\id GAL - NTB བོད་འགྱུར་གསར་མ། 
\h ག་ལད་ཡཱ་པ། 
\toc1 ༄༅། །ག་ལད་ཡཱ་པ་རྣམས་ལ་སྤྲིངས་པའི་འཕྲིན་ཡིག 
\toc2 ག་ལད་ཡཱ་པ། 
\mt1 ༄༅། །ག་ལད་ཡཱ་པ་རྣམས་ལ་སྤྲིངས་པའི་འཕྲིན་ཡིག  
\imt1 ག་ལད་ཡཱ་པ་རྣམས་ལ་སྤྲིངས་པའི་འཕྲིན་ཡིག་གི་ངོ་སྤྲོད་མདོར་བསྡུས།  
\is1 ཁ་བྱང་དང་ལོ་རྒྱུས་རྒྱབ་ལྗོངས།  
\ipi སྐབས་དེར་ཡ་ཧུ་དཱ་མི་རིགས་ལས་མི་མང་པོ་ཞིག་གིས་ཡེ་ཤུའི་ཆོས་ལུགས་ལ་དད་པ་བྱས་པ་དང་། དེ་རྣམས་ལས་མི་འགའ་ཞིག་གིས་ཞལ་ཆད་རྙིང་པའི་ཁྲིམས་སྲོལ་སྣ་ཚོགས་བསྲུང་དགོས་པའི་ལྟ་ཚུལ་བཏོན་ཏེ། ཞལ་ཆད་གསར་པའི་སྐབས་ཀྱི་ཆོས་ཚོགས་ཀྱིས་དེ་ལ་བསྟུན་དགོས་པར་བརྗོད་པ་རེད། ཕོལ་ལོལ་གྱིས་ག་ལད་ཡཱ་ཡུལ་དུ་འཕྲིན་བཟང་སྤེལ་བའི་རྗེས་སུ། ལྟ་ཚུལ་དེ་འདོན་མཁན་དག་གིས་ཡེ་ཤུའི་ཆོས་ལུགས་ལ་དད་པའི་ཕྱི་ཕྱོགས་པ་རྣམས་ཀྱིས་ཞལ་ཆད་རྙིང་པའི་ཁྲིམས་སྲོལ་ལ་ལ་བསྲུང་དགོས་པ་དང་། ལྷག་པར་དུ་མཚན་སྐྱི་གཅོད་པའི་ཁྲིམས་སྲོལ་བསྲུང་དགོས་པ་ནན་གྱིས་བརྗོད། ཡང་དེ་དག་གིས་ཕོལ་ལོལ་ནི་སྐུ་ཚབ་པ་ངོ་མ་ཞིག་མིན་པ་དང་། ཁོང་གིས་ཕྱི་ཕྱོགས་པ་རྣམས་འཕྲིན་བཟང་ལ་དགའ་བའི་ཆེད་དུ་འཕྲིན་བཟང་ལས་བསྲུང་དགོས་པའི་ཁྲིམས་སྲོལ་འགའ་མེད་པར་བཟོས་པ་རེད་ཅེས་རྫུན་བཤད་པ་རེད། དེ་བས་ཕོལ་ལོལ་གྱིས་འཕྲིན་ཡིག་འདི་བརྒྱུད་ནས་དེ་དག་ལ་དགག་ལན་བརྒྱབ།  
\is1 ཡི་གེར་འགོད་མཁན་དང་འགོད་དུས།  
\ipi གཞུང་འདིའི་ཚིག་རྐང་དང་པོ་ལས་འཕྲིན་ཡིག་འདི་ཡི་གེར་འགོད་མཁན་ཕོལ་ལོལ་ཡིན་པར་ངོས་འཛིན་བྱས་ཡོད། སྤྱིར་འཕྲིན་ཡིག་འདི་ཡེ་གེར་བཀོད་པའི་ལོ་ཚིགས་ཀྱི་ཐད་ལ་བཞེད་ཚུལ་མི་མཐུན་པ་འགའ་ཞིག་ཡོད་ནའང་། ཡོངས་གྲགས་སུ་སྤྱི་ལོ་50ལོའི་ཡས་མས་སུ་ཡི་གེར་བཀོད་པ་ཡིན་པར་དགོངས།  
\is1 བརྗོད་སྙིང་དང་གསུང་འཕྲིན།  
\ipi ཞལ་ཆད་གསར་པའི་བདེན་པའི་ལྟ་བ་སྟེ། སྐྱབས་མགོན་ཡེ་ཤུར་དད་པ་ཁོ་ན་བརྒྱུད་ནས་དཀོན་མཆོག་གིས་བདག་ཅག་མི་རྣམ་དག་ཏུ་བརྩིས་པ་ཞེས་པ་དེ་ག་ལད་ཡཱ་པའི་འཕྲིན་ཡིག་གི་བཀའ་གསུང་གིས་ངག་གི་མཐུ་ནུས་ལ་བརྟེན་ནས་ནན་གྱིས་སྲུང་སྐྱོབ་མཛད་པར་མ་ཟད། དམ་པའི་ཐུགས་ཉིད་དང་སྐྱབས་མགོན་ཡེ་ཤུའི་ཐུགས་རྗེ་བརྒྱུད་ནས་དཀོན་མཆོག་གིས་ཀྱང་བདག་ཅག་མི་དམ་པར་བཟོས་པ་བཅས་བརྗོད་ཡོད། ཡང་མི་འགའ་ཞིག་གིས་འཕྲིན་ཡིག་འདི་ལ་ཡེ་ཤུའི་ཆོས་ལུགས་པའི་རང་དབང་ལྡན་པའི་འཕྲིན་ཡིག་ཅེས་ཀྱང་བརྗོད་དོ།།  
\is1 འཆར་ཟིན།  
\ipi 1. ངོ་སྤྲོད་བྱེད་པ་སྟེ། ཁམས་འདྲི་དང་སྐྱོན་བརྗོད་པ། ༼1:1-9༽  
\ipi 2. ཕོལ་ལོལ་ཇི་ལྟར་སྐུ་ཚབ་པར་གྱུར་པའི་སྐོར། ༼1:10-2:21༽  
\ipi 3. ཁྲིམས་སྲོལ་གྱི་རང་དབང་དང་ཆོས་ཀྱི་དད་པའི་གཞུང་ལུགས་འཆད་པའི་རྒྱུ་མཚན། ༼3:1-4:31༽  
\ipi 4. མི་ཚེའི་རང་དབང་དང་ཆོས་ཀྱི་དད་པའི་སྦྱོང་བརྡར་སྐོར། ༼5:1-6:10༽  
\ipi 5. མཇུག་སྡོམ། ༼6:11-18༽  
\c 1
\cl ལེའུ་དང༌པོ། 
\toc1 ༄༅། །ག་ལད་ཡཱ་པ་རྣམས་ལ་སྤྲིངས་པའི་འཕྲིན་ཡིག 
\toc2 ག་ལད་ཡཱ་པ། 
\s1 འཕྲིན་ཡིག་བསྐུར༌ཡུལ།  
\p
\v 1 དེ་ཡང་སྐུ་ཚབ་པ་ཕོལ་ལོལ་ང་རང་ནི་མི་དང་མིའི་རྐྱེན་ལ་བརྟེན་ནས་སྐུ་ཚབ་པར་གྱུར་པ་ཞིག་མིན༌པར། ཡེ་ཤུ་མཱ་ཤི་ཀ་དང་ཁོང་ཉིད་གྲོངས་པ་ནས་སླར་གསོན་པར་མཛད་པའི་ཡབ་དཀོན་མཆོག་གིས་སྐུ་ཚབ་པར་བསྐོས་པ་ཞིག་ཡིན།  
\v 2 བདག་དང་མཉམ་དུ་ཡོད་པའི་སྤུན་ཟླ་རྣམས་ཀྱིས་ག་ལད་ཡཱ་ཡུལ་གྱི་ཆོས་ཚོགས་སོ་སོར་སྤྲིངས་པའི་འཕྲིན་ཡིག་འདི་ལྟ༌སྟེ།  
\v 3 བདག་ཅག་གི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཁྱོད་རྣམས་ལ་ཐུགས་རྗེ་དང་ཞི་བདེ་འཐོབ་པར༌སྨོན།  
\v 4 སྐྱབས་མགོན་མཱ་ཤི་ཀས་བདག་ཅག་གི་ཡབ་དཀོན་མཆོག་གི་ཐུགས་དགོངས༌བཞིན། བདག་ཅག་གི་སྡིག་པའི་ཕྱིར་རང་སྲོག་བློས་བཏང༌སྟེ། བདག་ཅག་བསྐལ་པ་ངན་པ་འདི་ལས་སྐྱོབ་པར་མཛད༌པས།  
\v 5 དཀོན་མཆོག་ལ་ཇི་སྲིད་བར་དུ་བསྟོད་བསྔགས་བརྗོད་པར༌བྱའོ།། ཨ༌མེན།   
\s1 དཀོན་མཆོག་གི་འཕྲིན་བཟང་འདི་མ་གཏོགས་མེད་པར་བརྗོད༌པ།  
\p
\v 6 སྐྱབས་མགོན་མཱ་ཤི་ཀའི་ཐུགས་རྗེ་བརྒྱུད་ནས་དཀོན་མཆོག་གིས་ཁྱོད་རྣམས་ལ་ཞལ་འབོད་གནང༌ཡང༌། ཁྱོད་རྣམས་ཀྱིས་འདི་ལྟར་མགྱོགས་མྱུར་ངང་ཁོང་ཉིད་རིང་དུ་དོར་ཏེ་འཕྲིན་བཟང་གཞན་ལ་བློ་ཕྱོགས་པར་ང་རང་ཧ་ལས༌བྱུང་།  
\v 7 དོན་དམ་དུ་དེ་ནི་འཕྲིན་བཟང་མ་ཡིན༌ཏེ། མི་ལ་ལས་ཁྱོད་རྣམས་ལ་གནོད་འཚེ་བཏང་ནས་སྐྱབས་མགོན་མཱ་ཤི་ཀའི་འཕྲིན་བཟང་ལ་བཟོ་བཅོས་བྱ་འདོད༌པ་ཡིན་ནོ།།  
\v 8 འོན༌ཀྱང༌། ངེད་ཅག་གམ་ནམ་མཁའི་ཞིང་ཁམས་ནས་ཕེབས་པའི་ཕོ་ཉ་གང་ཞིག་ཡིན༌ཡང༌། སྔོན་ཆད་ངེད་ཅག་གིས་བསྒྲགས་པའི་འཕྲིན་བཟང་དང་མི་འདྲ་བའི་འཕྲིན་བཟང་གཞན་ཞིག་ཁྱོད་རྣམས་ལ་སྒྲོག་པ་ཡིན༌ན། དེ་ལ་དམོད་མོ་ཐེབས་པར་གྱུར༌ཅིག  
\v 9 ངེད་ཅག་གིས་དེ་སྔར་སྨྲས་པ་བཞིན་ད་ལྟ་ཡང་སྨྲ་བར་བྱ༌སྟེ། སུ་ཞིག་གིས་ཁྱོད་རྣམས་ལ་འཕྲིན་བཟང་བསྒྲགས༌ཀྱང༌། དེ་ནི་ཁྱོད་ཅག་ལ་ཐོབ་པའི་འཕྲིན་བཟང་དང་མི་མཐུན༌ན། མི་དེ་ལའང་དམོད་མོ་ཐེབས་པར་གྱུར༌ཅིག  
\v 10 ད་ལྟ་བདག་གིས་མི་རྣམས་ཀྱི་སེམས་དགའ་བར་བྱེད༌དམ། ཡང་ན་དཀོན་མཆོག་གི་ཐུགས་དགྱེས་པར་བྱ། བདག་གིས་ད་དུང་མི་རྣམས་དགའ་བར་བྱེད་འདོད་པ་ཡིན༌ནམ། གལ་ཏེ་བདག་གིས་ད་དུང་མི་རྣམས་དགའ་བར་བྱེད་འདོད་པ་ཡིན་ན། ང་རང་ནི་སྐྱབས་མགོན་མཱ་ཤི་ཀའི་ཞབས་ཕྱི་པ་མ་ཡིན༌ནོ།།   
\s1 ཕོལ་ལོལ་ཇི་ལྟར་སྐུ་ཚབ་པར་གྱུར་པའི༌སྐོར།  
\p
\v 11 སྤུན་ཟླ༌རྣམས། ངས་ཁྱོད་རྣམས་ལ་ཤེས་སུ་འཇུག་པར་འདོད་དེ། བདག་གིས་སྔར་ཁྱོད་རྣམས་ལ་བསྒྲགས་པའི་འཕྲིན་བཟང་དེ་ནི་མིའི་བློ་ལས་བྱུང་བ་མ་ཡིན་ནོ།།  
\v 12 ཅིའི་ཕྱིར་ཞེ་ན། འཕྲིན་བཟང་དེ་ནི་མི་ལས་ཐོབ་པ་མིན༌ལ། མིས་བདག་ལ་ཁྲིད་སྟོན་བྱས་པའང་མ་ཡིན༌པར། བདག་ལ་ཡེ་ཤུ་མཱ་ཤི་ཀ་མངོན་པའི་སྒོ་ནས་ཐོབ་པའི་ཕྱིར༌ཡིན།  
\v 13 བདག་གིས་སྔོན་ཆད་ཡ་ཧུ་དཱའི་མི་རིགས་ཀྱི་ཆོས་ལུགས་ལ་དད་པ་བྱེད༌དུས། སྤྱོད་ལམ་ཅི་འདྲ་ཡིན་པ་དང་ཐབས་གང་ཡོད་ཀྱིས་དཀོན་མཆོག་གི་ཆོས་ཚོགས་ལ་ཇི་ལྟར་གཉའ་གནོན་ཚད་མེད་བྱས་པ༌དང༌། དེ་འཇོམས་པར་འབད་མྱོང་བ་ནི་ཁྱོད་ཅག་གིས་ཀྱང་ཐོས་པ་ཡིན།  
\v 14 བདག་ནི་ཡ་ཧུ་དཱ་པའི་ཆོས་ལུགས་ཀྱི་ཁྲོད༌དུ། རང་རིགས་ཀྱི་ན་ཟླ་མང་པོ་ལས་ཡ་ཧུ་དཱ་པའི་ཆོས་གཞུང་གི་ཡོན་ཚད་མཐོ༌ཞིང༌། རང་གི་ཕ་མེས་ཡང་མེས་ཀྱི་ལུགས་སྲོལ་ལའང་ལྷག་ཏུ་བརྩོན་པ་བྱས་མྱོང༌ངོ་།།  
\v 15 འོན༌ཀྱང༌། དཀོན་མཆོག་གིས་ང་རང་མའི་མངལ་དུ་ཡོད་པ་ནས༌བཟུང༌ལོགས་སུ་བཀར་ཞིང་། ཁོང་གི་ཐུགས་རྗེས་ང་རང་ལ་ཞལ་འབོད་གནང་བ༌དང༌།  
\v 16 ངས་སྐྱབས་མགོན་ཡེ་ཤུ་ཕྱི་ཕྱོགས་པ་རྣམས་ལ་སྒྲོག་པའི༌ཕྱིར། དཀོན་མཆོག་གིས་ཐུགས་དགྱེས་པའི་ངང་ནས་རང་ཉིད་ཀྱི་སྲས་བདག་གི་སེམས་སུ་མངོན་པར་མཛད་པ༌ན། ངས་དོན་འདི་ཤ་ཁྲག་ལྡན་པའི་མི་རྣམས་ལ་གྲོས་མ་བྱས༌ཤིང༌།  
\v 17 ཡར་ཡེ་རུ་སཱ་ལེམ་དུ་བདག་གི་སྔོན་ལ་སྐུ་ཚབ་པར་གྱུར་པ་དེ་རྣམས་ཀྱི་དྲུང་དུའང་མ་སོང༌བར། ཨ་རབ་ཡུལ་ཁོ་ནར་སོང་བ་དང་དེ་ནས་སླར་ཡང་དཱ་མེ་སེག་ཏུ་ལོག་པ་ཡིན༌ནོ།།   
\p
\v 18 དེ་ནས་ལོ་གསུམ་འགོར༌རྗེས། ང་རང་ད་གཟོད་ཡར་ཡེ་རུ་སཱ་ལེམ་དུ་སྐུ་ཚབ་པ་ཀེ་ཕཱ་ལ་ངོ་འཕྲད་དུ་སོང་ནས་ཁོ་དང་མཉམ་དུ་ཉིན་བཅོ་ལྔར་བསྡད༌དོ།།  
\v 19 དེ་རུ་སྐྱབས་མགོན་ཡེ་ཤུའི་ནུ་བོ་ཡ་ཀོབ་ལས་སྐུ་ཚབ་པ་གཞན་སུ་ཡང་མ་མཐོང༌།  
\v 20 བདག་གིས་ཁྱོད་རྣམས་ལ་བྲིས་པ་འདི་ནི་རྫུན་གཏམ་མིན༌ཏེ། ངས་དཀོན་མཆོག་གི་སྤྱན་སྔར་སྨྲས༌པ་དང་།  
\v 21 དེའི་རྗེས༌སུ། ང་རང་སིར་ཡཱ་དང་ཀི་ལིག་ཡཱ་ཡུལ་དུ་སོང༌བ་ཡིན།  
\v 22 དུས༌དེར། ཡ་ཧུ་དཱའི་ཡུལ་དུ་སྐྱབས་མགོན་མཱ་ཤི་ཀའི་ནང་དུ་ཡོད་པའི་ཆོས་ཚོགས་སོ་སོས་ང་རང་མཐོང་མ་མྱོང༌ཡང༌།  
\v 23 སྔོན་ཆད་བདག་ཅག་ལ་གནོད་འཚེ་བྱེད་མཁན༌དེས། ད་ལྟ་ཁོས་དེ་སྔར་འཇོམས་པར་འབད་པའི་ཆོས་དེ་སྒྲོག་གིན་འདུག་ཅེས་སྨྲས་པ་ཐོས་ཤིང་།  
\v 24 དེ་རྣམས་ཀྱིས་ཀྱང་བདག་གི་རྐྱེན་གྱིས་དཀོན་མཆོག་ལ་བསྟོད་བསྔགས་བརྗོད༌དོ།།   
\c 2
\cl ལེའུ་གཉིས༌པ། 
\toc1 ༄༅། །ག་ལད་ཡཱ་པ་རྣམས་ལ་སྤྲིངས་པའི་འཕྲིན་ཡིག 
\toc2 ག་ལད་ཡཱ་པ། 
\s1 སྐུ་ཚབ་པ་རྣམས་ཀྱིས་ཕོལ་ལོལ་དང་དུ་བླངས་པ།  
\p
\v 1 དེ་ནས་ལོ་བཅུ་བཞི་འགོར༌རྗེས། བདག་དང་པཱར་ན་པཱ་གཉིས་ཀྱིས་ཐེ་ཏུ་ཁྲིད་ནས་སླར་ཡང་ཡར་ཡེ་རུ་སཱ་ལེམ་དུ་སོང༌ངོ་༎  
\v 2 ང་རང་ནི་མངོན་པར་མཛད་པ་བཞིན་སོང༌སྟེ། ཕྱི་ཕྱོགས་པ་རྣམས་ལ་སྒྲོག་བཞིན་པའི་འཕྲིན་བཟང་དེ་སྤུན་ཟླ་རྣམས་ལ་སྨྲས་པ༌དང༌། རང་གིས་འདས་པ་དང་ད་ལྟར་ཅི་བྱས་པ་ཐམས་ཅད་དོན་མེད་དུ་མི་འགྱུར་བའི༌ཕྱིར། ཆོས་དཔོན་གྲགས་ཆེན་རྣམས་ལའང་ཟུར་དུ་སྨྲས༌པའོ།།  
\v 3 འོན༌ཀྱང༌། བདག་དང་མཉམ་དུ་འགྲོ་བའི་ཐེ་ཏུ་ནི་གྷི་རིག་པ་ཡིན༌ཡང༌། ཁོ་རང་ལ་བཙན་གྱིས་མཚན་སྐྱི་གཅོད་དུ་མ་བཅུག  
\v 4 དེ་ནི་སྤུན་ཟླ་རྫུས་མ་འགའ་ཞིག་ལྐོག་འཛུལ་གྱིས་ཡོང་ནས་བདག་ཅག་བྲན་གཡོག་ཏུ་བསྒྱུར་བའི༌ཆེད་དུ། མཱ་ཤི་ཀ་ཡེ་ཤུའི་ནང་གི་ང་ཚོའི་རང་དབང་ལ་ལྐོག་ལྟ་བྱས༌པའི་ཕྱིར་ཡིན།  
\v 5 འཕྲིན་བཟང་གི་བདེན་པ་ཉིད་དེ་ཁྱོད་རྣམས་ཀྱི་ཁྲོད་དུ་སྔར་བཞིན་གནས་པའི༌ཕྱིར། ངེད་ཅག་གིས་ཡུད་ཙམ་ལའང་དེ་དག་གི་གཏམ་ལ་མ་བསྟུན་མོད།  
\v 6 འོན་ཀྱང་མི་གྲགས་ཆེན་དེ་དག་ནི་མི་ཅི་ལྟ་བུ་ཞིག་ཡིན་ཡང་བདག་ལ་འབྲེལ་བ་མེད༌དེ། དཀོན་མཆོག་ལ་ཕྱོགས་རིས་མེད་ཅིང་། མི་གྲགས་ཆེན་དེ་རྣམས་ཀྱིས་ཀྱང་ང་ལ་ཁ་སྣོན་ཅི་ཡང་མ་བརྒྱབ༌པར།  
\v 7 དཀོན་མཆོག་གིས་སྐུ་ཚབ་པ་པེ་ཏྲོ་ཁོང་ཉིད་མཚན་སྐྱི་བཅད་པ་རྣམས་ལ་འཕྲིན་བཟང་སྒྲོག་པར་མངགས་བཅོལ་གནང་བ༌ལྟར། ང་རང་ཡང་ཕྱི་ཕྱོགས་པ་རྣམས་ལ་འཕྲིན་བཟང་སྒྲོག་པར་མངགས་བཅོལ་གནང་ཡོད་པ་ཁོ་རྣམས་ཀྱིས་ཤེས་སོ།།  
\v 8 ཅིའི་ཕྱིར་ཞེ་ན། མཚན་སྐྱི་བཅད་པ་རྣམས་ལ་སྐུ་ཚབ་པའི་ལས་བསྒྲུབ་པར་པེ་ཏྲོ་ཁོང་ཉིད་ལ་སྐུལ་སློང་གནང་མཁན་དེ་ཉིད་ཀྱིས། ཕྱི་ཕྱོགས་པ་རྣམས་ལ་སྐུ་ཚབ་པའི་ལས་བསྒྲུབ་པར་ང་རང་ལའང་སྐུལ་སློང་གནང་བའི་ཕྱིར་རོ༎  
\v 9 ང་རང་ལ་གནང་བའི་ཐུགས་རྗེ་དེ་ནི་ཆོས་དཔོན་རྣམས་ཀྱིས་ཤེས༌ཤིང་། ཆོས་ཚོགས་ཀྱི་ཀ་བ་ཡིན་ཟེར་བའི་ཡ་ཀོབ༌དང༌། ཀེ་ཕཱ། ཡོ་ཧ་ནན་བཅས་ཀྱིས་ང་དང་པཱར་ན་པཱ་གཉིས་མཉམ་གྲོགས་ཡིན་པའི་རྟགས་སུ་ངེད་གཉིས་ལ་གཡས་ལག་གིས་ལག་འཇུ་བྱས༌ཏེ། ངེད་གཉིས་ཕྱི་ཕྱོགས་པ་རྣམས་ལ་ཆོས་སྤེལ་བ་དང་ཁོ་རྣམས་མཚན་སྐྱི་བཅད་པ་རྣམས་ལ་ཆོས་སྤེལ་དུ་འགྲོ་བར་ཐག་བཅད།  
\v 10 ཁོ་རྣམས་ཀྱིས་ངེད་གཉིས་ལ་དབུལ་པོ་རྣམས་སེམས་ལ་འཛིན་དགོས་པར་བསྐུལ༌ཞིང༌། དེ་ནི་བདག་གིས་བརྩོན་སེམས་ཆེན་པོས་བསྒྲུབ་འདོད་པའང་ཡིན༌ནོ།།   
\s1 ཕོལ་ལོལ་གྱིས་པེ་ཏྲོ་ལ་འགོག་རྒོལ་བྱས་པ།  
\p
\v 11 དོན་དེའི་རྗེས༌སུ། ཀེ་ཕཱ་ནི་ཨན་ཏི་ཡོག་ཡཱ་རུ་སླེབས་པ༌དང༌། ཁོ་རང་ལ་ནོར་འཁྲུལ་གྱི་ཆ་ཡོད་པས་བདག་གིས་ཁ་རི་ཁ་ཐུག་གིས་ཁོ་ལ་འགོག་རྒོལ་བྱས་པ་ཡིན་ནོ།།  
\v 12 རྒྱུ་མཚན་ནི་ཡ་ཀོབ་ཀྱི་ཕྱོགས་ནས་ཡོང་བའི་མི་རྣམས་མ་སླེབས་པའི་སྔོན༌ལ། ཁོས་ཕྱི་ཕྱོགས་པ་རྣམས་དང་མཉམ་དུ་ཁ་ཟས་སྤྱད་ཅིང༌། ཡང་མི་དེ་རྣམས་སླེབས་པ༌དང༌། ཁོ་རང་མཚན་སྐྱི་བཅད་པ་རྣམས་ལ་འཇིགས་ཏེ་ཕྱི་ཕྱོགས་པ་རྣམས་དང་ཁ་བྲལ་ནས་སོང་བའི་ཕྱིར༌རོ།།  
\v 13 དེ་ནས་ཡ་ཧུ་དཱ་པ་གཞན་རྣམས་ཀྱིས་ཀྱང་ཁོ་དང་མཉམ་དུ་ཚུལ་འཆོས་བྱས་ཤིང༌། པཱར་ན་པཱ་ཡིས་ཀྱང་དེ་དག་དང་ལྷན་དུ་ཚུལ་འཆོས་བྱས་པ་ཡིན།  
\v 14 འོན༌ཀྱང༌། བདག་གིས་ཁོ་རྣམས་ཀྱི་སྤྱོད་ལམ་མི་དྲང་བ་དེ་ནི་འཕྲིན་བཟང་གི་བདེན་ལུགས་དང་མི་མཐུན་པ་མཐོང༌བས། མི་ཚོགས་ཀྱི་མདུན་ནས་ཀེ་ཕཱ་ལ་འདི་ལྟར༌དུ། ཁྱོད་ནི་ཡ་ཧུ་དཱ་པ་ཞིག་ཡིན་ཡང་ཡ་ཧུ་དཱ་པའི་ཆོས་ཀྱི་ལུགས་སྲོལ་དོར་ནས་ཕྱི་ཕྱོགས་པ་ལྟར་སྤྱད་པ་སྤྱོད་ན། ད་དུང་བཙན་གྱིས་ཕྱི་ཕྱོགས་པ་རྣམས་ལ་ཡ་ཧུ་དཱ་པ་ལྟར་སྤྱད་པ་སྤྱོད་པར་བསྐུལ་བ་དེ་ཅི་ཡིན་ནམ་ཞེས་སྨྲས༌ཤིང༌།  
\v 15 བདག་ཅག་ནི་སྐྱེས་མ་ཐག་ནས་ཡ་ཧུ་དཱ་པ་ཡིན་པ༌ལས། ཕྱི་ཕྱོགས་པ་སྡིག་ཅན་ལྟ་བུ་ཞིག་མིན༌ཡང༌།  
\v 16 མི་རྣམ་དག་ཏུ་བརྩི་བ་ནི་བཀའ་ཁྲིམས༌ལྟར་བསྒྲུབས་པའི་རྐྱེན་གྱིས་མ་ཡིན༌ཏེ། ཡེ་ཤུ་མཱ་ཤི་ཀ་ལ་དད་པ་བྱས་པའི་རྐྱེན་ཡིན་པ་ངེད་ཅག་གིས་ཤེས་པས། བདག་ཅག་ཀྱང་བཀའ་ཁྲིམས་ལྟར་བསྒྲུབས་པའི་རྐྱེན་གྱིས་མ་ཡིན་པར། སྐྱབས་མགོན་མཱ་ཤི་ཀ་ལ་དད་པའི་སྒོ་ནས་མི་རྣམ་དག་ཏུ་བརྩི་བའི༌ཕྱིར། མཱ་ཤི་ཀ་ཡེ་ཤུ་ལ་དད་པ་བྱས་སོ༎ རྒྱུ་མཚན་ནི་ཤ་ཁྲག་ལྡན་པའི་མི་སུ་ཡིན་ཡང་བཀའ་ཁྲིམས་ལྟར་བསྒྲུབས་ནས་མི་རྣམ་དག་ཏུ་གྱུར་པ་ནི་གཅིག་ཀྱང་མེད་པའི་ཕྱིར༌རོ།།  
\v 17 བདག་ཅག་ནི་སྐྱབས་མགོན་མཱ་ཤི་ཀར་དད་པ་བྱས་ནས་མི་རྣམ་དག་ཏུ་བརྩི་འདོད༌ཀྱང༌། ད་དུང་བདག་ཅག་མི་སྡིག་ཅན་ཡིན་པར་བརྩིས་ན། སྐྱབས་མགོན་མཱ་ཤི་ཀས་མི་ལ་སྡིག་པ་བྱེད་དུ་འཇུག་པ་ཡིན་ནམ་ཞེ༌ན། དེ་འདྲ་གཏན་ནས་མ་ཡིན༌ཏེ།  
\v 18 བདག་གིས་སྔར་ནས་བཤིགས་པ་དེ་ཡང་བསྐྱར་བརྩིགས་པ་ཡིན༌ན། དེ་ནི་ང་རང་ཉེས་པ་བྱེད་མཁན་ཡིན་པར་བདེན་དཔང་བྱས་པ་ཡིན།  
\v 19 ཅིའི་ཕྱིར་ཞེ་ན། བཀའ་ཁྲིམས་བརྒྱུད་ནས་དེའི་ཕྱོགས་སུ་རང་ཉིད་ཤི་བ་སྟེ། བདག་ \f + \ft འདིར་ཕོལ་ལོལ་གྱིས་བདག་ཅེས་གསུངས་ཤིང་དེའི་ཤུགས་སུ་བདག་ཅག་ཐམས་ཅད་ཀྱང་བསྟན་ཡོད། ཚིག་རྐང་ཉི་ཤུ་ཡང་འདི་དང༌མཚུངས། \f*ནི་དཀོན་མཆོག་གི་ཕྱོགས་སུ་གསོན་པོར་གནས་ཐུབ་པའི་ཕྱིར༌རོ།།  
\v 20 བདག་ནི་སྐྱབས་མགོན་མཱ་ཤི་ཀ་དང་མཉམ་དུ་ཤིང་རྒྱ་གྲམ་གྱི་སྟེང་དུ་བརྡབས་ཟིན། ད་ལྟ་གསོན་པོར་གནས་པ་ནི་ང་རང་མིན༌ཏེ། སྐྱབས་མགོན་མཱ་ཤི་ཀ་བདག་གི་སེམས་སུ་གསོན་པོར་བཞུགས་པ་ཡིན། ད་ལྟ་བདག་གི་ལུས་ཕུང་གསོན་ཞིང་འཚོ་བཞིན་ཡོད་པ་ནི་དཀོན་མཆོག་གི་སྲས་ལ་དད་པ་བྱས་པར་བརྟེན་ནས་འཚོ་ཞིང་གཞེས་པ་ཡིན༌ལ། ཁོང་གིས་ང་རང་ལ་བྱམས་ཤིང་གཅེས་པས་བདག་གི་དོན་དུ་རང་སྲོག་ཀྱང་བློས་བཏང༌ངོ་།།  
\v 21 དེའི༌ཕྱིར། བདག་གིས་དཀོན་མཆོག་གི་ཐུགས་རྗེ་མི་འདོར། གལ༌ཏེ། མི་རྣམ་དག་ཏུ་བརྩི་བ་ནི་བཀའ་ཁྲིམས་ཀྱི་སྒོ་ནས་བྱུང་བ་ཡིན༌ན། སྐྱབས་མགོན་མཱ་ཤི་ཀ་ནི་དོན་མེད་དུ་སྐུ་གྲོངས་པ་མ་ཡིན་ནམ་ཞེས་སྨྲས༌པའོ།།   
\c 3
\cl ལེའུ་གསུམ༌པ། 
\toc1 ༄༅། །ག་ལད་ཡཱ་པ་རྣམས་ལ་སྤྲིངས་པའི་འཕྲིན་ཡིག 
\toc2 ག་ལད་ཡཱ་པ། 
\s1 དད་པ་དང་བཀའ་ཁྲིམས་གཉིས་ཀྱི་གཤིབ༌བསྡུར།  
\p
\v 1 ཀྱེ། ག་ལད་ཡཱ་པ༌བླུན་པོ་རྣམས། ཡེ་ཤུ་མཱ་ཤི་ཀ་ཇི་ལྟར་ཤིང་རྒྱ་གྲམ་གྱི་སྟེང་དུ་བརྡབས་པའི་དོན་དེ་ཁྱོད་ཅག་གི་མིག་མདུན་དུ་གསལ་པོར་བཤམས༌ནའང༌། སུ་ཞིག་གིས་ཁྱོད་རྣམས་བསླུས་པ་ཡིན༌ནམ།  
\v 2 ངས་ཁྱོད་རྣམས་ལ་དོན་གཅིག་ཁོ་ན་དྲི་བར་བྱ༌སྟེ། ཁྱོད་རྣམས་ལ་དམ་པའི་ཐུགས་ཉིད་ཐོབ་པ་ནི་བཀའ་ཁྲིམས་ལྟར་བསྒྲུབས་པའི་རྐྱེན་གྱིས་ཡིན༌ནམ། ཡང་ན་འཕྲིན་བཟང་ལ་མཉན་ནས་དད་པ་བྱས་པའི་རྐྱེན་གྱིས་ཡིན།  
\v 3 ཁྱོད་ཅག་གིས་དམ་པའི་ཐུགས་ཉིད་ལ་བརྟེན་ནས་འགོ་བརྩམས༌མོད། འོན་ཀྱང་ད་ལྟ་ཁྱོད་ཅག་གིས་ཤ་ཁྲག་གི་ཕུང་བོར་བརྟེན་ནས་ལས་དེ་བསྒྲུབ་ཐུབ་བམ་ཞེ་ན་མི་ཐུབ། ཁྱོད་ཅག་ནི་ཇི་འདྲའི་བླུན་པ་ལ༌ཨང༌།  
\v 4 ཁྱོད་ཅག་གིས་སྡུག་བསྔལ་དེ་འདྲ་མང་པོ་མྱངས་པར་སྙིང་པོ་མེད་དམ་ཞེ༌ན། སྙིང་པོ་མེད་པ་ཞིག་གཏན་ནས་མ་ཡིན།  
\v 5 དཀོན་མཆོག་གིས་ཁྱོད་ཅག་ལ་དམ་པའི་ཐུགས་ཉིད་གནང་ཞིང་། ཁྱོད་རྣམས་ཀྱི་ཁྲོད་དུ་ངོ་མཚར་བའི་འཕྲིན་ལས་མཛད་པ་ནི་ཁྱོད་ཅག་གིས་བཀའ་ཁྲིམས་ལྟར་བསྒྲུབས་པའི་ཕྱིར་མིན༌ཏེ། འཕྲིན་བཟང་ལ་མཉན་ནས་དད་པ་བྱས་པའི་ཕྱིར་ཡིན༌ནོ།།   
\p
\v 6 དེ་ལྟར་ཨབ་ར་ཧམ་གྱི་སྐོར་ལ་ཇི་སྐད་དུ། ཁོང་གིས་དཀོན་མཆོག་ལ་དད་པ་བྱས་པ་དང༌། དཀོན་མཆོག་གིས་ཀྱང་ཁོང་ནི་མི་རྣམ་དག་ཏུ་བརྩིས་པ་ཡིན་ཞེས་གསུངས་ཡོད༌པས།  
\v 7 ཁྱོད་ཅག་གིས་ཤེས་དགོས་པ་ནི་དད་པ་བྱེད་མཁན་གྱི་མི་རྣམས་ཨབ་ར་ཧམ་གྱི་བུ་རབས་ཚ་རྒྱུད་ཡིན་པ་དང་།  
\v 8 གསུང་རབ་ལས་ཀྱང་སྔོན་ལ་བསྟན་ཡོད་དེ། དཀོན་མཆོག་གིས་ཕྱི་ཕྱོགས་པ་རྣམས་དད་པའི་སྒོ་ནས་མི་རྣམ་དག་ཏུ་བརྩི་ངེས་པའི་སྐོར༌ལ། སྔར་ནས་ཨབ་ར་ཧམ་ལ་ཇི་སྐད༌དུ། ཁྱོད་རང་བརྒྱུད་ནས་ས་སྟེང་གི་མི་རིགས་ཐམས་ཅད་ལ་བྱིན་རླབས་འཐོབ་པར་འགྱུར་ཞེས་འཕྲིན་བཟང་བསྒྲགས༌པས།  
\v 9 དད་པ་བྱེད་མཁན་རྣམས་ལ་དད་པ་ཅན་ཨབ་ར་ཧམ་དང་མཉམ་དུ་བྱིན་རླབས་ཐོབ་པའང་ཤེས་ནུས༌སོ།།   
\p
\v 10 དེ་ཡང་བཀའ་ཁྲིམས་ཀྱི་ལས་ལ་བརྟེན་མཁན་ཐམས་ཅད་ལ་དམོད་མོ་ཐེབས་འོས་སོ།། ཅིའི་ཕྱིར་ཞེ་ན། གསུང་རབ་ཀྱི་མདོ་ལས་ཇི་སྐད༌དུ། རྟག་ཏུ་བཀའ་ཁྲིམས་ཀྱི་མདོ་ལས་གསུངས་ཡོད་པ་མཐའ་དག་བཞིན་མི་སྒྲུབ་མཁན་ཐམས་ཅད་ལ་དམོད་མོ་ཐེབས་འོས་ཞེས་བཀོད་པའི་ཕྱིར༌ཡིན།  
\v 11 ཡང་གསུང་རབ་ཀྱི་མདོ་ལས་ཇི་སྐད༌དུ། མི་རྣམ་དག་ནི་དད་པའི་སྒོ་ནས་འཚོ་བར་འགྱུར་ཞེས་གསུངས༌པས། བཀའ་ཁྲིམས་ལ་བརྟེན་ནས་དཀོན་མཆོག་གི་དྲུང་དུ་མི་རྣམ་དག་ཏུ་གྱུར་པ་ནི་གཅིག་ཀྱང་མེད་པ་གསལ་ལོ།།  
\v 12 བཀའ་ཁྲིམས་ནི་དད་པ་ལ་བརྟེན་ནས་བྱུང་བ་མ་ཡིན༌ཏེ། ཇི་སྐད༌དུ། བཀའ་ཁྲིམས་བཞིན་དུ་སྒྲུབ་མཁན་གྱིས་བཀའ་ཁྲིམས་ལ་བརྟེན་ནས་འཚོ་བ་རོལ་དགོས་པ་ཡིན་ཞེས་གསུངས་པའི་ཕྱིར༌རོ།།  
\v 13 ཡང་གསུང་རབ་ཀྱི་མདོ་ལས་ཇི་སྐད༌དུ། སྡོང་པོའི་སྟེང་དུ་དཔྱངས་པ་ཐམས་ཅད་ནི་དམོད་མོ་ཐེབས་པ་ཡིན་ཞེས་བཀོད་ཡོད༌པས། སྐྱབས་མགོན་མཱ་ཤི་ཀ་ནི་བདག་ཅག་གི་ཆེད་དུ་དམོད་མོ་རུ་གྱུར༌ཏེ། བདག་ཅག་བཀའ་ཁྲིམས་ཀྱི་དམོད་མོ་ལས་བླུས་པ་ཡིན།  
\v 14 དེ་ནི་ཨབ་ར་ཧམ་ལ་གནང་བའི་བྱིན་རླབས་དེ་མཱ་ཤི་ཀ་ཡེ་ཤུ་བརྒྱུད་ནས་ཕྱི་ཕྱོགས་པ་རྣམས་ལ་འཐོབ་པར་འགྱུར༌ཞིང༌། བདག་ཅག་ལའང་དད་པའི་སྒོ་ནས་ཞལ་བཞེས་གནང་བའི་དམ་པའི་ཐུགས་ཉིད་འཐོབ་པར་འགྱུར་བའི་ཕྱིར༌རོ།།   
\s1 དཀོན་མཆོག་གི་ཞལ་བཞེས་དང་བཀའ༌ཁྲིམས།  
\p
\v 15 སྤུན་ཟླ༌རྣམས། ངས་མི་ཡི་བཤད་སྲོལ་ལྟར་སྨྲ་བར་བྱ༌སྟེ། མི་དང་མིའི་བར་གྱི་གྲོས་འཆམ་ཡི་གེ་ཞིག་ལ་མཚོན༌ན། གཏན་ལ་ཕབ་རྗེས་འདོར་བའམ་ཁ་སྣོན་བྱས་མི་ཆོག  
\v 16 ཞལ་བཞེས་གནང་བ་རྣམས་ནི་ཨབ་ར་ཧམ་དང་ཁོའི་བུ་རྒྱུད་ལ་གསུངས་པ་ཡིན༌མོད། འོན་ཀྱང་བུ་རྒྱུད་རྣམས་ཞེས་གསུངས་མེད༌ཅིང༌། དེ་ནི་མི་མང་པོ་བསྟན་པ་མ་ཡིན༌པར། ཁྱོད་ཀྱི་བུ་རྒྱུད་ཅེས་གསུངས༌ཏེ། མི་གཅིག་ཁོ་ན་བསྟན་པ་ཡིན་ཞིང་དེ་ནི་སྐྱབས་མགོན་མཱ་ཤི་ཀ་ལགས་སོ།།  
\v 17 བདག་གི་སྨྲ་བའི་དོན་ནི་འདི་ལྟ་སྟེ། དཀོན་མཆོག་གིས་སྔ་མོ་ནས་གཏན་ལ་ཕབ་པའི་ཞལ་ཆད་དེ་ནི། ལོ་ངོ་བཞི་བརྒྱ་སུམ་ཅུའི་རྗེས་སུ་བྱུང་བའི་བཀའ་ཁྲིམས་ཀྱིས་མེད་པར་བཟོ་མི་ནུས༌ལ། ཞལ་བཞེས་ཀྱང་སྟོང་བར་བྱ་མི་ནུས་ཏེ།  
\v 18 བགོ་སྐལ་ནི་བཀའ་ཁྲིམས་ལས་ཐོབ་པ་ཡིན༌ན། ཞལ་བཞེས་གནང་བ་ལས་ཐོབ་པ་མིན་པའི་ཕྱིར༌ཡིན། འོན༌ཀྱང༌། དཀོན་མཆོག་གིས་ཞལ་བཞེས་གནང་བ་ལྟར་བགོ་སྐལ་དེ་ཨབ་ར་ཧམ་ལ་གནང་བ་ཡིན༌ནོ།།   
\p
\v 19 དེས་ན་ཅིའི་ཕྱིར་བཀའ་ཁྲིམས་བྱུང་བ་ཡིན་ཞེ༌ན། ཞལ་བཞེས་གནང་བའི་ས་བོན་དེ་ཉིད་ཕེབས་ཡོང་བའི་བར༌དུ། མི་རྣམས་ཀྱིས་ཉེས་སྐྱོན་བྱས་པའི་དབང་གིས་ཆེད་དུ་གནང་བ་ཡིན༌ཞིང༌། ཕོ་ཉ་རྣམས་ཀྱིས་བར་མི་དེ་ཉིད་བརྒྱུད་ནས་གཏན་ལ་ཕབ་ཅིང་བསྒྲགས༌པ་ཡིན།  
\v 20 སྤྱིར་བར་མི་ནི་ཕྱོགས་གཅིག་ལ་བྱེད་པ་མ་ཡིན༌མོད། འོན་ཀྱང་དཀོན་མཆོག་ནི་གཅིག་རང་ཡིན་ནོ།།  
\v 21 དེས་ན་བཀའ་ཁྲིམས་ནི་དཀོན་མཆོག་གི་ཞལ་བཞེས་དང་འགལ་བ་ཡིན་ནམ་ཞེ༌ན། གཏན་ནས་མི་འགལ་ལོ།། མི་ཞིག་ལ་ཚེ་སྲོག་གནང་བར་བྱེད་ནུས་པའི་བཀའ་ཁྲིམས་ཤིག་གནང་ཡོད་པ་ཡིན༌ན། མི་རྣམ་དག་ཏུ་བརྩི་བ་ནི་བཀའ་ཁྲིམས་ཀྱི་སྒོ་ནས་བྱུང་བ་མ་ཡིན༌ནམ།  
\v 22 ཞལ་བཞེས་དེ་ནི་ཡེ་ཤུ་མཱ་ཤི་ཀར་དད་པའི་སྒོ་ནས་དད་ལྡན་རྣམས་ལ་གནང་བར་འགྱུར་བའི་ཕྱིར། གསུང་རབ་ཀྱིས་འཇིག་རྟེན་གྱི་མི་ཐམས་ཅད་སྡིག་པའི་ཁོངས་སུ་བསྡུས་པ་ཡིན་ནོ།།   
\p
\v 23 འོན༌ཀྱང༌། དད་པ་བྱེད་པའི་དུས་དེ་མ་སླེབས་པའི་སྔོན༌ལ། བཀའ་ཁྲིམས་ཀྱིས་བདག་ཅག་ཐམས་ཅད་དབང་དུ་བསྡུས༌ཤིང༌། མ་འོངས་པར་དད་པ་དེ་གསལ་པོར་མངོན་པའི་བར་དུ་བསྲུངས་སོ།།  
\v 24 དེ་བས་བདག་ཅག་དད་པའི་སྒོ་ནས་མི་རྣམ་དག་ཏུ་བརྩི་བར་མཛད་པའི་ཕྱིར། བཀའ་ཁྲིམས་ནི་བདག་ཅག་ལ་སློབ་སྟོན་གནང་བའི་སློབ་དཔོན་ཡིན༌ཏེ། བདག་ཅག་སྐྱབས་མགོན་མཱ་ཤི་ཀའི་དྲུང་དུ་འདྲེན་པ་ཡིན།  
\v 25 འོན༌ཀྱང༌། དད་པ་བྱེད་པའི་དུས་དེ་སླེབས་པ་དང་བདག་ཅག་ནི་སློབ་དཔོན་གྱི་དབང་འོག་ཏུ་ཡོད་པ་མ་ཡིན༌ནོ།།   
\s1 དཀོན་མཆོག་གི་བུ་དང་བུ༌མོ།  
\p
\v 26 དེའི༌ཕྱིར། ཁྱོད་རྣམས་ཀྱིས་མཱ་ཤི་ཀ་ཡེ་ཤུར་དད་པ་བྱས་པའི་དབང༌གིས། ཐམས་ཅད་དཀོན་མཆོག་གི་བུ་དང་བུ་མོ་ཡིན་ནོ།།  
\v 27 སྐྱབས་མགོན་མཱ་ཤི་ཀའི་ནང་ནས་ཁྲུས་གསོལ་ལ་ཞུགས་མཁན་ཐམས་ཅད་ཀྱིས་སྐྱབས་མགོན་མཱ་ཤི་ཀ་ནི་གོས་བཞིན་དུ་རང་གི་ལུས་ལ་གྱོན་པ་ཡིན།  
\v 28 ཁྱོད་རྣམས་ནི་ཡ་ཧུ་དཱ་པ༌དང༌། གྷི་རིག་པ། བདག་པོའམ་བྲན༌གཡོག ཕོ་མོའི་དབྱེ་བ་བཅས་མི་མཛད་པར། དད་ལྡན་ཐམས་ཅད་མཱ་ཤི་ཀ་ཡེ་ཤུའི་ནང་གཅིག་ཏུ་བསྒྲིལ་ལོ།།  
\v 29 ཁྱོད་ཅག་ནི་སྐྱབས་མགོན་མཱ་ཤི་ཀར་གཏོགས༌པ་ཡིན་ན། ཁྱོད་ཅག་ཨབ་ར་ཧམ་གྱི་བུ་རབས་ཚ་རྒྱུད་ཡིན་ཞིང་། ཞལ་བཞེས་གནང་བ་ལྟར་ཕ་ཤུལ་འཛིན་མཁན་དུ་གྱུར་པའང་ཡིན༌ནོ།།   
\c 4
\cl ལེའུ་བཞི༌པ། 
\toc1 ༄༅། །ག་ལད་ཡཱ་པ་རྣམས་ལ་སྤྲིངས་པའི་འཕྲིན་ཡིག 
\toc2 ག་ལད་ཡཱ་པ། 
\s1 སྐྱབས་མགོན་ཡེ་ཤུའི་དད་ལྡན༌སྐོར།  
\p
\v 1 དེ་ཡང་བདག་གིས་ཕ་ཤུལ་འཛིན་མཁན་ཞེས་བརྗོད་པ་ནི་རྒྱུ་ནོར་ཐམས་ཅད་ཀྱི་བདག་པོ་ལ་གོ་བ་ཡིན༌ཡང༌། བྱིས་པའི་དུས་སུ་གཡོག་པོ་ཞིག་དང་ཁྱད་པར་གང་ཡང་མེད་དེ།  
\v 2 རང་གི་ཕ་ཡིས་གཏན་ཁེལ་བྱས་པའི་དུས་དེ་སླེབས་པའི་བར༌དུ། དགེ་རྒན་དང་གཉེར་པའི་དབང་འོག་ཏུ་སྡོད་པ་ཡིན་ནོ།།  
\v 3 དེ་བཞིན་དུ་བདག་ཅག་ཀྱང་བྱིས་པ་ལྟ་བུའི་དུས་སུ་འཇིག་རྟེན་གྱི་ཤེས་ཡོན་ཕྲན་བུ་དག་གི་དབང་འོག་ཏུ་སྡོད༌པ་ཡིན།  
\v 4 འོན༌ཀྱང༌། དུས་ལོངས༌པའི་ཚེ། དཀོན་མཆོག་གིས་རང་ཉིད་ཀྱི་སྲས་འཇིག་རྟེན་དུ་མངགས༌ཤིང༌། བུ་མོ་ཞིག་གི་མངལ་ལས་འཁྲུངས་པ་དང་། བཀའ་ཁྲིམས་ཀྱི་ལུགས་སྲོལ་འོག་ཏུ་འཁྲུངས་པའང་ཡིན་ཏེ།  
\v 5 བཀའ་ཁྲིམས་ཀྱི་དབང་འོག་ཏུ་ཡོད་པ་རྣམས་བླུས་ནས། བདག་ཅག་ཁོང་གི་བུ་དང་བུ་མོར་མཛད་པའི༌ཕྱིར་རོ།།  
\v 6 ཁྱོད་ཅག་ནི་དཀོན་མཆོག་གི་བུ་དང་བུ་མོ་ཡིན༌པས། དཀོན་མཆོག་གིས་རང་གི་སྲས་ཀྱི་ཐུགས་ཉིད་དེ་ཁྱོད་རྣམས་ཀྱི་སེམས་སུ་མངགས༌ཤིང༌། ཨབ་བཱ་ལགས། ཡབ་ལགས་ཞེས་འབོད་པར་བསྐུལ་ལོ།།  
\v 7 དེའི༌ཕྱིར། དུས་དེ་ནས༌བཟུང༌། ཁྱོད་ཅག་ནི་གཡོག་པོ་མ་ཡིན་པར་དཀོན་མཆོག་གི་བུ་དང་བུ་མོ་ཡིན། དེ་ལྟར་ལགས༌ན། ཁྱོད་ཅག་ནི་དཀོན་མཆོག་གི་རྐྱེན་གྱིས་ཕ་ཤུལ་འཛིན་མཁན་ཡང་ཡིན༌ནོ།།   
\s1 ཕོལ་ལོལ་གྱིས་དད་ལྡན་རྣམས་ལ་སེམས་ཁྲལ་བྱས༌པ།  
\p
\v 8 སྔོན་ཆད་ཁྱོད་ཅག་གིས་དཀོན་མཆོག་ངོ་མི་ཤེས་པའི་དུས༌སུ། ངོ་བོ་ལྟར་དཀོན་མཆོག་མ་ཡིན་པ་དག་གི་གཡོག་པོ་བྱས༌པ་ཡིན་ནོ།།  
\v 9 ད་ལྟ་ཁྱོད་ཅག་གིས་དཀོན་མཆོག་ངོ་ཤེས༌ཤིང༌། དོན་དམ་དུ་དཀོན་མཆོག་གིས་ཀྱང་ཁྱོད་རྣམས་མཁྱེན༌པ་ཡིན་པས། ཁྱོད་རྣམས་སླར་ཡང་ནུས་པ་མེད་པའི་ཤེས་ཡོན་ཕྲན་བུའི་དབང་འོག་ཏུ་འཇུག་དོན༌ཅི། ཁྱོད་ཅག་གིས་སླར་ཡང་དེར་གཡོག་བྱེད་པར་འདོད་དམ།  
\v 10 ཁྱོད་རྣམས་ཀྱིས་ཚེས༌དང༌། ཟླ༌བ། དུས༌ཚིགས། ལོ་འཁོར་བཅས་གཟབ་གཟབ་ངང་ནས་བསྲུངས་པས།  
\v 11 སྔར་བདག་གིས་ཁྱོད་རྣམས་ཀྱི་ཕྱིར་བརྩོན་པའི་ལས་དེ་རྣམས་དོན་མེད་དུ་གྱུར་པ་ལ་སེམས་ཁྲལ་བྱེད་དོ།།  
\v 12 སྤུན་ཟླ༌རྣམས། དེ་སྔར་ང་རང་ཁྱོད་རྣམས་དང་འདྲ་བར་གྱུར་མྱོང་བས། ཁྱོད་ཅག་ང་དང་འདྲ་བར་གྱུར་ཅིག་ཅེས་ཞུའོ།། ཁྱོད་ཅག་གིས་བདག་ལ་འགལ་བའི་ལས་ཅི་ཡང་བྱས་མ་མྱོང༌།  
\v 13 བདག་གིས་ཐེངས་དང་པོར་ཁྱོད་རྣམས་ལ་འཕྲིན་བཟང་བསྒྲགས་པའི་དོན་དེ་ཁྱོད་ཅག་གིས་ཀྱང་ཤེས༌ཏེ། སྐབས་དེར་བདག་ལ་ན་ཚ་བྱུང་ཡོད་པས།  
\v 14 བདག་གི་ལུས་པོའི་རྐྱེན་གྱིས་ཁྱོད་ཅག་ལ་དཀའ་སྡུག་བྱུང་ནའང་ཁྱོད་རྣམས་ཀྱིས་བདག་ལ་མཐོང་ཆུང་མ་བྱས་ཤིང་ང་རང་མ་དོར༌བར། དཀོན་མཆོག་གི་ཕོ་ཉ་དང་མཱ་ཤི་ཀ་ཡེ་ཤུ་བཞིན་དུ་སྣེ་ལེན་བཟང་པོ་བྱས་སོ།།  
\v 15 དེས་ན་སྔོན་ཆད་ཁྱོད་ཅག་གི་སྤྲོ་སྣང་དེ་གང་དུ་ཡོད༌དམ། དེའི་དུས༌སུ། བསྒྲུབ་ནུས་པ་ཡིན་ན་ཁྱོད་རྣམས་ཀྱིས་རང་གི་མིག་བཏོན་ནས་བདག་ལ་སྟེར་བར་ངེས་ཤིང་། དོན་འདིར་བདག་གིས་བདེན་དཔང་བྱེད་པ་ཡིན།  
\v 16 ད་ལྟ་བདག་གིས་ཁྱོད་ཅག་ལ་བདེན་ལུགས་སྨྲས་པའི་རྐྱེན་གྱིས་བདག་ནི་ཁྱོད་རྣམས་ཀྱི་དགྲ་བོར་གྱུར་པ་ཡིན༌ནམ།  
\v 17 ད་ལྟ་ཁྱོད་ཅག་ལ་འབྲེལ་བ་འཛུགས་པར་བརྩོན་མཁན་རྣམས་ཀྱི་དམིགས་ཡུལ་མི་བཟང༌སྟེ། དེ་དག་གིས་བདག་ཅག་ཕྲལ་ནས་ཁོ་རྣམས་ལ་འབྲེལ་བ་འཛུགས་འདོད༌ཅིང་།  
\v 18 སྤྱིར་རྟག་ཏུ་དོན་བཟང་པོར་བརྩོན་པ་བྱས་ན་ལེགས། འོན༌ཀྱང༌། བདག་ཁྱོད་རྣམས་དང་ལྷན་དུ་ཡོད༌དུས་ཁོ་ནར་དེ་ལྟར་བྱ་མི་འོས་སོ།།  
\v 19 བདག་གི་བུ་ཕྲུག༌རྣམས། ཁྱོད་ཅག་གི་སེམས་ནང་དུ་སྐྱབས་མགོན་མཱ་ཤི་ཀའི་གཤིས་རྒྱུད་འཆག་པའི་བར༌དུ། ངས་ཁྱོད་ཅག་གི་ཆེད་དུ་ཕྲུ་གུ་བཙའ་བའི་ཟུག་གཟེར་ཡང་བསྐྱར་མྱོང་བ་ཡིན།  
\v 20 བདག་གི་སེམས་ནི་ཁྱོད་རྣམས་ཀྱི་ཕྱིར་ཅི་བྱ་གཏོལ་མེད་དུ་གྱུར་པས། བདག་ནི་ད་ལྟ་ཁྱོད་རྣམས་དང་མཉམ་དུ་འགྲོགས་ནས་རང་གི་སྨྲ་ཚུལ་བསྒྱུར་འདོད་དོ།།   
\s1 གཡོག་མོ་ཧ་གར་དང་བདག་མོ་སཱ་རའི༌སྐོར།  
\p
\v 21 དེ་ཡང་བཀའ་ཁྲིམས་ཀྱི་དབང་འོག་ཏུ་སྡོད་འདོད་པ་ཁྱོད་རྣམས་ཀྱིས་བདག་ལ་ཤོད༌དང༌། ཁྱོད་ཅག་གིས་བཀའ་ཁྲིམས་ཐོས་པ་མ་ཡིན་ནམ།  
\v 22 གསུང་རབ་ལས་འདི་ལྟར་བཀོད་ཡོད༌དེ། ཨབ་ར་ཧམ་ལ་བུ་གཉིས་ཡོད༌ཅིང༌། བུ་གཅིག་ནི་གཡོག་མོ་ལས་སྐྱེས་པ་ཡིན་ལ། ཅིག་ཤོས་ནི་རང་དབང་ལྡན་པའི་བུད་མེད་ལས་སྐྱེས་པ་ཡིན་ནོ།།  
\v 23 འོན༌ཀྱང༌། གཡོག་མོ་ལས་སྐྱེས་པ་ནི་ཤ་ཁྲག་གི་ཕུང་བོར་བརྟེན་ནས་སྐྱེས་པ༌དང༌། རང་དབང་ལྡན་པའི་བུད་མེད་ལས་སྐྱེས་པ་ནི་ཞལ་བཞེས་གནང་བ་ལྟར་སྐྱེས་པ་ཡིན།  
\v 24 དེ་ནི་འདྲ་དཔེའི་སྒོ་ནས་གསུངས་པ༌ཞིག་སྟེ། བུད་མེད་དེ་གཉིས་ནི་ཞལ་ཆད་གཉིས་ཡིན༌ལ། རི་བོ་སི་ནཱ་ལས་བྱུང་བའི་ཞལ་ཆད་ནི་གཡོག་མོ་ཧ་གར་ཡིན༌ལ། ཁོ་མོ་ལས་སྐྱེས་པའི་བུ་ཕྲུག་དག་ནི་གཡོག་པོ་ཡིན།  
\v 25 ཧ་གར་ཞེས་པའི་ཡིག་འབྲུ་འདིས་ཨ་རབ་ཡུལ་གྱི་རི་བོ་སི་ནཱ་བསྟན་ཅིང་དེང་གི་ཡེ་རུ་སཱ་ལེམ་མཚོན་པ་ཡིན་ཏེ། ད་ལྟའི་ཡེ་རུ་སཱ་ལེམ་དང་གནས་དེར་ཡོད་པའི་བུ་ཕྲུག་ཐམས་ཅད་ནི་གཡོག་པོ་ཡིན་པས་སོ།།  
\v 26 འོན༌ཀྱང༌། སྟེང་གི་ཡེ་རུ་སཱ་ལེམ་ནི་རང་དབང་ལྡན་པ༌ཞིག་ཡིན་པ་དང༌། བདག་ཅག་ཐམས་ཅད་ཀྱི་ཡུམ་ཡིན།  
\v 27 རྒྱུ་མཚན་ནི་གསུང་རབ་ཀྱི་མདོ་ལས་ཇི་སྐད༌དུ།  
\q1 མངལ་ཡང་མ་སྦྲུམ་བུ་ཡང་མ་སྐྱེས༌ན།།  
\q1 བུད་མེད་ཁྱོད་ནི་དགའ་ཞིང་རངས་པར་གྱིས།།  
\q1 ཕྲུ་གུ་བཙའ་བའི་ཟུག་གཟེར་མ་མྱངས་ན།།  
\q1 དགའ་སྤྲོའི་འབོད་སྒྲ་ཁྱོད་ཀྱིས་མཐོན་པོར༌སྒྲོགས།།  
\q1 རྒྱུ་མཚན་ཁྱོ་ག་མེད་པའི་བུད་མེད༌ལ།།  
\q1 ཁྱོ་ག་ཅན་ལས་བུ་ཕྲུག་མང་དུ༌འབྱུང༌།།  
\m ཞེས་བཀོད་པའི་ཕྱིར༌རོ།།   
\p
\v 28 སྤུན་ཟླ༌རྣམས། བདག་ཅག་ནི་ཨི་སཱག་བཞིན་དུ་དཀོན་མཆོག་གི་ཞལ་བཞེས་ལ་བརྟེན་ནས་ཁོང་གི་བུ་ཕྲུག་ཏུ་གྱུར་པ་ཡིན།  
\v 29 སྐབས་དེར། ཤ་ཁྲག་གི་ཕུང་བོ་ལས་སྐྱེས་པའི་བུ་ཡིས། དམ་པའི་ཐུགས་ཉིད་བརྒྱུད་ནས་འཁྲུངས་པའི་བུ་ལ་གནོད་འཚེ་བྱས་པ་བཞིན་ད་ལྟའང་དེ་ལྟར་བྱེད་དོ།།  
\v 30 དེས་ན་གསུང་རབ་ལས་ཇི་ལྟར་གསུངས་འདུག་ཅེ༌ན། འདི་ལྟ༌སྟེ། གཡོག་མོའི་བུ་ཡིས་རང་དབང་ལྡན་པའི་བུད་མེད་ཀྱི་བུ་དང་མཉམ་དུ་ཁྱིམ་རྒྱུད་འཛིན་མི་རུང༌བས། གཡོག་མོ་མ་བུ་གཉིས་ཀ་ཕྱིར་ཕུད་ཅིག་ཅེས་པ་ཡིན།  
\v 31 སྤུན་ཟླ༌རྣམས། དེའི༌ཕྱིར། བདག་ཅག་ནི་གཡོག་མོའི་བུ་ཕྲུག་མ་ཡིན༌པར། རང་དབང་ལྡན་པའི་བུད་མེད་ཀྱི་བུ་ཕྲུག་ཡིན༌ནོ།།   
\c 5
\cl ལེའུ་ལྔ༌པ། 
\toc1 ༄༅། །ག་ལད་ཡཱ་པ་རྣམས་ལ་སྤྲིངས་པའི་འཕྲིན་ཡིག 
\toc2 ག་ལད་ཡཱ་པ། 
\s1 སྐྱབས་མགོན་མཱ་ཤི་ཀའི་ནང་གི་རང་དབང༌སྐོར།  
\p
\v 1 དེ་ཡང་སྐྱབས་མགོན་མཱ་ཤི་ཀས་བདག་ཅག་རང་དབང་ནང་དུ་གནས་པའི༌ཕྱིར་གྲོལ་བར་མཛད༌པས། ཁྱོད་རྣམས་བརྟན་པོར་ལངས་ནས་སྡོད་པ་ལས་སླར་ཡང་བྲན་གཡོག་གི་གཉའ་ཤིང་འོག་ཏུ་འཛུལ་མི་འོས་སོ།།  
\v 2 ལྟོས་དང་། ཕོལ་ལོལ་ངས་ཁྱོད་རྣམས་ལ་འདི་ལྟར་སྨྲ་བར་བྱ༌སྟེ། ཁྱོད་རྣམས་ཀྱིས་མཚན་སྐྱི་གཅོད་པའི་ལུགས་སྲོལ་བཞིན་དུ་བྱས༌ན། སྐྱབས་མགོན་མཱ་ཤི་ཀ་ནི་ཁྱོད་ཅག་ལ་ཕན་ཐོགས་ཅི་ཡང་མེད།  
\v 3 ཡང་ངས་མཚན་སྐྱི་གཅོད་པའི་ལས་ལ་ཞུགས་མཁན་ཐམས་ཅད་ལ་བདེན་པར་སྨྲ༌སྟེ། ཁྱོད་རྣམས་ཀྱིས་བཀའ་ཁྲིམས་ཐམས་ཅད་སྲུང་བའི་འགན་འཁུར་དགོས།  
\v 4 བཀའ་ཁྲིམས་ལ་བརྟེན་ནས་མི་རྣམ་དག་ཏུ་བརྩི་བར་འདོད་པ་མཐའ་དག་ནི་སྐྱབས་མགོན་མཱ་ཤི་ཀ་དང་ཁ་གྱེས༌ཤིང༌། ཐུགས་རྗེ་ལའང་རིང་དུ་བྲལ་ཏོ།།  
\v 5 འོན་ཀྱང་། བདག་ཅག་གིས་དམ་པའི་ཐུགས་ཉིད་བརྒྱུད་ཅིང་དད་པ་ལ་བརྟེན་ནས་མི་རྣམ་དག་ཏུ་འགྱུར་བར་རེ་སྒུག་བྱེད༌པ་ཡིན།  
\v 6 རྒྱུ་མཚན་ནི་མཱ་ཤི་ཀ་ཡེ་ཤུའི་ནང་དུ། མཚན་སྐྱི་གཅོད་མིན་ལ་སྙིང་པོ་ཅི་ཡང་མེད༌དེ། བྱམས་བརྩེའི་སྒོ་ནས་མཚོན་དགོས་པའི་དད་པ་ཁོ་ནར་དོན་སྙིང་ཆེན་པོ་ལྡན་པའི་ཕྱིར༌རོ།།   
\p
\v 7 སྤྱིར་ཁྱོད་རྣམས་རྒྱུགས་པ་མགྱོགས་ནའང་སུ་ཞིག་གིས་ཁྱོད་རྣམས་བདེན་པ་ཉིད་ལ་བསྟུན་པར་བཀག་རྒྱ་བཟོས༌སམ།  
\v 8 སྐུལ་སློང་དེ་ནི་ཁྱོད་རྣམས་ལ་ཞལ་འབོད་གནང་མཁན་དེ་ཉིད་ནས་བྱུང་བ་མིན༌ནོ།།  
\v 9 སྐྱུར་རྩི་ཉུང་ཙམ་གྱིས་བག་ཕྱེ་ཚང་མ་སྐྱུར་ལང་དུ་འཇུག་པ་ཡིན།  
\v 10 བདག་གིས་གཙོ་བོ་ལ་བརྟེན་ནས་ཁྱོད་རྣམས་ལ་ཡིད་རྟོན་བྱེད༌དེ། ཁྱོད་རྣམས་ཀྱིས་བསམ་ཚུལ་གཞན་མི་བཅང་མོད། འོན་ཀྱང་ཁྱོད་རྣམས་ལ་གནོད་འཚེ་བྱེད་མཁན་སུ་ཞིག་ཡིན་ཡང་དེ་ལ་ཉེས་ཆད་གཅོད་ངེས་ཡིན།  
\v 11 སྤུན་ཟླ༌རྣམས། ངས་ད་ལྟའང་མཚན་སྐྱི་གཅོད་འོས་པའི་བཀའ་བསྒྲགས༌ན། ཅིའི་ཕྱིར་ད་དུང་བདག་ལ་མནར་གཅོད་བྱེད༌དམ། གལ༌སྲིད་དེ་ལྟར་ཡིན༌ན། ཤིང་རྒྱ་གྲམ་གྱིས་མི་སར་འགྱེལ་དུ་འཇུག་པའི་དོན་ནི་མེད་དོ།།  
\v 12 དེའི༌ཕྱིར། ཁྱོད་རྣམས་ལ་གནོད་འཚེ་བྱེད་མཁན་དེ་དག་ནི་རང་གིས་རང་ཉིད་ཉུག་རུམ་པར་བཟོས་ན་ཅི་མ་རུང༌།  
\v 13 སྤུན་ཟླ༌རྣམས། ད་ལྟ་ཁྱོད་རྣམས་རང་དབང་ལྡན་པར་ཞལ་འབོད་གནང༌བ་ཡིན། འོན༌ཀྱང༌། རང་དབང་དེ་ནི་ཤ་གཟུགས་ཀྱི་འདོད་ཆགས་ལ་གཡེང་བའི་གོ་སྐབས་ཤིག་ཏུ་མི་འཛིན༌པར། དུས་རྒྱུན་བྱམས་བརྩེ་ལ་བརྟེན་ནས་ཕན་ཚུན་ལ་ཞབས་ཕྱི་བྱ་འོས་སོ།།  
\v 14 རྒྱུ་མཚན་ནི་བཀའ་ཁྲིམས་ཐམས་ཅད་ཀྱི་ནང་དོན་གཅིག་ཏུ་བསྡུས་ན་འདི་ལྟ༌སྟེ། ཁྱོད་ཀྱིས་ཁྱིམ་མཚེས་ལ་རང་དང་འདྲ་བར་གཅེས་ཤིག་ཅེས་གསུངས་པ་འདི་ཡིན་པའི་ཕྱིར༌རོ།།  
\v 15 འོན༌ཀྱང༌། ཁྱོད་ཅག་གིས་མཉམ་འཇོག་དགོས་པ་ཞིག༌ནི། ཁྱོད་རྣམས་ཀྱིས་ཕན་ཚུན་ལ་སོ་བཏབ་ནས་གསོད་རེས་བྱས༌ན། མཐའ་མར་ཐམས་ཅད་བརླག་པར་འགྱུར་བ༌དེའོ།།   
\s1 དམ་པའི་ཐུགས་ཉིད་ལ་བསྟུན་པ།  
\p
\v 16 ཡང་བདག་གིས་འདི་ལྟར་སྨྲ་བར་བྱ༌སྟེ། ཁྱོད་རྣམས་ཀྱིས་དམ་པའི་ཐུགས་ཉིད་ལ་བསྟུན་ནས་སྤྱད་པ་སྤྱོད༌ན། ཤ་གཟུགས་ཀྱི་འདོད་ཆགས་ཀྱི་དབང་དུ་མི་འགྲོའོ།།  
\v 17 ཅིའི་ཕྱིར་ཞེ་ན། ཤ་གཟུགས་ཀྱི་འདོད་ཆགས་ཀྱིས་དམ་པའི་ཐུགས་ཉིད་ལ་འགྲན་རྩོད་བྱེད་པ༌དང༌། དམ་པའི་ཐུགས་ཉིད་ཀྱིས་ཀྱང་དེ་ལ་འགྲན་རྩོད་བྱེད༌པ་ཡིན། དེ་གཉིས་ནི་འགལ་བ་ལྟག་སྤྲོད་ཡིན་པས་ཁྱོད་ཅག་གིས་རང་གི་འདོད་བློ་ལྟར་བསྒྲུབ་མི་ནུས་པའི་ཕྱིར༌རོ།།  
\v 18 འོན༌ཀྱང༌། དམ་པའི་ཐུགས་ཉིད་ཀྱིས་ཁྱོད་རྣམས་འཁྲིད་པར་མཛད༌ན། ཁྱོད་ཅག་ནི་བཀའ་ཁྲིམས་ཀྱི་དབང་འོག་ཏུ་མེད་དོ།།  
\v 19 ཤ་གཟུགས་ཀྱི་འདོད་ཆགས་ཀྱི་ལས་རྣམས་ནི་མངོན་གསལ་ཡིན༌ཏེ། ལོག་གཡེམ༌དང༌། མི་ཚངས༌སྤྱོད། འཆལ་སྤྱོད།  
\v 20 ལྷ་སྐུར་བརྟེན༌པ། རྫུ༌འཕྲུལ། ཞེ༌འཁོན། འགྲན༌རྩོད། ཕྲག༌དོག ཞེ༌སྡང༌། སྒེར་སེམས། དབྱེན་འབྱེད། ལོག༌ལྟ།  
\v 21 འགྲན་སེམས། ར་རོར་གྱུར༌པ། གསོལ་སྟོན་ལ་བག་མེད་དུ་ཞུགས་པ་སོགས༌ཡིན། བདག་གིས་སྔོན་ཆད་ཁྱོད་རྣམས་ལ་སྨྲས་མྱོང་ཞིང་ད་ལྟའང་སྨྲ་བར་བྱ༌སྟེ། ལས་ངན་པ་འདི་ལྟ་བུ་བྱེད་པ་རྣམས་ལ་དཀོན་མཆོག་གི་རྒྱལ་སྲིད་ནམ་ཡང་མི་འཐོབ་བོ།།  
\v 22 འོན༌ཀྱང༌། དམ་པའི་ཐུགས་ཉིད་ལས་སྨིན་པའི་འབྲས་བུ་ནི་འདི་ལྟ༌སྟེ། བྱམས་པ༌དང༌། དགའ༌སྤྲོ། ཞི༌བདེ། བཟོད༌བསྲན། སྙིང༌རྗེ། གཤིས་བཟང་། ཡིད་རྟོན་རུང་བ།  
\v 23 ཞི༌འཇམ། རང་ཚོད་ཟིན་པ་བཅས་ཡིན། དོན་འདིའི་ཐད་ལ་བཀའ་ཁྲིམས་ཅི་ཡང་མེད།  
\v 24 མཱ་ཤི་ཀ་ཡེ་ཤུར་གཏོགས་པ་རྣམས་ཀྱིས་ཤ་གཟུགས་ཀྱི་ཕུང་བོ་དང་དེར་འབྲེལ་བའི་འདོད་ཆགས་དེའང་ཤིང་རྒྱ་གྲམ་གྱི་སྟེང་མཉམ་དུ་བརྡབས༌པ་ཡིན།  
\v 25 བདག་ཅག་དམ་པའི་ཐུགས་ཉིད་ལ་བརྟེན་ནས་འཚོ་ཞིང་གཞེས་པ་ཡིན༌ན། ངེས་པར་དམ་པའི་ཐུགས་ཉིད་བཞིན་སྤྱད་པ་སྤྱོད་དགོས་པ༌ལས།  
\v 26 རང་གི་མཚན་སྙན་གྲགས་ཙམ་ལ་བརྩོན་པ༌དང༌། ཕན་ཚུན་ལ་ཁོང་ཁྲོ་སློང༌བ། ཕན་ཚུན་ལ་ཕྲག་དོག་བྱེད་པ་བཅས་ནི་མི་རུང༌ངོ༌།།   
\c 6
\cl ལེའུ་དྲུག༌པ། 
\toc1 ༄༅། །ག་ལད་ཡཱ་པ་རྣམས་ལ་སྤྲིངས་པའི་འཕྲིན་ཡིག 
\toc2 ག་ལད་ཡཱ་པ། 
\s1 ཀུན་ལ་དོན་བཟང་པོ་བྱེད་པར་བསྐུལ་བ།  
\p
\v 1 སྤུན་ཟླ༌རྣམས། ཁྱོད་རྣམས་ལས་མི་ཞིག་གློ་བུར་སྡིག་པའི་དབང་དུ་ལྷུང༌བ་ཡིན་ན། དམ་པའི་ཐུགས་ཉིད་དང་ལྡན་པ་ཁྱོད་རྣམས་ཀྱིས་ཞི་འཇམ་གྱི་སེམས་དང་བཅས་མི་དེ་བསྐྱབ་འོས་སོ།། འོན༌ཀྱང༌། ཁྱོད་རྣམས་བསླུ་བྲིད་ཀྱི་དབང་དུ་མི་ལྷུང་བའི་ཕྱིར་རང་གིས་ཀྱང་སེམས་ཆུང་བྱ་འོས།  
\v 2 ཁྱོད་རྣམས་ཀྱིས་ཕན་ཚུན་ལ་སྡུག་གི་ཁུར་པོ་མཉམ་ཁུར་བྱེད་དགོས༌ཏེ། འདི་ལྟར་བྱས་ན། ད་གཟོད་སྐྱབས་མགོན་མཱ་ཤི་ཀའི་བཀའ་དེ་བསྒྲུབས་པ་ཡིན།  
\v 3 གལ༌ཏེ། མི་ཞིག་ཅི་ཡང་མིན་ནའང་རང་ཉིད་ཆེན་པོར་རློམ་ན། དེ་ནི་རང་མགོ་རང་གིས་གཡོག༌པ་ཡིན།  
\v 4 ཡང་མི་སུ་ཞིག་ཡིན་རུང་རང་གི་བྱ་སྤྱོད་ལ་ཞིབ་བཤེར་བྱ་དགོས༌ཏེ། ལས་བཟང་པོ་བསྒྲུབས་ན་རང་གི་ཡིད་ཚིམ་པར་འགྱུར༌ཡང༌། དེ་ནི་མི་གཞན་གྱི་བྱ་སྤྱོད་ལ་བསྡུར་མི་དགོས་སོ།།  
\v 5 ཅིའི་ཕྱིར་ཞེ་ན། མི་ཀུན་གྱིས་རང་གི་ཁུར་པོ་རང་གིས་འཁུར་དགོས་པའི་ཕྱིར༌རོ།།   
\p
\v 6 ཆོས་སློབ་མཁན་གྱིས་ཆོས་འཆད་མཁན་གྱི་སློབ་དཔོན་ལ་གང་མཁོ་བའི་རྒྱུ་ནོམ་པ་ཐམས་ཅད་འབུལ་དགོས་སོ།།  
\v 7 རང་མགོ་རང་གིས་གཡོག་མི༌རུང༌། དཀོན་མཆོག་ལ་འཕྱ་དམོད་བྱ་མི༌རུང༌། རྒྱུ་མཚན་ནི་མིས་ས་བོན་གང་ཞིག་བཏབ་ན་འབྲས་བུའང་དེ་འབྱུང་བའི་ཕྱིར༌རོ།།  
\v 8 སུ་ཞིག་གིས་ཤ་གཟུགས་ཀྱི་ཕུང་བོ་ལ་བསྟུན་ནས་ས་བོན་བཏབ་ན། ཤ་གཟུགས་ཀྱི་ཕུང་བོ་ལས་འཇིག་པའི་འབྲས་བུ་འབྱུང༌ལ། སུ་ཞིག་གིས་དམ་པའི་ཐུགས་ཉིད་ལ་བསྟུན་ནས་ས་བོན་བཏབ་ན། དམ་པའི་ཐུགས་ཉིད་ལས་མཐའ་མེད་པའི་ཚེ་སྲོག་འཐོབ་ངེས༌སོ༎  
\v 9 བདག་ཅག་གིས་དོན་བཟང་པོ་གང་ཞིག་བྱེད་ནའང་ཡིད་ཕམ་མི་རུང༌སྟེ། ཡིད་མ་ཕམ་ན་དུས་གང་ཞིག་སླེབས་པ་དང་འབྲས་བུ་དེའང་ལེན་ཐུབ།  
\v 10 དེའི༌ཕྱིར། ད་ལྟ་བདག་ཅག་ལ་གོ་སྐབས་བྱུང༌ན་མི་ཐམས་ཅད་ལ་ལས་བཟང་པོ་བྱེད་དགོས༌པ་དང༌། ནང་སྒོས་སུ་དད་ལྡན་ཁྱིམ་མི་རྣམས་ལ་ལྷག་པར་ལས་བཟང་པོ་བྱེད་དགོས༌སོ།།   
\s1 མི་གསར་པ་ཞིག་ཡིན་པའི༌སྐོར།  
\p
\v 11 བདག་གིས་དངོས་སུ་བྲིས་པའི་ཡི་གེ་ཆེན་པོ་འདིར་ཁྱོད་རྣམས་ཀྱིས་ལྟོས༌ཤིག  
\v 12 ཡང་སྐྱབས་མགོན་མཱ་ཤི་ཀའི་ཤིང་རྒྱ་གྲམ་གྱི་དོན་དེ་ལས་རང་རང་ལ་གནོད་འཚེ་ཐེབས་པར་འཇིགས་པའི་ཕྱིར། མིའི་ཕྱི་ཚུགས་འདྲ་ཆགས་པོར་བཅོས་པ་དག་གིས་ཁྱོད་རྣམས་ལ་མཚན་སྐྱི་གཅོད་དགོས་པར་ནན་གྱིས་བསྐུལ་ལོ༎  
\v 13 མཚན་སྐྱི་བཅད་ཟིན་པའི་མི་དེ་དག་རང་གིས་བཀའ་ཁྲིམས་མི་སྲུང༌ནའང༌། ཁྱོད་ཅག་གི་ཤ་ཁྲག་གི་ཕུང་བོར་བརྟེན་ནས་ཁ་ཕོ་བཤད་པའི༌ཕྱིར། ཁྱོད་རྣམས་ལ་མཚན་སྐྱི་གཅོད་པར་རེ་བ་བྱེད་དོ།།  
\v 14 འོན༌ཀྱང༌། བདག་གིས་བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཤིང་རྒྱ་གྲམ་སྐོར་ལ་བསྟོད་བསྔགས་བརྗོད་པ་ལས་གཞན་འཆད་པར་མི་འགྱུར་བར་སྨོན། ཤིང་རྒྱ་གྲམ་གྱི་དབང་གིས། བདག་ལ་མཚོན་ན་འཇིག་རྟེན་འདི་ནི་སྔར་ནས་ཤིང་རྒྱ་གྲམ་གྱི་སྟེང་དུ་བརྡབས་ཟིན། འཇིག་རྟེན་ལ་མཚོན་ན་ང་རང་ཡང་སྔར་ནས་ཤིང་རྒྱ་གྲམ་གྱི་སྟེང་དུ་བརྡབས་ཟིན།  
\v 15 མཚན་སྐྱི་གཅོད་མིན་ལ་སྙིང་པོ་ཅི་ཡང་མེད༌དེ། གལ་ཆེ་བ་ནི་གསར་དུ་བསྐྲུན་པའི་མི་ཞིག་ཡིན་པ་དེའོ།།  
\v 16 གནས་ལུགས་དེ་བཞིན་དུ་སྒྲུབ་མཁན་རྣམས་དང་དཀོན་མཆོག་གི་ཡེས་ར་ཨེལ་པ་རྣམས་ལ་ཞི་བདེ་དང་ཐུགས་རྗེ་འཐོབ་པར༌སྨོན།   
\p
\v 17 བདག་གི་ལུས་སྟེང་དུ་སྐྱབས་མགོན་ཡེ་ཤུའི་རྟགས་མཚན་\f + \ft འདིའི་དོན་ནི་སྐུ་ཚབ་པ་ཕོལ་ལོལ་གྱིས་སྐྱབས་མགོན་ཡེ་ཤུ་ལ་དད་པ་བྱས་ཤིང་ཁོང་གི་འཕྲིན་བཟང་སྤེལ་བའི་དུས་སུ་དད་པ་མེད་པ་རྣམས་ཀྱིས་ཁོང་ལ་གཅར་རྡུང་བྱས་ཏེ་སྡུག་བསྔལ་མང་དུ་མྱངས་ཤིང་ལུས་སྟེང་དུ་རྨ་ཤུལ་ཡོད་པ་དེ་བསྟན་པ་ཡིན། \f*ཡོད་པས། དུས་ད་ནས༌བཟུང༌། ཁྱོད་རྣམས་ཀྱིས་མི་སུ་ལའང་བདག་ལ་བར་ཆད་བཟོ་རུ་མ་འཇུག་ཅིག།   
\p
\v 18 སྤུན་ཟླ༌རྣམས། བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་ནམ་ཡང་ཁྱོད་ཅག་གི་སེམས་སུ་གནས་པར༌སྨོན། །ཨ༌མེན།། །།