\id GAL  - Benabena NT [bef] -Papau New Guinea 1982 (DBL -2014) 
\h GALESIA 
\toc1 Galesia Polu koyoto epiꞌehina fayahi 
\toc2 Galesia 
\toc3 Gal 
\mt1 GALESIA  
\mt2 Polu koyoto epiꞌehina fayahi  
\c 1  
\p
\v 1 Poluita nani aposolo bo nohugo yaꞌma bo moneuba noho melifiꞌehina yabe. To bonaꞌmagi liliꞌnaga meli neteꞌahana yabe. Yesu Kilisito to aimo filiꞌehinaguti leꞌmo ho tiꞌehina bouba, afotifu Huꞌma yaꞌma aiꞌa kagaꞌalo aposolo lolo huꞌohuna yabe.  
\v 2 To nani nalaluꞌnigihi lugaꞌa maga nehanaꞌa enali hiti moneka nohutoti yaꞌma Yesuhi nagaꞌa Galesia metoga minete biꞌahana bonaꞌi lenali fayahi yaꞌma koyoto nolepunagihe.   
\p
\v 3 Afotifu, Huꞌmau to Sipi Boti Yesu Kilisito aitogati leheꞌmoseꞌna hiti fulunaꞌa hiti lenalitoga minomo tito mineno.   
\p
\v 4 Yesu ai afotifu Huꞌma ai kagaꞌalo yaꞌma ho tilina kanaꞌalo foipanauba leleꞌmo sibina nohinogo gulu ho letalinaꞌmu yabe luto lali foipanatiꞌmu yabe luto yaꞌma aiꞌa gufaꞌa hꞌemiꞌehina yabe.  
\v 5 Ya huꞌehinaꞌmu Huꞌmamofihi giꞌamu fokehi liba liba huto mino lito buto minalibe. Maꞌnaka.   
\s1 Ka lamanaꞌa fatoꞌi mone meniꞌibe  
\p
\v 6 Lenali yaꞌma Kilisitohi leheꞌmose nasanagu molo emilabe luto elesa molo epiꞌehina bomofitoga mino hepi bati hite meminese lenemegesa hi emilete fato monolugu yaꞌma bite lenegekesa melete kehelilata nehabe. Nani yaꞌmu yaꞌma nehanaꞌamu topa hoto oho luto nolu lepolobe.  
\v 7 Ka lamanaꞌa yaꞌma fato fato ka meniꞌinaya faꞌmene bonaꞌi lugaꞌamagi Kilisitohi kaꞌa yaꞌma li sibina hilupi lite fato mono ka lu lepite komopatini li sibi sibi hite yamofihi suhi hilata nehabe.  
\v 8 Nanifi to kokulumaguti agelo moneubafi ka lamanaꞌa afehaꞌalo lu lepiluta logo hepalugu nagaꞌi lolo hilutaꞌaloko niꞌibe.  
\v 9 Yaꞌma kaga koyapaꞌi luꞌohuta anaꞌago akuꞌi nolube. Moneꞌamagi yaꞌma ka lamanaꞌa afehaꞌalo lu melepiꞌahanamo lu sibi hite fatoꞌmofihi lolo hite lu lepilana yaꞌma logo hepalugu nagaꞌi lolo hilanaꞌmu yabe luto akuꞌi yaꞌma nolube.   
\p
\v 10 Ka noluna yaꞌma bonaꞌmagi bu gete lagaꞌa kehelilabe luto nolufihe? Oꞌe. Huꞌmau aiꞌa bu genogo bati hilibe luto yaꞌma nolube. Nani yaꞌma bonaꞌmagi nani kumu kehelinogo tilibe luto foya yaꞌma nolufihe? Oꞌe, to nani bonaꞌmagi nani kumu laga epesilinaꞌmu sa sa nohufiye? Oꞌe, Yaꞌma hutita Kilisitohi kele kele boꞌa lolo huto meminotitaꞌmu yabe.   
\s1 Polu aposolo lolo huꞌehinamofihi hapaꞌa  
\p
\v 11 Nalaluꞌnigita nani yaꞌma kaga lu lepilugi kehelilo. Ka lamanaꞌa lu lepiꞌohunamo yamofihi bonaꞌmagi enegekesa kehelite yamofihi li huto hiꞌahana meniꞌibe.  
\v 12 To melugu bonaꞌmagitogati meliꞌohube. To bonaꞌmagi menelepiꞌahana. Yesu Kilisitou aiꞌasigo lu hokolo huto huto lu nimiꞌehinamo niꞌibe.   
\p
\v 13 Nani koyapaꞌi Yuta bo nohuto lali folagahatigu minoto anaꞌina lolo huto moloto huꞌohunaꞌa alu lepugo keheliꞌahabe. Nani yaꞌma komopaꞌni uleꞌale huto Yesuhi kaꞌa keheliꞌahana bonaꞌi kalanaꞌi molo epoloto enahalube luto enoho lifi heꞌmito eneleꞌmo sibina sabana huꞌohunamo niꞌibe.  
\v 14 Yuta yagapanaꞌi nafaluꞌnigihi enebe ligito itoꞌnigihi afoꞌnigihi to tatatigihi kaꞌani yaꞌma limi lalibe luto ana kauba amuya moloto minalibe luto luloto yaꞌma amuya moloto ya hulata huꞌohunamo niꞌibe.   
\p
\v 15 Ya hulata huꞌohunamoya Huꞌmau aiꞌa yaꞌma afehaꞌaga itoꞌnifihi ipagu nohugo bu goloto mehi nimito neleꞌmo eto huloto aiꞌa foyaꞌa lilube luto elesa molo nimiꞌehinamo niꞌibe.  
\v 16 Elesa molo nimiꞌehina yaꞌma keheligo tigo kaꞌa yaꞌma fegutoga bonaꞌi enalitoga ka lamanaꞌa lu yege hoto yaꞌma luto lu hofa talane luto panaꞌamofihi hapaꞌa lu huto huto nelepiꞌehina. To ya huꞌehinaya ana kagamuꞌi yaꞌma nani fatoꞌi lu nimilo luto bonaꞌmagihi suhi lolo huto loka meho epoloꞌohunamo niꞌibe.  
\v 17 To Yelusale hepatoga aposolo kohe tete lolo hite mineꞌahanaꞌa bu enagalube kagamuꞌi enoloka halube luto metiꞌohunamo niꞌibe. Anaga mebuse ka meꞌi mone Alebia metoga fotoga buto minoto i behe huto Tamasiko hepatoga buto nehetiꞌohuna.  
\v 18 Nehetito nohugo yalo kufu kana loebe monebe nobigo Pitahi bu galube luto Yelusale hepatoga nehetugo ai hiti loe salelegu minoꞌohuꞌina yabe.  
\v 19 Ya huto nohuꞌigo aposolo bo lugaꞌa bu meenogobe. Sipi Bomofihi gonaꞌa Yemesihi yaꞌma aigo bu goꞌohuna yabe. Yana bonaꞌmagi aposolo neleꞌmo ho metiꞌahanagi Huꞌmau aiꞌago neleꞌmo ho tiꞌehina.  
\v 20 To yaꞌma nolunaya mone faga menolube. Yaꞌma fayahi nokoyona Huꞌmamofihi bulo lamaꞌnaka luto fayahi nokoyobe.   
\p
\v 21 Yelusale hepatoga ya huto minolotoꞌni yaꞌma Silia metoga to Silisia metoga yaꞌma buto minoꞌohuna yabe.  
\v 22 To Yutia melugu Yesuhi panaꞌaloboꞌa yaꞌma nogokabalo bu megeꞌahana yabe.  
\v 23 Enali yaꞌma bonaꞌi lugaꞌamagi kagꞌa lago yaꞌma lite keheliꞌahana: Kalanaꞌi molo letoto lohoto ho lifiꞌehina Yesuhi ka li sibina hilube luto huꞌehina bomo akuꞌi i gelehe huto bonaꞌi yaꞌma Yesuhi ka lamanaꞌa lu noepibe.  
\v 24 Ya lite lilete yaꞌma hapaꞌa kehelite nani kumu yabe lite Huꞌmamofitoga fokehi hete enegelo hiꞌahanamo niꞌibe.   
\c 2  
\s1 Aposolo bonaꞌi lugaꞌamagi Poluhi liliꞌnaꞌamu kehelite meleꞌahana  
\p
\v 1 Ya hulago kufu kanaꞌa 14 nobigo yaꞌma Banabasi hiti leꞌali Yelusale hepatoga akuꞌi i behe huto bulototiꞌa Taitasihi yaꞌma leꞌmoto buto moneka buꞌohuta.  
\v 2 Yamofihi faꞌmene ya mebuꞌohube. Huꞌmau kaꞌa lu hokolo huto lu nimiꞌehinalo yaꞌmu buꞌohuna yabe. Yaꞌma fegutoga bonaꞌi ka lamanaꞌa yaꞌma lu huto huto lu epilata nohuna ka yaꞌma mono kalo enigihiti bo enaliꞌanisigo li nupa hite suguna nehago beto hu epiꞌohuna yabe. Nani yaꞌma foyaꞌa kohe toto lito minoꞌohunaꞌa to akuꞌi yatai lito nominanaꞌa yamofihi faꞌmenena lolo hu lalibe luto nani foyaꞌnimu buto beto epiꞌohuna yabe.  
\v 3 Ya hulago enali yaꞌma Taitasi Giliki bo nohinaya yanaꞌmu Huꞌmamofihi kaga kehelise bo yaꞌma Yuta bo lolo hilibe luto gufaꞌalo laga huseꞌnaꞌa hiti minalibe lu memolo eteꞌahana yabe.  
\v 4 Akuꞌi ema afetoga bonaꞌi lugaꞌa enali minete fagalo bo yaꞌma ete folagahatigu sugunaꞌi nehetite mineꞌahanamagi enali ya suhi huto gufaꞌa laga hu etalune lite liꞌahabe. Lali Kilisitotoga buto molo emiloto minoto li meleꞌahana kamofihi nagalugu meminoꞌohutamo niꞌibe. Enali yamofihi hapaꞌa bu galune lite nelite keya ka lu laga huto luꞌehinamofihi kele keleꞌi pananaꞌa ana suhi hite kagagu leleꞌmo malalune lite kofohi kapo oꞌehina.  
\v 5 Enali ya bomagi laliꞌi leleꞌmo afetoga malalune lite nelago lali ka lamanaꞌamofihi hapaꞌamu kaba hu lepoloꞌohuta yaꞌma ka lamanaꞌauba lenalitoga buto leꞌmo amuya malalibe luto kaꞌani heꞌmito kanaꞌa moneꞌya hiti megeꞌi memoloꞌohutamo niꞌibe.   
\p
\v 6 Ya higo enali mono kaba bonaꞌmagi mone fato ka hiti memeleꞌahana yabe. Enali lusi kaba bonaꞌi mineꞌahafi ya memineꞌahafi nani keheli bati mehube. To ya nehafi menehafi kehelugo faꞌmenena niꞌibe. To Huꞌmau ai bonaꞌmagihi enugufaꞌanigo bu goloto eneleꞌmo ho tila limila menohibe. Komopaꞌani bu goloto ya nohibe. Ya huto niꞌinaya nani Yelusale hepatoga buna yupahi yaꞌma mono ka kaba bonaꞌi enali kosaba ka mone lu menimiꞌahana yabe.  
\v 7 Enali ma lite keheliꞌehite: Huꞌmau ai Pitahi yaꞌma Yuta bonaꞌi enalitoga ka lamanaꞌa lu huto huto lu epilibe luto lu etoꞌehinamo ana suhi huto nani yaꞌma fegutoga bonaꞌi enalitoga ka lamanaꞌa lu huto huto lu epilane luto lu netoꞌehina, enali yaꞌma keheliꞌahana yabe.  
\v 8 Pitau ai Huꞌmamofihi amuyalo yaꞌma Yuta bonaꞌmagihi aposolo lolo huꞌehina. Ana suko huto nani yaꞌma Huꞌmamofihi amuyalo fegutoga bonaꞌmagihi aposolo lolo huꞌohuna.  
\v 9 Ya hulago Yemesiugo Pitaugo Yoniugo monoꞌmofihi enikibina bo nehafihe lite keheliꞌahana yamagi Huꞌmau pa sose foyaꞌalo leꞌmo hetofa huꞌehibe lite nani kumu ya lite keheliꞌahana. Kehelilete lalalutifu yabe lite Banabasi hiti leꞌeyanugu liꞌahana. Ya hilete lenali fegutoga bonaꞌmagitoga Huꞌmamofihi foya nelinogo laliti Yuta bonaꞌmagitoga nelinogo huto minalune lite lu meleꞌahana.  
\v 10 Enumuhi meniꞌina bonaꞌi enali limite nehanaꞌa i pebisa meho epolose eneheꞌmalane lite nelite yaꞌma kagaꞌasigo lu nimiꞌahana. To ana foya emasana amuya moloto liꞌohube luto kehelito nohunalo nohube.   
\s1 Atioki hepato Polu Pitahi ka emekiꞌehina kaꞌa  
\p
\v 11 To Pitau ai Atioki hepatoga olago ai mone bati mehina suhi huto higo nani bu go bati huloto li gehesa nehago asaga bonaꞌmagihi bulo ka emekiꞌohuna yabe.  
\v 12 Kohe toto yaꞌma fegutoga bonaꞌi Huꞌmamofihi kaꞌa keheliseꞌnamagi hiti Pitagi hiti noseꞌna monekoluguti nelago alihaꞌa yaꞌma Yuta bonaꞌi mone lugaꞌa Yemesiu enoho lifiꞌehinaꞌamagi elago bu enogoloto enali kumu luto lesaꞌa luꞌehina. Lesa noligo fegutoga bonatoga noseꞌna menose mo sito enaliꞌi heꞌmi epoloꞌehina. Fegutoga bonaꞌi enali hiti enugufa laga mehuseꞌna minalibe lite lu meleꞌahana bona enali kumu lesa luꞌehina.  
\v 13 Ya huloto buto lelito ola lelito bula nohigo Yuta bonaꞌi lugaꞌa laluꞌagi ana suhi hite kenetufaꞌani loe hiti bonaꞌmagihi suhi lite Pitahi leꞌmo laga hinaꞌa hago Banabasiu enalitoga molo emito enali suhi huto lesa luꞌehina.  
\v 14 Ya hite minete ka lamanaꞌamofihi kapogu fotogo hite mebago bu enogolotoꞌni yaꞌma bonaꞌi lugaꞌa enali enogobisalo yaꞌma Pitahi ya luto lu emiꞌohuna: Kai yaꞌma Yuta bomo nohataya Yuta bonaꞌi lolo huto moloto yanagu mebane. Fegutoga bonaꞌi enali lolo hite melete nehananagu nobane. To kai henabe luto yaꞌma fegutoga bonaꞌi enali Yuta bonaꞌi lolo hite melelete nehananagu bilabe luto lu laga huꞌahana? Ya bati mehuꞌehibe luto ka emekiꞌohuna yabe.   
\s1 Yuta bonaꞌi hiti fegutoga bonaꞌi hiti keheli uleꞌale hiꞌahanaꞌmu yabe luto enubuto bilata nohibe  
\p
\v 15 Lali yaꞌma fegutoga bonaꞌi sibigopa minelata nehana bonaꞌi huto mehune. Yuta bonaꞌi huto huꞌohutaya,  
\v 16 yama luto kehelilata nohune. Moseu keya ka luꞌehina ya ema keheliya iloto foyaꞌa lelito buto minenogoti foipanati su halinaꞌa meniꞌibe. Yesu Kilisito kumu yabe luto keheli uleꞌale huto foipanati meminenogo komopatigu leꞌmo bati huꞌehinogo minaluneꞌmu hune. Ya luto keheliloto keya ka luꞌehina kaꞌamofihi foyaꞌa lito buto minenogo foipanati meminenogo minalune luto Yesu Kilisito kumu keheli emiꞌohune. Keya ka luꞌehina kamofihi megeꞌi melelata nehanaya Huꞌmau eneleꞌmo lamana hilinaꞌa yaꞌma meniꞌibe.  
\v 17 To lali Yuta bonaꞌmagita Kilisitotoga buto i hepiloto foipanati su halibe luto nohutaya fegutoga bonaꞌi tegi huto foipa nasana lilata nohutogo yanaꞌmu henabe luto lilune? Kilisito yaꞌma foipana lilo luto leleꞌmo bati hulata bo nohifihe? Ya luto meniꞌibe.  
\v 18 To nani tatatifu Moseu luꞌehina kaga yataꞌa kehelise amuyamofihi leꞌmo laba huto heꞌmito Kilisitohi kagalo megeꞌi nomolona bomofita akuꞌi i gelehe huto Mosehi kaga megeꞌi malalo linogo nani kumu keheligo lamaꞌnaka luto foipa bo nohibe lite lilanaꞌmu yabe.  
\v 19 To yaꞌma keya ka lu laga huto luꞌehina kamofihi nagalugu mone meminoꞌohunaya keya kamuꞌi filiꞌehina bo tegi huto lolo huto ana kamofihi nagalugu menominobe. Huꞌmamofi kumu yabe luto minalube luto ho tiꞌohunamo niꞌibe. Nani anamofihi foipana lilata nohunaꞌmu Kilisito hiti malipu yafalo filiꞌehina moneka leꞌeheꞌahana lolo huꞌehinaya.  
\v 20 Ya huꞌohunaya yatai yaꞌma minoto lito nohuna yaꞌma naniꞌnigo minoto lito mehube. Kilisitou komopaꞌnigu minoto lito nohigo nugufaloti minoto lito nohuna. Yaꞌma Huꞌmamofihi panaꞌamu keheli uleꞌale huto minolatana nohuto minoto lito nohube. Ai yaꞌma komopaꞌa nanitoga mololoto minoto lito hinaꞌa nani kumu yabe luto gufaꞌa heꞌmiloto filiꞌehinamo niꞌibe.  
\v 21 Yesu nofilito Huꞌmamofihi leheꞌmoseꞌnaꞌa neleꞌmo hetofa huꞌehinamo niꞌigo yaꞌma li sibina huto heꞌmilunaꞌa meniꞌibe. Lu laga huto luꞌehina kaꞌa emaꞌalo keheliloto foipanati meminago Huꞌmamofitoga leleꞌmo lamana higo minoꞌehinalo niꞌitita yaꞌma Kilisitou aiꞌa filiꞌehinaꞌa faꞌmenena lolo hitine.   
\c 3  
\s1 Keya ka hiti to Huꞌmau kaga moloꞌehinaꞌa hiti  
\p
\v 1 Oho, Galesia bonaꞌise. Negi nagiꞌa lenali yaꞌma kiꞌafu leneleꞌmo gopa napa huꞌehigo Kilisitohi ka lamanaꞌalo aheꞌmiꞌahabe? Nani Yesu Kilisitohi malipu yafalo hago filiꞌehinamofihi babeyafaꞌa lolo huto lu lepiꞌohugo lenubutu bu go akutete bu geꞌahanamo niꞌina. Henabe luto aitogati heꞌmiꞌahabe?  
\v 2 Nasana mone kumu lenoloka halube. Kehelite lu nimilo. Lenali Huꞌmamofihi Sikalafuꞌa hiya hite liꞌahabe? Moseu keya ka luꞌehinana kehelite lilete liꞌahana niꞌifihe? Oꞌe, yaꞌma meniꞌibe. To Kilisitohi ka keheli bati hilete lenemehi emilete liꞌahanamo niꞌibe.  
\v 3 Henaꞌmu negi nete mineꞌahana niꞌibe? Huꞌmamofihi Sikalafuꞌmofihi kapoꞌalo hapi hite lelite tite biꞌahanamo yabe. Yaꞌma yatai heꞌmite tafa kapomogu bite nehetilafihe?  
\v 4 Lenalitoga kalanaꞌi meletago huto huꞌehina nasana asagaꞌi ya suhi huto lenugupisalo tiꞌehinamo faꞌmene niꞌifihe? Ya huto meniꞌibe luto nekesa nokehelube.  
\v 5 Huꞌmau aiꞌa Sikalafuꞌa molo lepolola to amuya nasana lenalitoga topa hoseꞌna huto hula nohina bouba henabe luto ya nohibe. Keya ka keheliya ite megeꞌi melelago leneleꞌmo bati hulata nohifihe? To Kilisitohi ka lamanaꞌa keheliya ite agoya hu emilago leneleꞌmo hetofa hulata nohinamo niꞌifihe? Oꞌyo, yaꞌma niꞌibe.   
\p
\v 6 Mono kagu Abalahahi hapaꞌa yaꞌma lite fayahi keyeꞌahanamo niꞌibe: \it Ai Huꞌmamofihi agoya hu emito minago yaꞌmu lamaꞌnaka luto bati hina bo yabe luto lu molo etoꞌehina.\it*  
\v 7 Yaꞌmu ma lite kehelilo. Huꞌmamofihi agoya hu emilata nehanaꞌa enalisigo yaꞌma Abalahahi pananaꞌa lamanaꞌa nehabe.  
\v 8 Fegutoga bonaꞌi enali Huꞌmamofihi agoya hu emilenogo yamofihi foipanaꞌani li heꞌmi epalalibe. Koyapaꞌi mono bukugu Huꞌmau aiꞌa Abalahahi ka lamanaꞌa lu emiꞌehina yaꞌma lite kehelite mono kagu fayahi ma lite keyeꞌahanamo niꞌibe: \it Kai agoya hu nimiꞌahatalo lusa gi ketoꞌohuna yaꞌma melugu bonaꞌi asagatoga li su halubeꞌmu hibe.\it*  
\v 9 Yaꞌma Abalahau keheli uleꞌale huto agoya hu emilata huꞌehina hetofa kapogu giyaka ito buꞌehina. To enali ana hite Huꞌmamofitoga agoya hu emilata ana kapoloko ite bilanaꞌa enali lusaꞌagu bi falalabe.   
\p
\v 10 To Moseu keya ka luꞌehina kagagu bi felelete ai mege mege nehana bonaꞌi enali gumiꞌani tinago salafaꞌa minalanaꞌmu yabe. Henaꞌmube? Yamofihi mono bukugu yaꞌma lite fayahi keyeꞌahanamo niꞌibe: \it Moseu keya ka luꞌehina kaga yege yegeꞌna niꞌinagi yamofihi mone nesi kegiꞌa megeꞌi memelese heꞌmilanaꞌa enali gumiꞌuba ho epalalibe.\it*  
\v 11 Bonaꞌi moneꞌamagi Moseu keya ka luꞌehina kagagu bite i hepilete nehago yaꞌma Huꞌmau eneleꞌmo bati hilinaꞌa ya huto meniꞌibe. Yamofihi hapaꞌa ahuto huꞌehibe. Yamofihi mono bukugu kaga mone ma luto niꞌibe: \it Huꞌmamofihi keheli uleꞌale huto agoya hu emilago leꞌmo bati huꞌehina bouba ai minoba minoba huseꞌnaꞌa lilinaꞌmu yabe.\it*  
\v 12 To keya ka megeꞌi malalata nehana Huꞌmamofihi keheli uleꞌale hite agoya hu emilata nehanalo eneleꞌmo bati hilinaꞌa meniꞌibe. Enali keya ka megeꞌi malalata nehanamagi ana kaga luꞌehinanaꞌa mone nesiꞌa meheꞌmise asagaꞌi hu baga ilana bonaꞌmagi ana nehanalo minoba minoba huseꞌna lilanaꞌmu yabe. To ya mehilanamagi enali gumiꞌani tilinaꞌmu yabe luto keya kagu niꞌibe.   
\p
\v 13 Ya huto niꞌinaya keya kamomuꞌi lalitoga gumiꞌi hoꞌehinaꞌa kilisitou ai gupisaꞌalo liꞌehina yabe. Ya huto keya kamofihi gumiꞌmofihi nagaluguti gulu ho letoꞌehina yabe. Ananamomuꞌi mono bukugu ma luto niꞌina: \it Yafalo halana bomofitoga gumiꞌi tilibe.\it* To Kilisitou ai lali kumu luto malipu yafalo fililoto yaꞌma gumiꞌiloti lubuto biꞌehinagihe.  
\v 14 To ai henabe luto ya huto filiꞌehibe? Huꞌmau Abalahahi lusa gi emito ka moloꞌehinaꞌa yaꞌma fegutoga bonatoga hiti li huto hilibe luto yabe. To lali Yesu Kilisitohi keheli uleꞌale huto aitoga agoya hu emiluta bonaꞌi nohune luto Huꞌmau ai Sikalafuꞌi epilube luto lu moloꞌehinaꞌmu yamꞌa keheliloto liluneꞌmu hune.   
\s1 Keya ka hiti to Huꞌmau kaga lu moloꞌehina hiti  
\p
\v 15 Nalaluꞌnigita, nani babeyafaꞌa moneto lu moloto lilugi kehelilo. Bonaꞌi loemaleꞌi etali anaꞌina mone kumu lite lu mu tifite fayahi kayalaꞌina etali moneuba lito ligofa hoto gupisalo ka mone molo emito loka hoto fayahi kayalinaꞌa meniꞌibe.  
\v 16 To yanaꞌmu Huꞌmau yaꞌma Abalaha to pananaꞌa leneleꞌmo hetofa hilube luto mu tifito limito luꞌehinamo yaꞌma pananaꞌa asaga kumu meluꞌehinamo niꞌibe. Monekoꞌi Kilisito kumu luꞌehinamo niꞌibe.  
\v 17 Nani ya lu lepiꞌohuna ka hapaꞌa yaꞌma nolube. Huꞌmau koyapaꞌi mono feꞌnohi kumu lu mu tifito leneleꞌmo hetofa hilube luto lu molo letoꞌehinamo niꞌibe. Ya hulago alihaꞌa kufu kana 430 nobigo Moseu keya ka luꞌehina kaꞌa huto huꞌehina. To keya ka luꞌehina kaꞌa alihaꞌauba Huꞌmau lu letoꞌehina kaꞌamofihi be meligilinaꞌmu yabe. Yaꞌma yataꞌa lu moloꞌehina ka fenene mehilubeꞌmu hibe.  
\v 18 Huꞌmamofihi mono lusamofihi lubuto biseꞌnaꞌa yaꞌma keya kaguti niꞌitita yamofihi Huꞌmau kaga lu letoꞌehina kagaguti melutitaꞌmu yabe. Ya huꞌehinaꞌa yaꞌma meniꞌibe. Huꞌmau henabe luto Abalaha lusa gi etoꞌehibe? Abalahau keya ka kehelito megeꞌi moloꞌehinalo niꞌifi? Oꞌe, ai Huꞌmau lu molo etoꞌehina kaꞌalo yabe. To lali lubuto biseꞌnaꞌa lilutana ana huto ai lu molo letoꞌehina kaꞌalo niꞌibe.   
\p
\v 19 Yamofihi yaꞌma keya ka luꞌehina kaꞌa yaꞌma henaꞌmube? Lu laga huꞌehinaꞌmu anaꞌina foipana lolo hulata nohutamofihi hapaꞌa lu huto hilibe luto nolelepigo Huꞌmau moloꞌehinamo niꞌibe. To molo lito buto minoto yamofihi leleꞌmo hetofa hilibe luto lu etoꞌehina bo Abalahahi panaꞌa Yesu Kilisito huto hulenogo keya kamofihi kana su halibe luto luꞌehinamo niꞌibe. To keya ka luꞌehina kaꞌamo yaꞌma agelo lugaꞌamagi kokulumaluguti limite folagahatigu nohina bo Mosehi yanugu melelago lu limiꞌehinamo niꞌibe.  
\v 20 To Huꞌmau Abalahatoga yaꞌma lusamofihi kaga moloꞌehinaꞌmu aiꞌasigo molo emiꞌehina. Agelo bonaꞌmagihi yaꞌma epilago enali lite epiꞌahanamo yaꞌma meniꞌibe. To folaganugu minana bo meniꞌibe. Huꞌmau aiꞌa monekoꞌi nohina bo aiꞌago yaꞌma lusamofihi kaga lubuto biseꞌnaꞌa limiꞌehina yabe.   
\s1 Moseu keya kaꞌa huto hilinamofihi hapaꞌa  
\p
\v 21 To Moseu keya ka luꞌehina kauba yaꞌma Huꞌmau lu limito moloꞌehina kaꞌa be ligilifihe? Ya huto meniꞌibe. Keya kauba lali leꞌmo amuya moloto minolata nohuta nasana niꞌitita yamofihi lamaꞌnaka luto keya ka luꞌehina kauba foipanati li heꞌmi letenogo Huꞌmamofihi bulo lamana bonaꞌi nehabe luto ligo minaluta kapoti huto hitine.  
\v 22 Ya huꞌohutaya lali melugu bonaꞌmagita asagaꞌi foipanamofihi amuya nagalugu nohutogo yamofihi hapaꞌa mono bukuguti li huto hite meleꞌahanamo niꞌibe. Ya hulago yanaꞌmu yaꞌma Yesu Kilisito kumu luto keheli uleꞌale huto agoya hu emutogo lenubuto bilube luto lu molo letoꞌehina yamofihi legeyaꞌa liluta ahuto niꞌibe.   
\p
\v 23 Yuta bonaꞌi lali koyapaꞌi yaꞌma lali Yesu Kilisitotoga keheli uleꞌale huto agoya hu emise kapo huto mehigo keya ka luꞌehina kauba nagaꞌi limigo nagalugu mino lito buto nobutogo keheli uleꞌale huseꞌnamofihi kauba huto hu lamana huꞌehina.  
\v 24 To keya ka yauba kaba hu letoto leleꞌmo bebe sose kapo lolo hulago nohutogo Kilisitotoga leleꞌmo malago yaꞌma alihi Yesutoga agoya hu emito Huꞌmamofitoga leleꞌmo lamana higo minalutaꞌmu yabe.  
\v 25 Lali agoya hu emiseꞌnamofihi kapoꞌa huto higo analo nobunogo keya kamofihi kabaꞌalo menominune.   
\p
\v 26 To lenali yaꞌma Yesu Kilisito kumu keheli uleꞌale huto agoya hu emutaꞌmu yabe lite yataꞌisi asagaꞌi Huꞌmamofihi yagapanaꞌa lolo hite nehabe.  
\v 27 Mono nagamiꞌi felelete Kilisitotoga molo emiꞌahana silagaꞌi Kilisitohi legegeto suhi molo emite hepiꞌahana.  
\v 28 To ya huꞌehinaꞌmu Yuta bonaꞌi nehana to fegutoga bonaꞌi nehana, kele keleꞌi yagapanaꞌi lolo hite tinaꞌa liminaꞌa hite mineꞌahana, faꞌmenego minelata hiꞌahana boanaꞌi fato hite minelata hiꞌahana. Yamofihi su hoꞌehigo yatai lenali asagaꞌi Yesu Kilisitotoga bite hepite moneko koguna lolo hiꞌahabe.  
\v 29 Lenali Kilisitohi nagaꞌi lolo hiꞌahana niꞌinogomo yanaꞌmu Abalahahi pananaꞌa lolo hite nehite Abalahahi yogo feꞌnohi Huꞌmau molo etalube luto lu etoꞌehina yaꞌma asagaꞌmagita lenaliꞌna lolo hilubeꞌmu hibe.   
\c 4  
\p
\v 1 Mone ma luto lilugi kehelilo. Panaꞌi lagasoꞌasiuba ai afoꞌafu fililenogo asaga yogo feꞌnohi li nupa huto lilina panaꞌuba ai lagasoꞌasi nohinogo faꞌmene enali kele kele panaꞌi kaba nehana tegi huto kaba nehi etabe.  
\v 2 Lagasoꞌasi nohinogo goꞌagi afoꞌagi enali yogo feꞌnohaꞌa kaba hi etalanaꞌmu yabe. To afoꞌafu kanaꞌa moloꞌehinaya tupa hulenogo akuꞌi lilinaꞌmu yabe.  
\v 3 Ana suhi ya huto lali koyapaꞌi Huꞌmamofihi kagu olopa bonaꞌmagi suhi huto meminose melugu bonaꞌmagi lu laga hiꞌahana ka megeꞌi mololata huꞌohuta yabe.  
\v 4 Ya hulago alihaꞌa yaꞌma kanaꞌa moloꞌehina yaꞌma su nohago Huꞌmau panaꞌa ho lifigo limito melugu oꞌehina yabe. Ana panaꞌmofihi itoꞌafu melugu aꞌi yabe. To ana panaꞌuba huto huloto ai Mosehi keya kamofihi agoya hu etoto minoꞌehina.  
\v 5 Minoꞌehinaꞌmu lali yaꞌma keya ka luꞌehina kamofihi nagaluguti gulu ho letelenogo Huꞌmau leleꞌmo aitoga malalibe luto huꞌehinamo niꞌigo lali Huꞌmamofihi panaꞌa huto hiluneꞌmu hune.   
\p
\v 6 To lenali Huꞌmamofihi panaꞌi lolo hite nehana yabe luto Huꞌmau panaꞌamofihi Sikalafuꞌuba komopatigu ho lifigo limiꞌehina. Limito nohigo lali Huꞌmamofi kumu: Oho, Apaobe lulata huto nominone.  
\v 7 Ya huꞌehinaꞌmu lenali kele keleꞌi yagapanaꞌi lolo hite nehanagopa Huꞌmamofihi panaꞌa nehabe. To ai pananaꞌa nehabe luto Huꞌmamofihi mehi emiseꞌnamofihi ai felisa nasanamofihi afoꞌafu bo lolo huto neminabe.   
\s1 Polu Galesia bona kumu kekeꞌi lu epoloꞌehina  
\p
\v 8 Fegutoga bonaꞌi lenali koyapaꞌi Huꞌmamofi kumu keheliya meise faga faga lugefamofihi nasana kele keleꞌi hi epite minete nagalugu minete agoya hi epelete mineꞌahana yabe.  
\v 9 To yatai lenali Huꞌmamofihi hapaꞌa bu go fotogo nehabe. Yaꞌmu yaꞌma luto lu nolepube. Lamaꞌnaka. Huꞌmau lenaliꞌi bu lenogoto nohibe. Ya higo faꞌmenena gusunupaꞌa meniꞌina felisa meniꞌina yamofihi henabe luto akuꞌi lenogobisa emite yaꞌma felemagihi nasanaꞌmu agoya nehi etete neminabe?  
\v 10 Ya hite nehite, Huꞌmau kehelinogo bati hilibe lite fato fato yupahi kanalo to ikahi o boloto filito huꞌehina nohina kanalo to melekehi kufugu kanalo to lenekesa keheli keheli nehite fuli minelata nehana yabe.  
\v 11 Foyaꞌnimofihi legeyaꞌa lenalitoga huto mehinogo fenene hilibe luto kehelugo akuꞌi keta gofa nohibe.   
\p
\v 12 Nalaluꞌnigita, nani buka tito lilugi. Nani lenali suhi huto Moseu keya ka luꞌehina kamofihi nagaluguti neleꞌmo ho tigo ho tito nohube. Lenali nani suhi yaꞌma bu go bati hite bu gete lilo. Lenalitoga mino lito nobugo lenali laga mehina nasana lolo mehi neteꞌahanamo niꞌibe.  
\v 13 Lenali keheliꞌahabe. Nani koyapaꞌi kekeꞌi luseꞌna nebesilago yataꞌa hapi huto ka lamanaꞌa lu lepiꞌohunamo niꞌinagihe.  
\v 14 To nugufaꞌnigu bati mehigo keta lepesi tegi huꞌehinaya nani faꞌmene koseleꞌi melenohoꞌehinamo niꞌibe. To mu lenipa huꞌehinamo niꞌibe. Lenali bu negete Huꞌmamofihi ageloꞌa leꞌmalana suhi hite nebe tigite neleꞌmeꞌahabe. To ana huto Yesu Kilisitohi leꞌmalana suhi hite neleꞌmeꞌahabe.  
\v 15 Ke, kanaꞌa ya yupahi lenegelo sipi bite mineꞌahanamo yaꞌma yatai hiyaga nobibe? Lenali hapatiniꞌmu lamaꞌnaka luto ma lu lepilugi kehelilo. Lenali lenubu he lilune lite lilenogomo faꞌmene he lite naniꞌi neleꞌmo bati hite kimilune nelite lite faꞌmene nimititaꞌmu mineꞌahana yabe.  
\v 16 To yatai kanaꞌamofihi ka lamanaꞌa lu nolepunaꞌmu yamofihi fatehe bonatini lolo nohufiye?   
\p
\v 17 Yaꞌma faga mono ka lu lepilata nehana bonaꞌmagi leneleꞌmo netibe. To yaꞌma nehana leneleꞌmo bati hilabe menehabe. Leꞌmo kela ho tila hilenogo nani kumu sibina hi netete enaliꞌani enigiꞌani leꞌmo saga hilune lite amuya melete nehabe.  
\v 18 Anaꞌina lamanaꞌamu yabe luto lenofokehi holata nohuta yaꞌma bati hutomo niꞌibe. Lenalitoga buto minona yupahifi yaꞌmago meniꞌibe. Kanaꞌamu kanaꞌamu lolo hilata nehinogo bati hilubeꞌmu hibe.  
\v 19 Pananaꞌnimagita, nani lenali kumu luto kekeꞌi luse akuꞌi nokehelube. Anaꞌmagi yagapanaꞌi ketaluneꞌmu nehite kekeꞌi lilata nehana, ya suhi huto kekeꞌi luseꞌna sipi akuꞌi nokehelube. Kilisitohi babeyafaꞌa suhi huto lenalitoga huto hilibe luto lenali kumu kehelugo keta nebesilata nohibe.  
\v 20 Lenalitoga meleꞌisi buto lenogobisalo fato fato suhi huto kaga lepilube luto kehelilata nohuto lenali kumu negekesa yigi yigi nohube.   
\s1 Hegago Selago etali keyaꞌmofihi kaga  
\p
\v 21 Moseu keya ka luꞌehinamofihi agoya hu etalune lite lilata nehanamagita, lenoloka nohenogo lu nimilabe. Lenali keya ka luꞌehinamofihi fayahaꞌa nasana leka sete keheli fotogo mehafihe?  
\v 22 Yaguꞌya ma lite keyete meleꞌahanamo niꞌibe: Abalahahi ai panaꞌa loemo eteketoꞌehina. Moneꞌi yaꞌma kele kele paꞌauba ketoꞌehina. To mone yaꞌma mina fi emiꞌahana aꞌuba ketoꞌehina.  
\v 23 To kele kele aꞌuba ketoꞌehina yamofihi faꞌmene huto huꞌehina. To mina fi emiꞌehina aꞌuba ketoꞌehina yaꞌma Huꞌmamofihi bulo lu emiꞌehina kaꞌalo yaꞌma ketoꞌehina.  
\v 24 To ya kaꞌamofihi komopaꞌagu nekisaꞌa mone ma luto niꞌibe: Ana ate loemo etali Huꞌmau lu mu tifise kaꞌa loemo yamofihi babeyafaꞌa lolo hiꞌahaꞌina. Lu mu tifisemofihi kagaꞌa mone yaꞌma Sainai kosaguti lu huto huꞌehina yamofihi komopaꞌagu nehana bonaꞌmagi enali keya ka luꞌehinamofihi kele keleꞌi hi etete neminabe. Yamofihi suhi huto kele kele aꞌi Hegahi yagapanaꞌa lolo hiꞌahana.  
\v 25 To Alebia metoga Sainai kosamofi kumu Hegahi kosa yabe lite lilata nehabe. To Hegau ai Yelusale hepatoga faꞌmene metoga minoꞌehina anamofihi babeyafaꞌa nohibe. Yelusale hepaꞌi yaꞌma Moseu keya ka luꞌehinamofihi megusaꞌa lolo hite nehana bonaꞌmagihi koto hepaꞌanimo niꞌibe.  
\v 26 To kokulumagu Yelusale hepaꞌmofihi niꞌina yauba mina fite emiꞌahana aꞌi Selau ai suhi huto yamofihi niꞌibe. Yaloꞌi minete lite nehana bonaꞌi yaꞌma keya kamofihi nagalugu menehabe. Ya huꞌehinaꞌmu ana hepaꞌuba itotifu lolo huꞌehibe.  
\v 27 Ya huꞌehinaꞌmu mono bukugu fayahi mone Sela kumu ma lite keyeꞌahanamo niꞌibe:  
\q1 Namopa aꞌuba yagapanaꞌi hiti huto  
\q1 meketose minoꞌahata,  
\q1 kai komopakagu bati huto kehelibo.  
\q1 Kai kagabuꞌi ginogo  
\q1 yagapanaꞌi meketose minoꞌahata  
\q1 kekeꞌi meluse kaika kegelo bito minobo.  
\q1 Henaꞌmube?  
\q1 Ai bahaꞌauba heꞌmi etoꞌehina aꞌuba  
\q1 yagapanaꞌi ketalinaꞌmu yabe.  
\q1 Yagapanaꞌi babu luto huto hilenogo  
\q1 ai bo hiti nohina aꞌmofihi  
\q1 be ligilinaꞌmu yabe,  
\p ya luto ligo keyeꞌahana yabe.   
\p
\v 28 Nalaluꞌnigita, lali Abalahahi panaꞌa Isakaha supo huto Huꞌmau lepiꞌehina kaꞌalo huto huꞌohune.  
\v 29 Faꞌmene huto huꞌehinauba Huꞌmamofihi Sikalafuꞌmofihi kaꞌalo huto huꞌehina bomofihi yaꞌma kalanaꞌi mele etete luba ka li emiꞌahana. Ana suhi yataꞌisi yaꞌma huto hulago keya ka luꞌehina kamofihi mege mege hite foya nelina bonaꞌmagi kalanaꞌi mele letelata nehabe.  
\v 30 To ya huꞌehinaya mono bukugu kaꞌa hena hena huto niꞌibe? \it Kele kele aꞌmo hiti ai panaꞌa hiti etaliꞌi etoho lifi heꞌminogo biꞌino. Kele kele aꞌmofihi panaꞌauba yogo feꞌnohi aitoga li memalalibe. Mina fite li emiꞌahana aꞌmofihi panaꞌauba aiꞌasigo lilibe\it*, lite keyeꞌahanamo niꞌibe.  
\v 31 Yanaꞌmu nalaluꞌnigita, lali yaꞌma kele kele aꞌmofihi yagapanaꞌi menohune. Mina fite emiꞌahana aꞌmofihi yagapanaꞌa nohutaya. Huꞌmamofihi Sikalafuꞌmofihi feꞌnohi nasanaꞌa lilutamo niꞌinaꞌmu yabe.   
\c 5  
\s1 Tafaꞌa nagalugu meminalutamofihi kaꞌa  
\p
\v 1 Nagaꞌi melepinogo minalabe luto Kilisitou aiꞌa gulu ho letoꞌehinamo niꞌibe. Ya huꞌehinaꞌmu bonaꞌi lugaꞌamagihi enali Mosehi keya kamofihi nagalugu akuꞌi leneleꞌmo melenogo kele keleꞌi hi etalabe lite nelinogomo oꞌe lite amuya malalo.   
\p
\v 2 Nani Poluita lu lepilugi kehelilo. Lenali keya kagamuꞌi lugufa laga huto minalune lite keheli epilana ya hite, Kilisitohi leneheꞌmoseꞌnauba lenalitoga faꞌmenena lolo hilinaꞌmu yabe.  
\v 3 To akuꞌi lenelepi bati hilugi kehelilo. Moneꞌamagi enali keya kagamomuꞌi enugufa laga hilanamagi enali keya kamofihi mege megeꞌi hite melete foyaꞌa lelite bilanaꞌmu mone kegiꞌa heꞌmilete sibina hilanaꞌmu yabe.  
\v 4 Lenali lugaꞌamagi keya ka kehelinogo foipanati meminenogo Huꞌmamofihi bulo lamana bonaꞌi nohune lite nelana lenali Kilisito hiti hepite mu tifiꞌahanamofihi laga hilete nehago aitogati leneheꞌmoseꞌnaꞌa neheꞌmibe.  
\v 5 To lali yaꞌma Huꞌmamofihi Sikalafuꞌmofihi keheli uleꞌale huꞌohutaꞌmu yabe luto foipanati meminenogo Huꞌmau leleꞌmo bati huꞌehina bonaꞌi minalune luto yamofihi agoya hu etoto minolata nohune.  
\v 6 Yesu Kilisitotoga buto i hepito minaluta yaꞌma lugufa laga huseꞌna to lugufa laga mehuseꞌna li nupa napa huto moneꞌna legeyaꞌa meniꞌina futuꞌa yabe luto lilune. Keheli uleꞌale hulatanamofihi fayahaꞌa komopatigu minelenogo komopati bonaꞌi asagatoga malalutaꞌmuko legeyaꞌa yabe liluneꞌmu hune.   
\p
\v 7 Lenali monoꞌmofihi kapoꞌa bati hite lelite nebinogo moneuba hena huto kapo fi hekini lo lepalago ka lamanaꞌamu henabe lite lenemegesa hi emiꞌahanamo niꞌibe?  
\v 8 Huꞌmau elesa molo lepiꞌehina bouba aiꞌamofihi lenogoꞌna hoto ya suhi mehu lepoloꞌehinamo niꞌibe.  
\v 9 Enali kaga lilananaꞌani ma luto niꞌibe: Mone yisiti nesiꞌauba palauꞌa noseꞌnagu limiloto nominago beleti noseꞌna yeye bito hofa toloto baga ilinaꞌmu yabe.  
\v 10 To lenali nanitoga bilabe luto kehelugo keta mehigo lu nolepube. Sipi Bomofitoga hepilataꞌmu yabe luto Huꞌmamofihi fulunaꞌa lenugufaga niꞌilinaꞌmu nani nokeheluna suhi huto lenali kehelilana yamofihi buto so kilune luto nokehelube. To leneleꞌmo sibi hulata nohina bo ai yisitiu noseꞌnagu minalina suhi huto yaꞌma foipanaꞌamofihi nonaꞌa lilinaꞌmu yabe.   
\p
\v 11 Nalaluꞌnigita, nani bonaꞌmagihi enugufalo Huꞌmamofihi keya kamofihi laga huseꞌna keyaꞌa hiti minalabe luto fi lehe toto buꞌohuna niꞌitita kalanaꞌi lenugufalo minalibe luto lu epito minotita yaꞌma Yesuhi malipu yafalo filiꞌehina yamofihi kaꞌa lu nolepunaꞌmu mu lenipa hulata nohinamofihi su hatitaꞌmu yabe.  
\v 12 To leneleꞌmo sibina hilata nehana enaliꞌani enugufaꞌani asagaꞌi hobe laga hibe hite minalana niꞌinaya nani negelo bilube.   
\p
\v 13 Nalaluꞌnigita, anamofihi nagalugu mone meminalabe luto elesa molo lepiꞌehinamo niꞌibe. To nagalugu meminanaꞌmu yabe lite lenugufamofihi bita hulata nohina nasanamofihi kele keleꞌi mehi etalo. Komopatini epilete ai heꞌmenogo ai heꞌmenogo hite minalabe.  
\v 14 Moseu keya ka luꞌehina kaꞌa li nupa huto hapaꞌa moneꞌmofihi ma huto niꞌibe: \it Kaikaꞌmu kehelilata nohata ya suhi huto kalalukagi kumu kehelito komopaka epilane.\it*  
\v 15 Lenali ma heꞌmise. Yagamagi suhi lite ai heni etago ai heni etago hite asagaꞌi sibina hi lalabe luto kaba hu bati hilo luto lenegekesa nolube.   
\s1 Tafa komopatimofihi legeyaꞌa hiti to Sikalafuꞌmofihi legeyaꞌa hiti  
\p
\v 16 Mone ma luto nolube. Lenali fana mehaꞌa hiti Huꞌmamofihi Sikalafuꞌuba lilina ka lilina ka hite melete hilo. Ya hilete tafa komopatiniuba anaꞌinaꞌmu bita hulata nohina nasanamofihi foyaꞌa melilo.  
\v 17 Tafa komopatini yaꞌma lagaꞌauba Sikalafuꞌmofihi lu baga lu emilata nohibe. To Sikalafuꞌmofihi nasanauba tafa komopatimofihi ana huto lu baga lu emilata nohibe. Ya hilete etali luba sabo hite minaꞌigo lenali anaꞌina lolo hite melete hilune lite babahi hite meleꞌisi ya mehabe.  
\v 18 Sikalafuꞌuba leneleꞌmo lolo huꞌehigo Moseu keya ka luꞌehinauba yaꞌma kibina botini lolo mehilinaꞌmu yabe.   
\p
\v 19 Tafa komopatinimofihi foyaꞌa yaꞌma suguna nasana niꞌigopa ahuto hulata nohibe. Ma huto hulata nohinamo niꞌibe. Moko lise nasana to foipa nasana hiti asaga kolotanaꞌa lugufamofihi buya hulata nasana yabe.  
\v 20 To faga lugefa nasanamofihi fokehi holatana, nalisanauba komopaꞌani li sibi hulatana, fatehe bona tegi hilata nehana to gulu gulu bilata nehanana luba sabo hulatana, siko hulatana, enaliꞌani keheligo tigo amuya melelata, to loko hite mine luga luga nehite minelata nasana.  
\v 21 To enipakafa enehete eneleꞌmo laba hilatana to bia nagamito nete minelata nehana, noseꞌna li goli fite hiti ne su helatana to anaꞌina lugaꞌa ya suhi hite lilata nehana yaꞌma nasanaꞌmu koyapaꞌi alu lepiꞌohunamo niꞌibe. To yaꞌma akuꞌi yatai lenegekesa lito lu nolepunagihe. Ana foipana lilanaꞌa enali Huꞌmamofihi kapoꞌagu bi mefalalanaꞌmu yabe.   
\p
\v 22 To Sikalafuꞌmofihi legeyaꞌa ma suhi huto hulata nohibe. Mehi lepito komopatini lepilata nohina, lenegelo biseꞌna hulata nehana, mino fulu huseꞌna, koseleꞌi melenohose bati huto minoseꞌna, leneleꞌmo bati hulatana, komopatini lamana hite minolata, foyagu agoya emilata nohuto Huꞌmamofihi kagaꞌa mone kegiꞌa meheꞌmilata,  
\v 23 legeso huto limito minolatana lenugufamofihi laga lepesiseꞌna kaba hilata nasana yanamo niꞌibe.  
\v 24 To Yesu Kilisitohi nagaꞌi lali tafa komopatimofihi bita hulata nasana to foipanaꞌmu enuluhaya ilatamofihi aho filigo faꞌmenena lolo huꞌehinamo niꞌibe.  
\v 25 Sikalafuꞌmofihi amuyaꞌalo minoto lito nohutaya yaꞌmu Sikalafuꞌmofihi kapoloko megeꞌi moloto bilune.  
\v 26 Lugufaꞌuba hofa toloto ai fitu fenogo ai fitu fenogo nehinogoti bonaꞌmagihi komopaꞌanigu sibina hilina nasana melilune. To siko ai hu etenogo ai hu etenogo yanamuꞌi ya mehilune.   
\c 6  
\s1 Ketaꞌa hiti nasanalo ai heꞌmenogo ai heꞌmenogo hilutana  
\p
\v 1 Nalaluꞌnigita, lenali folagahatinigu moneuba foipa foya li huto hulenogo lenali Sikalafuꞌi hiti nehanamagita leniginaga fi etenogo yamofihi fulu hite leꞌmo bati bati hilo. Ya nehitetini lenimiꞌi malalanaꞌmu limite ke lalagi kaba hilo.  
\v 2 To keta lenoholata nohina nasana yamofihi ai heꞌmenogo ai heꞌmenogo nehite Kilisitou ka lu moloꞌehinamofihi yaꞌma bati hite kehelilanaꞌmu yabe.  
\v 3 To bo moneuba faꞌmene lusi bo menohinaꞌauba aiꞌa kumu nani sipi bo nohube luto hapaꞌa futuꞌa suhi huto niꞌigo kehelilinaꞌa ai keheli sibina huto negi nose suhi nohilinaꞌmu yabe.  
\v 4 Yanaꞌmu folagahatiniguti moneꞌamagi eto eto hite hapa hapatini bu go bebe salo. To hapatini mone bati hinogo bu gelete ana hapa hapatini lenegelo bise kamofihi huto hilina. Yamofihi lenalitini lite melete hilana yanauba li huto hilibe. Bonaꞌi moneꞌamagihi hapaꞌaniga keheli melete legegeto hilafi lite ya melilo.  
\v 5 Foyamofihi ketanaꞌa aguna ito leꞌmo eto eto huto afoꞌagita lolo huto nohune.   
\p
\v 6 Kilisitohi mono ka kehelite neminana bo lenali ana ka leꞌmo eto eto nehana bo lenali anaꞌina guna ite epilabe.   
\p
\v 7 Lenali komopatinigu keheli fetaga mehilo. Huꞌmamofihi miꞌi meleꞌahanamofihi meniꞌibe. Bonaꞌmagi enali foya lilanalo minete yamofihi legeyaꞌago lilanaꞌmu yabe.  
\v 8 Moneꞌa enali tafa komopaꞌanilo kehelite tafa komopaꞌanimofihi foya yaꞌma fililatana li huto hilanaꞌmu yabe. To moneꞌamagi enali Sikalafuꞌmofihi foya lilana enali minete Sikalafuꞌmofihi legeyaꞌa enemehi mefilise mino kosaba huse nasana lamanaꞌa lilanaꞌmu yabe.  
\v 9 Ya huto niꞌigo anaꞌina lamanaꞌamu yaꞌma koseleꞌi mehose amuya moloto lito ho tito hilune. Buto koseleꞌi melahalutamofihi Huꞌmau moloꞌehina kanaꞌalo minoba minoba huse nasana li huto hilutana yamofihi legeyaꞌa lilune.  
\v 10 Ya nohuto kanaꞌati niꞌigo bonaꞌi asagaꞌmagihi lemehi epito hetofa hu epalalune. Ya nehinogoti mono kagu ligibo enaliꞌani lalalutigihi nasana yaꞌma lelito tito eneleꞌmo bati hilune.   
\s1 Lipoti molo epito kekeꞌi lu epoloꞌehina  
\p
\v 11 Lenali fayahi napaꞌa yaꞌma nani nayahaꞌniloti koyoꞌohuna. Ya bu galo.  
\v 12 Bonaꞌi lugaꞌamagi enali enugufaꞌani leꞌmo ho tilata nehanamagi lenalitini lenugufa keyaꞌi gufa laga huꞌehinaꞌa hiti minalabe lite amuya melelata lenegekesa lite nehabe. To enali enugufaga henabe lite laga nehabe? Huꞌmamofihi keyaꞌa enugufaga minalibe lite nehanaꞌa meniꞌibe. Yaꞌma Kilisitou malipu yafalo filiꞌehinauba yaꞌmuko leleꞌmo bati hilina niꞌibe lite lilenogomo Yuta bonaꞌmagi kalanaꞌi mele epilabe. Enali yaꞌma kehelite kete higo Yuta bonaꞌi kalanaꞌi mele lepalalanaꞌmu hu lalibe lite enugufa laga nehana yabe.  
\v 13 To enugufaga keyaꞌi laga hiꞌahana bonaꞌi enali Moseu keya ka luꞌehina ka mone kegiꞌa megeꞌi menemalabe. To lenali ma lite nekehelibe. Lenali hiti enali hiti keyaꞌa hiti nehite molo emilenogo enaliꞌani enugufaꞌani lelite tiluneꞌmu nehabe.  
\v 14 Nani yaꞌma anaꞌinaꞌnimufi yanaꞌmu melube. Sipi Boti Yesu Kilisitohi malipu yafalo filiꞌehinamofihi yaꞌma kaꞌa moneko kumu liyafa huto lu emilata nohube. Yanaꞌmu yabe luto melugu nasana fulupa ito kisililatanaꞌmu kehelinogo metilibe. To ana huto melugu nasanaꞌmu kehelito megeꞌi moloꞌohunamofihi bu nogogo neleꞌmo kefefe mehilinaꞌmu yabe.  
\v 15 Lugufalo Huꞌmamofihi keyaꞌi laga huꞌehina ya niꞌifihe? Laga mehuꞌehina ya niꞌifihe? Yamofihi yaꞌma lamanaꞌa meniꞌibe. Kosaba lemehati hiti minaluta nasana monekoꞌisi lamanaꞌa niꞌibe.  
\v 16 Yaguꞌya mineme bite mineꞌahanaꞌa lenalitoga Huꞌmamofitogati fulunaꞌa to kekeꞌi luseꞌnaꞌa leneleꞌmo bebe seseꞌna minomo tito minalibe. Ya nehinogo Huꞌmamofihi yagapanaꞌa silagatoga yaꞌma minalibe.   
\p
\v 17 Ma kaga lu nolepuna su halibe. Kalanaꞌi mele netete nehago nufuheꞌi nugufalo ma niꞌigo yamofihi nani Yesuhi kele kele boꞌa nohube. Yamofihi hapaꞌa huto hulata nohinamo niꞌinagi kaga yaꞌma lu nolepuna mamofihi leꞌmo gupilo bo moneuba keta foya akuꞌi menimilinaꞌmu yabe.   
\p
\v 18 Nalaluꞌnigita, Sipi Boti Yesu Kilisitohi leneheꞌmoseꞌnauba komopatinigu mino lito buto mineno. Lamaꞌnaka.