\id PHP - TBaruga 
\h Filipai Enembodu 
\toc3 Flp 
\toc1 Filipai Enembodu Pol Unda Ingiso Filipai Enembodu Gefiria, Aná Evere. 
\toc2 Filipai Enembodu 
\mt1 Filipai Enembodu  
\mt2 Pol Unda Ingiso Filipai Enembodu Gefiria, Aná Evere.  
\ip Iesu da aghi kato, Pol, umó Rom anava dibura ea irirota, ená ingiso ghaeko* 62 Iesu siroruturia-da ambova gefiria-jogo. Filipai enembomi sonembea, undú guri ututuria-du, “aiye” rirota, ená ingiso gefirie.  
\ip Kotú unda gefiria-da bee eini mo, Filipai enembodu nghaĩ ituturie. Irugari gavera kakatomi, Kuristini embobo dano vii mendó andoro tafugari-du, kotú Jiusi enemboda agho dari ijoijokoko dano kaifa egegari-du regeguturie. Avore, Pol aná irugari kakato sembagoda gaga ningauve-degea gefirie. Kotú irugari sembago dumeni dodogea neno kaverea, Iesu gaabee urota, Kuristini mokogo iririgari-du, gefirie.  
\ip Aghade ekaresia* avo Filipai vitiria-da rova besiga eini siroruturia-du, Pol na gaga dumeni tano 4 anava gefirie. Kotú banuna urota, rekago númanda guri ututuguturia-da sonembadu “aiye” gaga gefirie.  
\is1 Pol Ená Buka Gefiria Gagada Mendó Mane, Aná Evere:  
\io1 1:1-11 Pol unda ghanena uria re.  
\io1 1:12-30 Pol umó daiyagha diburava vitiria-da gaga re.  
\io1 2:1-18 Pol da, Iesu Keriso undufa unda durogha gari uutuva doa furia, enembo bee nindia durumugea, mema tambua ambubuturia aghagonu, namonde amó aghagonu egegari-du, riria re.  
\io1 2:19-30 Timoti ungá Epafroditus ya, Filipai bogu naava bubota, natofomi “Orokaiva!” rirota, númane bubugarida gaga re.  
\io1 3:1-21 Pol na, rourogo irugari gavera kakatoda gaa niningigea, ambo-ambo egegauve-degea gaa rirota, isuri uria re.  
\io1 4:1-23 Besiga dodogea, taubana iririgari-du rea, Pol unda aiye gaga rirota, tano uria re.  
\c 1  
\s1 1:1-11 Pol Na Filipai Enembo Ghanena Urota, Númandu Daiyagha Benunu Eta Uria-nu Riria Re.  
\p
\v 1 \x - \xo 1:1 \xt Eka 16:12\x*Ariee, anda ikoko mendi, ariri gharovu!  
\p Gaga oreki tutuno ea reisi-gefera mo, nímanda kokomana, Iesu Keriso da buro kakato, Pol ungá Timoti gha, angá amó re. Nímane dano avo Filipai bogu naava, Iesu Keriso de takembea, God da natofo ea vitera enembo dano, námanena nenode asiside dano ghanena rosoreta. Yata bua gigige!  
\p Kotú nímanda ekaresiada* beforo ririkigaride ogabada manede dano ghanena rosoreta. Yata bua gigige!   
\p
\v 2 Namonde anda Afa God de, Jojabee Iesu Keriso deda kauta kaveverade siriri aride utota bubugadi rere!   
\p
\v 3 Amó nanjigo nímane nundubeta rora aghade, God dava nímandu “aiye” reta rore.  
\v 4-5 Anada bee mo, nímane tutuno ea, God da Gaga Taubana niningiguturera fefera aghade reta, sonembuta reisi-foravore. Nímanena amó sonembutuaveta, God da Gaga Taubana-nu minono rita deĩ eta rore. Oreki aná dabako aghagonu rosoravore. Amindu, amó tumanadu nímane nundubuturota, gangorogha nímandu benunu urota vitere.  
\v 6 Amó tanana rore: God undufa nímanda neno rova unda buro taubana tutuno uria-nu uta irurota, Iesu Keriso kaverea furaita rouvia feferava, aná buroda bee isagha aita rouvie.   
\p
\v 7 Amó nenode asiside dano, nímane nundubuturota irita rore. Kotú anda aghá eta rora, aná jo akuago irambi re. Anada bee mo evere. Unda Gaga Taubana minono rari-du rirota, God na sei amonu gateguturieta, amó iru-furu urota, unda Gaga Taubana-nu gaabee egegari-du rea, enembo dumenide besiga ea minono rirera-va, nímane anda kasava jiria sonembutureravore. Kotú, amó oreki diburava iria, nímane aghá egegeta rosoravore.  
\v 8 Atá God umó rei-gerue: Iesu Keriso da nímane neno buta rouvia aghagonu, amó neno dano ututurota nímane neno buta rore.   
\p
\v 9-11 Kotú amó nímandu rea God dava, donu benunu eta rora, aná evere, nímanda neno bari daiyagha baria, jojabe asueta, nímane gaa beenu tanana ea bua righia goghó urota, neno nundubarida emboro tanana egegasira-du rea, benunu eta rore. Aghá egegadora, nimane eini-eini taubana, gaga taubana kotú emboro taubana tanana egeguturota, gategari inono egegaita rosoravore. Aghá urota iririgadora mo, ari bari kotú nundubari taubanami, nímanda neno rova beda urota, Keriso da Kaverea furari feferava, God da dibeva nímanda dinunu eini kotú ari akuago eini jo gambi aita rouvie. Atá aná dano, enembomi God da duroghadu raga regegari-du rea, Iesu Keriso na utuaveta nímanda neno rova siroreta rouvie.   
\s1 1:12-30 Pol Da Tamova Donu Siroruturia-Mi, Gaga Taubanada Ragaro Aria Fafate Uria Re.  
\p
\v 12 Anda ikoko mendi, ariri gharovu, nímane enanu gia tanana egegadi rere. Dara kotú mema sirorutata, itatama utara-mi, sonembutata God da Gaga Taubana bejea irueta, enembo oruabe, niningigea gaabee egeguta.  
\v 13 \x - \xo 1:13 \xt Eka 28:30\x*Atá anda aghá utara-da kikinu, Rom enemboda kotofu jojabeda kambo kaifa arida mene-mene ari kakatode, kotú enembo eve vitia-de dano niningigea, tanana egeguta: amó jo tefo diburava irambi re. Amó Keriso da buro kato-gea diburava vitere.  
\v 14 Amó diburava itutata irieta, namonde anda ikoko mendi ekaresia* rova vitia ananu gigigea, númane jo oru ambi faghighi egeguturota, Jojabee gaabee ea goghó egegeta rousue. Aghá urota, God da Gaga aná minono rita deĩ eta rousue.   
\p
\v 15 Gaa bee re: enembo daba-daba nundubari akuago urota, anda bingádu mandudu urota, nenuka númanda ragaro righota erari-du rea, minono regegeta rousue. O enembo dumeni mo, nundubari taubana urota, amó sonembaita rea, Keriso da Gaga Taubananu minono regegeta rousue.  
\v 16 Ená enembo rera, númane eghá tanana egegeta rousue. Amó bua diburava itieta vitera-da bee mo, Gaga Taubana sorari-du rea, Jojabee na, amó bua diburava itieta vitere. Amindu, númane amó neno rururota, minono anda rasira katogo, númanena regegeta rousue.  
\v 17 O sei retora nundubari akuago enembo dumeni, númane gaabee ambi urota, nendufa númanda bingádu rea, minono regegeta rousue. Amó eve diburava irirota, bouvu memagha tambari-du rea, númane Keriso da ragarova minono rari aghago egegeta rousue.   
\p
\v 18 Avotago, enembo númanda bingánu nundubuturota o Keriso da bingánu nundubuturota minono regegadua, amó jo mema ambi re. Anada bee mo, evere. Eini-eini jojabe bee aná Keriso re, jo namonde amó irambi re. Amindu rea, nundubari akuago eta rousua enembomi aĩ, nundubari taubana eta rousua enembomi Keriso da Ragarova reaveta, enembo Kerisoda Gaga ningia gaabee egegadua mo, amó gangoro aita rore. Kotú amó aiye rirota, gangorogha iraita rore.  
\v 19 Anada bee mo, amó tanana rore, nímane andú rea, benunu egegeta rosora-mi, kotú Iesu Keriso da Asisi amó sonembeta rouvia-mi, amó jebugea neno asegaitare.  
\v 20 Kotú amó dodu uno ea, kaifa gigita rora mo, aná evere: amó daiyagha ea, jo jabura o meka gambi, dibe emboro asire. Amó jebuga iradora, o Keriso da bingádu amburadora mo, Keriso da bingá baria, jojabe asua amindu, amó uno gogorego eta rore.   
\p
\v 21 Avotago, gigige! Jebuga mo, doro? Jebuga andava vitia-da ruru aná, Keriso umó re. Amburadora beago, angá danode takembea irirota, taubana tafirota iraitare.  
\v 22-23 Atá, ená endava jebuga irirota mo, minono rirota-gea enembo dumeni niningigea, Keriso da jebuga tambua bubugaita rousue. Emboro niananu ba? Anda mana-mana evere: amó mo diburavareta doata bubua furá ená endava buro ara, aĩ, dedegota ambua Keriso dava yara? Amó rorova righia sarigari aghago rouvie. Taubana bee mo, amó ambua ya, Keriso gha irasire.  
\v 24 Tago, eve endava amó jebuga irasira aná, nímandava mo, taubana asue.  
\v 25 Aghá-gea, amó tanana rore, nímanda gaabee ari baria jojabe ea, kotú gangoro egegadi rea, Jojabee na rata, amó numbogo nímandava iraitare, jo oreki amburambi aita rore.  
\v 26 Amó diburavareta bubua ya, nímandava bubota gigigadora-da bee mo, nímane Keriso de dano takembea vitera-du rekago gangoro urota, undú raga regegadi rea, aghá aita rore.   
\p
\v 27 Atá, amó eghá egegadi rere. Keriso da Gaga Taubana ambo-ambo eta rousua enemboda ari-bari esiko-esiko ananu egeguturota iririge! Aghá egegasira-da bee mo, amó ya, nímandava bubadora, o airo irirota, tefo bingá nuenembo ningadora mo, nímane ano ea, Keriso da Gaga Taubananu enembo dumeni gaabee egegari-du rirota, nundubari dabako urota, enembo dabakomi irarigo mino-mino sonembuturota, ininigha buro urota, iraita rosora-nu ningasire.  
\v 28 Nímanda gitofodu mania oru egegata! Gitofomi nímandava donu egegota, nímane jo oru ambi egegadora anami, númane sirivu aita rousua-nu, tanana egegaita rousue. Kotú, oru jo egegambi adora mo, God na sonembota, jebuga tumanadu irarinu bubugaita rosora beago, nímanda gitofomi tanana egegaita rousue.  
\v 29 Ano egegadi retora-da bee, aná evere: Keriso jo tefo umonu gaabee egegari-du rambi re. Tago, umonu gaabee urota, unda ragarova bouvu mema tambari-du rea, nímandu kavevera urota, emboro ifeguturie.  
\v 30 \x - \xo 1:30 \xt Eka 16:19-40\x*Amindu, oreki namonde amó dano Keriso du rea mene-mene egegore! Anada bee mo, amó sei mene-mene ueta niningigutara, kotú oreki aghá urota vitera-nu reisi-niningoravore.   
\c 2  
\s1 2:1-11 Keriso Umó Durumugea, Tofo Ituturieta Vovoruria-du Rea, God Na Unda Ragaro Ririkurieta Eroruria Re.  
\p
\v 1 Atá, nímane Keriso de takembea irirota, ano ea jiria, unda neno bari itatama egeguturota, God da Asisi Kakarami, nímanda neno rova irirota, nímane mino-mino kavevera urota, neno rururota viteravore.  
\v 2 Aghá-gea, nímane asisida anomi neno dabako egeguturota, mino-mino neno rururota iririge! Aghá egegadora mo, amó nímandu gangoro aitare.  
\v 3 Mania nímanda ikoko mendi, ariri gharovu doa serigaita rea, gare-garegha egegata! Aghade, mania enembo dumeni nímandu raga rari-du, nundubata! Tefo! Nímanda ragaro do-gea, vovorurota, fefera inono enembo dumenidu raga regege!  
\v 4 Kotú nímane, mania nenuka, nímanda unonu egegata! Nímanda ikoko mendi, ariri gharovuda unode burode nundubaride dano sonembadi rere.  
\v 5 Aghá urota, Iesu Keriso da daiyagha nundubuturota vitiria aghagonu, nundubuturota iririgadi rere.   
\q1
\v 6 Aná rera-da bee mo, aná evere:  
\q2 Unda irari, umó aná God re, tumanadu irita urie.  
\q1 Tago, unda irari, kotú ano, jo unda tofonu righia jiraita rambi re.   
\q1
\v 7 Umó God gha aghá urota vitirie.  
\q2 Tago, unda ano durogha kosugea itia doa, furia, sabuada* irari,  
\q2 kotú, enembo beeda tamo ananu bua, asugea siroruturie.   
\q1
\v 8 Amindu rea, enemboda ambuta rouvia aghagonu urota,  
\q1 unda bingá ititurieta vovorurieta, umó God da unonu urota ambubuturie.  
\q1 Aghá urota, meka gia, mema itatama urota, ifatarava ambubuturie.   
\b  
\q1
\v 9 Aghá uria-du,  
\q2 God na ragaro anogha eini, uutu endava aghago tefonu, ututurota,  
\q2 umó ririkurieta, iti bee itiva jiria vitie.   
\b  
\q1
\v 10  \x - \xo 2:10 \xt Is 45:23\x*Aghá uria-da bee mo,  
\q2 eini-eini dano uutu endava vitia, enda rova vitia,  
\q2 kotú, enembode, anera manede, taimu manede dano,  
\q2 Iesu da dibeva koubomi jenjengirea, tumogha baĩ egeguturota,  
\q2 undú raga regegari-du rea, aghá urie.   
\q1
\v 11 Kotú tofo unda durogha gari isagha ari-du rea,  
\q2 God Afa na rata, enembode, anera manede  
\q2 kotú taimu manede dano, eghá regegaita rousue,  
\q1 “Iesu Keriso, imó Jojabee re!”   
\s1 2:12-18 God Da Natofo Unanami Janimbarigo Urota-Gea, Natofo Gigigaita Rousue.  
\p
\v 12 Avore, anda ikoko mendi, ariri gharovu, amó arera bubua avo namonde irirota, anda gaga donu rirera, nímane fefera inono aghagonu egegutureravore. Aná taubana re-tago, oreki amó serigea, airo vitera beago, anda gaga ningia, ambo-ambo egegadora, aná taubana bee re. Kotú nímane God du verua, oru egeguturota, jebuga tumanadu irari baita rea, ivatava ititiguturota iririgadi rere!  
\v 13 Anada bee mo, God unona, nímanda neno rova buro urota, umó dodu gangoro rouvia-nu, nímane beago dabako anadu uno urota egegari-du rea, ano ututa rouvie.   
\p
\v 14 Nímane buro donu egegadora mo, mania minoinjagha urota, besiga egegata!  
\v 15-16  \x - \xo 2:15-16 \xt Deut 32:5\x*Aghá egeguturota, nímane, nundubari sembago kotú ari-bari akokogo ari kakatoda rorova irirota, God da sasingu dinunu tefo bebeta ambi ea irirota, eto-bato foghaemi, tumbade janimbeta rouvia aghagonu, God unda jebugade, unanade aná retora enembodava vesa boanda egege, jebuga tumanadu irarida emboro gigigoe! Aghá egeguturota iririgadora mo, Keriso da furaita rouvia fefera aghade, amó avo nímanda rorova buro eta urera, anada bee sirorea vitia-du nímandu gangoro aitare.   
\p
\v 17 Eto-bato námane Jiusi enemboda fristi* mane vesa dungiturota, \tl vaini\tl* etova averegea dungeta rousua aghagonu, gitofomi amó data, anda amburaita rora-da tatangunu nímanda God gaabee urota, vesa undava ututa rosora-da etova averegadua-jogo. Aghá ata-gea, amó gangoro aita rore, kotú nímane beago, amonu nundubea andú gangoro egegadi rere.  
\v 18 Aghade, andú gangoro egeguturota, namonde neno dabako egegea, gangoro egegore!   
\s1 2:19-30 Pol Unda Buro Kokomanadu Ghaito Teno Fugari-Du Riria Re.  
\p
\v 19 Jojabee Iesu avore rata-gea emboro ifegadua mo, amó Timoti ninengota ya, nímanda gaga ningia doa, kaverea furá rata ningia gangoro aita rea, uno urota kaifa gigiturota vitere.  
\v 20 Amó nímane neno buta rora aghagonu, Timoti umó dabako aghago rei-nundubutue. Enembo eini avona jo umongo irambi re.  
\v 21 Enembo dumeni mo, nendufa númanda unode eini-einide nundubuturota, Iesu Keriso da buro jo gogorego nundubambi eta rousue.  
\v 22 O Timoti mo, buro ea goghó eta rouvie. Kotú embó einimi unda mendigha eta rouvia aghagonu, angá danode Gaga Taubananu vesa egegutueta, gigigutureravore.  
\v 23 Amindu, amó diburava reta doa bubara aĩ, irara? Ananu nanjigo tanana adora, umó nímandava yari-du niningigaita uno rore.  
\v 24 Tago, anda rei-gerora mo, Jojabee avore rata emboro ifegota, amó beago tutomi ya, nímandava bubaitare.   
\p
\v 25 Atá, nímanena ninenguturieta nímanda gaga bua furia, amó sonembuturia embó, Epafroditus mo, umó angá danode jiria, Keriso da ragarova buro urota, mene-mene egegeta urere. Umó beago ninengota nímandava kaverea yasua, rei-nundubutore.  
\v 26 Anada bee mo, unda kae rura-da gaga angieta, niningutara-du neno mema ea, umó nímandava ya bubua, gaita uno bee rouvie.  
\v 27 Niningigutara, aná gaa bee re. Umó kae akuago bua amburaita itoko uta. Avore, umó amburasueta, amó neno mema jojabe itatama asira-tago, God undú kotú andú neno mema utata, umó seibe jebugea vitie.  
\v 28 Amindu, umó tutomi ya, nímandava bubota gangoro egeguturadi-gea, amó beago neno asegasira-nu uno bee rore.  
\v 29-30 Nímane amó sonembari jo inono irambi-gea, umó nímanda kambesi bua, amó sonembuturota, Keriso da buro urota amburaita itoko uta. Aghá uta-du, umó ya bubadua mo, Jojabeeda ragarova gangorogha ghaito teno fufugegadi rere. Kotú enembo aghago manedu aghá urota, verua egegadi rere.   
\c 3  
\s1 3:1-12 Jebuga Bari Emboro Iesu Da Uria Re.  
\p
\v 1 Anda ikoko mendi, ariri gharovu, amó tano urota, eghá raitare. Jojabeede takembea vitera-du, gangorogha iririge! Amó sei aghá ritare. Tago, gaga dabako ananu rekago radora, andava jo fakara irambi re, kotú anami, nímane gangada aita rouvie.   
\p
\v 2 Avore, enembo nímanda vii mendó andoro divegari gaa reisi-ria-du, oru egeguturota serigea airo jijiregadi rere. Númane tamo mamasade, ari akokogo urota vitie.  
\v 3 Aná enembo tamo nuenembo divegadi reisi-rie. Tago, aná jo God da saro bee irambi re. Unda saro bee mo, unda Asisi re. Atá, aná retora enembo jo bambi re. Tago, namonde amó unda Asisi nu bua, anada anomi God du tumogha baĩ urota, unda mendi Iesu Keriso de takembea gangorogha vitere. O saro itaita rea, tamo nuenembo divegaridava namonde amó jo gaabee ambi re.  
\v 4 Atá, nundubea gigige! Aná rera enembo vii mendó andoro diveguturota God da saro itadi reta rousua, seibe andava siroruturie. Tago, númane jo anda eta urera aghago ari inono irambi re. Amó ari-bari aghagonu oreki gaabee asira mo, amó seibe tutuno ea, andufa anda bingá righota erari-du asire.  
\v 5  \x - \xo 3:5 \xt Rom 11:1; \xt Eka 23:6; 26:5\x*Anada bee mo, amó fufirieta, fefera 8 sidara uria-da ambova bua arieta, anda vii mendó andoro diveguturie. Aghá uria-da ruru mo, amó evovo Israel enemboda eini re. Anda afa, umó Jiusi enemboda abua ragaro Benjamin re. Anda aya beago, umó Israel enemboda eini re. Aghade, amó sei aná Jiusi enemboda noni eini, Moses da Gaga Kaifa kakato* reta rousua, anada rova terua, Jiusi enemboda Agho Dari kaifa eta urere.  
\v 6  \x - \xo 3:6 \xt Eka 8:3; 22:4; 26:9-11\x*Aghade, anda anode nundubaride dano ititurota, God da ekaresiadu* bouvu mema fakara bee ututa urere. Amó Agho Dari dano kaifa urere. Aghá-gea, embó eini Agho Darida emboro ambo-ambo urota, jebuga tambasua mo, amó jebuga tambasire.   
\p
\v 7 Tago, oreki amó jo anda daiyagha eta urera, jo nundubambi re. Anada bee mo, amó andufako embó jojabe gaa rirota, tefo jenjago urota, Iesu tambari kasovigeta urere.  
\v 8 Aghá-gea, endava eini-eini dano, anda bingáde, gugua-ghayafade, dano dotuturota jo nundubambi vitere. Anada bee mokó mo, aná dano ijoijokoko re. Tago, anda Jojabee Iesu Keriso tanana ea, unda tofo ari mo, jojabe bee re. Keriso de takembea umongo aita rea, kotú umó baita rea, amó endada eini-einidu susundo gaa rea, fugea dotuturere.  
\v 9 Sei amó Agho Darinu ambo-ambo urota, andufa taubana aita ea gerurere. Tago, aná rera emboro, amó injigha ea dotuturere. Oreki mo, God daiyagha, amó Keriso gaabee eta rora-du, undufa “Imó taubana” rari-du nundubeta rore.  
\v 10 Oreki ená anda uno reta raita rore. Amó daiyagha ea, Keriso da tofo asire. Kotú unda tofo ea, unda amburarivareta jebugea eroruria-da ano itatama asire. Aghade, unda mema itatama uria aghago, anona mema tambua, umongo ea amburasire. Anda aghá uno rora-da bee mo,  
\v 11 God na ririeta, Iesu amburarivareta jebugea eroruria aghagonu, amó beago, unona rasueta, amburarivareta jebugea erasire.  
\v 12 “Amó Keriso gha danode takembea, umongo asire.” retore-tago, amó jo ata-gea, inono ambi re. Aghá re-tago, Iesu Keriso na amó unda tofo ari-du rururia amindu, umongo aita rea ea jariturota irita rore.   
\s1 3:13-21 Namonde Amó Durumugea Pol Da Vitiria Aghago, Ea Goghó Egegasire.  
\p
\v 13 Amó aná retora gaga dabako ananu rere. Anda ikoko mendi, ariri gharovu, anda gariva, amó jo Keriso aghago ari inono irambi re. Tago, amó eghá aita rei-nundubutore. Irari sei, donu eta urera dano neno itia, eini-eini donu ambova sirorota baita rora-nu nundubuturota vitere.  
\v 14 Aghá urota, eto-bato enembo undiriva terua, sereka sumbuta rouvia aghagonu, God na jebuga tumanadu irari unda mendi Iesu Keriso da ragarova bari-du aghi uria-nu baita rea, anda ano dano ituturota vitere.   
\p
\v 15 Avore, namonde amó avona sei Keriso da tofo ea, unda gaabee ari unduaveta, barita rouvia, namonde amó nundubari dabako aghago urota iririgasire. O nímandava nundubari eini siroradua mo, God na nímandava gaa beenu isuri ata, tanana aita rosoravore.  
\v 16 Avore, God namonde andú daiyagha irari-du iruguturia, ananu urota, kaifa ea goghó egegore!   
\p
\v 17  \x - \xo 3:17 \xt 1 Ko 4:16; 11:1\x*Anda ikoko mendi, ariri gharovu, enembo dumeni, námanda aito fugari taubana nímanda dibeva egegeta urera-da ambo-ambo eta rousua-nu gerurota, nímane beago anda eta rora-nu ambo-ambo egegari-du rere.  
\v 18 Anda ambo-ambo egegadi rera-da bee mo, evere: anda gaga sei reta urera, dabako ananu oreki rekago jiigha dano rere. Nímanda rorova vitia enembo oruaruabe tamo firída uno urota, Keriso ifatarava ambubuturia-da beeda rurudu injigha ea, goitu fotea, Keriso da gitofo aghago ea vitie.  
\v 19 Aghá urota, Iesu injigha ea doa, númanda anode nundubaride dano tamo firída unodava ititigeta rousue. Aghade, númane ari ivata dibe eini be eini eta rousua-du, meka gigigasue. Tago, númane nendufako raga reisi-rie. Amindu rea, númane fefera ambova God da bouvu itatama urota, sirivugaita rousue.  
\v 20 O namonde amó, uutuda natofo re. Amindu, namonde anda sonemba kato, namonde anda Jojabee Iesu Keriso, uutuvareta vorefuraita rouvia-nu, kaifa urota vitere.  
\v 21 Atá, unda ano rururia-mi eini-eini dano kaifa rouvie. Eini-eini dano unda rari ningari re. Ano dabako anami, unona rata-gea, namonde anda tamo betuturia, ana kaverea eto-bato unda tamo duroghade aghago aita rouvie.   
\c 4  
\s1 4:1-9 Gaga Dumeni Evere.  
\p
\v 1 Avore, anda ikoko mendi, ariri gharovu, amó nímane neno rururota, daiyagha gasira, ananu nundubuturota vitere. Kotú nímanda iraride gaabee aride gerurota, Keriso andú raga raita rouvie, kotú amó beago gangoro aita rore. Amindu, Iesu da anomi jiria goghó egege!   
\p
\v 2 Anda gharototo, Yuodia ungá Sintike gha, amó nímandu benunu rore. Ingá imó Jojabeeda tofo ea vitera-du rere. Besiga doa, neno dabako ea iririge!  
\v 3 Avore, anda neno bari komana, anda sonemba kato, inona aná evevetu ungagha sonembuturadi-gea, ungá umó neno dabako egegari-du rere. Anada bee mo, aná evevetu ungagha Klemen de anda ikoko mendi dumenide, namonde iru-furu urota, God da Gaga Taubananu minono regegeta urere. Amó tanana rore, númanda ragarode, aná evevetu ungaghada ragarode dano, God da jebuga tumanadu irari tambua baita rouvia-da buka rova vitie.   
\p
\v 4 Neno roo gangoromi beda ea iririge! Rekago rere: nímane Jojabee gha takembea vitera-du rifo inono, neno roo gangoromi beda ata-gea iririge!  
\v 5 Atá, Jojabeeda kaverea furari uutuva rouvieta enembo nanjogodu aito durumugari fufugege!  
\v 6 Mania eini-einidu neno mema egegata! Nímandava domi tefo adua, God dava “aiye” rirota, benunu egegutu-gea, utota bubugadi!  
\v 7 Aghá urota, Iesu Keriso gaabee egeguturadi-gea, God da neno jamade siriridemi utota, nímanda neno rova, kotú nundubari beda urota, jo irarida eini-einidu mana-mana ambi aita rosoravore. Atá, unda neno jamade siriri aride rera mo, jo enemboda nundubea tanana ari katogo irambi re.   
\p
\v 8 Avore, anda ikoko mendi, ariri gharovu, amó ená gaga eve tano urota eghá rere. Eini-eini taubana nuenembo nímanda neno roomi nundubuturota iririge! Aná eini-eini retora enanu, isuri aitare. Gaga kotú ari ivata taubana bee re, kotofuda nundubari re, nundubari bebeta tefo re, eini-eini gari esiko-esiko re, kotú enemboda ivatadu raga reta rousua, aná beago nundubuturota iririge!  
\v 9 Aghá urota, amó nímandu nghaĩ ituturota, donu reaveta niningigeta urera, kotú emboro taubana daiyagha irugeaveta gigigeta urera, ananu urota iririge! Aghá urota, iririgutu-gea, God siriri ari ututa rouvia-mi nímandava iraita rouvie!   
\s1 4:10-20 Filipai Enemboda Vesa Ututuria Guridu, Pol Da “Aiye” Riria Re.  
\p
\v 10 Amó tanana rore: fefera numbobe amó sonembarida goroto jo isagha ambi re. Tago, amó Jojabeeda dibeva jiriturota rere, nímane oreki rekago amó nundubuturota, vesami sonembutara-du, amó gangoro rore.  
\v 11 Kotú gugua-ghayafa andava sidara ari gaa jo rambi re. Gugua ghayafa tefo adua, o kotú iradua, aná amó gangoro jojabe rore.  
\v 12 Anada bee mo, rifo einiva amó uvude undaridedu baimana itatama eta rore. Kotú rifo eini undari digeta rouvie. Rifo dumeni amó inono bee inono eta rore. Kotú rifo dumeni, eini-eini andava tefo eta rouvie. Tago, amó irari taubanade irari akuagodeda rova, gangoro arida emboro tanana ea vitere. Amindu eini-eini tefo adua o inono ambi adua mo, amó gangoro gha iraitare.  
\v 13 Avore, Keriso andava ututa rouvia anomi amó eini-eini dano ari inono re.   
\p
\v 14 Avore-tago, amó mema tafieta, anada rova nímanda amó sonembutara, aná taubana egegutaravore.  
\v 15  \x - \xo 4:15 \xt 2 Ko 11:9\x*Atá, anda natofo Filipai kambesiva vitera, nímane tanana rosoravore. Amó seibe God da Gaga Taubana-nu rirota, Frovensi Masedonia doa irueta, nímane nenuka amó gurimi sonembutureravore. Ekaresia* dumeni jo amó sonembambi re. Nenona nenuka sonembutureravore.  
\v 16  \x - \xo 4:16 \xt Eka 17:1\x*Kotú amó Tesalonaika irirota, anda irarida gorotova bouvu sirorarinu itatama ea, nímane sonembeta ureravore.  
\v 17 Atá ená gaga rei-gefera, aná jo guri ututugadi gembambi re. Tago, God nímanda ututa rosora vesanu nundubea, unda ea simbugari utota bubugadi uno rore.  
\v 18  \x - \xo 4:18 \xt Ex 29:18\x*Tago, nímanda vesade guride rurara amindu “Aiye” rere. Jojatofo bee re. Ená gaga iruguturota, tanana egegaita rosoravore: Epafroditus nímanda vesa dano ututata rurare. Anada gari eto-bato anda Jiusi enemboda mambube maneda vesa gari eini, dungeaveta evirota, muno basi-basi uaveta, God da fufirota gangoro eta uria aghagonu, God nímanda vesa ututara-nu gia gangoro rouvie.  
\v 19 Unda vesa arida emboro Iesu Keriso da amburarimi siroruturia anami, God na, sonembuturota, donu nímandava tefo adua-nu utota, oruabe aita rouvie.   
\p
\v 20 Avore, namonde anda God, kotú Afada duroghadu tumanadu raga rirota iririgore! Aĩ, gaa bee re.   
\s1 4:21-23 Pol Unda Ikoko Mendi, Ariri Gharovu Ghanena Urota, Tano Uria Re.  
\p
\v 21 Ariee, amó nímane God da natofo Iesu Keriso de takembea vitera, aná nímane dano ghanena rore. Rege niningigoe! Anda ikoko mendi, eve vitia beago, nímane dano ghanena rousue. Yata bua gigige!  
\v 22 Kotú God da natofo dano Rom eve vitia-mi, kotú gogorego Rom enemboda kotofukoda kambova buro kakato God gaabee eta rousua, númane beago, nímane ghanena rousue.   
\p
\v 23 Avore, Jojabee Iesu Keriso da sonemba nímane nanjogodava iroe!  
\p Avore, anda gaga tano evere.  
\pmc Amó Pol re.