\id 1PE  - Biangai NT [big] -Papua New Guinea 1985 (DBL -2014) 
\h 1 Pita 
\toc1 Kapiya Pitago Were Lende Mizarik 
\toc2 1 Pita 
\toc3 1Pi 
\mt1 1 Pita  
\mt2 Kapiya Pitago Were Lende Mizarik  
\c 1  
\p
\v 1 Ne Pita, ne Yisu Kilisigi ngagora orowei mizibokko kapiya perik yongkambanu Anotogo iza logo ngabelakpekke pelege yereng nararau ono logo yagong yereng Pondasi, Kalesiya, Kaparosiya, Asia keya Pitiniya mei piyengki yolu wizigeya yereng puwiligi paka ngalegeragi yuke yolu puwiliyegi lende miza yani.  
\v 2 Ini kazing Anoto Pebago sawiyamekke iza logo ini pigi yango keya marekngangwili mizagi purik pugu koka solowekka iwaka. Ini Anotoyegi yawe miziweki pigi Kung Walekpokko kaile nayendau onowili keleya logo ini Yisu Kilisiyegi kerewiyibene keya iwi pugubokko kaile inuguyeng kaigesa wazayibene.  
\p Anotogo pigi wazono tonugu weiyagi langai ono pugu yani pura keya ngezege sa yolu pura iniyegi keremungke panu yani pani.   
\b  
\p
\v 3 Teni Yisu Kilisi Yemizi tonugubekki Anotobek keya Mangobekyegi ngago wilik kagowing meiweki, purik Anotogi yalek yemane purago mizagewiyege Yisu ibendaga yangalekta wazamiyarikku Anotogo teni ngereke wik keremiza. Logo teni wik keremiza kopong teni Anotogo paka ngalege yongkambanu puguwili yaniweki palumu panu wara yowiya yolu puragi wilek kang tiya mani.  
\v 4 Logo teni teni makngezegi weiweki teni wik koyimagi palumu panu Anotogo yongkambanu puguwiligi wara yowiya yolu puragi wilek kang tiya mani. Wik koyimagi pura pugu paka ngalege kaile kaile mizi, ma kowiyeng mizi ma wazono puragirarau ibengki onolege pugu inigi warara yolu.  
\v 5 Keya Anoto kozang yemane puguraga ini pura weiweki keleyi penangai purik ini Yisuyegi ngizi kumuli legi. Wangki wok kangkali panubekke wik koyimagi pura inigiweki inugu weirikki mamokko keriyibene waligeleyi penangai.   
\p
\v 6 Pobilik purikki wilik mizi. Ini mabek ngabelakka pelege ngangang kolokngagono wageli kele kapura paka ngalege wilik kagowing yemanera ngoluk wizinda.  
\v 7 Yang keleyi pobiyengki yawera ngizi kumuli inigi Kilisiyegi pura kozang keya kaile nangezirau ono ma talik miza legi miziyengko. Kolibek yeik sawiyibokko logo yezizikke kulugulu nayendau mane miza legi yang kelemibokko. Anotoyegirik kumuli inigi pura ngalege panu logo kolibektau ula. Logo tamizeige ngizi kumuli inugura yeziyeng kelikyengko yang kelemiya kapura mabilik kozang purik mabura wok Yisu Kilisi yobokko pilikpokyegi wilik ngago mei keya ngaiwaktiktau managi keya yeik pugurarau yongolok meiyagi.  
\v 8 Inugurau pi pakeli ono kele kapura ini piyegi keli, keya inugu mabek pi pakeli ono kele kapura ini piyegi ngizi kumuli logo iniyegi wilik kagowing yemane panu ngaiwaktikku kola wizigeya ngago yeiktago kozak kaiyagi langai ono nara iniyegi wizinda.  
\v 9 Logo purik ini ngizi kumuli inuguragi kangara wei yagenda kopong logo pura wilek kang inuguyeng kaileyengka wila wazayi pura.   
\p
\v 10 Yaka kaileyengka kemenak wila wazayi pura yombanu koka Anotoyaga ngagoyeng weiya logo kozak kisawiligurau iwaka panu onoyeng. Puwili wazono tonugu weiyagi langai ono Anotogo yanagi puragi langai kele kozak kisa kapura pura talik nalikta miza purik puwili lusuwei miza,  
\v 11 logo puwili Anotogi Kung Walek puwiligi yungke yolubok ngenangaiyengki kaiyageya wizinda miza, purik Kung Walekpokko puwiliyegi Kilisigi ngangang weik ulogo lewagela pura keya pulaga kalike yeik yemane pigi lewagela puragi langai kozak kisiweki yeiya, logo puwili pura talikwekke lewagelagi keya takyegi piyeng lewagelagi miza.  
\v 12 Anotogo puwiliyegi watabi piyeng teng puwiligiraga lewagelagi ono yeiya, kapura kalike panu teng inuguraga lewagelagi yeiya. Logo weik mabek ngago wazono Yisuyegi langai pura teni mabuwiliyegi kimeike panu kozak yeiya. Ngago wazono pura Kung Walek paka ngalega wezamela logo yombanu Anotoyaga ngagoyeng weiya logo kozak kisawiliyegi kozak yeiya mabokko kozanda kiling teniyegi kozak yeiya. Watabi peyeng lewege panu logo angela paka ngalege yolu puwiligirau mawiyarek iwakaweki keli.   
\b  
\p
\v 13 Tegi kangka inuguyeng kangkere mizi logo inugu ngai yuke yolu puragi ini ngizi iwakaweki yawe kozang mizi nangairikka keya inugu mizageya puragi ini iwaka koyizo. Purik pelik, Watabi nayengkirau wilek kang tiya mani wak kapura Anotogi wazono tonugu weiyagi langai ono pugu yeik yani logo Yisu Kilisi yowekke inugu ngereke kolok ulagi puragi keke wilek kang tiya mani.  
\v 14 Anotoyegi kerewiyagirikki kai, purik ini pigi yango keya marekngangwili legi keya kazing were inigi pumokko kando wak, pumok inigi koka ini ngoluk pangka iwaka onowekke korik inuguyengki keli kaileyengki kira orowei mizamek pumok.  
\v 15 Logo pilik segeya inugu mizi piyengka yeikta kaileyeng mei pilik piyengka koweige koyi, mabilik Anoto ini pigi yango keya marekngangwili kaiyabokko kaile nayendau ono yolu pilik.  
\v 16 Kapiya Walektikku pelik kai,  
\q1 Ini kaile nayendau ono koyagirikki kai, purik ne Anoto kaile nayendau ono legi. \rq Lebitika 11:44\rq*   
\b  
\p
\v 17 Keya inigi Mango paka ngalege inugu piyegi waberek mizi pok yongkambanuwili ngagozak keleyiwekkerik yewizek mizi onobek kani logo kumulizo. Pugu inugu mizi piyeng mabiyengki pangka pangka ngagozak keleyi penangai legi mabek pewekka paka ngalege kangki pulogo tek purik pi sisik mizibene kelemiya nelegi waberek panu koyagirikki kai.  
\v 18 Ini inigi yelibungangwiligu kazing kaile ngizi nariktau ono koyamekke kokarik ini koya kapura Anotogo kazing pumokka ini weiya logo Anotogi kazingmekke iza orowei wiriya logo pugu pilik miza purik watabi ngabelakpekke siliba keya koliyeng mei piyengki ngane weiya ono, logo purik inugu ngizi panu iwaka.  
\v 19 Pilik segeya pugu ini Kilisigi iwi Anotogi wilekpekke kumanabokki ngane weiya. Pi kaile nayendau onobek keya pi wamenak Anotogi liyeng memeng kungkak nangezirau onomek.  
\v 20 Ngabelakpek keremizagine Anotogo pilik miziweki pugu pi miza kapura inigi weraga ulogo ngolukku wok kangkali peyengke yombanugi lengke miza orowei wiriya.  
\v 21 Logo purik piliktikki wiyeke ngizi kumuli inigi pura Anoto, Kilisi ibendaga yangalekta wazamiya logo ngaiwak yemanerik manabokyegi yolu purik pangka. Keya weik ngizi kumuli inigi pura keya inugu ngai yuke yolu purarau Anoto wamenakyaga kebangkelara koyagi.   
\b  
\p
\v 22 Ini weik mamokyegi ngizi kelagi, purik ini Kilisigu yaliya wazayagi miza puwekke Anotogo ya inuguyengke kazing nazuwagawiliyegi kumbak mizi keya ini makngezeyegi kumuli wilibek mizimokka kaigesa wazaya, legi ini wameik nakko nakyegi yezingeira kiling ya inigi pura maburagi yungka kelagirikki kai.  
\v 23 Purik ini weik ngereke wik keremiza logo inigi panu keya mango ibengki puwiliyaga lewagelara ono segeya Anotogi ngago wik wizagomagi puraga lewara.  
\v 24 Kapiya Walektikku pobilik kai pelik,  
\q1 Yongkambanu mabuwili yengelikpek kelik keya ngaiwak puwiligirik purukpuruk ngezeyeng lewa meli piyeng kelik. Pulaga yengelikpek ngaingai liyi keya purukpurukyeng wali  
\v 25 kapura Yemizibekki ngagora wizagomagira. \rq Isaya 40:6-8\rq*  
\m Keya ngago pura ngago wazono Yisuyegi langai iniyegi kozak yeiya pura.   
\c 2  
\p
\v 1 Tegi wilek kang werebekki kazing korowali pobilik piyeng, ikuyogorik kisi piyeng keya nugu kai puragi kiriwei yolu ono pumok keya nakko miziyengki ma nakki piyengki yagolok miza logo sisik mizi pumok keya nazuwagawiliyegi kezanga mana koyimowei puwiliyegi langai ngago kaile kozak keli piyendau kemenak wezamelizo.  
\v 2-3 Ini ulogo Yemizibekki wazonora kolok ula legi mandik songono melegewiligu yebiliyengki ingkisi pilik mawiyarekka yebili kumbekki pangka panu pumokki ingkisi. Anotogi ngagora ngeragi wezarik ni, purik pelik kai yagenda, ngago pura mei logo puragi kumuli keya Yemizibokko ini kozang sibene keleyi pani logo kazing kumbekki lewengke ini yemane si kuniweki.   
\p
\v 4 Kilisi king wik yolubek logo Anotogo imak pigi ngalege ngizi kambekyegi mereke koli. Yombanuwiligu yeik ulakpek meiya logo kang wezamela kele kapura pi Anotogi wilekpekke kumanabek keya Anotogo piyegi kumulirik ngalege panu logo pi miza.  
\v 5 Keya ini weik king wik i ngiziyeng kelik logo Anotogo i pugumak ngiziweki weiyayeng kelik. Keya Yisu Kilisigu mizagewiyege ini i pugumakke King Ngaibekki yombanu nazuwagawiligi wiyeke Anotoyegi kang miziwili logo Anotoyegi yawe pugu kelagiyeng kolak miziweki puraga keke yawe miziweki wazaya.   
\p
\v 6 Kapiya Walektikku pelik kai pelik,  
\q1 Keriyi, ne Saiyong mei lemengke king nogo miza pura keya negi wilekpekke kumana pura wiyi, pi king panu imak mamak kebangkela yolu pura kani.  
\q2 Yombanu piyegi ngizi kumulibok yeik ulak ngizi kumulagi ono, kai. \rq Isaya 28:16\rq*   
\m
\v 7 Keya ini ngizi kumuliwiliyegirik kimbok yemane panubokko, kapura piyegi ngizi kumuli ono puwiliyegirik, Kapiya Walektikku pelik kai,  
\q1 King yombanu imak ngiziwiligu kiyebuk miza logo wezamela pura ngereke king panu imak mamak kebangkela yolu pura kani, kai. \rq Ingi Sam 118:22\rq*   
\m
\v 8 Keya Kapiya Walektikku piyegi ngizi kumuli ono puwiliyegi pobiliktarau kai,  
\q1 King pobokko yongkambanuwili natengka walibene keleyagi, kai. \rq Isaya 8:14\rq*  
\m Puwili Anotogi ngagoragi ngizi kumula keya kerewiya ono kopong puwili natengka wala logo Anotogo puwili pilik mizibene sawiyawili.  
\v 9 Kapura ini Anotogo izawili, keya ini King Ngaibekki yombanu nazuwagawiligi wiyeke Anotoyegi kangwili, keya ini ngai kaile nayendau onomekkiwili, keya ini yongkambanu Anotogi kekewili, logo ini Anoto ini kaileyengki kusabanurikka panga pigi wilangka palumu panurikkeweki ngago yeiyabokko wazono mizi piyengki kozak kisiweki izawili.  
\v 10 Ulogorik ini Anotogi yongkambanuwili miza ono kapura mabek perik ini weik yongkambanu puguwili. Ulogorik ini Anotogi yalekta kolok ula ono kapura mabek weik yalek pugura ini waligeleya.   
\b  
\p
\v 11 Ini ne kiling Yisuyegi ngizi kumuli puwili keya nogo keli puwili, ini yeik pelege yagong koyinda kani. Inigi yereng ngizi panura paka ngalege legi ngabelakpekki langai korikwekko kaile keli piyengki kira orowei mizimokka koweige koyiweki ne kelegele keya nguk yei. Korowali pilik piyeng inigi onoyeng purik piyeng wilek kang inuguyeng kiling ngai keliyeng legi.  
\v 12 Inugu ngizi kumuli ono puwiligi tepekke mizi piyengki waberek panu purik puwiligu ini kaile kumula koyimoweira kiling miza kisi keya iniyegi langai yang kisi nangai kele kapura wok Kilisi yobokko inugu wazono mizayengki keriya logo Anotogi yeikta yongolok meiyagi.   
\p
\v 13 Keya Yemizibek kazing kerewiyimekke wiziya legi Kapmanwiligi lo piyeng mabiyengki kiriwei mizi keya ngabelak inigibokki ngai yemanebokki lo piyengkirau kiriwei mizagirikki kai, purik pi ngai koru ngabelakpokki wizageya koyi kambeli puwiliyaga ngai ngalege panubek legi.  
\v 14 Keya ngai yemanebokki yawera miziweki wezayela puwiligi ngagoyengkirau kiriwei mizagirikki kai, purik korowali mizi puwili nganganda yanibene pugu wezayela keya wazono mizi puwiliyegi wilik kagowing yeiweki.  
\v 15 Purik Anotogi kelira pera, pugu kelirik inugu wazono mizi piyengko wazewaze kisa meli puwiligi ngagoyeng ngagoluk sa wazayiweki.  
\v 16 Yombanu wigira ono puwiligu mizi pilik kerewiyi keya kiriwei mizi kapura korowali mizi piyeng kazing pumokko kagorik wezarik ngokmanagi onoyeng kani kapura segeya Anotoyegi yeik yawe mizi ngezebekkiweki ngezebokko weiyawili logo ngezewiligi keliragi kiriwei mizi onowili kapura Anoto ngai puwiligibekki keliragi kiriwei miziwili mizi.  
\v 17 Yongkambanu mabuwiligi yungke wazono nara wizinda mizi keya inugu Kilisiyegi ngizi kumuli pilik nazuwaga piyegi ngizi kumuli puwiliyegirau keli keya Anotoyegi kazi mizi keya Kapmanbekki ngai yemanebekki yeikta yongolok mei.   
\b  
\p
\v 18 Ini yombanu ngai nakko weiya logo piyegi yeik ulak yawe miza puwili, inigi ngai puwiligu kisi piyengki panga yungke mizi keya kerewiyi keya puwiligu miziweki kisi piyeng mizi. Ngai wazono keya pangkaraga keleyi puwiliyegi kerewiyi keya ngai ngalik kisa meli keya kaile kaile keleyi puwiliyegirau kerewiyi.  
\v 19 Nugu kaile narik miza ono kele kapura puwiligu waze yeik ula neli puwekke mabura ni yeik neli pani mizara yolu, purik Anotogo nugu mizagiweki keli pura ni makngezego iwaka logo pilik mabura Anotogo niyegi wazono mizagi keya niyegi sawelagi.  
\v 20 Purik tamizeige ni kaile narik miza wizigeya neli logo neli mizara kozang yolu purik yeik nugura yongolok meiyagi ono kapura tamizeige ni pangka mizawekke neli logo neli mizara kozang yolu purik mabura Anotogo niyegi wazono mizagi keya pilik mizarikki wiyeke niyegi sawelagi.  
\v 21 Purik ngangang pilik wageli piyeng Anotogo miziweki nana piyengkayengko. Kilisi tenigi wiyeke ngangang miza purago waligeleyi legi kazing pugumekki kiriwei mizi,  
\v 22 Pi kaile narik miza ono keya kili puguraga ikuyogorik nara punda wiriya wizigeya nakko kerewiya ono.  
\v 23 Piyegi kendek mizagiyeng meiyawekke pugu kangara kaiya yo mela ono. Pi ngangang mizawekke pugu kanga mizagi kaiya ono segeya piyeng mabiyeng pugu Anoto ngagozakyeng pangkaraga kerewiyibekki melezikke mana purik Anoto watabi mabiyeng pangkaraga keleyibek legi.  
\v 24 Kilisi ngezebek yengeleileige ibeng sawekke kik kaile tonuguyengko wilak pugik korik ngezebekkiweki ngalege wara keya kaile tonuguyengki wiyeke tonugu kanga weiyagi langai pura pugu wagela logo kaileyengkirik teni ibeng keya pangkayengkirik teni wik yoluweki, Wizing kung puguyengko teni kemegeme ya kaileyeng kiling puraga weik wazono keleya.  
\v 25 Purik ini liyeng memeng kazing leweng wiya logo lelewe sowei mizi puwili kelik koya kapura ini weik iniyegi ngaibek keya wilek kang keya kung inuguwiligi ngai yolubekyegi kiriwei kuniweki iza orowei yo wiriya.   
\c 3  
\p
\v 1 Nogo yombanu ngai nakko weiya logo ngai pilikpokyegi yeik yawe mizi puwiliyegi langai kozak kaiya mabilik ini yongokwili inigi kerekpungangwiliyegi panga kulengke mizi logo tamizeige puwiliyaga nawili Anotogi ngagoragi wameik mizi ono purik inugu kazing mizimekki keriya logo inugu ngago nara kisi nagai wizigeya waze Anotoyegi ngizi kumuli nangai.  
\v 2 Purik inugu puwiliyegi panga kulengke mizi keya inugu Anotoyegi kazi miza logo kazing pangka panumekke yolurikki pakela puwekke pilik mizi nangai.  
\v 3 Ni yongok palumumele mizagirik kebi polo ula keya kolau keya watabi koliyengka keremiza keya kagorik keya melewangka wazono panu piyengko pilikmele mizi nagani.  
\v 4 Pilik segeya ni pilikmele mizagirik yenge ya nuguragi yungka legi yenge ya nuguraga kazing ya kuzigeragi pumok keya ngago wageliwei kaiya meli ono ngagoluk yolumok nigi yungke yolu purikku logo Anotogi wiregerik purik yemane panurikku.  
\v 5 Purik kazing pilikmekke koka yongok pangka panu koya logo Anotoyegi wilekpek ngalege wiya puwiligu ngezewili palumuwili miziweki puwiligi kerekpungangwiliyegi panga kulengke koya.  
\v 6 Ik Sera pilik namologo. Pi Abalamgu kaiyengki kerewiya keya pugu Abalamyegi, Yemizi nogobek, meiya. Ni pigi yangomele, tamizeige ni pangkayeng mizi purik logo ya nugura nigi kerekpubek keya Anotoyegirau ngezege sa wizei penangai.   
\p
\v 7 Kazing mabilikmekke ini yombuwilirau inigi yongokpungangwiliyegi kazing Anotogi pangkamekke waberek ngai, keya puwiligu mizagi keli keya pilik piyengkirau waberek keriyi purik puwili yombuwiligi kozang puleirau onowili legi. Ni yali yongokpu Anotogi wazono pura yali mabiyau weiyagiyau logo tamizeige ni piyegi waberek ngai ono purik waberek nugumekki kazing leweng waliyagi legi kumulizo.   
\b  
\p
\v 8 Keya ngago piyengki kangkalira ini Yisuyegi ngizi panu kumuli mabuwiliyegira, ini kangka wamenak koyi keya ya inuguyengka nakko nakyegi yalek mizi keya kunengyengke nakko nakyegi saweli keya ya kuzigera kiling ni makngeze kulengkebek miza wizimowei nakko nakyegi keli.  
\v 9 Keya nakko korowali keleni purikki wiyeke korowalira kiling kanga kelemi nagani ma niyegi kaile kisi puwiliyegi kailera kiling kanga yeiya to meli nagani segeya Anotogo puwiliyegi wazono mizibene nguk mei purik teni nazuwagawiliyegi wazono miziwekiwiligu logo tonuwago pilik mizirikki wiyeke Anotogo tonuwayegi wazono mizagi.  
\v 10 Kapiya Walektikku pobilik kai pelik,  
\q1 Yombanu pugu yolura wazono keya wok wilik kagowing yemaneyeng pakelagi kelibok, kiligawere puguraga ngago korowaliyeng punda nelegi waliyagirikki kai keya ikuyogorik kai piyeng wiya wazami.  
\v 11 Keya pi kazing korowaliyengki pumok wiya logo wazonoyeng mizagibokko keya pi nazuwagawili kiling kazing ngezege saragimekke yoluweki welagibokko logo kazing pilikmekki kiriwei yoluweki mizagibokko.  
\v 12 Purik Yemizibek pigi yango keya marekngang pangkayeng mizi puwiliyegi ngai yuke yolubek keya wok mabiyeng puwiligi waberekyengki kerewiyibek kapura kaile mizi puwiliyegi wiregawerera kokowa sibek, kai. \rq Ingi Sam 34:12-16\rq*   
\b  
\p
\v 13 Ni wazono miziweki kelibokyegi nakko kaile kaile keleniyagi ono.  
\v 14 Kapura tamizeige ni pangka pura mizawekke nakko kaile kaile keleni purik, purik wazonorik mizi. Yombanu kaile kaile kelenibokyegi kazi mizi nagani keya wilek ngong mizi nagani.  
\v 15 Kapura ya inuguyengke yungke Kilisi wamenak kaile nayendau onobok Yemizi inugubek kelemi. Keya nakko iniyegi ini ngenangki pilik Yisuyegi wilekpek keya ngai yuke yolu keya ngizi kumuli kai purik mabura piyegi kozak meiyagirikki kangkere mizara wiziyagerikki kai keya yelakkelek wizimowei wazono kozak mei.  
\v 16 Kazing pangkamekke mizizo logo tamizeige nawili iniyegi kaile kisi purik inugu Kilisi kiling sawela purikka pangka mizawekke puwiligu ikuyogoriktaga iniyegi meleyeng yowarikki wiyeke ngezewili kendek mizi nangaiwiligu.  
\v 17 Purik kaile mizarikki ngangang wageli purik pangka kapura tamizeige Anotogi kelira mabura wazono mizarikki wiyeke ngangang wageli purik pangka panu.   
\b  
\p
\v 18 Kilisirau ngangang wagela. Teni kaile miziwili mabuwiligi kaileyengki wiyeke kemenak kang wamenara ula logo ibeng sa, pi ngezebek kaile nayendau onobek kaileyengko kolawiligi pilik miza. Pi tenigi wiyeke ibeng sa purik pugu teni iza orowei Anoto kiling pangka koyagimekke wazayiweki. Korik puguwek ula logo ibeng sa kapura kung pugubek wik yolu.  
\v 19 Keya pi yeik kung yeikpek wizimowei yombanu kaile puwiligiyeng kiling ibeng puwiligi kungwili logo wigira yoluwiliyegi ngago wazono pugura kozak yei kambela.  
\v 20 Kung puwili yongkambanu wok Nowago sik yemanemak ngizageya wiziyayengkewekke Anotoyegi nagerewiyi mizi legi pi yelakkelek wizimowei puwili kaile puwiligiyengki kuneng miza logo kowitagi nobiyeng yuke wizagoma puwiligi kungwili. Anotogo yongkambanu melenazik keya nazikka neyauganak kaingai yemane yombanu kaiyaga na piyauga yaliya wazaya.  
\v 21 Purikku walimizi purik kaimeliragi walimizi yagenda logo kaimeli inigi purago walimizi purik Yisu Kilisigu ibendaga yangalekta purikku mizagewiyege ini weik mabek kemenak ibeng koyimagi puraga yaliya wazaya pura. Kaimeli pura korikwekke kowiyembok kaigesagerikki kai ono kapura kumuli tonuguyeng kaileyengka tumula melibene teni Anotoyegi nguk meirikki kai yagenda.  
\v 22 Keya Kilisi weik paka ngalege Peba Anotogi mele ngaigezikke mogosa logo angela mabuwili, keya Sadang keya ngai nawili, keya kerewawili keya kozang yemane paka kurung yeikwekke piyeng mabiyeng piyegi ingegere laliya mani keya pugu kaiyengki kerewiyi.   
\c 4  
\p
\v 1 Kilisigi korikwek ngangang miza legi inirau pugu kangka kumula wizimowei ngangang wagelabok kumulagirikki kai keya ngangangyeng lewarik kele kangkere mizagirikki kai, purik nakki korikwek ngangang mizi puwekkerik kaileyengki kozang pura weik kawiyegi.  
\v 2 Mabek pewekka purik mabura ngabelakka pelege koyi kang kunagi purik Anotogi kelirago iniyegi ngaiweki mizagirikki kai keya ngabelakpekkewiligu keli piyengko iniyegi ngai nagani.  
\v 3 Ini weik ulogo kang kolokngagono yongkambanu Anoto kiling ono puwiligu keli keya miziyeng mizageya koya logo purik weik. Ini kazing inigi tepekke pangka ono mizi ma kerewiyi ma kozak kelagi langai ono piyengkirau mizageya koya, keya korikwekko kaile keli piyengki kira orowei mizimekke kiriwei mizageya koya, keya kai nameli keya mizageya koya, keya kai kozangyeng weiya logo ni kaiyageya koya keya ngeragi yemane miza niyengke kisageli meiya meliyaugi kang kaiyageya koya, keya anoto ikuyogorikwiliyegi ngago yeiyageya koya keya kaile kolokngagono nayendau mizageya koya.  
\v 4 Wameik, purik ini kiling walaka kewengke miza puwili, ini puwili kiling sawela logo kazing korowali puwiligu mizi piyengka mizi onorikki wiyeke lebuk ngeli nangai logo puwili iniyegi songomeiyageya koyimowei iniyegi ngago kaile kisi nangai.  
\v 5 Kapura yombanu wik yolu puwili keya ibeng puwili mabuwili ngagozak keleyagibekki wirege kang puwekkerik kanga meiyagiyeng kiling kunagi legi kumulizo. Kazing puwiligu koya pumokki wiyeke puwili ngangang yanagi.  
\v 6 Logo piliktikki wiyeke ngago wazono Yisuyegi langai pura yombanu ulogo kaingaiyauge ibengwiliyegi kozak yeiya logo korik puwiligiyeng yombanu mabuwiligu ibeng si pilik ibeng sa kele kapura ngago Yisuyegi langai pura kerewiya logo ngizi kumularikku kung puwiligiwili Anoto kiling paka ngalege wik yolu.   
\b  
\p
\v 7 Watabi mabiyeng yeik sawiyagira weik mereke, legi ini wirere yolu keya ngai yukeweki logo kangka inuguyeng pangkaraga koyimowei Anotoyegi waberek miziweki.  
\v 8 Keya nakko nakyegi keli panu pura kozang panu warara koyi purik ini nakko nakyegi keli puwekke kaile kolokngagono mizi piyeng keli purago tumuli.  
\v 9 Keya wilik kagowinda kiling koyimowei nazuwagawili i inuguyengke koli keleyi.  
\v 10 Anotogo wazono puguraga teni mamokyegi nak kangka nak keleya, legi nak nakyegi Anotogo kangka manibokko nazuwagawiliyegi sawelagibokko.  
\v 11 Tamizeige iniyaga nak Anotogi ngagora kozak kaibek mabura ngago pugu kozak kai pura Anoto ngezebekki Kapiya Walektikkaraweki. Keya tamizeige iniyaga nak nawiliyegi yaweyengki saweli mabura kozang Anotogo piyegi manabok kiling yawe miziweki logo watabi mabiyengki Yisu Kilisigi yeiktaga Anotogi yeikta yongolok mei keya Kilisiyegi ngaiwaktik keya kozanda wok mabiyeng wizagomagi. Wameik panu.   
\b  
\p
\v 12 Ini kiling Yisuyegi ngizi kumuli nogo keli puwili iniyegi yang keleyi nganganda kiling puragi pura wikta miza logo lebukka ngane mizi nagani.  
\v 13 Segeya ini Kilisigu ngangang wagela mabilik wageli purikki wilik mizi logo ngaiwak pugurik walimizi puwekke ini wilik kagowingmokko kolaweki.  
\v 14 Tamizeige ini Kilisiyegi kiriwei mizirikki wiyeke ngago kaile yei mabura purikku walimizi purik Anotogi Kung Walek ngaiwaktikku kolabek ini kiling wizeiweki wiriya wizinda, legi pilik purikki wilik kagowing mizi.  
\v 15 Keya iniyaga nak yombanu ula ma ngoweiya ma kaile kaile miza ma watabi nawiligiyengki wazewaze miza logo pilik piyengki wiyeke kuneng ma ngangang mizi kisiyagalege nogo kerewiya nagani.  
\v 16 Kapura ini Kilisiyegi ngizi kumulirikki wiyeke kuneng ma ngangang wageli purik kendek mizagi onorikku kapura ini yeik pugura kilingwili mizara koyimowei ngangang wageli purikki Anotoyegi wazono mei.   
\p
\v 17 Teng ngagozakta mizagira weik lewagela logo Anotogi yango keya marekngangwili were ngagozak keleyagi logo tamizeige teni yeikta ngizi kumuliwili meiya puwili ngagozak keleyagi mabura Anotogi ngago wazono Yisuyegi langairagirau nangezi kumula ono yeik panu puwili ngagozak yemane panu keleyagi purik teni iwaka.  
\v 18 Kapiya Walektikku pelik kai,  
\q1 Tamizeige yombanu Anotogo keliragi kiriwei panu mizi nak ngangang keya kuneng piyengke kozang wiziyarikka paka ngalege kangki mabura Anoto kiling onobok keya kailebok paka ngalege talik kangki, kai. \rq Ngago yogong 11:31\rq*   
\p
\v 19 Tegi ini Anotogo kelirarikki wiyeke kuneng ma ngangang wageli puwili kazing pangkaragi pumok mawiyarekka mizi keya ini makngeze kemenak Anoto ini keremizabekki melezikke mani purik pugurau ini kawiye walibene keleyagi ono.   
\c 5  
\p
\v 1 Ne weik inigi tepekke yombu Yisuyegi ngizi panu kumuliwiligi ngai puwiliyegi ne ngago nara kozak yeiweki. Nerau ngizi kumuliwiligi ngai nakko. Wire ne makngezegeyaugu Kilisi yengeleileige ibeng sageya wizilege keriya. Logo Kilisi yo puwekke nerau ngaiwak pigi purikki yungke wiziyagi, logo ne ini Yisuyegi ngizi kumuliwiligi ngai puwiliyegi pelik nguk kozang yei,  
\v 2 Anotogi yongkambanu Yisuyegi ngizi panu kumuli liyeng memengwili kelik inugu ngai yolu puwili ngeragi yaniweki. Liyeng memeng nuguwiliyegi kelirikki wiyeke puwiliyegi ngai wiziyagi mabilik Anotogi keliragi kiriwei yongkambanu puwiliyegirau ngai koyi. King weiyagirikki wiyeke yawe mizi yagenda mizi nagani kapura yenge wilekpekka ngizi Anotoyegi yawe mizagi keli legi mizi.  
\v 3 Nugu ngaiweki wazaya pilik puwili ulumowei keleyi kang keya mizi nagani kapura segeya kazing pangka inugu yolumokko puwili kiriwei miziweki kung wezarik waligeleyibene mizi.  
\v 4 Logo Kilisi ini liyeng memengwiliyegi ngai puwiligi ngai yemane panubek lewa purik wokpokko ini peraisi ngaiwaktikku kolarik weiyagi keya ngaiwak purik yeik sagi onorik.   
\b  
\p
\v 5 Keya mabilik ini yombu nawekkewili yombu Yisuyegi ngizi kumuliwiligi ngaiwiligu kisi piyengki kerewiyizo. Ini makngeze kulengkewili mizara koyimowei nakko nakyegi yawe mizi purik Kapiya Walektikku pelik kai,  
\q1 Anoto lewegewili mizi puwiliyegi kezanga yani kapura pigi wazono tonugu weiyagi langai ono pura kulengkewili mizi puwiliyegi yani mizibek, kai. \rq Ngago yogong 3:34\rq*   
\m
\v 6 Tegi Anotogi mele kozang panuzikke yengezege tung ngabelakka panurik weiyagi purikki wilik mizi logo teng pugu sawiya puraga pugu ni yongolok meiyagine.  
\v 7 Pi iniyegi wilek ngong mizibek legi kuneng inigi piyeng mabiyeng piyegi mani.   
\p
\v 8 Wirere koyimowei ngai yuke koyi. Ini Yisuyegi ngizi kumuli kopong iniyegi kumbak mizi yogo Sadang meibok namele keya nak niweki keri wizing yagasimok kelik sengekta wei kaiyageya puloge.  
\v 9 Pi ngai mizi purik mabura luwe kozang koyi logo Yemizibekyegi wilekpek ngalege wiyi keya yombanu ngabelakpekke Yisuyegi ngizi kumuli puwili mabilik ngangang mizi yagenda mena kozang sara koyi.  
\v 10 Kapura ini tek nangezi kuneng ma ngangang wagelarikka purik Anoto ngezebokko ini luwe wazayi penangai keya inugu ngizi kumuli puraga ngai kalagalo keleyi penangai keya kozang sara koyibene keleyi penangai. Anoto wazonoragi mangobek ini Kilisi kiling sawelarikka ngaiwak pigi ibengki ono purikka weiweki ngago yeiyabokko iniyegi pilik mizagi.  
\v 11 Piyegi kozang yemane panu watabi mabiyengki ngaiwekira wok mabiyeng wizagomagi. Wameik panu.   
\b  
\p
\v 12 Ne kapiya ngerewalek perik Silasiyegi orowei wezameli puloge. Pi nogo Kilisiyegi ne kiling ngizi kumulibek mizibek keya pangkayeng mizi wilibekpek. Ini kozang sibene nogo Anotogi wazono pugu yani puragi langai kozak yei keya nogo kozak yei pura wameik panurago. Mena wazono puguragi yungke koyi.   
\p
\v 13 Kongkirigesen yereng Pabilong mei puraga ini kiling kemenak iza puwiligu wangane puwiligira iniyegi wezameli keya Mak negi marekpokkorau mabilik mizi.  
\v 14 Ini ngizi kumuli puwili nakko nakyegi kelira wilik kagowinda kiling melegulang mizi puraga walimizizo.  
\p Ini Kilisi kiling sawela puwiliyegi Anotogo ngezege sara yani pani.  
\p Mabura.  
\p Ne Pita kapiya perik lende mizabek.