\id 2PE - NTB བོད་འགྱུར་གསར་མ། 
\h པེ་ཏྲོ་གཉིས་པ། 
\toc1 ༄༅། །པེ་ཏྲོའི་འཕྲིན་ཡིག་གཉིས་པ། 
\toc2 པེ་ཏྲོ་གཉིས་པ། 
\mt1 ༄༅། །པེ་ཏྲོའི་འཕྲིན་ཡིག་གཉིས་པ།  
\imt1 པེ་ཏྲོའི་འཕྲིན་ཡིག་གཉིས་པའི་ངོ་སྤྲོད་མདོར་བསྡུས།  
\is1 ཁ་བྱང་དང་ལོ་རྒྱུས་རྒྱབ་ལྗོངས།  
\ipi པེ་ཏྲོས་རང་གི་འཕྲིན་ཡིག་དང་པོ་ལས་གསུངས་པ་བཞིན་དུ་འཕྲིན་ཡིག་འདི་ཐོབ་མཁན་ནི་ཁ་ཐོར་དུ་ཕྱིན་པའི་ཡེ་ཤུའི་ཆོས་ལུགས་པ་རྣམས་ཡིན་ལ། སྐབས་དེར་དགེ་རྒན་རྫུས་མའི་རིགས་ཀྱིས་ཁོ་རྣམས་མགོ་འཐོམ་དུ་འཇུག་པའི་ཉེན་ཁ་ཡོད་པ་རེད།  
\is1 ཡི་གེར་འགོད་མཁན་དང་འགོད་དུས།  
\ipi འཕྲིན་ཡིག་འདི་ཡི་གེར་འགོད་མཁན་གྱིས་རང་ཉིད་ནི་སི་མོན་པེ་ཏྲོ་ཡིན་པ་གསལ་བཤད་བྱས་ཡོད་པར་མ་ཟད། ཁོང་གིས་ལེའུ་གསུམ་པའི་ཚིག་རྐང་དང་པོ་ནང་དུ་འདི་ནི་ཀློག་པ་པོ་རྣམས་ལ་ཕུལ་བའི་འཕྲིན་ཡིག་གཉིས་པ་ཡིན་ཞེས་བདེན་དཔང་ཡང་མཛད་ཡོད་ལ། ལེའུ་གསུམ་པའི་ཚིག་རྐང་བཅོ་ལྔ་པར་ཕོལ་ལོལ་ནི་བདག་ཅག་གི་སྙིང་ནས་བརྩེ་བའི་སྤུན་ཟླ་ཡིན་ཞེས་ཀྱང་བརྗོད་ཡོད། དེ་ཡང་འཕྲིན་ཡིག་འདིའི་ཁྱད་ཆོས་ལས་ཀྱང་འཕྲིན་ཡིག་འདི་ཡི་གེར་འགོད་མཁན་པེ་ཏྲོ་ཡིན་པ་ཤེས་ཐུབ་ལ། འཕྲིན་ཡིག་འདི་ནི་སྤྱི་ལོ་66ལོའི་ཡས་མས་སུ་ཡི་གེར་བཀོད་པ་ཡིན།  
\is1 བརྗོད་སྙིང་དང་གསུང་འཕྲིན།  
\ipi པེ་ཏྲོ་ནི་སྐྱབས་མགོན་ཡེ་ཤུ་མཱ་ཤི་ཀའི་ལུག་རྣམས་ཀྱི་རྫི་བོ་ལྟ་བུ་ཡིན་ལ། ཁོང་གིས་ཆོས་ཚོགས་ལ་འོངས་པའི་དགེ་རྒན་རྫུས་མ་དང་ངན་པ་སྤྱོད་མཁན་རྣམས་ལ་སེམས་ཁྲལ་ཆེན་པོ་བྱས་ཤིང་། ཆོས་ཚོགས་ལ་དགེ་རྒན་རྫུས་མ་རྣམས་ཀྱི་གནད་དོན་ཇི་ལྟར་ཐག་གིས་གཅོད་དགོས་པར་ཁྲིད་སྟོན་གནང་བར་མ་ཟད། ཀློག་པ་པོ་རྣམས་ལ་ཡེ་ཤུའི་ཆོས་ལུགས་པས་ཡང་དག་པའི་དད་པ་དང་སྤྱོད་ལམ་བཟང་པོ་བྱེད་པར་སྐུལ་མ་བཏང་ཞིང་། ཡང་གཙོ་བོ་ཡེ་ཤུ་དངོས་སུ་ཕྱིར་ཕེབས་པར་འགྱུར་བས་དད་ལྡན་རྣམས་ཀྱིས་དེ་ལ་གཟབ་གཟབ་བྱེད་དགོས་པ་བཅས་བརྗོད་ཡོད།  
\is1 འཆར་ཟིན།  
\ipi 1. ངོ་སྤྲོད། ༼1:1-2༽  
\ipi 2. ཡེ་ཤུའི་ཆོས་ལུགས་པའི་སྤྱོད་བཟང་ཇེ་ལེགས་སུ་གཏོང་བའི་སྐོར། ༼1:3-11༽  
\ipi 3. པེ་ཏྲོའི་འཕྲིན་བཟང་གི་སྐོར། ༼1:12-21༽  
\ipi 4. དགེ་རྒན་རྫུས་མ་རྣམས་ལ་ཉེན་བརྡ་གཏོང་བ། ༼2:1-22༽  
\ipi 5. སྐྱབས་མགོན་ཡེ་ཤུ་ཕྱིར་ཕེབས་པའི་སྐོར། ༼3:1-16༽  
\ipi 6. མཇུག་སྡོམ། ༼3:17-18༽  
\c 1
\cl ལེའུ་དང༌པོ། 
\toc1 ༄༅། །པེ་ཏྲོའི་འཕྲིན་ཡིག་གཉིས་པ། 
\toc2 པེ་ཏྲོ་གཉིས་པ། 
\s1 འཕྲིན་ཡིག་འབྱོར་ཡུལ།  
\p
\v 1 དེ་ཡང་སི་མོན་པེ་ཏྲོ་ང་རང་ནི་ཡེ་ཤུ་མཱ་ཤི་ཀའི་ཞབས་ཕྱི་པ་དང་སྐུ་ཚབ་པ་ཞིག་ཡིན༌ལ། འཕྲིན་ཡིག་འདི་ནི་བདག་ཅག་གི་དཀོན་མཆོག་དང་སྐྱབས་མགོན་ཡིན་པའི་ཡེ་ཤུ་མཱ་ཤི་ཀའི་དྲང་བདེན་ལ་བརྟེན་ནས། ངེད་ཅག་དང་ལྷན་ཅིག་དད་པ་རིན་ཐང་ཅན་འདྲ་མཚུངས་ཐོབ་པ་རྣམས་ལ་སྤྲིངས་པ་སྟེ།  
\v 2 ཁྱོད་ཅག་གིས་དཀོན་མཆོག་དང་བདག་ཅག་གི་གཙོ་བོ་ཡེ་ཤུ་ངོ་ཤེས་པ་བརྒྱུད་ནས། ཁྱོད་རྣམས་ལ་ཐུགས་རྗེ་དང་ཞི་བདེ་མང་དུ་འཐོབ་པར༌སྨོན།   
\s1 ཞལ་འབོད་དང་བདམས་པ་ལ་བློ་བརྟན་དགོས་པའི་སྐོར།  
\p
\v 3 དེ་ཡང་དཀོན་མཆོག་གི་ནུས་མཐུ་ཡིས་བདག་ཅག་ལ་ཚེ་སྲོག་དང་དད་གུས་སྐོར་གྱི་དོན་ཐམས་ཅད་གནང་ཟིན་ནོ།། དེ་ནི་བདག་ཅག་གིས་ཁོང་ཉིད་ངོ་ཤེས་པའི་རྐྱེན་གྱིས་ཡིན་ལ། ཁོང་ནི་རང་ཉིད་ཀྱི་གཟི་བརྗིད་དང་ཕུལ་བྱུང་ལ་བརྟེན་ནས་བདག་ཅག་ལ་ཞལ་འབོད་གནང་མཁན་ཡིན།  
\v 4 དོན་དེ་བརྒྱུད་ནས་ཁོང་གིས་རིན་ཐང་ལྡན་ཞིང་ཤིན་ཏུ་ཆེ་བའི་ཞལ་བཞེས་རྣམས་བདག་ཅག་ལ་གནང་ཞིང་། དེ་ནི་བདག་ཅག་འཇིག་རྟེན་གྱི་འདོད་ཆགས་ནས་བྱུང་བའི་ངན་རུལ་ལས་ཐར་ཏེ་དཀོན་མཆོག་གི་རང་བཞིན་དང་ལྡན་པར་འགྱུར་བའི་ཕྱིར་རོ།།  
\v 5 རྒྱུ་མཚན་འདིའི་དབང༌གིས། ཁྱོད་རྣམས་ཀྱིས་ལྷག་ཏུ་བརྩོན་པ་བྱེད་དགོས༌ཏེ། དད་སེམས་ལྡན་པའི་ཁར་ད་དུང་སྤྱོད་བཟང་ཡོད་དགོས༌ལ། སྤྱོད་བཟང་ལྡན་པའི་ཁར་ད་དུང་ཤེས་ཡོན་ཡོད༌དགོས།  
\v 6 ཤེས་ཡོན་ལྡན་པའི་ཁར་ད་དུང་རང་ཚོད་ཟིན་དགོས་ལ། རང་ཚོད་ཟིན་པའི་ཁར་ད་དུང་སྙིང་རུས་ཡོད༌དགོས། སྙིང་རུས་ལྡན་པའི་ཁར་ད་དུང་དད་གུས་ཡོད༌དགོས་ལ།  
\v 7 དད་གུས་ལྡན་པའི་ཁར་ད་དུང་སྤུན་ཟླར་གཅེས་སེམས་ཡོད་དགོས། སྤུན་ཟླར་གཅེས་སེམས་ཡོད་པའི་ཁར་ད་དུང་མི་ཐམས་ཅད་ལ་གཅེས་སེམས་ཡོད་དགོས༌པའོ།།  
\v 8 གལ་ཏེ། ཁྱོད་ཅག་ལ་དོན་དེ་རྣམས་ལྡན་ཞིང་དེ་དག་འཕེལ་བཞིན་ཡོད་ན། ཁྱོད་རྣམས་ནི་བདག་ཅག་གི་གཙོ་བོ་ཡེ་ཤུ་མཱ་ཤི་ཀ་ངོ་ཤེས་པའི་ཕྱོགས་སུ་ཕན་ཐོགས་མེད་པ་དང་འབྲས་བུ་མི་འབྱུང་བ་མིན་ནོ།།  
\v 9 གལ་ཏེ། མི་སུ་ཞིག་ལ་དོན་དེ་རྣམས་མི་ལྡན་ན། ཁོ་ནི་ལོང་བ་ཡིན་ལ། ཁོས་མིག་མདུན་ཁོ་ན་ལས་གཞན་ཅི་ཡང་མི་མཐོང༌ཞིང༌། རང་གི་སྔར་བྱས་ཀྱི་སྡིག་པ་རྣམས་དག་ཟིན་པའང་བརྗེད༌པའོ།།   
\p
\v 10 དེའི་ཕྱིར། སྤུན་ཟླ༌རྣམས། ཁྱོད་ཅག་ལ་ཞལ་འབོད་ཐོབ་པ་དང་ཁྱོད་ཅག་བདམས་པར་གྱུར་པ་དེ་བརྟན་ཅིང་མི་འགྱུར་བའི་ཕྱིར། ཁྱོད་ཅག་གིས་དེ་བས་ཀྱང་བརྩོན་དགོས་སོ།། གལ་ཏེ། ཁྱོད་ཅག་གིས་དོན་དེ་རྣམས་བྱེད་པ་ཡིན་ན་ནམ་ཡང་ས་རུ་འགྱེལ་མི་སྲིད་དོ།།  
\v 11 དེ་ལྟར་ན། ཁྱོད་རྣམས་བདག་ཅག་གི་གཙོ་བོ་དང་སྐྱབས་མགོན་ཡིན་པའི་ཡེ་ཤུ་མཱ་ཤི་ཀའི་མཐའ་མེད་པའི་རྒྱལ་སྲིད་ནང་དུ་འགྲོ་བར་ཕུན་སུམ་ཚོགས་པའི་བདེ་ལམ་གནང་བར༌འགྱུར་རོ།།   
\s1 དཀོན་མཆོག་གི་གསུང་རབ་ལས་ལུང་བསྟན་གྱི༌སྐོར།  
\p
\v 12 དེ་བས་ན་ཁྱོད་ཅག་གིས་དོན་འདི་རྣམས་རྟོགས་ཤིང་ཁྱོད་ཅག་ལ་སྔར་ནས་ཡོད་པའི་བདེན་པ་ཉིད་ཀྱི་ཆ་ནས་བརྟན་པོ་ཡིན༌ཡང་། བདག་གིས་རྒྱུན་དུ་དོན་འདི་རྣམས་ཁྱོད་ཅག་ལ་དྲན་སྐུལ་བྱའོ།།  
\v 13 ངས་རང་ཉིད་ད་དུང་གུར་འདིའི་ནང་དུ་བསྡད་ཡོད་པའི་གོ་སྐབས་དང་བསྟུན་ནས། ཁྱོད་རྣམས་ལ་དྲན་སྐུལ་བརྒྱུད་ནས་སྐུལ་མ་གཏོང་འོས་པར༌སྙམ།  
\v 14 ཅིའི་ཕྱིར་ཞེ་ན། བདག་ཅག་གི་གཙོ་བོ་ཡེ་ཤུ་མཱ་ཤི་ཀས་བདག་ལ་མཛུབ་སྟོན་གནང་བ་བཞིན། ངས་ཀྱང་རང་ཉིད་གུར་འདི་དང་ཁ་འབྲལ་བའི་དུས་སླེབས་ལ་ཉེ་བ་ཤེས་པའི་ཕྱིར་ཡིན།  
\v 15 ང་རང་ཚེ་ལས་འདས་རྗེས། ཁྱོད་ཅག་གིས་རྒྱུན་དུ་དོན་འདི་དག་ལ་དྲན་གསོ་བྱེད་པའི་ཆེད་དུ། བདག་གིས་ད་དུང་བརྩོན་པ་ཆེན་པོ་བྱེད༌པའོ།།   
\p
\v 16 སྔོན་ཆད་ངེད་ཅག་གིས་བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ནུས་མཐུ་ཆེན་པོ་དང་ཁོང་ཉིད་ཕེབས་པར་འགྱུར་བའི་དོན་རྣམས་ཁྱོད་ཅག་ལ་སྨྲས་པ༌ནི། མཁས་པས་སྒྲིགས་པའི་སྒྲུང་བཞིན་དུ་མ་ཡིན་པར། ངེད་རྣམས་ཀྱིས་ཁོང་གི་གཟི་དཔལ་མིག་གིས་དངོས་སུ་མཐོང་བ་ཡིན།  
\v 17 ཡབ་དཀོན་མཆོག་ནས་ཁོང་ལ་བཀུར་སྟི་དང་གཟི་བརྗིད་ཐོབ་པའི་དུས་སུ། གཟི་འོད་ཆེན་པོ་དེ་ཉིད་ཀྱིས་ཁོང་ལ་ཇི་སྐད་དུ། འདི་ནི་བདག་གི་གཅེས་པའི་བུ་ཡིན་ཞིང་། ང་རང་ཁོ་ལ་ཤིན་ཏུ་དགའ་ཞེས་གསུངས༌པའི་སྒྲ་གྲགས་ཤིང་།  
\v 18 ངེད་ཅག་ཁོང་དང་མཉམ་དུ་རི་བོ་དམ་པ་རུ་ཡོད་པའི་དུས༌སུ། ནམ་མཁའི་ཞིང་ཁམས་ནས་སྒྲ་དེ་གྲགས་ཡོང་བ་དངོས་སུ་ཐོས༌སོ།།   
\p
\v 19 བདག་ཅག་ལ་ལུང་སྟོན་པའི་ལུང་བསྟན་དེ་ལས་ཀྱང་ཁུངས་བཙན་ཡོད༌དེ། སྐྱ་རེངས་ཤར་བ་དང་ཁྱོད་ཅག་གི་སེམས་སུ་ཐོ་རེངས་སྐར་ཆེན་ཤར་བའི་དུས་སུ། མུན་ནག་ནང་དུ་སྒྲོན་མེའི་འོད་ཟེར་འཕྲོ་བ་བཞིན། ཁྱོད་རྣམས་ཀྱིས་ལུང་བསྟན་འདིར་གཟབ་གཟབ་བྱས་ན་ལེགས་སོ།།  
\v 20 དེ་བས་ཀྱང་ཆེས་གལ་ཆེ་བ་ནི་གསུང་རབ་ཀྱི་ལུང་བསྟན་གང་ཞིག་ཡིན་ཡང་། རང་འདོད་ལྟར་འགྲེལ་བཤད་བྱས་ཆོག་པ་གཅིག་ཀྱང་མེད་པ་ཤེས་པར་གྱིས།  
\v 21 རྒྱུ་མཚན་ནི་ལུང་བསྟན་གང་ཞིག་ཡིན་ཡང་མིའི་འདོད་བློ་ལྟར་བྱུང་བ་གཏན་ནས་མ་ཡིན་པར། དམ་པའི་ཐུགས་ཉིད་ཀྱིས་མི་ལ་བསྐུལ་ཞིང་དཀོན་མཆོག་ནས་བྱུང་བའི་བཀའ་རྣམས་མི་ཡིས་བརྗོད་པའི་ཕྱིར་རོ།།   
\c 2
\cl ལེའུ་གཉིས༌པ། 
\toc1 ༄༅། །པེ་ཏྲོའི་འཕྲིན་ཡིག་གཉིས་པ། 
\toc2 པེ་ཏྲོ་གཉིས་པ། 
\s1 སློབ་དཔོན་རྫུས་མའི༌སྐོར།  
\p
\v 1 དེ་ཡང་སྔོན་ཆད་མི་རྣམས་ཀྱི་ཁྲོད་དུ་ལུང་སྟོན་པ་རྫུས་མ་བྱུང་བ་བཞིན། ཕྱིས་སུ་ཁྱོད་ཅག་གི་ཁྲོད་དུའང་སློབ་དཔོན་རྫུས་མ་འབྱུང་བར་འགྱུར༌ལ། དེ་རྣམས་ཀྱིས་ལྐོག་ནས་མི་ལ་གནོད་འཚེ་གཏོང་བའི་ལོག་ལྟ་རྣམས་ཁྲིད་འོང་བར་འགྱུར་ཞིང་། དེ་དག་གིས་ཁོ་རྣམས་བླུ་མཁན་གྱི་བདག་པོའང་ཁས་མི་ལེན༌པར། མྱུར་དུ་རང་གིས་རང་ཉིད་བརླག་པར་འགྱུར་རོ།།  
\v 2 མི་མང་པོ་ཞིག་གིས་ལོག་གཡེམ་པ་དེ་དག་གི་བྱ་སྤྱོད་བཞིན་བྱེད་པར་འགྱུར་ཞིང་། སློབ་དཔོན་རྫུས་མ་དེ་དག་གི་རྐྱེན་གྱིས། བདེན་པ་ཉིད་ཀྱི་ལམ་ལ་འཕྱ་དམོད་བྱེད་པར་འགྱུར།  
\v 3 དེ་དག་ལ་བརྣབ་སེམས་ཆེ་བས་རྫུན་གཏམ་ལ་བརྟེན་ནས་ཁྱོད་ཅག་ལས་འཕྲོག་པར་འགྱུར། དེ་དག་ལ་ཉེས་ཆད་གཅོད་པ་ནི་གནའ་སྔ་མོ་ནས་དུས་མི་འགྱངས་ལ། དེ་རྣམས་བརླག་པར་འགྱུར་བའི་དུས་ཀྱང་གཉིད་ལ་མི་ཡུར་རོ།།   
\p
\v 4 སྔོན་ཆད་ཕོ་ཉ་རྣམས་ཀྱིས་སྡིག་པ་བྱས་པ་ན། དཀོན་མཆོག་གིས་དེ་རྣམས་ལའང་བཟོད་སྒོམ་མ་གནང་བར་དམྱལ་བའི་གནས་སུ་གཡུགས་ཤིང་། མུན་ནག་གི་དོང་ནང་དུ་ཁྲིམས་ཐག་གཅོད་པའི་བར་དུ་བསྐྱུར་བ་ཡིན་ནོ།།  
\v 5 ཡང་དཀོན་མཆོག་གིས་གནའ་བོའི་འཇིག་རྟེན་ལའང་བཟོད་སྒོམ་མ་གནང་བར། དད་གུས་མེད་པའི་མི་རྣམས་ཆུ་ལོག་གིས་བསྣུབས་པར་མཛད༌མོད། འོན་ཀྱང་ཡང་དག་པའི་ཆོས་སྒྲོག་མཁན་ནོ་ཨའི་ཁྱིམ་མི་བརྒྱད་པོ་བསྐྱབས་མྱོང་།  
\v 6 ཡང་ཁོང་གིས་སཱ་དོམ་དང་གཱ་མོ་ར་གཉིས་ལ་ཉེས་ཆད་བཅད་ནས་མེར་བསྲེགས་ཤིང༌རྡུལ་དུ་བཏང་བ་དང་། དུས་རབས་ཕྱི་མའི་དད་གུས་མེད་པའི་མི་རྣམས་ལ་བསླབ་བྱའི་དཔེ་རུ་གནང་བ་ཡིན།  
\v 7 དུས་དེར་ཁྲིམས་མེད་ལུགས་མེད་ཀྱི་མི་དག་གི་གཡེམ་སྦྱོར་གྱི་རྐྱེན་གྱིས། དུས་རྒྱུན་དུ་ཡིད་སེམས་སྐྱོ་བའི་མི་གཞུང་དྲང་ལོད་ཐུ་ཁོ་ན་ཁོང་གིས་བསྐྱབས་པ་ཡིན།  
\v 8 རྒྱུ་མཚན་ནི་མི་གཞུང་དྲང་དེ་ཁོ་རྣམས་ཀྱི་ཁྲོད་དུ་སྡོད༌ཅིང༌། མི་དེ་དག་གི་ཁྲིམས་མེད་ལུགས་མེད་ཀྱི་དོན་རྣམས་མཐོང་ཐོས་སུ་གྱུར་པས། ཁོའི་དྲང་སེམས་ནི་ཉིན་རེ་བཞིན་སྐྱོ་གདུང་གིས་མནར༌བར་གྱུར་པའོ༎  
\v 9 དེ་ལྟར་ཡིན་ན། གཙོ་བོས་དད་གུས་ལྡན་པའི་མི་ནི་ཉམས་ཚོད་ལས་སྐྱོབ་པ་དང་། དྲང་བདེན་མིན་པའི་མི་ནི་ལེགས་ཉེས་ཀྱི་ཁྲིམས་ཐག་གཅོད་པའི་ཉིན་མོའི་བར་ཉེས་ཆད་འོག་ཏུ་བསྐྱུར་བ་མཁྱེན༌ནོ།།  
\v 10 ཤ་གཟུགས་ཀྱི་ཕུང་བོར་བསྟུན་ནས་འདོད་ཆགས་ལ་འཇོལ་ཉོག་ཏུ་སྤྱོད་མཁན་དང་། དབང་ཆེན་ལ་མཐོང་ཆུང་བྱེད་མཁན་ནི་ཁོང་གིས་ལྷག་ཏུ་མཁྱེན་ལ། མི་དེ་དག་ནི་སྤོབས་པ་ཆེ་ཞིང་གཤིས་རྒྱུད་གྱོང་པོ་ཡིན་ལ། གཟི་བརྗིད་ཅན་རྣམས་ལ་དམའ་འབེབས་བྱེད་པ་ལའང་མི་འཇིགས་སོ།།  
\v 11 ཕོ་ཉ་རྣམས་ལ་མཚོན་ན་མི་དེ་དག་ལས་མཐུ་སྟོབས་དང་དབང་ཐང་ཆེ༌ཡང་། གཙོ་བོའི་དྲུང་དུ་དམའ་འབེབས་ཀྱི་ཚིག་གིས་དེ་རྣམས་གཏུག་པར་མི༌བྱ།  
\v 12 འོན་ཀྱང་། མི་དེ་དག་ནི་ཡིད་ཤེས་མེད་པ་དང་མཚུངས༌པར། སྐྱེས་མ་ཐག་ནས་དུད་འགྲོ་ཡིན་ཏེ། མི་ཡིས་བཟུང་ནས་བཤས་ཟོག་ལ་སྟ་གོན་བྱེད་པ་ཡིན། མི་དེ་རྣམས་ཀྱིས་རང་གིས་མི་ཤེས་པའི་དོན་རྣམས་ལ་དམའ་འབེབས་བྱེད་ཅིང༌། མི་གཞན་དག་བརླག་བཞིན་པའི་དུས་སུ། ཁོ་རང་ཉིད་བརླག་པར་འགྱུར་ངེས་སོ།།  
\v 13 དེ་རྣམས་ཀྱི་སྤྱོད་ལམ་དྲང་པོ་མ་ཡིན་པས་འབྲས་བུ་མི་བདེན་པ་ཐོབ། མི་དེ་དག་ནི་ཉིན་མོར་བག་མེད་ལོངས་སྤྱོད་ལ་ཞུགས་པར་དགའ་ཞིང་། བཙོག་པར་གྱུར་པ་དང་སྐྱོན་ཅན་ཡང་ཡིན་ལ། ཁྱོད་ཅག་དང་མཉམ་དུ་གསོལ་སྟོན་ལ་ཞུགས་དུས། རང་གི་གཡོ་སྒྱུ་ནི་དགའ་སྐྱིད་དུ་འདོད་པ་རེད།  
\v 14 མི་དེ་རྣམས་ཀྱི་མིག་ནང་དུ་ལོག་གཡེམ་གྱིས་ཁེངས་ཤིང་སྡིག་པའི་མཚམས་མི་འཇོག༌པར། བློ་མི་བརྟན་པ་རྣམས་ལ་སླུ་བྲིད་བྱེད་པ་དང༌། སེམས་ནང་དུ་འདོད་རྔམ་ལ་གོམས་ཡོད་པས། དངོས་གནས་སྡིགས་དམོད་ཐེབས་པའི་རིགས་རྒྱུད་ཡིན།  
\v 15 མི་དེ་རྣམས་ཀྱིས་དྲང་ལམ་སྤངས་ནས་ལོག་ལམ་དུ་ཞུགས་པ་དང་། པེ་ཨོར་གྱི་བུ་པེལ་ཨམ་གྱི་ལམ་དུ༌ཞུགས་པ་ཡིན། པེལ་ཨམ་ནི་གླ་ཆའི་ཡོང་ཁུངས་མི་གཙང་བ་ལ་འདོད་རྔམ་བཅང་མཁན་ཞིག་ཡིན༌མོད།  
\v 16 འོན་ཀྱང་ཁོ་བོར་རང་གི་ནག་ཉེས་དབང་གིས་བཀའ་བཀྱོན་ཐེབས་ཤིང་། སྨྲ་མི་ཤེས་པའི་བོང་བུས་མི་སྐད་སྨྲས་ཏེ་ལུང་སྟོན་པའི་སྨྱོ་སྤྱོད་བཀག༌པའོ།།   
\p
\v 17 ཡང་མི་དེ་རྣམས་ནི་ཆུ་མིག་སྐམ་པོ་དང་རླུང་ནག་འཚུབ་མས་འདེད་པའི་སྨུག་པ་ཡིན༌ལ། མུན་པའི་སྨག་རུམ་ནི་མི་དེ་རྣམས་ཀྱི་ཆེད་དུ་སྟ་གོན་མཛད་ཡོད།  
\v 18 དེ་རྣམས་ཀྱིས་ང་རྒྱལ་གྱི་བླུན་གཏམ་སྨྲ༌ཞིང༌། ཤ་གཟུགས་ཀྱི་ཆགས་ཞེན་དང་ལོག་གཡེམ་གྱི་ལས་ལ་བརྟེན་ནས། ནོར་འཁྲུལ་ཅན་ལས་ཐར་མ་ཐག་པ་དེ་རྣམས་ལའང་སླུ་བྲིད་བྱེད།  
\v 19 དེ་རྣམས་ཀྱིས་མི་རྣམས་ལ་རང་དབང་འཐོབ་པར་ཁས་ལེན་ནའང་། རང་ཉིད་ནི་འཕུང་དཀྲོལ་གྱི་གཡོག་པོ་རུ་བྱེད༌པ་ཡིན། ཅིའི་ཕྱིར་ཞེ་ན། མི་སུ་ཡིན་ཡང་གང་ཞིག་གི་དབང་འོག་ཏུ་བཅུག་ན་དེའི་གཡོག་པོ་ཡིན་པའི་ཕྱིར་རོ།།  
\v 20 གལ་ཏེ། མི་དེ་རྣམས་ཀྱིས་གཙོ་བོ་དང་སྐྱབས་མགོན་ཡིན་པའི་ཡེ་ཤུ་མཱ་ཤི་ཀ་ངོ་ཤེས་པ་བརྒྱུད་ནས། འཇིག་རྟེན་གྱི་མི་གཙང་བ་སྤངས་ཐུབ་པ་བྱུང༌ནའང༌། རྗེས་སུ་སླར་ཡང་དེའི་ནང་དུ་ཞུགས་ཤིང་དེའི་དབང་འོག་ཏུ་ཚུད་ན། མི་དེ་དག་གི་ཕྱིས་ཀྱི་གནས་ཚུལ་དེ་སྔ་ལས་ཀྱང་སྡུག་པ་ཡིན།  
\v 21 ཁོ་རྣམས་ཀྱིས་དྲང་བདེན་གྱི་ལམ་ཤེས་བཞིན་དུ། ཁོ་རྣམས་ལ་གནང་བའི་བཀའ་དམ་པ་རྒྱབ་ཏུ་བསྐྱུར་བས། ཁོ་རྣམས་ཀྱིས་དོན་དེ་ཤེས་པ་ལས་མ་ཤེས་ན་ལེགས་སོ།།  
\v 22 ཁ་དཔེ་ལ། ཁྱི་ནི་རང་གི་སྐྱུག་རོར་ལོག །ཕག་ནི་བཀྲུས་ཀྱང་འདམ་ལ་འགྲིལ། །ཞེས་པའི་ཚིག་འདི་ཅིས་མ་བདེན། དེ་ནི་ཁོ་རྣམས་ཀྱི་སྟེང་དུ་བྱུང་བའོ།།   
\c 3
\cl ལེའུ་གསུམ༌པ། 
\toc1 ༄༅། །པེ་ཏྲོའི་འཕྲིན་ཡིག་གཉིས་པ། 
\toc2 པེ་ཏྲོ་གཉིས་པ། 
\s1 གཙོ་བོ་ཡེ་ཤུའི་ཉིན་མོའི༌སྐོར།  
\p
\v 1 སྙིང་ནས་བརྩེ་བའི་སྤུན་ཟླ༌རྣམས། ད་ལྟ་བདག་གིས་ཁྱོད་ཅག་ལ་འབྲི་བཞིན་པ་འདི་ནི་འཕྲིན་ཡིག་གཉིས་པ་ཡིན་ནོ༎ འཕྲིན་ཡིག་འདི་གཉིས་ནི་ཁྱོད་ཅག་གི་གཞུང་སེམས་དྲང་པོ་ལ་དྲན་སྐུལ་དང་སྐུལ་སློང་བྱེད་པའི་ཆེད་དུ་བྲིས་པ་ཡིན་ལ།  
\v 2 དེ་ནི་ལུང་སྟོན་པ་དམ་པ་རྣམས་ཀྱིས་སྔར་གསུངས་པའི་བཀའ་རྣམས་དང་། གཙོ་བོ་དང་སྐྱབས་མགོན་དེ་ཉིད་ཀྱི་བཀའ༌སྟེ་ཁྱོད་ཅག་གི་སྐུ་ཚབ་པ་རྣམས་ཀྱིས་གནང་བ་དེ་དག་ཁྱོད་རྣམས་ཀྱི་ཡིད་ལ་འཛིན་པའི་ཕྱིར་དུ་ཡིན།  
\v 3 ཆེས་གལ་ཆེ་བ་ནི། མཐའ་མའི་ཉིན་མོ་དག་ལ་འཕྱ་སྨོད་བྱེད་པར་དགའ་བའི་མི་འབྱུང་བར་འགྱུར་བ་ཤེས་དགོས༌ཏེ། ཁོ་རྣམས་རང་གི་འདོད་ཆགས་ཀྱི་རྗེས་སུ་འབྲངས་ཏེ་ན་རེ།  
\v 4 ཁོང་ཉིད་ཕེབས་ཡོང་རྒྱུ་ཡིན་ཟེར་བའི་ཞལ་བཞེས་དེ་གང་དུ་ཡོད༌དམ། ཅིའི་ཕྱིར་ཞེ་ན། མེས་པོ་རྣམས་ཚེ་ལས་འདས་པ་ནས་བཟུང་། དོན་ཐམས་ཅད་ཐོག་མར་བསྐྲུན་པའི་དུས་དང་གཅིག་མཚུངས་ཡིན་པའི་ཕྱིར་རོ་ཞེས་སྨྲ་བ་ཡིན།  
\v 5-6 གནའ་སྔ་མོ་ནས་དཀོན་མཆོག་གི་བཀའ་ལ་བརྟེན་ནས་ནམ་མཁའ་བྱུང་བ་དང་། ས་གཞི་ནི་ཆུ་ནས་བྱུང་ཞིང་ཆུ་ལས་གྲུབ་པ་ཡིན་ལ། སྐབས་དེའི་འཇིག་རྟེན་ཆུས་བསྣུབས་ཏེ་འཇིག་པར་གྱུར་པ་ནི་མི་དེ་རྣམས་ཀྱིས་བསམ་བཞིན་བརྗེད་པར་བྱས་སོ།།  
\v 7 འོན་ཀྱང་ད་ལྟའི་གནམ་ས་གཉིས་ནི་ད་དུང་ཡང་བཀའ་དེར་བརྟེན་ནས་གནས༌ཤིང་། དད་གུས་མེད་པའི་མི་རྣམས་ལ་ཉེས་ཆད་ཕོགས་ནས་བརླག་པར་མཛད་པའི་ཉིན་མོའི་བར་དུ་བསྐྱུར་བ་དང་། དེ་ནས་གནམ་ས་གཉིས་མེར་བསྲེག་པར་འགྱུར་རོ།།   
\p
\v 8 སྙིང་ནས་བརྩེ་བའི་སྤུན་ཟླ༌རྣམས། ཁྱོད་ཅག་གིས་བརྗེད་མི་རུང༌བ་ཞིག་ནི། གཙོ་བོའི་སྤྱན་ལམ་དུ་ཉིན་གཅིག་ནི་ལོ་འཁོར་ཆིག་སྟོང་དང་ལོ་འཁོར་ཆིག་སྟོང་ནི་ཉིན་གཅིག་དང་མཚུངས་པ་དེ་ཡིན་ནོ།།  
\v 9 གཙོ་བོས་ཞལ་བཞེས་གནང་བ་བཞིན་ད་དུང་འགྲུབ༌མེད་པས། མི་འགའ་ཤས་ཀྱི་སེམས་སུ་ཁོང་གིས་དུས་འགྱངས་མཛད་དོ་སྙམ་མོད། འོན་ཀྱང་དོན་དམ་དུ་དུས་འགྱངས་མཛད་པ་མ་ཡིན་པར། ཁྱོད་རྣམས་ལ་བཟོད་སྒོམ་གནངས་ཏེ། མི་གཅིག་ཀྱང་འཇིག་པར་འགྱུར་བར་ཐུགས་མི་མཉེས་ཤིང་། མི་ཐམས་ཅད་ཀྱིས་འགྱོད་བཤགས་བྱེད་པར་དགོངས༌པའོ།།   
\p
\v 10 འོན་ཀྱང་། རྐུན་པོ་གློ་བུར་སླེབས་པ་ལྟར་གཙོ་བོའི་ཉིན་མོའང་སླེབ༌པར་ངེས་སོ།། ཉིན་དེར། ནམ་མཁའ་འུར་སྒྲ་ཆེན་པོ་དང་བཅས་ཡལ་བར་འགྱུར༌བ་དང་། འབྱུང་བ་ཐམས་ཅད་མེ་དཔུང་དྲག་པོས་བསྲེགས་ཏེ་མེད་པར་འགྱུར་ཞིང་། ས་གཞི་དང་དེའི་སྟེང་གི་དངོས་པོ་ཐམས་ཅད་ཀྱང་མེས་བསྲེག་པར་འགྱུར༌རོ།།   
\p
\v 11 དེ་ཐམས་ཅད་དེ་བཞིན་མེད་པར་འགྱུར་འགྲོ་བ་ཡིན་ན། ཁྱོད་ཅག་གིས་ཇི་ལྟར་དམ་པ་དང་དད་གུས་ཡོད་པ་ཞིག་བྱེད་ཅིང་།  
\v 12 དཀོན་མཆོག་གི་ཉིན་མོ་སླེབ་ཡོང་བར་རེ་སྒུག་བྱེད་ལོང་མེད་པ་མ་ཡིན་ནམ། ཉིན་དེར། ནམ་མཁའ་མེས་བསྲེགས་ནས་མེད་པར་འགྱུར་ཞིང་། འབྱུང་བ་ཐམས་ཅད་ཀྱང་མེ་དཔུང་དྲག་པོས་ཞུ་བར་འགྱུར་རོ།།  
\v 13 འོན་ཀྱང་། ཁོང་གིས་ཞལ་བཞེས་གནང་བ་བཞིན། བདག་ཅག་གིས་དྲང་བདེན་བཞུགས་སའི་གནམ་ས་གསར་པ་ལ་རེ་སྨོན་བཅང་བའོ།།   
\p
\v 14 དེའི་ཕྱིར། སྙིང་ནས་བརྩེ་བའི་སྤུན་ཟླ༌རྣམས། ཁྱོད་ཅག་གིས་དོན་དེ་དག་ལ་རེ་སྨོན་བཅངས་པ་ཡིན་ན། རང་ཉིད་སྐྱོན་གྱི་དྲི་མས་མ་གོས་པ་དང་། སྐྱོན་བརྗོད་རྒྱུ་ཅི་ཡང་མེད་པ། གཙོ་བོའི་སྤྱན་སྔར་བློ་སེམས་བདེ་བའི་ངང་གནས་ཐུབ་པའི་ཕྱིར་བརྩོན་པ་བྱེད་དགོས་སོ།།  
\v 15 དེར་མ་ཟད། བདག་ཅག་གི་གཙོ་བོས་ཡུན་རིང་ལ་བཟོད་སྒོམ་གནང་བ་ནི་ཐར་པ་འཐོབ་པའི་རྒྱུ་རྐྱེན་དུ་བརྩི་དགོས་ལ། དེ་ནི་བདག་ཅག་གི་སྙིང་ནས་བརྩེ་བའི་སྤུན་ཟླ་ཕོལ་ལོལ་གྱིས་རང་ཉིད་ལ་གནང་ཡོད་པའི་ཤེས་རབ་བཞིན་ཁྱོད་ཅག་ལ་འཕྲིན་ཡིག་སྤྲིངས་པ་ལྟར་ཡིན།  
\v 16 ཁོང་གི་འཕྲིན་ཡིག་ཐམས་ཅད་ལས་དོན་དེ་རྣམས་བརྗོད་ཡོད། འཕྲིན་ཡིག་ལས་གོ་བ་ལོན་དཀའ་བ་དག༌ནི། བློ་གྲོས་མེད་པ་དང་བློ་མི་བརྟན་པ་རྣམས་ཀྱིས་ལོག་བཤད་བྱེད་ཅིང་། དེ་ནི་གསུང་རབ་ཀྱི་མདོ་གཞན་དག་ལ་ལོག་བཤད་བྱེད་པ་ལྟར། རང་གིས་རང་ཉིད་འཇིག་པར་བྱེད་དོ།།   
\p
\v 17 སྙིང་ནས་བརྩེ་བའི་སྤུན་ཟླ༌རྣམས། དེ་ལྟར་ཡིན་པས། ཁྱོད་ཅག་གིས་སྔ་མོ་ནས་དོན་འདི་དག་ཤེས་པ་ཡིན༌ན། ཁྲིམས་མེད་ལུགས་མེད་ཀྱི་མི་དག་གི་ནོར་འཁྲུལ་གྱི་གཡོ་འོག་ཏུ་མི་ཚུད་པ་དང་། རང་ཉིད་བརྟན་པོ་ཡིན་པ་དེ་མི་ཉམས་པའི་ཕྱིར་དོགས་ཟོན་བྱེད་དགོས་སོ།།  
\v 18 འོན་ཀྱང་། ཁྱོད་རྣམས་དེ་ལས་ལྡོག་སྟེ་བདག་ཅག་གི་གཙོ་བོ་དང་སྐྱབས་མགོན་ཡིན་པའི་ཡེ་ཤུ་མཱ་ཤི་ཀའི་ཐུགས་རྗེ་དང་ཤེས་ཡོན་རྟོགས་པའི་ཆ་ནས་ཡར་ཐོན་ཡོང་དགོས། དུས་ད་ལྟ་དང་མཐའ་མེད་པའི་ཉིན་མོའི་བར་དུ་ཁོང་ལ་བསྟོད་བསྔགས་བརྗོད་པར་སྨོན། ཨ༌མེན།། །།