\id EPH NT0016.EP BINUMARIEN NT OATRIDGE DP TRF 17-JUL-85; 13-April-2016 
\h EEFEESUSA 
\toc1 EEFEESUSA  Eefeesusa maqusanaasa Pauroofa akara rumannimaqoo ufafa. 
\toc2 EEFEESUSA 
\mt1 EEFEESUSA  
\mt2 Eefeesusa maqusanaasa Pauroofa akara rumannimaqoo ufafa.  
\c 1  
\p
\v 1 Qinee Pauroosa Anutuna iriranannai asauku mundirana Yisunaindi maridaqa, mifa diqiqoo fasiqausa maridaqa. Anutuna maqasaa fasiqa anaasee Eefeesusa maqusai mariasa asauku mundirana Yisuna ufamau andeeqasee maqee maqee fimariasa inni maa akarana rumannimaqaidaqa.   
\p
\v 2 Maasa qikoofa Anutufa faqa maasa karaambaiqa asauku mundirafa Yisufa faqa narí afaarirana faqa narí asooarana faqa inni nimiani.   
\s1 Pauroofa asauku mundiranaki mariasa innaarunai amiqi amiqirana mararufa.  
\p
\v 3 Maasa dufi dufi qirana maasa qikoona Anutuna faqa maasa karaambaiqa Yisuna faqa nimiaqa. Maasa asauku mundiranaki keeqafufanoo mina akoofa Anutufa amiqi amiqirana maasa Yisuna namufaqa qiminau. Mifa innaarunaindaraa amiqira dadaaqirana qimaqaifanoo miqoo innaarunai maridanoo, minara maasa dufi dufi qimamaqaidaqa.  
\v 4 Ooqai maa maqa maaqana sia auqu kamuqoo faiqí faqa sia maru kamuqoo Anutufa moomoosa kambiaqa marifandinausa kinaana maasa rusandeesamumandee marararee qimaqoosa maraqaisa maridaqa. Narí asauku mundirana Yisunannai maasa maraqoosa sia aaqarausa mariaqeera noori kandamasee andeeqarausa mariaqee qimasee maasa rusandeesamumasee maraqoosa maridaqa.  
\v 5 Sia faiqí maru kamuqoo Anutufa narí aidiranannai maasara maaqimminau, qeeqa qisauku mundiranannai misa qini faiqi namu qiraamuqmaakai kammambifaqa qeeqa unnannai misa mara quqaanauree qinau. Anutuna aidirafa fuaninnana miqiminoo maridanoo.  
\v 6 Anutufa narí kaaqa qara areenara afaarirana narí amuqusira amaaku kaqi nimimari ainainnara foora kaqi niminau. Minara maasa qimuqusa ookiqari idaaqira ainaina uqannee qiaqeera kaqi niminau.   
\p
\v 7 Anutufa narí asauku mundirana kuqiranannai maasa mandainainakinaana idukuqiseenoo maasa mandoosana akiaqara minniqisainaqa marianaura. Maasa minara irisee Anutuna firaa afaariranara akooqoo uqanna marifaqa qafamasee irisee naqimasee maraanauree minara rufiaida furufaridaqa.  
\v 8-9 Anutufa narí irirana firaana faqa qafeemariana faqa maraseenoo minannai ooqai marararee qimaqoona maraseenoo narí kukeeqara irirana asauku mundiranannai aiqama qimaqoo ainaina anoonaikianifeera qimasee mina maa kamuqoo kooroomasee narí faiqi namu araamuqmmaakai kiranara maasa qimaqiminau.  
\v 10 Anutufa narí kai irinoo andeeqara aukuanee qimasee narí ooqai kambiqaaninna ainainara qimarufa taikaannoo minara qimarufa maaqimmiannoo Anutufa aiqama ainainna auquqoo ainainafa innaarunai mari ainaina faqa maaqoo mari ainaina faqa oonu maree ani mareeqeenoo moodaanaki quqaseenoo asauku mundirafa misa nikiaqasaa mariannoo.   
\p
\v 11 Anutufa mi aiqama ainainna narí ooqai fuanee qimaqoomau fidanoo miqidanoo. Anutufa narí ooqai fuanee qimaqoomau fidanoo maasa narí aiku asauku mariaqee qimasee faiqí aanaaseeki rusandeesamumandee maasa maranau. Sia kaqi miqinau, asauku mundiranannai kai mina aiku asauku mariafanausa maridaqa. Ooqai indaaru oosana aroo aukuanna mi irirana maraqoomau fidanoo asauku mundiranannai maasa maraidanoo.  
\v 12 Maasa asauku mundirana irirana naaree indaaru irisee minara afeesimariasa maasa Anutuna kaaqa areenaranara dufi dufi qidaqa.   
\p
\v 13 Innee Eefeesusa maqannaasa faqa miqikai iqa mariafanoo. Amiqira fasaasa ufa innaaruna asumu marirana nimi maria ufana innee iriseeqa kuqaa anoonufee qufanoo Anutufa narí naaquqara maraquna nimiani qimasoofa inni niminoo minannai nariara utaaqanau.  
\v 14 Anutuna maraquna nimirafa Anutufa innaarunai qimianinna ainainnara qima afeekaikamma utaaqamaqoofa maridanoo, mifa Anutufa kuqaa mandainaina akiaqara rumbaranakinaana idukirana qimiannoo fee qimarifa maridanoo, maasa minara irisee Anutuna kuqaa areenaranara dufi dufi qidaqa.   
\s1 Pauroofa Eefeesusa maqannaasara innaaru qidanoo.  
\p
\v 15-16 Qinee Pauroosa minara iriseeqa innee Eefeesusa maqannaasa Karaambaiqa Yisuna saqarikiranara irisee faiqí aanaaseera Anutuna ufa irimariasara ridaqa dadaaqidaqa minara iriseeqa iriafannaqooqari qinee Pauroosa inniara Anutufinnai dufi dufi qidaqa. Qinee maqee maqee inniara innaaru qidaqa, maasa karaambaiqa asauku mundirana Yisuna kaaqa areenarana akoofa  
\v 17 Anutufa narí maraquna inni niminanoo mifa irirana faqa Anutuna oosana faqa kooroomannimaqainaqa innee minara iriaqeera innaaru qidaqa.   
\p
\v 18 Anutufa inni naaramasee narí areenaranara afeesiaqee qimarianara innee iriaqee qimasee inniara innaaru qimasaanaqa inni nifu nitikura quandasainaqa areenarana nimianinnanara afeesiaqeera innaaru qidaqa. Naaquqara amiqi amiqirafa idaaqirafa moomoo uqanna narí maqasaa fasiqa anaasee innaarunai nimirara qima afeekaikidanoo nimiannoo minauqara faqa inniara iriaqeera innaaru qidaqa.  
\v 19-20 Maasaki mina ufasaa irirana rusimariaqooqari Anutuna afeeka fannoo maasaki ainaini marinara faqa innee iriaqeera qinee Pauroosa inniara innaaru qidaqa. Anutufa asauku mundirana kuqiranakinaana uqeerasee innaarunai narí aaqa narí asauku uqannai ooqumaruqoo firaa afeeka faqa maasaki ainainimarifa faqa amana amana kai moodaa firaa afeeka maridanoo.   
\p
\v 21 Miqoo innaarunai asauku mundirafa aiqama ainainasaa uriqaramafi rakisidanoo, aiqama innaarunai uriqararausa faqa faiqí firaasa faqa afeekafaqaasa faqa karaambaiqauqa faqa misauqa faqa urinaaqaramafi rakisidanoo. Mifa aiqama afeeka nuqu faqaasa maa maqa maaqanaki mariasa faqa innaarunai mariasa faqa urinaaqaramafi rakisidanoo.  
\v 22 Anutufa aiqama ainaina mareeqeenoo asauku mundirana aramandunnai quqaseenoo mina mareeqeenoo Yisuna ufara suqimariasa nikiaqasaa quqasaifanoo aiqama ainaina uriqarara karaambaiqa maridanoo.  
\v 23 Yisuna ufara suqimariasa Yisuna adakara foora maridaqa, aiqamai mariainainafa qumbiqeemarifa narí adakaki Yisuna ufara suqimariasaki firaaqoo maridanoo.   
\c 2  
\s1 Ooqai kuqiranaki ubeekoofaqa maqee asumu mariranaki ubeekaqa maridaqa.  
\p
\v 1-2 Qinee Pauroosa sia Yuda maqannaara qidaqa innee aanaamuru mariasara qidaqa, ooqai inniqa ufa rukiarana faqa aaqarana faqa miqiunna akiaqara kuqiranaki mariusa mariqau, mi aukuanna maa maqa maaqana mandoosanamau kai fimariqau. Anutuna ufa rukiee mariasa maqee rakisi mari afaannafa Anutuna innaaruna meerai marifanoo mina ameemaanai marina, mina ufara eedoo kai qimarusa mariqau.  
\v 3 Maasa faqa aiqamausa aanaamuru Anutuna ufa rukiee mariasa naanna ramasee maasa qeeqa faiqí faiqi mandiriranamau fidaqa qeeqa qifaaqa irirana afaariqa kaqi qeeqa manda didiramau kai fiqiafana. Maasa Yuda maqannaasa aanaamuru naanna ramasee qeeqa qifaaqa afaaramasee mina akiaqara Anutuna aranaqaranaki firaridaqa.   
\p
\v 4-5 Anutufa mina qafamaseenoo maasara amuqusirana faqa nifauarafa faqa firaatia marifanoo asauku mundirana saimbaqa maasa faqa kuqiranakinaana uqeera qiseenoo sia moo ainaina, Anutuna afaarirafa kai innaaruna asumu mariranaki quqanniseenoo.  
\v 6 Anutufa maasa asauku mundirana Yisunasaa atooarana qafamaseenoo mina namufaqa kuqiranakinaana uqeeraqiseenoo Yisuna namufaqa Anutuna innaaruna mariasasaa rakisi nimaqaaqee qifaqa miqoo rakisirausaikiqa marianaura.  
\v 7 Sia Anutufa fifau miqinau, narí firaa afaarirana faqa, maasa asauku mundirana Yisunaki keeqarana qafamaseenoo narí firaa aidirana amuqusirana faqa naaru kambiqainausa uqannifiqarara miqinau.  
\v 8 Sia moo ainainannai Anutufa narí afaariranannai kai inni innaarunai asumu mariranaki quqannisaidanoo, innee Yisuna saqarikiranannai afaaramma nimaqaidanoo. Inni asumu nimirafa sia innee andeeqasee fimarianasaafau mundidanoofau, sia innee amiqira oosana marasaida kadaapiridee qimarianasaafau mundidanoofau, Anutuna kaqi nimiranasaa kai innaarunai asumu marirana maasa qimirana uqeereenoo.   
\p
\v 9 Sia maasa qeeqa kadaapiriranannai innaaruna asumu maraanaura minara sia fifau maasa qeeqa qimooqira ufa mariannoo.  
\v 10 Anutufa maasa auqufa maridanoo sia fifau maasa auqinau, maasa asauku mundirana Yisunasaa atooqaranasaaqari andeeqasee nirana marirana mariaqee qimasee maasa auqinau. Doo ooqai mi andeeqara nirana marirana maasara deedaqammaqoofa maridanoo.   
\s1 Yuda maqannaasa faqa aanaamuru faqa asauku mundiranaki moodaanaki maridaqa.  
\p
\v 11 Yuda maqannaasa ooqaindari naríara kai Yuda maqannaasa fainanduqirausa Anutunaindi maridee qimasaida inni aanaamuruara sia maasa fainanduqirausa marunnanara aqoosai mariasa maridee qimariqau. Misa fifau nári fainanduqiranara qidaqa miqi qimariqau. Innee aanaamuru mariasa innee ooqai mariunara iriaqa.  
\v 12 Innee Eefeesusa maqusanaasa asauku mundiranasaaqari naaduma nianasaa mariusa mariafanoo, innee aanaamuru Anutufa maqasaaqaraasaki sia rusandeesamumandee nariara maroosa mariafanoo, aanaamuru nianasaa mariusa mariafanoo. Anutufa Yuda maqannaasa faqa moodaanakikira ufa oosana oosana qima afeekaikiranasaa mundiqa mariusa mariafaqa innee aanaamuru sia minaki marusa naaduma nianasaa marusa mariafanoo. Innee Eefeesusa maqusanaasa maa maqa maaqanaki maridaqa sia Anutunara faqa moo ainainara faqa irimariqau kaqi furufara kaimmiqaniqau, Anutuna siaisa mariqau.   
\p
\v 13 Doo maqee innee asauku mundirana Yisunasaa atooqaana akiaqara inni ooqaindari nianai mariusa maqee Anutufa inni rarisameeqeenoo adeedi quqeenoo, asauku mundirafa aunirira saqarisaa kuqunannai kai miqinoo.  
\v 14 Anaamuru faqa Yuda maqannaasa faqa namuqaara foora niana niana rakee iqa mariaasa asauku mundirafa narí kai mareeqee moodaanaki quqaseenoo asooarana maasa qiminau. Yuda maqannaasa faqa aanaamuru faqa namuqaakiqa marufanoo qambaana faandamura ititanoo maruna asauku mundirafa narí afaaqannai faandaamura rakee mandoofaqa moodaanaki kiqau.  
\v 15 Mooseena sandufakina oosanoosana ainainara nimaarusirana mifa faandaamurara foora Yuda maqannaasa faqa aanaamuru faqa aiqamaqara rakeemaqoofaqa mariqau. Asauku mundirafa doo mina ruka taikasoofaqa mi atiqanda oonu maree ani maree asauku mundirana faqa moodaanaki kiqa asooaranaki maridaqa.   
\p
\v 16 Asauku mundirafa narí aunirira saqarisaa kuqunannai Yuda maqannaa faqa aanaamuru faqa nariara nariara fidiaqaa imaruna aru taikanau, narí aunirira saqarisaa kuqunannai Yuda maqannaa faqa aanaamuru faqa rakimaruna taikaseenoo Yisufa mareeqeenoo mafi moodaanaki quqaseenoo mareeqeenoo Anutuna aanooqirana taikaseenoo narí akoona Anutunaki asooaranaki quqanau.  
\v 17 Miqi marunara asauku mundirafa narí amiqira asooara fasaasa ufa maree qumureenoo innee Anutunasaaqari nianai maria anaamurusa faqa Yuda maqannaa Anutuna aaqa mariasa faqa qimanniminau.  
\v 18 Maasa aiqamaqara Yuda maqannaa faqa aanaamuru faqa asauku mundiranannai kai amana maasa moodaa maraqunaki anireeqa maasa qikoona Anutuna afusaa kikiqianaura.   
\p
\v 19 Ooqai innee moo maqannaara foora aanaamuruara foora mariasa mariafanoo doo maqee sia miqiqa mariafanoo innee doo maqee Anutuna aiku asauku mariasa Yuda maqannaasaki moodaa maqannaa kammambi innee mariafanoo.  
\v 20 Doo maqee sia Yuda maqannaa kai, innee faqa maaqara foora usakafifanoo asauku mundirafa Yisufa narí uqanna faakana miqirafa marinanoo Yisufa niqiqoo fasiqausa faqa Anutuna tamummaqara fasiqauqa faqa maaqa atunara foora marifanoo innee faqa maaqa asaanara foora misasaa faqa Yisunasaa faqa atukaramambiqa mariafanoo.  
\v 21 Yisufa uqanna faakanara foora maridanoo aiqama maaqa asaana afapita qumarasaifaqa afeekaikiqa mariafanoo karaambaiqa naaquqara amaana maqara foora usakaidanoo fimaree aimaree innooqaidanoo.  
\v 22 Innee aanaamuru asauku mundirana saqariki mariasa faqa aiqamausa Yisunaki mariasa faqa Anutufa inni qumareeqeenoo maaqara foora usakaseenoo narí maraqunannai mi maqanaki inniki mari maqafa maridanoo.   
\c 3  
\s1 Pauroofa narí aanaamuruki saikiranara qidanoo.  
\p
\v 1 Qinee Pauroosa minara iriseeqa inni Eefeesusa maqannara Anutufinnai innaaru qidaqa. Qinee inni aanaamuruara qimannimunnana akiaqara asauku mundirana Yisuna rumbaranara foora Roomma maqannaasa rumbaranaki marunausa maridaqa inniara innaaru qidaqa.  
\v 2 Anutufa narí afaariranannai inni aanaamuru dadaaqiaqee qimasee qimunara innee amiqimmandee minara irimariafanoo.  
\v 3-4 Anutufa Yisunara ooqaindari kukeeqanoo marunara maqee aukuana qini kooroomaqimaqeenoo. Qinee maa pasanaki kaqikaaqoo minara inni qimannimiqa, innee mina asaana rumaseeqa iriqa qiniara asauku mundirana kukeeqara irirana amiqimmandee iridanoommifoo qifaranoo.   
\p
\v 5 Ooqai narí kukeeqara irirana Anutufa sia kooroo inau, doo maqee narí maraqunannai amiqira niqiqoo fasiqausa faqa tamummaqara fasiqauqasaa faqa qimanniminoo.  
\v 6 Mina kukeeqara ufa maaqimminoo maridanoo. Yuda maqannaasa Anutuna amiqi amiqiranaki maridaqa, Yisuna amiqira fasaasa ufa fannoo inni aanaamuru faqa oonu mareeqeenoo Yuda maqannaa amiqi amiqiranaki quqannisaidanoo. Innee aanaamuru mariasa maqee Yuda maqannaasa saimbaqa moodaa nifaaqara foora maridaqa asauku mundirana Yisunakiqari Yuda maqannaasa qima afeekaikammaqoofa innee aanaamuru misa saimbaqa minaki marida maree mariafanoo.   
\p
\v 7 Anutufa narí afeekannai naakaparana akoofasaikirana moo qimufaqa qinee minannai Yisuna amiqira fasaasa ufa saikira faiqikiqa maridaqa.  
\v 8 Qinee Anutuna aiku asauku maqasaa fasiqaki oorudupirausa marunanoo Anutufa sia minara irinoo kaqi mi naakaparana qiminoo diqiqamaqimaqeenoo asauku mundirana, innaarunai nimira amiqi amiqira ainaina moomoo ainaina sia amana asaana rirana amana mi ufanara aanaamuru qimannimiranaki qini quqaqisaifaqa maridaqa.  
\v 9 Anutuna ooqai kukeeqara irirafa maqee kooroommasee faiqí anaasee amiqimmandee iriaqeera faqa qini minaki faqa quqaqisaifaqa maridaqa. Anutufa aiqama ainaina auquqoofanoo marufa miqooqari moomoo aukuana narí kukeeqara irirana Yisunara kisaaqasaa rafaaqafuqoofanoo marinau.  
\v 10 Maqee aukuana kooroo ianifeera qimasee Yisuna ufara suqimariasa misannai Anutufa narí irirana quandaqaandidanoo uqannifiqaifaqa qafaidaqa mina amiqi amiqiranara innaarunai ameemaanai mariasa misa uriqararausa faqa rakisirausa faqa maqee uqannifiqaanifeera Yisuna kooroo idanoo.   
\p
\v 11 Anutufa narí naaru naaru mariranaki maridanoo mi ainainna auquanauree qimaqoona maqee auqinau, narí asauku mundirana Yisunannai mi ainainna, narí ufara suqimariasakina narí irirana kooroo ianifeera auqinau.  
\v 12 Maasa Yisunasaa atooaqa marianannai faqa maasa mina saqarikiranannai faqa sia maasa nisaurida rufiaanaura, paasoosamasee Anutuna afusaa fuannanara mi eedoo qirafa maasaindi maridanoo.  
\v 13 Qinee Pauroosa minara irisee inni afeekaikamandaida qimannimidaqa. Qinee Yisuna ufa qimannimunaqa misa minara fifau qini karabusaki quqeeqa. Inni Eefeesusa maqannaasa qinee karabusaki marunna aupuraranara iriseeqa sia Yisuna ufa minniseeqa kudoosaapaaqa, innee minara maaqi qiaqa Pauroona karabusaki marirana maasa Eefeesusa maqusanaasa amiqimaqimaqaidanoo fee qimasee asasiaqa.   
\s1 Innee nariara nariara nimuqusiranaki mariaqeera qidanoo.  
\p
\v 14 Qinee minara iriqa maasa qikoona Anutunara iriseeqa qiqoori saunarafiqa kummara mafi inniara qeeqa qimuqusannoo innaaru qidaqa.  
\v 15 Innaarunai mariasa faqa maqasaa mariasa faqa aiqamatia Anutunasaaqaraana nariqa nuqu uqanna maraidaqa.  
\v 16-18 Mi Anutunara inniara innaaru qidaqa, asauku mundirana innee saqarikiranannai mifa anireenoo inni naunduraki maaqakiara foora ani keeqaanifeera. Mifa narí maraqunannai narí areenarana firaanakiqari inni naunduraki afeeka niminaqa mapukusee mariaqa. Qinee inniara maaqi qidaqa innaaru qidaqa, innee inneeqa atukara foora faqa faakanara foora faqa nariara nariara nimuqusiranaki mapukusaaqa, innee Eefeesusa maqannaasa faqa Anutuna aiku asauku moo maqannaa mariasa saimbaqa afeeka marinaqa minannai asauku mundirana inniara amuqusinoo aidirana firaana iriaqeera innaaru qidaqa. Mifa inniara amuqusinoo aidirana mina kisaaqasaa aidirana faqa mina qusa kamu faqa mina meerai sandaaqaira faqa mina meemai farumara foora marirana faqa mina firaatiara iriaqeera qinee innaaru qidaqa.  
\v 19 Eeoo innee mina inniara amuqusirana firaanara iriaqeera innaaru qidaqa, sia amana moo fannoo firaaqoo iriannoo, firaafa maridanoo, mina amuqusirana firaafa maridanoo, innee mina amuqusirana firaana iriseeqa Anutuna umbiqarafa innikina umbiqaanifeera inniara innaaru qidaqa.   
\p
\v 20 Anutuna afeeka fannoo maasaki saikiranannai naunduraki amiqi amiqirana nimiannoo, mina naunduraki dadaaqirafa maasa sia amana minara iramasee qimiannee qianaura sia amana maasa minara irianaura firaa ainainatia maridanoo.  
\v 21 Yisuna ufara suqimariasa nariqa asauku mundiranasaa atooaranannai Anutuna amooqirafa maqee kamuqoo faqa naaru naaru faqa mariani.   
\c 4  
\s1 Maasa Yisuna adaka atiara foora maridaqa.  
\p
\v 1 Qinee Pauroosa karaambaiqa Yisuna ainaini marunnana akiaqara Roomma maqannaa karabusaki maridaqa. Qinee karabusaki maridaqa inniara afeekaikamandee qimannimidaqa. Anutufa inni naaramasoofaqa innee asauku mundirana saqariki maru kamuqooqari inneeqa nirana mariranara andeeqasee marianifee qimasee inni naarama minaki quqeenoo. Inneeqa marirafa mina amanakai marianifeera qinee qeeqa qimuqusa ookiqari afeekaikamandee qimannimidaqa.   
\p
\v 2 Sia Anutufa quqaqoo andeeqarana minnisee moomau fuaqa, innee maqee maqee sia urinaaqaraaqa oorudupimasee mariaqa, sia aanooiaqa, ireeda kai pisoopisoomandee mariaqa sia faiqí aanaaseera qusa ufa qimasee aanooiaqa kisaaqasaa ireeda kai idaaqammannimaqaaqa. Innee faiqí aanaaseera nimuqusinanoo nidimarinaqa mifa kooroo ianifee qimasee narinni narinni dadaaqifanoo mifa kooroo iani.   
\p
\v 3 Anutuna maraquna fannoo inni moodaanaki mara quqasaifaqa mariafanoo innikina asooarafa inni moodaanaki afapita qumaraifaqa mariafanoo innee mina moodaanaki marirana amiqimasee rakisiaqa, rakee iani.  
\v 4 Maasa Yisuna ufa irimariasa moodaa nifaaqara foora maridaqa, Anutuna maraquna faqa moodaa maridanoo Anutufa moodaa ainainara afeesiranaki inni rarisama quqeenoo.  
\v 5-6 Karaambaiqa moodaa kai maridanoo, Yisuna saqarikirafa moodaa kai maridanoo, amaana nammari moodaa Yisuna auqusaa kai rumannimaqarafa maridanoo maasa aiqama maqa maaqakinaasa nikoofa Anutufa moodaa kai maridanoo, aiqamausa karaambaiqa mifa kai maridanoo mifa narí ufara suqimariasa aiqama naunduraki maridanoo aiqamausakiaqa ainainidanoo.   
\p
\v 7 Asauku mundirafa nimira dadaaqira afeeka maasa aiqamausa qiminau narí moomoo dadaaqiranakinaana qiminau. Moo dadaaqira afeeka moo fasiqa aminau, moo dadaaqira afeeka moo fasiqa anaasee niminau. Nimisoofaqa minannai Yisuna saika maraaqeera niminau.  
\v 8 Ooqeenaa tamummaqara fasiqa asauku mundirafa dadaaqira afeeka qimianinnanara maaqi qimasee akara rinau.  
\q1 Mifa rakira karaambaiqara foora maridanoo namuqaa maqusaki ititasee misa narusee faiqí moomoo karabusa rumbasee misa ainaina faqa indaa mamaree nifiqamaree meerai narí maqusai oorureenoo narí maqannaasa qimannimifaqa mina amooqiafanoo ainaina raina niminau.   
\p
\v 9 Mi tamummaqara fasiqana ufa kooroo irafa Yisunara maaqimminoo maridanoo.  
\v 10 Mifa narí maqusai meerai ooru funara maaqi qidanoo, mifa naaree meemai maqa ameemaanai ooqureenoo miqooqari mifa kai innaaruna maarini aiqama innaaruna maarinni oorureenoo narí marirana narí auqu amana kai marianifeera aiqama atinai narí irirana narí auqu amana kai quqasanau.   
\p
\v 11 Mifa kaqi nimira dadaaqira afeeka faiqí anaasee niminau, mi dadaaqira afeekafa ainainirana akoofasaikiaqee qimasee akaqausee niqiqoo fasiqausa akoofasaikirana niminau, akaqausa faiqí anaasee qimannimirana akoofasaikirana niminau, akaqausa aamina maqannaasa qimannirana akoofasaikirana faqa paatoo saika akoofasaikirana faqa ufasaa rakisirana akoofasaikirana faqa niminau.  
\v 12 Anutufa sia fifaufau mi dadaaqira afeekana niminau, faiqí anaasee Yisuna ufara suqimariasa Yisuna afaaqara foora afeekaikamasee mariaqeera mi dadaaqira afeekana oosana oosana maasa qiminoo qinau, innee maa dadaaqira afeekana marasee minannai qini ufara suqimariasa afeekaikamannisaaqee qinau.  
\v 13 Maasa miqimamaree fidaqa maasa kasooqaqee moodaanaki kianaura. Anutuna amaakuara irirana faqaa irirana minasaa rusirana faqa miqiananannai mi moodaanaki kirafa amana kambiqaannoo, mikari maasa faiqí firaasa iriranara foora maraanauranoo maraseeqa asauku mundirana firaa irirana amana kai ooru mundufuanauranoo.  
\v 14 Mikari maasa sia faiqi aanaaqiara foora aiqama oosana oosana amaana ufa iriseeqa munari minari ianaura unna ufa qimaria fasiqausa nári nikaruqira finnai akaqausa aaqaranaki rarisama quqaidaqa maasa misa ufa iriseeqa sia ufaira foora aiqama saqari udammi udammianaura.  
\v 15 Maasa sia miqiaqa, maaqiaqa, nariara nariara qimudaoo qimasee ridaqa minaki maridaqa nariara nariara sia unnufa qiaqa, anoona ufa kai qidaqa maasa miqianannai faiqi aanaaqiara foora asauku mundirana maasa qikiaqa amanakai innooqamaree ooru mundufuanaura.   
\p
\v 16 Asauku mundirafa narí ufa ameemaanai mariasa rakisimarifaqa misa minara maasa qikiaqa fee qidaqa. Faiqí afaaqa sia moodaa ainaina maridanoo oosana oosana afaaqa ati fannoo aadu aadu ainaina akoofasaikirana moodaanaki ootupamafifanoo moodaa fasiqa maridanoo. Asauku mundirafa maasa qikiaqa marifa maasa rakisimarifaqa maasa faqa miqi kai iqa faiqí afaaqa fooqaana aadu aadu akoofasaikirausa moodaanaki ootupanoo marifaqa maasa qikiaqa Yisunasaa atooaqa maridaqa mina afaaqaikiqa maridaqa. Maasaki aiqamausa naadu naadu nariqa saikirana andeeqasee maridaqa sia nariara nariara nikooqaani nariara nariara rinnanannai moodaanaki innooqafinoo amiqimmandee kambiqafi fuannoo.   
\s1 Asauku mundiranaki mariasa asukunakinaa oosana taikafinanoo kaaqa qarafa aniani.  
\p
\v 17 Miqi marianara qinee Pauroosa Karaambaiqa auqusaa inni qimannimidaqa afeekaikamandee kafaa kafaa qimannimidaqa, sia Anutunara aamina maqannaasa naanna raaqa. Misa irirafa fifau faafaumminoo maridanoo. Innee andeeqasee mariaqa.  
\v 18 Misa nitikurakinaa irirafa asukunaki maridanoo Anutufa nimimari marirana sia misa kaqikaaqoo maraidaqa aanaamuruara foora sia maraidaqa, misa kaaqa irirana siaisa furufari mariasa nári qimaqaamau kai fimariasa, minara kai asukunaki maridaqa.  
\v 19 Misa nisaurirana taikarausa maridaqa nári nifaaqa marirana mandoosanai kai ubeekaidaqa oosana oosana nisaurimaria ainainna sia nisauridaqa fanandidaqa kaqi umaraidaqa.   
\p
\v 20-21 Innee Eefeesusa maqannaasa miqira mandoosana sia asauku mundirana saaqaraana iriafanoo, innee minara irisee Yisuna aiku asauku kambiqafufaqa andeeqara irirana faqaasa inni mina anoona ufa inni qimannimiafaqa irimariafanoo.  
\v 22 Minara innee inneeqa ooqeenaa marirana nirana fatika aqusaaqa inni ooqeenaa marirafa inniqa mareeqeenoo inniqa manda nikaruqira nidiranaki quqasoofaqa miqoo innee inneeqa kai kuridimariafanoo.  
\v 23 Inni nimuqusaki manda nidira nidimarina faqa nitikura mandirira irimariana faqa taikasee innaarunaindaraana fuka amiqirafa kai mariani.  
\v 24 Inni innaarunaindaraa fuka marirafa Anutuna narí miqirafa maridanoo, mina anoona ufaki andeeqasee marirana faqa Anutuna ufa ameemaanai marirana faqa mina amooqirana faqa mi fuka marirafa anoona maridanoo, innee mi marirana kai qamunnara foora afisusee minaki maraqa nuaqa.   
\p
\v 25 Doo minara maaqooqari sia unna ufa kafaa mariani, taikaani, aiqama narinni narinni anoona ufa kai narí qimami narí qimami qiaqa, maasa aiqamausa moodaa nifaaqara foora kai marunnanara naríndi naríndi marunnanara unna ufa sia qiaqa anoona ufa kai qiaqa.   
\p
\v 26-27 Ani aanooirafa kambiqafinoo sia ani rarisameeqee mandainainaki quqaani, anee aanoo qinana doo mi faasaanasaa mi suanina keeqarana namufaqa taikaseena faiqaa sia kisaaqasaa aanooida maria, dauni taikaa, Sadannafa minaki keekafinoo mandainaina uqeeraandoora.   
\p
\v 28 Ainaina ummuari mari fasiqafa ummuarirana taikaani, taikasee quandaki andeeqasee narí ainainamasee narí narana namasee kudi fasiqauqa faqa naida niminaqa naaqa.   
\p
\v 29 Sia putaa ainaina afunda ainainara ufa qiaqa, faiqí anaasee pooduqamannimaqaida dadaaqimaria ufana kai qimasaifaqa misa iriseeqa amiqirana adiafaairana mareefaranoo.   
\p
\v 30 Manda ufa qinanoo Anutuna naaquqara maraquna fannoo iriseenoo akooqaanoo. Anutuna maraquna fannoo inni faqa marifa Anutuna akarara foora naríndi fee qidanoo inniki akara rinoo maridanoo. Mi maraquna akarafa maaqi qimasee inniara qima afeekaikidanoo kasooqaqee Anutufa qinanoo Yisufa qumuree inniara qinindi fee qimasee maraannoo.   
\p
\v 31 Doo maqee aukuana aiqama sukaqara ufa faqa qusufa qimasee darara qirafa faqa naunduraki mari aanooirafa faqa fatika aquaqa. Nariara nariara firaa kari nameera ufasaa niqimariafa faqa aquraree mariannana faqa sia kafaa mariani naundurakinaa nariara nariara fidiaqaa ira irirafa faqa taikaani.   
\p
\v 32 Sia miqiaqa, maaqiaqa, nariara nariara ireeda kai nimuqusa reendeenirafa faqa dadaaqirafa faqa mariani, narinni narinni mandainaina minnisaaqa. Maasa oosana oosana ainainannai Anutuna mandaikamma amaqaafanausa marifanoo Anutufa asauku mundiranannai maasa darirana minniqisanau. Doo innee minara iriseeqa mina amana kai doo inniqa niqoonausa mandaikamma nimaqarana narí minnisee narí minnisee iaqa.   
\c 5  
\s1 Anutufa maasara rirana ammeemmeeriaqa kaaqa qarana maraaqa.  
\p
\v 1-2 Innee Eefeesusa maqusanaasara Anutuna amuqusira aiku asauku marianara mina ammeemmeeriaqa asauku mundirafa maasara rinoo amuqusinoo narí marirana maasa qimaaqa maqasee kuqiranaki quqasoofanoo tatufira aandau suqara fara foora Anutuna aikiambu inau, innee faqa miqi kai iqa asauku mundirafa maasara rirana ameemmeerida nariara nariara ruaqa. Inni nariara nariara rirafa maqee maqee inniqa marirana rakisinnimaqaani.   
\p
\v 3 Innee Anutuna maqasaa aiku asauku marianara inniki faiqí anaasee narí ummuari narí ummuari maria ufana faqa ikairi irirana faqa ainainara faqa aanaaseera faqa kaaqa fanandi mariana faqa sia mi oosanna maraaqa minara ufa qimariafa faqa doo taikaaqa.  
\v 4 Ikairi putaa ufa faqa furufarira ufa faqa uteeti qimasee naanaindara qimaria ufana faqa aiqama sia andeeqara ufa sia inniki amanaikinoo maridanoo Anutuna maqasaa aiku asauku mariafanoo. Innee sia miqaa miqaa iaqa, maaqiaqa innee maqee maqee Anutunara dufi dufi qirafa kai inniki mariani.  
\v 5 Innee maa moodaa ainainnara kai amiqimmandee iriaqa, faiqí anaasee narí ummuari narí ummuari mariasa faqa ikairi faqaasa faqa kaaqa ainainara rimariasa faqa miqaa qiqanuasauqa, asauku mundirana ququsaki faqa Anutuna ququsaki faqa sia uqanna kaqikaaqoo mareefaranoo. Kaaqa ainainara rimaria oosanafa mifa moo unna anutunara innaaru qimaria fara foora mina ufa iri maria fara foora maridanoo.   
\p
\v 6 Minara moo fannoo mi oosana oosana manda ainainnara aufadamasee ufa qimasee narí furufarira ufannai inni nikaruqimasee mandainainaki fuaqee qinaqa sia uqanna innee mina iriaqa.  
\v 7 Maqee maqee Anutufa mi manda oosannara kai qaoo qimarifaqa sia irianannai kai Anutuna aanoo qirafa misasaa aqufidanoo. Minara qinee inni qimannimidaqa miqinna fasiqa anaaseesa sia misa faqa mariaqa, nianasaa rufiasee mariaqa. Minara qinee maaqi qimasee qimannimidaqa.   
\p
\v 8 Ooqai innee Eefeesusa maqusanaasa faqa asukunaki mariusa mariafanoo doo maqee karaambaiqa Anutuna faiqí anaasee aiku asauku kamambi mariafanoo kaaqa qarana fooqaasa mariafanoo, doo minara iriseeqa kaaqa qaranaki mariasara foora ida mariaqa.  
\v 9 Kaaqa qarafa qafuqakinaa ainaina amiqi amiqifanoo kambiqaidanoo Anutuna kaaqa qaranaki mariasa miqi kai iqa kaaqa qaranaki maridaqa misaki amiqirana faqa andeeqarana faqa anoona ufa qirana faqa misaki kambiqaidanoo.  
\v 10 Innee karaambaiqa aidi mari mariranara randasee maraaqa.  
\v 12 Asukunaki mariasa kukeeqaranaki maridaqa oosana oosana manda nisauri maria ainainna maraifaqa maasa misara qisauruanoo qimasee sia misa oosanara kaqikaaqoo ufa qianaura.  
\v 11 Minara innee furufarira marirana maree mariasara faqa asukunakinaa oosana maree mariasara faqa rufiasee innee nianasaa mariaqa innee misa manda asukuna mareeqee aiqamausa nifusaa kaaqa qara qoo quqasaifaqa mi manda asukunaki mariasa nisaurirana marasee minnisaaqeera.  
\v 13 Mi manda ainainausa mareeqee aiqamausa nifusaa kaaqa qara qoo quqasaifanoo mi manda ainainausa oosana uqanna kaaqa kooroomambuannoo.  
\v 14 Aiqama ainaina asukunakinaana mareeqe kaaqa qara qoo aiqamausa nifusaa quqasaifanoo mi ainainausa faqa kaaqa qaranaikiannoo. Minara maasa idi moo maaqi qinoo maridanoo.  
\q1 Anee faiqee marianafa findi fua.  
\q1 Kuqiranakiqari findi finanoo  
\q1 asauku mundirafa suaniara foora anisaa qaani.   
\p
\v 15 Mi ufafa miqinoo marinara innee Eefeesusa maqannaasa inneeqa mariranasaa amiqimmandee rakisiaqa. Sia aamina fasiqara foora mariaqa irirana faqaasara foora mariaqa.  
\v 16 Maa kamuqoo manda marira kamu marinara sia fifau suani afu afeesimarina kaqinni aiqaraani, aiqama faasaanara ainainira faasaanee qiaqa.  
\v 17 Minara innee sia furufariaqa Karaambaiqa inniara fuaqee qinaqa fifandinnanara faqa auqeefandinnanara faqa ooqai iridanoo innee mi iriranara randasee paqurimandee mi mau afeekaikamandee fidaqa qafaaqa.   
\p
\v 18 Innee nammari namasee furufarirana sia maraaqa mifa inni kuridimarifa maridanoo Anutuna maraquna fannoo kai inni naakufinoo naundurai qumbiqafinaqa mariaqa.  
\v 19 Innee narí qimami narí qimamidaqa Anutunara amooqirafa inni naundurai qumbiqafina maridaqa Dafidina idi faqa amaana idi faqa Anutunara rara idi faqa mi idinannai narí qimami narí qimami qiaqa.  
\v 20 Maasa karaambaiqa asauku mundirana Yisuna auqusaa maqee maqee aiqama ainainara maasa qikoona Anutunara dufi dufi qiaqa.   
\s1 Faiqí aanaaseera qidanoo.  
\p
\v 21 Innee asauku mundiranara naaquqee marinara nariara nariara ureeqafi maridaqa reendeena mandee mariaqa.   
\p
\v 22 Innee aanaaseeuqa faiqí ninaaqmaaka qimannimidaqa, innee faqa karaambaiqa aramandunnai maridaqara foora inneeqa nifaaqmaaka ufa ameemaanai miqimandee mariaqa.  
\v 23 Asauku mundirafa narí ufara suqimariasa innaaruna asumu nimimarifa maridanoo, misa uriqararafa maridanoo, anaasee nifaaqmaaka miqikai iqa nári ninaaqmaaka uriqara mafi marianara inneeqa nifaaqmaaka nimeemaanai ureeqaqa mariaqa.  
\v 24 Asauku mundirana ufara suqimariasa eedoo qimasee mina aramandunnai ooqu mari fidaqa mariandee kai iqa aanaaseeuqa nári nifaaqmaaka aiqama ufa ameemaanai mariaqa.   
\p
\v 25 Faiqí inni faqa qimannimidaqa innee aanaaseeuqa nifaaqmaaka inni qimannimidaqa, innee faqa asauku mundirana aanna raaqa, Yisufa narí ufara suqimariasa narí aanaaqara foora misara kaaqa amuqusufanoo misa naaru mariaqeera qimasee narí marirana misara kuqiranaki paasoosamandee quqanau. Innee inneeqa ninaaqmakara miqi kai iqa uriqarara ainainee qimasee nimuqusinaqa ruaqa.  
\v 26-27 Fuka anaasee narí afaaqinnai fuanee qimaseenoo afaaqa anukamaseenoo amiqira siara qamunna afisumareenoo narí afaaqa akumbau fee namuana fee qikairi fee sia marifanoo andeeqa mareenoo narí afaaqinnai fidanoo. Asauku mundirafa narí ufara suqimariasa fuka anaaseera foora nammariara foora ruma nimaqaseenoo andeeqara amiqiranaki faqa nifaaqa idaaqiranaki faqa mareeqeenoo narinnai amiqiranaki quqaani fee qimaseenoo maasa narí ufannai nammariara foora ruma qimaqasaidanoo nariara kai mara quqeenoo, minara Yisufa narí ufara suqimariasara amuqusufanoo narí marirana misara kuqiranaki quqanau maqi qidaqa.  
\v 28 Faiqí nári ninaaqmaakara miqi kai mandee nári nifaaqara foora nimuqusiani, narí aanaaqara uriqarara ainainee qimasee amuqusimariafa narí kai nariara faqa uriqarara ainainee qidanoo amuqusidanoo.  
\v 29-30 Sia moo fannoo narí afaaqara akooqaidanoo amiqimmandee rakisidanoo narana amidanoo asauku mundirafa Yisufa narí ufa suqimariasara narí afaaqafee qimaseenoo rakisidanoo, innee faqa miqikai iqa inneeqa ninaaqmaakara qini qifaaqa fee qimasee amiqimasee rakisiaqa.  
\v 31 Ooqeenaa tamummaqara fasiqauqa akara mina maaqimminoo maridanoo,  
\q1 Anutufa qunara faiqí moo fannoo narí anoofa akoona minniseenoo narí aanaaqasaa atooqafinoo miqanda moodaa kara mafifaranoo.   
\p
\v 32 Mi ufana maa ainainnara kikiqusidanoo anoona amiqirafa maridanoo asauku mundirafa faqa narí ufara suqimariasa faqa faiqí narí aanaaqara faqara foora inoo maridanoo moodaa kara mafuannoo.  
\v 33 Mi ufana inni faiqiara faqa qidanoo aiqama fasiqa nári ninaaqmaakara nári nifaaqara foora nári nimuqusiani, anaasee faqa nári nifaaqmaaka ufa ameemaanai eedoo qimasee mariaqa.   
\c 6  
\s1 Faiqiuqaindiara faqa nári ninaukoora faqa qidanoo.  
\p
\v 1 Faiqiuqaindi inniara qidaqa, inneeqa ninausa nikausa ufara eedoo kai qiaqa. Innee Yisuna ufara suqimariasaki marianara andeeqarafa mifa maridanoo.  
\v 2 Mooseena sandufara innee irimariafanoo minakinaafa aaquqira ufa qisaukuqara taikasee maridanoo. Minakinaana moo sandufa maasa mi mau fuanoo Anutufa moo ainaina maaqoo maa maqanasaa maasa qimirara qima afeekaikammaqoofa maaqimminoo maridanoo, inniqa ninausa nikausara naaquqaina misa ufamau fuaqa.  
\v 3 Fifanoo Anutufa inniara kisaaqasaa inneeqa maqa maaqaki maridaqa amiqiranaki mariaqee qimasee maasara qimafeekaikinau. Maasa mi ufanara uriqarara ufee qidaqa. Doo innee faiqiuaindi mi mau fuaqa.   
\p
\v 4 Faiqi nikausamara inni qimannimidaqa sia inneeqa faiqi fifau nirana fundakifaqa aanoo iaqa, sia miqiaqa, maaqiaqa, Yisuna ufamau inni faiqiuqa andeeqee andeeqasaifaqa Yisuna ufasaa innooqaaqa.   
\s1 Ainainimariasara faqa misa uriqararausa faqa misara qidanoo.  
\p
\v 5 Qinee Pauroosa innee moosa ainainimariasa qimannimidaqa. Inneeqa feefauru marara saikaki keeqafinaqa amiqimasee mina ainainammaisaaqa. Sia nifaaqa quqasee mana mana iaqa. Innee naaquqee marinaqa ainaina akoona anainammaisaaqa, innee asauku mundirana ainainidee qidaqa maqasaa ainaina akoona amiqimasee nimuqusannai ainainammaisaaqa.  
\v 6 Sia misa eedoo qira ufara kai irisee misa nifusaa kai ainainiaqa, inneeqa nimuqusannai Anutuna ufamau asauku mundirana ainainidara foora amiqimasee ainainamannimaqaaqa.  
\v 7 Sia fifau faiqí ainainamaiseera fooriaqa, karaambaiqa ainainammidee qimasee amiqimasee ainainamaisaa.  
\v 8 Innee miqidaqa maanara iriaqa, Karaambaiqa aiqama fasiqa amana amana kai nimidanoo moosa rumbara saikaki mariasee narí ainainira saikaki mariasee nári amiqira ainainirana akiaqara amana amana kai innaarunai nimiannoo.   
\p
\v 9 Qinee ainainimariasara innee inneeqa ainaina akoona amiqimasee ainainammaisaa qee qimaseeqa innee ainaina akausa faqa qimannimidaqa innee faqa miqikai mandee inniqa ainainimariasasaa amiqimmandee rakisiaqa, amiqimasee ainainiaqee qimasee aanoo irana faqa narirari mariana faqa taikaaqa. Innee faqa maanara iriaqa, innee faqa inni ainainimariasa faqa moodaa rakisirafa innaarunai marifa, sia mifa ainainimariasara ureeqarausee qimasee kafaa quandaki rakisi nimaqee mariasara uriqararausee qimasee qaara irirana maraidanoo, moodaa irirana marasee amana amana kai rakisi nimaqaidanoo.   
\s1 Roomma maqannaa sundiara foora afaaqa ititamareena Sadannana faqa rakuaqa.  
\p
\v 10 Maa ufana taikara ufa maaqimminoo maridanoo, innee karaambaiqa faqa maridaqa moodaanaki nimarifaqa mina firaa afeekannai inni faqa moodaanakikirana firaaqoo afeekaikamma mapukuaqa.  
\v 11 Sadannafa oosana oosana narí manda nikaru qiranannai inni naruannoo, innee minara rufiasee Anutufa niminna saqari duru saamunannai inneeqa nifaaqa ititaaqa.  
\v 12 Maasa Yisuna ufa irimariasa sia faiqí faqa rakidaqa maasa meerai Anutuna innaaruna ameemaanai maria manda afaanausa faqa rakidaqa, maa asukunaki maria kamuqoo mirindari rakimariasa faqa misa uriqararausa faqa misa faiqí firaasa faqa meeraindari maasa daruafaqa maasa misa faqa rakidaqa.  
\v 13 Innee minara iriseeqa Anutufa niminna duru saamu saqarina qumareeqa deedaqida mariaqa. Sadannafa mi manda faasaanna narirara anirainaqa innee amanaikiqa mariafanoo narí faqa aruafaqaammasee miqoo kai eeraaramasee ititaqa mariaqa, sia amana ainnaaqaraani.   
\p
\v 14 Minara qimannimidaqa. Innee findifi deedaqida mariaqa Sadannafa inni mandoosana nimisee naruandoora. Roomma maqannaa sundia nifaaqa rafaaqafimariana kikiqususee inniara qianauranoo. Inneeqa fausanda niranaqumuki rumbee maria fara foora mifa inni anoona ufa kai qirafa mifa mariannoo. Inni nimuqusasaa ititee maria afeeka ainainara foora inni andeeqara oosana mariannoo.  
\v 15 Inni niku ititee mariafa niku aanaamuara foora mifa Anutufa faqa mari asooara amiqira fasaasa ufa maqee maqee aamina maqannaa qimannimirafa mifa inni niku aanaamuara foora ititarafa mariannoo. Mi andeeqara oosannausa marasaifanoo Sadannafa sia amana inni naruani.   
\p
\v 16 Inniqa saqari ukeeqirira fara foora Yisuna saqarikirafa maridanoo. Innee Roomma maqannaa sundiara foora maqee maqee mi saqarina ukeeqirisee maraqa nifanoo Sadannafa narí feefa ida muquru qumaree inniara oosana oosana furufarira irirana minannai inni nifaaqa naqusee nariraree qimasee aqusainaqa innee Yisuna saqarikiranannai mina mafi ruki aquaqa.   
\p
\v 17 Roomma maqannaa sundiauqa rakiranaki fidaqa qafee nikiaaqa afisusee nikiaqa rukamifoora afisimariqau. Inneeqa nikiaqaki ititee maria qafeenara foora Anutufa innaarunai asumu marirana nimufa maridanoo. Sadannafa inni kuridiranaki maqee maqee mara quqararinaqa innee mi qafeena afisusee asumu mariaqa. Roomma maqannaa sundiauqa rakira paipana dinni dinni afaifaqaanannai faiqí ateekeeqa raquru nimiqa imariqau. Inni raiqara paipana aseema fooqaafa marina Anutuna ufa maridanoo mina maraquna fannoo mi ufana nimu ufafa maridanoo. Sadannafa inni faqa rakinaqa mi samuna qumaree mina aruaqa.  
\v 18 Innee mi ainainausa maraidaqa innaaru qidaqa maqee maqee Anutuna dadaaqiranara faqa innaaru qiaqa. Anutuna maraquna afeekannai maqee maqee eendaki faqa faasaana faqa Anutuna maqasaa fasiqa anaaseera Anutufa amiqi amiqimma nimaqaanifeera innaaruqiaqa. Sia kudoosaapaaqa afeekaikamandee innaaruqiaqa.  
\v 19 Qini Pauroosara faqa innaaru qiaqa Anutufa oosana qimasainaqa qinee faiqí anaasee Yisunara qimannimianauree qimasee paasoosamandee qimannimianaura, Yisuna amiqira fasaasa ufa ooqai kukeeqanoo marifa maqee aukuana Anutufa faiqí anaasee kooroomannimaqeenoo.   
\p
\v 20 Qinee Pauroosa mi amiqira fasaasa ufana aanaiqikirausa maridaqa. Kuqaa Roomma maqanna karabusaki maridaqa kuqaa aanaiqikirausa maridaqa. Anutufa qiniara paasoosamandee faiqí anaasee qimannimiannee qifaqa innee qiniara innaaru qifaqa paasoosamandee qimannimianaura.   
\s1 Pauroona akara taikara akara.  
\p
\v 21 Qinee Tikikusana aqiqaananoo qini daufakiana inni qimannimiannoo. Mifa maasa qimuqusi mari qikaqaafasaafa maridanoo, karaambaiqa saikaki amiqi amiqira ainainimarifa maridanoo. Mifa qini fasaasa ufa inni qimanniminaqa innee qini mariranara iriaqeera.  
\v 22 Mina qimannimianifeera aqiqaanaura inni nimuqusa pooduqaanifeera aqiqaanauranoo.  
\v 23 Maasa qikoofa Anutufa faqa maasa karaambaiqa asauku mundirana Yisuna faqa naunduraki asooarana faqa nariara nariara uriqarara ainainee qimasee nimuqusirana faqa Yisuna saqarikirana faqa inni aiqama qini qikaqaafasaauqa nimiani.  
\v 24 Innee aiqamausa maasa karaambaiqa asauku mundirana Yisunara sia taikee maria rirana rimariasa, Anutuna afaarirafa inni faqa mariani.