\id 1PE - Fanamaket 4 
\h 1 Pita 
\toc3 1Pita 
\toc2 1Pita 
\toc1 Leta Famu ke Pita 
\mt1 Leta Famu  
\mt1 ke Pita  
\imt1 Orek Famu  
\ip Leta igii i e leta famu ae Pita i siit ta u. Pita i neng lon nenge sangful ini u e kalalik na fafausum ke Iesu. I siit ta leta igii usuf foron tom unune ae ri kiis arae foron ses na fale maleh keskes. I siit ta u aunbiing i kiis na Rom.  
\ip Foron tom unune ri tafe ifuun e tatawin tina matanfuntih na Rom, wara le ri unune lo Iesu. Pita i ier isi farakrakai unune kiri ini leta igii. I fas ri ini liu fuuh kiri lo Karisito ke ka fas ri le Iesu sabin i tafe ta ifuun e tatawin. I fas ri sabin ini foron rokap na sinang ae rin mi lo.  
\iot Leta Famu ke Pita i aragii:  
\io1 1:1-2 Tanwara na leta igii  
\io1 1:3-12 Gamen nene ini unune isi liu fitliu  
\io1 1:13—2:12 Liu ae i kalkaluu  
\io1 2:13—3:7 Rokap na sinang ae gamen mi lo  
\io1 3:8—4:19 Foron tom unune rin kalsakai fangungut  
\io1 5:1-11 Gamen fapu gam  
\io1 5:12-14 Farfarop na orek ke Pita  
\c 1  
\p
\v 1 Ia Pita, nenge aposel ke Iesu Karisito, ia sisiit usuf gam ae God ka tim pes ta gam, ae gam kiis sarara arae foron ses na falifu na Pontus, Galatia, Kapadosia, Eisia ke Bitinia.   
\p
\v 2 God Tama kerer ka tim pes ta gam, wara le pakanini tom i usum ta lo gam, ke Tanwa Kalkaluu ka fakalkaluu ta gam. Ma igii gam ka wong ta sing Iesu Karisito ke dawu ka fafuu ta gam.  
\p Ia sising le famais turan siaroh in fuun lo gam.   
\s1 Gamen Nene ini Unune isi Sani ae God i Fakale ta Gam ini  
\p
\v 3 Keren usefages God Tama Kumguui kirer Iesu Karisito. Na tara famais kia, kere ka pang fuu sabin. Ma igii, kere ka nene ini unune isi liu fitliu, wara na apaptifis ke Iesu Karisito tina minet.  
\v 4 Ma kere nene ini unune isi keren kep sani ae God ka fakale ta kerer ini ke ka pakne ta u buuii na kukulii. Tier ae, biil ifasi in marot, biil in laulau ke biil in to aspaket.  
\v 5 Ma i fofonoi rokap lo gam ini rakrakai kia, wara le gam unune lo. In fofonoi lo gam papang na aunbiing gamen kep liu fitliu, ae ka fageges ta u isi in famalal u na farfarop na aunbiing.  
\v 6 Pesu gam ka lala laes, taftawa le marmarsan fatoftof i fatamais ta gam na fatuklin aunbiing.  
\v 7 Ma foron fatoftof ae, ri tapiek una tof unune kimi, le i tekentu le biil, arae ri fafuu goul ini yiif. Isau le, unune kimi i laumet kanaka na goul, wara le goul in rop sau. Male unune kimi i ti rakrakai tom na palgan foron fatoftof, ke gamen kep as laumet, memeh ke ususefages, aunbiing Iesu Karisito in fis.   
\p
\v 8 Taftawa le biil biitom gam par u, isau le gam ier kanaka isi. Ke taftawa le biil gam par u igii, isau le gam unune lo ke gam ka gesges isi, ini tara laes ae ifuun ini memeh ma biil ifasi rin fatof u ini ti orek.  
\v 9 Wara le gam kep fafaliu na tanwa gam, i e fuan unune kimi.   
\p
\v 10 Foron profet tinpakanini, ri orek profet ta isi fafaliu ae God in ta u arae fafen usuf gam. Ri lala ier isi usum lo ke ri ka tatang rokap ta isi.   
\p
\v 11 Tanwa Karisito i susuef lo ri ke ka fas famu ta ri ini foron fangungut ae Karisito in kalsakai u, ke ini memeh ae in kep u namih. Ke ri ka totof ta isi rik usum le nangis foron tier ae in tapiek, ma in tapiek arafah.  
\v 12 God i famalal u usuf foron profet le foron orek profet ae, biil usuf ri tom, biil. Ri use u usuf gam. Ma igii gam ka ongen ta u sing fanu ae ri fafas ta ini Rokap na Fafas ini rakrakai ken Tanwa Kalkaluu ae God i wuun ta u tinbae na kukulii. Ma foron angelo sabin, ri lala kalkal isi par foron tier igii.   
\s1 Gamen Kalkaluu arae God i Kalkaluu  
\p
\v 13 Pesu, gamen fageges fakasi wolwol kimi ke ik malal una tel foim. Ke gamek nene ini unune tikii kimi isi fafen ae God in ta u usuf gam aunbiing Karisito in tapiek.  
\v 14 Gam berberat ke God ae gam misuut la lo, pesu gong sabin gam mi na foron wolwol laulau ae gam tel u la pakanini, aunbiing biil biitom i malal e wolwol kimi.  
\v 15 Isau le, gamen kalkaluu na foron sinang tikii, arae ier ae i tawi pes ta gam, i kalkaluu.  
\v 16 \x - \xo 1:16 \xt WokPris 11:44,45; 19:2\x*Wara le ri ka siit ta u na Buk na Gogoh aragii, “Gamen kalkaluu, wara le ia kalkaluu.”   
\p
\v 17 Male gam foteng God le Tama gam, ier ae i nagogon foim ken fanu tikii la ini tortores na nagogon, ke in rokap le gamen liu ini sokeh na mata aunbiing gam kiis arae foron ses aga na piklinbat.  
\v 18 Wara le God ka fiil fasengsegeng pes ta gam tina matngan liu kimi ae biil ti kamtina, ae gam kep ta u sing foron tubutamat gam. Gam usum le biil i fiil fasengsegeng ta gam ini ti tier ae in laulau sau, arae siliwa le goul, biil.  
\v 19 I fiil fasengsegeng gam ini dawu Karisito tom ae i rokap kanaka. I arae nenge natun sipsip ae biil ti duh lo ma biil ti fabiro laulau lo.  
\v 20 God i tim pes ta u aunbiing biil biitom i fakiis ta piklinbat, ma igii na foron farfarop na biing, ka tapiek malal isi una rokap kimi.  
\v 21 Lo i sau, gam ka unune lo God ae i fapti fafis ta u tina minet ma ka ta memeh usuf i. I e wara ae gam ka unune lo God ke gam ka nene ini unune isi sani ae in tel u namih.   
\s1 Gamen Famais faliu ini Gam  
\p
\v 22 Ma igii, gam ka tapiek fuu tah, wara le gam misuut na tekentu ke gam ka ier tekentu isi foron tualik gam na asa Iesu. Pesu, gamen famais faliu ini gam ini balmi tikii,  
\v 23 wara le biil gam pang fuuh lon tikas tinaga na piklinbat ae in met sau, biil. Gam pang fuuh na tier ae biil i met la, i e orek ke God, ae i liu ma i kiis fitliu.  
\v 24 \x - \xo 1:24 \xt Aisaia 40:6-8\x*Wara le Buk na Gogoh i use u aragii,  
\q1 “Fanu tikii ri arae fifih sau  
\q2 ke foron memeh tikii kiri i arae foron sian fifih.  
\q1 Fifih in mang, ke foron sian au rik us,   
\q1
\v 25 isau le orek ke God in kiis fitliu.”  
\m Ma orek igii, i e orek ae ri fafas ta ini usuf gam.   
\c 2  
\p
\v 1 Pesu, gamen tel ufu foron sinang laulau tikii, foron sinangun lem tikii, garan, bala laulau, ke marmarsan orek laulau.  
\v 2 Arae foron mirmiriiu ae ri lala ier isi sus, ke gam sabin gamen lala ier isi inen na tanwa ae i kalkaluu, isi gamek kuum tin lo papang na aunbiing ik matuk e liu fuu kimi.  
\v 3  \x - \xo 2:3 \xt BukSong 34:8\x*Ma igii, gam ka tof ta u ke gam ka usum le Kumguui i rokap kanaka.   
\s1 Iesu i e Fat ae i Liu  
\p
\v 4 Gamen la usuf Kumguui, i e fat ae i liu. Fanu ri puris ta u, isau le God i tim pes ta u ma i rokap kanaka na mata.  
\v 5 Ma gam sabin, gam arae foron fat ae ri liu. God i tel gam arae felu Tanwa Kalkaluu. Gamen tapiek foron pris kalkaluu isi gamek ta foron fafen ae Tanwa Kalkaluu i fatapiek u na liu kimi ae God in somangat isi, wara lo Iesu Karisito.  
\v 6  \x - \xo 2:6 \xt Aisaia 28:16\x*Wara le ri siit ta u na Buk na Gogoh aragii,  
\q1 “Par u, ia luun ta nenge fat na Saion.  
\q2 Fat ae ia tim pes ta u una tuh na fel i rokap kanaka,  
\q1 ma se i unune lo,  
\q2 biil in to matlawen.”   
\m
\v 7  \x - \xo 2:7 \xt BukSong 118:22\x*Usuf gam ae gam unune, fat igii i rokap kanaka. Isau le usuf fanse ae biil ri unune,  
\q1 “Fat ae foron tom tel fel ri puris ta u,  
\q2 ka tapiek temin fat na waransinglen.”   
\m
\v 8  \x - \xo 2:8 \xt Aisaia 8:14,15\x*Ma  
\q1 “Fat ae i tel fanu ri ka tipe la  
\q2 ma i fatkiis ae i tel fanu ri ka luut la.”  
\m Ri tipe lo, wara le biil ri misuut na orek ke God. Aunbiing ri tel u arae, ri ka fasuut orek ae pakanini tom God i use ta u ulo ri.   
\p
\v 9  \x - \xo 2:9 \xt KisimBek 19:5,6; Aisaia 43:20; Lo 4:20; 7:6; 14:2; Taitus 2:14; Aisaia 43:21; 9:2\x*Isau le gam fanu ae God i tim pes ta gam, gam foron pris ken King, gam mat kalkaluu ke gam fanu ke God. God i tawi pes ta gam tina kubunor una rokap na malal kia, isi gamek fafas ini foron rokap na foim ae ka fatapiek ta u.  
\v 10  \x - \xo 2:10 \xt Hosea 2:23\x*Pakanini biil gam fanu ta ke God, isau le igii, gam ka tapiek fanu mang kia. Pakanini biil gam kiis ta na piklin famais kia, isau le igii, gam mang ae na pikli.   
\p
\v 11 Foron talang, biil e maleh kimi igii, gam kiis arae foron ses sau aga na piklinbat, pesu ia ka sising gam le, gong gam mi na foron wolwol laulau na pununfo gam ae ri fapaket turan tanwa gam, gong.  
\v 12 Gamen tel rokap na sinang na fatpoton fanu ae na kabarais, isi taftawa le ri tiu gam ini ti foron sinang laulau, rin par foron rokap na foim kimi tom ke rik usefages God na biing ae in tapiek lo.   
\s1 Gamen Fapu Gam na Piklin foron Famfamu  
\p
\v 13 Gamen fapu gam tom na piklin foron famfamu tikii aga na piklinbat, wara le Kumguui i ier isi arae. Gamen fapu gam na pikli king, ae i famfamu na matanfuntih  
\v 14 ke gamen fapu gam sabin usuf foron fafawu sabin ken king, ae i wuun ri la isi nagogon fanu ae ri tel sinang laulau ke isi usefages fanu ae ri tel rokap na sinang.  
\v 15 Wara le God i ier le gamen tel foron rokap na foim, isi gamek tikale foron orek foes ken foron talos.   
\p
\v 16 Gamen liu arae fanu ae ri ka sengsegeng tah, isau le gong gam wol le sengsegeng kimi i arae bobo kaleh sau una tel sinang laulau, gong. Gamen liu arae foron fafauun tom ke God.  
\v 17 Gamen finngas sinangun bulat usuf fanu tikii, gamen ier isi foron tualik gam na asa Iesu, in mel e sokeh lo God ke gamek bulat lo king.   
\p
\v 18 Gam foron fafauun, gamen fapu gam na piklin foron laulaumet kimi ini tara bulat. Gong gam wong sau sing foron laulaumet ae ri rokap la ini gam ke ri fofo la ini gam, gong. Gamen wong sabin sing ri ae ri tuktuk la ini gam.  
\v 19 God in laes ini gam male gam mi na wolwol kia ma gam ka tifat aunbiing gam kalsakai foes fangungut sing fanu.  
\v 20 God biil in usefages gam male ri pose gam ke gam ka kalsakai fangungut isi sinang laulau kimi tom, biil. Isau male gam tifat aunbiing gam kalsakai fangungut isi sinang ae i tortores, ke God in laes ini gam.  
\v 21 God i tawi ta gam isi gamen mi na matngan sinang arae, wara le Karisito tom i kalsakai ta fangungut isi gam ke ka tel ta nenge tintof usuf gam isi gamen mi na min keke.   
\q1
\v 22  \x - \xo 2:22 \xt Aisaia 53:9\x*“Biil i tel ta ti sinang laulau  
\q2 ke biil ti lem i suu ta tina ngusu.”   
\m
\v 23  \x - \xo 2:23 \xt Aisaia 53:7\x*Aunbiing ri orek laulau ulo, biil i kiliis ri ini ti orek laulau. Aunbiing ri ta fangungut sing i, biil i fasoksoke ri ini ti orek. Isau le i unune ufu tom una lima God ae i tel tortores na nagogon la.  
\v 24  \x - \xo 2:24 \xt Aisaia 53:5,6\x*Karisito tom i kep ta foron sinang laulau kirer na pununfo aunbiing i met bae na aupaket, isi keren met koseng foron sinang laulau kirer ma kerek liu ini tortores na sinang. Ma na foron tamtamsih na pununfo, ka faliu gam.  
\v 25 Wara le gam arae foron sipsip ae ri rong tah, isau le igii gam ka fis ta usuf Tom Fofonoi na Sipsip, i e Tom Fofonoi na tanwa gam.   
\c 3  
\s1 Sinangun Fakekel  
\p
\v 1  \x - \xo 3:1 \xt Efeses 5:22; Kolosi 3:18\x*Kelefin, gam sabin gamen fapu gam na piklin foron antu gam. Male ti fal lo ri biil ri unune na orek ke God, taftawa le biil gam use ti tier, rokap na sinangu gam sau in filange ri usuf God,  
\v 2 aunbiing rin par sinangun bulat ke sinang ae i kalkaluu na liu kimi.  
\v 3  \x - \xo 3:3 \xt 1Timoti 2:9\x*Gong gam lala wol isi me pununfo gam ini foron tier aragii: Marmarsan fisfis ol, marmarsan kutkute ae ri tel u ini goul ke foron rokap na kilkiliis, gong.  
\v 4 Memeh tutus kimi in la tom tina balmi, aragii: Sinangun kiis fofo ke sinangun liu ini siaroh. Memeh ae biil in to rop ma i laumet kanaka na mata God.   
\p
\v 5 Sinang igii, kelefin kalkaluu tinpakanini ae ri unune lo God, ri ges la ini. Ri fapu ri la tom na piklin foron antu ri.  
\v 6  \x - \xo 3:6 \xt Stat 18:12\x*Arae Sara, i wong la tom sing Abaram ke ka foteng u le kumguui kia. Ke gam sabin, male gam tel sani ae i tortores ma biil gam soke ti tier, ke gam foron tubufifin e Sara.   
\p
\v 7  \x - \xo 3:7 \xt Efeses 5:25; Kolosi 3:19\x*Fanu tamat, gam sabin gamen bulat lon foron antu gam, wara gamen usum le mian kelefin biil i laumet arae gam, ke liu ae God i fakale ta gam ini, i fakale ri sabin ini. Gamen tel u arae, isi biil ti tier in tikale foron sising kimi.   
\s1 Gamen Kalsakai Fangungut  
\p
\v 8 Farfarop na orek kiak usuf gam i aragii: In tikii sau e wolwol kimi ke male tikas lo gam i kalsakai ti tatawin, gam sabin gamen kalsakai u tura. Gamen ier isi temtem tikii lo gam arae foron fatlatualik. Gamen famais la, ke gamek fapu gam tom.  
\v 9 Gong gam kiliis laulau ini laulau, ke male tikas i orek laulau ulo gam, gong gam kiliis u ini orek laulau. Isau le, gamen kiliis u ini fafakalok, wara le God i tawi pes ta gam isi gamen tel u arae, isi ik fakalok gam.  
\v 10  \x - \xo 3:10 \xt BukSong 34:12-16\x*Wara le Buk na Gogoh i tarah,  
\q1 “Male tikas i ier isi liu kia  
\q2 ma ka ier isi par foron rokap na biing na liu kia,  
\q1 ke in fofonoi rokap na kerme koseng foron orek laulau  
\q2 ma gong ti lem in suu tina ngusu.   
\q1
\v 11 In tamikis koseng sinang laulau  
\q2 ma ik tel sinang rokap.  
\q1 In im sal una liu ini siaroh,  
\q2 ma in rakrakai tom isi mi lo.   
\q1
\v 12 Wara le Kumguui i luun mata la lon foron tom tortores  
\q2 ma i ongen sising kiri la.  
\q1 Isau le Kumguui i ta pokta la lon fanse ae ri tel sinang laulau.”   
\p
\v 13 Se in falaulau gam male gam lala ier isi tel sinang rokap?  
\v 14  \x - \xo 3:14 \xt Aisaia 8:12,13; Metiu 5:10\x*Isau male rin ta fangungut usuf gam wara na tortores na sinang, ke gam kalok.  
\q1 “Gong gam soke foron tier ae rin fasoksoke gam ini,  
\q2 ke gong gam nangnangih.”   
\p
\v 15 Isau le na balmi, gamen luun Karisito arae Kumguui kimi. Foron aunbiing tikii gamen kiis an geges, isi ifasi gamek kiliis fanse ae ri diik gam le, isi sani gam ka nene ini unune. Isau le aunbiing gam kiliis ri, gamen kiliis ri ini sinang ae i fofo ke ini bulat.  
\v 16 Gamen mi tom na wolwol ae i rokap, isi fanse ae ri orek laulau ulo gam, rik matlawen kunan orek laulau kiri wara na foron rokap na sinang ae gam tel u aunbiing gam mi lo Karisito.  
\v 17 Male gam kalsakai fangungut isi sinang laulau, ke biil i rokap. Isau male na wolwol ke God le gamen kalsakai fangungut isi foron rokap na foim ae gam tel u, ke i rokap.   
\p
\v 18 Karisito fatikii sau i met ta isi foron sinang laulau kirer. I Tom Tortores ma i met ta isi fanse ae biil ri tortores, isi ik filange gam usuf God. Ri siimete ta u na pununfo, isau le na tanwa, ka apti fis.  
\v 19 Ke ka la ma ka fafas usuf foron tanwa ae ri kiis na kamkabet.  
\v 20  \x - \xo 3:20 \xt Stat 6:1—7:24\x*Foron tanwa ae, e tanwan fanu tinpakanini na foron bet ke Noa. God i nene ta isi rin kiliis liu kiri aunbiing Noa i teltel sip la, isau le biil ri wong sing i. Iwal sau lo ri, God i faliu pes ta ri tina nor.  
\v 21 Nor i fakileng na bapitaiso ae i faliu gam igii. Biil ri baptais gam isi sufe ufu duh na pununfo gam, biil. Bapitaiso ae, i arae gam ta gam tom usuf God ini wolwol ae i rokap. Ma i faliu gam wara na apaptifis ke Karisito.  
\v 22 Ma igii, Karisito ka la ta ubae na kukulii, ma ka kiis na mia God. Foron angelo, ke foron tanwa ae imel e rakrakai kiri una nagogon turan foron rakrakai na tanwa, ri tikii ri kiis na pikli Karisito.   
\c 4  
\s1 Gamen Susuaf na Tel Sinang Laulau  
\p
\v 1 Karisito i kalsakai ta fangungut na pununfo. Pesu, gam sabin in mel e matngan wolwol kimi arae Karisito una geges isi kalsakai fangungut. Wara le fanse ae ri kalsakai fangungut na pununfo, ri ka susuaf ta na tel sinang laulau.  
\v 2 Ma tipes u na aunbiing ae, na liu tikii kiri na piklinbat, biil mang ri mi na foron wolwol laulau tina pununfo, biil. Rin liu mang namin wolwol ke God.  
\v 3 Ma ka fasi ta e aunbiing kimi ae gam tel ta sinang laulau lo ae fanu tina kabarais ri ier la isi tel u. Foron sinang aragii: Sinangun tamfaes, wolwol isi tel sinangun puur, sinangun umin dan rakrakai, sinangun fatalmak isi yin ke talos, ke sinangun lotu unaisan foron god famfabal, ae i laulau kanaka na mata God.  
\v 4 Ma igii foron talmi ri ka lala bitit le biil mang gam ier sabin isi fatalmak tura ri na matngan liu laulau kiri, ke ri ka use falaulau gam.  
\v 5 Isau le nami rin ti na mata God ke rik fapos sani ae ri ka tel ta u. Wara le i Tom Nagogon, ae in nagogon fanu tikii ae ri liu ke foron minet sabin.  
\v 6 I e wara ae ri ka fafas ta ini Rokap na Fafas usuf fanu ae ri met. Aunbiing ri met, ri ka kep ta nagogon na pununfo ri arae fanu tikii, isau le tanwa ri in liu tura God.   
\s1 Gamen Foim Rokap ini foron Fafen ae God i Ta ta u usuf Gam  
\p
\v 7 Farfarop na foron tier tikii ka fatat mang. Pesu, in poh ma ik malal e wolwol kimi isi ifasi gamek sising.  
\v 8  \x - \xo 4:8 \xt Sindaun 10:12\x*Tier ae i laumet na foron tier tikii i aragii, gamen famais faliu ini gam ini tekentu, wara le famais i afit tikii ifuun e sinang laulau.   
\p
\v 9 Gamen somangat faliu ini gam una foron fel kimi, ma aunbiing gam tel u, gong gam belbel orek.   
\p
\v 10 God ka ta ta foron fafen usuf gam temtem tikii tina marmarsan fafen kia. Pesu, i rokap le gamen foim rokap ini, una falupes faliu na fatpoto gam.  
\v 11 Male tikas i kep fafen una fafas, ke in fafas tom ini orek ke God. Male tikas i kep fafen una falupes, ke in falupes tom ini rakrakai ae God i ta ta u usuf i, isi na foron tier tikii ae gam tel u, God ik kep ususefages isi, wara lo Iesu Karisito. Kia tom e memeh turan rakrakai, fitliu ma biil ti farfarop lo. Amen.   
\s1 Gamen Kalsakai Fangungut tom arae Karisito  
\p
\v 12 Foron talang, gong gam bitit aunbiing gam kalsakai tara fangungut ae i arae fatoftof unaismi, ke gong gam wol le nenge tier keskes i tapiek lo gam.  
\v 13 Isau le gamen laes, wara le gam sabin gam kalsakai ta fangungut arae Karisito, isi gamek fuun ini laes aunbiing Karisito in tapiek ini memeh kia.  
\v 14 Gam kalok male ri orek laulau ulo gam, wara na asa Karisito, wara le Tanwan memeh, i e Tanwa God, i kiis lo gam.   
\p
\v 15 Gong tikas lo gam i kalsakai fangungut wara le i nenge tom sisiimete, le nenge tom suksukuum, le nenge kaltu laulau, le kaltu una fakau paklu na tier ken fal.  
\v 16 Isau male tikas lo gam i kalsakai fangungut wara le i ke Karisito, gong i matlawen, in usefages God wara le i kep asa Karisito.   
\p
\v 17 Ka aunbiing mang una nagogon ma nagogon in tipes u lon fanu ke God. Male in tipes u lo kerer, ke sani in tapiek lon fanu ae biil ri unune na Rokap na Fafas ke God?  
\v 18  \x - \xo 4:18 \xt Sindaun 11:31\x*Buk na Gogoh i use u aragii,  
\q1 “Male i ngangaten isi foron tom tortores rin kep fafaliu,  
\q2 ke arafa in tara arae usuf fanu ae ri ta pokta ri  
\q3 usuf God  
\q2 turan foron tom tel sinang laulau?”   
\p
\v 19 Pesu, male gam kalsakai fangungut namin wolwol ke God, ke i rokap le gamen ta gam tom na lima Tom Fakfakiis kimi, wara le biil i to ruu gam la. Ke gong gam susuaf na tel rokap na sinang.   
\c 5  
\s1 Fafanau usuf foron Famfamu turan Fanu Fufuuh  
\p
\v 1 Igii ia ier isi ian orek sing gam foron famfamu na lotu, wara le ia sabin ia nenge famfamu arae gam, ia par ta Karisito aunbiing i kalsakai fangungut, ma aunbiing in fis, ia sabin ian kiis tura na memeh kia.  
\v 2  \x - \xo 5:2 \xt Jon 21:15-17\x*Gamen fofonoi rokap na fanu ke God ae ka luun ta u na liumi, arae foron tom fofonoi na sipsip. Gong gam foim sau wara le fanu ri fangongos gam, gong. Gamen tel foim ini laes, arae God i ier isi. Gong gam foim sau isi pitkalang, gong. Gamen foim tom ini gesges na balmi.  
\v 3 Gong gam luun rakrakai na nagogon na olon fanse ae God i unune ufu ta ri na liumi, isau le gamen tapiek rokap na tintof usuf ri.  
\v 4 Ke aunbiing Laulaumet ken foron tom fofonoi na sipsip in tapiek, in suat gam ini bangbang ae memeh lo biil in to rop.   
\p
\v 5  \x - \xo 5:5 \xt Sindaun 3:34\x*Ke orek kiak usuf fanu fufuuh i aragii, gamen fapu gam na piklin foron famfamu. Gam tikii gamen ges ini sinangun fapu gam tom na fatpoto gam. Wara le Buk na Gogoh i use u aragii,  
\q1 “God biil i ges e bala ini fanse ae ri sik ri la tom,  
\q2 isau le, i finngas famais kia la usuf fanse ae ri fapu ri la tom.”   
\m
\v 6  \x - \xo 5:6 \xt Metiu 23:12; Luk 14:11; 18:14\x*Pesu, gamen fapu gam tom na piklin rakrakai na lima God, isi na aunbiing kia tom, ik sik gam.  
\v 7 Gamen ta foron tatawin tikii kimi usuf i, wara le i lala wol lo gam.   
\p
\v 8 Wolwol kimi in malal ma gamek tumarang, wara le tuui kimi Satan i aragii laion ae i famam kukuk sararah, ma ka batbatam fanu isi kiim ri.\fig Satan i arae laion ae i kukuk|src="1Peter 5.8 GS.tif" size="col" ref="5:8" \fig*  
\v 9 Gamen tifat na unune kimi ke gamek tikale u, wara gam usum le foron tualik gam na foron maleh tikii na piklinbat, ri sabin ri kalsakai matngan fangungut ae gam kalsakai u.   
\p
\v 10 Isau le God i e God na famais, ma lo Karisito, ka tawi pes ta gam isi gamen kiis turim tura na memeh kia ae biil ti farfarop lo. Ke aunbiing gam kalsakai ta fangungut na fatuklin aunbiing sau, i tom in tumarnge fafis gam, ik ta rakrakai sing gam ke ik farakrakai gam isi gamek tifat.  
\v 11 Rakrakai kia in kiis fitliu ma biil ti farfarop lo. Amen.   
\s1 Farfarop na Orek ke Pita  
\p
\v 12  \x - \xo 5:12 \xt Aposel 15:22,40\x*Sailas i lupes ta iau aunbiing ia siit fatuklin leta igii. Ia tel u la arae tuaklik tutus ae imel e unune kiak lo. Na leta igii, ia lala ier tom isi ian farakrakai gam, ke iak famalal gam ini famais tekentu ke God. Gamen tifat lo.  
\v 13  \x - \xo 5:13 \xt Aposel 12:12,25; 13:13; 15:37-39; Kolosi 4:10; Pilimon 1:24\x*Foron tom unune ae ri kiis na Babilon,\f + \fr 5:13 \ft Fale tom tasum na Buk na Gogoh ri wol le Pita i foteng Rom ini Babilon, wara le sinang laulau i laumet na maleh ae\f* ri ta orek an famais kiri usuf gam. Ri sabin ri fanu ae God i tim pes ta ri arae gam. Mak sabin, keng kalalik na asa Iesu, i ta orek an famais kia usuf gam.  
\v 14 Aunbiing gam faorek pes gam, gamen fador ini sinangun famais. Siaroh usuf gam tikii ae gam patep lo Karisito.