\id 2TI NT0016.4T BINUMARIEN OATRIDGE dp transfer 17-JUL-85; 13-April-2016 
\h 2 TIMOOTI 
\toc1 2 TIMOOTI  Timootina inaaqianna rumamaqoo akarafa. 
\toc2 2 TIMOOTI 
\mt1 2 TIMOOTI  
\mt2 Timootina inaaqianna rumamaqoo akarafa.  
\c 1  
\p
\v 1 Anutuna ufasaa asauku mundirana Yisufa narí ufara diqiqoosa maqasaa fasiqa Pauroosa maridaqa. Yisufa naaru naaru marirana qima afeekaikammandee qimiraree qimaqoona mifa nariki asauku mundirana Yisunaki maridanoo maasa minaki oonu maridaqa mi naaru marirana maraanaura.   
\p
\v 2 Oo Timooti anee qini qifaaqasaa qimaakuara foora marianafa qinee maa akarana ani rumamaqaidaqa. Maasa aiqamausa faqa aiqama ainaina faqa nikoofa Anutufa faqa maasa karaambaiqa asauku mundirafa Yisufa faqa narí afaarirana faqa amuqusifanoo nifauarana faqa aundurai asooarana faqa ani amiani.   
\s1 Pauroofa Timootinara dufi dufi qidanoo pooduamamaqanau.  
\p
\v 3 Qini qikeeku qikaaku sia moo ainaina rafaaqafinau Anutuna sandufamau amiqimasee fidaqa maqee maqee Anutunara innaaru qimariqau. Qinee faqa miqi kai masee misa naanna ramasee maqee maqee innaaru qidaqa aniara Timootinara dufi dufi qidaqa. Oo Timooti ani anoofa Eeunisa nammarifa faqa ani ataatoofa Rooisa nammarifa faqa miqanda noori kandamasee Yisunasaa amiqimasee mundiqa mariqau. Maqee anee faqa miqanda naanna ramasee mi oosanna kai maree mariana qinee iridaqa qafaidaqa. Mi irirafa kaqi aniki marifaqa qinee iridaqa.  
\v 4 Qinee ani quqasee fuafannana qiniara anee ikiraqoonnanara qinee minara iridaqa qinee faqa aniara didimarifaqa kasooqaqee ani qafamaseeqa firaaqoo asasianaurannoo.  
\v 5 Qinee aniara firaaqoo eendaki faqa faasaana faqa innaaru qimamaqaidaqa aniara dufi dufi qidaqa.   
\p
\v 6 Minara qinee maana qimamidaqa ooqai qinee sindimeera foora ani quqamaqaafananoo Anutufa ani amu afaaqooqana anee amiqimasee rakisiinana kuqua.  
\v 7 Anutuna maraquna maasa qimufa sia maparaairana rufiarana qimidanoo, mina maraquna fannoo afeekaikirana faqa faiqí aanaaseera amuqusirana faqa qeeqa daundurai qimanasaa andeeqasee rakisirana faqa maasa qimidanoo.   
\p
\v 8 Minara irisee maasa karaambaiqara sia asaurua. Qinee Pauroosa minasaara karabusaki marunnanara faqa sia asaurua kaqi paasoosamasee qimannimia. Anee faqa miqi kai inana Anutufa afeeka amiqaina anee faqa Yisuna amiqira fasaasa ufara kaqi aupuraranaki keeqaa.   
\p
\v 9-10 Anutufa maasa asumu mareenoo maasa daaramasee mai aniannee qimasee qini faiqí anaasee uqanna mariafaqee qidanoo. Sia maasa oosana moo ainaina amiqirana qafeenoofau maasa asumu mareenoofau. Narí irirana narí afaarirana minannai kai miqinoo. Ooqai maa maqa maaqana faqa innaaruna faqa sia maru aukuanna narí mi afaarirana maasara narí asauku mundirana Yisunasaa quqaqoofanoo maqee maa aukuanna maasa asumu maree marifa asauku mundirafa Yisufa maa maqanasaa kooroomafinoo mi afaarirana maasa faiqí faiqi qiminau. Asauku mundirafa Yisufa kuqirana aru taikaseenoo narí amiqira fasaasa ufannai kaqi marirana faqa naaru naaru marirana faqa koorooinoo marifaqa maridaqa.   
\p
\v 11-12 Qinee sia fifau oosana oosana aupurarana karabusaki maridaqau maraidau, Anutufa diqiqoofaqa maa maqanasaa qinee mina ufa faiqí anaasee naamua qidaqa Yisuna amiqira fasaasa ufa kooroomannimidaqa qimannimunnanara aupurarana qeeqa qifaaqasaa maraidaqa. Sia qinee minara qisauridaqa. Qinee qeeqa irirana irira fasiqasaa mundusauna maridanoo, qinee minara maana amiqimasee iridaqa, Yisufa narí afaaqooqa qimuna sia kadiqaannoo mifa amiqimasee dadaaqinoo fifi inoo narí qumira aukuana paquriannoo.  
\v 13 Oo Timooti qini kuqaa anoona ufauqa anee karaambaiqa ufara foora mina afaqamaree fua. Maasa asauku mundirana Yisunaki keeqafi marifanoo mifa Anutuna saqarikirana faqa faiqí aanaaseera nimuqusirana faqa maasa qimidanoo anee minaki maria.  
\v 14 Anutufa oosana oosana amiqira irirana anisaa quqaqoona mina naaquqara maraquna fannoo aniki marina mi afeekanannai mi oosana oosana irirana amiqimasee rakisia.   
\p
\v 15 Oo Timooti anee maanara irimariananoo. Misa qini Roomma maqannaa ruumbeeqee karabusaki quqasoofaqa aiqama Asia maqa maaqakina qini qiqoondiuqa qini minnisee quqasee sandamafiqau. Fikeerusafa faqa Qeeramookeeneesafa faqa miqanda faqa quqasee sandaqau.  
\v 16-17 Ooneesifoorusafa mifa kai sia qinee karabusaki mariafannanara asaurinau. Roomma maqusai firaa taunna marufanoo qini sia dauni paqurinau anireenoo qiniara fiqu faiqu fumandee randaseenoo paqurimandee moomoo kari qini dadaaqimarinau. Qinee karaambaiqara mi fasiqana aiku asaukuara amiqi amiqi mannisaannee qidaqa.  
\v 18 Qinee karaambaiqara narí qumira faasaanasaa mi fasiqanara afauaannee qidaqa innaaru qidaqa. Qinee Eefeesusa maqusai mariafananoo mi fasiqafa Ooneesifoorusafa firaaqoo qini dadaaqiufa marifana anee Timooti anee minara irimariananoo.   
\c 2  
\s1 Pauroofa Timootinara anee Yisuna amiqira sundiara maqi mariannee qinau.  
\p
\v 1 Anutuna afaarirana dadaaqirana asauku mundirana Yisunaki mariainainafa marinaqa maasa minaki mariananoo maasaindi mariannoo. Oo Timooti mi afaarirana maraseenana minasaa mapukina maria.  
\v 2 Qinee moomoo fasiqa anaasee nifusaa ufa nimiafannana anee faqa mina irimariananoo. Mi ufausa maramareenana andeeqara fasiqauqasaa quqasainaqa misa qumareeqa quandafi niqoonausa faiqí anaasee qimannimiaqeera.   
\p
\v 3 Anee faqa asauku mundirana Yisuna rakira faiqiara foora maridana aupuraidana anee faqa kadaapirina fua. Timooti anee rakira fasiqa oosana iria.  
\v 4 Sundiauqa rakiranaki fidaqa sia kaiqeesa maria marirana maridaqa nariqa aiqama ainaina minniseeqa doo rakira ainainara kai noori faqa irirana minni kai ubeekamasee nári karaambaiqa afusaa afeekaikamaseenoo rakirara kai iridaqa. Timooti anee faqa Anutuna saikaki fidana misa naanna raa.  
\v 5 Kafaa sandee maria fasiqausa oosana irimariana sia ufamau sandeenana taikara qoo oonu kasoomafinana sia feefauru mareennaranoo Timooti anee faqa mi ufamau sandeera foora amanamasee qafa.  
\v 6 Sia moo fannoo fukasaa narana unakusee naannoo. Narana ummaqi mari fasiqafa mifa kai indaaru unakusee naannoo mina kadaapirirana akiaqa mariannoo. Anee faqa Anutuna saikaki kadaapirina fifi inana naaru unakuseena suqaseenana neera foora innaranoo.  
\v 7 Anee mi ufana qunnana irisainanoo karaambaiqa fannoo dadaaqinana mi oosanna irinnaranoo.   
\p
\v 8 Aneenna aaqooki asauku mundirana Yisunara iria, mifa Dafidina ati kuqiranakiqari findifufa maridanoo. Mina amiqira fasaasa ufa qinee qimannimi marunnana mina koorooidanoo.  
\v 9 Qinee mi amiqira fasaasa ufana qimannimunnanara aupuraidaqa. Misa qiniara mandoosana maree mari fee qimaseeqa qini qumareeqa sainandannai rumba quqeeqa. Kuqaa qinee sainandannai rumbaqa marida Anutuna ufa fannoo sia rumbanoo maridanoo kaqi idukinoo maridanoo.  
\v 10 Qinee minara iriseeqa, Anutufa rusandeesamumasee mareefandinna fasiqa anaaseesara irisee misa Yisunara iriaqeera oosana oosana mandainaina aiqama ainaina maraidaqa. Misa faqa asumu mariaqeera faqa naaru areenarana maraaqeera faqa mandainaina kaqi qeeqa qipatasaa maraidaqa. Mi asumu marirana faqa naaru areenarana faqa asauku mundirana Yisunaki kai maridanoo.   
\p
\v 11 Maa ufafa kuqaa maridanoo. Maasa Yisuna faqa kuqiqa mina faqa findifuanauranoo.  
\v 12 Maasa mina faqa afeekaikamande fifi inaqa maasa kasooqaqee mina faqa rakisirausa marianaura. Maasa minara qaoo qiananoo mifa maasara faqa qaoo qiannoo.  
\v 13 Maasa mina akaru qiananoo mifa kai amana kai andeeqasee mariannoo. Mifa sia amana narí oosana minnisee maasa mandoosanamau fuannoo, andeeqarafa kai maridanoo.   
\s1 Pauroofa Timootina aakapanau, amiqimasee ainainiannee qinau.  
\p
\v 14 Timooti mi ufausa ani Yisuna ufara suqimaria maqanaki keeqee mariasa qimannimidana maa ufana faqa Anutuna afusaa oori kandamasee aaquqimannimaqa. Misa sia kai fifau ufara tinoo taanoo riqa rairaiqiaqa. Mi oosanafa sia anoonaikidanoo faiqí anaasee kuridi mariafa mi oosanafa maridanoo  
\v 15 Anee aneennara Anutuna afusaa anee afeekaikamandee maridana saika maree mariananoo Anutufa aniara maaqi qianifeera oo maa fasiqafa amiqimmandee qini saika uqeeraidanoo qini anoona ufa amiqimasee andeeqasee qimannimimarifa sia narí saikara oonumafi irinoo asauruanifeera.   
\p
\v 16 Akaqausa ooqai Yisuna ufaki mariusa oosana oosana fifau faafau ufa uqeeree mariafaqa anee minara eerairia. Anutuna andeeqarufa sia minaki mari ufana dapi ufa narí qimami narí qimamira fee qinnufana faqa furufarira ufara faqa anee minara rufiasee nianasaa fua. Mi ufafa faiqí anaasee Anutufinnaindaraana mareeqee kaqirunna ubeekeemarifa maridanoo.  
\v 17-18 Mi dapi ufana qimannimimariasa ufa fannoo fidika namuanara foora firaaqoo amaqi naidanoo firaaqoo qaidanoo mi dapi ufana miqi qifanoo firaanaikiandoora. Miqira ufa qimariasa nuqu Qimeenaiusafa faqa Fireetusafa faqa miqanda anoona ufa qimaria aana minnisee unna qimasee aiqamausa kuqiranakiqari findifirafa ooqai taikanoo maridanoo fee qidaqa. Miqira ufannai Yisuna ufamau fimariasa akaqausa nikuamannimiafaqa saamuridaqa.   
\p
\v 19 Misa miqira ufa fannoo sia amana Anutuna ufa aruannoo, faakanara foora arufinoo sia kasiannoo. Mi faakannasaa maa ufana akara rinoo maridanoo Karaambaiqa narí faiqí aanaaseera iridanoo. Ya faiqi anaasee fee nariara karaambaiqaindi fee qinafa mifa mandoosana ameesuquseenoo andeeqara oosana maraannoo. Anutuna ufa faakanara foora marina oosana miqi mminoo maridanoo.   
\p
\v 20 Ainaina faqaasa maaqaki qafee disa kaafaina piritaina oosana oosana maridanoo. Akaqana siruaannai auqirafa maridanoo akaqafa koorannai auqirafa maridanoo akaqafa saqarinnai auqirafa maridanoo akaqafa maqannai auqirafa maridanoo. Akaqana amiqira difaaniki narana saka faiqí nimimariafa maridanoo. Akaqausa mandaikirafa kai madaapeenni marifa maridanoo.  
\v 21 Faiqí moo fannoo madaapeenni mari difaanifara foora marifa narí anukamasainanoo ainaina saka neemaria difaanifara foora amiqirafa mariannoo. Miqinanoo mina akoofa mareeqee amiqira saikaki quqaannoo.   
\p
\v 22 Nimuqusa anukarausa maqee maqee karaambaiqa aaraidaqa dadaaqiannee qidaqa anee misa faqa misa naanna raidana kumaaraa mandainainara nidiranara eerairiaqa andeeqaranara afeekaikamasee afaqaaqa, Yisunasaa irirana rusirana faqa faiqí aanaaseera nimuqusirana faqa naunduraki asooarana faqa afeekaikamasee afaqaaqa.   
\p
\v 23 Furufarira ufa, dapi ufa rainarafa minauqara eerairiaqa. Miqi qimariasa aiqama kari aanooqiranaki aqufidaqa.  
\v 24 Anutuna ainainira fasiqa fannoo sia ufa rainainnanaki keeqaani. Mifa aiqamausara reendeenamandee ireeda kai qimannimiani mifa amiqimasee ireeda kai fifimmasee Anutuna ufa naamuaqiani.  
\v 25 Mifa ireeda kai mina ufara qaoo qimariasa andeeqannimaqaani. Mifa miqinanoo abee Anutufa dadaaqiannoo fee misa quandaki anoona ufai ubeekeefaranoo fee.  
\v 26 Sadannafa narí ufaanaki mara arinoo narí iriranamau quqasoofaqa fimarufaqa misa anoona ufasaa ubeekaifanoo nári irirafa kambiqafinaqa Sadannana ufaanakiqari aruruduku fifaranoo.   
\c 3  
\s1 Pauroofa taikara aukuanara Timootina qimaminau.  
\p
\v 1 Oo Timooti anee maa ufana aaqoo iria. Taikara aukuana manda aukuana afeeka aukuana mariannoo.  
\v 2 Mi aukuanna mi kamuqoo faiqí náriara kai irifaranoo kaaqa ainainara rimarifaranoo, náriara firaaqoo ufa qimarifaranoo, firaaqoo náriara nári nimooqimarifaranoo, misa mandufa faiqí anaasee qimannimi marifaranoo, misa nári ninausa nikausa ufa rukieefaranoo, misa nimira ainainara sia dufi dufi qifaranoo kai mareefaranoo, sia Anutunara irifaranoo mana mana kaimmifaranoo.  
\v 3-4 Sia faiqí anaasee reendeenama nimaqeefaranoo. Sia faiqí anaasee nifaueefaranoo. Misa moosara munuqi miniqifaranoo. Kaaqa faiqí narimarisa kaasau fainiara foora kaaqa faiqí narimarifaranoo. Misa andeeqarausara fidiaqaammifaranoo. Misa kaaqa faiqiara ueeqee mariasa misa irirana siaisa kaqi minaki rakeemasee fimariasa misa kaaqa nári nimooqiqa nári nuqu uqeeree mariasa. Misa niqaara ree mari ainainnara kai riqa Anutunara sia rifaranoo.  
\v 5 Misa amaana ufa sia irifaranoo nipatakai qumareefaranoo, anoona amuqusakinaana sia qumareefaranoo. Timooti anee miqi mariasara eerairamandee nianai maria.   
\p
\v 6 Misakiqari akaqa fasiqauqa nariqa unna amaana ufa qianeera furufari maria anaaseesa mandoosana maree maru anaaseesa maaqaki oonureeqa unna amaana ufa qimannimiseenoo misa afapita qumareenoo misa firaafaikinoo marifaqa mi irirana siai anaaseesa nári oosana oosana mandainaina nidudusaa aruqaafanoo innee doo mi mau kai fuaqee qifaqa mi mau kai fidaqa.  
\v 7 Miqimari anaaseesa Anutuna ufa anoonara maqee maqee oosana oosana amaana ufaki randaidaqa sia anoona paquridaqa.  
\v 8 Ooqai Mooseefa Isipa maqusai Faraoona asaukukinaana Isaraee maqannaasa idukumaree fuaneera qufanoo Faraoona afunee fasiqaqanda nuqu Yaneesafa faqa Yambareesafa faqa miqanda Mooseena itita amaqaqau. Maa maqee maria unna amaana ufana qimariasa misa miqanda naanna raidaqa, Anutuna anoona ufa ititaidaqa. Misa Anutuna anoona iriranara kadiqaidaqa oorudupidaqa misa mi irirafa kuqiara foora inoo maridanoo sia kasidanoo.  
\v 9 Ooqai Mooseena aukuana Yaneesasa Yambareesasa miqanda furufarirana aiqamausa qafamasee misa ufa minnisaqau. Maa maqee maria unna amaana ufana qimariasa aiqama sia misa ufa irifara, misa furufarirafa akooqoo marifaqa minniseefara akaqausa kai irifaranoo.   
\s1 Pauroofa taikara naamuaqira ufa Timootina qimaminau.  
\p
\v 10 Oo Timooti anee sia miqi marianafa anee qini naamuaqira ufamau kai fimarianafa qini oosana maree marianafa qinee fimarunnaqoo kai anee fimariananoo qinee Yisuna anoona ufamau fimariafannana anee qiqafoonafa mariananoo Anutuna saikasaara daruafaqa sia rakeemasee minniseeqa reendeenamandee kaqi miqoo marunana anee qiqafaananoo. Qinee faiqí aanaaseera qimuqusi mariafannana anee mina faqa qiqafoonafa mariananoo. Qinee kisaaqasaa Anutuna aanara afeekaikirana anee qafaananoo.  
\v 11 Qinee Anutuna ufasaara darirana faqa aupurarana faqa mareemarunana anee qafaananoo. Qinee Antiooka maqusa faqa Ikooniumma maqusa faqa Ristara maqusa faqa mi maqusanakiaqa fimariafanaqa misa dariqa fimarufaqa firaaqoo aupuraqa fimariqiafana. Anee minara faqa irimariananoo. Karaambaiqa fannoo mi ainainnakinaana qini asumu mara quqasoofaqa maridaqa.   
\p
\v 12 Aiqama maqasaa qaraasa asauku mundiranasaa irirana rusiseeqa miqooqari Anutuna andeeqara oosana maraifaqa narirana aupurarana mareefaranoo.  
\v 13 Mandoosana maree mariasa faqa unnaqi maria fasiqausa faqa nári mandoosana maraqa fidaqa ootupaqa fidaqa miqiqa fifi ifaqa firaanaikifaranoo. Misa akaqausa nikaru qiafaqa kafaa misa quandaki nári faqa nikaru qifaranoo.  
\v 14 Oo Timooti anee sia misa naanna reemariananoo. Qinee Anutuna anoona ufa ani aamuaqiafannana amiqimmandee qumaroonnana mi mau kai amiqimasee fua. Anee yanasaaqari fee Anutunaindaraa ufa irira oosana mareenanee. Doo miqikaimmasee mi fasiqafa indee kai inana naaru naaru miqi kai ia.  
\v 15 Oo Timooti anee aanaaqisaa Anutuna naaquqara akarakinaa ufa irimarianafa mariananoo anee minara faqa iria sia aunua. Mi naaquqara akararufafa asumu marira irirana ani amiannoo. Mi asumu marirafa asauku mundiranaki maridanoo.   
\p
\v 16-17 Anutufa qimannimufaqa akara rumaqoo ufafa maridanoo Anutuna ufa qimannimimaria fasiqausa mina qumaraifanoo minakinaa ufa fannoo nári naamuaqiannoo nári aaqaranara qaoo qiannoo, nári eendaandirana andeeqaannoo nári andeeqasee firana naamuaqiannoo. Miqi qimasee Anutuna ufa qimannimimaria fasiqausa andeeqasee amanaikinaqa Anutuna saika oosana oosana uqeeraaqa.   
\c 4  
\s1 Pauroofa faiqí anaasee qimannimira oosanara Timootina qimaminau.  
\p
\v 1 Oo Timooti qinee Pauroosa Anutuna afusaa faqa asauku mundirana kuqirausa faqa kaqi mariasa faqa aaquqimannimaqee marina afusaa faqa doori kandamasee ani faqa aaquqimamaqaidaqa. Yisufa kaifaa kooroomafi aiqamausa rakisianinnanara iriseeqa ani aaquqimamaqaidaqa.  
\v 2 Anee Yisuna amiqira fasaasa ufara faiqí anaasee qimannimia, narí qanaa fee kaqiqoo fee sandanainai qimasee qimannimia, anee misa iriaqaa iaqee qimasee qimanniminaqa misa iriaqa anee mandoosana maree mariasara qaoo qia, anee faiqí aanaaseera nifeeqaraidana poodua. Anee ubiqafi sanaasamasee faiqí anaasee qimannimia.   
\p
\v 3 Qusasaa sia anoona ufa naamuaqirana irifaranoo misa nári manda nidimari ainainna kai afaqee fidaqa nári naaqookinaa manda irirana naamuaqimariasa misauqa kai moomoo nifiqasee innee mi manda irirausa kai qimaqimiaqee qifaranoo.  
\v 4 Misa anoona ufara nimeesuqusee kai fifau uriara kai naaqoo rammatini imariasa.  
\v 5 Timooti misa miqimarifana anee aneenna kasoomambi ubiqafinana misa ani ariranee aupuraranee amimarifana kaqi kai fua. Amiqira fasaasa ufa naamuaqira saika maqee maqee marana fua, anee aneenna aiqama saikaki maridana Anutuna ainainira faiqi maridaqee qimasaidana marana fua.   
\p
\v 6 Oo Timooti anee iria doo qini fidika ruqiqa qimaqeefandinnafa doo ani maridanoo. Doo qusasaa misa qini darifaqa qinee maa mariranakiqari doo taikasee fifuanauranoo.  
\v 7 Doo qinee amiqira rakiranakiara foora rakumaree uriqaramafiara foora mafiqa. Doo narí amani narí amanira sandaranaki qimudaanaiqimaseeqa sandaqa aniifaqa doo taikarana paquriqa. Qinee Anutuna ufa faqa marirana faqa andeeqasee qumaree sandeeqa taikarana aniree paquriqa.  
\v 8 Doo maqee sandaida uriqareemariasa feefauru qiniara deedaqinoo maridanoo. Karaambaiqa andeeqasee ufa nimimarifa qumira faasaana andeeqeemariasa qafee qini qikiaaqa afisuannoo. Mikari sia qini kai qimiannoo, moomoosa minara nidimarisa mina koorooiranara afeesidaqa nidimarifaqa afeesimariasa misa faqa nimiannoo.   
\s1 Pauroofa Timootina qimaminau, qini qamunna papiaqa maree mini qimia.  
\p
\v 9 Oo Timooti anee kaqi kaqi mindari aniree qiqafaa.  
\v 10 Deemasafa maa maqa maaqanakinaa ainainara kaaqa ridanoo qini minniqiseenoo doo Teesaroonika maqusai finoo Kareeseenasafa doo Karatia maqa maaqai finoo, Titusafa Daramatia maqa maaqai finoo.  
\v 11 Rukaafa sia rumbaranaki marifa kaqi marifa mifa kai qini faqa maridanoo. Anee Marikoona afiqee minisainanoo Anutuna saika qini dadaaqiani.  
\v 12 Tikikusafa qini faqa marina qinee doo aqiqaunanoo Eefeesusa maqusai finoo.  
\v 13 Qini suara qamunna Tarooasa maqusai faiqí moo auqu Karapoosana maaqaki quqaqaafannana anee aninana aimaree ania. Qini papiqauqa faqa qini akara papiqa faqa aimaree mini qimia. \fig Sandufa akara amiqi minoo marinau.|alt="Scrolls/pen and ink well" src="HK00153B.TIF" size="col" loc="2Timothy 4:13" ref="4:13" \fig*   
\p
\v 14-15 Areesandeerafa mifa qainna faqa koopaa faqa auqimarifa mifa narí mandoosana mareenoo qini firaaqoo mandaikamaqimaqeenoo, mifa firaaqoo maasa qimannimira ufara akooqaidanoo anee faqa firaaqoo minara eerairia. Anutufa miqimarina akiaqara arirana mina amiannoo.   
\p
\v 16 Qinee Roomma maqannaa kootaki indaaru kamu mariafananoo sia moo fannoo qini dadaaqinau aiqamausa qini quqaqisee sandamafufaqa qeeqaraa kai kooti mariqiafana. Qinee Anutunara sia mina akiaqara nimiannee qidaqa.  
\v 17 Misa fufanoo Karaambaiqa kai qumee qini pooduqee marufaqa qinee kootaki kikiqamafi Yisuna ufa aiqama amiqimasee aanaamuru aiqama qimannimiafanaqa iriqau. Miqimasaafananoo Anutufa kaasau aandau ookinaanara foora qini rafieenoora foora inau.  
\v 18 Karaambaiqa fannoo oosana oosana mandainainakinaana qini mareeqeenoo narí innaaruna ququsaki amiqimasee quqaqisaannoo. Mina areenarafa naaru naaru mariani, kuqaa.   
\s1 Pauroofa nimandoo ufafa.  
\p
\v 19 Anee Pirisikira nammarifa faqa narí afaaqi Akuiraana faqa nimandaa, Ooneesifoorusafa faqa narí faiqi anaasee faqa nimandaa.  
\v 20 Erasatusafa Koorinti maqusai miqoo kasooinoo marinau Taroofimusafa aurimarufaqa Mireetusa maqusaki quqaqiafana.   
\p
\v 21 Suara aukuana aniannoo anee naaree amanamasee qafeenana ania. Eeuburusafa faqa Pudeenasafa faqa Rinusafa faqa Karaudiafa faqa maaqoo maria qikaqaafasaasa faqa aiqamausa Timooti ani amandaidaqa.   
\p
\v 22 Karaambaiqa maraquna fannoo ani faqa mariani Anutuna afaarirafa inni aiqamausa faqa mariani.