\id 3JN -[BNP] -Aloysius Baki -3/2/01; Brent and Sandi Wiebe; Dec 7, 2010 
\h 3 Ioanes 
\toc1 A Toluna Raukea i Herea e Ioanes 
\toc2 3 Ioanes 
\toc3 3Ion 
\mt2 A Toluna Raukea i Herea e  
\mt1 Ioanes  
\imt1 A Nita Vakalohoka  
\ip E Ioanes i herea a raukea iea, i lakea na bakovi tara, a rana e Gaius. E Gaius i uka ma ia a Iuda. I pulo a vilona, i ramaia e Kristo. E Ioanes i kavurikea e Gaius vona a hini i pesi tora na niluhoi torea e Kristo. I kavurikea vona a hini i tuhori e huriki ri rata a leho ne Bakovi Dagi.  
\c 1  
\p
\v 1 \x * \xo 1:1 \xt Apo 19:29; Rom 16:23\x*Mu lohoka nau, iau a gare na lotu. A here lakene vomu, o Gaius. A ngaru ioe na hategu.   
\p
\v 2 Turagu, a vasileki na Vure, go made kamumu, i uka ma go giloa, ge kinigao kunana a kakaimu, i manga a hini a hanumu i kinigao turana Vure.  
\v 3 \x * \xo 1:3 \xt 2Ion 4\x*E huriki a turane hita ri valai ri vakalongo iau, ta o ramai kamumu a ngava muholi. A longoa a ngava iea, a vivi hateka. I muholi, o ramai vakaroro a ngava muholi.  
\v 4 Na tahuna a longo e huriki a koma nau ri ramai a ngava muholi, a vivi hateka.   
\s1 I Ranga Ri Leho Kamumu  
\p
\v 5 Turagu, i kamumu o matakari e huriki a tara na Vure ri havai mua. I uka ma o lohoka ne ria, pali o ramai kamumu a ningaru na Vure na tahuna o matakari ria.  
\v 6 \x * \xo 1:6 \xt Tit 3:13\x*E huriki ranga ne ria ri bele pali koea. Ri vakalongo koea e huriki a tara na Vure, a naro kamumu o rata virihi ria vona, o ngaru hateka ria. A ngaru go tabana ni tuhori e huriki a bakovi maea, na naro a Vure ge vivi vona, ri gi laho tala,  
\v 7 \x * \xo 1:7 \xt 1Ko 9:11-12\x*a vuhuna ri laho tala ni taki tala a rane Kristo. Ri koi ni bole a kinori ne huriki i uka ma ri lohoka na Vure.  
\v 8 I mavonga, si gi do rike e huriki a bakovi ri leho maea. Bara si rata mavonga, bara si leho turane ria ni taki tala a ngava muholi.   
\p
\v 9 A herea pali tara raukea i lakea ne huriki a tara na Vure vonga. Pali e Diotrepes i rata polo muga muga. I uka ma i longo mai a nitane mia.  
\v 10 I mavonga, na tahuna a bele iene, bara taki tala ne huriki a narona. I padimomo mia na ngava hale tavula. I uka ma i ngi kunana. I marikoi ni tagui e huriki a turane hita ri bele ne mua. Pali e huriki ranga ri ngaru ni tagui ria, i pupukari ria, i lili tala ria na vaponga na Vure.   
\p
\v 11 \x * \xo 1:11 \xt 1Ion 3:6-10\x*Turagu, naha ni ramai a naro hale. O ramai a naro kamumu. E rei a viri i rata a naro kamumu, ia a bakovi na Vure. Pali e rei a viri i rata a naro hale, i uka ma i masia a Vure.  
\v 12 E huriki lobo ri taki tala a naro kamumu ne Demitrius. A nita muholi na Vure tara i taki tala a naro kamumu vona. Mia ranga, mi taki tala vona a naro kamumu vona. Ioe o lohoka ne mia, a ngavane mia i muholi.   
\s1 A Nilobona Ngava  
\p
\v 13 \x * \xo 1:13 \xt 2Ion 12\x*A ngava i kupo ta ga here lakene vomu, pali a koi ni here.  
\v 14 A ngaru i uka ma ge tabaka, ga lakene, ga matai ioe, tu gu vata.  
\v 15 O made na nivalemu. E huriki e turane tarua ieni ri talo rike a haro kamumu vomu. A haro kamumu ne huriki e turane tarua iene.