\id GAL - Kaluli Bible 
\h Galasia 
\toc1 Mo꞉fo꞉s We Fo꞉l Eyo꞉ Galasia Kaluka꞉isalemo꞉ Sa꞉sa꞉liga꞉fo꞉ 
\toc2 Galasia 
\toc3 Gala 
\mt2 Mo꞉fo꞉s We Fo꞉l Eyo꞉  
\mt1 Galasia  
\mt2 Kaluka꞉isalemo꞉ Sa꞉sa꞉liga꞉fo꞉  
\imt1 Asuluma꞉no꞉ towo꞉ we  
\ip Fo꞉l eyo꞉ Ya꞉suwa꞉ to nafa wida꞉li ha꞉nakiyo꞉, Galasia sa꞉so꞉ a꞉na mo꞉mo꞉do꞉. Tif amio꞉ Yu widan kalu nowo꞉ a꞉na ha꞉na꞉sa꞉ga꞉ a꞉widakiyo꞉, “Gio꞉ Godeya꞉ siwa꞉l amio꞉ digalo꞉ doma꞉nikiyo꞉, Mo꞉sa꞉sa꞉ ele saefa꞉ a꞉no꞉ mada kudu ha꞉na꞉bi” a꞉la꞉wido꞉. Galasia tilidabu kaluka꞉isaleyo꞉ halayo꞉ mo꞉asuluma꞉ki, Fo꞉l eyo꞉ iyo꞉ asulo꞉ dimiakiyo꞉, mo꞉fo꞉s we a꞉na sa꞉sa꞉liga꞉fo꞉.  
\ip Mo꞉fo꞉s us wenamio꞉, Fo꞉l eyo꞉ sa꞉sa꞉lakiyo꞉ a꞉la꞉sio꞉, “Gio꞉ Ya꞉su amilo꞉ tilida꞉dab a꞉namio꞉, Godeya꞉ si wa꞉l amio꞉ digalo꞉le fa꞉la꞉doma꞉ib” a꞉la꞉sa꞉sa꞉lo꞉. A꞉la꞉ta꞉ga꞉ Fo꞉l e iliga꞉felo꞉ kalu nowo꞉ elo꞉b a꞉la꞉sama꞉kiyo꞉, imo꞉wo꞉ mo꞉fo꞉so꞉ a꞉la꞉sa꞉sa꞉lo꞉, “To we ni asulo꞉ amilo꞉wo꞉ ko꞉lo꞉ sa꞉ma꞉nigo꞉ba. Ya꞉su Kelisowa꞉lo꞉ nemo꞉lo꞉ fanda wido꞉ aumbo꞉ gimo꞉ so꞉lo꞉l” a꞉la꞉sa꞉sa꞉lo꞉.  
\ip Fo꞉l elo꞉ to sa꞉sa꞉lo꞉ nowo꞉ we. Nio꞉ Godeya꞉ siwa꞉l amio꞉ digalo꞉le doma꞉nikiyo꞉, nili tilidabu a꞉ma꞉ ilikiyo꞉, digalo꞉ fa꞉la꞉do alifa꞉ib. A꞉la꞉ta꞉ga꞉ Ya꞉su eyo꞉ nio꞉ ga꞉li sili alita꞉sa꞉ga꞉yo꞉, ene Mama eyo꞉ nio꞉ tililia꞉ ha꞉nabiki, nio꞉ Godeya꞉ enedo꞉ asulab man a꞉no꞉ ko꞉lo꞉ kudu ha꞉na꞉sen.  
\c 1  
\p
\v 1 Ne Fo꞉l, iliga꞉felo꞉ kalu nowo꞉ ne. Ne nanog dima꞉kiyo꞉, kaluwa꞉ halaido꞉ a꞉ma꞉ da꞉fea꞉sa꞉ga꞉ iliga꞉foma. Ya꞉su Keliso o꞉lia꞉ Do Gode, Ya꞉su sowo꞉lo꞉ a꞉ma꞉la꞉ dasi alifa꞉ a꞉no꞉lia꞉ma꞉yo꞉ ne ene nanog a꞉no꞉ dima꞉ki da꞉fea꞉sa꞉ga꞉ iliga꞉fo꞉.  
\v 2 Mo꞉fo꞉s we ne o꞉lia꞉ Keliso kaluka꞉isale wilo꞉ sab niliyo꞉ sa꞉sa꞉la꞉sa꞉ga꞉, sa꞉s tambo Galasia hen a꞉namilo꞉ a꞉lab gimo꞉ iliga꞉to꞉l.   
\p
\v 3 Nili Do Gode o꞉lia꞉ Alan Ya꞉su Keliso o꞉lia꞉ma꞉ ha꞉fo꞉ disa꞉lan man a꞉no꞉lo꞉, ha꞉sa mesa꞉no꞉ man a꞉no꞉lo꞉ gi o꞉lia꞉ doma꞉ki dulugu so꞉lo꞉l.  
\v 4 \x - \xo 1.4 \xt Gala 2.20\x*Ya꞉su eyo꞉ nili Do Godeya꞉lo꞉ asulab au kudu ha꞉nakiyo꞉, nili mogago꞉ dimido꞉ a꞉no꞉ hala꞉ma꞉ki, ene mela꞉no꞉wo꞉ mo꞉kanulaki dimi. Nio꞉ henfelo꞉ man mogago꞉ usamilo꞉ a꞉lab a꞉no꞉ sili alifoma꞉ki, Ya꞉su eyo꞉ a꞉la꞉dimido꞉.  
\v 5 A꞉la꞉fo꞉ko꞉lo꞉ niliyo꞉ Godeya꞉ wiyo꞉ ho꞉leno꞉ tambo wabuda꞉mela꞉no꞉. Hendele.   
\s1 To nafa hendeyo꞉ imilig ko꞉lo꞉lab  
\p
\v 6 Amayo꞉! Kelisowa꞉lo꞉ ha꞉fo꞉ disa꞉lan man a꞉namio꞉, Gode eyo꞉ kaluka꞉isale gio꞉ eno꞉le doma꞉ki ho꞉ido꞉ ko꞉sega, giliyo꞉ kalu gilo꞉ ho꞉ido꞉ a꞉no꞉ bo꞉bo꞉ge gola ba꞉dakiyo꞉, to ko꞉li widab a꞉no꞉ kudu ha꞉nait ko꞉lo꞉ ne mada iligo꞉.  
\v 7 \x - \xo 1.7 \xt Ilig 15.1,24\x*To ko꞉li a꞉widab ko, to nafaleyo꞉ o꞉mba. Kalu nolba꞉yo꞉ Ya꞉suwa꞉ to nafa a꞉no꞉ ko꞉li nodo sa꞉lab ko꞉lo꞉, gio꞉ babale asuluma꞉ki gab.   
\p
\v 8 \x - \xo 1.8 \xt 1Kol 16.22\x*Ko꞉sega tolo꞉ widan kalu niya꞉le, ma꞉mula꞉ kalu Hebene a꞉la꞉ta꞉ga꞉lo꞉ yab a꞉ma꞉ya꞉le, to nafa ko꞉lo꞉ nilo꞉ tamin amilo꞉ wido꞉ a꞉no꞉ nodola꞉sa꞉ga꞉, gimo꞉wo꞉ to ko꞉li a꞉widalega, Gode eyo꞉ kalu i a꞉no꞉ wa꞉deaki, de hena mela꞉no꞉ melea꞉ki asulab.  
\v 9 To nafa a꞉no꞉ niyo꞉ sio꞉ ko꞉lo꞉ wa꞉ka sa꞉ma꞉nigo꞉l. Kalu abeyo꞉ to nafa gililo꞉ tamin amilo꞉ tilidabu a꞉no꞉ nodola꞉sa꞉ga꞉, gimo꞉wo꞉ to ko꞉li a꞉widalega, Gode eyo꞉ kalu a꞉no꞉ wa꞉deaki de hena mela꞉no꞉ mesea꞉ki asulab.   
\p
\v 10 \x - \xo 1.10 \xt 1Tes 2.4\x*To we niyo꞉ widakiyo꞉, kaluka꞉isaleya꞉yo꞉ nemo꞉ sagalema꞉ki wido꞉lba. Gode eyo꞉ nemo꞉wo꞉ sagalema꞉ki wido꞉l. Niyo꞉ kaluka꞉isale ko꞉lo꞉ sagalema꞉ki widai kibo꞉bowo꞉, ne Kelisowa꞉ nanogdo꞉ dian kalu hendeleyo꞉ mo꞉domo꞉lo.   
\s1 Fo꞉l e iliga꞉felo꞉ kalu doma꞉ki Godeya꞉ ho꞉ido꞉  
\p
\v 11 \x - \xo 1.11 \xt Madi 16.17\x*Ni nao nado i, gio꞉ fanda asuluma꞉ki so꞉lo꞉l. Ya꞉suwa꞉ to nafale ko꞉lo꞉ nilo꞉ wido꞉ a꞉no꞉ kaluwa꞉ asulo꞉wa a꞉la꞉ta꞉ga꞉ mio꞉ma.  
\v 12 Niyo꞉ to we nili ma꞉muwa꞉ man a꞉namilo꞉ mo꞉di a꞉la꞉ta꞉ga꞉, kalu nolba꞉yo꞉lo꞉ nemo꞉wo꞉ mo꞉wido꞉. O꞉ngo꞉ma. To nafa we Ya꞉su Kelisowo꞉ nelo꞉wa fa꞉la꞉dowaki, nemo꞉wo꞉ kalaba wido꞉.   
\p
\v 13 \x - \xo 1.13 \xt Ilig 8.3\x*Yuwa꞉ ele kudu ha꞉na꞉likilo꞉ man nilo꞉ dimidan a꞉no꞉ gio꞉ tamin amio꞉ dabu. Niyo꞉ Godeya꞉ ene sa꞉s kaluka꞉isale o꞉mo꞉wo꞉ hida꞉yo꞉ ko꞉li ko꞉lilo꞉ dimiaki, tambo yasa danela꞉ma꞉no꞉ asulaki dimida꞉len.  
\v 14 \x - \xo 1.14 \xt Ilig 22.3\x*Nili ma꞉muwa꞉ ele difa꞉ a꞉no꞉ ne mada halaido꞉ kudu ha꞉na꞉len. Yuwa꞉ ele man a꞉no꞉ asululia꞉sa꞉ga꞉ kudu ha꞉na꞉likiyo꞉, niasi kaluka꞉isale nolo꞉ ne tinio꞉ ko꞉lo꞉ elen.  
\v 15-16 \x - \xo 1.15-16 \xt Ais 49.1, Gala 2.7\x*Ko꞉sega, ne o꞉sa꞉la꞉lia꞉no꞉ a꞉namio꞉, Gode eyo꞉ nemo꞉ ha꞉fo꞉ disa꞉lakiyo꞉, ene nanog dima꞉ki da꞉feyo꞉. A꞉la꞉ta꞉ga꞉ niyo꞉ to nafa Yu kaluka꞉isalema imo꞉wo꞉ walama꞉kiyo꞉, Godeya꞉ ene inso꞉ Ya꞉suwo꞉ nemo꞉ wido꞉. Ho꞉len nemo꞉lo꞉ wido꞉ amio꞉, ne kalu no o꞉lia꞉yo꞉ nenelema꞉nikiyo꞉ mo꞉ane.  
\v 17 Ho꞉len a꞉namio꞉, iliga꞉felo꞉ kalu Godeya꞉lo꞉ tamin amilo꞉ da꞉feyo꞉ a꞉no꞉ Ya꞉lusalem elen ko꞉sega, niyo꞉ iyo꞉lo꞉ mo꞉ba꞉ba꞉ni ane. Ne Alabia hen a꞉naka tigini ha꞉na꞉sa꞉ga꞉, tif amio꞉ Damaskas amisa꞉na a꞉ma꞉la꞉ mio꞉.   
\p
\v 18 \x - \xo 1.18 \xt Ilig 9.26-27\x*Dona otaleno꞉ ta꞉ta꞉ga꞉yo꞉, ne Bidayo꞉ ba꞉ba꞉niki, Ya꞉lusalemo꞉ a꞉na ane. Ne Bida o꞉lia꞉lo꞉ seno꞉, ho꞉leno꞉ do꞉ a꞉la꞉ta꞉ga꞉ bila꞉fo꞉ dowo꞉.  
\v 19 Ne Ya꞉suwa꞉ ene ao, Ya꞉ma꞉s ko꞉ ba꞉ba꞉ ko꞉sega, iliga꞉felo꞉ kalu nol a꞉no꞉ mo꞉ba꞉ba꞉.  
\v 20 To nilo꞉ sa꞉sa꞉lo꞉l we hendele a꞉la꞉likiyo꞉, Godeya꞉ siwa꞉la so꞉lo꞉l.   
\p
\v 21 \x - \xo 1.21 \xt Ilig 9.30\x*Ne Ya꞉lusalem a꞉na sa꞉ga꞉yo꞉, Silia hena a꞉la꞉ta꞉ga꞉ Silisia hen a꞉namida꞉ ane.  
\v 22 Ho꞉len a꞉namio꞉, sa꞉s kaluka꞉isale Yudia hen amilo꞉ sab i a꞉ma꞉yo꞉ ne semo꞉ ba꞉ba꞉ ko꞉lo꞉lab.  
\v 23 Ko꞉sega iliyo꞉ nilo꞉ dimida꞉len a꞉no꞉ malolabiki a꞉la꞉dabu, “Tamin amilo꞉ Keliso kaluka꞉isale nilo꞉ mogagila꞉sen kalu a꞉ma꞉yo꞉, Godeya꞉ to elo꞉ mogagila꞉sen a꞉no꞉ o꞉go꞉ e wida꞉lab” a꞉la꞉malolo꞉ meabiki dabulo꞉bo.  
\v 24 A꞉la꞉fo꞉ko꞉lo꞉ Godeya꞉lo꞉ nemo꞉lo꞉ dimido꞉ a꞉na ilikiyo꞉, iliyo꞉ Godeyo꞉ wabulu sio꞉.   
\c 2  
\s1 Iliga꞉felo꞉ kalu nolba꞉yo꞉ Fo꞉l e o꞉lika꞉ a꞉lakiyo꞉ da꞉fe alifa꞉  
\p
\v 1 \x - \xo 2.1 \xt Ilig 15.2\x*Donayo꞉ do꞉la꞉ta꞉ga꞉ fa꞉la꞉da꞉in a꞉no꞉ ta꞉ta꞉ga꞉yo꞉, ne Ya꞉lusalemo꞉ wa꞉ka ha꞉nakiyo꞉, Banabaso꞉ ne o꞉lia꞉ ane. A꞉la꞉ta꞉ga꞉ Taituso꞉lo꞉ tililia꞉gane.  
\v 2 Gode eyo꞉ ne Ya꞉lusalem a꞉ma꞉la꞉ hamana꞉ki wido꞉ ko꞉lo꞉ ne a꞉na ane. Nilo꞉ Yu kaluma o꞉lia꞉lo꞉ nanog tamin amilo꞉ dimido꞉ o꞉lia꞉ o꞉gdo꞉ dimida꞉lo꞉l a꞉no꞉lia꞉yo꞉ madali wala꞉ma꞉kiyo꞉ mo꞉asulo꞉. A꞉la꞉go꞉ko꞉lo꞉ ne a꞉na ha꞉na꞉sa꞉ga꞉yo꞉, sa꞉sdo꞉ bo꞉fo꞉lowan misa꞉ kalu egelese silikiyo꞉, niyo꞉ towo꞉ Yu kaluka꞉isalema imo꞉lo꞉ wido꞉ a꞉no꞉ misa꞉ kaluwo꞉ fanda asuluma꞉ki malolo꞉ me.  
\v 3 Taitus ne o꞉lia꞉lo꞉ mio꞉ e Gilig kalu, ko꞉sega iliyo꞉ to nilo꞉ sio꞉ a꞉no꞉ da꞉da꞉sa꞉ga꞉yo꞉, e do꞉go꞉fo꞉ hege gedema a꞉lakiyo꞉ iliyo꞉ mo꞉dibodo꞉.  
\v 4 \x - \xo 2.4 \xt Gala 1.7, 5.1,13\x*Ko꞉sega kalu nolba꞉yo꞉ Taituso꞉ do꞉go꞉fo꞉ hege gedema꞉ki asulo꞉. Kalu i a꞉no꞉ tilidabu kalu hendelema. Iyo꞉ nililo꞉ nenelab us a꞉na ka꞉la꞉gedema꞉ni yakiyo꞉, nililo꞉ Ya꞉su Keliso amilo꞉ ga꞉lilo꞉ dowab a꞉no꞉ ko꞉lo꞉, bo꞉bo꞉le ba꞉ba꞉ni mio꞉. I a꞉ma꞉yo꞉ nio꞉ dibolo ta꞉fa꞉niki, Yuwa꞉ ele ha꞉ga dowaki, madali nanogdo꞉ dian kalu o꞉ngo꞉ doma꞉ki asulo꞉.  
\v 5 Ko꞉sega niliyo꞉ ililo꞉ asulab a꞉no꞉ mo꞉kudu ha꞉na꞉no꞉ a꞉lakiyo꞉, to imilig gedea꞉taki, mo꞉kudu ane. To nafa hendele a꞉no꞉ giya dofo꞉melea꞉kiyo꞉, niliyo꞉ ililo꞉ asulab a꞉ma꞉ ha꞉g amio꞉ mo꞉dowo꞉.  
\v 6 Ko꞉sega Ya꞉lusalem sa꞉sdo꞉ bo꞉fo꞉lowan misa꞉ kalu i a꞉ma꞉yo꞉lo꞉ to nilo꞉ sio꞉ a꞉no꞉ moda꞉da꞉li silikiyo꞉, iliyo꞉ towo꞉ nemo꞉wo꞉ mo꞉kudu sio꞉. Gode eyo꞉ kaluwa꞉lo꞉ do꞉mo꞉ wa꞉l wenamilo꞉ nili siya꞉lo꞉ ba꞉dab a꞉no꞉ mo꞉aloba꞉da꞉sen ko꞉lo꞉, niyo꞉lo꞉ wilo꞉ di kalulo꞉b a꞉la꞉bo꞉ mo꞉molo asulo꞉l.  
\v 7 \x - \xo 2.7 \xt Ilig 22.21\x*Sa꞉sdo꞉ bo꞉fo꞉lowan misa꞉ kalu iliyo꞉ to nowo꞉ mo꞉kudu sa꞉lai ko꞉sega, ili asulakiyo꞉, Gode eyo꞉ Bidayo꞉ Yu kaluka꞉isalemo꞉lo꞉ to walama꞉kilo꞉ da꞉feyo꞉ o꞉leaumbo꞉, nelo꞉ Yu kaluka꞉isalema imo꞉wo꞉ Ya꞉suwa꞉ to nafa a꞉no꞉ walama꞉ki da꞉feyo꞉lo꞉b a꞉la꞉bo꞉ iliyo꞉ asulo꞉.  
\v 8 Bidayo꞉ Yu kaluka꞉isale us a꞉na nanogdo꞉ dimidabikilo꞉, Godeya꞉lo꞉ e asufa꞉ o꞉leaumbo꞉, nelo꞉ Yu kaluka꞉isalema us a꞉na nanogo꞉ dimida꞉likiyo꞉, Gode eyo꞉ ne a꞉na asufa꞉.  
\v 9 Sa꞉s amilo꞉ misa꞉ kalu sabo꞉, Ya꞉ma꞉so꞉, Bidayo꞉, Yo꞉no꞉, i a꞉no꞉ ko꞉lo꞉lab ko꞉lo꞉, kalu otalen a꞉ma꞉yo꞉ Gode eyo꞉ ne o꞉lia꞉yo꞉ ha꞉fo꞉ disa꞉laki, nanog a꞉no꞉ nemo꞉ dimilo꞉b a꞉la꞉bo꞉ ba꞉da꞉ga꞉yo꞉, nio꞉ to imilise dia꞉taki, Banabas na꞉n o꞉lia꞉yo꞉ dagiyo꞉ ebeyo꞉. Na꞉no꞉ Yu kaluka꞉isalema imo꞉wo꞉lo꞉ wida꞉b, a꞉la꞉ta꞉ga꞉ iliyo꞉lo꞉ Yu kaluka꞉isalemo꞉wo꞉lo꞉ wida꞉b a꞉la꞉ma꞉no꞉ a꞉la꞉likiyo꞉, negelebo꞉ towo꞉ saefa꞉.  
\v 10 \x - \xo 2.10 \xt Ilig 11.29-30\x*Iliyo꞉ na꞉nbo꞉wo꞉ dabu ba꞉dakiyo꞉, Yu amilo꞉ tilidabu kelego꞉lo꞉ma kaluka꞉isale a꞉no꞉ ko꞉lo꞉ asuwa꞉foma a꞉la꞉liki dabu ba꞉ba꞉. A꞉la꞉ta꞉ga꞉ to a꞉namio꞉ nilo꞉ tamin amilo꞉ dimidama꞉no꞉ asululiyo꞉ o꞉m.   
\s1 Fo꞉l eyo꞉ Bidamo꞉wo꞉ towo꞉ tigini sio꞉  
\p
\v 11 Ko꞉sega tif amio꞉, Bidayo꞉ Antio꞉g amisa꞉na fa꞉la꞉dowa꞉sa꞉ga꞉ sabikiyo꞉, e halayo꞉ dimido꞉ ko꞉lo꞉, niyo꞉ emo꞉wo꞉ tigini sio꞉.  
\v 12 \x - \xo 2.12 \xt Ilig 11.3\x*Bida elo꞉ hala dimido꞉wo꞉ we. Bida e ho꞉gi fa꞉la꞉dowakiyo꞉, Yuma tilidabu kaluka꞉isale i o꞉lia꞉yo꞉ ma꞉no꞉wo꞉ uwa na꞉len. Ko꞉sega Yu kalu nol, Ya꞉ma꞉sa꞉lo꞉ iliga꞉fo꞉ a꞉no꞉ fa꞉la꞉dowabikiyo꞉, Bida e Yuma kaluka꞉isale i o꞉lia꞉yo꞉ mo꞉gasa dowaki, ma꞉no꞉wo꞉ wa꞉kabiyo꞉ mo꞉mo꞉no꞉. Mo꞉wo꞉ kalu nolba꞉lo꞉ “kalu do꞉go꞉fo꞉ mo꞉hege gedealega, e Kelisowo꞉ mo꞉doma꞉ib” a꞉la꞉do꞉ sa꞉lan a꞉no꞉ asulaki, Bida e a꞉no꞉ ko꞉lo꞉ tagilaki elen.  
\v 13 Bida eyo꞉ digalo꞉ dimidama꞉no꞉wo꞉ asulufo꞉liki ko꞉sega, e kalu nol a꞉no꞉ tagilaki, mano꞉ ko꞉li dimido꞉. A꞉la꞉ta꞉ga꞉ Yu tilidabu kaluka꞉isale Antio꞉gdo꞉ san iliyo꞉lo꞉ elo꞉ man dimidab a꞉no꞉ko꞉ kudu ane ko꞉lo꞉, man ililo꞉ a꞉ma꞉yo꞉ Banabas e sendelia꞉gane ko꞉lo꞉ elo꞉ a꞉la꞉ka dimido꞉.   
\p
\v 14 Ne ba꞉ba꞉ amio꞉ ililo꞉ dimido꞉ a꞉no꞉ to nafa hendele o꞉lia꞉yo꞉ mo꞉imilo꞉ dowo꞉ a꞉la꞉asulab. A꞉la꞉fo꞉ko꞉lo꞉ kaluka꞉isale tambo dabuma꞉kiyo꞉, niyo꞉ Bidamo꞉wo꞉ tigini sa꞉laki a꞉la꞉sio꞉, “Ge Yu kalu, ko꞉sega Yuwa꞉ eleyo꞉ tambo mo꞉kudu ha꞉naki, Yu kaluma ili man o꞉leo꞉ngo꞉ a꞉no꞉ ge kudu ha꞉na꞉lab. A꞉la꞉go꞉ko꞉lo꞉ gilo꞉ Yu kaluka꞉isalema ko꞉lo꞉ Yuwa꞉ ele a꞉no꞉ kudu hamana꞉kilo꞉ dibodab ko, mo꞉wo꞉ ha꞉?   
\p
\v 15 “Nili ma꞉mu iyo꞉ Yu kalu ko꞉lo꞉, nio꞉ sa꞉la꞉liab amio꞉ Yu kalule dowo꞉. Yu kaluma i a꞉no꞉ mogago꞉lo꞉ dimidan kalu a꞉la꞉so꞉lo꞉l ko꞉lo꞉, nio꞉ kalu i o꞉ngo꞉ma.  
\v 16 \x - \xo 2.16 \xt Ilig 15.10-11, Lom 3.20-28, Gala 3.11\x*Ko꞉sega niliyo꞉ a꞉la꞉asulo꞉l. Kaluka꞉isale Mo꞉sa꞉sa꞉ elelo꞉ tambo kudu ha꞉na꞉lab a꞉no꞉, Gode eyo꞉ ba꞉da꞉sa꞉ga꞉yo꞉, kalu we digalo꞉ a꞉la꞉bo꞉ mo꞉sa꞉lan. A꞉la꞉do꞉ mo꞉auma꞉ib. Kaluka꞉isale abeyo꞉ Ya꞉su Keliso amilo꞉ tilida꞉dab a꞉no꞉, Gode eyo꞉ e digalo꞉ a꞉la꞉sa꞉ma꞉ib. Yu kalu, Ya꞉su amilo꞉ tilidabu niliyo꞉ a꞉la꞉ asulufo꞉lo꞉l. Hendele nio꞉lo꞉ Gode eyo꞉ digalo꞉ kalu a꞉la꞉sama꞉kiyo꞉, Ya꞉su Keliso e amio꞉ tilidabu. Elelo꞉ kudu ha꞉nab a꞉namio꞉ nio꞉ digalo꞉ fa꞉la꞉dowab a꞉la꞉bo꞉ Gode eyo꞉ mo꞉sa꞉ma꞉ib. Mo꞉wo꞉ ele ko꞉lo꞉ kudu ha꞉na꞉lab a꞉ma꞉yo꞉ kalu imilig nowo꞉ Godeya꞉ siwa꞉l amio꞉ digalo꞉wo꞉ mada mo꞉ta꞉fa꞉ib.   
\p
\v 17 “O꞉go꞉ niliyo꞉ Ya꞉su amilo꞉ tilida꞉ba꞉no꞉ man kudu ha꞉nab a꞉namio꞉ Gode eyo꞉ nio꞉ digalo꞉le a꞉la꞉asulab. A꞉la꞉ta꞉ga꞉ niliyo꞉ tog a꞉na iliki ba꞉ba꞉ amio꞉, nio꞉lo꞉ mogago꞉ kalule dowab a꞉la꞉asulo꞉. A꞉la꞉fo꞉ ko꞉sega Kelisowa꞉yo꞉ nio꞉ mogago꞉wo꞉ o꞉li ka dimidama꞉ki sa꞉laigaba꞉le? A꞉la꞉do꞉ mo꞉auma꞉ib!  
\v 18 Tamin amilo꞉ ele kudu ha꞉nan man ko꞉lo꞉ ta꞉fo꞉ a꞉no꞉ niyo꞉ wa꞉ka a꞉tili da꞉da꞉sa꞉ga꞉ kudu ha꞉nalega, mogago꞉ kaluwo꞉ ne, a꞉la꞉liki widakigab.  
\v 19 Tamin amio꞉ nelo꞉ ele a꞉ma꞉ ha꞉ga elen ko꞉sega a꞉namilo꞉ eleno꞉ ta꞉ta꞉ga꞉ handalowo꞉ amio꞉, ne Gode eno꞉le dowaki, e kudu ha꞉na꞉mela꞉no꞉.  
\v 20 \x - \xo 2.20 \xt Gala 1.4\x*Ne Ya꞉su Keliso o꞉lia꞉ i malana sowo꞉ ko꞉lo꞉, mela꞉no꞉ ho꞉gi di a꞉no꞉ nino꞉ma. Ne amio꞉ Keliso e mela꞉no꞉ sab. A꞉la꞉fo꞉ko꞉lo꞉ ne henfelo꞉ wena silikiyo꞉, Godeya꞉ ene So꞉waya tilida꞉da꞉sa꞉ga꞉ ha꞉na꞉mela꞉no꞉. Mo꞉wo꞉ eyo꞉ ne mada alan asulakiyo꞉ ene mela꞉no꞉wo꞉ neya wala꞉ ko꞉lo꞉lab.  
\v 21 Gode eyo꞉ ne ha꞉fo꞉ disa꞉lakiyo꞉, ne digalo꞉ kalu a꞉la꞉sio꞉ ko꞉lo꞉, ha꞉fo꞉ disa꞉lan man a꞉no꞉ ne o꞉ngo꞉malo꞉ngo꞉ a꞉la꞉bo꞉ mo꞉asuluma꞉no꞉. Kaluka꞉isale imilig nowo꞉ ele mada kudu ha꞉na꞉lab a꞉namio꞉, Godeya꞉ siwa꞉l amio꞉ nafa digalo꞉ ka dowan kibabeyo꞉, Ya꞉su Keliso sowo꞉ a꞉no꞉ o꞉ngo꞉malo꞉ngo꞉ domabe.”   
\c 3  
\s1 Tili dabu man o꞉lia꞉ ele kudu ha꞉nan man o꞉lia꞉ wido꞉  
\p
\v 1 Galasia kaluka꞉isale gio꞉ asugdo꞉ma dowab! Niliyo꞉ Ya꞉su Kelisowo꞉ gimo꞉wo꞉ kalaba wido꞉ ko꞉lo꞉, e i malan amilo꞉ alu a꞉no꞉ go꞉no꞉n siya꞉lo꞉ ba꞉ba꞉yo꞉ o꞉ngo꞉ dowo꞉. Ko꞉sega nolba꞉yo꞉ dikili wido꞉ ko꞉lo꞉, gio꞉ no꞉nolo alifa꞉ ko꞉lo꞉lab.  
\v 2 Gimo꞉lo꞉ dabu ba꞉ba꞉nigo꞉l we asuluma. Gio꞉ ele kudu ane ami Godeya꞉ Mamayo꞉ a꞉na diya꞉le? O꞉ gio꞉ to nafa a꞉no꞉ tilida꞉dab ami Godeya꞉ Mamayo꞉ a꞉na diya꞉le?  
\v 3 Gio꞉ asugdo꞉ma dowab. Gio꞉ mo꞉mo꞉dakiyo꞉, Mamaya꞉ halaido꞉wa a꞉la꞉ta꞉ga꞉ tilidabu ko꞉lo꞉, o꞉go꞉ go꞉no꞉n halaido꞉ a꞉ma꞉yo꞉ o꞉li halale kagayalikiyo꞉ egema꞉iba?  
\v 4 To nafa ko꞉lo꞉ gililo꞉ kudu ane amilo꞉ hida꞉yo꞉ dia꞉li ane a꞉no꞉ madali wala꞉ya꞉le? Niyo꞉ a꞉no꞉ madalilo꞉ mo꞉wala꞉ma꞉ki asulo꞉l.  
\v 5 Gode eyo꞉ ene Mamayo꞉ gimo꞉wo꞉ dimiabikiyo꞉, Mama a꞉ma꞉yo꞉ gi usamio꞉ molo ha꞉na꞉no꞉wo꞉ dimido꞉. Elo꞉ dimido꞉ a꞉no꞉, giyo꞉ Yuwa꞉ ele a꞉no꞉ ko꞉lo꞉ kudu ha꞉nabiki go꞉wa꞉le? O꞉ngo꞉ma. Ginido꞉ Ya꞉su Keliso amilo꞉ tilidabu a꞉na go꞉ ko꞉lo꞉lab.   
\p
\v 6 \x - \xo 3.6 \xt Mo꞉mo꞉ 15.6\x*Gio꞉ Ablahamo꞉ asuluma. Godeya꞉ to sa꞉sa꞉lo꞉ a꞉namio꞉ a꞉la꞉sio꞉, “Ablaham e Gode amio꞉ tilidabu ko꞉lo꞉, Gode eyo꞉ e digalo꞉ kalu a꞉la꞉bo꞉ a꞉na sio꞉.”  
\v 7 A꞉la꞉fo꞉ko꞉lo꞉ gio꞉ to we dinafa asuluma. Kaluka꞉isale abeyo꞉ Gode amilo꞉ tilida꞉dab a꞉no꞉, Ablahama꞉ ene inso꞉le dowab.  
\v 8 \x - \xo 3.8 \xt Mo꞉mo꞉ 12.3, Lom 4.3,16\x*Gode eyo꞉ tif amio꞉ Yu kaluka꞉isalema ini tilidabu amio꞉ iyo꞉ digalo꞉ kalu a꞉la꞉sa꞉ma꞉no꞉ a꞉lakiyo꞉, Gode eyo꞉ tamina asula꞉sa꞉ga꞉yo꞉, Ablahambo꞉wo꞉ a꞉la꞉dinali sio꞉, “Henfelo꞉ amilo꞉ so꞉lo꞉ sab a꞉no꞉ tambo geya a꞉la꞉ta꞉ga꞉yo꞉, halaido꞉ nafale mesea꞉ki ta꞉fa꞉no꞉.”  
\v 9 A꞉la꞉fo꞉ko꞉lo꞉ Ablaham e tilida꞉dabikilo꞉ Gode eyo꞉ e nafale mesea꞉ki ta꞉fo꞉ o꞉leaumbo꞉, kaluka꞉isale abeyo꞉ Gode amilo꞉ tilida꞉dab a꞉no꞉ Gode eyo꞉ i a꞉no꞉lo꞉ nafale mesea꞉ki ta꞉fa꞉ib.   
\p
\v 10 \x - \xo 3.10 \xt Lo 27.26\x*Kaluka꞉isale abeyo꞉, Godeya꞉ si wa꞉l amio꞉ Mo꞉sa꞉sa꞉ ele saefa꞉lo꞉ kudu ha꞉nab a꞉namio꞉, iyo꞉ digalo꞉ doma꞉ib a꞉la꞉asulalega, Godeya꞉ gadio꞉ a꞉no꞉ imo꞉ dimia꞉no꞉ a꞉la꞉liki dinali saefa꞉ ko꞉lo꞉lab. Godeya꞉ bugo꞉ amio꞉ a꞉la꞉sa꞉sa꞉li alifa꞉ ko꞉lo꞉ da꞉lab, “Kaluka꞉isale abeyo꞉ ele ko꞉lo꞉ bugo꞉ amilo꞉ sa꞉sa꞉lo꞉ a꞉no꞉ tambowo꞉ mo꞉kudu ha꞉na꞉lalega, Godeya꞉ gadio꞉ a꞉no꞉ imo꞉ dimia꞉no꞉ a꞉la꞉liki dinali saefa꞉ ko꞉lo꞉lab.”  
\v 11 \x - \xo 3.11 \xt Hab 2.4, Gala 2.16\x*Kalu nowo꞉ ele kudu ane a꞉na ilikiyo꞉, Gode eyo꞉ ge digalo꞉leka꞉ a꞉la꞉bo꞉ mada mo꞉sa꞉ma꞉ib. Mo꞉wo꞉ Godeya꞉ bugo꞉ amio꞉ a꞉la꞉sa꞉sa꞉lo꞉, “Kaluka꞉isale Godeya꞉lo꞉ digalo꞉ a꞉la꞉do꞉ sa꞉lab a꞉no꞉, ene tilidabu a꞉ma꞉yo꞉ ene mela꞉no꞉wo꞉ dinafa tili dofo꞉mela꞉ib.”  
\v 12 \x - \xo 3.12 \xt Wkp 18.5\x*Elelo꞉ kudu ha꞉nan man a꞉no꞉ tilidabu man a꞉no꞉lia꞉yo꞉ mo꞉imilo꞉. A꞉la꞉ba, Godeya꞉ bugo꞉ amio꞉ a꞉la꞉sa꞉sa꞉lo꞉ da꞉lab, “Kaluka꞉isale abeyo꞉ Godeya꞉ ele saefa꞉lo꞉ tambolo꞉ kudu ha꞉na꞉lab a꞉no꞉ e mela꞉no꞉wo꞉ dia꞉ib.”  
\v 13 \x - \xo 3.13 \xt Lo 21.23, Lom 8.3\x*Kaluka꞉isale nio꞉ Godeya꞉ eleyo꞉ tambo mo꞉kudu ane ko꞉lo꞉, Godeya꞉ gadio꞉ a꞉no꞉ nio꞉ dia꞉no꞉ elen ko꞉sega, gadio꞉ a꞉no꞉ Ya꞉su Keliso e diaki, nio꞉ sili alifa꞉. Godeya꞉ bugo꞉ amio꞉ a꞉la꞉sa꞉sa꞉lo꞉, “I malan amilo꞉ alulab kalu a꞉no꞉ Godeya꞉ gadio꞉ ha꞉g a꞉na dowab.”  
\v 14 Kelisowa꞉lo꞉ dimido꞉ a꞉ma꞉yo꞉, Godeya꞉lo꞉ Ablahambo꞉lo꞉ dinafa mesea꞉kilo꞉ dinali sio꞉ o꞉leaumbo꞉, Yu kaluka꞉isalema ilo꞉ amio꞉lo꞉ fa꞉la꞉doma꞉kiyo꞉, Ya꞉su e dimido꞉. A꞉la꞉ta꞉ga꞉ nio꞉ tilida꞉dabikiyo꞉, Mama Malilo꞉ a꞉no꞉ Godeya꞉lo꞉ dimia꞉no꞉ a꞉la꞉do꞉ dinali sio꞉ a꞉no꞉ dima꞉kiyo꞉, e dimido꞉.   
\s1 Ele difa꞉ a꞉ma꞉yo꞉ dinali sio꞉ a꞉no꞉ mo꞉dila꞉  
\p
\v 15 Nao nado i, nili man dimidan a꞉na da꞉fe sa꞉ma꞉nigo꞉l. Kalu a꞉la꞉ nowo꞉ asulo꞉ imilig dowaki, towo꞉ dinali saetalega, dinali saefa꞉ a꞉no꞉ imilig noma꞉yo꞉ mo꞉wa꞉la꞉ sa꞉ma꞉ib, a꞉la꞉ta꞉ga꞉ to nowo꞉ mo꞉ba꞉ma꞉ib. Godeya꞉lo꞉ dinali saefa꞉ a꞉no꞉lo꞉ o꞉leo꞉ngo꞉ ko꞉lo꞉lab.  
\v 16 \x - \xo 3.16 \xt Mo꞉mo꞉ 12.7\x*Godeya꞉lo꞉ dinali saefa꞉ a꞉no꞉ Ablaham o꞉lia꞉ e ma꞉mu imilig o꞉lia꞉mo꞉ sio꞉. Godeya꞉ bugo꞉ a꞉namilo꞉ to sa꞉sa꞉lo꞉ a꞉no꞉ “e ma꞉mu i” a꞉la꞉bo꞉ mo꞉sa꞉sa꞉lo꞉. “E ma꞉mu imilig” a꞉no꞉ ko꞉lo꞉ sa꞉sa꞉lo꞉. E ma꞉mu imilig a꞉la꞉do꞉ sa꞉sa꞉lo꞉ a꞉no꞉ Keliso a꞉no꞉ ko꞉lo꞉ sio꞉.  
\v 17 \x - \xo 3.17 \xt Kis 12.40\x*To nilo꞉ so꞉lo꞉l wema꞉ ha꞉go꞉ we. Tamin amio꞉ Gode eyo꞉ Ablaham e o꞉lia꞉yo꞉ towo꞉ dinali saefa꞉. A꞉la꞉ta꞉ga꞉ donayo꞉ 430 a꞉la꞉fo꞉wo꞉ ta꞉ta꞉ga꞉yo꞉, Gode eyo꞉ Mo꞉sa꞉sbo꞉wo꞉ eleyo꞉ dimi. A꞉la꞉fo꞉ko꞉lo꞉ ele a꞉ma꞉yo꞉ Ablaham emo꞉lo꞉ to saefa꞉ a꞉no꞉ mo꞉dilaki, dinali saefa꞉ a꞉no꞉ mada mo꞉ko꞉lo꞉.  
\v 18 \x - \xo 3.18 \xt Lom 4.14\x*Nio꞉ ele kudu ha꞉nab a꞉nami Godeya꞉lo꞉ boba kelego꞉wo꞉ a꞉na dia꞉no꞉ kibo꞉bowo꞉, nio꞉ Godeya꞉lo꞉ dinali sio꞉ a꞉namio꞉ mo꞉dimabe. Ko꞉sega Gode eyo꞉ Ablaham e o꞉lia꞉yo꞉ ha꞉fo꞉wo꞉ disa꞉laki dinali saefa꞉ ko꞉lo꞉, boba kelego꞉wo꞉ e a꞉na di.   
\p
\v 19 \x - \xo 3.19 \xt Ilig 7.38, Lom 5.20\x*A꞉la꞉fo꞉ko꞉lo꞉ Mo꞉sa꞉s emo꞉lo꞉ ele dimi a꞉no꞉ mo꞉wo꞉ ha꞉? Kaluka꞉isaleyo꞉ mogago꞉ dimidakilo꞉ hala ha꞉na꞉len a꞉no꞉ kalaba walama꞉ki, ele a꞉no꞉ dinali sio꞉ o꞉lia꞉ gasalifa꞉. Ele a꞉no꞉ dowa꞉i ya꞉la꞉ga꞉, Ablahama꞉ e ma꞉mu imilig, Godeya꞉lo꞉ tamin amilo꞉ dinali sio꞉ a꞉no꞉ ko꞉lo꞉ fa꞉la꞉dowabiki edo꞉. Ele a꞉no꞉ Gode eyo꞉ ma꞉mula꞉ kalumo꞉ a꞉la꞉ta꞉ga꞉yo꞉ us kalu Mo꞉sa꞉s emo꞉ dimi, ko꞉lo꞉ Mo꞉sa꞉s e Godeyo꞉ nol, kaluka꞉isaleyo꞉ nol, a꞉lo꞉ usa elen.  
\v 20 Usamilo꞉ dowab kalu a꞉ma꞉yo꞉, kalu a꞉la꞉ usa dowakilo꞉ asuwa꞉tano꞉ o꞉m. Ko꞉sega Godeyo꞉ imilise e ko꞉lo꞉, eyo꞉ Ablahambo꞉ dinali sa꞉lakiyo꞉, ene ka sio꞉. \fig Mo꞉sa꞉s eyo꞉ ele a꞉no꞉ uwa sa꞉sa꞉la꞉sa꞉ga꞉ dia꞉mio꞉.|alt="Moses with stone tablets" src="02_Ex_35_02_RG_gr.tif" size="col" copy="© Sweet Publishing http://sweetpublishing.com, licensed under a CC: BY-SA 3.0 Unported licence." ref="3.19" \fig*   
\p
\v 21 \x - \xo 3.21 \xt Lom 8.2-4\x*A꞉la꞉go꞉ko꞉lo꞉ ele difa꞉ a꞉ma꞉yo꞉ dinali sio꞉ o꞉lia꞉yo꞉ giso꞉ dowaba꞉le? A a꞉la꞉bo꞉ mo꞉gab. Ele difa꞉ a꞉ma꞉yo꞉ ko꞉ngo꞉ mela꞉no꞉le dimian kibabeyo꞉, kaluwo꞉ ele kudu ha꞉nab a꞉namio꞉, Gode eyo꞉ e digalo꞉ kalu dowab a꞉la꞉bo꞉ o꞉li sa꞉mabe.  
\v 22 Ko꞉sega Godeya꞉ to sa꞉sa꞉lo꞉ a꞉ma꞉yo꞉ nimo꞉wo꞉ a꞉la꞉sio꞉, “Henfelo꞉ kaluka꞉isale tambowo꞉ man mogago꞉ a꞉ma꞉ ha꞉ga iliki, dibolowa disa꞉fo꞉len.” A꞉la꞉fo꞉ko꞉lo꞉ kaluka꞉isale abeyo꞉ Ya꞉su Keliso amilo꞉ tilida꞉dab a꞉ma꞉yo꞉, Godeya꞉lo꞉ tamin amilo꞉ dinali sio꞉ a꞉no꞉ tilidabu enedo꞉ a꞉na ilikiyo꞉, o꞉li dia꞉ib.  
\v 23 \x - \xo 3.23 \xt Gala 4.3\x*Keliso e amilo꞉ tilida꞉ba꞉no꞉ man a꞉no꞉ kalab amio꞉ o꞉fa꞉la꞉doma꞉no꞉ a꞉lab a꞉namio꞉, ele a꞉ma꞉yo꞉ nio꞉ mela꞉sa꞉ga꞉ dibolowa to꞉lo alifo꞉len.  
\v 24 \x - \xo 3.24 \xt Lom 10.4\x*A꞉la꞉fo꞉ko꞉lo꞉ Keliso e o꞉mia꞉no꞉ a꞉labikiyo꞉, ele a꞉ma꞉yo꞉ nio꞉ bo꞉fo꞉len. Nio꞉ tilida꞉da꞉sa꞉ga꞉ digalo꞉ kalu doma꞉kiyo꞉, ele a꞉ma꞉yo꞉ nio꞉ tililia꞉ga꞉ Ya꞉sulo꞉wa ta꞉fo꞉.  
\v 25 O꞉go꞉ tilidabu man a꞉no꞉ mio꞉ ko꞉lo꞉, nio꞉ eleya꞉ ha꞉g amio꞉ mo꞉doma꞉no꞉. Ele a꞉ma꞉yo꞉ nio꞉ mo꞉bo꞉fo꞉mela꞉ib.   
\s1 Nio꞉ Godeya꞉ ene so꞉wale dowab  
\p
\v 26 \x - \xo 3.26 \xt Yo꞉n 1.12\x*Gio꞉ tambo Ya꞉su Kelisowa tilidabu ko꞉lo꞉, Godeya꞉ ene so꞉wale dowab.  
\v 27 \x - \xo 3.27 \xt Lom 6.3\x*Gio꞉ ho꞉n ami to꞉lolabikilo꞉ Ya꞉su Kelisowa dowab a꞉ma꞉yo꞉, Kelisowa꞉ helebeso꞉g ho꞉gi o꞉ngo꞉ma꞉ momade alifa꞉ ko꞉lo꞉lab.  
\v 28 \x - \xo 3.28 \xt Lom 10.12\x*A꞉la꞉fo꞉ko꞉lo꞉ Ya꞉su Keliso amilo꞉ dowo꞉ gi a꞉no꞉, tambowo꞉ imilise ko꞉lo꞉ a꞉lab. Yu kalu o꞉lia꞉ Gilig kalu o꞉lia꞉yo꞉ imilig dowo꞉ ko꞉lo꞉lab. Da꞉ibo꞉ kaluwo꞉lo꞉, ga꞉lilo꞉ sab kaluwo꞉lo꞉ imilig dowo꞉ ko꞉lo꞉lab. Kaluwo꞉lo꞉, gayo꞉lo꞉ imilig dowo꞉ ko꞉lo꞉lab.  
\v 29 \x - \xo 3.29 \xt Lom 4.13\x*Kelisowa꞉ eno꞉le dowab gio꞉, Ablahama꞉ ene so꞉wale dowo꞉ ko꞉lo꞉, Godeya꞉lo꞉ dinali sio꞉ a꞉no꞉ gio꞉lo꞉ dia꞉ib.   
\c 4  
\p
\v 1 Gio꞉ fanda asuluma꞉kiyo꞉, niyo꞉ towo꞉ da꞉fe sa꞉ma꞉nigo꞉l. So꞉wa wa꞉la꞉b a꞉no꞉ iyayo꞉ sowalikiyo꞉, hen o꞉lia꞉ dabun o꞉lia꞉yo꞉ e dia꞉ib. Ko꞉sega e so꞉wala꞉su elen ami iyayo꞉ a꞉na sowalega, e hendele hendo꞉ biso꞉ doma꞉ib. Ko꞉sega kelego꞉ elo꞉ a꞉no꞉ nolba꞉ bo꞉fo꞉liki e madali nanog dian kalu o꞉ngo꞉ elen.  
\v 2 So꞉wa a꞉ma꞉lo꞉ kelego꞉ tambolo꞉ bo꞉fo꞉mela꞉no꞉ ho꞉len a꞉no꞉ iyaya꞉ da꞉feyo꞉ ko꞉lo꞉, ho꞉len a꞉no꞉ o꞉semo꞉fa꞉la꞉dowalikiyo꞉, so꞉wa a꞉no꞉ elo꞉ bo꞉fo꞉lab kalu a꞉ma꞉ ha꞉ga mela꞉ib.  
\v 3 \x - \xo 4.3 \xt Kolo 2.20\x*A꞉la꞉ta꞉ga꞉ nio꞉lo꞉ o꞉leo꞉ngo꞉ elen. Tamin amio꞉ nio꞉ so꞉wa o꞉ngo꞉ ilikiyo꞉, henfelo꞉ wenamilo꞉ mama ko꞉li ko꞉lilo꞉wa꞉ halaido꞉ ha꞉ga siliki, madali nanog dian kalu o꞉ngo꞉ elen.  
\v 4 \x - \xo 4.4 \xt Yo꞉n 1.14, Lom 1.3\x*Ko꞉sega ho꞉lendeyo꞉ fa꞉la꞉dowabikiyo꞉, Gode eyo꞉ ene so꞉wayo꞉ iliga꞉fo꞉. E gaya꞉yo꞉ sa꞉la꞉lia꞉sa꞉ga꞉, Yuwa꞉ ele difa꞉ a꞉ma꞉ ha꞉ga elen.  
\v 5 Nio꞉ Godeya꞉ ene So꞉wale doma꞉kiyo꞉, ene so꞉wayo꞉ ya꞉sa꞉ga꞉, nio꞉ ele ha꞉ga sen a꞉no꞉ ga꞉li mesea꞉ki, e a꞉ma꞉la꞉ kililia꞉sa꞉ga꞉ ta꞉fo꞉.  
\v 6 \x - \xo 4.6 \xt Lom 8.15-17\x*O꞉go꞉ nio꞉ Godeya꞉ ene so꞉wale dowo꞉ a꞉no꞉ ko꞉lo꞉ widakiyo꞉, eyo꞉ Ya꞉suwa꞉ ene Mamayo꞉ ni asulo꞉ usa melea꞉ki iliga꞉fo꞉. Mama a꞉no꞉ ni o꞉lia꞉ silikiyo꞉ “Do, Do,” a꞉la꞉bo꞉ ho꞉le sa꞉la꞉lab.  
\v 7 A꞉la꞉go꞉ko꞉lo꞉ o꞉go꞉ gio꞉ ele ha꞉ga iliki madali nanog dian kaluwo꞉ mo꞉dowaki, Godeya꞉ ene so꞉wale dowab. A꞉la꞉ta꞉ga꞉ Godeya꞉ so꞉wale dowab gi a꞉ma꞉yo꞉, iyaya꞉ dabun kelego꞉ a꞉no꞉ hendele dia꞉ib.   
\s1 Galasia kaluwo꞉ towo꞉ kudu ho꞉no꞉babese a꞉la꞉asulaki sio꞉  
\p
\v 8 Tamin amio꞉ gio꞉ Godelo꞉ mo꞉fanda asulo꞉ amio꞉, madali gode ko꞉li ko꞉lilo꞉ a꞉ma꞉ ha꞉ga iliki, ini madali nanog dian kalu dofo꞉len. I a꞉no꞉ gode hendelema.  
\v 9 Ko꞉sega o꞉go꞉ gio꞉ Godeyo꞉ fanda ba꞉daki asulab. Ko꞉sega o꞉ngo꞉ma. Hendele, Gode eyo꞉ gio꞉ fanda ba꞉da꞉sa꞉ga꞉ asulo꞉. Mama ko꞉li ko꞉lilo꞉ henfelo꞉ wenamilo꞉ a꞉lab a꞉no꞉ halaido꞉lo꞉ma dowab ko꞉lo꞉, gio꞉ a꞉na a꞉kudu ha꞉nab ko waga dimidaya? Gio꞉ ene madali nanog dian kalu a꞉doma꞉no꞉ asulaya?  
\v 10 \x - \xo 4.10 \xt Lom 14.5, Kolo 2.16\x*Gililo꞉ kudu ha꞉na꞉seno꞉ we. Giliyo꞉ Godeyo꞉ sagalema꞉ki, ho꞉len alan nol ami gulugululakiyo꞉, imo a꞉no꞉lo꞉, ta꞉n a꞉no꞉lo꞉, a꞉la꞉ta꞉ga꞉ dona ho꞉gi fa꞉la꞉dowab a꞉no꞉ ko꞉lo꞉ duludaki gulugulula꞉sen.  
\v 11 Gililo꞉ dimida꞉sen a꞉no꞉ ne da꞉da꞉ga꞉yo꞉, nanog nilo꞉, gilo꞉ amilo꞉ dimido꞉ a꞉no꞉ madali walab a꞉la꞉asulakiyo꞉, ne kele asulo꞉wo꞉ alan dowo꞉.   
\p
\v 12 Wai! Nao nado i, ne gilo꞉wa mio꞉ amio꞉, Yuwa꞉ eleyo꞉ ta꞉ta꞉ga꞉, gi o꞉ngo꞉ dowo꞉ ko꞉lo꞉, o꞉go꞉ gio꞉lo꞉ ne dowo꞉ o꞉ngo꞉ doma꞉ki asulo꞉l. Giliyo꞉ mogago꞉ nowo꞉ nemo꞉lo꞉ mo꞉dimidale.  
\v 13 Gio꞉ a꞉asuluma. Tamin amio꞉ ne walaf delen ko꞉lo꞉, a꞉na ilikiyo꞉ ne gilo꞉wa ya꞉sa꞉ga꞉, Godeya꞉ to nafayo꞉ gimo꞉wo꞉ a꞉na wido꞉.  
\v 14 Ni do꞉mo꞉wo꞉ halaido꞉lo꞉ma dowo꞉ a꞉ma꞉yo꞉ gimo꞉wo꞉ hida꞉yo꞉ dimi ko꞉sega, giliyo꞉ ne dianilakiyo꞉ mo꞉gola ba꞉ba꞉. A꞉la꞉ba. Godeya꞉ ene ma꞉mula꞉ kalu ko꞉lo꞉ tilidoma꞉ib o꞉leaumbo꞉, giliyo꞉ ne a꞉la꞉tili dowo꞉. Hendele gililo꞉ Ya꞉su Keliso tilidoma꞉ib o꞉leaumbo꞉lo꞉, ne a꞉la꞉tili dowo꞉.  
\v 15 Ho꞉len a꞉namilo꞉ sagalo꞉ gilo꞉ amilo꞉ elen a꞉no꞉, o꞉go꞉ o꞉ba aneyo꞉? Ho꞉len a꞉namio꞉ giliyo꞉ o꞉li dimidama꞉no꞉ kibo꞉bowo꞉, go꞉no꞉n si ko dugulia꞉sa꞉ga꞉yo꞉ nemo꞉wo꞉ o꞉li dimibabe. Niyo꞉ mada hende a꞉la꞉asulo꞉.  
\v 16 Ko꞉sega nilo꞉ gimo꞉lo꞉ to hendele wido꞉l wena ilikiyo꞉, o꞉go꞉ giliyo꞉ nemo꞉wo꞉ mo꞉beaki, gis dowaba꞉le?   
\p
\v 17 Widan kalu i wema꞉yo꞉ gio꞉ ililo꞉ asulab au kudu mena꞉ki, nanogo꞉ halaido꞉ dimidaki ha꞉nola꞉lab. Ko꞉sega ililo꞉ dimida꞉lab a꞉no꞉ gio꞉ ko꞉lo꞉ asuwa꞉fa꞉no꞉ a꞉la꞉liki ga꞉laba. Gio꞉ ne o꞉lia꞉yo꞉ miliyo꞉ mo꞉doma꞉ki ka꞉laki susudab ko꞉lo꞉, gio꞉ ililo꞉ sa꞉lab a꞉no꞉ko꞉ kudu hamana꞉ki gab.  
\v 18 Ne gi o꞉lia꞉ a꞉lalikiyo꞉lo꞉, nelo꞉malamio꞉lo꞉, kalu noma꞉yo꞉ man nafale dimidaki, gio꞉ halale tili doma꞉no꞉ a꞉laki dimidalega, man a꞉no꞉ o꞉li nafaleyo꞉ ko꞉m.   
\p
\v 19 Ni so꞉wa gio꞉, gaya꞉lo꞉ so꞉wa sa꞉la꞉lia꞉nikilo꞉ nagalo꞉ dian aumbo꞉, nelo꞉ gi asulakiyo꞉ nagalo꞉wo꞉ a꞉la꞉ dio꞉l. Nagalo꞉ us wenamio꞉ halaido꞉ dia꞉i ha꞉na꞉la꞉ga꞉, gio꞉ Keliso amio꞉ mela꞉no꞉wo꞉ dia꞉sa꞉ga꞉ halaido꞉ dowaliki ta꞉fa꞉no꞉.  
\v 20 Ne gi o꞉lia꞉ mesa꞉no꞉wo꞉ mada alan asulo꞉l. Ne gi o꞉lia꞉ kona siliki kibo꞉bowo꞉, gi asuwa꞉fa꞉no꞉ togo꞉ o꞉li alobana so꞉mo꞉lo. Ko꞉sega ne ko꞉na꞉ siliki ko꞉lo꞉ kele asulaki babalab.   
\s1 Ha꞉ga o꞉lia꞉ Sa꞉la o꞉lia꞉ma꞉ so꞉wa  
\p
\v 21 Kaluka꞉isale nolo꞉ Mo꞉sa꞉sa꞉ ele a꞉no꞉ ko꞉lo꞉ kudu ha꞉na꞉mela꞉no꞉ asulab ko꞉lo꞉, kalu gi ko Mo꞉sa꞉sa꞉ eleya꞉lo꞉ sa꞉lab a꞉no꞉ gio꞉ fanda asululiya꞉le?  
\v 22 \x - \xo 4.22 \xt Mo꞉mo꞉ 16.15, 21.2\x*Godeya꞉ bugo꞉ amio꞉ a꞉la꞉sa꞉sa꞉lo꞉. Ablaham eyo꞉ kalu so꞉wayo꞉ a꞉la꞉ ko꞉lo꞉ sa꞉la꞉li. So꞉wa nowo꞉ madali nanogdo꞉ dian gaya꞉ sa꞉la꞉li. So꞉wa nowo꞉ ga ga꞉lilo꞉ elen a꞉ma꞉ sa꞉la꞉li.  
\v 23 \x - \xo 4.23 \xt Lom 9.7-9\x*Madali nanogdo꞉ dian gaya꞉lo꞉ so꞉wa sa꞉la꞉li a꞉no꞉ kaluwa꞉lo꞉ asulab man a꞉na a꞉la꞉ta꞉ga꞉ sa꞉la꞉li. Ko꞉sega ga꞉lilo꞉ elen ga a꞉ma꞉lo꞉ so꞉wa sa꞉la꞉li a꞉no꞉, Godeya꞉ enedo꞉ dinali sio꞉ a꞉no꞉ ko꞉lo꞉ ilili alitaki sa꞉la꞉li.  
\v 24 Ga a꞉la꞉ wenamilo꞉ bale so꞉lo꞉l a꞉no꞉ we. Ga a꞉la꞉ wenamio꞉, nio꞉ Gode o꞉lia꞉lo꞉ ege doma꞉no꞉ a꞉la꞉likilo꞉ tog a꞉la꞉ a꞉no꞉ ko꞉lo꞉ bale sio꞉. Ga nowo꞉ ene wiyo꞉ Ha꞉ga. Sainai misio꞉ amio꞉ Godeya꞉ ene eleyo꞉ a꞉na saefa꞉ ko꞉lo꞉, Ha꞉ga e Godeya꞉lo꞉ a꞉namilo꞉ saefa꞉yo꞉ o꞉m. Ga a꞉ma꞉lo꞉ so꞉wa sa꞉la꞉liab a꞉no꞉ madali nanog dian kalu ta꞉fa꞉ib.  
\v 25 Ha꞉ga e Alabia hen amilo꞉ Sainai misio꞉ o꞉leo꞉ngo꞉ ka꞉ a꞉la꞉liki bale sio꞉. Ha꞉ga o꞉lia꞉ ene so꞉wa sa꞉la꞉li a꞉no꞉ madali nanog dian kaluka꞉isale dowo꞉ ko꞉lo꞉lab. A꞉la꞉ta꞉ga꞉ o꞉gdo꞉ Ya꞉lusalemdo꞉ sab kaluka꞉isale iyo꞉ eleyo꞉ kudu ha꞉na꞉lab ko꞉lo꞉, Ha꞉ga o꞉ngo꞉ ka dowaki, iyo꞉lo꞉ madali nanog dian kaluka꞉isale fa꞉la꞉dowab.  
\v 26 \x - \xo 4.26 \xt Hibu 12.22, Kala 21.2,10\x*Ko꞉sega akin halonamilo꞉ Ya꞉lusalem ho꞉gi a꞉lab a꞉no꞉ Sa꞉la o꞉ngo꞉ dowab. Ya꞉lusalem a꞉no꞉lia꞉ Sa꞉la o꞉lia꞉yo꞉ ga꞉li sen ko꞉lo꞉, Sa꞉la e Keliso kaluka꞉isale nili no꞉le ko꞉lo꞉ dowab.  
\v 27 \x - \xo 4.27 \xt Ais 54.1\x*Aisaya bugo꞉ amio꞉ a꞉la꞉sa꞉sa꞉lo꞉ da꞉lab.  
\q1 “Faino dowo꞉ ga ge sagalema.  
\q2 So꞉wa sa꞉la꞉liakilo꞉ nagalo꞉lo꞉ mo꞉di ge, gulo꞉ gulaki, sagala꞉li ho꞉lema.  
\q1 Ga ina꞉lo꞉ ta꞉fo꞉ ge, so꞉wayo꞉ modo꞉le sa꞉la꞉lakiyo꞉, ga indo꞉wa꞉lo꞉ sa꞉la꞉la꞉ a꞉no꞉ gi tininila꞉ma꞉ib.”   
\m
\v 28 \x - \xo 4.28 \xt Mo꞉mo꞉ 15.4-5, Lom 9.7\x*Godeya꞉lo꞉ dinali sio꞉ amilo꞉ Aisa꞉g sa꞉la꞉li o꞉leaumbo꞉, gio꞉lo꞉ Godeya꞉lo꞉ dinali sio꞉ a꞉namio꞉ ene so꞉wale fa꞉la꞉dowab.  
\v 29 \x - \xo 4.29 \xt Mo꞉mo꞉ 21.9-10, Yo꞉n 8.35\x*Tamin amio꞉ kaluwa꞉lo꞉ asulab man a꞉na a꞉la꞉ta꞉ga꞉lo꞉ so꞉wa sa꞉la꞉li a꞉ma꞉yo꞉, Mamaya꞉ halaido꞉ a꞉na ilikilo꞉ so꞉wa sa꞉la꞉li o꞉mo꞉wo꞉ hida꞉yo꞉wo꞉ dimia꞉len. A꞉la꞉ta꞉ga꞉ o꞉g wenamio꞉lo꞉ man o꞉leo꞉ngo꞉ka dimidaki, elelo꞉ kudu ha꞉na꞉sen kalu iliyo꞉, nimo꞉wo꞉lo꞉ hida꞉yo꞉wo꞉ dimia꞉lab.   
\p
\v 30 Ko꞉sega Godeya꞉ bugo꞉ a꞉namio꞉ a꞉la꞉sa꞉sa꞉lo꞉ da꞉lab. “Ga꞉lilo꞉ sab gaya꞉ so꞉wa a꞉no꞉, madali nanog dian gaya꞉ inso꞉ a꞉no꞉lia꞉yo꞉ dabuno꞉ mada mo꞉aloba꞉ma꞉ib ko꞉lo꞉, giyo꞉ madali nanog dian ga o꞉lia꞉ ene inso꞉ o꞉lia꞉yo꞉ ta꞉taki, o꞉luga꞉foma.”  
\v 31 A꞉la꞉fo꞉ko꞉lo꞉ ni nao nado i, nio꞉ madali nanogdo꞉ dian gaya꞉ so꞉wama. Nio꞉ ga꞉lilo꞉ sen ga a꞉ma꞉ ene so꞉wale ko꞉lo꞉ a꞉lab.   
\c 5  
\s1 Keliso eyo꞉ nio꞉ ga꞉li mesea꞉ki ta꞉fo꞉ ko꞉lo꞉lab  
\p
\v 1 Keliso eyo꞉ nanogo꞉ dia꞉sa꞉ga꞉, nio꞉ ga꞉li mesea꞉ki ta꞉fo꞉. A꞉la꞉fo꞉ko꞉lo꞉ gio꞉ mada halale kagayaki, ele kudu ha꞉na꞉no꞉ man a꞉ma꞉yo꞉ gio꞉ wa꞉ka mele alitaki, madali nanog dian kalu o꞉ngo꞉ dowabena꞉ki, dinafa dowa꞉bi.   
\p
\v 2 Ne Fo꞉l, niyo꞉ gimo꞉wo꞉ fanda sa꞉ma꞉nigo꞉l ko꞉lo꞉, to we dinafa dabuma! Giliyo꞉ “ne do꞉go꞉fo꞉ hege gedeab a꞉namio꞉ Gode eyo꞉ ne digalo꞉ sa꞉ma꞉ib,” a꞉la꞉asulaki gedealega, Kelisowa꞉lo꞉ nanog di a꞉no꞉ o꞉ngo꞉malo꞉ngo꞉ dowaki, ge mo꞉asuwa꞉fa꞉ib.  
\v 3 To we niyo꞉ gimo꞉wo꞉ wa꞉ka halale a꞉so꞉lo꞉l. Kalu abeyo꞉ do꞉go꞉fo꞉ hege gedema꞉no꞉ man ko꞉lo꞉ kudu ha꞉nab a꞉ma꞉yo꞉, Yuwa꞉ ele nol a꞉no꞉lo꞉ tambowo꞉ kudu ha꞉na꞉melea꞉ki gab.  
\v 4 Kalu abeyo꞉ Gode eyo꞉ e digalo꞉ a꞉la꞉bo꞉ba꞉ki, Yuwa꞉ ele a꞉no꞉ kudu ha꞉na꞉lalega, e Ya꞉su Keliso o꞉lia꞉lo꞉ eleno꞉ gedega꞉tab ko꞉m. Eyo꞉ Godeya꞉lo꞉ ha꞉fo꞉ disa꞉ma꞉no꞉ dowo꞉ a꞉no꞉ gola ba꞉dakigab.  
\v 5 Ya꞉su amilo꞉ tilidabu kaluka꞉isale nio꞉ Gode eyo꞉ digalo꞉ ta꞉foma꞉kiyo꞉, Mamaya꞉ halaido꞉wa iliki, tilida꞉da꞉li yasiso꞉l.  
\v 6 \x - \xo 5.6 \xt 1Kol 7.19, Gala 6.15\x*Keliso amilo꞉ dowab gio꞉, do꞉go꞉fo꞉ hege gedeo꞉wa꞉le, mo꞉gedeo꞉wa꞉le, Godeya꞉ siwa꞉l amio꞉ o꞉ngo꞉ma dowab. Ya꞉su amilo꞉ tilida꞉da꞉sa꞉ga꞉lo꞉, kaluka꞉isale nol o꞉lia꞉yo꞉ gio꞉ ha꞉fo꞉ disa꞉lakilo꞉ dowab a꞉no꞉ Godeya꞉ siwa꞉l amio꞉ alandeyo꞉ o꞉m.   
\p
\v 7 Gio꞉ tilida꞉da꞉sa꞉ga꞉, halale nai ha꞉na꞉len ko꞉sega, gio꞉ to hendelelo꞉ mo꞉kudu ane a꞉no꞉ kalu abe anilia꞉ ha꞉nabeyo꞉?  
\v 8 Asulo꞉ gililo꞉ ko꞉lo꞉ sendelia꞉ ha꞉nab a꞉no꞉, gelo꞉ ho꞉leli Gode a꞉na a꞉la꞉ta꞉ga꞉ mio꞉ma.  
\v 9 \x - \xo 5.9 \xt 1Kol 5.6\x*Ma꞉n halo꞉wo꞉ dia꞉sa꞉ga꞉ ma꞉n nafa o꞉lia꞉ wo꞉gelalega, ma꞉n a꞉no꞉ tambo halo꞉ doma꞉ib. Ililo꞉ to hala widab a꞉no꞉lo꞉ o꞉leo꞉ngo꞉ dowab.  
\v 10 \x - \xo 5.10 \xt 2Kol 11.15, Gala 1.7\x*Ko꞉sega nio꞉ Ya꞉suwa oga꞉di dowo꞉ ko꞉lo꞉, gio꞉ tog no amio꞉ mo꞉kudu ha꞉naki, to nilo꞉ wido꞉ a꞉no꞉ ko꞉lo꞉ kudu ha꞉na꞉ib a꞉la꞉tili asulo꞉l. Kalu abeyo꞉ gimo꞉wo꞉ towo꞉ hala widaki, gili asulo꞉wo꞉ yo꞉le alitab a꞉no꞉, e wa꞉lo꞉ dia꞉ib.  
\v 11 Ni nao nado i, niyo꞉ ko꞉lo꞉ do꞉go꞉fo꞉ hege gedema a꞉la꞉liki wida꞉li kibo꞉bowo꞉, iliyo꞉ nagalo꞉ we nemo꞉lo꞉ mo꞉dimibabe. Niyo꞉ Ya꞉su Keliso ko꞉lo꞉ i malan amilo꞉ sowo꞉ a꞉no꞉ mo꞉wida꞉li kibo꞉bowo꞉, ili asulo꞉wo꞉ mo꞉kulufa꞉mabe.  
\v 12 Kalu gili asulo꞉lo꞉ no꞉nolo꞉ alitab a꞉no꞉, inino꞉ do꞉go꞉fo꞉ hege gedeakiyo꞉, uso꞉lo꞉ tambo dugulalega, niyo꞉ o꞉li a꞉la꞉asulo꞉l.   
\p
\v 13 \x - \xo 5.13 \xt 1Bid 2.16\x*Nao nado i, Gode eyo꞉ gio꞉ ga꞉li mesea꞉ki da꞉fea꞉sa꞉ga꞉ ta꞉fo꞉ ko꞉lo꞉, gio꞉ ele ha꞉g amio꞉ mo꞉dowab. Ko꞉sega gio꞉ ga꞉li dowo꞉l a꞉la꞉asulakiyo꞉, go꞉no꞉n do꞉mo꞉wa꞉lo꞉ asulab a꞉no꞉ kudu ha꞉nakiyo꞉, mogago꞉wo꞉ dimida꞉so꞉bo. A꞉la꞉ba. Giliyo꞉ nol o꞉lia꞉yo꞉ ha꞉fo꞉ disa꞉lakiyo꞉ asuwa꞉ta꞉lubi.  
\v 14 \x - \xo 5.14 \xt Wkp 19.18, Lom 13.9\x*Ele imilig wenamio꞉, ele difa꞉ nolo꞉ tambo kegenelia꞉sa꞉ga꞉, us a꞉na da꞉lab. Ele alande a꞉no꞉ we “Gio꞉ go꞉no꞉n asulan o꞉leaumbo꞉, giasi kaluka꞉isale nolo꞉lo꞉ a꞉la꞉asulaki ha꞉fo꞉wo꞉ disa꞉la꞉bi.”  
\v 15 Ko꞉sega gegelebo꞉ nol o꞉lia꞉yo꞉ kegefo꞉ko꞉ ha꞉na꞉lalega, dinafa dowa꞉bi! Giliyo꞉ a꞉la꞉dimidalega, tilidabu gililo꞉ a꞉no꞉ tambo mogagila꞉ma꞉ib.   
\s1 Mamaya꞉lo꞉ asulab au kudu ha꞉na꞉bi  
\p
\v 16 A꞉la꞉fo꞉ko꞉lo꞉ niyo꞉ to we a꞉la꞉so꞉lo꞉l. Mamaya꞉ halaido꞉ a꞉ma꞉yo꞉ gio꞉ tililia꞉ga꞉ ha꞉na꞉melea꞉ki ta꞉foma. Gio꞉ a꞉la꞉dimidalega, do꞉mo꞉wa꞉lo꞉ meselan man a꞉no꞉ mo꞉dimidama꞉ib.  
\v 17 \x - \xo 5.17 \xt Lom 7.15-23\x*Do꞉mo꞉wa꞉lo꞉ meselan man a꞉ma꞉yo꞉, Mama Malilo꞉wa꞉lo꞉ asulab a꞉no꞉ ko꞉lo꞉ sana to꞉lola꞉lab. A꞉la꞉ta꞉ga꞉ Mamaya꞉lo꞉ asulab a꞉ma꞉yo꞉ do꞉mo꞉wa꞉lo꞉ meselan man a꞉no꞉ sana to꞉lola꞉lab. Gili asulo꞉ usamio꞉ man a꞉la꞉ a꞉no꞉ ko꞉lo꞉ iliki, tadowo꞉laki buba꞉lab. A꞉la꞉gab amio꞉, gilo꞉ dimidama꞉no꞉ asulab a꞉no꞉ mo꞉dimidama꞉no꞉ dowab.  
\v 18 Ko꞉sega gio꞉ Mama malilo꞉ a꞉ma꞉ tililia꞉ hamana꞉ki ta꞉talega, ge ele a꞉ma꞉ ha꞉g amio꞉ mo꞉dowab.   
\p
\v 19 \x - \xo 5.19 \xt 1Kol 6.9-10\x*Do꞉mo꞉wa꞉lo꞉ meselan man a꞉no꞉, kalab amilo꞉ fa꞉la꞉dowano꞉ we. Uwo꞉ diano꞉, no o꞉lia꞉lo꞉ uwo꞉ dia꞉no꞉ mada alan asulano꞉,  
\v 20 madali gode gulugululano꞉, fofa dimidano꞉, eteano꞉, mululo꞉ to sa꞉lano꞉, kelego꞉ noma꞉lo꞉ da꞉lab asulano꞉, gadiano꞉, no꞉no꞉na꞉ma꞉la꞉ asulano꞉, so꞉lo꞉wo꞉ aloba꞉dakilo꞉ ina꞉li ina꞉li a꞉la꞉do꞉ dowano꞉,  
\v 21 meselano꞉, aluna꞉ ho꞉n nakilo꞉ no꞉nolano꞉, mogago꞉lo꞉ dimidama꞉nikilo꞉ kegea꞉lab mano꞉lo꞉, a꞉la꞉ta꞉ga꞉ mogago꞉ ko꞉li ko꞉lilo꞉ nol a꞉no꞉lo꞉ o꞉leo꞉ngo꞉ka dimida꞉labiki a꞉na so꞉lo꞉l. Nilo꞉ tamin amilo꞉ hagugo꞉ to sio꞉ o꞉leaumbo꞉, o꞉go꞉ wa꞉ka a꞉so꞉lo꞉l. Kaluka꞉isale man ko꞉li ko꞉lilo꞉lo꞉ dimida꞉lab a꞉no꞉, Godeya꞉lo꞉ bo꞉fo꞉mela꞉nigab us a꞉namio꞉ mo꞉tina꞉ib.   
\p
\v 22 Ko꞉sega Godeya꞉ Mamaya꞉lo꞉ nio꞉ ko꞉lo꞉ tili dowakilo꞉ fo helema꞉no꞉wo꞉ we. Nolo꞉ mada alan asulano꞉, sagalano꞉, ha꞉sa dowano꞉, ha꞉fa꞉nolo dowano꞉, ha꞉fo꞉ disa꞉lano꞉, nolbo꞉wo꞉ man nafale dimidano꞉, halale tili asula꞉sa꞉ga꞉lo꞉ dimidano꞉,  
\v 23 ha꞉nolo sa꞉lano꞉, a꞉la꞉ta꞉ga꞉ go꞉no꞉na꞉ma꞉la꞉yo꞉ dinafa tili dowano꞉. Gio꞉ man a꞉no꞉ ko꞉lo꞉ kudu ha꞉nalega, ge ele imilig no꞉wo꞉ mo꞉guma꞉ib.  
\v 24 \x - \xo 5.24 \xt Lom 6.6, Kolo 3.5\x*Ya꞉su Kelisowa꞉no꞉ dowo꞉ kaluka꞉isale a꞉ma꞉yo꞉, enedo꞉ man mogago꞉ ko꞉li ko꞉lilo꞉ dimidama꞉no꞉ asulan a꞉no꞉ tambo i malana alu alitaki, sana sowo꞉.   
\p
\v 25 Godeya꞉ Mama a꞉ma꞉yo꞉ mela꞉no꞉wo꞉ nimo꞉ dimi ko꞉lo꞉, nio꞉ Mama elo꞉ asulab au kudu ha꞉na꞉mela꞉niki.  
\v 26 \x - \xo 5.26 \xt Fili 2.3\x*Nio꞉ ninina꞉ma꞉la꞉yo꞉ o꞉li a꞉la꞉bo꞉ asula꞉so꞉bo. Nol o꞉lia꞉yo꞉ babuma꞉kiyo꞉ digene mea꞉so꞉bo. A꞉la꞉ta꞉ga꞉ kalu nol o꞉lia꞉ eteakiyo꞉ mulula꞉so꞉bo.   
\c 6  
\s1 Kaluka꞉isale nolo꞉ asuwa꞉ta꞉lubi  
\p
\v 1 \x - \xo 6.1 \xt Madi 18.15\x*Nao nado i, kalu imilig nowo꞉ mogago꞉wa sulufo꞉ tinalega, tilidabuwo꞉ halaido꞉lo꞉ o꞉a꞉lab giliyo꞉, kalu a꞉no꞉ ha꞉sa gasiliaki, digale alita꞉bi. Giliyo꞉ a꞉la꞉bo꞉ dimidakiyo꞉, go꞉no꞉n gelo꞉ da꞉feyo꞉ a꞉namio꞉ sulufo꞉ tinabena꞉ki, dinafa halale dowa꞉bi.  
\v 2 \x - \xo 6.2 \xt Lom 15.1\x*Gio꞉ hida꞉yo꞉lo꞉ diab amio꞉, gegelebo꞉ nowo꞉ asuwa꞉ta꞉bi. Man a꞉la꞉do꞉ dimidab a꞉namio꞉, Kelisowa꞉ ele saefa꞉ a꞉no꞉ mada ilili alifa꞉ib.  
\v 3 Kalu abeyo꞉ e alan wilo꞉ka꞉ a꞉la꞉sa꞉lab ko꞉sega, elo꞉ to sa꞉lab o꞉lia꞉ man dimidan o꞉lia꞉ a꞉no꞉ imilo꞉wo꞉ mo꞉dowalega, enena꞉ma꞉la꞉yo꞉ dikili sa꞉laki gab.  
\v 4 Nanog go꞉no꞉ndo꞉ dimido꞉ a꞉no꞉ go꞉no꞉no꞉ dinafa alobana ba꞉da꞉bi. Nanog go꞉no꞉ndo꞉ dimido꞉ a꞉no꞉ nafa ba꞉dalega, go꞉no꞉no꞉ sagala꞉bi. Ko꞉sega nanog kalu noma꞉lo꞉ di a꞉no꞉, gilo꞉ di a꞉no꞉lia꞉yo꞉ da꞉feakiyo꞉, alobana ba꞉da꞉so꞉bo.  
\v 5 \x - \xo 6.5 \xt Lom 14.12\x*Kaluwo꞉ tambo ina꞉li ina꞉lilo꞉wa꞉lo꞉ nanog di a꞉no꞉, enedo꞉leko꞉ dinafa tilidowaka bo꞉fo꞉lubi.   
\p
\v 6 \x - \xo 6.6 \xt 1Kol 9.11,14\x*Tilidabu kaluka꞉isale giliyo꞉ kelego꞉ nafale da꞉labko, kalu gimo꞉lo꞉ tolo꞉ widab o꞉mo꞉wo꞉lo꞉ aloba꞉da꞉sa꞉ga꞉ dimia꞉bi.  
\v 7 \x - \xo 6.7 \xt Lom 8.13\x*Giliyo꞉ ginina꞉ma꞉la꞉yo꞉ dikida꞉so꞉bo. Godeyo꞉ giliyo꞉ mada mo꞉dikilima꞉ib. Giliyo꞉ fo o꞉bo꞉ngo꞉wa꞉le egelo꞉ amilo꞉ gelab a꞉no꞉, a꞉ma꞉ ene foleko꞉ tuma꞉ib.  
\v 8 Kalu abeyo꞉ ene do꞉mo꞉wa꞉lo꞉ meselan man a꞉no꞉ kudu ha꞉naki, man mogago꞉ dimidalega, fo hedan aumbo꞉ soma꞉no꞉ ko꞉lo꞉ dia꞉ib. Kalu abeyo꞉ Mamaya꞉lo꞉ asulab au kudu ha꞉nakiyo꞉, man nafale dimidalega, fo hedan aumbo꞉ Mama eya a꞉la꞉ta꞉ga꞉yo꞉ ko꞉ngo꞉ mela꞉no꞉ dia꞉ib.  
\v 9 A꞉la꞉ma꞉no꞉lo꞉biki, nio꞉ man nafa dimidaki, dinafa kudu ha꞉nakiyo꞉, mo꞉mo꞉bema꞉niki. Nio꞉ bo꞉sulakiyo꞉ mo꞉ta꞉talega, ho꞉lende a꞉no꞉ fa꞉la꞉dowalikiyo꞉, fo a꞉no꞉ nafale ililo꞉ tuma꞉no꞉.  
\v 10 A꞉la꞉fo꞉ko꞉lo꞉ fogdo꞉ dowab ho꞉len wenamio꞉, niliyo꞉ kaluka꞉isale tambomo꞉wo꞉ man nafale dimidama꞉niki. A꞉la꞉ta꞉ga꞉ Keliso kaluka꞉isale a꞉lab o꞉mo꞉wo꞉lo꞉ man nafale mada dimidama꞉niki.   
\s1 Mela꞉no꞉wo꞉ ho꞉gilo꞉ diab a꞉no꞉ alandeyo꞉ o꞉m  
\p
\v 11 Mo꞉fo꞉s we edakiyo꞉, no꞉no꞉n dagileya꞉ sa꞉sa꞉lo꞉ ko꞉lo꞉, gio꞉ sa꞉sa꞉lo꞉ toda꞉ a꞉no꞉ ba꞉dakiyo꞉, ni dagiya꞉ sa꞉sa꞉lo꞉lo꞉b a꞉la꞉asula꞉bi.  
\v 12 Kalu nolba꞉yo꞉ wi alan dia꞉no꞉ a꞉la꞉asulakiyo꞉, gio꞉ do꞉go꞉fo꞉ hege gedema꞉ki halaido꞉ sa꞉la꞉lab. Yu kalu nolba꞉yo꞉ imo꞉wo꞉ hida꞉yo꞉ dimiabena꞉kiyo꞉, iliyo꞉ Keliso i malan amilo꞉ sowo꞉ a꞉no꞉ mo꞉fanda widaki, do꞉go꞉fo꞉ hege gedema a꞉lakiyo꞉ halaido꞉ sa꞉la꞉lab.  
\v 13 Kalu a꞉la꞉do꞉ widab i a꞉no꞉ do꞉go꞉fo꞉ hege gedeo꞉ ko꞉sega, ele a꞉no꞉ tambowo꞉ mo꞉kudu ha꞉na꞉sen. Ko꞉sega iyo꞉ wiyo꞉ alan dia꞉no꞉ a꞉lakiyo꞉, giyo꞉lo꞉ do꞉go꞉fo꞉ hege gedema꞉ki susiab. \fig Fo꞉l eyo꞉ ene dagiya꞉yo꞉ to nolo꞉ toda꞉ sa꞉sa꞉lo꞉.|alt="Paul with large handwriting" src="C103_gr.tif" size="col" copy="© 1997 New Tribes Mission/Foreign Mission Board, Southern Baptist Convention. Used with permission." ref="6.11" \fig*   
\p
\v 14 Ko꞉sega niyo꞉ ne no꞉no꞉na꞉ma꞉la꞉ wi duludaki go꞉ba. Alan Ya꞉su Keliso ko꞉lo꞉ i malan amilo꞉ sowo꞉ a꞉no꞉ ne duludaki sa꞉ma꞉no꞉. Ya꞉su i malan amilo꞉ sana sowo꞉ a꞉ma꞉yo꞉, ne amilo꞉ henfelo꞉wa꞉ man dimidama꞉no꞉ asulan a꞉no꞉ sana sowo꞉ ko꞉lo꞉ a꞉lab. A꞉la꞉ta꞉ga꞉ kaluka꞉isale henfelo꞉ man welo꞉ dimidab a꞉ma꞉yo꞉ ne o꞉ngo꞉malo꞉ngo꞉ ba꞉dab.  
\v 15 \x - \xo 6.15 \xt Gala 5.6, 2Kol 5.17\x*Kaluwo꞉ do꞉go꞉fo꞉ hege gedeo꞉lalikiyo꞉lo꞉, mo꞉hege gedeo꞉lalikiyo꞉lo꞉ a꞉no꞉ o꞉ngo꞉mal dowab. Ko꞉sega kaluwa꞉ mela꞉no꞉ ho꞉gilo꞉ diab a꞉no꞉ alandeyo꞉ o꞉m.  
\v 16 Gode eyo꞉ kaluka꞉isale man welo꞉ kudu ha꞉na꞉lab i o꞉mo꞉wo꞉ nofolo alitaki, ha꞉sa mesea꞉ki ta꞉fa꞉ib. Kaluka꞉isale i a꞉no꞉ Godeya꞉no꞉ kaluka꞉isale hendeleyo꞉ o꞉m.   
\p
\v 17 \x - \xo 6.17 \xt 2Kol 4.10\x*A꞉la꞉go꞉ko꞉lo꞉ kalu i nol wema꞉yo꞉ gili sa꞉so꞉ aloba꞉dakiyo꞉, hida꞉yo꞉ a꞉no꞉ nemo꞉wo꞉ wa꞉kabiyo꞉ mo꞉dimina꞉ki asulo꞉l. Ni do꞉mo꞉ amilo꞉ imu wo꞉len wema꞉ sa꞉lakiyo꞉, ne Ya꞉suwa꞉ ene nanog dian kaluka꞉ a꞉la꞉liki widakigab.  
\v 18 Ni nao nado i, nili Alan Ya꞉su Kelisowa꞉ ene ha꞉fo꞉ disa꞉lan man a꞉no꞉ gi mama o꞉lia꞉ doma꞉ki, niyo꞉ Godemo꞉ dulugu so꞉lo꞉l. Hendele.