\id 1TH - Bhilali Standard Project
\ide UTF-8
\h 1 थीसलुनीकी
\toc3 1 थीसलुनीकी
\toc2 1 थीसलुनीकी
\toc1 थीसलुनीकी मंडळी वाटे पोलुसेन पेहली चिट्‌ठी
\mt2 थिस्सलुनीकियों की कलिसीया के लिए पौलुस की पहली पत्री
\mt1 थीसलुनीकीन मंडळी वाटे पोलुसेन पेहली चिट्‌ठी
\imt 1 थीसलुनीकीन बारामां
\ip थीसलुनीकी काजे पेहली चिट्‌ठी नेवताळा पोलुस \xt 1:1\xt* साहरे लिखी गुयलु। जी पेहली चिट्‌ठी हय सके ज्‌य पोलुस लिखलु ज्‌य बाइबीलेन हीस्‌सु बण गुयु ने ज्‌य ईसुन पयदा हवणेन लक-भग 51 साल पछे लिखी गुयलो। पोलुस कुरींथी मां हतलु जत्‌यार हीयु थीसलुनीकीन मंडळी काजे जी चिट्‌ठी लिख्‌यु, एक मंडळी तेरेमां हीयु आपणी दीसरी कावा सेवा करनेन चाल पर जागु बणावलु \xt नेवताळा 17:1-10\xt* नेवताळान कामेन किताप मां ज्‌य कवलो छे की मंडळी थुड़ाक यहुदी माणसे ने बेसका युनानी माणसे सी बन्‌नली हतली।
\ip मंडळीन जागु बणावणेन पछे बी पोलुस थीसलुनीकी मां रवणे मां ताकत वाळु नी हतलु हेरेसी हीयु पछे एनी चिट्‌ठी काजे चाहान भुरसु करन्‌या काजे हीम्‌मत राखणे करीन मकल्‌यु। चिट्‌ठी मां बेसका बारामां भेसकी मेल्‌यो ने ईसु पर भुरसु करन्‌या काजे कसो रवणु चाहजे हेरे बारामां जारा-जाराक समजाड़न्‌यु। पोलुस मसीन दीसरी कावा आवणे पर थुड़ाक हेर राखे कांखुर मायन थीसलुनीकीन मंडळीन भुरसु करन्‌या एना बारामां खास रुप सी मरजी राखे। पोलुस मसीन दीसरी कावा आवणे काजे भगवान काजे खुस करने वाळु जीवन जीवणेन काम मां लावणेन रुप मां काम मां लाय गुयो। \xt 5:6-8 \xt*
\iot बाहरती वात
\io1 1. पोलुस एनी चिट्‌ठीन सुरुवात मंडळीन आव-भाव करने ने हींद्‌रे वाटे भगवान काजे भगवान काजे तु बेसकु वारु कह्‌वणेन साहरे करे। \ior 1\ior*
\io1 2. अळतेन चु आपणा कामेन ने तीमुथीयुसेन साहरे लावला खबरेन बारामां बताड़े। \ior 2—3 \ior*
\io1 3. अगलु पोलुस समजाड़े की कसा ईसु पर भुरसु करन्‌या काजे ईसुन दीसरी कावा आवणेन उजाळा मां रवणु चाहजे। \ior 4:1—5:15 \ior*
\io1 4. पोलुस मंडळीन माणसे काजे पछु अळी आव-भाव करे ने हेरे पर भुरसु करने वाटे कह्‌यु की मंडळी मां एक-एक माणसे काजे चिट्‌ठी काजे भन्‌नु चाहजे। \ior 5:16-28\ior*
\c 1
\p
\v 1 पोलुस ने सीलवानुस तीमुथीयुस,
\p भीणी सी थीसलुनीकीया सहर मां रहणे वाळी ईसुन मंडळीन माणसेक लिख रयु, तुहुं जे भगवान बास मां ने मालीक ईसु मसी मां भुरसु करीन रवे।
\p तुहुं आखा काजे भगवानेन गीण-दया ने सुक-सांती तुंद्‌रे पुठ्‌ये रवे।
\s थीसलुनीकी मंडळी वाळान भुरसु ने जीवन
\p
\v 2 हामु तुहुं आखा वाटे जलम भगवान काजे बेसकु वारु कवता रवजे। ने हामरी दुवा मां हामु तुंद्‌री हेर करता रवजे। 
\v 3 तुहुं ते भगवान बास पर भुरसु करीन वारलु काम कर र्‌या, ने परम सी काठो काम कर रया, ने आपणु मालीक ईसु मसी आपणुक वाचाड़ने करीन सरगे सी पछु आवसे करीन तुहुं आस कर रया, ने ईनी आसेन गम खाय्‌न वाट देख रया। ईनी वातेक आपणा भगवान बास अगळ अळी अळीन हेर करीन हामु तुंद्‌रे वाटे भगवान काजे बेसकु वारु कह्‌या करजे। 
\v 4 भगवानेन परमवाळा मारा भायस्‌यो ने बहणस्‌या हामु जाणजे की तुहुं तेरा नेवाड़ला छे। 
\v 5 काहाकी हामु जी खुस-खबर तुहुं काजे सामळावला, तीनी खुस-खबर मां बुले अतरात नी हतला, बाकुन हामरा बुल भेळा, भगवानेन चुखली-आत्‌मान ताकत बी उजेंती हवली। तुंद्‌रे वाटे, हामु तुंद्‌रे ईचमां कसा जीया, जी वात तुहुं देख लेदा; हामरे सी सामळावली खुस-खबर पर तुंद्‌रु पाक्‌कु भुरसु हय गुयु। 
\v 6 ने माणसे तुहुंक बेसका वेला पाड़्‌या; तेबी भगवानेन चुखली-आत्‌मा सी जड़ली खुसी भेळा, तुहुं हामरा ने मालीक ईसुन चाल धरन्‌या बण गुयला। 
\v 7 ने तेरेमां मकीदुनीया जीलाम ने अखाया जीलाम रहण्‌या, ईसुक मान्‌या आखा माणसेन चाल धरने करीन एक वारलु दाखलु बण गुया। 
\v 8 काहाकी तुंद्‌रेन्‌चां सी अतरात नी मकीदुनीया ने अखाया मां मालीकेन बुल सामळाया, बाकुन तुंद्‌रु भुरसु जु भगवान पर छे, ची वात आखे दुर जाती रय, की हामुक कहणेन जरुवत बी नी पड़ी। 
\v 9 काहाकी चे आफरतात हामरा बारामां बताड़े, की तुहुं कसा मुरती पुजा छुड़ीन भगवान भीणी फीर्‌या, काहाकी जीवला ने छाचला भगवानेन सेवा करे, 
\v 10 ने तेरा पुर्‌यान सरग सी आवणेन वाट देखता रहु तीनाक चु मर्‌या-सर्‌या मां सी जीवतु कर्‌यु, मतलब ईसु, जु हामुक आवणे वाळी गरा\f + \fr 1:10 \fr*\fq गरा \fq*\ft प्रकोप\ft*\f* सी बचाड़े।
\c 2
\s पोलुस थीसलुनीकाय मंडळीक, तींद्‌रा ईचमां हवला सेवान कामेन बारामां हेर कराड़े
\p
\v 1 ए भायस्‌यो ने बहणस्‌या हामरो तुंद्‌रेन्‌चां आवणु फालतु नी हय, जी वात ते तुहुं काजे मालुम छे। 
\v 2 तुहुं जाणु की फीलीपी सहर मां ईसुन खुस-खबर सामळावणे गुयला, ती माणसे खुस-खबरेन बेसका वीरुद कर्‌या, ने हामुक बेसका वेला पाड़्‌या, तेबी हामु भगवानेन भुरसे, बीहे बीगुर तुंद्‌रेन्‌चां आया, ने तुहुं काजे ईसुन खुस-खबर सामळाया। जी वात बी तुहुं काजे मालुम छे। 
\v 3 काहाकी हिम्‌मत सी तुहुंक सीकाड़नु ने नी भरम सी छे ने नी वीटेळ्‌ळा सी छे, ने नी धुका सी छे। 
\v 4 बाकुन जसु भगवान हामुक कामका समजीन खुस-खबर सुपलु, हामु तसात बताड़जे; ने हामु माणसे काजे खुस करनेन कुसीस नी करजे बाकुन हामु ते तीना भगवान काजे खुस\f + \fr 2:4 \fr*\fq खुस \fq*\ft प्रसन्न\ft*\f* करजे चु हामरा मनेन वात काजे पारखे। 
\v 5 हामु तुंद्‌रे धड़े सी फायदु लेणे करीन, तुहुं बेसका वारु छे कय्‌न तुंद्‌रेन्‌चां कदी नी आया। ने हाय करीन हामु कदी ढंगड़ा नी कर्‌या। जी वात बी तुहुं जाण रया ने भगवान बी ईनी वातेन गवा छे। 
\v 6 हामु काजे माणसे भीणी सी ईज्‌जत नी चाहती, हव तुंद्‌रे भीणी सी बी, नी ने दीसरा भीणी सी बी ईज्‌जत नी चाहती।
\p
\v 7 हामु ते ईसु मसीन नेवताळा छे असा कय्‌न तुंद्‌रे पर हक जमाड़ सकजे; बाकुन तेबी हामु तुंद्‌रे साते असु दया कर्‌यु, जसी माय आपसा पुर्‌या काजे दुत पीयाड़ीन पाळे पुसे। 
\v 8 हामु तुंद्‌री बेसकी हेर करीन परम कर्‌या। तुहुं हामरे वाटे लाटेक्‌ला छे; तेरेमां हामु तुहुं काजे भगवानेन खुस-खबर सामळावणे अतरात नी, बाकुन हामरु जीव आपणे बी तीयार हय गुयला।
\p
\v 9 ए भायस्‌यो ने बहणस्‌या, तुहुंक हामरी काठी मेहनत ने हरबड़ हेर हसे। तीनु दाहड़ाम, तुंद्‌रे पर बुजु नी आवणु चाहजे, करीन हामु रात-दाहड़ु मेहनत करीन कमाय बी कर्‌या, ने खरचु करीन तुहुं काजे भगवानेन खुस-खबर सामळाया।
\p
\v 10 तुहुं गवा छे, ने भगवान बी गवा छे, की तुहुं भुरसु करने वाळान ईचमां हामरु वेहवार कसु चुखलु ने धरमेन ने नी-गुनाळु \f + \fr 2:10 \fr*\fq नी-गुनाळु \fq*\ft निर्दोष\ft*\f*रयु। 
\v 11 जसु बास तेरा पुर्‌या साते वेहवार करे, तसात हामु बी तुंद्‌रे साते वेहवार करला। 
\v 12 जसात हामु तुहुंक भात-भात्‌ये समजाड़ीन सीकाड़ता रया; हामु कह्‌या भगवान तुहुंक हेरा राज मां, ने राजेन सेक-सींगार मां, साजल्‌या बणने करीन तुहुंक बुलावलु छे; तेरेमां तुहुं भगवानेक गमे तसों जीवन जीवु।
\p
\v 13 ने तेरेमां हामु भगवानेक वारु छे करीन जलम कवता रवजे, काहाकी हामरे सी जत्‌यार तुहुं भगवानेन खरला बुले समजीन आवर्‌या ने छाचलीन हयु वचन भगवानेन छे, ने तुहुं जे भुरसु कर्‌या, तुंद्‌रा जे बुले बेसको काम करे। अतरामा ईनी वातेन करता हामु भगवान काजे बेसकु वारु कह्‌या करजे। 
\v 14 मेसेक यहुदीया जीलान, भगवानेन मंडळीन माणसे हेर आय रय। चे यहुदी माणसेम सी ईसु मसी पर भुरसु कर्‌या। तत्‌यार यहुदी दीसरा माणसे तीनुक वेला पाड़्‌या, तेबी चे ची वेला ने दुख वेठी लेदा। तींद्‌रेन तसात, जत्‌यार तुंद्‌रा माणसे तुहुंक वेला पाड़्‌या, तत्‌यार तुहुं बी ची वेला ने दुख वेठी लेदा। तेरेमां ए भायस्‌यो ने बहणस्‌या, तुहुं यहुदी ईसु वाळान चाल धरन्‌या बण गुयला छे। 
\v 15 चे मालीक ईसु काजे ने भगवानेन अघली वात बताड़ने वाळा माणसे काजे बी मार नाख्‌या ने हामुक तळ्‌या, ने भगवान तींद्‌रे सी खुस नी हय, ने चे आखा माणसे पर रुक लागाड़े, 
\v 16 ने चे नी-यहुदीया सी तींद्‌रा छुटकारा वाटे वाते करने सी हामुक रुके, काहाकी जलम आपणा पापेन गुळा\f + \fr 2:16 \fr*\fq पापेन गुळा \fq*\ft नपुआ\ft*\f* भरता रहे; बाकुन तीनु पर भगवानेन रीसेन गरा आय्‌त पड़ली छे।
\s पोलुस मंडळी काजे भेळु हवणेन हर करे
\p
\v 17 ए भायस्‌यो ने बहणस्‌या हामु थुड़ीक वार लग तुंद्‌रे सी छेटे हय गुयला, मन मां छेटे नी हया, बाकुन डील मां छेटे हय गुयला। तेरेमां हामु तुंद्‌रा मुंहडा देखणे करीन बेसका हेर कर रवला। 
\v 18 तेरेमां हामु तुंद्‌रेन्‌चां पछा आवणे कर रवला, खास करीन मे पोलुस, एक कावा नी बाकुन दुयेक कावा आवणे करलु, बाकुन भुतड़ु रुक लेदलु। 
\v 19 आपणु मालीक ईसु पछु आवसे तीने टेमे, तेरे धड़े सी हामुक ईनाम जड़नेन आस, ने खुसी ने ईज्‌जत आपणी पागड़ी कुण रवसे? तीने टेमे, तेरे अगळ हामुक मटाय करनेन उत्‌तर तुहुंत बणसु; नी की? 
\v 20 हामरी बड़ाय ने खुसी तुहुंत छे।
\c 3
\s पोलुस तीमुथीयुस काजे थीसलुनीकी मंडळी मां खबर्‌यु मकले
\p
\v 1 काहाकी जत्‌यार हामरे सी नी रह्‌वायो, ती हामु वीच्‌यार कर्‌या की एथेंस सहर मां रय जाजे, 
\v 2 ने हामु तीमुथीयुस काजे, जु मसीन खुस-खबर मां मदत करने वाळु हामरु भाय ने भगवानेन सेवक छे, असा करीन मकल्‌या की चु तुहुंक मजबुत करे ने तुंद्‌रो भुरसान बारामां तुहुंक समजाड़े, 
\v 3 काहाकी कुय दुख तकलीप वजे सी कमजुर नी हवे, काहाकी तुहुं आपसाक जाणु की हामु हींद्‌रेत वाटे नक्‌खी करलो छे। 
\v 4 काहाकी पेहलुत, जत्‌यार हामु तुंद्‌रेन्‌चां हतला ती तुहुंक कह्‌या करतेला की हामुक दुख तकलीप हाकलनु पड़से, ने असोत हवलो छे, जसा की तुहुं जाणु बी। 
\v 5 हेरे वजे सी जत्‌यार मारे सी नी रह्‌वायो, ती तुंद्‌रा भुरसान हाल जाणने करीन मकल्‌या, की कांखुर असो नी हय जाय की पारखणे वाळु तुंद्‌री पारख कर्‌यु, ने हामरी मेहनत फालतुत\f + \fr 3:5 \fr*\fq फालतुत \fq*\ft व्यर्थ\ft*\f* हय जाय।
\p
\v 6 बाकुन हय्‌स ते तीमुथीयुस तुंद्‌रेन्‌चां सी पछु आवीन तुंद्‌रे बारामां हामुक असु सामळायु, थीसलुनीकी मंडळीन माणसे वारु ईसु पर भुरसु कर र्‌या, ने चे परमेन खुस-खबर सामळाया ने ईनी वातेक बी सामळाया की तुहुं जलम परम सी हेर करे। ने जसा आपणु तीनुक देखणेन हेर कर्‌या, तसात चे बे आपणु काजे देखणेन बेसका हेर करे। 
\v 7 तेरेसी ए भायस ने बहणस्‌या, हामु हामरा आखा दुख ने तकलीप मां तुंद्‌रा भुरसा सी तुंद्‌रे बारामां सांती जड़ी। 
\v 8 काहाकी हय कदी तुहुं मालीक मां काठा रहु ती हामु जीवला छे। 
\v 9 तुंद्‌रा बारामां सामळीन, तुंद्‌रे सी जी खुसी जड़ रय, तीनी खुसी सी हामु भगवान काजे कसा कहीन बेसकु वारु कवजे, जी वात हामुक समज मां नी आवती। 
\v 10 तुहुंक भेळा हवणे करीन ने तुंद्‌रा भुरसा सी सीकणे मां जी बी कसर छे, ची कसर पुरी करने करीन हामु रात दाहड़ु भगवान सी दुवा कर्‌या करजे।
\p
\v 11 हामरी हेर असी छे, तुंद्‌रेन्‌चां आवणे करीन भगवान बास ने मालीक ईसु मसी, तुंद्‌रेन्‌चां आवणे करीन अगवाय करे! 
\v 12 ने मालीक असु करे की जसा हामु तुंद्‌रे सी परम कर्‌या तसात तुंद्‌रा परम बी तुंद्‌रे मां ने आखा माणसे साते अधे, ने बड़तो जाय, 
\v 13 काहाकी हयु तुंद्‌रा मन काजे काठो करे, काहाकी जत्‌यार हामरु मालीक ईसु आपसा आखा चुखला माणसे भेळु आवे, ती चे हामरा भगवान बास अगळ चुखला ने छाचला बणावे।
\c 4
\s चुखा हवणेन बुलावु
\p
\v 1 ए भायस्‌यो ने बहणस्‌या, भगवानेन मरजीन अनसारे कसों जीवणु छे, ने तीनाक कसों खुस करनु छे; ईनी वातेन सीकणु तुहुं हामरे धड़े सी सीक लेदा, ने ईनी सीकणेन अनसारे तुहुं जीवता आय रया। हय हामु मालीक ईसुन नावे तुंद्‌रे धड़े लीलघाय करीन तुहुंक ज समजाड़जे, भगवानेक खुस करता जाय्‌न जीवणे मां तुहुं अगा बड़ता जावु। 
\v 2 काहाकी तुहुं जाणु की हामु मालीक ईसु भीणी सी तुहुंक काहनी-काहनी हुकुम बताड़्‌या। 
\v 3 तुहुं चुखला रहणु चाहजे; जीत भगवानेन मरजी छे; मतलब छीनाळा सी छेटे रहु। 
\v 4 ने तुंद्‌रे मां सी हर एक जणु चुखलु ने ईज्‌जत करीन आपणी लाडी साते रहणे जाणे। 
\v 5 छीनाळाय ने चंगली हेर सी छेटे रवजु। भगवान काजे नी जाणे, असला नी-यहुदीया माणसेत असी हेर करे। 
\v 6 की हीनी वात मां कुय बी आपसान भाय काजे नी ठगे ने अळी नी तेरे पर दावु लागाड़े, काहाकी मालीक असली आखी वातेन हीसाब लेण्‌यु छे। जी वात हामु पेहेल बी कहीन तुहुं काजे चेतावला। 
\v 7 काहाकी भगवान आपणु काजे वीटाळने करीन नी बुलायु, बाकुन तेरी नींगाम चुखला रहणे करीन बुलावलु छे। 
\v 8 हेरे वजे सी जु कुय हीनाक नानु जाणे तीना माणुस काजे नी बाकुन भगवान काजे नानु जाणे चु तेरी चुखली-आत्‌मा तुसेक आपे।
\p
\v 9 मंडळीन भाय-बहणस्‌यान परमेन बारामां तुहुं काजे लिखणु जरुड़ी नी हय, काहाकी तुहुं काजे आंबा-सांबा परम करनेन वात भगवान सी सीकला छे। 
\v 10 ने आखा मकीदुनीया जीलान आखा मंडळीन आखा भाय-बहण्‌स्‌या काजे परम कर रया। तेबी अतरोत घुण कहुं। ए भायस्‌यो ने बहणस्‌या, हामु तुहुं काजे समजाड़जे की तुहुं आंबा-सांबा बी जादा परम करता जावु। 
\v 11 ने जसा हामु तुहुं काजे पेहेल हुकुम आपीन कहला तसात हय बी कवजे की दीसरान काम-धंदा मां अड़चन मां नाखु। आपसोत काम करता रवु, ने खुदेन हातेन कमाय सी खावु। 
\v 12 तत्‌यार तुहुंक कसरायला माणसेन तसा दीसरान भुरसे रहणु नी पड़े, ने मंडळीन बाहरना माणसे बी तुंद्‌री जीवाय देखीन तुहुंक वारु कवसे।
\s मालीकेन पछु आवणेन
\p
\v 13 ए भायस ने बहणस्‌या, हामु नी चाहता की तुहुं तींद्‌रा बारामां जे सुय गुयला चे तींद्‌रा बारामां अंजाण्‌या\f + \fr 4:13 \fr*\fq अंजाण्‌या \fq*\ft अज्ञानी\ft*\f* रहु, असो नी हवे की तुहुं दीसरान तसा रड़ु ने कलप्‌या करु, तीनुक काय बी आस नी रवे। 
\v 14 कदी हामु भुरसु करजे की ईसु मर गुयलु, ने पछु जीवतु बी हय गुयु अतरामा जे ईसु पर भुरसु करीन मर गुया, भगवान तीनुक बी पछा जीवता करीन ईसु पुठ्‌ये ली जासे।
\p
\v 15 काहाकी हामु मालीकेन बुलेन अनसारे ज कह्‌जे जत्‌यार ईसु कळीम पछु आवसे, तत्‌यार ईसु पर भुरसु करन्‌या मरला भाय-बहणस्‌या जीवता हय्‌न ईसुक भेटणे पेहेल जासे। अळतेन आपणु जे जीवतेला छे, ने ईसुक आवता लग जीवतेला रवसु, तींद्‌रे पछळ ईसुक भेळा हवणे जासु। 
\v 16 काहाकी तीने दाहड़े, पेहेल मालीक ईसु खुद सरगे सी उतेरतु जाय्‌न कुर्‌रु दीन बुलावसे। तीने टेमे एक मटला सरग वाळा खबर लावण्‌यान अवाज सामळायसे। एक सरग वाळु खबर लावण्‌यु, भगवान अगे सी फेप्‌या वाजाड़से। तत्‌यार जे ईसु मसी पर भुरसु करता जाय्‌न मर गुया, चे पछा जीवता हवसे। 
\v 17 तत्‌यार आपणु बी जे जीवतेला रवसु, ने बचला रवसु, ईसुक भेळा हवणे करीन वादळा मां हाकलायन जासु। ईसुक मान्‌या आपणु आखा, सरगेम ईसु साते भेळा हवसु, ने असा करीन चां आपणु जलम मालीक ईसु पुठ्‌ये रवसुन। 
\v 18 हेरे वजे सी तुहुं जी वात कहीन एक दीसरा काजे हिम्‌मत आप्‌या करु।
\c 5
\s ईसु पछु आवसे, तीने टेमे भेळा हवणे तीयार रवु
\p
\v 1 ए भायस्‌यो ने बहणस्‌या, हेरे बारामां लिखणेन जरुवत नी हय की टेमेन ने दाहड़ान बारामां तुंद्‌रे वाटे काहींग लिखजे। 
\v 2 काहाकी तुहुं आपसा वारु जाणु की जसु राते चुट्‌टु आवे, तसुत मालीकेन दाहड़ु बी आवणे वाळु छे। 
\v 3 जत्‌यार माणसे कवता हसे, “सांती मां छे \f + \fr 5:3 \fr*\fq सांती मां छे \fq*\ft कुशल\ft*\f*ने काय डर नी हय,” ती तींद्‌रे पर उचकाणुन नास हवणेन दुख आय पड़से, जसों भार पाये बायर पर पीड़ा दुख ने चे काहनी बी रीती सी नी बचे। 
\v 4 बाकुन ए भायस ने बहणस्‌या, तुहुं आंदारला मां नी हय, की चु दाहड़ु तुंद्‌रे पर चुट्‌टान तसु आय पड़े। 
\v 5 काहाकी तुहुं आखा वीजाळान अवल्‌यात ने दाहड़ान अवल्‌यात छे, हामु नीते रातेन छे, ने नी आंदारलान छे। 
\v 6 तेरेमां हामु दीसरान तसा सुवता नी रवजे, पर जागता ने समळीन रवजे। 
\v 7 काहाकी जे सुवे चे रातेत सुवे, ने जे दारु पीन छाके चे रात मात छाके। 
\v 8 आपणु ते दीसुन छे, तेरेमां भुरसान ने परमेन झीलम पेहरीन, ने छुटकारु हात करनेन आस काजे टुपान तसा पेहरीन, समळीन रहणु चाहजे। 
\v 9 काहाकी भगवान आपणु काजे डंड आपणे करीन नी नेवाड़्‌यु, बाकुन आपणा मालीक ईसु मसीन पापेन डंडेम सी छुटकारु जड़े करीन नेवाड़लु छे। 
\v 10 ईसु हामरे वाटे हेरे वजे सी मर्‌यु की हामु चाहे जागता रवजे चाहे सुवता रवजे, आखा मेळीन तेरेत साते जीवजे। 
\v 11 तेरेमां तुहुं एक दीसरान हिम्‌मत बड़ावता रहु, ने एक दीसराक चुखली-आत्‌मा मां टणका करता रहु, जसा तुहुं करता आय रया।
\s चिट्‌ठीन पेहली सीकणो
\p
\v 12 ए भायस्‌यो, हामु तुहुं काजे लीलघाय्‌न कय र्‌या की, जे तुंद्‌रे वाटे काठी मेहनत करने बाजी रया, ने मालीक ईसु मां तुंद्‌री अगवाय करे, ने जे तुहुं काजे सीकाड़े, तींद्‌री सामळीन तींद्‌री ईज्‌जत करु। 
\v 13 ने तींद्‌रा काम वाटे, तुहुं परम सी तींद्‌रु वारु आव-भाव करु; ने हेळी-मेळीन\f + \fr 5:13 \fr*\fq हेळी-मेळीन \fq*\ft मेलमिलाप\ft*\f* रहु।
\p
\v 14 ए भायस्‌यो, हामु तुंद्‌रे सी जी लीलघाय कवजे की गलत चाल रया, तीनु काजे तुहुं लड़ीन समजाड़ु, ने बीहेतेला काजे हिम्‌मत आपु, ने लुल्‌ला काजे संभाळु, ने आखान वेहवार काजे वेठता जाय्‌न गम खावु। 
\v 15 चेतीन रहु! कुय करु दीसरान कुहराय्‌न बदले कुहराय मां करु; बाकुन तुहुं जलम एक दीसरान ने मंडळीन बाहरनान बी भलो कर्‌या करजु।
\p
\v 16 जलम खुस रवजु। 
\v 17 भगवान धड़े अळी-अळीन दुवा कर्‌या करजु, 
\v 18 हर वात मां, भगवान काजे बेसकु वारु कवता रहु। काहाकी ईसु मसी मां तुंद्‌रे धड़े भगवानेन बी जीत मरजी छे।
\p
\v 19 भगवानेन चुखली-आत्‌मान अगवाय काजे घुण रुकता। 
\v 20 खास करीन, भगवानेन अघी सी आवणे वाळी वात बताड़न्‌या माणसे वाटे कहली वातेक फालतु घुण समजु। 
\v 21 आखी वात काजे पारखीन देखणु चाहजे: जी वारु छे, तीनी वातेक मानीन जीवु। 
\v 22 आखी भातीन नाव-बद्‌दी सी छेटा रहु।
\p
\v 23 सांतीन भगवान आपसुत तुहुंक पुरी रीती सी चुखु करे, ने तुंद्‌री जीव-आत्‌मा ने मन ने डील हामरा मालीक ईसु मसीन आवणे लग पुरु-पुरु ने नी-गुनाळा बणीन रवे। 
\v 24 तुंद्‌रु बुलावणे वाळु खरलु छे, ने चु असुत करसे।
\p
\v 25 ए भायस्‌यो, हामरे वाटे दुवा करु।
\p
\v 26 आखा भायस ने बहणस्‌या काजे ईसुन चुखलु गुळु दीन वारला छे की पुछ्‌जु।
\p
\v 27 मे मालीक ईसुन हक सी तुहुं काजे कह्‌वो, जी चिट्‌ठी आखा भायस्‌यो काजे भणीन सामळावजु।
\p
\v 28 आपणा मालीक ईसु मसीन गीण-दया तुंद्‌रे पुठ्‌ये बणीन रहे।