\id 2TI Bugun: Bible Translation 1st Edition
\ide UTF-8
\ide Unicode (UTF8)
\h 2 Thimothi
\toc1 THIMOTHI shii Phaul re-è Nyichiieng pha Jigigam
\toc2 2 Thimothi
\toc3 2Thi
\mt1 THIMOTHI
\mt2 Shii Phaul Re-è Nyichiieng Pha Jigigam
\imt Yaophi
\ip \bk Phaul re-è Thimothi shii Nyichiieng pha Jigigam \bk* filiao nong gieng pha nane din pha ilkhi duiine boh shii um pha nujo pha muyua Thimothi shii yao. Miyaosiu ne zud pha ji ro. Thimothi shii ne migi re-è Isu Masi ro khagi rek yi pha chiih-è izai yua pha Mua Wie ji nane Surua Ihèg shii kho pha, chiih-è airo masdo nane yuapho duiine blia rek pha zab shii diig duchoi shii awai blia ji rek pha lububo rek phi.
\ip Thimothi shii ne phriie “bi-ìe nane awie pha khnaingthek shii adoggieng bone, ji ne wie arek ro.” Jishii hanyie è ithek shii yoi pha branthek shii mua bie yi ro.
\ip Hì thek zab shii ne, Thimothi shii zeypho awai chai pha miirag nane awai migi, jum, miie, zud diig khui pha ji shii nowkhlei yie ro.
\iot Iliing shii um pha ji
\io1 Yaophi \ior (1:1-2) \ior*
\io1 Chiong nane yao \ior (1:3—2:13) \ior*
\io1 Yua nane phriie \ior (2:14—4:5) \ior*
\io1 Phaul awai ro tharo \ior (4:6-18) \ior*
\io1 Jongsha \ior (4:19-22) \ior*
\c 1
\p
\v 1 Hamangkhung-aphuii è yang pha Isu Masi ro guaphasamoy Phaul re-è, nyie gethek yi Masi Isu rog ò um pha sbang pha chai shii yua pha thoh ge.
\p
\v 2 \x - \xo 1:2: \xo*\xt Blk 16:1\xt*\x* Guro bushun dufuii Thimothi shii:
\p Aphuii Hamangkhung-aphuii nane gethek ro Ithong Masi Isu ne na shii bushun, nane liijiing phi bo.
\s Lasothek phi pha nane lububo rek
\p
\v 3 Gune, gui blangthek re-è rek pha duiine hanyie shii gu è sang munow rog shii blia rek pha Hamangkhung-aphuii shii lasothek phi. Gu è hanai nane habiu gu misiathek shii na shii now pha duiine gu ne aishii laso phi ro. 
\v 4 Gu ne naro miegkhothek shii now muii ro, chiih-è gu ne na shii bajo riig yang muii ro, ji è gu ne lubo rog shii ley mua ruii phro. 
\v 5 \x - \xo 1:5: \xo*\xt Blk 16:1\xt*\x* Naro moi Lois nane naro amuii Eunise shii de um pha ichua, naro isiie migi shii de now khlei muii ro. Gu ne migi rek ji ne na shii de um ro. 
\v 6 Gu è wadthek na lakhung ruii magey shii Hamangkhung-aphuii re-è phi pha lasen shii isieng ruii yi pha ji pha chiang gu na shii nowkhlei yi. 
\v 7 Chiih-è Hamangkhung-aphuii re-è gethek shii phi pha Ragung ji ne gethek shii murumdum rek pha aphi ro; ji pha chiang, airo Ragung ne gethek rog blu, miie, nane zud pha zan phi ro.
\p
\v 8 Chiihphado, gethek Ithong shii khagi rek pha awo rabo, din ne Isu Masi chiang gu phatheg hà rai pha ji shii awo rabo. Ji phachiang shii, Hamangkhung-aphuii re-è na shii chua phi pha duiine Mua Wie pha diig shii nawai ro ichua rek bo. 
\v 9 Ai ne gethek shii ragia rek ne gethek shii awai bran rey yi pha ho phro, nyieliieshii gethek è nyie rek pha ji re-è asi ro, jishii nyieliieshii ai awai ro blia nane bushun re-è ro. Ai è gethek shii phi pha awai bushun ne ishak ajo ba pha ibi Masi Isu chiang re-è phijong, 
\v 10 Jishii thuh hì ne gethek ro Ragia Masi Isu wuii ruii pha ji è gethek shii dong phi ro. Ai è iy pha blu shii jong muii chiih-è muawie ji è a-iy pha chai ji shii dong phi.
\p
\v 11 \x - \xo 1:11: \xo*\xt 1Thi 2:7\xt*\x* Hamangkhung-aphuii è gu shii Mua Wie ji yao pha guaphasamoy nane masdo duiine boh ro, 
\v 12 chiih-è hì ne ji pha chiang re-è gu ne hì pha manathek shii diig rey ro. Jishii gu ne thuh de ley migi um ro, nyieliieshii gu ne hanyie shii migi rek aishii ne thieg, chiih-è migi rek nyie yi gu shii phi pha blia ji pha Inai ji thogdang pha ai ne ragia rek mua.\f + \fr 1:12: \fr*\fqa Ai è gu shii nyie yung pha ji; \fqa*\ft dinne \ft*\fqa Gu è aishii nyie yung pha ji.\fqa*\f* 
\v 13 Na shii iikhiing shii luagieng yi pha duiine, gu è na shii yuajong pha izai miyaogamthek shii chuh re-è khoh bo, chiih-è gethek ro Masi Isu rog ò rek pha miie nane migi shii rey ne rai bo. 
\v 14 Hanyie gethek shii rai pha Ragung So pha blu re-è nathek shii phi pha blia shii wie manathek shii ruii bone nathek shii yao ro.
\p
\v 15 Nathek ne thieg, zab Asia pha du-ùa, Phygelus nane Hermogenes dungdang ne gu shii ne thoh marui. 
\v 16 Onesiphorus haliingpho shii ne Ithong è bushun doh yi bo, nyieliieshii ai è gu shii ne bleb-bleb sang phi. Gu ne phatheg hà um pha ji shii de ai ne awo ro, 
\v 17 jishii ai ne Rom hà thogdang shii, ai ne gu shii adoh sapho shiine jao ne sow. 
\v 18 Ji pha Inai shii Ithong airo bushun ne aishii phi bo! Chiih-è ai ne gu shii Iphisus hà khama wie rek phi pha ji nathek ne wie re-è thieg ro.
\c 2
\s Masi Isu ro isiie siphahi
\p
\v 1 Gu dufuii, na shii, Masi Isu rog shii gethek ro ò bushun ji è gang rek bo. 
\v 2 Ai ne bajo khagi moe shii nathek gu re-è yoi pha muyuathek shii yie bo, chiih-è hanyie è gaithek shii de yua mua ruii pha, migi bran ithek shii phi muii bo.
\p
\v 3 Masi Isu ro isiie siphahi duiine, nawaithek ro diig ichua ji yie bo. 
\v 4 Wie blia rek ramuii pha siphahi ne awairo yungpho pha ophispho shii nya yie chiih-è fuang pha bran ro chai ne ithek blia shii alao yi. 
\v 5 Hanyie è chua ne ranpho ne khothek shii anuii sapho shii ne lasen ayang muii phro. 
\v 6 Raigpho hanyie è diig blia rek ruii pho ne ibi pha yamiing mathang um chid. 
\v 7 Gu è nyie yao pha chiang shii now bo, nyieliieshii Ithong re-è na shii zab ìd muii yi ruii phro.
\p
\v 8 Gu è yao pha Mua Wie ji duiine Isu Masi shii now bo, hanyie yi iy pha ji re-è hòi, hanyie yi Dawid ro riing ro. 
\v 9 Nyieliieshii gu è Mua Wie yua, gu ne diig rek chiih-è gu ne suruii pho duiine shiirnai rek ne phang muii. Jishii Hamangkhung-aphuii pha miyaogam ne shiirnaithek re-è aphang ro, 
\v 10 chiih-è ji pha giawo ne Masi Isu re-è rey pha nane idang pha biisiie yie pha ji shii ithek shii de mua yi pha Hamangkhung-aphuii è gua pha bran chiang shii gu ne zab shii zud. 
\v 11 Hì thek ne zai yao:
\q1 Gethek ai rog shii iy arone,
\q2 gethek de ai rog shii sieng ruii phro.
\q1
\v 12 \x - \xo 2:12: \xo*\xt Mth 10:33; Lug 12:9\xt*\x* Gethek ne athodang pha zud arone,
\q2 Gethek de ai rog shii kho ruii phro.
\q1 Gethek ne ai rog shii snai arone,
\q2 ai de gethek shii snai ruii phro.
\q1
\v 13 Gethek ne isiie asi arone,
\q2 ai ne isiie shii rai yi phro,
\q2 nyieliieshii ai ne awai shii biidiie asi rone arek mua phro.
\s Nuii pha bliapho
\p
\v 14 Nawai branthek shii hì now yi bo, chiih-è miyaogamthek chiang shii mak arek rabone ithek shii Hamangkhung-aphuii moe shii surua phriie bo. Hì ne wie arek ro, jishii hanyie è nuii pha branthek shii mua ruii phro. 
\v 15 Hanyie Hamangkhung-aphuii ro izai mua shii wie yua ne, awairo blia shii awo pha bliapho duiine, Hamangkhung-aphuii mieg moe shii ley nuii pha ji yang pha nawairo wie ji rek bo. 
\v 16 Nyie yi branthek shii Hamangkhung-aphuii re-è ruang rek bie pha, sohjambling pha nane bi-ìe miyao ji re-è ruang rek bo. 
\v 17 Ji-è yua pha ji ne saduii re-è isiu shii chie muii pha duiine ro. Ji pha manathek shii yua pha bran nyi ne Hemenius nane Philethus ro. 
\v 18 Ithek ne izai lumuii shii thoh marui rone gethek ro hòi pha ji ne reyjong rone yao ne izai pha gai migiphothek shii samdiig yi ro. 
\v 19 \x - \xo 2:19: \xo*\xt Ssb 16:5\xt*\x* Jishii Hamangkhung-aphuii è zieg pha ii-àk sarong ji shii ne anai mua ro; chiih-è ji shii ne hì pha miyaogamthek ne zeyjong ro: “Ithong ne thieg hanyie yi ai ro.” Chiih-è “Hanyie yi Ithong ro rone yao ithek ne awie pha rek pha ji re-è ruang khid chid.”
\p
\v 20 Hò boh shii ne zab ichuathek pha skhongthek nane shiikhiia um ro: giak ne san luman re-è rab chiih-è giakthek ne hing nane nyiak re-è rab pha ro; giak ne mugak blia pha ro, giak shii ne thaluii kho bie ro. 
\v 21 Hanyie è awaithek shii zab awie pha manathek re-è sud pho shiine, wie blia shii kho ruii phro, nyieliieshii ithek shii ne zid ne awaithek spho shii kho yi pha, zab wie blia shii kho pha sarojong ro. 
\v 22 Filiaomiliao shii awie pha chid pha ji shii thoh muii bo, chiih-è giang, migi, miie, chiih-è liijiingthek hanyie shii Ithong è nong phi pha ho pha igang lubu pho rog shii ò rek ne snak ne sgow bo. 
\v 23 Jishii bi-ìe nane asi pha khnaingthek re-è ruang rek bo; nathek ne thieg ithek ne gethek shii gui pha jiha the muii ro. 
\v 24 Nathek Ithong ro khiao ji re-è, nathek ne agui rabo. Nathek ne zab shii bushun rek bo, hanyie è nawai ro gidiegthek shii khriig rek pha duiine hanyie yi jum wie nane jum masdo duiine bushun rek bo, 
\v 25 na è makpho shii khriig rek shii jum um chid, ji duiine Hamangkhung-aphuii ne ithek shii lubukhid ne izai shii ìd mua yi pha wie jo phi ruii phro. 
\v 26 Chiih-è chiihphado awaithek munohthek wuii magey shii ne, chiih-è hanyie è ithek shii zum srane ithek shii ji pha yang hà nuii yi pha Sakhathong pha ibong re-è yoh rey ruii phro.
\c 3
\s Idohhè pha inai
\p
\v 1 Now bo iidohè pha inaithek shii diig pha ishak um ruii phro. 
\v 2 Branthek ne munyua, sgow, nyigodog, nane, wiangwe; ithek ne makhak-riing, awaithek aphuii-amuiithek shii anuii, bushun oi rai pha chiih-è giang de arek phro; 
\v 3 ithek ne bushun arek, khlam pha, guirai, chiih-è makhak-riing; ithek ne wie shii khiijai; 
\v 4 ithek ne khinrin rek bie yie, chiih-è nyigodog shii phieng rek; ithek Hamangkhung-aphuii è muna awaithek chid pha ji miie ba; 
\v 5 ithek ne gathek ro giang shii ibeng re-è khoh bie, jishii zai blu shii ne snai muii. Ji è rek pha branthek re-è ruang rai bo. 
\v 6 Ithek gai ne branthek hò khud chiih-è arey aho pha hò-amuiithek hanyie shii ithek ro layogthek pha ichiig re-è doh ne ruii pha chiih-è zab ichuathek è chid pha ji re-è yie ne ruii, 
\v 7 ji pha hò-amuii hanyie yi ìd pha idang bidiang jishii khuchung de izai athieg mua pho lakhung shii phriie phro. 
\v 8 \x - \xo 3:8: \xo*\xt Mul 7:11\xt*\x* Jannes nane Jambres è Moses shii gidieg rek pha duiine—Jihà branthek hanyie ro khanithek ne blia arey chiih-è hanyie yi migi shii buyud rey dun pha branthek ne izai shii gidieg rek. 
\v 9 Jishii ithek ne ruang awuii mua ro, nyieliieshii ithek ne khama bi-ìe rone zab è riig ruii phro. Jine Jannes nane Jambres shii de reyjong ro.
\s Idohhè yuathek
\p
\v 10 Jishii nathek ne gu muyua shii lua bo, chiih-è gu blia shii, chiih-è guro blia pha chai shii luagieng bo; nathek ne guro migi, guro jum, guro miie, guro zud, 
\v 11 \x - \xo 3:11: \xo*\xt Blk 13:14-52 \xt*\xt Blk 14:1-7 \xt*\xt Blk 14:8-20\xt*\x* guro diigchiaothek, chiih-è guro diigthek shii riigjong ro. Gu shii Anthiokh, Ikhonium hà rey, chiih-è Listhra, hà diig diigchiaothek rek pha ji shii gu è zud pha jithek ne nathek zab thieg jong! Jishii Ithong è gu shii jithek zab re-è ragia rek phi. 
\v 12 Zab hanyie magunde Masi Isu rog shii ò rek ne wie chai shii rai yang arone aishii ne khui ruii phro; 
\v 13 chiih-è awie pha branthek nane khinrinpho ne awie pha ji è awiedang pha ji è de gai shii khinrin ne awaithek shii de khinrin ruii phro. 
\v 14 Jishii nathek shii yuajong chiih-è migi shii chuh rek ne athodang pha zaithek rek bo. Nathek ne thieg hanyie yi nathek ro masdothek, 
\v 15 chiih-è now bo nathek ne ani pha ishak re-è yie ne, nyie yi nathek shii khani phi mua pha Masi Isu shii migi rek pha ji re-è giawo hà lua mua yi pha nathek ne So Jigithek shii ne thiegjong ro. 
\v 16 Zab Jigithek ne Hamangkhung-aphuii re-è thog chiih-è kho\f + \fr 3:16: \fr*\fqa Zab Jigithek ne Hamangkhung-aphuii re-è thog chiih-è kho sapho; \fqa*\ft dinne\ft*\fqa Zab Jigithek ne Hamangkhung-aphuii re-è thog jide kho sapho.\fqa*\f* ne izai shii yua, asi pha ji shii giung, biidiie shii khriig rek, chiih-è giang shii sieng pha nong phi, 
\v 17 ji è branthek hanyie è Hamangkhung-aphuii ro blia rek pho shii ley ìdlie ne wie blia zab shii khriig rek chid.
\c 4
\p
\v 1 Hamangkhung-aphuii nane Masi Isu um pha moe shii ne, hanyie è isieng nane iy pha ji shii chua ne, chiih-è nyieliieshii ai ne Saja duiine, khoh pha wuii ruii phro ne 
\v 2 mua shii yua bo, ji shii ne din ne de yao bo (ishak khriig magunde akhriig magunde), na è zab shii liijiing è yua pha duiine nyu ne, phriie chiih-è lububo rek phi bo gu ne surua khung phro. 
\v 3 Izai yua pha ji shii branthek ne anuii pha ishak thog magey shii, chiih-è nyie yi awaithek è yoi yang pha ji shii yao pha mana re-è mana masdothek shii khrab ne ithek ne awaithek è nyie nuii yang pha ji shii yua ruii phro. 
\v 4 Ithek ne izai nuii pha ji è khid dun phro chiih-è ithek ro khani ne phaluiihèg hà rai dun phro. 
\v 5 Jishii nathek ne zab khi-è-rek pha ishak shii magunde ji shii zud bo nawaithek shii zud bo; Mua Wie yua pha blia rek bo, Hamangkhung-aphuii ro khiao duiine nawaithek ro blia rek bo.
\p
\v 6 Gu shii ne; zid pha ishak thog sha ro; hì pha chai shii thoh pha guro ishak ne ichiih um ro. 
\v 7 Gu ran muii pha ji shii, gu ne ranjong, gu ne khama ran chid pha ji shii ranjong ne, chiih-è gu ne migi shii ruiijong.\f + \fr 4:7: \fr*\fqa Migi shii ruii; \fqa*\ft dinne \ft*\fqa Guro izai sbang shii.\fqa*\f* 
\v 8 Chiih-è thuh thiisa hàne nyie yi Hamangkhung-aphuii rog shii rai pha rangsua chiang yang pha lasen ji ne gu shii khan muii ro. Ithong hanyie yi giangthek Chua pha ji re-è gu shii lasen ne ji pha Inai gu shii phi ruii phro—Chiih-è gu shii asi bie pha, jishii zab hanyie è miie rog shii ai dong ruii phro ne khan pho shii de phi ruii phro.
\s Hanyiehanyie ro miyaogamthek
\p
\v 9 Gu shii khthiie wuii mua pha nawai shii bidiang. 
\v 10 \x - \xo 4:10: \xo*\xt Khol 4:14; Phlm 24; 2Khor 8:23; Gal 2:3; Thd 1:4\xt*\x* Demas ne duchung pha sohjambling rog shii miie dun chiih-è gu shii thoh srane Thesalonikha hà dun dun. Khresens ne Galathia hà dun dun, chiih-è Thaidas re-è Dalmathia hà dun dun. 
\v 11 \x - \xo 4:11: \xo*\xt Khol 4:14; Phlm 24; \xt*\xt Blk 12:12-25; 13:13; 15:37-39; Khol 4:10; Phlm 24\xt*\x* Gu rog shii Lug bie. Marg shii sow ne na rog shii noh ruii bo, nyieliieshii ai ne gu ro blia shii nong mua. 
\v 12 \x - \xo 4:12: \xo*\xt Blk 20:4; Iphi 6:21-22; Khol 4:7,8\xt*\x* Gu è Thychikhus shii Iphisus hà thoh gey. 
\v 13 \x - \xo 4:13: \xo*\xt Blk 20:6\xt*\x* Na dun shii, Kharphus rog Throas hà guro phadiig bia marui pha ji yie phi bo; chiih-è jigi de shukhug re-è rab pha jigi yiedo phi bo.
\p
\v 14 \x - \xo 4:14: \xo*\xt 1Thi 1:20; Chng 62:12; Rom 2:6\xt*\x*Jabapho Alezendar è gu shii ne bajo boh diig phi; awai è nyie rek ruii pha ji è Ithong ne aishii lasen phi ruii phro. 
\v 15 Nawai shii airo suang ji è ragia rek bo, nyieliieshii ai ne gethek ro mua shii bajo buii re-è gak muii ro.
\p
\v 16 Igobi gu ne gui shii ragia rek shii hanyie de gu chiang shii ariu ro; zab è gu shii ne ji thoh marui. Hamangkhung-aphuii ne ithek suang shii sasab ayie rabo! 
\v 17 Jishii Ithong gurog shii rai ne chua phi, ji è gu ne jab mua ne Gaibranthek shii yao muii pha; chiih-è gu ne iy pha yaothiek pha ji è ragia rey ge. 
\v 18 Chiih-è Ithong è gu shii zab awie pha ji è ragia rek ruii phro chiih-è awai ro hamangkhung pha Sajathua hà ragia è noh ruii phro. Aishii ne idang nane idang biisiie rey bo! Amen.
\s Idohhè pha salamthek
\p
\v 19 \x - \xo 4:19: \xo*\xt Blk 18:2; 2Thi 1:16-17\xt*\x*Gu è Phrisila nane Akhuila chiih-è Onesiphorus pha haliing shii de salamthek thoh gey. 
\v 20 \x - \xo 4:20: \xo*\xt Blk 19:22; Rom 16:23; Blk 20:4—21:29\xt*\x* Erasthus ne Khorinth hà rai dun ro, chiih-è gu è Throphimus shii Milethus hà thoh marui, nyieliieshii ai ne rad muii. 
\v 21 Hakhangshak athog ba pha ibi shii dun pha bidiang bo.
\p Eubulus, Phudens, Linus, chiih-è Khlaudia è awaithek ro salamthek thoh ge, chiih-è ji duiine gai Masiphothek de nathek zab shii salam thoh gey ro.
\p
\v 22 Ithong ne nathek ragung rog shii um bo.
\p Hamangkhung-aphuii ro bushun ne zab nathek rog shii um bo.