\id 2PE Baghlayani Bible
\ide UTF-8
\ide UTF-8
\rem Copyright Information: Creative Commons Attribution-ShareAlike 4.0 License
\h 2 पतरस
\toc1 पतरसो री दूजी पत्री
\toc2 2 पतरस
\toc3 2 पत
\mt1 2 पतरस
\mt2 पतरसो री लिखी री दूजी चिट्ठी
\imt भूमिका
\ip पतरसो री पईली चिट्ठी शुरूओ रे मसीहिया रे एक बऊत बड़े समुदाय रे नाओं लिखी थी। एते चिट्ठिया री खास चिन्ता रा विषय चूठे शिक्षका रे काम और तिना री शिक्षा ते पैदा बुरे चाल-चलणो रे खलाफ संघर्ष करना ए। इना समस्या रा उत्तर परमेशर और प्रभु यीशु मसीह रे सच्चे ज्ञानो रे बणे रे रणे ते मिलोआ, से ज्ञान जो तिना लोका रे जरिए पऊँछाई राखेया, जिने आपू प्रभु यीशु देखेया और तेसरी शिक्षा खे सुणेया। लेखक खास करी की तिना लोका रिया शिक्षा ते चिन्तित ए जो दावा करोए कि मसीह दुबारा ते वापस नि आऊणा। लेखक बोलोआ कि एड़ा लगोआ कि मसीह रे आऊणे रे देर ऊणे लगी री, पर सच्ची एड़ा इजी खे ऊणे लगी रा कऊँकि परमेशर नि चांदा कि कोई नाश ओ, बल्कि ये चाओआ कि सबी खे मन फेरने रा मौका मिलो।
\is रूप-रेखा
\io1 भूमिका 1:1, 2
\io1 मसीही बुलाहट 1:3-21
\io1 चूठे शिक्षक 2:1-22
\io1 मसीह रा आऊणा 3:1-18
\c 1
\s अभिवादन
\p
\v 1 आँऊ शमौन पतरस एसा चिट्ठिया खे लिखणे लगी रा, जो यीशु मसीह रा दास और प्रेरित ए। ये चिट्ठी आँऊ तिना सबी लोका खे लिखणे लगी रा जिने म्हारे परमेशर और उद्धारकर्ता यीशु मसीह री धार्मिकता रे जरिए आसा जेड़ा बऊत किमती विश्वास पाई राखेया। 
\v 2 आँऊ प्रार्थना करूँआ कि जिंयां तुसे परमेशर और म्हारे प्रभु यीशु मसीह रे ज्ञानो रे बड़दे जाओए, परमेशर तुसा लोका खे ओर बी जादा कृपा और शान्ति देंदा रओ।
\s परमेशरो री बुलाहट और चुनाव
\p
\v 3 परमेशरे आपणी ई सामर्था रे जरिए आसा खे से सब कुछ देई राखेया जो ईश्वरीय जिन्दगी जिऊणे खे जरूरी ए। आसे परमेशरो खे जाणूंए और तिने ई आसे सब आपणे लोक करी की आपणी महिमा और अच्छे इरादे रे मुताबिक बुलाए। 
\v 4 परमेशरे आसा सबी खे तेसा ई सामर्था रे जरिए बऊत किमती और बड़े वादे देई राखे। ताकि इना वादे रे जरिए तुसे तिना गन्दे कामो ते छूटी की नठी सको जो दुनिया रे बुरी इच्छा ते ओए और ईश्वरीय सबाओ रे शामिल ऊई जाओ।
\p
\v 5 कऊँकि तुसे ईश्वरीय सबाओ रे शामिल ओ इजी खे सिर्फ तुसे मसीह रे विश्वास करने वाल़े ई नि बणो पर अच्छे चाल-चलणो ते बी जिओ। तुसे सिर्फ अच्छे चाल-चलणो तेई नि जिओ पर ये बी जाणो कि आसे किंयां समजा साथे बर्ताव करिए। 
\v 6 तुसे सिर्फ समजा ते बर्ताव करने वाल़े ई नि बणो पर आपू पाँदे काबू राखणे वाल़े बी बणो। तुसे सिर्फ आपू पाँदे काबू राखणे वाल़े ई नि बणो पर दुःखो रे सब्र राखणे वाल़े बी बणो। तुसे सिर्फ दुःखो रे सब्र राखणे वाल़े ई नि बणो पर ईश्वरीय जिन्दगी जिऊणे वाल़े बी बणो। 
\v 7 सिर्फ ईश्वरीय जिन्दगी जिऊणे वाल़े ई नि बणो पर एकी दूजे री चिन्ता करने वाल़े बी बणो जिंयां पाई-बईण एकी दूजे री चिन्ता करोए। सिर्फ एकी दूजे री चिन्ता करने वाल़े ई नि बणो पर सबी लोका ते प्यार बी राखो। 
\v 8 जे तुसा रे यो सब गुण मौजूद ए और जे तुसा रे इना गुणा री बड़ोतरी ऊणे लगी री तो इजी री बजअ ते तुसे आसा रे प्रभु यीशु मसीह रे पूरे ज्ञानो रे ना तो नकम्मे ऊणे और ना ई निष्फल ऊणे। 
\v 9 पर जेस केसी मांणूए रे ये गुण मौजूद निए तो से अन्दा ए या तेसखे तूँदल़ा दिखोआ। से पूली चुकी रा कि परमेशरे तेसरा से सारा पाप माफ करी ता रा जो तिने मसीह रे आऊणे ते पईले करी राखेया था।
\p
\v 10 इजी बजअ ते ओ साथी विश्वासियो, आपणे बुलाए जाणे और चूणे जाणे खे साबित करने खे ठीक-टंगो रे कोशिश करदे रओ। जे तुसे एड़ा करदे रओगे, तो कदी बी बाटा ते नि पटकणे। 
\v 11 ईंयां ई तुसा रा म्हारे प्रभु और उद्धारकर्ता यीशु मसीह रे अनन्त कालो रे राज्य रे बड़े आदरो साथे स्वागत कित्तेया जाणा।
\s पतरसो रा आखरी बखत
\p
\v 12 हालाँकि तुसे इना गल्ला खे जाणो ईए और मसीह री एसा सच्ची शिक्षा रे, जो तुसा खे सखाई राखी, तुसे बणे रे रओए। तेबे बी आऊँ तुसा खे इना गल्ला री याद दलाणे खे सदा त्यार रऊँगा। 
\v 13 जदुओ तक आऊँ एस शरीर रूपी डेरे रे जिऊँदा ए तदुओ तक तुसा लोका खे याद दलाई की सावधान करना आपणी जिम्मेवारी समजूँआ। 
\v 14 कऊँकि आऊँ ये जाणूंआ कि आसा रे प्रभु यीशु मसीह रे बोले रे वचनो रे मुताबिक मेरे मरने रा बखत नेड़े आईगा रा। 
\v 15 इजी री खातर मां एड़ी कोशिश करनी कि मेरे मरने ते बाद तुसे इना सबी गल्ला खे याद करी सको।
\s मसीह री महिमा रे आखी देखे रे गवा
\p
\v 16 जेबे आसे प्रेरिते तुसा लोका खे आपणे प्रभु यीशु मसीह री सामर्था रा और तिना रे वापस आऊणे रा संदेशा दित्तेया था, तो आसे चलाकिया ते गढ़ी री मनकड़न्त काणियां रा सआरा नि लया था। बल्कि आसे आपू ई आपणी आखी ते तेसरा प्रताप देखेया था। 
\v 17-18 पवित्र पाह्ड़ो पाँदे तेस बखते आसे तेस साथे थे जेबे पिता परमेशरे तिना खे आदर और महिमा दित्ती। तेस बखते प्रतापमय महिमा बीचा ते ये आवाज आई, “ये मेरा प्यारा पुत्र ए जेसते आऊँ बऊत खुश ए।” आसे आपू ई स्वर्गो ते ये आवाज आऊँदे ऊए सुणी।
\p
\v 19 आसे ये बी जाणूंए कि भविष्यबक्तेया जो वचन मसीह रे बारे लिखी राखेया से एकदम सच ए और आसे तुसा लोका खे मसीह रे बारे रे जो सखाई राखेया था से इजी गल्ला खे साबित करोए। तुसे इना वचना खे आसा रे प्रभु यीशुए रे वापस आऊणे तक त्यानो साथे सुणो, कऊँकि जिंयां दिऊआ लोका खे न्हेरे रे सई बाट दखाणे खे प्रयासा देओआ तिंयाँ ई एस वचनो तुसा खे समजणे रे मताद करनी कि सच क्या ए। तिना रा वापस आऊणा नये दिनो रे प्यागा रे प्रयासे जेड़ा ऊणा और से प्याणु तारे जेड़ा चमकणा। तेस बखते तिना री ज्योति तुसा रे दिलो रे चमकणी और तेस परमेशर तुसा पाँदे साफ-साफ प्रकट करना। 
\v 20 पर सबी ते पईले ये समजी लो कि पवित्र शास्त्रो री कोई बी भविष्यबाणी केसी रे आपणे ई सोचणे ते पूरी नि ऊँदी 
\v 21 कऊँकि कोई बी भविष्यबाणी मांणूए री इच्छा ते कदी पनि ऊई, पर भविष्यबक्ता पवित्र आत्मा ते परी की परमेशरो री तरफा ते बोलो थे।
\c 2
\s चूठे शिक्षक
\p
\v 1 बऊत दिन पईले जिंयाँ इस्राएली लोका बीचे चूठे भविष्यबक्ता थे, तिंयाँ ई तुसा लोका बीचे बी चूठे उपदेशका चूठी शिक्षा देणी। सेयो लोक तुसा बीचे आऊल़े-आऊल़े कूसी जाणे और तुसा ते परमेशरो रे बारे रे सर्वनाश करने वाल़ा चूठ बोलणा। एथो तक तिना मसीह खे बी आपणे प्रभुए रे रूपो रे मानणे ते ना करनी जिने तिना खे पापो ते छुटकारा देई राखेया। तिना एड़ा काम करी की आपू पाँदे चट ई सर्वनाश ल्याऊणा। 
\v 2 बऊत सारे परमेशरो रे लोका तिना चूठे उपदेशका री बुरी शिक्षा मानणी और तिजी रे मुताबिक बुरे काम करने। नतीजन, तिना रे बुरे कामो री बजअ ते ओरी लोका सच्चो री बाटा री निन्दा करनी। 
\v 3 ये चूठे उपदेशक बऊत लाल़ची ऊणे और तिना तुसा खे मनकड़न्त काणियां बणाई की तोखा देणा कि तुसा ते पैसे कमाई सको। परमेशर पईले तेई तिना लोका खे सजा देणे रा फैंसला करी चुकी रा और से ये करने खे त्यार बी ए। परमेशरो पक्का ई तिना लोका रा सत्यानाश करी देणा।
\p
\v 4 परमेशरे तिना स्वर्गदूता खे बी नि छाडेया जिने पाप करी राखेया था। पर नरको रे पेजी की न्हेरे कुण्डो रे पाई की जंजीरा साथे बानी ते। ताकि सेयो न्याय रे दिनो तक कैद रओ। 
\v 5 और नूह रे दिना रे परमेशरे दुनिया रे दुष्ट लोका पाँदे दया नि कित्ती। पर परमेशरे महा जलप्रलय ते धार्मिकता रे प्रचारक नूह समेत कुल आठ लोका खे बचाई की दुनिया रे सारे लोक नाश करी ते। 
\v 6 और परमेशरे सदोम और गमोरा रे नगरो खे नाशो रा एड़ा दण्ड दित्तेया कि सेयो स्वा करी की स्वाई रे मलाई ते। ताकि सेयो आऊणे वाल़े बिना भग्तिया रे लोका खे उदारण बणो 
\v 7 पर तिने सदोम नगरो खे नाश करने ते पईले लूत तेथा ते जाणे दित्तेया जो एक तर्मी मांणू था और ईंयां से बचाईता। लूत पापिया रे बुरे चाल-चलणो ते बऊत दु:खी था। 
\v 8 लूत जो तर्मी मांणू था तिना लोका बीचे रंदे ऊए और तिना रे पापो रे काम देखी-देखी की और सुणी-सुणी की हर दिन आपणे सच्चे मनो खे दुःखी करो था। 
\v 9 जबकि परमेशरे यो सब गल्ला करी राखिया, तो इजी ते साफ पता चलोआ कि परमेशर ये जाणोआ कि तर्मिया खे किंयां परीक्षा ते निकाल़ेया जाओ और अधर्मिया खे किंयां न्याय रे दिनो तक सजा देणे खे राखेया जाओ। 
\v 10 खास करी की परमेशरो तिना चूठे शिक्षका खे सजा देणी जो गन्दी इच्छा रे पीछे शरीरो रे मुताबिक चलोए और परमेशरो रे अक्को खे तुच्छ जाणोए। सेयो टीठ और हठी ए और तेजोमय स्वर्गिय प्राणिया खे बुरा-पला बोलणे ते नि डरदे। 
\v 11 पर एथो तक कि स्वर्गदूत बी जो तिना चूठे शिक्षका ते शक्ति और सामर्था रे बऊत बड़ी की ए, प्रभुए रे सामणे तिना तेजोमय स्वर्गिय प्राणिया खे पला-बुरा बोली की तिना पाँदे दोष नि लगांदे। 
\v 12 पर यो चूठे शिक्षक बिना दमाक वाल़े डांगरा जेड़े ए। सेयो लोक पकड़े जाणे और नाश ऊणे खेई पैदा ऊई रे। जिना गल्ला खे सेयो जाणदे ई नि, तिना रे बारे रे ओरी लोका खे पला-बुरा बोलोए। पर सेयो आपणे बुरे कामो तेई नाश ऊई जाणे।
\p
\v 13 तिने लोके बुरा करी राखेया और तिना खे तिजी रा फल बुरा ई मिलणा। तिना लोका खे दिने-त्याड़े सुख-विलास करना खरा लगोआ। सेयो लोक तुसा बीचे कलंक और दोष ए। तिना लोका खे तुसा री सभा री पाट्टिया रे तुसा साथे खाणे रे बावजूद बी तुसा ते कपटो साथे गल्ला करने रे खुशी मिलोई। 
\v 14 सेयो जेसा केसी बी जवाणसा खे देखोए तेसा साथे व्याभिचार करना चाओए। सेयो पाप करने ते बिना रूकी नि सकदे। सेयो तिना लोका खे तोखा देई की पापो रे पाई देओए जिना रा कमजोर विश्वास ए। कऊँकि तिना री बड़दी ऊई इच्छा री बजअ ते परमेशरो तिना खे सजा देणी। 
\v 15 सेयो सीदी बाटा खे छाडी की पटकी गे रे और बओरो रे पाऊ बिलामो री बाटा रिये ऊईगे, जिने पापो री मजदूरी प्यारी जाणी। 
\v 16 पर परमेशर बिलामो खे तेसरे अपराधो री बजअ ते बकेया। एथो तक कि तेसरी अबोल गह्दीए बी मांणूए री आवाजा रे से भविष्यबक्ता गल़त काम करने ते रोकेया।
\p
\v 17 यो चूठे शिक्षक सुके कुँएं और तूफानो रे उड़ाए रे बादल़ ए, तिना खे अनन्त न्हेरा ठराई राखेया। 
\v 18 जेबे सेयो लोका खे उपदेश देओए तो सेयो कमण्डो साथे परिया रिया बेकार गल्ला ते लोका खे वासना री शारीरिक इच्छा रे फसाई देओए, जो बाटा ते पटकेया रे लोका बीचा ते एबु ई विश्वासो रे आई रे। 
\v 19 सेयो चूठे शिक्षक लोका खे आजाद करने रा वादा तो करोए, पर सेयो आपू ई पापी सबाओ री बजअ ते पापो रे दास ए। कऊँकि जो कुछ बी तुसा खे आपणे वशो रे करी लओआ तो तुसे तेसरे दास बणी जाओए। 
\v 20 जे सेयो आसा रे प्रभु और उद्धारकर्ता यीशु मसीह रे सारे ज्ञानो रे जरिए दुनिया री कई प्रकारा रिया गन्दगिया ते छूटी की निकल़ने ते बाद फेर तिजी रेई फसी की तिजी रे वशो रे ऊईगे रे तो ये गल्ल साफ ए कि तिना री आज की दशा पिछली दशा ते ओर बी बुरी ऊईगी री। 
\v 21 पला तो येई ऊँदा कि तिना खे धार्मिकता री बाटा रा एहसास ऊआ ई नि ऊँदा बजाए एतेरे कि से तिजी खे जाणने ते बाद जो पवित्र आज्ञा तिना गे सम्बाल़ी थी तिजी ते मूँ फेरी लंदे। 
\v 22 तिना लोका पाँदे ये कहावत ठीक बैठोई, “कुत्ता आपणी ई कित्ती री ऊल्टिया खे फेर खाओआ और नल़वाई री सुंरनी चीकड़ो रे लेटणे खे फेर चली जाओई।”
\c 3
\s प्रभुए रे आऊणे रा दिन
\p
\v 1 ओ प्यारेओ, तुसा लोका खे ये मेरी दूजी चिट्ठी ए। इना दूँईं चिट्ठिया रे जरिए आँऊ तुसा खे याद दलाई की तुसा रे साफ मनो खे जगाऊँआ 
\v 2 मेरा मकसद ये ए कि तुसे तिना वचना खे याद राखो जो परमेशरो रे भविष्यबक्तेया रे जरिए बऊत पईले तुसा लोका ते बोली राखे। आसा रे प्रभु और उद्धारकर्ता यीशु मसीह री तिना शिक्षा खे बी याद राखो जो प्रेरिता रे जरिए तुसा खे दित्ती थी।
\p
\v 3 सबी ते जरूरी गल्ल ये ए कि तुसे ये समजी लो कि अंतो रे दिना रे आस्सी और मजाक करने वाल़े आऊणे, जो आपणी ई बुरी इच्छा रे मुताबिक चलणे। 
\v 4 तिना लोका बोलणा, “प्रभुए रे दुबारा आऊणे रा वादा केई गया? कऊँकि आसा रे बुजुर्गा री मौता ते लयी की एबुए तक सब कुछ तेड़ा ईए, जेड़ा सृष्टिया री शुरूआता ते था।” 
\v 5 सेयो तो जाणी बूजी की ये पूली गे कि परमेशरो रे वचनो रे जरिए सर्ग पुराणे जमाने ते मौजूद ए और तरती बी पाणिए बीचा ते बणी और तिजी रे चऊँ कनारे पाणी ई पाणी ए। 
\v 6 एसी पाणिए रे जरिए तेस जुगो री दुनिया पाणिए रे डूबी की नाश ऊईगी। 
\v 7 पर परमेशरे एसी वचनो रे जरिए आजका सर्ग और तरती इजी खेई सम्बाल़ी की राखी राखे, कि तिजी खे आगी साथे फूको। और यो बिना भग्ति वाल़े मांणूआ रे न्याय और नाश ऊणे रे दिनो तक ईंयां ई रणे।
\p
\v 8 ओ प्यारेओ, ये एक गल्ल तुसा ते छिपी री नि रओ कि प्रभुए रे कअरे एक दिन ह्जार सालो रे बराबर ए और ह्जार साल एक दिनो रे बराबर ए। 
\v 9 कुछ लोक सोचोए कि प्रभु वापस आऊणे रे आपणे वादे रे बारे रे देर करने लगी रा। पर प्रभु आपणे वादे रे बारे रे देर नि करदा। बल्कि से तुसा रे बारे रे सब्र राखोआ और ये नि चांदा कि कोई नाश ओ, पर ये कि सबी खे पापो ते मन फेरने रा मोका मिलो।
\p
\v 10 पर प्रभुए रा दिन चोरो जेड़ा आऊणा। तेस दिने सर्ग बड़ी-पारी गिड़ने रिया री आवाजा ते नाश ऊई जाणा और तत्व बऊत गर्म ऊई की गल़ी जाणे। तरती और तिजी पाँदले कित्ते रे काम प्रकट ऊई जाणे।
\p
\v 11 कऊँकि परमेशरो यो सब चीजा पक्का ई नाश करी देणियां जेड़ा कि मैं बोली राखेया, तो तुसे पवित्र चाल-चलण और भग्तिया रे ईंयां जिन्दगी बिताओ जेते की परमेशर खुश ओआ। 
\v 12 जेड़ा कि तुसे तेस दिनो रा बड़ी बेसबरिया ते इन्तजार करने लगी रे जेस दिने परमेशर दुनिया रा न्याय करने आऊणा और आपणी तरफा ते कोशिश करो कि से दिन चट आई जाओ। तिना दिना रे सर्ग आगी की गल़ी जाणा और नाश ऊई जाणा और सर्गो रे गण बऊत जादा गर्म ऊई की गल़ी जाणे। 
\v 13 पर आसे विश्वासी परमेशरो रे वादे रे मुताबिक एक नये सर्ग और नई तरतिया रा इन्तजार करूँए। जिदे सिर्फ तर्मी लोका ई वास करना।
\s जागदे और त्यार रओ
\p
\v 14 इजी री खातर ओ प्यारेओ, जबकि तुसे इना गल्ला रा इन्तजार करोए, तो ईंयां कोशिश करो कि तुसे लोक प्रभुए री नजरा रे निष्कलंक और निर्दोष ठईरो और तुसा रे शान्तिया रा वास ओ। 
\v 15 जे आसा रा प्रभु आपणी सईन शीलता री बजअ ते देर करो बी आ तो इजी खे आपणे उद्धारो रे मददगार समजो। ये सेई गल्ल ए जेतेखे म्हारे प्यारे साथी विश्वासी पौलुसे बी तुसा खे परमेशरो रे जरिए दित्ते रे ज्ञानो रे मुताबिक चिट्ठिया रे लिखी राखेया। 
\v 16 तिंयाँ ई पौलुसे आपणी सबी चिट्ठिया रे बी इना गल्ला री चर्चा करी राखी। तिना चिट्ठिया रे कितणिया गल्ला तो एड़िया ए, जिना रा समजणा कठण ए। अनपढ़ और चंचल लोक तिना री चिट्ठिया री गल्ला खे पवित्र शास्त्रो री गल्ला जेड़िया ई खिंजी-खांजी की आपणे ई नाशो री बजअ बणाओए।
\p
\v 17 ओ प्यारेओ, तुसे पइले ई जाणोए कि यो सारिया गल्ला ऊणिया। इजी खे चौकस रओ ताकि दुष्ट लोक तुसा खे आपणी चूठी शिक्षा ते बईकाई की तोखा नि देओ। जे तिना री चूठी शिक्षा खे मानोगे तो तुसा सच्चाईया पाँदे विश्वास करना बन्द करी देणा। 
\v 18 बल्कि तुसे लोक म्हारे प्रभु और उद्धारकर्ता यीशु मसीह री कृपा और पछयाणी रे बड़दे जाओ। तेसरी ई महिमा एबे बी ओ और जुगो-जुगो तक ऊँदी रओ। आमीन्।