\id 2TH  - Biangai NT [big] -Papua New Guinea 1985 (DBL -2014) 
\h 2 Tesalonika 
\toc1 Paulugi Kapiya Kalike Anotogi Yongkambanu Yereng Tesalonika Mei Puragiwiliyegi Lende Miza Yanarik 
\toc2 2 Tesalonika 
\toc3 2Te 
\mt1 2 Tesalonika  
\mt2 Paulugi Kapiya Kalike Anotogi Yongkambanu Yereng Tesalonika Mei Puragiwiliyegi Lende Miza Yanarik  
\c 1  
\p
\v 1 Ne Paulu kiling Silasi keya Timoti kapiya perik ini kongkirigesen Yisuyegi ngizi kumuli yereng Tesalonika mei puraga Anoto tenigi Mangobek keya Yemizi Yisu Kilisi kiling sawela puwiliyegi lende miza yani.   
\p
\v 2 Peba Anoto keya Yemizi Yisu Kilisigu iniyegi wazono piyaugira keya ngezege sa piyaugira wilek kang inuguyengke yani pani.   
\b  
\p
\v 3 Ini teni kiling Yisuyegi ngizi kumuli puwiliyegi weraga yawe tonugu wok mabiyeng mizageyara Anotoyegi wazono mei pura. Ini Anotoyegi mawiyarekka ngizi kumuli keya inuwa ngezego nakko nakyegi kelirik yemane si kang wilibek legi teni Anotoyegi wazono mei pilik purik pangka.  
\v 4 Tegi tonuwa ngezego Anotogi kongkirigesen wiza kambeli piyengki iniyegi langai yeirik ini lewege panuwili yei. Tonugu ini ngizi kumuli wilibekwili yei logo Yisuyegi ngizi kumuli ono nawiligu ini ngangang keleyi keya kuneng yani kele kapura ini pilik piyeng wagelageya koyimowei kozang yolu yei.   
\b  
\p
\v 5 Anotogo ini ngangang wageli pani keleyi purago walimizi purik pugu ngagozak keleyi piyeng pangkaraga ngagozak keleyi. Keya ini pilik ngangang wageli purago Anotogo ini paka yereng pugu ngai yolu puraga kangkirik weik pangka mizi penangai logo yereng puragi wiyeke ini mabek weik ngangang wageli.  
\v 6 Anotogo mizi piyeng pangkayeng. Iniyegi ngangang keleyi puwiliyegi pugu nganganda kanga keleyagi.  
\v 7 Ini keya tenigi ngangang piyeng mabiyeng Yemizi Yisu paka ngalega angela kozang puguwili kiling lewagela puwekke Anotogo ngangang teni mabuwiligi piyeng wezamelagi.  
\v 8 Logo pulaga kangara yani penangai keya Anotoyegi iwaka ono puwiliyegi yezizik kiling yani penangai keya mabilik ngago wazono tenigi Yemizibek Yisuyegi langai puragi nagerewiyi puwiliyegirau pilik mizagi.  
\v 9 Pilik puwili kazing pobilikmekke kangara yanagi, Yemizibokko puwili ngangang mizageya koyimagira yanagi keya wire puguyau keya kozang puguragi yemane puraga yenge kezangka wazayagi, pi wokpokko lewawekke.  
\v 10 Keya wok pi yogibokko pigi puwiligu yeik yemanera managi keya piyegi ngizi kumuli puwili mabuwili yeik pugura yongolok meiyagi. Ini nogo kozak yei puragi ngizi kumuli legi ini kiling ngizi panu kumuli puwili mabuwili wokpokko pulogo koyagi.   
\b  
\p
\v 11 Tegi tonuwa wok mabiyeng iniyegi wiyeke waberek mizi. Tonuwa Anotogo ini kazing pangka pugu weiweki kaiya pumokko ini pangka pangka koyiweki keleyibene tonuwa piyegi nguk mei. Pigi kozang purago iniyegi sawela wizigeya watabi pangka inugu keli piyeng keya yawe ini ngizi kumuli legi mizi piyeng miziweki.  
\v 12 Kazing pilikmekke inugu tenigi Yemizibek Yisugi yeikta yongolok meiyagi keya pugu yeik inuguyeng yongolok meiyagi purik Anoto tonugubek keya Yemizi Yisu Kilisigu wazono tonugu weiyagi langai ono teni yani purago mizagewiyege.   
\c 2  
\p
\v 1 Ini ne kiling Yisuyegi ngizi kumuli puwili ne wok Yisu Kilisi yorik pugu pi kiling teni menalege wawere keleyibokko  
\v 2 ini wilek ngelengelek kumula meli keya nakko iniyegi Yemizibekki wokpek weik yaka lewa kai purikki yangeze miza nelegi ne iniyegi kelegele keya nguk yei. Nalikwekkerik ini nakko ngago pera Anotoyaga weiyara logo kozak kaira kai purikki ini kerewiya ma nakko Anotogi ngagora kozak kaiyawekke ini ngago pera kerewiya ma nawiligu kapiya narikke tonugu lende mizarik kisi nangai.  
\v 3 Kazing nalangai nalangai miza piyengki nawiligu ini ikuyogorik keleya nagani purik wok Yemizibek yogibok tabundagine watabi neyau were wiriyagi. Watabi piyau pelik, teng kangkali puraga purik yongkambanuwili Yemizibekyegi nagerewiyi mizi keya kezanga managi logo pura nara keya nara yombanu korowali panu yezizikke wezamelagibek kaiyabok tabundagira.  
\v 4 Pilik mizibok watabi yongkambanuwiligu walek keya ya kumulagiyeng kisi pilik piyengki ngai mizibek. Pugu ngezebek watabi piyeng mabiyengka yeke ngalege panu wazamiyagi. Keya peliktiktau mizi penangai pi Anotogi i walek yemanemakke yungke kiliya yabela logo mogosagi wizigeya ngezebekyegi langai pelik kaiyagi, Ne Anoto, kai penangai.   
\p
\v 5 Nogo kumularik ini piyeng mabiyengki keremarekegi langai ono, purik ne ini kiling wiziyawekke iniyegi nogo mawiyarekka kozak yeiya.  
\v 6 Ngoluk nak yaka yombanu korowali panubok wiriyagirikka waliyi wei kelemiyagibek wizinda logo pilik purikki ini iwaka. Pi pilik mizi purik wok Anotogo sawiyabokko yombanu korowali panubok lewagelaweki.  
\v 7 Yombanu korowali panu yaka liwik yongkambanuwili kaile mizibene keleyibok weik mabek yawe mizageya wizinda. Kapura yombanu korowali panubok lewagela nelegi waliyageyabok Anotogo towilizami mabuwekke yombanu korowali panubok lewagi.  
\v 8 Yombanu korowali panubok tabundagi logo Yemizi Yisugi kiligawereraga yaumbokko pi ulagi logo Yemizibek lewa puwekkerik ngaiwak pugurik kiling wiriyagi logo purago yombanu korowali panubok neneng ngela melagi.  
\v 9 Yombanu korowali panubok Sadangki kozanda kiling wiriyagi keya pugu watabi kozangka yombanuwiligu mizagi onoyeng mizagi keya wirangai piyeng keya watabi lebuk mizagiyeng ikuyogorikta kiling mizagi.  
\v 10 Keya yombanu korowalibokko yongkambanu yezizikke kangkiwili kazing kaile nalangai nalangai miza piyeng mabiyengko ikuyogorik keleyi penangai. Yongkambanu puwili Anotogo yezizikke wezayelagi purik puwili wameiktagi kezanga mani legi keya wameiktagi keli ono legi logo piliktikki wiyeke Anotogo puwili yaliya wazaya ono.  
\v 11 Tegi Anotogo kozang puwiliyegi ngaigu keleyagi nara puwiligi yungke yawe mizibene wezamelagi logo puwili ngizi ono puragi ngizi panu kumuli nangai.  
\v 12 Kanga yanagira Anotogo yongkambanu wameiktagi ngizi kumuli ono kapura kaile kaileyeng mizagirikki wilik mizi puwili mabuwili ngangang mizageya koyimagira weibene yezizikke wezayelagi.   
\b  
\p
\v 13 Ini ne kiling ngizi kumuli Yemizibokko keli puwili yawe nogora iniyegi langai nogo Anotoyegi wazono meiyagi pura purik ini pugu izawili legi. Anotogo watabi mabiyeng keremizawekke pugu ini yaliya wazayiweki iza. Pugu ini Kung Walek pigi teni kaile nayendau onoweki keleyibokko yaliya wazaya, keya inigu wameiktagi ngizi kumuli purikku.  
\v 14 Anotogo iniyegi weiweki mena koli kaiyarik tonugu iniyegi ngago wazono Kilisiyegi langai pura kozak yeiya puwekke logo ini tenigi Yemizi Yisu Kilisigi ngaiwak purikka inigi wale sawiya purik weiweki.  
\v 15 Tegi ini ne kiling ngizi kumuli puwili ini kozang koyizo keya watabi wameik tonugu iniyegi kozak yei keya kapiya wererikke lende miza yana piyengka waligeleya piyeng kozang kebangkelara koyizo.   
\p
\v 16 Yemizi Yisu Kilisi ngezebek keya Peba Anoto teniyegi keli keya wazono pugurago teniyegi tonugu pigi yogiragi wilekpek keya ngai yuke yoluweki kozang wizagomagira yanabokko  
\v 17 ya inuguyeng ngezege sara koyiweki keleyi keya ini mawiyarekka pangka piyengka mizi keya kisiweki kozang keleyi pani.   
\c 3  
\p
\v 1 Ne weik watabi kalogomokyengki lende miziweki. Ini ne kiling Yisuyegi ngizi kumuli puwili Anotoyegi tonuwagi wiyeke waberek mizizo logo ngago Yemizibekyegi langai pura yongkambanu mamokyegi kang peyeng mabiyengki pangka pangka siweki keya yongkambanu mamokko ngago puragi panga yungke kiliyi keya yongolok meiweki mabilik ngagora iniyegi pangka pangka sawekke inugu yongolok meiya pilik.  
\v 2 Keya mabilik Anotogo tonuwa yongkambanu korowali teniyegi kaile kaile keleyiweki mizi puwiliyaga kazi iza orowei kunibene waberek mizizo, purik yongkambanu nawili Yisuyegi ngizi kumuli onowili kani.  
\v 3 Kapura Anoto wok mabiyeng pugu mizagi kaiya piyeng mizibokko. Logo pugu ini kozang keleyi penangai keya pugu ini Sadang kailebekyaga iza warara wizi penangai.  
\v 4 Yemizibokko mizagewiyege tonugu ini pangkayeng mizagiwili purikki teni iwaka. Tonuwago ngizi kumulirik ini tonugu miziweki yeiya piyeng ini mizageya keya tonugu mabek miziweki yei piyeng ini mizagi keya ngoluk mizi kai kang kunagi.   
\p
\v 5 Yemizibokko Anotogi keli iniyegi yolu maburago nawiliyegi kelageya koyimowei ini keli puraga yemane sibene keleyi pani keya Kilisigu iniyegi sawela wizigeya pugu luwe kozang wiziya mabilik inirau luwe kozang koyibene keleyi pani.   
\b  
\p
\v 6 Ini ne kiling Yisuyegi ngizi kumuli puwili nogo wameik panu yei kani ini pilik mizizo keya Yemizi Yisu Kilisigu neyegi iniyegi pelik yeiweki kai kani, ini Yisuyegi ngizi kumuli yawe namizi kiyebuk sende wizigeya kazing tonugu iniyegi koyiweki waligeleya pumokka kokowa yolubokyaga koweige koyizo.  
\v 7 Ne keya Silasi keya Timoti ini kiling koyawekke tonuwago koya mabilik ini koyiweki purik ini iwaka koyinda. Tonuwa nawiligu tonuwa yanagi mizara koyimowei yeik koya ono purik ini iwaka koyinda.  
\v 8 Tonuwa kingyeng yana onowekkerik tonuwa i keya ngeragi nayeng weiya ono kapura tonuwago yokolong panu yawe miza keya kusaga yoklongko yawe miza purik tonuwayegi ngaigirikki wiyeke iniyaga nawili yawe kozang miza nelegi.  
\v 9 Tonuwago inugu kiriwei miziweki kung wezarik waligeleyi kuna logo tonuwago pilik miza. Tonuwago iniyegi watabiyeng yani keya teniyegi ngaiweki nguk yeiya kesak purik pangka.  
\v 10 Tonuwa ini kiling koyawekke tonuwago iniyegi ngago kozangka nara pelik kozak yeiya, Yawe namizibok ngeragi nagi onobek, yeiya.   
\p
\v 11 Tonuwago pilikyeng kisi purik yongkambanu iniyaga nawiligu tonuwayegi yongkambanu tenigi tepekke nawili kiyebuk sende logo yawe mizi ono logo yawe mizagirikka yeik mogosara koyimowei nawiliyegi langai kozak keli keya wok mabiyeng nawiliyegi peyeng pilik mizagiyeng keya peyeng pelik mizagiyeng yei, kisi legi.  
\v 12 Tonuwago pilik puwiliyegi keleyagi nara logo pura pelik, tonuwago Yemizi Yisugi yeiktage puwiliyegi waberek panu keleyi logo puwiliyegi kozang pelik yei, Wokyengki pangka pangka yawe mizi keya king ini makngezegiyengki yawe mizizo, yei.   
\p
\v 13 Ini ne kiling ngizi kumuli puwili pangka mizagirikki kiyebuk miza meli keya wiyi nagani.  
\v 14 Tamizeige nak ngago nogo kapiya perikke lende miza piyengki nagerewiyi mizi mabura pilik pok kangka inuguyengke wiyizo keya ini pilik pok kiling yawe mizi ma kewengke mizi ma ngago keli nagani logo pi kazing pugu mizimokki kendek miziweki.  
\v 15 Kapura pilik pok iniyegi kumbak mizibek mizi nagani, kapura segeya inigi ingembuwili nakyegi ni waberek panu wizimo meiyagi mabilik pilik pokyegirau waberek panu wizimo meizo.   
\b  
\p
\v 16 Yemizibek ngezebek ngezege saragi mangobokko wilek kang inuguyengke kazing ngezege saragimek inugu mizi mabiyengki yungke wok mabiyeng yani pani.   
\p
\v 17 Ne Paulugu kapiya perik mele ne makngezege panuzikku waliyi keya wangane nogora lende mizi logo pumok kazing nogo kapiya nogoyengke mizimek. Tamizeige kapiya narikke pilik lende miza wizilege pakeli purik mabura kapiya purik neyagarik kani.   
\p
\v 18 Yemizi Yisu Kilisigi wazono pura ini kiling wizei pani.  
\p Mabura.  
\p Ne Paulu kapiya perik lende mizabek.