\id 1JN - Barok 
\h 1 JON 
\toc3 1 Jon 
\toc1 A Sisila ne Ginigeet te JON 
\toc2 1 JON 
\mt1 A Sisila ne  
\mt2 Ginigeet te  
\mt1 JON  
\ip Jon a aposol ixo geet ina ginigeet. A oleleng ne tene nanase te döxömen bere Jon ixo kis so Esia nang ixo geet ina ginigeet ma ixo gegeet urungan köbo lotu ruso iat Esia. Jon ixo mamaa rua ötumarang idi abo tene nunu ulamun abo tene ausu töxö (pere 1 Jon 2.26) ewe nang toxobo rengrengen bara abo lalaa tabo pere ra xö öxöno lagunon i saban, ma abo lewene aine ire i saban bölök, ma abo tanono ire i deek. Io nang, idi toxobo rengrengen bara kaim pe laa bara ire tabo pet tebo sasaban köbo lewene aine ire nang i saban. Me idi toxobo rengrengen bölök bara Jisas a tödi mon ine, ma nang ixo met, kaim bara e Krais a Barok kö God nang ixo met. Inexalik e Jon i öös tewe abo mangana dinödöm pe idi biringan. I tengen bara nang ire te pet te sasaban, ire te lexe abo warkurai te God (3:4). Ma i tengen bölök bara a bung barok ke God tekara pet te sasaban (2:28; 3:12). Jon i mamaa bara ire tabo önga balade arixe me God kölöme xö tatalien maras. Ina na a unine ina ginigeet, bara \bd abo tene nunu idi tabo mumuu a tatalien möxö maras\bd* (1:5-7). I kobo eöt te öng bara irabo tengen bara iri nunu re Krais ma inexalik ibo mumuu abo magingin saban möxö ködö. Ma lamun ewe a öng i rarame abo warkurai kö God i kisisik kölöme re God (3:24). Ma a unine ina warkurai te God i bira, bara ire tabo mana mamaa ulamun ire iat ma tabo nunu re Jisas Krais a Barok kö God (3:23). Jon ixo mamaa bara ire tabo maras bara ina tödi niang ine e Jisas (1:1; 4:2-3), ine a Barok kö God bölök (2:23; 3:23; 4:9-10; 4:14-15; 5:5-13; 5:20), me ine a Mesaia (nang toxo tengen ine bere ‘Krais’; 2:22; 5:1), ma bere ine iat ixo met tua gene ire bara irabo öro ire (5:4-8). Jon ixo mamaa bara ire tabo maras bere ire tere kip lo ina to ulorexe saxit nang bere ire tere nunu xö Barok kö God (5:13).  
\c 1  
\s1 A Tinenge ne To  
\p
\v 1 Mem me töngösen e mum ma a lasa nang ixo kis sik mesila xö urulo, a lasa nang mem moxo ölangen ma moxo pere ma mara mem. Me mem moxo pere ma moxo sigi ine mabo lime mem. Me ine iat mon ina tinenge möxö to na nang mem me töngösen e mum ulamunon.  
\v 2 Ma ina to ixoro wösö me mem me töngösen e mum ulamun ina to ulorexe saxit. Mem moxo pere ine me mem me öturunon ine rö mum. Ine niang nang ixo kis arixe me Mama ma ixoro wösö re mem.  
\v 3 Me mem me töngösen bölök e mum ulamun a lasa nang mem moxo pere ma moxo ölangen, rue mum bölök ka önga balade arixe me mem. Me mem pua önga balade arixe me Mama ma a Barok ke ine, e Jisas Krais.  
\v 4 Mem me geet inabo lalaa na urö mum, rue ire ra wöwöwö ma axanan.   
\s1 Ire tabo mana önan kö maras  
\p
\v 5 Io, ina na a tinenge mem moxoro ölangen lo xalik e Jisas Krais me mem me töngösen e mum ulamunon, bara God i eöt ma bibio ma kaim arixe re ködö kölöme re ine.  
\v 6 Nang bara ire te tengen bere ire te önga balade arixe me ine, ma lamun ire te önan kö ködö, io, ire te etöxö ma abo tatalien te ire i karabo eöt mabo turunon kö God nang ixoro wösö.  
\v 7 Inexalik nang bara ire te önan kö maras xarnang ine iat i kis kö maras, io, ire te önga balade arixe ma uleng kabise ma a dee re Jisas, a Barok ke ine, i ömadakdak ire xalik abo magingin saban kirip.   
\p
\v 8 Nang bara ire te tengen bara kaim ire mere magingin saban, ire te ösaxit baling iat te ire me ire te döxömen bara ina atöxö i turunon. Inexalik abo turunon kö God i karabo kis kölöme re ire.  
\v 9 Ma lamun nang bere ire te etöngösen maras mabo magingin saban te ire, io, God irabo pet eörin abo kunubus se ine ma irabo pet a tatalien töxödös sua döxömen taun abo sasaban te ire ma rua ömadakdak ire xalik abo magingin kirip nang i kobo töxödös.  
\v 10 God i tengen bara ire tere pet a sasaban. Ma nang bara ire te tengen bara ire tekobo pet te sasaban, io, ire te tengen e God bara a tene atöxö ine ma a tinenge re ine i kobo kis kölöme re ire.   
\c 2  
\p
\v 1 E geet abo lalaa na urungan tö mum, abo bung barok lixilik ke e kölöme re Krais, rue mum pa ganim a wewet tebo magingin saban. Ma lamun nang bara re öng i pet te sasaban, ire ma önga tödi nangen nang ibo wöwörö rua gene ire xö wawara xö God. Me ine e Jisas Krais, a tene töxödös.  
\v 2 Me ine iat a arabaa nang ibo ruruu wi a bala laie xö God tua xikip tewe abo magingin saban te ire. Ma kaim bara ine a arabaa rua xikip tewe a magingin sasaban te ire xalik mon. Kaim. Ine a arabaa rua gene magingin saban möxö öxöno lagunon kirip.   
\s1 Ire tabo ösöxö bule bara ire te ösöxö sik e God  
\p
\v 3 Ire te maras bara ire te ösöxö sik e God nang bara ire te tame abo warkurai te ine.  
\v 4 Me ewenene i tengen bara i ösöxö e God, ma lamun i kara muu eörin a warkurai te ine, ine a tene röxröxö ma a turunon kö God i kobo kis kölöme re ine.  
\v 5 Ma lamun turunon saxit, nang bara re öng i tame abo tinenge re ine, i osen bara a mamaa raxin te ine urungan kö God iri wöwö. Me ire tabo ösöxö bule bara ire te kis kölöme re ine? Ma i bira:  
\v 6 Ewenene re öng nang i rengrengen bara ine i kis kölöme re God, ine irabo mana wan xarnang e Jisas ixo pet bie.   
\p
\v 7 Abo ais deek ke e, e kobo geet te warkurai maxat urungan tö mum, ma lamun a warkurai maut mon nang mum moxo kip lo mesila saxit. Ma ina warkurai maut, ine a tinenge nang mum moxoro ölangen.\f + \fr 2.7 \ft Ina warkurai bira: “Ire tabo mana mamaa ulamun ire iat.” Pere 3:11; Jon 13:34-35.\f*  
\v 8 Ma lamun i turunon bere e gegeet bölök a warkurai maxat urungan tö mum. Me ire te maras bara turunon ina warkurai maxat, möxösa, ire te pere xöbo to re Jisas me mum. Ma i maras bira, möxösa, a xödxödö iri eka xaköwöm ma a bibio runon iri marmaras.   
\p
\v 9 Me ewenene nang i tengen bara i kis kölöme xö maras, nexalik bara i mimixenin a tönö ine kölöme re Krais, ine nangen nang kö xödxödö.  
\v 10 Me ewenene nang i mamaa lamun a tönö ine kölöme re Krais, ine ibo xisixis kölöme xö maras ma kaim pe sasaban kölöme re ine nang bara irabo ösubu ine.  
\v 11 Ma lamun ewenene re öng i mimixenin a tönö, ine i kisisik kö xödxödö ma i önan eli nana xö ködö. Ma i kobo ösöxö a xönö nang i önan ne, möxösa, a xödxödö ixoro öwulo a nine marna.   
\q1
\v 12 Abo baroxorok ke e,  
\q1 xö esene e Krais, God ixoro döxömen taun abo magingin saban te mum, io niang, e gegeet ina tinenge na urungan tö mum.   
\q1
\v 13 E gegeet urungan tö mum, abo duöng tataxin möxö lotu,  
\q1 möxösa, mum mo ösöxö ine ewe nang ixoro kis sila xö urulo möxö öxöno lagunon.  
\q1 E gegeet urungan tö mum, abo guama,  
\q1 möxösa, mum moxo erese me Satan a tene saban, ma moxoro kawönö ine.   
\q1
\v 14 E gegeet urungan tö mum abo baroxorok lixilik  
\q1 möxösa, mum mo ösöxö e Mama.  
\q1 Me e gegeet urungan tö mum abo ötaxin,  
\q1 möxösa, mum mo ösöxö ine ewe nang ixoro kis sila xö urulo möxö öxöno lagunon.  
\q1 Me e gegeet urungan tö mum abo guama,  
\q1 möxösa, mum mo lölös sik bira:  
\q1 a tinenge re God ibo xisixis kölöme re mum,  
\q1 me mum moxo erese me Satan ma moxoro kawönö ine.   
\s1 Ire tebele mamaa ulamun abo tatalien möxö öxöno lagunon  
\p
\v 15 Mum bele mamaa ulamun abo tatalien mabo lalaa möxö öxöno lagunon. Ma nang bara re öng i mamaa ulamun abo tatalien mera xö öxöno lagunon, io, ine i kobo mamaa ulamun e Mama,  
\v 16 möxösa, abo lalaa xirip möxö öxöno lagunon, abo mamaa saban, abo a neek saban, ma abo tatalien ne aölolot, idi tokobo wanot meriso re Mama. Kaim. Idi te wanot mera xö öxöno lagunon.  
\v 17 Ma öxöno lagunon i ka xakawöm, arixe mabo lalaa nang a nangadi tobo mamaa ulamunon. Ma lamun ewenene nang i pet eörin a nang e Mama i mamaa ulamun, ine irabo kis kö to ulorexe saxit.   
\s1 Abo iuo re Krais  
\p
\v 18 Abo baroxorok ke e kölöme re Krais, a na a axana bung möxö xakawöm. Ma xarnang mum moxoro ölangen sik bara abo iuo re Krais tabo wanot, ma na iat a oleleng ke idi toxoro baa wanot. Io, lamun ina na ire tere ösöxö xulen bara na a xaköwöm.  
\v 19 Idi toxo wan tewe xalik ire, ma lamun kaim bere idi mere ire runon. Inexalik nang bara idi runon mere ire, idi tekexebe eöt tua nuan tewe xalik ire. Ma lamun a inuan tewe re idi, i osen bara idi xirip tokoxobo mere ire.   
\p
\v 20 Inexalik, a Öng Nang a lak Madakdak ixoro tabaa e mum ma Töxödös ne Tanono, rue mum kirip pa ösöxö a sa i turunon.  
\v 21 Rösa me e gegeet urungan te mum? Möxösa kaim bara mum kobo ösöxö inabo turunon, nexalik bara mum mo ösöxö sik, ma, möxösa, mum mo ösöxö tuar abo turunon me mum mo ösöxö bara kaim pe atöxö irabo wanot meringan kölöme xöbo turunon.  
\v 22 Ewe ine ina tene atöxö? Ine a öng nang ibo öös ulamun e Jisas bere ine a Mesaia. A önga mangana tödi xarna na, ine a iuo re Krais, möxösa, ibo öös ulamun e Mama ma a Barok ke ine bölök.  
\v 23 Ewenene re öng i öös lamun a Barok ke ine, i karabo uruoxe e Mama. Me ewenene nang i aut lo bara e Jisas a Barok kö God, io, ine iri uruoxe e Mama bölök.   
\p
\v 24 Me mum, mum morobo mana öbala lo ina tinenge nang mum moxoro ölangen lo xö urulo bara irabo mana kis kölöme re mum. Nang bara ina tinenge nang mum moxoro ölangen kö urulo ibo xisixis kölöme re mum, io, mum bölök morobo kis kölöme re Mama ma Barok ke ine.  
\v 25 Ma a kunubus nang ine iat ixoro isik kö ire, a to ulorexe saxit.   
\p
\v 26 E geet inabo lalaa urungan tö mum ulamun idi nang ewe te mamaa rua silien ölelebes e mum.  
\v 27 Me mum kobo sasaxan bara re öng irabo usu e mum mere laa, möxösa, e Krais ixoro tabaa e mum ma Töxödös ne Tanono me ine ibo xisixis kölöme re mum ma ibo usu e mum mabo ausu re ine ulamun abo lalaa xirip, ma ina ausu i turunon ma i kobo töxö. Lamun ina na, mum morobo mana kis kölöme re Krais xarnang a Tanono ibo usu e mum bie.   
\s1 Abo baroxorok ke God takarabo pet a magingin saban  
\p
\v 28 Io, abo baroxorok ke e kölöme re Krais, mum morobo mana kis kölöme re Krais, rue ire ra balamasa nang bara ine irabo wösö, me ire tekebeöt ta minenge xö wawara re ine xö ina bung nang ine irabo wanot.  
\v 29 Nang bere mum mo ösöxö bara Krais, ine a tene töxödös, mum mo ösöxö bölök bara ewenene re öng nang ibo wewet tatalien töxödös, ine a önga bak kö God.   
\c 3  
\p
\v 1 Pere bang! A mamaa raxin nang e Mama ixoro tabaa ire min! Io, lamun ina na, i tengen bara ire a bung baroxorok kö God. Ma ina na i turunon. A öxöno lagunon i koxobo ösöxö xulen ire, möxösa, i koxobo ösöxö xulen bölök e God.  
\v 2 Abo ais deek ke e, ire na im abo baroxorok kö God. Ma lamun i kela osen ire bang bara ire abo mangana nangadi bule nang Krais irabo wösö. Inexalik ire te ösöxö bara ire tabo kis xarnang ine, möxösa, irabo wanot maras urö ire bara a mangana tödi bule runon ine.  
\v 3 Me ewe re öng ibo xixiset arixe ma nunu bara irabo kis iat xarnang e Krais ixo bie, io, ina tödi ibo ömadakdak a to re ine xarnang e Krais bölök i madakdak.   
\p
\v 4 Ewenene re öng i pet sasaban, i uli abo warkurai te God. Ma abo magingin saban, i eöt xarnang a magingin möxö uli warkurai.  
\v 5 Me mum mo ösöxö bere Krais ixo wanot tua xikip tewe abo magingin saban. Ma kaim pe sasaban i kis kölöme re ine.  
\v 6 Kaim pe öng nang ibo xisixis kölöme re ine, ibo wewet sasaban. Ma kaim pe öng nang ibo wewet sasaban ixoro pere ine bara i ösöxö ine.   
\p
\v 7 Abo baroxorok ke e kölöme re Krais, mum moro ebalaure deek, xalik ke öng irabo silien ölelebes e mum. Ewenene nang ibo wewet a töxödös, ine a lak töxödös, xarnang e Krais ine a tene töxödös.  
\v 8 Me ewe re öng nang ibo wewet sasaban, ine mere Satan, möxösa, Satan ixo wewet sasaban meringan kö urulo. A unine inot kö Barok kö God, bara irabo ögarin esexerein abo tinörön te Satan.  
\v 9 Kaim pe bak kö God ibo wewet sasaban, möxösa, ine iri kip lo a mangana tatalien kö God kölöme re ine. Me ine i kebeöt tua wewet te sasaban, möxösa, ine a bak kö God.  
\v 10 Ire tabo maras bira, bara ewenene idi abo baroxorok kö God me ewenene idi abo baroxorok ke Satan. Me ewe me idi nang tekobo wewet a tatalien töxödös, bara tekobo mamaa ulamun abo tönö idi kölöme re Krais, idi kaim bara mere God.   
\s1 Ire tabo mamaa ulamun ire iat  
\p
\v 11 Io, ina na a atöngösen nang mum moxoro ölangen lo meringan kö urulo, bara ire tabo mana mamaa ulamun ire iat.  
\v 12 Ganim e mum pa talien xarnang e Kaen. Ine mere ina Tene Saban ma ewe nang ixo sexomet a tönö ine. Ma rösa ixo sexomet ine? Möxösa abo tatalien te ine iat a lak saban ma nang kö tönö ine a lak töxödös.  
\v 13 Abo töke kölöme re Krais, mum bele wuwuwus nang bara a öxöno lagunon i mimixenin e mum.  
\v 14 Ire te ösöxö bara ire tere wan lie a minet ma tere laxa xö to, möxösa, ire te mamaa ulamun abo tönö ire kölöme re Krais. Me ewenene re öng i kobo uruoxe a tatalien ne mamaa, ine irabo kisisik iat kö minet.  
\v 15 Ewenene re öng i mimixenin abo tönö kölöme re Krais, ine a tene inarese ömet. Me mum mo ösöxö bara önga tene inarese ömet i karabo uruoxe a to ulorexe kölöme re ine.   
\p
\v 16 Ire te ösöxö bara a mangana tatalien sa ina tatalien ne mamaa nang te pere bara Jisas ixo isik tewe a to re ine ma ixo met tua gene ire. Io, ire tabo mana tagur sik kua minet tua gene abo tönö ire bölök kölöme re Krais.  
\v 17 Ma lamun ewe nang i unan sik kebo lalaa mera xö öxöno lagunon, ma i werwere a tönö ine kölöme re Krais i sasaxan, nexalik ine i kobo balamu ine, io, turunon saxit a mangana mamaa nang kö God i kobo kis kölöme re ine.  
\v 18 Abo baroxorok ke e kölöme re Krais, ire tebele mamaa ulamun a öng ma tinenge tataun mon te ire. Inexalik ire tabo mana osen kö tatalien te ire urungan te idi bara a mamaa re ire a lak turunon.  
\v 19-20 Nang bara ire ma tatalien ne mamaa bira, ire tabo ösöxö bara ire te xisixis kölöme xö turunon kö God. Ma nang bara ire te tuu xö wawara re ine, a öngöng iat irabo örasen kulen kölöme xö balana ine bara nangen a sasaban. Ma lamun, ire nang te mamaa, ire tabo kis ne balamasa. Rösa, möxösa, God i ösöxö abo lalaa xirip ulamun ire, ma a nanase re ire ulamun ire iat i kobo eöt ma a nanase re ine ulamun ire.   
\p
\v 21 Abo ais deek ke e, nang bara ire tokobo örasen bara ire ma sasaban, io, ire tabo kis ne balamasa xö wawara xö God.  
\v 22 Me God irabo tabaa ire ma a lasa ire te ose ulamun, möxösa, ire te tame abo warkurai te ine me ire te pet abo lalaa nang i öaxanan ine.  
\v 23 Ma a warkurai te ine ina na, bara ire tabo mana nunu xö esene a Barok ke ine, e Jisas Krais, ma bara ire tabo mana mamaa ulamun ire iat xarnang a warkurai te ine nang ixoro isik ke ire.  
\v 24 Me ewenene i tame abo warkurai te ine, ine i kis kölöme xö God me God bölök irabo kis kölöme re ine. Me ire te ösöxö bule bara God i kisisik kölöme re ire? A Tanono nang e God ixoro isik ine urö ire, ibo ömaras ire ulamun ina na.   
\c 4  
\s1 Ire tabo mana walar abo propet  
\p
\v 1 Abo ais deek ke e, a oleleng nebo propet atöxö idi toxoro wan nana ra xö öxöno lagunon. Lamun ina na, ganim e mum pa nunu xö nangadi xirip nang idi te tengen bara a Tanono God i töngösen idi ma lalaa. Inexalik mum morobo mana könönöin idi rua ösöxö bara e God ixo isik abo tinenge re idi bara kaim.  
\v 2 Ma i eöt te mum pa werwere xulen a Tanono God kölöme xö önga tödi xöbo tinenge re ine. Ewe re öng i nunu bara e Jisas Krais ixo wanot xarnang a tödi ine, ma i etöngösen maras bira, io, mum morobo ösöxö bara a Tanono meriso re God i kis se ine.  
\v 3 Ma lamun ewe re öng i öös tewe e Jisas bira, io, a Tanono meriso re God i kobo kis se ine. Kaim. I uruoxe a tanono möxö iuo re Krais. Me mum moxoro ölangen bara abo iuo re Krais tabo wanot. Ma turunon, idi ia tere wanot ta xö öxöno lagunon.   
\p
\v 4 Abo baroxorok ke e kölöme re Krais, mum mere God me mum moxoro bulus ösu inabo mangana nangadi arixe ma inausu re idi, möxösa, ewe nang i kis kölöme re mum i taxin saxit te Satan, ewe nang i kis kö öxöno lagunon.  
\v 5 Idi mera xö öxöno lagunon. Möxö ina na, idi tobo wöwörö mera xö öxöno lagunon ma öxöno lagunon ibo ölangen idi.  
\v 6 Ire mere God. Me ewenene nang i ösöxö e God, irabo ölangen ire. Ma lamun ewenene nang i kobo mere God, ine i karabo ölangen ire. Xö ina na mon, ire tabo perexulen a Tanono möxö turunon kö God, ma a tanono möxö röxröxö.   
\s1 A abalamu re God ma a abalamu re ire  
\p
\v 7 Abo ais deek ke e, ire tabo mana mamaa kaluluonin ire iat, möxösa, a tatalien ne mamaa, ine meriso lömö xö God. Me ewenene nang ibo mamaa ulamun a öng, ine a bak kö God ma i ösöxö e God.  
\v 8 Me ewenene nang i kobo mamaa ulamun a öng, ine i kobo ösöxö e God, möxösa, abo tatalien kirip pe God, a tatalien ne mamaa.  
\v 9 Me God ixo osen bara i mamaa ulamun ire bira: God ine ma önga Barok kalik mon. Me God ixo tile ösu ine ura xö öxöno lagunon, bara ire tabo kip a to mere ine.  
\v 10 A lasa ina tatalien ne mamaa turunon? Kaim bara ina tatalien na nang ire toxo mamaa ulamun e God. Kaim. Inexalik bara ina tatalien na nang ine ixo mamaa ulamun ire, ma ixo tile ösu a Barok ke ine, ine a arabaa nang ibo ruruu wi a bala laie xö God tua kip tewe abo magingin saban te ire.  
\v 11 Abo ais deek ke e, nang bere God ixoro mamaa ulamun ire xarna na, io, i töxödös bara ire tabo mana mamaa kaluluonin ire iat.  
\v 12 Ma kaim pe öng ixoro pere e God. Inexalik nang bara ire te mamaa kaluluonin ire iat, God irabo kis kölöme re ire ma ina mangana mamaa iat nang ke God irabo kis kölöme xö to re ire.   
\p
\v 13 Ire te ösöxö bara ire te kis kölöme re ine me ine i kis kölöme re ire, möxösa, ine ixoro isik tabaa ire ma Tanono ine.  
\v 14 Me ire toxoro pere me ire toxoro öturunon köbo atöngösen te ire, bara a Mama ixo tile a Barok ke ine bara irabo a Tene Aöro möxö öxöno lagunon.  
\v 15 Ewenene re öng niang i aut bara e Jisas, ine a Barok kö God, God i kis kölöme re ine me ine i kis kölöme re God.  
\v 16 Me ire toxoro örasen me ire te nunu xö ina tatalien ne mamaa re God ulamun ire.  
\p Abo tatalien kirip pe God, a tatalien ne mamaa. Me ewenene re öng ibo mumuu ina tatalien ne mamaa, ine i kis kölöme re God me God i kis kölöme re ine.  
\v 17 Ma nang bere ire te kis bira, a tatalien ne mamaa irabo taxin köba kölöme re ire. Möxö ina na, ire tabo kis ne balamasa kölöme xö bung möxö warkurai, möxösa, ire te xarnang e Krais sa xö öxöno lagunon.  
\v 18 Ma nang bere ire te mamaa re ine bira, me ine bölök i mamaa ulamun ire, i kebeöt bara ire tabo buut. Kaim. Ma nang bara ire te mamaa runon te ine, me ine i mamaa runon tö ire, ina tatalien irabo kip tewe ina binuut, möxösa, a binuut i kis arixe ma ömokorot mon. Ewenene re öng i bubuut, ina tatalien ne mamaa i karabo wöwö re ine.   
\p
\v 19 Io, ire te mamaa ulamun ine, möxösa, ine ixo araun ta mamaa ulamun ire. Me ire te mamaa ulamun idi xabise, möxösa, ine ixo araun ta mamaa lamun ire.  
\v 20 Ma nang bara re öng i tengen bara, “E mamaa lamun e God,” ma lamun ine i mimixenin abo tönö ine kölöme re Krais, io, ine a tene röxröxö. Ma i turunon, möxösa, ewe re öng nang i kobo mamaa ulamun a nangadi xabise nang ine ixoro pere idi, i kebeöt bara irabo mamaa ulamun e God, nang kaim ine xo werwere.  
\v 21 Me ire toxoro kip lo a warkurai meringan te ine bira, bara ewe re öng i mamaa ulamun e God irabo mana mamaa bölök ulamun a tönö ine kölöme re Krais.   
\c 5  
\p
\v 1 Ewenene re öng i nunu bere e Jisas ine a Mesaia, io, ine a barok kö God. Me ewenene re öng i mamaa ulamun a tata irabo mamaa ulamun a barok ke ine bölök.  
\v 2 Nang bere ire te mamaa ulamun e God me ire te pet eörin abo warkurai te ine, ire tabo ösöxö bere ire te mamaa ulamun a bung baroxorok kö God.  
\v 3 Ma nang bere ire te tame abo warkurai te God, i osen bara ire te mamaa ulamun ine. Mabo warkurai te ine i kobo tiip,  
\v 4 möxösa, a bung baroxorok kö God te eöt tua wawas bulus abo magingin saban möxö öxöno lagunon. Ma a nunu re ire iri pas bulus abo magingin saban möxö öxöno lagunon.  
\v 5 Me ewenene re öng i eöt tua wawas bulus abo magingin saban möxö öxöno lagunon? Ewe mon nang i nunu bere e Jisas ine a Barok kö God.   
\p
\v 6 E Jisas Krais ine iat mon nang ixo wanot ta ma ixo kip baptais ma ixo met. Ma nang ixo wanot ta, kaim ine ra kip baptais kalik mon. Kaim. Ine ixo kip baptais ma ixo met bölök. Ma a Töxödös ne Tanono ine ewe nang ibo öturunon ina na ma abo atöngösen te ine, möxösa, ibo rengrengen abo turunon.  
\v 7 Io, a narun idiet ewe nang tobo öturunon e Jisas bara a Barok kö God:  
\v 8 a Tanono, a baptais se ine ma a minet te ine. Me idiet kirip tobo aut arixe.  
\v 9 Ire tobo ömaraxen lo a atöngösen maras kö önga tödi bara i öturunon te laa. Inexalik nang bere e God i öturunon a na ma atöngösen te ine, io, a atöngösen te ine i turunon saxit kö atöngösen kö nangadi, möxösa, ina atöngösen, ine mere God ulamun a Barok ke ine.  
\v 10 Me ewenene i nunu xö Barok kö God, i kip a atöngösen na xö kat te ine. Me ewenene nang i koxobo nunu xö God, i rengrengen e God bara a tene atöxö ine, möxösa, ine i koxobo nunu xö atöngösen kö God, xarnang ixoro öturunon ulamun a Barok ke ine.  
\v 11 Ma ina atöngösen nang e God ixo öturunon tö ine, ine bira: God ixoro isik tabaa ire ma to ulorexe ma ina to i meringan kö Barok ke ine.  
\v 12 Me ewenene nang i kip a Barok ke ine i kip sik a to ulorexe. Me ewenene nang i kobo kip lo a Barok kö God, ine i kobo kip sik a to ulorexe.   
\s1 Ire te eöt tua ösöxö bara ire te uruoxe a to ulorexe  
\p
\v 13 E geet inabo lalaa na urungan tö mum ewe mum mo nunu xö esene a Barok kö God, rue mum pa ösöxö bere mum mo uruoxe a to ulorexe.  
\v 14 Me ire tabo balamasa xö wawara xö God, möxösa, ire te ösöxö bere e God ibo ölangen ire nang bara ire te seseseng eöt ma mamaa re ine.  
\v 15 Ma nang bara ire te ösöxö bara ibo ölangen abo sineseng kirip pe ire, io, ire tabo ösöxö bere ire tabo uruoxe abo lalaa möxöbo sineseng ke ire xalik ine.   
\p
\v 16 Nang bara re öng i pere re tönö ine kölöme re Krais, i pet te sasaban nang i koxobo eöt ta silien ine xö minet, io, ine irabo seseng, me God irabo tabaa a tönö ine ma to. E wöwörö ulamun abo magingin saban nang i koxobo eöt ta silien te öng ka minet. Inexalik a mangana sasaban nangen nang i eöt ta sisilien te öng kua minet. E kobo tengen bara irabo seseng ulamunon.  
\v 17 Abo tatalien kirip nang i kobo töxödös, a magingin saban. Inexalik, nangen a dauleng ne mangana sasaban nang i kobo eöt tua sisilien te öng ka minet.   
\p
\v 18 Ire te ösöxö bara ewe nang ine a barok kö God, ine i kara pet magingin saban. Ma lamun a Barok kö God ibo balaure ödeek sik ine ma a Tene Saban i kebeöt tua ögarin ine.  
\v 19 Me ire te ösöxö bara ire a bung baroxorok kö God, ma bara a öxöno lagunon kirip i kisisik kö warkurai möxö Tene Saban.  
\v 20 Me ire te ösöxö bölök bara a Barok kö God ixoro wanot ura ma ixoro ömaras ire, rue ire ra ösöxö ewe nang a lak turunon. Me ire te kis kölöme re ine ewe nang i turunon, ma kölöme bölök kö Barok ke ine, e Jisas Krais. Me ine a God turunon me ine a to ulorexe saxit.   
\p
\v 21 A bung baroxorok ke e kölöme re Krais, mum morobo mana kis pes kalik abo god töxö.