\id 2CO Baghlayani Bible
\ide UTF-8
\ide UTF-8
\rem Copyright Information: Creative Commons Attribution-ShareAlike 4.0 License
\h 2 कुरिन्थियों
\toc1 कुरिन्थियों री दूजी पत्री
\toc2 2 कुरिन्थियों
\toc3 2 कुरिन्थ
\mt1 2 कुरिन्थियों
\mt2 कुरिन्थ नगरो री विश्वासी मण्डल़िया खे प्रेरित पौलुसो री दूजी चिट्ठी
\imt भूमिका
\ip कुरिन्थियों रे नाओं पौलुस प्रेरितों री दूजी चिट्ठी पौलुस और कुरिन्थुसो री मण्डल़िया बीचे जेबे कट्टर रिश्ते थे, तेस बखते लिखी थी। मण्डल़िया रे कई सदस्ये पौलुसो रे खलाफ स्पष्ट रूपो रे गम्भीर आरोप लगाए थे, पर से मेल-मलापो री आपणी गईरी इच्छा खे दखाओआ और जेबे एड़ा ऊई जाओआ तेबे से आपणी बऊत जादा खुशिया खे प्रगट करोआ।
\ip एसा चिट्ठिया रे पईले पाअगो रे पौलुस कुरन्थिसो री मण्डल़िया साथे आपणे रिश्ते रे बारे रे बिचार करोआ और से तिना खे समजयाओआ कि तिने कऊँ मण्डल़िया रे बेज्जती और बिरोद करने जेड़ा कठोर बर्ताव कित्तेया और तेबे आपणी खुशिया खे प्रगट करोआ कि तेसरी कठोरता रा नतीजा पछतावा और मेल-मलाप ऊआ। तेबे से मण्डल़िया ते, यहूदिया रे गरीब मसीहिया री खातर उदारता साथे दान देणे री प्रार्थना करोआ। आखरी रे पाठा रे पौलुस कुरिन्थुसो रे कई लोका रे खलाफ आपणी प्रेरताईया रा समर्थन करोआ, जिने आपणे-आपू खे सच्चा चेले ऊणे रा दर्जा देईता था, जबकि सेयो पौलुसो पाँदे चूठा चेले ऊणे रा आरोप लगाया करो थे।
\is रूप-रेखा
\io1 भूमिका 1:1-11
\io1 पौलुस और कुरिन्थुसो री कलीसिया 1:12-7:16
\io1 यहूदिया रे मसीहिया खे दान 8:1-9:15
\io1 पौलुसो रे जरिए प्रेरितों रे रूपो रे आपणे अक्को रा समर्थन 10:1-13:10
\io1 निचोड़ 13:11-14
\c 1
\s अभिवादन
\p
\v 1 ये चिट्ठी पौलुस और आसा रा पाई तीमुथियुसो री तरफा ते ए। आँऊ पौलुस परमेशरो री इच्छा ते यीशु मसीह रा प्रेरित ए। ये चिट्ठी परमेशरो री तेसा मण्डल़िया रे नाओं पाँदे लिखूँआ जो कुरिन्थुस नगरो रे ए और परमेशरो रे सब पवित्र लोका रे नाओं पाँदे जो सारे अखाया प्रदेशो रे रओए। 
\v 2 म्हारे पिता परमेशर और प्रभु यीशु मसीह री तरफा ते कृपा और शान्ति मिलदी रओ।
\s परमेशरो रा धन्यवाद करना
\p
\v 3 म्हारे प्रभु यीशु मसीह रे पिता परमेशरो रा धन्यवाद ओ। परमेशर दया रा पिता और सब प्रकारा री सुख-शान्ति देणे वाल़ा ए। 
\v 4 परमेशर म्हारे सबी क्ल़ेशो रे सुख-शान्ति देओआ ताकि आसे बी ओरी लोका खे तिना रे क्ल़ेशा रे सेई सुख-शान्ति देई सकिए जो परमेशरो ते आसे पाई राखी। 
\v 5 कऊँकि जिंयाँ मसीह रे दु:खो रे आसे जादा सहभागी ओए, तिंयाँ ई आसे शान्तिया रे बी मसीह रे जरिए जादा सहभागी ओए। 
\v 6 जे आसे क्ल़ेश पाऊँए, तो ये तुसा री शान्ति और उद्धारो खे ए और जे आसे शान्ति पाऊँए, तो ये तुसा री शान्तिया खे ए। जेतेरे असरो ते तुसे सब्रो साथे तिना क्ल़ेशो खे सयी लओए, जिना खे आसे बी सऊँए। 
\v 7 और म्हारी उम्मीदा तुसा रे बारे रे पक्की ए, कऊँकि आसे जाणूंए कि जेड़े तुसे म्हारे दु:खो रे सहभागी ए, तेड़े ई तुसे आसा री शान्तिया रे बी सहभागी ऊणे।
\p
\v 8 ओ साथी विश्वासियो! आसे नि चांदे कि तुसे म्हारे तिना क्ल़ेशो ते अणजाण रओ जो आसिया प्रदेशो रे आसा पाँदे पड़ेया कि एड़े पारी बोजो ते दबी गे थे, जो म्हारे सईणे ते बी बारे था। एथो तक कि आसे आपणी जिन्दगिया ते जिऊणे री बी उम्मीद छाडी ती थी। 
\v 9 बल्कि आसे आपणे मनो रे समजी ला था कि आसा पाँदे मौता री सजा ऊई चुकी री। पर ये तेबे ऊआ ताकि आसे आपू पाँदे नि, पर तेस परमेशरो पाँदे विश्वास राखिए जो मरे रेया खे जिऊँदा करोआ। 
\v 10 तिने ई आसे एड़ी बड़ी मौता ते बचाए और बचाणे बीए। तेस पाँदे आसा री ये उम्मीद ए कि से आसा खे आगे बी बचांदा रणा। 
\v 11 जेड़ा कि तुसे बी आपणी प्रार्थना रे जरिए म्हारी मताद करोए कि जो बरदान बऊत लोका री प्रार्थना रे जरिए आसा खे मिलेया, तिजी री बजअ ते बऊत लोक म्हारी तरफा ते धन्यवाद करो।
\s पौलुसो री यात्रा-योजना रे बदलाव
\p
\v 12 आसा खे इजी गल्ला पाँदे कमण्ड ए कि आसा रा विवेक साफ ए कि दुनिया रे और खास करी की तुसा बीचे म्हारा चाल-चलण परमेशरो जोगा, एड़ा पवित्र और सच्चाईया साथे था, जो शरीरो रे ज्ञानो ते नि, बल्कि परमेशरो री कृपा साथे था। 
\v 13 आसे तुसा खे ओर कुछ नि लिखदे, बस सेई जो तुसे पढ़ो या मानो बी ए। माखे उम्मीद ए कि एक दिन तुसा आँऊ पुरिया तरअ ते समजी लणा। 
\v 14 जेड़ा तुसा बीचा ते कितणे जणेया मानी ला रा कि आसे तुसा रे कमण्डो री बजअ ए तिंयाँ ई तुसे बी प्रभु यीशुए रे वापस आऊणे रे दिने आसा खे कमण्डो री बजअ ठईरने।
\p
\v 15 और एस परोसे ते आऊँ चाऊँ था कि पईले तुसा गे आऊँ ताकि तुसा खे एक और दान मिलो। 
\v 16 मेरी सलाह थी कि आँऊ तुसा गिये ऊई कि मकिदुनिया प्रदेशो खे जाऊँ और फेर मकिदुनिया प्रदेशो ते तुसा गे आऊँ। तिजी ते बाद तुसे माखे सफरो रे जरूरी समान देई की यहूदिया प्रदेशो खे पेजो। 
\v 17 इजी री खातर मैं जो ये सोचेया था तो क्या मैं तिदे लापरवाई दखाई? या जो आँऊ करना चाऊँआ क्या से दुनिया रे लोका रे मुताबिक करूँआ कि एक ई बखतो री गल्ला दे आ-आ बी करदा रऊँ और ना-ना बी करदा रऊँ?
\p
\v 18 जिंयाँ सच्ची ई परमेशर विश्वासो जोगा ए, तिंयाँ ई आसा री गल्ला रे बी “आ” रा मतलब आ और “ना” रा मतलब ना ई ओआ। 
\v 19 कऊँकि परमेशरो रा पुत्र यीशु मसीह जेसरा प्रचार सिलवानुस, तीमुथियुस और मैं तुसा बीचे कित्तेया। तिदे आ और ना दोनो नि थे, बल्कि तिदे सदा आ और आ ई थी। 
\v 20 कऊँकि परमेशरो री जितणिया बी प्रतिज्ञा ए, सेयो सब मसीह रे आ साथे ए, इजी बजअ ते तेस साथे आमीन् बी ऊई ताकि म्हारी बजअ ते परमेशरो री महिमा ओ। 
\v 21 और जो आसा खे तुसा साथे मसीह रे पक्का करोआ और जिने आसा रा अभिषेक कित्तेया, सेई परमेशर ए। 
\v 22 जिने आसा पाँदे छाप बी करी ती री और बयाने रे आत्मा आसा रे मनो रे दित्ती।
\p
\v 23 आऊँ परमेशरो खे गवा करूँआ कि आऊँ एबुए तक कुरिन्थ नगरो रे इजी री खातर नि आया कऊँकि आँऊ तुसा खे जो गल़त काम तुसे करी राखे तिजी खे डांटणा नि चाऊँ था। 
\v 24 ये नि कि आसे विश्वासो रे बारे रे तुसा पाँदे अक्क जताणा चाऊँए, पर तुसा री खुशिया रे शामिल ए, कऊँकि तुसे विश्वासो साथे ई खड़े रओए।
\c 2
\p
\v 1 मैं आपणे मनो रे ये ठाणी ला था कि एक बार फेर तुसा गे आई कि तुसा खे दुःख नि देऊँ। 
\v 2 कऊँकि तेती आई कि जे आऊँ ई तुसा खे दुःखी करुँ तो माखे खुश करने वाल़ा कुण ऊणा, बस सेई जो मैं दुःखी कित्तेया? 
\v 3 मैं तुसा खे ये गल्ल इजी खे लिखी ताकि एड़ा नि ओ कि मेरे आऊणे ते जिना ते माखे खुशी मिलणी चाईयो, आऊँ तिना ते दुःखी ऊई जाऊँ। कऊँकि माखे तुसा सबी पाँदे एसा गल्ला रा विश्वास ए कि जो मेरी खुशी ए, सेई तुसा सबी री बी ए। 
\v 4 बड़े क्ल़ेश और मनो रे कष्टो ते मैं आसू बाई-बाई कि से चिट्ठी तुसा खे लिखी थी। इजी री खातर नि कि तुसे उदास ऊई जाओ, बल्कि इजी री खातर कि तुसे तेस बड़े प्यारो खे जाणी लओ, जो माखे तुसा ते ए।
\s अपराधिया खे माफी
\p
\v 5 जे किने दुःखी करी राखे, तो आऊँ ई नि बल्कि कुछ-कुछ तो तुसे सब लोक बी दुःखी करी राखे। आँऊ इजी रे बारे रे इजी ते जादा कुछ ओर नि बोलणा चाँदा। 
\v 6 ये सजा जो तुसे विश्वासी पाईया बीचा ते तेसखे देई राखी काफी ए। 
\v 7 इजी ते तो ये खरा ए कि तेसरा अपराध माफ करो और तेसखे शान्ति देओ। एड़ा नि ओ कि एड़ा मांणू, निराशा रेई डूबी जाओ। 
\v 8 इजी बजअ ते आऊँ तुसा ते बिनती करूँआ कि तेसखे आपणे प्यार-प्रेमो रा सबूत देओ। 
\v 9 कऊँकि मैं इजी खे बी लिखेया था ताकि तुसा खे परखुँ कि तुसे सब मेरी गल्ला खे मानणे खे त्यार ए कि नई। 
\v 10 जेसखे तुसे कुछ माफ करोए, तेसखे आऊँ बी माफ करूँआ। कऊँकि मैं बी जो कुछ माफ करी राखेया, जे माफ करी राखेया ओ, तो तुसा री बजअ ते मसीह री जगा पाँदे ऊई की माफ करी राखेया, 
\v 11 ताकि शैतानो रा आसा पाँदे कोई दावो नि चलो। कऊँकि आसे तेसरी चाला ते अणजाण निए।
\s त्रोआसो रे पौलुसो री परेशानी
\p
\v 12 जेबे आऊँ मसीह रा सुसमाचार सुनाणे खे त्रोआस नगरो रे आया और प्रभुए माखे सुसमाचार प्रचार करने खे मौका देईता। 
\v 13 तेबे मेरे मनो खे चैन नि मिलेया कऊँकि मैं आपणा विश्वासी पाई तीतुस नि देखेया। तेबेई मैं त्रोआस नगरो रे विश्वासी लोका ते बिदा ऊई की मकिदुनिया प्रदेशो खे तीतुसो खे टोल़ने वापस चली गा।
\s मसीह रे विजय रा त्योआर
\p
\v 14 पर परमेशरो रा धन्यवाद ओ, कऊँकि मसीह री एकता री बजअ ते से आसा खे सदा आपू साथे चलाओआ और आसा के जय दलाओआ और आपणे ज्ञानो री खुशबू आसा रे जरिए हर जगा रे फैलांदा रओआ। 
\v 15 आसे परमेशरो खे मसीह री खुशबू जेड़े ए। जो सुसमाचार आसे प्रचार करी राखेया से चाए से उद्धार पाणे वाल़े ओ या नाश ऊणे वाल़े ओ सबी लोका खे एक खुशबू जेड़ा फैलणे लगी रा। 
\v 16 बऊत जणेया खे तो मरने जोगी मौता री बास और बऊत जणेया खे जिऊणे जोगी जिऊणे री खुशबू और पल्ला इना गल्ला जोगा कुण ए? 
\v 17 कऊँकि आसे तिना सबी जेड़े निए, जो परमेशरो रे वचनो रा प्रचार अमीर ऊणे खे करोए। पर मनो री सच्चाईया ते और परमेशरो री तरफा ते, परमेशरो खे आजीर जाणी की मसीह रे बोलोए।
\c 3
\s नयी वाचा रे सेवक
\p
\v 1 क्या आसे फेर आपणी बडयाईया करने लगे? या आसा खे कईया लोका जेड़े सपारीशा री चिट्ठिया तुसा गे ल्याऊणिया या तुसा ते लणियां ए? 
\v 2 तुसे आपू ई आसा खे चिट्ठिया जेड़े ए जो आसा खे सपारिश करोए और तुसा खे सब मांणू पछयाणोए और पढ़ोए। 
\v 3 ये सामणे ए कि तुसे मसीह री चिट्ठिया जेड़े ए, जो मसीहे आसे रे जरिए लखाई। ये चिट्ठी स्याईया ते निए, बल्कि जिऊँदे परमेशरो री पवित्र आत्मा ते, पात्थरो री पट्टिया पाँदे नि, बल्कि दिलो रे मासो री पट्टिया पाँदे लिखी राखी।
\p
\v 4 आसे मसीह रे जरिए परमेशरो पाँदे एड़ा ई परोसा राखूँए। 
\v 5 आसे ये नि बोलदे कि आसा गे कुछ करने री काबलियत ए। पर म्हारी काबलियत परमेशरो री तरफा ते ए। 
\v 6 तिने आसे नई वाचा रा काम करने जोगे सेवक बणाए। ये वाचा लिखी रे बिधानो री नि बल्कि आत्मा री ए। कऊँकि बिधान मौता खे जन्म देओआ पर आत्मा जिन्दगी देओई।
\p
\v 7 जे मौता रा से बिधान, जेतेरे अक्षर पात्थरा पाँदे खणे थे, एथो तक तेजोमय ऊई की मूसे रे मुंओ पाँदले तेजो री बजअ ते जो कटदा बी जाओ था, इस्राएली तेसरे मुंओ पाँदे देखी नि सको थे। 
\v 8 तो आत्मा री वाचा ओर बी तेजोमय कऊँ नि ऊणी? 
\v 9 कऊँकि जेबे दोषी ठईराणे वाल़ी वाचा तेजोमय थी, तो परमेशरो रे सामणे तर्मी ठईराणे वाल़ी नई वाचा ओर बी तेजोमय कऊँ नि ऊणी? 
\v 10 सच तो ए कि जो तेजोमय था से बी तेसा नई वाचा रे तेजो री तुलना रे तेजोमय नि ठईरेया। 
\v 11 जेबे मूसे रा बिधान इतणी तेजोमय थी जो थोड़े ई बखतो खे थी तो नई वाचा रा तेज कितणा जादा ऊणा जो सदा खे ए?
\p
\v 12 तो एड़ी उम्मीद राखी कि आसे इम्मता साथे बोलूँए। 
\v 13 आसे मूसे जेड़े नि, जिने आपणे मुंओ पाँदे पड़दा पाया था ताकि इस्राएली लोक तेस कटणे वाल़े तेजो रे अंतो खे नि देखो। 
\v 14 पर इस्राएली लोक बिना दमाको रे ऊईगे। आजो तक पुराणी वाचा खे पढ़दे बखते तिना रे दिलो पाँदे तेड़ा ई पड़दा पड़े रा रओआ। ये पड़दा सिर्फ मसीह पाँदे विश्वास करने तेई उठाया जाई सकोआ। 
\v 15 और आजो तक जेबे कदी मूसे री कताब पढ़ी जाओई, तो तिना रे दिलो पाँदे पड़दा पड़े रा रओआ और सेयो इजी खे पूरिया तरअ ते समजी नि सकदे। 
\v 16 पर जेबे कदी तिना रा दिल प्रभु यीशुए री तरफा खे फिरना, तेबे से पड़दा उठी जाणा। 
\v 17 प्रभु और पवित्र आत्मा एक ईए और जेती केथी प्रभुए रा आत्मा ए, तेती बिधानो ते आजादी ए। 
\v 18 पर जेबे आसा सबी रे क्वाड़े मुंओ पाँदो ते प्रभुए रा प्रताप ईंयां सामणे आओआ, जिंयाँ शीशे रे, तो प्रभुए रे पवित्र आत्मा रे जरिए आसे तेसी तेजस्वी रूपो रे अंश-अंश करी की बदलदे जाऊँए।
\c 4
\s माट्टिया रे पांडेया रे धन
\p
\v 1 तेबे जेबे आसा पाँदे परमेशरो री एड़ी दया ऊई कि आसा खे परमेशरो रा संदेश प्रचार करने री सेवा मिली, तो आसे इम्मत नि छाडदे। 
\v 2 पर आसे शरमा रे गुप्त काम छाडी ते। ना चलाकिया रे चलूँए और ना ई परमेशरो रे वचनो रे मिलाऊट करूँए। परमेशर आसा रा गवा ए कि आसे सिर्फ सच बोलूँए, जेते की ओर लोक ये पक्का जाणी लो कि आसे परोसे जोगे ए। 
\v 3 जे आसा रे सुसमाचारो पाँदे जो आसे प्रचार कित्तेया पड़दा पड़ी रा, तो ये नाश ऊणे वाल़ेया खेई पड़ी रा। 
\v 4 और तिना अविश्वासिया खे, जिना रा दमाक एते दुनिया रे ईश्वर शैताने अन्दा करी ता रा ताकि मसीह जो परमेशरो रा रूप ए, तेसरे तेजोमय सुसमाचारो खे नि समजी सको। 
\v 5 आसे आपणे बारे रे प्रचार नि करदे। बल्कि यीशु मसीह रा प्रचार करूँए कि से प्रभु ए। आसे यीशुए री बजअ ते आपणे आपू खे तुसा लोका रे सेवक समजूँए। 
\v 6 तेबेई परमेशर बोलेया, “न्हेरे बीचा ते जोति चमको,” और सेई आसा रे दिलो रे चमकेया ताकि परमेशरो री महिमा खे पछयाणी सको जो यीशु मसीह रे प्रकट ऊई री।
\p
\v 7 आसे माट्टिया रे पांडेया जेड़े ए जिदे ये धन राखी राखेया। ताकि एसा गल्ला रा पता लगी जाओ कि ये बड़ी सामर्थ म्हारी तरफा ते नि, बल्कि परमेशरो री ई तरफा तेईए। 
\v 8 आसा खे चऊँ कनारो ते क्लेश तो ओआ, पर मुसीबता रे नि पड़दे। आसे कबराए रे तो आए, पर निराश नि ऊँदे। 
\v 9 सताए तो जाऊँए, पर छाडे नि जांदे, रूड़ाए तो जाऊँए, पर नाश नि ऊँदे। 
\v 10 आसे हर बखत आपणे शरीरो रे यीशुए रे दुःख और मौता खे लयी की फिरूँए, ताकि यीशुए रा जीवन बी आसा रे शरीरो ते प्रकट ओ। 
\v 11 कऊँकि आसे जिऊँदे जिऊए सदा यीशुए री बजअ ते मौता रे आथो रे सम्बाल़े जाऊँए ताकि यीशुए रा जीवन बी आसा रे मरने वाल़े शरीरो ते प्रकट ओ। 
\v 12 इजी बजअ ते मौत तो आसा पाँदे असर पाओई पर अनन्त जीवन तुसा पाँदे असर पाओआ।
\p
\v 13 पर आसे प्रचार करना जारी राखूँए कऊँकि आसा गे सेई विश्वास ए जो पवित्र शास्त्रो रे लिखी राखेया, “मैं परमेशरो पाँदे विश्वास कित्तेया, तेबेई मैं बोलेया।” 
\v 14 कऊँकि आसे जाणूंए कि परमेशर जिने प्रभु यीशुए खे मरे रेया बीचा ते जिऊँदा कित्तेया। तेस आसे बी यीशुए रे सहभागी जाणी कि जिऊँदे करने। तिजी ते बाद परमेशरो आसे तुसा साथे आपणे सामणे आजीर करने। 
\v 15 ये सब कुछ तुसा लोका री पलाईया खे ऊणे लगी रा, तेबेई जादा ते जादा लोका जाणी लणा कि परमेशर कितणा दयालु ए और तिना परमेशरो री तारीफ और धन्यवाद करना।
\p
\v 16 इजी री खातर आसे इम्मत नि छाडदे, हालाँकि आसा रा बारला रुप नाश बी ऊँदा जाओआ, तेबे बी आसा रा पीतरला रुप हर रोज नया ऊँदा जाओआ। 
\v 17 कऊँकि आसा रा दूँईं कअड़िया रा अल़का जा क्ल़ेश आसा खे बऊत ई खास और अनन्त जीवनो री महिमा पैदा करोआ 
\v 18 और आसे देखी री चीजा खे नि, पर बिना देखी री चीजा खे देखदे रऊँए, कऊँकि देखी री चीजा तो थोड़े ई दिनो खे ए, पर बिना देखी री चीजा सदा बणी री रओईया।
\c 5
\s आसा रा स्वर्गो रा कअर
\p
\v 1 आसे जाणूंए कि तरतिया पाँदे आसा रा शरीर एक तम्बूए जेड़ा ए जिदे आसे रओए। पर जेबे आसा रा तरतिया पाँदला तम्बू सरिखा कअर टाल़ेया जाणा, तो आसा खे परमेशरो री तरफा ते स्वर्गो पाँदे एड़ा भवन मिलणा, जो आथो साथे बणाए रा कअर नि, पर सदा खे बणेया रा ऊणा। 
\v 2 आसे एते शरीरो रे तरतिया पाँदे कणदे रऊँए और तेस स्वर्गो रे कअरो खे तारण करने री इच्छा करदे रऊँए। 
\v 3 जेबे आसा से स्वर्गिय शरीर पाई लणा तेबे आसे नांगे नि पाए जाणे। 
\v 4 और आसे एस तम्बू सरिखे शरीरो रे रंदे ऊए बोजो साथे दबे रे कणदे रऊँए, कऊँकि आसे संसारिक शरीर छाडे बिना तेस पाँदे स्वर्गिय शरीर पईनणा चाऊँए। ताकि जो मरनहार शरीर ए से अविनाशी शरीरो रे बदली जाओ 
\v 5 और परमेशर आपू ईए जिने आसे इजी गल्ला खेई त्यार करी राखे, और तिने आसा खे बयाने रे पवित्र आत्मा बी देई राखेया। ये बयाना से बादा ए जो परमेशरो बादो ते पुरा करना।
\p
\v 6 तो आसे सदा इम्मत बाने रे राखूँए और ये जाणूंए कि जेबे आसे शरीरो रे रऊँए, तदुओ तक प्रभुए ते लग ए। 
\v 7 जेबे आसे एबु बी एते दुनिया रे जिऊणे लगी रे तो आसे विश्वासो ते प्रभुए पीछे चलूँए न कि तेसखे देखी की। 
\v 8 इजी री खातर आसे इम्मत राखूँए और शरीरो ते लग ऊई की आसे मरने ते बाद प्रभुए साथे रणा ओर बी खरा समजूँए। 
\v 9 इजी बजअ ते आसा रे मनो री इच्छा ये कि चाए आसे तेस साथे स्वर्गो रे रईये, चाए आसे एसा तरतिया पाँदे रईये पर आसे तेसखे खरे लगदे रईये। 
\v 10 कऊँकि जरूरी ए कि आसा सबी रा आल मसीह रे न्याय आसणो रे सामणे खुली जाओ, ताकि हर एक मांणू आपणे-आपणे खरे-बुरे कामो रा बदला, जो तिने शरीरो रे जरिए करी राखेया, पाओ।
\s परमेशरो साथे मेल-जोल
\p
\v 11 तो प्रभुए रा डर मानी की आसे लोका खे सच्चो पाँदे विश्वास करने खे विनती करूँए और परमेशर आसा खे पूरिया तरअ ते जाणोआ और मेरी ये उम्मीद ए कि तुसा री समजे बी आसे अच्छी तरअ जाणी ले रे कि आसे केड़े लोक ए। 
\v 12 आसे तेबे बी आपणी बडयाईया तुसा सामणे नि करदे, बल्कि आसे आपणे बारे रे तुसा खे कमण्ड करने रा मौका देऊँए, ताकि तुसे तिना खे जवाब देई सको, जो मनो पाँदे निए, बल्कि दखाऊटी गल्ला पाँदे कमण्ड करोए। 
\v 13 जे आसे ओशा रे निए, तो परमेशरो री खातर, और जे ओशा रे, तो तुसा री पलाईया री खातर ए। 
\v 14 कऊँकि मसीह रा प्यार आसा खे मजबूर करी देओआ। आसा खे ये पक्का विश्वास ए कि मसीह सबी री खातर मरेया, तो आसे सब पुराणे जीवनो खे मरी गे। 
\v 15 और मसीह सबी री खातर इजी खे मरेया ताकि जो जिऊँदे ए, सेयो आगो खे आपणी खातर नि जियो, बल्कि तेसरी खातर, जो तिना री खातर मरेया और तेबे जिऊँदा ऊआ।
\s मसीह रे नई सृष्टि
\p
\v 16 तो आजो ते आसे केसी रा बी दुनिया रे मुताबिक न्याय नि करदे। आसे मसीह खे पईले दुनिया री नजरा ते देखेया, पर एबे आसे एड़ा नि करदे। 
\v 17 जे कोई मसीह रे विश्वास करोआ, तो से नई सृष्टि ए, पुराणिया गल्ला बीती गी रिया, देखो, सेयो सब नईया ऊईगी रिया। 
\v 18 ये सब गल्ला परमेशरो री तरफा ते ए, जिने मसीह रे जरिए आपू साथे आसा रा मेल-जोल करी ता और मेल-जोलो री सेवा आसा खे सम्बाल़ी ती री। 
\v 19 मतलब-परमेशरे मसीह रे ऊई की आपणा दुनिया साथे मेल-जोल करी ला और लोका रे पापो रा दोष, तिना पाँदे नि लगाया और परमेशरे मेल-जोलो रा संदेश आसा गे सम्बाल़ी ता रा। 
\v 20 आसे मसीह रे राजदूत ए, मानो परमेशर आसा रे जरिए लोका ते आपणा संदेश मानणे खे बिनती करने लगी रा। आसे मसीह री तरफा ते बिनती करुँए कि परमेशरो साथे मेल-जोल करी लो। 
\v 21 मसीह निष्पाप था, पर परमेशरे आसा खे तेसते पापिए जेड़ा बर्ताव कित्तेया ताकि आसे मसीह रे ऊई की परमेशरो री धार्मिकता बणी जाऊँ।
\c 6
\p
\v 1 आसे परमेशरो साथे मिली की काम करने वाल़े ए और तुसा लोका ते ये बिनती करूँए कि परमेशरो री कृपा जो तुसा पाँदे ऊई, तिजी खे बेकार नि जाणे देओ। 
\v 2 कऊँकि पवित्र शास्त्रो रे परमेशर बोलोआ,
\q1 “सई बखतो पाँदे मैं तुसा री प्रार्थना सुणी ली
\q2 और उद्धारो रे दिने मैं तुसा री मताद कित्ती।”
\p सुणो, एबु सई बखत ए, सुणो, एबु उद्धारो रा दिन ए। 
\v 3 आसे केसी बी गल्ला रे ठोकर खाणे रा कोई बी मोका नि देंदे, ताकि म्हारी सेवा पाँदे कोई दोष नि आओ। 
\v 4 पर आसे हर बखतो रे हर तरअ ते आपणे बर्ताव रे जरिए ये साबित करूँए कि सच्ची आसे परमेशरो रे अच्छे सेवक ए। आसे सब्रो साथे क्ल़ेश सईन करने रे, गरीबिया रे, मुसीबता रे, 
\v 5 कोड़े खाणे रे, कैद ऊणे रे, आल्ले-गोल्ले रे, मईणती रे, जागदे रणे रे, बअरत करने रे, 
\v 6 पवित्रता रे, ज्ञानो रे, सब्रो रे, कृपा रे, पवित्र आत्मा रे, सच्चे प्यारो रे, 
\v 7 सच्चो रे वचनो रे, परमेशरो री सामर्था रे; आसा गे धार्मिकता रे अथियार ए जेते की आसे अमला बी करूँए और बचाव बी करूँए। 
\v 8 आदर और निरादरो रे, बुरे नाओं और सुनामो रे, आसा खे कपट्टी समजेया जाओआ, तेबे बी आसे सच बोलूँए। 
\v 9 कुछ लोक आसा खे अणजाण समजोए ए, तेबे बी कुछ लोक आसा खे जाणे-माणे रे समजोए ए, मरने वाल़ेया जेड़े ए, पर तेबे बी जिऊँदे ए, मार खाणे वाल़ेया जेड़े ए, पर प्राणो ते मारे नि जांदे। 
\v 10 शोग करने वाल़ेया जेड़े ए, पर सदा खुशी मनाऊँए, आसे आपू कंगाल़ ए, पर बऊत जणेया खे आत्मिकता दे अमीर बणाई देऊँए, आसे एड़े ए, जेड़ा आसा गे कुछ निए तेबे बी सब कुछ राखोए।
\p
\v 11 ओ कुरिन्थियों रे विश्वासियो, आसे खुली कि तुसा साथे गल्ला करी राखिया, आसे तुसा ते खुले दिलो साथे प्यार कित्तेया। 
\v 12 तुसा री तंईं म्हारे मनो रे कोई शक निए, पर तुसा रे मनो रेई आसा खे शक ए। 
\v 13 पर आपणे बाल-बच्चे जाणी की तुसा खे बोलूँआ कि तुसे बी तिजी रे बदले आसा साथे प्यार राखो।
\s आसे परमेशरो रे मन्दर ए
\p
\v 14 अविश्वासिया साथे लग जुँगड़े रे नि जुड़ो, कऊँकि धार्मिकता और पापो रा क्या मेल-जोल? या जोति और न्हेरे री किंयाँ दोस्ती ऊई सकोई? 
\v 15 और मसीह रा शैतानो साथे क्या लगाव! या विश्वासियो साथे अविश्वासिया रा क्या नाता? 
\v 16 और मूर्तिया साथे परमेशरो रे मन्दरो रा क्या सलबंद? कऊँकि आसे तो जिऊँदे परमेशरो रा मन्दर ए, जेड़ा परमेशरे पवित्र शास्त्रो रे बोली राखेया,
\q1 “मां तिना लोका साथे रणा और तिना रे चलेया फिरेया करना;
\q2 और आऊँ तिना रा परमेशर ऊणा और सेयो मेरे मांणू ऊणे।”
\p
\v 17 इजी री खातर प्रभु बोलोआ,
\q1 “अविश्वासिया बीचा ते निकल़ो
\q2 और लग रओ;
\q1 और अशुद्ध चीजा खे नि छूँओ,
\q2 तो मां तुसे अपनाणे।
\q1
\v 18 आऊँ तुसा रा पिता ऊणा
\q2 और तुसे मेरे माठे-बेटिया ऊणे।
\q1 ये सर्वशक्तिमान् प्रभु परमेशरो रा वचन ए।”
\c 7
\p
\v 1 तो ओ प्यारेओ! जबकि आसा खे यो वादे मिली रे, तो आओ, आसे आपणे आपू खे शरीर और आत्मा रे सब मईलो ते साफ करूँए और परमेशरो रा डर और आदर करदे ऊए, पवित्रता री भरपूरिया तक पऊँछणे री कोशिश करदे रऊँए।
\s पौलुसो री खुशी
\p
\v 2 आसा खे आपणे दिलो रे जगा देओ। आसे ना तो केसी साथे अन्याय कित्तेया, ना कोई बिगाड़ेया और ना ई कोई ठगेया। 
\v 3 आऊँ तुसा पाँदे दोष लगाणे खे नि लगी रा बोलणे, कऊँकि आऊँ पईले ई बोली चुकेया रा कि तुसे म्हारे दिलो रे एड़े बसी चुके रे कि आसे तुसा साथे मरने-जिऊणे खे त्यार ए। 
\v 4 माखे तुसा पाँदे बऊत परोसा ए और आँऊ तुसा पाँदे बड़ा कमण्ड करूँआ। आऊँ शान्तिया साथे परी गा रा, सारे क्ल़ेशा रे आऊँ बड़े मजे ते रऊँआ।
\p
\v 5 जेबे आसे त्रोआस नगरो खे छाडी की मकिदुनिया प्रदेशो रे आए, तेबे बी आसा रे शरीरो खे चैन नि मिलेया, बल्कि आसा खे चऊँ कनारे ते क्ल़ेश मिलो था, बारे लड़ाईया थिया, पीतरे डरो रिया गल्ला थिया। 
\v 6 तेबे बी निराश लोका खे सुख-शान्ति देणे वाल़े परमेशरे तीतुसो रे आऊणे ते आसा खे शान्ति दित्ती। 
\v 7 और बस तेसरे ई आऊणे तेई नि, बल्कि तेसरी तेसा शान्तिया ते बी, जो तेसखे तुसा री तरफा ते मिली थी और तिने तुसा री इच्छा, तुसा रे दु:ख, और मेरिया तंईं तुसा री धुना रा समाचार आसा गे सुणाया, जेते की माखे ओर बी खुशी ऊई।
\p
\v 8 हालाँकि मैं तुसे लोक आपणी तेसा चिट्ठिया ते दु:खी कित्ते, तेबे बी माखे तिजी ते पछतावा निया। जेड़ा कि पईले पछताऊँ था, कऊँकि आऊँ देखूँआ कि तिजी चिट्ठिया साथे तुसा खे दु:ख तो ऊआ, पर से थोड़ी देरा खे था। 
\v 9 एबे आऊँ खुश ए। पर इजी री खातर नि कि तुसा खे दु:ख ऊआ, बल्कि इजी री खातर कि तुसे तेस दु:खो री बजअ ते मन फिराया। तुसा रा दु:ख परमेशरो री इच्छा रे मुताबिक था, ताकि म्हारी तरफा ते तुसा खे कोई नुकशाण नि पऊँछो। 
\v 10 से दुःख जो परमेशरो री भक्तिया री तरफा ते आओआ, तिजी रा नतीजा मन फिराणा और उद्धार ओआ और एस दुःखो ते पछताणा नि पड़दा। बल्कि दुनिया रे लोका रा दु:ख सदा री मौत पैदा करोआ। 
\v 11 त्यान देओ कि परमेशरो री भक्तिया री बजअ ते आये रे दु:खे तुसे पूरिया तरअ ते बदली ते। तिने तुसा रे उत्साह, आपू खे बेकसुर साबित करने री इच्छा, अन्याय रे खलाफ गुस्सा, मुसीबता रे बखते एड़ी चौकसी, मांते मिलणे री एड़ी इच्छा, सेवा रिया तंईं एड़ी धुन और दुराचारिए खे दण्ड देणे रा बिचार पैदा कित्तेया। तुसे सबी प्रकारा ते ये सिद्ध करी की दखाई ता कि तुसे इना गल्ला ते निर्दोष ए। 
\v 12 तेबे मैं जो तुसा गे चिट्ठी लिखी थी, से ना तो तिजी बजअ ते लिखी, जिने अन्याय कित्तेया और ना ई तेसरी बजअ ते जेस पाँदे अन्याय कित्तेया, बल्कि इजी री खातर कि तुसा रा उत्साह, जो आसा री खातर ए, से परमेशरो सामणे तुसा पाँदे प्रगट ओ। 
\v 13 इजी ते आसा खे औंसला मिलेया।
\p म्हारे एस औंसले साथे तीतुसो री खुशिया री बजअ ते ओर बी खुशी ऊई, कऊँकि तेसरा जिऊ तुसा सबी री बजअ ते अरा-परा ऊईगा रा। 
\v 14 कऊँकि जे मैं तेस सामणे तुसा रे बारे रे कुछ कमण्ड दखाया, तो शर्मिंदा नि ऊआ, पर जिंयाँ ई आसे तुसा गे सब गल्ला सच-सच बोलिया, तिंयाँ ई म्हारा कमण्ड दखाणा तीतुसो सामणे सच ऊआ। 
\v 15 और जेबे तेसखे तुसा सबी रे आज्ञाकारी ऊणे री याद आओई कि किंयाँ तुसे डरदे और थरथरांदे ऊए तेसरा स्वागत कित्तेया, तो तेसरा प्यार तुसा खे ओर बी बड़दा जाओआ। 
\v 16 आऊँ एबे बऊत खुश ए कऊँकि माखे तुसा पाँदे पूरा परोसा ए।
\c 8
\s खुशिया साथे दान देणा
\p
\v 1 एबे ओ साथी विश्वासियो! आसे तुसा खे परमेशरो री तेसा कृपा रा समाचार देऊँए, जो मकिदुनिया प्रदेशो री विश्वासी मण्डल़िया रे ऊई री। 
\v 2 जेबे बऊत मुसीबता रे जरिए तिना री परीक्षा ऊई, तेबे तिने तिदे बी बड़ी खुशी मनाई और बेशक सेयो बड़े पारी गरीब थे तेबे बी तिने दूजे विश्वासिया री खुले दिलो पैसेया साथे मताद कित्ती। 
\v 3 और तिना रे बारे रे मेरी ये गवाई ए कि तिने आपणी सामर्था ते, बल्कि आपणी सामर्था ते बी जादा आपणी इच्छा ते मताद कित्ती। 
\v 4 तिने आपू ई आसा ते बार-बार बिनती कित्ती कि यरूशलेम नगरो रे विश्वासिया री मताद करने खे आसा खे मौका मिलो। 
\v 5 और जेड़ी आसे उम्मीद कित्ती थी, तेड़ी ई नि, बल्कि तिने सबी ते पईले आपणे आपू खे प्रभुए री सेवा करने खे देईता। तिजी ते बाद तिने आपणे आपू खे परमेशरो री इच्छा रे मुताबिक आसा खे देईता। 
\v 6 इजी री खातर आसे तीतुस समजयाया कि जेड़ा तिने पईले शुरूओ रे कित्तेया था, तेड़ा ई तुसा बीचे बी एस दानो रे कामो खे पूरा बी करी लो। 
\v 7 तो जेड़ा तुसे हर गल्ला रे मतलब-विश्वास, वचन, ज्ञान और सब प्रकारा री कोशिशा रे और तेस प्यारो रे, जो आसा साथे राखोए, बड़दे जाओए, तेड़ा ई गरीब विश्वासिया खे दान देणे रे बी बड़दे जाओ।
\p
\v 8 आऊँ आज्ञा री रीतिया पाँदे नि, पर ओरी री खुशिया ते तुसा रे प्यारो री सच्चाई परखणे खे बोलूँआ। 
\v 9 तुसे म्हारे प्रभु यीशुए मसीह री कृपा जाणोए कि से अमीर ऊई की बी तुसा री तंईं कंगाल़ बणीगा ताकि तेसरे कंगाल़ ऊणे ते तुसे अमीर बणी जाओ।
\p
\v 10 सबी ते पईले सिर्फ तुसे लोके ई पिछले साल जो दान देणे रा काम शुरू कित्तेया और जेतेरी योजना तुसे आपू ई बणाई थी। ये तुसा खे अच्छा ए और एसा गल्ला रे आँऊ ये सलाह देऊँआ। 
\v 11 कि एबे एस कामो खे पूरा करो जो तुसे शुरू कित्तेया था। जेड़ी तुसा री इच्छा गरीब विश्वासिया री मताद करने खे पईले थी, तेड़ी ई एबे बी आपणी-आपणी सम्पतिया रे मुताबिक पूरी बी करो। 
\v 12 कऊँकि जे मनो री त्यारी ओ तो दान तेते मुताबिक लया जाओआ, जो तेसगे अया, ना कि तेते मुताबिक जो तेसगे अया नि।
\p
\v 13 आँऊ ये नि चांदा कि ओरी री पलाई करने री बजअ ते तुसा खे कष्ट ओ। पर सबी खे एक जेड़ा मिलणा चाईयो 
\v 14 पर बराबरिया रे बिचारो ते एस बखते तुसा री बड़दी तिना री कटिया रे कामे आओ, ताकि तिना री बड़दी बी तुसा री कटिया रे कामे आओ कि बराबरी ऊई जाओ। 
\v 15 जेड़ा पवित्र शास्त्रो रे लिखी राखेया, “जिने बऊत कट्ठा कित्तेया तेसरा कुछ जादा नि निकल़ेया और जिने थोड़ा कट्ठा कित्तेया तेसरा तिजी तेई गुजारा ऊईगा।”
\s तीतुस और तेस साथे काम करने वाल़े
\p
\v 16 परमेशरो रा धन्यवाद ओ, जिने तुसा री खातर सेई उत्साह तीतुसो रे दिलो रे पाईता रा जो मांदे था। 
\v 17 जेबे आसे तीतुसो खे तुसा गे जाणे खे बिनती कित्ती तेबे तिने म्हारी गल्ल मानी ली। बल्कि बऊत उत्साही ऊई कि से आपणी इच्छा ते तुसा गे आऊणे लगी रा। 
\v 18 और आसे तेस साथे एक ओर विश्वासी पाई पेजणे लगी रे जेसरा नाओं सुसमाचार फैलाणे रे बारे रे सबी मण्डल़िया रे फैली गा रा। 
\v 19 और इतणा ई नि, पर से मण्डल़िया ते ठईराया बी गया कि एस दानो रे कामो खे आसा साथे जाओ और आसे ये सेवा इजी री खातर करूँए ताकि प्रभुए री महिमा ओ और म्हारे मनो री त्यारी मताद करने खे सामणे आयी जाओ। 
\v 20 आसे एसा गल्ला रे चौकस रऊँए कि साथी विश्वासिये खे तीतुसो साथे पेजी की एस उदारता ते दित्ते रे दानो रे बारे रे, जेसरी सेवा आसे करूँए, कोई आसा पाँदे दोष नि लगाई सको। 
\v 21 कऊँकि जो गल्ला बस प्रभुए रेई नेड़े निए, बल्कि मांणूआ रे नेड़े बी खरी ए, आसे तिना री चिन्ता करूँए। 
\v 22 इना दूँईं साथे आसे आपणा एक ओर विश्वासी पाई पेजणे लगी रे। जो आसे बार-बार परखी कि बऊत गल्ला रे खुश पाया। पर एबे तुसा पाँदे तेसखे बऊत विश्वास ए, इजी बजअ ते से ओर बी जादा खुश ए। 
\v 23 जे कोई तीतुसो रे बारे रे पूछो, तो से मेरा साथी, तुसा खे मेरा सहकर्मी और जे म्हारे विश्वासी पाईया रे बारे रे पूछो, तो सेयो मण्डल़िया रे पेजे रे और मसीह री महिमा करोए। 
\v 24 तो आपणा प्यार और आसा रा से कमण्ड जो तुसा रे बारे रे ए मण्डल़िया रे सामणे तिना खे सिद्ध करी की बताओ।
\c 9
\s साथी मसीहिया खे मताद
\p
\v 1 यरूशलेमो री मण्डल़िया रे विश्वासिया खे पैसेया साथे मताद करने री सेवा रे बारे रे माखे तुसा लोका खे लिखणा जरूरी निए। 
\v 2 कऊँकि आऊँ तुसा रे मनो री त्यारिया खे जाणूंआ, जेतेरी बजअ ते आऊँ तुसा रे बारे रे मकिदुनिया प्रदेशो रे लोका रे सामणे कमण्ड दखाऊँआ कि तुसे कुरन्थी लोक अखाया प्रदेशो रे एकी सालो ते त्यार ऊई रे और तुसा रे उत्साहे ओर बी बऊत उभारी राखे। 
\v 3 पर आँऊ तीतुस और दो पाईया खे तुसा गे इजी खे पेजणे लगी रा कि आसे जो कमण्ड तुसा रे बारे रे दखाया, से एसा गल्ला रे बेकार नि ठईरो, पर जेड़ा मैं बोलेया, तेड़े ई तुसे यरूशलेमो रे विश्वासिया खे पैसे देणे खे त्यार रओ। 
\v 4 एड़ा नि ओ कि जे कोई मकिदुनीवासी मां साथे आओ और तुसा खे त्यार नि पाओ, तो क्या पता एस परोसे री बजअ ते जो आसा खे तुसा पाँदे ए शर्मिंदा ऊणा पड़ो। पर तुसा खे ओर बी जादा शर्मिंदा ऊणा पड़ना। 
\v 5 इजी री खातर मैं विश्वासी पाईया ते ये बिनती करना जरूरी समजेया कि सेयो पईले तेई तुसा गे जाओ और तुसा री उदारता रा फल जेतेरे बारे रे पईले तेई वचन दित्तेया था, त्यार करी की राखो कि ये दबाओ ते नि पर उदारता रे फलो जेड़ा त्यार ओ।
\s दान किंयाँ देणा चाईयो
\p
\v 6 पर गल्ल तो ये कि जो थोड़ा बीजोआ, तेस थोड़ा ई बाडणा बी और जो बऊत बीजोआ, तेस बऊत बाडणा। 
\v 7 हर एक जणा जेड़ा मनो रे ठाणो तेड़ा ई दान करो, ना कि कुड़कुड़ाई की और ना दबाओ ते, कऊँकि परमेशर खुशिया ते देणे वाल़ेया साथे प्यार राखोआ। 
\v 8 और परमेशर सब प्रकारो री कृपा तुसा खे बऊत जादा देई सकोआ। जेते साथे हर गल्ला रे और हर बखते, सब कुछ, जो तुसा खे जरूरी ए, तुसा गे रओ और हर एक खरे कामो खे तुसा गे बऊत कुछ ओ। 
\v 9 जेड़ा पवित्र शास्त्रो रे लिखी राखेया,
\q1 “परमेशर खुले दिलो ते कंगाल़ा खे दान देओआ,
\q2 तेसरा तर्म सदा बणेया रा रणा।”
\p
\v 10 परमेशर ईए जो जिम्मीदारो खे बाणे खे बीजो रा और खाणे खे रोटिया रा इन्तजाम करोआ। तेस तुसा खे बी इन्तजाम करना और तुसे फलवंत करने, ताकि तुसे जरूरतमंद लोका खे खुले दिलो ते मताद करी सको। 
\v 11 तुसे लोक हर प्रकारा री आशीषा ते भरपूर ऊई जाणे। जेबे आसा तुसा रा दान बाँडणा तो बऊत सारे लोका परमेशरो रा धन्यवाद करना।
\p
\v 12 ये सेवा पूरी करने ते, ना बस विश्वासी लोका रिया कमिया पूरिया ओईया, बल्कि तिना री तरफा ते परमेशरो रा बऊत धन्यवाद ओआ। 
\v 13 कऊँकि दान देई की ओरी खे मताद करने री सेवा खे सबूत मानी की परमेशरो री महिमा सामणे आओई कि तुसे मसीह रा सुसमाचार मानी की तेसरे अधीन रओए और तिना री और सबी री मताद करने रे उदारता दखाओए। 
\v 14 सेयो तुसा खे परमेशरो ते प्रार्थना करोए और तुसा खे देखणे री इच्छा करोए। कऊँकि परमेशरे तिना खे आशीष देणे रे तुसा लोका रा इस्तेमाल करी राखेया। 
\v 15 परमेशरो रा तेसरे तेस दानो खे जो कईणे ते बारे ए, धन्यवाद ओ।
\c 10
\s पौलुसो रा अक्क
\p
\v 1 आऊँ पौलुस तुसा खे मसीह री नम्रता और नरमाईया साथे मेरी गल्ला सुणने खे विनती करूँआ। माखे तुसा बीचे आजीर ऊणे पाँदे बोलणे रे डरपोक और पीठी पीछे नडरा समजेया जाओआ। 
\v 2 आऊँ ये बिनती करूँआ कि जेबे आँऊ तेती तुसा गे आँऊ तो माखे तिना लोका खे जो ये सोचोए कि आसे दुनिया रे लोका रे मुताबिक चलणे वाल़े ए, से सखतयाई माखे दखाणी ना पड़ो जेतेरी मांते उम्मीद कित्ती जाओई। 
\v 3 हालाँकि आसे दुनिया रे चलूँ-फिरूँए, तेबे बी दुनिया रे लोका जेड़े आसे दुश्मणा ते नि लड़दे। 
\v 4 कऊँकि म्हारी लड़ाईया रे अथियार दुनिया जेड़े निए, पर दुश्मणा रे गढ़ो खे टाल़ने खे परमेशरो रे सामर्थी अथियार ए। 
\v 5 तो आसे ख्यालो खे और हर एक ऊच्ची गल्ला खे, जो परमेशरो री पछयाणी रे बिरोदो रे ऊठोई, खण्डन करूँए; और हर एकी इच्छा खे कैद करी की मसीह रा आज्ञाकारी बणाई देऊँए। 
\v 6 और जेबे तुसे मसीह री आज्ञा पूरिया तरअ ते मानणे लगी जाओ, तो आसे हर एक तरअ री आज्ञा ना मानणे वाल़ेया खे सजा देणे खे त्यार ए।
\p
\v 7 तुसे इना ई गल्ला खेई देखोए, जो आखी रे सामणे ए, जे केसी रा आपू पाँदे ये विश्वास ओ कि आऊँ मसीह राए, तो से ये बी जाणी लो कि जेड़ा से मसीह राए, तेड़े ई आसे बी मसीह रे ए। 
\v 8 कऊँकि जे आऊँ तेस अक्को रे बारे रे ओर बी कमण्ड दखाऊँ, जो प्रभुए तुसा रे विश्वासो खे नाश करने खे नि, पर तुसा रे विश्वासो खे बड़ाणे खे आसा गे देई राखेया, तो आँऊ शर्मिंदा नि ऊणा। 
\v 9 ये आऊँ इजी री खातर बोलूँआ कि चिट्ठिया रे जरिए तुसा खे डराणे वाल़ा नि ठईरूँ। 
\v 10 कऊँकि तुसा बीचा ते कुछ लोक बोलोए, “तेसरी चिट्ठिया तो दमदार और असरदार ए; पर जेबे देखोए तो से शरीरो रा कमजोर और बोलणे रे अल़का जाणोआ।” 
\v 11 तो जो लोक एड़ा बोलोआ, से ये समजी लो कि जेड़ा पीठी पीछे चिट्ठिया रे म्हारे वचन ए, तेड़ा ई तुसा रे सामणे म्हारे काम बी ऊणे।
\p
\v 12 कऊँकि आसा रे ये इम्मत निए कि आसे आपणे आपू खे तिना बीचा ते एड़े कितणेया साथे गिणिये या तिना साथे आपू खे मलाईये, जो आपणी तारीफ आपू करोए और आपू खे आपू बीचे नापी-तोली की एकी दूजे साथे मिली की मूर्ख ठराओए। 
\v 13 आसे तो कामो री सीमा ते बारे कदी बी कमण्ड नि करदे, पर तेसा ई सीमा तक जो परमेशरे आसा री तंईं ठराई राखी और तिदे तुसे बी आईगे रे और तिजी रे मुताबिक कमण्ड बी करूँगे। 
\v 14 कऊँकि आसे आपणे कामो री सीमा ते बारे आपू खे बड़ाणा नि चांदे, जेड़ा कि तुसा तक पऊँछणे री दशा रे ऊँदा। आसे तुसा खे मसीह रा सुसमाचार सुनाणे खे सबी बाटा रिये ऊँदे ऊए कुरिन्थ नगरो रा सफर करने वाल़े पईले मांणू थे। 
\v 15 और आसे सीमा ते बारे ओरी री मईणता पाँदे कमण्ड नि करदे, पर आसा खे उम्मीद ए कि जिंयाँ-जिंयाँ तुसा रा विश्वास बड़दा जाणा, तिंयाँ-तिंयाँ आसे आपणी सीमा रे मुताबिक तुसा री बजअ ते ओर बी लोका तक पऊँछदे जाणे, 
\v 16 ताकि आसे तुसा री सीमा ते आगे बड़ी की दूर-दूर जगा रे बी सुसमाचार सुणाईए। कऊँकि ये निए कि आसे ओरी री सीमा रे पीतरे बणे-बणाए कामो पाँदे कमण्ड करिए। 
\v 17 जेड़ा कि पवित्र शास्त्र बोलोआ, “जो कमण्ड करो, से सिर्फ प्रभुए पाँदे कमण्ड करो।” 
\v 18 कऊँकि जो आपणी तारीफ करोआ, से नि, बल्कि जेसरी तारीफ प्रभु करोआ, सेई ग्रहण कित्तेया जाओआ।
\c 11
\s पौलुस और चूठे प्रेरित
\p
\v 1 तुसे ओरी लोका री जो आपणे बारे रे खरिया गल्ला बोलोए तिना खे सईन करी लओए। आँऊ बी ये उम्मीद करूँआ कि तुसे मेरी बी थोड़ी जी मूर्खता सईन करी लओ। 
\v 2 जिंयाँ परमेशर त्यान राखोआ तिंयाँ ई आऊँ तुसा रे बारे रे चिन्ता करूँआ। तुसे एक पवित्र कुआँरिया जेड़े ए जो मैं एकलौते लाड़े यीशु मसीह खे देणे खे चुणी राखे। 
\v 3 पर आऊँ डरूँआ कि जेड़े शैताने सापो रे रूपो रे पईली जवाणस हव्वा बईकाई, तेड़े ई तुसा रे मन तेसा सिधाईया और पवित्रता ते जो मसीह साथे ऊणी चाईयो, केथी प्रष्ट नि करे जाओ। 
\v 4 जे कोई तुसा गे आयी की केसी दूजे यीशुए रा प्रचार करो, जेतेरा प्रचार आसे नि कित्तेया; या कोई और ई आत्मा तुसा खे मिली जाओ, जो पईले नि मिलेया था; या और ई कोई सुसमाचार सुणाओ जो तुसे पईले नि मानी राखेया ओ, तो तुसा रा इना शिक्षा खे मानणा गल़त ए।
\p
\v 5 आऊँ तो समजूँआ कि आऊँ किजी बी गल्ला रे तिना ते जो आपणे आपू खे बड़ा प्रेरित समजोए कम निया। 
\v 6 जे आऊँ बोलणे दे अनाड़ी ए, फेर बी माखे मसीह और सुसमाचारो रे बारे रे ज्ञान ए। आसे इजी रा सबूत हर प्रकारा री गल्ला दे सिखाणे रे जरिए देईता रा। 
\v 7 क्या इदे मैं कुछ पाप करेया कि मैं तुसा खे परमेशरो रा सुसमाचार मुफ्त सुणाया और आपणे आपू खे नीच करेया, ताकि तुसे ऊच्चे ऊई जाओ? 
\v 8 तुसा लोका री मुफ्तो रे सेवा करने खे मैं ओरी मण्डल़िया ते आपणा जीवन चलाणे खे दान लया तुसे एड़ा नि बोलो कि मैं सेयो लूटिते। 
\v 9 जेबे आँऊ तुसा साथे था और माखे पैसेया री जरूरत ऊई, तो मैं केसी पाँदे पाअर नि दित्तेया। कऊँकि विश्वासी पाईए मकिदुनिया प्रदेशो ते आयी कि मेरी पैसेया री जरूरत पूरी कित्ती। मैं हर गल्ला रे आपू खे तुसा पाँदे पाअर ऊणे ते रोकेया और रोकेया रा राखूँगा। 
\v 10 जे मसीह री सच्चाई मांदे आए, तो अखाया प्रदेशो रे कोई माखे इजी पाँदे कमण्ड करने ते नि रोकी सकदा। 
\v 11 मैं तुसा रे पैसे कऊँ नि लये? क्या इजी खे कि आऊँ तुसा खे प्यार नि करदा? परमेशर ये जाणोआ कि आऊँ प्यार राखूँआ।
\p
\v 12 पर जो आऊँ करूँआ, सेई करदा रणा ताकि जो लोक मोका टोल़ोए, तिना खे मां मोका नि देणा, ताकि सेयो तिना कामा रे कमण्ड नि करो, कि तिना रा काम आसा जेड़ा ईए। 
\v 13 कऊँकि एड़े लोक चूठे प्रेरित, तोखे साथे काम करने वाल़े और मसीह रे प्रेरित ऊणे रा ढोंग करोए। 
\v 14 और ये कुछ अचम्बे री गल्ल निए कऊँकि शैतान आपू बी ज्योतिर्मय स्वर्गदूत ऊणे रा ढोंग करोआ। 
\v 15 तो जे शैतानो रे सेवक बी तर्मी सेवको जेड़े ऊणे रा ढोंग करोए, तो कोई बड़ी गल्ल निए, पर तिना रा अंत तिना रे कामो रे मुताबिक ऊणा।
\s प्रेरितों रे रूपो रे पौलुसो रा दु:खपोग
\p
\v 16 आऊँ फेर बोलूँआ कि कोई माखे मूर्ख नि समजो। पर जे तुसे आँऊ एड़ा मानी ला रा तो माखे मूर्ख ई समजी की सईन करी लो, ताकि आऊँ बी थोड़ा जा कमण्ड करुँ। 
\v 17 इजी रे बारे रे आँऊ जो कुछ बोलूँआ से प्रभुए री आज्ञा रे मुताबिक निए, पर न समजो रे मुताबिक नशंग कमण्डो ते बोलूँआ। 
\v 18 जबकि बऊत लोक दुनिया रे लोका रे मुताबिक कमण्ड करोए, तो मां बी कमण्ड करना। 
\v 19 तुसे तो समजदार ऊई की खुशिया साथे मुर्खा री सईन करी लओए। 
\v 20 कऊँकि जेबे तुसा खे कोई दास बणाई लओआ या तुसा गे जो कुछ बी ओ से बी लई लओआ, या तोखा देई की फाईदा लई लओआ, या आपणे आपू खे तुसा ते बड़ा बणाई देओआ, या तुसा रे मुंओ पाँदे थप्पड़ बाओआ, तो तुसे सयी लओए। 
\v 21 शायद माखे शर्मिंदा ऊणा चाईयो कि माखे तुसा लोका साथे एड़ा बर्ताव करने री इम्मत नि ऊई।
\p पर जेसा केसी गल्ला रे कोई कमण्ड करोआ आऊँ मूर्खताईया रे बोलणे लगी रा कि आऊँ बी कमण्ड करी सकूँआ। 
\v 22 क्या सेयो ई इब्रानी ए? आऊँ बी ए। क्या सेयो ई इस्राएली ए? आऊँ बी ए। क्या सेयो ई अब्राहमो रे वंशो रे ए? आऊँ बी ए। 
\v 23 क्या सेयो ई मसीह रे सेवक ए? आऊँ पागलो जेड़ा बोलूँआ, पर आऊँ तिना ते केथी बढ़ी की सेवक ए। मैं तिना ते केथी जादा मईणत करी राखी, तिना ते जादा आँऊ बार-बार जेला रे गया, कई बार कोड़े खाई राखे, जादातर मेरे ई प्राण मुसीबता रे पड़ी रे। 
\v 24 पाँज बार मैं यहूदी अगुवे रे आथो साथे ऊँताल़ी-ऊँताल़ी कोड़े खाए। 
\v 25 तीन बार मैं डण्डे खाए, एक बार मां पाँदे पात्थर बाए, तीन बार जाह्जो रे जिना पाँदे आऊँ चढ़ेया था, टूटी गे, एक दिन और एक रात मैं समुद्रो रे बिताया। 
\v 26 आऊँ बार-बार सफरो रे, नदिया रे खतरेया रे, डाकूआ रे खतरेया रे, आपणी जाति वाल़ेया रे खतरेया रे, दूजी जातिया रे खतरेया ते, नगरो रे खतरेया रे, सुणसाण जगा रे खतरेया रे, समुद्रो रे खतरेया रे, चूठे विश्वासी पाईया बीचे खतरेया रे रया। 
\v 27 मैं सख्त मईणत कित्ती और बऊत राती जागदे ऊए बिताई। माखे बार-बार खाणे खे रोटी नि मिली। पूख-त्याय, सेल़ा और टालेया री कमी इना सबी तकलीफा खे सईन करदा रया। 
\v 28 और ओरी गल्ला खे छाडी की जिना रे बारे रे आऊँ नि बतांदा, सबी मण्डल़िया री चिन्ता माखे हर रोज दबाओ थी। 
\v 29 जेबे कोई कमजोर ओआ तो आँऊ बी कमजोरी महसूस करूँआ। जेबे कोई पापो रे पड़ोआ तो मेरा जिऊ बऊत दुःखी ओआ।
\p
\v 30 जे कमण्ड करना जरूरी ए, तो मां आपणी कमजोरिया री गल्ला पाँदे करना। 
\v 31 प्रभु यीशु मसीह रा पिता परमेशर जो सदा धन्य ए, जाणोआ कि आऊँ चूठ नि बोलदा। 
\v 32 जेबे आँऊ दमिश्क नगरो रे था तो अरितास राजे रे राज्यपाले माखे पकड़ने खे दमिश्क नगरो रे पईरा बठयाल़ी ता 
\v 33 और आऊँ टोकरिया रे दवारिया ते ऊई की पीतो पाँदा ते त्वारेया और तेसरे आथो ते बची की निकल़ी गा।
\c 12
\s पौलुसो रा दिव्य दर्शन और कमजोरी
\p
\v 1 त्वाल़िया देणे ते कुछ बी फाईदा निए, तेबे बी माखे एड़ा करना पड़ोआ। आऊँ प्रभुए रे दित्ते रे दर्शन और परकाशनो री चर्चा करूँगा। 
\v 2 आँऊ चौदा साल पईले स्वर्गो रे चकी ता। चाए आँऊ आपणे शरीरो रे या आपणे शरीरो रे बारे था आँऊ नि जाणदा परमेशर ई जाणोआ। 
\v 3 आ, सिर्फ परमेशर ई जाणोआ कि आऊँ शरीरो रे था या शरीरो ते बारे था। पर आँऊ जाणूंआ 
\v 4 कि आँऊ स्वर्ग रे चकी ला था। मैं तेती एड़िया नौखिया गल्ला सुणिया जिना खे शब्दा रे जरिए नि बोली सकदे और जिना रा मुंओ रे ल्याऊणा मांणूआ खे ठीक निए। 
\v 5 इना गल्ला पाँदे कमण्ड करना ठीक ए, पर आँऊ एड़ा करने वाल़ा निए। मां सिर्फ आपणी कमजोरिया पाँदे कमण्ड करना।
\p
\v 6 जे आऊँ कमण्ड करना चाऊँ बी तो मूर्ख नि ऊणा, कऊँकि सच बोलूँगा। पर आँऊ आपणे आपू खे कमण्ड करने ते रोकूँआ। कऊँकि लोक जेड़ी मेरी जिन्दगिया खे देखोए और मांते उपदेश सुणोए तिजी ते जादा बढ़ी की माखे कुछ बी नि समजो।
\p
\v 7 माखे परमेशरे बऊत ई नौखिया गल्ला दखाईया। आँऊ इना गल्ला पाँदे कमण्ड नि करूँ इजी खे मेरे शरीरो रे एक कांडा चुबाई राखेया। से कांडा शैतानो रा दूत ए से माखे तकलीफ देंदा रओआ कि आऊँ कमण्ड नि करूँ। 
\v 8 इजी रे बारे रे मैं प्रभुए ते तीन बार बिनती कित्ती कि ये मांते दूर ऊई जाओ। 
\v 9 प्रभुए माखे बोलेया, “मेरी कृपा ताखे बऊत ए; कऊँकि मेरी सामर्थ कमजोरिया रे बऊत अच्छा काम करोई।” इजी री खातर आऊँ बड़ी खुशिया साथे आपणी कमजोरिया पाँदे कमण्ड करूँगा ताकि मसीह री सामर्थ मां पाँदे छांएं करदी रओ। 
\v 10 इजी बजअ ते आऊँ मसीह री खातर कमजोरिया रे, निन्दा रे, गरीबिया रे, उपद्रवो रे और मुसीबता रे खुश ए; कऊँकि जेबे आऊँ कमजोर ओऊँआ, तेबे मसीह री सामर्था ते तागतबर ओऊँआ।
\s कुरिन्थियों खे पौलुसो री चिन्ता
\p
\v 11 आऊँ मूर्खता री गल्ला करूँआ, पर तुसे लोके ई मांते ये जबरदस्ती कराया। तुसा तो मेरी सपारिश करनी चाईए थी, हालाँकि आऊँ कुछ पनिए, तेबे बी तिना बड़ेया ते बड़े प्रेरित बोलणे वाल़ेया ते किजी गल्ला रे बी कम निए। 
\v 12 जेबे आँऊ तुसा साथे था तो मैं तुसा खे प्रेरित ऊणे रा प्रमाण दित्तेया। मैं सब्रो साथे तुसा बीचे चिह्न्, अचम्बे रे काम और सामर्था रे काम दखाए। 
\v 13 ओरी मण्डल़िया रे मुकाबले रे तुसा लोका रे किजी गल्ला री कमी रईगी? आ, आँऊ तुसा लोका पाँदे बोज नि बणेया। तुसे मेरा ये अन्याय माफ करेयो।
\p
\v 14 देखो, आऊँ तीजी बार तुसा गे आऊणे खे त्यार ए और मां तुसा पाँदे कोई बोज नि राखणा। कऊँकि आऊँ तुसा री सम्पति नि, बल्कि तुसा खेई चाऊँआ। कऊँकि बच्चेया, माया-बावा खे पैसा कट्ठा नि करना चाईयो, पर माया-बावा, बच्चेया खे पैसा कट्ठा करना चाईयो। 
\v 15 मां तुसा लोका रिया तंईं बड़ी खुशिया साथे खर्च करना, और आपणे प्राण बी तुसा खे देई देणे। क्या जितणा जादा आऊँ तुसा साथे प्यार राखूँआ, तिथणा ई कअटी की तुसे बी मांते प्यार राखोगे?
\p
\v 16 फेर बी तुसा खे ये मानणा पड़ना कि आँऊ तुसा लोका पाँदे बोज नि बणेया, पर एड़ा ऊई सकोआ कि कोई बोलो कि मैं चलाकिया ते तुसे तोखा देई कि फसाई ले। 
\v 17 तुसेई बताओ जो लोक मैं तुसा गे पेजे, क्या तिना लोका बीचा ते किने बी तोखा करी की तुसा ते कुछ गल़त फाईदा लया? 
\v 18 मैं तीतुसो खे समजयाई की तेस साथे से पाई पेजेया, तो क्या तीतुसे तोखा करी की तुसा ते कुछ गल़त फाईदा लया? क्या आसे एक ई पवित्र आत्मा रे चलाए नि चले? क्या एक ई बाटा रे नि चलिए?
\p
\v 19 पर तुसे एबुए तक समजणे लगी रे ऊगे कि आसे तुसा सामणे जवाब देणे लगी रे। आसे तो परमेशरो खे आजीर जाणी की मसीह रे बोलूँए। ओ प्यारेओ, सब गल्ला तुसा रे विश्वासो री बड़ोतरिया खे बोलूँए। 
\v 20 कऊँकि माखे डर ए कि केथी एड़ा नि ओ कि आऊँ आईकि जेड़ा चाऊँआ, तिंयाँ तुसा खे नि पाऊँ और माखे बी जेड़ा तुसे नि चांदे, तेड़ा ई पाओ। केथी एड़ा नि ओ कि आँऊ तुसा रे एती आईकि चगड़ा, जल़न, रोष, बिरोद, ईर्ष्या, चुगली, कमण्ड और बखेड़े पाऊँ 
\v 21 और केथी एड़ा नि ओ कि जेबे आँऊ वापस आँऊ तो मेरा परमेशर माखे तिना सामणे शर्मिंदा नि करी देओ और माखे बऊत जणेया खे फेर शोग करना पड़ो, जिने पईले पाप कित्तेया था और गन्दे काम, व्याभिचार, लीचड़पण ते, जो तिने कित्तेया, मन नि फेरेया।
\c 13
\s आखरी चेतावणी
\p
\v 1 एबे तीजी बार आँऊ तुसा लोका गे आऊणे वाल़ा ए। पवित्र शास्त्र बोलोआ, “दो या तीन गवाओ री गवाईया रे जरिए हर एक गल्ल साबित कित्ती जाओ।” 
\v 2 जेड़ा जेबे आऊँ दूजी बार तुसा साथे था, तो तेड़ा ई एबे दूर रंदे ऊए तिना लोका खे जिने पईले पाप कित्तेया और बाकि सबी लोका खे एबे पईले तेई बोली देऊँआ कि जे आऊँ फेर आऊँगा, तो सजा दित्ते बिना छाडूंगा नि। 
\v 3 आँऊ तुसा ते बोलूँआ कि तुसे तो इजी रा सबूत चाओए कि मसीह मेरे जरिए बोलोआ। तुसा खे सुदारने खे मसीह कमजोर निए, पर तुसा रे सामर्थी ए। 
\v 4 से कमजोरिया री बजअ ते क्रूसो पाँदे चढ़ाया तो गया, तेबे बी परमेशरो री सामर्था ते जिऊँदा ए। आसे बी तो तेसदे कमजोर ए, पर परमेशरो री सामर्था ते जो तुसा खे ए, तेस साथे जिऊणे।
\p
\v 5 आपणे आपू खे परखो कि तुसे विश्वासो रे आए कि नि। आपणे आपू खे परखो, क्या तुसे आपणे बारे रे ये नि जाणदे कि यीशु मसीह तुसा रे ए? नई तो तुसे परखणे रे नक्कमे निकल़ी रे। 
\v 6 पर मेरी उम्मीद ए कि तुसे जाणी लो कि आसे नक्कमे नि निकल़े। 
\v 7 और आसे आपणे परमेशरो ते प्रार्थना करूँए कि तुसे कोई बुराई नि करो; इजी खे नि कि आसे खरे दिखूँ, पर आसे एड़ा ई चाऊँए कि तुसे पलाई करो, चाए आसे नक्कमे ई ठईरूँ। 
\v 8 कऊँकि आसे सच्चो रे बिरोदो रे कुछ नि करी सकदे, पर सच्चो साथे सदा खड़े रई सकूँए। 
\v 9 जेबे आसे कमजोर ए और तुसे तागतबर ए, तो आसे खुश ओऊँए और ये प्रार्थना बी करूँए कि तुसे विश्वासो रे मजबूत ऊई जाओ। 
\v 10 येई बजअ ए कि आऊँ तुसा गे आऊणे ते पईले इना सारी गल्ला खे लिखूँआ ताकि माखे आपणे अक्को रा इस्तेमाल करी की तुसा खे सजा देणे रे जरूरत नि पड़ो, से अक्क माखे परमेशरे देई राखेया। कऊँकि आँऊ आपणा अक्क तुसा रे विश्वासो खे मजबूत करने खे चाऊँआ न कि तिजी खे नाश करने खे।
\s आखरी अभिवादन
\p
\v 11 ओ साथी विश्वासियो, आँऊ इना शब्दा साथे आपणी चिट्ठी बन्द करूँआ। खुश रओ, सिद्ध बणदे जाओ, एकी दूजे खे औंसला देंदे रओ, एक ई मन राखो, मेल-मिलापो साथे रओ। तेबे प्यार और शान्तिया रा परमेशर तुसा साथे रणा।
\p
\v 12 एकी-दूजे खे प्यारो साथे गल़े मिली की नमस्कार करो। 
\v 13 सब परमेशरो रे पवित्र लोक तुसा खे नमस्कार करोए।
\p
\v 14 प्रभु यीशु मसीह री कृपा, परमेशरो रा प्यार और पवित्र आत्मा री सहभागिता तुसा सबी साथे ऊँदी रओ।