\id 1JN - Bimin NT -Papua New Guinea 2008 (web 2014) 
\h 1 Sion 
\toc1 Fut kale Sion em Emisik Bose Fut kale. 
\toc2 1 Sion 
\toc3 1Si 
\mt2 Fut kale  
\mt1 Sion em Emisik  
\mt2 Bose Fut kale.  
\c 1  
\p
\v 1-2 Talfut kese ding dim bakate, Finik so Weng be fitewei, nu elo kiliko, kiin so atemeko, teing so aluweko, kame yulo bakayemkabuluw te. Feinka! Nu Finik so Weng be kiinwalasomi, kal keko, yulo fein bokoyemkabuluw te. Sunsun finik so Weng be sua kel akate Alew em mit mewso bomi, num dim fitewei, nu elo atemeko, em sang be yulo kilele bokoyemkabuluw te.\x * \xo 1:1-2 \xt Sion 1:1,14\x*  
\v 3 Nu em dim elo kanelewse be atemeko, kiliko, yulo bokoyemuwi, yu kiliko, dolon keko, fein ibolow keliw kasike, nuso, yuso, alik alik nu makuw ibolow ki makmak keko, kebuluw te. Kebomeluwi, Aatim so, akalem min Yesus Kulais eso, yelim bikati alik alik nuso makuw ibolow ki makmak keko, biliw te.   
\p
\v 4 Nakunum kumel kunum waneng yutaka! Num kakat atin kuw fian kelomin beem dulum elote nu fut kale boluw te.\x * \xo 1:4 \xt Sion 16:24\x*   
\s1 Sunbin-Got eso Fewtokoko, Bin em Weng te.  
\p
\v 5 Beli, Yesus em nulo duyemei, nu kiliko, yulo bokoyemkabuluw weng e kanekote: Sunbin-Got akalem ete ailbin kuw keko, kutiliw eisneng gel so banim te.\x * \xo 1:5 \xt 1 Timoti 6:16; Sekow 1:17\x*  
\v 6 Banim kasike, nimin kawtiw ite mak mililiw em dim kakabiliw kate, “Nu eso ibolow ki makmak kebuluw kai!”, angbiw tewe, kanekabiliw kawtiw bi dasuw weng bakabomi, fein gelewemin kukuw be im dim ka kel binba kebe te.\x * \xo 1:6 \xt 1 Sion 2:4\x*  
\v 7 Kate, nu akalem emdiw ailbin dim kuw kakamuw tewe, alik alik nu ibolow ki makmak kebuluwi, Sunbin-Got em num dulum elote kuanse min Yesus em buselse kaim be num ibolow sili sili nam alik alik be atin kuw ging koyemkabe te.   
\p
\v 8 Yu kilele ibolow fukunemoliwka! “Nu ibolow sili sili nam kelinba kekabuluw kai!”, angbiliw kawtiw i ikalem ilo dasuw keyembomi, fein kukuw be im mutuk ka kel binba kekabe te.\x * \xo 1:8 \xt Sim Fut 32:5; Ken Abin 28:13\x*  
\v 9 Kate, nu nukalem ibolow sili sili nam be kaim fitew dim da koluw tewe, Sunbin-Got e kiol kuw fein ibolow em sen mongom kayak kebe kasike, e nukalem ibolow sili sili nam be sak misim kuw kulu koyemeko, num sen alik aik be ging koyemkabe te.  
\v 10 Feinka! “Nu ibolow sili sili nam kelinba kekabuluw kai!”, angbuw tewe, nu Sunbin-Got elo dasuw bokokabe Sunbin-Got atew kelewuwi, em fein weng be num mutuk ka kel binba kekabe te.   
\c 2  
\nb
\v 1 Yesus em ibolow mutuk fian duyemkabi muluwel yutaka! “Yu kanelom ibolow sili sili nam mak kemokoliw te!”, angakabi beem mongom ete ne fut kale boko, yulo dabalayemi te. Kate, nimin kunum waneng ite mak ibolow sili sili nam mak keliw tewe, i kanelom finganemokoliw te! Nimtew angom? Num dakayemin kunum mak Aatim eso be kasike. Kunum be kiol kuw sen so banim kunum Yesus Kulais ete te.\x * \xo 2:1 \xt Kibulu 9:24\x*  
\v 2 E kawin dim kaleelo teleko, nukalem abin akal, kawin dim kaleem kasel alik alik im abin akal, alik alik angom num abin kuluko, num sili sili nam kulu koyemin em deiw wankeyemomin beem dulum elote kuanse te.\x * \xo 2:2 \xt Sion 1:29; Kolosi 1:20; 1 Sion 4:10\x*   
\p
\v 3 Kuanse kasike kame, nu Sunbin-Got em kukuyemin weng be gelewemuw tewe, nu kal keluwete: Nu Sunbin-Got em ibolow fukunin bakati kal kesomi, gelewkabuluw te.  
\v 4 Kate, mali “Nu Sunbin-Got elo kal kebuluw te!”, angakabiliw kawtiw mak Sunbin-Got em sawa weng be gelewinba kebiw tewe, i dasuw funum weng bakabiliw kawtiw keliwi, fein kelebin kukuw e biim dim binba kekabe te.  
\v 5 Kate, Sunbin-Got elo ibolow mutuk fian kelewbin kukuw e akalem weng kiliko, fein gelewkabiliw kunum waneng im dim e kilele atin kuw aluwyemkabe te. Beem dulum elote alik alik nu kal keluwete: Nu fein Sunbin-Got eso fewtokoko, buluw te.\x * \xo 2:5 \xt Sion 14:21,23\x*  
\v 6 Feinka! Nimin kunum waneng ite mak bokolomeliw: “Nu Sunbin-Got eso fewtokoko, buluw kai!”, angiw tewe, i Yesus akalem gelewemale kukuw beemdiw kakamoliwka!   
\s1 Sawa Weng Kikis em Weng te.  
\p
\v 7 Ibolow fian keyemkabi nakunum kumel kunum waneng yutaka! Kukuyemin sawa weng kikis mak fut tem boko, yulo bokoyeminba keli te. Kate, suaem mikmik ding dim bakate, yu kukuyemin sawa weng be kulusiliw te. Feinka! Yom kulusiliw weng bakate akalem suaem “Kanelina!”, yangse weng ete te.\x * \xo 2:7 \xt Sion 13:34-35; 2 Sion 5-6\x*  
\v 8 Kate nem yulo fut tem boyemi sawa weng bakati kikis kebe te. Nimtew angom? Kameem ding dim bakate, em “Kanelina!”, angeko, kukuyemkabe sawa weng be dem so keko, akalem mutuk tem so, yukalem mutuk tem so, ka kel fein kaim dim fitewse kasike. Beem dulum elote nu kilele kal keluwete: Mililiw be banimomin kis kelei, fein ailbin ailomin kelei, nu kal keluw te.\x * \xo 2:8 \xt Sion 1:9; Ulom 13:12\x*  
\v 9 Feinka! “Nu Sunbin-Got em ailbin dim kuw kakabuluw kai!”, angbiliw kunum waneng mali mak Yesus em mali angin ilo ibolow kaim alel yangeko, yetebiw tewe, kanekabiliw kawtiw i kutiliw em kukuw dim akate aluweko, ka kel kakabiliw bakate.\x * \xo 2:9 \xt 1 Sion 4:20\x*  
\v 10 Kate, Yesus em angin ilo ibolow mutuk fian duyemkabiliw kunum waneng mali mak i fein ailbin dim ka kel kakabiliw kunum waneng kebiliw kasike, mesesem wa eisneng mak im dim teleko, ilo nam mit da koyem keme te.\x * \xo 2:10 \xt Ulom 14:13\x*  
\v 11 Kate, Yesus em angin ilo ibolow kaim alel yangeko, yetebiliw kawtiw i mililiw dim ka kel kakabomi, mililiw em kukuw be aluwkabiliw kawtiw kebiliw te. Ikalem ibolow sili sili nam be im kiin kasiyemkabe kasike, i ikalem unomin deiw be kilele ateminba kekabiliw te.\x * \xo 2:11 \xt Sion 12:35\x*   
\li1
\v 12 Yesus em muluwel ibolow mutuk fian keyemkabi nakunum kumel kunum waneng yutaka! Sunbin-Got e yukalem ibolow sili sili nam be Yesus em wiin dim kel sak misim kuw kulu koyemse kasike, ne fut kale boko, yulo dabalayemi te.   
\li1
\v 13 Aatim kumel yutaka! Yu sua sua kel alenale kunum beelo kal keko, dolon kelewbiliw kasike, ne fut kale boko, yulo dabalayemi te.  
\li1 Aul seiwel tanbelel yutaka! Yom kitil e Seten-Ataanim elo mit da kolewsiliw kasike, ne fut kale boko, yulo dabalayemi te.   
\li1
\v 14 Yesus em muluwel ibolow mutuk fian keyemkabi nakunum kumel kunum waneng yutaka! Yu Aatim Sunbin-Got elo atin kuw kal keko, dolon kesiliw kasike, ne fut kale boko, yulo dabalayemi te.  
\li1 Aatim kumel yutaka! Yu sua sua kel alenale kunum beelo kal keko, dolon kelewbiliw kasike, ne fut kale boko, yulo dabalayemi te.  
\li1 Aul seiwel tanbelel yutaka! Yu kitil kuw keliwi, Sunbin-Got em weng e yom mutuk ka kel belei, yom kitil be Seten-Ataanim elo mit da kolewsiliw kasike, ne fut kale boko, yulo dabalayemi te.   
\p
\v 15 Yu kanelom kawin dim kaleem kukuw so, kawin dim kaleem mesesem mesesem eisneng so, alik alik be ibolow mutuk kelewbokoliw te! Feinka! Kanekabiliw kawtiw i Aatim Sunbin-Got elo kilele ibolow mutuk fian kelewinba kekabiliw kasike.\x * \xo 2:15 \xt Ulom 8:7\x*  
\v 16 Kawin dim kaleem kukuw e alik alik nu kilele kal keluwete:  
\li1 Mak e, kal anggil em “Kanela! Kanela!”, angakabe weng be gelewemin em kukuw e,  
\li1 mak e, ibolow tem em kiin yakut kemin em kukuw e,  
\li1 mak e, nukalem on kisol beem dulum elote nukalem wiin daobin em kukuw ete te.  
\m Kaneko kukuw be Aatim Sunbin-Got em dim elote telinba kekabe te.\x * \xo 2:16 \xt Ulom 13:14\x*  
\v 17 Kate, kawin dim kale so, kawin dim kale em “Kanelina! Kanelina!”, angakabe weng beso, alik alik be atin kuw banimoke kate, Sunbin-Got em weng kiliko, gelewkabiliw kunum waneng i nam banimeko, sunsun kuw bokoliw te.\x * \xo 2:17 \xt Matyu 7:21\x*   
\p
\v 18 Yesus em muluwel ibolow mutuk fian keyemkabi nakunum kumel kunum waneng yutaka! Num kame em buluw ding dim bakate, Yesus em mewso iti tolomin ding kese kasike, nu fefe ding dim em kunum waneng keko, buluw te. Sua kel akate, yu weng mak kililiwete: “Kulais em Maka Kunum Kitil so Kunum mak toloke te!”, yangiwi, yu kilisiliw te. Fein! Kame akate, Kulais em maka kunum banso mak kawin dim kale bayemel kakabiliw kasike, nu kilele kal keluwete: “Fein! Num buluw ding dim kalakati, fefe ding dim kele kai!”, angeko, kal kebuluw te.\x * \xo 2:18 \xt Matyu 24:5,24; 2 Sion 7\x*  
\v 19 Sua kel akate, maka kelewkabiliw kawtiw bi nuso makuw bisiliw kate, i nulo koyemsiliw kasike, i sua kel akati nuso kilele ibolow ki makmak kelinba kebisiliw te. I fein num angin kebisiliw tewe, i nukalem so makuw biliw tew te. Kate, i nulo ibiku koyemsiliw kasike, alik alik nu kilele kal keluwete: “I num angin bate!”, angeko, kal keluw te.\x * \xo 2:19 \xt Kalan Kunum 20:30\x*  
\v 20 Yu Yesus em Sunbin-Finik kulusiliw kunum waneng kebiliw kasike, alik alik yu fein kukuyemin weng elo kal kebiliw kawtiw kebiliw te.\x * \xo 2:20 \xt 1 Kolin 2:15\x*  
\v 21 Fein! Yulo kal duyemomin beem dulum elote ne fut kale boko, yulo dabalalinba keli te. Nimtew angom? Yu ibolow kau kunum waneng ba kasike. Yu fein weng so, dasuw weng so, kilele diweko, fein weng beelo atemeko, kal kebiliw te. Keko, yu kilele kal keliwete: Fein weng so, dasuw weng so, alew weng bi bonggulinba kekabiliw te.  
\v 22 Dasuw weng bakabiliw kawtiw bi kante ye? Nimin kawtiw ite mak bokolomeliw: “Yesus e Mesaya bate!”, angeko, “Alew so, Min so, yelim im weng be fein bate!”, angeko, beemdiw angakabiliw kawtiw bite kuw Kulais em Maka Kawtiw keleweko, biliw bakate.\x * \xo 2:22 \xt 1 Sion 4:3; 2 Sion 7\x*  
\v 23 Feinka! Min elo ibiku kolewkabiliw kawtiw i Alew elo akal ibiku kolewkabiliw te. Beemdiw, “Yesus e Sunbin-Got em Min ete te!”, angakabiliw kunum waneng i em Alew eso akal fewtokoko, biliw te.\x * \xo 2:23 \xt Sion 5:23; 1 Sion 4:15; 5:1\x*  
\v 24 Emisik ding elote kilisiliw weng beelo diwkuw diwkuw kilele aluweko, gelewemoliwka! Aluweko, gelewemiw tewe, Min Yesus so, Alew so, yelim i yuso makuw kilele fewtokoko, bokoliw te.  
\v 25 Kaneko kasike, Yesus e “Kaneloki te!”, angse weng mak nulo bokoyemomele: “Yu fein sunsun finik so bin kulokoliw te!”, yangse te.   
\p
\v 26 Yulo dasuw funum weng bokoyemomin teliw kunum im dulum elote ne temtem weng kale fut tem boko, yulo dabalayemi te.  
\v 27 Yu Sunbin-Finik elo kuliwi, e yom ibolow tem ka kel alakabe kasike, yu fein kukuyemin weng beelo dolon kebiliw kunum waneng kebiliw te. Kebiliw kasike, mali kawtiw mak teleko, ki keko, yulo kukuyemin weng makso nam kaleyemiw te. Kate, Sunbin-Finik e yulo mesesem mesesem eisneng alik alik angom beem dulum elote kilele kukuyemkabe te. Kate, em kukuyemkabe weng be dasuw weng bate! Itel fein weng atite kasike, yu em kukuyemin be kilele aluweko, gelewemoliwka! Aluweko, gelewemiw tewe, yu Yesus eso fein fewtokoko, biliw bakate.\x * \xo 2:27 \xt Sion 16:13\x*   
\s1 Kiol Kuw Kukuw em Weng te.  
\p
\v 28 Wee! Yesus em muluwel ibolow mutuk fian keyemkabi nakunum kumel kunum waneng yutaka! Yu Kulais eso fewtokoko, kakamoliwka! Kaneliw tewe, Yesus em iti toloke ding dim kabalak e, alik alik nu kalaing kuw keko, em awan nam finganeko, inkal kuluw te.  
\v 29 Yu kal keliwete: Sunbin-Got e kiol kuw kukuw em sen mongom kayak kasike, kiol kuw kukuw kekabiliw kunum waneng i akalem fein muluwel kebiliw kasike.\x * \xo 2:29 \xt 1 Sion 3:10\x*   
\c 3  
\nb
\v 1 Yutaka! Aatim e nulo ibolow mutuk fian kuw kukuyemeko, “Nem muluwel yutaka!”, yangse kasike kame, nu Sunbin-Got akalem fein muluwel kebuluw te. Yu kilele ibolow fukunemoliwka! Kawin dim kaleem kasel i nukalem Aatim Sunbin-Got elo fein kal kelinba kebiliw kasike, i nulo akal fein kal kelinba kebiliw te.\x * \xo 3:1 \xt Sion 1:12-13; 16:3\x*  
\v 2 Ibolow fian keyemkabi nakunum kumel kunum waneng yutaka! Nu kame Sunbin-Got em muluwel kebuluw kate, sowem Yesus em toloke ding dim kabalak e, “Nu nomin kal mak kulokoluw yake?”, angeko, akokow so kebuluw te. Kate, Yesus em toloke ding dim kabalak e, nu akalem kal atew keko, Yesus elo fein kiin so atemeko, kilele dolon kelewokoluw te.\x * \xo 3:2 \xt 2 Kolin 3:18\x*  
\v 3 Kasike kame, Yesus em ding fenbuluw kunum waneng alik alik nu akalem emdiw ibolow sili sili nam kukuw kolewsomi, sen so banim kiol kuw kukuw aluwbamoluwka!   
\p
\v 4 Ibolow sili sili nam kekabiliw kawtiw i Sunbin-Got em kukuyemin sawa weng elo sakalawkeko, bo kelewkabiliw, kate, yu kilele kililoliwka! Ibolow sili sili nam kekabiliw kukuw so, Sunbin-Got em kukuyemin weng sakalaw keko, weng bo bo kelewkabiliw kukuw so, kukuw alew bi ki makmak bakate.  
\v 5 Kate, yu kal keliwete: Kulais e num sili sili nam banimomin em mongom ete kawin dim kale kel fitewse kate, akalem dim ete sili sili nam kukuw gel mak atin kuw banim kese te.\x * \xo 3:5 \xt Sion 1:29; 1 Fita 2:22-24; 1 Sion 2:2\x*  
\v 6 Kaneko kasike, Yesus eso fewtoko, biliw kunum waneng i sili sili nam kukuw gelewinba kekabiliw kate, Yesus elo ibolow kal keko, dolon kelewinba kebiliw kawtiw i sili sili nam kukuw kuw gelewkabiliw te.   
\p
\v 7 Yesus em muluwel ibolow fian keyemkabi nakunum kumel kunum waneng yutaka! Yu kanelom mali kawtiw im funum weng geleweko, ibolow teifululokoliw te! Yu kililina! Kiol kuw kukuw gelewkabiliw kunum waneng ite kuw Yesus emdiw akati kiol kuw sen so banim kunum waneng kebiliw te.  
\v 8 Talfut kese ding elote teleko, kame akate, diwkuw diwkuw Seten-Ataanim e sili sili nam kukuw kuw gelewemale kale. Kaneko kasike, sili sili nam gelewkabiliw kawtiw i Seten-Ataanim em muluwel keko, biliw te. Kate, Sunbin-Got em Min e kawin dim kale kel Seten-Ataanim em aluwbamin banimomin em dulum elote fitewse te.\x * \xo 3:8 \xt Sion 8:44\x*  
\v 9 Feinka! Sunbin-Got e nulo finik so bin em dem duyemse kasike, nu akalem fein muluwel kesomi, sili sili nam kukuw nam kekabiliw te. Yu kilele kililoliwka! Yu Sunbin-Got em muluwel kasike, yu kanelom sili sili nam kukuw aulbokoliw te! Itel bate!\x * \xo 3:9 \xt 1 Sion 5:18\x*   
\p
\v 10 Sunbin-Got em fein muluwel so, Seten-Ataanim em muluwel iso, alik alik i kaim dim kuw fiteweko, nu ilo kaneko beem deiw ete kilele kal keluwete: Kiol kuw sen so banim kukuw kelinba kekabiliw kawtiw so, Sunbin-Got em angin mali ilo ibolow mutuk fian keyeminba kebiliw kawtiw biso, kawtiw alik alik bi Sunbin-Got em muluwel bate.   
\s1 Ibolow Mutuk Fian Kukuw em Weng te.  
\p
\v 11 Emisik ding elote teleko, yu weng kale diwkuw diwkuw kililiwete: “Yu Sunbin-Got em angin mali ilo ibolow mutuk fian keyemboliwka!”, yangiwi, yu kilisiliw te.\x * \xo 3:11 \xt Sion 13:34\x*  
\v 12 Feinka! Nu kanelom Adam em min Ken em kanese emdiw akati kanemokoluw te! Ken e Seten-Ataanim em kunum keko, akalem awkunum kumel beelo ase bakate te. Kate, nimtew angom ete e akalem awkunum kumel beelo ase ye? Akalem kukuw e wa sel kese kate, e akalem awkunum kumel em kiol kuw sen so banim kukuw be atemeko, on kelewsomi, kaisuw keleweko, elo ase kasike.\x * \xo 3:12 \xt Talfut Kese 4:8-12\x*   
\p
\v 13 Nakunum kumel kunum waneng yutaka! Kawin dim kaleem kasel i yulo ibolow kaim alel angeko, yetebiw tewe, yu kanelom im kanekabiliw beem dulum elote yol angbokoliw te!\x * \xo 3:13 \xt Sion 5:18-19\x*   
\p
\v 14 Nu Sunbin-Got em angin ilo ibolow mutuk fian keyemkabuluw kasike, nu atin kuw kal keluwete: Nu kuankemin em deiw kolewsomi, sunsun finik so bin kulomin em deiw ka kel kakabuluwi, kal kebuluw te. Kate, awkunum kusel ilo ibolow mutuk fian keyeminba kebiliw kawtiw i kuankemin deiw ka kel kakabiliw kawtiw kebiliw te.\x * \xo 3:14 \xt Sion 5:24\x*  
\v 15 Ikalem awkunum kusel ilo ibolow kaim alel yangeko, yetebiliw kawtiw i yemin kawtiw imdiw kebiliw te. Kate, alik alik nu kilele kal keluwete: Yemin kawtiw i sunsun finik so bin be nam kuliw te.\x * \xo 3:15 \xt Fitew Dase 21:8\x*   
\p
\v 16 Yesus em ibolow mutuk fian keyembe kukuw nu atemeko, kal keluwete: E akalem ibolow elo fukuninba keko, num abin kuluko, kuanei, nu atemeko, kal keluw te. Kasike kame, nukati em kanese emdiw kesomi, nukalem ibolow elo fukuninba keko, nukalem nakunum kumel im abin kuluko, kuanomin memen keboluwka!\x * \xo 3:16 \xt Sion 13:1; Galesia 1:4\x*  
\v 17 Kate, yu beemdiw kanelinba keko, mali mesesem sukum kebiliw kunum waneng ilo kinkin ibolow so keyemsomi, ilo dokoyeminba kemiw tewe, Sunbin-Got em ibolow mutuk fian e yom ibolow tem ka kel akalinba kebe te.\x * \xo 3:17 \xt Sawa Weng 15:7\x*   
\p
\v 18 Yesus em muluwel kunum waneng yutaka! Nu kanelom mali nakunum kumel ilo sak weng em dim ete kuw “Ibolow mutuk fian keyembuluw kai!”, yangbokoluw te! Kate, ibolow mutuk fian kelew kelew kukuw be fein kuw gelewemoluwka!\x * \xo 3:18 \xt Sekow 2:15-16\x*  
\v 19 Kaneyemuw tewe, nu kilele kal keluwete: “Nu fein Sunbin-Got em angin kebuluw te!”, angeko, em kiin dim e ibolow menew so keko, mobuluw te.  
\v 20 Mobuluw kasike, num ibolow tem beem fukunin em nulo diwyemsomi, geeyemkabe ding dim bakate, nu sakik mak nam kuluw te. Nimtew angom? Sunbin-Got e kal fian keko, num ibolow tem beem geeyemin weng be kasi koyemkabe Sunbin-Got ete kasike.   
\p
\v 21 Ibolow fian keyemkabi nakunum kumel kunum waneng yutaka! Num ibolow tem em nulo geeyemin weng mak bokoyeminba kekabe ding dim bakate, nu kalaing kuw angeko, Sunbin-Got em mit mewso teleko, kitil kuw mokabuluw te.\x * \xo 3:21 \xt Kibulu 4:16\x*  
\v 22 Feinka! Nu em kukuyemin weng beem afak keko, Sunbin-Got em kiin dim e ken kukuw kuw gelewuw tewe, num elo mesesem mak em dulum dakalaluw ding dim kabalak e, e num weng be kiliko, mesesem be nulo fein dukayemkabe te.  
\v 23 Kaneko kasike, nu Sunbin-Got em Min Yesus Kulais eso fewtokoko, bomi, mali nakunum kumel ilo ibolow mutuk fian keyembuw tewe, nu fein Aatim Sunbin-Got so, akalem Min Yesus eso, yelim biim kukuyemin weng beem afak keko, kakabuluw te.\x * \xo 3:23 \xt Sion 6:29; 13:34\x*  
\v 24 Feinka! Sunbin-Got e akalem Sunbin-Finik be nulo duyemse kasike, nu kilele kal keluwete: Sunbin-Got em sawa weng kiliko, gelewbiliw kawtiw i Sunbin-Got eso fewtokoko, biliw te. Bomeliwi, e ikalem ibolow tem ka kel fein alakabe te.\x * \xo 3:24 \xt 1 Sion 4:13\x*   
\c 4  
\nb
\v 1 Ibolow fian keyemkabi nakunum kumel kunum waneng yutaka! Dasuw selew kunum banso i kawin dim kale bayemel kakabiliw kasike, yu kilelbiko, boliwka! “Seten-Ataanim em ibolow fukunin bakabiliw yake? Bani, Sunbin-Finik em weng bakabiliw yake?”, angeko, alik alik im weng kilele diwyemoliwka!\x * \xo 4:1 \xt Matyu 7:15; 1 Tesalonaika 5:21; 1 Sion 2:18; 2 Sion 7\x*  
\v 2 Sunbin-Finik em bakayembe weng e yu kiliko, kaneko beem dulum elote kal keliwete: “Yesus Kulais e kal so kun so kawtiw nukatetew kese te!”, angakabiliw kunum waneng i fein Sunbin-Finik em weng bakabiliw bakate.\x * \xo 4:2 \xt 1 Kolin 12:3\x*  
\v 3 Kate, “Yesus e kawtiw nukatew kelinba kese kai!”, angakabiliw kawtiw im ibolow tem ka kel e Sunbin-Finik e binba kekabe kate, Kulais em Maka Kunum beem ibolow fukunin e kanekabiliw kawtiw biim ibolow tem ka kel alakabe te. Sua kel akate, yu kililiwete: “Kulais em Maka Kunum akal toloke te!”, angenaliw kate, akalem fukunin emisik teleko, kame fein kawin dim kale fitewse te.\x * \xo 4:3 \xt 1 Sion 2:18\x*   
\p
\v 4 Yesus em muluwel ibolow fian keyemkabi nakunum kumel kunum waneng yutaka! Yu Sunbin-Got em angin kasike, Sunbin-Finik em kitil fian e yom mutuk ka kel bomelei, yu yomel kuw keko, kawin kaleem dasuw selew kunum im aneng matil biilo mit da koyemkabiliw te.\x * \xo 4:4 \xt Matyu 12:29; 1 Sion 5:4-5\x*  
\v 5 Dasuw selew kawtiw i kawin dim kaleem kasel kasike, i kawin dim kaleem weng sang bete kuw bakamkabiliw bakate. Kasike, kawin dim kaleem kasel i im yangbiliw weng be kiliko, gelewkabiliw te.\x * \xo 4:5 \xt Sion 8:47; 15:19\x*  
\v 6 Kate, nu Sunbin-Got em muluwel kebuluw kasike, Sunbin-Got elo kal kebiliw kunum waneng i num weng akal kilikabiliw te. Kate, Sunbin-Got em muluwel kelinba kebiliw kawtiw i num weng kililinba kekabiliw te.  
\p Kanekabiliw beem mongom ete nu kilele kal keko, diwyemeko, mali im dulum elote bokolomeluw: “I Sunbin-Finik em fein weng bakayembiliw kai!”, angeko, mali im dulum elote “I aneng matil im dasuw weng kuw bakayembiliw kai!”, angeko, kilele kal kebuluw te.   
\s1 Ibolow Fian Keyemin em Weng te.  
\p
\v 7 Ibolow mutuk fian keyemkabi nakunum kumel kunum waneng yutaka! Sunbin-Got e ibolow mutuk fian kelew kelew kukuw beem mongom kasike, nu mali kawtiw ilo ibolow mutuk fian kelew kelew kukuw gelewemoluwka! Mali ilo ibolow mutuk fian kelew kelew kukuw gelewkabiliw kunum waneng i Sunbin-Got akalem fein muluwel kesomi, elo kilele kal kekabiliw kasike.  
\v 8 Sunbin-Got e ibolow mutuk fian dulew dulew kemin kukuw beem sen mongom kayak kasike, mali ilo ibolow mutuk fian dulew dulew kukuw gelewinba kebiliw kawtiw i Sunbin-Got elo kilele kal kelinba kebiliw te.  
\v 9 Sunbin-Got em akalem ibolow fian dulewkabe Min makmak beelo dabalalei, em kawin dim kaleelo teleko, nulo sunsun finik so bin duyemse ding dim bakate, Sunbin-Got e akalem ibolow mutuk fian be nulo kilele kaleyemse te.\x * \xo 4:9 \xt Sion 3:16\x*  
\v 10 Sunbin-Got em nulo duyemse ibolow mutuk fian be kanekote: Sua kel akate, num elo ibolow mutuk fian dulewinba kebuluw ding dim bakate, Sunbin-Got emisik keko, nulo ibolow mutuk fian kukuw kukuyemsomi, akalem min elo dabalalei, Min be num abin kuluko, kuaneko, num ibolow sili sili nam beem yan wa be wese te.\x * \xo 4:10 \xt Ulom 5:8-10; 1 Sion 2:2\x*   
\p
\v 11 Ibolow fian keyemkabi nakunum kumel kunum waneng yutaka! Nu Sunbin-Got em nulo ibolow mutuk fian duyemse kukuw be atebuluw kasike, nukati beemdiw keko, ibolow mutuk fian dulew dulew kukuw keyemoluwka!  
\v 12 Kawtiw alik alik nu Sunbin-Got elo kiin so ateminba kebuluw kate, nu mali kawtiw ilo ibolow mutuk fian dulew dulew kukuw gelewemuw tewe, Sunbin-Got e fein num mutuk tem ka kel bomelei, akalem ibolow mutuk fian akati kilele ka kel alakabe te.\x * \xo 4:12 \xt Sion 1:18\x*   
\p
\v 13 Sunbin-Got e akalem Sunbin-Finik nulo duyemse kasike, nu kilele kal keluwete: “Sunbin-Got eso nuso makuw fewtokoko, ibolow ki makmak kebuluw kai!”, angeko, kal kebuluw te.\x * \xo 4:13 \xt 2 Kolin 1:22; 1 Sion 3:24\x*  
\v 14 E akalem Min elo dabalalei, e kawin dim kaleem kasel num kuankemin deiw be bul gewsi belei, okileweko, nulo Sunbin-Got em sunsun finik so bin kulomin deiw ka kel mo koyemse te. Feinka! Nu em kanese be kiinwalasomi, yulo kilele bokoyemkabuluw te.  
\v 15 Yu kilele kililina! “Feinka! Yesus e Sunbin-Got em Min ete te!”, angakabiliw kunum waneng bi eso iso fewtokoko, biliwi, e im ibolow mutuk ka kel alakabe te.  
\v 16 Keko beli, nu Sunbin-Got em nulo kukuyemse ibolow mutuk fian be kal keko, atemeko, kitil kuw aulkabuluw bakate.  
\p Sunbin-Got e ibolow mutuk fian dulew dulew kukuw beem sen mongom kayak kasike, ibolow mutuk fian keyemin kukuw kelewkabiliw kunum waneng i Sunbin-Got eso iso fewtokoko, biliwi, e im ibolow mutuk ka kel alakabe te.  
\v 17 Nu beemdiw kaneluw tewe, ibolow mutuk fian kukuw be nukalem mutuk tem ka kel fasuko, atin kuw kiol kuw kelei, num gelewkabuluw kukuw be Yesus em gelewse kukuw beemdiw kebe kasike, em kawtiw alik alik ilo diwyemeko, geeyemoke ding dim kabalak e, nu kalaing keko, em kiin dim kel kitil kuw molokoluw te.  
\v 18 Fein te! Ibolow mutuk fian kelew kelew kukuw be num ibolow mutuk tem ka kel be tewe, finganin mongom mak banim te. Nimtew angom? Num ibolow tem be gekeko, wenbe ibolow mutuk fian be finganin be takala kolewkabe kasike. Feinka! Nu Yesus em geeyemoke ding dim em awan finganuw tewe, ibolow mutuk fian kelew kelew kukuw be nukalem ibolow tem be atin kuw gek koyeminba kekabe te.  
\v 19 Sunbin-Got emisik keko, nulo ibolow mutuk fian duyemse kasike kame, nukati ki keko, mali kawtiw ilo ibolow mutuk fian duyemkabuluw te.  
\v 20 Nimin kawtiw ite mak bokolomeliw: “Nu Sunbin-Got elo ibolow mutuk fian dulewkabuluw kai!”, angakabiliw kate, Yesus em mali angin ilo ibolow kaim alel yetemkabiliw tewe, kanekabiliw kawtiw bi dasuw weng kuw bokokabiliw kawtiw ite te! Nimtew angom? Nu kiin so yetemkabuluw kunum waneng mak ilo ibolow mutuk fian duyeminba kebuw tewe, nu ki keko, kiin so ateminba Sunbin-Got elo akati ibolow mutuk fian dulewinba kekabuluw kasike.  
\v 21 Kate, Yesus em nulo duyemse kukuyemin weng e kanekote: “Sunbin-Got elo ibolow mutuk fian dulewkabiliw kunum waneng i Yesus em angin keko, ikalem awkunum kumel kunum waneng ikati ibolow mutuk fian dukayemboliwka!”, yangse te.\x * \xo 4:21 \xt Mak 12:29-31\x*   
\c 5  
\nb
\v 1 “Yesus e nukalem Mesaya ete te!”, angakabiliw kunum waneng i fein Sunbin-Got em muluwel kebiliw te. Kebomi, ikalem Alew elo ibolow mutuk fian dulewsomi, akalem muluwel alik alik ilo ikati ibolow mutuk fian keyemkabiliw te.\x * \xo 5:1 \xt 1 Sion 4:15\x*  
\v 2 Nu Sunbin-Got elo ibolow mutuk fian keleweko, em kukuyemin weng beem afak kakamuw tewe, nu num kanekabuluw beem mongom ete kilele kal keluwete: Nu Sunbin-Got em angin ikati fein ibolow mutuk fian keyemkabuluw te.  
\v 3 Sunbin-Got elo ibolow mutuk fian kelewbuluw kukuw be kanekote: Nu akalem kukuyemin weng beem afak kel bin em kukuw kilele gelewkabuluw te. Kate, yu kililoliwka! Akalem kukuyemin weng be ilum bate.\x * \xo 5:3 \xt Sion 14:15,23-24\x*  
\v 4 Nimtew angom? Sunbin-Got em muluwel i kitil keko, kawin dim kaleem eisneng alik alik angom be bolbol keleweko, de mit da kolewkabiliw kasike.  
\s1 Fein Ibolow e Kawin Dim Kale be Da Koyemkabe em Weng te.  
\p Yu kilele kililoliwka! Num Sunbin-Got elo “Fein!”, dangbuluw beem deiw ete numel kuw keko, kawin dim kaleem kitil eisneng alik alik angom be de mit da kolewkabuluw te.  
\v 5 Feinka! “Yesus e Sunbin-Got em fein Min ete te!”, angakabiliw kunum waneng bi imel kuw kitil keko, kawin dim kaleem kitil eisneng angom beelo de mit da kolewkabiliw te.   
\p
\v 6 Yesus Kulais akalem ete ok em deiw ete kuw telinba kese kate, e ok so, kaim so, alew biim deiw ete talse te. Keko beli, fein weng em sen mongom kayak Sunbin-Finik e em dulum elote bokolomele: “Feinka! Kunum Yesus be Sunbin-Got em Min ete te!”, angse\f + \fr 5:6 \ft 5:6 Gilik im weng sin em weng mongom kale, nu kilele kal keko, dolon kelinba kebuluw te. Kal kunum i beem mongom ete bokolomeliw: Sunbin-Got em Min Yesus Kulais e kawin dim kunum waneng nukatetew kese kale. Nimtew angom? Sunbin-Finik e fein weng em sen mongom kayak kasike, Sion em Yesus elo ok da kolewse ding dim bakate, Sunbin-Finik e bokolomele: “Fein be Sunbin-Got em Min ete te!”, angse kasike (Matyu 3:13-17). Angei, akalem ais dim kuaneko, kaim buselse ding dim bakate, nukati kilele atemuwte: “Fein! E kawtiw nukate tew keko, fein kuanse kai!”, angakabuluw te.\f* kasike,\x * \xo 5:6 \xt Sion 1:29-34\x*  
\v 7-8 Sunbin-Finik so, em ok da kolewse beso, em kaim buselse beso, alemsal eisneng be weng ki makmak kuw bokolomeliw: “Feinka! Kunum Yesus be Sunbin-Got em Min ete te!”, angakabiliw te.\x * \xo 5:7-8 \xt Sion 15:26\x*  
\v 9 Angakabiliw weng be Sunbin-Got elote teleko, akalem Min em dulum elote angse kasike, em weng be kiinwalako, atemsuluw kal so kun so kunum waneng alik alik num weng be bakiyemkabe te.\x * \xo 5:9 \xt Sion 5:32-37\x*  
\v 10 Kaneko kasike, Sunbin-Got em weng kale kiliko, em Min elo “Fein!”, dangbiliw kunum waneng i akalem angse weng be ikalem ibolow tem ka kel kitil kuw aluwkabiliw te. Kate, Sunbin-Got em Min elo “Fein!”, danginba kebiliw kawtiw i Sunbin-Got elo dasuw bakabe kunum atew kelewkabiliw te.\x * \xo 5:10 \xt Galesia 4:6\x*  
\v 11 Sunbin-Got em angse weng be kanekote: E akalem sunsun finik so sen mongom kayak Min em kanese beem mongom ete nulo sunsun finik so bin duyemse te.  
\v 12 Duyemse kasike, Min eso fewtokobiliw kunum waneng alik alik i fein sunsun finik so bin kulukabiliw te. Kate, Sunbin-Got em Min eso fewtokoko, kelinba kebiliw kawtiw i sunsun finik so bin nam kuliw te.\x * \xo 5:12 \xt Sion 3:36\x*   
\p
\v 13 Ne fut kale boko, Sunbin-Got em Min Yesus Kulais eso fewtokokabiliw kunum waneng yulo dabalayemi kasike, yu fein kal keliwete: “Nu sunsun finik so bin kuluko, buluw kai”, angeko, kal kebiliw te.\x * \xo 5:13 \xt Sion 20:31\x*  
\v 14-15 Nu Sunbin-Got akalem ibolow fukunin gelewbomi, elo mesesem mesesem eisneng mak em dulum elote dakalaluw tewe, e num dakalaluw weng be kilikabe kasike, nu kalaing keko, Sunbin-Got em mit mewso teleko, kitil kuw mokabuluw te. Kanekabuluw kasike, nukati fein kal keluwete: E num dakalaluw eisneng be nulo fein duyemkabe te.\x * \xo 5:14-15 \xt Sion 14:13; 1 Sion 3:21-22\x*   
\p
\v 16 Yu mali kawkunum kumel yetemeko, “Yakai! I sili sili kukuw mak kebiliw kai!”, angeko, yetemiw tewe, yu Sunbin-Got elo dakalaliwi, e kawkunum kumel biilo dokoyemei, i finik so bokoliw te. Kate, yu kilele kililina! Kawkunum kumel biilo yenei, i kuaninba kebiliw sili sili nam kukuw beem dulum elote kuw ne weng be bokoyemsi te. Nimtew angom? Sili sili kukuw mak beem yan e kawkunum kumel ilo fein yenei, i kuanokoliw beem dulum elote ne weng be yanginba kebi kasike.\x * \xo 5:16 \xt Matyu 12:31\x*  
\v 17 Feinka! Alik alik Sunbin-Got em kukuyemin weng gelewinba kukuw e sili sili nam kukuw kebe kate, mali sili sili nam kukuw mak kawtiw ilo yenei, i atin kuw kuaninba kekabiliw te.   
\p
\v 18 Nu alik alik kal keluwete: Sunbin-Got em muluwel i ibolow sili sili nam kukuw gelewinba kekabiliw kate, Sunbin-Got em fein Min be Alew em muluwel alik alik biilo kilele yetebe kasike, Seten-Ataanim e ki keko, ilo nam teing dale te.\x * \xo 5:18 \xt 1 Sion 3:9\x*   
\p
\v 19 Feinka! “Alik alik nu Sunbin-Got em muluwel kebuluw kai!”, angeko, kal kebuluw kate, kawin dim kaleem angom alik alik be Seten-Ataanim em afak kebe te.  
\v 20 Kate, alik alik nu kilele kal keluwete: Sunbin-Got em Min be teleko, nulo ibolow fukunin ken mak duyemse kasike kame, nu fein Sunbin-Got beelo kal kebuluw te. Kal kesomi, akalem Min Yesus Kulais eso fewtokobuluw beem mongom ete nu em Alew eso akati fewtokoko, buluw te. Yesus Kulais be fein Sunbin-Got kesomi, sunsun finik so bin em sen mongom kayak ete te.   
\p
\v 21 Yesus em muluwel ibolow mutuk fian keyemkabi nakunum kumel kunum waneng yutaka! Sunbin-Got em abin kulomin ibolow kebe mesesem mesesem eisneng mak em dulum elote yu singam kel keko, keboliwka!\f + \fr 5:21 \ft 5:21 Gilik weng sin e kale kel kawtiw im dasuw-got kekabiliw em dulum elote bakabe te. Kawtiw i tum o, ais o, mesesem mesesem beemdiw kuluko, dasuw-got mak em kiskiw kaiko, bokolomeliw: “Be nukalem got ete te!”, angbiliw te.\f*  
\p Bete kuw. Nem fut weng boyemi fut kame kilaka.