\id HEB Baki 
\h Abe Kulo Ju 
\toc1 M̃esi Napano Ban Namoneano Nalo Na  ABE KULO JU 
\toc2 Abe Kulo Ju 
\mt2 M̃esi Napano Ban Namoneano Nalo Na  
\mt1 ABE KULO JU  
\imt1 Verialiano Moti  
\is1 Tukunuano bulati na niosi nei  
\ip Toro napano jiri m̃esi nei, naio jirio ba ban taara tai na namoneano nalo napano aju abiniua bogokouo ea kialo meuliano, bior napano tomu nalo na maka ave namoneano aju amilkueilo. Bajago nei napano tomu nalo na aju amilkuei ealo laka mila na nalo amial jikili, a vaataro atuvan kialo moneano ea Yesu Kristo. Naruei toro nei ber kalo ber monoka asikil atu sikili ea kialo moneano nene. Naio ber kalo ber Yesu Kristo ga naio be toro napano jiloglog Atua ban kito. A ka verial vite nei, naio berii vite tolu.  
\ip Vite na be moti, Yesu be Atua Kenerinio riano, a mia naio to bogo nonovio rivano maka rijikia ribisi. Mia be riano laka napano be Atua Kenerinio, mia naio mila kakar nioniag na bajago nei napano naio monea Atua, ea vite nalo na amila mijog bova eaio. Naruei bior napano naio be Atua Kenerinio, naio jo loa liei naverialiano nalo, a agelo nalo, bija bunu Mosis.  
\ip Vite juo nene, Atua berial ruei ka Yesu, naio be Parinio toro lu napano mia to o-o maka rijikia ribisi. Naio be Parinio Toro Lu napano loa laka ka toro lu nalo re nua.  
\ip Mia vite tolu nene, ea Yesu kiano im̃auano napano naio be Parinio Tubo naio m̃aro ka rilarur tomu nalo, bar bulag kialo kariano nalo milalo maka bunu amerou, a jian meuliano napano maka rijikia ribisi banlo. Sida nalo re nua abe kijokijo ga na sida napano Yesu Kristo milaio.  
\ip Ea mirano duelimo ba tai [11] toro na jiri m̃esi nei, naio berii tomu tealo na Verikariano Moruo napano amonea Atua kirisikili. Mia naio ber ka tomu nalo napano bivitauia m̃esi nei ba banlo, ber boka atakii kialo kijokijo nei, ka ajikia atu sikili bogo nonovio. Mia ea mirano duelimo ba juo [12], naio ber banlo, ber monoka asikil atu sikili ea kialo moneano, rivano-o rivokar juluvati na kialo meuliano. Mia bogo nonovio monoka aviti Yesu, ka amijikia avardulu bogokouo nalo, napano nalo aju abokario ea tomu nalo na aju amila jikili laka banlo. Mia ka rila nonovio kiano iliano, naio mil vatitig ban kiano tomu nalo, berkakar banlo ka monoka avitikar vatitig kialo meuliano.  
\is1 Torogio nalo na niosi nei  
\ili Iliano moti, Kristo berial Atua ban kito 1:1-3  
\ili Kristo loa laka ka agelo nalo 1:4—2:18  
\ili Kristo loa laka ka Mosis naio Yosua 3:1—4:13  
\ili Kristo loa laka ka parinio toro lu nalo 4:14—7:28  
\ili Verikariano vou loa laka ka verikariano moruo 8:1—9:28  
\ili Sida napano Kristo mila loa laka ka sida re nua nalo 10:1-31  
\ili Bajago na moneano bo laka 11:1—12:29  
\ili Iliano nalo napano ka rila tomu nalo asikil atu sikili, bija iliano maariano 13:1-25  
\c 1  
\s1 Yesu naio loa laka ka naverialiano nalo  
\p
\v 1 Bilbilu Ju nalo, beamu beamu laka binimei, ea m̃arabo telabo a ea bajago kinkin nene nalo, Atua na naio jom̃a berial kiano iliano vatelabo ban kiado tormoruo nalo, binimei ea kiano naverialiano nalo.  
\v 2 Mia voniganei, ea legiano na maaro nalo na kito rojua nei, naio mil ban kito jel ea kenerinio memedu Yesu. Kenerinio nene naruei napano beamu, ea tiiano na yetemeriba nei, Atua mim̃au eaio, ana na nalojuo ajii bogo nalo a vio nonovio, avona iorou kanio ana na Atua naio bitirilar kenerinio nei, naio mije vite nonovio monea jum̃ano be parinio kalo.  
\v 3 Kenerinio nene nei, Atua kiano mermerano mereralii kiano meuliano, jibe ka napano naio bar nonovio Atua mirano-o mia memedu garuei, naio be tovorovo na Atua kiano bajago. A moroano na kiano iliano naio jikili laka, naio ga bokar masosoua vite nonovio nalo na yetemeriba nei bija vio dolu nalo bunu aju bo. A bereio, naio naruei mijamo ka naio binimei milakon nono kiado kariano nalo biniu, mia bogo na mila nonovio kiano im̃auano na yetemeriba nei, ana naio bavin bereio tiniabene, ba jotano tivelinio vameruo na karam̃ano jum̃ano, napano be Barago na tiniabene.   
\s1 Yesu naio loa laka ka nailiano nalo  
\p
\v 4 Yesu jotano jibe na, naio toru mave loa ka nailiano nalo napano m̃a aju, bior siano na midu bior kiano im̃auano naio bo laka loa sialo.  
\v 5 Verver kito reial ea vivitauiano lu nalo, iliano miroano napano ju na m̃a aberenio Atua mila kenerinio naio loa lie vo ka nailiano nalo. Ea iliano nalo nei tai kalo, Atua mil ban kiano Naverikariano, naio berinavo  
\q1 \qt “Jau na, kiniou namial jibe ka banei jau kobinimei kobe keneriku riano, a kiniou nebe karam̃amo riano.” \qt* \rq Iouano 2:7\rq*  
\m A tai bereio jibe na bunu, naio berinavo  
\q2 \qt “Mia kiniou nemei neve karam̃ano, a mia naio rive keneriku.”\qt* \rq 2Sam 7:14\rq*  
\m Iliano juo nei, Atua maka lele river ka kiano nailiano nalo nei tai, river naio be kenerinio lu, mia ber ka Yesu ga.  
\v 6 Ana be iliano tai bereio, na naio berii bogo na Atua jidom riila kenerinio motoru nene rimei ea yetemeriba nei, ana na naio berenio  
\q2 \qt “Mo bo ka nailiano nonovio alotu ka naio.”\qt* \rq Tiut 32:43\rq*   
\m
\v 7 Mo tivelinio ka nailiano nalo, nalo amila im̃auano na bo telabo, naruei Iliano Lu beriilo berenio  
\q2 \qt “Atua kiano nailiano nalo, abar kiano iliano, ajibe ka jegi, amim̃au Atua kanano, ajibe ka sebi.”\qt* \rq Iouano 104:4\rq*   
\m
\v 8 Mia bogo na Iliano Lu ber Atua kenerinio, ber naio loa laka ka nailiano nalo, beriio jibena ka naio bevirare ka Atua, bio naio ka Atua. Berii naio berinavo  
\q1 \qt “Atua o, kanamo vio lu na m̃a kojojo tanea mia naio ritobo to. Nasitogo na kiamo navenatuboiano, na bajago memedu. \qt*   
\q1
\v 9 \qt Jau kajaaro m̃ele ka bajago na bo, mia maka kosidom keial bajago na kirivova, naruei na kanamo Atua Sop̃i midu larso kojo mave kojo loa ka kanamo bilbilu nalo, \qt*  
\q2 \qt naio mila burum̃ara saariano banso jibe ka amiovovuaso batitig ka bonotanunu maraiu tai.” \qt* \rq Iouano 45:6-7\rq*   
\m
\v 10 Ana ea iliano tai bereio, romial ka napano Atua Sop̃i bio kenerinio berenio Tubo, a naio berii vite nalo na m̃a naio milalo, berinavo  
\q1 \qt “Tubo, jau na naruei jau kobitirilar burupati na yetemeriba, jum̃amo ga mim̃auka vio iauo mave. \qt*   
\q1
\v 11 \qt Vite nalo nei, mia amdagdago, rivanvano-o mia avavakovio, mia jau kotobo koto. \qt*   
\q1
\v 12 \qt Tavukia m̃adayebe moruo tai, mia jau kojukilo a keyabulaglo, a tavukia kanamo m̃ada kulum̃arauo tai, mia jau kovarvar bulaglo, \qt* 
\q2 \qt ana mia jau koto kove terivou dam̃ariga, mia kanamo yuka nalo mia ribisi re bogo tai.” \qt* \rq Iouano 102:25-27\rq*   
\m
\v 13 Mia bereio, Atua kiano iliano dolu tai naio jo, napano maka leleio river ka kiano nailiano tai, mia naio berka kenerinio naio takurano ga, naio berinavo  
\q2 \qt “Jau koto tano ea jum̃aku tivelinio vameruo, jau koto tibena, rivanvano-o mia nala kiamo uolu nalo amei atavukia m̃adayebe tai na m̃a kovijankon jaamo eaio.” \qt* \rq Iouano 110:1\rq*   
\p
\v 14 Naina naruei be iliano na maaro ea tivelinio nei, na m̃a berii jum̃abe ka Atua kiano nailiano nalo na aim̃au kanano ga, nalo abe niununo nalo na m̃a abar kanano iliano, a nalo na ka m̃a ajai kito na m̃a rojev ioruriano, mia be toro tai jo napano naio loa lievo kalo, nina naio be Kenerinio Lu na Yesu, napano Atua mil maariano ban kito eaio.   
\c 2  
\s1 Ioluano Vou na bo na Yesu kanano naio loa lie ka Mosis kiano tuboiano moruo  
\p
\v 1 Ver tibena, iliano riano novo nalo na Ioluano Vou na bo na m̃a kito rojum̃a romijogio ruei, mia monoka rosidomii vetemii lievo kalo, monoka rovokarlo sikili rivu, ver p̃eli na, mia vier rivuru kito reielalo denlo bereio.  
\v 2 Tivelinio na tuboiano moruo re nua, nailiano nalo ga amidu binimei, mia iliano nene nalo amemedu ga bo, a ajikili. Nalakokoroviano na iliano nene nonovio, a jog volvoliano nonovio nene, sano mauo nene memedu jo ruei.   
\p
\v 3 Mia voniganei, Ioluano Vou na bo na terivou naio binimei bokar kito ruei, mia naio toru lie loa ka Tuboiano moruo na beamu. Jibena, ver kito rosidomii kurano ea m̃arabo na kiado ioruriano napano joaio, mia maka rejikia rovuro den kanano vironiano leleio. Kanado Tubo nene naruei naio mila Ioluano Vou na bo naio miyotuba jukamu, mia nalo na m̃a amijog naio ka m̃a berialio ea tilinielo nalo, nalo kija aberial sosolio binimei boru ea kito, amila meravo ka be riano.   
\p
\v 4 Mia Atua bunu miija iliano nei, napano m̃a mila vremesiano ninio nalo, a vite na vameneano nalo, a im̃auano nalo na kiano moroano, mia mave ka nina, naio biovio ka bulagio Niununo Lu kiano ijaiano nalo ban kito kei napano naio jidom rudu vanio. Ana na kito romial vite nalo nei ana romijikia ka Ioluano Vou na bo na Yesu Kristo kiano naio be iliano tai napano bo-o laka loa ka tuboiano moruo na kito kulo Ju kiado.   
\s1 Yesu be tubo ka yetemeriba na mia rimei navo  
\p
\v 5 Kito romijikia ka Yesu naio loa lie ka nailiano nalo bior ea tivelinio na yetemeriba na to rimei keano, mia Atua rudu re kiano nailiano nalo ka ave tubo eaio, mia naio rudu totano yetano ka kenerinio.  
\v 6 Vite na niosi moruo berenio bunu, ea Barago Teviti kiano iliano tai napano berka Atua, naio berinavo  
\q1 \qt “?Vite novo venia na joa toro, mila na jau kojidomii m̃elea naio jibe na? \qt*  
\q2 \qt ?P̃elina venia mila na jau kojom̃a komiyotuba ka kulorinio kenerinio? \qt*   
\q1
\v 7 \qt Beamu, jau komidu naio jotano ka nailiano nalo, mia nina naio be tena bogo bulati ga, mia voniganei, jau kobitirilar naio bereio ruei, \qt*  
\q2 \qt jau komidu naio joa vio na loa laka tai mave bija kiano burum̃ara mermerano a kiano m̃arouano, \qt*   
\q1
\v 8 \qt jau kabar vite nonovio ajutano ka kiano moroano.” \qt* \rq Iouano 8:4-6\rq*  
\p Mia bogo na Atua mila kiano toro be parinio ka vite nonovio, mila na maka ve titai leleio napano naio maka rive tubo kalo. Naio mila ka mia tibena, mia binimei bokar vonganei, mia maka reial ka mirado vo ka vite nonovio nalo na yetemeriba nei naio rivokar jeleigio na Atua naio jidomii kanio.  
\v 9 Mia vite nalo naio makanio vo, mia dam̃ariga kito rotu resirarago ka Yesu, napano Atua bitirilar naio loa loa laka. Beamu, Atua naio tinien miia kito toru laka, ana na naio miila Yesu naio batove telisu ka bogo tai ga, mila naio batove yetano ka nailiano nalo, ana mila naio jen tanea jogvaiano napano m̃aro ka kito nonovio, mia iorou kanio, ana naio bitirilar naio bereio, miyovovua batitig naio bo bija mermerano na vio mave.   
\s1 Yesu naio be kiado ioruriano, naio be kiado parinio toro lu  
\p
\v 10 Atua kiano bajago na im̃auano na ka naio rilarur kito naio memedu, bior naio jii vite nonovio, a vite nonovio be kiano, naruei naio jidom ka mia naio tovulu meran bereio burum̃ara taara na kenerinio nalo ataluvo den yetemeriba nei, amei ave kiano bereio. Naio jidom ka rila tibena, mia ka rim̃auka tibena naio kirisikili laka, naruei naio mial m̃arabo tai ga ka rilaio, naio jibenei: be Yesu kiano m̃arabo na jogvaiano, napano mia Atua mila naio binimei be toro, naio be toro na m̃a je dulu m̃arabo ka tovulu kiado ioruriano.  
\v 11 Yesu naio mijikia tukamu ka kito tibena bior naio na m̃a milakon kito romeravo, mila na naio jaaro ka rial kito tibe ka robe m̃aratavo takurano ga kitoliko naio.  
\v 12 Kiano iliano tolu ban Atua ber jibenei. Tai joa niosi na Iouano, naio ber jibenei, naio berinavo  
\q2 \qt “Mia kiniou naverial siamo na bo van kuruaku nalo, mia kiniou navameneaso tukamu ka kulorinio nalo.” \qt* \rq Iouano 22:22\rq*   
\m
\v 13 Mia dolu nene naio berial ka Yesu naio monea Atua jibeka na kito romonea naio, be iliano na joa naverialiano Aisea, naio berinavo  
\q2 \qt “Kiniou nei, kanaku monmoneano nomidu joa naio.” \qt* \rq Ais 8:17\rq*  
\m Mia nana maariano, iliano tai bereio ea Aisea, naio ber Yesu bija kuruano nalo, naio berinavo  
\q2 \qt “Ninei be kiniou nene nei nojo nei kumemliko Atua kenerinio dolu nalo napano naio barlo ajua jum̃aku.” \qt* \rq Ais 8:18\rq*   
\p
\v 14 Mia kito robiniu robe Atua kenerinio nalo kia nei, kito robiniu robe kulorinio, bija niabedo a kiado burukija, mia ka Yesu rimei rive kuruado be riano, naio binimei ea yetemeriba nei, midu niabene a kiano burukija jibe ka kito ga. Tibena, mia bogo na naio mijamo ka bereio, naio m̃aro bior kito, naruei kiano m̃ariano nei naio muelar moroano na parinio tubo na kirisikili na m̃ariano kiano, nina be Sim̃aro.  
\v 15 Naio muelar Sim̃aro kiano moroano, ana naio mijubar bulag teli nalo na merouano na m̃ariano na amiorkakar tanea niegeniege kito, napano mila kito romijog bova biorio ea kiado meuliano momou.  
\v 16 Riano ga na, Yesu kiano im̃auano novo na ijaiano nene, naio maka rila rivan nailiano nalo na vio mave, mia naio mila ban kito tomu na yetemeriba nei. Iliano telabo na m̃a aber vite na jibena, aberinavo  
\q2 \qt “Naio jom̃a miija batitig tormoruo Epraamo kiano bajulukuti nalo.” \qt* \rq Ais 41:8-9\rq*   
\m
\v 17 Naina naruei be Atua kiano jidom-iano naio jibenei. Naio mial bo ka mia Yesu naio rimei tibeka ga kito kuruano nalo ea vite nonovio, rivanvano-o mia mijikia rijikia vatitig kito rivu, naio mijikia tinien riia kito. Ana mia kito ravarkar tiniedo ea naio, ka mia naio riviekouo ea im̃auano na mia naio rila van Atua rivior kanado kariano nalo, napano naio mila kiado merevuiano bija Atua, jibeka naio be kiado parinio toro lu.  
\v 18 Naio mial burum̃ara lavoniano na miyotuba ka kiano meuliano, naio mijog bova bano-o na naio jovulio, mila naruei naio mijikia rijai vatitig kito bereio rivu ka bogo na lavoniano naio binimei jikili bunu ka kito.   
\c 3  
\s1 Yesu naio loa laka ka tormoruo Mosis  
\p
\v 1 Kuruaku a kuvivinioku lu nalo, na m̃a kamiu kumonea vioano na mave ruei, kiniou neber ruei ka kamiu ka Yesu naio mijikia rijai vatitig kito rivu, mia naruei nejikili ka kamiu, nejidom na ver bo ka kuvilavon ka kuvisidomial naio lie vo, tibeka na naio be atevi a naio be parinio toro lu na kanado moneano.  
\v 2 Ralavon ka revitii vatitig Yesu naljuo tormoruo Mosis re nua nei. Tormoruo Mosis re nua, naio biekouo laka ea kiano im̃auano ea Atua kiano m̃aratavo, a Yesu bunu naio biekouo laka ea kiano im̃auano, na m̃a Atua bitirilar naio ka rilaio.  
\v 3 Nalo abe juo abiekouo ea im̃auano, mia Atua bitirilar Yesu naio loa lie laka ka Mosis, bior naio jibeka na Mosis naio jo joomo ea Atua kunuano naio jom̃a mila kiano im̃auano sesa nalo eaio, mia im̃auano na toru ka avitirilar yimo nei, Yesu naio takurano mim̃aukanio.  
\v 4 Yimo nonovio, monoka ve toro tai na ka m̃a riim̃aukanio, ana Yesu nene naruei naio mim̃auka Atua kunuano, mia Atua naio be parinio ka im̃auano na ga.  
\v 5 Jibena, Mosis naio be toro na im̃auano, na kirimemedu bo ea kiano im̃auano nonovio na jouro ea Atua kiano m̃aratavo, rivanvano-o rivokar ka na m̃a naio be toro na m̃a berverial Atua kiano iliano nalo na burutomormoruo na m̃a ajum̃a aberial lilianlo binimei bokar voniganei,  
\v 6 mia Kristo naio mila lievo, bior ka naio biekouo ka rivitikar im̃auano na burutomoluo nonovio ea yimo nei, jibeka na naio be kenerinio motoru kar garuei ka naio be napano boru na yimo nene.  
\p ?Ana yimo nei naio jom̃a ber venia, p̃elina ber kei? Naio jo ber kito ga, bior ka na ver romerou re, a ver rajaa-ro ka kiano verikariano nalo, rovokar vatitig rivu kiado verikario ealo, mia kito rove kiano m̃aratavo lu memedu.   
\s1 Yesu naio loa ka Mosis, a kito monoka romonea van lievo tuvulu nalo na Mosis jukamu kalo  
\p
\v 7 Be iliano tai joa vivitauiano lu, napano naio be iliano na Niununo Lu ka labon kito, napano naio ber jibenei, naio berinavo  
\q1 \qt “Banei, ver kamiu kuvijog joono, \qt*   
\q1
\v 8 \qt maka rivu ka kenemiu jidomiano rimei sikili bereio, tavukia na kenemiu tormoruo nalo amilaio. \qt*  
\q2 \qt Beamu ea vio iauo, ajua bogo tai na lavoniano toru laka, aju banbano-o karina ajumolu amila pariparilo bereio. \qt*   
\q1
\v 9 \qt Naruei Atua mial lo, ana naio ber jibenei, berinavo. \qt*  
\q2 \qt Ea kialo ieliano ka yuka duelimo va ver [40] nei, dam̃ariga kiniou nojo bijalo, amial kanaku ijaiano novo na banlo, mia kialo bajago nalo na aju amilavon kiniou laka. \qt*   
\q1
\v 10 \qt Kialo veribinio nei naio mila tinieku bilulu m̃ele, ana namial jibe makanio, nalo na julaka ga ajum̃a aburvuru dedade ealo ajanea vio ajum̃a ajaluvo den kiaku m̃arabo na memedu nalo. \qt*   
\q1
\v 11 \qt Tinieku m̃aro ka nalo na jibe na ruei, tinieku kiri seri tanealo, naruei nojumolu namila verikariano tai, neberinavo buruvenuo na jilimebiano novo na kiniou namila batitigio bo jo kalo, mia maka ajikia ava jouro ea bereio.” \qt* \rq Iouano 95:7-11\rq*   
\p
\v 12 Kuruaku nalo bija kuvivinieku nalo, bior vite nalo na mia bo ka mia kamiu kuvitikar kamiu rivu. Maka rivu ka mia kamiu tai, jidomiano na bova toa naio, p̃eli kiano iviso rimonea re bunu, ka mia rila naio rivan bereio taluvo den meuliano nabo na Atua na meul kiano.  
\v 13 Maka rosidom ka mia kito tai rijoru tibena, naruei monoka rotunukakar kito dam̃ariga ka legiano nonovio, ka mia ve re tai ka kito napano bajago na kariano atum̃a atubolbolili lelan naio rivano-o mia rimenini nonovio. Iliano na mave na ber “Banei, ver kamiu kuvijog joono Atua,” mia naio be iliano na beamu tai, mia naio ju jikili kia ga vo, joono naio jom̃a bio kiaga vo, kito rojua legiano nalo na jogvaiano kiaga vo.  
\v 14 Bokanio kito rovokar vatitig sikili kiado moneano ea naio tavukia ga na m̃a rojum̃a romonmonea jukamu, bo ka kito rotu sikili rivanvano-o rivokar jukuti. Ana vere rotum̃a ralala ga tibena, mia kitoliko Kristo, kito tomu nalo na m̃a ravar bitiran Atua kiano mermerano novo nalo rivija naio.  
\v 15 Rian ga na, iliano lu na mave naio ber jibenei ber maka rivu ka kenemiu jidomiano rimei sikili bereio, tavukia nanua m̃a kenemiu tormoruo nalo amilaio ea kialo bogo na lavoniano beamu ea vio iauo, napano ajumolu bereio amildie Mosis.   
\p
\v 16 ?Mo nalo na m̃a amila parilo jikili jibena, nalo abe kenia? Nalo na m̃a amila jibena, nalo na m̃a beamu ajaaro ka m̃a amidu Atua joono ruei, abatove ka kialo tor na toru Mosis, naio jukamu kalo ajaluvo den Ijivi. Naio jukamu kalo abatavio, mia maka vesiou, ana amildie naio bereio.   
\p
\v 17 ?Mia nalo na m̃a amilavon Atua, ajuljulu tiniene ka yuka duelimo va veri [40] nei ea kialo burutili m̃arabo nei, banbano-o na naio tinien jerlo toru, nalo nene kiaga nei vo, a? Ee nalo na m̃a amila jibe nei, nina nalo kiaga nene kiana vo na, napano naio milarurlo, mia iorou kanio ana ajum̃a amila kariano dam̃ariga ea mirano, mia iorou kanio ana naio milalo napano am̃arm̃aro ga, salo buriu nalo abe dedade ea vio iauo.   
\p
\v 18 ?A nalo na m̃a naio berkar ber mia nalo ajikia lele re ka mia ava jouro ea kiano buruvenuo novo na jilimebiano napano naio mila batitigio be kanalo, nalo abe tomu na ajum̃abe? Nalo na maka ajikia avano, nina nalo na m̃a amila pariparilo, a nalo na m̃a maka adu niono.   
\p
\v 19 ?Mia venia na mila napano maka ajikia ava jouro ea vio novo na jilimebiano nene? Maka ajikia avano, bior maka amonea kar Atua, maka avarkar tinielo ea naio.   
\c 4  
\s1 Jilimebiano lu na Atua kanano tomu nalo kialo  
\p
\v 1 Naruei beamu, Atua naio mila batitig kiado tormoruo nalo kanalo vio novo na jilimebiano tai, mia voniganei naio mila batitig ber ga bunu kiado jilimebiano lu tai ruei jibe na. Verikariano na jilimebiano na naio meul batitig bo jo kiana vo, naruei maka rivu ka kito rotibe ka kiado tormoruo nalo nei, napano amilaluvu kialo jilimebiano nene, nalo miroano maka ava jouro eaio. P̃eli bo ka kito rotu rovitii vatitig kito rivu, maka rivu ka rotu ga o-o mia kito tealo nalo bunu alaluvu kialo bogu, avitiilo ka maka ajikia avokar kialo jilimebiano.  
\v 2 Nina bior kito rabare ga ka kiado tormoruo nalo nei, ka lilianiano na bo na Atua kiano binimei bokar kito, javukia napano bokarlo, mia nalo amila jibe ka amijogio, mia maka ajedu moneano mave kanio. Nalo maka aje batitigio rimon ea kialo meuliano, naruei iliano nei maka rivar m̃arati ealo.  
\v 3 Naruei ea tivelinio na nalo na maka amonea naio jibe na ana na Atua mil jikili ruei, naio berenio iliano na kiniou nebivitauia mave vaarakurano garuei. Iliano nene naio berinavo  
\q2 \qt “Nalo na amila m̃a tinieku jerlo toru laka, naruei neberkar ka mia ajikia re avokar kanaku jilimebiano nei.” \qt* \rq Iouano 95:11\rq*  
\p Mia kito na ga kito romonea naio riano, jilimebiano nei naruei naio be kiado, ka rava jouro eaio.  
\p Atua kiano jilimebiano nene, naio mila batitigio bogobe ruei jo be kiado, bior ka bogo na tiiano, naio mim̃auo ea legiano ari nei o-o biniu,  
\v 4 ana jibe ka Iliano Lu naio ber kovio tai navo, ka legiano aluo, mia naio mijilimebi ka kiano im̃auano nalo, maka bunu rim̃aukalo bereio.   
\p
\v 5 Ana vite takurano bereio, be iliano na mave naio berii Atua ka naio berinavo mia tomu tealo ajikia re avokar kanano jilimebiano,  
\v 6 ana na iliano nei mila kirimeravo ka monoka ve tomu nalo na vio dolu tai bereio na mia Atua naio rijamo kalo ava jouro eaio. Nalo na beamu, amijog Atua kiano lilianiano vou na bo, bija buruvenuo na berkario ka ve kialo, mia maka atu sikili, maka amonmonea, mia nalo amilaluvu tanea garuei, maka ava jouro eaio.  
\v 7 Mia kiado jilimebiano jo kiano vo, a Atua jekar legiano nene memedu ka mia rovokario, bior yuka miroano barlaka ruei, avona bisi, ana na parinio tubo Teviti naio berial iliano nalo na aju mave ruei, napano naio ber jibe nei, berinavo  
\q2 \qt “Banei, ver kamiu kovijog joono, maka rivu ka kenemiu jidomiano nalo amei sikili bereio.” \qt* \rq Iouano 95:7,8\rq*  
\p Bo ka rovitilubar ka “banei” napano naio berenio ea vio nene nainei naruei kito rojua nei ruei, napano Atua jekar ka ber bogo nene memedu ka rovokar ioruriano eaio.   
\p
\v 8 Kuvisidomii von tormoruo Yosua nei nua. Naio jukamu ka kiado tormoruo nalo nei togio abano jouro ea buruvenuo novo napano Atua berkario, a ver naina naruei naio be Atua kiano jilimebiano na amijevio ruei, mia Atua maka bunu rijikia riverii bogo dolu tai bereio ka Teviti, ka river be legiano na va jouroiano ea kiano jilimebiano.  
\v 9 Ana makanio, naio jom̃a ber be jilimebiano lu tai naio jo keano be kiano tomu nalo kanalo,  
\v 10 mia ver kei na riva jouro eaio, mia rivu mia rivu ka naio, naio mijikia rijil mebi ka kiano im̃auano nonovio, tavukia na Atua naio mijilimebi ka kanano.   
\p
\v 11 Ver tibena, bo ka kito resikili ka ravokar jilimebiano lu novo na, maka rivu ka mia kito tai bunu rimonmonea re Atua, ka mia rilaluvuio.   
\s1 Atua kiano Iliano na bo laka  
\p
\v 12 Kito rojutano ka Atua kiano iliano, bior kiano iliano naio meul, naio jom̃a mim̃auo jikili laka, naio mijikia julu dulu toro kiano meuliano, naio mali laka jovulu iobogu na mira napano mali ea ikiti be juo. Atua kiano iliano naio mijikia riovodulu riva joomo ea kito, riva tibure venia napano joa kiado jidomiano, p̃eli vitii venia napano joa niunudo.  
\v 13 Nao, naina mia rivitii kiado meuliano, mirano joa vite nonovio, maka kito tai napano mijikia toluku ka naio. \fig Mijikia julu dulu toro|alt="Two-edged Sword" src="59_Heb4.12_Two-edgedSword.tif" size="col" loc="Top right" copy="Gordon Thompson" ref="4:12" \fig*   
\s1 Yesu be kiado parinio toro lu  
\p
\v 14 Atua mijikia vite nonovio ea tivelinio na kito, mia siva ga kanio ka napano kenerinio, kiado parinio toro lu na toru na Yesu, naio juvan vio nei naio mijaka ban ea kiano vio mave niogovu, naio ba mila merevuiano ban Atua kar kito bereio. Mo bior naio jom̃a mila batitig kito bo bija Atua jibe na, mia bo ka rovokar sikili kiano moneano, bo ka rotuvan re naio bogo tai leleio.  
\v 15 Kiado parinio toro lu nei, naio maka ve tai na m̃a maka rijikialubar kiado mijikikiano, mia naio mijikia vatitig ka kito maka m̃a rotumolu rotu sikili laka. Naio tinien miia kito, mia naio rijai kito, bior beamu naio bunu, juboluboiano nalo abinimei kirisikili laka ban naio ka tivelinio nonovio, jibe ka ga napano m̃a ajum̃a abinimei ea kito. Naio javukia ga kito, mia vite takurano ga, juboluboiano maka rivuru naio rijoru ea kariano leleio kija garuei.  
\v 16 Jibena, ana kito romial ka napano robe kiado m̃arabo naruei napano romijikia ralavon ka rojian kija kito romei vaataro ka Atua kanano jobaro lu, napano be burupati na tiniememiano. Kito romerou re bunu, rasaaro ga ka romei ea Atua, ana na mia rovokar kiano tinieiiano ea kiado meuliano, rovitiio ka kiano tinievuiano naio mijai kito ea bogokouo vaio na rojoaio.   
\c 5  
\s1 Yesu be parinio toro lu na m̃a tinien miia ea toro  
\p
\v 1 Nalo nam̃a abokar im̃auano na parinio toro lu, abitiri bulaglo den kulo lu dolu nalo ka aim̃au tibena naruei. Parinio toro lu naio be toro tai na mia tumolu to iviso ka tomu nalo a Atua, ka mia sian ijaiano nalo p̃elina sida nalo na kialo riva naio, ka naio mijikia riviekokoa kialo kariano nalo.  
\v 2 Parinio kulo lu nei naio bitilubar batitig bo ka na m̃a tomu nalo amim̃au bova, ajum̃a amiel belbele amilaluvu m̃arabo, bior naio bunu be sunbue, mijikia jikia, naruei naio mijikia tinien miia tomu dolu nalo riano, mijikia melokloko vanlo.  
\v 3 Naio a javukia ga tomu dolu nalo, naruei bogo na m̃a mila jokoluolu nalo, monoka rila, maka ka tomu nalo ga kialo kariano, mia bior kiano kariano bunu.  
\v 4 Bior vite na, maka rivu ka tor tai ga rivijauia naio bereio ka naio river bo ka naio rimei rive parinio toro lu, makanio, mia Atua ga mijikia rivijauialar toro na mia mijikia rudu sio na toru na jibena, jibeka naio bijauialar tormoruo Erono re nua naio be kiado parinio toro lu na be moti garuei.   
\p
\v 5 Ana tivelinio na Kristo kanano naio jibena bunu. Naio be kiado parinio toro lu na toru, mia maka rivevavinia naio ka river naio jibena, mia Atua ga bitirilar naio. Atua kiano iliano na m̃a ber jibena naio jikili jua vivitauiano lu moruo nalo re nua, napano tai ber jibe nei, naio berinavo  
\q2 \qt “Jau na, kiniou nemial jibeka banei jau kobinimei kobe keneriku riano, a kiniou nebe karam̃amo riano.”\qt* \rq Iouano 2:7\rq*   
\m
\v 6 Mia dolu naio ber jibe nei ber  
\q2 \qt “Kiniou nomiduso kojo javukia tormoruo Melkeseteki, jau kobe parinio toro lu na maariano na ea kiano bajulukuti, ka na mia jau kovokar im̃auano nei rivan mia ribisi deio.” \qt* \rq Iouano 110:4 \rq*   
\p
\v 7 \x - \xo 5:7 \xt Mat 26:36-46; Mak 14:32-42; Luk 22:39-46\x*Atua midu im̃auano nei ban Yesu, naruei romial ka bogo na kiano meuliano na ea yetemeriba nei, naio milaiio ruei. Dam̃ariga naio jom̃a jidom yetemeriba nei toru laka, naruei naio jegi ban Atua, sano jogumirano miou biorio. Naio jom̃a biekouo jikili ea Atua ka ver kiano meuliano rivakovio, mia Atua rila naio rimeul bereio, naruei naio jikili lie ka m̃a bolkouo bior kito ban naio.  
\p Ana na Atua naio tinien miia, bitii kiano bajago novo na namelumuano a navatoveiano na Yesu kiano, ana na mijog kiano viiano.  
\v 8 Be riano ka Yesu be Atua kenerinio ruei, mia Atua naio mijamo ka jogvaiano na jikili nalo amiyotuba kanio, jidom ka riverloglog Yesu ka rivokar vatitig rivu bajago na monmoneano ea kiano meuliano.  
\v 9-10 Naio batove ka karam̃ano kanano sidomiano nalo abiniu, bano-o na mila nonovio im̃auano na Atua midu banio, mila na Atua bitirilar naio javukia tormoruo Melkeseteki. Jibena, Yesu binimei be Atua kiano parinio toro lu, binimei be burupati na meuliano na maka rijikia ribisi, na kiado robiniu napano romijogkar naio.   
\s1 Bo ka romei romeruo rivu ea Kristo  
\p
\v 11 Naruei sio nei Melkeseteki, naio be kiano tukunu moruo na bo nalo aju, napano amijikia ala rimeravo rivu van kamiu jum̃abe ka tete na bija kanano im̃auano. Kirisikili ka avisivisii rivan kamiu, bior be bogo tai napano m̃a burutiliniemiu nalo abonvono kija. Mia ver kamiu kuvilavon ka kuvijoglubarbario,  
\v 12 \x - \xo 5:12 \xt 1Kor 3:2\x*mia rivu, bior kamiu kumonea bogbe ruei, mia memedu ka kumei kuve naverloglogiano na iliano lu na Atua kanano ruei. Ana makanio, kumitu jibena ga, ka mia averloglog ka kamiu bereio, tikar bereio ea burupati na iliano nalo na kiano.  
\p !Riano ga na, kamiu na ka mia kuvisen sinaniano na jikili ruei, mia jibeka napano kumitum̃a kumisidom kumunu yu kia ga vo!  
\v 13 Kulo be na m̃a ajum̃a ajidom amunu yu jibena kia ga vo, nalo abe kiritete kia ga vo, tenene na maka ajikia ave masou rivu ka iliano na m̃arabo na memedu,  
\v 14 mia nalo na m̃a ajum̃a ajen sinaniano nalo na kirisikili, na ameruo bo ruei. Nalo na ajibe nei, kialo jidomiano nalo amim̃au bo bano-o abitii lubarbar vite nalo nonovio, naruei amiluo abinimei abo bokar nana abitilubar vatitig vite venia nalo na bo a vite venia nalo na bova.   
\c 6  
\s1 Bo ka rovitikar vatitig kito ka rava iorou re bunu  
\p
\v 1 Bior jidomiano nalo na, mia bo ka kito rotuvan bajago na kiritete naio to, rava lie rivija Kristo kiano verloglogiano na jikirkili jibe na, napano amemedu ka jidomiano nana mermeruo bo. Kito robilig kito den im̃auano va nalo na m̃ariano ruei, kito robokar viekouoiano ea Atua ruei, ana maka rivu ka rotum̃a rajajaloa bereio. Naio jibe ka na romilakon jeleig yimo ruei, mia be bogo na rotu rovitirilar tu sikili naruei.  
\v 2 Ajiloglog kito ruei ka varueiano, a ajokol pariparido ruei, romonea ruei ka mia rotumolu bereio den m̃ariano, a romijikia ruei ka tibureiano tai jo bija kiano vironiano napano mia tomu na bova mia avokar rivano-o mia rijikia re ribisi bogo tai. Mia vite nalo na kito romiovo dulu ealo ruei, mia maka rivu ka rotum̃a rataki jaado ka m̃a reseliviv ea vite nene dam̃ariga, mia bo ka rotu rava lie vo vija kiado Tubo.  
\v 3 Vite na kirisikili, mia ver Atua naio rijamo ka ga rivan kito, mia romijikia ga ka roim̃aukanio.  
\v 4 Nao, mia kito monoka ralavon ka rotu rava lie vo rivija naio dam̃ariga, mia tum̃abe ka nalo na amijoru, aban bereio ruei? Nalo na beamu amiel bo ea miamoiano, a ajum̃a ajinan ea tiniavio na vio mave ruei, a Niununo Lu binimei ealo bunu, mia bogo na m̃a aban bova bereio jibe na, mia maka bunu ajikia aviliglo amei bereio ea meuliano na bo.  
\v 5 Atua kiano Iliano Lu naio miija batitiglo bo ea kialo meuliano, ana abokar kija moroano na navenatuboiano napano jo binimei,  
\v 6 mia bogo na m̃a abilig bereio taakalo, amila pariparilo jibe na, mia tum̃abe ana ajikia amei bereio rivu? Makanio, mia rivova laka vanlo, bior ajum̃a amila jibe ka napano ajukukakar Atua kenerinio mave ea m̃akolkolo bereio, ka jum̃alo nalo, tibe ka napano ajum̃a amidular naio ea tomu nalo miralo ka aiolua searia siano bereio.   
\p
\v 7 Kuvisidomii von ninei. Borotano na m̃a jo munu yuo nam̃a jibirbili julaka eaio, mia naio bar m̃arati miroano ka nalo napano aim̃au eaio, ana mia Atua jaaro toru kanio, kiano ilivuiano joaio.  
\v 8 Mia borotano na na maka rivar tena bo, bar ga soro na bova, naio jibe ka napano aberkar m̃ariano ga banio, mia maka ajikia ala tena bo tai eaio, mia aisebio ga.  
\v 9 Be riano laka banalo, iliano nalo na jibe na ajikili laka, mia tivelinio ka kamiu, maka rosidomii ka kumitibena. P̃eli ga, kiniou nabarkar tinieku ea kamiu, ka m̃arati na bo nalo na meuliano vou ajum̃a amiluo bo ea kenemiu meuliano kia navo.  
\v 10 Kiniou nomonea Atua ka mia naio tiniene ribobogia re kenemiu im̃auano na bo nalo ka mia naio sidomii ve iakurano re ea kenemiu bajago na bo na tinietiiano a auaiano ka na kumila banio, ka bogo na m̃a kumijai kiano namoneano lu dolu nalo. Kamiu kumim̃au bo jibe na mila na Atua jaaro toru laka kanio, mia naio bunu rila rimemedu a rivu ka kamiu.  
\v 11 Tibe na, ana mia nojidom notunukakar kamiu bereio, ka kamiu kuvan re bunu, kuvisikili ka kuva lie vo rivano-o rivokar jukuti nene, ka mia monoka kuvokar vatitig vite nonovio na m̃a kenemiu jidomiano joaio.  
\v 12 Kamiu kuviovo re, niabemiu rimelukluku re, mia kuvim̃au sikili rivare ka kiado tormoruo novo nalo nanua m̃a abokar masosoua im̃auano nalo, napano kialo jidomiano nalo terebievi bano-o na abokar vite nonovio na Atua berkario beamu ruei banlo.   
\s1 Atua kiano verikariano be riano laka  
\p
\v 13 Verikariano tai na jibe na, Atua mila ban Epraamo, napano naio berkar jikili banio ea tivelinio na yati nalo na mia ayotuba eaio. Maka ve sio dolu napano Atua naio mijikia river ka rila kiano verikariano nei naio sikili, bior siano naio loa laka ka sio dolu nalo, naruei Atua berkar ea siano bereio, naio berinavo   
\q2
\v 14 “Kiniou Atua, kiniou neilivu kaso ve toru, ka mia nala kiamo bajulukuti amei ve miroano laka ea yetemeriba nei.”   
\p
\v 15 Mia vaataro ka Epraamo rimonea re iliano nei, mia naio mial ka napano Atua mila kiano verikariano nei jikili bo laka, mia be kurano Epraamo bokar bogokouo miroano, mia naio maka tuvan verikariano nei, naio bokario bo bano-o na naio jikar ka bokar venia na m̃a Atua berkar banio.   
\p
\v 16 Ka tivelinio na bajago na ala verikariano jikili, tomu nalo ajum̃a aberii tor lu tai siano p̃elina vite lu tai. Mia bogo na tomu dolu amijogio, monoka amonea ga, maka bunu ajikia ail mum̃ii ka bereio, bior sio na aber naio mila iliano nene tu sikili.  
\v 17 ?Mia jum̃abe ka Atua? Naio bunu tinien jii ka rila kiano iliano ea kito sikili rivu, ka mia romonmonea, maka rejikia rovitovitonia naio kanio. Kito rojibe ka kiritete nalo na mia ravar kiano jajum̃ano, naruei naio jidom ka rejikia rive riano ka kiano jidomiano na bo ka kito naio maka rijikia ribisi bogo tai, naruei naio milakar verikariano nei ban kito naio jikili bo laka.  
\v 18 Atua kiano verikariano ka kito jibe na naio bo, naio jikili ruei, bior naio maka rila sibi bogo tai, kiano iliano maka rijikia rive dolu bogo tai, mia mave ka kiano verikariano, berkar bija siano lu bereio. Ana vite juo nei, kiano verikariano bija siano, naljuo amim̃au biju ka rila kito rotumolu rotu sikili ea kiano iliano. Kito roburo den vio na bova nanua m̃a rojujua mugaruei, rojum̃a rojiravo vio na tolukuano, naruei Atua kiano verikariano na bo nalo amila kiado jidomiano rimei rive tebievi rivu. Tibena mia kito romijikia rava rovokar vatitig rivu vio novo nei napano Atua naio mila batitigio bo midu jo kamu ea mirado. \fig Yesu naio jibeka veru na m̃a bokar uako jo|alt="Anchor" src="59_Heb6.19_Anchor.tif" size="col" loc="Top right" copy="Gordon Thompson" ref="6:19" \fig*   
\p
\v 19 Mia kiado moneano kouo nene, napano rober ka mia Yesu rilarur kito, naio be jidomiano tai napano jibe ka veru na m̃a bokar batitig uako jo. Mia naio rivokar vatitig kiado meuliano rivu, ka mia ve re titai napano mia rijikia rivurular kito bereio, rivano-o rivokar bogo na kito rava resel iorou ka burum̃ara jagidago joomo ea vio Lu napano be Lu laka. Ea Vio na, mia rotumolu rotua Atua mirano rimemedu, mia kiado jidomiano mijikia sikili rivu kianavo ka mia rivu ga van kito.  
\v 20 Nina bior Yesu naio jukamu ka kito ban ea vio lu nene ruei, naio ba mila kiano im̃auano jibe ka parinio toro lu na kiado, ka rila kiado merevuiano rivija Atua.  
\p Jibe ka na m̃a kito roberiio beamu ruei, naio javukia parinio tor lu na maariano na yati na tormoruo toro lu na Melkeseteki, naruei naio bulu bulag nono kiado kariano nalo ruei, ana mia rimonmon bo ka kiano im̃auano na kar kito rivano-o mia maka rijikia ribisi bogo tai.   
\c 7  
\s1 Melkeseteki re beamu naio loa laka ka toro lu dolu nalo  
\p
\v 1 ?Ana tormoruo Melkeseteki nene, naio be kei, a sano tukunuano nene jum̃abe? Niosi na Tikariano berii naio, berenio naio jo ka bogo na tormoruo Epraamo re nua, na naio be parinio tubo ka komeli lu moruo na Salemo, mia naio be toro lu na toru na Atua kiano. Ana ka bogo tai, ana tormoruo Epraamo ba mila mira ka kiano uolu nalo, ka parinio tubo dolu nalo, karina naio jo binimei bereio, ana naio biviuo naljuo Melkeseteki mia naio batove kanio, ana Melkeseteki mialio, ana milivu kanio.  
\v 2 Ana Epraamo mije ijaiano banio, duelimo jaluvo den tormomou ea vite nonovio nalo na naio mijevilo ea mira, napano naio jom̃a bar ban bere ea kiano vio. Mia burum̃ara toro lu nei naio be toro tai, na jibe ka siano juo nei aberenio. Siano na na jukamu nene, be Melkeseteki, nioti nene ber “Parinio tubo na memedu,” ana, siano juo nene naio ber jibe nei ber “Parinio tubo na tum̃aro,” bior naio be parinio tubo na komeli na Salemo, napano nioti nene ber tum̃aro.  
\v 3 Kema na, kiano tukunuano naio be dolu, bior ka maka romijog ka napano m̃a aberenio ka kiano tormoruo juo nei ajum̃abe, p̃elina korobinio nalo yati re be. Maka averenio ka kiano meuliano naio jikar jel jum̃abe, a tukunuano na kiano m̃ariano maka tai. !Jibe napano naio maka rim̃aro kulio, mia naio jom̃a bokar dolu ka ga kiano im̃auano vo! Jibe na naio jibe ka Atua kenerinio, napano naio be kiado toro lu riva vano-o mia ribisi re bogo tai.  
\v 4 Bior vite nalo na, romial ea Atua kiano iliano moruo, ka napano sio nei Melkeseteki naio be sio tai na loa laka, banbano-o na korobido tormoruo Epraamo, na m̃a ajidom sop̃eia naio ruei, naio bunu batove kanio, naio jian ijaiano banio ea togio na vite nalo na barlo ea bogo na jovulu mira.   
\p
\v 5 Mia bajago na asian ijaiano na jibe na, naio be bajago tai na m̃a tuboiano berenio berinavo kulo Israel monoka ala tulaka. Nalo na abe tomu lu na kanalo yati na Livai, monoka ava avitikar vatitiglo, monoka asian duelimo taluvo den tormomou na kanalo saba nalo nonovio vanlo, bior nalo ajibe ka m̃aratavo takurano ga, abe bajulukuti na Epraamo.  
\v 6 Mia Melkeseteki nene, naio maka ve m̃aratavo na Epraamo, mia tormoruo Epraamo naio bitilubar ka naio be toro lu tai, ana naio bio ka togio na ijaiano banio. Tormoruo Epraamo nei naruei nanm̃a Atua berkar tonovo nalo banio, mia naio batove ka Melkeseteki.  
\p Mia bogo na Melkeseteki bokar ijaiano nei, naio jaaro milivu ka Epraamo, a nina naio mila kirimeravo ban kito ka naio loa lie kanio,  
\v 7 bior toro na bare ka rilivu ka toro dolu, naio monoka loa lie ka toro nene.  
\v 8 Mo na Melkeseteki naliko kulo lu dolu nalo nei, nalo nonovio abokar ijaiano na bevirare ga, mia abe dolu ka titai. Vite na jibe na, aber kulo lu nalo abokar kanalo, iorou kanio ana am̃arm̃aro, mia Melkeseteki naio bokar kiano, aberinavo naio jo bano-o na maka rim̃aro kulio.  
\v 9 Mo na jibe ka napano Melkeseteki naio loa lie ka tormoruo Epraamo, naio loa lie bunu ka sio dolu na tortoru napano Livai. Be riano ka na Livai naio be korobido moti garuei na yati na kulo lu memedu, mia naio bunu miyotuba ea yati na Epraamo, ana bogo na Epraamo naio batove ka Melkeseteki, naio jian ijaiano banio, jibeka ga na m̃a Livai bunu batove ka Melkeseteki jian ijaiano banio.  
\v 10 Vite na jibe na javukia bogo na Epraamo biviuo Melkeseteki, mila banio, Livai naio maka riyotuba ea korobinio nei navo, mia jibe ka napano naio bunu milaio.   
\s1 Yesu maka moluo ea yati na kulo lu nalo, mia moluo ea yati vou tai  
\p
\v 11 Ana iliano nalo na mave nei aberial burum̃ara vite tai. Amila kirimeravo ka na Atua midular bajulukuti na kulo lu na Livai nalo, naio bitirilar bajulukuti dolu tai na kulo lu nalo, midu jo jeleig naio. Tormoruo Erono bunu naio bitirilar im̃auano na bajulukuti na kulo lu nalo, a Mosis naio bar kiano tuboiano miyotuba, mia ver Atua rial ka vite juo nei bevirare ka rila kito romemedu rivu vija naio, mia naio tuvan tobo. Mia makanio, naio mijebukua, naio miila parinio toro lu vou tai miyotuba ka kito, napano naio be bajulukuti na tormoruo dolu nei Melkeseteki.  
\v 12 Ana bior Atua bitirilar parinio toro lu vou nei, memedu bunu ka ver rivitirilar kiano tuboiano nene.  
\v 13 Naio monoka tibe na, bior vio nei naio berii kiado Tubo, napano naio miyotuba ea yati tai napano maka lele tai ka nalo sikili tu ea boda ka rila toro lu kiano im̃auano.  
\v 14 Yati napano Yesu naio miyotuba eaio, romijikia ka naio be yati na Yuta, ana bogo na Mosis berial sio na bajulukuti na tomu lu nalo, naio maka riverial leleio sio na Yuta.   
\p
\v 15 Mia Yesu, be yati dolu na toro lu jo napano naio miyotuba eaio, naina naruei be Melkeseteki kiano bajulukuti nene napano rojum̃a roberenio. Vite na naruei mila na romial ka Yesu maka tavukia kulo lu dolu nalo, mia naio jibe ka Melkeseteki garuei.  
\v 16 Nalo dolu nei, abinimei abe kulo lu bior ka ga ajakii jameul na kiano bajulukuti, jibe ka na tuboiano moruo naio berenio, mia Yesu naio binimei be kiado parinio toro lu ea burum̃ara moroano na kiano meuliano nei na maka ajikia ala lelanio, napano mia naio to tobo to.  
\v 17 Kito romijikia ka mia naio toboto tibe na, bior Atua kiano iliano naio berenio ruei, napano naio berinavo  
\q2 \qt “Kiniou nomiduso kojo jibe ka tormoruo Melkeseteki, jau kobe toro lu na maariano ea kiano bajulukuti, ka na mia kovokar im̃auano rivano-o mia maka rijikia ribisi.” \qt* \rq Iouano 110:4\rq*   
\p
\v 18 Ea vio na, binimei meravo bo ban kito ka Atua biebukua m̃arabo na kiano im̃auano. M̃arabo moruo, na be Mosis kiano tuboiano re beamu, napano jumolu ju bogo be ruei, mia javukia napano maka rijev moroano tai ka mia rila vite novo tai van kito.  
\v 19 Naio bijuku deio ka rila kito romei romemedu, tenene na Atua juvan m̃arabo moruo nene jobo garuei, ana mila jidomiano vou tai binimei medave, midu jeleigio. M̃arabo vou nei naruei romijikia romonea sikili ka naio be m̃arabo na be riano, napano mia naio mijikia rivuru m̃arabo ka kito ka mia romei vaataro ka Atua.   
\p
\v 20 Ana m̃arabo vou nei, Atua kanano verikariano tai naio mila jumolu ju jikili ju. Kulo lu dolu nalo re beamu, bogo na ajokol parilo, amioakolo ka kialo im̃auano nalo, maka ve verikariano tai tibe na.  
\v 21 Mia bogo na Atua bitirilar Yesu be kiado parinio toro lu, naio milakar bija kiano verikariano na jikili tai. Javukia napano iliano tai ea niosi lu na iouano naio berenio, napano naio berinavo  
\q1 \qt “Atua sop̃i naio berkar ruei, mia naio maka rijikia river bukua kanano iliano bereio, naio berinavo \qt*  
\q2 ‘\qt Jau mia kovokar im̃auano na parinio toro lu na kanaku tomu nalo, rivano-o mia jau kobisi ka re bogo tai.’ ” \qt* \rq Iouano 110:4\rq*   
\p
\v 22 Mia Yesu naio bokar batitig kiano im̃auano jibe na, be kijokijo na verikariano vou na Atua kanano bija kito, napano naio bo lie vo loa ka nana beamu, a naio be tikariano na vite dolu nalo na Atua berkario ban kito, mia na rila nonovio ea kito iorou.   
\p
\v 23 Kulo lu nalo na beamu nalo miroano, bior nalo tai mim̃au bano-o bakovio, ana na dolu midu jum̃ano, mim̃au banbano-o, naio bunu bakovio, nalo amila jibe na naruei. Nalo maka ajikia avokar tobo to,  
\v 24 mia Yesu, naio be na toboto nam̃ariga, mia naio ga ve takurano na mia rivokar kiano im̃auano tibe ka kiado parinio toro lu rivanvano-o mia rimebi re bogo tai.  
\v 25 Jibe na naio jo dam̃ariga ea Atua mirano, naio jo bolkouo dam̃ariga banio ka kito, mila na kito na voniganei, p̃elina kito tomu na romei iorou, mia naio naruei mijikia rilarur nono kito na m̃a rejelea naio robinimei vaataro ka Atua.   
\s1 Yesu naio be parinio toro lu kar garuei  
\p
\v 26 Kito rajaaro toru ka na Atua mial bo ka tuvan parinio toro lu tai na naio bo laka jibe na rimei rivior kito. Naio be toro tai na be lu laka, napano maka vijukubeleano tai rimonea naio leleio, naio meravo nonovio, kiano bajago naio maka tibe ka tomu na m̃a amila kariano leleio, siano jo mave loa laka ka vite nonovio nalo na tiniabenei.  
\v 27 Mia kulo lu dolu nalo nei, nalo monoka atum̃a ala sida na meravoiano tulaka ea legiano nonovio. Beamu, monoka ala rivior kialo kariano nalo bereio, ana iorou, amijikia ala rivior kariano na tomu dolu nalo kanalo, mia Yesu naio maka tibe na. Naio mila sida na meravoiano na kariano na yetemeriba nei reraio ve vaarakurano ga, nina, ka bogo na naio mila jokoluolu ka mokotenano bereio kar kito.  
\v 28 Be riano ka tuboiano moruo binimei beamu, mia kiano parinio kulo lu be kulorinio ga, melokloko ga, mia verikariano vou na binimei iorou, kiano parinio toro lu naio memedu dam̃ariga, be Yesu Atua kenerinio.   
\c 8  
\s1 Virakariano vou: Im̃auano na parinio toro lu kanano naio bo lie vo  
\p
\v 1 Naruei verloglogiano nalo nei aber vite telabo ea tivelinio na parinio toro lu nalo. Mia burum̃ara burupati iliano tai na naio jo, napano temi bo ka rosidomii ve temi eaio, napano berenio kiado parinio toro lu novo tai jo ruei. Naio be Yesu na naio ban bere mave tiniabenei, naruei toro na toru na vio mave naio midu naio jotano tivelinio na jum̃ano meruo.  
\v 2 Naio joa vio na, naio mila kiano im̃auano lu, javukia napano parinio toro lu nalo re beamu amila lotuano joomo ea yimo lu panpano nei ea vio yauo. Mia vio na lotuano nei, tomu nalo ga amim̃aukanio, mia kiado parinio toro lu Yesu, naio jom̃a mim̃au joomo ea vio na lotuano na bo laka, nana be riano, napano Atua ga mim̃aukanio.  
\v 3 Mia parinio kulo lu dolu nalo nei, kialo im̃auano nalo, napano dam̃ariga abitiribulaglo ana m̃a ajum̃a ajian ijaiano ban Atua, a napano m̃a amila sida banio, mia bo ka rovika rover kiado toro lu nei, p̃eli naio bunu midu ijaiano ban Atua, mila sida kanio?  
\v 4 Verver yetemeriba nei ga, mia naio maka aial naio tibe toro lu tai, bior naio maka riyotuba ea yati na Livai, na m̃a tuboiano mije moroano banlo ga ka amijikia asian ijaiano rivan Atua. Jibe na, kiado parinio toro lu nene naio jom̃a mim̃au ea vio lu na mave ga. \fig Amila lotuano joomo ea yimo lu panpano|alt="Tabernacle" src="59_Heb8.2-5_Tabernacle.tif" size="col" loc="Top right" copy="Gordon Thompson" ref="8:2-5" \fig*   
\p
\v 5 Vio lu na yetemeriba nei, bija im̃auano na na m̃a amim̃au kalo eaio, naio javukia melukuti nene ga, p̃elina kijokijo ga, mia na na ea vio mave, naio be telerinio nene. Atua bunu ber jibe na ga, tilikiti na naio berlubarbario ban Mosis, naio berkanio ber mia tum̃abe ka mia naio rim̃auka yimo panpano lu nei, naio berinavo mia naio monoka rim̃auka takii tiiano nene rimemedu ka na m̃a naio mialio bogo napano naio bavin ea burusuku.  
\v 6 Mo jibe na na kito romial ka Yesu kiado parinio toro lu naio be riano, a kanano im̃auano nonovio nalo abo lie vo. Naio jotano iviso ka kito bija Atua, naio mim̃auka virakariano vou tai ea kito bija naio napano bo lie vo, napano jikili jua Atua kanano verikariano napano abo lie vo, o-oa na nalo romial naio jo mave mila im̃auano tai ea vio lu napano naio bo lie laka.  
\v 7 Verver virakariano na beamu naio rivu kia ga vo, mia ve re bunu tinene bereio, mia makanio, milaio ana na Atua bitirilar virakariano vou bija kito napano naio bo bo laka garuei.   
\s1 Virakariano vou: Atua naio berkario beamu ruei  
\p
\v 8 Virakariano na jukamu, Atua naio jo mial ka maka rim̃au rivu, ana naio maka rivare vo ea kiano jidomiano, mila na naio berkar na na terivou dolu bereio. Naio berial jibe nei ea iliano tai nanua jian ban naverialiano Jeremaia ka naio riverialio. Ea iliano nene, Atua berkar jibe nei, berinavo  
\q2 \qt “Kamiu kuvije tiliniemiu vatitig rivu. Kiniou nojidom never ka kamiu ka bogo tai jo binimei kiana, ka mia kiniou nala virakariano vou tai vija kamiu kanaku tomu nalo, kamiu na kube bajulukuti na Yuta bija bajulukuti na Israel. \qt*   
\q1
\v 9 \qt Mia virakariano nei naio rivevirare re ka nanua namila kar bija korobimiu nalo re nua. Virakariano moruo nene, nina ea bogo na kiniou tinieku miialo, kiniou noburu bulaglo den bogokouo ea vio Ijivi, mia iorou kanio, ana maka bunu asidomial virakariano nene, a maka bunu amonmoneaio, mila na kiniou bunu nobilig taakaku kalo. \qt*   
\q1
\v 10 \qt Mia vonganei, kiniou nevitirilar virakariano vou tai vija kenemiu bajulukuti nalo bereio. Ea virakariano nene, mia kiniou nala tibe nei: \qt*  
\q2 \qt mia nevitiri bulag vatitig kiaku tuboiano nalo tua kialo jidomiano nalo, \qt*  
\q2 \qt mia nevivitauia kanaku iliano nalo tua kialo iviso nalo, \qt*  
\q2 \qt mia nemei neve kialo Atua riano, \qt* 
\q2 \qt mia nalo na amei ave taara na kanaku tomu nalo. \qt*   
\q1
\v 11 \qt Ka tilikiti na, mia alavon re bunu ka m̃a aververlogloglo bereio, ka na mia tai river ka kiano bilbilu riverinavo ‘E, m̃arabo naio nei,’ p̃elina tai river ka kuruano, riverinavo ‘Atua, naio jibene jibene.’ \qt*  
\q2 \qt Makanio, mia ala re bunu tibe na, bior mia aviniu ajikia vatitig kiniou ea kialo meuliano nalo aviniu koko, tikar ea nalo na tertelisu laka, riva rivokar kialo tomu na tortoru nalo. \qt*   
\q1
\v 12 \qt Kiniou neberkar ka kialo vovaiano nalo, mia nevie kokoalo ga, \qt* 
\q2 \qt a kialo kariano nalo, mia nosidomialo re bunu. \qt* 
\q1 \qt Naina naruei be kanaku virakariano vou bija kanaku tomu nalo.” \qt* \rq Jeremaia 31:31-34\rq*   
\p
\v 13 Ana ea kanano iliano nene nei, Atua berii virakariano vou nei, mila kito robitilubar ka naio jo mial virakariano na beamu nei naio be termoruo ruei. Mia jidomiano tai na jo ber vite na m̃a Atua ber be termoruo ruei, vonganei jo batove lilie ka mia riviniuviniu nonovio.   
\c 9  
\s1 Virakariano vou: Kiano jeleig na lotuano naio bo lie vo  
\p
\v 1 Mia kito romijikia ruei bo ka virakariano moruo, naio be kiano m̃arabo nalo ka rila kanano lotuano eaio, a be bunu vio tai na rila kanano lotuano nei eaio, napano joa ga yetemeriba nei.  
\v 2 Vio na lotuano nene, be kiano yimo panpano lu nene, napano aburuko ka burum̃ara jagidago eaio, a amuebure togio juo. Ea togio, na abio ka Vio Lu, be burupati na yulu tai jum̃ano aluo, bija barobaro na joko duelimo ba juo napano abio ka “Joko na asiloglog ka Atua.” \fig Ea togio, Vio Lu na be Lu Laka|alt="Holy Place" src="59_Heb9.2_HolyPlace.tif" size="col" loc="Top right" copy="Gordon Thompson" ref="9:3" \fig*   
\p
\v 3 Ana iorou ka jagidago nei, togio na bano ba yesobi nene, naina abio ka vio Lu na be Lu Laka.  
\v 4 Joomo ea Vio nei, naio be boda na bonotanunu na m̃a amim̃auka niogo, bija basidobidobi na tuboiano nei. Basidobidobi nei, abijan niogo ea kulukuti, vajoomo a tavio bunu, mia vajoomo nene, be vite tolu napano abar batitiglo ajuio. Nana jukamu, naio be baju na niogo tai napano niati sinaniano na vio iauo na abio ka mana naio joaio, a vite juo nene, naio be tormoruo Erono kiano nasitogo napano toti barboṽeio nua, a vite na maariano naio be puruveru na mierivin juo napano Atua bivitauia kiano tuboiano ealo.  
\v 5 Ana mave ea basidobidobi na tuboiano nei, naio be sikmirano, napano abio ka vio na totaniano na Atua kanano tinieiiano. A be tovorovo na nailiano juo ajumolu aju mave eaio, napano sibialo amiaveveko tivelvelinio vio na m̃a Atua kiano mermerano jom̃a batove eaio. Naruei vio lu na lotuano na virakariano termoruo nene naio be vite novo nalo nei naruei, mia maka rejikia rover vite ve miroano bere vo ea tivelinio na nalo. Mia vite takurano ga na roverenio, ka vio na lotuano nene, vija kiano saba nalo, nina amim̃auka ga ea tenalo na yetemeriba, naio maka rijikia tobo to kanio ga, naio maka rivu tibe ka vio na lotuano na virakariano vou. \fig Boda na bonotanunu|alt="Ark Of Covenant" src="59_Heb9.4-5_ArkOfCovenant.tif" size="col" loc="Top right" copy="Gordon Thompson" ref="9:4-5" \fig*   
\s1 Virakariano vou: Jokoluolu nene naio bo lie vo  
\p
\v 6 Vite nalo na mave nei, naina naruei vite nalo na m̃a abar batitiglo aju joomo ea yimo panpano lu na beamu nei, mia bogo na kulo lu nalo aba joomo, amim̃au bijalo. Mia dam̃ariga, ajum̃a aba joomo ea ga vio lu na jukamu nene,  
\v 7 ana ea vio lu juo nene, na be vio na mia be lu laka, kulo lu nalo maka leleio ava joomo eaio. Vio nei, toro takurano ga mijikia ba joomo eaio, nina be kialo parinio toro lu, a naio maka m̃a to riva joomo tulaka, mijikia ban vaarakurano ga ka yuka takurano. Ana bogo na m̃a ver naio bano, maka rijikia riva jum̃ano yauo ga tibe na, mia monoka takii m̃arabo nene. Beamu ka naio rivano, monoka ala jokoluolu ka temeul tai, ka mia naio monoka rivar basidobidobi tai na burukija nene riva joomo tibe ka ijaiano tai, naina ea tivelinio na kiano kariano, a bija tomu nalo kanalo.  
\v 8 Mia bogo na ajum̃a amila jibe na, javukia kijokijo na Niununo Lu napano mila meravo ban kito ka bogo na ver yimo panpano lu naio tumolu tu kia ga vo, mia kito tomu ninio kito ve re kiado m̃arabo tai leleio ka ravan rovokar vio na m̃a Atua naio joaio.  
\v 9 Panpano na yimo lu nei, bija sano jagidago nene napano jakilele jo joomo, a sano vite nalo, abe tena vio beamu ruei, mia aber burum̃ara titai ban kito banei. Amila kito robitilubar ka ijaiano nalo na m̃a kulo lu nalo ajiajian ban Atua a jokoluolu nalo na m̃a ajum̃a amilaio, nalo abo ga, mia vite nalo nei maka ajikia ala tomu nalo ajog ka kialo iviso meravo reraio ea vitiiano na Atua kiano.  
\v 10 Amila vite nalo na, bija venia napano tuboiano sesa nalo aberenio ea tivelinio na m̃arabo na amim̃auka sinaniano bija munuiano, a ea tivelinio na bajago na sekoniano na saba. Mia vite nalo na naio be tena vio tavio ea toro niabene ga, mia maka atokol toro kiano iviso p̃eli kiano jidomiano. Mia kiado tormoruo nalo ajum̃a abokar bajago nalo jibene bano-o, abe navokariano nalo ga rivano-o rivokar bogo na Atua mila kiado m̃arabo vou, napano naio be kiano virakariano vou napano maluvo ruei.   
\s1 Yesu kiano burukija naio jekon batitig kito ruei  
\p
\v 11 Mo bogo na Kristo miyotuba, naio binimei jibe ka kiado parinio toro lu, napano naio maka ve tena bajago moruo, mia naio be tena m̃arabo vou, ka rila napano romijikia rovokar ilivuiano na kirinovo nalo na Atua bar batitiglo bo aju. Naio maka riva rim̃au joomo ea yimo panpano lu na beamu, mia naio mim̃au ea tai napano bo lie vo, a loa lie vo. Vio lu napano naio jom̃a mila im̃auano eaio, maka ve toro jum̃ano napano milaio, mia maka toa yetemeriba nei, mia naio joa vio medave kamu ea Atua mirano mave.  
\v 12 Ana bogo na Kristo ba joomo ea vio lu nei, naio banbano bokar vio nana be lu mia be lu laka kanio, mia naio ba vaarakurano ga, maka ka mia naio riva ve vaarakurano bereio. Ana bogo na naio ba joomo, burukija na bario naio maka ve burukija na nani, p̃elina burukija na kirikiti bue m̃arauo, mia be kiano burukija ga napano miou ea m̃akolkolo. Naruei kiano burukija nei naio joa Atua mirano jibe na, naio bokar vulbulagiano na kiado kariano ka ritoboto.  
\v 13 Monoka tibe na, bior ea bajago moruo, ka ver toro tai mila titai na bova, ana amidu burukija na nani p̃elina bue m̃arauo, bija bulum̃aroro na kirikiti bue m̃arauo napano amisebio, amidu ban ea vio lu. Ana ea bogo na, ajidom aber ka ijaiano na jibe na mijikia rila toro neibano naio rimeravo bereio ea Atua mirano.  
\v 14 Mo na ver burukija na temeul ga mijikia rila tibe na, mia Kristo kiano burukija naio mijikia rila riva lie vo ve toru laka. Kristo naio be toro lu tai, naio meravo nonovio, maka ve niajebijo tai toaio, naruei naio mijamo ka kiano meuliano ka Niununo Lu mijikia rudu van Atua tibe ka ijaiano tai, ana naio binimei be kiado naioruriano. Tibena na mia burukija na Kristo mijikia rila tiniedo rimeravo, rivurular kito den kiado im̃auano na m̃ariano nalo rivitiri bulag kito, ka romila Atua na meul kiano im̃auano.   
\s1 Yesu kiano ja mila verikariano vou jikili ju jikili  
\p
\v 15 Ana bior Yesu mila im̃auano na bo nalo jibe na, romijikia reial naio, naio be toro na m̃a bar tenalo novo na virakariano vou nalo amaluvo ka kito. Nina naio milaiio ea kiano m̃ariano, napano be m̃ariano tai napano bular meuliano nonovio na tomu nalo na lakokoroviano na tuboiano na virakariano na beamu. Ana bior naio bulbulag kito jibe na, mila na kito kei napano Atua bio ka kito, romijikia rovokar kiado jajum̃ado neibano mia maka rijikia ribisi bogo tai.  
\v 16 Ver Yesu rim̃aro re, mia kito maka rejikia rovokar kiado jajum̃ado nene, mia bogo napano be riano ka naio m̃aro, verikariano nonovio na virakariano nei binimei jibe ka Yesu kiano iliano na maaro, naruei vite nonovio binimei ea jum̃ado.  
\v 17 Bior ver toro tai riverkar vite tai tibe na naio kiano iliano na maaro, ka bogo na naio meul kia ga vo, ajum̃a abokar batitigio bo kanano verikariano nei jo, mia maka alaiio tibekovio kanio bano-o bokar bogo na ver naio rim̃aro, ana mia alaiio.  
\v 18 Naio jibe ka ga ea virakariano na beamu na Atua mila bunu, napano burukija na jokoluolu miou, ana na iliano nalo na virakariano na atumolu atu.   
\p
\v 19 Tena Mosis bunu mila, napano Atua jian tuboiano banio mave ea burusuku, ana naio batove berial iliano nonovio na kanano ban tomu nalo, ana ka bogo na naio berialio bisi, naio muebinivin sida nalo, ka rila ka iliano nalo na tuboiano nei ameul, atumolu atu. Amuebinvin kirikiti bue marauo bija nani nalo, naruei naio midu kija kialo burukija telisu, mion kija uei telisu ban ea, ana midu jaiesi tai na telisu, abio ka isop, bija vijinio sipsip na bilvil, ana budomio ban ea burukija nene, bukio tertelisu mave ea niosi na tuboiano nene, a bukio bunu ea tomu nalo, karina naio berial banlo, naio berinavo   
\q1
\v 20 \qt “Naina naruei be burukija na temeul napano naio m̃aro ka rila Atua kiano tuboiano rimeul. Naruei kito rotovonio, kito romonmoneaio.” \qt* \rq Eks 24:8\rq*   
\p
\v 21 Ana jibe ka napano p̃iligṽilig burukija nei ealo, naio p̃iligṽilig bunu tertelisu ea yimo panpano nei, bija vite nalo na aju joomo eaio napano m̃a abar amila kialo lotuano bijaio.  
\v 22 M̃arabo na im̃auano na tuboiano moruo nei naio jibe na naruei, napano mia vaataro ka vite nonovio na m̃a amim̃au bijaio, monoka ap̃iligṽilig burukija eaio dam̃ariga ka rilalo ave lu. Nina jiloglog burum̃ara titai na rivan kito, ka ver burukija riou re, viekokoano na kariano maka tai.   
\s1 Virakariano vou: Jokoluolu nene naio bar bulag nonovio kariano na yetemeriba  
\p
\v 23 Tibe na, vite nalo na m̃a kulo lu nalo amim̃au bijaio, bogo nonovio monoka ala bunu rimeravo ea m̃arabo sesa nalo nene. Mia yimo panpano lu nene, bija sano tenene nalo, nalo abe tena yetemeriba nei ga, ana jum̃abe ka vio lu nana be riano, napano Atua joaio ea vio mave? ?Naio bunu monoka ve jokoluolu tai na viekokoano na naio? Nao, naio bunu monoka burukija riiou ka rila kiano saba nalo riviniu rive lu, vija bunu nalo na m̃a aju aban eaio. Mia jokoluolu na vio lu na tiniabene naio maka tibe ka temeul nalo na m̃a amila jokoluolu kalo ea vio lu na yetemeriba nei, naio be jokoluolu tai na toru lie vo, a bo lie vo laka.  
\v 24 Ana burukija na jokoluolu nei naio joa Atua mirano ruei, bior kiado parinio toro lu Kristo naio ban ea vio lu nei ruei, napano maka ve vio lu na tomu nalo ga amim̃aukanio, mia be vio lu na be riano, nina ea vio mave tiniabene.  
\v 25 Mia bogo na mila kiano jokoluolu jibe na, naio maka tavukia nalo na m̃a parinio kulo lu dolu nalo amilaio. Nalo amila jokoluolu ka burukija na temeul nalo, mia naio mila jokoluolu ka kiano burukija bereio. Mia nalo, aba amila ea vio lu vaarakurano ga ka yuka nonovio, monoka mia ala tibena rivan dam̃ariga, ana naio mim̃au ka nonovio varakurano ka bogo tai na ga, bisi, ana maka ka mia aim̃au ka bereio.  
\v 26 Ver Yesu monoka tom̃a rila kiano jokoluolu tulaka rivior kariano nalo na m̃a tomu nalo ajumon ka m̃a amilaio, nina jibe ka ber jikar ea tikariano na yetemeriba binimei bokar vonganei, naio jo jaklele ea m̃akolkolo ga, naio mijog bova ka napano kiano burukija jom̃a miou bogo nonovio ga.  
\p Mia ea tiiano na Atua bitirilar naio maka tibe na. Naio mial jukuti na bogo nei rojua voniganei naio binimei lilie vaataro, ana na mila napano Yesu binimei miyotuba ka kito maka vesiou. Naio maluvo ka kito naruei naio mila jokoluolu ka nono kiano meuliano, mijil lar bajago na kariano.  
\v 27 Ea tivelinio na kito tomu nalo, Atua mila ka kito romeul ea yetemeriba, karina rava kovio denio karina romeul bereio ka ravan ea tibureiano,  
\v 28 mia ea tivelinio na Kristo, naio jibe na bunu. Naio binimei miyotuba ea yetemeriba nei, karina mila jokoluolu ka naio ka rivar vironiano na kiado kariano nalo, karina mia riyotuba bereio ve valuo nene, maka ka mia rivulu bulag kariano bereio, mia ka rivuru bulag kito den vironiano na kariano na kiado, na m̃a rabarkar tiniedo eaio, rojidom ka mia naio rimei rilarur kito.   
\c 10  
\s1 Jokoluolu na Yesu kanano naio bo laka  
\p
\v 1 Kito rosidomii von bereio tuboiano moruo na Mosis kanano. Naio ber saba novo nalo tealo tai, ana mia naio maka riverial nonovio ilivuiano novo nalo na m̃a Atua naio jidom ka Kristo rila riyotuba ka kito, mila na tuboiano nei naio jibe ka vaiunu ga, maka ve niosunbue riano nene. Tuboiano moruo nei naio jom̃a beve torogio mugaruei jibe na, naio jiloglog ka kanano jokoluolu nalo, napano m̃a ajum̃a amilaio ka yuka nonovio, maka avare, maka ajikia ala rimeravo vatitigio rivu nonovio nalo na m̃a amila lotuano bijaio.  
\v 2 Aver tibe na, mia nalo nam̃a amila lotuano jibena, p̃eli mia nalo amei ameravo nonovio ruei na, ajog re bunu ka kariano joalo, ka na mia asidomii re bunu ka mia ala jokoluolu, mia makanio, amonmon ga amila jibe na.  
\v 3 Jokoluolu nalo na monoka ala ka ajog ka nalo maka ve kariano tai, mia makanio, yuka nonovio amialio ka napano jokoluolu nalo nei amila nalo ajidomial bereio vovaiano nalo na kanalo, ana amijog ealo ka niamiamo na kariano jo kia ealo vo napano ba bova lie vo.  
\v 4 Ajum̃a amijog jibe na bior kialo jidomiano tai jo, aber burukija na buruolu bue marauo p̃elina burukija na nani naio mijikia sekon bulag kialo kariano tum̃abe? Vite na, ajidom bitovitonia toru laka kanio, ban bano-o na abitiidieio, kialo kariano jo keano vo.   
\p
\v 5 Ana bior tenalo na, bogo na Kristo riyotuba ka kito ea yetemeriba nei, naio berial kiano m̃arabo vou naruei. Naio midu iliano tai napano joa niosi na Iouano Lu, naio ber ka karam̃ano Atua, naio berinavo  
\q1 \qt “Jau maka bunu kosidom jokoluolu nalo a ijaiano nalo, mia jau komim̃auka batitig mokotenaku ka najamo ka vanso. \qt*   
\q1
\v 6 \qt Vite nalo na m̃a aju amisebio jijenio ba biniuviniu, jau komial bova ga, \qt*  
\q2 \qt a ijaiano nalo na meravoiano na kariano, maka lele tiniem tiio. \qt*   
\q1
\v 7 \qt Karina, kiniou nojumolu neberial batitig banso, neber \qt*  
\q2 \qt ‘Atua, kiniou najaaro ka nala kanamo sidomiano, \qt*  
\q2 \qt nina ga kiniou nebinimei biorio, \qt*  
\q2 \qt nina tibe ka ga napano Niosi Moruo naio berenio ber mia kiniou nalaio.’ ” \qt* \rq Iouano 40:6-8\rq*   
\m
\v 8 Mo bo ka kito rovitii vatitig rivu iliano na Kristo berenio nei. Vite na jukamu napano naio berenio, ber napano jokoluolu nalo bija ijaiano doldolu nalo na m̃a ajum̃a amilaio, be kurano ka na m̃a tuboiano naio berenio ber monoka alaio, mia Atua naio maka tom̃a rijog rivu kalo, mia naio maka bunu sidom ka mia alaio.  
\v 9 Karina, vite juo na m̃a Kristo berenio, berinavo naio mijamo ka naio naruei, ka naio rimei rila Atua kiano sidomiano.  
\p Ea vio na, romial napano m̃arabo na jukamu na m̃a amila jokoluolu bior kariano, Atua midu lario ruei, kanano m̃arabo juo nene, naio jakiio.  
\v 10 Ea m̃arabo vou nei naruei, Kristo naio mila jibe ka na Atua kiano sidomiano naio berenio, naio jian nonovio mokotenano, ana mila napano kito robinimei romeravo a robe lu ea Atua mirano, naio jo jibe na dam̃ariga.   
\s1 Jokoluolu na Yesu kiano naio toboto  
\p
\v 11 Kulo lu nalo na m̃a ajum̃a amim̃au ea bajago moruo, monoka ve tealo na m̃a legiano nonovio ga atumolu atua Vio Lu. Nalo ajum̃a amila jokoluolu sesa nalo dam̃ariga, napano abe vevirare ga bogo nonovio. Jokoluolu nalo nei ajum̃a amila bior kariano na tomu nalo ajum̃a amilaio, mia maka lele ajikia avare ka avar bulag bajago na kariano den tomu nalo kialo meuliano.   
\p
\v 12 Mia kiado parinio toro lu nei Kristo, kiano jokoluolu naio maka tibe na. Naio mila jokoluolu ka kiri vite takurano ga bior kariano nalo nonovio, mia naio mila vaarakurano ga, ana bogo napano mila bisi, ana naio ba jotano mave ea tivelinio vameruo na Atua.  
\v 13 Atua naio mial Yesu ka mila jibena, berenio ber mia rivar Yesu kiano uolu nalo, rudulo atutano ka naio tibe ka yebe tai napano bijankon jaano eaio.  
\v 14 Maka ver im̃auano dolu tibe na ka Yesu monoka rila, bior ka napano naio jian ijaiano ruei, kiano burukija mila kito romeravo, vonganei robo ea Atua mirano ruei, rivanvano-o mia ribisi deio.  
\v 15 Niununo Lu bunu naio miasol iliano ban kito ea vio na, ea iliano tai nanua binimei ea naverialiano Jeremaia. Ea iliano nene Atua naio ber jibe nei berinavo   
\q1
\v 16 \qt “Ana vonganei mia kiniou nevitirilar virakariano vou tai vija kanaku tomu nalo bereio. \qt*  
\q2 \qt Ea virakariano nei, mia nala tibe nei. Mia nodu vatitigio kanaku tuboiano nalo atoa kanalo jidomiano nalo, mia nevivitauia kanaku iliano nalo toa kanalo iviso nalo.” \qt* \rq Jeremaia 31:33\rq*   
\m
\v 17 Atua naio ber jibe nei, ana ba lie telisu ga naio miasol bereio, naio ber jibe nei berinavo  
\q1 \qt “Mia kialo kariano nalo, vija kialo vovaiano nalo, mia nosidomialo re bunu.” \qt* \rq Jeremaia 31:34\rq*   
\m
\v 18 Iliano nei naio berial burum̃ara viekokoano napano Atua naio mila ban kito ruei, ana ver tibe na, ve re ijaiano dolu bereio napano romijikia resian ka rivokar viekokoano rivior kiado kariano p̃elina kiado vovaiano nalo, bior ka napano Atua naio mila batitigio bo ruei.   
\s1 Kito romerou re ka rava vaataro kean Atua  
\p
\v 19 Kuruaku nalo a kuvivinieku nalo, jibe ka na m̃a iliano nalo nei aberenio, Yesu kiano burukija betavo ea kiado m̃arabo ruei, naruei bo ka romerou re ga, mia resel ea naio rava joomo ea Vio Lu napano Atua joaio.  
\v 20 Beamu, burum̃ara jagidago na jaklele ko kanado m̃arabo, mia Yesu mokotenano naio burup̃e, jagidago nei bunu burup̃e niati juo, naruei naio betavo ka kito rava joomo. Vonganei kito rojua m̃arabo novo nei naruei, napano be m̃arabo vou tai, a be m̃arabo na ban kar meuliano.  
\v 21 Naruei Yesu naio mila kiado m̃arabo ba joomo ea vio lu jibe nei, naio binimei be kiado burum̃ara toro lu, napano bitikar kito nonovio ea m̃aratavo na Atua kanano.  
\v 22 Kiano burukija naio milakon niamiamo na bova napano ju joomo ea kito, kiano uei na meravo novo naio jekon niabedo binimei meravo nonovio, ana maka bunu roimou, mia romijikia rava joomo. Romijikia rava vaataro kean Atua napano kiado iviso be riano, rotu sikili laka ea naio rober mia naio rivuku bulag kito re, ka na mia naio rila vorvoruano van kito ga.  
\v 23 Kito romijikia romonmonea rivu vatitig ka mia Atua rila rivu tibe na van kito, bior dam̃ariga, naio jom̃a mila memedu ga ea venia napano m̃a naio berkario. Kito maka bunu rosidom dede kanio, mia robokar batitig im̃auano na ka roverial van kulo dolu nalo vite novo nei na m̃a naio milaio ban kito.  
\v 24 Ana ea tivelinio ka kito bereio, bo ka rotu rosidomii vatitig rivu, roseravo m̃arabo na tutuliano na kiado jidomiano nalo ka tiniedo tii kito rivu lie, a ka ralala im̃auano novnovo nalo van kito rivan lie tibe na.  
\v 25 Maka rivu ka kito rotuvan bajago na reiasosol vatitig kito rivu, tavukia na tealo ajum̃a amila ruei, mia bo ka na kito rotum̃a rotunukakar kito tulaka dam̃ariga. Bajago novo nalo nei monoka rotum̃a rala van kito dam̃ariga, ana ver bogo tai kito reial ka bogokouo na legiano na maaro atu vaataro, bo ka rovu ka kito tibe na dam̃ariga lie vo.   
\s1 Kito rosidomii kurano re ka Atua kiano tibureano  
\p
\v 26 Bo ka kito rovika vikadeniano ea tivelinio na kito napano robokar jikiaiano nalo na ilirianiano ruei. Rovika tibe na, rover ver kito rotovon re, rotumolu rotum̃a rala tanea kariano lie, mia tum̃abe ka kito? Sano verdop̃eiano nene, naio jibe nei, ka kariano nalo na jibe na, maka bunu ve jokoluolu tai napano mijikia rivar bulagio bereio.  
\v 27 Venia napano ga jo, nina Atua kiano verikariano ka mia sian vironiano na jikili riviorio, vija burum̃ara jeleig sebi napano mia sisen nonovio kiano uolu nalo. Naina be vite na merouano toru laka na.  
\v 28 Ea tuboiano moruo na Mosis kanano beamu, ver toro tai rila korov iliano nei tai, mia tomu ve juo p̃elina ve tolu bereio avirokarlo ka be riano, ka toro na mila jibe na jibe na, mia ve re bunu m̃arabo na tinieiiano bereio, mia toro nene mia atelar kiano meuliano ve vaarakurano ga.  
\v 29 Ver ala tibe na ka toro na mila korov Mosis kiano tuboiano, mia tum̃abe ka toro na bilig taakano ka Atua kenerinio? Mia kanano vironiano naio ve burutomoluo laka na, bior naio mila lelan burukija na virakariano vou napano beamu mila naio meravo ruei ea Atua mirano. Mia Niununo na tiniememiano naio rijog rivova ka bajago na mia naio tinien ser m̃elea toro na m̃a mila.  
\v 30 Mia monoka naio rudu vironiano nene bior Atua naio berkario jibe na ruei. Kiano iliano lu tai naio joa niosi na tuboiano moruo, napano naio ber jibe nei, naio berinavo  
\q1 \qt “Ka tibureiano na kariano, be kanaku kiniou ga takurano. \qt*  
\q2 \qt Nesian meran sikili mia sikili rivior kialo vovaiano nalo.”\qt* \rq Tiut 32:35\rq*  
\m Ana ea vio nene kia ga vo iliano dolu naio ber jibe nei bereio, naio berinavo  
\q2 \qt “Mia Atua sop̃i naio tibure kanano tomu nalo.” \qt*\rq Tiut 32:36\rq*   
\p
\v 31 Kito monoka rovitikar vatitig rivu, bior toro na m̃a milala kariano, ka bogo na adu naio toa Atua jum̃ano ka rivitii naio, naina maka ve tena telisu tai, mia naio be tena merouano memedu.   
\s1 Bo rotu sikili ka roviniua venia na mia rijikia rimaluvo iorou  
\p
\v 32 Kito maka rejikia ka mia tum̃abe ea legiano nalo na aju abinimei, mia bo ka rotu rosidomial m̃arabo novnovo nalo nam̃a Atua mijaja kito kanio ea legiano nalo napano abarlaka ban ruei. Bogo na kito romiyotuba ea miamoiano nanua beamu na, maka vesiou ana romidu bogo na jikili laka, napano aju amila kirivova ban kito napano romonea Yesu.  
\v 33 Bogoti tealo, kamu ea tomu nalo miralo, abuku iliano na bova ban kito, bogo tealo am̃ele tanea kito ea bajago va nalo napano kirivova-o mia kirivova. Ana bogo tealo, maka rivan kito mia amila ban kanado bilbilu nalo, ana robano rejikili roju bijalo, romijailo.   
\p
\v 34 Kito tealo, abukulo aban ea yimo na lakoiano, ana tiniedo miialo toru laka, roju raba romilavon ka rejailo ka ravar bulag kanalo burum̃ara jogvaiano napano aju abiniua ea vio nene. Ana bogo tealo bereio, nalo na m̃a ajerm̃i ka kito abinimei kar kiado saba nalo, ka avar bulavulag lelan kito, be burum̃ara laluvuiano ea kito laka. Ana ka bogo na, mia tiniedo serlo re, rajamo ka ga, bior be saariano tai napano joa kito, ka vite nalo na abar bulagio abe tena yetemeriba nei ga, mia kanado tonovnovo nalo napano abo laka aju, napano maka ajikia avakovio bogo tai, mia ave kiado bo kanio.   
\p
\v 35 Naina naruei burum̃ara kanado vulaviano napano mia Atua naio sian van kito, ana bior ka ijaiano novo nei naio jokamu ea mirado, maka rivu ka ralaluv bereio burum̃ara jikiaiano riano napano joa kito ruei,  
\v 36 mia monoka rotu sikili dam̃ariga ea Atua. Kiado jidomiano monoka ve tebievi rivu ka rotu rala naio kiano sidomiano nalo, ka mia romijikia rovokar vite nalo na m̃a naio berkario ban kito.  
\v 37 Ana bogo na ka rovokario, p̃eli mia ve sio re ga na mia naio riyotuba ka kito, tavukia na Atua kanano iliano tai napano naverialiano Abakuku naio berialio, napano naio berinavo  
\q1 \qt “Bogo ve telisu kija bereio, ve sio re ga na, mia toro na toru nei napano ka mia rimei naio maka rijikia tuliliei va lie vo, ana mia naio riyotuba. \qt*   
\q1
\v 38 \qt Ka bogo na, kanaku tomu na memedu nalo mia amijikia ameul rivu ga, bior ka na m̃a amonmonea kiniou, \qt*  
\q1 \qt mia ver neial nalo tai kalo na maka asidom kiniou, vurudidig naio, mia kanaku iviso risaaro re ka naio leleio.” \qt* \rq Apakuk 2:3-4\rq*   
\p
\v 39 Ana naina maka ve kito nei. Kiniou Maka ve tinieku ka kito ka kito tomu kinkin na m̃a romerou ka Atua. Nalo na m̃a aburu didiglo jibe na, mia monoka ava kovio mia kito, tomu na m̃a roju jikili ea naio, mia monoka ravokar meuliano.   
\c 11  
\s1 ?Viekouoiano naio be venia?  
\p
\v 1 ?Kiado viekouoiano nei, mia roverenio naio be vite venia? Romijikia roverenio naio be bajago na romonmonea vatitig Atua rivu sikili, ka naio mijikia rila kiado jidomiano riluo rivu ea naio ga, mia mijikia rila kiado moneano tu sikili ka rover vite nalo na m̃a maka rejikia reialio, abe riano aju.  
\v 2 Viekouoiano naio be burum̃ara vite laka ea Atua kiano vitiiano. Jikario ea kanado tormoruo nalo na beamu binimei, nina be m̃arabo takurano ga napano Atua mila ka naio rijikia saaro ka tomu nalo.  
\v 3 \x - \xo 11:3 \xt Jon 1:3\x*Bajago na viekouoiano nene naio naruei mila kito robitilubar ka be riano, Atua kanano iliano ga naio jii vite nonovio, a naio mila kanado yetemeriba miyotuba. Kiano moroano naruei midu vite napano toro maka rijikia rialio, mim̃auka vite nonovio na m̃a roju robitii joaio.   
\p
\v 4 Bo ka kito rosidomial korobido nalo tealo, ka jum̃abe nalo bunu abalea Atua bogo na beamu.  
\p Nalo tai be tormoruo Epel. Ea kiano viekouoiano ea Atua, naio milotu ban naio ka ijaiano tai napano memedu, ana Atua jaaro ka rijevio, naio mial bo loa ka ijaiano na kuruano Ken naio jianio. Mia Ken tinieno mimi, ana naio muetam̃aria kuruano nene, mia Epel kiano bajago bo na viekouoiano ea Atua, mila Atua mial naio be toro na memedu tai, mia vite nei mijikia rija kito rimei rivokar banei keana vo.   
\p
\v 5 Tormoruo dolu, naio be Inok. Ea kanano viekouoiano ea Atua, naio maka rivokar m̃ariano. Naio be tormoruo laka ana Atua ga naio binimei burulario jaluvo den yetemeriba nei, naio bavin mave, ana ajiravo naio mia maka alealio. Atua mila jibe na ka naio bior jibe ka na m̃a aju aber, ka bogo na naio joa yetemeriba nei, naio be toro novo tai na m̃a Atua naio jaaro toru laka kanio.  
\v 6 Be riano, ver viekouoiano ea Atua naio toa re kito, maka rejikia rala ka na mia Atua naio saaro ka kito. Toro kei napano naio jidom rijikia Atua ea kiano meuliano, jidom rimei vaataro ka naio, monoka riviekouo sikili ea naio tibe na. Naio monoka rimonmonea ka be riano laka, Atua naio jo, a monoka rivarkar tinieno eaio ka mia naio rila rivu laka van nalo na m̃a ajum̃a abitikar naio.   
\p
\v 7 Tormoruo tai bereio naio be Noa. Ea kiano viekouoiano ea Atua, naio mila venia na m̃a naio berkanio. Atua berial burum̃ara ueimiya nei banio, ana bogo na Noa naio maka rial kijokijo na tenei tai leleio vo, mia naio mila ga venia napano Atua naio ber kanio, mim̃auka burum̃ara kanalo uako ka sano m̃aratavo nene amijikia ameul eaio.  
\p Noa kiano viekouoiano na ea Atua milarur nalo nene, mia mila bunu burum̃ara vironiano maluvo ka nalo dolu nonovio ea yetemeriba nei, bior nalo maka amonea. Mia Noa be nalo tai ea taara nei na m̃a amonea Atua, ana Atua milalo amemedu ea mirano.   
\p
\v 8 Dolu, naio be tormoruo Epraamo. Ea kanano viekouoiano ea Atua, naio monea naio batitig bo, naio jumolu den vio nanua naio joaio, naio ban ea vio dolu tai, napano Atua berkario ka mia rudu vanio. Naio jo miel ban ea vio nene, maka rijikia ka naio jo ba be na, mia bior Atua bio naio, naio ban ga.  
\v 9 Naio miel banbano-o mia bogo na naio miyotuba keanio, mia naio javukia ga valauo tai, mia buruvenuo nei naruei napano Atua berkario ban naio. Ana naio jom̃a buru kunuano panpano ea vio nene, naio joaio naliko kanano m̃aratavo nalo, jibe ka kenerinio nalo napano Aisak nalo bija kumabinio sesa nalo, napano Yakovo nalo, napano nalo bunu aborkar borotano nei nanua m̃a Atua naio jian banlo ka ve kanalo tobo to.  
\v 10 Ana Epraamo naio boru ea vio nene, naio joaio, mia naio maka rim̃auka m̃ano yimo na toru tai, naio jom̃a mon ea ga yimo panpano nei ga. Naio ga bior ka napano naio monmonea ka maka ve kiano vonuo riano vo, mia naio jo ga jibe na, ka mia riva jouro ea burum̃ara komeli na Atua kanano, napano Atua naio bitirilario a mim̃aukanio bija kanano burupati na jikili napano mia maka ajikia avurukorov bereio bogo tai.   
\p
\v 11 Tai bereio, naio be tiramoruo Sera. Ea kiano viekouoiano ea Atua, naio be m̃abono ka kenerinio motoru neibano Aisak. Beamu, naio maka rijikia rivar kiritete banbano-o binimei be tiramoruo, mia naio biekouo ju jikili ea Atua ka mia Atua rive riano ea kanano verikariano van naio vija kanano tormoruo Epraamo, ka mia naljuo avar kenerilo tai.  
\v 12 Mia tormoruo Epraamo nene bunu, jibe ka m̃erenio batove ruei, mia kiritete neibano naio bario mila na kanano m̃aratavo nalo binimei telabo. Karina abar sosolilo batove binimei jibe na banbano-o na kanano yati nalo abinimei miroano javukia m̃arvitano nalo na vio iauo, maka bunu ajikia avulukulo ajavukia kurukuti yono na koyou ea tei.  
\v 13 Mia tormoruo nalo nonovio nei na m̃a amonmonea Atua jibe na, mia Atua naio berkar tonovnovo nalo banlo, mia nalo amijev togio telisu ga, mia am̃arm̃aro ajaluvo den yetemeriba nei. Mia nalo amijikia ka mia Atua rijev togio ga vanlo, mia sian nonovio togio na toru nene vanlo iorou, naruei naio mila abitilubar ka nalo abe valauo ga ea vio nene.  
\v 14 Vio yetemeriba nei naio maka ve kialo vio rimemedu, mia kialo jidomiano jua kialo vonuo riano tai.  
\v 15 Ana ver vio neibano ajum̃a ajidomii m̃elea, naio be buruvenuo nei napano beamu ajuvanio abinimei, ver nalo asidom, amijikia avarp̃iliglo avan ea naio bereio ga.  
\v 16 Ana makanio, mia nalo maka atu tinielo rimaio ka naio bereio, nalo ajum̃a ajidomii ka mia avokar vio dolu tai napano naio bo laka, ajidom vonuo na vio mave ga. Atua naio mila batitig kanalo komeli novo nene ruei, ana naio tinien jiilo toru ka rijog ka na mia atum̃a averenio ka naio be kialo Atua riano, a napano ajum̃a aber kiano vonuo, naio be kialo vonuo dam̃ariga.  
\v 17 Ana ea tivelinio na tormoruo nalo nei keana vo, kito rover tormoruo Epraamo bereio, naina ea lavoniano kouo napano naio biniuaio. Ea kanano viekouoiano ea Atua, naio mijamo ka kenerinio takuranolar ga nei Aisak, naio mijamo ka mia rila jokoluolu ka naio bereio. Naina be Aisak nene nanua beamu, Atua naio berkar jikili ban karam̃ano, naio berinavo   
\q1
\v 18 \qt “Riyotuba ea kenerimo na mia kanamo bajulukuti nalo amei ve miroano.” \qt* \rq Jen 21:12\rq*   
\p
\v 19 Ana ka bogo napano Aisak vaataro ka naio rim̃aro, Epraamo naio maka vitovtonia ea Atua kanano verikariano nei, mia naio jo monmonea ga ka ver naio monoka ruebin kenerinio nene rim̃aro, mia Atua mijikia rila naio rimeul bereio. Ana Atua mial kiano viekouoiano ea naio be riano jibe na, ana Aisak naio maka bunu m̃aro, mia karam̃ano naio mial ka napano Atua mila kenerinio kiano meuliano ban ea jum̃ano bereio.   
\p
\v 20 Mo be tormoruo nene tai bereio, naio be Epraamo kenerinio Aisak. Ea kiano viekouoiano ea Atua, naio jian kiano iliano na maaro ban kenerinio juo nei Yakovo naio Isau, naio monmonea ka mia iorou ana mia ilivuiano rimei ea naljuo tibe ka ga napano naio berkario banlo.   
\p
\v 21 Ana Yakovo nei bunu naio jibe na. Ea kiano viekouoiano ea Atua, mia naio barkar tiniene ea naio ka mia naio rila rivu van kiano bajulukuti nalo na mia amei iorou. Naio bar kenerinio nei Yoseve, ana Yoseve nene naio bar kenerinio nalo juo. Ana ka bogo titai, bogo napano vaataro ka korobilo tormoruo Yakovo nene rivakovio, mia naio jumolu ka kiano nasitogo naio jurubanini ka parinio naio milotu ka Atua, ana naio berial kanano verikariano na ilivuiano ban kum̃abinio sesa nalo abiniu.   
\p
\v 22 Karam̃alo tormoruo nei Yoseve, naio bunu bo ka rosidomial naio. Ea kiano viekouoiano ea Atua, naio monmonea jikili ka mia Atua tuvan re kulo Israel atubo ea vio Ijivi, mia naio rivuru bulaglo avan bereio ea kialo buruvenuo rimemedu. Naio berial jibe na, ana bogo napano kiano meuliano vaataro ka ribisi, naio ber bunu ber, ver naio rim̃aro mia ativin re naio to Ijivi, mia monoka adu riva ativin toa kanalo vio.   
\p
\v 23 Tai bereio be tormoruo Mosis, kanano tormoruo juo nene. Ea kanalo viekouoiano ea Atua, naljuo maka amerou ka parinio tubo Vero kanano tuboiano na kirisikili nei, mia bogo na naljuo nene kenerilo Mosis naio moluo, amial naio kirinovo tai vo, ana maka ajamo ka naio ka auebinio, mia amidu van batitig naio jo banbano-o bokar siberio tolu.   
\p
\v 24 Ana Mosis nene, naio bunu, bogo napano naio miluo bavin naio toru ruei, naio bunu be toro na moneano. Ea kiano viekouoiano ea Atua, naio maka sidomii m̃elea ka sio novo na amidu banio jibe ka parinio tubo Vero kenerinio vevinio kenerinio,  
\v 25 mia naio jidomii temi laka ka kiano bajulukuti dolu nalo, tomu nalo na abe Atua kanano m̃aratavo. Naio juva vonuo na tor na toru kanano, bija yetemeriba nei kiano bajago nene nalo, napano kanano saariano nene naio be tena banei ga, ana naio ba miasol kanano tomu nalo, ea meuliano na bogokouo napano m̃a kulo Ijivi nalo ajum̃a amila banlo.  
\v 26 Ea bogo na, naio jom̃a bitikuku ilivuiano nalo napano rijikia rimaluvo kanio, ea bogo na jo binimei iorou. Naio bitii ka ver naio jo bar jogvaiano bijalo bior Naverikariano kiano im̃auano, naio bo loa ka naio rivar kanano tonovnovo nalo ea kiano meuliano na monmaio ea tor na toru na Ijivi kunuano.  
\v 27 Ea kiano viekouoiano ea Atua, naio maka rimerou ka venia napano parinio tubo Vero mijikia rila vanio, mia juvan vio Ijivi, jibe ka napano Atua ber kanio. Naio maka bitikar Atua mirano, mia naio jom̃a monmonea ka ga jibe ka napano naio jom̃a bitikar naio ka mirano memedu ga.  
\v 28 Bereio bunu, ea kiano viekouoiano ea Atua naio bokar batitig m̃arabo na ioruriano napano Atua ber kanio, ana naio mila kiano tomu nalo ap̃iligṽilig burukija na nunu ea kialo m̃aratavo, ana bogo napano Atua naio miila kiano nailiano na m̃ariano binimei ka rudu vironiano van Vero, naio bar laka jel mave ka kialo vonuo nalo, mia naio ba muebinvin nonovio kiritete motoru ea vonuo nonovio na ea vio Ijivi.   
\p
\v 29 Ana iorou ka naina kulo Israel nalo aburo den Vero, amiel aba abokar tei napano be Teimia. Ea kialo viekouoiano ea Atua, abarkor aba tivelinio ea burum̃ara tei nei, amiel aba jibe ka ga na m̃a amiel ea borotano ga. Mia nalo na Ijivi aju abinimei iorou kalo, naruei nalo amilavon ka aiel avarkor tibe na bunu, mia burum̃ara tei nei naio binimei miasol bereio, miladomdomlo am̃arm̃aro nonovio.  
\v 30 Ana bogo napano kulo Israel nalo amiel aba lie vo, aba aboru ea burum̃ara komeli na vio Jeriko, bija kiano kulo na mira nalo napano aju jouro ea kanano burum̃ara tagvoru napano burutomormoruo napano amivon be puruveru jeliviv. Ana ea kialo viekouoiano ea Atua, kulo Israel nalo amiel abulan jaalo jeliviv ea komeli nei ba bokar bogoti ari, banbano-o bogoti aluo nene, amialio ka napano Atua mila tagvoru nalo nei ajibirbili vaarakurano.  
\v 31 Ana na jouro ea komeli nene, be tira tai napano jo, napano beamu naio be tira na m̃arabo, siano be Reavo. Beamu tomu juo na Israel amiilalo ka ava aviti venalulua kulo Jeriko kialo vio, nalo abano ajoluku jouro Jeriko, ana bogo napano ajuaio, tira nei milavanlo ajua kunuano, naio miija tomu juo nei toru. Mia nalo, aba amila ea vio lu vaarakurano ga ka yuka nonovio, monoka mia ala tibena rivan dam̃ariga, ana naio mim̃au ka nonovio varakurano ka bogo tai na ga, bisi, ana maka ka mia aim̃au ka bereio.   
\p
\v 32 Naina naruei be kiado tormoruo tealo napano abe burupati toro na viekouoiano re nua. Mia romijikia rava lie vo, bior ka sio miroano ju keano vo, javukia tormoruo nalo nei Kition, Barak, Samson, Javta, bija parinio tubo Teviti bunu a Samuel bija naverialiano dolu nalo, mia namial jibe ka bare beamu vo, maka bunu ve bogo na rovivitauia bulag kialo tukunuano nalo riviniu riveve terakurano.  
\v 33 Be riano keana, ver romijikia rojog tukunuano nalo nei ga, nalo bo mia bo. Ea kialo viekouoiano na ea Atua kiado tormoruo nalo amila burum̃ara vite nalo telabo. Reialio ka napano amila mira, ajovulu buruvenuo dolu na jikili, amila napano tomu na vio ga nalo monoka aim̃au takii tuboiano memedu, mia ajikili ka avokar venia napano amijikia ka Atua naio berkario banlo. Kulo dolu nalo abukulo aban ea bulukup̃ili na laion ka aserlo, mia maka ajikia aserlo.  
\v 34 Mia abukulo aban ea burum̃ara kenieno sebi na, ana mia maka rijikia sisenlo leleio. Bogo tai ana abiniua iobogu na mira, mia aburo denio bo ga, mia bogo tealo uolu nalo amila kikilo banbano-o na kialo moroano batove, vaataro ka ribisi. Ana iorou kanio, ana amial ka napano abavin bereio, abinimei jikili laka, naruei amila mira ka kialo uolu na ea buruvenuo dolu nalo, banbano-o na ajovulu lo, amijil bulaglo aban bereio.   
\p
\v 35 Nalo tealo kalo am̃arm̃aro ea bogokouo nei, naruei koalo nalo ajum̃a ajiglo toru, mia amiilo ka napano Atua jian bereio niunulo banlo, bar bulaglo ameul bereio. Nalo tealo bereio, uolu nalo amila jaleleano telabo ea mokotenalo, a amilavonlo ka ver aber maka bunu amonea ga Atua, mia nalo atuvanlo avan bereio. Mia verver nalo aber ka aju amonmonea, mia ala kilkil ealo liei vo.  
\p Mia ea bogo na, Atua kiano tomu nalo aberver ver nalo ala sikili liei kalo, mia bo ga, mia nalo maka ajikia atuvan kialo Tubo. Nalo tinielo maio ga ka bogo na mia naio rilalo asikil atu bereio, nalo ajidom asikil atua mirano napano asaaro, a nalo aimou re bunu kanio.  
\v 36 Nalo tealo amiorkakarlo ana abitivlo ea vio medave kamu ea tomu nalo na m̃a aju amilkuei kalo m̃elei. Mia nalo tealo, bogo na amiorkarlo, nina ea m̃armieni na teremi, naruei abukulo bijaio ban ea nalakoiano.  
\v 37 Tai bereio, ajubabinvinlo ka puruveru, a tealo abijikokorov mokotenalo beve juo ka so, a tealo ajebinvinlo ka iobogu na mira. Nalo napano ver maka am̃aro, nalo bunu vite nonovio kirisikili banlo. Nalo maka ve kialo titai, jum̃alo bulati laka, naruei amijulu bulag kulukuti nani p̃elina nunu bunu ka mia mila niabele bitunu, mia vite nonovio bova ga banlo julaka ga, mia tomu dolu nalo maka aialerinio ealo, amila lelanlo toru laka.  
\v 38 Nalo na maka ve kialo vonuo, maka ve kialo vio na mia avan eaio, naruei amiel janea vio nalo na be teauo p̃elina ea burusuku, aju janea buluvai nalo.  
\p Nina be tomu na viekouoiano nalo, nalo ajibe na naruei. Yetemeriba nei naio bijuku bova toru kalo, jibe ka napano romijikia roverenio roverinavo yetemeriba nei naio maka bunu rivare ka kulo novo nalo na jibe nei atuaio, tomu nalo nei bo ka atua ga kanalo vonuo na jo mave.  
\v 39 Romial ka nalo nonovio napano roberiilo ruei, abiniua bogokouo telabo laka mia maka ajoru, aju jikili dam̃ariga, mila kito robitii kialo viekouoiano ea Atua naio burutomoruo, a be riano. Nalo abe tomu na virakariano moruo na beamu ga, ana ajum̃a amijog Atua kanano verikariano novo nalo, ka mia naio rila m̃arabo na ka mia ajikia avokar meuliano napano maka ve jukuti nene tai, mia maka aial m̃arati na verikariano nene maluvo keanlo.   
\p
\v 40 Mia Atua naio jo bitii boka rila m̃arabo vou tai van kito. Mia naio miila Yesu binimei mila kiano im̃auano bisi, mila na nalo na beamu nei, bija kito, kito nonovio robar m̃arati na Atua kanano verikariano nei ea m̃arabo takurano ga a ea bogo takurano ga.   
\c 12  
\s1 Rovitii Yesu ga, ka naio jikili juvulu bogokouo nalo  
\p
\v 1 Mia nalo nonovio napano roberiilo ruei, nalo ajibe ka burupati tormoruo nalo na burum̃ara viekouoiano, napano be kialo burum̃ara taara na ajumolu ajum̃a amial kito, naruei ajum̃a abitii kanado viekouoiano ka kito rejikiti jum̃abe. Vite venia na m̃a monko kiado m̃arabo, monoka rovukulario, a kariano nalo na m̃a abivikakar tanea kito, monoka ravar bulagio, ka mia ve p̃irido ka retikiti ea burutili m̃arabo na tebievi na jokamu ea mirado, ka na jidomiano na tuvaniano maka toa kito leleio, mia kiado jidomiano ve tebievi ga rivu.   
\s1 Sirarago ka Yesu ga  
\p
\v 2 Kito rovuku mirado ea Yesu sikili, napano m̃a jikili ju ea juluvati m̃arabo iako. Naio be burupati m̃arabo na viekouoiano, a naio be jukuti nene, mia bogo na tiniedo maio ka naio, mia naio rije moroano van kito. Romijikia rosidomii jum̃abe ka bogo na m̃a naio jom̃a bar niabejalele nalo a mijog kirivova mave ea m̃akolkolo, naio jidom bea ga ka bogokouo na naio jo biniuaio. Naio midu kiano jidomiano jo jikili ea burum̃ara saariano napano jokamu ea mameriniano, rivano-o mia naio tovulio, napano vonganei naio jom̃a jotano ea Atua jum̃ano vameruo, ea kanano vio lu napano loa laka tiniabene.  
\v 3 Mia bo ka rotu tiniedo rimaio ka Yesu, ea bogo na tomu na bova nalo nei ajum̃a ajuba naio ka iliano na bova nalo, a tinielo jer m̃elea naio jibe na, mia naio mijamo ka naio ga ba bokar jukuti nene. Jibe na, kito bunu bo ka tiniedo rim̃aro re sop̃eli ka im̃auano, maka rejikia romerou, maka rosidomii ka mia rovuro ka venia napano monoka ralaiio.  
\v 4 P̃eli roberiam̃a romijog bova ka m̃a romila mira ka bajago na bova bare, tiniedo m̃aro, mia kito maka rovokar vo venia nam̃a Yesu milaiio, maka rotuko vio ka kariano-o mia sado burukija riiou lele niabedo kario.  
\v 5 Mia bo bunu ka maka tiniedo ribobogia iliano na tunukakariano na karam̃ado Atua naio ber ka kito, na naio bio kito jibe ka robe kenerinio, napano naio berinavo  
\q1 \qt “Keneriku, ver kiniou neial rivu ka jogvaiano tai rimei rivokarso, mia jau keiakurano ea re, \qt* 
\q2 \qt p̃eli na ver bogo tai neial ka monoka nodu vironiano vanso, mia kanamo jidomiano rijoru re, \qt* 
\q2 \qt bior kanaku bajago na mia m̃a noverloglogso kanio naio jibe na naruei. \qt*   
\q1
\v 6 \qt Ver nalo na m̃a kiniou tinieku jiilo, bogo tealo monoka nalalo ajog rivova, \qt* 
\q2 \qt a nalo na m̃a nebe karam̃alo, mia bogo tealo monoka nevitivilo.” \qt* \rq Ilimasou 3:11-12\rq*   
\p
\v 7 Tibe na, ver bogo tai jau keial ka jibe nei banso, mia monoka kodu ga tibe ka m̃arabo tai napano Atua naio jidom ka mia riverloglogso kanio, naio jidom rivuririi kanamo meuliano. Kito nonovio na m̃a robe teta, roju m̃a romila jibe na ka kenerido nalo, naruei ver Atua rial kito tibe ka kenerinio, naio monoka rila tibe na ka kito bunu.  
\v 8 Tena be kiado ka mia kito roviniu rovokar, mia ver rila re ka kito tai, tibe na mia naio rial toro na tibe ka maka bunu memedu ka ve kenerinio, mia be tete nalo na karam̃alo toro dolu na kovio tai bereio.  
\v 9 Mia beamu, kito robiniu, bogo na karam̃ano ajum̃a amila vironiano ban kito, maka rosidomio, be riano, voniganei robitilubario ka nalo amemedu ga, mia mila na rabamenealo loa laka. Tibe na ana bo ka ravatove ka niunudo na naio be karam̃alo, rasaaro ka venia na naio mila miyotuba ka kito, bior naina naruei be m̃arabo na meuliano.   
\p
\v 10 Karam̃ado nalo ajum̃a amije vironiano ban kito ka yuka nalo na m̃a robe kiritete kia ga vo, amila jibe na ka ajidom aber mia rivu kalo bereio, mia bogo na Atua midu vironiano ban kito, naio mila ka mia rivu lie van kito vo, ka mia kito bunu rojikia rovokar kiano meuliano lu.  
\v 11 Vironiano naio be titai na ka bogo na ravario, mia naio maka sese leleio, naio mijea laka. Mia iorou kanio, ver kito rajamo ka naio riverloglog vatitig rivu kiado meuliano, mia naio rivar sano m̃arati na bo, napano bajago na melumuiano vija tum̃aroano, vija bajago na be lu a memeduano.  
\v 12 Tibe na, be kurano ka venia na m̃a kubiniualo, mia kamiu kuvila von ka kuvila tavukia na m̃a naverialiano Aisea naio ber beamu ruei, na m̃a naio berinavo  
\q2 \qt “Kuvitiri bulag jumemiu na m̃a melukluku jaklele, kuvilalo aikulkulu bereio, \qt*  
\q2 \qt a sudu jaamiu na m̃a aju amemebiju na, kuvilalo asikil bereio.” \qt* \rq Ais 35:3\rq*   
\p
\v 13 Jibe na, kamiu bunu kuvila kenemiu m̃arabo nalo amemedu rivu, ana kenemiu jaba nalo napano amiel jakio, mia jaalo riva rivova lie re, mia amijikia amei asikil bereio.   
\p
\v 14 Vite juo na m̃a ratam̃i ka rovokar tulaka atibe na. Tai, naio bajago na bilbilu na bo vija kulo dolu nalo, a tinene, naio be bajago na meuliano lu na m̃a toro monoka toaio ver naio jidom rial Atua na loa laka mirano.  
\v 15 Ana monoka kuvim̃auka im̃auano m̃ele ka mia ve re kamiu tai tikiti mia rijoru rimebi ea m̃arabo togio, napano maka rivokar Atua kanano tiniememiano vo. Kuvitikar vatitig bunu rivu ka kiri pati na mijea tai na telisu ga rimei re ka rivijurukar kiamo iviso. Verver makanio, bisi mia riluo rivar m̃arati na bova nalo ve telabo ea kiamo meuliano, a napano niamiamo nene rila niegeniege namoneano lu dolu nalo kanalo meuliano na bo nalo.  
\v 16 Monoka ve re bajago va na sum̃ano vija tira rimonea kamiu, a monoka ve re bajago na tiniel ribobogia batitig Atua, tibe ka Isau re nua naio milaio. Isau nene, Atua bijauialario be motoru na karam̃ano ka mia mijikia rivar nonovio kiano jajum̃ano, mia ka bogo tai ana naio jijerio, mijugun bonoti vaatei na bo, napano kuruano maratoru Yakovo naio jonio, ana naio p̃iliṽililar ka Atua kanano tiiano na kiano meuliano, berika kuruano ber “Ei kodu vaatei nei van kiniou voniganei ga, a teta jajum̃ano napano kanaku, mia nesian vanso.”   
\p
\v 17 Ana jibe ka kito romijikia ruei, ka iorou kanio ana Isau naio berenio mia rivar bereio kiano jajum̃ano nene, mia aberbureio ga, bior ka naio p̃iliṽililario ka ruei. Mia naio mijog bova o-o jidom riviligio, jegi mia kiride ga. Naio jidomii bereio, ber ver naio rila re ga, ana bo, mia voniganei bano bisi.   
\s1 Sinai burusuku na yetemeriba, bija Saion burusuku na tiniabene  
\p
\v 18 Bo ka kito rosidomii ve telisu kija bereio ka tivelinio na tuboiano moruo na beamu vo, rivija Ioluano Vou na bo na Yesu kanano napano binimei voniganei. Vite juo nei abe dolu laka garuei, mia vite nei kito romijikia rovitilubar ea salo burusuku nene ve juo.  
\p Burusuku na tuboiano moruo, nina naio be burusuku Sinai, napano ea yetemeriba nei ga. Kiado tormoruo Ju nalo amijikia amialio ka miralo, naruei amial ka naio be burum̃ara jeleigio vio na miroano, napano sebi joaio, a be bolu nene napano vio nene kiri bobogio ga, bija kiano suku nalo napano melijokouo jovukoio jo, mia jegi tai napano jom̃a miuvuvu jan eaio.  
\v 19 Mia kiano burum̃ara pasimeduo miaga m̃eleia, mia amijog joono tai mil napano kiri temi kar ga jo, mila amerou mia amerou m̃a ajegi aber mia naio river re bunu titai vanlo.  
\v 20 Nalo amial ka vio nene be lu laka, ajerako jikili mia kirisikili, ka temeul venia nam̃a ban vaataro ka burusuku nei, tokol luvluvu ga, mia monoka atubabinio ka rim̃aro.  
\v 21 Mia tormoruo Mosis naio mial vite nalo nene, mia naio bunu merou, naio berinavo “Lerinio, kiniou nememebiju ka nam̃aro.”   
\p
\v 22 Naina naruei be burusuku lu na tuboiano moruo re beamu, mia vonganei kito maka bunu m̃a ravan eaio, robinimei ea burusuku lu na Ioluano Vou na bo burusuku Saion nei. Naina jo tiniabene, napano be burum̃ara bulukomeli na Atua na meul kanano naio joaio, naio be Yerusalemo vou na vio mave. Naio bujo magmago ka nailiano nalo, miroano mia miroano napano maka ajikia avulukulo, napano abitiri bijiilo aju janea vio ka ala iouano na saariano.  
\v 23 Mia iviso kalo, kito taara na namoneano lu nalo rotu vio takurano, napano rojibe Atua kenerinio motoru nalo, napano romidu jajum̃ano ruei. A bija kito bunu, niununo na kanado m̃ariano nalo aju, nina nalo napano amemedu bo ruei ea yetemeriba nei, ana bogo na m̃a am̃aro, abur bulaglo aba aboru ea jukuti na m̃arabo na ioruriano, napano aju bo ea vio nei. Mia toro na tibureiano tai bunu naio jom̃a jotano mave ea vio nene, nina be Atua na vite nonovio.  
\v 24 A bija vite dolu na bo nene nalo napano ajua kiado burusuku lu na Ioluano Vou na bo nei, mia romijikia reial Yesu, vija kiano burukija na miou, napano m̃a ap̃iligṽilig ea kiado iviso nalo ka rila romeravo. Kiano burukija nei, naio maka tibe ka burukija na tormoruo Epel re beamu, na m̃a ajum̃a aber naio be burukija na m̃a wem̃aren toro, aber bunu be burukija na riuemeran na bova, mia Yesu kiano naio be burukija na milarur toro a naio be burukija na viekokoano. Yesu mila tanea keana, ka naio jikili ju iviso ka Atua bija toro, naio mila virakariano vou ka tom juo nei ju jikili bo, naio milalo aju burukuti bo bereio.   
\s1 Iagago Vatitig ka Atua joono  
\p
\v 25 Tuboiano moruo re beamu, naio jibe ka ililaboniano tai napano miyotuba ea yetemeriba nei, a ioluano vou na bo, naio jibe ka ililaboniano tai na miyotuba ea vio tiniabene. Nalo na m̃a abilig taakalo ka tuboiano moruo, maka ajikia avuro ka kialo vironiano leleio, naruei ver tibe na, mia tum̃abe ka nalo na m̃a abilig taakalo ka ioluano na bo? Mia nalo avuro kulu kija re na. Tibe na, mia bo ka raiagago vatitig ka Atua joono, bo kito roduio.  
\v 26 Ka bogo na m̃a Atua mil ban nalo nanua na, kiano iliano kiritemi tanea naio mila borotano mikulkulu, avona bisi, ana kiano verikariano tai naio berenio bavin lie ka naio bereio, naio berinavo  
\q1 \qt “Bogo tai bereio mia kiniou noikulkulu vatitig ka vio nalo, maka yetemeriba nei ga, mia vija rera garuei mave vaarakurano.” \qt* \rq Akai 2:6\rq*   
\p
\v 27 Mia iliano na ea vio nei na ber “Vaarakurano bereio,” naio ber titenia. Naio berenio Atua mikulkulu ka vio vaarakurano ruei, ana kiano jidomiano jikili ka mia rikulkulu vitii bereio saba nalo. Ka legiano na maaro mia naio rijagdag boṽeio ka yetemeriba nei, vija vite nalo nonovio na m̃a jiilo ajuaio, naruei mia vite na m̃a maka rijikia rijagdag boṽeio kanio mia naio tumolu tu sikili tubo tu.  
\v 28 Titai ga naio mijikia tu sikili tubo tu jibe nei, naina be kiado Atua kiano navenatuboiano nene, a siva toru laka ka na m̃a naio midu kiado meuliano jo bo joomo eaio. Bo ka bogo nonovio rodu lotuano na bo tai vanio ka mia naio mijikia saaro kanio, mia robitilubar ka naio be lu laka, a rotovon naio.  
\v 29 Bior kanado Atua naio be sebi napano jum̃ano nalo amijikia asisen nonovio vite nalo rivano-o riviniu kokoio.   
\c 13  
\s1 Bajago nalo na m̃a Atua naio jaaro kanio  
\p
\v 1 Iliano tealo bereio ka rijai kamiu ajibe nei. Bo ka kamiu kuvitum̃a tiniemiu riia kamiu dam̃ariga, tibe ka na m̃a kamiu kube m̃aratavo takurano ga bija Kristo.  
\v 2 Mia kamiu tiniemiu riia re kamiu ga, mia tiniemiu riia bunu valauo nalo, kuvisaaro ka kuvitikarlo ea kenemiu vonuo nalo. Bo ka kuvila tibe na, bior ka na m̃a bogo tealo, maka ajikia, mia valauo nalo na m̃a kumitu kubitikarlo, nalo abe Atua kanano nailiano nalo.  
\v 3 Kuvisidomial nalo na m̃a ajua nalakoiano, kuvar bitiran kanalo jogvaiano nalo, na tavukia ga napano abuku kamiu bunu kumitu bijalo. Mia kamiu tiniemiu ribobogialo re bunu nalo na m̃a kulo dolu nalo amila lelanlo, bior ka kito robiniu rojua vio yetemeriba nei ga, monoka rajai kito ka ravar bitiran bogokouo nalo nam̃a robiniuaio.  
\v 4 Bo ka roviniu rovitii vatitig bajago na soriano naio be kirinovo tai a be vite lu, ana bior vite na, maka rivu ka niamiamo tai rimei rila niegeniege jogu novo napano aboeio ban naljuo neibano ajoro, bior napano aberkar ka mia nalo avuru re bunu dolu. Mia Atua rije tibureiano van nalo na m̃a amiel janea vio, jibe nalo napano ajoro amila siakaiano p̃elina m̃eiaku bija niatira amila siakiano.  
\v 5 Kuvitikar vatitig ka kodu re veru naio to tukamu ka kanamo meuliano. Bo ka mia kala jau kasaaro ga ka venia na telisu napano naio joa jum̃amo ruei, bior verikariano na Atua kanano napano naio jom̃a ber jibe na, berinavo  
\q1 \qt “Mia kiniou notuvanso re bogo tai, maka nejikia novilig taakaku kaso.” \qt* \rq Tiut 31:6\rq*   
\p
\v 6 Ana bogo na m̃a tiniedo maio ka nina, naio mije moroano ban kito bereio, ka romijikia roverial iliano na niosi na Iouano, na binimei be kiado iliano, roberinavo  
\q1 \qt “Toro na miija batitig kiniou naio be Atua sop̃i ga naruei, \qt* 
\q1 \qt mia kiniou nomerou re bunu, \qt*  
\q2 \qt toro dolu naio mijikia rila venia na vova van kiniou bereio?” \qt* \rq Iouano 118:6\rq*   
\p
\v 7 Vite dolu, bo ka kamiu kuvitu tiniemiu rimaio ka kenemiu navu-rim̃araboiano nalo, napano ajukamu ka aberial Atua kanano iliano beamu ban kamiu. Kuvilavon ka kuvitii vatitig m̃arati napano naio miyotuba ea kialo bajago novo na kialo meuliano, a kuvilaii kialo moneano na jikili ea kenemiu meuliano nalo.  
\v 8 Nalo amonmonea bo, ana kito bunu romijikia romonea, bior Tubo Yesu Kristo naio rive dolu re bogo tai, naio bare ga ka naniovo, a banei, a beni bunu rivano-o mia maka rijikia ribisi.   
\p
\v 9 Bo ka rover bunu ka kamiu, ka kuvitikar vatitig kamiu rivu, ka iliano dedade nalo a verloglogiano vovu nalo amei re avuru bulag kamiu den burusio na bo neibano kumituaio ruei. Tomu tealo ajidomii m̃elei ka jokoluolu lu nalo, bija salo bajago lu likiliki nalo, mia m̃arabo nalo na amim̃auka sinaniano nalo nei maka ajikia ajai kialo meuliano nalo. Vite takurano ga na naio mijikia rila kiado iviso nalo sikili rivu vatitig, nina be Atua kiano tiniememiano na bo ban kito.  
\v 10 Sinaniano nalo tai na jibe na, nina be sunbue na jokoluolu napano kulo lu nalo ajum̃a abuku jua boda. Abolkouo kanio, amila im̃auano bisi ana iorou kanio ana ajen jibe ka salo sinaniano nalo. Kulo lu nalo nei nalo ameul ea sinaniano na boda nei, mia kito na m̃a romonea Yesu, maka rotum̃a rosinan ea boda nene, mia be kiado boda dolu tai na naio jo, napano romeul ea jokoluolu napano abuku joaio, napano kulo lu nalo maka avitilubario, mia maka ajikia asinan eaio.  
\v 11 Nalo ajum̃a amila kialo jokoluolu nalo nene, naruei tai naio be dolu kija, jibe ka napano jidom rila tovorovo na Yesu kiano m̃ariano. Jokoluolu nene naio na m̃a aberenio be ijaiano na viekokoano rivior kariano, naruei bogo napano parinio toro lu mila nina, naio maka rudu momon temeul niabene riva joomo ea vio na be lu laka, mia naio bar ga burukija nene ba jua boda nene. Mia niabene temeul nei, abar ba tavio ea komeli bereio, ana amisebio.  
\v 12 Nina jibe ka ga na m̃a Yesu milaio, napano naio bunu amidu naio ba tavio ea burusio na komeli, amila naio mijog bova banbano-o na kanano burukija miou dabo nonovio, napano maka riou kurano, mia miou ka rila kito kiano tomu nalo romei rove lu rivu kamu ea Atua mirano.  
\v 13 Ana bior Yesu naio jaaro ka rila tibe na rivior kito, kito bunu monoka rasaaro ka ravavin vija naio ea vonuo tavio, napano tomu nalo ajum̃a abitiidie kito jibe ka na m̃a ajum̃a abitidie naio, mia kito ravar jogvaiano jibe ka na m̃a naio bario bunu.  
\v 14 Verver rivova van kito ea yetemeriba nei tibe na, mo bo ga, bior maka rotum̃a rosidomii ka mia rotua komeli tai ea vio nei napano jo julaka ga, mia rojum̃a romidu kiado jidomiano joa kiado vonuo memedu ea komeli vou napano roju raban ka keana.   
\p
\v 15 Jibe na, bo ka rosidomial ka Yesu, naio bijuku bo laka ban kito, naio betavo ea kiado m̃arabo, mia rodular Atua siano tulaka kanio. Rala re sida ka temeul nalo vanio, tibe nalo re nua, ana iliano nalo na amiyotuba ea niodo ka rudular naio ajibe ka m̃arati tai napano jesei bo laka banio.  
\v 16 Ana kito tiniedo ribobogia re ka rala im̃auano na bo nalo, bior nalo ajibe ka sida napano romijikia ravar van Atua. Mia tai napano naio jo jaaro toru kanio naio jibe ka ver kito rala rivu dam̃ariga van kulo dolu nalo, rasaaro ratan ka kiado saba nalo vijalo.   
\p
\v 17 Vite ta bunu bereio, na naio bo ka kito monoka romonmonea kiado navurim̃araboiano nalo, a monoka rasaaro ka rotutano ka kanalo iliano nalo. Nalo aju amila vio jikili ka abitikar batitig kito bo, bior kanalo tomu na tortoru nalo na mave kalo ajum̃a abitii kialo im̃auano nalo a kialo bajago nalo bunu. Verver kiado navurim̃araboiano nalo, kialo jidomiano nalo am̃arm̃aro, ana mia im̃auano nonovio rivova, mia ver romonmonea nalo rivu, ana mia rila im̃auano ve temi laka re vanlo. Mia asaaro kanio ana mia rivu lie bunu rivan kito tomu na im̃auano nonovio.   
\p
\v 18 Bo ga, ana vaataro ka iliano nonovio riviniuviniu naruei, mia kumemi numisidom nuvika bunu den kamiu ka kuvisidomial kumemi ka kenemiu volkouano nalo, rivior vio na kirisikili nei na m̃a kumemi numituaio voniganei. Kumemi maka nuvial kar ka torokoriano naio joa kumemi, mia kenememi jidomiano naio meravo bo ga, ana numitum̃a numisikili ga numitua bajago na bo napano memedu ea tomu nalo miralo.  
\v 19 Mia kiniou nojidom laka ka kuvolkouo ka ala iliano nalo nei amemedu vatitig sop̃eli, ka mia nejikia notumolu den vio nei neviedu kean kamiu rivesiou re.  
\v 20 Kiniou nojom̃a nobolkouo ka kamiu bunu, ka mia Atua rijai kamiu. Naio be Atua na tum̃aro, a be Atua na tinien miia kito kiano nunu nalo, naruei naio miila kiado Tubo Yesu naio binimei ea yetemeriba nei, naio binimei be kiado toro na toru na bitikar nunu nalo, kiano burukija naio miou ka rivitirilar virakariano vou nei napano mia naio to toboto. Naio be Atua nene kiaga vo bunu napano Yesu mijamo ka kiano meuliano banio, naruei naio burulario den m̃ariano, bitirilario meul bereio.  
\v 21 Ana kiniou nabarkar tinieku ea naio ka mia naio sian vite novnovo nalo riviniu napano kamiu kuvisidom ka kuvila kanano im̃auano ea yetemeriba nei tibe ka na naio jidomio. Naio jo mim̃au ea kanado meuliano nalo beve terakurano ea ga Yesu Kristo, ana naio jo mim̃auka batitig kanado bajago binimei jibe ka na naio jaaro kanio, ana mia kito reiaia naio ve toru laka riviorio, rivanvano-o na mia rijikia re ribisi, Mm.   
\p
\v 22 Kanaku m̃aratavo nalo na ea Kristo, nebivitauia m̃esi nei biedu ban kamiu, be kurano ka maka ve tebievi laka, mia ver kuvial tum̃abe ana mia tiniemiu ser m̃elea re kiniou, mia kuvidu tibe ka kanaku iliano na ijaiano ka rijai kamiu ga.  
\v 23 Kiniou nojidom neverial van kamiu ka kuvijog ka kuruado nei Timoti, amijamo ka naio batavio bereio ruei den nalakoiano, p̃eli mia naio rimei sel ea vio nei vesiou re ga, mia kumemi ve juo nuviedu ka nuviadu ka kamiu.  
\v 24 Kumemi numisidom ka kuverial van kenemiu navurim̃araboiano nalo, vija Atua kanano tomu dolu nalo, ka kumemi numitum̃a nubika ka nalo ajum̃abe na, aju bo p̃elina jum̃abe, a nalo na vio Italia napano m̃a ajua vio nei nalo ajidom aver bogiano bo van kamiu bunu.  
\v 25 Kanaku iliano na maaro ea vio nei naruei, neberinavo mia Atua kanano tiniememiano novo a kanano tinievuiano naio to vija kamiu nonovio.