\id COL  
\h Kolosi Enembodu 
\toc3 Kol 
\toc1 Kolosi Enembodu Pol Unda Ingiso Kolosi Enembodu Gefiria, Aná Evere. 
\toc2 Kolosi Enembodu 
\mt1 Kolosi Enembodu  
\mt2 Pol Unda Ingiso Kolosi Enembodu Gefiria, Aná Evere.  
\ip Pol umó aghajora ghaeko* 60 Iesu siroruturia-da ambova diburava irirota, Kolosi naava Ekaresia* desea vitia-du ená ingiso gefirie. Ená Ekaresia rera mo, jo Pol na minono rata sirorambi re. Tago, aná kambesi unda kaifa arida tuva irasua, aghago nundubuturota, ená ingiso gembua, Tikikus ungá Onesimus gha dava ututurieta bua igiguturie.  
\ip Pol ená ingiso gefiria-da bee mo, Kolosi desea vitia-da rova enembo dumenimi gaga gaveranu iruguturota, “Enembo avona God da jebuga tumanadu irari baita adua, Iesu umonu gaabee ari jo inono irambi re. Iesu gaabee arida kasava taimu manede anera manede tumogha baĩ urota, ari bari dumeni, vii mendó andoro tafugari aghago adua mo, God da jebuga baita rouvie.”  
\ip Pol ená ingisova gefiria-da mendó jojabe mo, eghá re. Enembo avona Iesu Keriso unuka umonu gaabee adua, jebuga tumanadu baita rouvie. Tago, asisi dumeninu gaabee adua-mi aná enembo kofiri ea bata, umó Iesu doa, jebugada emboro kasovigaita rouvie.  
\is1 Pol Ená Buka Gefiria Gagada Mendó Mane, Aná Evere:  
\io1 1:1-8 Kolosi enembo daiyagha gaabee egeguturia-da gaga re.  
\io1 1:9-2:19 Keriso umó daiyagha enda tamo bua asugea furia sirorea, buro uria re.  
\io1 2:20-4:6 Keriso dava Jebuga reka barida gaga re.  
\io1 4:7-18 Pol unda gaga ambo gajari riria re.  
\c 1  
\p
\v 1-2 Ariee, anda ikoko mendi, ariri gharovu, amó Pol re. Amó God da unova Iesu Keriso da aghi kato ea vitere. Nímane God da unonu urota, Keriso de dano takembea, unda natofo kakara ea, Kolosi bogu naava vitera enembo dano, namonde anda ikoko Timoti de amó nímane ghanena bee rosore. Yata bua gigige!  
\p Namonde anda Afa God na unda sonembade siriri aride nímandu utota bubugadi rere!   
\p
\v 3-4 Nímane daiyagha ea, Iesu Keriso gaabee eta rosora, kotú daiyagha ea, God da natofo dano neno bua goghó eta rosora amindu, namonde anda Jojabee Iesu Keriso da Afa God dava benunuva nímandu “aiye” reta rosore.  
\v 5 Avore, nímane ambova uutuva donu baita rosora-nu, kaifa gigita urota vitera-du, nímane Iesu gaabee urota, God da natofo neno bubugeta rosoravore. Epafras na seibe aria, nímandava bubua, God da Gaga Taubana bee mokónu minono ririeta niningigea, neno kaverea, anavareta aná eini-eini uutuva baita rosora-nu kaifa gigita urota reisi-foravore.  
\v 6-7 \x - \xo 1:6-7 \xt Kol 4:12; Flm 1:23\x*Eto-bato Epafras na seibe tutuno ea, nímandava God da sonembada beede unda Gaga Taubanadenu minono ririeta niningigea tanana egegutureravore. Anavareta etia oreki, unda ea simbugari bua, nímane oruabe ea viteravore. Kotú aghagonu, enembo kambesi nanjogova aghá egegeta rousue. Epafras mo, námanda neno bari buro komana eini re. Umó Keriso da buro kato ea aria, nímane sonembeta rouvie.  
\v 8 God da Asisi daiyagha urieta, nímane God da natofo dano neno buta rosora-da bingá unona bua futa, námandu ritata niningigutare.   
\p
\v 9 Avore, nímanda bingá ningia angá tutuno ea, tumanadu nímandu benunu urota vitere. God na unda unonu irugota, tanana ea goghó egegadi rirota, unda Asisi na sonembuturota, beforo gari jojabede neno nundubaride bubugadi, benunu urota vitere.  
\v 10 Aghá siroradua mo, nímane Jojabeeda unonu egeguturota, umó nímandu gangoro aita rouvie. Aghade, nímane ari-bari taubana dibe eini be eini egeguturota, nímanda God tanana ari baborurota yaita rouvie.  
\v 11-12 Tago, angá anda benunuda mendó eini aná evere: God da anode duroghadenu bua, ano ea jiria, nímane darade memade itatama egegeta rosora-da rova durumugea gangoro urota, God Afadava “aiye” rirota iririgadi rere. Anada bee mo, umó seibe nímandu “avore” riria-du unda kambesi unanade unda natofodu* simbuguturia-va teraita rosoravore.  
\v 13-14 \x - \xo 1:13-14 \xt Efe 1:7\x*Namonde amó tumbava irieta, God unda neno bari Mendida daiyagha uria-da anomi namonde anda ari-bari akokogo nundubea gia doa, namonde amó Satan da ingova reta rougea bua, unda neno bari Mendida ingova\f + \fr 1:13-14 \ft Ii, \ft \+it Gaga Isuri Ari Kambesi\+it* anava, gaga dumeni gaga \+it Natofo \+it*da tuva vitia-nu irugea gia, tanana adi!\f* ititurieta, namonde danode takembea irita rosore.   
\s1 1:15-23 Pol Keriso Da Ambubuturia-Da Bee Isuri Uria Re.  
\p
\v 15 God umó eini-eini dano ata sirorambi irieta, God da mendi Keriso umó seibe vitirie. Eini-eini dano ambova urieta siroruturie, kotú eini jo Keriso go irambi re. Namonde amó God jo dibemi gambi vitere. Tago, Keriso nu gerurota, God da daiyagha vitia-nu gigigeta rosore.  
\v 16 Anada bee mo, God umó eini-eini dano uutuvade endavade Keriso da anomi urieta siroruturie. Eini-eini dibemi gita rosora, kotú dibemi jo gambi eta rosora, kotú asisi dibe eini be einide anerade, taimu mane númanda kokotofude babarigaride dano, Keriso da anomi urieta siroruturie. Aná mo, Keriso da anomi kotú Keriso undú urieta siroruturie.  
\v 17 Aná eini-eini nanjogoda dibe kena Keriso sirorea vitirie. Kotú eini-eini dano Keriso unona bua righia vitie.  
\v 18 \x - \xo 1:18 \xt Efe 1:22-23\x*Ekaresia* mo, eto-bato unda tamogo re. Kotú umó ekaresiada beforo righari re. Umó eini-eini nanjogoda beforo righari ari-du rea, God na ririeta umó enembo nanjogoda dibeva amburarivareta jebugea erorurie.  
\v 19 Aghade, God unda unova urieta, unda daiyagha ea vitia-de unda anode dano unda mendi Keriso na bua dabako aghago siroruturie.  
\v 20 \x - \xo 1:20 \xt Efe 2:16\x*Kotú, enembode uutu endava eini-eini nanjogode Iesu da tatangumi siriri urota, jebuga barida emboro ifegaita rea, Iesu ifatarava amburari-du ninenguturieta, furie.   
\p
\v 21 Seibe nímane nundubari sembago kotú ari-bari akokogo urota, God dava gitofo ea vitaravore.  
\v 22 Tago, oreki mo, unda natofo taubana kakarago dinunu tefo ea ya, unda dibeva jirari-du rea, umó nímanenu aghi jufirota, unda mendi ninenguturieta furia, enembo bee ea ambubuturie. Aghá urota, siriri arida emboro ifeguturieta, unda kokomana ea viteravore.  
\v 23 Avore, nímane God da Gaga Taubananu gaabee egeguturota, donu baita gigigutara-nu kaifa urota, ano ea, jo mana-mana egegambi adora mo, nímane ya, unda dibeva jijiregea, jebuga tumanadu irari bubugaita rosoravore. Gaga Taubana rera, endava enembo nanjogodava minono reaveta ningita rousua, anada aghi kato mo, Pol amó re.   
\s1 1:24-2:5 Pol Ekaresiadu Minono Riria-da Gaga Re.  
\p
\v 24 Oreki, amó nímane sonembaita rea, mema itatama urota, gangoro rore. Anada bee mo, Keriso unda tamodu bouvu mema itatama eta uria aghago, amó beago unda natofo, nemonde dano, sonembaita rea, mema bouvu itatama eta rore (amó unda ekaresiadu* rere.).  
\v 25 Kotú God undufa urieta, amó unda ekaresiada buro kato ea vitere. Aghá ea, nímane sonembea, unda Gaganu nímandu isuri ea goghó ata niningigadi, buro andava ututurie.  
\v 26 Atá, unda Gaga rera, umó sei enembo nanjogodu kivu eta urie. Tago, oreki unda Gaga unda natofo dava ifegetueta ningia, tanana rousue.  
\v 27 Kotú God unda nundubuturia-va, umó seibe aná Gaga kivu ea, fefera ambova unda natofodu irugota, tanana ari-du nundubea, aghá urie. Aghade, unda Gaga enembo eini jo gia tanana egegambi vitiria-da durogha jojabenu nímane gaabee ari enembodu, kotú endava enembo nanjogodedu irugota gigigari-du nundubea, aghá urie. Gagada durogha rera, aná eghá re. Namonde amó tanana rosore, Keriso namonde amó gaabee ari enemboda neno rova terua vitia-du, namonde amó ambova unda dibeva jiria, unda durogha gigigaita rosore.  
\v 28 Enembo nanjogo Keriso gaabee ari evevetu o embobo ea, God da dibe kena jiria goghó egegari-du rea, námane neno nundubarimi, númandu gaa dibeva rirota, natofo nanjogodava Keriso da Gaga Taubananu minono regegeta rosore.  
\v 29 Aghá aita rea, amó ano ititurota, Keriso da andú ututa rouvia ano jojabemi buro fakara bee urota vitere.   
\c 2  
\p
\v 1 Amó daiyagha nímane nanjogodu, Leodisea enembodu, kotú ikoko mendi, ariri gharovu nanjogo amó dibe mokómi jo gambi vitia enembodu ano utaita buro urota vitera-nu, tanana egegadi rere.  
\v 2 Anda aghá eta rora-da bee mo, eghá re. Anda uno mo, númane neno feru-feru urota, mino-mino neno rururota, neno dabako egegari-du rere. Anada bee mo, númane aghá urota, God donu kivu uria-nu tanana ea goghó egegasue, amó Keriso du rere.  
\v 3 Umó God da beforo gari kotú neno nundubari nungea vitia-nu barida emboro bee re.   
\p
\v 4 Rourogo enembo dumenimi nímane kukuvirota, númanda gaga be vivimi riradua ningia, gaabee egegara-degea amindu rirota rere.  
\v 5 Nímane jo namonde utuvako iririgambi re. Tago, anda neno roomi nímane nundubuturota vitere. Aghá urota, nímanda durumugea irirota, Keriso gaabee ea goghó egegeta rosora-nu gerurota, amó gangoro eta rore.   
\s1 2:6-23 Keriso De Takembea Iririgadora Mo, Namonde Amó God Da Jebuga Bua, Taimu Akokogoda Anodu Oro Jo Ambi Egegaita Rosore!  
\p
\v 6-7 Nímane Iesu Keriso de takembea, umonu nímanda Jojabeedu bua viteravore. Aghá-gea, Epafras da donu iruguturia ananu urota, Keriso da jebuganu bua righia jiria, unda ano ututa rouvia-nu badi-gea, nímanda gaabee ari baria jojabe ae! Aghade gangoro urota, aiye rirota iririge!   
\p
\v 8 Aghá urota, Keriso da gaga beede nundubari beede aná nuenembo gaabee egegadi rere. O nundubari dumeni mo, enembomi donu nundubeaveta siroreta rouvia-nu bua, númanda evovo kiki gaa rirota, númanda imendi gamendidu irugeta rousua, bee tefo re. O kotú eini mo, taimu akokogoda babarigarimi uutuva, kotú endava iru-furu urota vitia-mi, númanda donu nundubeta rousua-mi enembo kuvia gita rousue. Amindu rea, rourogo aná enemboda rei-irugutua-de taimumi rei-irugutua-denu gigigea, gaabee urota, númanda sabua* egegara-degea rirota rere.   
\p
\v 9-10 Atá, nímane reisi-geroravore, Keriso mo, anera mane, taimu mane, kotú kokotofu nanjogoda dibe kena bee dibe kena re. Anada bee mo, God daiyagha vitia-de unda anode dano, Keriso da tamova terua vitie. Aghá ea irieta, nímane Keriso de takembea, nímanda neno roode asiside unda jebugami beda ea vitie.  
\v 11 Enembo nino okadava nghaĩ buta rousua aghagonu, námane Jiusi enembo God da tofonu iruguturota, vii mendó andoro tafugeta urere. Aghagonu, enembo avona Keriso de takembadua mo, unona númandava nghaĩ buta rousua aghagonu, númane tamo firída unomi bunditurieta vitiria-nu eaveta, tefo neno eta rousue.  
\v 12  \x - \xo 2:12 \xt Rom 6:4\x*Aghá rera-da bee mo, God unda anomi urieta, Keriso ambua, amburarivareta jebugea eroruria aghago, nímane God da ano gaabee ea, bafutaito egeguturera aghade, God na urieta, nímane ambua sidara ea, rekago jejebugea erorureravore.   
\p
\v 13  \x - \xo 2:13 \xt Efe 2:1-5\x*Sei námane Jiusi enemboda Agho Darida gaga jo gia tanana egegambi irirota, ari-bari akokogomi amburarigo ea vitara aghade, God na urieta jejebugutureravore. God umó namonde anda ari-bari akokogo nundubea gia dotuturota ririeta, nímane Keriso de dano jejebugutureravore.  
\v 14  \x - \xo 2:14 \xt Efe 2:15\x*Aghade, God na namonde anda eta urera ari-bari akokogoda ingiso dufiturota, Agho Darida anomi namonde amó bundituria-nu vuregea, Keriso ifatarava derurieta ambubuturia aghagonu urieta, aná ingisoda gagade namonde anda ari akokogoda minode dano sidara ueta, namonde amó jejebuguturere.  
\v 15 Aghade, aná ifatarava ambua jebugea eroruria-mi Keriso na ano ea, anera mane, taimu akokogode númanda babarigaride, kotú kokotofude númanda ano dano serigea vitie. Amindu, númanda ano unona isaghava dea bejea ekami fatia jiriturieta, namonde amó dano gigiguturere.   
\p
\v 16  \x - \xo 2:16 \xt Rom 14:1-6\x*Amindu rea, enembo erea, nímane iruruturota, uvu undari bari dibe eini be eini tama adi dibeva regegadua mo, mania gaabee egegata! O ekaresiada* banauda rifo einiva, o nangu undari rifo einiva donu kaifa adi radua mo, mania númanda gaga niningigata! O námane Jiusi enemboda abua mane marabe reka vitarida rifova banau egegeta rousua aghagonu kaifa adi regegadua, mania “avore” rea, aghago egegata!  
\v 17 Aito fugari oreki-enembo irugetora, aná imumu, kotú siruru nuenembo re. Keriso furasua-nu tanana egegadi rea, God na ririeta, aná eini-eini siroruturie. Tago, aná eini-einida bee, aná Keriso umó re.  
\v 18 Atá, enembo dumeni barauva eini-eini númanda dibe mokomi gari gaa rea, bee tefo nendufa raga rirota, nímane undari tama urota, anera mane tumogha baĩ egegadi regegadua mo, mania gaabee egegata! Aná enembo tefo enemboda nundubarimi nendufa kukuvirota gogore eta rousue.  
\v 19  \x - \xo 2:19 \xt Efe 4:16\x*Gigige! Aná enembo seibe Keriso doa, airo vitie. Avore, namonde amó Keriso da tamo aghago re. Umó namonde anda beforo righari re. Kotú God daiyagha nundubuturari aghagonu urota, Keriso na ano utuaveta, anami tamova eka ingova unda ghughurova unda ganafu-ganafuva barita rouvie.   
\p
\v 20-21 O nímane mo, Keriso de dano ambubutueta, uutuva endava vitia taimuda babarigarida ano nímandava sidara urie. Aghá-gea, mania aná taimu maneda sabua aghago rekago urota, agho dari bee tefo, “Mania righata!”, “Mania undata!”, “Mania jijimu ata!” anada ambo-ambo egegata!   
\p
\v 22 Reisi-gerora? Aná eini-eini righita rosora-mi, o undita rosora-mi, sidara eta rouvie. Amindu aná agho dari dano irugetora-da bee eini jo irambi aita rouvie. Aná agho dari dano tefo enemboda nundubarimi siroruturie.  
\v 23 Avore, aná agho dari mane: durumugea iraride, anera kotú taimu mane tumogha baĩ aride, tamo firída uno buregaride dano, anada ningari mo, aná taubana aghago re. Tago, tamo firída unomi kuviraita rouvia feferava aná agho darimi jo sonembambi aita rouvie.   
\c 3  
\s1 3:1-17 Pol Na Uutuva Donu Ambova Siroraita Rouvia-Nu Nundubari-Du Ririe.  
\p
\v 1  \x - \xo 3:1 \xt Ps 110:1\x*Avore, seibe God na urieta, nímane Keriso de dano amburarivareta jebugea erea viteravore. Amindu, eini-eini uutuva vitia, ananu sivegea baita rirota, nímanda neno dano avo ititurota iririgadi rere. Uutu rera anava, Iesu umó God da ingo bee kena asumbea vitie.  
\v 2 Aghá-gea, nímane eini-eini uutuva vitia, ananu nundube-nundube urota, eve endava eini-eini nanjogo injigha egegadi rere.  
\v 3 Anada bee mo, nímane Keriso de dano ambubuturera-du, oreki nímanda jebuga bee aná Keriso ungá God ghadava nungari vitie.  
\v 4 Nímanda jebuga bee aná Keriso umó re. Aghá-gea, umó kaverea furá, isagha aita rouvia-va, nímanede dano unda duroghade unanadeda rova jijiregaita rosoravore.   
\p
\v 5 Aghá-gea, nímandava tamo firída uno siroreta rouvia-nu buregea, do-gea, sidara ae! Tamo firída uno rera mo, kombo yagera, dita faima, komanada evetu o embódu muu undari, ari akokogo dibe eini be eini arida uno, jinanga ari avore. Tago, jinanga ari mo, akuago bee re, avona God injigha ea, ingomi uubu ari gaabee eta rouvia aghago re.  
\v 6 Enembo dumeni aito fugari aghago mane egegeta rousua-du God da neno akuago númandava sirorota, itatama egegaita rousue.  
\v 7 Kotú nímane beago, aná ivata mane dabako aghago egegeta ureravore.   
\p
\v 8 Tago, oreki ari-bari eghago mane doa, injigha egegadi rere: neno akuago ari, komanadu mema utaita rea, emboro tava ari, komanada tamova gaga gavera rari, kotú tauga kavavana itoko jo regegambi aita rosoravore!  
\v 9  \x - \xo 3:9 \xt Efe 4:22\x*Mania mino-mino gavera regegata! Anada bee mo, nímanda nundubari seide irari seide kosugea,  
\v 10  \x - \xo 3:10 \xt Efe 4:24; \xt Gen 1:26\x*irari reka bua asugea, irari rekada ari ivatanu egeguturota viteravore. Nundubari, kotú irari reka retora mo, God na ririeta siroruturie. Umó gia tanana ea goghó urota, umongo egegadi rea, God unona aná nundubari reka nímanda neno rova itia undutueta rei-baborue.  
\v 11 Aghá-gea, nímane nundubari reka bua vitera noniva, “Amó Jiusi enembo eini”, o “Natofo Jiusi enemboda gitofo eini amó re”, mania itoko rata! Gari dabako aghago, enembo avona númanda vii mendó andoro divegea vitia, o jo divegambi re, o dumeni aná kunika enembo, o dumeni karaje enembo, o dumeni\f + \fr 3:11 \ft Pol ená noni ijoko iruguturota, umó noni einidu rea, aná nonida yovenidu ririe, sabua* kotofu, evetu embó aghago re. Noni dumeni námane gegembuguturera mo, mema tefo re. Tago, noni ungagha saghaideda gagami \ft \+tl barbarians\+tl* kotú \+tl savages\+tl* reta rosora, námandava kaverari fakara uria-du námane noni einidu “kunika enembo” rea unda yoveni jirasua nonidu rirota, karaje enembo rirere. \f* sabua* re, o dumeni kokotofu re, aná mania itoko nundubata! Anada bee mo, nímane dano Keriso da natofo ea irieta, umó nímanda neno rova terua, nemonde viteravore.   
\p
\v 12  \x - \xo 3:12 \xt Efe 4:2\x*Avore, God unda natofo neno rururota gateguturia, aná nímane re. Amindu, mino-mino neno mema ea, kauta kavevera, urota iririge! Aghá urota, tumo gonea, roboghomi dibe ambua durumugea iririge!  
\v 13  \x - \xo 3:13 \xt Efe 4:32\x*Aghade, durumuguturota, Iesu da nímanda ari-bari akokogo nundubea gia dotuturia aghagonu, embó einimi dara mema nímanda rorova adua, mino-mino nundubea gia doadi rere.  
\v 14 Avore, ená aito fugari egegadi retora, aná taubana dogo re. Avore-tago, taubana bee taubana mo, nímane mino-mino neno rururota iririgadi rere. Anada bee mo, neno barimi namonde amó danode takembea tamo dabako ea vitere.  
\v 15 Keriso de takembea, unda tamo dabako ea, unda siririmi nímanda neno roo beda ari-du rea, God na nímane aghi jufirie. Amindu, do-gea, Keriso da siriri arimi emboro taubana iruguturota, itatama urota iririge! Kotú gangoro urota, “aiye” rirota iririge!  
\v 16  \x - \xo 3:16 \xt Efe 5:19-20\x*Aghade Keriso da Gaga nímanda neno rova itia, kaifa egeguturadi-gea, ami sonembuturota, ano bubugaita rosoravore. Aghá ea, neno nundubuturota, mino-mino irugea, kotú mino-mino nghaĩ ititurota iririgadi rere. Aghá urota, daa God da Gaga rova gefirieta vitia-mi, o God du raga raita rea, daa oreki gefirieta vitia-mi, o daa dumeni Asisida sonembami gembuaveta siroreta rouvia-mi, bua nímanda neno roomi God dava didivurota, “aiye” rirota iririgadi rere. \fig Keriso da Gaga … neno rova itia, kaifa egegore!|src="99 ReadBible_SIL_Misc_famlread_scp.tif" size="col" loc="3:16" ref="Kolosi Enembodu 3:16" \fig*   
\p
\v 17 Aghade, nímane ari bari donu egegadora o gaga donu regegadora, aná dano Jojabee Iesu da ragarova aita rosoravore, kotú raita rosoravore. Aghá egeguturota, unda donu uria-nu nundubuturota, God Afadava “aiye” rirota iririgadi rere.   
\s1 3:18-4:6 Namonde Amó Eghá Egegore!  
\p
\v 18  \x - \xo 3:18 \xt Efe 5:22; 1 Pi 3:1\x*Atá evevetu, nímandu eghá rere. Jojabeeda uno mo, nímanda emboboda gaga ningia, aghagonu egegari-du uno rouvie.   
\p
\v 19  \x - \xo 3:19 \xt Efe 5:25; 1 Pi 3:7\x*Kotú embobo, nímandu eghá rere. Durumugea, roboghami nímanda evevetudu neno bubuguturota, kavevera egege!   
\p
\v 20  \x - \xo 3:20 \xt Efe 6:1\x*Kotú sasingu mane, nímandu eghá rere. Nímanda nie nimamoda gaga daiyagha regegadua-nu ningia, aghago urota iririge! Aghá egegadora, God umó gangoro aita rouvie.   
\p
\v 21  \x - \xo 3:21 \xt Efe 6:4\x*Atá embó evetugha nímandu eghá rere. Mania nímanda sasingudu neno akuago urota, gia regegata! Aghá egegadora mo, númanda neno juraita rouvie.  
\v 22-23  \x - \xo 3:22-23 \xt Efe 6:5-8\x*Kotú sabua* kakato, nímandu eghá rere. Nímanda babarigarida gaga dano, niningiguturota, aghago egegaita rosoravore. Mania, “Ená tefo enemboda buro” gaa regegata! Buro donu egegadora mo, neno dano avo ititurota, buro egege! Jojabee Iesu aghá egegadi reiria, aghagonu nundubuturota, neno dano avo ititurota, buro egege! Nímane jo babarigarida dibeva irirota, gangoro ari-du buro egegambi aita rosoravore. Babarigarida dibeva vitera, aĩ, airobe vitera, nímanda Jojabee Iesu gangoro ari-du, neno dano avo ititurota, buro egege!  
\v 24 Anada bee mo, nímanda Jojabee jo enembo eini irambi re, Iesu umó re. Unona nímanda mino itari vitia-nu, ambova utota bubugaita rosoravore.  
\v 25  \x - \xo 3:25 \xt Deut 10:17; Efe 6:9\x*Atá, ari-bari akokogo egegeta rousua enembodava, God na mino akuagonu utota bubugaita rousue. Aghá urota, umó enembo dano inonova iruruturota, mino utaita rouvie.   
\c 4  
\p
\v 1  \x - \xo 4:1 \xt Efe 6:9\x*Atá, babarigari, nímandu eghá rere. Nímanda Jojabee uutuva vitia-da tuva vitera-nu nundubuturota, nímanda sabua kakato gurimi utua rururera-du verua kauta urota, roboghomi kaifa ea goghó egege!   
\p
\v 2 Dibe fangea, neno dano ititurota, God Afadava “aiye” rirota, benunu urota iririgadi rere!  
\v 3 Aghá urota, námandu beago benunu egegutu-gea, God na, námandu emboro ifegota, námane ya, Keriso daiyagha furia-da gaga nungea vitiria-nu minono regegore! Unda gaga minono reta utara-du diburava ititigutata vitere.  
\v 4 Amó daiyagha daiyagha ea, minono rasira ananu nundubuturota, benunu egege! Kotú, anda minono raita rora, aná isagha asueta, enembo dano gia tanana ea goghó egegasua-du rea, benunu egege!   
\p
\v 5  \x - \xo 4:5 \xt Efe 5:16\x*Avore, God gaabee ambi enembo, niananu tambadora aghade, nímanda Keriso gaabee eta rosora-nu neno nundubuturota isagha ege, niningigoe!  
\v 6 Aghá urota, gaga taubanako roboghomi regegadi rere. Aghade, ano ea, enemboda uriga ututa rousua-da, mino neno nundubuturota regegadi!   
\s1 4:7-18 Pol Unda Ghanena Gaga Rirota, Tano Uria Re.  
\p
\v 7  \x - \xo 4:7 \xt Eka 20:4; 2 Ti 4:12\x*\x - \xo 4:7 \xt Efe 6:21-22\x*Avore, anda neno bari ikoko Tikikus na anda bingá rata niningigaita rosoravore. Unda buro ea goghó eta rouvia-du umonu gaabee eta rore. Umó namonde dano Jojabeeda aghi kato ea vitere.  
\v 8 Umó ya, anda irarida gagade, eta rora-da gagade rata niningigea, gangoro egegadi rea, umonu ninengota nímandava yaita rouvie.  
\v 9  \x - \xo 4:9 \xt Flm 1:10-12\x*Tikikus da kanona ari-du rea, amó nímanda embó eini Onesimus reta ninengota ungá yaita rousue. Umó beago neno rururota, gaabee eta rore. Ungá unona ya, avo bubua, námandava donu rei-sufia-nu isuri egegota niningigaita rosoravore.   
\p
\v 10  \x - \xo 4:10 \xt Eka 19:29; 27:2; Flm 1:24; \xt Eka 12:12, 25; 13:13; 15:37-39\x*Avore, Aristarkus umó eve angá diburava vitera-mi, nímane ghanena rouvieta. Yata bua gigige!  
\p Kotú Barnabas da nomono, Mak beago, nímane ghanena rouvie. Atá, námane seibe undú rirota gefirieta bua irugea gigigutureravore. Amindu umó ya, nímandava bubadua mo, orokaiva rea vuria dasea, ghaito teno fugea bua, tavo ea goghó egege! Yata bua gigige!  
\v 11 Josua (o Jastus reta rousua) umó beago nímane ghanena rouvie. Yata bua gigige!  
\p Námane eve irirota, enembo God da natofo* egegari-du aghi jufirota vitera-da rova, Jiusi enembo dumeni tefo re. Enembo bakode irugetora nenuka re. Númanda sonembadu gangoro rore.   
\p
\v 12  \x - \xo 4:12 \xt Kol 1:7; Flm 1:23\x*Kotú Epafras beago nímanda embó einimi nímane ghanena rouvie. Umó, Iesu Keriso da sabua* kato eini ea vitie. Umó ano urota, tumanadu nímandu benunu urota vitie. Aghá urota, God na nímane sonembuturota, umonu gaabee urota, ano ea jiria goghó urota, unda unonu egegadi benunu eta rouvie.  
\v 13 Unda nímane sonembaita rea, buro eta rouvia-nu andufa gerurota, gaa bee rere. Nímane Kolosi enembo sonembaita rea, buro fakara eta rouvie. Aghade Laodisia enembode Hierofolis enembode beago sonembaita rirota, buro fakara eta rouvie.  
\v 14  \x - \xo 4:14 \xt 2 Ti 4:11; Flm 1:24; \xt 2 Ti 4:10; Flm 1:24\x*Eini mo, námanda neno buta rora ingi embó Luk ungá Demas gha beago nímane ghanena rousue. Yata bua gigige!   
\p
\v 15 Atá namonde anda Laodisia avo desea vitia ikoko mendi, ariri gharovu ghanena rosoreta, rege niningigoe! Nimfa, kotú unda kambova totorugea, benunu egegeta rousua ikoko mendi, ariri gharovu beago, ghanena rosoreta, rege niningigoe!  
\v 16 Avore, ená ingiso irugea gigigadora mo, utu, rekimbea yata, Iesu gaabee egegeta rousua enembo, Laodisia avo irugoe! Kotú Laodisia enembomi rura ingiso eini, nímandava furaita rouvia-nu bua irugadi rere.  
\v 17  \x - \xo 4:17 \xt Flm 1:2\x*Aghade Arkipus rege, ningoe, Jojabee buro donu ari-du ututa-nu aná ata, sidara ae!   
\p
\v 18 Avore, ená ghanena mo, andufa anda ingomi rei-gefereta gigige! Kotú amó diburava vitera-nu, mania neno itata! God da sonemba nímandava iroe!  
\p Avore, anda gaga eve tano rouvie.  
\pmc Amó Pol re.