\id TIT - Kaluli Bible 
\h Taitus 
\toc1 Mo꞉fo꞉s We Fo꞉l Eyo꞉ Taitus Emo꞉ Sa꞉sa꞉liga꞉fo꞉ 
\toc2 Taitus 
\toc3 Tait 
\mt2 Mo꞉fo꞉s We Fo꞉l Eyo꞉  
\mt1 Taitus  
\mt2 Emo꞉ Sa꞉sa꞉liga꞉fo꞉  
\imt1 Asuluma꞉no꞉ towo꞉ we  
\ip Mo꞉fo꞉s we Fo꞉l eyo꞉ Taitusbo꞉wo꞉ sa꞉sa꞉liga꞉fo꞉. Tamin amio꞉ Fo꞉l o꞉lia꞉ Taitus o꞉lia꞉ ha꞉na꞉sa꞉ga꞉, ho꞉na꞉lo꞉ hegefa꞉ hen nowo꞉ Kilit, a꞉la꞉yo꞉ a꞉na ane. A꞉la꞉yo꞉ to nafayo꞉ wida꞉sa꞉ga꞉, Fo꞉l e hen nowa ha꞉nakiyo꞉, Taitus e Kilit sa꞉s ho꞉giyo꞉ bo꞉fo꞉melea꞉ki, a꞉na ta꞉fo꞉. A꞉la꞉fo꞉ko꞉lo꞉ Fo꞉l eyo꞉ Taitusbo꞉wo꞉ asulo꞉wo꞉ dimiakiyo꞉, Kilit sa꞉so꞉ halaido꞉ doma꞉ki mo꞉fo꞉s we a꞉na sa꞉sa꞉liga꞉fo꞉.  
\ip Mo꞉fo꞉s sa꞉sa꞉lo꞉ us wenamio꞉ to ha꞉g nolo꞉ da꞉lab. Nowo꞉ Taitus eyo꞉ Keliso kaluka꞉isale ini mano꞉ dibebea꞉sa꞉ga꞉, sa꞉s misa꞉ kaluka꞉isaleyo꞉ da꞉fema꞉ki, Fo꞉l eyo꞉ wido꞉. Nowo꞉ Taitus e ko꞉go꞉do꞉ kaluka꞉isale o꞉lia꞉ kaluka꞉isale so꞉wa o꞉lia꞉ a꞉la꞉ta꞉ga꞉ madali nanogdo꞉ dian kaluka꞉isale imo꞉wo꞉ mano꞉ walama꞉ki, Fo꞉l eyo꞉ wido꞉. Nowo꞉ Kilit Keliso kaluka꞉isaleyo꞉ mano꞉ nafale dimidaki, nolbo꞉wo꞉ ha꞉fo꞉ disa꞉laki towa꞉yo꞉ mo꞉kegema꞉ki, Fo꞉l eyo꞉ to we a꞉na sa꞉sa꞉liga꞉fo꞉.  
\c 1  
\p
\v 1 Ne Fo꞉l, Godeya꞉ ene nanogdo꞉ dian kalu nowo꞉ ne. Ya꞉su Kelisowa꞉lo꞉ iliga꞉felo꞉ kalu nowo꞉ ne. A꞉la꞉fo꞉ko꞉lo꞉ Godeya꞉lo꞉ da꞉fe alifelo꞉ kaluka꞉isale nolba꞉ tilidabu a꞉no꞉ ko꞉lo꞉ halale alitakiyo꞉, Godeya꞉ to man hendele a꞉no꞉ fanda asula꞉ melea꞉kiyo꞉, ne nanog we dimidama꞉ki da꞉feyo꞉.  
\v 2 \x - \xo 1.2 \xt Kolo 1.27\x*A꞉la꞉go꞉ko꞉lo꞉ tilidabu a꞉no꞉lia꞉ asulo꞉ a꞉no꞉lia꞉yo꞉ dialikiyo꞉, iyo꞉ mela꞉no꞉ mela꞉no꞉ sagala꞉liki yasilima꞉ib. Mo꞉wo꞉ Gode e mo꞉dikili sa꞉lan ko꞉lo꞉, eyo꞉ taminde amio꞉ gio꞉ mela꞉no꞉ mela꞉no꞉wo꞉ dia꞉ib a꞉la꞉liki saefa꞉.  
\v 3 A꞉la꞉saefa꞉ ko꞉lo꞉ ho꞉lendeyo꞉ fa꞉la꞉dowabiki, Gode eyo꞉ ene to a꞉no꞉ kalaba fa꞉la꞉do alifa꞉. To a꞉no꞉ kalaba fa꞉la꞉doma꞉kiyo꞉, Gode nilo꞉ gasili a꞉ma꞉yo꞉ to a꞉no꞉ nolbo꞉wo꞉ walama꞉kiyo꞉, nemo꞉ dimi.   
\p
\v 4 \x - \xo 1.4 \xt Lom 1.7, 2Kol 8.23, Gala 2.3\x*Taitus, na꞉no꞉ tilidabuwo꞉ imilig dowo꞉ ko꞉lo꞉, ge no꞉no꞉n so꞉wale dowabikiyo꞉, niyo꞉ mo꞉fo꞉s we gemo꞉ sa꞉sa꞉liga꞉to꞉l. Ha꞉fo꞉ disa꞉lan mano꞉ a꞉la꞉ta꞉ga꞉ ha꞉sa dowan man a꞉no꞉ ge o꞉lia꞉ melea꞉ki, niyo꞉ Do Gode o꞉lia꞉ nilo꞉ a꞉ma꞉la꞉ gasili Ya꞉su Keliso o꞉lia꞉mo꞉wo꞉ dulugu so꞉lo꞉l.   
\s1 Sa꞉s amilo꞉ misa꞉ kaluwa꞉ man dibebeakilo꞉ da꞉feano꞉ we  
\p
\v 5 Niyo꞉ ge Kilit ho꞉na꞉lo꞉ hegefa꞉ hen a꞉namilo꞉ ta꞉fo꞉wo꞉ mo꞉wo꞉ we. Nanogo꞉ mo꞉kedefo꞉ a꞉no꞉ gi dimidaki a꞉la꞉ta꞉ga꞉ Kilit amisa꞉no꞉ tambo amio꞉ nilo꞉ gemo꞉lo꞉ sio꞉ aumbo꞉, sa꞉sdo꞉ bo꞉fo꞉lowan kaluwo꞉ da꞉fema꞉ki, a꞉na ta꞉fo꞉.  
\v 6 \x - \xo 1.6 \xt 1Tim 3.2-7, 2Tim 2.24-26\x*Giyo꞉ sa꞉s amilo꞉ misa꞉ kaluwo꞉ da꞉fema꞉nikiyo꞉, kalu we o꞉ngo꞉ ko꞉lo꞉ da꞉fea꞉bi. Eyo꞉ man digalo꞉le kudu ha꞉naki, kalu nolba꞉yo꞉ e hala dimidab a꞉la꞉bo꞉ mo꞉asula꞉sen. E gayo꞉ imilig di. A꞉la꞉ta꞉ga꞉ kalu ene so꞉wagalin a꞉no꞉ Kelisowa tilida꞉da꞉sa꞉ga꞉, kaluka꞉isaleya꞉ siwa꞉l amio꞉ iyo꞉ mo꞉a꞉la꞉iyaki, iya o꞉lia꞉ ano o꞉lia꞉ma꞉ towo꞉ kudu ha꞉na꞉sen a꞉no꞉ ko꞉lo꞉ da꞉fea꞉bi.  
\v 7 Sa꞉sdo꞉ bo꞉fo꞉lowan kalu iyo꞉, Godeya꞉ ene nanog bo꞉fo꞉lowa꞉sen ko꞉lo꞉ giliyo꞉ kalu we o꞉ngo꞉ ko꞉lo꞉ da꞉fea꞉bi. Eyo꞉ man digalo꞉le kudu ha꞉naki, kalu nolba꞉yo꞉ e hala dimidab a꞉la꞉bo꞉ mo꞉asula꞉sen. A꞉la꞉ta꞉ga꞉ e kalu alan a꞉lakiyo꞉, kaluka꞉isaleyo꞉ mo꞉wa꞉la꞉sa꞉ndan. E bo꞉ebo꞉ mo꞉gadian. E aluna꞉ ho꞉no꞉ no꞉noloma꞉no꞉wo꞉ mo꞉nan. A꞉la꞉ta꞉ga꞉ nol o꞉lia꞉yo꞉ mo꞉buban. E mole alan dia꞉no꞉wo꞉ mo꞉meselan.   
\p
\v 8 Man o꞉leo꞉ngo꞉wo꞉ mo꞉dimidaki, e mageso꞉ kaluwo꞉ dinafa tilidowan. E man nafale dimidama꞉no꞉ asulan. E asulo꞉wo꞉ nafale kudu ha꞉nan. Ene man digalo꞉le, Godeya꞉lo꞉ asulab a꞉no꞉lo꞉ kudu ha꞉na꞉sen. Ene asulo꞉wo꞉ dinafa tilidowan.  
\v 9 To hendele emo꞉lo꞉ wido꞉ a꞉no꞉, eyo꞉ dinafa halale ta꞉li silikiyo꞉, kaluka꞉isale nolba꞉ tilidabuwo꞉ halaido꞉ doma꞉ki man a꞉no꞉ wida꞉sen. A꞉la꞉ta꞉ga꞉ Godeya꞉ tolo꞉ gola ba꞉da꞉sen kaluka꞉isale i a꞉no꞉ to we hendelelo꞉b a꞉la꞉bo꞉ fanda asuluma꞉ki, man a꞉no꞉ eyo꞉ wida꞉sen. \fig Sa꞉sdo꞉ bo꞉fo꞉lowan kalu iliyo꞉ mageso꞉ kaluwo꞉ dinafa tilidowan.|alt="Guests in home" src="BA03023BW.tif" size="col" copy="Used with permission of Louise Bass." ref="1.8" \fig*   
\p
\v 10 \x - \xo 1.10 \xt 1Tim 4.7\x*Mo꞉wo꞉ Kilit sa꞉s us a꞉namio꞉, tolo꞉ sanditan man o꞉lia꞉, madali tolo꞉ sa꞉lan man o꞉lia꞉, dikili sa꞉lan man a꞉no꞉lia꞉yo꞉ kaluka꞉isaleyo꞉ modo꞉ ko꞉lo꞉ kudu ha꞉na꞉lab. A꞉la꞉ta꞉ga꞉ kalu nolba꞉yo꞉ Yuma Keliso kaluka꞉isale a꞉no꞉ Yuwa꞉ eleyo꞉ ko꞉lo꞉ o꞉kudu hamana꞉kilo꞉ diboda꞉sen iliyo꞉lo꞉ man a꞉no꞉ alan dimida꞉lab.  
\v 11 \x - \xo 1.11 \xt 2Tim 3.5-6, 1Bid 5.2\x*Iliyo꞉ mole afale dia꞉no꞉ a꞉la꞉liki, nililo꞉ mo꞉dimidan man a꞉no꞉ wida꞉lab ko꞉lo꞉, kaluka꞉isale nol o꞉lia꞉ ini so꞉lo꞉ o꞉lia꞉yo꞉ asulo꞉wo꞉ no꞉nolo alitakiyo꞉, ili tilidabuwo꞉ ka ta꞉tab. A꞉la꞉fo꞉ko꞉lo꞉ iliyo꞉ to man a꞉no꞉ wa꞉kabiyo꞉ widabena꞉ki ka꞉la꞉bi.   
\p
\v 12 Tamin amio꞉ asulo꞉lo꞉ di kalu nowo꞉ Kilit hen a꞉na ilikiyo꞉, towo꞉ a꞉la꞉sa꞉sa꞉lo꞉, “Kilit kaluka꞉isaleyo꞉ madali towo꞉ sa꞉la꞉sen. Iyo꞉ saila gasayo꞉ o꞉ngo꞉ dowa꞉sen. Iyo꞉ bo꞉sulakiyo꞉, ma꞉no꞉wo꞉ besagali na꞉sen.”  
\v 13-14 \x - \xo 1.13-14 \xt 1Tim 4.7, 2Tim 4.2\x*To we mada hendele sa꞉sa꞉lo꞉. A꞉la꞉fo꞉ko꞉lo꞉ kaluka꞉isale ili tilidabu a꞉no꞉ halaido꞉ doma꞉ki, a꞉la꞉ta꞉ga꞉ iliyo꞉ Yuwa꞉ kandayo꞉ malolab a꞉namida꞉yo꞉ mo꞉iligi dabuma꞉ki, a꞉la꞉ta꞉ga꞉ to hendelelo꞉ mo꞉kudu ha꞉nab kaluwa꞉lo꞉ ele difa꞉ a꞉no꞉, mo꞉kudu hamana꞉kiyo꞉, giyo꞉ halale sa꞉laki, i a꞉no꞉ digalaki wida꞉bi.  
\v 15 Kaluka꞉isale abeyo꞉ Godeya꞉ siwa꞉l amio꞉ asugo꞉ go꞉go꞉do꞉lo꞉ a꞉lab i a꞉namio꞉, kelego꞉wo꞉ tambo nafale dowo꞉. Ko꞉sega kaluka꞉isale abeyo꞉ Ya꞉suwo꞉ mo꞉tilida꞉dakilo꞉, asulo꞉wo꞉ mogago꞉ a꞉lab i amio꞉, kelego꞉wo꞉ tambo mogago꞉le dowab. Kalu i a꞉no꞉ ili asulo꞉wa꞉lo꞉ nafale aloba꞉dan a꞉no꞉ mogagila꞉ ko꞉lo꞉lab.  
\v 16 \x - \xo 1.16 \xt 1Yo꞉n 1.6, 2.4\x*Iliyo꞉ “Ne Godeyo꞉ mada asulo꞉” a꞉la꞉sa꞉la꞉lab ko꞉sega, ililo꞉ man dimidab a꞉ma꞉yo꞉, iyo꞉ Godeyo꞉ mo꞉ba꞉dan a꞉la꞉ widakigab. A꞉la꞉fo꞉ko꞉lo꞉ Gode eyo꞉ kalu o꞉mo꞉wo꞉ mada mogago꞉le ba꞉da꞉sa꞉ga꞉ mo꞉beab. Iyo꞉ Godeya꞉lo꞉ sio꞉ aumbo꞉ mo꞉kudu ha꞉nakiyo꞉, i a꞉ma꞉yo꞉ man nafa dimidama꞉no꞉wo꞉ mo꞉ililo꞉.   
\c 2  
\s1 Ko꞉go꞉do꞉ kaluka꞉isalemo꞉lo꞉ to wido꞉wo꞉ we  
\p
\v 1 Taitus giyo꞉ to man widakiyo꞉, to hendele o꞉lia꞉lo꞉ ililo꞉ dowab a꞉no꞉ ko꞉lo꞉ wida꞉bi.  
\v 2 Kalu ko꞉go꞉do꞉le sab o꞉mo꞉wo꞉ a꞉la꞉wida꞉bi. “Kalu ko꞉go꞉do꞉ gio꞉ mo꞉no꞉nolo dowaki, asulo꞉ nafaleyo꞉ ko꞉lo꞉ kudu ha꞉na꞉lubi. Giliyo꞉ mano꞉ nafale dimidaki, go꞉no꞉n a꞉ma꞉la꞉yo꞉ tili dowa꞉lubi. Tilidabu mano꞉, ha꞉fo꞉ disa꞉lan mano꞉, a꞉la꞉ta꞉ga꞉ hida꞉yo꞉ fa꞉la꞉dowalikilo꞉ halale kagama꞉no꞉ man a꞉no꞉ ko꞉lo꞉ kudu ha꞉na꞉lubi.” Giyo꞉ imo꞉wo꞉ a꞉la꞉wida꞉bi.  
\v 3 \x - \xo 2.3 \xt 1Tim 3.11\x*Taitus giyo꞉, ka꞉isale ko꞉go꞉do꞉ sab imo꞉wo꞉ towo꞉ a꞉la꞉wida꞉bi. “Ka꞉isale ko꞉go꞉do꞉ giliyo꞉ Godeya꞉lo꞉ asulab au dimidakiyo꞉, nolo꞉ sada꞉da꞉so꞉bo. Aluna꞉ ho꞉n nab a꞉ma꞉yo꞉ gili asulo꞉wo꞉ mo꞉tilidoma꞉ki ta꞉ta꞉bi. Man digalo꞉ mesa꞉no꞉ a꞉no꞉ ko꞉lo꞉ wida꞉li ha꞉na꞉bi.”  
\v 4-5 \x - \xo 2.4-5 \xt A꞉fe 5.22\x*Giyo꞉ a꞉la꞉widalikiyo꞉, ka꞉isale ko꞉go꞉do꞉ iliyo꞉lo꞉ ka꞉isale kalu ho꞉gilo꞉ ane imo꞉wo꞉lo꞉ a꞉la꞉wida꞉bi. Kalu gilo꞉ o꞉lia꞉ so꞉wa gilo꞉ o꞉lia꞉mo꞉wo꞉ ha꞉fo꞉wo꞉ disa꞉la꞉lubi. A꞉la꞉ta꞉ga꞉ gio꞉ asulo꞉ nafale kudu ha꞉naki, malilo꞉ man a꞉no꞉ ko꞉lo꞉ kudu ha꞉na꞉lubi. Gio꞉ kalu go꞉ndo꞉ma꞉ ha꞉ga dowaki, ginin so꞉lo꞉wo꞉ dinafa bo꞉fo꞉lubi. A꞉la꞉ta꞉ga꞉ gio꞉ nowo꞉mbo꞉wo꞉lo꞉ sagale alita꞉bi. Kaluka꞉isale nolba꞉yo꞉ Godeya꞉ to nafa a꞉no꞉ dio꞉ge sa꞉labena꞉kiyo꞉, ka꞉isale i a꞉no꞉ man we ko꞉lo꞉ kudu hamana꞉ki wida꞉bi.   
\s1 Kalu so꞉wamo꞉lo꞉ to wido꞉wo꞉ we  
\p
\v 6 A꞉la꞉ta꞉ga꞉ kalu so꞉wa iliyo꞉ asulo꞉ nafaleyo꞉ kudu hamana꞉ki, iyo꞉ halale alita꞉bi.  
\v 7 \x - \xo 2.7 \xt 1Tim 4.12\x*Iliyo꞉ man gilo꞉wo꞉ ba꞉da꞉sa꞉ga꞉ kudu mena꞉ki, giyo꞉ kelego꞉ tambo dimidakiyo꞉, mano꞉ nafale dimida꞉bi. Giyo꞉ mano꞉ widakiyo꞉, man digalo꞉le kudu ha꞉naki, a꞉la꞉ta꞉ga꞉ to gilo꞉ sa꞉lab a꞉no꞉ hendele a꞉la꞉asuluma꞉ki wida꞉bi.  
\v 8 \x - \xo 2.8 \xt 1Bid 2.15\x*Giyo꞉ to man widakiyo꞉, to nafale digalo꞉ a꞉no꞉ko꞉ sa꞉la꞉lubi. A꞉la꞉dimidalikiyo꞉, nililo꞉ mogago꞉ dimido꞉ imilig nowo꞉ gis kaluwa꞉yo꞉ mo꞉ba꞉ba꞉ ko꞉lo꞉, to sa꞉ma꞉no꞉wo꞉ aundo꞉ma dowaki, iyo꞉ sendeloma꞉ib.   
\s1 Madali nanogdo꞉ dian kaluka꞉isalemo꞉lo꞉ to wido꞉wo꞉ we  
\p
\v 9-10 \x - \xo 2.9-10 \xt 1Tim 6.1\x*Giyo꞉ madali nanogdo꞉ dian kaluka꞉isalemo꞉wo꞉ a꞉la꞉wida꞉bi. “Nanog dian kaluka꞉isale gio꞉, kelego꞉ tambo amio꞉ gilo꞉ bo꞉fo꞉lowan kaluwa꞉ ha꞉ga iliki, towo꞉ a꞉ma꞉la꞉bo꞉ sa꞉la꞉so꞉bo. Bo꞉fo꞉lowan kaluwo꞉ sagale alita꞉bi. A꞉la꞉ta꞉ga꞉ bo꞉fo꞉lowan kaluwa꞉ kelego꞉wo꞉ afalebo꞉ dia꞉so꞉bo. Ko꞉sega gilo꞉ bo꞉fo꞉lowan kaluwa꞉yo꞉ gio꞉ tili asuluma꞉kiyo꞉, giliyo꞉ ho꞉leno꞉ tambo man digalo꞉ a꞉no꞉ ko꞉lo꞉ kudu ha꞉na꞉lubi.” Iliyo꞉ a꞉la꞉dimidalikiyo꞉, kaluka꞉isale nolba꞉yo꞉ ililo꞉ dimidab a꞉no꞉ ba꞉da꞉sa꞉ga꞉, Godeya꞉lo꞉ ni ko꞉lo꞉ gasili to wida꞉lab a꞉no꞉ hendelelo꞉b a꞉la꞉bo꞉ asulakiyo꞉, to a꞉no꞉ iyo꞉lo꞉ kudu ha꞉na꞉no꞉ asuluma꞉ib.   
\s1 Ya꞉su mia꞉no꞉ yasilakiyo꞉, man nafale dimida꞉bi.  
\p
\v 11 Godeya꞉lo꞉ ha꞉fo꞉ disa꞉lan man a꞉ma꞉yo꞉ kaluka꞉isaleyo꞉ o꞉lika gasilia꞉ib ko꞉lo꞉, man a꞉no꞉ kaluka꞉isale tambolo꞉ amio꞉ kalaba fa꞉la꞉dowo꞉.  
\v 12 \x - \xo 2.12 \xt 1Yo꞉n 2.16\x*Godeya꞉lo꞉ mo꞉asulab a꞉no꞉lia꞉ do꞉mo꞉wa꞉lo꞉ asulan man a꞉no꞉lia꞉yo꞉ kata꞉foma꞉kiyo꞉, Godeya꞉ ene ha꞉fo꞉ disa꞉lan man a꞉ma꞉yo꞉ nimo꞉wo꞉ wida꞉lab. Man a꞉no꞉ ta꞉takiyo꞉, nio꞉ henfelo꞉ wena silikiyo꞉, asulo꞉ nafalelo꞉ kudu ha꞉na꞉sen man o꞉lia꞉, digalo꞉ doma꞉no꞉ man o꞉lia꞉, Godeya꞉lo꞉ asulab au doma꞉no꞉ man o꞉lia꞉yo꞉ kudu hamana꞉ki, widab.  
\v 13 Nilo꞉ gasilia꞉no꞉ Gode Alan o꞉lia꞉ Ya꞉su Keliso elo꞉ a꞉ma꞉la꞉do꞉ mia꞉nigab ho꞉len alan a꞉no꞉, nio꞉ sagala꞉li yasila꞉likiyo꞉, man a꞉no꞉ ko꞉lo꞉ dimida꞉mela꞉niki.  
\v 14 \x - \xo 2.14 \xt Kis 19.5, Lo 7.6, Ese 37.23, Gala 1.4, 1Bid 2.9\x*Nio꞉ man mogago꞉ dimida꞉len amio꞉ a꞉ma꞉la꞉ gasiliaki, a꞉la꞉ta꞉ga꞉ nili asulo꞉wo꞉ malilo꞉ doma꞉kiyo꞉, Ya꞉su Keliso eyo꞉ ene mela꞉no꞉wo꞉ a꞉na wala꞉. A꞉la꞉go꞉ko꞉lo꞉ kaluka꞉isale nio꞉ eno꞉le doma꞉ki, a꞉la꞉ta꞉ga꞉ mano꞉ nafale dimidama꞉no꞉ mada asuluma꞉kiyo꞉, Ya꞉suwa꞉yo꞉ a꞉na dimido꞉.   
\p
\v 15 \x - \xo 2.15 \xt 1Tim 4.12\x*A꞉la꞉fo꞉ko꞉lo꞉ giyo꞉ to a꞉no꞉ wida꞉lubi. Giyo꞉ towo꞉ halaido꞉ widakiyo꞉, kaluka꞉isaleya꞉ tilidabu a꞉no꞉ halale alitakiyo꞉, mogago꞉ dimido꞉ a꞉no꞉ digala꞉lubi. Kaluka꞉isale nolba꞉yo꞉ ge wa꞉la꞉ sa꞉ndabena꞉ki, ge halaido꞉ dowa꞉bi.   
\c 3  
\s1 Man nafale dimida꞉bi  
\p
\v 1 \x - \xo 3.1 \xt Lom 13.1-7, 1Bid 2.13-14\x*Taitus giyo꞉ Kilit Keliso kaluka꞉isalemo꞉ a꞉widakiyo꞉, iliyo꞉ gamani misa꞉ kalu o꞉lia꞉ amisa꞉na꞉ misa꞉ kalu o꞉lia꞉ma꞉ ha꞉ga dowaki, ililo꞉ to sa꞉lab a꞉no꞉ kudu hamana꞉ki wida꞉bi. Kaluka꞉isaleyo꞉ ho꞉leno꞉ tambo man nafa dimidaki kudu hamana꞉ki wida꞉bi.  
\v 2 Kaluka꞉isale iliyo꞉ nolo꞉ mo꞉sada꞉daki, ha꞉sa doma꞉ki wida꞉bi. Wi enedo꞉wo꞉ mo꞉wabudaki, kaluka꞉isale tambomo꞉wo꞉ ege doma꞉ki wida꞉bi.   
\p
\v 3 \x - \xo 3.3 \xt 1Kol 6.9-11, A꞉fe 2.1-2, 5.8\x*Nio꞉lo꞉ tamin amio꞉ babale dowaki a꞉la꞉iyakiyo꞉ mo꞉kudu ha꞉na꞉sen. A꞉la꞉ta꞉ga꞉ man ko꞉li ko꞉lilo꞉, nili do꞉mo꞉wa꞉lo꞉ asulan o꞉lia꞉ nili sagalakilo꞉ dimida꞉sen a꞉no꞉lia꞉ma꞉yo꞉, nio꞉ dikidabikiyo꞉, meya꞉lo꞉ melo꞉ o꞉ngo꞉ a꞉ma꞉ susululia꞉ga꞉ ha꞉na꞉len. Nio꞉ ho꞉leno꞉ tambo man mogago꞉ dimida꞉likiyo꞉, nol o꞉lia꞉yo꞉ etea꞉liki mo꞉bea꞉sen. A꞉la꞉ta꞉ga꞉ kaluka꞉isale nolba꞉yo꞉ nimo꞉wo꞉ kulufa꞉yab amio꞉, niliyo꞉lo꞉ imo꞉wo꞉ kulufa꞉ya꞉sen.  
\v 4-5 \x - \xo 3.4-5 \xt 2Tim 1.9, Hibu 10.22\x*Ko꞉sega nilo꞉ gasili Gode eyo꞉ nimo꞉wo꞉ ha꞉fo꞉ disa꞉laki, sagale alita꞉sen ko꞉lo꞉ nio꞉ a꞉ma꞉la꞉ gasili. Nio꞉ man digalo꞉le dimida꞉lena gasilima. Ko꞉sega Gode eyo꞉ nio꞉ nofolo alitaki, gasili ko꞉lo꞉, ene Mama a꞉ma꞉ halaido꞉wa꞉ ilikiyo꞉, nio꞉ to꞉go꞉de alifa꞉ ko꞉lo꞉, nio꞉ ho꞉gi a꞉sa꞉la꞉liaki, mela꞉no꞉ ho꞉giyo꞉ dimi.  
\v 6 \x - \xo 3.6 \xt Ilig 2.17-18\x*Nilo꞉ gasili, Ya꞉su Keliso eya ilikiyo꞉, Gode eyo꞉ Ene Mama Malilo꞉ a꞉no꞉ boba dimiaki, niya ko꞉go꞉lu alifelo꞉.  
\v 7 Elo꞉ dimido꞉wo꞉ mo꞉wo꞉ we. Godeya꞉ ene kanulo꞉ a꞉ma꞉yo꞉ nio꞉ ene siwa꞉l amio꞉ digalo꞉le ta꞉fo꞉ ko꞉lo꞉, a꞉na ilikiyo꞉, nio꞉ ene so꞉wale ta꞉taki, mela꞉no꞉ mela꞉no꞉wo꞉ mada dia꞉no꞉ a꞉la꞉asulaki yasiso꞉l.  
\v 8 To a꞉no꞉ hendele so꞉lo꞉l. Kaluka꞉isale Gode amilo꞉ tilidabu i a꞉ma꞉yo꞉ man nafa halale dimidama꞉no꞉wo꞉, tamindeyo꞉ welo꞉b a꞉la꞉asuluma꞉ki, giyo꞉ to a꞉no꞉ halale wida꞉bi. Nilo꞉ to wido꞉l we nafale ko꞉lo꞉, to wema꞉yo꞉ tambo asuwa꞉fa꞉ib.  
\v 9 \x - \xo 3.9 \xt 2Tim 2.14,16\x*Ko꞉sega giyo꞉ mo꞉lo꞉ma kabilo꞉ towa꞉lo꞉ kegab a꞉no꞉lia꞉, ge ma꞉mu i mio꞉ agela꞉sen a꞉no꞉lia꞉, Mo꞉sa꞉sa꞉ ele saefa꞉ amilo꞉ to kegab a꞉no꞉lia꞉, towa꞉lo꞉ kegab a꞉no꞉ tambo ta꞉ta꞉ga꞉, a꞉le dowa꞉bi. Mo꞉wo꞉ towa꞉lo꞉ kegab a꞉ma꞉yo꞉ fo nafayo꞉ mo꞉helema꞉ib.  
\v 10 \x - \xo 3.10 \xt Madi 18.15-17\x*Sa꞉s us amio꞉, kaluka꞉isale imilig noma꞉yo꞉ towa꞉ kegakiyo꞉ aloba꞉ma꞉no꞉ to sa꞉lalega, giyo꞉ hagugo꞉wo꞉ sa꞉la꞉bi. A꞉la꞉ta꞉ga꞉ emo꞉wo꞉ hagugo꞉ towo꞉ wa꞉ka sio꞉ amio꞉ mo꞉da꞉dalega, gio꞉ kalu a꞉no꞉ fa꞉s dimia꞉bi.  
\v 11 Kalu o꞉ngo꞉wo꞉ e asulo꞉ nafaleyo꞉ ta꞉taki, man mogago꞉le dimida꞉lab ko꞉lo꞉, ene mogago꞉ dimido꞉ a꞉ma꞉yo꞉ e mo꞉walila꞉la꞉ga꞉ ta꞉li ko꞉lo꞉lab, a꞉la꞉bo꞉ ge asulo꞉.   
\p
\v 12 \x - \xo 3.12 \xt A꞉fe 6.21-22, Kolo 4.7-8\x*Niyo꞉ kalu imilig nowo꞉, Atemas eya꞉le, Tikikus eya꞉le gelo꞉wa iliga꞉fa꞉no꞉. Ta꞉n ho꞉len amio꞉ ne Nikobolis amisa꞉n a꞉na mesa꞉no꞉ asulo꞉ ko꞉lo꞉, kalu a꞉no꞉ gelo꞉wa fa꞉la꞉dowa꞉sa꞉ga꞉yo꞉, ge ne a꞉na galima꞉ni bo꞉bo꞉ge ya꞉bi.  
\v 13 \x - \xo 3.13 \xt Ilig 18.24, 1Kol 3.5-6\x*Abolos o꞉lia꞉ gamani elelo꞉ asulo꞉ kalu, Senas o꞉lia꞉yo꞉ ha꞉na꞉nigalikiyo꞉, a꞉la꞉yo꞉ kelego꞉lo꞉ma dowabena꞉ki, giyo꞉ mada asuwa꞉ta꞉bi.  
\v 14 \x - \xo 3.14 \xt A꞉fe 4.28\x*A꞉la꞉ta꞉ga꞉ Kilit Keliso kaluka꞉isaleya꞉yo꞉ kelego꞉lo꞉ma kaluka꞉isaleyo꞉ halale asuwa꞉ta꞉ melea꞉ki asulo꞉l. Iliyo꞉ a꞉la꞉dimidalikiyo꞉, fowo꞉ nafa hedaki, ho꞉leno꞉ tambo amio꞉ kelego꞉wo꞉ o꞉li doma꞉ib.   
\p
\v 15 Kaluka꞉isale tambo ne o꞉lia꞉lo꞉ sab wema꞉yo꞉ gimo꞉wo꞉ sagalo꞉ towo꞉ iliga꞉tab. A꞉la꞉ta꞉ga꞉ tilidabu kaluka꞉isale, ne mili ko꞉lo꞉ gi o꞉lia꞉lo꞉ sab nol o꞉mo꞉wo꞉lo꞉ sagalo꞉ towo꞉ sa꞉la꞉biyo꞉.  
\p Godeya꞉ ha꞉fo꞉ disalano꞉ gi o꞉lia꞉ dowa꞉biyo꞉.