\id 2TH  
\h 2 Tesalonaika Enembodu 
\toc3 2 Te 
\toc1 2 Tesalonaika Enembodu Pol Unda Ingiso Ambova, Tesalonaika Enembodu Gefiria, Aná Evere. 
\toc2 2 Tesalonaika Enembodu 
\mt1 2 Tesalonaika Enembodu  
\mt2 Pol Unda Ingiso Ambova, Tesalonaika Enembodu Gefiria, Aná Evere.  
\ip Pol unda ingiso sei Tesalonaika Enembodava gefiria-da ambova, umó itoko kaifa ea, ghaeko* 52 Iesu siroruturia-da ambova númandava rekago gefirie. Enembo dumenimi \it Jojabeeda kaverea furaita rouvia fefera seibe bubie.\it* regeguturieta, Tesalonaika enembo oru egegutua-du, umó rekago gaga eghá gefirie. Jojabeeda furari fefera mo, daiyaghago ro ananu isuri urie.  
\is1 Pol Ená Buka Gefiria Gagada Mendó Mane, Aná Evere:  
\io1 1:1-2 Pol númane ghanena urie.  
\io1 1:3-12 Namonde Jojabeeda ragarova mema itatama egegadora, aná taubana re.  
\io1 2:1-17 God na rata, unda Asisi Kakara ená endava vitia, doa serigota Satan da ano rekago isagha adua-da ambova, Jojabee rekago kaverea furaita rouvie.  
\io1 3:1-15 Kuristini da irari.  
\io1 3:16-18 Pol númane ea simbugea unda gaga rea sidara urie.  
\c 1  
\p
\v 1 \x - \xo 1:1 \xt Eka 17:1\x*Ariee! Námane Pol, Sailas kotú Timoti de nímane Tesalonaika anava God Afa, kotú Jojabee Iesu Keriso da natofo ea vitera enembo ghanena rosore.  
\v 2 God Afa kotú Jojabee Iesu Keriso da sonembade, kotú siriri aride, kaveverade nímandava irari-du benunu rosore.   
\s1 1:3-12 Pol Na, Tesalonaika Enembo Ghanena Urota, God Dava “Aiye” Riria Re.  
\p
\v 3 Anda ikoko mendi, ariri gharovu, nímanda gaabee ari God dava baria jojabe rouvia-du “aiye” reisi-rere. Nímanda mino-mino neno bari aná rei-baborue, aghá uua-du námane God du “aiye” regegadora, aná taubana re.  
\v 4 Nímanda gaabee ari baria jojabe ueta, enembo nímandu mema kotú bouvu jojabe reisi-ututue. Tago, nímane durumugea jiria God gaabee rosoravore. Nímanda aghá rosora-du, námanena God gaabee eta rousua enembo dumenidava, nímanenu raga reisi-rere.  
\v 5 Nímanda mema itatama rosora-du rea, God da nundubari nímandava aná taubana vitie. Nímanda mema jojabe itatama urota, vitera anami ano utota nímane inono adi-gea, God na, “Anda enembo taubana re,” rirota, rata-gea ya, unda enembo tumanadu kaifa eta rouvia kambesiva\f + \fr 1:5 \ft Ii, \ft \+it Gaga Isuri Ari Kambesi\+it* anava, gaga dumeni gaga \+it Natofo \+it*da tuva vitia-nu irugea gia, tanana adi!\f* terota, kaifa urota, iraita rouvie.  
\v 6-7 God na namonde anda irari gerurota, mino aghagonu ututa rouvie. Jojabee Iesu, ivari buburagha, kotú unda anera anoghade uutuvareta vorefuraita rouvia aghade, God na enembo avona nímandu mema reisi-ututua-du mino utota rururota, namonde andú siriri arinu utota bubugaitare.  
\v 8 God na enembo avona umó gambi vitia, kotú namonde anda Jojabee Iesu Keriso da Gaga taubana ambo-ambo ambi rousua-du, bouvu fakarabe utaita rouvie.  
\v 9 \x - \xo 1:9 \xt Is 2:10\x*Aghá ata-gea, númane ari sembagoda mino utari kambesiva tumanadu iraita rousue. Númane, jo Jojabeeda dibeva irambi, kotú unda duroghade anode jo gambi egegaita rousue.  
\v 10 Iesu furaita rouvia feferava, unda natofomi undú raga rari-du, kotú umó gaabee eta rousua enembomi unda durogha gerurota, unda ragaro righota erari-du rea, furaita rouvie. Aghade, nímane beago, unda natofoda rova iririgaita rosoravore. Anada bee mo, nímanena námanda minono niningigea gaabee egegutureravore.  
\v 11 Avore, God na, nímane inono gerurie-gea, jebuga bubugadi, kotú unda unonu egegadi rea, aghi urie. Amindu, umó daiyagha ea sonembasueta, nímane unda uno arida ano bubugadi rea, námane benunu urota vitere. Kotú, umó daiyagha ano utasueta, nímane gaabee urota, buro egegeta rosora-da beede, kotú ari taubana aita nundubeta rosora-da beede, isagha asua-nu nundubuturota, námane benunu urota vitere.  
\v 12 Aghá sirorari-du uno rosora-da bee mo evere. Nímanena namonde anda Jojabee Iesu da ragaro righota erorurota, enembo dumenimi unda durogha nímandava gigigari-du uno rosore. Kotú, umó beago unda durogha nímandava utota bubugadi uno rosore. Aná mo, namonde anda God kotú Jojabee Iesu Keriso da sonembava siroraita rouvie.   
\c 2  
\s1 2:1-12 Embó Akuago Eini Ambova Siroraita Rouvia-Da Gaga Re.  
\p
\v 1-2  \x - \xo 2:1-2 \xt 1 Te 4:15-17\x*Anda ikoko mendi, ariri gharovu, namonde anda Jojabee Iesu Keriso kaverea furá namonde amó bata danode iraita rosora-da gaga raita rore. Enembo eini gaga gavera anda ragarova eghá rirota, “Jojabeeda fefera seibe etia bubie,” radua o gembadua mo, mania gaabee egegata, kotú enembo einimi undufa feroveta gaa rirota, aghá radua mo, mania ningia gaabee egegata! Aná gavera raita rouvieta!  
\v 3 Mania doadi, enembo einimi imó gaga gaverami kuvirauveta! Anada bee mo, ari akuagoda beforo righari embó eini erea, isagha ata-gea, enembo dano unda ambo-ambo urota, God de mene-mene aita urota, ambova Jojabee kaverea furota, aná ari akuagoda beforo righari aná God na rata ambova amburariva mema tumanadu itatama aita rouvie.  
\v 4  \x - \xo 2:4 \xt Dan 11:36; Ezek 28:2\x*Aná ari akuagoda beforo righari, enembo avona ingomi uubu ari o god dumeni tumogha baĩ egegadua-nu injigha urota, undufako righota erota, God du Tafaroro Ari Kambova terua asumbea, umó God gaa raita rouvie.  
\v 5 Nímane reisi-geroravore, amó namonde irirota, aná ari akuagoda beforo righari embóda gaga ririeta nímane niningigutureravore.  
\v 6 Kotú, aná embóda furari eini-eini einimi gajitueta vitia, nímane reisi-geroravore. Unda simbuguturia fefera bubadua, umó isaghava bubota gigigaita rosoravore.  
\v 7 Oreki ari-bari akuago seibe kivumi buro rouvie-tago, enembo oruabe jo gigigambi vitie. Embó avona aná ari-bari akuago gajiturota vitia-nu, God na rata serigota, aná ari akuagoda beforo righari embó isaghava bubota gigigaita rosore.  
\v 8  \x - \xo 2:8 \xt Is 11:4\x*Ari-bari akuago retora-da beforo righari isaghava bubua, buro urota, Jojabee Iesu unanagha kaverea furá, neno asegota, unda beeda oenomi furota, aná ari akuagoda beforo righari amburaita rouvie.  
\v 9-10  \x - \xo 2:9-10 \xt Mat 24:24\x*Iesu kaverea furaita rouvia-da dibe kena, ari akuagoda beforo righari embó umó Satan da anonu bua furá, jebuga tumanadu irari kasovigaita rouvia enembomi umonu gaabee ari-du rea, ari akuago manemi kuvia gerurota, gavera ivata dumenide dano takembea ata siroruturota, enembo sei aghago jo gambi iririgadua, aná ivatanu gia duduku-dadaka egegaita rousue. Aná enembo jebuga tumanadu irari kasovigaita rousua retora-da bee mo, númane gaa bee injigha ea, jebuga tumanadu irari kasovigea vitie.  
\v 11 Anada bee mo, númane jo gaabee ambi eta rousua-du God na númandava gaveranu gaabee arida ano utota, númane gaveranu gaabee egegaita rousue.  
\v 12 Anada mino mo, enembo avona gaga bee jo gaabee ambi urota ari-bari akuago manenu gangoro urota iririgadua, númane anada mema fakarabe itatama aita rousue.   
\s1 2:13-17 Ano Ea God Da Gaga Righia Goghó Ea Iririge!  
\p
\v 13 Anda ikoko mendi, ariri gharovu, námane nímandu rea, fefera inono God Afadava “aiye” regegasire. Anada bee mo, God na tutunova, unda Asisi utota nímanda neno roo seghea simbugota gaga beenu gaabee urota jebuga tumanadu irari bubugadi rea, nímane gateguturie.  
\v 14 Námane Gaga Taubananu nímandu minono rieta, God nímane namonde anda Jojabee Iesu Keriso da durogha nímanda boanda bubugadi rea, God na nímane gateguturie.  
\v 15 Amindu rea, anda ikoko mendi, ariri gharovu, jiria goghó ea, námane gaabee nímandu rei-irugutora, bemi ritara, kotú ingisova gefivutara, ananu bua righia goghó egege.  
\v 16-17 Namonde anda Jojabee Iesu Keriso kotú God Afa, namonde amó neno bua, unda kaveverami tefo sonembutueta, namonde ano ea, unda kaverea furaita rouvia feferadu, uno urota, kaifa eta rosore. Ungá nímandu ari-bari taubana ari-du, kotú gaga taubana rari-du tavo urota, ano ututugoe!   
\c 3  
\s1 3:1-5 Pol Na Tesalonaika Enembomi Númandu Benunu Ari-Du Riria Re.  
\p
\v 1 Avore, anda ikoko mendi, ariri gharovu, gaga ambo jetuko mo, God dava námandu benunu egege, unona sonembuturota, námane Jojabeeda Gaga taubana minono riradua, enembo niningigea tutumi neno kaveruturota, nímanda gaabee egegutara aghagonu, unda Gaga kakara egegoe!  
\v 2 Kotú eini mo, námandu benunu egegutu-gea, God na enembo akokogo námandava bua serigoe! Anada bee mo, God da Gaga Taubana minono reta rosora, enembo oruabe jo gaabee ambi egegeta rousue.  
\v 3 Tago, Jojabee umó donu rari aghagonu eta rouvie. Satan nímandava dara utaita uradua, unona nímandu ano utua gangada urota, jejebugaita rosoravore.  
\v 4 Jojabee na námane sonembuta-du námane tanana rosore, nímane donu ari-du regegutara, aná eta rosoravore, kotú aghá nuenembo aita rosoravore!  
\v 5 Jojabee na nímanda neno roo righota dambu ata, God neno rururota, Keriso da durumugari ututa-nu righia goghó ea iririgadi, rere!   
\s1 3:6-15 Namonde Burodu Jo Injigha Ambi Egegasire.  
\p
\v 6 Anda ikoko mendi, ariri gharovu, Jojabee Iesu Keriso da ragarova nímandu eghá rere. Namonde anda rorova dogabi enembo, kotú námanda gaga ritara ningia, ambo-ambo ambi rousua enembode, mania uumo egegata!  
\v 7 Námane, namonde irirota, guri baita buro daiyagha egegutara, nímane gigigutaravore. Amindu aghagonu urota iririge, mania burodu injigha egegata!  
\v 8 Namonde vitara aghade, nímandu bouvu utara-degea, námane tumba onembo buro urota guri bua, nímandava undari bari gurimi mino ea bua reisi-nendare.  
\v 9 Nímane sonembaita rea igigutare-gea, nímanda undari-bari jo tefo bua undidigambi re. Tefo benunu ea bua undasira aná taubana re, tago námanda unonu egeguturota, nímane gia, beforo isagha urota, námanda ambo-ambo egegadi rea, aghá egegutare.  
\v 10 Námane namonde irirota, nímandu gaga eini eghá regegutare. Enembo avona buro ambi tefo iradua-dava, “Mania undari utata!” regegutare.  
\v 11 Nímanda kokomana dumeni dogabi tefo emborova deĩ egeguturota, kokomanada irarinu gia, unongu reta rousua-du, gaga dabako aghago rekago nímandu reisi-rere.  
\v 12 Nímanda gorotova enembo dumeni dogabi desea irieta aghá rei-niningore. Amindu Jojabee Iesu Keriso da ragarova, aná enembo durumugea, buro ea, undari bari bua dirota iririgari-du rere!  
\v 13 Avore, anda ikoko mendi, ariri gharovu, ari taubana egeguturota, mania rorova injigha ea dodogata!  
\v 14 Atá enembo eini avona, námanda gaga ená ingisova rera ningia, ambo-ambo ambi adua, umonu gia goghó ea, mania ya, undava takembata! Aghá ege-gea, umó ari akuago eta rouvia aná tanana ea meka gae!  
\v 15 Tago, mania umó gitofo aghago bata, umó ikoko mendi aghago rururota, nghaĩ iti, ningoe!   
\s1 3:16-18 Pol Da Ghanena Gaga Riria Re.  
\p
\v 16 Avore, Jojabee tofo namonde anda siriri arida ruru unona, fefera inono emboro nanjogova unda siriri ari tumanadu ututurota rururota iririge! Jojabee nimonde dano iroe!  
\v 17 Avore, amó Pol nu tanana egegadi rea, nímane ghanena urota, anda ingomi, daiyagha gembuta rora aghagonu rei-gefereta. Yata bua gigige!  
\v 18 Namonde anda Jojabee Iesu Keriso da kavevera nímandava iroe!  
\pmc Avore, anda gaga tano evere.