁོའི་ལག་ནས་སྒྲོལ་བར་འགྱུར་ཞེས་དཀོན་མཆོག་ཡ་ཝཱེས་གསུངས་སོ། །  
\v 12 ངས་ཁྱོད་ཅག་ལ་སྙིང་རྗེ་བསྒོམས་ན། ཁོས་ཀྱང་ཁྱོད་ཅག་ལ་སྙིང་རྗེ་བསྐྱེད་ནས་ཁྱོད་ཅག་རང་ཡུལ་དུ་ལོག་པར་བྱའོ་ཞེས་གསུངས།  
\v 13 གལ་ཏེ་ཁྱོད་ཅག་གིས་ངེད་རྣམས་ཡུལ་འདིར་གནས་པར་མི་བྱའོ་ཟེར་ཞིང་། ཁྱོད་རྣམས་ཀྱི་དཀོན་མཆོག་ཡ་ཝཱེའི་བཀའ་ལའང་མི་མཉན་པར།  
\v 14 ཡང་ངེད་ཅག་འཐབ་མོ་མི་མཐོང་བ་དང་། དམག་དུང་གི་སྒྲ་མི་ཐོས་པ། ཁ་ཟས་མེད་པས་བཀྲེས་ལྟོགས་མི་མྱང་བའི་ཨེ་ཅིབ་ཡུལ་དུ་སོང་ནས་དེར་སྡོད་དགོས་ཏེ་འདི་རུ་མི་འདུག་ཟེར་ན།  
\v 15 ཀྱེ་ཡ་ཧུ་དཱ་པ་ཤུལ་ལུས་རྣམས། ཁྱོད་རྣམས་ཀྱིས་ད་ལྟ་དཀོན་མཆོག་ཡ་ཝཱེའི་བཀའ་ལ་ཉོན་ཅིག དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཇི་སྟེ་ཁྱོད་ཅག་ཨེ་ཅིབ་ཡུལ་དུ་སོང་ནས་དེར་སྡོད་པའི་སེམས་ཐག་བཅད་པ་ཡིན་ན།  
\v 16 ཁྱོད་ཅག་འཇིགས་པའི་རལ་གྲི་ཡིས་ཨེ་ཅིབ་ཡུལ་དུ་ཁྱོད་ཅག་བཟུང་བར་འགྱུར་བ་དང་། ཡང་ཁྱོད་ཅག་སྐྲག་པའི་མུ་གེ་ཡིས་ཨེ་ཅིབ་ཡུལ་དུ་ཁྱོད་ཅག་འདེད་པར་འགྱུར་ལ། ཁྱོད་རྣམས་དེ་རུ་འཆི་ངེས་ཡིན།  
\v 17 ཨེ་ཅིབ་ཡུལ་དུ་སོང་ནས་དེར་སྡོད་པའི་སེམས་ཐག་བཅད་པ་རྣམས་ནི། ཐམས་ཅད་རལ་གྲི་དང་མུ་གེ་དང་རིམས་ནད་བཅས་ཀྱིས་འཆི་བར་འགྱུར་ཏེ། མི་གཅིག་ཀྱང་ལུས་པར་མི་འགྱུར་ལ། ངས་དེ་དག་གི་སྟེང་དུ་འབེབ་པའི་ཆག་སྒོ་ལས་ཀྱང་ཐར་བར་མི་འགྱུར་རོ་ཞེས་གསུངས་སོ། །  
\v 18 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ངས་ཡེ་རུ་སཱ་ལེམ་གྱི་མི་རྣམས་ཀྱི་སྟེང་དུ་རང་གི་ཁོང་ཁྲོ་དང་ཁྲོ་གཏུམ་ཇི་ལྟར་བླུགས་པ་ཡིན་ན། ཁྱོད་ཅག་ཨེ་ཅིབ་ཡུལ་དུ་སླེབས་པ་ཙམ་གྱིས་ངའི་ཁྲོ་གཏུམ་ནི་ཁྱོད་ཅག་གི་སྟེང་དུ་དེ་ལྟར་བླུག་བར་བྱ་སྟེ། ཐ་ན་ཁྱོད་ཅག་ལ་ངན་སྨྲས་དང་འཇིགས་སྐྲག དམོད་མོ། ངོ་ཚ་བཅས་ཐེབས་པར་འགྱུར་ཞིང་། ཡུལ་འདི་སླར་ཡང་མཐོང་བར་མི་འགྱུར་རོ་ཞེས་གསུངས།  
\v 19 ཀྱེ་ཡ་ཧུ་དཱ་པ་ཤུལ་ལུས་རྣམས། དཀོན་མཆོག་ཡ་ཝཱེས་ཁྱོད་ཅག་གི་སྐོར་ལ་འདི་སྐད་དུ། ཨེ་ཅིབ་ཡུལ་དུ་མ་འགྲོ་ཞིག་ཅེས་གསུངས། དེ་རིང་གི་ཉིན་མོར་ངས་ཁྱོད་ཅག་ལ་ཉེན་བརྡ་གཏོང་བ་འདི་རྟོགས་པར་གྱིས།  
\v 20 ཁྱོད་ཅག་གིས་གཡོ་སྦྱོར་སྤེལ་ནས་རང་ལ་གནག་པའོ། །ཅི་ལ་ཞེ་ན། ཁྱོད་ཅག་གིས་ང་རང་ཁྱོད་རྣམས་ཀྱི་དཀོན་མཆོག་ཡ་ཝཱེའི་དྲུང་དུ་བསུས་ནས་འདི་ལྟར། ཁྱེད་ཀྱིས་ངེད་ཅག་གི་དོན་དུ་ངེད་ཀྱི་དཀོན་མཆོག་ཡ་ཝཱེ་ལ་གསོལ་བ་འདེབས་རོགས་ཞུ། ཁྱེད་ཀྱིས་ངེད་ཀྱི་དཀོན་མཆོག་ཡ་ཝཱེས་ཅི་དང་ཅི་གསུང་བ་ཐམས་ཅད་ངེད་རྣམས་ལ་སྨྲ་བར་མཛོད། ངེད་ཀྱིས་དེ་བཞིན་བསྒྲུབ་པར་བྱའོ་ཞེས་སྨྲས་སོ། །  
\v 21 ངས་དེ་རིང་གི་ཉིན་མོར་ཁྱོད་རྣམས་ལ་སྨྲས་ཀྱང་། ཁྱོད་ཅག་གིས་རང་གི་དཀོན་མཆོག་ཡ་ཝཱེས་ང་ཁྱོད་ཅག་གི་མདུན་དུ་མངགས་ནས་གསུངས་པའི་བཀའ་གཅིག་ལའང་མ་མཉན་ཏོ། །  
\v 22 ད་ལྟ་ཁྱོད་རྣམས་ཀྱིས་དངོས་གནས་ཤེས་དགོས་པ་ཞིག་ལ། ཁྱོད་རྣམས་སོང་ནས་སྡོད་འདོད་པའི་གནས་སུ་རལ་གྲི་དང་། མུ་གེ་དང་། རིམས་ནད་ཀྱིས་འཆི་བར་འགྱུར་རོ་ཞེས་གསུངས་སོ། །   
\c 43
\cl ལེའུ་ཞེ་གསུམ་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེ་རེམ་ཡཱ་ནི་ཨེ་ཅིབ་ཡུལ་དུ་ཁྲིད་པ།  
\p
\v 1 ཡེ་རེམ་ཡཱ་ཡིས་མི་ཀུན་ལ་ཁོ་ཚོའི་དཀོན་མཆོག་ཡ་ཝཱེའི་བཀའ་ཐམས་ཅད་དེ། ཁོ་ཚོའི་དཀོན་མཆོག་ཡ་ཝཱེས་ཁོང་ཉིད་མངགས་ནས་སྨྲ་བར་བཅུག་པའི་བཀའ་རྣམས་བཤད་རྗེས།  
\v 2 ཧོ་ཤ་ཡཱའི་བུ་ཨ་ཟར་ཡཱ་དང་། ཀཱ་རེ་ཨའི་བུ་ཡོ་ཧ་ནན། དེ་མིན་ང་རྒྱལ་གྱིས་ཁེངས་པའི་མི་རྣམས་ཀྱིས་ཡེ་རེམ་ཡཱ་ལ་ན་རེ། ཁྱེད་ཀྱིས་རྫུན་སྨྲས་པ་ཡིན་ཏེ། རང་ཅག་གི་དཀོན་མཆོག་ཡ་ཝཱེས་ཁྱོད་རྣམས་ཨེ་ཅིབ་ཡུལ་དུ་སྡོད་པར་མ་འགྲོ་ཞེས་སྨྲ་བར་ཁྱེད་རང་མ་མངགས་ལ།  
\v 3 འདི་ནི་ནེར་ཡཱའི་བུ་པཱ་རུག་གིས་ཁྱེད་ལ་ངན་སྐུལ་བྱས་ནས་ངེད་ཅག་ལ་གནོད་པ་བཏང་སྟེ། ངེད་རྣམས་ཀལ་དི་པའི་ལག་ཏུ་སྤྲོད་པ་དང་། ངེད་ཅག་གསོད་པའམ་ཡང་ན་པཱ་པེལ་ལོན་དུ་བཙན་ཁྲིད་བྱེད་པའི་ཆེད་དུ་ཡིན་ཞེས་སྨྲས་པ་ལ།  
\v 4 ཀཱ་རེ་ཨའི་བུ་ཡོ་ཧ་ནན་དང་། དམག་དཔོན་ཀུན་དང་། མི་ཐམས་ཅད་ཀྱིས་དཀོན་མཆོག་ཡ་ཝཱེའི་བཀའ་ལ་མཉན་ནས་ཡ་ཧུ་དཱའི་ཡུལ་དུ་མ་བསྡད་པར།  
\v 5 ཀཱ་རེ་ཨའི་བུ་ཡོ་ཧ་ནན་དང་། དམག་དཔོན་ཀུན་གྱིས་ཤུལ་དུ་ལུས་པའི་མི་རྣམས་ཏེ། ཡུལ་ཁམས་སོ་སོར་ཐོར་ནས་ཕྱིར་ལོག་ཅིང་ཡ་ཧུ་དཱ་ཡུལ་དུ་སྡོད་པ་རྣམས་ཡིན་ལ།  
\v 6 སྐྱེས་པ་དང་བུད་མེད། བྱིས་པ། རྒྱལ་པོའི་སྲས་མོ་བཅས་དང་། སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་ཤཱ་ཕན་གྱི་ཚ་བོའམ་ཨ་ཧི་ཀམ་གྱི་བུ་གེ་དལ་ཡཱའི་རྩར་བསྐྱུར་བའི་མི་ཐམས་ཅད་དང་། ལུང་སྟོན་པ་ཡེ་རེམ་ཡཱ་དང་། ནེར་ཡཱའི་བུ་པཱ་རུག་བཅས་པ་སྟེ།  
\v 7 ཐམས་ཅད་ཨེ་ཅིབ་ཡུལ་དུ་ཁྲིད་ནས་ཐ་ཕན་ཧེ་སི་བྱ་བར་སླེབས་སོ། །དེ་ནི་ཁོ་རྣམས་ཀྱིས་དཀོན་མཆོག་ཡ་ཝཱེའི་བཀའ་ལ་མ་མཉན་པའི་ཕྱིར་རོ། །  
\v 8 ཡང་ཐ་ཕན་ཧེ་སི་རུ་དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།  
\v 9 ཁྱོད་ཀྱིས་ཡ་ཧུ་དཱ་པའི་མིག་མདུན་དུ་ལག་ལ་རྡོ་ཆེན་པོ་འགའ་བཟུང་ནས། ཐ་ཕན་ཧེ་སིའི་ཕཱར་ཨོལ་གྱི་ཕོ་བྲང་གི་སྒོ་ཁའི་རྡོ་གཅལ་བཟོ་བྱེད་གཏུན་ཁུང་ནང་དུ་སྦོས་ཤིག  
\v 10 ཡང་དེ་རྣམས་ལ་འདི་ལྟར། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ལྟོས་ཤིག ངས་རང་གི་གཡོག་པོ་སྟེ་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་བོས་འོངས་ནས། སྦས་པའི་རྡོ་འདི་རྣམས་ཀྱི་སྟེང་དུ་ངས་དེའི་རྒྱལ་ཁྲི་འགོད་པ་དང་། ཁོས་དེའི་སྟེང་དུ་རྒྱལ་པོའི་གུར་དབུབ་ཅིང་།  
\v 11 ཁོ་འོངས་ནས་ཨེ་ཅིབ་ཡུལ་ལ་རྒོལ་ཏེ། འཆི་དགོས་པ་དག་འཆི་བར་འགྱུར་བ་དང་། བཙོན་དུ་འཁྲིད་དགོས་པ་དག་བཙོན་དུ་འཁྲིད་ཅིང་། རལ་གྲིས་གསོད་དགོས་པ་རྣམས་གསོད་པར་འགྱུར།  
\v 12 ངས་ཨེ་ཅིབ་པའི་ལྷ་ཁང་དག་མེས་བསྲེག་དགོས་པ་དང་། པཱ་པེལ་ལོན་གྱི་རྒྱལ་པོས་ལྷ་ཁང་རྣམས་བསྲེགས་ནས་སྐུ་འདྲ་རྣམས་བཙོན་དུ་འཁྱེར་བར་འགྱུར། ཡང་དེ་ལ་ཨེ་ཅིབ་ཡུལ་ཐོབ་ནས། ཕྱུགས་རྫིས་རང་གི་གོས་གྱོན་པ་ལྟར་བདེ་བའི་ངང་བཞུད་པར་འགྱུར།  
\v 13 དེས་ཨེ་ཅིབ་ཡུལ་གྱི་པེད་ཤེ་མེ་སིའི་ཀ་བ་རྣམས་གཅོག་ཅིང་། ཨེ་ཅིབ་པའི་ལྷ་ཁང་རྣམས་མེས་བསྲེག་པར་འགྱུར་རོ་ཞེས་སྨྲོས་ཤིག་ཅེས་གསུངས་སོ། །   
\c 44
\cl ལེའུ་ཞེ་བཞི་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཨེ་ཅིབ་ཡུལ་དུ་འཁྱམ་པའི་ཡེས་ར་ཨེལ་པ་རྣམས་ལ་འཕྲིན་བསྐུར་བ།  
\p
\v 1 དེ་ཡང་ཨེ་ཅིབ་ཡུལ་ཏེ། མིག་དོལ་དང་ཐ་ཕན་ཧེ་སི། ནོབ། ཕཱད་རུའུ་སི་བཅས་ཡུལ་འཁོར་དུ་སྡོད་པའི་ཡ་ཧུ་དཱ་པ་ཐམས་ཅད་ཀྱི་ཕྱིར་དུ། ཡེ་རེམ་ཡཱ་ལ་བྱུང་བའི་བཀའ་ནི་འདི་ལྟ་སྟེ།  
\v 2 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ངས་ཡེ་རུ་སཱ་ལེམ་དང་ཡ་ཧུ་དཱའི་གྲོང་ཁྱེར་རྣམས་ཀྱི་སྟེང་དུ་ཕབ་པའི་ཆག་སྒོ་ཐམས་ཅད་ཁྱོད་ཚོས་མཐོང་བ་ཡིན་ལ། ལྟོས་ཤིག གྲོང་ཁྱེར་དེ་རྣམས་དེ་རིང་གི་བར་དུ་ཞིག་རོར་ལུས་ནས་འདུག་མཁན་གཅིག་ཀྱང་མེད།  
\v 3 དེ་ནི་མི་རྣམས་ཀྱིས་སྤྱོད་ངན་སྤྱད་པའི་རྐྱེན་གྱིས་ཡིན་ལ། ཁོ་ཚོས་ལྷ་གཞན་རྣམས་ཏེ་ཁོ་ཚོ་དང་ཁྱོད་ཅག དེ་མིན་ཁྱོད་ཅག་གི་ཕ་མེས་རྣམས་ལ་རྒྱུས་མི་མངའ་བའི་ལྷ་རྣམས་ལ་སྤོས་བདུགས་པ་དང་ཞབས་ཏོག་བསྒྲུབས་ནས་ང་ལ་ཁོང་ཁྲོ་བསླངས།  
\v 4 ངས་རང་གི་ཞབས་ཕྱི་ལུང་སྟོན་པ་ཀུན་ཡང་ཡང་ཁྱོད་ཅག་གི་གམ་དུ་མངགས་ནས་འདི་ལྟར། ཁྱོད་ཚོས་ང་ཞེ་མེར་ཞིང་སྡང་བའི་དོན་འདི་མ་བྱེད་ཅིག་ཅེས་བསྒོས་ནའང་།  
\v 5 དེ་དག་གིས་མ་མཉན་ཏེ། རྣ་བ་གཏད་ནས་མ་མཉན་ལ། རང་གི་ངན་སྤྱོད་ལས་ཀྱང་ཕྱིར་མ་འཁོར་བར་སྔར་བཞིན་ལྷ་གཞན་རྣམས་ལ་སྤོས་བདུགས་པས།  
\v 6 ངའི་ཁོང་ཁྲོ་དང་ཁྲོ་གཏུམ་བླུགས་ཤིང་། ཡ་ཧུ་དཱའི་གྲོང་ཁྱེར་རྣམས་དང་ཡེ་རུ་སཱ་ལེམ་གྱི་སྲང་ལམ་དུ་མེ་ལྟར་འབར་བས། དེ་རིང་གི་ཉིན་མོ་ལྟར་དེ་དག་བཤིག་ནས་ཞིག་རོར་བྱས་སོ་ཞེས་གསུངས།  
\v 7 ད་ལྟ་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཁྱོད་ཅག་གིས་སྤྱོད་ངན་འདི་དག་སྤྱད་ནས་རང་ཉིད་བརླགས་ཏེ། ཁྱོད་ཅག་གི་སྐྱེས་པ་རྣམས་དང་བུད་མེད་རྣམས། བྱིས་པ་རྣམས། འོ་འཐུང་དང་བཅས་ཡ་ཧུ་དཱ་ནས་མེད་པར་བྱས་ཏེ་གཅིག་ཀྱང་མི་ལུས་པར་བྱེད་པ་ཅི་ཡིན་ནམ།  
\v 8 ཁྱོད་ཅག་གིས་རང་གི་ལག་པས་བཟོས་པ་ཡིས་བྱེས་སུ་སྡོད་པའི་ཨེ་ཅིབ་ཡུལ་དུ་ལྷ་གཞན་རྣམས་ལ་སྤོས་བདུགས་ནས་ང་ཁྲོ་བར་བཅུག་སྟེ། ཁྱོད་རྣམས་མེད་པར་བཟོས་པ་དང་། ས་སྟེང་གི་ཡུལ་ཁམས་ཐམས་ཅད་དུ་དམོད་པ་དང་སྨད་ར་གཏོང་བའི་གཞི་རུ་གྱུར་ཏོ། །  
\v 9 ཡ་ཧུ་དཱའི་ཡུལ་དང་ཡེ་རུ་སཱ་ལེམ་གྱི་སྲང་ལམ་རྣམས་སུ་སྤྱད་པའི་སྤྱོད་ངན་ཏེ། ཁྱོད་ཅག་གི་མེས་པོ་རྣམས་ཀྱི་སྤྱོད་ངན་དང་། ཡ་ཧུ་དཱའི་རྒྱལ་པོ་དག་དང་བཙུན་མོ་རྣམས་ཀྱི་སྤྱོད་ངན། ཁྱོད་ཅག་དང་ཁྱོད་ཅག་གི་ཆུང་མ་རྣམས་ཀྱི་སྤྱོད་ངན་རྣམས་ཁྱོད་རྣམས་ཀྱིས་བརྗེད་སོང་ངམ།  
\v 10 དེ་རིང་གི་བར་དུ་ཁོ་རྣམས་ད་དུང་བློ་འགྱོད་མ་སྐྱེས་ཤིང་། འཇིགས་ཀྱང་མ་འཇིགས་ལ། ངས་ཁྱོད་ཅག་དང་ཁྱོད་ཅག་གི་མེས་པོའི་མདུན་དུ་བཞག་པའི་བཀའ་ཁྲིམས་དང་སྒྲིག་སྲོལ་རྣམས་མ་བརྩིས་པས།  
\v 11 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ལྟོས་ཤིག ངས་ཁྱོད་རྣམས་ལ་ཆག་སྒོ་འབྱུང་བར་བྱས་ཏེ་ཡ་ཧུ་དཱ་པ་རྣམས་མེད་པར་བཟོ་བའི་སེམས་ཐག་བཅད་ཟིན་ཏོ། །  
\v 12 ཡང་ཨེ་ཅིབ་ཡུལ་དུ་འགྲོ་བར་ཐག་བཅད་པ་དང་དེ་རུ་བྱེས་སུ་སྡོད་པའི་མི་སྟེ། ཤུལ་དུ་ལུས་པའི་ཡ་ཧུ་དཱ་པ་ཐམས་ཅད་ངས་མེད་པར་བཟོ་བ་དང་། དེ་རྣམས་ནི་ཨེ་ཅིབ་ཡུལ་དུ་མེད་པར་འགྱུར་རོ། །རལ་གྲི་དང་མུ་གེའི་རྐྱེན་གྱིས་རྩ་མེད་དུ་འགྲོ་བ་དང་། མཆོག་དམན་སུ་ཡིན་ཡང་རལ་གྲི་དང་མུ་གེ་ལས་འཆི་བར་འགྱུར་ལ། ཐ་ན་ངན་སྨྲས་དང་འཇིགས་སྐྲག དམོད་མོ། ངོ་ཚ་བཅས་ཐེབས་པར་འགྱུར་རོ། །  
\v 13 ངས་ཇི་ལྟར་རལ་གྲི་དང་མུ་གེ་དང་རིམས་ནད་བཅས་ཀྱིས་ཡེ་རུ་སཱ་ལེམ་ལ་ཉེས་ཆད་བཅད་པ་ཡིན་ན། ཨེ་ཅིབ་ཡུལ་དུ་སྡོད་པའི་ཡ་ཧུ་དཱ་པ་རྣམས་ལའང་དེ་ལྟར་ཉེས་ཆད་གཅོད་ངེས་ཡིན།  
\v 14 ཨེ་ཅིབ་ཡུལ་དུ་སོང་ནས་དེ་རུ་སྡོད་པའི་མི་སྟེ་ཡ་ཧུ་དཱ་པ་ཤུལ་ལུས་རྣམས་ནི་སུ་ཡང་ཐར་མི་ཐུབ་ལ་གསོན་པོར་ཡང་མི་ལུས་ཏེ། ཁོ་རྣམས་ཡ་ཧུ་དཱའི་ཡུལ་དུ་ཕྱིར་ལོག་མི་ནུས་སོ། །དེ་དག་གི་སེམས་སུ་ཕྱིར་ལོག་ནས་དེ་རུ་འདུག་འདོད་ཀྱང་། བྲོས་ནས་ཐར་བའི་མི་འགའ་རེ་མ་གཏོགས་གཞན་སུ་ཡང་ཕྱིར་ལོག་མི་ནུས་ཞེས་གསུངས་སོ་ཞེས་པའོ། །  
\v 15 དེ་ཡང་ཨེ་ཅིབ་ཀྱི་ཕཱད་རུའུ་སི་ཡུལ་དུ་སྡོད་པའི་མི་རྣམས་ཏེ། རང་གི་ཆུང་མས་ལྷ་གཞན་རྣམས་ལ་སྤོས་བདུགས་པ་ཤེས་པའི་སྐྱེས་པ་རྣམས་དང་དེར་ལངས་སྡོད་པའི་བུད་མེད་ཚོགས་ཀྱིས་མཉམ་དུ་ཡེ་རེམ་ཡཱ་ལ་ལན་བཟློགས་ནས་འདི་ལྟར།  
\v 16 ཁྱོད་ཀྱིས་དཀོན་མཆོག་ཡ་ཝཱེའི་མཚན་གྱི་སྒོ་ནས་ངེད་ཅག་ལ་བསྒོས་པ་དེར་ངེད་རྣམས་ཀྱིས་མཉན་པར་མི་བྱ།  
\v 17 ངེད་རྣམས་ཀྱིས་རང་གི་ངག་ནས་ཐོན་པའི་ཚིག་བཞིན་བྱེད་ངེས་ཡིན་ཏེ། ནམ་མཁའི་རྒྱལ་མོར་སྤོས་བདུགས་ནས་སྐྱེམས་མཆོད་འབུལ་བ་དང་། ངེད་ཅག་དང་ངེད་ཅག་གི་ཕ་མེས་རྣམས། རྒྱལ་པོ་རྣམས། འགོ་དཔོན་བཅས་ཀྱིས་ཡ་ཧུ་དཱའི་གྲོང་ཁྱེར་རྣམས་དང་། ཡེ་རུ་སཱ་ལེམ་གྱི་སྲང་ལམ་དུ་ཅི་ལྟར་སྤྱད་པ་བཞིན་དུ་སྤྱོད་པར་འགྱུར་ཏེ། ཅི་ལ་ཞེ་ན། དེའི་དུས་སུ་ངེད་རྣམས་ལྟོ་བ་འགྲངས་ཤིང་བདེ་སྐྱིད་ལྡན་ལ། ཆག་སྒོ་ཅི་ཡང་མ་མཐོང་བས་སོ། །  
\v 18 འོན་ཀྱང་ངེད་རྣམས་ཀྱིས་ནམ་མཁའི་རྒྱལ་མོར་སྤོས་བདུག་པ་དང་སྐྱེམས་མཆོད་འབུལ་བ་མཚམས་བཞག་པའི་ཚུན་ལ། ངེད་རྣམས་ལ་ཅི་ཡང་མེད་པར་མ་ཟད། རལ་གྲི་དང་མུ་གེས་ཚར་བཅད་དོ་ཞེས་སྨྲས་སོ། །  
\v 19 བུད་མེད་རྣམས་ན་རེ། ངེད་ཅག་གིས་ནམ་མཁའི་རྒྱལ་མོར་སྤོས་བདུགས་ནས་སྐྱེམས་མཆོད་ཕུལ་བ་དང་། ནམ་མཁའི་རྒྱལ་མོའི་རྟེན་གྱི་འཁུར་ར་བཟོས་ནས་དེར་ཕུལ་བ་དང་སྐྱེམས་མཆོད་ཕུལ་བ་ངེད་རྣམས་ཀྱི་སྐྱེས་པ་དག་གིས་མི་ཤེས་སམ་ཞེས་སྨྲས་པ་ན།  
\v 20 ཡེ་རེམ་ཡཱ་ཡིས་ཁོང་ལ་དེ་ལྟར་ལན་བཟློགས་པའི་སྐྱེས་པ་དང་བུད་མེད་ཡོངས་ལ་འདི་ལྟར།  
\v 21 ཁྱོད་ཅག་དང་ཁྱོད་ཅག་གི་ཕ་མེས་དང་། རྒྱལ་པོ། འགོ་དཔོན། དེ་མིན་ཡུལ་མི་བཅས་ཀྱིས་ཡ་ཧུ་དཱའི་གྲོང་ཁྱེར་རྣམས་དང་། ཡེ་རུ་སཱ་ལེམ་གྱི་སྲང་ལམ་རྣམས་སུ་སྤོས་བདུགས་པ་དཀོན་མཆོག་ཡ་ཝཱེས་ཐུགས་སུ་དྲན་ཞིང་དགོངས་པ་མ་ཡིན་ནམ།  
\v 22 ཁྱོད་ཅག་གིས་སྤྱད་པའི་སྤྱོད་ངན་དང་ཞེ་མེར་བའི་དོན་རྣམས་ཀྱི་ཕྱིར་དཀོན་མཆོག་ཡ་ཝཱེས་ཐུགས་ནས་བཟོད་མ་ནུས་པས། དེ་རིང་ཉིན་མོ་ལྟར་ཁྱོད་ཅག་གི་ཡུལ་ཁམས་ཞིག་རོར་ལུས་པ་དང་། མི་རྣམས་འཇིགས་ཤིང་དམོད་མོ་འདེབས་པའི་གཞི་རུ་གྱུར་ཅིང་། སྡོད་མཁན་གཅིག་ཀྱང་མེད་པར་མཛད་དོ། །  
\v 23 ཁྱོད་ཚོས་སྤོས་བདུགས་ནས་དཀོན་མཆོག་ཡ་ཝཱེ་ལ་འགལ་བའི་སྡིག་པ་བྱས་ཤིང་། དཀོན་མཆོག་ཡ་ཝཱེའི་བཀའ་ལའང་མ་མཉན་པར། ཁོང་གི་བཀའ་ཁྲིམས་དང་སྒྲིག་ལམ། དཔང་ཡིག་བཅས་བརྩི་སྲུང་མ་བྱས་པས། དེ་རིང་ཉིན་མོ་བཞིན་དུ་ཆག་སྒོ་འདི་ཁྱོད་ཅག་གི་སྟེང་དུ་བབས་པ་ཡིན་ནོ་ཞེས་གསུངས་སོ། །  
\v 24 དེ་ནས་ཡེ་རེམ་ཡཱ་ཡིས་ཡང་མི་ཀུན་དང་བུད་མེད་རྣམས་ལ་འདི་ལྟར། ཨེ་ཅིབ་ཡུལ་དུ་གནས་པའི་ཡ་ཧུ་དཱ་པ་རྣམས་ལགས། དཀོན་མཆོག་ཡ་ཝཱེའི་བཀའ་ལ་ཉོན་ཅིག  
\v 25 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ཁྱོད་ཅག་དང་ཁྱོད་ཅག་གི་ཆུང་མ་རྣམས་ཀྱིས་ངག་ནས་སྨྲས་ཤིང་ལག་ནས་བསྒྲུབས་ཏེ་ན་རེ། ངེད་རྣམས་ཀྱིས་ནམ་མཁའི་རྒྱལ་མོར་སྤོས་བདུགས་ནས་སྐྱེམས་མཆོད་ཕུལ་ཏེ་དམ་བཅས་པ་དག་བསྒྲུབ་པར་བྱ་ཞེས་སྨྲས་པ་དང་། ད་ལྟ་ཁྱོད་རྣམས་ཀྱིས་རང་གི་དམ་བཅའ་བསྲུངས་ནས་དེ་བཞིན་སྒྲུབས་ཤིག་ཅེས་གསུངས་སོ། །  
\v 26 ཨེ་ཅིབ་ཡུལ་དུ་གནས་པའི་ཡ་ཧུ་དཱ་པ་ཐམས་ཅད་ཀྱིས་དཀོན་མཆོག་ཡ་ཝཱེའི་བཀའ་ལ་ཉོན་ཅིག དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་རང་གི་མིང་ཆེན་པོ་དཔང་དུ་བཙུགས་ནས་མནའ་བསྐྱལ་ཏེ། ཨེ་ཅིབ་ཡུལ་ཐམས་ཅད་དུ་ཡ་ཧུ་དཱ་པ་སུ་དང་སུ་ཡིས་ཀྱང་འདི་ལྟར། ངའི་གཏན་དུ་བཞུགས་པའི་གཙོ་བོ་ཡ་ཝཱེ་དཔང་དུ་བཙུགས་ནས་མནའ་བསྐྱལ་ལོ་ཞེས་ངའི་མིང་ལ་ཞུ་བར་མི་འགྱུར་རོ། །  
\v 27 ལྟོས་ཤིག ངས་དེ་དག་ལ་ཆག་སྒོ་འབྱུང་བ་ལས་བྱིན་རླབས་མི་འཐོབ་པའི་ཕྱིར་དུ་དེ་དག་ལ་ལྟོས་ཡོད། ཨེ་ཅིབ་ཡུལ་དུ་ཡོད་པའི་ཡ་ཧུ་དཱ་པ་རྣམས་ནི་རལ་གྲི་དང་མུ་གེས་ཚར་བཅད་དེ་རྩ་མེད་དུ་གཏོང་བར་འགྱུར་རོ། །  
\v 28 ཨེ་ཅིབ་ཡུལ་ནས་རལ་གྲི་ལས་ཐར་ཏེ་ཡ་ཧུ་དཱ་རུ་ལོག་པའི་མི་གྲངས་ནི་ཤིན་ཏུ་ཉུང་བ་ཡིན། ཨེ་ཅིབ་ཡུལ་དུ་སོང་ནས་བྱེས་སུ་སྡོད་པའི་མི་སྟེ། ཡ་ཧུ་དཱ་པ་ཤུལ་ལུས་ཐམས་ཅད་ཀྱིས་ངའི་བཀའ་འམ་ཡང་ན་ཁོ་ཚོའི་གཏམ་ལས་སུ་ཞིག་གི་ཚིག་བརྟན་པོར་ཚུགས་པ་རྟོགས་པར་འགྱུར་རོ། །  
\v 29 ཡང་གནས་འདི་རུ་ངས་ཁྱོད་ཅག་ལ་ཉེས་ཆད་གཅོད་པར་བྱ་ཞིང་དེ་ནི་སྔ་ལྟས་ཡིན་ལ། ངས་ཁྱོད་ཅག་ལ་ཆག་སྒོ་འབེབ་རྒྱུ་ཡིན་པའི་བཀའ་དེ་བརྟན་པོར་ཚུགས་པ་ཁྱོད་ཅག་གིས་ཤེས་པར་འགྱུར་ཞེས་དཀོན་མཆོག་ཡ་ཝཱེས་གསུངས་སོ། །  
\v 30 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ཨེ་ཅིབ་ཀྱི་རྒྱལ་པོ་ཧོབ་རཱ་ཕཱར་ཨོལ་ནི་ཁོའི་དགྲ་དང་ཁོའི་སྲོག་སྙེག་མཁན་རྣམས་ཀྱི་ལག་ཏུ་གཏོད་ཅིང་། དེ་ནི་ངས་ཡ་ཧུ་དཱའི་རྒྱལ་པོ་ཚིད་ཀི་ཡཱ་ནི་ཁོའི་དགྲ་དང་ཁོའི་སྲོག་སྙེག་མཁན་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱི་ལག་ཏུ་གཏད་པ་དང་འདྲའོ་ཞེས་གསུངས་སོ། །   
\c 45
\cl ལེའུ་ཞེ་ལྔ་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡ་ཝཱེས་པཱ་རུག་ལ་ཞལ་བཞེས་གནང་བ།  
\p
\v 1 ཡ་ཧུ་དཱའི་རྒྱལ་པོ་ཡོ་ཤི་ཡཱའི་བུ་ཡེ་ཧོ་ཡཱ་ཀིམ་བྱ་བའི་སྲིད་ལོ་བཞི་པར། ནེར་ཡཱའི་བུ་པཱ་རུག་གིས་ལུང་སྟོན་པ་ཡེ་རེམ་ཡཱའི་ཞལ་ལས་གསུངས་པའི་བཀའ་རྣམས་གླེགས་བམ་དུ་བཀོད་པ་སྟེ། ཡེ་རེམ་ཡཱ་ཡིས་པཱ་རུག་ལ་འདི་ལྟར།  
\v 2 ཀྱེ་པཱ་རུག་ལགས། ཡེས་ར་ཨེལ་གྱི་དཀོན་མཆོག་ཡ་ཝཱེས་ཁྱོད་ལ་འདི་སྐད་དུ།  
\v 3 སྔར་ཁྱོད་ཀྱིས་སྐྱོ་བ་ལ། དཀོན་མཆོག་ཡ་ཝཱེས་ངའི་ཟུག་གཟེར་གྱི་སྟེང་དུ་སྡུག་བསྔལ་བསྣན་པས། ང་འཁུན་ཞིང་ཐང་ཆད་དེ་ངལ་གསོ་མི་འཐོབ་བོ་ཞེས་སྨྲས་སོ། །  
\v 4 དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་དེ་ལ་འདི་ལྟར། ལྟོས་ཤིག ངས་རང་གིས་གང་ཞིག་བརྩིགས་པ་དེ་བཤིག་པར་འགྱུར་ལ། རང་གིས་གང་ཞིག་བཙུགས་པ་དེ་བསློག་པར་བྱ་སྟེ། ངས་ཡུལ་ཁམས་ཡོངས་སུ་དེ་ལྟར་བྱའོ། །  
\v 5 ཁྱོད་ཀྱིས་རང་གི་ཆེད་དུ་དོན་ཆེན་རྣམས་སྙེག་པ་ཡིན་ནམ། མ་སྙེག་ཅིག ལྟོས་ཤིག ངས་མིའི་རིགས་ཐམས་ཅད་ལ་ཆག་སྒོ་འབྱུང་བར་བྱེད་མོད། འོན་ཀྱང་ཁྱོད་ནི་གང་དུ་སོང་ནའང་ངས་ཁྱོད་རང་དམག་འཁྲུག་ལས་སྲོག་ཐར་བར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །   
\c 46
\cl ལེའུ་ཞེ་དྲུག་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཨེ་ཅིབ་སྐོར་གྱི་གཏམ།  
\p
\v 1 རྒྱལ་ཁམས་རྣམས་ཀྱི་སྐོར་དུ་དཀོན་མཆོག་ཡ་ཝཱེ་ནས་ལུང་སྟོན་པ་ཡེ་རེམ་ཡཱ་ལ་བྱུང་བའི་བཀའ་ནི་འདི་ལྟ་སྟེ།  
\v 2 ཨེ་ཅིབ་ཀྱི་སྐོར་དང་ཨེ་ཅིབ་ཀྱི་རྒྱལ་པོ་ནེ་ཀོ་ཕཱར་ཨོལ་གྱི་དམག་དཔུང་གི་སྐོར་གླེང་ན། དམག་དཔུང་འདིས་ཕི་རཱད་གཙང་པོའི་འགྲམ་གྱི་ཀར་ཀེ་མི་སི་རུ་དམག་སྒར་བཙུགས་ཤིང་། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་ཡ་ཧུ་དཱའི་རྒྱལ་པོ་ཡོ་ཤི་ཡཱའི་བུ་ཡེ་ཧོ་ཡཱ་ཀིམ་གྱི་སྲིད་ལོ་བཞི་པར་དེ་ཕམ་པར་བརྒྱབ་པའོ། །  
\v 3 ཁྱོད་རྣམས་ཀྱིས་ཕུབ་ཆེ་ཆུང་གཉིས་ཀ་གྲ་སྒྲིག་བྱོས་ལ་འཐབ་མོར་ཞུགས་ཤིག  
\v 4 ཤིང་རྟ་གྲ་སྒྲིག་བྱས་ནས་རྟ་ལ་ཞོན་དང་། ཁྲབ་རྨོག་གྱོན་ནས་ཡར་ལོངས་དང་། མདུང་རྡོར་ལ་གོ་ཁྲབ་གྱོན་ཞིག  
\v 5 ངས་དེ་དག་འཇིགས་ནས་ཕྱི་བསྣུར་སྟེག་པ་མཐོང་བ་ཅི་ཡིན་ནམ། དེ་དག་གི་དཔའ་བོ་རྣམས་ཕམ་པར་བརྒྱབ་ནས་མྱུར་དུ་བྲོས་ཏེ་ཁ་ཕྱིར་མི་འཁོར་ལ། ཕྱོགས་ཀུན་ཏུ་འཇིགས་སྐྲག་ཡོད་དོ་ཞེས་དཀོན་མཆོག་ཡ་ཝཱེས་གསུངས་སོ། །  
\v 6 རྐང་པ་མྱུར་བ་རྣམས་འབྲོ་མི་ཐུབ་ལ། དཔའ་བོ་རྣམས་ཀྱང་ཐར་བར་མི་འགྱུར། ཁོ་རྣམས་བྱང་གི་ཕི་རཱད་གཙང་པོའི་འགྲམ་དུ་འདྲེད་ནས་འགྱེལ་བར་འགྱུར།  
\v 7 ནཱ་ཡོལ་གཙང་པོ་བཞིན་རྒྱས་ཤིང་། གཙང་པོའི་ཆུ་བཞིན་འཕྱུར་ནས་འོང་བ་འདི་སུ་ཡིན་ནམ།  
\v 8 ཨེ་ཅིབ་ནི་ནཱ་ཡོལ་གཙང་པོ་བཞིན་རྒྱས་ཤིང་། གཙང་པོའི་ཆུ་བཞིན་འཕྱུར་བ་དང་། མོ་ན་རེ། ང་ཡར་རྒྱས་ནས་ཡུལ་ཁམས་ཐམས་ཅད་འགེབ་པ་དང་། ངས་གྲོང་ཁྱེར་དང་དེའི་ནང་གི་མི་རྣམས་མེད་པར་བྱའོ་ཟེར།  
\v 9 ཀྱེ་རྟ་རྣམས་ཡར་སོང་དང་། ཀྱེ་ཤིང་རྟ་རྣམས་སྨྱོན་པ་བཞིན་རྒྱུགས་ཤིག ལག་ཏུ་ཕུབ་བཟུང་བའི་གུ་ཤ་པ་དང་ཕུ་ཏཱའི་དཔའ་བོ་རྣམས་དང་། གཞུ་འཐེན་མཁན་ལུ་དཱ་པ་རྣམས་མདུན་དུ་སྐྱོད་ཅིག  
\v 10 ཉིན་མོ་དེ་ནི་དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་འཁོན་ལན་སློག་པའི་དུས་ཡིན་ཏེ། ཁོང་གིས་དགྲ་རྣམས་ལ་འཁོན་ལན་སློག་པར་འགྱུར་བ་དང་། རལ་གྲི་ཡིས་ཚིམ་པའི་བར་དུ་ཁྱུར་མིད་གཏོང་ཞིང་། སྐོམ་པ་སེལ་བའི་བར་དུ་ཁྲག་འཐུང་བར་འགྱུར། ཅི་ལ་ཞེ་ན། བྱང་ཕྱོགས་ཀྱི་ཕི་རཱད་གཙང་པོའི་འགྲམ་དུ། དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་དམར་མཆོད་ཀྱི་ཕྱུགས་རྣམས་བཤའ་བ་བཞིན་དུ་དགྲ་རྣམས་གསོད་དགོས་པས་སོ། །  
\v 11 ཀྱེ་ཨེ་ཅིབ་ཀྱི་ན་ཆུང་བུ་མོ་ཁྱོད་གིལ་ཨད་དུ་སྤོས་དཀར་ལེན་དུ་སོང་ཞིག ཁྱོད་ཀྱིས་སྨན་མང་པོ་བསྟེན་ཡང་དོན་མེད་ཡིན་ལ་གསོ་བར་མི་འགྱུར་རོ། །  
\v 12 ཡུལ་ཁམས་ཀུན་གྱིས་ཁྱོད་ཀྱི་ངོ་ཚ་ཐོས་ཤིང་། ཁྱོད་ཀྱིས་སྨྲེ་སྔགས་འདོན་པའི་སྒྲ་ནི་ས་གཞི་ཡོངས་ལ་ཁྱབ་པ་དང་། དཔའ་བོ་དང་དཔའ་བོ་ཐོགས་ནས་གཉིས་ཀ་མཉམ་དུ་ས་རུ་འགྱེལ་ཏོ། །   
\s1 ནེ་བོ་ཀད་ནེ་ཙར་འཐབ་དུ་འོང་བ།  
\p
\v 13 འདི་ནི་དཀོན་མཆོག་ཡ་ཝཱེས་ལུང་སྟོན་པ་ཡེ་རེམ་ཡཱ་ལ་གསུངས་པའི་བཀའ་ཡིན་ཏེ། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་འོངས་ནས་ཨེ་ཅིབ་ཡུལ་ལ་ཅི་ལྟར་རྒོལ་བར་འགྱུར་བའི་སྐོར་ལ་འདི་སྐད་དུ།  
\v 14 ཁྱོད་ཅག་གིས་ཨེ་ཅིབ་ཡུལ་དུ་ཁྱབ་བསྒྲགས་བྱོས་ལ་མིག་དོལ་དུ་ཀུན་ལ་སྒྲོགས་ཤིག ནོབ་དང་ཐ་ཕན་ཧེ་སི་རུ་གསལ་བསྒྲགས་གྱིས་ལ། དཔུང་བསྒྲིགས་ནས་དམག་རྒྱག་པར་གྲ་སྒྲིག་གྱིས་ཤིག ཅི་ལ་ཞེ་ན། རལ་གྲིས་ཁྱོད་ཀྱི་མཐའ་འཁོར་ནས་ཁྱུར་མིད་གཏོང་བའི་ཕྱིར་རོ་ཞེས་སྨྲོས་ཤིག  
\v 15 ཁྱོད་ཀྱི་དཔའ་བོ་རྣམས་སར་བཏུད་པ་ཅི་ཡིན་ནམ། དཀོན་མཆོག་ཡ་ཝཱེས་དེ་དག་བསྒྱེལ་བས་ཁོ་རྣམས་ཚུགས་མི་ནུས་སོ། །  
\v 16 ཁོང་གིས་མི་མང་པོ་འགྱེལ་དུ་བཅུག་པ་དང་། དེ་དག་ན་རེ། ལོངས་ཤིག གཉའ་གནོན་གཏོང་བའི་རལ་གྲི་ལས་ཐར་བའི་ཕྱིར་བདག་ཅག་རང་གི་མི་རྣམས་དང་རང་གི་སྐྱེས་ཡུལ་དུ་འགྲོ་བར་བྱའོ་ཟེར་ཞིང་།  
\v 17 ཁོ་ཚོས་གནས་དེ་རུ་ཨེ་ཅིབ་ཀྱི་རྒྱལ་པོ་ཕཱར་ཨོལ་ནི་སྐད་ཅོར་ཙམ་ཡིན་ཏེ་ཁོས་རང་གི་གོ་སྐབས་ཤོར་ཟིན་ཞེས་འུར་རྒྱག་པ་ཡིན་ཞེས་གསུངས་སོ། །  
\v 18 མཚན་ལ་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ཞེས་འབོད་པའི་རྒྱལ་པོས་འདི་སྐད་དུ། བདག་གིས་རང་གི་ཚེ་སྲོག་དཔང་དུ་བཙུགས་ནས་འདི་ལྟར་མནའ་བསྐྱལ་བ་ཡིན་ཏེ། དགྲ་འོང་བའི་དུས་སུ་རི་རྒྱུད་ནང་གི་ཐ་པོར་དང་། མཚོ་འགྲམ་གྱི་ཀར་མེལ་བཞིན་ཡིན་ནོ། །  
\v 19 ཀྱེ་ཨེ་ཅིབ་ཡུལ་དུ་སྡོད་པའི་མི་རྣམས། བཙོན་དུ་འཁྲིད་དུས་བཀོལ་བའི་དངོས་པོ་དག་གྲ་སྒྲིག་བྱོས་ཤིག ཅི་ལ་ཞེ་ན། ནོབ་ནི་ཞིག་རོར་ལུས་ནས་མེས་བསྲེག་པ་དང་སྡོད་མཁན་མེད་པར་འགྱུར་རོ། །  
\v 20 ཨེ་ཅིབ་ནི་ཤ་ཤེད་རྒྱས་པའི་བ་གཞོན་དང་འདྲ་ཡང་། བྱང་ཕྱོགས་ནས་ཕྱུགས་སྦྲང་འོང་གིན་འདུག  
\v 21 དེའི་གླས་དམག་རྣམས་ནི་ཕྱུགས་རའི་ནང་གི་བ་ཕྲུག་ཤ་ཤེད་ཅན་དང་མཚུངས་མོད། དེ་དག་ཀྱང་མཉམ་དུ་ཁ་ཕྱིར་འཁོར་ནས་འབྲོ་ཞིང་ཚུགས་མི་ཐུབ། ཅི་ལ་ཞེ་ན། དེ་དག་ལ་བར་ཆད་འབྱུང་བའི་ཉིན་མོ་དང་ཉེས་ཆད་གཅོད་པའི་དུས་ནི་སླེབས་ཟིན་པའི་ཕྱིར་རོ། །  
\v 22 དེས་འབྱིན་པའི་སྒྲ་ནི་སྦྲུལ་འགྲོ་བའི་སྒྲ་དང་མཚུངས་ལ། དགྲ་རྣམས་དཔུང་བསྒྲིགས་ཏེ་འོང་བ་དང་། ཤིང་གཅོད་མཁན་བཞིན་དུ་ལག་ལ་སྟ་རེ་ཐོགས་ནས་དེར་རྒོལ་བར་འགྱུར་རོ། །  
\v 23 དེའི་ནགས་ཚལ་སྟུག་ཅིང་རྒྱུ་དཀའ་ཡང་དགྲ་ཡིས་ཤིང་རྣམས་གཅོད་པར་འགྱུར་ཞེས་དཀོན་མཆོག་ཡ་ཝཱེས་གསུངས། ཅི་ལ་ཞེ་ན། དགྲ་ནི་ཆ་ག་འབུ་ལས་མང་ཞིང་བགྲང་གིས་མི་ལང་ངོ་། །  
\v 24 ཨེ་ཅིབ་ཀྱི་བུ་མོ་ངོ་ཚར་གཏོད་ཅིང་བྱང་ཕྱོགས་པའི་ལག་ཏུ་སྤྲོད་པར་འགྱུར་ཞེས་གསུངས་སོ། །  
\v 25 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ལྟོས་ཤིག ངས་ནོ་གྲོང་ཁྱེར་གྱི་ལྷ་ཨ་མོན་དང་ཕཱར་ཨོལ་དང་། ཨེ་ཅིབ་དང་དེའི་ལྷ་རྣམས་དང་། ད་དུང་རྒྱལ་པོ་རྣམས་དང་། ཕཱར་ཨོལ་དང་དེ་ལ་བརྟེན་མཁན་རྣམས་ལ་ཡང་ཉེས་ཆད་གཅོད་པར་འགྱུར།  
\v 26 ངས་དེ་ཚོ་ནི་དེ་དག་གི་སྲོག་སྙེག་མཁན་ཏེ་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་དང་དེའི་འཁོར་གཡོག་རྣམས་ཀྱི་ལག་ཏུ་གཏོད་པར་བྱའོ། །ཡིན་ཡང་ཕྱིས་སུ་ཨེ་ཅིབ་ཡུལ་དུ་སྔོན་ལྟར་མི་རྣམས་གནས་པར་འགྱུར་རོ་ཞེས་དཀོན་མཆོག་ཡ་ཝཱེས་གསུངས་སོ། །  
\v 27 ཀྱེ་ངའི་ཞབས་ཕྱི་ཡ་ཀོབ་ཁྱོད་རང་མ་འཇིགས་ཤིག ཀྱེ་ཡེས་ར་ཨེལ་ཁྱོད་མ་དངངས་ཤིག ཅི་ལ་ཞེ་ན། ངས་རྒྱང་རིང་ཡུལ་ནས་ཁྱོད་སྐྱོབ་ཅིང་། བཙོན་དུ་ཁྲིད་པའི་ཡུལ་ནས་ཁྱོད་ཀྱི་བུ་རྒྱུད་རྣམས་སྒྲོལ་བར་བྱའོ། །དེ་ནས་ཡ་ཀོབ་ཕྱིར་ལོག་ངེས་ཤིང་། སེམས་བདེ་ལ་བབས་ནས་བག་ཕབ་ངང་སྡོད་པར་འགྱུར་ལ། སུས་ཀྱང་དེ་སྐྲག་པར་མི་བྱའོ། །  
\v 28 ཀྱེ་ངའི་ཞབས་ཕྱི་ཡ་ཀོབ་ཁྱོད་རང་མ་འཇིགས་ཤིག ཅི་ལ་ཞེ་ན། ང་རང་ཁྱོད་དང་མཉམ་དུ་གནས་ཤིང་། ངས་ཁྱོད་ཅག་སྐྲོད་སའི་ཡུལ་གྱི་མི་རིགས་ཀུན་ཚར་བཅད་ནའང་ཁྱོད་རང་ཚར་གཅོད་པར་མི་བྱ། ངས་དྲང་གཞག་སྒོས་ཁྱོད་ལ་ཉེས་ཆད་གཅོད་པ་ལས། ཁྱོད་རྩ་བ་ནས་ཉེས་མེད་དུ་བརྩིས་པ་མིན་ཞེས་དཀོན་མཆོག་ཡ་ཝཱེས་གསུངས་སོ། །   
\c 47
\cl ལེའུ་ཞེ་བདུན་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཕེ་ལེ་ཤེད་སྐོར་གྱི་གཏམ།  
\p
\v 1 ཕཱར་ཨོལ་གྱིས་གཱ་ཟཱ་ལ་མ་རྒོལ་སྔོན་དུ། ཕེ་ལེ་ཤེད་པའི་སྐོར་ནས་ཡེ་རེམ་ཡཱ་ལ་དཀོན་མཆོག་ཡ་ཝཱེའི་བཀའ་བྱུང་བ་འདི་ལྟ་སྟེ།  
\v 2 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག བྱང་ཕྱོགས་ནས་ཆུ་རྣམས་རྒྱས་ཏེ་ཆུ་རྒྱུན་དྲག་པོར་འགྱུར་བ་དང་། ཡུལ་ཁམས་དང་དེའི་ནང་ཡོད་པ་ཐམས་ཅད་དང་། གྲོང་ཁྱེར་དང་དེའི་ནང་གནས་པ་ཀུན་བསྣུབ་པར་འགྱུར་ཞིང་། མི་རྣམས་ཀྱིས་སྐད་རྒྱག་པ་དང་། ཡུལ་ཁམས་སུ་གནས་པའི་མི་རྣམས་ཀྱིས་ངུ་འབོད་བྱེད་པར་འགྱུར་རོ། །  
\v 3 ཡང་དགྲ་རྣམས་ཀྱི་རྟ་མཆོག་གི་གོམ་སྒྲ་དང་། ཤིང་རྟ་རྒྱུག་པའི་སྒྲ་དང་། དེའི་འཁོར་ལོའི་སྒྲ་བྱུང་བ་ཙམ་གྱིས་ཕ་རྣམས་ཀྱི་ལག་རྩ་ལྷོད་ཅིང་། ཁ་ཕྱིར་འཁོར་ནས་རང་གི་བུ་ཕྲུག་ལ་ལྟ་སྐྱོང་མི་བྱེད་དོ། །  
\v 4 ཅི་ལ་ཞེ་ན། དུས་དེ་སླེབས་ལ་ཉེ་སྟེ། དཀོན་མཆོག་ཡ་ཝཱེས་ཕེ་ལེ་ཤེད་པ་ཐམས་ཅད་འཇོམས་པར་མཛད་ཅིང་། ཐཱར་དང་ཚི་ཏུན་ལ་རྒྱབ་རོགས་བྱས་ནས་ཤུལ་དུ་ལུས་པ་དག་མེད་པར་གཏོང་བ་དང་། ཁོང་གིས་ཕེ་ལེ་ཤེད་པ་རྣམས་ཏེ་ཀབ་ཐོར་གྱི་གླིང་ཕྲན་དུ་ལུས་པའི་མི་རྣམས་འཇོམས་པར་འགྱུར།  
\v 5 གཱ་ཟཱ་ནི་སྐྱ་ཐེར་ཐེར་དུ་གྱུར་པ་དང་ཨ་ཤཱ་ཀེ་ལོན་ནི་འཇམ་ཐིང་ངེར་ལུས། ཀྱེ་ཐང་དུ་ལུས་པ་ཁྱོད་རྣམས་ཀྱིས་དུས་ནམ་ཞིག་གི་བར་དུ་རང་གི་ཤ་གཅོད་པར་བྱའམ།  
\v 6 ཀྱེ་དཀོན་མཆོག་ཡ་ཝཱེའི་རལ་གྲི་ལགས། ཁྱེད་ཀྱིས་དུས་ནམ་ཞིག་ལ་མཚམས་འཇོག་གམ། ཤུབས་ནང་ཞུགས་ལ་བདེ་བར་བཞུགས་དང་།  
\v 7 དཀོན་མཆོག་ཡ་ཝཱེས་དེར་ཨ་ཤཱ་ཀེ་ལོན་དང་རྒྱ་མཚོའི་འགྲམ་རྒྱུད་ལ་རྒོལ་བའི་བཀའ་བཀོད་ཅིང་། ཁོང་གིས་ཁྱེད་མངགས་པ་ཡིན་ན། ཁྱེད་ནི་ཅི་ལྟར་ཁུ་སིམ་པོར་གནས་སམ་ཞེས་གསུངས་སོ། །   
\c 48
\cl ལེའུ་ཞེ་བརྒྱད་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 མོ་ཨབ་སྐོར་གྱི་གཏམ།  
\p
\v 1 མོ་ཨབ་ཀྱི་སྐོར་ལ་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ནེ་བོ་ནི་སྟོང་བར་འགྱུར་བས་ཆག་སྒོ་འབྱུང་། ཀིར་ཡ་ཐཱ་ཡེམ་ནི་ངོ་ཚར་སྦྱར་ཏེ་བཙན་འཛིན་བྱེད་པར་འགྱུར་ལ། མཱེ་སི་ཀ་ནི་ངོ་ཚར་སྦྱར་ནས་མེད་པར་བཟོའོ། །  
\v 2 མོ་ཨབ་ལ་སླར་ཡང་བསྟོད་བསྔགས་མི་འབྱུང་སྟེ། ཧེ་སི་པོན་དུ་མི་ཡིས་གྲོས་ངན་བཏབ་ནས་དེ་ལ་གནོད་བསྐྱལ་ཞིང་ན་རེ། ཚུར་ཤོག་དང་ཡུལ་ཁམས་ཤིག་ཏུ་མི་ལུས་པའི་ཕྱིར་རང་ཅག་གིས་དེ་མེད་པར་བྱའོ་ཟེར་ཞིང་། ཀྱེ་མད་མེན་ན་ཁྱོད་ཀྱང་ཁུ་སིམ་པོར་བསྡད་དེ་རལ་གྲིས་ཁྱོད་འདེད་པར་འགྱུར།  
\v 3 ཧོ་རོ་ན་ཨིམ་ལས་སྟོངས་ཤིང་གཏོར་བརླག་ཐེབས་པའི་ངུ་སྐད་བྱུང་བ་དང་།  
\v 4 མོ་ཨབ་མེད་པར་བཟོས་ནས། དེའི་བྱིས་པ་རྣམས་ཀྱི་ངུ་སྐད་ནི་མི་ཡིས་ཐོས་སོ། །  
\v 5 མི་རྣམས་ལུ་ཧིད་ཀྱི་ལ་ངོས་སུ་ངུ་བཞིན་ཡར་འགྲོ་བ་སྟེ། ཅི་ལ་ཞེ་ན། ཧོ་རོ་ན་ཨིམ་གྱི་ལ་ཐུར་དུ་གཏོར་བརླག་ཐེབས་པའི་ངུ་སྐད་ཐོས་པས་སོ། །  
\v 6 ཁྱོད་རྣམས་སྲོག་ཐར་བར་ཕྲོས་ཤིག དབེན་སྟོང་གི་ཨ་རོ་ཨེར་ལྟར་གཅིག་པུར་ལུས་སོ། །  
\v 7 ཁྱོད་ནི་རང་གིས་ཅི་བྱས་པ་དང་རྒྱུ་ནོར་ལ་བརྟེན་པའི་དབང་གིས་གཞན་གྱིས་ལེན་པར་འགྱུར་ཏེ། ཀེ་མོ་སི་ \f + \ft ཀེ་མོ་སི་ཞེས་པ་ནི་མོ་ཨབ་ཀྱི་ལྷ་ཞིག་གི་མིང་ཡིན།\f*དང་དེའི་མཆོད་དཔོན་དང་འགོ་དཔོན་རྣམས་ཀྱང་བཙོན་དུ་འཁྲིད་པར་འགྱུར།  
\v 8 ཡང་དཀོན་མཆོག་ཡ་ཝཱེས་ཅི་གསུངས་བཞིན་དུ། གཏོར་བརླག་གཏོང་མཁན་དེ་གྲོང་ཁྱེར་རེ་རེར་འོང་ཞིང་། གྲོང་ཁྱེར་གང་ཡང་ཐར་ས་མེད་པར་ལུང་པ་རྣམས་ཉམས་ཤིང་ཐང་ཆེན་རྣམས་བརླག་པར་འགྱུར་རོ། །  
\v 9 མོ་ཨབ་འཕུར་ནས་འགྲོ་བའི་ཕྱིར་དུ། ཁྱོད་ཅག་གིས་མོ་ལ་གཤོག་པ་སྤྲོད་ཅིག དེའི་གྲོང་ཁྱེར་རྣམས་སྟོང་བར་འགྱུར་ལ་མི་གཅིག་ཀྱང་སྡོད་པར་མི་འགྱུར།  
\v 10 སྒྱིད་ལུག་གི་དབང་དུ་སོང་ནས་དཀོན་མཆོག་ཡ་ཝཱེའི་དོན་མི་བྱེད་པ་རྣམས་ལ་དམོད་མོ་ཐེབས་པ་དང་། རལ་གྲི་ལ་ཁྲག་འགོ་བར་མི་བྱེད་པ་དེ་ལའང་དམོད་མོ་ཐེབས་པར་འགྱུར།   
\s1 མོ་ཨབ་ཀྱི་གྲོང་ཁྱེར་གཏོར་བར་མཛད་པ།  
\p
\v 11 མོ་ཨབ་ནི་ལོ་ན་གཞོན་དུས་ནས་སྐྱིད་པོར་བསྡད་དེ་བཙོན་དུའང་མ་ཕྱིན་ལ། སྙིགས་རོ་མ་དཀྲུག་པའི་རྒུན་ཆང་དྭངས་མོ་དང་འདྲ་ཞིང་། སྣོད་གཅིག་ལས་སྣོད་གཞན་དུ་བླུགས་མ་མྱོང་ལ་དེའི་བྲོ་བ་ལུས་ཤིང་དྲི་ཞིམ་ཡལ་མེད་དོ་ཞེས་གསུངས་སོ། །  
\v 12 ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། ངས་དེའི་རྩར་ཆང་ལྡུག་མཁན་མངགས་ནས་དེ་བླུག་པར་འགྱུར་ལ། དེ་དག་གིས་སྣོད་རྣམས་སྟོང་བར་བྱས་ཏེ་རྫ་མ་རྣམས་གཅོག་པར་བྱའོ། །  
\v 13 སྔར་ཡེས་ར་ཨེལ་གྱི་ཁྱིམ་རྒྱུད་པེད་ཨེལ་ལ་བརྟེན་ཞིང་ངོ་ཚ་བར་གྱུར་པ་བཞིན་དུ། མོ་ཨབ་ཀྱང་ཀེ་མོ་སིའི་རྐྱེན་གྱིས་ངོ་ཚ་བར་འགྱུར།  
\v 14 ཁྱོད་རྣམས་ཀྱིས་ངེད་ཅག་ནི་དཔའ་བོ་སྟེ། དམག་འཐབ་ལ་བྱང་བའི་དཔའ་བོ་ཡིན་ཟེར་བ་ཅི་ཡིན་ནམ།  
\v 15 མོ་ཨབ་ནི་དབེན་སྟོང་དུ་གྱུར་ཏེ། དགྲ་རྣམས་ཡར་སོང་ནས་དེའི་གྲོང་ཁྱེར་རྣམས་བཟུང་བ་དང་། དེའི་དར་མའི་མཆོག་རྣམས་མར་སོང་ནས་གསོད་པར་འགྱུར་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་མཚན་མངའ་བའི་རྒྱལ་པོས་གསུངས་སོ། །  
\v 16 མོ་ཨབ་ཀྱི་ཆག་སྒོ་འབྱུང་ལ་ཉེ་སྟེ། དེའི་སྡུག་བསྔལ་ནི་མྱུར་བ་མྱུར་དུ་སླེབ་འོང་ངོ་། །  
\v 17 དེའི་མཐའ་འཁོར་དུ་གནས་པ་དང་དེའི་མིང་ལ་གསལ་ཆ་ཡོད་པ་རྣམས་ཀྱིས་དེའི་ཕྱིར་དུ་མྱ་ངན་བྱས་ནས། སྲ་བའི་དབྱུག་པ་དང་མཛེས་པའི་འཁར་བ་དེ་ཆག་བྱུང་ཞེས་སྨྲ་བར་འགྱུར།  
\v 18 ཀྱེ་དི་བོན་གྱི་བུ་མོ་ལགས། ཁྱོད་ནི་རང་གི་གཟི་བརྗིད་ཀྱི་བཞུགས་ཁྲི་ལས་མར་བོབས་ཤིག ཁ་སྐམ་ནས་སྡོད་ཅིག ཅི་ལ་ཞེ་ན། མོ་ཨབ་རྩ་མེད་དུ་གཏོང་མཁན་དེ་ཡར་འོངས་ནས་ཁྱོད་ལ་རྒོལ་ཞིང་ཁྱོད་ཀྱི་མཁར་བརྟན་པོ་རྣམས་གཏོར་བར་བྱེད།  
\v 19 ཀྱེ་ཨ་རོ་ཨེར་དུ་གནས་པ་རྣམས། ལམ་ཁར་ལངས་ནས་ལྟོས་ཤིག འབྲོ་བའི་སྐྱེས་པ་དང་ཐར་བའི་བུད་མེད་རྣམས་ལ་ཅི་ཞིག་བྱུང་ངམ་ཞེས་དྲིས་ཤིག  
\v 20 མོ་ཨབ་ལ་གཏོར་བརླག་ཐེབས་པས་ངོ་ཚར་སྦྱར་བ་དང་། ཁྱོད་ཅག་གིས་ངུ་སྐད་བཏོན་ལ་འུར་རྒྱོབ་ཅིག ཨར་ནོན་ཆུ་བོའི་འགྲམ་དུ་མོ་ཨབ་བརླགས་ཚར་ཞེས་སྒྲོགས་ཤིག  
\v 21 ཐང་ཆེན་གྱི་ཧོ་ལོན་དང་། ཡ་ཙཱ། མེ་ཕཱ་ཨད།  
\v 22 དི་བོན། ནེ་བོ། པེད་དིབ་ལ་ཐ་ཡིམ།  
\v 23 ཀིར་ཡ་ཐཱ་ཡེམ། པེད་ག་མུལ། པེད་མེ་ཨོན།  
\v 24 ཀེ་རི་ཨོད། པོ་ཚ་རཱ། མོ་ཨབ་ཡུལ་ཁམས་ཀྱི་ཐག་ཉེ་རིང་གི་གྲོང་ཁྱེར་ཀུན་དང་བཅས་པ་ལ་ཉེས་ཆད་ཐེབས་པར་འགྱུར་ཏེ།  
\v 25 མོ་ཨབ་ཀྱི་རྭ་ཅོ་བཅད་ནས་དཔུང་པ་བཅག་ཟིན་ཞེས་དཀོན་མཆོག་ཡ་ཝཱེས་གསུངས་སོ། །  
\v 26 མོ་ཨབ་ཀྱིས་དཀོན་མཆོག་ཡ་ཝཱེའི་ཞལ་ངོར་རང་མཐོང་ཆེན་པོ་བྱས་པས། ཁྱོད་ཅག་གིས་མོ་ཨབ་བཟི་རུ་ཆུག་ཅིག མོ་ཨབ་ནི་རང་གི་སྐྱུག་རོའི་ནང་དུ་འགྲེ་ལྡོག་བརྒྱབ་ཅིང་། མི་ཡིས་དེ་ལ་འཕྱ་དགོད་བྱེད་པར་འགྱུར་རོ། །  
\v 27 ཡེས་ར་ཨེལ་ནི་ཁྱོད་ཀྱི་དགོད་གཞི་མ་ཡིན་ནམ། ཁྱོད་ཀྱིས་དེའི་མིང་གླེང་བ་ཙམ་གྱིས་མགོ་བོ་གཡུག་པ་ནི་དེ་ཇག་རྐུན་གྱི་གྲས་ནས་བཟུང་བ་ཡིན་ནམ་ཅི།  
\v 28 ཀྱེ་མོ་ཨབ་ཀྱི་ཡུལ་མི་རྣམས། ཕུག་རོན་གྱིས་བྲག་ཁར་ཚང་བཅའ་བ་བཞིན་དུ། གྲོང་ཁྱེར་རྣམས་དང་བྲལ་ནས་བྲག་གཡང་དུ་སྡོད་ཅིག  
\v 29 ངེད་ཅག་གིས་མོ་ཨབ་པའི་ང་རྒྱལ་ཐོས་མྱོང་སྟེ། ང་རྒྱལ་ཤིན་ཏུ་ཆེ་ཞིང་། དེ་དག་ནི་རང་སྣང་མཐོ་ཞིང་རང་རློམ་ཆེ་བ་དང་། ཁེངས་དྲེགས་ཆེ་ལ་སེམས་སུ་རང་མཐོང་ཆེན་པོ་ཡིན།  
\v 30 དེའི་ཁྲོ་གཏུམ་ནི་སྟོང་བ་ཡིན་པ་ངས་རྟོགས་ཤིང་། དེའི་འུར་སྒྲོག་གི་གཏམ་ནི་གཅིག་ཀྱང་འགྲུབ་པར་མི་འགྱུར་ཞེས་དཀོན་མཆོག་ཡ་ཝཱེས་འདི་སྐད་གསུངས།  
\v 31 དེ་བས་ངས་མོ་ཨབ་ཀྱི་དོན་དུ་འོ་དོད་འབོད་ཅིང་། མོ་ཨབ་ཁྱོན་ཡོངས་ཀྱི་དོན་དུ་ངུ་འབོད་བྱེད་པ་དང་། ཀིར་ཧེ་རེ་སིའི་ཆེད་དུ་མི་རྣམས་ཀྱིས་འཁུན་སྒྲ་འབྱིན་ནོ། །  
\v 32 ཀྱེ་སིབ་མའི་རྒུན་ཤིང་། ང་རང་ཁྱོད་ཀྱི་དོན་དུ་ངུ་ཞིང་དེ་ནི་ཡཱ་ཟེར་གྱི་ངུ་འབོད་ལས་ཀྱང་ལྷག་པ་ཡིན། ཁྱོད་ཀྱི་ཡལ་ག་རྣམས་རྒྱ་མཚོའི་ཕ་རོལ་ཏུ་རྒྱས་ཏེ་ཡཱ་ཟེར་གྱི་རྒྱ་མཚོའི་བར་དུ་རྒྱས་མོད་ཀྱང་། འཇོམས་པར་བྱེད་མཁན་དེ་ཁྱོད་ཀྱི་དབྱར་ཐོག་གི་འབྲས་བུ་དང་རྒུན་འབྲུམ་སྟེང་དུ་སླེབས་ཟིན།  
\v 33 ས་ཞིང་གཤིན་པོ་དང་མོ་ཨབ་ཡུལ་གྱི་དགའ་མགུ་དང་བདེ་སྐྱིད་ནི་ཕྲོགས་པ་དང་། ངས་རྒུན་འབྲུམ་འཚིར་གཞོང་ལས་རྒུན་ཆང་བཞུར་མཚམས་བཅད་པ་སྟེ། སུས་ཀྱང་དགའ་མགུ་ཡི་རང་གིས་རྒུན་ཆང་བརྫི་བར་མི་བྱེད་ལ། སྐད་རྒྱག་པའི་སྒྲ་ཡོད་ཀྱང་དེ་ནི་དགའ་མགུ་རངས་པའི་སྒྲ་མ་ཡིན་ནོ། །  
\v 34 ངུ་འབོད་ཅིག་ཧེ་སི་པོན་ནས་ཨེལ་ཨ་ལེ་དང་དེ་ནས་ཡ་ཧ་ཙཱའི་བར་དུ་སླེབས་པ་དང་། ཚོ་ཨར་ནས་ཧོ་རོ་ན་ཨིམ་དང་དེ་ནས་ཨེག་ལད་ཤེ་ལི་ཤི་ཡཱའི་བར་དུ་སླེབས་པ་སྟེ། ཅི་ལ་ཞེ་ན། ནིམ་རིམ་གྱི་ཆུ་རྣམས་ཀྱང་སྐམ་པའི་ཕྱིར་རོ། །  
\v 35 ངས་མོ་ཨབ་ཀྱི་མཐོ་གླིང་རྣམས་སུ་མཆོད་པ་འབུལ་མཁན་དང་། རང་གི་ལྷ་རྣམས་ལ་སྤོས་གདུག་མཁན་རྣམས་ཚར་གཅོད་བྱེད་ངེས་ཡིན་ཞེས་དཀོན་མཆོག་ཡ་ཝཱེས་གསུངས་སོ། །  
\v 36 དེ་བས་ན་ང་ཡི་སེམས་ཀྱིས་མོ་ཨབ་ཀྱི་ཕྱིར་དུ་གླིང་བུ་དང་འདྲ་བར་སྨྲེ་སྔགས་འདོན་པ་དང་། ངའི་སེམས་ནི་ཀིར་ཧེ་རེ་སི་པའི་དོན་དུ་ངུ་བ་ཡིན་ཏེ། མོ་ཨབ་པའི་རྒྱུ་ནོར་ལོངས་སྤྱོད་ཡོད་ཚད་ཟད་ཚར་བས་སོ། །  
\v 37 མི་རེ་རེའི་མགོ་ནི་སྤྱི་ཐེར་ཏུ་གྱུར་ཏེ་སྨ་ར་བཞར་བ་དང་། ལག་པ་གཤགས་ནས་རྐེད་པར་རྩིད་རས་གཡོགས་འདུག  
\v 38 མོ་ཨབ་ཀྱི་ཁང་ཐོག་རེ་རེ་དང་ཐང་ཆེན་དུ་མྱ་ངན་བྱེད་མཁན་གྱིས་བཀང་བ་སྟེ། ཅི་ལ་ཞེ་ན། མི་ཡིས་གཅེས་སུ་མི་འཛིན་པའི་ཡོ་བྱད་གཅོག་པ་བཞིན་དུ་ངས་མོ་ཨབ་རྡུལ་དུ་བརླགས་པའི་ཕྱིར་རོ་ཞེས་དཀོན་མཆོག་ཡ་ཝཱེས་གསུངས་སོ། །  
\v 39 མོ་ཨབ་ལ་ཐེབས་པའི་གཏོར་བརླག་ནི་ཅི་འདྲའི་ཚབས་ཆེའང་། དེ་དག་གི་ངུ་འབོད་ནི་ཅི་འདྲའི་སྐྱོ་བ་ལ། མོ་ཨབ་སྐྱེངས་ནས་ཁ་ཕར་འཁོར་ཞིང་དེ་ནི་ཉེ་འཁོར་གྱི་མི་ཐམས་ཅད་ཀྱིས་འཕྱ་དམོད་བྱེད་ས་དང་འཇིགས་པའི་རྒྱུ་རུ་གྱུར་པའོ། །   
\s1 མོ་ཨབ་ལ་འབྲོ་ས་མེད་པ།  
\p
\v 40 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག དགྲ་བོ་ནི་བྱ་རྒོད་ལྟར་འཕུར་ཞིང་། གཤོག་ཟུང་བརྐྱངས་ནས་མོ་ཨབ་ལ་རྒོལ་བ་དང་།  
\v 41 ཀེ་རི་ཨོད་ལ་རྒོལ་ནས་ལེན་པར་འགྱུར་ལ། མཁར་བརྟན་པོ་རྣམས་ཀྱང་བཙན་གྱིས་འཛིན་པ་དང་། ཉིན་མོ་དེར་མོ་ཨབ་ཀྱི་དཔའ་བོའི་སེམས་སུ་དངངས་སྐྲག་སྐྱེས་ནས་སྐྱེ་གཟེར་རྒྱག་པའི་བུད་མེད་དང་འདྲའོ། །  
\v 42 ཡང་མོ་ཨབ་ནི་མེད་པར་བཟོ་ཞིང་མི་རིགས་ཤིག་ཏུ་མི་འགྱུར་ཏེ། ཅི་ལ་ཞེ་ན། དེས་དཀོན་མཆོག་ཡ་ཝཱེའི་ཞལ་ངོར་རང་མཐོང་ཆེན་པོ་བྱས་པའི་ཕྱིར་རོ། །  
\v 43 ཀྱེ་མོ་ཨབ་ཀྱི་མི་རྣམས། འཇིགས་སྐྲག་དང་ས་དོང་། རྙི་རྒྱ་བཅས་ནི་ཁྱོད་དང་ཉེའོ་ཞེས་དཀོན་མཆོག་ཡ་ཝཱེས་གསུངས།  
\v 44 འཇིགས་པ་ལས་ཐར་བ་དེ་ས་དོང་ནང་དུ་ལྷུང་བ་དང་། ཡང་ས་དོང་ལས་ཡར་འཛེག་པ་དེ་རྙི་རྒྱས་འཛིན་པར་འགྱུར། ཅི་ལ་ཞེ་ན། བདག་གིས་ཉེས་ཆད་གཅོད་པའི་དུས་ནི་མོ་ཨབ་ཀྱི་སྟེང་དུ་འབེབ་པར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །  
\v 45 འབྲོ་མཁན་རྣམས་ནི་ཧེ་སི་པོན་གྱི་གྲིབ་བསིལ་འོག་ཏུ་སྟོབས་ཉམས་ཤིང་ལངས་སྡོད་པ་སྟེ། ཅི་ལ་ཞེ་ན། ཧེ་སི་པོན་ལས་མེ་ཞིག་དང་སི་ཧོན་གྱི་གྲོང་ཁྱེར་ནས་མེ་ལྕེ་ཞིག་ཐོན་ཞིང་། མོ་ཨབ་ཀྱི་དཔྲལ་བ་དང་འུར་སྒྲོག་མཁན་རྣམས་ཀྱི་སྤྱི་བོ་བསྲེགས་པ་ཡིན་ནོ། །  
\v 46 ཀྱེ་མོ་ཨབ་ཁྱོད་ལ་ཆག་སྒོ་འབྱུང་ལ། ཀེ་མོ་སི་ལ་གཏོགས་པའི་མི་རྣམས་འཆི་བའོ། །ཅི་ལ་ཞེ་ན། ཁྱོད་ཀྱི་བུ་རྣམས་བཙོན་དུ་ཁྲིད་ཅིང་། ཁྱོད་ཀྱི་བུ་མོ་རྣམས་ཀྱང་བཙོན་དུ་ཁྲིད་དོ། །  
\v 47 ཡིན་ཡང་མཐའ་མའི་ཉིན་མོ་དག་ལ་ངས་མོ་ཨབ་ལས་བཙོན་དུ་ཁྲིད་པ་རྣམས་ཕྱིར་ལོག་པར་བྱའོ་ཞེས་དཀོན་མཆོག་ཡ་ཝཱེས་གསུངས་པ་དང་། མོ་ཨབ་ལ་ཉེས་ཆད་གཅོད་པའི་གཏམ་ནི་འདི་རུ་མཚམས་བཞག་པའོ། །   
\c 49
\cl ལེའུ་ཞེ་དགུ་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཨམ་མོན་སྐོར་གྱི་གཏམ།  
\p
\v 1 ཨམ་མོན་པའི་སྐོར་ལ་དཀོན་མཆོག་ཡ་ཝཱེས་འདི་སྐད་དུ། ཡེས་ར་ཨེལ་ལ་བུ་མེད་དམ། དེ་ལ་བུ་རབས་ཚ་རྒྱུད་མེད་དམ། མིལ་ཀོམ་ \f + \ft མིལ་ཀོམ་ཞེས་པ་ནི་ཨམ་མོན་གྱི་ལྷ་ཞིག་གི་མིང་ལ་འཇུག\f*གྱིས་གཱ་རྡུ་ས་སྐལ་དུ་བླངས་པ་ཅི་ཡིན་ནམ། ཁོའི་མི་རྣམས་དེའི་གྲོང་ཁྱེར་ནང་དུ་སྡོད་པ་ཅི་ཡིན་ནམ།  
\v 2 ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། ངས་མི་ལ་དམག་འཐབ་པའི་སྐད་སྒྲ་ཐོས་སུ་འཇུག་སྟེ། དེ་ནི་ཨམ་མོན་པའི་རབ་བཱ་ལ་རྒོལ་བའི་སྐད་སྒྲ་ཡིན་ལ། རབ་བཱ་ནི་དབེན་སྟོང་དུ་འགྱུར་ཞིང་། དེ་ལ་གཏོགས་པའི་གྲོང་ཁྱེར་དག་ནི་མེས་བསྲེག་པར་འགྱུར། དེ་སྔར་ཡེས་ར་ཨེལ་ནོར་སྐལ་དུ་འཛིན་མཁན་རྣམས་ནི་ད་ལྟ་ཡེས་ར་ཨེལ་གྱིས་ནོར་སྐལ་དུ་འཛིན་པར་འགྱུར་ཞེས་དཀོན་མཆོག་ཡ་ཝཱེས་གསུངས།  
\v 3 ཀྱེ་ཧེ་སི་པོན་ཁྱོད་ཀྱིས་འོ་དོད་བོས་ཤིག ཅི་ལ་ཞེ་ན། ཨེ་ཡུ་ནི་དབེན་སྟོང་དུ་གྱུར་པའོ། །ཀྱེ་རབ་བཱ་གྲོང་ཁྱེར་གྱི་བུ་མོ་རྣམས་ཀྱིས་སྐད་བརྒྱབ་ནས་རྐེད་པར་རྩིད་རས་གཡོགས་ཤིག སྨྲེ་སྔགས་འདོན་བཞིན་མཁར་གྱི་ནང་དུ་ཡར་རྒྱུག་མར་རྒྱུག་གྱིས་ཤིག ཅི་ལ་ཞེ་ན། མིལ་ཀོམ་དང་དེའི་མཆོད་དཔོན་དང་འགོ་དཔོན་རྣམས་མཉམ་དུ་བཙོན་དུ་འཁྲིད་འགྲོ་བའི་ཕྱིར་རོ། །  
\v 4 ཀྱེ་བཀའ་དང་འགལ་བའི་མི་སྡེ་རྣམས། ཁྱོད་ཀྱིས་ཅིའི་ཕྱིར་ལུང་པ་ཡོད་པ་དང་། ཆུ་རྒྱུན་ཡོད་པའི་ལུང་པའི་ཕྱིར་དུ་ཁ་ཕོ་གཏོང་བ་ཡིན་ནམ། རང་གི་རྒྱུ་ནོར་ལ་བརྟེན་ནས་སུ་ཞིག་ངེད་ཀྱི་གནས་འདིར་སླེབས་ནུས་ཟེར་བ་ཅི་ཡིན་ནམ།  
\v 5 དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་མཐའ་འཁོར་གྱི་ཡུལ་ཁམས་རྣམས་ལས་ཁྱོད་ཀྱི་སྟེང་དུ་འཇིགས་སྐུལ་འདྲེན་ཞིང་། ཁྱོད་ཅག་སྐྲོད་པར་འགྱུར་ལ། མི་རེ་རེ་མདུན་དུ་བསྐྱོད་ཀྱང་བྲོས་བྱོལ་བ་རྣམས་སུས་ཀྱང་མི་བསྡུའོ། །  
\v 6 ཡིན་ཡང་རྗེས་སུ་ངས་བཙོན་དུ་ཁྲིད་པའི་ཨམ་མོན་པ་རྣམས་ཕྱིར་ལོག་པར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །   
\s1 ཨེ་དོམ་སྐོར་གྱི་གཏམ།  
\p
\v 7 ཨེ་དོམ་གྱི་སྐོར་ལ་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཐེ་མཱན་གྱི་ནང་དུ་ཤེས་རབ་མི་ལྡན་ནམ། མཁས་པའི་ཐབས་ཇུས་དག་བཀོལ་ཚར་རམ། དེ་དག་གི་ཤེས་རབ་ཟད་སོང་བ་ཡིན་ནམ།  
\v 8 ཀྱེ་དེ་དན་གྱི་མི་རྣམས། ཁ་ཕྱིར་འཁོར་ནས་བྲོས་ཏེ་ཕུག་ཏུ་སྡོད་ཅིག ཅི་ལ་ཞེ་ན། ངས་ཨེ་སཱབ་ལ་ཉེས་ཆད་གཅོད་དུས་སུ་ཆག་སྒོ་དེའི་སྟེང་དུ་འབེབ་པར་བྱའོ། །  
\v 9 ཇི་སྟེ་རྒུན་འབྲུམ་འཐོག་མཁན་ཁྱོད་ཀྱི་རྩར་འོངས་ན་དེ་རྣམས་ཀྱིས་རྒུན་འབྲུམ་ཁ་ཤས་བསྐྱུར་བ་མ་ཡིན་ནམ། ཡང་གལ་ཏེ་མཚན་མོར་རྐུན་མ་འོངས་ན། དེ་དག་གིས་ཅི་འདོད་པ་འབའ་ཞིག་རྐུ་བ་མ་ཡིན་ནམ།  
\v 10 འོན་ཀྱང་ངས་ཨེ་སཱབ་གཅེར་བུར་འདོན་ཞིང་དེའི་གསང་བའི་གནས་ནི་མངོན་པར་བྱེད་དེ། དེས་རང་ཉིད་སྦ་བར་མི་ནུས་ལ། དེའི་བུ་རབས་ཚ་རྒྱུད་དང་སྤུན་མཆེད། ཁྱིམ་མཚེས་དང་བཅས་མེད་པར་གྱུར་ནས། དེ་ཡང་ལུས་པར་མི་འགྱུར་རོ། །  
\v 11 ཁྱོད་ཀྱིས་དྭ་ཕྲུག་རྣམས་བསྐྱུར་ཡང་ངས་དེ་དག་གི་ཚེ་སྲོག་བསྲུང་ཞིང་། ཁྱོད་ཀྱི་ཡུགས་མོས་ཀྱང་ང་ལ་བློ་གཏོད་རུང་བ་ཡིན་ཞེས་གསུངས་སོ། །  
\v 12 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ཕོར་པ་དེ་ལས་འཐུང་མི་རུང་བ་དག་གིས་ཅི་ནས་ཀྱང་འཐུང་དགོས་ན། ཁྱོད་ནི་ཉེས་ཆད་ལས་ཐར་བར་འགྱུར་རམ་ཞེ་ན་ཐར་བར་མི་འགྱུར་ལ་ངེས་པར་འཐུང་དགོས་ཞེས་གསུངས།  
\v 13 ངས་རང་ཉིད་དཔང་དུ་བཙུགས་ནས་མནའ་སྐྱེལ་ཏེ། པོ་ཚ་རཱ་ལ་འཇིགས་སྣང་དང་ངོ་ཚ། དམོད་མོ་བཅས་ཐེབས་ཤིང་རྩ་བ་ནས་སྟོང་བར་འགྱུར་ལ། དེའི་གྲོང་ཁྱེར་ཐམས་ཅད་དུས་གཏན་དུ་ཞིག་རོར་ལུས་པར་འགྱུར་ཞེས་དཀོན་མཆོག་ཡ་ཝཱེས་གསུངས་སོ། །  
\v 14 ངས་དཀོན་མཆོག་ཡ་ཝཱེ་ལས་གསུང་འཕྲིན་ཞིག་ཐོས་ཏེ། ཕོ་ཉ་ཞིག་མི་རིགས་དེ་དག་གི་ཁྲོད་དུ་མངགས་ཤིང་དེ་དག་ལ་ན་རེ། ཁྱོད་ཅག་འདུས་ནས་ཨེ་དོམ་ལ་རྒོལ་བར་སོང་ཞིག འཐབ་མོར་ལོངས་ཤིག་ཅེས་སྦྲན་ནོ། །  
\v 15 ལྟོས་ཤིག བདག་གིས་མི་རིགས་རྣམས་ཀྱི་ཁྲོད་ནས་ཁྱོད་ནི་ཆུང་བར་བྱ་ཞིང་། མི་རྣམས་ཀྱི་ཁྲོད་ནས་ཁྱོད་ལ་མཐོང་ཆུང་བྱེད་པར་འགྱུར།  
\v 16 ཀྱེ་བྲག་སྲུབ་ཏུ་གནས་ཤིང་རི་མགོ་འཛིན་པ་ཁྱོད་ཀྱིས་རང་གི་རྔམ་བརྗིད་དང་སེམས་ཀྱི་ང་རྒྱལ་གྱི་ཕྱིར་རང་མགོ་རང་གིས་གཡོགས་པ་དང་། ཁྱོད་ཀྱིས་བྱ་རྒོད་བཞིན་དུ་མཐོ་སར་ཚང་བཅས་ཀྱང་། ངས་ཁྱོད་དེ་ནས་མར་འབེབ་པར་འགྱུར་ཞེས་དཀོན་མཆོག་ཡ་ཝཱེས་གསུངས།  
\v 17 ཡང་ཨེ་དོམ་ནི་འཇིགས་པའི་གནས་སུ་གྱུར་ཏེ། ཡུལ་དེ་བརྒྱུད་ནས་འགྲོ་མཁན་རྣམས་དེའི་ཆག་སྒོའི་ཕྱིར་དུ་སྐྲག་ཅིང་འཕྱ་དགོད་བྱེད་པར་འགྱུར།  
\v 18 དཀོན་མཆོག་ཡ་ཝཱེས་འདི་སྐད་དུ། དེ་ནི་སཱ་དོམ་དང་གཱ་མོ་ར་དང་། དེའི་ཉེ་འདབས་ཀྱི་གྲོང་ཁྱེར་རྣམས་དང་འདྲ་བར་ཕམ་པར་བཟོ་ཞིང་། སུ་ཡང་དེ་རུ་མི་གནས་ཤིང་། སུ་ཡང་དེར་བྱེས་སུ་སྡོད་པར་མི་འགྱུར་ཞེས་གསུངས།  
\v 19 ལྟོས་ཤིག སེང་གེ་ཇི་ལྟར་ཡོར་དན་གཙང་པོ་འགྲམ་གྱི་ནགས་ཚལ་ནས་ཐོན་ཏེ་གནས་ཡུལ་བརྟན་པོར་རྒོལ་བ་བཞིན། ངས་ཨེ་དོམ་པ་ནི་སྐད་ཅིག་ཙམ་ལ་གནས་འདི་ལས་སྐྲོད་པར་བྱའོ། །ངས་སུ་ཞིག་བདམས་པ་ཡིན་ན་དེ་མངགས་ནས་ཡུལ་ཁམས་འདི་སྐྱོང་བར་བྱ་སྟེ། ང་དང་འདྲ་བ་སུ་ཡོད་དམ། སུ་ཞིག་གིས་ང་ཁྲིམས་སར་བོས་ནས་འདྲི་གཅོད་བྱེད་ནུས་སམ། ངའི་མདུན་དུ་འགྲེང་ནུས་པའི་རྫི་བོ་སུ་ཡོད་དམ་ཞེས་གསུངས་སོ། །  
\v 20 དེའི་ཕྱིར། དཀོན་མཆོག་ཡ་ཝཱེའི་ཨེ་དོམ་ལ་རྒོལ་བའི་ཐབས་ཇུས་དང་། ཐེ་མཱན་གྱི་ཡུལ་མི་རྣམས་ལ་རྒོལ་བའི་ཐུགས་དགོངས་ལ་ཁྱོད་རྣམས་ཀྱིས་ཉོན་དང་། དགྲ་བོས་དེ་དག་གི་ལུག་ཁྱུ་ནང་གི་ཉམས་ཆུང་དག་འདྲུད་པར་འགྱུར་ཞིང་། དེ་དག་གི་རྩྭ་ས་ཡང་དབེན་སྟོང་དུ་འགྱུར་རོ། །  
\v 21 དེ་དག་འགྱེལ་བའི་སྒྲ་ཡིས་ས་གཞི་འདར་ཞིང་། འོ་དོད་འདོན་པའི་སྒྲ་ནི་རྒྱ་མཚོ་དམར་པོ་ནས་ཀྱང་ཐོས་པར་འགྱུར་རོ། །  
\v 22 ལྟོས་ཤིག དགྲ་བོ་ནི་བྱ་རྒོད་ལྟར་འཕུར་བ་དང་། གཤོག་ཟུང་བརྐྱངས་ནས་པོ་ཚ་རཱ་ལ་རྒོལ་ཞིང་། ཉིན་མོ་དེར་ཨེ་དོམ་གྱི་དཔའ་བོའི་སེམས་སུ་དངངས་སྐྲག་སྐྱེས་ནས་སྐྱེ་གཟེར་རྒྱག་པའི་བུད་མེད་དང་འདྲའོ། །   
\s1 དཱ་མེ་སེག་སྐོར་གྱི་གཏམ།  
\p
\v 23 དཱ་མེ་སེག་གི་སྐོར་གླེང་ན། ཧ་མཱད་དང་ཨར་ཕད་གཉིས་ལ་ངོ་ཚ་ཐེབས་པ་ཡིན་ཏེ། ཅི་ལ་ཞེ་ན། དེ་དག་གིས་གཏམ་ངན་ཐོས་པས་དཔའ་ཞུམ་པ་དང་། སེམས་ཁྲལ་ནི་རྒྱ་མཚོའི་རྦ་རླབས་བཞིན་དུ་ཞི་བ་མེད་དོ། །  
\v 24 དཱ་མེ་སེག་རྒུད་ནས་ཁ་ཕྱིར་འཁོར་ཏེ་བྲོས་པ་དང་། འདར་ཞུམ་དང་སྡུག་བསྔལ། སེམས་ཁྲལ་བཅས་ཀྱིས་དེ་བཟུང་ཞིང་སྐྱེ་གཟེར་རྒྱག་པའི་བུད་མེད་དང་འདྲའོ། །  
\v 25 ང་རང་དགའ་ཞིང་བསྟོད་བསྔགས་བརྗོད་པའི་གྲོང་ཁྱེར་ནི་ད་དུང་མ་དོར་བ་ཅི་ཡིན་ནམ།  
\v 26 དེའི་དར་མ་རྣམས་ནི་ཐང་ཆེན་དུ་འགྱེལ་བ་དང་། ཉིན་མོ་དེ་ལ་དམག་མི་ཐམས་ཅད་གྲགས་འགུལ་མེད་པར་འགྱུར་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་གསུངས་སོ། །  
\v 27 ཡང་ངས་དཱ་མེ་སེག་གི་མཁར་རྣམས་ལ་མེ་སྦར་བ་དང་། དེས་པེན་ཧ་དཱད་ཀྱི་ཕོ་བྲང་རྣམས་ཁྱུར་མིད་གཏོང་བར་འགྱུར་རོ། །   
\s1 ཀེ་དར་དང་ཧ་ཟོར་སྐོར་གྱི་གཏམ།  
\p
\v 28 པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་རྒོལ་བའི་ཀེ་དར་དང་ཧ་ཟོར་གྱི་རྒྱལ་ཕྲན་རྣམས་ཀྱི་སྐོར་ལ་དཀོན་མཆོག་ཡ་ཝཱེས་འདི་སྐད་དུ། ཀྱེ་ཀལ་དི་པ་ཁྱོད་རྣམས་ཡར་ལངས་ནས་ཀེ་དར་ལ་སོང་ཞིག ཤར་ཕྱོགས་པ་རྣམས་མེད་པར་བཟོས་ཤིག  
\v 29 མི་ཡིས་དེ་རྣམས་ཀྱི་གུར་དང་ལུག་ཁྱུ་རྣམས་འཕྲོག་ཅིང་། མི་ཡིས་དེ་དག་གི་ཡོལ་བ་དང་ཡོ་བྱད་ཐམས་ཅད་དང་། རྔ་མོང་རྣམས་བདག་གིར་འཛིན་པར་འགྱུར་ལ། ཡང་མི་ཡིས་དེ་དག་གི་ཕྱོགས་སུ་ཀི་བཏབ་ནས་ན་རེ། ཕྱོགས་བཞི་རུ་འཇིགས་པ་ཡོད་དོ་ཞེས་ཟེར་རོ། །  
\v 30 ཀྱེ་ཧ་ཟོར་གྱི་ཡུལ་མི་ཁྱོད་རྣམས་རྒྱང་རིང་ཡུལ་དུ་བྲོས་ལ་ཕུག་ཏུ་སྡོད་ཅིག ཅི་ལ་ཞེ་ན། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་ཇུས་ངན་བཀོད་དེ་ཁྱོད་ལ་གནོད་བསྐྱལ་བ་དང་། ཁྱོད་ལ་རྒོལ་བར་བསམ་མོ་ཞེས་དཀོན་མཆོག་ཡ་ཝཱེས་གསུངས།  
\v 31 ཀྱེ་ཀལ་དི་པ་ཁྱོད་རྣམས་ཡར་ལོངས་ཤིག བློ་བདེ་བག་ཕེབས་ངང་སྡོད་པའི་ཡུལ་མི་རྣམས་ཀྱི་རྩར་སོང་ཞིག དེ་དག་ལ་རྒྱ་སྒོ་དང་སྒོ་གཏན་མེད་པར་གཅིག་པུར་གནས་སོ་ཞེས་དཀོན་མཆོག་ཡ་ཝཱེས་གསུངས།  
\v 32 དེ་དག་གི་རྔ་མོང་རྣམས་བཅོམ་ནོར་དུ་འགྱུར་ཞིང་། དེ་དག་གི་སྒོ་ཕྱུགས་གྲངས་མེད་འཕྲོག་པར་འགྱུར། ཡང་ངས་ཡ་ཐོད་ཀྱི་སྐྲ་གཞར་མཁན་དེ་རྣམས་ཕྱོགས་བཞིར་གཏོར་ཞིང་། ཆག་སྒོ་ནི་ཕྱོགས་བཞི་མཚམས་བརྒྱད་ནས་དེ་དག་གི་སྟེང་དུ་འབེབ་པར་བྱའོ་ཞེས་དཀོན་མཆོག་ཡ་ཝཱེས་གསུངས།  
\v 33 ཧ་ཟོར་ནི་ཁྱི་སྤྱང་གནས་སར་གྱུར་ཏེ་གཏན་དུ་སྟོངས་ཤིང་། སུ་ཡང་དེར་མི་གནས་ལ། དེར་བྱེས་སུ་སྡོད་མཁན་ཡང་ཡོད་མི་སྲིད་དོ། །   
\s1 ཨེ་ལཱམ་སྐོར་གྱི་གཏམ།  
\p
\v 34 ཡ་ཧུ་དཱའི་རྒྱལ་པོ་ཚིད་ཀི་ཡཱས་སྲིད་སྐྱོང་བའི་ཐོག་མར། ཨེ་ལཱམ་གྱི་སྐོར་ལ་དཀོན་མཆོག་ཡ་ཝཱེའི་བཀའ་ནི་ཡེ་རེམ་ཡཱ་ལ་བྱུང་བ་འདི་ལྟ་སྟེ།  
\v 35 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ཨེ་ལཱམ་པའི་གཞུ་གཅོག་པར་བྱེད་ཅིང་། དེ་ནི་ཁོ་ཚོས་འཐབ་འཛིང་བྱེད་པའི་གཙོ་ཤུགས་ཡིན།  
\v 36 ཡང་ངས་ནམ་མཁའི་ཕྱོགས་བཞི་ནས་རླུང་བཞི་ཨེ་ལཱམ་གྱི་སྟེང་དུ་དྲངས་ནས་དེ་དག་ཕྱོགས་བཞི་རུ་གཏོར་བར་བྱེད་ཅིང་། ཕྱི་རུ་བསྐྲད་པའི་ཨེ་ལཱམ་པ་རྣམས་མི་སླེབས་པའི་ཡུལ་ཁམས་གཅིག་ཀྱང་མེད་དོ། །  
\v 37 ཡང་ངས་ཨེ་ལཱམ་པ་རྣམས་རང་གི་དགྲ་ཟླ་རྣམས་དང་དེ་དག་གི་སྲོག་སྙེག་མཁན་རྣམས་ཀྱི་མདུན་དུ་འཇིགས་པར་བྱེད་ཅིང་། དེ་དག་གི་སྟེང་དུ་ཆག་སྒོ་སྟེ་ངའི་ཁྲོ་གཏུམ་དྲག་པོ་འབེབ་པར་བྱའོ། །ཡང་ངས་དེ་རྣམས་ཚར་མ་བཅད་བར་དུ་དེ་དག་རལ་གྲིས་འདེད་པར་འགྱུར་ཞེས་དཀོན་མཆོག་ཡ་ཝཱེས་གསུངས།  
\v 38 ངས་རང་གི་རྒྱལ་ཁྲི་ཨེ་ལཱམ་དུ་འགོད་ཅིང་། དེ་རུ་རྒྱལ་པོ་དང་འགོ་དཔོན་རྣམས་མེད་པར་བྱའོ་ཞེས་དཀོན་མཆོག་ཡ་ཝཱེས་གསུངས།  
\v 39 འོན་ཀྱང་མཐའ་མའི་ཉིན་མོ་དག་ལ་ངས་ཨེ་ལཱམ་གྱི་བཙོན་དུ་ཁྲིད་པ་རྣམས་ཕྱིར་ལོག་པར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །   
\c 50
\cl ལེའུ་ལྔ་བཅུ་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 པཱ་པེལ་ལོན་བཙན་འཛིན་བྱས་པ།  
\p
\v 1 པཱ་པེལ་ལོན་དང་ཀལ་དི་པའི་ཡུལ་ཁམས་ཀྱི་སྐོར་ལ་དཀོན་མཆོག་ཡ་ཝཱེས་ཡེ་རེམ་ཡཱ་བརྒྱུད་ནས་འདི་སྐད་དུ།  
\v 2 ཁྱོད་རྣམས་ཀྱིས་ཡུལ་ཁམས་རྣམས་ཀྱི་ནང་དུ་འདི་ལྟར་སྒྲོགས་ཤིག རྒྱལ་མཚན་བསྒྲེངས་ནས་སྦ་གསང་མེད་པར་འདི་ལྟར་སྒྲོགས་ཤིག པཱ་པེལ་ལོན་ནི་བཙན་འཛིན་བྱེད་ཅིང་པེལ་ལ་ངོ་ཚ་ཐེབས་པ་དང་། མེ་རོ་དག་ནི་འཇིགས་པར་གྱུར། པཱ་པེལ་ལོན་གྱི་རྟེན་རྣམས་སྐྱེངས་ཤིང་མོའི་སྐུ་འདྲ་རྣམས་ཀྱང་འཇིགས་པར་གྱུར།  
\v 3 ཅི་ལ་ཞེ་ན། བྱང་ཕྱོགས་ནས་མི་རིགས་ཤིག་དེར་རྒོལ་དུ་འོང་གིན་འདུག དེས་ཁོའི་ཡུལ་ཁམས་སྟོངས་སུ་བཅུག་སྟེ། མི་གཅིག་ཀྱང་གནས་པར་མི་འགྱུར་ལ། མི་ཕྱུགས་གཉིས་ཀ་བྲོས་འགྲོའོ་ཞེས་གསུངས་སོ། །  
\v 4 ཡང་ཉིན་དེ་དང་དུས་དེ་ལ་ཡེས་ར་ཨེལ་པ་རྣམས་ནི་ཡ་ཧུ་དཱ་པ་རྣམས་དང་མཉམ་དུ་འོང་བར་འགྱུར་ལ། དེ་དག་ངུ་ཞོར་དུ་སོང་ནས་རང་གི་དཀོན་མཆོག་ཡ་ཝཱེ་འཚོལ་བར་འགྱུར་ཞེས་དཀོན་མཆོག་ཡ་ཝཱེས་གསུངས།  
\v 5 དེ་དག་ཛ་ཡན་གྱི་ཕྱོགས་སུ་འཁོར་ནས་དེའི་ལམ་འདྲི་ཞིང་ན་རེ། ཚུར་ཤོག་དང་། ངེད་ཅག་དུས་གཏན་གྱི་ཁ་ཆད་ཀྱི་ནང་དུ་དཀོན་མཆོག་ཡ་ཝཱེ་དང་འབྲེལ་བར་བྱའོ་ཞེས་ཟེར་བར་འགྱུར།  
\v 6 བདག་གི་འབངས་མི་ནི་ཁ་ཐོར་དུ་སོང་བའི་ལུག་དང་འདྲ་ཞིང་། རྫི་བོ་རྣམས་ཀྱིས་དེ་རྣམས་ཀྱི་ལམ་བོར་དུ་བཅུག་པས་དེ་དག་རི་རྒྱུད་རྣམས་རྒྱུ་ཞིང་། རི་རབ་ནས་རི་སྒང་དུ་སོང་སྟེ་རང་གི་ངལ་གསོ་བའི་སྡོད་གནས་བརྗེད་པའོ། །  
\v 7 སུ་ཞིག་དེ་དག་དང་ཕྲད་ན་ཁོ་རྣམས་ཁྱུར་མིད་བཏང་སྟེ། དགྲ་རྣམས་ན་རེ། ངེད་ཅག་ལ་ཉེས་པ་མེད་དོ། །ཅི་ལ་ཞེ་ན། དེ་དག་གིས་སྡོད་གནས་ངོ་མ་ཡིན་པའི་དཀོན་མཆོག་ཡ་ཝཱེ་སྟེ། ཁོ་ཚོའི་ཕ་མེས་རྣམས་ཀྱི་རེ་བ་ཡིན་པའི་དཀོན་མཆོག་ཡ་ཝཱེ་ལ་འགལ་བའི་སྡིག་པ་བྱས་པའི་ཕྱིར་རོ་ཞེས་སྨྲས་སོ། །  
\v 8 ཀྱེ་ང་ཡི་མི་རྣམས། ལུག་ཁྱུའི་མདུན་དུ་འགྲོ་བའི་ར་ཕོ་བཞིན་དུ། ཁྱོད་ཅག་ནི་པཱ་པེལ་ལོན་དང་ཀལ་དི་པའི་ཡུལ་ནས་ཕྲོས་ཤིག  
\v 9 ལྟོས་དང་། ངས་མཉམ་འབྲེལ་བྱས་པའི་མི་རིགས་ཆེན་པོ་རྣམས་ལ་བསྐུལ་བར་བྱ་ཞིང་། དེ་རྣམས་བྱང་ཕྱོགས་ཡུལ་ནས་པཱ་པེལ་ལོན་ལ་རྒོལ་དུ་ཁྲིད་འོངས་ནས། དེ་དག་གིས་དམག་བཤམས་ནས་དེ་ལ་རྒོལ་ཞིང་དེ་བཙན་འཛིན་བྱེད་པར་འགྱུར་བ་དང་། དེ་དག་གི་མདའ་ནི་དཔའ་བོ་མདའ་པའི་མདའ་དང་འདྲ་ཞིང་། མདའ་རྐང་གཅིག་ཀྱང་དོན་མེད་དུ་ཕྱིར་མི་ལོག་གོ །  
\v 10 དེ་ནས་ཀལ་དི་ཡུལ་ནི་བཅོམ་ནོར་དུ་འགྱུར་ཞིང་། དེ་འཇོམས་མཁན་ཀུན་གྱི་ཡིད་ཚིམ་པར་འགྱུར་རོ་ཞེས་དཀོན་མཆོག་ཡ་ཝཱེས་གསུངས་སོ། །   
\s1 པཱ་པེལ་ལོན་དགྲ་ལག་ཏུ་ཤོར་བ།  
\p
\v 11 ཀྱེ་ངའི་ནོར་སྐལ་འཕྲོག་མཁན་རྣམས། ཁྱོད་རྣམས་དགའ་ཞིང་མགུ་བ་ནི་གཡུལ་གཅོག་པའི་བ་གཞོན་གྱིས་རྩེད་འཇོ་བྱེད་པ་དང་། རྟ་མཆོག་འཚེར་བ་བཞིན་ཡིན་མོད་ཀྱང་།  
\v 12 ཁྱོད་རྣམས་ཀྱི་མ་ནི་སྐྱེངས་པར་འགྱུར་ཞིང་། ཁྱོད་རྣམས་བཙའ་མཁན་དེ་ངོ་ཚ་བར་འགྱུར། ལྟོས་ཤིག མོ་ནི་མི་རིགས་རྣམས་ཀྱི་ནང་དུ་ཆུང་ཤོས་དང་། དབེན་སྟོང་དང་སྐམ་ས། བྱེ་ཐང་བཅས་སུ་འགྱུར་རོ། །  
\v 13 དཀོན་མཆོག་ཡ་ཝཱེའི་ཐུགས་ཁྲོའི་དབང་གིས་པཱ་པེལ་ལོན་དུ་མི་སྡོད་མཁན་མེད་དེ་ཁྱོན་ནས་ས་སྟོང་དུ་འགྱུར་ཞིང་། གནས་དེ་བརྒྱུད་ནས་འགྲོ་མཁན་ཐམས་ཅད་ཞེད་སྣང་ཚ་པོ་སྐྱེ་ཞིང་། དེར་བྱུང་བའི་ཆག་སྒོ་ཡི་རྐྱེན་གྱིས་འཕྱ་དགོད་བྱེད་པར་འགྱུར།  
\v 14 ཀྱེ་གཞུ་འཐེན་མཁན་རྣམས། ཁྱོད་ཅག་གིས་པཱ་པེལ་ལོན་གྱི་མཐའ་འཁོར་དུ་དམག་ཤོམས་ཤིག མདའ་ལ་སེར་སྣ་མི་བྱེད་པར་འཕངས་ནས་དེར་རྒོལ་ཞིག ཅི་ལ་ཞེ་ན། དེས་དཀོན་མཆོག་ཡ་ཝཱེ་དང་འགལ་བའི་སྡིག་པ་བྱས་པས་སོ། །  
\v 15 དེའི་མཐའ་ནས་བསྐོར་ཏེ་ཀི་ཐོབས་ཤིག དེས་མགོ་བསྒུར་ཅིང་ལྕོག་མཁར་རྣམས་བརྡིབས་པ་དང་མཁར་རྣམས་བཤིག་གོ །འདི་ནི་དཀོན་མཆོག་ཡ་ཝཱེས་འཁོན་ལན་སློག་པ་ཡིན་ཏེ། ཁྱོད་ཅག་གིས་དེ་ལ་དགྲ་ཤ་ལོངས་ཤིག དེས་ཁྱོད་རྣམས་ལ་ཇི་ལྟར་སྤྱད་ན། ཁྱོད་རྣམས་ཀྱིས་ཀྱང་མོ་ལ་དེ་ལྟར་སྤྱོད་ཅིག  
\v 16 ཁྱོད་ཅག་གིས་པཱ་པེལ་ལོན་གྱི་ནང་དུ་ཞིང་རྨོ་མཁན་དང་། སྟོན་ལེན་དུས་ལག་ཏུ་ཟོར་བ་འཛིན་མཁན་ཐམས་ཅད་ཚར་ཆོད་ཅིག དེ་རྣམས་རེ་རེ་གཉའ་གནོན་གཏོང་བའི་རལ་གྲི་ལ་གཡོལ་བའི་ཕྱིར་དུ། རང་གི་མི་རིགས་ཀྱི་རྩར་ཕྱིར་ལོག་ཅིང་། རང་གི་ཕ་ཡུལ་དུ་འབྲོ་བར་འགྱུར་རོ། །  
\v 17 ཡེས་ར་ཨེལ་ནི་ཁ་ཐོར་དུ་སོང་བའི་ལུག་ཡིན་ཏེ། སེང་གེས་དེ་ནི་ཐོར་དུ་བཅུག་པ་ཡིན། ཐོག་མར་ཨ་སུར་རྒྱལ་པོས་དེ་ཁྱུར་མིད་བཏང་བ་དང་། ཕྱིས་སུ་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་དེའི་རུས་པ་རྣམས་གཅོག་གོ །  
\v 18 དེ་བས་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། ལྟོས་ཤིག ངས་སྔོན་ཆད་ཇི་ལྟར་ཨ་སུར་རྒྱལ་པོ་ལ་ཉེས་ཆད་བཅད་པ་ཡིན་ན། པཱ་པེལ་ལོན་གྱི་རྒྱལ་པོ་དང་དེའི་ཡུལ་ཁམས་ལའང་དེ་ལྟར་ཉེས་ཆད་གཅོད་དེ།  
\v 19 ངས་ཡེས་ར་ཨེལ་སླར་ཡང་རང་གི་རྩྭ་ཁར་ཁྲིད་ནས། དེ་ཡིས་ཀར་མེལ་དང་པཱ་ཤན་དུ་རྩྭ་བཟའ་ཞིང་། ཨེ་ཕཱར་ཡིམ་རི་ཁུལ་དང་གིལ་ཨད་ཡུལ་དུ་ཡིད་ཚིམ་པར་འགྱུར།  
\v 20 ཉིན་མོ་དེ་དང་དུས་དེ་ལ་ཁྱོད་ཀྱིས་ཡེས་ར་ཨེལ་གྱི་སྡིག་པ་བཙལ་ཡང་མི་རྙེད་ལ། ཡ་ཧུ་དཱའི་སྡིག་པ་བཙལ་ཡང་རྙེད་པར་མི་འགྱུར། ཅི་ལ་ཞེ་ན། ངས་ལུས་སུ་བཅུག་པ་རྣམས་ཀྱི་སྡིག་པ་བསལ་བར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །   
\s1 དཀོན་མཆོག་གིས་པཱ་པེལ་ལོན་ལ་ཉེས་ཆད་བཅད་པ།  
\p
\v 21 ཁྱོད་ཡར་སོང་ནས་མེ་རཱ་ཏ་ཡིམ་གྱི་གནས་ལ་རྒོལ་ཞིག ཡང་ཕེ་ཀོད་ཀྱི་མི་སྡེ་ལ་རྒོལ་ནས། དེ་དག་འདེད་བཅོམ་བྱས་ཏེ་རྩ་མེད་དུ་ཐོངས་ཤིག ངས་ཁྱོད་ལ་བསྒོས་པའི་བཀའ་བཞིན་དུ་བྱོས་ཤིག་ཅེས་དཀོན་མཆོག་ཡ་ཝཱེས་གསུངས།  
\v 22 ཡུལ་ཁམས་སུ་འཐབ་མོའི་འུར་སྒྲ་དང་འཇིག་པ་ཆེན་པོ་ཡོད།  
\v 23 ས་གཞི་ཡོངས་ལ་རྡུང་བའི་ཐོ་བ་དེ་ཅི་ལྟར་བཅག་ནས་གཏོར་བ་ཡིན་ནམ། མི་རིགས་རྣམས་ཀྱི་ཁྲོད་དུ་པཱ་པེལ་ལོན་ནི་ཅི་ལྟར་འཇིགས་པའི་གནས་སུ་གྱུར་པ་ཡིན་ནམ།  
\v 24 ཀྱེ་པཱ་པེལ་ལོན། ངས་ཁྱོད་ཀྱི་ཕྱིར་དུ་རྙི་རྒྱ་བཙུགས་ནས། ཁྱོད་དེའི་ནང་དུ་ཚུད་ཀྱང་མ་ཚོར་ཏེ། ཁྱོད་ནི་རྙེད་ནས་བཟུང་བ་ཡིན་ནོ། །ཅི་ལ་ཞེ་ན། ཁྱོད་ཀྱིས་དཀོན་མཆོག་ཡ་ཝཱེ་ལ་འགོག་རྒོལ་བྱས་པས་སོ། །  
\v 25 དཀོན་མཆོག་ཡ་ཝཱེས་ཉིད་ཀྱི་དམག་ཆས་ཀྱི་མཛོད་སྒོ་ཕྱེས་ནས། ཉིད་ཀྱི་ཐུགས་ཁྲོའི་མཚོན་ཆ་རྣམས་བཏོན་པ་སྟེ། ཅི་ལ་ཞེ་ན། འདི་ནི་དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་ཀལ་དི་པའི་ཡུལ་དུ་མཛད་དགོས་པ་ཡིན་ནོ། །  
\v 26 ཁྱོད་རྣམས་རྒྱང་རིང་གི་ས་མཚམས་ནས་འོངས་ཏེ་རྒོལ་བར་གྱིས་ཤིག དེའི་འབྲུ་མཛོད་རྣམས་ཁ་ཕྱེས་ནས་ས་ཕུང་མཐོན་པོ་ལྟར་བརྩིགས་ལ། རྩ་བ་ནས་མེད་པར་བྱས་ཏེ་ཅི་ཡང་ལུས་པར་མ་བྱེད་ཅིག  
\v 27 དེའི་བ་ཕྲུག་ཐམས་ཅད་སོད་ཅིག དེ་དག་གསོད་གཅོད་ཐེབས་པར་མར་འགྲོ་རུ་ཆུག དེ་རྣམས་ཀྱི་ཉིན་མོ་སྟེ་ཉེས་ཆད་ཕོག་པའི་དུས་ལ་སླེབས་པས། དེ་དག་ལ་ཆག་སྒོ་འབྱུང་བར་འགྱུར།  
\v 28 པཱ་པེལ་ལོན་ནས་ཐར་བའི་ཡུལ་འཁྱར་པ་རྣམས་ཀྱིས། ཛ་ཡན་དུ་རང་ཅག་གི་དཀོན་མཆོག་ཡ་ཝཱེས་ཉིད་ཀྱི་མཆོད་ཁང་གི་ཕྱིར་དུ་འཁོན་ལན་ཅི་ལྟར་སློག་པ་ཁྱབ་བསྒྲགས་བྱེད་པའོ། །  
\v 29 ཁྱོད་ཅག་གིས་མདའ་པ་ཐམས་ཅད་བསྡུས་ཏེ་པཱ་པེལ་ལོན་ལ་རྒོལ་བར་གྱིས་ཤིག པཱ་པེལ་ལོན་གྱི་མཐའ་འཁོར་དུ་དམག་སྒར་བཙུགས་ཏེ་མི་གཅིག་ཀྱང་འབྲོ་བར་མ་འཇུག དེས་གང་ཞིག་སྤྱད་པ་བཞིན་དུ་དེ་ལ་འཁོན་ལན་སློགས་ཤིག དེས་ཇི་ལྟར་བྱས་ན་ཁྱོད་ཅག་གིས་ཀྱང་དེ་ལྟར་བྱོས་ཤིག ཅི་ལ་ཞེ་ན། དེས་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དམ་པ་ཉིད་ལ་ང་རྒྱལ་བཅངས་ནས་འགོག་རྒོལ་བྱས་པས་སོ། །  
\v 30 དེ་བས་མོའི་དར་མ་རྣམས་ནི་ཐང་ཆེན་དུ་འགྱེལ་ཞིང་། ཉིན་མོ་དེ་ལ་དམག་མི་ཐམས་ཅད་ཁ་རོག་ཏུ་སྡོད་པར་འགྱུར་ཞེས་དཀོན་མཆོག་ཡ་ཝཱེས་གསུངས།  
\v 31 ལྟོས་ཤིག ངས་ང་རྒྱལ་ཅན་ཁྱོད་དགྲ་རུ་འཛིན་ཏེ། ཅི་ལ་ཞེ་ན། ཁྱོད་ཀྱི་ཉིན་མོ་སྟེ་ངས་ཁྱོད་ལ་ཉེས་ཆད་གཅོད་པའི་དུས་ལ་སླེབས་པས་སོ་ཞེས་དཔུང་ཚོགས་ཀུན་གྱི་གཙོ་བོ་དཀོན་མཆོག་ཡ་ཝཱེས་གསུངས།  
\v 32 ང་རྒྱལ་ཅན་ནི་འདྲེད་ཅིང་འགྱེལ་བར་འགྱུར་ལ་སུས་ཀྱང་དེ་སློང་བར་མི་བྱེད། ངས་དེའི་གྲོང་ཁྱེར་རྣམས་ལ་མེ་སྦར་ནས་མཐའ་འཁོར་ལ་ཡོད་པ་ཐམས་ཅད་ཁྱུར་མིད་གཏོང་བར་འགྱུར་རོ། །  
\v 33 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཡེས་ར་ཨེལ་པ་རྣམས་དང་ཡ་ཧུ་དཱ་པ་རྣམས་ལ་མཉམ་དུ་བརྙས་བཅོས་ཐེབས་པ་དང་། དེ་དག་འཛིན་མཁན་ཀུན་གྱིས་དེ་དག་དམ་པོར་བཟུང་ནས་སྒྲོལ་བར་མི་བྱའོ། །  
\v 34 དེ་དག་སྐྱོབ་མཁན་གཙོ་བོ་ཁོང་ནི་ནུས་མཐུ་ལྡན་པ་ཡིན་ཏེ། ཁོང་གི་མཚན་ནི་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལགས་པས། ཁོང་གིས་དེ་དག་གི་ཕྱིར་དུ་དག་འབུད་གསལ་ཐག་ཆོད་པ་བྱེད་ཅིང་། ས་གཞི་ཡོངས་བདེ་ལ་འགོད་པའི་ཕྱིར་ཡིན་མོད། འོན་ཀྱང་པཱ་པེལ་ལོན་གྱི་མི་རྣམས་ལ་ཁོང་གིས་དཀྲོག་རྐྱེན་སློང་བར་འགྱུར་རོ་ཞེས་གསུངས་སོ། །  
\v 35 ཡང་རལ་གྲི་ནི་ཀལ་དི་པ་དང་པཱ་པེལ་ལོན་གྱི་མི་རྣམས་དང་། དེའི་འགོ་དཔོན་རྣམས་དང་མཁས་པ་རྣམས་ཀྱི་སྟེང་དུ་འབབ་བར་འགྱུར་ཞེས་དཀོན་མཆོག་ཡ་ཝཱེས་གསུངས།  
\v 36 ཁེངས་རློམ་ཅན་གྱི་སྟེང་དུ་རལ་གྲི་ཞིག་འབབ་ཅིང་ཁོ་རྣམས་རྨོངས་པར་འགྱུར། དེའི་དཔའ་བོ་རྣམས་ཀྱི་སྟེང་དུ་རལ་གྲི་ཞིག་འབབ་ཅིང་དེ་རྣམས་འཇིགས་པར་འགྱུར།  
\v 37 དེའི་རྟ་དང་ཤིང་རྟ་དང་། དེའི་ནང་དུ་སྡོད་པའི་མི་རིགས་འདྲེས་མ་ཀུན་གྱི་སྟེང་དུ་རལ་གྲི་ཞིག་འབབ་ཅིང་དེ་རྣམས་བུད་མེད་བཞིན་དུ་འགྱུར། དེའི་རིན་པོ་ཆེ་རྣམས་ཀྱི་སྟེང་དུ་རལ་གྲི་ཞིག་འབབ་ཅིང་དེ་རྣམས་ཕྲོགས་ནས་འཁྱེར་བར་འགྱུར།  
\v 38 དེའི་ཆུ་རྣམས་ཀྱི་སྟེང་དུ་ཐན་པ་འབྱུང་ཞིང་དེ་རྣམས་སྐམ་པར་འགྱུར། ཅི་ལ་ཞེ་ན། འདི་ནི་བརྐོས་སྐུ་རྣམས་ཀྱི་ཡུལ་ཁམས་ཡིན་ལ་མི་ནི་འཇིགས་སུ་རུང་བའི་སྐུ་འདྲའི་དབང་གིས་སྨྱོ་བས་སོ། །  
\v 39 དེ་བས་དབེན་སྟོང་གི་རི་དྭགས་དང་འཕར་སྤྱང་དེ་རུ་གནས་ཤིང་། རྔ་བྱ་རྣམས་ཀྱང་དེར་གནས་པ་དང་། ཕྱིན་ཆད་ནམ་ཡིན་ཡང་དེ་རུ་མི་སྡོད་མཁན་མེད་ལ། མི་རབས་ནས་མི་རབས་བར་དུ་མི་སྡོད་མཁན་མེད་དོ། །  
\v 40 དཀོན་མཆོག་གིས་ཇི་ལྟར་སཱ་དོམ་དང་གཱ་མོ་ར་དང་། དེའི་ཉེ་འཁོར་གྱི་གྲོང་ཁྱེར་རྣམས་ཕམ་པར་བཟོས་པ་བཞིན། པཱ་པེལ་ལོན་དུ་སྡོད་མཁན་མི་གཅིག་ཀྱང་མེད་ལ། སུ་ཡང་དེ་རུ་བྱེས་སུ་སྡོད་པར་མི་འགྱུར་ཞེས་དཀོན་མཆོག་ཡ་ཝཱེས་གསུངས་སོ། །  
\v 41 ལྟོས་ཤིག དམག་དཔུང་ཞིག་བྱང་ཕྱོགས་ནས་འོང་གིན་འདུག ས་གཞིའི་མཐའ་མཚམས་ནས་མི་རིགས་ཆེན་པོ་ཞིག་དང་རྒྱལ་པོ་རྣམས་ཀྱང་བསྐུལ་ནས་སླེབས་ཤིང་།  
\v 42 དེ་དག་གི་ལག་ཏུ་གཞུ་དང་མདུང་བཟུང་སྟེ་གདུག་རྩུབ་ཆེ་ལ་སྙིང་རྗེ་མེད་པ་དང་། རྒྱ་མཚོའི་རྦ་རླབས་འཕྱུར་བ་ནང་བཞིན་དེ་དག་གིས་ང་རོ་འདོན། ཀྱེ་པཱ་པེལ་ལོན་གྱི་བུ་མོ་ལགས། དེ་རྣམས་རྟ་ལ་ཞོན་ནས་བསླེབ་ཅིང་གཡུལ་ངོར་ཞུགས་པའི་དམག་མི་ནང་བཞིན་གྲལ་བསྒྲིགས་ཏེ་ཁྱོད་ལ་རྒོལ་བར་འགྱུར།  
\v 43 པཱ་པེལ་ལོན་གྱི་རྒྱལ་པོས་དེ་དག་སྐོར་གྱི་གཏམ་ཐོས་པ་དང་ལག་རྩ་ལྷོད་དེ། ཟུག་རྔུ་དྲག་པོས་གདུངས་ནས་སྐྱེ་གཟེར་རྒྱག་པའི་བུད་མེད་ལྟར་ན་ཟུག་ལང་ངོ་། །  
\v 44 ལྟོས་ཤིག སེང་གེ་ཇི་ལྟར་ཡོར་དན་གཙང་པོ་འགྲམ་གྱི་ནགས་ཚལ་ནས་ཐོན་ཏེ་གནས་ཡུལ་བརྟན་པོར་རྒོལ་བ་བཞིན། ངས་ཀལ་དི་པ་ནི་སྐད་ཅིག་ཙམ་ལ་གནས་འདི་ལས་སྐྲོད་པར་བྱའོ། །ངས་སུ་ཞིག་བདམས་པ་ཡིན་ན་དེ་མངགས་ནས་ཡུལ་ཁམས་འདི་སྐྱོང་བར་བྱ་སྟེ། ང་དང་འདྲ་བ་སུ་ཡོད་དམ། སུ་ཞིག་གིས་ང་ཁྲིམས་སར་བོས་ནས་འདྲི་གཅོད་བྱེད་ནུས་སམ། ངའི་མདུན་དུ་འགྲེང་ནུས་པའི་རྫི་བོ་སུ་ཡོད་དམ་ཞེས་གསུངས་སོ། །  
\v 45 དེའི་ཕྱིར། དཀོན་མཆོག་ཡ་ཝཱེས་པཱ་པེལ་ལོན་ལ་རྒོལ་བའི་ཐབས་ཇུས་དང་། ཀལ་དི་པའི་ཡུལ་ལ་རྒོལ་བའི་ཐུགས་དགོངས་ལ་ཁྱོད་རྣམས་ཀྱིས་ཉོན་དང་། དགྲ་བོས་དེ་དག་གི་ལུག་ཁྱུ་ནང་གི་ཉམས་ཆུང་དག་འདྲུད་པར་འགྱུར་ཞིང་། དེ་དག་གི་རྩྭ་ས་ཡང་དབེན་སྟོང་དུ་འགྱུར་རོ། །  
\v 46 པཱ་པེལ་ལོན་བཙན་བཟུང་བྱས་པའི་སྒྲ་ཡིས་ས་གཞི་འདར་ཞིང་། མི་ཡིས་ཡུལ་ཁམས་ཀུན་ཏུ་འོ་དོད་འདོན་པའི་སྒྲ་ཐོས་པར་འགྱུར་རོ། །   
\c 51
\cl ལེའུ་ང་གཅིག་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 པཱ་པེལ་ལོན་ལ་ཡང་བསྐྱར་ཉེས་ཆད་བཅད་པ།  
\p
\v 1 དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་འཇོམས་བྱེད་ཀྱི་རླུང་ཞིག་སློང་བར་བྱ་སྟེ། པཱ་པེལ་ལོན་དང་ལེ་ཀཱ་མཱེ་རུ་སྡོད་པའི་མི་རྣམས་ལ་རྒོལ་བར་བྱའོ། །  
\v 2 ཡང་ངས་ཕྱི་ཕྱོགས་པ་རྣམས་པཱ་པེལ་ལོན་དུ་མངགས་ནས། ཁོ་ཚོས་དེ་གཏོར་ཞིང་དེའི་ཡུལ་ཁམས་རྡུལ་དུ་བརླག་པར་བྱེད། ཡང་དེ་ལ་ཆག་སྒོ་འབྱུང་བའི་དུས་སུ། ཁོ་རྣམས་ཀྱིས་དེ་ལ་ཕྱོགས་བཞི་ནས་རྒོལ་བར་འགྱུར།  
\v 3 གཞུ་འཐེན་མཁན་ལ་གཞུ་འཐེན་དུ་མ་འཇུག་ཅིག དེ་ལ་ཁྲབ་རྨོག་གྱོན་དུ་མ་འཇུག་ཅིག པཱ་པེལ་ལོན་གྱི་དར་མ་དག་ལ་སྙིང་རྗེ་མ་སྒོམས་ཤིག དེའི་དམག་དཔུང་ནི་རྩ་བ་ནས་མེད་པར་བཟོས་ཤིག  
\v 4 དེ་དག་ཀལ་དི་པའི་ཡུལ་དུ་བསད་ནས་འགྱེལ་བར་འགྱུར་ཞིང་། པཱ་པེལ་ལོན་གྱི་སྲང་ལམ་དུ་བསྣུན་པར་འགྱུར་ཞེས་གསུངས།  
\v 5 ཡེས་ར་ཨེལ་དང་ཡ་ཧུ་དཱའི་ཡུལ་ཁམས་སུ་ཡེས་ར་ཨེལ་གྱི་དམ་པ་ཉིད་ལ་རྒྱབ་འགལ་བྱས་པའི་སྡིག་པ་ཡིས་བཀང་ན་ཡང་། དེའི་དཀོན་མཆོག་སྟེ་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་དེ་ནི་མ་དོར་རོ། །  
\v 6 ཁྱོད་རྣམས་པཱ་པེལ་ལོན་ནས་ཕྲོས་ཤིག་དང་། རེ་རེས་རང་གི་སྲོག་སྐྱོབས་ཤིག དེའི་སྡིག་པ་ནང་དུ་ལྷུང་ནས་མཉམ་དུ་འཆི་བར་མ་འགྱུར་ཞིག ཅི་ལ་ཞེ་ན། འདི་ནི་དཀོན་མཆོག་ཡ་ཝཱེས་འཁོན་ལན་སློག་པའི་དུས་ཏེ། ཁོང་གིས་པཱ་པེལ་ལོན་གྱི་ཕྱོགས་སུ་ལན་འཇལ་ངེས་ཡིན།  
\v 7 པཱ་པེལ་ལོན་ནི་སྔར་ནས་དཀོན་མཆོག་ཡ་ཝཱེའི་ཕྱག་གི་གསེར་ཕོར་ཞིག་ཡིན་ཏེ། དེས་ས་གཞི་ཚང་མ་བཟི་བར་བྱས། མི་རིགས་རྣམས་ཀྱིས་དེའི་རྒུན་ཆང་འཐུངས་བས་སྨྱོས་པར་གྱུར་ཏེ།  
\v 8 པཱ་པེལ་ལོན་ནི་གློ་བུར་ཉིད་ལ་འགྱེལ་ནས་བཤིག་པར་གྱུར་ལ། དེའི་དོན་དུ་ངུ་འབོད་བྱོས་ཤིག དེའི་ཟུག་གཟེར་གྱི་ཕྱིར་སྤོས་དཀར་དྲངས་ཤིག་དང་། ཡང་ན་དེ་གསོ་བར་འགྱུར་ཡང་སྲིད།  
\v 9 ངེད་ཀྱིས་པཱ་པེལ་ལོན་གསོ་བར་འདོད་ནའང་དེའི་ནད་མ་སངས་བས། དེ་དང་འབྲལ་བར་གྱིས་ཤིག་དང་། བདག་ཅག་རང་རང་གི་ཡུལ་དུ་ལོག་པར་བྱའོ། །ཅི་ལ་ཞེ་ན། དེར་ཐེབས་པའི་ཉེས་ཆད་ནི་བར་སྣང་དུ་སླེབས་ཤིང་། ནམ་མཁའི་བར་དུའང་སླེབས་པའོ། །  
\v 10 དཀོན་མཆོག་ཡ་ཝཱེས་རང་ཅག་གི་དྲང་བདེན་མངོན་པར་མཛད་པས། ཤོག་དང་། རང་ཅག་གིས་ཛ་ཡན་དུ་རང་རེའི་དཀོན་མཆོག་ཡ་ཝཱེའི་མཛད་རྗེས་འཆད་པར་བྱའོ། །  
\v 11 ཁྱོད་རྣམས་ཀྱིས་མདའ་རྩེ་རྡོར་དང་། ཕུབ་རྣམས་དམ་དུ་ཟུངས་ཤིག དཀོན་མཆོག་ཡ་ཝཱེས་པཱ་པེལ་ལོན་ནི་མེད་པར་མཛད་པའི་ཐུགས་ཐག་བཅད་པས་ན། མཱ་ཏི་པའི་རྒྱལ་པོའི་སེམས་དཀྲུགས་སོ། །ཅི་ལ་ཞེ་ན། འདི་ནི་དཀོན་མཆོག་ཡ་ཝཱེས་འཁོན་ལན་སློག་པ་སྟེ། ཁོང་གི་མཆོད་ཁང་གི་དོན་དུ་ལན་སློག་པ་ཡིན་ནོ། །  
\v 12 ཁྱོད་ཅག་གིས་དར་རྣམས་བསྒྲེངས་ཏེ་པཱ་པེལ་ལོན་གྱི་མཁར་རྣམས་ལ་རྒོལ་ཞིག མེལ་ཚེ་བརྟན་པོ་བྱོས་ལ་སོ་པ་རྣམས་ཞོག་ཅིག འཇབ་ས་རྣམས་ཤོམས་ཤིག ཅི་ལ་ཞེ་ན། དཀོན་མཆོག་ཡ་ཝཱེས་པཱ་པེལ་ལོན་གྱི་མི་རྣམས་ཀྱི་ཆེད་དུ་གསུངས་པ་ལྟར། ཁོང་གིས་དེ་བཞིན་དགོངས་པར་མ་ཟད་དེ་བཞིན་མཛད་པར་འགྱུར་རོ། །  
\v 13 ཀྱེ་ཆུ་རྣམས་ཀྱི་སྟེང་དུ་སྡོད་ཅིང་གཏེར་མང་པོ་ཡོད་པ་ཁྱོད་ཀྱི་མཐའ་མར་སླེབས་ཏེ། ཁྱོད་ཀྱི་འདོད་པ་ཁ་བཀང་བའོ། །  
\v 14 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་རང་ཉིད་དཔང་དུ་བཙུགས་ནས་མནའ་བཞེས་ཏེ་འདི་སྐད་དུ། ངས་ཆ་ག་འབུ་ནི་ག་ས་གང་དུ་བཀང་བ་བཞིན་དགྲ་རྣམས་ཁྱོད་ཀྱི་ཡུལ་ཁམས་སུ་ཁྱབ་པར་བྱ་སྟེ། དེ་དག་གིས་ངར་སྐད་སྒྲོག་བཞིན་ཁྱོད་ལ་རྒོལ་བར་འགྱུར་རོ་ཞེས་གསུངས་སོ། །   
\s1 དཀོན་མཆོག་ལ་བསྟོད་བསྔགས་བརྗོད་པའི་སྙན་ཚིག  
\p
\v 15 དཀོན་མཆོག་ཡ་ཝཱེས་ཉིད་ཀྱི་ནུས་མཐུ་ལ་བརྟེན་ནས་ས་གཞི་བཀོད་ཅིང་། ཉིད་ཀྱི་ཤེས་རབ་ཀྱིས་འཇིག་རྟེན་མཛད་པ་དང་། ཡང་ཁོང་གི་མཁྱེན་རབ་ཀྱིས་ཨ་སྔོན་དབྱིངས་རྣམས་བཏིངས།  
\v 16 ཁོང་གིས་གསུང་སྐད་འདོན་དུས་ནམ་མཁའ་ནས་ཆུ་རྣམས་འཕྱུར་ཞིང་། ཁོང་གིས་ས་མཐའ་ནས་སྤྲིན་དང་སྨུག་པ་ལང་བར་མཛད་པ་དང་། ཆར་བ་དང་ཆབས་ཅིག་གློག་དམར་འཁྱུག་པར་མཛད། ཉིད་ཀྱི་གཏེར་མཛོད་རྣམས་ལས་རླུང་ཡང་འདོན་ནོ། །  
\v 17 མི་རེ་རེ་དུད་འགྲོ་དང་འདྲ་སྟེ་ཤེས་བྱ་མེད་ལ། དངུལ་མགར་རྣམས་ནི་རང་རང་གི་སྐུ་འདྲའི་རྐྱེན་གྱིས་ངོ་ཚ་བ་དང་། དེས་བླུགས་པའི་སྐུ་འདྲ་རྣམས་ནི་རྫུས་མ་ཡིན་ལ་དེ་དག་གི་ནང་དུ་དབུགས་ཀྱང་མེད་དོ། །  
\v 18 སྐུ་འདྲ་ཐམས་ཅད་སྙིང་པོ་མེད་པ་དང་། དེ་ནི་མི་ལ་མགོ་སྐོར་གཏོང་བྱེད་ཙམ་ཡིན་ཏེ། ཉེས་ཆད་གཅོད་པའི་དུས་སུ་སླེབས་ཚེ་དེ་དག་མེད་པར་བཟོ་ངེས་ཡིན།  
\v 19 ཡང་ཡ་ཀོབ་ཀྱི་ཐོབ་སྐལ་ནི་དེ་འདྲ་མིན་ཏེ། ཅི་ལ་ཞེ་ན། ཁོང་ནི་ཐམས་ཅད་འགོད་མཁན་གཙོ་བོ་ཡིན་པས་སོ། །ཡེས་ར་ཨེལ་ཡང་ཁོང་གི་ནོར་སྐལ་གྱི་ཚོ་ཁག་ཡིན་པ་དང་། ཁོང་གི་མཚན་ནི་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལགས་སོ། །  
\v 20 ཁྱོད་ནི་ངའི་རྒྱག་བྱེད་ཀྱི་སྟ་རེ་དང་འཐབ་མོའི་མཚོན་ཆ་ཡིན་ཏེ། ངས་ཁྱོད་བརྒྱུད་ནས་མི་རྣམས་རྡུལ་དུ་བརླག་ཅིང་། རྒྱལ་ཕྲན་རྣམས་མེད་པར་བྱའོ། །  
\v 21 ངས་ཁྱོད་བརྒྱུད་ནས་རྟ་དང་སྐྱ་མི་གཉིས་པོ་རྡུལ་དུ་བརླག་ཅིང་། ཤིང་རྟ་དང་དེའི་ནང་དུ་སྡོད་མཁན་གཉིས་ཀ་རྡུལ་དུ་བརླག་པར་བྱའོ། །  
\v 22 ངས་ཁྱོད་བརྒྱུད་ནས་སྐྱེས་པ་དང་བུད་མེད་གཉིས་ཀ་རྡུལ་དུ་བརླག་ཅིང་། རྒན་པ་དང་ན་གཞོན་གཉིས་ཀ་རྡུལ་དུ་བརླག་པ་དང་། གཞོན་ནུ་ཕོ་མོ་གཉིས་ཀའང་རྡུལ་དུ་བརླག་པར་བྱའོ། །  
\v 23 ངས་ཁྱོད་བརྒྱུད་ནས་རྫི་བོ་དང་དེའི་ཕྱུགས་ཁྱུ་རྡུལ་དུ་བརླག་ཅིང་། ཞིང་པ་དང་དེའི་རྨོན་གླང་རྡུལ་དུ་བརླག་པ་དང་། བཀའ་བློན་དང་བློན་པོ་རྣམས་ཀྱང་རྡུལ་དུ་བརླག་པར་བྱའོ། །   
\s1 པཱ་པེལ་ལོན་ལ་ཉེས་ཆད་གཅོད་པ།  
\p
\v 24 པཱ་པེལ་ལོན་དང་ཀལ་དི་པའི་མི་ཐམས་ཅད་ཀྱིས་ཛ་ཡན་དུ་སྤྱད་པའི་ངན་སྤྱོད་ཀུན་གྱི་ཕྱིར་དུ། ངས་ཁྱོད་ཚོའི་མིག་མདུན་དུ་དེ་དག་ལ་འཁོན་ལན་སློག་པར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །  
\v 25 ཀྱེ་ཚར་གཅོད་བྱེད་པའི་རི་བོ། ས་གཞི་ཐམས་ཅད་རྩ་མེད་དུ་གཏོང་བའི་རི་བོ། ལྟོས་ཤིག ངས་ཁྱོད་ནི་དགྲ་རུ་བཟུང་སྟེ། ངས་ཁྱོད་ཀྱི་སྟེང་དུ་རང་གི་ལག་པ་བརྐྱངས་ཏེ་རྒོལ་བར་འགྱུར་ལ། བྲག་རྣམས་ལས་ཁྱོད་བསྒྲིལ་བར་བཅུག་ནས། ཁྱོད་ནི་མེས་བསྲེགས་པའི་རི་བོར་བྱའོ། །  
\v 26 དེ་ནས་མི་ཡིས་ཁང་པའི་གྲུ་རྡོ་བྱེད་དུ་ཁྱོད་ལས་མི་ལེན་པ་དང་། རྨང་རྡོ་ཡང་ཁྱོད་ལས་མི་ལེན་ནོ། །ཅི་ལ་ཞེ་ན། ཁྱོད་ནི་དུས་རྟག་ཏུ་ཞིག་རོར་ལུས་པར་འགྱུར་རོ་ཞེས་དཀོན་མཆོག་ཡ་ཝཱེས་གསུངས་སོ། །  
\v 27 ཁྱོད་ཅག་གིས་ཡུལ་ཁམས་ནང་དུ་དར་རྣམས་བསྒྲེངས་ཏེ། མི་རིགས་རྣམས་ཀྱི་ཁྲོད་དུ་རྭ་དུང་བུས་ཤིག མི་རིགས་རྣམས་ཀྱིས་པཱ་པེལ་ལོན་ལ་འཐབ་པར་གྲ་སྒྲིག་བྱོས་ཤིག ཡང་ཨ་ར་རད་དང་མིན་ནི་དང་། ཨ་ཤ་ཀེ་ནཱ་ཡི་རྒྱལ་ཕྲན་རྣམས་བསྡུས་ཏེ་དམག་དཔོན་མངགས་ནས་དེར་རྒོལ་དུ་ཆུག་དང་། ཡང་ཆ་ག་འབུ་བཞིན་དུ་རྟ་རྣམས་དྲངས་ནས།  
\v 28 མི་རིགས་རྣམས་དང་མཱ་ཏི་པའི་རྒྱལ་པོ་དང་། བཀའ་བློན་དང་བློན་པོ་རྣམས་དང་། དེ་དག་གིས་བཟུང་བའི་ཡུལ་ཁམས་ཐམས་ཅད་ཀྱིས་དེ་ལ་རྒོལ་བར་རྩོམ་དགོས།  
\v 29 དེ་ནས་ས་གཞི་འདར་ཞིང་གཅུ་གྲིམ་རྒྱག་གོ །ཅི་ལ་ཞེ་ན། པཱ་པེལ་ལོན་ནང་དུ་མི་གཅིག་ཀྱང་མི་གནས་པ་དང་སྟོངས་པར་མཛད་དུ་དཀོན་མཆོག་ཡ་ཝཱེའི་དགོངས་པ་རྣམས་གཏན་ལ་ཕབ་པས་སོ། །  
\v 30 པཱ་པེལ་ལོན་གྱི་དཔའ་བོ་རྣམས་ཀྱིས་དམག་འཁྲུག་མཚམས་བཞག་སྟེ་བཙན་རྫོང་ནང་དུ་སྦས་པ་དང་། དེ་དག་གི་སྟོབས་ཤུགས་ཉམས་ཏེ་བུད་མེད་ལྟ་བུར་གྱུར་ཏོ། །ཡང་པཱ་པེལ་ལོན་གྱི་སྡོད་གནས་དག་མེས་བསྲེགས་ཤིང་སྒོ་གཏན་རྣམས་བཅགས་སོ། །  
\v 31-32 པཱ་པེལ་ལོན་གྱི་རྒྱལ་པོ་ལ། ཁྱེད་ཀྱི་གྲོང་ཁྱེར་གྱི་ཕྱོགས་བཞི་པོ་བླངས་ཤིང་། རབ་ཁ་རྣམས་བཙན་བཟུང་བྱས་ཏེ་འདམ་གཞུང་རྣམས་མེས་བསྲེགས་པ་དང་། དམག་རྣམས་ཀྱང་འཇིགས་པར་གྱུར་ཏོ་ཞེས་ཞུ་བའི་བང་ཆེན་རྣམས་ཕན་ཚུན་གདོང་ཐུག་རྒྱག་པ་དང་། འཕྲིན་སྐྱེལ་མཁན་རྣམས་ཀྱང་ཕན་ཚུན་འཕྲད་དོ། །  
\v 33 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་གིས་འདི་སྐད་དུ། པཱ་པེལ་ལོན་གྱི་བུ་མོ་ནི་ཚར་མ་རྡུང་སའི་གཡུལ་ཁ་དང་མཚུངས་ཏེ། ཅང་མི་འགོར་བར་དེ་བསྡུ་བའི་སྐབས་ལ་སླེབ་པར་འགྱུར་རོ་ཞེས་གསུངས།  
\v 34 ཡེས་ར་ཨེལ་པ་རྣམས་ཀྱིས་འདི་ལྟར། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་ང་རང་ཁྱུར་མིད་བཏང་ནས་ང་རང་བརྫིས་པ་དང་། ང་རང་སྣོད་སྟོང་དུ་འགྱུར་བར་བྱས། ཁོ་ནི་ཆུ་སྲིན་ཞིག་དང་འདྲ་བར་ང་ཁྱུར་མིད་བཏང་ཞིང་། ང་ནི་ཟས་མཆོག་བཞིན་ཁོའི་ཁོག་པར་བཀང་བར་བཅུག་སྟེ། ཡང་ང་རང་བསྐྲད་པ་ཡིན་ནོ་ཞེས་སྨྲའོ། །  
\v 35 ཡང་ཛ་ཡན་གྱི་མི་རྣམས་ཀྱིས་འདི་ལྟར། ང་དང་ངའི་ཤ་ཁྲག་གིས་མྱངས་པའི་གདུག་རྩུབ་དེ་ཕྱིར་པཱ་པེལ་ལོན་གྱི་སྟེང་དུ་འབབ་པར་ཤོག་ཅེས་སྨྲ་བར་འགྱུར་ཞིང་། ཡེ་རུ་སཱ་ལེམ་གྱི་མི་རྣམས་ཀྱིས་འདི་ལྟར། ངེད་རྣམས་ལས་ཁྲག་བཞུར་བའི་ཉེས་ཆད་ནི་ཀལ་དི་པའི་སྟེང་དུ་འཕོག་གྱུར་ཅིག་ཅེས་སྨྲ་བར་འགྱུར་རོ། །   
\s1 དཀོན་མཆོག་ཡ་ཝཱེས་ཡེས་ར་ཨེལ་ལ་རོགས་རམ་མཛད་པ།  
\p
\v 36 དེ་བས་དཀོན་མཆོག་ཡ་ཝཱེས་འདི་སྐད་དུ། ལྟོས་ཤིག ངས་ཁྱོད་ཀྱི་དོན་དུ་དཀར་འདོན་པ་དང་། ཁྱོད་ཀྱི་དོན་དུ་འཁོན་ལན་སློག་པར་བྱ་སྟེ། ངས་པཱ་པེལ་ལོན་གྱི་རྒྱ་མཚོ་སྐམ་པར་བྱེད་ཅིང་། དེའི་ཆུ་མགོ་ཡང་སྐམ་པར་བྱའོ། །  
\v 37 པཱ་པེལ་ལོན་ནི་ཞིག་རོ་དང་ཁྱི་སྤྱང་གི་ཚང་དུ་གྱུར་ནས། འཇིགས་སུ་རུང་བ་དང་འཕྱ་དགོད་བྱེད་ཡུལ་དུ་འགྱུར་ཞིང་སྡོད་མཁན་གཅིག་ཀྱང་མེད་དོ། །  
\v 38 དེ་དག་གིས་སེང་གེ་དར་མ་བཞིན་ང་རོ་སྒྲོག་ཅིང་། སེང་ཕྲུག་ལྟར་ངར་སྐད་འདོན་པ་ཡིན།  
\v 39 དེ་དག་ལ་ཟ་འདོད་ཆེ་བའི་དུས་སུ། ངས་དེ་དག་ལ་གསོལ་སྟོན་བཤམས་ནས་ཁོ་ཚོ་བཟི་རུ་བཅུག་སྟེ་དགའ་བར་བྱེད་པ་དང་། དེ་དག་ལ་དུས་གཏན་དུ་གཉིད་འཐིབས་ནས་མི་སད་དོ་ཞེས་དཀོན་མཆོག་ཡ་ཝཱེས་གསུངས།  
\v 40 ངས་དེ་དག་ནི་ལུ་གུ་བཞིན་དང་། ལུག་ཐུག་དང་ར་ཐུག་ལྟར་བཤས་རར་ཤན་པའི་དྲུང་དུ་འཁྲིད་པར་བྱའོ། །  
\v 41 ཤེ་ཤག་ནི་ཅི་ལྟར་རྒོལ་ནས་བླངས་པ་ཡིན་ནམ། ས་གཞི་ཡོངས་ཀྱིས་བསྟོད་པ་དེ་ཅི་ལྟར་བཙན་བཟུང་བྱས་པ་ཡིན་ནམ། མི་རིགས་རྣམས་ཀྱི་ཁྲོད་དུ་པཱ་པེལ་ལོན་ནི་ཅི་ལྟར་འཇིགས་སུ་རུང་བར་གྱུར་པ་ཡིན་ནམ།  
\v 42 རྒྱ་མཚོ་འཕྱུར་ནས་པཱ་པེལ་ལོན་བསྣུབས་ཏེ། འཕྱུར་བའི་རྦ་རླབས་ཀྱིས་དེ་འགེབ་པར་འགྱུར།  
\v 43 དེའི་གྲོང་ཁྱེར་ནི་ས་སྟོང་དང་སྐམ་ས། བྱེ་ཐང་བཅས་སུ་གྱུར་ཏེ། སྡོད་མཁན་གཅིག་ཀྱང་མེད་ལ་དེ་བརྒྱུད་ནས་འགྲོ་མཁན་ཡང་མེད་པའི་གནས་སུ་འགྱུར་རོ། །  
\v 44 ངས་པཱ་པེལ་ལོན་གྱི་པེལ་ལ་ཆད་པ་གཅོད་ཅིང་། དེས་ཁྱུར་མིད་བཏང་བ་རྣམས་ཁ་ནས་སྐྱུག་པར་བྱ་སྟེ། ཕྱིན་ཆད་མི་རྣམས་དེའི་མདུན་དུ་ཕྱོགས་པར་མི་བྱེད་ལ། པཱ་པེལ་ལོན་གྱི་མཁར་རྣམས་ཀྱང་ལོག་པར་འགྱུར་རོ། །  
\v 45 ཀྱེ་བདག་གི་འབངས་མི་ལགས། ཁྱོད་རྣམས་པཱ་པེལ་ལོན་དང་འབྲལ་བར་གྱིས་ཤིག མི་རེ་རེ་སྲོག་ཐར་བར་བྲོས་ནས་དཀོན་མཆོག་ཡ་ཝཱེའི་ཐུགས་ཁྲོ་དྲག་པོ་ལ་གཡོལ་བར་གྱིས་ཤིག  
\v 46 ཡུལ་ཁམས་སུ་ཐོས་པའི་སྐད་ཆའི་ཕྱིར་དུ་ཁྱོད་ཅག་མ་ཞུམ་མ་འཇིགས་ཤིག ཅི་ལ་ཞེ་ན། ལོ་འདིའི་ནང་དུ་སྐད་ཆ་ཞིག་དང་། ལོ་རྗེས་མར་ཡང་སྐད་ཆ་གཞན་ཞིག་ཐོས་འོང་སྟེ། ཡུལ་ཁམས་སུ་དྲག་ཤུགས་འབྱུང་བ་དང་འགོ་དཔོན་གྱིས་འགོ་དཔོན་ལ་རྒོལ་བར་འགྱུར།  
\v 47 དེ་བས་ན་ལྟོས་ཤིག དུས་དེ་སླེབས་ལ་ཉེ། ངས་པཱ་པེལ་ལོན་གྱི་བརྐོས་སྐུ་ལ་ཉེས་ཆད་གཅོད་པར་འགྱུར་ཏེ། དེའི་ཡུལ་ཁམས་ཡོངས་རྫོགས་ངོ་ཚ་བར་འགྱུར་ལ། དེའི་བསད་པའི་མི་ཐམས་ཅད་ནི་དེའི་དབུས་སུ་འགྱེལ་བར་འགྱུར།  
\v 48 དུས་དེར། ནམ་མཁའ་དང་ས་གཞི་དང་དེའི་ནང་ཡོད་པ་ཀུན་གྱིས་པཱ་པེལ་ལོན་གྱི་རྐྱེན་གྱིས་དགའ་འབོད་བྱེད་འོང་སྟེ། ཅི་ལ་ཞེ་ན། གཏོར་བརླག་བྱེད་མཁན་ནི་བྱང་ཕྱོགས་ཡུལ་ནས་དེར་འོང་བར་འགྱུར་ཞེས་དཀོན་མཆོག་ཡ་ཝཱེས་གསུངས།  
\v 49 སྔར་པཱ་པེལ་ལོན་གྱིས་ཇི་ལྟར་ཡེས་ར་ཨེལ་གྱི་བསད་པའི་མི་རྣམས་འགྱེལ་བར་བྱས་ན། དེའི་ཡུལ་ཁམས་ཡོངས་ཀྱི་བསད་པའི་མི་ཐམས་ཅད་ཀྱང་དེ་དང་དེ་བཞིན་པཱ་པེལ་ལོན་དུ་འགྱེལ་བར་འགྱུར་རོ། །   
\s1 པཱ་པེལ་ལོན་དུ་ཡོད་པའི་ཡེས་ར་ཨེལ་པ་རྣམས་ལ་བསྐུར་བའི་འཕྲིན།  
\p
\v 50 རལ་གྲི་ལ་གཡོལ་བ་ཁྱོད་རྣམས་མྱུར་དུ་སོང་ཞིག་དང་། ལངས་ནས་མ་སྡོད་ཅིག རྒྱང་རིང་ཡུལ་ནས་དཀོན་མཆོག་ཡ་ཝཱེ་དྲན་པར་གྱིས། སེམས་སུ་ཡེ་རུ་སཱ་ལེམ་དྲན་གསོ་བྱོས་ཤིག  
\v 51 ངེད་ཅག་གིས་ངན་སྨྲས་ཐོས་པས་ངོ་ཚ་བ་དང་། གདོང་དུ་ངོ་ཚ་ཡིས་བཀང་བ་སྟེ། ཅི་ལ་ཞེ་ན། ཕྱི་ཕྱོགས་པ་རྣམས་དཀོན་མཆོག་ཡ་ཝཱེའི་མཆོད་ཁང་གི་གནས་དམ་པར་ཕྱིན་པས་སོ། །  
\v 52 དེ་བས་ན་ལྟོས་ཤིག དུས་དེ་སླེབས་ལ་ཉེའོ་ཞེས་དཀོན་མཆོག་ཡ་ཝཱེས་གསུངས་ཏེ། ངས་པཱ་པེལ་ལོན་གྱི་བརྐོས་སྐུ་ལ་ཉེས་ཆད་གཅོད་པར་འགྱུར་ཏེ། ཡུལ་ཁམས་ཡོངས་སུ་སྣད་པར་གྱུར་པའི་མི་ཡིས་འཁུན་སྒྲ་འདོན་པར་འགྱུར་ཞེས་དཀོན་མཆོག་ཡ་ཝཱེས་གསུངས།  
\v 53 པཱ་པེལ་ལོན་ནི་ནམ་མཁའ་རུ་འཛེགས་པ་དང་། དེས་རང་གི་མཐོ་ས་རྣམས་བརྟན་པོར་བྱས་ན་ཡང་། ངས་འཇིག་བྱེད་རྣམས་མངགས་ནས་དེར་འགྲོ་བར་བྱའོ་ཞེས་དཀོན་མཆོག་ཡ་ཝཱེས་གསུངས་སོ། །   
\s1 པཱ་པེལ་ལོན་ནུབ་པ།  
\p
\v 54 པཱ་པེལ་ལོན་ནས་ངུ་འབོད་ཅིག་ཐོན་ཏེ། ཀལ་དི་པའི་ཡུལ་ནས་འཇིག་པ་ཆེན་པོའི་སྒྲ་ཞིག་ཐོན།  
\v 55 དཀོན་མཆོག་ཡ་ཝཱེས་པཱ་པེལ་ལོན་ནི་དབེན་སྟོང་དུ་མཛད་ཅིང་། དེའི་ནང་གི་ཅ་ཅོའི་སྒྲ་རྣམས་མེད་པར་མཛད་པས། དགྲ་ཟླས་ཆུ་རྣམས་བཞིན་དུ་རྦ་རླབས་འཕྱུར་ཏེ་ཅ་ཅོ་བསྒྲག་འོང་།  
\v 56 འདི་ནི་འཇོམས་མཁན་རྣམས་པཱ་པེལ་ལོན་གྱི་སྟེང་དུ་བབས་ཏེ། པཱ་པེལ་ལོན་གྱི་དཔའ་བོ་རྣམས་བཟུང་ནས་དེ་དག་གི་གཞུ་རྣམས་དུམ་བུར་བཅག་གོ །ཅི་ལ་ཞེ་ན། དཀོན་མཆོག་ཡ་ཝཱེ་ནི་འཁོན་ལན་སློག་པའི་དཀོན་མཆོག་ལགས་པས། ཁོང་གིས་ངེས་པར་དུ་འཁོན་ལན་སློག་པའོ། །  
\v 57 ཡང་ངས་པཱ་པེལ་ལོན་གྱི་འགོ་དཔོན་དང་མཁས་པ། བཀའ་བློན། བློན་པོ། དཔའ་བོ་བཅས་ཐམས་ཅད་བཟི་རུ་བཅུག་སྟེ། ཁོ་རྣམས་ལ་དུས་གཏན་དུ་གཉིད་འཐིབས་ནས་སད་པར་མི་འགྱུར་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་མཚན་མངའ་བའི་རྒྱལ་པོས་གསུངས་སོ། །  
\v 58 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། པཱ་པེལ་ལོན་གྱི་ཡངས་ཤིང་རྒྱ་ཆེ་བའི་མཁར་རྣམས་ནི་རྩ་བ་ནས་ལོག་ཅིང་། དེའི་མཁར་སྒོ་མཐོན་པོ་རྣམས་མེས་བསྲེག་པར་འགྱུར། མི་རྣམས་ཀྱིས་དཀའ་ལས་ཆེན་པོ་མྱངས་པ་དོན་མེད་དུ་འགྱུར་ཞིང་། མི་རིགས་རྣམས་ཀྱིས་དཀའ་ལས་བྱེད་པ་རྣམས་མེས་བསྲེག་པར་འགྱུར་བས། དེ་དག་ཉམ་ཐག་པའོ། །  
\v 59 ཡ་ཧུ་དཱའི་རྒྱལ་པོ་ཚིད་ཀི་ཡཱས་སྲིད་སྐྱོང་བའི་ལོ་བཞི་པར། མ་སེ་ཡཱའི་ཚ་བོའམ་ནེར་ཡཱའི་བུ་སེ་ར་ཡཱ་ནི་རྒྱལ་པོ་དང་མཉམ་དུ་པཱ་པེལ་ལོན་དུ་སོང་སྟེ། སེ་ར་ཡཱ་ནི་རྒྱལ་པོའི་ཕོ་བྲང་གི་བློན་ཆེན་ཡིན་ནོ། །ལུང་སྟོན་པ་ཡེ་རེམ་ཡཱ་ཡིས་དེ་ལ་བཀའ་བསྒོས་པ་སྟེ།  
\v 60 དེ་ཡང་ཡེ་རེམ་ཡཱ་ཡིས་པཱ་པེལ་ལོན་གྱི་སྟེང་དུ་འབྱུང་བར་འགྱུར་བའི་ཆག་སྒོ་ཐམས་ཅད་དེ། པཱ་པེལ་ལོན་གྱི་སྐོར་དུ་བྲིས་པའི་གསུང་འདི་ཐམས་ཅད་གླེགས་བམ་ནང་དུ་བཀོད་པ་རེད།  
\v 61 ཡེ་རེམ་ཡཱ་ཡིས་སེ་ར་ཡཱ་ལ་འདི་ལྟར། ཁྱེད་རང་པཱ་པེལ་ལོན་དུ་སླེབས་དུས་གླེགས་བམ་འདིའི་ནང་གི་བཀའ་རྣམས་བཀླག་པར་མཛོད་ཅིག  
\v 62 ཡང་ཁྱེད་ཀྱིས་འདི་ལྟར། ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་གནས་འདིའི་སྐོར་ལ་འདི་རུ་མི་དང་དུད་འགྲོ་གང་ཡང་མི་གནས་པར་དུས་རྒྱུན་དུ་སྟོང་བར་ལུས་པའི་ཕྱིར་གནས་འདི་མེད་པར་བྱའོ་ཞེས་གསུངས་པ་ཡིན་ཞེས་སྨྲོས་ཤིག  
\v 63 ཁྱེད་ཀྱིས་མདོ་འདི་བཀླགས་ཚར་རྗེས་དེ་ལ་རྡོ་ཞིག་བཏགས་ནས་ཕི་རཱད་གཙང་པོའི་ནང་དུ་གཡུགས་ནས་འདི་ལྟར།  
\v 64 པཱ་པེལ་ལོན་ནི་དཀོན་མཆོག་ཡ་ཝཱེས་དེའི་སྟེང་དུ་འབེབ་པར་འགྱུར་བའི་ཆག་སྒོ་ཡི་རྐྱེན་གྱིས་འདི་ལྟར་ནུབ་ནས་སླར་ལང་བར་མི་འགྱུར་ཏེ། མི་རྣམས་ཀྱང་ཉམ་ཐག་པར་འགྱུར་རོ་ཞེས་སྨྲོས་ཤིག་ཅེས་གསུངས་པ་དང་། ཡེ་རེམ་ཡཱ་ཡི་གསུང་རྣམས་འདི་ནས་རྫོགས་སོ། །   
\c 52
\cl ལེའུ་ང་གཉིས་པ། 
\toc1 ༄༅། །ལུང་སྟོན་པ་ཡེ་རེམ་ཡཱའི་མདོ། 
\toc2 ཡེ་རེམ་ཡཱ། 
\s1 ཡེ་རུ་སཱ་ལེམ་དགྲ་ལག་ཏུ་ཤོར་བ།  
\p
\v 1 ཚིད་ཀི་ཡཱ་རྒྱལ་པོ་བྱེད་དུས་ལོ་ཉེར་གཅིག་ལོན་ཡོད་དེ། ཡེ་རུ་སཱ་ལེམ་དུ་ལོ་བཅུ་གཅིག་གི་རིང་ལ་རྒྱལ་སྲིད་བསྐྱངས་པ་དང་། ཁོའི་ཡུམ་གྱི་མིང་ལ་ཧ་མུ་ཏལ་ཟེར་ཞིང་། མོ་ནི་ལིབ་ནཱ་པ་ཡེ་རེམ་ཡཱའི་བུ་མོ་ཡིན་ནོ། །  
\v 2 ཚིད་ཀི་ཡཱ་ཡིས་ཡེ་ཧོ་ཡཱ་ཀིམ་གྱིས་གང་ཞིག་སྤྱད་པ་བཞིན། དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་པས།  
\v 3 དཀོན་མཆོག་ཡ་ཝཱེའི་ཐུགས་ཁྲོ་ནི་ཡེ་རུ་སཱ་ལེམ་དང་ཡ་ཧུ་དཱའི་སྟེང་ནས་བབས་ཏེ། ཐ་ན་དེ་རྣམས་ཁོང་ཉིད་ཀྱི་དྲུང་ནས་བསྐྲད་ཅིང་། ཚིད་ཀི་ཡཱ་ཡིས་པཱ་པེལ་ལོན་གྱི་རྒྱལ་པོར་རྒྱབ་འགལ་བྱས་སོ། །   
\p
\v 4 ཁོའི་སྲིད་ལོ་དགུ་པའི་ཟླ་བཅུ་པའི་ཚེས་བཅུ་ཉིན་ལ། པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱིས་དཔུང་ཚོགས་ཁྲིད་དེ་ཡེ་རུ་སཱ་ལེམ་ལ་རྒོལ་བར་འོངས་ནས་མཁར་གྱི་ཕྱོགས་སུ་དམག་སྒར་བཏབ་ཅིང་། གྲོང་ཁྱེར་ལེན་དུ་ཕྱོགས་བཞི་རུ་ས་རགས་བརྩིགས།  
\v 5 རྒྱལ་པོ་ཚིད་ཀི་ཡཱའི་སྲིད་ལོ་བཅུ་གཅིག་པའི་བར་དུ་རྒྱལ་ས་དམག་གིས་བསྐོར་ནས་བསྡད་པ་ལ།  
\v 6 ཟླ་བཞི་པའི་ཚེས་དགུ་ཉིན། གྲོང་ཁྱེར་ནང་གི་མུ་གེ་ནི་ཤིན་ཏུ་ཚབས་ཆེ་ཞིང་། གནས་དེའི་མི་རྣམས་ལ་ཁ་ཟས་ཅི་ཡང་མེད་པར་གྱུར།  
\v 7 དེ་ནས་ལྕགས་རི་གཏོར་བ་དང་། དམག་མི་རྣམས་མཚན་མོའི་དུས་སུ་རྒྱལ་པོའི་སྐྱེད་ཚལ་དང་ཉེ་བའི་མཁར་གཉིས་ཀྱི་བར་སྒོ་ནས་ཕྱི་རུ་བྲོས་ཤིང་། ཀལ་དི་པས་ཕྱོགས་བཞི་ནས་གྲོང་ཁྱེར་བསྐོར་བས་དེ་རྣམས་ཨ་ར་པཱ་རུ་བྲོས་སོ། །  
\v 8 ཀལ་དི་པའི་དམག་དཔུང་གིས་རྒྱལ་པོ་ཚིད་ཀི་ཡཱའི་རྗེས་དེད་ནས་ཡེ་རུ་ཀོའི་ཐང་དུ་ཁོའི་རྗེས་ཆོད་པ་དང་། དེའི་དམག་དཔུང་རྣམས་ཁོ་དང་བྲལ་ནས་ཁ་ཐོར་ཏུ་སོང་།  
\v 9 ཀལ་དི་པས་ཁོ་བཟུང་ནས་ཧ་མཱད་ཀྱི་གནས་རིབ་ལཱ་ཞེས་པར་པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱི་མདུན་དུ་ཁྲིད་པ་དང་། ནེ་བོ་ཀད་ནེ་ཙར་གྱིས་དེ་ལ་ཁྲིམས་ཐག་བཅད་དོ། །  
\v 10 པཱ་པེལ་ལོན་གྱི་རྒྱལ་པོས་ཚིད་ཀི་ཡཱའི་མདུན་དུ་ཁོའི་བུ་རྣམས་བསད་པ་དང་། ཡང་རིབ་ལཱ་རུ་ཡ་ཧུ་དཱའི་སྐུ་དྲག་ཐམས་ཅད་ཀྱང་བསད་པར་མ་ཟད།  
\v 11 ཚིད་ཀི་ཡཱའི་མིག་ཟུང་བཏོན་ནས་ལི་ཡི་སྒྲོག་རྣམས་བརྒྱབ་སྟེ་པཱ་པེལ་ལོན་དུ་ཁྲིད་པ་དང་། མ་ཤི་བར་དུ་བཙོན་ལ་བཅུག་གོ །   
\s1 མཆོད་ཁང་གཏོར་བ།  
\p
\v 12 པཱ་པེལ་ལོན་གྱི་རྒྱལ་པོ་ནེ་བོ་ཀད་ནེ་ཙར་གྱི་སྲིད་ལོ་བཅུ་དགུ་པའི་ཟླ་ལྔ་པའི་ཚེས་བཅུ་ཉིན་ལ། པཱ་པེལ་ལོན་གྱི་རྒྱལ་པོའི་མདུན་དུ་སྐུ་སྲུང་བྱེད་པའི་ནེ་བོ་ཟར་ཨ་དན་བྱ་བ་ཡེ་རུ་སཱ་ལེམ་དུ་སོང་ནས།  
\v 13 ཁོས་དཀོན་མཆོག་ཡ་ཝཱེའི་མཆོད་ཁང་དང་། རྒྱལ་པོའི་ཕོ་བྲང་དང་། ཡེ་རུ་སཱ་ལེམ་གྱི་ཁང་པ་ཐམས་ཅད་དང་ཁང་བརྩེགས་ཐམས་ཅད་མེར་བསྲེགས་སོ། །  
\v 14 ཡང་སྐུ་སྲུང་དམག་དཔོན་གྱི་རྗེས་འབྲང་པ་སྟེ་ཀལ་དི་པའི་དཔུང་ཚོགས་རྣམས་ཀྱིས་ཡེ་རུ་སཱ་ལེམ་གྱི་ཕྱོགས་བཞིའི་མཁར་རྣམས་བཤིགས་པ་དང་།  
\v 15 གྲོང་ཁྱེར་གྱི་ནང་དུ་ལུས་པའི་མི་རྣམས་དང་པཱ་པེལ་ལོན་རྒྱལ་པོར་མགོ་བཏགས་པ་རྣམས། དེ་མིན་ཡུལ་མི་ལྷག་ལུས་དང་བཅས་པ་སྐུ་སྲུང་དཔོན་པོ་ནེ་བོ་ཟར་ཨ་དན་གྱིས་བཙན་ཁྲིད་བྱས་སོ། །  
\v 16 ཡིན་ནའང་སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་ཡུལ་དེའི་དབུལ་པོ་དབུལ་རྐྱང་རྣམས་བསྐྱུར་ནས། དེ་རྣམས་ལ་རྒུན་འབྲུམ་ར་བ་ལེགས་བཅོས་བྱེད་པ་དང་ཞིང་རྨོ་རུ་བཅུག  
\v 17 དཀོན་མཆོག་ཡ་ཝཱེའི་མཆོད་ཁང་དུ་ཡོད་པའི་ལི་ཡི་ཀ་བ་རྣམས་དང་། དཀོན་མཆོག་ཡ་ཝཱེའི་མཆོད་ཁང་ནང་ཡོད་པའི་སྟེགས་བུ་རྣམས། ལི་ཡི་རྒྱ་མཚོ་ཞེས་པའི་འཁྲུད་གཞོང་བཅས་ནི་ཀལ་དི་པས་དུམ་བུར་བཅག་ནས་ལི་རྣམས་པཱ་པེལ་ལོན་དུ་ཁྱེར།  
\v 18 དེ་དག་གིས་སླ་ང་དང་མེ་ཁྱེམ། སྡོང་རས་གཅོད་བྱེད་སྐམ་ཆུང་། མཆོད་སྡེར། ཁེམ་བུ། དེ་མིན་མཆོད་ཁང་ནང་དུ་བཀོལ་བའི་ལི་ཡི་སྣོད་ཐམས་ཅད་དང་།  
\v 19 ཡང་བུམ་པ་དང་མེ་ཕོར། ཕོར་བ། གཞོང་པ། སྒྲོན་སྟེགས། ཁེམ་བུ། སྐྱེམས་མཆོད་འབུལ་བྱེད་ཨུ་ལུ་བཅས་གསེར་དངུལ་གང་ཡིན་གྱི་སྣོད་ཐམས་ཅད་སྐུ་སྲུང་དམག་དཔོན་གྱིས་ཁྱེར་སོང་ངོ་། །  
\v 20 རྒྱལ་པོ་སོ་ལོ་མོན་གྱིས་དཀོན་མཆོག་ཡ་ཝཱེའི་མཆོད་ཁང་ནང་དུ་བཟོས་པའི་ཀ་བ་གཉིས་པོ་དང་། ལི་ཡི་རྒྱ་མཚོ་གཅིག་དང་། དེའི་ཞབས་རའི་འོག་ཏུ་ཡོད་པའི་ལི་ཡི་གླང་བཅུ་གཉིས་དང་བཅས་པའི་ལི་ཡི་ལྗིད་ཚད་ནི་གཞལ་དུ་མེད་པ་ཡིན་ཏེ།  
\v 21 ཀ་བ་རེ་རེའི་མཐོ་ཚད་ལ་ཁྲུ་བཅོ་བརྒྱད་དང་། མཐུག་ཚད་ལ་སོར་བཞི་དང་། མུ་ཁྱུད་ལ་ཁྲུ་བཅུ་གཉིས་ཡིན་ལ། དཀྱིལ་ནི་སྟོང་པ་ཡིན་ནོ། །  
\v 22 ཀ་བའི་སྟེང་དུ་ལི་ཡི་ཀ་གཞུ་ཡོད་ལ། ཀ་གཞུ་རེ་རེའི་མཐོ་ཚད་ནི་ཁྲུ་ལྔ་ཡིན་པ་དང་། ཀ་གཞུའི་མཐའ་རུ་ལི་ཡིས་གྲུབ་པའི་དྲ་བ་དང་སེ་འབྲུས་བརྒྱན་ཡོད་དེ། ཀ་བ་ཅིག་ཤོས་དེ་ཡང་དེ་དང་དེ་བཞིན་དུ་སེ་འབྲུས་བརྒྱན་ཡོད་དོ། །  
\v 23 ཡང་ཀ་བའི་ཕྱོགས་བཞི་རུ་སེ་འབྲུ་དགུ་བཅུ་གོ་དྲུག་གིས་བརྒྱན་ཡོད་ལ། དེ་དག་ནི་དྲ་བའི་མཐའ་རུ་ཡོད་དེ། བསྡོམས་པས་སེ་འབྲུ་བརྒྱ་ཡོད་དོ། །   
\s1 ཡ་ཧུ་དཱ་པ་རྣམས་པཱ་པེལ་ལོན་དུ་བཙོན་ལ་ཁྲིད་པ།  
\p
\v 24 སྐུ་སྲུང་དམག་དཔོན་གྱིས་མཆོད་དཔོན་ཆེན་པོ་སེ་ར་ཡཱ་དང་། མཆོད་དཔོན་གཉིས་པ་ཟེ་ཕན་ཡཱ་དང་། སྒོ་སྲུང་མི་གསུམ་བཅས་བཙན་ཁྲིད་བྱས་པ་དང་།  
\v 25 ཡང་གྲོང་ཁྱེར་ནས་དམག་མིའི་བཀོད་འདོམས་པ་ཞིག་དང་། གྲོང་ཁྱེར་དུ་རྒྱལ་པོའི་སློབ་སྟོན་པ་མི་བདུན་དང་། ཡུལ་མིའི་དམག་དཔོན་གྱི་དྲུང་ཡིག་པ་རྣམས་དང་། དེ་མིན་གྲོང་ཁྱེར་ནང་རྙེད་པའི་མི་རྣམས་ལས་སྐྱེས་པ་དྲུག་ཅུ་དང་བཅས་པའང་ཁྲིད།  
\v 26 སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་དེ་དག་བཟུང་ནས་རིབ་ལཱ་རུ་པཱ་པེལ་ལོན་གྱི་རྒྱལ་པོའི་དྲུང་དུ་ཁྲིད་པ་ན།  
\v 27 པཱ་པེལ་ལོན་གྱི་རྒྱལ་པོས་ཧ་མཱད་ཡུལ་གྱི་རིབ་ལཱ་རུ་དེ་དག་བསད་དོ། །དེ་ལྟར་ཡ་ཧུ་དཱ་པ་རྣམས་རང་ཡུལ་ནས་བཙོན་དུ་ཁྲིད་དོ། །  
\v 28 ནེ་བོ་ཀད་ནེ་ཙར་གྱིས་བཙོན་དུ་ཁྲིད་པའི་མི་གྲངས་ནི་འདི་ལྟ་སྟེ། ཁོང་གིས་རྒྱལ་སྲིད་སྐྱོང་བའི་ལོ་བདུན་པར་ཡ་ཧུ་དཱ་པ་མི་སུམ་སྟོང་བརྒྱ་མེད་ཉེར་གསུམ་བཙོན་དུ་ཁྲིད།  
\v 29 ནེ་བོ་ཀད་ནེ་ཙར་གྱི་སྲིད་ལོ་བཅོ་བརྒྱད་པར་ཡེ་རུ་སཱ་ལེམ་ནས་མི་བརྒྱད་བརྒྱ་དང་སུམ་ཅུ་སོ་གཉིས་བཙོན་དུ་ཁྲིད།  
\v 30 ནེ་བོ་ཀད་ནེ་ཙར་གྱི་སྲིད་ལོ་ཉེར་གསུམ་པར་སྐུ་སྲུང་དམག་དཔོན་ནེ་བོ་ཟར་ཨ་དན་གྱིས་ཡ་ཧུ་དཱ་པ་རྣམས་ལས་མི་བདུན་བརྒྱ་དང་བཞི་བཅུ་ཞེ་ལྔ་བཙོན་དུ་ཁྲིད་དེ། བསྡོམས་པས་མི་བཞི་སྟོང་དྲུག་བརྒྱ་ཡོད་དོ། །  
\v 31 ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིན་བཙོན་དུ་བཟུང་བའི་ལོ་སུམ་ཅུ་སོ་བདུན་པ་སྟེ། པཱ་པེལ་ལོན་གྱི་རྒྱལ་པོ་ཨེ་ཝིལ་མེ་རོ་དག་བྱ་བ་རྒྱལ་པོར་བསྐོས་པའི་ལོ་དང་པོ་ཡི་ཟླ་བཅུ་གཉིས་པའི་ཚེས་ཉེར་ལྔ་ཉིན། ཁོས་ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིན་གྱི་དབུ་འཕང་མཐོ་བར་བྱས་ཏེ་བཙོན་གྲོལ་བཏང་ནས།  
\v 32 ཡང་ཁོ་ལ་བརྩེ་བའི་གཏམ་སྨྲས་ཤིང་། ཁོའི་གོ་ས་ནི་ཁོང་དང་མཉམ་དུ་པཱ་པེལ་ལོན་དུ་ཡོད་པའི་རྒྱལ་པོ་རྣམས་ལས་མཐོ་བར་བྱས།  
\v 33 ཡང་ཁོ་ལ་བཙོན་གོས་ཕུད་དུ་བཅུག་པ་དང་མི་ཚེ་གང་པོར་པཱ་པེལ་ལོན་གྱི་རྒྱལ་པོའི་དྲུང་དུ་ཁ་ཟས་རོལ་བར་བཅུག  
\v 34 པཱ་པེལ་ལོན་གྱི་རྒྱལ་པོས་དེ་ལ་རྒྱུན་མཁོའི་ཁ་ཟས་གནང་སྟེ། ཁོང་འཆི་བའི་བར་དུ་ཉིན་རེ་བཞིན་ཚེ་གང་པོར་དེ་ལྟར་བྱས་སོ།། །།