\id RUT - Kalul Bible \h Lud \toc3 Lud \toc2 Lud \toc1 Lud \mt1 Lud \imt1 Asuluma꞉no꞉ towo꞉ we \ip Isolael ta꞉i mio꞉ malolo꞉ a꞉no꞉ Lud bugo꞉ abol wema꞉yo꞉ ba asufa꞉ o꞉ngo꞉ dowaki, heb a꞉la꞉ a꞉no꞉ a꞉na kudu alifa꞉. Heb agel, Mo꞉mo꞉do꞉ a꞉na a꞉la꞉ta꞉ga꞉ aneyo꞉ Hetman bugo꞉ a꞉na edo꞉. Heb a꞉namio꞉ Godeya꞉lo꞉ Ablahama꞉ e ma꞉mui ko꞉lo꞉ Isolael amisa꞉n fa꞉la꞉doma꞉kilo꞉ dimido꞉ a꞉no꞉ ko꞉lo꞉ sa꞉sa꞉lo꞉. A꞉la꞉ta꞉ga꞉ Gode eyo꞉ Isolael kaluka꞉isale o꞉lia꞉ dinali saefa꞉ to a꞉no꞉ ko꞉lo꞉ sa꞉sa꞉lo꞉. Heb andeb, Samuel elo꞉ elen a꞉na a꞉la꞉ta꞉ga꞉ mio꞉wo꞉ Isolael misa꞉ kalu alan ko꞉li ko꞉lilo꞉ elen a꞉nami edo꞉. Malolo꞉ heb a꞉namio꞉ Isolael misa꞉ kaluwo꞉ a꞉na a꞉la꞉ta꞉ga꞉, Gode elo꞉ Da꞉ibid e Isolaela꞉ misa꞉ kalu alan fa꞉la꞉doma꞉kilo꞉ dinali saefa꞉ a꞉no꞉ ko꞉lo꞉ malolo꞉. Lud bugo꞉ a꞉no꞉ mo꞉mo꞉da malolab amio꞉ heb agel a꞉na da꞉lab. A꞉la꞉ta꞉ga꞉ bugo꞉ a꞉no꞉ edakiyo꞉, Da꞉ibida꞉ e so꞉lo꞉ amilo꞉ misa꞉ kalu fa꞉la꞉doma꞉ib a꞉no꞉ ko꞉lo꞉ agelo꞉. \ip Lud e Moab ga ko꞉lo꞉, Isolael kaluwa꞉ di. Ko꞉sega ino꞉ sowabikiyo꞉, eyo꞉ ena꞉sumo꞉ nofolo꞉ widakiyo꞉, e tili dofo꞉liki, Na꞉omiya꞉ Godeyo꞉ tilida꞉da꞉sa꞉ga꞉ gulugulula꞉len. A꞉la꞉ta꞉ga꞉yo꞉ Lud e kalu ho꞉gi noma꞉yo꞉ dima꞉kiyo꞉, Na꞉omi eyo꞉ asuwa꞉takiyo꞉, ene e so꞉lo꞉ us a꞉naka kedo꞉. A꞉la꞉do꞉ go꞉ a꞉namio꞉, e Da꞉ibida꞉ inuwo꞉ a꞉no꞉ fa꞉la꞉dowo꞉. \ip Henfelo꞉ wenamilo꞉ Godeya꞉lo꞉ dimidama꞉no꞉ asulab a꞉no꞉ waga fa꞉la꞉do alifa꞉iba꞉le a꞉la꞉do꞉ asulo꞉ a꞉no꞉ bugo꞉ wema꞉yo꞉ kalaba fa꞉la꞉do alifa꞉. Godeya꞉ ene ha꞉fo꞉ disa꞉lan man a꞉no꞉ bugo꞉ wema꞉yo꞉ kalaba wido꞉. \ip Hetman bugo꞉ a꞉namio꞉, kaluka꞉isaleyo꞉ Godeyo꞉ ta꞉ta꞉ga꞉ ha꞉nalikiyo꞉, hida꞉yo꞉ galilia꞉sen a꞉no꞉ ko꞉lo꞉ sa꞉sa꞉lo꞉. Ko꞉sega Lud bugo꞉ a꞉namio꞉, ha꞉la꞉ ga ko꞉lo꞉ nodola꞉sa꞉ga꞉lo꞉ Isolaela꞉ Godemo꞉ tilida꞉dakilo꞉ kudu ane o꞉mo꞉wo꞉ kelego꞉ nafale fa꞉la꞉do alifa꞉ a꞉la꞉ sa꞉sa꞉lo꞉. \c 1 \s1 A꞉lema꞉la꞉ga꞉ so꞉lo꞉wo꞉ Moab ane \p \v 1-2 Kamolo꞉ di kaluwa꞉lo꞉ bo꞉fo꞉len ho꞉len a꞉namio꞉ Isolael kaluka꞉isaleyo꞉ maiyo꞉wo꞉ alan dowo꞉. Kalu nowo꞉ a꞉na elen, ene wiyo꞉ A꞉lema꞉la꞉g. Ingaya꞉ wiyo꞉ Na꞉omi. Inso꞉ a꞉la꞉ma꞉ wiyo꞉ Malon, nowo꞉ Kilion. E so꞉lo꞉ a꞉ma꞉ mo꞉mio꞉wo꞉ A꞉fla꞉ta. Iyo꞉ Yuda hen, Ba꞉diliha꞉m amisa꞉n a꞉na sen amio꞉, maiyo꞉wo꞉ alan dowabiki, Ba꞉diliha꞉m a꞉no꞉ ta꞉ta꞉sa꞉ga꞉, Moab hen a꞉na ha꞉na꞉ni ane. \v 3 Moab a꞉na sen ami, A꞉lema꞉la꞉go꞉ a꞉na sowo꞉. A꞉lema꞉la꞉g e a꞉na sowabikiyo꞉, Na꞉omiyo꞉ a꞉la꞉ta꞉ga꞉ inso꞉ a꞉la꞉ko꞉ a꞉naka sen. \p \v 4 A꞉na silikiyo꞉, inso꞉ a꞉la꞉ma꞉yo꞉ Moab ka꞉isale ko꞉lo꞉ di. Ga wiyo꞉ nowo꞉ Oba, nowo꞉ Lud. \v 5 Gayo꞉ dia꞉sa꞉ga꞉ sena, Malon dia꞉ Kilion dia꞉yo꞉ a꞉na sowo꞉. Iyo꞉ a꞉namilo꞉ seno꞉ donayo꞉ do꞉la꞉fo꞉ ko꞉lo꞉ gulula꞉. Inso꞉ a꞉la꞉ a꞉no꞉ sowabikiyo꞉, Na꞉omiyo꞉ e fo꞉fo꞉dolo alifa꞉, mo꞉wo꞉ ene in o꞉lia꞉ so꞉wa o꞉lia꞉yo꞉ aundo꞉ma. \s1 Na꞉omiyo꞉ Ludo꞉ Ba꞉diliha꞉m tililia꞉mio꞉ \p \v 6 Na꞉omiyo꞉ a꞉la꞉ta꞉ga꞉ ena꞉su a꞉la꞉yo꞉ a꞉na sen ami, Na꞉omi e to nowo꞉ a꞉la꞉dabu. Ene hen a꞉namio꞉, Yawe eyo꞉ ma꞉no꞉ ma꞉no꞉wo꞉ alan dimiaka꞉, a꞉la꞉sio꞉ a꞉no꞉ da꞉da꞉sa꞉ga꞉, iyo꞉ a꞉ma꞉la꞉ Na꞉omiya꞉ hena ha꞉na꞉no꞉ asulo꞉. \p \v 7 Iyo꞉ ayo꞉ ta꞉ta꞉ga꞉ ha꞉na꞉ga꞉yo꞉, tog alan Yuda hen amilo꞉ ha꞉na꞉sen a꞉na o꞉kagataka, \v 8 ena꞉su a꞉la꞉mo꞉wo꞉ a꞉la꞉sio꞉, “Gaino꞉ ge kalu sowo꞉ a꞉la꞉mo꞉wo꞉lo꞉, nemo꞉wo꞉lo꞉ man nafa dimido꞉ ko꞉lo꞉, Yawe eyo꞉ ga꞉gdo꞉ ha꞉nab amio꞉ asuwa꞉taki, nafale mesea꞉ki ta꞉fa꞉ib. \v 9 Ga꞉go꞉ kalu ho꞉giyo꞉ dimia꞉sa꞉ga꞉ nafa mesea꞉kiyo꞉, Yawe emo꞉wo꞉ niyo꞉ dulugu sa꞉la꞉mela꞉no꞉. O꞉go꞉ ne no꞉no꞉n hena ho꞉no꞉l ko꞉lo꞉, ga꞉go꞉lo꞉ wenaka ta꞉bi,” a꞉la꞉sio꞉. A꞉la꞉sa꞉labiki a꞉la꞉yo꞉ Na꞉omiya ta꞉li dofo꞉liki alan ya꞉fodo꞉. \v 10 Ya꞉la꞉likiyo꞉ a꞉la꞉ma꞉yo꞉ a꞉la꞉sio꞉, “Na꞉no꞉ nani ayamio꞉ mo꞉ha꞉na꞉no꞉. Na꞉no꞉ gi so꞉lo꞉lo꞉ sab a꞉na, ua ha꞉na꞉no꞉” a꞉la꞉sio꞉. \p \v 11-13 Ko꞉sega Na꞉omiya꞉ ena꞉su a꞉la꞉mo꞉ sa꞉laki, “Ga꞉go꞉, nelo꞉ a꞉kudu ya꞉so꞉bo! Mo꞉wo꞉ ne anaso꞉ ko꞉m. Ga꞉gdo꞉ dia꞉no꞉ kalu so꞉wa nowo꞉, ne aundo꞉ma. Ne kaluwo꞉ a꞉ha꞉na꞉ga꞉, kalu so꞉wa a꞉la꞉ nowo꞉ a꞉na a꞉sa꞉la꞉lia꞉no꞉ kibo꞉bowo꞉, ga꞉go꞉ o꞉yasila꞉ga꞉yo꞉, a꞉na sili alifa꞉no꞉malo꞉ka꞉. Ga꞉go꞉ mada gaina꞉ aya ha꞉na꞉sia꞉bi! Yawe eyo꞉ ne gola ba꞉ba꞉ ko꞉m, ko꞉lo꞉ nilo꞉ halelia꞉sa꞉ga꞉lo꞉ hida꞉yo꞉ dio꞉l we, ga꞉g amio꞉lo꞉ golab.” Na꞉omi eyo꞉ a꞉la꞉sio꞉. \p \v 14 A꞉la꞉do꞉ sa꞉lab a꞉no꞉ a꞉la꞉ma꞉yo꞉ da꞉da꞉sa꞉ga꞉, wa꞉ka ya꞉fodo꞉. A꞉la꞉ta꞉ga꞉ Obayo꞉ mimila꞉sa꞉ga꞉ ha꞉nabiki, Ludo꞉ Na꞉omi eya ta꞉li dofo꞉len. \v 15 Na꞉omiya꞉ Lud emo꞉ sa꞉laki, “Obayo꞉ e hen enedo꞉wa, gode enedo꞉wa, a꞉ma꞉la꞉ ha꞉nabo꞉lo꞉ka꞉! Gelo꞉ a꞉ma꞉la꞉ doma꞉ni hamana!” a꞉la꞉sio꞉. \p \v 16 Ko꞉sega Lud eyo꞉ Na꞉omimo꞉ sa꞉laki, “Giyo꞉ ne ta꞉fo꞉ hamana a꞉la꞉bo꞉, nemo꞉wo꞉ sa꞉la꞉so꞉bo! Nelo꞉, gelo꞉ ha꞉naba mia꞉no꞉” a꞉la꞉sio꞉. “Hen o꞉ba mida꞉iya꞉le, gelo꞉ ha꞉nab a꞉na, nelo꞉ a꞉na mia꞉no꞉. Gode gilo꞉wo꞉, Gode nino꞉ doma꞉ib. Ge Isolael ga ko꞉lo꞉, nelo꞉ Isolael ga doma꞉ib. \v 17 Gelo꞉ sowa꞉sa꞉ga꞉lo꞉ daidab hen a꞉na nelo꞉ a꞉na dalima꞉ib. Niyo꞉ gemo꞉wo꞉ towo꞉ dinali so꞉lo꞉l. Na꞉n sowakiya, na꞉no꞉ a꞉na aloba꞉ma꞉ib. Ko꞉sega na꞉no꞉ mo꞉ nowa a꞉la꞉ta꞉ga꞉ aloba꞉dalega, Yawe eyo꞉ nemo꞉wo꞉ a꞉ma꞉la꞉ wa꞉dema꞉ib.” \v 18 Luda꞉lo꞉ dinali sa꞉lab a꞉no꞉ da꞉da꞉sa꞉ga꞉, Na꞉omi eyo꞉ wa꞉kabiyo꞉ towo꞉ mo꞉kudu sio꞉. \p \v 19 A꞉la꞉fo꞉ko꞉lo꞉ a꞉la꞉yo꞉ ha꞉na꞉ni ane. A꞉la꞉yo꞉ ha꞉na꞉sa꞉ga꞉, Ba꞉diliha꞉m hen a꞉na fa꞉la꞉dowo꞉. A꞉na fa꞉la꞉dowabiki, Ba꞉diliha꞉m amisa꞉n kaluka꞉isale a꞉ma꞉yo꞉ iliga꞉sa꞉ga꞉, amisa꞉n ka꞉isale i a꞉ma꞉yo꞉ a꞉la꞉sio꞉, “Ga we Na꞉omiya꞉le?” \v 20 A꞉la꞉sa꞉labiki, Na꞉omiya꞉ imo꞉ a꞉ma꞉la꞉ sa꞉laki, “Giliyo꞉, ne Na꞉omi a꞉la꞉bo꞉ sa꞉la꞉so꞉bo! Ne ‘Mala,’ a꞉la꞉sama.\f + \fr 1.20 \ft Hibulu towo꞉ “Mala” a꞉la꞉do꞉ sa꞉lab a꞉ma꞉ ha꞉go꞉ halo꞉ o꞉m.\f* Mo꞉wo꞉ Halaido꞉lo꞉ A꞉lab Gode eyo꞉ hida꞉yo꞉ alano꞉ nemo꞉ dimi ko꞉lo꞉ ne haleli ko꞉lo꞉ yo꞉l.” \v 21 “Ne tamin amio꞉ Isolael a꞉la꞉ta꞉ga꞉lo꞉ Moab hen a꞉na ha꞉nakiyo꞉, ne ego꞉ ane ko꞉sega, o꞉go꞉ ne a꞉ma꞉la꞉ Isolael wena a꞉fa꞉la꞉doma꞉ni yakiyo꞉, ne fo꞉fo꞉dolo꞉ yo꞉l” a꞉la꞉sio꞉. “Yawe eyo꞉ ne gola ba꞉daki, nemo꞉wo꞉ hida꞉yo꞉ dimi. A꞉la꞉fo꞉ko꞉lo꞉, giliyo꞉ ne ‘Na꞉omi’ a꞉la꞉bo꞉ sa꞉la꞉so꞉bo.”\f + \fr 1.21 \ft Hibulu towo꞉ “Na꞉omi” a꞉ma꞉ ha꞉go꞉ we, sagalan.\f* \p \v 22 A꞉la꞉do꞉ fa꞉la꞉dowo꞉ a꞉namio꞉, Na꞉omi e Moab a꞉la꞉ta꞉ga꞉ Ba꞉diliha꞉m amisa꞉na a꞉ma꞉la꞉ mio꞉. A꞉la꞉ta꞉ga꞉ Moab ga ena꞉su Lud elo꞉ e kudu mio꞉ ko꞉lo꞉ fa꞉la꞉dowo꞉. A꞉la꞉lo꞉ fa꞉la꞉dowo꞉ ho꞉len a꞉namio꞉, da꞉si balilo꞉ tuma꞉no꞉ elen. \c 2 \s1 Boasa꞉ egelo꞉ amio꞉ Lud e nanogo꞉ a꞉na di \p \v 1 Ho꞉len a꞉namio꞉ A꞉lema꞉la꞉ga꞉ ene so꞉lo꞉ amilo꞉ wabulun kalu imilig nowo꞉ a꞉na sen. Kalu a꞉ma꞉ wiyo꞉, Boas ko꞉lo꞉ elen. \v 2-3 \x - \xo 2.2-3 \xt Wkp 19.9-10, Lo 24.19\x*A꞉la꞉ta꞉ga꞉ Moab ga Lud eyo꞉ Na꞉omimo꞉ sa꞉lakiyo꞉, “Kalu abeyo꞉ nelo꞉ asuwa꞉fa꞉no꞉ dowab a꞉no꞉, ne ene egelo꞉wa ha꞉na꞉sa꞉ga꞉, iliyo꞉ da꞉si bali fo a꞉no꞉ tuda꞉sa꞉ga꞉ ha꞉nab amio꞉, ne tifa ha꞉naki, bali fo wa ko꞉lo꞉ sudufa꞉lab a꞉no꞉ ne kegenema꞉no꞉. A꞉no꞉ o꞉liya꞉le?” a꞉la꞉dabu ba꞉ba꞉. Na꞉omi eyo꞉ to a꞉no꞉ da꞉da꞉sa꞉ga꞉yo꞉, “O꞉lika꞉, ge hamana.” A꞉la꞉do꞉ sa꞉lab a꞉no꞉ da꞉da꞉ga꞉, Ludo꞉ da꞉si balilo꞉ tula꞉labdo꞉ hen a꞉na ha꞉na꞉ni ane. A꞉na ha꞉na꞉ga꞉ fa꞉la꞉dowa ba꞉ba꞉ amio꞉, iyo꞉ da꞉si baliyo꞉ tula꞉li ha꞉nabi ba꞉ba꞉. A꞉la꞉fo꞉ko꞉lo꞉ e ha꞉na꞉sa꞉ga꞉, da꞉si bali wa ta꞉fo꞉ a꞉no꞉ e kegea꞉liki a꞉na elen. Egelo꞉ hen a꞉no꞉, kalu a꞉ma꞉no꞉lo꞉b a꞉la꞉bo꞉, Ludo꞉ e mo꞉asulo꞉. Ko꞉sega hen a꞉no꞉ Boas eno꞉. A꞉lema꞉la꞉ga꞉ ene eso꞉lo꞉ nowo꞉ e. \fig Lud eyo꞉ bali fowo꞉ kegea꞉lab.|alt="Ruth gleans in the field" src="08_Ru_02_01_RG_gr.tif" size="col" copy="© Sweet Publishing http://sweetpublishing.com, licensed under a CC: BY-SA 3.0 Unported licence." ref="2.3" \fig* \p \v 4 Lud e a꞉na kegea꞉liki elen amio꞉, Boas e Ba꞉diliha꞉m a꞉la꞉ta꞉ga꞉yo꞉ ene egelo꞉wa fa꞉la꞉dowo꞉. E fa꞉la꞉dowakiyo꞉, ene nanogdo꞉ dia꞉sen kalu imo꞉wo꞉ sagalo꞉ towo꞉ ho꞉le sa꞉lakiyo꞉, “Yawe eyo꞉ gio꞉ bo꞉fo꞉len.” A꞉la꞉sa꞉labiki, nanogdo꞉ dia꞉sen kalu iliyo꞉ a꞉ma꞉la꞉ sa꞉laki “A꞉, Yawe eyo꞉ gelo꞉ tili dofo꞉mela꞉ib” a꞉la꞉sio꞉. \v 5 A꞉la꞉ta꞉ga꞉ Boas eyo꞉ nanogdo꞉ bo꞉fo꞉len kalu o꞉mo꞉ dabu ba꞉ba꞉, “Ga tif amilo꞉ dia꞉lab hoso o꞉ba?” a꞉la꞉sio꞉. \v 6 To elo꞉ sa꞉lab a꞉no꞉ da꞉da꞉ga꞉, nanogdo꞉ bo꞉fo꞉len kalu a꞉ma꞉ sa꞉laki, “Ga hoso, Moab ga ko꞉lo꞉, Na꞉omi o꞉lia꞉lo꞉ mio꞉wo꞉ o꞉m. \v 7 E kea꞉fo ya꞉ga꞉, nemo꞉ dabu ba꞉dakiyo꞉ a꞉la꞉sio꞉, ‘Bali wa sulufo꞉sia꞉yo꞉ ne kegenema꞉no꞉wo꞉ o꞉liya꞉le?’ A꞉la꞉dabu ba꞉dabiki, niyo꞉ ‘O꞉lika꞉’ a꞉la꞉sio꞉ ko꞉lo꞉, e a꞉na dia꞉likilo꞉ mio꞉wo꞉, ha꞉fo꞉la꞉su dota꞉ga꞉, nanogo꞉ dia꞉lab.” \p \v 8 A꞉no꞉ da꞉da꞉sa꞉ga꞉, Boas e Lud elo꞉wa kagayaka, a꞉la꞉sio꞉, “Ga, ge nanogo꞉ wenaka dia꞉liki ta꞉bi. Ge hen nol amio꞉ da꞉si baliyo꞉ kegenema꞉nikiyo꞉ ha꞉na꞉so꞉bo. Ni nanogdo꞉ dia꞉sen ka꞉isale we o꞉lia꞉ ani dia꞉i ha꞉na꞉bi. \v 9 Ilo꞉ nanogdo꞉ diab hen a꞉no꞉ ba꞉da꞉sa꞉ga꞉, gelo꞉ i a꞉no꞉ ko꞉lo꞉ kudu ha꞉naki, nanogo꞉ a꞉na dia꞉bi. Niyo꞉ na꞉ nanog kalu imo꞉wo꞉ ge amio꞉ gola꞉so꞉boka꞉ a꞉la꞉salifa꞉. A꞉la꞉ta꞉ga꞉, ge ho꞉n maiyalega, ho꞉n wasula꞉ hoso, gelo꞉ ma꞉ ha꞉na꞉bi.” \v 10 Boas eyo꞉ a꞉la꞉sa꞉la꞉sa꞉ga꞉ dowabiki, Lud e hena misa꞉fu siliki a꞉la꞉sio꞉, “Ne Isolael ka꞉isalema, ne ha꞉la꞉ ga. Giyo꞉ nemo꞉wo꞉ mada nafa dimidab ko, ne waga asula꞉sa꞉ga꞉ gaya?” a꞉la꞉dabu ba꞉ba꞉. \v 11 Boas eyo꞉ a꞉ma꞉la꞉ sa꞉laki, “Ge kaluwo꞉ sowab amio꞉, go꞉no꞉n heno꞉lo꞉, so꞉lo꞉wo꞉lo꞉ ta꞉taki, o꞉go꞉ ge hen ho꞉gi, gelo꞉ mo꞉ba꞉dan, wena mesa꞉ni mio꞉ ko꞉lo꞉, gilo꞉ man nafale ko꞉lo꞉ ga꞉sumo꞉lo꞉ dimido꞉ a꞉no꞉ ne tambo dabu. A꞉la꞉fo꞉ko꞉lo꞉ a꞉na ilikiyo꞉, niyo꞉ ge asuwa꞉to꞉l. \v 12 Gilo꞉ man nafa dimida꞉len a꞉na ilikiyo꞉, Yawe eyo꞉lo꞉ gemo꞉wo꞉ wa꞉lo꞉ nafa dimina꞉ki asulab. Ge ha꞉fa꞉nolo mesa꞉no꞉ a꞉lakiyo꞉, Isolaela꞉ Gode ene kanulo꞉ a꞉ma꞉yo꞉ ge go꞉lu alitaki tilidoma꞉ki, ge wena mio꞉ ko꞉lo꞉, eyo꞉ wa꞉lo꞉ gemo꞉wo꞉ mada dimia꞉ib.” \v 13 To a꞉no꞉ da꞉da꞉sa꞉ga꞉, Lud eyo꞉ a꞉la꞉sio꞉, “Ne gi nanog dian gama ko꞉sega, giyo꞉ nemo꞉wo꞉ ha꞉fo꞉ disa꞉laki, madali asuwa꞉tab. Gilo꞉ man nafa dimidab a꞉ma꞉yo꞉ ni asulo꞉wo꞉ ko꞉lo꞉ sagale alitakigab,” a꞉la꞉sio꞉. \p \v 14 A꞉la꞉ta꞉ga꞉ iliyo꞉ ma꞉no꞉ ma꞉niki kegeakiyo꞉, Boas eyo꞉ Ludo꞉lo꞉ ho꞉lelia꞉sa꞉ga꞉ a꞉la꞉sio꞉, “Gelo꞉ ya꞉ga꞉ ma꞉no꞉ nakiyo꞉, ma꞉n heb a꞉no꞉ wain ho꞉n wena gelema꞉ni mena.” A꞉la꞉sa꞉labiki Lud e nanog dia꞉leno꞉ ta꞉ta꞉ga꞉, ma꞉no꞉ ma꞉ni ane. Lud e nanogdo꞉ dia꞉len kaluka꞉isale o꞉lia꞉ sabiki, Boas eyo꞉ da꞉si bali dele so꞉fa꞉ a꞉no꞉lo꞉ emo꞉ dimiabiki, a꞉na mo꞉no꞉. Eyo꞉ ma꞉no꞉wo꞉ na꞉i ha꞉na꞉sa꞉ga꞉ o꞉li dowabiki, hebo꞉ ka difa꞉. \v 15 Ma꞉no꞉wo꞉ na꞉sa꞉ga꞉, Ludo꞉ nanogo꞉ a꞉ma꞉la꞉ dia꞉ni ha꞉nabiki, Boasa꞉ ene nanogdo꞉ dian kalumo꞉wo꞉ a꞉la꞉sio꞉, “Ga a꞉ma꞉yo꞉ da꞉si bali bobodo꞉ anib amilo꞉ sulufa꞉lab a꞉no꞉ kegealega, giliyo꞉ emo꞉wo꞉ sendeloma꞉no꞉ towo꞉ sa꞉la꞉so꞉bo! \v 16 Ko꞉sega giliyo꞉ da꞉si bali fowo꞉ bobodakiyo꞉, gililo꞉ bobodo꞉ us a꞉namio꞉ heb nolo꞉ emo꞉ dima꞉ki, a꞉ma꞉la꞉ suduto꞉lo fela꞉bi. A꞉la꞉ta꞉ga꞉ emo꞉wo꞉ towo꞉ halalebo꞉ sa꞉la꞉so꞉boka꞉” a꞉la꞉sio꞉. \p \v 17-18 Lud e nanogo꞉ dia꞉i ha꞉na꞉sa꞉ga꞉, ga꞉lo aya ha꞉na꞉nikiyo꞉, da꞉si bali elo꞉ kegea꞉i mio꞉ a꞉no꞉, fowo꞉ fifi alima꞉ki a꞉na basio꞉. Basia꞉la꞉ga꞉, bali foleyo꞉ a꞉na disa꞉la꞉sa꞉ga꞉, wo꞉fa꞉ imilig ko꞉lo꞉ ga꞉lita꞉ga꞉ amio꞉, ma꞉no꞉ heb elo꞉ difa꞉ a꞉no꞉lo꞉ dia꞉sa꞉ga꞉ ane. E ha꞉na꞉ga꞉, Na꞉omilo꞉ sab amisa꞉n a꞉na fa꞉la꞉dowo꞉. Da꞉si bali wo꞉fa꞉ alan a꞉no꞉ a꞉la꞉ta꞉ga꞉ ma꞉no꞉ heb elo꞉ dia꞉mio꞉ a꞉no꞉, Na꞉omimo꞉ wida꞉sa꞉ga꞉ dimi. \v 19 Na꞉omi eyo꞉ ba꞉da꞉sa꞉ga꞉yo꞉ a꞉la꞉sio꞉, “Ge mada nanog we abelo꞉wa dio꞉? Ma꞉no꞉ we abe meabeyo꞉? Kalu gelo꞉ asufa꞉ a꞉no꞉, Gode eyo꞉ emo꞉wo꞉ sagale alifa꞉ib,” a꞉la꞉sio꞉. Luda꞉ ena꞉sumo꞉wo꞉ a꞉la꞉sio꞉, “O꞉go꞉ ne ha꞉na꞉sa꞉ga꞉lo꞉ nanogdo꞉ di we, Boasa꞉ ene egelo꞉wa dia꞉la꞉ga꞉ mio꞉.” A꞉la꞉fo꞉ko꞉lo꞉ Boas elo꞉ dimido꞉wo꞉ tambo, Na꞉omimo꞉ malolo꞉ me. \p \v 20 \x - \xo 2.20 \xt Wkp 25.25\x*Luda꞉ to a꞉no꞉ da꞉da꞉sa꞉ga꞉, Na꞉omi eyo꞉ a꞉la꞉sio꞉, “Yawe eyo꞉ na꞉ndo꞉ ta꞉i ha꞉na꞉no꞉wo꞉lo꞉, sowo꞉ ta꞉fo꞉ mio꞉ a꞉no꞉lo꞉ asulufo꞉ mela꞉no꞉ a꞉laki go꞉. Gode eyo꞉ kalu welo꞉ dowa꞉i ha꞉na꞉no꞉wo꞉ tif amio꞉ asuwa꞉foma꞉ki asulab. Hendele, kalu a꞉no꞉ nili ho꞉bo꞉wa a꞉la꞉ta꞉ga꞉ fa꞉la꞉dowo꞉wo꞉ e ko꞉lo꞉, eyo꞉ na꞉no꞉ ko꞉lo꞉ asuwa꞉taki tili dofo꞉mela꞉ib.” Na꞉omi eyo꞉ emo꞉wo꞉ a꞉la꞉sio꞉. \v 21 A꞉la꞉sa꞉labiki Lud e sa꞉laki, “Boas eyo꞉ to nowo꞉ nemo꞉wo꞉ a꞉la꞉salabe, ‘Ni nanog dian kaluka꞉isale we o꞉lia꞉ dia꞉i ha꞉na꞉la꞉ga꞉, nanogdo꞉ kedetaba eda꞉bi.’ ” \v 22 A꞉la꞉do꞉ sa꞉lab a꞉no꞉ da꞉da꞉sa꞉ga꞉, Na꞉omi eyo꞉ a꞉la꞉sio꞉, “Ge Boasa꞉ ene nanog dian ka꞉isale so꞉wa o꞉lia꞉ dia꞉ni ha꞉na꞉lubi. Kalu nolba꞉yo꞉ ge mogagabena꞉kiyo꞉, egelo꞉ noma꞉lo꞉ amio꞉ dia꞉ni ha꞉na꞉so꞉bo.” \v 23 A꞉la꞉fo꞉ko꞉lo꞉ e Boas ene nanog dian ka꞉isale o꞉lia꞉ egele dia꞉i ha꞉na꞉leno꞉, da꞉si bali o꞉lia꞉ da꞉si wit o꞉lia꞉ tula꞉leno꞉ kedetabiki, a꞉na edo꞉. Ho꞉len a꞉namio꞉ Ludo꞉ ena꞉su o꞉lia꞉ sen. \c 3 \s1 Na꞉omi eyo꞉ Ludo꞉ kalumo꞉ mea꞉ni nenelo꞉ \p \v 1 Ho꞉len imilig no amio꞉, Na꞉omi eyo꞉ a꞉la꞉sio꞉, “Ge nafa mesea꞉ki, kaluwo꞉ ni kelema꞉nigo꞉l. \v 2 Ka꞉isale so꞉wa gegeledo꞉ egelo꞉ amilo꞉ nanogdo꞉ dian i o꞉lo꞉ bo꞉fo꞉lowan kaluwo꞉ Boas ko꞉lo꞉ e nio꞉ so꞉lo꞉ imilise. O꞉g nuluwo꞉, eyo꞉ nanogo꞉ da꞉si bali bebdo꞉ dila꞉mela꞉nikilo꞉ kegea꞉sen hen a꞉na dia꞉nigab. Da꞉si bali beb a꞉no꞉ fa꞉fa꞉sa꞉ dia꞉hamana꞉ki, a꞉na tagu talola꞉mela꞉ib. \v 3 A꞉la꞉fo꞉ko꞉lo꞉ ge ho꞉no꞉ mulula꞉b, helebeso꞉g ho꞉giyo꞉ sa꞉ga꞉la꞉b, wa ho꞉no꞉ mulula꞉b, a꞉la꞉ta꞉ga꞉yo꞉ a꞉na handaloma꞉ ha꞉na꞉bi! Boas e ma꞉no꞉wo꞉ mo꞉mo꞉no꞉ ilikiyo꞉, eyo꞉ ge ba꞉dabena꞉ki, ge wo꞉no꞉le ha꞉na꞉ga꞉ dowa꞉bi. \v 4 E nanogo꞉ dia꞉la꞉ga꞉yo꞉, ma꞉no꞉wo꞉ ho꞉n o꞉lia꞉ na꞉sa꞉ga꞉, e alima꞉ mia꞉ib ko꞉lo꞉, elo꞉ alilabo꞉ giyo꞉ dinafa ba꞉da꞉bi. A꞉la꞉ta꞉ga꞉yo꞉ ge a꞉na ha꞉na꞉ga꞉, elo꞉ so꞉g go꞉lo꞉ a꞉no꞉, gido꞉fo꞉ gasa amilo꞉ a꞉no꞉ da꞉ga꞉ita꞉bi. Da꞉ga꞉itakiyo꞉ ge gido꞉fo꞉ gasalo꞉ doba꞉da꞉ alila꞉bi. Gilo꞉ dimidama꞉no꞉wo꞉, Boas eyo꞉ a꞉na sa꞉ma꞉ib.” Na꞉omi eyo꞉ a꞉la꞉walasio꞉. \v 5 To a꞉no꞉ da꞉da꞉sa꞉ga꞉, Luda꞉ a꞉ma꞉la꞉ sa꞉laki, “Gilo꞉ sa꞉lab aumbo꞉ dimidama꞉nigo꞉l.”\fig Boas e nanog dia꞉labikiyo꞉, Lud e wo꞉no꞉le kagafo꞉len.|alt="Ruth hides at he threshing floor" src="08_Ru_03_02_RG_gr.tif" size="col" copy="© Sweet Publishing http://sweetpublishing.com, licensed under a CC: BY-SA 3.0 Unported licence." ref="3.1-6" \fig* \s1 Ludo꞉ Boasdo꞉wa fa꞉la꞉dowo꞉ \p \v 6 A꞉la꞉ta꞉ga꞉ ena꞉suwa꞉lo꞉ to sio꞉ aumbo꞉ dimida꞉sa꞉ga꞉, Boas elo꞉ nanogdo꞉ dia꞉labdo꞉ hen a꞉na fa꞉la꞉doma꞉ni ane. A꞉na ha꞉na꞉sa꞉ga꞉yo꞉ e wo꞉no꞉le kagafo꞉len. \v 7 Boas e ma꞉no꞉ o꞉lia꞉ ho꞉n o꞉lia꞉yo꞉ dinafa na꞉sa꞉ga꞉, nuluwo꞉ e mida꞉iyabiki, da꞉si bali folo꞉ dibido꞉ anib a꞉na alima꞉ni ane. E alilabiki ba꞉da꞉ga꞉yo꞉, Lud e ha꞉sa ha꞉na꞉ga꞉, Boasa꞉ gido꞉fo꞉ amilo꞉ so꞉g go꞉lo꞉ a꞉no꞉ da꞉ga꞉lia꞉ dia꞉ta꞉ga꞉, Lud e gido꞉fo꞉ gasalo꞉ a꞉na ali. \p \v 8 Nulu us dowabiki, Boas e emegelaki, iligi dasila꞉sa꞉ga꞉, ga nowo꞉ e gido꞉fo꞉ gasalo꞉wa alifo꞉lena ba꞉ba꞉. \v 9 Boas e sa꞉laki, “Ge o꞉ba?” A꞉la꞉sa꞉labiki Luda꞉ sa꞉lakiyo꞉, “Ne Lud ko꞉lo꞉ mio꞉. Ge A꞉lema꞉la꞉ga꞉ ene eso꞉lo꞉ ho꞉bo꞉wo꞉ imiliselo꞉biki, ne gi ha꞉ga dowaki giyo꞉ ne dinafa tilidoma꞉ki, gemo꞉ dabu ba꞉ba꞉ni mio꞉ ko꞉lo꞉ so꞉l. A꞉la꞉fo꞉ko꞉lo꞉ so꞉g gilo꞉ go꞉lo꞉ ko hebo꞉ nelo꞉ go꞉lu alifoma.” \v 10 Boas eyo꞉ Luda꞉lo꞉ to sa꞉lab a꞉no꞉ da꞉da꞉sa꞉ga꞉ a꞉la꞉sio꞉, “Gilo꞉ tamin amilo꞉ man nafa dimido꞉wo꞉, ne sagalo꞉. A꞉la꞉ta꞉ga꞉ o꞉go꞉ gilo꞉ nemo꞉lo꞉ dimidab ko, ne mada sagalab. Mo꞉wo꞉ ge kalu so꞉wa nafa sab a꞉namio꞉ ge mo꞉ o꞉lu ane. Ge nelo꞉ amilo꞉ mio꞉ we ne sagalab. A꞉la꞉fo꞉ko꞉lo꞉ Gode eyo꞉ gelo꞉ dowa꞉i ha꞉nab amio꞉lo꞉, ge asuwa꞉foma꞉ki, asulo꞉l. \v 11 Nelo꞉ wena mio꞉lo꞉biki, gilo꞉ to sa꞉lab ko, niyo꞉ o꞉li dimidama꞉no꞉ ko꞉lo꞉, ge kele asula꞉so꞉bo. Amisa꞉n kalu sab we tambowo꞉ ge digalo꞉ ka꞉isale a꞉la꞉ asulufo꞉lab. \v 12 \x - \xo 3.12 \xt Lud 2.20\x*Gilo꞉ nemo꞉lo꞉ sa꞉lakilo꞉ ho꞉bo꞉wo꞉ imilise a꞉la꞉do꞉ sio꞉ a꞉no꞉ hendele ko꞉sega, ne ha꞉lu heb doba꞉da꞉ dowo꞉. Gelo꞉ tili doma꞉no꞉wo꞉ ge so꞉lo꞉leyo꞉ o꞉sab. \v 13 A꞉la꞉fo꞉ko꞉lo꞉ ali kea꞉fowo꞉ niyo꞉ emo꞉wo꞉ dabu ba꞉ba꞉ni ha꞉na꞉no꞉. Eyo꞉ ge dia꞉no꞉ka꞉lalega, ge ene bo꞉fo꞉mela꞉ib. Ko꞉sega e mo꞉eka꞉ a꞉lalega, ge mada no꞉no꞉n dia꞉no꞉ ko꞉lo꞉, Yawe ene siwa꞉la gemo꞉ dinali salito꞉l. A꞉la꞉fo꞉ko꞉lo꞉ o꞉go꞉ ge a꞉naka alita꞉ga꞉, ali kea꞉fo ha꞉na꞉bi.” \p \v 14 A꞉la꞉fo꞉ko꞉lo꞉ nulu a꞉namio꞉, Lud e Boasa꞉ gido꞉fo꞉ gasalo꞉ a꞉naka ali. Kalu nolba꞉yo꞉ Lud e a꞉na mia꞉lo꞉b a꞉la꞉bo꞉ mo꞉bo꞉ba꞉ki, e kea꞉fo nulu dasi. A꞉la꞉ta꞉ga꞉ Boas eyo꞉ a꞉la꞉sio꞉, “Kaluka꞉isale nolbo꞉wo꞉ ge hen wena mio꞉ka꞉ a꞉la꞉bo꞉ malola꞉so꞉bo.” \v 15 Lud e kea꞉fo nulu dasila꞉sa꞉ga꞉ ha꞉na꞉nigabiki, Boasa꞉ sa꞉laki, “Gi helebeso꞉g wa꞉l amilo꞉ go꞉lo꞉ ko wena fele alifoma.” Lud eyo꞉ helebeso꞉go꞉ a꞉na fele alitabiki, da꞉si baliyo꞉ wo꞉fa꞉ a꞉la꞉yo꞉ o꞉ngo꞉ ko꞉lo꞉ koloda꞉sa꞉ga꞉ dimi. A꞉la꞉ta꞉ga꞉ Ludo꞉ kea꞉fo nulu ha꞉nabiki, Boas elo꞉ Ba꞉diliha꞉m amisa꞉n a꞉na ane. \p \v 16 Ludo꞉ ha꞉na꞉sa꞉ga꞉, Na꞉omi elo꞉wa fa꞉la꞉dowo꞉. E a꞉na fa꞉la꞉dowabikiyo꞉, Na꞉omi eyo꞉ Ludbo꞉wo꞉ a꞉la꞉dabu ba꞉ba꞉, “Boas eyo꞉ gemo꞉wo꞉ waga sa꞉labeyo꞉?” \p A꞉la꞉dabu ba꞉dabiki, Boas elo꞉ to sio꞉wo꞉ Lud eyo꞉ tambo malolo꞉ me. \v 17 A꞉la꞉ta꞉ga꞉ Luda꞉ sa꞉laki, “Da꞉si welo꞉, Boasa꞉ nemo꞉ dimiabeka꞉. Boas eyo꞉ nemo꞉wo꞉ a꞉la꞉sio꞉, ‘Ge Na꞉omilo꞉ amio꞉ madali fa꞉la꞉doma꞉ ha꞉na꞉no꞉wo꞉ mogago꞉lo꞉biki, da꞉si bali we o꞉lia꞉ dia꞉ hamana!’ a꞉labiki dia꞉mio꞉.” \v 18 A꞉la꞉sa꞉labiki Na꞉omiya꞉ sa꞉laki, “We mada o꞉li go꞉. Boas eyo꞉ gilo꞉ asulab a꞉no꞉ e nenelema꞉ni ha꞉na꞉ib. E a꞉ma꞉la꞉ ya꞉ga꞉lo꞉ sa꞉labo꞉ ko꞉lo꞉ da꞉ba꞉niki, ge ha꞉sa yasi ta꞉bi.” \c 4 \s1 Ludo꞉ Boasa꞉ di \p \v 1 Ludo꞉ Na꞉omilo꞉wa fa꞉la꞉doma꞉ni ha꞉nabikiyo꞉, Boas e kalu Ludbo꞉lo꞉ sio꞉ a꞉no꞉ ko꞉lo꞉ Ba꞉diliha꞉m amisa꞉n a꞉na kelema꞉ni ane. E kalulo꞉ kegea꞉sen hen a꞉na fa꞉la꞉dowa꞉sa꞉ga꞉, kalu a꞉no꞉ a꞉na yasisen. A꞉na yasisen ami, A꞉lema꞉la꞉ga꞉ ene so꞉lo꞉leya a꞉la꞉ta꞉ga꞉lo꞉ ane kalu a꞉no꞉ a꞉na fa꞉la꞉dowo꞉. Kalu a꞉no꞉ a꞉na fa꞉la꞉dowabiki, Boas e sa꞉laki, “Nao, ge towo꞉ nain nenela꞉ma꞉nigo꞉l ko꞉lo꞉, wena mesa꞉ mena.” A꞉la꞉sa꞉labiki kalu a꞉no꞉ elo꞉wa mesa꞉ mio꞉. \v 2 A꞉la꞉ta꞉ga꞉ Boas eyo꞉ amisa꞉n ko꞉go꞉do꞉ kalu do꞉la꞉fo꞉wo꞉ tililia꞉ga꞉, a꞉na mesa꞉ mena꞉ki towo꞉ sio꞉. \v 3-4 A꞉la꞉yo꞉ towo꞉ nenelakiyo꞉, Boas eyo꞉ a꞉la꞉sio꞉, “Na꞉omiyo꞉ Moabdo꞉ ane a꞉no꞉ a꞉ma꞉la꞉ mio꞉ ko꞉lo꞉, hen elo꞉wo꞉ kililia꞉no꞉ da꞉lab. Hen a꞉no꞉ nain nao, A꞉lema꞉la꞉g eno꞉ ko꞉lo꞉, go꞉no꞉n dia꞉no꞉ asulaba꞉le a꞉la꞉liki, nenelema꞉ni mio꞉. O꞉go꞉ hen a꞉no꞉ go꞉no꞉n dia꞉no꞉ asulalega, ko꞉go꞉do꞉ kalu i wema꞉ siwa꞉l amio꞉ ‘no꞉no꞉n kililia꞉no꞉ka꞉’ a꞉la꞉bo꞉ dinali sama. Mo꞉wo꞉ na꞉no꞉ A꞉lema꞉la꞉g ene so꞉lo꞉ imilise ko꞉sega, ne ha꞉lu ko꞉na꞉ dowo꞉. A꞉la꞉fo꞉ko꞉lo꞉ gemo꞉wo꞉ tamina dabu bo꞉do꞉l. Ko꞉sega ge mo꞉bealega, nelo꞉ ko꞉na꞉ma dowo꞉ ko꞉lo꞉ ni kililia꞉nigo꞉l.” A꞉la꞉sa꞉labiki kalu a꞉ma꞉ sa꞉laki, “Heno꞉ no꞉no꞉n kililia꞉nigo꞉l.” \p \v 5 A꞉la꞉gabiki Boasa꞉ kalu o꞉mo꞉ sa꞉laki, “Heno꞉ gi kililiakiyo꞉, Moab ga sa꞉ba꞉lo꞉, Lud ko꞉lo꞉ mio꞉ a꞉no꞉lo꞉, gi dia꞉ib. Kalu sowo꞉ a꞉ma꞉ heno꞉ ene so꞉lo꞉ us a꞉naka dowaki, ene wiyo꞉ sa꞉la꞉i ha꞉na꞉melea꞉ki, ga sa꞉ba꞉lo꞉ a꞉no꞉ gi dia꞉ib.” \v 6 A꞉la꞉sa꞉labiki kalu a꞉ma꞉ sa꞉lakiyo꞉, “Hen a꞉no꞉ ni dialega, ni so꞉waya꞉lo꞉ dabun dia꞉no꞉ dowo꞉ a꞉no꞉ mogaima꞉ib ko꞉lo꞉, niyo꞉ hen a꞉no꞉ mada mo꞉dia꞉no꞉. A꞉la꞉fo꞉ko꞉lo꞉ gi kililima.” \v 7-8 \x - \xo 4.7-8 \xt Lo 25.9\x*Kalu a꞉ma꞉yo꞉ “Hen a꞉no꞉ gi ka kililima” a꞉la꞉sa꞉lakiyo꞉, ene budi gido꞉fo꞉ amilo꞉ ko꞉lo꞉ a꞉no꞉ dugu. Budi ko꞉lo꞉ duguwo꞉ mo꞉wo꞉ we. Mo꞉luwo꞉ Isolael iliyo꞉ hen kililia꞉nikiyo꞉, to saefa꞉ a꞉no꞉ wa꞉kabiyo꞉ mo꞉dimidama꞉no꞉ a꞉la꞉li elela꞉ sa꞉lakiyo꞉, kalu a꞉ma꞉ ene gido꞉fo꞉ amilo꞉ budi a꞉no꞉ duda꞉sa꞉ga꞉, kalu o꞉mo꞉ dimian. A꞉la꞉fo꞉ko꞉lo꞉ A꞉lema꞉la꞉g e so꞉lo꞉ a꞉ma꞉yo꞉ a꞉la꞉dimido꞉. \v 9 A꞉la꞉dimidabiki Boas eyo꞉ a꞉la꞉sio꞉, “Gi kegeo꞉ wema꞉yo꞉ naindo꞉ dimido꞉l we ba꞉dab. O꞉go꞉ A꞉lema꞉la꞉go꞉, ene so꞉wa a꞉la꞉, Malono꞉ Kiliono꞉ ili hen Na꞉omiya꞉lo꞉ bo꞉fo꞉lab a꞉no꞉ ni kililiyo꞉l. \v 10 \x - \xo 4.10 \xt Lo 25.5-6\x*Kalu sowo꞉ a꞉ma꞉ heno꞉ ene so꞉lo꞉ us a꞉naka dowaki, ene wiyo꞉ sa꞉la꞉i ha꞉na꞉melea꞉ki, Malona꞉ inga sa꞉ba꞉lo꞉, Lud a꞉no꞉lo꞉ ni dia꞉no꞉. A꞉la꞉ta꞉ga꞉ Malona꞉ wi sa꞉sa꞉lo꞉wo꞉ ho꞉lefo꞉ ko꞉ ha꞉na꞉mela꞉ib. O꞉go꞉do꞉ nilido꞉ dimido꞉ we gio꞉lo꞉ ba꞉dab.” \p \v 11 \x - \xo 4.11 \xt Mo꞉mo꞉ 29.31\x*A꞉la꞉sa꞉labiki ko꞉go꞉do꞉ kalu o꞉lia꞉ kaluka꞉isale nol a꞉namilo꞉ elen o꞉lia꞉ma꞉ sa꞉lakiyo꞉, “Gililo꞉ dimidab we nio꞉ bo꞉do꞉l. A꞉la꞉fo꞉ko꞉lo꞉ tif amio꞉ to nowo꞉ mo꞉sa꞉ma꞉ib. Tamin amio꞉ Lesol o꞉lia꞉ Lea o꞉lia꞉ma꞉yo꞉ so꞉wayo꞉ modo꞉ sa꞉la꞉la꞉sa꞉ga꞉, Isolael kaluka꞉isaleyo꞉ a꞉na fa꞉la꞉dowo꞉ ko꞉lo꞉, o꞉go꞉ Yawe eyo꞉ ga gilo꞉ diab wenamio꞉lo꞉ o꞉leau fa꞉la꞉do alifoma꞉ki asulo꞉l. A꞉la꞉ta꞉ga꞉ Ba꞉diliha꞉m amisa꞉n amio꞉ gi wiyo꞉lo꞉ mada alan doma꞉ki asulo꞉l. A꞉fla꞉ta so꞉lo꞉ gililo꞉ a꞉namio꞉ gi wiyo꞉ wabulun wa꞉la꞉b fa꞉la꞉doma꞉ki asulo꞉l. \v 12 \x - \xo 4.12 \xt Mo꞉mo꞉ 38.27-30\x*Yuda o꞉lia꞉ Temal o꞉lia꞉ma꞉ inso꞉, Beles e so꞉lo꞉ amilo꞉ kaluka꞉isale modo꞉ ko꞉lo꞉ fa꞉la꞉dowo꞉ auma꞉ib, Yawe eyo꞉ Boas gilo꞉ ga diab wenamio꞉lo꞉ so꞉lo꞉wo꞉ alan fa꞉la꞉dowa꞉i ha꞉na꞉melea꞉ki asulo꞉l.” Iliyo꞉ a꞉la꞉sio꞉. \s1 Boasa꞉ e so꞉lo꞉wo꞉ we \p \v 13 A꞉la꞉fo꞉ko꞉lo꞉ Boas eyo꞉ Ludo꞉ di. Ludo꞉ dia꞉sa꞉ga꞉ sen amio꞉, Gode eyo꞉ Lud e ege alifa꞉ ko꞉lo꞉, Lud e so꞉wayo꞉ a꞉na alelo꞉. Alela꞉sa꞉ga꞉ kalu so꞉wayo꞉ a꞉na sa꞉la꞉li. \v 14 So꞉wa sa꞉la꞉li a꞉no꞉ ba꞉da꞉ga꞉, amisa꞉n ka꞉isale nolba꞉yo꞉ Na꞉omimo꞉ sa꞉laki, “Niliyo꞉ Godeya꞉ wiyo꞉ dulugu sa꞉ma꞉niki, mo꞉wo꞉ Kalu Alana꞉yo꞉ so꞉lo꞉ gilo꞉lo꞉ bo꞉fo꞉mela꞉no꞉ so꞉wayo꞉ gemo꞉ sa꞉la꞉ meab. Isolael hen a꞉namio꞉ so꞉wa we wilo꞉ doma꞉ib. \v 15 Eyo꞉ ge sagalo꞉ mesea꞉ki ta꞉fa꞉ib a꞉la꞉ta꞉ga꞉ ge anaso꞉ ulula꞉li dowalikiyo꞉, eyo꞉ ge tili dofo꞉mela꞉ib. Ga꞉su Lud a꞉ma꞉yo꞉ ge mada alan asula꞉sa꞉ga꞉, so꞉wa we gemo꞉wo꞉ a꞉na sa꞉la꞉meab. Giyo꞉ kalu so꞉wa doma꞉la꞉fo꞉ sa꞉la꞉li kibo꞉bowo꞉, ge sagalemabe. Ko꞉sega ga Lud wema꞉lo꞉ma꞉ tiginilab.” \p \v 16 A꞉la꞉fo꞉ko꞉lo꞉ Na꞉omi eyo꞉ so꞉wa a꞉no꞉ fo꞉fo꞉lelia꞉ga꞉ ta꞉li silikiyo꞉, dinafa bo꞉fo꞉len. \v 17 Amisa꞉n ka꞉isale nolba꞉ sa꞉laki a꞉la꞉sio꞉, “Na꞉omiya꞉ ene so꞉waleyo꞉ sa꞉la꞉li ko꞉lo꞉ diab.” A꞉la꞉fo꞉ko꞉lo꞉ so꞉wa a꞉no꞉ Obed wikili alifa꞉. Obed eyo꞉ Ya꞉si ko꞉lo꞉ sa꞉la꞉li. Ya꞉si eyo꞉ Da꞉ibido꞉ sa꞉la꞉li. \v 18 A꞉la꞉fo꞉ko꞉lo꞉ Belesa꞉ eso꞉lo꞉ mo꞉mio꞉wo꞉ we. Belesa꞉ inso꞉wo꞉, Heslon. \v 19 Heslona꞉ inso꞉wo꞉, Lam. Lama꞉ inso꞉wo꞉, Aminadab. \v 20 Aminadaba꞉ inso꞉wo꞉, Nason. Nasona꞉ inso꞉wo꞉, Salamon. \v 21 Salamona꞉ inso꞉wo꞉, Boas. Boasa꞉ inso꞉wo꞉, Obed. \v 22 Obeda꞉ inso꞉wo꞉, Ya꞉si. Ya꞉siya꞉ inso꞉wo꞉ Da꞉ibid. E so꞉lo꞉wo꞉ o꞉m.