\id 1PE 1 Pita - Tafota Baruga J. FARR 
\h 1 Pita 
\toc3 1 Pi 
\toc1 1 Pita Iesu Gaabee Ari Kakatodu, Pita Da Ambova Gefiria Gaga Re. 
\toc2 1 Pita 
\mt1 1 Pita  
\mt2 Iesu Gaabee Ari Kakatodu, Pita Da Ambova Gefiria Gaga Re.  
\ip Iesu da ambo nimbi ragaro Pita unda ingiso tutunova aná “God da gateguturia enembo” Pontus, Galesia, Kapadosia, Esia, kotú Bitinia frovensiva didighigea vitiria-dava gefirie. Pita ená ingiso aghajora ghaeko* 65 Iesu siroruturia-da ambova gefirie.  
\ip God gaabee ari kakatodava gitofomi bouvude memade ututuaveta, númane mema itatama eta uria-nu nundubuturota, Pita ená gaga gefirie. Kotú, númane sonembuturota, rourogo mema itatama egeguturota, mana-mana ea, Iesu injigha egegauve-degea, ená gaga gefirie.  
\is1 Pita Ená Buka Gefiria Gagada Mendó Mane, Aná Evere:  
\io1 1:1-2 Pita na God da natofo ghanena urie.  
\io1 1:3-2:10 God namonde amó sonembuturota, fefera ambova jebuga utaita rouvia-du, Pita namonde amó ano ea, kaifa egegari-du riria re.  
\io1 2:11-5:9 Namonde Amó God gaabee ea, Iesu da furari kaifa urota, donu egegasira-nu Pita na ririe.  
\c 1  
\s1 1:1-2 Pita Enembo Ghanena Urie.  
\p
\v 1 Ariee, anda ikoko mendi, ariri gharovu! Anda ragaro Pita re. Amó Iesu Keriso da aghi kato eini re. Nímane God da gateguturia natofo Pontus, Galesia, Kapadosia, Esia, kotú Bitinia frovensi anava taivea andivea arera didighigea vitera dano, ghanena roreta! Yata bua gigige!  
\v 2 God Afa unda unova nímane gateguturie. Aghade, nímanda ari akokogo Iesu Keriso da tatangumi seseghurota, unda Gaga niningigadi rea, God da Asisi Kakarami ririeta, God da natofo kakarago ea viteravore. God da sonembade siriri aride nímanda neno rova vorea baria jojabe ae!   
\s1 1:3-12 God Namonde Andava Sonemba Jojabe Utaita Rei-simbugetua-du Raga Regegore!  
\p
\v 3-4 Namonde anda Jojabee Iesu Keriso da God, kotú Afadu “aiye” regegore! Anada bee mo, umó namonde andú neno mema jojabe ea, Iesu Keriso amburarivareta jebugea eroruria-da anomi namonde andú jebuga reka ututurie. Aghá uria-mi, namonde amó God da ea simbugari fefera ambova bubugaita rosora-nu kaifa gigita urota vitere. Aná ea simbugari rera, unona uutuva kaifa rouvie, jo nanjigo aghade sidara ambi, kotú akuago ea betambi aita rouvie!  
\v 5 Avore, aná ea simbugari esiko-esiko bee fefera ambova nímanena bubugadi, God na uutuva kaifa ueta vitie. Kotú nímane beago, God na kaifa ueta viteravore. Amindu, nímane beago gaabee egeguturadi-gea, nímane unda anomi kaifa urota, unda jebuga tumanadu irari utaita rea simbuguturia-da rifo furá banuna ata-gea, bubugadi!   
\p
\v 6 Amindu, nímane aná ea simbugari esiko-esiko bubugaita rosora-du gangorogha iririgasiravore. Avotago, fefera tufokoda rova dara kotú bouvu nímandava siroreta rouvia-du neno mema urota viteravore.  
\v 7 Auri \tl goldi\tl* ananu nundubea gigige! \tl Goldi\tl* mo, taubana re-tago, jo tumanadu irambi aita rouvie. Nímanda gaabee arimi donu siroraita rouvia, tumanadu iraita rouvie. Tago, \tl goldi\tl* taubana ari-du rea, ivariva dungeaveta jee vorea sidara eaveta, aná \tl goldi\tl* taubana eta rouvie. Avore, namonde amó gaabee ea goghó urota, mema rova jiraita rosora, aĩ tefo, ananu kuvia gerurota, God, aná ivari retora aghago, namonde andava dara kotú bouvu utuaveta itatama egegeta rosore. Anami namonde anda gaabee ari kuvia gita rouvie. Enembo avona jiradua mo, ambova Iesu Keriso da furaita rouvia feferava, God aná enembodu durogha utua, númane righota erorurota, númandu raga raita rouvie.  
\v 8 Nímane Iesu Keriso jo gigigambi re. Avotago, umó neno buta rosoravore. Kotú oreki beago, nímanda dibe mokomi umó jo gigigambi viteravore-tago, umó gaabee egeguturota, undú gangoro jo namonde anda enemboda bemi isuri ari aghago irambi-nu urota viteravore.  
\v 9 Anada bee mo, nímanda asisi jejebugea tumanadu irari-du rea, nímane Iesu gaabee egeguturera-da bee aná rururota viteravore.   
\p
\v 10-11 Atá, fefera nanjigo aghade emboro daiyagha ea utota bubugaita rosora-nu, feroveta manemi gia tanana egegaita nundubuturota, uriga ea ningia egegutueta, Keriso da Asisimi númanda neno rova buro ueta, God emboro daiyaghava jebuga utaita rouvia, kotú Keriso furá mema tafirota, ambua, rekago amburarivareta jebugea duroghagha eraita rouvia-nu tanana ea, minono regeguturota, gegembuguturie.  
\v 12 God na urieta, feroveta maneda tanana egeguturia mo, jo nendufa númanda taubanadu buro urota, minono regegambi re. Aná mo, nímane daiyagha ea jebuga tatambugasira-du minono rirota gegembuguturie. Anada ambova God unda Asisi Kakara ninenguturieta vorea furia, God da Gaga Taubanada aghi kakatodu ano ututurieta aria, nímandava aná feroveta maneda sei gegembuguturia gaganu minono regeguturieta niningigutureravore. Atá, anera mane aná gaga rera ningia, tanana egegaita uno eta rousue.   
\s1 1:13-25 Namonde Amó Aito Taubana Fugiturota, God Da Natofo Kakarago Egegore!  
\p
\v 13 Aghá-gea, nundubea goghó urota, dibe fangea, Iesu Keriso kaverea furarida rifo furá, isagha aita rouvia aghade, God unda ea simbugari nímandu utota bubugaita rosora-nu neno dano ititurota, kaifa gigita urota iririgadi rere!  
\v 14 Nímane sei nundubambi irirota, tamo firída uno egeguturota, bingoiva fufugegea vitaravore. Oreki, mania aghagonu egegata! God da unonu urota iririgadi rere!  
\v 15 Anada bee mo, God nímane aghi uria, umó aná Kakara bee re. Amindu nímane beago aghagonu egeguturota, unda enembo kakarago ea iririgadi rere!  
\v 16 \x - \xo 1:16 \xt Lev 11:44-45; 19:2\x*Anada bee mo, unda gagava eghá gembari vitie, “Amó ari kakarago nuenembo eta rore. Amindu, nímane beago, dabako aghago egegadi rere!”   
\p
\v 17 Nímane benunuva God du “Afa” regegeta rosoravore. Tago, umó enembo dano inonova gia irureta rouvia-du, ená endava jebuga irirota, undú oru egeguturota, kakara urota iririgadi rere.  
\v 18 Anada bee mo, irari sembago mambu bee maneda vareta furia-mi bebeta egeguturera-da dongoro segharida mino aná jojabe beenu, nímane sei tanana egegutureravore. Jo itoko \tl goldi\tl* o \tl siliva\tl* genanje ea betea sidara eta rouvia aghago irambi re.  
\v 19 Anada mino mo, God du ari akokogoda mino ututurota, oka sifi da mendi gari taubana kotú betoda bubugha eini tefo aghago dea buria ivariva dungeta egeguturia aghago, God namonde anda ari akokogo nundubea gia doaita rea, unda mendi Iesu Keriso nu ninenguturieta furia, endava unda tatangu averegea ambubuturie.  
\v 20 Avore, uutu enda sirorambi-da dibeva, Keriso mo, seibe gateguturieta vitirie. Avotago, nímandu rea, reka sirorarigo ea furia, uutu enda banuna aita uua feferava, nímandava isagha urie.  
\v 21 Keriso donu uria-mi, nímane God gaabee egegutureravore. Kotú, God Afa na ririeta, Keriso amburarivareta jebugea unda durogha rururie. Amindu, umó donu utaita riria-nu bubugaita rirota, nímane God gaabee ea, unda sonemba kaifa gigita urota viteravore.   
\p
\v 22 Gaa bee, nímane God da Gaga beenu ambo-ambo egeguturota, nímanda neno roo seghea simbugea, nímane neno dabako urota, nímanda ikoko mendi, ariri gharovu neno bubugeta rosoravore. Avore, neno dano avo ititurota, aghá urota iririgadi rere.   
\p
\v 23 Anada bee mo, God da jebuga bua furia, kotú tumanadu vitia Gaganu, vee aghago, unona nímanda neno rova goviturieta, nímane unda jebuganu bua, unda sasingu ea viteravore. Tago unda Gaga mo, jo ená endava goveaveta beteta rouvia vee aghago irambi re. Tumanadu iraita rouvie.  
\v 24 \x - \xo 1:24 \xt Is 40:6-8\x*Amindu rea, God da gagava eghá reirie,  
\q1 “Enembo nanjogoda gari aná kirisago re. Númanda durogha gari mo, siginago re.  
\q1 Kirisa evia, gharasa eta rouvia o sigina mane fangea jua voraita rouvia aghago,  
\q2 enembo beago, tutomi ambua tamo betea sidara eta rouvie.   
\q1
\v 25 Avotago, God da Gaga jo nanjigo aghade manjambi,  
\q2 tumanadu iraita rouvie.”  
\m Avore, ená Gaga rera mo, God da Gaga Taubana nímandu minono reta uria avore.   
\c 2  
\s1 2:1-10 Avona Iesu Da Ambova Yadua, Umó Jebuga Tambaita Rouvie. Tago Injigha Egegadua Enembo Amburaita Rousue.  
\p
\v 1 Mania inda gavera gagami kokomana kuvirota, ari akokogo auvota! Mania komanadu jii dimbua, tauga kavavana regegata! Sei nímanda ari akokogo egegeta rosora, dodogadi rere.  
\v 2 Soká mane reka fumbarimi emi undaita nundubea sorara egegeta rousua aghagonu, nímane beago, Asisida undari undidigea, jebuga reka tumanadu irarinu bubugaita nundubuturota, inini egegadi rere.  
\v 3  \x - \xo 2:3 \xt Ps 34:8\x*Aghá egegadi rera-da bee mo, nímane seibe Jojabeeda taubana daiyaghago, aná itatama egegutureravore.   
\p
\v 4 Jojabeedava fufugadi rera mo, endava enembomi injigha urota, bee tefo gaa regeguturie. Tago, God undú singoi jebuga irari gaa rirota, aná singoimi unda kamboda roro tutumbu jirari-du nundubea gateguturie.  
\v 5 Amindu fufuge, Asisi Kakarami nímane unda kambo itari singoi jebuga irari aghago bua, aná roro tutumbu kakarada etova itota, nímane jijiregea, fristi* kakarada buro egeguturota, Asisida sonembami, God da uno eta rouvia vesa, utaita rosoravore.  
\v 6  \x - \xo 2:6 \xt Is 28:16\x*God da Gagava eghá reirie,  
\q1 “Gigige! Amó doriri Saion* anava andú tafaroro ari kambo itaita rea, singoi taubana,  
\q2 kotú durogha gari esiko beenu gategea, kamboda roro tutumbu ari-du simbugetore.  
\q1 Enembo avona umó ená singoi rera-nu gaabee egegadua mo,  
\q2 númane jo meka gigigambi aita rousue.”   
\p
\v 7-8  \x - \xo 2:7-8 \xt Ps 118:22; Is 8:14-15\x*Avore, enembo avona Iesu gaabee egegeta rousua-dava, God na gangorode jebugade utota bubugaita rousue. Tago, gaabee ambi enembo God da Gagava kambo itari kakatodu reiria, aghago re: “Singoi eini kambo itari kakatomi injigha ea doa fugituria-nu Jojabee na bua, unda kambo roro tutumbudu itia simbuguturie.” God da Gagava singoida gaga aghago eini vitie, “Aná singoi mo, enemboda ekava dimbota juraita baĩ-baĩ rousue. Kotú ekava data jujugaita rousue.” God númane aghá egagari-du emboro simbuguturia-da bee mo, númane unda gaga ningari injigha egeguturie.   
\p
\v 9  \x - \xo 2:9 \xt Ex 19:5-6; Is 43:20; \xt Ex 19:5; Deut 4:20; 7:6; 14:2; Tai 2:14; \xt Is 43:21; \xt Is 9:2\x*Avotago, nímane sei bingoiva vitirera enembonu, God na gategea bua, unda donu ririeta siroruturia-du raga radi rea, unda natofo kakara egegea, kotú Kini da fristi mane aghago egegadi rea, nímane unda tofo bua, unda unana jojabeva ititurie.   
\q1
\v 10  \x - \xo 2:10 \xt Hos 2:23\x*Sei nímane jo unda natofo irambi re.  
\q2 Tago, oreki nímane unda natofo ea viteravore.  
\q1 Sei God jo nímandu neno mema ata, itatama ambi ureravore.  
\q1 Oreki umó nímandu neno mema rouvia, aná itatama urota viteravore.   
\s1 2:11-17 Namonde Endava Irirota, Aito Fugari Eghago Mane Egegore!  
\p
\v 11 Ariee, anda neno buta rora ikoko mendi, ariri gharovu, endava irirota, aná esega enembo aghago vitera-du rere. Mania tamo firída unonu ambo-ambo egegata! Anada bee mo, firída unomi inda asisida jebugagha mene-mene eta rouvie.  
\v 12 Nímane God gaabee ambi enemboda rova irirota, yavi taubana esiko-esiko egegadi rere. Aghá egegutu-gea, gaabee ambi enembo nímanda tamova gaga raita simbugadua mo, nímanda yavi taubana gigiguturota, God da kaverea furari rifova undú raga regegaita rousue.   
\p
\v 13-14 Namonde anda Jojabee Iesu Rom enemboda kotofu iti beevada gagadu jo besiga ambi eta uria aghago, nímane beago, aghago egegadi rere. Rom enemboda kotofuko, unda gavana nanjogo unda tuva buro egegeta rousua-mi, ari akokogo egegeta rousua enemboda darada mino utari-du rirota, ari taubana enembodu raga rari-du rea, ririeta jiria vitie. Aghá-gea, gavana nanjogo ijokovareta iya jojabeva vitia-da gaga ningia ambo-ambo egegadi rere.  
\v 15 Anada bee mo, God da uno mo, beforo dinunu enembo nundubambi gaga sembago nímanda tamova reta rousua-nu, nímanda irari taubanami data, manjea sidara ae!  
\v 16 Nímane reisi-geroravore, nímane jo enemboda rari ningari irambi re. Avotago, mania tefo neno irari gaa rirota, ari akokogo nungarimi egegata! Anada bee mo, nímane God da sabua* ea viteravore. Amindu, God da uno egeguturota iririge!  
\v 17 Enembo nanjogodu verua egeguturota, nímanda ikoko mendi, ariri gharovu mino-mino neno rururota iririge! Aghade God du oru egeguturota, Rom enemboda kotofuko kakara egege!   
\s1 2:18-25 Namonde Amó, Keriso Da Daiyagha Mema Itatama Uria, Aghagonu Egegasire.  
\p
\v 18 Sabua* kakato nímanda babarigaridu kakara egeguturota, donu ari-du regegadua, ningia aghago egege! Mania nímanda babarigari taubana mane nuenembodu kakara egegata! Tago, nímane dibe beva regegeta rousua babarigari beago, kakara egege!  
\v 19 Nímane God da uno retora-nu urota, buro taubana egeguturota, nímanda babarigarimi bee tefo neno akuago ea, nímane dedegadua, o mema utadua mo, God na nímane amindu ea simbugaita rouvie.  
\v 20 Atá, nímane dinunu egegadua-du dedegota, mema itatama egeguturadua, God jo nímandu gangoro ambi aita rouvie. Tago, nímane aito taubana fufugeguturota, nímane bee tefo dedegota, mema itatama egegadora mo, God nímane ea simbugaita rouvie.  
\v 21 God nímane aghá egegari-du aghi urie. Nímane reisi-geroravore, Keriso ari dabako aghagonu urota, nímandu irugari taubana ututurota durumuguturota, mema itatama urie. Amindu nímane beago, aghá egegasiravore.  
\v 22  \x - \xo 2:22 \xt Is 53:9\x*Umó ari akuago eini jo ambi re. Kotú unda beeva gavera eini jo sirorota ningambi re.  
\v 23  \x - \xo 2:23 \xt Is 53:7\x*Undú tauga kavavana riria enembodu, umó mino jo rambi re. Aghagonu, undú mema ututuria enembodu beago, umó mino utari gaa eini jo rambi re. Iesu undú ari akokogo egeguturia enembo dano, God na gaa beedu nuenembo irureta rouvia-da ingova itia dotuturie.  
\v 24  \x - \xo 2:24 \xt Is 53:5-6\x*Keriso namonde anda ari akokoda bouvu unona bua aria, ifatarava ambubuturia-mi, ari akokogoda ano namonde andava sidara urie. Unda tamova beto siroruturia-mi nímane jebuga tatambugutureravore. Amindu namonde ari taubana egeguturota, iririgasire.  
\v 25 Sei nímane oka sifi emboro kasovigea kasava susumbuguturia aghago vitireravore. Avotago, oreki nímane kaverea nímanda asisida kaifa tavo katodava bubera-du, nímane bua kaifa ueta viteravore.   
\c 3  
\s1 3:1-7 Evetu Embóghada Gaga Re.  
\p
\v 1  \x - \xo 3:1 \xt Efe 5:22; Kol 3:18\x*Gavanada gaga ningari-du retora aghagonu, evevetu nímanda emboboda gaga niningige! Aghá egeguturadi-gea, nímanda embobo, God da gaga gaabee ambi egegeta rousua, nímanda irari taubana egegeta rosora-mi eto-bato númane nghaĩ itarigo ata-gea, númane neno kaveraita rousua-jogo.  
\v 2 Anada bee mo, nímanena irari taubana, kotú kakara egeguturadi-gea, nímanda embobo God gaabee egegaita rousue.  
\v 3  \x - \xo 3:3 \xt 1 Ti 2:9\x*Nimane, mania enembomi nímane tatasegea gari-du rea, fouma ga guri asugea, eembo boo taubana mane evivigata!  
\v 4 Tamoda gari isagha kena mania nundubata! Inda goghó mo, neno roode asiside ea simbugea, gaga roboghami raride, durumugea irarideda aito fugiturota, tumanadu aghá urota, iradi rere! Aito aghá fugiturota, imó God da uno beenu urota, iraita roravore.  
\v 5 Nímane reisi-geroravore, seibe sei evevetu God gaabee egegeta uria-mi numu mane gangoro egegari-du rirota, númanda neno roo simbugea, númanda emboboda gaga niningigeta urie.  
\v 6  \x - \xo 3:6 \xt Gen 18:12\x*Abraham da evetu Sara nu nundubea gigige! Unda embó du “Jojabee” rirota, kakara urota, unda gaga ningia ambo-ambo eta urie. Avore, jo oru ambi ari taubana urota, iririgadora mo, nímane beago, Sara da arikoko aghago iririgaita rosoravore.   
\p
\v 7  \x - \xo 3:7 \xt Efe 5:25; Kol 3:19\x*Dabako aghago, embobodu rere, niningige! Nímanda evevetu kakara egeguturota, sonembe! Númanda ano jo nímandago irambi re. Tago, númane namonde amó dano God da vesa, unda jebuga tumanadu irarinu bubugaita rosore. Aghá egegutu-gea, nímanda benunu dii ae.   
\s1 3:8-22 Avona Nímandu Ari Akokogo Egeguturadua-du Mania Neno Akuago Egeguturota, Mino Egegata!  
\p
\v 8 Anda banuna gagava, amó nímandu eghá rere. Nímane neno barimi bego amboda irari aghago iririgadi rere! Nímandava bouvu siroradua mo, mino-mino sonembuturota durumugea iririge!  
\v 9 Enembo dumeni nímandu ari akokogo adua, aĩ, tauga kavavana radua, avore, númandava mania mino egegata! Númanenu ea simbugadi rere. Anada bee mo, nímane unda ea simbugari bubugadi rea, God na nímanda kokomananu ea simbugadi ghogho ririe.  
\v 10  \x - \xo 3:10 \xt Ps 34:12-16\x*Amindu, God da Gagava eghá reirie,  
\q1 “Nímane avona irari taubana gangorogha iraita uno egegadora mo,  
\q2 nímanda aveva kaifa egeguturota, gaga akokogo nímanda beemi rambi,  
\q1 kotú gavera rirota, enembo kuvia gegha rambi egegadi rere.”   
\q1
\v 11 Nimane avona aghá egegadora-mi, ari akokogo da emboro serigea,  
\q2 ari bari taubana egeguturota, inini ea, siriri arida emboro tava ea tambua, ananu ambo-ambo egegadi rere.   
\q1
\v 12 “Anada bee mo, Jojabee irari taubana enembo kaifa gangada urota,  
\q2 tumanadu nghaĩ javea, númanda benunu ningita rouvie.  
\q1 Avotago, ari akokogo enembodu ambo foteta rouvie.”   
\p
\v 13 Avore, nímane ari-bari taubana egeguturadua, nímandava avona ari akuago eini jo ambi aita rouvia-jogo.  
\v 14  \x - \xo 3:14 \xt Mat 5:10; Is 8:12-13\x*Avotago, nímanda ari-bari taubana egegeta rosora-du avona nímandu dara adua, o mema utadua mo, mania oru o neno mema egegata! Anada bee mo, God nímane ea simbugaita rouvie.  
\v 15 Amindu, nímanda neno roo dano Keriso dava ututurota, umó nímanda Jojabeenu nundubuturota, umonu kakara egegadi rere. Aghá urota, avona nímandava uriga adua mo, God donu nímandu utaita riria-nu kaifa gigita eta rosora-da beenu númandava isuri egegadi rere!  
\v 16 Avotago, aná uriga rousua enembonu, kakara urota roboghomi mino regege! Nímanda neno roo simbugea, ari akokogoda emboro doa serigadi rere. Anada bee mo, nímane Keriso da ambo-ambo urota, ari-bari taubana egegeta rosora-nu gerurota, enembo dumeni nímanda tamova gaa regegeta rousua-mi meka gigigaita rousue.  
\v 17 Atá, God da unova, nímane ari bari taubana egeguturota, nímane bee tefo dedegota mema itatama egegadora, nímane God da dibeva ari akuago eini jo ambi egegaita rosoravore. Tago, nímane God ambo-ambo ari gaa rirota, yavi akokogo egeguturadora-du, nímane dedegota mema itatama egegadora mo, nímane God da dibeva beago ari akuago egegaita rosoravore.   
\p
\v 18 Nímane reisi-geroravore, Iesu dava akuago eini tefo re. Namonde amó aná ari akokogo enembo re. Avotago, Iesu namonde amó bua, God dava utaita rea, namonde anda ari akokogodu fefera dabako ambua, kotú amburarivareta jebugea erorurie. Unda tamo ambubuturie-tago God da Asisida anomi jebuguturie.  
\v 19 Umó jebugea, God da Asisida anomi aria amburari enemboda bunditurieta vitia asisi manedava bubua, minono ririe.  
\v 20  \x - \xo 3:20 \xt Gen 6:1—7:24\x*Amburari enemboda asisi rera mo, Noa da feferava God da Gaga ningia, gaabee egegambi uria, enemboda asisidu rere. Noa unda gha ititueta, God enembo neno kaverari-du durumugea kaifa ueta, ea sidara urieta, uvu gau urieta, enembo 8 nuenembo ghaa* rova fẽ urota jejebuguturie.  
\v 21-22 Aná uvumi jejebuguturia mo, namonde amó bafutaito ea jebugeta rosora-da isuri ari eini re. Bafutaito egegeta rosora, jo tamo dongoro seghaita rea, ambi re. Anami God namonde anda ari akokoda bouvu Iesu Keriso da amburarivareta jebugea eroruria-da anomi nundubea gia doari-du benunu reta rosore. Kotú Keriso umó, uutuva God Afada ingo bee kena asumbea irieta, anera manede kokotofude kotú uutuva babarigari nanjogode umó tumogha baĩ rousue.   
\c 4  
\s1 4:1-6 Namonde Anda Aito Fugari Sei Doa, Aito Fugari Taubana Urota Iririgore!  
\p
\v 1 Iesu endava irirota, mema itatama urie. Nímane beago, unda nundubeta uria aghagonu urota, ano ea jijiregadi rere! Anada bee mo, enembo avona endava irirota, mema itatama adua mo, ari akokogoda ano númandava sidara aita rouvie.  
\v 2 Amindu, nímane beago, enda etova irirota, tamo firída uno bureguturota, God da unonu ambo-ambo urota iririge!  
\v 3 Gigige! Nímane seibe fefera yafabe God gaabee ambi enemboda irarinu egeguturota, ari akokogo egegea, viro isaghava-isaghava ea, eini-eini muu undia, beforo biruru ata tefo-tafo aita rirota, uvu fakara undia, viro kombo egeguturota, kotú aito fugari obero tugarigonu egeguturota, nímanda ingomi uubu ari god gaabee egegeta ureravore.  
\v 4 Nímane aná irari akokogo doa, irari taubana rosora-du, God gaabee ambi egegeta rousua enembomi, nímanda irari reka gia duduku egegea, nímandu tauga kavavana rirota, kuvia gegha regegeta rousue.  
\v 5 Avotago, God na jebuga vitia enembode, amburari enembode dano iruraita rouvia feferava aná enembonu iruraita simbugea vitie. Aghá-gea, irurari feferava, aná enembo rera, unda dibeva jijiregea, eini-eini dano karigaita rousue.  
\v 6 Aghá-gea, umó seibe God da Gaga Taubana amburari enembodu minono ririe. Anada bee mo, enembo dano ambuta rousua aghago, númane beago ambubuguturie-tago, oreki númanda asisi jebugea God de dano vitie.   
\s1 4:7-11 Namonde Anda God Da Ano Kotú Unda Vesa Rei-Ututua-nu Bubuguturota, Mino-mino Sonembuturota, Unda Buro Egegore!  
\p
\v 7 Endava eini-eini nanjogo etia, banuna aita rouvie. Amindu, nímanda benunu dii ari-du rea, ari akokogo egegareta, dibe fangadi rere!  
\v 8  \x - \xo 4:8 \xt Prov 10:12\x*Aito fugari nanjogoda itiva, aná evere: mino-mino neno bua goghó urota iririge! Neno bubugeta rosora-mi, aná ari akokogoda memade bouvude nanjogo seghota, sidara aita rouvie.  
\v 9 Nímanda ikoko mendi, ariri gharovu, esega furadua mo, minoinja gaa mania regegata! Neno gangorogha ghaito teno fugea númane bua, kaifa ea goghó egege!  
\v 10 God unda buro egegadi rirota, ano dibe eini be eini nímane enembo daba-dabadava ututa rouvia-nu bua, kokomanade mino-mino sonembuturota iririge!  
\v 11 Avore, imó minono raita adora mo, God da minono rari-da ano ututa rouvia-mi radi rere. Aghagonu, avona enembo sonembadua mo, God enembo sonembarida ano ututa rouvia-mi enembo sonembadi rere. Nímane aghá egeguturota, Iesu Keriso da sonembava eini-eini nanjogo egegeta rosora-mi, God da anode duroghadedu tumanadu raga rirota, iririgaita rosoravore! Aĩ gaa bee re!   
\s1 4:12-19 Kerisoda Ragarova Mema Bouvu Itatama Urota, Mana-mana Auve-degea Riria Re!  
\p
\v 12 Anda ikoko mendi, ariri gharovu, nímane God da natofo ea irirota, bouvu o mema itatama egeguturota mo, mania mana-mana egeguturota, “Ená doreta rei-sirorutu?” regegata!  
\v 13 Gangoro egegadi rere! Anada bee mo, nímane Keriso da mema itatama uria aghago, eta rosora-du, unda durogha furá isagha aita rouvia feferava, nímane gangoro jojabe egegaita rosoravore.   
\p
\v 14 Keriso ambo-ambo egeguturota, avona nímane kuvia gegha radua mo, nímane gangoro egegasiravore! Nímane aghá egegasira-da bee mo, God unda Asisi duroghagha seibe nímandava asugea irieta, itatama urota, nímane aghá egegeta rousue.  
\v 15 Tago, mema itatama ari retora, amó jo ari akokogo egegasueta, mema itatama egegasira-du rambi re. Jo bagia ari, o enembo data amburari, o kotú beforomi-beforomi rari urota, mema itatama egegasira-du rambi re.  
\v 16 Tago, nímane Iesu da natofo ea irirota, mema itatama egegadora mo, mania anadu meka egegata! Keriso da ragarova mema itatama eta rosora-du, God du “aiye” regege!  
\v 17 Enembo irurari rifo etia bubieta, God unda natofo namonde andava tutuno ea iruraita rouvie. Tago, namonde andava tutuno ea iruradua mo, unda Gaga Taubana ningambi egegeta rousua enembo irururota, daiyagha egegadu?  
\v 18  \x - \xo 4:18 \xt Prov 11:31\x*Amindu, God da Gagava eghá reirie.  
\q1 “God da jebuga bari, ana fakarabe re.  
\q2 Ari taubana eta rousua enembomi bari, aná fakara re.  
\q1 Aghá-gea, God gaabee ambi enembo mo, daiyagha egegadu?”   
\p
\v 19 Amindu rere, God da unova nímane bouvu kotú mema itatama urota mo, ari taubana egeguturota, nímanda asiside tamode dano, God uutu enda uubu uria-da ingova ututuge! Unda be gajiturota, donu aita riria-nu dano ata, bee siroraita rouvie.   
\c 5  
\s1 5:1-11 Pita Na Ekaresiada Beforo Ririkigaride Mendi Rekadedu Nghaĩ Itituria Re.  
\p
\v 1 Avore, nímane ekaresiada* beforo ririkigaridu rereta niningige! Amó beago ekaresiada beforo righari eini re. Iesu mema tafieta, amó gerurere. Kotú umó kaverea, unda duroghade furaita rouvia aghade, amó beago, unda durogha rova iraita rore. Amindu anda gaga niningigadi rere!  
\v 2  \x - \xo 5:2 \xt Jon 21:15-17\x*God unda sifi nímanena kaifa egegadi rea ututuria-nu, kaifa ea goghó egegadi rere. Mania guri baita nundubuturota kaifa ambi egegata! Tago, neno gangorogha kotú enembo sonembaita rirota, kaifa egegadi rere!  
\v 3 Mania “Amó barirari eini” gaa rirota, bouvu ututugata! Kotú, ekaresia ari-bari taubana arida emboro tanana egegari-du rea, beforo isagha arida aito fugiturota, kaifa egege!  
\v 4 Aghá egegadora mo, namonde anda sifi kaifa kakatoda beforo righari bee bubadua, nímanda buroda mino duroghade eto-bato dibeva itari nanamugonu utota asugaita rosoravore. Aná nanamu rera-da unana jo nanjigo aghade gotambi aita rouvie.   
\p
\v 5  \x - \xo 5:5 \xt Prov 3:34\x*Nímane mendi reka beago, niningige! Nímane ari dabako aghagonu urota, ekaresiada beforo ririkigarida gaganu niningigadi rere. Kotú nímane dano niningigadi rere. Nímanda uno doa, kokomana sonembea, númanda unonu urota iririge! Anada bee mo, God da Gaga bukava eghá gembari vitie,  
\q1 “God na gogore kakato buregeta rouvie-tago, unda sonemba, aná durumugea irari enembodu ututa rouvie.”   
\m
\v 6  \x - \xo 5:6 \xt Mat 23:12; Luk 14:11; 18:14\x*Amindu, nendufako durumugea, God da anoda tuva iririgutu-gea, unona unda gategaita rouvia feferava, nímane righota ereregaita rosoravore.  
\v 7 Nímanda mema dano undava regegutu-gea, unona bae! Anada bee mo, unona nímane kaifa urota sonembaita rei-nundubutue.   
\p
\v 8 Dibe fangea, nendufa kaifa egege! Anada bee mo, oka \tl laioni\tl* baimana itatama urota, neno gangaragha jireta rouvia aghago, nímanda gitofo Satan na, enembo nandaita rea, goroto tava urota vitie.\fig |src="112 Lion_HK00046B_scp.jpg" size="col" loc="5:8" ref="1 Pita 5:8" \fig*  
\v 9 God nu ininigha gaabee egeguturota, Satan buregadi rere! Anada bee mo, ená endava nímanda kokomana kambesi dumeniva vitia beago, mema bouvu nímanda itatama rosora dabako aghagonu, itatama egegeta rousue.   
\p
\v 10 Avotago, fefera tufoko mema itatama egegadi-gea, God sonembarida ruru, nímane Keriso de takembea unda durogha tumanadu irarinu bubugadi rea, aghi uria-mi, nímane irari memagha vitia-nu righota, taubana aita rouvie. Aghade, umó ata, nímane ano ea, jirari inono urota, jo jurambi egegaita rosoravore.  
\v 11 Unda ano tumanadu iraita rouvia-du raga regegore! Ai gaa bee re.   
\s1 5:12-14 Pita Unda Gaga Gajiturota, Enembo Ghanena Uria Re.  
\p
\v 12  \x - \xo 5:12 \xt Eka 15:22, 40\x*Amó Sailas na sonembutueta ená ingiso rei-gefere. Sailas umó namonde anda gaabee ari komana eini re, kotú donu aita rari-nu ea goghó eta rouvie. Amó ená neno evurari gaga tufoko nímandu gembera-da rova God unda sonemba daiyagha ututa rouvia-nu isuri etore. Anada rova jiria goghó egegadi rere!  
\v 13  \x - \xo 5:13 \xt Eka 12:12, 25; 13:13; 15:37-39; Kol 4:10; Flm 1:24\x*God da gateguturieta eve Babilon vitia ikoko mendi, ariri gharovumi, nímane ghanena rousue. Eto-bato God na nímane gateguturia, aghagonu númane gateguturieta, unda natofo ea vitie. Anda mendi Mak beago, nímane ghanena rouvieta, yata bua gigige!  
\v 14 Nímanda ikoko mendi, ariri gharovu ghanena urota mo, gangorogha “Oro kaiva” regeguturota, neno bua goghó egege!\f + \fr 5:14 \ft Pita, númane mino-mino ghanena egegari-du riria mo, muno kakara urota, ghanena egegari-du ririe. Fefera anava númanda egeguturia-da kiki mo, komana ghanena urota, nandia muno egegeta urie.\f*  
\p Siriri ari nímane avona Keriso da natofo ea vitera-dava iroe! Avore, anda gagada tano evere.  
\pmc Amó Pita re.