\id 2CO - NTB བོད་འགྱུར་གསར་མ། 
\h ཀོ་རིན་ཐུ་པ་གཉིས་པ། 
\toc1 ༄༅། །ཀོ་རིན་ཐུ་པ་རྣམས་ལ་སྤྲིངས་པའི་འཕྲིན་ཡིག་གཉིས་པ། 
\toc2 ཀོ་རིན་ཐུ་པ་གཉིས་པ། 
\mt1 ༄༅། །ཀོ་རིན་ཐུ་པ་རྣམས་ལ་སྤྲིངས་པའི་འཕྲིན་ཡིག་གཉིས་པ།  
\imt1 ཀོ་རིན་ཐུ་པ་རྣམས་ལ་སྤྲིངས་པའི་འཕྲིན་ཡིག་གཉིས་པའི་ངོ་སྤྲོད་མདོར་བསྡུས།  
\is1 ཁ་བྱང་དང་ལོ་རྒྱུས་རྒྱབ་ལྗོངས།  
\ipi འཕྲིན་ཡིག་འདི་ནི་འཕྲིན་ཡིག་དང་པོའི་གཞུག་གི་ཟླ་བ་འགའི་རྗེས་སུ་ཡི་གེར་བཀོད་པ་ཡིན། ཀོ་རིན་ཐུ་པའི་འཕྲིན་ཡིག་དང་པོའི་ནང་བརྗོད་པའི་འགལ་ཟླ་དང་ཉོག་དྲ་དག་ཀོ་རིན་ཐུ་ཆོས་ཚོགས་ཀྱི་ནང་དུ་སྔར་བཞིན་གནས་ཏེ། དགེ་རྒན་རྫུན་མ་དག་གིས་ཕོལ་ལོལ་གྱི་བྱ་སྤྱོད་ཡང་དག་དང་ཁོང་གི་སྐུ་ཚབ་པའི་དབང་ཆ་ལ་རྒོལ་བ་བཏང་ནས། ཁོང་ནི་སྐུ་ཚབ་པ་ངོ་མ་ཞིག་མིན་པ་དང་། ཡེ་རུ་སཱ་ལེམ་གྱི་དབུལ་པོ་དད་ལྡན་རྣམས་ཀྱི་ཆེད་དུ་བསྡུས་པའི་གཞུང་དངུལ་རྣམས་ཁོང་གིས་ལྐོག་ཟ་བྱས་པ་རེད་ཅེས་སྙད་བརྐོས།  
\is1 ཡི་གེར་འགོད་མཁན་དང་འགོད་དུས།  
\ipi འཕྲིན་ཡིག་འདི་ཡི་གེར་འགོད་མཁན་ནི་སྐུ་ཚབ་པ་ཕོལ་ལོལ་ཡིན་པ་དང་། འཕྲིན་ཡིག་འདི་ལ་ཁོང་གི་རྩོམ་སྟངས་ཀྱི་ཁྱད་ཆོས་ལྡན། གཞུང་འདིའི་ནང་དུ་རང་གི་སེམས་སུ་བྱུང་བའི་གནས་ཚུལ་རྣམས་ཇི་མ་ཇི་བཞིན་དུ་བཀོད་ཡོད་པས་འཕྲིན་ཡིག་གཞན་དག་དང་བསྡུར་ན་ཧ་ཅང་མངོན་གསལ་ཡིན། ཞིབ་འཇུག་དང་བདེན་དཔང་མཛད་པ་ལྟར་ན་ཀོ་རིན་ཐུ་པའི་འཕྲིན་ཡིག་དང་པོ་ནི་སྤྱི་ལོ་55ལོའི་དཔྱིད་ཀར་ཡི་གེར་བཀོད་པ་དང་། ཀོ་རིན་ཐུ་པའི་འཕྲིན་ཡིག་གཉིས་པ་ནི་ལོ་དེའི་སྟོན་དུས་སུ་ཡི་གེར་བཀོད་པ་ཡིན་པར་དགོངས།  
\is1 བརྗོད་སྙིང་དང་གསུང་འཕྲིན།  
\ipi འཕྲིན་ཡིག་གཞན་དང་བསྡུར་ན་འདིའི་ནང་དུ་ཕོལ་ལོལ་གྱིས་རང་གི་མྱོང་ཚོར་ཤུགས་ཆེན་པོས་བརྗོད་ཡོད་པ་དང་། ཁོང་གི་སེམས་སྐྱོ་བ་ནས་དགའ་སྤྲོ་དཔག་མེད་ཐོབ་པའི་སྐོར་བྲིས་ཡོད། འཕྲིན་ཡིག་འདི་ནི་སྡེ་ཚན་གསུམ་དུ་བཀར་ཡོད་པ་སྟེ།  
\ipi ༼1༽ ལེའུ་དང་པོ་ནས་བདུན་པའི་བར། ཕོལ་ལོལ་གྱིས་རང་གི་འགྲུལ་སྐྱོད་ཀྱི་འཆར་གཞི་ལ་འགྱུར་བ་བཏང་བའི་དགོས་པ་དང་རྒྱུ་མཚན་གསལ་བཤད་གནང་ཡོད།  
\ipi ༼2༽ ལེའུ་བརྒྱད་པ་ནས་དགུ་པའི་བར། ཁོང་གིས་ཀོ་རིན་ཐུ་པ་རྣམས་ལ་རང་ཉིད་གནས་དེར་མ་སླེབས་སྔོན་དུ་ཞལ་འདེབས་བསྡུ་ཆ་བརྒྱབ་ནས་ཚར་དགོས་པའི་སྐུལ་མ་བཏང་ཡོད།  
\ipi ༼3༽ ལེའུ་བཅུ་པ་ནས་བཅུ་གསུམ་པའི་བར། ཁོང་གནས་དེར་སླེབས་ལ་ཉེ་བ་དང་། ཁོང་ནི་སྐུ་ཚབ་པ་ངོ་མ་ཞིག་ཡིན་ལ། གལ་སྲིད་དགོས་པར་གྱུར་ན་སྐུ་ཚབ་པའི་གོ་གནས་བཞིན་སྒྲིག་ཁྲིམས་འཇོག་པར་སྟ་གོན་ཡང་བྱས་ཡོད་པ་བཅས་ནན་གྱིས་བརྗོད་ཡོད།  
\is1 འཆར་ཟིན།  
\ipi 1. འཕྲིན་ཡིག་གི་ངོ་སྤྲོད་དེ། ཁམས་འདྲི་དང་བཀའ་དྲིན་ཞུ་བ། ༼1:1-11༽  
\ipi 2. ཕོལ་ལོལ་གྱིས་རང་གི་བྱ་སྤྱོད་དང་སྐུ་ཚབ་པའི་ལས་འགན་གསལ་བཤད་བྱས་པ། ༼1:12-7:16༽  
\ipi 3. ཡེ་རུ་སཱ་ལེམ་གྱི་ཡེ་ཤུའི་ཆོས་ལུགས་པ་རྣམས་ལ་ཞལ་འདེབས་ཀྱི་དངུལ་ཕུལ་བ། ༼8:1-9:15༽  
\ipi 4. ཕོལ་ལོལ་གྱིས་རང་ཉིད་སྐུ་ཚབ་པ་ཡིན་པར་བདེན་དཔང་བྱས་པ། ༼10:1-13:10༽  
\ipi 5. མཇུག་སྡོམ། ༼13:11-14༽  
\c 1
\cl ལེའུ་དང༌པོ། 
\toc1 ༄༅། །ཀོ་རིན་ཐུ་པ་རྣམས་ལ་སྤྲིངས་པའི་འཕྲིན་ཡིག་གཉིས་པ། 
\toc2 ཀོ་རིན་ཐུ་པ་གཉིས་པ། 
\s1 འཕྲིན་ཡིག་འབྱོར་ཡུལ།  
\p
\v 1 དེ་ཡང་ཕོལ་ལོལ་ང་རང་ནི་དཀོན་མཆོག་གི་ཐུགས་དགོངས་བཞིན་མཱ་ཤི་ཀ་ཡེ་ཤུའི་སྐུ་ཚབ་པ་ཞིག་ཡིན༌ལ། སྤུན་ཟླ་ཐི་མོ་ཐེ་ངེད་གཉིས༌ཀྱིས། ཀོ་རིན་ཐུ་རུ་ཡོད་པའི་དཀོན་མཆོག་གི་ཆོས་ཚོགས༌དང༌། ཨ་ཀ་ཡཱ་ཡུལ་ཀུན་ཏུ་ཡོད་པའི་དད་ལྡན་དམ་པ་རྣམས་ལ་འཕྲིན་ཡིག་འདི་ཉིད་སྤྲིངས་པ༌སྟེ།  
\v 2 བདག་ཅག་གི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཁྱོད་རྣམས་ལ་ཐུགས་རྗེ་དང་ཞི་བདེ་འཐོབ་པར༌སྨོན།   
\s1 སེམས་གསོ་ཇི་སྙེད་གནང་མཁན་གྱི་དཀོན༌མཆོག  
\p
\v 3 བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཡབ་དཀོན་མཆོག༌སྟེ། ཐུགས་རྗེའི་ཡབ་དང་སེམས་གསོ་ཇི་སྙེད་གནང་མཁན་དཀོན་མཆོག་ལ་བསྔགས་བརྗོད་བྱའོ།།  
\v 4 བདག་ཅག་དཀའ་སྡུག་སྣ་ཚོགས་ཀྱི་ནང་དུ་ཡོད་དུས། ཁོང་གིས་བདག་ཅག་ལ་སེམས་གསོ་གནང༌ཞིང༌། དེ་ནི་བདག་ཅག་གིས་ཀྱང་དཀོན་མཆོག་ནས་ཐོབ་པའི་སེམས་གསོ་ལ་བརྟེན༌ནས། དཀའ་སྡུག་སྣ་ཚོགས་མྱོང་མཁན་གཞན་དག་ལའང་སེམས་གསོ་བྱེད་ནུས་པའི་ཕྱིར་རོ།།  
\v 5 བདག་ཅག་གིས་སྐྱབས་མགོན་མཱ་ཤི་ཀའི་སྡུག་བསྔལ་དེ་མང་པོ་མྱངས༌ན། སྐྱབས་མགོན་མཱ་ཤི་ཀར་བརྟེན་ནས་སེམས་གསོའང་དེ་འདྲ་མང་པོ་འཐོབ་པའོ།།  
\v 6 ངེད་ཅག་གིས་དཀའ་སྡུག་མྱོང་བ་ཡིན་ན། དེ་ནི་ཁྱོད་རྣམས་ལ་སེམས་གསོ་དང་ཐར་པ་འཐོབ་པའི་ཕྱིར་ཡིན༌ལ། ངེད་ཅག་ལ་སེམས་གསོ་ཐོབ་པ་ཡིན་ན། དེ་ནི་ཁྱོད་རྣམས་ལའང་སེམས་གསོ་འཐོབ་པའི་ཕྱིར་ཡིན། སེམས་གསོ་དེ་ཡིས་ངེད་ཅག་གིས་མྱངས་པའི་སྡུག་བསྔལ་དང་འདྲ་བར་ཁྱོད་ཅག་གིས་ཀྱང་བཟོད་བསྲན་ངང་ནས་མྱང་ཐུབ་པར་བྱེད།  
\v 7 ངེད་ཅག་གིས་ཁྱོད་རྣམས་ལ་རེ་བ་བརྟན་པོ་བཅངས་ཡོད་དེ། ཁྱོད་ཅག་གིས་ངེད་ཅག་དང་མཉམ་དུ་སྡུག་བསྔལ་མྱངས༌ཤིང༌། ངེད་ཅག་དང་མཉམ་དུ་སེམས་གསོ་འཐོབ་ངེས་པའང་ངེད་ཅག་གིས་ཤེས་པའི་ཕྱིར༌རོ།།   
\p
\v 8 སྤུན་ཟླ༌རྣམས། དེ་སྔར་ངེད་ཅག་གིས་ཨེ་ཞི་ཡཱ་ཡུལ་ནས་མྱངས་པའི་དཀའ་སྡུག་དེ་ཁྱོད་རྣམས་ཀྱིས་ཀྱང་ཤེས་དགོས༌ཏེ། དུས་དེར་ངེད་ཅག་གིས་གནོན་ཤུགས་བཟོད་ཐབས་མེད་པ་མྱངས་ཤིང་ལུས་སྟོབས་ཟད་པ༌དང༌། ཐ་ན་གསོན་པའི་རེ་བའང་ཡོངས་སུ་ཆད་པ༌དང༌།  
\v 9 རང་སེམས་ནས་ཀྱང་འཆི་ངེས་ཡིན་སྙམ་མོ།། དེ་ནི་ངེད་ཅག་གིས་རང་ལ་མི་བརྟེན༌པར། འདས་པོ་རྣམས་སླར་གསོན་པར་མཛད་མཁན་དཀོན་མཆོག་ཁོ་ནར་བརྟེན་དགོས་པའི་ཕྱིར་ཡིན།  
\v 10 དཀོན་མཆོག་གིས་དེ་སྔོན་ངེད་རྣམས་འཆི་བའི་ཉེན་ཁ་ལས་བསྐྱབས༌ཤིང༌། ད་ལྟའང་སྐྱོབ་པར་མཛད་པ༌དང༌། མ་འོངས་པའི་དུས་སུའང་སྐྱོབ་པའི་ཕྱིར་ངེད་ཅག་གིས་ཁོང་ལ་རེ་བ་བྱེད་དོ།།  
\v 11 མི་མང་པོས་དཀོན་མཆོག་ལ་བཀའ་དྲིན་ཞུ་བ་དང་། སྨོན་ལམ་མང་པོར་བརྟེན་ནས་ངེད་ཅག་ལ་བྱིན་རླབས་འཐོབ༌པའི་ཕྱིར། ཁྱོད་རྣམས་ཀྱིས་ཀྱང་གསོལ་བ་འདེབས་པའི་སྒོ་ནས་ངེད་ཅག་ལ་རོགས་རམ་བྱེད་དགོས༌སོ།།   
\s1 ཕོལ་ལོལ་གྱིས་འཆར་གཞི་བསྒྱུར༌པ།  
\p
\v 12 ངེད་ཅག་གི་བསྔགས་བརྗོད་ནི་འདི་ལྟ་སྟེ། ངེད་ཅག་གིས་འཇིག་རྟེན་འདི་ནས་དཀོན་མཆོག་གི་རྣམ་དག་དང་ཐུགས་རྒྱུད་དྲང་མོར་བརྟེན་པ་ལས། མིའི་བློ་གྲོས་ལ་མི་བརྟེན་པར་དཀོན་མཆོག་གི་ཐུགས་རྗེ་ལ་བརྟེན་ནས་ལེགས་པར་སྤྱད་པ་དང༌། ཁྱོད་རྣམས་ལ་དེ་ལས་ལྷག་ཏུ་ལེགས་པར་སྤྱད་པ་ལ་རང་གི་བསམ་པས་བདེན་དཔང་བྱས་པ་ཡིན།  
\v 13 ངེད་ཅག་གིས་ད་ལྟ་ཁྱོད་རྣམས་ལ་ཡི་གེ་བྲིས་པ་ནི་ཁྱོད་རྣམས་ཀྱིས་ཀློག་པ་དང་ཤེས་ཐུབ་པའི་ཕྱིར་ཡིན༌ལ། ཁྱོད་རྣམས་ཀྱིས་རྩ་བ་ནས་ཤེས་པར་བདག་གིས་རེ་བ་བྱེད་དོ༎  
\v 14 ཁྱོད་ཅག་གིས་ངེད་རྣམས་ཏོག་ཙམ་ཤེས་པ་དང་། གཙོ་བོ་ཡེ་ཤུའི་ཉིན་མོར་ངེད་རྣམས་ཁྱོད་ཅག་གི་གཟི་བརྗིད་དུ་འགྱུར་བ་ལྟར་ཁྱོད་རྣམས་ཀྱང་ངེད་ཅག་གི་གཟི་བརྗིད་དུ་འགྱུར་རོ།།   
\p
\v 15 བདག་ལ་དེ་ལྟ་བུའི་ཡིད་ཆེས་བརྟན་པོ་ཡོད༌པས། ཁྱོད་རྣམས་ལ་སླར་ཡང་ཕན་ཐོགས་པའི༌ཕྱིར། བདག་ནི་སྔ་མོ་ནས་ཁྱོད་རྣམས་ཀྱི་གམ་དུ་འགྲོ་འདོད༌ཅིང༌།  
\v 16 ཁྱོད་ཚོའི་ཡུལ་བརྒྱུད་ནས་མ་ཀེ་དོན་ཡཱ་ཡུལ་དུ་འགྲོ་བ༌དང༌། མ་ཀེ་དོན་ཡཱ་ཡུལ་ནས་སླར་ཡང་ཁྱོད་ཅག་གི་གམ་དུ་ལོག༌སྟེ། ཁྱོད་རྣམས་ཀྱིས་ང་རང་ཡ་ཧུ་དཱའི་ཡུལ་དུ་སྐྱེལ་མ་བྱེད་པར་རེ་བ་བྱས་པ་ཡིན།  
\v 17 དེའི་ཕྱིར། བདག་གིས་དེ་ལྟར་བྱེད་འདོད་པ་ལ་ཐེ་ཚོམ་སྐྱེས་སམ། ཡང་ན་བདག་གི་དམིགས་པ་ནི་རང་གི་འདོད་བློ་ལས་བྱུང༌སྟེ། ཡིན་མིན་གྱི་ཤན་འབྱེད་མི་ཐུབ་བམ་ཞེ་ན་མ་ཡིན་ནོ།།   
\p
\v 18 དཀོན་མཆོག་ནི་ཡིད་རྟོན་རུང་བ་ཡིན་ཞིང་། ངེད་ཅག་གིས་ཁྱོད་རྣམས་ལ་བསྒྲགས་པའི་བཀའ་ནི་ཡིན་མིན་གཉིས་ལྡན་ཞིག་མ་ཡིན་ནོ།།  
\v 19 ཅིའི་ཕྱིར་ཞེ་ན། བདག་དང༌། སིལ་ཝ་ནཱ། \f + \ft སིལ་ཝ་ནཱ་ཞེས་པ་ནི་སི་ལཱ་ཞེས་པའི་མིང་གཞན་ཞིག་ཡིན།\f* ཐི་མོ་ཐེ་བཅས་ཀྱིས་ཁྱོད་ཅག་གི་ཁྲོད་དུ་བསྒྲགས་པའི་དཀོན་མཆོག་གི་སྲས་ཡེ་ཤུ་མཱ་ཤི་ཀ་ནི་ཅིས་ཀྱང་ཡིན་མིན་གཉིས་ལྡན་ཞིག་མ་ཡིན༌པར། ཁོང་ལ་བརྟེན་ནས་ཡིན་པ་ཁོ་ན་ལགས་པའི་ཕྱིར༌རོ།།  
\v 20 དཀོན་མཆོག་གི་ཞལ་བཞེས་ཅི་ཙམ་ཡོད་ནའང་། སྐྱབས་མགོན་མཱ་ཤི་ཀ་ལ་བརྟེན་ནས་ཐམས་ཅད་ཡིན་པ་ལགས༌པས། བདག་ཅག་བརྒྱུད་ནས་དཀོན་མཆོག་ལ་བསྟོད་བསྔགས་འབུལ་བའི་ཕྱིར། ངེད་ཅག་གིས་སྐྱབས་མགོན་མཱ་ཤི་ཀར་བརྟེན་ནས་ཨ་མེན་ཞེས༌སྨྲ་བ་ཡིན།  
\v 21 དཀོན་མཆོག་ནི་སྐྱབས་མགོན་མཱ་ཤི་ཀའི་ནང་དུ་ངེད་ཅག་དང་ཁྱོད་རྣམས་བརྟན་པོར་མཛད་མཁན་དང༌། བདག་ཅག་ལ་འབྱུག་མཁན་ཡང་ཡིན།  
\v 22 ཡང་ཁོང་གིས་བདག་ཅག་ལ་ཐེལ་བརྒྱབ་པ་དང་དམ་པའི་ཐུགས་ཉིད་བདག་ཅག་གི་སེམས་སུ་གཏའ་མར་གནང༌ངོ༌།།   
\p
\v 23 ཁྱོད་རྣམས་ལ་བཟོད་པ་སྒོམ་པའི་ཕྱིར་ང་རང་ཀོ་རིན་ཐུ་རུ་མ་ཡོང༌སྟེ། ངས་རང་གི་ཚེ་སྲོག་དཔང་དུ་བཙུགས་ནས་དཀོན་མཆོག་གི་བདེན་དཔང་ཞུས་པ་ཡིན།  
\v 24 ངེད་ཅག་གིས་ཁྱོད་རྣམས་ཀྱི་དད་སེམས་ལ་ཚོད་འཛིན་བྱེད་འདོད་པ་མིན༌པར། ངེད་ཅག་ནི་ཁྱོད་རྣམས་དགའ་ཞིང་སྤྲོ་བར་བྱེད་པའི་ལས་གྲོགས་ཡིན་ལ། དེ་ནི་ཁྱོད་རྣམས་དད་པར་བརྟེན་ནས་བརྟན་པོར་གནས་ཐུབ་པའི་ཕྱིར་རོ།།   
\c 2
\cl ལེའུ་གཉིས༌པ། 
\toc1 ༄༅། །ཀོ་རིན་ཐུ་པ་རྣམས་ལ་སྤྲིངས་པའི་འཕྲིན་ཡིག་གཉིས་པ། 
\toc2 ཀོ་རིན་ཐུ་པ་གཉིས་པ། 
\s1 ཕོལ་ལོལ་གྱི་བྱམས་པ།  
\p
\v 1 བདག་གིས་སེམས་ཐག་བཅད་རྗེས། ཕྱིས་སུ་སླར་ཡང་སྐྱོ་སྡུག་ངང་ཁྱོད་ཅག་གི་གམ་དུ་མི་ཡོང་ངོ་།།  
\v 2 གལ༌ཏེ། བདག་གིས་ཁྱོད་ཅག་ལ་སེམས་སྐྱོ་བར་བྱེད༌ན། བདག་གིས་གང་ཞིག་ལ་སེམས་སྐྱོ་བར་བྱེད་པ་དེ་ལས་གཞན། སུ་ཞིག་གིས་བདག་ལ་དགའ་ཞིང་སྤྲོ་བར་བྱེད་ནུས༌སམ།  
\v 3 ང་རང་སླེབ་པའི་དུས༌སུ། ང་རང་དགའ་བར་བྱེད་འོས་པ་རྣམས་ཀྱིས་བདག་གི་སེམས་སྐྱོ་བར་མི་བྱེད་པའི༌ཕྱིར། བདག་གིས་སྔོན་ཆད་དོན་འདི་ཁྱོད་རྣམས་ལ་འཕྲིན་ཡིག་ཏུ་བྲིས༌པ་ཡིན། ང་རང་དགའ་ཞིང་སྤྲོ་བ་ལ་བརྟེན་ནས་ཁྱོད་རྣམས་ཀྱང་དགའ་ཞིང་སྤྲོ་བར་འགྱུར་བ་བདག་ལ་ཡིད་ཆེས་བརྟན་པོ་ཡོད།  
\v 4 དེ་སྔར་བདག་གིས་སེམས་སྡུག་ཆེན་པོ་དང་སྐྱོ་བའི་ངང་ནས་མཆི་མ་མང་པོ་བཞུར་གྱིན་ཁྱོད་རྣམས་ལ་འཕྲིན་ཡིག་བྲིས༌ཤིང༌། དེ་ནི་ཁྱོད་ཅག་གི་སེམས་སྐྱོ་རུ་འཇུག་པའི་ཕྱིར་མ་ཡིན༌པར། བདག་གིས་ཁྱོད་ཅག་ལ་ཤིན་ཏུ་གཅེས་པ་ནི་ཁྱོད་ཅག་ལ་ཤེས་སུ་འཇུག་པའི་ཕྱིར༌ཡིན་ནོ།།   
\s1 སྡིག་ཅན་ལ་གུ་ཡངས་གཏོང༌དགོས་པའི་སྐོར།  
\p
\v 5 སུ་ཞིག་གིས་མི་སེམས་སྐྱོ་བར་བྱེད༌ན། མི་དེ་ཡིས་བདག་སེམས་སྐྱོ་བར་བྱས་པར་མ་ཟད། ཁྱོད་ཅག་ཐམས་ཅད་ལའང་སེམས་ཅུང་ཙམ་སྐྱོ་རུ་འཇུག༌པ་ཡིན། བདག་གིས་དེ་ལྟར་སྨྲས་པ་ཕལ་ཆེར་འུད་ཆེ་ཡང་སྲིད༌མོད།  
\v 6 འོན་ཀྱང་མི་དེ་ལྟ་བུར་མི་མང་ཤས་ཀྱི་ཆད་པ་འཕོག་པས་ཆོག་ལ།  
\v 7 ཁོ་རང་སྐྱོ་སྡུག་ཆེན་པོས་མནར་ནས་ཡོངས་སུ་མི་ཕམ་པའི༌ཕྱིར། དེ་ལས་ལྡོག་པར་ཁོ་ལ་གུ་ཡངས་གཏོང་བ་དང་སེམས་གསོ་བྱ་འོས་སོ།།  
\v 8 དེའི༌ཕྱིར། ཁྱོད་རྣམས་ཀྱིས་ཁོ་ལ་ཡང་བསྐྱར་བྱམས་པ་གནང་བར་བྱའོ་ཞེས་བདག་གིས་བསྐུལ༌བ་ཡིན།  
\v 9 བདག་གིས་དེ་སྔར་ཁྱོད་རྣམས་ལ་འཕྲིན་ཡིག་འབྲི་དོན་ནི་ཁྱོད་རྣམས་ཀྱིས་དོན་ཀུན་ནས་བདག་དང་བསྟུན་མིན་ལ་བརྟགས༌པ་ཡིན།  
\v 10 ཁྱོད་རྣམས་ཀྱིས་མི་སུ་ཞིག་ལ་གུ་ཡངས་བཏང་ན། བདག་གིས་ཀྱང་དེ་ལྟར་གུ་ཡངས་གཏོང༌བ་དང་། བདག་གིས་དོན་གང་ཞིག་ལ་གུ་ཡངས་བཏང་བ་ཡིན༌ན། དེ་ནི་སྐྱབས་མགོན་མཱ་ཤི་ཀའི་སྤྱན་དྲུང་ནས་ཁྱོད་རྣམས་ཀྱི་ཆེད་དུ་གུ་ཡངས་བཏང་བ་ཡིན༌ཏེ།  
\v 11 བདུད་སཱ་ཏན་གྱིས་གླགས་བཙལ་ནས་བདག་ཅག་ལས་མི་རྒྱལ་བའི་ཕྱིར་དེ་ལྟར་བྱ་དགོས་སོ།། རྒྱུ་མཚན་ནི་བདག་ཅག་གིས་བདུད་ཀྱི་གཡོ་ཐབས་མི་ཤེས་པ་མ་ཡིན་པའི་ཕྱིར༌རོ།།   
\p
\v 12 སྔོན་ཆད་བདག་ནི་སྐྱབས་མགོན་མཱ་ཤི་ཀའི་འཕྲིན་བཟང་སྒྲོག་པའི་དོན་དུ་ཏྲོ་ཡཱ་རུ་སོང་བ་ན། གཙོ་བོས་ཀྱང་བདག་ལ་སྒོ༌ཕྱེས་བྱུང་།  
\v 13 དུས༌དེར། བདག་གི་སྤུན་ཟླ་ཐེ་ཏུ་དང་མ་ཕྲད་པས། ངའི་སེམས་མ་བདེ་བར་ཡུལ་དེའི་མི་རྣམས་དང་ཁ་བྲལ་ནས་མ་ཀེ་དོན་ཡཱ་ཡུལ་དུ་སོང༌ངོ༌།།   
\p
\v 14 དཀོན་མཆོག་གིས་རྟག་ཏུ་སྐྱབས་མགོན་མཱ་ཤི་ཀའི་ནང་དུ་བདག་ཅག་ཁྲིད་དེ་རྣམ་པར་རྒྱལ་བར་མཛད་པ༌དང༌། བདག་ཅག་བརྒྱུད་ནས་ཡུལ་ཀུན་ཏུ་སྐྱབས་མགོན་མཱ་ཤི་ཀ་ངོ་ཤེས་པའི་དྲི་ཞིམ་ཁྱབ་པར་མཛད་པས་ཁོང་ལ་ཐུགས་རྗེ་ཆེ༌ཞུའོ།།  
\v 15 བདག་ཅག་ནི་དཀོན་མཆོག་གི་སྤྱན་དྲུང༌དུ། ཐར་པ་འཐོབ་བཞིན་པ་དང་འཇིག་བཞིན་པའི་མི་རྣམས་ལ་སྐྱབས་མགོན་མཱ་ཤི་ཀའི་དྲི་ཞིམ་ཡིན་ལ།  
\v 16 མི་གཅིག་ལ་འཆི་རུ་འཇུག་པའི་དྲི་མ༌དང༌། མི་གཞན་ལ་གསོན་དུ་འཇུག་པའི་དྲི་མའང་ཡིན། སུ་ཞིག་གིས་དོན་དེ་ལྟ་བུ་བསྒྲུབ་ནུས༌སམ་ཞེ་ན་མི་ནུས་སོ།།  
\v 17 ངེད་ཅག་ནི་ཁེ་ཕན་གྱི་དོན་དུ་དཀོན་མཆོག་གི་བཀའ་ལ་ལྷད་འཇུག་མཁན་གྱི་མི་མང་པོ་དང་མི་འདྲ༌སྟེ། ངེད་ཅག་ནི་གཤིས་རྒྱུད་དྲང་ཞིང་དཀོན་མཆོག་ནས་ཡོང་བ༌དང༌། དཀོན་མཆོག་གི་སྤྱན་དྲུང་དུ་སྐྱབས་མགོན་མཱ་ཤི་ཀར་བརྟེན་ནས་བཀའ་སྒྲོག་མཁན་ཡིན༌ནོ།།   
\c 3
\cl ལེའུ་གསུམ༌པ། 
\toc1 ༄༅། །ཀོ་རིན་ཐུ་པ་རྣམས་ལ་སྤྲིངས་པའི་འཕྲིན་ཡིག་གཉིས་པ། 
\toc2 ཀོ་རིན་ཐུ་པ་གཉིས་པ། 
\s1 ཞལ་ཆད་གསར་པའི་ཞབས་ཕྱི༌པ།  
\p
\v 1 ངེད་ཅག་གིས་སླར་ཡང་རང་ལ་བསྟོད་པ་བྱེད༌དམ། མི་གཞན་དག་ལྟར་ངེད་ཅག་གི་མཚམས་སྦྱོར་ཡི་གེ་ཁྱོད་རྣམས་ལ་སྤྲོད༌པའམ། ཡང་ན་ཁྱོད་ཅག་གི་མཚམས་སྦྱོར་ཡི་གེ་མི་གཞན་ལ་སྤྲོད་དགོས་སམ་ཞེ་ན་མི་དགོས་སོ།།  
\v 2 ཁྱོད་རྣམས་ནི་ངེད་ཅག་གི་སེམས་སུ་བྲིས་པའི་ངོ་སྤྲོད་ཡི་གེ་ཡིན༌ཏེ། མི་ཀུན་གྱིས་ཤེས་ཤིང་ཀློག༌པ་ཡིན།  
\v 3 ཁྱོད་ཅག་ནི་སྐྱབས་མགོན་མཱ་ཤི་ཀའི་འཕྲིན་ཡིག་ཡིན་པར་མངོན་ཞིང་། ངེད་ཅག་ལ་བརྟེན་ནས་བྱུང་བ་ཡིན་ལ། དེ་ནི་སྣག་ཚས་བྲིས་པ་མ་ཡིན་པར་གཏན་དུ་གསོན་པོར་བཞུགས་པའི་དཀོན་མཆོག་གི་ཐུགས་ཉིད་ཀྱིས་ཕྱག་བྲིས་གནང༌ཞིང༌། རྡོ་ལེབ་སྟེང་དུ་བྲིས་པ་མ་ཡིན་པར་མིའི་སེམས་ནང་དུ་བྲིས་པ་ཡིན༌ནོ།།   
\p
\v 4 སྐྱབས་མགོན་མཱ་ཤི་ཀ་བརྒྱུད་ནས་ངེད་ཅག་ལ་དཀོན་མཆོག་གི་སྤྱན་དྲུང་དུ་ཡིད་ཆེས་དེ་འདྲ་ཡོད་པ་ཡིན།  
\v 5 ངེད་ཅག་གིས་རང་ལ་བརྟེན་ནས་གང་ཞིག་བསྒྲུབ་ནུས་པར་བསམ་པ་མིན༌ཏེ། གང་ཞིག་བསྒྲུབ་ནུས་པ་ནི་དཀོན་མཆོག་ལ་བརྟེན་ནས་བྱུང༌བ་ཡིན།  
\v 6 ཁོང་གིས་ཀྱང་ངེད་ཅག་ནི་ཞལ་ཆད་གསར་པའི་ཞབས་ཕྱི་པ་བྱེད་ནུས་པར་མཛད༌ཅིང༌། དེ་ནི་བཀའ་ཁྲིམས་ལས་བྱུང་བ་མ་ཡིན་པར་དམ་པའི་ཐུགས་ཉིད་ལས་བྱུང་བ་ཡིན༌ཏེ། བཀའ་ཁྲིམས་ཀྱིས་འཆི་རུ་འཇུག་པ༌དང༌། དམ་པའི་ཐུགས་ཉིད་ཀྱིས་གསོན་དུ་འཇུག་པའི་ཕྱིར༌རོ།།   
\s1 ཞལ་ཆད་གསར་པའི་གཟི༌འོད།  
\p
\v 7 སྔོན་ཆད་རྡོའི་སྟེང་དུ་ཡི་གེ་བརྐོས་ཤིང་འཆི་བར་གཏོགས་པའི་ཞབས་ཏོག་དེ་ལ་གཟི་འོད་ཡོད་པ༌དང༌། མོ་ཤེའི་གདོང་གི་གཟི་འོད་ཉམས་བཞིན་ཡོད་ཀྱང་ད་དུང་གཟི་འོད་ཡོད༌པས། ཡེས་ར་ཨེལ་གྱི་བུ་རྒྱུད་ཀྱིས་ཁོང་གི་གདོང་ལ་མིག་གིས་ཐད་ཀར་ལྟ་མ་ནུས༌ན།  
\v 8 དམ་པའི་ཐུགས་ཉིད་ཀྱི་ཞབས་ཏོག་ལ་ལྷག་ཏུ་གཟི་འོད་ལྡན་པ་མ་ཡིན༌ནམ།  
\v 9 གལ༌ཏེ། ཉེས་ཆད་གཅོད་པའི་ཞབས་ཏོག་ལ་གཟི་འོད་ཡོད༌ན། རྣམ་པར་དག་པ་ལ་གཏོགས་པའི་ཞབས་ཏོག་ལ་དེ་བས་ཀྱང་གཟི་འོད༌ཆེའོ།།  
\v 10 སྔོན་ཆད་གཟི་འོད་ཡོད་པ་དེ་ནི་ད་ལྟའི་གཟི་འོད་ཆེན་པོ་འདིའི་དབང་གིས་གཟི་འོད་ལྡན་པར་གྱུར་པ་མིན།  
\v 11 དེ་སྔར་ཉམས་པར་གྱུར་པ་དེ་ལ་གཟི་འོད་ཡོད་ན། གཏན་དུ་བཞུགས་པ་དེ་ལ་ལྷག་ཏུ་གཟི་འོད་ལྡན་པ་ཡིན༌ནོ།།   
\p
\v 12 དེའི་ཕྱིར། ངེད་ཅག་ལ་རེ་བ་དེ་ལྟ་བུ་ཡོད་པས་སྤོབས་པ་ཆེན་པོས༌སྨྲ་བ་ཡིན་ནོ།།  
\v 13 དེ་ནི་མོ་ཤེ་ཡིས་རང་གི་གདོང་ལ་སེང་རས་བཀབ་སྟེ་ཡེས་ར་ཨེལ་གྱི་བུ་རྒྱུད་ལ་ཉམས་པར་འགྱུར་བའི་གཟི་འོད་ཐད་ཀར་མི་མཐོང་བར་བྱས་པ་དང་མི་མཚུངས་སོ།།  
\v 14 འོན༌ཀྱང༌། དེ་དག་གི་སེམས་རྒྱུད་གྱོང་པོ་ཡིན༌ཏེ། ད་ལྟའི་བར་དུ་ཞལ་ཆད་རྙིང་པའི་གཞུང་དོན་བཀླགས་ནའང་སེང་རས་དེ་བླངས་མེད་དོ།། རྒྱུ་མཚན་ནི་སྐྱབས་མགོན་མཱ་ཤི་ཀའི་ནང་ནས་སེང་རས་དེ་ལེན་ནུས༌པའི་ཕྱིར་རོ།།  
\v 15 དེང་གི་བར་དུ་མོ་ཤེའི་མདོ་ཀློག་ཐེངས་རེ༌རེར། སེང་རས་དེས་ཡེས་ར་ཨེལ་མི་རྣམས་ཀྱི་སེམས་གཡོགས་འདུག  
\v 16 འོན༌ཀྱང༌། སུ་ཞིག་དུས་ནམ་ཞིག་ལ་གཙོ་བོའི་ཕྱོགས་སུ་འཁོར༌ན། དེའི་དུས་སུ་སེང་རས་དེ་ཡང་ལེན་ངེས༌ཡིན།  
\v 17 གཙོ་བོ་ནི་ཐུགས་ཉིད༌ཡིན། གཙོ་བོའི་ཐུགས་ཉིད་དེ་གང་དུ་བཞུགས་ན་དེ་རུ་རང་དབང་ཡོད་དོ།།  
\v 18 བདག་ཅག་ཐམས་ཅད་ཀྱིས་གདོང་མ་གཡོགས་པར་གཙོ་བོའི་གཟི་འོད་མཐོང་བ་ནི་མེ་ལོང་ལས་ཕྱིར་སྣང་བ་དང་མཚུངས༌ཤིང༌། བདག་ཅག་ཐམས་ཅད་ནི་གཙོ་བོའི་སྣང་བརྙན་དང་མཚུངས་པར་འགྱུར་བཞིན་པ༌དང༌། དེ་ནི་རིམ་བཞིན་གཟི་བརྗིད་ཀྱི་སྟེང་དུ་གཟི་བརྗིད་བསྣན་པར་འགྱུར་ཞིང་ཐུགས་ཉིད་ཡིན་པའི་གཙོ་བོ་ནས་བྱུང་ངོ་།།   
\c 4
\cl ལེའུ་བཞི༌པ། 
\toc1 ༄༅། །ཀོ་རིན་ཐུ་པ་རྣམས་ལ་སྤྲིངས་པའི་འཕྲིན་ཡིག་གཉིས་པ། 
\toc2 ཀོ་རིན་ཐུ་པ་གཉིས་པ། 
\s1 རྫ་ཆས་ནང་གི་རིན་པོ་ཆེའི༌དཔེ།  
\p
\v 1 དེ་ལྟར་ཡིན་པས། ངེད་ཅག་ལ་ཐུགས་རྗེའི་སྒོ་ནས་ཞབས་ཏོག་བྱེད་པའི་ལས་འགན་འདི་ཐོབ་པས་དཔའ་མི་ཞུམ༌པར།  
\v 2 ལྐོག་གྱུར་དང་ངོ་ཚའི་དོན་རྣམས་སྤངས་ཤིང་གཡོ་སྒྱུ་མི་བྱེད་པ་དང་དཀོན་མཆོག་གི་བཀའ་ལའང་ལྷད་ཞུགས་སུ་མི་འཇུག༌པར། དཀོན་མཆོག་གི་བདེན་པ་ཉིད་ཁོ་ན་གསལ་པོར་བསྟན༌ཏེ། དཀོན་མཆོག་གི་སྤྱན་སྔར་རང་ཉིད་ནི་མི་ཚང་མའི་བསམ་པ་ལ་གཏོད་པར་བརྩོན་པ་ཡིན་ནོ།།  
\v 3 གལ༌ཏེ། ངེད་ཅག་གི་འཕྲིན་བཟང་བསྒྲིབས་པར་གྱུར༌ན། འཇིག་པར་འགྱུར་བའི་མི་རྣམས་ཀྱི་ཁྲོད་དུ་བསྒྲིབས༌པ་ཡིན།  
\v 4 འཇིག་རྟེན་འདིའི་ལྷ་ཡིས་དད་པ་མེད་པའི་མི་རྣམས་ཀྱི་སེམས་རྨོངས་པར་བྱས༌ཏེ། སྐྱབས་མགོན་མཱ་ཤི་ཀའི་གཟི་བརྗིད་དང་ལྡན་པའི་འཕྲིན་བཟང་གི་འོད་སྣང་ཁོ་རྣམས་ལ་འཕྲོ་རུ་མི་འཇུག༌པའི་ཕྱིར་རོ།། སྐྱབས་མགོན་མཱ་ཤི་ཀ་ནི་དཀོན་མཆོག་གི་སྣང་བརྙན་ཡིན།  
\v 5 ངེད་ཅག་གིས་རང་ཉིད་སྒྲོག་པ་མ་ཡིན༌པར། ཡེ་ཤུ་མཱ་ཤི་ཀ་ནི་གཙོ་བོ་ཡིན༌པ་དང་། སྐྱབས་མགོན་ཡེ་ཤུའི་དོན་དུ་ངེད་ཅག་ནི་ཁྱོད་རྣམས་ཀྱི་གཡོག་པོ་ཡིན་པ་སྒྲོག༌པ་ཡིན།  
\v 6 ཡེ་ཤུ་མཱ་ཤི་ཀའི་ཞལ་རས་ནས་མངོན་པའི་དཀོན་མཆོག་གི་གཟི་འོད་དེ་བདག་ཅག་ལ་ཤེས་སུ་འཇུག་པའི་ཕྱིར། མུན་པའི་ཁྲོད་ནས་འོད་སྤྲོ་བར་བཀའ་གནང་མཁན་དཀོན་མཆོག་ནི་བདག་ཅག་གི་སེམས་ནང་དུ་འཕྲོས༌སོ༎   
\p
\v 7 འོན་ཀྱང་། དཔག་ཏུ་མེད་པའི་ནུས་མཐུ་ནི་དཀོན་མཆོག་ནས་བྱུང་བ་ལས་བདག་ཅག་ལས་བྱུང་བ་མ་ཡིན༌པའི་དོན་དེ་མངོན་པའི་ཕྱིར། བདག་ཅག་གི་ནོར་བུ་འདི་ནི་རྫ་ཆས་ནང་དུ་བཞག་ཡོད༌པ་ཡིན༌ནོ།།  
\v 8 ངེད་ཅག་ལ་ཕྱོགས་བཞི་ནས་དཀའ་སྡུག་གིས་མནན་ཡང་བཙིར་མི་ནུས་ལ། སེམས་ནི་ཅི་བྱ་གཏོལ་མེད་དུ་གྱུར་ནའང་བློ་མི༌ཕམ་མོ།།  
\v 9 གཉའ་གནོན་མྱངས་ཀྱང་འདོར་བ་མིན། ས་རུ་བསྒྱེལ་ཡང་འཆི་བར་གྱུར་མེད་དོ།།  
\v 10 སྐྱབས་མགོན་ཡེ་ཤུའི་ཚེ་སྲོག་ཀྱང་ངེད་ཅག་གི་སྟེང་དུ་གསལ་པོར་མངོན་པར་བྱེད༌པའི་ཕྱིར། ངེད་ཅག་གིས་རྟག་ཏུ་སྐྱབས་མགོན་ཡེ་ཤུ་སྐུ་གྲོངས་པའི་དོན་དེ་ལུས་ལ་འཁུར༌བ་ཡིན།  
\v 11 ཡང་ཁོང་ཉིད་ཀྱི་ཚེ་སྲོག་དེ་ངེད་ཅག་གི་འཆི་བར་འགྱུར་བའི་ལུས་སྟེང་ནས་གསལ་པོར་མངོན་པའི་ཕྱིར། ངེད་ཅག་གསོན་པོར་གནས༌ཀྱང༌། རྟག་ཏུ་སྐྱབས་མགོན་ཡེ་ཤུའི་དོན་དུ་འཆི་ལམ་ལ་བརྫངས༌པ་ཡིན་ནོ།།  
\v 12 དེའི༌ཕྱིར། འཆི་བས་ངེད་ཅག་གི་ནང་དུ་ལས་བྱེད་ཀྱང༌། ཚེ་སྲོག་གིས་ཁྱོད་ཅག་གི་ནང་དུ་ལས་བྱེད་དོ།།   
\p
\v 13 འོན༌ཀྱང༌། ངེད་ཅག་ལ་དད་སེམས་ཡོད༌དེ། གསུང་རབ་ཀྱི་མདོ་ལས་ཇི་སྐད༌དུ། བདག་གིས་དད་པ་བྱེད་པས་གཏམ་འདི་ལྟར་སྨྲས་པ་ཡིན་ཞེས་གསུངས་པ༌བཞིན། ངེད་ཅག་ལའང་དད་པའི་སེམས་དང་ལྡན་པས་གཏམ༌སྨྲ་བ་ཡིན་ནོ།།  
\v 14 སྐྱབས་མགོན་ཡེ་ཤུ་སླར་གསོན་པར་མཛད་མཁན་གྱིས་བདག་ཅག་ཀྱང་སྐྱབས་མགོན་ཡེ་ཤུ་དང་མཉམ་དུ་སླར་གསོན་པར་མཛད་ངེས་པར་མ༌ཟད། ངེད་ཅག་དང་ཁྱོད་རྣམས་ལྷན་དུ་ཁོང་གི་སྤྱན་སྔར་མཉམ་དུ་སྡོད་པར་མཛད་ངེས་པའང་བདག་ཅག་གིས་ཤེས་སོ།།  
\v 15 ཐུགས་རྗེས་མི་གྲངས་ཇེ་མང་དུ་སོང་བ་དང་བསྟུན༌ནས། ལྷག་ཏུ་བཀའ་དྲིན་ཞུ་མཁན་མང་དུ་མངོན་ཞིང་དཀོན་མཆོག་ལ་བསྟོད་བསྔགས་འབུལ་བར་འགྱུར་བའི་ཕྱིར། དོན་ཐམས་ཅད་ཁྱོད་ཅག་གི་ཆེད་དུ་ཡིན༌ནོ།།   
\p
\v 16 དེའི༌ཕྱིར། བདག་ཅག་དཔའ་མི་ཞུམ་ལ། ཕྱིའི་ལུས་པོ་རླག་དང་བརླག་པར་འགྱུར་ནའང་ནང་སེམས་ནི་ཉིན་རེ་བཞིན་གསར་དུ་སྒྱུར་བ་ཡིན་ནོ།།  
\v 17 བདག་ཅག་གི་ཡུད་ཙམ་གྱི་སྡུག་བསྔལ་ཆུང་ངུ་འདིས་བདག་ཅག་ལ་བླ་ན་མེད་པ་དང་མཐའ་ཡས་པའི་གཟི་བརྗིད་འཐོབ་པར་བྱེད།  
\v 18 མིག་གིས་མཐོང་བ་དག་ནི་གནས་སྐབས་ཙམ་དང་མི་མཐོང་བ་དག་ནི་གཏན་དུ་གནས༌པས། བདག་ཅག་གིས་མིག་གིས་མཐོང་བ་དག་ལ་མི་བལྟ་བར་མིག་གིས་མི་མཐོང་བ་དག་ལ་བལྟ༌བར་བྱའོ།།   
\c 5
\cl ལེའུ་ལྔ༌པ། 
\toc1 ༄༅། །ཀོ་རིན་ཐུ་པ་རྣམས་ལ་སྤྲིངས་པའི་འཕྲིན་ཡིག་གཉིས་པ། 
\toc2 ཀོ་རིན་ཐུ་པ་གཉིས་པ། 
\s1 ནམ་མཁའི་ཞིང་ཁམས་ཀྱི་སྡོད༌གནས།  
\p
\v 1 དེ་ལྟར་ཡིན་པས། བདག་ཅག་གི་ས་སྟེང་གི་ཁང་པ་ཡིན་པའི་གུར་འདི་བཤིག་པར་འགྱུར༌ཚེ། དཀོན་མཆོག་གིས་བསྐྲུན་པའི་སྡོད་གནས་ཤིག་བདག་ཅག་ལ་ཡོད་པ་དང་། དེ་ནི་མིའི་ལག་པས་བསྐྲུན་པ་མ་ཡིན༌ཞིང༌། ནམ་མཁའི་ཞིང་ཁམས་སུ་གཏན་དུ་གནས་པའི་ཁང་པ་ཞིག་འཐོབ་ངེས་པ་བདག་ཅག་གིས་ཤེས་སོ།།  
\v 2 བདག་ཅག་གིས་གུར་འདིའི་ནང་དུ་ཤུགས་རིང་འབྱིན་ཞིང་། ནམ་མཁའི་ཞིང་ཁམས་ནས་འཐོབ་པའི་སྡོད་གནས་དེ་ནི་གོས་བཞིན་དུ་གྱོན་འདོད༌པ་དང་།  
\v 3 གོས་དེ་གྱོན་པ་ཡིན་ན་གཅེར་བུར་མི་ལུས་སོ།།  
\v 4 བདག་ཅག་གིས་གུར་འདིའི་ནང་དུ་དཀའ་སྡུག་མྱོང་བཞིན་ཤུགས་རིང་འབྱིན༌མོད། འོན་ཀྱང་མི་རྟག་པ་ནི་མཐའ་མེད་པའི་ཚེ་སྲོག་གིས་ཁྱུར་མིད་བྱེད་པའི༌ཕྱིར། གོས་འདི་ཕུད་འདོད་པ་མ་ཡིན་པར་གོས་དེ་གྱོན་འདོད༌པ་ཡིན།  
\v 5 དོན་འདི་བདག་ཅག་གི་ཕྱིར་དུ་སྟ་གོན་མཛད་མཁན་ནི་དཀོན་མཆོག་ཡིན༌ལ། ཁོང་གིས་དམ་པའི་ཐུགས་ཉིད་བདག་ཅག་ལ་གཏའ་མར་གནང༌ངོ༌།།   
\p
\v 6 དེའི༌ཕྱིར། བདག་ཅག་རྒྱུན་དུ་སྙིང་སྟོབས་ཆེ་བར་མ༌ཟད། ལུས་པོའི་ནང་སྡོད༌པ་ན་གཙོ་བོ་དང་ཁ་གྱེས་པའང་ཤེས་སོ།།  
\v 7 ཅིའི་ཕྱིར་ཞེ་ན། བདག་ཅག་གིས་དད་པར་བརྟེན་ནས་སྤྱོད་པ༌ལས། མིག་གིས་མཐོང་བ་ལ་བརྟེན་ནས་སྤྱོད་པ་མ་ཡིན་པའི་ཕྱིར༌རོ།།  
\v 8 བདག་ཅག་དཔའ་ངར་ཞུམ་མེད་དུ་གནས༌ཤིང༌། དེ་ལས་ཀྱང་ལུས་པོ་དང་ཁ་བྲལ་ནས་གཙོ་བོ་དང་ལྷན་དུ་སྡོད་འདོད༌པས།  
\v 9 ལུས་པོའི་ཕྱི་ནང་གང་དུ་བསྡད་ཀྱང་བདག་ཅག་གིས་ཕུགས་འདུན་བཅངས་ཏེ། སྐྱབས་མགོན་མཱ་ཤི་ཀའི་ཐུགས་དགྱེས་པ་དེ་ཉིད་འཐོབ་པར་བརྩོན༌པ་ཡིན།  
\v 10 རྒྱུ་མཚན་ནི་བདག་ཅག་ཐམས་ཅད་སྐྱབས་མགོན་མཱ་ཤི་ཀའི་ལེགས་ཉེས་ཀྱི་ཁྲིམས་ཐག་གཅོད་པའི་བཞུགས་ཁྲིའི་མདུན་དུ་ལང་དགོས་ཤིང་། ལུས་པོའི་ནང་གསོན་པའི་དུས་སུ་རང་རང་གིས་ཅི་བྱས་བཞིན་མི་རེ་རེར་བཟང་ངན་གང་རུང་གི་འབྲས་བུ་འཐོབ་པར་འགྱུར་བའི་ཕྱིར༌རོ།།   
\s1 འདུམ་སྒྲིག་གི་ལས་འགན།  
\p
\v 11 དེ་བས་ན། ངེད་ཅག་གིས་གཙོ་བོ་ལ་འཇིགས་པ་ཤེས་པས་མི་རྣམས་ལ་བསྐུལ་བར༌བྱའོ།། འོན་ཀྱང་ངེད་རྣམས་དཀོན་མཆོག་གི་སྤྱན་སྔར་མངོན་པར་གསལ་བ་བཞིན༌དུ། ཁྱོད་ཅག་གི་བསམ་པ་ལའང་མངོན་པར་གསལ་བའི་རེ་བ་བྱའོ།།  
\v 12 ངེད་ཅག་གིས་ཁྱོད་རྣམས་ལ་རང་གིས་རང་ལ་འུད་བསྟོད་བྱེད་པ་མིན༌ཏེ། སེམས་ལ་མི་བརྟེན་པར་ཕྱིའི་རྣམ་པར་བརྟེན་ནས་འུད་བསྟོད་བྱེད་མཁན་དག་ལ་ལན་ཡོད་པར་འགྱུར་བའི༌ཕྱིར་དུ། ཁྱོད་ཅག་གིས་ངེད་ཅག་ལ་བསྟོད་པ་བྱ་བའི་གོ་སྐབས་ཤིག་སྟེར་རོ།།  
\v 13 གལ༌ཏེ། ངེད་ཅག་སྨྱོས་པ་ཡིན་ན་དཀོན་མཆོག་གི་ཆེད་དུ་ཡིན༌ལ། དྭངས་གསལ་ཡིན་ན་ཁྱོད་ཅག་གི་དོན་དུ་ཡིན།  
\v 14 ངེད་ཅག་གི་སེམས་སུ་མི་ཐམས་ཅད་ཀྱི་ཚབ་ཏུ་མི་གཅིག་སྐུ་གྲོངས་པ་ཡིན་ན་མི་ཐམས་ཅད་ཀྱང་ཤི་བ་ཐག་གིས་ཆོད་པས། སྐྱབས་མགོན་མཱ་ཤི་ཀའི་བྱམས་པས་ངེད་ཅག་ལ་ངར་ཤུགས་སློང་བ་ཡིན།  
\v 15 སྐྱབས་མགོན་ཡེ་ཤུ་ནི་མི་ཐམས་ཅད་ཀྱི་ཆེད་དུ་སྐུ་གྲོངས་པ་ཡིན༌ཏེ། གསོན་པོར་གནས་པ་རྣམས་ནི་དེང་ཕྱིན་རང་ཉིད་ཀྱི་དོན་དུ་མི་གསོན༌པར། ཁོ་རྣམས་ཀྱི་ཆེད་དུ་སྐུ་གྲོངས་ཤིང་སླར་གསོན་པ་ཁོང་ཉིད་ཀྱི་དོན་དུ་གསོན་དགོས་པའི་ཕྱིར༌རོ།།   
\p
\v 16 དེའི༌ཕྱིར། བདག་ཅག་གིས་ད་ནས་བཟུང་མིའི་ཕྱི་ཡི་རྣམ་པར་མི༌བལྟའོ།། དེ་སྔོན་ཕྱིའི་རྣམ་པར་བལྟས་ནས་སྐྱབས་མགོན་མཱ་ཤི་ཀ་ངོས་བཟུང་མྱོང་ཡང་ད་ལྟ་དེ་ལྟར་ངོས་མི་འཛིན་པས།  
\v 17 སུ་ཞིག་སྐྱབས་མགོན་མཱ་ཤི་ཀའི་ནང་དུ་ཡོད༌ན། མི་དེ་ནི་གསར་དུ་བསྐྲུན་པའི་མི་ཡིན༌ལ། འདས་དོན་ཚང་མ་མེད་པར་གྱུར་ཅིང་། ལྟོས་དང་། གསར་པ་དེ་བྱུང་འདུག་གོ།  
\v 18 དོན་ཐམས་ཅད་ནི་དཀོན་མཆོག་ནས་བྱུང་བ༌སྟེ། ཁོང་གིས་སྐྱབས་མགོན་མཱ་ཤི་ཀ་བརྒྱུད་ནས་བདག་ཅག་ཁོང་དང་འདུམ་པར་མཛད་པ༌དང༌། མི་རྣམས་ཁོང་དང་འདུམ་པར་མཛད་པའི་ལས་འགན་ཡང་བདག་ཅག་ལ་གནང༌བ་ཡིན།  
\v 19 དེ་ནི་དཀོན་མཆོག་གིས་སྐྱབས་མགོན་མཱ་ཤི་ཀའི་ནང་དུ་འཇིག་རྟེན་གྱི་མི་རྣམས་ཁོང་ཉིད་དང་འདུམ་པར་མཛད༌ཅིང༌། ཁོ་རྣམས་ཀྱི་ཉེས་སྐྱོན་ཁོ་རྣམས་ལ་མི་འགེལ༌བར། འདུམ་པར་མཛད་པའི་བཀའ་ཡང་བདག་ཅག་ལ་བཅོལ་བ་ཡིན།  
\v 20 དེ་བས་ངེད་ཅག་ནི་སྐྱབས་མགོན་མཱ་ཤི་ཀའི་སྐུ་ཚབ་པ་ཡིན༌ལ། དཀོན་མཆོག་གིས་ངེད་ཅག་བརྒྱུད་ནས་ཁྱོད་རྣམས་ལ་བསྐུལ་བ༌བཞིན། ངེད་ཅག་གིས་སྐྱབས་མགོན་མཱ་ཤི་ཀའི་ཚབ་བྱས་ནས་ཁྱོད་རྣམས་དཀོན་མཆོག་དང་འདུམ་པར༌ཞུའོ།།  
\v 21 བདག་ཅག་སྐྱབས་མགོན་མཱ་ཤི་ཀའི་ནང་ནས་དཀོན་མཆོག་གི་མི་རྣམ་དག་ཏུ་འགྱུར་བའི༌ཕྱིར། དཀོན་མཆོག་གིས་སྡིག་པ་མེད་པ་དེ་ཉིད་བདག་ཅག་གི་ཚབ་ཏུ་སྡིག་པར་མཛད༌དོ།།   
\c 6
\cl ལེའུ་དྲུག༌པ། 
\toc1 ༄༅། །ཀོ་རིན་ཐུ་པ་རྣམས་ལ་སྤྲིངས་པའི་འཕྲིན་ཡིག་གཉིས་པ། 
\toc2 ཀོ་རིན་ཐུ་པ་གཉིས་པ། 
\s1 སྐུ་ཚབ་པ་ཕོལ་ལོལ་གྱི་དཀའ༌ཚེགས།  
\p
\v 1 དཀོན་མཆོག་གི་ལས་གྲོགས་ཡིན་པ་ངེད་ཅག་གིས་ཁྱོད་རྣམས་ལ་ཁོང་གི་ཐུགས་རྗེ་དོན་མེད་དུ་དང་ལེན་མི་བྱེད་པར་བསྐུལ༌བ་ཡིན་ནོ།།  
\v 2 ཅིའི་ཕྱིར་ཞེ་ན། དཀོན་མཆོག་གིས་འདི་སྐད༌དུ།  
\q1 ཐུགས་དགྱེས་དུས་སུ་བདག་གིས་ཁྱོད་ཀྱི་སྨོན་ལམ༌བསྐངས།།  
\q1 སྐྱོབ་པའི་ཉིན་མོར་བདག་གིས་ཁྱོད་ལ་རོགས་རམ༌མཛད།།  
\m ཅེས་གསུངས་པའི་ཕྱིར༌རོ།། ལྟོས༌དང༌། ད་ནི་འོས་ཤིང་འཚམ་པའི་དུས་ལ་བབས། ལྟོས་དང་། ད་ལྟ་ནི་སྐྱོབ་པའི་ཉིན་མོ་ཡིན༌ནོ།།   
\p
\v 3 ངེད་ཅག་གི་ཞབས་ཏོག་བྱེད་པའི་ལས་འགན་འདི་ལ་མི་གཞན་གྱིས་སྐྱོན་བརྗོད་མི་བྱེད་པའི༌ཕྱིར། ངེད་ཅག་གིས་ལས་གང་གི་ཆ་ནས་ཀྱང་བར་ཆད་མི༌བཟོ་ལ།  
\v 4 དོན་ཐམས་ཅད་ཀྱི་ཐད་ནས་ཀྱང་རང་ཉིད་ནི་དཀོན་མཆོག་གི་ཞབས་ཕྱི་པ་ཡིན་པ་གསལ་པོར་སྟོན་པ༌སྟེ། དཔེར༌ན། བཟོད་བསྲན༌དང༌། དཀའ༌སྡུག ཉམ་ཐག ཆག་སྒོ།  
\v 5 གཅར༌རྡུང༌། བཙོན༌འཇུག ཟིང༌སློང༌། ལས་ལ་བརྩོན་པ། གཉིད་མི་ཁུག༌པ། ཟས་མི་སྤྱོད༌པ།  
\v 6 སྤྱོད་གཙང༌། ཡོན༌ཏན། བཟོད༌པ། སྙིང༌རྗེ། དམ་པའི་ཐུགས་ཉིད། བཅོས་མ་མིན་པའི་བྱམས༌པ།  
\v 7 གཏམ་བདེན༌པ། དཀོན་མཆོག་གི་ནུས་མཐུ་ཆེན༌པོ། ལག་པ་གཡས་གཡོན་དུ་ཡོད་པའི་དྲང་བདེན་གྱི་མཚོན༌ཆ།  
\v 8 གཟི༌བརྗིད། ངོ༌ཚ། མིང༌ངན། མཚན༌སྙན། བལྟས་ན་བསླུ་བྲིད་ཡིན་ཡང་དོན་ལ་དྲང་པོ་ཡིན༌པ།  
\v 9 བལྟས་ན་ཅང་གིས་ངོ་མི་ཤེས་ཀྱང་དོན་ལ་ཀུན་གྱིས་ངོ་ཤེས་པ། བལྟས་ན་འཆི་ལ་ཉེ་ཡང་དོན་ལ་གསོན་པོ་ཡིན༌ལ། བལྟས་ན་ཉེས་ཆད་ཕོག་ཀྱང་དོན་ལ་སྲོག་མི་འཆོར་བ།  
\v 10 བལྟས་ན་སེམས་སྐྱོ་ཡང་དོན་ལ་ནམ་རྒྱུན་དགའ་སྤྲོས་ཁེངས༌པ། བལྟས་ན་དབུལ་ཕོངས་ཡིན་ཡང་དོན་ལ་མི་མང་པོ་ཕྱུག་པར་བྱེད༌པ། བལྟས་ན་ཅི་ཡང་མེད་ཀྱང་དོན་ལ་ཐམས་ཅད་འཛོམས་པ་ལྟ༌བུའོ།།   
\p
\v 11 ཀོ་རིན་ཐུ་པ་རྣམས། ངེད་ཅག་གིས་ཁྱོད་རྣམས་ལ་གཏམ་དྲང་པོར་སྨྲ་ཞིང་སེམས་རྒྱ་ནི༌ཆེའོ།།  
\v 12 ཁྱོད་རྣམས་གུ་དོག་པ་ནི་ངེད་ཅག་གི་རྐྱེན་གྱིས་མིན༌ཏེ། ཁྱོད་ཅག་གི་སེམས་རྒྱ་ཆུང་བ་ལ་རག་ལས༌པ་ཡིན།  
\v 13 ཁྱོད་ཅག་གིས་ཀྱང་སེམས་རྒྱ་ཆེ་བའི་ངང་ནས་ངེད་རྣམས་ལ་དྲིན་ལན་གཞལ་དགོས༌ཏེ། བདག་གི་གཏམ་འདི་ནི་བུ་ཕྲུག་ལ་སྨྲ་བ་དང་མཚུངས༌སོ།།   
\s1 དད་མེད་རྣམས་དང་མཉམ་དུ་གཉའ་ཤིང་མི་འཁུར་བ།  
\p
\v 14 ཁྱོད་ཅག་གིས་དད་མེད་རྣམས་དང་མཉམ་དུ་གཉའ་ཤིང་མ་ཁུར༌ཅིག དྲང་བདེན་དང་ཁྲིམས་མེད་ལུགས་མེད་གཉིས་ལ་འབྲེལ་བ་ཅི་ཡོད་དམ། འོད་དང་མུན་པ་གཉིས་ལ་འབྲེལ་བ་ཡོད་ནུས་སམ།  
\v 15 སྐྱབས་མགོན་མཱ་ཤི་ཀ་དང་པེལ་ལེ་ཨར་\f + \ft འདིར་བརྗོད་པའི་པེལ་ལེ་ཨར་ཞེས་པ་ནི་བདུད་སཱ་ཏན་གྱི་མིང་གཞན་ཞིག་ཡིན།\f*གཉིས་ལ་གཞི་མཐུན་ས་ཅི་ཡོད༌དམ། དད་པ་བྱེད་མཁན་དང་དད་པ་མི་བྱེད་མཁན་གཉིས་ལ་འབྲེལ་བ་ཅི་ཡོད༌དམ།  
\v 16 དཀོན་མཆོག་གི་མཆོད་ཁང་དང་སྐུ་འདྲ་གཉིས་ལ་མཐུན་ས་ཡོད་དམ་ཞེ་ན་མེད་དོ།། ཅིའི་ཕྱིར་ཞེ་ན། བདག་ཅག་ནི་གཏན་དུ་གསོན་པོར་བཞུགས་པའི་དཀོན་མཆོག་གི་མཆོད་ཁང་ཡིན༌ཏེ། སྔར་དཀོན་མཆོག་གིས་འདི་སྐད༌དུ།  
\q1 བདག་ནི་དེ་རྣམས་ནང་དུ་སྡོད་པ༌དང༌།།  
\q1 དེ་དག་ཁྲོད་ནས་འགྲོ་འོང་བྱེད་པ༌དང༌།།  
\q1 བདག་ནི་དེ་ཚོའི་དཀོན་མཆོག་བྱེད་པ༌དང༌།།  
\q1 དེ་རྣམས་བདག་གི་འབངས་མི་ཡིན་པར༌འགྱུར།།  
\m ཞེས༌དང༌།  
\v 17 ཡང་གཙོ་བོ་ལགས་ཀྱིས་འདི་སྐད༌དུ།  
\q1 དེའི༌ཕྱིར་ཁྱོད་རྣམས་དེ་དག་ལས་ཐོན་ཤོག །  
\q1 དེ་དག་ལ་ནི་དབྱེ་བ་འབྱེད་པར༌ཤོག །  
\q1 མི་གཙང་བ་ལ་རེག་པར་མ་བྱེད༌ཅིག །  
\q1 བདག་གིས་ཁྱོད་རྣམས་དྲུང་དུ་ལེན་པར༌བྱེད།།   
\q1
\v 18 བདག་ནི་ཁྱོད་ཚོའི་ཕ་རུ་བྱེད་པ༌དང༌།།  
\q1 ཁྱོད་རྣམས་བདག་གི་བུ་དང་བུ་མོར༌འགྱུར།།  
\m ཞེས་ཀུན་དབང་གཙོ་བོས་བཀའ་བསྩལ༌པའོ།།   
\c 7
\cl ལེའུ་བདུན༌པ། 
\toc1 ༄༅། །ཀོ་རིན་ཐུ་པ་རྣམས་ལ་སྤྲིངས་པའི་འཕྲིན་ཡིག་གཉིས་པ། 
\toc2 ཀོ་རིན་ཐུ་པ་གཉིས་པ། 
\s1 སྐུ་ཚབ་པ་ཕོལ་ལོལ་གྱི་དགའ༌སྤྲོ།  
\p
\v 1 དེ་བས་ན། སྙིང་ཉེ་བའི་སྤུན་ཟླ༌རྣམས། བདག་ཅག་ལ་དེ་ལྟ་བུའི་ཞལ་བཞེས་ཡོད་པས་རང་ཉིད་གཙང་མར་བྱས༌ཏེ། ལུས་སེམས་ཀྱི་མི་གཙང་བ་ཐམས་ཅད་དོར་ནས་དཀོན་མཆོག་ལ་གུས་ཤིང་འཇིགས་པའི་ངང་ནས་དམ་པ་རུ་འགྱུར་བར་བྱེད་དགོས་སོ།།   
\p
\v 2 ཁྱོད་རྣམས་ཀྱིས་སེམས་རྒྱ་བསྐྱེད་ནས་ངེད་ཅག་དང་ལེན་བྱེད་པར༌གྱིས། ངེད་ཅག་གིས་མི་སུ་ལའང་གྱོང་གུད་མ༌བཟོས། སུ་ཡང་ཉམས་དམས་སུ་མ་བཏང་། སུ་ལས་ཀྱང་ཁེ་བཟང་མ་བླངས་སོ།།  
\v 3 བདག་གིས་འདི་ལྟར་སྨྲས་པ་ནི་ཁྱོད་རྣམས་ལ་སྐྱོན་སྨྲ་བའི་ཕྱིར་མིན༌ཏེ། ཁྱོད་རྣམས་རྟག་ཏུ་ངེད་ཅག་གི་སེམས་སུ་གནས༌ཤིང༌། བདག་ཅག་གསོན་ན་མཉམ་གསོན་དང་ཤི་ན་མཉམ་ཤི་བྱེད་པར་དགའ་ཞེས་དེ་སྔར་བདག་གིས་སྨྲས་མྱོང༌།  
\v 4 བདག་གིས་སྤོབས་པ་ཆེན་པོས་ཁྱོད་རྣམས་ལ་གཏམ་སྨྲས༌ཤིང༌། ཁྱོད་ཅག་གི་རྐྱེན་གྱིས་བསྟོད་པ་མང་པོ་བརྗོད་ཅིང་སེམས་གསོ་ཆེན་པོ་ཐོབ༌པ་དང་། ངེད་ཅག་ལ་དཀའ་སྡུག་ཐམས་ཅད་ཀྱི་ཁྲོད་ནས་དགའ་སྤྲོ་དཔག་མེད་བྱུང༌ངོ༌།།   
\p
\v 5 དེ་ཡང་སྔོན་ཆད་ངེད་ཅག་མ་ཀེ་དོན་ཡཱ་ཡུལ་དུ་སླེབས་པའི་དུས༌སུ། རང་གི་ལུས་པོར་ངལ་གསོ་གང་ཡང་མ་བྱུང་བར། ཕྱོགས་བཞི་ནས་དཀའ་སྡུག་སྣ་ཚོགས་ལ༌ཕྲད་ཅིང་། ཕྱི་རུ་འཁྲུག་རྩོད་དང་ནང་དུ་འཇིགས་པ༌ཡོད་དོ།།  
\v 6 འོན༌ཀྱང༌། ཡིད་སྐྱོ་བ་རྣམས་ལ་སེམས་གསོ་གནང་མཁན་དཀོན་མཆོག་གིས་ཐེ་ཏུ་སླེབས་པ་བརྒྱུད་ནས་ངེད་ཅག་ལ་སེམས་གསོ་མཛད་པར་མ༌ཟད།  
\v 7 ཐེ་ཏུ་ཡིས་ཁྱོད་ཅག་ནས་ཐོབ་པའི་སེམས་གསོར་བརྟེན་ནས་ངེད་ཅག་ལ་སེམས་གསོ་བྱས་པ་ཡིན། ཁོས་ཁྱོད་ཅག་གི་དུང་སེམས༌དང༌། སེམས་སྡུག བདག་ལ་བཅངས་པའི་སྤྲོ་སེམས་ཐམས་ཅད་བདག་ལ་སྨྲས༌པས། ང་རང་སྔར་ལས་ལྷག་ཏུ་དགའ་བར་གྱུར་ཏོ།།   
\p
\v 8 དེ་སྔར་བདག་གིས་འཕྲིན་ཡིག་བྲིས་ཏེ་ཁྱོད་རྣམས་ལ་སེམས་སྐྱོ་རུ་བཅུག་པས་ང་རང་རེ་ཞིག་འགྱོད་བྱུང་ལ། འཕྲིན་ཡིག་དེས་ཁྱོད་རྣམས་ལ་སེམས་སྐྱོ་རུ་བཅུག་པ་ནི་གནས་སྐབས་ཙམ་ཡིན་པ་བདག་གིས་ཤེས༌པས། ད་ནི་བདག་ལ་འགྱོད་པ་མེད་དོ།།  
\v 9 ད་ལྟ་ང་རང་དགའ་བ་ནི་ཁྱོད་ཅག་གི་སེམས་སྐྱོ་བའི་ཕྱིར་མིན༌ཏེ། ཁྱོད་ཅག་གིས་སྐྱོ་སེམས་ཀྱི་ཁྲོད་ནས་འགྱོད་བཤགས་བྱས་པའི་ཕྱིར༌ཡིན། རྒྱུ་མཚན་ནི་དཀོན་མཆོག་གི་ཐུགས་དགོངས་བཞིན་ཁྱོད་ཅག་གི་སེམས་སྐྱོ༌ཞིང༌། ལས་གང་ལའང་ངེད་ཅག་གི་རྐྱེན་གྱིས་གྱོང་གུད་ཐེབས་མི་སྲིད་པའི་ཕྱིར༌ཡིན།  
\v 10 དཀོན་མཆོག་གི་ཐུགས་དགོངས་བཞིན་སེམས་སྐྱོ་བ་ཡིས་ཐར་ལམ་ལ་འཁྲིད་པའི་འགྱོད་བཤགས་འབྱུང་དུ་འཇུག་ཅིང་། དོན་དེར་འགྱོད་པ་གཅིག་ཀྱང་མེད་དོ།། འོན་ཀྱང་། འཇིག་རྟེན་གྱི་སྐྱོ་གདུང་གིས་མི་རྣམས་འཆི་བར་བྱེད་པ་ཡིན།  
\v 11 ལྟོས༌དང༌། དཀོན་མཆོག་གི་ཐུགས་དགོངས་བཞིན་ཁྱོད་ཅག་གི་སེམས་སྐྱོ་བར་གྱུར་པ་ནས༌བཟུང༌། ཁྱོད་རྣམས་ལ་བརྩོན་འགྲུས༌དང༌། ཉེས་སྐྱོན་མེད་པ། ཁྲོ་གཏུམ། འཇིགས༌སྣང༌། དུང༌སེམས། སྤྲོ༌སེམས། རང་ལ་ཆད་པ་གཅོད་པ་བཅས་བྱུང་བ༌དང༌། དོན་དེ་ཐམས་ཅད་ལས་ཁྱོད་ཅག་གཙང་མ་ཡིན་པ་གསལ་པོར་མངོན་ནོ།།  
\v 12 བདག་གིས་སྔོན་ཆད་ཁྱོད་རྣམས་ལ་འཕྲིན་ཡིག་བྲིས༌ཤིང༌། དེ་ནི་ཉེས་སྐྱོན་བཟོ་མཁན་དེའི་ཆེད་དུ་མིན༌ལ། ཉེས་སྐྱོན་ཐེབས་མཁན་གྱི་དོན་དུའང་མ་ཡིན༌པར། དཀོན་མཆོག་གི་སྤྱན་སྔར་ཁྱོད་རྣམས་ཀྱིས་ངེད་ཅག་ལ་སེམས་ཁུར་བྱས་པའི་སྤྲོ་སེམས་དེ་ཉིད་ཁྱོད་ཅག་ལ་གསལ་པོར་མངོན་པའི་ཕྱིར་ཡིན༌པས།  
\v 13 ངེད་ཅག་ལ་སེམས་གསོ་ཐོབ་པར་མ༌ཟད། ཁྱོད་རྣམས་ཀྱིས་ཐེ་ཏུའི་ཡིད་སེམས་སྤྲོ་བར་བྱས་ཤིང་ཁོ་རང་དགའ་བར་གྱུར་པས་ངེད་ཅག་ལྷག་ཏུ་དགའ་ཞིང་སྤྲོ་བར་གྱུར་ཏོ།།  
\v 14 བདག་གིས་ཐེ་ཏུའི་མདུན་ནས་ཁྱོད་རྣམས་ལ་བསྔགས་བརྗོད་གང་ཞིག་བྱས་པ་ཡིན༌ན། བདག་ལ་ངོ་གནོང་བའི་དོན་མེད༌དེ། བདག་གིས་ཁྱོད་རྣམས་ལ་སྨྲས་པ་ཐམས་ཅད་བདེན་པ་ཡིན་པ༌ལྟར། ཐེ་ཏུའི་མདུན་ནས་ཁྱོད་རྣམས་ལ་བསྔགས་བརྗོད་བྱས་པའང་བདེན་པ་ཡིན།  
\v 15 ཐེ་ཏུས་ཁྱོད་རྣམས་ཐམས་ཅད་ཀྱིས་ཁོའི་ངག་ལ་མཉན་པ་དང་སྐྲག་ཅིང་འདར་བའི་ངང་ནས་ཁོ་ལ་སྣེ་ལེན་བྱས་པ་དྲན༌པས། ཁོ་རང་ཁྱོད་རྣམས་ལ་ལྷག་ཏུ༌དགའ་བར་གྱུར་པ་ཡིན།  
\v 16 དོན་ཀུན་ནས་ང་རང་ཁྱོད་རྣམས་ལ་ཡིད་ཆེས་པས་དགའོ།།   
\c 8
\cl ལེའུ་བརྒྱད༌པ། 
\toc1 ༄༅། །ཀོ་རིན་ཐུ་པ་རྣམས་ལ་སྤྲིངས་པའི་འཕྲིན་ཡིག་གཉིས་པ། 
\toc2 ཀོ་རིན་ཐུ་པ་གཉིས་པ། 
\s1 ཞལ་འདེབས་འབུལ་མཁན་ལ་སྐུལ་མ་གནང་བའི༌སྐོར།  
\p
\v 1 ཀྱེ། སྤུན་ཟླ༌རྣམས། དཀོན་མཆོག་གིས་མ་ཀེ་དོན་ཡཱ་ཡུལ་གྱི་ཆོས་ཚོགས་དག་ལ་གནང་བའི་ཐུགས་རྗེ་དེ་ངེད་ཅག་གིས་ཁྱོད་རྣམས་ལ་འཆད་པར༌བྱའོ།།  
\v 2 ཆོས་ཚོགས་དེ་དག་ལ་དཀའ་སྡུག་གི་ཁྲོད་དུ་ཚོད་བགམ་ཆེན་པོ་ཐེབས་པའི་དུས་སུའང་དགའ་སྤྲོ་དཔག་མེད་ཡོད་པ༌དང༌། ཁོ་རྣམས་ཤིན་ཏུ་དབུལ་བའི་དུས་སུའང་ཞལ་འདེབས་འབུལ་བར་དགའ་བས་ཁོ་རྣམས་ཀྱི་བཀའ་དྲིན་ལྷག་ཏུ་ཆེའོ།།  
\v 3 ཁོ་རྣམས་ཀྱིས་རང་གི་ནུས་པ་བཞིན་བསྒྲུབས་པར་མ༌ཟད། ནུས་པ་ལས་བརྒལ་ནའང་ཞལ་འདེབས་འབུལ་བར་སེམས་དགའ་བ༌དང༌།  
\v 4 དད་ལྡན་དམ་པ་གཞན་དག་ལ་འབུལ་བ་ཕུལ་བའི་ཐུགས་རྗེའི་ནང་དུ་ཞུགས་པའི་རེ་བ་ཡང་ཡང་ཞུས་མྱོང་བར་བདག་གིས་བདེན་དཔང་བྱ་ནུས༌པ་ཡིན།  
\v 5 གཞན༌ཡང༌། ཁོ་རྣམས་ཀྱིས་ངེད་ཅག་གི་རེ་བ་ལས་ལྷག་པ་བསྒྲུབས་པར་མ༌ཟད། དཀོན་མཆོག་གི་ཐུགས་དགོངས་བཞིན་ཐོག་མར་རང་ཉིད་གཙོ་བོ་ལ་ཕུལ་བ༌དང༌། ངེད་ཅག་ལའང་གཏོགས་པར་བྱས་སོ།།  
\v 6 དེའི༌ཕྱིར། ངེད་རྣམས་ཀྱིས་ཐེ་ཏུ་ལ། ཁོས་སྔར་ནས་འགོ་བརྩམས་པ་ལྟར་ཁྱོད་ཅག་གི་ཁྲོད་དུ་བྱམས་སྙིང་རྗེའི་དོན་དེ་ཉིད་ཀྱང་སྒྲུབས་ཤིག་ཅེས་སྐུལ་མ་གནང༌བ་ཡིན་ལ།  
\v 7 ཁྱོད་ཅག་གིས་དད་སེམས༌དང༌། སྨྲ༌བརྗོད། ཤེས༌བྱ། བརྩོན༌སེམས། ངེད་ཅག་ལ་བཅངས་པའི་བྱམས་པ་བཅས་ལས་ཕུན་སུམ་ཚོགས་པ་མངོན༌པ་བཞིན། བྱམས་སྙིང་རྗེའི་དོན་འདིའི་སྟེང་དུའང་ཕུན་སུམ་ཚོགས་པར་གྱུར་ཅིག།   
\p
\v 8 བདག་གིས་དེ་ལྟར་སྨྲས་པ་ནི་ཁྱོད་རྣམས་ལ་བཀའ་ཕབ་པ་མིན༌ཏེ། མི་གཞན་གྱི་བརྩོན་སེམས་ལ་བརྟེན་ནས་ཁྱོད་ཅག་གི་བྱམས་པ་དངོས་མ་ཡིན་མིན་ལ་ཚོད་བགམ་བྱེད༌པ་ཡིན་ནོ།།  
\v 9 བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་ནི་ཁྱོད་རྣམས་ཀྱིས་ཀྱང་ཤེས༌ཏེ། ཁོང་ནི་ཕྱུག་པོ་ཡིན༌ཡང༌། ཁྱོད་ཅག་གི་ཆེད་དུ་དབུལ་ཞིང་ཕོངས་པར་གྱུར་པ༌དང༌། དེ་ནི་ཁོང་ཉིད་དབུལ་བར་བརྟེན་ནས་ཁྱོད་རྣམས་འབྱོར་བ་དང་ལྡན་པར་འགྱུར་བའི་ཕྱིར་རོ།།   
\p
\v 10 བདག་གིས་དོན་འདིའི་སྟེང་ནས་རང་གི་དྲན་འཆར་ཁྱོད་ཅག་ལ་སྨྲ་ཞིང་དེ་ནི་ཁྱོད་རྣམས་ལ་ཕན་ཐོགས་ཡོད་དེ། ཁྱོད་ཅག་གིས་དོན་དེ་འགོ་བརྩམས་ཤིང་དེ་བསྒྲུབ་འདོད་ཀྱི་སེམས་ཀྱང་བྱུང་ནས་ལོ་གཅིག་ཙམ་འགོར༌བས།  
\v 11 སྔོན་ལ་ཇི་ལྟར་བསྒྲུབ་འདོད་པའི་སེམས་ཡོད༌ན། ད་ལྟ་དོན་དེ་བསྒྲུབ་འོས༌ཏེ། ཁྱོད་ཅག་གིས་ནུས་པ་བཞིན་དུ་བསྒྲུབ་འོས་སོ།།  
\v 12 མི་ལ་བསྒྲུབ་འདོད་ཀྱི་སེམས་ཡོད༌ན། དེ་ནི་རང་ལ་ཅི་ཡོད་པ་བཞིན་འབུལ་བས་ཆོག་སྟེ། རང་ལ་གང་ཞིག་མེད་པ་ལྟར་འབུལ་བ་མིན།  
\v 13 བདག་གིས་སྨྲས་པའི་དོན་ནི་མི་གཞན་དག་གི་ཁུར་པོ་ཇེ་ཡང་དུ་གཏོང་བ་དང་། ཁྱོད་ཅག་ལ་དཀའ་སྡུག་མྱང་དུ་འཇུག་པའི་ཕྱིར་མ་ཡིན་པར་ཆ་སྙོམས་ཡོང་བའི་ཕྱིར་ཡིན།  
\v 14 མ་འོངས་པར་ཁྱོད་རྣམས་ཀྱི་མི་འདང་ས་དེ་ཁོ་རྣམས་ཀྱི་འབྱོར་བ་ལས་ཁ་བསྐང་བར་འགྱུར་བའི་ཕྱིར། ད་ལྟ་ཁྱོད་ཅག་གི་འབྱོར་བས་ཁོ་རྣམས་ཀྱི་དགོས་མཁོ་སྐོང་འོས༌ཤིང༌། དེ་ལྟར་བྱས་ན་ཆ་སྙོམས་སུ་འགྱུར་རོ།།  
\v 15 དེ་ལ་གསུང་རབ་ཀྱི་མདོ་ལས་ཇི་སྐད༌དུ།  
\q1 མང་པོ་བསྡུས་ཀྱང་ཁོ་ལ་ལྷག་མ་མེད༎  
\q1 ཉུང་ངུ་བསྡུས་ཀྱང་ཁོ་ལ་མི་འདང་མེད།།  
\m ཅེས་བཀོད་པ་བཞིན༌ནོ།།   
\s1 ཀོ་རིན་ཐུ་གྲོང་ཁྱེར་དུ་ཐེ་ཏུ་མངགས༌པ།  
\p
\v 16 དཀོན་མཆོག་གིས་ཐེ་ཏུ་ལ་སེམས་འགུལ་ཐེབས་པར་མཛད་དེ་བདག་དང་མཚུངས་པར་ཁྱོད་ཅག་ལ་སྤྲོ་སེམས་བཅངས༌ཡོད་པས། དཀོན་མཆོག་ལ་ཐུགས་རྗེ་ཆེ༌ཞུའོ།།  
\v 17 ཐེ་ཏུས་བདག་གི་ངག་ལ་མཉན་པ་དང་དེ་ལས་ཀྱང་སྤྲོ་སེམས་ཆེ་ཞིང་ཁྱོད་རྣམས་ཀྱི་གམ་དུ་ཕྱིན་པ་ཡིན།  
\v 18 ངེད་ཅག་གིས་སྤུན་ཟླ་གཞན་ཞིག་ཀྱང་ཁོ་དང་མཉམ་དུ་མངགས་ཤིང༌། སྤུན་ཟླ་དེ་ནི་འཕྲིན་བཟང་གི་ཕྱོགས་ནས་ཆོས་ཚོགས་ཀུན་གྱི་བསྔགས་བརྗོད་ཐོབ་མྱོང་བ་ཞིག་ཡིན༌པར་མ་ཟད།  
\v 19 ཁོ་རང་ཡང་ཆོས་ཚོགས་དག་གིས་བདམས་ནས་ངེད་རྣམས་དང་མཉམ་དུ་འགྲོ་བར་མཛད་པ༌དང༌། ངེད་རྣམས་ལ་བཅོལ་བའི་ཞལ་འདེབས་ཁྱེར་ནས་སླེབ་དགོས་པ་སྟེ། གཙོ་བོ་ལ་གཟི་བརྗིད་མང་དུ་འབུལ་བ་དང་ངེད་ཅག་གི་བསྒྲུབ་པར་དགའ་བའི་སེམས་པའང་གསལ་པོར་མངོན༌པའི་ཕྱིར་རོ།།  
\v 20 དེ་ནི་ངེད་ཅག་གིས་ཞལ་འདེབས་དངུལ་སྒོར་མང་པོ་བསྡུས་པས་སུས་ཀྱང་ངེད་ཅག་ལ་སྐྱོན་མི་འཛུགས་པའི་ཆེད་དུ་ཡིན༌ལ།  
\v 21 ངེད་ཅག་གིས་ནན་ཏན་གྱི་ངང་ནས་དོན་ལེགས་པོར་བསྒྲུབ༌པར་དམིགས་ཤིང༌། གཙོ་བོའི་སྤྱན་སྔར་དེ་ལྟར་སྒྲུབ་པ་དང་མི་རྣམས་ཀྱི་མིག་མདུན་དུའང་དེ་ལྟར་སྒྲུབ་བཞིན་ཡོད་དོ།།   
\p
\v 22 ཡང་ངེད་ཅག་གིས་སྤུན་ཟླ་གཞན་ཞིག་ཀྱང་ཁོ་གཉིས་དང་མཉམ་དུ་མངགས་སོ།། ངེད་ཅག་གིས་དོན་དག་མང་པོ་ཞིག་ནས་ཁོ་ལ་ཚོད་བགམས་མྱོང༌ལ། ཁོ་ནི་བརྩོན་སེམས་ཆེ་བ་ཞིག་ཡིན། ད་ལྟ་ཁོས་ཁྱོད་རྣམས་ལ་ཡིད་ཆེས་ཆེན་པོ་བྱེད་པས་ཁོའི་བརྩོན་སེམས་ནི་སྔར་ལས་ཀྱང༌ཆེའོ།།  
\v 23 ཐེ་ཏུ་གླེང་ན། ཁོ་ནི་བདག་གི་ལས་གྲོགས་ཡིན༌ལ། བདག་དང་མཉམ་དུ་ཁྱོད་ཅག་ལ་ཞབས་ཕྱི་སྒྲུབ་མཁན་ཞིག་ཀྱང་ཡིན། སྤུན་ཟླ་གཞན་གཉིས་ཀ་གླེང་ན། ཁོ་གཉིས་ནི་ཆོས་ཚོགས་དག་གི་བང་ཆེན་དང་སྐྱབས་མགོན་མཱ་ཤི་ཀའི་གཟི་བརྗིད་ཀྱང་ཡིན།  
\v 24 དེའི༌ཕྱིར། ཁྱོད་ཅག་གིས་ངེས་པར་ཆོས་ཚོགས་དག་གི་དྲུང་དུ་མངོན་པའི་བྱམས་པ་ལ་བདེན་དཔང་བྱེད་པ༌དང༌། ངེད་རྣམས་ཀྱིས་ཁྱོད་ཅག་ལ་བསྔགས་བརྗོད་བྱས་པའི་རྒྱུ་མཚན་ཡང་སྟོན་དགོས༌སོ།།   
\c 9
\cl ལེའུ་དགུ༌པ། 
\toc1 ༄༅། །ཀོ་རིན་ཐུ་པ་རྣམས་ལ་སྤྲིངས་པའི་འཕྲིན་ཡིག་གཉིས་པ། 
\toc2 ཀོ་རིན་ཐུ་པ་གཉིས་པ། 
\s1 ཞལ་འདེབས་འབུལ༌ཚུལ།  
\p
\v 1 དད་ལྡན་དམ་པ་རྣམས་ལ་འབུལ་བའི་ཞབས་ཏོག་སྒྲུབ་པའི་སྐོར་ནས་བདག་གིས་ཁྱོད་ཅག་ལ་འཕྲིན་ཡིག་འབྲི་དགོས་དོན་མེད་དོ།།  
\v 2 ཅིའི་ཕྱིར་ཞེ་ན། ཁྱོད་རྣམས་ཀྱི་བསྒྲུབ་པར་དགའ་བའི་སེམས་ནི་བདག་གིས་ཤེས་ཏེ། ཨ་ཀ་ཡཱ་ཡུལ་གྱི་མི་རྣམས་ཀྱིས་གྲ་སྒྲིག་བྱས་ནས་ལོ་གཅིག་འགོར་ཟིན་ཞེས་སྨྲས་ནས། རྒྱུན་དུ་མ་ཀེ་དོན་ཡཱ་ཡུལ་གྱི་མི་རྣམས་ཀྱི་མདུན་ནས་ཁྱོད་ཅག་ལ་བསྔགས་བརྗོད་བྱེད༌ཅིང༌། ཁྱོད་ཅག་གི་བརྩོན་སེམས་ཀྱིས་མི་མང་པོར་སེམས་འགུལ་ཐེབས་སུ་བཅུག་པའི་ཕྱིར༌རོ།།  
\v 3 འོན༌ཀྱང༌། ངེད་ཅག་གིས་དོན་འདིའི་ཆ་ནས་ཁྱོད་རྣམས་ལ་བསྔགས་བརྗོད་བྱས་པའི་གཏམ་དེ་སྟོང་བར་མི་འགྱུར༌བར། བདག་གིས་སྨྲས་པ་བཞིན་ཁྱོད་རྣམས་ཀྱིས་གྲ་སྒྲིག་ལེགས་པོ་བྱེད་པའི༌ཕྱིར། བདག་གིས་སྤུན་ཟླ་འདི་དག་མངགས༌པ་ཡིན།  
\v 4 གལ༌ཏེ། མ་ཀེ་དོན་ཡཱ་ཡུལ་གྱི་མི་འགའ་ཤས་བདག་དང་མཉམ་དུ་ཡོང༌སྟེ། ཁྱོད་ཅག་གིས་གྲ་སྒྲིག་བྱས་མེད་པ་མཐོང༌ན། ངེད་ཅག་གིས་ཡིད་ཆེས་བརྟན་པོ་བྱས་པ་དེ་ནི་ངོ་གནོང་བར་འགྱུར་བ༌དང༌། ཁྱོད་རྣམས་ངོ་གནོང་བ་ནི་དེ་བས་ཀྱང་སྨོས་མ་དགོས་སོ།།  
\v 5 དེའི༌ཕྱིར། བདག་གིས་སྤུན་ཟླ་དེ་རྣམས་ཐོག་མར་ཁྱོད་ཅག་གི་གམ་དུ་སོང༌སྟེ། སྔོན་ཆད་ཁས་བླངས་པའི་ཞལ་འདེབས་གྲ་སྒྲིག་ལེགས་པོ་བྱེད་པར་ཞུ་བ་མི་བྱེད་ཐབས་མེད་རེད་བསམས༌ཤིང༌། དེ་ནས་ཁྱོད་ཅག་གིས་ཕུལ་བའི་ཞལ་འདེབས་ནི་དགའ་མོས་ཡིན་པ་ལས་འུ་ཐུག་གིས་མིན་པ་མཚོན་ནུས༌སོ།།   
\s1 ས་བོན་སྣ་ཚོགས་ཀྱི༌དཔེ།  
\p
\v 6 དོན་ནི་འདི་ཡིན་ཏེ། ས་བོན་ཉུང་ངུ་བཏབ་ན་ལོ་ཏོག་ཉུང་ངུ་བསྡུ༌ཞིང༌། ས་བོན་མང་པོ་བཏབ་ན་ལོ་ཏོག་མང་པོ་བསྡུ་ཞེས་པའོ།།  
\v 7 ཡིད་སེམས་དགའ་མོས་ངང་ནས་ཞལ་འདེབས་ཕུལ་བ་ལ་དཀོན་མཆོག་ཐུགས་དགྱེས་པ་ཡིན༌པས། མི་སོ་སོས་རང་སེམས་ནས་ཐག་གིས་བཅད་པ་ལྟར་འབུལ་དགོས་པ༌ལས། སེམས་སྡུག་གམ་ཨུ་ཚུགས་ཀྱི་ངང་ནས་འབུལ་མི་འོས་པ་ཡིན།  
\v 8 དཀོན་མཆོག་གིས་ཐུགས་རྗེ་སྣ་ཚོགས་ཁྱོད་རྣམས་ལ་མང་དུ་གནང༌ནུས་ཏེ། རྟག་ཏུ་དོན་གང་ཅིའི་ཐད་ནས་ཁྱོད་རྣམས་ལ་མི་འདང་ས་མེད་ཅིང་དོན་བཟང་མང་དུ་བསྒྲུབ་ཐུབ་པའི་ཕྱིར་རོ།།  
\v 9 དེ་ལ་གསུང་རབ་ཀྱི་མདོ་ལས་ཇི་སྐད༌དུ།  
\q1 རྒྱུ་ནོར་བཏང་ནས་དབུལ་པོ་སྐྱོབ་བྱེད༌པས།།  
\q1 ཁོང་གི་དྲང་བདེན་ཇི་སྲིད་བར་དུ༌གནས།།  
\m ཞེས་བཀོད་པ་བཞིན༌ནོ།།   
\p
\v 10 ཞིང་འདེབས་མཁན་ལ་ས་བོན་དང་མི་ལ་བག་ལེབ་གནང་མཁན་གྱིས་ཁྱོད་རྣམས་ལ་གདབ་བྱའི་ས་བོན་སྦྱོར་ཞིང་སྤེལ་ཏེ། ཁྱོད་རྣམས་ཀྱི་དྲང་བདེན་གྱི་འབྲས་བུའང་འཕེལ་བར་མཛད་ངེས༌སོ།།  
\v 11 ཁྱོད་ཅག་གིས་ཀྱང་སྦྱིན་པ་མང་པོ་གཏོང་བའི་ཕྱིར། ཁྱོད་རྣམས་དོན་གང་ཅིའི་ཐད་ནས་ཕུན་སུམ་ཚོགས་པར་མཛད༌པར་འགྱུར་ཞིང༌། དེ་ནས་ངེད་ཅག་བརྒྱུད་ནས་དཀོན་མཆོག་ལ་བཀའ་དྲིན་ཞུ་བའི་སེམས་འབྱུང་ངོ་།།  
\v 12 ཅིའི་ཕྱིར་ཞེ་ན། འབུལ་བའི་ཞབས་ཏོག་འདི་བསྒྲུབས༌ན། དད་ལྡན་དམ་པ་རྣམས་ཀྱི་དགོས་མཁོ་བསྐངས་པར་མ༌ཟད། མི་མང་པོས་ལྷག་ཏུ་དཀོན་མཆོག་ལ་བཀའ་དྲིན་ཞུ་བའི་ཕྱིར༌རོ།།  
\v 13 ཁོ་རྣམས་ལ་འབུལ་བའི་ཞབས་ཏོག་གི་ཆ་ནས་བདེན་དཔང་ཐོབ༌ཅིང༌། ཁྱོད་ཅག་གིས་སྐྱབས་མགོན་མཱ་ཤི་ཀའི་འཕྲིན་བཟང་ཁས་ལེན་པ༌དང༌། དེ་ལ་བསྟུན༌པ། ཁོ་རྣམས་དང་མི་གཞན་དག་ལ་ཞལ་འདེབས་མང་པོ་ཕུལ་བའང་ཁོ་རྣམས་ཀྱིས་ཤེས་པར་འགྱུར༌བས། དཀོན་མཆོག་ལ་བསྟོད་བསྔགས་བརྗོད་པར༌འགྱུར་ལ།  
\v 14 དཀོན་མཆོག་གི་བླ་ན་མེད་པའི་ཐུགས་རྗེ་དེ་ཁྱོད་ཅག་གི་སེམས་ནང་དུ་མངོན་པར་གྱུར༌པས། ཁོ་རྣམས་ཀྱིས་ཁྱོད་ཅག་ཤིན་ཏུ་དྲན༌ཏེ། ཁྱོད་ཅག་གི་ཆེད་དུ་གསོལ་བ་འདེབས་པར་ངེས།  
\v 15 དཀོན་མཆོག་ལ་བརྗོད་ཀྱིས་མི་ལང་བའི་གནང་སྦྱིན་ཡོད་པས་ཁོང་ལ་ཐུགས་རྗེ༌ཆེ་ཞུའོ།།   
\c 10
\cl ལེའུ་བཅུ༌པ། 
\toc1 ༄༅། །ཀོ་རིན་ཐུ་པ་རྣམས་ལ་སྤྲིངས་པའི་འཕྲིན་ཡིག་གཉིས་པ། 
\toc2 ཀོ་རིན་ཐུ་པ་གཉིས་པ། 
\s1 ཕོལ་ལོལ་གྱིས་རང་གི་ལས་འགན་ལ་བདེན་དཔང་བྱེད༌པ།  
\p
\v 1 དེ་ཡང་ཕོལ་ལོལ་བདག་ནི་ཁྱོད་རྣམས་དང་ངོ་ཕྲད་པའི་དུས་སུ་ཁེངས་ཆུང་ཡིན༌ལ། ཁྱོད་ཅག་གི་གམ་དུ་མེད་པའི་དུས་སུ་ཁྱོད་ཅག་ལ་སྤོབས་པ་ཆེ་བ༌དང༌། ད་ལྟ་རང་གིས་དངོས་སུ་སྐྱབས་མགོན་མཱ་ཤི་ཀའི་ཞི་ཞིང་དུལ་བའི་རང་བཞིན་ལ་བརྟེན་ནས་ཁྱོད་ཅག་ལ་སྐུལ་མ་གཏོང་ངོ་།།  
\v 2 མི་ལ་ལས་ངེད་ཅག་གིས་ངར་ཤུགས་ལ་བརྟེན་ནས་སྤྱད་པ་སྤྱོད་པར་སྙམ་ལ། ངས་མི་དེའི་རིགས་ལ་ངེས་པར་སྤོབས་པར་བརྟེན་ནས་སྐུལ་ལྕག་གཏོང་དགོས་པར༌བསམས་མོད། འོན་ཀྱང་ང་རང་ཁྱོད་ཅག་དང་མཉམ་དུ་ཡོད་དུས། དེ་ལྟར་སྤོབས་པ་ལྡན་མི་དགོས་པའི་ཚུལ་ཁྱོད་ཅག་ལ་ཞུའོ།།  
\v 3 ངེད་ཅག་གིས་ངར་ཤུགས་ལ་བརྟེན་ནས་སྤྱད་པ་སྤྱོད༌ནའང༌། ངར་ཤུགས་ལ་བརྟེན་ནས་འཐབ་པར་མི་བྱེད།  
\v 4 ངེད་ཅག་གིས་འཐབ་པར་བྱེད་པའི་གོ་མཚོན་ནི་ངར་ཤུགས་ཀྱི་གོ་མཚོན་མ་ཡིན༌པར། དཀོན་མཆོག་གི་མཐུ་སྟོབས་དང་ལྡན་པས་བཙན་རྫོང་རྣམས་ཀྱང་གཏོར་ནུས༌ཤིང༌།  
\v 5 དཀོན་མཆོག་ཤེས་པར་བཀག་འགོག་བྱེད་པའི་ཇུས་ངན་སྣ་ཚོགས་དང་ང་རྒྱལ་ཅན་གྱི་དོན་ཐམས་ཅད་ཀྱང་ངེད་ཅག་གིས་འཇོམས་པ་དང་། བསམ་པ་ཐམས་ཅད་ཕྱིར་བཀུག་ནས་སྐྱབས་མགོན་མཱ་ཤི་ཀ་ལ་བསྟུན་དུ་འཇུག་པ་ཡིན།  
\v 6 ཡང་ཁྱོད་ཅག་གིས་བཀའ་ཡོངས་སུ་བརྩི་བའི་དུས༌སུ། ངེད་ཅག་གིས་བཀའ་མི་བརྩི་བ་ཐམས་ཅད་ལ་ཉེས་ཆད་གཅོད་པར་སྟ་གོན་བྱས་ཟིན༌ཏོ།།   
\p
\v 7 ཁྱོད་ཅག་གིས་ཕྱིའི་རྣམ་པ་ཁོ་ནར༌ལྟའམ། གལ༌ཏེ། མི་ཞིག་ལ་རང་ཉིད་ནི་སྐྱབས་མགོན་མཱ་ཤི་ཀར་གཏོགས་པར་ཡིད་ཆེས་བརྟན་པོ་ཡོད༌ན། ད་དུང་བསམ་བློ་གཏོང་དགོས༌ཏེ། ཁོ་ནི་སྐྱབས་མགོན་མཱ་ཤི་ཀར་ཇི་ལྟར་གཏོགས་པ༌བཞིན། ངེད་ཅག་ཀྱང་དེ་ལྟར་སྐྱབས་མགོན་མཱ་ཤི་ཀར་གཏོགས༌པ་ཡིན་ནོ།།  
\v 8 གཙོ་བོས་ངེད་ཅག་ལ་དབང་ཆ་གནང༌བ་ནི་ཁྱོད་རྣམས་སྐྱེད་སྲིང་བྱེད་པ་ལས་ཉམས་དམས་སུ་གཏོང་ཕྱིར་མ་ཡིན། ངས་དབང་ཆ་འདི་ལ་བསྔགས་བརྗོད་ཅུང་ཙམ་བྱས་ཀྱང་ང་རང་ངོ་གནོང་བར་མི་འགྱུར།  
\v 9 ངས་དེ་ལྟར་སྨྲས་དོན༌ནི། བདག་གིས་འཕྲིན་ཡིག་བྲིས་ནས་ཁྱོད་ཅག་ལ་འཇིགས་སྣང་བསྐུལ་བའི་ཕྱིར་མ་ཡིན།  
\v 10 ཅིའི་ཕྱིར་ཞེ་ན། མི་འགའ་ཤས་ན༌རེ། ཁོའི་འཕྲིན་ཡིག་གི་ནང་དོན་ལྕི་ཞིང་དྲག་རྩུབ་ཆེ༌ཡང༌། ཁོ་དང་ངོ་ཕྲད་ན། ཁོ་རང་ནི་སྐྱེས་གཟུགས་ཞན་ཞིང་ཚིག་ཐ་མལ་སྨྲ་མཁན་ཡིན་ཞེས་ཟེར་བའི་ཕྱིར༌རོ།།  
\v 11 མི་འདི་ལྟ་བུ་རྣམས་ཀྱིས་ངེད་ཅག་གནས་དེར་མེད་པའི་དུས་སུ་འཕྲིན་ཡིག་གི་རྗོད་བྱེད་ཀྱི་ཚིག་ཇི་ལྟར་ཡིན༌ན། ངོ་འཕྲད་པའི་དུས་སུའང་དོན་དེ་བཞིན་དུ་བསྒྲུབ་ངེས་པར་བསམ་བློ་གཏོང་དགོས༌སོ།།   
\p
\v 12 ཅིའི་ཕྱིར་ཞེ་ན། ངེད་ཅག་གིས་རང་ཉིད་ནི་རང་བསྟོད་བྱེད་པའི་མི་རྣམས་ལ་བརྩི་བའམ་བསྡུར་མི་ཕོད༌དེ། མི་དེ་རྣམས་ཀྱིས་རང་གིས་རང་ལ་ཚད་འཇལ་ཞིང་རང་གིས་རང་ལ་བསྡུར་བར་བྱེད་པ་ནི་བློ་དམན༌པ་ཡིན་ནོ།།  
\v 13 ངེད་ཅག་གིས་ཚད་ལས་འདས་པར་བསྔགས་བརྗོད་བྱ་མི་འདོད༌དེ། དཀོན་མཆོག་གིས་ངེད་ཅག་ལ་བསྩལ་པའི་དབྱེ་མཚམས་ལྟར་བསྔགས་བརྗོད་བྱ་ཞིང་ཁྱོད་ཅག་ཀྱང་དེའི་ནང་དུ་གནས་སོ།།  
\v 14 ངེད་ཅག་ཐོག་མ་ནས་ཁྱོད་ཅག་གི་གམ་དུ་སླེབས་ཏེ་སྐྱབས་མགོན་མཱ་ཤི་ཀའི་འཕྲིན་བཟང་བསྒྲགས་པ་ཡིན་པས། ངེད་རྣམས་ཀྱི་དབྱེ་མཚམས་ནི་ཁྱོད་རྣམས་ཀྱི་བར་དུ་མ་སླེབས་པ་ལྟར། ངེད་ཅག་ནི་རང་གི་དབྱེ་མཚམས་ལས་བརྒལ་བ་མ་ཡིན།  
\v 15 ངེད་ཅག་གིས་མི་གཞན་གྱི་དཀའ་ཚེགས་ལ་བརྟེན་ནས་བསྔགས་བརྗོད་ཚད་བརྒལ་མི་བྱེད༌ནའང༌། ཁྱོད་ཅག་གི་དད་པ་ཇེ་བརྟན་དུ་འགྲོ་བའི་དུས༌སུ། ངེད་ཅག་གི་དབྱེ་མཚམས་ནི་ཁྱོད་ཅག་གི་རྐྱེན་གྱིས་རྒྱ་ཆེ་རུ་འགྲོ་བ་དང༌།  
\v 16 ཁྱོད་ཅག་གི་ཡུལ་ལས་གཞན་པའི་ཡུལ་རྣམས་ལ་འཕྲིན་བཟང་སྒྲོག་ནུས་པར་རེ་བ་བྱེད། དེ་ནི་མི་གཞན་གྱི་དབྱེ་མཚམས་ནང་དུ་བསྒྲུབས་ཟིན་པའི་དོན་ལ་བརྟེན་ནས་བསྔགས་བརྗོད་བྱེད་པའང་མིན་ནོ།།  
\v 17 འོན༌ཀྱང༌། བསྔགས་བརྗོད་བྱེད་མཁན་སུས་ཀྱང་གཙོ་བོ་ལ་བསྔགས་འོས༌སོ།།  
\v 18 ཅིའི་ཕྱིར་ཞེ་ན། དཀོན་མཆོག་གི་ཐུགས་ལ་ལྡན་པ་ནི་རང་བསྟོད་བྱེད་མཁན་གྱིས་བསྟོད་པ་མ་ཡིན༌པར། གཙོ་བོས་བསྟོད་ཅིང་བསྔགས་པ་དེ་ཡིན་པའི་ཕྱིར༌རོ།།   
\c 11
\cl ལེའུ་བཅུ་གཅིག༌པ། 
\toc1 ༄༅། །ཀོ་རིན་ཐུ་པ་རྣམས་ལ་སྤྲིངས་པའི་འཕྲིན་ཡིག་གཉིས་པ། 
\toc2 ཀོ་རིན་ཐུ་པ་གཉིས་པ། 
\s1 ཕོལ་ལོལ་དང་སྐུ་ཚབ་པ་རྫུས་མའི༌སྐོར།  
\p
\v 1 དེ་ཡང་བདག་གི་གླེན་རྟགས་ཕྲན་བུ་འདིར་ཁྱོད་རྣམས་ཀྱིས་བཟོད་སྒོམ་གནང་བར༌སྨོན། དོན་དངོས་སུ་ཁྱོད་ཅག་གིས་བདག་ལ་བཟོད་སྒོམ་གནང༌བ་ཡིན་ནོ།།  
\v 2 བདག་གིས་དཀོན་མཆོག་གི་ཕྲག་དོག་སྤྱད་ནས་ཁྱོད་རྣམས་ལ་གཅེས་པ་ཡིན། ཅིའི་ཕྱིར་ཞེ་ན། སྔོན་ཆད་བདག་གིས་ཁྱོད་རྣམས་མག་གསར་གཅིག་ལ་གཉེན་རྟགས་བརྒྱབ་པ༌དང༌། ཁྱོད་ཅག་ན་ཆུང་བུ་མོ་གཙང་མ་ཞིག་ཡིན་པ་བཞིན་དུ་སྐྱབས་མགོན་མཱ་ཤི་ཀར་འབུལ་ཐུབ་པའི་ཕྱིར༌རོ།།  
\v 3 འོན༌ཀྱང༌། སྦྲུལ་གྱིས་གཡོ་སྒྱུར་བརྟེན་ནས་ཧ་ཝཱ་བསླུས་པ༌ལྟར། ཁྱོད་ཅག་གི་བསམ་པའང་སྐྱབས་མགོན་མཱ་ཤི་ཀར་བཅངས་པའི་དད་སེམས་དྲང་པོ་དང་གཙང་མ་དེ་ནས་ངན་ཕྱོགས་སུ་འཁོར་བར་ང་རང་འཇིགས༌པ་ཡིན།  
\v 4 རྒྱུ་མཚན་ནི་མི་ཞིག་ཡོང་ནས་ཁྱོད་རྣམས་ལ་ངེད་ཅག་གིས་བསྒྲགས་པ་མ་ཡིན་པའི་ཡེ་ཤུ་གཞན་ཞིག་བསྒྲགས༌པའམ། ཡང་ན་ཁྱོད་ཅག་ལ་སྔར་ཐོབ་མ་མྱོང་བའི་ཐུགས་ཉིད་གཞན་ཞིག་ཐོབ༌པ། ཡང་ན་ཁྱོད་རྣམས་ལ་སྔར་ཐོབ་མ་མྱོང་བའི་འཕྲིན་བཟང་གཞན་ཞིག་ཐོབ༌ན། ཁྱོད་རྣམས་དགའ་ཞིང་དེའི་དབང་དུ་འགྲོ་བའོ།།  
\v 5 འོན༌ཀྱང༌། ངས་རང་ཉིད་ནི་མཆོག་ཏུ་གྱུར་པའི་སྐུ་ཚབ་པ་ཞེས་པ་དག་ལས་ཅུང་ཙམ་ཡང་མི་དམན་སྙམ།  
\v 6 བདག་གི་སྨྲ་བརྗོད་ནི་ཕལ་བ་ཡིན༌ཡང༌། བདག་གི་ཡོན་ཏན་ནི་ཕལ་བ་མ་ཡིན། འདི་ནི་ངེད་ཅག་གིས་ལས་ཀུན་ནས་ཁྱོད་རྣམས་ལ་གསལ་པོར་བསྟན་པ་ཡིན༌ནོ།།   
\p
\v 7 བདག་གིས་དཀོན་མཆོག་གི་འཕྲིན་བཟང་ནི་རིན་མེད་པར་ཁྱོད་རྣམས་ལ་བསྒྲགས༌ཤིང༌། ཁྱོད་ཅག་མཐོ་སར་འཕར་བའི༌ཕྱིར་ང་རང་དམའ་སར་བསྡད་པ་ནི་བདག་གིས་སྡིག་པ་བྱས་པ་ཡིན་ནམ།  
\v 8 བདག་གིས་ཆོས་ཚོགས་གཞན་ལ་གྱོང་གུད་བཟོས་ཤིང༌། ཁོ་རྣམས་ལས་གླ་ཕོགས་བླངས་ཏེ་ཁྱོད་ཅག་ལ་ཞབས་ཕྱི་སྒྲུབ༌པ་ཡིན།  
\v 9 ང་རང་ལ་ཁྱོད་ཅག་གི་གམ་དུ་དགོས་མཁོ་བྱུང་བའི་དུས༌སུ། མ་ཀེ་དོན་ཡཱ་ཡུལ་ནས་ཡོང་བའི་སྤུན་ཟླ་རྣམས་ཀྱིས་བདག་གི་དགོས་མཁོ་བསྐངས༌པས། ངས་ཁྱོད་རྣམས་སུ་ལའང་དཀའ་ལས་མ་གཏད། བདག་གིས་དེ་སྔར་ལས་ཀུན་ནས་གཟབ་གཟབ་བྱས་ཤིང་ཕྱིས་སུའང་དེ་ལྟར་བྱས་ཏེ་ཁྱོད་རྣམས་ལ་ཅིས་ཀྱང་དཀའ་ལས་མི་གཏོད།  
\v 10 སྐྱབས་མགོན་མཱ་ཤི་ཀའི་ཐུགས་རྒྱུད་དྲང་པོ་དེ་ཉིད་བདག་གི་སེམས་ཁོང་དུ་བཞུགས༌པས། མི་སུས་ཀྱང་ཨ་ཀ་ཡཱ་ཡུལ་ནས་བདག་གི་རང་བསྟོད་དེ་ནི་འགོག་མི་ནུས་སོ།།  
\v 11 ཅིའི་ཕྱིར་ཞེ་ན། ངས་ཁྱོད་རྣམས་ལ་མི་གཅེས་པའི་རྐྱེན་གྱིས་མིན༌ཏེ། དོན་དེ་ནི་དཀོན་མཆོག་གིས་མཁྱེན་ནོ།།   
\p
\v 12 འོན་ཀྱང་། མི་གཞན་རྣམས་ཀྱིས་རང་བསྟོད་བྱེད་པའི་ཐད་ནས་ངེད་ཅག་དང་འདྲ་བར་འདོད༌ཀྱང༌། གོ་སྐབས་འཚོལ་བ་དེ་དག་གི་གོ་སྐབས་མེད་པར་བཟོ་བའི༌ཕྱིར། བདག་གིས་ད་ལྟ་ཅི་ལྟར་བྱེད་པ༌བཞིན། ཕྱིས་སུའང་དེ་ལྟར་བྱེད་པར་བྱའོ༎  
\v 13 མི་དེ་ལྟ་བུ་རྣམས་ནི་སྐུ་ཚབ་པ་རྫུས་མ་ཡིན༌ཏེ། ལས་ཀུན་སྒྲུབ་པར་གཡོ་སྒྱུ་ཆེ་ཞིང་སྐྱབས་མགོན་མཱ་ཤི་ཀའི་སྐུ་ཚབ་པ་ཡིན་ཁུལ་བྱེད་པ་ཡིན།  
\v 14 དེ་ལ་ངོ་མཚར་བ་མེད༌དེ། བདུད་སཱ་ཏན་གྱིས་ཀྱང་འོད་སྣང་གི་ཕོ་ཉ་ཡིན་ཁུལ་བྱེད་པའི་ཕྱིར༌ཡིན།  
\v 15 དེ་བས་བདུད་ཀྱི་གཡོག་པོ་དག་གིས་ཀྱང་དྲང་བདེན་གྱི་ཞབས་ཕྱི་པ་ཡིན་ཁུལ་བྱེད༌པས། དེ་ལའང་ངོ་མཚར་བ་མེད། དེ་དག་གི་མཐའ་འབྲས་ནི་དེ་དག་གི་སྤྱོད་ལམ་བཞིན་དུ་འབྱུང་ངེས༌སོ།།   
\s1 སྐུ་ཚབ་པ་ཕོལ་ལོལ་གྱི་དཀའ༌ཚེགས།  
\p
\v 16 བདག་གིས་ཡང་བསྐྱར་སྨྲ་བར་བྱ༌སྟེ། མི་སུས་ཀྱང་བདག་ནི་བླུན་པོར་བརྩི་བར་མི༌བྱའོ། །གལ༌ཏེ། བླུན་པོར་བརྩིས་པའི་དབང་དུ་བཏང༌ནའང༌། བདག་གིས་ཀྱང་རང་བསྟོད་ཅུང་ཙམ་བྱེད་ཐུབ་པའི༌ཕྱིར། ང་རང་བླུན་པོར་བརྩིས་ཀྱང་སྣེ་ལེན་བྱེད་པར་རིགས་སོ།།  
\v 17 གཏམ་འདི་ནི་བདག་གིས་གཙོ་བོའི་བཀའ་ལྟར་སྨྲས་པ་མ་ཡིན༌ལ། མི་གླེན་པ་ཞིག་དང་མཚུངས་པར་ཅི་མི་སྙམ་པར་རང་བསྟོད་བྱས༌པ་ཡིན།  
\v 18 མི་མང་པོས་རང་གི་ངར་ཤུགས་ལ་བརྟེན་ནས་རང་བསྟོད་བྱེད༌པས། ངས་ཀྱང་རང་བསྟོད་བྱའོ།།  
\v 19 ཁྱོད་ཅག་ནི་མཁས་མཛངས་ཅན་ཡིན་པས་བླུན་པོ་རྣམས་ལའང་བཟོད་པ་སྒོམ་པར་དགའ་བ་མ་ཡིན༌ནམ།  
\v 20 གལ༌ཏེ། མི་ཞིག་གིས་ཁྱོད་རྣམས་བཙན་གྱིས་བྲན་དུ་བཀོལ༌བའམ། ཡང་ན་ཁྱོད་ཅག་ཧམ་བཟུང་བྱེད༌པ། ཡང་ན་ཁྱོད་རྣམས་འཕྲོག་བཅོམ་བྱེད་པ། ཡང་ན་ཁྱོད་ཅག་ལ་བརྙས་བཅོས་བྱེད༌པ། ཡང་ན་ཁྱོད་རྣམས་ལ་འགྲམ་ལྕག་གིས་གཞུ་བ་བཅས་བྱེད༌ཀྱང༌། ཁྱོད་ཅག་གིས་ཁོ་རྣམས་ལ་བཟོད་བསྲན་བྱེད་པ་ཡིན།  
\v 21 གཏམ་འདི་ནི་རང་གིས་རང་ལ་ངོ་གནོང་བའི་ཕྱིར་སྨྲས་པ་ཡིན༌ལ། སྔོན་ཆད་ངེད་ཅག་ནི་གཉོམ་ཆུང་ཡིན་པ༌འདྲ་མོད། འོན༌ཀྱང༌། མི་སུ་ཞིག་དོན་གང་གི་ཆ་ནས་སྤོབས་པ་ཅན་ཡིན༌ན། ངས་ཀྱང་བླུན་གཏམ་ཞིག་སྨྲ་བར་བྱ༌སྟེ། ང་རང་ཡང་སྤོབས་པ་ཅན་ཡིན་ནོ།།  
\v 22 དེ་རྣམས་ནི་ཨིབ་རི་པ་མ་ཡིན༌ནམ། ང་རང་ཡང་ཨིབ་རི་པ་ཡིན། དེ་རྣམས་ནི་ཡེས་ར་ཨེལ་པ་མ་ཡིན༌ནམ། ང་ཪང་ཡང་ཡེས་ར་ཨེལ་པ་ཡིན། དེ་རྣམས་ནི་ཨབ་ར་ཧམ་གྱི་རིགས་རྒྱུད་མ་ཡིན༌ནམ། ང་རང་ཡང་ཨབ་ར་ཧམ་གྱི་རིགས་རྒྱུད་ཡིན།  
\v 23 དེ་རྣམས་ནི་སྐྱབས་མགོན་མཱ་ཤི་ཀའི་ཞབས་ཕྱི་པ་མ་ཡིན༌ནམ། ཡང་ངས་སྨྱོ་གཏམ་ལྟ་བུ་ཞིག་སྨྲ་བར་བྱ༌སྟེ། ང་རང་ཡང་ལྷག་ཏུ་ཞབས་ཕྱི་པ་ཡིན། བདག་གིས་ཁོ་རྣམས་ལས་ཀྱང་དཀའ་ངལ་མང་དུ་མྱངས༌ཤིང༌། བཙོན་ཁང་དུ་ཐེངས་མང་པོར་བཅུག་པ༌དང༌། གཅར་རྡུང་ཚབས་ཆེན༌མྱངས། ཐེངས་དུ་མར་འཆི་བའི་ཉེན་ཁར་ཐུག  
\v 24 ཡ་ཧུ་དཱ་པས་བདག་ལ་གཅར་རྡུང་ཐེངས་ལྔ་བྱས༌པ་དང་། ཐེངས་རེར་རྟ་ལྕག་བཞི་བཅུ་གཞུས་ཤིང་དེའི་ནང་ནས་རྟ་ལྕག་གཅིག་བླངས།  
\v 25 ཡང་དབྱུག་པས་ཐེངས་གསུམ་ལ་བརྒྱབ། རྡོ་རུབ་ཐེངས་གཅིག་ལ་བཏང་། གྲུ་གཟིངས་ཐེངས་གསུམ་ལ་ཆག་གྲུམ་བྱུང༌སྟེ། ཉིན་ཞག་གཅིག་ལ་རྒྱ་མཚོའི་འཇིངས་སུ་ལུས།  
\v 26 ཡང་ཐེངས་དུ་མར་ལམ་ཐག་རིང་པོར་འགྲོ༌དུས། ཆུ་བོའི་ཉེན་ཁ༌དང༌། ཇག་པའི་ཉེན༌ཁ། ཡུལ་མི་རྣམས་ཀྱི་ཉེན༌ཁ། ཕྱི་ཕྱོགས་པ་རྣམས་ཀྱི་ཉེན༌ཁ། གྲོང་ཁྱེར་གྱི་ཉེན༌ཁ། དབེན་སྟོང་གི་ཉེན༌ཁ། རྒྱ་མཚོའི་ནང་གི་ཉེན༌ཁ། སྤུན་ཟླ་རྫུས་མའི་ཉེན་ཁ་བཅས་དང་ཕྲད།  
\v 27 ཡང་དཀའ་ཚེགས་དང་ངལ་བ་མྱངས་ཤིང་ཐེངས་མང་པོར་གཉིད་མ་ཁུག་པ༌དང༌། ཟས་མེད་པར་བཀྲེས་སྐོམ༌མྱངས། གྲངས་ངར་མྱངས་ཤིང་གཅེར་བུར་ལུས།  
\v 28 དོན་དེ་དག་ལས༌གཞན། བདག་གིས་ཆོས་ཚོགས་ཐམས་ཅད་ཀྱི་དོན་ལ་སེམས་ཁྲལ་བྱས་པས། ཉིན་རེར་སེམས་ཀྱི་ཁུར་བོའང་ཤིན་ཏུ༌ལྕི་མོ་ཡིན།  
\v 29 སུ་ཞིག་སྟོབས་ཞན་པར་གྱུར༌ན། ང་རང་ཞན་པར་མི་འགྱུར༌རམ། སུ་ཞིག་སར་འགྱེལ་ན། ང་རང་སེམས་འཚབ་པར་མི་འགྱུར༌རམ།   
\p
\v 30 གལ༌ཏེ། བདག་གིས་ངེས་པར་རང་བསྟོད་བྱེད་དགོས༌ན། ང་རང་གཉོམ་ཆུང་ཡིན་པའི་ཐད་ལ་བསྟོད་པར་བྱ༌སྟེ།  
\v 31 ངས་རྫུན་མི་སྨྲ་བ་ནི་དུས་རྟག་ཏུ་བསྔགས་པར་འོས་པའི་གཙོ་བོ་ཡེ་ཤུའི་ཡབ་དཀོན་མཆོག་གིས་མཁྱེན༌ཏོ།།  
\v 32 དཱ་མེ་སེག་གི་རྒྱལ་པོ་ཨ་རེ་ཏའི་བློན་ཆེན་གྱིས་དཱ་མེ་སེག་མཁར་གྲོང་བསྲུངས་ནས་ང་རང་འཛིན་འདོད་པ༌ལ།  
\v 33 བདག་ནི་སླེ་བོའི་ནང་དུ་བསྡད་ཅིང་མཁར་གྱི་སྒེའུ་ཁུང་ལས་མར་དཔྱངས་ཏེ་བློན་ཆེན་གྱི་ལག་ནས་ཐར་བར་གྱུར༌ཏོ།།   
\c 12
\cl ལེའུ་བཅུ་གཉིས༌པ། 
\toc1 ༄༅། །ཀོ་རིན་ཐུ་པ་རྣམས་ལ་སྤྲིངས་པའི་འཕྲིན་ཡིག་གཉིས་པ། 
\toc2 ཀོ་རིན་ཐུ་པ་གཉིས་པ། 
\s1 ཕོལ་ལོལ་གྱི་ཞལ་གཟིགས་དང་ལུས་ཀྱི་ཚེར་མའི༌དཔེ།  
\p
\v 1 དེ་ཡང་རང་བསྟོད་བྱས་ན་ཕན་ཐོགས་མེད་ཀྱང་བདག་གིས་དེ་ལྟར་མི་བྱེད་ཀ་མེད་བྱུང༌ངོ་༎ ད་ལྟ་བདག་གིས་གཙོ་བོའི་ཞལ་གཟིགས་དང་ཁོང་གི་མངོན་པར་གསལ་བའི་དོན་རྣམས་སྨྲ་བར༌བྱ་སྟེ།  
\v 2 བདག་གིས་སྐྱབས་མགོན་མཱ་ཤི་ཀའི་ནང་དུ་གནས་པའི་མི་ཞིག་ངོ་ཤེས༌ཏེ། ཁོ་རང་ནི་ལོ་བཅུ་བཞིའི་སྔོན་ལ་ནམ་མཁའི་ཞིང་ཁམས་ཀྱི་རིམ་པ་གསུམ་པར་དྲངས། ཁོ་རང་ནི་ལུས་ཕྱི་ནང་གང་དུ་ཡོད་པ་བདག་གིས་མི་ཤེས་ཀྱང་དཀོན་མཆོག་གིས་མཁྱེན༌ཏོ།།  
\v 3 ངས་མི་དེ་ངོ་ཤེས་པ་དང་ཁོ་རང་ལུས་ཕྱི་ནང་གང་དུ་ཡོད་པ་མི་ཤེས༌ཀྱང༌། དཀོན་མཆོག་གིས་མཁྱེན་ཏེ།  
\v 4 ཁོ་རང་ནི་ནམ་མཁའི་ཞིང་ཁམས་ཀྱི་དགའ་བདེའི་ལྡུམ་རར་དྲངས༌ཤིང༌། གསང་བའི་སྐད་ཆ་ཐོས་པ༌དང༌། དེ་ནི་མིས་སྨྲ་མི་རུང་བ་ཞིག་ཡིན།  
\v 5 བདག་གིས་མི་དེའི་དོན་དུ་བསྔགས་པར༌བྱའོ།། འོན་ཀྱང་བདག་གི་དོན་དུ་རང་ཉིད་གཉོམ་ཆུང་ཡིན་པ་དེ་ལས༌གཞན། བདག་ལ་བསྔགས་པར་བྱ་བ་ཅི་ཡང་མེད།  
\v 6 བདག་གིས་བདེན་གཏམ་སྨྲ་ངེས༌པས། རང་བསྟོད་བྱེད་འདོད་ནའང་དེ་ནི་བླུན་རྟགས་མ་ཡིན། མི་གཞན་གྱིས་བདག་ལས་བྱུང་བའི་མཐོང་ཐོས་བརྒལ་ནས་ང་རང་ཆེན་པོར་མི་བརྩི་བའི༌ཕྱིར། བདག་གིས་རང་བསྟོད་མི༌བྱའོ།།   
\p
\v 7 ཡང་བདག་ལ་མངོན་པར་གསལ་བའི་དོན་རྣམས་རླབས་ཤིན་ཏུ་ཆེ་བས། ང་རྒྱལ་མི་སྐྱེ་བའི༌ཕྱིར། ངའི་ལུས་སྟེང་དུ་ཚེར་མ་ཞིག་གནང་བ་ཡིན་ལ། དེ་ནི་བདུད་སཱ་ཏན་གྱི་ཕོ་ཉས་བདག་ལ་རྡུང་རྡེག་བཏང༌བ་ཡིན་ཏེ་བདག་ང་རྒྱལ་མི་སྐྱེ་བའི་ཕྱིར་རོ།།  
\v 8 དོན་འདིའི་ཆེད་དུ་བདག་གིས་གཙོ་བོར་ཐེངས་གསུམ་ལ་ཚེར་མ་དེ་བདག་ལས་ལེན་པར་ཞུ་བ་བྱས༌པ་དང་།  
\v 9 ཁོང་གིས་བདག་ལ་འདི་སྐད༌དུ། ཁྱོད་ལ་བདག་གི་ཐུགས་རྗེ་ཡོད་པས་འདང༌སྟེ། བདག་གི་ནུས་མཐུ་ནི་མི་གཉོམ་ཆུང་རྣམས་ལ་ཡོངས་སུ་རྫོགས་པར་མངོན་པ་ཡིན་ཞེས་གསུངས༌པས། སྐྱབས་མགོན་མཱ་ཤི་ཀའི་ནུས་མཐུ་བདག་གི་སྟེང་དུ་བཞུགས་པའི༌ཕྱིར། བདག་ནི་རང་ཉིད་ཀྱི་གཉོམ་ཆུང་ལ་བསྔགས་པར་ལྷག་ཏུ༌དགའོ།།  
\v 10 དེའི་ཕྱིར་བདག་གིས་སྐྱབས་མགོན་མཱ་ཤི་ཀའི་ཆེད་དུ། གཉོམ་ཆུང༌དང༌། བརྙས༌བཅོས། དཀའ༌སྡུག གཉའ་གནོན། དཀའ་ཚེགས་བཅས་ནི་དགའ་འོས་པར་བརྩིས། རྒྱུ་མཚན་ནི་ང་རང་དུས་ནམ་ཞིག་ལ་གཉོམ་ཆུང་ཡིན༌ན། དུས་དེ་ལ་བདག་ནི་སྟོབས་ཅན་ཡིན་པའི་ཕྱིར༌རོ།།   
\s1 ཕོལ་ལོལ་གྱིས་ཆོས་ཚོགས་ལ་གཟིགས་སྐྱོང་མཛད༌པ།  
\p
\v 11 སྤྱིར་ཁྱོད་ཅག་གིས་བདག་ལ་བཟང་སྨྲས་ན་འགྲིག༌མོད། འོན་ཀྱང་ད་ལྟ་ང་རང་བླུན་པོར་གྱུར་པ་ནི་ཁྱོད་ཅག་གིས་བཙན་སྐུལ་བྱས༌པ་ཡིན། བདག་ནི་ཅི་ཡང་མིན་ནའང་མཆོག་ཏུ་གྱུར་པའི་སྐུ་ཚབ་པ་ཞེས་པ་དག་ལས་དོན་གང་གི་ཐད་ནས་ཀྱང་མི་དམན་ནོ།།  
\v 12 བདག་གིས་ཁྱོད་ཅག་གི་ཁྲོད་དུ་བཟོད་བསྲན་ཚད་མེད་བྱས༌ནས། གྲུབ་རྟགས༌དང༌། དོན་ངོ་མཚར༌ཅན། ངོ་མཚར་བའི་ནུས་མཐུ་བཅས་ལ་བརྟེན་ནས་སྐུ་ཚབ་པ་དངོས་མའི་རྟགས་བསྟན༌པ་ཡིན།  
\v 13 བདག་གིས་ཁྱོད་ཅག་ལ་དཀའ་ལས་མ་གཏད་པ་འདི་ལས༌གཞན། ཁྱོད་རྣམས་དོན་གང་གི་ཆ་ནས་ཆོས་ཚོགས་གཞན་ལ་མི་དོའམ། འདྲ་མཉམ་མིན་པའི་ཆ་དེ་ལ་ཁྱོད་ཅག་གིས་གུ་ཡངས་གཏོང་བར༌ཞུའོ།།   
\p
\v 14 ད་ལྟ་བདག་ནི་ཐེངས་གསུམ་པར་ཁྱོད་ཅག་གི་གམ་དུ་འགྲོ་རྩིས་ཡོད༌ཀྱང༌། ཁྱོད་རྣམས་ལ་དཀའ་ལས་གཏོད་མི་སྲིད་དོ།། ཅིའི་ཕྱིར་ཞེ་ན། བདག་གི་རེ་བ་ནི་ཁྱོད་ཅག་ཡིན་པ་ལས་ཁྱོད་ཅག་གི་རྒྱུ་ནོར་མ་ཡིན། ཕ་མས་བུ་ཕྲུག་གི་དོན་དུ་རྒྱུ་ནོར་གསོག་དགོས་པ༌ལས། བུ་ཕྲུག་གིས་ཕ་མའི་དོན་དུ་རྒྱུ་ནོར་གསོག་དགོས་པ་མ་ཡིན།  
\v 15 ཁྱོད་རྣམས་ཀྱི་ཚེ་སྲོག་གི་ཆེད༌དུ། བདག་ནི་རྒྱུ་ནོར་དང་ནུས་ཤུགས་གཉིས་ཀ་ཕུད་པར་ཤིན་ཏུ༌དགའོ།། ངས་ཁྱོད་རྣམས་ལ་ལྷག་ཏུ་བྱམས་ཤིང་གཅེས་པ་ཡིན༌ན། བདག་ལ་ཁྱོད་ཅག་གི་བྱམས་བརྩེ་དེ་བས་ཉུང་བ་ཞིག་འཐོབ༌བམ།  
\v 16 བདག་གིས་ཁྱོད་རྣམས་དཀའ་ལས་ལ་མ་སྦྱར༌ཡང༌། མི་ལ་ལས་བདག་ནི་གཡོ་སྒྱུ་ཅན་ཡིན་པས། གཡོ་ཐབས་ཀྱིས་ཁྱོད་རྣམས་དྲ་བར་ཚུད་དུ་བཅུག་ཟེར།  
\v 17 ངས་ཁྱོད་རྣམས་ཀྱི་གམ་དུ་མངགས་པའི་མི་སུ་ཞིག་ལ་བརྟེན་ནས་ཁྱོད་ཅག་ལས་ཁེ་བཟང་བླངས༌མྱོང་ངམ།  
\v 18 བདག་གིས་ཐེ་ཏུ་ཁྱོད་ཅག་གི་གམ་དུ་འགྲོ་བར་བསྐུལ༌ཞིང༌། སྤུན་ཟླ་གཞན་ཡང་ཁོ་དང་མཉམ་དུ་འགྲོ་བར་མངགས་མྱོང༌། ཐེ་ཏུས་ཁྱོད་རྣམས་ལས་ཁེ་བཟང་བླངས་མྱོང༌ངམ། ངེད་ཅག་གིས་སེམས་གཅིག་དང་སྤྱོད་ལམ་གཅིག་གི་སྒོ་ནས་དོན་བསྒྲུབས་པ་མ་ཡིན༌ནམ།   
\p
\v 19 ཁྱོད་རྣམས་ཀྱིས་ད་ལྟའི་བར་དུ་ངེད་ཅག་གིས་ཁྱོད་རྣམས་ཀྱི་མདུན་དུ་རང་ཉིད་ལ་དག་འབུད་བྱེད་པ་རེད་སྙམ༌མམ། ངེད་ཅག་གིས་སྐྱབས་མགོན་མཱ་ཤི་ཀར་བརྟེན་ནས་དཀོན་མཆོག་གི་སྤྱན་སྔ་ནས་གཏམ་སྨྲས༌པ་ཡིན། སྙིང་ཉེ་བའི་སྤུན་ཟླ༌རྣམས། དོན་འདི་ཐམས་ཅད་ནི་ཁྱོད་ཅག་སྐྱེད་སྲིང་བྱེད་པའི་ཆེད་དུ་ཡིན་ནོ།།  
\v 20 ང་རང་ཡོང་བའི་དུས༌སུ། ངས་ཁྱོད་རྣམས་མཐོང་ན་ཁྱོད་ཅག་ནི་བདག་གི་རེ་བ་དང་མི་མཐུན༌ཞིང༌། ཁྱོད་རྣམས་ཀྱིས་ང་རང་མཐོང་ན་བདག་ནི་ཁྱོད་ཅག་གི་རེ་བ་དང་མི་མཐུན་པར་སྙམ་པ་ལ་བདག་ནི་འཇིགས༌ཏེ། ཁྱོད་ཅག་ནང་ཁུལ་དུའང་རྩོད་པ༌དང༌། ཕྲག༌དོག ཁོང༌ཁྲོ། སྒེར་སེམས། འཕྱ༌སྨོད། ཕྲ༌མ། ང༌རྒྱལ། རྙོག་འཛིང་ཆེ་བ་བཅས་ཀྱི་དོན་དག་འབྱུང་བར་ཡང་འཇིགས་སོ།།  
\v 21 ང་རང་ཡོང་བའི་དུས༌སུ། བདག་གི་དཀོན་མཆོག་གིས་ང་ནི་ཁྱོད་རྣམས་ཀྱི་མདུན་ནས་ངོ་གནོང་དུ་འཇུག་པ་ལའང་ང་རང་འཇིགས་པ༌དང༌། ཡང་མི་མང་པོས་སྔོན་ཆད་མི་གཙང་བ༌དང༌། ལོག༌གཡེམ། འདོད་ཆགས་བཅས་སྡིག་པའི་ལས་བྱས་ཀྱང་འགྱོད་བཤགས་མི་བྱེད༌པས། ང་རང་ཡིད་སྐྱོ་བར་ཡང་འཇིགས་སོ།།   
\c 13
\cl ལེའུ་བཅུ་གསུམ༌པ། 
\toc1 ༄༅། །ཀོ་རིན་ཐུ་པ་རྣམས་ལ་སྤྲིངས་པའི་འཕྲིན་ཡིག་གཉིས་པ། 
\toc2 ཀོ་རིན་ཐུ་པ་གཉིས་པ། 
\s1 མཇུག་མཐའི་གདམས༌པ།  
\p
\v 1 ད་ནི་ང་རང་ཐེངས་གསུམ་པར་ཁྱོད་ཅག་གི་གམ་དུ་ཡོང་བ་ཡིན་ལ། མི་གཉིས་གསུམ་ཞིག་གི་ངག་ལས་བདེན་དཔང་བྱེད་པར་བརྟེན༌ནས། ཚིག་རེ་རེ་བཞིན་གཏན་ལ་དབབ་དགོས་ཞེས་པ༌ལྟར།  
\v 2 བདག་གིས་སྔོན་ཆད་སྨྲས་མྱོང་ཞིང་ད་ལྟ་ང་རང་ཁྱོད་ཅག་གི་གམ་དུ་མེད༌ནའང༌། བདག་གིས་ཐེངས་གཉིས་པར་ཁྱོད་རྣམས་མཐོང་བའི་དུས་སུ་སྨྲས་པ༌བཞིན། སྡིག་པའི་ལས་བྱེད་མཁན་དང་མི་གཞན་ཐམས་ཅད་ལ་འདི་ལྟར༌སྨྲ་བར་བྱ༌སྟེ། ང་རང་ཡང་བསྐྱར་ཡོང་བ༌ན། བཟོད་པ་སྒོམ་པར་མི་བྱེད་ཅེས༌པའོ།།  
\v 3 རྒྱུ་མཚན་ནི་ཁྱོད་ཅག་གིས་སྐྱབས་མགོན་མཱ་ཤི་ཀས་བདག་གི་སེམས་ནང་ནས་གསུངས་པའི་དཔང་རྟགས་འཚོལ་བའི་ཕྱིར་རོ།། སྐྱབས་མགོན་མཱ་ཤི་ཀ་ནི་ཁྱོད་ཅག་གི་ཆ་ནས་གཉོམ་ཆུང་མ་ཡིན་པར་ནུས་མཐུ་ཆེན་པོ་མངའ་བ་ཡིན།  
\v 4 ཁོང་ནི་གཉོམ་ཆུང་གི་ངང་ནས་ཤིང་རྒྱ་གྲམ་གྱི་སྟེང་དུ་བརྡབས༌ནའང༌། དཀོན་མཆོག་གི་ནུས་མཐུ་ཆེན་པོར་བརྟེན་ནས་ད་དུང་སྐུ་གསོན༌པོར་བཞུགས། ངེད་ཅག་ཀྱང་ཁོང་གི་ནང་ནས་གཉོམ་ཆུང་ཡིན༌མོད། འོན་ཀྱང་དཀོན་མཆོག་གིས་ཁྱོད་ཅག་ལ་བསྟན་པའི་ནུས་མཐུ་ཆེན་པོའི་དབང་གིས། ངེད་རྣམས་ནི་སྐྱབས་མགོན་མཱ་ཤི་ཀ་དང་ལྷན་དུ་གསོན༌པར་འགྱུར་རོ།།   
\p
\v 5 ཁྱོད་རྣམས་ཀྱིས་རྟག་པར་རང་ཉིད་དད་པའི་ནང་དུ་ཡོད་མེད་ལ་བརྟག༌དགོས་ཤིང༌། རང་གིས་རང་ལ་ཚོད་ལྟའང་བྱ་འོས་སོ།། ཁྱོད་ཅག་ནི་ཚོད་བགམ་ཐེག་མི་ཐུབ་པ་ཡིན༌པ་མ་གཏོགས། ཁྱོད་ཅག་གི་སེམས་སུ་ཡེ་ཤུ་མཱ་ཤི་ཀ་བཞུགས་ཡོད་པ་མི་ཤེས༌སམ།  
\v 6 ཁྱོད་རྣམས་ཀྱིས་ངེད་ཅག་ནི་ཚོད་བགམ་མི་ཐེག་པའི་མི་མ་ཡིན་པ་ཤེས་པའི་ཕྱིར་བདག་གིས་རེ་བ་བྱེད།  
\v 7 ཁྱོད་ཅག་གིས་ལས་ངན་པ་ཅི་ཡང་མི་བྱེད་པའི༌ཕྱིར། ངེད་ཅག་གིས་དཀོན་མཆོག་ལ་གསོལ་བ་འདེབས། འདི་ནི་ངེད་ཅག་ཚོད་བགམ་ཐེག་ཐུབ་པའི་མི་ཡིན་པ་མངོན་པའི་ཆེད་དུ་མ་ཡིན༌པར། ཁྱོད་ཅག་གི་སྤྱོད་ལམ་དྲང་པོ་བྱེད་པའི་ཆེད་དུ་ཡིན༌པས། མི་གཞན་དག་གིས་ངེད་ཅག་ཚོད་བགམ་མི་ཐེག་པར་འདོད་ནའང་རུང༌།  
\v 8 ངེད་ཅག་གིས་རྟག་ཏུ་བདེན་པ་སྐྱོང་བ་ལས་བདེན་པ་ལ་ངོ་རྒོལ་བྱེད༌མི་ནུས།  
\v 9 ངེད་ཅག་གཉོམ་ཆུང་ཡིན༌ནའང་ཁྱོད་ཅག་སྟོབས་ཅན་ཡིན་ན་ངེད་ཅག་དགའ། ངེད་ཅག་གི་རེ་སྨོན་ནི་ཁྱོད་རྣམས་མི་ཡོངས་སུ་རྫོགས་པ་ཞིག་ཏུ་འགྱུར་བ་དེ་ཡིན་ནོ།།  
\v 10 དེའི༌ཕྱིར། ང་རང་ཁྱོད་ཅག་གི་གམ་དུ་མེད་པའི་དུས་སུ་ཁྱོད་རྣམས་ལ་དོན་འདི་དག་བྲིས་པ༌ནི། ང་རང་ཁྱོད་ཅག་དང་འཕྲད་པའི་དུས༌སུ། གཙོ་བོས་བདག་ལ་གནང་བའི་དབང༌ལྟར། བདག་གིས་ཁྱོད་རྣམས་ལ་བཙན་སྐུལ་བྱེད་མི་དགོས་པའི་ཕྱིར་ཡིན༌ལ། དབང་དེ་ནི་མི་རྣམས་ཉམས་དམས་སུ་གཏོང་བའི་ཕྱིར་མ་ཡིན༌པར། མི་རྣམས་སྐྱེད་སྲིང་བྱེད་པའི་ཆེད་དུ་གནང་བ་ལགས༌སོ།།   
\s1 མཇུག་མཐའི་འཚམས༌ཞུ།  
\p
\v 11 སྤུན་ཟླ་རྣམས། མཐར་ཁྱོད་རྣམས་དགའ་ཞིང་སྤྲོ་བར༌གྱིས། ཁྱོད་ཅག་ནི་མི་ཡོངས་སུ་རྫོགས་པ་ཞིག་བྱེད་པ༌དང༌། སེམས་གསོ་ཐོབ་པ། བློ་སེམས་མཐུན༌པ། ཕན་ཚུན་འགྲིག་མཐུན་ཡོང་བ་བཅས་བྱེད་པར༌གྱིས། དེ་ནས་བྱམས་པ་དང་ཞི་བདེ་མངའ་བའི་དཀོན་མཆོག་ནི་ཁྱོད་རྣམས་དང་ལྷན་དུ་བཞུགས་ངེས༌སོ།།   
\p
\v 12 ཁྱོད་ཅག་གིས་ཕན་ཚུན་བར་དུ་དམ་པའི་འོ་བྱས་ནས་འཚམས་འདྲི་ཞུ་བར༌གྱིས།  
\v 13 དད་ལྡན་དམ་པ་མཐའ་དག་གིས་ཀྱང་ཁྱོད་ཅག་ལ་འཚམས་འདྲི༌ཞུའོ།།   
\p
\v 14 གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ༌དང༌། དཀོན་མཆོག་གི་བྱམས༌པ། དམ་པའི་ཐུགས་ཉིད་ཀྱི་འབྲེལ་འདྲིས་བཅས་ནི་ཁྱོད་ཅག་ཐམས་ཅད་དང་མཉམ་དུ་བཞུགས་པར༌སྨོན།། །།