\id 1TI  
\h 1 Timoti du 
\toc3 1 Ti 
\toc1 1 Timoti du Pol Unda Ingiso Sei Timoti Du Gefiria, Aná Evere. 
\toc2 1 Timoti du 
\mt1 1 Timoti du  
\mt2 Pol Unda Ingiso Sei Timoti Du Gefiria, Aná Evere.  
\ip Pol unda ingiso sei Timoti dava gefiria, aná evere: Timoti da nue mo, Jiusi evetu re. O numamo mo, Jiusi enemboda gitofo, Grik embó re. Pol Iesu da bingá minono ririeta, Timoti ningia, gaabee ea, bafutaito urie. Urieta, Pol na Timoti unda mendi aghago bua kaifa urie. Pol unda sei Timoti dava gefiria ingiso, umó jo diburava irirota gembambi re. O unda ingiso ambo kena gefiria mo, umó diburava irirota gefirie.  
\ip Enembo dumenida nundubariva, Pol fefera dabako Rom anava dibura ari nundubeta rousue. O enembo dumenida nundubariva, Pol fefera ungagha Rom anava dibura ari nundubeta rousue.  
\ip Avore, umó fefera ungagha dibura ari aná gaa bee irasua mo, umó sei dibura uria-da ambova, isaghava deĩ urota, aghajora ghaeko* 63-65 Iesu siroruturia-da ambova gefirie.  
\ip Timoti mo, fristi* aghago o Iesu gaabee eta uria enemboda barirari aghago urota, ekaresia* dumenida beforo righita urie. Aghá urota irieta, Pol ená ingisova ekaresiada irari, kotú buroda gaga dumeni-dumeni nghaĩ ititurota, Timoti dava gefirie.  
\is1 Pol Ená Buka Gefiria Gagada Mendó Mane, Aná Evere:  
\io1 1:1-2 Pol na Timoti ghanena uria re.  
\io1 1:3-20 Timoti daiyagha God da Gaga bee o Irugari bee nuenembo irugasua-nu Pol na nghaĩ itituria re.  
\io1 2:1-15 Kuristini daiyagha God tumogha baĩ asua-da aitonu isuri uria re.  
\io1 3:1-16 Namonde amó, Iesu gaabee ari enemboda babarigari o ogababada gategaita adora mo, númanda irariva gerurota gategasire.  
\io1 4:1-6:21 Pol na Timoti daiyagha asua, o ekaresia daiyagha kaifa asua, kotú ari donu injigha asua-nu isuri uria re.  
\c 1  
\p
\v 1 Ariee, anda mendi, God namonde anda sonemba kato na, kotú Iesu Keriso namonde anda kaifa gigita arida ruru na ririeta, embó eini unda aghi kato ea vitia, aná amó re. Imó ghanena bee rore. Yata bua gi! Amó Pol re.  
\v 2 \x - \xo 1:2 \xt Eka 16:1\x*Timoti, imó gari re. Anona arera, minono ririeta ningia, imó gaabee ea, anda mendi aghago ureravore. God Afa kotú angá anda Jojabee Iesu Keriso da sonembade, kaveverade, kotú siriride utota badi!   
\s1 1:3-11 Pol Na Namonde Amó Irugari Gavera Kakatoda Agho Dari Ningauve-Degea Riria Re.  
\p
\v 3 Amó Masedonia Frovensiva irurota, indú donu rirera, dabako ananu rekago raita rore. Imó Efesus irirota, enembo avona irugari gavera irugeta rouvia ananu radi-gea dodogari-du rere.  
\v 4 Ená enembo rera, númane evovo kikinu iruguturota gaa bee gaa rea, anade dano nuabua maneda ragarode kikide iruguturota vitie. Aná irugeta rousua kikide gagade dano rege-gea, dodogoe! Anada bee mo, númane aná gagada beenu rea niningiguturota, besiga urota, jebuga eini jo tambambi eta rousue. O God da uno mo, enembo undava yari emboro ifegea vitia-nu, gaabee ea, unda sasingu egegasue.  
\v 5 Amó aghá adi retora-da bee mo, amó uno rore: anava vitia enemboda neno evurari gaga inona radi, neno simbugea númanda ari akokogo karigea, gaabee ea goghó egegasue. Aghá urota, númane mino-mino neno rururota iririgasue.  
\v 6 Enembo dumeni ari-bari aghago dotuturota, emboro kasoviguturota, tefo gaga nuenembo reta rousua, anada bee eini tefo re.  
\v 7 Aná enembo rera-da uno mo, númane God da Agho Darida irugari kakato egegasue. Tago, númanda mana-managha rambi eta rousua gaga, anava bee tefo re. Númane donu reta rousua-da bee jo gerurota, tanana ambi eta rousue.   
\p
\v 8 Namonde amó tanana rosore, Agho Dari aná taubana re. Amindu Agho Darida emborova igigasira, aná taubana re.  
\v 9 Tago, Agho Dari jo ari taubana ari enembodu utambi re-tago, enembo Agho Dari nundubambi urota, gogore eta rousua enembodu, God nundubambi urota, ari-bari akokogo eta rousua enembodu, God da jebuga, kotú Asisida jebuga jo nundubambi eta rousua enembodu, avona nue numamo deaveta ambuta rousua enembodu, kotú enembo dumeni kae righiaveta ambuta rousua enembodu, God unda Agho Dari ututurie.  
\v 10 Aghade, avona kombo yagera eta rousua enembodu, o nino okade kombo undiri eta rousua enembodu, enembo avona kokomana nandia bua iiava utua guri buta rousua enembodu, gavera kakatodu, kotú enembo avona irugari bee dotuturota gavera dibe eini be eini irugeta rousua enembodu nundubuturota, God unda Agho Dari ututurie.  
\v 11 Irugari bee retora, aná God da Gaga Taubana duroghade avore. Unona aná Gaga minono rari-du rea, anda ingova ututurie. Undú raga regegore!   
\s1 1:12-20 Pol Jojabeeda Sonemba Itatama Urota, “Aiye” Riria Re.  
\p
\v 12 Namonde anda Jojabee Iesu Keriso, anda gaa bee ari gia, “avore” rea, unda buro ari-du rea, andava ano ututuria-du “aiye” rere.  
\v 13 \x - \xo 1:13 \xt Eka 8:3; 9:4-5\x*Sei amó undú sembago rirota, unda natofo dea ga urota, unda tamova gaga sembago reta urere. Tago, fefera aghade andava gaabee ari tefo, kotú amó donu eta urera, aná jo gerurota, ambi eta urera-du God andú neno mema ea kauta urie.  
\v 14 Namonde anda Jojabee Iesu Keriso unda natofo sonembeaveta, umonu gaabee urota mino-mino neno buta rousua aghagonu urota, unda sonemba andava avereguturieta, anda neno rova beago gaabee aride, ikoko mendi neno baride siroruturieta rururere.   
\p
\v 15 Ená gaga, aná gaa bee re. Gaabee ea goghó egegadi rere. Iesu Keriso umó endava furia-da bee mo, ari bari akokogo enembo sonembota jebuga bari-du rea, furie. Ari akokogo enembo rera, eini jo amogo irambi re. Amó akuago bee eta urere.  
\v 16 Avore, ari akokogo eta rousua enemboda iti bee itiva anona eta urere. Tago, enembo avona ambova Iesu Keriso gaabee ea, jebuga tumanadu irari bubugaita rousua-mi amó gerurota, tanana egegasue: Iesu Keriso da daiyagha durumugea roboghomi amonu sonembea jebuga tumanadu ututuria aghagonu, númandava aita rouvie.  
\v 17 Amindu, namonde God kakara urota, unda duroghadu raga rirota iririgore! Umó namonde anda kini re. Umó vitirie, vitie, kotú tumanadu iraita rouvie. Jo dibemi gari aghago irambi re. Umó God bee re, eini umongo tefo re. Aĩ gaa bee re!   
\p
\v 18-19 Timoti, anda mendi, ená raita rora gaga jo reka irambi re. God da feroveta einimi, imó donu asira aná seibe ririe. Aná riria gaganu kaifa urota, anami Jojabee gaabee urota, unda ragarova mene-mene ege! Aghá urota, inda neno roode gaabee aride kaifa adi rere! Enembo dumeni númanda neno roode gaabee aride jo kaifa ea simbugambi eta uria-mi, númanda gaabee ari jujururieta, númane bebeta ea, sembago urie.  
\v 20 Aná noni rera-da rova enembo ungagha, aná Himeneus ungá Aleksander gha re. Númane God da bingá utata akuago uta-du, amó tanana ea doari-du rea, ungá umó Satan da ingova itari vitie.   
\c 2  
\s1 2:1-15 Tumogha Baĩ Arida Emboro Taubana, Aná Evere.  
\p
\v 1 Avore, anda gagada mendó bouvu aná evere. Anda uno mo, namonde amó enembo dano nundubuturota, númandu benunu egeguturota, God Afadava, “Aiye” regegore!  
\v 2 Aghá urota, namonde amó durumugaride siriri aride iririgaita rea, God nundubuturota, unda aito fugari uno rouvia-nu egegaita rea, namonde anda kini manede kokotofu gavanada buro kaifa eta rousua-dedu benunu urota irore!  
\v 3-4 Aghá adora, namonde anda Sonemba Kato, God enembo nanjogoda gaa beeda ruru umó aná tanana ea, jebuga tumanadu irari tatambugari-du uno rouvia-mi gangoro aita rouvie.  
\v 5 Anada bee mo, God umó dabako re. God eini tefo re. Kotú embó dabakomi roro kangoro ea enembo bua, God dava futa rouvia, aná Iesu Keriso umó re.  
\v 6 Enembo dano unona bua furá, God de takembaita rirota, God da gateguturia feferava undufako utua ambubuturia-mi rei-irugutue: God enembo dano unda jebuga bubugari-du uno rouvie.  
\v 7  \x - \xo 2:7 \xt 2 Ti 1:11\x*Aná gaa beede, Iesu gaabee arida emborode unda natofo Jiusi enemboda gitofodava irugota, tanana egegari-du rea, amonu unda aghi katodu gateguturia, aná gaa bee rere, jo gavera rambi re.   
\p
\v 8 Avore, anda uno mo, kambesi niavo-niavo embobo dano, neno akuago, kotú besiga ambi irirota, númanda neno roo simbugea, númanda ingo righota erota, God dava benunu egegasue.   
\p
\v 9-10  \x - \xo 2:9-10 \xt 1 Pi 3:3\x*Avore, evevetu God da natofo ea vitia-da aito taubana fufugegasua-du raita rore, niningige! Nimane jo enembo nímandu raga rari-du rea, o dibe fangari-du rea fefera yafabe númanda tamode eembode foumade simbuguturota, guri fugambi aita rosoravore. Durumugea, ari taubana egeguturota iririgadi rere!  
\v 11 Evevetu númane tumo gonea, be doa irirota, irugari niningigasue.  
\v 12 Amó jo doata, evetu einimi erea, embobo nghaĩ itambi aita rouvie. O emboboda beforo righari ambi aita rouvie. Evevetu númane be doa iririgasue.  
\v 13  \x - \xo 2:13 \xt Gen 2:7; \xt Gen 2:21-22\x*Anada bee mo, God sei Adam urieta siroruturieta, Iv umó Adam da ambova siroruturie.  
\v 14  \x - \xo 2:14 \xt Gen 3:1-6\x*Eini mo, Adam jo sei dara ambi re. Sei mo, Satan Iv kukuvirieta, ari akuago unona urieta siroruturie.  
\v 15 Avotago, evevetu roboghomi gaabee urota, neno rururota, ari taubananu urota iririgadua mo, númane mendi sasingu fumbariva jebugaita rousue.   
\c 3  
\s1 3:1-7 Iesu Gaabee Ari Kakatoda Kofiri Righarida Emboro Eghá Re!  
\p
\v 1 Ená gaga aná gaa bee re, avona ekaresiada* kofiri righari aita uno adua mo, taubana re. Aná buro fakarabe, kotú taubana re.  
\v 2  \x - \xo 3:2 \xt Tai 1:6-9\x*Embó bingá taubana, dinunu tefo kotú evetu dabako bua irarinu kofiri righari-du gategadi rere. Tamo firída uno buregea, durumugea irari embónu badi rere. Umó esega enembodu gangorogha orokaiva rirota bua, kaifa tavo asue, kotú irugarida gorotova umó inono asue.  
\v 3 Umó jo uvu fakara oruabe undia beforo biruru ambi aita rouvie. Umó durumugadua, jo tataya kato irambi aita rouvie. Aghade, umó jo guri neno bambi aita rouvie.  
\v 4 Unda evetu mendi sasingu taubana kaifa tavo urota, númane umó kakara urota, unda gaga niningigasue.  
\v 5 Anada bee mo, umó avona evetu mendi sasingu kaifa ea simbugari inono ambi adua mo, umó daiyagha ekaresia kaifa adu?  
\v 6 Tumbo enembo neno kaveradua embobodava, aná buro mania utata! Rourogo, Satan gogore ueta, God umó injigha uria aghagonu, aná embó gogore urota, God na umó injigha auveta!  
\v 7 Kotú gagada mendó eini mo, God tanana ambi kasava vitia enembomi umó kakara eta rousua embónu gatege! Aghá adora mo, umó jo tutomi damé-damé ea, Satan da amuva vorea, meka gambi aita rouvie.   
\s1 3:8-13 Iesu Gaabee Ari Enemboda Oga Eghá Egegasua Re.  
\p
\v 8 Ogababada mane, númane gari dabako aghago egegasue. Númane natofo jededa dibeva ari taubana nuenembo urota, gavera jo regegambi egegasue. O uvu fakara jojabe jo undia beforo biruru ambi, o guridu jinanga ambi asue.  
\v 9 Númane neno roo simbugea, kotú neno dano ututurota, God sei unda nundubari dumeni nungiturieta, ambova isagha uria-nu, gaabee urota ambo-ambo egegasue!  
\v 10 Númanda irari gia irurea goghó ea, dara eini jo tambambi adora mo, rege-gea, númane aná buro egegoe!   
\p
\v 11 Gari dabako aghagonu, númanda evevetu beago, natofo jededa dibeva ari taubana nuenembo urota iririgasue. Númane jo unongu regegambi asue. Númane tamo firída uno dotuturota, gaa bee nuenembo regegasue.   
\p
\v 12 Aghade ogabada, umó evetu dabako bua, unda evetude mendi sasingude dano durumuguturota kaifa ea goghó asue.  
\v 13 Enembo avona ogabada buro ea goghó adua mo, númanda bingá jojabe ata-gea, númane ano ea jiria, daiyagha Iesu Keriso gaabee eta rouvia-nu minono rari inono aita rousue.   
\s1 3:14-16 God Unda Nundubari Donu Kivu Ea, Ambova Isagha Uria, Aná Evere.  
\p
\v 14 Amó ya, imó gaita rei-nundubutore. Tago, amó ená ingiso rei-gefera-da bee mo,  
\v 15 domi amó buregasueta jirasua mo, namonde anda God jebuga vitia-da natofo daiyagha irasua amindu, imó jo mana-mana ambi asiravore. God da natofo rera, unda ekaresiadu* rere. Kotú ekaresiada buro mo, tutumbumi kamboda bouvu fumbua irita rouvia aghago, ekaresiami God da Gaga beenu bua righia, kaifa eta rouvie.  
\v 16 Kotú namonde anda gaabee arida ruru God na nungia, ambova isagha uria, aná jojabe re. Aná jo injigha ari aghago irambi re. Aná Keriso umó re. Umó enemboda tamonu asugea furia, ená endava siroruturie. Unda gagade aito fugaride dano gaa beenu, God da Asisimi irugeaveta gigigeta rosore. Umó endava irieta, anera mane gerurie. Kotú unda bingá minono regeguturieta, sarigea aria, endava abua-abua niningigea, enembo oruabe umonu gaabee egeguturie. Aghá ueta, God na ririeta, umó rekago kaverea uutuva vitia, unda durogha bua avo asumbuturie.   
\c 4  
\s1 4:1-5 Irugari Sembago Siroraita Rouvia-du, Namonde Mana-Mana Egegambi Aitare.  
\p
\v 1 God da Asisimi isagha bee eghá ririe, “Fefera ambova, enembo dumeni namonde anda gaabee rosora-nu injigha ea doa, asisi gavera kakatoda gaga ningia, taimuda irugarinu ambo-ambo egegaita rousue.”  
\v 2 Enembo dumeni, númanda nundubari seibe ari akuagomi bundetueta vitia-mi aná taimuda irugari rera-nu bua fuava, natofo jede kukuvirota irugeta rousue.  
\v 3 Aná enembo, númane eghá irugeta rousue. Gimasa irirota, evetu jo yagera ambi aita rouvie, o ariri mose irirota vai ambi aita rouvie, kotú aghá urota, aná enembo rourogo evetu yagera auve-degea o gimasadava vai auve-degea irugeta rousue. O undarida gorotova, undari dibe eini be eini undambi tama ari-du irugeta rousue. Tago, God da uno mo, unda gaga tanana urota, gaabee rosora enembomi, undú benunuva aiye rirota, aná undari undidigasue.  
\v 4-5 Anada bee mo, God eini-eini nanjogo urieta siroruturia, aná dano taubana re. Aghá-gea, God du aiye rirota, unda Gaga iruguturota aná undari ea simbugadora mo, aná dano God da dibeva kakara aita rouvie. Amindu injigha ambi undidigore!   
\s1 4:6-16 Pol Na Timoti Buro Daiyagha Asua-Du, Nghaĩ Itituria Re.  
\p
\v 6 God da Gaga taubanade Gaa Beede rei-irugutora-nu tofo ambo-ambo urota, aná gagada mendó retora-nu angá anda ikoko mendidava irugadora mo, imó God da aghi kato taubana aita roravore.  
\v 7 Aghade, imó beago abua maneda evovo kiki mania ningata! Aná jo God da Gaga irambi re. Imó ininigha God da unonu urota irasira-da aitonu fuge!  
\v 8 Gaa bee re: tamoda undiri adora-mi, tamo ano ata angá anda endava irari itoko taubana aita rouvie. O namonde ininigha God da uno egegadora mo, taubana bee re. Namonde amó God da be gajari righia jiradora, jebuga endava irirota itatama rora aghagonu, ambova beago tumanadu iririgaita rosore.   
\p
\v 9 Ená gaga, aná gaa bee re. Gaabee ea goghó egegadi rere.  
\v 10 Avore, namonde amó ano urota, Jojabeedu buro fakara eta rosora-da bee mo, God jebuga vitia, enembo dano, kotú gogorego namonde amó gaabee ari enemboda sonemba kato ea vitia-nu gaabee urota, umonu kaifa gigita urota vitere.   
\p
\v 11 Aná gaga nanjogo retora-nu iruguturota, aghá ambo-ambo egegari-du rirota iririge!  
\v 12 Imó mendi reka re, tago, rourogo doata, enembo imó tumo gonea gauve-degea rere. Kofiri ririkuradi-gea, ekaresia* dano inda gaga taubanade, irari taubanade, neno baride, kotú inda gaabee ari anoghade gerurota, ambo-ambo egegoe! Aghade, imó daiyagha ari akuago injigha uradi-gea, Iesu gaabee ari enembo gerurota, ari dabako aghago egegoe!  
\v 13 Imó enembodu, God da Gaga iruguturota, minono rirota, nghaĩ ititurota irasiravore. Inda ano avo ititurota, buro uu-gea, amó ya, indava bubore!  
\v 14 Eini mo, feroveta God da uno indava isagha urieta, ekaresiada babarigari númanda ingo inda beforova itia, benunu ueta, God da Asisi indava ano donu ututuria, aná mania injigha ata! Jijimu adi rere!   
\p
\v 15 Aná retora-nu ivatava itadi rere. Inda neno dano itia, ano ea, inda buro arida aito fugari barirota, enembo dano gigigoe!  
\v 16 Inda irari kaifa ea simbuguturota iiri! Kotú inda donu irugeta rora, aná gaa bee nuenembo irugadi rere. Anada bee mo, inda aghá aita rora-mi imó jebuga rururadi-gea, inda gaga niningigadua enembo beago, jebuga tambua, bubugaita rousue.   
\c 5  
\s1 5:1-6:2 Iesu Gaabee Ari Enemboda Irari Eghá Irasue!  
\p
\v 1 Embobo bee mane mania dibeva rata! Númane nimamo aghago kakara urota, nghaĩ iti! Embobo reka inda ikoko mendi aghago nundubuturota, roboghomi nghaĩ itia, tavo urota iiri!  
\v 2 Evevetu bee niemane aghago kakara urota, nghaĩ iti! Kotú evevetu reka inda gharototo aghago nundubuturota, roboghomi nghaĩ itia, tavo urota, irii! Tago, rourogo nundubari akuago sirorauveta, indufako kaifa ea goghó ege!   
\p
\v 3 Ekaresiadu* rege, evevetu dodoru mendi sasingu tefo, kotú sonemba tefonu kakara urota, sonemboe!  
\v 4 Avotago, doru einidava mendi sasingu, o imemendi iradua mo, ekaresia dano aná doru jo sonembambi asue. Anada bee mo, doru tofo unda sasingumi o imemendimi God da uno urota, nue numamo o nuavia nuabuada sonemba sei númandava ututurota, unduta uria-da mino ututurota, nue numamo o novia nombua númanena tofo sonemboe. Aghá urota, God gerurota, gangoro aita rouvie.  
\v 5 Imó rei-geroravore, evetu doru sonemba eini tefode umó seibe tutuno ea, unda gaabee ari God dava ututurota, God da sonembadu tumba onembo benunu urota irita rouvie.  
\v 6 Tago, dodoru dumeni tamoda unonu urota irita rouvia, númane tamomi jebuga irita rouvie. Tago, God da dibeva númane seibe ambua irarigo urota irita rouvie.  
\v 7 Natofo jedemi unongu rauve-degea anda retora gaganu dodorudava nghaĩ itadi rere!  
\v 8 Avona unda ikoko mendi, kotú jojago mo, nue numamo o nuavia nuabua jo sonembuturota, kaifa ambi adua, aná sembago bee re. Aghá urota, umó seibe unda gaabee ari injigha ea, God gaabee ambi enemboda ari akokogo serigea, ari akuago iti bee itiva aita rouvie.   
\p
\v 9-10 Ekaresia dodoruda ragaro ingisova gefirota mo, dodoru ghaeko 60 tambua vitia-da ragaro nuenembo gembu! Aghade dodoru avona fefera dabako vai ea irirota, kasava kombo undiri ambi ari, kavevera egegari, unda sasingu kaifa urota, nghaĩ roboghomi ititigari, esega enembodu ghaito teno fufugegari, dara mema tatambugari enembodu kavevera ea sonembari, kotú ari-bari taubana dumeni egegari, avona natofo jede gerurota númandu raga regegeta rousua dodorudu rere. Avore dodoru aghago maneda ragaro manenu gegembugoe!   
\p
\v 11 Dodoru rekada ragaro ingisova gembara-degea rere. Anada bee mo, númanda tamoda unonu urota, rekago vai aita nundubuturota, Keriso doaita rousue.  
\v 12 Aghá urota, Keriso dava sei donu aita be gajituria, aná bejuturota, dara aita rousue.  
\v 13 Aghade, númane Jojabee jo nundubuturota, buro ea goghó ambi aita rousue. Númane buro ambi dogabi irita rousue. O sembago bee mo evere: númane enembodu unongu rirota, kambo kambo iru-furu urota, beforomi-beforomi egegeta rousue. Aghá urota, gaga jo rari katogonu rambi eta rousue.  
\v 14 Amindu, anda uno mo, gitofomi namonde anda tamova unongude gaga sembagode rarida goroto gajari-du rirota, dodoru reka mane rekago vai ea mendi sasingu sirorota númanda kambo tofo kaifa urota iririgasue!  
\v 15 Gaa bee rere, dodoru dumeni seibe kaverea Satan da gaga niningurota, unda ambo-ambo rousue.  
\v 16 O Iesu gaabee ari evetu einida rao tato, O bi-bimono o aya tata eini doru adua mo, aná evetu unona doruda irari sonemboe! Anada bouvu unona rururota, ekaresia númane dodoru dumeni avona makasi bee ananu sonemboe!   
\p
\v 17 Ekaresiada beforo ririkigari avona kofiri righari taubana eta rousua-nu, kakara urota, númanda mino utua, kotú etova utu, bae! Jojago mo, beforo ririkigari avona buro fakara urota, minono rirota irugeta rousua-du rere.  
\v 18  \x - \xo 5:18 \xt Deut 25:4; \xt Mat 10:10; Luk 10:7\x*God da Gaga anadu eghá reirie,  
\q1 “Inda \tl burumakau\tl* farava vuri dasari-du tino ata biruru urota iradua mo, vuri undauve-degea, mania be rafata!”  
\q1 O gaga einiva dabako aghago reirie, “Inda buro katoda mino utu bae!”  
\m reirie.\fig Jiusi enembomi númanda burumakau undari undia gangoro ari-du rirota farava vuri dasarida feferava númanda be jo rafambi re. Aghagonu, Pol namonde andu ekaresiada buro kakato sonembari-du reirie.|src="101Thresh&OxEat_ WA04013b_scp.tif" size="span" loc="5:18" ref="1 Timoti du 5:18" \fig*  
\v 19  \x - \xo 5:19 \xt Deut 17:6; 19:15\x*Embó eini ekaresiada beforo righari einida iraridu jii difirota ya, aná barirari iruradi radua, mania yata! Tago, enembo ungagha o bakode furá gaga dabako aghago radua mo, avota ii, aná barirari iruradi!  
\v 20 Númane avona ari akokogo urota iradua, natofoda rorova dibe beva ininigha rege! Aghá ege-gea, natofo dano ananu gia oru egegoe!   
\p
\v 21 Afa God, Iesu Keriso kotú Anera Kakarada dibeva jiria rere. Gaga gembera, aná kaifa adi rere. Aghá urota mo, enembo dano inonova sonembaita roravore, o iruraita roravore!   
\p
\v 22 Enembo Jojabeeda buro egegari-du baita adora mo, durumugea, enemboda irari kuvia gerurota gategea simbugadi rere. Ari akokogo uradua enembode mania takembea uumo ata! Indufa kaifa urota ari akuagoda emboro serigadi rere!   
\p
\v 23 Inda uro sembago uaveta kae itatama eta rora vota! Uvu nuenembo mania dirota irata! Tutuno ea \tl vaini\tl* gha bagega ea dirota iradi rere!   
\p
\v 24 Enembo dumeni ari akokogo isaghava urari-du, númane bua, koto eta rousue. O enembo dumeni númanda ari akokogo kivumi eta rousue. Tago, koto eta rousua feferava isagha eta rousue.  
\v 25 Kotú, dabako aghago, enembo númanda ari taubana eta rousua, gita rosore. Kotú ari taubana kivumi eta rousua beago, ambova fuava isagha eaveta gita rosore.   
\c 6  
\p
\v 1 Namonde anda gaabee ari kakato avonu enembo einimi gurimi rururieta aná embóda sabua* ea vitia-du rere. Rourogo natofo isaghava God da ragaro righia sembago urota, kotú namonde anda irugaridu unongu rauve-degea rere. Númanda babarigarida reta rousua gaganu kakara ea goghó urota, ambo-ambo egegoe!  
\v 2 Gari dabako aghago, sabua dumeni númanda babarigari beago, God da natofo ea vitia-du rere. Nímanda babarigari kuristini ea vitia, aná nímanda ikoko mendi eini aghago ea vitie. Amindu númanda gaga jo bua fugambi, niningigaita rosoravore. Nímane sei eta urera, anada itiva urota, nímanda babarigari kakara ea goghó urota, buro ea goghó egege! Anada bee mo, nímanda babarigari sonembeta rosora beago, God da natofo ea vitie. Aghá-gea, neno bubugadi rere!  
\s1 6:3-10 Namonde Guri Neno Bubugadora, Jebugada Emboro Kasovigaitare.  
\p Ená retora gaganu iruguturota rege, enembo aghago egegoe!  
\v 3 Namonde anda gaabee ari rurugha re, kotú namonde anda Jojabee Iesu Keriso da Gaga aná gaa bee re. Aghá-gea, enembo avona namonde anda gaabee ari injigha ea, gaga dumeni irugadua mo,  
\v 4 umó deriva urota, undufa raga rirota aghá aita rouvie. Unda nundubari tufoko re. Umó nundubari sembago urota, veso-veso urota, gagada beedu besiga eta rouvie. Anami besiga, tauga kavavana rari, komanada bingádu mandudu ari, komanadu nundubari akuago ari,  
\v 5 kotú anami sosou bauso siroreta rouvie. Aghá egegeta rousua enembomi seibe gaa bee kasoviguturota, númanda beforo munju jo buro ea goghó ambi egegeta rousue. Númanda nundubari mo, númane God da natofode takembadua, guri oruabe bubugasue.   
\p
\v 6 Gaa bee mo, gaabee arida emborova irirota, ea simbugadora, imó eini-eini oruabe baita roravore. Tago, God indú donu ututa rouvia-du imó gangoro asiravore!  
\v 7 Imó rei-geroravore, namonde amó fufiria-va donu eini jo bua furambi re. Kotú amburadora beago, donu eini jo bua yambi aita rosore.  
\v 8 Tago, undaride dighari ombaride iradua mo, avore, namonde andava inono re.  
\v 9 O guri baita, muu dirota vitia enembo, Satan na kukuvirota, tamoda unonu ambo-ambo uta ya jua, jebuga kasovigea amburaita rousue.  
\v 10 Anada bee mo, gurinu neno bari anami eaveta ari akokogo o dara mane siroreta rousue. Enembo dumeni guri baita nunundubuturota, gaabee arida emboro doa, dara kotú mema dibe eini be eini itatama eta rousue.   
\s1 6:11-21 Pol Na Timoti Du Rekago Nghaĩ Itituria Re.  
\p
\v 11 Imó indufako God dava ututureravore. Amindu, eini-eini akuago retora, aná goitu fote! Aghá urota, imó God gaabee ea goghó urota, unda uno eta rouvia ari taubananu urota, enembo neno rururota durumugea jire!  
\v 12 Jebuga tumanadu irari tambadi rea, God na imó aghi urieta, imó gaabee ea erea, natofoda dibeva Jojabee daiyagha daiyagha gaabee urera-nu isagha ureravore. Anada beenu tambaita rea, ano ea mene-mene urota iradi rere.  
\v 13  \x - \xo 6:13 \xt Jon 18:37\x*Amó, God eini-eini nanjogoda jebuga utarida dibeva, kotú Iesu Keriso, Pontus Pailat da dibe kena jiria tumo faĩ ea, gaga bee nuenembo riria-da dibeva jiria, ininigha imó eghá adi rere.  
\v 14 God imó donu ari-du riria, ananu urota, kaifa ea goghó urota iri-gea, namonde anda Jojabee Iesu Keriso da furaita riria fefera furá buboe!  
\v 15 Aná fefera, God, beforo righari iti bee itiva, kini nanjogoda kini, jojabe nanjogoda Jojabee unona undufa gategaita rouvie. God du enembo dano raga regegasue!  
\v 16 Umó unuka seibe vitirie, vitie, kotú tumanadu iraita rouvie. Umó unana jojabeda rova irita rouvie. Enembo eini, avona ya, undava bubari inono irambi re. Enembo avona sei jo gambi re. O enembo avona gari aghago irambi re. Umonu kakara egegore! Unda ano tumanadu vitia-du raga regegore! Ai, gaa bee re!   
\p
\v 17 Gugua ghayafade enembodu nghaĩ ititurota, eghá rege! Gugua ghayafa nanjogo dano siosa jijimu ata, ya sidara aita rouvie. Aghá-gea, rourogo tofo númanda gugua-ghayafadu raga rirota, númanda kaifa gigita ari anava itauveta, rege! God unuka namonde amó gangoro egegari-du kavevera urota, eini-eini nanjogo ututa rouvie. Amindu umonu kaifa gigita egegari-du rege!  
\v 18 Rege-gea, númane kavevera urota, ari taubana urota iririgoe! Aghá egeguturota, númanda gugua-ghayafa kokomanade vesa boanda egegaita simbugoe!  
\v 19 Aghá egegadua mo, gugua-ghayafa dumeni uutuva kamboda tutumbu fugeta rouvia aghago, númanda ragarova sirorea jiraita rouvie. Númane fefera ambova-du rirota, aghá egegadua mo, númane jebuga bee tambua bubugaita rousue.   
\p
\v 20-21 Timoti, buroda mendó dumenide Jojabeeda Gagade indava ututurieta vitia, aná kaifa adi rere. Enembo dumeni God jo nundubambi urota, gaga dumenidu “taubana” gaa rirota besiga egegeta rousue. Aná dano doa serigadi rere! Anada rova beforo gari taubana eini tefo re. Númane beforo gari jojabe bubugaita rirota, gaabee arida emboro kasoviguturie. Anadu besiga urota, God seibe gaabee egeguturia-nu doa, jebuga kasoviguturie.  
\p God da sonemba indava iroe! Avore, anda gaga tano eve sidara etue. Yata bua gi!  
\pmc Amó Pol re.