\id JDG - NTB 
\h ཁྲིམས་དཔོན། 
\toc1 ༄༅། །ཁྲིམས་དཔོན་གྱི་མདོ། 
\toc2 ཁྲིམས་དཔོན། 
\mt1 ༄༅། །ཁྲིམས་དཔོན་གྱི་མདོ།  
\imt1 ཁྲིམས་དཔོན་གྱི་མདོ་ཞེས་བྱ་བའི་ངོ་སྤྲོད་མདོར་བསྡུས།  
\is1 ཁ་བྱང་དང་ལོ་རྒྱུས་རྒྱབ་ལྗོངས།  
\ipi ཁྲིམས་དཔོན་ཞེས་པའི་ཁ་བྱང་འདི་ནི་ཡེས་ར་ཨེལ་པའི་ཁྲིམས་དཔོན་རྣམས་ཀྱིས་སྲིད་བསྐྱངས་པའི་སྐབས་སུ་བཏགས་པ་ཡིན། ཡོ་ཤུ་ཨ་སྐུ་གྲོངས་པའི་རྗེས་སུ་ཁྲིམས་དཔོན་དེ་དག་གིས་ཡེས་ར་ཨེལ་གྱི་རྒྱལ་རྒྱུད་རིང་ལུགས་མ་བྱུང་བར་དུ་ཡེས་ར་ཨེལ་པ་རྣམས་ལ་སྲིད་བསྐྱངས་པ་རེད། ཡེས་ར་ཨེལ་པ་རྣམས་ལ་ཁྲིམས་དཔོན་ཡོད་པའི་རྒྱུ་མཚན་ལེའུ་གཉིས་པའི་ཚིག་རྐང་བཅུ་དྲུག་པར་བཀོད་ཡོད་དེ། དཀོན་མཆོག་ཡ་ཝཱེས་ཁོ་ཚོའི་དོན་དུ་ཁྲིམས་དཔོན་བསྐོས་ཤིང་། ཁྲིམས་དཔོན་གྱིས་ཁོ་རྣམས་འཕྲོག་བཅོམ་བྱེད་མཁན་གྱི་ལག་ནས་ཐར་བར་བྱས་ཞེས་གསུངས་ཡོད། གཞུང་འདིའི་ནང་དུ་ཡོ་ཤུ་ཨ་སྐུ་གཤེགས་པ་དང་སཱ་མུ་ཨེལ་གྱིས་སྲིད་བསྐྱངས་པའི་དུས་དེའི་བར་གྱི་ཡེས་ར་ཨེལ་པའི་ལོ་རྒྱུས་བཀོད་ཡོད།  
\is1 ཡི་གེར་འགོད་མཁན་དང་འགོད་དུས།  
\ipi ཡེས་ར་ཨེལ་གྱི་རིག་གཞུང་ལྟར་ན། གཞུང་འདི་ཡི་གེར་འགོད་མཁན་ནི་སཱ་མུ་ཨེལ་ཡིན་ཞེས་བརྗོད་ཡོད་ནའང་། ཡི་གེར་འགོད་མཁན་ངོ་མ་སུ་ཡིན་ཐག་གིས་མི་ཆོད། ཅིག་བྱས་ན་སཱ་མུ་ཨེལ་གྱིས་ཁྲིམས་དཔོན་རྣམས་ཀྱི་སྐབས་དེའི་ལོ་རྒྱུས་ཡིག་ཆ་བསྡུ་སྒྲིག་བྱས་ནས་ཉར་ཚགས་བྱས་ཡོད་པ་དང་། ལུང་སྟོན་པ་ཁ་ཤས་ཀྱིས་ཡིག་ཆ་དེ་དག་གི་མ་ཕྱི་ཇི་བཞིན་ཡི་གེར་བཀོད་པ་ཡིན་ཀྱང་སྲིད། དེའི་སྐོར་སྔོན་རབས་དང་པོའི་ལེའུ་ཉེར་དགུ་པའི་ཚིག་རྐང་ཉེར་དགུ་ལ་གཟིགས་རོགས། གཞུང་འདི་ཡི་གེར་བཀོད་པའི་ལོ་ཚིགས་ནི་སྤྱི་ལོ་སྔོན་གྱི་ལོ་ཆིག་སྟོང་གི་རྗེས་སུ་ཡིན་པར་གདོན་མི་ཟ།  
\is1 བརྗོད་སྙིང་དང་གསུང་འཕྲིན།  
\ipi ཕྱོགས་གཅིག་ནས་ཁྲིམས་དཔོན་གྱི་གཞུང་དུ་སྐབས་དེར་ཡང་དང་བསྐྱར་དུ་བྱུང་བའི་ལྟ་ལོག་པའི་རྐྱེན་གྱིས་དཀོན་མཆོག་གིས་ཁོ་རྣམས་ལ་ཉེས་ཆད་བཅད་པ་དང་། ཕྱོགས་གཞན་ཞིག་ནས། དཀའ་སྡུག་དང་ཕྲད་པའི་སྐབས་སུ་དཀོན་མཆོག་ལ་ཞུ་བ་ནན་གྱིས་ཞུས་ཚུལ་བརྗོད་ཡོད། དེ་བས་དཀོན་མཆོག་གིས་ཁྲིམས་དཔོན་བསྐོས་པ་དང་། ཁྲིམས་དཔོན་རྣམས་བརྒྱུད་ནས་གནོད་འཚེ་གཏོང་མཁན་གྱི་ཕྱི་ཕྱོགས་པ་རྣམས་མེད་པར་མཛད་པར་མ་ཟད་ཡུལ་དེ་སླར་ཡང་བདེ་ལ་བཀོད། གཞུང་འདི་ལས་ཡང་དང་བསྐྱར་དུ་བྱུང་བའི་གནས་ཚུལ་རྣམས་གསུངས་ཡོད་དེ། དཔེར་ན། ཡེས་ར་ཨེལ་པ་རྣམས་ལྟ་བ་ལོག་པ་དང་ཁོ་ཚོར་གཉའ་གནོན་ཐེབས་པ། སྡུག་བསྔལ་བྱུང་བ། དཀོན་མཆོག་གིས་ཁོ་ཚོ་སྡུག་བསྔལ་དེ་དག་ལས་ཐར་བར་མཛད་པ་བཅས་ཀྱི་སྐོར་བརྗོད་ཡོད། ཁྲིམས་དཔོན་ཞེས་པའི་གཞུང་དུ་ཡེས་ར་ཨེལ་པ་རྣམས་ཀྱིས་བྱ་སྤྱོད་ཅི་ལྟར་སྤེལ་བའི་ཐད། སྐབས་དེར་ཡེས་ར་ཨེལ་གྱི་ཁྲོད་དུ་རྒྱལ་པོ་མེད་ལ། མི་རེ་རེས་གང་འདོད་བཞིན་བྱས་སོ། །ཞེས་ལུང་དྲངས་ཡོད།  
\is1 འཆར་ཟིན།  
\ipi 1. ཡེས་ར་ཨེལ་པ་རྣམས་ཀྱིས་མི་རིགས་གཞན་དག་ཕྱིར་མ་བསྐྲད་པ་དང་དཀོན་མཆོག་སྤངས་པའི་སྐོར། ༼1:1-3:6༽  
\ipi ཀ ས་བཅད་དང་པོ། ༼1:1-2:5༽  
\ipi ཁ། ས་བཅད་གཉིས་པ། ༼2:6-3:6༽  
\ipi 2. རྒྱལ་ཕྲན་རྣམས་ཀྱིས་ཡེས་ར་ཨེལ་ལ་གཉའ་གནོན་བྱས་པ་དང་ཁྲིམས་དཔོན་དག་གིས་དེ་ཚོར་སྲུང་སྐྱོབ་བྱས་པའི་སྐོར། ༼3:7-16:31༽  
\ipi 3. ཆོས་ལུགས་དང་ཀུན་སྤྱོད་ཕྱོགས་ཀྱི་རྙོག་དྲ། ༼17:1-21:25༽  
\ipi ཀ ས་བཅད་དང་པོ། ༼17:1-18:31༽  
\ipi ཁ། ས་བཅད་གཉིས་པ། ༼19:1-21:25༽  
\c 1
\cl ལེའུ་དང་པོ། 
\toc1 ༄༅། །ཁྲིམས་དཔོན་གྱི་མདོ། 
\toc2 ཁྲིམས་དཔོན། 
\s1 ཡ་ཧུ་དཱ་པས་ཀ་ན་ཨན་གྱི་ལྷག་ལུས་རྣམས་ལ་འཐབ་འཛིང་བྱས་པ།  
\p
\v 1 ཡོ་ཤུ་ཨ་ཚེ་ལས་འདས་རྗེས། ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་འདི་ལྟར་ཞུས་པ་སྟེ། ངེད་རྣམས་ལས་སུ་ཞིག་སྔོན་ལ་ཡར་སོང་སྟེ་ཀ་ན་ཨན་པ་རྣམས་ལ་རྒོལ་ནས་ཁོ་ཚོ་དང་འཐབ་འཛིང་བྱེད་འོས་སམ་ཞེས་པ་ལ།  
\v 2 དཀོན་མཆོག་ཡ་ཝཱེས་འདི་སྐད་དུ། ཡ་ཧུ་དཱ་སྔོན་ལ་ཡར་འགྲོ་འོས་ཏེ། ལྟོས་དང་། བདག་གིས་ཡུལ་དེ་ཁོའི་ལག་ཏུ་སྤྲད་ཟིན་ཞེས་གསུངས།  
\v 3 ཡ་ཧུ་དཱ་ཡིས་རང་གི་ཕུ་བོ་སི་མུ་ཨོན་ལ། ཀ་ན་ཨན་པ་རྣམས་དང་འཐབ་འཛིང་བྱེད་པའི་ཕྱིར་ཁྱེད་རང་ང་དང་མཉམ་དུ་ངས་རྒྱན་བླངས་ནས་ཐོབ་པའི་ཡུལ་དེར་འགྲོ་རོགས་ཞུ། རྗེས་སུ་ང་རང་ཡང་ཁྱེད་དང་མཉམ་དུ་ཁྱེད་ཀྱིས་རྒྱན་བླངས་ནས་ཐོབ་པའི་ཡུལ་དེར་འགྲོ་བར་བྱ་ཞེས་སྨྲས་པ་ལ། སི་མུ་ཨོན་ཁོ་དང་མཉམ་དུ་ཕྱིན་ཏོ། །  
\v 4 དེར་ཡ་ཧུ་དཱ་ཡར་ཕྱིན་པ་དང་དཀོན་མཆོག་ཡ་ཝཱེས་ཀ་ན་ཨན་པ་དང་ཕེ་རེ་ཟི་པ་རྣམས་ཁོ་ཚོའི་ལག་ཏུ་སྤྲད་ཅིང་། ཁོ་ཚོས་པེ་ཟེག་ཏུ་མི་ཁྲི་གཅིག་བསད།  
\v 5 ཡང་དེར་ཨ་དོ་ནི་པེ་ཟེག་ལ་ཕྲད་དེ་ཁོ་དང་འཐབ་ནས་ཀ་ན་ཨན་པ་དང་ཕེ་རེ་ཟི་པ་རྣམས་ཕམ་པར་བརྒྱབ།  
\v 6 ཨ་དོ་ནི་པེ་ཟེག་བྲོས་པ་དང་། ཁོ་ཚོས་དེའི་རྗེས་དེད་ནས་བཟུང་ཞིང་རྐང་ལག་གཉིས་ཀའི་མཐེ་བོང་བཅད།  
\v 7 ཨ་དོ་ནི་པེ་ཟེག་གིས། སྔར་རྒྱལ་པོ་བདུན་ཅུ་ཡོད་ཅིང་དེ་དག་གི་རྐང་ལག་གཉིས་ཀའི་མཐེ་བོང་རྣམས་བཅད་པ་དང་། ངའི་གསོལ་ལྕོག་གི་འོག་ཏུ་ཁ་ཟས་ཙག་ཙིག་འཐུ་བ་ཡིན། ད་ནི་དཀོན་མཆོག་གིས་ངས་ཅི་ཞིག་བྱས་པ་བཞིན་དུ་ང་ལ་ལན་གནང་བྱུང་ཞེས་སྨྲས། དེ་ནས་ཁོ་ཚོས་ཨ་དོ་ནི་པེ་ཟེག་ཁོ་རང་ཡེ་རུ་སཱ་ལེམ་དུ་ཁྲིད་པ་དང་ཁོ་དེ་རུ་ཤིའོ། །  
\v 8 ཡ་ཧུ་དཱ་པ་རྣམས་ཀྱིས་ཡེ་རུ་སཱ་ལེམ་ལ་དམག་བརྒྱབ་ནས་གྲོང་ཁྱེར་བླངས་པ་དང་། གྲོང་ཁྱེར་ནང་གི་མི་རྣམས་ལ་རལ་གྲིས་བརྒྱབ་པར་མ་ཟད་གྲོང་ཁྱེར་མེར་བསྲེགས།  
\v 9 དེ་ནས་ཡ་ཧུ་དཱ་པ་རྣམས་མར་སོང་སྟེ་རི་ཁུལ་དང་ནེ་གུབ་ཡུལ། རི་ཀླུང་བཅས་སུ་གནས་པའི་ཀ་ན་ཨན་པ་རྣམས་དང་འཐབ་འཛིང་བྱས།  
\v 10 ཡ་ཧུ་དཱ་པ་རྣམས་སོང་ནས་ཧེབ་རོན་དུ་གནས་པའི་ཀ་ན་ཨན་པ་རྣམས་ལ་རྒོལ་ཞིང་། ཤེ་ཤཱ་ཨི་དང་ཨ་ཧི་མན། ཐལ་མ་ཨི་བཅས་ཕམ་པར་བརྒྱབ། ཧེབ་རོན་ལ་སྔོན་ཆད་ཀིར་ཡཱད་ཨར་པཱ་ཞེས་བྱའོ། །  
\v 11 ཁོ་ཚོ་དེ་ནས་སོང་སྟེ་དི་བིར་དུ་གནས་པ་རྣམས་ལ་ཕར་རྒོལ་བྱས། དི་བིར་ལ་སྔར་ཀིར་ཡཱད་སེ་ཕེར་ཞེས་འབོད་པ་ཡིན།  
\v 12 ཀཱ་ལེབ་ཀྱིས། སུ་ཞིག་གིས་ཀིར་ཡཱད་སེ་ཕེར་ལ་དམག་བརྒྱབ་ནས་གྲོང་ཁྱེར་འཕྲོག་ནུས་ན། ངས་རང་གི་བུ་མོ་ཨག་ས་དེའི་ཆུང་མར་སྟེར་བར་བྱ་ཞེས་སྨྲས།  
\v 13 ཀཱ་ལེབ་ཀྱི་ནུ་བོ་སྟེ་ཀེ་ན༌ཟཱ་ཡི་བུ་ཨོད་ནི་ཨེལ་གྱིས་གྲོང་ཁྱེར་དེ་ཕྲོགས་པས། ཀཱ་ལེབ་ཀྱིས་བུ་མོ་ཨག་ས་དེར་ཆུང་མར་བྱིན།  
\v 14 ཨག་ས་བག་མར་གཏོང་བའི་སྐབས་སུ། སྐྱེས་པར་ཁོ་མོའི་ཕ་ལས་ཞིང་ས་ཞིག་སློང་དགོས་པར་བསྐུལ་ཞིང་། ཨག་ས་བོང་བུ་ནས་བབས་མ་ཐག་ཀཱ་ལེབ་ཀྱིས་ཁོ་མོར། ཁྱོད་ལ་ཅི་ཞིག་དགོས་སམ་ཞེས་དྲིས་པ་ལ།  
\v 15 ཁོ་མོས། ཁྱེད་ཀྱིས་ང་ལ་བྱིན་རླབས་གནང་བར་མཛོད། ཁྱེད་ཀྱིས་ང་རང་ནེ་གུབ་ཡུལ་དུ་བཀོད་སྒྲིག་མཛད་པས་ང་ལ་ཆུ་མིག་རྣམས་ཀྱང་གནང་རོགས་ཞུ་ཞེས་ཞུས་པ་དང་། ཀཱ་ལེབ་ཀྱིས་སྟོད་སྨད་གཉིས་ཀྱི་ཆུ་མིག་རྣམས་ཁོ་མོར་གནང་ངོ་། །   
\s1 ཡ་ཧུ་དཱ་དང་པེན་ཡཱ་མེན་གཉིས་ལ་རྒྱལ་ཁ་ཐོབ་པ།  
\p
\v 16 མོ་ཤེའི་སྒྱུག་པོ་ནི་ཀེ་ནེ་པ་ཡིན་ཞིང་། ཁོའི་བུ་རྒྱུད་རྣམས་ཡ་ཧུ་དཱ་པ་རྣམས་དང་མཉམ་དུ་ཤིང་ཏ་ལའི་གྲོང་ཁྱེར་དང་བྲལ་ནས་ཨ་རད་དང་ཉེ་བའི་ནེ་གུབ་ཡུལ་གྱི་ཡ་ཧུ་དཱའི་དབེན་སྟོང་དུ་སོང་སྟེ་དམངས་ཁྲོད་དུ་བསྡད།  
\v 17 ཡ་ཧུ་དཱ་དང་ཁོའི་ཕུ་བོ་སི་མུ་ཨོན་གཉིས་ཀ་མཉམ་དུ་སོང་ནས། ཚེ་པད་དུ་གནས་པའི་ཀ་ན་ཨན་པ་རྣམས་བསད་ཅིང་། གྲོང་ཁྱེར་མེད་པར་བཟོས་པ་དང་། གྲོང་ཁྱེར་དེའི་མིང་ལ་ཧོར་མཱ་ \f + \ft ཧོར་མཱ་ཞེས་པ་ནི་གཏོར་བརླག་བཏང་བའི་དོན་ལ་འཇུག\f*ཞེས་བྱའོ། །  
\v 18 ཡ་ཧུ་དཱས་གཱ་ཟཱ་དང་དེའི་མངའ་ཁོངས། ཨ་ཤཱ་ཀེ་ལོན་དང་དེའི་མངའ་ཁོངས། ཨེག་རོན་དང་དེའི་མངའ་ཁོངས་བཅས་ཀྱང་བླངས།  
\v 19 དཀོན་མཆོག་ཡ་ཝཱེ་ནི་ཡ་ཧུ་དཱ་དང་མཉམ་དུ་བཞུགས་པས། ཡ་ཧུ་དཱས་རི་ཁུལ་གྱི་མི་རྣམས་ཕར་བསྐྲད་མོད། ཐང་གི་མི་རྣམས་ལ་ལྕགས་ཀྱི་ཤིང་རྟ་ཡོད་པས་དེ་རྣམས་ཕར་སྐྲོད་མ་ནུས་སོ། །  
\v 20 ཡ་ཧུ་དཱ་པ་རྣམས་ཀྱིས་མོ་ཤེས་ཇི་ལྟར་གསུངས་པ་ནང་བཞིན་ཧེབ་རོན་ཡུལ་ནི་ཀཱ་ལེབ་ལ་སྤྲད་པ་དང་། ཀཱ་ལེབ་ཀྱིས་དེ་ནས་ཨ་ནག་གི་རིགས་རྒྱུད་གསུམ་ཕར་བསྐྲད།  
\v 21 པེན་ཡཱ་མེན་གྱི་མི་རྣམས་ཀྱིས་ཡེ་རུ་སཱ་ལེམ་དུ་གནས་པའི་ཡེ་བུ་སི་པ་རྣམས་ཕར་མ་བསྐྲད་ཅིང་། ད་ལྟའི་བར་དུ་ཡེ་བུ་སི་པ་རྣམས་སྔར་བཞིན་ཡེ་རུ་སཱ་ལེམ་དུ་པེན་ཡཱ་མེན་གྱི་མི་རྣམས་དང་མཉམ་དུ་གནས་སོ། །   
\s1 ཨེ་ཕཱར་ཡིམ་དང་མཱ་ན་ཤེ་གཉིས་ཀྱིས་པེད་ཨེལ་བླངས་པ།  
\p
\v 22 ཡོ་སེབ་ཀྱི་ཁྱིམ་རྒྱུད་ཡར་སོང་སྟེ་པེད་ཨེལ་ལ་རྒོལ་ཞིང་། དཀོན་མཆོག་ཡ་ཝཱེ་ཁོ་རྣམས་དང་མཉམ་དུ་བཞུགས་སོ། །  
\v 23 ཡོ་སེབ་ཁྱིམ་རྒྱུད་ཀྱིས་མི་མངགས་ཏེ་པེད་ཨེལ་ལ་ལྐོག་ཞིབ་བྱེད་དུ་ཕྱིན་པ་དང་། སྔར་གྲོང་ཁྱེར་དེའི་མིང་ལ་ལོ་ཟི་ཞེས་བྱ།  
\v 24 ལྟ་ཉུལ་པ་རྣམས་ཀྱིས་མི་ཞིག་གྲོང་ཁྱེར་ནས་ཕྱིར་ཐོན་འོང་བ་མཐོང་སྟེ་མི་དེ་ལ། ཁྱོད་ཀྱིས་གྲོང་ཁྱེར་ནང་དུ་འགྲོ་བའི་ལམ་སྟོན་དང་ངེད་རྣམས་ཀྱིས་ཁྱོད་རང་དྲིན་གྱིས་སྐྱོང་བར་བྱ་ཞེས་སྨྲས་པ་ལ།  
\v 25 མི་དེས་གྲོང་ཁྱེར་ནང་དུ་འགྲོ་བའི་ལམ་ཁོ་རྣམས་ལ་བསྟན་ཅིང་། ཁོ་ཚོས་གྲོང་ཁྱེར་ནང་གི་མི་རྣམས་ལ་རལ་གྲིས་བརྒྱབ་མོད། འོན་ཀྱང་མི་དེ་དང་དེའི་ཁྱིམ་མི་ཚང་མ་བཏང་ངོ་། །  
\v 26 མི་དེ་ཧེད་པའི་ཡུལ་དུ་ཕྱིན་ཅིང་གྲོང་ཁྱེར་ཞིག་བརྩིགས་ནས་མིང་ལ་ལོ་ཟི་ཞེས་བཏགས་པ་དང་། གྲོང་ཁྱེར་དེའི་མིང་ལ་ད་ལྟའང་དེ་སྐད་འབོད་དོ། །   
\s1 ཡེས་ར་ཨེལ་པ་རྣམས་ཀྱིས་ཕྱིར་མ་བསྐྲད་པའི་མི།  
\p
\v 27 མཱ་ན་ཤེ་ཡིས་པེད་ཤེ་ཨན་དང་དེའི་གྲོང་རྡལ་ལ་གཏོགས་པའི་མི་རྣམས་དང་། ཐ་ཨ་ནག་དང་དེའི་གྲོང་རྡལ་ལ་གཏོགས་པའི་མི་རྣམས། དཱོར་དང་དེའི་གྲོང་རྡལ་ལ་གཏོགས་པའི་མི་རྣམས། ཡིབ་ལེ་ཨམ་དང་དེའི་གྲོང་རྡལ་ལ་གཏོགས་པའི་མི་རྣམས། མེ་གིད་དོ་དང་དེའི་གྲོང་རྡལ་ལ་གཏོགས་པའི་མི་རྣམས་བཅས་ཕར་མ་བསྐྲད་མོད། འོན་ཀྱང་ཀ་ན་ཨན་པ་རྣམས་ཨུ་ཚུགས་ཀྱིས་ཡུལ་དེ་དག་ཏུ་བསྡད།  
\v 28 དེ་ལྟར་ཡེས་ར་ཨེལ་སྟོབས་འབྱོར་ལྡན་པར་གྱུར་པའི་ཚེ། ཀ་ན་ཨན་པ་རྣམས་སྡུག་ལས་སུ་སྦྱར་ནའང་དེ་དག་ཡོངས་སུ་མ་བསྐྲད་དོ། །  
\v 29 ཨེ་ཕཱར་ཡིམ་གྱིས་གེ་ཟེར་དུ་གནས་པའི་ཀ་ན་ཨན་པ་རྣམས་ཕྱིར་མ་བསྐྲད་པས། ཀ་ན་ཨན་པ་རྣམས་སྔར་བཞིན་ཨེ་ཕཱར་ཡིམ་གྱི་ཁྲོད་དུ་གེ་ཟེར་དུ་གནས་སོ། །  
\v 30 ཟེ་བུ་ལུན་གྱིས་ཀིད་རོན་གྱི་མི་རྣམས་དང་ན་ཧ་ལོལ་གྱི་མི་རྣམས་ཕྱིར་མ་བསྐྲད་པས། ཀ་ན་ཨན་པ་རྣམས་སྔར་བཞིན་ཟེ་བུ་ལུན་གྱི་ཁྲོད་དུ་གནས་ཤིང་སྡུག་ལས་བྱེད་མཁན་དུ་གྱུར་ཏོ། །  
\v 31 ཨ་ཤེར་གྱིས་ཨག་ཀོ་དང་ཚི་ཏུན་གྱི་མི་རྣམས་དང་། ཨག་ལབ་དང་ཨག་སིབ་ཀྱི་མི་རྣམས། ཧེལ་པཱ་དང་ཨ་པིག རེ་ཧོབ་བཅས་ཀྱི་མི་རྣམས་ཕྱིར་མ་བསྐྲད་པ་དང་།  
\v 32 དེ་ནས་ཨ་ཤེར་པ་རྣམས་ཀྱིས་ཡུལ་དེའི་ཀ་ན་ཨན་པ་རྣམས་ཕྱིར་མ་བསྐྲད་པས་ཁོ་རྣམས་ཀྱི་ཁྲོད་དུ་གནས་སོ། །  
\v 33 ནཱབ་ཐ་ལི་ཡིས་པེད་ཤེ་མེ་སི་དང་པེད་ཨ་ནད་ཀྱི་མི་རྣམས་ཕྱིར་མ་བསྐྲད་པས། ནཱབ་ཐ་ལི་ཡུལ་དེའི་ཀ་ན་ཨན་པ་རྣམས་ཀྱི་ཁྲོད་དུ་གནས། འོན་ཀྱང་པེད་ཤེ་མེ་སི་དང་པེད་ཨ་ནད་ཀྱི་མི་རྣམས་ཁོ་ཚོར་སྡུག་ལས་བྱེད་མཁན་དུ་གྱུར་ཏོ། །  
\v 34 ཨེ་མོར་པ་རྣམས་ཀྱིས་དཱན་གྱི་མི་རྣམས་བཙན་གྱིས་རི་ཁུལ་དུ་དེད་ནས་ཁོ་ཚོ་ཐང་བདེ་ལ་འོང་དུ་མ་བཅུག  
\v 35 ཨེ་མོར་པ་རྣམས་ཨུ་ཚུགས་ཀྱིས་ཧེ་རེ་སི་རི་དང་ཨ་ཡཱ་ལོན། ཤཱ་ཨལ་པིམ་བཅས་སུ་བསྡད་མོད། འོན་ཀྱང་ཡོ་སེབ་ཀྱི་བུ་རྒྱུད་ནི་ཁོ་རྣམས་ལས་རྒྱལ་བས་ཁོ་རྣམས་སྡུག་ལས་བྱེད་མཁན་དུ་གྱུར་ཏོ། །  
\v 36 ཨེ་མོར་པ་རྣམས་ཀྱི་ས་མཚམས་ནི་ཨག་རབ་པིམ་དང་སེ་ལཱ་ནས་གོང་དུ་ཕྱིན་ཏོ། །   
\c 2
\cl ལེའུ་གཉིས་པ། 
\toc1 ༄༅། །ཁྲིམས་དཔོན་གྱི་མདོ། 
\toc2 ཁྲིམས་དཔོན། 
\s1 དཀོན་མཆོག་ཡ་ཝཱེའི་ཕོ་ཉ་པོ་ཀིམ་དུ་མངོན་པ།  
\p
\v 1 དཀོན་མཆོག་ཡ་ཝཱེའི་ཕོ་ཉ་ནི་གིལ་གལ་ནས་ཡར་པོ་ཀིམ་དུ་སླེབས་ཤིང་ཡེས་ར་ཨེལ་པ་རྣམས་ལ། བདག་གིས་ཁྱོད་རྣམས་ཨེ་ཅིབ་ཡུལ་ནས་ཁྲིད་དེ་ཁྱོད་ཅག་གི་མེས་པོ་རྣམས་ལ་མནའ་བསྐྱལ་ནས་ཞལ་བཞེས་གནང་བའི་ཡུལ་འདིར་འོངས་པ་ཡིན། ཡང་ངས་ཁྱོད་རྣམས་དང་བཞག་པའི་ཞལ་ཆད་ནི་ནམ་ཡིན་ཡང་འདོར་བར་མི་བྱ་ཞིང་།  
\v 2 ཁྱོད་རྣམས་ཀྱིས་ཀྱང་ཡུལ་འདིའི་མི་རྣམས་དང་ཁ་ཆད་བཞག་མི་ཆོག་ལ། ཁོ་ཚོའི་མཆོད་ཁྲི་བཤིག་དགོས་ཞེས་གསུངས་ནའང་། ཁྱོད་ཚོས་ངའི་བཀའ་ལ་མ་མཉན་པར་འདི་ལྟར་བྱེད་དོན་ཅི་ཡིན་ནམ།  
\v 3 དེའི་ཕྱིར་ངས་ཡང་ཁྱོད་ཅག་ལ། བདག་གིས་ཁོ་ཚོ་ནི་ཁྱོད་རྣམས་ཀྱི་མདུན་ནས་ཕྱིར་སྐྲོད་པར་མི་བྱ་སྟེ། ཁོ་ཚོ་ནི་ཁྱོད་རྣམས་ཀྱི་རྩིབ་འོག་གི་ཚེར་མ་ལྟ་བུར་འགྱུར་ངེས་ཤིང་། ཁོ་ཚོའི་ལྷ་རྣམས་ནི་ཁྱོད་ཅག་གི་རྙི་རྒྱ་རུ་འགྱུར་ངེས་ཞེས་སྨྲའོ་ཞེས་གསུངས།  
\v 4 དཀོན་མཆོག་ཡ་ཝཱེའི་ཕོ་ཉས་ཡེས་ར་ཨེལ་པ་ཐམས་ཅད་ལ་འདི་ལྟར་སྨྲ་བའི་སྐབས་སུ། འབངས་རྣམས་སྐད་ཆེན་པོས་ངུས་སོ། །  
\v 5 དེ་ནས་ཁོ་ཚོས་ཡུལ་དེའི་མིང་ལ་པོ་ཀིམ་\f + \ft པོ་ཀིམ་ཞེས་པ་ནི་ངུ་བའི་དོན་ཡིན།\f*ཞེས་བཏགས་པ་དང་། མི་རྣམས་ཀྱིས་གནས་དེར་དཀོན་མཆོག་ཡ་ཝཱེ་ལ་མཆོད་པ་ཕུལ་ཏོ། །   
\s1 ཡོ་ཤུ་ཨ་ཚེ་ལས་འདས་པ།  
\p
\v 6 ཡོ་ཤུ་ཨ་ཡིས་ཡེས་ར་ཨེལ་གྱི་འབངས་རྣམས་མངགས་པ་དང་། ཁོ་ཚོ་རང་རང་གི་ས་སྐལ་དུ་སོང་ནས་ས་བཟུང་བའོ། །  
\v 7 ཡོ་ཤུ་ཨ་གསོན་པའི་དུས་ཀུན་དང་ཡོ་ཤུ་ཨ་ཚེ་ལས་འདས་རྗེས། དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ཀྱི་དོན་དུ་མཛད་པའི་དོན་ཆེན་ཐམས་ཅད་མཇལ་བའི་རྒན་པོ་རྣམས་ད་དུང་ཡོད་པའི་དུས་ཡོངས་སུ། འབངས་རྣམས་ཀྱིས་དཀོན་མཆོག་ཡ་ཝཱེ་ལ་བསྙེན་བཀུར་ཞུས་སོ། །  
\v 8 དཀོན་མཆོག་ཡ་ཝཱེའི་ཞབས་ཕྱི་སྟེ་ནུན་གྱི་བུ་ཡོ་ཤུ་ཨ་དགུང་ལོ་བརྒྱ་དང་བཅུ་རུ་སོན་ནས་ཚེ་ལས་འདས་པ་དང་།  
\v 9 ཡེས་ར་ཨེལ་པས་ཁོང་ནི་ཁོང་གི་ས་སྐལ་གྱི་མངའ་ཁོངས་ཏེ། གཱ་ཨ་སི་རི་བོའི་བྱང་ཕྱོགས་སུ་ཨེ་ཕཱར་ཡིམ་རི་ཁུལ་གྱི་ཐིམ་ནད་ཧེ་རེ་སི་རུ་དུར་ལ་སྦས།  
\v 10 དུས་རབས་དེའི་མི་ཐམས་ཅད་ཀྱང་རང་རང་གི་མེས་པོ་རྣམས་ཀྱི་དྲུང་དུ་འཛོམས་པ་དང་། རྗེས་སུ་དུས་རབས་གསར་པའི་མི་རྣམས་བྱུང་ཞིང་དེ་དག་གིས་དཀོན་མཆོག་ཡ་ཝཱེ་མི་ཤེས་ལ། དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ཀྱི་ཕྱིར་མཛད་པའི་དོན་རྣམས་ཀྱང་མི་ཤེས་སོ། །   
\s1 ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་དོར་བ།  
\p
\v 11 ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་ཅིང་། པཱ་ཨལ་རྣམས་ལ་བསྙེན་བཀུར་བྱས་པ་དང་།  
\v 12 ཁོ་ཚོ་ཨེ་ཅིབ་ཡུལ་ནས་ཕྱིར་ཁྲིད་མཁན་ཡ་ཝཱེ་སྟེ་ཁོ་ཚོའི་མེས་པོ་རྣམས་ཀྱི་དཀོན་མཆོག་བསྐྱུར་ཏེ། ལྷ་གཞན་པ་སྟེ་ཉེ་འཁོར་གྱི་མི་སྡེ་དག་གི་ལྷ་རྣམས་ལ་ཕྱག་བཙལ་ནས་དཀོན་མཆོག་ཡ་ཝཱེའི་ཐུགས་སེམས་དཀྲུགས་པར་མ་ཟད།  
\v 13 དཀོན་མཆོག་ཡ་ཝཱེ་བསྐྱུར་ནས་པཱ་ཨལ་དང་ཨ་ཤཱ་ཏ་རོད་ལ་བསྙེན་བཀུར་བྱས་སོ། །  
\v 14 དཀོན་མཆོག་ཡ་ཝཱེ་ཡེས་ར་ཨེལ་པ་རྣམས་ལ་ཐུགས་ཁྲོས་ནས། ཁོ་རྣམས་འཕྲོག་བཅོམ་བྱེད་མཁན་གྱི་ལག་ཏུ་སྤྲད་ནས་དེ་དག་གིས་ཁོ་རྣམས་ལ་འཕྲོག་བཅོམ་བྱས་པ་དང་། ཡང་ཁོ་རྣམས་མཐའ་འཁོར་གྱི་དགྲ་ཟླའི་ལག་ཏུ་སྤྲད་ཅིང་། ཐ་ན་དེ་རྣམས་དགྲ་བོའི་མདུན་དུ་ཚུགས་མ་ཐུབ་བོ། །  
\v 15 ཁོ་རྣམས་གང་དུ་སོང་ནའང་དཀོན་མཆོག་ཡ་ཝཱེས་བཀའ་ཇི་ལྟར་གསུངས་པ་དང་ཡང་ཁོང་གིས་ཁོ་རྣམས་ལ་ཇི་ལྟར་མནའ་བཞེས་པ་བཞིན་དུ། བགེགས་བར་ཆད་ཀྱིས་ཁོ་རྣམས་ལ་རྒོལ་བས། ཁོ་ཚོས་དཀའ་སྡུག་ཆེན་པོ་མྱངས།   
\s1 དཀོན་མཆོག་ཡ་ཝཱེས་ཁྲིམས་དཔོན་རྣམས་བསྐོས་པ།  
\p
\v 16 དཀོན་མཆོག་ཡ་ཝཱེས་ཁོ་ཚོའི་དོན་དུ་ཁྲིམས་དཔོན་རྣམས་བསྐོས་ཤིང་། ཁྲིམས་དཔོན་གྱིས་ཁོ་རྣམས་འཕྲོག་བཅོམ་བྱེད་མཁན་གྱི་ལག་ནས་ཐར་བར་བྱས།  
\v 17 ཡིན་ནའང་ཁོ་ཚོས་ཁྲིམས་དཔོན་གྱི་བཀའ་ལ་མི་ཉན་པར་ལྷ་གཞན་གྱི་རྗེས་སུ་འབྲངས་ཏེ་དེར་ཕྱག་བཙལ་ནས་ལོག་གཡེམ་བྱས་པ་དང་། མྱུར་བ་མྱུར་དུ་ཁོ་ཚོའི་མེས་པོ་རྣམས་འགྲིམས་པའི་ལམ་དང་བྲལ་ཏེ། ཁོ་ཚོའི་མེས་པོ་རྣམས་ཀྱིས་དཀོན་མཆོག་ཡ་ཝཱེའི་བཀའ་བརྩི་སྲུང་བྱེད་པ་བཞིན་དུ་མ་ཡིན་ནོ། །  
\v 18 དཀོན་མཆོག་ཡ་ཝཱེས་ཁོ་ཚོའི་དོན་དུ་ཁྲིམས་དཔོན་བསྐོས་ཤིང་དེ་རྣམས་དང་མཉམ་དུ་བཞུགས། ཁྲིམས་དཔོན་རྣམས་འཚོ་བཞུགས་ཡོད་པའི་སྐབས་སུ་དཀོན་མཆོག་ཡ་ཝཱེས་ཁོ་རྣམས་དགྲ་བོའི་ལག་ནས་ཐར་བར་མཛད་པ་སྟེ། ཅི་ལ་ཞེ་ན། ཁོ་རྣམས་ཀྱིས་མནར་གཅོད་དང་གནོད་འཚེ་འོག་ཏུ་སྨྲེ་སྔགས་བཏོན་པས་དཀོན་མཆོག་ཡ་ཝཱེའི་ཐུགས་ལ་སྙིང་རྗེ་འཁྲུངས་པའོ། །  
\v 19 དེ་ནས་ཁྲིམས་དཔོན་ཚེ་ལས་འདས་རྗེས་ཁོ་རྣམས་བློ་ཁ་འགྱུར་ནས་ངན་པའི་ལས་བྱས་ཤིང་ཁོ་ཚོའི་མེས་པོ་རྣམས་ལས་ཀྱང་ཐུ་སྟེ། ལྷ་གཞན་རྣམས་ལ་བསྙེན་བཀུར་བྱས་ནས་ཕྱག་བཙལ་ཞིང་། ཨུ་ཚུགས་ཀྱི་སྤྱོད་ཚུལ་ངན་པ་ནམ་ཡང་རྒྱུན་མ་ཆད་དོ། །  
\v 20 དེ་ནས་དཀོན་མཆོག་ཡ་ཝཱེ་ནི་ཡེས་ར་ཨེལ་པ་རྣམས་ལ་ཐུགས་ཁྲོས་ནས་འདི་སྐད་དུ། མི་རིགས་འདིས་བདག་གིས་ཁོ་ཚོའི་མེས་པོ་རྣམས་ལ་བསྲུང་བར་བསྒོས་པའི་ཞལ་ཆད་དང་འགལ་ཞིང་ངའི་བཀའ་ལ་མི་ཉན་པས།  
\v 21 ཡོ་ཤུ་ཨ་ཚེ་ལས་འདས་པའི་སྐབས་སུ་ལྷག་པའི་མི་རིགས་གཞན་རྣམས་ད་ནི་བདག་གིས་ཁོ་ཚོའི་སྔུན་ནས་ཕྱིར་སྐྲོད་པར་མི་བྱ་སྟེ།  
\v 22 ཅི་ལ་ཞེ་ན། འདི་བརྒྱུད་ནས་ཡེས་ར་ཨེལ་པ་རྣམས་ལ་ཚོད་བགམ་བྱེད་དེ། ཁོ་རྣམས་ཀྱིས་ཁོ་ཚོའི་མེས་པོ་རྣམས་བཞིན་དུ་ངའི་བཀའ་ལ་མཉན་མིན་བལྟ་བར་བྱའོ་ཞེས་གསུངས་སོ། །  
\v 23 དེ་ལྟར་དཀོན་མཆོག་ཡ་ཝཱེས་མི་རིགས་དེ་རྣམས་མྱུར་བ་མྱུར་དུ་ཕྱིར་མ་བསྐྲད་པར་བསྐྱུར་ཅིང་། ཡོ་ཤུ་ཨ་ཡི་ལག་ཏུ་ཡང་མ་སྤྲད་དོ། །   
\c 3
\cl ལེའུ་གསུམ་པ། 
\toc1 ༄༅། །ཁྲིམས་དཔོན་གྱི་མདོ། 
\toc2 ཁྲིམས་དཔོན། 
\s1 ཤུལ་དུ་བསྐྱུར་བའི་མི་རིགས་རྣམས།  
\p
\v 1 དཀོན་མཆོག་ཡ་ཝཱེས་མི་རིགས་འདི་རྣམས་བསྐྱུར་བ་ནི། ཀ་ན་ཨན་པ་རྣམས་དང་འཐབ་པའི་དོན་གང་ཡང་མི་ཤེས་པའི་ཡེས་ར་ཨེལ་པ་རྣམས་ལ་ཚོད་བགམ་བྱེད་པ་དང་།  
\v 2 ཡེས་ར་ཨེལ་པ་རྣམས་ཀྱི་མི་རབས་ཕྱི་མ་དག་གིས་སྔར་མ་ཤེས་པའི་དམག་འཁྲུག་དེ་ཤེས་པ་དང་སློབ་པར་འཇུག་པའི་ཕྱིར་ཡིན།  
\v 3 ཤུལ་དུ་བསྐྱུར་བ་རྣམས་ནི་ཕེ་ལེ་ཤེད་པའི་འགོ་དཔོན་ལྔ་དང་། ཚི་ཏུན་པ་དང་ལེ་པཱ་ནོན་རི་བོར་སྡོད་པའི་ཧེ་བི་པ་རྣམས་འདུས་པའི་ཀ་ན་ཨན་པ་ཐམས་ཅད་ཡིན་ལ། པཱ་ཨལ་ཧེར་མོན་རི་བོ་ནས་ཧ་མཱད་ཀྱི་འཇུག་སྒོའི་བར་དུའོ། །  
\v 4 མི་རིགས་འདི་རྣམས་བསྐྱུར་བ་ནི་ཡེས་ར་ཨེལ་པ་རྣམས་ལ་ཚོད་བགམ་བྱེད་པ་དང་། ཁོ་རྣམས་ཀྱིས་དཀོན་མཆོག་ཡ་ཝཱེས་མོ་ཤེ་བརྒྱུད་ནས་ཁོ་ཚོའི་མེས་པོ་རྣམས་ལ་བསྒོས་པའི་བཀའ་ལ་མཉན་མིན་ཤེས་པའི་ཕྱིར་ཡིན།  
\v 5 ཡེས་ར་ཨེལ་པ་རྣམས་ཀ་ན་ཨན་པ་དང་ཧེད་པ། ཨེ་མོར་པ། ཕེ་རེ་ཟི་པ། ཧེ་བི་པ། ཡེ་བུ་སི་པ་བཅས་ཀྱི་ཁྲོད་དུ་གནས་ཤིང་།  
\v 6 ཁོ་རྣམས་ཀྱི་བུ་མོ་ཆུང་མར་བླངས་ནས། རང་གི་བུ་མོ་རྣམས་ཁོ་ཚོའི་བུ་རྣམས་ལ་མནའ་མར་བྱིན་པར་མ་ཟད། ཁོ་ཚོའི་ལྷ་རྣམས་ལ་བསྙེན་བཀུར་བྱས་སོ། །   
\s1 ཨོད་ནི་ཨེལ།  
\p
\v 7 ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་པ་དང་། ཁོ་རྣམས་ཀྱི་དཀོན་མཆོག་ཡ་ཝཱེ་བརྗེད་ནས་པཱ་ཨལ་དང་ཨ་ཤེ་རཱ་རྣམས་ལ་བསྙེན་བཀུར་བྱས་པས།  
\v 8 དཀོན་མཆོག་ཡ་ཝཱེ་ནི་ཡེས་ར་ཨེལ་པ་རྣམས་ལ་ཐུགས་ཁྲོས་ཤིང་། ཁོ་རྣམས་ཆུ་བོ་གཉིས་ཀྱི་བར་དུ་ཡོད་པའི་ཨ་རམ་ཡུལ་གྱི་རྒྱལ་པོ་ཀུ་ཤན་རིས་ཨ་ཏ་ཡིམ་གྱི་ལག་ཏུ་སྤྲད་པ་དང་། ཡེས་ར་ཨེལ་པ་རྣམས་ཀྱིས་ཀུ་ཤན་རིས་ཨ་ཏ་ཡིམ་ \f + \ft རིས་ཨ་ཏ་ཡིམ་ཞེས་པ་ནི་ལྡབ་འགྱུར་གྱིས་ངན་པ་ཡིན་པའི་དོན་ལ་འཇུག\f*ལ་ལོ་ངོ་བརྒྱད་ཀྱི་རིང་དུ་གཡོག་བྱས་སོ། །  
\v 9 ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་ཞུ་འབོད་བྱས་པ་ན། དཀོན་མཆོག་ཡ་ཝཱེས་ཀཱ་ལེབ་ཀྱི་ནུ་བོ་སྟེ་ཀེ་ན༌ཟཱ་ཡི་བུ་ཨོད་ནི་ཨེལ་ཁོ་རྣམས་སྐྱོབ་མཁན་དུ་བསྐོས་ཤིང་། ཁོས་དེ་རྣམས་བསྐྱབས་པའོ། །  
\v 10 དཀོན་མཆོག་ཡ་ཝཱེའི་ཐུགས་ཉིད་ཁོའི་སྟེང་དུ་བབས་པས་ཁོ་རང་ཡེས་ར་ཨེལ་པའི་ཁྲིམས་དཔོན་བྱས་ཤིང་འཐབ་འཁྲུག་རྒྱག་པར་སླེབས། དཀོན་མཆོག་ཡ་ཝཱེས་ཨ་རམ་ཡུལ་གྱི་རྒྱལ་པོ་ཀུ་ཤན་རིས་ཨ་ཏ་ཡིམ་ཁོའི་ལག་ཏུ་སྤྲད་པས་ཁོས་དེ་ཕམ་པར་བརྒྱབ་ཏོ། །  
\v 11 དེ་ནས་ཡུལ་དེ་ལོ་ངོ་བཞི་བཅུའི་རིང་ལ་བདེ་བར་གནས་པ་དང་། ཀེ་ན༌ཟཱ་ཡི་བུ་ཨོད་ནི་ཨེལ་ཚེ་ལས་འདས་སོ། །   
\s1 ཨེ་ཧུད།  
\p
\v 12 ཡེས་ར་ཨེལ་པ་རྣམས་ཀྱིས་ཡང་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་པས། དཀོན་མཆོག་ཡ་ཝཱེས་མོ་ཨབ་ཀྱི་རྒྱལ་པོ་ཨེག་ལོན་དར་བར་མཛད་ཅིང་ཡེས་ར་ཨེལ་པ་ལ་རྒོལ་ཏོ། །  
\v 13 ཨེག་ལོན་གྱིས་ཨམ་མོན་པ་དང་ཨ་མཱད་ལེག་པ་རྣམས་བསྡུས་ནས་ཡེས་ར་ཨེལ་པ་ལ་དམག་བརྒྱབ་སྟེ་ཤིང་ཏ་ལའི་གྲོང་ཁྱེར་བདག་ཏུ་བཟུང་ངོ་། །  
\v 14 དེ་ནས་ཡེས་ར་ཨེལ་པ་རྣམས་ཀྱིས་མོ་ཨབ་ཀྱི་རྒྱལ་པོ་ཨེག་ལོན་ལ་ལོ་ངོ་བཅོ་བརྒྱད་རིང་དུ་གཡོག་བྱས།  
\v 15 ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་ཞུ་འབོད་བྱས་པ་ན། དཀོན་མཆོག་ཡ་ཝཱེས་པེན་ཡཱ་མེན་པ་གེ་རཱ་ཡི་བུ་ཨེ་ཧུད་ཁོ་རྣམས་སྐྱོབ་མཁན་དུ་བསྐོས་ཤིང་། ཁོ་ནི་གཡོན་ལག་ཅིག་ཡིན། ཡེས་ར་ཨེལ་པ་རྣམས་ཀྱིས་ཁོ་བརྒྱུད་དེ་མོ་ཨབ་ཀྱི་རྒྱལ་པོ་ཨེག་ལོན་ལ་ལག་རྟགས་ཕུལ་ཏོ། །  
\v 16 ཨེ་ཧུད་ཀྱིས་རལ་གྲི་ཁ་གཉིས་མ་རིང་ཚད་ཁྲུ་གང་ཡིན་པ་ཞིག་བརྡུངས་ནས་བརླ་གཡས་པའི་གྱོན་གོས་འོག་ཏུ་བཏགས།  
\v 17 ཁོས་མོ་ཨབ་ཀྱི་རྒྱལ་པོ་ཨེག་ལོན་ལ་ལག་རྟགས་ཕུལ་ཞིང་། མ་གཞི་ཨེག་ལོན་ནི་ཤིན་ཏུ་ཤ་རྒྱགས་པ་ཞིག་ཡིན་ལ།  
\v 18 ཨེ་ཧུད་ཀྱིས་ལག་རྟགས་ཕུལ་ཚར་བ་དང་ལག་རྟགས་འཁུར་མཁན་རྣམས་ལ་སྐྱེལ་མ་བྱས་ཤིང་།  
\v 19 རང་ཉིད་གིལ་གལ་ཉེ་འགྲམ་གྱི་སྐུ་འདྲ་རྣམས་ཡོད་ས་ནས་ཕྱིར་ལོག་སྟེ་ན་རེ། ཀྱེ་རྒྱལ་པོ་ལགས། ང་ཁྱེད་ལ་གསང་བ་ཞིག་ཞུ་རྒྱུ་ཡོད་ཅེས་སྨྲས་པ་ལ། རྒྱལ་པོས། ཅུང་ཙམ་སྒུགས་དང་ཞེས་སྨྲས་པ་དང་། གཡས་གཡོན་གྱི་སྐུ་སྲུང་ཐམས་ཅད་ཕྱི་རུ་སོང་ངོ་། །  
\v 20 དེ་ནས་རྒྱལ་པོ་གཅིག་པུ་བསིལ་ཁང་ནང་དུ་བསྡད་ཡོད་པ་ལ། ཨེ་ཧུད་ཁོའི་མདུན་དུ་ཡོང་སྟེ་ན་རེ། བདག་གིས་དཀོན་མཆོག་གི་བཀའ་བཞིན་ཁྱེད་ལ་དོན་ཞིག་ཞུ་བར་བྱ་ཞེས་སྨྲས་པས། རྒྱལ་པོ་རང་གི་བཞུགས་ས་ནས་ཡར་ལངས་ཤིང་།  
\v 21 ཨེ་ཧུད་ཀྱིས་གཡོན་ལག་བརྐྱངས་ཏེ་བརླ་གཡས་པ་ནས་རལ་གྲི་ཕྱུང་སྟེ་རྒྱལ་པོའི་ཁོག་པའི་ནང་བསྣུན་པ་དང་།  
\v 22 གྲིའི་ཡུ་བའང་ཁོག་པའི་ནང་དུ་བསྣུན། རལ་གྲི་ཚིལ་གྱིས་བཏུམས་ཤིང་ཁོས་དེ་རྒྱལ་པོའི་ཁོག་པ་ནས་ཕྱིར་མ་ཕྱུང་བར་མ་ཟད་རྒྱབ་ཀྱང་བརྟོལ་ཏོ། །  
\v 23 ཨེ་ཧུད་བར་ཁྱམས་སུ་སླེབས་ནས་བསིལ་ཁང་གི་སྒོ་རྣམས་གཏན་ནས་ཟྭ་བརྒྱབ།  
\v 24 ཨེ་ཧུད་ཕྱིར་བུད་རྗེས་རྒྱལ་པོའི་འཁོར་གཡོག་རྣམས་ཡོང་སྟེ། ལྟོས་དང་། བསིལ་ཁང་གི་སྒོ་རྣམས་ཟྭ་བརྒྱབ་ཡོད་པ་མཐོང་ནས། ཁོ་རང་བསིལ་ཁང་གི་ཁང་པ་སྦུག་མའི་ནང་དུ་སྒོ་ལ་བསྡད་ཡོད་པར་ངེས་ཞེས་སྨྲས་པ་དང་།  
\v 25 དེ་དག་གིས་སུན་སྣང་སྐྱེས་པའི་བར་དུ་བསྒུགས་ནའང་ད་དུང་བསིལ་ཁང་གི་སྒོ་འབྱེད་རྒྱུ་མེད་པ་མཐོང་ནས་ལྡེ་མིག་བླངས་ཏེ་སྒོ་ཕྱེས་པ་ན། བསམ་ཡུལ་ལས་འདས་པ་ཞིག་ལ་ཁོ་ཚོའི་བདག་པོ་ཚེ་ལས་འདས་ནས་ས་རུ་འགྱེལ་འདུག་གོ །  
\v 26 དེ་དག་གིས་འགོར་འགྱངས་བྱེད་པའི་དུས་སུ་ཨེ་ཧུད་ནི་སྐུ་འདྲ་རྣམས་ཡོད་ས་ནས་བརྒལ་ཞིང་སེ་ཨི་རཱ་ཞེས་པར་བྲོས།  
\v 27 དེར་སླེབས་པ་དང་ཨེ་ཕཱར་ཡིམ་རི་ཁུལ་དུ་རྭ་དུང་བུས་ཤིང་། ཡེས་ར་ཨེལ་པ་རྣམས་ཁོའི་རྗེས་འབྲངས་ཏེ་རི་ཁུལ་ནས་མར་བབས་པ་དང་ཁོས་མདུན་ནས་ལམ་ཁྲིད་དོ། །  
\v 28 ཡང་དེ་རྣམས་ལ་འདི་ལྟར་སྨྲས་པ་སྟེ། བདག་གི་རྗེས་སུ་འབྲང་བར་གྱིས། ཅི་ལ་ཞེ་ན། དཀོན་མཆོག་ཡ་ཝཱེས་ཁྱོད་ཅག་གི་དགྲ་བོ་མོ་ཨབ་པ་རྣམས་ཁྱོད་ཅག་གི་ལག་ཏུ་སྤྲད་ཟིན་པས་སོ་ཞེས་པ་ལ། དེ་རྣམས་ཁོའི་རྗེས་སུ་འབྲངས་ཏེ་མར་སོང་ནས་ཡོར་དན་གཙང་པོའི་རབ་ཁ་བཟུང་ནས་མོ་ཨབ་པ་གཅིག་ཀྱང་དེར་བརྒལ་དུ་མ་བཅུག་གོ །  
\v 29 དེའི་དུས་སུ་མོ་ཨབ་པ་ཧ་ལམ་མི་ཁྲི་གཅིག་ཡོད་པ་ཚང་མ་དཔའ་རྒོད་སྟོབས་ཅན་ཡིན་ལ། ཁོ་རྣམས་ཀྱིས་དེ་དག་ལས་གཅིག་ཀྱང་འཆོར་དུ་མ་བཅུག་པར་བསད་པ་དང་།  
\v 30 མོ་ཨབ་ནི་དེ་བཞིན་ཡེས་ར་ཨེལ་པས་དབང་འོག་ཏུ་བསྡུས་ཤིང་། བགྲང་བྱ་བརྒྱད་ཅུའི་རིང་ལ་ཡུལ་དེ་བདེ་བར་གནས་སོ། །   
\s1 ཤམ་གཱར།  
\p
\v 31 ཨེ་ཧུད་ཀྱི་རྗེས་སུ་ཨ་ནད་ཀྱི་བུ་ཤམ་གཱར་བྱུང་སྟེ། ཁོས་གླང་ལྕག་གིས་ཕེ་ལེ་ཤེད་པ་མི་དྲུག་བརྒྱ་ལ་བརྡུངས་ནས་བསད་པ་དང་། ཁོས་ཀྱང་ཡེས་ར་ཨེལ་པ་རྣམས་བསྐྱབས་པའོ། །   
\c 4
\cl ལེའུ་བཞི་པ། 
\toc1 ༄༅། །ཁྲིམས་དཔོན་གྱི་མདོ། 
\toc2 ཁྲིམས་དཔོན། 
\s1 དི་བོ་རཱ་དང་པཱ་རག  
\p
\v 1 ཨེ་ཧུད་ཚེ་ལས་འདས་རྗེས་ཡེས་ར་ཨེལ་པ་རྣམས་ཀྱིས་ཡང་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་པས།  
\v 2 དཀོན་མཆོག་ཡ་ཝཱེས་དེ་དག་ཧ་ཟོར་ཡུལ་དུ་སྲིད་སྐྱོང་མཁན་ཀ་ན་ཨན་གྱི་རྒྱལ་པོ་ཡཱ་བིན་གྱི་ལག་ཏུ་སྤྲད་ཅིང་། དེའི་དམག་དཔོན་ནི་སི་སེ་རཱ་ཡིན་ཞིང་ཕྱི་ཕྱོགས་པའི་ཡུལ་ཧ་རོ་ཤེད་ཅེས་པར་གནས་སོ། །  
\v 3 རྒྱལ་པོ་ཡཱ་བིན་ལ་ལྕགས་ཀྱི་ཤིང་རྟ་དགུ་བརྒྱ་ཡོད་ཅིང་། ཁོས་བགྲང་བྱ་ཉི་ཤུའི་རིང་ལ་ཡེས་ར་ཨེལ་པ་རྣམས་ལ་མནར་གཅོད་དྲག་པོ་བཏང་བས། ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་འོ་དོད་བོས་སོ། །  
\v 4 བུད་མེད་ལུང་སྟོན་པ་ཞིག་ཡོད་པའི་མིང་ལ་དི་བོ་རཱ་ཞེས་བྱ་ཞིང་ལབ་པི་དོད་ཀྱི་ཆུང་མ་ཡིན་ལ། དུས་དེར་ཡེས་ར་ཨེལ་གྱི་ཁྲིམས་དཔོན་ལགས་སོ། །  
\v 5 ཁོ་མོ་ནི་ཨེ་ཕཱར་ཡིམ་རི་ཁུལ་གྱི་རཱ་མ་དང་པེད་ཨེལ་གྱི་བར་དུ་དི་བོ་རཱའི་ཁ་སུར་ཤིང་ཏ་ལའི་འོག་ཏུ་གནས་པ་དང་། ཡེས་ར་ཨེལ་པ་ཐམས་ཅད་ཁོ་མོའི་རྩར་ཁྲིམས་གཅོད་ལ་མཉན་དུ་གཅར་བའོ། །  
\v 6 ཁོ་མོས་མི་མངགས་ཏེ་ནཱབ་ཐ་ལི་ཞེས་པའི་ཀེ་དེ་སི་ནས་ཨ་བི་ནོ་ཨམ་གྱི་བུ་པཱ་རག་བོས་ཡོང་ཞིང་འདི་ལྟར་སྨྲས་པ་སྟེ། ཡེས་ར་ཨེལ་གྱི་དཀོན་མཆོག་ཡ་ཝཱེས་ཁྱོད་ལ་འདི་སྐད་དུ། ནཱབ་ཐ་ལི་པ་དང་ཟེ་བུ་ལུན་པ་མི་ཆིག་ཁྲི་ཁྲིད་ནས་ཐ་པོར་རི་ལ་སོང་དང་།  
\v 7 བདག་གིས་ཡཱ་བིན་གྱི་དམག་དཔོན་སི་སེ་རཱ་ཁོའི་ཤིང་རྟ་རྣམས་དང་དམག་མི་ཡོངས་རྫོགས་ཁྲིད་ནས་ཁི་ཤོན་གཙང་པོའི་འགྲམ་དུ་ཁྱོད་རང་ཡོད་སར་ཡོང་དུ་འཇུག་པ་དང་། ཁོ་རང་ཁྱོད་ཀྱི་ལག་ཏུ་སྤྲོད་པར་བྱ་ཞེས་བཀའ་གནང་ངོ་ཞེས་པ་ལ།  
\v 8 པཱ་རག་ན་རེ། གལ་ཏེ་ཁྱེད་རང་བདག་དང་མཉམ་དུ་འགྲོ་ན་ང་རང་འགྲོ་བར་བྱ། ཁྱེད་རང་མི་འགྲོ་ན་ང་ཡང་མི་འགྲོ་ཞེས་སྨྲས་སོ། །  
\v 9 དི་བོ་རཱ་ཡིས་ལན་དུ། བདག་ནི་ཁྱོད་དང་ལྷན་ཅིག་ཏུ་འགྲོ་བར་བྱེད་མོད། འོན་ཀྱང་དཀོན་མཆོག་ཡ་ཝཱེས་སི་སེ་རཱ་ནི་བུད་མེད་ཅིག་གི་ལག་ཏུ་སྤྲོད་པར་འགྱུར་བས། ཁྱོད་རང་འགྲུལ་བའི་ལམ་དུ་ཁྱོད་ལ་མཚན་སྙན་འཐོབ་པར་མི་འགྱུར་ཞེས་སྨྲས་ཤིང་། དེ་ནས་དི་བོ་རཱ་ཡར་ལངས་ཏེ་པཱ་རག་དང་མཉམ་དུ་ཀེ་དེ་སི་རུ་ཕྱིན་པ་རེད།  
\v 10 དེ་ནས་པཱ་རག་གིས་ཟེ་བུ་ལུན་པ་དང་ནཱབ་ཐ་ལི་པ་རྣམས་ཀེ་དེ་སི་རུ་བསྡུས་པ་དང་། མི་ཆིག་ཁྲི་ཁོའི་རྗེས་སུ་འབྲངས་ནས་སོང་ཞིང་། དི་བོ་རཱ་ཡང་ཁོ་དང་ལྷན་ཅིག་ཏུ་ཕྱིན་ཏོ། །  
\v 11 མོ་ཤེའི་སྒྱུག་པོ་\f + \ft འདིར་སྒྱུག་པོ་ཞེས་པ་འགྱུར་ལ་ལར་ཆུང་མའི་གཅེན་པོ་ཞེས་མཐོང་།\f*ཧོ་པཱབ་ཀྱི་བུ་རྒྱུད་དེ། ཀེ་ནེ་པ་ཧེ་བེར་ཞེས་བྱ་བ་སྔར་ཀེ་ནེ་པ་གཞན་རྣམས་དང་བྲལ་ནས། ཀེ་དེ་སི་དང་ཉེ་བའི་ཚ་ཨ་ནན་ནིམ་གྱི་བེ་ཤིང་གི་འགྲམ་དུ་གུར་ཕུབ་པའོ། །  
\v 12 དེ་དག་གིས་སི་སེ་རཱ་ལ། ཨ་བི་ནོ་ཨམ་གྱི་བུ་པཱ་རག་ནི་ཡར་ཐ་པོར་རི་ལ་ཕྱིན་ཏོ་ཞེས་སྨྲས་པ་ན།  
\v 13 སི་སེ་རཱ་ཡིས་ལྕགས་ཀྱི་ཤིང་རྟ་དགུ་བརྒྱ་བོ་ཡོད་ཚད་དང་ཁོའི་རྗེས་སུ་འབྲང་བའི་དམག་མི་ཡོངས་རྫོགས་བསྡུས་པ་དང་། ཕྱི་ཕྱོགས་པའི་ཡུལ་ཧ་རོ་ཤེད་ནས་ཕྱིར་བུད་དེ་ཁི་ཤོན་གཙང་པོར་སླེབས།  
\v 14 དི་བོ་རཱ་ཡིས་པཱ་རག་ལ་འདི་ལྟར་སྨྲས་པ་སྟེ། ཁྱོད་ལོངས་ཤིག འདི་ནི་དཀོན་མཆོག་ཡ་ཝཱེས་སི་སེ་རཱ་ཁྱོད་ཀྱི་ལག་ཏུ་སྤྲོད་པའི་ཉིན་མོ་ཡིན་པས། དཀོན་མཆོག་ཡ་ཝཱེ་ནི་ཁྱོད་ཀྱི་སྔོན་དུ་ཕེབས་པ་མ་ཡིན་ནམ་ཞེས་པ་ལ། པཱ་རག་ཐ་པོར་རི་ལས་མར་བབས་ཤིང་མི་ཆིག་ཁྲི་ཁོའི་རྗེས་སུ་འབྲངས་སོ། །  
\v 15 དཀོན་མཆོག་ཡ་ཝཱེས་སི་སེ་རཱ་དང་ཁོའི་ལྕགས་ཀྱི་ཤིང་རྟ་དང་དམག་མི་ཡོངས་རྫོགས་འཇིགས་པར་མཛད་པ་དང་། དེ་རྣམས་པཱ་རག་གི་མདུན་དུ་རལ་གྲིའི་འོག་ནས་འགྱེལ་ཞིང་། སི་སེ་རཱ་འཁོར་ལོ་ལས་བབས་ཏེ་རྐང་ཐང་ལ་བྲོས་བྱོལ་བྱས་པ་ན།  
\v 16 པཱ་རག་ནི་ཤིང་རྟ་རྣམས་དང་དམག་དཔུང་གི་ར་མདར་བརྒྱུགས་ནས་ཕྱི་ཕྱོགས་པའི་ཡུལ་ཧ་རོ་ཤེད་ཀྱི་བར་དུ་སླེབས་ཤིང་། སི་སེ་རཱ་ཡི་དམག་མི་ཡོངས་རྫོགས་གྲི་ཁ་ནས་འགྱེལ་ཏེ་གཅིག་ཀྱང་མ་ལུས་སོ། །  
\v 17 སི་སེ་རཱ་ཁོ་ན་རྐང་ཐང་ལ་བྲོས་ནས་ཀེ་ནེ་པ་ཧེ་བེར་གྱི་ཆུང་མ་ཡ་ཨེལ་ཞེས་བྱ་བའི་གུར་དུ་སླེབས་པ་སྟེ། ཅི་ལ་ཞེ་ན། ཧ་ཟོར་གྱི་རྒྱལ་པོ་ཡཱ་བིན་དང་ཀེ་ནེ་པ་ཧེ་བེར་གྱི་ཁྱིམ་གཉིས་འགྲིག་མཐུན་ཡིན་པས་སོ། །  
\v 18 ཡ་ཨེལ་ཕྱི་རུ་ཐོན་ནས་སི་སེ་རཱ་ལ་བསུ་བ་བྱས་ཏེ་ན་རེ། ང་ཡི་བདག་པོ། འཇིགས་སྣང་མེད་པར་ནང་དུ་ཕེབས་ཤོག་ཅེས་སྨྲས་པ་ལ། སི་སེ་རཱ་ཁོ་མོའི་གུར་གྱི་ནང་དུ་སོང་ཞིང་ཡ་ཨེལ་གྱིས་ཁོ་རང་ཉལ་ཐུལ་གྱིས་བཀབ།  
\v 19 སི་སེ་རཱ་ཡིས་ཡ་ཨེལ་ལ། ང་ལ་སྐོམ་པ་བྱུང་བས་ཆུ་ཉུང་ཙམ་གནང་རོགས་ཞེས་ཞུས་པ་ལ། ཡ་ཨེལ་གྱིས་འོ་རྐྱལ་གྱི་ཁ་ཕྱེས་ཏེ་ཁོ་ལ་འོ་མ་བླུགས་ཤིང་། སྔར་བཞིན་ཁོ་རང་བཀབ་ནས་བཞག  
\v 20 ཡང་སི་སེ་རཱ་ཡིས་ཡ་ཨེལ་ལ། ཁྱེད་རང་གུར་གྱི་སྒོ་ཁར་ལངས་བསྡད་དེ་སུ་ཞིག་ཡོང་ནས་ཁྱེད་ལ་འདིར་མི་ཡོད་མེད་དྲིས་ན། ཁྱེད་ཀྱིས་མེད་ཅེས་སྨྲོས་ཤིག་ཅེས་སྨྲས་སོ། །  
\v 21 དེར་སི་སེ་རཱ་ཐང་ཆད་ནས་གཉིད་སྟུག་པོ་ཁུག་ཅིང་། ཧེ་བེར་གྱི་ཆུང་མ་ཡ་ཨེལ་གྱིས་གུར་གྱི་ཕུར་བ་བླངས་ནས་ལག་ལ་ཐོ་བ་ཐོགས་ཏེ། ཁུ་སིམ་མེར་ཁོའི་རྩར་ཕྱིན་ནས་ཕུར་པ་དེ་ཁོའི་ཟ་འགྲམ་ལ་བརྡབས་ཤིང་ས་ནང་དུ་ཐུག དེ་ནས་སི་སེ་རཱ་ཤིའོ། །  
\v 22 ལྟོས་དང་། པཱ་རག་ནི་སི་སེ་རཱ་ཡི་ར་མདར་རྒྱུག་པའི་དུས་སུ། ཡ་ཨེལ་ཕྱི་རུ་ཐོན་ནས་ཁོ་ལ་བསུ་བ་བྱས་ཏེ་ན་རེ། ཤོག་དང་བདག་གིས་ཁྱེད་ཀྱིས་འཚོལ་བའི་མི་དེ་ཁྱེད་ལ་སྟོན་པར་བྱ་ཞེས་སྨྲས་པ་ལ། ཁོ་རང་གུར་གྱི་ནང་དུ་ཕྱིན་ཅིང་། ལྟོས་དང་། སི་སེ་རཱ་ཤི་ནས་སར་འགྱེལ་བ་དང་ཕུར་པ་ད་དུང་ཁོའི་ཟ་འགྲམ་དུ་ཡོད་པ་མཐོང་ངོ་། །  
\v 23 ཉིན་མོ་དེར་དཀོན་མཆོག་གིས་ཀ་ན་ཨན་གྱི་རྒྱལ་པོ་ཡཱ་བིན་ནི་ཡེས་ར་ཨེལ་པ་རྣམས་ཀྱི་མདུན་དུ་འདུལ་བར་མཛད་དོ། །  
\v 24 དུས་དེ་ནས་བཟུང་ཡེས་ར་ཨེལ་པ་རྣམས་སྟོབས་ཤུགས་རྒྱས་པར་གྱུར་ཅིང་། ཀ་ན་ཨན་གྱི་རྒྱལ་པོ་ཡཱ་བིན་རྩ་མེད་དུ་འགྲོ་བའི་བར་དུ་དེ་ལས་རྒྱལ་བའོ། །   
\c 5
\cl ལེའུ་ལྔ་པ། 
\toc1 ༄༅། །ཁྲིམས་དཔོན་གྱི་མདོ། 
\toc2 ཁྲིམས་དཔོན། 
\s1 དི་བོ་རཱ་ཡི་བསྟོད་གླུ།  
\p
\v 1 ཉིན་མོ་དེར་དི་བོ་རཱ་དང་ཨ་བི་ནོ་ཨམ་གྱི་བུ་པཱ་རག་གཉིས་ཀྱིས་མགུར་བླངས་ནས་འདི་ལྟར།  
\v 2 ཡེས་ར་ཨེལ་གྱི་ཁྲོད་དུ་ཁྲིད་མཁན་དམག་དཔོན་མཆིས། །འབངས་མི་རྣམས་ཀྱང་རང་ཉིད་བློས་གཏོང་ལ་ནི་མོས། །ཁྱོད་ཚོས་ཡ་ཝཱེ་ཁོང་ལ་བསྟོད་པ་འབུལ་འོས་སོ། །  
\v 3 ཀྱེ་ཀྱེ་གོང་མ་རྒྱལ་པོས་གསན་དགོས་ཏེ། །ཀྱེ་ཀྱེ་རྒྱལ་སྲས་རྣམས་ཀྱིས་རྣ་བ་གཏོད། །ང་ཡིས་ཡ་ཝཱེ་ཁོང་ལ་བསྟོད་དབྱངས་འབུལ། །ཡེས་ར་ཨེལ་གྱི་དཀོན་མཆོག་ཡ་ཝཱེར་བསྟོད། །  
\v 4 ཀྱེ་ཀྱེ་ཡ་ཝཱེ་སེ་ཨིར་ནས་ཕེབས་ཤིང་། །ཨེ་དོམ་ཡུལ་ནས་ཞབས་ཀྱིས་བཅགས་པའི་དུས། །ས་འགུལ་གནམ་ཟགས་སྤྲིན་ལས་ཆར་བ་བབས། །  
\v 5 ཡ་ཝཱེའི་དྲུང་དུ་རི་ལས་ཆུ་བོ་བབས། །ཡེས་ར་ཨེལ་གྱི་དཀོན་མཆོག་ཡ་ཝཱེ་ཡི། །སྤྱན་སྔར་སི་ནཱ་རི་ལས་ཆུ་རྣམས་བཞུར། །  
\v 6 ཨ་ནད་ཅེས་པའི་བུ་སྟེ་ཤམ་གཱར་དུས། །ཡ་ཨེལ་ཉིན་མོར་ལམ་ཆེན་སྟོང་བར་གྱུར། །ལམ་འགྲོ་ཀུན་པོ་ལམ་དེ་བསྐོར་ནས་སྐྱོད། །  
\v 7 དི་བོ་རཱ་བདག་ཡེས་ར་ཨེལ་གྱི་ཁྲོད། །ལངས་ནས་མ་རུ་གྱུར་པའི་དུས་ཀྱི་བར། །ཡེས་ར་ཨེལ་ཁྲོད་རྗེ་བོའི་རྒྱུན་ཆད་དོ། །  
\v 8 ཡེས་ར་ཨེལ་པས་ལྷ་གསར་རྣམས་བདམས་པས། །དམག་འཁྲུག་དོན་ནི་མཁར་གྱི་སྒོ་ཁར་སླེབས། །ཡེས་ར་ཨེལ་གྱི་འབངས་མི་བཞི་ཁྲིའི་ཁྲོད། །ཕུབ་དང་མདུང་ནི་མིག་གིས་མཐོང་མ་ཐུབ། །  
\v 9 ང་ཡི་སེམས་ནི་ཡེས་ར་ཨེལ་གྱི་འབངས་མི་རྣམས་ཀྱི་ཁྲོད། །རང་ཉིད་བློས་གཏོང་མོས་པའི་འགོ་དཔོན་རྣམས་ལ་ཕྱོགས། །ཁྱོད་ཚོས་ཡ་ཝཱེ་ཁོང་ལ་བསྟོད་པར་འོས་སོ་ལོ། །  
\v 10 བོང༌དཀར་ཞོན་ཞིང་གོས་ཆེན་གདན་ལ་སྡོད་པ་དང་། །ལམ་དུ་བགྲོད་མཁན་ཁྱོད་ཀྱིས་ཁྱབ་བསྒྲགས་བྱེད་པར་འོས། །  
\v 11 ཆུ་ལེན་གནས་ཀྱི་སྐད་ཅོར་མདའ་གཞུའི་སྒྲ་ལས་བརྒལ། །མི་ཡིས་ཡ་ཝཱེ་ཁོང་གི་དྲང་བདེན་འཕྲིན་ལས་ཏེ། །ཡེས་ར་ཨེལ་ལ་བདག་སྐྱོང་གནང་བའི་མཛད་པ་བརྗོད། །དུས་དེར་ཡ་ཝཱེའི་འབངས་རྣམས་མཁར་སྒོར་སླེབས་པ་ཡིན། །  
\v 12 ཀྱེ་ཀྱེ་དི་བོ་རཱ་ཁྱེད་ཡར་ལ་ལོངས་ཤིག་དང་། །ཁྱེད་རང་ཡར་ལ་ལངས་ནས་གླུ་ཞིག་ལེན་པར་གྱིས། །ཀྱེ་ཀྱེ་ཨ་བི་ནོ་ཨམ་གྱི་བུ་པཱ་རག་ཁྱེད། །ཁྱེད་རང་ཡར་ལ་ལངས་ནས་དགྲ་རྣམས་འཛིན་འོས་སོ། །  
\v 13 དུས་དེར་ལྷག་ལུས་རྗེ་དང་འབངས་རྣམས་ལྷན་ཅིག་མར་ཡོང་སྟེ། །ཡ་ཝཱེ་ཁོང་ཉིད་ཕེབས་ཏེ་བདག་གི་ཆེད་དུ་དཔའ་ལ་རྒོལ། །  
\v 14 རྩ་བ་ཨ་མཱད་ལེག་ཅེས་བྱ་བའི་ཡུལ་ཡིན་པའི། །ཨེ་ཕཱར་ཡིམ་གྱི་ཁྲོད་ནས་འོངས་པའི་པེན་ཡཱ་མེན། །འབངས་རྣམས་ཁྲོད་ནས་ཁྱེད་ཀྱི་རྗེས་སུ་འབྲངས་པ་འོ། །མངའ་བདག་རྣམས་ནི་མཱ་ཀིར་ཡུལ་ནས་མར་ལ་སླེབས། །ཁྲིམས་དབྱུག་ཐོགས་ནས་འབངས་མིར་ཞིབ་བཤེར་བྱེད་མཁན་རྣམས། །ཟེ་བུ་ལུན་ཞེས་བྱ་བའི་ཡུལ་ནས་མར་ལ་སླེབས། །  
\v 15 ཡེས་སི་ཀཱར་གྱི་འགོ་དཔོན་རྣམས་ནི་དི་བོ་རཱ་དང་མཉམ། །ཡེས་སི་ཀཱར་ནི་ཅི་འདྲ་ཡིན་ན་པཱ་རག་དེ་འདྲ་ཡིན། །ཁོ་རྣམས་པཱ་རག་རྗེས་སུ་འབྲངས་ནས་ལུང་པའི་ནང་དུ་བརྒྱུགས། །རུ་བེན་རུས་རྒྱུད་ལས་ནི་བློ་སྟོབས་ལྡན་པའི་མི་རྣམས་ཡོད། །  
\v 16 ཁྱོད་རང་ཅིའི་ཕྱིར་ལུག་རའི་ནང་དུ་སྡོད་པ་ཡིན། །ལུག་ཁྱུ་རྣམས་ལ་འབུད་པའི་གླིང་བུར་ཉན་ནམ་ཅི། །རུ་བེན་རྒྱུད་ལས་བློ་སྟོབས་ལྡན་པའི་མི་རྣམས་ཡོད། །  
\v 17 གིལ་ཨད་པ་རྣམས་ཡོར་དན་གཙང་པོའི་ཕར་ལ་གནས། །དཱན་གྱི་མི་རྣམས་གནས་སྐབས་གྲུའི་སྟེང་སྡོད་པ་ཅི། །ཨ་ཤེར་པ་རྣམས་མཚོ་ཁར་ལུས་ཤིང་གྲུ་ཁར་བདེ། །  
\v 18 ཟེ་བུ་ལུན་ནི་རང་སྲོག་འབེན་ལ་འཇོག་པའི་མི་ཚོགས་ཡིན། །ནཱབ་ཐ་ལི་ཡང་མཐོ་སྒང་ཡུལ་དུ་དེ་དང་དེ་བཞིན་ཡིན། །  
\v 19 རྒྱལ་པོ་ཐམས་ཅད་འོངས་ནས་འཐབ་འཛིང་བྱས་པ་ཡིན། །མེ་གིད་དོ་ཡི་ཆུ་བོ་འགྲམ་དུ་གནས་པ་ཡི། །ཐ་ཨ་ནག་ཏུ་ཀ་ན་ཨན་གྱི་རྒྱལ་རྣམས་འཐབ། །འོན་ཀྱང་འཕྲོག་བཅོམ་བྱས་པའི་དངུལ་ནི་མ་རེག་གོ །  
\v 20 སྐར་མའི་ཚོགས་ཀྱིས་ནམ་མཁའི་དབྱིངས་ནས་འཐབ་འཛིང་བྱས། །རང་རང་རྒྱུ་སྐར་ལམ་ནས་སི་སེ་རཱ་ལ་རྒོལ། །  
\v 21 གནའ་བོའི་ཁི་ཤོན་གཙང་པོས་དགྲ་བོ་རྩ་ནས་ཁུར། །ང་ཡི་སེམས་ནི་སྟོབས་ཤུགས་དང་བཅས་མདུན་དུ་སྐྱོད། །  
\v 22 དེའི་དུས་རྟ་མཆོག་རྒོད་པོ་འཕུར་སྐྱོད་མཆོང་རྒྱུག་བྱེད། །དེ་ཚོའི་རྨིག་པས་ས་ལ་རྡོག་རྫིས་བཏང་བ་ཡིན། །  
\v 23 ཡ་ཝཱེ་ཁོང་གི་ཕོ་ཉས་འདི་སྐད་དུ། །མེ་རོས་དང་དེའི་ཡུལ་མི་རྣམས་ལ་ནི། །དམོད་མོ་ངན་པ་ཐོངས་ཞེས་བཀའ་བསྩལ་ཏེ། །ཡ་ཝཱེས་སྟོབས་ལྡན་དགྲ་བོར་རྒོལ་བ་ལ། །དེ་རྣམས་ཁོང་གི་རོགས་སུ་མ་འོང་ཕྱིར། །  
\v 24 ཀེ་ནེ་པ་ཡི་ཧེ་བེར་གྱི་ཆུང་མ། །ཡ་ཨེལ་བུད་མེད་ཀུན་ལས་བདེ་བ་ཡིན། །གུར་ལ་སྡོད་པའི་བུད་མེད་ལས་ཀྱང་བདེ། །  
\v 25 སི་སེ་རཱ་ཡིས་བཏུང་ཆུ་བསླངས་པ་ལ། །ཡ་ཨེལ་གྱིས་ནི་འོ་མ་སྦྱིན་པ་དང་། །རིན་ཆེན་དཀར་ཡོལ་ནང་དུ་ནུ་ཞོ་སྤྲད། །  
\v 26 ཡ་ཨེལ་གཡོན་ལག་ལ་ནི་ཕུར་པ་ཐོགས། །གཡས་ལག་ནང་དུ་བཟོ་བའི་ཐོ་བ་བཟུང་། །སི་སེ་རཱ་ལ་བརྡུངས་ཤིང་མགོ་བོ་རྨས། །དེ་ཡི་ཟ་འགྲམ་གཏོར་ནས་བརྟོལ་བ་ཡིན། །  
\v 27 སི་སེ་རཱ་ནི་ཁོ་མོའི་རྐང་འོག་འགྱེལ། །ཁོ་མོའི་རྐང་འོག་ཁ་སྦུབ་ལོག་ནས་འགྱེལ། །གང་དུ་འགྱེལ་བའི་གནས་སུ་ཤི་བ་འོ། །  
\v 28 སི་སེ་རཱའི་མས་དཀར་ཁུང་ནས་བལྟས་ཤིང་། །དྲ་མིག་བརྒྱབ་ནས་འོ་དོད་འབོད་བཞིན་དུ། །ཁོ་བོའི་ཤིང་རྟ་ཡུན་རིང་འགོར་བ་ཅི། །རྟ་ཡི་གོམ་སྒྲ་མི་ཐོས་ཅི་ཡིན་ཟེར། །  
\v 29 མཁས་མཛངས་བཙུན་མོས་ཁོ་མོར་ལན་བཏབ་ཅིང་། །ཁོ་མོས་ཁེར་ལབ་བྱེད་ཀྱིན་འདི་ལྟར་ཞུས། །  
\v 30 ཁོ་ཚོར་བཅོམ་ནོར་ཐོབ་སྟེ་བགོས་པ་འམ། །སྐྱེས་པ་རེ་ལ་བུད་མེད་གཅིག་གམ་གཉིས། །སི་སེ་རཱ་ཡི་ཟ་འོག་གོས་ཆེན་ཏེ། །ཟ་འོག་གཙགས་མའི་བཅོམ་ནོར་མ་ཐོབ་བམ། །ཟ་འོག་གོས་ཆེན་ཕྱི་ནང་ཉིས་གཙགས་མ། །འཛིན་བཟུང་ཐེབས་པར་བསྐོན་པ་མ་ཡིན་ནམ། །  
\v 31 ཀྱེ་ཀྱེ་ཡ་ཝཱེ་ལགས་ཀྱེ་ཁྱེད་ཉིད་ཀྱི། །དགྲ་བོ་ཐམས་ཅད་དེ་བཞིན་མེད་གྱུར་ཅིག །ཁྱེད་ལ་དགའ་བའི་མི་རྣམས་ཉི་མ་བཞིན། །འོད་སྟོང་འབར་བར་གྱུར་ཅིག་ཅེས་པ་འོ། །དེ་བཞིན་བགྲང་བྱ་བཞི་བཅུའི་རིང་ལ་ཡུལ་དེ་བདེ་བར་གནས་སོ། །   
\c 6
\cl ལེའུ་དྲུག་པ། 
\toc1 ༄༅། །ཁྲིམས་དཔོན་གྱི་མདོ། 
\toc2 ཁྲིམས་དཔོན། 
\s1 གིད་ཡོན།  
\p
\v 1 ཡེས་ར་ཨེལ་པ་རྣམས་ཀྱིས་ཡང་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་པས། དཀོན་མཆོག་ཡ་ཝཱེས་དེ་དག་ལོ་ངོ་བདུན་གྱི་རིང་ལ་མིད༌ཡཱན་པའི་ལག་ཏུ་སྤྲད་ཅིང་།  
\v 2 མིད་ཡཱན་པས་ཡེས་ར་ཨེལ་པ་རྣམས་ལ་བཙན་གནོན་བྱས་པ་དང་། ཡང་མིད༌ཡཱན་པའི་རྐྱེན་གྱིས་ཡེས་ར་ཨེལ་པ་རྣམས་ཀྱིས་རི་ཁྲོད་དུ་བྲག་ཕུག་དང་བྲག་ཁུང་། མཁར་རྫོང་བཅས་པ་བཟོས་སོ། །  
\v 3 ཡེས་ར་ཨེལ་པ་རྣམས་ཀྱིས་ས་བོན་བཏབ་ཟིན་པའི་དུས་སུ། མིད་ཡཱན་པ་དང་ཨ་མཱད་ལེག་པ། ཤར་ཕྱོགས་པ་ཐམས་ཅད་ཡར་ཁོ་རྣམས་ལ་འཐབ་ཏུ་འོངས་པ་དང་།  
\v 4 ཁོ་རྣམས་ཀྱི་ཁ་གཏད་དུ་དམག་སྒར་བཏབ་ནས་གཱ་ཟཱའི་བར་དུ་ལོ་ཏོག་མེད་པར་བཟོས་ཤིང་། ཡེས་ར་ཨེལ་པ་རྣམས་ལ་ཟ་རྒྱུ་དང་བ་གླང་། ལུག བོང་བུ་སོགས་ཅི་ཡང་མ་བསྐྱུར་ཏོ། །  
\v 5 རྒྱུ་མཚན་ནི་དེ་རྣམས་ཀྱིས་ཕྱུགས་ཟོག་དེད་ནས་གུར་དང་བཅས་ཡོང་བ་ནི་འབུ་ཆ་ག་པ་ལྟར་མང་ལ། མི་དང་རྔ་མོང་ནི་བགྲང་ལས་འདས་ཤིང་ཐམས་ཅད་ཡོང་སྟེ་ཡུལ་དེ་རྩ་བ་ནས་བརླགས་པའོ། །  
\v 6 ཡེས་ར་ཨེལ་པ་རྣམས་མིད་ཡཱན་པའི་རྐྱེན་གྱིས་དབུལ་ཞིང་ཕོངས་པར་གྱུར་པས་དཀོན་མཆོག་ཡ་ཝཱེ་ལ་འོ་དོད་བོས་སོ། །  
\v 7 ཡེས་ར་ཨེལ་པ་རྣམས་ཀྱིས་མིད་ཡཱན་པའི་རྐྱེན་གྱིས་དཀོན་མཆོག་ཡ་ཝཱེ་ལ་འོ་དོད་བོས་པས།  
\v 8 དཀོན་མཆོག་ཡ་ཝཱེས་ལུང་སྟོན་པ་ཞིག་ཡེས་ར་ཨེལ་པ་རྣམས་ཀྱི་རྩར་མངགས་ཏེ་འདི་ལྟར། ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། བདག་གིས་སྔར་ཁྱོད་རྣམས་ཨེ་ཅིབ་ཡུལ་ནས་ཡར་ཁྲིད་འོངས་ཤིང་། བྲན་དུ་བཀོལ་བའི་གནས་ནས་ཕྱི་རུ་བཏོན་པ་དང་།  
\v 9 ཨེ་ཅིབ་པའི་ལག་དང་ཁྱོད་རྣམས་ལ་གཉའ་གནོན་བྱེད་པ་ཀུན་ལས་བསྐྱབས་ནས་ཐར་དུ་བཅུག དེ་དག་ཁྱོད་རྣམས་ཀྱི་མདུན་ནས་བསྐྲད་ཅིང་ཁོ་རྣམས་ཀྱི་ཡུལ་ཁྱོད་ཅག་ལ་གནང་བ་ཡིན་ཞེས་དང་།  
\v 10 ཡང་ཁྱོད་རྣམས་ལ། ང་རང་ཁྱོད་ཅག་གི་དཀོན་མཆོག་ཡ་ཝཱེ་ཡིན། ཁྱོད་རྣམས་ཨེ་མོར་པའི་ཡུལ་དུ་གནས་པ་དང་། ཁོ་ཚོའི་ལྷ་རྣམས་ལ་བསྙེན་བཀུར་བྱེད་མི་རུང་ཞེས་སྨྲས་ནའང་། ཁྱོད་རྣམས་ཀྱིས་ངའི་གཏམ་ལ་མཉན་མ་སོང་ཞེས་གསུངས་ཞེས་སྨྲས་སོ། །   
\s1 གིད་ཡོན་ལ་ཐུགས་རྗེ་ཐོབ་པ།  
\p
\v 11 དཀོན་མཆོག་ཡ་ཝཱེའི་ཕོ་ཉ་ཨོབ་རཱ་ཡུལ་དུ་སླེབས་ནས། ཨ་བི་ཨེ་ཟེར་པ་ཡོ་ཨ་སི་ཞེས་བྱ་བའི་བེ་ཤིང་འོག་ཏུ་བཞུགས་པ་ལ། ཡོ་ཨ་སིའི་བུ་གིད་ཡོན་གྱིས་མིད་ཡཱན་པ་རྣམས་ལ་སྦས་པའི་ཆེད་དུ་རྒུན་འབྲུམ་འཚིར་གཞོང་ཡོད་སར་གྲོ་རྡུང་བཞིན་བསྡད།  
\v 12 དཀོན་མཆོག་ཡ་ཝཱེའི་ཕོ་ཉ་གིད་ཡོན་ལ་མངོན་པར་གྱུར་ཏེ་ཁོ་ལ་འདི་ལྟར་སྨྲས་པ་སྟེ། ཀྱེ་སྙིང་སྟོབས་ཅན་གྱི་དཔའ་རྒོད་ལགས། དཀོན་མཆོག་ཡ་ཝཱེ་ནི་ཁྱོད་དང་མཉམ་དུ་བཞུགས་ཞེས་པ་ལ།  
\v 13 གིད་ཡོན་ན་རེ། ཀྱེ་གཙོ་བོ་ལགས། གལ་ཏེ་དཀོན་མཆོག་ཡ་ཝཱེ་ངེད་དང་མཉམ་དུ་བཞུགས་ན། ངེད་རྣམས་དོན་འདི་ཐམས་ཅད་ལ་ཕྲད་དོན་ཅི། ཡང་བདག་ཅག་གི་ཕ་མེས་ཡང་མེས་རྣམས་ཀྱིས་དཀོན་མཆོག་ཡ་ཝཱེས་ངེད་རྣམས་ཨེ་ཅིབ་ཡུལ་ནས་ཡར་ཁྲིད་འོངས་པ་ཡིན་ཞེས་སྨྲས་པ་མ་ཡིན་ནམ། ཁོང་གི་ངོ་མཚར་བའི་འཕྲིན་ལས་རྣམས་གང་དུ་མཆིས་སམ། ད་ནི་ཁོང་གིས་བདག་ཅག་དོར་ནས་མིད་ཡཱན་པའི་ལག་ཏུ་སྤྲད་པ་ཡིན་ཞེས་ཞུས་སོ། །  
\v 14 དཀོན་མཆོག་ཡ་ཝཱེས་གིད་ཡོན་ལ་གཟིགས་ཏེ་འདི་སྐད་དུ། ཁྱོད་ཀྱིས་རང་གི་མཐུ་སྟོབས་འདི་ལ་བརྟེན་ནས་མིད་ཡཱན་པའི་ལག་ནས་ཡེས་ར་ཨེལ་པ་རྣམས་སྐྱོབས་ཤིག བདག་གིས་ཁྱོད་རང་མངགས་པ་མ་ཡིན་ནམ་ཞེས་གསུངས་པ་དང་།  
\v 15 གིད་ཡོན་ན་རེ། ཀྱེ་གཙོ་བོ་ལགས། བདག་གིས་ཡེས་ར་ཨེལ་པ་རྣམས་ཅི་ལྟར་སྐྱོབ་ནུས་སམ། གཟིགས་དང་། བདག་གི་ཁྱིམ་རྒྱུད་ནི་མཱ་ན་ཤེའི་ཚོ་པའི་ཁྲོད་ཆེས་དབུལ་ཞིང་ཕོངས་པ་དང་། ང་རང་བདག་གི་ཕ་ཁྱིམ་དུ་ཆེས་ཆུང་ཤོས་ཡིན་ཞེས་ཞུས།  
\v 16 དཀོན་མཆོག་ཡ་ཝཱེས་ཁོ་ལ་འདི་སྐད་དུ། ང་རང་ཁྱོད་དང་མཉམ་དུ་གནས་པས། ཁྱོད་ཀྱིས་མིད་ཡཱན་པ་རྣམས་མི་གཅིག་དང་འདྲ་བར་ཕམ་པར་རྒྱག་ངེས་ཡིན་ཞེས་གསུངས།  
\v 17 གིད་ཡོན་ན་རེ། གལ་ཏེ་ཁྱེད་ཀྱི་སྤྱན་སྔར་ང་རང་ལ་ཐུགས་རྗེ་ཐོབ་པ་ཡིན་ན། ང་ལ་བཀའ་གནང་མཁན་ནི་ཁྱེད་རང་ཡིན་པའི་རྟགས་ཤིག་བདག་ལ་གནང་བར་མཛོད།  
\v 18 བདག་གིས་འབུལ་བ་འཁྱེར་ཡོང་སྟེ་ཁྱེད་ཀྱི་དྲུང་དུ་འབུལ་བའི་བར་དུ། ཁྱེད་རང་འདི་དང་མི་འབྲལ་བར་ཞུ་ཞེས་ཞུས་པ་ལ། གཙོ་བོས་འདི་སྐད་དུ། བདག་གིས་ཁྱོད་རང་ཕྱིར་ལོག་པར་སྒུག་ངེས་ཡིན་ཞེས་གསུངས།  
\v 19 གིད་ཡོན་སོང་ནས་རེའུ་གཅིག་སྟ་གོན་བྱས་པ་དང་། གྲོ་ཕྱེ་ཨེ་ཕཱ་གང་གིས་སྐྱུར་མེད་བག་ལེབ་བཟོས་ཤིང་། ཤ་སླེ་བོ་ནང་དུ་བཞག་ནས་ཁུ་བ་སྣོད་ཀྱི་ནང་དུ་བླུགས་ཏེ། བེ་ཤིང་འོག་ཏུ་ཁྱེར་ནས་ཕོ་ཉའི་དྲུང་དུ་ཕུལ་ཏོ། །  
\v 20 དཀོན་མཆོག་གི་ཕོ་ཉས་གིད་ཡོན་ལ་འདི་སྐད་དུ། ཤ་དང་སྐྱུར་མེད་བག་ལེབ་ཕ་བོང་འདིའི་སྟེང་དུ་བཞག་ནས་ཁུ་བ་བླུགས་ཤིག་ཅེས་གསུངས་པ་ལ། ཁོས་དེ་ལྟར་བྱས་སོ། །  
\v 21 དཀོན་མཆོག་ཡ་ཝཱེའི་ཕོ་ཉས་ཕྱག་གི་འཁར་བ་བརྐྱངས་ནས་འཁར་བའི་སྣེ་མོས་ཤ་དང་སྐྱུར་མེད་བག་ལེབ་ལ་རེག་པ་ན། ཕ་བོང་ལས་མེ་འཕྱུར་ཏེ་ཤ་དང་སྐྱུར་མེད་བག་ལེབ་ཡོངས་རྫོགས་རྩ་མེད་བཏང་ཞིང་། དཀོན་མཆོག་ཡ་ཝཱེའི་ཕོ་ཉའང་མི་མཐོང་བར་གྱུར།  
\v 22 གིད་ཡོན་གྱིས་ཁོང་ནི་དཀོན་མཆོག་ཡ་ཝཱེའི་ཕོ་ཉ་ཡིན་པ་ཤེས་ཏེ་ན་རེ། ཀྱེ་ཧུད་གཙོ་བོ་ཡ་ཝཱེ། བདག་གིས་དཀོན་མཆོག་ཡ་ཝཱེའི་ཕོ་ཉ་ཁ་རི་ཁ་ཐུག་ཏུ་མཇལ་བྱུང་ཞེས་ཞུས་པ་ལ།  
\v 23 དཀོན་མཆོག་ཡ་ཝཱེས་ཁོ་ལ་འདི་སྐད་དུ། ཁྱོད་ཀྱི་སེམས་བདེ་བར་གྱིས་དང་མ་འཇིགས་ཤིག ཁྱོད་རང་འཆི་བར་མི་འགྱུར་ཞེས་གསུངས།  
\v 24 དེ་ནས་གིད་ཡོན་གྱིས་དེར་དཀོན་མཆོག་ཡ་ཝཱེ་ལ་མཆོད་ཁྲི་ཞིག་བརྩིགས་པ་དང་མིང་ལ་ཡ་ཝཱེ་ཤཱ་ལོམ་\f + \ft འདིར་ཤཱ་ལོམ་ཞེས་པ་ནི་དཀོན་མཆོག་ཡ་ཝཱེས་ཞི་བདེ་གནང་ཞེས་པའི་དོན་ཡིན།\f*ཞེས་བཏགས་པ་དང་། མཆོད་ཁྲི་དེ་ནི་ད་ལྟའི་བར་དུ་ཨ་བི་ཨེ་ཟེར་པ་རྣམས་ཀྱི་ཨོབ་རཱ་ཞེས་པར་གནས་སོ། །  
\v 25 ཡང་མཚན་མོ་དེར་དཀོན་མཆོག་ཡ་ཝཱེས་གིད་ཡོན་ལ་འདི་སྐད་དུ། ཁྱོད་ཀྱིས་རང་གི་ཕ་ཡི་བ་གླང་རྣམས་ལས་བ་གླང་གཉིས་པ་སྟེ་ཁ་གང་འཁྲིད་པར་མ་ཟད། ཁྱོད་ཀྱི་ཕ་ཡིས་པཱ་ཨལ་ལ་བརྩིགས་པའི་མཆོད་ཁྲི་བཤིག་ནས་དེའི་འགྲམ་དུ་ཡོད་པའི་ཨ་ཤེ་རཱ་སྟེ་ཤིང་སྐུ་དེ་ཆོད་ཅིག  
\v 26 དེ་ནས་བྲག་རི་འདིའི་སྟེང་དུ་ཁྱོད་ཀྱི་དཀོན་མཆོག་ཡ་ཝཱེའི་ཕྱིར་མཆོད་ཁྲི་ཡག་པོ་ཞིག་རྩིགས་ལ། ཁྱོད་ཀྱིས་བཅད་པའི་ཨ་ཤེ་རཱ་སྟེ་ཤིང་སྐུ་བུད་ཤིང་དུ་བྱས་ནས་བ་གླང་གཉིས་པ་དེ་སྦྱིན་སྲེག་གི་མཆོད་པར་ཕུལ་ཞིག་ཅེས་བཀའ་བསྒོས་པས།  
\v 27 གིད་ཡོན་གྱིས་རང་གི་གཡོག་པོ་རྣམས་ལས་མི་བཅུ་བདམས་ནས། དཀོན་མཆོག་ཡ་ཝཱེས་ཁོ་ལ་བཀའ་ཇི་ལྟར་བསྒོས་པ་བཞིན་དུ་བྱས། ཡང་ཕ་གཞིས་དང་གྲོང་ཁྱེར་དེའི་མི་རྣམས་ལ་འཇིགས་པས་ཉིན་དཀར་དོན་དེ་བྱེད་མ་ཕོད་པར་མཚན་མོར་བྱས་པའོ། །   
\s1 གིད་ཡོན་གྱིས་པཱ་ཨལ་གྱི་མཆོད་ཁྲི་བཤིག་པ།  
\p
\v 28 གྲོང་ཁྱེར་གྱི་མི་རྣམས་ནངས་སྔ་མོ་ཡར་ལངས་ཏེ། ལྟོས་དང་། པཱ་ཨལ་གྱི་མཆོད་ཁྲི་བཤིག་ནས་དེའི་འགྲམ་གྱི་ཨ་ཤེ་རཱ་སྟེ་ཤིང་སྐུ་བཅད་པ་དང་། བ་གླང་གཉིས་པ་གསར་དུ་བརྩིགས་པའི་མཆོད་ཁྲིའི་སྟེང་ཕུལ་ཡོད་པ་མཐོང་ནས།  
\v 29 ཕན་ཚུན་ན་རེ། འདི་ནི་སུ་ཞིག་གིས་བྱས་པ་ཡིན་ནམ་ཞེས་སྨྲས་ཤིང་། ཡང་རྩད་བཅད་ནས་དྲིས་རྗེས་འདི་ནི་ཡོ་ཨ་སིའི་བུ་གིད་ཡོན་གྱིས་བྱས་པ་རེད་ཅེས་སྨྲས།  
\v 30 གྲོང་ཁྱེར་གྱི་མི་རྣམས་ཀྱིས་ཡོ་ཨ་སི་ལ་འདི་ལྟར་སྨྲས་པ་སྟེ། ཁྱོད་ཀྱི་བུ་ཕྱིར་སྤྲོད་ཅིག་ཁོས་པཱ་ཨལ་གྱི་མཆོད་ཁྲི་བཤིག་ནས་དེའི་འགྲམ་གྱི་ཨ་ཤེ་རཱ་བཅད་པས་ཁོ་ནི་གསོད་རུང་བ་ཡིན་ཞེས་པ་ལ།  
\v 31 ཡོ་ཨ་སི་ཡིས་དེར་ལངས་བསྡད་ནས་ཁོ་ལ་རྒོལ་བའི་མི་ཚོགས་ལ་འདི་ལྟར། ཁྱོད་ཅག་གིས་པཱ་ཨལ་གྱི་དོན་དུ་རྩོད་གླེང་བྱེད་པ་ཡིན་ནམ། ཡང་ན་ཁྱོད་ཅག་གིས་དེ་སྐྱོབ་འདོད་པ་ཡིན་ནམ། སུ་ཞིག་གིས་དེའི་དོན་དུ་རྩོད་གླེང་བྱེད་ན་དེ་ནི་ནམ་མ་ལངས་སྔོན་ལ་གསོད་པར་འོས། གལ་ཏེ་པཱ་ཨལ་ལྷ་ཡིན་ན། མི་ཞིག་གིས་ཁོའི་མཆོད་ཁྲི་བཤིག་པ་ཡིན་པས་ཁོ་རང་ལ་རྩོད་གླེང་བྱེད་དུ་ཆུག་ཅེས་སྨྲས།  
\v 32 དེའི་ཕྱིར་ཉིན་དེ་ནས་བཟུང་མི་རྣམས་ཀྱིས་གིད་ཡོན་གྱི་མིང་ལ་ཡེ་རུབ་པཱ་ཨལ་ཞེས་བོས་ཤིང་། ཁོས་པཱ་ཨལ་གྱི་མཆོད་ཁྲི་བཤིག་པ་ཡིན་པས་པཱ་ཨལ་ལ་ཁོ་དང་རྩོད་གླེང་བྱེད་དུ་ཆུག་ཅེས་པའི་དོན་ནོ། །  
\v 33 དེའི་དུས་སུ་མིད་ཡཱན་པ་དང་ཨ་མཱད་ལེག་པ། ཤར་ཕྱོགས་པ་བཅས་ཀུན་པོ་འདུས་ནས་གཙང་པོ་བརྒལ་ཞིང་། ཡེ་སི་རེ་ཨེལ་གྱི་ཐང་དུ་སྒར་བཏབ།  
\v 34 དཀོན་མཆོག་ཡ་ཝཱེའི་ཐུགས་ཉིད་གིད་ཡོན་གྱི་སྟེང་དུ་བབས་པ་དང་ཁོས་རྭ་དུང་བུས་ཤིང་། ཨ་བི་ཨེ་ཟཱེར་པ་རྣམས་ཁོའི་རྗེས་སུ་འབྲངས།  
\v 35 ཡང་ཁོས་བང་ཆེན་མངགས་ཏེ་མཱ་ན་ཤེའི་ཡུལ་ཀུན་བརྒྱུད་ཅིང་མཱ་ན་ཤེ་པ་རྣམས་ཀྱང་འདུས་ནས་ཁོའི་རྗེས་སུ་འབྲངས། ཡང་ཨ་ཤེར་དང་ཟེ་བུ་ལུན་དང་། ནཱབ་ཐ་ལི་བཅས་ཀྱི་རྩར་བང་ཆེན་མངགས་ཤིང་། དེ་རྣམས་ཀྱང་ཁོ་རྣམས་དང་འཛོམས་པར་སླེབས་སོ། །   
\s1 དོན་ཡ་མཚན་ཅན།  
\p
\v 36 གིད་ཡོན་གྱིས་དཀོན་མཆོག་ལ། གལ་ཏེ་ཁྱེད་ཀྱིས་ཅི་གསུངས་པ་བཞིན་དུ་ང་རང་བརྒྱུད་ནས་ཡེས་ར་ཨེལ་པ་རྣམས་སྐྱོབ་པ་ཡིན་ན།  
\v 37 གཟིགས་དང་། བདག་གིས་བལ་རྡོག་ཅིག་གཡུལ་ཁ་རུ་འཇོག་པར་བྱ་སྟེ། གལ་ཏེ་བལ་རྡོག་ཁོ་ནའི་སྟེང་དུ་ཟིལ་བ་ཡོད་པ་དང་ཉེ་འཁོར་ཐམས་ཅད་སྐམ་པོར་ལུས་ན། ཁྱེད་ཀྱིས་ཅི་གསུངས་པ་བཞིན་དུ་ང་རང་བརྒྱུད་ནས་ཡེས་ར་ཨེལ་པ་རྣམས་སྐྱོབ་རྒྱུ་ཡིན་པ་བདག་གིས་ཤེས་པར་འགྱུར་ཞེས་ཞུས་སོ། །  
\v 38 དེའི་ཕྱི་ཉིན་ཞོགས་པར་གིད་ཡོན་ཡར་ལངས་པ་ལ་དེ་བཞིན་དུ་བྱུང་བ་མཐོང་ཞིང་། བལ་རྡོག་བཙིར་བ་ལ་ཆུ་ཕོར་བ་གང་ཐོན་ནོ། །  
\v 39 དེ་ནས་གིད་ཡོན་གྱིས་ཡང་དཀོན་མཆོག་ལ་འདི་ལྟར། བདག་གིས་ཡང་བསྐྱར་བལ་རྡོག་ལས་ཚོད་ལྟ་བྱེད་པར་བྱ་ཞེས་ཡང་ཐེངས་ཤིག་ཞུས་པར་ཁྱེད་རང་དགོངས་པ་མི་ཚོམ་པར་མཁྱེན། བལ་རྡོག་ནི་སྐམ་པོར་ལུས་ནས་ཉེ་འཁོར་ཐམས་ཅད་ལ་ཟིལ་བ་འབབ་པར་ཤོག་ཅེས་ཞུས་ཤིང་།  
\v 40 མཚན་མོ་དེར་དཀོན་མཆོག་གིས་ཡང་དེ་བཞིན་མཛད་ཅིང་། བལ་རྡོག་ཁོ་ན་སྐམ་པོར་ལུས་ནས་ཉེ་འཁོར་ཐམས་ཅད་ལ་ཟིལ་བ་བབས་སོ། །   
\c 7
\cl ལེའུ་བདུན་པ། 
\toc1 ༄༅། །ཁྲིམས་དཔོན་གྱི་མདོ། 
\toc2 ཁྲིམས་དཔོན། 
\s1 གིད་ཡོན་གྱིས་མིད་ཡཱན་པ་རྣམས་ཕམ་པར་བརྒྱབ་པ།  
\p
\v 1 ཡེ་རུབ་པཱ་ཨལ་ཞེས་བྱ་བའི་གིད་ཡོན་དང་ཁོའི་རྗེས་སུ་འབྲངས་པ་རྣམས་ནངས་སྔ་མོ་ནས་ཡར་ལངས་ཏེ། ཧ་རོད་ཆུ་མགོའི་རྩར་སྒར་བཏབ། མིད༌ཡཱན་གྱི་དམག་སྒར་ནི་བྱང་ཕྱོགས་ཀྱི་ཐང་དུ་མོ་རེ་རི་བོའི་ཉེ་འདབས་སུ་ཡོད་པ་ཡིན།  
\v 2 དཀོན་མཆོག་ཡ་ཝཱེས་གིད་ཡོན་ལ་འདི་སྐད་དུ། ཁྱོད་ཀྱི་རྗེས་སུ་འབྲངས་པའི་མི་མང་དྲགས་པས་བདག་གིས་མིད་ཡཱན་པ་རྣམས་ཁོ་ཚོའི་ལག་ཏུ་སྤྲོད་མི་རུང་སྟེ། ཡེས་ར་ཨེལ་པ་རྣམས་ཀྱིས་ང་ལ་འུད་ཤོབ་བྱས་ཏེ། ང་ཚོ་རང་གིས་རང་ཉིད་བསྐྱབས་པ་ཡིན་ཞེས་ཟེར་ཉེན་ཆེ།  
\v 3 ཁྱོད་ཀྱིས་ད་ལྟ་མི་འདི་རྣམས་ལ་འདི་ལྟར། འཇིགས་ཤིང་དཔའ་ཞུམ་པ་རྣམས་གིལ་ཨད་རི་དང་བྲལ་ནས་ཕྱིར་ལོག་ཆོག་ཅེས་ཁྱབ་བསྒྲགས་བྱོས་ཤིག་ཅེས་གསུངས་ཤིང་། དེ་ནས་མི་ཉིས་ཁྲི་ཉིས་སྟོང་ཕྱིར་ལོག་ཅིང་ཆིག་ཁྲི་འབའ་ཞིག་ལུས་སོ། །  
\v 4 ཡང་དཀོན་མཆོག་ཡ་ཝཱེས་གིད་ཡོན་ལ་འདི་སྐད་དུ། མི་ནི་ད་དུང་མང་དྲགས་པས་ཁྱོད་ཀྱིས་དེ་རྣམས་ཆུ་འགྲམ་དུ་ཁྲིད་དང་། བདག་གིས་དེ་རུ་ཁྱོད་ཀྱི་ཕྱིར་ཁོ་རྣམས་ལ་ཚོད་བགམ་བྱེད་པར་བྱ། ངས་སུ་ཞིག་ཁྱོད་དང་མཉམ་དུ་འགྲོ་ཆོག་པར་བསྟན་ན་དེ་ཁྱོད་དང་ལྷན་ཅིག་ཏུ་འགྲོ་བར་རུང་ལ། ངས་སུ་ཞིག་ཁྱོད་དང་མཉམ་དུ་འགྲོ་མི་ཆོག་པར་བསྟན་ན་དེ་ཁྱོད་དང་ལྷན་ཅིག་ཏུ་འགྲོ་བར་མི་རུང་ཞེས་གསུངས་པས།  
\v 5 གིད་ཡོན་གྱིས་མི་རྣམས་མར་ཆུ་འགྲམ་དུ་ཁྲིད་པ་དང་། དཀོན་མཆོག་ཡ་ཝཱེས་གིད་ཡོན་ལ། སུ་ཞིག་གིས་ཁྱི་ལྟར་ཆུ་ལྕེ་ཡིས་བལྡགས་ནས་འཐུང་བ་ཡིན་ན་དེ་རྣམས་ལོགས་སུ་ཁོར་དང་། ཡང་སུ་ཞིག་གིས་པུས་མོ་བཙུགས་ནས་ཆུ་འཐུང་བ་རྣམས་ཀྱང་དེ་བཞིན་དུ་ལོགས་སུ་ཁོར་ཅིག་ཅེས་གསུངས་སོ། །  
\v 6 དེ་ནས་ཆུ་ལག་མཐིལ་དུ་བླངས་ནས་བལྡགས་ཏེ་འཐུང་མཁན་མི་སུམ་བརྒྱ་བྱུང་བ་དང་། དེའི་འཕྲོ་མ་རྣམས་ཀྱིས་པུས་མོ་བཙུགས་ཏེ་ཆུ་འཐུང་ངོ་། །  
\v 7 དཀོན་མཆོག་ཡ་ཝཱེས་གིད་ཡོན་ལ་འདི་སྐད་དུ། ཆུ་བལྡགས་ཏེ་འཐུང་བའི་མི་སུམ་བརྒྱ་འདི་བརྒྱུད་ནས་བདག་གིས་ཁྱོད་རྣམས་སྐྱོབ་ཅིང་། མིད་ཡཱན་པ་རྣམས་ཁྱོད་ཀྱི་ལག་ཏུ་སྤྲོད་པར་བྱ། དེའི་འཕྲོ་མ་རྣམས་རང་རང་སར་ལོག་ཆོག་ཅེས་གསུངས་པ་ལ།  
\v 8 མི་སུམ་བརྒྱ་བོ་དེས་བྲོ་དང་རྭ་དུང་ཁྱེར་བ་དང་། གིད་ཡོན་གྱིས་དེའི་འཕྲོ་ཡི་ཡེས་ར་ཨེལ་པ་ཐམས་ཅད་རང་རང་གི་གུར་ཡོད་སར་ལོག་ཏུ་བཅུག མི་སུམ་བརྒྱ་བོ་རང་གི་རྩར་བཞག་པ་དང་། མིད༌ཡཱན་གྱི་དམག་སྒར་ནི་ཁོའི་ཉེ་འདབས་ཀྱི་ཐང་དུ་ཡོད་དོ། །  
\v 9 མཚན་མོ་དེར་དཀོན་མཆོག་ཡ་ཝཱེས་གིད་ཡོན་ལ་འདི་སྐད་དུ། བདག་གིས་ཁོ་རྣམས་ཁྱོད་ཀྱི་ལག་ཏུ་སྤྲད་ཟིན་པས། ཡར་ལོངས་ལ་མར་མིད་ཡཱན་གྱི་དམག་སྒར་དུ་སོང་ཞིག  
\v 10 གལ་ཏེ་ཁྱོད་འགྲོ་བར་འཇིགས་ན། ཁྱོད་ཀྱི་གཡོག་པོ་ཕུ་རཱ་ཁྲིད་ནས་དམག་སྒར་དེ་རུ་སོང་དང་།  
\v 11 ཁོ་རྣམས་ཀྱིས་ཅི་སྨྲ་བ་ཁྱོད་ཀྱིས་ཐོས་པ་དང་། ཁྱོད་ལ་མར་སོང་ནས་དམག་སྒར་དེར་དཔུང་འཇུག་བྱེད་པའི་སྙིང་སྟོབས་ལྡན་པར་འགྱུར་ཞེས་གསུངས། དེ་ནས་གིད་ཡོན་གྱིས་གཡོག་པོ་ཕུ་རཱ་ཁྲིད་ནས་མར་དམག་སྒར་གྱི་མཐའ་མཚམས་སུ་སོང་ངོ་། །  
\v 12 དེར་མིད་ཡཱན་པ་དང་ཨ་མཱད་ལེག་པ། ཤར་ཕྱོགས་པ་ཐམས་ཅད་ཐང་ལ་ཁྱབ་ཅིང་འབུ་ཆ་ག་པ་ལྟར་མང་ལ། དེ་རྣམས་ཀྱི་རྔ་མོང་ནི་མཚོ་འགྲམ་གྱི་བྱེ་མ་ལྟར་བགྲང་ལས་འདས་པའོ། །  
\v 13 གིད་ཡོན་དེར་སླེབས་པ་ལ། མི་ཞིག་གིས་རང་གི་གྲོགས་པོར་རྨི་ལམ་བཤད་དེ་འདི་ལྟར་སྨྲས་པ་སྟེ། ལྟོས་དང་། བདག་གིས་རྨི་ལམ་ཞིག་རྨིས་པ་ནི་འདི་ལྟ་སྟེ། སོ་ཕྱེའི་བག་ལེབ་ཅིག་མིད༌ཡཱན་གྱི་དམག་སྒར་དུ་གྲིལ་འོང་ཞིང་། གུར་གྱི་རྩར་སླེབས་ནས་གུར་ལ་ཐོགས་ཏེ་བསྒྱེལ་བ་དང་གུར་གྱི་མགོ་རྟིང་བསློགས་ཞེས་པ་ལ།  
\v 14 གྲོགས་པོ་དེ་ན་རེ། འདི་ནི་གཞན་ཞིག་མ་ཡིན་པར་ཡེས་ར་ཨེལ་པ་ཡོ་ཨ་སིའི་བུ་གིད་ཡོན་གྱི་རལ་གྲི་ཡིན་ཏེ། དཀོན་མཆོག་གིས་མིད༌ཡཱན་དང་དམག་མི་ཡོངས་རྫོགས་ཁོའི་ལག་ཏུ་སྤྲད་པ་ཡིན་ཞེས་སྨྲས་སོ། །  
\v 15 གིད་ཡོན་གྱིས་རྨི་ལམ་དང་དེའི་དོན་འགྲེལ་ཐོས་ནས་དཀོན་མཆོག་ལ་བསྙེན་བཀུར་ཕུལ་ཞིང་། ཡེས་ར་ཨེལ་པའི་དམག་སྒར་དུ་ཕྱིར་ལོག་སྟེ་འདི་ལྟར། ཡར་ལོངས་དང་། དཀོན་མཆོག་ཡ་ཝཱེས་མིད༌ཡཱན་གྱི་དམག་དཔུང་ཁྱོད་རྣམས་ཀྱི་ལག་ཏུ་སྤྲད་ཟིན་ཞེས་སྨྲས་པའོ། །  
\v 16 དེ་ནས་གིད་ཡོན་གྱིས་མི་སུམ་བརྒྱ་ཁག་གསུམ་དུ་བགོས་ནས། མི་རེའི་ལག་ཏུ་རྭ་དུང་རེ་དང་རྫ་ཁོག་སྟོང་བ་རེ་སྤྲད་ཅིང་། རྫ་ཁོག་རེ་རེའི་ནང་དུ་དཔལ་འབར་རེ་བཞག་པ་དང་།  
\v 17 དེ་རྣམས་ལ་འདི་ལྟར་སྨྲས་པ་སྟེ། ཁྱོད་རྣམས་ཀྱིས་བདག་གིས་ཅི་བྱེད་པར་ལྟོས་ཤིག ངས་དམག་སྒར་གྱི་རྩར་སླེབས་ནས་ཅི་ལྟར་བྱས་ན་ཁྱོད་ཅག་གིས་ཀྱང་དེ་ལྟར་བྱོས་ཤིག  
\v 18 ང་དང་ངའི་རྗེས་སུ་འབྲངས་པ་ཐམས་ཅད་ཀྱིས་རྭ་དུང་འབུད་པའི་དུས་སུ། ཁྱོད་རྣམས་ཀྱིས་ཀྱང་དམག་སྒར་གྱི་ཕྱོགས་བཞི་རུ་རྭ་དུང་འབུད་པ་དང་། དཀོན་མཆོག་ཡ་ཝཱེ་དང་གིད་ཡོན་གྱི་ཕྱིར་ཞེས་འུར་རྒྱོབ་ཅིག་ཅེས་པའོ། །  
\v 19 གིད་ཡོན་དང་ཁོའི་རྗེས་སུ་འབྲངས་པའི་མི་བརྒྱ་བོ་དེ་མཚན་མོ་ཐུན་གཉིས་པའི་ཐོག་མར་སོ་སྲུང་བརྗེ་བའི་དུས་སུ་དམག་སྒར་གྱི་རྩར་སླེབས་ནས། རྭ་དུང་བུས་ཤིང་ལག་གི་རྫ་ཁོག་བཅག་གོ །  
\v 20 ཁག་གསུམ་པོས་རྭ་དུང་བུས་ཤིང་རྫ་ཁོག་བཅག གཡོན་ལག་ཏུ་དཔལ་འབར་ཐོགས་པ་དང་གཡས་ལག་ཏུ་རྭ་དུང་བཟུང་ནས། དཀོན་མཆོག་ཡ་ཝཱེ་དང་གིད་ཡོན་གྱི་རལ་གྲི་ཞེས་འུར་བརྒྱབ།  
\v 21 ཁོ་རྣམས་དམག་སྒར་གྱི་ཕྱོགས་བཞི་རུ་རང་རང་སར་ལངས་བསྡད་པ་ལ་སྒར་ཡོངས་ཀྱི་མི་ཐམས་ཅད་ཡར་རྒྱུག་མར་རྒྱུག་བྱས་ནས་འཁྲུག་ཅིང་། དེ་རྣམས་ཀི་འདེབས་བཞིན་བྲོས་སོ། །  
\v 22 མི་སུམ་བརྒྱ་དེས་རྭ་དུང་བུས་པ་དང་། དཀོན་མཆོག་ཡ་ཝཱེས་དམག་སྒར་གྱི་མི་ཐམས་ཅད་ལ་རལ་གྲིས་ཕན་ཚུན་སྣུན་པར་མཛད་ཅིང་། དེ་རྣམས་ཚེ་རེ་རཱ་ཞེས་པའི་པེད་ཤིད་ཏ་དང་། ཏབ་པཱད་ཉེ་འགྲམ་གྱི་ཨ་བེལ་མེ་ཧོ་ལཱའི་བར་དུ་བྲོས་སོ། །  
\v 23 དེ་ནས་ཡེས་ར་ཨེལ་པ་རྣམས་ནཱབ་ཐ་ལི་དང་ཨ་ཤེར་དང་། མཱ་ན་ཤེ་བཅས་ཀྱི་ཡུལ་ཐམས་ཅད་ནས་འདུས་ཏེ་མིད་ཡཱན་པ་རྣམས་ཀྱི་ར་མདར་བརྒྱུགས།  
\v 24 གིད་ཡོན་གྱིས་ཨེ་ཕཱར་ཡིམ་གྱི་རི་ཁུལ་ཐམས་ཅད་དུ་བང་ཆེན་མངགས་ནས་འདི་ལྟར། ཁྱོད་རྣམས་མར་ཤོག་ལ་མིད་ཡཱན་པར་རྒོལ་ཞིག དེ་དག་གི་སྔོན་ལ་པེད་པཱ་རའི་བར་དུ་ཡོར་དན་གཙང་པོའི་རབ་ཁ་སྲུངས་ཤིག་ཅེས་བསྒོས་པ་ལ། ཨེ་ཕཱར་ཡིམ་གྱི་མི་ཐམས་ཅད་འདུས་ནས་པེད་པཱ་རའི་བར་དུ་ཡོར་དན་གཙང་པོའི་རབ་ཁ་བསྲུངས་པ་དང་།  
\v 25 དེ་ཚོས་མིད་ཡཱན་པའི་འགོ་དཔོན་གཉིས་ཟིན་པ་སྟེ་གཅིག་གི་མིང་ལ་ཨོ་རེབ་ཅེས་དང་ཅིག་ཤོས་དེའི་མིང་ལ་ཟེབ་ཅེས་བྱ། ཨོ་རེབ་ནི་ཨོ་རེབ་ཀྱི་ཕ་བོང་སྟེང་དུ་བསད་ཅིང་། ཟེབ་ནི་ཟེབ་ཀྱི་རྒུན་འབྲུམ་འཚིར་གཞོང་ཡོད་སར་བསད་པ་དང་། ཡང་མིད་ཡཱན་པ་རྣམས་བདས་ནས། ཨོ་རེབ་དང་ཟེབ་གཉིས་ཀྱི་མགོ་བོ་ཡོར་དན་གཙང་པོའི་ཕ་རོལ་ཏུ་གིད་ཡོན་ཡོད་སར་ཁྱེར་ཏོ། །   
\c 8
\cl ལེའུ་བརྒྱད་པ། 
\toc1 ༄༅། །ཁྲིམས་དཔོན་གྱི་མདོ། 
\toc2 ཁྲིམས་དཔོན། 
\s1 གིད་ཡོན་ཞེས་པ་མིད་ཡཱན་གྱི་རྒྱལ་པོའི་ར་མདར་བརྒྱུགས་པ།  
\p
\v 1 དེར་ཨེ་ཕཱར་ཡིམ་པ་རྣམས་ཀྱིས་གིད་ཡོན་ལ་འདི་ལྟར། ཁྱོད་རང་མིད་ཡཱན་པ་རྣམས་ལ་འཐབ་འཛིང་བྱེད་དུ་འགྲོ་དུས་ངེད་ཅག་མ་བོས་ཤིང་། ངེད་ཅག་ལ་འདི་ལྟར་བྱེད་དོན་ཅི་ཞེས་སྨྲས་ནས། དེ་རྣམས་ཀྱིས་གིད་ཡོན་དང་ཁ་རྩོད་དྲག་པོ་བྱས།  
\v 2 གིད་ཡོན་གྱིས་དེ་རྣམས་ལ་འདི་ལྟར་སྨྲས་པ་སྟེ། བདག་གིས་ཅི་བྱས་པ་ནི་ཁྱོད་རྣམས་ཀྱིས་བྱས་པར་བསྡུར་ནུས་སམ། ཨེ་ཕཱར་ཡིམ་གྱིས་བཏུས་པའི་རྒུན་འབྲུམ་ལྷག་མ་དེ་ཨ་བི་ཨེ་ཟཱེར་གྱིས་བཏོགས་པའི་རྒུན་འབྲུམ་ལས་ལེགས་པ་མ་ཡིན་ནམ།  
\v 3 དཀོན་མཆོག་གིས་མིད་ཡཱན་པའི་འགོ་དཔོན་ཨོ་རེབ་དང་ཟེབ་གཉིས་ཁྱོད་ཅག་གི་ལག་ཏུ་སྤྲད་ཅིང་། བདག་གིས་ཅི་བྱས་པ་ནི་ཁྱོད་རྣམས་ཀྱིས་བྱས་པར་བསྡུར་ནུས་སམ་ཞེས་པའོ། །གིད་ཡོན་གྱིས་དེ་སྐད་སྨྲས་པ་དང་ཨེ་ཕཱར་ཡིམ་པ་རྣམས་ཀྱི་ཁོང་ཁྲོ་ཞི་བར་གྱུར་ཏོ། །  
\v 4 གིད་ཡོན་དང་ཁོའི་རྗེས་སུ་འབྲངས་པའི་མི་སུམ་བརྒྱ་བོ་ཡོར་དན་གཙང་པོར་སླེབས་ནས་དེ་བརྒལ་ཞིང་། ཐང་ཆད་ཀྱང་ད་དུང་ར་མདར་བརྒྱུགས།  
\v 5 གིད་ཡོན་གྱིས་སོའུ་ཀོད་པ་རྣམས་ལ་འདི་ལྟར་སྨྲས་པ་སྟེ། ངའི་རྗེས་སུ་འབྲངས་པ་རྣམས་ནི་ཐང་ཆད་པས་ཁྱེད་ཀྱིས་ཁོ་ཚོར་བག་ལེབ་གནང་རོགས་ཞུ། ངེད་རྣམས་མིད་ཡཱན་པའི་རྒྱལ་པོ་ཟེ་བཱ་དང་ཚལ་མུན་ནཱ་གཉིས་ཀའི་ར་མདར་རྒྱུག་གིན་ཡོད་ཅེས་པ་ལ།  
\v 6 སོའུ་ཀོད་པའི་འགོ་དཔོན་ན་རེ། ཟེ་བཱ་དང་ཚལ་མུན་ནཱ་གཉིས་ཁྱོད་ཀྱི་ལག་ཏུ་ཡོད་པས། ངེད་ཅག་གིས་ཁྱོད་ཀྱི་དམག་ལ་བག་ལེབ་སྟེར་དགོས་པ་ཡིན་ནམ་ཞེས་སྨྲས།  
\v 7 གིད་ཡོན་གྱིས་འདི་ལྟར་སྨྲས་པ་སྟེ། དཀོན་མཆོག་ཡ་ཝཱེས་ཟེ་བཱ་དང་ཚལ་མུན་ནཱ་གཉིས་ངའི་ལག་ཏུ་སྤྲད་རྗེས། བདག་གིས་ས་རྒོད་ཀྱི་སྡོང་ཕྲན་ཡལ་ག་དང་ཚེར་མས་ཁྱོད་རྣམས་རྨས་པར་བྱ་ཞེས་པའོ། །  
\v 8 གིད་ཡོན་ཡུལ་དེ་ནས་ཡར་ཕཱ་ནེ་ཨེལ་དུ་ཕྱིན་ཅིང་ཡུལ་དེའི་མི་རྣམས་ལའང་དེ་བཞིན་སྨྲས་པ་ལ། ཕཱ་ནེ་ཨེལ་པ་རྣམས་ཀྱིས་ཀྱང་སོའུ་ཀོད་པ་རྣམས་ཀྱིས་ཁོ་ལ་ཇི་ལྟར་ལན་བཏབ་པ་བཞིན་དུ་སྨྲས།  
\v 9 ཁོས་ཕཱ་ནེ་ཨེལ་པ་རྣམས་ལ་འདི་ལྟར་སྨྲས་པ་སྟེ། ང་རང་བདེ་བར་ཕྱིར་ལོག་པའི་དུས་སུ། ངས་ལྕོག་མཁར་འདི་བཤིག་པར་བྱ་ཞེས་པའོ། །  
\v 10 དེའི་དུས་སུ་ཟེ་བཱ་དང་ཚལ་མུན་ནཱ་གཉིས་ཁོ་ཚོའི་རྗེས་སུ་འབྲངས་པའི་དམག་དཔུང་དང་བཅས་ཐམས་ཅད་ཁ་གོར་དུ་གནས་ཤིང་། ཧ་ལམ་མི་ཆིག་ཁྲི་ལྔ་སྟོང་ཙམ་ཡོད་དེ། ཤར་ཕྱོགས་པའི་དམག་མི་ཡོངས་རྫོགས་ལས་ལུས་པའི་གྲངས་ཀ་ཡིན་ལ། རལ་གྲི་ཐོགས་མཁན་ཧ་ལམ་ཁྲི་བཅུ་གཉིས་བསད་པའོ། །  
\v 11 དེ་ནས་གིད་ཡོན་ནི་ནོ་བ་དང་ཡོག་པེ་ཧ་ཡི་ཤར་ཕྱོགས་ནས། གུར་དུ་སྡོད་པ་རྣམས་ཀྱི་ལམ་ཁ་ནས་ཡར་ཕྱིན་ཏེ། མིད་ཡཱན་པའི་དམག་དཔུང་འཇིགས་སྣང་གང་ཡང་མེད་པར་གནས་པས། ཁོས་དེ་རྣམས་ཕམ་པར་བརྒྱབ།  
\v 12 ཟེ་བཱ་དང་ཚལ་མུན་ནཱ་གཉིས་བྲོས་ཤིང་། གིད་ཡོན་གྱིས་ཁོ་གཉིས་བདས་ནས། མིད༌ཡཱན་གྱི་རྒྱལ་པོ་ཟེ་བཱ་དང་ཚལ་མུན་ནཱ་གཉིས་བཟུང་ཞིང་། དམག་མི་ཡོངས་རྫོགས་འཇིགས་ནས་འཐོར་དུ་བཅུག  
\v 13 ཡོ་ཨ་སིའི་བུ་གིད་ཡོན་ནི་ཧེ་རེ་སི་སྒང་བརྒྱུད་དེ་གཡུལ་ལས་ཕྱིར་ལོག་ཅིང་།  
\v 14 སོའུ་ཀོད་པའི་གཞོན་ནུ་ཞིག་བཟུང་སྟེ་ཁོ་ལ་འདི་ལྟར། སོའུ་ཀོད་ཀྱི་འགོ་དཔོན་དང་རྒན་པོ་རྣམས་ནི་སུ་ཡིན་ཞེས་དྲིས་པ་ན། དེས་འགོ་དཔོན་དང་རྒན་པོ་མི་དོན་བདུན་གྱི་མིང་རྣམས་བྲིས།  
\v 15 དེ་ནས་གིད་ཡོན་ནི་སོའུ་ཀོད་དུ་སླེབས་ཤིང་དེའི་མི་རྣམས་ལ་འདི་ལྟར། སྔར་ཁྱོད་རྣམས་ཀྱིས་བདག་ལ་འཕྱ་སྨོད་བྱེད་ཀྱིན། ཟེ་བཱ་དང་ཚལ་མུན་ནཱ་གཉིས་ཁྱོད་ཀྱི་ལག་ཏུ་ཡོད་པས། ངེད་ཅག་གིས་ཁྱོད་ཀྱི་རྗེས་སུ་འབྲངས་པའི་ཐང་ཆད་པའི་མི་རྣམས་ལ་བག་ལེབ་སྟེར་དགོས་པ་ཡིན་ནམ་ཞེས་པ་དང་། ད་ནི་ཟེ་བཱ་དང་ཚལ་མུན་ནཱ་གཉིས་འདི་རུ་ཡོད་ཅེས་སྨྲས་ཤིང་།  
\v 16 དེ་ནས་དེས་གྲོང་ཁྱེར་དེའི་རྒན་པོ་རྣམས་བཟུང་བ་དང་། ས་རྒོད་ཀྱི་སྡོང་ཕྲན་ཡལ་ག་དང་ཚེར་མས་སོའུ་ཀོད་པ་རྣམས་ལ་ཉེས་རྡུང་བཏང་ངོ་། །  
\v 17 ཡང་ཕཱ་ནེ་ཨེལ་གྱི་ལྕོག་མཁར་བཤིག་ནས་གྲོང་ཁྱེར་དེའི་སྐྱེས་པ་རྣམས་བསད་དོ། །  
\v 18 དེར་གིད་ཡོན་གྱིས་ཟེ་བཱ་དང་ཚལ་མུན་ནཱ་གཉིས་ལ་འདི་ལྟར། ཁྱོད་ཅག་གིས་ཐ་པོར་རི་བོར་བསད་པའི་མི་ནི་ཅི་འདྲ་འདུག་ཅེས་དྲིས་པ་ལ། ལན་དུ། ཁོ་རྣམས་ཁྱེད་དང་མཚུངས་ཤིང་རེ་རེ་རྒྱལ་སྲས་ལྟ་བུ་འདུག་ཅེས་སྨྲས་པ་དང་།  
\v 19 ཡང་གིད་ཡོན་ན་རེ། ཁོ་རྣམས་ནི་ངའི་མ་གཅིག་གི་སྤུན་ཡིན། བདག་གིས་རྒྱུན་ནས་རྒྱུན་དུ་གསོན་པོར་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་བསྐྱལ་བ་སྟེ། གལ་ཏེ་ཁྱོད་ཅག་གིས་སྔར་ཁོ་རྣམས་ཀྱི་སྲོག་བསྐྱུར་བ་ཡིན་ན། བདག་གིས་ད་ལྟ་ཁྱོད་ཅག་གསོད་པ་མིན་ཞེས་སྨྲས་ཤིང་།  
\v 20 ཁོའི་བུ་སྐྱེས་འགོ་ཡེ་ཐེར་ལ། ཁྱོད་ཡར་ལོངས་ལ་ཁོ་རྣམས་སོད་ཅིག་ཅེས་སྨྲས་ནའང་། ཡེ་ཐེར་ནི་ད་དུང་བྱིས་པ་ཡིན་པས་འཇིགས་ནས་རལ་གྲི་ཕྱུང་མ་ཕོད།  
\v 21 ཟེ་བཱ་དང་ཚལ་མུན་ནཱ་གཉིས་ན་རེ། ཁྱོད་རང་ཉིད་ལོངས་ལ་ངེད་གཉིས་སོད་ཅིག ཅི་ལ་ཞེ་ན། མི་ཅི་ལྟ་བུ་ཡིན་ན་སྟོབས་ཀྱང་དེ་ལྟར་ཡིན་ཞེས་སྨྲས་པ་དང་། གིད་ཡོན་ཡར་ལངས་ཏེ་ཟེ་བཱ་དང་ཚལ་མུན་ནཱ་གཉིས་བསད་ཅིང་། ཁོ་ཚོའི་རྔ་མོང་རྣམས་ཀྱི་མཇིང་གི་རྒྱན་ཆ་རྣམས་བླངས་སོ། །   
\s1 གིད་ཡོན་གྱིས་ཨོབ་རཱ་རུ་བེར་ཐུལ་ཞིག་བཟོས་པ།  
\p
\v 22 ཡེས་ར་ཨེལ་པ་རྣམས་ཀྱིས་གིད་ཡོན་ལ། ཁྱེད་ཀྱིས་བདག་ཅག་མིད་ཡཱན་པའི་ལག་ནས་བསྐྱབས་ཏེ་ཐར་དུ་བཅུག་པས། ཁྱེད་དང་ཁྱེད་ཀྱི་བུ་རབས་ཚ་རྒྱུད་ཀྱིས་ངེད་རྣམས་ལ་དབང་སྒྱུར་ཅིག་ཅེས་སྨྲས་པ་ལ།  
\v 23 གིད་ཡོན་གྱིས་འདི་ལྟར་སྨྲས་པ་སྟེ། བདག་གིས་ཁྱོད་རྣམས་ལ་དབང་སྒྱུར་བར་མི་བྱ་ཞིང་། བདག་གི་བུ་ཡིས་ཀྱང་ཁྱོད་རྣམས་ལ་དབང་སྒྱུར་བར་མི་བྱ་སྟེ། དཀོན་མཆོག་ཡ་ཝཱེ་གཅིག་པུས་ཁྱོད་རྣམས་ལ་དབང་སྒྱུར་བར་འགྱུར་ཞེས་པ་དང་།  
\v 24 ཡང་གིད་ཡོན་གྱིས་དེ་རྣམས་ལ་འདི་ལྟར་སྨྲས་པ་སྟེ། བདག་ལ་ཁྱོད་ཅག་ལ་ཞུ་བའི་དོན་ཞིག་ཡོད་དེ། ཁྱོད་རྣམས་མི་རེ་རེས་ཕྲོགས་འོངས་པའི་རྣ་ཏོག་རྣམས་ང་ལ་སྟེར་རོགས་ཞེས་པ་ན། ༼མ་གཞི་དགྲ་བོ་ནི་ཡེས་མ་ཨེལ་པ་ཡིན་ཞིང་ཀུན་པོས་གསེར་གྱི་རྣ་ཏོག་འདོགས་པ་ཡིན་ནོ། །༽  
\v 25 ཡེས་ར་ཨེལ་པ་རྣམས་ཀྱིས་ངེད་ཅག་ཁྱོད་ལ་སྟེར་བར་མོས་པ་ཡིན་ཞེས་སྨྲས་ཤིང་། ཕྱི་གོས་ཤིག་བཏིངས་ནས་མི་རེ་རེས་ཕྲོགས་འོངས་པའི་རྣ་ཏོག་དེའི་སྟེང་དུ་འཕངས་སོ། །  
\v 26 གིད་ཡོན་ལ་ཐོབ་པའི་གསེར་གྱི་རྣ་ཏོག་རྣམས་གྱི་ལྗིད་ཚད་ནི་སྲང་ཆིག་སྟོང་བདུན་བརྒྱ་ཡིན་པ་དང་། དེ་མིན་ད་དུང་མིད༌ཡཱན་རྒྱལ་པོ་རྣམས་ཀྱིས་བཏགས་པའི་རྒྱན་ཆ་དང་རྣ་ཏོག གྱོན་པའི་གོས་རྒྱ་སྨུག ད་དུང་རྔ་མོང་མཇིང་གི་གསེར་ཐག་བཅས་ཡོད་དོ། །  
\v 27 གིད་ཡོན་གྱིས་བེར་ཐུལ་ཞིག་བཟོས་ནས་རང་གི་གྲོང་ཁྱེར་ཨོབ་རཱ་རུ་བསླངས་ཏེ། ཕྱིས་སུ་ཡེས་ར་ཨེལ་པ་རྣམས་ཀྱིས་བེར་ཐུལ་དེ་ལ་ཕྱག་བཙལ་ནས་ལོག་གཡེམ་བྱས་པས། དེ་ནི་གིད་ཡོན་དང་ཁོའི་ཁྱིམ་རྒྱུད་ཀྱི་རྙི་རུ་གྱུར་ཏོ། །  
\v 28 དེ་བཞིན་མིད་ཡཱན་པ་རྣམས་ཡེས་ར་ཨེལ་པ་རྣམས་ཀྱི་མདུན་ནས་བཏུལ་ཞིང་མགོ་ཡར་འདེགས་མ་ཕོད་ལ། གིད་ཡོན་གསོན་པའི་དུས་སུ་བགྲང་བྱ་བཞི་བཅུའི་རིང་ལ་ཡུལ་དེ་བདེ་བར་གནས་སོ། །   
\s1 གིད་ཡོན་ཚེ་ལས་འདས་པ།  
\p
\v 29 ཡོ་ཨ་སིའི་བུ་ཡེ་རུབ་པཱ་ཨལ་\f + \ft ཡེ་རུབ་པཱ་ཨལ་ཞེས་པ་ནི་པཱ་ཨལ་གྱིས་འཐབ་འཛིང་བྱེད་ཅེས་པའི་དོན་ལ་འཇུག་ཅིང་གིད་ཡོན་གྱི་མིང་གཞན་ཡིན།\f*ཕྱིར་སོང་ནས་རང་གི་ཁྱིམ་དུ་གནས།  
\v 30 གིད་ཡོན་ལ་ཆུང་མ་མང་པོ་ཡོད་པས་རང་སྐྱེས་ཀྱི་བུ་བདུན་ཅུ་ཡོད་དོ། །  
\v 31 ཁོའི་ཆུན་མ་སི་ཀེམ་དུ་གནས་ཤིང་དེ་ལས་ཀྱང་བུ་ཞིག་སྐྱེས་པ་ལ། གིད་ཡོན་གྱིས་བུ་དེའི་མིང་ལ་ཨ་བི་མེ་ལེག་ཅེས་བཏགས་སོ། །  
\v 32 ཡོ་ཨ་སིའི་བུ་གིད་ཡོན་ལོ་ན་རྒས་ཏེ་ཚེ་ལས་འདས་ཤིང་། ཨ་བི་ཨེ་ཟེར་པ་རྣམས་ཀྱི་ཨོབ་རཱ་ཞེས་པའི་ཡུལ་དུ། རང་གི་ཕ་ཡོ་ཨ་སིའི་དུར་དུ་སྦས་སོ། །  
\v 33 གིད་ཡོན་ཚེ་ལས་འདས་རྗེས། ཡེས་ར་ཨེལ་པ་རྣམས་ཀྱིས་ཡང་བསྐྱར་པཱ་ཨལ་རྣམས་ཀྱི་རྗེས་སུ་འབྲངས་ཏེ་ལོག་གཡེམ་བྱས་ཤིང་། པཱ་ཨལ་པེ་རིད་རང་གི་ལྷ་ཞིག་ཏུ་བཀུར།  
\v 34 ཡེས་ར་ཨེལ་པ་རྣམས་ཀྱིས་ཁོ་རྣམས་ཕྱོགས་བཞིའི་དགྲ་བོ་ཐམས་ཅད་ཀྱི་ལག་ནས་ཐར་བར་མཛད་མཁན་ཏེ། ཁོ་ཚོའི་དཀོན་མཆོག་ཡ་ཝཱེ་མ་དྲན་ལ།  
\v 35 ཡང་ཡེ་རུབ་པཱ་ཨལ་ཞེས་བྱ་བའི་གིད་ཡོན་གྱིས་ཁོ་རྣམས་ལ་བྱས་པའི་ལས་བཟང་པོ་ཐམས་ཅད་བཞིན། དེའི་ཁྱིམ་རྒྱུད་དྲིན་གྱིས་མ་བསྐྱངས་སོ། །   
\c 9
\cl ལེའུ་དགུ་པ། 
\toc1 ༄༅། །ཁྲིམས་དཔོན་གྱི་མདོ། 
\toc2 ཁྲིམས་དཔོན། 
\s1 ཨ་བི་མེ་ལེག  
\p
\v 1 དེ་ནས་ཡེ་རུབ་པཱ་ཨལ་གྱི་བུ་ཨ་བི་མེ་ལེག་ཅེས་བྱ་བ་སི་ཀེམ་ཡུལ་གྱི་རང་གི་ཨ་ཞང་རྣམས་ཀྱི་རྩར་ཕྱིན་ཏེ། དེ་དག་དང་ཁོའི་ཨ་མའི་ཁྱིམ་རྒྱུད་ལ་འདི་ལྟར་སྨྲས་པ་སྟེ།  
\v 2 ཁྱོད་རྣམས་ཀྱིས་སི་ཀེམ་གྱི་འགོ་དཔོན་ཀུན་ལ། ཡེ་རུབ་པཱ་ཨལ་གྱི་བུ་བདུན་ཅུ་བོ་ཚང་མས་ཁྱོད་རྣམས་ལ་དབང་བསྒྱུར་ན་བཟང་ངམ། ཡང་ན་མི་གཅིག་གིས་ཁྱོད་རྣམས་ལ་དབང་བསྒྱུར་ན་བཟང་། ཡང་ང་རང་ཁྱོད་རྣམས་ཀྱི་ཤ་དང་རུས་པའི་གཉེན་ཉེ་ཡིན་པ་ཡིད་ལ་དྲན་དགོས་ཞེས་ཞུ་བར་མཛོད་ཅེས་པ་ལ།  
\v 3 ཁོའི་ཨ་ཞང་རྣམས་ཀྱིས་ཁོའི་དོན་དུ་གཏམ་འདི་ཐམས་ཅད་སི་ཀེམ་པ་རྣམས་ལ་སྨྲས་པ་དང་། དེ་དག་གི་སེམས་ནི་ཨ་བི་མེ་ལེག་གི་ཕྱོགས་སུ་འཁོར་ཞིང་། ཁོ་ནི་མ་གཞི་བདག་ཅག་གི་སྤུན་ཡིན་ཞེས་སྨྲས་ནས།  
\v 4 དེ་ཚོས་པཱ་ཨལ་པེ་རིད་ཀྱི་མཆོད་ཁང་ནས་དངུལ་སྲང་བདུན་ཅུ་བླངས་ནས་ཨ་བི་མེ་ལེག་ལ་སྤྲད་ཅིང་། ཨ་བི་མེ་ལེག་གིས་དངུལ་དེ་ཡིས་རང་གི་རྗེས་སུ་འབྲང་བའི་ཁྲམ་པ་ཇག་རྐུན་སྐོར་ཞིག་གླས་པའོ། །  
\v 5 དེ་ནས་ཁོ་ཨོབ་རཱ་རུ་རང་གི་ཕ་ཡི་ཁྱིམ་དུ་ཕྱིན་ཅིང་། ཁོའི་སྤུན་རྣམས་ཏེ་ཡེ་རུབ་པཱ་ཨལ་གྱི་བུ་བདུན་ཅུ་བོ་ཕ་བོང་གཅིག་གི་སྟེང་བསད་པ་དང་། ཡེ་རུབ་པཱ་ཨལ་གྱི་བུ་ཆུང་བ་ཡོ་ཐམ་ནི་སྦས་བསྡད་པས་དེ་ཁོ་ན་ལུས་སོ། །  
\v 6 སི་ཀེམ་པ་དང་པེད་མིལ་ལོས་ཀྱི་མི་རྣམས་མཉམ་དུ་འཛོམས་ཤིང་། སི་ཀེམ་གྱི་བེ་ཤིང་གི་ཀ་བ་ཡོད་སར་ཕྱིན་ཏེ་ཨ་བི་མེ་ལེག་རྒྱལ་པོར་བསྐོས་སོ། །  
\v 7 མི་ཞིག་གིས་དོན་དེ་ཡོ་ཐམ་ལ་སྨྲས་པས་ཁོ་རང་གེ་རི་ཟིམ་རི་མགོར་སོང་སྟེ་སྐད་ཆེན་པོས་འདི་ལྟར་སྨྲས་པ་སྟེ། ཀྱེ་སི་ཀེམ་པ་རྣམས། དཀོན་མཆོག་གིས་ཁྱོད་ཅག་ལ་གསན་པའི་ཕྱིར་བདག་ལ་ཉོན་ཅིག  
\v 8 དུས་ནམ་ཞིག་གི་ཚེ་ལྗོན་ཤིང་རྣམས་ཀྱིས་ལྗོན་ཤིང་གཅིག་རྒྱལ་པོར་བསྐོས་ནས། ཁོ་རྣམས་ལ་བདག་སྐྱོང་བྱེད་དུ་འཇུག་དགོས་འདོད་དེ། སོང་ནས་སྐྱུ་རུ་ཤིང་ལ་འདི་ལྟར། ཁྱེད་རང་ཕེབས་ནས་ངེད་ཅག་གི་རྒྱལ་པོར་བཞུགས་པར་མཛོད་ཅེས་ཞུས་པ་ལ།  
\v 9 སྐྱུ་རུ་ཤིང་ན་རེ། བདག་གིས་ལྷ་ལ་བསྙེན་བཀུར་འབུལ་བ་དང་མི་རྣམས་ལ་བཀུར་བྱེད་ཀྱི་སྣུམ་བསྐྱུར་ཏེ། ལྗོན་ཤིང་རྣམས་ཀྱི་རྩེ་མོར་གཡོ་རུང་ངམ་ཞེས་སྨྲས།  
\v 10 དེ་ནས་ལྗོན་ཤིང་རྣམས་ཀྱིས་སེ་ཡབ་ཤིང་ལ་འདི་ལྟར། ཁྱེད་རང་ཕེབས་ནས་ངེད་ཅག་གི་རྒྱལ་པོར་བཞུགས་པར་མཛོད་ཅེས་ཞུས་པ་ལ།  
\v 11 སེ་ཡབ་ཤིང་ན་རེ། བདག་གིས་ཞིམ་མངར་ལྡན་པའི་འབྲས་བུ་བསྐྱེད་པ་སྤངས་ནས་ལྗོན་ཤིང་རྣམས་ཀྱི་རྩེ་མོར་གཡོ་རུང་ངམ་ཞེས་སྨྲས།  
\v 12 དེ་ནས་ལྗོན་ཤིང་རྣམས་ཀྱིས་རྒུན་འབྲུམ་ཤིང་ལ་འདི་ལྟར། ཁྱེད་རང་ཕེབས་ནས་ངེད་ཅག་གི་རྒྱལ་པོར་བཞུགས་པར་མཛོད་ཅེས་ཞུས་པ་ལ།  
\v 13 རྒུན་འབྲུམ་ཤིང་ན་རེ། བདག་གིས་ལྷ་དང་མི་རྣམས་སྤྲོ་བར་བྱེད་པའི་རྒུན་ཆང་གསར་པ་བསྐྱུར་ནས། ལྗོན་ཤིང་རྣམས་ཀྱི་རྩེ་མོར་གཡོ་རུང་ངམ་ཞེས་སྨྲས།  
\v 14 དེ་ནས་ལྗོན་ཤིང་རྣམས་ཀྱིས་ཚེར་མ་ལ་འདི་ལྟར། ཁྱེད་རང་ཕེབས་ནས་ངེད་ཅག་གི་རྒྱལ་པོར་བཞུགས་པར་མཛོད་ཅེས་ཞུས་པ་ལ།  
\v 15 ཚེར་མ་ན་རེ། གལ་ཏེ་ཁྱོད་རྣམས་ཀྱིས་བསམ་པ་རྣམ་དག་གིས་ང་རང་རྒྱལ་པོར་བསྐོས་པ་ཡིན་ན། བདག་གི་གྲིབ་བསིལ་འོག་ཏུ་སྡོད་དགོས། དེ་ལྟར་མིན་ཚེ། ཚེར་མ་ལས་མེ་ཐོན་ཏེ་ལེ་པཱ་ནོན་གྱི་ཐང་ཤིང་རྣམས་འགེམ་པར་ཤོག་ཅེས་སྨྲས་སོ། །  
\v 16 ད་ལྟ་ཁྱོད་ཅག་གིས་གཞུང་དྲང་ཟོལ་མེད་ཀྱིས་ཨ་བི་མེ་ལེག་རྒྱལ་པོར་བསྐོས་ཤིང་། གལ་ཏེ་ཡེ་རུབ་པཱ་ཨལ་དང་ཁོའི་ཁྱིམ་རྒྱུད་ལ་བཟང་པོ་བྱས་ཏེ། ཁོ་ཡི་ལག་པས་བཟོས་པ་ལྟར་དེ་ལ་དྲིན་ལན་འཇལ་ན།  
\v 17 སྔར་བདག་གི་ཡབ་ཀྱིས་རང་སྲོག་འབེན་ལ་བཞག་ནས་ཁྱོད་ཚོའི་དོན་དུ་འཐབ་ཅིང་། ཁྱོད་རྣམས་བསྐྱབས་ཏེ་མིད་ཡཱན་པའི་ལག་ནས་ཐར་དུ་བཅུག  
\v 18 ཡིན་ནའང་ད་ལྟ་ཁྱོད་ཅག་ལངས་ཏེ་ངའི་ཕ་ཡི་ཁྱིམ་རྒྱུད་ལ་རྒོལ་ཞིང་། ཁོའི་བུ་བདུན་ཅུ་བོ་ཕ་བོང་གཅིག་གི་སྟེང་དུ་བསད་པ་དང་། ཡང་ཁོའི་གཡོག་མོ་ལས་སྐྱེས་པའི་བུ་སྟེ་ཨ་བི་མེ་ལེག་ནི་སི་ཀེམ་པའི་རྒྱལ་པོར་བསྐོས་པ་དང་། མ་གཞི་དེ་ནི་ཁྱོད་ཅག་གི་སྤུན་ཡིན་པའོ། །  
\v 19 གལ་ཏེ་ཁྱོད་རྣམས་ཀྱིས་ད་ལྟ་ཡེ་རུབ་པཱ་ཨལ་དང་ཁོའི་ཁྱིམ་རྒྱུད་ལ་གཞུང་དྲང་ཟོལ་མེད་ཀྱི་སྤྱོད་སྟངས་འཛིན་ན། ཁྱོད་རྣམས་ཨ་བི་མེ་ལེག་གི་རྐྱེན་གྱིས་དགའ་བར་གྱིས། ཁོ་ཡང་ཁྱོད་རྣམས་ཀྱི་རྐྱེན་གྱིས་སྤྲོ་བར་གྱུར་ཅིག  
\v 20 དེ་ལྟར་མིན་ཚེ། ཨ་བི་མེ་ལེག་ནས་མེ་ཞིག་ཐོན་ཏེ་སི་ཀེམ་པ་དང་པེད་མིལ་ལོས་ཀྱི་མི་ཐམས་ཅད་འགེམ་པ་དང་། ཡང་སི་ཀེམ་པ་དང་པེད་མིལ་ལོས་ཀྱི་མི་རྣམས་ལས་མེ་ཞིག་ཐོན་ཏེ་ཨ་བི་མེ་ལེག་འགེམ་པར་གྱུར་ཅིག་ཅེས་པའོ། །  
\v 21 ཡོ་ཐམ་ནི་ཁོའི་སྤུན་ཨ་བི་མེ་ལེག་ལ་འཇིགས་ནས་བྲོས་ཤིང་པེར་དུ་སོང་སྟེ་དེར་བསྡད་དོ། །  
\v 22 ཨ་བི་མེ་ལེག་གིས་ལོ་གསུམ་གྱི་རིང་ཡེས་ར་ཨེལ་པ་རྣམས་ལ་དབང་བསྒྱུར་ཏོ། །  
\v 23 དཀོན་མཆོག་གིས་ཨ་བི་མེ་ལེག་དང་སི་ཀེམ་པའི་བར་ལ་གདོན་འདྲེ་ཞིག་མངགས་པས། སི་ཀེམ་པ་རྣམས་ཀྱིས་ཨ་བི་མེ་ལེག་ལ་གཡོ་སྒྱུ་ཁྲམ་གསུམ་བྱས།  
\v 24 ཅི་ལ་ཞེ་ན། ཡེ་རུབ་པཱ་ཨལ་གྱི་བུ་བདུན་ཅུ་བོར་ཐེབས་པའི་གནོད་འཚེ་ཡི་ལན་དེ་ཁོ་རྣམས་ཀྱི་གཅེན་པོ་ཨ་བི་མེ་ལེག་གི་སྟེང་དུ་འབེབ་པ་དང་། ཡང་ཁོ་རྣམས་ཀྱི་ཁྲག་བཞུར་བའི་སྡིག་པ་དེ་ཨ་བི་མེ་ལེག་ལ་རོགས་བྱས་ནས་སྤུན་ཟླ་རྣམས་གསོད་པའི་སི་ཀེམ་པ་རྣམས་ཀྱི་སྟེང་དུ་འབེབ་པའི་ཕྱིར་རོ། །  
\v 25 སི་ཀེམ་གྱི་འགོ་དཔོན་རྣམས་ཀྱིས་མི་མངགས་ནས་རི་མགོར་འཇབས་ཤིང་ཨ་བི་མེ་ལེག་ལ་བསྒུགས་པ་དང་། ཁོ་རྣམས་ཡོད་སར་བརྒྱུད་ནས་འགྲོ་མཁན་ཐམས་ཅད་ལ་འཕྲོག་བཅོམ་བྱས་པ་ལ། མི་ཞིག་གིས་དོན་དེ་ཨ་བི་མེ་ལེག་ལ་སྨྲས།  
\v 26 ཡང་ཨེ་བེད་ཀྱི་བུ་གཱ་ཨལ་དང་དེའི་སྤུན་རྣམས་སི་ཀེམ་ཡུལ་དུ་སླེབས་པ་དང་། སི་ཀེམ་པ་རྣམས་ཀྱིས་ཁོ་རང་ལ་བློ་གཏད་དོ། །  
\v 27 དེ་ནས་སི་ཀེམ་པ་རྣམས་ཞིང་ཁར་སོང་སྟེ་རྒུན་འབྲུམ་ར་བ་ནས་རྒུན་འབྲུམ་བཏོགས་ཏེ་རྒུན་ཆང་བཙིར་ཞིང་གསོལ་སྟོན་བཤམས་པ་དང་། དེ་དག་རང་གི་ལྷ་ཁང་དུ་སོང་ནས་བཟའ་བཏུང་ལོངས་སུ་སྤྱད་ཅིང་ཨ་བི་མེ་ལེག་ལ་དམོད་མོ་བྱས།  
\v 28 དེ་ནས་ཨེ་བེད་ཀྱི་བུ་གཱ་ཨལ་ན་རེ། ཨ་བི་མེ་ལེག་ནི་སུ་ཡིན་ནམ། སི་ཀེམ་པ་ནི་སུ་ཡིན་ནམ། བདག་ཅག་གིས་ཁོ་ལ་ཞབས་ཕྱི་བསྒྲུབ་དགོས་དོན་ཅི། ཁོ་ནི་ཡེ་རུབ་པཱ་ཨལ་གྱི་བུ་མ་ཡིན་ནམ། ཟེ་བུལ་ནི་ཁོའི་ལག་རོགས་མ་ཡིན་ནམ། ཁྱོད་རྣམས་ཀྱིས་སི་ཀེམ་གྱི་ཕ་སྟེ་ཧ་མོར་གྱི་བུ་རྒྱུད་ལ་ཞབས་ཕྱི་བསྒྲུབ་ཆོག་ལ། བདག་ཅག་གིས་ཨ་བི་མེ་ལེག་ལ་ཞབས་ཕྱི་བསྒྲུབ་དགོས་དོན་ཅི་ཡོད།  
\v 29 མི་འདི་རྣམས་ངའི་དབང་འོག་ཏུ་ཡོད་པ་ཡིན་ན་བདག་གིས་ཨ་བི་མེ་ལེག་མེད་པར་བཟོ་བ་ཡིན་ཞེས་སྨྲས་པ་དང་། ཡང་གཱ་ཨལ་གྱིས་ཨ་བི་མེ་ལེག་ལ་འདི་ལྟར་སྨྲས་པ་སྟེ། ཁྱོད་ཀྱི་དམག་མི་ཇེ་མང་དུ་བཏང་ནས་ཕྱི་རུ་ཤོག་ཅིག་ཅེས་པ་དེ་ཡིན།  
\v 30 གྲོང་ཁྱེར་གྱི་འགོ་དཔོན་ཟེ་བུལ་གྱིས་ཨེ་བེད་ཀྱི་བུ་གཱ་ཨལ་གྱི་གཏམ་ཐོས་པ་དང་ཤིན་ཏུ་ཁྲོས་ཤིང་།  
\v 31 ལྐོག་ནས་ཨ་བི་མེ་ལེག་གི་རྩར་ཕོ་ཉ་མངགས་ཏེ་ན་རེ། ཨེ་བེད་ཀྱི་བུ་གཱ་ཨལ་དང་ཁོའི་སྤུན་རྣམས་སི་ཀེམ་དུ་སླེབས་ཤིང་། གྲོང་ཁྱེར་གྱི་མི་རྣམས་ལ་ཁྱོད་ལ་རྒོལ་བར་ངན་སྐུལ་བྱེད་ཀྱིན་ཡོད།  
\v 32 ད་ནི་ཁྱོད་དང་ཁྱོད་ཀྱི་རྗེས་འབྲང་བ་རྣམས་ཀྱིས་དོ་དགོང་ལོངས་ལ་ཞིང་ཁར་འཇབ་སྒུག་བྱོས་ཤིག  
\v 33 ཞོགས་པར་ཉི་རྩེ་བརྒྱབ་མ་ཐག་ཁྱོད་རང་ལངས་ནས་གྲོང་ཁྱེར་ནང་རྒྱུགས་ཤིག ལྟོས་དང་། གཱ་ཨལ་དང་ཁོའི་རྗེས་སུ་འབྲངས་པ་རྣམས་ཕྱི་རུ་ཐོན་ནས་ཁྱོད་ལ་རྒོལ་བའི་དུས་སུ། ཁྱོད་ཀྱིས་ཁོ་རྣམས་ལ་ཅི་བྱེད་ནུས་ན་དེ་ལྟར་བྱོས་ཤིག་ཅེས་སྨྲས་པ་ལ།  
\v 34 ཨ་བི་མེ་ལེག་དང་ཁོའི་རྗེས་འབྲང་བ་རྣམས་མཚན་མོར་ལངས་ཏེ་ཁག་བཞི་རུ་བགོས་ཤིང་། སི་ཀེམ་པ་རྣམས་ལ་འཇབ་སྒུག་བྱས།  
\v 35 ཨེ་བེད་ཀྱི་བུ་གཱ་ཨལ་ཕྱི་རུ་ཐོན་ནས་མཁར་སྒོ་རུ་ལངས་བསྡད་པ་ལ། ཨ་བི་མེ་ལེག་དང་ཁོའི་རྗེས་སུ་འབྲངས་པ་རྣམས་འཇབ་སྒུག་བྱེད་ས་ནས་ལངས།  
\v 36 གཱ་ཨལ་གྱིས་མི་དེ་རྣམས་མཐོང་བ་དང་ཟེ་བུལ་ལ་འདི་ལྟར་སྨྲས་པ་སྟེ། ལྟོས་དང་། མི་རྣམས་རི་མགོ་ནས་མར་ཡོང་བཞིན་ཡོད་ཅེས་པ་ལ། ཟེ་བུལ་ན་རེ། ཁྱོད་ཀྱིས་རི་བོའི་གྲིབ་གཟུགས་མཐོང་ནས་མི་ཡིན་པར་སྙམ་པ་རེད་ཅེས་སྨྲས།  
\v 37 ཡང་གཱ་ཨལ་གྱིས་འདི་ལྟར་སྨྲས་པ་སྟེ། ལྟོས་དང་། མི་རྣམས་མཐོ་ས་ནས་མར་ཡོང་བཞིན་ཡོད། ཡང་རུ་ཁག་གཅིག་ནི་མོ་པའི་བེ་ཤིང་གི་ཕྱོགས་ནས་ཡོང་བཞིན་གདའ་ཞེས་པ་ལ།  
\v 38 ཟེ་བུལ་ན་རེ། དེ་སྔར་ཁྱོད་ཀྱིས་ཨ་བི་མེ་ལེག་ནི་སུ་ཡིན་ནམ། བདག་ཅག་གིས་ཁོ་ལ་ཞབས་ཕྱི་བསྒྲུབ་དགོས་དོན་ཅི་ཞེས་སྨྲས་ཤིང་། ཁྱོད་ཀྱིས་ཁ་ཕོ་བྱེད་པ་དེ་གང་དུ་ཡོད་དམ། འདི་ནི་ཁྱོད་ཀྱིས་མཐོང་ཆུང་བྱེད་པའི་མི་རྣམས་མ་ཡིན་ནམ། ད་ནི་ཁྱོད་རང་ཕྱི་རུ་སོང་ནས་ཁོ་རྣམས་དང་འཐབ་འཛིང་བྱོས་ཤིག་ཅེས་སྨྲས་པ་ལ།  
\v 39 གཱ་ཨལ་གྱིས་སི་ཀེམ་པ་རྣམས་ཁྲིད་དེ་ཕྱི་རུ་སོང་ནས་ཨ་བི་མེ་ལེག་དང་འཐབ་འཛིང་བྱས།  
\v 40 ཨ་བི་མེ་ལེག་གིས་གཱ་ཨལ་བདས་པ་ལ། གཱ་ཨལ་ནི་ཁོའི་སྔུན་ནས་མཁར་སྒོའི་བར་དུ་བྲོས་ཤིང་མི་མང་པོ་རྨས་ཏེ་འགྱེལ་ནས་མཁར་སྒོ་རུ་སླེབས།  
\v 41 ཨ་བི་མེ་ལེག་ནི་ཨ་རུ་མཱ་ལ་གནས་པ་དང་། ཟེ་བུལ་གྱིས་གཱ་ཨལ་དང་དེའི་སྤུན་རྣམས་ཕྱིར་བསྐྲད་ཅིང་། ཁོ་རྣམས་སི་ཀེམ་ལ་སྡོད་དུ་མ་བཅུག་གོ །  
\v 42 དེའི་ཕྱི་ཉིན་མི་རྣམས་ཞིང་ཁར་སླེབས་པ་དང་། མི་ཞིག་གིས་ཨ་བི་མེ་ལེག་ལ་དོན་དེ་སྨྲས་པ་ན།  
\v 43 ཁོས་རང་གི་མི་རྣམས་ཁག་གསུམ་དུ་བགོས་ནས་ཞིང་ཁར་འཇབ་སྒུག་བྱས་ཤིང་། སི་ཀེམ་པ་རྣམས་གྲོང་ཁྱེར་ནས་ཕྱིར་ཐོན་པ་མཐོང་ནས་ལངས་ཏེ་ཁོ་རྣམས་དང་འཐབ་པ་ལ།  
\v 44 ཨ་བི་མེ་ལེག་དང་ཁོའི་རྗེས་སུ་འབྲངས་པའི་རུ་ཁག་མདུན་དུ་བརྒྱུགས་ནས་མཁར་སྒོ་རུ་ལངས་བསྡད་ཅིང་། གཞན་པའི་རུ་ཁག་གཉིས་ཞིང་ཁར་བརྒྱུགས་ནས་མི་རྣམས་ལ་འཐབ་པའོ། །  
\v 45 ཨ་བི་མེ་ལེག་གིས་ཉིན་གང་པོར་གྲོང་ཁྱེར་ལ་དམག་བརྒྱབ་ནས་གྲོང་ཁྱེར་ཕྲོགས་པ་དང་། དེའི་ནང་གི་མི་རྣམས་བསད་ཅིང་གྲོང་ཁྱེར་བཤིག་སྟེ་ཚྭ་གཏོར་བའོ། །  
\v 46 སི་ཀེམ་ལྕོག་མཁར་ནང་གི་མི་རྣམས་ཀྱིས་དེ་ཐོས་ནས་ལྷ་པེ་ཨེད་ཐུ་ཡི་ལྷ་ཁང་གི་ས་དོང་ནང་དུ་སྦས།  
\v 47 ཡང་མི་ཞིག་གིས་ཨ་བི་མེ་ལེག་ལ་འདི་ལྟར་སྨྲས་པ་སྟེ། སི་ཀེམ་ལྕོག་མཁར་ནང་གི་མི་རྣམས་ཕྱོགས་གཅིག་ཏུ་འཛོམས་འདུག་ཅེས་པས།  
\v 48 ཨ་བི་མེ་ལེག་དང་ཁོའི་རྗེས་སུ་འབྲངས་པའི་མི་ཐམས་ཅད་ཙལ་མོན་རི་བོར་འགོས་པ་དང་། ཨ་བི་མེ་ལེག་གིས་ལག་ལ་སྟ་རེ་བཟུང་སྟེ་ཡལ་ག་ཞིག་བཅད་ནས་ཕྲག་ལ་ཁུར་ཞིང་། རང་གི་རྗེས་སུ་འབྲངས་པའི་མི་རྣམས་ལ་འདི་ལྟར་སྨྲས་པ་སྟེ། ཁྱོད་རྣམས་ཀྱིས་བདག་གིས་ཅི་བྱེད་པ་མཐོང་བ་ཇི་བཞིན་མྱུར་བ་མྱུར་དུ་བྱོས་ཤིག་ཅེས་པ་ལ།  
\v 49 མི་རྣམས་ཀྱིས་སོ་སོར་ཡལ་ག་རེ་བཅད་ནས་ཨ་བི་མེ་ལེག་གི་རྗེས་སུ་འབྲངས་ཤིང་། ཡལ་ག་རྣམས་ས་དོང་གི་ཐོག་ཏུ་སྤུངས་ནས་ས་དོང་མེར་བསྲེགས་པ་ན། སི་ཀེམ་མཁར་གྱི་སྐྱེས་ཕོ་མོ་ཐམས་ཅད་ཤི་བ་དང་ཁྱོན་བསྡོམས་མི་ཆིག་སྟོང་ཙམ་ཡོད་དོ། །  
\v 50 དེ་ནས་ཨ་བི་མེ་ལེག་ནི་ཐེ་བེ་སི་ལ་ཕྱིན་ཏེ། དེའི་སྔུན་ནས་སྒར་བཏབ་ཅིང་གྲོང་ཁྱེར་ལ་དམག་བརྒྱབ་ནས་བླངས།  
\v 51 ཡང་གྲོང་ཁྱེར་ནང་དུ་ལྕོག་མཁར་བརྟན་པོ་ཞིག་ཡོད་ཅིང་། གྲོང་ཁྱེར་གྱི་སྐྱེས་ཕོ་མོ་ཐམས་ཅད་ལྕོག་མཁར་གྱི་ནང་དུ་བྲོས་ནས་སྒོ་བརྒྱབ་པ་དང་ལྕོག་མཁར་གྱི་ཀླད་ལ་བུད་དེ་བསྡད།  
\v 52 ཨ་བི་མེ་ལེག་ལྕོག་མཁར་གྱི་མདུན་དུ་སླེབས་ནས་འཐབ་ཅིང་མཁར་སྒོའི་ཉེ་སར་བཅར་ཏེ་མེས་བསྲེག་པར་བརྩམས་པ་ལ།  
\v 53 བུད་མེད་ཅིག་གིས་རང་ཐག་གི་རྡོ་ཞིག་ཨ་བི་མེ་ལེག་གི་མགོ་ལ་འཕངས་ཏེ་ཁོའི་ཀླད་རུས་གཏོར་བ་དང་།  
\v 54 ཁོས་རང་གི་མཚོན་ཆ་འཁུར་བའི་གཞོན་ནུ་མྱུར་དུ་བོས་ནས་དེ་ལ་འདི་ལྟར་སྨྲས་པ་སྟེ། མི་རྣམས་ཀྱིས་ང་ནི་བུད་མེད་ཅིག་གིས་བསད་པ་ཡིན་ཞེས་མི་གླེང་བའི་ཕྱིར། ཁྱོད་ཀྱིས་རལ་གྲི་བཏོན་ནས་ང་རང་སོད་ཅིག་ཅེས་པ་དང་། གཞོན་ནུ་ཡིས་ཁོ་ལ་རལ་གྲིས་བསྣུན་པས་ཁོ་ཚེ་ལས་འདས་སོ། །  
\v 55 དེ་ནས་ཡེས་ར་ཨེལ་པ་རྣམས་ཀྱིས་ཨ་བི་མེ་ལེག་ཚེ་ལས་འདས་པ་མཐོང་ནས་རང་རང་གི་གནས་སུ་ལོག་གོ །  
\v 56 དེ་བཞིན་དཀོན་མཆོག་གིས་ཨ་བི་མེ་ལེག་གིས་རང་གི་ཕ་ལ་བྱས་པའི་ལས་ངན་པ་སྟེ། སྤུན་བདུན་ཅུ་བོ་བསད་པའི་ངན་ལ་ངན་ལན་འཇལ།  
\v 57 སི་ཀེམ་པའི་ལས་ངན་པ་ཐམས་ཅད་ལའང་དཀོན་མཆོག་གིས་ངན་ལན་འཇལ་ཞིང་། ཡེ་རུབ་པཱ་ཨལ་གྱི་བུ་ཡོ་ཐམ་གྱི་དམོད་མོ་རྣམས་དེ་དག་གི་སྟེང་དུ་བབས་པའོ། །   
\c 10
\cl ལེའུ་བཅུ་པ། 
\toc1 ༄༅། །ཁྲིམས་དཔོན་གྱི་མདོ། 
\toc2 ཁྲིམས་དཔོན། 
\s1 ཐོ་ལཱ།  
\p
\v 1 དེ་ཡང་ཨ་བི་མེ་ལེག་གི་རྗེས་སུ། ཡེས་སི་ཀཱར་པ་དོ་དོ་ཡི་ཚ་བོ་སྟེ། ཕུ༌བཱ་ཡི་བུ་ཡེས་སི་ཀཱར་པ་ཐོ་ལཱ་ནི་ཡེས་ར་ཨེལ་པ་རྣམས་སྐྱོབ་པར་བྱུང་ཞིང་། ཁོ་རང་ཨེ་ཕཱར་ཡིམ་གྱི་རི་ཁུལ་ཏེ་ཤཱ་མིར་དུ་གནས།  
\v 2 ཐོ་ལཱ་ནི་ལོ་ཉེར་གསུམ་རིང་ལ་ཡེས་ར་ཨེལ་གྱི་ཁྲིམས་དཔོན་བྱས་རྗེས་ཚེ་ལས་འདས་ཤིང་ཤཱ་མིར་དུ་དུར་ལ་སྦས་སོ། །   
\s1 ཡཱ་ཨིར།  
\p
\v 3 ཡང་ཁོའི་རྗེས་སུ་གིལ་ཨད་པ་ཡཱ་ཨིར་བྱུང་ཞིང་། ལོ་ཉེར་གཉིས་རིང་ལ་ཡེས་ར་ཨེལ་གྱི་ཁྲིམས་དཔོན་བྱས།  
\v 4 དེ་ལ་བུ་སུམ་ཅུ་ཡོད་པ་བོང་གསེབ་སུམ་ཅུར་བཞོན་པ་དང་། ཁོ་རྣམས་ལ་གྲོང་ཁྱེར་སུམ་ཅུ་ཡོད་པའི་མིང་ལ་ད་ལྟའི་བར་དུ་ཡཱ་ཨིར་གྱི་གྲོང་ཁྱེར་རྣམས་ཟེར་ཞིང་། དེ་ཐམས་ཅད་གིལ་ཨད་ཡུལ་དུ་ཆགས་སོ། །  
\v 5 ཡཱ་ཨིར་ཚེ་ལས་འདས་རྗེས་ཀཱ་མོན་ཡུལ་དུ་དུར་ལ་སྦས་སོ། །   
\s1 ཡེབ་ཐཱ།  
\p
\v 6 ཡང་ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་ཅིང་། པཱ་ཨལ་ལིམ་རྣམས་དང་ཨ་ཤཱ་ཏ་རོད་དང་། དེ་མིན་ཨ་རམ་གྱི་ལྷ་རྣམས་དང་། ཚི་ཏུན་གྱི་ལྷ་རྣམས། མོ་ཨབ་པའི་ལྷ་རྣམས། ཨམ་མོན་པའི་ལྷ་རྣམས། ཕེ་ལེ་ཤེད་པའི་ལྷ་རྣམས་བཅས་ལ་ཞབས་ཏོག་བསྒྲུབས་ཤིང་། དཀོན་མཆོག་ཡ་ཝཱེ་སྤངས་ནས་ཁོང་ལ་ཞབས་ཕྱི་མ་བསྒྲུབས་སོ། །  
\v 7 དེ་ནས་དཀོན་མཆོག་ཡ་ཝཱེ་ནི་ཡེས་ར་ཨེལ་པ་རྣམས་ལ་ཐུགས་ཁྲོས་ཤིང་། ཁོ་རྣམས་ཕེ་ལེ་ཤེད་པ་དང་ཨམ་མོན་པའི་ལག་ཏུ་སྤྲད།  
\v 8 དེ་ནས་བཟུང་སྟེ་ལོ་ངོ་བཅོ་བརྒྱད་ཀྱི་རིང་ལ། དེ་དག་གིས་ཡོར་དན་གཙང་པོའི་ཕ་རོལ་གྱི་ཨེ་མོར་པའི་གིལ་ཨད་ཡུལ་ལ་གནས་པའི་ཡེས་ར་ཨེལ་པ་རྣམས་ལ་འཚེ་ཞིང་མནར་གཅོད་བཏང་ངོ་། །  
\v 9 ཡང་ཨམ་མོན་པ་རྣམས་ཀྱིས་ཡོར་དན་གཙང་པོ་བརྒལ་ནས་ཡ་ཧུ་དཱ་དང་པེན་ཡཱ་མེན། དེ་མིན་ཨེ་ཕཱར་ཡིམ་གྱི་ཁྱིམ་རྒྱུད་བཅས་ལ་འཐབ་པས། ཡེས་ར་ཨེལ་པ་རྣམས་ལ་སྡུག་བསྔལ་ཆེན་པོ་བྱུང་ངོ་། །  
\v 10 དེ་ནས་ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་འོ་དོད་བོས་ནས་འདི་ལྟར། ངེད་རྣམས་ཀྱིས་ཁྱེད་ལ་འགལ་བའི་སྡིག་པ་བྱས་ཏེ། རང་གི་དཀོན་མཆོག་སྤངས་ནས་པཱ་ཨལ་ལིམ་རྣམས་ལ་ཞབས་ཏོག་བསྒྲུབས་པ་ཡིན་ཞེས་ཞུས་པ་ལ།  
\v 11 དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ལ་འདི་སྐད་དུ། ངས་ཁྱོད་རྣམས་ཨེ་ཅིབ་པ་དང་། ཨེ་མོར་པ། ཨམ་མོན་པ། ཕེ་ལེ་ཤེད་པ་རྣམས་ཀྱི་ལག་ནས་ཐར་བར་མ་བྱས་སམ།  
\v 12 ཡང་ཚི་ཏུན་པ་དང་ཨ་མཱད་ལེག་པ། མ་ཨོན་པ་རྣམས་ཀྱིས་ཀྱང་ཁྱོད་ཅག་ལ་མནར་གཅོད་བཏང་ཞིང་། ཁྱོད་རྣམས་ཀྱིས་ང་ལ་འོ་དོད་བོས་པས་བདག་གིས་ཁྱོད་རྣམས་དེ་དག་གི་ལག་ནས་ཀྱང་ཐར་དུ་བཅུག་པ་ཡིན།  
\v 13 འོན་ཀྱང་ཁྱོད་ཅག་གིས་ང་རང་སྤངས་ཏེ་ལྷ་གཞན་དག་ལ་ཞབས་ཏོག་བསྒྲུབས་པས། ད་ནི་བདག་གིས་ཁྱོད་རྣམས་སྐྱོབ་པར་མི་བྱ་སྟེ།  
\v 14 ད་ནི་སོང་ལ་ཁྱོད་ཅག་གིས་བདམས་པའི་ལྷ་རྣམས་ལས་སྐྱབས་ཚོལ་ཞིག ཁྱོད་རྣམས་དཀའ་སྡུག་ལ་འཕྲད་པའི་དུས་སུ་དེ་ལ་ཁྱོད་ཅག་སྐྱོབ་ཏུ་ཆུག་ཅེས་གསུངས།  
\v 15 དེ་ནས་ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་འདི་ལྟར། ངེད་ཅག་གིས་སྡིག་པ་བྱས་པས་ཁྱེད་ཀྱིས་ངེད་རྣམས་ལ་ཐུགས་དགོངས་ཇི་བཞིན་མཛད་རོགས། ཡིན་ནའང་དེ་རིང་ཁྱེད་ཀྱིས་ངེད་རྣམས་སྐྱོབ་པར་མཛོད་ཅེས་ཞུས་ཤིང་།  
\v 16 ཡེས་ར་ཨེལ་པ་རྣམས་ཀྱིས་ཕྱི་ཕྱོགས་པའི་ལྷ་རྣམས་ཁོ་ཚོའི་ཁྲོད་ནས་སྤངས་ཏེ་དཀོན་མཆོག་ཡ་ཝཱེ་ལ་ཞབས་ཏོག་བསྒྲུབས། ཡེས་ར་ཨེལ་པ་རྣམས་ཀྱི་དཀའ་སྡུག་གི་ཕྱིར་དཀོན་མཆོག་ཡ་ཝཱེས་དེ་རྣམས་ལ་ཐུགས་ཁྲལ་གནང་ངོ་། །  
\v 17 དུས་དེར་ཨམ་མོན་པ་རྣམས་འདུས་ནས་གིལ་ཨད་དུ་སྒར་བཏབ་པ་དང་། ཡེས་ར་ཨེལ་པ་རྣམས་ཀྱང་འདུས་ཏེ་མཱས་ཟི་ཕཱ་རུ་སྒར་བཏབ།  
\v 18 དེ་ནས་གིལ་ཨད་པ་དང་འགོ་དཔོན་རྣམས་ཀྱིས་ཕན་ཚུན་ན་རེ། སུ་ཞིག་སྔོན་ལ་ཕྱིན་ཏེ་ཨམ་མོན་པ་རྣམས་ལ་འཐབ་འཛིང་བྱས་ན་དེ་ནི་གིལ་ཨད་ཀྱི་ཡུལ་མི་ཐམས་ཅད་ཀྱི་འགོ་དཔོན་དུ་འགྱུར་ངེས་ཡིན་ཞེས་གྲོས་བྱས་སོ། །   
\c 11
\cl ལེའུ་བཅུ་གཅིག་པ། 
\toc1 ༄༅། །ཁྲིམས་དཔོན་གྱི་མདོ། 
\toc2 ཁྲིམས་དཔོན། 
\s1 ཡེབ་ཐཱ་སྐྱེས་པ།  
\p
\v 1 གིལ་ཨད་པ་ཡེབ་ཐཱ་ནི་དཔའ་རྒོད་རྩལ་ཅན་ཞིག་ཡིན་ལ། དེ་ནི་གིལ་ཨད་ལས་སྐྱེས་ཤིང་མ་ནི་སྨད་འཚོང་མ་ཞིག་ཡིན།  
\v 2 ཡང་གིལ་ཨད་ཀྱི་ཆུང་མས་ཀྱང་དེ་ལ་བུ་འགའ་བཙས་ཤིང་། ཁོའི་ཆུང་མས་བཙས་པའི་བུ་རྣམས་ནར་སོན་པ་དང་ཡེབ་ཐཱ་ཕྱིར་ཕུད་དེ་ན་རེ། ཁྱོད་ནི་སྨད་འཚོང་མའི་བུ་ཡིན་པས་ངེད་ཅག་གི་ཕ་ལས་ནོར་སྐལ་ཐོབ་མི་རུང་ཞེས་སྨྲས་པས།  
\v 3 ཡེབ་ཐཱ་རང་གི་སྤུན་རྣམས་ལས་བྲོས་ཏེ་ཏོབ་ཀྱི་ཡུལ་དུ་གནས་པ་དང་། ཇག་རྐུན་འགའ་ཞིག་ཁོའི་གམ་དུ་འདུས་ནས་ཁོའི་རྗེས་སུ་འབྲངས།  
\v 4 ཉིན་འགའ་ཡི་རྗེས་སུ་ཨམ་མོན་པས་ཡེས་ར་ཨེལ་ལ་འཐབ་འཛིང་བྱས་ཤིང་།  
\v 5 ཨམ་མོན་པས་ཡེས་ར་ཨེལ་ལ་འཐབ་འཛིང་བྱེད་པའི་དུས་སུ། གིལ་ཨད་ཀྱི་རྒན་པོ་རྣམས་ཏོབ་ཀྱི་ཡུལ་དུ་ཡེབ་ཐཱ་འབོད་དུ་སོང་ནས།  
\v 6 དེ་ཚོས་ཡེབ་ཐཱ་ལ་འདི་ལྟར། ངེད་ཅག་གིས་ཨམ་མོན་པ་རྣམས་ལ་དམག་བརྒྱག་པའི་ཕྱིར་ཁྱེད་ཡོང་ནས་ངེད་ཅག་གི་དམག་དཔོན་བྱེད་རོགས་ཞེས་ཞུས་པ་ལ།  
\v 7 ཡེབ་ཐཱ་ཡིས་གིལ་ཨད་ཀྱི་རྒན་པོ་རྣམས་ལ་འདི་ལྟར། སྔོན་ཆད་ཁྱོད་རྣམས་ང་ལ་སྡང་ཞིང་ང་རང་ཕ་གཞིས་ནས་ཕྱིར་ཕུད་པ་མ་ཡིན་ནམ། ད་ལྟ་ཁྱོད་རྣམས་དཀའ་སྡུག་ལ་ཕྲད་དུས་ཅིའི་ཕྱིར་ངའི་རྩར་ཡོང་ངམ་ཞེས་ལན་བཏབ་པ་དང་།  
\v 8 གིལ་ཨད་ཀྱི་རྒན་པོ་རྣམས་ཀྱིས་ཡེབ་ཐཱ་ལ། ངེད་ཅག་ད་ལྟ་ཁྱེད་ཀྱི་དྲུང་དུ་ཡོང་དོན་ནི། ཁྱེད་རང་ངེད་ཅག་དང་མཉམ་དུ་ཕྱིན་ཏེ་ཨམ་མོན་པ་རྣམས་ལ་འཐབ་པའི་ཕྱིར་ཡིན་ལ། ཁྱེད་ནི་གིལ་ཨད་པ་ཐམས་ཅད་ཀྱི་འགོ་དཔོན་དུ་འགྱུར་རོ་ཞེས་ཞུས་ཤིང་།  
\v 9 ཡེབ་ཐཱ་ཡིས་གིལ་ཨད་ཀྱི་རྒན་པོ་རྣམས་ལ། ཁྱོད་རྣམས་ཀྱིས་ང་རང་ཨམ་མོན་པ་རྣམས་ལ་འཐབ་པའི་ཕྱིར་ཁྲིད་ནས། དཀོན་མཆོག་ཡ་ཝཱེས་དེ་དག་ངའི་ལག་ཏུ་སྤྲད་པ་ཡིན་ཚེ། ང་རང་ཁྱོད་རྣམས་ཀྱི་འགོ་དཔོན་བྱེད་དམ་ཞེས་ལན་བཏབ་པ་དང་།  
\v 10 གིལ་ཨད་ཀྱི་རྒན་པོ་རྣམས་ཀྱིས་ཡེབ་ཐཱ་ལ། དཀོན་མཆོག་ཡ་ཝཱེས་བདག་ཅག་གི་བར་དུ་བདེན་དཔང་མཛད་པ་སྟེ། ངེད་རྣམས་ཀྱིས་ཁྱེད་ཀྱིས་ཅི་སྨྲས་པ་བཞིན་བྱེད་ངེས་ཡིན་ཞེས་ཞུས།  
\v 11 དེ་ནས་ཡེབ་ཐཱ་ནི་གིལ་ཨད་ཀྱི་རྒན་པོ་རྣམས་དང་མཉམ་དུ་ཕྱིར་ལོག་ཅིང་། འབངས་རྣམས་ཀྱིས་ཁོ་འགོ་དཔོན་དང་དམག་དཔོན་དུ་བསྐོས་པ་དང་། ཡེབ་ཐཱ་ཡིས་མཱས་ཟི་ཕཱ་རུ་དཀོན་མཆོག་ཡ་ཝཱེའི་དྲུང་དུ་རང་གི་གཏམ་ཐམས་ཅད་གསལ་པོར་ཞུས་སོ། །  
\v 12 ཡེབ་ཐཱ་ཡིས་ཨམ་མོན་པ་རྣམས་ཀྱི་རྒྱལ་པོའི་དྲུང་དུ་བང་ཆེན་མངགས་ཏེ་འདི་ལྟར། འུ་གཉིས་བར་དུ་འབྲེལ་བ་ཅི་ཡོད། ཁྱོད་རང་ངའི་ཡུལ་དུ་འོངས་ནས་ང་ལ་རྒོལ་དགོས་པའི་དོན་ཅི་ཡོད་དམ་ཞེས་སྨྲས་པར།  
\v 13 ཨམ་མོན་པ་རྣམས་ཀྱི་རྒྱལ་པོས་ཡེབ་ཐཱ་ཡི་བང་ཆེན་ལ་འདི་ལྟར། ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཐོན་པའི་ཚེ་ངའི་ཡུལ་ཏེ་ཨར་ནོན་གཙང་པོ་ནས་ཡཱབ་པོག་གཙང་པོ་དང་དེ་ནས་ཡོར་དན་གཙང་པོའི་བར་དུ་བཟུང་བས། ད་ལྟ་ཁྱོད་ཀྱིས་ཡུལ་དེ་རྣམས་ཞི་བདེའི་ངང་ཕྱིར་སྤྲོད་ཅིག་ཅེས་ལན་བཏབ།  
\v 14 ཡེབ་ཐཱ་ཡིས་ཡང་ཨམ་མོན་པ་རྣམས་ཀྱི་རྒྱལ་པོའི་དྲུང་དུ་བང་ཆེན་མངགས་ཏེ།  
\v 15 ཁོ་ལ་ན་རེ། ཡེབ་ཐཱས་འདི་ལྟར། ཡེས་ར་ཨེལ་པས་མོ་ཨབ་པའི་ཡུལ་དང་ཨམ་མོན་པའི་ཡུལ་རྣམས་བཟུང་མེད་དེ།  
\v 16 ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཐོན་ཏེ་དབེན་སྟོང་བརྒྱུད་ནས་རྒྱ་མཚོ་དམར་པོ་དང་དེ་ནས་ཀཱ་དེའེ་ཤཱ་རུ་སླེབས་པའི་ཚེ།  
\v 17 ཨེ་དོམ་གྱི་རྒྱལ་པོའི་དྲུང་དུ་བང་ཆེན་མངགས་ནས་འདི་ལྟར། ངེད་ཅག་ཁྱེད་ཀྱི་ཡུལ་བརྒྱུད་ནས་འགྲོ་རུ་འཇུག་པར་མཛོད་ཅེས་ཞུས་ནའང་། ཨེ་དོམ་རྒྱལ་པོས་ཆོག་མཆན་མ་གནང་། ཡང་དེ་བཞིན་དུ་མོ་ཨབ་རྒྱལ་པོའི་དྲུང་དུ་བང་ཆེན་མངགས་ནའང་། ཁོ་ཡང་དེར་མ་འཐད་པས། ཡེས་ར་ཨེལ་པ་རྣམས་ཀཱ་དེའེ་ཤཱ་རུ་བསྡད།  
\v 18 ཡང་ཁོ་རྣམས་དབེན་སྟོང་བརྒྱུད་དེ་ཨེ་དོམ་དང་མོ་ཨབ་ཀྱི་ཡུལ་བསྐོར་ནས། མོ་ཨབ་ཡུལ་གྱི་ཤར་ཕྱོགས་སུ་སླེབས་ཤིང་ཨར་ནོན་གཙང་པོའི་འགྲམ་དུ་སྒར་བཏབ་པ་དང་། ཨར་ནོན་གཙང་པོ་ནི་མོ་ཨབ་ཀྱི་ས་མཚམས་ཡིན་པས་དེ་དག་མོ་ཨབ་ཀྱི་མངའ་ཁོངས་སུ་མ་ཕྱིན་ཏོ། །  
\v 19 དེ་ནས་ཡེས་ར་ཨེལ་པ་རྣམས་ཀྱིས་ཧེ་སི་པོན་གྱི་རྒྱལ་པོ་སྟེ། ཨེ་མོར་པའི་རྒྱལ་པོ་སི་ཧོན་གྱི་དྲུང་དུ་བང་ཆེན་མངགས་ཏེ་དེ་ལ་འདི་ལྟར། ངེད་ཅག་ཁྱེད་ཀྱི་ཡུལ་བརྒྱུད་ནས་རང་གི་གནས་སུ་འགྲོ་རུ་འཇུག་པར་མཛོད་ཅེས་ཞུས་པ་ལ།  
\v 20 སི་ཧོན་གྱིས་ཡེས་ར་ཨེལ་པ་རྣམས་ལ་ཡིད་མ་ཆེས་པས། དེ་རྣམས་ཁོའི་མངའ་ཁོངས་བརྒྱུད་ནས་འགྲོ་རུ་མ་བཅུག་པར། རང་གི་མི་རྣམས་བསྡུས་ནས་ཡ་ཙཱ་རུ་སྒར་བཏབ་ཅིང་ཡེས་ར་ཨེལ་པ་རྣམས་ལ་འཐབ་འཛིང་བྱས།  
\v 21 དེར་ཡེས་ར་ཨེལ་གྱི་དཀོན་མཆོག་ཡ་ཝཱེས་སི་ཧོན་དང་ཁོའི་མི་ཐམས་ཅད་ཡེས་ར་ཨེལ་པ་རྣམས་ཀྱི་ལག་ཏུ་སྤྲད་པས། ཡེས་ར་ཨེལ་པས་ཁོ་རྣམས་ཕམ་པར་བརྒྱབ་སྟེ་ཨེ་མོར་པའི་ཡུལ་ཐམས་ཅད་བཟུང་བ་སྟེ།  
\v 22 དེ་ཚོས་ཨར་ནོན་གཙང་པོ་ནས་ཡཱབ་པོག་བར་དང་། དབེན་སྟོང་ནས་ཡོར་དན་གཙང་པོ་བར་གྱི་ཨེ་མོར་པའི་ཡུལ་ཐམས་ཅད་བཟུང་ངོ་། །  
\v 23 ཡེས་ར་ཨེལ་གྱི་དཀོན་མཆོག་ཡ་ཝཱེས་ད་ལྟ་ཁོང་གི་འབངས་མི་ཡེས་ར་ཨེལ་པའི་མདུན་ནས་ཨེ་མོར་པ་རྣམས་ཕྱིར་བསྐྲད་ཀྱང་། ཁྱོད་ཀྱིས་ཁོ་རྣམས་ཀྱི་ཡུལ་ལེན་པ་ཡིན་ནམ།  
\v 24 ཁྱོད་ཀྱི་ལྷ་ཀེ་མོ་སི་ཡིས་ཁྱོད་ལ་གནང་བའི་ཡུལ་ནི་ཁྱོད་ལ་ནོར་སྐལ་དུ་ཐོབ་པ་མ་ཡིན་ནམ། ངེད་ཅག་གི་དཀོན་མཆོག་ཡ་ཝཱེས་སུ་ཞིག་ངེད་རྣམས་ཀྱི་མདུན་ནས་ཕྱིར་བསྐྲད་ན། དེའི་ཡུལ་ནི་ངེད་རྣམས་ལ་ཐོབ་པ་ཡིན།  
\v 25 ཁྱོད་རང་མོ་ཨབ་ཀྱི་རྒྱལ་པོ་སྟེ་ཚིབ་ཕོར་གྱི་བུ་པཱ་ལག་ལས་ངར་བ་ཡིན་ནམ། དེས་ཡེས་ར་ཨེལ་པ་རྣམས་ལ་རྩོད་གླེང་ངམ་ཡང་ན་འཐབ་འཛིང་བྱས་སམ།  
\v 26 ཡེས་ར་ཨེལ་པ་རྣམས་ཧེ་སི་པོན་དང་དེ་ལ་གཏོགས་པའི་གྲོང་རྡལ་རྣམས་དང་། ཨ་རོ་ཨེར་དང་དེ་ལ་གཏོགས་པའི་གྲོང་རྡལ་རྣམས། དེ་མིན་ཨར་ནོན་གཙང་པོའི་འགྲམ་རྒྱུད་ཀྱི་གྲོང་ཁྱེར་ཐམས་ཅད་དུ་གནས་ཤིང་ལོ་ངོ་སུམ་བརྒྱ་འདས་པ་དང་། ལོ་ངོ་སུམ་བརྒྱའི་རིང་ལ་ཁྱོད་ཅག་གིས་ཅིའི་ཕྱིར་ཡུལ་དེ་རྣམས་ཕྱིར་མ་བླངས་པ་ཡིན།  
\v 27 མ་གཞི་བདག་གིས་ཁྱོད་ལ་འགལ་བའི་སྡིག་པ་མ་བྱས་ནའང་། ཁྱོད་ཀྱིས་ང་ལ་དམག་བརྒྱབ་ནས་གནོད་བསྐྱལ་བས་ན། དེ་རིང་གི་ཉིན་མོ་འདིར་མི་ལ་ཉེས་ཁྲིམས་གཅོད་པའི་དཀོན་མཆོག་ཡ་ཝཱེ་ཉིད་ཀྱིས་ཡེས་ར་ཨེལ་པ་དང་ཨམ་མོན་པའི་བར་དུ་ལེགས་ཉེས་ཀྱི་དབྱེ་བ་འབྱེད་པར་ཤོག་ཅེས་སྨྲས་ནའང་།  
\v 28 ཨམ་མོན་པའི་རྒྱལ་པོས་ཡེབ་ཐཱ་ཡིས་མི་མངགས་ནས་སྨྲས་པའི་གཏམ་ལ་མ་མཉན་ཏོ། །  
\v 29 དཀོན་མཆོག་ཡ་ཝཱེའི་ཐུགས་ཉིད་ཡེབ་ཐཱ་ཡི་སྟེང་དུ་བབས་ཤིང་། ཁོ་རང་གིལ་ཨད་དང་མཱ་ན་ཤེ་བརྒྱུད་ནས་གིལ་ཨད་ཀྱི་མཱས་ཟི་ཕཱ་རུ་སླེབས་པ་དང་། ཡང་གིལ་ཨད་ཀྱི་མི་ཙི་ཕེ་ནས་ཨམ་མོན་པ་རྣམས་ཀྱི་ཕྱོགས་སུ་ཕྱིན།  
\v 30 དེ་ནས་ཡེབ་ཐཱ་ཡིས་དཀོན་མཆོག་ཡ་ཝཱེ་ལ་དམ་བཅའ་ཕུལ་ནས་འདི་ལྟར། གལ་ཏེ་ཁྱེད་ཀྱིས་ཨམ་མོན་པ་རྣམས་བདག་གི་ལག་ཏུ་སྤྲད་ན།  
\v 31 ང་རང་ཨམ་མོན་པ་རྣམས་ལས་བདེ་བར་ཕྱིར་ལོག་པའི་དུས་སུ། བདག་གི་ཁྱིམ་ནས་སུ་ཞིག་སྔོན་ལ་ང་བསུ་བར་ཡོང་ན་དེ་ནི་ཁྱེད་ཀྱི་ཡིན་ཏེ། བདག་གིས་དེ་ནི་སྦྱིན་སྲེག་ཏུ་འབུལ་བར་ངེས་ཞེས་ཞུས་སོ། །  
\v 32 དེ་ནས་ཡེབ་ཐཱ་ཁོ་རང་ཨམ་མོན་པ་རྣམས་ལ་འཐབ་འཛིང་བྱེད་དུ་སོང་ཞིང་། དཀོན་མཆོག་ཡ་ཝཱེས་དེ་དག་ཁོའི་ལག་ཏུ་སྤྲད་པས།  
\v 33 ཁོས་ཨ་རོ་ཨེར་ནས་མིན་ནིད་བར་དང་དེ་ནས་ཨ་བེལ་ཀེ་ར་མིམ་གྱི་བར་དུ་དེ་དག་རྩ་མེད་བཏང་ཞིང་། གྲོང་ཁྱེར་ཉི་ཤུ་རྒོལ་ནས་བླངས། ཨམ་མོན་པ་རྣམས་དེ་ལྟར་ཡེས་ར་ཨེལ་པ་རྣམས་ཀྱི་མདུན་དུ་བཏུལ་བའོ། །   
\s1 ཡེབ་ཐཱ་ཡི་བུ་མོ།  
\p
\v 34 ཡེབ་ཐཱ་ཕྱིར་མཱས་ཟི་ཕཱ་རུ་ལོག་སྟེ་རང་ཡུལ་དུ་སླེབས་པ་ན། བསམ་ཡུལ་ལས་འདས་པ་ཞིག་ལ་ཁོའི་བུ་མོས་སིལ་རྔ་བརྡུངས་ནས་བྲོ་འཁྲབ་ཀྱིན་ཁོ་བསུ་རུ་འོངས་པ་དང་། དེ་ནི་ཁོའི་བུ་མོ་གཅིག་པུ་ཡིན་ཞིང་། དེ་ལས་གཞན་ཁོ་ལ་བུ་དང་བུ་མོ་མེད་དོ། །  
\v 35 ཡེབ་ཐཱ་ཡིས་ཁོ་མོ་མཐོང་མ་ཐག་རང་གི་གྱོན་པ་གཤགས་ནས་འདི་ལྟར་སྨྲས་པ་སྟེ། ཀྱེ་ཧོ་བདག་གི་བུ་མོ་ལགས། ངས་དཀོན་མཆོག་ཡ་ཝཱེ་ལ་དམ་བཅའ་བཞག་ཅིང་དེ་ལ་ཟློག་ཐབས་མེད་པས། ཁྱོད་ཀྱིས་ང་རང་སྡུག་བསྔལ་ཆེན་པོ་དང་དཀའ་ལས་ཁག་པོར་གཏད་བྱུང་ཞེས་པ་ལ།  
\v 36 ཁོའི་བུ་མོ་ན་རེ། ཀྱེ་ཕ་ལགས། ཁྱེད་ཀྱིས་དཀོན་མཆོག་ཡ་ཝཱེ་ལ་དམ་བཅས་པ་ཡིན་ན། ཁྱེད་ཀྱིས་ཅི་ལྟར་ཁས་བླངས་པ་བཞིན་བདག་ལ་བྱེད་འོས། ཅི་ལ་ཞེ་ན། དཀོན་མཆོག་ཡ་ཝཱེས་ཁྱེད་ཀྱི་དགྲ་བོ་ཨམ་མོན་པ་རྣམས་ཀྱི་སྟེང་ནས་དགྲ་ཤ་བླངས་ཟིན་ཞེས་དང་།  
\v 37 ཡང་ཕ་ལ་འདི་ལྟར་ཞུས་པ་སྟེ། ཁྱེད་ཀྱིས་དོན་འདི་གཅིག་པུ་ལ་ཆོག་མཆན་གནང་བར་མཛོད། ང་རང་ད་དུང་ན་ཆུང་བུ་མོ་ཡིན་པའི་རྐྱེན་གྱིས་ང་དང་ངའི་མཛའ་གྲོགས་རྣམས་སོང་ནས་རི་མགོར་མྱ་ངན་བྱེད་པའི་ཆེད་དུ། ཟླ་བ་གཉིས་ཀྱི་དགོངས་པ་གནང་བར་མཛོད་ཅེས་པ་ལ།  
\v 38 ཡེབ་ཐཱ་ན་རེ། ཁྱོད་རང་སོང་ཞིག་ཅེས་སྨྲས་ཏེ། བུ་མོ་ཟླ་བ་གཉིས་ཀྱི་རིང་ལ་འགྲོ་རུ་བཅུག་གོ །དེ་ནས་བུ་མོ་རང་གི་མཛའ་གྲོགས་རྣམས་དང་མཉམ་དུ་སོང་ནས་རི་མགོར་ཁོ་མོ་ད་དུང་ན་ཆུང་བུ་མོ་ཡིན་པའི་རྐྱེན་གྱིས་མྱ་ངན་བྱས།  
\v 39 ཟླ་བ་གཉིས་ལོངས་པ་དང་ཁོ་མོ་ཕ་ཡི་དྲུང་དུ་ལོག་ཅིང་། ཕ་ཡིས་ཇི་ལྟར་དམ་བཅས་པ་བཞིན་ཁོ་མོར་དེ་ལྟར་བྱས། བུ་མོ་དེ་སྐྱེས་པར་འགྲོགས་མ་མྱོང་ངོ་། ། ཕྱིས་སུ་ཡེས་ར་ཨེལ་པའི་ཁྲོད་དུ་སྲོལ་ཞིག་ཆགས་པ་སྟེ།  
\v 40 ཡེས་ར་ཨེལ་པའི་བུད་མེད་རྣམས་ལོ་རེ་བཞིན་སོང་སྟེ་གིལ་ཨད་པ་ཡེབ་ཐཱ་ཡི་བུ་མོའི་དོན་དུ་ཉིན་བཞི་ལ་མྱ་ངན་བྱེད་པ་ཡིན་ནོ། །   
\c 12
\cl ལེའུ་བཅུ་གཉིས་པ། 
\toc1 ༄༅། །ཁྲིམས་དཔོན་གྱི་མདོ། 
\toc2 ཁྲིམས་དཔོན། 
\s1 ཡེབ་ཐཱ་དང་ཨེ་ཕཱར་ཡིམ་པ་གཉིས་དམག་བརྒྱབ་པ།  
\p
\v 1 ཨེ་ཕཱར་ཡིམ་པ་རྣམས་ལྷན་དུ་འདུས་ཏེ་བྱང་ཕྱོགས་སུ་སླེབས་ཤིང་། ཡེབ་ཐཱ་ལ་འདི་ལྟར་སྨྲས་པ་སྟེ། ཁྱོད་རང་ཨམ་མོན་པར་འཐབ་འཛིང་བྱེད་དུ་འགྲོ་དུས། ངེད་ཅག་ཁྱོད་དང་ལྷན་དུ་འགྲོ་ཕྱིར་མི་འབོད་པ་ཅི་ཡིན། ངེད་ཅག་གིས་ཁྱོད་དང་ཁྱོད་ཀྱི་ཁང་པ་མེར་བསྲེག་པར་བྱ་ཞེས་པ་ལ།  
\v 2 ཡེབ་ཐཱ་ཡིས་དེའི་ལན་དུ། བདག་དང་བདག་གི་མི་རྣམས་ཨམ་མོན་པ་དང་འཐབ་འཛིང་དྲག་པོ་བྱེད་པའི་དུས་སུ། བདག་གིས་ཁྱོད་རྣམས་བོས་ཀྱང་ཁྱོད་རྣམས་འོངས་ནས་ང་རང་དེ་དག་གི་ལག་ནས་ཐར་བར་མ་བྱས།  
\v 3 ངས་ཁྱོད་རྣམས་ང་རང་སྐྱོབ་ཏུ་མི་ཡོང་བ་མཐོང་ནས། རང་སྲོག་འབེན་ལ་བཞག་སྟེ་སོང་ནས་ཨམ་མོན་པ་རྣམས་ལ་འཐབ་འཛིང་བྱས་པ་དང་། དཀོན་མཆོག་ཡ་ཝཱེས་ཁོ་རྣམས་ངའི་ལག་ཏུ་སྤྲད། དེ་རིང་ཁྱོད་རྣམས་ཅིའི་ཕྱིར་འདི་རུ་ང་དང་འཐབ་འཛིང་བྱེད་དུ་འོངས་པ་ཡིན་ནམ་ཞེས་སྨྲས།  
\v 4 དེ་ནས་ཡེབ་ཐཱ་ཡིས་གིལ་ཨད་ཀྱི་མི་རྣམས་བསྡུས་ཏེ་ཨེ་ཕཱར་ཡིམ་པ་རྣམས་ལ་འཐབ་འཛིང་བྱས་ཤིང་། གིལ་ཨད་པ་རྣམས་ཀྱིས་ཨེ་ཕཱར་ཡིམ་པ་རྣམས་གསོད་དོན་ནི། དེ་དག་གིས་ཁྱོད་གིལ་ཨད་པ་རྣམས་ནི་ཨེ་ཕཱར་ཡིམ་དང་མཱ་ན་ཤེའི་ཁྲོད་དུ་ཨེ་ཕཱར་ཡིམ་གྱི་བྲོས་བྱོལ་པ་ཙམ་ཡིན་ཞེས་སྨྲས་པའི་ཕྱིར་རོ། །  
\v 5 གིལ་ཨད་པ་རྣམས་ཀྱིས་ཡོར་དན་གཙང་པོའི་རབ་ཁ་བསྲུངས་ནས་ཨེ་ཕཱར་ཡིམ་པ་རྣམས་བཀག་པ་དང་། ཨེ་ཕཱར་ཡིམ་པ་ལས་ཕྱིར་བྲོས་པ་རྣམས་ཀྱིས་ང་ཕར་འགྲོ་རུ་འཇུག་རོགས་ཞེས་ཞུ་བའི་ཚེ། གིལ་ཨད་པ་རྣམས་ཀྱིས་དེ་ལ། ཁྱོད་རང་ཨེ་ཕཱར་ཡིམ་པ་ཡིན་ནམ་མིན་ཞེས་དྲིས་ཤིང་། གལ་ཏེ་ཁོས་མིན་ཟེར་ན།  
\v 6 དེ་དག་གིས་ཁོ་ལ། ཁྱོད་ཀྱིས་ཤིབ་པོ་ལེད་ཅེས་སྨྲོས་ཤིག་ཅེས་སྨྲས་པ་དང་། ཨེ་ཕཱར་ཡིམ་པས་དེ་གསལ་པོར་སྨྲ་མ་ནུས་པར་སིབ་པོ་ལེད་ཅེས་སྨྲས་པས། གིལ་ཨད་པས་ཁོ་བཟུང་སྟེ་ཡོར་དན་གཙང་པོའི་རབ་ཁ་ནས་བསད་ཅིང་། དུས་དེར་ཨེ་ཕཱར་ཡིམ་པ་མི་བཞི་ཁྲི་ཉིས་སྟོང་བསད་དོ། །  
\v 7 ཡེབ་ཐཱ་ལོ་དྲུག་གི་རིང་ལ་ཡེས་ར་ཨེལ་གྱི་ཁྲིམས་དཔོན་བྱས། དེ་ནས་གིལ་ཨད་པ་ཡེབ་ཐཱ་ཚེ་ལས་འདས་ཤིང་གིལ་ཨད་ཀྱི་གྲོང་ཁྱེར་ཞིག་གི་ནང་དུ་དུར་ལ་སྦས།   
\s1 ཨིབ་ཙན་དང་ཨེ་ལོན། ཨབ་དོན།  
\p
\v 8 ཡེབ་ཐཱ་ཡི་རྗེས་སུ། པེད་ལེ་ཧེམ་པ་ཨིབ་ཙན་ནི་ཡེས་ར་ཨེལ་གྱི་ཁྲིམས་དཔོན་བྱས།  
\v 9 དེ་ལ་བུ་སུམ་ཅུ་དང་བུ་མོ་སུམ་ཅུ་ཡོད་ཅིང་། ཁོས་བུ་མོ་ཚང་མ་ཕྱི་ལ་མནའ་མར་བྱིན་པ་དང་། རང་གི་བུ་རྣམས་ལ་ཕྱི་ནས་མནའ་མ་སུམ་ཅུ་བླངས། ཁོ་རང་ལོ་བདུན་གྱི་རིང་ལ་ཡེས་ར་ཨེལ་གྱི་ཁྲིམས་དཔོན་བྱས།  
\v 10 ཨིབ་ཙན་ཚེ་ལས་འདས་ཏེ་པེད་ལེ་ཧེམ་དུ་དུར་ལ་སྦས་སོ། །  
\v 11 ཨིབ་ཙན་གྱི་རྗེས་སུ་ཟེ་བུ་ལུན་པ་ཨེ་ལོན་ནི་ཡེས་ར་ཨེལ་གྱི་ཁྲིམས་དཔོན་བྱས། ཁོ་རང་ལོ་བཅུའི་རིང་ལ་ཡེས་ར་ཨེལ་གྱི་ཁྲིམས་དཔོན་བྱས།  
\v 12 ཟེ་བུ་ལུན་པ་ཨེ་ལོན་ཚེ་ལས་འདས་ཤིང་ཟེ་བུ་ལུན་ཡུལ་གྱི་ཨ་ཡཱ་ལོན་དུ་དུར་ལ་སྦས་སོ། །  
\v 13 ཨེ་ལོན་གྱི་རྗེས་སུ་ཕི་ར་ཐོན་པ་ཧིལ་ལེལ་གྱི་བུ་ཨབ་དོན་ནི་ཡེས་ར་ཨེལ་གྱི་ཁྲིམས་དཔོན་བྱས།  
\v 14 དེ་ལ་བུ་བཞི་བཅུ་དང་ཚ་བོ་སུམ་ཅུ་ཡོད་པ་དང་། དེ་རྣམས་བོང་གསེབ་བདུན་ཅུ་ལ་ཞོན་ཡོད་པ་ཡིན། ཨབ་དོན་ལོ་བརྒྱད་ཀྱི་རིང་ལ་ཡེས་ར་ཨེལ་གྱི་ཁྲིམས་དཔོན་བྱས།  
\v 15 ཕི་ར་ཐོན་པ་ཧིལ་ལེལ་གྱི་བུ་ཨབ་དོན་ཚེ་ལས་འདས་ཤིང་། ཨེ་ཕཱར་ཡིམ་ཡུལ་གྱི་པི་ར་ཐོན་ཞེས་པ་སྟེ། ཨ་མཱད་ལེག་པའི་རི་ཁུལ་དུ་དུར་ལ་སྦས་སོ། །   
\c 13
\cl ལེའུ་བཅུ་གསུམ་པ། 
\toc1 ༄༅། །ཁྲིམས་དཔོན་གྱི་མདོ། 
\toc2 ཁྲིམས་དཔོན། 
\s1 སཱམ་སོན་སྐྱེས་པ།  
\p
\v 1 ཡང་ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེའི་སྤྱན་སྔར་ངན་པ་གང་ཡིན་དེ་སྤྱད་པས། དཀོན་མཆོག་ཡ་ཝཱེས་ཁོ་རྣམས་ལོ་ངོ་བཞི་བཅུའི་རིང་ལ་ཕེ་ལེ་ཤེད་པའི་ལག་ཏུ་སྤྲད་དོ། །  
\v 2 དུས་དེར་ཚོར་ཨ་པ་ཞིག་ཡོད་ལ་དཱན་གྱི་ཚོ་པར་གཏོགས་ཤིང་མིང་ལ་མ་ནོ་ཨ་ཞེས་བྱ་བ་དང་། དེའི་ཆུང་མར་མངལ་མི་སྦྲུམ་ལ་ཕྲུ་གུ་སྐྱེས་མི་ཐུབ་བོ། །  
\v 3 དཀོན་མཆོག་ཡ་ཝཱེའི་ཕོ་ཉ་ཞིག་བུད་མེད་དེར་མངོན་ཞིང་འདི་སྐད་དུ། ལྟོས་དང་། ཁྱོད་རང་སྔར་ནས་མངལ་མི་སྦྲུམ་ལ་ཕྲུ་གུ་སྐྱེས་རྒྱུ་མེད་ནའང་། ད་ནི་ཁྱོད་ལ་མངལ་སྦྲུམ་ནས་བུ་ཞིག་སྐྱེ་ངེས་ཡིན།  
\v 4 དེ་བས་ཁྱོད་ཀྱིས་གཟབ་གཟབ་བྱེད་དགོས་ཏེ། རྒུན་ཆང་དང་ཨ་རག་གར་པོ་གང་ཡང་འཐུང་མི་རུང་ལ། མི་གཙང་བའི་རིགས་ཀྱང་གང་ཡང་བཟའ་མི་རུང་།  
\v 5 ལྟོས་དང་། ཁྱོད་ལ་མངལ་སྦྲུམ་ནས་བུ་ཞིག་སྐྱེ་ངེས་ཤིང་། དེའི་མགོ་ལ་སྐྲ་གྲིས་རེག་མི་ཆོག ཅི་ལ་ཞེ་ན། ཕྲུ་གུ་འདི་ནི་སྐྱེས་མ་ཐག་ནས་དཀོན་མཆོག་ལ་གཏོགས་ཤིང་ལོགས་སུ་བཀར་བའི་མི་རུ་འགྱུར་ལ། ཁོས་ཡེས་ར་ཨེལ་པ་རྣམས་བསྐྱབས་ཏེ་ཕེ་ལེ་ཤེད་པ་རྣམས་ཀྱི་ལག་ནས་ཐར་དུ་འཇུག་པར་རྩོམ་པ་ཡིན་ཞེས་གསུངས།  
\v 6 དེ་ནས་བུད་མེད་དེ་ཕྱིར་ལོག་ནས་སྐྱེས་པ་ལ་འདི་ལྟར་སྨྲས་པ་སྟེ། དཀོན་མཆོག་གི་སྐྱེས་བུ་ཞིག་ངའི་མདུན་དུ་སླེབས་ཤིང་དེའི་ཞལ་རས་ནི་དཀོན་མཆོག་གི་ཕོ་ཉའི་ཞལ་རས་དང་མཚུངས་ལ་ཤིན་ཏུ་གུས་ཞུམ་བྱེད་འོས་པར་སྣང་། ངས་ཁོང་ཉིད་གང་ནས་འོངས་པ་མ་དྲིས། ཁོང་གིས་ཀྱང་ཉིད་ཀྱི་མཚན་ང་ལ་གསུངས་མ་བྱུང་།  
\v 7 ཡིན་ནའང་ཁོང་གིས་བདག་ལ་འདི་སྐད་དུ། ལྟོས་དང་། ཁྱོད་ལ་མངལ་སྦྲུམ་ནས་བུ་ཞིག་སྐྱེ་ངེས་ཡིན། དེ་བས་ཁྱོད་ཀྱིས་རྒུན་ཆང་དང་ཨ་རག་གར་པོ་གང་ཡང་འཐུང་མི་རུང་ལ། མི་གཙང་བའི་རིགས་ཀྱང་གང་ཡང་བཟའ་མི་རུང་། ཅི་ལ་ཞེ་ན། ཕྲུ་གུ་འདི་ནི་སྐྱེས་མ་ཐག་ནས་འཆི་བའི་བར་དུ་དཀོན་མཆོག་ལ་གཏོགས་ཤིང་ལོགས་སུ་བཀར་བའི་མི་རུ་འགྱུར་ཞེས་གསུངས་བྱུང་ཞེས་པ་ལ།  
\v 8 མ་ནོ་ཨ་ཡིས་དཀོན་མཆོག་ཡ་ཝཱེ་ལ་ཞུ་བ་ཕུལ་ནས་འདི་ལྟར། ཀྱེ་གཙོ་བོ་ལགས། སྐྱེ་བར་འགྱུར་བའི་ཕྲུ་གུ་དེ་ཅི་ལྟར་སྐྱོང་དགོས་པ་ངེད་ཅག་ལ་མཛུབ་སྟོན་གནང་བའི་ཆེད་དུ། ཁྱེད་ཀྱིས་དཀོན་མཆོག་གི་སྐྱེས་བུ་དེ་ཡང་བསྐྱར་ངེད་ཀྱི་རྩར་མངགས་པར་མཛོད་ཅེས་ཞུས།  
\v 9 དེར་དཀོན་མཆོག་གིས་མ་ནོ་ཨ་ཡི་ཞུ་བར་གསན་ཏེ། བུད་མེད་དེ་ཞིང་ཁར་སྡོད་པའི་སྐབས་སུ་དཀོན་མཆོག་གི་ཕོ་ཉ་ཡང་བསྐྱར་ཁོ་མོའི་གམ་དུ་སླེབས། ཡིན་ནའང་ཁོ་མོའི་སྐྱེས་པ་མ་ནོ་ཨ་ཁོ་མོ་དང་མཉམ་དུ་མེད་པ་རེད།  
\v 10 བུད་མེད་མྱུར་བ་མྱུར་དུ་བརྒྱུགས་སོང་སྟེ་སྐྱེས་པར་ན་རེ། ལྟོས་དང་། ཉིན་དེར་ངའི་མདུན་དུ་འོངས་པའི་མི་དེ་ཡང་བསྐྱར་ང་ལ་མངོན་བྱུང་ཞེས་སྨྲས་པ་དང་།  
\v 11 མ་ནོ་ཨ་ཡར་ལངས་ཏེ་རང་གི་ཆུང་མའི་རྗེས་འབྲངས་ནས་མི་དེའི་དྲུང་དུ་སླེབས་ནས་འདི་ལྟར། བུད་མེད་འདིར་གསུང་གནང་མཁན་ནི་ཁྱེད་རང་ཡིན་ནམ་ཞེས་དྲིས་པ་ལ། ཁོང་གིས་ང་ཡིན་ཞེས་གསུངས།  
\v 12 དེ་ནས་མ་ནོ་ཨ་ན་རེ། ཁྱེད་ཀྱི་གསུང་བཞིན་འགྲུབ་པར་ཤོག ངེད་ཅག་གིས་ཕྲུ་གུ་དེ་ཅི་ལྟར་སྐྱོང་དགོས་པ་དང་། ཕྱིས་སུ་ཁོ་རང་ཅི་འདྲ་ཡིན་དགོས་སམ་ཞེས་ཞུས་པ་ལ།  
\v 13 དཀོན་མཆོག་ཡ་ཝཱེའི་ཕོ་ཉས་མ་ནོ་ཨ་ལ་འདི་སྐད་དུ། བདག་གིས་བུད་མེད་ལ་སྨྲས་པའི་དོན་ཐམས་ཅད་ཀྱི་ཐད་ཁོ་མོས་གཟབ་གཟབ་བྱེད་དགོས།  
\v 14 རྒུན་ཤིང་ལས་ཐོགས་པ་ཐམས་ཅད་བཟའ་མི་རུང་ཞིང་། རྒུན་ཆང་དང་ཨ་རག་གར་པོ་གང་ཡིན་ཡང་འཐུང་མི་རུང་ལ། མི་གཙང་བའི་རིགས་ཀྱང་གང་ཡང་བཟའ་མི་རུང་། ངས་ཅི་བསྒོས་པ་ཐམས་ཅད་ཁོ་མོས་བསྲུང་དགོས་ཞེས་གསུངས།  
\v 15 མ་ནོ་ཨ་ཡིས་དཀོན་མཆོག་ཡ་ཝཱེའི་ཕོ་ཉ་ལ་འདི་ལྟར། ངེད་ཅག་གིས་ཁྱེད་ལ་ར་ཕྲུག་ཅིག་སྟ་གོན་བྱེད་པའི་ཕྱིར། ཁྱེད་རང་ཡུད་ཙམ་ལ་བཞུགས་རོགས་ཞེས་ཞུས་པ་དང་།  
\v 16 དཀོན་མཆོག་ཡ་ཝཱེའི་ཕོ་ཉས་མ་ནོ་ཨ་ལ་འདི་སྐད་དུ། ཁྱོད་ཀྱིས་ང་རང་བཀག་ནའང་ངས་ཁྱོད་ཀྱི་ཟས་མི་ཟ། གལ་ཏེ་ཁྱོད་ཀྱིས་སྦྱིན་སྲེག་གི་མཆོད་པ་སྟ་གོན་བྱེད་ན་དེ་ནི་དཀོན་མཆོག་ཡ་ཝཱེ་ལ་འབུལ་བར་འོས་ཞེས་གསུངས་པ་སྟེ། མ་གཞི་མ་ནོ་ཨས་དེ་ནི་དཀོན་མཆོག་ཡ་ཝཱེའི་ཕོ་ཉ་ཡིན་པ་མ་ཤེས་སོ། །  
\v 17 མ་ནོ་ཨ་ཡིས་དཀོན་མཆོག་ཡ་ཝཱེའི་ཕོ་ཉ་ལ་འདི་ལྟར། ཁྱེད་ཀྱི་གསུང་ལྟར་འགྲུབ་པའི་ཚེ། ངེད་ཅག་གིས་ཁྱེད་ལ་བཀུར་བ་བྱེད་པའི་ཆེད་དུ་ཁྱེད་ཀྱི་མཚན་ང་ལ་གསུང་རོགས་ཞེས་ཞུས་པ་ལ།  
\v 18 དཀོན་མཆོག་ཡ་ཝཱེའི་ཕོ་ཉས་ཁོ་ལ་འདི་སྐད་དུ། ཁྱོད་ཀྱིས་ངའི་མིང་འདྲི་དོན་ཅི། ངའི་མིང་ནི་ངོ་མཚར་ཅན་ཞིག་ཡིན་ཞེས་གསུངས།  
\v 19 དེ་ནས་མ་ནོ་ཨས་ཕ་བོང་ཞིག་གི་སྟེང་དུ་དཀོན་མཆོག་ཡ་ཝཱེ་ལ་ར་ཕྲུག་ཅིག་དང་འབྲུ་མཆོད་ཕུལ་བ་དང་། ཕོ་ཉས་དོན་ངོ་མཚར་ཅན་མཛད་པར་མ་ནོ་ཨ་དང་ཁོའི་ཆུང་མ་གཉིས་ཀྱིས་དེར་བལྟས་པ་ལ།  
\v 20 མཆོད་ཁྲིའི་སྟེང་ནས་མེ་ལྕེ་གྱེན་དུ་འཕྱུར་བ་དང་། དཀོན་མཆོག་ཡ་ཝཱེའི་ཕོ་ཉ་མཆོད་ཁྲི་སྟེང་གི་མེ་ལྕེ་ཁྲོད་ཡར་འཕགས་པ་མཐོང་། མ་ནོ་ཨ་དང་ཁོའི་ཆུང་མ་གཉིས་ཀྱིས་དེ་མཐོང་སྟེ་ཁ་སར་གཏད་ནས་བསྡད།  
\v 21 དཀོན་མཆོག་ཡ་ཝཱེའི་ཕོ་ཉ་དེ་མ་ནོ་ཨ་དང་ཁོའི་ཆུང་མ་གཉིས་ལ་ཡང་བསྐྱར་མ་མངོན་ཞིང་། མ་ནོ་ཨས་ད་གཟོད་དེ་ནི་དཀོན་མཆོག་ཡ་ཝཱེའི་ཕོ་ཉ་ཡིན་པ་ཤེས་སོ། །  
\v 22 མ་ནོ་ཨས་རང་གི་ཆུང་མར་འདི་ལྟར་སྨྲས་པ་སྟེ། བདག་ཅག་གིས་དཀོན་མཆོག་མཇལ་བས་འཆི་བར་ངེས་ཞེས་པ་ལ།  
\v 23 ཁོའི་ཆུང་མ་ན་རེ། གལ་ཏེ་དཀོན་མཆོག་ཡ་ཝཱེས་བདག་ཅག་གསོད་པར་དགོངས་ན། ཁོང་གིས་བདག་ཅག་གི་ལག་ནས་སྦྱིན་སྲེག་གི་མཆོད་པ་དང་འབྲུ་མཆོད་བཞེས་མི་སྲིད་ཅིང་། དོན་འདི་ཐམས་ཅད་བདག་ཅག་ལ་སྟོན་པར་མི་འགྱུར་ལ། དེ་རིང་བཀའ་འདི་རྣམས་བདག་ཅག་ལ་གསུང་བར་ཡང་མི་འགྱུར་ཞེས་སྨྲས།  
\v 24 ཕྱིས་སུ་བུད་མེད་དེས་བུ་ཞིག་བཙས་ཤིང་མིང་ལ་སཱམ་སོན་ཞེས་བཏགས། ཕྲུ་གུ་ཆེར་སྐྱེས་པ་དང་དཀོན་མཆོག་ཡ་ཝཱེས་ཁོ་ལ་བྱིན་རླབས་གནང་།  
\v 25 ཚོར་ཨ་དང་ཨེ་སི་ཐ་ཨོལ་གྱི་མཚམས་སུ་ཡོད་པའི་མ་ཧ་ནེ་དཱན་དུ་དཀོན་མཆོག་ཡ་ཝཱེའི་ཐུགས་ཉིད་ཀྱིས་སཱམ་སོན་ལ་སྐུལ་སློང་མཛད་དོ། །   
\c 14
\cl ལེའུ་བཅུ་བཞི་པ། 
\toc1 ༄༅། །ཁྲིམས་དཔོན་གྱི་མདོ། 
\toc2 ཁྲིམས་དཔོན། 
\s1 སཱམ་སོན་གྱི་གཉེན་དོན།  
\p
\v 1 སཱམ་སོན་ནི་ཐིམ་ནཱ་རུ་ཕྱིན་པ་དང་དེ་རུ་བུ་མོ་ཞིག་མཐོང་ཞིང་། དེ་ནི་ཕེ་ལེ་ཤེད་པའི་བུ་མོ་ཞིག་ཡིན་ནོ། །  
\v 2 ཁོ་ཡར་འོངས་ནས་རང་གི་ཕ་མ་གཉིས་ལ་ན་རེ། ངས་ཐིམ་ནཱ་རུ་ཕེ་ལེ་ཤེད་པའི་བུ་མོ་ཞིག་མཐོང་བྱུང་། ད་ལྟ་ཁྱེད་ཀྱིས་དེ་ངའི་ཆུང་མར་ལེན་རོགས་ཞེས་ཞུས་པ་ལ།  
\v 3 ཁོའི་ཕ་མས་འདི་ལྟར། ཁྱོད་ཀྱི་སྤུན་མཆེད་ཀྱི་བུ་མོ་རྣམས་དང་ཡང་ན་རང་རེའི་མི་ཀུན་གྱི་ཁྲོད་དུ་བུད་མེད་གཅིག་ཀྱང་མི་འདུག་གམ། ཁྱོད་སོང་སྟེ་མཚན་སྐྱི་མ་བཅད་པའི་ཕེ་ལེ་ཤེད་པ་རྣམས་ལས་ཆུང་མ་ལེན་དགོས་བྱུང་ངམ་ཞེས་སྨྲས་ཤིང་། སཱམ་སོན་གྱིས་རང་གི་ཕ་ལ། བུ་མོ་དེ་ངའི་བློར་བབ་བྱུང་བས་ཁྱེད་ཀྱིས་བུད་མེད་དེ་ང་ལ་ལེན་རོགས་ཞེས་ཞུས།  
\v 4 ཁོའི་ཕ་མས་དོན་དེ་ནི་དཀོན་མཆོག་ཡ་ཝཱེ་ནས་བྱུང་ཞིང་ཁོང་གིས་ཕེ་ལེ་ཤེད་པ་རྣམས་དང་འཐབ་འཛིང་བྱེད་པའི་གོ་སྐབས་འཚོལ་བའི་རྐྱེན་གྱིས་ཡིན་པ་མ་ཤེས་པ་རེད། དེའི་དུས་སུ་ཕེ་ལེ་ཤེད་པ་རྣམས་ཀྱིས་ཡེས་ར་ཨེལ་པ་ལ་དབང་བྱེད་པའོ། །  
\v 5 སཱམ་སོན་རང་གི་ཕ་མ་དང་ལྷན་ཅིག་ཏུ་ཐིམ་ནཱ་རུ་ཕྱིན་ཅིང་། ཐིམ་ནཱའི་རྒུན་འབྲུམ་ར་བར་སླེབས་པ་ལ། སེང་གེ་དར་མ་ཞིག་གིས་ཁོ་ལ་ང་རོ་སྒྲོག་པ་མཐོང་།  
\v 6 དེ་ནས་དཀོན་མཆོག་ཡ་ཝཱེའི་ཐུགས་ཉིད་ཀྱིས་སཱམ་སོན་ལ་སྐུལ་སློང་ཆེན་པོ་མཛད་དེ། ཁོའི་ལག་ཏུ་མཚོན་ཆ་མེད་ནའང་སེང་གེ་དེ་ནི་ར་ཕྲུག་ཅིག་གཤགས་པ་ལྟར་དུམ་བུར་གཤགས་ཤིང་། ཁོས་དོན་གང་ཞིག་བྱས་པ་དེ་ཕ་མར་མ་བཤད་དོ། །  
\v 7 སཱམ་སོན་མར་སོང་ནས་བུ་མོ་དེ་དང་གཏམ་ལབ་ཅིང་ཁོ་མོ་བློར་བབ་པ་རེད།  
\v 8 ཉིན་འགའི་རྗེས་སུ་ཡང་བུ་མོ་དེ་ལེན་དུ་མར་ཕྱིན་པ་དང་། ལམ་འགྲམ་དུ་འཁོར་ནས་སེང་གེ་ཤི་རོ་ལ་བལྟ་འདོད་པ་ན། ངོ་མཚར་བ་ཞིག་ལ། སེང་གེ་ཤི་རོ་དེའི་ནང་དུ་བུང་བའི་ཁྱུ་ཚོགས་དང་སྦྲང་རྩི་ཡོད་པ་མཐོང་སྟེ།  
\v 9 ཁོས་སྦྲང་རྩི་ལག་མཐིལ་དུ་བླངས་ནས་ཟ་ཞོར་ཕྱིན་པ་དང་། ཕ་མའི་རྩར་སླེབས་ནས་ཁོ་རྣམས་ལ་སྤྲད་པར་ཁོ་ཚོས་ཀྱང་ཟོས། ཡིན་ནའང་ཁོས་སྦྲང་རྩི་དེ་ནི་སེང་གེ་ཤི་རོ་ལས་བླངས་འོངས་པ་མ་བཤད་དོ། །  
\v 10 ཁོའི་ཕ་ནི་བུ་མོ་དེར་བལྟ་རུ་མར་ཕྱིན་པ་དང་། སཱམ་སོན་གྱིས་དེར་སྟོན་མོ་བཤམས་པ་སྟེ། རྒྱུ་མཚན་དེ་ནི་སྐབས་དེའི་གཞོན་ནུ་རྣམས་ཀྱི་སྲོལ་ཡིན་ནོ། །  
\v 11 མི་རྣམས་ཀྱིས་སཱམ་སོན་མཐོང་བ་དང་ཁོ་ལ་འདུག་གྲོགས་མི་སུམ་ཅུ་ཁྲིད་འོངས་པ་རེད།  
\v 12 སཱམ་སོན་གྱིས་དེ་དག་ལ་འདི་ལྟར་སྨྲས་པ་སྟེ། ངས་ཁྱོད་རྣམས་ལ་གབ་ཚིག་ཅིག་བཤད། ཁྱོད་རྣམས་ཀྱིས་སྟོན་མོའི་ཉིན་བདུན་གྱི་རིང་དེ་ཅི་ཡིན་པ་ཤེས་ན་བདག་ལ་ཤོད་ཅིག བདག་གིས་ཁྱོད་རྣམས་ལ་ནང་གོས་སུམ་ཅུ་དང་ཕྱི་གོས་ཁ་ཚང་སུམ་ཅུ་སྟེར་བར་བྱ།  
\v 13 གལ་ཏེ་ཁྱོད་རྣམས་ཀྱིས་དེའི་ལན་ང་ལ་བཤད་མ་ཐུབ་ན། ཁྱོད་ཅག་གིས་ང་ལ་ནང་གོས་སུམ་ཅུ་དང་ཕྱི་གོས་ཁ་ཚང་སུམ་ཅུ་སྟེར་དགོས་ཞེས་པ་ལ། དེ་དག་ན་རེ། གབ་ཚིག་ངེད་རྣམས་ལ་བཤད་རོགས་ཞེས་སྨྲས་སོ། །  
\v 14 དེ་ནས་སཱམ་སོན་ན་རེ། ཟ་མཁན་ནས་ཟས་ཐོན། སྟོབས་ཅན་ནས་མངར་མོ་ཐོན་ཞེས་སྨྲས་ཤིང་། ཁོ་རྣམས་ཀྱིས་ཉིན་གསུམ་གྱི་རིང་ལ་གབ་ཚིག་གི་ལན་མ་ཤེས་པ་རེད།  
\v 15 དེ་ནས་ཉིན་བདུན་པར་ཁོ་རྣམས་ཀྱིས་སཱམ་སོན་གྱི་ཆུང་མར་འདི་ལྟར་སྨྲས་པ་སྟེ། ཁྱོད་ཀྱིས་རང་གི་སྐྱེས་པ་བསླུས་ནས་གབ་ཚིག་གི་ལན་ལ་རྩད་ཆོད་ཅིག དེ་མིན་ཚེ་ངེད་རྣམས་ཀྱིས་ཁྱོད་དང་ཁྱོད་ཀྱི་ཕ་གཞིས་མེར་བསྲེག་པར་བྱ། ཁྱོད་ཅག་གིས་ངེད་རྣམས་འདིར་བོས་འོངས་པ་ནི་ངེད་རྣམས་ཀྱི་ཡོད་ཚད་འཕྲོག་པའི་ཕྱིར་ཡིན་ནམ་ཞེས་པའོ། །  
\v 16 དེ་ནས་སཱམ་སོན་གྱི་ཆུང་མ་སྐྱེས་པའི་མདུན་དུ་ངུས་ཤིང་ན་རེ། ཁྱོད་ནི་ང་ལ་སྡང་བ་ལས་དགའ་བ་མ་ཡིན་ཏེ། ཁྱོད་ཀྱིས་ངའི་མི་རྣམས་ལ་གབ་ཚིག་སྨྲས་ཀྱང་དེའི་ལན་བདག་ལ་མི་སྨྲའོ་ཞེས་སྨྲས་པ་ལ། སཱམ་སོན་གྱིས་དེའི་ལན་དུ། ལྟོས་དང་། དེ་ནི་ངས་ཐ་ན་རང་གི་ཕ་མ་ལའང་བཤད་མེད་པས་ཁྱོད་ལ་ཅི་ལྟར་སྨྲ་རུང་ངམ་ཞེས་སྨྲས།  
\v 17 སྟོན་མོའི་ཉིན་བདུན་པོར་ཁོ་མོ་སྐྱེས་པའི་མདུན་དུ་ངུས་ཤིང་། ཉིན་བདུན་པར་ཚ་འདྲི་བྱས་པས་ཁོས་ད་གཟོད་གབ་ཚིག་གི་ལན་རང་གི་ཆུང་མར་བཤད་པ་དང་། ཁོའི་ཆུང་མས་གབ་ཚིག་གི་ལན་རང་རིགས་ཀྱི་མི་རྣམས་ལ་བཤད་དོ། །  
\v 18 དེ་ནས་ཉིན་བདུན་པར་ཉི་མ་ནུབ་པའི་སྔོན་དུ། གྲོང་ཁྱེར་དེའི་མི་རྣམས་ཀྱིས་སཱམ་སོན་ལ། སྦྲང་རྩི་ལས་ཀྱང་མངར་བ་ཅི་ཞིག་མཆིས། སེང་གེ་ལས་ཀྱང་སྟོབས་ཅན་གང་ཞིག་ཡོད་ཅེས་སྨྲས་པར། སཱམ་སོན་ན་རེ། གལ་ཏེ་ཁྱོད་ཅག་གིས་བདག་གི་བ་གཞོན་གྱིས་ཞིང་རྨོས་པ་མིན་ན་ངའི་གབ་ཚིག་གི་ནང་དོན་ཤེས་མི་སྲིད་ཅེས་སྨྲས།  
\v 19 དཀོན་མཆོག་ཡ་ཝཱེའི་ཐུགས་ཉིད་ཀྱིས་སཱམ་སོན་ལ་སྐུལ་སློང་ཆེན་པོ་མཛད་པས། ཁོ་རང་མར་ཨ་ཤཱ་ཀེ་ལོན་དུ་ཕྱིན་ནས་དེར་མི་སུམ་ཅུ་བསད་པ་དང་། དེ་དག་གི་གྱོན་གོས་ཕྲོགས་ཏེ་གབ་ཚིག་གི་ལན་ཤེས་པའི་མི་རྣམས་ལ་སྤྲད། ཡང་ཁོ་རང་ཁྲོས་ནས་ཕ་གཞིས་སུ་ཕྱིན་ཏོ། །  
\v 20 སཱམ་སོན་གྱི་ཆུང་མ་ནི་ཁོའི་འདུག་གྲོགས་ཏེ་ཁོའི་མག་རོགས་བྱས་མྱོང་བ་དེར་དབང་བར་གྱུར་ཏོ། །   
\c 15
\cl ལེའུ་བཅོ་ལྔ་པ། 
\toc1 ༄༅། །ཁྲིམས་དཔོན་གྱི་མདོ། 
\toc2 ཁྲིམས་དཔོན། 
\s1 སཱམ་སོན་གྱིས་ཕེ་ལེ་ཤེད་པ་ཕམ་པར་བརྒྱབ་པ།  
\p
\v 1 ཉིན་འགའ་ཤས་ཀྱི་རྗེས་སུ་གྲོ་རྔ་བའི་དུས་ལ་སླེབས་པ་ན། སཱམ་སོན་གྱིས་ར་ཕྲུག་ཅིག་ཁྲིད་ནས་རང་གི་ཆུང་མར་བལྟ་རུ་ཕྱིན་པ་དང་འདི་ལྟར་སྨྲས་པ་སྟེ། ང་ཁང་པ་སྦུག་མའི་ནང་རང་གི་ཆུང་མར་འཕྲད་དུ་འགྲོ་བར་བྱ་ཞེས་པ་ལ། ཁོའི་སྒྱུག་པོས་ཁོ་རང་ནང་ལ་འགྲོ་རུ་མ་བཅུག་པར་ན་རེ།  
\v 2 ཁྱོད་རང་ཁོ་མོར་ཤིན་ཏུ་སྡང་བར་ངས་སེམས་ཐག་ཆོད་པས། ངས་ཁོ་མོ་ཁྱོད་ཀྱི་གྲོགས་པོར་བྱིན་པ་ཡིན། ཁོ་མོའི་གཅུང་མོ་དེ་ལས་ཀྱང་མཛེས་པ་མ་ཡིན་ནམ། ཁྱོད་ཀྱིས་ཁོ་མོའི་ཚབ་ཏུ་དེ་ལེན་པར་མཛོད་ཅེས་སྨྲས་པ་ལ།  
\v 3 སཱམ་སོན་ན་རེ། ཐེངས་འདིར་བདག་གིས་ཕེ་ལེ་ཤེད་པ་རྣམས་ལ་གནོད་བསྐྱལ་ཡང་ཉེས་པ་མེད་ཅེས་སྨྲས།  
\v 4 དེར་སཱམ་སོན་སོང་ནས་ཝ་མོ་སུམ་བརྒྱ་བཟུང་འོངས་ཏེ་མཇུག་མ་ཆ་རེ་ཆ་རེ་སྦྲེལ་ཞིང་། མཇུག་མ་གཉིས་ཀྱི་བར་ལ་དཔལ་འབར་རེ་བཏགས།  
\v 5 ཁོས་དཔལ་འབར་ལ་མེ་བསྒྲོན་རྗེས་ཝ་མོ་རྣམས་ཕེ་ལེ་ཤེད་པའི་གྲོ་ཞིང་དུ་བཏང་བ་ལ། ཚར་ཕོན་དང་མ་བརྔས་པའི་སྙེ་མ། སྐྱུ་རུ་རའི་ར་བ་བཅས་ཐམས་ཅད་བསྲེགས་སོ། །  
\v 6 དེར་ཕེ་ལེ་ཤེད་པ་རྣམས་ཀྱིས་དོན་འདི་ནི་སུ་ཞིག་གིས་བྱས་པ་ཡིན་ནམ་ཞེས་དྲིས་པ་ལ། འགའ་ཤས་ན་རེ། ཐིམ་ནཱ་པའི་མག་པ་སཱམ་སོན་གྱིས་དེ་ལྟར་བྱས། ཅི་ལ་ཞེ་ན། ཁོའི་སྒྱུག་པོས་དེའི་ཆུང་མ་ཁོའི་གྲོགས་ལ་བྱིན་པ་རེད་ཅེས་སྨྲས། དེ་ནས་ཕེ་ལེ་ཤེད་པ་རྣམས་ཡར་སོང་སྟེ་བུད་མེད་དང་དེའི་ཕ་གཉིས་མེར་བསྲེགས་སོ། །  
\v 7 དེ་ནས་སཱམ་སོན་གྱིས་དེ་རྣམས་ལ་འདི་ལྟར་སྨྲས་པ་སྟེ། ཁྱོད་ཅག་གིས་དེ་ལྟར་བྱས་པས་བདག་གིས་ཁྱོད་རྣམས་ལས་དགྲ་ཤ་མ་བླངས་བར་དུ་མཚམས་མི་འཇོག་ཅེས་པའོ། །  
\v 8 སཱམ་སོན་གྱིས་ཁོ་རྣམས་མང་དུ་བསད་ཅིང་བརླ་དང་དཔྱི་རྣམས་ཀྱང་བཅད་དེ། མར་སོང་ནས་ཨེ་ཏམ་གྱི་བྲག་ཁུང་དུ་བསྡད་དོ། །  
\v 9 ཕེ་ལེ་ཤེད་པ་རྣམས་ཡར་སོང་སྟེ་ཡ་ཧུ་དཱ་རུ་སྒར་བཏབ་ཅིང་ལེ་ཧི་རུ་ཁྱབ་པའོ། །  
\v 10 དེར་ཡ་ཧུ་དཱ་པ་རྣམས་ན་རེ། ཁྱོད་རྣམས་ཡར་ཡོང་སྟེ་ངེད་ཅག་ལ་རྒོལ་དོན་ཅི་ཞེས་སྨྲས་པ་ལ། དེ་རྣམས་ཀྱིས། ངེད་རྣམས་སཱམ་སོན་བཀྱིག་ཕྱིར་ཡར་འོངས་པ་ཡིན། ཁོས་ངེད་རྣམས་ལ་ཅི་བྱས་པ་ལྟར་ངེད་ཅག་གིས་ཀྱང་ཁོ་ལ་དེ་བཞིན་བྱེད་པར་འགྱུར་ཞེས་སྨྲས།  
\v 11 དེ་ནས་ཡ་ཧུ་དཱ་པ་མི་སུམ་སྟོང་མར་ཨེ་ཏམ་གྱི་བྲག་ཁུང་དུ་སོང་སྟེ་སཱམ་སོན་ལ་ན་རེ། ཕེ་ལེ་ཤེད་པ་རྣམས་ཀྱིས་ངེད་ཅག་ལ་དབང་བྱེད་པ་ཁྱོད་ཀྱིས་མི་ཤེས་སམ། ཁྱོད་ཀྱིས་ངེད་རྣམས་ལ་ཅི་བྱས་པ་ཡིན་ནམ་ཞེས་སྨྲས་པ་ལ། ཁོས་འདི་ལྟར། ཁོ་རྣམས་ཀྱིས་བདག་ལ་ཇི་ལྟར་བྱས་ན་བདག་གིས་ཀྱང་ཁོ་རྣམས་ལ་དེ་ལྟར་བྱས་པ་ཡིན་ཞེས་སྨྲས།  
\v 12 ཡ་ཧུ་དཱ་པ་རྣམས་ཀྱིས་ཁོ་ལ་འདི་ལྟར་སྨྲས་པ་སྟེ། ངེད་ཅག་ནི་ཁྱོད་རང་བཀྱིགས་ནས་ཕེ་ལེ་ཤེད་པའི་ལག་ཏུ་སྤྲོད་པའི་ཕྱིར་མར་འོངས་པ་ཡིན་ཞེས་པ་ན། སཱམ་སོན་ན་རེ། ཁྱོད་ཅག་རང་གིས་ང་ལ་མི་རྒོལ་བ་མནའ་དང་བཅས་ཁས་ལེན་དགོས་ཞེས་སྨྲས་ཤིང་།  
\v 13 དེ་དག་ན་རེ། ངེད་ཅག་གིས་ཁྱོད་རང་བཀྱིགས་ཏེ་ཕེ་ལེ་ཤེད་པ་རྣམས་ཀྱི་ལག་ཏུ་སྤྲོད་པ་ལས་ཁྱོད་རང་མི་གསོད་ཁག་ཐེག་ཡིན་ཞེས་སྨྲས། དེ་ནས་ཁོ་ཚོས་སཱམ་སོན་ནི་ཐག་གསར་གཉིས་ཀྱིས་བཀྱིགས་ཏེ་ཨེ་ཏམ་ནས་ཡར་ཁྲིད་དོ། །  
\v 14 སཱམ་སོན་ནི་ལེ་ཧི་རུ་སླེབས་པ་དང་ཕེ་ལེ་ཤེད་པ་རྣམས་ཀྱིས་མདུན་ནས་འུར་བརྒྱབ་ཅིང་། དཀོན་མཆོག་ཡ་ཝཱེའི་ཐུགས་ཉིད་ཀྱིས་སཱམ་སོན་ལ་སྐུལ་སློང་ཆེན་པོ་མཛད་པ་དང་། ཁོའི་དཔུང་པ་བཀྱིག་བྱེད་ཀྱི་ཐག་པ་ནི་མེར་བསྲེགས་པའི་སོ་མ་དང་མཚུངས་ཤིང་། བཀྱིག་ཐག་རྣམས་ཁོའི་ལག་པ་ནས་བྲུལ་ཏོ། །  
\v 15 ཁོས་བོང་བུའི་འགྲམ་རུས་རློན་པ་ཞིག་མཐོང་ནས་ལག་པ་བརྐྱངས་ཏེ་བླངས་ཤིང་། དེ་ཡིས་མི་ཆིག་སྟོང་བསད།  
\v 16 དེར་སཱམ་སོན་ན་རེ། ངས་བོང་བུའི་འགྲམ་རུས་ཀྱིས་མི་བསད་ནས་སྤུངས་པ་དང་། བོང་བུའི་འགྲམ་རུས་ཀྱིས་མི་ཆིག་སྟོང་བསད་པ་ཡིན་ཞེས་སྨྲས།  
\v 17 དེ་ལྟར་སྨྲས་པ་དང་བོང་བུའི་འགྲམ་རུས་དེ་ལག་ནས་ཕར་གཡུགས་ཤིང་། དེ་ནས་གནས་དེའི་མིང་ལ་རཱ་མད་ལེ་ཧི་ \f + \ft འདིར་རཱ་མད་ལེ་ཧི་ཞེས་པ་ནི་འགྲམ་རུས་ཕར་གཡུགས་པའི་དོན་ལ་འཇུག\f*ཞེས་ཐོགས་པའོ། །  
\v 18 སཱམ་སོན་ཤིན་ཏུ་སྐོམ་པས་དཀོན་མཆོག་ཡ་ཝཱེ་ལ་འདི་ལྟར། ཁྱེད་ཀྱིས་གཡོག་པོའི་ལག་པ་བརྒྱུད་ནས་སྐྱབས་ཆེན་པོ་འདི་ལྟ་བུ་མཛད་པས། བདག་སྐོམས་ནས་འཆི་བ་དང་མཚན་སྐྱི་མ་བཅད་པ་རྣམས་ཀྱི་ལག་ལ་འཆོར་དུ་འཇུག་ག་ལ་རུང་ཞེས་ཞུ་བ་ཕུལ་བ་ལ།  
\v 19 དཀོན་མཆོག་གིས་ལེ་ཧི་ཡི་གཤོང་ས་བཀས་པར་མཛད་པས་དེ་ལས་ཆུ་ཐོན་པ་དང་། སཱམ་སོན་གྱིས་དེ་འཐུངས་བས་སླར་ཡང་སེམས་ཤུགས་རྒྱས་པར་གྱུར། ཆུ་མགོ་དེའི་མིང་ལ་ཨེན་ཧག་ཀོ་རེ་ \f + \ft འདིར་ཨེན་ཧག་ཀོ་རེ་ཞེས་པ་ནི་ཞུ་འབོད་བྱེད་མཁན་གྱི་ཆུ་མིག་ཅེས་པའི་དོན་ལ་འཇུག\f*ཞེས་བཏགས་ཤིང་། དེ་ནི་དུས་དེ་རིང་བར་དུ་ལེ་ཧི་རུ་ཡོད་དོ། །  
\v 20 ཕེ་ལེ་ཤེད་པ་རྣམས་ཀྱིས་དབང་བྱེད་པའི་དུས་སུ། སཱམ་སོན་ནི་ལོ་ངོ་ཉི་ཤུའི་རིང་ལ་ཡེས་ར་ཨེལ་གྱི་ཁྲིམས་དཔོན་བྱས་པའོ། །   
\c 16
\cl ལེའུ་བཅུ་དྲུག་པ། 
\toc1 ༄༅། །ཁྲིམས་དཔོན་གྱི་མདོ། 
\toc2 ཁྲིམས་དཔོན། 
\s1 སཱམ་སོན་དང་དི་ལེ་ལཱ།  
\p
\v 1 དེ་ནས་སཱམ་སོན་ནི་གཱ་ཟཱ་རུ་སླེབས་ཤིང་དེར་སྨད་འཚོང་མ་ཞིག་མཐོང་ནས་དེ་དང་མཉམ་དུ་བསྡད།  
\v 2 མི་ཞིག་གིས་གཱ་ཟཱ་པ་རྣམས་ལ་སཱམ་སོན་འདི་རུ་སླེབས་འདུག་ཅེས་ཞུས་པ་ན། དེ་ཚོས་ཁོ་རང་བསྐོར་ནས་མཚན་གང་པོར་གྲགས་འགུལ་ཅི་ཡང་མེད་པར་མཁར་སྒོ་རུ་འཇབ་སྒུག་བྱས་པ་དང་། ནམ་ལངས་པའི་དུས་སུ་བདག་ཅག་གིས་ཁོ་གསོད་པར་བྱ་ཞེས་སྨྲས།  
\v 3 སཱམ་སོན་ཉལ་ནས་ནམ་གུང་ལ་སླེབས་པ་དང་ཡར་ལངས་ཏེ་མཁར་སྒོའི་སྒོ་གླེགས་གཉིས་ཀ་དང་སྒོ་རུ། སྒོ་གཏན་བཅས་ཐམས་ཅད་བླངས་ནས་ཕྲག་ལ་ཁུར་ཏེ་ཧེབ་རོན་མདུན་ཕྱོགས་ཀྱི་རི་རྩེ་ཞིག་ལ་ཁྱེར།  
\v 4 དེའི་རྗེས་སུ་སཱམ་སོན་ནི་སོ་རེག་གྲོག་མོ་རུ་མིང་ལ་དི་ལེ་ལཱ་བྱ་བའི་བུད་མེད་ཅིག་ལ་དགའ་བར་གྱུར།  
\v 5 ཕེ་ལེ་ཤེད་པའི་འགོ་དཔོན་རྣམས་ཡར་བུད་མེད་དེའི་རྩར་ཕྱིན་ཏེ་ན་རེ། ཁྱོད་ཀྱིས་སཱམ་སོན་བསླུས་ནས་ཁོ་རང་ལ་ཅིའི་ཕྱིར་སྟོབས་ཤུགས་ཆེན་པོ་དེ་འདྲ་ལྡན་པ་དང་། ཐབས་བཀོད་གང་ཞིག་གིས་ངེད་ཅག་ཁོ་ལས་རྒྱལ་ཐུབ་པ་རྩད་ཨེ་ཆོད་བལྟ་རོགས། དེ་ནས་ཁོ་རང་བཀྱིགས་ནས་འདུལ་བར་བྱ། ངེད་ཅག་མི་རེས་ཁྱོད་ལ་དངུལ་སྲང་ཆིག་སྟོང་དང་བརྒྱ་རེ་སྟེར་བར་བྱ་ཞེས་སྨྲས་པས།  
\v 6 དི་ལེ་ལཱ་ཡིས་སཱམ་སོན་ལ་འདི་ལྟར་སྨྲས་པ་སྟེ། ཁྱོད་ལ་ཅིའི་ཕྱིར་སྟོབས་ཤུགས་ཆེན་པོ་དེ་འདྲ་ལྡན་པ་དང་། ཐབས་བཀོད་གང་ཞིག་གིས་ཁྱོད་རང་བཀྱིགས་ནས་འདུལ་ཐུབ་པ་ང་ལ་སྨྲ་བར་མཛོད་ཅེས་པ་ན།  
\v 7 སཱམ་སོན་ན་རེ། གལ་ཏེ་སུ་ཞིག་གིས་འབྲེང་བུ་རློན་པ་བདུན་གྱིས་ང་རང་བཀྱིགས་ན། ང་ནི་སྟོབས་ཉམས་ནས་མི་གཞན་དང་འདྲ་བར་འགྱུར་རོ་ཞེས་སྨྲས།  
\v 8 དེ་ནས་ཕེ་ལེ་ཤེད་པའི་འགོ་དཔོན་རྣམས་ཀྱིས་འབྲེང་བུ་རློན་པ་བདུན་ཁྱེར་ཡོང་སྟེ་བུད་མེད་དེར་སྤྲད་ཅིང་། ཁོ་མོས་སཱམ་སོན་ཐག་པས་བཀྱིགས་པ་རེད།  
\v 9 སྐབས་དེར་མི་འགའ་ཞིག་གིས་སྔ་མོ་ནས་བུད་མེད་ཀྱི་ཁང་པ་སྦུག་མ་རུ་འཇབ་སྒུག་བྱས་ཡོད་ཅིང་། བུད་མེད་ན་རེ། ཀྱེ་སཱམ་སོན། ཕེ་ལེ་ཤེད་པ་རྣམས་ཁྱོད་རང་འཛིན་དུ་འོངས་པ་རེད་ཅེས་སྨྲས་པ་ལ། སཱམ་སོན་གྱིས་གསོ་སྐུད་མེ་ལ་ཐུག་ན་ཆད་འགྲོ་བ་བཞིན་འབྲེང་བུ་རྣམས་བཅད། དེ་ལྟར་མི་རྣམས་ཀྱིས་ཁོའི་སྟོབས་ཤུགས་ཀྱི་འབྱུང་རྩ་མ་ཤེས་སོ། །  
\v 10 དི་ལེ་ལཱ་ཡིས་སཱམ་སོན་ལ་འདི་ལྟར་སྨྲས་པ་སྟེ། ལྟོས་དང་། ཁྱོད་ཀྱིས་ང་ལ་མགོ་གཡོགས་ཏེ་རྫུན་སྨྲས་པ་རེད། ད་ནི་ཁྱོད་རང་ཐབས་བཀོད་གང་ཞིག་གིས་བཀྱིག་ནུས་པ་ང་ལ་སྨྲ་བར་མཛོད་ཅེས་པར།  
\v 11 སཱམ་སོན་ན་རེ། གལ་ཏེ་སུ་ཞིག་གིས་ཐག་པ་གསར་པ་བཀོལ་མ་མྱོང་བ་རྣམས་ཀྱིས་ང་རང་བཀྱིགས་ན། ང་ནི་སྟོབས་ཉམས་ནས་མི་གཞན་དང་འདྲ་བར་འགྱུར་རོ་ཞེས་སྨྲས་པས།  
\v 12 དི་ལེ་ལཱ་ཡིས་ཐག་པ་གསར་པས་ཁོ་རང་བཀྱིགས་ནས་འདི་ལྟར་སྨྲས་པ་སྟེ། ཀྱེ་སཱམ་སོན། ཕེ་ལེ་ཤེད་པ་རྣམས་ཁྱོད་རང་འཛིན་དུ་འོངས་པ་རེད་ཅེས་པ་དང་། སྐབས་དེར་མི་འགའ་ཞིག་གིས་སྔ་མོ་ནས་ཁང་པ་སྦུག་མ་རུ་འཇབ་སྒུག་བྱས་ཡོད་པ་ལ། སཱམ་སོན་གྱིས་དཔུང་པའི་ཐག་པ་དེ་སྐུད་པ་རྐྱ་གཅིག་གཅོད་པ་བཞིན་དུ་བཅད་པ་རེད།  
\v 13 དེ་ནས་དི་ལེ་ལཱ་ཡིས་སཱམ་སོན་ལ་འདི་ལྟར་སྨྲས་པ་སྟེ། ཁྱོད་ཀྱིས་ད་དུང་ང་ལ་མགོ་གཡོགས་ཏེ་རྫུན་སྨྲས་པ་རེད། ཐབས་བཀོད་གང་ཞིག་གིས་ཁྱོད་རང་བཀྱིག་ནུས་པ་ང་ལ་སྨྲ་བར་མཛོད་ཅེས་པ་ལ། སཱམ་སོན་ན་རེ། ཁྱོད་ཀྱིས་ངའི་སྐྲ་ལན་གྱི་སྣེ་བདུན་པོ་ཐགས་དང་མཉམ་དུ་བཏགས་པས་ཆོག་ཅེས་སྨྲས་པ་ལ།  
\v 14 དི་ལེ་ལཱ་ཡིས་ཁོའི་སྐྲ་ལན་གྱི་སྣེ་མོ་རྣམས་ཐགས་དང་མཉམ་དུ་བཏགས་ཤིང་ཕུར་བས་བརྡབས་ནས་ཁོ་ལ་འདི་ལྟར་སྨྲས་པ་སྟེ། ཀྱེ་སཱམ་སོན། ཕེ་ལེ་ཤེད་པ་རྣམས་ཁྱོད་རང་འཛིན་དུ་འོངས་པ་རེད་ཅེས་པ་ན། སཱམ་སོན་གཉིད་ལས་སད་དེ། ཐགས་ཁྲི་སྟེང་གི་ཕུར་བ་དང་ཐགས་བཅས་ཐམས་ཅད་བལ་ཏོ། །  
\v 15 དེ་ནས་དི་ལེ་ལཱ་ཡིས་སཱམ་སོན་ལ་འདི་ལྟར་སྨྲས་པ་སྟེ། ཁྱོད་ཀྱིས་བདག་ལ་སེམས་མི་སྟེར་བས་ཁྱོད་ང་ལ་དགའ་ཞེས་ཟེར་དོན་ཅི་ཡིན་ནམ། ཁྱོད་ཀྱིས་ཐེངས་གསུམ་དུ་ང་ལ་མགོ་གཡོགས་པ་སྟེ། ཁྱོད་ལ་ཅིའི་ཕྱིར་སྟོབས་ཆེན་པོ་འདི་འདྲ་ཡོད་པ་བདག་ལ་མ་སྨྲས་ཞེས་པའོ། །  
\v 16 དི་ལེ་ལཱ་ཡིས་ཉིན་རྒྱུན་ཁོ་ལ་ནན་གྱིས་བསྐུལ་བས། ཁོ་རང་སེམས་འཁྲུགས་ནས་ཐ་ན་འཆི་དགོས་པའི་ཚད་ལ་སླེབས་པ་དང་།  
\v 17 སཱམ་སོན་གྱིས་རང་གི་སྙིང་གཏམ་ཡོད་ཚད་ཁོ་མོ་ལ་སྨྲས་ཏེ་ན་རེ། ང་རང་ནི་སྐྱེས་མ་ཐག་ནས་དཀོན་མཆོག་ལ་གཏོགས་ཤིང་ལོགས་སུ་བཀར་བའི་མི་རུ་གྱུར་པ་ཡིན་པས། ངའི་སྐྲ་ལོ་ནི་ནམ་ཡང་སྐྲ་གྲིས་བཞར་མྱོང་མེད། གལ་ཏེ་མི་ཞིག་གིས་ངའི་སྐྲ་ལོ་བཞར་ན་ངའི་སྟོབས་ཤུགས་ང་དང་བྲལ་ནས། ང་རང་སྟོབས་ཉམས་ནས་མི་གཞན་དང་འདྲ་བར་འགྱུར་འགྲོ་ཞེས་སྨྲས།  
\v 18 དི་ལེ་ལཱ་ཡིས་ཁོས་སྙིང་གཏམ་ཡོད་ཚད་ཁོ་མོར་སྨྲས་པ་མཐོང་ནས། ཕེ་ལེ་ཤེད་པའི་འགོ་དཔོན་རྣམས་ཀྱི་རྩར་མི་མངགས་ཏེ་ན་རེ། ཁོས་སྙིང་གཏམ་ཡོད་ཚད་བདག་ལ་སྨྲས་ཟིན་པས་ཁྱེད་རྣམས་ཡང་བསྐྱར་ཐེངས་གཅིག་ཡར་ཕེབས་རོགས་ཞེས་སྨྲས་པ་ལ། ཕེ་ལེ་ཤེད་པའི་འགོ་དཔོན་རྣམས་ཀྱིས་ལག་ལ་དངུལ་ཁྱེར་ནས་བུད་མེད་དེའི་རྩར་ཕྱིན།  
\v 19 དི་ལེ་ལཱ་ཡིས་སཱམ་སོན་རང་གི་པང་ལ་སྔས་ཏེ་གཉིད་དུ་བཅུག་པ་དང་། མི་ཞིག་བོས་ཡོང་སྟེ་ཁོའི་མགོ་ཡི་སྐྲ་ལན་གྱི་སྣེ་བདུན་པོ་འབྲེག་ཏུ་བཅུག་ཅིང་། དི་ལེ་ལཱ་ཡིས་ཁོ་རང་ངོ་ཚར་སྦྱར་བ་དང་ཁོའི་སྟོབས་ཤུགས་ཁོ་དང་བྲལ་ཏོ། །  
\v 20 དེར་ཁོ་མོ་ན་རེ། ཀྱེ་སཱམ་སོན། ཕེ་ལེ་ཤེད་པ་རྣམས་ཁྱོད་འཛིན་དུ་འོངས་པ་རེད་ཅེས་སྨྲས་པ་ལ། སཱམ་སོན་གཉིད་ལས་སད་ཅིང་སེམས་སུ། བདག་སྔར་བཞིན་ཕྱི་རོལ་ཏུ་སོང་སྟེ་འཆིང་བ་ལས་ཐར་དགོས་སྙམ་ནའང་། ཁོས་དཀོན་མཆོག་ཡ་ཝཱེ་ནི་ཁོ་དང་བྲལ་ཟིན་པ་མ་ཤེས་སོ། །  
\v 21 ཕེ་ལེ་ཤེད་པ་རྣམས་ཀྱིས་ཁོ་རང་བཟུང་སྟེ་མིག་གཉིས་བཏོན་ཅིང་མར་གཱ་ཟཱ་རུ་ཁྲིད་ནས་ལི་སྒྲོག་བརྒྱབ་པ་དང་། ཁོས་བཙོན་ཁང་དུ་རང་འཐག་བསྐོར་ནས་བསྡད།  
\v 22 ཡིན་ནའང་ཁོའི་སྐྲ་ནི་བཞར་བའི་རྗེས་སུ་ཡང་བསྐྱར་སྐྱེས་པའོ། །   
\s1 སཱམ་སོན་ཚེ་ལས་འདས་པ།  
\p
\v 23 ཕེ་ལེ་ཤེད་པའི་འགོ་དཔོན་རྣམས་དེ་དག་གི་ལྷ་དཱ་གོན་ལ་དམར་མཆོད་རྒྱ་ཆེན་པོ་འབུལ་བ་དང་སྤྲོ་སྤྲོ་གཏོང་བའི་ཕྱིར་འཛོམས་པ་སྟེ། ཁོ་རྣམས་ཀྱིས། བདག་ཅག་གི་ལྷ་ཡིས་དགྲ་བོ་སཱམ་སོན་བདག་ཅག་གི་ལག་ཏུ་སྤྲད་པ་རེད་ཅེས་སྨྲས་སོ། །  
\v 24 མི་རྣམས་ཀྱིས་སཱམ་སོན་མཐོང་ནས་ཁོ་ཚོའི་ལྷ་ལ་བསྟོད་བསྔགས་བརྗོད་དེ་འདི་ལྟར་སྨྲས་པ་སྟེ། རང་ཅག་གི་ཡུལ་རྣམས་བརླག་ཅིང་། རང་ཅག་ལས་མི་མང་པོ་གསོད་མཁན་དགྲ་བོ་དེ་ནི་བདག་ཅག་གི་ལྷ་ཡིས་རང་རེའི་ལག་ཏུ་སྤྲད་པ་རེད་ཅེས་པའོ། །  
\v 25 ཁོ་རྣམས་ཀྱིས་སྤྲོ་སྐྱིད་ལ་རོལ་བའི་དུས་སུ། སཱམ་སོན་བོས་ཡོང་སྟེ་ངེད་ཅག་གི་མདུན་དུ་ལྟད་མོ་སྟོན་ཅིག་ཅེས་སྨྲས་པ་ལ། ཁོ་ཚོས་སཱམ་སོན་བཙོན་ཁང་ནས་ཕྱིར་ཁྲིད་ཡོང་བ་དང་། ཁོས་མི་རྣམས་ཀྱི་མདུན་དུ་བཞད་གད་བསླངས་ཤིང་། དེ་དག་གིས་ཁོ་རང་ཀ་བ་གཉིས་ཀྱི་བར་ལ་འགྲེང་དུ་བཅུག  
\v 26 དེ་ནས་སཱམ་སོན་གྱིས་ཁོའི་ལག་པ་འཛིན་མཁན་བྱིས་པ་དེར་འདི་ལྟར་སྨྲས་པ་སྟེ། ང་རང་ཁང་པ་འདེགས་བྱེད་ཀ་བ་འདིར་བརྟེན་ཕྱིར་དེ་ལ་རེག་ཏུ་འཇུག་རོགས་ཞེས་པའོ། །  
\v 27 དུས་དེར་ཁང་པའི་ནང་དུ་སྐྱེས་པ་དང་བུད་མེད་ཀྱིས་གང་ཞིང་། ཕེ་ལེ་ཤེད་པའི་འགོ་དཔོན་ཐམས་ཅད་ཀྱང་དེར་ཡོད་པ་རེད། ཁང་ཐོག་ཏུ་སཱམ་སོན་གྱི་བཞད་གད་ལ་ལྟད་མོ་ལྟ་མཁན་སྐྱེས་ཕོ་མོ་ཧ་ལམ་སུམ་སྟོང་ཡོད་པའོ། །  
\v 28 དེ་ནས་སཱམ་སོན་གྱིས་དཀོན་མཆོག་ཡ་ཝཱེ་ལ་འདི་ལྟར། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་ང་རང་ཐུགས་ལ་དགོངས་པར་མཛོད། ཀྱེ་དཀོན་མཆོག་ལགས། བདག་གིས་ཕེ་ལེ་ཤེད་པ་རྣམས་ལས་ངའི་མིག་ཟུང་བཏོན་པར་དགྲ་ཤ་ལེན་པའི་ཕྱིར། ཐེངས་འདི་ཁོ་ནར་ཁྱེད་ཀྱིས་ང་ལ་སྟོབས་ཤུགས་གནང་བར་མཛོད་ཅེས་ཞུས་པ་དང་།  
\v 29 སཱམ་སོན་གྱིས་ཁང་པའི་དཀྱིལ་དབུས་སུ་ཡོད་པའི་འདེགས་བྱེད་ཀ་བ་དེ་གཉིས་ལ་འཇུས་པ་སྟེ། གཡོན་ལག་གིས་གཅིག་དང་གཡས་ལག་གིས་གཅིག་ལ་འཇུས་ནས་ན་རེ།  
\v 30 ང་རང་ཕེ་ལེ་ཤེད་པ་རྣམས་དང་མཉམ་དུ་འཆི་བར་ཤོག་ཅེས་སྨྲས་པ་དང་། སྟོབས་ཤུགས་ཡོད་རྒུས་འཕུལ་རྒྱག་བྱས་པ་ལ། ཁང་པ་བརྡིབས་ནས་འགོ་དཔོན་རྣམས་དང་ཁང་པའི་ནང་གི་མི་ཐམས་ཅད་མནན་པ་རེད། དེ་ལྟར་སཱམ་སོན་གྱིས་ཚེ་ལས་འདའ་བའི་དུས་སུ་བསད་པའི་མི་ནི་ཁོ་གསོན་པའི་དུས་སུ་བསད་པ་ལས་ཀྱང་མང་བའོ། །  
\v 31 དེ་ནས་སཱམ་སོན་གྱི་སྤུན་རྣམས་དང་ཁོའི་ཕ་གཞིས་ཐམས་ཅད་མར་ཁོའི་བེམ་པོ་ལེན་དུ་ཕྱིན་པ་དང་། ཁྱེར་ཡོང་ནས་ཚོར་ཨ་དང་ཨེ་སི་ཐ་ཨོལ་གཉིས་ཀྱི་བར་དུ་ཁོའི་ཕ་སྟེ་མ་ནོ་ཨ་ཡི་དུར་ས་རུ་བསྐུངས། ཁོ་ལོ་ངོ་ཉི་ཤུའི་རིང་ལ་ཡེས་ར་ཨེལ་གྱི་ཁྲིམས་དཔོན་བྱས་པའོ། །   
\c 17
\cl ལེའུ་བཅུ་བདུན་པ། 
\toc1 ༄༅། །ཁྲིམས་དཔོན་གྱི་མདོ། 
\toc2 ཁྲིམས་དཔོན། 
\s1 མི་ཀཱ་ཡི་སྐུ་འདྲ།  
\p
\v 1 ཨེ་ཕཱར་ཡིམ་གྱི་རི་ཁུལ་དུ་མི་ཀཱ་ཞེས་པའི་མི་ཞིག་ཡོད་པ་དང་།  
\v 2 དེས་རང་གི་མ་ལ་འདི་ལྟར་སྨྲས་པ་སྟེ། གཞན་གྱིས་ཁྱེད་ནས་ཁྱེར་བའི་དངུལ་སྲང་ཆིག་སྟོང་ཆིག་བརྒྱ་དེའི་ཕྱིར་ཁྱེད་ཀྱིས་དམོད་མོ་བྱས་པ་ངས་ཀྱང་ཐོས་བྱུང་། ལྟོས་དང་། དངུལ་དེ་ངའི་ལག་ཏུ་ཡོད་དེ་ངས་ཁྱེར་བ་ཡིན་ཞེས་པར། ཁོའི་མ་ན་རེ། ཀྱེ་བདག་གི་བུ། དཀོན་མཆོག་ཡ་ཝཱེས་ཁྱོད་ལ་བྱིན་རླབས་གནང་བར་ཤོག་ཅེས་སྨྲས།  
\v 3 མི་ཀཱ་ཡིས་དངུལ་སྲང་ཆིག་སྟོང་དང་བརྒྱ་ཕྱིར་རང་གི་མ་ལ་ཕུལ་བ་ལ། ཁོའི་མ་ན་རེ། སྐུ་ཞིག་བརྐོ་བ་དང་སྐུ་ཞིག་ལྡུག་པའི་ཕྱིར་བདག་གིས་དངུལ་འདི་ཁྱོད་ཀྱི་དོན་དུ་དཀོན་མཆོག་ཡ་ཝཱེ་ལ་འབུལ་བར་བྱ་སྟེ། བདག་གིས་ད་ལྟ་ཁྱོད་ལ་སྤྲོད་པར་བྱ་ཞེས་སྨྲས་སོ། །  
\v 4 མི་ཀཱ་ཡིས་དངུལ་དེ་ཕྱིར་རང་གི་མ་ལ་ཕུལ་བ་དང་། ཁོའི་མ་ཡིས་དངུལ་སྲང་ཉིས་བརྒྱ་དངུལ་མགར་ལ་སྤྲད་ཅིང་། སྐུ་ཞིག་བརྐོས་པ་དང་སྐུ་ཞིག་བླུགས་ནས་མི་ཀཱའི་ཁང་པར་བཞག  
\v 5 མི་ཀཱ་ལ་ལྷ་ཁང་ཞིག་བྱུང་བ་དང་། བེར་ཐུལ་ཞིག་དང་ཁྱིམ་གྱི་ལྷ་སྐུ་རྣམས་བཟོས་ཏེ་རང་གི་བུ་རྣམས་ལས་གཅིག་མཆོད་དཔོན་དུ་བསྐོས་པའོ། །  
\v 6 དེའི་དུས་སུ་ཡེས་ར་ཨེལ་གྱི་ནང་དུ་རྒྱལ་པོ་མེད་ལ། མི་རེ་རེས་གང་འདོད་བཞིན་བྱས་སོ། །  
\v 7 ཡ་ཧུ་དཱའི་པེད་ལེ་ཧེམ་དུ་གཞོན་ནུ་ཞིག་ཡོད་པ་ཡ་ཧུ་དཱའི་རིགས་རྒྱུད་ཀྱི་ལེ་ཝི་པ་ཡིན་ལ། ཁོ་ཡུལ་དེར་བྱེས་སུ་བསྡད་ཡོད་པ་དང་།  
\v 8 མི་དེ་ཡ་ཧུ་དཱའི་པེད་ལེ་ཧེམ་གྲོང་རྡལ་དང་བྲལ་ནས་འདུག་ས་ཞིག་འཚོལ་བའི་ཕྱིར་སོང་ཞིང་། ལམ་དུ་བགྲོད་པའི་དུས་སུ་ཨེ་ཕཱར་ཡིམ་རི་ཁུལ་གྱི་མི་ཀཱ་ཚང་ལ་སླེབས།  
\v 9 མི་ཀཱས་དེ་ལ་འདི་ལྟར། ཁྱོད་རང་གང་ནས་འོངས་པ་ཡིན་ཞེས་དྲིས་པ་ལ། ཁོ་ན་རེ། བདག་ནི་ཡ་ཧུ་དཱའི་པེད་ལེ་ཧེམ་ནས་འོངས་པ་དང་། བདག་ནི་ལེ་ཝི་པ་ཞིག་ཡིན་ལ་འདུག་ས་འཚོལ་བ་ཡིན་ཞེས་སྨྲས་ཤིང་།  
\v 10 མི་ཀཱ་ན་རེ། ཁྱེད་རང་བདག་དང་མཉམ་དུ་བསྡད་ཆོག་པ་སྟེ། ངས་ཁྱེད་རང་ཕ་དང་མཆོད་དཔོན་དུ་བཀུར་ཞིང་། ངས་ལོ་རེར་ཁྱེད་ལ་དངུལ་སྲང་བཅུ་དང་། གྱོན་གོས་ཁ་ཚང་གཅིག མི་ཚེ་བསྐྱལ་བའི་ཁ་ཟས་བཅས་འབུལ་བར་བྱ་ཞེས་སྨྲས་པ་ལ། ལེ་ཝི་པ་དེ་ཁོའི་ཁྱིམ་དུ་འཛུལ་བའོ། །  
\v 11 ལེ་ཝི་པ་མི་དེ་དང་མཉམ་དུ་སྡོད་པར་དགའ་ཞིང་། ཁོས་གཞོན་ནུ་དེ་རང་གི་བུ་བཞིན་བསྐྱངས་སོ། །  
\v 12 མི་ཀཱས་ལེ་ཝི་པའི་གཞོན་ནུ་དེ་མཆོད་དཔོན་དུ་བསྐོས་པ་དང་ཁོ་རང་མི་ཀཱའི་ཁྱིམ་དུ་བསྡད།  
\v 13 དེ་ནས་མི་ཀཱ་ན་རེ། ད་ནི་བདག་ལ་ལེ་ཝི་པ་ཞིག་མཆོད་དཔོན་དུ་ཡོད་པས། དཀོན་མཆོག་ཡ་ཝཱེས་བདག་ལ་བྱིན་རླབས་གནང་ངེས་ཡིན་པ་ཤེས་ཞེས་སྨྲས་སོ། །   
\c 18
\cl ལེའུ་བཅོ་བརྒྱད་པ། 
\toc1 ༄༅། །ཁྲིམས་དཔོན་གྱི་མདོ། 
\toc2 ཁྲིམས་དཔོན། 
\s1 དཱན་གྱི་མི་རྣམས་ལཱ་ཨི་སི་ཡུལ་དུ་གཞིས་ཆགས་པ།  
\p
\v 1 དེའི་དུས་སུ་ཡེས་ར་ཨེལ་གྱི་ཁྲོད་དུ་རྒྱལ་པོ་མེད་པ་དང་། དཱན་གྱི་ཚོ་པས་ད་དུང་སྡོད་སའི་གནས་ཤིག་འཚོལ་བ་སྟེ། དུས་དེ་བར་དུ་ཁོ་རྣམས་ལ་ཡེས་ར་ཨེལ་ཚོ་པའི་ཁྲོད་དུ་ད་དུང་ས་སྐལ་འཐོབ་མེད་པས་སོ། །  
\v 2 དེའི་ཕྱིར་དཱན་གྱི་མི་རྣམས་ཀྱིས་ཚོར་ཨ་དང་ཨེ་སི་ཐ་ཨོལ་ནས་རང་གི་ནང་མི་ལས་དཔའ་རྒོད་ལྔ་ཡུལ་དེར་ལྐོག་ཞིབ་བྱེད་པར་བཏང་ནས་ན་རེ། ཁྱོད་རྣམས་ཡུལ་དེར་ལྐོག་ཞིབ་བྱེད་དུ་སོང་ཞེས་སྨྲས། དེ་ནས་ཁོ་རྣམས་ཨེ་ཕཱར་ཡིམ་རི་ཁུལ་དུ་སླེབས་ཤིང་། མི་ཀཱ་ཡི་ཁང་པར་ཕྱིན་ནས་དེར་ཞག་སྡོད་བྱས།  
\v 3 ཁོ་རྣམས་མི་ཀཱའི་ཁང་པ་དང་ཉེ་བར་སླེབས་པ་ལ་གཞོན་ནུ་ལེ་ཝི་པ་དེའི་སྐད་གདངས་ཤེས་ཏེ་ནང་དུ་སོང་ནས་ཁོ་ལ་འདི་ལྟར། སུ་ཞིག་གིས་ཁྱོད་འདིར་ཁྲིད་འོངས་པ་ཡིན། ཁྱོད་ཀྱིས་འདིར་ཅི་བྱེད། ཁྱོད་ལ་འདི་ནས་ཅི་ཐོབ་ཅེས་དྲིས་པ་ལ།  
\v 4 ཁོ་ན་རེ། མི་ཀཱས་ང་ལ་འདི་ལྟར་བྱས་བྱུང་། ཁོང་གིས་ང་རང་གླས་ནས་ཁོང་གི་མཆོད་དཔོན་དུ་བཞག་པ་ཡིན་ཞེས་སྨྲས་ཤིང་།  
\v 5 དེ་དག་གིས་ཁོ་ལ་འདི་ལྟར། ངེད་རྣམས་བགྲོད་པའི་ལམ་འདི་བདེ་བླག་ཡིན་མིན་ཤེས་པའི་ཕྱིར་ཁྱེད་ཀྱིས་དཀོན་མཆོག་ལ་ཞུ་རོགས་ཞེས་ཞུས་པ་ལ།  
\v 6 མཆོད་དཔོན་གྱིས་ཁོ་རྣམས་ལ། ཁྱོད་རྣམས་བདེ་བར་ཕྱིན་ཅིག ཁྱོད་རྣམས་དཀོན་མཆོག་ཡ་ཝཱེའི་སྤྱན་སྔར་ལམ་འདིར་བགྲོད་པ་ཡིན་ཞེས་སྨྲས་སོ། །  
\v 7 དེ་ནས་མི་ལྔ་པོ་དེ་སོང་ནས་ལཱ་ཨི་སི་ཡུལ་དུ་སླེབས་པ་དང་། ཡུལ་དེའི་མི་རྣམས་ཚི་ཏུན་པ་རྣམས་བདེ་བར་སྡོད་པ་ནང་བཞིན་བག་ཡངས་ཞི་བདེ་ངང་སྡོད་པ་མཐོང་ཞིང་། ཡུལ་དེར་དབང་དུ་སྡུད་མཁན་དང་གནོད་འཚེ་གཏོང་མཁན་མེད་དེ། དེ་རྣམས་ཚི་ཏུན་པ་དང་རྒྱང་ཐག་རིང་ལ་གཞན་དང་འགྲོ་འོང་མེད་པ་རེད།  
\v 8 མི་ལྔ་པོ་དེ་ཕྱིར་ཚོར་ཨ་དང་ཨེ་སི་ཐ་ཨོལ་དུ་རང་གི་སྤུན་རྣམས་ཀྱི་སར་འོངས་པ་དང་། སྤུན་རྣམས་ན་རེ། ཁྱོད་རྣམས་ལ་སྨྲ་རྒྱུ་ཅི་ཞིག་ཡོད་ཅེས་དྲིས་པ་ལ།  
\v 9 དེ་དག་ན་རེ། ལོངས་དང་བདག་ཅག་ཡར་སོང་ནས་ཁོ་རྣམས་ལ་འཐབ་པར་བྱ། ངེད་རྣམས་ཀྱིས་ཡུལ་དེར་ལྐོག་ཞིབ་བྱས་ཤིང་ཡུལ་དེ་ཤིན་ཏུ་ཡག་པོ་འདུག ཁྱོད་རྣམས་ད་དུང་ས་འདིར་འདུག་གམ། མྱུར་བ་མྱུར་དུ་སོང་ནས་ཡུལ་དེ་ས་སྐལ་དུ་ལེན་པ་ལས་དུས་འགྱངས་བྱེད་མི་རུང་།  
\v 10 ཁྱོད་རྣམས་དེར་སླེབས་དུས་བག་ཡངས་ཞི་བདེ་ངང་སྡོད་པའི་མི་རྣམས་མཐོང་ངེས་ཤིང་ས་རྒྱའང་ཆེ་བ་ཡིན། དཀོན་མཆོག་གིས་ཡུལ་དེ་ཁྱོད་རྣམས་ཀྱི་ལག་ཏུ་སྤྲད་ཟིན། ཡུལ་དེར་དངོས་པོ་གང་ཡིན་ཡང་གྱ་ནོམ་པ་ཡོད་ཅིང་མི་ཚང་བ་གཅིག་ཀྱང་མེད་ཅེས་སྨྲས་སོ། །  
\v 11 དེ་ནས་དཱན་གྱི་ཁྱིམ་རྒྱུད་ཁྲོད་ཀྱི་མི་དྲུག་བརྒྱ་ཡིས་རང་རང་སར་མཚོན་ཆ་ཁྱེར་ཏེ་ཚོར་ཨ་དང་ཨེ་སི་ཐ་ཨོལ་ནས་ཆས་སོ། །  
\v 12 དེ་དག་ཡར་སོང་སྟེ་ཡ་ཧུ་དཱའི་ཀིར་ཡད་ཡེ་ཨ་རིམ་དུ་སླེབས་པ་དང་དེར་སྒར་བཏབ་པས། ཡུལ་དེར་ད་ལྟའི་བར་དུ་མ་ཧ་ནེ་དཱན་ \f + \ft འདིར་མ་ཧ་ནེ་དཱན་ཞེས་པ་ནི་དཱན་གྱི་སྒར་ཞེས་པའི་དོན་ཡིན།\f*ཞེས་འབོད་པའོ། །ལྟོས་དང་། དེ་ནི་ཀིར་ཡཱད་ཡེ་ཨ་རིམ་གྱི་ནུབ་ཕྱོགས་སུ་ཡོད་དེ།  
\v 13 ཁོ་རྣམས་དེ་ནས་ཨེ་ཕཱར་ཡིམ་རི་ཁུལ་དུ་ཕྱིན་ཅིང་མི་ཀཱའི་ཁང་པར་སླེབས།  
\v 14 སྔར་ལཱ་ཨི་སི་ཡུལ་ལ་ལྐོག་ཞིབ་བྱེད་མཁན་མི་ལྔ་པོ་དེས་རང་གི་སྤུན་རྣམས་ལ་འདི་ལྟར། ཁང་པ་འདིའི་ནང་དུ་བེར་ཐུལ་ཞིག་དང་ཁྱིམ་གྱི་ལྷ་སྐུ་རྣམས་དང་། དེ་མིན་སྐུ་བརྐོས་མ་དང་སྐུ་བླུགས་མ་ཡོད་པ་ཁྱོད་ཅག་གིས་ཤེས་སམ། ད་ནི་ཁྱོད་ཅག་གིས་ཅི་བྱེད་འོས་པར་བསམ་བློ་གཏོང་དགོས་ཞེས་སྨྲས་ཤིང་།  
\v 15 མི་ལྔ་པོ་དེ་མི་ཀཱའི་ཁང་པར་ཕྱིན་ཅིང་། གཞོན་ནུ་ལེ་ཝི་པ་དེའི་ཁང་པར་སླེབས་པ་དང་ཁོ་ལ་འཚམས་འདྲི་ཞུས།  
\v 16 དཱན་གྱི་མི་དྲུག་བརྒྱ་བོས་རང་རང་གི་མཚོན་ཆ་བཟུང་ནས་སྒོ་ཁར་འགྲེང་ནས་བསྡད།  
\v 17 དེ་ནས་ཡུལ་དེར་ལྐོག་ཞིབ་བྱེད་མཁན་མི་ལྔ་པོ་ནང་དུ་སོང་ནས་སྐུ་བརྐོས་མ་དང་བེར་ཐུལ། ཁྱིམ་གྱི་ལྷ་སྐུ། དེ་མིན་སྐུ་བླུགས་མ་བཅས་ཐམས་ཅད་ཁྱེར། མཆོད་དཔོན་དང་མཚོན་ཆ་ཐོགས་པའི་མི་དྲུག་བརྒྱ་བོ་ལྷན་ཅིག་ཏུ་སྒོ་ཁར་འགྲེང་ནས་བསྡད།  
\v 18 མི་ལྔ་པོ་དེ་མི་ཀཱའི་ཁང་པར་ཕྱིན་ཏེ་སྐུ་བརྐོས་མ་དང་བེར་ཐུལ། ཁྱིམ་གྱི་ལྷ་སྐུ། དེ་མིན་སྐུ་བླུགས་མ་བཅས་བླངས་པ་ལ། མཆོད་དཔོན་གྱིས་ཁོ་རྣམས་ལ། ཁྱོད་ཅག་གིས་ཅི་བྱེད་དམ་ཞེས་དྲིས་པ་དང་།  
\v 19 ཁོ་རྣམས་ན་རེ། ཁ་མི་གྲགས་པར་ལག་པས་ཁ་བཅད་ནས་ངེད་ཅག་མཉམ་དུ་ཤོག་ཅིག ངེད་རྣམས་ཀྱིས་ཁྱེད་རང་ཕ་དང་མཆོད་དཔོན་དུ་བརྩི་བར་བྱ། ཁྱེད་རང་ཁྱིམ་གཅིག་གི་མཆོད་དཔོན་བྱས་ན་དགའ་འམ་ཡང་ན་ཡེས་ར་ཨེལ་གྱི་རིགས་རྒྱུད་གཅིག་དང་ཚོ་པ་གཅིག་གི་མཆོད་དཔོན་བྱས་ན་ལེགས་ཞེས་སྨྲས་པ་ལ།  
\v 20 མཆོད་དཔོན་དགའ་བར་གྱུར་ཏེ་བེར་ཐུལ་དང་ཁྱིམ་གྱི་ལྷ་སྐུ། དེ་མིན་སྐུ་བརྐོས་མ་བཅས་རྣམས་ཁྱེར་ནས་ཁོ་རྣམས་ཀྱི་ཁྲོད་དུ་ཕྱིན།  
\v 21 དེ་ནས་ཁོ་རྣམས་ཡུལ་དེར་བྲལ་ཞིང་། བུ་ཕྲུག་དང་ཕྱུགས་ཟོག རྒྱུ་ནོར་བཅས་ཐམས་ཅད་སྔོན་ལ་བཏང་ངོ་། །  
\v 22 ཁོ་ཚོ་མི་ཀཱའི་ཁང་པ་དང་རྒྱང་ཐག་རིང་པོར་སླེབས་པ་ལ། མི་ཀཱའི་ཁྱིམ་མཚེས་རྣམས་འདུས་ཏེ་དཱན་གྱི་མི་རྣམས་བདས་ཤིང་།  
\v 23 ཁོ་ཚོས་དཱན་གྱི་མི་རྣམས་བོས་པ་ལ། དཱན་གྱི་མི་རྣམས་ཁ་ཕྱིར་འཁོར་ནས་མི་ཀཱ་ལ་འདི་ལྟར། ཁྱོད་ཀྱིས་མི་འདི་འདྲ་མང་པོ་བསྡུས་ཡོང་ནས་ཅི་བྱའམ་ཞེས་དྲིས་པ་ན།  
\v 24 མི་ཀཱ་ན་རེ། ཁྱོད་རྣམས་ཀྱིས་ངས་བཟོས་པའི་ལྷ་སྐུ་དང་མཆོད་དཔོན་བཅས་ཐམས་ཅད་ཁྱེར་སོང་བ་དང་། ད་ནི་བདག་ལ་ཅི་ཞིག་ལུས་ཡོད་དམ། ད་དུང་བདག་ལ་ཁྱོད་ཀྱིས་ཅི་བྱའམ་ཞེས་འདྲི་བ་ཅི་ཞེས་སྨྲས་པ་དང་།  
\v 25 དཱན་གྱི་མི་རྣམས་ཀྱིས་ཁོ་ལ་འདི་ལྟར་སྨྲས་པ་སྟེ། གདུག་རྩུབ་ཅན་འདི་ཚོས་ཁྱོད་ལ་རྒོལ་ཏེ་ཁྱོད་དང་ཁྱོད་ཀྱི་ཁྱིམ་གང་པོའི་སྲོག་འཆོར་ཉེན་ཡོད་པས། ཁྱོད་ཀྱིས་རང་གི་སྐད་ངེད་རྣམས་ལ་ཐོས་སུ་མ་འཇུག་ཅེས་པའོ། །  
\v 26 དཱན་གྱི་མི་རྣམས་སྔར་བཞིན་རང་གི་ལམ་དུ་སྐྱོད་པ་ལ། མི་ཀཱ་ཡིས་དེ་རྣམས་ཀྱི་སྟོབས་ཤུགས་རང་ཉིད་ལས་ཆེ་བ་མཐོང་སྟེ་ཁ་ཕྱིར་འཁོར་ནས་ཡུལ་དུ་ལོག  
\v 27 དཱན་གྱི་མི་རྣམས་ཀྱིས་མི་ཀཱས་བཟོས་པའི་ལྷ་སྐུ་དང་དེའི་མཆོད་དཔོན་བཅས་ཐམས་ཅད་ལཱ་ཨི་སི་ཡུལ་དུ་ཁྱེར་བ་དང་། བག་ཡངས་ཞི་བདེ་ངང་སྡོད་པའི་ཡུལ་མི་རྣམས་མཐོང་ནས་དེ་རྣམས་ལ་རལ་གྲིས་བརྒྱབ་ཅིང་། ཡང་གྲོང་ཁྱེར་དེ་མེར་བསྲེགས་པའོ། །  
\v 28 གྲོང་ཁྱེར་དེ་ཚི་ཏུན་དང་རྒྱང་ཐག་རིང་བ་དང་གཞན་དང་འགྲོ་འོང་མེད་པས་སྐྱོབ་མཁན་གཅིག་ཀྱང་མ་བྱུང་། གྲོང་ཁྱེར་དེ་ཐང་ཞིག་ཏུ་ཡོད་པ་དང་ཐང་དེ་པེད་རེ་ཧོབ་དང་ཉེ། དཱན་གྱི་མི་རྣམས་ཀྱིས་ཡང་བསྐྱར་དེ་རུ་མཁར་བརྩིགས་ནས་བསྡད་ཅིང་།  
\v 29 ཁོ་རྣམས་ཀྱི་ཕ་མེས་ཡེས་ར་ཨེལ་གྱི་བུ་དཱན་གྱི་མིང་ལྟར་གྲོང་ཁྱེར་དེའི་མིང་ལ་དཱན་ཞེས་བཏགས། སྔར་གྲོང་ཁྱེར་དེའི་མིང་ལ་ལཱ་ཨི་སི་ཞེས་བྱའོ། །  
\v 30 དཱན་གྱི་མི་རྣམས་ཀྱིས་སྐུ་བརྐོས་མ་དེ་རང་གི་དོན་དུ་བཞག ཡང་ཡུལ་དེར་འཕྲོག་བཅོམ་ཐེབས་པའི་ཉིན་མོའི་བར་དུ། མོ་ཤེའི་ \f + \ft འདིར་མོ་ཤེ་ཞེས་པར་མ་ཕྱི་ལས་མཱ་ན་ཤེ་ཞེས་མཐོང་།\f*ཚ་བོ་སྟེ་གེར་ཤོམ་གྱི་བུ་ཡོ་ནཱ་ཐན་དང་དེའི་བུ་རབས་ཚ་རྒྱུད་ནི་དཱན་ཚོ་པའི་མཆོད་དཔོན་བྱས་ཤིང་།  
\v 31 དཀོན་མཆོག་གི་མཆོད་ཁང་ཞི་ལོ་རུ་ཡོད་པའི་ཉིན་མོ་དག་ལ། དཱན་གྱི་མི་རྣམས་ཀྱིས་རང་གི་དོན་དུ་བཞག་པའི་མི་ཀཱ་ཡིས་བརྐོས་པའི་སྐུ་ཡང་དཱན་དུ་ཡོད་པ་ཡིན་ནོ། །   
\c 19
\cl ལེའུ་བཅུ་དགུ་པ། 
\toc1 ༄༅། །ཁྲིམས་དཔོན་གྱི་མདོ། 
\toc2 ཁྲིམས་དཔོན། 
\s1 ལེ་ཝི་པ་ཞིག་དང་དེའི་ཆུན་མ།  
\p
\v 1 ཡེས་ར་ཨེལ་གྱི་ཁྲོད་དུ་རྒྱལ་པོ་མེད་པའི་དུས་སུ། ཨེ་ཕཱར་ཡིམ་རི་ཁུལ་དུ་བྱེས་སུ་སྡོད་པའི་ལེ་ཝི་པ་ཞིག་གིས་ཡ་ཧུ་དཱའི་པེད་ལེ་ཧེམ་གྱི་བུད་མེད་ཅིག་ཆུན་མར་བླངས་ཤིང་།  
\v 2 ཆུན་མ་དེས་ལོག་གཡེམ་བྱས་ཏེ་སྐྱེས་པར་བྲལ་ནས་ཕྱིར་ཡ་ཧུ་དཱའི་པེད་ལེ་ཧེམ་དུ་ཕ་གཞིས་སུ་སླེབས་པ་དང་། ཟླ་བ་བཞིའི་རིང་ལ་དེར་བསྡད།  
\v 3 དེ་ནས་ཁོ་མོའི་སྐྱེས་པ་ལངས་ནས་གཡོག་པོ་ཞིག་དང་བོང་བུ་གཉིས་ཁྲིད་དེ་ཁོ་མོའི་རྩར་ཕྱིན་ཅིང་། ཚིག་སྙན་མོས་ཁོ་མོ་ཕྱིར་ལོག་པར་བསྐུལ་བ་ལ། བུད་མེད་ཀྱིས་སྐྱེས་པ་ཁྲིད་ནས་ཕ་གཞིས་སུ་ཕྱིན་ཏེ། མོའི་ཕ་ཡིས་ཁོ་མཐོང་བ་དང་དགའ་དགའ་སྤྲོ་སྤྲོས་བསུ་བ་བྱས།  
\v 4 ཁོའི་སྒྱུག་པོ་སྟེ་བུད་མེད་ཀྱི་ཕ་ཡིས་ཁོ་རང་ཉིན་གསུམ་ལ་བཀག་པ་དང་ཁོ་གཉིས་ཀྱིས་དེ་རུ་མཉམ་དུ་བཟའ་བཏུང་ལ་རོལ་ནས་ཞག་སྡོད་བྱས།  
\v 5 ཉིན་བཞི་པར་ལེ་ཝི་པ་ནངས་སྔ་མོ་ཡར་ལངས་ནས་འགྲོ་བར་བརྩམས་པ་ལ། བུད་མེད་ཀྱི་ཕ་ཡིས་མག་པར་འདི་ལྟར་སྨྲས་པ་སྟེ། ཁྱོད་ཀྱིས་ཁ་ཟས་ཉུང་ཙམ་ཟོས་ནས་སེམས་ཤུགས་བསྐྱེད་རྗེས་ལམ་དུ་ཆས་དང་ཞེས་པའོ། །  
\v 6 དེ་ནས་ཁོ་གཉིས་བསྡད་དེ་མཉམ་དུ་བཟའ་བཏུང་ལ་རོལ་ཅིང་། བུད་མེད་ཀྱི་ཕ་ཡིས་ཁོ་ལ་ན་རེ། ཁྱོད་ད་དུང་ཞག་གཅིག་ལ་བསྡད་ནས་སེམས་དགའ་བར་མཛོད་ཅིག་ཅེས་སྨྲས།  
\v 7 ཡང་མི་དེ་ལངས་ནས་འགྲོ་བར་བརྩམས་པ་ལ། ཁོའི་སྒྱུག་པོས་ཁོ་རང་བཙན་གྱིས་བཀག་པས་ཡང་གནས་དེར་ཞག་གཅིག་ལ་བསྡད།  
\v 8 ཉིན་ལྔ་པར་ཁོ་རང་ནངས་སྔ་མོ་ཡར་ལངས་ནས་འགྲོ་བར་བརྩམས་པ་ལ། བུད་མེད་ཀྱི་ཕ་ན་རེ། ཁྱོད་ཀྱིས་ཁ་ཟས་ཉུང་ཙམ་ཟོས་ནས་སེམས་ཤུགས་བསྐྱེད་དེ་ཉི་མ་ཕྱི་དྲོ་ལོན་རྗེས་ལམ་དུ་ཆས་པར་མཛོད་ཅེས་སྨྲས་ཤིང་། དེ་ནས་ཁོ་གཉིས་ཀྱིས་མཉམ་དུ་བཟའ་བཏུང་ལ་རོལ་བའོ། །  
\v 9 ཡང་མི་དེ་ཁོའི་ཆུན་མ་དང་གཡོག་པོ་མཉམ་དུ་ལངས་ནས་འགྲོ་བར་བརྩམས་པ་ལ། ཁོའི་སྒྱུག་པོ་སྟེ་བུད་མེད་ཀྱི་ཕ་ཡིས་ཁོ་ལ་འདི་ལྟར་སྨྲས་པ་སྟེ། ལྟོས་དང་ཉི་མ་ཕྱི་དྲོ་ལོན་འདུག ཁྱོད་ཡང་ཞག་གཅིག་ལ་འདུག་རོགས། ཉི་མ་ནུབ་ལ་ཉེ་བས་འདིར་བསྡད་ནས་སེམས་དགའ་བར་གྱིས། སང་ཉིན་ནངས་སྔ་མོ་ཡར་ལངས་ནས་ཕྱིར་རང་ཡུལ་དུ་ལོག་ཅིག་ཅེས་པའོ། །  
\v 10 མི་དེ་ཡང་ཞག་གཅིག་ལ་སྡོད་མ་འདོད་པར་བོང་བུ་གཉིས་ལ་ཁལ་བཀལ་ཏེ། ཆུན་མ་ཁྲིད་ནས་ཕྱིན་ཅིང་ཡེ་བུ་སིའི་ཁ་ཐུག་ཏུ་སླེབས་པ་སྟེ། ཡེ་བུ་སི་ནི་ཡེ་རུ་སཱ་ལེམ་ཡིན་ནོ། །  
\v 11 ཡེ་བུ་སི་དང་ཉེ་བར་སླེབས་དུས་ཉི་མ་ནུབ་ལ་ཉེ། གཡོག་པོས་བདག་པོ་ལ་འདི་ལྟར། ཕེབས་ཤོག་དང་ངེད་ཅག་ཡེ་བུ་སི་པའི་གྲོང་ཁྱེར་དུ་ཞག་སྡོད་བྱས་ན་དགའ་ཞེས་ཞུས་པ་ལ།  
\v 12 བདག་པོ་ན་རེ། ངེད་ཅག་ཡེས་ར་ཨེལ་པ་རྣམས་ཀྱི་སྡོད་གནས་མ་ཡིན་པའི་ཕྱི་ཕྱོགས་པའི་གྲོང་ཁྱེར་དུ་འགྲོ་མི་རུང་སྟེ། གིབ་ཨ་རུ་སོང་ན་དགའ་ཞེས་སྨྲས་པ་དང་།  
\v 13 ཡང་གཡོག་པོ་ལ་འདི་ལྟར་སྨྲས་པ་སྟེ། ཤོག་དང་། ངེད་ཅག་གིབ་ཨ་ཡུལ་དང་ཡང་ན་རཱ་མའི་གནས་ཤིག་ཏུ་ཞག་སྡོད་བྱས་ཆོག་ཅེས་པའོ། །  
\v 14 དེ་ནས་ཁོ་རྣམས་གནས་དེ་ལས་བརྒལ་ཏེ་སོང་ནས་པེན་ཡཱ་མེན་པའི་གིབ་ཨ་དང་ཉེ་བར་སླེབས་དུས། ཉི་མ་ནུབ་ལ་བཞུད་དོ། །  
\v 15 ཁོ་རྣམས་གིབ་ཨ་རུ་སོང་ནས་དེར་ཞག་སྡོད་བྱེད་འདོད་ཅིང་། ཁོ་གཉིས་གྲོང་ཁྱེར་གྱི་ཐང་ཆེན་དུ་བསྡད་ཀྱང་ཁྱིམ་དུ་བསུ་མཁན་མ་བྱུང་ངོ་། །  
\v 16 ལྟོས་དང་། དགོང་མོར་རྒན་པོ་ཞིག་ཞིང་ཁ་ནས་ལས་མཚམས་བཞག་སྟེ་ཕྱིར་འོངས་པ་དང་། མ་གཞི་ཁོ་ནི་ཨེ་ཕཱར་ཡིམ་རི་ཁུལ་གྱི་ཡིན་ཞིང་གིབ་ཨ་རུ་བྱེས་སུ་སྡོད་པ་ཡིན་མོད། འོན་ཀྱང་ཡུལ་དེའི་མི་རྣམས་ནི་པེན་ཡཱ་མེན་པ་ཡིན་ནོ། །  
\v 17 རྒན་པོ་དེས་མགོ་ཡར་བཀྱགས་ནས་བལྟས་པར་ལམ་པ་ཞིག་གྲོང་ཁྱེར་གྱི་ཐང་ཆེན་དུ་སྡོད་པ་མཐོང་ནས་ཁོ་ལ་འདི་ལྟར། ཁྱོད་གང་ནས་འོངས། གང་དུ་འགྲོ་ཞེས་དྲིས་པ་ན།  
\v 18 ཁོ་ན་རེ། ངེད་རྣམས་ཡ་ཧུ་དཱའི་པེད་ལེ་ཧེམ་ནས་འོངས་པ་དང་རྒྱང་རིང་གི་ཨེ་ཕཱར་ཡིམ་རི་ཁུལ་ཕྱོགས་སུ་འགྲོའོ། །ང་ནི་མ་གཞི་ཡུལ་དེའི་ཡིན་ཞིང་ཡ་ཧུ་དཱའི་པེད་ལེ་ཧེམ་དུ་ཕྱིན་པ་དང་། ད་ལྟ་ང་རང་དཀོན་མཆོག་ཡ་ཝཱེའི་བཞུགས་གནས་སུ་འགྲོ་བ་ཡིན། འདི་རུ་ང་རང་ཁྱིམ་དུ་བསུ་མཁན་མི་འདུག  
\v 19 དོན་དམ་དུ་བདག་ལ་བོང་བུ་གསོ་བྱེད་གཟན་རྩྭ་དང་ཆས་ཡོད་ལ། བདག་དང་བདག་གི་ཆུན་མ་དང་། བདག་གི་གཡོག་པོ་ལའང་བག་ལེབ་དང་རྒུན་ཆང་ཡོད་པས་དགོས་མཁོ་ཅི་ཡང་མེད་ཅེས་སྨྲས་པར།  
\v 20 རྒན་པོ་ན་རེ། ཁྱོད་རང་བདེ་བར་སྨོན། ཁྱོད་ཀྱི་དགོས་མཁོ་ཐམས་ཅད་བདག་གིས་བསྐང་བར་བྱ། ཡིན་ནའང་ཐང་ཆེན་དུ་ཞག་སྡོད་བྱེད་མི་རུང་ཞེས་སྨྲས།  
\v 21 དེ་ནས་རྒན་པོས་ཁོ་རྣམས་ཁྱིམ་དུ་ཁྲིད་ནས་བོང་བུ་ལ་ཆས་བྱིན་རྗེས། ཁོ་རྣམས་ཀྱིས་རྐང་བ་བཀྲུས་ནས་བཟའ་བཏུང་ལ་རོལ་བའོ། །   
\s1 གིབ་ཨའི་ངན་སྤྱོད།  
\p
\v 22 ཁོ་རྣམས་དགའ་ཞིང་སྤྲོ་བའི་དུས་སུ། ལྟོས་དང་། གྲོང་ཁྱེར་དེའི་ཁྲམ་པ་འགའ་རེས་ཁང་པ་བསྐོར་ཅིང་། ཡང་ཡང་སྒོ་བརྡུངས་ནས་ཁང་བདག་རྒན་པོ་ལ་འདི་ལྟར་སྨྲས་པ་སྟེ། ཁྱོད་ཚང་ལ་འོངས་པའི་མི་དེ་ཕྱི་རོལ་ཏུ་ཁྲིད་ཤོག་ཅིག ངེད་རྣམས་དེ་དང་འགྲོགས་པར་བྱ་ཞེས་པ་ལ།  
\v 23 ཁང་བདག་དེ་ཕྱི་རུ་འོངས་ནས་ཁོ་རྣམས་ལ་འདི་ལྟར། བདག་གི་སྤུན་ཟླ་རྣམས། འདི་ལྟར་དོན་ངན་མི་བྱེད་རོགས། མི་དེ་བདག་གི་ཁྱིམ་དུ་འོངས་པས་ཁྱོད་རྣམས་ཀྱིས་དོན་ཁྲེལ་མེད་འདི་འདྲ་མི་བྱེད་རོགས།  
\v 24 ལྟོས་དང་། བདག་ལ་བུ་མོ་ཞིག་ཡོད་པ་ད་དུང་ན་ཆུང་ཡིན་པར་མ་ཟད། མི་འདིའི་ཆུན་མ་ཡང་ཡོད་པས་བདག་གིས་ཁོ་མོ་རྣམས་ཕྱི་རུ་ཁྲིད་ཡོང་བར་བྱ་སྟེ། ཁྱོད་ཅག་གིས་ཁོ་མོ་རྣམས་བཏུལ་ནས་ཅི་འདོད་ལྟར་བྱས་ཆོག ཡིན་ནའང་མི་འདི་ལ་དོན་ཁྲེལ་མེད་འདི་འདྲ་མི་བྱེད་རོགས་ཞེས་སྨྲས་ཀྱང་།  
\v 25 མི་དེ་རྣམས་ཀྱིས་ཁོའི་གཏམ་ལ་མ་མཉན་པས། མི་དེས་ཁོའི་ཆུན་མ་བཟུང་སྟེ་ཕྱི་རུ་ཁྲིད་ནས་མི་དེ་རྣམས་ལ་སྤྲད་པ་དང་། དེ་རྣམས་ཁོ་མོར་འགྲོགས་ནས་མཚན་གང་པོར་བརྙས་བཅོས་བྱས་ཏེ། ནམ་ལངས་ལ་ཉེ་དུས་ད་གཟོད་ཁོ་མོ་བཏང་ངོ་། །  
\v 26 ཞོགས་པའི་དུས་སུ། བུད་མེད་དེ་ཕྱིར་རང་གི་བདག་པོ་སྡོད་དུ་འཇུག་མཁན་མི་དེའི་ཁང་པའི་སྒོ་ཁར་ཡོང་སྟེ་སར་འགྱེལ་ཞིང་། ནམ་ལངས་པའི་བར་དུ་དེར་ལུས་སོ། །  
\v 27 ཞོགས་པར་ཁོ་མོའི་བདག་པོ་ལངས་ནས་སྒོ་ཕྱེས་ཏེ་ཕྱི་རོལ་ཏུ་ཕྱིན་ནས་ལམ་ལ་ཆས་སྙམ་པ་ལ། ལྟོས་དང་། བསམ་ཡིད་ལས་འདས་པ་ཞིག་ལ་ཁོའི་ཆུན་མ་སྒོ་ཁར་འགྱེལ་ཞིང་ལག་ཟུང་མ་ཐེམ་སྟེང་བཞག་ཡོད་པའོ། །  
\v 28 ཁོས་བུད་མེད་ལ་འདི་ལྟར། ཡར་ལོངས་དང་བདག་ཅག་འགྲོ་བར་བྱ་ཞེས་སྨྲས་ནའང་། བུད་མེད་དེས་ལན་མ་བཏབ། དེར་མི་དེས་ཁོ་མོ་བོང་བུར་བཀལ་ནས་ལམ་ལ་ཆས་ཏེ་རང་ཡུལ་དུ་ལོག  
\v 29 ཡང་རང་ཁྱིམ་དུ་སླེབས་པ་དང་དེས་ཆུན་མའི་བེམ་པོ་གྲི་ཡིས་ལྷུ་བཅུ་གཉིས་སུ་བཅད་ཅིང་། མི་མངགས་ནས་ཡེས་ར་ཨེལ་གྱི་མཐའ་མཚམས་བཞི་པོར་འཁྱེར་དུ་བཅུག  
\v 30 དེ་མཐོང་བ་ཀུན་ན་རེ། ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཐོན་པ་ནས་ད་ལྟའི་བར་དུ་དོན་འདི་འདྲ་བྱུང་མ་མྱོང་ལ་མཐོང་ཡང་མ་མྱོང་ངོ་། །ད་ལྟ་བསམ་བློ་གཏོང་རན་འདུག ཚང་མས་ཅི་ལྟར་ཐག་གིས་གཅོད་པར་གྲོས་བྱེད་འོས་ཞེས་སྨྲས་སོ། །   
\c 20
\cl ལེའུ་ཉི་ཤུ་པ། 
\toc1 ༄༅། །ཁྲིམས་དཔོན་གྱི་མདོ། 
\toc2 ཁྲིམས་དཔོན། 
\s1 ཡེས་ར་ཨེལ་པ་རྣམས་ཀྱིས་པེན་ཡཱ་མེན་པ་རྣམས་ལ་འཐབ་འཛིང་བྱས་པ།  
\p
\v 1 དེ་ནས་ཡེས་ར་ཨེལ་པ་རྣམས་དཱན་ནས་པེར་ཤ་བཱ་བར་དང་། གིལ་ཨད་ཡུལ་ནས་ཕྱི་རུ་ཐོན་ཏེ་མི་གཅིག་ནང་བཞིན་མཱས་ཟི་ཕཱ་ཞེས་པར་དཀོན་མཆོག་ཡ་ཝཱེའི་དྲུང་དུ་འཛོམས་པ་རེད།  
\v 2 ཡེས་ར་ཨེལ་པའི་འགོ་དཔོན་ཏེ་ཚོ་པ་ཁག་གི་དམག་དཔོན་ཚང་མ་དཀོན་མཆོག་གི་འབངས་མི་རྣམས་འཚོགས་པའི་ཁྲོད་དུ་འགྲེང་ནས་བསྡད་ཅིང་། གྲི་ཐོགས་པའི་རྐང་དམག་ཁྱོན་བསྡོམས་འབུམ་བཞི་ཡོད་པའོ། །  
\v 3 ཡེས་ར་ཨེལ་པ་རྣམས་ཡར་མཱས་ཟི་ཕཱ་རུ་སླེབས་པ་ནི་པེན་ཡཱ་མེན་པ་ཀུན་གྱིས་ཐོས་སོ། །དེ་ནས་ཡེས་ར་ཨེལ་པ་རྣམས་ན་རེ། ཁྱོད་ཀྱིས་དོན་ངན་དེའི་འབྱུང་རྩ་ངེད་ཅག་ལ་གསལ་པོར་ཤོད་ཅིག་ཅེས་སྨྲས་པ་དང་།  
\v 4 ལེ་ཝི་པ་སྟེ། གཞན་གྱིས་བསད་པའི་བུད་མེད་དེའི་སྐྱེས་པ་ན་རེ། བདག་དང་བདག་གི་ཆུན་མ་གཉིས་པེན་ཡཱ་མེན་གྱི་གིབ་ཨ་རུ་སླེབས་ནས་དེར་ཞག་སྡོད་བྱས་པ་དང་།  
\v 5 གིབ་ཨ་པའི་འགོ་དཔོན་རྣམས་མཚན་མོར་ལངས་ནས་ངའི་ཁང་པ་བསྐོར་ཞིང་ང་རང་གསོད་འདོད་པ་དང་། ངའི་ཆུན་མའང་བརྙས་བཅོས་བྱས་ནས་བསད།  
\v 6 དེ་ནས་བདག་གིས་རང་གི་ཆུན་མའི་བེམ་པོ་ལྷུ་ལྷུ་རུ་བཅད་ཅིང་། མི་མངགས་ཏེ་ཡེས་ར་ཨེལ་གྱི་ས་སྐལ་ཡིན་པའི་ཡུལ་ཐམས་ཅད་ལ་འཁྱེར་དུ་བཅུག་པ་ཡིན། ཅི་ལ་ཞེ་ན། གིབ་ཨ་པ་རྣམས་ཀྱིས་ཡེས་ར་ཨེལ་གྱི་ཁྲོད་དུ་ངོ་ཚ་བའི་དོན་ངན་འདི་འདྲ་བྱས་པས་སོ། །  
\v 7 ལྟོས་དང་། ད་ནི་ཁྱོད་ཡེས་ར་ཨེལ་པ་ཐམས་ཅད་ཀྱིས་འདིར་གྲོས་བྱས་ནས་འཆར་གཞི་འགོད་དགོས་སོ་ཞེས་སྨྲས་པ་ལ།  
\v 8 མི་ཐམས་ཅད་ཡར་ལངས་ནས་མགྲིན་གཅིག་གིས་འདི་ལྟར། ངེད་རྣམས་ལས་སུ་ཞིག་ཀྱང་རང་གི་གུར་རམ་ཁང་པར་མི་ལོག  
\v 9 ད་ལྟ་ངེད་ཅག་གིས་གིབ་ཨ་\f + \ft འདིར་གིབ་ཨ་ཞེས་པར་གེ་བཱ་ཞེས་ཀྱང་འབོད་པ་ཡིན།\f*པ་རྣམས་ལ་འདི་ལྟར་བྱེད་ངེས། རྒྱན་བླངས་པ་ལྟར་སོང་ནས་ཁོ་རྣམས་ལ་འཐབ་པར་བྱ།  
\v 10 ངེད་རྣམས་ཀྱིས་ཡེས་ར་ཨེལ་གྱི་ཚོ་པ་རེ་རེ་ནས་མི་བརྒྱ་ལས་བཅུ་དང་། མི་སྟོང་ལས་བརྒྱ། མི་ཁྲི་ལས་སྟོང་བཅས་བདམས་ནས་དམག་མིའི་ཆེད་དུ་རྒྱགས་བསྐྱལ་དགོས་ལ། དེ་ནས་དམག་མི་རྣམས་པེན་ཡཱ་མེན་གྱི་གེ་བཱ་རུ་སླེབས་དུས། གིབ་ཨ་པས་ཡེས་ར་ཨེལ་གྱི་ཁྲོད་དུ་བྱས་པའི་སྐྱུག་བྲོ་བའི་དོན་ཐམས་ཅད་ཀྱི་ཕྱིར་དུ་ལན་འཇལ་ཆོག་པ་ཡིན་ཞེས་སྨྲས་པའོ། །  
\v 11 དེ་ནས་ཡེས་ར་ཨེལ་གྱི་མི་རྣམས་ནི་མི་གཅིག་ནང་བཞིན་མཉམ་དུ་འབྲེལ་ཞིང་། གྲོང་ཁྱེར་དེ་ལ་དམག་དྲངས་སོ། །  
\v 12 ཡེས་ར་ཨེལ་གྱི་ཚོ་པ་ཁག་གིས་མི་མངགས་ཏེ་པེན་ཡཱ་མེན་ཚོ་པའི་ཁྱིམ་རེ་རེར་སོང་སྟེ་ན་རེ། ཁྱོད་རྣམས་ཀྱི་ཁྲོད་ནས་དོན་ངན་འདི་འདྲ་ཅི་ལྟར་བྱས་སམ།  
\v 13 ད་ལྟ་ཁྱོད་ཅག་གིས་གིབ་ཨ་ཡི་ཁྲམ་པ་དེ་དག་ཕྱིར་སྤྲོད་ཅིག ངེད་ཅག་གིས་དེ་རྣམས་བསད་དེ་ཡེས་ར་ཨེལ་གྱི་ཁྲོད་ནས་ངན་པ་ཚར་གཅོད་བྱེད་དགོས་ཞེས་སྨྲས་ཀྱང་། པེན་ཡཱ་མེན་པ་དག་གིས་ཁོ་རྣམས་ཀྱི་སྤུན་ཡེས་ར་ཨེལ་པ་རྣམས་ཀྱི་གཏམ་ལ་མ་མཉན་པ་རེད།  
\v 14 པེན་ཡཱ་མེན་པ་རྣམས་ནི་ཡེས་ར་ཨེལ་པ་རྣམས་ལ་འཐབ་འཛིང་བྱེད་པའི་ཕྱིར་དུ་གྲོང་ཁྱེར་སོ་སོ་ནས་ཕྱི་རོལ་ཏུ་ཐོན་ཞིང་གིབ་ཨ་རུ་འདུས་སོ། །  
\v 15 ཉིན་དེར་པེན་ཡཱ་མེན་པ་རྣམས་ཀྱིས་གྲོང་ཁྱེར་སོ་སོ་ནས་རལ་གྲི་ཐོགས་མཁན་གྱི་དམག་གྲངས་བླངས་པ་ལ་ཁྱོན་བསྡོམས་མི་ཉིས་ཁྲི་དྲུག་སྟོང་ཡོད་པ་དང་། གཞན་ད་དུང་གིབ་ཨ་པ་རྣམས་ལས་དམག་ཧྲག་བདུན་བརྒྱ་ཡོད་པའོ། །  
\v 16 དམག་མི་རྣམས་ཀྱི་ཁྲོད་དུ་བདམས་པའི་དམག་ཧྲག་བདུན་བརྒྱ་ཡོད་པ་ཚང་མ་གཡོན་ལག་ཡིན་པ་དང་། རེ་རེ་འུར་རྡོས་མི་ལ་གཡོ་གཟུར་སྤུ་ཙམ་ཡང་མེད་པར་རྒྱག་ཐུབ་པ་ཡིན་ནོ། །  
\v 17 པེན་ཡཱ་མེན་པ་ལས་གཞན་ཡེས་ར་ཨེལ་པའི་རལ་གྲི་ཐོགས་མཁན་གྱི་གྲངས་ཀ་བླངས་པ་ལ་ཁྱོན་བསྡོམས་མི་འབུམ་བཞི་ཡོད་པ་དང་ཐམས་ཅད་དམག་མི་ཡིན་ནོ། །   
\s1 ཡེས་ར་ཨེལ་པ་རྣམས་ཀྱིས་པེན་ཡཱ་མེན་པ་ཕམ་པར་བརྒྱབ་པ།  
\p
\v 18 དེ་ནས་ཡེས་ར་ཨེལ་པ་རྣམས་ལངས་ནས་པེད་ཨེལ་དུ་སོང་སྟེ་དཀོན་མཆོག་ལ་འདི་ལྟར། ངེད་རྣམས་ལས་སུ་ཞིག་སྔོན་ལ་སོང་སྟེ་པེན་ཡཱ་མེན་པ་རྣམས་དང་འཐབ་འོས་སམ་ཞེས་ཞུས་པ་ལ། དཀོན་མཆོག་ཡ་ཝཱེས་འདི་སྐད་དུ། ཡ་ཧུ་དཱ་སྔོན་ལ་འགྲོ་འོས་ཞེས་གསུངས་སོ། །  
\v 19 དེ་ནས་ཡེས་ར་ཨེལ་པ་རྣམས་ཞོགས་པ་ཡར་ལངས་ནས་གིབ་ཨའི་ཁ་ཐུག་ཏུ་སྒར་བཏབ།  
\v 20 ཡེས་ར་ཨེལ་པ་རྣམས་ནི་པེན་ཡཱ་མེན་པ་རྣམས་ལ་འཐབ་ཕྱིར་ཕྱི་རོལ་ཏུ་ཐོན་ཞིང་། ཡེས་ར་ཨེལ་པ་རྣམས་ཀྱིས་གིབ་ཨའི་ཕྱོགས་སུ་ཁོ་ཚོར་ཁ་གཏད་དེ་དམག་བཤམས་སོ། །  
\v 21 དེ་ནས་པེན་ཡཱ་མེན་པ་རྣམས་གིབ་ཨ་ནས་ཕྱི་རུ་ཐོན་ཞིང་། ཉིན་དེར་ཡེས་ར་ཨེལ་པ་ཉིས་ཁྲི་ཉིས་སྟོང་གནས་དེ་རུ་བསད་དོ། །  
\v 22 ཡེས་ར་ཨེལ་པའི་དམག་མི་རྣམས་ཀྱིས་ཕན་ཚུན་སྙིང་ཕུར་བརྡབས་ནས་སྔར་བཞིན་ཉིན་དང་པོར་དམག་ཤོམ་སར་དམག་བཤམས།  
\v 23 དམག་མི་རྣམས་ཤི་བའི་ཉིན་མོ་དེར། ཡེས་ར་ཨེལ་པ་རྣམས་ཡར་སོང་སྟེ་མཚན་མོའི་བར་དུ་དཀོན་མཆོག་ཡ་ཝཱེའི་དྲུང་ནས་ངུ་འབོད་བྱས་ཤིང་། དཀོན་མཆོག་ཡ་ཝཱེ་ལ་འདི་ལྟར། ངེད་རྣམས་ཡང་བསྐྱར་སོང་ནས་རང་གི་སྤུན་པེན་ཡཱ་མེན་དང་འཐབ་འཛིང་བྱེད་རུང་ངམ་ཞེས་ཞུས་པར། དཀོན་མཆོག་ཡ་ཝཱེས་འདི་སྐད་དུ། ཡར་སོང་ནས་ཁོ་རྣམས་དང་འཐབ་ཆོག་ཅེས་གསུངས།  
\v 24 དེའི་ཕྱི་ཉིན་ཡེས་ར་ཨེལ་པ་རྣམས་ཡར་སོང་སྟེ་པེན་ཡཱ་མེན་པ་རྣམས་ལ་གཏུགས།  
\v 25 པེན་ཡཱ་མེན་པ་རྣམས་ཀྱང་ཉིན་དེར་གིབ་ཨ་ནས་ཕྱི་རུ་ཐོན་ཞིང་། ཡེས་ར་ཨེལ་པ་རྣམས་ཀྱི་གདོང་བསུས་ནས་འཐབ་པ་དང་། ཡང་ཁོ་རྣམས་ལས་མི་ཆིག་ཁྲི་བརྒྱད་སྟོང་གནས་དེེ་རུ་བསད་ཅིང་ཚང་མ་རལ་གྲི་ཐོགས་མཁན་ཡིན་ནོ། །  
\v 26 དེ་ནས་ཡེས་ར་ཨེལ་པ་ཐམས་ཅད་ཡར་པེད་ཨེལ་དུ་སོང་ནས། དཀོན་མཆོག་ཡ་ཝཱེའི་དྲུང་དུ་བསྡད་ནས་ངུ་འབོད་བྱས་ཤིང་། ཉིན་དེར་དགོང་མོའི་བར་དུ་སྨྱུང་གནས་བསྲུངས། ཡང་དཀོན་མཆོག་ཡ་ཝཱེའི་དྲུང་དུ་སྦྱིན་སྲེག་དང་ཞི་བདེའི་མཆོད་པ་ཕུལ་ཏོ། །  
\v 27 ཡང་ཡེས་ར་ཨེལ་པ་རྣམས་ཡར་སོང་ནས་དཀོན་མཆོག་ཡ་ཝཱེ་ལ་ཞུས་པ་དང་། དེའི་དུས་སུ་དཀོན་མཆོག་གི་ཞལ་ཆད་ཀྱི་ཤུར་སྒམ་དེ་རུ་ཡོད་པ་དང་།  
\v 28 དུས་དེར་ཨ་རོན་གྱི་ཚ་བོ་དང་ཨེ་ལི་ཨ་ཟར་གྱི་བུ་ཕི་ནེ་ཧེ་ཞལ་ཆད་ཀྱི་ཤུར་སྒམ་མདུན་དུ་ཀྲོང་ངེར་ལངས་ཤིང་། ཁོ་ཚོས་དཀོན་མཆོག་ཡ་ཝཱེ་ལ་འདི་ལྟར། ངེད་རྣམས་ཡང་བསྐྱར་ཕྱི་རོལ་ཏུ་སོང་ནས་རང་གི་སྤུན་པེན་ཡཱ་མེན་དང་འཐབ་འཛིང་བྱེད་རུང་ངམ། ཡང་ན་མཚམས་འཇོག་འོས་ཞེས་ཞུས་པ་ལ། དཀོན་མཆོག་ཡ་ཝཱེས་འདི་སྐད་དུ། སང་ཉིན་ངས་དེ་དག་ཁྱོད་རྣམས་ཀྱི་ལག་ཏུ་སྤྲོད་རྒྱུ་ཡིན་པས་ཁྱོད་རྣམས་ཡར་འགྲོ་འོས་ཞེས་གསུངས།  
\v 29 དེ་ནས་ཡེས་ར་ཨེལ་པས་གིབ་ཨའི་ཕྱོགས་བཞི་རུ་འཇབ་དམག་བཏང་ངོ་། །  
\v 30 ཉིན་གསུམ་པར་ཡེས་ར་ཨེལ་པ་རྣམས་ཡང་བསྐྱར་ཡར་སོང་སྟེ་པེན་ཡཱ་མེན་པ་རྣམས་ལ་འཐབ་ཅིང་། སྔར་བཞིན་གིབ་ཨའི་ཕྱོགས་སུ་དམག་བཤམས།  
\v 31 པེན་ཡཱ་མེན་པ་རྣམས་ཀྱང་ཕྱི་རུ་ཡོང་སྟེ་དགྲ་བོའི་གདོང་བསུས་པས་གྲོང་ཁྱེར་དང་བྲལ་བའི་གཡོ་འོག་ཏུ་ཚུད། ཞིང་བར་གྱི་བགྲོད་ལམ་གཉིས་ཏེ་གཅིག་ནི་པེད་ཨེལ་ལ་སླེབས་ཤིང་ཅིག་ཤོས་ནི་གིབ་ཨ་རུ་སླེབས་ཡོད་པའི་སྟེང་དུ། ཁོ་ཚོས་སྔར་བཞིན་ཡེས་ར་ཨེལ་པ་སུམ་ཅུ་ཙམ་བསད་དོ། །  
\v 32 པེན་ཡཱ་མེན་པ་རྣམས་ཀྱིས་འདི་ལྟར། ཁོ་རྣམས་སྔར་བཞིན་བདག་ཅག་གི་མདུན་དུ་ཕམ་པ་རེད་ཅེས་སྨྲས། ཡིན་ནའང་ཡེས་ར་ཨེལ་པ་རྣམས་ན་རེ། བདག་ཅག་བྲོས་ཏེ་ཁོ་རྣམས་གྲོང་ཁྱེར་ནས་བགྲོད་ལམ་སྟེང་གཡོ་ཁྲིད་བྱས་ན་ཅི་འདྲ་ཞེས་སྨྲས་ཤིང་།  
\v 33 ཡེས་ར་ཨེལ་པ་ཐམས་ཅད་ལངས་ཏེ་པཱ་ཨལ་ཐལ་མཱར་དུ་དམག་བཤམས་ཤིང་། ཡེས་ར་ཨེལ་གྱི་འཇབ་དམག་རྣམས་གེ་བཱ་ཞིང་ཁའི་འཇབ་སྒུག་བྱེད་ས་ནས་ཡར་བརྒྱུགས།  
\v 34 ཡེས་ར་ཨེལ་པའི་ཁྲོད་ཀྱི་དམག་ཧྲག་ཆིག་ཁྲི་གིབ་ཨའི་ཁ་ཐུག་ཏུ་གདོང་བསུས་ནས་འོངས་པ་དང་། འཐབ་འཛིང་གཏུམ་དྲག་ཧ་ཅང་ཆེ་མོད། འོན་ཀྱང་པེན་ཡཱ་མེན་པ་རྣམས་ཀྱིས་ཆག་སྒོ་ཉེ་བར་སླེབས་པ་མ་ཚོར་རོ། །  
\v 35 དཀོན་མཆོག་ཡ་ཝཱེས་པེན་ཡཱ་མེན་པ་རྣམས་ནི་ཡེས་ར་ཨེལ་པའི་མདུན་དུ་ཕམ་པར་མཛད་ཅིང་། ཉིན་དེར་ཡེས་ར་ཨེལ་པས་པེན་ཡཱ་མེན་པ་ཉིས་ཁྲི་ལྔ་སྟོང་ཆིག་བརྒྱ་བསད་ཅིང་ཚང་མ་རལ་གྲི་ཐོགས་མཁན་ཡིན་ནོ། །   
\s1 ཡེས་ར་ཨེལ་པ་རྣམས་རྒྱལ་བ།  
\p
\v 36 དེ་ནས་པེན་ཡཱ་མེན་པ་རྣམས་ཀྱིས་རང་ཉིད་ཕམ་པ་ཤེས་སོ། །ད་ནི་ཡེས་ར་ཨེལ་པ་རྣམས་ཀྱིས་གིབ་ཨ་རུ་འཇབ་དམག་བཞག་པར་ཡིད་ཆེས་ཏེ་པེན་ཡཱ་མེན་པ་རྣམས་ཀྱི་མདུན་དུ་ཕམ་ཁུལ་བྱས་ཤིང་།  
\v 37 འཇབ་དམག་མྱུར་བ་མྱུར་དུ་གིབ་ཨ་རུ་བརྒྱུགས་ནས་ཁོ་ཚོ་མུ་མཐུད་དུ་མདུན་སྐྱོད་བྱས་ཏེ་གྲོང་ཁྱེར་ཧྲིལ་པོར་རལ་གྲིས་བརྒྱབ།  
\v 38 ཡེས་ར་ཨེལ་པ་དང་འཇབ་དམག་བར་ལ་སྔོན་ནས་ཁ་དན་བཞག་ཡོད་པ་སྟེ། གྲོང་ཁྱེར་ནང་མེ་སྦར་ཏེ་དུ་བ་ལང་ལོང་འཕྱུར་བ་རྟགས་བྱེད་པ་དེ་ཡིན།  
\v 39 ཡེས་ར་ཨེལ་པ་རྣམས་གཡུལ་ས་ནས་ཕྱིར་འཐེན་བྱེད་པའི་དུས་སུ། པེན་ཡཱ་མེན་པ་རྣམས་ཀྱིས་ལག་འགུལ་ནས་ཡེས་ར་ཨེལ་པ་སུམ་ཅུ་ཙམ་བསད་པས་ན་རེ། ཁོ་རྣམས་སྔར་བཞིན་བདག་ཅག་གིས་ཕམ་པར་བརྒྱབ་ཅེས་སྨྲས།  
\v 40 གྲོང་ཁྱེར་ལས་དུ་སྨུག་ཀ་བ་བཞིན་འཕྱུར་བའི་དུས་སུ། པེན་ཡཱ་མེན་པ་རྣམས་ཁ་ཕྱིར་འཁོར་ནས་བལྟས་ཤིང་། ལྟོས་དང་། གྲོང་ཁྱེར་ཡོངས་སུ་དུ་བ་མཁའ་དབྱིངས་སུ་འཕྱུར་ཏོ། །  
\v 41 ཡེས་ར་ཨེལ་པ་རྣམས་ཁ་ཕྱིར་འཁོར་ནས་འོངས་ཤིང་། པེན་ཡཱ་མེན་པ་རྣམས་ཀྱིས་ཆག་སྒོ་རང་སྟེང་དུ་སླེབས་པ་མཐོང་ནས་ཤིན་ཏུ་འཚབ་པ་རེད།  
\v 42 ཁོ་རྣམས་ཡེས་ར་ཨེལ་པའི་མདུན་ནས་ཁ་ཕྱིར་འཁོར་ཏེ་དབེན་སྟོང་དུ་བྲོས་ཤིང་། ཡེས་ར་ཨེལ་པ་རྣམས་ཀྱིས་ཁོ་རྣམས་འདེད་བཅོམ་བྱས་པ་དང་། གྲོང་ཁྱེར་སོ་སོ་ནས་ཐོན་པ་དག་གིས་ཀྱང་ཁོ་རྣམས་བར་དུ་བླངས་ནས་བསད།  
\v 43 ཡེས་ར་ཨེལ་པས་པེན་ཡཱ་མེན་པ་རྣམས་བསྐོར་ནས་དེད་ཅིང་། ཁོ་རྣམས་ངལ་གསོ་ས་སྟེ་ཤར་ཕྱོགས་སུ་གཏད་པའི་གིབ་ཨ་རུ་དེ་དག་རྡོག་པས་བརྫིས་སོ། །  
\v 44 པེན་ཡཱ་མེན་པ་རྣམས་ལས་མི་ཆིག་ཁྲི་བརྒྱད་སྟོང་ཤི་བ་དང་ཚང་མ་དཔའ་རྒོད་ཡིན་ནོ། །  
\v 45 དེའི་འཕྲོས་མི་རྣམས་ཁ་ཕྱིར་འཁོར་ནས་དབེན་སྟོང་ཕྱོགས་སུ་རིམ་མོན་གྱི་བྲག་ཏུ་བྲོས་པ་ལ། ཡེས་ར་ཨེལ་པས་ལམ་དུ་ཁོ་རྣམས་ལས་མི་ལྔ་སྟོང་བསད་པ་དང་། སྙེ་མ་འཐུ་བ་བཞིན་ཀི་དོན་བར་དུ་དེད་ནས་ཡང་ཁོ་རྣམས་ལས་མི་ཉིས་སྟོང་བསད།  
\v 46 ཉིན་དེར་པེན་ཡཱ་མེན་པ་རྣམས་ལས་ཁྱོན་བསྡོམས་མི་ཉིས་ཁྲི་ལྔ་སྟོང་བསད་ཅིང་རལ་གྲི་ཐོགས་པའི་དཔའ་རྒོད་རྐྱང་རྐྱང་ཡིན་ནོ། །  
\v 47 ཡིན་ནའང་མི་དྲུག་བརྒྱ་ཏག་ཏག་ལུས་པ་ཁ་ཕྱིར་འཁོར་ནས་དབེན་སྟོང་ཕྱོགས་སུ་བྲོས་ཤིང་རིམ་མོན་གྱི་བྲག་ཏུ་སླེབས་པ་དང་། དེར་ཟླ་བཞིའི་རིང་ལ་བསྡད་དོ། །  
\v 48 ཡེས་ར་ཨེལ་པ་རྣམས་ཡང་ཕྱིར་པེན་ཡཱ་མེན་གྱི་ཡུལ་དུ་སོང་སྟེ། གྲོང་ཁྱེར་སོ་སོའི་མི་དང་ཕྱུགས་ཟོག དེ་མིན་གང་ལ་ཕྲད་པ་ཐམས་ཅད་ལ་རལ་གྲིས་བརྒྱབ་ཅིང་། ཡང་གྲོང་ཁྱེར་མཐའ་དག་མེས་བསྲེགས་སོ། །   
\c 21
\cl ལེའུ་ཉེར་གཅིག་པ། 
\toc1 ༄༅། །ཁྲིམས་དཔོན་གྱི་མདོ། 
\toc2 ཁྲིམས་དཔོན། 
\s1 པེན་ཡཱ་མེན་པ་རྣམས་ཀྱི་ཕྱིར་ཆུང་མ་བཀོད་སྒྲིག་བྱས་པ།  
\p
\v 1 སྔར་ཡེས་ར་ཨེལ་པ་རྣམས་ཀྱིས་མཱས་ཟི་ཕཱ་རུ་འདི་ལྟར། ངེད་རྣམས་ལས་སུ་ཞིག་གིས་ཀྱང་རང་གི་བུ་མོ་པེན་ཡཱ་མེན་པ་རྣམས་ལ་མནའ་མར་མི་སྟེར་ཞེས་མནའ་བསྐྱལ་བ་རེད།  
\v 2 ཡེས་ར་ཨེལ་པ་རྣམས་པེད་ཨེལ་དུ་འོངས་ཏེ། དགོང་མོའི་བར་དུ་དཀོན་མཆོག་གི་དྲུང་དུ་བསྡད་ཅིང་སྐད་ཆེན་པོས་ངུ་འབོད་བྱས་ཏེ་ན་རེ།  
\v 3 ཀྱེ་ཡེས་ར་ཨེལ་གྱི་དཀོན་མཆོག་ཡ་ཝཱེ་ལགས། ཡེས་ར་ཨེལ་གྱི་ཁྲོད་དུ་ཚོ་པ་གཅིག་ཆད་པའི་དོན་འདི་ཅིའི་ཕྱིར་བྱུང་ངམ་ཞེས་ཞུས་སོ། །  
\v 4 དེའི་ཕྱི་ཉིན་འབངས་རྣམས་ནངས་སྔ་མོ་ཡར་ལངས་ནས་དེར་མཆོད་ཁྲི་ཞིག་བརྩིགས་ཤིང་སྦྱིན་སྲེག་དང་ཞི་བདེའི་མཆོད་པ་ཕུལ་ཏོ། །  
\v 5 ཡེས་ར་ཨེལ་པ་རྣམས་ཕན་ཚུན་ན་རེ། ཡེས་ར་ཨེལ་གྱི་ཚོ་པ་རྣམས་ལས་གང་ཞིག་མི་ཚོགས་དང་བཅས་དཀོན་མཆོག་ཡ་ཝཱེའི་དྲུང་དུ་ཡར་མ་ཡོང་བ་ཡིན་ནམ་ཞེས་སྨྲས། སྔར་ཡེས་ར་ཨེལ་པ་རྣམས་ཀྱིས་མནའ་ཆེན་པོ་ཞིག་བསྐྱལ་བ་སྟེ། ཡར་མཱས་ཟི་ཕཱ་རུ་དཀོན་མཆོག་ཡ་ཝཱེའི་དྲུང་དུ་མི་ཡོང་བ་ཐམས་ཅད་ངེས་པར་གསོད་དགོས་ཞེས་སྨྲས་མྱོང་ངོ་། །  
\v 6 ཡེས་ར་ཨེལ་པ་རྣམས་ཀྱིས་རང་གི་སྤུན་པེན་ཡཱ་མེན་ལ་སྙིང་རྗེ་ནས་ན་རེ། ད་ལྟ་ཡེས་ར་ཨེལ་གྱི་ཁྲོད་དུ་ཚོ་པ་གཅིག་ཆད་པ་ཡིན།  
\v 7 བདག་ཅག་གིས་དཀོན་མཆོག་ཡ་ཝཱེའི་དྲུང་དུ་མནའ་བསྐྱལ་ནས། རང་ཅག་གི་བུ་མོ་རྣམས་ནི་ཅི་ནས་ཀྱང་པེན་ཡཱ་མེན་པ་རྣམས་ལ་མནའ་མར་མི་བརྫང་ཞེས་སྨྲས་པ་ཡིན་པས། ད་ལྟ་བདག་ཅག་གིས་ཅི་བྱས་ནས་ཁོ་རྣམས་ལས་ཤུལ་དུ་ལུས་པ་རྣམས་ལ་ཆུང་མ་ཡོད་པར་བྱའམ་ཞེས་སྨྲས།  
\v 8 ཡང་ཕན་ཚུན་ན་རེ། ཡེས་ར་ཨེལ་གྱི་ཚོ་པ་རྣམས་ལས་སུ་ཞིག་མཱས་ཟི་ཕཱ་རུ་ཡར་དཀོན་མཆོག་ཡ་ཝཱེའི་དྲུང་དུ་མ་འོངས་པ་ཡིན་ནམ་ཞེས་དྲིས་ཤིང་། ལྟོས་དང་། གིལ་ཨད་ཀྱི་ཡཱ་བེ་སི་ནས་མི་གཅིག་ཀྱང་མི་ཚོགས་ཀྱི་ཁྲོད་དུ་མ་འོངས་པ་རྩད་ཆོད་པ་རེད།  
\v 9 ཅི་ལ་ཞེ་ན། འབངས་རྣམས་ཀྱི་གྲངས་ཀ་ལེན་པའི་དུས་སུ། གིལ་ཨད་ཀྱི་ཡཱ་བེ་སིའི་མི་རྣམས་ལས་གཅིག་ཀྱང་དེར་མ་རྙེད་དོ། །  
\v 10 དེ་ནས་མི་ཚོགས་ཀྱིས་མི་དཔའ་རྩལ་ཅན་ཆིག་ཁྲི་ཉིས་སྟོང་མངགས་ཏེ་ན་རེ། ཁྱོད་རྣམས་སོང་ལ་གིལ་ཨད་ཀྱི་ཡཱ་བེ་སིའི་མི་རྣམས་བུད་མེད་དང་བྱིས་པ་བཅས་ཐམས་ཅད་རལ་གྲིས་སོད་ཅིག  
\v 11 ཁྱོད་ཅག་གིས་འདི་ལྟར་བྱེད་དགོས་ཏེ། སྐྱེས་པ་དང་ཡང་སྐྱེས་པར་འགྲོགས་མྱོང་བའི་བུད་མེད་ཐམས་ཅད་ཚར་གཅོད་བྱེད་དགོས་ཞེས་སྨྲས་སོ། །  
\v 12 དེ་ནས་ཁོ་རྣམས་ཀྱིས་གིལ་ཨད་ཀྱི་ཡཱ་བེ་སིའི་མི་རྣམས་ལས་མནའ་མར་ཕྱིན་མེད་པའི་ན་ཆུང་བུ་མོ་བཞི་བརྒྱ་རྙེད་ཅིང་། དེ་དག་ཀ་ན་ཨན་ཡུལ་གྱི་ཞི་ལོའི་དམག་སྒར་དུ་ཁྲིད་དོ། །  
\v 13 མི་ཚོགས་ཡོངས་ཀྱིས་རིམ་མོན་བྲག་གི་པེན་ཡཱ་མེན་པ་རྣམས་ཀྱི་རྩར་མི་མངགས་ཏེ། དེ་རྣམས་ལ་འགྲིག་མཐུན་ཡོང་བའི་གཏམ་སྨྲས་པ་དང་།  
\v 14 དེའི་དུས་སུ་པེན་ཡཱ་མེན་པ་རྣམས་ཕྱིར་ལོག་ཅིང་། ཡེས་ར་ཨེལ་པས་ཡཱ་བེ་སི་གིལ་ཨད་ཀྱི་བུད་མེད་གསོན་པོར་ལུས་པ་རྣམས་དེ་དག་ལ་ཆུང་མར་བྱིན་ནའང་ད་དུང་མ་འདང་ངོ་། །  
\v 15 དཀོན་མཆོག་ཡ་ཝཱེས་ཡེས་ར་ཨེལ་གྱི་ནང་དུ་ཚོ་པ་ཞིག་ཆད་པར་མཛད་པས། འབངས་རྣམས་ཀྱིས་པེན་ཡཱ་མེན་པ་རྣམས་ལ་སྙིང་རྗེ་བ་རེད།  
\v 16 མི་ཚོགས་ཁྲོད་ཀྱི་རྒན་པོ་རྣམས་ན་རེ། པེན་ཡཱ་མེན་པའི་ཁྲོད་ནས་བུད་མེད་རྣམས་མེད་པར་བྱས་པས། ངེད་ཅག་གིས་ཅི་ལྟར་བྱས་ནས་ཤུལ་དུ་ལུས་པ་དེ་རྣམས་ལ་ཆུང་མ་ཡོད་པར་བྱའམ་ཞེས་སྨྲས་པ་དང་།  
\v 17 ཡང་འདི་ལྟར་སྨྲས་པ་སྟེ། ཡེས་ར་ཨེལ་གྱི་ཁྲོད་ནས་ཚོ་པ་ཞིག་མེད་པར་མི་འགྲོ་བའི་ཕྱིར། པེན་ཡཱ་མེན་པ་བྲོས་ནས་ཐར་བ་རྣམས་ལ་ས་སྐལ་ཡོད་ན་འོས།  
\v 18 ཡིན་ནའང་ཡེས་ར་ཨེལ་པ་རྣམས་ཀྱིས་སྔར་མནའ་བསྐྱལ་ནས། རང་གི་བུ་མོ་པེན་ཡཱ་མེན་པ་རྣམས་ལ་ཆུང་མར་སྟེར་མཁན་ཡོད་ན་དེ་ལ་དམོད་མོ་ཐེབས་ངེས་ཡིན་ཞེས་སྨྲས་པས། བདག་ཅག་གིས་རང་གི་བུ་མོ་དེ་རྣམས་ལ་ཆུང་མར་སྟེར་མི་རུང་ཞེས་པར།  
\v 19 ཡང་ཁོ་རྣམས་ན་རེ། ལེ་བོ་ནཱའི་ལྷོ་ཕྱོགས་དང་། པེད་ཨེལ་གྱི་བྱང་ཕྱོགས། སི་ཀེམ་ལམ་ཆེན་ཤར་ཕྱོགས་ཀྱི་ཞི་ལོ་རུ་ལོ་རེ་བཞིན་དཀོན་མཆོག་ཡ་ཝཱེའི་དུས་ཆེན་ཡོད་ཅེས་སྨྲས་ཤིང་།  
\v 20 ཁོ་ཚོས་པེན་ཡཱ་མེན་པ་རྣམས་ལ་འདི་ལྟར། ཁྱོད་རྣམས་སོང་ལ་རྒུན་འབྲུམ་ར་བར་འཇབ་སྒུག་གྱིས་ཤིག  
\v 21 ལྟོས་དང་། གལ་ཏེ་ཞི་ལོའི་བུད་མེད་རྣམས་ཕྱི་རུ་ཐོན་ནས་ཞབས་བྲོ་འཁྲབ་པ་མཐོང་ན། རྒུན་འབྲུམ་ར་བ་ནས་ཕྱི་རུ་ཡོང་སྟེ་ཞི་ལོའི་བུད་མེད་རྣམས་ལས་རེ་རེས་ཆུང་མ་རེ་ཕྲོགས་ལ་པེན་ཡཱ་མེན་ཡུལ་དུ་ལོག་ཅིག  
\v 22 གལ་ཏེ་ཁོ་མོ་རྣམས་ཀྱི་ཕ་དང་ཡང་ན་སྤུན་རྣམས་ཡོང་ནས་ངེད་རྣམས་དང་ཚིག་རྩོད་བྱས་ན། ངེད་ཅག་གིས། ཁྱེད་རྣམ་པས་ངེད་ཅག་གི་ཆེད་དུ་འདི་རྣམས་ལ་ཐུགས་རྗེས་གཟིགས་རོགས། ཅི་ལ་ཞེ་ན། ངེད་ཅག་གིས་འཐབ་འཛིང་གི་དུས་སུ་ཁོ་རྣམས་ལ་ཆུང་མ་མ་རེག འདི་ནི་བུད་མེད་རྣམས་ཁྱེད་རྣམ་པས་དེ་དག་ལ་བྱིན་པ་མ་ཡིན་པས་ཁྱེད་རྣམ་པ་ཉེས་མེད་ཡིན་ཞེས་སྨྲ་བར་བྱ་ཞེས་བསྐུལ་ཏོ། །  
\v 23 དེ་ནས་པེན་ཡཱ་མེན་པ་རྣམས་ཀྱིས་དེ་བཞིན་དུ་བྱས་ཤིང་། ཁོ་རྣམས་ཀྱི་གྲངས་ཀ་བཞིན་ཞབས་བྲོ་འཁྲབ་པའི་བུད་མེད་རྣམས་ལས་ཕྲོགས་ཡོང་སྟེ་ཆུང་མར་བླངས་པ་དང་། རང་གི་ས་སྐལ་དུ་ལོག་སྟེ་ཡང་བསྐྱར་གྲོང་ཁྱེར་རྣམས་བསྐྱར་གསོ་བྱས་ནས་བསྡད།  
\v 24 དེའི་དུས་སུ་ཡེས་ར་ཨེལ་པ་རྣམས་ཡུལ་དེར་བྲལ་ནས་ཕྱིར་རང་རང་གི་ཚོ་པ་དང་། རང་རང་གི་རིགས་རྒྱུད། རང་རང་གི་ས་སྐལ་དུ་ལོག  
\v 25 སྐབས་དེར་ཡེས་ར་ཨེལ་གྱི་ཁྲོད་དུ་རྒྱལ་པོ་མེད་ལ། མི་རེ་རེས་གང་འདོད་བཞིན་བྱས་སོ།། །།