\id 1JN - Bola Bible; Brent and Sandi Wiebe; May 5, 2011 
\h 1 Ioanes 
\toc1 A Mugana Raukea i Herea e Ioanes 
\toc2 1 Ioanes 
\toc3 1Ion 
\mt2 A Mugana Raukea i Herea e  
\mt1 Ioanes  
\imt1 A Nita Vakalohoka na Raukea i Tolu ne Ioanes  
\ip A viri i here ra raukea nga i uka ma i kilalea a rana. Pali i tahoka ranga maki i vakasiri maea e Ioanes a murimuri ne Isu, ra viri i here. I tahoka ranga ngava i palupu turana ngava i tabuli na Velenga Kamumu i herea e Ioanes, i vakasiri maea ra buk nga lobo i here a bakovi ala taku, re Ioanes. Ne 1 Ioanes 1:1-3 a viri i here i taki ia i turana e Isu na tahuna e Isu i vara koea na malala. Ne 2 Ioanes, e 3 Ioanes i taki ia a gare. A maka maki i here na raukea iea i vakasiri manga ia a gare, a gare ne huriki a tara ne Kristo.  
\ip I mata manga e Ioanes i here ra raukea nga na pida e 90 AD, a pida i 60 muri ne Isu i mate, i mahuri mule.  
\ip Na parava iea a maka tara ne Kristo ri bele kupo na maka tanga, lakea e huriki ala kupo ri laho tala, ri tovo ria. Pali ranga ne ria ri pulo a nitovo na Velenga Kamumu, ri ru dili ranga niluhoi ne ria. Re huriki a mari nitovo taminga nga ri rata e huriki, ri koi ni ramai a nitovo ne Ioanes. Ngane e Ioanes i here ni vakatora a tara ne Kristo, nahea ri gi loho rua vona a nita muholi na velenga kamumu i tovo ria vona. Na tahuna e Ioanes i gare, i made o Epesus, na tabeke na nirolona haro na hini mona ni gale e Teki. E Ioanes kikeri ra murimuri ne Isu i tabana ni mahuri, ra i maea e huriki a tara ne Kristo na tabeke iea ri mata rike vona, ri ramai a nitovo vona. I here ra raukea nga lakea na maka tara ne Kristo i matakari ria.  
\ip A ngava dagi na raukea nga i rua. A nita muholi turana naro na nivangaru.  
\ip A nita muholi i maea, o lohoka kamumu na Vure ia e rei, e Isu ia e rei, na maki a Vure i ratea ne hita na limana e Kristo. “Mia mi tahoka ra niluhoi iea, a vuhuna a Vure i vakasiria ne mia.” E Ioanes i ta maea, lakea ra niluhoi iea ge muga e huriki a tara ne Kristo lobo. Nahea ri gi loho vagori lae.  
\ip A nivangaru, e Ioanes i ratea ra ngava iea, ge vakasiri e huriki na ningaru na Vure ne hita, a ningaru ne hita lakea na Vure, lakea ne turane hita. I ta hateka maea, a vuhuna i ngaru e huriki ri luhoi torea e Kristo ri gi vangaru, manga a Vure i ngaru e huriki lobo.  
\c 1  
\s1 A Nita Mahuri i Bele Kavakava  
\p
\v 1 \x * \xo 1:1 \xt Ion 1:1\x*A Nita Mahuri i made hosi, muga na maka maki ni ratarike. Mi longoa a nitana, mi masia na matane mia. I muholi mi masia, mi padoi ia na limane mia.  
\v 2 \x * \xo 1:2 \xt Ion 1:14\x*A Nimahuri iea i bele kavakava, mi masia. Mi vakalongo mua vona a Nimahuri Vakaroro iea, ra i made muga turana e Tamana, muri i bele kavakava ne mia.  
\v 3 A maki lobo mi matai, a maki lobo mi longo, ngane mi taki tala ne mua, lakea mua ranga mu gu rihi mia. I muholi, si rihi e Tamana turana e Tuna, re Isu Kristo.  
\v 4 \x * \xo 1:4 \xt Ion 16:24\x*A herea a raukea iea, a nivivi ne mia ge bele dagi.   
\s1 Si Gi Laho na Nipara na Vure  
\p
\v 5 \x * \xo 1:5 \xt 1Tim 6:16; Iak 1:17\x*A ngava mi longo vona, ngane mi vakalongo mua vona i maea: A Vure a Nipara. I uka ranga hini ge uvo ge tabuli vona.  
\v 6 \x * \xo 1:6 \xt 1Ion 2:4\x*E rei a viri i taki ta i rihi a Vure, pali i laho na uvo, i uka ma i ta muholi. Ia a bakovi na taminga.  
\v 7 A Vure i made na hini palala. I mavonga, na tahuna si laho na hini palala, si varihi, a darane Tuna, e Isu, i vahilolo hita na naro hale lobo ne hita.  
\v 8 \x * \xo 1:8 \xt Sng 32:5; Snd 28:13\x*Pali a viri i taki ta i uka naro hale, i uka ma i ta muholi. I tami mulea.  
\v 9 Pali na tahuna si taki tala na Vure a naro hale ne hita, a Vure bara i ramai a ngava muholi i taki pali, bara i ramai a naro kiripiripi vona, i puga vuroki a naro hale ne hita, i vahilolo hita, si malamala na matana.  
\v 10 Pali a viri i taki ta i uka naro hale ge rata, ngane i takia a Vure, ta ia a bakovi na taminga. A bakovi maea i marikoi a nitana Vure.   
\c 2  
\s1 E Isu Kristo Ia a Nikori ne Teu  
\p
\v 1 \x * \xo 2:1 \xt Hib 7:25-26\x*Mua e huriki e tugu, a here lakene ne mua a nita iea, nahea mu gu rata a naro hale. Pali a viri tara ge rata a naro hale, si tahoka a Viri i made turane Tamana, i takia ge puga vuroki a naro hale si rata. Ra viri iea, e Isu Kristo a Viri malamala.  
\v 2 \x * \xo 2:2 \xt Ion 1:29; Kol 1:20; 1Ion 4:10\x*Ia kunana a dala ne hita, ge puga vuroki a naro hale ne hita. I uka ma a dala ne hita kunana. Ia a dala ne huriki lobo na malala.   
\p
\v 3 Si gi matakilaka navai na viri i lohoka na Vure? A viri i lohoka na Vure bara i longototo a vinara vona.  
\v 4 E rei a viri i taki ta i lohoka na Vure, pali i uka ma i longo mai a vinara vona, a bakovi iea a bakovi na taminga. I marikoi na nita muholi.  
\v 5 \x * \xo 2:5 \xt Ion 14:21,23\x*Pali e rei a viri i longototoa a nitana Vure, ia i ngaru muholia a Vure. A kilakila na viri i madoko turana Vure i maea,   
\p
\v 6 a viri i madoko turana Vure bara i laho manga e Kristo i laho.   
\s1 A Vinara Karaba  
\p
\v 7 \x * \xo 2:7 \xt Ion 13:34; 2Ion 5-6\x*Mua e huriki a turagu, a vinara a vakalongo mua vona i uka ma a vinara karaba. A vinara a vakalongo mua vona a vinara hosi, mu lohoka vona pali. A vinara hosi a ngava mu longoa pali.  
\v 8 \x * \xo 2:8 \xt Ion 1:9; Rom 13:12\x*I muholi, a vinara iea, a vinara hosi. Pali a vinara iea, ia tara, a vinara karaba. A narone Kristo i vakasiri a vinara iea i muholi. A narone mua ranga, i vakasiri i muholi, a vuhuna a uvo i vakatubu ni lobo, a nipara muholi i para pali.  
\v 9 \x * \xo 2:9 \xt 1Ion 4:20\x*E rei a bakovi i taki ta i laho na hini palala, pali i marikoi ne turana, a bakovi iea i tabana ni made na uvo.  
\v 10 \x * \xo 2:10 \xt Rom 14:13\x*A viri i ngarua e turana, i made na hini palala. I uka naro ge sibo vona ge boru.  
\v 11 \x * \xo 2:11 \xt Ion 12:35\x*Pali e rei a viri i marikoi e turana, a viri iea i made na uvo, i laho na uvo. I ruru, a vuhuna i uvo a matana.   
\q1
\v 12 Mua e huriki e tugu, a here lakea ne mua,  
\q2 a vuhuna a Vure i puga vuroki na rane Kristo a naro hale ne mua.   
\q1
\v 13 Mua e huriki a tamana koma, a here lakea ne mua  
\q2 a vuhuna mu lohoka vona e Kristo, ra Viri i made hosi, muga na maki lobo ni ratarike.  
\q1 Mua e huriki a riau, a here lakea ne mua  
\q2 a vuhuna mu rangia pali e Satan.  
\q1 Mua e huriki e tugu, a here lakea ne mua  
\q2 a vuhuna mu lohoka vona e Tamane hita.   
\q1
\v 14 Mua e huriki a tamana koma, a here lakea ne mua  
\q2 a vuhuna mu lohoka vona a Viri i made hosi, muga na maki lobo ni ratarike.  
\q1 Mua e huriki a riau, a here lakea ne mua  
\q2 a vuhuna mu pesi tora ni luhoi torea a Vure,  
\q2 mu loho doko vona a nitana Vure  
\q2 mu rangia pali e Satan.   
\s1 Naha Ni Ngaru a Maki na Malala  
\p
\v 15 \x * \xo 2:15 \xt Rom 8:7\x*Naha ni ngaru a naro na malala. Naha ni ngaru a maka maki na malala. E rei a viri i ngaru a maka maki na malala, i uka ma i ngarua e Tamane hita.  
\v 16 \x * \xo 2:16 \xt Rom 13:14\x*A maki lobo na malala, i manga a ningaru hale na kakaine hita, a ningutu na maki na viri tara, a naro na viri i bibi rike mule ia na hini i tahoka a mahala i kupo, a naro nga i uka ma ri valai ne Tamane hita. Ria a naro na malala.  
\v 17 \x * \xo 2:17 \xt Mat 7:21\x*E huriki a bakovi a ngatavine na malala bara ri velu. A ningaru lobo na malala bara ri lobo. Pali e rei a viri i ratea a ningaru ne Tamane Hita, bara i made vakaroro.   
\s1 A Pile ne Kristo  
\p
\v 18 \x * \xo 2:18 \xt Mat 24:5,24; 2Ion 7\x*Mua e huriki e tugu, ngane a nilobo­na parava i tabukoi. Mu longo pali vona a pile ne Kristo ge valai na nilobona parava. Mona e huriki a pile ne Kristo ala kupo ri bele pali. I mavonga, ngane si lohoka vona, a nilobona parava i tabukoi.  
\v 19 \x * \xo 2:19 \xt Apo 20:30\x*Ranga e huriki a pile ne Kristo, muga ri dili turane hita, pali i uka ma ria e huriki e turane hita muholi. Bara ria e turane hita muholi, i uka ma ri gi ha taro hita, bara ri tabana ni made turane hita. Pali ri ha taro hita pali, i vakasiri manga i uka ma ria a turane hita muholi.  
\v 20 \x * \xo 2:20 \xt 1Ko 2:15; 2Ko 1:21; 2Ion 2\x*Pali mua, a Viri Malamala i habi ne mua a Hanu Kiripiripi. Mu tahoka a lohokanga.  
\v 21 A here lakea ne mua a vuhuna mu lohoka vona a ngava muholi. A ngava muholi i uka ma ge vakabele a ngava taminga.  
\v 22 \x * \xo 2:22 \xt 1Ion 4:3; 2Ion 7\x*E rei a viri i takia e Isu, ta a Vure i uka ma i rudua ge korimule e huriki, a viri iea a bakovi na taminga. Ia a pile ne Kristo. I ngalahere varago ne Tamana, ne Tuna.  
\v 23 \x * \xo 2:23 \xt Ion 5:23; 1Ion 4:15; 5:1\x*A viri i ngalahere na Tuna Vure, i ngalahere ne Tamana. A viri i luhoi torea a Tuna Vure, i luhoi torea e Tamana.  
\v 24 A ngava mu longo muga, mu loho doko vona. Na tahuna mu rata mavonga, bara mu rihi e Tuna, e Tamana.  
\v 25 E Isu i ta muholi ne hita ge habi ne hita a nimahuri vakaroro.   
\p
\v 26 A ngava nga, a here virihi e huriki a bakovi ri ngaru ni tami mua.  
\v 27 \x * \xo 2:27 \xt Ion 16:13\x*Pali mua, e Kristo i habi pali ne mua a Hanu Kiripiripi, i made turane mua. A Hanu Kiripiripi i tovo mua na maki lobo, lakea i uka ma ge tovo mua tara viri. I muholi hateka a hini i tovo mua vona, ra mu gu rihi e Kristo. I mavonga mu rihia.   
\s1 Ngane Hita a Tuna Vure  
\p
\v 28 Mua e huriki e tugu, mu rihi e Kristo. Mu rata mavonga, i uka ma mu gu maruhu na tahuna ge hamule valai.  
\v 29 \x * \xo 2:29 \xt 1Ion 3:10\x*E Kristo i malamala. I mavonga, e huriki ri ramai a naro malamala, ria e huriki a tuna Vure.   
\c 3  
\p
\v 1 \x * \xo 3:1 \xt Ion 1:12-13; 16:3\x*E Tamane hita i ngaru hateka hita, i gale hita e huriki e tuna. Ngane hita e huriki e tuna. E huriki a bakovi a ngatavine na malala i uka ma ri matakilala hita, a vuhuna i uka ma ri matakilalea a Vure.  
\v 2 \x * \xo 3:2 \xt 2Ko 3:18\x*Mua e huriki a turagu, ngane hita e huriki a tuna Vure. I uka ma si lohoka vona a kakaine hita ge mata navai muri ma. Pali si lohoka vona a ngava nga: na tahuna i hamule valai, bara si mapulo, si manga ia, a vuhuna si masia na matane hita, i mata navai.  
\v 3 E rei a viri i pasimata ni masia, bara i ramai a naro malamala, i manga e Kristo i malamala.   
\p
\v 4 A viri i rata vakaroro a naro hale, i putu puru vakaroro a vinara. A naro ni putu puru a vinara ni gale a naro hale.  
\v 5 \x * \xo 3:5 \xt Ion 1:29; 1Pe 2:22-24; 1Ion 2:2\x*Mu lohoka vona, e Kristo, i uka liu a naro hale ge ratea. I valai ge puga vuroki a naro hale.  
\v 6 Pali e rei a viri i rihi e Kristo, i uka ma ge ramai tabu a naro hale. E huriki ri rata vakaroro a naro hale i uka ma ri lohoka ne Kristo, i uka ma ri matakilalea.  
\v 7 Mua e huriki e tugu, mu matadoko, ma ge tami mua a viri tara. E rei a viri i ramai a naro malamala, ia a bakovi malamala, i manga e Kristo.  
\v 8 \x * \xo 3:8 \xt Ion 8:44\x*Pali e rei a viri i ramai vakaroro a naro hale, ia a bakovi ne Satan, a vuhuna e Satan i ramai a naro hale, i vakatubu hosi na nidoko na hunu a malala. A Tuna Vure i puru valai koea na malala ge vakalobo a leho ne Satan.  
\v 9 \x * \xo 3:9 \xt 1Ion 5:18\x*E rei a viri ni gale a tuna Vure i uka ma ge ramai tabu a naro hale, a vuhuna i bole pali a vilona Vure. Bara i keri ni ramai a naro hale, a vuhuna i bele manga a tuna Vure ngane.  
\v 10 Na naro iea bara mu matakilaka vona e rei e huriki a tuna Vure, e rei e huriki e tune Satan. E rei a viri i uka ma i ramai a naro kamumu, i uka ma i valai na Vure. A viri i marikoi e turana, ia tara i uka ma i valai na Vure.   
\s1 Mu Vangaru  
\p
\v 11 \x * \xo 3:11 \xt Ion 13:34\x*A ngava ni vara paru hosi i maea, “Mu vangaru.”  
\v 12 \x * \xo 3:12 \xt Vuh 4:8\x*Nahea si gi naro manga e Kain. Ia a bakovi ne Satan, lakea i rabalakia e tarina, i mate. I rabalakia a vuhuna a narona i hale, a narone tarina i malamala.  
\v 13 \x * \xo 3:13 \xt Ion 5:18-19\x*Mua e huriki a turagu, naha ni turutu na tahuna e huriki na malala ri marikoi mua.  
\v 14 \x * \xo 3:14 \xt Ion 5:24\x*Si lohoka vona, si ha taro pali a dala na matenga, si bole a nimahuri, a vuhuna si vangaru. E rei a viri i uka ma i ngarua e turana i tabana ni laho na dala na matenga.  
\v 15 \x * \xo 3:15 \xt Kap 21:8\x*E rei a viri i marikoi e turana, i manga a mari ni rabalaki a viri. Pali mu lohoka vona, e rei a viri i rabalaki a viri i uka ma i bole a nimahuri vakaroro.   
\p
\v 16 \x * \xo 3:16 \xt Ion 13:1; Gal 1:4\x*E Kristo i vakasiria ne hita a naro ni vangaru muholi. I mate na murine hita. I mavonga, hita ranga, i kamumu si gi ramai a narone Kristo, si gi lohopile mule hita, si gi vatuhori.  
\v 17 \x * \xo 3:17 \xt Vin 15:7\x*Pali a bakovi tara ge tahoka a mahala na malala, i matai e turana i bala a maki, pali i uka ma i dodoa, i uka ma i tuhoria, ngane a ningaru na Vure i uka ma i tabuli na hatena.  
\v 18 \x * \xo 3:18 \xt Iak 2:15-16\x*Mua e huriki e tugu, nahea si gi taki kunana si vangaru. Si gi vangaru muholi, si gi vakasiri na narone hita.   
\s1 E Huriki a Tara ne Kristo Ri Gi Pesi Tora na Matana Vure  
\p
\v 19 Na tahuna si vangaru, si lohoka vona si ramai a ngava muholi. I mavonga i luke a hatene hita na matana Vure.  
\v 20 Na tahuna si hataki manga si rare na matana Vure, si lohoka vona a Vure i rangi a niluhoi iea. I lohoka na maki lobo.  
\v 21 \x * \xo 3:21 \xt Hib 4:16\x*Pali na tahuna i uka ma si hataki manga si rare na matana Vure, si lohoka vona a Vure ge longo hita na tahuna si vasileki.  
\v 22 A ra maki si takia vona, bara i habi, a vuhuna si longototo a vinara vona, si rata a naro i vivi vona.  
\v 23 \x * \xo 3:23 \xt Ion 6:29; 13:34\x*A vinara vona i maea, si gi luhoi torea a rane Tuna, e Isu Kristo, si gi vangaru, i manga a hini i vakuku hita vona.  
\v 24 \x * \xo 3:24 \xt 1Ion 4:13\x*E huriki ri longototo a vinara vona ri rihi ia. Ia tara i rihi ria. Si lohoka vona si rihi a Vure, a vuhuna i habi ne hita a Hanu Kiripiripi.   
\c 4  
\s1 Si Gi Toha a Maka Nitovo  
\p
\v 1 \x * \xo 4:1 \xt Mat 7:15; 1Tes 5:21; 1Ion 2:18; 2Ion 7\x*Mua e huriki a turagu, e huriki a nitamina propet ri laho lae. I mavonga, naha ni longo mai a nitovo ne huriki a bakovi lobo. Mu toni a niluhoi ne ria, ri valai na Vure, o i uka.  
\v 2 \x * \xo 4:2 \xt 1Ko 12:3\x*A nitovo i valai na Vure, bara mu matakilaka vona maea: Bara i taki tala ne Isu Kristo i valai na Vure, i bele manga a bakovi.  
\v 3 \x * \xo 4:3 \xt 1Ion 2:18\x*Pali a maka nitovo i uka ma ri valai na Vure bara ri takia e Isu, ta i uka ma i valai na Vure. A maka nitovo maea i valai na hanitu, a pile ne Kristo. Mu longo pali ta ge valai. Ngane i bele pali.   
\p
\v 4 \x * \xo 4:4 \xt Mat 12:29; 1Ion 5:4-5\x*Mua e huriki e tugu, mua a tara na Vure. Mu rangi pali e huriki a nitamina propet nga, a vuhuna a Hanuna Vure, ra i made pololilo ne mua i rangi a hanitu, ra i made turane huriki na malala.  
\v 5 \x * \xo 4:5 \xt Ion 8:47; 15:19\x*Ria a bakovi na malala. A ngavane ria a ngava na malala. I mavonga e huriki a bakovi a ngatavine na malala ri longo mai ria.  
\v 6 Pali hita si valai na Vure. E huriki ri lohoka na Vure, ri longo mai hita. E huriki i uka ma ri valai na Vure, i uka ma ri longo mai hita. Na naro iea kunana, si matakilaka vona e huriki ri ramai a ngava muholi, e huriki ri ramai a ngava taminga.   
\s1 A Vure i Ngaru Hita  
\p
\v 7 Mua e huriki a turagu, si gi vangaru, a vuhuna a naro ni vangaru, a naro na Vure. E huriki ri ngaru e huriki e turane ria, ria a tuna Vure, ri lohoka na Vure.  
\v 8 E rei a viri i uka ma i ngaru e huriki e turana, i uka ma i lohoka na Vure, a vuhuna a Vure ia a vuhuna naro na nivangaru.  
\v 9 \x * \xo 4:9 \xt Ion 3:16\x*A Vure i rudu vilia na malala e Tuna a madiva, si gi bole a nimahuri vakaroro. Na naro iea kunana a Vure i vakasiri a ningaru dagi vona ne hita.  
\v 10 \x * \xo 4:10 \xt Rom 5:8-10; 1Ion 2:2\x*A naro ni ngaru muholi a viri i maea: Hita i uka ma si ngaru mugea a Vure. Pali a Vure i ngaru muga hita, i rudua e Tuna, ge a nihabi, ge kadoa a dala a Vure ge ravunu vuroki a naro hale ne hita.  
\v 11 Mua e huriki a turagu, a Vure i ngaru hateka hita. I mavonga hita ranga, si gi vangaru.  
\v 12 \x * \xo 4:12 \xt Ion 1:18\x*I uka tara viri ge masia a Vure. Pali na tahuna si vangaru, a Vure i made turane hita, i rata hita si gi vangaru hateka tabu.   
\p
\v 13 \x * \xo 4:13 \xt 2Ko 1:22; 1Ion 3:24\x*A Vure i habi ne hita a Hanu Kiripi­ripi. I mavonga si lohoka vona si rihi a Vure. A Vure tara i rihi hita.  
\v 14 Mia, mi masia na matane mia e Tuna, lakea mi vakalongo mua vona e Tamana i rudu vilia, ge korimule e huriki.  
\v 15 E huriki ri taki tala ne Isu ia a Tuna Vure, a Vure i rihi ria, ria ranga ri rihi a Vure.  
\v 16 Si lohoka vona a Vure i ngaru hita. Si roe vona a hini i ngaru hita. A Vure kunana a vuhuna a naro na nivangaru. E rei a viri i rihi a Vure, a Vure tara i rihi ia.   
\p
\v 17 Na tahuna si rihi a Vure, a naro na nivangaru i bele dagi ne hita. Muri, na parava a Vure ge pelekado e huriki vona, i uka ma si gi mangenge, a vuhuna si laho manga e Isu koea na malala.  
\v 18 E huriki ri ngarua a Vure, i uka ma ri gi mangenge na Vure. Na tahuna a naro na nivangaru i bele dagi ne hita, ra naro iea i valai na Vure, i uka ma si gi mangenge tabu na Vure. E huriki ri mangenge na Vure, a vuhuna ri rata hale. Ri lohoka vona a Vure ge habi a nimadihi ne huriki ri rata hale. E huriki ri mangenge na Vure ri vakasiri manga a naro na Vure na nivangaru i uka ma i leho pololilo ne ria.   
\s1 A Vure i Ngaru Muga Hita  
\p
\v 19 Si vangaru a vuhuna a Vure i ngaru muga hita.  
\v 20 E rei a viri i taki ta i ngarua a Vure, pali i mari koi e turana, ia i tatami. I uka ma i ngarua e turana, ra i masia na matana, pali ge ngaru navia a Vure, ra i uka ma i masia ma.  
\v 21 \x * \xo 4:21 \xt Mrk 12:29-31\x*A Vure i vakuku hita maea: E rei a viri i ngarua a Vure ge ngaru tabu e huriki e turana.   
\c 5  
\s1 Si Rangi a Nitoni na Malala  
\p
\v 1 \x * \xo 5:1 \xt 1Ion 4:15\x*E huriki ri takia a Vure i rudu vilia e Isu ge korimule hita, ria a tuna Vure. E huriki ri ngarua e Tamana bara ri ngaru tabu e huriki e tuna.  
\v 2 Na tahuna si ngarua a Vure, si longototo a vinara vona, si vakasiri manga si ngaru e huriki a tuna Vure.  
\v 3 \x * \xo 5:3 \xt Ion 14:15,23-24\x*E huriki ri ngarua a Vure ri longototo a vinara vona. Pali a maka vinara na Vure, i uka ma ri habi a maregoa ne hita.  
\v 4 Hita e huriki a tuna Vure, si rangi a maka nitoni na malala, a vuhuna si luhoi torea a Vure.  
\v 5 E rei a viri i rangi a maka nitoni na malala? A bakovi i lohoka vona e Isu ia a Tuna Vure i rangi a maka nitoni na malala.   
\s1 I Muholi, a Vure i Rudu Vilia e Isu  
\p
\v 6 \x * \xo 5:6 \xt Ion 1:29-34\x*A Vure i rudu vilia e Isu Kristo ge puru valai na malala. A Vure i vakasiri i rudua na tahuna e Isu ni vahilolo na naru. I vakasiri tabu na tahuna e Isu i mate na kai tavalavala, i tua a darana. A Hanu Kiripiripi i vakalongo hita vona i muholi, a vuhuna a Hanu Kiripiripi ia a vuhuna ngava muholi.  
\v 7 A maki i tolu to vakalongo hita ne Isu i valai na Vure.  
\v 8 \x * \xo 5:8 \xt Ion 15:26\x*A maki i tolu nga: a Hanu Kiripiripi, a naru, a dara. To vakalongo palupu a ngava i taku.  
\v 9 \x * \xo 5:9 \xt Ion 5:32-37\x*Si longo mai a ngavane huriki a bakovi tavula. Pali a ngavana Vure i muholi hateka. I vakalongo hita pali ne Tuna, i mavonga si gi longo maia.  
\v 10 \x * \xo 5:10 \xt Ion 5:36-40\x*E huriki ri luhoi torea a Tuna Vure, ri lohoka na hatene ria i muholi ia a Tuna Vure. E rei a viri i uka ma i luhoi torea a Tuna Vure, i manga i galea a Vure a bakovi na taminga, a vuhuna i uka ma i longo mai a ngava a Vure i vaka­longo hita vona e Tuna.  
\v 11 A ngava a Vure i vakalongo hita vona i maea, ge habi ne hita a nimahuri vakaroro. A nimahuri vakaroro iea i valai ne Tuna.  
\v 12 \x * \xo 5:12 \xt Ion 3:36\x*E rei a viri i laho turana Tuna Vure bara i tahoka a nimahuri vakaroro. Pali e rei a viri i uka ma i laho turana Tuna Vure i uka ma ge tahoka a nimahuri vakaroro.   
\s1 Si Tahoka a Nimahuri Vakaroro  
\p
\v 13 \x * \xo 5:13 \xt Ion 20:31\x*Iau a here a ngava nga lakene mua e huriki mu luhoi torea a rana Tuna Vure, mu gu lohoka vona mu tahoka a nimahuri vakaroro.  
\v 14 \x * \xo 5:14 \xt Ion 14:13-14; 1Ion 3:21-22\x*Na tahuna si takia vona tara maki, pali a maki si nana vona i ramai a ningaru vona, si lohoka vona bara i longo.  
\v 15 Na naro iea, si lohoka vona i longo a ninana ne hita. A ra maki si nanea vona, bara i habi kunanea.   
\p
\v 16 \x * \xo 5:16 \xt Mat 12:31\x*Na tahuna mu matai e turane hita tara i rata a naro hale, ra i uka ma i vakabele a matenga, mu vasileki vona, lakea a Vure ge habi a nimahuri vakaroro vona. Pali e huriki ranga, a naro hale ri ratea bara i vakabele a matenga. I uka ma a taki mu gu vasileki ne huriki ngi.  
\v 17 A naro hale lobo ri hale. Pali a naro hale ranga i uka ma ri vakabele a matenga.   
\p
\v 18 \x * \xo 5:18 \xt 1Ion 3:9\x*Si lohoka vona e huriki a tuna Vure i uka ma ri ramai tabu a naro hale. E Satan i keri ni padoi ria, a vuhuna a Tuna Vure i matakari ria.  
\v 19 Hita e huriki a ngate na Vure. Pali e huriki ranga, a nitora ne Satan i matakari ria.  
\v 20 A Tuna Vure i valai, i vakapalala a gine hita, si gi lohoka vona a Viri Muholi. Si rihia e Tuna, re Isu Kristo, a Bakovi Muholi. Ia a Vure Muholi. Ia a vuhuna a nimahuri vakaroro.   
\p
\v 21 Mua e huriki e tugu, mu malele ha na maka vure taminga.