\id GAL - Bhilali Standard Project
\ide UTF-8
\h गलाती
\toc3 गलाती
\toc2 गलाती
\toc1 गलातीन मंडळी वाटे पोलुसेन चिट्‌ठी
\mt2 गलातियों की कलिसीया के लिए पौलुस की पत्री
\mt1 गलातीन मंडळी वाटे पोलुसेन चिट्‌ठी
\imt गलातीन बारामां
\ip गलातीन किताप काजे नेवताळु पोलुस \xt 1:1\xt* लिखलु छे। जी एक चिट्‌ठी हतली जीनीक पोलुस गलातीन मंडळी काजे मसीन पयदावारीन 48-57 सालेन ईचमांस लिखलु छे। गलातीन माणसे हय सके की चे रोमन सहर मां रहणे वाळा हतला। नीयमेन किताप जान्‌ने वाळाक असो पाक्‌को मालम नी हय की जी चिट्‌ठी लिखणेन टेमे पोलुस कां हतलु, बाकुन हय सके की चु ईफीसुस नीते कुरींथी सहर मां हतलु।
\ip पोलुस गलातीन मंडळी मां यहुदी ने नी-यहुदी दुयु मसीक मान्‌ने वाळा माणसे वाटे लिखलु। खास करीन चां गलत सीकापण काजे रुकणे करीन, काहाकी चे मसी माणसे काजे पुराणा नीयमेन यहुदी नीयम काजे पालनु करीन सीकाड़तेला, खास करीन अगली फतरी काजे काटाड़नेन। मसी माणसेन ईचमां यहुदी नावेन एक टुळु हतलु, जीनुक नी यहुदी मसी वाळा काजे अगली फतरी काजे काटाड़नेन जरुड़ी हतली। चे पोलुस पर नेवताळु बन्‌नेन हक पर सवाल बी पुछ्‌या। पोलुस काय काहानी \xt 1:11; 2:14\xt* बताड़ीन आपसाक नेवताळान हक काजे नी बताड़्‌यु ने तीनुक असु करीन खुस-खबर समजाड़ने लाग्‌यु की छुटकारु ईसु पर भुरसु करने सीत हवसे ने जड़से। जु दयान फळ छे जु भगवान देखाड़े असो नी जे माणसे करे।
\iot बाहरती वात
\io1 1. पोलुस आपसान चिट्‌ठीन सुरुवात गलातीन मंडळी काजे वारलु छे की कय्‌न करे। \ior 1:1-15 \ior*
\io1 2. तत्‌यार पोलुस खुदेन बारामां बताड़तु जाय्‌न आपसान हक काजे वाचाड़ने करीन ने असु देखाड़ने करीन की हयु मुसान नीयम पर चालनेन कुसीत ते कर्‌यु, बाकुन आपसु काम नी करतेलु। \ior 1:6—2:21 \ior*
\io1 3. अघु हयु छुटकारा मां नीयम ने गीण-दयान बारामां अघु बताड़े। \ior 3—4 \ior*
\io1 4. अळतेन हयु वारलु मसी जीवनेन बारामां वारलु सीकाड़े। \ior 5:1—6:10 \ior*
\io1 5. पोलुस आपसान चिट्‌ठी मां वारु छे करीन ने आकरी लीलघाय्‌न साते कहें की भगवान भीणी सी एक नवला माणुस मां बदलनु बाहरना नीयम सी घणो वारु, जसा की अगली फतरी काटाड़नु। \ior 6:11-18 \ior*
\c 1
\s आव-भाव
\p
\v 1 पोलुसेन, जी चिट्‌ठी नीते माणसे भीणी सी, ने नी माणसे सी, बाकुन ईसु मसीन ने भगवान बास भीणी सी छे, जु तीनाक मर्‌या-सर्‌याम सी जीवाड़्‌यु, चु नेवताळु छे। 
\v 2 ने आखा भायस भीणी सी जे मार साथी छे; गलातीन मंडळ्‌यान नाव।
\p
\v 3 मे तुंद्‌रे सी असी आस करो की आपणा भगवान बास अगु सी, ने तीना मालीक ईसु मसीन अगु सी, तुहुं काजे गीण-दया ने सुक सांती जड़ती रहणु चाहजे।
\p
\v 4 जु ईसु, आपणा भगवान बासेन मरजीन अनसारे, आपसा जीव काजे आपणा पापेन बादा छुटणे करीन आपी देदु, ने चु असु करीन आपसा काजे आपी देदु की आपणु हय ईनी कळी मां रय र्‌या, ईनीत पापी कळीम सी आपणुक छुड़ाय लेय। 
\v 5 ने तेरी सेक-सींगार सदा हवती रहे। आमीन।
\s एकुत खुस-खबर
\p
\v 6 मे चकराय गुयु की जु तुहुंक ईसु मसीन गीण-दया सी बुलावलु चां सी अतरा छाटा पछा वळीन दीसरी भातीन खुस-खबर भीणी वळने लाग गुया। 
\v 7 बाकुन दीसरी खुस-खबर हय्‌त नी, बाकुन वात जी छे की बेसका असा छे, चे तुहुंक घाबराड़ी देय, ने ईसु मसीन खुस-खबर काजे बीगाड़ने हींडे। 
\v 8 बाकुन ईसुन जी खुस-खबर, हामु तुहुं काजे सामळावला छे, तीनी खुस-खबर काजे छुड़ीन, काहनु बी तुहुं काजे दीसरीत खुस-खबर सामळावे, तीना पर जलम की गरा आय पड़नु चाहे, भले चे, हामु हय ते ने, भगवानेन सरग वाळा काहवाळ्‌या हय ते। 
\v 9 जसा हामु तुहुंक पेहलुत कय देदला, तसुत मे हय अळी कहो की, कदी तीनी खुस-खबर काजे छुड़ीन कुय बी, दीसरीत खुस-खबर सामळावे, ती तेरे पर गरा आय पड़नु चाहजे।
\p
\v 10 हय मे माणसेक मानाड़ने करीन हेर कर र्‌यु की भगवानेक काय? मे माणसेक खुस करनेन हेर कर र्‌यु? कदी मे आज लग माणसेत काजे, खुस करनेन हेर करतु, ती ईसु मसीन पावर्‌यु नी रवतु।
\s पोलुस काजे ईसु मसी सी खुस-खबर जड़े
\p
\v 11 ए भायस ने बहणस्‌या, मे तुहुंक बताड़ी दम की जी खुस-खबर मे सामळावलु छे, ची खुस-खबर माणसे सी नी हय। 
\v 12 काहाकी जी खुस-खबर मेसेक काहना माणसे सी नी जड़ी। ने काहनु बी दीसरु ईनी खुस-खबरेन बारामां मेसेक नी सीकाड़्‌यु। बाकुन ईसु मसी मेसेक देखाव पड़्‌यु, ने सुदु सट मारे पर ईनी खबर काजे उजेंतु करलु छे।
\p
\v 13 तुहुं मारा वेहवारेन ने वीच्‌यारेन बारामां सामळी रया, की मे ते पेहले यहुदी धरमेन बेसकु पाळनी पाळतेलु, की ईसु वाळान मंडळी काजे, ने भगवानेन मंडळी काजे वेला पाड़तेलु, ने तीनी मंडळी काजे ठायकी मारीन सारने हींडतेलु। 
\v 14 मे ते मार पाळीन बेसका यहुदी माणसे सी बी पेहेल सीत यहुदी धरमेन नीयम पाळतेलु, काहाकी जी धरमेन रीती मेसेक डाहा-डाहा सी जड़ली, ने ईनी रीतीक पाळने मां बी मे बेसकु हवस्‌यु हतलु।
\p
\v 15 बाकुन भगवान मेसेक मारी आयसीन कुखेम सीत मेसेक नेवाड़ लेदलु, ने आपसी गीण-दयान अनसारे मार पर भुरसु करने ने आपसी सेवा करने बुलायु।\f + \fr 1:15 \fr*\ft रोमी 1:1, यीरम्‌या 1:5, यसाया 49:1\ft*\f* 
\v 16 जत्‌यार मरजी हय की मेसेक ने आपणा पुर्‌याक उजेंतु करे की मे आड़जात्‌या मां तेरो खुस-खबर सामळावो, ती नीते मे डील ने लुही सी पुछ्‌यु; 
\v 17 ने नीते यरुसलेम मां तींद्‌रे धड़े गुयु जु मारे सी पेहल नेवताळु हतलु, बाकुन तत्‌यारुत अरब देस मां जाती र्‌यु। ने अळी चां सी दमीस्‌क सहर मां पछु आवती र्‌यु। 
\v 18 तीन साल हय गुया ने अळतेन मे ईसुन नेवताळा केफा काजे भेळु हवणे करीन यहुदीया जीलान यरुसलेम सहर मां गुयु, ने तींद्‌रेन्‌चां पंद्‌रे दाहड़ा रयु। 
\v 19 ने मालीक ईसुन संगा भायस याकुप काजे भेळु हयु, ईनुक छुड़ीन दीसरा काहना बी ईसुन नेवताळा काजे नी भेळु हयु।
\p
\v 20 जी वात मे तुहुंक लिखणे बाजी र्‌यु, ची वात मे भगवान काजे मारेन्‌चां हजुर जाणीन लिखणे बाजी र्‌यु, ने मे झुट नी मेल्‌तु।
\p
\v 21 अळतेन मे सीरीया ने कीलक्‌या ईलाका मां बेसके लांबे जात र्‌यु। 
\v 22 ने यहुदीया जीला मां रहण्‌या जे माणसे मसीन मां छे, चे मेसेक हय लग नी देख्‌या। 
\v 23 बाकुन तीनु मंडळ्‌यान माणसे मारे बारामां जी वात सामळ्‌या करतेला, की पेहले जु माणुस हामुक वेला पाड़तेलु, ने हामुक भुरसाम सी छुड़ावणे हींडतेलु ने ईना पंथन भुरसा काजे ठायकुत सारने हींडतेलु, चु हय ईसु पर भुरसु करनेन बारामां खुस-खबर सामळावणे बाजी रयु। 
\v 24 ने असा करीन यहुदीया जीला मां रहण्‌या ईसुन मंडळ्‌यान माणसे मारा बारामां सामळीन भगवानेन बड़ाय करतेला।
\c 2
\s ईसुन दीसरा नेवताळा बी पोलुसेन साहरे परचार करली खुस-खबर मां राजी हवे
\p
\v 1 दस ने चार साल हय गुया, ने अळतेन मे अळी यरुसलेम मां गुयु। तत्‌यार बरनाबास बी मारे पुठ्‌ये हतलु, ने मे तीतुस काजे बी पुठ्‌ये ली गुयलु। 
\v 2 भगवान मेसे काजे यरुसलेम जाणे करीन चुखो झण कह्‌लु, ने मे चां गुयलु। ने मे चां आड़जात्‌या माणसे काजे जी खुस-खबर सामळावो, तीनी खुस-खबरेन वात मे चां वाळी ईसुन मंडळीन मुख्‌याक बी समजाड़ीन कह्‌यु; बाकुन मंडळीवाळा दीसरा माणसे अगळ उजेंतु नी कह्‌यु, कांखुर मायन मारी खुस-खबर बमदीन परचार करनेन पेहली ने हय्‌न मेहनत, झुटी सीकापण सी फालतु नी हवणु चाहजे, करीन मे जी वात मंडळीन आखा मुख्‌या काजे कय देदु। 
\v 3 बाकुन तीतुस काजे बी जु मारे साते हतलु, ने जु युनानी आड़जात्‌यु हतलु। तेरेमां तीनाक पेहेरवोटन अघली चामड़ी काट करीन नी कह्‌यु। 
\v 4 असो तीनु लुच्‌चा भायसेन वजे सी हयो जे चुरी सी भराय गुयला, की तीना छुटला हवणे करीन जो मसी ईसु मां हामुक जड़ी, समज लीन हामुक सेवा करने वाळा बणावे। 
\v 5 एक कावु बी तींद्‌रे हक मां हामु नी हया, काहाकी खुस-खबरेन छाचलो तुंद्‌रेम बन्‌लो रहे।
\p
\v 6 भगवान ते काहनान मुंहडो देखीन तेरे अगु वळन्‌यु नी हय, ने ईनी वातेन मारी फीकुर नी हय की माणसे मार सी यरुसलेम वाळी ईसुन मंडळीन तीनु मुख्‌यान अदु ईज्‌जत करता आय र्‌या, ने तीनुक अदु मटा समजे, बाकुन तेबी जी खुस-खबर तु सामळावे तेर साते थुड़ीक दीसरी वात भेसकीन सामळावणु चाहजे करीन चे मुख्‌या माणसे मेसेक नी कह्‌या।\f + \fr 2:6 \fr*\ft लेवयवेवस्‌था 10:17, 2 कुरी 11:5\ft*\f* 
\v 7 बाकुन तेरो उल्‌टो जत्‌यार चे देख्‌या, की फतरी काटण्‌या माणसे वाटे खुस-खबरेन काम पतरस काजे सुपायलो तसोत, नी फतरी काटण्‌या माणसे वाटे मेसेक खुस-खबर सामळावणे करीन सुपलो छे। 
\v 8 काहाकी जु पतरस सी फतरी काटण्‌या करतेलु मां नेवताळान काम मटुत असर पड़े तसु कराड़्‌यु, ने हयुत मार सी बी आड़जात्‌या मां मटु असर सात मां काम कराड़्‌यु। 
\v 9 ने मुख्‌यान डाहला मुख्‌या याकुप, केफा ने युहन्‌‌‌नु मारे पर भगवानेन गीण-दयान सी हवला तीना सेवान काम काजे खाम्‌बा मान लेदा, ने चे मेसेक ने बरनाबास काजे आपसा साजल्‌या समजीन सात संगात मां ली लेदा। ने चे असी बुली देदा की तुहुं नी-यहुदी मां खुस-खबर सामळावता रवजु, ने हामु फतरी काटड़न्‌या यहुदी माणसे मां सामळावता रवजु। 
\v 10 चे हामुक अतरोत कहींन अगवाय कर्‌या की तुहुं गरीब माणसेन हेर करीन तींद्‌री मदत करु। ने असला कामेक करने करीन मे पेहलुत तीयार हतलु।
\s पोलुस पतरस काजे लड़े
\p
\v 11 बाकुन जत्‌यार केफा अन्‌ताकीया मां आयु, ती मेसेक तीनाक उजेंतु लड़नु पड़्‌यो, काहाकी चु वारु काम करनु छुड़ देदलु।\f + \fr 2:11 \fr*\ft गला 2:14\ft*\f* 
\v 12 अन्‌ताकीया मां थुड़ाक दाहड़ा लग ईसुक मान्‌या आड़जात्‌या माणसे भेळु बसीन खाया करतेलु, बाकुन एक दाहड़ु यरुसलेम सी थुड़ाक यहुदी माणसे डाहला मुख्‌या याकुपेन नाव लीन आय लाग्‌या। तत्‌यार चु तींद्‌री सामळीन असु वीच्‌यार करीन बीही गुयु की बाहरला फतरी काटाड़न्‌या यहुदी माणसे हय काय करसे? ने चु ईसुक मान्‌या आड़जात्‌या माणसेन सात संगात छुड़ीन एक धड़े हय गुयु।\f + \fr 2:12 \fr*\ft नेवता 10:28, नेवता 11:2-3\ft*\f* 
\v 13 ने ज देखीन ईसुक मान्‌या चां वाळा यहुदी माणसे पतरसेन तसा ढंगड़ा करने बाजी गुया ने बरनाबास बी। 
\v 14 बाकुन मे ज देख्‌यु की केफा ने दीसरा, खुस-खबरेन छाचली वात पर हय नी चालता, ती मे आखा अगळ पतरस काजे उजेंतु लड़ीन कह्‌यु, “तु यहुदी माणुस हय्‌न बी, यहुदी माणसेन नीयम तुड़ीन आड़जात्‌या माणसे भेळु खात्‌लु, ती हय तु आड़जात्‌या काजे यहुदी माणसेन तसा जीवु करीन कसु जुर कर सके?”
\s भुरसु ने काम
\p
\v 15 “आपणु ते पयदावारी सीत यहुदी माणसे छे,” ने आड़जात्‌या माणसे मायन नी हय, तीनुक दीसरा यहुदी माणसे पापी कह्‌वे। 
\v 16 तेबी आपणु जाण लेदा की मुसा सी लिखला नीयम पाळनेन वजे सी कुय बी माणुस धरमी नी बणे, बाकुन ईसु मसी पर भुरसु करने सी माणसे पापेन कब्‌जाम सी छुटीन भगवानेन नींगा मां धरमी बण जाय। ने आपणु बी पाप सी छुटकारु हात करने करीन मुसा सी लिखला नीयम काजे पाळने छुड़ीन ईसु मसी पर भुरसु कर्‌या। खरला कायदा पाळने सी कुय काजे पाप सी छुटकारु नी जड़े।\f + \fr 2:16 \fr*\ft रोमी 3:20-22, फीली 3:9\ft*\f* 
\v 17 आपणु ते ईसु मसी मां भुरसु करने सी धरमी गीणायणेन हेर कर र्‌या, बाकुन थुड़ाक माणसे आपणुक देखीन असु वीच्‌यार करे की जे ते मुसान नीयम कायदाक पाळनु छुड़ देदा ने चे पापी छे; असो हय ती ईसु मसी आपणुक पाप करान्‌यु गुनाळु चाकर्‌यु गीणाये काय? कदी नी। 
\v 18 कदी मे ईनी वातेक छुड़ देदु तीनी वातेक हय अळी पछु पाळने बाजी जाम, असो हय ती ते मे आपसात काजे मे गुनाळु छे करीन गवा दी रयु। बाकुन मे ईनी वातेम गुनाळु नी हय। 
\v 19 मे ते मुसा सी लिखला नीयम अनसारे नीयम वाटे मर गुयु, काहाकी भगवान वाटे जीवो ने समजो की मे भगवान भेळु जीवो करीन ईसु मसी पुठ्‌ये आपसा काजे कुरुस पर चड़ाय देदलु छे, ने मर गुयलु छे। 
\v 20 ने हय मे जीवतेलु नी हय बाकुन ईसु मसी मारेम जीवतेलु छे। ने मे हय बी डीलेम जीवतेलु रय रयु, बाकुन मे भगवानेन बेटास ईसु पर भुरसु करने सी जीवतेलु रय रयु, जु मेसेक परम कर्‌यु, ने मारे वाटे आपसा जीव काजे कुरुस पर चड़ाय देदु। 
\v 21 कदी मुसान लिखला नीयम पाळने सी धरमी बण जाता ती ईसु मसीन मरनु फालतु हय जातो; करीन मे मारे पर हवली भगवानेन ईनी गीण-दया काजे कदी बी फालतु हवणी नी दम।
\c 3
\s मुसान लिखली सास्‌तुर नीते भुरसु
\p
\v 1 ए गलाती वाळा, तुंद्‌री अक्‌कल नी आवती काय? तुहुंक कुण मोहवी लेदो? तुहुं काजे ते हामु खुल्‌लाम कय देदला, की ईसु मसी काजे कुरुस पर चड़ावीन कसा खीळा ठुकला हतला। 
\v 2 मे तुंद्‌रे सी एक वात जाणने हींडी र्‌यु, की तुहुं भगवानेन जीव-आत्‌मा काजे मुसान लिखला नीयम पाळीन हात करला, की ईसुन खुस-खबर पर भुरसु करीन हात करला?\f + \fr 3:2 \fr*\ft गला 3:5, नेवता 15:8-10\ft*\f* 
\v 3 तुहुं अतरा डेड़-अकल्‌या हय गुया काय? की तुहुं ज जीवन भगवानेन जीव-आत्‌मा सी सुरु कर्‌या, तीनी जीवन काजे डीलेन मरजी सी पुरी करने हींड र्‌या काय? 
\v 4 तुहुं अतरो जादा दुख फालतुत झेल्‌या काय? मारु भुरसु छे की तुहुं फालतु दुख नी झेल्‌या। 
\v 5 तुहुं मुसान नीयम काजे भुरसा सी पाळ र्‌या करीन भगवान तुहुंक आपसु चुखलु जीव-आत्‌मा आपीन तुंद्‌रे मां ताकुतेन मटा काम कर र्‌यु।
\p
\v 6 आखा यहुदी माणसेन डाहलु बास अब्‌राहमेन बारामां वीच्‌यार करु, तेरे बारामां असो लिखलो छे; अब्‌राहम ते भगवान पर भुरसु कर्‌यु, ने भगवान तीना भुरसाक देखीन तीनाक धरमी गीण्‌यु\f + \fr 3:6 \fr*\ft कळ घड़ाय 15-6\ft*\f*। 
\v 7 जी वात हेर राखु की जे भगवान पर भुरसु करे, तीनात हीसाबे अब्‌राहमेन खरली अवल्‌यात छे। 
\v 8 चुखला सास्‌तुरेन अनसारे पेहेल सीत अब्‌राहम काजे खुस-खबर सामळाय देदु की तारे सी आखी जातीन माणसे संयबरकत हात करसे। ने आपणुक बी जी वात समज मां आवे की भगवान आड़जात्‌या माणसे काजे भुरसु करने सी धरमी गीणीन तीनुक छुटकारु आपसे ईनी खुस-खबरेन वातेन बारामां, अब्‌राहम काजे भगवान पेहलुत सी देखाड़ देदलु। 
\v 9 ने चे भगवान पर भुरसु करे, चेत भगवान पर भुरसु करन्‌या अब्‌राहम पुठ्‌ये छुटकारान संयबरकत हात करे।
\p
\v 10 मुसान नीयम मां असो बी लिखलो छे, जु काहनुक ईना नीयमेन किताप मां लिखली वात काजे पुरो की पुरो नी पाळे तेरे पर गरा छे। ने जे नीयम कायदा पाळीन धरमी बणनेन हर करे, चे आखा गरात मां छे।\f + \fr 3:10 \fr*\ft याकुप 2:10, लेवयवेवस्‌था 27:26\ft*\f* 
\v 11 मुसान नीयम मां असो बी लिखलो छे, “माणुस भुरसु राखीन धरमी बणीन जलम जीवतेलु रवसे।” ने जी वात छाची छे, की मुसान नीयम पाळने सी भगवान अगळ कुय बी धरमी नी बणे। 
\v 12 मुसान नीयम मां असो लिखलो छे, “जु ईनी लिखली आखी वात काजे पाळे, चु की चु जी आखी वात पाळनेन वजे सी जलम जीवतेलु रवसे।” बाकुन असु आखा नीयम पाळन्‌यु एक बी माणुस नी हय। ने जी वात छाची छे की नीयम, भगवानेन खुस-खबर पर भुरसु करनेन वात पर टेकायली नी हय।\f + \fr 3:12 \fr*\ft लेवेवस्‌था 18:5\ft*\f*
\p
\v 13 मुसान नीयम मां असो बी लिखलो छे, “तीनाक बी लाकड़ा पर टांगीन मार देय, चु गरा वाळु छे।” ईने रीते ईसु काजे बी माणसे लाकड़ान कुरुस पर खीळा ठुकीन टांग देदा ने तीनाक मार नाख्‌या। मुसान नीयम पुरा की पुरा नी पाळने सी जी गरा आपणे पर आवे, छाचीन तीनी गरा काजे ईसु मसी आपसा पर झेलीन, गरा वाळु बण गुयु, ने तीनी गराम सी आपणुक छुड़ाय लेदु। \f + \fr 3:13 \fr*\ft लेवेवस्‌था 21:23\ft*\f* 
\v 14 असु ईसु काहा गरा वाळु बण गुयु। अब्‌राहम काजे जी संयबरकत भगवान आपलु, ची संयबरकत मसी ईसु सी आखा आड़जात्‌या बी जड़नु चाहजे ने मसी ईसु पर भुरसु करने सी, आपणुक बी भगवान सी वायदु करलु चुखलु जीव-आत्‌मा जड़नु चाहजे, असु वीच्‌यार करीन ईसु आपणी गरा झेल्‌यु।
\s कायदु ने वायदु
\p
\v 15 ए भायस्‌यो ने बहणस्‌या, मे तीनुक समजाड़ने करीन माणसे जीवनेन एक दाखलु देखाड़ु। कदी दुय माणसेन ईचमां वायदु हय जाय ती अळतेन चे बुली कुय बी टाळ नी सके, ने तेरेमां नी बड़े ने नी घटे। भगवान अब्‌राहम साते जी बुली कर्‌यु ची बी असीत छे। 
\v 16 भगवानेन बुली करला वायदु ते अब्‌राहम ने तेरी अवल्‌यात मायन एकुत जणा भीणी हवली छे। भगवान असु नी कह्‌यु की “आखी अवल्‌यात काजे,” बाकुन तेरी अवल्‌यात मायन एकुत जणा काजे असु वायदु करलु छे, ने चु अवल्‌यात ईसु मसी छे।\f + \fr 3:16 \fr*\ft मत्‌‌ती 1:1\ft*\f* 
\v 17 ईनी वात पर वीच्‌यार करु, भगवान अब्‌राहम साते वायदु कर्‌यु ने चार सोव तीस साल हय गुया ने अळतेन भगवान मुसान लिखला नीयम आपलु। मारो कह्‌णेन मतलब छे की जी बुली भगवान अब्‌राहम साते पेहेल करलु, तीनी बुली काजे अळतेन मुसा सी लिखला नीयम फालतु नी कर सके।\f + \fr 3:17 \fr*\ft नीरगमन 12:40\ft*\f* 
\v 18 काहाकी संयबरकतेन हक मुसा सी लिखला नीयम पर टेकलु रवतु, ती बुली करलु वायदु काय कामको नी रवतो, बाकुन हसो नी हवे, भगवान ते अब्‌राहम पर गीण करीन संयबरकतेन हक वायदा सी पेहलुत आपी देदु।
\p
\v 19 असो हय ती मुसान नीयम काय कामको? भगवान अब्‌राहम साते बुली करीन वायदु करलु ती चु अळतेन नीयम काहा आप्‌यु? हया नीयम ते, वायदु करला एकुत अवल्‌यात ईसु काजे आवता लग, माणसेक तींद्‌रा पापेन बारामां समजाड़ने करीन आपला हतला। ने जे नीयम ते, भगवान थुड़ाक सरग काहवाळ्‌या सी माणसे वाटे मुसाक मेळ कराड़न्‌यु बणावीन तेरा हात मां आपला हतला। 
\v 20 मेळ कराड़न्‌यु ते एकुत नी रहे, बाकुन भगवान एकुत छे।
\s कायदान मतलब
\p
\v 21 असो हय ती मुसा सी लिखला नीयम भगवानेन करला वायदान वीरुद मां छे काय? कदी नी, कदी भगवान मुसान नीयम पाळनेन अनसारे खरलो जीवन आपी देदु, ती ते छाचलीन, धरमी बणनेन मतलब मुसान नीयम पाळनेन अनसारेत रवतो। 
\v 22 बाकुन चुखला सास्‌तुर मां असो देखाड़े की नीयम आखा माणसेक केदड़ान तसा पापेन कब्‌जा मां कर देदा। ने भगवानेन वायदान नेहु, ईसु मसी पर भुरसु करनेन छे, ने जे ईसु पर भुरसु करे, तीनुत काजे भगवानेन नीयमेन अनसारे छुटकारान संयबरकत जड़े।
\p
\v 23 तेबी ईसुन आवणेन पेहेल ने ईसु पर भुरसु करनेन पेहेल, आपणु काजे भुरसान वाट देखाव पड़ता लग, मुसान नीयम सी आपणी गुवाळी हवतेली। 
\v 24 आपणु ईसु पर भुरसु करीन धरमी बन्‌नु चाहे करीन आपणुक ईसु मसी धड़े लावणे करीन, मुसान नीयम पुर्‌या राखवाळ्‌यान तसा आपणी राखवाळी करतेला। 
\v 25 बाकुन हय ते भुरसान वाट देखाव पड़ गुई, ती हय आपणु पुर्‌या राखवाळ्‌यान कब्‌जा मां नी हय।
\p
\v 26 तुहुं बी आखा ने आखा मसी ईसु पर भुरसु करने वाटे, भगवानेन बेटास बण गुयला छे, भले यहुदी हय, ते ने भले नी-यहुदी आड़जात्‌या हय। 
\v 27 ने ईसु मसी मां एक हवणे करीन, तुहुं आखा ने आखा बपतीस्‌मा लीन, ईसु मसी काजे नवला पुथल्‌यान तसा पेहेर लेदला छे। 
\v 28 तुहुं हय एक घरन्‌या बण गुयला छे, ने हय तुंद्‌रेम काय बी छीट नी रय, भले तुहुं यहुदी माणसे हय नीते युनानी माणसे हय नीते आड़जात्‌या हय, भले गुलाम पावर्‌यु हय नीते मालीक हय, भले अदमी नीते बायर हय, तुहुं आखा ईसु मसी मां एक हय गुयला छे। 
\v 29 असा करीन हय तुहुं ईसु मसीन माणसे छे, ने तुहुं बी अब्‌राहमेन अवल्‌यात ने वायदान अनसारे हकदार्‌या बी छे।
\c 4
\p
\v 1 मान लेवु की एक मालदारेन एकुत पुर्‌यु हय, ने चु तेरा आखा धनेन हकदार्‌यु हय। तेरा बंगला मां पुर्‌या राखवाळ्‌या ने पावर्‌या ने गुलाम पावर्‌या बी हय। तेबी जत्‌यार लग चु हकदार्‌यु पुर्‌यु हुस्‌यार नी हवे, चां लग आखी चीजेन मालीक हय्‌न बी चु आपसा घरेन गुलाम पावर्‌या सी मटु नी हय। 
\v 2 तीना पुर्‌याक ते बासेन टाकली टेम लग, पुर्‌या राखवाळ्‌यान ने सामाळन्‌या पावर्‌यान कब्‌जाम रहणु पड़े, ने तीनाक आपसी मरजीन अनसारे नी जीवाये। 
\v 3 ईसु मसी पर भुरसु करनेन पेहेले आपणु बी, ईना पुर्‌यान तसा रवता। आपणु ईनी कळीन रीती-भातीन ने नीयमेन कब्‌जाम रवीन गुलामी करतेला। 
\v 4 बाकुन जत्‌यार भगवान बासेन टाकली टेम पुरी हय गुय, ती चु आपसा बेटा ईसु काजे ईनी धरती पर मकल्‌यु। चु एक बायर सी पयदा हयु, ने मुसा सी लिखला नीयमेन कब्‌जाम मां रवीन चे आखा नीयम फालतु जाय्‌न जीयु, 
\v 5 तेरे सी चु ईसु, मुसा सी लिखला नीयमेन कब्‌जा मां रहणे वाळा आपणु आखा काजे छुड़ावे, ने आपणु काजे भगवानेन खुळे लेदला बेटा-बेटी बणावे।
\p
\v 6 हय हामु ने तुहुं आखा भगवानेन बेटा-बेटी बण गुयला छे, ने भगवान आपणा मन मां आपसा बेटासेन चुखली-आत्‌मा काजे मकेल्‌लु छे, जु चुखलु जीव-आत्‌मा आपणे भेळु भेसकायन भगवान काजे असु आयड़ीन बुलावे, “ए अब्‌बा, ए बास।” 
\v 7 हय तुहुं नीयमेन गुलाम पावर्‌या नी हय, बाकुन भगवानेन बेटा-बेटी छे, ने हय तुहुं भगवानेन मरजी सी वारीस बण गुयला छे।
\s गलातीन मंडळी वाटे पोलुसेन फीकुर
\p
\v 8 पेहेल ते तुहुं भगवानेक नी उळख्‌या ने तेरु गुलाम हतला जु छाचलीन भगवान नी हय,\f + \fr 4:8 \fr*\ft यसाया 37:19, यीरम्‌या 2:11\ft*\f* 
\v 9 बाकुन हय ते तुहुं खरला भगवान काजे उळखी लेदा, नीते असा कहणु चाहजे, की भगवान तुहुं काजे आपसान उळखाण कराड़्‌यु, ने हय तुहुं ईनी कळीन लुल्‌ली ने रीकामी रीती-भातीन ने नीयम भीणी काहा जाय र्‌या। तुहुं अळी ईनी सुरु वाळी वातेन गुलाम मां काहा हवणे हींडी र्‌या? 
\v 10 ने आपसाक धरमी बणावणेन हर करीन, तुहुं खास दाहड़ान पाळनी ने खास महनान, ने खास तीहवारेन, ने खास सालेन पाळनी काहा पाळने बाजी गुया। 
\v 11 तुंद्‌रे बारामां मे बीही र्‌यु, कांखुर मायन असो ते नी हय जाय, की जी मेहनत मे तुंद्‌रे वाटे करलु छे, ची फालतु हय जाय।
\p
\v 12 ए भायस्‌यो, मे तुंद्‌रे सी लीलघाय्‌न कहो, तुहुं मारेन तसा हय जावु, काहाकी मे बी तुंद्‌रेन तसु हय गुयु, तुहुं मारो काय बी नी बीगाड़्‌या। 
\v 13 बाकुन तुहुं जाणु की पेहेलुत मे डीलेन कमजुरीन वजे सी तुहुंक खुस-खबर सामळायु। 
\v 14 ने मारा डीलेन लुल्‌गाय वाटे तुहुंक एला करनु ते पड़्‌यो, तेबी तुहुं मेसेक हेटु समजीन फालतु नी जाण्‌या। बाकुन तुहुं मेसेक सरग काहवाळ्‌यु जु भगवानेन समजीन, एर सी बी जादा मेसेक ईसु मसी समजीन, मारी आव-भाव कर्‌या। 
\v 15 ती ची तुंद्‌री खुसी कां गुई? मे तुंद्‌रु गवा छे, की तुंद्‌रु अतरु परम हतलु, की कदी मारे वाटे डुळा नीकाळीन आपणु पड़तो तेबी तुहुं डुळा लग नीकाळीन आप देदा। 
\v 16 मे छाचली वात कय देदु करीन तुंद्‌रु दुस्‌मन बण गुयु काय?\f + \fr 4:16 \fr*\ft आमोस 5:10\ft*\f* 
\v 17 मे जाणो की थुड़ाक माणसे ईनु दाहड़ाम तुहुंक दुस्‌तीदार बणावणेन हर कर र्‌या, बाकुन भला वीच्‌यार करीन दुस्‌तीदार बणावणे नी हींडता, तुहुं हींद्‌रीत हर करनु चाहजे करीन जे माणसे झुटी सीकापण आपीन तुहुं काजे मार सी आंग्‌ये कर र्‌या। 
\v 18 भली वाते वाटे हर करनु, घणो वारु छे, ने च मे ईतरीक वार नी बाकुन जलम भली वाते वाटे हर करनु चाहजे। 
\v 19 ए मारा पुर्‌या-पारी, हय लग तुहुं नानलात छे काय? मे तुंद्‌रे वाटे तीनी फवरी हवणेवाळी बायरीन तसु दुख सेण कर रयु, ने जत्‌यार लग तुहुं ईसु मसी मां पुरा पाक्‌का नी हवे, ती लग मारो मन दुख्‌या करे। 
\v 20 नांबे रवीन तुहुंक कसु समजाड़ो, ज मेसेक समज मां नी आवतो। मारी हर ते जी छे, की मे तुंद्‌रेन्‌चां आवीन आंबु-सांबु धीरु रय्‌न वात करो, बाकुन हय ते लिखणुत पड़ रह्‌यो।
\s सारा ने हाजीरान दाखलु
\p
\v 21 तुंद्‌रे मायन थुड़ाक मुसान नीयमेन कब्‌जा मां ते रहणेन हर ते कर रया तीनु काजे मे एक वात पुछो, तुहुं मुसा सी लिखली नीयम मां जी वात नी सामळ्‌या काय? 
\v 22 अब्‌राहमेन दुय पुर्‌या हतला, एक पुर्‌यु ते आपसी लाडी सारा सी पयदा हयु, ने दीसरु पुर्‌यु ते गुलाम पावरनी हाजीरा सी पयदा हयु।\f + \fr 4:22 \fr*\ft कळ घड़ाय 16:5, कळ घड़ाय 21:2\ft*\f* 
\v 23 जु पुर्‌यु गुलाम पावरनी सी हयु, चु डीलेन मनेन अनसारे पयदा हयु। ने इसाक जु अब्‌राहमेन लाडी सी पयदा हयु, चु ते भगवानेन वायदान अनसारे पयदा हयु। 
\v 24 ईनी वाते मां दाखलु छे, जे बायरा मानु की दुय वायदा छे, एक ते सीनाय उचु बयड़ान, तेरेमां सी गुलाम्‌यात पयदा हवे; ने ची हाजीरा छे। 
\v 25 ने हाजीरा मानु अरबेन सीनाय उचु बयड़ु छे, ने हय्‌न यरुसलेम तेरेन तसों छे, काहाकी हयी आपसा पुर्‌या समोत गुलाम मां छे। 
\v 26 बाकुन उपरनी यरुसलेम सहर बांदायली नी हय, ने ची आपणी माय छे। 
\v 27 काहाकी लिखलो छे,
\q1 ए आंझी, तु भारीस हय्‌न फवरी नी हवे,
\q2 तेबी खुस हय जां, फवरी हवणे करीन,
\q1 तारा दुखेन पीड़ा नी हवती, तेबी आयड़ी आयड़ीन खुसीन गीत गांव,
\q2 काहाकी छुड़ली बायरीन अवल्‌यात सी जादा हवसे, तेरु धेणी छे।\f + \fr 4:27 \fr*\ft यसाया 54:1\ft*\f*
\p
\v 28 ए भायस्‌यो ने बहणस्‌या, आपणु इसाकेन तसा वायदान अवल्‌यात छे। 
\v 29 जसु डीलेन मनेन अनसारे पयदा हवण्‌यु इसमायेल तीने टेमे, भगवानेन जीव-आत्‌मान जुरेन अनसारे पयदा हवण्‌या इसाक काजे एला पाड़तेलु, तसोत हय बी हवे।\f + \fr 4:29 \fr*\ft कळ घड़ाय 21:9\ft*\f* 
\v 30 बाकुन वीच्‌यार करु, चुखला सास्‌तुर मां काय कहें? “गुलाम पावरनीन पुर्‌या काजे, खास बायरीन पुर्‌या भेळतु नी रहे ने गुलाम पावरनीक ने तेरा पुर्‌या काजे बाहर नीकाळ देवु।”\f + \fr 4:30 \fr*\ft कळ घड़ाय 21:10\ft*\f* 
\v 31 ए भायस्‌यो ने बहणस्‌या, आपणु तीनी गुलाम पावरनीन अवल्‌यात नी हय, बाकुन तीनी खास बायरीन अवल्‌यात छे, जी गुलाम नी हवती, ने मुसान नीयमेन गुलामी मां सी आपणुक छुटकारु जड़लु छे।
\c 5
\s भगवान वाटे छुटकारु हात करलान तसा जीवु
\p
\v 1 ईसु मसी आपणु काजे नीयमेन कब्‌जाम सी छुड़ावलु छे, ने हय तुहुं छुटकारु हात करलान तसा जीवु, ने अळी पछा नीयमेन जुड़ा मां जुपाय्‌न गुलामी मां करु।
\p
\v 2 सामळु मे पोलुस तुहुं काजे खुल्‌लाम कहं की तुहुं आपसा पेहेरवटेन अगली चामड़ी काटाड़सु, ती तुहुं काजे ईसु मसीन मोत सी काय बी फायदु नी हय। 
\v 3 मे तुहुंक अळी चेताय्‌न कहं, जतरा बी धरमी गीणायणे करीन पेहेरवटेन अगली चामड़ी काटाड़े तीनुक मुसान नीयम मां सी आखात नीयम बीगुर नी पाळाये। 
\v 4 तुहुं नीयम सी धरमी ठहराय्‌णे चाही र्‌या, मसी सी अलग ने गीण-दया सी छेटा हय गुया। 
\v 5 काहाकी आत्‌मान वजे हामु भुरसा सी, आसा करीन धरमीन काम करनेन वाट देख्‌जे। 
\v 6 मसी ईसु मां नीते फतरी काटणु बी नीते अघली चामड़ी नी काटाड़्‌ला कामका छे, बाकुन भुरसु अतरुत, जु परमेन वजे जुर दी सके।
\p
\v 7 तुहुं ते ईसु मसी पर भुरसु करीन बेसका वारु जीवणे बाजी रवला। हय छाचली काजे मानीन जीवणे मां कुण रूकावट बण रह्‌यो? 
\v 8 जु भगवान तुहुं काजे बुलावलु छे, चु ते तुहुं काजे असु नी सीकाड़्‌यु। 
\v 9 ईतरोक खटाणो आखा कुसण्‌ला पीठा काजे खटाणो बणाय देय। झुटी सीकापण बी असोत छे। 
\v 10 तेबी तुंद्‌रे बारामां मेसेक मालीक ईसु पर भुरसु छे, की तुंद्‌रु दीसरु वीच्‌यार नी रवसे, बाकुन जे तुहुं काजे भुरसा सी छेटा करनेन कर रया, भले चो कुय बी हय, तीनाक भगवान डंड आपसे की आपसे।
\p
\v 11 ए भायस ने बहणस्‌या, कदी मे हय लग पेहेरवटेन अगली चामड़ी काटाड़नेन परचार कर रयु हय, ती फतरी काटड़न्‌या मेसेक काहा एला पाड़े? कदी मे असु अगली चामड़ी काटाड़नेन परचार करतु, ती कुरुस पर टांगायला ईसुन खुस-खबरेन कुय बी रुकावट नी करतु। 
\v 12 तुहुं काजे जे एला पाड़ रया, चे पेहेरवटेन अगली चामड़ी काटाड़नेन अतरी हर कर रया, ती चे आपसान ने पेहेरवट काटाड़ लेता ती वारलु रवतो।
\p
\v 13 भायस ने बहणस्‌या, तुहुं जाणु की भगवान तुहुंक नीयमेन गुलाम रहे बीगुर छुटला रहणे करीन बुलावलु छे, बाकुन आपसा डीलेन हर पुरी करता जाय्‌न पाप करने करीन छुटला नी छुड़्‌यु। ने परम सी एक दीसरान सेवा करु। 
\v 14 काहाकी मुसान नीयमेन सास्‌तुर मां बी असोत लिखलो छे “तु आपसा धड़ेवाळाक आपसान तसु परम कर।” तुहुं एरेत अनसारे आखा पर परम करु, ती ईना परम सीत आखा नीयम पुरा हय जासे।\f + \fr 5:14 \fr*\ft मत्‌‌ती 22:39-40, लेवेवस्‌था 19:18\ft*\f* 
\v 15 बाकुन तुहुं ते हय जंगली जनवार्‌यान तसा आंबा-सांबा चावणे ने नुकसाण करने बाजी र्‌या, असा करता रवसु, ती तुंद्‌रु मेळ सर जासे। ने चेतीन रहु।
\s भगवानेन चुखली-आत्‌मा ने चाल-चालण
\p
\v 16 बाकुन मे कहो, आत्‌मान अनसारे चालु ती तुहुं डीलेन मरजी काहनी रीती सी पुरी नी करसु। 
\v 17 काहाकी डील आत्‌मान वीरुद मां नी हय ने आत्‌मा डीलेन वीरुद मां नी हवणेन मरजी करे, ने जे एक दीसरान वीरुद मां नी हय, असो काहा छे की जो तुहुं करने हींडे, चो कराये नी। 
\v 18 ने कदी तुहुं आत्‌मान कह्‌याम चालता हय ती नीयम मां नी रया।
\p
\v 19 हय डीलेन कामे ते उजेंता छे, मतलब छीनाळो करनु, भुंडा कामे, ने लुच्‌चायन काम करनु, 
\v 20 दगड़ा पुजणु, बड़वाय करनु, झगड़ु करनु, जखड़ी पड़नु, कुहराय्‌णु, रीस करनु, आपसान वाटे भलो हवणेन वीच्‌यार करनु, टुळाम सी अलग हवणु, ने कुहराय करनु, 
\v 21 दीसरान चीजेन हाय करनु, दारुड़्‌यु बणनु, छाकी पड़नु ने छीनाळा मां मुजा लेणु ने असला बेसका गलत काम छे, ईनु गलत कामेन बारामां जसु पेहेल बी मे कय देदलु, मे हय बी कय दम की असा-असा कामे कर्‌या करे, चे भगवानेन राज मां भरायणेन हकदार्‌या कदी नी बणे।
\p
\v 22 बाकुन भगवान जीव-आत्‌मा आपसा कह्‌याम जीवण्‌यान जीवन मां आपसा फळेन जे गुणे उजेंतु करे; परम करनु, खुस रहणु, सांती सी हेळी-मेळीन रहणु, गम खाणु, दीसरान भलाय करनु, भुरसाम रहणु, 
\v 23 दीसरा साते भुळा बणीन रहणु, ने आपसाक कब्‌जाम राखणु, असला वारला कामेन काहना बी कायदान वीरुद नी करे। 
\v 24 जे ईसु मसीन छे, चे आपसा डीलेन पापेन हाय ने हर काजे कुरुस पर चड़ावीन खीळा ठुक देदला छे। 
\v 25 आपणुक भगवानेन जीव-आत्‌मा सी असली नवली जीवन जड़ली छे, ती छाचलीन भगवानेन जीव-आत्‌मान अनसारे जीवणु बी चाहजे। 
\v 26 ने आंबा-सांबा जखड़ी पड़ता जाय्‌न कुहराये मटाय घुण करु।
\c 6
\s एक दीसरान मदत करु
\p
\v 1 ए भायस्‌या ने बहणस्‌या, कदी तुहुं, तुंद्‌रे मायन काहनाक काजे पाप करता देख लेवु, ती तुहुं भगवानेन जीव-आत्‌मान कह्‌याम जीवण्‌या छे, तुहुं सुवाळा बणीन तीनाक समजाड़ु ने ईसुत सात संगात मां पछा लावु, ती तुहुं आपसान बी चुकसी कर, कांखुर मायन असो नी जाय की तुहुं पापेन पारख मां पड़ जावु। 
\v 2 असु करीन तुहुं एक दीसरान काहनु बी बुजु हाकलीन सात देवु, ने ईने रीते तुहुं ईसु मसीन परमेन नीयम पुरो करे। 
\v 3 काहाकी काहनुक काय बी नी हय तेबी आपसा काजे दीसरा सी मटु समजे, ने ईनी रीते दीसरान भार नी हाकले, चु आपसा काजे धुकु देय। 
\v 4 बाकुन हर एक आपणात काम काजे जांच लेय, ने तत्‌यार दीसरान बारामां नी बाकुन आपणात बारामां तीनाक घमट करनेन टेम रवसे। 
\v 5 काहाकी हर एक माणुस आपसान ने बुज हाकलसे।
\p
\v 6 जु काहनुक तुहुंक भगवानेन बुले सीकाड़े, तीना काजे तुहुं तुंद्‌री आखी वारलु चीजेम साजु करु।
\p
\v 7 आपसा काजे धुकु मां देवु, भगवानेन ठट्‌टा नी उडाड़े, काहाकी माणुस ज वेरे चत काट्‌से। 
\v 8 जु डीलेन हर काजे खुस करीन जीवसे, तीनाक डीलेन हरेन अनसारे डंड जड़से, ने जु भगवानेन जीव-आत्‌मा काजे खुस करीन जीवसे तेरा जीवन मां भगवानेन जीव-आत्‌मान फळ मतलब तेरो गुण देखाव पड़से ने चु सदान जीवन काजे हात करसे। 
\v 9 आपणु काजे भलाय करता-करता हिम्‌मत नी हारनु चाहजे, आपणु जाणजे की भलाय करता जाय्‌न वारु टणका रवसु, ती आपणुक टेम आवसे ती मालीक भीणी सी ईनाम बी जड़से की जड़से। 
\v 10 ने मुखु जड़तात आखान वारु करनु चाहजे, खास करीन जे ईसु पर भुरसु करे, तींद्‌री भलाय ते करनुत चाहजे।
\s आकरी चेतावणी ने आव-भाव
\p
\v 11 देखु, मे कसुक तुहुं काजे आपसान हाते करीन मोटा-मोटा आकड़ा मां लिखलु छे। 
\v 12 जे माणसे डीलेन दीखावु चाहे चेत तुंद्‌री फतरी काटाड़ने वाटे दबाव बणावे, सीरप हेरेसी की चे मसीन कुरुसेन वजे सी सताय नी जाय। 
\v 13 जे आपसात पेहेरवटेन अघली चामड़ी काटाड़ला ते खरा, बाकुन जे बी मुसान नीयम पुरु नी पाळतेला, तेबी चे दीसरा यहुदी माणसे अगळ हामु हींद्‌रा पेहेरवटेन अघली चामड़ी काटाड़्‌या करीन तुंद्‌रे पर मटाय करने करीन तुंद्‌री पेहेरवटेन अघली चामड़ी काटाड़्‌ने हींडी र्‌या। 
\v 14 मे ते असली वातेन फीकुर नी करो, मारी हर जी छे की मे आपणा मालीक ईसु मसीन कुरुस पर अतरुत मटाय करो। ने मारी नींगा मां ईनी कळी काजे कुरुस पर चड़ावीन खीळा ठुकला छे, ने ईनी कळीन माणसेन नींगा मां मे कुरुस पर चड़ावीन खीळा ठुकाड़लु छे। 
\v 15 काहाकी हय फतरी काटणु बी कामको नी हय, बाकुन खास कामकी वात जी छे, की आपणु काजे पुरा की पुरा ईसुन तसा नवला बणता जाणु चाहजे। 
\v 16 जतरा बी ईना नीयम मां चाले, चे की चे भगवानेन खास ईस्‌रायली माणसे छे, तीनु आखा काजे भगवान सुक-सांती ने दया आप्‌या करे, असु मे भगवान सी दुवा करो।
\p
\v 17 अगा कुय मेसे काजे दमणु नी चाहजे, काहाकी मे ईसुन घाव काजे आपणा डील मां लीन फीरो।
\p
\v 18 ए भायस ने बहणस्‌या, आपणा मालीक ईसु मसीन गीण-दया तुंद्‌री जीव-आत्‌मा साते रया करे असु मे भगवान सी मांग करो, आमीन।