\id 2SA – NTB 
\h སཱ་མུ་ཨེལ་གཉིས་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\mt1 ༄༅། །སཱ་མུ་ཨེལ་གྱི་མདོ་གཉིས་པ།  
\imt1 སཱ་མུ་ཨེལ་གྱི་མདོ་གཉིས་པའི་ངོ་སྤྲོད་མདོར་བསྡུས།  
\is1 ཁ་བྱང་དང་ལོ་རྒྱུས་རྒྱབ་ལྗོངས།  
\ipi ཐོག་མའི་དུས་སུ་སཱ་མུ་ཨེལ་དང་པོ་དང་གཉིས་པ་གཉིས་ནི་གཞུང་གཅིག་ཡིན། དེའི་སྐོར་སཱ་མུ་ཨེལ་དང་པོའི་ངོ་སྤྲོད་ལ་གཟིགས་རོགས།  
\is1 ཡི་གེར་འགོད་མཁན་དང་འགོད་དུས།  
\ipi སཱ་མུ་ཨེལ་དང་པོའི་ངོ་སྤྲོད་ལ་གཟིགས་རོགས།  
\is1 བརྗོད་སྙིང་དང་གསུང་འཕྲིན།  
\ipi སཱ་མུ་ཨེལ་གཉིས་པའི་གཞུང་གི་ནང་དུ་རྒྱལ་པོ་དཱ་བིད་ཕུལ་དུ་བྱུང་བ་ཞིག་མིན་ནའང་། ཁོང་ནི་དཀོན་མཆོག་གི་རྒྱལ་སྲིད་ཡང་དག་པར་བསྐྱངས་པའི་ཚབ་མཚོན་མི་སྣ་ཡིན་པར་བརྗོད་ཡོད། དཱ་བིད་ཀྱིས་རྒྱལ་སྲིད་བསྐྱངས་པའི་དུས་སུ་དཀོན་མཆོག་གིས་རྒྱལ་ཁམས་དར་བར་མཛད་པ་དང་དགྲ་བོ་རྣམས་ཆམ་ལ་ཕབ། གཞུང་འདིའི་ལེའུ་བདུན་པར་དཀོན་མཆོག་གིས་དཱ་བིད་ཀྱི་རྒྱལ་རྒྱུད་གཏན་དུ་གནས་པ་དང་དཱ་བིད་ལ་བཞག་པའི་ཞལ་ཆད་ཀྱང་གཏན་དུ་གནས་པའི་ཞལ་བཞེས་གནང་བར་གསུངས་ཡོད།  
\is1 འཆར་ཟིན།  
\ipi 1. དཱ་བིད་ཡ་ཧུ་དཱ་པའི་རྒྱལ་པོར་གྱུར་པའི་སྐོར། ༼1:1-4:12༽  
\ipi 2. དཱ་བིད་ཡེས་ར་ཨེལ་པ་ཡོངས་ཀྱི་རྒྱལ་པོར་གྱུར་པའི་སྐོར། ༼5:1-5༽  
\ipi 3. དཱ་བིད་ཀྱི་རྒྱལ་སྲིད་ལེགས་འགྲུབ་བྱུང་བ་དང་དེའི་གཟི་བརྗིད་ཀྱི་སྐོར། ༼5:6-9:13༽  
\ipi 4. དཱ་བིད་ཀྱིས་རྒྱལ་སྲིད་བསྐྱངས་དུས་ཀྱི་སྐྱོན་དང་ནོར་བ། ༼10:1-20:26༽  
\ipi 5. དཱ་བིད་ཀྱིས་རྒྱལ་སྲིད་བསྐྱངས་པའི་སྐབས་ཀྱི་མཇུག་མཐའི་དགོངས་ཚུལ་སྐོར། ༼21:1-24:25༽  
\c 1
\cl ལེའུ་དང་པོ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 དཱ་བིད་ཀྱིས་རྒྱལ་པོ་སོ་ལོ་དང་ཡོ་ནཱ་ཐན་གཉིས་སྐུ་གཤེགས་པར་མྱ་ངན་བྱས་པ།  
\p
\v 1 དེ་ཡང་སོ་ལོ་གྲོངས་རྗེས་དཱ་བིད་ཀྱིས་ཨ་མཱད་ལེག་པ་རྣམས་\f + \ft འདིར་ཨ་མཱད་ལེག་པ་ཞེས་པ་ནི་ཨེ་སཱབ་ཀྱི་བུ་ཨེ་ལི་ཕཱ་ཟིའི་ཆུན་མ་ཐིམ་ནཱ་ཞེས་པ་ལས་སྐྱེས་ཤིང་། དེའི་བུ་རབས་ཚ་རྒྱུད་རྣམས་ཀྱིས་སྐུ་འདྲ་བསྟེན་པ་ཡིན། བཀོད་པའི་མདོ་ཡི་ལེའུ་སོ་དྲུག་གི་ཚིག་རྐང་བཅུ་གཉིས་ལ་གཟིགས་རོགས། \f*ཕམ་པར་བརྒྱབ་ནས་ཕྱིར་ལོག་སྐབས། དཱ་བིད་ཉིན་གཉིས་ཀྱི་རིང་ཙིག་ལག་དུ་གནས་སོ། །  
\v 2 ལྟོས་དང་། ཉིན་གསུམ་པར། གྱོན་གོས་གཤགས་ཤིང་མགོ་ལ་ས་རྡུལ་གྱིས་གཡོགས་པའི་མི་ཞིག་སོ་ལོའི་དམག་སྒར་ནས་ལོག་འོངས་པ་དང་། དཱ་བིད་ཀྱི་མདུན་དུ་སླེབས་ཏེ་ལུས་སར་བཏུད་ནས་ཕྱག་བཙལ་ཏོ། །  
\v 3 དཱ་བིད་ཀྱིས་དེ་ལ་ཁྱོད་གང་ནས་འོངས་པ་ཡིན་ཞེས་དྲིས་པར། མི་དེས་ཡེས་ར་ཨེལ་གྱི་དམག་སྒར་ནས་བྲོས་འོངས་པ་ཡིན་ཞེས་ཞུས་སོ། །  
\v 4 ཡང་དཱ་བིད་ཀྱིས་དེ་རུ་ཅི་ཞིག་བྱུང་བ་ང་ལ་ཤོད་ཅིག་ཅེས་སྨྲས་པར་མི་དེས། མི་རྣམས་གཡུལ་ས་ནས་བྲོས་ཤིང་དེ་དག་གི་ཁྲོད་ནས་མི་མང་པོ་སར་འགྱེལ་ནས་ཤི་བར་མ་ཟད། སོ་ལོ་དང་དེའི་སྲས་ཡོ་ནཱ་ཐན་གཉིས་ཀྱང་གྲོངས་སོ་ཞེས་ཞུས་པ་ལ།  
\v 5 དཱ་བིད་ཀྱིས་འཕྲིན་སྐྱེལ་མཁན་གཞོན་ནུ་དེ་ལ་ཁྱོད་ཀྱིས་སོ་ལོ་དང་དེའི་སྲས་ཡོ་ནཱ་ཐན་གཉིས་གྲོངས་པ་ཅི་ལྟར་ཤེས་པ་ཡིན་ཞེས་དྲིས་པ་ལ།  
\v 6 འཕྲིན་སྐྱེལ་མཁན་གཞོན་ནུ་དེས། རི་བོ་གིལ་བོ་ཨ་རུ་ང་རང་སྟེས་དབང་གིས་སོ་ལོ་དང་ཕྲད་དེ་སོ་ལོ་ནི་རང་གི་མདུང་ལ་བརྟེན་ཅིང་ཤིང་རྟ་དང་སྐྱ་དམག་རྣམས་ཀྱིས་ཁོང་གི་རྗེས་འདེད་པ་མཐོང་ངོ་། །  
\v 7 ཡང་ཁོང་གིས་ཕྱི་མིག་བལྟས་ཏེ་བདག་མཐོང་ནས་བོས་པར། བདག་གིས་ང་རང་འདི་རུ་ཡོད་ཞུས་པ་ན།  
\v 8 ཁོང་གིས་བདག་ལ་ཁྱོད་སུ་ཡིན་ཞེས་དྲིས་པས། ང་ཨ་མཱད་ལེག་པ་ཡིན་ཞེས་ཞུས།  
\v 9 དེ་ནས་ཁོང་གིས་བདག་ལ་ངའི་རྩར་ཤོག་དང་། ང་རང་སོད་ཅིག རྒྱུ་མཚན་བདག་གི་སེམས་ཤིན་ཏུ་སྐྱོ་ནའང་འཆི་བའི་ཐབས་མ་བྱུང་ཞེས་སྨྲས་པའོ། །  
\v 10 དེར་བདག་ཁོང་གི་གཞོགས་སུ་ལངས་ནས་ཁོང་བཀྲོངས་པ་ཡིན་ཏེ། གང་ལ་ཞེ་ན་གལ་ཏེ་ཁོང་སར་འགྱེལ་ཚེ་ཁོང་གསོན་མི་ནུས་པ་ངས་ཤེས་པའི་ཕྱིར་ཡིན། ཁོང་གི་དབུ་ལ་ཡོད་པའི་ཅོད་པན་དང་ཕྱག་ལ་ཡོད་པའི་གདུ་བུ་གཉིས་བླངས་ནས་འདི་རུ་བདག་གི་ཇོ་བོའི་དྲུང་དུ་ཁྱེར་འོངས་པ་ཡིན་ཞེས་པའི་འཕྲིན་ཐོས་སོ། །  
\v 11 དེ་ནས་དཱ་བིད་ཀྱིས་རང་གི་གོས་བླངས་ནས་གཤགས་ཤིང་ཁོ་དང་ལྷན་དུ་ཡོད་པའི་མི་རྣམས་ཀྱིས་ཀྱང་དེ་བཞིན་བྱས་ཏེ།  
\v 12 སོ་ལོ་དང་དེའི་སྲས་ཡོ་ནཱ་ཐན། དཀོན་མཆོག་ཡ་ཝཱེའི་འབངས་མི། ཡེས་ར་ཨེལ་གྱི་ཁྱིམ་རྒྱུད་རྣམས་རལ་གྲིའི་ཁ་ནས་གྲོངས་པས། དཱ་བིད་འཁོར་དང་བཅས་པ་སེམས་སྡུག་ནས་ངུས་ཤིང་དགོང་མོའི་བར་དུ་སྨྱུང་གནས་བསྲུངས་སོ། །  
\v 13 ཡང་དཱ་བིད་ཀྱིས་འཕྲིན་སྐྱེལ་མཁན་གཞོན་ནུ་དེ་ལ་ཁྱོད་གང་གི་མི་ཡིན་ཞེས་དྲིས་པར། དེས་བདག་ནི་བྱེས་པ་ཞིག་གི་བུ་སྟེ་ཨ་མཱད་ལེག་པ་ཞིག་ཡིན་ཞུས་ཤིང་།  
\v 14 དཱ་བིད་ཀྱིས་འདི་ལྟར། ཁྱོད་རང་ལག་པ་བརྐྱངས་ནས་དཀོན་མཆོག་ཡ་ཝཱེས་བྱུགས་པ་དེ་དགྲོང་བར་མི་འཇིགས་སམ་ཞེས་དྲིས་པ་དང་།  
\v 15 དཱ་བིད་ཀྱིས་གཞོན་ནུ་ཞིག་བོས་ཏེ་ཁྱོད་སོང་ལ་མི་དེ་སོད་ཅིག་ཅེས་བཀའ་བསྩལ་པ་ལ། དེས་ཁོ་ལ་བརྡུངས་ནས་བསད་དོ། །  
\v 16 དཱ་བིད་ཀྱིས་མི་དེར། ཁྱོད་རང་གི་ཁ་ནས་ངས་དཀོན་མཆོག་ཡ་ཝཱེས་བྱུགས་པ་དེ་བཀྲོངས་པ་ཡིན་ཞེས་དཔང་པོ་བྱས་པས་ཁྱོད་ཀྱི་ཁྲག་ནི་རང་གི་མགོ་ལ་འབབ་དགོས་ \f + \ft འདི་ནི་སུ་ཞིག་གིས་མི་བསད་ན་དེའི་ཉེས་པ་རང་གིས་འཁུར་དགོས་ཞེས་པའི་དོན་ཡིན། \f*ཞེས་སྨྲས་སོ། །   
\s1 དཱ་བིད་ཀྱིས་སོ་ལོ་དང་ཡོ་ནཱ་ཐན་གཉིས་ཀྱི་ཆེད་དུ་སྐྱོ་གླུ་བྲིས་པ།  
\p
\v 17 ཡང་དཱ་བིད་ཀྱིས་སོ་ལོ་དང་དེའི་སྲས་ཡོ་ནཱ་ཐན་གཉིས་ཀྱི་ཕྱིར་སྐྱོ་གླུ་འདི་བྲིས་ཤིང་།  
\v 18 གཞུ་མོ་ཞེས་པའི་མགུར་མ་དེ་ནི་ཡ་ཧུ་དཱ་པ་རྣམས་ཀྱིས་སློབ་དགོས་པར་ཁོང་གིས་བསྐུལ་ཞིང་མགུར་མ་དེ་བདེན་པའི་གླེགས་བམ་ནང་བཀོད་ཡོད་དོ། །  
\v 19 ཀྱེ་མ་ཡེས་ར་ཨེལ་ལགས་ཁྱོད་ཚོ་ཡི། །གཟི་བརྗིད་ཅན་ནི་མཐོ་སར་བཀྲོངས་འདུག་སྟེ། །དཔའ་བོ་ཆེན་པོ་དེ་ཉིད་འགྱེལ་བ་ཅི། །  
\v 20 ཕེ་ལེ་ཤེད་པའི་མཚན་སྐྱི་མ་བཅད་པའི། །ཚོགས་ལས་བྱུང་བའི་བུ་མོ་རྣམས་ཀྱིས་ནི། །དགའ་མགུ་རང་ཞིང་སྤྲོ་བ་མི་གཏོང་ཕྱིར། །གཱད་ཀྱི་ཡུལ་ལ་སྨྲ་བར་མི་བྱ་འོ། །ཨ་ཤཱ་ཀེ་ལོན་སྲང་དུ་སྐད་མ་རྒྱག །  
\v 21 ཀྱེ་མ་གིལ་བོ་ཨ་ཡི་རི་བོ་རྣམས། །ཁྱོད་ལ་ཆར་ཟིལ་འབབ་པར་མ་གྱུར་ཅིག །ཞིང་ལས་མཆོད་རྫས་འཐོན་པར་མ་གྱུར་ཅིག །དཔའ་བོའི་ཕུབ་ནི་དེ་རུ་བརྫད་ཅིང་དོར། །སོ་ལོའི་ཕུབ་ལ་སྣུམ་གྱིས་མ་བྱུགས་ཕྱིར། །  
\v 22 བསད་པའི་ཁྲག་དང་དཔའ་བོའི་ཚིལ་བུ་ལས། །ཡོ་ནཱ་ཐན་གྱི་མདའ་གཞུ་ཕྱིར་མ་འཐེན། །སོ་ལོའི་རལ་གྲི་སྟོང་བར་ལོག་མ་སོང་། །  
\v 23 སོ་ལོ་དང་ནི་ཡོ་ནཱ་ཐན་ཁོང་གཉིས། །གསོན་དུས་གཞན་གྱིས་བྱམས་ཤིང་བློ་ལ་བབས། །གྲོངས་པའི་སྐབས་སུ་ཕན་ཚུན་བྲལ་མ་གྱུར། །ཁོང་གཉིས་གླག་ལས་མགྱོགས་མྱུར་ལྡན་པ་དང་། །སེང་གེ་ལས་ཀྱང་ངར་ཤུགས་ལྡན་པ་འོ། །  
\v 24 ཀྱེ་ཀྱེ་ཡེས་ར་ཨེལ་གྱི་བུད་མེད་རྣམས། །སོ་ལོ་ཁོང་གི་ཕྱིར་དུ་ངུ་བར་གྱིས། །ཁོང་གིས་ཁྱོད་ལ་གྱོན་གོས་རྒྱ་སྨུག་བསྐོན། །ཁྱོད་ཀྱི་ཕྱི་གོས་གསེར་གྱི་རྒྱན་ཆས་བརྒྱན། །  
\v 25 དཔའ་བོ་དེ་དག་གཡུལ་སར་ཇི་ལྟར་གཤེགས། །ཡོ་ནཱ་ཐན་ནི་མཐོ་སར་ཇི་ལྟར་བཀྲོངས། །  
\v 26 ཀྱེ་ཀྱེ་ང་ཡི་སྤུན་ཟླ་ཡོ་ནཱ་ཐན། །ཁྱོད་ཀྱི་དོན་དུ་ང་ལ་སྡུག་བསྔལ་ཆེ། །ཁྱོད་ལ་ངའི་སེམས་རབ་ཏུ་འཕྲེང་བ་ཡིན། །ཁྱོད་ཀྱིས་ང་ལ་བཅངས་པའི་བརྩེ་བ་ནི། །བུད་མེད་ལས་ཀྱང་ལྷག་པར་ཟབ་པ་འོ། །  
\v 27 ཀྱི་ཧུད་དཔའ་བོ་ཇི་ལྟར་གཤེགས་པ་དང་། །དམག་ཆས་རྣམས་ནི་ཇི་ལྟར་ཡལ་བ་ཡིན། །ཞེས་པའོ། །   
\c 2
\cl ལེའུ་གཉིས་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 དཱ་བིད་བྱ་བ་ཡ་ཧུ་དཱའི་རྒྱལ་པོར་བསྐོས་པ།  
\p
\v 1 དེའི་རྗེས་སུ་དཱ་བིད་ཀྱིས་དཀོན་མཆོག་ཡ་ཝཱེ་ལ་འདི་ལྟར། བདག་ནི་ཡ་ཧུ་དཱའི་གྲོང་ཁྱེར་དུ་འགྲོ་རུང་ངམ་ཞེས་ཞུས་པར། དཀོན་མཆོག་ཡ་ཝཱེས་དེ་ལ་ཁྱོད་སོང་ཞིག་ཅེས་གསུངས། ཡང་དཱ་བིད་ཀྱིས། བདག་གང་དུ་འགྲོའམ་ཞུས་པ་དང་ཁོང་གིས། ཧེབ་རོན་དུ་སོང་ཞིག་ཅེས་གསུངས་སོ། །  
\v 2 དེའི་ཕྱིར་དཱ་བིད་ཀྱིས་རང་གི་ཆུང་མ་གཉིས་ཀ་སྟེ་ཡེ་སི་རེ་ཨེལ་པ་ཨ་ཧི་ནོ་ཨམ་དང་། ཀར་མེལ་པ་ནཱ་རྦལ་གྱི་ཡུགས་མོར་ལུས་པའི་ཆུང་མ་ཨ་བི་གཱ་ཡིལ་བྱ་བ་གཉིས་ཁྲིད་ནས་ཕྱིན་ཏོ། །  
\v 3 ཡང་དཱ་བིད་ཀྱིས་རང་གི་དྲུང་དུ་ཡོད་པའི་མི་རྣམས་དང་དེ་དག་གི་ཁྱིམ་མི་རྣམས་ཁྲིད་དེ་ཧེབ་རོན་ཉེ་འདབས་ཀྱི་གྲོང་རྡལ་དག་ཏུ་གནས་སོ། །  
\v 4 དེ་ནས་ཡ་ཧུ་དཱ་པ་རྣམས་འོངས་ནས་དཱ་བིད་ནི་ཡ་ཧུ་དཱ་ཁྱིམ་རྒྱུད་ཀྱི་རྒྱལ་པོར་བསྐོས་ཤིང་། ཡང་མི་ཞིག་གིས་དཱ་བིད་ལ་སོ་ལོའི་བེམ་པོ་དུར་དུ་འཇུག་མཁན་ནི་ཡཱ་བེ་སི་གིལ་ཨད་པ་རྣམས་ཡིན་ནོ་ཞེས་སྨྲས་པས།  
\v 5 དཱ་བིད་གྱིས་ཡཱ་བེ་སི་གིལ་ཨད་པ་རྣམས་ལ་བང་ཆེན་མངགས་ནས་དེ་དག་ལ་ཁྱོད་ཅག་གིས་རང་གི་ཇོ་བོ་སོ་ལོ་ལ་དྲིན་བསྟན་ཅིང་དུར་དུ་བཅུག་པའི་ཕྱིར། དཀོན་མཆོག་ཡ་ཝཱེས་ཁྱོད་ཅག་ལ་བྱིན་རླབས་གནང་བར་ཤོག  
\v 6 ཡང་དེ་ལྟར་བྱས་པས་དཀོན་མཆོག་ཡ་ཝཱེས་ཁྱོད་རྣམས་བྱམས་བརྩེ་དང་དྲང་བདེན་གྱིས་སྐྱོང་བར་མ་ཟད་ངས་ཀྱང་ཁྱོད་རྣམས་ལ་དྲིན་ལན་འཇལ་ལོ། །  
\v 7 ད་ལྟ་ཁྱོད་རྣམས་ཀྱི་ཇོ་བོ་སྟེ་སོ་ལོ་གྲོངས་པ་དང་ཡ་ཧུ་དཱའི་ཁྱིམ་རྒྱུད་ཀྱིས་ང་ནི་རྒྱལ་པོར་བསྐོས་པས་ཁྱོད་རྣམས་སྟོབས་ཤུགས་ཅན་དང་སྤོབས་པ་ཅན་དུ་འགྱུར་བར་ཤོག་ཅེས་སྨྲས་སོ། །   
\s1 ཨིས་པོ་ཤེད་བྱ་བ་ཡེས་ར་ཨེལ་གྱི་རྒྱལ་པོར་བསྐོས་པ།  
\p
\v 8 དེ་ནས་ནེར་གྱི་བུ་སྟེ། སོ་ལོའི་དམག་དཔུང་གི་དམག་དཔོན་ཨབ་ནེར་གྱིས་སྔར་སོ་ལོའི་སྲས་ཨིས་པོ་ཤེད་ཁྲིད་ནས་མཱ་ཧ་ནཱ་ཡིམ་གྱི་ཕ་རོལ་ཏུ་དྲངས་ཏེ།  
\v 9 གིལ་ཨད་དང་ཨ་ཤུར་པ་རྣམས་དང་། ཡེ་སི་རེ་ཨེལ་དང་། ཨེ་ཕཱར་ཡིམ་དང་། པེན་ཡཱ་མེན་དང་། ཡེས་ར་ཨེལ་ཡོངས་ཀྱི་རྒྱལ་པོར་བསྐོས་ཤིང་།  
\v 10 ཨིས་པོ་ཤེད་བྱ་བ་ཡེས་ར་ཨེལ་གྱི་རྒྱལ་པོར་བསྐོ་བའི་དུས་སུ་ལོ་བཞི་བཅུ་ལོན་ཡོད་དེ། དེས་ལོ་གཉིས་ལ་སྲིད་བསྐྱངས་ནའང་ཡ་ཧུ་དཱའི་ཁྱིམ་རྒྱུད་ནི་དཱ་བིད་ཀྱི་རྗེས་སུ་འབྲངས་སོ། །  
\v 11 ཡང་དཱ་བིད་ཀྱིས་ཧེབ་རོན་དུ་ལོ་བདུན་དང་ཟླ་དྲུག་གི་རིང་ལ་ཡ་ཧུ་དཱའི་ཁྱིམ་རྒྱུད་ལ་སྲིད་བསྐྱངས་པའོ། །   
\s1 གིབ་ཡོན་ཡུལ་གྱི་དམག་འཁྲུག  
\p
\v 12 དེ་ནས་ནེར་གྱི་བུ་ཨབ་ནེར་གྱིས་སོ་ལོའི་སྲས་ཨིས་པོ་ཤེད་འཁོར་དང་བཅས་པ་ཁྲིད་ནས་མཱ་ཧ་ནཱ་ཡིམ་ནས་ཐོན་ཞིང་གིབ་ཡོན་གྲོང་ཁྱེར་དུ་ཕྱིན།  
\v 13 ཡང་ཟེ་རུ་ཡཱ་ཡི་བུ་ཡོ་ཨབ་དང་དཱ་བིད་ཀྱི་འཁོར་གཡོག་རྣམས་ཀྱང་ཐོན་ཏེ། གིབ་ཡོན་གྱི་རྫིང་བུའི་འགྲམ་དུ་དེ་དག་དང་ཕྲད་ཅིང་། དཔུང་ཁག་གཅིག་ནི་རྫིང་བུའི་ཚུར་རོལ་དང་གཞན་དེ་རྫིང་བུའི་ཕ་རོལ་ཏུ་བསྡད་དོ། །  
\v 14 དེ་ནས་ཨབ་ནེར་གྱིས་ཡོ་ཨབ་ལ། གཞོན་ནུ་རྣམས་ཡར་ལངས་ཏེ་ངེད་ཅག་གི་མདུན་དུ་རྩལ་འགྲན་པར་བཀའ་གནོངས་ཤིག་ཅེས་སྨྲས་པར། ཡོ་ཨབ་ཀྱིས་ལེགས་སོ་དེ་དག་འགྲན་དུ་ཆུག་ཅེས་སྨྲས་ཤིང་།  
\v 15 པེན་ཡཱ་མེན་དང་སོ་ལོའི་སྲས་ཨིས་པོ་ཤེད་གཉིས་ཀྱི་ཕྱོགས་ནས་མི་བཅུ་གཉིས་དང་དཱ་བིད་ཀྱི་འཁོར་གཡོག་རྣམས་ལས་མི་བཅུ་གཉིས་རྩིས་བླངས་པ་ལྟར་ཡར་ལངས་ཏེ་ཐོན།  
\v 16 དེ་རྣམས་ཀྱིས་རང་རང་གི་འགྲན་ཟླའི་མགོ་བོར་འཇུས་པ་དང་རལ་གྲི་འགྲན་ཟླའི་རྩིབ་གཞོགས་སུ་བཙུགས་པས། དེ་དག་ལྷན་ཅིག་ས་རུ་འགྱེལ་ཏོ། །དེའི་ཕྱིར་གིབ་ཡོན་གྱི་ས་ཆ་དེ་ལ་ཧེལ་ཀད་ཧ་ཙུ་རིམ་ \f + \ft ཧེལ་ཀད་ཧ་ཙུ་རིམ་ཞེས་པ་ནི་བོད་སྐད་དུ་གྲི་རྣོ་བའི་ཞིང་ཞེས་པའི་དོན་ལ་འཇུག\f*ཞེས་བཏགས་སོ། །  
\v 17 དེའི་ཉིན་མོར་དམག་འཁྲུག་ཆེན་པོ་བརྒྱབ་པ་དང་ཨབ་ནེར་དང་ཡེས་ར་ཨེལ་པ་རྣམས་དཱ་བིད་ཀྱི་འཁོར་གཡོག་རྣམས་ཀྱི་མདུན་དུ་ཕམ་པར་གྱུར་ཏོ། །  
\v 18 ཡང་ཟེ་རུ་ཡཱ་ཡི་བུ་ཡོ་ཨབ་དང་ཨ་བི་ཤཱ་ཨི་དང་ཨ་སཱ་ཧེལ་གསུམ་དེ་རུ་ཡོད་དེ། ཨ་སཱ་ཧེལ་ནི་རི་དྭགས་དགོ་བ་ལྟར་མྱུར་བའོ། །  
\v 19 ཨ་སཱ་ཧེལ་གྱིས་གཡས་གཡོན་གང་ལའང་མ་གཟུར་བར་ཨབ་ནེར་བདས་ཤིང་།  
\v 20 ཨབ་ནེར་གྱིས་ཕྱི་མིག་བལྟས་པ་དང་། ཁྱོད་ཨ་སཱ་ཧེལ་ཡིན་ནམ་དྲིས་པར། དེས་ནི་ཡིན་ཞེས་སྨྲས།  
\v 21 ཡང་ཨབ་ནེར་གྱིས་དེ་ལ། ཁྱོད་རང་གཡས་གཡོན་གང་རུང་དུ་འཁོར་ནས་གཞོན་ནུ་ནང་གི་གཅིག་བཟུང་སྟེ། དེའི་མཚོན་ཆ་ཕྲོགས་ནས་ཁྱེར་ཞིག་ཅེས་སྨྲས་ཀྱང་། ཨ་སཱ་ཧེལ་ཁོའི་རྗེས་སུ་དེད་ནས་མ་བྲལ་ཏོ། །  
\v 22 ཨབ་ནེར་གྱིས་སླར་ཡང་ཨ་སཱ་ཧེལ་ལ། ཁྱོད་ཀྱིས་ངའི་རྗེས་མ་འདེད་ཅིག ངས་ཁྱོད་རང་ཅིའི་ཕྱིར་ས་རུ་བརྡབ་དགོས་སམ། ངས་དེ་ལྟར་བྱས་ཚེ་ཁྱོད་ཀྱི་ཕུ་བོ་ཡོ་ཨབ་ཀྱི་གདོང་ལ་ཅི་ལྟར་བལྟའམ་ཞེས་སྨྲས་ཀྱང་།  
\v 23 ཁོ་རང་ཁ་མ་བྲལ་བས་ཨབ་ནེར་གྱིས་མདུང་གི་རྩེ་མོ་\f + \ft མདུང་གི་རྩེ་མོ་ཞེས་པར་མདུང་གི་རྔ་མ་ཞེས་ཀྱང་བསྒྱུར་རུང་།\f*དེའི་ཕོ་བར་བཙུགས་པས། མདུང་རྒྱབ་ནས་ཐོན་ཏེ་ཨ་སཱ་ཧེལ་སར་འགྱེལ་ཞིང་གནས་དེ་རུ་ཤིའོ། །ཨ་སཱ་ཧེལ་ཤི་བའི་གནས་སུ་སླེབས་པའི་མི་ཐམས་ཅད་དེར་ལངས་ནས་བསྡད།  
\v 24 ཡང་ཡོ་ཨབ་དང་ཨ་བི་ཤཱ་ཨི་གཉིས་ཀྱིས་ཨབ་ནེར་བདས་ཤིང་། གིབ་ཡོན་ཐང་སྟོང་དུ་འགྲོ་བའི་ལམ་དང་། གི་ཨ་ཞེས་པའི་ཁ་གཏད་དུ་ཡོད་པའི་ཨམ་མཱ་རི་བོར་སླེབས་པ་ཙམ་གྱིས་ཉི་མ་ནུབ་པ་རེད།  
\v 25 དེར་པེན་ཡཱ་མེན་པ་རྣམས་ཨབ་ནེར་གྱི་རྗེས་སུ་ཕྱོགས་གཅིག་ཏུ་འཛོམས་ནས་དཔུང་གཅིག་ཏུ་བསྒྲིགས་ཏེ་རི་མགོ་ཞིག་ཏུ་ལངས་བསྡད་དོ། །  
\v 26 ཡང་ཨབ་ནེར་གྱིས་ཡོ་ཨབ་ལ། རལ་གྲིས་མཚམས་མེད་པར་མི་གསོད་དགོས་སམ། དེའི་མཐའ་མ་ནི་སྡུག་བསྔལ་ཡིན་པ་མི་ཤེས་སམ། ཁྱོད་ཀྱིས་མི་རྣམས་ལ་རང་རང་གི་སྤུན་འདེད་པ་ལས་ཕྱིར་ལོག་པའི་བཀའ་དུས་ནམ་ཞིག་ལ་སྩོལ་ལམ་ཞེས་དྲིས་པར།  
\v 27 ཡོ་ཨབ་ཀྱིས། ངས་གཏན་དུ་བཞུགས་པའི་དཀོན་མཆོག་དཔང་དུ་བཙུགས་ནས་མནའ་སྐྱེལ་ཏེ། ཁྱོད་ཀྱིས་རྩལ་འགྲན་པའི་གཏམ་སྨྲས་པ་མིན་ན་མི་རྣམས་ནངས་སྔ་མོ་ནས་ཕྱིར་ལོག་ཚར་ཞིང་། རང་གི་སྤུན་འདེད་པ་སྤང་བའོ་ཞེས་སྨྲས་ཤིང་།  
\v 28 དེ་ནས་ཡོ་ཨབ་ཀྱིས་རྭ་དུང་བུས་པ་དང་མི་རྣམས་ལངས་བསྡད་ཅིང་ཡེས་ར་ཨེལ་པ་རྣམས་ཀྱི་རྗེས་སུ་མ་དེད་པ་དང་དམག་ཀྱང་མ་བརྒྱབ་ཏོ། །  
\v 29 ཡང་ཨབ་ནེར་དང་དེའི་མི་རྣམས་མཚན་གང་པོར་ཨ་ར་པཱ་བརྒྱུད་དེ་ཕྱིན་པ་དང་། ཡོར་དན་གཙང་པོ་བརྒལ་ནས་བིད་རོན་ཡུལ་ཐམས་ཅད་བརྒྱུད་ནས་ཆས་ཏེ་མཱ་ཧ་ནཱ་ཡིམ་དུ་སླེབས།  
\v 30 ཡོ་ཨབ་བྱ་བ་ཨབ་ནེར་བདས་ནས་ཕྱིར་ལོག་པ་དང་མི་ཐམས་ཅད་བསྡུས་པའི་སྐབས་སུ། དཱ་བིད་ཀྱི་འཁོར་གཡོག་རྣམས་ལས་ཨ་སཱ་ཧེལ་ལས་གཞན་ད་དུང་མི་བཅུ་དགུ་མ་ཚང་ངོ་། །  
\v 31 དཱ་བིད་ཀྱི་འཁོར་གཡོག་རྣམས་ཀྱིས་པེན་ཡཱ་མེན་པ་དང་ཨབ་ནེར་གྱི་འཁོར་རྣམས་ལས་མི་སུམ་བརྒྱ་དང་དྲུག་ཅུ་བསད་དོ། །  
\v 32 དེ་ནས་ཁོ་ཚོས་ཨ་སཱ་ཧེལ་གྱི་བེམ་པོ་ཁྱེར་ནས་པེད་ལེ་ཧེམ་དུ་ཡོད་པའི་རང་གི་ཕ་ཡི་དུར་ཁུང་དུ་བཞག་པ་དང་། ཡང་ཡོ་ཨབ་དང་དེའི་འཁོར་རྣམས་མཚན་གང་པོར་འགྲུལ་ཏེ་སྐྱ་རེངས་ཤར་དུས་ཧེབ་རོན་དུ་སླེབས་སོ། །   
\c 3
\cl ལེའུ་གསུམ་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\p
\v 1 དེ་ནས་སོ་ལོའི་ཁྱིམ་དང་དཱ་བིད་ཀྱི་ཁྱིམ་གཉིས་བར་དུ་ཡུན་རིང་པོར་དམག་འཁྲུག་བྱུང་བ་དང་། དཱ་བིད་ཀྱི་སྟོབས་ནི་ཇེ་ཆེར་འཕེལ་ཞིང་སོ་ལོའི་ཁྱིམ་ནི་སྟོབས་ཇེ་ཆུང་དུ་གྱུར་ཏེ་ཉམས་སོ། །   
\s1 དཱ་བིད་ཀྱི་བུ་རྣམས།  
\p
\v 2 ཡང་ཧེབ་རོན་དུ་དཱ་བིད་ལ་བུ་རྣམས་སྐྱེས་ཤིང་ཡེ་སི་རེ་ཨེལ་གྱི་ཨ་ཧི་ནོ་ཨམ་ལས་ཆད་པའི་བུ་ཐོག་མ་ཨམ་ནོན་དང་།  
\v 3 བུ་གཉིས་པ་ནི་ཀར་མེལ་ཡུལ་གྱི་ནཱ་རྦལ་ཞེས་པའི་འདས་པོ་ཁོའི་ཆུང་མ་ཨ་བི་གཱ་ཡིལ་ལས་ཆད་པའི་ཀིལ་ཨབ་དང་། བུ་གསུམ་པ་ནི་གེ་ཤུར་གྱི་རྒྱལ་པོ་ཏལ་མཱ་ཨི་ཡི་སྲས་མོ་མ་ཨ་ཀཱ་ཞེས་པ་ནས་ཆད་པའི་ཨབ་ཤཱ་ལོམ་དང་།  
\v 4 བུ་བཞི་པ་ནི་ཧག་གིད་ལས་ཆད་པའི་ཨ་དོ་ནེ་ཡཱ་ཡིན་པ་དང་། བུ་ལྔ་པ་ནི་ཨ་བི་ཏལ་ལས་ཆད་པའི་ཤེ་ཕད་ཡཱ་ཡིན་པ་དང་།  
\v 5 བུ་དྲུག་པ་ནི་དཱ་བིད་ཀྱི་ཆུང་མ་ཨེག་ལཱ་ལས་ཆད་པའི་ཡེད་རེ་ཨམ་སྟེ་འདི་རྣམས་ཧེབ་རོན་དུ་དཱ་བིད་ལ་སྐྱེས་པའི་བུ་རྣམས་ཡིན་ནོ། །   
\s1 ཨབ་ནེར་གྱིས་དཱ་བིད་ལ་མགོ་འཛུལ་བ།  
\p
\v 6 ཡང་སོ་ལོ་དང་དཱ་བིད་ཀྱི་ཁྱིམ་གཉིས་འཁྲུག་པའི་སྐབས་སུ། ཨབ་ནེར་བྱ་བ་སོ་ལོའི་ཁྱིམ་དུ་དབང་ཇེ་ཆེ་ནས་ཇེ་ཆེར་གྱུར།  
\v 7 སྔར་སོ་ལོ་ལ་ཨ་ཡཱ་ཡི་བུ་མོ་སྟེ་རི་ཚི་ཕཱ་བྱ་བའི་ཆུན་མ་ཞིག་ཡོད་དེ། ཡང་ཨིས་པོ་ཤེད་ཀྱིས་ཨབ་ནེར་ལ། ཁྱོད་ངའི་ཕ་ཡི་ཆུན་མ་དང་འགྲོགས་དོན་ཅི་ཞེས་དྲིས་པ་དང་།  
\v 8 ཨིས་པོ་ཤེད་ཀྱི་གཏམ་དེའི་རྐྱེན་གྱིས་ཨབ་ནེར་ཤིན་ཏུ་ཁྲོས་ནས་དེ་ལ། ང་ནི་ཡ་ཧུ་དཱ་རུ་ཁྱི་ཤི་རོ་ཞིག་ཡིན་ནམ། ད་ལྟའི་དུས་འདིར་ང་རང་ཁྱེད་ཀྱི་ཡབ་སོ་ལོའི་ཁྱིམ་མི་སྤུན་ཟླ་དང་མཛའ་གྲོགས་ཐམས་ཅད་ལ་བློ་དཀར་ཞིང་། ཁྱེད་ཀྱང་དཱ་བིད་ཀྱི་ལག་ཏུ་མ་གཏད། འོན་ཀྱང་དེ་རིང་ཁྱེད་ཀྱིས་བུད་མེད་འདིའི་ཆེད་དུ་ང་ལ་སྙད་འདོགས་སམ།  
\v 9 གལ་ཏེ་བདག་གིས་དཀོན་མཆོག་ཡ་ཝཱེས་དཱ་བིད་ལ་མནའ་དང་བཅས་ཞལ་བཞེས་གནང་བ་བཞིན་སྤྱད་པ་མིན་ན། དཀོན་མཆོག་གིས་ཨབ་ནེར་ལ་འདིའམ་འདི་ལས་ལྷག་པ་ཞིག་མཛད་པར་ཤོག  
\v 10 གང་ཡིན་ཞེ་ན། རྒྱལ་སྲིད་སོ་ལོའི་ཁྱིམ་ལས་ཕྲལ་ཏེ། དཱན་ནས་པེར་ཤ་བཱ་ཡི་བར་དུ་ཡེས་ར་ཨེལ་དང་ཡ་ཧུ་དཱ་གཉིས་ལ་དབང་བསྒྱུར་བར་དཱ་བིད་ཀྱི་རྒྱལ་ཁྲི་བཙུགས་པ་དེའོ་ཞེས་སྨྲས།  
\v 11 ཨིས་པོ་ཤེད་ནི་ཨབ་ནེར་ལ་ཤིན་ཏུ་འཇིགས་པས་ལན་ཚིག་གཅིག་ཀྱང་སྨྲ་བར་མ་སྤོབས་སོ། །  
\v 12 དེ་ནས་ཨབ་ནེར་གྱིས་དཱ་བིད་ཀྱི་དྲུང་དུ་བང་ཆེན་མངགས་ནས་འདི་ལྟར། ཡུལ་འདི་སུའི་ཡིན་ནམ་ཞེས་དང་། ཡང་ཁྱེད་ཀྱིས་བདག་ལ་ཆད་དོན་མཛོད་ཅིག དེ་ནས་བདག་གིས་ཡེས་ར་ཨེལ་ཐམས་ཅད་ཁྱེད་ཀྱི་ཕྱོགས་སུ་ཁ་བསྒྱུར་བར་རོགས་བྱེད་ངེས་ཡིན་ཞེས་སྨྲས་པ་ལ།  
\v 13 དཱ་བིད་ན་རེ། ལེགས་པོ་འདུག བདག་གིས་ཁྱོད་དང་ཆད་དོན་བཞག་ཆོག་མོད། ང་ལ་རེ་བ་གཅིག་ཡོད་པ་ནི། ཁྱོད་རང་ངའི་མདུན་དུ་འོང་བའི་དུས་སུ་ཐོག་མར་སོ་ལོའི་སྲས་མོ་མི་ཀལ་འཁྲིད་ཡོང་དགོས། དེ་ལྟར་མ་བྱས་ན་ཁྱོད་ཀྱིས་ང་རང་མཐོང་བར་མི་འགྱུར་ཞེས་སྨྲས།  
\v 14 དེའི་རྗེས་སུ་དཱ་བིད་ཀྱིས་སོ་ལོའི་སྲས་ཨིས་པོ་ཤེད་ཀྱི་མདུན་དུ་ཡང་བསྐྱར་བང་ཆེན་བརྫངས་ནས་དེ་ལ། ཕེ་ལེ་ཤེད་པའི་མཚན་སྐྱི་བརྒྱ་ཕྲག་ཅིག་རིན་པར་སྤྲད་ནས་བག་མར་བླངས་པ་སྟེ། ངའི་ཆུང་མ་མི་ཀལ་ཕྱིར་འོང་དུ་འཇུག་དགོས་ཞེས་སྨྲས་པས།  
\v 15 ཨིས་པོ་ཤེད་ཀྱིས་མི་མངགས་ནས་བུད་མེད་དེའི་ཁྱོ་བོ་སྟེ་ལཱ་ཨི་སིའི་བུ་ཕལ་ཏི་ཨེལ་ཞེས་པ་ལས་ཕྲོགས་སོ། །  
\v 16 ཡང་མི་ཀལ་གྱི་ཁྱོ་ག་ངུ་བཞིན་མཉམ་དུ་ཕྱིན་ཅིང་ཁོ་མོའི་རྗེས་དེད་ནས་པཱ་ཧུ་རིམ་བར་དུ་སླེབས། དེ་ནས་ཨབ་ནེར་གྱིས་ཁོ་ལ་ཁྱོད་རང་སོང་ཞིག ཕྱིར་ལོག་ཅིག་ཅེས་བསྒོས་པ་དང་ཕལ་ཏི་ཨེལ་ཕྱིར་ལོག་གོ །  
\v 17 ཨབ་ནེར་གྱིས་ཡེས་ར་ཨེལ་གྱི་རྒན་པོ་རྣམས་ལ་གཏམ་བྱས་ཏེ་འདི་ལྟར། སྔར་ཁྱོད་རྣམས་ཀྱིས་དཱ་བིད་རང་གི་རྒྱལ་པོ་བྱེད་པར་རེ་ལྟོས་བྱས་པ་ཡིན།  
\v 18 སྔར་དཀོན་མཆོག་ཡ་ཝཱེས་དཱ་བིད་ཀྱི་སྐོར་ལ་འདི་སྐད་དུ། བདག་གིས་རང་གི་ཞབས་ཕྱི་དཱ་བིད་བརྒྱུད་ནས་བདག་གི་འབངས་མི་ཡེས་ར་ཨེལ་ནི་ཕེ་ལེ་ཤེད་པ་དང་དེ་དག་གི་དགྲ་བོ་ཡོངས་ཀྱི་ལག་ནས་སྐྱོབ་པར་འགྱུར་ཞེས་གསུངས་པས་ད་ལྟ་དེ་བཞིན་གྲུབ་གྱུར་ཅིག་ཅེས་སྨྲས།  
\v 19 ཨབ་ནེར་གྱིས་པེན་ཡཱ་མེན་ལའང་དེ་ལྟར་སྨྲས་སོ། །དེ་ནས་ཨབ་ནེར་ཡང་ཧེབ་རོན་དུ་སོང་སྟེ་ཡེས་ར་ཨེལ་པ་རྣམས་དང་པེན་ཡཱ་མེན་གྱི་ཁྱིམ་ཡོངས་རྫོགས་མོས་མཐུན་ཡིན་པའི་དོན་ཐམས་ཅད་དཱ་བིད་ལ་སྨྲས་སོ། །  
\v 20 ཨབ་ནེར་དང་བཅས་མི་ཉི་ཤུ་དཱ་བིད་ཀྱི་དྲུང་དུ་ཧེབ་རོན་དུ་སོང་བ་དང་། དཱ་བིད་ཀྱིས་ཨབ་ནེར་དང་བཅས་པའི་མི་རྣམས་ལ་གསོལ་སྟོན་བཤམས་པ་རེད།  
\v 21 དེའི་རྗེས་སུ་ཨབ་ནེར་གྱིས་དཱ་བིད་ལ་འདི་ལྟར། ཁྱེད་དང་ཆད་དོན་འཇོག་པའི་ཕྱིར། ང་རང་ལངས་ནས་སོང་སྟེ་ཡེས་ར་ཨེལ་པ་ཐམས་ཅད་བདག་གི་ཇོ་བོ་དང་བདག་གི་རྒྱལ་པོའི་དྲུང་དུ་འཛོམ་པར་བྱའོ། །དེ་ལྟར་བྱས་ན་ཁྱེད་ཀྱིས་ཉིད་ཀྱི་ཐུགས་དགོངས་བཞིན་དུ་ཐམས་ཅད་ལ་དབང་བསྒྱུར་བར་འགྱུར་རོ་ཞེས་ཞུས་པ་ལ། དཱ་བིད་ཀྱིས་ཨབ་ནེར་ཕྱིར་མངགས་ཤིང་ཁོ་བདེ་བར་ཕྱིན་ཏོ། །   
\s1 ཨབ་ནེར་བཀྲོངས་པ།  
\p
\v 22 དེའི་དུས་སུ་ཡོ་ཨབ་དང་དཱ་བིད་ཀྱི་འཁོར་གཡོག་རྣམས་ཀྱིས་དགྲ་ལ་རྒོལ་ནས་བཅོམ་ནོར་མང་པོ་ཁྱེར་ཏེ་ལོག་འོངས་ཤིང་། སྐབས་དེར་ཨབ་ནེར་ནི་དཱ་བིད་དང་ལྷན་ཅིག་ཧེབ་རོན་དུ་མེད་དེ། གང་ལ་ཞེ་ན། དཱ་བིད་ཀྱིས་ཁོ་རང་བདེ་བར་འགྲོ་རུ་བཅུག་པས་སོ། །  
\v 23 དེ་ནས་ཡོ་ཨབ་དང་ཁོའི་རྗེས་སུ་འབྲངས་པའི་དམག་དཔུང་ཐམས་ཅད་སླེབས་པ་ལ། དེ་དག་གིས་ཡོ་ཨབ་ལ་ནེར་གྱི་བུ་ཨབ་ནེར་རྒྱལ་པོའི་དྲུང་དུ་འོངས་པ་དང་། རྒྱལ་པོས་ཁོ་འགྲོ་རུ་བཅུག་ཅིང་ཁོ་རང་བདེ་བར་ཕྱིན་ཚར་ཞེས་སྨྲས་པས།  
\v 24 ཡོ་ཨབ་རྒྱལ་པོའི་དྲུང་དུ་སོང་སྟེ་ན་རེ། ཁྱེད་ཀྱིས་ཅི་ཞིག་བྱས་པར་གཟིགས་དང་། ཨབ་ནེར་ཁྱེད་ཀྱི་དྲུང་དུ་སླེབས་ན་དེ་ནི་ཅིའི་ཕྱིར་འགྲོ་རུ་བཅུག་པ་ཡིན་ནམ། ད་ནི་ཁོ་རང་སོང་ཚར།  
\v 25 ཁྱེད་རང་ནེར་གྱི་བུ་ཨབ་ནེར་ལ་ཆ་རྒྱུས་ཡོད་ཅིང་། དེ་ནི་ཁྱེད་བསླུ་བ་དང་ཁྱེད་ཀྱི་འགྲོ་འདུག་མཛད་དོན་ཐམས་ཅད་རྟོགས་པའི་ཕྱིར་འདིར་འོངས་པ་ཡིན་ཞེས་སྨྲས་སོ། །  
\v 26 ཡོ་ཨབ་ནི་དཱ་བིད་ཀྱི་དྲུང་ནས་ཐོན་པ་ཙམ་གྱིས་ཨབ་ནེར་གྱི་རྗེས་སུ་བང་ཆེན་ར་མདར་མངགས་ཤིང་། དེ་དག་གིས་ཁོ་རང་སི་རཱའི་ཡུལ་གྱི་ཁྲོན་པ་ནས་ཕྱིར་ཁྲིད་འོངས་ནའང་། དཱ་བིད་ཀྱིས་དོན་དེ་ཅི་ཡང་མ་ཤེས་སོ། །  
\v 27 ཨབ་ནེར་ནི་ཧེབ་རོན་དུ་ཕྱིར་སླེབས་པའི་ཚེ། ཡོ་ཨབ་ཀྱིས་ཁོ་ལ་གསང་གཏམ་བཤད་པའི་ཚུལ་གྱིས་ཁོ་རང་མཁར་སྒོའི་གྲུ་ག་ཞིག་ཏུ་ཁྲིད་ནས་ཕོ་བ་བརྟོལ་བས་ཁོ་ཤིའོ། །ཡོ་ཨབ་ཀྱིས་དེ་ལྟར་རང་གི་ནུ་བོ་ཨ་སཱ་ཧེལ་ལ་དགྲ་ཤ་བླངས་པ་རེད།  
\v 28 དེའི་རྗེས་སུ་དཱ་བིད་ཀྱིས་འཕྲིན་དེ་ཐོས་པ་དང་འདི་ལྟར། ནེར་གྱི་བུ་ཨབ་ནེར་བསད་པའི་དོན་དེའི་ཐད་ནས་བདག་དང་བདག་གི་རྒྱལ་སྲིད་ལ་དཀོན་མཆོག་ཡ་ཝཱེའི་དྲུང་དུ་ནམ་ཡང་ཉེས་པ་མེད་དོ། །  
\v 29 ཉེས་པ་དེ་ནི་ཡོ་ཨབ་དང་དེའི་ཕ་གཞིས་ཡོངས་ལ་འབབ་པར་ཤོག་ཅིག ཡང་ཡོ་ཨབ་ཀྱི་ཁྱིམ་ལས་རྣག་འཛིར་བའི་ནད་དང་། མཛེ་ནད་དང་། འཁར་བ་ལ་བརྟེན་པ་དང་། གྲི་སོར་ལྟུང་བ་དང་། ཁ་ཟས་མེད་པ་རྣམས་ནི་ནམ་ཡང་ཆད་པར་མ་གྱུར་ཅིག་ཅེས་གསུངས་སོ། །  
\v 30 དེ་ལྟར་ཡོ་ཨབ་དང་དེའི་ནུ་བོ་ཨ་བི་ཤཱ་ཨི་གཉིས་ཀྱིས་ཨབ་ནེར་བསད་དོ། །གང་ལ་ཞེ་ན། དེས་ཁོ་ཚོའི་སྤུན་ཨ་སཱ་ཧེལ་བྱ་བ་གིབ་ཡོན་ཡུལ་དུ་འཐབ་མོར་བསད་པས་སོ། །   
\s1 ཨབ་ནེར་དུར་ལ་བཅུག་པ།  
\p
\v 31 དེར་དཱ་བིད་ཀྱིས་ཡོ་ཨབ་དང་བཅས་པའི་མི་རྣམས་ལ། རང་གི་གོས་གཤགས་ཏེ་རྩིད་རས་གཡོགས་ཤིག ཨབ་ནེར་གྱི་མདུན་ནས་མྱ་ངན་བྱོས་ཤིག་ཅེས་སྨྲས་ཤིང་ཡང་རྒྱལ་པོ་དཱ་བིད་ཀྱང་ཨབ་ནེར་གྱི་པུར་སྒམ་རྗེས་སུ་ཕྱིན་ཏོ། །  
\v 32 དེ་ནས་དེ་དག་གིས་ཨབ་ནེར་བྱ་བ་ཧེབ་རོན་ཡུལ་དུ་དུར་ལ་བཅུག་པ་དང་རྒྱལ་པོ་སྐད་ཆེན་པོས་ཨབ་ནེར་གྱི་དུར་ཁུང་གི་མདུན་དུ་བཤུམས་ཏེ་མི་ཐམས་ཅད་ཀྱང་ངུས་སོ། །  
\v 33 རྒྱལ་པོས་ཨབ་ནེར་གྱི་དོན་དུ་མྱ་ངན་བྱས་ནས་འདི་ལྟར། ཨབ་ནེར་ཁྱེད་རང་གྲོངས་པ་ནི། །བླུན་པོ་གྲོངས་པའི་ལུགས་ཡིན་ནམ། །  
\v 34 ཁྱེད་ཕྱག་ཐག་པས་མ་བཀྱིགས་ལ། །རྐང་པར་ལྕགས་སྒྲོག་ཀྱང་མ་བརྒྱབ། །ཁྱེད་རང་ཅི་ལྟར་ལྷུང་ཞེ་ན། །མི་ངན་མདུན་དུ་ལྷུང་བ་བཞིན། །ཞེས་གསུངས་པས་མི་རྣམས་ཨབ་ནེར་གྱི་དོན་དུ་ལྷག་པར་ངུས་སོ། །  
\v 35 དེ་ནས་ཉི་མ་ད་དུང་མ་ནུབ་པའི་དུས་སུ་མི་རྣམས་འོངས་ནས་དཱ་བིད་ལ་ཁ་ཟས་སྟེར་འདོད་ནའང་དཱ་བིད་ཀྱིས་མནའ་བསྐྱལ་ཞིང་གལ་ཏེ་ངས་ཉི་མ་ནུབ་པའི་སྔོན་དུ་ཟས་གང་ཞིག་ཁ་རག་ན། དཀོན་མཆོག་གིས་བདག་ལ་འདིའམ་འདི་ལས་ལྷག་པ་ཞིག་མཛད་པར་ཤོག་ཅེས་གསུངས།  
\v 36 མི་ཐམས་ཅད་ཀྱིས་དེ་མཐོང་ནས་དགའ་བར་གྱུར་ཅིང་རྒྱལ་པོས་ཅི་བྱས་ཐམས་ཅད་ལ་མི་རྣམས་དགའ་བར་གྱུར་ཏོ། །  
\v 37 ཉིན་དེར་མི་ཚོགས་དང་ཡེས་ར་ཨེལ་པ་ཐམས་ཅད་ཀྱིས་ནེར་གྱི་བུ་ཨབ་ནེར་བསད་པ་ནི་རྒྱལ་པོའི་ཐུགས་དགོངས་མིན་པ་ཤེས་པ་རེད།  
\v 38 དེ་ནས་རྒྱལ་པོས་ཉིད་ཀྱི་བློན་འཁོར་རྣམས་ལ། དེ་རིང་ཉིན་མོར་ཡེས་ར་ཨེལ་གྱི་ནང་དུ་རྗེ་བོ་དང་སྐྱེས་མཆོག་གྲོངས་པ་ཁྱོད་ཚོས་མི་ཤེས་སམ།  
\v 39 བདག་ནི་རྒྱལ་པོར་བྱུགས་ཀྱང་དེ་རིང་ཉིན་མོར་ད་དུང་ཉམས་ཆུང་སྟེ། ཟེ་རུ་ཡཱ་ཡི་བུ་འདི་རྣམས་ནི་ནུས་སྟོབས་རབ་ཏུ་ཆེ་བས་བདག་གིས་ཐུབ་པ་མིན། དཀོན་མཆོག་ཡ་ཝཱེས་ངན་སྤྱོད་མི་ལ་དེའི་ངན་ལན་འཇལ་བར་ཤོག་ཅེས་གསུངས་སོ། །   
\c 4
\cl ལེའུ་བཞི་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 སོ་ལོའི་སྲས་ཨིས་པོ་ཤེད་བཀྲོངས་པ།  
\p
\v 1 སོ་ལོའི་སྲས་ཨིས་པོ་ཤེད་ཀྱིས་ཨབ་ནེར་ཁོ་རང་ཧེབ་རོན་དུ་གྲོངས་པའི་འཕྲིན་ཐོས་པ་ཙམ་གྱིས། འཇིགས་ནས་སྟོབས་ཉམས་པ་དང་ཡེས་ར་ཨེལ་པ་ཐམས་ཅད་ཀྱང་བག་ཚ་བར་གྱུར་ཏོ། །  
\v 2 སོ་ལོའི་སྲས་ལ་འཕྲལ་རྒོལ་རུ་ཁག་གི་བཀོད་འདོམས་དམག་དཔོན་གཉིས་ཡོད་དེ་གཅིག་གི་མིང་ལ་པ་ཨ་ནཱ་དང་གཞན་དེའི་མིང་ལ་རེ་ཁབ་ཅེས་བྱའོ། །དེ་གཉིས་ནི་པེན་ཡཱ་མེན་གྱི་བུ་ལས་པེ་ཨེ་རཱོད་པ་རིམ་མོན་བྱ་བའི་བུ་ཡིན་ཞིང་། པེ་ཨེ་རཱོད་བྱ་བ་པེན་ཡཱ་མེན་གྱི་ཁོངས་སུ་བརྩིས་པ་ཡིན་ནོ། །  
\v 3 པེ་ཨེ་རཱོད་པ་རྣམས་ནི་སྔར་གིད་ཏཱ་ཡིམ་ཡུལ་དུ་བྲོས་པ་དང་དེ་རིང་གི་བར་དུ་དེ་རུ་བྱེས་པར་ལུས་སོ། །  
\v 4 ཡང་སོ་ལོའི་སྲས་ཡོ་ནཱ་ཐན་ལ་བུ་རྐང་པ་ཞ་བོ་ཅན་ཞིག་ཡོད་དེ། དེའི་མིང་ལ་མེ་ཕི་པོ་ཤེད་ཟེར་ཞིང་། ཡེ་སི་རེ་ཨེལ་ནས་སོ་ལོ་དང་ཡོ་ནཱ་ཐན་གཉིས་གྲོངས་པའི་སྐོར་གྱི་སྐད་སླེབས་པའི་དུས་སུ། བུ་དེ་ལོ་ལྔ་ཡིན་ལ། ཁོའི་མ་མས་བུ་བཟུང་ནས་བྲོས་ཤིང་། ཡང་ཁོ་མོ་རྟབ་རྟབ་པོར་བྲོས་པས་བུ་འགྱེལ་ནས་ཞ་བོར་གྱུར་ཏོ། །  
\v 5 དེ་ནས་པེ་ཨེ་རཱོད་པ་རིམ་མོན་གྱི་བུ་སྟེ་རེ་ཁབ་དང་པ་ཨ་ནཱ་གཉིས་ཉིན་གུང་ཚ་བ་ཆེ་བའི་དུས་སུ་ཨིས་པོ་ཤེད་ཀྱི་ཁྱིམ་དུ་ཕྱིན་པ་དང་། དེ་ནི་ཉིན་གུང་ངལ་གསོས་ནས་ཉལ་ཡོད་ཅིང་།  
\v 6-7 རེ་ཁབ་དང་དེའི་སྤུན་པ་ཨ་ནཱ་གཉིས་གྲོ་ལེན་ཁུལ་བྱས་ནས་ཨིས་པོ་ཤེད་ཀྱི་ཁང་པའི་ནང་དུ་འོངས་ཤིང་། ཨིས་པོ་ཤེད་རང་གི་གཟིམ་ཁང་དུ་མལ་ཁྲིའི་སྟེང་ཉལ་ཡོད་པ་ལ། དེ་གཉིས་ཀྱིས་ཁོ་ལ་རལ་གྲི་བཙུགས་ནས་བསད་དེ་མགོ་བཅད་ཅིང་བྲོས་པ་དང་། མཚན་གང་པོར་མགོ་ཁྱེར་ནས་ཨ་ར་པཱ་ཡི་ལམ་དུ་ཞུགས་ཏེ་སོང་།  
\v 8 དེ་ནས་ཨིས་པོ་ཤེད་ཀྱི་མགོ་ཧེབ་རོན་དུ་དཱ་བིད་ཀྱི་དྲུང་དུ་ཁྱེར་ནས་རྒྱལ་པོ་ལ་འདི་ལྟར། ཁྱེད་ཀྱི་དགྲ་བོ་སོ་ལོའི་བུ་ཨིས་པོ་ཤེད་ཀྱི་མགོ་འདི་ལ་གཟིགས་དང་། དེས་ནི་སྔར་རྟག་ཏུ་ཁྱེད་ཀྱི་སྲོག་ལ་བརྔམས་པའོ། །དེ་རིང་ཉིན་མོར་དཀོན་མཆོག་ཡ་ཝཱེས་བདག་གི་ཇོ་བོ་དང་བདག་གི་རྒྱལ་པོའི་དྲུང་དུ་སོ་ལོ་དང་དེའི་བུ་རྒྱུད་ལ་ལན་གནང་བ་ཡིན་ཞེས་ཞུས་པ་ལ།  
\v 9 དཱ་བིད་ཀྱིས་པེ་ཨེ་རཱོད་པ་རིམ་མོན་གྱི་བུ་རེ་ཁབ་དང་དེའི་སྤུན་པ་ཨ་ནཱ་གཉིས་ལ་འདི་ལྟར། དཀའ་སྡུག་ཀུན་ལས་ངའི་སྲོག་སྐྱོབ་མཁན་དང་གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་འཛུགས་པར་བྱ་སྟེ།  
\v 10 སྔར་མི་ཞིག་གིས་སོ་ལོ་གྲོངས་སོ་ཞེས་ང་ལ་འཕྲིན་བཟང་སྦྲོན་ནོ་སྙམ་ཞིང་། ངས་མི་དེ་བཟུང་ནས་ཙིག་ལག་ཡུལ་དུ་བསད་པ་དང་། དེ་ནི་ངས་དེ་ལ་འཕྲིན་བཟང་སྦྲོན་པའི་ལན་སྤྲད་པ་ཡིན་ནོ། །  
\v 11 མི་ངན་གྱིས་མི་དྲང་བདེན་ཞིག་དེའི་ཁྱིམ་དུ་མལ་ཁྲི་སྟེང་བསད་ན། ངས་དེའི་སྲོག་ལན་ཅིས་ཀྱང་ལེན་པར་བྱ་སྟེ། ཁྱོད་གཉིས་ཀྱང་གསོད་ངེས་ཡིན་ཞེས་གསུངས་ཤིང་།  
\v 12 དཱ་བིད་ཀྱིས་རང་གི་གཞོན་ནུ་རྣམས་ལ་བཀའ་བསྩལ་པ་དང་། དེ་དག་གིས་ཁོ་གཉིས་ཀ་བསད་ཅིང་། རྐང་ལག་བཅད་དེ་བེམ་པོ་ཧེབ་རོན་གྱི་རྫིང་བུའི་འགྲམ་དུ་བཀལ། འོན་ཀྱང་ཨིས་པོ་ཤེད་ཀྱི་མགོ་ཁྱེར་ཏེ་ཧེབ་རོན་དུ་ཨབ་ནེར་གྱི་དུར་ལ་བཅུག་གོ །   
\c 5
\cl ལེའུ་ལྔ་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 དཱ་བིད་བྱ་བ་ཡེས་ར་ཨེལ་གྱི་རྒྱལ་པོར་བསྐོས་པ།  
\p
\v 1 ཡང་དེ་ནས་ཡེས་ར་ཨེལ་པའི་ཚོ་ཁག་ཐམས་ཅད་ཧེབ་རོན་དུ་དཱ་བིད་ཀྱི་དྲུང་དུ་འོངས་ནས་ཁོང་ལ། གཟིགས་དང་བདག་ཅག་ནི་ཁྱེད་ཀྱི་ཤ་དང་རུས་པའི་གཉེན་ཉེ་ཡིན་ནོ། །  
\v 2 སྔར་སོ་ལོ་བདག་ཅག་གི་རྒྱལ་པོར་བཞུགས་པའི་ཚེ། ཁྱེད་ནི་ཡེས་ར་ཨེལ་པའི་དམག་དཔུང་གི་འགྲོ་འོང་ལ་སྣེ་ཁྲིད་བྱེད་མཁན་ཡིན། དཀོན་མཆོག་ཡ་ཝཱེས་ཀྱང་ཁྱེད་ལ། ཁྱོད་ཀྱིས་བདག་གི་འབངས་མི་ཡེས་ར་ཨེལ་ལ་བདག་སྐྱོང་བྱས་ནས་དེའི་འགོ་དཔོན་དུ་གྱུར་ཅིག་ཅེས་གསུངས་མྱོང་ངོ་ཞེས་ཞུས།  
\v 3 ཡེས་ར་ཨེལ་གྱི་རྒན་པོ་རྣམས་ཧེབ་རོན་དུ་རྒྱལ་པོའི་དྲུང་དུ་འོངས་པ་དང་། རྒྱལ་པོ་དཱ་བིད་ཀྱིས་ཧེབ་རོན་དུ་དཀོན་མཆོག་ཡ་ཝཱེའི་སྤྱན་སྔར་དེ་དག་དང་ཆད་དོན་མཛད་ཅིང་། དེ་དག་གིས་དཱ་བིད་ཡེས་ར་ཨེལ་གྱི་རྒྱལ་པོར་བསྐོ་ཆེད་སྣུམ་གྱིས་བྱུགས།  
\v 4 དཱ་བིད་ཀྱིས་རྒྱལ་སྲིད་འཛིན་པའི་ཚེ་ལོ་སུམ་ཅུ་ལོན་ཞིང་ཁོང་གིས་ལོ་བཞི་བཅུའི་རིང་དུ་རྒྱལ་སྲིད་བསྐྱངས།  
\v 5 ཁོང་གིས་ཧེབ་རོན་དུ་ཡ་ཧུ་དཱ་ལ་ལོ་བདུན་དང་ཟླ་བ་དྲུག་དང་། ཡང་ཡེ་རུ་སཱ་ལེམ་དུ་ཡེས་ར་ཨེལ་དང་ཡ་ཧུ་དཱ་གཉིས་ལ་ལོ་སུམ་ཅུ་སོ་གསུམ་གྱི་རིང་རྒྱལ་སྲིད་བསྐྱངས་སོ། །  
\v 6 ཡང་རྒྱལ་པོ་དང་ཁོང་གི་རྗེས་འབྲང་པ་རྣམས་ཡེ་རུ་སཱ་ལེམ་དུ་སླེབས་ཤིང་། ཡུལ་དེར་གནས་པའི་ཡེ་བུ་སི་པ་རྣམས་ལ་རྒོལ་བར་བསམས་པ་ལ། ཡེ་བུ་སི་པ་རྣམས་ཀྱིས་དཱ་བིད་ལ། ལོང་བ་དང་ཞ་བོ་འདི་རྣམས་ཀྱིས་ཀྱང་ཁྱོད་བཟློག་པར་བྱེད་པས་ཁྱོད་གྲོང་ཁྱེར་འདིའི་ནང་དུ་འོང་མི་ནུས་སོ་ཞེས་སྨྲས་ཤིང་། དེ་དག་གི་སེམས་སུ་དཱ་བིད་ཅི་ནས་ཀྱང་དེར་འོང་མི་ནུས་བསམས་ནའང་།  
\v 7 དཱ་བིད་ཀྱིས་ཛ་ཡན་གྱི་བཙན་རྫོང་སྟེ་དཱ་བིད་ཀྱི་གྲོང་ཁྱེར་བླངས་པའོ། །  
\v 8 དེའི་ཉིན་དཱ་བིད་ཀྱིས། ཡེ་བུ་སི་པ་རྣམས་ལ་རྒོལ་མཁན་དག་གིས། ཡུར་བ་ནས་ཡར་སོང་སྟེ་དཱ་བིད་སེམས་ནས་སྡང་བའི་ལོང་བ་དང་ཞ་བོ་རྣམས་ལ་རྒོལ་ཞིག་ཅེས་བཀའ་བསྩལ་པས། ལོང་བ་དང་ཞ་བོ་རྣམས་ཕོ་བྲང་ནང་དུ་འོང་མི་རུང་ཞེས་པའི་ངག་རྒྱུན་བྱུང་བའོ། །  
\v 9 ཕྱིས་སུ་དཱ་བིད་ནི་བཙན་རྫོང་དེའི་ནང་དུ་བཞུགས་ཤིང་དེའི་མིང་ལ་དཱ་བིད་ཀྱི་གྲོང་ཁྱེར་ཞེས་བཏགས་པ་དང་། ཡང་དཱ་བིད་ཀྱིས་འཛིངས་རགས་ནས་ནང་རོལ་དུ་གྱང་བརྩིགས་པ་རེད།  
\v 10 དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ནི་དཱ་བིད་དང་མཉམ་དུ་བཞུགས་པས་དཱ་བིད་ཉིན་རེ་བཞིན་དར་ཞིང་རྒྱས་པར་གྱུར།  
\v 11 དེ་ནས་ཐཱར་གྱི་རྒྱལ་པོ་ཧི་རཱམ་གྱིས་དཱ་བིད་ཀྱི་དྲུང་དུ་བང་ཆེན་མངགས་པ་དང་། ཡང་ཐང་ཤིང་དང་ཤིང་བཟོ་དང་རྡོ་བཟོ་རྣམས་བརྫངས་ཤིང་དེ་དག་གིས་དཱ་བིད་ལ་ཕོ་བྲང་བཞེངས།  
\v 12 དེར་དཱ་བིད་ཀྱིས་དཀོན་མཆོག་ཡ་ཝཱེས་རང་ཉིད་ཡེས་ར་ཨེལ་གྱི་རྒྱལ་པོར་བསྐོས་པ་དང་། ཡང་ཁོང་གི་འབངས་མི་ཡེས་ར་ཨེལ་གྱི་དོན་དུ་ཁོའི་རྒྱལ་སྲིད་དར་བར་མཛད་པ་རྟོགས་སོ། །  
\v 13 དཱ་བིད་ཁོང་ཉིད་ཧེབ་རོན་ནས་ཐོན་རྗེས་ཡེ་རུ་སཱ་ལེམ་དུ་ཆུན་མ་དང་བཙུན་མོ་མང་པོ་བཞེས་ཤིང་། སྲས་དང་སྲས་མོའང་ཤིན་ཏུ་མང་པོ་བལྟམས་སོ། །  
\v 14 ཡེ་རུ་སཱ་ལེམ་དུ་བལྟམས་པ་རྣམས་ཀྱི་མིང་ནི་འདི་ལྟ་སྟེ། ཤམ་མུ་ཨ་དང་ཤོ་བབ། ནཱ་ཐན། སོ་ལོ་མོན།  
\v 15 ཡིབ་ཧར། ཨེ་ལི་ཤུ་ཨ། ནེ་ཕེག ཡཱ་ཕི་ཨ།  
\v 16 ཨེ་ལི་ཤཱ་མ། ཨེལ་ཡཱ་ད། ཨེ་ལི་ཕེ་ལེད་བཅས་སོ། །   
\s1 ཕེ་ལེ་ཤེད་པ་རྣམས་ལས་རྒྱལ་བ།  
\p
\v 17 དེ་ནས་ཕེ་ལེ་ཤེད་པ་རྣམས་ཀྱིས་དཱ་བིད་ནི་ཡེས་ར་ཨེལ་གྱི་རྒྱལ་པོར་བྱུགས་པའི་གཏམ་ཐོས་པས། ཐམས་ཅད་དཱ་བིད་འཚོལ་དུ་ཡར་ཕྱིན་པ་དང་། དཱ་བིད་ཀྱིས་དེ་ཐོས་པ་ཙམ་གྱིས་མར་བཙན་རྫོང་དུ་བབས་སོ། །  
\v 18 ཕེ་ལེ་ཤེད་པ་རྣམས་འོངས་ནས་རེ་པཱ་པའི་ལུང་པར་ཁྱབ།  
\v 19 དེར་དཱ་བིད་ཀྱིས་དཀོན་མཆོག་ཡ་ཝཱེ་ལ། བདག་ཡར་སོང་ནས་ཕེ་ལེ་ཤེད་པ་རྣམས་ལ་རྒོལ་བར་བྱའམ། ཁྱེད་ཀྱིས་དེ་དག་བདག་གི་ལག་ཏུ་གཏོད་པར་མཛད་དམ་ཞུས་པ་ལ། དཀོན་མཆོག་ཡ་ཝཱེས་དཱ་བིད་ལ་འདི་སྐད་དུ། ཡར་སོང་ཞིག་དང་ངས་ཕེ་ལེ་ཤེད་པ་རྣམས་ཁྱོད་ཀྱི་ལག་ཏུ་གཏོད་ངེས་ཡིན་ཞེས་གསུངས་སོ། །  
\v 20 དེ་ནས་དཱ་བིད་ནི་པཱ་ཨལ་ཕེ་ར་ཙིམ་དུ་འོངས་པ་དང་། ཁོས་ཕེ་ལེ་ཤེད་པ་རྣམས་དེ་རུ་འཇོམས་པར་བྱས་ཏེ་འདི་ལྟར། ཆུས་རགས་བརྟོལ་བ་ལྟར་དཀོན་མཆོག་ཡ་ཝཱེས་དགྲ་བོ་རྣམས་ངའི་མདུན་དུ་བརྟོལ་བ་ཡིན་ཞེས་སྨྲས་ཤིང་། ཁོང་གིས་ཡུལ་དེའི་མིང་ལ་པཱ་ཨལ་ཕེ་ར་ཙིམ་ཞེས་བཏགས།  
\v 21 ཕེ་ལེ་ཤེད་པ་རྣམས་ཀྱིས་རང་གི་སྐུ་འདྲ་རྣམས་དེ་རུ་བསྐྱུར་ཅིང་། དཱ་བིད་དང་ཁོའི་ཞབས་འབྲང་རྣམས་ཀྱིས་དེ་དག་བླངས་ནས་ཁྱེར་ཏོ། །  
\v 22 ཕེ་ལེ་ཤེད་པ་རྣམས་སླར་ཡང་ཡར་འོངས་པ་དང་རེ་པཱ་པའི་ལུང་པར་ཁྱབ།  
\v 23 དཱ་བིད་ཀྱིས་དཀོན་མཆོག་ཡ་ཝཱེར་ཞུས་པ་ན། ཁོང་གིས་ཁྱོད་ཐད་ཀར་ཡར་མི་འགྲོ་བར། དེ་དག་རྒྱབ་ནས་བསྐོར་ཏེ་སྤོས་ཤིང་གི་ནགས་ཚལ་གྱི་ཁ་གཏད་ནས་དེ་དག་ལ་རྒོལ་ཞིག  
\v 24 ཁྱོད་ཀྱིས་སྤོས་ཤིང་གི་རྩེ་ནས་དཔུང་ཚོགས་ཀྱི་གོམ་སྒྲ་ཐོས་པ་ཙམ་གྱིས་ཡར་ལོངས་ཤིག གང་ལ་ཞེ་ན། དུས་དེར་དཀོན་མཆོག་ཡ་ཝཱེ་ཁྱོད་ཀྱི་སྔོན་དུ་གཤེགས་ཏེ། ཕེ་ལེ་ཤེད་པའི་དམག་ཚོགས་ལ་རྒོལ་བ་ཡིན་ནོ་ཞེས་གསུངས།  
\v 25 དེ་ནས་དཱ་བིད་ཀྱིས་དཀོན་མཆོག་ཡ་ཝཱེས་བཀའ་བསྩལ་པ་ཇི་བཞིན་བསྒྲུབས་པ་དང་ཕེ་ལེ་ཤེད་པ་རྣམས་གེ་བཱ་ནས་གེ་ཟེར་བར་དུ་བཅོམ་མོ། །   
\c 6
\cl ལེའུ་དྲུག་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 དཀོན་མཆོག་གི་ཞལ་ཆད་ཀྱི་ཤུར་སྒམ་ཡེ་རུ་སཱ་ལེམ་དུ་ཁྱེར་བ།  
\p
\v 1 ཡང་དཱ་བིད་ཀྱིས་ཡེས་ར་ཨེལ་ལས་བདམས་པའི་མི་ཁྲི་གསུམ་བསྡུས་པ་དང་།  
\v 2 དཱ་བིད་དང་མཉམ་དུ་ཡོད་པའི་མི་རྣམས་ཡར་ལངས་ནས་ལམ་ལ་ཆས་ཏེ་དཀོན་མཆོག་གི་ཞལ་ཆད་ཀྱི་ཤུར་སྒམ་ལེན་པར་པཱ་ཨལ་ཡ་ཧུ་དཱ་རུ་སོང་ཞིང་། ཤུར་སྒམ་དེ་ནི་ཀེ་རུབ་ཟུང་གི་གོང་དུ་བཞུགས་པའི་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་མཚན་ནས་འབོད་པའོ། །  
\v 3 ཁོ་ཚོས་དཀོན་མཆོག་གི་ཞལ་ཆད་ཀྱི་ཤུར་སྒམ་ནི་མཐོ་སྒང་དུ་གནས་པའི་ཨ་བི་ནཱ་དབ་ཀྱི་ཁྱིམ་ནས་བཏོན་པ་དང་། ཤིང་རྟ་གསར་པ་ཞིག་ལ་བསྐྱོན་ནས་ཨ་བི་ནཱ་དབ་ཀྱི་བུ་ཨུ་ཟཱ་དང་ཨ་ཧི་ཨོ་གཉིས་ཀྱིས་ཤིང་རྟ་གསར་པ་དེ་དེད་པ་ཡིན་ནོ། །  
\v 4 དཀོན་མཆོག་གི་ཞལ་ཆད་ཀྱི་ཤུར་སྒམ་ཤིང་རྟའི་སྟེང་དུ་ཡོད་པ་དང་། ཨ་ཧི་ཨོ་ཞལ་ཆད་ཀྱི་ཤུར་སྒམ་གྱི་སྔོན་དུ་བསྐྱོད་དོ། །  
\v 5 དཱ་བིད་དང་ཡེས་ར་ཨེལ་གྱི་ཁྱིམ་རྒྱུད་ཐམས་ཅད་ཀྱིས་དཀོན་མཆོག་ཡ་ཝཱེའི་དྲུང་དུ་གསོམ་ཤིང་གི་རོལ་ཆས་སྣ་ཚོགས་ཏེ། པི་ཝང་དང་རྒྱུད་མངས། སིལ་རྔ། སྦུག་ཆལ། སིལ་སྙན་བཅས་དཀྲོལ་ཞིང་གར་འཆམས་པའོ། །  
\v 6 དེ་དག་ནཱ་ཀོན་གྱི་གཡུལ་ཁར་སླེབས་པའི་ཚེ། བ་གླང་སར་འགྱེལ་ལ་ཁད་བྱས་པས་ཨུ་ཟཱ་ཡིས་ལག་པ་བརྐྱངས་ནས་དཀོན་མཆོག་གི་ཞལ་ཆད་ཀྱི་ཤུར་སྒམ་བསྐྱོར་བ་དང་།  
\v 7 དཀོན་མཆོག་ཡ་ཝཱེ་ནི་ཨུ་ཟཱ་ལ་ཐུགས་རབ་ཏུ་ཁྲོས་ཤིང་། ཁོའི་སྤྱོད་ལམ་ནོར་འཁྲུལ་ཅན་དེའི་རྐྱེན་གྱིས་དཀོན་མཆོག་གིས་ཁོ་བསད་པ་དང་། ཁོ་རང་དཀོན་མཆོག་གི་ཞལ་ཆད་ཀྱི་ཤུར་སྒམ་གྱི་གམ་དུ་ཤིའོ། །  
\v 8 དཀོན་མཆོག་ཡ་ཝཱེས་གློ་བུར་ཉིད་དུ་ཨུ་ཟཱ་ལ་ཉེས་ཆད་བཅད་པས་དཱ་བིད་རབ་ཏུ་ཁྲོས་ནས་ཡུལ་དེའི་མིང་ལ་ཕེ་རེལ་ཟི་ཨུ་ཟཱ་\f + \ft འདིར་ཕེ་རེལ་ཟི་ཨུ་ཟཱ་ཞེས་པ་ནི་ཨུ་ཟཱའི་སྟེང་ལ་ཁོང་ཁྲོ་རབ་ཏུ་འབར་བ་ཞེས་པའི་དོན་ཡིན། \f*ཞེས་བཏགས་ཤིང་དེ་རིང་གི་བར་དུ་ལུས།  
\v 9 དེའི་ཉིན་ལ་དཱ་བིད་དཀོན་མཆོག་ཡ་ཝཱེ་ལ་འཇིགས་ཏེ་ན་རེ། དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ནི་བདག་གི་རྩར་འབྱོན་ག་ལ་རུང་ཞེས་སྨྲས།  
\v 10 དེའི་ཕྱིར་དཱ་བིད་ཀྱིས་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་རང་གི་གྲོང་ཁྱེར་དུ་འཁྱེར་མ་འདོད་པར། དེ་ལས་ལྡོག་སྟེ་གཱད་པ་ཨོ་བེད་ཨེ་དོམ་ཞེས་བྱ་བའི་ཁྱིམ་དུ་ཁྱེར།  
\v 11 དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ཟླ་བ་གསུམ་གྱི་རིང་ལ་གཱད་པ་ཨོ་བེད་ཨེ་དོམ་གྱི་ཁྱིམ་དུ་ལུས་པ་དང་དཀོན་མཆོག་ཡ་ཝཱེས་ཨོ་བེད་ཨེ་དོམ་དང་དེའི་ཁྱིམ་མི་ཐམས་ཅད་ལ་བྱིན་གྱིས་བརླབས་སོ། །  
\v 12 དེ་ནས་མི་རྣམས་ཀྱིས་རྒྱལ་པོ་དཱ་བིད་ལ། དཀོན་མཆོག་ཡ་ཝཱེས་ཨོ་བེད་ཨེ་དོམ་གྱི་ཁྱིམ་དང་དེ་ལ་གཏོགས་པ་ཐམས་ཅད་ལ་དཀོན་མཆོག་གི་ཞལ་ཆད་ཀྱི་ཤུར་སྒམ་གྱི་རྐྱེན་གྱིས་བྱིན་གྱིས་བརླབས་པའོ་ཞེས་ཞུས་པས། དཱ་བིད་དགའ་དགའ་སྤྲོ་སྤྲོ་ངང་ལམ་དུ་ཆས་ཤིང་དཀོན་མཆོག་གི་ཞལ་ཆད་ཀྱི་ཤུར་སྒམ་དེ་ཨོ་བེད་ཨེ་དོམ་གྱི་ཁྱིམ་ནས་རང་གི་གྲོང་ཁྱེར་དུ་ཡར་གདན་དྲངས་སོ། །  
\v 13 དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་འཁུར་མཁན་རྣམས་ཀྱིས་གོམ་པ་དྲུག་བརྒྱབ་མཚམས་སུ་དཱ་བིད་ཀྱིས་བ་གླང་གཅིག་དང་ཕྱུགས་ཤ་ཤེད་ཅན་གཅིག་མཆོད་པར་ཕུལ་ཏོ། །  
\v 14 དཱ་བིད་ཀྱིས་སོ་རས་སྲབ་བུས་བཟོས་པའི་བེར་ཐུལ་གྱོན་པ་དང་སྟོབས་ཤུགས་ཡོད་རྒུ་བཏོན་ནས་དཀོན་མཆོག་ཡ་ཝཱེའི་དྲུང་དུ་གར་འཆམས།  
\v 15 དེ་ལྟར་དཱ་བིད་དང་ཡེས་ར་ཨེལ་གྱི་ཁྱིམ་རྒྱུད་ཐམས་ཅད་ཀྱིས་དགའ་སྤྲོའི་འབོད་སྒྲ་བསྒྲགས་ཤིང་རྭ་དུང་བུས་ནས་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ཡར་གདན་དྲངས་སོ། །  
\v 16 དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་དཱ་བིད་ཀྱི་གྲོང་ཁྱེར་དུ་འབྱོར་བའི་ཚེ། སོ་ལོའི་སྲས་མོ་མི་ཀལ་གྱིས་སྒེའུ་ཁུང་ནས་བལྟས་པ་ན། རྒྱལ་པོ་དཱ་བིད་ཀྱིས་དཀོན་མཆོག་ཡ་ཝཱེའི་དྲུང་དུ་གནམ་ལྡིང་ས་ལྡིང་བྱེད་ཀྱིན་བྲོ་འཁྲབ་པ་མཐོང་བས། སེམས་ནས་ཁོ་ལ་མཐོང་ཆུང་བྱས།  
\v 17 དེ་ནས་དེ་དག་གིས་དཀོན་མཆོག་ཡ་ཝཱེའི་ཞལ་ཆད་ཀྱི་ཤུར་སྒམ་ནང་དུ་གདན་དྲངས་པ་དང་། དཱ་བིད་ཀྱིས་དེའི་དོན་དུ་ཕུབ་པའི་གུར་མཆོག་གི་ནང་དུ་རང་སར་བཞག་ཅིང་། ཡང་དཱ་བིད་ཀྱིས་དཀོན་མཆོག་ཡ་ཝཱེའི་དྲུང་དུ་སྦྱིན་སྲེག་དང་ཞི་བདེའི་མཆོད་པ་ཕུལ་ཏོ། །  
\v 18 དཱ་བིད་ཀྱིས་སྦྱིན་སྲེག་དང་ཞི་བདེའི་མཆོད་པ་ཕུལ་རྗེས་སུ། ཁོང་གིས་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་མཚན་ལ་བརྟེན་ནས་མི་ཐམས་ཅད་ལ་བྱིན་རླབས་གནང་ཞིང་།  
\v 19 ཡེས་ར་ཨེལ་གྱི་མི་ཐམས་ཅད་དེ་སྐྱེས་ཕོ་མོ་རེ་རེར་བག་ལེབ་རེ་དང་། ཤ་ལེབ་མོ་ \f + \ft ཤ་ལེབ་མོ་ཞེས་པར་གནའ་བོའི་འགྱུར་ལས་ཁ་སུར་ལེབ་མོ་ཞེས་བསྒྱུར་ཡོད།\f*རེ་དང་། རྒུན་འབྲུམ་སྐམ་པོ་ལེབ་མོ་རེ་བགོས་ནས་མི་ཐམས་ཅད་རང་རང་གི་ཁྱིམ་དུ་ལོག་པ་རེད།  
\v 20 དཱ་བིད་རང་གི་ཁྱིམ་མི་ལ་བྱིན་རླབས་སྩོལ་བའི་ཕྱིར་འོངས་པ་ན། སོ་ལོའི་སྲས་མོ་མི་ཀལ་ནི་དཱ་བིད་དང་འཕྲད་པར་འོངས་ཏེ་ཁོང་ལ། དེ་རིང་ཉིན་མོར་ཡེས་ར་ཨེལ་གྱི་རྒྱལ་པོ་ནི་ཅི་འདྲའི་གཟི་བརྗིད་ལྡན་ཨང་། ཁོང་ཉིད་རང་གི་བློན་འཁོར་གྱི་གཡོག་མོ་རྣམས་ཀྱི་མཐོང་སར་གཅེར་བུར་བུད་ཅིང་། དེ་ནི་མི་ཐ་མལ་བ་ཞིག་གིས་ངོ་ཚ་སྤངས་ནས་གཅེར་བུར་བུད་པ་དང་མཚུངས་སོ་ཞེས་སྨྲས་པར།  
\v 21 དཱ་བིད་ཀྱིས་མི་ཀལ་ལ། བདག་གིས་དཀོན་མཆོག་ཡ་ཝཱེའི་སྤྱན་སྔར་དེ་ལྟར་བྱས་པ་ཡིན་ཏེ། དཀོན་མཆོག་ཡ་ཝཱེས་བདག་ནི་ཁོང་གི་འབངས་མི་ཡེས་ར་ཨེལ་གྱི་མངའ་བདག་ཏུ་བསྐོས་ནས་ང་རང་བདམས་ཤིང་། ཁྱོད་ཀྱི་ཕ་དང་ཁྱོད་ཀྱི་ཕ་ཡི་རྒྱུད་ཐམས་ཅད་ལས་མཐོ་བར་མཛད་པས། བདག་གིས་དཀོན་མཆོག་ཡ་ཝཱེའི་སྤྱན་སྔར་ཞབས་བྲོ་འཁྲབ་ཅིང་སྤྲོ་སྐྱིད་གཏོང་ངོ་། །  
\v 22 བདག་ནི་འདི་ལས་ཀྱང་ལྷག་པར་དམའ་བར་འགྱུར་བ་དང་། རང་གི་མཐོང་ངོར་དམན་ས་འཛིན་པར་འདོད་དེ། ཡང་ཁྱོད་ཀྱིས་གླེང་བའི་གཡོག་མོ་རྣམས་ཀྱིས་བདག་ལ་བཀུར་བསྟི་བྱེད་པ་ཡིན་ཞེས་སྨྲས་སོ། །  
\v 23 སོ་ལོའི་སྲས་མོ་མི་ཀལ་ལ་འཆི་བའི་བར་དུ་ཕྲུ་གུ་མ་སྐྱེས་སོ། །   
\c 7
\cl ལེའུ་བདུན་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 ནཱ་ཐན་གྱིས་རྒྱལ་པོར་ལུང་བསྟན་གནང་བ།  
\p
\v 1 ཡང་དེའི་རྗེས་སུ་དཀོན་མཆོག་ཡ་ཝཱེས་ཕྱོགས་བཞིའི་དགྲ་རྣམས་ཀྱི་བཙན་འཛུལ་བཟློགས་ནས་རྒྱལ་པོ་ཉིད་ཀྱི་ཕོ་བྲང་དུ་ཞི་བར་སྡོད་པའི་ཚེ།  
\v 2 རྒྱལ་པོས་ལུང་སྟོན་པ་ནཱ་ཐན་ལ། ལྟོས་དང་། བདག་ནི་ཐང་ཤིང་གི་ཕོ་བྲང་ནང་དུ་སྡོད་པ་དང་དཀོན་མཆོག་གི་ཞལ་ཆད་ཀྱི་ཤུར་སྒམ་ནི་གུར་གྱི་ནང་དུ་མཆིས་སོ་ཞེས་སྨྲས་པ་ལ།  
\v 3 ནཱ་ཐན་གྱིས་རྒྱལ་པོ་ལ། དཀོན་མཆོག་ཡ་ཝཱེ་ཁྱེད་དང་མཉམ་དུ་བཞུགས་པས་ཁྱེད་ཀྱི་ཐུགས་དགོངས་བཞིན་བྱོས་ཤིག་ཅེས་སྨྲས་སོ། །  
\v 4 དེའི་མཚན་མོར་དཀོན་མཆོག་ཡ་ཝཱེའི་བཀའ་ནི་ནཱ་ཐན་ལ་བྱུང་ནས་འདི་སྐད་དུ།  
\v 5 ཁྱོད་སོང་ནས་བདག་གི་ཞབས་ཕྱི་དཱ་བིད་ལ། དཀོན་མཆོག་ཡ་ཝཱེས་འདི་སྐད་དུ། ཁྱོད་ཀྱིས་བདག་གནས་སའི་མཆོད་ཁང་ཞིག་བཞེངས་པར་འདོད་དམ།  
\v 6 ངས་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཡར་ཁྲིད་པའི་ཉིན་ནས་བཟུང་དེ་རིང་གི་བར་དུ། བདག་ནི་མཆོད་ཁང་དུ་གནས་པ་མ་མྱོང་སྟེ། གུར་མཆོག་གཅིག་ནས་གུར་མཆོག་གཞན་ཞིག་ཏུ་སྤར་ནས་གནས་པ་ཡིན།  
\v 7 ཡེས་ར་ཨེལ་པ་རྣམས་ཡུལ་གང་དུ་ཕྱིན་ནའང་། བདག་གིས་སྔོན་ཆད་བདག་གི་འབངས་མི་སྐྱོང་བར་བྱོས་ཤིག་ཅེས་བཀའ་གནང་བའི་ཡེས་ར་ཨེལ་གྱི་ཚོ་པ་རྣམས་ཀྱི་འགོ་དཔོན་ \f + \ft འགོ་དཔོན་ཞེས་པར་མ་ཕྱི་ལས་ཚོ་ཁག་ཅེས་བཀོད་ཡོད།\f*སུ་ཞིག་ལ་ཁྱོད་ཅག་གིས་ངའི་དོན་དུ་ཐང་ཤིང་གི་མཆོད་ཁང་མི་བཞེང་བ་ཅི་ཡིན་ཞེས་སྨྲས་མྱོང་ངམ།  
\v 8 དེའི་ཕྱིར་ཁྱོད་ཀྱིས་ངའི་ཞབས་ཕྱི་དཱ་བིད་ལ་འདི་སྐད་སྨྲ་དགོས་ཏེ། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་རང་ལུག་ཁྱུ་འཚོ་སྐྱོང་གི་ལུག་ར་ནས་བླངས་ཏེ། བདག་གི་འབངས་མི་ཡེས་ར་ཨེལ་གྱི་མངའ་བདག་ཏུ་བསྐོས་ཤིང་།  
\v 9 ཁྱོད་གང་དུ་སོང་ནའང་ང་རང་ཁྱོད་དང་མཉམ་དུ་གནས། ཡང་དགྲ་བོ་ཐམས་ཅད་ཁྱོད་ཀྱི་མདུན་ནས་རྩ་མེད་དུ་གཏོང་བ་ཡིན་ཏེ། འཇིག་རྟེན་གྱི་མི་སྙན་གྲགས་ཅན་རྣམས་བཞིན་དུ་ངས་ཁྱོད་ཀྱང་མིང་གྲགས་ཅན་དུ་བྱེད་ངེས་ཡིན།  
\v 10 བདག་གིས་རང་གི་འབངས་མི་ཡེས་ར་ཨེལ་གྱི་དོན་དུ་ཡུལ་ཞིག་བདམས་ནས་དེ་དག་དེར་འཇོག་པར་བྱ་སྟེ། དེ་དག་རང་གི་གནས་སུ་གཞིས་ཆགས་ཏེ་གཞན་གྱིས་དཀྲུག་པར་མི་འགྱུར་ཞིང་། མི་ངན་རྣམས་ཀྱིས་ཀྱང་སྔར་བྱས་བཞིན་དེ་དག་ལ་འཚེ་བར་མི་འགྱུར་ཏེ།  
\v 11 བདག་གིས་རང་གི་འབངས་མི་ཡེས་ར་ཨེལ་ལ་བདག་སྐྱོང་བྱེད་པའི་ཁྲིམས་དཔོན་རྣམས་བསྐོས་པའི་ཉིན་དང་འདྲ་བར་མི་འབྱུང་བ་ཡིན། ངས་ཁྱོད་ཀྱི་དགྲ་བོ་ཐམས་ཅད་ཀྱི་བཙན་འཛུལ་བཟློགས་ནས་ཞི་བར་སྡོད་དུ་འཇུག་གོ །དཀོན་མཆོག་ཡ་ཝཱེས་ཁྱོད་ལ་འདི་སྐད་བསྒྲགས་པ་སྟེ། དཀོན་མཆོག་ཡ་ཝཱེས་དངོས་སུ་ཁྱོད་ལ་ཁྱིམ་རྒྱུད་འཛུགས་པར་བྱའོ། །  
\v 12 ཁྱོད་ཀྱི་ཚེ་ལོ་མཐར་ཕྱིན་ཏེ་རང་གི་ཕ་མེས་དང་ལྷན་ཅིག་གཉིད་དུ་ཡུར་བའི་ཚེ་ན། བདག་གིས་ཁྱོད་ལས་སྐྱེས་པའི་བུ་རྒྱུད་བསྐྱེད་ནས་ཁྱོད་ཀྱི་རྒྱུན་འཛིན་པར་མ་ཟད། དེའི་རྒྱལ་སྲིད་བརྟན་པར་བྱའོ། །  
\v 13 ཡང་དེས་བདག་གི་མིང་གི་ཕྱིར་མཆོད་ཁང་ཞིག་བཞེང་བར་འགྱུར་ཞིང་། བདག་གིས་དེའི་རྒྱལ་ཁྲི་ཇི་སྲིད་བར་དུ་བརྟན་པར་བྱའོ། །  
\v 14 བདག་ནི་ཁོ་ཡི་ཕ་དང་ཁོ་ནི་བདག་གི་བུ་རུ་འགྱུར་ཞིང་གལ་ཏེ་ཁོས་ཉེས་སྐྱོན་བཟོས་ན། ངས་མི་ཡི་ཁྲིམས་དབྱུག་དང་འཇིག་རྟེན་པའི་རྟ་ལྕག་གིས་ཁོ་ལ་ཡོ་བསྲང་བྱེད་དོ། །  
\v 15 འོན་ཀྱང་ཁྱོད་ཀྱི་མདུན་ནས་བསྐྲད་པའི་སོ་ལོ་དང་བྲལ་བ་བཞིན་དུ་ངའི་བྱམས་བརྩེ་ནི་ནམ་ཡང་ཁོ་དང་མི་འབྲལ་ལོ། །  
\v 16 ཡང་ཁྱོད་ཀྱི་ཁྱིམ་རྒྱུད་དང་རྒྱལ་སྲིད་དུས་རྒྱུན་དུ་བདག་\f + \ft བདག་ཅེས་པར་མ་ཕྱི་ལས་ཁྱོད་ཅེས་བཀོད་ཡོད།\f*གི་མདུན་དུ་བརྟན་པོར་ཚུགས་ཤིང་ཁྱོད་ཀྱི་རྒྱལ་ཁྲི་ནི་རྒྱུན་ནས་རྒྱུན་དུ་གཡོ་བར་མི་འགྱུར་ཞེས་གསུངས་སོ། །  
\v 17 བཀའ་ལུང་དེ་ཐམས་ཅད་དང་ཅི་ལྟར་མངོན་པར་མཛད་པ་བཞིན་དུ་ནཱ་ཐན་གྱིས་དཱ་བིད་ལ་ཞུས་སོ། །   
\s1 དཱ་བིད་ཀྱིས་སྨོན་ལམ་བཏབ་པ།  
\p
\v 18 དེ་ནས་རྒྱལ་པོ་དཱ་བིད་ནང་དུ་སོང་སྟེ་དཀོན་མཆོག་ཡ་ཝཱེའི་དྲུང་དུ་བསྡད་ནས་ཁོང་ལ། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་བདག་ཚད་འདི་ཙམ་གྱི་བར་དུ་ཁྲིད་པར་མཛད་པས། བདག་ནི་སུ་ཡིན་ནམ། བདག་གི་ཁྱིམ་རྒྱུད་ཅི་ལ་བརྩིའམ།  
\v 19 འདི་ཡང་ཁྱེད་ཀྱི་སྤྱན་སྔར་བྱ་བ་ཆུང་ངུ་ཞིག་ཡིན་ཏེ། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་ཉིད་ཀྱི་ཞབས་ཕྱིའི་ཁྱིམ་རྒྱུད་ཀྱི་མ་འོངས་འབྱུང་འགྱུར་ཐད་ལ་བཀའ་ལུང་གནང་བའོ། །ཀྱེ་གཙོ་བོ་ཡ་ཝཱེ་ལགས། དེ་ནི་མི་རྣམས་དུས་རྒྱུན་འཕྲད་སྲིད་པའི་དོན་ཡིན་ནམ།  
\v 20 ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་ཉིད་ཀྱི་ཞབས་ཕྱི་ཅི་འདྲ་ཡིན་པ་མཁྱེན་པས་དཱ་བིད་བདག་ལ་ལྷག་པར་ཞུ་རྒྱུ་ཅི་ཞིག་ཡོད།  
\v 21 ཁྱེད་ཀྱིས་ཉིད་ཀྱི་ཞལ་བཞེས་ཀྱི་རྐྱེན་དང་ཐུགས་དགོངས་བཞིན་དོན་ཆེན་པོ་དེ་མཛད་ཅིང་། ཁྱེད་ཀྱི་ཞབས་ཕྱི་ལ་རྟོགས་སུ་འཇུག་པའི་ཕྱིར་ཡིན་ནོ། །  
\v 22 ཀྱེ་གཙོ་བོ་ཡ་ཝཱེ་ལགས། དེའི་ཕྱིར་ཁྱེད་ནི་ཆེན་པོ་ལགས། ངེད་རྣམས་ཀྱི་རྣ་བས་ཐོས་པ་ལྟར་ན་ཁྱེད་དང་འདྲ་བ་གང་ཡང་མེད་དེ། ཁྱེད་མ་གཏོགས་དཀོན་མཆོག་གཞན་སུ་ཡང་མེད་དོ། །  
\v 23 ས་གཞི་རུ་ཁྱེད་ཀྱི་འབངས་མི་ཡེས་ར་ཨེལ་དང་འདྲ་བའི་མི་རིགས་གཞན་གང་དུ་ཡོད། དེ་ནི་དཀོན་མཆོག་གིས་དངོས་སུ་བླུས་ཤིང་། དེ་རྣམས་ཁྱེད་ཀྱི་མི་རུ་མཛད་པ་དང་། ཁྱེད་ཉིད་ཀྱི་མཚན་གྱི་ཕྱིར་དེ་རྣམས་ལ་དོན་ཆེན་མཛད་ཅིང་། ཁྱེད་ཀྱི་ཡུལ་གྱི་ཕྱིར་འཇིགས་རུང་གི་དོན་རྣམས་མཛད་པ་ཡིན། ཁྱེད་ཀྱི་འབངས་མི་སྟེ་ཁྱེད་ཀྱིས་ཨེ་ཅིབ་ཡུལ་ནས་བླུས་པའི་མི་རྣམས་ཀྱི་མདུན་དུ། མི་རིགས་གཞན་རྣམས་དང་དེ་དག་གི་ལྷ་རྣམས་མཐར་བསྐྲད་དོ། །  
\v 24 ཡང་ཁྱེད་ཀྱིས་ཉིད་ཀྱི་འབངས་མི་ཡེས་ར་ཨེལ་ནི་དུས་ནམ་ཡང་ཉིད་ཀྱི་འབངས་མི་རུ་བརྟན་པོར་བཞག་པ་ཡིན་ཞིང་། ཀྱེ་དཀོན་མཆོག་ཡ་ཝཱེ་ལགས་ཁྱེད་ནི་དེ་དག་གི་དཀོན་མཆོག་ཏུ་གྱུར་ཏོ། །  
\v 25 ཀྱེ་དཀོན་མཆོག་ཡ་ཝཱེ་ལགས། ད་ནི་ཁྱེད་ཀྱིས་ཉིད་ཀྱི་ཞབས་ཕྱི་དང་དེའི་ཁྱིམ་རྒྱུད་ལ་གནང་བའི་ཞལ་བཞེས་དེ་ནི་ཇི་སྲིད་བར་དུ་བརྟན་པོར་མཛད་ཅིང་། ཅི་གསུངས་བཞིན་དུ་བསྒྲུབ་པར་མཛོད་ཅིག  
\v 26 དེ་ནས་ཁྱེད་ཀྱི་མཚན་ནི་རྒྱུན་ནས་རྒྱུན་དུ་རབ་ཏུ་འཕགས་ཤིང་། མི་རྣམས་ཀྱིས་འདི་ལྟར། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ནི་ཡེས་ར་ཨེལ་གྱི་དཀོན་མཆོག་ལགས་སོ་ཞེས་བརྗོད་པར་ཤོག དེ་ནས་ཁྱེད་ཀྱི་ཞབས་ཕྱི་དཱ་བིད་ཀྱི་ཁྱིམ་རྒྱུད་དེ་ཡང་ཁྱེད་ཀྱི་སྤྱན་སྔར་བརྟན་པོར་ཚུགས་ངེས་ཡིན།  
\v 27 ཀྱེ་དཔུང་ཚོགས་ཀུན་གྱི་དཀོན་མཆོག་ཡ་ཝཱེ། ཡེས་ར་ཨེལ་གྱི་དཀོན་མཆོག་ལགས། ཁྱེད་ཀྱིས་ཉིད་ཀྱི་ཞབས་ཕྱི་ལ། བདག་གིས་ཁྱོད་ལ་ཁྱིམ་རྒྱུད་འཛུགས་པར་བྱ་ཞེས་མངོན་པར་མཛད་པས། ཞབས་ཕྱི་བདག་ལ་ད་གཟོད་སེམས་ནས་འདི་བཞིན་གསོལ་བ་འདེབས་པའི་སྙིང་སྟོབས་ཡོད་པ་ཡིན།  
\v 28 ཀྱེ་གཙོ་བོ་ཡ་ཝཱེ་ལགས། ཁྱེད་ཁོ་ན་དཀོན་མཆོག་ཡིན་ལ། ཁྱེད་ཀྱི་གསུང་ཐམས་ཅད་བདེན་ཞིང་ཡིད་རྟོན་རུང་བ་ཡིན། ཁྱེད་ཀྱིས་ཉིད་ཀྱི་ཞབས་ཕྱི་ལ་གཡང་འདི་དག་གནང་བའི་ཞལ་བཞེས་མཛད་པ་ཡིན།  
\v 29 ད་ལྟ་ཁྱེད་ཀྱིས་ཞབས་ཕྱིའི་ཁྱིམ་རྒྱུད་ལ་བྱིན་གྱིས་བརླབས་ནས། དོན་དེ་ནམ་ཡང་ཁྱེད་ཀྱི་མདུན་དུ་གནས་པར་མཛོད། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་སྔར་ཞལ་བཞེས་གནང་བ་བཞིན་ཞབས་ཕྱི་བདག་གི་ཁྱིམ་རྒྱུད་ལ་ཇི་སྲིད་བར་དུ་བྱིན་གྱིས་བརླབ་པར་སྨོན་ཞེས་གསོལ་ཏོ། །   
\c 8
\cl ལེའུ་བརྒྱད་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 ཡ་ཝཱེས་དཱ་བིད་དགྲ་ལས་རྒྱལ་བར་མཛད་པ།  
\p
\v 1 དེའི་རྗེས་སུ་དཱ་བིད་ཀྱིས་ཕེ་ལེ་ཤེད་པ་རྣམས་ལ་འཐབ་ནས་བཏུལ་ཞིང་། ཡང་ཁོང་གིས་མེ་ཐེག་ཨམ་མཱ་ཞེས་བྱ་བའི་གྲོང་ཁྱེར་ཕེ་ལེ་ཤེད་པའི་ལག་ནས་བླངས་ཏེ་དབང་དུ་བཅུག  
\v 2 ཡང་མོ་ཨབ་པ་རྣམས་ཕམ་པར་བརྒྱབ་ནས་དེ་རྣམས་ས་རུ་བསྙལ་ཏེ། ཐག་པས་ཚད་ཐིག་བླངས་པ་དང་། ཐག་ཚད་གཉིས་ཡོད་པ་རྣམས་བསད་ཅིང་། ཐག་ཚད་གཅིག་ཡོད་པ་རྣམས་ཚེ་ཐར་དུ་བཏང་། དེ་ནས་མོ་ཨབ་པ་རྣམས་དཱ་བིད་ཀྱི་མངའ་འོག་ཏུ་གྱུར་ཏེ་འབུལ་བ་རྣམས་དྲངས་སོ། །  
\v 3 ཡང་ཙོ་བཱ་ཡི་རྒྱལ་པོ་རེ་ཧོབ་ཀྱི་བུ་ཧ་དད་ཨི་སེར་ཞེས་པ་ཕི་རཱད་གཙང་པོའི་ཕྱོགས་སུ་རང་གི་དབང་ཤུགས་ཕྱིར་ལེན་པར་འགྲོ་བའི་སྐབས་སུ། དཱ་བིད་ཀྱིས་ཁོ་ལ་དམག་བརྒྱབ་པ་དང་།  
\v 4 དཱ་བིད་ཀྱིས་དེ་ལས་སྐྱ་དམག་ཆིག་སྟོང་བདུན་བརྒྱ་དང་རྐང་དམག་ཉིས་ཁྲི་བཟུང་ནས། ཤིང་རྟ་བརྒྱ་འཐེན་པའི་རྟ་མ་གཏོགས་ཤིང་རྟ་འཐེན་པའི་རྟ་ཐམས་ཅད་ཀྱི་སུག་རྒྱུས་བཅད་དོ། །  
\v 5 ཡང་དཱ་མེ་སེག་གི་ཨ་རམ་པ་རྣམས་ཙོ་བཱ་ཡི་རྒྱལ་པོ་ཧ་དད་ཨི་སེར་ལ་རོགས་བྱེད་དུ་འོངས་པ་ལ། དཱ་བིད་ཀྱིས་ཨ་རམ་པའི་མི་ཉིས་ཁྲི་ཉིས་སྟོང་བསད་དོ། །  
\v 6 དེ་ནས་དཱ་བིད་ཀྱིས་དཱ་མེ་སེག་གི་ཨ་རམ་ཡུལ་དུ་སྲུང་དམག་བཞག་པ་དང་། ཨ་རམ་པ་རྣམས་དཱ་བིད་ཀྱི་བྲན་དུ་གྱུར་ཏེ་འབུལ་བ་རྣམས་དྲངས་ཤིང་། དཱ་བིད་གང་དུ་སོང་ན་ཡང་དཀོན་མཆོག་ཡ་ཝཱེས་དེ་ལ་རྒྱལ་ཁ་གནང་ངོ་། །  
\v 7 དཱ་བིད་ཀྱིས་ཧ་དད་ཨི་སེར་གྱི་བློན་འཁོར་རྣམས་ལ་ཡོད་པའི་གསེར་གྱི་ཕུབ་ཐམས་ཅད་ཕྲོགས་ནས་ཡེ་རུ་སཱ་ལེམ་དུ་ཁྱེར།  
\v 8 ཡང་ཧ་དད་ཨི་སེར་གྱི་གྲོང་ཁྱེར་པེ་ཏཱ་དང་པེ་རོ་ཐ་ཨི་གཉིས་ནས་རྒྱལ་པོ་དཱ་བིད་ཀྱིས་ལི་དཔག་ཏུ་མེད་པ་ཕྲོགས་སོ། །  
\v 9 དེ་ནས་ཧ་མཱད་ཀྱི་རྒྱལ་པོ་ཏོ་ཨི་བྱ་བས་དཱ་བིད་ཀྱིས་ཧ་དད་ཨི་སེར་གྱི་དམག་དཔུང་ཐམས་ཅད་ཕམ་པར་བརྒྱབ་པའི་གཏམ་ཐོས་པ་ཙམ་གྱིས།  
\v 10 རང་གི་སྲས་ཡོ་རཱམ་\f + \ft ཡོ་རཱམ་ཞེས་པར་གནའ་ཡིག་ལ་ལར་ཡེ་ཧོ་རཱམ་ཞེས་བཀོད་འདུག\f*བྱ་བ་དེ་རྒྱལ་པོ་དཱ་བིད་ལ་བདེ་འཚམས་ཞུ་བ་དང་རྟེན་འབྲེལ་ཞུ་བའི་ཆེད་དུ་ཁོང་གི་དྲུང་དུ་མངགས། གང་ལ་ཞེ་ན། ཏོ་ཨི་རྒྱུན་དུ་ཧ་དད་ཨི་སེར་དང་འཐབ་ཅིང་། དཱ་བིད་ཀྱིས་ཧ་དད་ཨི་སེར་ལ་འཐབ་ནས་ཕམ་པར་བརྒྱབ་པས་སོ། །ཡང་ཡོ་རཱམ་གྱི་ལག་ཏུ་དངུལ་གྱི་སྣོད་ཆས་དང་། གསེར་གྱི་སྣོད་ཆས་དང་། ལི་ཡི་སྣོད་ཆས་མང་པོ་ཁྱེར་འོངས་ནས་ཕུལ་ཏོ། །  
\v 11 རྒྱལ་པོ་དཱ་བིད་ཀྱིས་སྣོད་ཆས་དེ་དག་ནི་ཁོང་གིས་བཏུལ་བའི་རྒྱལ་ཁམས་ཐམས་ཅད་ནས་རྙེད་པའི་གསེར་དངུལ་དང་མཉམ་དུ་དམ་པར་བརྩིས་ནས་དཀོན་མཆོག་ཡ་ཝཱེ་ལ་ཕུལ་བ་སྟེ།  
\v 12 དེ་ནི་ཨ་རམ་དང་། མོ་ཨབ་དང་། ཨམ་མོན་པ་དང་། ཕེ་ལེ་ཤེད་པ་དང་། ཨ་མཱད་ལེག་པ་དང་། ཙོ་བཱ་ཡི་རྒྱལ་པོ་རེ་ཧོབ་ཀྱི་བུ་ཧ་དད་ཨི་སེར་བཅས་ནས་བླངས་པའི་བཅོམ་ནོར་ཡིན་ནོ། །  
\v 13 ཡང་དཱ་བིད་ཀྱིས་ཨེ་དོམ་པ་ཆིག་ཁྲི་བརྒྱད་སྟོང་ཚྭའི་ལུང་པར་འགེམས་ནས་ཕྱིར་ལོག་རྗེས་ཁོང་གི་མཚན་སྙན་གྲགས་རྒྱས་པ་རེད།  
\v 14 ཡང་དཱ་བིད་ཀྱིས་ཨེ་དོམ་ཡུལ་དུ་སྲུང་དམག་བཞག་སྟེ། ཨེ་དོམ་ཡུལ་ཀུན་ཏུ་སྲུང་དམག་གིས་ཁྱབ་པས། ཨེ་དོམ་པ་རྣམས་དཱ་བིད་ཀྱི་མངའ་འོག་ཏུ་གྱུར། ཡང་དཱ་བིད་ཡུལ་གང་དུ་སོང་ན་ཡང་དཀོན་མཆོག་ཡ་ཝཱེས་ཁོང་ལ་རྒྱལ་ཁ་གནང་ངོ་། །  
\v 15 དཱ་བིད་རྒྱལ་པོར་བཞུགས་ནས་ཡེས་ར་ཨེལ་ཐམས་ཅད་ལ་དབང་བསྒྱུར་ཅིང་། མི་ཐམས་ཅད་ལ་འདྲ་མཉམ་དྲང་གཞག་གི་ལྟ་སྟངས་བཟུང་བ་རེད།  
\v 16 དམག་ཚོགས་ཀྱི་འགོ་དཔོན་དུ་ཟེ་རུ་ཡཱ་ཡི་བུ་ཡོ་ཨབ་དང་ལོ་རྒྱུས་འགོད་མཁན་དུ་ཨ་ཧི་ལུད་ཀྱི་བུ་ཡེ་ཧོ་ཤ་ཕད།  
\v 17 མཆོད་དཔོན་དུ་ཨ་ཧི་ཏུབ་ཀྱི་བུ་ཟཱ་ཏོག་དང་། ཨབ་ཡཱ་ཐར་གྱི་བུ་ཨ་ཧི་མེ་ལེག་གཉིས་དང་། དྲུང་ཡིག་ཏུ་སེ་རཱ་ཡ་དང་།  
\v 18 ཀེ་རེད་པ་དང་ཕེ་ལེད་པ་རྣམས་ཀྱི་འགོ་དཔོན་དུ་ཡེ་ཧོ་ཡ་དཱ་ཡི་བུ་པེ་ནཱ་ཡ་དང་། དཱ་བིད་ཀྱི་སྲས་རྣམས་བཀའ་བློན་ \f + \ft འདིར་བཀའ་བློན་ཞེས་པར་མ་ཕྱི་ལས་མཆོད་དཔོན་ཞེས་མཐོང་།\f*དུ་བཞག་གོ །   
\c 9
\cl ལེའུ་དགུ་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 དཱ་བིད་དང་མེ་ཕི་པོ་ཤེད།  
\p
\v 1 ཡང་དཱ་བིད་ཀྱིས། སོ་ལོའི་ཁྱིམ་དུ་ད་དུང་མི་རེ་ལུས་སམ། ངས་ཡོ་ནཱ་ཐན་གྱི་ཕྱིར་དེ་ནི་བྱམས་བརྩེས་སྐྱོང་བར་བྱ་ཞེས་དྲིས་པར།  
\v 2 སོ་ལོའི་ཁྱིམ་དུ་མིང་ལ་ཙི་བཱ་ཞེས་བྱ་བའི་ཞབས་ཕྱི་ཞིག་ཡོད་པ་དཱ་བིད་ཀྱི་དྲུང་དུ་བོས་ཤིང་། རྒྱལ་པོས་དེ་ལ་ཁྱོད་ཙི་བཱ་ཡིན་ནམ་ཞེས་དྲིས་པ་ལ། མི་དེས་ཞབས་ཕྱི་བདག་ཡིན་ནོ་ཞེས་ཞུས་སོ། །  
\v 3 ཡང་རྒྱལ་པོས་ཁོ་ལ། སོ་ལོའི་ཁྱིམ་དུ་ད་དུང་མི་ཡོད་དམ། ངས་དཀོན་མཆོག་གི་བྱམས་བརྩེས་དེ་ནི་སྐྱོང་བར་བྱ་ཞེས་གསུངས་པས། ཙི་བཱ་ཡིས་རྒྱལ་པོ་ལ། ད་དུང་ཡོ་ནཱ་ཐན་གྱི་བུ་ཞིག་ཡོད་དེ། རྐང་པ་གཉིས་ཀ་ཞ་བོ་ཡིན་ཞེས་ཞུས།  
\v 4 ཡང་རྒྱལ་པོས་ཁོ་ལ། དེ་གང་དུ་ཡོད་དམ་ཞེས་དྲིས་པར་ཙི་བཱ་ཡིས་རྒྱལ་པོ་ལ། ཁོ་ནི་ལོ་རྡེ་བཱར་ཡུལ་དུ་ཨམ་མེ་ཨེལ་གྱི་བུ་མཱ་ཀིར་ཞེས་པའི་ཁྱིམ་དུ་ཡོད་ཅེས་ཞུས།  
\v 5 དེ་ནས་རྒྱལ་པོ་དཱ་བིད་ཀྱིས་མི་མངགས་ཤིང་། ཁོ་རང་ལོ་རྡེ་བཱར་ཡུལ་གྱི་ཨམ་མེ་ཨེལ་གྱི་བུ་མཱ་ཀིར་གྱི་ཁྱིམ་ནས་ཁྲིད་འོངས་པ་རེད།  
\v 6 ཡང་སོ་ལོའི་ཚ་བོ་སྟེ་ཡོ་ནཱ་ཐན་གྱི་བུ་མེ་ཕི་པོ་ཤེད་བྱ་བ་དེ་དཱ་བིད་ཀྱི་དྲུང་དུ་འོངས་ནས་ཕྱག་བཙལ་ཏོ། །དེར་དཱ་བིད་ཀྱིས་ཀྱེ་མེ་ཕི་པོ་ཤེད་ཅེས་གསུངས་པ་དང་། དེས་ལན་དུ་ཁྱེད་ཀྱི་ཞབས་ཕྱི་འདི་རུ་ཡོད་ཅེས་ཞུས།  
\v 7 ཡང་དཱ་བིད་ཀྱིས་དེ་ལ། མ་འཇིགས་ཤིག ཁྱོད་ཀྱི་ཡབ་ཡོ་ནཱ་ཐན་གྱི་རྐྱེན་གྱིས་ངས་ཁྱོད་རང་བྱམས་བརྩེས་བསྐྱང་བར་བྱ་སྟེ། ཁྱོད་ཀྱི་ཕ་མེས་སོ་ལོའི་ས་ཞིང་ཐམས་ཅད་ཁྱོད་ལ་ཟློག་པར་བྱ། ཁྱོད་ཀྱིས་རྒྱུན་དུ་ང་དང་གསོལ་ལྕོག་གཅིག་ལས་ཁ་ཟས་ལོངས་སུ་སྤྱོད་པར་འགྱུར་རོ་ཞེས་གསུངས་པ་དང་།  
\v 8 མེ་ཕི་པོ་ཤེད་ཀྱིས་ཕྱག་བཙལ་ཏེ་ཁོང་ལ། ཞབས་ཕྱི་ང་ནི་ཅི་ཡིན་ནམ། ཁྱེད་ཀྱིས་ཁྱི་ཤི་རོ་ལྟ་བུའི་ཞབས་ཕྱི་བདག་ལ་འདི་ལྟར་གཟིགས་སྐྱོང་གནང་བ་ཅི་ཞེས་ཞུས་སོ། །  
\v 9 དེ་ནས་རྒྱལ་པོས་སོ་ལོའི་ཞབས་ཕྱི་ཙི་བཱ་བོས་ནས་དེ་ལ། སོ་ལོ་དང་དེའི་ཁྱིམ་དུ་གང་ཡོད་པ་ཐམས་ཅད་ངས་ཁྱོད་ཀྱི་བདག་པོའི་ཚ་བོ་ལ་སྤྲད་པ་ཡིན།  
\v 10 ཁྱོད་དང་ཁྱོད་ཀྱི་བུ་དང་། ཁྱོད་ཀྱི་ཞབས་ཕྱི་རྣམས་དང་བཅས་པས་ཁྱོད་ཀྱི་བདག་པོའི་བུ་མེ་ཕི་པོ་ཤེད་ཀྱི་དོན་དུ་ས་ཞིང་འདེབས་དགོས་ཤིང་། སྟོན་ཐོག་ཁོ་ལ་ཁ་ཟས་སུ་འབུལ་དགོས། ཡང་ཁོས་ནི་རྒྱུན་དུ་ང་དང་གསོལ་ལྕོག་གཅིག་ལས་ཁ་ཟས་ལོངས་སུ་སྤྱོད་པར་འགྱུར་རོ་ཞེས་བཀའ་གནང་། ཙི་བཱ་ལ་བུ་བཅོ་ལྔ་དང་ཞབས་ཕྱི་ཉི་ཤུ་ཡོད་པ་ཡིན་ནོ། །  
\v 11 དེ་ནས་ཙི་བཱ་ཡིས་རྒྱལ་པོར། ངའི་ཇོ་བོ་དང་ངའི་རྒྱལ་པོ་ཁྱེད་ཀྱིས་ཅི་གསུངས་ཐམས་ཅད་ཞབས་ཕྱི་བདག་གིས་བསྒྲུབ་ངེས་ཡིན་ཞེས་ཞུས་སོ། །ཡང་མེ་ཕི་པོ་ཤེད་ནི་རྒྱལ་པོའི་སྲས་བཞིན་རྒྱལ་པོ་དང་མཉམ་དུ་གསོལ་ལྕོག་གཅིག་ལས་ཁ་ཟས་ལ་རོལ་བའོ། །  
\v 12 ཡང་མེ་ཕི་པོ་ཤེད་ལ་མི་ཀཱ་བྱ་བའི་བུ་ཆུང་བ་ཞིག་ཡོད་ཅིང་། ཙི་བཱ་ཡི་ཁྱིམ་དུ་གནས་པ་ཐམས་ཅད་ནི་མེ་ཕི་པོ་ཤེད་ཀྱི་ཞབས་ཕྱི་རུ་གྱུར་ཏོ། །  
\v 13 དེ་ལྟར་མེ་ཕི་པོ་ཤེད་ནི་ཡེ་རུ་སཱ་ལེམ་དུ་གནས་ཏེ། རྒྱུན་དུ་རྒྱལ་པོ་དང་གསོལ་ལྕོག་གཅིག་ལས་ཁ་ཟས་ལ་རོལ་བ་དང་། ཁོའི་རྐང་པ་གཉིས་ཀ་ཞ་བོ་ཡིན་ནོ། །   
\c 10
\cl ལེའུ་བཅུ་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 ཨམ་མོན་པ་དང་ཨ་རམ་པ་གཉིས་ཕམ་པར་བརྒྱབ་པ།  
\p
\v 1 ཡང་དེའི་རྗེས་སུ་ཨམ་མོན་པའི་རྒྱལ་པོ་གྲོངས་ནས་ཁོའི་སྲས་ཧ་ནུན་ནི་ཕ་ཡི་རྒྱུན་མཐུད་ནས་རྒྱལ་པོར་གྱུར།  
\v 2 དཱ་བིད་ཀྱིས་ནཱ་ཧ་སི་ཡིས་ང་རང་དྲིན་གྱིས་བསྐྱངས་པ་བཞིན་དུ། ངས་ཀྱང་ནཱ་ཧ་སི་ཡི་སྲས་ཧ་ནུན་དྲིན་གྱིས་བསྐྱང་བར་བྱ་ཞེས་གསུངས་ཤིང་། དེའི་ཡབ་ཀྱི་ཆེད་དུ་དེ་ལ་སེམས་གསོ་གཏོང་བར་དཱ་བིད་ཀྱིས་རང་གི་བློན་འཁོར་རྣམས་མངགས་ཤིང་། དཱ་བིད་ཀྱི་བློན་འཁོར་རྣམས་ཨམ་མོན་པའི་ཡུལ་དུ་ཕྱིན་པ་དང་།  
\v 3 ཨམ་མོན་པའི་འགོ་དཔོན་རྣམས་ཀྱིས་རང་གི་བདག་པོ་ཧ་ནུན་ལ། དཱ་བིད་ཀྱིས་ཁྱོད་ཅག་གི་སེམས་གསོ་བར་མི་མངགས་པ་དེ་ནི་ཁྱོད་ཅག་གི་ཡབ་ལ་བརྩི་བཀུར་བྱེད་པའི་ཕྱིར་ཡིན་པར་དགོངས་སམ། དཱ་བིད་ཀྱིས་རང་གི་བློན་འཁོར་འདི་དག་ནི་གྲོང་ཁྱེར་འདིར་ལྐོག་ལྟ་དང་ཉུལ་ཞིབ་བྱས་ནས་དབང་བསྒྱུར་བའི་ཕྱིར་བཏང་བ་མ་ཡིན་ནམ་ཞེས་སྨྲས་པས།  
\v 4 ཧ་ནུན་གྱིས་དཱ་བིད་ཀྱི་བློན་འཁོར་རྣམས་བཟུང་ནས་སྨ་ར་ཕྱེད་ཀ་བྲེགས་པ་དང་། ཕྱི་གོས་བཅད་ནས་འཕོངས་ཚོས་ཕྱི་རུ་མངོན་ཞིང་དེ་དག་འགྲོ་རུ་བཅུག་གོ །  
\v 5 མི་ཞིག་གིས་དོན་དེ་དཱ་བིད་ལ་ཞུས་པ་དང་ཁོང་གིས་དེ་དག་བསུ་མཁན་མངགས་སོ། །གང་ལ་ཞེ་ན། དེ་དག་ཤིན་ཏུ་ངོ་ཚ་བའི་ཕྱིར་རོ། །རྒྱལ་པོས་དེ་དག་ལ་ཁྱོད་ཅག་གི་སྨ་ར་སྐྱེས་པའི་བར་དུ་ཡེ་རུ་ཀོ་རུ་སྒུགས་ལ་དེ་ནས་ཕྱིར་ལོག་ཤོག་ཅེས་བསྒོས།  
\v 6 ཡང་ཨམ་མོན་པ་རྣམས་ཀྱིས་དཱ་བིད་ཁོ་རྣམས་ལ་ཤིན་ཏུ་སྡང་བ་ཤེས་པས། པེད་རེ་ཧོབ་ཀྱི་ཨ་རམ་པ་དང་། ཙོ་བཱ་ཡི་ཨ་རམ་པ་གཉིས་ལས་རྐང་དམག་མི་ཁྲི་གཉིས་དང་མ་ཨ་ཀཱ་ཡི་རྒྱལ་པོ་ལས་མི་ཆིག་སྟོང་དང་། ཏོབ་ལས་མི་ཆིག་ཁྲི་ཉིས་སྟོང་བཅས་གླས་པའོ། །  
\v 7 དཱ་བིད་ཀྱིས་གཏམ་དེ་ཐོས་ནས་ཡོ་ཨབ་དང་དམག་མི་དཔའ་རྩལ་ཅན་ཐམས་ཅད་མཉམ་དུ་མངགས།  
\v 8 ཡང་ཨམ་མོན་པ་རྣམས་ཕྱི་རུ་ཐོན་ནས་མཁར་སྒོའི་མདུན་དུ་དམག་བཀྲམས་པ་དང་། ཙོ་བཱ་དང་རེ་ཧོབ་ཀྱི་ཨ་རམ་པ་དང་། ཏོབ་པ་དང་མ་ཨ་ཀཱ་པ་རྣམས་ཀྱིས་ཀྱང་སོ་སོར་མཁར་ཕྱི་རུ་དམག་བཀྲམས་ནས་བསྡད།  
\v 9 ཡོ་ཨབ་ཀྱིས་རང་གི་མདུན་རྒྱབ་གཉིས་སུ་དགྲ་ཡོད་པར་མཐོང་བས། ཡེས་ར་ཨེལ་གྱི་དམག་ཧྲག་ཐམས་ཅད་ལས་ཁག་ཅིག་བདམས་ནས་ཨ་རམ་པ་རྣམས་ལ་འཐབ་པར་དམག་བཀྲམས།  
\v 10 ཡང་མི་གཞན་ཐམས་ཅད་རང་གི་གཅུང་པོ་ཨ་བི་ཤཱ་ཨི་ལག་ཏུ་གཏད་ཅིང་། དེ་དག་ཨམ་མོན་པ་རྣམས་ལ་འཐབ་པར་དམག་བཀྲམས།  
\v 11 དེར་ཡོ་ཨབ་ཀྱིས་ཨ་བི་ཤཱ་ཨི་ལ། གལ་ཏེ་ཨ་རམ་པ་རྣམས་ང་ལས་སྟོབས་ཆེ་ན། ཁྱོད་ཀྱིས་ང་ལ་རོགས་བྱེད་དགོས་པ་དང་། གལ་ཏེ་ཨམ་མོན་པ་རྣམས་ཁྱོད་ལས་སྟོབས་ཆེ་ན་ང་ཁྱོད་ལ་རོགས་བྱེད་དུ་འོང་།  
\v 12 རང་ཅག་གིས་སྙིང་སྟོབས་བསྐྱེད་དགོས། བདག་ཅག་གི་ཡུལ་མི་དང་རང་རེའི་དཀོན་མཆོག་གི་གྲོང་ཁྱེར་རྣམས་ཀྱི་དོན་དུ་སྙིང་སྟོབས་བསྐྱེད་དགོས། དཀོན་མཆོག་ཡ་ཝཱེས་ཁོང་གི་སྤྱན་ལམ་དུ་གང་ཞིག་ལེགས་པ་དེ་མཛད་པར་ཤོག་ཅེས་གདམས་པས།  
\v 13 ཡོ་ཨབ་འཁོར་དང་བཅས་པ་རྣམས་སོང་སྟེ་ཨ་རམ་པ་ལ་རྒོལ་བ་དང་། དེ་དག་ཁོའི་མདུན་ནས་བྲོས་སོ། །  
\v 14 ཡང་ཨམ་མོན་པ་རྣམས་ཀྱིས་ཨ་རམ་པ་རྣམས་བྲོས་ཟིན་པ་མཐོང་བས། དེ་དག་ཀྱང་ཨ་བི་ཤཱ་ཨིའི་མདུན་ནས་གྲོང་ཁྱེར་དུ་བྲོས། དེ་ནས་ཡོ་ཨབ་ནི་ཨམ་མོན་པ་རྣམས་དང་བྲལ་ནས་ཕྱིར་ཡེ་རུ་སཱ་ལེམ་དུ་ཕྱིན་པ་རེད།  
\v 15 ཨ་རམ་པ་རྣམས་ཀྱིས་རང་ཉིད་ཡེས་ར་ཨེལ་གྱི་མདུན་ནས་ཕམ་པར་གྱུར་པ་ཤེས་ཏེ་ཡང་བསྐྱར་ལྷན་དུ་འདུས།  
\v 16 ཧ་དད་ཨི་སེར་གྱིས་བང་ཆེན་མངགས་ཤིང་། གཙང་པོའི་ཕ་རོལ་གྱི་ཨ་རམ་པ་རྣམས་སྦྲན་ནས་དེ་དག་ཧེ་ལཱམ་ཡུལ་དུ་སླེབས་པ་དང་། ཧ་དད་ཨི་སེར་གྱི་དམག་དཔོན་ཤོ་བག་བྱ་བ་ཡིས་དེ་དག་ལ་འགོ་ཁྲིད་བྱས།  
\v 17 མི་ཞིག་གིས་དོན་དེ་དཱ་བིད་ལ་ཞུས་པ་དང་ཁོང་གིས་ཡེས་ར་ཨེལ་པ་ཐམས་ཅད་བསྡུས་ཤིང་། ཡོར་དན་གཙང་པོ་བརྒལ་ནས་ཧེ་ལཱམ་དུ་སླེབས་ཏེ། ཨ་རམ་པ་རྣམས་ཀྱིས་དཱ་བིད་ལ་འཐབ་པར་དམག་བཀྲམས་པ་དང་དེ་ལ་འཐབ་འཛིང་བྱས་སོ། །  
\v 18 ཨ་རམ་པ་རྣམས་ཡེས་ར་ཨེལ་གྱི་མདུན་ནས་བྲོས་ཤིང་དཱ་བིད་ཀྱིས་ཨ་རམ་པའི་ཤིང་རྟ་བདུན་བརྒྱ་དང་སྐྱ་དམག་ཁྲི་བཞི་མེད་པར་བྱས་པ་དང་། ཨ་རམ་པའི་དཔུང་ཚོགས་ཀྱི་དམག་དཔོན་ཤོ་བག་ཀྱང་འགེམས་ནས་ཁོ་དེ་རུ་ཤིའོ། །  
\v 19 དེར་ཧ་དད་ཨི་སེར་གྱི་མངའ་འོག་ཏུ་ཡོད་པའི་རྒྱལ་པོ་རྣམས་ཀྱིས་རང་ཉིད་ཡེས་ར་ཨེལ་གྱི་མདུན་ནས་ཕམ་ཟིན་པ་མཐོང་བས། ཡེས་ར་ཨེལ་པ་དང་མཐུན་པར་བྱས་ཤིང་དེའི་གཡོག་ཀྱང་བྱས། དེ་ལྟར་ཨ་རམ་པ་རྣམས་འཇིགས་ནས་ཡང་བསྐྱར་ཨམ་མོན་པ་རྣམས་ལ་རོགས་བྱེད་མ་ཕོད་དོ། །   
\c 11
\cl ལེའུ་བཅུ་གཅིག་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 དཱ་བིད་དང་པད་ཤེ་བཱ།  
\p
\v 1 དེ་ནས་ལོ་གཅིག་འགོར་རྗེས་རྒྱལ་པོ་རྣམས་དམག་ལ་སྐྱོད་པའི་དུས་སུ། དཱ་བིད་ཀྱིས་ཡོ་ཨབ་དང་རང་གི་བློན་འཁོར་རྣམས་དང་། ཡེས་ར་ཨེལ་གྱི་དམག་དཔུང་ཐམས་ཅད་དམག་ལ་མངགས་ཤིང་། དེ་དག་གིས་ཨམ་མོན་པ་རྣམས་མེད་པར་བྱས་ནས་རབ་བཱ་དམག་གིས་བསྐོར་བ་དང་། དཱ་བིད་སྔར་བཞིན་ཡེ་རུ་སཱ་ལེམ་དུ་བཞུགས་སོ། །  
\v 2 ཡང་ས་སྲོས་ཀྱི་དུས་སུ་དཱ་བིད་མལ་ནས་ལངས་ཏེ་ཕོ་བྲང་གི་ཁང་ཐོག་ནས་འཆམ་འཆམ་དུ་འགྲོ་སྐབས། ཁོང་གིས་འཁྲུད་བྱེད་པའི་བུད་མེད་ཅིག་མཐོང་ཞིང་། བུད་མེད་དེ་ནི་ཤིན་ཏུ་ཡིད་དབང་འཕྲོག་པ་ཞིག་ཡོད་པ་དང་།  
\v 3 དཱ་བིད་ཀྱིས་མི་མངགས་ནས་བུད་མེད་དེ་སུ་ཡིན་དྲིས་པ་ལ་མི་ཞིག་གིས། བུད་མེད་དེ་ནི་ཨེ་ལི་ཨམ་གྱི་བུ་མོ་སྟེ། ཧེད་པ་ཨུ་རི་ཡཱ་ཡི་ཆུང་མ་པད་ཤེ་བཱ་མ་ཡིན་ནམ་ཞེས་ཞུས།  
\v 4 དེ་ནས་དཱ་བིད་ཀྱིས་མི་མངགས་ནས་བུད་མེད་དེ་ཁྲིད་འོངས་ཤིང་། ཁོ་མོ་དཱ་བིད་ཀྱི་རྩར་སླེབས་པ་དང་དཱ་བིད་མོ་དང་ལུས་འབྲེལ་བྱས་ཏེ། སྐབས་དེ་ནི་ཁོ་མོ་ཟླ་མཚན་ནས་གཙང་མར་གྱུར་པ་ \f + \ft ཡེས་ར་ཨེལ་པའི་སྲོལ་ལྟར་ན། བུད་མེད་ཅིག་ལ་ཟླ་མཚན་ཡོང་ནས་ཆད་རྗེས་ཉིན་བདུན་འགོར་བ་ན་ད་གཟོད་བུད་མེད་དེ་གཙང་མར་རྩི་བ་ཡིན། \f*དང་འཁེལ། དེ་ནས་ཁོ་མོ་རང་ཁྱིམ་དུ་ཕྱིར་ལོག་གོ །  
\v 5 ཕྱིས་སུ་བུད་མེད་དེ་མངལ་དང་ལྡན་པར་གྱུར་པས་དཱ་བིད་ཀྱི་དྲུང་དུ་མི་མངགས་ནས་བདག་མངལ་དང་ལྡན་ནོ་ཞེས་ཞུས་པ་ལ།  
\v 6 དཱ་བིད་ཀྱིས་ཡོ་ཨབ་ཀྱི་མདུན་དུ་མི་མངགས་ནས་འདི་ལྟར། ཧེད་པ་ཨུ་རི་ཡཱ་ངའི་རྩར་ཐོངས་ཤིག་ཅེས་བཀའ་བསྩལ་པས། ཡོ་ཨབ་ཀྱིས་ཨུ་རི་ཡཱ་དཱ་བིད་ཀྱི་དྲུང་དུ་བརྫངས།  
\v 7 ཨུ་རི་ཡཱ་ཁོང་གི་དྲུང་དུ་ཕྱིན་ཅིང་ཁོང་གིས་ཡོ་ཨབ་དང་དམག་མི་རྣམས་དང་། གཡུལ་སའི་གནས་ཚུལ་ཅི་འདྲ་ཡིན་པ་དྲིས།  
\v 8 ཡང་དཱ་བིད་ཀྱིས་ཨུ་རི་ཡཱ་ལ། དེ་རིང་ཁྱིམ་དུ་སོང་ནས་རྐང་པ་ཁྲུས་ཤིག་ \f + \ft འདིར་རྐང་པ་ཁྲུས་ཤིག་ཅེས་པ་ནི་ལྷོད་ལྷོད་ངང་རང་གི་ཆུང་མ་དང་མཉམ་དུ་འདུག་པའི་དོན་ཡིན།\f*ཅེས་བསྒོས་པར། ཨུ་རི་ཡཱ་རྒྱལ་པོའི་ཕོ་བྲང་ནས་ཐོན་ཞིང་། རྒྱལ་པོས་ཁོ་ལ་ལེགས་སྐྱེས་ཤིག་ཀྱང་གནང་ངོ་། །  
\v 9 འོན་ཀྱང་ཨུ་རི་ཡཱ་རང་གི་ཇོ་བོའི་ཞབས་ཕྱི་དང་ལྷན་ཅིག་རྒྱལ་པོའི་ཕོ་བྲང་གི་སྒོ་ཁ་རུ་གཉིད་དེ་རང་ཁྱིམ་དུ་མ་སོང་ངོ་། །  
\v 10 དེ་ནས་མི་དེ་དག་གིས་དཱ་བིད་ལ། ཨུ་རི་ཡཱ་མར་རང་ཁྱིམ་དུ་མ་སོང་བ་རེད་ཅེས་ཞུས་པ་དང་། དཱ་བིད་ཀྱིས་ཨུ་རི་ཡཱ་ལ། ཁྱོད་རྒྱང་རིང་ནས་འོངས་པ་མིན་ནམ། ཅིའི་ཕྱིར་མར་རང་ཁྱིམ་དུ་མ་སོང་ངམ་ཞེས་དྲིས་པའི་ལན་དུ།  
\v 11 ཨུ་རི་ཡཱས་དཱ་བིད་ལ། ཤུར་སྒམ་དང་ཡེས་ར་ཨེལ་པ་རྣམས་དང་། ཡ་ཧུ་དཱ་པ་ཐམས་ཅད་སྤྱིལ་བུའི་ནང་དུ་གནས་ཤིང་། བདག་གི་འགོ་དཔོན་ཡོ་ཨབ་དང་བདག་གི་ཇོ་བོའི་འཁོར་གཡོག་རྣམས་ཐང་རྒོད་དུ་སྒར་བཏབ་ནས་བསྡད་ཡོད་པས། བདག་ནི་རང་ཁྱིམ་དུ་ལོག་སྟེ་བཟའ་བཏུང་ལ་རོལ་འོས་སམ། ཆུང་མ་དང་མཉམ་དུ་འགྲོགས་རུང་ངམ། བདག་གིས་རྒྱལ་པོ་ཁྱེད་དང་ཁྱེད་ཀྱི་སྐུ་སྲོག་དཔང་དུ་བཙུགས་ནས་མནའ་བསྐྱལ་བ་ཡིན་ཏེ། བདག་གིས་དེ་ལྟ་བུ་གཏན་ནས་བྱ་མི་ཕོད་ཅེས་ཞུས།  
\v 12 དེ་ནས་དཱ་བིད་ཀྱིས་ཨུ་རི་ཡཱ་ལ། ཁྱོད་དེ་རིང་ཡང་འདིར་ཞག་སྡོད་གྱིས་ཤིག སང་ཉིན་ངས་ཁྱོད་མངག་པར་བྱ་ཞེས་བཀའ་བསྩལ་ཅིང་། ཨུ་རི་ཡཱ་ཉིན་དེ་དང་དེའི་ཕྱི་ཉིན་ཡེ་རུ་སཱ་ལེམ་དུ་ལུས་སོ། །  
\v 13 དེའི་ཕྱི་ཉིན་དཱ་བིད་ཀྱིས་ཨུ་རི་ཡཱ་བོས་པ་དང་། དེས་ཁོང་གི་དྲུང་དུ་བཟའ་བཏུང་ལ་རོལ་ཞིང་ཁོང་གིས་དེ་བཟི་རུ་བཅུག མཚན་མོར་ཁོ་རང་གི་ཇོ་བོའི་ཞབས་ཕྱི་རྣམས་དང་མཉམ་དུ་རང་གི་མལ་སར་གཉིད་ནས་སྔར་བཞིན་རང་ཁྱིམ་དུ་མ་སོང་ངོ་། །   
\s1 དཱ་བིད་ཀྱིས་ཨུ་རི་ཡཱ་ལྐོག་ནས་བསད་པ།  
\p
\v 14 དེ་ནས་ཞོགས་པར་དཱ་བིད་ཀྱིས་ཡོ་ཨབ་ལ་འཕྲིན་ཡིག་ཅིག་བྲིས་ཤིང་ཨུ་རི་ཡཱའི་ལག་ཏུ་སྤྲད་ནས་བསྐུར་ཏོ། །  
\v 15 འཕྲིན་ཡིག་དེའི་ནང་འདི་ལྟར། འཐབ་འཛིང་ཤིན་ཏུ་ཛ་དྲག་ཆེ་བའི་དུས་སུ་ཨུ་རི་ཡཱ་མདུན་དུ་ཐོངས་ཤིག ཁྱོད་ཅག་དེ་ལས་ཕྱི་སྣུར་བྱས་ནས་ཁོ་རང་རྨས་ཏེ་འཆི་བར་གྱིས་ཞེས་བྲིས་སོ། །  
\v 16 སྐབས་དེར་ཡོ་ཨབ་ཀྱིས་གྲོང་ཁྱེར་བསྐོར་ཞིང་། ཁོས་སྲུང་དམག་དཔའ་སྟོབས་ཅན་རྣམས་གནས་གང་དུ་ཡོད་པ་ཤེས་པས། ཨུ་རི་ཡཱ་གནས་དེ་རུ་མངགས་པ་རེད།  
\v 17 ཡང་གྲོང་ཁྱེར་གྱི་མི་རྣམས་ཕྱི་རུ་ཐོན་ཏེ་ཡོ་ཨབ་འཁོར་དང་བཅས་པར་འཐབ་ཅིང་། དཱ་བིད་ཀྱི་འཁོར་གཡོག་རྣམས་ལས་འགའ་ཤས་འཆི་བར་གྱུར་པ་དང་། ཧེད་པ་ཨུ་རི་ཡཱ་ཡང་ཤིའོ། །  
\v 18 དེར་ཡོ་ཨབ་ཀྱིས་མི་མངགས་ནས་དམག་འཁྲུག་གི་གནས་ཚུལ་ཐམས་ཅད་དཱ་བིད་ལ་ཞུས་ཤིང་།  
\v 19 ཡང་བང་ཆེན་དེ་ལ་བཀའ་བསྩལ་ཏེ་འདི་ལྟར། ཁྱོད་ཀྱིས་དམག་འཁྲུག་གི་གནས་ཚུལ་ཐམས་ཅད་རྒྱལ་པོར་ཞུས་རྗེས།  
\v 20 གལ་ཏེ་རྒྱལ་པོ་ཐུགས་ཁྲོས་ནས་ཁྱོད་ལ། ཁྱོད་ཅག་གིས་ཅིའི་ཕྱིར་གྲོང་ཁྱེར་དེའི་ཉེ་སར་དམག་འཁྲུག་བརྒྱབ་པ་ཡིན་ནམ། དེ་དག་གིས་མཁར་ཁ་ནས་མདའ་འཕེན་པ་མི་ཤེས་སམ།  
\v 21 སྔར་ཡེ་རུབ་བེ་ཤེད་ཀྱི་བུ་ཨ་བི་མེ་ལེག་གསོད་མཁན་དེ་སུ་ཡིན་ནམ། བུད་མེད་ཅིག་གིས་མཁར་ཁ་ནས་ཁོའི་སྟེང་དུ་འཐག་རྡོ་འཕངས་ནས་ཁོ་ཐེ་བེ་སི་ཡུལ་དུ་ཤི་བ་མ་ཡིན་ནམ། ཁྱོད་རྣམས་མཁར་གྱི་ཉེ་སར་བཅར་བ་ཅི་ཞེས་དྲིས་ན། ཁྱོད་ཀྱིས་ཁོང་ལ་ཁྱེད་ཀྱི་ཞབས་ཕྱི་ཧེད་པ་ཨུ་རི་ཡཱ་ཡང་ཚེ་ལས་འདས་སོང་ཞེས་ཞུ་བར་གྱིས་ཞེས་སྨྲས་པ་ལ།  
\v 22 བང་ཆེན་སོང་སྟེ་སླེབས་པ་དང་། ཡོ་ཨབ་ཀྱིས་ཁོ་རང་མངགས་ནས་འཕྲིན་ཇི་དང་ཇི་བསྐུར་བ་ཐམས་ཅད་དཱ་བིད་ལ་ཞུས།  
\v 23 ཡང་བང་ཆེན་དེས་དཱ་བིད་ལ། མི་དེ་དག་ནི་ངེད་ཅག་ལས་སྟོབས་ཆེ་ཞིང་། ཁོ་རྣམས་ཐང་རྒོད་དུ་སླེབས་ནས་ངེད་ཅག་ལ་འཐབ་པ་དང་། ངེད་ཅག་གིས་དེ་དག་མཁར་སྒོ་རུ་དེད་ནས་སོང་བ་ལ།  
\v 24 མདའ་པས་མཁར་ཁ་ནས་ཁྱེད་ཀྱི་ཞབས་ཕྱི་རྣམས་ལ་མདའ་ཡིས་བརྒྱབ་པས། རྒྱལ་པོའི་ཞབས་ཕྱི་འགའ་ཞིག་སྟེ། ཁྱེད་ཀྱི་ཞབས་ཕྱི་ཧེད་པ་ཨུ་རི་ཡཱ་ཡང་བསད་དོ་ཞེས་ཞུས།  
\v 25 དེ་ནས་དཱ་བིད་ཀྱིས་བང་ཆེན་དེ་ལ། ཁྱོད་ཀྱིས་ཡོ་ཨབ་ལ་འདི་ལྟར། རལ་གྲིས་མི་སུ་དང་སུ་ཡང་གསོད་ངེས་ལ། བྱ་བ་དེའི་ཕྱིར་དུ་ཁྱོད་རང་སེམས་མི་སྡུག་པར་བྱའོ། །ཁྱོད་ཀྱིས་གྲོང་ཁྱེར་དེར་དམག་འཁྲུག་རྒྱག་ཤུགས་ཆེ་རུ་བཏང་ནས་དེ་རྩ་མེད་དུ་གཏོང་དགོས་ཞེས་ཁོ་ལ་སྐུལ་སློང་གྱིས་ཤིག་ཅེས་གསུངས་སོ། །  
\v 26 དེ་ནས་ཨུ་རི་ཡཱ་ཡི་ཆུང་མས་རང་གི་ཁྱོ་ག་ཤི་བའི་གཏམ་ཐོས་པས་རང་གི་ཁྱོ་གའི་དོན་དུ་མྱ་ངན་བྱས།  
\v 27 སྡུག་གི་ཉི་མ་རྫོགས་པ་དང་དཱ་བིད་ཀྱིས་མི་མངགས་ཤིང་། བུད་མེད་དེ་རང་གི་ཕོ་བྲང་དུ་བླངས་ནས་དེ་ཁོང་གི་ཆུང་མར་གྱུར་ཏེ་བུ་ཞིག་བཙས་མོད། དཱ་བིད་ཀྱིས་བྱས་པའི་བྱ་བ་དེ་ལ་དཀོན་མཆོག་ཡ་ཝཱེ་ཐུགས་མ་དགྱེས་སོ། །   
\c 12
\cl ལེའུ་བཅུ་གཉིས་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 ནཱ་ཐན་གྱིས་དཱ་བིད་ལ་བཀའ་བཀྱོན་གནང་བ།  
\p
\v 1 དེ་ནས་དཀོན་མཆོག་ཡ་ཝཱེས་ནཱ་ཐན་བྱ་བ་དཱ་བིད་ཀྱི་མདུན་དུ་མངགས་པ་དང་། ནཱ་ཐན་ཁོའི་རྩར་ཕྱིན་ནས་ཁོང་ལ། གྲོང་ཁྱེར་ཞིག་ཏུ་མི་གཉིས་ཡོད་ཅིང་། གཅིག་ནི་ཕྱུག་པོ་དང་གཞན་དེ་དབུལ་པོ་ཡིན།  
\v 2 ཕྱུག་པོ་དེ་ལ་ར་ལུག་དང་བ་གླང་གི་ཁྱུ་ཤིན་ཏུ་མང་པོ་ཡོད་པ་དང་།  
\v 3 དབུལ་པོ་དེ་ལ་ཉོས་ནས་གསོས་པའི་ལུ་གུ་མོ་ཆུང་ཆུང་གཅིག་ལས་གཞན་ཅི་ཡང་མེད་པ་ཡིན། ལུ་གུ་དེ་ནི་མི་དེའི་ཁྱིམ་ནས་རང་གི་ཕྲུ་གུ་རྣམས་དང་མཉམ་དུ་འཚར་ལོངས་བྱུང་། ལུ་གུ་དེས་ཁོའི་ཁ་ཟས་སྤྱད་ཅིང་ཕོར་བ་ལས་འཐུང་བ་དང་པང་ནས་ཉལ་ཏེ། མི་དེའི་བུ་མོ་ལྟ་བུ་ཡིན།  
\v 4 དེར་མི་ཕྱུག་པོའི་ཁྱིམ་དུ་མགྲོན་པོ་ཞིག་སླེབས་པ་དང་། ཁོས་རང་གི་བ་ཁྱུ་དང་ལུག་ཁྱུ་ནས་གཅིག་བཟུང་སྟེ་རང་གི་རྩར་སླེབས་པའི་མགྲོན་པོ་དེར་མགྲོན་བྱེད་པར་བློས་མ་ཐོངས་པས། མི་དབུལ་པོ་དེའི་ལུ་གུ་མོ་བཟུང་ནས་མགྲོན་པོ་དེར་ཟས་སུ་གཡོས་སོ་ཞེས་སྨྲས་པ་ན།  
\v 5 དཱ་བིད་མི་དེ་ལ་རབ་ཏུ་ཁྲོས་ནས་ནཱ་ཐན་ལ། ངས་གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་བསྐྱལ་བ་ཡིན་ཏེ། ལས་དེ་ལྟ་བུ་བྱེད་མཁན་ནི་འཆི་བར་འོས།  
\v 6 ཡང་མི་དེས་སྙིང་རྗེ་མེད་པར་ལས་འདི་ལྟ་བུ་བྱས་པས། ལུ་གུ་དེའི་སྐྱིན་ཚབ་ཏུ་ལྡབ་བཞི་འཇལ་དགོས་ཞེས་གསུངས།  
\v 7 དེ་ནས་ནཱ་ཐན་གྱིས་དཱ་བིད་ལ། མི་དེ་ཁྱོད་རང་ཡིན་ནོ། །ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་གསུངས་ཏེ། ངས་ཁྱོད་ཡེས་ར་ཨེལ་གྱི་རྒྱལ་པོར་བྱུགས་ཏེ་སོ་ལོའི་ལག་ནས་བསྐྱབས་པ་དང་།  
\v 8 ངས་ཁྱོད་ཀྱི་བདག་པོའི་ཁང་པ་དང་། བདག་པོའི་ཆེན་ཆུན་རྣམས་ཁྱོད་ལ་གནང་ཞིང་། ཡེས་ར་ཨེལ་དང་ཡ་ཧུ་དཱ་ཁྱིམ་རྒྱུད་གཉིས་ཁྱོད་ལ་སྤྲད་དོ། །གལ་ཏེ་ད་དུང་མི་འདང་ཚེ། ངས་ཁྱོད་ལ་དེ་ལས་ལྷག་པ་སྤྲད་ཆོག་ཆོག་ཡིན།  
\v 9 ཁྱོད་ཀྱིས་ཅིའི་ཕྱིར་དཀོན་མཆོག་ཡ་ཝཱེའི་བཀའ་སྣང་མེད་དུ་བཏང་སྟེ། ཁོང་གིས་ངན་པར་གཟིགས་པའི་ལས་སྤྱད་པ་ཡིན་ནམ། ཁྱོད་ཀྱིས་ཧེད་པ་ཨུ་རི་ཡཱ་རལ་གྲིས་བསད་ནས་ཁོའི་ཆུང་མ་རང་གི་ཆུང་མར་བླངས་ཏེ། ཁྱོད་ཀྱིས་ཨམ་མོན་པ་རྣམས་ཀྱི་རལ་གྲིས་ཁོ་བསད་པ་ཡིན།  
\v 10 དེའི་ཕྱིར་ད་ནས་བཟུང་ཁྱོད་ཀྱི་ཁྱིམ་དུ་རལ་གྲི་རྒྱུན་ཆད་པར་མི་འགྱུར་རོ། །དེ་ནི་ཁྱོད་ཀྱིས་ང་རང་སྣང་མེད་དུ་བཏང་བར་མ་ཟད། ཧེད་པ་ཨུ་རི་ཡཱ་ཡི་ཆུང་མ་དེ་ཁྱོད་རང་གི་ཆུང་མར་བླངས་པའི་རྐྱེན་གྱིས་སོ་ཞེས་དང་།  
\v 11 ཡང་དཀོན་མཆོག་ཡ་ཝཱེས་འདི་སྐད་དུ། ལྟོས་དང་། ངས་ཁྱོད་རང་གི་ཁྱིམ་ནས་ཆག་སྒོ་བསླངས་ཏེ་ཁྱོད་ལ་རྒོལ་བར་བྱའོ། །ངས་ཁྱོད་ཀྱི་ཆུང་མ་རྣམས་ཁྱོད་རང་གི་མིག་མདུན་ནས་ཁྱེར་ཏེ་ཁྱོད་ཀྱི་འགྲོགས་ཡ་ལ་གནང་བར་མ་ཟད། དེས་ཉི་མ་ཁ་དཀར་ངོ་དཀར་ལ་ཁྱོད་ཀྱི་ཆུང་མ་རྣམས་དང་ལུས་འབྲེལ་བྱའོ། །  
\v 12 ཁྱོད་ཀྱིས་ལྐོག་ནས་དེ་ལྟར་བྱས་ཤིང་། ངས་ཡེས་ར་ཨེལ་གྱི་མདུན་དུ་ཉི་མ་ཁ་དཀར་ངོ་དཀར་ལ་དེ་བཞིན་བྱས་ཏེ་ཁྱོད་ལ་ལན་སློག་པར་བྱ་ཞེས་གསུངས་ཞེས་སྦྲན་པ་དང་།  
\v 13 དཱ་བིད་ཀྱིས་ནཱ་ཐན་ལ། བདག་གིས་དཀོན་མཆོག་ཡ་ཝཱེའི་སྤྱན་སྔར་སྡིག་པ་བྱས་པ་ཡིན་ཞེས་ཞུས་པར། ནཱ་ཐན་གྱིས་དཱ་བིད་ལ། དཀོན་མཆོག་ཡ་ཝཱེས་ཁྱོད་ཀྱི་སྡིག་པ་སེལ་བས། ཁྱོད་ནི་འཆི་བར་མི་འགྱུར།  
\v 14 འོན་ཀྱང་ཁྱོད་ཀྱིས་ལས་དེ་བྱས་ནས་དཀོན་མཆོག་ཡ་ཝཱེའི་དགྲ་རྣམས་ལ་ཁོང་ལ་སྐུར་བ་འདེབས་པའི་གླགས་སྤྲད་པས། ཁྱོད་ལ་བཙས་པའི་བུ་དེ་འཆི་བར་འགྱུར་རོ་ཞེས་གསུངས།  
\v 15 དེ་ནས་ནཱ་ཐན་རང་གི་ཁྱིམ་དུ་བཞུད་ཅིང་། ཨུ་རི་ཡཱ་ཡི་ཆུང་མས་བཙས་པའི་དཱ་བིད་ཀྱི་བུ་དེ་ལ་དཀོན་མཆོག་ཡ་ཝཱེས་བརྡེགས་པ་དང་དེར་ན་ཚ་ལྗིད་མོ་ཕོག་པ་རེད།   
\s1 དཱ་བིད་ཀྱི་བུ་ཤི་བ།  
\p
\v 16 དཱ་བིད་ཀྱིས་བུ་དེའི་དོན་དུ་དཀོན་མཆོག་ལ་གསོལ་བ་བཏབ་ནས་སྨྱུང་གནས་བསྲུངས་པ་དང་། ཁང་པའི་ནང་དུ་སོང་ནས་མཚན་གང་པོར་ས་རུ་ཉལ་བསྡད་དོ། །  
\v 17 དེར་ཁོང་གི་ཞབས་ཕྱི་རྒན་པ་ཞིག་ཁོང་གི་གམ་དུ་ལངས་བསྡད་ནས་ཁོང་ས་ནས་ཡར་སློང་འདོད་ཀྱང་། ཁོང་ཡར་ལངས་མ་འདོད་ལ་དེ་དག་དང་ལྷན་ཅིག་ཏུ་ཁ་ཟས་ཀྱང་མ་སྤྱད་དོ། །  
\v 18 དེ་ནས་ཉིན་བདུན་པ་ལ་བུ་དེ་ཤིའོ། །དཱ་བིད་ཀྱི་བློན་འཁོར་རྣམས་ཀྱིས་ཕྲུ་གུ་ཤི་བའི་གཏམ་ཁོང་ལ་ཞུ་བར་མ་ཕོད་དེ། དེ་དག་གིས། ལྟོས་དང་། ཕྲུ་གུ་དེ་གསོན་པོར་ཡོད་པའི་ཚེ་བདག་ཅག་གིས་ཁོང་ལ་གཏམ་བྱས་ཀྱང་ཁོང་གིས་མི་མཉན་པས། ད་ནི་བདག་ཅག་གིས་ཁོང་ལ་བུ་ཤི་ཟིན་ཞེས་ཅི་ལྟར་ཞུ་ཕོད་དམ། ཁོང་གིས་གཞན་ལ་གནོད་བསྐྱལ་ཡང་སྲིད་ཅེས་གཏམ་བྱས་སོ། །  
\v 19 དཱ་བིད་ཀྱིས་རང་གི་བློན་འཁོར་རྣམས་ཀྱིས་ཕན་ཚུན་ལ་སྐད་ཆ་ཤབ་ཤུབ་སྨྲ་བ་མཐོང་ནས་བུ་ཤི་ཟིན་པ་ཤེས་ཤིང་། རང་གི་བློན་འཁོར་རྣམས་ལ། བུ་ཤི་ཟིན་ནམ་ཞེས་དྲིས་པ་ལ་དེ་དག་གིས། ཤི་ཟིན་ནོ་ཞེས་ཞུས་སོ། །  
\v 20 དེར་དཱ་བིད་ས་ནས་ཡར་ལངས་ཏེ་ཁྲུས་བྱས་ཤིང་སྣུམ་བྱུགས་པ་དང་། ན་བཟའ་བརྗེས་ནས་དཀོན་མཆོག་ཡ་ཝཱེའི་བཞུགས་གནས་སུ་ཕེབས་ཏེ་ཕྱག་ཕུལ་ཏོ། །དེ་ནས་རང་གི་ཁྱིམ་དུ་ལོག་སྟེ་མི་ཡིས་ཁོང་གི་བཀའ་བཞིན་ཁ་ཟས་དྲངས་པ་ལ་ཁོང་གིས་བཞེས་སོ། །  
\v 21 དེར་ཁོང་གི་བློན་འཁོར་རྣམས་ཀྱིས་ཁོང་ལ། ཁྱེད་ཀྱིས་མཛད་པ་དེ་ཅི་ལགས། བུ་གསོན་པོར་ཡོད་པའི་ཚེ་ཁྱེད་ཀྱིས་བུ་ཡི་ཕྱིར་དུ་སྨྱུང་གནས་བསྲུངས་ནས་ངུས་པ་དང་། བུ་ཤི་ཟིན་པའི་ཚེ་ན། ཁྱེད་ཡར་བཞེངས་ནས་གསོལ་བ་བཞེས་སོ་ཞེས་ཞུས་པ་ལ།  
\v 22 ཁོང་གིས་དེའི་ལན་དུ། ཕྲུ་གུ་ད་དུང་གསོན་པའི་ཚེ་ངས་སྨྱུང་གནས་བསྲུངས་ནས་ངུ་བཞིན་བསྡད་པ་ནི། ངས་སེམས་སུ་དཀོན་མཆོག་ཡ་ཝཱེས་བདག་ལ་སྙིང་རྗེ་དགོངས་ནས་ཕྲུ་གུ་གསོན་པོར་བསྐྱུར་ཡང་སྲིད་སྙམ་པ་ཡིན།  
\v 23 ད་ནི་ཕྲུ་གུ་ཤི་ཟིན་པས། བདག་གིས་ཅིའི་ཕྱིར་སྨྱུང་གནས་སྲུང་ངམ། ངས་ཁོ་རང་ཕྱིར་འགུག་ནུས་སམ། ང་ཁོའི་རྩར་འགྲོ་རྒྱུ་ཡིན་མོད། འོན་ཀྱང་ཁོ་ནི་ཕྱིར་ངའི་རྩར་འོང་མི་ནུས་ཞེས་གསུངས་སོ། །   
\s1 སོ་ལོ་མོན་འཁྲུངས་པ།  
\p
\v 24 དཱ་བིད་ཀྱིས་རང་གི་ཆུང་མ་པད་ཤེ་བཱ་ལ་སེམས་གསོ་བྱས་ཤིང་། ཁོ་མོའི་རྩར་སོང་ནས་མཉམ་དུ་འགྲོགས་པ་ལ། བུད་མེད་དེས་བུ་ཞིག་བཙས་པ་དང་དེའི་མིང་ལ་སོ་ལོ་མོན་ཞེས་བཏགས་སོ། །དཀོན་མཆོག་ཡ་ཝཱེས་ཀྱང་དེ་ལ་གཅེས་པར་གྱུར་ཏེ།  
\v 25 ལུང་སྟོན་པ་ནཱ་ཐན་མངགས་ནས་དཀོན་མཆོག་ཡ་ཝཱེའི་བཀའ་བཞིན་དུ། དེའི་མིང་ལ་ཨེ་དིད་ཡཱ་ \f + \ft ཨེ་དིད་ཡཱ་ཞེས་པ་ནི་དཀོན་མཆོག་ཡ་ཝཱེས་གཅེས་པའི་མི་ཞེས་པའི་དོན་ཡིན།\f*ཞེས་བཏགས་སོ། །   
\s1 དཱ་བིད་ཀྱིས་རབ་བཱ་ཞེས་པའི་གྲོང་ཁྱེར་བླངས་པ།  
\p
\v 26 དེའི་དུས་སུ་ཡོ་ཨབ་ཀྱིས་ཨམ་མོན་པའི་གྲོང་ཁྱེར་རབ་བཱ་ལ་དམག་དྲངས་ནས་རྒྱལ་ས་དེ་བཟུང་ངོ་། །  
\v 27 དེ་ནས་ཡོ་ཨབ་ཀྱིས་དཱ་བིད་ཀྱི་དྲུང་དུ་བང་ཆེན་མངགས་ནས་ཁོང་ལ། ངས་རབ་བཱ་ལ་དམག་བརྒྱབ་སྟེ་ཆུ་མཛོད་རྣམས་ཀྱང་བླངས་ཟིན་པས།  
\v 28 ད་ལྟ་ཁྱེད་ཀྱིས་འབངས་གཞན་དག་བསྡུས་ཤིག སྒར་བཏབ་སྟེ་གྲོང་ཁྱེར་དེ་ལ་རྒོལ་ནས་དེ་ལེན་ཐབས་གྱིས་ཤིག དེ་མིན་ན་གྲོང་ཁྱེར་དེ་ངས་བླངས་པའི་ཚེ། མི་རྣམས་ཀྱིས་ངའི་མིང་དེ་ལ་འདོགས་པར་འགྱུར་རོ་ཞེས་འཕྲིན་བསྐུར་བ་དང་།  
\v 29 དཱ་བིད་ཀྱིས་འབངས་ཐམས་ཅད་བསྡུས་ཤིང་རབ་བཱ་ལ་དམག་དྲངས་པ་དང་དེར་རྒོལ་ནས་རྒྱལ་ཁ་བླངས་སོ། །  
\v 30 དཱ་བིད་ཀྱིས་ཡུལ་དེའི་རྒྱལ་པོའི་\f + \ft འདིར་རྒྱལ་པོ་ཞེས་པ་ནི་ཁོ་ཚོའི་ལྷ་མའོ་ལག་ཅེས་པར་གོ་དགོས།\f*མགོ་ནས་ཅོད་པན་ཕྲོགས། རྒྱལ་པོའི་ཅོད་པན་སྟེང་གི་གསེར་ནི་རྡོ་ཚད་གཅིག་ཡོད་པ་དང་དེའི་སྟེང་ལ་རིན་པོ་ཆེའི་ཕྲ་བཏབ་ཡོད་ལ། མི་རྣམས་ཀྱིས་ཅོད་པན་དེ་དཱ་བིད་ཀྱི་དབུ་ལ་བསྐོན། དཱ་བིད་ཀྱིས་གྲོང་ཁྱེར་དེ་ལས་ད་དུང་བཅོམ་ནོར་དཔག་མེད་ཁྱེར་ཏོ། །  
\v 31 ཡང་ཁོང་གིས་གྲོང་ཁྱེར་དེའི་མི་རྣམས་ཕྱི་རུ་ཁྲིད་ནས། དེ་དག་ལ་སོག་ལེ་དང་། ལྕགས་སྤར་དང་། ལྕགས་ཀྱི་སྟ་རེ་བཅས་བཀོལ་དུ་བཅུག་པ་དང་། ཡང་ན་སོ་ཕག་སྲེག་ཁུང་དུ་ལས་ཀ་བྱེད་དུ་བཅུག \f + \ft འདིར་མ་ཕྱི་ལས་དེ་དག་སོག་ལེ་དང་ལྕགས་སྤར། ལྕགས་ཀྱི་སྟ་རེ་བཅས་ཀྱི་འོག་ཏུ་བཞག་པ་དང་། ཡང་ན་སོ་ཕག་སྲེག་ཁུང་བརྒྱུད་ནས་འགྲོ་རུ་བཅུག་ཅེས་མཐོང་། \f* ཁོང་གིས་ཨམ་མོན་པ་རྣམས་ཀྱི་གྲོང་ཁྱེར་ཐམས་ཅད་ལ་དེ་བཞིན་བྱས་ནས། དཱ་བིད་དང་འབངས་ཐམས་ཅད་ཕྱིར་ཡེ་རུ་སཱ་ལེམ་དུ་ལོག་གོ །   
\c 13
\cl ལེའུ་བཅུ་གསུམ་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 ཨམ་ནོན་དང་ཐལ་མཱར།  
\p
\v 1 དེའི་རྗེས་སུ་དོན་ཞིག་བྱུང་བ་འདི་ལྟ་སྟེ། དཱ་བིད་ཀྱི་བུ་ཨབ་ཤཱ་ལོམ་ལ་སྲིང་མོ་བཞིན་བཟང་མ་ཐལ་མཱར་བྱ་བ་ཞིག་ཡོད་པ་ལ། དཱ་བིད་ཀྱི་བུ་ཨམ་ནོན་གྱི་སེམས་དེ་ལ་འཕྲེང་བར་གྱུར།  
\v 2 ཨམ་ནོན་རང་གི་ཕ་གཅིག་མ་མི་གཅིག་པའི་སྲིང་མོ་ཐལ་མཱར་ལ་སེམས་འཕྲེང་བའི་སྡུག་བསྔལ་གྱིས་ན་བར་གྱུར་ཏོ། །ཐལ་མཱར་ནི་ད་དུང་ན་ཆུང་བུ་མོ་ཡིན་པས་ཨམ་ནོན་གྱིས་དེ་ལ་གང་ཞིག་བྱེད་འདོད་ཀྱང་དཀའ་བའི་གནས་སུ་ལྷུང་།  
\v 3 ཨམ་ནོན་ལ་མཛའ་གྲོགས་ཤིག་ཡོད་དེ་མིང་ལ་ཡོ་ན་དབ་ཅེས་ཟེར་ཞིང་། དེ་ནི་དཱ་བིད་ཀྱི་གཅེན་པོ་ཤིམ་ཨ་ཡི་བུ་ཡིན་ཏེ་མི་ཤིན་ཏུ་སྤྱང་པོ་ཞིག་ཡིན།  
\v 4 དེས་ཨམ་ནོན་ལ། རྒྱལ་སྲས་ལགས། ཁྱེད་རང་ཞོགས་པ་རེ་རེ་བཞིན་རིད་པ་དེ་ཅི་ཡིན། ཁྱེད་ཀྱིས་ང་ལ་སྨྲ་བར་མི་མཛད་དམ་ཞེས་ཞུས་པར། ཨམ་ནོན་ན་རེ། ང་ནི་རང་གི་གཅེན་པོ་ཨབ་ཤཱ་ལོམ་གྱི་སྲིང་མོ་ཐལ་མཱར་ལ་དགའ་བྱུང་ཞེས་སྨྲས།  
\v 5 དེར་ཡོ་ན་དབ་ཀྱིས་ཁོ་ལ། ཁྱེད་མལ་སའི་ནང་ཉལ་ཏེ་ན་ཁུལ་གྱིས་ཤིག ཁྱེད་ཀྱི་ཡབ་ཁྱེད་ལ་གཟིགས་པར་འོངས་སྐབས་ཁྱེད་ཀྱིས་ཁོང་ལ། ངའི་སྲིང་མོ་ཐལ་མཱར་འདིར་མངགས་ནས་ང་ལ་ཁ་ཟས་སྟེར་བར་མཛོད་དང་། ཡང་ངས་དངོས་སུ་མཐོང་བ་དང་དེའི་ལག་ནས་ཁ་ཟས་བླངས་ཏེ་བཟའ་བའི་ཕྱིར་མོས་ངའི་མཐོང་སར་ཁ་ཟས་སྟ་གོན་བྱེད་པར་མཛད་རོགས་ཞེས་ཞུས་ཤིག་ཅེས་བསླབས་པ་དང་།  
\v 6 ཨམ་ནོན་ཉལ་བསྡད་ནས་ན་རྫུ་བཏབ་ཅིང་། རྒྱལ་པོ་ཁོ་ལ་གཟིགས་པར་འོངས་པའི་ཚེ། ཨམ་ནོན་གྱིས་རྒྱལ་པོ་ལ། ངའི་སྲིང་མོ་ཐལ་མཱར་འདིར་འོང་བར་གནོངས་ཤིག་དང་། དེས་ངའི་མཐོང་ས་རུ་བདག་ལ་བག་ལེབ་གཉིས་བསྲེགས་ན་ངས་དེའི་ལག་ནས་བླངས་ཏེ་བཟའ་བར་བྱ་ཞེས་ཞུས་པར།  
\v 7 དཱ་བིད་ཀྱིས་ཕོ་བྲང་ནང་མི་མངགས་ཏེ་ཐལ་མཱར་གྱི་རྩར་སོང་ནས་དེ་ལ། ཁྱོད་རང་གི་ཕུ་བོ་ཨམ་ནོན་གྱི་ཁང་པར་སོང་སྟེ་ཁོ་ལ་ཁ་ཟས་གཡོས་ཤིག་ཅེས་བསྒོས་པས།  
\v 8 ཐལ་མཱར་རང་གི་ཕུ་བོ་ཨམ་ནོན་གྱི་ཁང་པར་ཕྱིན་ཏེ་ཁོ་རང་མལ་སར་ཉལ་ཡོད་པ་མཐོང་། དེ་ནས་ཁོ་མོས་ཕྱེ་བླངས་ནས་བརྫིས་ཏེ་ཁོའི་མཐོང་ས་རུ་བག་ལེབ་བསྲེགས་ཤིང་ཚོས་པ་ལ།  
\v 9 ཁོ་མོས་སླ་ང་ནས་བག་ལེབ་བླངས་ཏེ་ཨམ་ནོན་ལ་དྲངས་པ་ན་ཁོས་མ་ཟོས་པ་དང་། ཁོ་ན་རེ། མི་ཐམས་ཅད་ངའི་མདུན་ནས་ཕྱི་རུ་སོང་ཞིག་ཅེས་སྨྲས་པར། མི་ཐམས་ཅད་ཁོ་དང་བྲལ་ནས་སོང་།  
\v 10 དེར་ཨམ་ནོན་གྱིས་ཐལ་མཱར་ལ། ངས་ཁྱོད་ཀྱི་ལག་ནས་བླངས་ཏེ་བཟའ་ཕྱིར་ཁ་ཟས་གཟིམ་ཁང་དུ་འཁྱེར་ཤོག་སྨྲས་པས། ཐལ་མཱར་གྱིས་རང་གིས་བསྲེགས་པའི་བག་ལེབ་རྣམས་བླངས་ནས། གཟིམ་ཁང་དུ་རང་གི་ཕུ་བོ་ཨམ་ནོན་གྱི་གམ་དུ་སླེབས་ཏེ།  
\v 11 མདུན་དུ་བཅར་ནས་ཁོ་ལ་ཁ་ཟས་དྲངས་པའི་ཚེ། ཁོས་མོ་ལ་འཇུས་ནས་ན་རེ། ངའི་སྲིང་མོ། ང་དང་མཉམ་དུ་ཉོལ་ཞིག་ཅེས་སྨྲས་པ་ལ།  
\v 12 ཁོ་མོས་ལན་དུ། ཕུ་བོ་ལགས། དེ་ལྟར་བྱེད་མི་རུང་། ང་ལ་བཙན་མི་བཀོལ་རོགས། ཡེས་ར་ཨེལ་གྱི་ནང་དུ་ལས་དེ་ལྟ་བུ་བྱེད་མི་རུང་། ཁྱོད་ཀྱིས་སྐྱུག་བྲོ་བའི་ལས་འདི་མ་བྱེད་ཅིག  
\v 13 ཡང་ངས་རང་གི་ངོ་ཚ་ཁུར་ནས་གང་དུ་འགྲོའམ། ཁྱོད་ལ་མཚོན་ནའང་ཡེས་ར་ཨེལ་གྱི་ཁྲོད་དུ་མི་བླུན་རྨོངས་ཤིག་ཏུ་འགྱུར་ངེས་ཡིན། ད་ལྟ་ཁྱོད་ཀྱིས་རྒྱལ་པོ་ལ་ཞུ་བ་ཕུལ་དང་། ཁོང་གིས་ང་ཁྱོད་ལ་གནང་བར་གདོན་མི་ཟ་ཞེས་སྨྲས་ཀྱང་།  
\v 14 ཨམ་ནོན་གྱིས་མོའི་གཏམ་ལ་མ་མཉན་པར། ཁོ་ནི་མོ་ལས་ཤུགས་ཆེ་བས་ཁོ་མོར་བཙན་གཡེམ་བྱས་ཤིང་མཉམ་དུ་ཉལ་ཏོ། །  
\v 15 དེ་ནས་ཨམ་ནོན་མོ་ལ་ཤིན་ཏུ་སྡང་བ་སྟེ། ཁོ་མོར་སྡང་བའི་སེམས་ནི་སྔར་དེ་ལ་འཕྲེང་བའི་གདུང་བ་ལས་ཀྱང་ཐུ་ཞིང་ཁོ་མོར་ན་རེ། ཁྱོད་ཡར་ལོངས་ལ་ཕར་སོང་ཞིག་ཅེས་སྨྲས་པ་ལ།  
\v 16 ཐལ་མཱར་གྱིས་ཨམ་ནོན་ལ། འདི་ལྟར་མི་བྱེད་རོགས། ཁྱོད་ཀྱིས་ང་ཕྱི་རུ་འདོན་པའི་ཉེས་པ་འདི་ནི་ཁྱོད་ཀྱིས་ང་ལ་བྱས་པའི་ཉེས་པ་ལས་ཀྱང་ཚབས་ཆེའོ་ཞེས་སྨྲས་ཀྱང་། ཨམ་ནོན་གྱིས་ཁོ་མོའི་ཚིག་ལ་མ་མཉན་པར།  
\v 17 རང་གི་ཞབས་ཕྱི་བོས་ནས་དེ་ལ། བུད་མེད་འདི་ངའི་ཁྱིམ་ནས་བཏོན་ཞིག ཁོ་མོ་ཕྱི་རུ་སོང་མ་ཐག་སྒོ་ལ་སྒོ་གཏན་རྒྱོབ་ཅིག་ཅེས་སྨྲས་སོ། །  
\v 18 སྐབས་དེར་ཐལ་མཱར་གྱིས་གོས་ཁྲ་བོ་གྱོན་ཡོད་པ་ཡིན། གང་ལ་ཞེ་ན། རྒྱལ་པོའི་སྲས་མོ་ན་ཆུང་མ་ཡིན་པ་ཐམས་ཅད་ཀྱིས་ཕྱི་གོས་དེ་ལྟ་བུ་གྱོན་པ་ཡིན། ཨམ་ནོན་གྱི་ཞབས་ཕྱི་ཡིས་ཁོ་མོ་ཕྱི་རུ་བཏོན་ཞིང་། ཁོ་མོ་ཕྱི་རུ་སོང་མ་ཐག་ཁོས་སྒོ་ལ་སྒོ་གཏན་བརྒྱབ་པ་རེད།  
\v 19 དེར་ཐལ་མཱར་གྱིས་རང་གི་མགོ་ལ་ཐལ་བ་གཏོར་ནས་ལུས་ཀྱི་གོས་ཁྲ་གཤགས་ཏེ། མགོ་ལག་པས་བསྐྱོར་ནས་ངུ་བཞིན་སོང་བ་དང་།  
\v 20 ཁོ་མོའི་མིང་པོ་ཨབ་ཤཱ་ལོམ་ན་རེ། ཁྱོད་ཀྱི་ཕུ་བོ་ཨམ་ནོན་ཁྱོད་དང་འགྲོགས་པ་ཡིན་ནམ། ངའི་སྲིང་མོ། ད་གནས་སྐབས་སུ་ཁ་མི་གྲགས་པར་གྱིས། ཁོ་རང་ཁྱོད་ཀྱི་ཕུ་བོ་ཡིན་པས་སེམས་སུ་མ་འཛིན་ཞིག་ཅེས་སྨྲས་ཤིང་། ཐལ་མཱར་ནི་རང་གི་མིང་པོ་ཨབ་ཤཱ་ལོམ་གྱི་ཁྱིམ་ནས་གྲོགས་མེད་ཁེར་རྐྱང་དུ་བསྡད་དོ། །  
\v 21 རྒྱལ་པོ་དཱ་བིད་ཀྱིས་དོན་དེ་ཐམས་ཅད་ཐོས་པ་ཙམ་གྱིས་ཐུགས་རབ་ཏུ་ཁྲོས་པར་གྱུར་ཏོ། །  
\v 22 ཨབ་ཤཱ་ལོམ་གྱིས་ཨམ་ནོན་ལ་གཏམ་བཟང་ངན་གང་ཡང་མ་ལབ་སྟེ། གང་ལ་ཞེ་ན། དེས་ཁོའི་སྲིང་མོ་ཐལ་མཱར་ལ་བཙན་གཡེམ་བྱས་པས་ཨབ་ཤཱ་ལོམ་ནི་ཨམ་ནོན་ལ་ཤིན་ཏུ་སྡང་ངོ་། །   
\s1 ཨབ་ཤཱ་ལོམ་གྱིས་སྲིང་མོའི་ཆེད་དུ་དགྲ་ཤ་བླངས་པ།  
\p
\v 23 དེ་ནས་ལོ་གཉིས་འགོར་རྗེས། མི་རྣམས་ཀྱིས་ཨེ་ཕཱར་ཡིམ་ཉེ་འདབས་ཀྱི་པཱ་ཨལ་ཧ་ཟོར་ཡུལ་དུ་ཨབ་ཤཱ་ལོམ་གྱི་ལུག་བལ་འབྲེག་སྐབས་ \f + \ft ཡེས་ར་ཨེལ་པ་རྣམས་ཀྱིས་ལོ་རེའི་དཔྱིད་ཀར་དྲོད་བབས་རྗེས་ལུག་བལ་འབྲེག་པ་དང་། བལ་འབྲེག་པའི་སྐབས་སུ་གསོལ་སྟོན་གཤམ་པའི་དཔེ་ཡོད། \f*སུ། ཨབ་ཤཱ་ལོམ་གྱིས་རྒྱལ་སྲས་ཐམས་ཅད་དེ་རུ་མགྲོན་དུ་བོས་སོ། །  
\v 24 ཡང་ཨབ་ཤཱ་ལོམ་རྒྱལ་པོའི་དྲུང་དུ་ཕྱིན་ཏེ་ཁོང་ལ། གཟིགས་དང་། མི་རྣམས་ཀྱིས་ཁྱེད་ཀྱི་ཞབས་ཕྱིའི་ལུག་བལ་འབྲེག་གིན་ཡོད་པས། རྒྱལ་པོ་འཁོར་དང་བཅས་པ་ཉིད་ཀྱི་ཞབས་ཕྱི་མཉམ་དུ་ཕེབས་ཤིག་ཞུས་ཀྱང་།  
\v 25 རྒྱལ་པོས་ཨབ་ཤཱ་ལོམ་ལ། མི་འགྲོ་བར་བྱ་ངའི་བུ། ཁྱོད་ལ་ཚེགས་མི་བྱེད་པའི་ཕྱིར་ཚང་མ་འགྲོ་དགོས་དོན་མེད་ཅེས་སྨྲས། དེས་ཁོང་ལ་ཡང་ཡང་ཞུས་ཀྱང་ཁོང་སྔར་བཞིན་འགྲོ་མ་འདོད་པས་དེ་ལ་བྱིན་རླབས་མཛད་དོ། །  
\v 26 དེ་ནས་ཨབ་ཤཱ་ལོམ་གྱིས། གལ་ཏེ་ཁྱེད་མི་ཕེབས་ན། ངའི་ནུ་བོ་ཨམ་ནོན་ང་དང་མཉམ་དུ་མངག་པར་མཛོད་ཅེས་ཞུས་པའི་ལན་དུ་རྒྱལ་པོས། ཁོ་ཁྱོད་དང་མཉམ་དུ་འགྲོ་དགོས་དོན་ཅི་ཞེས་གསུངས་པ་དང་།  
\v 27 ཨབ་ཤཱ་ལོམ་གྱིས་རྒྱལ་པོ་ལ་ཡང་ནས་ཡང་དུ་ཞུ་བ་ཞུས་པས་ཁོང་གིས་ཨམ་ནོན་དང་རྒྱལ་སྲས་ཐམས་ཅད་ཁོ་དང་མཉམ་དུ་འགྲོ་བའི་དགོངས་པ་གནང་ངོ་། །  
\v 28 དེ་ནས་ཨབ་ཤཱ་ལོམ་གྱིས་རང་གི་འཁོར་གཡོག་རྣམས་ལ། མཉམ་ཞོག་ཅིག ཨམ་ནོན་གྱིས་རྒུན་ཆང་འཐུང་ནས་དགའ་བ་འབུམ་གྱིས་མཉེས་པའི་དུས་སུ་ངས་ཁྱོད་ཅག་ལ། ཨམ་ནོན་ལ་རྒྱོབ་ཅིག་ཅེས་སྨྲས་པ་ཙམ་གྱིས། ཁྱོད་ཅག་གིས་ཨམ་ནོན་གསོད་དགོས་ཏེ། མ་འཇིགས་ཤིག ངས་ཁྱོད་ཅག་ལ་བཀའ་བསྒོས་པ་མ་ཡིན་ནམ། དེ་བས་སྙིང་སྟོབས་དང་དཔའ་ངར་བསྐྱེད་ཅིག་ཅེས་སྨྲས་པར།  
\v 29 ཨབ་ཤཱ་ལོམ་གྱི་འཁོར་གཡོག་རྣམས་ཀྱིས་ཁོའི་བསྒོ་བ་བཞིན་དུ་ཨམ་ནོན་ལ་དེ་བཞིན་བྱས་ཤིང་། རྒྱལ་སྲས་ཐམས་ཅད་ལངས་ནས་རང་རང་གི་དྲེའུ་ལ་ཞོན་ཏེ་བྲོས་སོ། །  
\v 30 དེ་ནས་ཁོ་རྣམས་ད་དུང་ལམ་བར་དུ་འབྲོ་སྐབས་སུ། ཨབ་ཤཱ་ལོམ་གྱིས་རྒྱལ་སྲས་ཐམས་ཅད་བསད་ནས་གཅིག་ཀྱང་མ་ལུས་སོ་ཞེས་པའི་འཕྲིན་དཱ་བིད་ལ་སླེབས་པ་དང་།  
\v 31 རྒྱལ་པོ་ཧར་གྱིས་བཞེངས་ཤིང་། ན་བཟའ་གཤགས་ནས་ས་སྟེང་དུ་ཉལ། ཁོང་གི་བློན་འཁོར་ཐམས་ཅད་ཀྱིས་ཀྱང་ལུས་གོས་གཤགས་ནས་ཁོང་གི་དྲུང་དུ་ལངས་བསྡད་པ་རེད།  
\v 32 དེ་ནས་དཱ་བིད་ཀྱི་གཅེན་པོ་ཤིམ་ཨ་ཡི་བུ་ཡོ་ན་དབ་ཀྱིས། ཀྱེ་ཇོ་བོ་ལགས། དེ་དག་གིས་རྒྱལ་སྲས་དར་ལ་བབ་པ་ཐམས་ཅད་བཀུམ་པར་མ་དགོངས་ཤིག ཨམ་ནོན་འབའ་ཞིག་བཀུམ་པའོ། །ཨམ་ནོན་གྱིས་ཨབ་ཤཱ་ལོམ་གྱི་སྲིང་མོ་ཐལ་མཱར་ལ་བཙན་གཡེམ་བྱས་པའི་ཉིན་ནས་བཟུང་། ཨབ་ཤཱ་ལོམ་གྱིས་འདི་ལྟར་བགྱི་བའི་སེམས་ཐག་བཅད་པ་རེད།  
\v 33 དེའི་ཕྱིར་བདག་གི་ཇོ་བོ་དང་བདག་གི་རྒྱལ་པོ་ལགས། རྒྱལ་སྲས་ཐམས་ཅད་བཀུམ་པ་རེད་ཅེས་ཁྱེད་ཀྱི་ཐུགས་སུ་མི་དགོངས་པར་མཁྱེན། ཨམ་ནོན་འབའ་ཞིག་བཀུམ་མོ་ཞེས་ཞུས་སོ། །   
\p
\v 34 ཨབ་ཤཱ་ལོམ་བྲོས་སོང་ངོ་། །སོ་པ་གཞོན་ནུ་ཡིས་མགོ་ཡར་བཏེགས་ནས་བལྟས་པ་དང་། ལྟོས་ཤིག མི་མང་པོ་ཞིག་རི་ངོས་ཀྱི་ལམ་ནས་ཁོའི་རྗེས་སུ་འོང་བ་མཐོང་ངོ་། །  
\v 35 དེར་ཡོ་ན་དབ་ཀྱིས་རྒྱལ་པོ་ལ། གཟིགས་དང་། ཁྱེད་ཀྱི་ཞབས་ཕྱིས་ཞུས་པ་བཞིན་རྒྱལ་སྲས་རྣམས་འབྱོན་ནོ་ཞེས་ཞུས་ཤིང་།  
\v 36 དེ་ལྟར་ཞུས་པ་ཙམ་གྱིས། ལྟོས་ཤིག རྒྱལ་སྲས་རྣམས་སླེབས་ནས་སྐད་ཆེན་པོས་བཤུམས། རྒྱལ་པོ་དང་ཁོང་གི་བློན་འཁོར་རྣམས་ཀྱིས་ཀྱང་ངུ་སྐད་ཤིན་ཏུ་ཆེན་པོ་བཏོན་ཏོ། །  
\v 37 ཨབ་ཤཱ་ལོམ་བྲོས་ནས་གེ་ཤུར་གྱི་རྒྱལ་པོ་ཨམ་མེ་ཧུད་ཀྱི་སྲས་ཏལ་མཱ་ཨི་བྱ་བའི་དྲུང་དུ་ཕྱིན། དཱ་བིད་ཀྱིས་ཉིན་རེ་བཞིན་ཉིད་ཀྱི་སྲས་ཀྱི་ཕྱིར་མྱ་ངན་བྱས།  
\v 38 ཨབ་ཤཱ་ལོམ་བྲོས་ནས་གེ་ཤུར་དུ་ཕྱིན་ཏེ་དེར་ལོ་གསུམ་ལ་བསྡད།  
\v 39 ཡང་རྒྱལ་པོ་དཱ་བིད་ཀྱིས་ཨབ་ཤཱ་ལོམ་གསོད་མ་འདོད་དེ།\f + \ft ཡང་རྒྱལ་པོ་དཱ་བིད་ཀྱིས་ཨབ་ཤཱ་ལོམ་གསོད་མ་འདོད་དེ་ཞེས་པའི་མ་ཕྱིའི་དོན་ནི་དཱ་བིད་ཀྱིས་ཨབ་ཤཱ་ལོམ་འཚོལ་བ་མཚམས་བཞག་ཅེས་པ་ཡིན།\f* ཨམ་ནོན་གྲོངས་རྗེས་ད་ནི་ཁོང་ལ་སེམས་གསོ་ཐོབ་པའི་ཕྱིར་རོ། །   
\c 14
\cl ལེའུ་བཅུ་བཞི་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 ཡོ་ཨབ་ཀྱིས་ཨབ་ཤཱ་ལོམ་ཕྱིར་ཡོང་བར་བཅུག་པ།  
\p
\v 1 དེ་ཡང་ཟེ་རུ་ཡཱ་ཡི་བུ་ཡོ་ཨབ་ཀྱིས་རྒྱལ་པོའི་སེམས་ནས་ཨབ་ཤཱ་ལོམ་དྲན་པ་ཤེས་པས།  
\v 2 ཁོས་ཐེ་ཀོ་ཨ་རུ་མི་མངགས་པ་དང་། དེ་ནས་བུད་མེད་མཁས་པ་ཞིག་བོས་ནས་དེ་ལ། ཁྱོད་ཀྱིས་རང་གི་མགོར་སྡུག་ལྷུང་ཁུལ་བྱས་ཏེ་སྡུག་གོས་གྱོན་ལ། ལུས་ལ་སྣུམ་ཡང་མི་སྐུད་པར། དུས་ཡུན་རིང་པོར་གཤིན་པོའི་དོན་དུ་སྡུག་འཁུར་བའི་བུད་མེད་ལྟ་བུར་བྱས་ཏེ།  
\v 3 རྒྱལ་པོའི་དྲུང་དུ་ཕྱིན་ཏེ་ཁོང་ལ་འདི་བཞིན་ཞུ་དགོས་ཞེས་སྨྲས་ནས། ཡོ་ཨབ་ཀྱིས་བུད་མེད་ལ་ཅི་ལྟར་ཞུ་དགོས་པའི་ཚིག་ཐམས་ཅད་སྨྲས་སོ། །  
\v 4 དེ་ནས་ཐེ་ཀོ་ཨ་ཡུལ་གྱི་བུད་མེད་རྒྱལ་པོའི་དྲུང་དུ་འོངས་ནས་ཕྱག་བཙལ་ཏེ་ན་རེ། རྒྱལ་པོ་ལགས། ཁྱེད་ཀྱིས་སྐྱབས་མཛོད་ཅིག་ཅེས་ཞུས་པ་དང་།  
\v 5 རྒྱལ་པོས་དེ་ལ། ཁྱོད་ལ་ཅི་ཞིག་བྱུང་ཞེས་དྲིས་པའི་ལན་དུ་མོ་ན་རེ། བདག་ནི་ཡུགས་མོ་ཞིག་ཡིན་ཏེ། བདག་གི་ཁྱོ་ག་ཤི་སོང་བ་དང་།  
\v 6 ཁྱེད་ཀྱི་གཡོག་མོ་བདག་ལ་བུ་གཉིས་ཡོད་ཅིང་། དེ་གཉིས་ཞིང་ཁར་འཛིངས་པ་དང་བར་འབྱེད་མཁན་གང་ཡང་མེད་པས། གཅིག་གིས་གཞན་དེ་ལ་བརྡུངས་ནས་བསད་དོ། །  
\v 7 གཟིགས་དང་། ནང་མི་ཐམས་ཅད་ཁྱེད་ཀྱི་གཡོག་མོའི་དགྲ་རུ་ལངས་ནས་འདི་ལྟར། ཁྱོད་ཀྱིས་རང་གི་སྤུན་ཟླ་གསོད་མཁན་དེ་སྤྲོད་ཤོག སྤུན་བསད་པའི་སྲོག་ལན་དུ་ངེད་རྣམས་ཀྱིས་ཁོ་བསད་ནས་ཕ་ཤུལ་འཛིན་མཁན་མེད་པར་བྱའོ་ཞེས་སྨྲས་སོ། །དེ་ལྟར་ཁོ་ཚོས་བདག་ལ་ལུས་པའི་བུ་གཅིག་པོ་དེ་ཡང་གསོད་ཅིང་། ས་གཞིའི་ངོས་སུ་བདག་གི་ཁྱོ་གའི་མིང་ངམ་གང་ཡང་མི་ལུས་པའི་ཕྱིར་དེ་བཞིན་བྱེད་དོ་ཞེས་ཞུས་པ་དང་།  
\v 8 རྒྱལ་པོས་བུད་མེད་ལ། ད་ལྟ་རང་ཁྱིམ་དུ་སོང་ཞིག ངས་ཁྱོད་ཀྱི་དོན་དུ་བཀའ་གནང་བར་བྱ་ཞེས་གསུངས་ཤིང་།  
\v 9 ཐེ་ཀོ་ཨ་ཡུལ་གྱི་བུད་མེད་ཀྱིས་རྒྱལ་པོ་ལ། བདག་གི་ཇོ་བོ་དང་བདག་གི་རྒྱལ་པོ་ལགས། ཉེས་སྡིག་ཐམས་ཅད་བདག་དང་བདག་གི་ཕ་རྒྱུད་ལ་འབབ་པར་ཤོག་ཅིག རྒྱལ་པོ་དང་རྒྱལ་ཁྲི་གཉིས་ལ་ཉེས་སྐྱོན་མི་འཕོག་པར་ཤོག་ཅིག་ཅེས་ཞུས་པ་དང་།  
\v 10 རྒྱལ་པོས་དེ་ལ། སུ་ཞིག་གིས་ཁྱོད་ལ་ཅི་ཞིག་སྨྲས་ནས་སྡུག་ལ་གཏོད་ན་དེ་ངའི་མདུན་དུ་འཁྲིད་ཤོག་དང་། དེས་ཁྱོད་ལ་ཡང་བསྐྱར་དཀའ་ལས་མི་བཟོའོ་ཞེས་གསུངས་སོ། །  
\v 11 དེ་ནས་བུད་མེད་ན་རེ། ཡང་དགྲ་ཤ་ལེན་མཁན་དག་གིས་ངའི་བུ་རྩ་མེད་དུ་མི་གཏོང་བའི་ཕྱིར། རྒྱལ་པོ་ཁྱེད་ཀྱིས་ཉིད་ཀྱི་དཀོན་མཆོག་ཡ་ཝཱེ་དཔང་དུ་བཙུགས་ནས་དམ་བཅའ་བར་མཛོད་ཅེས་ཞུས་པ་ན། རྒྱལ་པོས་འདི་ལྟར། བདག་གིས་གཙོ་བོ་ཡ་ཝཱེ་དཔང་དུ་བཙུགས་ནས་དམ་བཅའ་འཇོག་སྟེ། ཁྱོད་ཀྱི་བུ་ཡི་སྐྲ་ཉག་མ་གཅིག་ཀྱང་སར་ལྷུང་བར་མི་འགྱུར་ཞེས་གསུངས།  
\v 12 དེར་བུད་མེད་ཀྱིས། བདག་གི་ཇོ་བོ་དང་བདག་གི་རྒྱལ་པོ་ཁྱེད་ཀྱིས་གཡོག་མོ་བདག་ལ་ཡང་ཚིག་གཅིག་ཞུ་བར་གནོངས་ཤིག་ཅེས་ཞུས་པ་ལ། རྒྱལ་པོས་སྨྲོས་ཤིག་གསུངས་ཤིང་།  
\v 13 བུད་མེད་ཀྱིས། རྒྱལ་པོ་ཁྱེད་ཀྱིས་དཀོན་མཆོག་གི་འབངས་མི་ལ་གནོད་བསྐྱལ་བའི་ཐུགས་སེམས་དེ་ལྟ་བུ་ཅིའི་ཕྱིར་བཅངས་པ་ཡིན་ནམ། རྒྱལ་པོས་བྲོས་བྱོལ་དུ་ཕྱིན་པ་དེ་ཕྱིར་འོང་དུ་མ་བཅུག་ན། རྒྱལ་པོས་དེ་བཞིན་གསུངས་པ་ནི་རང་ཉིད་ནོར་བར་ར་སྤྲོད་མཛད་པ་ཡིན་ནོ། །  
\v 14 ངེད་ཅག་ཐམས་ཅད་འཆི་བར་ངེས་ཤིང་། དེ་ནི་སར་ཕོ་བའི་ཆུ་སླར་སྡུད་ཐབས་མེད་པ་དང་འདྲའོ། །དཀོན་མཆོག་གིས་མི་ཡི་འཆི་བ་མེད་པར་མི་མཛད་མོད། འོན་ཀྱང་བྲོས་བྱོལ་དུ་ཕྱིན་པ་དེ་ནི་མཐར་བསྐྲད་དེ་ཕྱིར་ལོག་མི་ནུས་པའི་མི་རུ་མི་འགྱུར་བའི་ཕྱིར་ཐབས་མཛད་དོ། །  
\v 15 མི་རྣམས་ཀྱིས་བདག་འཇིགས་སུ་བཅུག་པས། ང་རང་ད་ལྟ་བདག་གི་ཇོ་བོ་དང་བདག་གི་རྒྱལ་པོར་གཏམ་འདི་ཞུ་བར་འོངས་པ་ཡིན། ཁྱེད་ཀྱི་གཡོག་མོས། བདག་གིས་རྒྱལ་པོ་ལ་ཞུས་ན་རྒྱལ་པོས་ཉིད་ཀྱི་གཡོག་མོའི་ཞུ་བ་བཞིན་མཛད་ཀྱང་སྲིད།  
\v 16 མི་ཡིས་བདག་དང་བདག་གི་བུ་གཉིས་མཉམ་དུ་དཀོན་མཆོག་གི་ནོར་སྐལ་ལས་མེད་པར་བྱེད་འདོད་པ་དང་། རྒྱལ་པོས་འདི་གསན་ནས་གཡོག་མོ་བདག་མི་རྣམས་ཀྱི་ལག་ནས་སྐྱོབ་ངེས་ཡིན་སྙམ་པ་དང་།  
\v 17 ཡང་ཁྱེད་ཀྱི་གཡོག་མོས། བདག་གི་ཇོ་བོ་དང་བདག་གི་རྒྱལ་པོའི་གསུང་གིས་ང་ལ་སེམས་གསོ་གནང་བར་ངེས་སྙམ་པ་ཡིན། གང་ལ་ཞེ་ན། བདག་གི་ཇོ་བོ་དང་བདག་གི་རྒྱལ་པོ་ནི་ལེགས་ཉེས་འབྱེད་པའི་ཐད་དཀོན་མཆོག་གི་ཕོ་ཉ་དང་འདྲ་བ་ལགས། ཁྱེད་ཀྱི་དཀོན་མཆོག་ཡ་ཝཱེ་ནི་ཁྱེད་དང་མཉམ་དུ་བཞུགས་པར་ཤོག་ཅེས་ཞུས་པའི་ལན་དུ།  
\v 18 རྒྱལ་པོས་བུད་མེད་དེ་ལ། ངས་ཁྱོད་ལ་ཚིག་གཅིག་འདྲི་བར་བྱ་སྟེ། ཁྱོད་ཀྱིས་གསང་བར་མི་བྱའོ་ཞེས་བསྐུལ་བར། བུད་མེད་ཀྱིས། བདག་གི་ཇོ་བོ་དང་བདག་གི་རྒྱལ་པོས་གསུང་བར་མཛོད་ཅེས་ཞུས་ཤིང་།  
\v 19 རྒྱལ་པོས། འདི་ཐམས་ཅད་ནི་ཡོ་ཨབ་ཀྱིས་ཁྱོད་ལ་བསྟན་པ་མིན་ནམ་ཞེས་དྲིས་པའི་ལན་དུ་བུད་མེད་ཀྱིས། བདག་གིས་རང་གི་ཇོ་བོ་དང་བདག་གི་རྒྱལ་པོའི་མདུན་དུ་མནའ་སྐྱེལ་ཏེ། བདག་གི་ཇོ་བོ་དང་བདག་གི་རྒྱལ་པོས་གནང་བའི་གསུང་ནི་གཡས་གཡོན་གང་དུའང་གཟུར་མེད། དེ་ནི་ཁྱེད་ཀྱི་ཞབས་ཕྱི་ཡོ་ཨབ་ཀྱིས་བདག་ལ་བསྒོས་ཤིང་། ཚིག་འདི་ཐམས་ཅད་ཁོས་གཡོག་མོ་བདག་གི་སྨྲ་སྒོ་རུ་བཞག་པ་ཡིན།  
\v 20 ཁྱེད་ཀྱི་ཞབས་ཕྱི་ཡོ་ཨབ་ཀྱིས་འདི་ལྟར་བྱེད་པ་ནི་གནས་ཚུལ་ཇེ་ལེགས་སུ་གཏོང་བའི་ཆེད་དུ་ཡིན་ཏེ། བདག་གི་ཇོ་བོའི་ཤེས་རབ་ནི་དཀོན་མཆོག་གི་ཕོ་ཉའི་ཤེས་རབ་དང་མཚུངས་ལ། ས་སྟེང་གི་དོན་ཐམས་ཅད་མཁྱེན་ནུས་པའོ་ཞེས་ཞུས་སོ། །  
\v 21 དེར་རྒྱལ་པོས་ཡོ་ཨབ་ལ། ལྟོས་ཤིག ངས་དེ་བཞིན་དུ་གནང་བས། སོང་ལ་ཨབ་ཤཱ་ལོམ་འདི་རུ་འཁྲིད་ཤོག་ཅེས་བསྒོས་པ་དང་།  
\v 22 ཡོ་ཨབ་ཀྱིས་ལུས་སར་བཏུད་ནས་ཕྱག་བཙལ་ཏེ་རྒྱལ་པོའི་ཆེད་དུ་སྨོན་འདུན་ཞུས་ཤིང་འདི་ལྟར། རྒྱལ་པོས་ཞབས་ཕྱི་བདག་གི་ཞུ་བ་བཞིན་དུ་མཛད་པས། བདག་གི་ཇོ་བོ་དང་བདག་གི་རྒྱལ་པོ་ཁྱེད་ཀྱི་སྤྱན་སྔར་ཐུགས་རྗེ་བརྙེད་པ་ཞབས་ཕྱིས་དེ་རིང་མཐོང་བ་ཡིན་ཞེས་ཞུས་ནས།  
\v 23 ཡོ་ཨབ་ཡར་ལངས་ཏེ་གེ་ཤུར་དུ་སོང་ནས་ཨབ་ཤཱ་ལོམ་ཕྱིར་ཡེ་རུ་སཱ་ལེམ་དུ་ཁྲིད་འོངས་ནའང་།  
\v 24 རྒྱལ་པོས་ཁོ་ནི་རང་གི་ཁྱིམ་ལ་འགྲོ་རུ་ཆུག་དང་། ངའི་མཐོང་སར་འོང་མི་རིགས་སོ་ཞེས་བཀའ་བསྩལ་པས། ཨབ་ཤཱ་ལོམ་རང་ཁྱིམ་དུ་སོང་ནས་རྒྱལ་པོ་མཇལ་བར་མ་གྱུར་ཏོ། །   
\s1 དཱ་བིད་ཀྱིས་ཨབ་ཤཱ་ལོམ་གུ་ཡངས་སུ་བཏང་བ།  
\p
\v 25 ཡེས་ར་ཨེལ་ཡུལ་ཐམས་ཅད་དུ་ཨབ་ཤཱ་ལོམ་དང་འདྲ་བའི་སྐྱེས་ཡག་བསྔགས་བརྗོད་བྱ་རུང་བ་གཅིག་ཀྱང་མེད་དེ། དེའི་རྐང་མཐིལ་ནས་སྤྱི་བོའི་བར་དུ་སྐྱོན་གང་ཡང་མེད་པ་ཡིན།  
\v 26 ཁོའི་མགོ་ཡི་སྐྲ་ནི་ཧ་ཅང་ལྗིད་དེ། ལོ་རེའི་མཇུག་ཏུ་སྐྲ་ཐེངས་གཅིག་ལ་འབྲེག་པ་དང་། དེའི་སྐྲ་ཡི་ལྗིད་ཚད་ནི་རྒྱལ་པོའི་རྒྱ་མར་ཚད་ན་སྲང་ཉིས་བརྒྱ་ \f + \ft འདིར་མ་ཕྱི་ལས་ཤེ་ཀེལ་ཉིས་བརྒྱ་ཞེས་མཐོང་ཞིང་དེང་གི་རྒྱ་མ་ལྔ་ཙམ་ཡིན།\f*ཡོད་པ་རེད།  
\v 27 ཨབ་ཤཱ་ལོམ་ལ་བུ་གསུམ་དང་བུ་མོ་གཅིག་སྐྱེས་པ་དང་། བུ་མོའི་མིང་ལ་ཐལ་མཱར་ \f + \ft འདིར་ཐལ་མཱར་ཞེས་འབྱུང་བ་ནི་ཨབ་ཤཱ་ལོམ་གྱི་བུ་མོ་ཡིན་པ་ལས་ཁོའི་སྲིང་མོ་ཐལ་མཱར་མ་ཡིན།\f*ཞེས་བཏགས་ཤིང་དེ་ནི་བུད་མེད་མཛེས་མ་ཞིག་ཡོད་པ་ཡིན།  
\v 28 ཨབ་ཤཱ་ལོམ་ལོ་ཧྲིལ་པོ་གཉིས་ལ་ཡེ་རུ་སཱ་ལེམ་དུ་གནས་ཀྱང་རྒྱལ་པོའི་ཞལ་མ་མཇལ་ལོ། །  
\v 29 དེ་ནས་ཨབ་ཤཱ་ལོམ་གྱིས་ཡོ་ཨབ་རྒྱལ་པོའི་དྲུང་དུ་མངག་ཆེད་བོས་ཀྱང་། ཡོ་ཨབ་མ་འོངས་པ་དང་། ཐེངས་གཉིས་པར་འབོད་དུ་མངགས་ཀྱང་མ་འོངས་པ་རེད།  
\v 30 དེའི་ཕྱིར་ཨབ་ཤཱ་ལོམ་གྱིས་རང་གི་ཞབས་ཕྱི་རྣམས་ལ། ལྟོས་ཤིག ཡོ་ཨབ་ཀྱི་ཞིང་ངའི་ཞིང་གི་འགྲམ་དུ་ཡོད་ཅིང་དེ་རུ་ནས་བཏབ་ཡོད། སོང་ལ་དེ་མེ་རུ་བསྲེག་པར་གྱིས་ཤིག་ཅེས་བསྒོས་པ་དང་། ཨབ་ཤཱ་ལོམ་གྱི་ཞབས་ཕྱི་རྣམས་སོང་ནས་ཞིང་དེ་མེར་བསྲེགས་སོ། །  
\v 31 དེར་ཡོ་ཨབ་ཡར་ལངས་ཏེ་ཨབ་ཤཱ་ལོམ་གྱི་ཁྱིམ་དུ་འོངས་ནས་དེ་ལ། ཁྱེད་ཀྱི་ཞབས་ཕྱི་རྣམས་ཀྱིས་ཅིའི་ཕྱིར་ངའི་ཞིང་བསྲེགས་པ་ཡིན་ཞེས་པའི་ལན་དུ།  
\v 32 ཨབ་ཤཱ་ལོམ་གྱིས་ཡོ་ཨབ་ལ། ལྟོས་དང་། ངས་མི་མངགས་ནས་ཁྱོད་འདིར་བོས་ཏེ། ཁྱོད་རྒྱལ་པོའི་དྲུང་དུ་མངགས་ནས་ཁོང་ལ། བདག་གེ་ཤུར་ནས་ཕྱིར་འོངས་དོན་ཅི་ཡོད། བདག་སྔར་བཞིན་དེ་རུ་གནས་ན་ལེགས་པ་ཡིན་ཞེས་ཞུ་བའི་ཕྱིར་ཡིན། ད་བདག་ལ་རྒྱལ་པོའི་ཞལ་མཇལ་དུ་གནོངས་ཤིག གལ་ཏེ་བདག་ལ་ཉེས་སྐྱོན་ཡོད་ན་ཁོང་གིས་བདག་སྲོག་དང་འཕྲལ་བར་རུང་ངོ་ཞེས་སྨྲས་པས།  
\v 33 ཡོ་ཨབ་རྒྱལ་པོའི་དྲུང་དུ་ཕྱིན་ནས་ཁོང་ལ་ཞུས་པ་དང་རྒྱལ་པོས་ཨབ་ཤཱ་ལོམ་བོས་ཤིང་། དེ་རྒྱལ་པོའི་དྲུང་དུ་འོངས་ནས་ལུས་སར་བཏུད་ཅིང་རྒྱལ་པོས་ཁོ་ལ་འོ་བྱས་སོ། །   
\c 15
\cl ལེའུ་བཅོ་ལྔ་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 ཨབ་ཤཱ་ལོམ་གྱིས་ལྐོག་ནས་རྒྱལ་པོར་ངོ་རྒོལ་བྱས་པ།  
\p
\v 1 དེའི་རྗེས་སུ་ཨབ་ཤཱ་ལོམ་གྱིས་རང་གི་དོན་དུ་ཤིང་རྟ་དང་རྟ་རྣམས་གྲ་སྒྲིག་བྱས་ཤིང་། ཡང་མི་ལྔ་བཅུ་མངགས་ཏེ་ཁོའི་མདུན་ནས་རྒྱུག་ཏུ་བཅུག  
\v 2 ཨབ་ཤཱ་ལོམ་དུས་རྒྱུན་ནངས་སྔ་མོ་ཡར་ལངས་ནས་མཁར་སྒོའི་ལམ་འགྲམ་དུ་ལངས་བསྡད་ཅིང་། ཡང་སུ་དང་སུ་ཞིག་རྩོད་གཞི་ལ་ཁྲིམས་ཐག་གཅོད་པའི་ཕྱིར་རྒྱལ་པོའི་དྲུང་དུ་འོང་སྐབས་སུ། ཨབ་ཤཱ་ལོམ་གྱིས་མི་དེ་བོས་ནས་དེ་ལ། ཁྱོད་རང་གྲོང་ཁྱེར་གང་ནས་ཡིན་ཞེས་འདྲི་ཞིང་། མི་དེས། ཞབས་ཕྱི་བདག་ནི་ཡེས་ར་ཨེལ་གྱི་ཚོ་པ་ག་གེ་མོའི་ཡིན་ཞེས་ཞུ་བ་དང་།  
\v 3 ཨབ་ཤཱ་ལོམ་གྱིས་དེ་ལ། ལྟོས་དང་། ཁྱོད་ཀྱི་གྱོད་དོན་ནི་ལེགས་ཤིང་ལུགས་དང་མཐུན་མོད་ཀྱང་། རྒྱལ་པོས་ཁྱོད་ཀྱི་ཚིག་ལ་མཉན་པར་མི་གང་ཡང་མ་མངགས་པས་ཕངས་པ་ལ་ཞེས་དང་།  
\v 4 ཡང་ཨབ་ཤཱ་ལོམ་ན་རེ། གལ་ཏེ་ང་རང་ཡུལ་འདིའི་ཁྲིམས་དཔོན་ཡིན་ན་ཅི་མ་རུང་། དེ་ནས་རྩོད་གཞི་ཡོད་པ་ཐམས་ཅད་ངའི་རྩར་སླེབས་ན། ངས་དྲང་གཞག་ངང་ཁྲིམས་ཐག་གཅོད་པར་བྱ་ཞེས་སྨྲའོ། །  
\v 5 ཡང་གལ་ཏེ་སུ་ཞིག་ཨབ་ཤཱ་ལོམ་ལ་ཕྱག་བཙལ་དུ་ཉེ་བར་འོང་སྐབས་སུ། ཁོས་ལག་པ་བརྐྱངས་ནས་མི་དེའི་ལག་པར་འཇུས་ནས་འོ་བྱེད་པའོ། །  
\v 6 ཨབ་ཤཱ་ལོམ་གྱིས་རྒྱལ་པོའི་དྲུང་དུ་གཏུག་བཤེར་ལ་འོང་བའི་ཡེས་ར་ཨེལ་པ་ཐམས་ཅད་ལ་དེ་ལྟར་བྱས་ནས་ཡེས་ར་ཨེལ་པ་ཐམས་ཅད་ཀྱི་སེམས་ཕྲོགས་པ་རེད།  
\v 7 དེ་ནས་ལོ་བཞི་\f + \ft ལོ་བཞི་ཞེས་པར་མ་ཕྱི་ལས་ལོ་བཞི་བཅུ་ཞེས་དང་གནའ་ཡིག་ལ་ལར་ཉིན་བཞི་བཅུ་ཞེས་བཀོད་ཡོད།\f*འགོར་རྗེས་ཨབ་ཤཱ་ལོམ་གྱིས་རྒྱལ་པོ་ལ། བདག་གིས་དཀོན་མཆོག་ཡ་ཝཱེ་ལ་ཁས་བླངས་པ་བཞིན་དུ་བསྒྲུབ་པའི་ཕྱིར་བདག་ཧེབ་རོན་དུ་འགྲོ་བར་གནོངས་ཤིག  
\v 8 ཞབས་ཕྱི་བདག་ཨ་རམ་ཡུལ་གྱི་གེ་ཤུར་དུ་གནས་པའི་དུས་སུ། བདག་གིས་འདི་ལྟར་དམ་བཅའ་བཞག་པ་སྟེ། གལ་ཏེ་དཀོན་མཆོག་ཡ་ཝཱེས་བདག་ཕྱིར་ཡེ་རུ་སཱ་ལེམ་དུ་བསྐྱལ་ན། བདག་གིས་དཀོན་མཆོག་ཡ་ཝཱེ་ལ་ཞབས་ཕྱི་བསྒྲུབ་པར་བྱ་ཞེས་ཞུས་པར།  
\v 9 རྒྱལ་པོས་དེ་ལ། བདེ་བར་སོང་ཞིག་གསུངས་པ་དང་ཁོ་ལངས་ནས་ལམ་ལ་ཆས་ཏེ་ཧེབ་རོན་དུ་སོང་ངོ་། །  
\v 10 དེ་ནས་ཨབ་ཤཱ་ལོམ་གྱིས་ཡེས་ར་ཨེལ་གྱི་ཚོ་པ་ཐམས་ཅད་དུ་གསང་ཉུལ་པ་རྣམས་བཏང་སྟེ་འདི་ལྟར། དུས་ནམ་ཞིག་ལ་ཁྱོད་ཚོས་རྭ་དུང་གི་སྒྲ་ཐོས་ན། ཨབ་ཤཱ་ལོམ་གྱིས་ཧེབ་རོན་དུ་རྒྱལ་སྲིད་སྐྱོང་ངོ་ཞེས་སྨྲ་བར་རིགས་ཞེས་བསྒྲགས་སོ། །  
\v 11 ཨབ་ཤཱ་ལོམ་གྱིས་ཡེ་རུ་སཱ་ལེམ་ནས་མི་ཉིས་བརྒྱ་རང་དང་མཉམ་དུ་ཁྲིད་ནས་ཕྱིན་ཏེ། དེ་དག་ནི་ལྷག་བསམ་རྣམ་དག་ཡིན་ཏེ་ཅི་ཡང་མི་ཤེས་སོ། །  
\v 12 དེ་ནས་ཨབ་ཤཱ་ལོམ་གྱིས་མཆོད་པ་འབུལ་སྐབས་སུ། མི་མངགས་ཏེ་དཱ་བིད་ཀྱི་བློ་འདོན་མཁན་གེ་ལོ་པ་ཨ་ཧི་ཐོ་ཕེལ་བོས་འོངས་པ་དང་། ཨབ་ཤཱ་ལོམ་གྱི་རྗེས་སུ་འབྲང་མཁན་ཉིན་རེ་བཞིན་འཕེལ་ཏེ་གྱེན་ལོག་གི་ཤུགས་ཆེ་རུ་སོང་ངོ་། །   
\s1 དཱ་བིད་ཡེ་རུ་སཱ་ལེམ་ནས་བྲོས་པ།  
\p
\v 13 ཡང་མི་ཞིག་དཱ་བིད་ཀྱི་དྲུང་དུ་སླེབས་ནས་ཁོང་ལ། ཡེས་ར་ཨེལ་པ་ཐམས་ཅད་ཀྱི་སེམས་ཨབ་ཤཱ་ལོམ་གྱི་ཕྱོགས་སུ་འཁོར་འདུག་ཅེས་ཞུས་པ་ལ།  
\v 14 དཱ་བིད་ཀྱིས་ཡེ་རུ་སཱ་ལེམ་དུ་ཁོང་དང་ལྷན་ཅིག་ཏུ་ཡོད་པའི་བློན་འཁོར་ཐམས་ཅད་ལ། ལོངས་དང་འབྲོའོ། །མ་བྲོས་ན་བདག་ཅག་ཨབ་ཤཱ་ལོམ་གྱི་ལག་ནས་ཐར་ཐབས་མེད། ཁོ་མྱུར་དུ་འོངས་ནས་བདག་ཅག་བཟུང་སྟེ་གནོད་འཚེ་བཏང་ནས། གྲོང་ཁྱེར་ནང་གི་མི་རྣམས་རལ་གྲིས་མི་གསོད་པའི་ཕྱིར་འཕྲལ་དུ་འབྲལ་བར་གྱིས་ཤིག་ཅེས་སྨྲས་ཤིང་།  
\v 15 རྒྱལ་པོའི་བློན་འཁོར་རྣམས་ཀྱིས་རྒྱལ་པོ་ལ། གཟིགས་དང་། ཁྱེད་ཀྱི་ཞབས་ཕྱི་རྣམས་ཀྱིས་ཇོ་བོ་རྒྱལ་པོས་ཅི་ལྟར་ཐུགས་ཐག་བཅད་ན་དེ་བཞིན་བྱའོ་ཞེས་ཞུས་སོ། །  
\v 16 དེ་ནས་རྒྱལ་པོ་ཕྱི་རོལ་ཏུ་ཕྱིན་པ་དང་། ཁོང་གི་ཁྱིམ་མི་ཐམས་ཅད་ཁོང་གི་རྗེས་སུ་འབྲངས་སོ། །ཡང་རྒྱལ་པོས་ཆུན་མ་བཅུ་ནི་ཕོ་བྲང་བསྲུང་བར་དེ་རུ་བཞག་གོ །  
\v 17 རྒྱལ་པོ་ཕྱི་རོལ་ཏུ་ཕྱིན་པ་དང་། མི་ཐམས་ཅད་ཀྱང་ཁོང་གི་རྗེས་སུ་འབྲངས་ཏེ་ཆེས་མཇུག་གི་ཁང་པར་སླེབས་ནས་དེར་ཡུད་ཙམ་བསྡད་པ་དང་།  
\v 18 རྒྱལ་པོའི་བློན་འཁོར་ཐམས་ཅད་ཁོང་གི་མདུན་ནས་ཕར་ཕྱིན་པ་དང་། ཡང་ཀེ་རེད་པ་དང་། ཕེ་ལེད་པ་ཐམས་ཅད་དང་། གཱད་ནས་རྒྱལ་པོའི་རྗེས་སུ་འོངས་པའི་གཱད་པ་མི་དྲུག་བརྒྱ་བཅས་ཐམས་ཅད་རྒྱལ་པོའི་མདུན་ནས་ཕར་ཕྱིན་ཏོ། །  
\v 19 རྒྱལ་པོས་གཱད་པ་ཨིད་ཏ་ཨི་བྱ་བ་ལ། ཁྱོད་ནི་ཕྱི་ཕྱོགས་པ་ཞིག་དང་རང་ཡུལ་ནས་བྲོས་འོངས་པ་ཡིན་པས་ངེད་རྣམས་དང་མཉམ་དུ་ཅིའི་ཕྱིར་འགྲོའམ། ཁྱོད་རང་ཕྱིར་ལོག་ནས་རྒྱལ་པོ་གསར་པ་དང་མཉམ་དུ་སྡོད་ཅིག  
\v 20 ཁྱོད་ནི་ཁ་སང་འདིར་སླེབས་ཤིང་། དེ་རིང་ངས་ཁྱོད་ངེད་རྣམས་དང་མཉམ་དུ་ཡུལ་འཁྱམ་དུ་འཇུག་ག་ལ་རུང་། ང་ནི་ག་ས་གང་དུ་འཁྱམ་པར་འགྱུར་རོ། །ཁྱོད་རང་ཕྱིར་ལོག་ཅིག རང་གི་སྤུན་རྣམས་ཁྲིད་ནས་ཕྱིར་ལོག་ཅིག གཙོ་བོས་བྱམས་བརྩེ་དང་དྲང་བདེན་ངང་ཁྱོད་རང་སྐྱོང་བར་ཤོག་ཅེས་གསུངས་པ་ལ།  
\v 21 ཨིད་ཏ་ཨི་ཡིས་ལན་དུ་རྒྱལ་པོ་ལ། བདག་གིས་གཏན་དུ་བཞུགས་པའི་དཀོན་མཆོག་ཡ་ཝཱེ་དཔང་དུ་བཙུགས་ནས་རྒྱལ་པོའི་དྲུང་དུ་མནའ་བསྐྱལ་བ་ཡིན་ཏེ། འཆི་གསོན་གང་ལ་ཐུག་ནའང་། ངའི་ཇོ་བོ་དང་ངའི་རྒྱལ་པོ་ཁྱེད་ཉིད་གང་དུ་བཞུགས་ན་ཁྱེད་ཀྱི་ཞབས་ཕྱི་ཡང་དེར་འདུག་པར་དགའོ་ཞེས་ཞུས་པས།  
\v 22 དཱ་བིད་ཀྱིས་ཨིད་ཏ་ཨི་ལ། ཕ་རོལ་ཏུ་སོང་ཞིག་གསུངས་ནས། གཱད་པ་ཨིད་ཏ་ཨི་ཡིས་རང་གི་རྗེས་སུ་འབྲང་བའི་མི་དང་བྱིས་པ་ཐམས་ཅད་ཁྲིད་ནས་ཕར་ཕྱིན་ཏོ། །  
\v 23 ཡང་འབངས་མི་ཐམས་ཅད་ཕར་འགྲོ་བའི་དུས་སུ། ཡུལ་མི་ཐམས་ཅད་སྐད་ཆེན་པོས་ངུས་ཤིང་། ཡང་རྒྱལ་པོ་ཉིད་ཀྱང་ཀིད་རོན་གྲོག་མོ་བརྒལ་ནས་ཕེབས་པ་དང་། མི་ཐམས་ཅད་དབེན་སྟོང་གི་ལམ་དུ་ཆས་པ་རེད།  
\v 24 ཡང་ལྟོས་དང་། ཟཱ་ཏོག་དང་དཀོན་མཆོག་གི་ཞལ་ཆད་ཀྱི་ཤུར་སྒམ་འཁུར་མཁན་ལེ་ཝི་པ་ཐམས་ཅད་དེ་རུ་འོངས་པ་དང་། དེ་དག་གིས་དཀོན་མཆོག་གི་ཞལ་ཆད་ཀྱི་ཤུར་སྒམ་གནས་དེར་བཞག ཨབ་ཡཱ་ཐར་ཡང་ཡར་འོངས་ནས་མི་ཐམས་ཅད་རྒྱལ་ས་ནས་ཐོན་ཏེ་ཕར་ཕྱིན་པའི་བར་དུ་དེར་བཞུགས་སོ། །  
\v 25 དེར་རྒྱལ་པོས་ཟཱ་ཏོག་ལ། དཀོན་མཆོག་གི་ཞལ་ཆད་ཀྱི་ཤུར་སྒམ་དེ་སླར་རྒྱལ་ས་རུ་འཁྱེར་ཞིག གལ་ཏེ་དཀོན་མཆོག་ཡ་ཝཱེའི་སྤྱན་སྔར་བདག་ལ་ཐུགས་རྗེ་ཐོབ་ན། ཁོང་གིས་བདག་ཕྱིར་ལོག་པར་མཛད་ཅིང་། ཞལ་ཆད་ཀྱི་ཤུར་སྒམ་དང་ཁོང་གི་བཞུགས་གནས་ཀྱང་བདག་གིས་སླར་ཡང་མཇལ་བར་འགྱུར་རོ། །  
\v 26 གལ་ཏེ་ཁོང་གིས། ང་ཁྱོད་ལ་མི་དགའ་ཞེས་གསུངས་ན། ཀྱེ་ཧོ། ང་རང་འདི་རུ་ཡོད་དེ། ཁོང་གི་སྤྱན་སྔར་གང་ལེགས་པར་གཟིགས་པ་བཞིན་བདག་ལ་མཛོད་ཅིག་ཅེས་ཞུས་སོ། །  
\v 27 ཡང་རྒྱལ་པོས་མཆོད་དཔོན་ཟཱ་ཏོག་ལ། ཁྱེད་ནི་མངོན་ཤེས་པ་ཞིག་མིན་ནམ། བདེ་བར་རྒྱལ་ས་རུ་ལོག་ཅིག ཡང་ཁྱོད་ཀྱི་བུ་ཨ་ཧི་མཱ་ཨ་སི་དང་། ཨབ་ཡཱ་ཐར་གྱི་བུ་ཡོ་ནཱ་ཐན། ཁྱོད་གཉིས་ཀྱི་བུ་དེ་གཉིས་ཁྱོད་རྣམས་དང་མཉམ་དུ་ཕྱིར་སོང་ཞིག  
\v 28 ལྟོས་དང་། ཁྱོད་ཅག་གིས་ང་ལ་ལན་བསྐུར་བའི་བར་དུ་ངས་དབེན་སྟོང་གི་རབ་ཁ་རུ་སྒུག་པར་བྱའོ་ཞེས་བསྐུལ་བས།  
\v 29 ཟཱ་ཏོག་དང་ཨབ་ཡཱ་ཐར་གཉིས་ཀྱིས་དཀོན་མཆོག་གི་ཞལ་ཆད་ཀྱི་ཤུར་སྒམ་དེ་ཕྱིར་ཡེ་རུ་སཱ་ལེམ་དུ་གདན་དྲངས་ནས་དེར་བསྡད་དོ། །  
\v 30 དེ་ནས་དཱ་བིད་དབུ་བཏུམས་ནས་ཞབས་རྗེན་པར་སྐྱུ་རུ་རའི་རི་བོར་འགོས་ཤིང་། སྤྱན་ཆབ་བསིལ་བཞིན་འགྲུལ་པ་དང་། ཁོང་གི་རྗེས་སུ་འབྲངས་པའི་མི་ཀུན་གྱིས་ཀྱང་མགོ་བཏུམས་ནས་ངུ་བཞིན་ཡར་འགོས་སོ། །  
\v 31 ཡང་མི་ཞིག་གིས་དཱ་བིད་ལ། ཨ་ཧི་ཐོ་ཕེལ་ཡང་འབངས་གྱེན་ལོག་བྱེད་མཁན་མཉམ་དུ་ཨབ་ཤཱ་ལོམ་གྱི་རྗེས་སུ་འབྲང་ཡོད་ཅེས་ཞུས་པར། དཱ་བིད་ན་རེ། ཀྱེ་དཀོན་མཆོག་ཡ་ཝཱེ་ལགས། ཁྱེད་ཀྱིས་ཨ་ཧི་ཐོ་ཕེལ་གྱི་གྲོས་དེ་ནི་བླུན་གྲོས་སུ་འགྱུར་བར་མཛོད་ཅིག་ཅེས་གསོལ་ཏོ། །  
\v 32 དེ་ནས་དཱ་བིད་དཀོན་མཆོག་ལ་ཕྱག་འཚལ་ཡུལ་རི་མགོར་སླེབས་པ་ཙམ་གྱིས། ལྟོས་དང་། ཨ་རག་པ་ཧུ་ཤཱ་ཨི་ནི་གྱོན་གོས་གཤགས་ནས་མགོ་ལ་ས་རྡུལ་གཡོགས་ཏེ་ཁོང་བསུ་བར་འོངས་པ་དང་།  
\v 33 དཱ་བིད་ཀྱིས་དེ་ལ། ཁྱོད་ང་དང་མཉམ་དུ་སོང་ཚེ་ང་ལ་དཀའ་ལས་བཟོ་ངེས་ཡིན།  
\v 34 ཁྱོད་རྒྱལ་ས་རུ་སོང་སྟེ་ཨབ་ཤཱ་ལོམ་ལ། ཀྱེ་རྒྱལ་པོ་ལགས། བདག་ནི་ཁྱེད་ཀྱི་ཞབས་ཕྱི་ཡིན། ང་རང་ཇི་ལྟར་ཁྱེད་ཀྱི་ཡབ་ཀྱི་ཞབས་ཕྱི་ཡིན་པ་བཞིན་ད་ལྟ་ཁྱེད་ཀྱི་ཞབས་ཕྱི་ཡིན་ཞེས་སྨྲས་ན། ཁྱེད་ཀྱིས་ངའི་དོན་དུ་ཨ་ཧི་ཐོ་ཕེལ་གྱི་གྲོས་ངན་བཟློག་སྲིད་དོ། །  
\v 35 ཟཱ་ཏོག་དང་ཨབ་ཡཱ་ཐར་མཆོད་དཔོན་གཉིས་ནི་ཁྱོད་དང་མཉམ་དུ་ཡོད་པ་མ་ཡིན་ནམ། ཁྱོད་ཀྱིས་རྒྱལ་པོའི་ཕོ་བྲང་ནས་ཅི་ཐོས་པ་དེ་མཆོད་དཔོན་ཟཱ་ཏོག་དང་ཨབ་ཡཱ་ཐར་གཉིས་ལ་འཆད་དགོས།  
\v 36 ལྟོས་དང་། ཟཱ་ཏོག་གི་བུ་ཨ་ཧི་མཱ་ཨ་སི་དང་། ཨབ་ཡཱ་ཐར་གྱི་བུ་ཡོ་ནཱ་ཐན་གཉིས་ཀྱང་ཁོང་རྣམས་མཉམ་དུ་ཡོད་པས། ཁྱོད་ཀྱིས་ཅི་ཐོས་པ་དེ་དག་བརྒྱུད་ནས་ང་ལ་འཕྲིན་བསྐུར་ཞིག་ཅེས་གདམས་པས།  
\v 37 དཱ་བིད་ཀྱི་མཛའ་བོ་ཧུ་ཤཱ་ཨི་རྒྱལ་ས་རུ་ཕྱིན་པ་དང་། ཨབ་ཤཱ་ལོམ་ཡང་ཡེ་རུ་སཱ་ལེམ་དུ་སླེབས་སོ། །   
\c 16
\cl ལེའུ་བཅུ་དྲུག་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 དཱ་བིད་དང་ཙི་བཱ།  
\p
\v 1 དཱ་བིད་རི་རྩེ་ལས་བརྒལ་བའི་ཚེ། ལྟོས་དང་། མེ་ཕི་པོ་ཤེད་ཀྱི་གཡོག་པོ་ཙི་བཱ་ཡིས་སྒ་གཏད་པའི་བོང་བུ་གཉིས་ཁྲིད་ནས་དེ་ལ་བག་ལེབ་ཉིས་བརྒྱ་དང་། རྒུན་འབྲུམ་སྐམ་པོ་ལེབ་མོ་བརྒྱ་དང་ཤིང་འབྲས་ལེབ་མོ་བརྒྱ་དང་། རྒུན་ཆང་རྐྱལ་བ་གང་བཅས་བཀལ་ནས་ཁོང་ཉིད་བསུ་བར་འོངས་སོ། །  
\v 2 དེར་རྒྱལ་པོས་ཙི་བཱ་ལ། འདི་དག་ཅི་ཡིན་ལགས་ཞེས་དྲིས་པའི་ལན་དུ་ཙི་བཱ་ན་རེ། བོང་བུ་ནི་རྒྱལ་པོའི་ཁྱིམ་མི་རྣམས་ཀྱི་ཞོན་པ་ཡིན་ལ། བག་ལེབ་དང་ཤིང་འབྲས་ལེབ་མོ་རྣམས་ནི་གཞོན་ནུ་རྣམས་ཀྱི་ཁ་ཟས་དང་། རྒུན་ཆང་ནི་དབེན་སྟོང་དུ་ཐང་ཆད་པ་རྣམས་ཀྱི་བཏུང་བྱ་ཡིན་ཞུས་པ་དང་།  
\v 3 རྒྱལ་པོས་དེ་ལ། ཁྱོད་ཀྱི་ཇོ་བོའི་བུ་གང་དུ་ཡོད་དམ་ཞེས་དྲིས་པར། ཁོ་ན་རེ། གཟིགས་དང་། ཁོང་གིས་དེ་རིང་ཉིན་མོར་ཡེས་ར་ཨེལ་གྱི་ཁྱིམ་རྒྱུད་ཀྱིས་ངའི་ཡབ་ཀྱི་རྒྱལ་སྲིད་ང་ལ་སླར་སྦྱིན་པར་བྱ་ཞེས་གསུངས་པས། ཁོང་ཉིད་ཡེ་རུ་སཱ་ལེམ་དུ་བཞུགས་པ་ཡིན་ཞེས་ཞུས་ཤིང་།  
\v 4 རྒྱལ་པོས་ཙི་བཱ་ལ། ལྟོས་ཤིག མེ་ཕི་པོ་ཤེད་ལ་ཡོད་པ་ཐམས་ཅད་ཁྱོད་ལ་དབང་བར་འགྱུར་རོ་ཞེས་གསུངས་ཤིང་། ཙི་བཱ་ཡིས། ངས་བདག་གི་ཇོ་བོ་དང་བདག་གི་རྒྱལ་པོ་ལ་གུས་ཕྱག་ཕུལ་ཏེ། ཁྱེད་ཀྱི་དྲུང་དུ་བདག་ལ་ཐུགས་རྗེ་འཐོབ་པར་ཤོག་ཅེས་ཞུས་སོ། །   
\s1 དཱ་བིད་དང་ཤིམ་ཨི།  
\p
\v 5 དེ་ནས་རྒྱལ་པོ་དཱ་བིད་པཱ་ཧུ་རིམ་དུ་ཕེབས་པའི་ཚེ་ན། སོ་ལོའི་ཁྱིམ་མི་ནང་གི་གེ་རཱ་ཡི་བུ་ཤིམ་ཨི་བྱ་བ་དེ་དམོད་མོ་འདེབས་ཀྱིན་ཐོན་ཏེ།  
\v 6 རྒྱལ་པོ་དཱ་བིད་དང་ཁོང་གི་བློན་འཁོར་ཀུན་ལ་རྡོས་བརྒྱབ་ཅིང་། འབངས་རྣམས་དང་དཔའ་བོ་ཐམས་ཅད་ཁོང་གི་གཡས་གཡོན་དུ་ཡོད་པ་ཡིན།  
\v 7 ཤིམ་ཨི་ཡིས་དམོད་མོ་བཏབ་ནས་འདི་ལྟར། ཁྲག་གིས་ཚོས་པ་ཁྱོད། ཁྲེལ་མེད་ཁྱོད། མར་སོང་ཞིག མར་སོང་ཞིག  
\v 8 ཁྱོད་ཀྱིས་སོ་ལོ་ཁྱིམ་མི་གང་པོ་བཀྲོངས་ཏེ་ཁོང་གི་རྒྱུན་མཐུད་ནས་རྒྱལ་པོར་གྱུར་པ་དང་། དཀོན་མཆོག་ཡ་ཝཱེས་སྡིག་པ་དེ་ཁྱོད་ཀྱི་སྟེང་ལ་བཀལ་ཞིང་། ཁྱོད་ཀྱི་རྒྱལ་སྲིད་ཁྱོད་ཀྱི་བུ་ཨབ་ཤཱ་ལོམ་གྱི་ལག་ཏུ་གཏད་དོ། །ལྟོས་དང་། ཁྱོད་ནི་ལག་དམར་ཡིན་པས་རང་སྡུག་རང་གིས་ཉོས་པ་ཡིན་ཞེས་སྨྲས་སོ། །  
\v 9 ཟེ་རུ་ཡཱ་ཡི་བུ་ཨ་བི་ཤཱ་ཨི་ཡིས་རྒྱལ་པོ་ལ། ཁྱི་ཤི་རོ་འདིས་བདག་གི་ཇོ་བོ་དང་བདག་གི་རྒྱལ་པོ་ལ་ཅིའི་ཕྱིར་དམོད་མོ་འདེབས་སམ། བདག་ཕར་སོང་ནས་ཁོའི་མགོ་ལེན་པར་གནང་རོགས་ཞེས་ཞུས་པ་ལ།  
\v 10 རྒྱལ་པོས། ཀྱེ་ཟེ་རུ་ཡཱ་ཡི་བུ། ང་རང་ཁྱོད་དང་འབྲེལ་བ་ཅི་ཡོད་དམ། དཀོན་མཆོག་ཡ་ཝཱེས་དེ་ལ། དཱ་བིད་ལ་དམོད་མོ་ཐོབས་ཤིག་ཅེས་གསུངས་པས་ཁོས་འདི་ལྟར་དམོད་པ་ཡིན་ལ། དེས་ན་སུ་ཞིག་གིས་ཁོ་ལ། ཁྱོད་ཀྱིས་འདི་ལྟར་བྱེད་པ་ཅི་ཡིན་ཟེར་ཐུབ་བམ་ཞེས་གསུངས་སོ། །  
\v 11 ཡང་དཱ་བིད་ཀྱིས་ཨ་བི་ཤཱ་ཨི་དང་ཉིད་ཀྱི་བློན་འཁོར་ཐམས་ཅད་ལ། ལྟོས་ཤིག ང་རང་གི་བུ་ཡང་ངའི་སྲོག་ལ་རྔམ་པས། པེན་ཡཱ་མེན་པ་འདི་ནི་ལྟ་ཅི་སྨོས། དཀོན་མཆོག་ཡ་ཝཱེས་ཁོ་ལ་བཀའ་བསྩལ་པས་དེར་དམོད་མོ་འདེབས་ན་འདེབས་སུ་ཆུག་དང་།  
\v 12 དཀོན་མཆོག་ཡ་ཝཱེས་ངའི་སྡུག་བསྔལ་གཟིགས་ཤིང་། དེ་རིང་ཉིན་མོར་མི་འདིས་དམོད་མོ་བཏབ་པའི་རྐྱེན་གྱིས་ང་ལ་ཐུགས་རྗེས་གཟིགས་ཀྱང་སྲིད་ཅེས་གསུངས་སོ། །  
\v 13 ཡང་དཱ་བིད་དང་ཁོང་གི་མི་རྣམས་ལམ་ནས་འགྲུལ་བ་དང་། ཤིམ་ཨི་ནི་དཱ་བིད་དང་ཁ་གཏད་ཀྱི་རི་ངོར་སྐྱོད་ཅིང་། འགྲོ་ཞོར་དུ་དམོད་མོ་བཏབ་པ་དང་། ཡང་ཁོང་ལ་རྡོ་ཡིས་བརྒྱབ་ནས་ས་རྡུལ་འཕྱར།  
\v 14 རྒྱལ་པོ་དང་ཁོང་གི་རྗེས་སུ་འབྲངས་པའི་མི་ཐམས་ཅད་དེར་སླེབས་ནས་ཐང་ཆད་དེ་ངལ་གསོས་སོ། །   
\s1 ཨབ་ཤཱ་ལོམ་ཡེ་རུ་སཱ་ལེམ་དུ་གནས་པ།  
\p
\v 15 དེ་ནས་ཨབ་ཤཱ་ལོམ་དང་ཡེས་ར་ཨེལ་གྱི་མི་ཐམས་ཅད་ཡེ་རུ་སཱ་ལེམ་དུ་ཕྱིན་ཏེ། ཨ་ཧི་ཐོ་ཕེལ་ཡང་དེ་དང་མཉམ་དུ་ཡོད་པ་ཡིན།  
\v 16 ཡང་དཱ་བིད་ཀྱི་མཛའ་བོ་ཨ་རག་པ་ཧུ་ཤཱ་ཨི་བྱ་བ་དེ་ཨབ་ཤཱ་ལོམ་གྱི་དྲུང་དུ་སོང་ནས་དེ་ལ། རྒྱལ་པོ་སྐུ་ཚེ་བརྟན་པར་ཤོག རྒྱལ་པོ་སྐུ་ཚེ་བརྟན་པར་ཤོག་ཅེས་ཞུས་པར།  
\v 17 ཨབ་ཤཱ་ལོམ་གྱིས་ཧུ་ཤཱ་ཨི་ལ། ཁྱོད་ཀྱིས་འདི་ལྟར་བྱེད་པ་ནི་གཞུང་དྲང་ངང་རང་གི་མཛའ་བོ་དྲིན་གྱིས་སྐྱོང་བ་ཡིན་ནམ། ཁྱོད་རང་ཅིའི་ཕྱིར་རང་གི་མཛའ་བོ་མཉམ་དུ་མ་སོང་ངམ་ཞེས་དྲིས་ཤིང་།  
\v 18 ཧུ་ཤཱ་ཨི་ཡིས་ཨབ་ཤཱ་ལོམ་ལ། དེ་བཞིན་མ་ཡིན། དཀོན་མཆོག་ཡ་ཝཱེ་དང་མི་རྣམས་དང་། ཡེས་ར་ཨེལ་པ་ཡོངས་ཀྱིས་སུ་ཞིག་བདམས་པར་མཛད་ན། བདག་ནི་ཁོང་ལ་གཏོགས་ཤིང་ཁོང་དང་མཉམ་དུ་གནས་པར་འགྱུར།  
\v 19 དེར་མ་ཟད། བདག་གིས་སུ་ལ་ཞབས་ཏོག་བསྒྲུབ་འོས་སམ། རྒྱལ་རབས་སྔོན་མའི་སྲས་མ་ཡིན་ནམ། བདག་གིས་ཇི་ལྟར་ཁྱེད་ཀྱི་ཡབ་ལ་ཞབས་ཏོག་བསྒྲུབས་པ་ཡིན་ན་ཁྱེད་ཀྱི་སྐུ་དྲུང་དུའང་དེ་བཞིན་བྱའོ་ཞེས་ཞུས་སོ། །  
\v 20 ཨབ་ཤཱ་ལོམ་གྱིས་ཨ་ཧི་ཐོ་ཕེལ་ལ། ད་བདག་ཅག་གིས་གང་འདྲ་བྱེད་དགོས་སམ། ཁྱོད་རྣམས་ཀྱིས་བློ་བཀོད་བཏོན་ཞིག་ཅེས་བསྒོས་པ་ལ།  
\v 21 ཨ་ཧི་ཐོ་ཕེལ་གྱིས་ཨབ་ཤཱ་ལོམ་ལ། ཁྱེད་ཀྱི་ཡབ་ཀྱིས་ཕོ་བྲང་བསྲུང་བར་བཞག་པའི་ཆུན་མ་རྣམས་ཀྱི་གམ་དུ་ཕྱིན་དང་། ཁྱེད་ཀྱིས་རང་གི་ཡབ་ཀྱང་རང་ལ་ཞེན་ཁ་ལོག་ཏུ་འཇུག་ཕོད་པ་དེ་ཡེས་ར་ཨེལ་པ་ཐམས་ཅད་ཀྱིས་ཐོས་ན། ཁྱེད་ཀྱི་རྗེས་སུ་འབྲང་བ་ཐམས་ཅད་ཀྱི་སྟོབས་ཤུགས་ཆེ་བར་འགྱུར་འགྲོ་ཞེས་སྨྲས་ནས།  
\v 22 དེ་དག་གིས་ཕོ་བྲང་གི་སྟེང་དུ་ཨབ་ཤཱ་ལོམ་གྱི་ཕྱིར་གུར་ཕུབ་ཅིང་། ཁོ་ཡེས་ར་ཨེལ་པ་ཐམས་ཅད་ཀྱི་མཐོང་ས་རུ་རང་གི་ཡབ་ཀྱི་ཆུན་མ་རྣམས་ཀྱི་གམ་དུ་སོང་ངོ་། །  
\v 23 དེའི་དུས་སུ་ཨ་ཧི་ཐོ་ཕེལ་གྱིས་བཏོན་པའི་བློ་བཀོད་ནི། མི་ཡིས་དཀོན་མཆོག་ལ་ཐུགས་བརྟག་ཞུས་ནས་ཐོབ་པའི་བཀའ་བཞིན་སྣང་བ་ཡིན་ལ། ཁོས་དཱ་བིད་དང་ཨབ་ཤཱ་ལོམ་གཉིས་ལ་བཏོན་པའི་བློ་བཀོད་ཐམས་ཅད་དེ་བཞིན་ཡིན་ནོ། །   
\c 17
\cl ལེའུ་བཅུ་བདུན་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 ཧུ་ཤཱ་ཨི་ཡིས་ཨ་ཧི་ཐོ་ཕེལ་གྱི་ཐབས་ཇུས་ལ་གཏོར་བརླག་བྱས་པ།  
\p
\v 1 ཡང་ཨ་ཧི་ཐོ་ཕེལ་གྱིས་ཨབ་ཤཱ་ལོམ་ལ། བདག་ལ་མི་ཆིག་ཁྲི་ཉིས་སྟོང་གདམ་གསེས་བྱེད་པར་གནོངས་ཤིག དོ་དགོང་ལངས་ནས་དཱ་བིད་ཀྱི་ར་མདར་རྒྱུག་པར་བྱ།  
\v 2 ཁོ་རང་ཉམ་ཐག་ནས་སྟོབས་ཞན་པའི་དུས་སུ། བདག་ཁོའི་རྗེས་ཆོད་ནས་ཁོ་སྐྲག་པར་བྱ། ཁོ་དང་མཉམ་དུ་ཡོད་པའི་མི་ཐམས་ཅད་འབྲོ་ངེས་ཤིང་། བདག་གིས་རྒྱལ་པོ་འབའ་ཞིག་གསོད་པར་བྱའོ། །  
\v 3 ཡང་བདག་གིས་མི་ཐམས་ཅད་ཁྱེད་ཀྱི་ཕྱོགས་སུ་འགུག་པར་བྱ་སྟེ། ཁྱེད་ཀྱིས་སྙེག་པའི་མི་དེ་ལས་གཞན་ཐམས་ཅད་ཁྱེད་ཕྱོགས་འཁོར་འོང་བའི་དུས་སུ། མི་ཐམས་ཅད་བདེ་ཞིང་འཇགས་པར་འགྱུར་ཞེས་སྨྲས།  
\v 4 ཨབ་ཤཱ་ལོམ་དང་ཡེས་ར་ཨེལ་གྱི་རྒན་པོ་རྣམས་གཏམ་དེ་ལ་ཤིན་ཏུ་དགའ་བར་གྱུར་ཏོ། །  
\v 5 དེ་ནས་ཨབ་ཤཱ་ལོམ་གྱིས། ཨ་རག་པ་ཧུ་ཤཱ་ཨི་ཡང་འདི་རུ་བོས་ཤོག་དང་། དེས་ཅི་ལྟར་སྨྲ་བ་ལ་ཡང་མཉན་པར་བྱ་ཞེས་བཀའ་བསྩལ།  
\v 6 དེ་ནས་ཧུ་ཤཱ་ཨི་ཁོང་ཉིད་ཨབ་ཤཱ་ལོམ་གྱི་དྲུང་དུ་འོངས་པའི་ཚེ། ཨབ་ཤཱ་ལོམ་གྱིས་དེ་ལ། ཨ་ཧི་ཐོ་ཕེལ་གྱིས་འདི་ལྟར་སྨྲས་པས། རང་ཅག་གིས་དེའི་གྲོས་བཞིན་དུ་བྱེད་རུང་ངམ་མི་རུང་། ཁྱོད་ཀྱིས་གཏམ་བྱོས་ཤིག་ཅེས་བསྐུལ་བས།  
\v 7 ཧུ་ཤཱ་ཨི་ཡིས་ཨབ་ཤཱ་ལོམ་ལ། ད་རེས་ཨ་ཧི་ཐོ་ཕེལ་གྱིས་བཏོན་པའི་བློ་བཀོད་ནི་མི་ལེགས་ཞེས་དང་།  
\v 8 ཡང་ཧུ་ཤཱ་ཨི་ན་རེ། ཁྱེད་ཀྱི་ཕ་དང་དེའི་མི་རྣམས་ནི་དཔའ་རྩལ་ཅན་ཡིན་པ་དང་། རི་ཐང་གི་དོམ་ཕྲུག་ཕྲོགས་ནས་ཁྱེར་བའི་དོམ་དང་འདྲ་བར། དེ་དག་གི་སེམས་ནི་ཞེ་སྡང་གིས་ཁེངས་པ་ཁྱེད་ཀྱིས་ཤེས་སོ། །ཡང་ཁྱེད་ཀྱི་ཕ་ནི་དམག་ཅིག་ཡིན་པས་མི་རྣམས་ཀྱི་ཁྲོད་དུ་གནས་མི་སྲིད།  
\v 9 གཟིགས་དང་། ཁོ་ནི་ད་ལྟ་ས་ཁུང་ངམ་གནས་གཞན་ཞིག་ཏུ་ཡིབ་ནས་བསྡད་ཡོད་ཀྱང་སྲིད། གལ་ཏེ་བདག་ཅག་ལས་མི་ཞིག་ཐོག་མར་བསད་པ་ཡིན་ན། དེ་ཐོས་མཁན་རྣམས་ཀྱིས། ཨབ་ཤཱ་ལོམ་གྱི་རྗེས་སུ་འབྲངས་པ་རྣམས་འགེམས་སོ་ཞེས་བརྗོད་པར་འགྱུར།  
\v 10 ཁྱེད་ཀྱི་ཕ་ནི་དཔའ་བོ་ཡིན་པ་དང་དེ་དང་མཉམ་དུ་ཡོད་པ་རྣམས་ཀྱང་དཔའ་རྩལ་ཅན་ཡིན་པ་ཡེས་ར་ཨེལ་པ་ཐམས་ཅད་ཀྱིས་ཤེས་པས། སེང་གེ་ལྟ་བུའི་སྙིང་སྟོབས་ཅན་རྣམས་ཀྱི་སེམས་ཀྱང་ཕམ་པར་འགྱུར།  
\v 11 དེ་བས་བདག་གི་བྱུས་ལྟར་ན། དཱན་ནས་བཟུང་སྟེ་པེར་ཤ་བཱ་ཡི་བར་དུ། རྒྱ་མཚོའི་འགྲམ་གྱི་བྱེ་མ་བཞིན་མང་བའི་ཡེས་ར་ཨེལ་པ་ཐམས་ཅད་ཁྱེད་ཀྱི་ཕྱོགས་སུ་བསྡུས་ནས། ཁྱེད་ཀྱིས་སྐུ་དངོས་སུ་དེ་རྣམས་ཁྲིད་ནས་འཐབ་མོར་ཞུགས་དགོས།  
\v 12 དེ་ལྟར་ཁོ་གང་དུ་སོང་ནའང་། ས་ལ་ཟིལ་བ་འབབ་པ་ལྟར་རང་ཅག་ཁོའི་ཐོག་ཏུ་འབབ་པ་དང་། ཁོ་རང་དང་ཁོའི་མཉམ་དུ་ཡོད་པའི་མི་རྣམས་ལས་གཅིག་ཀྱང་ལུས་པར་མི་འགྱུར།  
\v 13 གལ་ཏེ་ཁོ་རང་གྲོང་ཁྱེར་ཞིག་གི་ནང་དུ་ཕྱི་བསྣུར་བྱས་ན། ཡེས་ར་ཨེལ་པ་ཐམས་ཅད་ཀྱིས་ཐག་པ་ཁུར་ནས་གྲོང་ཁྱེར་དེ་རུ་སོང་སྟེ། རང་ཅག་གིས་གྲོང་ཁྱེར་དེ་གྲོག་མོའི་ནང་དུ་དྲུད་ནས་ཐ་ན་རྡོ་ཕྲུག་གཅིག་ཀྱང་མི་ལུས་པར་བྱེད་ངེས་ཡིན་ཞེས་སྨྲས་པ་ན།  
\v 14 ཨབ་ཤཱ་ལོམ་དང་ཡེས་ར་ཨེལ་པ་ཐམས་ཅད་ཀྱིས། ཨ་རག་པ་ཧུ་ཤཱ་ཨི་ཡི་ཐབས་ཇུས་ནི་ཨ་ཧི་ཐོ་ཕེལ་གྱི་ཐབས་ཇུས་ལས་ལྷག་པ་ཡིན་ཞེས་སྨྲས་སོ། །གང་ལ་ཞེ་ན། དཀོན་མཆོག་ཡ་ཝཱེས་ཨབ་ཤཱ་ལོམ་གྱི་སྟེང་དུ་བར་ཆད་འབེབ་པའི་ཕྱིར། ཨ་ཧི་ཐོ་ཕེལ་གྱི་ཐབས་བཟང་དེ་མེད་པར་མཛད་པའི་ཐུགས་ཐག་བཅད་པ་ཡིན་ནོ། །   
\s1 དཱ་བིད་བྲོས་པ།  
\p
\v 15 དེ་ནས་ཧུ་ཤཱ་ཨི་ཡིས་མཆོད་དཔོན་ཟཱ་ཏོག་དང་ཨབ་ཡཱ་ཐར་གཉིས་ལ། ཨ་ཧི་ཐོ་ཕེལ་གྱིས་ཨབ་ཤཱ་ལོམ་དང་ཡེས་ར་ཨེལ་གྱི་རྒན་པོ་རྣམས་ལ་འདི་དང་དེ་བཞིན་གྲོས་བཏབ་པ་དང་། ངས་ཀྱང་འདི་དང་དེ་བཞིན་གྲོས་བཏབ་པ་ཡིན།  
\v 16 ད་ལྟ་ཁྱོད་ཅག་གིས་གང་མྱུར་གྱིས་བང་ཆེན་མངགས་ནས་དཱ་བིད་ལ། དོ་དགོང་དབེན་སྟོང་གི་རབ་ཁ་རུ་མི་བཞུགས་པར་ཅི་ནས་ཀྱང་གཙང་པོའི་ཕ་རོལ་ཏུ་བརྒལ་དགོས། དེ་མིན་ཚེ་རྒྱལ་པོ་དང་ཁོང་གི་རྗེས་འབྲང་ཐམས་ཅད་འགེམ་པར་འགྱུར་རོ་ཞུ་དགོས་ཞེས་གདམས་སོ། །  
\v 17 ཡོ་ནཱ་ཐན་དང་ཨ་ཧི་མཱ་ཨ་སི་གཉིས་ཀྱིས་ཨེན་རོ་གེལ་\f + \ft འདིར་ཨེན་རོ་གེལ་ཞེས་པ་ནི་རོ་གེལ་ཆུ་མིག་ཅེས་པ་ཡིན་ཏེ། ཡེ་རུ་སཱ་ལེམ་གྱི་ཤར་ལྷོའི་མཚམས་སུ་ཡོད་ཅིང་བུད་མེད་རྣམས་ཆུ་ལེན་དུ་འགྲོ་ས་ཡིན། \f*དུ་སྒུག་བསྡད་ཅིང་། གཞན་གྱིས་མཐོང་བར་དོགས་ནས་གྲོང་ཁྱེར་ནང་དུ་འགྲོ་མ་ཕོད་པ་རེད། དེ་ནས་གཡོག་མོ་ཞིག་འོངས་ནས་ཁོ་གཉིས་ལ་གནས་ཚུལ་སྨྲས་པ་ལ། དེ་གཉིས་སོང་སྟེ་རྒྱལ་པོ་དཱ་བིད་ལ་འཕྲིན་བསྐྱལ་ཏོ། །  
\v 18 ཡིན་ཡང་གཞོན་ནུ་ཞིག་གིས་ཁོ་གཉིས་མཐོང་བ་དང་སོང་ནས་ཨབ་ཤཱ་ལོམ་ལ་ཞུས་ཤིང་། ཁོ་གཉིས་མྱུར་དུ་སོང་སྟེ་པཱ་ཧུ་རིམ་དུ་མི་ཞིག་གི་ཁྱིམ་ལ་སླེབས་པ་དང་། ར་སྐོར་ནང་དུ་དོང་ཆུ་ཞིག་ཡོད་པ་དེའི་ནང་དུ་བབས།  
\v 19 ཡང་ཁྱིམ་དེའི་བུད་མེད་ཀྱིས་ཁ་གཅོད་ཅིག་བླངས་ནས་དོང་ཆུའི་ཁ་བཅད་པ་དང་། དེའི་ཁར་འབྲུ་རིགས་བརྡལ་བས་དོན་དེ་ཕྱི་རུ་མ་ཤོར་བ་རེད།  
\v 20 ཨབ་ཤཱ་ལོམ་གྱི་འཁོར་གཡོག་རྣམས་བུད་མེད་དེའི་ཁྱིམ་དུ་འོངས་ནས། ཨ་ཧི་མཱ་ཨ་སི་དང་ཡོ་ནཱ་ཐན་གཉིས་གང་དུ་ཡོད་དམ་ཞེས་དྲིས་པར། བུད་མེད་ཀྱིས། དེ་གཉིས་ཆུ་བོ་བརྒལ་ཚར་རོ་ཞེས་སྨྲས་ཤིང་། དེ་དག་གིས་ཁོ་གཉིས་བཙལ་ཡང་མ་རྙེད་པས་ཕྱིར་ཡེ་རུ་སཱ་ལེམ་དུ་ལོག་གོ །  
\v 21 དེ་དག་སོང་རྗེས་ཁོ་གཉིས་དོང་ཆུ་ལས་ཡར་འོངས་ནས་སོང་སྟེ་རྒྱལ་པོ་དཱ་བིད་ལ། ཨ་ཧི་ཐོ་ཕེལ་གྱིས་ཁྱེད་ལ་གནོད་བསྐྱལ་བའི་ཐབས་འདི་བཞིན་བྱས་པས། ཁྱེད་རྣམས་གང་མྱུར་གྱིས་ཡར་ལངས་ནས་གཙང་པོ་བརྒལ་དགོས་ཞེས་ཞུས་པ་ལ།  
\v 22 དཱ་བིད་དང་ཁོང་གི་རྗེས་འབྲང་ཐམས་ཅད་ཡར་ལངས་ནས་ཡོར་དན་གཙང་པོ་བརྒལ་ཞིང་། ནམ་ལངས་དུས་གཅིག་ཀྱང་མ་ལུས་པར་ཡོར་དན་གཙང་པོ་བརྒལ་བ་རེད།  
\v 23 དེ་ནས་ཨ་ཧི་ཐོ་ཕེལ་གྱིས་རང་གི་ཐབས་ཇུས་ལ་མ་བསྟུན་པ་མཐོང་བས། བོང་བུར་སྒ་བསྟད་ནས་རང་གི་གྲོང་ཁྱེར་དུ་ལོག་སྟེ་ཁྱིམ་དུ་སླེབས་ཙ་ན། ཁོས་དེ་རུ་ཁ་ཆེམས་བཞག་ནས་ལྕེབས་པ་དང་། ཁོའི་བེམ་པོ་ནི་ཁོའི་ཕ་ཡི་དུར་དུ་བསྐུངས་སོ། །  
\v 24 དེ་ནས་དཱ་བིད་མཱ་ཧ་ནཱ་ཡིམ་དུ་སླེབས་པ་དང་། ཨབ་ཤཱ་ལོམ་དང་ཁོའི་རྗེས་སུ་འབྲངས་པའི་ཡེས་ར་ཨེལ་པ་ཐམས་ཅད་ཀྱང་ཡོར་དན་གཙང་པོ་བརྒལ་ཏེ་སོང་ངོ་། །  
\v 25 དེར་ཨབ་ཤཱ་ལོམ་གྱིས་ཡོ་ཨབ་ཀྱི་ཚབ་ཏུ་ཨ་མ་སཱ་དམག་དཔོན་དུ་བསྐོས་སོ། །ཨ་མ་སཱ་ནི་ཡེས་ར་ཨེལ་པ་ཡེད་རཱ་བྱ་བའི་བུ་ཡིན་ཏེ། ཡེད་རཱ་ནི་ནཱ་ཧ་སིའི་བུ་མོ་ཨ་བི་གཱ་ཡིལ་བྱ་བར་འགྲོགས་མྱོང་བ་ཡིན། ཨ་བི་གཱ་ཡིལ་ནི་ཡོ་ཨབ་ཀྱི་མ་ཟེ་རུ་ཡཱ་ཡི་མིང་སྲིང་ཡིན་ནོ། །  
\v 26 ཨབ་ཤཱ་ལོམ་དང་ཡེས་ར་ཨེལ་པ་རྣམས་ཀྱིས་གིལ་ཨད་ཡུལ་དུ་སྒར་བཏབ་བོ། །  
\v 27 ཡང་དཱ་བིད་མཱ་ཧ་ནཱ་ཡིམ་དུ་སླེབས་དུས་སུ། ཨམ་མོན་རིགས་ཀྱི་རབ་བཱ་ནས་ཐོན་པའི་ནཱ་ཧ་སིའི་བུ་ཤོ་བི་དང་། ལོ་རྡེ་བཱར་པ་ཨམ་མེ་ཨེལ་གྱི་བུ་མཱ་ཀིར་དང་། རོ་གེ་ལིམ་ནས་ཐོན་པའི་གིལ་ཨད་པ་པཱར་ཟིལ་ལ་ཨི་གསུམ་པོས།  
\v 28 མལ་ཆས་དང་གཞོང་པ། རྫ་མ། གྲོ། ནས། བག་ཕྱེ། ཡོས། སྲན་མ། སྲན་དམར། སྲན་ཡོས།  
\v 29 སྦྲང་རྩི། མར། ལུག བ་མོའི་འོ་ཕྱུར་བཅས་ཁྱེར་ཡོང་ནས་དཱ་བིད་དང་ཁོང་གི་རྗེས་འབྲང་རྣམས་ཀྱི་ཟས་སུ་དྲངས་ཏེ། དེ་དག་གིས་མི་ཚོགས་ནི་དབེན་སྟོང་དུ་བཀྲེས་སྐོམ་མྱངས་ཤིང་དུབ་པ་ཡིན་ནོ་སྙམ་པས་སོ། །   
\c 18
\cl ལེའུ་བཅོ་བརྒྱད་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 ཨབ་ཤཱ་ལོམ་ཕམ་པར་གྱུར་པ།  
\p
\v 1 དཱ་བིད་ཀྱིས་ཁོང་གི་རྗེས་སུ་འབྲངས་པའི་མི་ཚོགས་ཀྱི་གྲངས་ཀ་བླངས་ནས། དེ་རྣམས་ཀྱི་སྣེ་ཁྲིད་པར་སྟོང་དཔོན་དང་བརྒྱ་དཔོན་རྣམས་བསྐོས།  
\v 2 དཱ་བིད་ཀྱིས་མི་རྣམས་དམག་རྒྱག་ཏུ་མངགས་ཤིང་། སུམ་ཆའི་གཅིག་ཡོ་ཨབ་ཀྱི་ལག་ཏུ་བཏང་། སུམ་ཆའི་གཅིག་ཟེ་རུ་ཡཱ་ཡི་བུ་ཡོ་ཨབ་ཀྱི་ནུ་བོ་ཨ་བི་ཤཱ་ཨི་ཡི་ལག་ཏུ་བཏང་། སུམ་ཆའི་གཅིག་གཱད་པ་ཨིད་ཏ་ཨི་ཡི་ལག་ཏུ་བཏང་ནས། རྒྱལ་པོས་དམག་རྣམས་ལ། ང་ཡང་ཁྱོད་ཅག་དང་མཉམ་དུ་འཐབ་མོར་ཞུགས་ངེས་ཡིན་ཞེས་གསུངས་ཀྱང་།  
\v 3 དམག་རྣམས་ན་རེ། ཁྱེད་ནི་འཐབ་མོར་ཞུགས་མི་རུང་། གལ་ཏེ་ངེད་ཅག་བྲོས་ན་དགྲ་བོས་དོ་སྣང་བྱེད་མི་སྲིད་ལ། ཕྱེད་ཀ་གཡུལ་ངོར་ཤི་ནའང་དེ་དག་གིས་དོ་སྣང་བྱེད་མི་སྲིད། ཡིན་ན་ཡང་ད་ལྟ་ཁྱེད་ནི་བདག་ཅག་གི་མི་ཁྲི་ཚོ་གཅིག་དང་འདྲ་བས། ཁྱེད་ཉིད་གྲོང་ཁྱེར་དུ་བཞུགས་ནས་ངེད་རྣམས་ལ་དཔུང་གྲོགས་མཛད་ན་ལེགས་སོ་ཞེས་ཞུས་ཤིང་།  
\v 4 རྒྱལ་པོས་དེ་དག་ལ། ཁྱོད་ཅག་གིས་གང་ལེགས་པར་འདོད་ན་ངས་དེ་བཞིན་བྱའོ་ཞེས་གསུངས་ནས། རྒྱལ་པོ་མཁར་སྒོ་རུ་བཞེངས་བསྡད་ཅིང་། དམག་མི་རྣམས་བརྒྱ་ཕྲག་དང་སྟོང་ཕྲག་བྱས་ནས་རིམ་བཞིན་འཐབ་མོ་བྱེད་དུ་ཆས་སོ། །  
\v 5 རྒྱལ་པོས་ཡོ་ཨབ་དང་། ཨ་བི་ཤཱ་ཨི་དང་། ཨིད་ཏ་ཨི་གསུམ་ལ་བཀའ་བཀོད་ཅིང་འདི་ལྟར། ཁྱོད་རྣམས་ཀྱིས་ངའི་ཁ་ངོར་བལྟས་ནས་གཞོན་ནུ་ཨབ་ཤཱ་ལོམ་ལ་གུ་ཡངས་ཐོངས་ཤིག་ཅེས་བསྒོས་པ་དང་། རྒྱལ་པོས་ཨབ་ཤཱ་ལོམ་གྱི་དོན་དུ་དམག་དཔོན་ཐམས་ཅད་ལ་བཀའ་གནང་བ་དེ་ནི་དམག་ཐམས་ཅད་ཀྱིས་ཐོས་པར་གྱུར།  
\v 6 དེ་ལྟར་དམག་རྣམས་ཐང་དུ་སོང་ནས་ཡེས་ར་ཨེལ་གྱི་གདོང་བསུས་ཏེ་ཨེ་ཕཱར་ཡིམ་གྱི་ནགས་ཚལ་དུ་འཐབ་མོ་བྱུང་ངོ་། །  
\v 7 དེ་རུ་ཡེས་ར་ཨེལ་གྱི་མི་རྣམས་དཱ་བིད་ཀྱི་འཁོར་གཡོག་རྣམས་ཀྱི་མདུན་དུ་ཕམ་ནས། ཉིན་མོ་དེ་ལ་མི་མང་པོ་ཤི་བ་སྟེ་བསྡོམས་པས་མི་ཁྲི་གཉིས་ཡོད་དོ། །  
\v 8 ཡང་དམག་འཐབ་ནི་ཡུལ་གྲུ་ཀུན་ཏུ་ཁྱབ་པ་དང་། ཉིན་དེར་ནགས་ཚལ་གྱིས་བཀུམ་པའི་དམག་མི་ནི་རལ་གྲིས་བཀུམ་པ་ལས་ཀྱང་ལྷག་པར་མང་ངོ་། །  
\v 9 དེ་ནས་ཨབ་ཤཱ་ལོམ་ནི་དཱ་བིད་ཀྱི་འཁོར་གཡོག་རྣམས་དང་ཕྲད་པ་དང་། ཁོ་རང་དྲེའུ་ཞིག་ལ་ཞོན་ནས་བེ་ཤིང་ཆེན་པོ་ཞིག་གི་ཡལ་ག་སྦོམ་པོའི་འོག་ཏུ་སྐྱོད་པ་ལ། ཁོའི་མགོ་བེ་ཤིང་གི་བར་ལ་བཙིར་པ་དང་། ཁོ་རང་བར་སྣང་དུ་དཔྱངས་ཏེ་ཞོན་པ་དྲེའུ་ཁོའི་འོག་ནས་ཤོར་རོ། །  
\v 10 མི་ཞིག་གིས་དེ་མཐོང་ནས་ཡོ་ཨབ་ལ། གཟིགས་དང་། ངས་ཨབ་ཤཱ་ལོམ་བེ་ཤིང་སྟེང་དཔྱངས་ཡོད་པ་མཐོང་བ་ཡིན་ཞེས་སྨྲས་པར།  
\v 11 ཡོ་ཨབ་ཀྱིས་འཕྲིན་སྐྱེལ་མཁན་དེ་ལ། ལྟོས་དང་། ཁྱོད་ཀྱིས་ཁོ་མཐོང་ན་ཅིའི་ཕྱིར་སྐབས་དེར་ཁོ་བསད་ནས་སར་མི་འཕེན་ནམ། ངས་ཁྱོད་ལ་དངུལ་སྲང་བཅུ་དང་སྐ་རགས་གཅིག་དགའ་རྟགས་སུ་སྟེར་ངེས་ཡིན་ཞེས་སྨྲས་པ་དང་།  
\v 12 མི་དེས་ཡོ་ཨབ་ལ། ངའི་ལག་ཏུ་དངུལ་སྲང་སྟོང་གཅིག་ཡོང་ནའང་། ངས་རྒྱལ་སྲས་ཀྱི་ཕྱོགས་སུ་ལག་པ་བརྐྱང་མི་ཕོད། འོ་སྐོལ་ཀུན་གྱི་ཐོས་སར། རྒྱལ་པོས་ཁྱེད་དང་ཨ་བི་ཤཱ་ཨི་དང་ཨིད་ཏ་ཨི་གསུམ་ལ། དོགས་ཟོན་གྱིས་ཤིག གཞོན་ནུ་ཨབ་ཤཱ་ལོམ་ལ་གནོད་པ་མ་བྱེད་ཅིག་ཅེས་བཀའ་གནང་བ་ཡིན།  
\v 13 གལ་ཏེ་བདག་གིས་ཁོའི་སྲོག་བཅད་ཚེ། དོན་གང་ཡིན་ཡང་རྒྱལ་པོ་ལ་གསང་མི་ཐུབ་པར་མ་ཟད། ཁྱེད་ཀྱང་རྒྱང་རིང་ནས་ལངས་སྡོད་ངེས་ཡིན་ཞེས་སྨྲས།  
\v 14 དེར་ཡོ་ཨབ་ཀྱིས། ངས་ཁྱོད་ཀྱི་རྩར་འདི་ལྟར་དུས་འགྱང་བྱེད་མི་ནུས་ཞེས་སྨྲས་པ་དང་། མདུང་གསུམ་ལག་ཏུ་ཐོགས་ནས་ཨབ་ཤཱ་ལོམ་ད་དུང་བེ་ཤིང་གི་སྟེང་དུ་དཔྱངས་ནས་གསོན་པའི་དུས་སུ་ཁོའི་སྙིང་བརྟོལ་བར་བྱས་སོ། །  
\v 15 ཡོ་ཨབ་ཀྱི་གོ་མཚོན་འཁུར་བའི་གཞོན་ནུ་བཅུ་ཡིས་ཨབ་ཤཱ་ལོམ་བསྐོར་ཏེ་ཁོ་ལ་བརྡུངས་ནས་བསད་དོ། །  
\v 16 དེ་ནས་ཡོ་ཨབ་ཀྱིས་ཆེད་དུ་རྭ་དུང་བུས་པ་ལ། དམག་མི་རྣམས་ཡེས་ར་ཨེལ་གྱི་ར་མདའ་ནས་ཕྱིར་ལོག་པ་རེད། གང་ལ་ཞེ་ན། ཡོ་ཨབ་ཀྱིས་དམག་མི་རྣམས་བཀག་པའོ། །  
\v 17 དེ་ནས་དེ་དག་གིས་ཨབ་ཤཱ་ལོམ་མར་བླངས་པ་དང་། ནགས་གསེབ་ཀྱི་ས་དོང་ཆེན་པོ་ཞིག་གི་ནང་དུ་འཕངས་ནས་དེའི་སྟེང་དུ་རྡོ་སྤུང་ཤིན་ཏུ་ཆེན་པོ་བརྒྱབ། ཡེས་ར་ཨེལ་པ་ཐམས་ཅད་བྲོས་ནས་རང་རང་གི་གུར་དུ་སོང་ངོ་། །  
\v 18 ཨབ་ཤཱ་ལོམ་གྱིས་རང་ཉིད་གསོན་པོའི་དུས་སུ་རྒྱལ་པོའི་ལུང་པ་རུ་ཀ་བ་ཞིག་བསླངས་ཏེ། ཁོས་བདག་ལ་དྲན་རྟེན་དུ་རང་གི་མིང་ཐོགས་པའི་བུ་མེད་ཅེས་སྨྲས་ནས། ཀ་བ་དེའི་མིང་ལ་རང་གི་མིང་བཞིན་ཨབ་ཤཱ་ལོམ་གྱི་ཀ་རིང་ཞེས་བཏགས་ཤིང་དེ་རིང་གི་བར་དུ་ལུས་སོ། །   
\s1 དཱ་བིད་ཀྱིས་ཨབ་ཤཱ་ལོམ་ཤི་བའི་གཏམ་ཐོས་པ།  
\p
\v 19 དེར་ཟཱ་ཏོག་གི་བུ་ཨ་ཧི་མཱ་ཨ་སི་ཡིས། ད་ང་རང་བརྒྱུགས་སོང་སྟེ་རྒྱལ་པོ་ལ། དཀོན་མཆོག་ཡ་ཝཱེས་རྒྱལ་པོ་ཁོང་ཉིད་དགྲ་བོ་རྣམས་ལས་སྐྱོབ་པར་མཛད་པའི་འཕྲིན་འཁྱེར་རམ་ཞེས་ཞུས་པར།  
\v 20 ཡོ་ཨབ་ཀྱིས་དེ་ལ། དེ་རིང་ཉིན་མོར་ཁྱོད་ཀྱིས་འཕྲིན་མ་འཁྱེར་ཞིག ཉིན་མོ་གཞན་ཞིག་ལ་འཕྲིན་འཁྱེར་རུང་། དེ་རིང་རྒྱལ་སྲས་གྲོངས་པས་ཁྱོད་ཀྱིས་འཕྲིན་འཁྱེར་མི་རུང་ཞེས་སྨྲས་སོ། །  
\v 21 དེར་ཡོ་ཨབ་ཀྱིས་གུ་ཤ་པ་ཞིག་ལ། ཁྱོད་སོང་སྟེ་ཇི་མཐོང་བ་དེ་རྒྱལ་པོར་ཞུས་ཤིག་ཅེས་བཀའ་བསྩལ་པས། གུ་ཤ་པ་དེས་ཡོ་ཨབ་ལ་ཕྱག་བཙལ་ཏེ་བརྒྱུགས་སོ། །  
\v 22 ཟཱ་ཏོག་གི་བུ་ཨ་ཧི་མཱ་ཨ་སི་ཡིས་ཡང་བསྐྱར་ཡོ་ཨབ་ལ། ཅི་བྱུང་ན་བྱུང་། བདག་ནི་གུ་ཤ་པའི་རྗེས་སུ་རྒྱུག་པར་གནོངས་ཤིག་ཅེས་ཞུས་པར། ཡོ་ཨབ་ཀྱིས། ངའི་བུ། ཁྱོད་ཀྱིས་འཕྲིན་འདི་བསྐྱལ་བས་རྔན་པ་ཅི་ཡང་མེད་དེ། ཅིའི་ཕྱིར་རྒྱུག་འདོད་དམ་ཞེས་སྨྲས་ཀྱང་།  
\v 23 དེས་ནི་ཅི་བྱུང་ན་བྱུང་། ང་རང་རྒྱུག་དགོས་ཞུས་པས། དེས་རྒྱུག་ཅིག་ཅེས་སྨྲས་པ་དང་། ཡང་ཨ་ཧི་མཱ་ཨ་སི་ཐང་ལམ་ནས་བརྒྱུགས་ཏེ་གུ་ཤ་པའི་སྔོན་དུ་སླེབས་སོ། །  
\v 24 དེའི་ཚེ་དཱ་བིད་མཁར་སྒོ་གཉིས་ཀྱི་མཚམས་སུ་བཞུགས་ཡོད་པ་དང་། སོ་པ་ནི་མཁར་སྟེང་དུ་འགོས་ཏེ་མགོ་ཡར་བཏེགས་ནས་བལྟས་པ་ལ། ལྟོས་དང་། མི་གཅིག་རང་བརྒྱུགས་འོང་བ་མཐོང་ངོ་། །  
\v 25 སོ་པས་སྐད་ཆེན་པོས་རྒྱལ་པོར་ཞུས་ཤིང་། རྒྱལ་པོས། གལ་ཏེ་མི་གཅིག་འོངས་ན་དེ་ནི་ངག་འཕྲིན་འཁྱེར་མཁན་ཡིན་ཞེས་གསུངས་པ་དང་། མི་དེ་བརྒྱུགས་ནས་ཉེ་བར་སླེབས།  
\v 26 སོ་པས་ཡང་མི་ཞིག་བརྒྱུགས་འོང་བ་མཐོང་ནས། མཁར་སྒོ་སྲུང་མཁན་བོས་ཏེ་ན་རེ། ལྟོས་དང་། ཡང་མི་གཅིག་རང་ཚུར་རྒྱུག་གོ་ཞེས་སྨྲས་པར། རྒྱལ་པོས། དེ་ཡང་འཕྲིན་འཁྱེར་མཁན་ཡིན་ཞེས་གསུངས།  
\v 27 དེ་ནས་སོ་པས། མི་སྔ་མ་དེའི་རྒྱུག་ཚུལ་ལ་ལྟོས་ན་ཟཱ་ཏོག་གི་བུ་ཨ་ཧི་མཱ་ཨ་སི་ཡིན་པ་འདྲ་ཞེས་སྨྲས་ཤིང་། རྒྱལ་པོས། ཁོ་ནི་མི་བཟང་པོ་ཞིག་ཡིན་ལ་འཕྲིན་བཟང་ཡོད་དོ་ཞེས་གསུངས་སོ། །  
\v 28 ཡང་ཨ་ཧི་མཱ་ཨ་སི་ཡིས་འབོད་སྒྲ་བསྒྲགས་ཏེ། བདེ་ལ་བབས་སོ་ཞེས་ཞུས་ཤིང་། ལུས་སར་བཏུད་ནས་རྒྱལ་པོར་ཕྱག་བཙལ་ཏེ་ན་རེ། ཁྱེད་ཀྱི་དཀོན་མཆོག་ཡ་ཝཱེ་ནི་བསྟོད་འོས་པ་ལགས། ཁོང་གིས་བདག་གི་ཇོ་བོ་དང་བདག་གི་རྒྱལ་པོའི་ཕྱོགས་སུ་ལག་པ་བཏེགས་པའི་མི་རྣམས་རྒྱལ་པོར་སྤྲོད་པར་མཛད་དོ་ཞེས་ཞུས་པ་དང་།  
\v 29 རྒྱལ་པོས། ན་གཞོན་ཨབ་ཤཱ་ལོམ་བདེའམ་ཞེས་དྲིས་པར། ཨ་ཧི་མཱ་ཨ་སི་ཡིས། ཡོ་ཨབ་ཀྱིས་རྒྱལ་པོའི་ཞབས་ཕྱི་བདག་མངགས་པའི་ཚེ་ན། བདག་གིས་ཟང་ཟིང་ཆེན་པོ་ཞིག་མཐོང་ནའང་དེ་ཅི་ཡིན་ཤེས་མ་སོང་ཞེས་ཞུས།  
\v 30 རྒྱལ་པོས། ཁྱོད་ཡར་ལོངས་ལ་ལོགས་སུ་སྡོད་ཅིག་ཅེས་བཀའ་བསྩལ་པས་ཁོ་ཡར་ལངས་ནས་ལོགས་སུ་བསྡད་དོ། །  
\v 31 ཡང་ལྟོས་ཤིག གུ་ཤ་པ་དེ་ཡང་སླེབས་ནས། ཀྱེ་བདག་གི་ཇོ་བོ་དང་བདག་གི་རྒྱལ་པོ་ལ་འཕྲིན་ཞིག་ཞུ་རྒྱུ་ཡོད་དེ། དཀོན་མཆོག་ཡ་ཝཱེས་དེ་རིང་ཉིན་མོར་ཡར་ལངས་ནས་ཁྱེད་ལ་རྒོལ་མཁན་ཐམས་ཅད་ལས་ཁྱེད་རང་སྐྱོབ་པར་མཛད་དོ་ཞེས་ཞུས་པར།  
\v 32 རྒྱལ་པོས་གུ་ཤ་པ་དེ་ལ། ན་གཞོན་ཨབ་ཤཱ་ལོམ་བདེའམ་ཞེས་དྲིས་པའི་ལན་དུ་གུ་ཤ་པས། བདག་གི་ཇོ་བོ་དང་བདག་གི་རྒྱལ་པོའི་དགྲ་བོ་རྣམས་དང་། སེམས་ངན་དང་བཅས་ཡར་ལངས་ནས་ཁྱེད་ལ་གནོད་སྐྱེལ་མཁན་ཐམས་ཅད་ན་གཞོན་དེ་དང་འདྲ་བར་གྱུར་ཅིག་ཞུས་པས།  
\v 33 རྒྱལ་པོ་ཐུགས་རབ་ཏུ་འཁྲུགས་ཏེ་མཁར་སྒོའི་སྟེང་ཁང་དུ་འགོས་ནས། ཀྱེ་ངའི་བུ་ཨབ་ཤཱ་ལོམ། ངའི་བུ། ངའི་བུ་ཨབ་ཤཱ་ལོམ། ང་ནི་ཁྱོད་ཀྱི་ཚབ་ཏུ་ཤི་བ་ཡིན་ན་ཅི་མ་རུང་། ཀྱེ་ཨབ་ཤཱ་ལོམ། ངའི་བུ་ཞེས་ཤིན་ཏུ་ངུས་སོ། །   
\c 19
\cl ལེའུ་བཅུ་དགུ་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 ཡོ་ཨབ་ཀྱིས་རྒྱལ་པོའི་སྐྱོན་བརྗོད་པ།  
\p
\v 1 དེ་ནས་མི་ཞིག་གིས་ཡོ་ཨབ་ལ། གཟིགས་དང་། རྒྱལ་པོས་ཨབ་ཤཱ་ལོམ་གྱི་དོན་དུ་ངུ་ཞིང་མྱ་ངན་བྱེད་དོ་ཞེས་སྨྲས།  
\v 2 རྒྱལ་པོ་ཉིད་ཀྱི་སྲས་ཀྱི་ཕྱིར་ཐུགས་སྐྱོ་བ་དམག་དཔུང་ཡོངས་ཀྱིས་ཐོས་པས། རྒྱལ་ཁ་ཐོབ་པའི་ཉིན་དེ་ནི་ཁོ་ཚོར་མཚོན་ན་སྡུག་བསྔལ་དུ་གྱུར་ཏོ། །  
\v 3 ཉིན་མོ་དེར་དམག་རྣམས་ནི་གཡུལ་ལས་བྲོས་ཤིང་ངོ་གནོང་བའི་དམག་མི་བཞིན་དུ། ལྐོག་ནས་གྲོང་ཁྱེར་དུ་ཞུགས་པ་རེད།  
\v 4 རྒྱལ་པོས་ཞལ་ངོ་བཏུམས་ཏེ་སྐད་ཆེན་པོས་ངུས་ཤིང་། ཀྱེ་ངའི་བུ་ཨབ་ཤཱ་ལོམ། ཀྱེ་ཨབ་ཤཱ་ལོམ། ངའི་བུ། ངའི་བུ་ཞེས་བོས་པ་དང་།  
\v 5 ཡོ་ཨབ་རྒྱལ་པོའི་དྲུང་དུ་ཕོ་བྲང་ནང་སོང་སྟེ་འདི་ལྟར། དེ་རིང་ཁྱེད་ཀྱིས་ཉིད་ཀྱི་འཁོར་གཡོག་ཐམས་ཅད་ངོ་ཚར་གཏད་པ་ཡིན། དེ་དག་གིས་ཁྱེད་ཀྱི་སྲོག་དང་། ཁྱེད་ཀྱི་སྲས་དང་སྲས་མོའི་སྲོག་དང་། ཁྱེད་ཀྱི་ཆེན་ཆུན་རྣམས་ཀྱི་སྲོག་བསྐྱབས་ཀྱང་།  
\v 6 ཁྱེད་ཀྱིས་ཉིད་ལ་འཁོན་པ་རྣམས་ལ་བྱམས་པ་དང་། ཁྱེད་ལ་བརྩེ་བ་རྣམས་ལ་སྡང་བར་མཛད་དོ། །དེ་རིང་ཁྱེད་ཀྱིས་དམག་དཔོན་དང་འཁོར་གཡོག་གཉིས་ཀ་ཐུགས་སུ་མེད་པ་དེ་བསྟན་པ་ཡིན། གལ་ཏེ་ཨབ་ཤཱ་ལོམ་གསོན་ཞིང་། བདག་ཅག་ཐམས་ཅད་ཤི་བ་ཡིན་ན་ཁྱེད་ཐུགས་དགྱེས་པ་དེ་རིང་བདག་གིས་རྟོགས་སོང་།  
\v 7 ད་ལྟ་ཁྱེད་རང་ཡར་བཞེངས་ནས་ཕྱི་རུ་ཕེབས་ཏེ་ཁྱེད་ཀྱི་འཁོར་གཡོག་རྣམས་ལ་སེམས་གསོ་གནོངས་ཤིག ངས་དཀོན་མཆོག་ཡ་ཝཱེ་དཔང་དུ་བཙུགས་ནས་མནའ་བསྐྱལ་ཏེ། གལ་ཏེ་ཁྱེད་རང་ཕྱི་རུ་མི་འགྲོ་ན། དོ་དགོང་ཁྱེད་དང་མཉམ་དུ་མི་གཅིག་ཀྱང་འདུག་མི་སྲིད་དེ། གེགས་བར་ཆད་འདི་ནི་ཁྱེད་རང་སྐུ་ན་ཕྲ་མོ་ནས་ད་བར་དུ་ཕྲད་པའི་སྡུག་བསྔལ་ཐམས་ཅད་ལས་ལྷག་པར་ཚབས་ཆེའོ་ཞེས་ཞུས་པས།  
\v 8 རྒྱལ་པོ་ཡར་བཞེངས་ནས་མཁར་སྒོར་བཞུགས་པ་ལ། མི་ཐམས་ཅད་ཀྱིས་རྒྱལ་པོ་མཁར་སྒོར་བཞུགས་པ་ཐོས་པས་ཐམས་ཅད་རྒྱལ་པོའི་དྲུང་དུ་འོངས་སོ། །སྐབས་དེར་ཡེས་ར་ཨེལ་པ་རྣམས་བྲོས་ནས་རང་རང་གི་གུར་དུ་ཕྱིན་ཏོ། །   
\s1 དཱ་བིད་ཡེ་རུ་སཱ་ལེམ་དུ་ལོག་པ།  
\p
\v 9 ཡང་ཡེས་ར་ཨེལ་གྱི་ཚོ་པ་ཐམས་ཅད་ཀྱི་མི་རྣམས་ཀྱི་ཁྲོད་དུ་རྩོད་གླེང་བྱུང་སྟེ་ན་རེ། རྒྱལ་པོས་བདག་ཅག་ནི་དགྲ་བོ་རྣམས་ཀྱི་ལག་ནས་ཐར་བར་མཛད་པ་དང་། ཕེ་ལེ་ཤེད་པའི་ལག་ནས་ཀྱང་ཐར་བར་མཛད་ཀྱང་། ད་ལྟ་ཨབ་ཤཱ་ལོམ་གྱི་ཕྱིར་རང་རེའི་ཡུལ་འདི་ནས་འབྲོ་དགོས་བྱུང་བ་ཡིན།  
\v 10 འོ་སྐོལ་ཚོས་རྒྱལ་པོར་བྱུགས་པའི་ཨབ་ཤཱ་ལོམ་ནི་གཡུལ་ངོར་ཤིའོ། །ད་ལྟ་ཁྱོད་ཚོས་རྒྱལ་པོ་སླར་སྤྱན་འདྲེན་པའི་སྐོར་ཚིག་གཅིག་ཀྱང་མི་ལབ་པ་ཅི་ཞེས་གཏམ་བྱས་སོ། །  
\v 11 དེར་རྒྱལ་པོ་དཱ་བིད་ཀྱིས་མཆོད་དཔོན་ཟཱ་ཏོག་དང་ཨབ་ཡཱ་ཐར་གཉིས་ལ་ངག་འཕྲིན་བསྐུར་ནས་འདི་ལྟར། ཁྱོད་གཉིས་ཀྱིས་ཡ་ཧུ་དཱ་ཡི་རྒན་པོ་རྣམས་ལ་འདི་སྐད་སྨྲ་དགོས་ཏེ། རྒྱལ་པོ་ཕྱིར་ཕོ་བྲང་དུ་སྤྱན་འདྲེན་པའི་དོན་གྱི་ཐད་ཁྱོད་རྣམས་གཞན་པའི་རྗེས་སུ་ལུས་པ་ཅི་ཡིན་ནམ། ཡེས་ར་ཨེལ་པ་ཡོངས་ཀྱིས་རྒྱལ་པོ་ཕྱིར་སྤྱན་འདྲེན་པའི་གཏམ་ནི་རྒྱལ་པོའི་དྲུང་དང་རྒྱལ་པོའི་ཕོ་བྲང་དུ་སླེབས་ཚར།  
\v 12 ཁྱོད་རྣམས་ངའི་སྤུན་ཟླ་དང་ཤ་རུས་ཡིན་པས། རྒྱལ་པོ་ཕྱིར་སྤྱན་འདྲེན་པར་ཁྱོད་རྣམས་རྗེས་སུ་ལུས་པ་ཅི་ཡིན་ཞེས་དང་།  
\v 13 ཡང་ཁྱོད་རྣམས་ཀྱིས་ཨ་མ་སཱ་ལ་འདི་ལྟར། ཁྱོད་ངའི་ཤ་རུས་མ་ཡིན་ནམ། གལ་ཏེ་ངས་ཁྱོད་ནི་ཡོ་ཨབ་ཀྱི་ཚབ་ལ་བདག་གི་དྲུང་ནས་གཏན་དུ་དམག་དཔོན་དུ་མི་བྱེད་ན། དཀོན་མཆོག་གིས་བདག་ལ་འདིའམ་འདི་ལས་ལྷག་པ་ཞིག་མཛད་པར་ཤོག་ཅེས་སྨྲ་དགོས་ཞེས་བསྒོས།  
\v 14 དེ་ལྟར་ཁོང་གིས་མི་གཅིག་གི་སེམས་བཀུག་པ་ལྟར་ཡ་ཧུ་དཱ་པ་རྣམས་ཀྱི་སེམས་བཀུག་པར་མཛད་ཅིང་། དེ་དག་གིས་རྒྱལ་པོའི་དྲུང་དུ་མི་མངགས་ནས། རྒྱལ་པོ་དང་རྒྱལ་པོའི་བློན་འཁོར་རྣམས་ཕྱིར་ཕེབས་པར་མཛོད་ཅེས་ཞུས་སོ། །  
\v 15 དེ་ནས་རྒྱལ་པོ་ཕྱིར་ཕེབས་ནས་ཡོར་དན་གཙང་པོའི་འགྲམ་དུ་སླེབས། ཡ་ཧུ་དཱ་པ་རྣམས་རྒྱལ་པོ་ཡོར་དན་གཙང་པོའི་ཚུར་ཕྱོགས་ལ་བསུ་བར་གིལ་གལ་དུ་སླེབས།   
\s1 དཱ་བིད་ཀྱིས་དགྲ་རྣམས་ལ་དགོངས་སེལ་གནང་བ།  
\p
\v 16 ཡང་པེན་ཡཱ་མེན་པ་གེ་རཱ་ཡི་བུ་སྟེ། པཱ་ཧུ་རིམ་ནས་ཐོན་པའི་ཤིམ་ཨི་བྱ་བ་དེ་རྟབ་རྟབ་པོར་ཡ་ཧུ་དཱ་པ་རྣམས་དང་མཉམ་དུ་མར་སོང་ནས་རྒྱལ་པོ་དཱ་བིད་ལ་བསུ་བ་བྱས།  
\v 17 ཤིམ་ཨི་དང་མཉམ་དུ་པེན་ཡཱ་མེན་པ་མི་ཆིག་སྟོང་དང་། སོ་ལོ་ཚང་གི་གཡོག་པོ་ཙི་བཱ་དང་དེའི་བུ་བཅོ་ལྔ་དང་ཞབས་ཕྱི་ཉི་ཤུ་བཅས་ཡོད་པ་ཡིན། དེ་དག་བྲེལ་མྱུར་གྱིས་ཡོར་དན་གཙང་པོ་བརྒལ་ཏེ་རྒྱལ་པོའི་དྲུང་དུ་སོང་ཞིང་།  
\v 18 མི་རྣམས་རབ་ཁ་བརྒྱུད་ནས་རྒྱལ་པོའི་ཐུགས་དགོངས་བཞིན་རྒྱལ་པོ་དང་ཁོང་གི་ཁྱིམ་མི་རྣམས་གཙང་པོ་བརྒལ་དུ་བཅུག་པ་དང་། དཱ་བིད་ཡོར་དན་གཙང་པོ་བརྒལ་ནས་ཕེབས་པར་བརྩམས་པའི་ཚེ། གེ་རཱ་ཡི་བུ་ཤིམ་ཨི་ཡིས་རྒྱལ་པོའི་དྲུང་དུ་ལུས་སར་བཏུད་ནས་ཕྱག་བཙལ་བ་དང་།  
\v 19 རྒྱལ་པོ་ལ་འདི་ལྟར། བདག་གི་ཇོ་བོ་དང་བདག་གི་རྒྱལ་པོ་ཡེ་རུ་སཱ་ལེམ་དང་བྲལ་བའི་ཉིན་མོར་ཞབས་ཕྱི་བདག་གིས་ཉེས་པ་བཟོས་ཟིན། ད་ནི་བདག་གི་ཇོ་བོས་བདག་ལ་ཉེས་པ་མི་འགེལ་བ་དང་། རྒྱལ་པོའི་ཡིད་ལ་མི་དྲན་ཞིང་ཐུགས་སུའང་མི་འཛིན་པར་མཁྱེན།  
\v 20 གཟིགས་དང་། ཞབས་ཕྱིས་རང་ལ་སྡིག་ཉེས་ཡོད་པ་ཤེས་བཞིན་དུ། ཡོ་སེབ་ཀྱི་ཁྱིམ་རྒྱུད་ཡོངས་ཀྱི་ཁྲོད་ནས་དེ་རིང་ཉིན་མོར་ང་རང་ཐོག་མར་བདག་གི་ཇོ་བོ་དང་བདག་གི་རྒྱལ་པོ་བསུ་བར་འདིར་འོངས་པ་ཡིན་ཞེས་ཞུས་པ་ལ།  
\v 21 ཟེ་རུ་ཡཱ་ཡི་བུ་ཨ་བི་ཤཱ་ཨི་ཡིས་དེའི་ལན་དུ། ཤིམ་ཨི་ཡིས་དཀོན་མཆོག་ཡ་ཝཱེས་བྱུགས་པ་ལ་དམོད་མོ་བཏབ་པས་ཁོ་གསོད་པར་མི་འོས་སམ་ཞེས་སྨྲས་ཤིང་།  
\v 22 དཱ་བིད་ཀྱིས། ཟེ་རུ་ཡཱ་ཡི་བུ་རྣམས། ཁྱོད་ཅག་ང་དང་འབྲེལ་བ་ཅི་ཡོད། ཁྱོད་ཅག་གིས་དེ་རིང་ང་ལ་རྒོལ་ལན་སྤྲོད་དམ། དེ་རིང་ཡེས་ར་ཨེལ་གྱི་ཁྲོད་ནས་སུ་ཞིག་གསོད་རུང་ངམ། བདག་གིས་རང་ཉིད་ཡེས་ར་ཨེལ་གྱི་རྒྱལ་པོ་ཡིན་པ་མི་ཤེས་སམ་ཞེས་གསུངས་ནས།  
\v 23 རྒྱལ་པོས་ཤིམ་ཨི་ལ། ཁྱོད་འཆི་བར་མི་འགྱུར་རོ་ཞེས་བསྒོས་ཤིང་ཁོ་ལ་མནའ་བསྐྱལ་ཏོ། །   
\s1 དཱ་བིད་ཀྱིས་མེ་ཕི་པོ་ཤེད་གཅེས་སུ་བཟུང་བ།  
\p
\v 24 དེར་སོ་ལོའི་ཚ་བོ་མེ་ཕི་པོ་ཤེད་ཀྱང་རྒྱལ་པོ་བསུ་བར་འོངས། དེས་རྒྱལ་པོ་ཕྱིན་པའི་ཉིན་ནས་བཟུང་ཁོང་བདེ་བར་ཡེ་རུ་སཱ་ལེམ་དུ་ཕྱིར་ཕེབས་པའི་བར་དུ། རྐང་པ་མ་བཀྲུས་ཤིང་སྨ་ར་མ་བཞར་ལ། གོས་ཀྱང་མ་བཀྲུས་སོ། །  
\v 25 ཡང་ཁོ་རང་ཡེ་རུ་སཱ་ལེམ་དུ་རྒྱལ་པོ་བསུ་བར་འོངས་པའི་ཚེ། རྒྱལ་པོས་དེ་ལ། ཀྱེ་མེ་ཕི་པོ་ཤེད། ཁྱོད་ང་དང་མཉམ་དུ་ཅིའི་ཕྱིར་མ་སོང་ངམ་ཞེས་དྲིས་པའི་ལན་དུ།  
\v 26 ཁོ་ན་རེ། ཀྱེ་བདག་གི་ཇོ་བོ་དང་བདག་གི་རྒྱལ་པོ་ལགས། བདག་གི་ཞབས་ཕྱིས་ \f + \ft འདིར་ཞབས་ཕྱི་ཞེས་པ་ནི་ཙི་བཱ་ལ་གོ་བ་ཡིན་ཏེ། སྔར་དཱ་བིད་ཡེ་རུ་སཱ་ལེམ་དུ་འབྲོ་བའི་སྐབས་སུ། ཁོས་ལམ་བར་དུ་དཱ་བིད་ལ་བསུ་བ་བྱས་ཤིང་ཁ་ཟས་སྣ་ཚོགས་ཕུལ་བར་མ་ཟད། རང་གི་བདག་པོ་སྟེ་མེ་ཕི་པོ་ཤེད་ལ་སྐུར་འདེབས་བཏང་བ་ཡིན། \f*བདག་ལ་མགོ་བསྐོར་བཏང་བ་རེད། ཞབས་ཕྱི་བདག་ནི་ཞ་བོ་ཡིན་པས། ཉིན་དེར་ཞབས་ཕྱི་བདག་གིས་བོང་བུར་སྒ་བསྟད་ནས་རྒྱལ་པོ་མཉམ་དུ་འགྲོ་བར་བསམ་པ་ཡིན་མོད།  
\v 27 འོན་ཀྱང་མི་དེས་བདག་གི་ཇོ་བོ་དང་བདག་གི་རྒྱལ་པོའི་དྲུང་དུ་ཞབས་ཕྱིར་སྐུར་འདེབས་བྱས་པ་རེད། བདག་གི་ཇོ་བོ་དང་བདག་གི་རྒྱལ་པོ་ནི་དཀོན་མཆོག་གི་ཕོ་ཉ་དང་འདྲ་བས། ཁྱེད་ཀྱི་སྤྱན་སྔར་གང་ཞིག་ལེགས་ན་དེ་བཞིན་མཛོད་ཅིག  
\v 28 བདག་གི་ཕ་རྒྱུད་ཐམས་ཅད་ནི་བདག་གི་ཇོ་བོ་དང་བདག་གི་རྒྱལ་པོའི་དྲུང་དུ་ཤི་འོས་པའི་མི་ལྟ་བུ་ཡིན་ཡང་། རྒྱལ་པོ་ཁྱེད་ཀྱིས་ཞབས་ཕྱི་བདག་ནི་ཁྱེད་ཀྱི་གསོལ་ལྕོག་ལས་ཟས་སྤྱོད་པའི་གྲལ་དུ་བཅུག་པས། ད་ནི་བདག་ལ་རྒྱལ་པོར་འོ་དོད་འབོད་པའི་དབང་ཞིག་གང་དུ་ཡོད་ཅེས་ཞུས་པ་དང་།  
\v 29 རྒྱལ་པོས་དེ་ལ། ཁྱོད་ཀྱིས་ད་དུང་རང་གི་དོན་རྣམས་གླེང་བ་དེ་ཅི་ཡིན། ངས་ནི་ཁྱོད་དང་ཙི་བཱ་གཉིས་ཀྱིས་ས་ཞིང་བགོ་བར་བྱོས་ཤིག་ཅེས་བསྒོའོ་ཞེས་གསུངས་ཤིང་།  
\v 30 མེ་ཕི་པོ་ཤེད་ཀྱིས་རྒྱལ་པོ་ལ། བདག་གི་ཇོ་བོ་དང་བདག་གི་རྒྱལ་པོ་བདེ་བར་རང་གི་ཕོ་བྲང་དུ་སླེབས་བྱུང་བས། ཐ་ན་ཐམས་ཅད་ཙི་བཱ་ཡིས་ཁྱེར་ཡང་ཆོག་ཅེས་གསོལ་ཏོ། །   
\s1 དཱ་བིད་ཀྱིས་པཱར་ཟིལ་ལ་ཨི་གཅེས་སུ་བཟུང་བ།  
\p
\v 31 གཞན་ཡང་གིལ་ཨད་པ་པཱར་ཟིལ་ལ་ཨི་ནི་རོ་གེ་ལིམ་ནས་མར་འོངས་ཤིང་། རྒྱལ་པོ་སྲུང་སྐྱེལ་བགྱི་བའི་ཕྱིར་ཁོང་དང་ལྷན་ཅིག་ཡོར་དན་གཙང་པོ་བརྒལ་བའོ། །  
\v 32 པཱར་ཟིལ་ལ་ཨི་ནི་ཤིན་ཏུ་རྒས་ཤིང་ལོ་བརྒྱད་ཅུར་སོན་པ་ཞིག་ཡིན་ཏེ། ཡང་ཁོ་ནི་ཕྱུག་བདག་ཅིག་ཡིན་པས་རྒྱལ་པོ་མཱ་ཧ་ནཱ་ཡིམ་དུ་ལུས་པའི་ཚེ་ཁོས་ཁ་ཟས་བསྐྱལ་ཏོ། །  
\v 33 དེར་རྒྱལ་པོས་པཱར་ཟིལ་ལ་ཨི་ལ། ཁྱེད་རང་ང་དང་མཉམ་དུ་ཕར་འགྲོ་དང་། ངས་ཡེ་རུ་སཱ་ལེམ་དུ་རང་གི་རྩར་ཁྱེད་ཉིད་གསོ་སྐྱོང་བྱའོ་ཞེས་གསུངས་ཀྱང་།  
\v 34 པཱར་ཟིལ་ལ་ཨི་ཡིས་རྒྱལ་པོ་ལ། ཕྲན་ཆུང་བདག་རྒྱལ་པོ་དང་མཉམ་དུ་ཡེ་རུ་སཱ་ལེམ་ནས་ད་དུང་ལོ་ཅི་ཙམ་ལ་སྡོད་ཐུབ་བམ།  
\v 35 དེ་རིང་བདག་ནི་ལོ་བརྒྱད་ཅུ་ལོན་པས། ད་དུང་ཡག་བཙོག་ཤེས་སམ། ད་དུང་བཟའ་བཏུང་གི་བྲོ་བ་མྱོང་ཐུབ་བམ། ད་དུང་གླུ་བ་ཕོ་མོའི་གླུ་སྐད་ཐོས་ནུས་སམ། ཞབས་ཕྱི་བདག་གིས་ངའི་ཇོ་བོ་དང་ངའི་རྒྱལ་པོར་འོ་བརྒྱལ་གཏོད་དགོས་དོན་ཅི་ཡོད།  
\v 36 ཞབས་ཕྱི་བདག་གིས་རྒྱལ་པོ་ཁྱེད་ཉིད་ཡོར་དན་གཙང་པོའི་ཕ་རོལ་ཏུ་སྲུང་སྐྱེལ་བྱེད་པ་ནི་བྱ་བ་ཕྲན་བུ་ཞིག་ཡིན་ལ། རྒྱལ་པོས་བདག་ལ་དེ་ལྟ་བུའི་གསོལ་རས་གནང་དགོས་སམ།  
\v 37 ཁྱེད་ཀྱིས་ང་རང་ཕྱིར་ལོག་པར་གནོངས་ཤིག དེ་ནས་བདག་རང་གི་གྲོང་ཁྱེར་དུ་ཚེ་ལས་འདས་ཏེ་རང་གི་ཕ་མའི་དུར་ཁུང་དུ་བསྐུང་བར་འགྱུར་རོ། །ཁྱེད་ཀྱི་ཞབས་ཕྱི་ཀིམ་ཧམ་ལ་གཟིགས་དང་། ཁོ་རང་བདག་གི་ཇོ་བོ་དང་བདག་གི་རྒྱལ་པོ་མཉམ་དུ་ཕར་འགྲོ་བར་མཛོད། ཁྱེད་ཀྱི་སྤྱན་སྔར་གང་ལེགས་ན་ཁོ་ལ་དེ་བཞིན་མཛོད་ཅིག་ཅེས་ཞུས་པའི་ལན་དུ།  
\v 38 རྒྱལ་པོས། ཀིམ་ཧམ་ནི་ང་དང་མཉམ་དུ་ཕར་སོང་ཆོག་སྟེ། ཁྱེད་ཀྱིས་གང་ལེགས་པར་འདོད་ན་ངས་ཁོ་ལ་དེ་བཞིན་བྱའོ། །ཁྱེད་ཀྱིས་ང་ལ་གང་ཞུས་ཀྱང་ངས་ཁྱེད་ཀྱི་ཕྱིར་བྱའོ་ཞེས་གསུངས་སོ། །  
\v 39 མི་ཚོགས་ཐམས་ཅད་ཡོར་དན་གཙང་པོ་བརྒལ་ཟིན་ཏེ། རྒྱལ་པོའང་ཚུར་འབྱོན་པའི་ཚེ། ཁོང་གིས་པཱར་ཟིལ་ལ་ཨི་ལ་འོ་བྱས་ཤིང་ཁོ་ལ་བྱིན་རླབས་མཛད་ནས་དེ་རང་ཡུལ་དུ་ལོག་གོ །  
\v 40 དེ་ནས་རྒྱལ་པོ་གཙང་པོ་བརྒལ་ཏེ་གིལ་གལ་དུ་སླེབས་པ་དང་། ཀིམ་ཧམ་ཡང་ཁོང་དང་མཉམ་དུ་སོང་ངོ་། །དེར་ཡ་ཧུ་དཱ་ཡི་མི་ཐམས་ཅད་དང་ཡེས་ར་ཨེལ་གྱི་མི་རྣམས་ཀྱི་ཕྱེད་ཀས་རྒྱལ་པོར་སྐྱེལ་མ་བྱས།   
\s1 ཡེས་ར་ཨེལ་དང་ཡ་ཧུ་དཱ་ཡི་མི་རྣམས་བར་རྒྱལ་པོའི་ཆེད་དུ་རྩོད་པ་བྱུང་བ།  
\p
\v 41 ལྟོས་དང་། ཡེས་ར་ཨེལ་པ་ཐམས་ཅད་རྒྱལ་པོའི་དྲུང་དུ་འོངས་ནས་རྒྱལ་པོ་ལ། རང་རེའི་སྤུན་ཟླ་ཡ་ཧུ་དཱ་པ་རྣམས་ཀྱིས་ཅིའི་ཕྱིར་རྒྱལ་པོ་དང་ཁོང་གི་ཁྱིམ་མི་རྣམས་དང་། ཁོང་གི་རྗེས་སུ་འབྲངས་པའི་མི་ཐམས་ཅད་ལ་ལྐོག་ནས་སྐྱེལ་མ་བྱས་ཏེ་ཡོར་དན་གཙང་པོ་བརྒལ་བ་ཡིན་ནམ་ཞེས་ཞུས་པས།  
\v 42 ཡ་ཧུ་དཱ་པ་ཐམས་ཅད་ཀྱིས་ཡེས་ར་ཨེལ་པ་རྣམས་ལ། ངེད་རྣམས་རྒྱལ་པོའི་གཉེན་ཉེ་ཡིན་པས་དེ་ལྟར་བྱས་ཏེ། ཁྱོད་རྣམས་ཅིའི་ཕྱིར་དེའི་དོན་དུ་ཁྲོའམ། ངེད་རྣམས་ཀྱིས་རྒྱལ་པོར་བརྟེན་ནས་ཅི་ཞིག་ཟོས་སམ། ཁོང་གིས་ངེད་རྣམས་ལ་གསོལ་རས་གང་ཞིག་གནང་བ་ཡིན་ནམ་ཞེས་ལན་སྨྲས་ཤིང་།  
\v 43 ཡེས་ར་ཨེལ་པ་རྣམས་ཀྱིས་ཡ་ཧུ་དཱ་པ་རྣམས་ལ་ལན་དུ། ངེད་རྣམས་ནི་རྒྱལ་པོ་དང་ལྡབ་བཅུ་ \f + \ft འདིར་ལྡབ་བཅུ་ཞེས་པ་ནི་རྒྱལ་པོ་དཱ་བིད་ཀྱིས་ཡེས་ར་ཨེལ་པའི་ཚོ་པ་བཅུ་གཉིས་པོ་ལ་སྲིད་བྱེད་ཅིང་། དེ་ལས་ཡེས་ར་ཨེལ་ནི་ཚོ་པ་བཅུ་ཡིན་པ་དང་། ཡ་ཧུ་དཱ་ནི་ཚོ་པ་གཅིག་རང་ཡིན་པར་གོ་དགོས། \f*ཡིས་ཉེ་ཞིང་། དཱ་བིད་ཀྱི་སྟེང་དུའང་ཁྱོད་ཚོ་ལས་ངེད་རྣམས་ལ་དབང་ཆེ་བ་ཡིན། ཁྱོད་ཚོས་ཅིའི་ཕྱིར་ངེད་རྣམས་ལ་མཐོང་ཆུང་བྱེད་དམ། རྒྱལ་པོ་ཕྱིར་གདན་འདྲེན་ཞུ་བའི་གྲོས་ནི་ཐོག་མར་ངེད་རྣམས་ཀྱིས་བཏབ་པ་མ་ཡིན་ནམ་ཞེས་སྨྲས་ནའང་། ཡ་ཧུ་དཱ་པའི་གཏམ་ནི་ཡེས་ར་ཨེལ་གྱི་གཏམ་ལས་ཀྱང་མཁྲེགས་པར་གྱུར་ཏོ། །   
\c 20
\cl ལེའུ་ཉི་ཤུ་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 ཤེ་བཱས་ངོ་ལོག་བྱས་པ།  
\p
\v 1 དེར་ཏག་ཏག་ཁྲམ་པ་ཞིག་ཡོད་ཅིང་མིང་ལ་ཤེ་བཱ་ཞེས་བྱ་སྟེ། པེན་ཡཱ་མེན་པ་པིག་རེའི་བུ་ཡིན་ལ། དེས་རྭ་དུང་འབུད་ཀྱིན་འདི་ལྟར། བདག་ཅག་ལ་དཱ་བིད་ཀྱི་ནང་དུ་སྐལ་བ་མེད་ཅིང་། ཡེ་སེ་ཡི་བུ་དང་འབྲེལ་བ་མེད་དེ། ཀྱེ་ཡེས་ར་ཨེལ་པ་རྣམས། མི་རེ་རེ་རང་རང་གི་གུར་དུ་སོང་ཞིག་ཅེས་སྨྲས་པས།  
\v 2 ཡེས་ར་ཨེལ་པ་ཐམས་ཅད་དཱ་བིད་དང་བྲལ་ནས་པིག་རེའི་བུ་ཤེ་བཱ་ཡི་རྗེས་སུ་འབྲངས། ཡིན་ནའང་ཡ་ཧུ་དཱ་པ་རྣམས་ཡོར་དན་གཙང་པོ་ནས་བཟུང་སྟེ་ཡེ་རུ་སཱ་ལེམ་བར་དུ་རང་གི་རྒྱལ་པོའི་རྗེས་སུ་དམ་པོར་འབྲངས་པ་རེད།  
\v 3 རྒྱལ་པོ་དཱ་བིད་ཡེ་རུ་སཱ་ལེམ་དུ་སླེབས་ཤིང་རང་གི་ཕོ་བྲང་དུ་ཕེབས་ནས། སྔར་ཕོ་བྲང་བསྲུང་བར་བཞག་པའི་ཆུན་མ་བཅུ་པོ་བཀག་སྲུང་བྱས། ཁོང་གིས་དེ་དག་འཚོ་སྐྱོང་བྱས་ནའང་དེ་དག་གི་གམ་དུ་མ་ཕྱིན་པ་དང་། དེ་དག་འཆི་བའི་ཉིན་མོ་བར་བཙོན་དུ་ཟུར་བཀག་བྱས་ནས་བཞག་གོ །  
\v 4 དེ་ནས་རྒྱལ་པོས་ཨ་མ་སཱ་ལ། ཉིན་གསུམ་གྱི་ནང་དུ་ཡ་ཧུ་དཱ་པ་ཐམས་ཅད་ངའི་དྲུང་དུ་བསྡུས་ཤིག ཁྱོད་རང་ཡང་འདི་རུ་ལོག་དགོས་ཞེས་བཀའ་བསྩལ་པ་དང་།  
\v 5 ཨ་མ་སཱ་ནི་ཡ་ཧུ་དཱ་པ་རྣམས་བསྡུ་བར་ཕྱིན་ནའང་། ཁོས་འགོར་འགྱངས་བྱས་ཏེ་རྒྱལ་པོའི་དུས་བཅད་ལས་བརྒལ་བས།  
\v 6 དཱ་བིད་ཀྱིས་ཨ་བི་ཤཱ་ཨི་ལ། ད་ལྟ་པིག་རེའི་བུ་ཤེ་བཱ་ཡིས་རང་ཅག་ལ་ཨབ་ཤཱ་ལོམ་ལས་ཀྱང་ལྷག་པར་གནོད་པ་བྱེད་ཉེན་ཆེ་བས། མི་དེ་མཁར་རྫོང་བཙན་པོའི་ནང་དུ་ཞུགས་ཏེ་རང་རེའི་མིག་མདུན་ནས་མ་བྲོས་གོང་དུ། ཁྱོད་ཀྱིས་རང་གི་ཇོ་བོའི་ཞབས་ཕྱི་རྣམས་ཁྲིད་ནས་ཁོའི་ར་མདར་རྒྱུགས་ཤིག་ཅེས་བསྒོས་པ་ལ།  
\v 7 ཡོ་ཨབ་ཀྱི་མི་རྣམས་དང་། ཀེ་རེད་པ་དང་། ཕེ་ལེད་པ་དང་། དཔའ་རྩལ་ཅན་ཐམས་ཅད་ཡེ་རུ་སཱ་ལེམ་ནས་ཐོན་ཏེ་པིག་རེའི་བུ་ཤེ་བཱ་ཡི་ར་མདར་བརྒྱུགས་པ་དང་།  
\v 8 ཁོ་རྣམས་གིབ་ཡོན་གྱི་ཕ་བོང་ཆེན་པོ་ཡོད་སར་སླེབས་པའི་ཚེ། ཨ་མ་སཱ་ཁོ་རྣམས་བསུ་བར་འོངས་པ་དང་། སྐབས་དེར་ཡོ་ཨབ་ཀྱིས་གོ་ཁྲབ་གྱོན་ནས་རལ་གྲི་བཏགས་པའི་སྐ་རགས་བཅིངས་ཡོད་དེ། རལ་གྲི་ཤུབས་ཀྱི་ནང་དུ་ཡོད་པ་ཡིན། ཡོ་ཨབ་མདུན་དུ་སྐྱོད་པའི་ཚེ་རལ་གྲི་ཤུབས་ནས་ལྷུང་བ་རེད།  
\v 9 དེར་ཡོ་ཨབ་ཀྱིས་ཨ་མ་སཱ་ལ། ངའི་སྤུན་མཆེད། ཁྱོད་རང་སྐུ་ཁམས་བདེ་ལགས་སམ་ཞེས་སྨྲས་པ་དང་། ལག་གཡས་པས་ཨ་མ་སཱའི་སྨྲ་ར་ལ་འཐམས་ཏེ་ཁོ་ལ་འོ་བྱེད་རྩིས་བྱས་སོ། །  
\v 10 ཨ་མ་སཱ་ཡིས་ཡོ་ཨབ་ཀྱི་ལག་ཏུ་རལ་གྲི་ཡོད་པར་དོགས་ཟོན་མ་བྱས་པས། ཡོ་ཨབ་ཀྱིས་རལ་གྲི་ཡིས་ཁོའི་གྲོད་ཁོག་ལ་བསྣུན་ཐེངས་གཅིག་གིས་ཁོ་རྒྱུ་མ་ས་རུ་བླུགས་ནས་ཤིའོ། །དེ་ནས་ཡོ་ཨབ་དང་ཁོའི་ནུ་བོ་ཨ་བི་ཤཱ་ཨི་གཉིས་ཀྱིས་པིག་རེའི་བུ་ཤེ་བཱ་བདས་སོ། །  
\v 11 ཡོ་ཨབ་ཀྱི་གཡོག་པོ་ཞིག་ཨ་མ་སཱ་ཡི་བེམ་པོའི་རྩར་ལངས་བསྡད་དེ་ན་རེ། སུ་ཞིག་ཡོ་ཨབ་ལ་དགའ་བ་དང་དཱ་བིད་ཀྱི་ཕྱོགས་ཡིན་ན། དེ་ནི་ཡོ་ཨབ་ཀྱི་རྗེས་སུ་འབྲང་འོས་པ་ཡིན་ཞེས་བསྐུལ།  
\v 12 ཨ་མ་སཱའི་ལུས་ཡོངས་ཁྲག་གིས་བརྫིས་ནས་ལམ་དཀྱིལ་དུ་འགྱེལ་ཡོད་ཅིང་། མི་དེས་དེར་སླེབས་པའི་འབངས་ཐམས་ཅད་ལངས་སྡོད་པ་མཐོང་བས། ཨ་མ་སཱའི་བེམ་པོ་ལམ་ཁ་ནས་ཞིང་ཁར་བསྣུར་ཞིང་སྟེང་དུ་ལྭ་བ་བཀབ་བོ། །  
\v 13 བེམ་པོ་ལམ་ཁ་ནས་བསྣུར་བའི་རྗེས་སུ། མི་ཐམས་ཅད་ཡོ་ཨབ་ཀྱི་རྗེས་འབྲངས་ནས་པིག་རེའི་བུ་ཤེ་བཱ་ཡི་ར་མདར་བརྒྱུགས་སོ། །  
\v 14 དེ་ནས་ཤེ་བཱ་ནི་ཡེས་ར་ཨེལ་གྱི་ཚོ་ཁག་རེ་རེ་བརྒྱུད་ནས། པེད་མ་ཨ་ཀཱ་ཡི་ཨ་བེལ་བར་དང་པེ་རེ་པའི་མངའ་ཁོངས་ཀུན་ཏུ་སླེབས་པ་དང་། མི་ཐམས་ཅད་འདུས་ནས་ཁོའི་རྗེས་སུ་འབྲངས་པ་རེད།  
\v 15 ཡོ་ཨབ་ཀྱི་རྗེས་སུ་འབྲངས་པའི་མི་ཐམས་ཅད་ཨ་བེལ་པེད་མ་ཨ་ཀཱ་རུ་སླེབས་ནས་ཤེ་བཱ་བསྐོར་བ་དང་། གྲོང་ཁྱེར་གྱི་ཁ་གཏད་དུ་ས་རགས་བརྩིགས་ཤིང་ལྕགས་རིའི་ཁ་གཏད་དུ་བསྡད་ནས། ཁོ་རྣམས་ཀྱིས་ལྕགས་རི་རྡིབ་ཏུ་འཇུག་པའི་ཕྱིར་དེར་ཤུགས་ཀྱིས་བརྡབས་པ་རེད།  
\v 16 དེའི་ཚེ་བུད་མེད་བློ་གྲོས་དང་ལྡན་པ་ཞིག་གིས་མཁར་ཁ་ནས་བོས་ཏེ། གསན་རོགས་གནང་། གསན་རོགས་གནང་། ཁྱེད་ཅག་གིས་ཡོ་ཨབ་ལ། འདིར་ཉེ་བར་ཤོག་དང་ངས་ཁྱེད་ལ་གཏམ་ཞིག་ཞུ་བར་བྱའོ་ཞེས་ཞུ་བར་མཛོད་ཅེས་སྨྲས་པས།  
\v 17 ཡོ་ཨབ་བུད་མེད་དེའི་ཉེ་སར་ཕྱིན་པའི་ཚེ་བུད་མེད་ཀྱིས། ཁྱེད་རང་ཡོ་ཨབ་ལགས་སམ་ཞེས་སྨྲས་པས་ལན་དུ། ཁོས་ང་རང་ཡིན་ཞེས་སྨྲས་སོ། །དེ་ནས་བུད་མེད་ཀྱིས། ཁྱེད་ཀྱིས་གཡོག་མོ་བདག་གི་གཏམ་ལ་གསན་རོགས་ཞེས་ཞུས་པར། ཁོས་ངས་ཉན་ཡོད་ཅེས་སྨྲས་སོ། །  
\v 18 ཡང་བུད་མེད་ཀྱིས། གནའ་བོའི་ངག་རྒྱུན་ལ། ཨ་བེལ་དུ་གྲོས་འདྲི་འོས་ཏེ། དེ་རུ་དོན་རྣམས་ཐག་གིས་ཆོད་པ་ཡིན་ཞེས་ཟེར་རོ། །  
\v 19 ང་ནི་ཡེས་ར་ཨེལ་པའི་ཁྲོད་དུ་ཞི་བདེ་ལ་དགའ་བ་དང་བློ་དཀར་བ་ཡིན། ད་ལྟ་ཁྱེད་ཀྱིས་ཡེས་ར་ཨེལ་གྱི་མ་ཡུམ་ཡིན་པའི་གྲོང་ཁྱེར་འདི་བརླག་འདོད་པ་སྟེ། ཁྱེད་ཀྱིས་དཀོན་མཆོག་ཡ་ཝཱེའི་ནོར་སྐལ་མེད་པར་བཟོ་བ་དེ་ཅི་ཡིན་ཞེས་ཞུས་པར།  
\v 20 ཡོ་ཨབ་ཀྱིས་ལན་དུ། དེ་ལྟར་མིན་ཏེ། ངས་གཏན་ནས་ཁྱུར་མིད་མི་གཏོང་ལ་བརླག་པར་ཡང་མི་བྱེད།  
\v 21 གཏམ་ནི་དེ་བཞིན་མ་ཡིན་གྱི། ཨེ་ཕཱར་ཡིམ་རི་ཁུལ་གྱི་པིག་རེའི་བུ་ཤེ་བཱ་བྱ་བ་དེས། ལག་པ་བཏེགས་ནས་རྒྱལ་པོ་དཱ་བིད་ལ་ངོ་རྒོལ་བྱས་པའི་རྐྱེན་ཁོ་ན་ཡིན། ཁྱོད་ཀྱིས་མི་དེ་གཅིག་པུ་ངའི་ལག་ཏུ་སྤྲོད་ན། ང་གྲོང་ཁྱེར་དང་བྲལ་ནས་འགྲོ་ངེས་ཡིན་ཞེས་སྨྲས་པས། བུད་མེད་ཀྱིས་ཡོ་ཨབ་ལ། གཟིགས་དང་། དེའི་མགོ་ནི་ལྕགས་རིའི་སྟེང་ནས་གཡུག་པར་བྱའོ་ཞེས་སྨྲས་ཤིང་།  
\v 22 བུད་མེད་དེ་སོང་སྟེ་རང་གི་བློ་གྲོས་ལ་བརྟེན་ནས་མི་ཚོགས་ལ་སྐུལ་མ་བཏང་ཞིང་། དེ་དག་གིས་པིག་རེའི་བུ་ཤེ་བཱ་ཡི་མགོ་བཅད་དེ་ཡོ་ཨབ་ཀྱི་དྲུང་དུ་གཡུགས་པས། དེས་ནི་རྭ་དུང་བུས་པ་ལ་མི་རྣམས་གྲོང་ཁྱེར་དེ་ལས་ཆས་པ་དང་། མི་རེ་རེ་རང་རང་གི་གུར་དུ་སོང་། ཡོ་ཨབ་ཕྱིར་ཡེ་རུ་སཱ་ལེམ་དུ་ལོག་སྟེ་རྒྱལ་པོའི་དྲུང་དུ་ཕྱིན་ཏོ། །  
\v 23 ཡོ་ཨབ་ནི་ཡེས་ར་ཨེལ་པའི་དམག་དཔུང་ཐམས་ཅད་ཀྱི་དམག་དཔོན་དང་། ཡེ་ཧོ་ཡ་དཱ་ཡི་བུ་པེ་ནཱ་ཡ་ནི་ཀེ་རེད་པ་དང་ཕེ་ལེད་པའི་དམག་དཔོན་དུ་བསྐོས་ལ།  
\v 24 ཨ་དོ་རམ་ནི་སྡུག་ལས་རྒྱག་མཁན་རྣམས་ཀྱི་འགོ་དཔོན་དང་། ཨ་ཧི་ལུད་ཀྱི་བུ་ཡེ་ཧོ་ཤ་ཕད་ནི་ལོ་རྒྱུས་འགོད་མཁན་དུ་བསྐོས་ཏེ།  
\v 25 ཤེ་ཝཱ་ནི་དྲུང་ཡིག་དང་། ཟཱ་ཏོག་དང་ཨབ་ཡཱ་ཐར་གཉིས་ནི་མཆོད་དཔོན་དང་།  
\v 26 ཡཱ་ཨིར་པ་ཨི་རཱ་ཡང་དཱ་བིད་ཀྱི་མཆོད་དཔོན་དུ་བསྐོས་པའོ། །   
\c 21
\cl ལེའུ་ཉེར་གཅིག་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 སོ་ལོའི་མི་རྣམས་བསད་པ།  
\p
\v 1 དཱ་བིད་རྒྱལ་པོར་བཞུགས་དུས་སུ་ལོ་གསུམ་ལ་མུ་གེ་བྱུང་ཞིང་། དཱ་བིད་ཀྱིས་དཀོན་མཆོག་ཡ་ཝཱེ་ལ་ཐུགས་བརྟག་ཞུས་པ་ལ། དཀོན་མཆོག་ཡ་ཝཱེས་འདི་སྐད་དུ། སོ་ལོ་དང་ཁོའི་ཁྱིམ་རྒྱུད་ཀྱིས་གིབ་ཡོན་པ་རྣམས་བསད་ནས་ཁྲག་བཞུར་བའི་སྡིག་པ་བསགས་པའི་རྐྱེན་གྱིས་དེ་ལྟར་བྱུང་ངོ་ཞེས་གསུངས་སོ། །  
\v 2 རྒྱལ་པོ་དཱ་བིད་ཀྱིས་གིབ་ཡོན་པ་རྣམས་བོས་ཡོང་སྟེ་ཁོ་རྣམས་ལ་གསུང་མོལ་གནང་། གིབ་ཡོན་པ་ནི་ཡེས་ར་ཨེལ་གྱི་རྒྱུད་མ་ཡིན་གྱི་ཨེ་མོར་པའི་ལྷག་ལུས་རྣམས་ཡིན་ནོ། །ཡེས་ར་ཨེལ་པ་རྣམས་ཀྱིས་དེ་དག་ལ་ཁོ་རྣམས་མི་གསོད་པའི་མནའ་བསྐྱལ་ནའང་། སོ་ལོས་ཡེས་ར་ཨེལ་དང་ཡ་ཧུ་དཱ་པ་རྣམས་ཀྱི་དོན་དུ་བརྩོན་སེམས་བསྐྱེད་ནས་དེ་དག་གསོད་དུ་བསྙེགས་པ་རེད།  
\v 3 དཱ་བིད་ཀྱིས་གིབ་ཡོན་པ་རྣམས་ལ་འདི་ལྟར། ཁྱོད་ཅག་གིས་དཀོན་མཆོག་ཡ་ཝཱེའི་ནོར་སྐལ་ལ་བྱིན་གྱིས་བརླབ་པའི་ཕྱིར་ངས་ཁྱོད་ཅག་ལ་ཅི་བྱེད་དགོས་སམ། སྡིག་བཤགས་སུ་ངས་ཅི་གཏོང་བར་བྱའམ་ཞེས་དྲིས་པར།  
\v 4 གིབ་ཡོན་པས་ཁོང་ལ། ངེད་རྣམས་ནི་སོ་ལོ་དང་དེའི་ཁྱིམ་གྱི་དོན་དང་གསེར་དངུལ་ལ་འབྲེལ་བ་ཅི་ཡང་མེད། ཡང་ང་ཚོའི་རྐྱེན་གྱིས་ཡེས་ར་ཨེལ་པ་གང་རུང་ཞིག་མི་གསོད་པར་མཛོད་ཅེས་ཞུས་པ་དང་། ཁོང་གིས། ཁྱོད་རྣམས་ཀྱིས་ཅི་ལྟར་སྨྲས་ན་བདག་གིས་དེ་བཞིན་བྱ་ཞེས་གསུངས་ཤིང་།  
\v 5 དེ་དག་གིས་རྒྱལ་པོ་ལ། ང་ཚོ་བསད་ནས་རྩ་མེད་དུ་གཏོང་འདོད་མཁན་དང་། ང་ཚོ་ཡེས་ར་ཨེལ་གྱི་ཡུལ་ལ་སྡོད་དུ་མི་འཇུག་མཁན།  
\v 6 མི་དེའི་བུ་རབས་ཚ་རྒྱུད་ལས་མི་བདུན་ང་ཚོར་སྤྲོད་ཅིག་དང་། དཀོན་མཆོག་ཡ་ཝཱེས་སོ་ལོ་བདམས་སའི་ཡུལ་ཏེ་གིབ་ཨ་རུ། ང་ཚོས་དེ་དག་དཀོན་མཆོག་ཡ་ཝཱེའི་སྤྱན་སྔར་དཔྱང་བར་བྱའོ་ཞེས་ཞུས་པར། རྒྱལ་པོས། ངས་དེ་བཞིན་གཏོང་བར་བྱ་ཞེས་གསུངས་སོ། །  
\v 7 ཡང་དཱ་བིད་དང་སོ་ལོའི་བུ་ཡོ་ནཱ་ཐན་གཉིས་ཀྱི་བར་དུ་དཀོན་མཆོག་ཡ་ཝཱེ་དཔང་དུ་བཙུགས་པའི་མནའ་ཡོད་པས། རྒྱལ་པོས་སོ་ལོའི་ཚ་བོ་དང་ཡོ་ནཱ་ཐན་གྱི་བུ་མེ་ཕི་པོ་ཤེད་གཅེས་སུ་བཟུང་བ་དང་།  
\v 8 ཨ་ཡཱ་ཡི་བུ་མོ་རི་ཚི་ཕཱ་ལས་ཆད་པའི་སོ་ལོའི་བུ་ཨར་མོ་ནི་དང་། མེ་ཕི་པོ་ཤེད་ \f + \ft འདི་ནི་མིང་ལ་མེ་ཕི་པོ་ཤེད་ཅེས་པའི་མི་གཞན་ཞིག་ཡིན།\f*བྱ་བ་གཉིས་དང་། སོ་ལོའི་བུ་མོ་མི་ཀལ་ \f + \ft མི་ཀལ་ཞེས་པར་མ་ཕྱི་ལས་མི་ག་ཞེས་བཀོད་ཡོད།\f*དང་མེ་ཧོ་ལད་པ་པཱར་ཟིལ་ལ་ཨི་ཡི་བུ་ཨད་རི་ཨེལ་གཉིས་ལ་སྐྱེས་པའི་བུ་ལྔ་ནི།  
\v 9 གིབ་ཡོན་པ་རྣམས་ཀྱི་ལག་ཏུ་སྤྲད་ནས། དེ་དག་གིས་ཁོ་རྣམས་རི་མགོར་དཀོན་མཆོག་ཡ་ཝཱེའི་དྲུང་དུ་དཔྱངས་ཏེ། མི་བདུན་པོ་དེ་མཉམ་དུ་ཤི་བ་རེད། ཁོ་ཚོ་བསད་པའི་དུས་ནི་བཙས་མ་བརྔ་བའི་ཉིན་ཐོག་མ་རྣམས་ཏེ། ནས་འབྲེག་འགོ་ཚུགས་པའི་དུས་ཡིན་ནོ། །  
\v 10 དེ་ནས་ཨ་ཡཱ་ཡི་བུ་མོ་རི་ཚི་ཕཱ་ཡིས་རྩིད་རས་ཁུར་ཏེ་ཕ་བོང་སྟེང་བཏིངས་ནས་སྤྱིལ་བུ་བཟོས་ཤིང་། བཙས་མ་བརྔ་བའི་དུས་ཀྱི་ཐོག་མ་ནས་གནམ་ལས་ཆར་ཆུ་བེམ་པོའི་སྟེང་གཤོ་བའི་བར་དུ། ཉིན་དཀར་ནམ་མཁའི་བྱ་རྣམས་དང་། མཚན་མོར་ཐང་གི་གཅན་གཟན་རྣམས་འབབ་ཏུ་མ་བཅུག་པར་བེམ་པོ་བསྲུངས་སོ། །  
\v 11 ཡང་མི་ཞིག་གིས་སོ་ལོའི་ཆུན་མ་ཨ་ཡཱ་ཡི་བུ་མོ་རི་ཚི་ཕཱ་ཡིས་ཅི་བྱས་པ་དེ་དཱ་བིད་ལ་སྨྲས་པས།  
\v 12 དཱ་བིད་སོང་སྟེ་གིལ་ཨད་ཀྱི་ཡཱ་བེ་སི་པ་རྣམས་ནས་སོ་ལོའི་རུས་པ་དང་དེའི་བུ་ཡོ་ནཱ་ཐན་གྱི་རུས་པ་སྤོས་སོ། །སྔར་ཕེ་ལེ་ཤེད་པ་རྣམས་ཀྱིས་གིལ་བོ་ཨ་རུ་སོ་ལོ་བསད་ནས་བེམ་པོ་ནི་པེད་ཤན་གྱི་ཐང་ཆེན་དུ་དཔྱངས་པ་དང་། ཕྱིས་སུ་གིལ་ཡད་ཀྱི་ཡཱ་པིས་པ་རྣམས་ཀྱིས་བེམ་པོ་བརྐུས་པ་ཡིན་ནོ། །  
\v 13 དཱ་བིད་ཀྱིས་སོ་ལོ་དང་དེའི་བུ་ཡོ་ནཱ་ཐན་གཉིས་ཀྱི་རུས་པ་རྣམས་གནས་དེ་ནས་ཁྱེར་ཅིང་། དེ་དག་གིས་དཔྱངས་པ་རྣམས་ཀྱི་རུས་པ་ཡང་བསྡུས་སོ། །  
\v 14 དེར་ཁོ་རྣམས་ཀྱིས་སོ་ལོ་དང་དེའི་བུ་ཡོ་ནཱ་ཐན་གཉིས་ཀྱི་རུས་པ་རྣམས་པེན་ཡཱ་མེན་གྱི་ས་ཆ་ཙེ་ལཱ་རུ། སོ་ལོའི་ཕ་ཁི་སིའི་དུར་དུ་བསྐུངས་པ་དང་། དེ་རྣམས་ཀྱིས་རྒྱལ་པོས་བཀའ་བསྩལ་པ་ཐམས་ཅད་བསྒྲུབས་པ་དང་། དེ་ནས་དཀོན་མཆོག་གིས་ཡུལ་དེའི་ཞུ་བར་གསན་ཏོ། །   
\s1 ཕེ་ལེ་ཤེད་པའི་མི་ཆེན་དང་དམག་བརྒྱབ་པ།  
\p
\v 15 ཕེ་ལེ་ཤེད་པ་དང་ཡེས་ར་ཨེལ་པའི་བར་ལ་དམག་འཁྲུག་བྱུང་། དཱ་བིད་ཀྱིས་རང་གི་འཁོར་གཡོག་རྣམས་ཁྲིད་ནས་མར་སོང་སྟེ་ཕེ་ལེ་ཤེད་པ་དང་འཐབ་ཅིང་ཁོང་ཐང་ཆད་པར་གྱུར་ཏོ། །  
\v 16 མི་གཟུགས་རིང་གི་བུ་རྒྱུད་རྣམས་ལས་ཡེ་པི་བེ་ནོབ་བྱ་བ་དེས་དཱ་བིད་གསོད་དགོས་པར་སྨྲ་ཞིང་། དེའི་ལི་ཡི་མདུང་རྩེའི་ལྗིད་ཚད་ལ་སྲང་སུམ་བརྒྱ་ཡོད་ལ། རྐེད་པར་རལ་གྲི་གསར་པ་ཞིག་ཀྱང་བཏགས་ཡོད།  
\v 17 ཟེ་རུ་ཡཱ་ཡི་བུ་ཨ་བི་ཤཱ་ཨིས་ཁོང་ལ་རོགས་བྱས་ཏེ་ཕེ་ལེ་ཤེད་པར་བརྡུངས་ནས་བསད་དོ། །ཉིན་དེར་དཱ་བིད་ཀྱི་མི་རྣམས་ཀྱིས་མནའ་བསྐྱལ་ནས་ཁོང་ལ། ཡེས་ར་ཨེལ་གྱི་རྒྱུད་མི་ཆད་པའི་ཕྱིར་དེང་ཕྱིན་ཆད་ཁྱེད་ང་ཚོ་དང་མཉམ་དུ་འཐབ་མོར་མི་ཞུགས་པར་མཛོད་ཅེས་ཞུས་སོ། །  
\v 18 དེའི་རྗེས་སུ་ཡང་གོབ་ཡུལ་དུ་ཕེ་ལེ་ཤེད་པ་རྣམས་དང་འཐབ་མོ་བྱུང་བ་དང་། ཧུ་ཤཱ་པ་སིབ་བེ་ཀཱ་ཨི་བྱ་བ་དེས་མི་གཟུགས་རིང་གི་བུ་རྒྱུད་རྣམས་ལས་སབ་བྱ་བ་དེ་བསད་དོ། །  
\v 19 ཡང་དེ་རྣམས་གོབ་ཡུལ་དུ་སླར་ཡང་ཕེ་ལེ་ཤེད་པ་དང་འཐབ་ཅིང་། པེད་ལེ་ཧེམ་པ་ཡཱ་རེ་ཨོར་གིན་གྱི་བུ་ཨེལ་ཧ་ནན་གྱིས་གཱད་པ་གོལ་ཡད་བྱ་བ་དེ་བསད་པ་དང་། མི་དེའི་མདུང་ནི་འཐག་འཁོར་གྱི་གདུང་མ་ལྟ་བུ་ཡོད་པ་ཡིན།  
\v 20 དེ་ནས་ཡང་ཐེངས་ཤིག་ལ་ཁོ་རྣམས་གཱད་ཡུལ་དུ་འཐབ་ཅིང་། དེ་རུ་མི་ཆེན་ཞིག་ཡོད་ཅིང་དེའི་ལག་པ་དང་རྐང་པ་རེ་རེར་མཛུབ་མོ་དྲུག་རེ་ཡོད་པས་ཁྱོན་སྡོམ་མཛུབ་མོ་ཉེར་བཞི་ཡོད་པ་ཡིན། མི་དེ་ཡང་མི་གཟུགས་རིང་གི་རྒྱུད་ཡིན་ནོ། །  
\v 21 དེས་ནི་ཡེས་ར་ཨེལ་ལ་སྐུར་བ་བཏབ་པའི་ཚེ། དཱ་བིད་ཀྱི་སྐུ་མཆེད་ཤིམ་ཨི་ཡི་བུ་ཡོ་ནཱ་ཐན་གྱིས་ཁོ་བསད་དོ། །  
\v 22 མི་དེ་བཞི་པོ་གཱད་པའི་མི་གཟུགས་རིང་ལས་ཆད་ཅིང་། དཱ་བིད་དང་དེའི་འཁོར་གཡོག་གི་ལག་ནས་ཤིའོ། །   
\c 22
\cl ལེའུ་ཉེར་གཉིས་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 དཱ་བིད་ཀྱི་བསྟོད་གླུ།  
\p
\v 1 དཀོན་མཆོག་ཡ་ཝཱེས་དཱ་བིད་ནི་དེའི་དགྲ་བོ་ཐམས་ཅད་དང་སོ་ལོའི་ལག་ནས་བསྐྱབས་པའི་ཉིན་ལ། ཁོང་གིས་དཀོན་མཆོག་ཡ་ཝཱེའི་དྲུང་དུ་མགུར་མ་འདིའི་ཚིག་རྣམས་ཞུས་པ་སྟེ།  
\v 2 ང་ཡི་བྲག་རྡོ་དང་ནི་རི་རྫོང་དང་། །ང་ཡི་སྲོག་སྐྱོབ་ཡ་ཝཱེ་ཁོང་ཉིད་ཡིན། །  
\v 3 ང་ཡི་དཀོན་མཆོག་བདག་གི་ཕ་བོང་ལགས། །ཁྱེད་ནི་ང་རང་སྐྱབས་སུ་འགྲོ་ས་ཡིན། །ང་ཡི་ཕུབ་དང་ཐར་པའི་རྭ་དུང་ \f + \ft འདིར་རྭ་དུང་ཞེས་པ་ནི་དཀོན་མཆོག་ཡ་ཝཱེའི་མཐུ་སྟོབས་ལ་འཇུག\f*དང་། །བདག་གི་བཙན་རྫོང་དང་ནི་སྐྱབས་གནས་ལགས། །གདུག་རྩུབ་ཅན་ལས་བསྐྱབས་ནས་ཐར་མཛད་པ། །ཀྱེ་ཀྱེ་ང་ཡི་སྐྱབས་མགོན་ཁྱེད་ཉིད་དོ། །  
\v 4 བསྟོད་པར་འོས་པའི་ཡ་ཝཱེ་ང་ཡིས་འབོད། །དེ་ནས་ང་རང་དགྲ་བོ་ཀུན་ལས་ཐར། །  
\v 5 འཆི་བའི་རྦ་རླབས་ཀྱིས་ནི་བདག་མཐའ་བསྐོར། །འཇོམས་བྱེད་དྲག་བཞུར་ཆུ་བོས་ང་རང་བསྣུབས། །  
\v 6 གཤིན་པོའི་ཡུལ་གྱི་ཐག་པས་བདག་ནི་འཁྲིས། །འཆི་བའི་རྙི་རྒྱ་ང་ཡི་སྟེང་དུ་བབས། །  
\v 7 དཀའ་སྡུག་མྱོང་དུས་བདག་གིས་ཡ་ཝཱེ་བོས། །རང་གི་དཀོན་མཆོག་ཉིད་ལ་ཆོ་ངེ་བཏོན། །མཆོད་ཁང་ནང་དུ་བདག་གི་སྐད་གསན་ཅིང་། །བདག་གི་སྨྲེ་སྔགས་ཁོང་གི་སྙན་དུ་ཆུད། །  
\v 8 དེའི་དུས་ས་གཞི་འགུལ་ཞིང་འདར་བ་དང་། །ནམ་མཁའི་གཏིང་གཞི་ཀུན་ནས་གཡོས་པ་སྟེ། །ཡ་ཝཱེ་ཁོང་ཉིད་ཁྲོས་པའི་རྐྱེན་ལས་བྱུང་། །  
\v 9 ཁོང་གི་ཤངས་ལས་དུ་བ་སྟུག་པོ་འཕྱུར། །ཁོང་གི་ཞལ་ལས་མེ་དཔུང་དྲག་པོ་འབར། །ཐ་ན་སོལ་བ་ཡང་ནི་མེ་ལ་སྦར། །  
\v 10 ཁོང་གིས་ནམ་མཁའ་དཔྱངས་ནས་མར་ཕེབས་ཤིང་། །ཁོང་གི་ཞབས་འོག་སྤྲིན་ནག་སྟུག་པོ་འཁྲིགས། །  
\v 11 ཁོང་ནི་ཀེ་རུབ་\f + \ft ཀེ་རུབ་ཅེས་པ་ནི་དཀོན་མཆོག་གི་ཕོ་ཉའི་རིགས་སུ་གཏོགས་པ་དང་ནུས་པ་ཁྱད་པར་ཅན་ཞིག་ཡིན།\f*ཅིག་ལ་བཅིབས་ནས་འཕུར། །རླུང་གི་གཤོག་པའི་རྩེ་མོར་མངོན་པར་མཛད། །  
\v 12 ཁོང་ནི་སྨག་རུམ་དང་ནི་ཆུ་ཆེན་དང་། །ཆར་སྤྲིན་ནག་པོ་ཕྱོགས་བཞིའི་ཡོལ་བར་མཛད། །  
\v 13 ཁོང་ལས་འཁྱུགས་པའི་གློག་དམར་དྲག་པོ་ཡིས། །སོལ་བ་ཡང་ནི་མེ་རུ་སྦར་བ་འོ། །  
\v 14 ཡ་ཝཱེས་ནམ་མཁར་འབྲུག་སྒྲ་ལྡིར་བ་དང་། །བླ་ན་མེད་པ་ཉིད་ཀྱིས་གསུང་སྐད་བསྒྲགས། །  
\v 15 མདའ་མོ་འཕངས་ནས་དགྲ་རྣམས་ཕྱོགས་བཞིར་གཏོར། །གློག་དམར་འཁྱུགས་ཏེ་ཁོ་རྣམས་བཅོམ་པ་འོ། །  
\v 16 ཡ་ཝཱེས་བཀའ་བཀྱོན་གནང་བ་དང་། །ཤངས་ལས་དབུགས་ཤིག་ཐོན་མ་ཐག །རྒྱ་མཚོའི་མཐིལ་ནི་སྣང་བར་གྱུར། །ས་གཞིའི་རྨང་ཡང་ཕྱི་རུ་མངོན། །  
\v 17 སྟེང་ནས་ཕྱག་ཟུང་བརྐྱངས་ཏེ་ང་ནི་ཟིན། །གཏིང་ཟབ་ཆུ་ལས་ང་རང་ཡར་དྲངས་སོ། །  
\v 18 ཁོང་གིས་ང་ནི་དགྲ་བོ་སྟོབས་ཆེན་དང་། །ང་ལ་སྡང་བ་རྣམས་ལས་བསྐྱབས་པ་སྟེ། །དེ་རྣམས་ང་ལས་སྟོབས་བོ་ཆེ་ཕྱིར་རོ། །  
\v 19 ཆག་སྒོའི་ཉིན་མོར་ཁོ་རྣམས་ང་ལ་རུབས། །འོན་ཀྱང་ཡ་ཝཱེ་བདག་གི་སྐྱབས་གནས་ཡིན། །  
\v 20 ཁོང་གིས་ང་རང་ས་ཁོད་ཡངས་སར་ཁྲིད། །ཁོང་ནི་བདག་ལ་མཉེས་པས་བདག་ནི་བསྐྱབས། །  
\v 21 བདག་གི་དྲང་བདེན་བཞིན་དུ་གསོལ་རས་བསྩལ། །ལག་པ་གཙང་བ་ལྟར་དུ་ཨ་ལན་གནང་། །  
\v 22 རྒྱུ་མཚན་བདག་གིས་ཡ་ཝཱེའི་ལམ་རྣམས་བསྲུངས། །ངན་པར་སྤྱད་ནས་དཀོན་མཆོག་བསྐྱུར་པ་མེད། །  
\v 23 ཁོང་གི་ཁྲིམས་སྲོལ་ཐམས་ཅད་མདུན་དུ་མཆིས། །ཁོང་གི་སྒྲིག་ཁྲིམས་ནམ་ཡང་སྤངས་པ་མིན། །  
\v 24 ཁོང་གི་ཞལ་དྲུང་ང་རང་སྐྱོན་དང་བྲལ། །རང་ཉིད་ཉེས་སྐྱོན་རྣམས་ལས་བསྲུངས་པ་ཡིན། །  
\v 25 དེའི་ཕྱིར་ཡ་ཝཱེས་ང་ཡི་དྲང་བདེན་དང་། །ཁོང་གི་སྤྱན་སྔར་ང་རང་གཙང་བ་བཞིན། །དེ་དང་མཐུན་པའི་གསོལ་རས་ང་ལ་གནང་། །  
\v 26 བྱམས་བརྩེ་ཅན་ལ་ཁྱེད་ཀྱིས་བྱམས་བརྩེས༌སྐྱོང༌། །ཉེས་མེད་མི་ལ་ཁྱེད་ཀྱིས་ལྷག་བསམ༌མངོན། །  
\v 27 དྭངས་གཙང་མི་ལ་ཁྱེད་ཀྱིས་རྣམ་དག་མངོན། །གཡོ་སྒྱུ་ཅན་ལ་ཁྱེད་ཀྱིས་མཁས་མཛངས་སྤྱོད། །  
\v 28 ཉམ་ཐག་མི་རྣམས་ཁྱེད་ཀྱིས་སྐྱོབ་པ་དང་། །ཁྱེད་ཀྱི་སྤྱན་གྱིས་རང་མཐོང་ཅན་རྣམས་གཟིགས། །ཁྱེད་ཀྱིས་དེ་རྣམས་སྨད་པར་མཛད་པ་འོ། །  
\v 29 ཡ་ཝཱེ་ཁྱེད་ནི་བདག་གི་སྒྲོན་མེ་ལགས། །ཁྱེད་ཀྱིས་བདག་གི་མུན་པར་འོད་ཟེར་སྤྲོས། །  
\v 30 ཁྱེད་ལ་བརྟེན་ནས་དགྲ་བོའི་དམག་དཔུང་གཏོར། །དཀོན་མཆོག་མཉམ་དུ་ལྕགས་རིར་རྒྱང་མཆོང་བྱེད། །  
\v 31 དཀོན་མཆོག་ཁོང་གི་ལམ་ནི་རྣམ་དག་ཡིན། །ཡ་ཝཱེའི་བཀའ་ནི་དྲི་མ་མེད་པ་ལགས། །སྐྱབས་བཅོལ་རྣམས་ཀྱི་ཕུབ་ནི་ཁོང་ཉིད༌ཡིན། །  
\v 32 ཡ་ཝཱེ་མ་གཏོགས་དཀོན་མཆོག་གཞན་སུ་ཡོད། །དཀོན་མཆོག་ལས་གཞན་བྲག་རྡོ་སུ་ཡིན་ནམ། །  
\v 33 དཀོན་མཆོག་ཁོང་ཉིད་བདག་གི་བཙན་རྫོང་ལགས། །བདག་གི་སྤྱོད་ལམ་ཕུལ་དུ་བྱུང་བར་མཛད། །  
\v 34 ཁོང་གིས་བདག་ལ་ཤྭ་མོའི་བདེ་མྱུར་བསྩལ། །མཐོན་པོའི་གནས་སུ་བརྟན་པོར་ཚུགས་པར་མཛད། །  
\v 35 འཐབ་མོ་འགྱེད་ལུགས་བདག་གི་ལག་པར་བསླབ། །དཔུང་པས་ལི་གཞུ་འགུག་ཀྱང་ནུས་པར་མཛད། །  
\v 36 ཁྱེད་ཀྱི་ཐར་པའི་ཕུབ་ནི་ང་ལ་གནང་། །བཀའ་ལན་བཟང་པོས་ང་རང་ཆེན་པོར་མཛད། །  
\v 37 གོམ་པ་སྤོ་སའི་ལམ་ནི་ཡངས་པར་མཛད། །བདག་གི་རྐང་པ་ནམ་ཡང་འདྲེད་མ་གྱུར། །  
\v 38 རང་གི་དགྲ་རྣམས་དེད་ནས་ཚར་དུ་བཅད། །རྩ་མེད་གཏོང་བའི་བར་དུ་ཕྱིར་མ་ལོག །  
\v 39 བདག་གིས་དེ་རྣམས་རྩ་མེད་བཏང་ནས་ནི། །དེ་དག་རྨས་ཤིང་ལང་རྒྱུ་མེད་པར་བཟོས། །དེ་རྣམས་ང་ཡི་རྐང་འོག་ས་རུ་འགྱེལ། །  
\v 40 འཐབ་ཕྱིར་ང་ལ་སྟོབས་ཀྱི་སྐ་རགས༌བཅིངས། །དགྲ་རུ་ལང་མཁན་ང་ཡི་རྐང་འོག༌བཅུག །  
\v 41 དགྲ་རྣམས་ང་ཡི་མདུན་ནས་འབྲོ་མཛད་པས། །ང་ལ་སྡང་བའི་མི་རྣམས་བཅོམ་པ་ཡིན། །  
\v 42 དེ་ཚོས་རེ་སྒུག་བྱས་ཀྱང་སྐྱོབ་མཁན་མེད། །ཡ་ཝཱེ་བོས་ཀྱང་ཁོང་གིས་ལན་མ་གསུངས། །  
\v 43 རྡུལ་ལྟར་བདག་གིས་དེ་དག་ཕྱེ་མར་བཏགས། །ལམ་གྱི་འདམ་བཞིན་དེ་རྣམས་བརྫིས་ནས་གཡུགས། །  
\v 44 འབངས་ཀྱི་རྩོད་གླེང་ལས་བདག་ཐར་བར་མཛད། །མི་རིགས་རྣམས་ཀྱི་མགོན་དུ་ང་རང་བསྲུངས། །རྒྱུས་མེད་མི་སྡེས་ང་ལ་ཞབས་ཕྱི་སྒྲུབ། །  
\v 45 ཕྱི་ཕྱོགས་མི་རྣམས་བདག་ལ་མགོ་འདོགས་ཤིང་། །ཐོས་པ་ཙམ་གྱིས་དེ་ཚོས་ང་ལ་མཉན། །  
\v 46 ཁོ་རྣམས་ཀུན་པོ་ཉམས་རྒུད་དུ་གྱུར་ཅིང་། །སྐྲག་ནས་འདར་བཞིན་བཙན་རྫོང་དག་ནས་ཐོན། །  
\v 47 ཡ་ཝཱེ་ཁོང་ནི་གཏན་དུ་གསོན་པོར་བཞུགས། །བདག་གི་བྲག་རྡོར་བསྟོད་བསྔགས་བརྗོད་པར་ཤོག །དཀོན་མཆོག་ཉིད་དེ་ང་རང་སྐྱོབ་མཁན་གྱི། །བྲག་རྡོ་ཁོང་ལ་བཀུར་བསྟི་འབྱུང་བར་ཤོག །  
\v 48 དཀོན་མཆོག་ང་ཡི་དགྲ་ཤ་ལེན་མཁན་ཡིན། །མི་སྡེ་རྣམས་ནི་ང་ཡི་དབང་དུ་བཀོད། །  
\v 49 ཁྱེད་ཀྱིས་ང་རང་དགྲ་ལས་ཐར་བར་མཛད། །བདག་གི་དགྲ་ཟླ་རྣམས་ལས་མཐོན་པོར་བཏེགས། །གདུག་རྩུབ་ཅན་ལས་ང་ནི་བསྐྱབས་པ་འོ། །  
\v 50 ཀྱེ་ཀྱེ་ཡ་ཝཱེ་དེའི་ཕྱིར་བདག་གིས་ནི། །མི་རིགས་རྣམས་ཀྱི་དཀྱིལ་ནས་ཁྱེད་ལ་བསྔགས། །ཁྱེད་ཀྱི་མཚན་ལ་བསྟོད་པའི་མགུར་མ་འབུལ། །  
\v 51 ཡ་ཝཱེས་མཆོག་ཏུ་གྱུར་པའི་ཐར་པ་ནི། །ཁོང་གིས་བསྐོས་པའི་རྒྱལ་པོར་གནང་བ་དང་། །སྣུམ་གྱིས་བྱུགས་པར་བྱམས་བརྩེ་དཔག་མེད་མཛད། །དཱ་བིད་དང་ནི་ཁོང་གི་བུ་རྒྱུད་རྣམས། །རྒྱུན་ནས་རྒྱུན་དུ་བྱམས་བརྩེས་སྐྱོང་བ་འོ། །ཞེས་པའོ། །   
\c 23
\cl ལེའུ་ཉེར་གསུམ་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 དཱ་བིད་ཀྱི་མཇུག་གི་གཏམ།  
\p
\v 1 ཡང་འདི་ནི་དཱ་བིད་ཀྱི་གཏམ་ཕྱི་མ་སྟེ། ཡ་ཀོབ་ཁོང་གི་དཀོན་མཆོག་གིས་བྱུགས་ཤིང་། །གོ་གནས་མཐོན་པོར་སྡོད་པར་མཛད་པའི་མི། །ཡེས་ར་ཨེལ་རྣམས་མཉེས་པའི་གླུ་བ་སྟེ། །ཡེ་སེའི་བུ་སྟེ་དཱ་བིད་འདི་ལྟར་གསུངས། །  
\v 2 ཡ་ཝཱེའི་ཐུགས་ཉིད་བདག་བརྒྱུད་གསུང་གླེང་མཛད། །ཁོང་གི་བཀའ་རྣམས་བདག་གི་ངག་ལས་ཐོན། །  
\v 3 ཡེས་ར་ཨེལ་གྱི་དཀོན་མཆོག་བཀའ་བྱོན་ཏེ། །ཡེས་ར་ཨེལ་གྱི་བྲག་རྡོས་འདི་སྐད་དུ། །དྲང་གཞག་སྒོ་ནས་བདག་སྐྱོང་བྱེད་པ་དང་། །དཀོན་མཆོག་ཉིད་ལ་འཇིགས་ཤིང་གུས་པའི་ངང་། །རྒྱལ་སྲིད་སྐྱོང་མཁན་དེ་ནི་འདི་འདྲ་སྟེ། །  
\v 4 དེ་ནི་ཞོགས་པའི་སྐྱ་རེངས་ཤར་བ་དང་། །གཡའ་དག་དགུང་གི་ཉི་རྩེ་བརྒྱབ་འདྲ་སྟེ། །ཆར་རྗེས་འོད་ཟེར་སྤྲོས་ནས་རྩྭ་སྔོན་སྐྱེད། །  
\v 5 བདག་ཁྱིམ་དཀོན་མཆོག་དྲུང་དུ་དེ་བཞིན་ཡིན། །ཁོང་གིས་བདག་ལ་གཏན་གྱི་ཞལ་ཆད་མཛད། །དེ་ནི་ཡོངས་སུ་རྫོགས་ཤིང་བརྟན་བརླིང་ཡིན། །བདག་གི་ཐར་པ་དང་ནི་རེ་སྨོན་རྣམས། །ཁོང་གིས་འགྲུབ་པར་མཛད་པ་མ་ཡིན་ནམ། །  
\v 6 འོན་ཀྱང་ཁྲམ་པ་ཐམས་ཅད་ཚེར་མ་བཞིན། །གཡུག་ཅིང་མི་ཡིས་རེག་པར་མི་ནུས་ཏེ། །  
\v 7 རེག་འདོད་མི་ཡིས་ལྕགས་དང་མདུང་བཟུང་སྟེ། །དེ་དག་རང་གི་གནས་སུ་བསྲེག་པར་འགྱུར། །ཞེས་པའོ། །   
\s1 དཱ་བིད་ཀྱི་དཔའ་རྒོད་རྣམས།  
\p
\v 8 དཱ་བིད་ཀྱི་དཔའ་རྒོད་རྣམས་ཀྱི་མིང་ནི་འདི་ལྟ་སྟེ། ཐ་ཀེ་མོན་པ་ཡོ་ཤེབ་པ་ཤེ་བེད་བྱ་བ་དེ་ནི་དཔའ་རྒོད་གསུམ་པོའི་འགོ་དཔོན་ཡིན་ནོ། །ཁོའི་མིང་ལ་ཡེས་པ་ཨལ་ནོ་ཞེས་ཀྱང་བྱ་སྟེ། དེས་གཡུལ་འགྱེད་ཐེངས་གཅིག་གི་ཁྲོད་མི་བརྒྱད་བརྒྱ་བསད་པའོ། །  
\v 9 དེའི་འཕྲོར་ཨ་ཧོ་པ་དོ་དོའི་བུ་ཨེ་ལི་ཨ་ཟར་བྱ་བ་ཡིན་ཏེ། དཱ་བིད་ཀྱི་རྗེས་སུ་འབྲངས་པའི་དཔའ་རྒོད་གསུམ་པོ་ནང་གི་གཅིག་ལགས་སོ། །སྔར་ཕེ་ལེ་ཤེད་པ་རྣམས་འཐབ་མོའི་ཕྱིར་འདུས་པ་ལ། དེ་དག་གིས་ཕེ་ལེ་ཤེད་པ་རྣམས་ལ་འགོག་རྒོལ་བྱས་ནས་ཡེས་ར་ཨེལ་པ་རྣམས་གྱེན་དུ་འགྲོ་བའི་ཚེ།  
\v 10 མི་དེ་ལངས་ནས་ཐང་ཆད་དེ་ལག་པ་རལ་གྲིར་འབྱར་བའི་བར་དུ་ཕེ་ལེ་ཤེད་པ་རྣམས་ལ་བརྒྱབ་སྟེ། ཉིན་དེར་དཀོན་མཆོག་ཡ་ཝཱེ་ཕྱོགས་ལས་རྣམ་པར་རྒྱལ་བས། མི་རྣམས་ཨེ་ལི་ཨ་ཟར་གྱི་རྗེས་སུ་འབྲངས་ནས་བཅོམ་ནོར་འཕྲོག་པའི་ལས་ཁོ་ནར་བྲེལ་ཏོ། །  
\v 11 ཡང་དེའི་འཕྲོར་ཧ་རར་པ་ཨ་གེའི་བུ་ཤམ་མཱ་བྱ་བ་ཡིན་ཏེ། ཐེངས་ཤིག་ཕེ་ལེ་ཤེད་པ་རྣམས་ལེ་ཧི་ཞེས་པའི་ཡུལ་དུ་སྲན་དམར་གྱིས་ཁེངས་པའི་ཞིང་ཞིག་ཏུ་འདུས་ཡོད་པ་ལ། འབངས་རྣམས་ཕེ་ལེ་ཤེད་པའི་མདུན་ནས་བྲོས་སོང་བའི་ཚེ།  
\v 12 ཁོ་རང་ཞིང་དེའི་དཀྱིལ་དུ་ལངས་ནས་ཞིང་དེ་བསྲུངས་པ་དང་། ཕེ་ལེ་ཤེད་པ་རྣམས་ཕམ་པར་བརྒྱབ། དཀོན་མཆོག་ཡ་ཝཱེས་ཡེས་ར་ཨེལ་པ་རྣམས་ལ་རྒྱལ་ཁ་ཆེན་པོ་ཐོབ་པར་མཛད་དོ། །  
\v 13 བཙས་མ་བརྔ་འགོ་ཚུགས་པའི་དུས་སུ། འགོ་དཔོན་སུམ་ཅུ་ལས་འདི་གསུམ་པོ་ཨ་དུལ་ལཱམ་བྲག་ཕུག་ཏུ་དཱ་བིད་ཀྱི་དྲུང་དུ་ཕྱིན་པའི་ཚེ། ཕེ་ལེ་ཤེད་པའི་དམག་དཔུང་གིས་རེ་པཱ་པའི་ལུང་པ་རུ་སྒར་བཏབ་བོ། །  
\v 14 དེའི་དུས་སུ་དཱ་བིད་ནི་བཙན་རྫོང་ནང་དུ་ཡོད་པ་དང་། ཕེ་ལེ་ཤེད་པའི་འགོག་སྲུང་དམག་དཔུང་པེད་ལེ་ཧེམ་དུ་ཡོད་པ་ཡིན།  
\v 15 དེར་དཱ་བིད་ཤིན་ཏུ་སྐོམ་ནས་ན་རེ། ཀྱེ་ཧོ། སུ་ཞིག་གིས་པེད་ལེ་ཧེམ་གྱི་མཁར་སྒོའི་འགྲམ་དུ་ཡོད་པའི་ཁྲོན་པ་ལས་ཆུ་ཁུར་འོངས་ནས་ང་ལ་བླུད་ན་ཅི་མ་རུང་ཞེས་པར།  
\v 16 དཔའ་རྒོད་འདི་གསུམ་པོས་ཕེ་ལེ་ཤེད་པའི་དམག་སྒར་བརྒལ་ནས་སོང་སྟེ། པེད་ལེ་ཧེམ་གྱི་མཁར་སྒོའི་འགྲམ་དུ་ཡོད་པའི་ཁྲོན་པ་ལས་ཆུ་བཅུས་ནས་ཁུར་འོངས་ཏེ་དཱ་བིད་ལ་ཕུལ་ནའང་། ཁོང་གིས་དེ་མ་འཐུང་བར་དཀོན་མཆོག་ཡ་ཝཱེའི་དྲུང་དུ་མཆོད་ནས་ན་རེ།  
\v 17 ཀྱེ་དཀོན་མཆོག་ཡ་ཝཱེ་ལགས། བདག་གིས་འདི་ལྟ་བུ་གཏན་ནས་མི་བྱེད་དེ། འདི་ནི་མི་དེ་གསུམ་པོས་རང་སྲོག་འབེན་དུ་བཞག་ནས་སོང་བས། འདི་ནི་ཁོ་ཚོའི་ཁྲག་མ་ཡིན་ནམ་ཞེས་ཞུས་ནས། ཁོང་གིས་དེ་ལས་མ་འཐུང་ངོ་། །དཔའ་རྒོད་འདི་གསུམ་པོས་ལས་དེ་ལྟ་བུ་བྱས་སོ། །  
\v 18 ཟེ་རུ་ཡཱ་ཡི་བུ་ཨ་བི་ཤཱ་ཨི་སྟེ་ཡོ་ཨབ་ཀྱི་ནུ་བོ་ནི་དཔའ་རྒོད་གསུམ་པོའི་འགོ་དཔོན་ཡིན་ཞིང་། དེས་ནི་མི་སུམ་བརྒྱ་ལ་མདུང་གིས་བརྒྱབ་ནས་བསད་པས་དཔའ་རྒོད་གསུམ་པོའི་ཁྲོད་དུ་མིང་གྲགས་རྒྱས་སོ། །  
\v 19 ཁོ་ནི་དཔའ་རྒོད་གསུམ་པོ་དེའི་ཁྲོད་དུ་མིང་གྲགས་ཆེས་ཆེ་བ་ཡིན་པས་འགོ་དཔོན་དུ་གྱུར་ན་ཡང་། དཔའ་རྒོད་སྔོན་མ་གསུམ་པོར་མི་དོའོ། །  
\v 20 ཡང་ཡེ་ཧོ་ཡ་དཱ་ཡི་བུ་པེ་ནཱ་ཡ་བྱ་བ་ནི་ཀབ་ཟེ་ཨེལ་ནས་ཐོན་པའི་དཔའ་རྒོད་ཡིན་ཞིང་། སྔར་དོན་ཆེན་རྣམས་བྱས་མྱོང་སྟེ། དེས་ནི་མོ་ཨབ་པ་ཨ་རི་ཨེལ་གྱི་བུ་གཉིས་བསད་པ་དང་། ཡང་ཁ་བ་འབབ་དུས་དོང་ཞིག་ཏུ་སོང་སྟེ་སེང་གེ་ཞིག་བསད་དོ། །  
\v 21 ཡང་པེ་ནཱ་ཡ་ཡིས་ཨེ་ཅིབ་པ་སྟོབས་ཅན་ཞིག་བསད་པ་དང་། ཨེ་ཅིབ་པ་དེའི་ལག་ཏུ་མདུང་ཡོད་དེ། ཁོས་དབྱུག་པ་བཟུང་ནས་ཨེ་ཅིབ་པ་དེའི་ཕྱོགས་སུ་མར་སོང་སྟེ། དེ་ལག་ནས་མདུང་ཕྲོགས་ཤིང་མདུང་དེས་མི་དེ་བསད་དོ། །  
\v 22 ཡེ་ཧོ་ཡ་དཱ་ཡི་བུ་པེ་ནཱ་ཡས་ལས་དེ་ལྟ་བུ་བྱས་པས། ཁོ་རང་དཔའ་རྒོད་གསུམ་པོའི་ཁྲོད་དུ་མིང་གྲགས་ཅན་དུ་གྱུར་ཏོ། །  
\v 23 ཁོ་ནི་དཔའ་རྒོད་སུམ་ཅུ་ལས་མིང་གྲགས་ཆེ་ནའང་། དཔའ་རྒོད་སྔོན་མ་གསུམ་པོར་མི་དོའོ། །དཱ་བིད་ཀྱིས་དེ་ནི་སྐུ་སྲུང་པ་རྣམས་ཀྱི་འགོ་དཔོན་དུ་བཞག  
\v 24 དཔའ་རྒོད་སུམ་ཅུའི་གྲས་སུ་ཡོ་ཨབ་ཀྱི་ནུ་བོ་ཨ་སཱ་ཧེལ་བྱ་བ་དང་། པེད་ལེ་ཧེམ་པ་དོ་དོ་ཡི་བུ་ཨེལ་ཧ་ནན་དང་།  
\v 25 ཧ་རོད་པ་ཤམ་མཱ་དང་། ཧ་རོད་པ་ཨེ་ལི་ཀཱ་དང་།  
\v 26 ཕེ་ལེད་པ་ཧེ་ལེ་ཙི་དང་། ཐེ་ཀོ་ཨ་པ་ཨིག་ཀེ་སི་ཡི་བུ་ཨི་རཱ་དང་།  
\v 27 ཨ་ན་ཐོད་པ་ཨ་བི་ཨེ་ཟཱེར་དང་། ཧུ་ཤཱ་པ་མེ་བུན་ན་ཨི་དང་།  
\v 28 ཨ་ཧོ་པ་ཙལ་མོན་དང་། ནེ་ཏོ་ཕཱ་པ་མ་ཧ་རཱ་ཨི་དང་།  
\v 29 ནེ་ཏོ་ཕཱ་པ་པ་ཨ་ནཱ་ཡི་བུ་ཧེ་ལེབ་དང་། པེན་ཡཱ་མེན་གྱི་བུ་རབས་ཚ་རྒྱུད་དེ་གིབ་ཨ་པ་རི་བཱ་ཨི་ཡི་བུ་ཨིད་ཏ་ཨི།  
\v 30 ཕི་ར་ཐོན་པ་པེ་ནཱ་ཡ་དང་། གཱ་ཨ་སི་གྲོག་མོའི་ཧིད་དཱ་ཨི་དང་།  
\v 31 ཨ་རཱབ་པ་ཨ་བི་ཨལ་བོན་དང་། བར་ཧུམ་པ་ཨས་མ་ཝེད་དང་།  
\v 32 ཤ་ཨལ་བོན་པ་ཨེལ་ཡ་བཱ་དང་། ཡཱ་ཤེན་གྱི་བུ་རྣམས་ཀྱི་ཁྲོད་ནས་ཡོ་ནཱ་ཐན་དང་།  
\v 33 ཧ་རར་པ་ཤམ་མཱ་དང་། ཧ་རར་པ་ཤཱ་རར་གྱི་བུ་ཨ་ཧི་ཨམ་དང་།  
\v 34 མ་ཨ་ཀཱ་པ་ཨ་ཧས་པ་ཨི་ཡི་བུ་ཨེ་ལི་ཕེ་ལེད་ཤེད་དང་། གེ་ལོ་པ་ཨ་ཧི་ཐོ་ཕེལ་གྱི་བུ་ཨེ་ལི་ཨམ་དང་།  
\v 35 ཀར་མེལ་པ་ཧེ་ཚེ་རོ་དང་། ཨར་པཱ་པ་ཕ་ཨ་རཱ་ཨི་དང་།  
\v 36 ཙོ་བཱ་པ་ནཱ་ཐན་གྱི་བུ་ཡིག་ཨལ་དང་། གཱ་རྡུ་པ་པཱ་ནི་དང་།  
\v 37 ཨམ་མོན་པ་ཙེ་ལེག་དང་། ཟེ་རུ་ཡཱ་ཡི་བུ་ཡོ་ཨབ་ཀྱི་གོ་མཚོན་འཁུར་མཁན་པེ་ཨེ་རཱོད་པ་ན་ཧ་རཱ་ཨི་དང་།  
\v 38 ཡེད་རཱ་པ་ཨི་རཱ་དང་། ཡེད་རཱ་པ་ག་རེབ་དང་།  
\v 39 ཧེད་པ་ཨུ་རི་ཡཱ་བཅས་བསྡོམས་པས་སུམ་ཅུ་སོ་བདུན་ནོ། །   
\c 24
\cl ལེའུ་ཉེར་བཞི་པ། 
\toc1 ༄༅། །སཱ་མུ་ཨེལ་གྱི་མདོ་གཉིས་པ། 
\toc2 སཱ་མུ་ཨེལ་གཉིས་པ། 
\s1 དཱ་བིད་ཀྱིས་མི་གྲངས་བླངས་པ།  
\p
\v 1 ཡང་དཀོན་མཆོག་ཡ་ཝཱེ་ནི་ཡེས་ར་ཨེལ་གྱི་སྟེང་དུ་ཐུགས་ཁྲོས་པ་དང་། ཁོང་གིས་དཱ་བིད་ཀྱི་སེམས་སུ་དེ་དག་ལ་ཁོང་ཁྲོ་བསྐྱེད་ནས་འདི་སྐད་དུ། སོང་ལ་ཡེས་ར་ཨེལ་དང་ཡ་ཧུ་དཱ་ཡི་མི་གྲངས་ལོངས་ཤིག་ཅེས་སྐུལ་བར་མཛད་དོ། །  
\v 2 དེ་ནས་རྒྱལ་པོས་ཁོང་གི་རྗེས་སུ་འབྲངས་པའི་དམག་དཔོན་ཡོ་ཨབ་ལ། ཁྱོད་རང་དཱན་ནས་པེར་ཤ་བཱ་ཡི་བར་ཡེས་ར་ཨེལ་གྱི་ཚོ་ཁག་ཀུན་ཏུ་སོང་ནས། ངས་མི་གྲངས་ཤེས་པའི་ཕྱིར་འབངས་རྣམས་ཀྱི་གྲངས་ཀ་ལོངས་ཤིག་ཅེས་བཀའ་བསྩལ་པ་ལ།  
\v 3 ཡོ་ཨབ་ཀྱིས་རྒྱལ་པོ་ལ། ཁྱེད་ཀྱི་དཀོན་མཆོག་ཡ་ཝཱེས་ད་ལྟ་ཡོད་པའི་འབངས་རྣམས་ལྡབ་བརྒྱ་མང་དུ་མཛོད་ཅིག ངའི་ཇོ་བོ་དང་ངའི་རྒྱལ་པོའི་སྤྱན་གྱིས་དེ་གཟིགས་པར་ཤོག་ཅིག འོན་ཀྱང་ངའི་ཇོ་བོ་དང་ངའི་རྒྱལ་པོས་འདི་ལྟར་མཛད་དགོས་དོན་ཅི་ལགས་ཞེས་ཞུས་ཀྱང་།  
\v 4 རྒྱལ་པོས་ཡོ་ཨབ་དང་དམག་དཔོན་རྣམས་ལ་བབས་པའི་བཀའ་དེ་མཁྲེགས་འཛིན་བྱས་པས། ཡོ་ཨབ་དང་དམག་དཔོན་རྣམས་རྒྱལ་པོའི་དྲུང་ནས་ཕྱི་རུ་ཐོན་ཏེ་ཡེས་ར་ཨེལ་གྱི་མི་གྲངས་བླངས་པ་རེད།  
\v 5 དེ་དག་ཡོར་དན་གཙང་པོ་བརྒལ་ནས། གཱ་རྡུ་ལུང་པ་རུ་ཡོད་པའི་གྲོང་ཁྱེར་གཡས་ཕྱོགས་ཀྱི་ཨ་རོ་ཨེར་དུ། ཡཱ་ཟེར་གྱི་ཁ་གཏད་དུ་གུར་ཕུབ་བོ། །  
\v 6 ཁོ་རྣམས་གིལ་ཨད་དང་ཐ་ཏིམ་ཧོད་ཤི་ཡུལ་དུ་སླེབས་ཤིང་། ཡང་དཱན་ཡ་ཨན་དུ་ཕྱིན་པ་དང་། ཚི་ཏུན་ཡུལ་དུ་བསྐོར་ནས་སོང་ངོ་། །  
\v 7 དེ་ནས་ཐཱར་བྱ་བའི་བཙན་རྫོང་དང་། ཧེ་བི་པ་དང་ཀ་ན་ཨན་པའི་གྲོང་ཁྱེར་རྣམས་ལ་སླེབས་ནས་ཡང་ཕྱི་རུ་ཐོན་ཞིང་། ཡ་ཧུ་དཱ་ཡི་ལྷོ་ཕྱོགས་ཡུལ་གྱི་པེར་ཤ་བཱ་རུ་སླེབས་སོ། །  
\v 8 དེ་དག་ཡུལ་ཀུན་ཏུ་བརྒྱུད་ནས། ཟླ་བ་དགུ་དང་ཉིན་ཞག་ཉི་ཤུ་འགོར་རྗེས་ཕྱིར་ཡེ་རུ་སཱ་ལེམ་དུ་ལོག་གོ །  
\v 9 དེར་ཡོ་ཨབ་ཀྱིས་རྒྱལ་པོ་ལ་མི་གྲངས་ཀྱི་ཐོ་ཕུལ་ཏེ། ཡེས་ར་ཨེལ་གྱི་ཁྲོད་དུ་རལ་གྲི་ཐོགས་པའི་དཔའ་བོ་འབུམ་བརྒྱད་དང་། ཡ་ཧུ་དཱའི་ཁྲོད་དུ་འབུམ་ལྔ་ཡོད་པའོ། །  
\v 10 མི་གྲངས་བརྩིས་རྗེས། དཱ་བིད་ཀྱི་སེམས་མི་བདེ་བར་གྱུར་ཏེ། དཱ་བིད་ཀྱིས་དཀོན་མཆོག་ཡ་ཝཱེ་ལ། བདག་གིས་ལས་འདི་བྱས་པས་སྡིག་པ་ཤིན་ཏུ་ཆེའོ། །ཀྱེ་དཀོན་མཆོག་ཡ་ཝཱེ་ལགས། བདག་གིས་ཤིན་ཏུ་གླེན་པའི་དོན་བྱས་པས། ད་ལྟ་ཁྱེད་ཀྱིས་ཞབས་ཕྱི་བདག་གི་ཉེས་པ་བསལ་བར་མཛོད་ཅེས་གསོལ་ཏོ། །  
\v 11 དཱ་བིད་ཞོགས་པ་ཡར་ལངས་པའི་དུས་སུ། དཱ་བིད་ཀྱི་མངོན་ཤེས་པ་གཱ་རྡུ་བྱ་བའི་ལུང་སྟོན་པ་ལ་དཀོན་མཆོག་ཡ་ཝཱེའི་བཀའ་བྱུང་སྟེ་འདི་སྐད་དུ།  
\v 12 སོང་ནས་དཱ་བིད་ལ། དཀོན་མཆོག་ཡ་ཝཱེས་འདི་སྐད་དུ། ངས་ཁྱོད་ཀྱི་མདུན་དུ་གདམ་གསེས་གསུམ་འཇོག་སྟེ། དེའི་ནང་ནས་གཅིག་འདེམས་ཤིག་དང་ངས་ཁྱོད་ལ་དེ་བཞིན་བྱའོ་ཞེས་སྦྲོན་ཞིག་གསུངས་པ་དང་།  
\v 13 གཱ་རྡུ་ནི་དཱ་བིད་ཀྱི་དྲུང་དུ་འོངས་ནས་སྦྲན་ཅིང་དེ་ལ། ཁྱོད་ཀྱིས་ལོ་བདུན་གྱི་རིང་རྒྱལ་ཁབ་ཏུ་མུ་གེ་འབྱུང་བར་འདོད་དམ། ཡང་ན་ཟླ་བ་གསུམ་ཀྱི་རིང་དགྲ་བོས་ཁྱོད་འདེད་དགོས་སམ། ཡང་ན་ཁྱོད་ཀྱི་རྒྱལ་ཁབ་ཏུ་ཉིན་གསུམ་ལ་རིམས་ནད་འབྱུང་བར་འདོད་དམ། ད་ནི་བདག་མངག་མཁན་ལ་གཏམ་ལན་ཅི་འཁྱེར་དགོས་པར་བསམ་བློ་ཐོངས་ཤིག་ཅེས་དྲིས་པ་དང་།  
\v 14 དཱ་བིད་ཀྱིས་གཱ་རྡུ་ལ། བདག་ནི་ཅི་བྱ་གཏོལ་མེད་དུ་གྱུར། དཀོན་མཆོག་ཡ་ཝཱེ་ལ་ཐུགས་རྗེ་འཛད་མཐའ་མེད་པ་མངའ་བས་ན། མིའི་ལག་པར་ལྷུང་བ་ལས་ཁོང་གི་ཕྱག་ཏུ་ལྷུང་བ་ལེགས་སོ་ཞེས་ཞུས་པས།  
\v 15 དཀོན་མཆོག་ཡ་ཝཱེས་ཡེས་ར་ཨེལ་ལ་རིམས་ནད་ཕབ་ཅིང་། ཞོགས་པ་ནས་ཐུགས་ཐག་བཅད་པའི་དུས་ཀྱི་བར་དུ། དཱན་ནས་པེར་ཤ་བཱ་ཡི་བར་དུ་འབངས་རྣམས་ལས་མི་ཁྲི་བདུན་ཚེ་ལས་འདས་སོ། །  
\v 16 དེ་ནས་ཕོ་ཉ་དེས་ཡེ་རུ་སཱ་ལེམ་འཇོམས་པར་ཕྱག་བརྐྱངས་པ་དང་། དཀོན་མཆོག་ཡ་ཝཱེ་བར་ཆད་དེའི་ཕྱིར་ཐུགས་འགྱོད་ཅིང་། མི་སྡེ་གསོད་པའི་ཕོ་ཉ་དེ་ལ། ད་ནི་ཆོག་གོ །མཚམས་ཞོག་ཅིག་ཅེས་བཀའ་བསྩལ་ཏོ། །དེའི་ཚེ་དཀོན་མཆོག་ཡ་ཝཱེའི་ཕོ་ཉ་དེ་ནི་ཡེ་བུ་སི་པ་ཨ་རབ་ནཱ་ཡི་གཡུལ་ཁར་ཡོད་པ་ཡིན།  
\v 17 དཱ་བིད་ཀྱིས་འབངས་མི་རྣམས་གསོད་པའི་ཕོ་ཉ་དེ་མཇལ་ནས་དཀོན་མཆོག་ཡ་ཝཱེ་ལ་ཞུ་བ་ཕུལ་ཞིང་འདི་ལྟར། གཟིགས་དང་། སྡིག་པ་ནི་བདག་གིས་བྱས་ཏེ། ལས་ངན་པ་བདག་གིས་བྱས་པ་ཡིན། ལུག་ཁྱུ་འདིས་ཅི་བྱས་སམ། བདག་དང་བདག་གི་ཕ་གཞིས་སྟེང་དུ་ཕྱག་འདེགས་པར་མཛོད་ཅེས་ཞུས་སོ། །  
\v 18 ཉིན་དེར་གཱ་རྡུ་ནི་དཱ་བིད་ཀྱི་དྲུང་དུ་འོངས་ནས་དེ་ལ། ཡར་ཕེབས་ནས་ཡེ་བུ་སི་པ་ཨ་རབ་ནཱ་ཡི་གཡུལ་ཁ་རུ་དཀོན་མཆོག་ཡ་ཝཱེ་ལ་མཆོད་ཁྲི་ཞིག་བཞེངས་པར་གྱིས་ཞེས་བསྐུལ་བ་ལ།  
\v 19 དཱ་བིད་ཀྱིས་གཱ་རྡུ་ཡིས་བསྒོས་པ་བཞིན་དུ་བྱས་ཤིང་། དཀོན་མཆོག་ཡ་ཝཱེའི་བཀའ་བཞིན་དུ་ཡར་ཕྱིན་ཏོ། །  
\v 20 དེར་ཨ་རབ་ནཱ་ཡིས་བལྟས་པ་ལ་རྒྱལ་པོ་འཁོར་དང་བཅས་པ་རང་གི་ཕྱོགས་སུ་འོང་བཞིན་པ་མཐོང་བས། ཨ་རབ་ནཱ་ཕྱི་རུ་ཐོན་ཏེ་ལུས་པོ་སར་བཏུད་ནས་རྒྱལ་པོར་ཕྱག་བཙལ་ཏོ། །  
\v 21 ཨ་རབ་ནཱས། ང་ཡི་ཇོ་བོ་དང་ང་ཡི་རྒྱལ་པོ་སྐུ་ཉིད་ཞབས་ཕྱིའི་རྩར་བྱོན་པ་ཅི་ཡིན་ལགས་ཞེས་ཞུས་པས། དཱ་བིད་ཀྱིས། འབངས་རྣམས་ཀྱི་ཁྲོད་དུ་རིམས་ནད་ཆད་པའི་ཕྱིར་དཀོན་མཆོག་ཡ་ཝཱེ་ལ་མཆོད་ཁྲི་ཞིག་བཞེང་བར་ཁྱོད་ཀྱི་གཡུལ་ཁ་ཉོ་རུ་འོངས་པ་ཡིན་ཞེས་གསུངས་པ་དང་།  
\v 22 ཨ་རབ་ནཱས་དཱ་བིད་ལ། བདག་གི་ཇོ་བོ་དང་བདག་གི་རྒྱལ་པོ་ལགས། ཁྱེད་ཀྱི་སྤྱན་སྔར་གང་ལེགས་པ་དེ་བླངས་ནས་མཆོད་པར་ཕུལ་ཞིག གཟིགས་དང་། འདིར་སྦྱིན་སྲེག་གི་དོན་དུ་བ་གླང་དང་། བུད་ཤིང་ལ་གཡུལ་ཁ་གཅོག་བྱེད་ཡོ་ཆས་དང་བ་གླང་གི་གཉའ་ཤིང་ཡོད།  
\v 23 ཀྱེ་རྒྱལ་པོ་ལགས། ཨ་རབ་ནཱས་དེ་ཐམས་ཅད་རྒྱལ་པོ་ལ་འབུལ་བ་ཡིན་ཞེས་ཞུས་པ་དང་། ཡང་ཁོ་ན་རེ། ཁྱེད་ཀྱི་དཀོན་མཆོག་ཡ་ཝཱེ་ཁྱེད་ལ་ཐུགས་མཉེས་པར་ཤོག་ཅེས་རྒྱལ་པོར་ཞུས་སོ། །  
\v 24 རྒྱལ་པོས་ཨ་རབ་ནཱ་ལ། དེ་ལྟར་མིན། དེ་ཐམས་ཅད་ཁྱོད་ལས་རིན་གྱིས་ཉོ་བར་ང་རང་དགའོ། །ངས་རིན་མེད་པར་ཐོབ་པ་དེ་བདག་གི་དཀོན་མཆོག་ཡ་ཝཱེ་ལ་སྦྱིན་སྲེག་ཏུ་འབུལ་མི་རུང་ཞེས་གསུངས་ནས། དཱ་བིད་ཀྱིས་གཡུལ་ཁ་དེ་དང་བ་གླང་རྣམས་དངུལ་སྲང་ལྔ་བཅུས་ཉོས་སོ། །  
\v 25 དེ་ནས་དཱ་བིད་ཀྱིས་དེར་དཀོན་མཆོག་ཡ་ཝཱེ་ལ་མཆོད་ཁྲི་ཞིག་བཞེངས་ནས་སྦྱིན་སྲེག་དང་ཞི་བདེའི་མཆོད་པ་རྣམས་ཕུལ་བ་དང་། དཀོན་མཆོག་ཡ་ཝཱེས་ཡུལ་དེའི་ཞུ་བར་གསན་ཞིང་ཡེས་ར་ཨེལ་གྱི་ཁྲོད་ནས་རིམས་ནད་ཆད་པར་གྱུར་ཏོ།། །།