\id 1TH NT0016.1T BINUMARIEN OATRIDGE dp transfer 17-JUL-85; 13-April-2016 
\h 1 TEESAROONIKA 
\toc1 1 TEESAROONIKA  Teesaroonika Maqannaa Indaaru Nimu Akarafa. 
\toc2 1 TEESAROONIKA 
\mt1 1 TEESAROONIKA  
\mt2 Teesaroonika Maqannaa Indaaru Nimu Akarafa.  
\c 1  
\p
\v 1 Innee Teesaroonika maqannaasa Anutunaki mariasa karaambaiqa Yisuna asauku mundiranaki faqa mariasa, innee Teesaroonika maqannaasa Yisuna ufara suqimariasa qinee Pauroosa faqa Sirasifa faqa Timootifa faqa inni nimandaidaqa, akara rumannimaqaidaqa. Anutuna kaqi nimira afaarirana faqa asooarana narí aundura faqa inni faqa mariani.   
\s1 Pauroofa Teesaroonika maqannaasa Anutuna ufamau fimarunara nimooqidanoo.  
\p
\v 2 Maasa maaqoo marunna namusa inniara iriseeqa maqee maqee Anutufinnai dufi dufi qidaqa, maqee maqee inniara innaaru qimannimaqaidaqa.   
\p
\v 3 Maasa inniara maqee maqee maasa qikoona Anutuna aaqoo auqaidaqa. Innee Yisuna saqarikidaqa miqianara Anutuna ufirira ainainirana maqee maqee imariafanoo. Innee Anutunara faqa faiqí aanaaseera faqa nimuqusa imarinara Anutufinnai kadaapiri mariafanoo. Innee Yisunara asasammasee afeesira irirafa karaambaiqa asauku mundirana Yisunaki atukaramasee marianara minauqara faqa maasa irisee Anutuna aaqoo auqaida inniara innaaru qimannimaqaidaqa.   
\p
\v 4 Teesaroonika maqusanaasa qini qikaqaafasaa Anutufa inniara amuqusimarifa inni rusandeesamumasee maroonara maasa iridaqa.  
\v 5 Maasa Yisuna aufakiana sia noonnai kaifau inni qimannimidau, Anutuna afeekannai faqa mina naaquqara andeeqara maraqunannai faqa qeeqa faqa mi iriranamau fidaqa minannai faqa inni qimannimiafannana minara Anutufa inni rusandeesamunara iridaqa kuqaa fee qidaqa. Maasa inni faqa Teesaroonika maqusai mariafana qiqafoosa maridaqa inni dadaaqirara andeeqaseeqa mariafanausa maridaqa innee minara irimariafanoo.  
\v 6 Innee maasa andeeqarana qafamasee karaambaiqa faqa maasa faqa andeeqarana ameeraameerirana faqa maasa faqa andeeqarana ameeraameeri mariafanoo, inni maqannaasa Yisuna ufa irunara mina akiaqara inni aupurarana firaaqoo nimufaqa innee sia minara iriqau naaquqara maraquna nimimaru asasirana asasammasee karaambaiqa ufa kai maroosa.  
\v 7 Innee Teesaroonika maqannaasa miqiqa aiqama aanaamuru Yisuna ufa irimarusa inneeqa andeeqara oosana uqannifiqoonara innee Maseedoonia maqa maaqakina marusa faqa Kirisa maqa maaqakina marusa faqa uqannifiqoosa mariafanoo.   
\p
\v 8 Sia mi maqa maaqa qanda kaifau karaambaiqa ufa iriqau, aiqama maqa maaqai innee Teesaroonika maqannaasa Anutuna ufa irufa, mi ufafa aiqamai daraaninoo fifaininau. Maasa fifau inniara mi maqannaasa fiqu fiqu idaqa qimannimiqa nimariafanaqa misa ooqai iriseeqa qimaqimiqa.  
\v 9 Ooqai maasa inni Teesaroonika maqusai oonuraafanaqa innee maasa asasamandee oonu qifiqasee amiqimasee maasa ufa irunara faasai mi anaamurusa irimariqau. Innee inneeqa dapi saqari Anutunara foora innaaru qimaruna minnisee quandaki kuqaa anoona kasi mari Anutufinnai ubeekaranara faqa faasai mi anaamurusa iriseeqa minara aiqamausa qimannimimariqau.  
\v 10 Innee mifunnai ubeekamafi mina amaaku innaarunaindari qumiranara afeesu afeesirafa kaqi afeesida marunara faasai aanaamuru minara faqa irimariqau. Anutuna amaaku Yisufa kuqiranakinaana mara findifufa, maasa Anutufa kasooqaqee naruaninnanakinaana Yisufa maasa asumu qumaree marifa innee mifa qumuaninnanara afeesida marunara aiqama aanaamuru faasaimma irisee qimaqimiafanoo.   
\c 2  
\s1 Pauroofa Teesaroonika maqusai maridanoo narí ainaini marunara qimanniminau.  
\p
\v 1 Oo Teesaroonika maqannaasa qini qikaqaafasaauqa. Maasa namu inni maqusai fuafannakari sia kadiqamannisaqiafana, innee minara irimariafanoo.  
\v 2 Maasa namu Teesaroonika maqusai fuaneera Firipi maqusai oonuraafanaqa mandaikamma nimaqeeqa manda ufa qimunara irimariafanoo. Maasa inni maqusai oonuraafanaqa moomoosa aanooqima nimaqoofaqa oonumafi iriafananoo Anutufa paasoosirana nimufaqa mina ufa inni Teesaroonika maqannaasa qimannimiqiafana.  
\v 3 Maasa qimannimirafa faqa sia aaqaranasaa mundinoo maridanoo sia maasa mandainaina maraannanasaa mundinoo maridanoo, sia maasa ufa akaruqiranasaa mundinoo maridanoo.  
\v 4 Anutufa maasa nimanamasee inni qimannimiranara eedoo qimasee narí amiqira fasaasa ufa maasasaa quqasainaqa maasa maqee maqee Anutuna aidiramau kai inni qimannimidaqa. Anutufa maasa firana amanamasee qafeemarifa marifaqa minara irisee andeeqasee qimannimidaqa. Sia faiqí maasa ufa irisee eedoo qiaqeerau qimannimidau. Anutufa irisee eedoo qianinnamau kai inni qimannimidaqa.   
\p
\v 5 Maasa Anutuna afusaa maridaqa sia nimooqira ufannaifau inni qimannimiqiafana. Maasa Yisuna ufa qimannimidaqa sia maqandanai oosana oosana ainaina ummuariraree qimasee Yisuna ufa firaaqoo qimannimiafanausa, andeeqeemariafanausa innee minara faqa irimariafanoo.  
\v 6 Maasa inni faqa maridaqa inni fee akaqausee sia misa nimooqira ufara randaqiafana.  
\v 7 Kuqaa maasa asauku mundirafa niqiqoo fasiqausa maqasaa fasiqauqa maridaqa, maasa minara irisee sia inniara qimooqiranee, ainainee qimiaqee qimariqiafana. Ninausa faiqi aanaaqi ireeda rakisi mariandee maasa miqikai mandee ireeda kai inni faqa maridaqa qimannimiafanausa sia inni moo ainaina maraqiafana.  
\v 8 Maasa inni Teesaroonika maqannaasara firaaqoo nimuqusimarunara sia Anutunaindaraa amiqira fasaasa ufa kai naida nimiqa, maasa qeeqa dariranara sia rufiqarai irirana faqa qimuqusa faqa kaqi marirana faqa nimiaqaaida mariqiafana.   
\p
\v 9 Oo qini qikaqaafasaa maasa inni maqusai inni faqa mariafanaqa innee maasa oosana qafamasee irimariafanoo. Maasa narana maree maria saikana kadaapiriqa tooqaamu maraafana qafaqau. Maasa Anutufinnaindaraa amiqira fasaasa ufa qimannimiqa fifi inaqa innisaa oonu munduanaqa innee maasa naranara mamaraida miqidammiafoo qifoora faasaana faqa eendaki faqa qeeqa kai narana maree maria ainainirana kadaapiri mariafanaqa qafaqau.   
\p
\v 10 Maasa innee Teesaroonika maqannaa faqa mariafanna kamuqoo sia Anutufa kai maasa marirana qafanau, innee faqa qiqafoofanoo. Maasa inni Yisunara rimarusa faqa maridaqa maasa anukarana faqa andeeqarana faqa pisoopisooirana faqa sia aaqarana faqa mariafanaqa qiqafee marusa maridaqa.  
\v 11 Faiqi nikausa amiqimmandee faiqi rakisidaqa maasa miqi kai iqa inni rakisimariqiafana.  
\v 12 Maasa innee mandainaina maroofaqa reendeenamma nimaqeeaafanausa maridaqa. Anutufa inni naaraidanoo kasooqaqee innaarunai ooruree narí areenarana faqa narí ququsara faqa mina faqa marasee narí faqa mariaqee qidanoo. Maasa inniara minara iriseeqa innee maqee mariaqooqari Anutuna aidiramau kai fuaqa, minara fuki faaki qimariqiafana.   
\p
\v 13 Anutuna aufakiana maasasaa quqasoona inni qimannimiafaqa innee irisee umaraqau. Innee minara sia faiqí ufafee qimariqau. Anutuna ufafee qimasee umaraqau. Miquna qafamasee maasa Anutunara dufi dufi qidaqa. Kuqaa Anutuna ufa maridanoo innee mina ufa irimariasakina saikidanoo.   
\p
\v 14 Ooqai Yuda maqannaasa nári niqoonausa asauku mundirana Yisuna ufa irimarusa irisoona akiaqara kadaapirirana nidafirana nimiqau. Innee Teesaroonika maqannaasa faqa asauku mundirana Yisuna ufa irisoofaqa inniqa niqoonausa nikooqoofaqa miqi undee kai iqa nidafirana aupurarana inni nimiqau.  
\v 15 Yuda maqannaasa ooqai Anutuna tamummaqara fasiqauqa kuqa nariqau, kafaa maa kamuqoo karaambaiqa Yisuna kuqamma arusaqau. Doo kafaa maqee maasa mandaikamma qimaqaidaqa. Misa Anutuna afusaa firaaqoo mandaikidaqa misa kaaqa faiqí narimariasa maridaqa.  
\v 16 Maasa Anutuna ufa faiqí asumu marararufa aanaamuru qimannimimarunaqa misa nikooqaifaqa maasa rafaaqafirara amanidaqa. Miqidaqa Yuda maqannaasa aaqarafa doo firaafa uriqaranoo maridanoo, doo maqee mandainaina akiaqara Anutuna aranaqarafa doo misasaa aqufinoo maridanoo.   
\s1 Pauroofa kaifaa Teesaroonika maqusai fuaneerusia minnisanau.  
\p
\v 17 Anutufa misara miqi qimarifaqa qinee Pauroosa maasa qeeqara maaqi qidaqa. Yuda maqannaa nifaqasaifaqa qusasaa maasa nianai rakeeiqa maridaqa, qifaaqa kai nianai rakeeiqa maridanoo. Maasa irirafa inniki marifaqa fuaneera firaaqoo amanunanoo sia amanaikifaqa kaqi maridaqa.  
\v 18 Qinee Pauroosa faqa qini faqa mariasa Teesaroonika maqusai innee iannai fuaneera amanunanoo sia ifaqa qinee qeeqa kai moomoo kari amanunanoo Sadannafa qini faqa ititaifaqa minniseeqa kaqi Ateensa maqusai maridaqa.  
\v 19 Yisufa quminna aukuana innee Teesaroonika maqannaasa faqa aanaamuru qimanniminausa faqa innee inni andeeqaranannai marifaqa qinee inniara Yisuna afusaa qeeqa faiqiara foora inniara asasianauranoo.  
\v 20 Maasa qeeqa qifaaqa amooqirana faqa asasirana faqa inniki marinara innee maqee marianara firaaqoo iridaqa kumaaraa Timootina aqiqeeqa.   
\c 3  
\p
\v 1-3 Maasa inni Teesaroonika maqannaasara kisaaqasaa munari minari firariafanaisia doo maqee minnisee rakeemasee Ateensa maqusai maasa namu kaqi maridaqa maasa qikaqa Timootifa maasa faqa Anutuna saikaki marifa amiqira fasaasa ufa asauku mundiranara qimannimi noonifa maasa mina aqiqeeqa innee iannai inni pooduaanifeera innee Yisuna saqarikirana dadaaqianifeera, akaqausa inni nidafirana nimifaqa sia quandaki fuaqeera Timootina innee iannai aqiqeeqa. Aqiqamasee maasa kaqi Ateensa maqusai maridaqa. Maasa Yisuna ufasaara narirafa marianinnanara Anutufa ooqai maasara minaki fuaqee qimaqoo ufafa maridanoo. Innee minara faqa irimariafanoo.   
\p
\v 4 Maasa Teesaroonika maqusaki maridaqa inni qimannimiqa Yisuna ufa saara narirafa kambiqaannoo fee qiafannana doo mifa kambiqaidanoo innee minara faqa irimariafanoo.  
\v 5 Qinee Pauroosa minara iriseeqa innee iannai Timootina aqiqeeqa. Qinee inni naufakiana sia uqanna iriqa kisaaqasaa mariranara qikooqaifaqa munari minariqa Timootina aqiqeeqa. Mifa oonureenoo Yisunasaa mundiranara irianifeera aqiqeeqa, Sadannafa inni nikarimaqasee qafaifanoo qini saika kadiqaannoo fee sia fee kadiqaannoo.   
\p
\v 6 Doo maqee Timootifa oonurandee anireenoo inni adiafaaira naufakiana qifaqa iriqa. Mifa innee Yisuna saqarikirana faqa nariara nariara nimuqusirana faqa qimaqiminoo. Mifa innee maasara maqee maqee irimariana faqa maasa inni niqafaaqaairana amana amana kai innee maasa qiqafaaqaa imarianara Timootifa qimaqimifaqa iriqa. Ooqai maasa qifaaqa rumbanoo marifaqa mariunausa.  
\v 7 Innee Yisuna saqarikirafa kaqi marinara maqee iriseeqa qifaaqa asasifanoo kadaapirirana faqa aupurarana faqa doo aufadeenoo.  
\v 8 Inneeqa marirana mapukuseeqa karaambaiqa afusaa findififaqa maasa qifaaqa amiqiannoo.   
\p
\v 9 Doo maqee maasa innee mapukusee marianara Anutuna afusaa dufi dufi qianaura. Maasa inniara Anutuna afusaa asasidaqa minara faqa dufi dufi qimamaqaida.  
\v 10 Maasa faasaana eendaki inniara Anutufinnai innaaru qidaqa, Anutufa dadaaqinaqa inni noori nindafamasee inneeqa Anutuna ufamau firana andeeqa nimifaranoo.   
\p
\v 11 Maasa Anutufa maasa qikoofa narí uqanna, maasa karaambaiqa Yisufa faqa maasa aana afisusainaqa innee iannai fuanaura.  
\v 12 Karaambaiqa fannoo innee nariara nariara rirana firaanaikamma nimaqaani, inni aiqamausara nidirafa faqa maqee maqee firaanaikiani. Maasa inniara didirafa maqee maqee firaafaikidanoo. Innindi faqa miqi kai inoo maqee maqee firaafaikiani.  
\v 13 Miqifanoo Anutufa inni nimuqusa mapukusee afeekaikamma nimiannoo. Innisaimbaqa karaambaiqa Yisufa narí aiku asauku faqa kafaa qumureenoo inni mareeqeenoo andeeqarausa naaquqarausaikama nisainaqa maasa qikoona Anutuna afusaa kikiqifaranoo.   
\c 4  
\s1 Pauroofa Teesaroonika maqanaasara Anutuna aidiramau fuaqeera naakapaidanoo.  
\p
\v 1 Oo Teesaroonika maqannaasa qini qikaqaafasaauqa qeeqa ufa maa ufana ati qimannimianaura. Maasa inni faqa mariafanna kamuqoo Anutuna aidiramau firanara qimannimiafanaqa mi mau fifiusa doo maqee kaqi mi mau fimariafaqa qinee iridaqa. Karaambaiqa Yisufa qimaqimiqoonara doo maqee inni fuki faaki qidaqa sia ooqai undee kai kaqikaaqoo Anutuna iriranamau fuaqa, moo faqa moo faqa afeekaikamasee mi mau fuaqa.  
\v 2 Inni faqa marianna kamuqoo Karaambaiqa Yisuna ufamau fuaqeera naamuaqira ufa oosana oosana naakapaafannana innee irimariafanoo.   
\p
\v 3 Anutuna irirafa inniara maaqimminoo maridanoo inni andeeqara naaquqarafa marinaqa faiqí anaasee narí ummuari narí ummuarirafa sia inni rumbanoo mariani mandainainakiqari idukirausa naanna ramasee mariaqee qiaqa.  
\v 4 Anutufa inniara maaqiaqee qidanoo. Innee aiqamausa inneeqa nifaaqara naaquqara uriqarara ainainee qimasee rakisidaqa andeeqara oosana marararee qidaqa narí ummuari narí ummuarirana taika uqanna fuani.  
\v 5 Innee sia aamina maqannaasa sia Anutunara irimariasa naanna raaqa misa mandainaina fanandiranaki maridaqa innee sia misa naanna raaqa.  
\v 6 Sia inniki moo fannoo miqinoo narí aqoonausee moo maqannaasee mandaikamma nimaqaani. Ooqai maasa inni qimannimiafannana maqee kafaa aaquqimannimaqaidaqa Karaambaiqa fannoo mi umuarira oosannara narirafa maridanoo.  
\v 7 Anutufa sia maasara narí ummuari narí ummuariranaki mariaqeera maasa daarama narí ququsaki quqeenoofau. Maasa kaaqa andeeqaranaki mariaqeera maasa daarama quqanau.   
\p
\v 8-9 Faiqí fee anaasee fee moo fannoo maa qinee qunnufana minnisainafa sia faiqí ufafau minniseefara Anutufa narí naaquqara andeeqara maraquna niminna ufana rukieefaranoo. Innee Teesaroonika maqannaasa Yisuna ufa irimariasa nariara nariara nidiranara innee irimariafaqa fifau qimannimidaqa. Anutufa narí kai narí aidi narí aidiranara qimannimifaqa irimariafanoo.  
\v 10 Innee Teesaroonika maqusanaasa Yisuna ufa irimariasa Maseedoonia maqa maaqaki maria nikaqaafasaasa mi amiqira oosanna nimiqoosa mariafanoo. Sia maqee iandee kai kaqikaaqoo nariara nariara nidiani moo faqa moo faqa firaaqoo nariara nariara nidiani.   
\p
\v 11 Maasa ooqai inni faqa maridaqa qimannimiaafanandee kai qidaqa kafaa qimannimidaqa. Maa ainainausasaa nimana mundusaafanoo miqoo kai fuaqa. Aiqamausa inneeqa ainainiranasaa inneeqa rakisiaqa, aiqamausa inneeqa narana inneeqa ainaina inneeqa kai maraaqa.  
\v 12 Innee Yisuna ufa irimariasa miqi faqa mina ufara nikooqee mariasa inni nimooqiqa andeeqeeaafoo qifaranoo. Innee faqa miqidaqa sia moo ainainara sarauqinana moonasaa oonu mundua.   
\s1 Yisufa kafaa qumuaninna ufafa.  
\p
\v 13 Qini qikaqaafasaauqa anoona ufa siaisa kuqufiqa sia findifidammiafoo qimasee ikifaafau qimariana. Innee faqa misa naanna reefoo qimasee kuqirausara anoona ufa iriaqee qimasee inni qimannimidaqa.  
\v 14 Maasa maaqi qidaqa inni qimannimidaqa. Yisufa kuqufinoo kafaa minakiqari findifinau. Miqunara maasa maaqi qidaqa Yisuna saqariki mariasa kuqufifanoo Anutufa Yisuna mara findifundee kai inoo misa faqa marafindifumma nimaqaannoo. Yisufa qumuaninna aukuana Yisuna faqa moodaanaki mariaqeera Anutufa marafindifumma nimaqaannoo.   
\p
\v 15 Karaambaiqa naamuaqimaqoo ufafa maaqimminoo marifaqa qimannimidaqa. Karaambaiqa qumuaninna faasaanasaa maasa kaqi marianausa sia kuqirausa noorisaa ooru fuanauranoo.  
\v 16-17 Mi faasaannasaa innaarunaindari Anutuna daambeenda firaaqoo ruannoo, qangirooqua uriqararafa ufa qiannoo, Anutuna ukeena fuaqaannoo doo miqoo innaarunaindari karaambaiqa narí uqanna qumuannoo. Qumurainaqa kuqirausa kaqi maru kamuqoo asauku mundirana saqarikida mariusa misa naaree kuqiranakiqari findififaqa doo miqoo maasa mikari kaqi mariasa faqa kuqirausa faqa Anutufa moodaanaki afapita qumareenoo uqeerannisainaqa asurukina keeqakinaqa aanai ooru karaambaiqa paqurimasee mikari mina faqa naaru naaru marianaura.  
\v 18 Miqiannanara innee faiqí anaasee faiqi kuqufuafaqa nifaaqa rumbee marifaqa ikiraqee mariana mi ufana qimannimifanoo nifaaqa aufadaani.   
\c 5  
\s1 Yisufa tautumasee qumuaninnanara faasaanara foora mariaqa.  
\p
\v 1-2 Mi ainainna kambiqaaninna aukuanara maasa fifau akara rumasee qimannimianaura, ooqai doo innee irimariafanoo maaqimminoo mariannoo, karaambaiqa qumuaninna kari ummuara fasiqara foora kukeeqakinoo qumuannoo.  
\v 3 Faiqí anaasee maa aukuannara amiqiranaki asooaranaki maridee qimasee kaqi mana manida marifanoo doo miqoo kai rakeemasee firaa narirafa tautumannimaqaannoo. Sia moo ameekamasaannoo, anaasee innaamunai fimariandee iannoo sia aupurarafa sia mariannoo, mariannoo.   
\p
\v 4 Innee Teesaroonika maqannaasa qini qikaqaafasaauqa, innee sia asukunakiara foora nimariasa mariafanoo. Yisufa qumira faasaana ummuarira fasiqara foora kambiqafi naqa innee sia tautumasee nisaurifaranoo.  
\v 5 Innee aiqamausa kaaqa qaranaki nimariasa faasaanara foora nimariasa mariafanoo sia maasa innisaimbaqa eendakiara foora nimarunausa sia asukunakiara foora nimariasara foora maridaqa.  
\v 6 Miqunara maasa innisaimbaqa sia faiqeemariasa naanna raaqa nifu maqasee mariaqa. Maasa innee faqa sia nammari neemariasa naanna ree furufariaqa kaqi amiqimasee marianaura.   
\p
\v 7 Eendaki faiqí anaasee faiqaidaqa eendaki nammari namasee furufaridaqa.  
\v 8 Maasa sia miqimarunausa maridaqa kaaqa qaranaindi maridaqa maasa sia nammari namasee furufariqa nuaqaana kaqi mariaqaana. Maasa qeeqa Yisuna saqarikirana faqa qeeqa nariara nariara rirana faqa mi ainainaqandannai saqari kammandee ukee iriqa. Maasa asumu marianafa kasooqaqee kambiqaaninnanara asasidaqa rakisida maridaqa. Mi asasira afeesiranara pateeuqara foora qikiaqaki afisusee rakiranakiara foora maria.  
\p (Ooqai nikiaqa itairirausa suani qikiaqaki daruandoo qimasee pateeuqa nariqa nikiaqa itairiranasaa afisimariqau. Ooqai Yisuna aukuana Roomma maqanna rakira fasiqauqa ainna qafee afisusee rakiranaki nimariqau. Aiqama ainaina samu sia qikiaqa daruani fee qimasee afisiqau.)   
\p
\v 9 Anutufa sia maasa rusandeesamumasee narí aranaqaranaki quqarareefau qinau. Asauku mundirana karaambaiqa Yisunannai asumu marirana maraaqee qimaseenoo maasa rusandeesamumasee maranau.  
\v 10 Mi asauku mundirafa minasaimbaqa maasara moodaanaki mariaqeera maasa darirana qimaaqa maqasee kuqufa findifinoo maridanoo narí kaifaa qumurainaqa kuqiqee kaqi maridee narí faqa mariaqeera maasa qimaaqa maqasee kuqinau.  
\v 11 Innee mi irirana iriseeqa soofaari mariasa mi iriranannai narí dadaaqi narí dadaaqidaqa narí amana narí amana mapukuaqa.   
\s1 Pauroofa ufa taikaidanoo nimandaidanoo.  
\p
\v 12 Oo maasa qikaqaafasaa maasa qeeqa qimuqusa ookiqari inni qimannimidaqa. Inniki Anutuna ufa saiki maria fasiqausa Anutufa mareeqeenoo mi saikanaki uqannisoosara qidaqa, misa inni naamuaqira ufa qimannimiafaqa amiqira fasiqafee qimasee naaquqamasee iriaqa.  
\v 13 Misa nári amiqira saikara irisee firaaqoo noosaa qiranara rufiaida misara nidiaqa. Innee nariara nariara nidimarinaqa asooaranaki mariaqa.   
\p
\v 14 Qinee inni naamuaqi maruna fasiqausa qimannimidaqa, inni kudi fasiqauqara afeekaikamasee naakapaifaqa misa ainainiaqa, rufiee maria fasiqa anaaseesa nimana mapukunimaqaaqa, irirana oore̱eqarausa innee dadaaqiaqa, innee aiqamausa qambaanai reendeenidaqa asooamasee qimannimiqa fuaqa.  
\v 15 Innee maa ainainnara faqa rakisiaqa, moo fannoo ani mandaikammamaqainana akiaqara sia narí mandaikammamaqaa sia mi oosanafa mariani. Innee aiqama kari narinni narinni amiqira oosana kai narí ami narí amiaqa sia inneeqaki kai miqiaqa. Innee aiqama maqannaasaki maridaqa miqimannimaqaaqa. Inneeqa irirana nimana mi amiqira oosannasaa kai quqaaqa.   
\p
\v 16-18 Innee aiqama kari Yisuna ufa irimariasa asasida kai mariaqa, aiqama eendaki faasaana innaaru qiqa fuaqa. Aiqama ainaina tiaki Anutunara dufi dufi kai qiaqa. Innee mi ufamau fidaqa asauku mundirana Yisunaki fidaqa Anutufa inniara fuaqee qimaqoomau fifaranoo.   
\p
\v 19 Naaquqara andeeqara maraquna fannoo inni afeeka niminaqa sia mina rafaaqafuaqa.  
\v 20 Anutuna maraquna fannoo faiqí dadaaqinaqa sia nikoo nikaa iaqa, amiqimasee iriaqa.  
\v 21 Innee aiqama amaana ufa sia kaqi iriaqa aiqama ufa aiquqummasee iriseeqa anoona ufa kai iriaqa.  
\v 22 Oosana oosana mandainainara eerairiaqa.   
\p
\v 23 Anutufa maasa naundurai asooarana nimimarifa inni mariranaki naaquqara andeeqara oosana firaaqoo nimiani. Mifa kai inni aiqama marirana nipatasaa faqa nimana faqa maraquna faqa aaqarafa sia mariani anukarafa kai mari mari inanoo asauku mundirafa karaambaiqa Yisufa miqiqa marinnanaki qumuani.  
\v 24 Innee inneeqa mandainainakiqari aniaqeera naaree marifa Yisufa sia akoo akaa imarifa maqee maqee dadaaqimarifa maridannoora anukara oosana nimiannoo.   
\p
\v 25 Oo Teesaroonika maqannaasa maasa qikaqaafasaa, innee maasara maqee maqee innaaru qiaqa.  
\v 26 Innee aiqama inneeqa nikaqaafasaa nimandaidaqa moodaa fidikara foora nimandaaqa.   
\p
\v 27 Qinee Pauroosa Karaambaiqa ufa irisee inniara afeekaikida qimannimida innee maa papiqana maraseeqa minakinaa akara ufa aiqama Yisuna ufa irimariasa asaana rumasee qimannimiaqa.   
\p
\v 28 Asauku mundirana Karaambaiqa Yisuna afaarirafa inniki mariani.