\id EXO – NTB 
\h ཨེ་ཅིབ་ནས་ཐོན་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\mt1 ༄༅། །ཨེ་ཅིབ་ནས་ཐོན་པའི་མདོ།  
\imt1 ཨེ་ཅིབ་ནས་ཐོན་པའི་མདོ་ཞེས་བྱ་བའི་ངོ་སྤྲོད་མདོར་བསྡུས།  
\is1 ཁ་བྱང་དང་ལོ་རྒྱུས་རྒྱབ་ལྗོངས།  
\ipi ཨེ་ཅིབ་ནས་ཐོན་པ་ཞེས་པའི་གཞུང་འདིར་ཞལ་ཆད་རྙིང་པའི་ཆེས་རླབས་ཆེ་བ་དང་ངོ་མཚར་བའི་བྱ་བ་སྟེ། ཡེས་ར་ཨེལ་པ་རྣམས་བྲན་གཡོག་ནས་བསྐྱབས་ཤིང་ཨེ་ཅིབ་ཡུལ་ནས་ཕྱི་རུ་ཇི་ལྟར་ཐོན་པའི་ལོ་རྒྱུས་ཡི་གེར་བཀོད་ཡོད། དེ་ཡང་ཡེས་ར་ཨེལ་པའི་ལོ་རྒྱུས་ནི་འཇིག་རྟེན་ཁམས་བཀོད་པའི་མདོ་ནས་གསུངས་པ་ལྟར་ཨབ་ར་ཧམ་ནས་འགོ་བརྩམས་ཡོད། ཨེ་ཅིབ་ནས་ཐོན་པའི་གཞུང་འདིར་རི་བོ་སི་ནཱ་རུ་མོ་ཤེ་ལ་གནང་བའི་ཞལ་ཆད་གཞིར་བཞག་སྟེ། ཡེས་ར་ཨེལ་པ་རྣམས་དཀོན་མཆོག་གིས་བདམས་པའི་མི་རིགས་དང་ཁོང་ལ་གཏོགས་པའི་མི་རིགས་ཡིན་པའི་ལོ་རྒྱུས་སྔ་མ་རྣམས་བཀོད་ཡོད། དེ་ཡང་ལོ་རྒྱུས་དེ་དག་གཞུང་འདིའི་ནང་དུ་བརྗོད་པ་འབའ་ཞིག་མ་ཡིན་པར་འཇིག་རྟེན་ཁམས་བཀོད་པའི་མདོ་དང་། ལེ་ཝིའི་ཚུལ་ཁྲིམས་དང་གྲངས་ཀའི་མདོ། བཀའ་ལུང་གི་མདོ་བཅས་ཀྱི་བརྗོད་གཞི་དང་དམ་པོར་འབྲེལ་བའི་ལོ་རྒྱུས་ཀྱི་རྒྱུན་ཞིག་ཡིན།  
\is1 ཡི་གེར་འགོད་མཁན་དང་འགོད་དུས།  
\ipi ཨེ་ཅིབ་ནས་ཐོན་པའི་མདོ་ཡི་ནང་དུ་གསུངས་པ་ལྟར་ན། གཞུང་འདིའི་ནང་གི་གསུང་འགའ་ཤས་ཡི་གེར་འགོད་མཁན་ནི་ལུང་སྟོན་པ་མོ་ཤེ་ཡིན་པ་ཤུགས་ནས་བསྟན་ཡོད། ༼ཨེ་ཅིབ་ནས་ཐོན་པའི་མདོ་ཡི་ལེའུ་བཅུ་བདུན་པའི་ཚིག་རྐང་བཅུ་བཞི་པ་དང་། ལེའུ་ཉེར་བཞི་པའི་ཚིག་རྐང་བཞི་པ། ལེའུ་སོ་བཞི་པའི་ཚིག་རྐང་ཉེར་བདུན་པ་བཅས་སུ་གསལ།༽ ཡང་ཞལ་ཆད་གསར་པའི་ནང་དུ་གཞུང་འདིའི་དོན་ཚན་རྣམས་ལུང་དྲངས་ནས་ཡི་གེར་འགོད་མཁན་མོ་ཤེ་ཡིན་པ་གསལ་པོར་བསྟན་ཡོད་དེ། དཔེར་ན། ༼མཱར་ཀུའི་འཕྲིན་བཟང་གི་ལེའུ་བདུན་པའི་ཚིག་རྐང་བཅུ་པ་དང་། ལེའུ་བཅུ་གཉིས་པའི་ཚིག་རྐང་ཉེར་དྲུག་པ། ལོ་ཀུའི་འཕྲིན་བཟང་གི་ལེའུ་གཉིས་པའི་ཚིག་རྐང་ཉེར་གཉིས་ནས་ཉེར་གསུམ་པ་བཅས་སུ་གསལ།༽ དཔྱད་གཞི་དེ་དག་གཞིར་བཟུང་ནས་དཔག་ན་ཨེ་ཅིབ་ནས་ཐོན་པའི་མདོ་འདི་ཡི་གེར་འགོད་མཁན་གཙོ་བོ་ནི་ལུང་སྟོན་པ་མོ་ཤེ་ཡིན་པར་བདེན་དཔང་རྙེད་ཡོད།  
\ipi གཞན་ཡང་དམ་པའི་གསུང་རབ་ཀྱི་རྒྱལ་རབས་དང་པོའི་ལེའུ་དྲུག་པའི་ཚིག་རྐང་དང་པོ་ལས་གསུངས་པ་ལྟར་ན། ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཐོན་པའི་ལོ་ནི་རྒྱལ་པོ་སོ་ལོ་མོན་གྱིས་ཡེས་ར་ཨེལ་ལ་སྲིད་བསྐྱངས་པའི་ལོ་བཞི་པ་ནས་ཡར་བརྩིས་པའི་480ལོའི་སྔོན་དུ་བྱུང་བ་ཡིན་པར་བརྗོད་ཡོད། རྒྱལ་པོ་སོ་ལོ་མོན་གྱིས་སྲིད་བསྐྱངས་པའི་ལོ་བཞི་པ་ནི་སྤྱི་ལོ་སྔོན་གྱི་966ལོའི་ཡས་མས་ཡིན་ཞེས་བརྗོད་ཡོད་པས། ཨེ་ཅིབ་ཡུལ་ནས་ཐོན་པའི་དོན་དག་དེ་སྤྱི་ལོ་སྔོན་གྱི་1446ལོའི་ཡས་མས་སུ་བྱུང་། དེ་ཡང་ཨེ་ཅིབ་ནས་ཐོན་པའི་མདོ་འདི་ཡི་གེར་བཀོད་པའི་ལོ་ཚིགས་ནི་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཐོན་པའི་རྗེས་ཏེ། སྤྱི་ལོ་སྔོན་གྱི་1446ལོ་དང་ལུང་སྟོན་པ་མོ་ཤེ་སྐུ་མ་གཤེགས་གོང་གི་སྤྱི་ལོ་སྔོན་གྱི་1406ལོའི་བར་ཙམ་ཡིན་པ་རེད།  
\is1 བརྗོད་སྙིང་དང་གསུང་འཕྲིན།  
\ipi ཨེ་ཅིབ་ནས་ཐོན་པའི་མདོ་འདིར་དཀོན་མཆོག་གིས་ཁོང་གི་མཚན་དང་ཁོང་གི་རང་བཞིན། ཁོང་གི་སྐྱོབ་ཐབས། ཁོང་གི་བཀའ་ཁྲིམས། ཁོང་གི་བསྙེན་བཀུར་བཅས་མངོན་པར་མཛད་པ་ལ་དཀོན་མཆོག་གི་རིག་པའི་རྨང་བཏིངས་པར་མ་ཟད། ཞལ་ཆད་རྙིང་པའི་བར་མི་ལ་མོ་ཤེ་བསྐོ་གཞག་མཛད་པ་དང་མོ་ཤེའི་ཕྱག་ལས་རྣམས་ཀྱང་བརྗོད་ཡོད། མཆོད་དཔོན་གྱི་གོ་གནས་ཐོབ་པའི་འགོ་ཇི་ལྟར་ཚུགས་པ་དང་ལུང་སྟོན་པའི་འགན་འཁུར་རྣམས་ངེས་གཏན་གནང་ཞིང་། དེ་ཡང་དཀོན་མཆོག་དང་ཁོང་གི་འབངས་མིའི་བར་བཞག་པའི་གནའ་བོའི་དུས་ཀྱི་ཞལ་ཆད་དེ་ཚུལ་ཇི་ལྟར་སྐྱོང་བའི་ཐབས་གསར་པ་བརྗོད་ཡོད། སྐྱོང་ཚུལ་གསར་པ་དེ་ལ་རི་བོ་སི་ནཱའི་ཞལ་ཆད་ཅེས་བྱའོ། །  
\is1 འཆར་ཟིན།  
\ipi 1. དཀོན་མཆོག་གིས་ཡེས་ར་ཨེལ་པ་རྣམས་བྲན་གཡོག་ལས་སྐྱོབ་པའི་སྟ་གོན་མཛད་པ། ༼1:1-4:31༽  
\ipi 2. ཡེས་ར་ཨེལ་པ་རྣམས་ཨེ་ཅིབ་ཡུལ་གྱི་བྲན་གཡོག་ལས་བསྐྱབས་པའི་སྐོར། ༼5:1-18:27༽  
\ipi ཀ ཨེ་ཅིབ་རྒྱལ་པོ་ཕར་ཨོལ་གྱི་འགོག་རྒོལ་དང་དཀོན་མཆོག་གིས་སེམས་གསོ་གནང་བའི་སྐོར། ༼5:1-6:27༽  
\ipi ཁ། ཨེ་ཅིབ་ལ་བཏང་བའི་ཆག་སྒོ་སྣ་ཚོགས། ༼6:28-12:36༽  
\ipi ག ཨེ་ཅིབ་ནས་ཕྱི་རུ་ཐོན་པ་དང་རི་བོ་སི་ནཱའི་བར་དུ་སླེབས་པའི་སྐོར། ༼12:37-18:27༽  
\ipi 3. རི་བོ་སི་ནཱ་ནས་གནང་བའི་ཞལ་ཆད་ཀྱི་སྐོར། ༼19:1-24:18༽  
\ipi 4. བསྙེན་བཀུར་སྒྲུབ་སའི་གུར་མཆོག ༼25:1-40:38༽  
\c 1
\cl ལེའུ་དང་པོ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 ཡེས་ར་ཨེལ་པ་རྣམས་ལ་གཉའ་གནོན་ཐེབས་པ།  
\p
\v 1 དེ་ཡང་རང་རང་གི་ཁྱིམ་ཚང་དང་བཅས་ཡ་ཀོབ་དང་ལྷན་དུ་ཨེ་ཅིབ་ཡུལ་དུ་འོངས་པའི་ཡེས་ར་ཨེལ་གྱི་བུ་རྣམས་ཀྱི་མིང་ནི་གཤམ་དུ་བཀོད་པ་སྟེ།  
\v 2 རུ་བེན་དང་། སི་མུ་ཨོན། ལེ་ཝི། ཡ་ཧུ་དཱ།  
\v 3 ཡེས་སི་ཀཱར། ཟེ་བུ་ལུན། པེན་ཡཱ་མེན།  
\v 4 དཱན། ནཱབ་ཐ་ལི། གཱ་རྡུ། ཨ་ཤེར་བཅས་སོ། །  
\v 5 ཡ་ཀོབ་ནས་བྱུང་བའི་མི་ཐམས་ཅད་ཀྱི་གྲངས་ཀ་ནི་བསྡོམས་པས་བདུན་ཅུ་ཡོད་ཅིང་། ཡོ་སེབ་སྔར་ནས་ཨེ་ཅིབ་ཡུལ་དུ་ཡོད་པ་ཡིན།  
\v 6 དེ་ནས་ཡོ་སེབ་དང་ཁོའི་སྤུན་ཐམས་ཅད་དང་མི་རབས་དེའི་མི་མཐའ་དག་ཤི་ཟིན་མོད།  
\v 7 འོན་ཀྱང་། ཡེས་ར་ཨེལ་གྱི་བུ་རྣམས་རྒྱུད་དང་ལྡན་པར་གྱུར་ནས་གྲངས་ཀ་ཤིན་ཏུ་མང་པོར་འཕེལ་ཏེ་སྟོབས་ཧ་ཅང་ཆེ་བར་གྱུར་ནས་ཡུལ་གྲུ་དེར་བཀང་ངོ་། །   
\p
\v 8 དེ་ནས་ཡོ་སེབ་ལ་རྒྱུས་མི་མངའ་བའི་རྒྱལ་པོ་གསར་པ་ཞིག་བྱུང་ཞིང་། དེས་ཨེ་ཅིབ་ལ་དབང་བསྒྱུར་པ་དང་།  
\v 9 དེས་རང་གི་འབངས་མི་རྣམས་ལ། ལྟོས་དང་། ཡེས་ར་ཨེལ་པ་རྣམས་ཀྱི་མི་ཚོགས་རང་ཅག་ལས་མང་ཞིང་སྟོབས་ཀྱང་རྒྱས་པས།  
\v 10 ཤོག་དང་། རང་ཅག་གིས་དེ་རྣམས་ལ་གཡོ་སྦྱོར་སྤེལ་བར་བྱའོ། །དེ་ལྟར་མ་བྱས་ན། ཁོ་རྣམས་ད་དུང་འཕེལ་བར་འགྱུར་ཞིང་། ཕྱིས་སུ་དམག་འཁྲུག་འདྲ་བྱུང་ན་དེ་དག་གིས་དགྲ་བོར་གྲོགས་བགྱིས་ནས་རང་ཅག་ལ་རྒོལ་ཏེ་ཡུལ་འདི་དང་འབྲལ་སྲིད་ཅེས་སྨྲས་སོ། །  
\v 11 དེའི་ཕྱིར། ཨེ་ཅིབ་པ་རྣམས་ཀྱིས་ཁོ་རྣམས་ལ་ཁྲེས་པོ་ལྕི་མོ་བཀལ་ནས་དྲག་གནོན་ཆེན་པོ་བྱ་ཆེད་ལས་རྒྱབ་པ་རྣམས་བསྐོས་ཤིང་། ཁོ་རྣམས་ཀྱིས་ཕཱར་ཨོལ་ལ་བང་མཛོད་གྲོང་ཁྱེར་ཕི་ཐོམ་དང་རཱ་ཨམ་སེའེ་གཉིས་བརྩིགས་སོ། །  
\v 12 འོན་ཀྱང་དེ་རྣམས་ལ་ཇི་ལྟར་དྲག་གནོན་བྱས་ནའང་དེ་ལས་མང་པོར་འཕེལ་ཞིང་ཕྱོགས་ཀུན་ཏུ་ཁྱབ་པས། ཨེ་ཅིབ་པ་རྣམས་ཡེས་ར་ཨེལ་པའི་རྐྱེན་གྱིས་འཇིགས་པ་དང་།  
\v 13 ཡེས་ར་ཨེལ་པ་རྣམས་ལ་བཙན་བཀོལ་ནས་ལས་ཀ་བྱེད་དུ་བཅུག་སྟེ།  
\v 14 སོ་ཕག་དང་འཇིམ་པ་བཟོ་བའི་ལས་ཀ་ལྕི་མོ་དང་། ཞིང་ལས་སྣ་ཚོགས་བྱེད་དུ་བཅུག་ནས་ཁོ་རྣམས་ཀྱི་འཚོ་བ་སྡུག་ལ་སྦྱར་ཅིང་། ལས་ཀ་ཐམས་ཅད་ཀྱི་ཐད་ནས་ཁོ་རྣམས་ལ་གདུག་རྩུབ་སྤྱད་དོ། །   
\p
\v 15 དེ་ནས་ཨེ་ཅིབ་ཀྱི་རྒྱལ་པོས་ཨིབ་རི་པའི་སྐྱེ་གཡོག་མ་ཤིབ་རཱ་དང་ཕུ་ཨ་བྱ་བ་གཉིས་ལ་འདི་ལྟར།  
\v 16 ཁྱོད་ཅག་གིས་ཨིབ་རི་པའི་བུད་མེད་རྣམས་ལ་སྐྱེ་གཡོག་བྱེད་པའི་སྐབས་སུ་ཁོ་མོ་ཚོས་བཙའ་ཁྲིའི་སྟེང་ཕྲུ་གུ་བཙའ་དུས་ལྟོས་དང་། བུ་ཡིན་ན་སོད་ཅིག བུ་མོ་ཡིན་ན་འཚོ་བས་ཆོག་ཅེས་བཀའ་བསྒོས།  
\v 17 འོན་ཀྱང་སྐྱེ་གཡོག་མ་རྣམས་དཀོན་མཆོག་ལ་གུས་ཤིང་འཇིགས་པས། ཨེ་ཅིབ་ཀྱི་རྒྱལ་པོས་གནང་བའི་བཀའ་བཞིན་དུ་མ་བྱས་པར་བུ་རྣམས་ཀྱི་སྲོག་བསྐྱབས་པ་དང་།  
\v 18 ཨེ་ཅིབ་ཀྱི་རྒྱལ་པོས་སྐྱེ་གཡོག་མ་རྣམས་བོས་ནས་འདི་ལྟར་དྲིས་པ་སྟེ། ཁྱོད་ཅག་གིས་བུ་རྣམས་ཀྱི་སྲོག་བསྐྱབས་པ་ཅི་ཡིན་ནམ་ཞེས་པ་ན།  
\v 19 སྐྱེ་གཡོག་མ་རྣམས་ཀྱིས་ཕཱར་ཨོལ་ལ། ཨིབ་རི་པའི་བུད་མེད་དང་ཨེ་ཅིབ་ཀྱི་བུད་མེད་རྣམས་མི་འདྲ་སྟེ། ཨིབ་རི་པའི་བུད་མེད་ཀྱི་ལུས་སྟོབས་ཆེ་བས་སྐྱེ་གཡོག་མ་ད་དུང་མ་སླེབས་གོང་དུ་བཙས་ཚར་ཞེས་ཞུས་སོ། །  
\v 20 དེའི་ཕྱིར། དཀོན་མཆོག་གིས་སྐྱེ་གཡོག་མ་རྣམས་ལ་བཀའ་དྲིན་མཛད་པ་དང་། ཡེས་ར་ཨེལ་གྱི་མི་རྣམས་ཀྱང་འཕེལ་ཞིང་ཤིན་ཏུ་དར་བར་གྱུར།  
\v 21 སྐྱེ་གཡོག་མ་རྣམས་དཀོན་མཆོག་ལ་གུས་ཤིང་འཇིགས་པས་ཁོང་གིས་ཁོ་མོ་རྣམས་ལ་ཁྱིམ་གཞིས་མཛད་དོ། །  
\v 22 དེ་ནས་ཕཱར་ཨོལ་གྱིས་རང་གི་འབངས་མི་རྣམས་ལ་འདི་ལྟར། ཨིབ་རི་པའི་བུ་གསར་སྐྱེས་རེ་རེ་ནཱ་ཡོལ་གཙང་པོར་གཡུགས་དང་། བུ་མོ་རྣམས་འཚོ་རུ་ཆུག་ཅེས་བཀའ་བབས་སོ། །   
\c 2
\cl ལེའུ་གཉིས་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 ལུང་སྟོན་པ་མོ་ཤེ་འཁྲུངས་པ།  
\p
\v 1 དེ་ཡང་ལེ་ཝིའི་རྒྱུད་ཀྱི་མི་ཞིག་སོང་ནས་ཚོ་པ་དེའི་བུ་མོ་ཞིག་ཆུང་མར་བླངས་པ་དང་།  
\v 2 བུ་མོ་དེ་མངལ་དང་ལྡན་པར་གྱུར་ནས་བུ་ཞིག་སྐྱེས་ཤིང་། རང་གི་ཕྲུ་གུ་མཛེས་ཤིང་ལྟ་ན་སྡུག་པ་མཐོང་ནས་ཟླ་བ་གསུམ་ལ་སྦས་ནས་བཞག  
\v 3 ཕྱིས་སུ་སྦས་ཐབས་མ་བྱུང་བས་ཁོ་མོས་པ་པི་རཱའི་\f + \ft འདིར་པ་པི་རཱ་ཞེས་པ་ནི་འདམ་རྩྭ་པ་པི་རཱ་ལ་གོ་དགོས་པ་ཡིན།\f*གཟེབ་ཅིག་བླངས་ཏེ་རྒྱ་སྐྱེགས་དང་ཐང་ཆུ་བསྐུས་ཤིང་། ཕྲུ་གུ་དེའི་ནང་དུ་བཞག་ནས་ནཱ་ཡོལ་གཙང་པོ་འགྲམ་གྱི་འདམ་རྩྭའི་གསེབ་ཏུ་བཞག་པ་དང་།  
\v 4 བུ་དེའི་གཅེན་མོས་ཁོ་ལ་ཅི་ཞིག་འབྱུང་བར་བལྟ་བའི་ཕྱིར་རྒྱང་རིང་དུ་ལངས་བསྡད་དོ། །   
\p
\v 5 དེ་ནས་ཕཱར་ཨོལ་གྱི་སྲས་མོ་ནཱ་ཡོལ་གཙང་པོའི་འགྲམ་ལ་ཁྲུས་བྱེད་དུ་འོངས་པ་དང་། ཁོ་མོའི་གཡོག་མོ་རྣམས་ཆུ་ཁར་སོང་བ་ལ། སྲས་མོས་འདམ་རྩྭའི་གསེབ་ལ་ཡོད་པའི་གཟེབ་དེ་མཐོང་ནས་གཡོག་མོ་ཞིག་ལེན་དུ་བཏང་།  
\v 6 ཁོ་མོས་གཟེབ་ཀྱི་ཁ་ཕྱེས་པ་ན་བུ་ཞིག་ཡོད་པ་མཐོང་ཞིང་། ལྟོས་དང་། བུ་དེ་ངུ་བཞིན་ཡོད་པར་སྙིང་རྗེ་སྐྱེས་ཏེ་འདི་ལྟར་སྨྲས་པ། འདི་ནི་ཨིབ་རི་པའི་ཕྲུ་གུ་ཞིག་ཡིན་འདུག་ཅེས་པའོ། །  
\v 7 སྐབས་དེར། ཕྲུ་གུའི་གཅེན་མོས་ཕཱར་ཨོལ་གྱི་སྲས་མོ་ལ། ང་རང་སོང་སྟེ་ཁྱེད་ལ་ཨིབ་རི་པའི་བུད་མེད་རྣམས་ལས་ཉེ་བའི་མ་མ་ཞིག་བོས་ཏེ་བུ་འདིར་ནུ་མ་བསྣུན་པར་བྱའམ་ཞེས་ཞུས་པ་ལ།  
\v 8 ཕཱར་ཨོལ་གྱི་སྲས་མོས་ཁྱོད་སོང་ཞིག་ཅེས་བཀའ་གནང་བ་དང་། བུ་མོ་སོང་ནས་ཕྲུ་གུའི་ཨ་མ་བོས་ཡོང་ཞིང་།  
\v 9 ཕཱར་ཨོལ་གྱི་སྲས་མོས་ཁོ་མོར། ཁྱོད་ཀྱིས་ཕྲུ་གུ་འདི་ཁྱེར་སོང་སྟེ་བདག་གི་དོན་དུ་ཁོ་ལ་ནུ་མ་སྣུན་དང་། ངས་ཁྱོད་ལ་གླ་ཆ་སྟེར་ཞེས་སྨྲས་པ་ན། ཁོ་མོས་ཕྲུ་གུ་ཁྱེར་ནས་ནུ་མ་བསྣུན།  
\v 10 དེ་ནས་ཕྲུ་གུ་ནར་སོན་པ་ན་བུད་མེད་ཀྱིས་བུ་དེ་ཕཱར་ཨོལ་གྱི་སྲས་མོའི་རྩར་ཁྲིད་ནས་དེའི་གསོས་བུར་གྱུར་ཅིང་། སྲས་མོས་བྱིས་པའི་མིང་ལ་མོ་ཤེ་ཞེས་བཏགས་པ་སྟེ། བདག་གིས་ཁོ་རང་ཆུ་ལས་བླངས་པའི་ཕྱིར་ཡིན་ཞེས་སྨྲས་སོ། །   
\s1 མོ་ཤེ་ཨེ་ཅིབ་ཡུལ་ནས་བྲོས་པ།  
\p
\v 11 དེའི་རྗེས་སུ་མོ་ཤེ་ལང་ཚོ་དར་ལ་བབས་པ་ན། ཕྱི་རོལ་ཏུ་རང་གི་སྤུན་ཟླ་རྣམས་ཀྱི་གམ་དུ་སོང་བ་དང་། དེ་དག་གིས་དཀའ་སྡུག་མྱོང་བཞིན་ཡོད་པ་མཐོང་ཞིང་། ཨེ་ཅིབ་པ་ཞིག་གིས་ཁོའི་སྤུན་ཟླ་ཨིབ་རི་པ་ཞིག་ལ་གཅར་རྡུང་བྱེད་པ་མཐོང་ནས།  
\v 12 མོ་ཤེ་ཡིས་གཡས་གཡོན་ལ་བལྟས་ཤིང་སུ་ཡང་མ་མཐོང་བས། ཁོས་ཨེ་ཅིབ་པ་དེ་བསད་ནས་བྱེ་མའི་ནང་དུ་སྦས།  
\v 13 དེའི་ཕྱི་ཉིན་ཡང་ཁོ་རང་ཕྱི་རོལ་ཏུ་སོང་བ་ན། ལྟོས་དང་། ཨིབ་རི་པ་གཉིས་འཛིང་རེས་བྱེད་ཀྱིན་འདུག་པ་མཐོང་སྟེ། བརྙས་བཅོས་བྱེད་མཁན་དེ་ལ། ཁྱོད་ཀྱིས་ཅིའི་ཕྱིར་རང་གི་སྤུན་ཟླར་རྡུང་ངམ་ཞེས་སྨྲས་པ་ལ།  
\v 14 མི་དེ་ན་རེ། སུས་ཁྱོད་རང་ངེད་ཅག་གི་འགོ་དཔོན་ནམ་ཁྲིམས་དཔོན་དུ་བསྐོས་པ་ཡིན་ནམ། ཁྱོད་ཀྱིས་ཨེ་ཅིབ་པ་དེ་བཞིན་དུ་ང་རང་ཡང་གསོད་འདོད་དམ་ཞེས་སྨྲས་པས། མོ་ཤེ་འཇིགས་ནས་དོན་དེ་མི་གཞན་གྱིས་ཀྱང་དངོས་གནས་ཤེས་པ་འདྲ་སྙམ་མོ། །   
\p
\v 15 དེ་ནས་ཕཱར་ཨོལ་གྱིས་དོན་དེ་ཐོས་ནས་མོ་ཤེ་གསོད་པར་བསམས་མོད། འོན་ཀྱང་མོ་ཤེ་ནི་ཕཱར་ཨོལ་ལས་བྲོས་ཏེ་མིད༌ཡཱན་ཡུལ་དུ་སོང་ནས་བསྡད་པ་དང་།  
\v 16 ཉིན་ཞིག་ཁོ་རང་ཁྲོན་པ་ཞིག་གི་གམ་དུ་སྡོད་དུས། མིད༌ཡཱན་ཡུལ་གྱི་མཆོད་དཔོན་ལ་བུ་མོ་བདུན་ཡོད་པ་རྣམས་ཕ་ཡི་ར་ལུག་གི་ཁྱུ་ལ་ཆུ་ལྡུད་པའི་ཕྱིར་ཆུ་ལེན་དུ་ཡོང་ཞིང་གཞོང་པ་རྣམས་ཆུས་གང་བར་བྱས།  
\v 17 དུས་དེར་ལུག་རྫི་རྣམས་ཡོང་སྟེ་ཁོ་མོ་རྣམས་བདས། འོན་ཀྱང༌། མོ་ཤེ་ལངས་ནས་ཁོ་མོ་རྣམས་ལ་རོགས་བྱས་ཏེ་ཁོ་ཚོའི་ར་ལུག་གི་ཁྱུ་ལ་ཆུ་བླུད་དོ། །  
\v 18 དེ་ནས་ཁོ་མོ་རྣམས་ཕ་རུའུ་ཨེལ་གྱི་གམ་དུ་འོངས་པ་ན། ཕ་ན་རེ། དེ་རིང་ཁྱོད་རྣམས་འདི་ཙམ་མགྱོགས་མྱུར་ངང་སླེབས་པའི་རྒྱུ་མཚན་ཅི་ཞེས་དྲིས་པ་ལ།  
\v 19 ཁོ་མོ་རྣམས་ན་རེ། ཨེ་ཅིབ་པ་ཞིག་གིས་ངེད་རྣམས་རྫི་བོ་སྐོར་ཞིག་གི་ལག་འོག་ནས་བསྐྱབས་པར་མ་ཟད། ད་དུང་ཆུ་བླངས་ནས་ར་ལུག་རྣམས་ལ་བླུད་བྱུང་ཞེས་སྨྲས།  
\v 20 དེ་ནས་ཕ་ཡིས་བུ་མོ་རྣམས་ལ། མི་དེ་གང་དུ་ཡོད་དམ། ཅིའི་ཕྱིར་ཁོ་རང་བསྐྱུར་བ་ཡིན་ནམ། ཁྱོད་རྣམས་སོང་ནས་ཁོ་རང་ཟས་ལ་རོལ་བར་བོས་ཤིག་ཅེས་སྨྲས།  
\v 21 མོ་ཤེ་ནི་མི་དེ་དང་མཉམ་དུ་གནས་པར་དགའ་ཞིང་། མི་དེས་ཀྱང་རང་གི་བུ་མོ་ཚིབ་ཕའོ་རཱ་བྱ་བ་ཁོ་ལ་ཆུང་མར་གནང་བ་དང་།  
\v 22 ཚིབ་ཕའོ་རཱ་ལ་བུ་ཞིག་སྐྱེས་ཤིང་། མོ་ཤེ་ཡིས་བྱིས་པའི་མིང་ལ་གེར་ཤོམ་ཞེས་བཏགས་པ་སྟེ། ང་རང་ཡུལ་གཞན་དུ་བྱེས་པར་གྱུར་ཞེས་སྨྲས་པའི་ཕྱིར་རོ། །   
\p
\v 23 དེ་ནས་བགྲང་བྱ་མང་པོ་འདས་པ་ན་ཨེ་ཅིབ་ཀྱི་རྒྱལ་པོ་སྐུ་གྲོངས་ཤིང་། ཡེས་ར་ཨེལ་པ་རྣམས་དཀའ་སྡུག་གིས་མནར་ཏེ་ཤུགས་རིང་འཐེན་ནས་ངུ་འབོད་བྱས་པ་དང་། ཁོ་རྣམས་ཀྱི་སྡུག་ཡུས་ཡར་དཀོན་མཆོག་གི་དྲུང་དུ་སླེབས།  
\v 24 དཀོན་མཆོག་གིས་ཁོ་རྣམས་ཀྱི་སྡུག་ཡུས་གསན་ཅིང་། ཨབ་ར་ཧམ་དང་། ཨི་སཱག ཡ་ཀོབ་བཅས་ལ་བཞག་པའི་ཞལ་ཆད་ཐུགས་སུ་དྲན།  
\v 25 དཀོན་མཆོག་གིས་ཡེས་ར་ཨེལ་པ་རྣམས་ལ་གཟིགས་སྐྱོང་མཛད་ཅིང་ཁོང་གིས་དེ་རྣམས་ཀྱི་དཀའ་སྡུག་ཀྱང་མཁྱེན་ཏོ། །   
\c 3
\cl ལེའུ་གསུམ་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 ལུང་སྟོན་པ་མོ་ཤེ་དང་མེ་འབར་བའི་ཚེར་ཕུང་།  
\p
\v 1 དེ་ཡང་མོ་ཤེ་ཡིས་མིད༌ཡཱན་ཡུལ་གྱི་མཆོད་དཔོན་ཏེ་རང་གི་སྒྱུག་པོ་ཡི་ཏྲོའི་ར་ལུག་གི་ཁྱུ་འཚོས་པ་དང་། ཉིན་ཞིག་ལ། ར་ལུག་གི་ཁྱུ་དེད་ནས་ཡུལ་དབེན་པའི་ཕ་རོལ་ཏུ་ཆས་ཤིང་། དཀོན་མཆོག་གི་རི་བོ་སྟེ་ཧོ་རེབ་ཅེས་པར་ཕྱིན།  
\v 2 དུས་དེར་དཀོན་མཆོག་ཡ་ཝཱེའི་ཕོ་ཉ་ཞིག་ཚེར་ཕུང་དཀྱིལ་གྱི་མེ་ལྕེའི་ཁྲོད་ནས་མོ་ཤེ་ལ་མངོན་པར་གྱུར་ཏོ། །མོ་ཤེ་ཡིས་བལྟས་པ་ན། ཚེར་ཕུང་མེ་ལ་འབར་བཞིན་ཡོད་ནའང་མེས་འཚིག་པར་མ་གྱུར་པ་མཐོང་བས།  
\v 3 མོ་ཤེའི་སེམས་ལ་ང་རང་ངོ་མཚཪ་ཆེན་པོ་དེ་ལ་བལྟ་རུ་འགྲོ་དགོས། ཚེར་ཕུང་འདི་མེ་ཡིས་མི་འཚིག་པའི་རྒྱུ་མཚན་ཅི་ཡིན་ནམ་སྙམ་མོ། །  
\v 4 དཀོན་མཆོག་ཡ་ཝཱེས་ཁོ་རང་ཚེར་ཕུང་ལ་བལྟ་རུ་འགྲོ་བ་གཟིགས་ཏེ། ཚེར་ཕུང་གི་དཀྱིལ་ནས་མོ་ཤེ་མོ་ཤེ་ཞེས་ཞལ་འབོད་གནང་བ་ལ། མོ་ཤེ་ཡིས་ང་རང་འདི་རུ་ཡོད་ཅེས་ཞུས།  
\v 5 དེ་ནས་ཁོང་གིས་འདི་སྐད་དུ། ཉེ་སར་མ་འོང་ཞིག ཁྱོད་རང་ལངས་ནས་འདུག་ས་འདི་ནི་གནས་དམ་པ་ཡིན་པས། ཁྱོད་ཀྱིས་བསིལ་ལྷམ་ཕུད་ཅིག་ཅེས་དང་།  
\v 6 ཡང་འདི་སྐད་དུ། བདག་ནི་ཁྱོད་ཀྱི་ཕ་ཡི་དཀོན་མཆོག་དང་། ཨབ་ར་ཧམ་གྱི་དཀོན་མཆོག་དང་། ཨི་སཱག་གི་དཀོན་མཆོག་དང་། ཡ་ཀོབ་ཀྱི་དཀོན་མཆོག་ཡིན་ཞེས་གསུངས་པ་ལ། མོ་ཤེ་ཡིས་དཀོན་མཆོག་ལ་བལྟ་བར་འཇིགས་པས་རང་གི་ངོ་གདོང་བཀབ།  
\v 7 དེ་ནས་དཀོན་མཆོག་ཡ་ཝཱེས་འདི་སྐད་དུ། བདག་གི་འབངས་མི་རྣམས་ཀྱིས་ཨེ་ཅིབ་ཡུལ་དུ་མྱངས་པའི་དཀའ་སྡུག་ནི་བདག་གིས་དངོས་སུ་མཐོང་ཞིང་། ཁོ་རྣམས་ཀྱིས་ལས་རྒྱབ་པའི་གཉའ་གནོན་དྲག་པོའི་རྐྱེན་གྱིས་སྡུག་ཡུས་བཏོན་པའང་བདག་གིས་ཐོས་ལ། བདག་གིས་སྔར་ནས་དེ་རྣམས་ཀྱི་སྡུག་བསྔལ་ཤེས་པ་ཡིན།  
\v 8 ད་ནི་བདག་མར་འོངས་ནས་ཁོ་རྣམས་ཨེ་ཅིབ་པ་རྣམས་ཀྱི་ལག་འོག་ནས་ཐར་བར་བྱེད་ཅིང་། ཡུལ་དེ་ནས་ཡར་ཁྲིད་དེ། མཛེས་ཤིང་ཡངས་ལ་འོ་མ་དང་སྦྲང་རྩི་བཞུར་བའི་ཡུལ་ཏེ། ཀ་ན་ཨན་པ་དང་། ཧེད་པ་དང་། ཨེ་མོར་པ་དང་། ཕེ་རེ་ཟི་པ་དང་། ཧེ་བི་པ་དང་། ཡེ་བུ་སི་པ་བཅས་ཀྱི་གནས་སུ་བསླེབ་པར་བྱའོ། །  
\v 9 ལྟོས་དང་། ཡེས་ར་ཨེལ་པ་རྣམས་ཀྱི་སྡུག་ཡུས་བདག་གི་རྣ་བར་སླེབས་ཤིང་། ངས་ཨེ་ཅིབ་པ་རྣམས་ཀྱིས་ཁོ་རྣམས་ལ་ཇི་ལྟར་བརྙས་བཅོས་བྱས་པའང་མཐོང་བྱུང་བས།  
\v 10 ད་ནི་བདག་གིས་ཁྱོད་རང་ཕཱར་ཨོལ་གྱི་མདུན་དུ་མངགས་པར་བྱ་སྟེ། ཁྱོད་ནི་བདག་གི་འབངས་མི་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཕྱིར་འཁྲིད་དུ་སོང་ཞིག་ཅེས་བཀའ་གནང་ངོ་། །   
\p
\v 11 འོན་ཀྱང་མོ་ཤེ་ཡིས་དཀོན་མཆོག་ལ། ང་ནི་སུ་ཡིན་ནམ། ཕཱར་ཨོལ་དང་ངོ་འཕྲད་དུ་སོང་ནས་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཕྱིར་འཁྲིད་འོང་ནུས་སམ་ཞེས་ཞུས་པ་ལ།  
\v 12 དཀོན་མཆོག་གིས་འདི་སྐད་དུ། ང་རང་ཁྱོད་དང་མཉམ་དུ་འགྲོགས་ངེས་ཤིང་། ཁྱོད་ཀྱིས་འབངས་མི་རྣམས་ཨེ་ཅིབ་ཡུལ་ནས་ཕྱིར་ཁྲིད་འོངས་པའི་རྗེས་སུ། ཁྱོད་རྣམས་ཀྱིས་རི་བོ་འདི་ནས་བདག་ལ་བསྙེན་བཀུར་བྱེད་ངེས་ལ། འདི་ནི་ངས་ཁྱོད་རང་མངགས་པའི་དཔང་རྟགས་ཡིན་ཞེས་བཀའ་གནང་བ་དང་།  
\v 13 ཡང་མོ་ཤེ་ཡིས་དཀོན་མཆོག་ལ། ང་རང་ཡེས་ར་ཨེལ་པ་རྣམས་ཀྱི་གམ་དུ་སོང་ནས་དེ་དག་ལ། ཁྱོད་ཅག་གི་ཕ་མེས་ཡང་མེས་ཀྱི་དཀོན་མཆོག་གིས་ང་རང་ཁྱོད་ཅག་གི་གམ་དུ་མངགས་པ་ཡིན་ཞེས་བརྗོད་པར་བྱ་ཞིང་། གལ་ཏེ་ཁོ་རྣམས་ཀྱིས་བདག་ལ་ཁོང་གི་མཚན་ལ་ཅི་ཟེར་ཞེས་དྲིས་ན། ངས་དེ་རྣམས་ལ་ཅི་ཟེར་རམ་ཞེས་ཞུས་པ་ན།  
\v 14 ཡང་དཀོན་མཆོག་གིས་མོ་ཤེ་ལ། བདག་ནི་གཏན་དུ་གནས་པ་དེ་ཉིད་ཡིན་ཞེས་གསུངས་པ་དང་། ཡང་འདི་སྐད་དུ། ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྨྲ་བར་བྱ་སྟེ། གཏན་དུ་བཞུགས་པ་ཁོང་ཉིད་ཀྱིས་ང་རང་ཁྱོད་ཅག་གི་གམ་དུ་མངགས་པ་ཡིན་སྨྲོས་ཤིག་ཅེས་གསུངས་ཤིང་།  
\v 15 ཡང་དཀོན་མཆོག་གིས་མོ་ཤེ་ལ། ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྨྲོས་དང་། ཁྱོད་ཅག་གི་ཕ་མེས་ཡང་མེས་ཀྱི་དཀོན་མཆོག་ཡ་ཝཱེ་སྟེ། ཨབ་ར་ཧམ་གྱི་དཀོན་མཆོག་དང་། ཨི་སཱག་གི་དཀོན་མཆོག་དང་། ཡ་ཀོབ་ཀྱི་དཀོན་མཆོག་གིས་ང་རང་ཁྱོད་རྣམས་ཀྱི་གམ་དུ་མངགས་པ་ཡིན་ཞེས་པའོ། །ཡ་ཝཱེ་ནི་ཇི་སྲིད་བར་དུ་བདག་གི་མིང་ཡིན་ཞིང་། དུས་རབས་ཀུན་ཏུ་ང་རང་དྲན་པའི་རྟེན་ཡང་ཡིན།  
\v 16 ཁྱོད་རང་སོང་ནས་ཡེས་ར་ཨེལ་གྱི་རྒན་པོ་རྣམས་བསྡུས་ཏེ་ཁོ་རྣམས་ལ་འདི་ལྟར་སྨྲོས་དང་། ཁྱོད་ཅག་གི་ཕ་མེས་ཡང་མེས་ཀྱི་དཀོན་མཆོག་ཡ་ཝཱེ་སྟེ། ཨབ་ར་ཧམ་གྱི་དཀོན་མཆོག་དང་། ཨི་སཱག་གི་དཀོན་མཆོག་དང་། ཡ་ཀོབ་ཀྱི་དཀོན་མཆོག་བདག་ལ་མངོན་པར་མཛད་ཅིང་འདི་སྐད་དུ། བདག་གིས་དངོས་གནས་ཁྱོད་རྣམས་ལ་ལྟ་སྐྱོང་བྱས་པ་དང་། ཨེ་ཅིབ་ཡུལ་ནས་ཁྱོད་རྣམས་ལ་ཇི་ལྟར་བྱས་པའང་མཐོང་ཞིང་།  
\v 17 ཁྱོད་རྣམས་ཨེ་ཅིབ་ཡུལ་གྱི་དཀའ་སྡུག་ལས་ཡར་ཁྲིད་དེ། ཀ་ན་ཨན་པ་དང་། ཧེད་པ་དང་། ཨེ་མོར་པ་དང་། ཕེ་རེ་ཟི་པ་དང་། ཧེ་བི་པ་དང་། ཡེ་བུ་སི་པ་བཅས་ཀྱི་ཡུལ་ཏེ། འོ་མ་དང་སྦྲང་རྩི་བཞུར་བའི་ཡུལ་དུ་འཁྲིད་པར་བྱ་ཞེས་བདག་གིས་སྨྲས་པ་ཡིན་ཞེས་སྨྲ་བར་གྱིས་དང་།  
\v 18 དེ་རྣམས་ཀྱིས་ཁྱོད་ཀྱི་བཀའ་ལ་མཉན་ངེས་ཤིང་། ཁྱོད་དང་ཡེས་ར་ཨེལ་གྱི་རྒན་པོ་རྣམས་ཨེ་ཅིབ་ཀྱི་རྒྱལ་པོའི་མདུན་དུ་སོང་སྟེ་ཁོ་ལ་འདི་ལྟར། ཨིབ་རི་པའི་དཀོན་མཆོག་ཡ་ཝཱེ་ངེད་རྣམས་ལ་ཕྲད་པ་དང་། ད་ནི་ངེད་ཅག་གི་དཀོན་མཆོག་ཡ་ཝཱེ་ལ་མཆོད་པ་འབུལ་བའི་ཕྱིར། ཞག་གསུམ་གྱི་ལམ་ལ་དབེན་སྟོང་དུ་འགྲོ་བར་གནོངས་ཞེས་སྨྲོས་ཤིག  
\v 19 འོན་ཀྱང་ཨེ་ཅིབ་རྒྱལ་པོ་ལ་མཐུ་ལྡན་ཕྱག་གིས་བསྐུལ་ཡང་ཁྱོད་རྣམས་འགྲོ་རུ་མི་འཇུག་པ་བདག་གིས་ཤེས་པ་ཡིན།  
\v 20 དེའི་ཕྱིར། ངས་ལག་པ་བརྐྱངས་ནས་ཨེ་ཅིབ་པའི་ཁྲོད་དུ་བདག་གི་ངོ་མཚར་བའི་དོན་རྣམས་མཛད་དེ་ཡུལ་དེར་རྒོལ་བར་བྱེད་ཅིང་། དེའི་རྗེས་སུ་ཁོས་ད་གཟོད་ཁྱོད་རྣམས་འགྲོ་རུ་འཇུག་པ་ཡིན།  
\v 21 ཁྱོད་རྣམས་ཡུལ་དེ་ནས་འགྲོ་བའི་དུས་སུ་ལག་ཟུང་སྟོང་བར་མི་འགྲོ་བའི་ཕྱིར་དུ། བདག་གིས་ཨེ་ཅིབ་པ་རྣམས་ཀྱི་མདུན་དུ་མི་འདི་རྣམས་ལ་ཐུགས་རྗེ་འཐོབ་པར་བྱ་སྟེ།  
\v 22 བུད་མེད་སོ་སོས་རང་གི་ཁྱིམ་མཚེས་དང་། ཁོ་མོའི་ཁྱིམ་དུ་སྡོད་པའི་བུད་མེད་ལས་གསེར་ཆས་དང་དངུལ་ཆས། གྱོན་གོས་དག་སློང་ངེས་ཏེ། རང་གི་བུ་དང་བུ་མོ་རྣམས་ལ་བསྐོན་པའི་ཕྱིར་ཡིན་ལ། དེས་ན་ཁྱོད་ཅག་གིས་ཨེ་ཅིབ་པའི་ནོར་རྫས་ཕྲོགས་པ་ཡིན་ཞེས་གསུངས་སོ། །   
\c 4
\cl ལེའུ་བཞི་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 མོ་ཤེ་ལ་དོན་ངོ་མཚར་ཅན་སྣང་བ།  
\p
\v 1 དེ་ཡང་མོ་ཤེ་ཡིས་འདི་ལྟར་ལན་ཞུས་པ་སྟེ། ཡེས་ར་ཨེལ་པ་རྣམས་ཀྱིས་བདག་ལ་ཡིད་མི་ཆེས་ཤིང་ངའི་གཏམ་ལའང་མཉན་མི་སྲིད་ལ། དཀོན་མཆོག་ཡ་ཝཱེ་ནི་ཁྱོད་ལ་མངོན་པར་མ་མཛད་ཅེས་སྨྲ་ངེས་ཡིན་ཞེས་པ་དང་།  
\v 2 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱི་ལག་ཏུ་ཡོད་པ་དེ་ཅི་ཞེས་བཀའ་འདྲི་གནང་བ་ལ། ཁོས་འཁར་བ་ཡིན་ཞེས་ཞུས།  
\v 3 ཡང་དཀོན་མཆོག་ཡ་ཝཱེས་འཁར་བ་ས་ལ་ཕོངས་ཤིག་ཅེས་བཀའ་བསྩལ་པ་དང་། མོ་ཤེ་ཡིས་དེ་ས་ལ་འཕངས་པ་ན་སྦྲུལ་ཞིག་ཏུ་གྱུར་པས་ཁོ་བྲོས་པ་རེད།  
\v 4 དེ་ནས་དཀོན་མཆོག་ཡ་ཝཱེས་མོ་ཤེ་ལ། ལག་པ་བརྐྱངས་ཏེ་སྦྲུལ་གྱི་མཇུག་མ་ཟུངས་དང། དེ་ནི་ཁྱོད་ཀྱི་ལག་ཏུ་སྔར་བཞིན་འཁར་བ་རུ་འགྱུར་ངེས་ཡིན་ཞེས་གསུངས་ཤིང་། མོ་ཤེ་ཡིས་ལག་པ་བརྐྱངས་ནས་སྦྲུལ་དེ་བཟུང་བ་ལ་དེ་ཁོའི་ལག་ཏུ་ཕྱིར་འཁར་བ་རུ་གྱུར་ཏོ། །  
\v 5 ཡང་དཀོན་མཆོག་ཡ་ཝཱེས་འདི་སྐད་དུ། དེའི་རྒྱུ་མཚན་ནི་ཁོ་རྣམས་ཀྱི་ཕ་མེས་ཡང་མེས་ཀྱི་དཀོན་མཆོག་ཡ་ཝཱེ་སྟེ། ཨབ་ར་ཧམ་གྱི་དཀོན་མཆོག་དང་། ཨི་སཱག་གི་དཀོན་མཆོག་དང་། ཡ་ཀོབ་ཀྱི་དཀོན་མཆོག་ནི་ཁྱོད་ལ་མངོན་པར་གྱུར་པ་ལ་ཁོ་རྣམས་ཡིད་ཆེས་སུ་འཇུག་པའི་ཕྱིར་ཡིན་ཞེས་གསུངས་སོ། །  
\v 6 ཡང་དཀོན་མཆོག་ཡ་ཝཱེས་ཁོ་ལ། ལག་པ་རུམ་དུ་ཆུག་ཅེས་གསུངས་པ་དང་། ཁོས་ཀྱང་ལག་པ་རུམ་དུ་བཅུག་ནས་ཕྱིར་ཕྱུང་བ་ན། བསམ་ཡིད་ལས་འདས་པ་ཞིག་ལ། ལག་པར་མཛེ་ནད་བྱུང་སྟེ་ཁ་བའི་མདོག་ལྟར་དཀར་པོར་གྱུར་པའོ། །  
\v 7 ཡང་དཀོན་མཆོག་ཡ་ཝཱེས་འདི་སྐད་དུ། ཡང་ཁྱོད་ཀྱི་ལག་པ་རུམ་དུ་ཆུག་ཅེས་གསུངས་པ་དང་། ཁོས་ཀྱང་ལག་པ་རུམ་དུ་བཅུག་ནས་ཕྱིར་ཕྱུང་བ་ན། བསམ་ཡིད་ལས་འདས་པ་ཞིག་ལ། ལག་པ་སྔར་བཞིན་གྱུར་ཅིང་ལུས་སྟེང་གི་ཤ་དང་གཅིག་འདྲ་བྱུང་ངོ་། །  
\v 8 ཡང་དཀོན་མཆོག་གིས་འདི་སྐད་དུ། གལ་སྲིད་དེ་རྣམས་ཀྱིས་ཁྱོད་ཀྱི་བཀའ་ལ་མི་མཉན་པ་དང་། གྲུབ་རྟགས་དང་པོར་ཡིད་མ་ཆེས་ན། ཁོ་རྣམས་གྲུབ་རྟགས་གཉིས་པར་ཡིད་ཆེས་ངེས་ཡིན།  
\v 9 འོན་ཀྱང་དེ་རྣམས་གྲུབ་རྟགས་འདི་གཉིས་པོར་ཡིད་མི་ཆེས་ཤིང་ཁྱོད་ཀྱི་བཀའ་ལའང་མི་མཉན་ན། ཁྱོད་ཀྱིས་ནཱ་ཡོལ་གཙང་པོ་ནས་ཆུ་ཉུང་ཙམ་བླངས་ཏེ་སྐམ་ས་རུ་གཏོར་ཅིག ཁྱོད་ཀྱིས་གཙང་པོ་ནས་བླངས་པའི་ཆུ་ནི་སྐམ་ས་རུ་ཁྲག་ཏུ་འགྱུར་ངེས་ཡིན་ཞེས་གསུངས།  
\v 10 ཡང་མོ་ཤེ་ཡིས་དཀོན་མཆོག་ཡ་ཝཱེ་ལ་འདི་ལྟར། ཀྱེ་གཙོ་བོ་ལགས། ང་ནི་མ་གཞི་ནས་སྨྲ་བརྗོད་ལ་མཁས་པ་ཞིག་མིན་ཏེ། ཁྱེད་ཀྱིས་རང་གི་ཞབས་ཕྱི་བདག་ལ་བཀའ་གནང་བའི་རྗེས་སུའང་འདི་ལྟར་ཡིན་ལ། ང་ནི་མ་གཞི་ནས་སྨྲ་ལྕེ་རྟུལ་པོ་ཞིག་ཡིན་ཞེས་སྨྲས།  
\v 11 ཡང་དཀོན་མཆོག་ཡ་ཝཱེས་ཁོ་ལ་འདི་སྐད་དུ། མི་རྣམས་ཀྱི་ཁ་ནི་སུས་བཟོས་པ་ཡིན་ནམ། ཡང་སུ་ཞིག་གིས་མི་རྣམས་ལྐུགས་པའམ་ཡང་ན་འོན་པ། མིག་གསལ་བའམ་ཡང་ན་ལོང་པ་སོགས་སུ་བྱས་སམ། དེ་ནི་ཡ་ཝཱེ་ང་རང་མ་ཡིན་ནམ།  
\v 12 ད་ལྟ་སོང་དང་། བདག་གིས་ཁྱོད་ལ་སྨྲ་ལྕེ་སྦྱིན་ཞིང་ཁྱོད་ཀྱིས་ཅི་ཞིག་སྨྲ་འོས་པ་དེ་སྟོན་ངེས་ཡིན་ཞེས་གསུངས་པ་ལ།  
\v 13 མོ་ཤེ་ན་རེ། གཙོ་བོ་ལགས། ཁྱེད་ཀྱིས་སུ་ཞིག་མངག་འདོད་ན་དེ་ཉིད་མངག་པར་བྱའོ་ཞེས་ཞུས་སོ། །  
\v 14 དེ་ནས་དཀོན་མཆོག་ཡ་ཝཱེ་ཁོང་ཉིད་མོ་ཤེ་ལ་ཐུགས་ཁྲོས་ཏེ་འདི་སྐད་དུ། ལེ་ཝི་པ་ཨ་རོན་ཁྱོད་ཀྱི་གཅེན་པོ་མ་ཡིན་ནམ། ཁོ་ནི་སྨྲ་བརྗོད་ལ་མཁས་པ་ཞིག་ཡིན་པ་ངས་ཤེས་ཤིང་། ད་ལྟ་ཁོ་རང་ཁྱོད་བསུ་བར་ཡོང་བཞིན་ཡོད་དེ། ཁོས་ཁྱོད་རང་མཐོང་བ་དང་སྙིང་ནས་དགའ་བར་འགྱུར།  
\v 15 ཁྱོད་ཀྱིས་གཏམ་དེ་ཨ་རོན་ལ་སྨྲ་དགོས་ཤིང་། བདག་གིས་ཀྱང་ཁྱོད་གཉིས་ལ་སྨྲ་ལྕེ་སྦྱིན་ཏེ། ལས་ཅི་བྱེད་དགོས་པའང་སྟོན་པར་བྱ།  
\v 16 ཁོས་ཁྱོད་ཀྱི་ཚབ་ཏུ་འབངས་མི་རྣམས་ལ་གཏམ་སྨྲ་དགོས་ཤིང་། ཁྱོད་ཀྱིས་ཁོ་ནི་རང་གི་ཁ་བཞིན་དུ་བྱེད་པ་དང་། ཁོས་ཁྱོད་ནི་དཀོན་མཆོག་ལྟ་བུར་བྱེད་དགོས།  
\v 17 གྲུབ་རྟགས་སྟོན་པའི་ཕྱིར་ཁྱོད་ཀྱིས་འཁར་བ་འདི་ལག་ཏུ་ཟུངས་ཤིག་ཅེས་གསུངས་སོ། །   
\s1 མོ་ཤེ་ཕྱིར་ཨེ་ཅིབ་ཡུལ་དུ་ལོག་པ།  
\p
\v 18 དེ་ནས་མོ་ཤེ་རང་གི་སྒྱུག་པོ་ཡི་ཏྲོའི་དྲུང་དུ་ཕྱིར་ལོག་སྟེ་ཁོ་ལ། ཨེ་ཅིབ་ཡུལ་དུ་ཡོད་པའི་སྤུན་རྣམས་གསོན་མིན་ལ་བལྟ་བའི་ཕྱིར། ང་རང་དེ་དག་གི་གམ་དུ་འགྲོ་རུ་འཇུག་པར་མཛོད་ཅེས་སྨྲས་པ་ལ། ཡི་ཏྲོས་མོ་ཤེ་ལ། ཁྱོད་རང་བདེ་བར་སོང་ཞིག་ཅེས་སྨྲས།  
\v 19 དཀོན་མཆོག་ཡ་ཝཱེས་མིད༌ཡཱན་ཡུལ་དུ་མོ་ཤེ་ལ་འདི་སྐད་དུ། ད་ཨེ་ཅིབ་ཡུལ་དུ་ཕྱིར་ལོག་ཅིག་དང་། ཁྱོད་རང་གསོད་འདོད་པའི་མི་ཐམས་ཅད་ཤི་ཟིན་པས་ཁྱོད་ཨེ་ཅིབ་ཡུལ་དུ་ཕྱིར་ལོག་དང་ཞེས་གསུངས་པ་ལ།  
\v 20 མོ་ཤེ་ཡིས་རང་གི་ཆུང་མ་དང་བུ་གཉིས་ཁྲིད་ཅིང་། ཁོ་རྣམས་བོང་བུར་བསྐྱོན་ནས་ཨེ་ཅིབ་ཡུལ་དུ་ཕྱིར་ལོག་པ་དང་། ཁོའི་ལག་ཏུ་དཀོན་མཆོག་གི་འཁར་བ་ཐོགས་སོ། །  
\v 21 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་རང་ཨེ་ཅིབ་ཡུལ་དུ་ཕྱིར་ལོག་རྗེས། ངས་ཁྱོད་ལ་བསྟན་པའི་དོན་ངོ་མཚར་ཅན་ཐམས་ཅད་ཕཱར་ཨོལ་གྱི་མདུན་དུ་སྟོན་པར་གཟབ་གཟབ་གྱིས། འོན་ཀྱང་བདག་གིས་ཕཱར་ཨོལ་གྱི་སེམས་གྱོང་པོར་བྱས་པས་ཁོས་འབངས་མི་རྣམས་འགྲོ་རུ་འཇུག་མི་སྲིད།  
\v 22 དེ་ནས་ཁྱོད་ཀྱིས་ཕཱར་ཨོལ་ལ། དཀོན་མཆོག་ཡ་ཝཱེས་ཡེས་ར་ཨེལ་ནི་བདག་གི་སྲས་ཐོག་མ་ཡིན་ལ།  
\v 23 བདག་ལ་བསྙེན་བཀུར་བྱེད་པའི་ཆེད་དུ་བདག་གི་སྲས་འགྲོ་རུ་ཆུག་ཅེས་ངས་ཁྱོད་ལ་སྨྲས་མྱོང་ནའང་། ཁྱོད་ཀྱིས་ཁོ་རང་འགྲོ་རུ་མ་བཅུག་པས། ལྟོས་དང་། ངས་ཁྱོད་ཀྱི་བུ་ཐོག་མ་གསོད་པར་བྱ་གསུངས་ཞེས་སྨྲོས་ཤིག་ཅེས་གསུངས།  
\v 24 དེ་ནས་ལམ་ལ་ཞག་སྡོད་བྱེད་པའི་གནས་ཤིག་ཏུ་དཀོན་མཆོག་ཡ་ཝཱེས་མོ་ཤེ་དང་ཕྲད་དེ་ཁོ་རང་གསོད་རྩིས་བྱས་པ་ལ།  
\v 25 ཚིབ་ཕའོ་རཱས་མེ་ཆ་ཞིག་བླངས་ནས་རང་གི་བུའི་མཚན་སྐྱི་བཅད་དེ་མོ་ཤེའི་རྐང་པའི་མདུན་དུ་འཕངས་ཏེ་ན་རེ། ཁྱོད་ནི་དངོས་གནས་ངའི་ཁྲག་གི་མག་པ་ཡིན་འདུག་ཅེས་སྨྲས།  
\v 26 དེ་ནས་དཀོན་མཆོག་ཡ་ཝཱེས་ད་གཟོད་ཁོ་རང་སྲོག་ཐར་བཏང་ཞིང་། ཚིབ་ཕའོ་རཱས་ཁྱོད་ནི་མཚན་སྐྱི་བཅད་པའི་ཕྱིར་ཁྲག་གི་མག་པ་ཡིན་ཞེས་སྨྲས་སོ། །  
\v 27 ཡང་དཀོན་མཆོག་ཡ་ཝཱེས་ཨ་རོན་ལ་འདི་སྐད་དུ། ཁྱོད་རང་དབེན་སྟོང་དུ་མོ་ཤེ་བསུ་བར་སོང་ཞིག་ཅེས་བཀའ་གནང་བ་དང་། ཨ་རོན་སོང་ནས་དཀོན་མཆོག་གི་རི་བོ་ནས་མོ་ཤེ་དང་ཕྲད་དེ་འགྲམ་པར་འོ་བྱས།  
\v 28 དེ་ནས་མོ་ཤེ་ཡིས་དཀོན་མཆོག་ཡ་ཝཱེས་ཁོ་རང་མངགས་ཤིང་རང་ལ་བཀའ་ཅི་གནང་བ་ཐམས་ཅད་དང་། གྲུབ་རྟགས་གང་དག་སྟོན་དགོས་པ་ཐམས་ཅད་ཨ་རོན་ལ་སྨྲས།  
\v 29 དེར་མོ་ཤེ་དང་ཨ་རོན་གཉིས་སོང་ནས་ཡེས་ར་ཨེལ་གྱི་རྒན་པོ་ཐམས་ཅད་བསྡུས་ནས།  
\v 30 དཀོན་མཆོག་ཡ་ཝཱེས་མོ་ཤེ་ལ་གསུངས་པའི་བཀའ་ཐམས་ཅད་ཨ་རོན་གྱིས་ཐེངས་གཅིག་ལ་སྨྲས་པ་དང་། ཡང་མི་རྣམས་ཀྱི་མིག་འདུན་དུ་གྲུབ་རྟགས་བསྟན་པས།  
\v 31 འབངས་མི་རྣམས་ཡིད་ཆེས་ཏེ་དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ལ་ཐུགས་བརྩེ་དགོངས་ཤིང་། ཁོ་རྣམས་ཀྱི་སྡུག་བསྔལ་ཡང་གཟིགས་པས། ཁོ་རྣམས་ཀྱིས་མགོ་བོ་བཏུད་ནས་ཕྱག་བཙལ་ཏོ། །   
\c 5
\cl ལེའུ་ལྔ་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 ཕཱར་ཨོལ་གྱིས་དཀོན་མཆོག་གི་ཐུགས་དགོངས་ལ་ངོ་རྒོལ་བྱས་པ།  
\p
\v 1 དེའི་རྗེས་སུ་མོ་ཤེ་དང་ཨ་རོན་གཉིས་ཕཱར་ཨོལ་གྱི་གམ་དུ་སོང་ནས་འདི་ལྟར། ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། བདག་གི་འབངས་མིས་དབེན་སྟོང་ནས་བདག་ལ་དུས་ཆེན་བསྲུང་བའི་ཕྱིར་དེ་རྣམས་འགྲོ་རུ་ཆུག་ཅེས་གསུངས་བྱུང་སྨྲས་པ་ལ།  
\v 2 ཕཱར་ཨོལ་ན་རེ། དཀོན་མཆོག་ཡ༌ཝཱེ་ནི་སུ་ཡིན་ནམ། ངས་ཅིའི་ཕྱིར་ཁོའི་བཀའ་ལ་མཉན་ནས་ཡེས་ར་ཨེལ་པ་རྣམས་འགྲོ་རུ་འཇུག་དགོས་སམ། ངས་ཡ་ཝཱེ་མི་ཤེས་ལ། ཡེས་ར་ཨེལ་པ་རྣམས་ཀྱང་མི་གཏོང་ཞེས་སྨྲས།  
\v 3 དེ་ནས་ཁོ་གཉིས་ན་རེ། ཨིབ་རི་པའི་དཀོན་མཆོག་ནི་ངེད་ཅག་ལ་ཕྲད་མྱོང་བ་ཡིན། ཁོང་གིས་རིམས་ནད་དམ་རལ་གྲི་ཡིས་རང་ཅག་མི་འགེམ་པའི་ཕྱིར། ངེད་ཀྱི་དཀོན་མཆོག་ཡ་ཝཱེ་ལ་མཆོད་པ་འབུལ་བར་ཞག་མ་གསུམ་གྱི་ལམ་ལ་དབེན་སྟོང་དུ་འགྲོ་རུ་འཇུག་པར་མཛོད་ཅེས་སྨྲས་པ་ལ།  
\v 4 ཨེ་ཅིབ་ཀྱི་རྒྱལ་པོས་འདི་ལྟར། མོ་ཤེ་དང་ཨ་རོན་ཁྱོད་གཉིས་ཀྱིས་ཅིའི་ཕྱིར་མི་དེ་རྣམས་ལ་ལས་བྱོལ་བྱེད་དུ་འཇུག་གམ། ཁྱོད་རྣམས་རང་གི་ལས་ཀ་བྱེད་དུ་སོང་ཞིག་ཅེས་སྨྲས་ཤིང་།  
\v 5 ཡང་འདི་ལྟར། ད་ལྟ་ཡུལ་འདིའི་མི་རྣམས་ཀྱི་གྲངས་ཀ་ནི་ཤིན་ཏུ་མང་ནའང་། ཁྱོད་གཉིས་ཀྱིས་དེ་རྣམས་ལ་ལས་ཀ་མི་བྱེད་པར་སྡོད་དུ་འཇུག་གམ་ཞེས་སྨྲས།  
\v 6 ཉིན་དེར། ཕཱར་ཨོལ་གྱིས་མི་རྣམས་ཀྱི་ལས་རྒྱབ་པ་དང་ལས་དཔོན་རྣམས་ལ་འདི་ལྟར།  
\v 7 ཁྱོད་ཅག་གིས་མི་རྣམས་ལ་སྔར་བཞིན་སོ་ཕག་བཟོ་བར་རྩྭ་མ་སྟེར་ཅིག ཁོ་རྣམས་རང་ཉིད་རྩྭ་འཐུ་རུ་འགྲོ་དགོས།  
\v 8 འོན་ཀྱང་མི་རྣམས་ཀྱིས་སྔར་ནས་སོ་ཕག་ཇི་ཙམ་བཟོས་པ་དེ་ཙམ་ཁྱོད་ཅག་གིས་ཁོ་རྣམས་ལ་བཀལ་ནས། ཏོག་ཙམ་ཡང་ཇེ་ཉུང་དུ་མ་གཏོང་ཞིག ཅིའི་ཕྱིར་ཞེ་ན། དེ་དག་ནི་སྒྱིད་ལུག་ཡིན་པས། ངེད་རྣམས་རང་གི་དཀོན་མཆོག་ལ་མཆོད་པ་འབུལ་དུ་འགྲོ་བར་མཛོད་ཅེས་སྐད་ཅོར་རྒྱག་པའི་ཕྱིར་རོ། །  
\v 9 ཁྱོད་ཅག་གིས་མི་འདི་དག་གི་ལས་ཚགས་ཇེ་ལྗིད་དུ་བཏང་ནས། ཁོ་རྣམས་ལ་དཀའ་ལས་མྱང་དུ་བཅུག་སྟེ་རྫུན་གཏམ་ལ་མི་མཉན་པར་བྱེད་དགོས་ཞེས་བཀའ་བསྩལ་ཏོ། །   
\p
\v 10 དེ་ནས་མི་རྣམས་ཀྱི་ལས་རྒྱབ་པ་དང་ལས་དཔོན་རྣམས་སོང་ནས་མི་རྣམས་ལ་འདི་ལྟར། ཕཱར་ཨོལ་གྱིས་འདི་སྐད་དུ། ངས་ཁྱོད་ཅག་ལ་རྩྭ་ནི་མི་སྟེར།  
\v 11 ཁྱོད་རྣམས་རང་རང་གིས་གང་དུ་རྩྭ་རྙེད་ཐུབ་ན་དེ་རུ་བཙལ་དུ་སོང་། འོན་ཀྱང་ཁྱོད་ཅག་གི་ལས་ཀ་ཏོག་ཙམ་ཡང་ཉུང་དུ་གཏོང་མི་རུང་གསུངས་ཞེས་སྨྲས།  
\v 12 དེ་ནས་མི་དེ་རྣམས་ཨེ་ཅིབ་ཡུལ་ཀུན་ཏུ་ཐོར་ནས་སོག་མ་བཏུས་ཏེ་རྩྭ་རུ་བྱས་པ་ལ།  
\v 13 ལས་རྒྱབ་པ་རྣམས་ཀྱིས་ཚ་འདེད་བྱས་ཏེ་ན་རེ། ཁྱོད་རྣམས་ཀྱིས་ཉིན་རེ་བཞིན་ལས་ཀ་བསྒྲུབས་ཚར་དགོས་ལ། དེ་སྔར་རྩྭ་ཡོད་པའི་དུས་བཞིན་བསྒྲུབ་དགོས་ཞེས་སྨྲས་ཤིང་།  
\v 14 ཡང་ཕཱར་ཨོལ་མངའ་འོག་གི་ལས་རྒྱབ་པ་རྣམས་ཀྱིས་སྔར་ཡེས་ར་ཨེལ་པ་རྣམས་ལ་ལས་རྒྱབ་པར་བསྐོས་པའི་ལས་དཔོན་རྣམས་ལ་རྡུང་རྡེག་བྱས་ཏེ་ན་རེ། ཁྱོད་ཅག་གིས་ཁ་སང་དེ་རིང་སྔོན་ཆད་ཀྱི་གྲངས་ཀ་ལྟར་སོ་ཕག་མ་བཟོས་པ་དང་རང་གི་ལས་ཀ་བསྒྲུབས་མ་ཚར་བ་ཅི་ཞེས་སྨྲས་སོ། །   
\p
\v 15 དེ་ནས་ཡེས་ར་ཨེལ་པའི་ལས་འཛིན་པ་རྣམས་ཕཱར་ཨོལ་གྱི་དྲུང་དུ་འོངས་ཏེ་སྐད་ཆེན་པོས། ཁྱེད་ཀྱིས་རང་གི་བྲན་གཡོག་རྣམས་ལ་འདི་ལྟར་བྱེད་དོན་ཅི།  
\v 16 ཁྱེད་ཀྱི་བྲན་གཡོག་རྣམས་ལ་རྩྭ་མ་བྱིན་ཡང་ལས་རྒྱབ་པས་ངེད་ཅག་ལ་སོ་ཕག་བཟོས་ཤིག་ཅེས་ཡང་ཡང་བསྐུལ་ཞིང་། ལྟོས་དང་། ཁྱེད་ཀྱི་བྲན་གཡོག་རྣམས་ལ་རྡུང་རྡེག་ཀྱང་ཐེབས། དོན་དམ་དུ་དེ་ནི་ཁྱེད་ཀྱི་འབངས་མི་རྣམས་ཀྱི་ཉེས་སྐྱོན་ཡིན་ཞེས་ཞུས་ཀྱང་།  
\v 17 ཕཱར་ཨོལ་ན་རེ། ཁྱོད་ཅག་ནི་དངོས་གནས་ལེ་ལོ་ཅན་ཡིན་འདུག དེ་བས་ཁྱོད་རྣམས་ཀྱིས་ངེད་ཅག་དཀོན་མཆོག་ཡ་ཝཱེ་ལ་མཆོད་པ་འབུལ་དུ་འགྲོ་བར་མཛོད་ཅེས་ཟེར་རོ། །  
\v 18 ད་ནི་ཁྱོད་རྣམས་ལས་ཀ་བྱེད་དུ་སོང་ཞིག ཁྱོད་ཅག་ལ་རྩྭ་མི་སྟེར་ནའང་སོ་ཕག་ནི་གྲངས་ཀ་ལྟར་སྤྲོད་དགོས་ཞེས་སྨྲས་སོ། །  
\v 19 ཡེས་ར་ཨེལ་པའི་ལས་འཛིན་པ་རྣམས་ཀྱིས། ཁྱོད་ཅག་གིས་ཉིན་རེ་བཞིན་སོ་ཕག་བཟོ་བའི་ལས་ཀ་ནི་ཏོག་ཙམ་ཡང་ཉུང་དུ་གཏོང་མི་རུང་ཞེས་པའི་བཀའ་ཐོས་པས། དོན་ངན་ཞིག་དང་ཕྲད་པ་ཤེས་སོ། །  
\v 20 ཡང་ཁོ་རྣམས་ཕཱར་ཨོལ་གྱི་དྲུང་ནས་སོང་བ་ལ། མོ་ཤེ་དང་ཨ་རོན་གཉིས་ཀྱིས་ལངས་ནས་སྒུག་བསྡད་ཡོད་པ་དང་ཕྲད་པས།  
\v 21 ཁོ་གཉིས་ལ་འདི་ལྟར། ཁྱོད་གཉིས་ཀྱིས་ཕཱར་ཨོལ་དང་དེའི་འཁོར་གཡོག་གི་མདུན་དུ་ངེད་རྣམས་དྲི་ངན་པར་བྱས་ཤིང་། ངེད་ཅག་གསོད་པའི་ཕྱིར་དེ་དག་གི་ལག་ཏུ་རལ་གྲི་བཞག་པས། དཀོན་མཆོག་ཡ་ཝཱེས་ཁྱོད་གཉིས་ལ་དཔྱད་ཞིབ་གནང་ནས་ཤན་འབྱེད་པར་ཤོག་ཅེས་སྨྲས་སོ། །   
\p
\v 22 དེ་ནས་མོ་ཤེ་ཕྱིར་དཀོན་མཆོག་ཡ་ཝཱེའི་དྲུང་དུ་ལོག་སྟེ་འདི་ལྟར། ཀྱེ་གཙོ་བོ་ལགས། ཁྱེད་ཀྱིས་ཅིའི་ཕྱིར་མི་འདི་རྣམས་དཀའ་སྡུག་ལ་སྦྱར་བ་ཡིན་ནམ། ཅིའི་ཕྱིར་ང་རང་མངགས་པ་ཡིན་ནམ།  
\v 23 ཡང་ང་རང་ཕཱར་ཨོལ་གྱི་གམ་དུ་སོང་སྟེ་ཁྱེད་ཀྱི་མཚན་ལ་བརྟེན་ནས་གཏམ་སྨྲས་པའི་དུས་ནས་བཟུང་། ཁོས་མི་འདི་རྣམས་དཀའ་སྡུག་ལ་སྦྱར་ཞིང་། ཁྱེད་ཀྱིས་ཁོ་རྣམས་སྐྱོབ་པར་གཏན་ནས་མ་མཛད་ཅེས་སྨྲས་སོ། །   
\c 6
\cl ལེའུ་དྲུག་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 དཀོན་མཆོག་གིས་ཐར་པའི་ཞལ་བཞེས་གནང་བ།  
\p
\v 1 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ངས་ཕཱར་ཨོལ་ལ་ཅི་བྱེད་པ་དེ་ཁྱོད་ཀྱིས་ད་ལྟ་མཐོང་བར་འགྱུར། བདག་གི་མཐུ་ལྡན་ལག་པའི་རྐྱེན་གྱིས་ཁོས་ཡེས་ར་ཨེལ་པ་རྣམས་འགྲོ་རུ་འཇུག་པར་མ་ཟད། དེ་རྣམས་ཁོའི་ཡུལ་གྱི་ཕྱི་རུ་སྐྲོད་པར་འགྱུར་ཞེས་གསུངས་ཤིང་།  
\v 2 དཀོན་མཆོག་གིས་ཡང་མོ་ཤེ་ལ་འདི་སྐད་དུ། བདག་ནི་ཡ་ཝཱེ་ཡིན་ལ།  
\v 3 བདག་ནི་ཀུན་དབང་དཀོན་མཆོག་ཡིན་པ་སྔར་ཨབ་ར་ཧམ་དང་ཨི་སཱག་དང་ཡ་ཀོབ་བཅས་ལ་མངོན་པར་བྱས་པ་ཡིན་མོད། འོན་ཀྱང་བདག་གི་མིང་ཡ་ཝཱེ་ཞེས་པ་དེ་ལས་ངས་རང་ཉིད་ཁོ་རྣམས་ལ་མངོན་པར་མ་བྱས།  
\v 4 བདག་གིས་ཁོ་རྣམས་བྱེས་སུ་སྡོད་སའི་ཀ་ན་ཨན་ཡུལ་དེ་ཁོ་རྣམས་ཀྱི་དབང་དུ་གཏོང་བར་བྱེད་པའི་ཁ་ཆད་ཀྱང་དེ་རྣམས་ལ་བཞག་པ་དང་།  
\v 5 དེ་མིན་ཨེ་ཅིབ་པས་ཡེས་ར་ཨེལ་པ་རྣམས་ཚེ་གཡོག་ཏུ་བཀོལ་བས། དེ་དག་གིས་བཏོན་པའི་སྡུག་ཡུས་བདག་གིས་ཐོས་ཤིང་། རང་གི་ཁ་ཆད་ཀྱང་དྲན་པ་ཡིན།  
\v 6 དེ་བས་ན་ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟརཤོད་དང་། བདག་ནི་ཡ་ཝཱེ་ཡིན་ཏེ། བདག་གིས་ཁྱོད་རྣམས་ཨེ་ཅིབ་པའི་གཉའ་གནོན་འོག་ནས་འདོན་པ་དང་། དེ་དག་གི་ཚེ་གཡོག་བྱེད་པ་ལས་སྒྲོལ་ཞིང་། ཕྱག་བརྐྱངས་ནས་དེ་རྣམས་ལ་ཉེས་ཆད་དྲག་པོ་གཅོད་པའི་སྒོ་ནས་ཁྱོད་ཅག་བླུ་བར་བྱ།  
\v 7 བདག་གིས་ཁྱོད་རྣམས་ང་ཡི་འབངས་མི་བྱེད་ཅིང་། བདག་ཀྱང་ཁྱོད་རྣམས་ཀྱི་དཀོན་མཆོག་བྱེད་རྒྱུ་ཡིན། བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་པ་དང་། ཁྱོད་རྣམས་ཨེ་ཅིབ་པའི་གཉའ་གནོན་འོག་ནས་ཐར་དུ་འཇུག་མཁན་ཡིན་པ་ཁྱོད་རྣམས་ཀྱིས་ཤེས་པར་འགྱུར།  
\v 8 བདག་གིས་ཨབ་ར་ཧམ་དང་། ཨི་སཱག་དང་། ཡ་ཀོབ་བཅས་ལ་སྦྱིན་པར་མནའ་བསྐྱལ་ནས་ཁས་བླངས་པའི་ཡུལ་དེར་ཁྱོད་རྣམས་འཁྲིད་པ་དང་། ཡུལ་དེ་ཁྱོད་རྣམས་ལ་ཐོབ་སྐལ་དུ་སྦྱིན་པར་བྱ། བདག་ནི་ཡ་ཝཱེ་ཡིན་ཞེས་སྨྲ་དགོས་པར་གསུངས་སོ། །  
\v 9 མོ་ཤེ་ཡིས་བཀའ་དེ་ཡེས་ར་ཨེལ་པ་རྣམས་ལ་སྨྲས་ནའང་། ཁོ་རྣམས་གཉའ་གནོན་དྲག་པོས་གདུང་བས་མོ་ཤེ་ལ་མ་མཉན་ཏོ། །   
\p
\v 10 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 11 ཁྱོད་སོང་ནས་ཨེ་ཅིབ་རྒྱལ་པོ་ཕཱར་ཨོལ་ལ། ཡེས་ར་ཨེལ་པ་རྣམས་ཁྱོད་ཀྱི་ཡུལ་ནས་འགྲོ་རུ་ཆུག་ཅེས་སྨྲོས་ཤིག་ཅེས་གསུངས་མོད།  
\v 12 འོན་ཀྱང་མོ་ཤེ་ཡིས་དཀོན་མཆོག་ཡ་ཝཱེའི་དྲུང་ནས་འདི་ལྟར། གཟིགས་པར་ཞུ། ཡེས་ར་ཨེལ་པ་རྣམས་ཀྱིས་ཀྱང་ང་ལ་མི་མཉན་ན། ཕཱར་ཨོལ་གྱིས་སྨྲ་ལྕེ་རྟུལ་པོ་བདག་ལྟ་བུ་ལ་ཅི་ལྟར་མཉན་སྲིད་དམ་ཞེས་ཞུས།  
\v 13 དེ་ནས་དཀོན་མཆོག་ཡ་ཝཱེས་མོ་ཤེ་དང་ཨ་རོན་ལ་གསུང་གླེང་གནང་བ་སྟེ། ཡེས་ར་ཨེལ་པ་རྣམས་དང་ཨེ་ཅིབ་རྒྱལ་པོ་ཕཱར་ཨོལ་གྱི་གམ་དུ་སོང་ནས། ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཕྱི་རུ་འཁྲིད་དགོས་པའི་བཀའ་གནང་བའོ། །   
\s1 མོ་ཤེ་དང་ཨ་རོན་གཉིས་ཀྱི་རིགས་རྒྱུད།  
\p
\v 14 ཁོ་རྣམས་ཀྱི་ཁྱིམ་རྒྱུད་རེ་རེའི་ཁྱིམ་དཔོན་དག་གི་མིང་ནི་གཤམ་གསལ་ལྟར། ཡེས་ར་ཨེལ་གྱི་སྐྱེས་འགོ་རུ་བེན་གྱི་བུ་རྣམས་ནི་ཧ་ནོག་དང་ཕཱ༌ལུའུ། ཧེས་རོན། ཀར་མའེ་བཅས་ཡིན་ཞིང་། དེ་རྣམས་ནི་རུ་བེན་གྱི་རུས་རྒྱུད་ཡིན།  
\v 15 སི་མུ་ཨོན་གྱི་བུ་རྣམས་ནི་ཡཱ་མུ་ཨེལ་དང་ཡཱ༌མེན། ཨོ་ཧད། ཡཱ་ཀིན། ཚོ་ཧར། ཀ་ན་ཨན་བུད་མེད་ཀྱི་བུ་ཤཱ་ཨུལ་བཅས་ཡིན་ཞིང་། དེ་རྣམས་ནི་སི་མུ་ཨོན་གྱི་རུས་རྒྱུད་ཡིན།  
\v 16 ལེ་ཝི་ཡི་བུ་རྣམས་ཀྱི་མིང་རྣམས་རང་རང་གི་རིགས་རྒྱུད་བཞིན་བཀོད་པ་གཤམ་གསལ་ལྟར། གེར་ཤོན་དང་ཀོ་ཧད། མཱ་རཱ་རེའེ་བཅས་གསུམ་ཡིན་ཞིང་། ལེ་ཝི་ཡི་ཚེ་ཚད་ནི་ལོ་བརྒྱ་དང་སོ་བདུན་ཡིན།  
\v 17 གེར་ཤོན་གྱི་བུ་ནི་རང་རང་གི་རུས་རྒྱུད་བཞིན་དུ་ལིབ་ནིས་དང་ཤིམ་ཨི་གཉིས་ཡིན།  
\v 18 ཀོ་ཧད་ཀྱི་བུ་རྣམས་ནི་ཨམ་རམ་དང་ཡེས་ཧར། ཧེབ་རོན། ཨུ་ཟི་ཨེལ་བཅས་ཡིན་ཞིང་། ཀོ་ཧད་ཀྱི་ཚེ་ཚད་ནི་ལོ་བརྒྱ་དང་སོ་གསུམ་ཡིན།  
\v 19 མཱ་རཱ་རེའེ་ཡི་བུ་རྣམས་ནི་མཱ་ལི་དང་མུ་ཤི་གཉིས་ཡིན་ཞིང་། དེ་རྣམས་ནི་ལེ་ཝི་ཡི་རུས་རྒྱུད་དེ་རང་རང་གི་རིགས་རྒྱུད་བཞིན་དུ་ཡིན་ནོ། །  
\v 20 ཨམ་རམ་གྱིས་རང་གི་ཕ་ཡི་སྲིང་མོ་ཡོ་ཀེ་བེད་ཆུང་མར་བླངས་ཤིང་། དེས་ཁོ་རང་ལ་ཨ་རོན་དང་མོ་ཤེ་གཉིས་བཙས། ཨམ་རམ་གྱི་ཚེ་ཚད་ནི་ལོ་བརྒྱ་དང་སོ་བདུན་ཡིན།  
\v 21 ཡེས་ཧར་གྱི་བུ་རྣམས་ནི་ཀོ་རཱག་དང༌ནེ་ཕེག ཟིག་རི་བཅས་ཡིན།  
\v 22 ཨུ་ཟི་ཨེལ་གྱི་བུ་རྣམས་ནི་མེ་ཤཱ་ཨེལ་དང་ཨེལ་ཙ་ཕཱན། སིད་རེའེ་བཅས་ཡིན།  
\v 23 ཡང་ཨ་རོན་གྱིས་ཨ་མི་ནཱ་དབ་ཀྱི་བུ་མོ་དང་ནཱ་སོན་གྱི་ནུ་མོ་སྟེ་ཨེ་ལི་ཤེ་བཱ་ཆུང་མར་བླངས་ཤིང་། དེས་ཁོ་རང་ལ་བུ་ནཱ་དབ་དང་ཨ་བི་ཧུ། ཨེ་ལི་ཨ་ཟར། ཨི་ཐ་མཱར་བཅས་བཙས།  
\v 24 ཀོ་རཱག་གི་བུ་རྣམས་ནི་ཨ་སིར་དང་ཨེལ་ཁ་ནཱ། ཨ་བི་ཨ་སིབ་བཅས་ཡིན་ཞིང་། དེ་རྣམས་ནི་ཀོ་རཱག་པའི་རུས་རྒྱུད་ཡིན།  
\v 25 ཡང་ཨ་རོན་གྱི་བུ་ཨེ་ལི་ཨ་ཟར་གྱིས་ཕུ་ཏི་ཨེལ་གྱི་བུ་མོ་རྣམས་ལས་གཅིག་ཆུང་མར་བླངས་ཤིང་། དེས་ཁོ་ལ་ཕི་ནེ་ཧེ་བཙས། དེ་རྣམས་ནི་རུས་རྒྱུད་བཞིན་ལེ་ཝི་པའི་ཁྱིམ་རྒྱུད་རེ་རེའི་ཁྱིམ་དཔོན་ཡིན་ནོ། །  
\v 26 སྔར་ནས་དཀོན་མཆོག་ཡ་ཝཱེས་འདི་སྐད་དུ། ཡེས་ར་ཨེལ་པ་རྣམས་དཔུང་ཚོགས་རེ་རེ་བཞིན་ཨེ་ཅིབ་ཡུལ་ནས་ཕྱིར་ཁྲིད་ཅིག་ཅེས་པའི་བཀའ་ནི་ཨ་རོན་དང་མོ་ཤེ་འདི་གཉིས་ལ་གནང་བ་ཡིན་ནོ། །  
\v 27 ཨེ་ཅིབ་རྒྱལ་པོ་ཕཱར་ཨོལ་ལ་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཕྱིར་འཁྲིད་པར་འགྱུར་བའི་གཏམ་སྨྲ་མཁན་ནི་མོ་ཤེ་དང་ཨ་རོན་འདི་གཉིས་ཡིན་ནོ། །   
\p
\v 28 ཡང་དཀོན་མཆོག་ཡ་ཝཱེས་ཨེ་ཅིབ་ཡུལ་ནས་མོ་ཤེ་ལ་བཀའ་གནང་བའི་ཉིན་མོ་དེར།  
\v 29 ཁོང་གིས་འདི་སྐད་དུ། བདག་ནི་ཡ་ཝཱེ་ཡིན། ངས་ཁྱོད་ལ་ཅི་སྨྲ་བ་ཐམས་ཅད་ཁྱོད་ཀྱིས་ཨེ་ཅིབ་རྒྱལ་པོ་ཕཱར་ཨོལ་ལ་སྨྲ་བར་གྱིས་ཞེས་གསུངས་པ་ལ།  
\v 30 མོ་ཤེ་ཡིས་དཀོན་མཆོག་ཡ་ཝཱེའི་དྲུང་དུ་འདི་ལྟར། གཟིགས་པར་ཞུ། ང་རང་ནི་སྨྲ་ལྕེ་རྟུལ་པོ་ཡིན་པས། ཕཱར་ཨོལ་གྱིས་བདག་ལ་ཅི་ལྟར་མཉན་སྲིད་དམ་ཞེས་ཞུས་སོ། །   
\c 7
\cl ལེའུ་བདུན་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 མོ་ཤེའི་ཚབ་ཏུ་ཨ་རོན་གྱིས་གཏམ་སྨྲ་བར་ཐུགས་ཐག་བཅད་པ།  
\p
\v 1 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ལྟོས་དང་། ངས་ཕཱར་ཨོལ་གྱི་མདུན་དུ་ཁྱོད་རང་དཀོན་མཆོག་ལྟ་བུར་བྱས་པ་དང་། ཡང་ཁྱོད་ཀྱི་སྤུན་ཨ་རོན་ནི་ཁྱོད་ཀྱི་ལུང་སྟོན་པ་ཡིན་པར་འགྱུར།  
\v 2 ངས་ཁྱོད་ལ་བཀའ་ཅི་གནང་བ་ཐམས་ཅད་ཁྱོད་ཀྱིས་སྨྲ་དགོས་པ་དང་། ཁྱོད་ཀྱི་སྤུན་ཨ་རོན་གྱིས་ཕཱར་ཨོལ་ལ། ཡེས་ར་ཨེལ་པ་རྣམས་ཁོའི་ཡུལ་ནས་འགྲོ་རུ་འཇུག་པའི་གཏམ་དེ་སྨྲ་དགོས།  
\v 3 ངས་ཕཱར་ཨོལ་གྱི་སེམས་གྱོང་པོར་བྱེད་པ་དང་། ཨེ་ཅིབ་ཡུལ་ནས་ང་ཡི་གྲུབ་རྟགས་དང་དོན་ངོ་མཚར་ཅན་མང་པོའང་སྟོན་པར་བྱ།  
\v 4 འོན་ཀྱང་ཕཱར་ཨོལ་གྱིས་ཁྱོད་ཅག་ལ་མི་མཉན་ཞིང་། བདག་གིས་ལག་པ་བརྐྱངས་ནས་ཨེ་ཅིབ་ཡུལ་ལ་ཉེས་ཆད་དྲག་པོ་གཅོད་ཅིང་། བདག་གི་མི་ཚོགས་སྟེ་ང་ཡི་འབངས་མི་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཕྱིར་འཁྲིད་པར་བྱའོ། །  
\v 5 དེ་ནས་ངས་ལག་པ་བརྐྱངས་ནས་ཨེ་ཅིབ་ཡུལ་ལ་རྒོལ་ཞིང་། ཡེས་ར་ཨེལ་པ་རྣམས་དེ་དག་གི་ཁྲོད་ནས་ཕྱིར་འཁྲིད་པའི་དུས་སུ། ཨེ་ཅིབ་པ་རྣམས་ཀྱིས་བདག་ནི་ཡ་ཝཱེ་ཡིན་པ་ཤེས་པར་འགྱུར་ཞེས་གསུངས་པས།  
\v 6 མོ་ཤེ་དང་ཨ་རོན་གཉིས་ཀྱིས་དེ་ལྟར་བྱས་ཤིང་། དཀོན་མཆོག་ཡ་ཝཱེས་བཀའ་ཇི་ལྟར་བསྩལ་པ་བཞིན་དུ་བྱས་པ་དང་།  
\v 7 ཁོ་གཉིས་ཀྱིས་ཕཱར་ཨོལ་ལ་གཏམ་སྨྲ་བའི་དུས་སུ་མོ་ཤེ་ལོ་བརྒྱད་ཅུ་དང་། ཨ་རོན་ལོ་བརྒྱད་ཅུ་གྱ་གསུམ་ཡིན་ནོ། །   
\s1 ཨ་རོན་གྱི་འཁར་བ་སྦྲུལ་དུ་གྱུར་པ།  
\p
\v 8 ཡང་དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་འདི་སྐད་དུ།  
\v 9 ཕཱར་ཨོལ་གྱིས་ཁྱོད་ཅག་ལ་དོན་ངོ་མཚར་ཅན་ཞིག་སྟོན་པར་གྱིས་ཞེས་སྨྲ་བའི་ཚེ། ཁྱོད་ཀྱིས་ཨ་རོན་ལ། རང་གི་འཁར་བ་ཕཱར་ཨོལ་གྱི་མདུན་དུ་གཡུགས་ཤིག དེ་སྦྲུལ་དུ་འགྱུར་བ་ཡིན་སྨྲོས་ཤིག་ཅེས་གསུངས།  
\v 10 དེ་ནས་མོ་ཤེ་དང་ཨ་རོན་གཉིས་ཕཱར་ཨོལ་གྱི་མདུན་དུ་སོང་ནས། དཀོན་མཆོག་ཡ་ཝཱེས་བཀའ་ཇི་ལྟར་གནང་བ་བཞིན་དུ་བྱས་ཏེ། ཨ་རོན་གྱིས་ཕཱར་ཨོལ་འཁོར་དང་བཅས་པའི་མདུན་དུ་འཁར་བ་གཡུགས་པ་ལ་དེ་སྦྲུལ་དུ་གྱུར་པ་དང་།  
\v 11 ཕཱར་ཨོལ་གྱིས་མཁས་པ་དང་སྒྱུ་མ་མཁན་དག་བོས་འོངས་ཤིང་། དེ་རྣམས་ནི་ཨེ་ཅིབ་ཡུལ་གྱི་རྫུ་འཕྲུལ་སྟོན་མཁན་ཡིན་ལ། ཁོ་རྣམས་ཀྱིས་ཀྱང་རྫུ་འཕྲུལ་ལ་བརྟེན་ནས་དེ་བཞིན་བྱས་པ་སྟེ།  
\v 12 དེ་དག་གིས་རང་རང་གི་འཁར་བ་སར་འཕངས་པ་དང་དེ་སྦྲུལ་དུ་གྱུར་མོད། འོན་ཀྱང་ཨ་རོན་གྱི་འཁར་བས་དེ་དག་གི་འཁར་བ་རྣམས་ཁྱུར་མིད་བཏང་།  
\v 13 ཕཱར་ཨོལ་གྱི་སེམས་གྱོང་པོར་གྱུར་ཏེ། དཀོན་མཆོག་ཡ་ཝཱེས་གསུངས་པ་བཞིན་དུ་ཁོས་མོ་ཤེ་དང་ཨ་རོན་གཉིས་ལ་མ་མཉན་ཏོ། །   
\s1 གཙང་པོ་ཁྲག་ལ་འགྱུར་བའི་ཆག་སྒོ།  
\p
\v 14 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཕཱར་ཨོལ་གྱི་སེམས་ཨུ་ཚུགས་ཆེ་ཞིང་མི་རྣམས་འགྲོ་རུ་མི་འཇུག  
\v 15 སང་ཉིན་ཞོགས་པར་ཕཱར་ཨོལ་གྱི་མདུན་དུ་སོང་ཞིག ལྟོས་དང་། ཁོ་རང་ཕྱི་རུ་འོངས་ནས་ཆུ་ཁར་འགྲོ་བའི་དུས་སུ། ཁྱོད་རང་ནཱ་ཡོལ་གཙང་པོའི་འགྲམ་དུ་ལངས་བསྡད་ནས་ཁོ་བསུ་དགོས་ཤིང་། སྦྲུལ་དུ་གྱུར་མྱོང་བའི་འཁར་བ་དེ་ལག་ཏུ་ཟུངས་ཤིག  
\v 16 དེ་ནས་ཁོ་ལ་འདི་ལྟར་ཤོད་དང་། ཨིབ་རི་པའི་དཀོན་མཆོག་ཡ་ཝཱེས་ང་རང་ཁྱོད་ཀྱི་མདུན་དུ་མངགས་ནས་འདི་སྐད་དུ། བདག་ལ་བསྙེན་བཀུར་བྱེད་པའི་ཆེད་དུ་བདག་གི་འབངས་མི་དབེན་སྟོང་དུ་འགྲོ་རུ་ཆུག་ཅེས་གསུངས་ནའང་། ལྟོས་དང་། ཁྱོད་ཀྱིས་ད་ལྟའི་བར་དུ་མ་མཉན་ཏོ། །  
\v 17 ཡང་དཀོན་མཆོག་ཡ་ཝཱེས་འདི་སྐད་དུ། ལྟོས་དང་། བདག་གིས་རང་གི་ལག་ཏུ་ཡོད་པའི་འཁར་བས་ནཱ་ཡོལ་གཙང་པོའི་ཆུ་ལ་བརྡེག་ཅིང་ཆུ་ནི་ཁྲག་ཏུ་འགྱུར་བ་དང་། དེར་བརྟེན་ནས་ཁྱོད་ཀྱིས་བདག་ནི་ཡ་ཝཱེ་ཡིན་པ་རྟོགས་ངེས།  
\v 18 ནཱ་ཡོལ་གཙང་པོའི་ཉ་རྣམས་ཤི་ནས་གཙང་པོ་ལའང་དྲི་ངན་བྲོ་བར་འགྱུར་ལ། ཨེ་ཅིབ་པ་རྣམས་དེའི་ཆུ་འཐུང་བར་ཞེན་པ་ལོག་ཡོང་ཞེས་སྨྲ་དགོས་པར་བཀའ་གནང་ངོ་། །  
\v 19 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ཨ་རོན་ལ་འདི་ལྟར་ཤོད་དང་། ཁྱོད་ཀྱིས་རང་གི་འཁར་བ་ལོངས་ལ་ལག་པ་ཨེ་ཅིབ་ཡུལ་གྱི་ཆུ་རྣམས་ཏེ་གཙང་པོ་དང་། གྲོག་ཆུ་དང་། རྫིང་བུ་དང་། ཆུ་འགག་ཐམས་ཅད་བཅས་ཁྲག་ཏུ་འགྱུར་བའི་ཕྱིར་ཆུ་དེ་རྣམས་ཀྱི་ཕྱོགས་སུ་རྐྱོངས་ཤིག དེ་ནས་ཨེ་ཅིབ་ཡུལ་ཀུན་ཏུ་ཁྲག་ཡོད་པར་འགྱུར་ཞིང་། ཐ་ན་ཤིང་གི་ཡོ་བྱད་དང་། རྡོ་ཡི་ཡོ་བྱད་དུའང་ཁྲག་ཡོད་པར་འགྱུར་ངེས་ཞེས་བཤད་དགོས་པར་གསུངས་སོ། །   
\p
\v 20 དེ་ནས་མོ་ཤེ་དང་ཨ་རོན་གཉིས་ཀྱིས་དཀོན་མཆོག་ཡ་ཝཱེའི་བཀའ་བཞིན་དུ་བསྒྲུབས་པ་སྟེ། ཨ་རོན་གྱིས་ཕཱར་ཨོལ་འཁོར་དང་བཅས་པའི་མདུན་དུ་འཁར་བ་ཡར་བཀྱགས་ནས་ནཱ་ཡོལ་གཙང་པོའི་ཆུ་ལ་བརྡེགས་པ་དང་། གཙང་པོའི་ཆུ་ཡོངས་རྫོགས་ཁྲག་ཏུ་གྱུར་ཅིང་།  
\v 21 ནཱ་ཡོལ་གཙང་པོའི་ཉ་རྣམས་ཤི་བ་དང་། གཙང་པོར་ཡང་དྲི་ངན་བྲོ་བས། ཨེ་ཅིབ་པས་གཙང་པོ་དེའི་ཆུ་འཐུང་མ་ཕོད་ལ། ཨེ་ཅིབ་ཡུལ་ཐམས་ཅད་ལ་ཁྲག་གིས་གང་བའོ། །  
\v 22 དེ་ནས་ཨེ་ཅིབ་ཡུལ་གྱི་སྒྱུ་མ་མཁན་རྣམས་ཀྱིས་ཀྱང་རྫུ་འཕྲུལ་ལ་བརྟེན་ནས་དེ་བཞིན་བྱས་པ་དང་། ཕཱར་ཨོལ་གྱི་སེམས་གྱོང་པོར་གྱུར་ཏེ། དཀོན་མཆོག་ཡ་ཝཱེས་གསུངས་པ་བཞིན་དུ་ཁོས་མོ་ཤེ་དང་ཨ་རོན་གཉིས་ལ་མ་མཉན་པའི་ཁར།  
\v 23 ཁོ་རང་ཁ་ཕྱིར་འཁོར་ཏེ་ཕོ་བྲང་དུ་ལོག་ཅིང་། དོན་དེར་དོ་སྣང་ཙམ་ཡང་མ་བྱས་པ་དང་།  
\v 24 ཨེ་ཅིབ་པ་ཐམས་ཅད་ཀྱིས་གཙང་པོ་དེའི་ཆུ་འཐུང་མི་ཕོད་པས། འཐུང་ཆུ་འཐོབ་པའི་ཕྱིར་ནཱ་ཡོལ་གཙང་པོའི་འགྲམ་གཉིས་སུ་ས་བརྐོས་ཤིང་།  
\v 25 དཀོན་མཆོག་ཡ་ཝཱེས་ནཱ་ཡོལ་གཙང་པོར་བརྡེགས་ནས་ཉིན་བདུན་རྫོགས་སོ། །   
\c 8
\cl ལེའུ་བརྒྱད་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 སྦལ་བའི་ཆག་སྒོ།  
\p
\v 1 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཕཱར་ཨོལ་གྱི་མདུན་དུ་སོང་ནས་དེ་ལ། དཀོན་མཆོག་ཡ་ཝཱེས་འདི་སྐད་དུ། བདག་ལ་བསྙེན་བཀུར་བྱེད་པའི་ཆེད་དུ་བདག་གི་མི་རྣམས་འགྲོ་རུ་ཆུག  
\v 2 གལ་ཏེ་ཁྱོད་ཀྱིས་དེ་རྣམས་འགྲོ་བར་མི་འཇུག་ན། ལྟོས་དང་། བདག་གིས་ཁྱོད་ཀྱི་རྒྱལ་ཁམས་ཐམས་ཅད་སྦལ་བར་བརྫི་རུ་འཇུག་རྒྱུ་ཡིན།  
\v 3 ནཱ་ཡོལ་གཙང་པོར་སྦལ་བས་གང་བ་དང་། དེ་དག་ཐོན་ནས་ཁྱོད་ཀྱི་ཕོ་བྲང་དང་། གཟིམ་ཁང་དང་། མལ་ཁྲིའི་སྟེང་དང་། ཁྱོད་ཀྱི་འཁོར་གཡོག་རྣམས་ཀྱི་ཁང་པ་དང་། ཁྱོད་ཀྱི་འབངས་མི་རྣམས་ཀྱི་ལུས་སྟེང་དང་། ཁྱོད་ཀྱི་གཡོས་ཐབ་དང་། ཕྱེ་བརྫི་སའི་གཞོང་པ་བཅས་ཀྱི་ནང་དུ་འོང་བར་འགྱུར་ལ།  
\v 4 ཡང་ཁྱོད་དང་ཁྱོད་ཀྱི་འབངས་མི་དང་ཁྱོད་ཀྱི་འཁོར་གཡོག་ཐམས་ཅད་ཀྱི་ལུས་སྟེང་དུ་འོང་བར་འགྱུར་ཞེས་སྨྲོས་ཤིག་ཅེས་གསུངས་སོ། །  
\v 5 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ཨ་རོན་ལ། ཁྱོད་ཀྱིས་ལག་གི་འཁར་བ་ནི་གཙང་པོ་དང་། གྲོག་ཆུ་དང་། རྫིང་བུ་རྣམས་ཀྱི་ཕྱོགས་སུ་རྐྱོངས་ལ། སྦལ་བ་རྣམས་ཨེ་ཅིབ་ཡུལ་ལ་ཡོང་དུ་ཆུག་སྨྲོས་ཤིག་ཅེས་གསུངས།  
\v 6 དེ་ནས་ཨ་རོན་གྱིས་ལག་པ་ཨེ་ཅིབ་ཡུལ་གྱི་ཆུ་རྣམས་ཀྱི་ཕྱོགས་སུ་བརྐྱངས་པ་ན་སྦལ་བ་ཐོན་ཏེ་ཨེ་ཅིབ་ཡུལ་ཁེབས་པ་དང་།  
\v 7 སྒྱུ་མ་མཁན་རྣམས་ཀྱིས་ཀྱང་རྫུ་འཕྲུལ་ལ་བརྟེན་ནས་དེ་བཞིན་བྱས་ཤིང་སྦལ་བ་རྣམས་ཨེ་ཅིབ་ཡུལ་ལ་ཡོང་དུ་བཅུག་གོ །   
\p
\v 8 ཕཱར་ཨོལ་གྱིས་མོ་ཤེ་དང་ཨ་རོན་གཉིས་བོས་ཏེ་ན་རེ། ཁྱོད་གཉིས་ཀྱིས་དཀོན་མཆོག་ཡ་ཝཱེས་སྦལ་བ་རྣམས་ང་རང་དང་ངའི་འབངས་མི་རྣམས་དང་འབྲལ་བར་མཛད་པའི་ཕྱིར་ཞུ་བ་བྱོས་དང་། བདག་གིས་མི་རྣམས་དཀོན་མཆོག་ཡ་ཝཱེ་ལ་མཆོད་པ་འབུལ་དུ་འགྲོ་རུ་འཇུག་ཅེས་སྨྲས་པ་ལ།  
\v 9 མོ་ཤེ་ཡིས་ཕཱར་ཨོལ་ལ་འདི་ལྟར། སྦལ་བ་རྣམས་ཁྱོད་དང་ཁྱོད་ཀྱི་ཁང་པ་རྣམས་དང་བྲལ་ནས་ནཱ་ཡོལ་གཙང་པོ་འབའ་ཞིག་གི་ནང་དུ་ལུས་པའི་ཕྱིར། ངས་ཁྱོད་དང་ཁྱོད་ཀྱི་འཁོར་གཡོག་རྣམས་དང་འབངས་མི་རྣམས་ཀྱི་དོན་དུ་དུས་ནམ་ཞིག་ལ་ཞུ་བ་བྱེད་དགོས་པ་ཁྱོད་ཀྱིས་ང་ལ་སྨྲ་བར་གྱིས་ཞེས་སྨྲས་ཤིང་།  
\v 10 ཁོས་སང་ཉིན་ཞེས་སྨྲས་པ་དང་། མོ་ཤེ་ན་རེ། ངེད་ཅག་གི་དཀོན་མཆོག་ཡ་ཝཱེ་དང་འདྲ་བ་གཅིག་ཀྱང་མེད་པ་ཁྱོད་ཀྱིས་ཤེས་པའི་ཕྱིར་ཁྱོད་ཀྱི་གཏམ་བཞིན་གྲུབ་གྱུར་ཅིག  
\v 11 སྦལ་བ་རྣམས་ཁྱོད་དང་ཁྱོད་ཀྱི་ཁང་པ་རྣམས་དང་། འཁོར་གཡོག་དང་འབངས་མི་རྣམས་དང་བྲལ་ནས། ནཱ་ཡོལ་གཙང་པོ་འབའ་ཞིག་གི་ནང་དུ་ལུས་པར་འགྱུར་ཞེས་སྨྲས།  
\v 12 དེ་ནས་མོ་ཤེ་དང་ཨ་རོན་གཉིས་ཕཱར་ཨོལ་དང་བྲལ་རྗེས། ཕཱར་ཨོལ་ལ་རྙོག་དྲ་བཟོས་པའི་སྦལ་བ་རྣམས་ཀྱི་ཕྱིར་མོ་ཤེ་ཡིས་དཀོན་མཆོག་ཡ་ཝཱེ་ལ་སྐད་ཆེན་པོས་གསོལ་བ་བཏབ་ཅིང་།  
\v 13 དཀོན་མཆོག་ཡ་ཝཱེས་མོ་ཤེའི་ཞུ་བ་བཞིན་མཛད་དེ། ཁང་པ་དང་ར་བ་རྣམས་དང་ཞིང་སའི་ནང་དུ་ཡོད་པའི་སྦལ་བ་དག་ཤི་བ་དང་།  
\v 14 མི་རྣམས་ཀྱིས་སྦལ་རོ་བསྡུ་རུབ་བྱས་ནས་སྤུངས་པ་ལ་ཡུལ་ཕྱོགས་ཀུན་ཏུ་དྲི་ངན་འཐུལ།  
\v 15 འོན་ཀྱང་ཕཱར་ཨོལ་གྱིས་ཆག་སྒོ་ཞི་བ་མཐོང་སྟེ། དཀོན་མཆོག་ཡ་ཝཱེས་གསུངས་པ་བཞིན་དུ་ཁོས་སེམས་གྱོང་པོར་བྱས་ནས་མོ་ཤེ་དང་ཨ་རོན་གཉིས་ལ་མ་མཉན་ཏོ། །   
\s1 ཤིག་གི་ཆག་སྒོ།  
\p
\v 16 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཨ་རོན་ལ་ཁྱོད་ཀྱིས་རང་གི་འཁར་བ་བརྐྱངས་ནས་ས་སྟེང་གི་རྡུལ་ལ་རྡེགས་ཤིག་དང་། ཨེ་ཅིབ་ཡུལ་ཀུན་ཏུ་རྡུལ་ནི་ཤིག་ལ་འགྱུར་བར་ངེས་ཞེས་སྨྲོས་ཤིག་ཅེས་གསུངས་པ་ལ།  
\v 17 ཁོ་གཉིས་ཀྱིས་དེ་བཞིན་དུ་བྱས་ཏེ་ཨ་རོན་གྱིས་ལག་གི་འཁར་བ་བརྐྱངས་ནས་ས་རྡུལ་ལ་བརྡེགས་པ་དང་། མི་དང་དུད་འགྲོའི་སྟེང་དུ་ཤིག་བྱུང་ཞིང་། ཨེ་ཅིབ་ཡུལ་ཐམས་ཅད་ཀྱི་ས་རྡུལ་ཡོངས་རྫོགས་ཤིག་ཏུ་གྱུར།  
\v 18 སྒྱུ་མ་མཁན་དག་གིས་ཀྱང་རྫུ་འཕྲུལ་ལ་བརྟེན་ནས་ཤིག་འབྱུང་དུ་འཇུག་བསམ་ཡང་དེ་ལྟར་བྱེད་མ་ནུས་ཤིང་། མི་དང་དུད་འགྲོ་རྣམས་ཀྱི་སྟེང་དུ་ཤིག་ཡོད་དོ། །  
\v 19 དེ་ནས་སྒྱུ་མ་མཁན་རྣམས་ཀྱིས་ཕཱར་ཨོལ་ལ། འདི་ནི་དཀོན་མཆོག་གི་ནུས་མཐུ་ \f + \ft མ་ཕྱི་ལས་ཕྱག་མཛུབ་ཅེས་བྲིས་ཡོད་ཀྱང་དོན་ནི་ནུས་མཐུར་གོ་དགོས་པས་འདིར་དོན་སྒྱུར་བྱས་པ་ཡིན།\f*ཡིན་འདུག་ཅེས་སྨྲས་ནའང་། ཕཱར་ཨོལ་གྱི་སེམས་གྱོང་པོར་གྱུར་ཏེ་དཀོན་མཆོག་ཡ་ཝཱེས་གསུངས་པ་བཞིན་དུ་ཁོས་མོ་ཤེ་དང་ཨ་རོན་གཉིས་ལ་མ་མཉན་ཏོ། །   
\s1 སྦྲང་ནག་གི་ཆག་སྒོ།  
\p
\v 20 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཐོ་རངས་ཡར་ལངས་ཏེ། ཕཱར་ཨོལ་ཆུ་ཁར་འགྲོ་དུས་ཁོའི་མདུན་དུ་སོང་ནས་དེ་ལ་འདི་ལྟར་ཤོད་ཅིག དཀོན་མཆོག་ཡ་ཝཱེས་འདི་སྐད་དུ། ང་ལ་བསྙེན་བཀུར་བྱེད་པའི་ཆེད་དུ་བདག་གི་འབངས་མི་འགྲོ་རུ་ཆུག  
\v 21 གལ་ཏེ་ཁྱོད་ཀྱིས་བདག་གི་འབངས་མི་འགྲོ་རུ་མི་འཇུག་ན། ལྟོས་དང་། བདག་གིས་ཁྱོད་དང་ཁྱོད་ཀྱི་འཁོར་གཡོག་དང་ཁྱོད་ཀྱི་འབངས་མི་རྣམས་ཀྱི་སྟེང་དུ་སྦྲང་ནག་གི་ཁྱུ་ཚོགས་གཏོང་ངེས་པ་དང་། ཁྱོད་ཀྱི་ཕོ་བྲང་ནང་དུ་འཛུལ་བར་མ་ཟད། ཨེ་ཅིབ་པ་རྣམས་ཀྱི་ཁང་པ་དང་དེ་དག་གི་སྡོད་གནས་སུའང་སྦྲང་ནག་གིས་གང་བར་འགྱུར།  
\v 22 ཡང་ཉིན་དེ་ལ་ངས་རང་གི་འབངས་མི་གནས་པའི་གོ་ཤེན་ཡུལ་ལོགས་སུ་བཀར་ནས། དེ་རུ་སྦྲང་ནག་གི་ཁྱུ་ཚོགས་ཡོད་པར་མི་འགྱུར་ཏེ། བདག་ནི་གནམ་འོག་གི་ཡ་ཝཱེ་ཡིན་པ་ཁྱོད་ལ་ཤེས་སུ་འཇུག་པའི་ཕྱིར་རོ། །  
\v 23 བདག་གིས་རང་གི་འབངས་མི་ཁྱོད་ཀྱི་མི་ལས་ལོགས་སུ་བཀར་བ་དང་། སང་ཉིན་གྲུབ་རྟགས་དེ་འབྱུང་བར་འགྱུར་གསུངས་ཞེས་སྨྲོས་ཤིག་ཅེས་གསུངས།  
\v 24 དེ་ནས་དཀོན་མཆོག་ཡ་ཝཱེས་དེ་བཞིན་མཛད་དེ། སྦྲང་ནག་གི་ཁྱུ་ཚོགས་ཆེན་པོ་ཕཱར་ཨོལ་གྱི་ཕོ་བྲང་དང་དེའི་འཁོར་གཡོག་རྣམས་ཀྱི་ཁང་པ་རུ་བཏབ་པ་དང་། ཨེ་ཅིབ་ཡུལ་ཐམས་ཅད་སྦྲང་ནག་གི་ཁྱུ་ཚོགས་ཀྱིས་བརླགས་སོ། །   
\p
\v 25 དེ་ནས་ཕཱར་ཨོལ་གྱིས་མོ་ཤེ་དང་ཨ་རོན་གཉིས་བོས་ཏེ་ན་རེ། ཁྱོད་རྣམས་སོང་ལ་ཡུལ་འདི་ནས་ཁྱོད་ཅག་གི་དཀོན་མཆོག་ལ་མཆོད་པ་ཕུལ་ཞིག་ཅེས་སྨྲས།  
\v 26 འོན་ཀྱང་མོ་ཤེ་ཡིས་འདི་ལྟར། དེ་ལྟར་བྱེད་མི་འོས་ཏེ། ངེད་རྣམས་ཀྱིས་ཨེ་ཅིབ་པ་རྣམས་ཞེན་པ་ལོག་པ་གང་དེ་ངེད་ཅག་གི་དཀོན་མཆོག་ཡ་ཝཱེ་ལ་མཆོད་པར་འབུལ་ཡོང་། ཨེ་ཅིབ་པ་རྣམས་ཞེན་པ་ལོག་པ་གང་དེ་ཁོ་ཚོའི་མིག་མདུན་དུ་མཆོད་པར་ཕུལ་ན་དེ་དག་གིས་ངེད་རྣམས་རྡོ་རུབ་གཏོང་བ་མ་ཡིན་ནམ།  
\v 27 ངེད་རྣམས་ཉིན་གསུམ་གྱི་ལམ་ལ་དབེན་སྟོང་དུ་སོང་ནས། ངེད་ཅག་གི་དཀོན་མཆོག་ཡ་ཝཱེས་བཀའ་བསྩལ་པ་བཞིན་དུ་ཁོང་ལ་མཆོད་པ་འབུལ་དགོས་ཞེས་སྨྲས།  
\v 28 དེ་ནས་ཕཱར་ཨོལ་ན་རེ། ངས་ཁྱོད་ཅག་དབེན་སྟོང་དུ་ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་མཆོད་པ་འབུལ་བར་འགྲོ་རུ་འཇུག་མོད། འོན་ཀྱང་ཁྱོད་རྣམས་ཐག་རིང་ལ་མ་འགྲོ་ཞིག ངའི་དོན་དུ་གསོལ་བ་ཐོབས་ཤིག་ཅེས་སྨྲས་པ་ལ།  
\v 29 མོ་ཤེ་ཡིས་འདི་ལྟར། ལྟོས་དང་། ང་རང་འདི་ནས་སོང་མ་ཐག་དཀོན་མཆོག་ཡ་ཝཱེ་ལ་གསོལ་བ་འདེབས་པར་བྱ་སྟེ། སང་ཉིན་སྦྲང་ནག་གི་ཁྱུ་ཚོགས་ཕཱར་ཨོལ་དང་ཁོའི་འཁོར་གཡོག་རྣམས་དང་། འབངས་མི་རྣམས་དང་འབྲལ་བར་གྱུར་ཅིག་ཅེས་ཞུ་བ་ཡིན་མོད། འོན་ཀྱང་མི་རྣམས་དཀོན་མཆོག་ཡ་ཝཱེ་ལ་མཆོད་པ་འབུལ་བར་འགྲོ་རུ་མི་འཇུག་པའི་གཡོ་སྒྱུའི་སྦྱོར་བ་ནི་ཕཱར་ཨོལ་གྱིས་ཡང་བསྐྱར་སྤེལ་མི་རུང་ཞེས་སྨྲས་སོ། །   
\p
\v 30 དེ་ནས་མོ་ཤེ་ཡིས་ཕཱར་ཨོལ་དང་བྲལ་ནས་དཀོན་མཆོག་ཡ་ཝཱེ་ལ་གསོལ་བ་བཏབ་པ་དང་།  
\v 31 དཀོན་མཆོག་ཡ་ཝཱེས་མོ་ཤེ་ཡིས་གསོལ་བ་བཏབ་པ་བཞིན་དུ་མཛད་དེ། སྦྲང་ནག་གི་ཁྱུ་ཚོགས་ཕཱར་ཨོལ་དང་དེའི་འཁོར་གཡོག་རྣམས་དང་། འབངས་མི་རྣམས་དང་བྲལ་བར་མཛད་ནས་གཅིག་ཀྱང་མ་ལུས་སོ། །  
\v 32 ཐེངས་དེར་ཕཱར་ཨོལ་གྱིས་ཡང་སེམས་གྱོང་པོར་བྱས་ནས་མི་རྣམས་འགྲོ་རུ་མ་བཅུག་གོ །   
\c 9
\cl ལེའུ་དགུ་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 ཕྱུགས་ཟོག་ལ་གོད་ཁ་བྱུང་བའི་ཆག་སྒོ།  
\p
\v 1 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཕཱར་ཨོལ་གྱི་མདུན་དུ་སོང་ནས་ཁོ་ལ་འདི་ལྟར་ཤོད་དང་། ཨིབ་རི་པ་རྣམས་ཀྱི་དཀོན་མཆོག་ཡ་ཝཱེས་འདི་སྐད་དུ། ང་ལ་བསྙེན་བཀུར་བྱེད་པའི་ཆེད་དུ་ངའི་མི་རྣམས་འགྲོ་རུ་ཆུག་ཅེས་གསུངས།  
\v 2 གལ་ཏེ་ཁྱོད་ཀྱིས་དེ་དག་ད་དུང་བཀག་ནས་འགྲོ་རུ་མི་འཇུག་ན།  
\v 3 ལྟོས་དང་། དཀོན་མཆོག་ཡ་ཝཱེའི་ཕྱག་གིས་ཁྱོད་ཀྱི་ཞིང་ལ་ཡོད་པའི་ཕྱུགས་ཟོག་སྟེ། རྟ་དང་། བོང་བུ་དང་། རྔ་མོང་དང་། བ་གླང་གི་ཁྱུ་དང་། ར་ལུག་གི་ཁྱུ་བཅས་ལ་ནད་ཡམས་ཤིན་ཏུ་ལྕི་མོ་ཞིག་འབྱུང་བར་མཛད།  
\v 4 འོན་ཀྱང་དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ཀྱི་ཕྱུགས་ཟོག་ནི་ཨེ་ཅིབ་པ་རྣམས་ཀྱི་ཕྱུགས་ཟོག་ལས་ལོགས་སུ་བཀར་ཏེ། ཡེས་ར་ཨེལ་པ་རྣམས་ལ་དབང་བའི་ཕྱུགས་ཟོག་ལས་གཅིག་ཀྱང་འཆི་བར་མི་འགྱུར་བའི་ཕྱིར་ཡིན་ཞེས་སྨྲ་དགོས་པར་གསུངས་སོ། །   
\p
\v 5 ཡང་དཀོན་མཆོག་ཡ་ཝཱེས་དུས་བཅད་མཛད་དེ་འདི་སྐད་དུ། སང་ཉིན་ཡ་ཝཱེས་ཡུལ་འདིར་དོན་འདི་བསྒྲུབ་ངེས་ཡིན་ཞེས་གསུངས་པ་དང་།  
\v 6 དེའི་ཕྱི་ཉིན་དཀོན་མཆོག་ཡ་ཝཱེས་དོན་དེ་མཛད་ཅིང་། ཨེ་ཅིབ་པའི་ཕྱུགས་ཟོག་ཐམས་ཅད་ཤི་ནའང་། ཡེས་ར་ཨེལ་པ་རྣམས་ཀྱི་ཕྱུགས་ཟོག་ལས་གཅིག་ཀྱང་མ་ཤིའོ། །  
\v 7 ཕཱར་ཨོལ་གྱིས་མི་མངགས་ནས་བལྟ་རུ་ཕྱིན་པ་ན། ལྟོས་དང་། ཡེས་ར་ཨེལ་པ་རྣམས་ཀྱི་ཕྱུགས་ཟོག་ལས་གཅིག་ཀྱང་མ་ཤི་བ་མཐོང་མོད། འོན་ཀྱང་ཕཱར་ཨོལ་གྱི་སེམས་གྱོང་པོར་གྱུར་ཏེ་མི་རྣམས་འགྲོ་རུ་མ་བཅུག་གོ །   
\s1 གཉན་འབུར་གྱི་ཆག་སྒོ།  
\p
\v 8 དེ་ནས་དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་འདི་སྐད་དུ། སྲེག་ཐབ་ནས་དུ་དྲེག་སྤར་གང་ལོངས་ལ། མོ་ཤེ་ཡིས་ཕཱར་ཨོལ་གྱི་མིག་མདུན་དུ་གནམ་ལ་གཏོར་ཅིག་དང་།  
\v 9 དུ་དྲེག་དེ་ནི་ཨེ་ཅིབ་ཡུལ་ཡོངས་སུ་རྡུལ་དུ་འགྱུར་ཞིང་། མི་ཕྱུགས་གཉིས་ཀྱི་ལུས་སྟེང་དུ་གཉན་འབུར་ཆུ་བུར་ཅན་དུ་འགྱུར་འོང་ཞེས་གསུངས་པ་ལ།  
\v 10 མོ་ཤེ་དང་ཨ་རོན་གཉིས་ཀྱིས་དུ་དྲེག་བླངས་ནས་ཕཱར་ཨོལ་གྱི་མདུན་དུ་འགྲེང་སྟེ། མོ་ཤེ་ཡིས་དེ་གནམ་ལ་གཏོར་བ་ན། མི་ཕྱུགས་གཉིས་ཀྱི་ལུས་སྟེང་དུ་གཉན་འབུར་ཆུ་བུར་ཅན་དུ་གྱུར།  
\v 11 སྒྱུ་མ་མཁན་དེ་དག་དང་ཨེ་ཅིབ་པ་ཐམས་ཅད་ཀྱི་ལུས་སྟེང་དུ་གཉན་འབུར་བྱུང་བས། སྒྱུ་མ་མཁན་དེ་དག་མོ་ཤེའི་མདུན་དུ་ཚུགས་མ་ཐུབ།  
\v 12 འོན་ཀྱང་དཀོན་མཆོག་ཡ་ཝཱེས་ཕཱར་ཨོལ་གྱི་སེམས་གྱོང་པོར་མཛད་ཅིང་མོ་ཤེ་ལ་གསུངས་པ་བཞིན་དུ་ཕཱར་ཨོལ་གྱིས་མོ་ཤེ་དང་ཨ་རོན་གཉིས་ལ་མ་མཉན་ཏོ། །   
\s1 སེར་བ་ཆེན་པོའི་ཆག་སྒོ།  
\p
\v 13 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་རང་ཐོ་རངས་ཡར་ལངས་ཏེ། ཕཱར་ཨོལ་གྱི་མདུན་དུ་ལངས་བསྡད་ནས་ཁོ་ལ་འདི་ལྟར་ཤོད་ཅིག ཨིབ་རི་པ་རྣམས་ཀྱི་དཀོན་མཆོག་ཡ་ཝཱེས་འདི་སྐད་དུ། བདག་ལ་བསྙེན་བཀུར་བྱེད་པའི་ཆེད་དུ་ངའི་འབངས་མི་འགྲོ་རུ་ཆུག  
\v 14 རྒྱུ་མཚན་ནི་ཐེངས་འདིར་བདག་གིས་ཆག་སྒོ་ཐམས་ཅད་ཁྱོད་དང་ཁྱོད་ཀྱི་འཁོར་གཡོག་རྣམས་དང་། ཁྱོད་ཀྱི་འབངས་མི་རྣམས་ཀྱི་སྟེང་དུ་འབབ་པར་བྱ་སྟེ། བདག་དང་འདྲ་བ་ཞིག་གནམ་འོག་ཀུན་ཏུ་མེད་པ་ཁྱོད་ཀྱིས་ཤེས་པར་འགྱུར་བའི་ཕྱིར་རོ། །  
\v 15 ད་ལྟ་བདག་གིས་ལག་པ་བརྐྱངས་ཏེ་ནད་ཡམས་ཀྱིས་ཁྱོད་དང་ཁྱོད་ཀྱི་འབངས་མི་རྣམས་ལ་རྒོལ་བ་ཡིན་ན། ཁྱོད་རང་སྔར་ནས་ས་སྟེང་དུ་མེད་པར་གྱུར་པ་ཡིན།  
\v 16 དོན་དམ་དུ་བདག་གི་ནུས་མཐུ་ཁྱོད་ལ་མངོན་པ་དང་། བདག་གི་མིང་ནི་གནམ་འོག་ཀུན་ཏུ་བསྒྲག་པའི་ཕྱིར་ཁྱོད་རང་དར་བར་བྱས་པ་ཡིན་མོད།  
\v 17 འོན་ཀྱང་ཁྱོད་ཀྱིས་ད་དུང་བདག་གི་འབངས་མི་ལ་རང་རློམ་ཆེན་པོ་བྱས་ནས་ཁོ་ཚོ་འགྲོ་རུ་མི་འཇུག་པ་ཡིན་ནམ།  
\v 18 ལྟོས་དང་། སང་ཉིན་གྱི་དུས་འདི་ཙམ་ལ་བདག་གིས་སེར་བ་ཆེན་པོ་ཞིག་འབབ་པར་བྱ་སྟེ། ཨེ་ཅིབ་ཡུལ་ཆགས་པའི་དུས་ནས་བཟུང་སེར་བ་དེ་འདྲ་བབས་མྱོང་མེད།  
\v 19 ད་ལྟ་ཁྱོད་ཀྱིས་མི་མངགས་ནས་ཁྱོད་ཀྱི་ཕྱུགས་ཟོག་དང་། ཞིང་ལ་གང་ཡོད་པ་ཐམས་ཅད་ནང་ལ་བསྡུས་ཤིག ཞིང་ལ་བསྐྱུར་ཏེ་ནང་དུ་མ་བསྡུས་པ་མི་ཕྱུགས་གང་ཡིན་རུང་སེར་བ་དེའི་སྟེང་ལ་བབས་ནས་འཆི་བར་འགྱུར་ཞེས་སྨྲ་དགོས་པར་གསུངས་སོ། །  
\v 20 ཕཱར་ཨོལ་གྱི་འཁོར་གཡོག་རྣམས་ལས་དཀོན་མཆོག་ཡ་ཝཱེའི་བཀའ་འདི་ལ་འཇིགས་པ་རྣམས་ཀྱིས་རང་གི་གཡོག་པོ་རྣམས་དང་ཕྱུགས་ཟོག་མྱུར་དུ་ཁང་པའི་ནང་ལ་བསྡུས་མོད།  
\v 21 འོན་ཀྱང་དཀོན་མཆོག་ཡ་ཝཱེའི་བཀའ་འདི་སེམས་ལ་མ་བཟུང་བ་དག་གིས་གཡོག་པོ་རྣམས་དང་ཕྱུགས་ཟོག་ཞིང་ནང་དུ་བསྐྱུར་བ་རེད།   
\p
\v 22 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ལག་པ་ནམ་མཁར་རྐྱོངས་དང་། ཨེ་ཅིབ་ཡུལ་ཐམས་ཅད་དེ། མི་དང་ཕྱུགས་ཟོག་དང་ཞིང་ནང་གི་སྐྱེ་དངོས་ཐམས་ཅད་ཀྱི་སྟེང་དུ་སེར་བ་འབབ་པའི་ཕྱིར་ཡིན་ཞེས་གསུངས་པ་ལ།  
\v 23 མོ་ཤེ་ཡིས་རང་གི་འཁར་བ་ནམ་མཁར་བརྐྱངས་པ་དང་། དཀོན་མཆོག་ཡ་ཝཱེས་འབྲུག་སྒྲ་གྲགས་པ་དང་སེར་བ་འབབ་པར་མཛད་དེ། ས་ལ་མེའི་གློག་དམར་འཁྱུག་ཅིང་། དཀོན་མཆོག་ཡ་ཝཱེས་ཨེ་ཅིབ་ཡུལ་དུ་སེར་བ་ཕབ་བོ། །  
\v 24 དུས་དེར་སེར་བ་དང་མེའི་གློག་དམར་གཉིས་འདྲེས་ཤིང་ཤིན་ཏུ་དྲག་པོ་ཡིན་ཏེ། ཨེ་ཅིབ་ཡུལ་ཆགས་པའི་དུས་ནས་བཟུང་དེ་ལྟ་བུ་བྱུང་མྱོང་མེད།  
\v 25 ཨེ་ཅིབ་ཡུལ་ཐམས་ཅད་དུ། ཞིང་ལ་ཡོད་པའི་མི་ཕྱུགས་གཉིས་ཀ་དང་སྐྱེ་དངོས་ཡོད་ཚད་སེར་བས་བརྡུངས་པ་དང་། ཞིང་གི་ལྗོན་ཤིང་དང་རྩི་ཤིང་མཐའ་དག་ཀྱང་བཅག་པ་དང་།  
\v 26 ཡེས་ར་ཨེལ་པ་རྣམས་གནས་པའི་གོ་ཤེན་ཡུལ་འབའ་ཞིག་ཏུ་སེར་བ་མ་བབས་སོ། །   
\p
\v 27 དེ་ནས་ཕཱར་ཨོལ་གྱིས་མོ་ཤེ་དང་ཨ་རོན་གཉིས་བོས་འོངས་ནས་དེ་གཉིས་ལ་འདི་ལྟར། ད་རེས་ངས་སྡིག་པ་བྱས་ཤིང་། དཀོན་མཆོག་ཡ་ཝཱེ་དྲང་བདེན་ཡིན་ལ། བདག་དང་བདག་གི་འབངས་མི་རྣམས་ནི་ངན་པ་ཡིན་ནོ། །  
\v 28 དཀོན་མཆོག་གི་འབྲུག་སྒྲ་དང་སེར་བས་ད་ནི་ཆོག་སྟེ། དཀོན་མཆོག་ཡ་ཝཱེ་ལ་ཞུ་བ་ཕུལ་ཞིག དེ་ནས་བདག་གིས་ཁྱོད་རྣམས་འགྲོ་རུ་འཇུག་སྟེ་འདི་རུ་འདུག་མི་དགོས་ཞེས་སྨྲས།  
\v 29 ཡང་མོ་ཤེ་ན་རེ། ང་རང་གྲོང་ཁྱེར་གྱི་ཕྱི་རོལ་ཏུ་སོང་མ་ཐག་ངས་དཀོན་མཆོག་ཡ་ཝཱེའི་ཕྱོགས་སུ་ལག་ཟུང་བརྐྱངས་ནས་གསོལ་བ་འདེབས་པར་བྱ་སྟེ། འབྲུག་སྒྲ་ཆད་ནས་སེར་བ་ཡང་མེད་པར་འགྱུར་ལ། ས་གཞི་ཐམས་ཅད་དཀོན་མཆོག་ཡ་ཝཱེའི་ཡིན་པ་ཁྱོད་ཀྱིས་ཤེས་པར་འགྱུར་བའི་ཕྱིར་ཡིན།  
\v 30 འོན་ཀྱང་ཁྱོད་དང་ཁྱོད་ཀྱི་འཁོར་གཡོག་རྣམས་ད་དུང་དཀོན་མཆོག་ཡ་ཝཱེ་ལ་མི་འཇིགས་པ་ངས་ཤེས་པ་ཡིན་ཞེས་སྨྲས་སོ། །  
\v 31 དུས་དེར་ནས་ཀྱི་སྙེ་མ་འབུས་ཤིང་སོ་མའི་མེ་ཏོག་ཀྱང་བཞད་ཡོད་པས། སེར་བས་སོ་མ་དང་ནས་གཉིས་བརྡུངས་ནའང་།  
\v 32 གྲོ་དང་སོ་བ་ནི་ཕྱིས་སུ་སྨིན་པས་མ་བརྡུངས་སོ། །  
\v 33 དེ་ནས་མོ་ཤེ་ནི་ཕཱར་ཨོལ་དང་བྲལ་ནས་གྲོང་ཁྱེར་གྱི་ཕྱི་རོལ་ཏུ་སོང་སྟེ། དཀོན་མཆོག་ཡ་ཝཱེའི་ཕྱོགས་སུ་ལག་ཟུང་བརྐྱངས་ནས་གསོལ་བ་བཏབ་པ་ན། འབྲུག་སྒྲ་དང་སེར་བ་ཆད་ཅིང་། ཆར་བ་ས་ལ་འབབ་མཚམས་ཀྱང་བཞག་པ་རེད།  
\v 34 ཕཱར་ཨོལ་གྱིས་ཆར་བ་དང་སེར་བ་དང་འབྲུག་སྒྲ་བཅས་མཚམས་ཆད་པ་མཐོང་ནས་དེ་ལས་ཀྱང་སྡིག་པ་བྱས་ཏེ། ཁོ་དང་ཁོའི་འཁོར་གཡོག་རྣམས་ཀྱིས་སེམས་གྱོང་པོར་བྱས།  
\v 35 དེ་ལྟར་ཕཱར་ཨོལ་གྱི་སེམས་གྱོང་པོར་གྱུར་ནས། དཀོན་མཆོག་ཡ་ཝཱེས་མོ་ཤེ་བརྒྱུད་དེ་གསུངས་པ་བཞིན་དུ་ཡེས་ར་ཨེལ་པ་རྣམས་འགྲོ་རུ་མ་བཅུག་གོ །   
\c 10
\cl ལེའུ་བཅུ་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 འབུ་ཆ་ག་པའི་ཆག་སྒོ།  
\p
\v 1 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་རང་ཕཱར་ཨོལ་གྱི་མདུན་དུ་སོང་ཞིག བདག་གིས་ཁོ་དང་ཁོའི་འཁོར་གཡོག་རྣམས་ཀྱི་སེམས་གྱོང་པོར་བྱས་པའི་ཕྱིར་ཡིན། དེ་ནི་ཅི་ལ་ཞེ་ན། ངས་གྲུབ་རྟགས་དེ་རྣམས་ཁོ་ཚོའི་ཁྲོད་དུ་སྟོན་པ་དང་།  
\v 2 བདག་གིས་ཨེ་ཅིབ་པ་རྣམས་ལ་ཇི་ལྟར་འཕྲིན་ལས་མཛད་པ་དང་། དེ་དག་གི་ཁྲོད་དུ་གྲུབ་རྟགས་ཅི་ལྟ་བུ་བསྟན་པ་རྣམས་ཁྱོད་ཀྱིས་རང་རང་གི་བུ་དང་ཚ་བོའི་རྣ་བར་སྨྲ་བ་དང་། ཁྱོད་རྣམས་ཀྱིས་བདག་ནི་ཡ་ཝཱེ་ཡིན་པ་ཤེས་པར་འགྱུར་བའི་ཕྱིར་ཡིན་ཞེས་གསུངས་སོ། །   
\p
\v 3 དེའི་ཕྱིར་མོ་ཤེ་དང་ཨ་རོན་གཉིས་ཕཱར་ཨོལ་གྱི་མདུན་དུ་སོང་ནས་དེ་ལ། ཨིབ་རི་པ་རྣམས་ཀྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་དུས་ནམ་ཞིག་གི་བར་དུ་ངའི་མདུན་དུ་ཁེངས་སྐྱུང་མི་བྱེད་དམ། བདག་ལ་བསྙེན་བཀུར་བྱེད་པའི་ཆེད་དུ་བདག་གི་འབངས་མི་འགྲོ་རུ་ཆུག  
\v 4 གལ་ཏེ་ཁྱོད་ཀྱིས་བདག་གི་འབངས་མི་འགྲོ་རུ་མི་འཇུག་ན། སང་ཉིན་ངས་འབུ་ཆ་ག་པ་ཁྱོད་ཀྱི་ཡུལ་དུ་གཏོང་བར་བྱ་སྟེ།  
\v 5 དེ་དག་གིས་ས་ངོས་ཐམས་ཅད་འགེབ་ཅིང་དེ་མི་མཐོང་བར་འགྱུར་ཞིང་། ཁྱོད་ཅག་ལ་སེར་བ་ནས་ལུས་པ་དང་ཞིང་ལ་སྐྱེས་པའི་ལྗོན་ཤིང་ཐམས་ཅད་ཀྱང་བཟའ་བར་འགྱུར།  
\v 6 ཡང་ཁྱོད་ཀྱི་ཕོ་བྲང་དང་། ཁྱོད་ཀྱི་འཁོར་གཡོག་ཐམས་ཅད་ཀྱི་ཁང་པ་དང་། ཨེ་ཅིབ་པ་ཀུན་གྱི་ཁང་པ་ལ་འབུ་ཆ་ག་པས་གང་ཡོང་ལ། དེ་ལྟ་བུ་ནི་ཁྱོད་ཀྱི་ཕ་མེས་ཡང་མེས་རྣམས་འཇིག་རྟེན་དུ་སྐྱེས་པའི་དུས་ནས་བཟུང་ད་ལྟའི་བར་དུ་ནམ་ཡང་མཐོང་མ་མྱོང་གསུངས་ཞེས་སྨྲས་པ་དང་། མོ་ཤེ་ཁ་ཕྱིར་འཁོར་ཏེ་ཕཱར་ཨོལ་དང་བྲལ་ནས་སོང་ངོ་། །   
\p
\v 7 དེ་ནས་ཕཱར་ཨོལ་གྱི་འཁོར་གཡོག་རྣམས་ཀྱིས་ཁོ་ལ། མི་འདི་དུས་ནམ་ཞིག་གི་བར་དུ་ངེད་ཅག་འཛིན་པའི་རྙི་རུ་འགྱུར་རམ། མི་འདི་རྣམས་ཁོ་རྣམས་ཀྱི་དཀོན་མཆོག་ཡ་ཝཱེ་ལ་བསྙེན་བཀུར་བྱེད་པའི་ཆེད་དུ་འགྲོ་རུ་ཆུག་དང་། ཨེ་ཅིབ་ཡུལ་བརླགས་ཟིན་པ་ཁྱེད་ཀྱིས་ད་དུང་མི་ཤེས་སམ་ཞེས་ཞུས་པས།  
\v 8 མོ་ཤེ་དང་ཨ་རོན་གཉིས་ཕྱིར་ཕཱར་ཨོལ་གྱི་མདུན་དུ་བོས་ནས་དེས་ཁོ་གཉིས་ལ་འདི་ལྟར། ཁྱོད་ཅག་གི་དཀོན་མཆོག་ཡ་ཝཱེ་ལ་བསྙེན་བཀུར་བྱེད་དུ་སོང་ཞིག འོན་ཀྱང་སུ་འགྲོ་བར་བྱའམ་ཞེས་དྲིས་པར།  
\v 9 མོ་ཤེ་ན་རེ། དཀོན་མཆོག་ཡ་ཝཱེ་ལ་དུས་ཆེན་བསྲུང་བའི་ཕྱིར་ངེད་རྣམས་རྒན་གཞོན་དང་། བུ་བུ་མོ་རྣམས་མཉམ་དུ་བ་ཁྱུ་དང་ར་ལུག་གི་ཁྱུ་དེད་ནས་འགྲོ་བར་བྱ་ཞེས་སྨྲས།  
\v 10 ཡང་ཕཱར་ཨོལ་གྱིས་ཁོ་གཉིས་ལ། དེ་བས་ངས་ཁྱོད་རྣམས་བུད་མེད་དང་ཕྲུ་གུ་བཅས་པ་འགྲོ་རུ་འཇུག་དུས། དཀོན་མཆོག་ཡ་ཝཱེ་ཁྱོད་ཅག་དང་མཉམ་དུ་བཞུགས་ཀྱང་སྲིད། ཁྱོད་ཅག་ལ་དམིགས་ཡུལ་ངན་པ་ཡོད་པས་གཟབ་གཟབ་གྱིས་ཤིག  
\v 11 ཐམས་ཅད་སོང་མི་ཆོག་སྟེ། ཁྱོད་ཅག་སྐྱེས་པ་རྣམས་འབའ་ཞིག་སོང་ནས་དཀོན་མཆོག་ཡ་ཝཱེ་ལ་བསྙེན་བཀུར་བྱོས་ཤིག དེ་ནི་ཁྱོད་ཅག་གི་འདོད་པ་ཡིན་པས་སོ་ཞེས་སྨྲས་ཤིང་། ཁོ་གཉིས་ཕཱར་ཨོལ་གྱི་མདུན་ནས་ཕྱིར་བཏོན་ཏོ། །   
\p
\v 12 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ལག་པ་ཨེ་ཅིབ་ཡུལ་གྱི་ཕྱོགས་སུ་རྐྱོངས་དང་། འབུ་ཆ་ག་པ་རྣམས་ཨེ་ཅིབ་ཡུལ་དུ་འོངས་ནས་ས་སྟེང་གི་སྐྱེ་དངོས་ཐམས་ཅད་དེ། སེར་ཤུལ་ནས་ལུས་པ་མཐའ་དག་བཟའ་བའི་ཕྱིར་ཡིན་ཞེས་གསུངས་པ་དང་།  
\v 13 མོ་ཤེ་ཡིས་འཁར་བ་ཨེ་ཅིབ་ཡུལ་གྱི་ཕྱོགས་སུ་བརྐྱངས་ཤིང་། དཀོན་མཆོག་ཡ་ཝཱེས་ཉིན་མཚན་དེ་ལ་ཤར་རླུང་གཡུགས་པར་མཛད་དེ། ཐོ་རངས་ལ་སླེབས་དུས་ཤར་རླུང་གིས་འབུ་ཆ་ག་པ་རྣམས་ཁུར་ཡོང་ངོ་། །  
\v 14 འབུ་ཆ་ག་པ་རྣམས་ཨེ་ཅིབ་ཡུལ་ཀུན་ལ་ཁྱབ་ཡོང་སྟེ། ཡུལ་ཐམས་ཅད་ལ་ཤིན་ཏུ་མང་པོ་བབས། དེ་ལྟ་བུའི་འབུ་ཆ་ག་པ་སྔར་བྱུང་མ་མྱོང་ལ། ཕྱིས་སུའང་འབྱུང་བར་མི་འགྱུར།  
\v 15 འབུ་ཆ་ག་པ་ཡིས་ས་ངོས་ཐམས་ཅད་བཀབ་པས་ས་ནི་ནག་པོར་གྱུར་པ་དང་། ཡང་སེར་ཤུལ་ནས་ལུས་པའི་ས་སྟེང་གི་སྐྱེ་དངོས་མཐའ་དག་དང་ལྗོན་ཤིང་གི་འབྲས་བུ་ཐམས་ཅད་ཟོས་ནས། ཨེ་ཅིབ་ཡུལ་ཀུན་གྱི་ལྗོན་ཤིང་དང་ཞིང་ནང་གི་སྐྱེ་དངོས་ལས་སྔོན་པོ་ཅི་ཡང་མ་བསྐྱུར་ཏོ། །  
\v 16 དེ་ནས་ཕཱར་ཨོལ་གྱིས་མྱུར་དུ་མོ་ཤེ་དང་ཨ་རོན་གཉིས་བོས་ཏེ་ན་རེ། ངས་ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་འགལ་བའི་སྡིག་པ་བྱས་ཤིང་། ཁྱོད་གཉིས་ལའང་སྡིག་པ་བྱས་སོང་།  
\v 17 ད་ལྟ་ཁྱོད་གཉིས་ལ་ཞུ་བ་བྱེད་དེ། ཐེངས་འདི་ཁོ་ནར་ངའི་སྡིག་པ་ལ་གུ་ཡངས་གནང་བར་མཛོད། ཁྱོད་ཅག་གི་དཀོན་མཆོག་ཡ་ཝཱེས་ང་རང་ད་རེས་འཆི་བ་འདི་ནས་ཐར་བར་མཛད་པའི་ཕྱིར་ཞུ་བ་འབུལ་རོགས་ཞེས་སྨྲས་པ་ལ།  
\v 18 མོ་ཤེ་ཡིས་ཕཱར་ཨོལ་དང་བྲལ་ནས་དཀོན་མཆོག་ཡ་ཝཱེ་ལ་གསོལ་བ་བཏབ་ཅིང་།  
\v 19 དེ་ནས་དཀོན་མཆོག་ཡ་ཝཱེས་རླུང་ནི་ནུབ་རླུང་དྲག་པོར་བསྒྱུར་ཏེ། འབུ་ཆ་ག་པ་རྣམས་གཡུགས་ཤིང་རྒྱ་མཚོ་དམར་པོའི་ནང་དུ་ཁུར་བ་དང་། ཨེ་ཅིབ་ཡུལ་ཐམས་ཅད་ནས་འབུ་ཆ་ག་པ་གཅིག་ཀྱང་མ་བསྐྱུར་ཏོ། །  
\v 20 འོན་ཀྱང་དཀོན་མཆོག་ཡ་ཝཱེས་ཕཱར་ཨོལ་གྱི་སེམས་གྱོང་པོར་མཛད་པས། དེས་ཡེས་ར་ཨེལ་པ་རྣམས་འགྲོ་རུ་མ་བཅུག་གོ །   
\s1 མུན་པའི་ཆག་སྒོ།  
\p
\v 21 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ལག་པ་ནམ་མཁའི་ཕྱོགས་སུ་རྐྱོངས་དང་། རེག་ཀྱང་རེག་ནུས་པའི་མུན་པ་ཞིག་ཨེ་ཅིབ་ཡུལ་ལ་འབྱུང་བའི་ཕྱིར་ཡིན་ཞེས་གསུངས་པ་ལ།  
\v 22 མོ་ཤེ་ཡིས་ལག་པ་ནམ་མཁའི་ཕྱོགས་སུ་བརྐྱངས་པས། ཉིན་གསུམ་ལ་ཨེ་ཅིབ་ཡུལ་ཡོངས་སུ་མུན་པ་སྟུག་པོ་ཞིག་བྱུང་།  
\v 23 ཉིན་གསུམ་གྱི་རིང་མི་རྣམས་ཀྱིས་ཕན་ཚུན་མཐོང་མ་ནུས་ལ། མི་སུ་ཡང་ལངས་ནས་རང་སར་འབྲལ་མ་ཕོད་དོ། །འོན་ཀྱང་ཡེས་ར་ཨེལ་པ་རྣམས་ཀྱི་སྡོད་ཡུལ་རྣམས་ལ་འོད་ཡོད་པ་རེད།  
\v 24 དེ་ནས་ཕཱར་ཨོལ་གྱིས་མོ་ཤེ་བོས་ནས་ཁོ་ལ་འདི་ལྟར། ཁྱོད་ཅག་དཀོན་མཆོག་ཡ་ཝཱེ་ལ་བསྙེན་བཀུར་བྱེད་དུ་སོང་ཞིག འོན་ཏེ་ཁྱོད་རྣམས་ཀྱི་ར་ལུག་གི་ཁྱུ་དང་བ་ཁྱུ་འདི་རུ་བསྐྱུར་དགོས་པ་དང་། བུད་མེད་དང་ཕྲུ་གུ་རྣམས་ཁྱོད་ཅག་དང་མཉམ་དུ་སོང་ཆོག་ཅེས་སྨྲས་པ་ལ།  
\v 25 མོ་ཤེ་ན་རེ། ངེད་རྣམས་ཀྱིས་ངེད་ཅག་གི་དཀོན་མཆོག་ཡ་ཝཱེ་ལ་མཆོད་པ་འབུལ་ཐུབ་པའི་ཕྱིར། ཁྱོད་ཀྱིས་མཆོད་རྫས་དང་སྦྱིན་སྲེག་ཏུ་འབུལ་བྱའི་སེམས་ཅན་ཅིས་ཀྱང་ངེད་ཀྱི་ལག་ཏུ་གཏད་དེ།  
\v 26 ངེད་རྣམས་ཀྱི་ཕྱུགས་ཟོག་ཀྱང་ངེས་པར་ངེད་དང་མཉམ་དུ་འགྲོ་དགོས་ཤིང་། ཐ་ན་རྨིག་པ་གཅིག་ཀྱང་མི་བསྐྱུར། ཅིའི་ཕྱིར་ཞེ་ན། དེ་རྣམས་ལས་འགའ་ཤས་བླངས་ཏེ་ངེད་ཅག་གི་དཀོན་མཆོག་ཡ་ཝཱེ་ལ་བསྙེན་བཀུར་བྱེད་དགོས་པའི་ཕྱིར་ཡིན་ལ། ངེད་ཅག་གནས་དེར་མ་སླེབས་པའི་བར་དུ་གང་ཞིག་གིས་དཀོན་མཆོག་ཡ་ཝཱེ་ལ་བསྙེན་བཀུར་ཅི་ཞིག་བྱེད་དགོས་པ་མི་ཤེས་ཞེས་སྨྲས།  
\v 27 འོན་ཀྱང་དཀོན་མཆོག་ཡ་ཝཱེས་ཕཱར་ཨོལ་གྱི་སེམས་གྱོང་པོར་མཛད་པས། ཁོ་རྣམས་འགྲོ་རུ་འཇུག་མ་འདོད་ཅིང་།  
\v 28 ཕཱར་ཨོལ་གྱིས་མོ་ཤེ་ལ་འདི་ལྟར། ཁྱོད་འདི་ནས་ཕར་སོང་ཞིག ཕྱིན་ཆད་ང་དང་འཕྲད་པར་གཟབ་གཟབ་བྱོས། རྒྱུ་མཚན་ནི་ང་དང་འཕྲད་པའི་ཉིན་ལ་ཁྱོད་འཆི་བར་ངེས་པས་སོ་ཞེས་སྨྲས་པར།  
\v 29 མོ་ཤེ་ན་རེ། ཁྱོད་ཀྱིས་སྨྲས་པ་བདེན་ནོ། །ང་ནི་ཁྱོད་དང་སླར་ཡང་འཕྲད་མི་སྲིད་ཅེས་སྨྲས་སོ། །   
\c 11
\cl ལེའུ་བཅུ་གཅིག་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 སྐྱེས་འགོ་རྣམས་གསོད་པའི་ཆག་སྒོ།  
\p
\v 1 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། བདག་གིས་ད་དུང་ཆག་སྒོ་ཞིག་ཕཱར་ཨོལ་དང་ཨེ་ཅིབ་ཡུལ་དུ་འབྱུང་བར་བྱ། དེའི་རྗེས་སུ་ཁོས་ཁྱོད་རྣམས་ཡུལ་འདི་ནས་འགྲོ་རུ་འཇུག་པར་མ་ཟད། ཁོས་ཁྱོད་རྣམས་འགྲོ་རུ་འཇུག་པའི་དུས་སུ་ཁྱོད་ཅག་ཡོངས་རྫོགས་སྐྲོད་ངེས་ཤིང་།  
\v 2 མི་རྣམས་ཀྱི་རྣ་ལམ་དུ། སྐྱེས་ཕོ་མོ་རེ་རེས་རང་རང་གི་ཁྱིམ་མཚེས་ལ་གསེར་དངུལ་གྱི་ཡོ་བྱད་རྣམས་སློང་དགོས་པའི་གཏམ་འཇོག་པར་གྱིས་ཞེས་གསུངས་པ་དང་།  
\v 3 དཀོན་མཆོག་ཡ་ཝཱེས་ཨེ་ཅིབ་པའི་མིག་མདུན་དུ་མི་རྣམས་ལ་ཐུགས་རྗེ་ཐོབ་པར་མཛད་ཅིང་། ཡང་མོ་ཤེ་ནི་ཨེ་ཅིབ་ཡུལ་དང་། ཕཱར་ཨོལ་གྱི་འཁོར་གཡོག་རྣམས་དང་འབངས་མི་དག་གི་མིག་མདུན་དུ་ཤིན་ཏུ་ཆེན་པོ་ཡོད་པ་ཡིན་ནོ། །   
\p
\v 4 ཡང་མོ་ཤེ་ན་རེ། དཀོན་མཆོག་ཡ་ཝཱེས་འདི་སྐད་དུ། ནམ་ཕྱེད་ཙམ་ལ་ང་རང་ཨེ་ཅིབ་ཡུལ་ཀུན་ཏུ་རྒྱུ་ཞིང་།  
\v 5 ཨེ་ཅིབ་ཡུལ་དུ་སྐྱེས་འགོ་ཐམས་ཅད་དེ་ཁྲི་ལ་བཞུགས་པའི་ཕཱར་ཨོལ་ནས་རང་འཐག་ལ་ཡོད་པའི་བྲན་མོའི་བར་དུ་སྐྱེས་འགོ་ཡོད་དོ་ཅོག་དང་། ཕྱུགས་ཕྲུག་འགོ་མ་ཐམས་ཅད་འཆི་ངེས་ཡིན་ལ།  
\v 6 ཨེ་ཅིབ་ཡུལ་ཐམས་ཅད་དུ་ངུ་འབོད་ཆེན་པོ་འབྱུང་སྟེ། སྔར་དེ་འདྲ་བྱུང་མ་མྱོང་ལ། ཕྱིས་སུའང་འབྱུང་མི་སྲིད།  
\v 7 འོན་ཀྱང་ཡེས་ར་ཨེལ་པ་རྣམས་ཀྱི་ཁྲོད་དུ་མི་ཕྱུགས་གང་ཡིན་ཡང་། ཐ་ན་ཁྱི་ཡིས་ཀྱང་དེ་རྣམས་ལ་ཟུག་མི་ཕོད་ཅེས་གསུངས། དེ་ནི་དཀོན་མཆོག་ཡ་ཝཱེས་ཨེ་ཅིབ་པ་དང་ཡེས་ར་ཨེལ་པ་རྣམས་སོ་སོར་བཀར་བ་ཁྱོད་ཅག་གིས་ཤེས་པའི་ཕྱིར་ཡིན་ལ།  
\v 8 ཁྱོད་ཀྱི་འཁོར་གཡོག་འདི་རྣམས་ཐམས་ཅད་བདག་གི་མདུན་དུ་འོངས་ནས་གུས་འདུད་བྱེད་ཅིང་འདི་ལྟར། ཁྱོད་དང་ཁྱོད་ཀྱི་རྗེས་སུ་འབྲངས་པའི་མི་ཐམས་ཅད་འདི་ནས་སོང་ཞིག་ཅེས་སྨྲ་བར་འགྱུར་ཞིང་། དེའི་རྗེས་སུ་ང་རང་འགྲོ་བར་འགྱུར་ཞེས་སྨྲས་པ་དང་། མོ་ཤེ་ཁོང་ཁྲོ་ཆེན་པོ་དང་བཅས་ཕཱར་ཨོལ་དང་བྲལ་ནས་སོང་ངོ་། །   
\p
\v 9 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ངས་ཨེ་ཅིབ་ཡུལ་དུ་སྒྲུབ་པའི་དོན་ངོ་མཚར་ཅན་ཇེ་མང་དུ་འཕེལ་བའི་ཕྱིར། ཕཱར་ཨོལ་གྱིས་ཁྱོད་ཀྱི་བཀའ་ལ་མཉན་པར་མི་འགྱུར་ཞེས་གསུངས།  
\v 10 མོ་ཤེ་དང་ཨ་རོན་གཉིས་ཀྱིས་ཕཱར་ཨོལ་གྱི་མདུན་དུ་དོན་ངོ་མཚར་ཅན་དེ་ཐམས་ཅད་བསྟན་ནའང་། དཀོན་མཆོག་ཡ་ཝཱེས་ཕཱར་ཨོལ་གྱི་སེམས་གྱོང་པོར་མཛད་དེ། ཁོས་ཡེས་ར་ཨེལ་པ་རྣམས་རང་གི་ཡུལ་ནས་འགྲོ་རུ་མ་བཅུག་གོ །   
\c 12
\cl ལེའུ་བཅུ་གཉིས་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 པེ་སག་གི་དུས་ཆེན།  
\p
\v 1 ཡང་དཀོན་མཆོག་ཡ་ཝཱེས་ཨེ་ཅིབ་ཡུལ་དུ་མོ་ཤེ་དང་ཨ་རོན་གཉིས་ལ་འདི་སྐད་དུ།  
\v 2 ཟླ་འདི་ནི་ཁྱོད་ཅག་གི་ཟླ་དང་པོ་ཡིན་པ་དང་། ལོ་གཅིག་གི་ཐོག་མར་བརྩི་དགོས།  
\v 3 ཁྱོད་གཉིས་ཀྱིས་ཡེས་ར་ཨེལ་གྱི་ཚོགས་ཐམས་ཅད་ལ་འདི་ལྟར། ཟླ་འདིའི་ཚེས་བཅུ་པ་ལ་རང་རང་གི་ཕ་ཡི་ཁྱིམ་རྒྱུད་བཞིན་དུ་ཁྱིམ་ཚང་རེ་རེས་ལུ་གུ་ \f + \ft ཡང་ན་རེའུ་ལ་གོ་རུང་བ་ཡིན། གཤམ་དུ་ལུ་གུ་ཞེས་འབྱུང་བ་དོན་གཅིག་ཡིན། \f*རེ་ལེན་དགོས་ཤིང་།  
\v 4 གལ་ཏེ་ལུ་གུ་བཟའ་བ་ལ་ཁྱིམ་མི་ཉུང་ངུ་ཡིན་ན། ཁྱིམ་བདག་གིས་ཉེ་བའི་ཁྱིམ་མཚེས་དང་མཉམ་དུ་ལུ་གུ་གཅིག་ལེན་དགོས་ལ། ཁྱིམ་མི་རེ་རེའི་ཟ་ཚད་བཞིན་དུ་སྔོན་རྩིས་རྒྱག་དགོས།  
\v 5 ཁྱོད་ཅག་གི་ལུ་གུ་ནི་ལོ་གཅིག་ཅན་གྱི་ཕོ་ཕྱུགས་སྐྱོན་མེད་པ་ཞིག་ཡིན་དགོས་པ་དང་ལུག་གམ་ར་ཡི་ཁྲོད་གང་ནས་བླངས་ཀྱང་ཆོག  
\v 6 ཁྱོད་ཅག་གིས་ཟླ་འདིའི་ཚེས་བཅུ་བཞི་པའི་བར་དུ་བཞག་ནས། ཡེས་ར་ཨེལ་གྱི་ཚོགས་ཐམས་ཅད་ཀྱིས་ས་སྲོས་ཀྱི་དུས་སུ་ལུ་གུ་བཤའ་དགོས།  
\v 7 ཡང་ཁྱིམ་ཚང་རེ་རེས་དེའི་ཁྲག་ཉུང་ཙམ་བླངས་ཏེ་ལུ་གུ་བཟའ་སའི་ཁང་པ་དག་གི་སྒོ་འགྲམ་གཉིས་ཀ་དང་ཡ་ཐེམ་ལ་བསྐུ་དགོས།  
\v 8 མཚན་མོ་དེར་ལུ་གུའི་ཤ་བཟའ་དགོས་ཏེ། མེ་ལ་བསྲེགས་ནས་སྐྱུར་མེད་བག་ལེབ་དང་སྔོ་ཚོད་ཁ་པོ་དང་ལྷན་དུ་བཟའ་དགོས།  
\v 9 རློན་པའམ་ཆུ་ལ་བཙོས་པ་ནི་བཟའ་མི་རུང་སྟེ་མགོ་སུག་གཉིས་ཀ་དང་དེའི་ནང་ཁྲོལ་དང་བཅས་པ་མེ་ལ་བསྲེགས་ནས་བཟའ་དགོས།  
\v 10 ཕྱི་ཉིན་ཞོགས་པའི་བར་དུ་ཅི་ཡང་ལུས་སུ་འཇུག་མི་རུང་ལ། གལ་ཏེ་ཞོགས་པའི་བར་དུ་ལུས་ན་དེ་མེར་བསྲེག་དགོས།  
\v 11 ཡང་ཟ་སྲོལ་ནི་འདི་ལྟ་སྟེ། ཁྱོད་རྣམས་ཀྱིས་ཐུ་བ་བརྫེས་པ་དང་རྐང་པར་ལྷམ་གྱོན་ཞིང་། འཁར་བ་ལག་ཏུ་བཟུང་ནས་བྲེལ་མྱུར་ངང་བཟའ་དགོས་ལ། དེ་ནི་ཡ་ཝཱེའི་པེ་སག་གི་དུས་ཆེན་ཡིན་ནོ། །  
\v 12 མཚན་མོ་དེར་ང་རང་ཨེ་ཅིབ་ཡུལ་དུ་རྒྱུ་ཞིང་། མི་ཕྱུགས་གང་ཡིན་ཡང་ཨེ་ཅིབ་ཡུལ་གྱི་སྐྱེས་འགོ་ཐམས་ཅད་གསོད་པ་དང་། ཨེ་ཅིབ་ཡུལ་གྱི་ལྷ་ཀུན་ལ་ཁྲིམས་ཐག་གཅོད་པར་བྱ། བདག་ནི་ཡ་ཝཱེ་ཡིན།  
\v 13 ཁྲག་དེ་ཁྱོད་རྣམས་གནས་སའི་ཁང་པའི་སྟེང་རྟགས་སུ་འགྱུར་ལ། ངས་ཁྲག་དེ་མཐོང་བ་དང་ཕར་བརྒལ་ཞིང་། ཨེ་ཅིབ་ཡུལ་ལ་བརྡུང་བའི་ཚེ། མེད་པར་བཟོ་བའི་ཆག་སྒོ་དེ་ཁྱོད་རྣམས་ལ་འཕོག་པར་མི་འགྱུར་རོ། །   
\p
\v 14 ཡང་ཉིན་དེ་ནི་ཁྱོད་ཅག་གི་ཕྱིར་རྗེས་དྲན་དུ་འགྱུར་ཞིང་། དཀོན་མཆོག་ཡ་ཝཱེ་ལ་དུས་ཆེན་ཞིག་རོལ་དགོས་པ་དང་། ཁྱོད་རྣམས་ཀྱིས་མི་རབས་ནས་མི་རབས་བར་ཁྲིམས་སྲོལ་དེ་གཏན་དུ་བསྲུང་དགོས།  
\v 15 ཉིན་བདུན་གྱི་རིང་ལ་སྐྱུར་མེད་བག་ལེབ་བཟའ་དགོས་ཤིང་། ཉིན་དང་པོར་ཁྱོད་ཅག་གིས་རང་གི་ཁྱིམ་ནས་སྐྱུར་རྩི་ཕྱི་རུ་དོར་ཅིག ཅི་ལ་ཞེ་ན། ཉིན་དང་པོ་ནས་ཉིན་བདུན་པའི་བར་དུ་མི་སུ་ཞིག་གིས་སྐྱུར་རྩི་དང་ལྡན་པ་ཞིག་ཟོས་ན། མི་དེ་ཡེས་ར་ཨེལ་གྱི་ཁྲོད་ནས་འཕུད་དགོས་པའི་ཕྱིར་ཡིན།  
\v 16 ཉིན་དང་པོར་ཁྱོད་རྣམས་ལ་འདུ་འཛོམས་དམ་པ་ཡོད་དགོས་ལ། ཉིན་བདུན་པར་ཡང་འདུ་འཛོམས་དམ་པ་ཡོད་དགོས། ཉིན་དེ་གཉིས་ལ་མི་རེ་རེར་མཁོ་བའི་ཁ་ཟས་འབའ་ཞིག་སྟ་གོན་བྱེད་པ་ལས་གཞན། ལས་གང་ཡང་བྱེད་མི་རུང་།  
\v 17 ཉིན་དེ་ཉིད་ལ་ངས་ཁྱོད་རྣམས་ཀྱི་དཔུང་སྡེ་ཨེ་ཅིབ་ཡུལ་ནས་ཕྱིར་ཁྲིད་པའི་རྐྱེན་གྱིས། ཁྱོད་རྣམས་ཀྱིས་སྐྱུར་མེད་བག་ལེབ་ཀྱི་དུས་ཆེན་བསྲུང་དགོས་ལ། ཉིན་མོ་དེ་བསྲུང་བ་དང་མི་རབས་ནས་མི་རབས་བར་ཁྲིམས་སྲོལ་དེ་གཏན་དུ་བརྩི་དགོས།  
\v 18 ཟླ་དང་པོའི་ཚེས་བཅུ་བཞི་ཉིན་གྱི་དགོང་མོ་ནས་ཟླ་དེའི་ཚེས་ཉེར་གཅིག་ཉིན་གྱི་དགོང་མོའི་བར་དུ་སྐྱུར་མེད་བག་ལེབ་བཟའ་དགོས།  
\v 19 ཁྱོད་ཅག་གི་ཁྱིམ་རེ་རེར་ཉིན་བདུན་གྱི་རིང་ལ་སྐྱུར་རྩི་ཡོད་མི་རུང་སྟེ། བྱེས་པའམ་ཡུལ་མི་སུ་ཡིན་ཡང་སྐྱུར་རྩི་ཅན་གང་ཞིག་ཟ་མཁན་དེ་ཡེས་ར་ཨེལ་གྱི་ཚོགས་ནས་འཕུད་དགོས་པའི་ཕྱིར་ཡིན།  
\v 20 ཁྱོད་རྣམས་ཀྱིས་སྐྱུར་རྩི་ཅན་གང་ཡིན་ཡང་བཟའ་མི་རུང་ལ། ཁྱོད་ཅག་གང་དུ་གནས་ནའང་སྐྱུར་མེད་བག་ལེབ་བཟའ་དགོས་ཞེས་སྨྲོས་ཤིག་གསུངས་སོ། །   
\p
\v 21 དེ་ནས་མོ་ཤེ་ཡིས་ཡེས་ར་ཨེལ་གྱི་རྒན་པོ་རྣམས་བོས་ནས་དེ་དག་ལ། ཁྱོད་རྣམས་ཀྱིས་ཁྱིམ་མི་བཞིན་དུ་ལུ་གུ་བླངས་ནས་པེ་སག་གི་ལུ་གུ་ཤོས་ཞིག  
\v 22 ཡང་ཨི་སོབ་རྩྭ་ཤིང་ཕོན་པོ་ཞིག་གཞོང་པ་རུ་ཡོད་པའི་ཁྲག་གི་ནང་དུ་སྦངས་ནས། ཁྲག་དེ་སྒོའི་ཡ་ཐེམ་དང་སྒོ་འགྲམ་གཉིས་ལ་བསྐུ་དགོས་ཤིང་། ཞོགས་པའི་བར་དུ་ཁྱོད་རྣམས་ལས་སུ་ཡང་རང་གི་ཁྱིམ་ནས་སྒོ་རུ་འབུད་མི་རུང་།  
\v 23 ཅི་ལ་ཞེ་ན། དཀོན་མཆོག་ཡ་ཝཱེ་ཕྱོགས་ཀུན་ལ་རྒྱུ་ཞིང་ཨེ་ཅིབ་པ་རྣམས་དགུམ་པ་དང་། སྒོའི་ཡ་ཐེམ་དང་སྒོ་འགྲམ་གཉིས་ལ་བསྐུས་པའི་ཁྲག་གཟིགས་པ་ན། ཁོང་ཉིད་སྒོ་དེ་ལས་ཕར་བརྒལ་ཞིང་སྲོག་གཅོད་མཁན་དེ་ཁྱོད་ཅག་གི་ཁང་པའི་ནང་ལ་ཁྱོད་རྣམས་དགུམ་དུ་ཡོང་བར་མི་མཛད་པའི་ཕྱིར་རོ། །  
\v 24 ཁྱོད་ཅག་གིས་བཀའ་འདི་བསྲུངས་ཏེ། མི་རབས་ནས་མི་རབས་བར་ཁྲིམས་སྲོལ་དེ་གཏན་དུ་བསྲུང་དགོས།  
\v 25 ཡང་ཕྱིས་སུ་ཁྱོད་རྣམས་དཀོན་མཆོག་ཡ་ཝཱེས་ཁྱོད་ཅག་ལ་གནང་བར་ཞལ་གྱིས་བཞེས་པའི་ཡུལ་དུ་སླེབས་དུས། ཁྱོད་ཅག་གིས་ཆོ་ག་དེ་བསྲུང་དགོས།  
\v 26 ཁྱོད་ཅག་གི་བུ་ཕྲུག་རྣམས་ཀྱིས་ཆོ་ག་འདིའི་དོན་ཅི་ཡིན་ཞེས་འདྲི་བའི་ཚེ།  
\v 27 ཁྱོད་ཅག་གིས་དེ་རྣམས་ལ། འདི་ནི་དཀོན་མཆོག་ཡ་ཝཱེ་ལ་འབུལ་བའི་པེ་སག་གི་མཆོད་པ་དེ་ཡིན། ཁོང་གིས་ཨེ་ཅིབ་པ་རྣམས་ལ་བརྡུངས་པའི་ཚེ། ཨེ་ཅིབ་ཡུལ་དུ་ཡོད་པའི་ཡེས་ར་ཨེལ་པ་རྣམས་ཀྱི་ཁང་པ་རྣམས་ལས་ཕར་བརྒལ་ཏེ་རང་ཅག་གི་ཁྱིམ་ཚང་རེ་རེ་ཐར་བར་མཛད་པ་ཡིན་སྨྲོས་ཤིག་ཅེས་སྨྲས། དེ་ནས་མི་རྣམས་ཀྱིས་མགོ་བོ་བཏུད་ནས་ཕྱག་བཙལ་ཞིང་།  
\v 28 དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་བཀའ་ཇི་ལྟར་གནང་བ་ཡིན་ན། ཡེས་ར་ཨེལ་པ་རྣམས་ཀྱིས་དེ་བཞིན་དུ་བྱས་སོ། །   
\p
\v 29 ཡང་ནམ་ཕྱེད་ལ་དཀོན་མཆོག་ཡ་ཝཱེས་ཨེ་ཅིབ་ཡུལ་དུ་རྒྱལ་ཁྲི་ལ་སྡོད་པའི་ཕཱར་ཨོལ་གྱི་སྐྱེས་འགོ་ནས་བཙོན་དུ་བཅུག་ཡོད་པའི་བཙོན་པའི་སྐྱེས་འགོའི་བར་དང་། ཕྱུགས་ཕྲུག་འགོ་མ་རྣམས་བཅས་སྐྱེས་འགོ་ཐམས་ཅད་བཀུམས།  
\v 30 མཚན་མོ་དེ་ལ་ཕཱར་ཨོལ་དང་དེའི་འཁོར་གཡོག་རྣམས་དང་། ཨེ་ཅིབ་པ་ཐམས་ཅད་ལངས་ནས་ཨེ་ཅིབ་ཡུལ་དུ་ངུ་སྐད་ཆེན་པོ་ཞིག་བྱུང་བ་སྟེ། འཆི་བ་མེད་པའི་ཁྱིམ་ཚང་གཅིག་ཀྱང་མ་ལུས་པའི་ཕྱིར་རོ། །   
\s1 ཨེ་ཅིབ་ཡུལ་ནས་ཕྱིར་ཐོན་པ།  
\p
\v 31 དེ་ནས་མཚན་མོའི་དུས་སུ་ཕཱར་ཨོལ་གྱིས་མོ་ཤེ་དང་ཨ་རོན་གཉིས་བོས་ཏེ་ན་རེ། ཁྱོད་གཉིས་དང་ཡེས་ར་ཨེལ་པ་རྣམས་ངའི་འབངས་མིའི་ཁྲོད་ནས་ཆས་ཏེ་སོང་ཞིག ཁྱོད་གཉིས་ཀྱིས་སྨྲས་པ་བཞིན་དུ་དཀོན་མཆོག་ཡ་ཝཱེ་ལ་བསྙེན་བཀུར་བྱེད་དུ་སོང་ཞིག  
\v 32 ཡང་ཁྱོད་ཀྱིས་སྨྲས་པ་བཞིན་དུ་ར་ལུག་གི་ཁྱུ་དང་བ་ཁྱུ་དེད་ནས་སོང་ལ། ང་རང་ལ་ཡང་བྱིན་གྱིས་རློབས་ཤིག་ཅེས་སྨྲས་སོ། །   
\p
\v 33 ཨེ་ཅིབ་པ་རྣམས་ཀྱིས་ངེད་ཐམས་ཅད་འཆི་བར་འགྱུར་ཞེས་སྨྲས་པས། ཡེས་ར་ཨེལ་པ་རྣམས་ལ་ནན་གྱིས་བསྐུལ་ཏེ་ཁོ་རྣམས་ཡུལ་དེ་ནས་མྱུར་དུ་ཕྱིར་བཏོན།  
\v 34 དེ་ནས་ཁོ་རྣམས་ཀྱིས་ད་དུང་སྐྱུར་རྩི་མ་བཏབ་པའི་བག་ཟན་དང་ཟན་གཞོང་བཅས་གྱོན་གོས་ཀྱིས་བཏུམས་ཏེ་ཕྲག་ལ་ཁུར་ནས་ཁྱེར།  
\v 35 ཡེས་ར་ཨེལ་པ་རྣམས་ཀྱིས་མོ་ཤེ་ཡིས་སྨྲས་པ་བཞིན་དུ་བསྒྲུབས་པ་སྟེ། ཨེ་ཅིབ་པ་རྣམས་ལས་གསེར་དངུལ་གྱི་ཡོ་བྱད་དང་གྱོན་གོས་བསླངས་པ་དང་།  
\v 36 དཀོན་མཆོག་ཡ་ཝཱེས་ཨེ་ཅིབ་པ་དག་གི་མིག་མདུན་དུ་མི་རྣམས་ལ་ཐུགས་རྗེ་ཐོབ་པར་མཛད་པས། དེ་དག་གིས་ཅི་བསླངས་པ་བཞིན་དུ་ཐོབ་ཅིང་། ཨེ་ཅིབ་པའི་རྒྱུ་ནོར་དག་བཅོམ་ནས་ཁྱེར་ཏོ། །   
\p
\v 37 དེ་ནས་ཡེས་ར་ཨེལ་པ་རྣམས་རཱ་ཨམ་སེའེ་ནས་ཆས་ཏེ་སོའུ་ཀོད་ཡུལ་དུ་ཕྱིན་པ་དང་། བུད་མེད་དང་ཕྲུ་གུ་རྣམས་མ་ཐེ་བར། རྐང་པ་བརྒྱབ་ནས་འགྲོ་བའི་སྐྱེས་པའི་མི་གྲངས་ནི་འབུམ་དྲུག་ཙམ་ཡོད།  
\v 38 མི་ཚོགས་འདྲེས་མ་ཞིག་དང་ར་ལུག་དང་བ་གླང་གི་ཁྱུ་རྣམས་ཏེ་སྒོ་ཕྱུགས་གྲངས་ལས་འདས་པའང་ཁོ་རྣམས་དང་མཉམ་དུ་སོང་བ་དང་།  
\v 39 ཡང་ཁོ་རྣམས་ཀྱིས་ཨེ་ཅིབ་ཡུལ་ནས་ཁྱེར་བའི་བག་ཟན་ནས་སྐྱུར་མེད་བག་ལེབ་བསྲེགས་པ་སྟེ། ཅི་ལ་ཞེ་ན། ཨེ་ཅིབ་ཡུལ་ནས་བཏོན་ཞིང་འགོར་འགྱང་བྱེད་མ་ནུས་པས་བག་ཟན་ལ་སྐྱུར་རྩི་མ་བཅུག་པ་དང་། རང་གི་ཆེད་དུ་བཟའ་བཅའ་ཅི་ཡང་གྲ་སྒྲིག་བྱས་མེད་པའི་ཕྱིར་རོ། །   
\p
\v 40 ཡེས་ར་ཨེལ་པ་རྣམས་ཨེ་ཅིབ་ཡུལ་དུ་བསྡོམས་པས་ལོ་ངོ་བཞི་བརྒྱ་སུམ་ཅུར་བསྡད།  
\v 41 ཡང་ལོ་བཞི་བརྒྱ་སུམ་ཅུ་ཏག་ཏག་ལོན་པའི་ཉིན་དེ་ལ་དཀོན་མཆོག་ཡ་ཝཱེའི་དཔུང་སྡེ་ཐམས་ཅད་ཨེ་ཅིབ་ཡུལ་ནས་ཕྱིར་ཐོན་ཞིང་།  
\v 42 མཚན་མོ་དེ་ནི་དཀོན་མཆོག་ཡ་ཝཱེས་ཁོ་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་པའི་མཚན་མོ་ཡིན་པས། ཡེས་ར་ཨེལ་པ་རྣམས་དང་དེ་དག་གི་བུ་རབས་ཐམས་ཅད་ཀྱིས་མཚན་མོ་དེ་དཀོན་མཆོག་ཡ་ཝཱེ་ལ་ནན་བརྩི་བྱེད་དགོས་སོ། །   
\s1 པེ་སག་དུས་ཆེན་གྱི་ཁྲིམས་སྲོལ།  
\p
\v 43 ཡང་དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་འདི་སྐད་དུ། པེ་སག་དུས་ཆེན་གྱི་ཁྲིམས་སྲོལ་ནི་འདི་ལྟར་ཡིན་ཏེ། ཕྱི་ཕྱོགས་པ་སུ་ཡིན་ཡང་ལུ་གུའི་ཤ་བཟའ་མི་རུང་།  
\v 44 འོན་ཀྱང་། དངུལ་སྤྲད་ནས་ཉོས་པའི་གཡོག་པོ་ནི་མཚན་སྐྱི་བཅད་པ་ཡིན་ན་དེས་བཟའ་རུང་བ་ཡིན།  
\v 45 བྱེས་སུ་སྡོད་པའམ་གླ་པ་སུ་ཡིན་ཡང་དེ་ལས་བཟའ་མི་རུང་།  
\v 46 ཅིས་ཀྱང་ཁང་པ་གཅིག་གི་ནང་དུ་བཟའ་དགོས་ཤིང་། ལུ་གུ་དེའི་ཤ་ལས་ཅུང་ཙམ་ཡང་ཁང་པའི་ཕྱི་རུ་འཁྱེར་མི་འོས་ལ། དེའི་རུས་པ་གཅིག་ཀྱང་གཅོག་མི་རུང་།  
\v 47 ཡེས་ར་ཨེལ་གྱི་ཚོགས་ཐམས་ཅད་ཀྱིས་ཁྲིམས་སྲོལ་དེ་བསྲུང་དགོས།  
\v 48 གལ་ཏེ་བྱེས་པ་ཞིག་ཁྱོད་ཅག་གི་ཁྲོད་དུ་གནས་ཏེ་དཀོན་མཆོག་ཡ་ཝཱེ་ལ་པེ་སག་གི་དུས་ཆེན་བསྲུང་བར་དགའ་ཞིང་། ཁྱིམ་དེའི་སྐྱེས་པ་ཐམས་ཅད་ཀྱི་མཚན་སྐྱི་བཅད་ན། ད་གཟོད་ཡུལ་མི་ལྟར་ཡོང་ནས་དུས་ཆེན་བསྲུང་དུ་འཇུག་རུང་བ་ཡིན། འོན་ཀྱང་། མཚན་སྐྱི་མ་བཅད་པ་དག་གིས་དེ་ལས་བཟའ་མི་འོས།  
\v 49 ཡུལ་མི་དང་ཁྱོད་ཅག་གི་ཁྲོད་དུ་གནས་པའི་བྱེས་པ་རྣམས་ལ་ཁྱད་པར་གང་ཡང་མེད་པར་བཀའ་ཁྲིམས་གཅིག་ཡོད་དགོས་ཞེས་གསུངས་སོ། །   
\p
\v 50 དཀོན་མཆོག་ཡ་ཝཱེས་མོ་ཤེ་དང་ཨ་རོན་གཉིས་ལ་བཀའ་ཇི་ལྟར་གནང་བ་ཡིན་ན། ཡེས་ར་ཨེལ་པ་ཐམས་ཅད་ཀྱིས་དེ་བཞིན་དུ་བྱས་ཤིང་།  
\v 51 ཉིན་དེ་ལ་དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ཁོ་ཚོའི་དཔུང་སྡེ་བཞིན་དུ་ཨེ་ཅིབ་ཡུལ་ནས་ཕྱི་རུ་ཁྲིད་པར་མཛད་དོ། །   
\c 13
\cl ལེའུ་བཅུ་གསུམ་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 སྐྱེས་འགོ་ཀུན་དམ་པར་བྱེད་པའི་སྐོར།  
\p
\v 1 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 2 ཡེས་ར་ཨེལ་པ་རྣམས་ཀྱི་ཁྲོད་དུ་སྐྱེས་འགོ་ནི་མི་ཕྱུགས་གང་ཡིན་རུང་དེ་དག་བདག་གི་ཡིན་ཏེ། ཁོ་རྣམས་ཐམས་ཅད་ང་ལ་དམ་པར་གྱིས་ཞེས་གསུངས་སོ། །   
\p
\v 3 དེ་ནས་མོ་ཤེ་ཡིས་མི་རྣམས་ལ། ཁྱོད་རྣམས་ཨེ་ཅིབ་ཡུལ་གྱི་བྲན་དུ་བཀོལ་བའི་གནས་ནས་ཐོན་པའི་ཉིན་འདི་རྗེས་སུ་དྲན་པར་གྱིས་ཤིག དཀོན་མཆོག་ཡ་ཝཱེས་ནུས་མཐུ་ཆེན་པོའི་ཕྱག་གིས་ཁྱོད་རྣམས་ཡུལ་དེ་ནས་ཕྱི་རུ་ཁྲིད་པས། སྐྱུར་རྩི་ཅན་གང་ཡང་བཟའ་མི་རུང་།  
\v 4 ཨ་རྦིབ་ཟླ་བའི་ཉིན་འདི་ལ་ཁྱོད་རྣམས་ཕྱི་རོལ་ཏུ་ཐོན་པ་ཡིན་ནོ། །  
\v 5 དཀོན་མཆོག་ཡ་ཝཱེས་ཀ་ན་ཨན་པ་དང་། ཧེད་པ་དང་། ཨེ་མོར་པ་དང་། ཧེ་བི་པ་དང་། ཡེ་བུ་སི་པ་རྣམས་ཀྱི་ཡུལ་ཏེ། འོ་མ་དང་སྦྲང་རྩི་བཞུར་བའི་ཡུལ་དེ་ཁྱོད་ཅག་གི་ཕ་མེས་ཡང་མེས་རྣམས་ལ་མནའ་བཞེས་པ་བཞིན་ཁྱོད་རྣམས་ལ་གནང་ངེས་ཤིང་། ཁོང་གིས་ཁྱོད་རྣམས་དེ་ལ་འཁྲིད་པར་འགྱུར་བ་དང་། དེའི་དུས་སུ་ཟླ་བ་འདི་ལ་ཁྱོད་རྣམས་ཀྱིས་ཁྲིམས་སྲོལ་བསྲུང་དགོས་པ་ནི་འདི་ལྟ་སྟེ།  
\v 6 ཉིན་བདུན་གྱི་རིང་ཁྱོད་རྣམས་ཀྱིས་སྐྱུར་མེད་བག་ལེབ་ཟོ་ལ། ཉིན་བདུན་པར་དཀོན་མཆོག་ཡ་ཝཱེ་ལ་དུས་ཆེན་བསྲུང་བར་བྱའོ།  
\v 7 ཉིན་བདུན་པོའི་རིང་ལ་སྐྱུར་མེད་བག་ལེབ་བཟའ་དགོས་ཤིང་ཁྱོད་རྣམས་ཀྱི་ཁྲོད་དུ་སྐྱུར་རྩི་ཅན་གང་ཡང་མཐོང་མི་འོས། ཁྱོད་རྣམས་ཀྱི་ཡུལ་ཐམས་ཅད་ནས་ཀྱང་སྐྱུར་རྩི་མཐོང་མི་རུང་།  
\v 8 ཡང་ཉིན་དེར་ཁྱོད་རྣམས་ཀྱིས་རང་གི་བུ་ལ། འདི་ནི་ང་རང་ཨེ་ཅིབ་ཡུལ་ནས་ཕྱིར་ཐོན་པའི་སྐབས་སུ་དཀོན་མཆོག་ཡ་ཝཱེས་ང་རང་ལ་དེ་ལྟར་མཛད་པའི་ཕྱིར་ཡིན་ཞེས་སྨྲ་དགོས།  
\v 9 དཀོན་མཆོག་ཡ་ཝཱེས་ནུས་མཐུ་ཆེན་པོའི་ཕྱག་གིས་ཁྱོད་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་པའི་རྐྱེན་གྱིས། ཁྲིམས་སྲོལ་འདི་ནི་ཁྱོད་རྣམས་ཀྱི་ལག་པར་བཏབ་པའི་རྟགས་ཐམ་དང་། ཁྱོད་རྣམས་ཀྱི་དཔྲལ་བར་ཡོད་པའི་རྗེས་དྲན་དུ་འགྱུར་ཏེ། དཀོན་མཆོག་ཡ་ཝཱེའི་བཀའ་ཁྲིམས་ནི་དུས་རྒྱུན་ཁྱོད་རྣམས་ཀྱི་ངག་ཏུ་ཡོད་པར་བྱའོ། །  
\v 10 དེ་བས་ཁྱོད་རྣམས་ཀྱིས་ཁྲིམས་སྲོལ་འདི་ལོ་རེ་ནས་ལོ་རེ་བཞིན་དུས་ཚོད་ལྟར་བསྲུང་དགོས་སོ། །   
\p
\v 11 དཀོན་མཆོག་ཡ་ཝཱེས་དེ་སྔར་ཁྱོད་དང་ཁྱོད་རྣམས་ཀྱི་ཕ་མེས་ཡང་མེས་ལ་མནའ་བཞེས་པ་བཞིན་དུ། མ་འོངས་པར་ཁྱོད་རྣམས་ཀ་ན་ཨན་པའི་ཡུལ་དུ་ཁྲིད་ནས་ཡུལ་དེ་ཁྱོད་ཅག་ལ་གནང་བའི་ཚེ།  
\v 12 ཁྱོད་རྣམས་ཀྱིས་སྐྱེས་འགོ་ཀུན་དང་། ཡང་ཁྱོད་རྣམས་ཀྱི་ཕྱུགས་ཕྲུག་འགོ་མ་ཐམས་ཅད་དཀོན་མཆོག་ཡ་ཝཱེ་ལ་འབུལ་དགོས་ལ། ཕོ་ཡིན་པ་རྣམས་དཀོན་མཆོག་ཡ་ཝཱེ་ལ་གཏོགས་པ་ཡིན།  
\v 13 འོན་ཀྱང་བོང་ཕྲུག་འགོ་མ་ཐམས་ཅད་ནི་ལུ་གུ་ཞིག་གིས་བླུ་དགོས། ཅི་སྟེ་བླུ་བར་མ་བྱས་ན་དེའི་སྐེ་ཚིགས་རྫོག་ཅིག ཁྱོད་རྣམས་ཀྱི་བུ་སྐྱེས་འགོ་ཐམས་ཅད་བླུ་དགོས།  
\v 14 མ་འོངས་པར་ཁྱོད་རྣམས་ཀྱི་བུ་ཡིས་དེའི་དོན་ཅི་ཡིན་པ་ཁྱོད་རྣམས་ལ་འདྲི་བའི་ཚེ། ཁྱོད་ཅག་གིས་དེ་ལ་དཀོན་མཆོག་ཡ་ཝཱེས་ནུས་མཐུ་ཆེན་པོའི་ཕྱག་གིས་ངེད་རྣམས་ཨེ་ཅིབ་ཡུལ་གྱི་བྲན་དུ་བཀོལ་བའི་གནས་ནས་ཕྱི་རུ་ཁྲིད་པར་མཛད་ཅིང་།  
\v 15 ཕཱར་ཨོལ་གྱི་སེམས་གྱོང་པོ་ཡིན་ཞིང་ངེད་རྣམས་འགྲོ་རུ་མི་འཇུག་པ་ཙམ་བྱས་པའི་སྐབས་སུ། དཀོན་མཆོག་ཡ་ཝཱེས་ཨེ་ཅིབ་ཡུལ་གྱི་སྐྱེས་འགོ་ཐམས་ཅད་དེ་མིའི་སྐྱེས་འགོ་ནས་ཕྱུགས་ཕྲུག་འགོ་མའི་བར་དུ་བཀུམས། དེའི་ཕྱིར་ངས་ཕྱུགས་ཕྲུག་འགོ་མ་ཕོ་ཡིན་པ་ཐམས་ཅད་དཀོན་མཆོག་ཡ་ཝཱེ་ལ་འབུལ། འོན་ཀྱང་བུ་སྐྱེས་འགོ་ཐམས་ཅད་བླུ་བ་ཡིན་ཞེས་སྨྲ་དགོས།  
\v 16 དོན་འདི་ནི་ཁྱོད་རྣམས་ཀྱི་ལག་པར་བཏབ་པའི་རྟགས་ཐམ་དང་དཔྲལ་བ་རུ་མཚོན་བྱེད་ཡིན་དགོས་ཏེ། དཀོན་མཆོག་ཡ་ཝཱེས་ནུས་མཐུ་ཆེན་པོའི་ཕྱག་གིས་རང་ཅག་ཨེ་ཅིབ་ཡུལ་ནས་ཕྱི་རོལ་ཏུ་ཁྲིད་པའི་ཕྱིར་ཡིན་ཞེས་སྨྲས་སོ། །   
\p
\v 17 ཡང་ཕཱར་ཨོལ་གྱིས་མི་འགྲོ་རུ་བཅུག་པའི་དུས་སུ། ཕེ་ལེ་ཤེད་ཡུལ་གྱི་ལམ་ཐག་ཉེ་ནའང་དཀོན་མཆོག་གིས་དེ་དག་ཡུལ་དེ་བརྒྱུད་ནས་མ་ཁྲིད་དོ། །ཅིའི་ཕྱིར་ཞེ་ན། ཁོང་གི་ཐུགས་སུ་མི་རྣམས་ཀྱིས་དམག་འཁྲུག་འབྱུང་བ་མཐོང་ན་འགྱོད་ཅིང་ཨེ་ཅིབ་ཡུལ་དུ་ཕྱིར་ལོག་ཉེན་ཆེ་བར་དགོངས་པས་སོ། །  
\v 18 དེའི་ཕྱིར། དཀོན་མཆོག་གིས་མི་རྣམས་རྒྱ་མཚོ་དམར་པོའི་འགྲམ་གྱི་དབེན་སྟོང་ལ་ལམ་བསྐོར་ནས་ཁྲིད་པ་དང་། ཡེས་ར་ཨེལ་པ་རྣམས་དམག་ཆས་དང་བཅས་པ་ཨེ་ཅིབ་ཡུལ་ནས་ཡར་སོང་།  
\v 19 མོ་ཤེ་ཡིས་ཡོ་སེབ་ཀྱི་རུས་པའང་མཉམ་དུ་ཁྱེར་ཏོ། །གང་ལ་ཟེར་ན། ཡོ་སེབ་ཀྱིས་ཡེས་ར་ཨེལ་པ་རྣམས་ལ་མནའ་སྐྱེལ་དུ་བཅུག་ཅིང་། ཁོ་རྣམས་ལ་འདི་ལྟར། དཀོན་མཆོག་གིས་ཁྱོད་རྣམས་ལ་གཟིགས་སྐྱོང་གནང་བར་འགྱུར། ཁྱོད་ཅག་གིས་ངའི་རུས་པ་འདི་ནས་འཁྱེར་དགོས་ཞེས་བཀའ་གནང་བའི་ཕྱིར་རོ། །   
\p
\v 20 དེ་ནས་ཁོ་རྣམས་སོའུ་ཀོད་ཡུལ་ནས་ཆས་ཏེ་དབེན་སྟོང་གི་ལོགས་སུ་ཨེ་ཐཱམ་བྱ་བའི་གནས་སུ་སྒར་བཏབ།  
\v 21 དཀོན་མཆོག་ཡ་ཝཱེས་ཉིན་མོའི་དུས་སུ་སྤྲིན་གྱི་ཀ་བ་ཞིག་གི་དབྱིབས་ནས་ཁོ་རྣམས་ལ་ལམ་ཁྲིད་པ་དང༌། མཚན་མོར་མེའི་ཀ་བ་ཞིག་གི་དབྱིབས་ནས་དེ་རྣམས་ལ་འོད་སྤྲོས་ཏེ། ཁོ་རྣམས་ཉིན་མཚན་ཀུན་ཏུ་འགྲོ་ནུས་པར་མཛད།  
\v 22 ཉིན་མོར་སྤྲིན་གྱི་ཀ་བ་དང་མཚན་མོར་མེའི་ཀ་བ་ནི་ནམ་ཡིན་ཡང་མི་རྣམས་དང་ཁ་མ་བྲལ་ཏོ། །   
\c 14
\cl ལེའུ་བཅུ་བཞི་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 རྒྱ་མཚོ་དམར་པོ་བརྒལ་བ།  
\p
\v 1 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 2 ཡེས་ར་ཨེལ་པ་རྣམས་ཕྱིར་ལོག་སྟེ་མིག་དོལ་དང་རྒྱ་མཚོའི་བར་གྱི་ཕི་ཧཱ་ཧི་རོད་བྱ་བའི་མདུན་དུ། པཱ་ཨལ་ཚཱ་ཕོན་ཁ་གཏད་ཀྱི་རྒྱ་མཚོའི་འགྲམ་ལ་སྒར་འདེབས་པའི་བཀའ་སྒོས་ཤིག  
\v 3 དེ་ནས་ཕཱར་ཨོལ་གྱི་སེམས་སུ་ཡེས་ར་ཨེལ་པ་རྣམས་ཡུལ་འདི་རུ་མགོ་འཐོམས་ཏེ་དབེན་སྟོང་གིས་དེ་དག་འགོག་བཞིན་འདུག་སྙམ་ངེས།  
\v 4 བདག་གིས་ཕཱར་ཨོལ་གྱི་སེམས་གྱོང་པོར་བྱས་ཏེ། ཁོས་དེ་དག་གི་རྗེས་འདེད་པ་དང་། ཕཱར་ཨོལ་དང་དེའི་དམག་དཔུང་དང་བཅས་པ་ལས་བདག་ལ་གཟི་བརྗིད་ལྡན་པར་འགྱུར་ཞིང་། ཨེ་ཅིབ་པ་རྣམས་ཀྱིས་བདག་ནི་ཡ་ཝཱེ་ཡིན་པ་ཤེས་པར་འགྱུར་ཞེས་གསུངས་ནས་ཡེས་ར་ཨེལ་པ་རྣམས་ཀྱིས་དེ་བཞིན་དུ་བྱས་སོ། །   
\p
\v 5 ཡང་ཨེ་ཅིབ་རྒྱལ་པོར་མི་རྣམས་བྲོས་སོང་ཞེས་གཞན་ཞིག་གིས་སྨྲས་པ་ལ། ཕཱར་ཨོལ་དང་དེའི་འཁོར་གཡོག་རྣམས་མི་རྣམས་ཀྱི་ཕྱོགས་སུ་སེམས་འགྱུར་ནས། ངེད་རྣམས་ལ་གཡོག་བྱེད་པའི་ཡེས་ར་ཨེལ་པ་རྣམས་འགྲོ་རུ་བཅུག་ཅིང་། ངེད་རྣམས་ཀྱིས་དོན་ཅི་འདྲ་བ་བྱས་སམ་ཞེས་སྨྲས་པ་དང་།  
\v 6 ཕཱར་ཨོལ་གྱིས་རང་གི་ཤིང་རྟ་སྟ་གོན་བྱས་ཤིང་། དམག་དཔུང་ཁྲིད་ནས་སོང་བ་སྟེ།  
\v 7 ཤིང་རྟ་མཆོག་ཏུ་གྱུར་པ་དྲུག་བརྒྱ་དང་། ཨེ་ཅིབ་ཡུལ་གྱི་ཤིང་རྟ་ཇི་ཙམ་ཡོད་པ་ཐམས་ཅད་དང་། དེ་ཐམས་ཅད་ཀྱི་འགོ་དཔོན་རྣམས་མཉམ་དུ་ཁྲིད་དོ། །  
\v 8 དཀོན་མཆོག་ཡ་ཝཱེས་ཨེ་ཅིབ་ཡུལ་གྱི་རྒྱལ་པོ་ཕཱར་ཨོལ་གྱི་སེམས་གྱོང་པོར་མཛད་པས། ཁོ་སྤོབས་པ་ཆེན་པོའི་ངང་ནས་ཕར་འགྲོ་བཞིན་པའི་ཡེས་ར་ཨེལ་པ་རྣམས་ཀྱི་ར་མདར་བརྒྱུགས།  
\v 9 དེ་ནས་ཨེ་ཅིབ་པ་རྣམས་ཀྱིས་དེ་དག་གི་རྗེས་དེད་དེ། ཕཱར་ཨོལ་གྱི་རྟ་དང་ཤིང་རྟ་ཐམས་ཅད་དང་། སྐྱ་དམག་རྣམས་དང་། དམག་དཔུང་བཅས་ཕི་ཧཱ་ཧི་རོད་ཀྱི་ཉེ་སར། པཱ་ཨལ་ཚཱ་ཕོན་གྱི་ཁ་གཏད་དུ་རྒྱ་མཚོའི་འགྲམ་ལ་ཡོད་པའི་སྒར་འདེབས་ས་རུ་རྗེས་ཆོད་དོ། །   
\p
\v 10 ཕཱར་ཨོལ་ཉེ་བར་སླེབས་པའི་དུས་སུ། ཡེས་ར་ཨེལ་པ་རྣམས་ཀྱིས་ཡར་བལྟས་པ་དང་། ལྟོས་ཤིག ཨེ་ཅིབ་པ་རྣམས་ཀྱིས་རྗེས་དེད་ནས་ཡོང་བཞིན་པ་མཐོང་ནས་ཤིན་ཏུ་འཇིགས་ཏེ་དཀོན་མཆོག་ཡ་ཝཱེ་ལ་ངུ་འབོད་བྱས་པ་དང་།  
\v 11 མོ་ཤེ་ལ་འདི་ལྟར། ཨེ་ཅིབ་ཡུལ་དུ་དུར་ས་མེད་པས་ཁྱོད་ཀྱིས་ང་ཚོ་དབེན་སྟོང་ལ་འཆི་བར་ཁྲིད་དམ། ཁྱོད་ཀྱིས་ངེད་རྣམས་ལ་འདི་ལྟར་བྱས་ཏེ་ཨེ་ཅིབ་ཡུལ་ནས་ཕྱིར་ཁྲིད་འོངས་པ་ཅི་ཡིན།  
\v 12 ངེད་ཅག་གིས་ཨེ་ཅིབ་ཡུལ་ནས་ཁྱོད་ལ། ངེད་རྣམས་འདིར་བསྐྱུར་ནས་ཨེ་ཅིབ་པ་རྣམས་ལ་གཡོག་བྱེད་དུ་ཆུག་ཅེས་སྨྲས་པ་མ་ཡིན་ནམ། ཅིའི་ཕྱིར་ཞེ་ན། དབེན་སྟོང་དུ་འཆི་བ་ལས་ཨེ་ཅིབ་པ་རྣམས་ལ་གཡོག་བྱས་ན་ལེགས་པའི་ཕྱིར་ཡིན་ཞེས་སྨྲས་སོ། །  
\v 13 དེ་ནས་མོ་ཤེ་ཡིས་མི་རྣམས་ལ་འདི་ལྟར། མི་འཇིགས་པར་བརྟན་པོར་སྡོད་ཅིག དཀོན་མཆོག་ཡ་ཝཱེས་དེ་རིང་ཉིན་མོར་ཁྱོད་ཅག་ལ་གནང་ངེས་པའི་ཐར་པ་ལ་ལྟོས་དང་། དེ་རིང་ཉིན་མོར་ཁྱོད་རྣམས་ཀྱིས་མཐོང་བའི་ཨེ་ཅིབ་པ་དེ་དག་ནི་ཕྱིས་སུ་ནམ་ཡང་མཐོང་བར་མི་འགྱུར།  
\v 14 ཁྱོད་ཅག་ལྷོད་ལྷོད་གྱིས་དང་། དཀོན་མཆོག་ཡ་ཝཱེས་ཁྱོད་ཅག་གི་དོན་དུ་འཐབ་མོ་མཛད་ངེས་ཡིན་ཞེས་སྨྲས་སོ། །   
\p
\v 15 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ང་ལ་ངུ་འབོད་བྱེད་དོན་ཅི། ཡེས་ར་ཨེལ་པ་རྣམས་མདུན་དུ་འགྲོ་བའི་བཀའ་གནོངས་ཤིག  
\v 16 ཁྱོད་ཀྱིས་འཁར་བ་ཡར་བཀྱགས་ནས་ལག་པ་རྒྱ་མཚོའི་ཕྱོགས་སུ་རྐྱོངས་ལ་མཚོ་ཁག་གཉིས་སུ་ཕྱེས་ཤིག ཡེས་ར་ཨེལ་པ་རྣམས་རྒྱ་མཚོའི་དཀྱིལ་ནས་སྐམ་སའི་སྟེང་དུ་བགྲོད་པར་འགྱུར།  
\v 17 ལྟོས་དང་། ངས་ཨེ་ཅིབ་པ་རྣམས་ཀྱི་སེམས་གྱོང་པོར་བྱས་ཏེ་ཁོ་རྣམས་དེ་དག་གི་རྗེས་དེད་ནས་འགྲོ་བ་དང་། ཕཱར་ཨོལ་དང་དེའི་དམག་དཔུང་དང་། ཤིང་རྟ་དང་སྐྱ་དམག་རྣམས་བརྒྱུད་ནས་བདག་ལ་གཟི་བརྗིད་ལྡན་པར་འགྱུར།  
\v 18 ཡང་ཕཱར་ཨོལ་དང་དེའི་ཤིང་རྟ་དང་སྐྱ་དམག་རྣམས་བརྒྱུད་ནས་བདག་ལ་གཟི་བརྗིད་ཐོབ་པའི་ཚེ། ཨེ་ཅིབ་པ་རྣམས་ཀྱིས་བདག་ནི་ཡ་ཝཱེ་ཡིན་པ་ཤེས་པར་འགྱུར་ཞེས་གསུངས་སོ། །   
\p
\v 19 ཡེས་ར་ཨེལ་གྱི་སྒར་གྱི་སྔོན་ལ་སྐྱོད་པའི་དཀོན་མཆོག་གི་ཕོ་ཉ་ནི་དེ་དག་གི་རྒྱབ་ཏུ་སླེབས་ཤིང་། སྤྲིན་གྱི་ཀ་བ་ཡང་དེ་དག་གི་མདུན་ཕྱོགས་ནས་སོང་སྟེ་རྒྱབ་ཏུ་འགྲེང་ནས་བཞུགས།  
\v 20 དེ་ལྟར་ཨེ་ཅིབ་པ་རྣམས་ཀྱི་སྒར་དང་ཡེས་ར་ཨེལ་གྱི་སྒར་གཉིས་ཀྱི་བར་དུ་སྤྲིན་གྱི་ཀ་བ་བཞུགས་ཤིང་། ཕྱོགས་གཅིག་ནི་མུན་ནག་ཡིན་ཡང་ཅིག་ཤོས་སུ་འོད་འཕྲོ་བ་ཡིན་པས། མི་དེ་དག་མཚན་གང་པོར་ཕན་ཚུན་ཉེ་བར་མ་བཅར་ཏོ། །   
\p
\v 21 དེ་ནས་མོ་ཤེ་ཡིས་ལག་པ་རྒྱ་མཚོའི་ཕྱོགས་སུ་བརྐྱངས་པ་ན། དཀོན་མཆོག་ཡ་ཝཱེས་མཚན་གང་པོར་ཤར་རླུང་དྲག་པོ་གཡུག་ཏུ་བཅུག་ནས། མཚོ་དེད་ཅིང་སྐམ་སར་མཛད་དེ་ཆུ་ཁག་གཉིས་སུ་ཕྱེས།  
\v 22 ཡེས་ར་ཨེལ་པ་རྣམས་རྒྱ་མཚོའི་དཀྱིལ་ནས་སྐམ་སར་འགྲུལ་ཏེ། ཆུ་ནི་གཡས་གཡོན་དུ་ལྕགས་རི་ལྟར་གྲུབ།  
\v 23 ཨེ་ཅིབ་པ་རྣམས་ཀྱིས་རྗེས་དེད་ཅིང་། ཕཱར་ཨོལ་གྱི་རྟ་རྣམས་དང་། ཤིང་རྟ། སྐྱ་དམག་བཅས་ཐམས་ཅད་དེ་རྣམས་ཀྱི་རྗེས་དེད་ནས་རྒྱ་མཚོའི་དཀྱིལ་དུ་སོང་།  
\v 24 ནམ་ལངས་པའི་དུས་སུ་དཀོན་མཆོག་ཡ་ཝཱེས་མེ་དང་སྤྲིན་གྱི་ཀ་བ་ནས་ཨེ་ཅིབ་པའི་དམག་དཔུང་ལ་གཟིགས་ཏེ་ཁོ་རྣམས་འཁྲུག་པར་མཛད།  
\v 25 ཡང་ཁོང་གིས་ཤིང་རྟ་རྣམས་ཀྱི་འཁོར་ལོ་བཏོན་པ་དང་། ཤིང་རྟ་དེ་དག་འདེད་དཀའ་བར་གྱུར་པས། ཨེ་ཅིབ་པ་རྣམས་ན་རེ། དཀོན་མཆོག་ཡ་ཝཱེས་ཁོ་རྣམས་ཀྱི་ཕྱིར་དུ་བདག་ཅག་ལ་རྒོལ་བས། ཡེས་ར་ཨེལ་གྱི་མདུན་ནས་འབྲོ་བར་བྱའོ་ཞེས་སྨྲས་སོ། །   
\p
\v 26 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཨེ་ཅིབ་པ་དང་དེ་དག་གི་ཤིང་རྟ་དང་སྐྱ་དམག་རྣམས་ཀྱི་ཐོག་ལ་ཆུ་འབབ་པའི་ཕྱིར། ཁྱོད་ཀྱིས་ལག་པ་རྒྱ་མཚོའི་ཕྱོགས་སུ་རྐྱོངས་ཤིག་ཅེས་གསུངས་པ་ལ།  
\v 27 མོ་ཤེ་ཡིས་ལག་པ་རྒྱ་མཚོའི་ཕྱོགས་སུ་བརྐྱངས་ཤིང་། ཐོ་རངས་ཀྱི་དུས་སུ་རྒྱ་མཚོ་ནི་སྔར་དང་འདྲ་བར་གྱུར། ཨེ་ཅིབ་པ་རྣམས་དེའི་ཐད་དུ་བྲོས་པ་ལ། དཀོན་མཆོག་ཡ་ཝཱེས་ཁོ་རྣམས་རྒྱ་མཚོའི་དཀྱིལ་དུ་མགོ་རྟིང་བསློགས་པར་མཛད།  
\v 28 དེ་ལྟར་ཆུ་ནི་ཕྱིར་བཞུར་ཏེ་ཤིང་རྟ་དང་སྐྱ་དམག་རྣམས་དང་། ཡེས་ར་ཨེལ་པ་རྣམས་ཀྱི་རྗེས་དེད་ནས་རྒྱ་མཚོའི་ནང་དུ་སོང་བའི་ཕཱར་ཨོལ་གྱི་དམག་དཔུང་ཐམས་ཅད་བསྣུབས་ཤིང་གཅིག་ཀྱང་མ་ལུས་སོ། །  
\v 29 འོན་ཀྱང་ཡེས་ར་ཨེལ་པ་རྣམས་རྒྱ་མཚོའི་དཀྱིལ་དུ་སྐམ་སར་འགྲུལ་ཏེ། ཆུ་ནི་དེ་དག་གི་གཡས་གཡོན་དུ་ལྕགས་རི་ལྟར་གྲུབ།  
\v 30 ཉིན་མོ་དེར་དཀོན་མཆོག་ཡ་ཝཱེས་དེ་ལྟར་ཡེས་ར་ཨེལ་པ་རྣམས་ཨེ་ཅིབ་པ་དག་གི་ལག་ནས་ཐར་བར་མཛད་ཅིང་། ཡེས་ར་ཨེལ་པ་རྣམས་ཀྱིས་ཨེ་ཅིབ་པ་དག་གི་བེམ་པོ་རྣམས་རྒྱ་མཚོའི་འགྲམ་དུ་ཡོད་པ་མཐོང་།  
\v 31 དཀོན་མཆོག་ཡ་ཝཱེས་ཨེ་ཅིབ་པ་རྣམས་ལ་མཛད་པའི་ནུས་མཐུ་ཆེན་པོ་དེ་ཡེས་ར་ཨེལ་པ་རྣམས་ཀྱིས་མཐོང་བ་དང་། དཀོན་མཆོག་ཡ་ཝཱེ་ལ་གུས་ཤིང་འཇིགས་ཏེ། ཁོང་དང་ཁོང་གི་ཞབས་ཕྱི་མོ་ཤེ་ལ་ཡིད་ཆེས་སོ། །   
\c 15
\cl ལེའུ་བཅོ་ལྔ་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 མོ་ཤེ་སོགས་ཀྱིས་དཀོན་མཆོག་ལ་བསྟོད་གླུ་ཕུལ་བ།  
\p
\v 1 དེ་ནས་མོ་ཤེ་དང་ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་བསྟོད་གླུ་ཕུལ་བ་འདི་ལྟ་སྟེ།  
\q1 བདག་གིས་ཡ་ཝཱེ་ཁོང་ལ་བསྟོད་གླུ་འབུལ། །  
\q1 ཁོང་ནི་དཔལ་དང་བཅས་ཏེ་རྒྱལ་བར་གྱུར། །  
\q1 རྟ་དང་དེ་ལ་ཞོན་མཁན་ཁོང་གིས་ནི། །  
\q1 རྒྱ་མཚོའི་ནང་དུ་གཡུགས་པར་གྱུར་པ་འོ། །   
\q1
\v 2 ཡ་ཝཱེ་ཁོང་ཉིད་ང་ཡི་སྟོབས་ཤུགས་དང་། །  
\q1 ཡ་ཝཱེ་ཁོང་ཉིད་ང་ཡི་མགུར་མ་ཡིན། །  
\q1 ཁོང་ནི་ང་ཡི་སྐྱབས་སུ་གྱུར་པ་ཡིན། །  
\q1 ང་ཡི་དཀོན་མཆོག་ལགས་པས་ངས་ཁོང་ལ། །  
\q1 བསྟོད་པ་འབུལ་ལོ་ཁོང་ནི་ངའི་ཕ་ཡི། །  
\q1 དཀོན་མཆོག་ཀྱང་ནི་ཡིན་པས་བཀུར་བར་བྱ། །   
\q1
\v 3 ཡ་ཝཱེ་ཁོང་ཉིད་དམག་གི་དཔའ་བོ་དང་། །  
\q1 ཡ་ཝཱེ་ཞེས་པ་ཁོང་གི་མཚན་ཡང་ལགས། །   
\q1
\v 4 ཕཱར་ཨོལ་ཞེས་པའི་ཤིང་རྟ་རྣམས་དང་ནི། །  
\q1 དེ་ཡི་དམག་དཔུང་བཅས་ནི་རྒྱ་མཚོར་གཡུགས། །  
\q1 དམག་དཔོན་མཆོག་རྣམས་ཀྱང་ནི་ཁོང་ཉིད་ཀྱིས། །  
\q1 རྒྱ་མཚོ་དམར་པོའི་ནང་ལ་ནུབ་ཏུ་བཅུག །   
\q1
\v 5 གཏིང་ཟབ་ཆུ་ཡིས་དེ་དག་བསྣུབས་པ་དང་། །  
\q1 རྡོ་ལྟར་དེ་དག་རྒྱ་མཚོའི་མཐིལ་དུ་ལྷུང་། །   
\q1
\v 6 ཀྱེ་ཀྱེ་ཡ་ཝཱེ་ལགས་ཀྱེ་ཁྱེད་ཀྱི་ནི། །  
\q1 ཕྱག་གཡས་དེ་ལ་མཐུ་མངོན་དཔལ་དང་ལྡན། །  
\q1 ཀྱེ་ཀྱེ་ཡ་ཝཱེ་ལགས་ཀྱེ་ཁྱེད་ཀྱིས་ནི། །  
\q1 ཕྱག་གཡས་དེ་ཡིས་དགྲ་རྣམས་རྡུལ་དུ་བརླགས། །   
\q1
\v 7 ཁྱེད་ཀྱིས་བརྗིད་ཉམས་ཆེན་པོ་དང་བཅས་ཏེ། །  
\q1 ངོ་རྒོལ་བྱེད་མཁན་ཐམས་ཅད་བཟློགས་པ་དང་། །  
\q1 ཁྱེད་ཀྱིས་རང་གི་ཐུགས་ཁྲོའི་མེ་ཡང་གནང་། །  
\q1 མེ་དེས་ཁོ་རྣམས་སོག་མ་ལྟར་དུ་བསྲེགས། །   
\q1
\v 8 ཁྱེད་ཀྱི་ཤངས་ལས་ཐོན་པའི་དབུགས་ཀྱིས་ནི། །  
\q1 ཆུ་རྣམས་མཉམ་དུ་བསགས་ཤིང་ཆུ་རླབས་དག །  
\q1 རགས་ལྟར་ལངས་ཏེ་བསྡད་ཅིང་སྡོད་པ་ཡིན། །  
\q1 རྒྱ་མཚོའི་སྙིང་ནས་ཆུ་རྣམས་གོང་བུར་གྲུབ། །   
\q1
\v 9 དགྲ་བོ་ན་རེ་ངས་ནི་ཁོ་རྣམས་ཀྱི། །  
\q1 ར་མདར་བརྒྱུགས་ནས་རྗེས་སུ་ཆོད་པར་བྱ། །  
\q1 བཅོམ་ནོར་དག་ནི་བགོ་བཤའ་རྒྱག་པར་བྱ། །  
\q1 ང་རང་དེ་ཚོའི་སྟེང་ནས་རང་གི་ནི། །  
\q1 འདོད་པ་ཚིམ་པར་འགྱུར་ཞིང་རལ་གྲི་ཕྱུང་། །  
\q1 དངོས་སུ་དེ་དག་མེད་པར་བྱ་ཞེས་སྨྲ། །   
\q1
\v 10 ཁྱེད་ཀྱིས་ཞལ་ཕུ་དང་བཅས་རླུང་གཡུགས་མཛད། །  
\q1 རྒྱ་མཚོས་དེ་དག་བསྣུབས་པར་བྱས་པ་དང་། །  
\q1 ཞ་ཉེ་ལྟར་དུ་ཆུ་བོའི་ཀླུང་དུ་ནུབ། །   
\q1
\v 11 ཀྱེ་ཀྱེ་ཡ་ཝཱེ་ལགས་ཀྱེ་ལྷ་རྣམས་ཁྲོད། །  
\q1 ཁྱེད་དང་འདྲ་བ་སུ་ཡོད་སུ་ཡང་མེད། །  
\q1 དམ་པའི་ནང་ཡང་ཁྱེད་ལྟར་དཔལ་ལྡན་པ། །  
\q1 སུ་ཡང་མེད་དེ་བསྟོད་ཅིང་འཇིགས་འོས་ལ། །  
\q1 ངོ་མཚར་དོན་རྣམས་མཛད་ལ་ཁྱེད་འདྲ་མེད། །   
\q1
\v 12 ཁྱེད་ཀྱིས་ཕྱག་གཡས་བརྐྱངས་ཚེ་ས་ཡིས་ནི། །  
\q1 དེ་དག་ཁྱུར་མིད་བཏང་ཞིང་ཁྱེད་ཀྱིས་ནི། །   
\q1
\v 13 བྱམས་དང་སྙིང་རྗེ་ངང་ནས་བླུས་པ་ཡི། །  
\q1 མི་རྣམས་ཁྲིད་པར་མཛད་ཅིང་མཐུ་ཡིས་ནི། །  
\q1 ཉིད་ཀྱི་དམ་པའི་གནས་སུ་དེ་དག་དྲངས། །   
\q1
\v 14 མི་གཞན་རྣམས་ཀྱིས་གཏམ་དེ་ཐོས་ནས་འདར། །  
\q1 ཕེ་ལེ་ཤེད་ཀྱི་མི་རྣམས་ཟུག་རྔུས་བཟུང་། །   
\q1
\v 15 ཨེ་དོམ་དཔོན་རིགས་རྣམས་ནི་ཧོན་འཐོར་ཞིང་། །  
\q1 མོ་ཨབ་དཔའ་བོ་རྣམས་ཀྱང་འདར་ཞིང་འདར། །  
\q1 ཀ་ན་ཨན་པ་ཀུན་གྱི་སྙིང་སྟོབས་ཞུམ། །   
\q1
\v 16 དངངས་སྐྲག་དང་ནི་འཇིགས་སྣང་ཁོ་རྣམས་ཀྱི། །  
\q1 སྟེང་ལ་བབས་སོང་ཀྱེ་ཀྱེ་ཡ་ཝཱེ་ལགས། །  
\q1 ཁྱེད་ཀྱི་འབངས་མི་དེ་དག་ཕ་རོལ་ཏུ། །  
\q1 སླེབས་པའི་བར་དང་ཁྱེད་ཀྱིས་བླུས་པ་ཡི། །  
\q1 མི་རྣམས་ཕར་རོལ་སླེབས་པའི་བར་དུ་ནི། །  
\q1 ཁྱེད་ཀྱི་ཕྱག་གི་ནུས་མཐུའི་དབང་གིས་ནི། །  
\q1 མི་གཞན་རྡོ་བཞིན་གྲགས་འགུལ་མེད་པར་ལུས། །   
\q1
\v 17 ཀྱེ་ཀྱེ་ཡ་ཝཱེ་ལགས་ཀྱེ་ཁྱེད་ཉིད་ཀྱི། །  
\q1 གནས་མཆོག་དེ་ནི་ཁྱེད་ཀྱིས་བཞེངས་པ་དང༌། །  
\q1 རང་གི་ཕྱག་གིས་བཙུགས་པའི་གནས་མཆོག་དེར། །  
\q1 མི་རྣམས་ཁྲིད་དེ་ཁྱེད་ཀྱི་ནོར་སྐལ་གྱི། །  
\q1 རི་ལ་སྡོད་དུ་འཇུག་གོ་ཨེ་མ་རྨད། །   
\q1
\v 18 ཡ་ཝཱེ་ཁྱེད་ཀྱིས་རྒྱུན་ནས་རྒྱུན་དུ་ནི། །  
\q1 རྒྱལ་སྲིད་བསྐྱངས་ཤིང་སྐྱོང་བར་འགྱུར་བ་འོ། །ཞེས་པའོ། །   
\p
\v 19 ཕཱར་ཨོལ་གྱི་རྟ་དག་དང་། གཞན་ཤིང་རྟ་དང་སྐྱ་དམག་བཅས་རྒྱ་མཚོར་ཆས་ཚེ། དཀོན་མཆོག་ཡ་ཝཱེས་རྒྱ་མཚོའི་ཆུ་རྣམས་དེ་དག་གི་ཐོག་ཏུ་སླར་དྲངས་པ་དང་། ཡེས་ར་ཨེལ་པ་རྣམས་འབའ་ཞིག་རྒྱ་མཚོའི་དཀྱིལ་ནས་སྐམ་སར་འགྲུལ་ཏེ་སོང་ངོ་། །  
\v 20 ཡང་ཨ་རོན་གྱི་གཅེན་མོ་སྟེ་ལུང་སྟོན་མ་མིར་ཡམ་གྱིས་ལག་ཏུ་སིལ་རྔ་ཞིག་ཐོགས་ནས། བུད་མེད་ཐམས་ཅད་ཀྱང་ཁོ་མོའི་རྗེས་སུ་འབྲངས་ཏེ་ལག་ཏུ་སིལ་རྔ་ཁྱེར་ནས་སླེབས་ཤིང་བྲོ་འཁྲབ། །  
\v 21 མིར་ཡམ་གྱིས་དེ་དག་གི་ལན་དུ།  
\q1 ཡ་ཝཱེ་ཁོང་ནི་དཔལ་བཅས་རྣམ་པར་རྒྱལ། །  
\q1 ཁོང་ལ་བསྟོད་པའི་གླུ་ནི་ལེན་པར་གྱིས། །  
\q1 རྟ་དང་དེ་ལ་ཞོན་མཁན་ཁོང་གིས་ནི། །  
\q1 རྒྱ་མཚོའི་ནང་དུ་གཡུགས་པར་གྱུར་པ་འོ། །  
\m ཞེས་བསྟོད་གླུ་ཕུལ་ཏོ། །   
\s1 མཱ་ར་ཡུལ་དང་ཨེ་ལིམ་ཡུལ་གཉིས་ཀྱི་འཐུང་ཆུ།  
\p
\v 22 དེ་ནས་མོ་ཤེ་ཡིས་ཡེས་ར་ཨེལ་པ་རྣམས་རྒྱ་མཚོ་དམར་པོ་ནས་ཁྲིད་དེ་མདུན་དུ་བསྐྱོད་ཅིང་། དེ་དག་ཤུར་གྱི་དབེན་སྟོང་དུ་སླེབས་པ་དང་། ཉིན་གསུམ་ལ་དབེན་སྟོང་དུ་འགྲུལ་ནས་ཆུ་མ་ཐོབ།  
\v 23 མཱ་ར་བྱ་བའི་གནས་སུ་སླེབས་པ་ན་མཱ་ར་ཡི་ཆུ་ནི་ཁ་ཏིག་ཡིན་པས་འཐུང་མ་ནུས། དེའི་ཕྱིར་ཡུལ་དེའི་མིང་ལ་མཱ་ར་ཞེས་ཟེར།  
\v 24 དེར་མི་རྣམས་ཀྱིས་མོ་ཤེ་ལ་སྡུག་ཡུས་བཏོན་ཏེ། ངེད་ཅག་གིས་ཅི་འཐུང་ངམ་ཞེས་སྨྲས།  
\v 25 དེ་ནས་མོ་ཤེ་ཡིས་དཀོན་མཆོག་ཡ་ཝཱེ་ལ་ཞུ་འབོད་བྱས་ཤིང་། དཀོན་མཆོག་ཡ་ཝཱེས་ཁོ་ལ་ལྗོན་ཤིང་ཞིག་བསྟན་པ་དང་། ཁོས་དེ་ཆུའི་ནང་དུ་གཡུགས་པ་ན་ཆུ་མངར་མོར་གྱུར། དེར་དཀོན་མཆོག་ཡ་ཝཱེས་དེ་དག་ལ་སྒྲིག་ཁྲིམས་དང་སྲོལ་ཡིག་བཙུགས་ནས་ཁོ་རྣམས་ལ་བརྟགས་ཤིང་གསུངས་པ་ནི།  
\v 26 ཁྱོད་ཅག་གིས་གཟབ་གཟབ་ངང་ཁྱོད་ཅག་གི་དཀོན་མཆོག་ཡ་ཝཱེའི་གསུང་སྐད་ལ་མཉན་ཏེ། ཁོང་གི་སྤྱན་སྔར་ལེགས་པོ་གང་ཡིན་དེ་སྤྱོད་ཅིང་། གཟབ་ནན་ངང་ཁོང་གི་བཀའ་རྣམས་ལ་མཉན་པ་དང་། སྒྲིག་ཁྲིམས་ཐམས་ཅད་བསྲུངས་ན། ངས་ཨེ་ཅིབ་པ་རྣམས་ལ་ཕོག་ཏུ་བཅུག་པའི་ནད་ཡམས་གང་ཡང་ཁྱོད་ཅག་ལ་འབྱུང་བར་མི་བྱ་སྟེ། ང་ནི་ཁྱོད་རང་གསོ་མཁན་ཡ་ཝཱེ་ཡིན་པའི་ཕྱིར་རོ་ཞེས་པའོ། །  
\v 27 དེ་ནས་ཁོ་རྣམས་ཨེ་ལིམ་ཡུལ་དུ་སླེབས་ཤིང་དེ་རུ་ཆུ་མིག་བཅུ་གཉིས་དང་ཏ་ལའི་ཤིང་བདུན་ཅུ་ཡོད་པ་ཡིན། དེར་ཁོ་རྣམས་ཀྱིས་ཆུ་འགྲམ་དུ་སྒར་བཏབ་བོ། །   
\c 16
\cl ལེའུ་བཅུ་དྲུག་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 བྱ་ཤ་དང་བག་ལེབ་གནང་བ།  
\p
\v 1 དེ་ནས་ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་ཨེ་ལིམ་ཡུལ་ནས་ཆས་པ་དང་། ཨེ་ཅིབ་ཡུལ་ནས་ཐོན་པའི་ཟླ་གཉིས་པའི་ཚེས་བཅོ་ལྔའི་ཉིན་ཨེ་ལིམ་ཡུལ་དང་རི་བོ་སི་ནཱའི་བར་དུ་ཡོད་པའི་སིན་བྱ་བའི་དབེན་སྟོང་དུ་སླེབས།  
\v 2 ཡང་དབེན་སྟོང་ནས་ཡེས་ར་ཨེལ་པའི་མི་ཚོགས་ཐམས་ཅད་ཀྱིས་མོ་ཤེ་དང་ཨ་རོན་གཉིས་ལ་སྡུག་ཡུས་བཏོན་ཏེ།  
\v 3 ངེད་ཅག་ཨེ་ཅིབ་ཡུལ་དུ་ཤའི་ཁོག་མའི་རྩར་བསྡད་པ་དང་། གྲོད་ཁོག་འགྲང་བའི་དུས་སུ་དཀོན་མཆོག་ཡ་ཝཱེའི་ཕྱག་ནས་ཤི་བ་ཡིན་ན་ཅི་མ་རུང་། ཁྱོད་གཉིས་ཀྱིས་ངེད་ཅག་གི་ཚོགས་ཐམས་ཅད་བཀྲེས་ལྟོགས་ཀྱིས་འཆི་བའི་ཕྱིར་དབེན་སྟོང་འདིར་ཁྲིད་པ་ཡིན་ཞེས་སྨྲས་སོ། །   
\p
\v 4 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ལྟོས་དང་། ཁྱོད་ཅག་གི་ཕྱིར་བདག་གིས་ནམ་མཁའ་ནས་བག་ལེབ་འབབ་པར་བྱ་སྟེ། མི་རྣམས་ཕྱི་རུ་སོང་ནས་ཉིན་རེ་བཞིན་ཉིན་གཅིག་གི་སྐལ་བ་བསྡུ་དགོས་ཏེ། དེ་དག་གིས་ངའི་བཀའ་ཁྲིམས་བཞིན་དུ་བྱའམ་མི་བྱ་ལ་བརྟག་པའི་ཕྱིར་ཡིན།  
\v 5 ཡང་ཉིན་དྲུག་པ་ལ་སོ་སོས་བསྡུས་འོངས་པ་དེ་གྲ་སྒྲིག་བྱེད་དགོས་ཤིང་། དེ་ནི་ཉིན་རེར་བསྡུས་པ་ལས་ལྡབ་གཉིས་ཡོད་པར་འགྱུར་ཞེས་གསུངས་སོ། །  
\v 6 དེ་ནས་མོ་ཤེ་དང་ཨ་རོན་གཉིས་ཀྱིས་ཡེས་ར་ཨེལ་པ་ཐམས་ཅད་ལ་འདི་ལྟར། ཁྱོད་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་མཁན་དཀོན་མཆོག་ཡ་ཝཱེ་ཡིན་པ་ཁྱོད་ཅག་གིས་དགོང་མོའི་དུས་སུ་ཤེས་ཡོང་།  
\v 7 དཀོན་མཆོག་ཡ་ཝཱེས་ཁྱོད་རྣམས་ཀྱིས་ཁོང་ལ་སྡུག་ཡུས་འདོན་པ་གསན་པས། ཐོ་རངས་ཁྱོད་ཅག་གིས་ཁོང་གི་གཟི་བརྗིད་མཐོང་བར་འགྱུར། ཁྱོད་ཅག་གིས་ངེད་གཉིས་ལ་སྡུག་ཡུས་འདོན་པ་ངེད་གཉིས་ཅི་ཡིན་ནམ་ཞེས་སྨྲས་པ་དང་།  
\v 8 ཡང་མོ་ཤེ་ན་རེ། ཁྱོད་ཅག་གིས་དཀོན་མཆོག་ཡ་ཝཱེ་ལ་སྡུག་ཡུས་བཏོན་པ་ཁོང་གིས་ཐམས་ཅད་གསན་པས། ཁྱོད་ཅག་ལ་དགོང་མོའི་ཁ་ཟས་སུ་ཤ་དང་ཐོ་རངས་སུ་ལྟོ་བ་འགྲང་བའི་བག་ལེབ་གནང་བར་འགྱུར། ངེད་གཉིས་སུ་ཡིན་ནམ། ཁྱོད་ཅག་གིས་ངེད་གཉིས་ལ་སྡུག་ཡུས་འདོན་པ་མ་ཡིན་པར། དཀོན་མཆོག་ཡ་ཝཱེ་ལ་སྡུག་ཡུས་འདོན་པ་ཡིན་ཞེས་སྨྲས་སོ། །   
\p
\v 9 དེ་ནས་མོ་ཤེ་ཡིས་ཨ་རོན་ལ། ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་ལ། ཁོང་གིས་ཁྱོད་ཅག་གི་སྡུག་ཡུས་གསན་པའི་ཕྱིར། དཀོན་མཆོག་ཡ་ཝཱེའི་དྲུང་དུ་ཚུར་ཤོག་ཅེས་སྨྲ་བར་གྱིས་ཞེས་སྨྲས།  
\v 10 ཨ་རོན་གྱིས་ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་ལ་གཏམ་སྨྲ་བའི་ཚེ། དེ་དག་གིས་དབེན་སྟོང་གི་ཕྱོགས་སུ་བལྟས་ཤིང་། ཀྱེ་ཧོ། སྤྲིན་གྱི་ནང་དུ་དཀོན་མཆོག་ཡ་ཝཱེའི་གཟི་བརྗིད་མངོན་པར་གྱུར།  
\v 11 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 12 བདག་གིས་ཡེས་ར་ཨེལ་པ་རྣམས་ཀྱི་སྡུག་ཡུས་གསན་པ་དང་། ཁྱོད་ཀྱིས་དེ་དག་ལ་འདི་ལྟར། ས་སྲོས་ཀྱི་དུས་སུ་ཁྱོད་ཅག་གིས་ཤ་བཟའ་བ་དང་། ཐོ་རངས་བག་ལེབ་ཀྱིས་འགྲང་བར་འགྱུར་ལ། དེ་ནས་ཁྱོད་རྣམས་ཀྱིས་བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་པ་ཤེས་པར་འགྱུར་ཞེས་སྨྲ་བར་གྱིས་ཞེས་གསུངས་སོ། །   
\p
\v 13 དེ་ནས་དགོང་མོ་སྲེག་པ་མང་པོ་ཡོང་ནས་སྒར་ཡོངས་སུ་བཀབ་ཅིང་། ཐོ་རངས་སྒར་གྱི་མཐའ་འཁོར་དུ་ཟིལ་བ་བབས་ཡོད།  
\v 14 ཟིལ་བ་དེ་ས་ལ་འཐིམས་པ་དང་། ཀྱེ་ཧོ། དཀར་སྲབ་བ་མོ་ལྟ་བུའི་དངོས་པོ་ཞིག་གིས་དབེན་སྟོང་གི་ངོས་ཡོངས་སུ་བཀབ་ཡོད་ཅིང་།  
\v 15 ཡེས་ར་ཨེལ་པ་རྣམས་ཀྱིས་དེ་མཐོང་ནས་ཅི་ཡིན་མ་ཤེས་པར་ཕན་ཚུན་ན་རེ། དེ་ཅི་ཡིན་ནམ་ཞེས་དྲིས། དེ་ནས་མོ་ཤེ་ཡིས་དེ་དག་ལ། འདི་ནི་དཀོན་མཆོག་ཡ་ཝཱེས་ཁྱོད་ཅག་ལ་བཟའ་བར་གནང་བའི་བག་ལེབ་དེ་ཡིན།  
\v 16 དཀོན་མཆོག་ཡ་ཝཱེའི་བཀའ་ནི་འདི་ལྟར་ཡིན་ཏེ། རེ་རེས་རང་གི་ཟ་ཚད་སྡུས་ལ། སོ་སོས་རང་གི་གུར་ནང་གི་མི་གྲངས་བཞིན་དུ་མི་རེ་ལ་ཨོ་མཱར་ \f + \ft ཨོ་མཱར་ཞེས་པ་ནི་གནའ་བོའི་ཡ་ཧུ་དཱ་མི་རིགས་ཀྱི་འཇལ་བྱེད་ཚད་གཞི་ཞིག་གི་མིང་ཡིན་ལ། ཨོ་མཱར་གཅིག་ནི་ཨེ་ཕཱའི་བཅུ་ཆ་གཅིག་ཡིན། དེ་ནི་ལེའུ་འདིའི་ཚིག་རྐང་སོ་དྲུག་པར་གསལ། དེང་སང་གི་སྤྱི་བྲེ་གཉིས་ཙམ་ཡིན། \f*རེ་ལོངས་ཤིག་ཅེས་སྨྲས།  
\v 17 དེ་ནས་ཡེས་ར་ཨེལ་པ་རྣམས་ཀྱིས་དེ་བཞིན་བྱས་ཏེ། ཁ་ཤས་ཀྱིས་མང་པོ་བསྡུས། ཁ་ཤས་ཀྱིས་ཉུང་ངུ་བསྡུས།  
\v 18 ཨོ་མཱར་གྱི་ཚད་འཇལ་བ་ན་མང་པོ་བསྡུ་མཁན་དེར་ལྷག་མ་མ་བྱུང་ལ། ཉུང་ངུ་བསྡུ་མཁན་དེར་མི་འདང་བའང་མེད། མི་རེ་རེས་རང་རང་གི་ཟ་ཚད་བཞིན་བསྡུས།  
\v 19 མོ་ཤེ་ཡིས་དེ་དག་ལ། མི་སུས་ཀྱང་སང་ཉིན་ཞོགས་པའི་བར་དུ་ལྷག་མ་ཅི་ཡང་ལུས་སུ་བཅུག་མི་ཆོག་ཅེས་སྨྲས་ནའང་།  
\v 20 དེ་དག་གིས་མོ་ཤེའི་བཀའ་ལ་མ་མཉན་པར་ཁ་ཅིག་གིས་དེའི་ཕྱི་ཉིན་ཞོགས་པའི་བར་དུ་ལྷག་མ་ལུས་སུ་བཅུག་པས། དེ་ལ་འབུ་བཏབ་ནས་དྲི་ངན་བྱུང་ཞིང་། མོ་ཤེ་ཁོ་རྣམས་ལ་ཁྲོས།  
\v 21 ཁོ་རྣམས་ཀྱིས་ཞོགས་པ་རེ་རེར་རང་རང་གི་ཟ་ཚད་བཞིན་བསྡུས་ཤིང་། ཤུལ་དུ་ལྷག་པ་རྣམས་ཉི་མ་དྲོས་པ་དང་བཞུས་པའོ། །   
\p
\v 22 ཡང་ཉིན་དྲུག་པ་ལ་ཁོ་རྣམས་ཀྱིས་བག་ལེབ་ལྡབ་གཉིས་ཏེ་མི་རེ་རེར་ཨོ་མཱར་གཉིས་རེ་བསྡུས་པ་དང་། ཚོགས་དཔོན་རྣམས་ཡོང་སྟེ་མོ་ཤེ་ལ་སྨྲས་ཤིང་།  
\v 23 མོ་ཤེ་ཡིས་དེ་དག་ལ་འདི་ལྟར། དཀོན་མཆོག་ཡ་ཝཱེའི་བཀའ་ནི་འདི་ལྟར་ཡིན་ཏེ། སང་ཉིན་ནི་བསྲུང་དགོས་པའི་ངལ་གསོ་ཡོངས་སུ་རྫོགས་པའི་ཉིན་མོ་ཡིན་ཞིང་། དཀོན་མཆོག་ཡ་ཝཱེའི་ཆེད་དུ་ངལ་གསོ་ཡོངས་སུ་རྫོགས་པའི་ཉིན་མོ་ཡིན་པས། ཁྱོད་ཅག་གིས་ཟས་ཅི་བསྲེག་དགོས་པ་རྣམས་སྲེགས་ཤིག བཙོ་དགོས་པ་རྣམས་ཚོས་ཤིག ཅི་ལུས་པ་ཐམས་ཅད་སང་ཉིན་ཞོགས་པའི་བར་ཞོག་ཅིག་ཅེས་སྨྲས་པ་ལ།  
\v 24 ཁོ་རྣམས་ཀྱིས་མོ་ཤེ་ཡིས་སྨྲས་པ་བཞིན་དུ་དེའི་ཕྱི་ཉིན་ཞོགས་པའི་བར་དུ་བཞག་པ་དང་། དྲི་ངན་མ་བྱུང་ལ། དེའི་ནང་དུ་འབུ་ཡང་མ་བཏབ།  
\v 25 ཡང་མོ་ཤེ་ཡིས་ཁོ་རྣམས་ལ་འདི་ལྟར། དེ་རིང་བག་ལེབ་དེ་ཟོ་ཞིག དེ་རིང་ནི་དཀོན་མཆོག་ཡ་ཝཱེའི་ཆེད་དུ་ངལ་གསོ་བའི་ཉིན་མོ་ཡིན་པས། ཁྱོད་ཅག་གིས་བག་ལེབ་དེ་དག་ཐང་ནས་རྙེད་མི་སྲིད།  
\v 26 ཉིན་དྲུག་གི་རིང་ལ་བསྡུས་ཆོག་པ་དང་། ཉིན་བདུན་པ་ནི་ངལ་གསོ་བའི་དུས་ཡིན་པས་ཅི་ཡང་འཐོབ་པར་མི་འགྱུར་ཞེས་སྨྲས།  
\v 27 ཉིན་བདུན་པ་ལ་མི་ཚོགས་ཁྲོད་ནས་ཁ་ཤས་བག་ལེབ་བསྡུ་རུ་སོང་ཡང་ཅི་ཡང་མ་ཐོབ།  
\v 28 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཅག་གིས་ནམ་ཞིག་གི་བར་དུ་ངའི་བཀའ་དང་ངའི་བཀའ་ཁྲིམས་མི་བསྲུང་བ་ཡིན་ནམ།  
\v 29 ལྟོས་དང་། དཀོན་མཆོག་ཡ་ཝཱེས་ཁྱོད་ཅག་ལ་ངལ་གསོ་བའི་ཉིན་དེ་གནང་བས། ཁོང་གིས་ཁྱོད་རྣམས་ལ་ཉིན་དྲུག་པར་ཉིན་གཉིས་ཀྱི་ཁ་ཟས་གནང་ཞིང་། ཉིན་བདུན་པར་མི་རེ་རེ་རང་རང་གི་གནས་སུ་འདུག་དགོས་ལ་སུ་ཡང་ཕྱི་རུ་འགྲོ་མི་ཆོག་ཅེས་གསུངས་པས།  
\v 30 མི་ཚོགས་ཀྱིས་ཉིན་བདུན་པར་ངལ་གསོས་སོ། །   
\p
\v 31 ཡང་ཡེས་ར་ཨེལ་གྱི་ཁྱིམ་རྒྱུད་ཀྱིས་བག་ལེབ་དེའི་མིང་ལ་མཱན་ནཱ་ཞེས་བཏགས། དེ་ནི་སྔོ་སྨན་འུ་སུ་ལྟར་ཡིན་ཞིང་དཀར་པོ་ཡིན་པ་དང་། དེའི་རོ་ནི་སྦྲང་རྩི་བསྲེས་པའི་གོར་སྲབ་ལྟར་ཡོད།  
\v 32 དེ་ནས་མོ་ཤེ་ན་རེ། དཀོན་མཆོག་ཡ་ཝཱེས་བཀའ་འདི་གནང་བ་སྟེ། ཁྱོད་ཅག་གིས་མི་རབས་ཕྱི་མ་རྣམས་ཀྱི་ཕྱིར་མཱན་ནཱ་ཞེས་པ་དེ་ཨོ་མཱར་གང་གཅེས་སྲུང་བྱོས་ཤིག གང་ལ་ཟེར་ན། བདག་གིས་ཁྱོད་ཅག་ཨེ་ཅིབ་ཡུལ་ནས་ཕྱི་རུ་ཁྲིད་དེ་དབེན་སྟོང་དུ་ཁྱོད་ཅག་ལ་ཟས་སུ་བྱིན་པའི་བག་ལེབ་དེ་ཁོ་རྣམས་ཀྱིས་མཐོང་བའི་ཕྱིར་ཡིན་ཞེས་སྨྲས་པ་དང་།  
\v 33 མོ་ཤེ་ཡིས་ཨ་རོན་ལ། བུམ་པ་ཞིག་ཁྱེར་ནས་མཱན་ནཱ་ཨོ་མཱར་གང་དེའི་ནང་དུ་ཆུག་དང་། ཁྱོད་ཅག་གི་མི་རབས་ཕྱི་མ་རྣམས་ཀྱི་ཕྱིར་དཀོན་མཆོག་ཡ་ཝཱེའི་དྲུང་དུ་ཞོག་ཅིག་ཅེས་སྨྲས་སོ། །  
\v 34 དེ་ནས་དཀོན་མཆོག་ཡ་ཝཱེས་མོ་ཤེ་ལ་བཀའ་གནང་བ་བཞིན་དུ། ཨ་རོན་གྱིས་དེ་ལྟར་བྱས་ཤིང་། གཅེས་སྲུང་བྱེད་པའི་ཕྱིར་མཱན་ནཱ་དེ་དཔང་མཛད་ཤུར་སྒམ་གྱི་མདུན་དུ་བཞག  
\v 35 ཡེས་ར་ཨེལ་པ་རྣམས་ཀྱིས་མི་གཞན་བསྡད་ཡོད་པའི་ཡུལ་ཏེ་ཀ་ན་ཨན་ཡུལ་གྱི་ས་མཚམས་སུ་སླེབས་པའི་བར་དུ་ལོ་ངོ་བཞི་བཅུའི་རིང་ལ་མཱན་ནཱ་ཟོས་སོ། །  
\v 36 ཨོ་མཱར་གང་ནི་ཨེ་ཕཱའི་\f + \ft ཨེ་ཕཱ་ཞེས་པ་ནི་ཡ་ཧུ་དཱའི་སྐད་ཀྱི་འཇལ་བྱེད་ཅིག་གི་མིང་ཡིན་ལ། ཨེ་ཕཱ་གཅིག་ནི་སྤྱི་རྒྱ་ཉི་ཤུ་ཙམ་ཡིན། \f*བཅུ་ཆ་གཅིག་ཡིན་ནོ། །   
\c 17
\cl ལེའུ་བཅུ་བདུན་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 ཧོ་རེབ་རི་བོའི་བྲག་ལས་ཆུ་ཐོན་པ།  
\p
\v 1 དེ་ནས་ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་དཀོན་མཆོག་ཡ་ཝཱེའི་བཀའ་བཞིན་དུ། ས་ཆ་ས་ཆ་བྱས་ནས་སིན་ཟེར་བའི་དབེན་སྟོང་ནས་ཆས་པ་དང་། རཱ་ཕི་དིམ་བྱ་བའི་གནས་ལ་སྒར་བཏབ། འོན་ཀྱང་མི་རྣམས་ལ་འཐུང་ཆུ་མེད་པས།  
\v 2 མོ་ཤེ་ལ་ཁ་རྩོད་བྱས་ནས་ངེད་རྣམས་ལ་འཐུང་ཆུ་བླུད་ཅེས་སྨྲས་པར། མོ་ཤེ་ཡིས་དེ་དག་ལ། ཁྱོད་ཅག་གིས་ཅིའི་ཕྱིར་ང་ལ་ཁ་རྩོད་བྱེད་དམ། ཅིའི་ཕྱིར་དཀོན་མཆོག་ཡ་ཝཱེ་ལ་ཚོད་བགམ་བྱེད་དམ་ཞེས་སྨྲས།  
\v 3 མི་ཚོགས་དེ་སྐོམ་པས་གདུངས་ཏེ་མོ་ཤེ་ལ་སྡུག་ཡུས་བཏོན་ཞིང་ན་རེ། ཁྱོད་ཀྱིས་ངེད་ཅག་ཨེ་ཅིབ་ཡུལ་ནས་ཡར་ཁྲིད་ཡོང་སྟེ། ངེད་ཅག་དང་ངེད་རྣམས་ཀྱི་བུ་ཕྲུག་དང་། ཕྱུགས་ཟོག་རྣམས་སྐོམ་ནས་འཆི་རུ་འཇུག་དོན་ཅི་ཡིན་ཞེས་སྨྲས་པས།  
\v 4 མོ་ཤེ་ཡིས་དཀོན་མཆོག་ཡ་ཝཱེ་ལ་ཞུ་འབོད་བྱས་ཏེ། མི་འདི་རྣམས་ལ་བདག་གིས་ཅི་ཞིག་བྱའམ། དེ་དག་གིས་ང་རང་རྡོ་རུབ་གཏོང་གྲབས་འདུག་ཅེས་ཞུས་པ་ལ།  
\v 5 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་རང་མི་རྣམས་ཀྱི་མདུན་ཕྱོགས་ནས་ཕར་སྐྱོད་ཅིག ཡེས་ར་ཨེལ་གྱི་རྒན་པོ་འགའ་ཞིག་ཁྱོད་དང་མཉམ་དུ་ཁྲིད་དང་། ནཱ་ཡོལ་གཙང་པོ་ལ་བརྡེགས་པའི་འཁར་བ་དེ་རང་གི་ལག་ཏུ་ཁྱེར་ལ་སོང་ཞིག  
\v 6 ལྟོས་དང་། ང་རང་ཧོ་རེབ་རི་བོའི་བྲག་རྡོ་ཡོད་སར་ཁྱོད་ཀྱི་མདུན་དུ་སྡོད་པར་བྱ་སྟེ། ཁྱོད་ཀྱིས་བྲག་རྡོ་དེ་ལ་རྡུངས་དང་། མི་རྣམས་ཀྱིས་འཐུང་བའི་ཕྱིར་དེ་ལས་ཆུ་འཐོན་ཡོང་ཞེས་གསུངས་པ་དང་། མོ་ཤེ་ཡིས་ཀྱང་ཡེས་ར་ཨེལ་གྱི་རྒན་པོ་རྣམས་ཀྱི་མིག་མདུན་དུ་དེ་བཞིན་བྱས།  
\v 7 ཡེས་ར་ཨེལ་པ་རྣམས་ཀྱིས་གནས་དེར་རྩོད་གླེང་སྤེལ་བ་དང་། ཡང་དཀོན་མཆོག་ཡ་ཝཱེ་ལ་ཚོད་བགམས་ཏེ་དཀོན་མཆོག་ཡ་ཝཱེ་ངེད་ཅག་གི་དཀྱིལ་དུ་བཞུགས་སམ་མི་བཞུགས་ཞེས་སྨྲས་པས། མོ་ཤེ་ཡིས་གནས་དེའི་མིང་ལ་མཱ་སཱ་ \f + \ft མཱ་སཱ་ཞེས་པ་ནི་ཚོད་བགམ་གྱི་དོན་ཡིན།\f*དང་མེ་རི་བཱ་\f + \ft མེ་རི་བཱ་ཞེས་པ་ནི་རྩོད་གླེང་གི་དོན་ཡིན།\f*ཞེས་བཏགས་སོ། །   
\s1 ཨ་མཱད་ལེག་མི་རིགས་ལས་རྣམ་པར་རྒྱལ་བ།  
\p
\v 8 སྐབས་དེར་ཨ་མཱད་ལེག་གི་མི་རྣམས་འོངས་ཏེ། རཱ་ཕི་དིམ་ཡུལ་དུ་ཡེས་ར་ཨེལ་དང་འཐབ་ཅིང་།  
\v 9 མོ་ཤེ་ཡིས་ཡོ་ཤུ་ཨ་ལ་ན་རེ། རང་ཅག་གི་ཕྱིར་སྐྱེས་པ་རྣམས་བདམས་ནས་ཨ་མཱད་ལེག་པ་རྣམས་དང་འཐབ་ཏུ་སོང་། སང་ཉིན་བདག་གིས་ལག་ཏུ་དཀོན་མཆོག་གི་འཁར་བ་བཟུང་ནས་རི་བོའི་རྩེ་མོར་ལངས་སྡོད་པར་བྱའོ་ཞེས་སྨྲས་པ་དང་།  
\v 10 ཡོ་ཤུ་ཨ་ཡིས་མོ་ཤེའི་བཀའ་བཞིན་བྱས་ཏེ་ཨ་མཱད་ལེག་པ་རྣམས་དང་འཐབ་ཅིང་། མོ་ཤེ་དང་ཨ་རོན་དང་ཧུ་རཱ་བཅས་རི་བོའི་རྩེ་མོར་འགོས།  
\v 11 ཡང་འདི་ལྟར་བྱུང་བ་སྟེ། མོ་ཤེ་ཡིས་ནམ་ཞིག་ལ་ལག་པ་ཡར་བཀྱགས་ཚེ་ཡེས་ར་ཨེལ་པ་རྣམས་རྒྱལ་བ་དང་། ནམ་ཞིག་ལ་ལག་པ་མར་བཞག་ཚེ་ཨ་མཱད་ལེག་པ་རྣམས་རྒྱལ་བ་རེད།  
\v 12 འོན་ཀྱང་མོ་ཤེའི་ལག་པ་ངལ་བས། ཨ་རོན་དང་ཧུ་རཱ་གཉིས་ཀྱིས་རྡོ་ཞིག་ཁྱེར་འོངས་ཏེ་ཁོའི་འཕོངས་སྟེགས་བྱེད་དུ་བཅུག་པ་དང་ཁོ་དེ་ལ་བསྡད་ཅིང་། དེ་གཉིས་ཀྱིས་གཅིག་གིས་གཡས་དང་གཅིག་གིས་གཡོན་ནས་ཁོའི་ལག་པ་བསྐྱོར་བ་དང་། ཁོའི་ལག་པ་ཉི་མ་ནུབ་པའི་བར་དུ་བརྟན་པོར་ཚུགས།  
\v 13 ཡང་ཡོ་ཤུ་ཨ་ཡིས་ཨ་མཱད་ལེག་རྒྱལ་པོ་དང་དེའི་འབངས་མི་རྣམས་རལ་གྲིས་ཕམ་པར་བརྒྱབ།  
\v 14 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ངས་ཨ་མཱད་ལེག་གི་མིང་ཡང་གནམ་འོག་ཏུ་རྩ་བ་ནས་གསུབ་པར་བྱ། རྗེས་དྲན་གྱི་ཕྱིར་གཏམ་དེ་ཤོག་སྒྲིལ་སྟེང་བྲིས་ཏེ་ཡོ་ཤུ་ཨའི་རྣ་ལམ་དུ་འཇོག་དགོས་ཞེས་གསུངས་སོ། །  
\v 15 མོ་ཤེ་ཡིས་མཆོད་ཁྲི་ཞིག་བཞེངས་ནས་དེའི་མིང་ལ་དཀོན་མཆོག་ཡ་ཝཱེ་བདག་གི་རུ་དར་ཡིན་ཞེས་བཏགས་ཏེ་ན་རེ།  
\v 16 དཀོན་མཆོག་ཡ་ཝཱེས་མནའ་བཞེས་པ་ཡིན་པས། ཁོང་གིས་ཨ་མཱད་ལེག་མི་རིགས་ལ་མི་རབས་ནས་མི་རབས་བར་དུ་དཔུང་འཇུག་བྱེད་པར་འགྱུར་ཞེས་སྨྲས་སོ། །   
\c 18
\cl ལེའུ་བཅོ་བརྒྱད་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 ཡི་ཏྲོ་ཡིས་རང་གི་མག་པ་ལ་སྐོར་བརྒྱབ་པ།  
\p
\v 1 ཡང་མིད༌ཡཱན་ཡུལ་གྱི་མཆོད་དཔོན་ཏེ་མོ་ཤེའི་སྒྱུག་པོ་ཡི་ཏྲོ་ཡིས། དཀོན་མཆོག་གིས་མོ་ཤེ་དང་ཉིད་ཀྱི་འབངས་མི་ཡེས་ར་ཨེལ་ལ་ཅི་དང་ཅི་མཛད་པ་ཐམས་ཅད་དེ། དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་པ་ཐོས་ནས།  
\v 2 མོ་ཤེའི་ཆུང་མ་ཚིབ་ཕའོ་རཱ་སྟེ་སྔར་མོ་ཤེ་ཡིས་ཕྱིར་ཁྱིམ་ལ་ལོག་ཏུ་བཅུག་པ་དེ་དང་།  
\v 3 ཚིབ་ཕའོ་རཱ་ཡི་བུ་གཉིས་ཁྲིད་འོངས་པ་རེད། བུ་གཅིག་གི་མིང་ལ་གེར་ཤོམ་ཞེས་ཟེར་ཏེ། རྒྱུ་མཚན་ནི་སྔར་མོ་ཤེ་ཡིས་ང་རང་ཡུལ་གཞན་དུ་བྱེས་པར་གྱུར་ཞེས་སྨྲས་པས་སོ། །  
\v 4 བུ་གཞན་དེའི་མིང་ལ་ཨེ་ལི་ཨེ་བཟིར་ཞེས་ཟེར་ཏེ། ཅི་ལ་ཞེ་ན། སྔར་མོ་ཤེ་ཡིས་བདག་གི་ཕ་ཡི་དཀོན་མཆོག་གིས་ང་ལ་རོགས་རམ་གནང་ཞིང་ཕཱར་ཨོལ་གྱི་རལ་གྲི་ནས་ཐར་བར་མཛད་ཅེས་སྨྲས་པས་སོ། །   
\p
\v 5 དེ་ལྟར་མོ་ཤེའི་སྒྱུག་པོ་ཡི་ཏྲོ་ཡིས་མོ་ཤེའི་ཆུང་མ་དང་བུ་གཉིས་ཁྲིད་ནས་དཀོན་མཆོག་གི་རི་བོ་སྟེ། མོ་ཤེ་ཡིས་དབེན་སྟོང་དུ་སྒར་འདེབས་སའི་གནས་ལ་སླེབས་ཤིང་།  
\v 6 ཡང་ཁོས་མི་ཞིག་མངགས་ནས་མོ་ཤེ་ལ་འདི་ལྟར། བདག་ནི་ཁྱེད་ཀྱི་སྒྱུག་པོ་ཡི་ཏྲོ་ཡིན་ཞིང་། ཁྱེད་ཀྱི་ཆུང་མ་དང་བུ་གཉིས་ཁྲིད་ནས་ཁྱེད་རང་ཡོད་ས་འདི་རུ་སླེབས་ཡོད་ཅེས་ངག་འཕྲིན་བཏང་བ་ལ།  
\v 7 མོ་ཤེ་སྒྱུག་པོ་བསུ་བར་སོང་སྟེ། དེའི་མདུན་དུ་གུས་ཕྱག་ཕུལ་ནས་འོ་ \f + \ft འོ་ཞེས་པ་ནི་ཨ་མས་བུ་ཆུང་ལ་སྙིང་རྗེ་ནས་འོ་བྱེད་པ་ལྟ་བུ༌སྟེ། ཡ་ཧུ་དཱ་མི་རིགས་ཀྱི་གོམས་སྲོལ་ལ་བརྩི་བཀུར་བྱེད་པ་དང་ཤ་ཚ་ཞིང་སྙིང་ཉེ་བའི་མཚོན་རྟགས་ཤིག༌ཡིན། \f*བྱས་པ་དང་། ཕན་ཚུན་ཁམས་འདྲི་ཞུས་ནས་གུར་གྱི་ནང་དུ་ཞུགས།  
\v 8 དེ་ནས་མོ་ཤེ་ཡིས་སྒྱུག་པོ་ལ། དཀོན་མཆོག་ཡ་ཝཱེས་ཡེས་ར་ཨེལ་གྱི་དོན་དུ་ཕཱར་ཨོལ་དང་ཨེ་ཅིབ་པ་རྣམས་ལ་ཅི་དང་ཅི་ཞིག་མཛད་པ་ཀུན་དང་། ལམ་དུ་མྱངས་པའི་སྡུག་བསྔལ་ཐམས་ཅད་དང་། དཀོན་མཆོག་ཡ་ཝཱེས་ཁོ་རྣམས་ཅི་ལྟར་བསྐྱབས་པ་བཅས་སྨྲས་སོ། །  
\v 9 དཀོན་མཆོག་ཡ་ཝཱེས་ཡེས་ར་ཨེལ་ལ་བཀའ་དྲིན་མཛད་ཅིང་། དེ་དག་ཨེ་ཅིབ་པའི་དབང་ནས་ཐར་བར་མཛད་པས་ཡི་ཏྲོའི་སེམས་ཤིན་ཏུ་དགའ་བ་རེད།  
\v 10 ཡང་ཁོ་ན་རེ། དཀོན་མཆོག་ཡ་ཝཱེ་ལ་བསྟོད་པར་ཤོག ཁོང་གིས་ཁྱེད་ཅག་ཨེ་ཅིབ་པ་རྣམས་དང༌ཕཱར་ཨོལ་གྱི་ལག་ནས་ཐར་བར་མཛད་ཅིང་། ཁོང་གིས་མི་འདི་རྣམས་ཨེ་ཅིབ་པ་རྣམས་ཀྱི་ལག་ནས་བསྐྱབས་པ་ཡིན།  
\v 11 ལྷ་ཐམས་ཅད་དང་བསྡུར་ན་དཀོན་མཆོག་ཡ་ཝཱེ་ནུས་མཐུ་ཆེ་བ་ངས་ད་ལྟ་ཤེས་ཏེ། ཅི་ལ་ཞེ་ན། དོན་དེའི་ནང་དུ་ཨེ་ཅིབ་པ་རྣམས་ཀྱིས་མི་རྣམས་ལ་ཁེངས་དྲེགས་ཀྱི་སྤྱོད་ཚུལ་བཟུང་བའི་ཕྱིར་ཡིན་ཞེས་སྨྲས།  
\v 12 དེ་ནས་མོ་ཤེའི་སྒྱུག་པོ་ཡི་ཏྲོས་དཀོན་མཆོག་ལ་སྦྱིན་སྲེག་ཅིག་དང་དམར་མཆོད་རྣམས་ཕུལ་བ་དང་། ཨ་རོན་ནི་ཡེས་ར་ཨེལ་གྱི་རྒན་པོ་རྣམས་དང་བཅས་ཡོང་ནས་མོ་ཤེའི་སྒྱུག་པོ་དང་མཉམ་དུ་དཀོན་མཆོག་གི་སྤྱན་སྔར་གསོལ་ཚིགས་བཞེས་པར་ཕེབས་སོ། །   
\p
\v 13 དེའི་ཕྱི་ཉིན། མོ་ཤེ་མི་རྣམས་ལ་ལེགས་ཉེས་འབྱེད་པར་བཞུགས་ཤིང་། ཞོགས་པ་ནས་དགོང་མོའི་བར་དུ་མི་རྣམས་མོ་ཤེའི་དྲུང་དུ་ལངས་ནས་བསྡད།  
\v 14 མོ་ཤེ་ཡིས་མི་རྣམས་ཀྱི་དོན་དུ་ཅི་བྱེད་པ་ཐམས་ཅད་སྒྱུག་པོས་མཐོང་སྟེ་ན་རེ། ཞོགས་པ་ནས་དགོང་མོའི་བར་དུ་མི་རྣམས་ཁྱེད་ཀྱི་དྲུང་དུ་ལངས་ནས་སྡོད་ཅིང་། ཁྱེད་རང་གཅིག་པུ་བཞུགས་ནས་འདུག་དོན་ཅི་ཡིན་ནམ་ཞེས་དྲིས་པ་ལ།  
\v 15 མོ་ཤེ་ཡིས་སྒྱུག་པོ་ལ། དེ་ནི་མི་རྣམས་འདིར་འོངས་ནས་དཀོན་མཆོག་ལ་བཀའ་འདྲི་ཞུ་བའི་རྐྱེན་དང༌།  
\v 16 ཁོ་རྣམས་ལ་རྩོད་པ་འབྱུང་དུས་ཀྱང་ངའི་གམ་དུ་འོངས་ནས། ངས་མི་དང་མིའི་བར་ལ་ཤན་འབྱེད་པ་དང་། དཀོན་མཆོག་གི་སྒྲིག་ལམ་དང་བཀའ་ཁྲིམས་རྣམས་དེ་དག་ལ་བསླབས་པ་ཡིན་ཞེས་སྨྲས་སོ། །   
\p
\v 17 སྒྱུག་པོས་མོ་ཤེ་ལ། ཁྱེད་ཀྱི་བྱེད་ལུགས་དེ་ལེགས་པོ་མི་འདུག  
\v 18 ཁྱེད་དང་ཁྱེད་ཀྱི་དྲུང་དུ་འོངས་པའི་མི་རྣམས་ཐང་ཆད་ངེས་ཡིན། དོན་དེ་ནི་ཁྱེད་ཀྱིས་ཐེག་དཀའ་ཞིང་ཁྱེད་གཅིག་པུས་བསྒྲུབ་ཀྱང་མི་ནུས་སོ། །  
\v 19 ད་ལྟ་ངའི་གཏམ་ལ་གསན་པར་གྱིས། བདག་གིས་ཁྱེད་ལ་སློབ་སྟོན་བྱེད་དེ། དཀོན་མཆོག་ཁྱེད་དང་མཉམ་དུ་བཞུགས་པར་སྨོན། ཁྱེད་ནི་དཀོན་མཆོག་གི་དྲུང་དུ་འབངས་མིའི་ཚབ་བྱེད་མཁན་ཡིན་ཞིང་། རྩོད་གཞི་རྣམས་དཀོན་མཆོག་གི་དྲུང་དུ་ཕུལ་ཞིག  
\v 20 ཁྱེད་ཀྱིས་དེ་དག་ལ་སྒྲིག་ལམ་དང་བཀའ་ཁྲིམས་རྣམས་སློབས་དང་། ཁོ་རྣམས་ལ་འགྲུལ་དགོས་པའི་ལམ་དང་བྱེད་དགོས་པའི་ལས་རྣམས་སྟོན་པར་གྱིས་ཤིག  
\v 21 དེ་ནས་ཁྱེད་ཀྱིས་འབངས་མིའི་ཁྲོད་ནས་སྐྱེས་པ་འཇོན་པོ་རྣམས་འདེམས་དགོས་ཏེ། དཀོན་མཆོག་ལ་གུས་ཤིང་འཇིགས་པ་དང་། གཤིས་རྒྱུད་དྲང་བ་དང་། ལྐོག་ནོར་ལ་སྡང་བ་རྣམས་ཚོལ་དང་། དེ་དག་སྟོང་དཔོན་དང་། བརྒྱ་དཔོན་དང་། ལྔ་བཅུ་དཔོན་དང་། བཅུ་དཔོན་བཅས་བྱེད་དུ་ཆུག  
\v 22 ཁོ་རྣམས་ཀྱིས་དུས་རྒྱུན་མི་རྣམས་ལ་ལེགས་ཉེས་ཀྱི་ཤན་འབྱེད་དགོས་པ་འདི་ལྟ་སྟེ། དོན་ཆེན་གང་བྱུང་བ་དེ་དག་ཁྱེད་ལ་ཞུ་དགོས་པ་དང་། དོན་ཆུང་རྣམས་རང་རང་གིས་ཐག་གིས་གཅོད་དགོས། དེ་ལྟར་བྱས་ན་ཁྱེད་ཀྱི་ལས་ཚགས་ཇེ་ཡང་དུ་འགྲོ་བ་དང་། ཁོ་རྣམས་ཀྱིས་ཁྱེད་དང་མཉམ་དུ་འགན་འཁུར་བར་འགྱུར།  
\v 23 དོན་འདི་དཀོན་མཆོག་གིས་ཁྱེད་ལ་གནང་བའི་བཀའ་ཡིན་པ་དང་ཁྱེད་ཀྱིས་དེ་ལྟར་བྱས་ན། ཁྱེད་ཀྱིས་འགན་ཐེག་སྲིད་ཅིང་། མི་འདི་ཐམས་ཅད་ཀྱང་བདེ་བར་རང་གི་གནས་སུ་འགྲོ་བར་འགྱུར་ཞེས་སྨྲས་སོ། །   
\p
\v 24 དེ་ནས་མོ་ཤེ་ཡིས་སྒྱུག་པོའི་ངག་ལ་མཉན་ཏེ། ཁོས་ཅི་སྨྲས་པ་བཞིན་དུ་བྱས།  
\v 25 མོ་ཤེ་ཡིས་ཡེས་ར་ཨེལ་པ་དག་ལས་སྐྱེས་པ་འཇོན་པོ་རྣམས་བདམས་ཏེ་འབངས་མིའི་འགོ་དཔོན་དུ་བསྐོས་ཤིང་། སྟོང་དཔོན་དང་། བརྒྱ་དཔོན་དང༌། ལྔ་བཅུ་དཔོན་དང་། བཅུ་དཔོན་བཅས་བྱེད་དུ་བཅུག་པ་དང་།  
\v 26 དེ་དག་གིས་རྟག་ཏུ་མི་རྣམས་ལ་ལེགས་ཉེས་ཀྱི་ཤན་འབྱེད་ཅིང་། ཐག་གིས་ཆོད་དཀའ་བ་རྣམས་མོ་ཤེ་ལ་གཏད། འོན་ཀྱང་དོན་ཆུང་རྣམས་རང་རང་གིས་ཐག་གཅོད་བྱེད་དོ། །  
\v 27 དེ་ནས་མོ་ཤེ་ཡིས་རང་གི་སྒྱུག་པོར་སྐྱེལ་མ་བྱས་པ་དང་། ཁོ་ཕྱིར་རང་ཡུལ་དུ་ལོག་གོ །   
\c 19
\cl ལེའུ་བཅུ་དགུ་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 རི་བོ་སི་ནཱ་ནས་དཀོན་མཆོག་མཇལ་བ།  
\p
\v 1 དེ་ནས་ཡེས་ར་ཨེལ་པ་རྣམས་ཨེ་ཅིབ་ཡུལ་གྱི་ཕྱི་རུ་ཐོན་པ་ནས་ཟླ་བ་གསུམ་པའི་ཉིན་དེར་སི་ནཱ་བྱ་བའི་དབེན་སྟོང་དུ་སླེབས།  
\v 2 ཁོ་རྣམས་རཱ་ཕི་དིམ་ཡུལ་ནས་ཆས་ཏེ་སི་ནཱའི་དབེན་སྟོང་དུ་སླེབས་ནས་དེའི་རི་འདབས་སུ་སྒར་བཏབ།  
\v 3 མོ་ཤེ་ཡར་དཀོན་མཆོག་གི་དྲུང་དུ་སོང་བ་ལ། ཁོང་གིས་རི་མགོ་ནས་མོ་ཤེ་ལ་ཞལ་འབོད་གནང་སྟེ་འདི་སྐད་དུ། ཁྱོད་ཀྱིས་ཡ་ཀོབ་ཀྱི་ཁྱིམ་རྒྱུད་ལ་འདི་ལྟར་སྨྲོས་དང་། ཡེས་ར་ཨེལ་པ་རྣམས་ལ་འདི་ལྟར་སྒྲོགས་ཤིག  
\v 4 ངས་ཨེ་ཅིབ་པ་རྣམས་ལ་ཅི་ཞིག་བྱས་པ་དང་། ཇི་ལྟར་ཁྱོད་རྣམས་གླག་གི་གཤོག་པའི་སྟེང་འཁུར་བ་བཞིན་ངའི་དྲུང་དུ་ཁྲིད་པ་དེ་ཁྱོད་ཅག་གིས་མཐོང་བ་ཡིན།  
\v 5 ད་ལྟ་ཁྱོད་ཅག་གིས་དངོས་གནས་བདག་གི་ངག་ལ་མཉན་པ་དང་བདག་གི་ཁ་ཆད་བསྲུང་བ་ཡིན་ན། མི་ཐམས་ཅད་ལས་ཁྱོད་ཅག་ནི་ངའི་ནོར་བུ་ཁྱད་པར་ཅན་ཞིག་ཡིན་པར་འགྱུར། ཅིའི་ཕྱིར་ཞེ་ན། ས་གཞི་ཐམས་ཅད་བདག་གི་ཡིན་པའི་ཕྱིར་རོ། །  
\v 6 ཁྱོད་ཅག་ནི་ངའི་ཕྱིར་མཆོད་དཔོན་གྱི་རྒྱལ་ཁམས་ཤིག་དང་མི་རིགས་དམ་པ་ཞིག་ཏུ་འགྱུར་ཞེས་གཏམ་འདི་དག་ཁྱོད་ཀྱིས་ཡེས་ར་ཨེལ་པ་རྣམས་ལ་སྨྲ་དགོས་པ་དེ་ཡིན་ཞེས་གསུངས་སོ། །   
\p
\v 7 དེ་ནས་མོ་ཤེ་ཕྱིར་ལོག་སྟེ་མི་རྣམས་ཀྱི་རྒན་པོ་རྣམས་བོས་ཡོང་ནས། དཀོན་མཆོག་ཡ་ཝཱེས་ཁོ་རང་ལ་གནང་བའི་བཀའ་ཐམས་ཅད་དེ་རྣམས་ལ་སྨྲས།  
\v 8 དེའི་ལན་དུ་མི་ཐམས་ཅད་ཀྱིས་མགྲིན་གཅིག་ཏུ་དཀོན་མཆོག་ཡ་ཝཱེས་ཅི་དང་ཅི་གསུངས་པ་བཞིན་དུ་ངེད་རྣམས་ཀྱིས་བསྒྲུབ་པར་བྱ་ཞེས་སྨྲས་ཤིང་། མོ་ཤེ་ཡིས་མི་རྣམས་ཀྱི་གཏམ་དེ་དཀོན་མཆོག་ཡ་ཝཱེ་ལ་ཞུས་སོ། །  
\v 9 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཀྱེ་ཧོ། ང་རང་སྤྲིན་སྟུག་པོ་ཞིག་གི་ནང་ཁྱོད་ཀྱི་གམ་དུ་འོང་སྟེ། ཁྱོད་ལ་གཏམ་སྨྲ་བར་འགྱུར་བ་དེ་མི་རྣམས་ཀྱིས་ཀྱང་ཐོས་པ་དང་། ཁྱོད་ལ་རྟག་ཏུ་ཡིད་ཆེས་པའི་ཕྱིར་ཡིན་ཞེས་གསུངས་པ་དང་། མོ་ཤེ་ཡིས་མི་རྣམས་ཀྱི་གཏམ་དེ་དཀོན་མཆོག་ཡ་ཝཱེ་ལ་ཞུས་སོ། །   
\p
\v 10 ཡང་དཀོན་མཆོག་ཡ་ཝཱེས་མོ་ཤེ་ལ། ཁྱོད་རང་མི་རྣམས་ཀྱི་གམ་དུ་སོང་ནས་དེ་རིང་དང་སང་ཉིན་ཁོ་རྣམས་དམ་པར་བྱོས་ཤིག་དང་། དེ་དག་ལ་རང་གི་གོས་རྣམས་ཀྱང་བཀྲུ་རུ་ཆུག  
\v 11 ཉིན་གསུམ་པར་གྲ་སྒྲིག་བྱས་ཚར་དགོས། གང་ལ་ཟེར་ན། ཉིན་གསུམ་པར་དཀོན་མཆོག་ཡ་ཝཱེ་མི་ཐམས་ཅད་ཀྱི་མིག་མདུན་དུ་རི་བོ་སི་ནཱ་ལ་མར་ཕེབས་རྒྱུ་ཡིན་པས་སོ། །  
\v 12 ཁྱོད་ཀྱིས་རི་བོའི་ཕྱོགས་བཞིར་མི་རྣམས་ལ་དབྱེ་མཚམས་ཕྱེས་ནས་འདི་ལྟར། ཁྱོད་ཅག་གིས་གཟབ་གཟབ་བྱེད་དགོས་ཤིང་། རི་ལ་འགོས་པའམ་དེའི་འདབས་ལ་རེག་མི་རུང་སྟེ། སུ་ཞིག་གིས་རི་ལ་རེག་ན་དེ་ཅིས་ཀྱང་གསོད་དགོས།  
\v 13 མི་དེ་ལྟ་བུ་ལ་ལག་པས་རེག་མི་རུང་སྟེ་རྡོ་རུབ་གཏོང་བའམ་མདའ་ཡིས་བརྒྱབ་ནས་གསོད་དགོས། དུད་འགྲོའམ་མི་གང་ཡིན་རུང་གསོན་མི་འོས་ཞེས་སྨྲ་བར་གྱིས། རྭ་དུང་གི་སྐད་ཡུན་རིང་དུ་བྱུང་ཚེ་དེ་དག་ད་གཟོད་ཡར་རི་ལ་འོང་ཆོག་པ་ཡིན་ཞེས་གསུངས།  
\v 14 དེ་ནས་མོ་ཤེ་རི་ལས་བབས་ཏེ་མི་རྣམས་ཀྱི་གམ་དུ་འོངས་པ་དང་། ཁོ་རྣམས་དམ་པར་བྱས་ཤིང་། དེ་དག་གིས་རང་གི་གོས་རྣམས་བཀྲུས།  
\v 15 ཡང་མོ་ཤེ་ཡིས་མི་རྣམས་ལ། ཉིན་གསུམ་པར་གྲ་སྒྲིག་བྱས་ཚར་དགོས། སུ་ཡང་བུད་མེད་དང་འགྲོགས་མི་རུང་ཞེས་སྨྲས་ཤིང་།  
\v 16 ཉིན་གསུམ་པའི་ཞོགས་པར། འབྲུག་སྒྲ་ལྡིར་ཞིང་གློག་དམར་འཁྱུགས་པ་དང་རི་ལ་སྤྲིན་སྟུག་པོ་འཐིབས། རྭ་དུང་གི་སྐད་ཤིན་ཏུ་ཆེན་པོ་བྱུང་བས། སྒར་ལ་ཡོད་པའི་མི་ཐམས་ཅད་སྐྲག་ནས་འདར།  
\v 17 མོ་ཤེ་ཡིས་མི་རྣམས་སྒར་གྱི་ཕྱི་རོལ་ཏུ་དཀོན་མཆོག་མཇལ་བར་ཁྲིད་ཅིང་། དེ་དག་རི་འདབས་སུ་ལངས་ནས་བསྡད་དོ། །   
\p
\v 18 དཀོན་མཆོག་ཡ་ཝཱེ་མེ་དང་བཅས་རི་བོ་སི་ནཱ་ལ་མར་ཕེབས་པས་གནས་ཐམས་ཅད་ལས་དུ་བ་འཕྱུར་བ་དང་། མེ་ཐབ་ཀྱི་དུ་བ་ལྟར་དུ་བ་དེ་གྱེན་ལ་ལངས་ཤིང་། རི་བོ་ཡོངས་རྫོགས་ལྕིག་ལྕིག་ཏུ་འགུལ།  
\v 19 དེ་ནས་རྭ་དུང་གི་སྐད་རིམ་བཞིན་ཆེ་རུ་ཕྱིན་པའི་སྐབས་སུ། མོ་ཤེ་ཡིས་གཏམ་ཞུས་ཤིང་དཀོན་མཆོག་གིས་གསུང་སྐད་ཞིག་གིས་ཁོ་ལ་ལན་གསུངས་སོ། །  
\v 20 དཀོན་མཆོག་ཡ་ཝཱེ་རི་བོ་སི་ནཱའི་རྩེ་མོར་མར་ཕེབས་ཤིང་། ཁོང་གིས་མོ་ཤེ་རི་མགོར་འོང་བའི་ཞལ་འབོད་གནང་བ་དང་མོ་ཤེ་རི་ལ་འགོས།  
\v 21 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་མར་སོང་ནས་མི་རྣམས་ལ་ཉེན་བརྡ་ཐོངས་ཤིག དེ་ལྟར་མ་བྱས་ན། དེ་རྣམས་ཀྱིས་ང་རང་མཐོང་བའི་ཆེད་དུ་བཙན་གྱིས་མཚམས་ལས་བརྒལ་ནས་མི་མང་པོའང་འཆི་བར་ངེས།  
\v 22 ཡང་དཀོན་མཆོག་ཡ་ཝཱེའི་ཉེ་སར་འོང་བའི་མཆོད་དཔོན་རྣམས་ཀྱིས་རང་ཉིད་དམ་པར་བྱེད་དགོས་པ་ཡིན། དེ་མིན་ཚེ་དཀོན་མཆོག་ཡ་ཝཱེ་གློ་བུར་ཉིད་ལ་སླེབས་ནས་དེ་རྣམས་གསོད་ཉེན་ཆེ་ཞེས་གསུངས།  
\v 23 མོ་ཤེ་ཡིས་དཀོན་མཆོག་ཡ་ཝཱེ་ལ་འདི་ལྟར། མི་རྣམས་རི་བོ་སི་ནཱ་ལ་འགོས་མི་རུང་སྟེ། ཁྱེད་ཀྱིས་རི་འདིའི་ཕྱོགས་བཞིར་དབྱེ་མཚམས་ཕྱེས་ལ་དམ་པར་སྲུངས་ཤིག་ཅེས་བཀའ་གནང་བས་སོ་ཞེས་ཞུས་པ་ལ།  
\v 24 དཀོན་མཆོག་ཡ་ཝཱེས་ཁོ་རང་ལ། མར་སོང་དང་། དེ་ནས་ཁྱོད་ཨ་རོན་དང་མཉམ་དུ་ཡར་འོང་བར་གྱིས། འོན་ཀྱང་མཆོད་དཔོན་དང་མི་རྣམས་བདག་གི་མདུན་དུ་འོང་ཕྱིར་བཙན་གྱིས་མཚམས་ལས་བརྒལ་མི་རུང་སྟེ། ཅི་ལ་ཞེ་ན། དེ་ལྟར་བྱས་ན་ང་རང་གློ་བུར་ཉིད་ལ་སླེབས་ནས་དེ་དག་གསོད་ཉེན་ཆེ་ཞེས་གསུངས།  
\v 25 དེའི་ཕྱིར་མོ་ཤེ་རི་ལས་བབས་པ་དང་། མི་རྣམས་ཀྱི་གམ་དུ་སོང་ནས་དེ་དག་ལ་སྨྲས་སོ། །   
\c 20
\cl ལེའུ་ཉི་ཤུ་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 དཀོན་མཆོག་གི་བཀའ་ཁྲིམས་བཅུ།  
\p
\v 1 དཀོན་མཆོག་གིས་བཀའ་འདི་ཐམས་ཅད་གསུངས་ནས་འདི་སྐད་དུ།  
\v 2 བདག་ནི་ཁྱོད་ཅག་གི་དཀོན་མཆོག་ཡ་ཝཱེ་ཡིན་ཞིང་། ཁྱོད་རྣམས་ཨེ་ཅིབ་ཡུལ་གྱི་བྲན་དུ་བཀོལ་བའི་གནས་ནས་ཁྲིད་མཁན་ཡང་ཡིན་ནོ། །  
\v 3 ང་རང་མ་གཏོགས་པའི་དཀོན་མཆོག་གཞན་ཞིག་ཁྱོད་ལ་ཡོད་མི་ཆོག  
\v 4 ཁྱོད་ཀྱིས་རང་ཉིད་ལ་སྐུ་འདྲ་དང་། སྟེང་གི་ནམ་མཁའ་འམ། འོག་གི་སའམ། ས་འོག་གི་ཆུ་ལ་ཡོད་པའི་སེམས་ཅན་གྱི་གཟུགས་བརྙན་གང་ཡང་བཟོ་མི་རུང་།  
\v 5 དེ་དག་ལ་ཕྱག་མ་འཚལ། བསྙེན་བཀུར་ཡང་མ་བྱེད། གང་ལ་ཟེར་ན། ཁྱོད་ཀྱི་དཀོན་མཆོག་ཡ་ཝཱེ་ང་རང་ནི་ཕྲག་དོག་ཅན་ཞིག་ཡིན་ཏེ། ཕ་རྣམས་ཀྱི་ནག་ཉེས་ཕྱིར་མི་རབས་གསུམ་མམ་བཞིའི་བར་དུ་ང་རང་ལ་སྡང་མཁན་གྱི་བུ་ཕྲུག་རྣམས་ལ་བཀའ་ཆད་གཅོད་མོད།  
\v 6 འོན་ཀྱང་ང་རང་གཅེས་སུ་འཛིན་པ་དང་བདག་གི་བཀའ་སྲུང་མཁན་རྣམས་ལ་མི་སྟོང་ཕྲག་གི་བར་དུ་ཐུགས་བརྩེ་བར་བྱེད་དོ། །  
\v 7 ཁྱོད་ཀྱི་དཀོན་མཆོག་ཡ་ཝཱེའི་མཚན་གང་བྱུང་དུ་སྤྱོད་མི་རུང་། ཅི་ལ་ཞེ་ན། སུ་ཞིག་གིས་ཁོང་གི་མཚན་གང་བྱུང་དུ་སྤྱད་ན་དཀོན་མཆོག་ཡ་ཝཱེས་མི་དེ་ཉེས་མེད་དུ་རྩི་བར་མི་འགྱུར་རོ། །  
\v 8 ངལ་གསོ་བའི་ཉིན་མོ་དྲན་ནས་དེ་དམ་པར་སྲུངས་ཤིག  
\v 9 ཉིན་དྲུག་གི་རིང་ལ་འབད་ཅིང་རང་གི་ལས་ཀ་ཚང་མ་སྒྲུབ་རུང་བ་ཡིན།  
\v 10 འོན་ཀྱང་ཉིན་བདུན་པ་ནི་ཁྱོད་ཀྱི་དཀོན་མཆོག་ཡ་ཝཱེའི་ངལ་གསོ་བའི་ཉིན་མོ་ཡིན་པས། ཉིན་མོ་དེ་ལ་ཁྱོད་དང་ཁྱོད་ཀྱི་བུ་དང་བུ་མོ། གཡོག་པོ་དང་གཡོག་མོ། སྒོ་ཕྱུགས། རྒྱ་སྒོ་ནང་རོལ་ལ་གནས་པའི་བྱེས་པ་བཅས་ཀྱིས་ལས་ཀ་གང་ཡང་མ་བྱེད་ཅིག  
\v 11 ཅིའི་ཕྱིར་ཞེ་ན། ཉིན་དྲུག་གི་རིང་ལ་དཀོན་མཆོག་ཡ་ཝཱེས་ནམ་མཁའ་དང་ས་གཞི་དང་རྒྱ་མཚོ་དང་དེ་དག་གི་ནང་དུ་ཡོད་པ་ཐམས་ཅད་བཀོད་ནས། ཉིན་བདུན་པ་ལ་ངལ་གསོས་པའོ། །དེའི་ཕྱིར་དཀོན་མཆོག་ཡ་ཝཱེས་ངལ་གསོ་བའི་ཉིན་མོ་དེ་ལ་བྱིན་གྱིས་བརླབས་ནས་དམ་པར་མཛད་དོ། །  
\v 12 ཁྱོད་ཀྱི་དཀོན་མཆོག་ཡ་ཝཱེས་ཁྱོད་རྣམས་ལ་གནང་བྱའི་ཡུལ་དེར་ཚེ་ཐག་རིང་པོར་གནས་ཐུབ་པའི་ཕྱིར། རང་གི་ཕ་མ་གཉིས་ལ་བཀུར་སྟི་བྱེད་དགོས།  
\v 13 ཁྱོད་ཀྱིས་མི་མ་གསོད།  
\v 14 ལོག་གཡེམ་མ་བྱེད།  
\v 15 རྐུ་མ་བྱེད།  
\v 16 རང་གི་ཁྱིམ་མཚེས་ལ་རྫུན་གྱི་དཔང་པོ་མ་བྱེད།  
\v 17 གཞན་གྱི་ཁང་པ་ལ་འདོད་ཧམ་མ་བཅང་། གཞན་གྱི་ཆུང་མ་དང་། གཡོག་པོ་དང་། གཡོག་མོ་དང་། བ་གླང་དང་། བོང་བུ་དང་། དེ་ལྟར་མི་གཞན་གྱི་ཡིན་ཚད་གང་ལའང་ཧམ་པ་བཅང་མི་རུང་ཞེས་གསུངས་སོ། །   
\p
\v 18 མི་ཐམས་ཅད་ཀྱིས་འབྲུག་སྒྲ་ལྡིར་བ་དང་གློག་དམར་འཁྱུག་པ། རྭ་དུང་གི་སྐད་དང་རི་ལས་དུ་བ་འཕྱུར་བ་བཅས་མཐོང་བས། ཁོ་རྣམས་སྔངས་འདར་དང་བཅས་རྒྱང་རིང་ནས་ལངས་བསྡད་ཅིང་།  
\v 19 མོ་ཤེ་ལ་འདི་ལྟར། ཁྱེད་ཀྱིས་ངེད་ཅག་ལ་གཏམ་སྨྲ་བར་མཛོད་དང་ངེད་ཅག་གིས་མཉན་པར་བྱའོ། །འོན་ཀྱང་ངེད་རྣམས་འཆི་བར་མི་འགྱུར་བའི་ཕྱིར། དཀོན་མཆོག་གིས་ངེད་ཅག་ལ་གསུང་འབྱོན་པར་མི་བྱའོ་ཞེས་སྨྲས།  
\v 20 མོ་ཤེ་ཡིས་མི་རྣམས་ལ། མ་འཇིགས་ཤིག རྒྱུ་མཚན་ནི་དཀོན་མཆོག་ཁྱོད་རྣམས་ལ་བརྟག་པར་ཕེབས་པ་སྟེ། ཁྱོད་རྣམས་ཁོང་ལ་གུས་ཤིང་འཇིགས་པ་དང་སྡིག་པའང་མི་བྱེད་པའི་ཕྱིར་ཡིན་ཞེས་སྨྲས།  
\v 21 དེ་ལྟར་མི་རྣམས་རྒྱང་རིང་ནས་ལངས་བསྡད་པ་དང་། མོ་ཤེ་དཀོན་མཆོག་བཞུགས་ཡོད་པའི་མུན་པ་སྟུག་པོའི་ཉེ་སར་བཅར་ཏོ། །   
\s1 མཆོད་ཁྲི་བརྩིག་པར་བཀའ་གནང་བ།  
\p
\v 22 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྨྲོས་དང་། བདག་གིས་ནམ་མཁའི་ཞིང་ཁམས་ནས་ཁྱོད་ཅག་ལ་གཏམ་སྨྲས་པ་ཁྱོད་རྣམས་ཀྱིས་མཐོང་བ་ཡིན།  
\v 23 ཁྱོད་ཅག་གིས་ང་ཡི་དོ་ཟླར་ཅི་ཡང་བཟོ་མི་རུང་སྟེ། རང་ཉིད་ཀྱི་ཆེད་དུ་དངུལ་གྱི་སྐུ་བརྙན་ནམ་གསེར་གྱི་སྐུ་བརྙན་གང་ཡང་བཟོ་མི་རུང་།  
\v 24 ངའི་ཆེད་དུ་ས་ཡི་མཆོད་ཁྲི་ཞིག་བརྩིག་པར་གྱིས་ལ། དེའི་སྟེང་དུ་ཁྱོད་ཅག་གི་སྦྱིན་སྲེག་དང་། ཞི་བདེའི་མཆོད་པ་རྣམས་དང་། ར་ལུག་དང་བ་གླང་གི་མཆོད་པ་འབུལ་དགོས། ངས་རང་གི་མིང་དྲན་སྐུལ་བྱེད་པའི་གནས་གང་དང་གང་དུ་ང་རང་ཁྱོད་ཅག་གི་གམ་དུ་འོངས་ཏེ་ཁྱོད་ཅག་ལ་བྱིན་རླབས་གནང་བར་འགྱུར།  
\v 25 ཡང་གལ་ཏེ་ངའི་ཕྱིར་རྡོ་ཡི་མཆོད་ཁྲི་ཞིག་བརྩིག་པར་བྱེད་ན། མ་བཅོས་པའི་རྡོ་རྣམས་ལས་བརྩིག་པར་གྱིས། རྒྱུ་མཚན་ནི་ཁྱོད་རྣམས་ཀྱིས་དེའི་སྟེང་དུ་བཟོ་བྱེད་བཀོལ་ན་མཆོད་ཁྲི་མི་གཙང་བར་བྱེད་པས་སོ། །  
\v 26 ཡང་ཁྱོད་རྣམས་ཀྱི་ཁོག་སྨད་གཅེར་བུར་མི་འབུད་པའི་ཕྱིར། ཁྱོད་རྣམས་ཐེམ་སྐས་ཀྱི་སྟེང་ནས་བདག་གི་མཆོད་ཁྲི་སྟེང་དུ་མ་འབུད་ཅིག་ཅེས་གསུངས་སོ། །   
\c 21
\cl ལེའུ་ཉེར་གཅིག་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 བྲན་གཡོག་སྐོར་གྱི་ཁྲིམས་སྲོལ།  
\p
\v 1 ཡང་འདི་སྐད་དུ། ཁྱོད་ཀྱིས་འབངས་མིའི་མདུན་དུ་འཛུགས་དགོས་པའི་ཁྲིམས་སྲོལ་ནི་འདི་ལྟ་སྟེ།  
\v 2 ཁྱོད་རྣམས་ཀྱིས་ཨིབ་རི་པའི་བྲན་གཡོག་ཅིག་ཉོས་ཚེ། ཁོས་ལོ་དྲུག་གི་རིང་ལ་གཡོག་བྱེད་དགོས་པ་དང་། ལོ་བདུན་པར་ཁོ་ཚོར་རང་དབང་འཐོབ་འོས་ཏེ་རིན་ཅི་ཡང་སྤྲོད་མི་དགོས་པར་སོང་ཆོག་པ་ཡིན།  
\v 3 ཁོ་རང་གཅིག་པུ་ཡོང་བ་ཡིན་ན། གཅིག་པུ་ཕྱིར་སོང་ཆོག་ལ། ཁོ་ཆུང་མ་དང་ལྷན་དུ་ཡོང་བ་ཡིན་ན། ཆུང་མ་ཁོ་དང་མཉམ་དུ་སོང་ཆོག  
\v 4 དེའི་བདག་པོས་ཁོ་ལ་ཆུང་མ་ཞིག་སྤྲད་ནས། ཆུང་མ་དེས་ཁོ་ལ་བུའམ་བུ་མོ་བཙས་ན། ཆུང་མ་དང་བུ་ཕྲུག་རྣམས་བདག་པོའི་ཡིན་ཞིང་། ཁོ་རང་གཅིག་པུ་ཕྱིར་འགྲོ་དགོས།  
\v 5 གལ་ཏེ་བྲན་གཡོག་གིས་འདི་ལྟར། ངས་རང་གི་བདག་པོ་དང་ཆུང་མ་དང་བུ་ཕྲུག་རྣམས་ལ་གཅེས་ཤིང་། རང་དབང་གིས་ཕྱིར་འགྲོ་བར་མི་འདོད་ཅེས་གསལ་པོར་སྨྲས་ན།  
\v 6 ཁོའི་བདག་པོས་མི་དེ་དཀོན་མཆོག་གི་མདུན་དུ་ཁྲིད་པ་དང་། ཡང་སྒོ་མདུན་ནམ་ཡང་ན་སྒོ་འགྲམ་དུ་ཁྲིད་ནས། སྙུང་བུས་དེའི་རྣ་བ་འབིགས་དགོས་པ་དང་། མི་དེས་གཏན་དུ་བདག་པོར་གཡོག་བྱེད་དགོས་སོ། །   
\p
\v 7 ཡང་མི་ཞིག་གིས་རང་གི་བུ་མོ་གཡོག་མོ་བྱེད་དུ་བཙོངས་ན། ཁོ་མོ་གཡོག་པོ་རྣམས་ལ་རང་དབང་ཐོབ་པ་བཞིན་སོང་མི་ཆོག  
\v 8 བདག་པོས་ཁོ་མོ་རང་གི་ཕྱིར་བདམས་ཀྱང་དེ་ལ་མི་དགའ་ན། ཁོ་མོ་བླུ་རུ་འཇུག་དགོས། ཡང་བདག་པོས་ཁོ་མོ་བསླུས་པའི་རྐྱེན་གྱིས། ཁོ་མོ་ཕྱི་ཕྱོགས་པ་ལ་བཙོང་བའི་དབང་ཆ་དེ་ལ་མེད།  
\v 9 གལ་ཏེ་བདག་པོས་རང་གི་བུ་ཡི་ཕྱིར་ཁོ་མོ་བདམས་པ་ཡིན་ན་དེ་ལ་རང་གི་བུ་མོ་ཡིན་པའི་སྲོལ་བཞིན་བྱེད་དགོས།  
\v 10 ཡང་ཁོས་བུད་མེད་གཞན་ཞིག་ཆུང་མར་བླངས་ན། བུད་མེད་དེའི་ལྟོ་གོས་དང་གཉིས་སྦྱོར་གྱི་ཐོབ་འབབ་ཅི་ཡིན་ཡང་འཕྲི་མི་རུང་།  
\v 11 དོན་འདི་གསུམ་ག་མ་བསྒྲུབས་པ་ཡིན་ན། ཁོ་མོ་བླུ་རིན་མ་འཇལ་བར་སོང་ཆོག་པ་ཡིན་ཞེས་གསུངས་སོ། །   
\s1 ཉེས་སྐྱོན་སྐོར་གྱི་ཁྲིམས་སྲོལ།  
\p
\v 12 ཡང་འདི་སྐད་དུ། སུས་ཀྱང་མི་ཞིག་ལ་བརྡུངས་ནས་བསད་ཚེ། རྡུང་མཁན་དེའི་སྲོག་ཅི་ནས་ཀྱང་གཅོད་དགོས།  
\v 13 འོན་ཀྱང་ཁོས་མི་ལ་མ་འཇབ་པར། དཀོན་མཆོག་གིས་མི་དེ་ཁོའི་ལག་ཏུ་གཏད་པ་ཡིན་ན། མི་དེ་འབྲོ་སའི་གནས་ཤིག་བདག་གིས་བཀོད་སྒྲིག་བྱེད་པར་འགྱུར།  
\v 14 གལ་ཏེ་མི་ཞིག་གིས་གཡོ་ཐབས་ཀྱིས་མི་གཞན་ཞིག་བསམ་བཞིན་དུ་བསད་ཚེ། ཁོ་རང་བདག་གི་མཆོད་ཁྲིའི་གམ་དུ་སྦས་ན་ཡང་བཟུང་སྟེ་སྲོག་གཅོད་དགོས་སོ། །  
\v 15 ཡང་རང་གི་ཕའམ་མ་ལ་རྡུང་མཁན་དེའི་སྲོག་ཅི་ནས་ཀྱང་གཅོད་དགོས།  
\v 16 སུས་ཀྱང་མི་གཞན་ཞིག་བཙན་ཁྲིད་བྱས་ནས་བཙོངས་པའམ་ཡང་ན་རང་གི་དབང་འོག་ཏུ་ཉར་ན། ཁོའི་སྲོག་ཅི་ནས་ཀྱང་གཅོད་དགོས།  
\v 17 ཡང་རང་གི་ཕའམ་མ་ལ་སྨོན་ལོག་འདེབས་མཁན་དེའི་སྲོག་ཅི་ནས་ཀྱང་གཅོད་དགོས།  
\v 18 ཡང་མི་རྣམས་འཛིང་ནས་གཅིག་གིས་གཅིག་ལ་རྡོའམ་ལག་པས་བརྡུངས་པ་དང་། ད་དུང་འཆི་བའི་ཚད་ལ་མ་སླེབས་པར་མལ་སར་ལྷུང་བ་ཙམ་ཡིན་ཞིང་།  
\v 19 རྨས་མ་དེ་ཡང་བསྐྱར་ལངས་ནས་འཁར་བར་བརྟེན་ཏེ་ཕྱི་རོལ་ཏུ་འགྲོ་ཐུབ་པ་བྱུང་ཚེ། ཁོ་ལ་རྡུང་མཁན་དེ་ཉེས་མེད་དུ་རྩིས་ཆོག་མོད། འོན་ཀྱང་རྡུང་མཁན་གྱིས་རྨས་ཕོག་པའི་མི་དེའི་ལས་ཀར་དལ་འགོར་བྱས་པའི་གྱོང་གུད་འཚབ་དགོས་ཤིང་ཁོ་རང་སངས་དྲག་བྱེད་དུ་འཇུག་དགོས།  
\v 20 ཡང་མི་ཞིག་གིས་རང་གི་བྲན་གཡོག་གམ་ཡང་ན་གཡོག་མོ་ལ་དབྱུག་པས་བརྡུངས་ནས་འཕྲལ་དུ་ཁོའི་ལག་ཏུ་ཤི་ན། དེས་ངེས་པར་ཉེས་ཆད་འཁུར་དགོས།  
\v 21 འོན་ཀྱང་ཉིན་གཅིག་གམ་གཉིས་ལ་ད་དུང་གསོན་པོར་གནས་ན། ཁོ་རང་ནི་བདག་པོའི་རྒྱུ་ནོར་ཡིན་པའི་ཕྱིར་ཉེས་ཆད་འཁུར་མི་དགོས།  
\v 22 ཡང་མི་གཉིས་འཛིང་རེས་བྱེད་སྐབས་བུད་མེད་མངལ་དང་ལྡན་པ་ཞིག་ལ་ཁེལ་ནས་མངལ་ཤོར་དུ་བཅུག་ནའང་། ཕྱིས་སུ་གནོད་པ་གཞན་མ་བྱུང་ན། གནོད་སྐྱེལ་མཁན་གྱིས་བུད་མེད་དེའི་ཁྱོ་གའི་དགོས་འདོད་དང་། ཁྲིམས་དཔོན་རྣམས་ཀྱི་ཐག་བཅད་པ་བཞིན་འཇལ་དགོས།  
\v 23 གནོད་པ་གཞན་བྱུང་ན། དེ་ནས་སྲོག་ལ་སྲོག་ལན་དང་།  
\v 24 མིག་ལ་མིག་ལན། སོ་ལ་སོ་ལན། ལག་པ་ལ་ལག་པའི་ལན། རྐང་པ་ལ་རྐང་པའི་ལན།  
\v 25 འཚིག་རྨ་ལ་འཚིག་རྨའི་ལན། རྨས་ལ་རྨས་ལན། རྡུང་རྡེག་ལ་རྡུང་རྡེག་གིས་འཇལ་དགོས་སོ། །  
\v 26 ཡང་མི་ཞིག་གིས་རང་གི་བྲན་གཡོག་གི་མིག་གམ། ཡང་ན་གཡོག་མོའི་མིག་ལ་བརྒྱབ་ནས་མིག་ཞར་བར་བྱས་ན། མིག་དེའི་ཆེད་དུ་བྲན་གཡོག་དེར་རང་དབང་སྟེར་དགོས།  
\v 27 ཡང་ཁོས་རང་གི་བྲན་གཡོག་གི་སོའམ། ཡང་ན་གཡོག་མོའི་སོ་བཅག་ན། སོ་དེའི་ཆེད་དུ་བྲན་གཡོག་དེར་རང་དབང་སྟེར་དགོས་ཞེས་གསུངས་སོ། །   
\p
\v 28 ཡང་འདི་སྐད་དུ། གལ་ཏེ་བ་གླང་ཞིག་གིས་སྐྱེས་པའམ་བུད་མེད་ཅིག་ལ་བརྡུངས་ནས་བསད་ན། བ་གླང་དེ་རྡོ་རུབ་བཏང་ནས་གསོད་དགོས། དེའི་ཤ་བཟའ་མི་རུང་། འོན་ཀྱང་གླང་བདག་ལ་ཉེས་པ་མེད།  
\v 29 གལ་ཏེ་བ་གླང་དེ་སྔར་ནས་མི་ལ་རྡུང་བར་གོམས་པ་དང་། གཞན་གྱིས་བདག་པོ་ལ་ཉེན་བརྡ་སྤྲད་ཡོད་ཀྱང་། བདག་པོས་དེ་མ་བཏགས་པར་སྐྱེས་པའམ་བུད་མེད་ཅིག་ལ་བརྡུངས་ནས་བསད་པ་ཡིན་ན། དེ་རྡོ་རུབ་བཏང་སྟེ་གསོད་པ་དང་གླང་བདག་ཀྱང་གསོད་དགོས།  
\v 30 འོན་ཀྱང་བདག་པོ་ནས་བླུ་རིན་ལེན་པ་ཡིན་ན། ཁོས་དེ་བཞིན་དུ་རང་སྲོག་གི་ཆེད་དུ་བླུ་རིན་འཇལ་དགོས།  
\v 31 བ་གླང་གིས་བུ་ཞིག་གམ་ཡང་ན་བུ་མོ་ཞིག་ལ་བརྡུངས་པ་ཡིན་ན། ཁྲིམས་དེ་བཞིན་དུ་བྱེད་དགོས་སོ། །  
\v 32 བ་གླང་གིས་བྲན་གཡོག་གམ་ཡང་ན་གཡོག་མོ་ཞིག་ལ་བརྡུངས་ན། དེ་དག་གི་བདག་པོ་ལ་དངུལ་སྲང་སུམ་ཅུ་སྟེར་བ་དང་། བ་གླང་ཡང་རྡོ་རུབ་བཏང་སྟེ་གསོད་དགོས།  
\v 33 ཡང་སུ་ཞིག་གིས་དོང་ཁ་ཕྱེས་པའམ། ཡང་ན་དོང་ཞིག་བྲུས་ནས་ཁ་མ་བཀབ་པས་བ་གླང་ངམ་བོང་བུ་ཞིག་དེའི་ནང་དུ་ལྷུང་ན།  
\v 34 དོང་གི་བདག་པོས་དེའི་རིན་དུ་ཕྱུགས་བདག་ལ་ཚབ་བཅལ་ནས། ཕྱུགས་ཤི་རོ་ནི་ཁོ་རང་ལ་དབང་དགོས།  
\v 35 ཡང་མི་ཞིག་གི་བ་གླང་གིས་གཞན་ཞིག་གི་བ་གླང་ལ་བརྡུངས་ནས་བསད་ན། བ་གླང་གསོན་པོ་དེ་བཙོངས་ནས། དེའི་རིན་ཆ་སྙོམས་སུ་བགོ་བ་དང་། བ་གླང་ཤི་རོ་ཡང་ཆ་སྙོམས་སུ་བགོ་བཤའ་རྒྱག་དགོས།  
\v 36 འོན་ཀྱང་བ་གླང་དེ་སྔར་ནས་མི་ལ་རྡུང་བར་གོམས་ནའང་བདག་པོས་དེ་མ་བཏགས་ན། བ་གླང་ལ་བ་གླང་གིས་ཚབ་འཇལ་བ་དང་། བ་གླང་ཤི་རོ་ནི་ཁོ་རང་ལ་དབང་བ་ཡིན་ཞེས་གསུངས་སོ། །   
\c 22
\cl ལེའུ་ཉེར་གཉིས་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 རྒྱུ་ནོར་སྐོར་གྱི་ཁྲིམས་སྲོལ།  
\p
\v 1 ཡང་འདི་སྐད་དུ། མི་ཞིག་གིས་བ་གླང་ངམ་ར་ལུག་ཅིག་བརྐུས་ཏེ་བཤས་པའམ་ཡང་ན་བཙོངས་པ་ཡིན་ན། བ་གླང་གཅིག་བ་གླང་ལྔ་ཡིས་འཚབ་དགོས་ཤིང་། ར་ལུག་གཅིག་ར་ལུག་བཞི་ཡིས་འཚབ་དགོས།  
\v 2 མི་ཞིག་གིས་ཆོམ་རྐུན་ཞིག་འཕྲལ་མར་བཟུང་ཞིང་བརྡུངས་ནས་ཤི་བར་གྱུར་ཚེ། དེའི་ཕྱིར་ཁྲག་ལན་ཁྲག་གིས་འཇལ་མི་དགོས།  
\v 3 གལ་ཏེ་ཉི་མ་ཤར་བའི་རྗེས་སུ་དོན་དེ་བྱུང་ན་ཁྲག་ལན་འཇལ་དགོས། སྤྱིར་རྐུན་མས་རྒྱུ་ཚབ་འཇལ་དགོས་ཤིང་། ཁོ་ལ་རྒྱུ་ཚབ་འཇལ་རྒྱུ་མེད་ན། ཁོ་རང་ཉིད་བཙོངས་ཏེ་རྒྱུ་ཚབ་བྱེད་དགོས།  
\v 4 གལ་ཏེ་ཁོས་བརྐུས་པའི་བ་གླང་ངམ་བོང་བུའམ་ར་ལུག་བཅས་རྐུན་མའི་ལག་ནས་གསོན་པོ་ཡིན་ན། ལྡབ་འགྱུར་གྱིས་འཚབ་དགོས་སོ། །   
\p
\v 5 མི་ཞིག་གིས་རང་གི་ཕྱུགས་ཟོག་ནི་ཞིང་ངམ་རྒུན་ཚལ་དུ་འཚོས་ཏེ། རྗེས་སུ་ཕྱུགས་རྣམས་བཏང་ནས་གཞན་གྱི་ཞིང་ཁའང་བཟའ་བར་གྱུར་ན། རང་གི་ཞིང་དང་རྒུན་ཚལ་ནང་གི་མཆོག་ཡིན་པ་དེ་ཁོ་ལ་འཚབ་དགོས།  
\v 6 མེ་ཤོར་ནས་ཚེར་མ་བསྲེགས་ཏེ། གཞན་གྱི་མཉམ་དུ་སྤུངས་པའི་ཚར་ཕོན་དང་། གྱེན་ལ་འགྲེང་བའི་འབྲུ་སྙེ་དང་། ཡང་ན་ས་ཞིང་བཅས་ཐམས་ཅད་འཇོམས་པར་བྱས་ཚེ། མེ་གཏོང་མཁན་དེས་སྐྱིན་ཚབ་འཇལ་དགོས་སོ། །   
\p
\v 7 མི་ཞིག་གིས་ཁྱིམ་མཚེས་ལ་དངུལ་དང་ཡང་ན་རྒྱུ་རྫས་བཅོལ་བ་དང་དེའི་ཁྱིམ་ནས་རྐུན་མས་ཁྱེར་བ་དང༌། གལ་ཏེ་རྐུན་མ་བཟུང་ན། རྐུན་མ་དེས་ལྡབ་འགྱུར་གྱིས་འཚབ་དགོས།  
\v 8 གལ་ཏེ་རྐུན་མ་དེ་ལག་ཏུ་མ་ཚུད་ན། ཁྱིམ་མཚེས་ཀྱིས་རྒྱུ་རྫས་ཁྱེར་མིན་ལ་བལྟ་བའི་ཕྱིར་ཁོ་རང་ཁྲིམས་དཔོན་རྣམས་ཀྱི་དྲུང་དུ་བཅར་དགོས།  
\v 9 མི་གཉིས་ཀྱི་གྱོད་དོན་ནི་ཉེས་པ་གང་གི་ཕྱིར་ཡིན་ཡང་། བ་གླང་ངམ་བོང་བུའམ་ར་ལུག་གམ་གོས་སམ། ཡང་ན་བོར་བའི་རྒྱུ་རྫས་གང་ཞིག་གི་ཕྱིར་དུ་མི་ཞིག་གིས་དེ་ནི་བདག་གི་ཡིན་ཞེས་ཟེར་བའི་དོན་གང་ཞིག་བྱུང་ན། རྩོད་པ་བྱུང་བའི་མི་གཉིས་ཀའི་གྱོད་དོན་ཁྲིམས་དཔོན་རྣམས་ཀྱི་དྲུང་དུ་སྙན་འབུལ་ཞུ་དགོས་པ་དང་། ཁྲིམས་དཔོན་རྣམས་ཀྱིས་མི་གང་ལ་ཉེས་ཆད་བཅད་པ་དེས་ཁྱིམ་མཚེས་ལ་ལྡབ་འགྱུར་གྱིས་འཚབ་དགོས།  
\v 10 མི་ཞིག་གིས་བོང་བུའམ་བ་གླང་ངམ་ར་ལུག་གམ། ཡང་ན་སྒོ་ཕྱུགས་གཞན་གང་ཡིན་པ་ཁྱིམ་མཚེས་ལ་བཅོལ་ཚེ། དེ་ཤི་བའམ་རྨས་སྐྱོན་བྱུང་བའམ། ཡང་ན་སུས་ཀྱང་མ་མཐོང་བར་གཞན་གྱིས་དེད་ཚེ།  
\v 11 དེ་གཉིས་ཀྱི་བར་ལ། ཁྱིམ་མཚེས་ཀྱིས་བཅོལ་མཁན་གྱི་རྒྱུ་རྫས་མ་ཁྱེར་ཞེས་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་བསྐྱལ་དགོས་ཤིང་། བཅོལ་མཁན་གྱིས་ཀྱང་འདྲི་གཅོད་བྱེད་མཚམས་འཇོག་དགོས་པ་དང་། སྐྱིན་ཚབ་ཀྱང་སྤྲོད་མི་དགོས།  
\v 12 སྒོ་ཕྱུགས་ནི་འཚོ་མཁན་གྱི་ལག་ནས་རྐུན་མ་ལ་ཤོར་ན། ཁོས་བདག་པོར་སྐྱིན་ཚབ་འཇལ་དགོས།  
\v 13 གཅན་གཟན་གྱིས་ཐེར་ཚལ་དུ་དྲལ་བ་ཡིན་ན། དཔང་པོའི་ཕྱིར་དེའི་རོ་ཁྱེར་འོངས་པ་ལས་སྐྱིན་ཚབ་འཇལ་མི་དགོས།  
\v 14 ཡང་མི་ཞིག་གིས་ཁྱིམ་མཚེས་ནས་ཅི་ཞིག་གཡོར་བ་ལ། བདག་པོ་ཁོ་དང་མཉམ་དུ་མེད་པའི་ཚེ་དེ་ལ་རྨས་སྐྱོན་བྱུང་བའམ་ཤི་བ་ཡིན་ན། ཅིས་ཀྱང་སྐྱིན་ཚབ་འཇལ་དགོས་ཤིང་།  
\v 15 བདག་པོ་དང་མཉམ་དུ་ཡོད་ན་འཚབ་མི་དགོས། གལ་ཏེ་མི་དེས་ཁྱིམ་མཚེས་ནས་གླས་ \f + \ft སྐབས་དེའི་ཡ་ཧུ་དཱ་པའི་གོམས་སྲོལ་ལ་སྒོ་ཕྱུགས་གླས་ཏེ་རིན་འབབ་སྤྲོད་པའི་སྲོལ་དར་བ་ཡིན་པས། འདིར་ཡང་དེའི་ལུགས་དང་སྦྲེལ་ཏེ་གོ་བ་ལེན་རྒྱུ་ནི་གལ་ཆེ། \f*པ་ཡིན་ན་གླ་ཆའི་ཕྱིར་ཡིན་པས་འཚབ་མི་དགོས་ཞེས་གསུངས་སོ། །   
\s1 ཀུན་སྤྱོད་ཐད་ཀྱི་ཁྲིམས་སྲོལ།  
\p
\v 16 ཡང་འདི་སྐད་དུ། མི་ཞིག་གིས་གཉེན་རྟགས་བརྒྱབ་མེད་པའི་ན་ཆུང་བུ་མོ་ཞིག་བསླུས་ནས་དེ་དང་ལུས་འབྲེལ་བྱས་ན། རྒྱུ་བྱིན་ནས་བག་མར་ལེན་དགོས་ཏེ།  
\v 17 ཕ་ནི་བུ་མོ་མི་དེ་ལ་སྟེར་བར་ཁྱོན་ནས་མི་དགའ་ན། ན་ཆུང་བུ་མོ་རྣམས་ཀྱི་རྒྱུ་རིན་བཞིན་དུ་དངུལ་འཇལ་དགོས་སོ། །   
\p
\v 18 ངན་སྔགས་ཤེས་པའི་བུད་མེད་ཅིག་འཚོ་རུ་མ་འཇུག  
\v 19 སུ་ཞིག་གིས་དུད་འགྲོ་ཞིག་དང་འཁྲིག་པ་སྤྱད་ན་དེའི་སྲོག་ཅིས་ཀྱང་གཅོད་དགོས།  
\v 20 དཀོན་མཆོག་ཡ་ཝཱེ་གཅིག་པུ་མ་གཏོགས་པར་ལྷ་གང་རུང་ལ་མཆོད་པ་འབུལ་བའི་མི་དེ་ཁྱོན་ནས་མེད་པར་བྱེད་དགོས།   
\p
\v 21 ཁྱོད་ཅག་ཀྱང་ཨེ་ཅིབ་ཡུལ་ནས་བྱེས་པ་བྱས་མྱོང་བའི་ཕྱིར། བྱེས་པ་ཞིག་ལ་སྡུག་པོ་མ་གཏོང་། དེར་གནོན་ཤུགས་ཀྱང་སྦྱིན་མི་རུང་།  
\v 22 ཡུགས་མོ་དང་དྭ་ཕྲུག་སྡུག་ལ་མ་སྦྱོར་ཅིག  
\v 23 གལ་ཏེ་ཁྱོད་རྣམས་ཀྱིས་ཐབས་ཅི་ཞིག་གིས་དེ་དག་སྡུག་ལ་སྦྱར་བས་དེ་དག་གིས་ང་ལ་ཞུ་བ་ཕུལ་ན། བདག་གིས་དེ་རྣམས་ཀྱི་ཞུ་བར་ཅིས་ཀྱང་མཉན་ངེས་ཡིན་ལ།  
\v 24 ང་རང་ཁོང་ཁྲོ་རབ་ཏུ་འབར་ཏེ་ཁྱོད་རྣམས་རལ་གྲིས་འཇོམས་པར་བྱེད་པ་དང་། ཁྱོད་ཅག་གི་ཆུང་མ་རྣམས་ཡུགས་མོ་དང་། ཁྱོད་རྣམས་ཀྱི་བུ་ཕྲུག་རྣམས་དྭ་ཕྲུག་ཏུ་གཏོང་བར་འགྱུར་རོ། །   
\p
\v 25 ཁྱོད་རྣམས་ཀྱིས་བདག་གི་འབངས་མི་ལས་ཁྱོད་ཅག་དང་མཉམ་དུ་ཡོད་པའི་དབུལ་པོ་རྣམས་ཀྱི་གཅིག་ལ་དངུལ་བསྐྱིས་ན། དེ་ལ་བུན་བདག་གི་ལུགས་བཞིན་མ་བྱེད། དངུལ་བུན་ལེན་མི་རུང་།  
\v 26 ཁྱིམ་མཚེས་ཀྱི་གོས་གཏའ་མར་བླངས་ན། ཉི་མ་མ་ནུབ་སྔོན་དུ་དེ་ལ་ཕྱིར་སྤྲོད་དགོས།  
\v 27 རྒྱུ་མཚན་ནི་དེ་ལ་གོས་ཁེབས་དང་ལུས་ལ་གྱོན་པ་དེ་ཁོ་ན་ལས་མེད་པས། ཁོས་ཅི་གོན་ནས་གཉིད་ལོག་པར་བྱེད་དམ། ཡང་མི་དེས་ང་ལ་ཞུ་བ་ཕུལ་ན། བདག་ནི་སྙིེང་རྗེ་ཅན་ཡིན་པས་དེ་ལ་མཉན་པར་འགྱུར་རོ། །   
\p
\v 28 དཀོན་མཆོག་ལ་སྐུར་བ་མི་འདེབས་པ་དང་རང་གི་ཡུལ་མིའི་དཔོན་པོ་ལའང་སྐུར་བ་མི་འདེབས་པར་བྱའོ། །   
\p
\v 29 ཁྱོད་རྣམས་ཀྱིས་རང་གི་ཞིང་ནང་གི་འབྲུ་རིགས་དང་འཚིར་གཞོང་ནང་གི་བཅུད་ཁུ་དེ་བདག་ལ་མཆོད་པར་འབུལ་དགོས་པ་དང་། དེ་ལ་འགོར་འགྱངས་བྱེད་མི་རུང་། ཁྱོད་ཅག་གིས་བུ་རྣམས་ཀྱི་སྐྱེས་འགོ་ཡང་ང་ལ་འབུལ་དགོས།  
\v 30 དེ་ལྟར་རང་གི་བ་གླང་དང་ར་ལུག་གི་ཕྱུགས་ཕྲུག་འགོ་མའང་བདག་ལ་འབུལ་དགོས། ཉིན་བདུན་ལ་ཨ་མ་དང་མཉམ་པོར་འདུག་ཏུ་ཆུག་ལ་ཉིན་བརྒྱད་པར་ང་ལ་འབུལ་བར་བྱའོ། །   
\p
\v 31 ཁྱོད་རྣམས་ནི་ངའི་ཕྱིར་མི་དམ་པ་རྣམས་ཡིན་དགོས་པས་ན། ཐང་དུ་གཅན་གཟན་གྱིས་ཐེར་ཚལ་དུ་དྲལ་བའི་ཤ་དེ་ཁྱོད་ཅག་གིས་མི་བཟའ་བར་ཁྱི་རྣམས་ཀྱི་མདུན་ལ་གཡུགས་ཤིག་ཅེས་གསུངས་སོ། །   
\c 23
\cl ལེའུ་ཉེར་གསུམ་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 བདེན་ལུགས་བརྩི་བ་དང་སྙིང་རྗེ་བསྐྱེད་དགོས་པའི་ཁྲིམས་སྲོལ།  
\p
\v 1 ཡང་འདི་སྐད་དུ། ཁྱོད་རྣམས་ཀྱིས་རྫུན་གཏམ་བསྒྲག་པར་མི་བྱའོ། །མི་ངན་དང་ཁ་མཐུན་ཏེ་རྫུན་གྱི་བདེན་དཔང་མ་བྱེད་ཅིག  
\v 2 ཁྱོད་ཅག་གིས་མི་ཚོགས་ལ་བསྟུན་ནས་ལས་ངན་པ་བྱེད་མི་རུང་། རྩོད་གཞིའི་ཐད་ནས་མང་ཕྱོགས་སུ་འཐེན་ཞིང་ཁྲིམས་ལོག་པར་བྱ་བའི་ཕྱིར་རྫུན་དཔང་མ་བྱེད།  
\v 3 དབུལ་པོ་ཞིག་ལ་ཁྲིམས་གཅོད་སྐབས་སུ་དེ་ལ་ཕྱོགས་རིས་བྱེད་མི་རུང་།  
\v 4 ཁྱོད་རྣམས་ནི་དགྲ་ཟླའི་བ་གླང་ངམ་བོང་བུ་འཁྱར་བོ་དག་དང་ཕྲད་ན། དེ་ཅིས་ཀྱང་ཁྲིད་ཡོང་སྟེ་བདག་པོ་ལ་སྤྲོད་དགོས།  
\v 5 ཁྱོད་ཅག་ལ་སྡང་བའི་མི་ཞིག་གི་བོང་བུ་དོས་ཀྱིས་མནན་པ་མཐོང་ན། ཁྱོད་རྣམས་ཀྱིས་དེ་མི་བསྐྱུར་བར་ཅིས་ཀྱང་དེའི་བདག་པོ་དང་མཉམ་དུ་དོས་འབོགས་དགོས།  
\v 6 ཁྱོད་ཅག་གིས་དབུལ་པོའི་གཏུག་བཤེར་གྱི་ཐད་ནས་དྲང་གཞག་འདོར་མི་རུང་།  
\v 7 རྫུན་གྱི་དོན་དང་རིང་དུ་གྱེས་ཤིག ཉེས་མེད་གཞུང་དྲང་ཡིན་པའི་མི་ནི་གསོད་མི་རུང་། ཅིའི་ཕྱིར་ཞེ་ན། ངས་མི་ཉེས་ཅན་ཞིག་གཞུང་དྲང་དུ་རྩི་བར་མི་འགྱུར་བའི་ཕྱིར་རོ། །  
\v 8 གསུག་ནོར་གྱིས་མི་བློ་གྲོས་ཅན་གྱི་མིག་ལོང་བར་བྱེད་ཅིང་། མི་དྲང་པོ་རྣམས་ཀྱི་གཏམ་ཡང་གོ་ལྡོག་པར་བྱེད་པས། ཁྱོད་རྣམས་ཀྱིས་གསུག་ནོར་གང་ཡང་མ་ལེན་ཞིག  
\v 9 བྱེས་པ་ལ་གཉའ་གནོན་མ་བྱེད་ཅིག ཁྱོད་ཅག་ཀྱང་ཨེ་ཅིབ་ཡུལ་ནས་བྱེས་པ་བྱས་མྱོང་བས། བྱེས་པའི་སྐྱིད་སྡུག་ཁྱོད་ཅག་གིས་ཤེས་པ་ཡིན་ཞེས་གསུངས་སོ། །   
\s1 ངལ་གསོ་བའི་དུས་ཀྱི་བཀའ་ཁྲིམས།  
\p
\v 10 ཡང་འདི་སྐད་དུ། ལོ་དྲུག་གི་རིང་ལ་ཁྱོད་རྣམས་ཀྱིས་ཞིང་འདེབས་པ་དང་དེའི་ལོ་ཏོག་བསྡུས་ཆོག  
\v 11 འོན་ཀྱང་ལོ་བདུན་པ་ལ་ཁྱོད་ཅག་གིས་ཞིང་མི་རྨོ་ལ་བསློག་པར་ཡང་མི་བྱའོ། །དེ་ནས་ཁྱོད་ཅག་གི་མི་རྣམས་ལས་དབུལ་པོ་དག་གིས་དེ་ལས་བཟའ་བ་དང་། ལྷག་མ་རྣམས་ས་སྟེང་གི་དུད་འགྲོ་རྣམས་ཀྱིས་ཟོས་ཆོག་པ་ཡིན། ཁྱོད་ཅག་གི་རྒུན་ཚལ་དང་སྐྱུ་རུ་རའི་སྐྱེད་ཚལ་རྣམས་ཀྱང་ལུགས་དེ་བཞིན་དུ་བྱེད་དགོས།  
\v 12 ཉིན་དྲུག་གི་རིང་ལ་ཁྱོད་ཀྱིས་ལས་ཀ་བྱས་ཏེ། ཉིན་བདུན་པར་ངལ་གསོ་དགོས། གང་ལ་ཟེར་ན། ཁྱོད་རྣམས་ཀྱི་བ་གླང་དང་བོང་བུས་ཀྱང་ངལ་གསོ་དགོས་པ་དང་། ཁྱོད་ཅག་གི་གཡོག་མོའི་བུ་དང་བྱེས་པ་ལ་སྟོབས་ཤུགས་གསར་པ་འཐོབ་པའི་ཕྱིར་རོ། །  
\v 13 ངས་ཁྱོད་རྣམས་ལ་ཅི་དང་ཅི་སྨྲས་པ་ཐམས་ཅད་གཟབ་གཟབ་ངང་སྲུངས་ཤིག གཞན་པའི་ལྷ་རྣམས་ཀྱི་མིང་མ་ཟློ་ཞིག སོ་སོའི་ཁ་ནས་ཐོས་ཀྱང་མི་རུང་ཞེས་གསུངས་སོ། །   
\s1 ལོ་རེའི་དུས་ཆེན་གསུམ་གྱི་སྐོར།  
\p
\v 14 ཡང་འདི་སྐད་དུ། ལོ་རེར་ཁྱོད་ཅག་གིས་ལན་གསུམ་དུ་བདག་ལ་དུས་ཆེན་བསྲུང་དགོས་ཏེ།  
\v 15 སྐྱུར་མེད་བག་ལེབ་ཀྱི་དུས་ཆེན་འདི་བསྲུང་དགོས། ངས་ཁྱོད་ཅག་ལ་བསྒོས་པ་བཞིན་དུ་ཨ་རྦིབ་ཟླ་བའི་ནང་དུས་བཅད་ལྟར་ཉིན་བདུན་གྱི་རིང་ལ་སྐྱུར་མེད་བག་ལེབ་བཟའ་དགོས་ཏེ། རྒྱུ་མཚན་ནི། ཁྱོད་ཅག་སྐབས་དེར་ཨེ་ཅིབ་ཡུལ་ནས་ཐོན་པས་སོ། །སུ་ཡིན་ཡང་ལག་སྟོང་ལ་ངའི་མདུན་དུ་ཡོང་མི་རུང་།  
\v 16 དེ་ནས་ཁྱོད་ཅག་གིས་ཞིང་ལ་བཏབ་པའི་ས་བོན་ལས་འབྲས་བུ་ཐོག་མ་བསྡུ་བའི་ཕྱིར་སྟོན་བསྡུ་དུས་ཆེན་གཏོང་དགོས་པ་དང་། ལོ་མཇུག་ལ་ཁྱོད་ཅག་གིས་འབྲུ་རིགས་བསྡུ་ཉར་བྱས་ནས་བསྡུ་ཉར་དུས་ཆེན་གཏོང་དགོས་ཤིང་།  
\v 17 ལོ་རེར་ལན་གསུམ་ལ་ཁྱོད་ཅག་གི་སྐྱེས་པ་ཐམས་ཅད་གཙོ་བོ་ཡ་ཝཱེའི་མདུན་དུ་བསླེབ་དགོས།  
\v 18 ཁྱོད་ཅག་གིས་བདག་ལ་ཕུལ་བའི་དམར་མཆོད་ཀྱི་ཁྲག་དེ་སྐྱུར་རྩི་ལྡན་པའི་བག་ལེབ་དང་མཉམ་དུ་འབུལ་མི་རུང་ལ། ངའི་དུས་ཆེན་ལ་ཕུལ་བའི་ཚིལ་ནི་ཕྱི་ཉིན་ཞོགས་པའི་བར་དུ་བསྐྱུར་མི་རུང་།  
\v 19 ཁྱོད་ཅག་གི་ས་ཞིང་ལས་སྨིན་པའི་འབྲས་བུ་ཐོག་མ་ནི་ཁྱོད་ཅག་གི་དཀོན་མཆོག་ཡ་ཝཱེའི་བཞུགས་གནས་སུ་འབུལ་དགོས། ཁྱོད་ཅག་གིས་རེའུ་ཞིག་དེའི་ཨ་མའི་འོ་མ་ནང་དུ་བཙོ་མི་རུང་ཞེས་གསུངས་སོ། །   
\s1 དཀོན་མཆོག་གི་ཕོ་ཉས་ཕེབས་ལམ་སྟ་གོན་བྱེད་པ།  
\p
\v 20 ཡང་འདི་སྐད་དུ། ལྟོས་དང་། ངས་ཁྱོད་ཅག་གི་སྔོན་དུ་ཕོ་ཉ་ཞིག་གཏོང་བར་བྱ་སྟེ། དེས་ལམ་བར་ནས་ཁྱོད་ཅག་བསྲུང་ཞིང་། ངས་སྟ་གོན་བྱས་པའི་གནས་སུ་འཁྲིད་པར་འགྱུར།  
\v 21 ཁྱོད་ཅག་གིས་དེའི་དྲུང་དུ་གཟབ་གཟབ་གྱིས་ཤིག ཁོའི་བཀའ་ལ་ཉོན་ཅིག ཁོ་ལ་རྒྱབ་འགལ་མ་བྱེད་ཅིག ཅི་ཡིན་ཞེ་ན། བདག་གི་མིང་ཁོའི་ནང་དུ་ཡོད་པས། ཁོས་ཁྱོད་རྣམས་ཀྱི་ཉེས་པ་ལ་གུ་ཡངས་གཏོང་བར་མི་འགྱུར་བའི་ཕྱིར་རོ། །  
\v 22 ཁྱོད་ཅག་གིས་དངོས་གནས་དེའི་བཀའ་ལ་མཉན་པ་དང་། བདག་གིས་ཇི་སྨྲས་པ་བཞིན་དུ་བྱེད་ན། བདག་གིས་ཁྱོད་ཅག་གི་དགྲ་རྣམས་དགྲ་རུ་འཛིན་ཞིང་། ཁྱོད་ཅག་ལ་རྒོལ་མཁན་རྣམས་ལ་རྒོལ་བར་བྱ།  
\v 23 བདག་གི་ཕོ་ཉ་དེ་ཁྱོད་ཅག་གི་མདུན་དུ་བྱོན་ཏེ། ཁྱོད་ཅག་ཨེ་མོར་པ་དང་། ཧེད་པ་དང་། ཕེ་རེ་ཟི་པ་དང་། ཀ་ན་ཨན་པ་དང་། ཧེ་བི་པ་དང་། ཡེ་བུ་སི་པ་རྣམས་ཀྱི་ཡུལ་དུ་འཁྲིད་པ་དང་། བདག་གིས་མི་རིགས་དེ་རྣམས་རྩ་མེད་གཏོང་བར་འགྱུར།  
\v 24 ཁྱོད་ཅག་གིས་དེ་དག་གི་སྐུ་བརྙན་རྣམས་ལ་ཕྱག་མ་འཚལ་ཞིག དེ་རྣམས་ལ་བསྙེན་བཀུར་ཡང་མ་བྱེད་ཅིག དེ་དག་གི་བྱེད་ལུགས་བཞིན་དུ་ཡང་མ་སྤྱོད་ཅིག ཁྱོད་ཅག་གིས་དེ་དག་རྡུལ་དུ་བརླག་པ་དང་། དེ་དག་གི་རྡོ་སྐུ་རྣམས་ཀྱང་རྩ་མེད་དུ་གཏོང་བར་གྱིས།  
\v 25 ཡང་ཁྱོད་ཅག་གིས་ཁྱོད་རྣམས་ཀྱི་དཀོན་མཆོག་ཡ་ཝཱེ་ལ་བསྙེན་བཀུར་བྱེད་དགོས་ཤིང་། ཁོང་གིས་ཁྱོད་ཅག་གི་ཁ་ཟས་དང་ཆུ་ལ་བྱིན་རླབས་མཛད་པར་འགྱུར་ཞིང་། ཁྱོད་ཅག་གི་ཁྲོད་ནས་ནད་རིགས་ཀྱང་མེད་པར་བྱེད་ངེས་ཡིན།  
\v 26 མངལ་ནས་བྱིས་པ་ཤོར་བའམ་མོ་གཤམ་ནི་ཁྱོད་ཅག་གི་ཡུལ་དུ་ཡོད་མི་སྲིད། བདག་གིས་ཁྱོད་ཅག་གི་ཚེ་ཚད་ལོང་བར་བྱའོ། །  
\v 27 ཁྱོད་རང་ཡུལ་གང་དུ་སླེབས་ནའང་། བདག་གིས་ཁྱོད་ཅག་གི་མདུན་ནས་ང་ཡི་རྔམ་བརྗིད་སྟོན་ཞིང་ཡུལ་དེའི་མི་ཐམས་ཅད་འཁྲུག་ཏུ་འཇུག་པ་དང་། ཡང་ཁྱོད་ཅག་གི་དགྲ་བོ་ཐམས་ཅད་ཀྱིས་ཁྱོད་ཅག་ལ་རང་རང་གི་རྒྱབ་སྟོན་པར་འགྱུར།  
\v 28 ཡང་ངས་ཁྱོད་ཅག་གི་སྔུན་ལ་དུག་སྦྲང་མང་པོ་བཏང་ནས། དེ་དག་གིས་ཧེ་བི་པ་དང་ཀ་ན་ཨན་པ་དང་ཧེད་པ་རྣམས་སྐྲོད་པར་བྱའོ། །  
\v 29 ཡུལ་ནི་ས་སྟོང་དུ་ལུས་ཤིང་། ཁྱོད་ཅག་ལ་གནོད་པའི་ས་སྟེང་གི་གཅན་གཟན་རྣམས་འཕེལ་ཉེན་ཡོད་པས། ངས་མི་དེ་དག་ལོ་གཅིག་གི་རིང་ལ་སྐྲོད་པར་མི་བྱ།  
\v 30 བདག་གིས་ཁྱོད་ཅག་གི་མི་གྲངས་འཕེལ་ནས་ཡུལ་དེ་བདག་གིར་བཟུང་བའི་བར་དུ་ཁོ་རྣམས་རིམ་བཞིན་སྐྲོད་པར་བྱའོ། །  
\v 31 ངས་ཁྱོད་ཅག་གི་མཐའ་རྣམས་སུ་རྒྱ་མཚོ་དམར་པོ་ནས་ཕེ་ལེ་ཤེད་པའི་རྒྱ་མཚོའི་བར་དང་། དབེན་སྟོང་ནས་ཕི་རཱད་ཆུ་བོའི་བར་དུ་མཚམས་ཤིག་ཕྱེ་བར་བྱ། བདག་གིས་ཡུལ་དེའི་མི་རྣམས་ཁྱོད་ཅག་གི་ལག་ཏུ་སྤྲོད་ཅིང་། ཁྱོད་ཅག་གིས་དེ་དག་རང་གི་མདུན་ནས་སྐྲོད་པར་འགྱུར།  
\v 32 ཁྱོད་ཅག་གིས་དེ་དག་དང་དེ་དག་གི་ལྷ་རྣམས་ཀྱི་བར་ཁ་ཆད་མ་འཇོག་ཅིག  
\v 33 དེ་དག་གིས་ཁྱོད་རྣམས་ལ་ང་དང་འགལ་བའི་སྡིག་པ་བྱེད་དུ་འཇུག་ཉེན་ཡོད་པས། དེ་དག་ཁྱོད་ཅག་གི་ཡུལ་དུ་གནས་པར་མི་འོས་སོ། །གལ་ཏེ་ཁྱོད་ཅག་གིས་དེ་དག་གི་ལྷ་རྣམས་ལ་བསྙེན་བཀུར་བྱེད་ན། དེ་ནི་ཅིས་ཀྱང་ཁྱོད་ཅག་གཟུང་བའི་རྙི་ཞིག་ཏུ་འགྱུར་ངེས་ཡིན་ཞེས་གསུངས་སོ། །   
\c 24
\cl ལེའུ་ཉེར་བཞི་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 དཀོན་མཆོག་གིས་ཞལ་ཆད་ངེས་གཏན་མཛད་པ།  
\p
\v 1 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་དང་ཨ་རོན་དང་ནཱ་དབ་དང་ཨ་བི་ཧུ་དང་ཡེས་ར་ཨེལ་གྱི་རྒན་པོ་བདུན་ཅུ་དཀོན་མཆོག་ཡ་ཝཱེའི་མདུན་དུ་ཡར་ཤོག་དང་། རྒྱང་རིང་ནས་གུས་ཕྱག་ཕུལ་ཞིག  
\v 2 འོན་ཀྱང་མོ་ཤེ་གཅིག་པུ་དཀོན་མཆོག་ཡ་ཝཱེའི་ཉེ་སར་བཅར་ཆོག་ཅིང་། གཞན་དག་ཉེ་སར་ཡོང་མི་རུང་ལ། མི་རྣམས་ཀྱང་མོ་ཤེ་དང་མཉམ་དུ་ཡར་འོང་མི་རུང་ཞེས་གསུངས་སོ། །   
\p
\v 3 མོ་ཤེ་ཡོང་ནས་དཀོན་མཆོག་ཡ་ཝཱེའི་བཀའ་དང་ཁྲིམས་སྲོལ་ཐམས་ཅད་མི་རྣམས་ལ་སྨྲས་པ་དང་། དེའི་ལན་དུ་མི་ཐམས་ཅད་ཁ་མཐུན་ཏེ་ན་རེ། དཀོན་མཆོག་ཡ་ཝཱེས་བཀའ་ཅི་བསྒོས་པ་བཞིན་དུ་ངེད་ཅག་གིས་བསྒྲུབ་པར་བྱ་ཞེས་སྨྲས།  
\v 4 དེ་ནས་མོ་ཤེ་ཡིས་དཀོན་མཆོག་ཡ་ཝཱེའི་བཀའ་ཐམས་ཅད་ཡི་གེར་བཀོད་ཅིང་། ཐོ་རངས་ཡར་ལངས་ཏེ་རི་འདབས་སུ་མཆོད་ཁྲི་ཞིག་བཞེངས་པ་དང་། ཡང་ཡེས་ར་ཨེལ་གྱི་ཚོ་པ་བཅུ་གཉིས་བཞིན་དུ་ཀ་བ་བཅུ་གཉིས་བསྒྲེངས་སོ། །  
\v 5 ཡང་ཁོས་ཡེས་ར་ཨེལ་པའི་ཁྲོད་ཀྱི་གཞོན་ནུ་རྣམས་བཏང་བ་དང་། དེ་དག་གིས་སྦྱིན་སྲེག་རྣམས་ཕུལ་ཞིང་། གླང་ཐུག་རྣམས་བསད་ནས་ཞི་བདེའི་མཆོད་པ་རྣམས་དཀོན་མཆོག་ཡ་ཝཱེ་ལ་ཕུལ།  
\v 6 མོ་ཤེ་ཡིས་ཁྲག་གི་ཕྱེད་ཀ་གཞོང་པའི་ནང་དུ་བླུགས་ཤིང་། ཕྱེད་ཀ་མཆོད་ཁྲི་ལ་གཏོར་བའོ། །  
\v 7 ཡང་ཞལ་ཆད་ཀྱི་གླེགས་བམ་བླངས་ནས་མི་རྣམས་ཀྱི་མདུན་ནས་བཀླགས་པ་དང་། ཁོ་རྣམས་ན་རེ། དཀོན་མཆོག་ཡ་ཝཱེས་བཀའ་ཅི་བསྒོས་པ་བཞིན་དུ་ངེད་ཅག་གིས་བྱེད་པ་དང་། བཀའ་ལ་མཉན་པར་བྱའོ་ཞེས་སྨྲས།  
\v 8 དེ་ནས་མོ་ཤེ་ཡིས་ཁྲག་དེ་བླངས་ནས་མི་རྣམས་ལ་གཏོར་ཅིང་འདི་ལྟར། ལྟོས་དང་། འདི་ནི་ཞལ་ཆད་ཀྱི་ཁྲག་ཡིན་ཏེ། དཀོན་མཆོག་ཡ་ཝཱེས་བཀའ་འདི་ཐམས་ཅད་བཞིན་ཁྱོད་རྣམས་ལ་མཛད་ཟིན་པའི་ཞལ་ཆད་ཀྱི་གཞི་འཛིན་ས་ཡིན་ཞེས་སྨྲས་སོ། །   
\p
\v 9 དེ་ནས་མོ་ཤེ་དང་ཨ་རོན་དང་ནཱ་དབ་དང་ཨ་བི་ཧུ། དེ་མིན་ཡེས་ར་ཨེལ་གྱི་རྒན་པོ་བདུན་ཅུ་དང་བཅས་པ་ཡར་རི་ལ་འགོས་པ་དང་།  
\v 10 ཁོ་རྣམས་ཀྱིས་ཡེས་ར་ཨེལ་གྱི་དཀོན་མཆོག་མཇལ་ཞིང་། ཁོང་གི་ཞབས་འོག་ཏུ་ཨིནྡྲ་ནཱི་ལའི་རྡོ་གཅལ་ཞིག་བཏིངས་ཡོད་པ་དང་མཚུངས་ལ། དེ་ནི་དགུང་ཨ་སྔོན་བཞིན་གསལ་ཞིང་དྭངས་པ་ཞིག་ཡིན་འདུག  
\v 11 འོན་ཀྱང་ཁོང་གི་ཕྱག་གིས་ཡེས་ར་ཨེལ་པ་རྣམས་ཀྱི་འགོ་དཔོན་རྣམས་ལ་གནོད་མ་བསྐྱལ་ཞིང་། དེ་དག་གིས་དཀོན་མཆོག་མཇལ་བ་དང་བཟའ་བཏུང་སྤྱད་དོ། །   
\p
\v 12 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་མི་རྣམས་ལ་ཁྲིད་སྟོན་བྱེད་པའི་ཆེད་དུ། བདག་གིས་རྡོ་ལེབ་རྣམས་ལ་བྲིས་པའི་བཀའ་ཁྲིམས་དང་བཀའ་ཁྱོད་ལ་གནང་ངེས་ཡིན་པས། ཁྱོད་རང་རི་མགོར་ངའི་དྲུང་དུ་ཤོག་ལ་འདི་གར་སྡོད་ཅིག་ཅེས་གསུངས་པ་ལ།  
\v 13 མོ་ཤེ་དང་ཁོའི་ཞབས་ཕྱི་ཡོ་ཤུ་ཨ་གཉིས་ཆས་ཏེ་དཀོན་མཆོག་གི་རི་ལ་འགོས།  
\v 14 མོ་ཤེ་ཡིས་རྒན་པོ་རྣམས་ལ་འདི་ལྟར། ངེད་གཉིས་ཕྱིར་ལོག་པའི་བར་དུ་ཁྱོད་ཅག་གིས་འདི་རུ་སྒུག་སྡོད་དང་། ཨ་རོན་དང་ཧུ་རཱ་གཉིས་ཁྱོད་ཅག་དང་མཉམ་དུ་ཡོད་པས། སུ་ལ་གྱོད་གཞི་ཡོད་ན། དེ་གཉིས་ཀྱི་གམ་དུ་འགྲོ་དགོས་ཞེས་བཀའ་གནང་།  
\v 15 མོ་ཤེ་རི་ལ་འགོ་སྐབས་རི་ནི་སྤྲིན་གྱིས་གཡོགས་ནས་འདུག  
\v 16 དེ་ནས་སི་ནཱ་རི་བོ་ལ་དཀོན་མཆོག་ཡ་ཝཱེའི་གཟི་བརྗིད་བཞུགས་པ་དང་། ཉིན་དྲུག་གི་རིང་ལ་སྤྲིན་གྱིས་རི་བོ་གཡོགས་ཤིང་། ཉིན་བདུན་པར་ཁོང་གིས་སྤྲིན་གྱི་དཀྱིལ་ནས་མོ་ཤེ་ལ་ཞལ་འབོད་གནང་།  
\v 17 ཡེས་ར་ཨེལ་པ་རྣམས་ཀྱི་མིག་ལམ་དུ་དཀོན་མཆོག་ཡ་ཝཱེའི་གཟི་བརྗིད་མངོན་པ་ནི་ཡོངས་རྫོགས་རྩ་མེད་གཏོང་བའི་མེ་ལྟར་དུ་རི་རྩེར་ཡོད་དོ། །  
\v 18 དེ་ནས་མོ་ཤེ་སྤྲིན་གྱི་དཀྱིལ་དུ་ཞུགས་པ་དང་། རི་ལ་འགོས་ནས་ཉིན་ཞག་བཞི་བཅུའི་རིང་དེར་གནས་སོ། །   
\c 25
\cl ལེའུ་ཉེར་ལྔ་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 ཆེད་དུ་འབུལ་བ་བསྡུ་བ།  
\p
\v 1 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 2 ཁྱོད་ཀྱིས་ཡེས་ར་ཨེལ་པ་རྣམས་ལ། བདག་ལ་འབུལ་བ་འབུལ་དགོས་པར་སྨྲོས་ཤིག སེམས་ནས་འབུལ་བ་འབུལ་བར་དགའ་བ་རྣམས་ལས་བདག་ལ་འབུལ་བ་བསྡུ་དགོས།  
\v 3 དེ་རྣམས་ལས་བསྡུ་དགོས་པའི་འབུལ་བ་རྣམས་ནི་འདི་ལྟ་སྟེ། གསེར་དང་དངུལ་དང་ལི་དང་།  
\v 4 བལ་སྐུད་མཐིང་ག་དང་རྒྱ་སྨུག་དང་མཚལ་དམར་གྱི་མདོག་ཅན་དང་། སོ་རས་སྲབ་བུ་དང་། ར་མའི་ཁུལ་རྩིད་དང་།  
\v 5 ལུག་ཐུག་གི་པགས་པ་རྒྱ་ཚོས་བརྒྱབ་པ་དང་ཀོ་བ་སྤུས་ལེགས་དང་སེང་ལྡེང་ཤིང་དང་།  
\v 6 སྒྲོན་མེའི་ཕྱིར་འཚིར་སྣུམ་དང་། འབྱུག་སྣུམ་དང་དྲི་ཞིམ་བདུག་སྤོས་ཀྱི་ཕྱིར་བསུང་རྫས་རྣམས་དང་།  
\v 7 གཟི་དང་རིན་པོ་ཆེ་གཞན་དག་དགོས་པ་སྟེ། མཆོད་དཔོན་གྱི་བེར་ཐུལ་དང་བྲང་རྒྱན་ལ་ཕྲ་རྒྱག་དགོས་པའི་ཕྱིར་རོ། །  
\v 8 ཡང་ང་རང་ནི་དེ་དག་གི་དཀྱིལ་དུ་གནས་པའི་ཕྱིར་ཁོ་རྣམས་ཀྱིས་ང་ལ་གནས་མཆོག་ཅིག་བཟོ་དགོས།  
\v 9 ངས་ཁྱོད་ལ་སྟོན་པར་འགྱུར་བའི་གུར་མཆོག་གི་དཔེ་དང་། དེའི་ནང་ལ་ཡོད་པའི་ཡོ་བྱད་ཐམས་ཅད་ཀྱི་དཔེ་བཞིན་དུ་བཟོ་དགོས་ཞེས་གསུངས་སོ། །   
\s1 ཤུར་སྒམ་བཟོ་བའི་སྐོར།  
\p
\v 10 ཡང་འདི་སྐད་དུ། ཁོ་རྣམས་ཀྱིས་སེང་ལྡེང་ཤིང་གིས་ཤུར་སྒམ་ཞིག་བཟོ་དགོས། དེའི་རིང་ཚད་ལ་ཁྲུ་གཉིས་དང་ཕྱེད། ཞེང་ཚད་ལ་ཁྲུ་གཅིག་དང་ཕྱེད། མཐོ་ཚད་ལ་ཁྲུ་གཅིག་དང་ཕྱེད་ཀའོ། །  
\v 11 དེའི་ཕྱི་ནང་གཉིས་གསེར་བཙོ་མས་གཡོགས་ཤིག དེའི་མཐའ་འཁོར་ལ་གསེར་གྱི་མུ་ཁྱུད་ཅིག་བཟོ་དགོས།  
\v 12 ཡང་གསེར་གྱི་ཨ་ལོང་བཞི་བླུགས་ནས་དེའི་སུག་པ་བཞི་ལ་སྦྱོར་དགོས་ཤིང་། ཨ་ལོང་གཉིས་ལོགས་གཅིག་དང་ཨ་ལོང་གཉིས་ལོགས་ཅིག་ཤོས་ལ་སྦྱོར་ཅིག  
\v 13 ཡང་སེང་ལྡེང་ཤིང་གིས་རྒྱུག་པ་གཉིས་བཟོས་ནས་དེ་གསེར་གྱིས་གཡོགས་ཤིག  
\v 14 ཤུར་སྒམ་དེ་འཁུར་བའི་ཕྱིར་རྒྱུག་པ་གཉིས་ཤུར་སྒམ་གྱི་ལོགས་གཉིས་ཀའི་ཨ་ལོང་རྣམས་ལ་རྒྱུས་ཤིག  
\v 15 རྒྱུག་པ་དེ་གཉིས་ཤུར་སྒམ་གྱི་ཨ་ལོང་ནང་དུ་ཡོད་དགོས་ཤིང་དེ་ལས་འདོན་མི་རུང་།  
\v 16 ཡང་ངས་ཁྱོད་རང་ལ་གནང་རྒྱུ་ཡིན་པའི་དཔང་པོའི་རྡོ་ལེབ་གཉིས་པོ་ཤུར་སྒམ་གྱི་ནང་དུ་འཇུག་དགོས་སོ། །   
\p
\v 17 ཁྱོད་ཀྱིས་གསེར་བཙོ་མས་ཐུགས་རྗེའི་བཞུགས་ཁྲི་ཞིག་བཟོ་དགོས། དེའི་རིང་ཚད་ནི་ཁྲུ་གཉིས་དང་ཕྱེད། ཞེང་ཚད་ལ་ཁྲུ་གཅིག་དང་ཕྱེད་ཡིན།  
\v 18 ཁྱོད་ཀྱིས་ཐུགས་རྗེའི་བཞུགས་ཁྲི་ཡི་སྣེ་མོ་གཉིས་ལ་གསེར་གྱིས་འབུར་རྡུང་བྱས་པའི་ཀེ་རུབ་ཀྱི་གཟུགས་བརྙན་གཉིས་བཟོས་ཤིག  
\v 19 ཀེ་རུབ་གཅིག་སྣེ་མོ་གཅིག་དང་། ཀེ་རུབ་ཅིག་ཤོས་སྣེ་མོ་གཞན་དེ་ལ་བཟོས་ནས། ཀེ་རུབ་གཉིས་ནི་ཐུགས་རྗེའི་བཞུགས་ཁྲི་ཡི་སྣེ་མོ་གཉིས་ལ་དངོས་པོ་གཅིག་ཏུ་སྦྲེལ་བཟོ་བྱེད་དགོས།  
\v 20 ཀེ་རུབ་གཉིས་ཀྱིས་རང་གི་གཤོག་པ་གྱེན་དུ་རྐྱོང་ཞིང་ཐུགས་རྗེའི་བཞུགས་ཁྲི་གཡོགས་པ་དང་། ཀེ་རུབ་གཉིས་ཕན་ཚུན་ལ་གདོང་གཏོད་དགོས་པ་དང་། ཡང་དེ་གཉིས་ཀྱི་ཞལ་ངོ་ནི་བཞུགས་ཁྲི་ལ་འཁོར་དགོས།  
\v 21 ཁྱོད་ཀྱིས་ཐུགས་རྗེའི་བཞུགས་ཁྲི་དེ་ཤུར་སྒམ་གྱི་སྟེང་ལ་བཞག་ནས། ཤུར་སྒམ་གྱི་ནང་དུ་ངས་ཁྱོད་ལ་གནང་བར་འགྱུར་བའི་དཔང་པོའི་རྡོ་ལེབ་གཉིས་པོ་འཇུག་པར་བྱའོ། །  
\v 22 གནས་དེ་རུ་ང་རང་ཁྱོད་དང་འཕྲད་པར་འགྱུར་བ་དང་། ཐུགས་རྗེའི་བཞུགས་ཁྲིའི་གོང་ཕྱོགས་དང་། དཔང་མཛད་ཤུར་སྒམ་གྱི་སྟེང་ལ་ཡོད་པའི་ཀེ་རུབ་གཉིས་ཀྱི་དཀྱིལ་ཕྱོགས་ཀྱི་བར་ས་དེ་ནས། བདག་གིས་ཁྱོད་ལ་ཡེས་ར་ཨེལ་པ་རྣམས་ལ་སྒྲོག་པའི་བཀའ་ཐམས་ཅད་སྨྲ་བར་འགྱུར་ཞེས་གསུངས་སོ། །   
\s1 སྤྱན་བསྟར་བག་ལེབ་ཀྱི་སྒྲོག་ཙེའི་སྐོར།  
\p
\v 23 ཡང་འདི་སྐད་དུ། ཁྱོད་ཀྱིས་སེང་ལྡེང་ཤིང་གིས་སྒྲོག་ཙེ་ཞིག་བཟོ་དགོས། དེའི་རིང་ཚད་ནི་ཁྲུ་གཉིས་དང་། ཞེང་ཚད་ལ་ཁྲུ་གཅིག མཐོ་ཚད་ཁྲུ་གཅིག་དང་ཕྱེད་ཀའོ། །  
\v 24 དེ་གསེར་བཙོ་མས་གཡོགས་པ་དང་། དེའི་མཐའ་འཁོར་ལ་གསེར་གྱི་མུ་ཁྱུད་ཅིག་བཟོས་ཤིག  
\v 25 མུ་ཁྱུད་དེའི་འགབ་ཏུ་ཡང་མཐོ་ཚད་ལ་སོར་བཞི་ཅན་གྱི་མཐའ་རྒྱན་ཞིག་བྱོས་དང་། དེའི་སྟེང་དུ་ཡང་གསེར་གྱི་མུ་ཁྱུད་ཅིག་སྦྱོར་ཅིག  
\v 26 ཡང་དེ་ལ་གསེར་གྱི་ཨ་ལོང་བཞི་བཟོས་ཏེ། དེའི་གྲུ་བཞིའི་སུག་པ་བཞི་ལ་སྦྱོར་ཅིག  
\v 27 ཨ་ལོང་དེ་དག་མཐའ་རྒྱན་གྱི་འཁྲིས་སུ་སྦྱར་ཏེ་སྒྲོག་ཙེ་འཁུར་བའི་ཕྱིར་དེ་དག་ནི་རྒྱུག་པ་རྣམས་ཀྱི་བསྐོན་ས་ཡིན།  
\v 28 སྒྲོག་ཙེ་འཁུར་བའི་ཕྱིར་རྒྱུག་པ་དེ་རྣམས་སེང་ལྡེང་ཤིང་གིས་བཟོས་ཏེ་གསེར་གྱིས་གཡོགས་ཤིག  
\v 29 སྒྲོག་ཙེ་སྟེང་གི་གཞོང་པ་དང་སྡེར་མ་རྣམས་དང་། བུམ་པ་དང་། སྐྱེམས་མཆོད་འབུལ་བྱེད་ཨུ་ལུ་བཅས་བཟོ་དགོས་ཤིང་། དེ་དག་གསེར་བཙོ་མས་བཟོ་དགོས།  
\v 30 ཡང་སྒྲོག་ཙེ་དེའི་སྟེང་ལ་ཁྱོད་ཀྱིས་དུས་གཏན་དུ་ངའི་དྲུང་དུ་སྤྱན་བསྟར་བག་ལེབ་འཇོག་དགོས་ཞེས་གསུངས་སོ། །   
\s1 སྒྲོན་སྟེགས་ཀྱི་སྐོར།  
\p
\v 31 ཡང་འདི་སྐད་དུ། ཁྱོད་ཀྱིས་སྒྲོན་སྟེགས་ཤིག་གསེར་བཙོ་མས་བཟོ་དགོས་ཏེ། སྒྲོན་སྟེགས་དེ་ནི་འབུར་རྡུང་གིས་བཟོ་དགོས་ཤིང་། དེའི་ཞབས་ར་དང་སྟེགས་རྐང་། སྒྲོན་ཕོར། གང་བུའི་གཟུགས། མེ་ཏོག་གི་དབྱིབས་ཚུགས་བཅས་སྒྲོན་སྟེགས་དང་སྦྲེལ་བཟོ་བྱེད་དགོས།  
\v 32 སྒྲོན་སྟེགས་ཀྱི་ལོགས་གཉིས་ནས་གེལ་པ་དྲུག་འཐོན་པར་བྱེད་དགོས་ཏེ། སྒྲོན་སྟེགས་ཀྱི་ལོགས་གཅིག་ནས་གེལ་པ་གསུམ་དང་ལོགས་ཅིག་ཤོས་སུ་གེལ་པ་གསུམ་འཐོན་དགོས།  
\v 33 ལོགས་གཉིས་ཀའི་གེལ་པ་རེ་ལ་སྟར་སྡོང་གི་མེ་ཏོག་ལྟར་བྱས་པའི་སྒྲོན་ཕོར་གསུམ་རེ་ཡོད་པ་དང་། སྒྲོན་ཕོར་རེ་རེའི་སྟེགས་རྐང་དུ་གང་བུའི་གཟུགས་ཤིག་དང་། མེ་ཏོག་གཟུགས་ཤིག་བཅས་ཡོད་དགོས། སྒྲོན་སྟེགས་ཀྱི་སྤྱི་སྡོམ་གེལ་པ་དྲུག་པོ་ཕན་ཚུན་ཆ་མཚུངས་པ་ཡིན་དགོས།  
\v 34 ཡང་སྒྲོན་སྟེགས་རྐང་པའི་སྟར་སྡོང་གི་མེ་ཏོག་ལྟར་བྱས་པའི་སྒྲོན་ཕོར་བཞི་ལ་གང་བུའི་གཟུགས་ཤིག་དང་མེ་ཏོག་གཟུགས་ཤིག་བཅས་ཡོད་དགོས་པ་དང་།  
\v 35 དེའི་གེལ་པ་ཟུང་གཅིག་གི་འོག་ཏུ་གང་བུའི་གཟུགས་ཤིག་དང་། ཡང་དེའི་གེལ་པ་གཞན་ཟུང་གི་འོག་ཏུའང་གང་བུའི་གཟུགས་ཤིག་དང་། ཡང་དེའི་གེལ་པ་གཞན་ཟུང་གི་འོག་ཏུའང་གང་བུའི་གཟུགས་ཤིག་སྟེ། དེ་ལྟར་སྒྲོན་སྟེགས་ལས་བྱུང་བའི་གེལ་པ་དྲུག་པོ་ལ་ཡོད་པར་བྱེད་དགོས་སོ། །  
\v 36 གང་བུའི་གཟུགས་རྣམས་དང་གེལ་པ་རྣམས་ནི་མུ་འབྲེལ་དུ་འབུར་རྡུང་བྱས་པའི་གསེར་བཙོ་མས་བཟོ་བར་བྱའོ། །  
\v 37 ཡང་དེ་ལ་སྒྲོན་མེ་བདུན་བཟོས་ཤིག དེ་རྣམས་ཀྱི་འོད་མདུན་ཕྱོགས་སུ་འཆར་བའི་ཕྱིར་སྒྲོན་སྟེགས་སྟེང་དུ་ཞོག་ཅིག  
\v 38 དེའི་སྡོང་རས་གཅོད་བྱེད་སྐམ་ཆུང་དང་ཀ་ཏོ་ར་རྣམས་གསེར་བཙོ་མས་བཟོ་དགོས།  
\v 39 སྒྲོན་སྟེགས་དང་དེའི་ཡོ་བྱད་ཐམས་ཅད་གསེར་བཙོ་མ་རྡོ་ཚད་\f + \ft འདིར་རྡོ་ཚད་ཅེས་པ་ནི་མ་ཕྱི་ལས་ཡ་ཧུ་དཱའི་སྐད་དོད་དེ་ཁེ་ཁཱར་ཞེས་མཐོང་། ཁེ་ཁཱར་ནི་གནའ་བོའི་ཡ་ཧུ་དཱ་མི་རིགས་ཀྱི་ལྗིད་ཚད་འཇལ་བྱེད་ཅིག་ཡིན་ལ། ཁེ་ཁཱར་གཅིག་ནི་སྤྱི་རྒྱ་སུམ་ཅུ་སོ་བཞི་ཙམ་ཡིན། \f*གཅིག་གིས་བཟོ་དགོས།  
\v 40 རི་མགོ་ནས་ཁྱོད་ལ་བསྟན་པའི་དཔེ་བཞིན་དུ་དེ་དག་བཟོ་བ་ལ་གཟབ་གཟབ་གྱིས་ཤིག་ཅེས་གསུངས་སོ། །   
\c 26
\cl ལེའུ་ཉེར་དྲུག་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 གུར་མཆོག་གི་སྐོར།  
\p
\v 1 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ཡོལ་བ་བཅུ་ཡིས་གུར་མཆོག་བཟོ་བར་བྱའོ། །དེའི་རྒྱུ་ནི་སོ་རས་སྲབ་བུ་བསྒྲིམས་པ་ཅན་དང་། བལ་སྐུད་མཐིང་ག་དང་། རྒྱ་སྨུག་དང་། མཚལ་དམར་གྱི་མདོག་ཅན་བཅས་ཡིན་ལ་འཐག་མཁན་ལག་རྩལ་ཅན་གྱི་ལས་བཞིན་དུ་ཀེ་རུབ་ཀྱི་གཟུགས་བརྙན་དང་ལྡན་པ་དེ་དག་བཟོ་དགོས།  
\v 2 ཡོལ་བ་རེ་རེའི་རིང་ཚད་ལ་ཁྲུ་ཉི་ཤུ་ཉེར་བརྒྱད་དང་། ཞེང་ཚད་ལ་ཁྲུ་བཞི་ཡོད་པར་བྱོས། ཡོལ་བ་ཐམས་ཅད་ཀྱི་ཚད་ནི་གཅིག་ཡིན་དགོས།  
\v 3 ཡོལ་བ་ལྔ་ནི་ཕན་ཚུན་འབྲེལ་བར་བྱོས་ལ། ཡོལ་བ་གཞན་ལྔ་པོ་དེ་ཡང་ཕན་ཚུན་འབྲེལ་བར་བྱེད་དགོས།  
\v 4 ཡང་མུ་གཅིག་ཏུ་འབྲེལ་བའི་ཡོལ་བ་སྔ་མ་དེའི་སྣེ་མོར་མཐིང་མདོག་གི་སྒྲོག་ལུང་རྣམས་བྱོས་ལ། མུ་གཅིག་ཏུ་འབྲེལ་བའི་ཡོལ་བ་ཕྱི་མ་དེའི་སྣེ་མོ་ལའང་དེ་བཞིན་བྱོས་ཤིག  
\v 5 མུ་གཅིག་ཏུ་འབྲེལ་བའི་ཡོལ་བ་སྔ་མར་སྒྲོག་ལུང་ལྔ་བཅུ་བཟོ་བ་དང་། མུ་གཅིག་ཏུ་འབྲེལ་བའི་ཡོལ་བ་ཕྱི་མར་ཡང་སྒྲོག་ལུང་ལྔ་བཅུ་བཟོ་དགོས་ཏེ། སྒྲོག་ལུང་རྣམས་ཆ་རེ་ཁ་སྤྲད་ནས་འཇོག་དགོས།  
\v 6 ཡང་གུར་མཆོག་མུ་གཅིག་ཏུ་བསྒྲིལ་བའི་ཕྱིར་གསེར་ཀྱུ་ལྔ་བཅུ་བཟོས་ནས། ཡོལ་བ་རྣམས་གསེར་ཀྱུས་སྦྲེལ་དགོས་སོ། །   
\p
\v 7 ཡང་ཁྱོད་ཀྱིས་གུར་མཆོག་གི་ཁེབས་རས་ཀྱི་ཕྱིར་ར་རྩིད་ཀྱི་ཡོལ་བ་བཅུ་གཅིག་བཟོ་དགོས།  
\v 8 ཡོལ་བ་རེ་རེའི་རིང་ཚད་ནི་ཁྲུ་སུམ་ཅུ་དང་། ཞེང་ཚད་ལ་ཁྲུ་བཞི་ཡོད་དགོས། ཡོལ་བ་བཅུ་གཅིག་པོའི་ཚད་གཅིག་ཡིན་དགོས།  
\v 9 ཡོལ་བ་ལྔ་ནི་གཅིག་ཏུ་སྦྲེལ་དགོས་ཤིང་། ཡོལ་བ་གཞན་དྲུག་པོ་ཡང་གཅིག་ཏུ་སྦྲེལ་བར་གྱིས། ཡོལ་བ་དྲུག་ཅན་དེ་གུར་གྱི་མདུན་ལོགས་སུ་ཉིས་ལྟེབ་བྱོས་ཤིག  
\v 10 ཡོལ་བ་སྦྲེལ་མ་ལྔ་ཅན་དེའི་སྣེ་མོར་སྒྲོག་ལུང་ལྔ་བཅུ་དང་། ཡོལ་བ་སྦྲེལ་མ་དྲུག་ཅན་དེའི་སྣེ་མོ་ལའང་སྒྲོག་ལུང་ལྔ་བཅུ་བཟོ་བར་བྱའོ། །  
\v 11 ཁྱོད་ཀྱིས་ལི་ཡི་ཀྱུ་ལྔ་བཅུ་བཟོས་ནས། སྒྲོག་ལུང་རྣམས་ལ་བསྐོན་ནས་ཁེབས་རས་ནི་མུ་གཅིག་འཁྱུད་གཅིག་ཡོང་བར་བྱེད་དགོས།  
\v 12 གུར་མཆོག་གི་ཡོལ་བ་རྣམས་ནས་ལུས་ཤིང་བསྣར་བའི་ཡོལ་བ་ཕྱེད་ཀ་དེ་གུར་མཆོག་གི་རྒྱབ་ལོགས་སུ་བསྣར་དགོས།  
\v 13 གུར་མཆོག་གི་ཡོལ་བ་རྣམས་ཀྱི་རིང་ཚད་ནས་ལུས་པའི་ཆ་དེ་ཁྲུ་གཅིག་ནི་གུར་མཆོག་དེའི་ཕྱོགས་གཅིག་དང་། ཁྲུ་ཅིག་ཤོས་ནི་གུར་མཆོག་གི་ལོགས་གཞན་ལ་བསྣར་ཏེ་འགེབ་དགོས་སོ། །   
\p
\v 14 རྒྱ་ཚོས་བརྒྱབ་པའི་ལུག་ཐུག་གི་པགས་པས་ཁེབས་རས་གཡོགས་ཤིག་དང་། དེའི་སྟེང་དུ་ཀོ་བ་སྤུས་ལེགས་རྣམས་ཀྱིས་ཡང་ཁེབས་ཤིག་བཟོ་བར་བྱའོ། །   
\p
\v 15 གུར་མཆོག་གི་ཕྱིར་སེང་ལྡེང་ཤིང་གིས་གྱེན་དུ་འགྲེང་བའི་པང་ལེབ་རྣམས་བཟོས་ཤིག  
\v 16 པང་ལེབ་རེའི་རིང་ཚད་ནི་ཁྲུ་བཅུ་དང་། ཞེང་ཚད་ནི་ཁྲུ་གཅིག་དང་ཕྱེད་ཀའོ། །  
\v 17 པང་ལེབ་གཅིག་དང་གཅིག་འབྲེལ་བའི་ཕྱིར་རེ་རེ་ལ་ཁོང་གཟེར་གཉིས་བྱོས་ཤིག་དང་། གུར་མཆོག་གི་པང་ལེབ་ཐམས་ཅད་དེ་ལྟར་བྱའོ། །  
\v 18 གུར་མཆོག་གི་ལྷོ་ཕྱོགས་སུ་པང་ལེབ་ཉི་ཤུ་དང་།  
\v 19 པང་ལེབ་ཉི་ཤུ་དེའི་ཞབས་ལ་དངུལ་གྱི་ཞབས་ར་བཞི་བཅུ་བཟོ་དགོས་ལ། པང་ལེབ་རེའི་ཁོང་གཟེར་གཉིས་ལ་ཞབས་ར་ཟུང་རེ་བྱོས་ཤིག  
\v 20 གུར་མཆོག་གི་ལོགས་གཞན་ཏེ། བྱང་ཕྱོགས་སུ་ཡང་པང་ལེབ་ཉི་ཤུ་དགོས་སོ། །  
\v 21 དེའི་དངུལ་གྱི་ཞབས་ར་བཞི་བཅུ་དང་། པང་ལེབ་རེའི་འོག་ལ་ཞབས་ར་ཟུང་རེ་བྱོས་ཤིག  
\v 22 གུར་མཆོག་གི་རྒྱབ་ལོགས་ཏེ་ནུབ་ཕྱོགས་སུ་པང་ལེབ་དྲུག་དང་།  
\v 23 གུར་མཆོག་རྒྱབ་ལོགས་ཀྱི་ཟུར་གཉིས་ལ་པང་ལེབ་གཉིས་བཟོ་བར་བྱའོ། །  
\v 24 དེ་གཉིས་ཀྱི་འགབ་ལ་པང་ལེབ་ཉིས་གཤིབ་དགོས་ཤིང་། དེའི་གོང་ལའང་པང་ལེབ་གཅིག་གི་སྣེ་ནས་པང་ལེབ་གཞན་ཞིག་གི་བར་དུ་ཨ་ལོང་གཅིག་གིས་སྦྲེལ་བར་བྱ་ཞིང་། དེ་བཞིན་དུ་པང་ལེབ་གཉིས་དེ་ལྟར་ཡོད་དགོས་ཤིང་ཟུར་གཉིས་ཡིན་པར་འགྱུར།  
\v 25 དེ་ལྟར་པང་ལེབ་བརྒྱད་དང་། དེ་དག་ལ་དངུལ་གྱི་ཞབས་ར་བཅུ་དྲུག་ཡོད་དགོས་ཏེ། པང་ལེབ་རེ་ལ་ཞབས་ར་གཉིས་བཅས་སོ། །   
\p
\v 26 དེ་ནས་སེང་ལྡེང་ཤིང་གིས་འཕྲེད་རྒྱུག་རྣམས་བཟོ་དགོས་ཤིང་། གུར་མཆོག་གི་ལོགས་གཅིག་གི་པང་ལེབ་རྣམས་ཀྱི་ཕྱིར་འཕྲེད་རྒྱུག་ལྔ་དང་།  
\v 27 གུར་མཆོག་གི་ལོགས་གཞན་ལ་ཡོད་པའི་པང་ལེབ་རྣམས་ཀྱི་ཕྱིར་འཕྲེད་རྒྱུག་ལྔ་དང་། རྒྱབ་ལོགས་ཏེ་ནུབ་ཕྱོགས་ཀྱི་པང་ལེབ་རྣམས་ཀྱི་ཕྱིར་ཡང་འཕྲེད་རྒྱུག་ལྔ་ཡོད་དགོས།  
\v 28 པང་ལེབ་རྣམས་ཀྱི་དཀྱིལ་དུ་ཡོད་པའི་འཕྲེད་རྒྱུག་དག་སྣེ་གཅིག་ནས་སྣེ་གཞན་དུ་སླེབས་པར་བྱེད་དགོས།  
\v 29 པང་ལེབ་དེ་དག་གསེར་གྱིས་གཡོགས་ཤིག དེ་དག་གི་འཕྲེད་རྒྱུག་འཛིན་པའི་ཨ་ལོང་རྣམས་གསེར་དུ་བྱོས་ཤིག ཡང་འཕྲེད་རྒྱུག་དག་གསེར་གྱིས་གཡོགས་པར་བྱའོ། །  
\v 30 དེ་ལྟར་རི་ནས་ཁྱོད་ལ་བསྟན་པའི་དཔེ་བཞིན་དུ་གུར་མཆོག་ཕུབ་དགོས་སོ། །   
\p
\v 31 ཡང་ཁྱོད་ཀྱིས་ཡོལ་བ་ཞིག་བཟོ་བར་བྱའོ། །དེའི་རྒྱུ་ནི་བལ་སྐུད་མཐིང་ག་དང་། རྒྱ་སྨུག་དང་། མཚལ་དམར་དང་། སོ་རས་སྲབ་བུ་བསྒྲིམས་པ་ཅན་བཅས་ཡིན་དགོས་ཤིང་། ཡང་དེ་ལ་འཐག་མཁན་ལག་རྩལ་ཅན་གྱི་ལས་བཞིན་དུ་ཀེ་རུབ་ཀྱི་གཟུགས་བརྙན་དང་ལྡན་པར་བྱོས་ཤིག  
\v 32 ཡོལ་བ་དེ་ནི་སེང་ལྡེང་ཤིང་གི་ཀ་བ་བཞི་གསེར་གྱིས་གཡོགས་པར་འགེལ་བ་དང་། དེའི་ཀྱུ་རྣམས་གསེར་ཡིན་དགོས་ཏེ། ཀ་བ་རྣམས་དངུལ་གྱི་ཞབས་ར་ལ་བརྟེན་དགོས།  
\v 33 ཡོལ་བ་དེ་ཀྱུ་རྣམས་ཀྱི་སྣེ་རུ་དཔྱངས་པ་དང་། ཡོལ་བའི་ནང་ཐད་དུ་དཔང་མཛད་ཤུར་སྒམ་འཇོག་དགོས། དེ་ལྟར་ཡོལ་བ་དེས་ཁྱོད་རྣམས་ལ་གནས་དམ་པ་དང་གནས་དམ་མཆོག་གི་དབྱེ་མཚམས་འབྱེད་པར་འགྱུར་རོ། །  
\v 34 གནས་དམ་མཆོག་ནང་གི་དཔང་མཛད་ཤུར་སྒམ་གྱི་སྟེང་དུ་ཐུགས་རྗེའི་བཞུགས་ཁྲི་དེ་ཞོག་ཅིག  
\v 35 སྒྲོག་ཙེ་ནི་ཡོལ་བའི་ཕྱི་ལོགས་སུ་གུར་མཆོག་གི་བྱང་ཕྱོགས་དང་། སྒྲོན་སྟེགས་ནི་གུར་མཆོག་གི་ལྷོ་ཕྱོགས་སུ་ཕན་ཚུན་ཁ་སྤྲོད་དུ་འཇོག་དགོས་སོ། །   
\p
\v 36 གུར་མཆོག་གི་སྒོ་ལ་སྒོ་ཡོལ་ཞིག་བཟོ་དགོས་ཤིང་། དེའི་རྒྱུ་ནི་བལ་སྐུད་མཐིང་ག་དང་། རྒྱ་སྨུག་དང་། མཚལ་དམར་དང་། སོ་རས་སྲབ་བུ་བསྒྲིམས་པ་ཅན་བཅས་ཡིན་དགོས་ལ། འཐག་མཁན་གྱི་ལས་བཞིན་དུ་བཟོ་དགོས།  
\v 37 སྒོ་ཡོལ་གྱི་ཕྱིར་སེང་ལྡེང་ཤིང་གི་ཀ་བ་ལྔ་གསེར་གྱིས་གཡོགས་པར་བྱོས་ལ། དེ་དག་གི་ཀྱུ་རྣམས་ཀྱང་གསེར་ཡིན་དགོས་པ་དང་། དེ་དག་གི་ཕྱིར་ཁྱོད་ཀྱིས་ལི་ཡི་ཞབས་ར་ལྔ་བླུགས་ཤིག་ཅེས་གསུངས་སོ། །   
\c 27
\cl ལེའུ་ཉེར་བདུན་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 མཆོད་ཁྲིའི་སྐོར།  
\p
\v 1 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་སེང་ལྡེང་ཤིང་གིས་མཆོད་ཁྲི་ཞིག་བཟོ་དགོས་ཤིང་། དེའི་རིང་ཚད་ལ་ཁྲུ་ལྔ་དང་ཞེང་ཚད་ལ་ཁྲུ་ལྔ་སྟེ་གྲུ་བཞི་མ་ཞིག་དང་། དེའི་མཐོ་ཚད་ལ་ཁྲུ་གསུམ་ཡོད་དགོས།  
\v 2 དེའི་ཟུར་བཞི་ལ་རུ་ཐུར་བཞི་བཟོ་དགོས་པ་དང་། རུ་ཐུར་བཞི་ནི་མཆོད་ཁྲི་དང་གཅིག་ཏུ་སྦྲེལ་དགོས་ཤིང་། མཆོད་ཁྲི་ལི་ཡིས་གཡོག་པར་བྱའོ། །  
\v 3 ཡང་ཁྱོད་ཀྱིས་ཐལ་བ་འཁྱེར་བའི་ཕྱིར་གཞོང་པ་རྣམས་བཟོ་དགོས་པ་དང་། ཡང་མེ་ཁྱེམ་དང་། མཆོད་སྡེར་དང་ཤ་འཛིན་ཁ་དབྲག་དང་མེ་ཕོར་བཅས་བཟོ་དགོས། ཡོ་བྱད་དེ་ཐམས་ཅད་ལི་ཡིས་བཟོས་ཤིག  
\v 4 ཡང་རྒྱུ་ལི་ཡིན་པའི་ཐག་མིག་ཅིག་བཟོས་ཏེ་ཐག་མིག་དེའི་གྲུ་ག་བཞི་ལ་ལི་ཡི་ཨ་ལོང་རེ་བྱའོ། །  
\v 5 ཐག་མིག་ནི་མཆོད་ཁྲིའི་མུ་ཁྱུད་ཀྱི་འགབ་ལ་བཅུག་སྟེ་མཆོད་ཁྲིའི་མཐོ་ཚད་ཀྱི་ཕྱེད་ཙམ་ལ་སླེབས་པར་བྱེད་དགོས།  
\v 6 མཆོད་ཁྲི་ལ་སེང་ལྡེང་ཤིང་གིས་རྒྱུག་པ་བཟོས་ནས་དེ་གཉིས་ལི་ཡིས་གཡོགས་ཤིག  
\v 7 རྒྱུག་པ་ནི་མཆོད་ཁྲིའི་ལོགས་གཉིས་ཀྱི་ཨ་ལོང་རྣམས་སུ་བརྒྱུས་ཤིང་མཆོད་ཁྲི་འཁུར་བའི་ཕྱིར་ཡིན་ལ།  
\v 8 ཡང་པང་ལེབ་ཀྱིས་མཆོད་ཁྲི་བཟོ་དགོས་ཤིང་། དེའི་ནང་ནི་སྟོང་པ་ཡིན་པ་དང་། རི་ནས་ཁྱོད་ལ་བསྟན་པ་ཇི་བཞིན་བཟོ་དགོས་ཞེས་གསུངས་སོ། །   
\s1 ཁྱམས་རའི་སྐོར།  
\p
\v 9 ཡང་འདི་སྐད་དུ། ཁྱོད་ཀྱིས་གུར་མཆོག་ལ་ཁྱམས་ར་ཞིག་བཟོས་ཤིག དེའི་ལྷོ་ཕྱོགས་ཀྱི་ཁྱམས་ཡོལ་ནི་སོ་རས་སྲབ་བུ་བསྒྲིམས་པ་ཅན་གྱིས་བཟོ་དགོས་ཤིང་། རིང་ཚད་ནི་ཁྲུ་བརྒྱ་ཡིན་དགོས།  
\v 10 དེ་ལ་ཀ་བ་ཉི་ཤུ་དང་ལི་ཡི་ཞབས་ར་ཉི་ཤུ་བྱའོ། །ཀ་བའི་ཀྱུ་རྣམས་དང་དེ་དག་གི་ཁ་ཐུར་རྣམས་དངུལ་གྱིས་བཟོ་དགོས།  
\v 11 དེ་ལྟར་བྱང་ཕྱོགས་ཀྱི་ཁྱམས་ཡོལ་རྣམས་ཀྱི་རིང་ཚད་ལ་ཁྲུ་བརྒྱ་ཡོད་དགོས་པ་དང་། ཀ་བ་ཉི་ཤུ་དང་དེ་དག་གི་ལི་ཡི་ཞབས་ར་ཉི་ཤུ་དགོས་ཤིང་། ཀ་བའི་ཀྱུ་དང་ཁ་ཐུར་རྣམས་དངུལ་གྱིས་བཟོ་དགོས།  
\v 12 ཡང་ཁྱམས་རའི་ནུབ་ཕྱོགས་ཀྱི་ཡོལ་བ་རྣམས་ཀྱི་ཞེང་ཚད་ལ་ཁྲུ་ལྔ་བཅུ་ཡོད་དགོས་ཤིང་། དེ་ལ་ཀ་བ་བཅུ་དང་ཞབས་ར་བཅུ་བཅས་དགོས།  
\v 13 ཁྱམས་རའི་ཤར་ཕྱོགས་ཀྱི་ཞེང་ཚད་ལ་ཁྲུ་ལྔ་བཅུ་ཡོད་པར་བྱའོ། །  
\v 14 སྒོའི་ལོགས་གཅིག་གི་ཡོལ་བ་ནི་ཁྲུ་བཅོ་ལྔ་དང་། དེ་ལ་ཀ་བ་གསུམ་དང་ཞབས་ར་གསུམ་བཅས་དགོས།  
\v 15 སྒོའི་ལོགས་ཅིག་ཤོས་ཀྱི་ཡོལ་བ་ལའང་ཁྲུ་བཅོ་ལྔ་དང་། དེ་ལ་ཀ་བ་གསུམ་དང་། ཞབས་ར་གསུམ་བཅས་དགོས།  
\v 16 ཁྱམས་རའི་སྒོ་ཡོལ་གྱི་རིང་ཚད་ནི་ཁྲུ་ཉི་ཤུ་དང་། དེའི་རྒྱུ་ནི་བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་། སོ་རས་སྲབ་བུ་བསྒྲིམས་པ་ཅན་ཡིན་དགོས་པ་དང་། འཐག་མཁན་གྱི་ལས་བཞིན་དུ་བཟོ་དགོས་ཏེ། དེ་ལ་ཀ་བ་བཞི་དང་ཞབས་ར་བཞི་བཅས་ཡོད་དགོས།  
\v 17 ཁྱམས་རའི་ཕྱོགས་བཞིའི་ཀ་བ་ཐམས་ཅད་དངུལ་གྱི་ཁ་ཐུར་གྱིས་སྦྲེལ་དགོས་ཤིང་། དེ་དག་གི་ཀྱུ་རྣམས་དངུལ་གྱིས་བཟོ་བ་དང་དེ་དག་གི་ཞབས་ར་རྣམས་ལི་ཡིས་བཟོ་དགོས།  
\v 18 ཁྱམས་རའི་རིང་ཚད་ལ་ཁྲུ་བརྒྱ་དང་། ཞེང་ཚད་ལ་ཁྲུ་ལྔ་བཅུ། མཐོ་ཚད་ལ་ཁྲུ་ལྔ་བཅས་སོ། །དེ་དག་གི་རྒྱུ་ནི་སོ་རས་སྲབ་བུ་བསྒྲིམས་པ་ཅན་ཡིན་དགོས་པ་དང་། ཀ་བའི་ཞབས་ར་རྣམས་ལི་ཡིན་དགོས།  
\v 19 གུར་མཆོག་ཏུ་བཀོལ་དགོས་པའི་ཡོ་ཆས་ཐམས་ཅད་དང་། དེའི་ཕུར་བ་ཀུན་དང་། ཁྱམས་རའི་ཕུར་བ་མཐའ་དག་བཅས་ལི་ཡིས་བཟོ་དགོས་ཞེས་གསུངས་སོ། །   
\s1 སྒྲོན་མེའི་སྣུམ།  
\p
\v 20 ཡང་འདི་སྐད་དུ། ཁྱོད་ཀྱིས་ཡེས་ར་ཨེལ་པ་རྣམས་ལ། འོད་ཀྱི་ཆེད་དུ་སྐྱུ་རུ་རའི་ཤིང་ལས་བརྡུངས་པའི་སྣུམ་དྭངས་མ་ཁྱོད་ལ་འབུལ་དགོས་པའི་བཀའ་སྒོས་ཤིག དེ་ནི་སྒྲོན་མེ་རྟག་ཏུ་འབར་བའི་ཕྱིར་ཡིན།  
\v 21 མཇལ་འཕྲད་གུར་མཆོག་\f + \ft མཇལ་འཕྲད་གུར་མཆོག་ཅེས་པ་ནི་གུར་མཆོག་ཅེས་པའི་མིང་གཞན་ཡིན་ལ། ལེའུ་ཕྱི་མ་དག་ཏུ་འབྱུང་བའང་དེ་བཞིན་གོ་དགོས། \f*གི་ནང་དུ་ཡོད་པའི་དཔང་མཛད་ཤུར་སྒམ་མདུན་གྱི་ཡོལ་བའི་ཕྱི་ཕྱོགས་སར། ཨ་རོན་དང་དེའི་བུ་རྣམས་ཀྱིས་དཀོན་མཆོག་ཡ་ཝཱེའི་སྤྱན་སྔར་མཚན་མོ་ནས་ཞོགས་པའི་བར་དུ་སྒྲོན་མེ་ལ་ལྟ་སྲུང་བྱེད་དགོས། དེ་ནི་ཡེས་ར་ཨེལ་པ་རྣམས་ཀྱི་ཁྲོད་དུ་མི་རབས་ནས་མི་རབས་བར་གཏན་དུ་གནས་པའི་སྒྲིག་ཁྲིམས་ཤིག་ཏུ་འགྱུར་དགོས་ཞེས་གསུངས་སོ། །   
\c 28
\cl ལེའུ་ཉེར་བརྒྱད་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 མཆོད་དཔོན་གྱི་འཕགས་གོས།  
\p
\v 1 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཡེས་ར་ཨེལ་པ་རྣམས་ཀྱི་ཁྲོད་ནས་ཁྱོད་ཀྱི་ཕུ་བོ་ཨ་རོན་དང་ཁོའི་བུ་རྣམས་ཏེ། ནཱ་དབ་དང་ཨ་བི་ཧུ་དང་ཨེ་ལི་ཨ་ཟར་དང་ཨི་ཐ་མཱར་བཅས་བདག་གི་མཆོད་དཔོན་གྱི་ཞབས་ཕྱི་བྱེད་པར་ཁྱོད་ཀྱི་དྲུང་དུ་འོང་བར་ཆུག་ཅིག  
\v 2 ཁྱོད་ཀྱིས་རང་གི་ཕུ་བོ་ཨ་རོན་ལ་འཕགས་གོས་དམ་པ་བརྗིད་ཉམས་དང་མཛེས་སྡུག་ལྡན་པའི་ཕྱིར་བཟོ་དགོས།  
\v 3 ཨ་རོན་དམ་པར་བྱེད་པ་དང་ཁོས་ཀྱང་བདག་ལ་མཆོད་དཔོན་གྱི་ཞབས་ཕྱི་བྱེད་པའི་ཕྱིར། ཁྱོད་ཀྱིས་ལག་རྩལ་ཡོད་པའི་མི་སྟེ། བདག་གིས་ཤེས་རབ་ཀྱི་སེམས་རྒྱུད་ཀྱིས་ཁེངས་པར་མཛད་པའི་མི་དེ་དག་ལ་ཨ་རོན་ལ་འཕགས་གོས་བཟོ་བའི་བཀའ་སྒོས་ཤིག  
\v 4 དེ་དག་གིས་བཟོ་བྱའི་ན་བཟའ་རྣམས་ནི་འདི་དག་ཡིན་ཏེ། བྲང་རྒྱན་དང་བེར་ཐུལ་དང་། གོས་རིང་དང་། ནང་གོས་འབུར་རིས་མ་དང་། ལ་ཐོད་དང་སྐེད་ཆིངས་བཅས་སོ། །དེ་ལྟ་བུའི་ན་བཟའ་དམ་པ་རྣམས་ཁོ་རྣམས་ཀྱིས་ཁྱོད་ཀྱི་ཕུ་བོ་ཨ་རོན་དང་དེའི་བུ་རྣམས་ལ་བཟོ་དགོས་ལ། དེ་ནི་ཁོ་རྣམས་ཀྱིས་བདག་ལ་མཆོད་དཔོན་གྱི་ཞབས་ཕྱི་བྱེད་པའི་ཕྱིར་ཡིན།  
\v 5 དེ་བཟོ་བྱེད་ནི་གསེར་སྐུད་དང་བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་སོ་རས་སྲབ་བུ་བཅས་ཡིན་དགོས་ཞེས་གསུངས་སོ། །   
\s1 བེར་ཐུལ་བཟོ་སྟངས།  
\p
\v 6 ཡང་འདི་སྐད་དུ། བེར་ཐུལ་ཡང་གསེར་སྐུད་དང་བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་སོ་རས་སྲབ་བུ་བསྒྲིམས་པ་ཅན་བཅས་ཀྱིས་འཐག་མཁན་ལག་རྩལ་ཅན་གྱི་ལས་བཞིན་དུ་བཟོ་དགོས།  
\v 7 དེ་ལ་དཔུང་པའི་ཕྲག་ཁེབས་གཉིས་དགོས་ཤིང་། བེར་ཐུལ་གྱི་ཕྲག་མགོ་གཉིས་ལ་སྦྲེལ་ཞིང་འཆིང་བར་བྱའོ། །  
\v 8 ཡང་བེར་ཐུལ་དང་འབྲེལ་བའི་སྐེད་ཆིངས་མཆོར་པོ་ཅན་དེ་ནི་བེར་ཐུལ་གྱི་བཟོ་ཚུལ་དང་གཅིག་མཚུངས་ཡིན་དགོས་ཤིང་། དེའི་རྒྱུ་ནི་གསེར་སྐུད་དང་བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་སོ་རས་སྲབ་བུ་བསྒྲིམས་པ་ཅན་བཅས་ཡིན་དགོས།  
\v 9 ཡང་གཟི་གཉིས་ལོངས་ལ། དེའི་ཁར་ཡེས་ར་ཨེལ་གྱི་བུ་རྣམས་ཀྱི་མིང་བརྐོས་ཤིག  
\v 10 མིང་དྲུག་ནི་གཟི་གཅིག་གི་སྟེང་ལ་བརྐོ་བར་བྱ་ཞིང་། ཡང་མིང་དྲུག་ནི་གཟི་གཞན་པ་དེའི་སྟེང་དུ་བརྐོ་དགོས། དེ་ཐམས་ཅད་ཁོ་རྣམས་སྐྱེས་པའི་གོ་རིམ་བཞིན་དུ་བྱའོ། །  
\v 11 རྡོ་ལ་རྡོ་བཟོས་དམ་ཕྲུག་བརྐོ་བ་བཞིན་དུ་རྡོ་དེ་གཉིས་ཀྱི་སྟེང་དུ་ཡེས་ར་ཨེལ་གྱི་བུ་རྣམས་ཀྱི་མིང་བརྐོས་ཏེ་གསེར་གྱིས་འབུར་ཀོང་གཉིས་བྱའོ། །  
\v 12 རྡོ་དེ་གཉིས་བེར་ཐུལ་གྱི་དཔུང་པའི་ཕྲག་ཁེབས་གཉིས་ལ་སྦྱར་ཏེ། རྡོ་དེ་གཉིས་ལ་བརྟེན་ནས་ཡེས་ར་ཨེལ་གྱི་བུ་རྣམས་ལ་རྗེས་དྲན་ཡོད་དགོས། ཨ་རོན་གྱིས་དེ་དག་གི་མིང་རྣམས་རང་གི་ཕྲག་ལ་ཁུར་ནས་དཀོན་མཆོག་ཡ་ཝཱེའི་སྤྱན་སྔར་དྲན་རྟེན་དུ་བྱེད་དགོས།  
\v 13 ཁྱོད་ཀྱིས་གསེར་གྱི་འབུར་ཀོང་གཉིས་བཟོ་དགོས་པ་དང་།  
\v 14 གསེར་བཙོ་མས་བསླེས་པའི་ཉག་ཐག་གཉིས་བཟོས་ནས། དེ་ནི་གསེར་གྱི་འབུར་ཀོང་གཉིས་ལ་སྦྱོར་ཅིག་ཅེས་གསུངས་སོ། །   
\s1 བྲང་རྒྱན་གྱི་བཟོ་སྟངས།  
\p
\v 15 ཡང་འདི་སྐད་དུ། ཁྱོད་ཀྱིས་བློ་འདོན་པའི་བྲང་རྒྱན་བཟོ་བར་བྱའོ། །དེ་ནི་བཟོ་བ་ལག་རྩལ་ཅན་གྱིས་བྱས་པ་ཡིན་དགོས་པ་དང་བེར་ཐུལ་བཞིན་དུ་བཟོ་དགོས་ལ། དེའི་རྒྱུ་ནི་གསེར་སྐུད་དང་བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་སོ་རས་སྲབ་བུ་བསྒྲིམས་པ་ཅན་བཅས་ཡིན་དགོས།  
\v 16 དེ་ནི་ཁ་གང་ཉིས་ལྟེབ་ཅན་དང་། དེའི་རིང་ཚད་ནི་མཐོ་གང་དང་ཞེང་ལ་ཡང་མཐོ་གང་ཡོད་དགོས།  
\v 17 དེ་ལ་ཕ་ལམ་ཤུར་ཕྲེང་བཞི་ཡི་ཕྲ་འདེབས་དགོས་པ་སྟེ། ཤུར་ཕྲེང་དང་པོ་ནི་པདྨ་རཱ་ག་དང་། སྤྲིན་རྡོ། མ་རྒད་བཅས་གསུམ་དང་།  
\v 18 ཤུར་ཕྲེང་གཉིས་པ་ནི་གཡུ་དང་ཨིནྡྲ་ནཱི་ལ་དང་རྡོ་རྗེ་ཕ་ལམ་བཅས་གསུམ།  
\v 19 ཤུར་ཕྲེང་གསུམ་པ་ནི་རྟ་ཀླད་སྨུག་པོ་དང་། ཤེལ་རྡོ་དང་། མུ་མེན་བཅས་གསུམ།  
\v 20 ཤུར་ཕྲེང་བཞི་པ་ནི་བཻཌཱུརྱ་ལྗང་སེར་དང་། གཟི་དང་གཡང་ཊི་སྔོན་པོ་བཅས་གསུམ་སྟེ། དེ་དག་ནི་གསེར་གྱི་འབུར་ཀོང་ལ་འདེབས་པར་བྱའོ། །  
\v 21 རིན་པོ་ཆེ་དེ་དག་གིས་ཡེས་ར་ཨེལ་གྱི་བུ་རྣམས་ཀྱི་མིང་གི་མཚོན་རྟགས་བྱེད་ཅིང་མིང་ལྟར་བཅུ་གཉིས་ཡོད་དེ། དམ་ཕྲུག་བཞིན་དུ་རིན་པོ་ཆེ་རེ་རེའི་སྟེང་དུ་ཡེས་ར་ཨེལ་གྱི་ཚོ་པ་བཅུ་གཉིས་པོའི་མིང་རེ་རེ་ལྟར་དུ་བརྐོ་བར་བྱའོ། །  
\v 22 བྲང་རྒྱན་ལ་གསེར་བཙོ་མས་བསླེས་པའི་ཉག་ཐག་བཟོས་ཤིག  
\v 23 བྲང་རྒྱན་གྱི་གྲུ་ག་གཉིས་ལ་གསེར་གྱི་ཨ་ལོང་གཉིས་བཟོས་ཏེ་སྦྱོར་ཅིག་དང་།  
\v 24 ཡང་གསེར་གྱི་ཉག་ཐག་དེ་གཉིས་ནི་བྲང་རྒྱན་གྱི་གྲུ་ག་རུ་ཡོད་པའི་ཨ་ལོང་གཉིས་ལ་རྒྱུས་ཤིག  
\v 25 དེ་ནས་ཉག་ཐག་གི་སྣེ་གཉིས་འབུར་ཀོང་གཉིས་ལ་བཅུག་སྟེ། བེར་ཐུལ་མདུན་ལོགས་ཀྱི་ཕྲག་ཁེབས་སྟེང་སྦྱོར་དགོས།  
\v 26 ཡང་གསེར་གྱི་ཨ་ལོང་གཞན་གཉིས་བཟོས་ནས་བྲང་རྒྱན་གྱི་གྲུ་ག་གཉིས་ལ་སྦྱོར་ཅིག སྦྱོར་ས་དེ་ནི་བྲང་རྒྱན་གྱི་ཟུར་ཁ་ཡིན་ལ་བྲང་རྒྱན་དང་བེར་ཐུལ་གྱི་བར་མཚམས་ཀྱང་ཡིན་ནོ། །  
\v 27 ཡང་གསེར་གྱི་ཨ་ལོང་གཉིས་བཟོས་ནས་བེར་ཐུལ་གྱི་དཔུང་པའི་ཕྲག་ཁེབས་གཉིས་ཀྱི་མདུན་ལོགས་ཀྱི་འོག་དང་སྐེད་ཆིངས་མཆོར་པོ་ཅན་གྱི་འབྲེལ་སའི་ཅུང་ཟད་གོང་དུ་ཆུག་ཅིག  
\v 28 བྲང་རྒྱན་དེ་བེར་ཐུལ་གྱི་སྐེད་ཆིངས་མཆོར་པོ་ཅན་དང་དམ་དུ་འབྲེལ་བ་དང་བེར་ཐུལ་ལས་མི་འཆོར་བའི་ཕྱིར། བྲང་རྒྱན་གྱི་ཨ་ལོང་དེ་བེར་ཐུལ་གྱི་ཨ་ལོང་ལ་སྡེམ་ཐག་སྔོན་པོ་ཡིས་བསྡམ་དགོས།  
\v 29 དེ་ལྟར་ཨ་རོན་གནས་དམ་པར་འགྲོ་བའི་སྐབས་སུ། བློ་འདོན་པའི་བྲང་རྒྱན་ལ་ཡོད་པའི་ཡེས་ར་ཨེལ་གྱི་བུ་རྣམས་ཀྱི་མིང་དག་སྙིང་གི་དྲང་ཐད་དུ་འཛིན་པར་བྱེད་དགོས་ཤིང་། དེ་ནི་དཀོན་མཆོག་ཡ་ཝཱེའི་སྤྱན་སྔར་རྒྱུན་དུ་རྗེས་དྲན་ཡོད་པའི་ཕྱིར་ཡིན།  
\v 30 ཡང་ཨུའུ་རིམ་དང་ཐུའུ་མིམ་\f + \ft ཨུའུ་རིམ་དང་ཐུའུ་མིམ་ཞེས་པ་ནི་གནའ་བོའི་དུས་སུ་མཆོད་དཔོན་རྣམས་ཀྱིས་དཀོན་མཆོག་གི་ཐུགས་དགོངས་ཤེས་ཆེད་ལེན་པའི་རྟགས་རིལ་གྱི་མིང་ཡིན་པར་གསུངས། ཕྱིས་སུ་ལུང་སྟོན་པ་རྣམས་ཀྱིས་རྟགས་རིལ་འདི་དག་བཀོལ་བ་མེད་ལ་ཞལ་ཆད་གསར་པའི་ནང་དུའང་བཀོད་མེད། \f*ཞེས་པའི་རྟགས་རིལ་གཉིས་བློ་འདོན་པའི་བྲང་རྒྱན་གྱི་ནང་དུ་བཅུག་སྟེ། ཨ་རོན་དཀོན་མཆོག་ཡ་ཝཱེའི་སྤྱན་སྔར་འགྲོ་སྐབས་དེ་གཉིས་ཁོའི་སྙིང་གི་དྲང་ཐད་དུ་ཡོད་ཅིང་། ཁོས་རྒྱུན་པར་ཡེས་ར་ཨེལ་པ་རྣམས་ལ་བློ་འདོན་པ་དེ་རང་གི་སྙིང་གི་དྲང་ཐད་དུ་འཁུར་བར་འགྱུར་ཞེས་གསུངས་སོ། །   
\s1 གོས་རིང་བཟོ་སྟངས།  
\p
\v 31 ཡང་འདི་སྐད་དུ། བེར་ཐུལ་འོག་གི་གོས་རིང་ནི་ཁ་དོག་སྔོན་པོས་བཟོ་བར་བྱའོ། །  
\v 32 དེའི་སྟོད་དཀྱིལ་དུ་མགོའི་ཕྱིར་ཁུང་བུ་ཞིག་འཇོག་དགོས་ཤིང་། དེའི་མཐའ་འཁོར་ལ་འཐག་བཟོ་བྱས་པའི་གོང་བ་ཞིག་ཀྱང་ཡོད་པར་བྱེད་དགོས་ལ། མི་རལ་བའི་ཕྱིར་གོ་ཁྲབ་ཀྱི་གོང་བ་ལྟར་དུ་བཟོ་དགོས།  
\v 33 ཡང་དེའི་གོས་འདབ་ཀྱི་མཐའ་འཁོར་དུ་བལ་སྐུད་མཐིང་ག་དང་རྒྱ་སྨུག མཚལ་དམར་བཅས་ཀྱི་སེ་འབྲུས་བརྒྱན་དགོས་ཤིང་། སེ་འབྲུ་རེ་རེའི་བར་གསེབ་ཏུ་ཡང་གསེར་གྱི་གཡེར་ཁ་རྣམས་འདོགས་དགོས་པ་དང་།  
\v 34 གསེར་གྱི་གཡེར་ཁ་གཅིག་དང་སེ་འབྲུ་གཅིག ཡང་གསེར་གྱི་གཡེར་ཁ་གཅིག་དང་སེ་འབྲུ་གཅིག་བཅས་གོས་རིང་གི་འདབ་ཁ་ཐམས་ཅད་ལ་ཡོད་པར་བྱེད་དགོས་ཤིང་།  
\v 35 ཨ་རོན་གྱིས་ཞབས་ཕྱི་སྒྲུབ་སྐབས་གོས་དེ་གྱོན་དགོས་ཤིང་། གནས་དམ་པ་རུ་དཀོན་མཆོག་ཡ་ཝཱེའི་སྤྱན་དྲུང་དུ་འགྲོ་བ་དང་ཕྱིར་འོང་སྐབས་ཁོ་རང་མི་འཆི་བའི་ཕྱིར་གོས་དེའི་སྐད་སྒྲ་ཐོས་པར་འགྱུར་ཞེས་གསུངས་སོ། །   
\s1 ལ་ཐོད་བཟོ་སྟངས།  
\p
\v 36 ཡང་འདི་སྐད་དུ། ཁྱོད་ཀྱིས་གསེར་བཙོ་མའི་བྱང་བུ་ཞིག་བཟོས་ནས་དེའི་སྟེང་ལ་དམ་ཕྲུག་བརྐོ་བ་བཞིན་དུ། དཀོན་མཆོག་ཡ་ཝཱེའི་ཕྱིར་དུ་དམ་པའོ་ཞེས་བརྐོ་བར་བྱའོ། །  
\v 37 ཡང་དེ་ལ་རས་སྔོན་པོའི་ཉག་ཐག་ཅིག་སྦྱར་ནས་ལ་ཐོད་དང་སྦྲེལ་བ་དང་། གསེར་གྱི་བྱང་བུ་ནི་ལ་ཐོད་ཀྱི་མདུན་ལོགས་སུ་ཡོད་དགོས།  
\v 38 དེ་ལྟར་དེ་ནི་ཨ་རོན་གྱི་དཔྲལ་བར་ཡོད་པ་དང་། ཡེས་ར་ཨེལ་པ་རྣམས་ཀྱིས་མཆོད་པ་དམ་པ་འབུལ་བའི་ཚེ། སྐྱོན་དང་ནོར་བ་གང་ཞིག་ཡོད་ཚེ། དེའི་ཉེས་པ་ཐམས་ཅད་ཨ་རོན་རང་གིས་འཁུར་བ་དང་། དཀོན་མཆོག་ཡ་ཝཱེ་མཆོད་པ་དེ་དག་ལ་ཐུགས་དགྱེས་པའི་ཕྱིར་བྱང་བུ་དེ་གཏན་དུ་ཨ་རོན་གྱི་དཔྲལ་བར་ཡོད་དགོས་སོ། །   
\p
\v 39 ཡང་ཁྱོད་ཀྱིས་སོ་རས་སྲབ་བུ་ཡིས་ནང་གོས་འབུར་རིས་མ་འཐག་དགོས་པ་དང་། ཡང་སོ་རས་སྲབ་བུ་ཡིས་ལ་ཐོད་བཟོ་བ་དང་། འཐག་མཁན་གྱི་ལས་བཞིན་དུ་སྐེད་ཆིངས་བཅས་བཟོ་བར་བྱའོ། །  
\v 40 ཡང་ཨ་རོན་གྱི་བུ་རྣམས་ལ་ནང་གོས་དང་སྐེད་ཆིངས་དང་པྲོག་ཞུ་རྣམས་བརྗིད་ཉམས་དང་མཛེས་སྡུག་ལྡན་པའི་ཕྱིར་དུ་བཟོས་ཤིག  
\v 41 ཁྱོད་ཀྱིས་ན་བཟའ་དེ་རྣམས་རང་གི་ཕུ་བོ་ཨ་རོན་དང་དེའི་བུ་རྣམས་ལ་བསྐོན་དགོས་པ་དང་། དེ་དག་གིས་ང་ལ་མཆོད་དཔོན་གྱི་ཞབས་ཕྱི་བྱེད་པའི་ཕྱིར། ཁོ་རྣམས་ལ་སྣུམ་གྱིས་བྱུག་པ་དང་། བསྐོས་ནས་དམ་པར་བྱེད་དགོས།  
\v 42 ཡང་དེ་དག་གི་ཤ་རྗེན་པ་གཡོག་པའི་ཕྱིར་སོ་རས་ཀྱི་ཨང་ཐུང་རྐེད་པ་ནས་བརླའི་བར་དུ་སླེབས་པ་རྣམས་བཟོས་ཤིག  
\v 43 ཨ་རོན་དང་དེའི་བུ་རྣམས་མཇལ་འཕྲད་གུར་མཆོག་ནང་དུ་འཇུག་པའམ། གནས་དམ་པའི་ནང་ནས་ཞབས་ཕྱི་བྱེད་པའི་ཆེད་དུ་མཆོད་ཁྲིའི་དྲུང་དུ་འོང་ཚེ་དེ་དག་གྱོན་དགོས་པ་སྟེ། གལ་སྲིད་དེ་ལྟར་མ་བྱས་ན་ཉེས་སྐྱོན་ཕོག་ནས་འཆི་དགོས་པའི་ཕྱིར་རོ། །སྒྲིག་ཁྲིམས་དེ་ནི་གཏན་དུ་གནས་དགོས་ཏེ་ཨ་རོན་དང་དེའི་བུ་རྒྱུད་རྣམས་ཀྱི་ཕྱིར་དུ་ཡིན་ཞེས་གསུངས་སོ། །   
\c 29
\cl ལེའུ་ཉེར་དགུ་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 མཆོད་དཔོན་རྣམས་དམ་པར་བྱེད་པའི་སྐོར།  
\p
\v 1 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་ཨ་རོན་དང་ཁོའི་བུ་རྣམས་དམ་པར་འགྱུར་བ་དང་བདག་ལ་མཆོད་དཔོན་གྱི་ཞབས་ཕྱི་བྱེད་པའི་ཕྱིར་འདི་ལྟར་གྱིས་ཤིག གླང་ཐུག་ཁ་ཆུང་ཞིག་དང་། ལུག་ཐུག་བཙོག་སྐྱོན་མེད་པ་གཉིས་འདེམས་དང་།  
\v 2 སྐྱུར་མེད་བག་ལེབ་དང་སྐྱུར་མེད་བག་ལེབ་ལ་འཚིར་སྣུམ་བསྲེས་པ་ཅན་དང་སྐྱུར་མེད་བག་ལེབ་ལ་འཚིར་སྣུམ་གྱིས་བྱུགས་པ་ཅན་བཅས་གྲོ་ཞིབ་ལྡེ་གུ་ཡིས་བཟོ་བར་བྱའོ། །  
\v 3 དེ་དག་གཟེབ་ཀྱི་ནང་དུ་བཞག་སྟེ་ཁྱེར་འོང་བ་དང་གླང་ཐུག་དང་ལུག་ཐུག་གཉིས་ཀྱང་དེད་ནས་འོང་དགོས་པ་སྟེ།  
\v 4 ཨ་རོན་དང་ཁོའི་བུ་རྣམས་མཇལ་འཕྲད་གུར་མཆོག་གི་སྒོ་འགྲམ་དུ་ཁྲིད་དེ་ཆུས་བཀྲུ་བ་དང་།  
\v 5 དེ་ནས་ཨ་རོན་ལ་ནང་གོས་དང་གོས་རིང་དང་བེར་ཐུལ་དང་བྲང་རྒྱན་བཅས་གྱོན་དུ་འཇུག་པ་དང་བེར་ཐུལ་གྱི་སྐེད་ཆིངས་མཆོར་པོ་ཅན་གྱིས་བསྡམ་དགོས་ལ།  
\v 6 དེའི་མགོར་ལ་ཐོད་བསྐོན་ཏེ་ལ་ཐོད་ལ་ཅོད་པན་དམ་པ་སྦྱོར་ཅིག  
\v 7 དེ་ནས་ཁོའི་མགོ་ལ་འབྱུག་སྣུམ་བླུགས་ནས་བྱུགས་ཤིག  
\v 8 ཡང་ཁོའི་བུ་རྣམས་ཁྲིད་ཡོང་ནས་ནང་གོས་བསྐོན་པ་དང་།  
\v 9 ཨ་རོན་དང་ཁོའི་བུ་རྣམས་ལ་སྐེད་ཆིངས་བཅིངས་ནས་པྲོག་ཞུ་དཀྲི་དགོས་ཤིང་། དེ་ལྟར་ཁོ་རྣམས་ལ་མཆོད་དཔོན་གྱི་གོ་གནས་ཐོབ་པ་ནི་གཏན་དུ་གནས་པའི་སྒྲིག་ཁྲིམས་ཤིག་ཡིན། ཁྱོད་ཀྱིས་དེ་ལྟར་ཨ་རོན་དང་ཁོའི་བུ་རྣམས་བསྐོ་དགོས་སོ། །   
\p
\v 10 ཁྱོད་ཀྱིས་གླང་ཐུག་མཇལ་འཕྲད་གུར་མཆོག་གི་མདུན་སར་འཁྲིད་དགོས་ལ། ཨ་རོན་དང་ཁོའི་བུ་རྣམས་ཀྱིས་སོ་སོའི་ལག་པ་གླང་ཐུག་གི་མགོ་ལ་འཇོག་དགོས།  
\v 11 ཡང་དཀོན་མཆོག་ཡ་ཝཱེའི་སྤྱན་སྔ་རུ། མཇལ་འཕྲད་གུར་མཆོག་གི་སྒོ་ཁ་རུ་གླང་ཐུག་ཤོས་ཤིག  
\v 12 ཡང་གླང་ཐུག་གི་ཁྲག་ཉུང་ཙམ་བླངས་ནས་ལག་མཛུབ་ཀྱིས་མཆོད་ཁྲིའི་རུ་ཐུར་བཞི་ལ་བསྐུ་དགོས་པ་དང་། དེ་ནས་ཁྲག་ཡོངས་རྫོགས་མཆོད་ཁྲིའི་འགབ་འོག་ཏུ་བླུགས་ཤིག  
\v 13 དེ་ནས་ནང་ཁྲོལ་བཏུམས་པའི་ཚིལ་ཐམས་ཅད་དང་མཆིན་པའི་ཐོག་གི་རྩ་རྒྱུས་དང་། མཁལ་མ་གཉིས་ཀ་དང་དེའི་སྟེང་གི་ཚིལ་བཅས་ལོངས་ལ་མཆོད་ཁྲིའི་ཁ་ནས་མེས་སྲེགས་ཤིག  
\v 14 ཡང་གླང་ཐུག་གི་ཤ་དང་པགས་པ་དང་ལྕི་བ་བཅས་ནི་སྒར་གྱི་ཕྱི་རོལ་ཏུ་མེས་བསྲེག་དགོས། ཅི་ཡིན་ཞེ་ན། དེ་ནི་སྡིག་བཤགས་མཆོད་པ་ཡིན་ནོ། །   
\p
\v 15 ཡང་ལུག་ཐུག་ཅིག་ཁྱོད་ཀྱིས་ཁྲིད་ནས་ཨ་རོན་དང་དེའི་བུ་རྣམས་ཀྱིས་སོ་སོའི་ལག་པ་ལུག་ཐུག་གི་མགོ་ལ་འཇོག་དགོས།  
\v 16 ལུག་ཐུག་དེ་བཤས་ནས་དེའི་ཁྲག་ལོངས་ལ་མཆོད་ཁྲིའི་ཕྱོགས་བཞི་རུ་གཏོར་ཅིག  
\v 17 ཁྱོད་ཀྱིས་ལུག་ཐུག་གི་ལྷུ་ཚིགས་རེ་རེ་ཆོད་ལ། ནང་ཁྲོལ་དང་རྐང་ལག་དག་བཀྲུས་ནས་ལྷུ་རྣམས་མགོ་དང་མཉམ་དུ་ཞོག་ཅིག  
\v 18 ལུག་ཐུག་ཧྲིལ་པོ་མཆོད་ཁྲིའི་ཁར་སྦྱིན་སྲེག་ཏུ་ཕུལ་ཞིག དེ་ནི་དཀོན་མཆོག་ཡ་ཝཱེ་ལ་ཕུལ་བའི་སྦྱིན་སྲེག་དང་། དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་གྱི་མེ་མཆོད་ཡིན་ནོ། །   
\p
\v 19 དེ་ནས་ཁྱོད་ཀྱིས་ལུག་ཐུག་ཅིག་བཤས་ཏེ་ཁྲིད་འོངས་ནས། ཨ་རོན་དང་ཁོའི་བུ་རྣམས་ཀྱིས་སོ་སོའི་ལག་པ་དེའི་མགོར་འཇོག་དགོས་པ་དང་།  
\v 20 ལུག་ཐུག་དེ་བཤས་ནས། ཁྲག་ཉུང་ཙམ་བླངས་ཏེ་ཨ་རོན་གྱི་རྣ་ཤལ་གཡས་པ་དང་། དེའི་བུ་རྣམས་ཀྱི་རྣ་ཤལ་གཡས་པ་དང་། དེ་དག་གི་གཡས་ལག་གི་མཐེ་བོང་དང་། དེ་དག་གི་རྐང་པ་གཡས་པའི་མཐེབ་ཆེན་བཅས་ལ་བསྐུ་བར་བྱའོ། །ཡང་ཁྲག་དེ་མཆོད་ཁྲིའི་ཕྱོགས་བཞི་ལ་གཏོར་ཅིག  
\v 21 ཡང་མཆོད་ཁྲིའི་སྟེང་གི་ཁྲག་ཉུང་ཙམ་དང་འབྱུག་སྣུམ་ཕྲན་བུ་ཙམ་ལོངས་ལ་ཨ་རོན་དང་ཁོའི་གོས་དང་། ཁོ་དང་མཉམ་དུ་ཡོད་པའི་ཁོའི་བུ་རྣམས་དང་དེ་དག་གི་གོས་ཀྱི་སྟེང་ལ་གཏོར་ཅིག དེ་ནས་ཨ་རོན་དང་ཁོའི་གོས་དང་། ཁོའི་བུ་རྣམས་དང་དེ་དག་གི་གོས་དང་བཅས་པ་དམ་པར་འགྱུར་རོ། །   
\p
\v 22 དེ་ནས་ལུག་ཐུག་གི་ཚིལ་ཏེ། རྔ་མ་ཚོན་པོ་དང་། ནང་ཁྲོལ་བཏུམས་པའི་ཚིལ་དང་མཆིན་པའི་ཐོག་གི་རྩ་རྒྱུས་དང་། མཁལ་མ་གཉིས་ཀ་དང་དེའི་སྟེང་གི་ཚིལ་དང་། བརླ་རྐང་གཡས་པ་བཅས་ཁྱོད་ཀྱིས་ལོངས་ཤིག དེ་ནི་བསྐོ་བར་བྱེད་པའི་ལུག་ཐུག་ཡིན་པའི་ཕྱིར་རོ། །  
\v 23 ཡང་དཀོན་མཆོག་ཡ་ཝཱེའི་སྤྱན་སྔ་རུ་ཡོད་པའི་སྐྱུར་མེད་བག་ལེབ་འཇོག་བྱེད་ཀྱི་གཟེབ་ལས་བག་ལེབ་གཅིག་དང་སྣུམ་གོར་གཅིག་དང་། བག་ལེབ་སྲབ་བུ་གཅིག་བཅས་ལོངས་ལ།  
\v 24 རྫས་དེ་ཐམས་ཅད་ཨ་རོན་དང་ཁོའི་བུ་རྣམས་ཀྱི་ལག་ཏུ་བཞག་ནས་གཡོབ་མཆོད་དུ་བྱས་ཏེ་དཀོན་མཆོག་ཡ་ཝཱེའི་སྤྱན་སྔར་ཕར་ཚུར་ལ་གཡོབ་བར་གྱིས།  
\v 25 ཡང་རྫས་དེ་དག་ཁོ་ཚོའི་ལག་ནས་ཕྱིར་བླངས་ཏེ་མཆོད་ཁྲིའི་ཁར་ཡོད་པའི་སྦྱིན་སྲེག་གི་སྟེང་དུ། དཀོན་མཆོག་ཡ་ཝཱེའི་སྤྱན་སྔར་དྲི་ཞིམ་གྱི་སྦྱིན་སྲེག་ཏུ་ཕུལ་ཞིག དེ་ནི་དཀོན་མཆོག་ཡ་ཝཱེ་ལ་ཕུལ་བའི་མེ་མཆོད་ཡིན་ནོ། །   
\p
\v 26 དེ་ནས་ཁྱོད་ཀྱིས་ཨ་རོན་མཆོད་དཔོན་དུ་བསྐོ་བར་བྱེད་པའི་ལུག་ཐུག་གི་བྲང་ཁོག་དེ་བླངས་ནས་གཡོབ་མཆོད་དུ་བྱས་ཏེ་དཀོན་མཆོག་ཡ་ཝཱེའི་སྤྱན་སྔར་ཕར་ཚུར་གཡོབ་བར་གྱིས། དེ་ནི་ཁྱོད་རང་གི་སྐལ་བ་ཡིན།  
\v 27 ཨ་རོན་དང་ཁོའི་བུ་རྣམས་བསྐོ་བར་བྱེད་པའི་ལུག་ཐུག་གི་ཆ་ཤས་ཏེ། ཕར་ཚུར་གཡོབ་བར་བྱེད་པའི་གཡོབ་མཆོད་ཡིན་པའི་བྲང་ཁོག་དང་། འདེགས་པར་བྱེད་པའི་འདེགས་མཆོད་ཡིན་པའི་བརླ་རྐང་གཉིས་ནི་དམ་པར་བྱེད་དགོས་ལ།  
\v 28 དེ་གཉིས་ནི་རྟག་ཏུ་ཡེས་ར་ཨེལ་པ་རྣམས་ལས་འབུལ་དགོས་ཤིང་ཨ་རོན་དང་ཁོའི་བུ་རྣམས་ཀྱི་སྐལ་བ་ཡིན་ཏེ། ཅི་ཡིན་ཞེ་ན། དེ་ནི་འདེགས་མཆོད་ཡིན་པས་སོ། །ཡེས་ར་ཨེལ་པ་རྣམས་ཀྱིས་དཀོན་མཆོག་ཡ་ཝཱེ་ལ་ཕུལ་བའི་ཞི་བདེའི་མཆོད་པ་ལས་ཨ་རོན་དང་ཁོའི་བུ་རྣམས་ལ་འདེགས་མཆོད་དུ་འབུལ་དགོས་ཏེ། དེ་ནི་དཀོན་མཆོག་ཡ་ཝཱེ་ལ་འབུལ་བའི་འདེགས་མཆོད་ཡིན་ནོ། །   
\p
\v 29 ཡང་ཨ་རོན་གྱི་ན་བཟའ་དམ་པ་རྣམས་རང་གི་བུ་རྒྱུད་རྣམས་ལ་འཐོབ་དགོས་ཤིང་། དེ་དག་ལ་སྣུམ་གྱིས་བྱུགས་པ་དང་མཆོད་དཔོན་དུ་བསྐོ་བའི་དུས་སུ་ན་བཟའ་དེ་དག་གྱོན་དགོས་པ་ཡིན།  
\v 30 ཨ་རོན་གྱི་བུ་རྣམས་ལས་ཁོའི་ཚབ་ཏུ་མཆོད་དཔོན་བྱེད་པའི་བུ་དེ་ནི། མཇལ་འཕྲད་གུར་མཆོག་གི་ནང་དུ་སོང་སྟེ་གནས་དམ་པ་རུ་ཞབས་ཕྱི་བྱེད་པའི་དུས་སུ། ན་བཟའ་དེ་རྣམས་ཉིན་བདུན་གྱི་རིང་ལ་གྱོན་དགོས་སོ། །   
\p
\v 31 ཡང་ཁྱོད་ཀྱིས་མཆོད་དཔོན་དུ་བསྐོ་བར་བྱེད་པའི་ལུག་ཐུག་ལོངས་ལ། དེའི་ཤ་ནི་གནས་མཆོག་ཅིག་ཏུ་བཙོ་དགོས་ཤིང་།  
\v 32 ཨ་རོན་དང་དེའི་བུ་རྣམས་ཀྱིས་ལུག་ཐུག་གི་ཤ་དང་གཟེབ་ནང་དུ་ཡོད་པའི་བག་ལེབ་ནི་མཇལ་འཕྲད་གུར་མཆོག་གི་ཕྱི་སྒོ་ཁ་རུ་བཟའ་དགོས།  
\v 33 མཆོད་དཔོན་དུ་བསྐོ་བར་བྱེད་པ་དང་དམ་པར་བྱེད་པའི་ཕྱིར་སྡིག་བཤགས་སུ་ཕུལ་བའི་རྫས་ནི་དམ་པ་ཡིན་པས། ཁོ་རྣམས་ཁོ་ན་ལས་མི་གཞན་སུ་ཞིག་གིས་ཀྱང་བཟའ་བར་མི་རུང་།  
\v 34 གལ་ཏེ་མཆོད་དཔོན་དུ་བསྐོ་བར་བྱེད་པའི་ཤ་དང་བག་ལེབ་ལས་སང་ཉིན་གྱི་བར་དུ་ལྷག་མ་ལུས་ན། ལྷག་མ་དེ་མེས་བསྲེག་དགོས་ཤིང་། དེ་དམ་པ་ཡིན་པས་བཟའ་བར་མི་རུང་ངོ་། །   
\p
\v 35 བདག་གིས་ཁྱོད་ལ་ཅི་དང་ཅི་བསྒོས་པ་བཞིན་ཨ་རོན་དང་དེའི་བུ་རྣམས་ལ་བྱོས་ཤིག ཉིན་བདུན་གྱི་རིང་དུ་བསྐོ་བར་བྱའོ། །  
\v 36 ཡང་སྡིག་པ་བཤག་པའི་ཕྱིར་ཁྱོད་ཀྱིས་ཉིན་རེ་བཞིན་གླང་ཐུག་ཅིག་སྡིག་བཤགས་མཆོད་པར་འབུལ་དགོས་ཤིང་། ཡང་མཆོད་ཁྲིའི་ཁར་སྡིག་བཤགས་ཕུལ་ནས་དེ་འདག་པར་བྱའོ། །ཡང་དམ་པར་བྱེད་པའི་ཕྱིར་དེ་ལ་འབྱུག་སྣུམ་གྱིས་བྱུགས་ཤིག  
\v 37 ཉིན་བདུན་གྱི་རིང་ལ་མཆོད་ཁྲི་དམ་པར་བྱེད་པའི་ཕྱིར་སྡིག་བཤགས་མཆོད་པ་འབུལ་དགོས་ལ། དེ་ལྟར་མཆོད་ཁྲི་ནི་ཐམས་ཅད་ལས་དམ་པ་ཡིན་དགོས་ཤིང་། སུ་དང་གང་གིས་མཆོད་ཁྲི་ལ་རེག་ན་དེ་དམ་པར་འགྱུར་བའོ། །   
\p
\v 38 ཁྱོད་ཀྱིས་མཆོད་ཁྲི་ལ་ཉིན་རེ་བཞིན་དུས་རྒྱུན་དུ་འབུལ་བྱ་ནི་འདི་ལྟ་སྟེ། ལུ་གུ་ལོ་གཅིག་ཅན་གཉིས་འབུལ་དགོས་ཤིང་།  
\v 39 ལུ་གུ་གཅིག་ནངས་མོའི་དུས་སུ་འབུལ་དགོས་ལ། ལུ་གུ་ཅིག་ཤོས་ས་སྲོས་ཀྱི་དུས་སུ་འབུལ་དགོས།  
\v 40 ཕྱེ་བཟང་པོ་ཨེ་ཕཱ་གང་གི་བཅུ་ཆ་གཅིག་ལ་སྣུམ་བརྡུངས་མ་རྫ་བུམ་\f + \ft འདིར་རྫ་བུམ་ཞེས་པར་མ་ཕྱི་ལས་ཡ་ཧུ་དཱའི་སྐད་དོད་དེ་ཧིན་ཞེས་མཐོང་ལ། སྣུམ་སོགས་གཤེར་གཟུགས་འཇལ་བྱེད་ཀྱི་ཡོ་བྱད་ཀྱི་མིང་སྟེ་ཧིན་གཅིག་ནི་སྤྱི་བྲེ་བཞི་ཙམ་ཡིན། \f*གང་གི་བཞི་ཆ་གཅིག་བསྲེས་ནས། ད་དུང་སྐྱེམས་མཆོད་ཀྱི་ཕྱིར་རྒུན་ཆང་རྫ་བུམ་གང་གི་བཞི་ཆ་གཅིག་བཅས་ཁྱོད་ཀྱིས་ལུ་གུ་གཅིག་དང་མཉམ་དུ་མཆོད་པར་འབུལ་དགོས།  
\v 41 ཡང་ལུ་གུ་ཅིག་ཤོས་དེ་ས་སྲོས་ཀྱི་དུས་སུ་འབུལ་དགོས་ལ། ནངས་མོའི་དུས་ལྟར་འབྲུ་རིགས་ཀྱི་མཆོད་པ་དང་སྐྱེམས་མཆོད་ཀྱི་ལུགས་ཇི་མ་ཇི་བཞིན་གྱིས། དཀོན་མཆོག་ཡ་ཝཱེ་ལ་དྲི་ཞིམ་གྱི་མེ་མཆོད་དུ་འབུལ་དགོས་ཤིང་།  
\v 42 དེ་ནི་ཁྱོད་ཀྱི་བུ་རྒྱུད་རྣམས་ཀྱིས་རྒྱུན་མི་ཆད་པར། དཀོན་མཆོག་ཡ་ཝཱེའི་སྤྱན་སྔ་སྟེ། མཇལ་འཕྲད་གུར་མཆོག་གི་སྒོ་ཁ་རུ་སྦྱིན་སྲེག་འབུལ་དགོས་པ་དེའོ། །གནས་དེར་ངས་ཁྱོད་ལ་གཏམ་སྨྲ་བའི་ཕྱིར་གནས་དེ་རུ་ཁྱོད་རྣམས་དང་འཕྲད་པར་འགྱུར།  
\v 43 དེར་ང་རང་ཡེས་ར་ཨེལ་པ་རྣམས་དང་ཕྲད་དེ། མཇལ་འཕྲད་གུར་མཆོག་ང་ཡི་གཟི་བརྗིད་ཀྱིས་དམ་པར་འགྱུར་རོ། །  
\v 44 ཡང་བདག་གིས་མཇལ་འཕྲད་གུར་མཆོག་དང་མཆོད་ཁྲི་དམ་པར་བྱའོ། །ཨ་རོན་དང་དེའི་བུ་རྣམས་ཀྱང་བདག་ལ་ཞབས་ཕྱི་བྱེད་པའི་མཆོད་དཔོན་དུ་དམ་པར་བྱའོ། །  
\v 45 ཡང་ང་ནི་ཡེས་ར་ཨེལ་པ་རྣམས་ཀྱི་དཀྱིལ་དུ་གནས་ཤིང་། དེ་དག་གི་དཀོན་མཆོག་ཡིན་པར་འགྱུར།  
\v 46 ང་རང་དེ་དག་གི་དཀྱིལ་དུ་གནས་པའི་ཆེད་དུ། བདག་ནི་ཁོ་རྣམས་ཨེ་ཅིབ་ཡུལ་ནས་ཕྱི་རུ་ཁྲིད་མཁན་ཡིན་ཞིང་། ཁོ་རྣམས་ཀྱི་དཀོན་མཆོག་ཡ་ཝཱེ་ཡིན་པ་དེ་དག་གིས་ཤེས་པར་འགྱུར་ལ། བདག་ནི་ཁོ་རྣམས་ཀྱི་དཀོན་མཆོག་ཡ་ཝཱེ་ཡིན་ཞེས་གསུངས་སོ། །   
\c 30
\cl ལེའུ་སུམ་ཅུ་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 སྤོས་ཁྲི་ཡི་སྐོར།  
\p
\v 1 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་སེང་ལྡེང་ཤིང་གིས་སྤོས་ཁྲི་ཞིག་འདི་ལྟར་བཟོ་དགོས་ཏེ།  
\v 2 དེའི་རིང་ཚད་ལ་ཁྲུ་གཅིག་དང་། ཞེང་ཚད་ལ་ཁྲུ་གཅིག་སྟེ་གྲུ་བཞི་མ་ཞིག་ཡིན་དགོས། ཡང་དེའི་མཐོ་ཚད་ལ་ཁྲུ་གཉིས་དང་། རུ་ཐུར་རྣམས་སྤོས་ཁྲི་དང་དངོས་པོ་གཅིག་ཏུ་སྦྲེལ་བར་བཟོས་ཤིག  
\v 3 དེའི་ཐོག་དང་ལོགས་བཞི་དང་རུ་ཐུར་རྣམས་གསེར་བཙོ་མས་གཡོགས་ཤིག དེའི་མཐའ་འཁོར་ལ་གསེར་གྱི་མུ་ཁྱུད་ཅིག་བཟོ་དགོས།  
\v 4 ཡང་གསེར་གྱི་ཨ་ལོང་གཉིས་བཟོ་དགོས་ཏེ་མུ་ཁྱུད་ཀྱི་འོག་ནས་ཁ་གཏད་ཀྱི་ལོགས་གཉིས་ཀར་སྦྱོར་དང་། དེ་ནི་རྒྱུག་པ་གཉིས་བསྐོན་ས་ཡིན་ལ། དེས་སྤོས་ཁྲི་འཁུར་དགོས་པའི་ཕྱིར་རོ། །  
\v 5 རྒྱུག་པ་དེ་གཉིས་སེང་ལྡེང་ཤིང་གིས་བཟོས་ལ་གསེར་གྱིས་གཡོགས་ཤིག  
\v 6 ཡང་དཔང་མཛད་ཤུར་སྒམ་དང་དེའི་སྟེང་དུ་ཡོད་པའི་ཐུགས་རྗེའི་བཞུགས་ཁྲིའི་མདུན་ས་སྟེ། ང་རང་ཁྱོད་དང་འཕྲད་པའི་གནས་དེའི་ཡོལ་བའི་སྔོན་དུ་སྤོས་ཀྱི་སྒྲོམ་དེ་ཞོག་ཅིག  
\v 7 ཞོགས་པ་རེ་རེ་བཞིན་ཨ་རོན་གྱིས་སྒྲོན་མེ་རྣམས་ལ་བདག་བྱེད་པའི་སྐབས་སུ། སྤོས་ཀྱི་སྒྲོམ་དུ་དྲི་ཞིམ་བདུག་སྤོས་བདུག་དགོས།  
\v 8 ཁོས་ས་སྲོས་ཀྱི་དུས་སུ་སྒྲོན་མེ་རྣམས་སྒྲོན་པའི་ཚེ། ཡང་སྤོས་བདུག་དགོས་ལ། དེ་ནི་དཀོན་མཆོག་ཡ་ཝཱེའི་སྤྱན་སྔར་ཁྱོད་རྣམས་མི་རབས་ནས་མི་རབས་བར་རྒྱུན་ཆད་མེད་པའི་བདུག་སྤོས་ཡིན་ནོ། །  
\v 9 འོན་ཀྱང་སྤོས་ཁྲི་འདིའི་སྟེང་དུ་སྤོས་ཡ་མ་ཟུང་འབུལ་མི་རུང་། ཡང་སྦྱིན་སྲེག་གམ། འབྲུ་རིགས་ཀྱི་མཆོད་པའམ། སྐྱེམས་མཆོད་བཅས་དེ་ལ་འབུལ་མི་རུང་།  
\v 10 ཨ་རོན་གྱིས་ལོ་རེར་ཐེངས་གཅིག་ལ་དེའི་རུ་ཐུར་རྣམས་ཀྱི་སྟེང་དུ་སྡིག་པ་བཤགས་པའི་ཆོ་ག་བྱེད་དགོས་ཏེ། ཁྱོད་རྣམས་ཀྱི་མི་རབས་ནས་མི་རབས་བར། ཁོས་སྡིག་བཤགས་མཆོད་པའི་ཁྲག་གིས་དེའི་ཁར་ཆོ་ག་དེ་བྱེད་དགོས་ལ། སྤོས་ཁྲི་དེ་ནི་དཀོན་མཆོག་ཡ་ཝཱེའི་སྤྱན་སྔར་ཀུན་ལས་དམ་པ་ལགས་ཞེས་གསུངས་སོ། །   
\s1 བླུ་རིན་གྱི་སྐོར།  
\p
\v 11 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 12 ཁྱོད་ཀྱིས་ཡེས་ར་ཨེལ་པ་རྣམས་ཚང་རྩིས་བྱེད་པའི་ཚེ། དེ་དག་ལ་ཆག་སྒོ་མི་འབྱུང་བའི་ཕྱིར། སྐབས་དེར་ཁོ་ཚོ་མི་རེ་རེས་རང་གི་ཚེ་སྲོག་གི་ཕྱིར་བླུ་རིན་ཞིག་དཀོན་མཆོག་ཡ་ཝཱེ་ལ་འབུལ་དགོས།  
\v 13 དེ་དག་གི་འབུལ་བ་ནི་འདི་ལྟར། ཚང་རྩིས་བྱས་པའི་མི་རེས་གནས་མཆོག་གི་སྲང་བཞིན་དུ་དངུལ་སྲང་ཕྱེད་ཀ་འབུལ་དགོས། དངུལ་སྲང་ཕྱེད་ཀ་དེ་ནི་དཀོན་མཆོག་ཡ་ཝཱེ་ལ་ཕུལ་བའི་འབུལ་བ་ཡིན་ཏེ། དངུལ་སྲང་གཅིག་ནི་གཱེ་ར་ \f + \ft གཱེ་ར་ཞེས་པ་ནི་གནའ་བོའི་ཡ་ཧུ་དཱ་མི་རིགས་ཀྱི་གསེར་དངུལ་འཇལ་བྱེད་ཅིག་ཡིན། \f*ཉི་ཤུ་དང་འདྲ།  
\v 14 ཚང་རྩིས་བྱས་པའི་མི་ཐམས་ཅད་ལས། ལོ་ཉི་ཤུ་དང་དེ་ལས་བརྒལ་བ་ཚོས་འབུལ་བ་དེ་དཀོན་མཆོག་ཡ་ཝཱེ་ལ་འབུལ་དགོས།  
\v 15 ཁྱོད་ཅག་གིས་ཚེ་སྲོག་བླུ་བའི་ཕྱིར་དཀོན་མཆོག་ཡ་ཝཱེ་ལ་འབུལ་བ་འབུལ་བའི་ཚེ། དངུལ་སྲང་ཕྱེད་ཀ་མ་གཏོགས། མི་ཕྱུག་པོ་ཡིན་ཡང་ལྷག་མ་མི་འབུལ་ལ། མི་དབུལ་པོ་ཡིན་ཡང་ཉུང་དུ་མི་འཕྲི་བར་གྱིས།  
\v 16 ཡང་ཡེས་ར་ཨེལ་པ་རྣམས་ལས་བླུ་རིན་དེ་བསྡུས་ནས་མཇལ་འཕྲད་གུར་མཆོག་གི་ཞབས་འདེགས་ཕྱིར་ཞོག་ཅིག དེ་ལྟར་ཁྱོད་རྣམས་ཀྱི་ཚེ་སྲོག་བླུ་བ་དེ་དཀོན་མཆོག་ཡ་ཝཱེའི་སྤྱན་སྔར་ཡེས་ར་ཨེལ་པ་རྣམས་ལ་རྗེས་དྲན་ཡོད་པར་བྱའོ་ཞེས་གསུངས་སོ། །   
\s1 གཞོང་པའི་སྐོར།  
\p
\v 17 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 18 ཁྱོད་རྣམས་བཀྲུ་བའི་ཕྱིར་དུ་ལི་ཡི་གཞོང་པ་ཞིག་དང་དེའི་སྟེགས་བུ་ཞིག་བཟོས་ལ། མཇལ་འཕྲད་གུར་མཆོག་དང་མཆོད་ཁྲིའི་བར་དུ་བཞག་ནས་དེའི་ནང་དུ་ཆུ་བླུགས་ཤིག  
\v 19 ཨ་རོན་དང་དེའི་བུ་རྣམས་ཀྱིས་གཞོང་པ་འདིར་ལག་པ་དང་རྐང་པ་བཀྲུ་དགོས།  
\v 20 དེ་དག་མཇལ་འཕྲད་གུར་མཆོག་གི་ནང་དུ་འཇུག་པའམ། ཞབས་ཕྱི་བྱེད་དུ་མཆོད་ཁྲི་དང་ཉེ་བར་འོངས་ནས་དཀོན་མཆོག་ཡ་ཝཱེ་ལ་མེ་མཆོད་འབུལ་བའི་ཚེ། འཆི་བར་མི་འགྱུར་བའི་ཕྱིར་ཆུ་དེས་བཀྲུ་དགོས་པ་ཡིན།  
\v 21 རང་རང་གི་ལག་པ་དང་རྐང་པ་གཉིས་བཀྲུས་ན་ཁོ་ཚོ་འཆི་བར་མི་འགྱུར་ཞིང་། དེ་ནི་ཨ་རོན་དང་ཁོའི་བུ་རྒྱུད་རྣམས་ཀྱི་མི་རབས་ནས་མི་རབས་བར་གཏན་དུ་གནས་པའི་སྒྲིག་ཁྲིམས་ཤིག་ཏུ་འགྱུར་དགོས་ཞེས་གསུངས་སོ། །   
\s1 འབྱུག་སྣུམ་དམ་པའི་སྐོར།  
\p
\v 22 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 23 ཁྱོད་ཀྱིས་བསུང་རྫས་རྣམས་ཀྱི་མཆོག་སྟེ། རང་བཞིན་གྱིས་གཤེར་བའི་གུ་གུལ་སྲང་ལྔ་བརྒྱ་དང་ཤིང་ཚ་སྲང་ཉིས་བརྒྱ་དང་ལྔ་བཅུ་ལེན་དགོས་ལ། ཡང་སྲང་ཉིས་བརྒྱ་དང་ལྔ་བཅུ་ཡོད་པའི་ཤུ་དག་དང་།  
\v 24 གནས་མཆོག་གི་སྲང་བཞིན་དུ་ཁ་ཚི་ཡཱ་སྲང་ལྔ་བརྒྱ་དང་། སྐྱུ་རུ་རའི་འཚིར་སྣུམ་རྫ་བུམ་གང་ལོངས་དང་།  
\v 25 རྒྱུ་དེས་འབྱུག་སྣུམ་དམ་པ་བཟོ་དགོས་ཤིང་། དེ་ནི་སྤོས་ཆུ་བཟོ་མཁན་གྱི་ལུགས་བཞིན་དུ་བསྡེབ་པ་སྟེ་འབྱུག་སྣུམ་དམ་པ་ཡིན་དགོས།  
\v 26 དེ་ཡིས་མཇལ་འཕྲད་གུར་མཆོག་དང་དཔང་མཛད་ཤུར་སྒམ་དང་།  
\v 27 སྒྲོག་ཙེ་དང་དེའི་ཡོ་བྱད་ཐམས་ཅད་དང་། སྒྲོན་སྟེགས་དང་དེའི་ཡོ་བྱད་མཐའ་དག་དང་། དེ་མིན་སྤོས་ཁྲི་དང་།  
\v 28 སྦྱིན་སྲེག་གི་མཆོད་ཁྲི་དང་དེའི་ཡོ་བྱད་ཀུན། ཁྲུས་གཞོང་དང་དེའི་སྟེགས་བུ་ལའང་འབྱུག་དགོས།  
\v 29 དངོས་པོ་དེ་རྣམས་ནི་ཀུན་ལས་དམ་པར་འགྱུར་བའི་ཕྱིར་དེ་ལྟར་དམ་པར་བྱོས་ཤིག སུ་དང་གང་གིས་དེ་དག་ལ་རེག་ན་དམ་པར་འགྱུར།  
\v 30 ཁྱོད་ཀྱིས་ཨ་རོན་དང་དེའི་བུ་རྣམས་ལ་འབྱུག་དགོས་ཤིང་། དེ་དག་གིས་ང་རང་ལ་མཆོད་དཔོན་གྱི་ཞབས་ཕྱི་བྱེད་པའི་ཕྱིར་དམ་པར་བྱོས་ཤིག  
\v 31 ཡང་ཁྱོད་ཀྱིས་ཡེས་ར་ཨེལ་པ་རྣམས་ལ་འདི་སྐད་སྨྲོས་ཤིག འདི་ནི་ཁྱོད་ཅག་གི་མི་རབས་ནས་མི་རབས་བར་བདག་གི་ཕྱིར་འབྱུག་སྣུམ་དམ་པ་ཡིན་དགོས།  
\v 32 དེ་མི་ཡི་སྟེང་དུ་མི་ལྡུག་པར་གྱིས། ཁྱོད་རྣམས་ཀྱིས་དེ་དང་གཅིག་པའི་སྦྱོར་ལུགས་ཀྱིས་དེ་དང་མཚུངས་པའང་བཟོ་བར་མི་བྱ་སྟེ། ཅི་ཡིན་ཞེ་ན། དེ་ནི་དམ་པ་ཡིན་པས་ཁྱོད་ཅག་གིས་ཀྱང་དེ་དམ་པར་བརྩི་དགོས།  
\v 33 སུས་ཀྱང་དེ་དང་འདྲ་བའི་འབྱུག་སྣུམ་གྱི་སྦྱོར་ལུགས་བྱེད་པའམ། དེ་ཡིས་མི་གཞན་ཞིག་ལ་བྱུགས་པ་སོགས་གང་བྱས་ཀྱང་། མི་དེ་རང་གི་མི་རྣམས་ལས་འཕུད་དགོས་ཞེས་པའོ་གསུངས་སོ། །   
\s1 སྤོས་ཀྱི་སྐོར།  
\p
\v 34 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་བསུང་རྫས་ཏེ། ཐང་སྨན་ཤིང་ཚྭའི་སྣུམ་དང་། དབང་ལག་དང་། གན་ངྷ་ར་ས་དང་སྤོས་དཀར་སླད་མེད་བཅས་མང་ཉུང་མེད་པར་ལོངས་ལ།  
\v 35 སྤོས་ཆུ་བཟོ་མཁན་གྱི་ལུགས་བཞིན་དུ་བསྡེབ་པ་དང་། དེ་ལ་ཚྭ་བསྲེས་ནས་སླད་མེད་པ་དང་དམ་པར་མཛད་དེ་སྤོས་བཟོ་བར་བྱའོ། །  
\v 36 དེ་ལས་སྤོས་ཁ་ཤས་ཕྱེ་མར་བཏགས་ནས། མཇལ་འཕྲད་གུར་མཆོག་གི་ནང་དུ་དཔང་མཛད་ཤུར་སྒམ་གྱི་མདུན་དུ་ང་རང་ཁྱོད་དང་འཕྲད་སར་ཞོག་ཅིག དེ་ནི་ཁྱོད་ཅག་གི་ཕྱིར་ཀུན་ལས་དམ་པ་ཡིན་དགོས།  
\v 37 ཡང་ཁྱོད་ཀྱིས་སྤོས་དེའི་སྦྱོར་ལུགས་བཞིན་དུ་ཁྱོད་ཅག་གི་ཆེད་དུ་སྤོས་བཟོ་མི་རུང་ལ། དཀོན་མཆོག་ཡ་ཝཱེའི་ཕྱིར་དེ་ནི་ཁྱོད་ཀྱིས་དམ་པར་བརྩི་དགོས།  
\v 38 སྤོས་དྲིར་བསྣམ་པའི་ཕྱིར་དེ་དང་འདྲ་བ་ཞིག་བཟོ་བའི་མི་སུ་ཡིན་ཡང་རང་གི་མི་རྣམས་ལས་འཕུད་དགོས་ཞེས་གསུངས་སོ། །   
\c 31
\cl ལེའུ་སོ་གཅིག་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 བཟོ་བོ་མཁས་པའི་སྐོར།  
\p
\v 1 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 2 ལྟོས་དང་། བདག་གིས་ཡ་ཧུ་དཱ་ཚོ་པ་ནས་ཧུ་རཱའི་བུ་ཨོའུ་རེལ་དེའི་བུ་པི་ཟིད་ཨེལ་གྱི་མིང་ནས་བོས་ཤིང་།  
\v 3 ཡང་ངས་ཁོ་ལ་དཀོན་མཆོག་གི་ཐུགས་ཉིད་ཀྱིས་ཁྱབ་པར་བྱས་ཏེ། ཁོ་ལ་ཤེས་རབ་དང་སྤྱང་གྲུང་ལྡན་ཞིང་། བློ་རིག་མངའ་བ་དང་། ལག་རྩལ་སྣ་ཚོགས་བྱང་ཆུབ་པར་བྱས།  
\v 4 དེ་ནི་ལག་རྩལ་ཅན་གྱི་ལས་རྣམས་ཇུས་འགོད་བྱེད་པའི་ཆེད་དུ་ཡིན་ལ། གསེར་དངུལ་ལི་གསུམ་གྱི་མགར་བྱེད་པ་དང་།  
\v 5 རིན་པོ་ཆེ་དག་བརྐོ་གཏུབ་བྱེད་པ་དང་ཕྲ་རྒྱག་པ། ཤིང་བརྐོ་བ། ལག་རྩལ་སྣ་ཚོགས་ཀྱི་ལས་བྱེད་པའི་ཕྱིར་ཡིན།  
\v 6 ཡང་ལྟོས་དང་། ངས་ཁོ་དང་ལྷན་དུ་དཱན་གྱི་ཚོ་པ་ནས་ཨ་ཧི་སཱ་མག་གི་བུ་ཨོ་ཧོ་ལི་ཨབ་བྱ་བ་ཁོའི་ལས་གྲོགས་སུ་བདམས་ཤིང་། ཁྱོད་ལ་སྨྲས་པ་མཐའ་དག་བཟོ་བའི་ཕྱིར། བདག་གིས་བཟོ་བོ་མཁས་པ་ཐམས་ཅད་ལའང་ཤེས་རབ་མངའ་བར་བྱས་ཏེ།  
\v 7 མཇལ་འཕྲད་གུར་མཆོག་དང་། དཔང་མཛད་ཤུར་སྒམ་དང་། དེའི་སྟེང་དུ་ཡོད་པའི་ཐུགས་རྗེའི་བཞུགས་ཁྲི་དང་། གུར་མཆོག་གི་དངོས་པོ་ཐམས་ཅད་དང་།  
\v 8 སྒྲོག་ཙེ་དང་དེའི་ཡོ་བྱད་རྣམས་དང་། གསེར་བཙོ་མའི་སྒྲོན་སྟེགས་དང་དེའི་ཡོ་བྱད་རྣམས་དང་། སྤོས་ཁྲི་དང་།  
\v 9 སྦྱིན་སྲེག་གི་མཆོད་ཁྲི་དང་དེའི་ཡོ་བྱད་ཐམས་ཅད་དང་། ཁྲུས་གཞོང་དང་དེའི་སྟེགས་བུ་དང་།  
\v 10 ཐགས་ཞིབ་མོར་བཏགས་པའི་གོས་རྣམས་དང་། མཆོད་དཔོན་ཨ་རོན་གྱི་ན་བཟའ་དམ་པ་རྣམས་དང་ཁོའི་བུ་རྣམས་ཀྱིས་མཆོད་དཔོན་གྱི་ཞབས་ཕྱི་བྱེད་པའི་ན་བཟའ་རྣམས་དང་།  
\v 11 འབྱུག་སྣུམ་དང་དྲི་ཞིམ་བདུག་སྤོས་གནས་དམ་པའི་ཕྱིར་སྦྱར་བ་བཅས་ནི་ངས་ཁྱོད་ལ་ཅི་དང་ཅི་བསྒོས་པ་བཞིན་དུ་དེ་དག་གིས་བཟོ་དགོས་ཞེས་གསུངས་སོ། །   
\s1 ངལ་གསོ་བའི་ཉིན་མོའི་སྐོར།  
\p
\v 12 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ།  
\v 13 ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྨྲ་བར་གྱིས། བདག་གི་ངལ་གསོ་བའི་ཉིན་རྣམས་སྲུངས་ཤིག ཅི་ཡིན་ཞེ་ན། བདག་ནི་ཁྱོད་ཅག་དམ་པར་བྱེད་པའི་ཡ་ཝཱེ་ཡིན་པ་ཤེས་ཐུབ་པའི་ཕྱིར། ཉིན་དེ་ནི་ང་དང་ཁྱོད་ཅག་གི་མི་རབས་ནས་མི་རབས་བར་གྱི་རྟགས་ཤིག་ཡིན་ནོ། །  
\v 14 ངལ་གསོ་བའི་ཉིན་མོ་ནི་ཁྱོད་ཅག་གི་ཕྱིར་དམ་པ་ཡིན་པས་སྲུངས་ཤིག ཁྲིམས་དེ་མི་རྩི་མཁན་ཐམས་ཅད་སྲོག་དང་འཕྲལ་བར་གྱིས། ཉིན་མོ་དེ་ལ་ལས་ཀ་བྱེད་མཁན་སུ་ཡིན་ཡང་རང་གི་མི་རྣམས་ལས་འཕུད་པར་བྱའོ། །  
\v 15 ཉིན་དྲུག་གི་རིང་ལ་ལས་ཀ་བྱེད་ཅིང་ཉིན་བདུན་པ་ནི་ངལ་གསོ་ཡོངས་སུ་རྫོགས་པའི་ཉིན་མོ་ཡིན་ཏེ། དཀོན་མཆོག་ཡ་ཝཱེའི་ཕྱིར་ངལ་གསོ་བའི་ཉིན་དམ་པ་ཡིན། ངལ་གསོ་བའི་ཉིན་མོར་ལས་ཀ་བྱེད་མཁན་འཆི་དགོས་པ་ཡིན།  
\v 16 དེ་བས་ན་ཡེས་ར་ཨེལ་པ་རྣམས་ཀྱིས་ངལ་གསོ་བའི་ཉིན་བསྲུང་དགོས་ཤིང་། དེ་དག་གི་བུ་རྒྱུད་རྣམས་ཀྱིས་ཀྱང་དུས་གཏན་གྱི་ཁ་ཆད་འདི་འགྱུར་བ་མེད་པར་བསྲུང་དགོས།  
\v 17 དེ་ནི་ང་དང་ཡེས་ར་ཨེལ་པའི་བར་གྱི་གཏན་དུ་གནས་པའི་རྟགས་ཤིག་ཡིན། ཅིའི་ཕྱིར་ཞེ་ན། ཉིན་དྲུག་གི་རིང་ལ་དཀོན་མཆོག་ཡ་ཝཱེས་ནམ་མཁའ་དང་ས་གཞི་བཀོད་ཅིང་། ཉིན་བདུན་པར་ངལ་གསོ་མཛད་ནས་ཐུགས་དལ་བར་བཞུགས་པ་ཡིན་ཞེས་སྨྲ་དགོས་པར་གསུངས་སོ། །  
\v 18 ཡང་ཁོང་གིས་སི་ནཱ་རི་བོར་མོ་ཤེ་ལ་གསུང་གླེང་མཛད་ཟིན་ཏེ། དཔང་པོའི་རྡོ་ལེབ་གཉིས་ཏེ་དཀོན་མཆོག་གི་ཕྱག་མཛུབ་ཀྱིས་ཡི་གེར་བཀོད་པ་ཁོ་ལ་གནང་ངོ་། །   
\c 32
\cl ལེའུ་སོ་གཉིས་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 གསེར་གྱི་བ་ཕྲུག  
\p
\v 1 ཡང་མོ་ཤེ་ཡིས་རི་ནས་འབབ་པའི་དུས་ཚོད་འགོར་འགྱང་བྱས་པ་མི་རྣམས་ཀྱིས་ཤེས་ཏེ་ཁོ་ཚོ་ཨ་རོན་གྱི་མདུན་དུ་འཛོམས་ནས་འདི་ལྟར། ངེད་ཅག་ཨེ་ཅིབ་ཡུལ་ནས་ཕྱི་རུ་ཁྲིད་མཁན་མོ་ཤེ་དེ་ལ་ཅི་ཞིག་བྱུང་བ་མི་ཤེས་པས། ད་ལངས་ནས་ངེད་ཅག་ལ་ལམ་སྣ་འདྲེན་པའི་ལྷ་སྐུ་བཟོས་ཤིག་ཅེས་སྨྲས་ཤིང་།  
\v 2 ཨ་རོན་ན་རེ། ཁྱོད་ཅག་གིས་རང་གི་ཆུང་མ་དང་བུ་བུ་མོ་དག་གི་གསེར་གྱི་རྣ་ལུང་རྣམས་བླངས་ནས་ངའི་མདུན་དུ་ཁྱེར་ཤོག་ཅིག་ཅེས་སྨྲས་པ་ལ།  
\v 3 མི་ཐམས་ཅད་ཀྱིས་གསེར་གྱི་རྣ་ལོང་རྣམས་བླངས་ནས་ཨ་རོན་གྱི་མདུན་དུ་ཁྱེར་འོངས།  
\v 4 ཁོས་དེ་དག་གི་ལག་ནས་བླངས་ཤིང་གཟོང་ཁ་བསྐོར་ཏེ་བ་ཕྲུག་གི་སྐུ་བརྙན་ཞིག་བླུགས་པ་དང་། དེ་དག་གིས། ཀྱེ་ཡེས་ར་ཨེལ་པ་རྣམས། འདི་ནི་ཁྱོད་ཅག་ཨེ་ཅིབ་ཡུལ་ནས་ཕྱི་རུ་ཁྲིད་པའི་ལྷ་ལགས་སོ་ཞེས་སྨྲས།  
\v 5 ཨ་རོན་གྱིས་དེ་མཐོང་བ་དང་། བ་ཕྲུག་གི་སྐུ་བརྙན་མདུན་དུ་མཆོད་ཁྲི་ཞིག་བརྩིགས་ནས། སང་ཉིན་ནི་དཀོན་མཆོག་ཡ་ཝཱེའི་དུས་ཆེན་ཡིན་ཞེས་བསྒྲགས།  
\v 6 དེའི་ཕྱི་ཉིན་ཐོ་རངས་ཁོ་རྣམས་ཡར་ལངས་ནས་སྦྱིན་སྲེག་དང་ཞི་བདེའི་མཆོད་པ་ཕུལ་ཏེ། མར་བསྡད་ནས་བཟའ་བཏུང་ལ་རོལ་བ་དང་ཡར་ལངས་ནས་རྩེད་མོ་རྩེས་སོ། །   
\p
\v 7 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་མྱུར་དུ་རི་ལས་བོབས་ཤིག ཁྱོད་ཀྱིས་ཨེ་ཅིབ་ཡུལ་ནས་ཕྱི་རུ་ཁྲིད་འོངས་པའི་མི་རྣམས་ཀྱིས་སྤྱོད་པ་ཐ་ཤལ་བ་བྱས་ཡོད།  
\v 8 དེ་དག་གིས་མྱུར་བ་མྱུར་དུ་ངས་བསྟན་པའི་ལམ་དེ་ལོགས་སུ་བཞག་ཅིང་། རང་གི་ཆེད་དུ་བ་ཕྲུག་གི་སྐུ་བླུགས་ནས་དེ་ལ་ཕྱག་བཙལ་བ་དང་མཆོད་པ་ཕུལ་ནས་ན་རེ། ཀྱེ་ཡེས་ར་ཨེལ་པ་རྣམས། འདི་ནི་ཁྱོད་ཅག་ཨེ་ཅིབ་ཡུལ་ནས་ཕྱི་རུ་ཁྲིད་པའི་ལྷ་ལགས་སོ་ཞེས་སྨྲ་བཞིན་འདུག་ཅེས་གསུངས་པ་དང་།  
\v 9 ཡང་འདི་སྐད་དུ། བདག་གིས་མི་འདི་རྣམས་ལ་བལྟས་ཤིང་། ཀྱེ་ཧོ། དངོས་གནས་འབངས་གཉའ་རེངས་ཤིག་འདུག  
\v 10 དེ་བས་ན་ངའི་ཁོང་ཁྲོ་དེ་དག་གི་ཕྱོགས་སུ་འབར་ནས་དེ་དག་མེད་པར་གཏོང་བའི་ཕྱིར་དུ། ང་ནི་རང་དགར་བསྐྱུར་ཞོག ངས་ཁྱོད་རང་ཁོ་ནའི་བུ་རྒྱུད་ནི་རྒྱལ་ཁབ་ཆེན་པོ་ཞིག་ཏུ་འགྱུར་བར་བྱ་ཞེས་གསུངས་སོ། །   
\p
\v 11 དེ་ནས་མོ་ཤེ་ཡིས་རང་གི་དཀོན་མཆོག་ཡ་ཝཱེ་ལ་ནན་གྱིས་ཞུས་པ་ནི། ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་ནུས་མཐུ་ཆེ་ཞིང་སྟོབས་དང་ལྡན་པའི་ཕྱག་གིས་ཨེ་ཅིབ་ཡུལ་ནས་ཕྱི་རུ་ཁྲིད་འོངས་པའི་རང་གི་འབངས་མི་ལ། ཁྱེད་རང་ཐུགས་རབ་ཏུ་ཁྲོ་བ་ཅི་ཡིན་ནམ།  
\v 12 ཅིའི་ཕྱིར་མ་འོངས་པར་ཨེ་ཅིབ་པ་རྣམས་ལ། དཀོན་མཆོག་གིས་དམིགས་ཡུལ་ངན་པ་བཅངས་ནས་ཡེས་ར་ཨེལ་པ་རྣམས་ཕྱི་རུ་ཁྲིད་དེ། རི་བོ་ནས་བསད་དེ་ས་སྟེང་ནས་མེད་པར་མཛད་པའི་ཕྱིར་ཡིན་ཞེས་སྨྲ་རུ་འཇུག་གམ། ཁྱེད་ཀྱི་ཐུགས་ཁྲོ་བའི་མེ་ལྕེ་གཞིལ་བར་མཁྱེན། ཉིད་ཀྱི་འབངས་མི་ལ་གནོད་འཚེ་གཏོང་བར་དགོངས་ཀྱང་ཐུགས་ལ་སྙིང་རྗེ་ཡོད་པར་ཞུ།  
\v 13 ཁྱེད་ཀྱི་ཞབས་ཕྱི་རྣམས་ཏེ་ཨབ་ར་ཧམ་དང་། ཨི་སཱག་དང་། ཡེས་ར་ཨེལ་བཅས་ཐུགས་ལ་དྲན་དུ་གསོལ། སྔར་ཁྱེད་ཀྱིས་རང་ཉིད་དཔང་དུ་བཙུགས་ནས་དེ་དག་ལ་འདི་སྐད་དུ། ངས་ཁྱོད་ཅག་གི་བུ་རྒྱུད་ནམ་མཁའི་སྐར་མའི་གྲངས་ཙམ་དུ་སྤེལ་ཏེ། ངས་ཁས་བླངས་པའི་ས་ཐམས་ཅད་ཁྱོད་ཅག་གི་བུ་རྒྱུད་ལ་སྦྱིན་པར་འགྱུར་ཞིང་། ཁོ་རྣམས་ལ་རྟག་ཏུ་གནས་པའི་ནོར་སྐལ་དུ་འཐོབ་པར་ངེས་ཞེས་གསུངས་ཡོད་ཅེས་ཞུས་པས།  
\v 14 དཀོན་མཆོག་ཡ་ཝཱེའི་ཐུགས་འགྱུར་ནས་སྔར་གསུངས་པའི་གནོད་འཚེ་དེ་རང་གི་འབངས་མི་ལ་ཕོག་པར་མ་མཛད་དོ། །   
\p
\v 15 དེ་ནས་མོ་ཤེ་ཁ་ཕྱིར་འཁོར་ནས་རི་ལས་བབས་ཤིང་། དཔང་པོའི་རྡོ་ལེབ་གཉིས་ལག་ཏུ་ཁྱེར་བ་དང་། དེ་གཉིས་ཀྱི་ངོས་གཉིས་ལ་ཡི་གེ་བྲིས་འདུག་པ་སྟེ་མདུན་རྒྱབ་གཉིས་ལ་ཡི་གེ་བྲིས་ཡོད་ལ།  
\v 16 རྡོ་ལེབ་གཉིས་ནི་དཀོན་མཆོག་གིས་བཟོས་པ་དང་། ཡི་གེ་ནི་དཀོན་མཆོག་གིས་རྡོ་ལེབ་གཉིས་སུ་བརྐོས་ནས་བྲིས་ཡོད།  
\v 17 ཡང་ཡོ་ཤུ་ཨ་ཡིས་མི་རྣམས་ཀྱིས་སྐད་རྒྱག་པའི་འུར་ཟིང་ཐོས་ཏེ་མོ་ཤེ་ལ། སྒར་གྱི་ནང་དུ་དམག་འཁྲུག་གི་སྐད་སྒྲ་སྒྲོག་གིན་འདུག་ཅེས་པར།  
\v 18 མོ་ཤེ་ན་རེ། དེ་ནི་གཡུལ་ལས་རྒྱལ་བ་རྣམས་ཀྱི་སྒྲ་མ་ཡིན་ལ་གཡུལ་ལས་ཕམ་པ་རྣམས་ཀྱི་སྒྲ་ཡང་མ་ཡིན་པར། བདག་གིས་ཐོས་པ་མི་རྣམས་ཀྱིས་གླུ་ལེན་གྱིན་པའི་སྒྲ་རེད་ཅེས་སྨྲས་སོ། །   
\p
\v 19 དེ་ནས་མོ་ཤེ་སྒར་དང་ཉེ་བར་སླེབས་ཚེ་བ་ཕྲུག་དེ་དང་ཡང་མི་རྣམས་ཀྱིས་བྲོ་འཁྲབ་པ་མཐོང་ནས། ཁོང་ཁྲོ་རབ་ཏུ་འབར་ཞིང་རྡོ་ལེབ་གཉིས་ལག་ནས་རི་འདབས་སུ་གཡུགས་ཏེ་བཅག་པ་དང་།  
\v 20 ཡང་དེ་ཚོས་བཟོས་པའི་བ་ཕྲུག་མེར་བསྲེགས་པ་དང་རྡུལ་དུ་བཏགས་ནས་ཆུར་བཏབ་སྟེ། ཡེས་ར་ཨེལ་པ་རྣམས་ལ་འཐུང་དུ་བཅུག  
\v 21 དེ་ནས་མོ་ཤེ་ཡིས་ཨ་རོན་ལ། ཁྱོད་ཀྱིས་མི་འདི་རྣམས་ཀྱི་སྟེང་ལ་སྡིག་པ་ཆེན་པོ་དེ་ལྟ་བུ་ཞིག་འདྲེན་པའི་རྒྱུ་མཚན་ཅི། འབངས་ཀྱིས་ཁྱོད་ལ་ཅི་ཞིག་བྱས་སམ་ཞེས་སྨྲས་པ་ལ།  
\v 22 ཨ་རོན་ན་རེ། ང་ཡི་བདག་པོ་ལགས། ཐུགས་རྒྱལ་མི་བཞེངས་པར་ཞུ། འབངས་འདིའི་བློ་ཁ་ངན་པར་ཕྱོགས་ཡོད་པ་ཁྱེད་ཀྱིས་མཁྱེན་གསལ་ལྟར།  
\v 23 དེ་དག་གིས་ང་ལ་འདི་ལྟར། ངེད་ཅག་ཨེ་ཅིབ་ཡུལ་ནས་ཕྱི་རུ་ཁྲིད་མཁན་མོ་ཤེ་དེ་ལ་ཅི་ཞིག་བྱུང་བ་མི་ཤེས་པས། ངེད་ཅག་ལ་ལམ་སྣ་འདྲེན་པའི་ལྷ་སྐུ་བཟོས་ཤིག་ཅེས་སྨྲས་ཤིང་།  
\v 24 ཡང་ངས་དེ་དག་ལ། སུ་ལ་གསེར་ཡོད་པ་དེ་བླངས་ནས་ཁྱེར་ཤོག་ཅེས་སྨྲས་པ་དང་། ཁོ་ཚོས་ང་རང་ལ་སྤྲད་ཅིང་། ངས་གསེར་རྣམས་མེ་རུ་གཡུགས་ནས་བ་ཕྲུག་འདི་བྱུང་བ་ཡིན་ཞེས་སྨྲས་སོ། །   
\p
\v 25 མོ་ཤེ་ཡིས་མི་རྣམས་ལང་ཤོར་དུ་སོང་བ་མཐོང་བའི་ཚེ། ཨ་རོན་གྱིས་ཁོ་ཚོ་ལང་ཤོར་དུ་འགྲོ་བར་བཅུག་སྟེ། རང་གི་དགྲ་བོ་དག་གི་གད་མོའི་རྒྱུ་རུ་གྱུར་ཡོད་པས།  
\v 26 མོ་ཤེ་སྒར་གྱི་སྒོ་ཁ་རུ་འགྲེང་སྟེ། སུ་ཞིག་དཀོན་མཆོག་ཡ་ཝཱེའི་ཕྱོགས་བྱེད་པ་དེ་ཚུར་ཤོག་ཅིག་ཅེས་སྨྲས་པ་ན། ལེ་ཝིའི་བུ་རྒྱུད་ཐམས་ཅད་ཁོའི་དྲུང་དུ་འདུས།  
\v 27 ཡང་ཁོས་དེ་དག་ལ་འདི་ལྟར། ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། མི་རེ་རེས་རང་གི་རལ་གྲི་རྐེད་ལ་བཏགས་ནས་སྒར་གྱི་སྒོ་འདི་ནས་སྒོ་དེའི་བར་དུ་ཕར་ཚུར་སོང་ལ། མི་རེ་རེས་རང་གི་སྤུན་དང་། རང་གི་གྲོགས་པོ་དང་། རང་གི་ཁྱིམ་མཚེས་སོད་ཅིག་ཅེས་བཀའ་བསྩལ་པ་ལ།  
\v 28 ལེ་ཝིའི་བུ་རྒྱུད་རྣམས་ཀྱིས་མོ་ཤེའི་བཀའ་བཞིན་དུ་བྱས་པས། ཉིན་དེར་མི་རྣམས་ལས་མི་སུམ་སྟོང་བསད།  
\v 29 ཡང་མོ་ཤེ་ཡིས་དེ་རྣམས་ལ་འདི་ལྟར། མི་རེ་རེས་རང་གི་བུ་དང་སྤུན་ལ་རྒོལ་བས། དེ་རིང་གི་ཉིན་མོ་ལ་དཀོན་མཆོག་ཡ་ཝཱེའི་ཕྱིར་ཁྱོད་ཅག་གིས་རང་ཉིད་དམ་པར་གྱིས། དེ་ནི་ཉིན་འདིར་ཁྱོད་ཅག་ལ་བྱིན་རླབས་གནང་བར་འགྱུར་བའི་ཕྱིར་ཡིན་ཞེས་སྨྲས་སོ། །   
\p
\v 30 དེའི་ཕྱི་ཉིན་མོ་ཤེ་ཡིས་འབངས་མི་རྣམས་ལ། ཁྱོད་ཅག་གིས་སྡིག་པ་ཚབས་ཆེན་བྱས་པས། ང་རང་དཀོན་མཆོག་ཡ་ཝཱེའི་དྲུང་དུ་ཡར་འགྲོ་བར་བྱ་ཞིང་། ངས་ཁྱོད་ཅག་གི་ཕྱིར་སྡིག་བཤགས་བྱེད་ནུས་ཀྱང་སྲིད་ཅེས་སྨྲས།  
\v 31 མོ་ཤེ་ཕྱིར་དཀོན་མཆོག་ཡ་ཝཱེའི་དྲུང་དུ་ལོག་ནས་ན་རེ། ཀྱེ། མི་འདི་རྣམས་ཀྱིས་སྡིག་པ་ཚབས་ཆེན་བྱས་ཏེ། རང་ཉིད་ལ་གསེར་གྱི་ལྷ་སྐུ་བཟོས།  
\v 32 ཁྱེད་ཀྱིས་དེ་དག་གི་སྡིག་པ་བསལ་བར་མཛོད། ཅི་སྟེ་མི་བསལ་ན། ཁྱེད་ཀྱིས་ཕྱག་གིས་བྲིས་པའི་གླེགས་བམ་ལས་ངའི་མིང་ཡང་གསུབ་པར་མཛོད་ཅེས་ཞུས།  
\v 33 དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ང་ལ་འགལ་བའི་སྡིག་པ་བྱས་པའི་མི་སུ་ཡིན་ཡང་བདག་གིས་དེའི་མིང་ང་ཡི་གླེགས་བམ་ལས་གསུབ་པར་བྱ།  
\v 34 ད་ལྟ་ལམ་དུ་ཆས་ཏེ་ངས་ཁྱོད་ལ་སྨྲས་པའི་གནས་དེར་མི་རྣམས་འཁྲིད་པར་གྱིས། ལྟོས་དང་། བདག་གི་ཕོ་ཉ་ཁྱོད་ཀྱི་མདུན་དུ་འགྲོ་བར་ངེས། འོན་ཀྱང་ངས་ཉེས་ཆད་གཅོད་པའི་དུས་སུ་དེ་དག་གི་སྡིག་པར་ཉེས་ཆད་བཅད་ཡོང་ཞེས་གསུངས།  
\v 35 དེ་ནས་མི་རྣམས་ཀྱིས་ཨ་རོན་གྱིས་བཟོས་པའི་བ་ཕྲུག་ལ་བསྙེན་བཀུར་བྱས་པའི་རྐྱེན་གྱིས། དཀོན་མཆོག་ཡ་ཝཱེས་ཁོ་རྣམས་སྲོག་དང་འཕྲལ་བར་མཛད་པའོ། །   
\c 33
\cl ལེའུ་སོ་གསུམ་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 ཡང་བསྐྱར་ལམ་དུ་ཆས་པའི་བཀའ་གནང་བ།  
\p
\v 1 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་རང་དང་ཁྱོད་ཀྱིས་ཨེ་ཅིབ་ཡུལ་ནས་ཕྱི་རུ་ཁྲིད་པའི་མི་རྣམས་ནི་འདི་ནས་ཡར་སོང་དང་། ངས་ཨབ་ར་ཧམ་དང་། ཨི་སཱག་དང་། ཡ་ཀོབ་བཅས་ལ་མནའ་བསྐྱལ་ནས་ཁས་བླངས་མྱོང་བའི་ཡུལ་དུ་འགྲོ་བར་གྱིས། སྔར་ངས་དེ་རྣམས་ལ་འདི་ལྟར། ངས་ཡུལ་དེ་ཁྱོད་ཀྱི་བུ་རྒྱུད་ལ་གནང་བར་བྱ་ཞེས་སྨྲས་པའོ། །  
\v 2 ངས་ཁྱོད་ཀྱི་མདུན་དུ་ཕོ་ཉ་ཞིག་གཏོང་བར་ངེས་ཏེ། དེས་ཀ་ན་ཨན་པ་དང་ཨེ་མོར་པ་དང་ཧེད་པ་དང་ཕེ་རེ་ཟི་པ་དང་ཧེ་བི་པ་དང་ཡེ་བུ་སི་པ་རྣམས་སྐྲོད་པར་འགྱུར།  
\v 3 ཡུལ་གང་ལ་ཞེ་ན། འོ་མ་དང་སྦྲང་རྩི་བཞུར་བའི་ཡུལ་དེ་ལ་འགྲོ་བར་གྱིས། ང་ཁྱོད་རྣམས་དང་མཉམ་དུ་ཡར་འགྲོ་བར་མི་བྱ་སྟེ། ཁྱོད་ཅག་ནི་འབངས་གཉའ་རེངས་ཤིག་ཡིན་པས། ངས་ལམ་བར་དུ་ཁྱོད་ཅག་མེད་པར་བཟོ་ཉེན་ཡོད་ཅེས་གསུངས་སོ། །   
\p
\v 4 ཡང་མི་རྣམས་ཀྱིས་སེམས་མུག་བྱེད་ཀྱི་གསུང་དེ་ཐོས་པས་མྱ་ངན་བྱས་ཏེ། རྒྱན་ཆ་བཏགས་པ་མི་གཅིག་ཀྱང་མེད།  
\v 5 ཅི་ཡིན་ཞེ་ན། སྔར་དཀོན་མཆོག་ཡ་ཝཱེས་མོ་ཤེ་ལ། ཡེས་ར་ཨེལ་པ་རྣམས་ལ་འདི་སྐད་སྨྲོས་ཤིག ཁྱོད་ཅག་ནི་འབངས་གཉའ་རེངས་ཡིན་པས་ང་རང་སྐད་ཅིག་ཙམ་ལ་ཁྱོད་ཅག་གི་དཀྱིལ་དུ་ཡོང་ནའང་། བདག་གིས་ཁྱོད་ཅག་མེད་པར་བཟོ་ཉེན་ཡོད། དེའི་ཕྱིར་ཁྱོད་ཅག་གིས་རྒྱན་ཆ་འཕུད་དང་། ངས་ཁྱོད་ཅག་ལ་ཅི་བྱེད་དགོས་པ་ཤེས་པར་འགྱུར་ཞེས་གསུངས་པས།  
\v 6 ཡེས་ར་ཨེལ་པ་རྣམས་རི་བོ་ཧོ་རེབ་ནས་བུད་པའི་ཚུན་ལ་རྒྱན་ཆ་རྣམས་རྩ་བ་ནས་བླངས་སོ། །   
\s1 མཇལ་འཕྲད་གུར་མཆོག་གི་སྐོར།  
\p
\v 7 ཡང་མོ་ཤེ་ཡིས་རྒྱུན་སྲོལ་བཞིན་སྦྲ་ཞིག་ཁྱེར་ནས་སྒར་གྱི་ཕྱི་རོལ་ཏུ་རྒྱང་ཐག་ཅུང་རིང་བའི་སར་ཕུབ་པ་དང་། དེ་ལ་མཇལ་འཕྲད་གུར་མཆོག་ཅེས་མིང་བཏགས། དཀོན་མཆོག་ཡ་ཝཱེ་དང་མཇལ་བར་དགའ་བའི་མི་རྣམས་རྟག་ཏུ་སྒར་གྱི་ཕྱི་རོལ་ཏུ་ཡོད་པའི་མཇལ་འཕྲད་གུར་མཆོག་ཏུ་སོང་ངོ་། །  
\v 8 མོ་ཤེ་ནམ་ཡང་གུར་མཆོག་ཏུ་འགྲོ་བའི་ཚེ་མི་ཐམས་ཅད་རང་རང་གུར་གྱི་སྒོ་ཁར་ལངས་ནས་མོ་ཤེ་ནང་དུ་ཕྱིན་པའི་བར་དུ་སྡོད་པར་བྱེད།  
\v 9 ཡང་ནམ་ཞིག་མོ་ཤེ་གུར་ནང་དུ་སོང་ཚེ་སྤྲིན་གྱི་ཀ་བ་འབབ་ཅིང་གུར་གྱི་སྒོ་ཁར་འགྲེང་བ་དང་། དཀོན་མཆོག་ཡ་ཝཱེས་མོ་ཤེ་ལ་གསུང་གླེང་མཛད།  
\v 10 མི་ཀུན་གྱིས་དོན་དེ་མཐོང་བ་ན། མི་ཐམས་ཅད་འགྲེང་ཞིང་རེ་རེས་རང་རང་གུར་གྱི་སྒོ་འགྲམ་ནས་གུས་ཕྱག་ཕུལ་ཏོ། །  
\v 11 དེ་ལྟར་དཀོན་མཆོག་ཡ་ཝཱེས་མོ་ཤེ་ལ་ཁ་རི་ཁ་ཐུག་ཏུ་གསུང་གླེང་མཛད་ཅིང་། གྲོགས་པོས་གྲོགས་པོ་ལ་གླེང་མོལ་བྱེད་པ་བཞིན་ཡིན། ཡང་ནམ་ཞིག་མོ་ཤེ་སྒར་ལ་ཕྱིར་ལོག་ཚེ། དེའི་གཞོན་ནུ་ཞབས་ཕྱི་སྟེ་ནུན་ཞེས་པའི་བུ་ཡོ་ཤུ་ཨ་གཅིག་པུ་གུར་དང་མ་བྲལ་བར་བསྡད་དོ། །   
\s1 མོ་ཤེ་དང་དཀོན་མཆོག་གི་གཟི་བྱིན་སྐོར།  
\p
\v 12 ཡང་མོ་ཤེ་ཡིས་དཀོན་མཆོག་ཡ་ཝཱེ་ལ། གཟིགས་པར་ཞུ། ཁྱེད་ཀྱིས་ང་ལ་མི་འདི་རྣམས་ཡར་ཁྲིད་ཅིག་ཅེས་གསུངས་ཀྱང༌། ཁྱེད་ཀྱིས་སུ་ཞིག་ང་དང་མཉམ་དུ་འགྲོ་བར་མངག་རྒྱུ་ཡིན་པ་བདག་ལ་མ་གསུངས་ཤིང་། ཡང་སྔར་ནས་འདི་སྐད་དུ། ངས་ཁྱོད་ཀྱི་མིང་ནས་ཁྱོད་ངོ་ཤེས་ཤིང་བདག་གི་མིག་ལམ་ནས་ཁྱོད་ལ་སྙིང་རྗེ་ཐོབ་པ་ཡིན་ཞེས་གསུངས་མྱོང་བས།  
\v 13 གལ་ཏེ་ཁྱེད་ཀྱི་སྤྱན་སྔར་ང་ལ་ཐུགས་རྗེ་ཐོབ་པ་ཡིན་ན། བདག་ལ་ཁྱེད་ཀྱི་ལམ་སྟོན་པར་མཛོད། དེ་ལྟར་མཛད་ན་ངས་ཁྱེད་རང་ངོ་ཤེས་ཤིང་ཁྱེད་ཀྱི་སྤྱན་སྔར་ཐུགས་རྗེ་འཐོབ་ངེས་ཡིན་ལ། ཡང་མི་རིགས་འདི་ནི་ཁྱེད་ཀྱི་འབངས་མི་ཡིན་པར་གཟིགས་སུ་གསོལ་ཞེས་ཞུས་པ་དང་།  
\v 14 ཁོང་གིས་འདི་སྐད་དུ། ང་རང་དངོས་སུ་ཁྱོད་དང་མཉམ་དུ་འགྲོ་ཞིང་ཁྱོད་ལ་ངལ་གསོ་སྟེར་བར་བྱ་ཞེས་གསུངས་སོ། །  
\v 15 ཡང་མོ་ཤེ་ཡིས་ཁོང་ལ་འདི་ལྟར། གལ་ཏེ་ཁྱེད་ཉིད་དངོས་སུ་ང་ཚོ་དང་ལྷན་དུ་མི་ཕེབས་ན། ངེད་རྣམས་འདི་ནས་ཡར་ལའང་མི་འཁྲིད་རོགས།  
\v 16 ཁྱེད་རང་ངེད་རྣམས་དང་ལྷན་དུ་ཕེབས་ན་མ་གཏོགས། བདག་དང་ཁྱེད་ཀྱི་འབངས་མི་དང་བཅས་པ་ལ་ཁྱེད་ཀྱི་སྤྱན་སྔར་ཐུགས་རྗེ་ཐོབ་པ་ནི་མི་གཞན་དག་གིས་ཅི་ལྟར་ཤེས་ཐུབ་བམ། དེ་ལྟར་ལྷན་དུ་ཕེབས་པ་ན། ད་གཟོད་ས་སྟེང་གི་མི་ཐམས་ཅད་དང་ང་རང་ཐེ་བའི་ཁྱེད་ཀྱི་འབངས་མི་ལ་ཁྱད་པར་ཡོད་པ་ཤེས་པར་འགྱུར་ཞེས་ཞུས་སོ། །   
\p
\v 17 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། བདག་གི་མིག་ལམ་ནས་ཁྱོད་ལ་སྙིང་རྗེ་ཐོབ་ཅིང་ངས་ཁྱོད་ཀྱི་མིང་ནས་ཁྱོད་ངོ་ཤེས་པས། ང་རང་ལ་ཞུས་པ་བཞིན་དུ་བདག་གིས་ཀྱང་བྱེད་པར་འགྱུར་ཞེས་གསུངས་པ་དང་།  
\v 18 མོ་ཤེ་ཡིས། ཁྱེད་ཀྱི་གཟི་བརྗིད་ང་ལ་སྟོན་པར་མཛོད་ཅེས་ཞུས་ཤིང་།  
\v 19 ཁོང་གིས་འདི་སྐད་དུ། བདག་གིས་རང་གི་དྲིན་ཐམས་ཅད་ཁྱོད་ཀྱི་མདུན་དུ་འགྲོ་བར་འཇུག་ཅིང་དཀོན་མཆོག་ཡ་ཝཱེའི་མིང་ཡང་སྒྲོག་པར་བྱ། ངས་སུ་ཞིག་ལ་བརྩེ་བར་བསམ་ན་དེ་ལ་བརྩེ་བར་བྱ། ཡང་སུ་ཞིག་ལ་སྙིང་རྗེ་བར་འདོད་ན་དེ་ལ་སྙིང་རྗེ་བར༌བྱ་ཞེས་གསུངས།  
\v 20 ཡང་འདི་སྐད་དུ། ཁྱོད་ཀྱིས་བདག་གི་གདོང་ནི་མཐོང་མི་རུང་སྟེ། ཅིའི་ཕྱིར་ཞེ་ན། བདག་གི་གདོང་མཐོང་བའི་མི་སུ་ཡིན་ཡང་གསོན་པོར་འདུག་མི་ཐུབ་ཅེས་གསུངས་སོ། །  
\v 21 ཡང་དཀོན་མཆོག་ཡ་ཝཱེས་འདི་སྐད་དུ། ལྟོས་དང་། ངའི་དྲུང་དུ་གནས་ཤིག་ཡོད་དེ། ཁྱོད་རང་བྲག་དེའི་སྟེང་ལ་འགྲེང་བར་གྱིས།  
\v 22 ངའི་གཟི་བརྗིད་ཁྱོད་ཀྱི་མདུན་དུ་ཕར་འགྲོ་བའི་ཚེ། བདག་གིས་ཁྱོད་རང་བྲག་སྲུབས་ཤིག་ཏུ་བཞག་སྟེ། ང་རང་ཕར་བཞུད་པའི་བར་དུ་ངའི་ལག་པས་ཁྱོད་རང་འགེབ་པར་བྱ།  
\v 23 དེའི་རྗེས་སུ་ངས་རང་གི་ལག་པ་ཕྱིར་འཐེན་ཚེ་ཁྱོད་ཀྱིས་ངའི་རྒྱབ་མཐོང་བར་འགྱུར་ནའང་། གདོང་ནི་གཏན་ནས་མཐོང་བར་མི་རུང་ཞེས་གསུངས་སོ། །   
\c 34
\cl ལེའུ་སོ་བཞི་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 རྡོ་ལེབ་གསར་པའི་སྐོར།  
\p
\v 1 དེ་ནས་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཁྱོད་ཀྱིས་རང་ལ་སྔར་གྱི་རྡོ་ལེབ་དང་འདྲ་བ་གཉིས་བརྐོས་དང་། དེ་སྔོན་བཅག་པའི་རྡོ་ལེབ་སྟེང་གི་ཚིག་རྣམས་བདག་གིས་རྡོ་ལེབ་འདི་གཉིས་ལ་བརྐོ་བར་བྱ།  
\v 2 སང་ཉིན་ཐོ་རངས་ཁྱོད་ཀྱིས་སྟ་གོན་བྱས་ཏེ་རི་བོ་སི་ནཱ་རུ་ཡར་ཡོང་སྟེ་རི་རྩེ་ནས་ངའི་དྲུང་དུ་འགྲེང་བར་གྱིས་ཤིག  
\v 3 ཁྱོད་དང་མཉམ་དུ་མི་སུ་ཡང་ཡོང་མི་རུང་ལ། རི་དེ་ཡོངས་ལ་མི་སུ་ཡང་ཡོད་མི་རུང་ཞིང་། རི་དེའི་འདབས་སུ་ར་ལུག་གི་ཁྱུ་དང་བ་ཁྱུ་གང་ཡང་འཚོ་མི་རུང་ཞེས་གསུངས་པས།  
\v 4 མོ་ཤེ་ཡིས་སྔར་གྱི་རྡོ་ལེབ་གཉིས་དང་འདྲ་བ་བཟོས་ནས་དཀོན་མཆོག་ཡ་ཝཱེས་བཀའ་བསྩལ་པ་བཞིན་དུ་ཐོ་རངས་ཡར་ལངས་ཏེ་རི་བོ་སི་ནཱ་རུ་འགོས་ཤིང་། ལག་ཏུ་རྡོ་ལེབ་གཉིས་ཁྱེར་ཏོ། །   
\p
\v 5 དེར་དཀོན་མཆོག་ཡ་ཝཱེ་སྤྲིན་གྱི་ནང་ནས་མར་ཕེབས་ཤིང་། མོ་ཤེ་དང་ལྷན་དུ་འགྲེང་ནས་རང་གི་མཚན་ཡ་ཝཱེ་སྒྲོག་པར་མཛད།  
\v 6 དཀོན་མཆོག་ཡ་ཝཱེ་དེའི་མདུན་ནས་ཕར་ཕེབས་པ་དང་འདི་སྐད་དུ། ཡ་ཝཱེ་སྟེ། དཀོན་མཆོག་ཡ་ཝཱེ་ནི་སྙིང་རྗེ་ཆེ་ཞིང་ཐུགས་རྗེ་ཅན་ཡིན་ལ། རང་དགར་ཐུགས་མི་ཁྲོ་ཞིང་བྱམས་བརྩེ་དང་བདེན་པ་ཉིད་རྫོགས་མཐའ་མེད་པ་ལགས་ཏེ།  
\v 7 མི་ཁྲི་ཁྲི་འབུམ་འབུམ་ལ་ཐུགས་བརྩེ་བར་བྱེད་ཅིང་ཉེས་པ་དང་ནོར་འཁྲུལ་དང་སྡིག་པ་རྣམས་བསལ་ཞིང་། ཉེས་ཅན་རྣམས་རྩ་བ་ནས་ཉེས་མེད་དུ་མི་བརྩི་ཞིང་། ཕ་རྣམས་ཀྱི་ནག་ཉེས་ཕྱིར་བུ་དང་བུའི་བུ་རྣམས་ལ་མི་རབས་གསུམ་བཞིའི་བར་དུ་ཉེས་ཆད་གཅོད་པ་ལགས་ཞེས་བསྒྲགས་སོ། །  
\v 8 དེ་ནས་མོ་ཤེ་ཡིས་མྱུར་དུ་ལུས་སར་བཏུད་ནས་ཕྱག་བཙལ་ཏེ་ན་རེ།  
\v 9 ཀྱེ་གཙོ་བོ་ལགས། ང་རང་ལ་ཁྱེད་ཀྱི་སྤྱན་སྔར་ཐུགས་རྗེ་ཐོབ་པ་ཡིན་ན། ཁྱེད་རང་ང་ཚོ་དང་ལྷན་དུ་འགྲོགས་ནས་ཕེབས་སུ་གསོལ། མི་དེ་རྣམས་གཉའ་རེངས་ཡིན་ཡང་། ངེད་ཅག་གི་ཉེས་པ་དང་སྡིག་པ་སེལ་བ་དང་། ངེད་རྣམས་ནི་ཁྱེད་ཀྱི་ནོར་སྐལ་དུ་དགོངས་པར་མཛོད་ཅེས་ཞུས་སོ། །   
\s1 ཡང་བསྐྱར་ཞལ་ཆད་གནང་བ།  
\p
\v 10 ཡང་དཀོན་མཆོག་ཡ་ཝཱེས་འདི་སྐད་དུ། ལྟོས་དང་། བདག་གིས་ཞལ་ཆད་ཅིག་འཇོག་སྟེ། ཁྱོད་ཀྱི་མི་ཐམས་ཅད་ཀྱི་མཐོང་ལམ་དུ་ངས་དོན་ངོ་མཚར་དག་བྱེད་པར་འགྱུར་བ་ནི་ས་གཞི་ཀུན་དང་མི་རིགས་གང་ལའང་བྱས་མ་མྱོང་ཞིང་། ཁྱོད་ཀྱི་མཐའ་འཁོར་དུ་ཡོད་པའི་མི་ཐམས་ཅད་ཀྱིས་དཀོན་མཆོག་ཡ་ཝཱེའི་མཛད་པ་མཐོང་བར་འགྱུར་ལ། བདག་གིས་ཁྱོད་ལ་སྟོན་པར་འགྱུར་བའི་དོན་དེ་དག་དངོས་གནས་འཇིགས་སུ་རུང་བ་ཡིན།  
\v 11 ངས་དེ་རིང་གི་ཉིན་མོར་ཁྱོད་ཅག་ལ་བསྒོས་དང་སྒོ་བཞིན་པ་འདི་བསྲུང་དགོས་ཏེ། ལྟོས་དང་། བདག་གིས་ཁྱོད་ཅག་གི་མདུན་ནས་ཨེ་མོར་པ་དང་། ཀ་ན་ཨན་པ་དང་། ཧེད་པ་དང་། ཕེ་རེ་ཟི་པ་དང་། ཧེ་བི་པ་དང་། ཡེ་བུ་སི་པ་རྣམས་སྐྲོད་པར་འགྱུར།  
\v 12 ཁྱོད་ཅག་འགྲོ་བྱའི་ཡུལ་དེའི་མི་རྣམས་ནི་ཁྱོད་ཅག་གི་ཁྲོད་དུ་རྙི་རུ་འགྱུར་ཉེན་ཡོད་པས། དེ་དག་དང་ཁ་ཆད་འཇོག་པ་ལས་གཡོལ་བར་གྱིས་ཤིག  
\v 13 དེ་ལས་ལྡོག་སྟེ་ཁྱོད་ཅག་གིས་དེ་དག་གི་མཆོད་ཁྲི་རྣམས་བཤིག་པར་བྱའོ། །ཡང་དེ་ཚོའི་རྡོ་སྐུ་རྣམས་ཀྱང་རྩ་མེད་གཏོང་བར་གྱིས། ལྷ་མོ་ཨ་ཤེ་རཱའི་སྐུ་བརྙན་རྣམས་རྩ་བ་ནས་གཅོད་དགོས།  
\v 14 དཀོན་མཆོག་ཡ་ཝཱེ་ཁོང་གི་མཚན་ནི་ཕྲག་དོག་ཅན་ཡིན་ཏེ། ཐུགས་ཀྱང་ཕྲག་དོག་ཅན་ལགས་པས། ལྷ་རྣམས་ལ་ཕྱག་མ་འཚལ་ཞིག  
\v 15 དེ་ལྟར་མ་བྱས་ན། ཁྱོད་ཅག་གིས་གནས་དེའི་ཡུལ་མི་དང་ཁ་ཆད་འཇོག་ཉེན་ཡོད་དེ། མི་དེ་དག་གིས་རང་གི་ལྷ་རྣམས་ཀྱི་རྗེས་སུ་ལོག་གཡེམ་བྱེད་པ་དང་། རང་གི་ལྷ་རྣམས་ལ་དམར་མཆོད་འབུལ་བའི་སྐབས་སུ་ཁྱོད་ཅག་མགྲོན་དུ་འབོད་ཅིང་། ཁྱོད་ཅག་གིས་དེ་དག་གི་མཆོད་རྫས་བཟའ་བར་བྱེད་པ་དང་།  
\v 16 ཁྱོད་ཅག་གི་བུ་རྣམས་ལ་དེ་དག་གི་བུ་མོ་རྣམས་ལས་བག་མ་བླངས་ན། དེ་དག་གི་བུ་མོ་རྣམས་ཀྱིས་རང་གི་ལྷ་རྣམས་ཀྱི་རྗེས་སུ་ལོག་གཡེམ་བྱེད་ཅིང་ཁྱོད་ཅག་གི་བུ་རྣམས་ལའང་དེ་དག་གི་ལྷ་རྣམས་ཀྱི་རྗེས་སུ་ལོག་གཡེམ་བྱེད་དུ་འཇུག་སྲིད་པ་ཡིན་པས་གཟབ་གཟབ་གྱིས་ཤིག  
\v 17 ཁྱོད་ཅག་གིས་རང་གི་ཕྱིར་བླུགས་སྐུ་བཟོ་མི་རུང་ངོ་། །   
\p
\v 18 ཡང་སྐྱུར་མེད་བག་ལེབ་ཀྱི་དུས་ཆེན་བསྲུང་དགོས་ཏེ། ཁྱོད་ཅག་ཨ་རྦིབ་ཟླ་བའི་ནང་དུ་ཨེ་ཅིབ་ཡུལ་ནས་ཕྱི་རུ་ཐོན་པའི་ཕྱིར་ཨ་རྦིབ་ཟླ་བའི་དུས་དེར་སླེབས་ཚེ། ངས་ཁྱོད་ཅག་ལ་བསྒོས་པའི་བཀའ་བཞིན་དུ་ཉིན་བདུན་གྱི་རིང་ལ་སྐྱུར་མེད་བག་ལེབ་བཟའ་དགོས།  
\v 19 ད་དུང་མངལ་ལས་བྱུང་བའི་སྐྱེས་འགོ་ཐམས་ཅད་བདག་གི་ཡིན། ཁྱོད་རྣམས་ཀྱི་ཕྱུགས་ཁྱུ་ཁྲོད་ཀྱི་བ་གླང་དང་ལུག་གང་ཡིན་ཡང་སྐྱེས་འགོ་ཕོ་ཡིན་པ་མཐའ་དག་བདག་གི་ཡིན།  
\v 20 བོང་བུའི་བོང་ཕྲུག་འགོ་མ་ནི་ལུ་གུ་ཞིག་གིས་བླུ་དགོས། ཅི་སྟེ་བླུ་བར་མ་བྱས་ན་དེའི་སྐེ་ཚིགས་རྫོག་པར་བྱའོ། །ཁྱོད་ཅག་གི་བུ་སྐྱེས་འགོ་ཐམས་ཅད་བླུ་དགོས་ལ། སུ་ཡིན་ཡང་ལག་པ་སྟོང་བར་ངའི་མདུན་དུ་ཡོང་མི་རུང་ངོ་། །   
\p
\v 21 ཉིན་དྲུག་གི་རིང་དུ་ལས་ཀ་བྱོས་ལ་ཉིན་བདུན་པར་ངལ་གསོ་བར་གྱིས། སྟོན་ལས་དང་རྨོ་འདེབས་ཀྱི་སྐབས་སུའང་ངལ་གསོས་ཤིག  
\v 22 གྲོ་ཡི་ཐོག་ཕུད་བསྡུ་བའི་སྐབས་སུ་བདུན་ཕྲག་རྣམས་ཀྱི་དུས་ཆེན་བསྲུང་དགོས་ལ། ལོ་མཇུག་གི་བསྡུ་ཉར་དུས་ཆེན་ཡང་བསྲུང་དགོས།  
\v 23 ཁྱོད་ཅག་གི་སྐྱེས་པ་ཐམས་ཅད་ཀྱིས་གཙོ་བོ་ཡ་ཝཱེ་སྟེ་ཡེས་ར་ཨེལ་གྱི་དཀོན་མཆོག་ལོ་རེར་ཐེངས་གསུམ་ལ་མཇལ་དགོས།  
\v 24 བདག་གིས་ཁྱོད་ཅག་གི་མདུན་ནས་མི་རིགས་གཞན་རྣམས་བསྐྲད་ནས་ཁྱོད་ཅག་གི་མཐའ་མཚམས་རྒྱས་པར་བྱེད་པས། ཁྱོད་རྣམས་རང་གི་དཀོན་མཆོག་ཡ་ཝཱེའི་དྲུང་དུ་ལོ་རེ་བཞིན་ལན་གསུམ་དུ་འོང་བའི་སྐབས་སུ། མི་སུས་ཀྱང་ཁྱོད་ཅག་ལ་གཏོགས་པའི་ཡུལ་དེ་ཧམ་འཕྲོག་བྱེད་པར་མི་འགྱུར་རོ། །   
\p
\v 25 བདག་ལ་དམར་མཆོད་ཀྱི་ཁྲག་དང་སྐྱུར་རྩི་ལྡན་པའི་བག་ལེབ་གཉིས་ལྷན་དུ་འབུལ་མི་རུང་ལ། པེ་སག་དུས་ཆེན་གྱི་མཆོད་པའང་ཕྱི་ཉིན་ཞོགས་པའི་བར་དུ་བསྐྱུར་མི་རུང་།  
\v 26 ཁྱོད་ཅག་གིས་ས་ཞིང་ལས་ཐོག་མར་སྨིན་པའི་ལོ་ཏོག་གི་ཕུད་ནི་ཁྱོད་ཅག་གི་དཀོན་མཆོག་ཡ་ཝཱེའི་བཞུགས་གནས་སུ་འབུལ་དགོས་ལ། རེའུ་ཞིག་དེའི་ཨ་མའི་འོ་མ་ནང་དུ་བཙོ་མི་རུང་ཞེས་གསུངས་སོ། །   
\p
\v 27 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་དུ། ཚིག་དེ་རྣམས་ཡི་གེར་ཁོད་ཅིག རྒྱུ་མཚན་ནི། བདག་གིས་བཀའ་འདི་ལ་བརྟེན་ནས་ཁྱོད་དང་ཡེས་ར་ཨེལ་པ་རྣམས་ཀྱི་བར་ལ་ཞལ་ཆད་བཞག་པ་ཡིན་ཞེས་གསུངས་སོ། །  
\v 28 མོ་ཤེ་ནི་དཀོན་མཆོག་ཡ་ཝཱེའི་དྲུང་དུ་ཉིན་མཚན་བཞི་བཅུའི་རིང་དུ་གནས་ཤིང་ཟས་ཀྱང་མ་སྤྱད་ལ་སྐོམ་ཡང་མ་འཐུང་བ་དང་། དཀོན་མཆོག་ཡ་ཝཱེས་ཞལ་ཆད་ཀྱི་བཀའ་བཅུ་པོ་རྡོ་ལེབ་གཉིས་ལ་ཡི་གེར་བཀོད་དོ། །   
\s1 མོ་ཤེའི་གདོང་ནས་འོད་བཀྱེ་བ།  
\p
\v 29 ཡང་མོ་ཤེ་རི་བོ་སི་ནཱ་ལས་འབབ་པའི་ཚེ། ཁོའི་ལག་ཏུ་དཔང་པོའི་རྡོ་ལེབ་གཉིས་ཡོད་པ་དང་། དཀོན་མཆོག་ཡ་ཝཱེས་ཁོ་ལ་གསུང་གླེང་མཛད་པའི་རྐྱེན་གྱིས་ཁོའི་ངོ་གདོང་ལས་འོད་བཀྱེ་བ་མོ་ཤེ་རང་ཉིད་ཀྱིས་ཀྱང་ཤེས་མེད།  
\v 30 ཨ་རོན་དང་ཡེས་ར་ཨེལ་པ་ཐམས་ཅད་ཀྱིས་མོ་ཤེ་ལ་བལྟས་པ་ན། ཀྱེ་ཧོ། ཁོའི་ངོ་གདོང་ལས་འོད་བཀྱེ་བ་མཐོང་བས་དེ་དང་ཉེ་བར་བཅར་མ་ཕོད་དོ། །  
\v 31 དེ་ནས་མོ་ཤེ་ཡིས་དེ་དག་བོས་ཤིང་། ཨ་རོན་དང་ཚོགས་དཔོན་ཐམས་ཅད་ཁོའི་ཕྱོགས་སུ་འོངས་པ་དང་། མོ་ཤེ་ཡིས་དེ་དག་ལ་གཏམ་བྱས།  
\v 32 དེའི་རྗེས་སུ་ཡེས་ར་ཨེལ་པ་ཐམས་ཅད་ཚུཪ་འོངས་པ་ལ། ཁོས་དཀོན་མཆོག་ཡ་ཝཱེས་རི་བོ་སི་ནཱ་ལས་རང་ལ་ཅི་གསུངས་པ་ཐམས་ཅད་དེ་དག་ལ་ཇི་བཞིན་དུ་བསྒོས་པ་རེད།  
\v 33 ཡང་མོ་ཤེ་ཡིས་གཏམ་སྨྲས་ཚར་བ་དང་རང་གི་ངོ་གདོང་ལག་རས་ཤིག་གིས་བཀབ།  
\v 34 འོན་ཀྱང་ཁོ་རང་ནམ་ཞིག་དཀོན་མཆོག་ཡ་ཝཱེའི་སྤྱན་སྔར་ཞུ་གླེང་བྱེད་དུ་ནང་ལ་སོང་བའི་ཚེ། ཕྱིར་མ་ཐོན་བར་དུ་རང་གི་གདོང་གི་ལག་རས་བླངས་ཤིང་། རྗེས་སུ་ཡང་ཕྱི་རུ་ཐོན་ནས། དཀོན་མཆོག་ཡ་ཝཱེས་ཁོ་ལ་བཀའ་གནང་བ་བཞིན་དུ་ཡེས་ར་ཨེལ་པ་རྣམས་ལ་གཏམ་བྱས།  
\v 35 ཡང་ཡེས་ར་ཨེལ་པ་རྣམས་ཀྱིས་མོ་ཤེའི་ངོ་གདོང་ལས་འོད་བཀྱེ་བ་མཐོང་ཞིང་། ཁོས་ཡང་ལག་རས་ཀྱིས་རང་གི་ངོ་གདོང་བཀབ་པ་དང་། དཀོན་མཆོག་ཡ་ཝཱེ་ལ་ཞུ་གླེང་བྱེད་པའི་ཕྱིར་ནང་དུ་མ་སོང་བར་དུ་དེ་ལྟར་བྱས་སོ། །   
\c 35
\cl ལེའུ་སོ་ལྔ་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 ངལ་གསོ་བའི་ཉིན་གྱི་སྒྲིག་ཁྲིམས།  
\p
\v 1 ཡང་མོ་ཤེ་ཡིས་ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་བསྡུས་ནས་དེ་དག་ལ། དཀོན་མཆོག་ཡ་ཝཱེས་གསུངས་པའི་བཀའ་སྟེ་ཁྱོད་ཅག་གིས་བསྒྲུབ་དགོས་པ་རྣམས་ནི་འདི་ལྟ་སྟེ།  
\v 2 ཉིན་དྲུག་གི་རིང་ལ་ལས་ཀ་བྱེད་ཅིང་ཉིན་བདུན་པ་ནི་ཁྱོད་ཚོར་མཚོན་ན་དམ་པ་ཡིན་དགོས་ཤིང་། དཀོན་མཆོག་ཡ་ཝཱེའི་ཕྱིར་ངལ་གསོ་ཡོངས་སུ་རྫོགས་པའི་ཉིན་མོ་ཡང་ཡིན། ཉིན་དེ་ལ་ལས་ཀ་བྱེད་པའི་མི་སུ་ཡིན་ཡང་གསོད་དགོས།  
\v 3 ངལ་གསོ་བའི་ཉིན་ལ་ཁྱོད་ཅག་གི་སྡོད་གནས་རྣམས་སུ་མེ་སྦར་མི་རུང་ཞེས་བཀའ་གནང་བ་ཡིན་ནོ། །   
\s1 གུར་མཆོག་གི་འབུལ་བའི་སྐོར།  
\p
\v 4 ཡང་མོ་ཤེ་ཡིས་ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་ལ་འདི་ལྟར། དཀོན་མཆོག་ཡ་ཝཱེས་བཀའ་གནང་བ་འདི་ཡིན་ཏེ།  
\v 5 ཁྱོད་ཅག་གིས་རང་གི་ཁྲོད་ནས་དཀོན་མཆོག་ཡ་ཝཱེ་ལ་འབུལ་བ་རྣམས་ལོངས་ཤིག འབུལ་འདོད་པ་རྣམས་ཀྱིས་དཀོན་མཆོག་ཡ་ཝཱེ་ལ་འབུལ་བ་འདི་ཕུལ་ཞིག དེ་ནི་གསེར་དང་དངུལ་དང་ལི་བཅས་དང་།  
\v 6 བལ་སྐུད་མཐིང་ག་དང་རྒྱ་སྨུག་དང་མཚལ་དམར་གྱི་མདོག་ཅན་དང་། སོ་རས་སྲབ་བུ་དང་། ར་མའི་ཁུལ་རྩིད་དང་།  
\v 7 ལུག་ཐུག་གི་པགས་པ་རྒྱ་ཚོས་བརྒྱབ་པ་དང་ཀོ་བ་སྤུས་ལེགས་དང་སེང་ལྡེང་ཤིང་དང་།  
\v 8 སྒྲོན་མེའི་ཕྱིར་འཚིར་སྣུམ་དང་། འབྱུག་སྣུམ་དང་དྲི་ཞིམ་བདུག་སྤོས་ཀྱི་ཕྱིར་བསུང་རྫས་རྣམས་དང་།  
\v 9 གཟི་དང་རིན་པོ་ཆེ་གཞན་དག་དགོས་པ་སྟེ། མཆོད་དཔོན་གྱི་བེར་ཐུལ་དང་བྲང་རྒྱན་ལ་ཕྲ་རྒྱག་དགོས་པའི་ཕྱིར་ཡིན་ནོ། །   
\p
\v 10 ཁྱོད་ཅག་གི་ཁྲོད་དུ་སེམས་སུ་ཤེས་རབ་ལྡན་པ་ཐམས་ཅད་འོངས་ནས་དཀོན་མཆོག་ཡ་ཝཱེས་བཀའ་ཅི་བསྩལ་པ་ཐམས་ཅད་བསྒྲུབ་དགོས་ཏེ།  
\v 11 གུར་མཆོག་དང་དེའི་གུར་ཀླད་དང་ཐོག་ཁེབས་དང་ཀྱུ་དང་པང་ལེབ་དང་འཕྲེད་རྒྱུག་དང་ཀ་བ་དང་ཞབས་ར་བཅས་དང་།  
\v 12 ཤུར་སྒམ་དང་དེའི་རྒྱུག་པ་དང་ཐུགས་རྗེའི་བཞུགས་ཁྲི་དང་དེའི་གཡོག་བྱེད་ཀྱི་ཡོལ་བ་བཅས་དང་།  
\v 13 སྒྲོག་ཙེ་དང་དེའི་རྒྱུག་པ་དང་དེ་ལ་གཏོགས་པའི་ཡོ་བྱད་རྣམས་དང་། སྤྱན་བསྟར་བག་ལེབ་དང་།  
\v 14 འོད་ཀྱི་ཕྱིར་ཡིན་པའི་སྒྲོན་སྟེགས་དང་དེའི་ཡོ་བྱད་རྣམས་དང་སྒྲོན་མེ་རྣམས་དང་ཡང་སྒྲོན་མེའི་ཕྱིར་འཚིར་སྣུམ་དང་།  
\v 15 སྤོས་ཁྲི་དང༌། དེའི་རྒྱུག་པ་གཉིས་བཅས་པ་དང་། འབྱུག་སྣུམ་དང་དྲི་ཞིམ་བདུག་སྤོས་དང་། གུར་མཆོག་གི་སྒོའི་ཕྱིར་དུ་སྒོ་ཡོལ་དང༌།  
\v 16 སྦྱིན་སྲེག་གི་མཆོད་ཁྲི་དང་དེ་ལ་གཏོགས་པའི་ལི་ཡི་ཐག་མིག་དང་དེའི་རྒྱུག་པ་གཉིས་དང་དེའི་ཡོ་བྱད་ཐམས་ཅད་དང་དེའི་ཁྲུས་གཞོང་དང་དེའི་སྟེགས་བུ་དང་།  
\v 17 ཁྱམས་རའི་ཡོལ་བ་དང་དེའི་ཀ་བ་དང་དེའི་ཞབས་ར་རྣམས་དང༌། ཁྱམས་རའི་སྒོ་ཡོལ་དང་།  
\v 18 གུར་མཆོག་གི་ཕུར་བ་དང་ཁྱམས་ཀྱི་ཕུར་བ་དང་དེའི་ཆོན་ཐག་རྣམས་དང་།  
\v 19 གནས་དམ་པར་ཞབས་ཕྱི་བྱེད་པའི་ཆེད་དུ་ཐགས་ཞིབ་མོར་བཏགས་པའི་གོས་རྣམས་དང་། མཆོད་དཔོན་ཨ་རོན་གྱི་ན་བཟའ་དམ་པ་རྣམས་དང་། ཁོའི་བུ་རྣམས་ཀྱིས་མཆོད་དཔོན་གྱི་ཞབས་ཕྱི་བྱེད་པའི་ཕྱིར་ན་བཟའ་རྣམས་བཟོ་དགོས་ཞེས་བཀའ་གནང་ངོ་། །   
\p
\v 20 དེ་ནས་ཡེས་ར་ཨེལ་པ་རྣམས་ཀྱི་མི་ཚོགས་ཐམས་ཅད་མོ་ཤེའི་དྲུང་ནས་སོང་ངོ་། །  
\v 21 སེམས་འགུལ་ཐེབས་ནས་འབུལ་འདོད་ཡོད་པ་ཐམས་ཅད་ཚུར་འོངས་ཏེ། མཇལ་འཕྲད་གུར་མཆོག་གི་ལས་དང་དེ་རུ་ཡོད་པའི་ཞབས་འདེགས་དང་ན་བཟའ་དམ་པ་རྣམས་ཀྱི་ཕྱིར་དཀོན་མཆོག་ཡ་ཝཱེ་ལ་འབུལ་བ་རྣམས་ཁྱེར་འོངས་པ་རེད།  
\v 22 ཡང་སེམས་ནས་འབུལ་འདོད་ཡོད་པའི་སྐྱེས་པ་དང་བུད་མེད་རྣམས་ཀྱིས་བྲང་རྒྱན་དང་རྣ་ལོང་རྣམས་དང་། སོར་གདུབ་ཐམ་ག་ཅན་དང་ལག་གདུབ་བཅས་གསེར་གྱི་རྫས་སྣ་ཚོགས་ཁྱེར་འོངས་ཤིང་། མི་ཀུན་གྱིས་དཀོན་མཆོག་ཡ་ཝཱེ་ལ་གསེར་གཡོབ་མཆོད་དུ་ཕུལ་བ་རེད།  
\v 23 བལ་སྐུད་མཐིང་ག་དང་རྒྱ་སྨུག་དང་མཚལ་དམར་གྱི་མདོག་ཅན་དང་། སོ་རས་སྲབ་བུ་དང་། ར་མའི་ཁུལ་རྩིད་དང་། ལུག་ཐུག་གི་པགས་པ་རྒྱ་ཚོས་བརྒྱབ་པ་དང་ཀོ་བ་སྤུས་ལེགས་བཅས་སུ་ལ་ཡོད་པ་དེས་ཁྱེར་འོངས།  
\v 24 སུས་ཀྱང་དངུལ་དང་ལི་ཡི་འབུལ་བ་འབུལ་མཁན་ཐམས་ཅད་ཀྱིས་དཀོན་མཆོག་ཡ་ཝཱེ་ལ་འབུལ་བ་བཞིན་ཁྱེར་འོངས་པ་དང་། ཞབས་འདེགས་ཀྱི་ལས་སྣ་ཚོགས་ཀྱི་ཕྱིར་སེང་ལྡེང་ཤིང་ཡོད་པ་ཐམས་ཅད་ཀྱིས་ཀྱང་དེ་ཁྱེར་འོངས།  
\v 25 ཡང་བུད་མེད་ཤེས་རབ་ལྡན་པ་རྣམས་ཀྱིས་རང་གི་ལག་པས་བཀལ་བའི་བལ་སྐུད་མཐིང་ག་དང་རྒྱ་སྨུག་དང་མཚལ་དམར་གྱི་མདོག་ཅན་དང་སོ་རས་སྲབ་བུ་བཅས་ཁྱེར་འོངས།  
\v 26 སེམས་འགུལ་ཐེབས་ཤིང་སེམས་སུ་ཤེས་རབ་ལྡན་པའི་བུད་མེད་རྣམས་ཀྱིས་སོ་སོའི་ལག་རྩལ་ལ་བརྟེན་ནས་ར་རྩིད་འཁེལ།  
\v 27 ཡང་དཔོན་རིགས་རྣམས་ཀྱིས་མཆོད་དཔོན་གྱི་བེར་ཐུལ་དང་བྲང་རྒྱན་གྱི་ཕྱིར་གཟི་དང་རིན་པོ་ཆེ་དག་ཕྲ་རྒྱག་པར་ཁྱེར་འོངས་པ་དང་།  
\v 28 བསུང་རྫས་དང་འཚིར་སྣུམ་ནི་སྒྲོན་མེ་དང་འབྱུག་སྣུམ་དང་དྲི་ཞིམ་བདུག་སྤོས་ཀྱི་ཕྱིར་ཁྱེར་འོངས།  
\v 29 དཀོན་མཆོག་ཡ་ཝཱེས་མོ་ཤེ་ལ་བསྒྲུབ་དགོས་པར་བཀའ་གནང་བའི་ལས་ཐམས་ཅད་ཀྱི་ཕྱིར། སེམས་སུ་འབུལ་འདོད་ཡོད་པའི་ཡེས་ར་ཨེལ་པ་རྣམས་ལས་སྐྱེས་པ་དང་བུད་མེད་རེ་རེས་དཀོན་མཆོག་ཡ་ཝཱེ་ལ་ཡིད་མོས་འབུལ་བ་རྣམས་ཁྱེར་འོངས་སོ། །   
\s1 གུར་མཆོག་བཟོ་མཁན་གྱི་སྐོར།  
\p
\v 30 དེ་ནས་མོ་ཤེ་ཡིས་ཡེས་ར་ཨེལ་པ་རྣམས་ལ་འདི་ལྟར། ལྟོས་དང་། དཀོན་མཆོག་ཡ་ཝཱེས་ཡ་ཧུ་དཱ་ཚོ་པ་ནས་ཧུ་རཱའི་བུ་ཨོའུ་རེལ་དེའི་བུ་པི་ཟིད་ཨེལ་གྱི་མིང་ནས་བོས་ཤིང་།  
\v 31 ཡང་ཁོ་ལ་དཀོན་མཆོག་གི་ཐུགས་ཉིད་ཀྱིས་ཁྱབ་པར་མཛད་དེ། ཁོ་ལ་ཤེས་རབ་དང་སྤྱང་གྲུང་ལྡན་ཞིང་། བློ་རིག་མངའ་བ་དང་། ལག་རྩལ་སྣ་ཚོགས་བྱང་ཆུབ་པར་བྱས།  
\v 32 དེ་ནི་ལག་རྩལ་གྱི་ལས་རྣམས་ཇུས་འགོད་བྱེད་པར་དམིགས་ཏེ། གསེར་དངུལ་ལི་གསུམ་གྱི་མགར་བྱེད་པ་དང་།  
\v 33 རིན་པོ་ཆེ་དག་བརྐོ་གཏུབ་བྱེད་པ་དང་ཕྲ་རྒྱག་པ། ཤིང་བརྐོ་བ། ལག་རྩལ་གྱི་ལས་སྣ་ཚོགས་བྱེད་པའི་ཕྱིར་ཡིན།  
\v 34 ཡང་པི་ཟིད་ཨེལ་དང་དཱན་གྱི་ཚོ་པ་ནས་ཨ་ཧི་སཱ་མག་གི་བུ་ཨོ་ཧོ་ལི་ཨབ་གཉིས་ཀ་ལ་མི་གཞན་པར་སློབ་སྟོན་བྱེད་པའི་སེམས་གནང་བ་དང་།  
\v 35 ཁོ་གཉིས་ཀྱིས་བརྐོ་བཟོ་དང་ཇུས་འགོད་བྱེད་པ་དང་། ཡང་བལ་སྐུད་མཐིང་ག་དང་རྒྱ་སྨུག་དང་མཚལ་དམར་གྱི་མདོག་ཅན་དང་། སོ་རས་སྲབ་བུའི་འཚེམ་དྲུབས་བྱེད་པ་དང་། ཐགས་འཐག་པ་དང་། ལས་ཀུན་བྱེད་ཅིང་ཇུས་འགོད་བྱེད་པའི་ཕྱིར་དཀོན་མཆོག་ཡ་ཝཱེས་དེ་གཉིས་ཀྱི་སེམས་ལ་རྩལ་གྱིས་ཁྱབ་པར་མཛད་ཅེས་སྨྲས་སོ། །   
\c 36
\cl ལེའུ་སོ་དྲུག་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 གུར་མཆོག་བཟོ་མཁན་ཕྱི་མའི་སྐོར།  
\p
\v 1 ཡང་མོ་ཤེ་ཡིས་འདི་ལྟར། གནས་མཆོག་བཟོ་བའི་ལས་ཐམས་ཅད་ཇི་ལྟར་བསྒྲུབ་ཤེས་པའི་ཕྱིར། པི་ཟིད་ཨེལ་དང་ཨོ་ཧོ་ལི་ཨབ་དང་མི་ལག་རྩལ་ཅན་ཀུན་ལའང་དཀོན་མཆོག་ཡ་ཝཱེས་ཤེས་རབ་དང་བློ་རིག་གནང་བ་དེ་དག་གིས། དཀོན་མཆོག་ཡ་ཝཱེས་བཀའ་བསྩལ་པ་མཐའ་དག་བཞིན་དུ་བྱེད་དགོས་ཞེས་སྨྲས་སོ། །   
\p
\v 2 དེ་ནས་མོ་ཤེ་ཡིས་པི་ཟིད་ཨེལ་དང་ཨོ་ཧོ་ལི་ཨབ་དང་། སེམས་སུ་ཤེས་རབ་ལྡན་པ་སྟེ་དཀོན་མཆོག་ཡ་ཝཱེས་ཤེས་རབ་སེམས་སུ་གནང་བའི་མི་དང་། སེམས་འགུལ་ཐེབས་ནས་ལས་བསྒྲུབ་པར་འོང་འདོད་པ་ཐམས་ཅད་ཚུར་བོས་ནས།  
\v 3 གནས་མཆོག་བཟོ་བར་བྱེད་པའི་ལས་རྣམས་ཀྱི་དོན་དུ་ཡེས་ར་ཨེལ་པ་རྣམས་ཀྱིས་ཕུལ་བའི་འབུལ་བ་ཐམས་ཅད་ཁོ་ཚོས་མོ་ཤེ་ནས་བླངས་ཤིང་། ཡེས་ར་ཨེལ་པ་རྣམས་ཀྱིས་ཞོགས་པ་རེར་ད་དུང་ཡིད་མོས་ཀྱི་འབུལ་བ་ཁྱེར་འོངས་པས།  
\v 4 གནས་མཆོག་གི་ལས་ཐམས་ཅད་བྱེད་པའི་མི་ལག་རྩལ་ཅན་རེ་རེས་རང་རང་གི་ལས་ཀ་བྱེད་མཚམས་བཞག་སྟེ་འོངས་ནས།  
\v 5 མོ་ཤེ་ལ་ན་རེ། དཀོན་མཆོག་ཡ་ཝཱེས་བསྒྲུབ་དགོས་གསུངས་པའི་ལས་ཀྱི་ཕྱིར་མི་རྣམས་ཀྱིས་ཁྱེར་འོངས་པའི་དངོས་པོ་ལྷག་མ་མང་པོ་ཡོད་ཅེས་སྨྲས།  
\v 6 དེའི་ཕྱིར་མོ་ཤེ་ཡིས་བཀའ་བསྒོས་ནས་སྒར་ཡོངས་སུ་འདི་ལྟར། ད་ལྟ་སྐྱེས་པ་དང་བུད་མེད་སུ་ཡིན་ཡང་གནས་མཆོག་གི་ཕྱིར་འབུལ་བ་གང་ཡང་འབུལ་བར་མི་བྱའོ་ཞེས་བསྒྲགས་པས། དེ་ལྟར་འབངས་མི་ལ་འབུལ་དུ་མ་བཅུག  
\v 7 ལས་ཐམས་ཅད་བསྒྲུབ་དགོས་པའི་རྫས་རྣམས་ཀྱིས་ལོངས་པ་དང་ད་དུང་ལྷག་མ་ཡང་ཡོད་པ་ཡིན་ནོ། །   
\s1 གུར་མཆོག་བཟོས་པའི་སྐོར།  
\p
\v 8 དེ་ནས་ལས་མཁན་གྱི་ཁྲོད་དུ་མི་ལག་རྩལ་ཅན་ཐམས་ཅད་ཀྱིས་ཡོལ་བ་བཅུ་ཡིས་གུར་མཆོག་བཟོས་ཤིང་། དེའི་རྒྱུ་ནི་སོ་རས་སྲབ་བུ་བསྒྲིམས་པ་ཅན་དང་། བལ་སྐུད་མཐིང་ག་དང་རྒྱ་སྨུག་དང་མཚལ་དམར་གྱི་མདོག་ཅན་བཅས་ལ་འཐག་མཁན་ལག་རྩལ་ཅན་གྱི་ལས་བཞིན་དུ་ཀེ་རུབ་ཀྱི་གཟུགས་བརྙན་དང་ལྡན་པ་དེ་དག་བཟོས་སོ། །  
\v 9 ཡོལ་བ་རེ་རེའི་རིང་ཚད་ནི་ཁྲུ་ཉི་ཤུ་ཉེར་བརྒྱད་དང་། ཞེང་ནི་ཁྲུ་བཞི་ཡོད་པར་བྱས། ཡོལ་བ་ཐམས་ཅད་ཀྱི་ཚད་ནི་གཅིག་མཚུངས་ཡིན།  
\v 10 ཁོས་\f + \ft ཁོས་ཞེས་པ་ནི་བཟོ་མཁན་པི་ཟིད་ཨེལ་ཡིན་པར་གོ་དགོས། ལེའུ་སོ་གཅིག་གི་ཚིག་རྐང་གཉིས་ནས་བདུན་པའི་བར་དུ་གསལ། ལེའུ་འདིའི་ནང་དུ་འབྱུང་བའི་ཁོས་ཞེས་པའང་དེ་བཞིན་ཡིན། གོང་གི་ཚིག་རྐང་དང་པོ་ནས་གསུངས་པ་ལྟར་ལག་རྩལ་ཅན་མང་པོས་ལྷན་དུ་བཟོས་པ་ཡིན་པར་མཉམ་འཇོག་པར་འཚལ། \f*ཡོལ་བ་ལྔ་ནི་ཕན་ཚུན་སྦྲེལ་བ་དང་། ཡོལ་བ་གཞན་ལྔ་པོ་དེ་ཡང་ཕན་ཚུན་སྦྲེལ་ཏོ། །  
\v 11 ཡང་མུ་གཅིག་ཏུ་འབྲེལ་བའི་ཡོལ་བ་སྔ་མ་དེའི་སྣེ་མོར་ཁོས་མཐིང་མདོག་གི་སྒྲོག་ལུང་རྣམས་བཟོས་ཤིང་། མུ་གཅིག་ཏུ་འབྲེལ་བའི་ཡོལ་བ་ཕྱི་མ་དེའི་སྣེ་མོ་ལའང་ཁོས་དེ་བཞིན་བྱས།  
\v 12 ཁོས་མུ་གཅིག་ཏུ་འབྲེལ་བའི་ཡོལ་བ་སྔ་མར་སྒྲོག་ལུང་ལྔ་བཅུ་བཟོས་པ་དང་། མུ་གཅིག་ཏུ་འབྲེལ་བའི་ཡོལ་བ་ཕྱི་མར་ཡང་སྒྲོག་ལུང་ལྔ་བཅུ་བཟོས་ཏེ། སྒྲོག་ལུང་རྣམས་ཆ་རེ་ཁ་སྤྲད་ནས་བཞག  
\v 13 ཡང་གུར་མཆོག་མུ་གཅིག་ཏུ་བསྒྲིལ་བའི་ཕྱིར་གསེར་ཀྱུ་ལྔ་བཅུ་བཟོས་ཤིང་། ཡོལ་བ་རྣམས་གསེར་ཀྱུས་སྦྲེལ་ཏོ། །   
\p
\v 14 ཡང་གུར་མཆོག་གི་ཁེབས་རས་ཀྱི་ཕྱིར་ཁོས་ར་རྩིད་ཀྱི་ཡོལ་བ་བཅུ་གཅིག་བཟོས་ཤིང་།  
\v 15 ཡོལ་བ་རེ་རེའི་རིང་ཚད་ནི་ཁྲུ་སུམ་ཅུ་དང་། ཞེང་ཚད་ནི་ཁྲུ་བཞི་ཡོད་པ་དང་། ཡོལ་བ་བཅུ་གཅིག་པོའི་ཚད་གཅིག་མཚུངས་ཡིན།  
\v 16 ཁོས་ཡོལ་བ་ལྔ་ནི་གཅིག་ཏུ་སྦྲེལ་ཞིང་ཡོལ་བ་གཞན་དྲུག་ཀྱང་གཅིག་ཏུ་སྦྲེལ་བ་དང་།  
\v 17 ཡོལ་བ་སྦྲེལ་མ་ལྔ་ཅན་དེའི་སྣེ་མོར་སྒྲོག་ལུང་ལྔ་བཅུ་དང་། ཡོལ་བ་སྦྲེལ་མ་དྲུག་ཅན་དེའི་སྣེ་མོར་ཡང་སྒྲོག་ལུང་ལྔ་བཅུ་བཟོས།  
\v 18 ཡང་ཁེབས་རས་མུ་གཅིག་འཁྱུད་གཅིག་འོང་བའི་ཕྱིར་ཁོས་ལི་ཡི་ཀྱུ་ལྔ་བཅུ་བཟོས་པ་དང་།  
\v 19 རྒྱ་ཚོས་བརྒྱབ་པའི་ལུག་ཐུག་གི་པགས་པས་ཁེབས་རས་གཡོགས་པ་དང་། ཡང་དེའི་སྟེང་དུ་ཀོ་བ་སྤུས་ལེགས་རྣམས་ཀྱིས་ཁེབས་ཤིག་བཟོས་སོ། །   
\p
\v 20 དེ་ནས་ཁོས་གུར་མཆོག་གི་ཕྱིར་སེང་ལྡེང་ཤིང་གིས་གྱེན་དུ་འགྲེང་བའི་པང་ལེབ་རྣམས་བཟོས་པ་དང་།  
\v 21 པང་ལེབ་རེའི་རིང་ཚད་ནི་ཁྲུ་བཅུ་དང་། ཞེང་ཚད་ནི་ཁྲུ་གཅིག་དང་ཕྱེད་ཀ་ཡིན།  
\v 22 པང་ལེབ་གཅིག་དང་གཅིག་འབྲེལ་བའི་ཕྱིར་ཁོས་རེ་རེ་ལ་ཁོང་གཟེར་གཉིས་བཟོས་པ་དང་། གུར་མཆོག་གི་པང་ལེབ་ཐམས་ཅད་དེ་ལྟར་བཟོས།  
\v 23 ཁོས་གུར་མཆོག་གི་པང་ལེབ་བཟོས་པ་སྟེ། ལྷོ་ཕྱོགས་སུ་པང་ལེབ་ཉི་ཤུ་བཟོས་པ་དང་།  
\v 24 པང་ལེབ་ཉི་ཤུ་དེའི་ཞབས་ལ་དངུལ་གྱི་ཞབས་ར་བཞི་བཅུ་བཟོས་པ་དང་། པང་ལེབ་རེ་ལ་ཁོང་གཟེར་གཉིས་ཀྱི་ཞབས་ར་ཟུང་རེ་བཟོས་སོ། །  
\v 25 གུར་མཆོག་གི་ལོགས་གཞན་ཏེ། བྱང་ཕྱོགས་སུ་ཡང་ཁོས་པང་ལེབ་ཉི་ཤུ་བཟོས་པ་དང་།  
\v 26 དེའི་དངུལ་གྱི་ཞབས་ར་བཞི་བཅུ་དང་། པང་ལེབ་རེའི་འོག་ལ་ཞབས་ར་ཟུང་རེ་བཟོས།  
\v 27 གུར་མཆོག་གི་རྒྱབ་ལོགས་ཏེ་ནུབ་ཕྱོགས་སུ་ཁོས་པང་ལེབ་དྲུག་བཟོས་པ་དང་།  
\v 28 གུར་མཆོག་རྒྱབ་ལོགས་ཀྱི་ཟུར་གཉིས་ལ་པང་ལེབ་གཉིས་བཟོས།  
\v 29 དེ་གཉིས་ཀྱི་འགབ་ལ་པང་ལེབ་ཉིས་གཤིབ་ཡོད་ཅིང་། དེའི་གོང་ལའང་པང་ལེབ་གཅིག་གི་སྣེ་ནས་པང་ལེབ་གཞན་ཞིག་གི་བར་དུ་ཨ་ལོང་གཅིག་གིས་སྦྲེལ་བ་དང་། དེ་བཞིན་དུ་ཁོས་པང་ལེབ་གཉིས་དེ་ལྟར་ཟུར་གཉིས་ལ་བཟོས།  
\v 30 དེ་ལྟར་པང་ལེབ་བརྒྱད་དང་དེ་དག་ལ་དངུལ་གྱི་ཞབས་ར་བཅུ་དྲུག་དང་། པང་ལེབ་རེ་རེ་ལ་ཞབས་ར་གཉིས་བཅས་ཡོད་དོ། །   
\p
\v 31 དེ་ནས་ཁོས་སེང་ལྡེང་ཤིང་གིས་འཕྲེད་རྒྱུག་རྣམས་བཟོས་ཏེ། གུར་མཆོག་གི་ལོགས་གཅིག་གི་པང་ལེབ་རྣམས་ཀྱི་ཕྱིར་འཕྲེད་རྒྱུག་ལྔ་དང་།  
\v 32 གུར་མཆོག་གི་ལོགས་གཞན་ལ་ཡོད་པའི་པང་ལེབ་རྣམས་ཀྱི་ཕྱིར་འཕྲེད་རྒྱུག་ལྔ་དང་། རྒྱབ་ལོགས་ཏེ་ནུབ་ཕྱོགས་ཀྱི་པང་ལེབ་རྣམས་ཀྱི་ཕྱིར་ཡང་འཕྲེད་རྒྱུག་ལྔ་བཅས་བཟོས།  
\v 33 ཡང་ཁོས་པང་ལེབ་རྣམས་ཀྱི་དཀྱིལ་དུ་ཡོད་པའི་འཕྲེད་རྒྱུག་དག་སྣེ་གཅིག་ནས་སྣེ་གཞན་དུ་སླེབས་པར་བྱས་ཤིང་།  
\v 34 པང་ལེབ་དེ་དག་ཁོས་གསེར་གྱིས་གཡོགས་པ་དང་། དེ་དག་གི་འཕྲེད་རྒྱུག་འཛིན་པའི་ཨ་ལོང་རྣམས་གསེར་དུ་བྱས་ཤིང་། ཡང་འཕྲེད་རྒྱུག་དག་གསེར་གྱིས་གཡོགས་སོ། །   
\p
\v 35 ཡང་ཁོས་ཡོལ་བ་ཞིག་བཟོས་ཤིང་། དེའི་རྒྱུ་ནི་བལ་སྐུད་མཐིང་ག་དང་། རྒྱ་སྨུག་དང་། མཚལ་དམར་དང་། སོ་རས་སྲབ་བུ་བསྒྲིམས་པ་ཅན་བཅས་ཡིན་ཞིང་། ཡང་དེ་ལ་འཐག་མཁན་ལག་རྩལ་ཅན་གྱི་ལས་བཞིན་དུ་ཀེ་རུབ་ཀྱི་གཟུགས་བརྙན་དང་ལྡན་པ་རྣམས་བཟོས་ཤིང་།  
\v 36 ཁོས་ཡོལ་བའི་ཕྱིར་སེང་ལྡེང་ཤིང་གི་ཀ་བ་བཞི་བཟོས་ཤིང་གསེར་གྱིས་གཡོགས་པ་དང་། དེ་དག་གི་ཀྱུ་རྣམས་གསེར་ཡིན་པ་དང་། དེ་དག་གི་ཕྱིར་དངུལ་གྱི་ཞབས་ར་བཞི་བླུགས་སོ། །  
\v 37 ཁོས་གུར་མཆོག་གི་སྒོ་ལ་སྒོ་ཡོལ་ཞིག་བཟོས་ཏེ། དེའི་རྒྱུ་ནི་བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་། སོ་རས་སྲབ་བུ་བསྒྲིམས་པ་ཅན་ཡིན་ཏེ། འཐག་མཁན་གྱི་ལས་བཞིན་དུ་བཟོས།  
\v 38 ཡང་ཁོས་ཀ་བ་ལྔ་དང་སོ་སོའི་ཀྱུ་དང་བཅས་བཟོས་ཤིང་། ཀ་མགོ་རྣམས་དང་། ཁ་ཐུར་དག་གསེར་གྱིས་གཡོགས་པ་དང་། དེའི་ཞབས་ར་ལྔ་ནི་ལི་ཡིས་བཟོས་པ་ཡིན་ནོ། །   
\c 37
\cl ལེའུ་སོ་བདུན་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 ཤུར་སྒམ་བཟོས་པའི་སྐོར།  
\p
\v 1 ཡང་པི་ཟིད་ཨེལ་གྱིས་སེང་ལྡེང་ཤིང་གིས་ཤུར་སྒམ་བཟོས་པ་དང་། དེའི་རིང་ཚད་ལ་ཁྲུ་གཉིས་དང་ཕྱེད། ཞེང་ཚད་ལ་ཁྲུ་གཅིག་དང་ཕྱེད། མཐོ་ཚད་ལ་ཁྲུ་གཅིག་དང་ཕྱེད་ཀའོ། །  
\v 2 ཁོས་དེའི་ཕྱི་ནང་གཉིས་གསེར་བཙོ་མས་གཡོགས་པ་དང་། དེའི་མཐའ་འཁོར་ལ་གསེར་གྱི་མུ་ཁྱུད་ཅིག་བཟོས།  
\v 3 ཡང་ཁོས་གསེར་གྱི་ཨ་ལོང་བཞི་བླུགས་ནས་དེའི་སུག་པ་བཞི་ལ་སྦྱར་བ་དང་། ཨ་ལོང་གཉིས་ལོགས་གཅིག་དང་ཨ་ལོང་གཞན་གཉིས་པོ་ལོགས་ཅིག་ཤོས་ལ་སྦྱར།  
\v 4 ཡང་ཁོས་སེང་ལྡེང་ཤིང་གིས་རྒྱུག་པ་གཉིས་བཟོས་ནས་དེ་གསེར་གྱིས་གཡོགས་པ་དང་།  
\v 5 ཤུར་སྒམ་དེ་འཁུར་བའི་ཕྱིར་རྒྱུག་པ་གཉིས་ཤུར་སྒམ་གྱི་ལོགས་གཉིས་ཀའི་ཨ་ལོང་རྣམས་ལ་བརྒྱུས་སོ། །  
\v 6 ཡང་ཁོས་གསེར་བཙོ་མས་ཐུགས་རྗེའི་བཞུགས་ཁྲི་བཟོས་ཤིང་དེའི་རིང་ཚད་ནི་ཁྲུ་གཉིས་དང་ཕྱེད། ཞེང་ཚད་ལ་ཁྲུ་གཅིག་དང་ཕྱེད་ཀའོ། །  
\v 7 ཐུགས་རྗེའི་བཞུགས་ཁྲི་ཡི་སྣེ་མོ་གཉིས་ལ་གསེར་གྱིས་འབུར་རྡུང་བྱས་པའི་ཀེ་རུབ་ཀྱི་གཟུགས་བརྙན་གཉིས་བཟོས་ཤིང་།  
\v 8 ཀེ་རུབ་གཅིག་སྣེ་མོ་གཅིག་ལ་བཞག་པ་དང་། ཀེ་རུབ་ཅིག་ཤོས་སྣེ་མོ་གཞན་དེ་ལ་བཞག་སྟེ། ཀེ་རུབ་གཉིས་ནི་ཐུགས་རྗེའི་བཞུགས་ཁྲི་ཡི་སྣེ་མོ་གཉིས་ལ་དངོས་པོ་གཅིག་ཏུ་སྦྲེལ་བཟོ་བྱས།  
\v 9 དེ་གཉིས་ཀྱིས་གཤོག་པ་གྱེན་དུ་བརྐྱངས་ནས་ཐུགས་རྗེའི་བཞུགས་ཁྲི་གཡོགས་ཡོད་པ་དང་། ཕན་ཚུན་ལ་གདོང་གཏད་པ་དང་ཡང་དེ་གཉིས་ཀྱི་ཞལ་ངོ་ནི་བཞུགས་ཁྲི་ལ་འཁོར་ནས་ཡོད་དོ། །   
\s1 སྤྱན་བསྟར་བག་ལེབ་ཀྱི་སྒྲོག་ཙེ་བཟོས་པའི་སྐོར།  
\p
\v 10 ཡང་ཁོས་སེང་ལྡེང་ཤིང་གིས་སྒྲོག་ཙེ་ཞིག་བཟོས་ཤིང་། དེའི་རིང་ཚད་ལ་ཁྲུ་གཉིས། ཞེང་ཚད་ལ་ཁྲུ་གཅིག མཐོ་ཚད་ལ་ཁྲུ་གཅིག་དང་ཕྱེད་ཀ་བཅས་ཡོད།  
\v 11 ཁོས་དེ་གསེར་བཙོ་མས་གཡོགས་པ་དང་དེའི་མཐའ་འཁོར་ལ་གསེར་གྱི་མུ་ཁྱུད་ཅིག་བཟོས།  
\v 12 ཁོས་མུ་ཁྱུད་དེའི་འགབ་ཏུ་ཡང་མཐོ་ཚད་ལ་སོར་བཞི་ཅན་གྱི་མཐའ་རྒྱན་ཞིག་བཟོས་པ་དང་། དེའི་སྟེང་དུ་ཡང་གསེར་གྱི་མུ་ཁྱུད་ཅིག་སྦྱར།  
\v 13 ཡང་དེ་ལ་གསེར་གྱི་ཨ་ལོང་བཞི་བཟོས་ཏེ། དེའི་གྲུ་བཞིའི་སུག་པ་བཞི་ལ་སྦྱར།  
\v 14 ཨ་ལོང་དེ་དག་མཐའ་རྒྱན་གྱི་འཁྲིས་སུ་སྦྱར་ཏེ་སྒྲོག་ཙེ་འཁུར་བའི་ཕྱིར་དེ་དག་ནི་རྒྱུག་པ་རྣམས་ཀྱི་བསྐོན་ས་བྱས།  
\v 15 སྒྲོག་ཙེ་འཁུར་བའི་ཕྱིར་ཁོས་རྒྱུག་པ་དེ་རྣམས་སེང་ལྡེང་ཤིང་གིས་བཟོས་ཏེ་གསེར་གྱིས་གཡོགས་ཤིང་།  
\v 16 སྒྲོག་ཙེ་སྟེང་གི་ཡོ་བྱད་ཐམས་ཅད་དེ། གཞོང་པ་དང་སྡེར་མ་དང་། སྐྱེམས་མཆོད་འབུལ་བྱེད་ཨུ་ལུ་དང་བུམ་པ་བཅས་གསེར་བཙོ་མས་བཟོས་སོ། །   
\s1 སྒྲོན་སྟེགས་བཟོས་པའི་སྐོར།  
\p
\v 17 ཡང་ཁོས་སྒྲོན་སྟེགས་དེ་གསེར་བཙོ་མས་བཟོས་ཤིང་། སྒྲོན་སྟེགས་དང་དེའི་ཞབས་ར་དང་སྟེགས་རྐང་བཅས་འབུར་རྡུང་གིས་བཟོས་པ་དང་། དེའི་སྒྲོན་ཕོར་དང་། གང་བུའི་གཟུགས་དང་མེ་ཏོག་གི་དབྱིབས་ཚུགས་བཅས་སྒྲོན་སྟེགས་དང་དངོས་པོ་གཅིག་ཏུ་སྦྲེལ་བཟོ་བྱས།  
\v 18 སྒྲོན་སྟེགས་ཀྱི་ལོགས་གཉིས་ནས་གེལ་པ་དྲུག་ཐོན་པར་བྱས་ཤིང་། སྒྲོན་སྟེགས་ཀྱི་ལོགས་གཅིག་ནས་གེལ་པ་གསུམ་དང་ལོགས་ཅིག་ཤོས་སུ་གེལ་པ་གསུམ་ཐོན་པར་བྱས།  
\v 19 ལོགས་གཉིས་ཀའི་གེལ་པ་རེ་ལ་སྟར་སྡོང་གི་མེ་ཏོག་ལྟར་བྱས་པའི་སྒྲོན་ཕོར་གསུམ་རེ་ཡོད་པ་དང་། སྒྲོན་ཕོར་རེ་རེའི་སྟེགས་རྐང་དུ་གང་བུའི་གཟུགས་ཤིག་དང་། མེ་ཏོག་གཟུགས་ཤིག་བཅས་ཡོད་པར་བྱས། སྒྲོན་སྟེགས་ཀྱི་སྤྱི་སྡོམ་གེལ་པ་དྲུག་པོ་ཕན་ཚུན་ཆ་མཚུངས་པར་བྱས།  
\v 20 ཡང་སྒྲོན་སྟེགས་རྐང་པའི་སྟར་སྡོང་གི་མེ་ཏོག་ལྟར་བྱས་པའི་སྒྲོན་ཕོར་བཞི་ལ་གང་བུའི་གཟུགས་ཤིག་དང་མེ་ཏོག་གཟུགས་ཤིག་བཅས་ཡོད་པར་བྱས།  
\v 21 དེའི་གེལ་པ་ཟུང་གཅིག་གི་འོག་ཏུ་གང་བུའི་གཟུགས་ཤིག དེའི་གེལ་པ་གཞན་ཟུང་གི་འོག་ཏུའང་གང་བུའི་གཟུགས་ཤིག་སྟེ། དེ་ལྟར་སྒྲོན་སྟེགས་ལས་བྱུང་བའི་གེལ་པ་དྲུག་པོ་ལ་ཡོད་པར་བྱས།  
\v 22 གང་བུའི་གཟུགས་རྣམས་དང་གེལ་པ་རྣམས་ནི་མུ་འབྲེལ་དུ་འབུར་རྡུང་བྱས་པའི་གསེར་བཙོ་མས་བཟོས་སོ། །  
\v 23 ཡང་ཁོས་དེ་ལ་སྒྲོན་མེ་བདུན་དང་དེའི་སྡོང་རས་གཅོད་བྱེད་སྐམ་ཆུང་དང་ཀ་ཏོ་ར་རྣམས་གསེར་བཙོ་མས་བཟོས།  
\v 24 སྒྲོན་སྟེགས་དང་དེའི་ཡོ་བྱད་ཐམས་ཅད་གསེར་བཙོ་མ་རྡོ་ཚད་གཅིག་གིས་བཟོས་སོ། །   
\s1 སྤོས་ཁྲི་བཟོས་པའི་སྐོར།  
\p
\v 25 ཡང་ཁོས་སེང་ལྡེང་ཤིང་གིས་སྤོས་ཁྲི་བཟོས་ཏེ། དེའི་རིང་ཚད་ལ་ཁྲུ་གཅིག་དང་། ཞེང་ཚད་ལ་ཁྲུ་གཅིག་སྟེ་གྲུ་བཞི་མ་ཞིག་ཡིན་ལ། ཡང་དེའི་མཐོ་ཚད་ལ་ཁྲུ་གཉིས་ཡིན་པར་བྱས་ཤིང་། རུ་ཐུར་རྣམས་སྤོས་ཁྲི་དང་དངོས་པོ་གཅིག་ཏུ་སྦྲེལ་བཟོ་བྱས།  
\v 26 ཁོས་དེའི་ཐོག་དང་ལོགས་བཞི་དང་རུ་ཐུར་རྣམས་གསེར་བཙོ་མས་གཡོགས་ཏེ། དེའི་མཐའ་འཁོར་ལ་གསེར་གྱི་མུ་ཁྱུད་ཅིག་བཟོས།  
\v 27 ཡང་མུ་ཁྱུད་འོག་ནས་ཁ་གཏད་ཀྱི་ལོགས་གཉིས་ཀར་གསེར་གྱི་ཨ་ལོང་གཉིས་བཟོས་པ་དང་། དེ་ནི་རྒྱུག་པ་གཉིས་བསྐོན་ས་བྱས་ཤིང་། སྤོས་ཁྲི་འཁུར་བའི་ཕྱིར་ཡིན།  
\v 28 རྒྱུག་པ་དེ་གཉིས་སེང་ལྡེང་ཤིང་གིས་བཟོས་ཏེ་གསེར་གྱིས་གཡོགས་སོ། །   
\p
\v 29 ཡང་སྤོས་ཆུ་བཟོ་མཁན་གྱི་ལུགས་བཞིན་དུ། ཁོས་འབྱུག་སྣུམ་དམ་པ་དང་དྲི་ཞིམ་སླད་མེད་ཀྱི་བདུག་སྤོས་ནི་བསུང་རྫས་ནས་བཟོས་སོ། །   
\c 38
\cl ལེའུ་སོ་བརྒྱད་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 མཆོད་ཁྲི་དང་གཞོང་པ་བཟོས་པའི་སྐོར།  
\p
\v 1 ཡང་པི་ཟིད་ཨེལ་གྱིས་སེང་ལྡེང་ཤིང་གིས་སྦྱིན་སྲེག་གི་མཆོད་ཁྲི་བཟོས་ཤིང་། དེའི་རིང་ཚད་ནི་ཁྲུ་ལྔ་དང་ཞེང་ཚད་ནི་ཁྲུ་ལྔ་སྟེ་གྲུ་བཞི་མ་ཞིག་ཡིན་ཞིང་། མཐོ་ཚད་ནི་ཁྲུ་གསུམ་ཡིན།  
\v 2 དེའི་ཟུར་བཞི་ལ་རུ་ཐུར་བཞི་བཟོས་པ་དང་། རུ་ཐུར་བཞི་ནི་མཆོད་ཁྲི་དང་གཅིག་པར་སྦྲེལ་ཞིང་། མཆོད་ཁྲི་ལི་ཡིས་གཡོགས་པ་རེད།  
\v 3 ཡང་ཁོས་མཆོད་ཁྲིའི་གཞོང་པ་རྣམས་དང་མེ་ཁྱེམ་དང་། མཆོད་སྡེར་དང་ཤ་འཛིན་ཁ་དབྲག་དང་མེ་ཕོར་བཅས་བཟོས་ཤིང་། ཡོ་བྱད་དེ་ཐམས་ཅད་ལི་ཡིས་བཟོས།  
\v 4 ཡང་རྒྱུ་ལི་ཡིན་པའི་ཐག་མིག་ཅིག་བཟོས་ཏེ། ཐག་མིག་ནི་མཆོད་ཁྲིའི་མུ་ཁྱུད་ཀྱི་འགབ་ལ་བཅུག་ཅིང་། མཆོད་ཁྲིའི་མཐོ་ཚད་ཀྱི་ཕྱེད་ཙམ་ལ་སླེབས་སུ་བཅུག་པ་དང་།  
\v 5 ཐག་མིག་དེའི་གྲུ་ག་བཞི་ལ་ལི་ཡི་ཨ་ལོང་རེ་བླུགས་པ་དང་། དེ་དག་ནི་རྒྱུག་པ་གཉིས་བསྐོན་ས་ཡིན་པའི་ཕྱིར་རོ། །  
\v 6 ཁོས་སེང་ལྡེང་ཤིང་གིས་རྒྱུག་པ་བཟོས་ནས་དེ་གཉིས་ལི་ཡིས་གཡོགས་པ་དང་།  
\v 7 རྒྱུག་པ་ནི་མཆོད་ཁྲིའི་ལོགས་གཉིས་ཀྱི་ཨ་ལོང་རྣམས་སུ་བརྒྱུས་ཤིང་མཆོད་ཁྲི་འཁུར་བའི་ཕྱིར་ཡིན་ལ། ཡང་པང་ལེབ་ཀྱིས་མཆོད་ཁྲི་བཟོས་ཤིང་། དེའི་ནང་སྟོང་པ་ཡིན་ནོ། །   
\p
\v 8 ཡང་ཁོས་ལི་ཡི་གཞོང་པ་དང་དེའི་སྟེགས་བུ་བཟོས་ཤིང་། དེ་གཉིས་ནི་མཇལ་འཕྲད་གུར་མཆོག་གི་སྒོ་འགྲམ་ནས་ཞབས་ཕྱི་བྱེད་པའི་བུད་མེད་རྣམས་ཀྱི་མེ་ལོང་གིས་བཟོས་པའོ། །   
\s1 ཁྱམས་ར་བཟོས་པའི་སྐོར།  
\p
\v 9 དེ་ནས་ཁོས་ཁྱམས་ར་བཟོས་ཏེ། ལྷོ་ཕྱོགས་ཀྱི་ཁྱམས་ཡོལ་རྣམས་ནི་སོ་རས་སྲབ་བུ་བསྒྲིམས་པ་ཅན་གྱིས་བྱས་ཤིང་། དེའི་རིང་ཚད་ལ་ཁྲུ་བརྒྱ་ཡོད།  
\v 10 དེའི་ཀ་བ་ཉི་ཤུ་དང་དེ་དག་གི་ཞབས་ར་ཉི་ཤུ་ནི་ལི་ཡིས་བཟོས་པ་དང་། ཀ་བའི་ཀྱུ་རྣམས་དང་དེ་དག་གི་ཁ་ཐུར་རྣམས་དངུལ་གྱིས་བཟོས།  
\v 11 ཡང་བྱང་ཕྱོགས་ཀྱི་ཁྱམས་ཡོལ་རྣམས་ལ་ཡང་རིང་ཚད་ཁྲུ་བརྒྱ་ཡོད་ཅིང་། དེའི་ཀ་བ་ཉི་ཤུ་དང་དེ་དག་གི་ཞབས་ར་ཉི་ཤུ་ལི་ཡིས་བཟོས་པ་དང་། ཀ་བའི་ཀྱུ་དང་ཁ་ཐུར་རྣམས་དངུལ་གྱིས་བཟོས།  
\v 12 ཡང་ཁྱམས་རའི་ནུབ་ཕྱོགས་ཀྱི་ཡོལ་བ་རྣམས་ཀྱི་ཞེང་ཚད་ལ་ཁྲུ་ལྔ་བཅུ་ཡོད་ལ། དེར་ཀ་བ་བཅུ་དང་ཞབས་ར་བཅུ་བཟོས་ཤིང་། ཀ་བའི་ཀྱུ་དང་ཁ་ཐུར་རྣམས་དངུལ་གྱིས་བྱས་སོ། །  
\v 13 ཤར་ཕྱོགས་ཀྱི་ཁྱམས་ཡོལ་གྱི་ཞེང་ལའང་ཁྲུ་ལྔ་བཅུ་ཡོད་པ་དང་།  
\v 14 སྒོའི་ལོགས་གཅིག་གི་ཡོལ་བ་ལ་ཁྲུ་བཅོ་ལྔ་དང་། དེ་ལ་ཀ་བ་གསུམ་དང་ཞབས་ར་གསུམ་ཡོད།  
\v 15 དེ་བཞིན་དུ་སྒོའི་ལོགས་ཅིག་ཤོས་དེ་ལའང་དེ་བཞིན་བྱས། ཁྱམས་རའི་སྒོའི་ལོགས་རེ་ལ་ཡོལ་བ་ཁྲུ་བཅོ་ལྔ་དང་། ཀ་བ་གསུམ་དང་། ཞབས་ར་གསུམ་ཡོད།  
\v 16 ཁྱམས་ཡོལ་ཐམས་ཅད་ཀྱི་རྒྱུ་ནི་སོ་རས་སྲབ་བུ་བསྒྲིམས་པ་ཅན་ཡིན།  
\v 17 ཀ་བ་རྣམས་ཀྱི་ཞབས་ར་རྣམས་ལི་དང་ཀ་བའི་ཀྱུ་རྣམས་དང་ཁ་ཐུར་རྣམས་ནི་དངུལ་དང་། ཀ་མགོ་རྣམས་ཀྱང་དངུལ་གྱིས་གཡོགས་ཤིང་། ཁྱམས་རའི་ཀ་བ་ཐམས་ཅད་ཀྱི་རྒྱུག་པ་རྣམས་ཀྱང་དངུལ་གྱིས་བཟོས་སོ། །  
\v 18 ཁྱམས་རའི་སྒོ་ཡོལ་དེའི་རྒྱུ་ནི་བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་། སོ་རས་སྲབ་བུ་བསྒྲིམས་པ་ཅན་གྱིས་འཐག་མཁན་གྱི་ལས་བཞིན་བྱས་ཤིང་། དེའི་རིང་ཚད་ནི་ཁྲུ་ཉི་ཤུ་དང་མཐོ་ཚད་ལ་ཁྲུ་ལྔ་བཟོས་པ་དང་། མཐོ་ཚད་དེ་ནི་ཁྱམས་ཡོལ་རྣམས་དང་མཐུན།  
\v 19 དེའི་ཀ་བ་བཞི་དང་ཞབས་ར་བཞི་ནི་ལི་དང་། ཀ་བའི་ཀྱུ་དང་ཁ་ཐུར་རྣམས་ནི་དངུལ་གྱིས་བཟོས་ཤིང་། ཀ་མགོ་རྣམས་ནི་དངུལ་གྱིས་གཡོགས།  
\v 20 གུར་མཆོག་དང་ཁྱམས་རའི་མཐའ་འཁོར་གྱི་ཕུར་བ་ཐམས་ཅད་ལི་ཡིས་བཟོས་སོ། །   
\s1 གུར་མཆོག་གི་རྒྱུ་ཆའི་སྐོར།  
\p
\v 21 མོ་ཤེ་ཡིས་བཀའ་གནང་བ་བཞིན་དུ་ལེ་ཝི་པས་ཞབས་འདེགས་སྐོར་ལ་རྩིས་གྲངས་བླངས་ཤིང་། མཆོད་དཔོན་ཨ་རོན་གྱི་བུ་ཨི་ཐ་མཱཪ་གྱིས་རྩིས་ཐོར་བཀོད་པའི་གུར་མཆོག་གམ་དཔང་པོའི་གུར་མཆོག་གི་རྒྱུ་ཆའི་སྡོམ་ནི་འདི་ལྟར་ཏེ།  
\v 22 དཀོན་མཆོག་ཡ་ཝཱེས་མོ་ཤེ་ལ་བཀའ་ཅི་གནང་བ་བཞིན་དུ་བཟོ་མཁན་པི་ཟིད་ཨེལ་ཡིན་ལ། ཁོ་ནི་ཨོའུ་རེལ་གྱི་བུ་ཡིན་ཞིང་། ཨོའུ་རེལ་ནི་ཡ་ཧུ་དཱ་ཚོ་པའི་ཧུ་རཱ་ཡི་བུ་ཡིན་པ་དང་།  
\v 23 དཱན་ཚོ་པའི་ཨ་ཧི་སཱ་མག་གི་བུ་ཨོ་ཧོ་ལི་ཨབ་ནི་པི་ཟིད་ཨེལ་གྱི་ལས་གྲོགས་ཡིན་ཞིང་། ཁོ་ནི་བརྐོ་བཟོ་དང་ལས་ཀ་བྱེད་པའི་ལག་རྩལ་ཅན་དང༌། བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་སོ་རས་སྲབ་བུའི་འཐག་བཟོ་པའང་ཡིན་ནོ། །   
\p
\v 24 དེ་སྔར་ཕུལ་ཟིན་པའི་གསེར་ཐམས་ཅད་དེ། གནས་མཆོག་བཟོ་བའི་ལས་ཀུན་གྱི་ཕྱིར་གཡོབ་མཆོད་དུ་ཕུལ་བའི་གསེར་ནི་གནས་མཆོག་གི་སྲང་བཞིན་དུ་རྡོ་ཚད་ཉི་ཤུ་ཉེར་དགུ་དང་གསེར་སྲང་བདུན་བརྒྱ་སུམ་ཅུ་ཡིན།  
\v 25 མི་ཚོགས་ཀྱི་གྲངས་རྩིས་ལས་བྱུང་བའི་དངུལ་ནི་གནས་མཆོག་གི་སྲང་བཞིན་དུ་རྡོ་ཚད་བརྒྱ་དང་། དངུལ་སྲང་ཆིག་སྟོང་བདུན་བརྒྱ་བདུན་ཅུ་དོན་ལྔ་ཡིན།  
\v 26 མི་ཚོགས་ཀྱི་གྲངས་ཀ་རྩིས་པ་ལ་ལོ་ཉི་ཤུ་ཡན་གྱི་སྐྱེས་པའི་གྲངས་ནི་དྲུག་འབུམ་སུམ་སྟོང་ལྔ་བརྒྱ་ལྔ་བཅུ་ཡིན། དེ་རེ་རེ་ནས་དངུལ་ཁྲལ་པེ་ཁཱ་གཅིག་རེ་ཕུལ། པེ་ཁཱའི་ལྗིད་ཚད་ནི་གནས་མཆོག་གི་སྲང་བཞིན་གྱི་དངུལ་སྲང་ཕྱེད་ཀ་དང་འདྲ།  
\v 27 དངུལ་རྡོ་ཚད་བརྒྱ་ཡོད་པ་དེ་གནས་མཆོག་གི་ཞབས་ར་དང་ཡོལ་བའི་ཞབས་ར་རྣམས་བླུག་པའི་ཕྱིར་ཡིན་ཏེ། ཞབས་ར་བརྒྱ་ལ་རྡོ་ཚད་བརྒྱ། ཞབས་ར་རེ་ལ་རྡོ་ཚད་གཅིག་བཅས་སོ། །  
\v 28 དངུལ་སྲང་ཆིག་སྟོང་བདུན་བརྒྱ་བདུན་ཅུ་དོན་ལྔ་དེ་ཡིས་ཀ་བའི་ཀྱུ་རྣམས་བཟོས་པ་དང་། ཀ་མགོ་རྣམས་གཡོགས་པ་དང་། ད་དུང་ཁ་ཐུར་རྣམས་ཀྱང་བཟོས་སོ། །  
\v 29 ཡང་དེ་སྔར་གཡོབ་མཆོད་དུ་ཕུལ་ཟིན་པའི་ལི་སྟེ། རྡོ་ཚད་བདུན་ཅུ་དང་སྲང་ཉིས་སྟོང་བཞི་བརྒྱ་ཡོད།  
\v 30 དེ་ལས་མཇལ་འཕྲད་གུར་མཆོག་གི་སྒོའི་ཞབས་ར་རྣམས་དང་། ལི་ཡིན་པའི་མཆོད་ཁྲི་དང་། དེའི་ལི་ཡིན་པའི་ཐག་མིག་དང་མཆོད་ཁྲིའི་ཡོ་བྱད་ཐམས་ཅད་དང་།  
\v 31 ཕྱོགས་བཞི་ལ་བསྐོར་ཡོད་པའི་ཁྱམས་རའི་ཞབས་ར་རྣམས་དང་། ཁྱམས་སྒོའི་ཞབས་ར་རྣམས་དང་། གུར་མཆོག་གི་ཕུར་བ་ཐམས་ཅད་དང་ཕྱོགས་བཞི་ལ་བསྐོར་ཡོད་པའི་ཁྱམས་རའི་ཕུར་བ་ཐམས་ཅད་བཅས་བཟོས་སོ། །   
\c 39
\cl ལེའུ་སོ་དགུ་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 མཆོད་དཔོན་གྱི་འཕགས་གོས།  
\p
\v 1 གནས་དམ་པ་ནས་ཞབས་ཕྱི་བྱེད་པའི་ཕྱིར་པི་ཟིད་ཨེལ་སོགས་ཀྱིས་ཐགས་ཞིབ་མོར་བཏགས་པའི་གོས་རྣམས་བཟོས་པ་ནི། བལ་སྐུད་མཐིང་ག་དང་རྒྱ་སྨུག་དང་མཚལ་དམར་བཅས་ཀྱིས། དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་དུ་འཕགས་གོས་དམ་པ་རྣམས་ཨ་རོན་གྱི་ཕྱིར་བཟོས་སོ། །  
\v 2 ཁོས་བེར་ཐུལ་གྱི་རྒྱུ་ནི་གསེར་སྐུད་དང་བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་སོ་རས་སྲབ་བུ་བསྒྲིམས་པ་ཅན་དང་།  
\v 3 དེ་དག་གིས་གསེར་ནི་ལེབ་མོ་སྲབ་བུར་བརྡུངས་ནས་སྐུད་པ་དྲས་ཤིང་། བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་སོ་རས་སྲབ་བུ་བཅས་ཀྱིས་འཐག་མཁན་ལག་རྩལ་ཅན་གྱི་ལས་བཞིན་དུ་ཆ་མཚུངས་པར་སྦྱར།  
\v 4 བེར་ཐུལ་ལ་ཡང་དཔུང་པའི་ཕྲག་ཁེབས་གཉིས་བཟོས་ཤིང་། བེར་ཐུལ་གྱི་ཕྲག་མགོ་གཉིས་ལ་སྦྲེལ་ཞིང་འཆིང་བར་བྱས།  
\v 5 ཡང་བེར་ཐུལ་དང་འབྲེལ་བའི་སྐེད་ཆིངས་མཆོར་པོ་ཅན་ནི་བེར་ཐུལ་གྱི་བཟོ་ཚུལ་དང་གཅིག་མཚུངས་ཡིན་ཞིང་། དེའི་རྒྱུ་ནི་གསེར་སྐུད་དང་བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་སོ་རས་སྲབ་བུ་བསྒྲིམས་པ་ཅན་ཡིན་ཏེ། དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་ནོ། །   
\p
\v 6 ཡང་དེ་དག་གིས་གཟི་གཉིས་སྟ་གོན་བྱས་ནས་གསེར་གྱི་འབུར་ཀོང་གིས་བསྐོར་བ་དང་དམ་ཕྲུག་བརྐོ་བ་བཞིན་དུ་གཟི་གཉིས་ཀྱི་སྟེང་དུ་ཡེས་ར་ཨེལ་གྱི་བུ་རྣམས་ཀྱི་མིང་བརྐོས།  
\v 7 རྡོ་དེ་གཉིས་བེར་ཐུལ་གྱི་དཔུང་པའི་ཕྲག་ཁེབས་གཉིས་ལ་སྦྱར་ཅིང་། ཡེས་ར་ཨེལ་གྱི་བུ་རྣམས་ལ་རྗེས་དྲན་བྱེད་པའི་ཕྱིར་རོ། །དེ་ནི་དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་ནོ། །   
\s1 བྲང་རྒྱན་བཟོས་པའི་སྐོར།  
\p
\v 8 ཡང་པི་ཟིད་ཨེལ་གྱིས་བྲང་རྒྱན་དེ་བཟོས་ལ། དེ་ནི་བཟོ་བ་ལག་རྩལ་ཅན་གྱིས་བྱས་པ་དང་བེར་ཐུལ་གྱི་བཟོ་ཚུལ་བཞིན་དུ་བཟོས། དེ་ནི་གསེར་སྐུད་དང་བལ་སྐུད་མཐིང་ག་དང་རྒྱ་སྨུག་དང་མཚལ་དམར་དང་སོ་རས་སྲབ་བུ་བསྒྲིམས་པ་ཅན་གྱིས་བཟོས་ཟིན་ཏོ། །  
\v 9 དེ་ནི་གྲུ་བཞི་མ་ཞིག་ཡིན་ལ། རིང་ཚད་ལ་མཐོ་གང་དང་ཞེང་ལ་ཡང་མཐོ་གང་ཡོད་དེ་ཉིས་ལྟེབ་ཡིན།  
\v 10 དེ་ལ་ཕ་ལམ་ཤུར་ཕྲེང་བཞིའི་ཕྲ་བཏབ་ཡོད་དེ། ཤུར་ཕྲེང་དང་པོ་ནི་པདྨ་རཱ་ག་དང་། སྤྲིན་རྡོ། མ་རྒད་བཅས་གསུམ་དང་།  
\v 11 ཤུར་ཕྲེང་གཉིས་པ་ནི་གཡུ་དང་ཨིནྡྲ་ནཱི་ལ་དང་རྡོ་རྗེ་ཕ་ལམ་བཅས་གསུམ།  
\v 12 ཤུར་ཕྲེང་གསུམ་པ་ནི་རྟ་ཀླད་སྨུག་པོ་དང་། ཤེལ་རྡོ་དང་། མུ་མེན་བཅས་གསུམ།  
\v 13 ཤུར་ཕྲེང་བཞི་པ་ནི་བཻཌཱུརྱ་ལྗང་སེར་དང་། གཟི་དང་གཡང་ཊི་སྔོན་པོ་བཅས་གསུམ་སྟེ། དེ་དག་ནི་གསེར་གྱི་འབུར་ཀོང་ལ་བཏབ།  
\v 14 རིན་པོ་ཆེ་དེ་དག་གིས་ཡེས་ར་ཨེལ་གྱི་བུ་རྣམས་ཀྱི་མིང་གི་མཚོན་རྟགས་བྱེད་ཅིང་མིང་ལྟར་བཅུ་གཉིས་ཡོད་དེ། དམ་ཕྲུག་བཞིན་དུ་རིན་པོ་ཆེ་རེ་རེའི་སྟེང་དུ་ཡེས་ར་ཨེལ་གྱི་ཚོ་པ་བཅུ་གཉིས་པོའི་མིང་རེ་རེ་བཞིན་དུ་བརྐོས་ཟིན་ཏོ། །  
\v 15 དེ་དག་གིས་བྲང་རྒྱན་ལ་གསེར་བཙོ་མས་བསླེས་པའི་ཉག་ཐག་བཟོས་ཤིང་།  
\v 16 གསེར་གྱི་འབུར་ཀོང་གཉིས་དང་ཨ་ལོང་གཉིས་བཟོས་ཏེ་ཨ་ལོང་གཉིས་བྲང་རྒྱན་གྱི་གྲུ་ག་གཉིས་ལ་སྦྱར།  
\v 17 ཡང་གསེར་གྱི་ཉག་ཐག་དེ་གཉིས་ནི་བྲང་རྒྱན་གྱི་གྲུ་ག་རུ་ཡོད་པའི་ཨ་ལོང་གཉིས་ལ་བརྒྱུས་ཡོད་ཅིང་།  
\v 18 དེ་ནས་ཉག་ཐག་གི་སྣེ་གཉིས་འབུར་ཀོང་གཉིས་ལ་བཅུག་སྟེ། བེར་ཐུལ་གྱི་དཔུང་པའི་ཕྲག་ཁེབས་ཀྱི་མདུན་ལོགས་ལ་སྦྱར།  
\v 19 ཡང་ཁོས་གསེར་གྱི་ཨ་ལོང་གཞན་གཉིས་བཟོས་ནས་བྲང་རྒྱན་གྱི་གྲུ་ག་གཉིས་ལ་སྦྱར་ཅིང་། སྦྱོར་ས་དེ་ནི་བྲང་རྒྱན་གྱི་ཟུར་ཁ་ཡིན་ལ་བྲང་རྒྱན་དང་བེར་ཐུལ་གྱི་བར་མཚམས་ཀྱང་ཡིན།  
\v 20 ཡང་ཁོས་གསེར་གྱི་ཨ་ལོང་གཉིས་བཟོས་ནས། བེར་ཐུལ་གྱི་དཔུང་པའི་ཕྲག་ཁེབས་གཉིས་ཀྱི་མདུན་ལོགས་ཀྱི་འོག་དང་སྐེད་ཆིངས་མཆོར་པོ་ཅན་གྱི་འབྲེལ་སའི་ཅུང་ཟད་གོང་དུ་བཅུག་ཅིང་།  
\v 21 བྲང་རྒྱན་དེ་བེར་ཐུལ་གྱི་སྐེད་ཆིངས་མཆོར་པོ་ཅན་དང་དམ་དུ་འབྲེལ་བ་དང་བེར་ཐུལ་ལས་མི་འཆོར་བའི་ཕྱིར། བྲང་རྒྱན་གྱི་ཨ་ལོང་དེ་བེར་ཐུལ་གྱི་ཨ་ལོང་ལ་སྡེམ་ཐག་སྔོན་པོ་ཡིས་བསྡམས་ཤིང་། དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་ནོ། །   
\s1 འཕགས་གོས་གཞན་རྣམས་བཟོས་པའི་སྐོར།  
\p
\v 22 པི་ཟིད་ཨེལ་གྱིས་ཡང་བེར་ཐུལ་འོག་གི་གོས་རིང་ནི་ཁ་དོག་སྔོན་པོས་འཐག་བཟོའི་ལུགས་ལྟར་བྱས་ཤིང་།  
\v 23 དེའི་སྟོད་དཀྱིལ་དུ་མགོའི་ཕྱིར་ཁུང་བུ་ཞིག་བཞག་ཅིང་། དེའི་མཐའ་འཁོར་ལ་འཐག་བཟོ་བྱས་པའི་གོང་བ་ཞིག་ཀྱང་བཟོས་ཏེ། མི་རལ་བའི་ཕྱིར་གོ་ཁྲབ་ཀྱི་གོང་བ་ལྟར་དུ་བཟོས།  
\v 24 ཡང་དེའི་གོས་འདབ་ཀྱི་མཐའ་འཁོར་དུ་བལ་སྐུད་མཐིང་ག་དང་རྒྱ་སྨུག མཚལ་དམར་དང་སོ་རས་སྲབ་བུ་བསྒྲིམས་པ་ཅན་བཅས་ཀྱི་སེ་འབྲུས་བརྒྱན་ཡོད་ཅིང་།  
\v 25 གསེར་བཙོ་མས་གཡེར་ཁ་རྣམས་བཟོས་ཤིང་། སེ་འབྲུ་རེ་རེའི་བར་གསེབ་ཏུ་གསེར་གྱི་གཡེར་ཁ་རྣམས་བེར་ཐུལ་གྱི་འདབ་ཟུར་ཐམས་ཅད་ལ་སྦྱར།  
\v 26 གཡེར་ཁ་གཅིག་དང་སེ་འབྲུ་གཅིག ཡང་གཡེར་ཁ་གཅིག་དང་སེ་འབྲུ་གཅིག་བཅས་གོས་རིང་གི་འདབ་ཁ་ཐམས་ཅད་ལ་སྦྱར། དཀོན་མཆོག་ལ་ཞབས་ཕྱི་སྒྲུབ་སྐབས་གྱོན་པའི་ཕྱིར་བཟོས་ཏེ། དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་ནོ། །   
\p
\v 27 ཡང་དེ་དག་གིས་འཐག་མཁན་གྱི་ལས་བཞིན་དུ་ཨ་རོན་དང་ཁོའི་བུ་རྣམས་ལ་སོ་རས་སྲབ་བུ་ཡིས་ནང་གོས་བཟོས་པ་དང་།  
\v 28 ཡང་སོ་རས་ཀྱིས་ལ་ཐོད་དང་པྲོག་ཞུ་མཛེས་སྡུག་ལྡན་པ་རྣམས་བཟོས་པ་དང་། སོ་རས་སྲབ་བུ་བསྒྲིམས་པ་ཅན་གྱིས་ཨང་ཐུང་བཟོས་པ་དང་།  
\v 29 སྐེད་ཆིངས་ནི་བལ་སྐུད་མཐིང་ག་དང་། རྒྱ་སྨུག་དང་། མཚལ་དམར་དང་། སོ་རས་སྲབ་བུ་བསྒྲིམས་པ་ཅན་བཅས་ནས་འཐག་མཁན་གྱི་ལས་བཞིན་དུ་བཟོས་ཏེ། དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་དུའོ། །   
\p
\v 30 ཡང་དེ་དག་གིས་གསེར་བཙོ་མས་ཅོད་པན་དམ་པའི་བྱང་བུ་བཟོས་ཤིང་། དེའི་སྟེང་ལ་དམ་ཕྲུག་བརྐོ་བ་བཞིན་དུ། དཀོན་མཆོག་ཡ་ཝཱེའི་ཕྱིར་དུ་དམ་པའོ་ཞེས་བརྐོས།  
\v 31 ཡང་དེ་ལ་རས་སྔོན་པོའི་ཉག་ཐག་ཅིག་སྦྱར་ནས་གོང་གི་ལ་ཐོད་དང་སྦྲེལ་བ་སྟེ། དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་ནོ། །   
\s1 མོ་ཤེ་ཡིས་གུར་མཆོག་གི་བྱས་འབྲས་ཐམས་ཅད་ལ་བལྟས་པ།  
\p
\v 32 དེ་དག་གིས་དེ་ལྟར་གུར་མཆོག་སྟེ་མཇལ་འཕྲད་གུར་མཆོག་གི་ཕྱིར་ལས་ཀ་ཐམས་ཅད་རྫོགས་པ་དང་། དཀོན་མཆོག་ཡ་ཝཱེས་མོ་ཤེ་ལ་བཀའ་ཅི་དང་ཅི་གནང་བ་བཞིན་དུ་ཡེས་ར་ཨེལ་པ་རྣམས་ཀྱིས་བྱས་ཏེ། དེ་ག་བཞིན་དུ་བྱས་སོ། །  
\v 33 དེ་ནས་དེ་དག་གིས་མོ་ཤེའི་དྲུང་དུ་གུར་མཆོག་ཁྱེར་འོངས་ནས། གུར་དེ་དང་དེའི་ཡོ་བྱད་ཐམས་ཅད་དེ། དེའི་ཀྱུ་རྣམས་དང་། པང་ལེབ་དང་། འཕྲེད་རྒྱུག་དང་། ཀ་བ་དང་དེའི་ཞབས་ར་དང་།  
\v 34 རྒྱ་ཚོས་བརྒྱབ་པའི་ལུག་ཐུག་གི་པགས་པ་ནས་གུར་མཆོག་གི་ཁེབས་རས་དང་། དེའི་སྟེང་དུ་ཀོ་བ་སྤུས་ལེགས་རྣམས་ལས་བྱས་པའི་ཁེབས་དང་། གཡོག་བྱེད་ཀྱི་ཡོལ་བ་དང་།  
\v 35 དཔང་མཛད་ཤུར་སྒམ་དང་དེའི་རྒྱུག་པ་རྣམས་དང་། ཐུགས་རྗེའི་བཞུགས་ཁྲི་དང་།  
\v 36 སྒྲོག་ཙེ་དང་དེའི་ཡོ་བྱད་ཐམས་ཅད་དང་སྤྱན་བསྟར་བག་ལེབ་དང་།  
\v 37 གསེར་བཙོ་མའི་སྒྲོན་སྟེགས་དང་དེ་ལ་གྲལ་བསྒྲིགས་པའི་སྒྲོན་མེ་རྣམས་དང་། དེའི་ཡོ་བྱད་ཐམས་ཅད་དང༌། སྒྲོན་མེའི་ཕྱིར་འཚིར་སྣུམ་དང་།  
\v 38 གསེར་གྱི་སྤོས་ཁྲི་དང་། འབྱུག་སྣུམ་དང་དྲི་ཞིམ་བདུག་སྤོས་དང་གུར་མཆོག་གི་སྒོ་ཡོལ་དང་།  
\v 39 ལི་ཡི་མཆོད་ཁྲི་དང་དེའི་སྟེང་གི་ལི་ཡི་ཐག་མིག་དང་དེའི་རྒྱུག་པ་རྣམས་དང་དེའི་ཡོ་བྱད་ཐམས་ཅད་དང་། ཁྲུས་གཞོང་དང་དེའི་སྟེགས་བུ་དང་།  
\v 40 ཁྱམས་རའི་ཡོལ་བ་རྣམས་དང་དེའི་ཀ་བ་དང་། ཞབས་ར་དང་། ཁྱམས་རའི་སྒོ་ཡོལ་དང་དེའི་ཆོན་ཐག་དང་ཕུར་བ་དང་། གུར་མཆོག་སྟེ་མཇལ་འཕྲད་གུར་མཆོག་གི་ཕྱིར་བཀོལ་སྤྱོད་བྱེད་པའི་ཡོ་བྱད་ཐམས་ཅད་དང་།  
\v 41 གནས་དམ་པར་ཞབས་ཕྱི་བྱེད་པའི་ཆེད་དུ་ཐགས་ཞིབ་མོར་བཏགས་པའི་གོས་རྣམས་དང་། མཆོད་དཔོན་ཨ་རོན་གྱི་ན་བཟའ་དམ་པ་རྣམས་དང་། ཁོའི་བུ་རྣམས་ཀྱིས་མཆོད་དཔོན་གྱི་ཞབས་ཕྱི་བྱེད་པའི་ཕྱིར་ན་བཟའ་བཅས་ཁྱེར་ནས་འོངས།  
\v 42 དཀོན་མཆོག་ཡ་ཝཱེས་མོ་ཤེ་ལ་བཀའ་ཅི་དང་ཅི་གནང་བ་བཞིན་དུ་ཡེས་ར་ཨེལ་པ་རྣམས་ཀྱིས་ལས་ཀ་དེ་ཐམས་ཅད་བྱས་སོ། །  
\v 43 དེ་ནས་མོ་ཤེ་ཡིས་ལས་ཀ་དེ་ཐམས་ཅད་ལ་བལྟས་ནས། ལྟོས་དང་དཀོན་མཆོག་ཡ་ཝཱེས་བཀའ་ཇི་ལྟར་གནང་བ་བཞིན་དུ་ཁོ་རྣམས་ཀྱིས་དེ་ལྟར་བསྒྲུབས་པས། ཁོས་དེ་དག་ལ་བྱིན་གྱིས་བརླབས་སོ། །   
\c 40
\cl ལེའུ་བཞི་བཅུ་པ། 
\toc1 ༄༅། །ཨེ་ཅིབ་ནས་ཐོན་པའི་མདོ། 
\toc2 ཨེ་ཅིབ་ནས་ཐོན་པ། 
\s1 གུར་མཆོག་བསྒྲེངས་པའི་སྐོར།  
\p
\v 1 ཡང་དཀོན་མཆོག་ཡ་ཝཱེས་མོ་ཤེ་ལ་འདི་སྐད་ཅེས་གསུངས་པ་སྟེ།  
\v 2 ཟླ་དང་པོའི་ཚེས་གཅིག་ཉིན། ཁྱོད་ཀྱིས་གུར་མཆོག་སྟེ་མཇལ་འཕྲད་གུར་མཆོག་བསྒྲེང་དགོས་ཤིང་།  
\v 3 དེའི་ནང་དུ་དཔང་མཛད་ཤུར་སྒམ་བཞག་ནས། སྒམ་དེའི་མདུན་དུ་ཡོལ་བ་དཔྱང་བར་གྱིས་ཤིག  
\v 4 ཁྱོད་ཀྱིས་གུར་མཆོག་ཏུ་སྒྲོག་ཙེ་བཞག་སྟེ། དེའི་སྟེང་དུ་རྫས་གང་དགོས་པ་རྣམས་བཤམ་པར་བྱའོ། །སྒྲོན་སྟེགས་ཀྱང་ནང་དུ་ཁྱེར་ལ། དེའི་སྟེང་དུ་སྒྲོན་མེ་རྣམས་སྒྲིགས་ཤིག  
\v 5 ཁྱོད་ཀྱིས་གསེར་གྱི་སྤོས་ཁྲི་ནི་དཔང་མཛད་ཤུར་སྒམ་གྱི་མདུན་དུ་ཞོག་དང་། གུར་མཆོག་གི་སྒོ་ཡོལ་ཕོབས་ཤིག  
\v 6 ཡང་སྦྱིན་སྲེག་གི་མཆོད་ཁྲི་ནི་གུར་མཆོག་སྟེ་མཇལ་འཕྲད་གུར་མཆོག་གི་སྒོ་ཁ་རུ་ཞོག་ཅིག  
\v 7 ཡང་ཁྲུས་གཞོང་ནི་མཇལ་འཕྲད་གུར་མཆོག་དང་མཆོད་ཁྲིའི་བར་ལ་བཞག་ནས། ནང་དུ་ཆུ་བླུགས་ཤིག  
\v 8 ཡང་དེའི་མཐའ་བཞི་ལ་ཁྱམས་རས་བསྐོར་བ་དང་། ཁྱམས་རའི་སྒོ་ཡོལ་ཡང་དཔྱང་བར་གྱིས་ཤིག  
\v 9 དེ་ནས་གུར་མཆོག་དང་དེའི་ནང་དུ་ཡོད་པའི་ཡོ་བྱད་ཐམས་ཅད་ལ་འབྱུག་སྣུམ་གྱིས་བྱུགས་དང་། དེ་དང་དེའི་ཡོ་བྱད་ཐམས་ཅད་ཀྱང་དམ་པར་བྱོས་ཤིག ཡོངས་སུ་དམ་པར་འགྱུར་བ་ཡིན།  
\v 10 སྦྱིན་སྲེག་གི་མཆོད་ཁྲི་དང་དེའི་ཡོ་བྱད་རྣམས་ལ་འབྱུག་སྣུམ་གྱིས་བྱུགས་ནས་མཆོད་ཁྲི་དམ་པར་བྱོས་དང་། མཆོད་ཁྲི་དེ་ཀུན་ལས་དམ་པ་ཡིན་པར་བྱའོ། །  
\v 11 ཡང་ཁྲུས་གཞོང་དང་དེའི་སྟེགས་བུ་ལ་འབྱུག་སྣུམ་གྱིས་བྱུགས་ཏེ་དམ་པར་བྱོས་ཤིག  
\v 12 ཡང་ཨ་རོན་དང་དེའི་བུ་རྣམས་མཇལ་འཕྲད་གུར་མཆོག་གི་སྒོ་མདུན་དུ་ཁྲིད་ནས། ཁོ་རྣམས་ཆུས་བཀྲུ་དགོས།  
\v 13 ཁྱོད་ཀྱིས་ཨ་རོན་ལ་ན་བཟའ་དམ་པ་རྣམས་བསྐོན་ནས། ང་ལ་མཆོད་དཔོན་གྱི་ཞབས་ཕྱི་བྱེད་པའི་ཕྱིར་འབྱུག་སྣུམ་གྱིས་བྱུགས་པ་དང་། ཁོ་རང་དམ་པར་བྱོས་ཤིག  
\v 14 ཡང་ཁོའི་བུ་རྣམས་ཀྱང་སྒོ་མདུན་དུ་ཁྲིད་དེ་ནང་གོས་རྣམས་དེ་དག་ལ་སྐོན་ཅིག  
\v 15 ཁོ་རང་ཚོས་ཀྱང་ང་ལ་མཆོད་དཔོན་གྱི་ཞབས་ཕྱི་བྱེད་པའི་ཕྱིར། སོ་སོའི་ཕ་ཨ་རོན་ལ་འབྱུག་སྣུམ་གྱིས་བྱུགས་པ་ལྟར། ཁྱོད་ཀྱིས་ཁོ་ཚོར་འབྱུག་སྣུམ་གྱིས་བྱུག་དགོས་ཤིང༌། དེ་ལྟར་འབྱུག་སྣུམ་བྱུགས་པ་ཡིས་ཁོ་ཚོའི་བུ་རབས་ཚ་རྒྱུད་དུ་མཆོད་དཔོན་གྱི་ལས་ཚན་རྒྱུན་ཆད་མེད་པ་ཞིག་ཏུ་འཇུག་པར་འགྱུར་ངེས་ཞེས་པའོ། །  
\v 16 མོ་ཤེ་ཡིས་དེ་བཞིན་དུ་བྱས་ཤིང་ཐམས་ཅད་དཀོན་མཆོག་ཡ་ཝཱེས་ཁོ་ལ་བཀའ་ཇི་ལྟར་གནང་བ་བཞིན་དུ་བསྒྲུབས་སོ། །   
\p
\v 17 དེ་ལྟར་ལོ་གཉིས་པའི་ཟླ་དང་པོའི་ཚེས་གཅིག་ཉིན་གུར་མཆོག་དེ་བསྒྲེངས་པའོ། །  
\v 18 མོ་ཤེ་ཡིས་གུར་མཆོག་བསྒྲེངས་པ་དང་དེའི་ཞབས་ར་རྣམས་བསྒྲིགས། པང་ལེབ་རྣམས་བསླངས། འཕྲེད་རྒྱུག་རྣམས་བཅུག ཀ་བ་རྣམས་བསྒྲེངས།  
\v 19 ཁོས་ཁེབས་རས་ཀྱིས་གུར་མཆོག་གཡོགས་པ་དང་། དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་དུ་ཁེབས་གཞན་ཡང་དེའི་སྟེང་དུ་བཏིངས་པ་རེད།  
\v 20 དེ་ནས་ཁོས་དཔང་པོའི་རྡོ་ལེབ་གཉིས་བླངས་ནས་ཤུར་སྒམ་གྱི་ནང་དུ་བཞག་སྟེ། རྒྱུག་པ་གཉིས་ཤུར་སྒམ་གྱི་ལོགས་གཉིས་ལ་བརྒྱུས་ནས། ཐུགས་རྗེའི་བཞུགས་ཁྲི་དེ་ཤུར་སྒམ་གྱི་སྟེང་དུ་བཞག  
\v 21 ཡང་ཁོས་ཤུར་སྒམ་ནི་གུར་མཆོག་ཏུ་ཁྱེར་ནས། དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་དུ་དཔང་མཛད་ཤུར་སྒམ་མི་མཐོང་བའི་ཕྱིར་དེའི་མདུན་དུ་ཡོལ་བ་དཔྱངས།  
\v 22 དེ་ནས་ཁོས་སྒྲོག་ཙེ་དེ་མཇལ་འཕྲད་གུར་མཆོག་ནང་བྱང་ཕྱོགས་སུ་ཡོལ་བའི་ཕྱི་རོལ་ཏུ་བཞག་པ་དང་།  
\v 23 དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་དུ་དེའི་སྟེང་དུ་དཀོན་མཆོག་ཡ་ཝཱེའི་ཞལ་ངོར་བག་ལེབ་གྲལ་དུ་བསྒྲིགས་སོ། །  
\v 24 དེ་ནས་ཁོས་སྒྲོན་སྟེགས་ནི་མཇལ་འཕྲད་གུར་མཆོག་གི་ལྷོ་ཕྱོགས་སུ་སྒྲོག་ཙེའི་ཐད་དུ་བཞག  
\v 25 དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་དུ་ཁོས་དེའི་སྟེང་དུ་དཀོན་མཆོག་ཡ་ཝཱེའི་ཞལ་ངོར་སྒྲོན་མེ་རྣམས་སྦར་ཏོ། །  
\v 26 ཡང་ཁོས་མཇལ་འཕྲད་གུར་མཆོག་ནང་དུ་ཡོལ་བའི་མདུན་དུ་གསེར་གྱི་སྤོས་ཁྲི་དེ་བཞག་ཅིང་།  
\v 27 དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་དུ་དེའི་སྟེང་དུ་དྲི་ཞིམ་བདུག་སྤོས་བདུགས།  
\v 28 དེ་ནས་ཁོས་གུར་མཆོག་གི་སྒོ་ཡོལ་དེ་ཡང་དཔྱངས་སོ། །  
\v 29 གུར་མཆོག་སྟེ་མཇལ་འཕྲད་གུར་མཆོག་གི་སྒོ་མདུན་དུ་ཁོས་སྦྱིན་སྲེག་གི་མཆོད་ཁྲི་དེ་བཞག་ནས། དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་དུ་དེའི་སྟེང་དུ་སྦྱིན་སྲེག་དང་འབྲུ་རིགས་ཀྱི་མཆོད་པ་ཕུལ།  
\v 30 ཡང་མཇལ་འཕྲད་གུར་མཆོག་དང་མཆོད་ཁྲིའི་བར་དུ་ཁོས་ཁྲུས་གཞོང་བཞག་ནས་བཀྲུ་བའི་ཕྱིར་དེའི་ནང་དུ་ཆུ་བླུགས་ཤིང་།  
\v 31 གཞོང་པ་དེའི་ནང་དུ་མོ་ཤེ་དང་ཨ་རོན་དང་དེའི་བུ་རྣམས་ཀྱིས་རང་གི་རྐང་ལག་བཀྲུས།  
\v 32 དཀོན་མཆོག་ཡ་ཝཱེས་མོ་ཤེ་ལ་བཀའ་ཇི་ལྟར་གནང་བ་བཞིན་དུ། དེ་དག་ནམ་ཞིག་མཇལ་འཕྲད་གུར་མཆོག་གི་ནང་དུ་འགྲོ་བའམ་མཆོད་ཁྲིའི་དྲུང་དུ་ཡོང་བའི་སྐབས་སུ་བཀྲུས་སོ། །  
\v 33 དེ་ནས་ཁོས་གུར་མཆོག་དང་མཆོད་ཁྲིའི་ཕྱོགས་བཞི་ནས་བསྐོར་བའི་ཁྱམས་ར་དེ་བསྒྲེངས་ཤིང་། ཁྱམས་རའི་སྒོ་ཡོལ་དེ་དཔྱངས། དེ་ལྟར་མོ་ཤེ་ཡིས་ལས་ཀ་དེ་བསྒྲུབས་ནས་རྫོགས་སོ། །   
\s1 དཀོན་མཆོག་ཡ་ཝཱེའི་གཟི་བརྗིད།  
\p
\v 34 དེ་ནས་སྤྲིན་གྱིས་མཇལ་འཕྲད་གུར་མཆོག་གཡོགས་པ་དང་དཀོན་མཆོག་ཡ་ཝཱེའི་གཟི་བརྗིད་ཀྱང་གུར་མཆོག་དེར་ཁྱབ།  
\v 35 མོ་ཤེ་མཇལ་འཕྲད་གུར་མཆོག་ཏུ་འགྲོ་མ་ནུས་ཏེ། གང་ལ་ཟེར་ན། གུར་མཆོག་སྟེང་དུ་སྤྲིན་ཕུང་བཞུགས་ཤིང་དཀོན་མཆོག་ཡ་ཝཱེའི་གཟི་བརྗིད་ཀྱིས་གུར་མཆོག་ཁྱབ་པའི་ཕྱིར་རོ། །  
\v 36 ཡེས་ར་ཨེལ་པ་རྣམས་ཀྱི་བགྲོད་ལམ་ཀུན་ཏུ་འདི་ལྟར་ཡིན་ཏེ། ནམ་ཞིག་སྤྲིན་དེ་གུར་མཆོག་ནས་བཏེགས་པའི་ཚེ། ཁོ་རྣམས་རང་གི་ལམ་དུ་ཆས།  
\v 37 སྤྲིན་ཡར་མ་བཏེགས་ཚེ། ཁོ་ཚོ་དེ་མུར་སྡོད་ཅིང་། ནམ་ཞིག་སྤྲིན་བཏེགས་པའི་ཚེ་ཁོ་ཚོ་ཡང་བསྐྱར་ལམ་དུ་ཆས།  
\v 38 ཁོ་ཚོའི་བགྲོད་ལམ་ཀུན་ཏུ་དཀོན་མཆོག་ཡ་ཝཱེའི་སྤྲིན་ཕུང་ནི་ཉིན་མོར་གུར་མཆོག་སྟེང་དུ་བཞུགས་པ་དང་། མཚན་མོར་ཡེས་ར་ཨེལ་གྱི་ཁྱིམ་རྒྱུད་ཚང་མའི་མཐོང་ལམ་ལ་སྤྲིན་ནང་དུ་མེ་ཡོད་པ་ཡིན་ནོ།། །།