\id 2TH - Bola Bible; Brent and Sandi Wiebe; April 4, 2011. 
\h 2 Tesalonika 
\toc1 A Ruana Raukea e Paulus i Here Lakea ne Huriki a Tesalonika 
\toc2 2 Tesalonika 
\toc3 2Tes 
\mt2 A Ruana Raukea e Paulus i Here Lakea ne Huriki a  
\mt1 Tesalonika  
\imt1 A Nita Vakalohoka  
\ip E Paulus, a apostolo, i herea a raukea iea.  
\ip I here lakea ne huriki ri made na tanga e Tesalonika, na tabeke ne Masedonia. O matai a Nita Vakalohoka ne 1 Tesalonika.  
\ip E Paulus i herea a raukea iea ne vona ni vakatora a niluhoi ne huriki a tara ne Kristo o Tesalonika. Ri loholege vona a ngava taminga i bele, ta e Kristo i hamule valai pali. I taki ria a naro hale bara i bele dagi taro, muri e Kristo bara i valai. I taki ria ri gi hatenono na nimava. E Kristo bara i valai, i vakamadihi e huriki ri gege a Velenga Kamumu.  
\c 1  
\p
\v 1 Iau e Paulus, turane Sailas e Timoti mete herea ra raukea iea i lakene ne mua o Tesalonika, ra mua e huriki a tara na Vure, e Tamane hita, e Isu Kristo a Bakovi Dagi.   
\p
\v 2 \x * \xo 1:2 \xt Rom 1:7\x*A Vure, e Tamane hita, turane Isu Kristo a Bakovi Dagi ne hita, ru gu rata kamumu mua, ru gu habi a nivalemu ne mua.   
\s1 E Paulus i Kavurikea a Vure  
\p
\v 3 Mua e huriki a turagu, i kamumu mete ge luhoi mua, mete ge kavurike vaka­roroa a Vure, a vuhuna a niluhoi ne mua i bele tora hateka, a rabu ni vangaru i bebele dagi ne mua.  
\v 4 \x * \xo 1:4 \xt 2Ko 7:4; 1Tes 2:19\x*I mavonga, mete bibi rike a rane mua na matane huriki a tara na Vure na tanga lobo, a vuhuna mu pesi tora na niluhoi ne mua, mu hatenono na tahuna e huriki ri vakamadihi mua, mu bole a maregoa.   
\p
\v 5 Na tahuna mu pesi tora mavonga, i vakasiri hita na Vure i pelekado kamumu e huriki. I mavonga, a Vure ge taki mua, mua a viri kamumu, mu gu made na harikia vona, ra ngane mu bole a nimadihi a vuhuna mu ngaru ni dili vona.  
\v 6-7 \x * \xo 1:6-7 \xt Rom 12:19; 1Tes 3:13\x*A Vure i pelekado kamumu e huriki. Muri ma, a Bakovi Dagi ne hita e Isu, turane huriki a agelo hateka na Vure ri gi pe a hunu, ri gi luve kavakava turana hubena kanono. Na tahuna iea, bara i koli a narone huriki ri habi a maregoa ne mua, bara i habi a maregoa ne ria. Bara i vakalobo a maka maregoa mu tahoka, ge habi a nimalo ne mua. Mateu ranga bara i habi a nimalo ne mateu.   
\p
\v 8 \x * \xo 1:8 \xt Ais 66:15\x*E huriki i uka ma ri longototo a Velenga Kamumu ne Bakovi Dagi ne hita, e Isu, e huriki i uka ma ri lohoka na Vure, e Isu bara i vakamadihi ria.  
\v 9 \x * \xo 1:9 \xt Ais 2:10\x*Re huriki nga, e Isu ge vakamadihi ria, ge ratapile ria vakaroro. Bara ri made basi ne Bakovi Dagi, na bagetuanga na nitora vona.  
\v 10 \x * \xo 1:10 \xt Kol 3:4\x*Ra maki nga bara ri bele na tahuna i hamule valai. Na parava iea, e huriki a tara vona bara ri kavurikea, e huriki ri luhoi torea bara ri ngapa vona. Mua ranga bara mu vivi turane ria, a vuhuna mu luhoi tora a ngava mete vaka­longo mua vona.   
\p
\v 11 \x * \xo 1:11 \xt Kol 1:9; 1Tes 1:2-3\x*I mavonga, mete vasileki vakaroro na Vure, ge tuhori mua mu gu laho manga a hini i ngaru mu gu laho vona. Mete vasileki vona ge habi a nitora ne mua, mu gu rata a maka naro kamumu mu luhoi ni ratana.  
\v 12 Mete vasileki mavonga, a vuhuna mete ngaru e huriki a bakovi a ngatavine ri gi matai a narone mua, ri gi kavurikea e Isu a Bakovi Dagi. E Isu tara ge kavurike mua. I mavonga, ri kavurikea e Isu, a vuhuna a Vure rua e Isu Kristo a Bakovi Dagi ru rata kamumu mua.   
\c 2  
\s1 A Bakovi ni Longotaro a Vinara  
\p
\v 1 Mua e huriki a turagu, ngane mete ge vakalongo mua vona e Isu Kristo a Bakovi Dagi ge hamule valai, ge gale palupu hita. Mete taki tora mua,  
\v 2 nahea ge ruru a vurene mua vona a ngavana propet, a ngavane huriki ranga, a raukea ni taki ta mete herea, ri gi taki ta e Bakovi Dagi i hamule valai pali.  
\v 3 \x * \xo 2:3 \xt 1Tim 4:1; 1Ion 2:18; 4:3\x*Naha ni longo mai ria, a vuhuna a parava iea i uka ma ge bele tavula. I muga, e huriki ala kupo bara ri tagege, ri longotaro a nitana Vure. Muri, a bakovi ni longotaro a Vure bara i bele kavakava, ra bakovi iea bara i vurua na kanono.  
\v 4 \x * \xo 2:4 \xt Ese 28:2; Dan 11:36\x*A bakovi iea bara i gegea a Vure, i gege e huriki a vure taminga lobo, ra maka maki e huriki a bakovi a ngatavine ri kavurike bala. Bara i taki e huriki ri gi kavurike ia kunana. Bara i made pololilo na roho na Vure, i taki e huriki ta ia a Vure.   
\p
\v 5 Na tahuna a made turane mua, a taki mua vona pali a ngava nga. Mu tabana ni luhoi, o i uka?  
\v 6-7 A naro ni longotaro a vinara i leho kapiloho pali. Mu lohoka vona a maki i pesi karia a dalana bakovi hale. A bakovi hale iea bara i bele kavakava na parava a Vure i vulakia ge bele vona. Pali a viri i pesi karia a dalana bara i pesi kari mavonga ge harena na tahuna a Vure ge takia ge lobo.  
\v 8 \x * \xo 2:8 \xt Ais 11:4; Kap 19:15 \x*Muri a bakovi ni longotaro a Vure bara i bele kavakava. Muri e Isu a Bakovi Dagi bara i valai na nipara dagi, bara i rabalakia na nipara dagi iea, ge mate. Bara i rabalakia na bangona a bakovi hale iea.   
\p
\v 9 \x * \xo 2:9 \xt Kap 13:11-13\x*Na tahuna a bakovi ni longotaro a Vure i bele kavakava, bara i leho na nitora ne Satan. Bara i rata a maka nitamina nivakasiri legelege.  
\v 10 Bara i rata a naro hale i kupo ni tami e huriki ri laho na dala na vuranga. Re huriki nga bara ri vurua, a vuhuna ri marikoi a ngava muholi ge korimule ria.  
\v 11 I mavonga, a Vure i vakahale a niluhoi ne ria, ri gi longo mai a ngava taminga kunana.  
\v 12 I mavonga kunana a Vure ge pelekado e huriki lobo i uka ma ri luhoi torea a ngava muholi, ri ngaru a naro hale.   
\s1 Mu Pesi Tora  
\p
\v 13 \x * \xo 2:13 \xt Epe 1:4; 2Tes 1:3\x*Mua e huriki a turagu, e Bakovi Dagi i ngaru hateka mua. Mete luhoi vakaroro mua, lakea i kamumu hateka mete ge kavurikea a Vure, a vuhuna a Vure i vulaki mua, ge korimule mua. I vulaki mua pali na tahuna i ratarike a hunu a malala. A dala i korimule mua vona i maea: Na nitora na Hanu Kiripiripi, i rata mua mu malamala na matana. Mu luhoi torea a ngava muholi.  
\v 14 A Vure i ngaru mu gu made na bagetua na nitora ne Isu Kristo a Bakovi Dagi ne hita, lakea i gale palupu mua pali na Velenga Kamumu, ra mi tovo mua vona.  
\v 15 I mavonga, mua e huriki a turagu, mu pesi tora. Mu muri mai a vinara mete tovo mua vona, turana vinara mete here puru na raukea.   
\p
\v 16 E Isu Kristo a Bakovi Dagi ne hita, turana e Tamane hita, ra viri i ngaru hateka hita, i rata a naro kamumu ne hita, i luke vakaroro hita, si pasimata vona a maki kamumu ge habi ne hita muri ma,  
\v 17 ru gu vakatora a hatene mua, ru gu tuhori mua mu gu rata a naro kamumu, a ngava kamumu.   
\c 3  
\s1 Mu Vasileki na Vure Ge Tuhori Mateu  
\p
\v 1 Mua e huriki a turagu, ngane ga vakalobo a ngava. Mu vasileki ne mateu, mete ge vakalongo a nitane Bakovi Dagi, ge bele malaviriri na tanga lobo, lakea e huriki ri longoa ri gi togoa ge manga a hini mu rata pali.  
\v 2 Mu vasileki na Vure ge kori mateu na limane huriki a bakovi hale, a vuhuna mu lohoka vona i uka ma e huriki lobo ri luhoi torea a Vure.  
\v 3 Pali e Bakovi Dagi i ramai vakaroro a nitana. Bara i vakatora mua, i tagari mua na bakovi hale, re Satan.  
\v 4 \x * \xo 3:4 \xt 2Ko 7:16; Gal 5:10\x*Mete lohoka vona, mu ramai lobo a ngava mete habi ne mua. Mete lohoka vona tabu, e Bakovi Dagi ge tuhori mua ni ramai lobo a ngava nga.  
\v 5 Mete ngarua e Bakovi Dagi ge habi a niluhoi ne mua, mu gu lohoka kamumu vona a Vure i ngaru hateka mua. Mete ngarua ge vakasiri mua ni hatenono na maregoa i manga e Kristo i hatenono.   
\s1 Naha Ni Rakoli Tavula  
\p
\v 6 \x * \xo 3:6 \xt Rom 16:17\x*Mua e huriki a turagu, mete vakuku mua na rane Isu Kristo a Bakovi Dagi ne hita: Mu malele ha vona e huriki a turane hita ranga ri laho tavula, i uka ma ri muri mai a vinara mete vara mua vona.  
\v 7 \x * \xo 3:7 \xt Pili 3:17\x*Mu lohoka vona mete ngaru mu gu ramai a naro mete rata. Na tahuna mete made turane mua, i uka ma mete made tavula.  
\v 8 \x * \xo 3:8 \xt 1Tes 2:9\x*I uka ma mete kani tavula a maki ni kani ne mua. A maki ni kani lobo mete kona. Mete leho hateka na haro a rodo, nahea mete ge habi a nimava ne mua.  
\v 9 \x * \xo 3:9 \xt 1Ko 9:4; 1Tes 1:6\x*Na tahuna mete ngaru a maki, bara mete nana mua. Pali mete koi ni rata mavonga, a vuhuna mete ngaru ni vakasiri mua na naro kamumu mu gu ramaia.  
\v 10 Mu lohoka vona na tahuna mete tabana ni made turane mua, mete taki tora mua, mete ta maea, “A bakovi i marikoi ni leho, nahea ge kani.”   
\p
\v 11 \x * \xo 3:11 \xt 1Tim 5:13\x*Pali ngane mete longo ranga e huriki iene, ta ri rakoli tavula kunana, i uka ma ri leho. Ri rahi dili ria ni rata viliha kunana a maki na viri tara.  
\v 12 \x * \xo 3:12 \xt 1Tes 4:11\x*Mu vakuku ria na rane Isu Kristo a Bakovi Dagi, mu vakuku e huriki nga ri gi made tata, ri gi leho, ri gi matakari mule ria na maki ni kani.  
\v 13 \x * \xo 3:13 \xt Gal 6:9\x*Mua e huriki a turagu, naha ni tuha malulu ni rata a naro kamumu.   
\p
\v 14 E rei a bakovi i uka ma i ramai a ngava mete here puru na raukea iea, mu vakalongo e huriki vona, ri gi malele ha vona, ge maruhu.  
\v 15 \x * \xo 3:15 \xt 1Tes 5:14\x*Pali naha ni lohopile ia. Mu varea manga mu vara e huriki a turane mua.   
\s1 A Nilobona Ngava  
\p
\v 16 E Bakovi Dagi ia a vuhuna a nivalemu. Ge habi a nivalemu ne mua na parava vakaroro, ge habi a nivalemu ne mua na maki lobo, ge made turane mua.   
\p
\v 17 Iau e Paulus a herea na limagu a nilobona raukea iea. A raukea lobo a here, a here puru vona a maka nita maea, ge a nivakasiri nau. A hinere nau i maea.   
\p
\v 18 E Isu Kristo a Bakovi Dagi ne hita ge rata kamumu mua lobo.