\id 2TH - Bhilali Standard Project
\ide UTF-8
\h 2 थीसलुनीकी
\toc3 2 थीसलुनीकी
\toc2 2 थीसलुनीकी
\toc1 थीसलुनीकी मंडळी वाटे पोलुसेन दुसरी चिट्‌ठी
\mt2 थिस्सलुनीकियों की कलिसीया के लिए पौलुस की दूसरी पत्री
\mt1 थीसलुनीकीन मंडळी वाटे पोलुसेन दुसरी चिट्‌ठी
\imt 2 थीसलुनीकीन बारामां
\ip थीसलुनीकीन माणसे काजे दीसरी चिट्‌ठी नेवताळा पोलुस \xt 1:1\xt* साहरे लिखी गुय। हीयु जी चिट्‌ठी 1 थीसलुनीकीन थुड़ाक टेमेन पछे, मसीन पयदा हवणेन लग भग 51 साल पछेन लिखलु। पोलुस हय बी कुरींथी मां हतलु जत्‌यार हीयु थीसलुनीकीन मंडळी काजे जी चिट्‌ठी लिख्‌यु, एक मंडळी जेरेसी हीयु आपणी दीसरी कावा सेवान चाल पर जागु करलु \xt नेवताळा 17:1-10\xt* नेवताळान कामेन किताप मां ज्‌य कह्‌यो की मंडळी थुड़ाक यहुदी माणसे ने बेसका युनानी माणसे सी बन्‌नली हतली।
\ip थीसलुनीकीन मंडळीन नातो आकरी टेमेन ने मसीन दीसरी कावा आवणे सी हयो हसे, काहाकी पोलुस थीसलुनीकी काजे लिखला आपणी चिट्‌ठी मां हेरे बारामां बेसको लिखलो हतलो। 2 थीसलुनीकी मां सी लग भग आधो आकरी टेमेन बारामां छे। पोलुस उजेगलान खीलाप बी चेतावणी आप्‌यु। एक-एक माणसे काजे आपणे खाणा वाटे काम करनु चाहजे। \xt 3:6-10 \xt*
\iot बाहरती वात
\io1 1. पोलुस मां आपणा ने आपणे साते वाळान उळखाण देय चिट्‌ठीन सुरुवात करे। \ior 1:1-2 \ior*
\io1 2. तत्‌यार चु थीसलुनीकीन मंडळी वाटे भगवान काजे बेसकु वारु कह्‌वे ने हींद्‌रे वाटे दुवा करे। \ior 1:3-12 \ior*
\io1 3. मां पोलुस आकरी टेमेन बारामां बुले। \ior 2 \ior*
\io1 4. तत्‌यार चु उजेगला ने काम करनेन जरुवतेन खीलाप मां बुले। \ior 3:1-15 \ior*
\io1 5. पोलुस मंडळी काजे अळी नमस्‌कार करीन खत्‌तम करे। \ior 3:16-18 \ior*
\c 1
\p
\v 1 ए थीसलुनीकी सहर मां रवण्‌या ईसुन मंडळीन माणसे,
\p मे पोलुस, जी चिट्‌ठी, सीलवानुस ने तीमुथीयुस भेळु, तुहुं आखाक लिख र्‌यु, तुहुं ते आपणा भगवान बासेन ने मालीक ईसु मसीन भुरसे रय रया:
\p
\v 2 तुहुं आखा काजे आपणा भगवान बासेन ने मालीक ईसु मसीन गीण-दया ने सुक-सांती जड़ती रहणु चाहजे।
\s नीयावेन दाहड़ु
\p
\v 3 ए भायस्‌यो ने बहणस्‌या, ईसु पर तुंद्‌रु भुरसु बड़तुत जाय रयु, ने तुंद्‌रे मां परम बी बड़तुत जाय रयु, तेरेमां हामु, तुंद्‌रे वाटे आखे टेमे भगवान काजे बेसकु वारु कहणु चाहजे। 
\v 4 तुहुं काजे माणसे, अळी-अळीन वेला पाड़ रया, तेबी ईनु आखा वेला ने दुख काजे तुहुं झेल रया, ने असा करीन तुंद्‌री गम खाणेन ताकत ने तुंद्‌रु भुरसु उजेंतु हय रयु, तेरेमां हामु जागे-जागे भगवानेन मंडळी मां तुंद्‌रे बारामां मटाय करजे।
\p
\v 5 जु भगवानेन छाचला नीयावेन दाहड़ाम धरमीन पुरावु छे, तीने दाहड़े चु आखा माणसेन नीयाव करसे। तुहुं ते हय भगवानेन राजेन वाटे दुख झेल रया, तेरेमां नीयावेन दाहड़े, भगवान तुहुंक असु कवसे तुहुं मारा राज मां भराये असा छे। 
\v 6 काहाकी भगवान डंड आपसे की आपसे काहाकी तेरी नींगा मां असो करनु नीयावेन हीसाबे संय छे। 
\v 7 बाकुन तुहुं जे हय वेला करने बाजी र्‌या, तुहुं काजे ने हामु काजे नीयावेन दाहड़े वेलान बदला मां सुक आपणे बी तेरी नींगाम नीयावेन हीसाबे ताले छे। तीने दाहड़े, मालीक ईसु आपसा ताकत सी भरला सरग काहवाळ्‌या पुठ्‌ये, सरग सी धपतेला आकठा भेळु उजेंतु उतरसे। 
\v 8 ने जे भगवानेक नी जाणे ने हामरा मालीक ईसुन खुस-खबरेक नी माने तींद्‌रे सी बद्‌लु लेसे। 
\v 9 चे मालीक अगळ सी ने तेरी ताकुतेन सेक-सींगार सी छेटा हय्‌न जलम डंड हात करसे। 
\v 10 असो तीने दाहड़े हवसे, जत्‌यार चु, भगवान सी ठहरावले दाहड़े, सरग सी पछु आवसे। तत्‌यार आपणु जे तेरा चुखला माणसे छे, आपणे वाटे ईसु ज करलु तेरे बदले ईसुन बड़ाय करसु, ने ईसुक मान्‌या आपणु आखा तेरु सेक-सींगार देखीन देखतात रय्‌न तेरी बड़ाय करसु। तीनु भुरसु करन्‌या मां तुहुं बी रवसु, काहाकी तुहुं ईसुन तीनी गवाय पर भुरसु कर्‌या, तीनी गवाय काजे हामु देखाड़ला।
\p
\v 11 ने हामु तुंद्‌रे वाटे भगवान सी जलम असी दुवा करजे की ए हामरा भगवान, तु ईनु काजे जो चुखलो जीवन जीवणे करीन बुलावलु छे, असो जीवन जीवणे करीन जुर आप। ने जे ईसुन भुरसे ज काम करने बाजी र्‌या, तीनु कामेक तु पुरो कर, ने भलाय करनेन जी मरजी छे ची आखी तारी ताकत सी पुरी करनी दे। 
\v 12 असा करीन आपणा भगवानेन ने मालीक ईसु मसीन गीण-दया सी तुहुं असा करसु ती, तुंद्‌रे अनसारे आपणा मालीक ईसु मसीन नावेन बड़ाय हवसे। ने तेरे साहरे तुंद्‌री बी बड़ाय हवसे।
\c 2
\s ईसुन पछु आवणेन पेहेल कळीम वीतणे वाळी वात
\p
\v 1 ए भायस्‌यो ने बहणस्‌या, हय हामु आपणा मालीक ईसु मसीन पछु आवणेन बारामां, ने तीने टेमे आपणुक, तेरे अगळ भेळा हवणेन बारामां असा लीलघाय्‌न कवजे; 
\v 2 मालीक ईसुन चु दाहड़ु आय गुयु करीन कुय बी तुहुंक कवसे, तत्‌यार तुहुं घाबरायजु घुण, नी ते तीनी वात पर तत्‌यारुत भुरसु करीन खडळ-वडळ\f + \fr 2:2 \fr*\fq खडळ-वडळ \fq*\ft अस्थिर \ft*\f* घुण हय जावु, भले चु कहण्‌यु असु दावु करसे की जी वात ते चुखलु जीव-आत्‌मा मेसेक कहलु, नी ते पोल्‌लु ईसुन पावर्‌यु असु कय र्‌यु, नी ते चिट्‌ठी मां असोत लिखलो छे, तेबी तींद्‌री घुण सामळता। 
\v 3 कसा बी काहनाक ने वात मां आय्‌न ठगायजु घुण, काहाकी जत्‌यार लग भगवानेन वीरुद नी करे, ने तींद्‌रु डाहलु जु पापेम पुसायलु माणुस उजेंतु नी हवे, तेरो नास हवणे वाळोत छे, ती लग ईसुन आवणेन दाहड़ु नी आवे। 
\v 4 पापेम पुसायलु चु माणुस भगवानेन वेरी बणसे ने चु मटाय करीन देवता कहवायण्‌या आखा सी ने पुजायणी आखी देवधाणी सी मेत मटु छे करीन हक जमाड़से। ने मेत भगवान छे असु दावु करीन भगवानेन मंदीर मां बसीन राज करने बाजी जासे।
\p
\v 5 जत्‌यार मे तुंद्‌रे पुठ्‌ये हतलु, तत्‌यार मे तुहुं काजे जीत वात कह्‌या करतेलु ची वात तुहुंक हेर\f + \fr 2:5 \fr*\fq हेर \fq*\ft स्मरण\ft*\f* नी हय काय? 
\v 6 ने तुहुंक ते, जी वात मालुमुत छे की, पापेम पुसायला तीना माणसेक हय कुणीन जुर रुक र्‌यु; ने टाकले टेमे चु उजेंतु हवसे। 
\v 7 मे जी वात असु करीन कय र्‌यु, काहाकी भुतड़ान गरबड़ी करनी सातायली ताकत हय बी काम करने बाजी रय। बाकुन हय जु रुकणे बाजी र्‌यु, चु रुकणे वाळु टाकले टेमे छेटु हवणे लग, पापेम पुसायला माणुस काजे उजेंतु हवणे सी रुकी रवसे। 
\v 8 जत्‌यार लग रुकणे वाळु छेटु हय जासे, ती नेम नी मान्‌यु पापेम पुसायलु चु माणुस उजेंतु हवसे। बाकुन जत्‌यार मालीक ईसु आपसे दाहड़े, आपसान सेक-सींगार भेळु उजेंतु हवसे, तीने टेमे चु तीना काजे आपसे फुकेत मार नाखसे ने तत्‌यारुत चु गरबड़ी करन्‌यु सर जासे। 
\v 9 तीना गरबड़ी करन्‌या, भुतड़ान\f + \fr 2:9 \fr*\ft शैतान भुतड़ु\ft*\f* कामे लीन आवसे, जसु भुतड़ु लुच्‌चु छे, चु बी लुच्‌चु रवसे ने आखी भातीन ताकत सी भरायलु रवसे ने कदी देख्‌या नी, तीनु कामेन सहलाणी देखाड़से, 
\v 10 ने नास हवणे वाळा वाटे जे धरमेन काम नी करे चे आखी भातीन धुकान साते आवसे, काहाकी चे छाचली वात सी परम नी कर्‌या तेरेसी तींद्‌रु छुटकारु हवे। 
\v 11 तेरेमां भगवान तींद्‌रे मां एक भटकाय देणेवाळी ताकत मकलसे काहाकी चे झुटी वात पर भुरसु करे। 
\v 12 काहाकी जतरा माणसे छाचली वात पर भुरसु नी करे, ने जे धरमेन काम नी हय तीनु कामे सी खुस हवे, तीनु आखा काजे डंड जड़े।
\s तुहुं छुटकारा वाटे नेवाड़ला
\p
\v 13 ए भायस ने बहणस्‌या, तुहुं मालीक ईसुन लाटेक्‌ला छे। भगवानेन जीव-आत्‌मा सी चुखला बणीन, ने ईसुन खुस-खबरेन छाचली वात पर भुरसु करीन छुटकारु हात करनु चाहजे, करीन भगवान तुहुं काजे सुरु सीत नेवाड़ लेदु, ने हामु भगवान सी तुंद्‌रे वाटे हर घड़ी बेसका वारु कह्‌जे। 
\v 14 ने हेरेन करीन हामु तुहुं काजे छुटकारान बारामां सीकाड़जे, ने तेरे सी भगवान तुहुं काजे बुलायु हेरेसी की, तुहुं बी हामरा मालीक ईसु मसीन सेक-सींगार, पुथल्‌यान तसु पेहेर लेवु। 
\v 15 तेरेमां हामरा भायस ने बहणस्‌या, टणका रहु; जी-जी वात हामु तुंद्‌रेन्‌चां रय्‌न सीकाड़ला ने अळी चिट्‌ठीन अनसारे सीकाड़ला, तीनीत पाळनी पर टेकला रहु।
\p
\v 16 हामरु मालीक ईसु मसी तुत, ने हामरु बास भगवान, जु हामरे सी परम राख्‌यु ने गीण-दया सी जलमकी सांती ने मट्‌ली वारु आस आप्‌यु। 
\v 17 तुंद्‌रा मन मां सांती देय ने तुहुं हरेक वारु काम ने बुले मां टणका करे।
\c 3
\s हामरे वाटे दुवा करजु करीन कहें
\p
\v 1 आकरी मां, हामरा भायस ने बहणस्‌या, हामरे वाटे दुवा कर्‌या करजु की मालीकेन बुले असा मामार वाटाये ने सेक-सींगार काजे हात कर लेय, जसों तुंद्‌रे मां हयो, 
\v 2 दुवा करता रवु की आपणु भटकायला माणसे ने भुंडात माणसे सी छेटे रवु काहाकी आखा माणसेन मालीक पर भुरसु नी रवे।
\p
\v 3 बाकुन मालीक ते भुरसा मां पाक्‌कु छे, चु तुंद्‌री ताकत काजे बड़ावसे ने तुहुं काजे तीना वेरी सी बचाड़ीन राख्‌से। 
\v 4 हामुक मालीक मां रय्‌न तुंद्‌रे पर भुरसु छे, की जी-जी हुकुम तुहुंक देजे, तीनुक तुहुं मानु, ने मान्‌ता बी रवसु।
\p
\v 5 भगवानेन परम ने मसीन गम\f + \fr 3:5 \fr*\fq गम \fq*\ft धीरज\ft*\f* भीणी मालीक तुंद्‌रा मन काजे मनवी लेणु चाहजे।
\s मंडळीन उजग्‌या माणसेक सुदारने करीन, पोलुस हुकुम आपे
\p
\v 6 हामरा भायस ने बहणस्‌या, हामु तुहुंक आपणा मालीक ईसु मसीन नाव सी हुकुम देजे की, तुहुं तीनु भायस्‌योन चाल मां धरु, जे उजगाये हींडी फीरीन जीवे। जी सीकापण तुहुंक हामरे धड़े सी जड़ली छे, तीनी सीकाड़ली वातेन अनसारे ते, चे जीवे। 
\v 7 काहाकी तुहुं आपसात जाणु, की काहनी ढंग सी हामरेन तसी चाल-चालनु चाहजे, काहाकी हामु तुंद्‌रे ईचमां उजगाय नी कर्‌या। 
\v 8 ने काहनाक ने रुटु फुकट मां नी खादा; बाकुन काठलो काम ने मेहनत सी रात दाहड़ु काम धंदु करतेला, काहाकी तुंद्‌रे मायन काहनाक पर बुजु नी आवे। 
\v 9 असो नी, की हामुक हक नी हय; बाकुन हेरेसी की हामु तुंद्‌रे वाटे दाखलु ठेरजे, ने तुहुं हामरेन तसी चाल चालु। 
\v 10 ने जत्‌यार हामु तुंद्‌रेन्‌चां हतला, तत्‌यार बी जी हुकुम तुहुंक देदला, की कदी काहनुक काम करने नी हींडे, ती खाणु बी नी चाहजे।
\p
\v 11 हामु सामळजे, की कतरा माणसे तुंद्‌रे ईचमां उंजगाय्‌न चाल चाले, ने काय काम नी करे, बाकुन दीसरा काजे खुटी कर्‌या करे। 
\v 12 असला काजे हामु मालीक ईसु मसी मां हुकुम देजे ने समजाड़जे, की हुगा-हुगा काम करीन खाया करु।
\p
\v 13 ने तुहुं ए भायस्‌यो ने बहणस्‌या, भलो करने मां हिम्‌मत मां छुड़ु। 
\v 14 कदी काहनुक हामरी ईनी चिट्‌ठीन वात काजे नी माने, ती तीना माणसेन बारामां मंडळी मां खबर करजु, ने तेरी सात संगात मां घुण रहु, ने तत्‌यार हयु ज देखीन लाजवाय जासे। 
\v 15 तेबी तीना काजे तुहुं आपसान वेरी समजीन, वेहवार घुण करु; बाकुन भायस समजीन समजाड़ देवु।
\s आकरी बुले
\p
\v 16 मालीक ईसु जु सुक-सांतीन झीर छे, हयु खुद, तुहुं आखा पुठ्‌ये रवीन तुहुं काजे आखी भातीन सुक-सांती आप्‌या करनु चाहजे।
\p
\v 17 मे पोलुस, मारे हाते सी तुहुं काजे आवीस ने आवजी कहींन लिखी र्‌यु; मारा आखा चिट्‌ठीया मां मे असुत लिखो ने मारी लिखणेन जीत सहलाणी छे।
\p
\v 18 आपणा मालीक ईसु मसीन गीण-दया\f + \fr 3:18 \fr*\fq गीण-दया \fq*\ft अनुग्रह\ft*\f* तुंद्‌रे आखा पुठ्‌ये रया करे।