\id 1CO NT0016.1C BINUMARIEN NT OATRIDGE DP TRF 11-AUG-87; 13-April-2016 
\h 1 KOORINTI 
\toc1 1 KOORINTI  Pauroofa Koorinti maqannaa akararumannimaqoo ufafa. 
\toc2 1 KOORINTI 
\mt1 1 KOORINTI  
\mt2 Pauroofa Koorinti maqannaa akararumannimaqoo ufafa.  
\c 1  
\p
\v 1 Qinee Pauroosa maa pasana akara rumannimaqaidaqa Anutufa narí iriranannai qini maqasaa fasiqa daaramaseenoo narí asauku mundirana Yisufa niqiqoo fasiqausaki qini quqaqoosa maridaqa maa pasana akara rumannimaqaidaqa. Maasa qikaqaafasaa Soosateeneesafa maa pasanaki mifa faqa qinee faqa nianaindari inni nimandaidaqa.   
\p
\v 2 Innee Koorinti maqusai Anutuna ufara suqimariasa akara rumannimaqaidaqa Anutufa inniara narí aiku asauku mariaqeera utaaqamaqaisa mariafanoo, innee mina asauku mundirana Yisunasaa atooqaanara Anutunaindi kammiqa mariafanoo, Anutufa narí faiqi namu mariaqeera narí innai fuaqeera inni naareenoo, sia innee kai minaindi mariafanoo, aiqama maqanaa maasa karaambaiqa asauku mundirana Yisuna aaree mariasa misa faqa innee faqa minaindi mariafanoo. Yisufa misa faqa maasa faqa karaambaiqa maridanoo.   
\p
\v 3 Maasa qikoofa Anutufa faqa maasa karaambaiqa asauku mundirafa Yisufa faqa miqanda kaqi afaarirana faqa naundura asooarana faqa inni Koorinti maqannaasa nimiani.   
\s1 Pauroofa Roomma maqannaasara dufi dufi qidanoo.  
\p
\v 4 Anutufa innee mina asauku mundirana Yisuna saqarikianara narí afaarirana inni niminoo.  
\v 5 Innee Yisunaki marianara Anutufa oosana oosana amiqira ufa qirana faqa oosana oosana amiqira irirana faqa mi ainainaqanda moomoo nimunara qinee Pauroosa minara iriqa qeeqa Anutunara inniara maqee maqee dufi dufi qidaqa.  
\v 6-7 Innee maasa karaambaiqa asauku mundirana Yisunara innaarunaindaraafa kooroo iranara afeesimariafanoo asauku mundirana amiqi amiqirana aufakiana inni naunduraki mapukusee marinara Anutufa moomoo narí dadaaqi narí dadaaqirana akoofasaikirana niminau.  
\v 8 Anutufa maa mariaqooqari amiqimmandee rakisinoo fifi inaqa sia kasaaqai kuridifaranoo taikara aukuana andeeqasee paqurifaranoo. Miqunara mikari maasa karaambaiqa asauku mundirana Yisufa qumira faasaana Anutufa maasa niuqummasee moo aaqarana sia paquriannoo.   
\p
\v 9 Anutufa inniara narí amaaku narí asauku mundirana maasa karaambaiqa Yisuna faqa aqoondikiaqeera inni naaree marifa marinara sia inni nikaruqimasee kasaaqai mininnisaannoo innee minasaa nifaaqa quqeemariafa maridanoo.   
\s1 Pauroofa misaki raiqaranara aaqee mariafanoo fee qinau.  
\p
\v 10 Qini qikaqaafasaa Koorinti maqannaa mariasa, maasa karaambaiqa asauku mundirafa Yisufa inni qimannimira saika qimunara irisee inni reendeenamandee kai qimannimidaqa, inneeqa sia raina rainida furufariaqee qimasee moodaa ufa qimasee moodaanaki mariaqa kuqaa uqanna moodaanaki mariasa maridaqa moodaa irirana faqa moodaannai firana faqa mariaqa.  
\v 11 Moo anaasee auqu Karooeena nammarifa mina aiku asauku innikina manda ainaina, raiqara ainaina qafamasee akooqoo qimaqimiafaqa iriqa.   
\p
\v 12 Misa akooqoo qimaqimiafaqa doo qinee akooqoo inni qimannimianaura. Inniki naadu naadu moona ufa iriqa moona ufa iriqa ufa moo qimariana qambaanai raiqarafa aaqarafa maridanoo. Moo fannoo qinee Pauroona aiku asauku marunausee qiafanoo moo fannoo qinee Apooroosana aiku asauku marunausee qiafanoo moo fannoo Peetooroona aiku asauku marunausee qiafanoo moo fannoo asauku mundirana aiku asauku maridee qimasaida miqira raiqara ufa aaqarafa maridanoo.  
\v 13 Qinee Pauroosa minara maaqi qidaqa asauku mundirafa narí apata auku moodaa moodaa maqaisee maridee sia aukaakinoo marunara innee faqa sia rakeekaa iaqa. Qinee Pauroosee inniara aunirira saqarisaa kuqi fee qiqiafana. Sia kuquafannanara sia qini kikiqusuaqa. Innee nammari maraqau qini Pauroosa duqusaa fee nammari maroosee maridee. Asauku mundirana auqusaa qimasee nammari maroonara mina aiku asauku kai mariaqa.   
\p
\v 14 Qinee sia innikina nammari moomoo rumannimaqaqiafana minara Anutunara dufi dufi qidaqa.  
\v 15-16 Qinee Kirisipusana faqa Kaiusana faqa nammari rumannimaqaafannana. Doo daaqoo irifaqa Sateefanasana faqa narí aiku asauku faqa inamusa kai nammariki keeqannimaqaqiafana. Akaqausa faqee nammariki keeqannimaqaafananee doo maqee aunusee sia iridaqa, minara sia moo fannoo qiniara aiku asauku kammambi nammari mareeunoo qifaranoo.  
\v 17 Asauku mundirafa sia qiniara nammariki keeqannimaqaannee qimasee diqiqeenoo amiqira fasaasa ufa qimannimiannee qimasee qini diqiqeenoo sia faiqí faiqi iriranamau qimannimiannee qinoofau qini diqiqeenoofau. Qinee faiqí faiqi iriranamau qimannimiqa asauku mundirafa auniriranasaa kuqu afeeka ufana ureeqanoo marina sia irifoora.   
\s1 Anutuna irirafa aadumamaumbidanoo, maqasaa fasiqa irirafa moomau fidanoo.  
\p
\v 18 Asauku mundirafa aunirira saqarisaa kuqu ufana kuridiranaki fimariasa irisee furufarira ufa fee qidaqa. Maasa asumu mariranaki fimariasa sia miqi qidaqa mi ufanara Anutuna afeeka mi ufanara kai mari ifoo qidaqa.  
\v 19 Ooqai tamummaqara fasiqauqa minara maaqi qimasee akara riqau.  
\q1 Irirana faqaasa Anutunara sia irimaria irirana qinee qeeqa Anutusa kuridinnimaqaanaura. Aiqama firaa irirana irimariasa aiqama misa maa maqanasaaqaraa irirana rukasaanauranoo.  
\p Tamummaqarausa ufa oosana miqiminoo maridanoo.  
\v 20 Qinee Pauroosa minara kafaa maaqi qidaqa. Irirana faqaasa iriranara minara naqi fee qianauree. Uriqarara sukuraki keeqee mariasara naqi fee qianauree. Maa maqa maaqanasaaqaraa ufa akoofasauqa iriranara naqi fee qianauree. Misara maaqi qianaura, doo Anutufa ooqai uqannifiaqoofa kooroo inoo maridanoo qimaqiminoo. Maa maqa maaqanakinaasa irirafa Anutunara furufarirafa maridanoo.   
\p
\v 21 Anutufa narí firaa iriranaki maridanoo quandakinoo sia misa nári iriranannai qiniara iriaqee qimaseenoo faiqí auqu quqanau. Miqooqari maasara Yisuna aufakiana qimannimifaqa, misa minara furufarira ufa qimariafa, qimannimifaqa iriseeqa misa irirana minasaa rusimariasa asumu marirana Anutufa nimianifee qinau.  
\v 22 Yuda maqannaasa faiqí sia amana auqaaqaa ira ainaina uqaqifiqasainaqa ani ufara kuqaa fee qiraree qimariasa. Anaamuru Kirisa maqannaasa firaa iriranakinaa irirana qimaqimifaqa kuqaa fee qianauranoo.  
\v 23 Maasa sia mi maqannaaqanda naanna raidaqa, maasa asauku mundirafa aunirira saqarisaa kuqunara minara kai qimannimiafaqa Yuda maqannaasa mina irisee aanoo qiafaqa aanaamuru irisee furufarira ufee qimariafanoo.  
\v 24 Anutufa utaaqamannimaqaisa mi ufana iriseeqa Yuda maqannaasakiqari faqa aanaamurukiqari faqa mi ufanara asauku mundirana kuqirafa Anutuna firaa irirana faqa mina uriqarara afeeka faqa maridanoo fee qidaqa.   
\p
\v 25 Anee Anutuna irirana iriseenana minara furufarammi ifoo qinanoo Anutuna mi irirafa faiqí irirana urinaaqaranoo maridanoo. Anee Anutuna moo ainainara sia afeeka ainainammiifoo qinanoo Anutuna mi sia afeeka ainainafa faiqí afeeka urinaaqaranoo maridanoo.   
\p
\v 26 Oo Koorinti maqannaasa, maanara naaqooki iriaqa inni Anutufa naaroo aukuanna Yisuna saqariku aukuanafa innee mikari irirana faqaasa moomoosee mariqee iqau. Faiqí faiqi irirana faqaasa sia moomoo inniki mariqau. Faiqí faiqi afeeka faqaasa sia moomoo inniki mariqau, sia faiqí uriqararausa moomoo inniki mariqau.  
\v 27 Anutufa faiqí faiqi irirana faqaasa nisauriranaki quqaannee qimasee misakiaqa furufari mariasee qimariasa Anutufa mi furufarira fasiqa anaaseesara faqa nári irirana faqa qumareenoo minara qini amiqira irirana faqaasee qidanoo. Anutufa maqasaaqaraa afeeka faqaasa nisauruaqee qimasee faiqí faiqi akaqausara sia afeekee qimariasa Anutufa mi sia afeeka fasiqa anaaseesa faqa nári irirana namufaqa qumareenoo minara qini afeeka faqaasee qinau.  
\v 28 Anutufa faiqí faiqi uriqarara fasiqa anaasee fee qimariasa kuridianifeera misa nikooqee maria fasiqa anaaseesee qimariasa faqa misa fidiaqaa imaria fasiqa anaaseesee qimariasa faqa nári irirana namufaqa misakinaana nariara rusandeesamumasee qumareenoo uriqarara ainainee qidanoo.  
\v 29 Miqunara sia faiqí moo fannoo Anutuna oorisaa narí irirana amooqiannoo.   
\p
\v 30-31 Anutufa inni mareeqeenoo asauku mundirana Yisunasaa atooqaseenoo asauku mundirana qumareenoo maasa iriranee qimaseenoo maasa mareeqeenoo narí andeeqaranaki qiseenoo narí aiku asauku uqannaikamma qimaqeenoo maasa manda ainainakinaana idukuqisoofaqa marunnanara maasa tamummaqara fasiqa ufamau kai fuannanara minara maaqi qimasee mifa akararinau.  
\q1 Faiqí moo fannoo nana ainainaree moo ainaina amooqianauree qimasee sia narí amooqirana uqeeraani karaambaiqara kai amooqiani.   
\c 2  
\s1 Asauku mundirafa auniriranasaa kuqunara minara kai qimanniminau.  
\p
\v 1 Oo qini qikaqaafasaauqa qinee Pauroosa Koorinti maqusai oonuree Anutuna anoona ufa sia ooqai irirana faqaasa ufannai faqa sia uriqarara iriranannai faqa qimannimiqiafana.  
\v 2 Qinee qeeqa maaqi qimasee qimiriqa, qinee Koorinti maqannaasa qimannimidaqa qeeqa irirana aunusee asauku mundirana Yisunara kai qimannimianaura, mifa auniriranasaa kuqunara firaaqoo qimannimianauree qiqa.  
\v 3-4 Qinee minara iriseeqa innee iannai oonureeqa qeeqa ummooqukiranara iriseeqa maparaa idaqa daindiri ree marinaqa sia faiqí faiqi irirana faqaasa ufa faqa naufakiana faqa Yisunara qimannimiafannana. Qimannimi mariafananoo Anutuna maraquna afeeka fannoo amiqimasee qini ufa anoona uqannifiqanau.  
\v 5 Innee minara iriqa inneeqa Yisuna saqarikirana sia irirana faqaasa iriranasaa fau mundinoo marinau. Anutuna afeekasaa mundinoo maridanoo.   
\s1 Anutuna maraquna fannoo Pauroona dadaaqufanoo qimanniminau.  
\p
\v 6 Qinee sia faiqí irirana marasee aiqamausa qimannimidaqa, akaqausa Anutunara firaaqoo mapukusee irimariasa kuqaa qinee irira ufa misa qimannimidaqa. Sia maa maqanasaaqaraasa iriranau misa qimannimidau, sia maa maqanasaa rakisimari afeekausa iriranau qimannimidau doo misa afeeka taikaidanoo.  
\v 7 Qinee qimannimi marunna irirafa Anutuna ooqai kukeeqara irirana innaarunai asumu nimimarina qimannimidaqa mi irirana faiqí sia nifu qafaafa. Maa maqa maaqafa sia maru kamuqoo Anutufa mi irirana utaaqamaseenoo minannai maasa narí areenaranaki innaaruna ququsaki keeqaaqeera utaaqanau. Qinee mi irirana misa qimannimidaqa.  
\v 8 Ooqai maa maqa maaqanasaa rakisirausa sia mi irirana iriqau. Iriqau innaaruna areenaranakinaa karaambaiqa sia qumareefau aunirira saqarisaa arini.  
\v 9 Ooqai tamummaqara fasiqa minara maaqi qimasee akara rinau.  
\q1 Faiqí sia qafee maru ainainnara sia iri maru ainainara sia faiqí moo fannoo minara kambiqaannoo fee qimaru ainainnara, miqira ainaina kai Anutufa deedaqammaseenoo nariara rimariasa kai nimiannoo.   
\p
\v 10 Qinee Pauroosa minara maaqi qidaqa. Maasa inni saimbaqa Roomma maqannaasa namufaqa Anutufa narí maraqunannai narí ooqai kukeeqara irirana qiminau. Anutuna maraquna fannoo aiqama ainainara randasee aiquqummasee qafaidanoo. Sia akooqoo ainaina kai qafaidanoo Anutufa naaru kambiqaaninna kukeeqara ainaina farumara foora unaurinoo marina mina faqa aiquqummasee irimarifa marunara Anutufa narí ooqai kukeeqaqoo irirana inni saimbaqa qiminau.  
\v 11 Faiqí naundurakinaa maraquna fannoo mi fasiqana aundurakinaa irirana aiqama iridanoo. Miqi kai inoo Anutuna maraquna fannoo Anutuna aundurakinaa ainainara aiqama iridanoo.  
\v 12 Inni saimbaqa sia maa maqa maaqanasaaqaraa maraquna maroosa maridaqa. Inni saimbaqa Anutufa niqiqoo maraquna maroosa maridaqa Anutufa minannai innaarunai asumu mareemariana faqa minasaaqaraa naundura adiafaairana faqa niminau.   
\p
\v 13 Qinee minara irisee maaqi qimasee qimannimidaqa, maasa sia faiqí irirana uqannifiqee maria iriranau qimannimidau, Anutuna maraquna maasa uqaqifiqoo ufana inni qimannimidaqa. Maasa innaarunaindaraa ainainara Anutuna maraquna maroo fasiqa anaaseesa qimannimidaqa mi ufana kai inni qimannimidaqa.  
\v 14 Anutuna maraquna siai fasiqa anaaseesa sia amana Anutuna maraquna faiqí anaasee dadaaqimari afeekana nimimarina sia amana mareefaranoo. Misa mi ainainna qafamaseeqa sia minara iridaqa furufara ainainee qidaqa. Sia mina oosana iridaqa maraquna maree mariasa kai amana mina oosana aiquqummaseeqa irifaranoo.  
\v 15 Maraquna maree maria fasiqanaaseesa innaarunaindaraa ufa aina aiqama raina raina masee irimarifaranoo. Maraquna siaisa kaiqeesa sia amana maraquna faqaasa maree mariana oosana irifaranoo.  
\v 16 Ooqeenaa tamummaqara fasiqa minara maaqi qimasee akara rinau.  
\q1 Yafee moo fannoo Karaambaiqa iriranakinaana iriannoo fee. Yafee moo fannoo Karaambaiqa aamuaqira ufa amana amiannoo fee, sia amana moo fannoo miqiannoo.  
\p Tamummaqara fasiqa ufara qinee Pauroosa minara maaqi qidaqa. Sia moo fannoo amana aamuaqira ufa Anutuna amiannoo mifa nimimarifa marinara. Maasa kai asauku mundirana irirana doo mareeqa.   
\c 3  
\s1 Aiqamausa Anutunaindi kai maridaqa.  
\p
\v 1 Oo Koorinti maqannaasa qini qikaqaafasaa ooqai qinee inni maqusai mariaafanausa, innee sia maraquna faqaasara foora faiqí faiqi iriranamau fimarufaqa qinee sia maraquna iriramau inni qimannimiqiafana. Inni irirafa maa maqa maaqanasaaqaraa irirafa inniki marinara Yisuna saqarikiranaki innee sia faiqiara foora mariafanoo faiqi aanaaqiara foora aamina mariafanoo.  
\v 2 Innee sia faiqiara foora mariafanoo faiqi aanaaqiuqa irirana fooqaasa marufaqa qinee sia narana uqanna nimiqiafana naammara foora inni nimiqiafana, innee narana uqanna sia amanaikufaqa ninuqiqiafana. Doo maqee aukuana faqa sia amana innee narana naaqaa inoo maridanoo.  
\v 3 Innee maa maqa maaqanasaaqaraasa naanna ree mariasa aaqaida miqimarifanoo, innee nariara nariara rairai qidaqa ufa rainee marianannai maa maqa maaqanasaaqaraasa naanna ree mariana aaqarafa kooroo idanoo.  
\v 4 Innikiqari Koorinti maqusanaa Yisuna ufara suqimariasakiqari moo fannoo qinee Pauroona aiku asauku marida mina ufamau fida fee qidanoo kafaa moo fannoo qinee Apooroosana aiku asauku marida mina ufamau fidee qimasaida aaqaida miqi qimariafanoo sia fee mi oosanafa innikina maqasaaqaraasa naanna ree mariana kooroo idanoo fee. Doo kooroo idanoo.   
\p
\v 5 Apooroosa faqa Pauroosa faqa maaqanda uriqararaqandee maridee sia uriqararaqanda marisa maridaqa. Maaqanda fifau Anutuna ainainira fasiqaqara kai maridaqa, inni rarisameeqee Yisuna saqarikiranaki quqee mariaqanda kai maridaqa. Maaqanda karaambaiqa saika aadu aadu nimimarunnaqanda kai maridaqa.   
\p
\v 6 Qinee Koorinti maqusai inni iriranaki qaqammara foora aaqasaafananoo Apooroosafa aniree nammariara foora adiasoofanoo Anutufa kambiqarana aminau.  
\v 7 Aaqee mari fasiqafa faqa nammari adiee mari fasiqafa faqa kai fifau maridanoo, Anutufa kambiqarana amufa mifa anoona maridanoo.   
\p
\v 8-9 Aaqee mari fasiqana saika faqa nammari adiee mari fasiqana saika faqa amana amana kai maridanoo. Anutufa naadu naadu narí ainaini marina akiaqara feefauru kasooqaqee nimiannoo. Maaqanda moodaanaki Anutuna ainainiranaki maridaqa ainainidaqa innee afuqa qambaanai Anutuna ainainirafa mariafanoo. Qinee Pauroosa moo ainaina kikiqa usuanaura, innee Koorinti maqannaasa Anutuna maaqa mariafanoo.  
\v 10 Anutufa maaqa usakee maria iriranna qini qimusa maridaqa maaqa usakarana akoofasa qinee faakana faqa maaqa atuna faqa arusaunanoo moo fannoo asaanidanoo. Qinee andeeqasee maaqa atuna arusaunanoo moo fannoo sia fifau maaqa asaaniannoo andeeqee mari fasiqafa ireeda amiqimaseenoo kai maaqa asaaniannoo.  
\v 11 Anutufa narí asauku mundirana Yisuna doo moodaa faakana narí maaqaki rakiqeenoo, sia amana moo faakana rakiarafa mariannoo doo mifa kai mariannoo.  
\v 12 Oosana oosana maaqa usakee mariasara foora maridaqa akaqausa amiqimasee faiqí anaasee dadaaqidaqa mapuku nimaqaidaqa, akaqausa sia amiqimasee mapuku nimaqaidaqa moo fannoo koora fooqaa iranannai maaqa asaanimarifa amiqirafa maaqa asaanimarifa maridanoo, moo fannoo mina oorudupirana siruaannai maaqa asaanimarifa maridanoo. Moo fannoo mina oorudupirana firaa munnimma aqimaria ooninannai asaanimarifa maridanoo. Moo fannoo mina oorudupirana saqarinnai asaanimarifa maridanoo. Moo fannoo mina oorudupirana eefeedannai maaqa asaanimarifa maridanoo. Moo fannoo misa oorudupirafa fiaarunnai maaqa asaanimarifa maridanoo. Inni Koorinti maqannaa Yisunara qimannimiqa maaqa atuna rakiqannimaqaannee qiafanausa mariafanoo maaqa asaana imariasara qunnana misa miqooqari innikina ookaamandee maaqa asaanara foora moo faqa moo faqa qidaqa.  
\v 13 Asauku mundirafa qumuaninna aukuannai maaqa asaanira oosana aiqamausa nifusaa kooroo iannoo. Mi faasaannana Anutuna ida fannoo aiqama fasiqa ainainirana qamafinoo kooroo iannoo. Mi idafa aiqamausa ainainirana amanamandainanoo mina anoona kooroo iannoo.  
\v 14 Faiqí moo fannoo maaqa atunasaa ookaamandee usakee marina ida sia qama taikasainanoo Anutufa mina qafamaseenoo mi fasiqanara amiqimmandee usakee maqi qimasee feefauru amiannoo.  
\v 15 Faiqí moo fannoo mandainainannai usakee marina, ida qama taikasainanoo sia feefauru amiannoo. Mi fasiqafa mifa kaqisamu innaarunai asumu mariranaki fuannoo maaqakiqari raudamakinoo idauru aanaaqi ainaina sia uqirafa kaqi sandaannoo.   
\p
\v 16 Innee maana iridee sia fee iridee innee Yisuna ufara suqimariasa Anutuna amaana maqara foora mariafanoo, Anutuna maraquna fannoo narí maaqara foora inniki maridanoo.  
\v 17 Moo fannoo Yisuna ufa suqimarinanaki misa raiqara ufee oosana oosana manda ufa niminaqa raindaanifanoo Anutuna maaqara foora rapee inanoo Anutufa mi fasiqana kuridisaannoo. Anutuna amaana maqa naaquqarafa anukarafa maridanoo innee misa mi maqafa mariafanoo.   
\p
\v 18 Sia moo fannoo narí narí akaru qiannoo. Inniki moo fannoo nariara maqasaa fasiqaki irirana faqasee qimarifa narí maqasaa irirana amooidanoo sia anoona irirana faifa, mi fasiqafa nariara ureeqafinoo reendeenamafinanoo miqoo amana anoona irirana oosana araannoo.  
\v 19 Maqasaa fasiqauqa iriranee qimariana Anutufa minara furufara qidammiafoo qidanoo. Ooqeenaa tamummaqara fasiqa minara maaqi qimasee akara rinau.  
\q1 Anutufa irirana faqaasa qumaree nári firaa iriranaki ufaanakiara foora naridanoo.   
\p
\v 20 Tamummaqarafa moo fannoo minara maaqi qimasee akara rinau.  
\q1 Karaambaiqa firaa irirana faqaasa iriranara fifau ainaina maridanoo fee qidanoo.   
\p
\v 21-23 Innee Koorinti maqannaasa minara irisee sia moo fannoo faiqí irirafa afeekainainara irisee amooqiannoo. Innee Koorinti maqannaa Yisuna ufara suqimariasa kaaqa rakeekaamasee akaqausa Pauroosanaindifee qidaqa akaqausa Apooroosanaindi fee qidaqa akaqausa Peetooroonaindi fee qidaqa aaqaida miqi qimariafanoo. Innee sia misaindi mariafanoo misa innindi maridaqa. Aiqama maa ainainna inni dadaaqi mari ainainausa maridanoo. Pauroona faqa Apooroosana faqa Peetooroona faqa maa maqa maaqafa faqa kaqi marirana faqa kuqirana faqa maqee mariana faqa naaru marinnana faqa aiqama maa ainainausa inni dadaaqi mari ainainausa maridaqa innee asauku mundiranaindi mariafanoo kafaa asauku mundirafa Anutunaindi maridanoo. Innee minara irisee fifau ammuqundari qidaqa Pauroonaindi fee Apooroosanaindi fee Peetooroonaindi fee qimariafanoo Anutunaindi maridammia.   
\c 4  
\s1 Pauroofa nariara asauku mundirana ainainira fasiqee qinau.  
\p
\v 1 Innee Koorinti maqannaasa maasara maaqi qiaqa. Asauku mundirafa Yisufa maasa mina ainainira faiqiuqa Anutuna ooqai kukeeqara anoona ufara rakisiaqee qimaqoosa maridaqa.  
\v 2 Ainaina faqaafa narí ainainasaa rakisi mari fasiqanara akooqoo andeeqara fasiqa kai maraannoo. Narí ainainasaa amiqimasee rakisi marina kai narí ufa irimari faiqina kai mara quqaannoo. (Qinee Pauroosa Anutuna rakisira faiqiara foora maridaqa. Qinee inniki ainainidaqa qeeqa irirana qeeqa uriqararanasaa rusisee inniki ainaini mariqiafana.)   
\p
\v 3 Qinee inniki ainaini marunaqa innee qini ainainirana amanifaqa sia inni qimaniranara irianaura uriqararafa Anutuna ufa kai irianaura maqasaa fasiqa moo fannoo iriranannai qini ainainirana amanifaqa qeeqa uriqararana mina ufara kai irianaura. Qinee qeeqa faqa qeeqa ainainiranara andeeqaida fee sia fee andeeqaida fee qimasee sia qeeqa iriranara irianaura qini ainainirana andeeqee mari uriqararafa kai mina iriranara kai irianaura.  
\v 4 Innee qiniara qiafanoo qiqa daakirafa sia ummaara darifaqa kaqimbidaqa. Qini daakirafa qini darinoo fee sia fee darinoo sia qiniara andeeqara ainainira fee qidanoofau Karaambaiqa mifa kai qini saikara iridanoo ufa qiannoo.  
\v 5 Innee minara irisee sia maasara kasaaqaindari ufa qiaqa. Karaambaiqa innaarunaindari quminna faasaana kai taikara ufa qimannimirafa mariannoo. Mikari karaambaiqa sia ooqai akooqoo mariu irirana kukeeqara irirana oosana oosana irirana minakinaana uqeereeqeenoo aiqamausa nifusaa kooroomannimaqaannoo. Aiqama fasiqa anaasee naundurakinaa oosana auqeefandiannana deedaqirana akooqoo aiqamausa nifusaa mara quqasainaqa qafeefaranoo. Mikari aiqama fasiqa anaasee nári maqasaa andeeqara nirana marirana amana kai Anutuna amooqirana mareefaranoo. Mikari Anutufa maasa saika oosana aiquqummasee minara ufa qiannoo. Maasa mina ufamau fimariafanausa marunnanara innee sia ufannai maasa saika kasaaqaindari aruaqa.   
\p
\v 6 Oo qini qikaqaafasaa mariasa innee aiqamausa andeeqasee Anutuna akara ufamau fuaqee qimasee Apooroosasandiri maaqanda kikiqususee qimannimiaqeera maaqanda qimannimiranara qiqa. Anutuna ufa inni indaarunnikamma nimaqee mariasara sia moora amiqira fee qimasee moora manda fee qimasee rairaiqiaqa sia miqiaqa.  
\v 7 Inniki akaqausa náriara uriqararausee qimariana unna qimariasa mariafanoo. Yafee mi uriqararana niminoo fee, Inniki mari ainainna aiqama Anutufa kai niminau. Innee minara iriaqa, naqaa fee qifaqee qeeqa kai maraafanausa firaaqoo uriqaraqa maridee qidee. Anutufa kai aiqama ainaina niminau.   
\p
\v 8 Innee Koorinti maqannaasa unna qimasee aiqama ainaina maraafanausee qimariafanoo, innee inneeqara unna qimasee ainaina faqaasee qimariafanoo, doo innee unna qimasee karaambaiqara foora mariafaqa maasa sia. Innee Koorinti maqannaasa karaambaiqa mariaqaana. Innee kuqaa karaambaiqa marifaqau maasa maqee mandainainaki marunnana taikaseefau inni faqa kuqaa karaambaiqaikiqa marini.   
\p
\v 9 Maasa Yisufa niqiqoo fasiqausa Anutufa ureeqarana nimiqoosammia maqi qimasee qeeqa kai oonu mafi iridaqa nimiqaifaqa maasa minaki maridaqa. Maasa namuqaa nisaukukiara foora marianaqa aiqamausa faiqí faqa qangiroo faqa nifusaa ataasa ataasa qidaqa darifandinausa miqirausa maasa maridaqa.  
\v 10 Maasa niqiqoo fasiqausa asauku mundirana ufasaara furufarirausee qimariafaqa innee Koorinti maqanna Yisuna ufara suqimariasa asauku mundirana ufakina innee inneeqara irirana faqaasee qimariafanoo. Maasa Yisuna ufa qimannimi marunausa kudoosaapeera foora unaqa innee nimudaanai qidaqa afeeka mariafanoo. Maasa faiqí nifusaa fidiaqaa imariasara foora maridaqa innee misa nifusaa uriqararausa mariafanoo.  
\v 11 Maasa Yisufa niqiqoo fasiqausa ooqai faqa maqee marunnana faqa daara raidanoo nammariara sia amanaikidanoo maasa manda qamunna rakeekaa irana afisidaqa, misa maqee maqee unnaanasamu oonisamu saamusamu maasa daridaqa maasa maaqa siaisa kaqi maqusamau faiqaqa nidaqa.  
\v 12 Maasa qeeqa kadaapiriranannai tooqaamu darirananai minannai ainainamasee naidaqa. Faiqí maasa diquraraafaqa maasa amiqi amiqimmannimaqaidaqa. Misa mandaikamma qimaqaafaqa maasa kaqi kai mina maraqa fidaqa.  
\v 13 Misa mandufa maasara qiafaqa maasa amiqira ufa kai misa qimannimidaqa. Maasa maa maqa maaqanakinaasa madaapeera foora maridaqa ooqai miqiqa aniusa maqee faqa aiqama maqannaasa madaapee aqi maria madikara foora marisa maridaqa.   
\p
\v 14 Qinee Pauroosa inni Koorinti maqusanaasa sia nisaurirana nimiaqeera mi ufana qimannimisee akara ridaqa, qeeqa qimuqusa qeeqa faiqi namu mariafaqara foora naamua qidaqa.  
\v 15 Innee asauku mundirana ufamau fidaqa inni ufasaa rakisirausa fuki faaki qimariasa nukudara foora mariafaqa qinee moodaa inni nikausara foora maridaqa. Ooqai indaaru qinee amiqira fasaasa ufa maree aniree inni Koorinti maqannaa nimiafanaqa irisee asauku mundirana Yisuna ufamau fimariafaqa miqiafannanara inniqa nikausaikiqa maridaqa.   
\p
\v 16 Qinee minara irisee qeeqa qimuqusa ookiqari reendeenamandee inni qimannimidaqa innee inni nikausa qini daanna raaqa.  
\v 17 Innee qini daanna raanee qimasee Timootina aqiqaananoo innee iannai fuannoo. Maaqanda karaambaiqa ainainiranaki maridaqa mifa qini qimuqusa andeeqara qimaakuara foora maridanoo. Mifa innee iannai oonuree qini fuka marirana asauku mundirana Yisunaki marira oosana qimannimiannoo. Aiqama maqusa maqusa nidaqa Yisuna ufa irimariasa suqusaida naamuaqimaqaafannana Timootifa mi ufana inni naaqoo auqaannoo.   
\p
\v 18 Innikiqari akaqausa qini Pauroosara sia kafaa mai aniree maasa qiqafaannoo qifoo qimasee noori uqeerarausa nimariafanoo.  
\v 19 Karaambaiqa eedoo qinaqa innee iannai oonu nindafaanaura. Oonureeqa innikina noori uqeeree mariasa sia misa náriara firaa ufa qinnanara oonu qafaanaura misa auqi maria ainainna kai marinaqa qafaanaura. Anutuna afeeka misaki marinaqa auqeemarinnana kai qafaanaura Anutuna afeeka sia misaki mari ifoo qidaqa.  
\v 20 Anutuna innaarunai ququsaki fimariana maa maqanasaa marirana sia fifau ufasaa mundinoo maridanoo Anutuna afeeka dadaaqinoo auqiranasaa mundinoo maridanoo.  
\v 21 Oo Koorinti maqannaasa Yisuna ufa irimariasa aaqeemariana inneeqa kai iriaqa, unnaanasamuara foora uqirausee anianauree inniara qimuqusirana faqa reendeenirana faqa miqandee uqirausa anianauree. Inneeqa kai irisee inneeqa marirana andeeqasee mariaqa.   
\c 5  
\s1 Yisuna ufara suqimarunakina mandoosana kambiqanau.  
\p
\v 1 Oo Koorinti maqannaa Yisuna ufara suqimariasa inni ufa moo iriqa firaa manda oosana inniki marifa aamina maqannaasa firaaqoo mandoosana maree mariasa faqa sia maree maria oosana mareenoo inniki Yisuna ufa irimariasaki moo fannoo narí anoona aqoonnana narí akoona anaaqa mareenoo.  
\v 2 Mi ainainafa inniki marifaqa naqi fee mandee noori uqeerasee inneeqa nifaaqa amooqidee minara innee nisauruaqa, inni naunduraki soofaaraikinoo mariani, mi fasiqana inneeqakinaana naqiraree kaqi maridanoo, innee suqimarianakiqari mi fasiqana aqiqaaqa.  
\v 3 Qinee qeeqara qianaura kuqaa qinee moosaa nianai marida qini maraquna inni faqa maridanoo miqoo marifaqa karaambaiqa Yisuna auqusaa doo mandoosana marai fasiqana aqiqara ufa qiqa qinee inni faqa maridaqara foora doo aqiqara ufa qiqa.   
\p
\v 4-5 Innee moodaanaki suqimarifanoo qini maraquna faqa inni saimbaqa suquannoo, Karaambaiqa Yisuna afeeka miqoo maasa faqa marinaqa innee mi manda fasiqana mareeqee inni suqiranakiqari aqiqaifanoo mi aiqaranannai Sadannana amifanoo mina apata kuridinanoo karaambaiqa quminna faasaana mina aundurakinaana kai asumu maraannoo.   
\p
\v 6 Oo Koorinti maqusanaasa innee inneeqara kaaqa andeeqarausee qimasaida inni noori uqeerara oosana sia andeeqanoo maridanoo. Innee maa ooqeenaa ufana iridaqa maaqimminoo maridanoo. Narana moodaa qoo suqu quqasainanoo kaqikaafa moodaa putaa inanoo aiqamafa minasaaqaraana putaa iannoo.  
\v 7 Inneeqakinaana mi manda fasiqana maraqusaifanoo aiqama andeeqanoo mariani. Miqoo innee amiqira naranara foora mariaqa. Mi manda fasiqana aqiqaranara qidaqa ooqai Mooseena aukuana ainnaaqarara qoomaqa maruna kikiqususee sipsipa aanaaqi Anutuna suqa amisee nariqa ooruku fooqaa ira ainaina nariqa maaqakinaana aiqama doo maraquseeqa ainnaaqarara qoomaqa sakasee neemariqau. Doo maqee maria aukuana asauku mundirana aunirira saqarisaa sipsipa aanaaqiara foora doo kuqa arusee Anutuna amisaafanoo doo maasa mandoosana taikaqiseenoo maasa marirana faqa andeeqa qiseenoo maasa putaaira oosana taikaqisaifanoo aidaaqareenoo minara maasa aidaaqarara qoomaqa deedaqinoo marifoo qidaqa.  
\p (Isaraee maqannaasa ooqai ainnaaqarara qoomaki ooruku siai feemu kai neemariqau. Maasa ooruku moo maqee maridanoo misaindi moo marinau.)   
\p
\v 8 Doo maqee maasa ainnaaqarara qoomaqara foora suqufi naannana suqufi ooruku siai feemuara foora naanaura. Naranaki mari oorukufa manda oosanara faqa faiqí anaasee narí ummuari narí ummuari imariana faqa kikiqusidanoo. Ooruku siai feemu kikiqusimariafa Yisuna ufamau fidaqa nisakadiki ikairi sia marirana faqa anoona ufa qimariana faqa minara qidanoo. Maasa putaaira oosana taikaqisoofaqa maqee amiqira naranara foora putaaira oosana faqa aaqara oosana faqa taikasee nisakadiki ikairi siaisa anoona ufa qimariasa naanna ramafi marianaura.   
\p
\v 9 Qinee Pauroosa ooqai inni Koorinti maqannaasa Yisuna ufara suqimarusa pasa akara rumannimaqaafannana. Mi pasanaki inniara faiqí anaasee narí ummuari narí ummuari mariasa faqa sia aqoondikamma nimaqararee qimasee misara eerairiaqee qimasee akara rumannimaqaqiafana.  
\v 10 Innee akaqausa qini mi ufana irisee aaqaafanoo maqee qinee qiafannufana kafaa kooroo ianaura. Innee Koorinti maqusanaasaki sia Yisuna ufa irimariasa kai maridaqa aaminauqaindi faqa moomoosa maridaqa. Qinee sia inniara aamina fasiqa anaasee narí ummuari narí ummuariqa nimaria fasiqa anaaseeuqa faqa kaaqa ainainara rimaria fasiqa anaaseesa faqa unna ufa qimasaida ummuari maria fasiqa anaaseeuqa faqa tumunnai auqi maria afaannara innaaru qimaria fasiqanaaseeuqa faqa sia mi aiqama ainainna maree mariasara eerairiaqee qiqa, innee eerairiani qinnana moomoosa maa maqa maaqanasaa marianara fasauki fee quqoonasaa fee ooru atooqafi foora.  
\v 11 Sia qinee miqi qiqiafana maaqi qiqiafana. Inniki moo fannoo nariara Yisuna ufa irimarinafa inni nikaqaafasaa maridee qinafa faiqí anaasee ummuari mari fee kaaqa ainainara rimari fee tumunnai auqira afaannara innaaru qimari fee mandufa qidanoo faiqí anaasee niqi mari fee nammari namasee furufari mari fee unna qimasaida ummuari mari fee miqira fasiqa aanaaseera Yisuna ufa iri marianaki maria fasiqa anaaseesara eerairidaqa misa faqa sia ooqu marifi narana naaqa, misasaaqaraafa innisaa aqufuandoora.   
\p
\v 12-13 Yisuna ufa sia irimariasa aqoosai mariasa sia narira ufa qinee nimmianaura mi saikafa sia qini saika maridanoo. Anutufa kai misa narira ufa nimiannoo. Inneeqa kai inneeqa nikaqaafasaa kimariana Yisuna ufara suqimariasa aaqaifaqa ufa nimirafa innindi mariannoo. Ooqai tamummaqara fasiqa moo fannoo minara maaqi qimasee akara rinau.  
\q1 Inniqa suqiranakiqari mandoosana maree marina aaduma mara quqaaqee qidanoo.  
\p Qinee Pauroosa minara inniki mandoosana maree mari fasiqana aqiqaaqee qidaqa.   
\c 6  
\s1 Yisuna ufa irimarusa kaqiqee siaasinnai fimariqau.  
\p
\v 1 Innee Koorinti maqannaa Yisuna ufa irimariasa inneeqa nikaqaafasaa kimariana mara maree kaiqee siaasinnai mara maree fimariafanoo. Inneeqakiqari aneenna akaqaafasaa kimariannana faqa ufa raineenana, Yisunara sia irimarinna siaasi finnai sia maree fua, sia uqanna miqiaqa aaqaida miqi mariafanoo. Anutuna ufa irimariasa kai mina andeeqaaqaana.   
\p
\v 2 Kasooqaqee Yisufa qumuaninna aukuana maqee mariaqoo Anutuna faiqi namu mi aukuanna aiqama maa maqa maaqanakinaasa siaasiuqa marifaranoo sia fee minara innee iridee. Mi aukuanna innee Yisuna ufa irimariasa aiqama maa maqa maaqanasaaqaraasa aaqarana oosana oosana aaqarana andeeqanniseefaranoo, doo maqee inni ufa suqiranaki aaqarana marasaifaqa aiqama maa maqa maaqanasaaqaraasa andeeqannisee fandinausa mariafanoo inneeqa kai amana andeeqeefaranoo.  
\v 3 Mi aukuanna maasa siaasa maridaqa qangiroo ufa faqa irianaura, sia fee innee minara iridee. Doo maasa miqidaqa maqee marunna aukuana aaqarana marasaifaqa amana irianaura.  
\v 4 Innee miqi mariana inniki moo mandufa kambiqafinaqa innee mina mareeqee aqoosai mariasa nimifaree.  
\v 5 Nisauruaqa, sia fee inni Yisuna ufara suqiranaki moodaa ufa andeeqarana akoofasa maridanoo fee, inniki maridanoo sia fee mi fasiqafa amana ufa rainee mariaqanda ufa andeeqaannoo fee maridanoo amana andeeqannisaannoo.  
\v 6 Innee Yisuna ufara iri mariasa sia andeeqannisee mariafanoo, inneeqa nikaqaafasaa kimariasa mara maree sia Anutuna ufa iriasaki quqee mariafanoo aaqaida miqi mariafanoo.   
\p
\v 7 Inniki koota ufa marinaqa kaqi siaasinnai maree fimariafa innee Yisuna ufamau fimariana minasaaqari aikatamaki kaqinni aqufuanara kooroo idanoo. Yisuna ufa irimarifa moo fanoo mandufa aminana kaqi iriaqaana Yisuna ufa moo fannoo irimarifa ani ainaina ummuarinnana kaqi minnisaaqaana.  
\v 8 Inni sia andeeqasee maridaqa kaqi maree mariafanoo narinni narinni aaqamannimaqee mariafanoo narinni narinni ainainamma ummuaramasaidaqa siaasinnai maree fidaqa, innee kaiqeesa miqimannimaqee marifanoofau mifa faqa aaqarafa marini, inneeqa nikaqaafasaa kimariasa kai miqimmannimaqee mariafanoo firaaqoo aaqaida miqimariafanoo.   
\s1 Mandoosana maree mariasa sia uqanna innaarunai fifaranoo.  
\p
\v 9-10 Anutufa narí ququsaki naaru marirana sia mandoosana maree mariasa nimiannoo sia fee innee minara iridee. Innee sia inneeqa nikaruqimasee mandoosana maraqa nidaqa innaarunai firaree qiaqa. Dapi maraqa nua fasiqa anaaseesa faqa tumunnai auqira afaannara innaaru qimariasa faqa moona afaaqi anaaqa narí ummuari narí ummuari mariasa faqa faiqí anaasee aqoonna fasiqa anaasee aafeeqaidanoo mi oosanna maree mariasa faqa ainaina ummuari mariasa faqa kaaqa ainainara rimariasa faqa nammari namasaida maqee maqee furufari mariasa faqa manda ufa qimariasa faqa unna qimasaida ummuari mariasa faqa mi oosanausa maraqa nuasa faqa sia uqanna Anutuna innaaruna ququsaki keeqeefaranoo.  
\v 11 Koorinti maqannaasa innee akaqausa miqi marusa marufanoo inni mi manda ainainafa doo rukanoo maridanoo, nári nifaaqara Anutuna amidee qimariasa mariafanoo. Asauku mundirafa Yisufa maasa karaambaiqa minasaa rusiranannai faqa Anutuna naaquqara andeeqara maraqunannai faqa miqandannai innee Anutuna afusaa andeeqaranaki mariafanoo.   
\s1 Inni nifaaqa fannoo Anutuna amooqiranaki andeeqaranaki mariani.  
\p
\v 12 Moo fannoo nariara maaqi qiannoo qinee amana maridaqa aiqama ainaina mandainainee qimariana faqa amana maraanaura, anee miqi qianaqa qinee minara maaqi qidaqa kuqaa anee aiqama ainaina mareennaranoo moomoo ainaina sia ani dadaaqiannoo ani kuridiannoo. Qinee qiqa irirafa maaqi qimasee qimmiridaqa qinee akooqoo marida aiqama ainaina amana maraanauree qimmiridaqa qinee minara maaqi qianaura. Moo mandainaina fannoo qini mareeqee narí marinaki quqaqisaifanoo mi maraqunafa daakufuandoora rufiee sia mina maraanaura.  
\v 13 Faiqí moo fannoo anaasee ummuarianeera qimasee mina kikiqa maaqi qimasee usuannoo narana fannoo aranaqumundi maridanoo. Kafaa arana fannoo naranaindi maridanoo. Mi ufana saaqari mifa unna qimasee maaqi qimasee ookaa iannoo, anaasee faiqindi marifaqa kaqi maraanauree qiannoo. Qinee Pauroosa minara maaqi qidaqa Anutufa narana faqa arananda faqa naríndi naríndi quqasoofa kasooqaqee miqanda kuridiannoo maasa faiqí qifaaqa sia ummuariranaindi maridanoo Karaambaiqaindi andeeqaranaindi maridanoo kafaa karaambaiqa maasa qipatasaa rakisiqimaqeenoo amiqimmaqimaqaidanoo andeeqara marirana nimimarifa marinara andeeqara oosana kai maraaqa.   
\p
\v 14 Anutufa narí afeekannai maasa karaambaiqa kuqiranakinaana uqeera quqoofa mifa kai maasa qifaaqa faqa kuqiranakinaana uqeera quqaaninnanara inniqa nifaaqaki andeeqara oosana kai maraaqa.   
\p
\v 15 Inniqa nifaaqa asauku mundirana afaaqa atiuqa maridanoo. Amanee asauku mundirana afaaqa ati mareeqee dapi maraqa nua aanaaseena afaaqasaa quqaanauree oo sia uqanna amana miqianaura.  
\v 16 Faiqí moo fannoo narí afaaqa mareenoo dapi maraqa nua anaasee finnai finanoo mi fasiqana afaaqa fannoo mi anaaseena afaaqandiri moodaanaki atooqafuannoo. Oo innee sia minara irimariafanoo. Ooqeenaa akara minara maaqi qimasee akooqoo qidanoo  
\q1 Miqanda moodaa nifaaqaikamambi maruqanda marifaranoo.   
\p
\v 17 Qinee Pauroosa minara maaqi qidaqa moo fannoo karaambaiqasaa apamambi marinafa karaambaiqa amuqusandiri moodaanaki apainoo mariannoo.   
\p
\v 18 Faiqí anaasee narummuari narummuariranara eerairiaqa. Moo fannoo oosana oosana mandainaina marainafa mi manda ainainafa sia narí afaaqa mandaikammamaqaannoo. Faiqí moo fannoo moo anaasee ummuarinoo narí afaaqa uqanna mandaikamma maqaidanoo.  
\v 19 Innee sia fee maanara iridee, innee doo irimariafaqa qimannimidaqa inni nifaaqa Anutuna naaquqara andeeqara maraquna amaana maqa miqirafa maridanoo. Anutufa narí maraquna innikina quqasoofanoo marinara innee inneeqa nifaaqa Anutuna amooqira mariranaki quqasaifanoo mariani. Inni nifaaqa sia innindi maridanoo.  
\v 20 Anutunaindi mariafanoo. Mifa narí amaakunnai firaa feefaurumasee inni marasee nariara quqaqoosa mariafanoo minara innee inniqa nifaaqa Anutuna amooqira mariranaki quqasaifanoo mariani.   
\c 7  
\s1 Faiqí faqa anaasee faqa sia narí minnisee narí minnisee iaqa.  
\p
\v 1 Innee Koorinti maqannaasa pasa akara rumasee oosana oosana ainaina qiniara iree mariafanoo. Maqee innee akaraki iree maria ufana qinee inniqa qimannimianaura.  
\p Inneeqa faiqí anaasee nimundaranara qiafaqa maaqi qimannimianaura. Faiqí nariara adeedaana maridanoo andeeqarafa mariannoo.  
\v 2 Kafaa mina atiki maaqi qianaura. Faiqí anaasee narí ummuari narí ummuarirafa moomoo marinara aiqama fasiqauqa nári ninaaqa maraaqa, aiqama aanaaseeuqa nári nifaaqmaaka marasee andeeqasee mariaqa.  
\v 3 Afaaqi fannoo narí anaaqa aidimarina amiani miqikai inoo anaasee fannoo narí afaaqi aidimarina amiani. Aiqamaqara nariara nariara nidimari ainainna narí ami narí ami iaqa.  
\v 4 Anaasee fannoo sia narí afaaqa rakisirafa maridanoo narí afaaqi fannoo mina afaaqasaa rakisidanoo, miqi kai masee faiqí fannoo sia narí afaaqara rakisirafa maridanoo narí anaaqa fannoo mina afaaqasaa rakisidanoo minara qinee qidaqa nariara nariara nidimari ainainna narami narami iaqa.  
\v 5 Minara irisee sia innee nariara nariara qaoo qiaqa. Anutunara kisaaqasaa amiqimasee innaaru qiannee qimasee faiqí faqa anaasee faqa moodaaqooqara ufa qimaseenana naquma amaanee marasee akeeka masee aura masee maraanauree qimaseenana aadu aadu mambinana Anutunara kisaaqasaa innaaru qiaqa. Innaaru qimaseenana kafaa moodaanaki kiaqa kisaaqasaa aadu aadu ina mariannanara Sadannafa nimanamandee qafaina sia afeeka marina eedoo qifoora minara kafaa moodaanaki kiaqa.   
\p
\v 6 Faiqí nári ninaaqa mararanara faqa anaasee nári nifaaqmaaka mararanara faqa qunnana sia aranaiqi afeekaikamandee qiqa kaqi qimannimidaqa marararee qimaseenana doo maraa.  
\v 7 Qiqa irirafa maaqimminoo maridanoo. Aiqamausa qini daanna ree adeedaana mariaqaana. Anutufa narí irirananai naadu naadu marirana nimifaqa maridaqa faiqí moo adeedaana marinanee, faiqí moo anaasee faqaafa marinanee Anutufa kai nimidanoo.   
\p
\v 8 Doo maqee maanaaqa kumaaraa uruna mariasa faqa faiqí anaasee kuqufuafaqa adeedaana mariasa faqa inni qimannimidaqa innee qini daanna ree adeedaana mariqa amiqirafa marifaranoo.  
\v 9 Innee sia adeedaana amanaikiqa doo amundaaqa. Anaaseera faiqiara ani aundurai idara foora atakuqinana doo sia amanaikinoo amundarafa idara foora atakuqirana uriqararafa maridanoo.   
\p
\v 10 Qinee nimundarausara naamuaqira ufa qimannimianaura sia qeeqaindifau karaambaiqaindi qimannimianaura. Amundara anaasee moo fannoo sia amana narí afaaqi minnisarafa maridanoo.  
\v 11 Minniseenoo adeedaana kai mariani. Adeedaana mari naisia quandaki narí afaaqi kai kaifaa maraannoo. Faiqí faqa miqikai inoo sia narí anaaqa minnisaani.   
\p
\v 12 Doo adeedaana ufa qimaseeqa doo akaqausa qimannimianaura, sia karaambaiqa ufafau qimannimianaura qeeqa ufa qimannimianaura. Faiqí moo fannoo Yisuna ufa irimarifa mina anaaqa sia Yisuna ufa irimarifa maridanoo mi anaaseefa narí afaaqi faqa amiqimasee marinanoo sia mina afaaqi fannoo aqiqaannoo mina faqa mariannoo.  
\v 13 Anaasee moo fannoo Yisuna ufa irimarinafa marinanoo mina afaaqi sia Yisuna ufa irinafa maridanoo kaqi narí anaaqa faqa amiqimasee maridanoo mi anaaseefa sia narí afaaqi aqiqaannoo.  
\v 14 Yisuna ufa irimari anaaseefa narí afaaqindiri moodaa fara maqi mafuanara mi anaaseefa narí afaaqi mareeqeenoo Anutuna aqoondikiranaki quqaidanoo miqidanoo. Kafaa Yisuna ufa irimari fasiqafa narí aanaaqandiri moodaa fara foora mafuanara narí anaaqa sia amaana ufa irimarina maramareenoo Anutuna aqoondikiranaki quqaidanoo miqidanoo. Sia miqinoo marinanoofau miqanda faiqi namu aamina maqannaara foora mariaqini, maqee Anutufa misa faqa aqoondi kiannoo.   
\p
\v 15 Faiqí fee anaasee fee sia Yisuna ufa irinafa narí kai minnisee finafa amana saina fuani, sanda moo fannoo sia inniara sia rakisisimma umaraaqee qidanoo. Anutufa inniara sia kaukaataqiranaki mariaqee qidanoo asooaranaki mariaqeera naarameeqee narí ququsaki quqaqaifaqa minara qimannimidaqa, saifanoo fuani marinoo mariani.  
\v 16 Yisuna ufa irimari anaaseefa ani afaaqi ani faqa maridanoo mifa faqa innaaruna asumu marirana paquriannoo fee sia fee paquriannoo. Kafaa Yisuna ufa irimari fasiqafa ani anaaqa ani faqa maridanoo mifa faqa innaaruna asumu marirana paquriannoo fee sia fee paquriannoo.   
\s1 Innee Yisuna ufa iriraree qimasee anukamuqooqari doo minaki kai mariaqa.  
\p
\v 17 Qinee Pauroosa aiqama maqusa maqusa nidaqa maa ufana Yisuna ufara suqimariasa qimannimidaqa. Innee aiqamausa sia moo saika auqaaqa Karaambaiqa inniara mariaqee inna saikana kai maraaqa, Anutufa inni naaroofaqa Yisuna ufa irirara anukamuqoo maroo saikana kai maraaqa sia moo kiaqa mi saikanaki kai mariaqa, sia maqee moo kiaqa.  
\v 18 Yuda maqannaa fasiqa fannoo Anutuna ufa irisee Yisufinnai anirainafa sia mini narí Yuda maqannaasa fainanduqirana sia asauruani saina kaqi mariani. Anaamuru fasiqa moo fannoo Yuda maqannaasa fainanduqirana siaifa Anutuna ufa irisee aninafa sia quandaki fainanduquani saina kaqi mariani.  
\v 19 Fainanduqira fee sia fainanduqira fee mina fifau ainaina mariannoo. Anutuna naamuaqira ufamau eedoo qimasee finafa mifa anoona maridanoo.   
\p
\v 20 Aiqama fasiqa Anutufa naaroofaqa eedoo qu kamuqoo maru marirafa mifa doo sai kaqi minaki mariani.  
\p (Pauroona aukuana akaqausa faaqu fasiqausa nári ainainirana sia amanaikiqa ainaina faqaana karabusara foora ainaina maisee mariqau. Sia feefauru maree mariqau. Kadaapirumasee narana faqa maaqa faqa kai maree mariqau. Misa nuqu ainainira fasiqee qimariqau. Mi aukuanna ainaina faqaasa akaqausa faqa faaqu fasiqauqa faqa Yisuna ufa iriqau. Pauroofa minara irisee maa ufana qimanniminau.)   
\p
\v 21 Anutufa ani aaroo kamuqoo anee moona ainainira fasiqa marunafa saina kaqi maria, sia quqasee moosaa fua kasooqaqee idukirafa kambiqainana miqoo kai idukusainana fua.  
\v 22 Faiqí moo fannoo ainainimarinafa marinanoo karaambaiqa aarainanoo mi ainainiranaki kaqi maria Karaambaiqa idukira fasiqara foora mariananoo. Miqikai masee asauku mundirafa idukira fasiqa aaraifanoo kaqi narí ainainiranaki mariani asauku mundirana ainainira fasiqara foora mina ainainiranaki mariananoo.  
\v 23 Innee Yisuna ufa irimariasa Anutufa firaa feefauru aqusee inni maroonara irisee sia moo fasiqa ainainiranakiara foora keeqafinaqa mandoosana ufa ameemaanai mariaqa kaqi idukiqa mariara maqi idaqa Anutuna ufamau fuaqanani.   
\p
\v 24 Oo qini qikaqaafasaa innee aiqama Yisuna ufa irirara anukamuqoo marirana minaki kai maridaqa Anutuna aqoondikiranaki maqee maqee mariaqa.   
\s1 Kumaaraa maanaaqa adeedaana misa nimundaranara qidanoo.  
\p
\v 25 Doo maqee anaasee siaisa faqa faiqí siaisa faqa qimamianaura. Qinee Karaambaiqa amuqusirana maree marunausa marunnanara qini ufa irisee minasaa munduaqa, sia qinee karaambaiqa ufara inni qimannimidaqa qeeqa ufa qimannimidaqa.   
\p
\v 26 Innee Koorinti maqannaa Yisuna ufa irimariasa innee maqee aukuana Yisuna ufasaara firaa mandainaina nariranaki mariafaqa minara irisee qimannimidaqa, aiqama fasiqa maqee maria mariranaki kai mariaqa.  
\v 27 Ani anaaqa maridanoo fee sia mina minnisaa, anee adeedaana maridanee sia aanaaseera randasee maraa.  
\v 28 Anee anaasee maraseenana sia aaqaananoo. Maanaaqa moo fannoo kumaaraa mareenoo sia aaqaannoo. Maqee maria deedeepira aukuana Yisuna ufasaara faiqí anaasee faqaasa firaa ummaaraki mariafanoo minara irisee innee maqee Koorinti maqusai mari ummaarana sia maraaqee kaqi kasooiqa mariaqee qidaqa.   
\p
\v 29 Oo qini qikaqaafasaa qinee ufa qunnana anoona maaqimminoo maridanoo. Innee Koorinti maqusai ummaaraki marianara moomoo faasaana sia kaqi marifaranoo sia moomoo kari Anutuna ainainiranaki marifaranoo. Innee minara irisee anaasee faqaasa adeedaanara foora mariaqa kaqi kai ainainamamaree fuaqa.  
\v 30 Innee iki raqee mariasa sia iki raqeera maqi iaqa kaqi kai Anutuna ainainirana ainainiqa fuaqa. Innee naanaindara qimariasa sia naanaindara qidara maqi mariaqa kaqi kai Anutuna ainainirana ainainiqa fuaqa. Innee ainaina feefauri mariasa faqa sia anindiara foora mariani.  
\v 31 Innee maqasaa ainaina feefauru nimisaida ainaina maree mariasa sia kaaqa minara afeekaikiaqa, mana mana imariasara foora mariaqa. Maa maqa maaqafa maaqoo marinafa sia kisaaqasaa mariannoo. Qusasaa taikaannoo.   
\p
\v 32 Innee ummaara siaisa mariaqeera qimannimidaqa. Anaasee siaifa karaambaiqa ainainiranara kai irimaree fidanoo karaambaiqa eedoo qiranara kai irinoo fidanoo.  
\v 33-34 Anaasee faqaafa maa maqanasaaqaraa ainainara kai irimaree fidanoo maqee maqee narí aanaaqara aidimari iriramau fidanoo, qaara irirana faqaafa maqasaaqaraa irirana faqa Karaambaiqa irirana faqa minaki maridanoo. Adeedaana aanaaseeuqa faqa maanaaqauqa faqa karaambaiqa saikara kai irimaree fidaqa. Misa nári naundura faqa nifaaqara faqa karaambaiqaindi fee kai qimasee karaambaiqa saikara kai iridaqa. Faiqifaqaa anaasee fannoo narí afaaqi aidimari iriramau fidanoo maqasaa ainainara kai iridanoo.   
\p
\v 35 Sia qinee sandannaifau inni rumbaidau. Maa manda deedeepa aukuannara iridaqa. Inni dadaaqiraree qidaqa maa ufana qidaqa. Qinee inniara andeeqara aatata ufamau fuaqeera kai qidaqa naakapaidaqa. Innee sia kaqikaana raina quqaaqeera muduka uqanna karaambaiqa saikaki mariaqeera qimannimidaqa.  
\v 36 Kumaaraa maanaaqa utaaqaraqanda nimundaranara qaoo qimasee mi kumaaraafa kafaa quandakinoo aanaaseera aidirafa afeekaikifanoo mi kumaaraafa doo maraanauree qimaseenoo doo amana maraannoo sia aaqaidanoofau miqidanoo.  
\v 37 Faiqí moo fannoo Yisuna ufasaara nariranara irisee miqinafa sia moo fannoo qaoo qinoo kai narí uqanna sia qini utaaqa maqimaqarana maraanauree qinafa mina irirafa kuqaa afeekaikinafa narí aundurakiqari amiqimmandee qaoo qinafa sia mi manaaqana maraannoo andeeqaidanoo miqiannoo.  
\v 38 Kumaaraa narí utaaqamamaqara manaaqana marainafa andeeqaidanoo miqiannoo. Moo kumaaraa fannoo mina narí utaaqamamaqara manaaqana sia marararee qifa mifa firaaqoomma uriqareenoo.   
\p
\v 39 Anaaseeuqa nári nifaaqmaaka faqa kaqi marianara sia oonuree aniree iqanuaqa. Nári nifaaqmaaka kuqufuafaqa miqoo nári nidimari fasiqana amana mareefara. Moodaa ainaina kai mariannoo, Yisuna ufa irimarinna anaaseefa Yisuna ufa irinnana kai maraannoo.  
\v 40 Mi anaaseefa kaqi adeedaana maridanoo aufadaranaki mariannoo. Qinee mi ufana qunnana qeeqaindi qeeqa irirana maaqi qidaqa Anutuna maraquna fannoo dadaaqidanoo fee qidaqa.   
\c 8  
\s1 Unna tumunnai auqira afaannara dufi dufi qimasee narana aandaura qidanoo.  
\p
\v 1 Innee Koorinti maqusanaa Yisuna ufara suqimariasa unnaqira afaanna naranara iraafaqa inni minara qimannimianaura.  
\p (Inni maqannaasa Yisuna ufa sia irimariasa misa tumunnai auqira afaanna amaana maqaki aandau arusee suqasee unnaqira afaanna amaana maqaki qoomaqa naida tumunnai auqira afaannara dufi dufi qimasee animma amidaqee qimasee nári neemariafaqa innee akaqausa misa dadaaqidaqa mi oosannara qini iree mariafanoo. Innee Yisuna ufa irimariasa akaqausaki náriara maasa aaqaidaqa miqira aandau naida fee qimariafanoo, mi aandaufa maasa daundurakinaana kuridiandoo qimasaidaqa qimiridaqa naida fee qimariafanoo. Akaqausa náriara maasa irirana faqaasa noori uqeerasee fifau tumunnai auqira afaanna marifaqa kaqi naanauree qimariafanoo.)  
\p Qinee Pauroosa minara kuqaa fee qidaqa moo irirana minasaa ookaaidaqa maaqi qidaqa. Miqira irirafa narí aidirafa narí aundurai umbiqafinara oori uqeeraidanoo nasuridanoo narí kai narí kurididanoo. Moo irirafa amiqirafa maaqi qidanoo. Faiqí nariara nariara amuqusira irirafa mi irirafa sia kurididanoo faiqí anaasee nifeeqareenoo pooduqaifanoo anoonaikidanoo.  
\v 2 Moo fannoo nariara aiqama ainainara irimarunausee qimarifa sia anoonaikira irirana irimarifanoo Anutufa mi iriranara akooqaidanoo.  
\v 3 Faiqí anaasee moo fannoo Anutunara aidimarifanoo Anutufa amiqimmandee misara iridanoo aididanoo.   
\p
\v 4 Yisuna ufa sia irimariasa tumunnai auqira afaannara innaaru qimasee aandau narana neemariafaqa innee Yisuna ufa irimariasa mi naranna naanara iraafaqa qinee Pauroosa minara maaqi qidaqa. Tumunnai auqira afaanna oosana innisaimbaqa iridaqa mifa sia mari ainainna kikiqusirafa maridanoo fifau ainaina kai maridanoo. Maasa moodaa Anutufa marinara minara kai amiqimmandee iridaqa.  
\v 5 Maa maqa maaqanaki faqa innaarunai faqa moomoo oosana oosana afaannee qimariafa maridanoo. Mi afaanausa misa uriqararausa faqa Karaambaiqauqa faqa unna qimasee maridammiafoo qidaqa.   
\p
\v 6-7 Sia maasa misauqara iridaqa maasa Yisuna ufa irimariasa Anutufa aiqamausa nikoofa moodaa kai marifaqee qidaqa, aiqama ainaina auqu quqoo fee qidaqa maasa mi Anutuna ainainammaisaranara maridaqa. Sia moo karaambaiqa maridanoo maasa karaambaiqa, asauku mundirafa Yisufa mifa kai marifaqee qidaqa. Minannai Anutufa sia maru ainainanna aiqama ainaina auquqoofa maridanoo, maasa minasaaqaraa mariranasaa maridaqa. Minara maasa aiqama narana amana naanaura. Kaqi narana faqa fifau afaanna aandau faqa aiqamaqara namasee mina neemariafa sia aaqarafa maridanoo. Moo ainaina aaqarafa maaqimminoo maridanoo. Aiqama Yisuna ufa irimariasa sia maa qunnanara iridaqa. Akaqausa ooqaindari sia Yisunara iru aukuanaindari mi fifau afaanna amaana maqanaki maqee maqee keeqafiqa narana namasee mi narannara mi afaannanaindi fee qimariqau, kafaa maqee faqa Yisuna ufa iridaqa sia afaannara innaaru qidaqa kaqi keeqafi namasaidaqa unna qimasaida afaanna marifaqee qimasaidaqa kaqi mi narannara Anutuna namuqaandi fee qimasee boo Anutuna namuqaa aqoondikidaqa aaqaidee qimasaidaqa nári maraquna nári naakirafa ummaara nimifaqa maasa daunduraki putaairana qimifaqee qidaqa.  
\v 8 Qinee Pauroosa minara maaqi qidaqa. Sia fifau narana fannoo maasa mareeqee Anutuna aqoondikiannoo. Maasa sia neeqa sia Anutuna oorudupianaura kaqi neeqa sia ooraaqaraanaura. Narana fifau ainaina maridanoo maasa iridaqa.   
\p
\v 9 Innee afaanna amaana maqakinaa naranara mana mana imariasa minara eerairiaqa. Mi narannara akaqausa rufiee mariasa irirana oorudupimariasa ani mana mana iranasaaqari arufarindamaki mandainainaki aqufifaara.  
\v 10 Anee irirana afeeka faqaafa tumunnai auqira afaanna amaana maqaki keeqafi mana mana mandee narana nainanoo ani akaqaafasaa moo fannoo irirana amannaikimarifa fukasaa Yisuna ufa irimarifa ani qafamaseenoo afaanna amaana maqaki keeqafi narana nainanoo mina aundurakinaana akamummasainanoo mi fifau afaanna finnai kaifaa minni ubeekeenoo aqoondikiandoora.  
\v 11 Oorudupimasee iri mari fasiqafa afaanna naranara rufiee mari fasiqafa maridanoo. Mi fasiqafa afaanna narana mana mana mamaree neemaria fasiqausa oosana qafamaseenoo narí faqa namaseenoo minasaa arufarindamaki kuridiranaki aqufidanoo. Fifau kuridiranaki aqufuannoo asauku mundirafa minara faqa kuqufammi.   
\p
\v 12 Innee mana mana irirana faqaasa inneeqa nikaqaafasaa oorudupira irirana arimariafanoo, miqi marianannai inneeqa nikaqaafasaa mandaikamma nimaqaidaqa, miqianannai asauku mundirana faqa mandaikammamaqee mariafanoo.  
\v 13 Qinee Pauroosa minara maaqi qidaqa qinee afaannara dufi dufi qira narana aandau namasaananoo qini qikaqaafasaa qini qiqafeenoo minasaaqaraana mandainainaki aqufinaqa qinee naaru naaru sia uqanna afaanna aandau naanaura qini qikaqaafasaa sia aqufuanifee qimasee sia naanaura.   
\c 9  
\s1 Pauroofa narí kadaapisaaqaraa narana kai neemarinau.  
\p
\v 1 Qinee Pauroosa kuqaa Yisufa diqiqoo fasiqausa maridaqa kuqaa qinee Yisuna maasa karaambaiqa qafaafanausa maridaqa qinee sia moona karabusaki maridaqa qinee qeeqa iriranannoo maa saikana maraidaqa. Qinee Karaambaiqa saika inniki maraafannana mina anoona innee Yisuna ufa uqeeraafanoo.  
\v 2 Akaqausa qini Pauroosara sia Yisufa aqiqoo fasiqafee qimariafaqa innee Koorinti maqusanaasa sia qiniara miqi qimariafanoo. Innee Karaambaiqa ufa irisee mi mau fimariafanoo mifa kai Yisufa qini diqiqoonara koorooidanoo.   
\p
\v 3 Faiqí anaasee akaqausa qini saikoosanara diqiafaqa maaqi qimasee qeeqasaa ititaidaqa misa qimannimidaqa.  
\v 4 Qinee Yisuna ufa maqusa maqusa oonuree aniree idaqa Yisunara qimannimimarunnana akiaqara mi maqannaasa narana nammari kaqi qimifanoofau andeeqarafa mariqini.   
\p
\v 5-6 Yisuna niqiqoo fasiqausa Yisuna akaqaafasaauqa faqa Peetooroona faqa nári ninaaqmaaka Yisuna ufa irimaria anaaseeuqa nindiamaree misa faqa maqusa maqusa nidaqa. Yisuna ufa qimannimiafaqa neeqa kaqi narana nimiafaqa naidaqa. Qini Pauroosa miqifau andeeqaraqoo marini, sia miqidaqa Baranabasisandiri maaqanda kai fee ainainammasaida naidee. Maaqanda qeeqa ainainammasaida feefauru marasaidaqa naidaqa Yisuna ufa qimannimiqanidaqa.  
\v 7 Sundia moo fannoo fee ammi fee rakiranaki fidaqa ainainamandaida naidee sia fee. Sia uqanna miqidaqa. Uainna qaqamma ummaqimari fasiqafa narí naaree diqisee namaseenoo inaaqianna moosa nimidanoo. Sipsipasaa rakisimarifa narí kadaapiriranasaa mina naamma anoona naidanoo. Doo qinee faqa maqusa maqusa nidaqa Yisunara qimannimimarunnana narana nammari kaqi qimifanoofau qeeqa kadaapi akiaqara nani, sia miqidaqa.   
\p
\v 8 Sia qinee faiqí faiqi ufamau kai fidaqa Yisuna ufa qimannimimarunnana akiaqara narana narara qimannimidaqa.  
\v 9 Mooseena sandufa miqinoo marifaqa qidaqa. Mifa maaqi qimasee akara rinoo maridanoo.  
\q1 Inneeqa sakuma maqusasaa teeqimasee burimakau mareeqee miqoo quqasaifanoo burimakau fannoo oonuree aniree idanoo aikunnai rafarimarinaqa sia mina oori arooriaqa, sia mina oori rumbaaqa, saifanoo akaqana naidanoo rafariani.  
\p Qinee Pauroosa minara maaqi qidaqa. Anutufa burimakaura kai fee iridanoo fee miqi qinau, maasara faqee miqi qinau.  
\v 10 Oo sia misarau miqi qinau, maasara irinoo miqi qinau. Ummaqimarifa faqa aiqi marifa faqa minakinaana nararee qidanoo ainainidanoo.  
\v 11 Baranabasisandiri inni Koorinti maqusanaasa naunduraki innaarunaindaraa asumu ummaqusaafananoo kambiqaidanoo. Sia fee maqee mi kadaapirirana akiaqara maqasaa narana kaqi qimifaqee naanauree.  
\v 12 Akaqausa inniki kaqikaaqoo kadaapiri maruna akiaqara kaqi narana nimiafaqa naidaqa, maasa fiqaramasee inniki kadaapiri marunnana akiaqara inni narana marasee naunaiqini sia kaqi marasee naidaqa. Anutufa amanammifoo qifaqa maasa sia miqidaqa. Asauku mundirana Yisuna amiqira fasaasa ufa inni naundurai sia keeqaandoo qimasee daara rarana faqa kadaapirirana faqa oosana oosana saika auqee marunnanara faqa qimannimiqiafana.   
\p
\v 13 Anutuna firaa amaana maqa Yeerusaree maqusa marinaki ainaini mariasa misa minakinaana nariqa narana maraidaqa. Faiqí anaasee sipsipa arusee aandau tatufu Anutuna amaana maqaki amimariana minaki ainainimariasa aanaiqiki mariasa náriara akaqana marasee naidaqa innee minara amiqimasee irimariafanoo.  
\v 14 Karaambaiqa Yisufa miqi kai masee narí ufa qimannimi mariasara qimannimiqa fidaqa misakinaana narana marasee naaqee qinau.   
\p
\v 15 Mi andeeqara oosanafa marifaqa qinee sia miqiqa maa pasana akara runnana innee narana sia kaqi qimiaqee qidaqa akara rumannimaqaidaqa. Akaqausa qini maa ufanara fifau dapi ufammifoo qifoora sia inni narana marasee kaqi naanaura kuqiranaki fuanaura, qeeqa kadaapinnoo feefaurirafa amana. Miqi marifaqa Anutuna ufamau fiqaramasee funnanara qeeqa qimooqidaqa. Sia moo fannoo mi ainainniannanara qimooqirana aruannoo. Ainainamaseeqa feefaurumasee naanaura.   
\p
\v 16 Kuqaa qinee Pauroosa Yisuna amiqira fasaasa ufa oonuree aniree idaqa qimannimi marunausa maridaqa, sia miqiannanara qeeqa qimooqidaqa qeeqa duqu uqeeraanaura. Yisufa qimaqimunara miqidaqa. Sia miqianaqau mandainaina qambaanai mariaqini.  
\v 17 Qinee qeeqa kai qimannimira saika mareefau feefauruara qunaiqini. Anutufa daakapainara ainainidaqa mina akiaqara sia feefauruara innaaru qidaqa qimira saika marifaqa kaqi maraidaqa.  
\v 18 Qeeqa saika akiaqara nana feefauru fee maraidee, Anutufa amana kadaapi akiaqara narana marasee naannee qifaqa qinee sia miqidaqa amiqira fasaasa ufa sia feefauruara irisee kaqi didifaqa qimannimunafa mifa qini feefaurirafa maridanoo. Kaqi qimamidaqa qeeqa andeeqara kadaapirirana akiaqara sia maraida kaqi qimannimira asasirafa mifa qini amiqira feefauru maridanoo.   
\p
\v 19 Qinee sia moo fasiqa ainaini marunausara foora maridaqa kaqi fasiqara foora maridaqa Yisufinnai moomoosa aniaqeera aiqamausa ainainira faiqi kammambi maridaqa.  
\v 20 Qinee Yuda maqannaasaki Mooseena sandufa ameemaanai mariasaki ainainidaqa misa naanna ramafi misa marirana maraidaqa. Qinee sia Mooseena sandufa ameemaanai maridaqa, misa sandufa ameemaanai mariasa moomoosa Yisuna ufara aniaqeera qinee faqa mina ameemaanai maridara foora naaraidaqa.   
\p
\v 21 Miqi kai iqa aanaamuruki ainainidaqa aanaamuru moomoosa Yisuna ufara aniaqeera aanaamuara foora Yuda maqannaasa sandufara nianasaa tatiaqa maridaqa qimannimidaqa. Miqunnanannai sia Anutuna sandufa rukiaida miqidaqa. Qinee asauku mundirana sandufa ameemaanai qinee kuqaa maridaqa.  
\v 22 Qinee Yisuna ufara sia andeeqasee saqariki mariasaki ainainidaqa misa faqa moomoosa aniaqee qimasee misa naanna ramafi maridaqa. Qinee oosana oosana qaini qaini qiranannai faiqí anaasee maraanee qimasee aiqama fasiqa anaasee naanna ramafiqa misa naaraidaqa.   
\p
\v 23 Qinee maa ainainniranaki maridaqa moomoo oosana oosana ummaara kaqi maraidaqa qinee faqa innee faqa mi amiqira fasaasa ufanasaaqaraa naundurakina adiafaairana maraannanara miqidaqa.  
\v 24 Inni maqusai Koorinti maqusai faiqí moomoosa suqufiqa narí amani narí amani sandeemariana maqee maqee kambiqee marifaqa qafeemariafanoo. Sandee mariasaki moomoo sandaidaqa moodaa fannoo kai urinaaqareenoo qafee maraidanoo. Innee faqa misa naanna ramasee Yisuna aatata sandee fidaqa uriqarara qafee marararee qimasee sandaaqa.   
\p
\v 25 Aiqama sandee maria fasiqausa ooqaindari amanidaqa kaqiqoo afeekaikamandee mariiqa sandara aukuana anirainaqa kaqi sandeefaranoo. Misa sia mi kadaapiriranara iridaqa, uriqarara qafeeroo kai qimasaida kaqiqoo afeekaikamasee nimanida sandaidaqa. Misa dauni afauqaqee mari qafeenara kisaaqasaa kadaapiridaqa. Maasa misa naanna ramasee kisaaqasaa kadaapiridaqa, sia afauqaqee mari qafeenaranoofau idau miqidau, naaru naaru marira qafeeroo qidaqa kadaapiridaqa andeeqaidaqa.  
\v 26 Minara iriseeqa sandeeqa taikee aniaqoo andeeqasee fidaqa. Qinee bookseena akoofasa fasiqara foora sia fifau faafau qisauku aqidaqa andeeqasee kai qisauku aqiara foora idaqa.  
\v 27 Qeeqa qifaaqa qini ufa amiqimmandee iriaqeera firaaqoo qeeqa qifaaqa dariara foora idaqa, qeeqa qimudaani faasasaa afeekaikidaqa. Qinee aiqamausa naaramasee aniree bookseenara foora amaniaqee qimaseeqa qeeqa faqa amanianee qimasee oorudupiananoo Anutufa manda saikammiaanoo qimasee diqiqaandoo qimasaidaqa faasasaa afeekaikidaqa.   
\c 10  
\s1 Tumunnai auqira afaanna iriranara aaquqirafa.  
\p
\v 1 Oo Koorinti maqusanaasa qini qikaqaafasaauqa ooqai Mooseefa Isipa maqusaindari maasa Yuda maqannaasa qikeeku qikaaku nifiqee nári maaqai fiqau. Qinee minara qimannimianaura. Misa Isipa maqusaindari sandeemarufanoo namuqaa nári maaqi qimasee Anutufa qufanoo qoonnamu fannoo misa ninaaqiannai aiqamausa ititafufaqa amiqimasee aniree Taatuqee nammari taqamareeqa fiqau.   
\p
\v 2 Mi qoonnamunaki faqa mi nammarina Taatuqee nammari taqoonara amaana nammari kikiqusidanoo faqa Mooseefa mi nammarinaki misa aiqama ukuqnamaseenoo uqeeraseenoora foora masoofaqa aiqamausa Mooseenaindi kammambiqau.  
\v 3-4 (Misa miqooqari kaasau maqa maaqaki fimarufanoo Anutufa aiqama kananaana kananaana narana maqasaa quqasoofaqa marasaidaqa neemariqau. Nammariara nidufanoo Anutufa Mooseenara qufanoo oonikiqari nammari qumufaqa naqau.) Qinee Pauroosa minara maaqi qidaqa. Misa aiqamausa innaarunaindaraana moodaa feemu naqau, aiqamausa innaarunaindaraa nammari moodaa naqau. Mi nammarifa innaarunaindaraa oonikiqariara foora qumimarufaqa naqau. Mi oonifa asauku mundirafa misa faqa kukeeqasee nimarufa marinau.  
\v 5 Misa miqiqa fidaqa sia minara irirai moomoosa uqanna mandoosana marasoofanoo Anutufa qufaqa misa kuqufanoo misa iri fannoo mi aadana maqa maaqanaki furufaramminau.   
\p
\v 6-7 Mi aiqama ainainausa maasa aaquqimaqimaqarafa maridanoo, maasa faqa mina irisee sia misa naanna raanaura, sia manda nidi mari ainainnara randaanauranoo sia misa naanna reeqa tumunnai auqira afaannara faqa innaaru qianaura. Mooseena akara minara maaqi qimasee qidanoo.  
\q1 Faiqí anaasee ooqumari fi narana neeneesee nammari moomoo neeneesee mandidi raanauree qimasee findi fiqa idi ree mariqau.   
\p
\v 8 Qinee Pauroosa miqunara qimannimianaura maasa sia misa naanna ramasee faiqí anaasee narí ummuara narí ummuarianaura. Misa miqimarunara moodaa faasaana (tuenti tiri tauseena) nukudara foora teeqiqau moomoosa uqanna raurukaqau.  
\v 9 Maasa sia misa naanna reeqa karaambaiqa amanamandee qafaanauranoo. Misa akaqausa miqimarunara sakani fannoo narimarufaqa kuqimariqau.  
\v 10 Innee sia misa naanna reeqa Anutunara ninunuruaqa. Misa miqi marunara kuqira qangiroo fannoo aniree moomoo narinau.   
\p
\v 11 Mi aiqama ainainausa akaqausa aaquqima nimaqaaqeera misasaa kambiqanau. Maasa maqee mariasa aaquqimaqimaqaaqeera Anutufa qumee dadaaqufaqa miqooqaraafa moo fannoo akararinau. Maasa taikara aukuana adeedi rainaqa marinara aaqaranara rufiaaqeera aaquqidaqa.   
\p
\v 12 Faiqí moo fannoo nariara qeeqa afeekaikiranannai kikiqiqa maridee qinafa rufiaa, anee Isaraee maqannaasa naanna ramasee aqufinafaara.  
\v 13 Aiqama nimanirafa innisaa aqufinafa aiqama maqannaaki maqee maqee kambiqee mari ainainafa maridanoo. Anutufa minara iridanoo narí dadaaqira ufara kai iriannoo. Iridanoo firaa nimanirafa anireenoo inni urinaaqareenoo rafaaqafinafa anirainanoo Anutufa afeeka niminaqa innee amana mi nimariranaki mari inaqa mina uriaaqaree faranoo. Anutufa ititaseenoo fimariaana uqafiqainana fi ruiqakinana finnaranoo.   
\p
\v 14 Oo qifaaqasaa qini qiqoondiuqa tumunnai auqira afaannara innaaruqiranara nianasaa rufiaaqa.  
\v 15 Innee Koorinti maqusanaasa ooqeenaasa irirana faqaasa mariafanoo. Inneeqa kai qini ufa irisee oonumafi rainasee iriaqa.  
\v 16 Maasa aafaqa naidaqa kaafakinaa nammariara Anutunara dufi dufi qimasaidaqa mi kaafanakinaana naidaqa asauku mundirana fidika naida fee qimasaidaqa maasa kaqikaa feemu faqa ruqi ruqimasee naidaqa maasa asauku mundirana amaqi naida qimifaqa naidee qidaqa mi feemuna naidaqa.  
\v 17 Moodaa feemu kai marina maasa moomoosa ruqi ruqimasee neemarianara moodaara foora maridaqa.   
\p
\v 18 Qeeburu maqannaasa moo nuqu Isaraee maqannaasa nariqa aandau tatufira oosanara iriaqa. Faiqí anaasee moo fannoo aandau maramaree Anutuna aanaiqiki maru fasiqana amisoofanoo aandau tatufinoo nariara akaqana marasee neemarufanoo aandau akoofa narí aiku asauku faqa muduka nanau. Misa qiqau, maasa Anutuna tatufira qaindasaa qaraana naida qimifaqa naidaqa mina faqa moodaanaki maridee qimariqau.   
\p
\v 19 Doo qini ufa oosana naqi fee inoo maridanoo fee doo maqee mi ufana koorooianaura. Inni maqusanaasa narana maraseeqa tumunnai auqira afaanna amidee qimasee tatufimariafanoo. Mi tumunannai auqimaria afaannana amana sia anoonau kaqi fifau tumu kai maridanoo. Mi narana tatufirafa faqa sia anoonau, kaqi narana kai maridanoo.  
\v 20 Sia Yisunara irimaria fasiqauqa mi fifau naranna marasee sia Anutunau amisee dufi dufi qidau, afaannauqa nimisee dufi dufi qidaqa miqidaqa. Innee Yisuna ufa irimariasa afaanna naida nimimaria naranara innee sia mina naaqeera qidaqa qikooqaidanoo.   
\p
\v 21 Innee karaambaiqa aafaqa naidaqa Yisuna kaafakinaana nammari namasee sia amana quandakina afaanauqa kaafakinaa nammari neefaranoo, innee Yisuna aafaqa naidaqa karaambaiqa qaindasaaqaraa feemu namasee sia quandaki afaannauqa qaindasaaqaraa feemu neefaranoo.  
\v 22 Innee Yisuna aafaqa namasee quandaki afaanauqa aafaqa namasaifanoo karaambaiqa Yisuna qafamaseenoo rairaiqiannoo. Innee Yisufa inniara rairaiqianifee qimasaida fata fata idee miqidee, innee maasara karaambaiqa uraaqaraidee qida fee miqidee, sia amana karaambaiqa uriqareefaranoo firaa nariranaki aqufifoora.   
\p
\v 23 Akaqausa minara maaqi qidaqa. Maasa amana aiqama oosana amiqirana faqa mandaikirana faqa minauqa maraanauree qiafaqa qinee Pauroosa minara maaqi qidaqa. Kuqaa aiqama nana ainaina amana maraanaura, sia aiqama ainaina amiqirafa maridanoo. Akaqausa maaqi qidaqa aiqama oosana amana maasa maraanauree qiafaqa qinee minara aiqama oosana sia faiqí anaasee dadaaqimaria oosanafa marifanoo fee qidaqa akaqana kuridirafa maridanoo.  
\v 24 Sia moo fannoo narí aidi mari ainainna narí iriranaki uriqaranoo mariani aqoonausa nidimari ainaina kai narí iriranaki uriqaranoo mariani.   
\p
\v 25 Innee Koorinti maqusanaasa aandau maree makeetai fimariana akaqaandau arusee aukusee tumunnai auqira afaannara dufi dufi qimasee makeetaki quqasaafaqa feefauridaqa. Akaqaandau kaqi arusee auku quqasaafa feefauridaqa. Innee Yisuna ufa irimariasa makeetaki keeqafi inneeqa aandau marararee qimasee oonuree sia tumunnai auqira afaannara dufi dufi qinnanara iramasee eerairiaqa kaqi mana mana maraaqa. Aninna karaambaiqa saqarikiananoo aninna aakirafa marina sia minara irisee eerairiaqa, kaqi maraaqa.  
\v 26 Ooqeenaa tamummaqara fasiqauqa akara minara maaqi qinoo maridanoo.  
\q1 Maa maqa maaqafa faqa minaki aiqama ainaina marifa faqa karaambaiqaindi kai maridanoo.   
\p
\v 27 Qinee Pauroosa minara aiqama ainaina kaqi naaqee qidaqa. Inni Koorinti maqusanaasaki Yisunara sia irimariasa moomoo maridaqa. Misakiqari moo fannoo aniara mai aniree qini faqa narana naannee qinana aidinana kaqi mina faqa oonuree mina faqa narana naa. Anee mi naranna aandauna naaneera aneenna aakiranara kaqi kaaqoo oonumafi irinana sia eerairia kaqi naa.  
\v 28 Anee mi naranna naanee qinanoo moo fasiqa fannoo qimaminoo tumunnai auqira afaanara dufi dufi qira narana maridanoo qinana anee ani qimami fasiqana aakiranara irisee sia naa.  
\v 29 Sia aninna aakiranarau qidau ani qimami fasiqana aakiranara qidaqa. Innikiqari moo fannoo maa qunnufana irisee maaqi qiannoo, nanaree qinee moona aakiranara iriananoo fee mifa qini ititaqimaqaannoo fee.  
\v 30 Doo qinee qeeqa naranara Anutunara dufi dufi qimaseeqa nanaree moo fannoo aniree qini narana aandaura qaoo qiannoo fee.   
\p
\v 31 Qinee Pauroosa minara maaqi qidaqa Innee narana nammari aiqama ainaina neemarianara sia fee naanauree, naanauree, nana ainaina innaree, Anutuna amooqira ufa kambiqee marimau kai fuaqa.  
\v 32 Inni marirafa kaqi mana manifaqa nindafamaseeqa Yuda maqannaasee aanaamuru fee Yisuna ufa iri mariasee inni niqafamasee noori runifaara. Innee minara irisee mi oosannara eerairiaqa.  
\v 33 Innee qini daanna raaqa sia qinee qeeqa didirana qeeqa qifaaqa amiqi amiqiranara iridaqa aiqamausara iriseeqa misa nidiranamau fidaqa, aiqamausa innaaruna asumu maraaqeera miqidaqa.   
\c 11  
\s1 Amaana maqaki keeqee maru anaaseesa nikiaqa rumbarausa keeqee maria ufana.  
\p
\v 1 Qinee asauku mundirana Yisuna aanna raidaqa innee miqikai iqa qini daanna raaqa.   
\p
\v 2 Oo Koorinti maqannaasa innee qiniara maqee maqee irisee Yisuna ufa irimariasa sandufa qinee qimamiafanna ufamau fimarianara inni nimooqidaqa.  
\v 3 Qinee maa moodaa ainainnara kai inniara iriaqeera qimannimidaqa, aiqama fasiqa nári ninaaqmaaka urinaaqararausa maridaqa kafaa asauku mundirafa aiqama fasiqa urinaaqararafa maridanoo. Anutufa asauku mundirana uraaqararafa maridanoo.  
\p (Pauroofa narí maqannaa anaasee oosanara qimaqoofa sia maasaki maridanoo. Anaaseeuqa nariqa andeeqara oosana marasee narí nifaaqmaaka nimeemaanai oorudupi mambunara kooroo ianifeera qamunnannai nikiaqa rumbarausa amaana maqaki keeqee mariqau. Sia nikiaqa rumbasaidaqa keeqee marusa nisaurirana mara nimimariqau. Ummuari mari anaaseena paqurimasee asaurirana maraanifee qimasaida akiqa maqa namufaqa indufu aqimariqau.)   
\p
\v 4 Qinee Pauroosa faiqí narí anaaqa uraaqararanara irisee maaqi qidaqa. Faiqí moo fannoo akiqa rumbarafa amaana maqaki keeqafi aiqamausa nifusaa innaaru qina fee Anutuna ufa qimannimina fee asauku mundirana asaurirana amiannoo.   
\p
\v 5 Anaasee moo fannoo amaana maqaki keeqafi Anutuna ufa qimannimiannoo fee innaaru qiannoo fee akiaqa sia rumbarafa mi anaaseefa narí afaaqi asaurirana amidanoo ummuari mari anaaseena amanakai maridanoo, akiaqa maqa faqa indufira anaasee amana amana kai maridaqa. Saina akiaqa qamunnannoo rumbasee amaana maqaki keeqafinoo innaaru qiannoo fee Anutuna ufafee qimannimiannoo fee, andeeqanoo mariani.  
\v 6 Anaasee moo fannoo sia akiaqa rumbarafa amaana maqaki keeqaina see munusee akiaqa maqa faqa indufu aqusaa. Anaasee akiaqa maqa faqa indufirafa asaurinoo akiaqa qamunannai rumbarafa amaana maqaki sia asaurirainni kaqi keeqaannoo.  
\v 8 Indaaru Anutufa sia aanaaseesaa qaraana faiqí auqinau, faiqisaaqaraana anaasee auqinau.  
\v 9 Anutufa sia anaasee dadaaqianifee qimasee faiqí auqinau, faiqiara iriseenoo anaasee auqinau.   
\p
\v 7 Faiqí Anutuna amana faqa Anutuna areenarafa faqa minaki marifa marinara sia akiqa rumbarafa amaana maqaki keeqaannoo. Anaasee faiqí areenarafa minaki marifa marinara akiqa rumbarafa mariani.  
\v 10 Qangiroora maasa qiqafaidammiaafoo qimasee nári nifaaqmaaka ureeqarausa marianara koorooianifeera nikiaqa rumbara anaasee amaana maqaki keeqaaqa.  
\v 11 Maasa karaambaiqa ufamau fidaqa maa irirafa kai mariani, anaasee naríara aadumai marianinafa fifau mariani, faiqí miqikai masee aadumai marianinafa fifau mariani.   
\p
\v 12-15 Indaaru anaasee faiqisaaqari kambiqanau miqikai inoo miqooqari faiqí fannoo aanaaseekiqari kai kambiqaidanoo doo mi aiqama ainainaqanda Anutunakiqari kai kambiqanoo maridanoo. Faiqí fannoo akiqa asausi kisaaqa marinaqa faiqí anaasee narí kai nariara nariara irisee mandainainee qimasee nisaurifaranoo. Anaasee kisaaqa akiaqa asausifaqaanara sia miqidaqa amiqiranee qidaqa mi anaaseefa minara firaaqoo nasuridanoo. Anutufa anaasee kisaaqa akiaqa asausi inni nikiaqa paranna rafaaqafuanifeera niminau. Inneeqa kai iriaqa, anaasee sia akiaqa rumbara anaasee fannoo aiqamausa nifusaa amaana maqaki innaaru qirafa andeeqaidanoo fee sia fee andeeqaidanoo. Sia andeeqaidanoo. Innee minara irimariafanoo.   
\p
\v 16 Faiqí moo fannoo yafee ufa rainaani qimasainaqa maa ufana kai qimamianaura, maasa maaqooqaraasa faqa Anutuna ufara maqusa maqusa suqimariasa faqa mi ufamau kai fidaqa sia moo oosana maraidaqa.   
\s1 Karaambaiqa aafaqa neemaria naamuaqirafa.  
\p
\v 17 Innee Koorinti maqusanaasa Anutuna ufara suqidaqa sia amiqimmandee suqimariafanoo mandainaina kai kambiqaidanoo, minara maa ufana sia nimooqidafau qimannimidaqau.  
\v 18 Innee Anutuna ufara suqidaqa raina rainidaqa aanooqimariafaqa qimaqimiafaqa qinee iriqa akaqanara kuqaa fee qidaqa. [ 
\v 19 Aaqarausa faqa andeeqarausa faqa moodaanaki marifanoo kuqaa rainarafa kambiqaannoo. Miqimasainanoo aaqee mariasa faqa andeeqarausa faqa kooroo ifaranoo.]  
\p (Pauroona akara rumannimu aukuana Yisuna ufa irimarusa sia maqee maasa imarunandee aafaqa neemariqau, misa nári ainainirana taikasee eendaki aafaqa nararee qimasee nári narana deedaqammamaree mara maree moodaa maqaki mini quqasee qoomaqa sakasee namasee inaaqianna feemu marasee ruqi ruqi masee uainna nammari misa maqee maqee neemaru nammarina namufaqa innaaru qimasee namasee fifaini mariqau. Faiqí anaasee oosana oosana suqiqau. Ainaina faqaasa faqa kudi fasiqa faqa oosana oosana ainaini mariasa faqa nariqa ainainirana taikasee eendaki aniree moodaanaki suqiqau. Akaqausa furufara maseeqa narana moomoo namataikasoonara ninnaaqiana anusa naararanau. Akaqausa uainna nammari moomoo neeneesee sipakiqa furufariqau, Pauroofa minara iriseenoo maaqi qimasee akara rumannimaqanau.)   
\p
\v 20 Innee Koorinti maqannaasa Karaambaiqa qoomaqa suqufi naani qimasee innee sia kuqaa suqufi mina nararee qimaseefau aniafanoofau furufaridaqa naidaqa moosaindi faqa neemariafanoo.  
\v 21 Akaqausa nári maree ania naranna sia naida nimidaqa nariqa kai naafaqa akaqausa naarara maridaqa, akaqausa uainna nammari moomoo naida furufarida. Miqiafanoo mi qoomaqafa sia karaambaiqaindi maridanoo.  
\v 22 Innee maaqa siaisee maqee maqee neemaria narana nammarina sia minaki naidee, innee Anutuna ufara suqimariasa fidiaqaamma nimaqaidee miqidee, innee nara ainaina siaisa nisaurirana nimianee fee qidee miqidee. Innee minara irisee qiniara nana ufee qimaqimiannoo fee qidee. Abee nimoofee qianauree. Oo sia uqanna nimooqianaura.   
\p
\v 23-24 Ooqai qinee karaambaiqa ufa irisee qimannimiafanna sandufana maqee faqa kafaa qimannimianaura, karaambaiqa Yisufa Yudasifa ueeqoo eendanaki feemu asaukunnai qumareenoo Anutunara dufi dufi qimaseenoo, ruqi ruqi maseenoo maaqi qimasee narí faiqi namu qimanniminau. Maa feemufa qini qimaqi kikiqa usinoo maridanoo innimma kuqiranaki quqannimaqaanaura. Qinee kuquannanara aunifoora oonumafi iridaqa feemu maqee maqee naqafuaqa.   
\p
\v 25 Misa mi feemuna namaseeqa kaifaa miqoo narana namasoofanoo Yisufa uainna maru kaafana nariqa maqee maqee neemaru nammarina qumareenoo maaqi qimasee qimanniminau. Maa kaafanaki mari uainna qini fidika kikuqusinoo maridanoo. Anutufa maqasaa fasiqa anaaseera qini faqa moodaanaki kira ufa marifanoo qini fidika fannoo mi ufana mapukira fidika maridanoo. Innee mina naqa fidaqa qiniara irisaidaqa naqa fuaqa. Yisuna ufa miqiminoo marifaqa qinee Pauroosa minara maaqi qianaura.  
\v 26 Maa maqee kamuqoo Karaambaiqa sia kafaa qumi mari kamuqoo innee mina yakamuqoo fee maa feemuna faqa maa uainnana faqa naqa fidaqa innee Karaambaiqa kuqiranara kooroo idaqa.   
\p
\v 27 Qinee minara irisee maaqi qidaqa faiqí moo fannoo mina oosana furufarira fasiqa fannoo Karaambaiqa feemu fee mina kaafakinaa uainna fee furufara mandee namaseenoo karaambaiqa amaqi faqa fidika faqa mara maree furufara mamaqaidanoo naannoo.  
\v 28 Aiqama fasiqa anaasee nariqa kai nári naundura marirana irirana aiquqummasee oonumafi irirana iriseeqa feemu faqa kaafakinaa uainna faqa naaqa.  
\v 29 Karaambaiqa afaaqa oosana sia irimarifa kaqi fifau feemu faqa uainna faqa neemarifa Anutufa aruaninna ufana narí naidanoo narí afaaqai mafi quqaidanoo.  
\v 30 Innee Koorinti maqannaasa miqianara moomoosa aurimariafanoo kudoosaapee mariafanoo akaqausa doo kuqiqa maridaqa.  
\v 31 Maasa indaaru qeeqa daundura marirana qimanammandee andeeqasee naananoofau sia Anutuna darira ufa ameemaanai marunaiqini.  
\v 32 Maa maqanasaaqaraasa Yisuna ufa sia irimariasa kuridiranaki fidaqa maasa misa faqa fuanoora maqee kamuqoo karaambaiqa niuqummasee naridanoo.   
\p
\v 33 Qini qikaqaafasaauqa maa ufana iriseeqa karaambaiqa qoomaqa naani qimaseeqa qinaaqiana aninausara nifeesamasai faqa aniraifaqa doo moodaa kari oonuree naaqa.  
\v 34 Moo fannoo aararainafa aneenna maaqaki oonu namasee ania. Miqimandee moodaanaki keeqafifanoo Anutuna narira ufa fannoo sia innisaa mariani. Doo qina kai qimannimiqa qinee innee iannai fiqa akaqa ufa qimaqimuna andeeqaanaura.   
\c 12  
\s1 Anutuna naaquqara andeeqara maraquna oosana oosana dadaaqiranara qimannimidanoo.  
\p
\v 1 Doo maqee qinee Anutuna naaquqara andeeqara maraquna nimimari ainainnara qimannimianaura. Qini qikaqaafasaauqa qinee minara anoona ufa iriaqee qidaqa qimannimidaqa.  
\v 2 Ooqai innee aamina maru kamuqoo manda fasiqa fannoo inni rarisameeqee sia ufa qimaru tumunannai auqira afaannunnai ubeekee marufaqa mina ufa ameemaanai fimariqau.  
\v 3 Doo maqee innee maanara irimariafanoo Anutuna maraquna fannoo rakisimari fasiqafa sia amana Yisuna aqurarara ufa amiannoo kafaa mina dinni kai Yisufa karaambaiqa maridanoo fee qimariasa Anutuna naaquqara andeeqara maraquna fannoo misa dadaaqinara miqi qidaqa.   
\p
\v 4 Oosana oosana innaarunaindaraa ainaina faiqí anaasee dadaaqianifeera nimirafa marifanoo moodaa maraquna fannoo kai aiqama mi aiqama ainainna maqasaa fasiqa anaasee nimidanoo.  
\v 5 Maasa Anutuna ainainirafa oosana oosana ainainirafa maridanoo moodaa karaambaiqa ainainammidaqa.  
\v 6 Anutuna ufara suqimariasa dadaaqirafa oosana oosana maridanoo moodaa Anutufa kai aiqama aadu aadu akoofasaikirana faiqí anaasee nimifaqa minannai quandaki narí dadaaqi narí dadaaqiaqeera.  
\v 7 Anutufa Yisuna ufa irimariasaki aiqama fasiqa anaasee naadu naadu narí maraquna koorooianifee afeekana nimufaqa quandaki minannai narí dadaaqi narí dadaaqiaqeera nimidanoo.   
\p
\v 8 Anutuna maraquna fannoo moo fasiqa irirana faqaana ufa qimannimimarina amidanoo kafaa mi maraqunafa moo fasiqa aiqama ainainara irirana amidanoo.  
\v 9 Mi moodaa maraqunafa kai Yisuna mandaaqarana moo fasiqa amidanoo, moo fasiqa mi maraqunafa faiqí anaasee aurirana taikannisara afeeka amidanoo.  
\v 10 Anutuna maraquna fannoo faiqí sia amana auquaqaa ira ainaina afeeka moo fasiqa amifanoo mi fasiqafa afeeka ainaina auqaidanoo, moo fasiqa Anutuna afeeka amifanoo Anutuna ufa afeekaikamandee qimannimidanoo. Mi maraqunafa moo fasiqa afeeka amifanoo maraquna nimimariasa faqa moo unna qira maraquna nimimarina faqa mi fasiqafa kai rainasee nindafaidanoo. Mi maraqunafa moo fasiqa afeeka amifanoo aanaamura ufakiqari sia narí iri maru ufanakiqari amaana maqaki ufa qimannimidanoo. Mi maraqunafa kai faiqí moo afeekaikamma amifanoo aanaamura ufakiqari narí sia iri mari ufanakiqari faiqí anaasee qimannimisaifanoo moo fasiqa fannoo sia mi ufana oosana irirainni maraquna fannoo kai mina qimamifanoo mifa indee kai idanoo mina oosana qimannimidanoo.  
\v 11 Mi oosana oosana ainainna nimimarifa moodaa maraquna kai maridanoo. Mifa narí kai narí aidiramau raina raina mandaida aadu aadu dadaaqira akoofasaikirana nimidanoo.   
\s1 Maasa Yisuna atiki marunausara qidanoo.  
\p
\v 12 Asauku mundirana afaaqa moodaara foora maridanoo mina atiuqa moomoo maridaqa afaaqa sia rainanoo maridanoo moodaa maridanoo.  
\v 13 Miqikai masee maasa aiqama Yuda maqannaasa faqa aanaamuru moomoo maqannaa mariasa faqa karabusaki ainainimariasa faqa iduki mariasa faqa maasa aiqama moodaa maraqunannai nammari marasee moomoo atiuqa moodaana apataika kai iqa mariasa Yisuna apata mariafanoo Anutufa moodaa maraquna nammariara foora nimifaqa naunnanara miqidaqa.   
\p
\v 14 Faiqí moo adaka sia muduka maridanoo moomoo afaaqa ootupanoo maridanoo.  
\v 15 Mi fasiqana aiku fannoo qinoo sia qinee asauku mariaqaana minara qinee sia maa fasiqana afaaqau maridau. Qinee Pauroosa minara maaqi qiqa kuqaa aiku fannoo sia asauku kinoo sia mi ufana qinnanannai moona afaaqaikianau kaqi mi fasiqana afaaqa mariannoo.  
\v 16 Mi fasiqana aaqoo fannoo qinoo qinee sia maa fasiqana afu marunnanara sia mina afaaqau maridau. Qinee Pauroosa minara maaqi qidaqa kaqi mi aaqoofa sia afukinoo sia mi ufana qinnanannai moona afaaqai kiannoo kaqi mi fasiqana afaaqa mariannoo, sia sia miqiannoo.  
\v 17 Mi fasiqana aiqama afaaqa afu kai marinanoofau naqi fee mandee ufa iriannoo fee. Mina afaaqa aaqoo kai marinanoofau naqi fee mandee udiraannoo fee.  
\v 18 Anutufa kai narí iriseenoo narí aidiranannai faiqí afaaqa aiqama ainaina afaaqa quqaqoofa maridanoo.  
\v 19 Aiqama ainaina moodaa ainaina kai marinanoofau sia faiqí afaaqa marini.  
\v 20 Doo miqinoo moomoo afaaqa atiuqa moodaa afaaqara foora ootupanoo maridanoo.   
\p
\v 21 Faiqí afaaqaindaraa afu fannoo sia amana asaukuara anee fua sia qini dadaaqi marianna ainainafa mariananoo, sia qiannoo. Kafaa akiqa fannoo sia aikuara anee fua sia qini dadaaqi marianna ainainafa mariananoo. Sia miqi qiannoo.  
\v 22 Maasa qeeqa qifaaqa ati dauni nidafidanoo ummooquki mari atiuqara fifau ainainee qiananoo sia marinaqa naqi fee ianauree.  
\v 23 Maasa qeeqa qifaaqa atiuqa ureeqara atiuqee qimariana maasa misasaa firaaqoo amiqimmandee misasaa rakisidaqa. Nifu qafaafaqa nisaurimaria atiuqa maasa amiqimmandee rakisidaqa qamunnannai ititaidaqa.  
\v 24 Nifu qafaafanoo nidi mari atisa sia amiqimmandee ititaidaqa kai akooqoo maridanoo. Anutufa kai narí iriranannai maasa qifaaqasaa atiuqa maaqimasee ootupanau, Ureeqara atiuqa uriqarara rakisirana maraanee qimasee ootupanau.  
\v 25 Miqi marianara sia maasa qifaaqa rainarafa maridanoo aiqama aadu aadu qifaaqa ati fannoo nariara nariara amanamana kai amuqusidanoo narinni narinni rakisidanoo.  
\v 26 Moodaa qifaaqa ati didafifanoo aiqama qifaaqa didafidanoo, kafaa mina dinni moodaa qifaaqa amooqifanoo aiqama qifaaqa asasidanoo.   
\p
\v 27 Qinee Pauroosa inni Koorinti maqannaara qidaqa innee Yisuna ufara suqimariasa aiqama asauku mundirana afaaqara foora mariafaqa aiqama mina afaaqasaa afaaqa fannoo narí amaaqa narí amaaqaki kai mariafanoo.  
\v 28 Innee Yisuna ufa iridaqa nuasa suqiranaki Anutufa miqikai inoo inni faiqí anaasee mareeqeenoo maaqimmasee quqannisoofaqa mariafanoo. Anutufa Yisufa niqiqoo fasiqausa inniki uriqararausaikinau, miqooqari misa ureeqarausa Anutuna ufa faiqí anaasee maqusa maqusa qimannimimarusa faqa inniki quqanau. Doo misa ureeqarausa ufasaa rakisirausa maqusaki qimannimimarusa Anutufa inniki quqanau. Kafaa miqooqari faiqí anaasee oosana oosana ainainirausa quqanau.  
\p Akaqausa faiqí sia amana auquaqaa ira ainaina auqimariasa quqanau.  
\p Akaqausa aurirausa andeeqee marusa quqanau.  
\p Akaqausa faiqí anaasee narí dadaaqi narí dadaaqi marusa quqanau.  
\p Akaqausa ufa suqirausasaa amiqimmandee rakisirausa quqanau.  
\p Akaqausa aanaamuru ufakiqari narí sia irimaru ufanakiqari Yisuna ufa suqiranaki qimannimimarusa Anutufa quqanau.   
\p
\v 29 Innikiqari sia aiqamausa Yisufa niqiqoo fasiqausa mariafanoo, sia aiqamausa maqusa maqusa qimannimiqanusa maridaqa. Sia aiqamausa maqusai naamuaqira ufa qimannimimariasa maridaqa. Sia aiqamausa faiqí sia amana auqaaqaa ira ainaina auqimariasa maridaqa.  
\v 30 Sia aiqamausa aurirana taikanniseemaria fasiqausa maridaqa. Sia aiqamausa aanaamuru ufakiqari nári sia irimaria ufanakiqari qimannimimariasa maridaqa. Mi anaamuru ufanakiqari nári sia irimariafanoo maraquna afeeka fannoo dadaaqifaqa mi ufana oosana sia aiqamausa irimariana kooroo ifaranoo.   
\p
\v 31 Innee inneeqa irirana Anutuna afeekannai narí nimira afeeka oosana oosana faqa akoofasaikirana oosana oosana faqa misauqakinaana uriqararana kai ummarararee qimasee afeekaikiaqa. Doo qinee mi firaa uriqarara oosana uqanna maaqoo kooroo ianaura.   
\c 13  
\s1 Nariara nariara nimuqusira oosanara qidanoo.  
\p
\v 1 Mi firaaqoo uriqarara oosana koorooirafa maaqimminoo maridanoo, faiqí anaasee aiqamausa nariara nariara uriqarara ainainee qimasee misara nimuqusirafa mifa mina maridanoo. Qinee qeeqa Anutuna maraquna afeekannai aanaamuru moomoo maqannaa ufakiqari sia iria maria ufanakiqari faqa qangiroo ufakiqari faqa Yisuna ufara suqiranaki qimannimunanoo qeeqa qimuqusaki faiqí aanaaseera uriqarara ainainee qimasee misara nimuqusirafa sia marifaqa qeeqa kai qeeqa firaa ufatia fifau kammee kammee qidaqa.   
\p
\v 2 Anutuna maraquna fannoo oosana oosana afeeka qiminaqa qinee qeeqa kai Anutuna ufa amiqimasee qimannimianaqee qinee aiqama ainainara irisee aiqama kukeeqara ainainara irisee fee, qinee qeeqa Yisuna saqarikirafa afeeka marinaqee aaqana moo mafi moosaa quqaanauree, mi aiqama ainaina afeekafa qiqa daundurai afeekaikifanoo faiqí aanaaseera uriqarara ainainee qimasee misara qimuqusirafa sia marifaqa qinee sia maridara foora maridaqa.   
\p
\v 3 Qinee qeeqa aiqama ainainatia mareeqee ainaina siaisa kaqi nimiqee qeeqa qifaaqa faqa mareeqee idaki aquanauree miqidaqa faiqí aanaaseera uriqarara ainainee qimasee misara qimuqusirafa sia qini daundurai marifaqa mi ainainaqanda sia qini dadaaqianara miqidaqa.   
\p
\v 4 Faiqí aanaaseera uriqarara ainainee qimasee misara qimuqusirana qinee Pauroosa kooroo ianaura. Faiqí aanaaseera nimuqusirafa maaqimminoo mariannoo, reendeenamandee ubiqafi misa ufa irirafa mariannoo, fifimmasee faiqí aanaaseera qimannimirafa mariannoo. Faiqí aanaaseera nimuqusirafa sia rairaiqirafa mariannoo, sia nariara oori uqeerasee mariannoo, sia narí amooqirafa mariannoo.  
\v 5 Faiqí aanaaseera nimuqusirafa sia adi namufaqa marifa maridanoo sia nariara kai irimarifa maridanoo, sia dauni kaukaatufa qimarifa maridanoo, sia akaqausa mandaikammamaqaanara irimaree fimarifa maridanoo.  
\v 6 Faiqí aanaaseera nimuqusirafa sia mandoosanara asasidanoo kuqaa anoona ufa qiranara asasidanoo.  
\v 7 Faiqí aanaaseera nimuqusirafa sia minnisee finanoo akooqaidanoo, misa mina mandaikamma maqaafanoo kaqi kai irisee minni saidanoo, faiqí aanaaseera amiqira irirana irimaree fimarinafa faqa aaqainausakiara sia misara taikee maqi qirafa faqa oosana oosana ainaina amiafanoo reendeenamambi ubiqafi kaqi mi manda oosanna fee amiqira oosana fee kaqi mara maree fimarifanoo amuqusirafa miqiminoo maridanoo.   
\p
\v 8 Faiqí aanaaseera nimuqusirafa naaru naaru marira ainaina maridanoo sia taikarafa maridanoo. Maqee kamuqoo Anutuna maraquna akaqausa naakifaqa amiqimasee qimannimirafa maqee maridanoo ufaasu ainaina kai maridanoo. Akaqausa sia nári irimaria ufana qimannimirafa maridanoo mifa faqa taikaannoo, amiqira irirafa maridanoo marinoo aiqaraannoo.  
\v 9 Anutufa maqee qimimari irirafa faqa qimimarifaqa faiqí anaasee qimannimira ufa faqa maqee atisaa maridanoo.  
\v 10 Kasooqaqee Yisufa qumira aukuana firaafa anirainanoo maqee atisaa marirafa taikafuannoo.   
\p
\v 11 Qinee Pauroosa faiqi aanaaqi mariafanna kamuqoo qini ufa faqa qini didirafa faqa qini irirafa faqa faiqi aanaaqindi marinau, maqee faiqí kammambunanoo faiqi aanaaqi irirafa doo taikafinoo. Yisufa qumuaninna aukuanna miqikai iannoo.  
\v 12 (Pauroofa maru aukuanna manda tanuka kai marinau. Mi manda tanukana kikiqusidanoo maa ufana qinau.) Maasa tanukaki qeeqa doori qafaidaqa sia amiqimmandee qeeqa qimana qafaidaqa. Maasa maqee qafee marunafa miqirana ati kai qafaidaqa, Yisufa quminna aukuana maasa mina faqa narí oori narí oori andeeqasee qafaanaura. Maqee marunna irirafa ati kai maridanoo, Yisufa quminna aukuana maasa irirafa anoona mariannoo. Miqoo maasa irirafa Anutufa maasara amiqimasee irindee kai inoo anoona irirafa maasaki faqa mariannoo.   
\p
\v 13 Doo maqee kamuqoo maa qaaramoo ainainna kai maridanoo. Yisunasaa irirana rusirana faqa naaru kambiqaaninnanara asasamandee afeesirana faqa faiqí aanaaseera faqa Anutunara faqa uriqarara ainainee qimasee misara nimuqusirana miṉamufa kai maqee kamuqoo kaqi maridaqa misakiqari nimuqusirafa kai uriqararafa maridanoo.   
\c 14  
\s1 Kafaa amiqimmasee Anutuna maraquna dadaaqiranara qidanoo.  
\p
\v 1 Faiqí aanaaseera nimuqusirafa uriqararafa maridanoo fee qidaqa minara inni Koorinti maqannaasa qimannimidaqa, Innee minara irisee faiqí aanaaseera nimuqusirafa maraanauree qimaseeqa mina mararara kai kadaapiruaqa. Anutuna maraquna nimi mari afeeka oosana oosana faqa akoofasaikirana oosana oosana faqa, minauqa faqa innee inneeqa irirana ummarararee qimasee afeekaikiaqa. Miqidaqa faiqí anaasee Anutuna ufa qimannimira afeeka minara uriqarara fee qimasee firaaqoo randasee maraaqa.  
\v 2 Faiqí moo fannoo narí sia irinna aanaamurusa ufakiqari qimannimimarifa sia faiqifau qimannimidanoofau Anutuna faqa ufa qidanoo. Faiqí sia mina ufa iridaqa moosa ufa marifaqa. Mifa Anutuna maraquna afeekannai kukeeqara anoona ufa qidanoo.  
\v 3 Faiqí moo fannoo Anutuna maraquna fannoo dadaaqifanoo Anutuna ufa narí ufakiqari qimannimifanoo nimuqusaki mandaikisa mina ufa iriafanoo dadaaqirana faqa pooduqarana faqa amiqi amiqirana faqa maraidaqa.  
\v 4 Moosa ufakiqari narí sia iri maria ufanakiqari qimannimimari fasiqafa narí kai narí dadaaqidanoo, Anutuna ufa nári ufakiqari qimannimimarifa aiqama Yisuna ufara suqimariasa dadaaqidanoo uqeeraidanoo.   
\p
\v 5 Qinee inniara aanaamuru ufakiqari sia irianakiqari aiqamausa minakiqari ufa qiaqee qidaqa. Mi oosanna uriqararafa maaqimminoo maridanoo Anutuna ufa nári ufakiqari qimannimirafa Anutuna maraquna nimimarifa qinee inniara minara firaaqoo qiaqee qidaqa ridaqa. Anutuna ufa nári ufakiqari qimannimimarifa uriqararafa maridanoo, aanaamuru ufakiqari sia iria ufanakiqari qimarifa ureeqarafa maridanoo, mi moo ufanakiqari qimarinnana faiqí moo fannoo aniree nári ufakiqari mi ufana qimanniminanoo andeeqasee irifanoo amana mariannoo miqimasee Yisuna ufara suqimariasa dadaaqirana mareefaranoo.   
\p
\v 6 Oo qini qikaqaafasaa kasooqaqee innee iannai oonureeqa aanaamuru ufakiqari qimannimisee naqimandee dadaaqianauree. Sia dadaaqirafa mariannoo. Anutuna maraquna fannoo aamuaqira ufa qimannimira fee, qimannimiranee, irira ufa fee Anutuna maraquna dadaaqira ufa qimannira fee naamuaqira ufa fee nári ufakiqari qimannimianaqa aiqamausa dadaaqirana mareefaranoo. Moosa ufakiqari sia dadaaqirana mareefaranoo.   
\p
\v 7 Fifau sia kasi mari ainainna ufireena faqa kookaanauru faqa piripunna faqa marifaqa sia minauqakiqari amiqimmandee fuaqaidaqa minakiqari idi sia amiqimmandee fuaqaifanoo idirainna fasiqa anaaseesa naqi fee mandee irifaree, sia irifara.  
\v 8 Rakira karaambaiqa fannoo sia amiqimandee kaanina uqeeraifaqa naqimandee rakirana aiqamausa uqeereefaree, sia uqeeree faranoo.  
\v 9 Innee miqikai iqa maraquna fannoo naakinaqa aanaamuru ufakiqari sia irianakiqari ufa qifaqa naqimasee ani ufa oosana irifaree sia uqanna irifaranoo. Ani ufa fannoo fifau ufaira foora uqidanoo.  
\v 10 Maa maqa maaqanakina moomoosa ufa maridanoo aiqamausakina misa ufa anoona maridanoo.  
\v 11 Anaamuru moo fannoo findifi nári ufakiqari qini qimaqimifaqa qinee siamma irianaura. Qinee mi fasiqanara aanaamuru fee qiana mifa qiniara aanaamuru fee qiannoo.  
\v 12 Innee Koorinti maqannaasa kaaqa Anutuna maraquna fannoo nimimari afeekanara kai firaaqoo rimariasa mariafanoo. Mi afeeka iriranakiqari maanara kai afeekaikiaqa. Yisuna ufara suqimariasa misara dadaaqiqa firaaqoo uqeeree maria ainainnara kai nidinaqa uqeeraaqeera qidaqa.   
\p
\v 13 Faiqí moo fannoo maraqunannai aanaamuru ufakiqari qimannimidanoo narí faqa faiqí anaasee faqa sia irifanoo kafaa Anutunara innaaru qinanoo moo afeeka aminanoo sia irimaria ufanakiqari qimarina anoona irisee quandasee kooroommasee kafaa nári ufakiqari qimanniminaqa doo iriaqeera.  
\v 14 Maraquna fannoo dadaaqinaqa sia iria ufanakiqari innaaru qiananoo qini qimana fannoo kai kuqaa innaaru qiannoo qiqa irirafa sia innaaru qiannoo.  
\v 15 Qinee minara naqi fee qianauree qinee maaqimmianaura, qinee qeeqa qimana faqa qeeqa iriranannai faqa innaaru qianaura. Qinee Anutunara idi raidaqa qeeqa qimanannai faqa qeeqa iriranannai faqa Anutunara idi raanaura.  
\v 16 Innee Yisuna ufara suqimariasa suqimarifanoo moo fannoo Anutuna maraquna fannoo aakinanoo narí amana fannoo kai aanaamuru ufakiqari innaaru qinanoo moo kaqiqee fasiqa fannoo ani marida iridanoo naqimasee mifa iriseenoo Anutunara mifa faqa eedoo qiannoo fee. Mifa sia uqanna amana ani ufa oosanara iriannoo.  
\v 17 Ani Anutunara dufi dufi qira ufa amiqimmasee qinanoo moo fasiqa fannoo sia amiqimasee irinanoo ani ufa fannoo sia mina dadaaqiannoo.   
\p
\v 18 Qinee Pauroosa maanara Anutunara dufi dufi qidaqa, qinee firaaqoo moomoo kari inni fiqaramasee aanaamuru ufakiqari daadumai maridaqa innaaru qidaqa.  
\v 19 Yisuna ufara suqimariasaki suqidaqa qinee sia miqidaqa. Misaki maridaqa nári ufakiqari misa naamuaqianee qidaqa moodaannai qisauku ufa kai amana kai qusa qimannimiranara dididanoo. Moosa ufakiqari misa sia iri maria ufanakiqari kisaaqasaa qimannimianaqa sia irifoora qikooqaidanoo.   
\p
\v 20 Oo qini qikaqaafasaa sia inni irirafa faiqi aanaaqi iriranara foora mariani, faiqí firaasa iriranara foora mariani. Oosana oosana mandainainara minara kai inni irirafa faiqi aanaaqindiara foora nisakadiki qikairi siaisa mariaqa.  
\v 21 Tamummaqara fasiqauqa minara maaqi qimasee akara riqau.  
\q1 Karaambaiqa qinoo qinee maa maqannaasa qimannimianaura.  
\q1 Qinee aanaamuru ufa qimariasa niqiqaanaqa qimannimifaranoo.  
\q1 Qinee aanaamuru nifaurunnai qimannimianaura.  
\q1 Qini qiku qisauku aiqama mi ufana irisee nikooqainaqa sia irifaranoo.  
\p Tamummaqara fasiqa ufa miqimminoo marifaqa qinee Pauroosa minara maaqi qidaqa.   
\p
\v 22 Qinee maraqunannai aanaamuru ufa qiranara maaqi qidaqa Yisunara sia irimariasa irisee minara kuqaa fee qiaqee qimasee náriara Anutuna narira ufa ameemaanai marianara iriaqeera mi ufafa maridanoo. Yisunara doo irimariasara sia misarau maridanoo, doo misa iridaqa. Maraqunannai Anutuna ufa nári ufakiqari qimannimirafa Yisuna ufa irimariasa iriaqee ainainna maridanoo, mina ufa sia irimarinausa sia mina irifaranoo mina anoonara randee faranoo.   
\p
\v 23 Yisuna ufara suqimariasa aiqama suqusee maridaqa aiqamausa moodaa kari aanaamuru ufakiqari dapi dapi ufa qimarifanoo kaiqee fasiqa fee aamina fasiqa fee minaki ani keeqafiqa inniara furufari mariasee qimasee sandaannoo.  
\v 24 Aiqamausa suqidaqa Anutuna ufa nári ufakiqari narí qimami narí qimami qimarifanoo kaqiqee fasiqa fee aamina fasiqa fee inniki keeqafinoo irinoo narí mandoosanara aundurai oonumafi iriannoo. Narí irinnufafa narí raquru amiannoo.  
\v 25 Narí mandirirafa aundurai kukeeqanoo marinafa aiqama kooroomambinanoo mifa anuka kummarammafinoo Anutuna amooqidanoo maaqi qiannoo kuqaa Anutufa maaqoo inni faqa maridanoo fee qiannoo.   
\s1 Yisunara suqiranaki andeeqaaqeera qidanoo.  
\p
\v 26 Oo qini qikaqaafasaauqa, maa qinee qunna ufana anoona koorooianaura. Innee innaaru qiraree qimasee suqidaqa moo fannoo idi moo oosana araannoo moo fannoo naamuaqira ufa oosana araannoo, moo fannoo Anutunaindaraa ufa irisee qimannimiannoo moo fannoo aanaamuru ufakiqari qimannimisainanoo moo fasiqa maraquna fannoo dadaaqinanoo mi ufana anoona kooroomannimiannoo. Aiqama ainaina Yisuna ufara suqimariasa dadaaqirafa kai mariani.  
\v 27 Misa aanaamuru ufakiqari qimannimiani qimasee qaaraqanda kai fee qaaramoo kai findifinana moodaa moodaa fannoo kai qimannimiaqa, miqooqari moo fannoo misa ufa anoona nári ufakiqari kooroommasee qimannimiani.  
\v 28 Yisuna ufara suqiranaki koorooimarinna fasiqafa sia marinana sia aanaamuru ufakiqari qimannimiani. Narí kai narí aundurakiqari Anutuna faqa ufa qinafa amana narí kai qiani.  
\v 29 Qaaraqanda fee qaaramoo fee Anutufa ufa niminnana qifaqa aiqamausa suqimariasa irisee misa ufa raina rainammasee iriaqa.  
\v 30 Inni ufa suqiranaki faiqí moo fannoo ooqu marinafa Anutunaindaraa ufa marasainanoo ufa qimanniminna fasiqafa ooqu marinanoo mifa findifi qimannimiannoo.   
\p
\v 31 Innee aiqama amana Anutuna ufa qimannimiaqa moodaa kai moodaa kai findifidaqa amana qimannimifaranoo. Miqimandaifaqa aiqamausa misa irirana iriseeqa dadaaqirana mareefaranoo.   
\p
\v 32 Maraquna fannoo inni naakifaqa Anutuna ufa qimannimirana dadaaqirana nimifaqa sia dapi dapi furufariaqa innee inneeqa kai inneeqa nifauru naundurasaa rakisimariasa marianara amiqimasee rakisiaqa.  
\v 33 Anutufa sia maasara dapi dapi furufariranaki mariaqeera daarama quqeenoo asooaranaki andeeqasee mariaqeera daarama narí ufa iriranaki quqeenoo. Anutuna ufara suqimariasa maaqanna maaqana moodaa oosana qimannimiafanaqa maree mariafaqa inni faqa qimannimidaqa.  
\v 34 Yisuna ufara suqiranaki anaasee sia findifi ufa qimannimiaqa, kaqi ooqufaaqee mariaqa. Yuda maqannaasa sandufamau kai fiqa faiqí ufa ameemaanai kai mariaqa.  
\v 35 Anaasee moo ainainara irararee qimaseenoo sia paamma qimasee iraannoo, kasooqaqeenoo maaqaki oonureenoo narí afaaqisaa iraannoo. Yisuna ufara suqiranaki anaasee findifi ufa qinafa asaurirafa mariannoo.  
\p (Koorinti maqannaasa akaqausa Pauroona ufara sia anoona ufa fee qimasee nári iriranamau fimarufanoo Pauroofa minara maaqi qimasee qimanniminoo qinau.)   
\p
\v 36 Oo Koorinti maqannaasa Anutuna ufa fannoo innikiqari fee indaaru kambiqeenoo fee innee inneeqara maasa kai mareeunoo fee qidee.  
\v 37-38 Innikqari moo fasiqa fannoo nariara Anutuna tamummaqara fasiqausee qimaseenoo fee maraquna qimimari afeekana faqaasee qimaseenoo fee mi fasiqafa qinee Pauroosa akara rumannimunnufanara kuqaa Anutuna naamuaqira ufa fee qinafa anoona mariannoo. Qini maa ufanara sia iridee qinafa innee minara unna qira fasiqa maridanoo fee qimasee mina ufa faqa sia iriaqa.   
\p
\v 39 Oo qini qikaqaafasaa Koorinti maqannaasa inneeqa Anutuna ufa faiqí anaasee qimannimiranara maraanauree qimasee afeekaikida mina mararara kai kadaapiruaqa, akaqausa sia irimaria ufanakiqari maraqunannai qimannimifaqa sia qaoo qiaqa.  
\v 40 Innee ufa suqiranaki iriranamau kai andeeqasee maqee maqee fuaqa.   
\c 15  
\s1 Yisufa kuqiranakiqari findifunara koorooidanoo.  
\p
\v 1 Oo qini qikaqaafasaa ooqai qinee Pauroosa Yisuna amiqira fasaasa ufa qimannimiafannana, innee mina irisee maqeeiafanoo inni irirafa minasaa rusisoofa mapukinoo marinara inni naaqoo auqaidaqa.  
\v 2 Yisuna amiqira fasaasa ufa qimannimiafannana, innee mina rakisi mapuku qumareeqa innaarunai asumu marirana maree mariafanoo. Abee innee indaaru kuqaa fee iriqee iqau unna qimasee iridee qifaara.   
\p
\v 3 Qinee sia qinee qeeqa ufa kaifau qimannimiafannanau. Yisuna aiku asauku mariannaindari anu ufana firaaqoo uriqarara ufa qimannimiafannana. Mi ufana oosana maaqimminoo maridanoo. Asauku mundirafa tamummaqara fasiqauqa akarakinaa ufamau finoo maasa mandainainara kuquqimaqanau.  
\v 4 Kuqufufaqa misa mina iri akundamasoofanoo qaaramoo faasaana marinoo tamummaqara fasiqa akarakinaa ufamau finoo kuqiranakiqari findifinau.  
\v 5 Findifufanoo Peetooroona afusaa koorooinoo miqooqari qisaukuqara taikaseenoo qikunni ooqu qaaraqanda mareenoo niqiqaaninna fasiqausa aiqama nifusaa koorooufaqa qafaqau.  
\v 6 Qafamasoofanoo miqooqari narí ufa irimarusa faifa handareeta fasiqa anaesee moomoo uqanna nifusaa moodaa kari kai kooroo inau. Misauqakiqari akaqausa asooqaqee kuqufufaqa, moomoosa kaqi maridaqa.  
\v 7 Miqooqari Yisufa Yameesana afusaa kooroomambinoo miqooqari niqiqaaninna fasiqausa nifusaa kooroomambinoo qimanniminau.   
\p
\v 8 Inaaqianna uqanna qini Pauroosa qifusaa faqa koorooinau. Qinee daaduma uqanna moo oosanakiqari amaneendaraasa eedadara foora mariafanausa maridaqa Yisufa qini qifusaa kambiqoofaqa qafaqiafana.  
\v 9 Qinee Yisufa niqiqoo fasiqausakina ureeqarausa maridaqa. Qinee Anutuna ufara suqimariasa aupurarana nimiafanausa marunnanara naqi fee ifaqee misa qiniara Yisufa niqiqoo fasiqafee qida fee, sia qinee misa nimana maridaqa.  
\v 10 Anutufa sia qini ureeqaranara irinoo kaqi narí afauaranannai qini mareeqeenoo narí niqiqoo fasiqausaki quqaqiseenoo ufa qimannimiannee afeeka qimufanoo sia qiniki mandaikinau. Qinee aiqama niqiqoo fasiqausa urinaaqaramasee faiqí aanaaseeki maqusa maqusa kadaapiriqa, sia qeeqa kaifau miqidau Anutufa qimu afeekafa qiniki kasinara miqidaqa.  
\v 11 Yisufa maasara kuqinoo findifunara qimannimunnufana akaqa niqiqoo fasiqausa nookinaanee iridee qini dookinaanee iridee, mi ufana kai maasa qimannimisaafanaqa minasaa inni irirafa rusinoo maridanoo.   
\s1 Maasa kuqiranakinaana findifuannanara qidanoo.  
\p
\v 12 Maasa asauku mundirafa kuqiranakiqari findifunara maasa qimannimiafanaqa innikiqari akaqausa naqimasee kuqirausara sia findififaranoo fee qida fee.  
\v 13 Kuqirausa kasooqaqee sia kuqiranakiqari findifirarifanoofau asauku mundirafa miqi kai inoofau sia findifu qini.  
\v 14 Ooqai asauku mundirafa kuqiranakiqari sia findifinaqau maasa qimannimira ufafa sia marinaqau sia qimannimunaiqini, innee inneeqa irirana rusimari ainainafa sia mariqini.  
\v 15 Kuqirausa kuqiranakiqari sia findififanoofau asauku mundirafa faqa sia findi fiqini. Anutunara asauku mundirana kuqiranakiqari uqeeree maqi qiafannanara kuqirausa kuqiranakiqari sia findififaqau maasa qimannimiafanna ufanara unna ufa fee qini.  
\v 16 Kuqirausa sia findi fifaqau asauku mundirafa faqa sia findifiqini.  
\v 17 Asauku mundirafa kuqiranakiqari sia findifinaqau inniqa saqarikirafa kai fifau ainainara foora sia mari ainainnaki faqa innee inneeqa mandainainaki kaqi auiamakifau furufarammiaqini.  
\v 18 Kuqirausa kuqiranakiqari sia findififaqau moomoosa asauku mundiranasaa irirana rusisaida kuqimariasa sia innaarunai fini auiamakifau furufariaqini.  
\v 19 Maasa maaqoo marunna kamuqoora kai iriseefau asauku mundirana minasaa irirana rusidau, maasa mandainaina firaafa mariqini, aiqama maqannaasa maqa afaaqasasa mariasakiqari maasa dinee teeroo uriqaranoo mariqini.   
\p
\v 20 Anoona ufa maaqimminoo maridanoo. Doo kuqaa asauku mundirafa kuqiranakiqari findi finau, mina findifirafa maasa kuqirausa findifirana qima afeekaikidanoo mapukidanoo. Doo kuqaa maridanoo.  
\v 21 Ooqai indaaru moodaa fasiqannai kai kuqirana kambiqanau, miqi kai inoo moodaa fasiqannai kuqiranakiqari findifirafa kambiqanau.  
\v 22 Maasa aiqama fasiqa anaasee Adamana faiqi namu marunnanara kuqidaqa, miqikai inoo asauku mundirana faiqi namu marianara Anutufa misa kuqiranakinaana uqeera quqaannoo.  
\v 23 Sia dapi dapi Anutufa kuqiranaki uqeeraannoo andeeqaseenoo mara findifuannoo, asauku mundirana naaree doo mara findifumaqoofanoo maridanoo miqooqari mifa quminna aukuana mina aiku asauku mareeqee findifuma nimaqaannoo.  
\v 25 Anutufa narí asauku mundirana mapuku amaqaseenoo qimaminau. Anee aiqama ainainasaa rakisimaree fimarinaqa qinee Anutusa aiqama namuqaa afaannainaina mareeqeeqa ani asauku mundirana aramandunnai quqasaanana anee maqa mammaaqai radamusainaqa kaifaa rakisianauranoo.  
\v 26 Inaaqianna radamuaninna namuqaafa kuqirafa maridanoo mina faqa radamuannoo.  
\v 24 Miqoo taikarafa kambiqaannoo Asauku mundirafa afaannauqa uriqararausa faqa misa faiqí firaasa faqa misa afeeka fasiqauqa aiqama mareeqeenoo narí aramandunnai quqaseenoo radamuseenoo narí ququsakinaasa aiqamausa mareeqeenoo narí akoona amiannoo.   
\p
\v 27 Tamummaqara fasiqausa akarakinaafa minara maaqimminoo maridanoo.  
\q1 Anutufa aiqama ainaina mina aramandunnai kai quqaannoo fee qidanoo.  
\p Tamummaqara fasiqa minara miqi qimasoofaqa qinee minara maaqi qidaqa. Anutufa aiqama ainaina mina aramandunnai quqararee qidanoo sia nariarau mina aramandunnai quqararee qidaqinoofau.  
\v 28 Anutufa aiqama ainaina mareeqeenoo asauku mundirana rakisirana ameemaanai quqasainanoo asauku mundirafa mina amaaku fannoo quandaki Anutuna aramandunnai narí keeqaannoo, aiqama ainaina quqoona aramandunnai keeqafinanoo miqooqari Anutufa aiqama ainainatia uqanna uriqararafa mariannoo.  
\p (Pauroofa maru aukuanna faiqí moo fannoo Yisuna ufa irimarufa sia nammari mararai kuqufufanoo moo fannoo qaara kari nammari maree marinau. Mifa nariara faqa kuqunara faqa maree marinau. Mi aukuanna mi oosannara Pauroofa qimannimirara maaqi qinau.)   
\p
\v 29 Inni Koorinti maqannaasaki kuqirausara nammari maree marusara misara naqi fee qianauree. Kuqirausa kuqiranaki sia findifuafaqa innee nanaree fifau misaree qimasaida fifau nammari maraidee. Innee yanee dadaaqidee miqidee.  
\v 30 Maasara faqa iriaqa maasa Yisuna ufa saara aiqama faasaana moomoo kari aupurarana narirana eerairirana maraidaqa.  
\v 31 Qini qikaqaafasaa, qinee aiqama faasaana kuqiranara aniraannoo qidaqa eerairidaqa. Qinee sia kaiqeesa maana koorooidaqa. Innee maasa karaambaiqa asauku mundirana Yisunaki fimarianara nimooidaqa minara kai kooroomannimidaqa.  
\p (Pauroona aukuana Roomma maqannaasa sia Yisuna ufa irimariasa nári oosana maraidaqa faiqí anaasee qafaifanoo adiafaa ianifee qimasee ooni faandamuraki faiqí faqa kaasau aandau faqa mara quqasoofaqa rakimariqau. Yisuna ufa irimaru ufafa taikaanifeera mara quqasoofanoo kaasau aandau naru neemarinau. Pauroofa minara iriseenoo Koorinti maqannaasa qimannimidanoo mina kikiqusimarinau. Koorinti maqusanaasa maa ufana qimanniminoo qinau.)   
\p
\v 32 Qinee Pauroosa Eefeesusa maqusai kaasau aandaura foora marufaqa misa faqa rakimariqiafana. Kuqirausa sia kuqiranakiqari findififaqau qinee maaqoo Eefeesusa maqusai mi fasiqausa faqa rakidaqa nana ainainee maraanauree qimasee misa faqa rakiqiafana, fifau maaqoo maria fasiqaanaaseesa qiqafaaqee qimasee fee rakiqiafana. Oo sia miqi qiafana. Kuqaa kuqiranakiqari findi fuanauree qidaqa miqi qiafana. Faiqí firaasa unna ufa moo minara maaqimminoo maridanoo. Duna maasa kuquannanara maqee narana nammari moomoo naa. Qinee Pauroosa minara maaqi qidaqa. Kuqirausa kuqiranakiqari sia findififaqau anoonammifooqini, findififaranoo unna qimariafanoo.   
\p
\v 33 Innee sia mi unna ufana iriaqa,  
\q1 Moo amaana ufa minara maaqi qidanoo, Mandoosana maree maria aqoondisa inni marirana putaamma nimaqeefaranoo.   
\p
\v 34 Innee Koorinti maqannaasaki akaqausa kuqirausa sia findifi maria ufana qimariasa inni putaamma nimaqaifaqa innee misa mandoosana maraseeqa furufarirana maree mariafanoo. Innee mina minnisee kafaa andeeqara irirana marasee inneeqa mandoosana quqasee andeeqaramau fuaqa. Inneeqa nisauruaqa innikiqari akaqausa Anutuna afeekara sia amiqimasee iri marifanoo kaqi meeramau irirana irimariafanoo.   
\s1 Maasa kuqiranakiqari findifuanna qifaaqanara qidanoo.  
\p
\v 35 Inniki moo fannoo kuqirausa findi firanara maaqi qiannoo, kuqirausa doo putaamminoo maridanoo naqimasee fee findi fifaree, nana afaaqee findi fuannoo fee.  
\v 36 Anee furufarimarianafa mi ufana qimariananoo. Anee nandi ummaqusainanoo sia aaqee kambiqaannoo mifa putaa mambinanoo mina uapaaqi fannoo inaaqiana kambiqaannoo.  
\v 37 Innee sakuma qaqama fee moo narana qaqama fee ummaqidaqa sia narana faqa amanee faqa ummaqi mariafanoo qaqama kai ummaqi mariafanoo. Ummaqusaafanoo sia qaqama kai kambiqaidanoo narana anoona namufaqa amanee namufaqa kambiqaifaqa qafee mariafanoo.  
\v 38 Anutufa narí iriranannai aiqama aadu aadu qaqama nári aadu aadu kambiqaaninnana anoona namufaqa amanee namufaqa nimidanoo. Anutufa aiqama qaqama andeeqasee narí kai anoona amidanoo.   
\p
\v 39 Kasimari ainaina nimaqi miqi kai idanoo sia aiqama moodaa nimaqi faqaasa maridaqa. Faiqí moo nimaqi faqaasa maridaqa aandau moo nimaqi faqaasa maridaqa, ufini moo nimaqi faqaasa maridaqa, noodaanna moo nimaqi faqaasa maridaqa.   
\p
\v 40 Innaarunaindaraa nifaaqa faqaasa faqa maqasaaqaraa nifaaqa faqaasa faqa aaduma maridaqa. Innaarunaindaraa nifaaqa areenarafa moo maridanoo maqasaa qaraasa nifaaqa areenarafa moo maridanoo.  
\v 41 Suani afu narí areenarafa aaduma moo maridanoo, quqoona narí areenarafa aaduma moo maridanoo, fasau narí areenarafa aaduma moo maridanoo, fasau misaki faqa aadu aadu areenarafa maridaqa.   
\p
\v 42 Kasooqaqee kuqirausa kuqiranakiqari findififanoo miqiminoo mariannoo. Faiqí anaasee kuqufifanoo mina iri akundee mariafa maqasaaqaraafa maqa maridanoo. Kuqiranakiqari Anutufa uqeerasainanoo mi afaaqafa naaru naaru marira afaaqa mariannoo.  
\v 43 Nikundee mari nifaaqafa ummooqukidanoo mandaikidanoo, kasooqaqee kuqiranakiqari Anutufa uqeerasainanoo afu qafainanoo idaaqirafa amiqirafa afeeka mariannoo.  
\v 44 Nikundee maria nifaaqafa maqasaaqaraa nifaaqa ufaasu marifa maridanoo. Anutufa uqeerasainanoo naaru marianinna innaarunai nifaaqa mariannoo. Maqasaa nifaaqa ufaasu nifaaqa maaqoo mariana amana kai marifa maridanoo. Mifa marinanoo innaaruna naaruara marira nifaaqa amana kai marifa kuqaa mariannoo.   
\p
\v 45 Tamummaqara fasiqauqa akara minara maaqimminoo maridanoo.  
\q1 Indaaruqaa fasiqa Adamafa kasimaruna auquqoofa marinau.  
\p Qinee Pauroosa minara maaqi qidaqa. Adamana aanaaqiannaa fasiqa Yisufa maqee marirana faqa naaru marirana faqa nimimari maraqunafa maridanoo.  
\v 46 Sia naaru marirafa naaru kambiqaidanoo maqasaaqaraafa naaree kambiqaidanoo, miqooqari kai naaru marirafa kambiqaidanoo.  
\v 47 Indaaruqaa Adamafa maqasaaqaraa kookoomannai auqirafa marinau. Inaaqianna Adamafa Yisufa innaarunaindari quminau.  
\v 48 Maqasaaqaraasa nári nikoona Adamana fooqaasa maqa nifaaqafaqaasa maridaqa. Innaarunai fimariasa innaarunaindaraa fasiqa Yisuna afaaqaikirausa marifaranoo.  
\v 49 Maqee maasa maqannai auqira fasiqa afaaqa afisiqa moodaa karammiqa maridaqa kasooqaqee maasa miqikai masee innaarunaindaraa fasiqa afaaqa afisusee miqi kai iqa moodaa karakaimmianaura.   
\p
\v 50 Oo qini qikaqaafasaa qini Pauroosa ufa anoona maaqimminoo maridanoo. Faiqí nimaqi faqaasa faqa fidika faqaasa faqa sia Anutuna ququsaki keeqafifanoo naida nimiannoo. Ufaasu maqasaa ainaina faqa sia amana naaru marirana maraannoo.   
\p
\v 51 Innee amiqimmandee iriaqa, kukeeqara ufa qimannimianaura, maasa sia aiqama kuquanaura. Qusasaa uqanna Anutufa tautumaqimaqaseenoo maasa moo kamaakamma qimaqaannoo.  
\v 52 Nifu tasunduna tasunduna kaqi kaqi idanoo miqirafa kai inaaqianna ufireena fannoo fuaqainanoo Anutufa maasa moo kamaakamma qimaqaannoo. Mi ufireenna fuaqasainanoo kuqirausa minakiqari naaru marira nifaaqa faqaasa findififanoo maasa aiqama moo kamma qimaqaannoo.  
\v 53 Ufaasu maqasaa nifaaqa faqa sia kaqi ooru fifaranoo naaru marirana naaree afisumareeqa ooru fifaranoo. Kaqi mariasa kuqifandinausa misa afeeka nipata naaree afisumaree amana innaarunai ooru fifaranoo.  
\v 54 Ufaasu maqasaaqaraa nipata faqaasa kuqifandinausa naaru marira nifaaqa sia kuqimaria nifaaqana afisumareeqa doo miqoo ooqeenaasa akara anoona kambiqaannoo. Misa maaqi qiqau.  
\q1 Anutufa doo kuqirana aiqama nambiqama taikaseenoo mina uraaqaranoo maridanoo.  
\q1 Kuqirana rafaaqafirafa doo taikeenoo.  
\p Kafaa moo akarakinaa ufa minara maaqi qidanoo.   
\q1
\v 55 Oo kuqirafa maasa rafaaqafimarianafa ani uriqarara afeeka yaifee maridanoo. Doo taikeenoo.  
\q1 Oo kuqirafa ani aupurara afeeka maasa qimimarianafa yaifee maridanoo. Doo taikeenoo.   
\p
\v 56 Akara miqinoo marifaqa qinee Pauroosa minara maaqi qidaqa. Maasa aiqamausa mandoosana fannoo kai aupurara afeeka kuqirana amifanoo doo kuqirafa maasa daridanoo. Kafaa mandainaina fannoo mina narira afeeka Anutuna nimaarusira sandufakiqari kambiqaidanoo.  
\v 57 Oo Anutufinnai dufi dufi qidaqa. Maasa inni saimbaqa karaambaiqa asauku mundirana Yisunannai kuqirana faqa mandainaina faqa maasa uriqaraqa maridaqa.   
\p
\v 58 Oo qini qikaqaafasaa doo minara iriseeqa sia kasi kasiaqa mapukuseeqa atukaraqa mariaqa. Karaambaiqa marirana nirana mariana maqee maqee minaki kai noori runusee mariaqa. Karaambaiqa marirana niranaki marianara aiqama saika naaru marira anoona marifa maridanoo karaambaiqa marirana nirana sia moo fannoo anoona siaifa maridanoo. Anoona marifa kai maridanoo.   
\c 16  
\s1 Anutuna ufa irimariasa sarauqinana dadaaqiranara qidanoo.  
\p
\v 1 Oo Koorinti maqannaasa innee Yudeea maqa maaqaki Anutuna saika maree mariasa narana sarauqi marianara munnimma kaqi nimiranara qini iraafaqa minara inni qimannimidaqa. Qinee Karatia maqa maaqaki Yisuna ufara suqimarusa qimannimiafannaqoo miqoo kai fuaqa.   
\p
\v 2 Aiqama amaana faasaanasaa aiqama fasiqa anaasee akaqa munnimma aaduma raina quqaaqa. Narí ainainirana akiaqara munnimma firaana marainafa mina amana kai kaqikaana quqaani kaqikaana marainafa doo narí maraina amana kai kaqikaana quqaani, qambaana amana marainafa doo mina amana kai quqaani, innee aiqama amaanasaa amaanasaa miqikai idaqa raina quqeesaifanoo innooqafinaqa qinee inni maqusai oonuraanna kari munnimma suqirana sia mariani doo faasai suqinoo mariani.  
\v 3 Innee maqee andeeqara fasiqauqa mara quqasaifaqa qinee oonuraanaqa mi munnimmana faqa pasakina akara rumasaanaqa misa mi pasana faqa mi munnimmana faqa mareeqa Yeerusareenni muru kaqi nimiaqa.  
\v 4 Innee qiniara faqa ooru fuannee qifaqa qini faqammooru fifaranoo.   
\s1 Pauroofa narí fuaninnanara tipundaaridanoo qimannimidanoo.  
\p
\v 5 Qinee maaqooqari Maseedoonia maqa maaqakina oonuree aniree iqa ninii taikasee innee mariannai fuanaura.  
\v 6 Inni maqusai oonureeqa kaqi kaaqoo kisaaqasaa inni faqa marianauree, aukuana aiqaramafinaqa qambaanasaqa suara aukuana qaaramoo quqoona inni faqa marianauree. Doo miqooqari moosaa fuanaura yaifee fuanauree maqee sia iridaqa.  
\v 7 Karaambaiqa eedoo qinnanara kaqikaaqoo kisaaqasaa inni faqa marianauree qidaqa. Miqoo inni fi inni nindafee firanara qidaqa.   
\p
\v 8 Qinee maqee Eefeesusa maqusai kaqi marianaura. Yeerusareenni Yuda maqannaasa qoomaqa suqanee maru quqoonafa anirainaqa qinee minasaa Eefeesusa maqusaindari Maseedoonia maqa maaqaki ooruree minni oonuree aniree masee miqooqari innee iannai Koorinti maqusai fuanauree qidaqa.  
\v 9 Maqee Eefeesusa maqusai maaqoo firaa saika anoona saika maridanoo, moomoosa qini ufa ititee mariasa mariafaqa saikidaqa.   
\p
\v 10 Qinee Timootinara qimannimianaura, mifa inni maqusai oonurainaqa innee mina amiqi amiqimmasaifanoo afaaqa quqaani, mifa qini daanna ree marifa karaambaiqa ainainiranaki marifa maridanoo.  
\v 11 Timootifa Yisuna ufa irimariasa qini qikaqaafasaauqa saimbaqa mootinai aiquqaki mai aniraree qimasee inni maqusai naaree anireenoo mai qinee minara rakisi marunnannai Eefeesusa maqusai anianifeera qidaqa. Innee Timootinara kumaaraa fee qimaseeqa sia minara nikoo nikaa iaqa amiqimmandee dadaaqifanoo asooaranakiqari findifinoo mai aniani.   
\p
\v 12 Doo maqee maasa qikaqa Apooroosanara qianauranoo. Qinee innee iannai qikaqaafasaauqa faqa namummaqee fiqa anianneera qidaqa fuki faaki qunanoo sia fidanoo ititammasee kaqi maridanoo maqee sia fuanauree sia andeeqara aukuanee qidanoo. Kasooqaqee andeeqara aukuana kambiqafinanoo fuannoo.   
\s1 Pauroona taikarana ufa.  
\p
\v 13 Inni Koorinti maqusanaasa maqee maa ufana qimannimianaura. Innee maqee maqee aufarida mariaqa, innee Yisuna saqarikiranaki minaki mapukufina kikiqammambuaqa innee maqee maqee paasoosida mariaqa, afeekaikiqa mariaqa.  
\v 14 Inneeqa maridaqa aiqama nirana marirana nimuqusi marinaqa narí dadaaqi narí dadaaqi qiqanuaqa.   
\p
\v 15-16 Innee Sateefanasana faiqi anaasee aiku asaukuara irimariafanoo, misa Akaia maqa maaqakiqari oosanarasee Yisuna saqarikusa mariasa maridaqa. Misa Anutuna ufa irimariasa ainainamma nisee mariasa maridaqa, narí faiqi anaasee faqa nári marirana minaki kai nifaaqa quqasee auqaidaqa. Oo qini qikaqaafasaauqa inni qimannimidaqa. Miqinna fasiqana aanna reeqa mina ufamau fuaqa, akaqausa misa dadaaqimariasa misa ufamau faqa fuaqa.   
\p
\v 17 Mi fasiqafa Sateefanasafa faqa Fooratunatusafa faqa Akaikusafa faqa misa mai aniroofaqa nindafaida asasiqiafana, misara inni Koorinti maqusanaasa ani ani anireera foora qufaqa asasiqiafana.  
\v 18 Misa inni asasirana nimimariandee kai iqa qini qimiqau. Miqira fasiqauqara aiqamausa iriaqaana.   
\p
\v 19 Asia maqa maaqaki Yisuna ufara suqimariasa misa inni nimandaidaqa. Maaqoo Akuirafa faqa narí anaaqa Pirisikira nammarifa faqa nári maaqaki Yisuna ufara suqimariasa faqa inni firaaqoo amiqimmandee Yisuna ufa irimariasara foora inni nimandaidaqa.  
\v 20 Maaqoo mariasa Yisuna ufa irimaria qikaqaafasaauqa faqa inni nimandaidaqa. Innee nariara nariara nikaqafasaa fee qimasee narí amooqee narí amooqee iaqa.   
\p
\v 21 Faiqí moo fannoo qini dookinaana iriseenoo maa pasana akara rinau, maa qusa ufana atisaa qeeqa qisaukunnai akara ruanaura. Qinee Pauroosa inni nimandaidaqa.   
\p
\v 22 Karaambaiqara sia amuqusimarinafa aqurarara ufa minasaa mariannoo. Nári ufakiqari maranata, maasa ufakiqari maasa karaambaiqa qumuannee qidaqa.   
\p
\v 23 Karaambaiqa Yisufa narí afaarira oosana inni faqa nimiani.   
\p
\v 24 Maasa aiqamausa asauku mundirana Yisunaki mariasara irisee qini qimuqusirafa inniki mariani.